1 ꞌPiɛlɩ

ꞌPIƐLƖꞌa ꞌꞌyizabɔgʋ

Wludie poꞌa nyɔ ꞌꞌbɔgʋ -nɛɛꞌɛ -naagɩ ꞌli.

Zeziiꞌa -glɩgbɩ -lrɩɩ nyʋ-ʋ klaꞌa nyanɩ ꞌmʋ, ꞌɩnnʋ ꞌPiɛlɩ poꞌo ꞌꞌbɔgʋ -nɛɛ -jeyi. Ɔ ꞌnʋ-o -kaa ꞌle ɔ ꞌke ʋ ꞌkpa ꞌꞌyi po ꞌle ʋn ꞌke ꞌkpa ꞌꞌyi ku. Ɔ-ɔ ꞌꞌdu -ʋ ꞌꞌdɩ ꞌmʋ -ka -zɛgɛka.

ꞌYewlu

¹A-bʋ -aꞌba -tɩta -Lagɔ -zaꞌa ꞌbho a ꞌke ꞌɔ nyʋ ꞌꞌdu, -ʋ ꞌꞌduꞌa ꞌɛ dɩ, -ʋ ꞌma-a ꞌlɩkpamʋ ꞌnɔɔ ꞌkmʋ ꞌmʋ ꞌle -ʋ ꞌꞌsiꞌa ꞌbho -ʋ bʋbaꞌa ti ꞌle ꞌPɔɔn-e, Galasii-e, Kapadɔɔsɩ-e, Azii -ke Bitiniiꞌa ꞌbhlɩkpɩ ꞌꞌkpi, ꞌɩnmɔ *ꞌPiɛlɩ ꞌma-a *Zezii *Kliisɩꞌa -dalbhoyi, ꞌɩnmɔ poꞌo amʋ ꞌꞌbɔgʋ -nɛɛ -jeyi. ²ꞌAn ꞌlotʋꞌa ꞌꞌnynuu-a, -ka aꞌba tinɩɛ-ɛ ꞌyeꞌa ꞌmʋtinɩnɩ mʋ ꞌle nyaka, ɔ yibo nɩ-oꞌo see ꞌle ɔ ꞌye ꞌbho amʋ -za a ꞌke ꞌɔ nyʋ ꞌꞌdu. Ɔ -zaꞌa ꞌle-e amʋ nyʋꞌa ꞌꞌklumʋ, ꞌle ɔ ꞌye ꞌbho amʋ tide, ꞌle, -ka ꞌɔ -pɔlʋ ꞌybhaꞌa ꞌtɩn, *ꞌɔ Lisaazuzu -nɩꞌa amʋ ꞌmʋ ꞌle -ɔ ꞌꞌnyɩꞌa amʋ wɔnkuɛ, ɔ ꞌke -kaa amʋ -jolʋ gbo po ꞌle a ꞌke *Zezii Kliisɩ ꞌbho ꞌꞌdu, ꞌle, ꞌɔ nymɔ-ɔ ꞌwlaꞌa ti ꞌbho ꞌɔ ꞌmɛnamʋ, ɛ ꞌke amʋ zetie ꞌle aꞌba ꞌꞌnyinynidɩ ꞌmʋ ꞌle a ꞌke *liꞌsaa ꞌbho -Lagɔꞌɔ ꞌꞌyigbeyi. Ɔ nʋ amʋ -zɛgɛ ꞌꞌlruli ꞌle ɔ ꞌke amʋ -pɔlʋꞌa bhlubhlua ꞌꞌnyɩ ꞌle ɩ -nɩ ꞌsɔn ꞌke ꞌꞌkpiꞌkpa tenyɩ!

-Lagɔ ꞌꞌnyɩ-e amʋ tinɩɛlre

³ꞌAn ꞌlotʋꞌa ꞌꞌnynuu-a, -Lagɔ ꞌma-a -aꞌba -Kɔyi *Zezii *Kliisɩꞌa -tɩta, -a ꞌbhɛɛ ꞌɔ ꞌnynɩ ꞌꞌyi! -Ɛkedɩmaa, ꞌɔ ꞌlimʋ -nmɔꞌɔ-ɔ wɔn tenyɩ ꞌbho -amʋ ꞌꞌkpi. ꞌƖnnɛ ꞌbhleꞌe ꞌnynɩꞌa dɩ, -ka ɔ -zaꞌa Zezii Kliisɩ glu, ɔ ꞌye -kaa -amʋ ꞌwlʋ -lrɛɛke, ꞌle, -ka ɔ ꞌꞌnyɩ ꞌɔ tinɩɛlre, ɔ ꞌye -kaa -aꞌba nɛ ꞌꞌnyɩ -lrɛɛ. ꞌKa-a ɩ -nɩꞌe ꞌmʋꞌa dɩ, ꞌꞌkɔgwlɛtinɩɛzɛgɛ ɔ ꞌꞌnyɩꞌa -amʋ, -ɛ ꞌyeꞌa -amʋ ꞌmʋ ꞌꞌyi mʋ, ꞌle ɛ ꞌke tiꞌpɩple ꞌle yaku ꞌli, -a de ꞌɛ -pɔlʋ ꞌꞌyi. ⁴A -gblee, ɛ-bɛ -zɛgɛ ɔ-ɔ ꞌyeꞌa -amʋ ꞌꞌlruli-nʋ mʋ, ɛ-ɛ ꞌmo-o ꞌꞌkɔgwlɛlɛ. ꞌƐ -nyni wɔn, ꞌɛ kpʋn -vlɛɛn. Aꞌba dɩ ɔ de ꞌɛ ꞌle yaku ꞌli ti. ⁵A-bʋ de ꞌɔ ꞌꞌgwli, ɔ-ɔ ꞌꞌdu-o amʋ ꞌꞌyrili ꞌle ꞌɔ wɔnkuɛ ꞌmʋ, ꞌle, ꞌpʋnpʋan a ꞌyeꞌa, -ɛ ꞌyeꞌa amʋ ꞌmʋ ꞌꞌyi mʋ ꞌle ɛ ꞌka tiꞌpɩple ꞌbho ꞌɔ ꞌꞌtroli ꞌle yaku ꞌli, a ꞌke ɛ ꞌli ti-de ꞌꞌkɔgwlɛka. Ɛ-bɛ ꞌpʋnpʋan ꞌmnɛ, ꞌɩnnɛ -nɩꞌe ꞌle amʋ wɔnfuonamʋ, ꞌle, -bho *-lebhɔɔnɔɔ -nɛɛ zi, a ꞌke ꞌle ꞌɛ ꞌli ti-de.

⁶Ɛbɛ ꞌmnɛ, ɛ-ɛ ꞌlbhaa-a amʋ ꞌbʋbʋa ꞌꞌyi. -Nɔɔ -gbɛ -sieꞌa ꞌbho ꞌle ꞌɛ da ꞌke nyni, -bho a -kɛ ɛ-ɛ ti sɩa nɩ tenyɩ, ꞌɛ ꞌbʋbʋa ꞌlbhaꞌa amʋ-ɛ ꞌꞌkɔmʋ. ⁷Lɛ -ke ꞌꞌlru ꞌꞌyi a-a sɩaꞌa -kaa, a yibo nɛ ꞌnɩ? -Bho aꞌba -Lagɔꞌɔ ꞌꞌgwlideɛ ku ꞌmʋ, ꞌɩnnɛ ꞌɛ lɛtu-u tɔꞌɔ nyʋ. A -gblee, sanu-u ꞌma-a tisɔlɛ, nyʋ-ʋ lele nɛ-oꞌo, -bho ɛ -nmɔ ꞌꞌyrili ꞌle ʋn-ʋ yibo nɩꞌo. ꞌKa-a aꞌba ꞌꞌgwlideɛꞌɛ dɩ -nɩꞌe ꞌmʋ -lrɛɛ. ꞌꞌGwlideɛ-ɛ kuꞌa ꞌmʋ ꞌꞌkɔmʋ ꞌle sɩasɩaalɩ ꞌmʋ, ꞌɩnnɛ ꞌbhleꞌe ꞌnynɩ tenyɩ ꞌbho -Lagɔꞌɔ ꞌꞌyigbeyi, -ɛ ziꞌe lelesanuzɛgɛ. ꞌƐ lɛtu -nɩꞌe-e -kaa, ꞌle, -da *Zezii *Kliisɩ-ɩ ꞌyeꞌa le -yi -nɩ mʋ, a ꞌke ꞌnynɩ ꞌwlʋ. ⁸A -gblee, ɔ-bɔ Zezii ꞌmnɔ, a -see ɔ ꞌye. Ɛ -nɩꞌa -kaa ꞌmʋ a, a -kmaꞌa-a ꞌɔ dɩ. ꞌLe ꞌtraamʋ -bhla a, a -see ɔ ꞌye ke. Ɛ -nɩꞌa -kaa ꞌmʋ, a ꞌde -ɔ ꞌꞌgwli ꞌle a ꞌꞌduꞌo ꞌɛ dɩ, a-a liꞌe ꞌbʋbʋa. Ɛ-bɛ ꞌbʋbʋa ꞌmnɛ, ɛ ꞌbhɛ-ɛ ꞌꞌyi, ɛ ꞌye ꞌbʋbʋa ꞌwee -ziꞌa dɩ, wlu -yɛ nyɔ ꞌka ꞌmʋꞌꞌluo ꞌle ɔ ꞌkɛ ɛ -bha, ɛ se -nɩ. Yaku ꞌliꞌa -nɛ -ke ɛ gʋgɔꞌɔ ꞌꞌyiti. ⁹-Ɛkedɩmaa, ꞌpʋnpʋan a ꞌyeꞌa, -ɛ ꞌyeꞌa amʋ ꞌmʋ ꞌꞌyi mʋ ꞌle ɛ ꞌke tiꞌpɩple ꞌbho ꞌɔ ꞌꞌtroli, -ɛ -ke ꞌli a-a ꞌyeꞌa ti-de mʋ, ꞌɩnnɛ ꞌmo-o lɛ a -deꞌa -pɔlʋ ꞌꞌyi ꞌle ɛ ꞌꞌduꞌo lɛ aꞌba ꞌɔ ꞌꞌgwlideɛ poꞌa ꞌꞌlru ꞌꞌkpi ti -lrɛɛ.

¹⁰-Lagɔꞌɔ wluꞌa ꞌmʋtizamʋ -nɩꞌa -bɛnyɩ, -ka ɔ ꞌka nyʋ ꞌmʋtiꞌpʋnpʋn, ʋn ꞌcrɩ -ɩ ꞌmʋti tenyɩ, ꞌle, -ka ꞌɔ ꞌlimʋ-ʋ ꞌyeꞌa wɔn-nmɔ mʋ ꞌbho amʋ ꞌꞌkpi, ʋn ꞌye ɩ ꞌmʋ-za. ¹¹*ꞌƆ Lisaazuzu ʋn ꞌbhleꞌa ꞌmʋ, ꞌɩnnɔ ꞌtmʋʋ nʋꞌo see, -ka, *ꞌɔ ꞌBhozayi -ɔ ꞌpʋʋnꞌa nyʋ, ɔ-ɔ ꞌyeꞌa ꞌkle ꞌye mʋ tenyɩ. -Bho ɛ-bɛ ꞌkleyeɛɛ ꞌmnɛ zi, ꞌle ꞌɔ ꞌnynɩ ꞌke ꞌꞌyiꞌbhɛ-ɛ. -Nɔɔ -ke ti ɩ-bɩ dɩ ꞌmnɩ ꞌka zi, ꞌle ʋ-bʋ -Lagɔwluꞌa ꞌmʋtizamʋ ꞌye ɛ tiꞌbɔ tenyɩ ʋn ꞌke ɛ yibo. -Ka ɩ ꞌka ꞌmʋtizizi, ꞌle ʋn ꞌye ɩ tiꞌbɔ tenyɩ ʋn ꞌke ɩ yibo -lrɛɛ. ¹²-Lagɔꞌɔ ꞌꞌbhuo-o ꞌtmʋʋ nʋꞌo na, ɛ -se ꞌbho ꞌwa -nɔɔ ꞌꞌyi ɩ ꞌke -nʋ-ɛ -nɩ -ko. ꞌBho aꞌba -nɔɔ ꞌꞌyi ɩ-ɩ ꞌye -zi -nɩ mʋ. ꞌTraamʋ -bhla a, nyʋ-ʋ ꞌma-a Zeziiꞌa ꞌꞌdɩzɩgɩꞌa -zamʋ, ʋn-ʋ ꞌzɩ -ɩ amʋ -bodɩ ꞌmʋ. A -gblee, -Lagɔ -nɩꞌa ꞌle yaku ꞌli, ꞌɔ Lisaazuzu ɔ po ꞌʋ -jeyi, ꞌɩnnɔ zi nɩ ꞌnʋ ꞌmʋ ꞌle ʋn-ʋ wluꞌo. ꞌLe, ɩ-bɩ ꞌꞌdɩzɩgɩ ꞌmnɩ, ɔ gboꞌa -dalbhomʋꞌa ꞌꞌbhi-i ꞌbɔꞌɔ ti tenyɩ -lrɛɛ, ʋn ꞌke ɩ ꞌmʋtiꞌwɔn.

*Lisɛɛɛ ꞌbho -Lagɔꞌɔ ꞌꞌyigbeyi

¹³Ɩ-bɩ ꞌꞌyrilinmɔdɩ -Lagɔ nʋꞌa amʋ ꞌꞌlruliꞌa kamʋ, a yaa ꞌmʋti ꞌle a ꞌke ꞌɔ lbhʋ nʋ. A kpʋn dɩ li! ꞌBho *Zezii *Kliisɩꞌa leyinɔɔ ꞌꞌyi, -zɛgɛ -Lagɔ-ɔ ꞌyeꞌa amʋ ꞌꞌlruli-nʋ mʋ, a -de ꞌɛ ꞌꞌsɛꞌɛ dɩ -pɔlʋ ꞌꞌyi! ¹⁴-Ka ꞌꞌyu-u ꞌꞌduꞌa ꞌbho ꞌɔ -tɩtaꞌa wlu, a ꞌꞌdu -kaa ꞌbho -Lagɔꞌɔ wlu! -Da a -seeꞌa -bhla Zeziiꞌa ꞌꞌdɩzɩgɩ ꞌbʋꞌwɔn ke -tanyɩ, kpli-i seꞌa ꞌꞌyrili-nmɔ, ꞌɩnnɩ a-a nʋꞌo. ꞌTraamʋ ꞌtɔ ɔ, a ꞌꞌtayi nɩ ꞌꞌyiti! ¹⁵-Ɛkedɩmaa, -Lagɔ -zaꞌa ꞌbho amʋ a ꞌke ꞌɔ nyʋ ꞌꞌdu, ɔ ꞌsaaꞌa-a li. A-bee -mnʋʋ -lrɛɛ ɛ, ꞌle aꞌba nʋnʋkpli ꞌwee ꞌmʋ, a *ꞌsaa li ꞌɔ ka! ¹⁶-Bɛnyɩ, ꞌɔ ꞌꞌbhuo-o nʋꞌo na: A ꞌsaa li, -ɛkedɩmaa, ꞌɩn ꞌsaaꞌa-a li, ꞌle, ꞌɔ wlu ꞌmnɛ ꞌye ꞌcnɩ-ɛ ꞌle ꞌɔ ꞌꞌbɔgʋ ꞌli.

¹⁷-Bho a pa -Lagɔ li, -bho a -kɔ ɔ *wɔn gbo-o po, a-a ꞌlɔ -ɔ aꞌba -tɩta. ꞌƐ dɩ, -bhladɩ a ꞌꞌduꞌa ꞌlɩkpamʋ ꞌnɔɔ ꞌkmʋ ꞌmʋ, a ꞌꞌdu ɔ ꞌbho ꞌle a ꞌke kplizɩgɩ nʋ, -ɛkedɩmaa, ꞌɔ ꞌtɛ nyɔ ꞌmʋ! Lɛꞌꞌo lɛ nyɔ-ɔ nʋꞌa a, ꞌɩnnɛ ɔ-ɔ gbʋꞌo ya ꞌle ɔ-ɔ tu ꞌnɔ -zigle. ¹⁸ꞌAn ꞌlotʋꞌa ꞌꞌnynuu-a, aꞌba ꞌꞌbhi yiboꞌo-o na Zezii Kliisɩ zetieꞌe amʋ ꞌle aꞌba ꞌꞌnyinynidɩ ꞌmʋ. ꞌƐ kamʋ, bhubhuyitiꞌa lɩ aꞌba ꞌꞌna ꞌꞌwe -tɔꞌɔ amʋ, a ꞌye ɩ kwa gbo -za. Ɔ ꞌka ꞌɛ lɛtu nʋ a, mɔni-i nyniꞌa wɔn, ɛ -se ꞌɩnnɛ ɔ -nʋ -nɩ nɛ -ko. ¹⁹A -gblee, ɔ-bɔ Zezii Kliisɩ ꞌka ꞌmɛ, ꞌɔ nymɔ-ɔ ꞌbhleꞌa ꞌnynɩ tenyɩ, -ɛ -ziꞌa lɛꞌꞌo lɛ, -ɛ ꞌwlaꞌa ti, ꞌɩnnɛ zetieꞌe amʋ ꞌle aꞌba ꞌꞌnyinynidɩ ꞌmʋ. *ꞌBhlabhlɛgbuda ʋn-ʋ zaꞌa *ꞌsraga ꞌmʋ nyʋꞌa ꞌꞌnyinynidɩꞌa dɩ, -ka ɛ seꞌa ꞌbɩ liꞌbhle, ꞌka-a ɔ -nɩꞌo. ²⁰-Da -Lagɔ ꞌka lɩ ꞌwee ti-ya, ɔ -nɩꞌe-e ti ꞌle ɔ ꞌye ɔ ꞌbho -za see, ɔ ꞌye ɔ kpɔ -cɛ ꞌɔ lbhʋꞌa dɩ. Ɔ ꞌke amʋ ꞌpʋʋnꞌa ꞌꞌlru ꞌꞌyi ɔ ꞌꞌtayi ꞌnɔ ꞌꞌyiti ꞌtraamʋ ꞌtɔ, ꞌle *-lebhɔɔnɔɔ ꞌli, ꞌle ɔ ꞌye ꞌnɔɔ ꞌkmʋ ꞌmʋ yi, ²¹ꞌle -Lagɔ ꞌye ɔ glu -za ꞌle ꞌmɛmʋꞌa ꞌꞌklumʋ, ɔ ꞌye ɔ tinɩɛlre -ke ꞌnynɩꞌa ꞌꞌyibhɛɛɛ ꞌꞌnyɩ, ꞌle ꞌɔ dɩ a ꞌye -Lagɔ ꞌmnɔ ꞌꞌgwlide. Ɩ-bɩ ꞌɔ kpli ꞌmnɩꞌa kamʋ a de ꞌɔ ꞌꞌgwli ꞌle a ꞌꞌsiꞌe ꞌbho a de ꞌɔ -pɔlʋ ꞌꞌyi -lrɛɛ.

²²ꞌƆ wlu-u ꞌma-a -ziadɩ, a-a ꞌꞌdu -ɛ ꞌbhoꞌa dɩ, a *ꞌsaaꞌa li ꞌbho ꞌɔ ꞌꞌyigbeyi, ꞌle a ꞌbhɛɛꞌo a ꞌke a -Bozeziiꞌa nyʋꞌa dɩ -kma -ka -zɛgɛka. ꞌƐ kamʋ, ꞌɩn-ɩ ꞌtmʋʋꞌo amʋ, a -kma ꞌwa dɩ, ꞌle aꞌba -pɔlʋꞌa klɛ ti! ²³ꞌAn ꞌlotʋꞌa ꞌꞌnynuu-a, aꞌba ꞌꞌbhi yiboꞌo-o na, ꞌɔ wlu-u -seeꞌa ꞌplʋ ꞌkpa yi ꞌꞌkɔmʋkɔmʋ, -ɛ ꞌꞌnyɩꞌa ꞌɔ nyʋ ꞌꞌkɔgwlɛtinɩɛzɛgɛ, ꞌle ꞌɛ wɔnkuɛ ꞌmʋ a ꞌwlʋ -nɩꞌo -lreeka ꞌle a ꞌye tinɩɛlre ꞌye. Ɔ-bɔ ꞌꞌKɔgwlɛlagɔ ꞌmnɔꞌɔ ꞌꞌyreetɩ a ꞌꞌduꞌo. Ɛ-bɛ tinɩɛ ꞌmnɛ, nyunyɔ ꞌyeꞌa ꞌmɛ mʋ, ɛ -se ꞌɔ nyɔtu ꞌꞌnyɩ ɛ amʋ ꞌnɩ -ko. ²⁴A -gblee, ꞌɛ dɩꞌa kpɛ-ɛ -de-ɛꞌo -bɛnyɩ ꞌle -Lagɔꞌɔ wluꞌa ꞌmʋtizayi *Ezayii ꞌye ɩ ꞌcnɩ ꞌle -Lagɔꞌɔ ꞌꞌbɔgʋ ꞌli. Ɛ-bɛ wlu ꞌmnɛ na:

-Bho ꞌyrʋ fan tenyɩ, -sukui-i yɛ-oꞌo ꞌle ɩ-ɩ sɔꞌɔ ti. -Ka -lue ꞌmnɔ, ꞌka-a nyunyɔꞌɔ tinɩɛ -nɩꞌo. -Bho -sukui yɛ, -ka ꞌya ꞌꞌbowle-e cɛꞌɛ tawɔn, ꞌle ɩ-ɩ ꞌgaꞌa ti a, ꞌka-a nyunyu-u sieꞌe ꞌwa ꞌnynɩwlʋɛɛ ti. ²⁵Ɛ -nɩꞌa -kaa ꞌmʋ a, -aꞌba -Kɔyi -Lagɔꞌɔ wlu-u ꞌmo-o -ziadɩ, ɛ -see ꞌplʋ ꞌkpa yi ꞌꞌkɔmʋ.

ꞌKa-a Ezayii ꞌlɛꞌo. A -gblee, ɛ-bɛ -Lagɔꞌɔ wlu ɔ ꞌꞌsiꞌa ꞌnynɩ, ɛ-ɛ ꞌmo-o Zeziiꞌa ꞌꞌdɩzɩgɩ a ꞌwɔnꞌɔ ꞌbɔ see.

*Zezii ꞌꞌnyɩꞌa nyʋ tinɩɛzɛgɛ -ke -Lagɔꞌɔ kpɔcɛmʋ

¹-Lagɔ ꞌꞌnyɩ-e ꞌtɔ amʋ tinɩɛlreꞌa dɩ, sɩn o, -mɩɛ ꞌsɔn o, ꞌꞌmʋnynɩ o, nyʋꞌa ꞌꞌnyinynikaꞌa ꞌnynɩsiɛɛ o, lɛꞌꞌo lɛ-ɛ ꞌma-a ꞌꞌnyinynilɛ, a -zɛ ɛ kwa gbo! ²A -gblee, -bho ꞌꞌyu ꞌwlʋ -lreeka, ɔ-ɔ ꞌbɔ-ɔ ti ɔ ꞌke ꞌnya ꞌle ɔ-ɔ ꞌnyaꞌo, ɔ-ɔ ꞌbhʋaꞌo. -Ka -lue ꞌmnɔ, a-bʋ ꞌyeꞌa ɛ-bɛ tinɩɛzɛgɛ ꞌmnɛ, a ꞌbɔ ti a ꞌke -Lagɔwlu ꞌmʋtiꞌcrɛ, ꞌle a ꞌke ɛ ꞌmʋtiꞌcrɛ zɔꞌꞌo zɔ ꞌle ɛ ꞌke amʋ ꞌkpɩ ꞌmʋ po ꞌle a ꞌke ɛ-bɛ tinɩɛlre ꞌmnɛ ꞌli ti-de -ka -zɛgɛka, ꞌle, -nɔɔ -ke ti a-a ꞌyeꞌa ꞌbho -Lagɔꞌɔ ꞌꞌtroli -nɩ mʋ ꞌle yaku ꞌli, ɛ ꞌke ɛ ꞌꞌkpi bhla! ³ꞌƐ dɩ ɩ ꞌcnɩ-ɛꞌɛ -kaa ꞌle -Lagɔꞌɔ ꞌꞌbɔgʋ ꞌli: Aꞌba ꞌꞌbhi yibo-oꞌo -ka -aꞌba -Kɔyiꞌa ꞌlimʋ -nmɔꞌɔ wɔn.

⁴ꞌKa-a ɩ -nɩꞌe ꞌmʋꞌa dɩ, a ꞌꞌsrii -aꞌba -Kɔyi *Zezii! ꞌƆ nyɔtu kɔɔꞌɔ-ɔ sʋkpʋ ꞌle ɔ-ɔ ꞌꞌnyɩꞌe nyʋ ꞌꞌkɔgwlɛtinɩɛzɛgɛ. Ɛ -nɩꞌa -kaa ꞌmʋ a, nyunyuꞌa -dadudu -see ɔ ꞌybha. Ɛ -nɩꞌa -kaa ꞌmʋ -lrɛɛ, -Lagɔ -cɛ ꞌnɔ-ɔ kpɔ ꞌɔ lbhʋꞌa dɩ, ꞌle, sʋkpʋ-ʋ ꞌbhleꞌa ꞌpɛlʋ, ɔ -nɩꞌe ꞌɛ ka. ⁵A -gblee, ɛ-bɛ ꞌꞌkɔgwlɛtinɩɛzɛgɛ ꞌmnɛ, a ꞌye -ɛꞌo -lrɛɛ. ꞌƐ dɩ, a ꞌꞌsrii nɔ ꞌle a -ke ɔ ꞌke ꞌꞌyiꞌꞌsisri ꞌle a-bee -mnʋʋ ꞌke ꞌꞌyiꞌꞌsisri -lrɛɛ ꞌle a ꞌke aꞌba ꞌꞌbhi -aꞌba -Kɔyi -Lagɔ -jeyi ꞌꞌnyɩ ꞌwee ꞌle a ꞌke ꞌɔ bʋbɔmʋ ꞌꞌdu, ꞌle, Zezii *Kliisɩ ꞌmɛꞌɛ -aꞌba ꞌꞌnyinynidɩꞌa dɩ, ꞌɔ kamʋ aꞌba bʋbɔɛ ꞌmnɛ ꞌke -Lagɔ ꞌmnɔ ꞌtʋ nʋ! ⁶A ꞌye li-ɔ, ꞌlotʋꞌa ꞌꞌnynuu-a, ɩ ꞌcnɩ-ɛꞌɛ-ɛ ꞌle -Lagɔꞌɔ ꞌꞌbɔgʋ ꞌli ꞌɔ damʋ na:

A -gblee, *Siɔn (ꞌma-a Zelizalɛɛmʋ), sʋkpʋ-ʋ ꞌma-a sʋkpʋzɛgɛ, -ɛ ꞌbhleꞌa ꞌnynɩ, -ɛ -ziꞌa -buduꞌa sɩkpɩ ꞌwee, ꞌɩnnɛ ꞌɩn-ɩ poꞌo ꞌle glu. Nyɔ-ɔ de -ɔ ꞌꞌgwli, ꞌkpɩ -see ɔ ꞌꞌyiti-wa yi.

⁷A ꞌye li-ɔ, a-bʋ de ꞌɔ ꞌꞌgwli, ɔ-ɔ ꞌmo-o aꞌba damʋ nyɔklagba. ꞌBho nyʋ -yʋ -see ꞌɔ ꞌꞌgwlideꞌa damʋ, ɔ-ɔ ꞌmo-o:

Sʋkpʋ -budupomʋ -baꞌa, ʋn nʋꞌa ɛ se ꞌꞌyrili-nmɔ, ʋn poꞌa ti, -ɛ -ke ꞌbɩ-ɩ ꞌye-ɛꞌɛ na ꞌɩnnɛ -nmɔꞌɔ ꞌꞌyrili -ɛ -ziꞌe sɩkpɩ ꞌwee.

⁸Le ɛ-bɛ -Lagɔꞌɔ ꞌꞌbɔgʋ -lue ꞌmnɛ ꞌli, wludie ꞌcnɩ-ɛꞌɛ ꞌle -lrɛɛ ꞌɔ damʋ, ɛ na:

Nyʋ-ʋ dide-e sʋkpʋklagba ꞌle ʋn-ʋ ꞌgɛ ꞌɛ ꞌꞌyriti.

A -gblee, ʋ-bʋ nyʋ ꞌmnʋ -see ɔ ꞌybha, -ɛkedɩmaa, ʋn -see tiꞌbɔ ʋn ꞌke -Lagɔꞌɔ wlu ꞌbho ꞌꞌdu. Ɛ-bɛ ꞌꞌmamajolʋ ʋn-ʋ bhluꞌa, -Lagɔ -zaꞌa-a ꞌɛ dɩ ꞌmʋ see na ꞌka-a ꞌwa dɩ-ɩ ꞌye ꞌmʋ-nɩ mʋ.

⁹Ɛ -nɩꞌa -kaa ꞌmʋ a, a-bee -mnʋʋ ꞌmo-o nyʋ -aꞌba -Kɔyi -Lagɔ -cɛꞌɛ kpɔ ɔ ꞌke -kɔ, ꞌle a ꞌke ꞌɔ bʋbɔmʋ ꞌꞌdu. Ɔ -zaꞌa-a amʋ ꞌle ꞌꞌnyinynidɩꞌa -kuyre ꞌmʋ ꞌle ɔ ꞌye zɔ -ya ꞌle aꞌba -pɔlʋ ꞌzɔ ꞌle a ꞌye ꞌɔ ꞌꞌdɩzɩgɩ ꞌwɔɔn, ɔ ꞌye amʋ tinɩɛlre ꞌꞌnyɩ, ꞌle, lɩklɩgbɩ ɔ-ɔ nʋꞌa, a ꞌke ɩ nyʋ -bodɩ ꞌmʋ-za. ¹⁰-Bɛnyɩ a, a -se ꞌkɩ-ɩ ꞌɔ nyʋ -ko. ꞌTraamʋ a ꞌꞌduꞌo ꞌɔ nyʋ. -Bɛnyɩ a, -ka -Lagɔ ꞌyeꞌa aꞌba ngaze, a se ɩ ꞌkɩ yibo. ꞌTraamʋ ꞌtɔ ɔ, ꞌɛ lɛtu -tɔ-ɛꞌɛ-ɛ amʋ ꞌꞌyi ꞌle a ꞌye ɩ yibo.

A nʋ -Lagɔꞌɔ lbhʋnʋmʋꞌa kpli

¹¹ꞌAn dɩkmalotʋꞌa ꞌꞌnynuu-a, a popo ꞌgwlʋti na, a-a ꞌmo-o ꞌlɩkpamʋ ꞌnɔɔ ꞌkmʋ ꞌmʋ! A -see ꞌnɔɔ -gwlenamʋ yi. ꞌƐ ꞌꞌlru ꞌꞌyi ꞌɩn-ɩ ꞌtmʋʋꞌo amʋ, lɩ aꞌba ꞌꞌnyinyninaagɩ-ɩ ꞌꞌtuuꞌa amʋ ꞌmʋ ꞌle a ꞌbɔꞌɔ ti a ꞌke ɩ nʋ, a ꞌꞌdu aꞌba ꞌꞌbhi ꞌꞌyrili ꞌya damʋ! Ɩ-bɩ lɩ ꞌmnɩ, ɩ-ɩ ꞌꞌdu-o amʋ -zicɛ ꞌmʋ, ꞌle, kpli-i nʋꞌa -Lagɔ ꞌtʋ, a -kɩɩ ɩ nʋ. ¹²Nyʋ-ʋ se ꞌɔ yibo, ꞌnɔɔ a -nɩꞌa ꞌle ꞌwa ꞌꞌklumʋ, a nʋ ꞌle kplizɩgɩ! Ʋ-bʋ nyʋ ꞌmnʋ, -bho ʋn -ka amʋ dɩ ꞌꞌyi-ikpa, a nʋ ꞌꞌyrilinmɔkpli ꞌꞌkɔmʋ, ʋn ꞌke ɩ ꞌꞌyrili-gwɛ, ꞌle, -da *Zezii-i ꞌyeꞌa ꞌnɔɔ ꞌkmʋ ꞌmʋ le -yi -nɩ mʋ, ɔ ꞌke ʋ -zigle -tu, ꞌle ʋn ꞌke ꞌɔ ꞌnynɩ ꞌꞌyiꞌbhɛɛ!

¹³ꞌAn ꞌlotʋꞌa ꞌꞌnynuu-a, ꞌbhlɩkpɩ -ke ꞌꞌkpi a -nɩꞌa a, nyɔꞌꞌo nyɔ-ɔ ꞌma-a ꞌleꞌa nyʋꞌa -jolʋgbopoyi, -aꞌba -Kɔyi Zezii *Kliisɩꞌa nyʋ a ꞌꞌduꞌa kamʋ, a ꞌꞌdu ɔ ꞌbho! ꞌBhlʋkpayowliklagba-a -kɔꞌɔ nyʋ ꞌwee, a ꞌꞌdu ɔ ꞌbho! ¹⁴Ɔ-bɔ ꞌbhlʋkpayowliklagba ꞌmnɔ, ꞌbhlʋkpayowli ɔbɔ ꞌꞌduꞌa ꞌbho -lrɛɛ, a ꞌꞌdu ɔ ꞌbho -lrɛɛ! Ɔ ꞌꞌdu -ʋ ꞌbho, ꞌle, nyʋ-ʋ nʋꞌa ꞌꞌnyinynidɩ, ɔ ꞌke ʋ ꞌkleyeɛɛ ꞌꞌkpi -ya, ꞌle, -yʋ nʋꞌa -zɛgɛ, ɔ ꞌke ꞌwa ꞌꞌyrilinmɔdɩ -za. ¹⁵A -gblee, Zeziiꞌa ꞌꞌdɩzɩgɩ a-a zaꞌa ꞌmʋ, nyʋ-ʋꞌa ꞌwɩn ꞌɩ ꞌmʋti, -ʋ ꞌꞌdu ꞌɛ dɩ -ʋ cɛꞌɛ amʋ, -Lagɔ ꞌbɔ-ɔ ti a ꞌke kplizɩgɩ nʋ ꞌꞌkɔmʋ, -bho ʋn -gbʋ nɩ ya ꞌle ʋn ꞌke wɔn ꞌꞌmu. ¹⁶A-bʋ ꞌma-a ꞌꞌyiflɔmʋ, -ʋ zetie-ɛꞌɛ ꞌle ꞌꞌnyinynidɩ ꞌmʋ, kpli a ꞌka nʋ a, a nʋ ɩ! ꞌBho ꞌɛ lemʋ, aꞌba ꞌꞌyiflɔɛ ꞌmnɛ, aꞌba ꞌnɛ ɛ ꞌꞌyi, aꞌba nʋ ꞌꞌnyinynidɩ -le! A-bʋ ꞌma-a -Lagɔꞌɔ lbhʋnʋmʋ, kpli a ꞌka ꞌbhle a, a ꞌbhle ɩ ꞌle a ꞌke ɔ ꞌbho ꞌꞌdu! ¹⁷ꞌAn ꞌlotʋꞌa ꞌꞌnynuu-a, a ꞌꞌdu ꞌbho nyʋ ꞌwee! A -kma a -Bozeziiꞌa nyʋꞌa dɩ! A ꞌꞌdu ꞌbho -Lagɔ! A ꞌꞌdu ꞌbho ꞌbhlʋkpayowliklagba -lrɛɛ!

A nʋ *Zezii *Kliisɩꞌa kpli

¹⁸A-bʋ ꞌma-a nyʋꞌa lbhʋnʋmʋ, ꞌɩn-ɩ ꞌtmʋʋꞌo amʋ-ɛ, aꞌba -klɩgbɩ -ke lbhʋ a-a nʋꞌa a, a ꞌꞌdu ʋ ꞌbho! ꞌWa -yʋ -nmɔꞌɔ amʋ kwa ꞌmʋti, aꞌba ꞌꞌdu ꞌbho ꞌwa ꞌꞌsɛ -le! -Yʋ -nyniꞌa amʋ kwa ꞌmʋti, a ꞌꞌdu ʋ ꞌbho -lrɛɛ! ¹⁹A -gblee, nyɔ-ɔ -seeꞌa ꞌꞌnyinynilɛ nʋ, -bho ʋn -kɔ ɔ ꞌkleyeɛɛ ꞌꞌkpi-i ya, -bho ɔ popo -Lagɔ ꞌgwlʋti ꞌle ɔ ꞌke ꞌꞌgwli-ku, ɔ ꞌke ɩ wɔn ꞌmʋ cɛ, ꞌɛ lɛtu nʋꞌo -Lagɔ ꞌtʋ. ²⁰ꞌBho ꞌɛ lemʋ, -bho aꞌba kpli se ꞌꞌyrili-nmɔ, -bho ʋn ꞌꞌdu ꞌɛ dɩ, -bho ʋn -ka amʋ-ʋ sɩa nɩ, ꞌle a ꞌke ꞌꞌgwli-ku, a ꞌke ɩ wɔn ꞌmʋ cɛ, leedɩ a-a fuo ꞌnɔ wɔn aꞌba -zɛgɛꞌɛ dɩꞌa? Ɛ -nɩꞌa -kaa ꞌmʋ a, -bho a -ka kplizɩgɩ-ɩ nʋ, -bho ʋn ꞌꞌdu ꞌɛ dɩ, -bho ʋn -ka amʋ ꞌkleyeɛɛ ꞌꞌkpi-i ya, ꞌle a ꞌke ꞌꞌgwli-ku, a ꞌke ɩ wɔn ꞌmʋ cɛ, ꞌɛ lɛtu nʋ ꞌɔ ꞌtʋ. ²¹A ꞌye li-ɔ, a ꞌke ꞌkle ꞌye ꞌle a ꞌke ꞌꞌgwli-ku, a ꞌke ɩ wɔn ꞌmʋ cɛ, ꞌɩnnɛ ɔ ꞌybhaꞌo a ꞌke ꞌmʋ-zi -nɩ ꞌle lɩ -lrɩɩ ꞌmʋ, -ɛkedɩmaa, *ꞌɔ ꞌBhozayi -ɔ ꞌpʋʋnꞌa nyʋ, ꞌka-a ɔ ꞌyeꞌe ꞌkle aꞌba dɩ, ꞌle ɔ ꞌye amʋ ꞌɛ yagbʋlɛ lisie ꞌle aꞌba kpli ꞌke ꞌɔ nɩ ꞌꞌsɛlɩ-za. ²²Lɛ-ɛ ꞌma-a ꞌꞌnyinynilɛ ꞌbho -Lagɔꞌɔ ꞌꞌyigbeyi, ɔ -see ꞌɛ -lue ꞌtɩn nʋ, ꞌle, lɛ-ɛ ꞌma-a sɩn, ɛ -see ꞌle ꞌɔ wɔn ꞌmʋ ꞌwlʋ.

²³Ɔ -nɩꞌa ꞌnɔɔ ꞌkmʋ ꞌmʋ, nyʋꞌa -dadudu ꞌꞌjree nɔ-oꞌo. Ɛ -nɩꞌa -kaa ꞌmʋ a, ɔ -see ꞌwa nyɔ -lue ꞌtɩn ꞌꞌjree. Ʋn -yɔ ꞌɔ-ɔ ꞌkleyeɛɛ ꞌꞌkpi -lrɛɛ. Ɛ -nɩꞌa -kaa ꞌmʋ a, ɔ -see ꞌꞌyitiꞌꞌbhiti ꞌle ɔ ꞌke ʋ -kaa ꞌꞌyi-iꞌlɛ na, ɔ-ɔ ꞌye -ʋ ꞌkleyeɛɛ ꞌꞌkpi -ya -mʋ, nʋ. -Lagɔ -ke -zigle ꞌsrɛɛꞌɛ ꞌꞌyi, ꞌle ꞌɔ kwa ꞌmʋ ɔ-ɔ de ꞌɩ ti. ²⁴Ɔ-bɔ -Lagɔꞌɔ ꞌBhozayi ꞌmnɔ, -aꞌba ꞌꞌnyinynidɩꞌa ꞌꞌlru ꞌꞌyi ʋn ꞌlbha -nɩ ꞌnɔ ꞌbho nyʋyrilbhaatu ꞌꞌyri, ꞌle ꞌɔ ꞌmɛmɛɛ ꞌmnɛꞌɛ dɩ ɔ ꞌye -amʋ zetie ꞌle ɩ ꞌmʋ, ꞌle, ꞌya -belu ꞌka -amʋ bhla, ɩ ꞌye ɔ ꞌꞌkpi tiꞌga. ꞌKa-a ɔ ꞌmɛꞌo -aꞌba dɩ ꞌle ꞌꞌnyinynidɩ -kaa ꞌtɔ -amʋ ꞌꞌlru ꞌmʋ -kɔ ꞌle -a ꞌke ꞌya nʋnʋdɩ ꞌbhɔ, ꞌle, kpli-i ꞌsrɛɛꞌɛ ꞌꞌyi ꞌbho -Lagɔꞌɔ ꞌꞌyigbeyi, -a ꞌke ɩ ꞌli ti-de ꞌle -aꞌba tinɩɛ ꞌmʋ. Kɩn, ꞌan ꞌlotʋꞌa ꞌꞌnynuu-a, ɛ-bɛ ꞌkle ɔ ꞌyeꞌa dɩ, a ꞌpʋnꞌo. ²⁵A -gblee, -bɛnyɩ a, -da a se ꞌɔ -bhla yibo ke, lɛ a ꞌybhaꞌa, ꞌɩnnɛ a-a nʋꞌo ꞌle a-a bhluꞌo ꞌꞌmamajolʋ -ka *ꞌbhlabhlɩ-ɩ seꞌa *ꞌꞌyriliduyi ꞌbhle, ꞌle ɩ-ɩ naꞌa ti badiibadii. ꞌTraamʋ ꞌtɔ ɔ, -ka, -bho ɩ ꞌyeꞌa -jolʋ ꞌle ɩ-ɩ muꞌa ꞌya ꞌꞌyriliduyi gbo, ɔ-bɔ *Zezii *Kliisɩ ꞌꞌduꞌa amʋ ꞌꞌyrili, -ɔ poꞌa amʋ -jolʋzɛgɛ gbo, ꞌka-a a ꞌꞌbhiti ꞌnɔ gbo ꞌle ɔ ꞌke amʋ -kɔ.

*ꞌPiɛlɩ ꞌꞌdu-o ꞌnynɔ -ke nyimiɛ ꞌꞌdɩ ꞌmʋ

¹A-bʋ ꞌnynʋkpakpɩ-ɩ ꞌꞌtiꞌa nyna, a-bʋ ꞌɩn-ɩ ꞌꞌsiꞌe ꞌnynɩ -lrɛɛ. Aꞌba nyɔꞌꞌo nyɔ ꞌꞌdu ꞌbho ꞌwa nyimiɛ, ꞌle, -yʋ -ke -nɔ -seeꞌa tiꞌbɔ ɔ ꞌke -Lagɔwlu -lokuipo ꞌle ɔ ꞌke ɛ ꞌbho ꞌꞌdu, -bho ʋn se ɔ ɛ -bodɩ ꞌmʋ-za -dɩ, -bho ɔ -gbʋ ꞌwa kplizɩgɩ ya, ɔ ꞌbhɛɛꞌo ꞌle ɔ ꞌke -pɔlʋ ꞌꞌyizizia, ɔ ꞌke ɛ ꞌwɔɔn, ꞌle ɔ ꞌke ɛ ꞌbho ꞌꞌdu! ²-Ka a-a ꞌꞌduꞌa ꞌbho -Lagɔ ꞌle aꞌba kpli ꞌsrɛɛꞌɛ ꞌꞌyi ꞌbho ꞌɔ ꞌꞌyigbeyi, ꞌwa ꞌꞌbhi-i ꞌye -ɩ yibo -mʋ. ³Lɩ-ɩ ꞌka amʋ ꞌꞌyrili-nmɔ -nɩ: ꞌꞌnɩmnɩꞌa timɔɛ -ke ꞌya lbhalbhaa o, ꞌmʋpalɩ -ke -bɛbɛlɩ -ke ꞌpɛlʋ-ʋ -kmuꞌa ꞌꞌyi o, aꞌba tri ꞌya ꞌꞌlru ti -le! ⁴Lɛ-ɛ ꞌka amʋ ꞌꞌyrili-nmɔ -nɩ -ziaka, -ɛ -ke dɩ a ꞌka zi, ꞌɩnnɛ ꞌmo-o, nʋnʋkplizɩgɩ-ɩ ꞌwlʋꞌa ꞌle aꞌba ꞌꞌyrilinmɔpɔlʋ gbo. Aꞌba ꞌbhle ꞌcɛ ꞌmna ꞌꞌyi -le, a -nmɔ kpli ꞌmʋ, -ɛkedɩmaa, ꞌya lɩtu gwleꞌe ꞌmʋ ꞌꞌkɔgwlɛka, ꞌle ɩ ꞌbhleꞌe ꞌnynɩ -lrɛɛ ꞌbho -Lagɔꞌɔ ꞌꞌyigbeyi! ⁵A -gblee, ꞌnynʋkpakpɩ-ɩ -cɛꞌɛ kpɔ -bɛnyɩ ꞌɔ lbhʋꞌa dɩ, -ʋ -de ꞌnɔ -pɔlʋ ꞌꞌyi, kplizɩgɩ ꞌmnɩ, ꞌɩnnɩ ʋn-ʋ nʋꞌo, ꞌle ʋn-ʋ ꞌꞌduꞌo ꞌbho ꞌwa nyimiɛ ꞌꞌwe. ⁶*Ablaamʋꞌa ꞌnynɔ *Salaa -nɩꞌa -bɛnyɩ, a popo ꞌwa dɩ ꞌgwlʋti! ꞌKa-a ʋn-ʋ ꞌꞌduꞌo ꞌbho ꞌwa nyimiɛ ꞌle ʋn-ʋ ꞌlɔ ꞌɔ ꞌwa -kɔyi. -Bho a se nyɔꞌɔ -fanʋ ku ꞌmʋti ꞌbhle, ꞌle a ꞌke kplizɩgɩ nʋ a, a-a ꞌzʋ -ʋ ꞌꞌsɛlɩ.

⁷-Ɩnmɔ ꞌma-a ꞌnynɔbhleyi, -ɩnmɔ ꞌɩn-ɩ ꞌꞌsiꞌe ꞌnynɩ -lrɛɛ. Nʋ -zɛgɛ -aꞌa ꞌnynɔ ꞌꞌlruli! De ꞌꞌgwli na, ʋn se ꞌmʋtikuku ꞌle ʋn se ꞌliti-ku -lrɛɛ! ꞌꞌDu ʋ ꞌbho, -ɛkedɩmaa, -ka, a -nɩ ꞌsɔn, a ꞌꞌduꞌa nyʋ-ʋ ꞌyeꞌa ꞌꞌkɔgwlɛtinɩɛzɛgɛ, -Lagɔ ꞌbɔ-ɔ ti a ꞌke ꞌle ꞌɛ ꞌli ti-de ꞌꞌkɔmʋ! -Bho -ɩn -ka ɩ-bɩ kplizɩgɩ -nɩɩ-ɩ nʋ a, ꞌꞌlemnɩɩ lɛ -see aꞌba *wɔngbopowlu -zicɛ ꞌmʋ ꞌꞌdu yi, ɔ-ɔ kpʋn -ɩꞌo.

-Bho a -ka ꞌkle-e ꞌye, a nʋ -zɛgɛ ꞌꞌkɔmʋ!

⁸A -gblee, ꞌan ꞌlotʋꞌa ꞌꞌnynuu-a, a -plɛ -pɔlʋ ꞌmʋ ꞌwee! A *-Bozeziiꞌa nyɔ ꞌcnaa amʋ ku ꞌꞌyi! A -kma ꞌɔ dɩ! Aꞌba ꞌlimʋ -nmɔ wɔn ꞌbho ɔ ꞌꞌkpi! A -ya aꞌba ꞌꞌbhi ꞌzɔ! ⁹-Bho nyɔ nʋ amʋ ꞌꞌnyinynidɩ ꞌꞌlruli, aꞌba -za ꞌɛ kpa -le! -Bho nyɔ ꞌꞌjree amʋ, aꞌba ꞌꞌjree nɔ -le -lrɛɛ! A po ꞌɔ dɩ *-Lagɔ wɔn gbo ꞌle ɔ ꞌke ɔ ꞌꞌniti-wʋnna, -ɛkedɩmaa, ɔ ꞌlaꞌa amʋ-ɛ a ꞌke ꞌɔ nyʋ ꞌꞌdu ꞌle ɔ ꞌke amʋ ꞌꞌniti-wʋnna. ¹⁰A -gblee, ꞌya wludie ꞌcnɩ-ɛꞌɛ ꞌle ꞌɔ ꞌꞌbɔgʋ ꞌli see, ɛ na:

Nyɔ-ɔ ꞌbɔꞌɔ ti ɔ ꞌke tinɩɛzɛgɛ ꞌye, ꞌɔ ꞌbhle ꞌꞌnyinyniwlu wɔn ꞌmʋ -le! ꞌƆ ꞌlbha nyɔ ꞌꞌyrabha ꞌmʋ -le! ¹¹Ɔ -za ꞌꞌnyinynilɩ kwa gbo, ꞌle ɔ ꞌke -zɛgɛ nʋ! -Da ɔ -nɩꞌa a, ɔ ꞌbɔ ti wɔnlipɩpɛɛ ꞌke ꞌbho -nɩ, ꞌle ɔ ꞌke ꞌle ꞌkpɩ po ɔ ꞌke ɛ tikpʋn ꞌꞌkɔmʋ! ¹²-Ɛkedɩmaa, nyʋ-ʋ ꞌma-a ꞌꞌyisrɛɛmʋ, -aꞌba -Kɔyi -Lagɔ-ɔ ꞌnʋ -ʋ -zɛgɛ ꞌꞌlruli ꞌle ɔ-ɔ kpʋnꞌo ꞌwa bhadewlu -lrɛɛ. Ɛ -nɩꞌa -kaa ꞌmʋ, nyʋ-ʋ ꞌma-a ꞌꞌnyinynidɩꞌa nʋmʋ, ꞌɔ -kpa nʋ.

¹³A ꞌye li-ɔ, ꞌlotʋꞌa ꞌꞌnynuu-a, -bho a ꞌbɔ ti aꞌba -pɔlʋꞌa klɛ ti, a ꞌke ꞌꞌyisrɛɛmʋ ꞌꞌdu ꞌbho ꞌɔ ꞌꞌyigbeyi, yɔɔ ꞌbhɛɛꞌo ɔ ꞌke amʋ ꞌkleyeɛɛ ꞌꞌkpi -ya ꞌle ɔ ꞌke amʋ lɛ li-zaꞌa? ¹⁴-Bho a -ka -zɛgɛ-ɛ nʋ, -bho ʋn ꞌꞌdu ꞌɛ dɩ, -bho ʋn -ka amʋ-ʋ sɩa nɩ, a ꞌwa-a ti. Aꞌba ꞌbhle ꞌwa -fanʋ ku ꞌmʋti -le! Nymɔꞌɔ ꞌꞌsi amʋ ꞌgwlʋ -le -lrɛɛ! ¹⁵A ꞌꞌnyɩ *Zezii *Kliisɩ aꞌba ꞌꞌbhi -jeyi ꞌwee ꞌle a ꞌke ɔ -nɩ -lue ꞌtɩn ꞌbho ꞌꞌdu ꞌle ɔ ꞌke aꞌba -kɔyi ꞌꞌdu. -Bho nyɔ dede amʋ ti, na: Leedɩ a -de ꞌnɔ -pɔlʋ ꞌꞌyiꞌa?, a ꞌsrɛɛ ꞌꞌyi ꞌtɩn ꞌle a ꞌke ɩ gbɔzɩza, a ꞌke ɩ ɔ ꞌtmʋʋ! ¹⁶-Bho a -ka -kaa ɩ gbɔ-ɔzɩza, a -nʋ nɩ ꞌle -pɔlʋzɛgɛ ꞌmʋ ꞌle a ꞌke ɔ ꞌbho ꞌꞌdu -lrɛɛ! Aꞌba -pɔlʋ ꞌsrɛɛ ꞌꞌyi ꞌbho -Lagɔꞌɔ ꞌꞌyigbeyi, ꞌle, kplizɩgɩ a-a nʋꞌa Zezii Kliisɩꞌa nyʋꞌa kamʋ, -bho ʋn -ka amʋ ꞌya dɩ ꞌꞌyi-ikpa, ʋn -ka amʋ ꞌꞌnyinyniwlu -bodɩ ꞌmʋ-ʋza, ꞌle ꞌwa ꞌꞌbhiꞌa ꞌmʋzadɩ ꞌke ʋ dɩn ꞌꞌyi ꞌlbhaa! ¹⁷A ꞌye li-ɔ, nyɔ-ɔ nʋꞌa -zɛgɛ, -bho ʋn -kɔ ɔ ꞌkleyeɛɛ ꞌꞌkpi-i ya, -bho ɛ ꞌꞌdu -Lagɔꞌɔ ꞌgwlʋdɩ, ɛ -nmɔꞌɔ-ɔ ꞌꞌyrili, ɛ ꞌye ꞌꞌnyinynidɩꞌa nʋyiꞌa nɛ -zi.

¹⁸A -gblee, -a-bʋ nyunyuꞌa ꞌꞌnyinynidɩꞌa ꞌꞌlru ꞌꞌyi Zezii Kliisɩ ꞌmɛꞌo ꞌbho nyʋyrilbhaatu ꞌꞌyri ꞌle ɔ ꞌke -amʋ zetie ꞌle ɩ ꞌmʋ. ꞌƆ ꞌmɛmɛɛ ꞌmnɛ, ꞌɛ lɛtu -see -zi yi kpɛ ꞌsɔn. Ɛ-ɛ ꞌmo-o kpɛ -lue ꞌtɩnꞌa lɛ. Ɔ-bɔ ꞌma-a ꞌꞌyisrɛɛyi, ꞌɩnnɔ ꞌmɛꞌo ꞌꞌnyinynikpliꞌa nʋmʋꞌa dɩ, ꞌle nyunyu -ke -Lagɔ ꞌke ꞌꞌyiꞌꞌsisri.a ƆFa 3 18 Nyɔ ꞌbhɛɛꞌo ɔ ꞌke nʋ na -lrɛɛ: 18 . . . Ʋn -zaꞌa-a ꞌɔ *ꞌbhlʋku ti. Ɛ -nɩꞌa -kaa ꞌmʋ a, *-Lagɔꞌɔ Lisaazuzu nʋ ɛꞌo ꞌle ɔ ꞌye ti-nɩ ꞌꞌkɔgwlɛka -lrɛɛ. 19 Ɔ-bɔ -Lagɔꞌɔ Lisaazuzu ɔ ꞌbhleꞌa ꞌmʋ, -da -Lagɔ -kuꞌa ꞌꞌgwli ꞌle ɔ ꞌyeꞌa nyɔ ꞌꞌyiflɔɛ ꞌꞌnyɩ -bɛnyɩ ʋn ꞌke ꞌwa ꞌꞌnyinynidɩ ꞌꞌyiyibo ʋn ꞌke ɔ gbo ꞌꞌbhiti, ꞌɔ lbhʋnʋyi *Nʋe ꞌbhle -ɔ ꞌmʋ -lrɛɛ, ꞌle ɔ ꞌye ʋ-bʋ nyʋ ꞌmnʋ ꞌtmʋʋ, ʋn ꞌke -kaa nʋ ꞌle ʋn -see ꞌwɔn ʋn ꞌke ɔ ꞌbho ꞌꞌdu. ꞌƐ dɩ a, ꞌtraamʋ ꞌtɔ ɔ, ꞌle ꞌmɛmʋꞌa -denamʋ ʋn -nɩꞌo, ꞌle, -ka -Lagɔ ꞌkʋ ʋ dɩ -kpʋn, ʋn-ʋ fuoꞌo ꞌna wɔn. 20 A ꞌye li-ɔ, -da Nʋe-e kɔꞌɔ batoo, ꞌbho-o ɔ ꞌtmʋʋ -nɩꞌe nyʋ ʋn ꞌke -Lagɔ gbo ꞌꞌbhiti, ʋn -see ꞌɔ wlu -lokuipoꞌa dɩ, batoo ꞌmnɛꞌɛ kɔkɔɔ -gwɛꞌɛ ꞌꞌyi a, ꞌle nyʋ -mɛɛtan ꞌtɩnꞌa ꞌꞌsɛ ꞌye ɛ ꞌli ꞌkpa ꞌle ʋn ꞌye ꞌpʋn ꞌꞌniklagba wɔn ꞌmʋ.Ʋn -zaꞌa-a ꞌɔ *ꞌbhlʋku ti, ɛ -nɩꞌa -kaa ꞌmʋ a, ꞌɔ -zuzu -nɩꞌe-e ti ꞌꞌkɔgwlɛka. ¹⁹ꞌƆ -zuzu ꞌmnɛ, ꞌɩnnɛ -yɛꞌɛ ꞌmɛmʋ ꞌle ꞌwa -denɩ ꞌmʋ, -ɛ ꞌtmʋʋ nʋꞌo na ɔ ꞌlu-o ꞌꞌnyinynidɩ tʋ wɔn ꞌmʋ. ꞌƐ dɩ ʋn yiboꞌo -ka -Lagɔ ꞌkʋ ʋ dɩ -kpʋn. ²⁰A ꞌye li-ɔ, -da ʋ-bʋ ꞌmɛmʋ ꞌmnʋ -nɩꞌa ti -bɛnyɩ, ꞌle -Lagɔꞌɔ lbhʋnʋyi *Nʋe-e kɔꞌɔ batoo, -Lagɔ -kuꞌo-o ꞌꞌgwli ɔ ꞌye ʋ ꞌꞌyiflɔɛ ꞌꞌnyɩ ʋn ꞌke ꞌwa ꞌꞌnyinynidɩ ꞌꞌyiyibo, ʋn ꞌke ɔ gbo ꞌꞌbhiti, ꞌle ʋn -see ꞌwɔn ʋn ꞌke ɛ nʋ. ꞌƐ dɩ a, ꞌɛ kɔkɔɔ -gwɛꞌɛ ꞌꞌyi a, nyʋ -mɛɛtan ꞌtɩn, ꞌwa ꞌꞌsɛ-ɛ ꞌkpɛ ꞌɛ ꞌli ꞌle ʋn ꞌye ꞌpʋn ꞌꞌniklagba wɔn ꞌmʋ. ²¹Ɛ-bɛ ꞌꞌni ꞌmnɛ, ꞌɛ ꞌꞌyitigʋgɔlɛ ꞌmo-o nyʋꞌa *batizeeɛ-ɛ tɔꞌɔ nyʋ -ka -a ꞌpʋnꞌa ꞌbho -Lagɔꞌɔ ꞌꞌyigbeyi. Ɛ-bɛ batizeeɛ ꞌmnɛ, ɛ -se -lrelrea -ko. Ɛ-ɛ ꞌmo-o lɛ-ɛ tɔꞌɔ nyʋ na, -ka -aꞌba -pɔlʋ ꞌsrɛɛꞌɛ ꞌꞌyi ꞌbho -Lagɔꞌɔ ꞌꞌyigbeyi, -a ꞌbɔ-ɔ ti ɛ ꞌke -kaa -nɩ ꞌꞌkɔmʋ. Ɛ-ɛ ꞌtɔ-ɔ -ka -a ꞌpʋnꞌa ꞌbho ꞌɔ ꞌꞌyigbeyi, -ɛkedɩmaa, -aꞌba -Kɔyi Zezii Kliisɩ -sɔꞌɔ-ɔ glu, ꞌle ɔ ꞌye ti-nɩ -lrɛɛke. ²²Ɔ-bɔ Zezii Kliisɩ ꞌmnɔ ɔ, ɔ ꞌmu-o yaku ꞌli le ꞌbho -Lagɔꞌɔ ꞌꞌtroli, ꞌle, ʋn -nɩ ꞌsɔn, ʋn -kɔꞌɔ ɔ gboꞌa -dalbhomʋ -ke *wɔnkulɩ -lrɩɩ.

Kpliꞌa ꞌꞌyiziziɛɛ

¹Ɔ-bɔ *Zezii ꞌma-a *-Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ ꞌꞌluoꞌa nyunyɔku ꞌmʋ, -ɔ yiꞌa ꞌnɔɔ ꞌkmʋ ꞌmʋ a, ɔ ꞌye-e ꞌkle. ꞌƖnnɛ ꞌbhleꞌe ꞌnynɩꞌa dɩ, a-bee -mnʋʋ -lrɛɛ, a po ꞌle ꞌkpɩ a -ke ɔ ꞌke -naagɩ -lue ꞌmʋ-plɛ ꞌle aꞌba kpli ꞌke ꞌɔ nɩ ꞌꞌsɛlɩ-za. -Ɛkedɩmaa, nyɔ-ɔ ꞌyeꞌa ꞌkle a, ɔ-ɔ ꞌbhɔ-ɔ ꞌꞌnyinynidɩꞌa nʋnʋdɩ. ²A -gblee, -ɛ ꞌwlʋꞌa -laa -zɩan, -ɛ nyniꞌa aꞌba zʋɩnꞌa -gwɛnamʋ, kpli-i nʋꞌa -Lagɔ ꞌtʋ, a nʋ ɩ! Aꞌba ꞌbɔ aꞌba ꞌꞌbhiꞌa ꞌgwlʋdɩ ti -le! ³-Ziadɩ moꞌo, nyʋ-ʋ seꞌa -Lagɔ yibo, dɩ -ke nʋnʋdɩ ʋn -kmaꞌa, ꞌɩnnɩ a-a nʋ ꞌkoꞌo -bɛnyɩ ꞌyrɛlɛɛ: A-a ꞌꞌdu ꞌko-o gɔɛ, a-a de ꞌko-o ti -biɔɔ, ꞌle a-a ꞌnaꞌa nmɛ, lɩ-ɩ ꞌꞌluoꞌa -Lagɔꞌɔ ꞌbɩ ꞌmʋ, ꞌɩnnɩ a-a bʋbɔ ꞌkoꞌo, ꞌꞌnyinyninaagɩꞌa ꞌtʋnʋlɩ -ke dɩ -lrɩɩ-ɩ seꞌa nʋka -nɩ, ꞌɩnnɩ a-a nʋ ꞌkoꞌo. ⁴ꞌTraamʋ ꞌtɔ ɔ, ʋ-bʋ nyʋ-ʋ seꞌa -Lagɔ yibo, -bho ʋn -ka ɩ-bɩ ꞌꞌnyinynikpli ꞌmnɩ-ɩ nʋ, a -ke ʋn se -na. -Bho ʋn ꞌye ꞌɛ lɛtu li a, wɔn-ɔ ꞌmʋ -ʋ ti ꞌle ʋn-ʋ ꞌꞌsiꞌe amʋ ꞌnynɩ ꞌꞌnyinynika. ⁵Ɛ -nɩꞌa -kaa ꞌmʋ a, -Lagɔ -nɩꞌe-e -jeyi, ɔ-ɔ yi-oꞌo ɔ ꞌke tinɩmʋ -ke ꞌmɛmʋ -zigle -tu, ꞌle, -bho ɔ yi a, ʋ-bʋ nyʋ ꞌmnʋ, ɔ-ɔ ꞌye-e ꞌwa ꞌꞌnyinynikpli ya-gbʋ -mʋ ꞌle ʋn ꞌke ꞌya kuna po. ⁶A -gblee, -Lagɔ ꞌke -kaa nʋꞌa dɩ, nyʋ-ʋ ꞌmɛꞌɛ ɛ, ʋn -nɩ ꞌka ti a, ꞌɔ ꞌꞌdɩzɩgɩ -zʋ ꞌʋ -bodɩ ꞌmʋ -lrɛɛ, ꞌle -ɛ ꞌwlʋꞌa ꞌbho, -bho ꞌwa *ꞌbhlʋku -sɔ ti -dɩ nyunyu ꞌweeꞌa ka, ꞌꞌkɔgwlɛtinɩɛzɛgɛ-ɛ ꞌwlʋꞌa -Lagɔ ꞌmʋ, ꞌwa -zuzu ꞌꞌwe ꞌke ɛ ꞌye ꞌbho ꞌɔ ꞌꞌyigbeyi.

-Lagɔꞌɔ ꞌꞌgwlidemʋꞌa kpli ʋn ꞌka ti-nɩ

⁷ꞌAn ꞌlotʋꞌa ꞌꞌnynuu-a, lɛꞌꞌo lɛ -Lagɔ -yaꞌa ti, ꞌɛ tisɔnɔɔ ꞌꞌkɔɔꞌɔ-ɔ gbo. ꞌƐ dɩ, a kpʋn dɩ li ꞌle a ꞌke ꞌmʋtiyaa a ꞌke ɔ *wɔn gbo po! ⁸A -gblee, lɛ-ɛ ꞌbhleꞌa ꞌnynɩ tenyɩ, ꞌɩnnɛ ꞌmo-o, a ꞌke dɩ kɩkma aꞌba -pɔlʋꞌa klɛ ti. -Ɛkedɩmaa, -bho nyɔ -kma ɔ -bonyunyɔꞌɔ dɩ, ꞌle, ꞌɔ -bonyunyɔ ꞌmnɔ, -bho ɔ -kɔ ɔ ꞌꞌnyinynidɩ ꞌꞌlruli-inʋ, ɔ-ɔ ꞌbhɔꞌɔ ꞌya dɩ ꞌle ɔ-ɔ kmaꞌa ꞌɔ dɩ ꞌꞌkɔmʋ. ⁹-Bho nyɔ yi amʋ ꞌꞌbhli, a -kpʋn -nɩ nɔ -kʋtɩ ꞌsɔn -gli! Aꞌba wluwlu ꞌzɔti -le! ¹⁰A ꞌye li-ɔ, -zɛgɛ -Lagɔ nʋꞌa amʋ ꞌꞌlruli -lue -lue, ɩ se gʋgɔ. Nyɔꞌꞌo nyɔ ꞌye-e ꞌɔ ꞌꞌbhuoꞌa wɔnkuɛ. ꞌƐ dɩ nyɔꞌꞌo nyɔ ꞌke ꞌꞌyiꞌsrɛɛ, ꞌle, ɩ-bɩ ꞌkpɩ *-Lagɔꞌɔ Lisaazuzu ꞌꞌnyɩ ꞌɔ, ɔ ꞌke -Lagɔꞌɔ lbhʋ nʋ, ɔ ꞌke ɩ ꞌle po ꞌle ɔ ꞌke nyʋ -lrʋʋ -kpa. ¹¹A -gblee, nyɔ -Lagɔ ꞌꞌnyɩꞌa ꞌɔ wluꞌa ꞌmʋzalbhʋ, dɩ-ɩ ꞌma-a ꞌɔ ꞌmʋzawlu, ɔ ꞌtmʋʋ nɩ nyʋ! Nyɔ -yɔ ɔ ꞌꞌnyɩꞌa nyʋꞌa kwagbɔlitideɛꞌɛ lbhʋ, ꞌmʋtikukuɛ ɔ-ɔ ꞌꞌnyɩ ꞌɔ, ɔ -kpa nʋ ꞌle ɛ ꞌmʋ! A nʋ ꞌya lɩtu ꞌle lɛꞌꞌo lɛ ꞌmʋ, ꞌle, -bho nyʋ -lrʋʋ ꞌye ɩ li, ʋn ꞌke -Lagɔꞌɔ ꞌnynɩ ꞌꞌyiꞌbhɛɛ *Zezii *Kliisɩꞌa dɩ! Ɔbɔ ꞌmnɔ ɔ, ꞌɩnnɔ ꞌbhleꞌe ꞌnynɩꞌa ꞌꞌyibhɛɛɛ -ke wɔnkuɛ ꞌꞌkɔgwlɛka.

Ɩ-bɩ dɩ -nɩɩ ꞌwee, *ɩ -nɩ -kaa ꞌmʋ!

ꞌKleyeɛɛ *Zezii *Kliisɩꞌa dɩ

¹²ꞌAn dɩkmalotʋꞌa ꞌꞌnynuu-a, wɔnkusɩasɩaa-a ꞌkpaꞌa ti, -ɩ bhlaꞌa amʋ ꞌꞌkpi ɩ ꞌke amʋ tiꞌdɩn, ꞌya wɔnꞌɔ ma amʋ ti -le! Ɩ ꞌke -nʋ-ɛ moꞌo, ꞌle, -bho aꞌba -Lagɔꞌɔ ꞌꞌgwlideɛ ku ꞌmʋ, ɔ ꞌke ɩ yibo. ¹³-Bho a -ka ꞌkle-e ꞌye a, a ꞌwa-a ti, -ɛkedɩmaa, *Zezii *Kliisɩꞌa sɩasɩaa-a -nɩ ꞌka, ꞌɩnnɛ a -ke ɔ-ɔ ꞌgbleꞌe ꞌmʋ. -Bho a nʋ -kaa a, ꞌꞌlemnɩɩ, -nɔɔ -ke ti nyʋ-ʋ ꞌyeꞌa ꞌɔ ꞌnynɩꞌa ꞌꞌyibhɛɛɛ liꞌye mʋ, a-a ꞌli-e ꞌbʋbʋaklagba. ¹⁴ꞌƆ ꞌnynɩ a ꞌbhleꞌa ꞌꞌkpi, -bho nyʋ ꞌꞌdu ꞌɛ dɩ, -bho ʋn -ka amʋ ꞌnynɩ-ɩ ꞌꞌsi ꞌꞌnyinynika, a ꞌwa-a ti. -Ɛkedɩmaa, *-Lagɔꞌɔ Lisaazuzu -ke ꞌnynɩ-ɩ ꞌbhɛꞌɛ ꞌꞌyi tenyɩ, ꞌɩnnɔ -nɩꞌe amʋ ꞌmʋ. ¹⁵-Bho nyɔ -nɩ ꞌle aꞌba ꞌꞌklumʋ ꞌle ɔ ꞌke ꞌꞌnyinynilɛ nʋ, -bho ɔ ꞌꞌdu ꞌɛ dɩ, -bho ɔ -ka ꞌkle-e ꞌye, ꞌꞌkulbhɛɛɛ o, ꞌꞌyriyria o, ꞌle ꞌꞌbhalrɛɛke, ꞌɔ -bonyunyɔꞌɔ dɩ-ɩ se ꞌɔ ꞌꞌyiꞌꞌtuu, ꞌya ꞌꞌyimɛnɩɛ o, ꞌya ꞌkleyeɛɛꞌɛ lɛtu se ꞌꞌyrili-nmɔ. ¹⁶ꞌLe, -bho ɛ ꞌꞌdu, -bho ɔ -ka ꞌkle-e ꞌye *Zezii *Kliisɩꞌa nyɔꞌɔ kamʋ, ꞌɛ dɩnꞌa ꞌlbhɔ ɔ -le! Ɔ ꞌbhɛɛ -Lagɔꞌɔ ꞌnynɩ ꞌꞌyi, -ɛkedɩmaa, ꞌɔ nyɔ ɔ ꞌꞌduꞌo.

¹⁷ꞌAn ꞌlotʋꞌa ꞌꞌnynuu-a, -nɔɔ -Lagɔ ꞌꞌduꞌa ꞌle ɔ ꞌke yi, ɔ ꞌke nyʋ -zigle -tu, ɛ ꞌꞌkɔɔꞌɔ-ɔ gbo. -Bho ɔ yi a, -a-bʋ ꞌma-a ꞌɔ ꞌꞌbhuoꞌa -glɩgbawɔnyiꞌa nyʋ, -a-bʋ ɔ-ɔ ꞌye ꞌmʋꞌnyaa mʋ. ꞌꞌWii! -Bho ɔ ꞌnyaa ꞌtɔ -abʋ ꞌmʋ ꞌle, nyʋ-ʋ -seeꞌa ꞌwɔn ʋn ꞌke ꞌɔ ꞌꞌdɩzɩgɩ ꞌbho ꞌꞌdu, koo ꞌwa -zigle ꞌke ꞌtɔ ꞌmʋtinɩnɩꞌa? ¹⁸A -gblee, -kaa ɩ ꞌcnɩ-ɛꞌɛ -kaa ꞌle -Lagɔꞌɔ ꞌꞌbɔgʋ ꞌli, na:

Nyʋ-ʋ ꞌma-a ꞌꞌyisrɛɛmʋ ꞌbho -Lagɔꞌɔ ꞌꞌyigbeyi, -bho ꞌwa ꞌpʋnpʋan -kmu ꞌtɔ -kaa ꞌꞌyi ꞌle, ꞌꞌnyinynidɩꞌa nʋmʋ-ʋ ꞌye -kaa ꞌpʋn mʋ ꞌnɩ?

¹⁹ꞌKa-a ɛ -nɩꞌe ꞌmʋꞌa dɩ, -Lagɔ ꞌma-a lɩ ꞌweeꞌa tiyayi, -ɔꞌɔ cɛꞌɛ sɩn, -ɔ ꞌꞌduꞌa ꞌɔ nyʋ ꞌꞌyrili ꞌꞌkɔmʋ, -bho ɔ ꞌwɔn ꞌle aꞌba ꞌꞌklumʋꞌa nyɔ ꞌke ꞌle ꞌkle ꞌyenamʋ -nɩ a, -zɛgɛ ɔ -nɩꞌa nʋnamʋ, ɔ ꞌꞌdu ɛ ꞌꞌyrili, ꞌle ɔ ꞌke ꞌɔ ꞌꞌbhuoꞌa tinɩɛ ꞌmʋꞌꞌluo, ɔ ꞌke ɛ ꞌle ɔ-bɔ -Lagɔꞌɔ kwa ꞌmʋ tide!

A ꞌꞌdu *Zeziiꞌa nyʋ ꞌꞌyrili

¹ꞌKa-a ɛ -nɩꞌe ꞌmʋꞌa dɩ, nyʋ-ʋ -nɩꞌa ꞌle aꞌba ꞌꞌklumʋ, -ʋ ꞌma-a *Zezii *Kliisɩꞌa -glɩgbaꞌa ꞌꞌlrutidemʋ, ꞌɩnnʋ ꞌɩn-ɩ ꞌꞌsiꞌe -laa ꞌnynɩ. ꞌƆ -glɩgbaꞌa ꞌꞌlrutideyi ꞌmna-aꞌa ꞌꞌbhuo ꞌꞌduꞌo -lrɛɛ. Ɔ -nɩꞌa ꞌnɔɔ ꞌkmʋ ꞌmʋ, ꞌkle ɔ ꞌyeꞌa a, ꞌɩn-ɩ ꞌmo-o ꞌya -dayeyi. -Da ɔ-ɔ ꞌyeꞌa le -yi -nɩ mʋ ꞌle ꞌɔ ꞌnynɩꞌa ꞌꞌyibhɛɛɛ ꞌmʋ, -ka aꞌba ꞌnynɩ ꞌka ꞌꞌyiꞌbhɛ ꞌle ꞌan nɛ ꞌke -kaa -nɩ -lrɛɛ. A -gblee, ꞌɩn-ɩ ꞌꞌdu-o amʋ ꞌꞌsrɩn ꞌmʋ na: ²Zezii Kliisɩꞌa nyʋ ɔ ꞌꞌnyɩꞌa amʋ, a ꞌꞌdu ʋ ꞌꞌyrili! A ꞌꞌdu ʋ ꞌꞌyrili aꞌba -pɔlʋꞌa klɛ ti! ꞌƖnnɛ ꞌmo-o -Lagɔꞌɔ ꞌgwlʋdɩ. Aꞌba -nʋ -nɩ nɛ ꞌle aꞌba ꞌꞌnyinynipɔlʋ ꞌmʋ -le! A ꞌwla aꞌba lbhʋ ꞌmnɛ -pɔlʋ ꞌꞌkpi ti! Mɔni a-a ꞌye nɩꞌa ꞌbho, ꞌya ꞌtʋꞌa -zi aꞌba lbhʋ ꞌmnɛꞌɛ nɛ ꞌmʋ -le! ³Aꞌba ꞌbɔ ti a ꞌke ʋ ꞌꞌlru ꞌmʋ -kɔ -le! A ꞌꞌdu -tɔmʋzɩgɩ-ɩ -ke kpli-i -nmɔꞌɔ ꞌꞌyrili ʋ -bodɩ! ⁴ꞌꞌLemnɩɩ Zezii Kliisɩ ꞌma-a ꞌɔ -glɩgbaꞌa ꞌꞌlrutidemʋ ꞌweeꞌa -kɔyi, -bho ɔ yi le a, ɔ-ɔ ꞌnʋ-o amʋ -zɛgɛ ꞌꞌlruli, ꞌle, -ka ꞌɔ ꞌnynɩ ꞌbhɛꞌɛ ꞌꞌyi, ɔ ꞌke -kaa amʋ ꞌnynɩ ꞌꞌkpi po ꞌle a -ke ɔ ꞌke ꞌle ɩ ꞌmʋ ti-de ꞌꞌkɔgwlɛka. ⁵-Ka -lue ꞌmnɔ ɔ, ꞌbhʋabhʋayreetɩ-a, a ꞌꞌdu -kaa ꞌbho aꞌba -klɩgbɩ! A -ke ʋn bhete gbo, a ꞌke aꞌba ꞌꞌbhi ꞌzɔ -ya ꞌle a ꞌke kpʋkpa! A -gblee, ɩ ꞌcnɩ-ɛꞌɛ-ɛ ꞌle -Lagɔꞌɔ ꞌꞌbɔgʋ ꞌli, na:

Nyʋ-ʋ ꞌbhɛɛꞌɛ ꞌwa ꞌꞌbhi ꞌꞌyi, -Lagɔꞌɔ -gbʋ nʋ ya. Ɛ -nɩꞌa -kaa ꞌmʋ a, nyʋ-ʋ yaꞌa ꞌwa ꞌꞌbhi ꞌzɔ ꞌbho ꞌɔ ꞌꞌyigbeyi, ɔ-ɔ kpa nʋ-oꞌo.

⁶ꞌKa-a ɛ -nɩꞌe ꞌmʋꞌa dɩ, Wɔnkulagɔ -kɔꞌɔ lɩ ꞌwee, a -ya aꞌba ꞌꞌbhi ꞌzɔ ꞌbho ꞌɔ ꞌꞌyigbeyi, ꞌle, -nɔɔ ɔ ꞌꞌduꞌa, -bho ɛ nyni, ɔ ꞌke amʋ ꞌꞌyiꞌꞌluo! ⁷A -gblee, -bho nyɔ ꞌbhle ꞌgbɛ, -ka ɔ-ɔ zɛ ꞌɛ ꞌꞌlru, ꞌle ɔ-ɔ de ꞌɛ nyɔ -lrɔɔ ꞌꞌlru, -ka -lue ꞌmnɔ, lɛꞌꞌo lɛ-ɛ -kmuꞌa ꞌꞌyi, -ɛ ꞌka amʋ -sɩa -nɩ, a ꞌꞌluo nɛ ꞌmʋ a ꞌke ɛ ꞌle ꞌɔ kwa ꞌmʋ tide, -ɛkedɩmaa, ꞌɩnnɔ ꞌmo-o aꞌba ꞌꞌyriliduyi!

⁸ꞌAn ꞌlotʋꞌa ꞌꞌnynuu-a, a yaa ꞌmʋti ꞌle a ꞌke dɩ likpʋn -lrɛɛ! -Ɛkedɩmaa, -bho -bhlakpa -ka ꞌɛ lilinmi-i tiꞌbɔ, -ka ɛ-ɛ kluꞌa, ꞌꞌnyinynidɩꞌa tiyayi *Sataan ꞌma-a aꞌba ꞌꞌyidedeyi, ꞌka-a ɛ-ɛ ꞌbɔꞌɔ ti ɛ ꞌke amʋ lɛ ꞌꞌlrulinʋ ꞌle a ꞌke Zeziiꞌa ꞌꞌgwlidedɩ ꞌbhɔ. ⁹-Bho ɛ -ka ꞌɛ lɛtu-u nʋ a, aꞌba ꞌɔ ꞌꞌgwlideɛꞌɛ -sɔ -denɩ ꞌmʋ -le! ꞌƐ ꞌye aꞌba -flɔna -le! -Ɛkedɩmaa, a -Bozeziiꞌa nyʋ-ʋ -nɩꞌa daꞌꞌo da, aꞌba ꞌꞌbhi yiboꞌo-o -ka ʋn -nɩꞌa ɩ-bɩ ꞌkleyeɛɛ ꞌmnɩ wɔn ꞌmʋ -lrɛɛ.

¹⁰-Bho a ꞌye -kaa ꞌkle -daan, lɛꞌꞌo lɛ-ɛ ꞌma-a -zɛgɛ, -Lagɔ -ke ꞌmʋ ɛ-ɛ ꞌwlʋꞌa, -ɔ ꞌlaꞌa amʋ, ꞌle, -ka ꞌɔ ꞌnynɩ ꞌbhɛꞌɛ ꞌꞌyi, a ꞌke -kaa ꞌnynɩ ꞌwlʋ -lrɛɛ, ꞌle a ꞌke ꞌbho ꞌɔ ꞌꞌtroli -nɩ ꞌꞌkɔgwlɛka, a -ke Kliisɩ ꞌke ꞌꞌyiꞌꞌsisri, ɔ-bɔ -Lagɔ ꞌmnɔ, ɔ-ɔ ꞌye -ɛ -nʋ -mʋ ꞌle a ꞌke pepe -nɩ ꞌbho ꞌɔ ꞌꞌyigbeyi, ɔ-ɔ ꞌye-e amʋ ꞌkpɩ ꞌmʋ -po -mʋ tenyɩ ꞌle aꞌba ꞌꞌgwlideɛ -see -denɩ ꞌmʋ -sɔ yi. ¹¹Wɔnkuɛ ꞌmo-o ꞌɔ lɛ ꞌꞌkɔmʋ!

Dɩ ꞌwee ꞌɩn -zaꞌa ꞌmʋ, *ɩ -nɩ -kaa ꞌmʋ!

ꞌYewlu

¹²A -gblee, wludie ꞌɩn-ɩ poꞌa -laa amʋ -jeyi, -aꞌba ꞌlotʋꞌa ꞌꞌyu *Silɩvɛɛ ꞌꞌyri kpʋnꞌa ti ꞌbho -Lagɔjeyi, ꞌle ꞌɩn deꞌa ꞌꞌgwli na ꞌka-a ɛ -nɩꞌe ꞌmʋ a, ꞌɩnnɔ ꞌcnɩꞌe ꞌya ꞌꞌbɔgʋ. ꞌƖn ꞌybha-oꞌo ꞌɩn ꞌke amʋ ꞌkpɩ ꞌꞌyi po ꞌle ꞌɩn ꞌke amʋ ꞌtmʋʋ gbaa na, ꞌka-a -Lagɔꞌɔ ꞌlimʋꞌa wɔnnmɔɛ -nɩꞌo. A -de ꞌle ꞌɛ ꞌlimʋ ti! Aꞌba ꞌwlʋ ɛ ꞌꞌyrili -le!

¹³A *-Bozeziiꞌa nyʋ -Lagɔ -zaꞌa ꞌbho -lrɛɛ aꞌba ka, -ʋ -nɩꞌa *Babilɔɔnʋgwlɔ ꞌmʋ, ʋn na ʋ-bʋ ꞌyeꞌe amʋ! ꞌAn -Lagɔjeyiꞌa ꞌꞌyu Maakɩ na ɔ-bɔ ꞌyeꞌe amʋ -lrɛɛ! ¹⁴ꞌƖnmɔ ꞌyeꞌe amʋ ꞌwee! -Bho a ꞌwɔn ꞌan ꞌyewlu ꞌbɔ, a gbɩgble ꞌwee ꞌle a ꞌke ꞌyɩye ꞌle dɩkɩkmɛɛ ꞌmʋ!

A-bʋ -ke *Kliisɩ ꞌꞌsisriꞌa ꞌꞌyi, aꞌba klɛ, a ꞌye -pɔlʋꞌa bhlubhlua!