ꞌZAANꞌa ꞌꞌyizabɔgʋ
Wludie poꞌa nyɔ ꞌꞌbɔgʋ -nɛɛꞌɛ -naagɩ ꞌli.
Zeziiꞌa nyʋꞌa -dadudu ꞌZaan poꞌo ꞌꞌbɔgʋ -nɛɛ -jeyi. Ɔ ꞌnʋ-o -kaa, ꞌle, lɩ-ɩ seꞌa ꞌkpʋ ꞌbhle, nyʋ-ʋ tɔ ꞌnɩ, ꞌbho ꞌwa damʋ ʋn ꞌke ꞌwa ꞌꞌbhi ꞌꞌyriliꞌꞌdu. Ɔ ꞌpo -ɛ ʋ -jeyi ꞌle ɔ ꞌke ʋ ꞌkpa ꞌꞌyi po -lrɛɛ ꞌle ʋn -ke Zezii ꞌke ꞌꞌyiꞌꞌsisri -ka -zɛgɛka.
1-Lagɔwlu ꞌꞌnyɩꞌa nyɔ tinɩɛzɛgɛ, ꞌɩnnɛ *Zezii ꞌꞌduꞌo
1*Zezii ꞌma-a -Lagɔꞌɔ wlu-u ꞌꞌnyɩꞌa nyɔ ꞌꞌkɔgwlɛtinɩɛzɛgɛ, ꞌɔ dɩ -a poꞌo amʋ ꞌꞌbɔgʋ -jeyi. -Da -Lagɔ ꞌka lɩ ꞌwee ti-ya -bɛnyɩ, ɔ -nɩꞌe-e ti see. -Aꞌba ꞌꞌbhiꞌa pɛyri ꞌsɔn ꞌye -ɔꞌo. -A ꞌye-e ꞌɔ -wluna ꞌle -a ꞌye ɔ liꞌtʋ -lrɛɛ. 2A -gblee, ɔ-bɔ Zezii ꞌꞌnyɩꞌa nyɔ tinɩɛzɛgɛ ꞌmnɛ, ɔ ꞌyi-e ꞌnɔɔ ꞌkmʋ ꞌmʋ, ꞌle -a ꞌye ɔ ꞌye. ꞌBho -aꞌba -tɩta -Lagɔꞌɔ ꞌꞌtroli ɔ -nɩꞌo ꞌle ɔ ꞌye ꞌbho ꞌwlʋ, ɔ ꞌye ꞌnɔɔ ꞌkmʋ ꞌmʋ yi. ꞌƐ kamʋ -a zaꞌa amʋ ꞌɔ dɩ -bodɩ ꞌmʋ ꞌle -a ꞌtmʋʋꞌo amʋ -lrɛɛ -ka ɔ-ɔ ꞌꞌnyɩꞌa nyɔ ꞌꞌkɔgwlɛtinɩɛzɛgɛ. 3A-a ꞌye-e liꞌa, ɔ-bɔ Zezii -a ꞌyeꞌa li, ꞌɔ wlu -a ꞌwɔnꞌɔ ꞌbɔ, -a ꞌpo-o amʋ ꞌya wlu -jeyi -lrɛɛ, ꞌle, -ka -a -ke -aꞌba -tɩta -Lagɔ -ke ꞌɔ ꞌꞌyu Zezii *Kliisɩ ꞌmnɔ ꞌꞌsisriꞌa ꞌꞌyi, -a -ke abʋ ꞌke ɛ ꞌmʋ-plɛ -lrɛɛ. 4Ɩ-bɩ dɩ -nɩɩ, -a ꞌpo-o amʋ ꞌya ꞌꞌbɔgʋ -jeyi, ꞌle, ꞌbʋbʋa-a ꞌlbhaꞌa -a -nɩ ꞌwee, ɛ ꞌke -amʋ ꞌmʋ ꞌꞌyi tenyɩ.
-Lagɔ *ꞌsaaꞌa-a li.
5-Lagɔꞌɔ ꞌꞌdɩzɩgɩ *Zezii *Kliisɩ -zaꞌa -amʋ -bodɩ ꞌmʋ, -a ꞌwɔnꞌɔ ꞌbɔ, -ɛ -ke dɩ -a -nɩꞌa amʋ wlu -jeyi -ponamʋ, ꞌɩnnɛ ꞌka-a: Ɔ na: -Ka zɔ-ɔ ꞌyeꞌa ti wesaa, ꞌka-a -Lagɔ *ꞌsaaꞌa li, ꞌle ꞌꞌnyinynidɩꞌa -kuyre se ɔ ꞌmʋ -nɩ. 6A ꞌye li-ɔ, -bho -aꞌba nyɔ nʋ, ɔ -ke -Lagɔ ꞌꞌsisriꞌe-e ꞌꞌyi, ꞌle ɔ ꞌke ꞌꞌnyinynidɩꞌa nʋnʋa ꞌli ti-de a, ꞌɔ nyɔtu-u ꞌcɛ-ɛ sɩn ꞌle ꞌɔ wɔnmʋwlu ꞌmʋ -ke ꞌɔ nʋnʋkpli ꞌmʋ. 7Ɛ -nɩꞌa -kaa ꞌmʋ a, -ka -Lagɔ ꞌsaaꞌa li, -bho -aꞌba nʋnʋkpli *ꞌsaa -kaa li ꞌbho ꞌɔ ꞌꞌyigbeyi, ꞌꞌlemnɩɩ -ka -a -dieꞌa ꞌmʋ ꞌwee, -a kpʋkpʋnꞌo-o ti, ꞌle, ꞌɔ ꞌꞌyu Zezii ꞌmɛꞌɛ -aꞌba ꞌꞌnyinynidɩꞌa dɩ, -ɔ -ke nymɔ-ɔ ꞌwlaꞌa ti, ɔ-ɔ zetieꞌe -amʋ ꞌle ɩ-bɩ ꞌꞌnyinynidɩ ꞌmnɩ ꞌmʋ.
8-Bho -aꞌba nyɔ nʋ, ɔ -se ꞌtɔ-ɔ ꞌꞌnyinynidɩꞌa nʋyi -ko a, ɔ-bɔ nyɔ ꞌmnɔ, -ziadɩ se ꞌle ꞌɔ -pɔlʋ ꞌzɔ -nɩ. Ɔ-ɔ ꞌꞌmaa-a ꞌɔ ꞌꞌbhuo. 9Ɛ -nɩꞌa -kaa ꞌmʋ a, -bho -a nʋ ꞌꞌnyinynidɩ, ꞌle -a ꞌke ɩ ꞌꞌyiyibo, -a ꞌke ɩ ꞌbho -Lagɔꞌɔ ꞌꞌyigbeyi tide a, ɔ-ɔ ꞌbhɔ-ɔ ꞌya dɩ ꞌle ɔ-ɔ zetieꞌe -amʋ ꞌle ɩ ꞌmʋ. -Ɛkedɩmaa, ɔ ꞌsrɛɛꞌɛ-ɛ ꞌꞌyi ꞌle ɔ -nmɔꞌɔ ꞌꞌyiti nyɔ ꞌke ɔ ꞌꞌgwlide. 10ꞌLe -aꞌba ꞌꞌklumʋ, -bho nyɔ nʋ ɔ -see ꞌꞌnyinynidɩ nʋ a, ɔ-bɔ nyɔ ꞌmnɔ-ɔ ꞌꞌluo-o -Lagɔ ꞌmʋ -ka sɩncɛyi, ꞌle -Lagɔꞌɔ wlu -lue ꞌtɩn se ɔ ꞌmʋ -nɩ.
2*Zezii *Kliisɩ-ɩ kpaꞌa -amʋ-ɛ
1ꞌAn dɩkmayreetɩ-a, dɩ ꞌɩn-ɩ zaꞌa -laa ꞌmʋꞌa kamʋ ꞌɩn-ɩ poꞌo amʋ wlu -jeyi ꞌle a ꞌke ꞌꞌnyinynidɩꞌa nʋnʋdɩ ꞌbhɔ. ꞌLe aꞌba ꞌꞌklumʋ, -bho nyɔ nʋ ꞌle ꞌꞌnyinynidɩ, -a ꞌbhle-e -kpayi -lue ꞌbho -aꞌba -tɩta -Lagɔꞌɔ ꞌꞌtroli: ꞌɩnnɔ ꞌmo-o ꞌꞌYisrɛɛyi *Zezii *Kliisɩ. 2A -gblee, ɔ-bɔ Zezii Kliisɩ ꞌmnɔ, -Lagɔꞌɔ ꞌꞌbhuo-o -zɔ ꞌɔ ꞌbho ꞌle ꞌɔ nymɔ ꞌye tiꞌwla, ꞌle ɔ ꞌye ꞌmɛ. A ꞌye li-ɔ, ɛ -se -aꞌba ꞌꞌsɛꞌɛ ꞌꞌnyinynidɩꞌa kamʋ ɔ ꞌmɛ ꞌnɩ -ko. Ɔ ꞌmɛ-oꞌo nyunyu ꞌweeꞌa ꞌꞌnyinynidɩꞌa dɩ ꞌle ꞌya -belu ꞌke ʋ ꞌka bhla, ɛ ꞌye ɔ ꞌꞌkpi tiꞌga ꞌbho nyunyu ꞌweeꞌa ꞌbɩ ꞌmʋ. ꞌWa *ꞌsraga ɔ -zaꞌo ꞌbho -Lagɔꞌɔ ꞌꞌyigbeyi ꞌle ꞌwa ꞌꞌnyinynidɩ ꞌke ʋ ꞌꞌkpi ti-gwɛ.
3-Bho -a po -Lagɔꞌɔ wlu -lokui ꞌle -a ꞌke ɩ ꞌbho ꞌꞌdu a, ꞌꞌlemnɩɩ, -ka -a yibo ꞌnɔ -ziaka, -a ꞌde -ɩ ꞌꞌgwli. 4-Bho -aꞌba nyɔ -lue nʋ ɔ yibo nɔ-oꞌo, -bho ꞌɔ ꞌꞌdu ꞌbho ꞌɔ wlu a, ɔ-bɔ nyɔ ꞌmnɔ ꞌnʋ-o sɩncɛyi, -ziadɩ se ꞌle ꞌɔ -pɔlʋ ꞌzɔ -nɩ. 5Ɛ -nɩꞌa -kaa ꞌmʋ a, nyɔ-ɔ ꞌꞌduꞌa ꞌbho ꞌɔ wlu, ɔ-ɔ ꞌmo-o nyɔ-ɔ -kmaꞌa -Lagɔ ꞌmnɔꞌɔ dɩ tenyɩ. A -gblee, -ka nyɔ ꞌka yibo na ɔ -ke ɔ ꞌꞌsisriꞌe-e ꞌꞌyi a, ꞌkla-a ꞌka-a! 6-Bho nyɔ nʋ ɔ -ke -Lagɔ ꞌꞌsisriꞌe-e ꞌꞌyi, -ka Zeziiꞌa -dedekpli -nɩꞌa a, ꞌɔ -dedekpli -nɩ -kaa!
-Lagɔꞌɔ wlulre.
7ꞌAn dɩkmalotʋꞌa ꞌꞌnynuu-a, wlu ꞌɩn -nɩꞌa -laa amʋ -jeyi ponamʋ, ɛ se wlulre -ko. A ꞌwɛn -ɛ ꞌbɔ see ꞌle a yibo nɛꞌo. 8ꞌBho ꞌɛ lemʋ, ɛ-bɛ wlu -ke dɩ ꞌɩn -nɩꞌa amʋ -bodɩ ꞌmʋzanamʋ a, ɛ-ɛ ꞌmo-o wlulre -lrɛɛ. A -ke *Zeziiꞌa nʋnʋkplizɩgɩ ꞌmʋ, ꞌle-e nyʋ yibo -nɩ ꞌnɛ ꞌꞌyi ꞌle -a yiboꞌo -ka ɛ ꞌꞌduꞌa lɛlre. -Ɛkedɩmaa, ꞌꞌnyinynidɩꞌa -kuyre-e ꞌwlʋ-o ꞌbho -jeyi, ꞌle, Zeziiꞌa ꞌꞌyrilinmɔdɩ kɔɔꞌɔ zɔ, ɩ-ɩ ziꞌe ꞌbho ꞌya ꞌbɩ ꞌmʋ.
9ꞌKa-a ɛ -nɩꞌe ꞌmʋꞌa dɩ, nyɔ-ɔ ꞌnyɛꞌɛ ɔ -Bozeziiꞌa nyɔ ꞌmʋ, -ka -Lagɔ ꞌsaaꞌa li, -bho ɔ nʋ ꞌka-a ꞌɔ nʋnʋkpli -nɩꞌo ꞌbho -Lagɔꞌɔ ꞌꞌyigbeyi a, ꞌɔ nyɔtu-u ꞌnʋ-o -bhla ꞌꞌnyinynidɩ ꞌꞌkɔmʋ. 10Ɛ -nɩꞌa -kaa ꞌmʋ a, -bho nyɔ -kma ɔ -Bozeziiꞌa nyɔꞌɔ dɩ, ꞌɔ nyɔtu -deꞌe-e ꞌle -zɛgɛ ꞌli ti. Lɛ -see ɔ ꞌꞌnyinynidɩ wɔn-po yi ꞌbho -Lagɔꞌɔ ꞌꞌyigbeyi. 11A -gblee, nyɔ-ɔ ꞌnyɛꞌɛ ɔ -Bozeziiꞌa nyɔ ꞌmʋ, ɔ -nɩꞌe-e -bhla ꞌle ꞌꞌnyinynidɩ ꞌli ꞌꞌkɔmʋ. ꞌLe ꞌꞌnyinynidɩꞌa nʋnʋa ꞌli ɔ -deꞌe ti ꞌꞌkɔmʋ. Ɩ-bɩ ꞌꞌnyinynidɩ ꞌmnɩ -kaꞌa ꞌtɔ-ɔ ꞌɔ ꞌꞌyriꞌa dɩ, ɔ se ꞌɔ ꞌꞌyisrɛɛjolʋ yibo.
12ꞌAn dɩkmayreetɩ-a, ꞌɩn-ɩ ꞌpo-o amʋ dɩ -nɩɩꞌa ꞌꞌbɔgʋ -jeyi, -ɛkedɩmaa, aꞌba ꞌꞌnyinynidɩ -gwɛꞌɛ-ɛ ꞌbho -Lagɔꞌɔ ꞌꞌyigbeyi ti Zezii *Kliisɩꞌa ꞌsana ꞌmʋ.
13A-bʋ ꞌma-a nyunyuzɩgɩ a, ꞌɩn-ɩ ꞌpo-o amʋ ꞌꞌbɔgʋ -nɛɛ -jeyi, -ɛkedɩmaa, -da -Lagɔ ꞌka lɩ ꞌwee ti-ya -bɛnyɩ, Zezii -nɩꞌa ti see, a yibo nɔ-oꞌo.
A-bʋ ꞌma-a ꞌbhʋabhʋayreetɩ, ꞌɩn-ɩ ꞌzɩ -ɩ amʋ -bodɩ ꞌmʋ -lrɛɛ, -ɛkedɩmaa, a ꞌlu-o tʋ ꞌbho ꞌꞌnyinynidɩꞌa tiyayi *Sataan ꞌꞌkpi.
14ꞌAn dɩkmayreetɩ-a, a yiboꞌo-o -aꞌba -tɩta -Lagɔꞌɔ dɩ ꞌɩn-ɩ poꞌo amʋ ꞌꞌbɔgʋ -nɛɛ -jeyi.
A-bʋ ꞌma-a nyunyuzɩgɩ, ꞌɩn-ɩ ꞌzɩ -ɩ amʋ -bodɩ ꞌmʋ, -ɛkedɩmaa, -da -Lagɔ ꞌka lɩ ꞌwee ti-ya, Zezii -nɩꞌa ti see, a yibo nɔ-oꞌo.
A-bʋ ꞌma-a ꞌbhʋabhʋayreetɩ, ꞌɩn-ɩ ꞌpo-o amʋ ꞌꞌbɔgʋ -nɛɛ -jeyi -lrɛɛ, -ɛkedɩmaa, a ꞌbhle-e ꞌkpɩ ꞌmʋ ꞌbho -Lagɔjeyi. A -deꞌe-e ꞌle ꞌɔ wlu ꞌli ti ꞌle a ꞌye tʋ lu ꞌbho ꞌꞌnyinynidɩꞌa tiyayi Sataan ꞌꞌkpi.
15A -gblee, lɩ-ɩ -nɩꞌa ꞌnɔɔ ꞌkmʋ ꞌmʋ, -yɩꞌa ꞌbhɛɛꞌɛ -Lagɔꞌɔ ꞌnynɩ ꞌꞌyi a, aꞌba -kma ꞌya dɩ -le! -Bho nyɔ -kma ꞌya dɩ a, ɔ se -Lagɔꞌɔ dɩkmɛɛ ꞌmʋꞌbhle. 16Lɛꞌꞌo lɛ-ɛ -seꞌa-a -Lagɔꞌɔ ꞌgwlʋdɩ: ꞌꞌnyinyninaagɩꞌa ꞌtʋnʋlɩ o, nyɔꞌɔ lɛꞌɛ -pɔlʋꞌa ꞌꞌyicnɛɛɛ o, ꞌꞌjɛꞌɛ ꞌꞌyibhɛɛɛ o, ɩ-ɩ ꞌmo-o ꞌkmʋ ꞌmʋꞌa lɩ, ɩ -se -aꞌba -tɩta -Lagɔꞌɔ nɩ -ko. 17A -gblee, ꞌkmʋ -nɛɛ -nɩꞌe-e ꞌꞌyitibhitinamʋ. ꞌƐ lɩ-ɩ nʋꞌa nyʋ ꞌtʋ, -yɩꞌa nʋꞌa -Lagɔ ꞌtʋ a, ꞌka-a ɛ -ke ɩ-ɩ muꞌo -lrɛɛ. Ɛ -nɩꞌa -kaa ꞌmʋ a, nyɔ-ɔ nʋꞌa -Lagɔꞌɔ ꞌgwlʋdɩ a, ɔ-ɔ ꞌnɩ-e ti ꞌꞌkɔgwlɛka.
*-Lagɔꞌɔ ꞌBhozayi -ɔ ꞌpʋʋnꞌa nyʋꞌa ꞌꞌyidedeyi.
18ꞌAn dɩkmayreetɩ-a, -a -nɩꞌe ꞌtɔ-ɔ *-lebhɔɔnɔɔ ꞌli. ꞌLe a ꞌwɔnꞌɔ ꞌbɔ see -ka *-Lagɔꞌɔ ꞌBhozayi -ɔ ꞌpʋʋnꞌa nyʋꞌa ꞌꞌyidedeyi-i ꞌyeꞌa -yi mʋ. A -gblee, -nɔɔ -ke ꞌli -a -nɩꞌa ꞌtraamʋ a, ꞌwa -dadudu yi-oꞌo, ꞌle, -ka -lebhɔɔnɔɔ nyniꞌa a, -a yibo nɩꞌo. 19Ʋ-bʋ nyʋ ꞌmnʋ a, -a -ke ʋn bheteꞌe-e gbo -bɛnyɩ. ꞌTraamʋ ꞌtɔ ɔ, -a -ke ʋn se -pɔlʋ ꞌmʋ-plɛ. ꞌƐ dɩ ʋn ꞌwlʋꞌo -amʋ ꞌꞌyrili. -Bho -a -ke ʋn -plɛ ꞌkɩ -pɔlʋ ꞌmʋ, -a -ke ʋn-ʋ de ꞌko-o ti ꞌꞌkɔmʋ. ꞌƐ lɛtu -nʋ-ɛꞌo, ꞌle, -ka -a -ke ʋn seꞌa -pɔlʋ ꞌmʋ-plɛ ɛ, ꞌle nyʋ ꞌye ɩ yibo.
20ꞌBho a-bee -mnʋʋꞌa damʋ a, -Lagɔꞌɔ ꞌBhozayi -ɔ ꞌpʋʋnꞌa nyʋ ꞌꞌnyɩ-e amʋ *-Lagɔꞌɔ Lisaazuzu -lue -lue, ꞌle a -nɩ ꞌwee yiboꞌo -ziadɩ. 21Ɛ -se a se -ziadɩ yiboꞌa ꞌꞌlru ꞌꞌyi ꞌɩn-ɩ po amʋ wlu -jeyi ꞌnɩ -ko. A yibo nɩ-ɩꞌa dɩ ꞌɩn-ɩ zɩ ꞌɩ ꞌmʋ. ꞌƐ dɩ, -ka sɩn seꞌa ꞌbhɛɛ ɩ ꞌke ꞌle -ziadɩ ꞌmʋ ꞌwlʋ a, a yibo nɩꞌo.
22Yɔɔ moꞌo ꞌtɔ-ɔ sɩncɛyiꞌa? A -gblee, nyɔ-ɔ nʋꞌa Zezii -se -Lagɔꞌɔ ꞌBhozayi -ɔ ꞌpʋʋnꞌa nyʋ -ko a, ꞌɩnnɔ ꞌmo-o sɩnꞌa nyɔ. Ɔ-bɔ nyɔ ꞌmnɔ, ɔ-ɔ ꞌmo-o -Lagɔꞌɔ ꞌBhozayi -ɔ ꞌpʋʋnꞌa nyʋꞌa ꞌꞌyidedeyi, -ɛkedɩmaa, ɔ -see ꞌwɔn ɔ ꞌke -aꞌba -tɩta -Lagɔ -ke ꞌɔ ꞌꞌyu ꞌꞌgwlide. 23A ꞌye li-ɔ, nyɔ-ɔ nʋꞌa Zezii -se -Lagɔꞌɔ ꞌꞌyu -ko, ɔ -see ꞌɔ -tɩta -Lagɔ ꞌꞌgwlide -lrɛɛ, ꞌle ɔ -ke ɔ -see tikpʋkpʋn. Ɛ -nɩꞌa -kaa ꞌmʋ a, nyɔ-ɔ nʋꞌa ꞌbho nyʋꞌa ꞌꞌyigbeyi, Zezii ꞌmo-o -Lagɔꞌɔ ꞌꞌyu, ꞌɔ nyɔtu -ke -Lagɔ ꞌꞌsisriꞌe-e ꞌꞌyi.
24ꞌƐ kamʋ a, -da a -yi -nɩꞌa ꞌbho -Lagɔjeyi -lreeka, -Lagɔwlu a ꞌwɔnꞌɔ ꞌbɔ, a -de nɩ ꞌli ti! Ɩ-bɩ wlu ꞌmnɩ, -bho a -de nɩ ꞌli ti a, ꞌꞌlemnɩɩ a -ke -aꞌba -tɩta -Lagɔ -ke ꞌɔ ꞌꞌyu Zezii ꞌꞌsisriꞌe-e ꞌꞌyi. 25A -gblee, ꞌꞌkɔgwlɛtinɩɛzɛgɛ Zezii ꞌꞌduꞌo -amʋ wɔn ꞌmʋti.
26A ꞌye li-ɔ, nyʋ-ʋ nʋꞌa ʋn ꞌke amʋ dɩ ꞌꞌyriliꞌꞌmaa, ꞌwa kamʋ ꞌɩn-ɩ poꞌo amʋ dɩ -nɩɩꞌa ꞌꞌbɔgʋ -jeyi. 27A-bee -mnʋʋ a, *-Lagɔꞌɔ Lisaazuzu Zezii ꞌꞌnyɩꞌa amʋ, ɔ -nɩꞌe-e amʋ ꞌmʋ. -Lagɔwluꞌa -tɔyi -ɔ ꞌka amʋ -tɔ ɔ, ꞌɛ dɩ a se ꞌbhɛɛ a ꞌke ɔ ꞌmʋ ꞌpɛɛ tenyɩ. -Ɛkedɩmaa, ɔ-bɔ -Zuzu ꞌmnɔ-ɔ ꞌtɔ-ɔ amʋ lɩ ꞌwee, ꞌle ꞌɔ -tɔtɔlɩ ꞌmnɩ-ɩ ꞌmo-o -ziadɩ. Ɩ se sɩn ꞌmʋꞌbhle. ꞌKa-a ɛ -nɩꞌe ꞌmʋꞌa dɩ, a -ke Zezii ꞌꞌsisri ꞌꞌyi ꞌle a ꞌke -Lagɔꞌɔ Lisaazuzuꞌa -tɔtɔlɩ ꞌli ti-de!
28ꞌAn dɩkmayreetɩ-a, ꞌɩn-ɩ ꞌmu-o ꞌbho le -lrɛɛ, a -ke Zezii ꞌꞌsisri ꞌꞌyi, ꞌle, -bho ɔ yi le a, ꞌɔ -sɩanyɩ -ke ꞌɔ dɩn -kaa amʋ ꞌlbha! 29A -gblee, -ka -aꞌba -Kɔyi ꞌsrɛɛꞌɛ ꞌꞌyi, a yibo nɩ-oꞌo seeꞌa dɩ, a yiboꞌo -lrɛɛke na, nyɔꞌꞌo nyɔ-ɔ nʋꞌa ꞌꞌyisrɛɛdɩ ꞌbho -Lagɔꞌɔ ꞌꞌyigbeyi, ɔ-ɔ ꞌmo-o -Lagɔꞌɔ ꞌꞌyu.
3-A ꞌmo-o -Lagɔꞌɔ ꞌꞌyreetɩ
1-Ka -aꞌba -tɩta -Lagɔ -kmaꞌa -aꞌba dɩ tenyɩ, a ꞌye -kaa li-ɔ! Ɔ-ɔ ꞌla-a -amʋ ꞌɔ ꞌꞌyreetɩ. Kɩn, -ziadɩ moꞌo, ꞌɔ ꞌꞌyreetɩ -a ꞌꞌduꞌo -ziaka. -Ka -a ꞌꞌdu ꞌʋ a, nyʋ-ʋ -see ꞌɔ ꞌꞌgwlide, ʋn se ꞌbhɛɛ ʋn ꞌke ɩ ꞌmʋtiꞌwɔn, -ɛkedɩmaa, ʋn se ɔ yibo. 2ꞌAn dɩkmalotʋꞌa ꞌꞌnynuu-a, ꞌtraamʋ ꞌtɔ ɔ, -a ꞌmo-o ꞌɔ ꞌꞌyreetɩ. Ɛ -nɩꞌa -kaa ꞌmʋ a, lɛ -a ꞌka ꞌꞌdu ꞌwla, -a se ɛ -bhla yibo. Lɛ -a yiboꞌa, ꞌɛ ꞌꞌsɛ ꞌmo-o, -bho *Zezii *Kliisɩ -ka le-e yi ꞌle ꞌɔ ꞌnynɩꞌa ꞌꞌyibhɛɛɛ ꞌmʋ, -a -ke ɔ-ɔ ꞌye-e gʋgɔ -mʋ, -ɛkedɩmaa, -ka ɔ -nɩꞌa a, ꞌka-a -a ꞌye ɔ ꞌye mʋ ꞌꞌgɩɩ! 3ꞌƆ -glɩgbawɔnyiꞌa nyɔ-ɔ de ꞌɔ -kaa -pɔlʋ ꞌꞌyi a, ɔ-ɔ ꞌꞌdu-o ꞌɔ ꞌꞌbhuo ꞌꞌyrili, ꞌle, -ka ɔ-bɔ Zezii Kliisɩ ꞌsaaꞌa li, ɔ-ɔ nɩꞌe -kaa ꞌbho -Lagɔꞌɔ ꞌꞌyigbeyi.
4A -gblee, nyɔ-ɔ nʋꞌa ꞌꞌnyinynidɩ ꞌbho -Lagɔꞌɔ ꞌꞌyigbeyi, *-Lagɔꞌɔ gba ɔ-ɔ cɛꞌɛ ꞌmʋ. -Ɛkedɩmaa, ꞌꞌnyinynidɩꞌa nʋnʋa-a ꞌmo-o ꞌɔ gbaꞌa ꞌmʋcɛɛ. 5ꞌBho ꞌɛ lemʋ, a yiboꞌo-o -ka Zezii Kliisɩ yiꞌa ꞌnɔɔ ꞌkmʋ ꞌmʋ ꞌle ɔ ꞌke -amʋ zetie ꞌle -aꞌba ꞌꞌnyinynidɩ ꞌmʋ. A ꞌye li-ɔ, ɔ-bɔ Zezii ꞌmnɔꞌɔ ꞌꞌbhuo -see ꞌꞌnyinynidɩ -lue ꞌtɩn nʋ ꞌbho -Lagɔꞌɔ ꞌꞌyigbeyi. 6ꞌKa-a ɛ -nɩꞌe ꞌmʋꞌa dɩ, nyɔꞌꞌo nyɔ-ɔ -ke ɔ ꞌꞌsisriꞌa ꞌꞌyi, ɔ-ɔ ꞌbhɔꞌɔ ꞌꞌnyinynidɩꞌa nʋnʋdɩ. Ɛ -nɩꞌa -kaa ꞌmʋ a, nyɔ-ɔ mu ꞌnɩ ꞌꞌlru, ɔ se ɔ yibo ꞌle ɔ -see ꞌɔ ꞌꞌkpidɩ ꞌmʋtiꞌwɔn.
7ꞌAn dɩkmayreetɩ-a, aꞌba ꞌꞌtayi nyɔ ꞌꞌyiti, ꞌɔ ꞌꞌmaa amʋ dɩ ꞌꞌyrili -le! Nyɔ-ɔ nʋꞌa ꞌꞌyisrɛɛdɩ ꞌbho -Lagɔꞌɔ ꞌꞌyigbeyi, -ka Zezii Kliisɩ ꞌsrɛɛꞌɛ ꞌꞌyi, ꞌka-a ꞌɔ nyɔtu -nɩꞌo. 8Nyɔ-ɔ nʋꞌa ꞌꞌnyinynidɩ ꞌꞌcɩcɩ a, ɔ-ɔ ꞌmo-o ꞌꞌnyinynidɩꞌa tiyayiꞌa nyɔ, -ɛkedɩmaa, -da -Lagɔ -ya -nɩꞌa lɩ ꞌwee ti a, ꞌbho-o ɛ -zaꞌa ɩ-bɩ ꞌꞌnyinynidɩ ꞌmnɩꞌa nʋnʋa. A -gblee, ɛ-bɛ ꞌꞌnyinynidɩꞌa tiyayiꞌa kplisasʋɩ ꞌmnɩꞌa tizɛɛꞌɛ ꞌꞌlru ꞌꞌyi -Lagɔꞌɔ ꞌꞌyu Zezii yiꞌe ꞌnɔɔ ꞌkmʋ ꞌmʋ.
9A ꞌye li-ɔ, nyɔꞌꞌo nyɔ-ɔ ꞌma-a -Lagɔꞌɔ ꞌꞌyu, ɔ-ɔ ꞌbhɔ-ɔ ꞌꞌnyinynidɩꞌa nʋnʋdɩ, -ɛkedɩmaa, ɔ ꞌbhle-e ꞌɔ -tɩtaꞌa ꞌꞌyrilinmɔpɔlʋ ꞌli. ꞌƆ -tɩta moꞌo ꞌtɔ-ɔ -Lagɔꞌɔ dɩ, ɔ se ꞌbhɛɛ ɔ ꞌke ꞌꞌnyinynidɩ nʋ ꞌyrɛlɛɛ. 10Leelɛ nyɔ ꞌke -Lagɔꞌɔ ꞌꞌyreetɩ -ke ꞌꞌnyinynidɩꞌa tiyayiꞌa nʋ ꞌmʋyibo -nɩꞌa? A ꞌye li-ɔ, nyɔꞌꞌo nyɔ-ɔꞌɔ nʋꞌa ꞌꞌyisrɛɛdɩ ꞌbho -Lagɔꞌɔ ꞌꞌyigbeyi, ꞌle ꞌꞌbhalrɛɛke nyɔ-ɔ seꞌa ꞌɔ -bonyunyɔꞌɔ dɩ -kma, ɔ -se -Lagɔꞌɔ ꞌꞌyu -ko. ꞌꞌNyinynidɩꞌa tiyayiꞌa -nɔ ɔ ꞌꞌduꞌo.
11ꞌAn dɩkmalotʋꞌa ꞌꞌnynuu-a, -da a -yi -nɩꞌa ꞌbho -Lagɔjeyi -lreeka, -ɛ ꞌwlʋꞌa ꞌbho, -ɛ bhlaꞌa -zɩan ꞌꞌkpi a, a ꞌwɔn-ɔ wlu -lue ꞌbɔ. Ɛ-bɛ wlu ꞌmnɛ, ꞌɩnnɛ ꞌmo-o, -a kɩkma -kɩkma dɩ! 12*Kayinɩ -nɩꞌa ti -bɛnyɩ, -aꞌba -nɩ ꞌɔ ka -le! Ɔ-bɔ Kayinɩ ꞌmnɔ, ɔ-ɔ ꞌmo-o ꞌꞌnyinynidɩꞌa tiyayi *Sataanꞌa nyɔ ꞌle ɔ ꞌye ꞌɔ ꞌꞌbhuoꞌa ꞌbɩtbhaleyi ꞌlbha, ɔ ꞌye ꞌmɛ. Lɛ-ɛ -ke ꞌꞌlru ꞌꞌyi ɔ ꞌlbhɔ ꞌɔ ɔ, a yibo nɛ ꞌnɩ? A -gblee, kpli ɔ-ɔ nʋꞌa a, ɩ se ꞌꞌyiꞌsrɛɛ ꞌbho -Lagɔꞌɔ ꞌꞌyigbeyi. Ɛ -nɩꞌa -kaa ꞌmʋ a, -yɩ ꞌma-a ꞌɔ leyiꞌa -nɩ, ɩ-ɩ ꞌmo-o -Lagɔꞌɔ ꞌgwlʋdɩ.
ꞌLe kplizɩgɩ ꞌmʋ nyɔ-ɔ yibo nɩꞌe nyɔꞌɔ dɩkmɛɛ
13ꞌAn dɩkmalotʋꞌa ꞌꞌnynuu-a, *Kayinɩ seꞌa -Lagɔ yibo, nyʋ-ʋ -nɩꞌa ꞌɔ ka, -bho ʋn ꞌnyɛ amʋ ꞌmʋ a, -tɔɔꞌɔ ꞌꞌmaa -amʋ -le! 14-Ka -a -seeꞌa ꞌtɔ ꞌmɛ ꞌle -a -nɩꞌa ti ꞌbho -Lagɔꞌɔ ꞌꞌyigbeyi, -a yibo nɩ-oꞌo, -ɛkedɩmaa, -a -kmaꞌa-a -aꞌba -bonyunyuꞌa dɩ. Nyɔ-ɔ seꞌa ꞌɔ -bonyunyɔꞌɔ dɩkmɛɛ ꞌmʋꞌbhle, ꞌɔ nyɔtu ꞌbhle-e ꞌmɛmɛɛ ꞌꞌkpi ꞌbho -Lagɔꞌɔ ꞌꞌyigbeyi. 15Nyɔ-ɔ ꞌnyɛꞌɛ ꞌɔ -bonyunyɔ ꞌmʋ a, ɔ-ɔ ꞌmo-o ꞌꞌkulbhayi. ꞌLe, nyɔꞌꞌo nyɔ-ɔ ꞌma-a ꞌꞌkulbhayi, -ka ɔ -seeꞌa ꞌꞌkɔgwlɛtinɩɛzɛgɛ ꞌye, aꞌba ꞌꞌbhi yibo nɩꞌo. 16A -gblee, *Zezii *Kliisɩ -kmaꞌa-a -aꞌba dɩ. ꞌƐ kamʋ ɔ yiꞌe ꞌnɔɔ ꞌkmʋ ꞌmʋ ꞌle ɔ ꞌye ꞌmɛ ꞌbho -aꞌba ꞌbɩ ꞌmʋ. Ɩ-bɩ dɩ ꞌmnɩ, -bho -a ꞌwɩn ɩ ꞌmʋti, ꞌꞌlemnɩɩ -a yiboꞌo-o lɛ-ɛ ꞌma-a nyɔꞌɔ dɩkmɛɛ. -Ka ɔ -kmaꞌa -aꞌba dɩ, -ka -lue ꞌmnɔ, -a -kma -kaa -aꞌba -bonyunyuꞌa dɩ! 17A ꞌye li-ɔ, -bho nyɔ -lue ꞌbhle lɩꞌa -dadudu, ꞌle ꞌꞌpʋan ꞌke ꞌɔ -bonyunyɔ -lrɔɔ ꞌlbhanamʋ -nɩ, ꞌle ɔ ꞌke ɩ yibo, -bho ꞌɔ ngaze -see ɔ ꞌlbha ꞌle ɔ ꞌke ɔ -kpa, ɔ ꞌbhɛɛꞌo ɔ ꞌke na, ɔ -kmaꞌa-a -Lagɔꞌɔ dɩ, nʋꞌa? 18ꞌAn dɩkmayreetɩ-a, -aꞌba nʋ wɔnmʋwluꞌa ꞌꞌsɛ, -aꞌba -kma -aꞌba -bonyunyuꞌa dɩ -le! -A -kma ꞌwa dɩ -ka -zɛgɛka ꞌle -a ꞌke ꞌya kpli -tɔ!
-Ka nyɔꞌɔ -pɔlʋ ꞌka tiꞌwla ꞌbho -Lagɔꞌɔ ꞌꞌyigbeyi
19-20-Bho -a nʋ -kaa a, -Lagɔ ꞌma-a -ziadɩ, -ka ɔ -kɔꞌɔ -amʋ, -a yibo nɩ-oꞌo, ꞌle -aꞌba -pɔlʋ-ʋ ꞌwlaꞌa ti ꞌbho ꞌɔ ꞌꞌyigbeyi. -Bho -aꞌba -pɔlʋ ꞌmnɛ -ka -amʋ dɩ ꞌꞌyi-ikpa a, lɛ -a ꞌka ꞌꞌgwlide ꞌle ɛ ꞌka ti-de, ꞌɩnnɛ ꞌmo-o, -Lagɔ ꞌbhɛ-ɛ ꞌꞌyi, ɔ -ziꞌe-e -aꞌba -pɔlʋ ꞌmnɛ ꞌle ɔ yiboꞌo lɩ ꞌwee. 21ꞌAn dɩkmalotʋꞌa ꞌꞌnynuu-a, -bho -aꞌba -pɔlʋ ꞌsrɛɛ ꞌꞌyi ꞌbho -Lagɔꞌɔ ꞌꞌyigbeyi, -bho ɛ -see -amʋ dɩ ꞌꞌyikpa a, ꞌꞌlemnɩɩ dɩn -see -amʋ ꞌlbha yi ꞌbho ꞌɔ ꞌꞌyigbeyi. 22A -gblee, -bho -aꞌba -pɔlʋ -nɩ -kaa a, lɛꞌꞌo lɛ-ɛ -a ꞌybhaa ꞌnɔ ɔ, ɔ-ɔ ꞌꞌnyɩ ꞌɛ -amʋ-ɛ, -ɛkedɩmaa, -a ꞌꞌdu-o ꞌbho ꞌɔ wlu ꞌle -a nʋꞌo ꞌɔ ꞌgwlʋdɩ. 23Lɛ ɔ ꞌbɔꞌɔ ti, -a ꞌke nʋ, a yibo nɛ ꞌnɩ? Ɔ na: -A de ꞌɔ ꞌꞌyu *Zezii *Kliisɩ ꞌꞌgwli, ꞌle, -ka ɔ ꞌlɛꞌɛ -amʋ ꞌꞌyi, -a ꞌke -kaa dɩ kɩkma! 24-A-bʋ ꞌꞌduꞌa ꞌbho -Lagɔꞌɔ wlu a, -a -ke ɔ ꞌꞌsisriꞌe-e ꞌꞌyi, ꞌle, -ka ɔ -nɩꞌa -amʋ ꞌmʋ, -a yibo nɩ-oꞌo, -ɛkedɩmaa, *ꞌɔ Lisaazuzu ɔ ꞌꞌnyɩꞌa -amʋ, ꞌɩnnɔ tɔ ꞌnɩ -amʋ.
4*-Lagɔꞌɔ Lisaazuzu -ke *-Lagɔꞌɔ ꞌBhozayi -ɔ ꞌpʋʋnꞌa nyʋꞌa ꞌꞌyidedeyiꞌa -zuzu
1ꞌAn dɩkmalotʋꞌa ꞌꞌnynuu-a, nyʋ-ʋ -seꞌa-a -Lagɔꞌɔ wluꞌa ꞌmʋtizamʋzɩgɩ, ʋn bʋbaꞌa-a ꞌnɔɔ ꞌbhlɩkpɩ ꞌꞌkpi ti. ꞌƐ dɩ, nyʋ-ʋ nʋꞌa ʋn ꞌbhle-e *-Lagɔꞌɔ Lisaazuzu ꞌmʋ, aꞌba de ʋ ꞌꞌgwli -le! A ꞌcrʋ ʋ ꞌmʋti -antanyɩ, ꞌle, -bho ɛ ꞌꞌdu -Lagɔꞌɔ Lisaazuzu -ziaka ꞌle a ꞌke ɩ yibo. 2-Bho ɛ ꞌꞌdu -Lagɔꞌɔ Lisaazuzu, -ka a ꞌkɩ ɩ yibo, ꞌkla-a ꞌka-a: ꞌBho nyʋ ꞌweeꞌa ꞌꞌyigbeyi, nyɔꞌꞌo nyɔ-ɔ nʋꞌa *Zezii ꞌmo-o *-Lagɔꞌɔ ꞌBhozayi -ɔ ꞌpʋʋnꞌa nyʋ, ꞌle ɔ ꞌka ꞌnɔɔ ꞌkmʋ ꞌmʋ yi, nyunyɔku ɔ ꞌꞌluoꞌo ꞌmʋ a, ɔ-bɔ nyɔ ꞌmnɔ ꞌbhle-e -Lagɔꞌɔ Lisaazuzu ꞌmʋ. 3Ɛ -nɩꞌa -kaa ꞌmʋ a, ɩ-bɩ Zeziiꞌa dɩ ꞌmnɩ, nyɔꞌꞌo nyɔ-ɔ -see ꞌɩ -ziadɩ ꞌla, ɔ se -Lagɔꞌɔ Lisaazuzu ꞌmʋꞌbhle. -Lagɔꞌɔ ꞌBhozayi -ɔ ꞌpʋʋnꞌa nyʋꞌa ꞌꞌyidedeyi -ke ꞌnynɩ a ꞌwɔnꞌɔ ꞌbɔ, -ɔ ꞌka ꞌnɔɔ ꞌkmʋ ꞌmʋ yi, ɔbɔ ꞌmnɔ, ꞌɔ -zuzu ɔ ꞌbhleꞌe ꞌmʋ, ꞌle ɛ-bɛ -zuzu ꞌmnɛ -nɩꞌe lbhʋ -nʋnamʋ see ꞌnɔɔ ꞌkmʋ ꞌmʋ.
4A-bee -mnʋʋ a, ꞌan dɩkmayreetɩ-a, -Lagɔꞌɔ nyʋ a ꞌꞌduꞌo. Ʋ-bʋ nyʋ ꞌmnʋ, -ʋ -seꞌa-a ꞌɔ wluꞌa ꞌmʋtizamʋzɩgɩ, ꞌle a ꞌye ʋ tʋ wɔn ꞌmʋ lu, -ɛkedɩmaa, -Lagɔꞌɔ Lisaazuzu a ꞌbhleꞌa ꞌmʋ a, ɔ ꞌku-o wɔn, ꞌle, -Lagɔꞌɔ ꞌBhozayi -ɔ ꞌpʋʋnꞌa nyʋꞌa ꞌꞌyidedeyiꞌa -nɛ ʋn ꞌbhleꞌa ꞌmʋ, ɔ ꞌye ɛ -zi. 5Ʋ-bʋ nyʋ ꞌmnʋ, ʋn se -Lagɔ yibo. ꞌƐ kamʋ, dɩ-ɩꞌa ꞌbhɛɛꞌɛ ꞌɔ ꞌnynɩ ꞌꞌyi, ʋn-ʋ zɩ ꞌɩ ꞌmʋ ꞌle ꞌꞌnyinynidɩꞌa nʋmʋ -lrʋʋ-ʋ poꞌo ꞌwa wlu -lokui ꞌle ʋn-ʋ ꞌꞌdu ꞌɩ ꞌbho. 6-A-bʋ -yʋʋ, -a ꞌmo-o -Lagɔꞌɔ ꞌꞌyreetɩ. Nyɔ-ɔ yibo ꞌnɔ ɔ, ɔ-ɔ ꞌpo-o -amʋ -lokui ꞌle ɔ-ɔ ꞌꞌduꞌo ꞌbho -aꞌba wlu. Nyɔ-ɔ se ꞌɔ yibo a, ꞌɔ ꞌꞌdu ꞌbho -aꞌba wlu. A -gblee, -Lagɔꞌɔ Lisaazuzu poꞌa nyʋ -jolʋzɛgɛ gbo-e, -Lagɔꞌɔ ꞌBhozayi -ɔ ꞌpʋʋnꞌa nyʋꞌa ꞌꞌyidedeyiꞌa -nɔ ꞌꞌmaaꞌa nyʋ -ziadɩ ꞌꞌyrili-e, -ka a ꞌkʋ ʋ ꞌmʋyibo ꞌle a ꞌka ꞌwa -gbɩɩ lizɩza a, ꞌkla-a ꞌka-a!
-Lagɔ ꞌbhleꞌe dɩkɩkmɛɛꞌɛ ꞌꞌlru kwa.
7-8ꞌAn dɩkmalotʋꞌa ꞌꞌnynuu-a, -a kɩkma -kɩkma dɩ, -ɛkedɩmaa, ꞌle -Lagɔ ꞌmʋ, ꞌle-e dɩkɩkmɛɛ-ɛ ꞌwlʋꞌo! ꞌƖnnɔ ꞌbhleꞌe dɩkɩkmɛɛꞌɛ ꞌꞌlru kwa. Nyɔ-ɔ -kmaꞌa ɔ -bonyunyɔꞌɔ dɩ, ɔ-ɔ ꞌmo-o -Lagɔꞌɔ ꞌꞌyu ꞌle ɔ yibo nɔꞌo. Nyɔ-ɔ se ꞌɔ -bonyunyɔꞌɔ dɩ -kma a, ꞌɔ nyɔtu se -Lagɔ yibo. 9-Ka ɔ -kmaꞌa -aꞌba dɩ, a -gbʋ -kaa ya! *Zezii *Kliisɩ ꞌma-a ꞌɔ ꞌꞌyuꞌa ꞌdɛ -lue, ꞌɩnnɔ ɔ -yaꞌa ꞌnɔɔ ꞌkmʋ ꞌmʋ ꞌle ꞌɔ dɩ -a ꞌke ꞌꞌkɔgwlɛtinɩɛzɛgɛ ꞌye. 10A -gblee, nyɔꞌɔ dɩkmɛɛ ꞌka-a: -Lagɔ -kmaꞌa -aꞌba dɩ -antanyɩ. Ɔ -yaꞌa-a ꞌnɔɔ ꞌkmʋ ꞌmʋ ꞌɔ ꞌꞌyuꞌa ꞌdɛ -lue, ꞌle ɔ ꞌye ꞌmɛ -aꞌba ꞌꞌnyinynidɩꞌa dɩ, ꞌle, ꞌya -belu ꞌke ꞌka -amʋ bhla, ɛ ꞌye ɔ ꞌꞌkpi tiꞌga ꞌbho -aꞌba ꞌbɩ ꞌmʋ. ꞌƆ nymɔ ꞌwla-a ti, ꞌle, -aꞌba *ꞌsraga ɔ -zaꞌa -kaa ꞌbho -Lagɔꞌɔ ꞌꞌyigbeyi, ɛ ꞌye -amʋ zetie ꞌle -aꞌba ꞌꞌnyinynidɩ ꞌmnɩ ꞌmʋ. A ꞌye li-ɔ, ɛ -se -a-bʋ -kma -Lagɔꞌɔ dɩ -antanyɩ ꞌnɩ -ko.
11ꞌAn dɩkmalotʋꞌa ꞌꞌnynuu-a, ꞌka-a -Lagɔ -kmaꞌa -aꞌba dɩꞌa dɩ, -abʋ kɩkma -kɩkma dɩ -lrɛɛ! 12Nyɔ-ɔ ꞌka -Lagɔ ꞌye, ɔ se -nɩ. -Bho -a kɩkma -kɩkma dɩ, ꞌꞌlemnɩɩ -a -ke ɔ ꞌꞌsisriꞌe-e ꞌꞌyi, ꞌle, ꞌɔ nyunyɔꞌɔ dɩkmɛɛ-ɛ -nɩꞌa -amʋ ꞌmʋ, ɛ-ɛ ꞌwlʋꞌo ꞌꞌyiglu -ka -zɛgɛka.
13Ɔ ꞌꞌnyɩ-e -amʋ ꞌɔ Lisaazuzuꞌa dɩ, -a yiboꞌo -ka -a -ke ɔ ꞌꞌsisriꞌa ꞌꞌyi. 14-Da ꞌɔ ꞌꞌyu Zezii -nɩꞌa ꞌnɔɔ -aꞌba ꞌꞌklumʋ, -a-bʋ ꞌma-a *ꞌɔ -dalbhomʋ, -a ꞌye -ɔ li ꞌle -a deꞌe ꞌꞌgwli -ka -aꞌba -tɩta -Lagɔ ꞌmnɔ lbho ꞌɔ ꞌnɔɔ ꞌkmʋ ꞌmʋ ꞌle ɔ ꞌke *nyʋꞌa ꞌpʋʋnyi ꞌꞌdu. Ɩ-bɩ dɩ ꞌmnɩ, -a ꞌzɩ -ɩ nyʋ -bodɩ ꞌmʋ gbaa, -ɛkedɩmaa, ɩ-ɩ ꞌmo-o -ziadɩ. 15ꞌBho nyʋꞌa ꞌꞌyigbeyi, nyɔ-ɔ waꞌa wɔnti, -ɔ nʋꞌa Zezii ꞌmo-o -Lagɔꞌɔ ꞌꞌyu, ɔ -ke -Lagɔ ꞌꞌsisriꞌe-e ꞌꞌyi. 16-A-bʋ Zeziiꞌa nyʋ, -ka -Lagɔ -kmaꞌa -aꞌba dɩ, -a yibo nɩ-oꞌo, -a ꞌye ɩ ꞌwɔɔn ꞌle -a ꞌye ɩ ꞌli ti-de. -Lagɔ ꞌbhleꞌe dɩkɩkmɛɛꞌɛ ꞌꞌlru kwa. Nyɔ-ɔ -deꞌa ꞌle ɔ -bonyunyɔꞌɔ dɩkmɛɛ ꞌmʋ ti a, ɔ -ke -Lagɔ ꞌꞌsisriꞌe-e ꞌꞌyi. 17Dɩkɩkmɛɛ-ɛ -nɩꞌa -amʋ ꞌmʋ, -bho ɛ -se -sɛ ꞌle ɛ ꞌke ꞌꞌyi-die tenyɩ ꞌle ɛ ꞌke ꞌꞌyiglu ꞌwlʋ -ka -zɛgɛka, -ka -Lagɔꞌɔ -zigle -seeꞌa -amʋ -kpʋn yi, ꞌꞌlemnɩɩ -a ꞌde -ɩ ꞌꞌgwli, -ɛkedɩmaa, -aꞌba tinɩɛ -ke Zezii Kliisɩꞌa nɛ gʋgɔꞌɔ-ɔ ꞌꞌyiti ꞌnɔɔ ꞌkmʋ ꞌmʋ. 18Nyɔ-ɔ -kmaꞌa ɔ -bonyunyɔ -ke -Lagɔꞌɔ dɩ, -Lagɔꞌɔ -zigleꞌa -sɩanyɩꞌa ꞌlbhɔ ɔ. -Bho ꞌwa dɩkmɛɛ -die nyɔ ꞌmʋ ꞌꞌyi a, lɛꞌɛ nymɔꞌɔ ꞌꞌsi ɔ ꞌgwlʋ. -Bho ɛ se ɔ ꞌmʋ ꞌꞌyi-die a, ɔ-ɔ ꞌbhle-e -sɩanyɩ kuku ꞌzɔti, -ɛkedɩmaa, ɛ-bɛ -sɩanyɩ ꞌmnɛ ꞌbhle-e -Lagɔꞌɔ nyɔꞌɔ ꞌkleyeɛɛꞌɛ -sɩanyɩ kli.
19-A-bʋ -yʋʋ, -Lagɔ -kmaꞌa -aꞌba dɩ -antanyɩꞌa dɩ -a -kmaꞌa ɔ -ke nyʋ -lrʋʋꞌa dɩ. 20A -gblee, -bho nyɔ nʋ ɔ -kmaꞌa-a -Lagɔꞌɔ dɩ ꞌle ɔ ꞌke ɔ -Bozeziiꞌa nyɔ ꞌmʋꞌnyɛ ɛ, ɔ-ɔ ꞌmo-o sɩnbhleyi. A ꞌye li-ɔ, ɔ -Bozeziiꞌa nyɔ ɔ-ɔ ꞌyeꞌa li, -bho ɔ se ꞌɔ dɩ -kma, -Lagɔ ꞌɔ ꞌyeꞌa li, ɔ ꞌbhɛɛ ɔ ꞌke ꞌɔ dɩ -kma ꞌnɩ? -Gba! 21ꞌBho ꞌɛ lemʋ, -Lagɔꞌɔ ꞌꞌbhuo na, nyɔ-ɔ -kmaꞌa ꞌɔ dɩ, ɔ -kma ɔ -bonyunyɔꞌɔ dɩ -lrɛɛ!
5-A ꞌlu-o *Sataan -ke ꞌɔ nyʋ tʋ wɔn ꞌmʋ
1Nyɔꞌꞌo nyɔ-ɔ deꞌa ꞌꞌgwli na *Zezii ꞌmo-o *-Lagɔꞌɔ ꞌBhozayi -ɔ ꞌpʋʋnꞌa nyʋ a, ɔ-ɔ ꞌmo-o -Lagɔꞌɔ ꞌꞌyu. ꞌLe, nyɔ-ɔ -kmaꞌa -Lagɔꞌɔ dɩ a, ɔ -kmaꞌa ꞌɔ ꞌꞌyreetɩꞌa dɩ -lrɛɛ. 2A -gblee, -bho -a -kma -Lagɔꞌɔ dɩ ꞌle -a ꞌke ꞌɔ wlu -lokuipo, -a ꞌke ɩ ꞌbho ꞌꞌdu a, -mnɩɩ -a yiboꞌo -ka -a -kmaꞌa ꞌɔ ꞌꞌyreetɩ -lrʋʋꞌa dɩ. 3A yibo -Lagɔꞌɔ dɩꞌa -kmakmaa ꞌnɩ? Nyɔ-ɔ ꞌꞌduꞌa ꞌbho ꞌɔ wlu, ꞌɩnnɔ -kmaꞌa ꞌɔ dɩ. ꞌBho -amʋ -bodɩ, ꞌɔ wluꞌa ꞌbhoduɛɛ se ꞌꞌyi-kmu, 4-ɛkedɩmaa, nyɔꞌꞌo nyɔ-ɔ ꞌma-a ꞌɔ ꞌꞌyu, nyʋ-ʋ -seꞌa-a ꞌɔ -nʋ, ɔ-ɔ ꞌlu-o, ʋn -ke ꞌwa -kɔyi, *Sataan, tʋ wɔn ꞌmʋ. A -gblee, ꞌle -aꞌba Zeziiꞌa ꞌꞌgwlidɛɛ ꞌmʋ -a lu nɩꞌe tʋ. 5Ʋ-bʋ nyʋ ꞌmnʋ ꞌle, yɔɔ lu ꞌʋ tʋ wɔn ꞌmʋꞌa? A -gblee, nyɔ-ɔ deꞌa ꞌꞌgwli na Zezii ꞌmo-o -Lagɔꞌɔ ꞌꞌyu a, ꞌɩnnɔ nʋ ɛꞌo.
*Zeziiꞌa ꞌꞌkpidɩꞌa ꞌmʋzɛɛ
6A -gblee, *Zezii *Kliisɩ ꞌmo-o nyɔ -yɔ yiꞌa ꞌnɔɔ ꞌkmʋ ꞌmʋ. Ɔ yiꞌa a, ʋn *batizee -nɩ ꞌnɔ-ɔ ꞌle ꞌꞌnukɔ, ꞌle, ɔ ꞌka ꞌmɛ, ꞌɔ nymɔ ꞌye tiꞌwla. Ʋn batizee -nɩ ꞌnɔ ꞌꞌnukɔ, ɛ -see ꞌbho ꞌꞌtii, ꞌɔ nymɔ ꞌwla-a ti -lrɛɛ. ꞌLe, *-Lagɔꞌɔ Lisaazuzu ꞌma-a -ziadɩꞌa ꞌmʋzayi, ɔ na ɩ -se sɩn -ko. 7-8A ꞌye li-ɔ, -Lagɔꞌɔ Lisaazuzu-e, ꞌɔ batizeeni -ke ꞌɔ nymɔ-ɔ ꞌwlaꞌa ti, ꞌɩnnɩ -tɔꞌɔ nyʋ -ka ɔ ꞌꞌduꞌa -Lagɔꞌɔ ꞌꞌyu. Ɩ-bɩ lɩꞌa ꞌdigbi tan ꞌmnɩ, lɛ -lue ɩ-ɩ zaꞌa ꞌzɔ. 9Lɩ -ke -da nyʋ ꞌyeꞌa, -bho ʋn -za ꞌya ꞌꞌkpidɩ ꞌmʋ, a-a ꞌlɩ -ɩ -ziadɩ, ꞌle -Lagɔꞌɔ ꞌmʋzadɩ ꞌbhle-e ꞌnynɩ, ɛ ꞌye nyunyuꞌa nɛ -zi, ꞌle ɩ-bɩ dɩ ꞌmnɩ, -Lagɔꞌɔ ꞌꞌbhuo-o -zɩ ꞌɩ ꞌmʋ ꞌbho ꞌɔ ꞌꞌyu ꞌꞌkpi.
10Nyɔ-ɔ deꞌa ꞌɔ ꞌꞌyu ꞌmnɔ ꞌꞌgwli, ꞌɛ dɩ ꞌɔ ꞌmʋzadɩ ꞌmnɩ -nɩꞌe -ɩnmʋ ꞌmʋ. Ɛ -nɩꞌa -kaa ꞌmʋ a, nyɔ-ɔ seꞌa -Lagɔ ꞌꞌgwlide, ɔ-ɔ ꞌꞌluo-o -Lagɔ ꞌmʋ -ka sɩncɛyi. -Ɛkedɩmaa, dɩ ɔ -zaꞌa ꞌmʋ ꞌbho ꞌɔ ꞌꞌyu ꞌꞌkpi, ꞌɔ nyɔtu -see ɩ -ziadɩ ꞌla. 11Ɩ-bɩ ꞌɔ ꞌmʋzadɩ ꞌmnɩ, ꞌɩnnɩ ꞌka-a: Ɔ ꞌꞌnyɩ-e -amʋ ꞌꞌkɔgwlɛtinɩɛzɛgɛ. ꞌLe, ɛ-bɛ tinɩɛ ꞌmnɛ ɛ, ꞌɔ ꞌꞌyu-u ꞌbhleꞌe ꞌɛ ꞌꞌlru kwa. 12Ɛ-bɛ ꞌꞌkɔgwlɛtinɩɛzɛgɛ ꞌmnɛ, nyɔ-ɔ -ke ꞌɔ ꞌꞌyu ꞌmnɔ ꞌꞌsisriꞌa ꞌꞌyi, ɔ-ɔ ꞌye -ɛꞌo. Nyɔ -yɔ -ke ɔ seꞌa tikpʋkpʋn, ɔ-ɔ bɔ ꞌnɛ ꞌmʋ-ɛ.
ꞌꞌKɔgwlɛtinɩɛzɛgɛ
13A-bʋ deꞌa -Lagɔꞌɔ ꞌꞌyu, *Zezii, ꞌꞌgwli, ꞌɩn-ɩ ꞌpo-o amʋ ꞌꞌbɔgʋ -nɛɛ -jeyi, ꞌle, -ka a ꞌyeꞌa ꞌꞌkɔgwlɛtinɩɛzɛgɛ, a ꞌke ɩ yibo. 14-Bho -a -ka -Lagɔꞌɔ ꞌgwlʋdɩ-ɩ nʋ, ꞌle -a ꞌke ɔ lɛ ꞌybhaa, -a ꞌde-e ꞌꞌgwli na ɔ ꞌkpʋn-o -aꞌba bhadewlu. ꞌƐ dɩ, -bho -a -nɩꞌe ꞌbho ꞌɔ ꞌꞌyigbeyi, ꞌle -sɩanyɩꞌa ꞌlbhaꞌa -amʋ. 15-Bho -a ꞌybhaa nɔ lɛ, -a de ꞌtɔ-ɔ ꞌꞌgwli na ɔ ꞌkpʋn-o -aꞌba bhadewluꞌa dɩ, -a deꞌe ꞌꞌgwli -lrɛɛke na ɔ-ɔ ꞌꞌnyɩ ꞌɛ -amʋ-ɛ.
16A -gblee, ꞌꞌnyinynidɩ -ke ꞌꞌlru ꞌꞌyi nyɔ -seeꞌa ꞌmɛ yi katii ꞌbho -Lagɔꞌɔ ꞌꞌyigbeyi, -bho a ꞌye a -Bozeziiꞌa nyɔ li, -bho ɔ -kɩ ɩ-ɩ nʋ a, a po *-Lagɔ wɔn gbo ꞌle ɔ ꞌke ꞌya dɩ ꞌbhɔ, ɔ ꞌke ɔ ꞌbho ꞌɔ ꞌꞌkɔgwlɛtinɩɛzɛgɛꞌɛ -jeyi le -ya! ꞌꞌNyinynidɩ -ke ꞌꞌlru ꞌꞌyi nyɔ -seeꞌa ꞌmɛ yi katii ꞌbho ꞌɔ ꞌꞌyigbeyi, nyʋ-ʋ nʋ ꞌɩ a, ꞌwa ꞌꞌsɛ ꞌɩn ꞌꞌsiꞌe ꞌnynɩ. A -gblee, ꞌꞌnyinynidɩ -lue-e -nɩꞌe ꞌbho: ꞌɛ dɩ nyɔ-ɔ ꞌye ꞌmɛ mʋ katii ꞌbho ꞌɔ ꞌꞌyigbeyi. -Bho ɛ ꞌꞌdu ɛ-bɛ ꞌꞌnyinynidɩ ꞌmnɛ, aꞌba po ɔ wɔn gbo -le ꞌɔ nyɔtuꞌa dɩ! 17Lɛꞌꞌo lɛ-ɛ seꞌa ꞌꞌyiꞌsrɛɛ ꞌbho ꞌɔ ꞌꞌyigbeyi, ɛ-ɛ ꞌmo-o ꞌꞌnyinynidɩ. Ɛ -nɩꞌa -kaa ꞌmʋ a, ꞌꞌnyinynidɩ -lrɩɩ-ɩ -nɩꞌe ꞌbho, ꞌya dɩ nyɔ -see ꞌmɛ yi katii ꞌbho ꞌɔ ꞌꞌyigbeyi.
18Nyɔ-ɔ ꞌma-a ꞌɔ -nɔ ɔ, -a ꞌde-e ꞌꞌgwli na ɔ-ɔ ꞌbhɔ-ɔ ꞌꞌnyinynidɩꞌa nʋnʋdɩ, -ɛkedɩmaa, ꞌɔ ꞌꞌyu Zezii-i ꞌꞌdu -ɔ ꞌꞌyrili ꞌle ꞌꞌnyinynidɩꞌa tiyayi se ɔ wɔnyiꞌbhɛɛ.
19-Abʋ ꞌde-e ꞌꞌgwli na -Lagɔꞌɔ ꞌꞌyreetɩ -a ꞌꞌduꞌo, ꞌle nyʋ -lrʋʋ -nɩꞌe ꞌꞌnyinynidɩꞌa tiyayiꞌa -kpɛɛ wɔn ꞌmʋ.
20-A yiboꞌo-o -lrɛɛke na -Lagɔꞌɔ ꞌꞌyu Zezii *Kliisɩ ꞌyi-e ꞌnɔɔ ꞌkmʋ ꞌmʋ ꞌle ɔ ꞌye -amʋ -naagɩ ꞌꞌnyɩ -a ꞌke -Lagɔzɛgɛ yibo. -A -ke -Lagɔzɛgɛ ꞌmnɔꞌɔ ꞌꞌbhuo ꞌꞌsisriꞌe-e ꞌꞌyi ꞌle -a -ke ꞌɔ ꞌꞌyu, Zezii, kpʋkpʋnꞌo ti -lrɛɛ, -ɛkedɩmaa, Zezii-i ꞌmo-o -Lagɔzɛgɛ ꞌle ɔ ꞌbhleꞌe ꞌꞌkɔgwlɛtinɩɛzɛgɛꞌɛ ꞌꞌlru kwa.
21A -gblee, ꞌan dɩkmayreetɩ-a, lɛꞌꞌo lɛ-ɛ ꞌka -Lagɔꞌɔ ꞌbɩ ꞌmʋꞌꞌluo ꞌle aꞌba -pɔlʋ ꞌzɔ, a ꞌꞌdu aꞌba ꞌꞌbhi ꞌꞌyrili ꞌɛ dɩ!