2 Timoti

Nzryr-krbz Pol Krali Mz Timoti

Natq Ngr Nzaplxtqngr Mz Nzryr-krbz Pol Krali Mz Timoti

Mc natq ngr nzaplxtqngr mz nzryr-krbz Pol ayrnrngr mz Timoti.

Pol yrle letz krali lc mz mzlir yiz 65—67 AD, mzli kc tqmncpx-ngr-mople mz presin mz nzwrde krali, tqaenzli-ngrde nznibq-krdr nide. Kztedeng amrlx nzrlaszpxlr nide, a’ ngi txpwz Luk kc tzmncng badr. Yrle letz lc x sc tzbz ate.

Mz letz lc, Pol pibzle mz Timoti da kcng naokatrlr nide mz nzwztr-krbzle mz Gct. X rngidrlvz-ngrbzle bade mz nztu-amqngi-krde mz nzrlxngiti-krde x nzwz-krde kxmule-esz’ da kx prtz. Rpi-kzpzle bade kx, “Sutitx-zlwzbz drtwrnge kx navz-kaipe’ x mzli r nenq kzprla kc ate.” Murde krlzle kx ycpe pipz nzbz-krde.

¹ Nim la Timoti. Ninge Pol, aposol ne Mevalu Jiszs. X mcpx Gct ninge mz nzyapwxtipx-krnge nzlungr kxboi kc tqesalz-ngrbzle mz leplz kcng tzlxngitilr Mevalu Jiszs.

² Timoti, apubo bam trtem angidr. X krka’-ngrne kx Gct Trtegu x Kxetu rgu Mevalu Jiszs, nakabzlr bam zmrlz ngrdr kxmyalz, nzmnc-zpwxngr, x nayc mz drtwrdr nim. ³ Wztrpo mz Gct mz nabz kxtubq, da kc tzwai melrmqngeng. X mzli kang kqlu krka’-ngrne nim, x awi-zvz-ngrbo bade. ⁴ Mz nzdctipxkr drtwrnge mzli kc tqprszpx-ngrne nim, tqyrni-ngrme bange, sutitx zlwz drtwrnge nzmc-krnge nim, murde na-abrtz-mouki.

Natu-amqngi Mz Nzwztr-krbzme Mz Kxetu, Kxmule-esz’ Drtqm Nzaetqbz

⁵ Krlz-angidrx kx lxngiti-zpwxq Kxetu rgu. Murde blrkqm Lois x lxem Yunis, nzalvztr-ngrdr nim, mz nzlxngiti-krm Jiszs Kxnzmcpx. X krlz-kzx kx nzrlxngiti-krm sc tqxplrpe krlzmle mzli ka. ⁶ A’ mzli ka nadcpx mz drtwrm mzli kc tqyrlqo-ngrbo mqnge bam, x Gct avzomle bam zmatq ngr Mqngrkxtr mz nzwztr-krbzme bade. X drtwrm napqtr zvz mz nzwz-nqblq-krm zmatq lc. ⁷ Murde Mqngrkxtr ngi nou zmatq, nivz, x nzaclve-lzbqngr. A’ trbatrpwzleu zmwxlr. ⁸ Delc, bzkq mwxlrq nzpipx-krbzme Kxetu rgu mz leplz, x bzkq myangr drtqm nzmncpx-krmc mz presin mz nzwztr-krbo bade. A’ narlrpx-lzbq-ngrn mz nzyapwxtipx-krm Nrpakxmrlz mz zmatq ngr Mqngrkxtr, kxmule-esz’ drtqm nzaetqbz da kc tqwaix.

⁹ X Nrpakxmrlz lc nide sele.

Gct arlapxle x kqlele nigu nzngini-krgu doa kxnztr nedeng, mz nzvz-nqblq-krde me pnz drtwrde x zmrlz ngrde kxmyalz. A’ trvzpxpuu mz da kx aleku. Murde mzli kc nrlc trnzwzka-ngrde, Gct pnzpe drtwrde kx Mevalu Jiszs Kxnzmcpx na-arlapxle nigu. X mz nzvzo-krmle mz nrlc, aovxiole zmatq ngr nzbzngr. X Nrpakxmrlz aelwapx-ngrde kxnamu nzprtrngr mz nzlungr kxboi.

¹¹ X nzmcpx ninge mz nzngini-krnge aposol mz nzalvztrngr x nzrlepxngr Nrpakxmrlz. ¹² X mzli ka, mz nzwztr-krnge lc mz Nrpakxmrlz, dekc tqaetqmle drtqnge x tqmncpx-ngrmc mz presin. A’ trmya-ngru drtqnge. Murde krlzx Gct kc tqabrkitrx drtwrnge. X lxngitix kx sa nabatrple Nrpakxmrlz kc tqaprcmle bange nzryapwxtipx-zvzngr nakrlzbzle nzyzlu-krm Jiszs. + 1:12 Kzdung leplz nztekqtr-krdr ngalrde lc blepxbz, mz nzrpi-krdr kx, “X lxngitix kx sa na-aclve-angidrle nzlu-krnge, nakrlzbzle mzli kc nabz-ngrne o nzyzlu-krm Jiszs.” Kzdung natq mz Grik tropxu.

¹³ Timoti, nadcpx mz drtwrm nzalvztrngr kxtubq kcng tqpibo bam. X alvztr-zpwxbz mz leplz. X mz nzaxvctr-krbzme mz Mevalu Jiszs, navz zvz nzabrtr-krbzme drtwrm bade x nzmrlzti-krm nide. ¹⁴ X mz nzokatrkr Mqngrkxtr kc tqmncpxm bagu, aclve angidr Nrpakxmrlz kc tzaprcbz bam. Murde nzalvztr-ngrng amrlx mz Nrpakxmrlz lc natubqpwz mz nzyapwxtipx-krmleng.

¹⁵ Krlzpeq kx kxnzrlxngiting nzkqlung dalr Provins kc Esia, trnztu-amqngiung mz nzokatr-krdr ninge, a’ mzli ka nzrlaszpelr ninge. X wai-kzle Fijelzs x Hzmcjinis.

¹⁶ A’ abrtz-zlwz-ngrne Onesiforzs. Krlzpeq kxmu nzokatr-krde ninge mztea Efiszs. X mzli kc tqkaputr-ngrmle Rom, rtangrtile ninge, vz vz mzli kx rmcti-ngrde ninge. X trmya-ngru drtqde nzmncpx-krmc mz presin. A’ okatr-zvzle ninge. X delc, mz nzkrka’-krnge, tqrlxti-ngrbo mz Kxetu rgu kx na-amrlzle lr ma nyzde mzli ka. X krka’-ngrne kx Kxetu rgu nayc mz drtwrde nide mzli kc nayzlu-ngrm Jiszs.

¹ Mrlxnge Timoti, nzrlxngiti-krm naxplr mz nzokatrkr Mevalu Jiszs nim. ² Xlr-zvzme nzalvztr-krnge mz Nrpakxmrlz. Mzli ka, aprcbz nzalvztrngr lcng mz leplz kcng tqabrtrpzku drtwrgu badr mz nzalvztr-krdr kzdung kz leplz, murde leplz lcng na-alvztr-moulr kzdung kz leplz. ³ Rlrpx-lzbqngr, da kc tqwaix, mz nzwztr-krbzki mz Mevalu Jiszs, kxmule-esz’ drtqgi nzaetqbz. ⁴ Na-apuki ncblo ngr vea, kc tqvz-nqblqpwzle kxetu rde. X tr-rlr-ngrpwzleu nzaotrkr ncte dalr nrlc. X dekc tqabrtzlvzngr kxetu rde nide. ⁵ X na-apu-kzki doa kx prtr mz nzesangr. Murde vz-nqblqpwzle nqmq ngr nzesangr, murde natwzle da kxmrlz. ⁶ X na-apu-kzki doa kxwz kato mz nrlanc. Murde sa nangq-kaile dalr nrlanc kc tqetqti drtqde. ⁷ Na-aoti zvz drtwrm nzycmne-ebzpxngr lcng tq, murde Kxetu rgu na-aopxbzle bam kxnamu nzwztr-krbzme bade.

⁸ Delc, nayc-zvz-ngrde mz drtwrm Nrpakxmrlz lc tqyapwxtipxx mz nzwztr-krbo bade, kxmule-esz’ nzaetqbz drtqm. Murde Jiszs Kxnzmcpx kc tqvzpxm mz nqvi lr King Devet, drtqde nzaetq-kaipz mz nzrnibqngr nide, a’ tulz-mop mz nzbzngr. ⁹ X drtqnge nzaetq-kzpz mz nzamyati-ngrm drtqnge x nzamncpx-krmlr ninge mz presin. X nzapusr-ngrdr ninge ncblo kx xpqbrlrngr lou murde lepxx Nrpakxmrlz. A’ natq Gct rblx nzapqbrlvzngr mz presin. ¹⁰ Delc, tqvz-zvzngr nzlepx-krnge Nrpakxmrlz, x rlrpx-lzbq-ngrne mz nzprtilz-krdr ninge da lcng amrlx, murde leplz kcng tqmcpx Gct narlapx-kzng, mz nzlxngiti-krdr Mevalu Jiszs, x naprtr-kzng mz nzlungr kxboi Heven. ¹¹ Murde natq angidr deseleng.

Mz nzbzmi-krgu Kraes, sa nalu-aloku badr.

Mz nztu-amqngi-krgu mz nzrlxngitingr, sa na-aclveku badr mz nrlc kc navzm.

A’ nekeng nzpxtxpx-ngrdr nide, sa napxtxpx-kz-ngrde nidr.

Kxmule-esz’ taoku mz nzatutr-krgu da kx esalz-ngrbzku bade, a’ trtxpnzngr nztao-krde mz nzatutr-krde da kx esalz-ngrmle bagu.

Murde nqmq kr Kraes trpnzngr nztekqtr-krde, a’ vz-nqblq-zvzle nqmq krde lc tqmrlz.

Kxnzawz Angidr Ne Gct

¹⁴ Timoti, adcpx-mopwz mz leplz nemqng natq kcmang tqpi-kaipo. X mz drtq Gct, rpwa’-ngrbz badr nzotablrlvz-krdr natq kx akipxle leplz. Murde trokatrleu leplz, a’ atrkatile kxnzlalztqng. ¹⁵ Navz zvz nzalvztr-zpwx-krm Nrpa ngr Jiszs, murde nakrlzq kx Gct abrtzlvzle nzalvztr-krmq lcng x drtqm trmyau mz nzmc-krdeleng. ¹⁶ A’ kapx-lzbqm mz leplz kcng tzycmnetr-ngrdr dalr nrlc. Murde drtwr kxmule lc tramatqleu Gct x trokatrleu leplz. A’ mailztxpxle nidr mz nzrtxlvzlz-zvz-krdr alwx ngrdr. ¹⁷ X nzalvztr-krdr lcng tqtrka sa naetunepx mz mzlirmu. X na-apule kxsqki kc tqngi kansz. Kzdq kxnzalvztr-rbr lcng drtqde Haemznezs x kzdq kz drtqde Filetzs. ¹⁸ Nzvz-rlrubzng mz nzalvztrngr angidr. Murde nzrpilr kx nigu kxnzrlxngiting sc tzatulzpeng mz nzbzngr x trpe-moungr nztulzkr nrkrdrtqgu kalr. Nzalvztrngr lc tqatrkatipebzle nzrlxngitikr kzdung leplz. + 2:18 1 Korint 15 ¹⁹ A’ krlzku kx nzalvztrngr angidrng kc tqkabz Gct sa natu-amqngi-alo. Murde Nzryrngrkxtr rpile kx, “Yawe krlz-angidrle nekeng leplz nedeng.” + 2:19 Nzkqlu-krdr 16:5;Jon 10:14 X rpi-kzle kx, “Leplz amrlx kcng tzplzpxlr kx nzlxngitilr Kxetu naesablqtilr nqmq krdr kxtrka.” + 2:19 Joel 2:32;Sam 34:12-14;Nzyrplapxngr 3:7

²⁰ Mz nzvz-nqblq-krde nqmq krgu, mzli kx vz-ngrm kzdq kxetu mz ma nyzgu, rkabzku bade dakxnzng kxmrlzti, mz nzamatq-krgu nide. A’ mzli kx mnc-ngrgu esz’-krgu, trmu-zvzkuu dakxnzng kxnamulr krkcng tzkabz bade. ²¹ X krlc nzycmne-ebzpxngr kx navz-nqblqku. Nzmu alqngi-lzbqku mz da kcng tqtrka, apuku dakxnzng kcng tqmrlz. X takitrde nzmcpx nigu mz nzokatr-krgu Kxetu rgu, murde tqoliqpe-ngrgu mz nzale-zvz-krgu da kxmrlzti. ²² Mz nzmu-krde lcde, kx Timoti, esablqti da kxtrka amrlx kcng tzmrlzbz mz obla. A’ mz nzokatrkr leplz kcng tzlxngitilr Kxetu rgu x tzsuti drtwrdr nzabrtzlvz-krde nidr, navz zvz nzale-krm da kxtubq, nztu-amqngi-krm mz nzrlxngiti-krgu, nzmrlzti-krm Gct x leplz, x nzmnc-zpwx-kz-krmu badr. ²³ Eu, navz zvz mz nzpxtxpx-krm nzaongr drtwr kcng tqangqngu-ngrde leplz, murde nzbatrpzlr nzotablrngr. ²⁴ Murde kxnzawz ne Kxetu, bzkq nzotablrng x drtwrde ngya ani mz nzatrkatikr leplz nide. A’ nanginide mrlx kx okatrle leplz amrlx x alvztr angidr. ²⁵ X mz nivz lr Kxetu, na-atubqtile leplz kcng tzpxtxpx-ngrdr nide, murde mwx elx Gct naokatrle nidr mz nztekqtr-krdr nqmq nr drtwrdr x nalxngitilr natq angidr. ²⁶ X drtwrdr naopx, murde narlapxbzng mz nzesabrtikr Setzn, kc tqrtulrtr-ngrbzle badr nzale-krdr me pnz drtwrde.

Leplz Kxnztrkang Mzli Ka Tqaenzli-ngrgu Nzyzlu-krm Jiszs

¹ Nakrlzq kx mzli ka tqaenzli-ngrgu nzyzlu-krm Jiszs sa naprtr-kzku mz nzkxpungr kang kqlu. ² Murde kxmule-esz’ nzrpilr kx nzlxngitilr Jiszs, a’ leplz nzkqlung sa navz-rbrng. Sa na-aoti txpwz drtwrdr nidr esz’-krdr, x namrlzbz badr trau. Sa naglqpx-lzbqng x nalcpung. Sa narpibqting leplz x narnzlvzolr natq trtedr x lxedr. Trna-abrtzlvzlru da kxmrlz x trna-amatq-kzlru Gct. ³ Trpnzngr scdr nivz x trnakrlzlru nzipqngr leplz. Trna-aclvetio-lzbqung x sa narpikiti-katong leplz. Trpnzngr nzrycngr mz drtwr badr, x sa natrka badr da kxmrlz amrlx. ⁴ Trpnzngr nardr x sa na-amwalr kztedrng. Sa namrlzbz badr alwx ngr nrkrdrtqdr namyaszpxle nzvz-nqblq-krdr Gct. ⁵ Leplz lcng sa naprtrpqng bagu mz nzrpi-krdr kx nidr lrmakxtr. A’ trtingr, murde trnzrlrpx-lzbq-ngrpwzung mz zmatq ngr Mqngrkxtr, nztekqtr-krde nabzdr. Delc nayrlqpx-lzbq-ngrbzku badr.

⁶ Kzdung leplz kxnzmulr lcng nzprtrpzng mz ma nyz olvz kcng nzrlxngiti-krdr trxplru, mz nzesabrti-krdrleng mz nzalvztr-rbr-krdr. X olvz lcng nzvz-nqblq-txpwzlr drtwrdr esz’-krdr. X o ani txpwz nzrtwz-krdr nrpa kznike vzne, murde nzrpilr narmcti-ngrdr nrwx. A’ rblx nzkrlz-krdr da angidr murde suti drtwrdr alwx ngrdr namyaszpxle nzvz-nqblq-krdr Gct, kc tqngi nou nrwx. ⁸ Ncblo kcng tzvznebzng mz ma lcng, nzpibqtilr Nrpakxmrlz. Murde nzao-krdr drtwrdr kxdrka’-ngrng, x nzvz-rbrng mz nzrlxngiti-krdr. Ncblo lcng nzapulr Janzs x Jabrzs kcng bqnc, tzpibqtilr nzalvztrkr Mosis. A’ nzpokia-krdr aelwapx-lzbqpengr. X mz nqmq lcpwz, ncblo kcng tzvzneng mzli ka, nzvz-rbr-krdr sa naopx kalr. + 3:8-9 Mzle-lzbq lcng, Janzs x Jabrzs, drtqdr trnzyroung mz Nzryrngrkxtr. A’ mz nqmq kr lr Jiu, nzrpilr kx ncblo lcng nidr ncblo neng King r Ijipt kxnzrngineng dabo ngr nzaelwapx-krdr rkx kx vzpxm mz drka’. [Nzrlaszngr 7:11-22; 8:7-19]

Vz-nqblqpwz Nzalvztrngr Angidr

¹⁰ Timoti, vz-nqblqpeq nzalvztr-krnge, nqmq krnge, me pnz drtwrnge, nzrlxngiti-krnge, trnzngya-ani-kru drtwrnge, nivz lrnge, x nztu-amqngi-krnge. ¹¹ X krlzpeq kxmu nzatrkati-krdr ninge, x nzaetq-krdr drtqnge mzli kc tqmnc-ngrne mztea Adiok, Ikonizm, x Listra. + 3:11 Aposol 13:50;14:4-6,19-20 Kxmule-esz’ sc tzatrkatilr ninge, a’ Kxetu rgu sc tqokatrpele ninge x arlapxle ninge murde ma tqbzx. ¹² Murde da zpwxtx kx leplz amrlx kcng tzsuti drtwrdr nzvz-nqblq-krdr me pnz drtwr Gct mz nzlxngiti-krdr Mevalu Jiszs, sa na-atrkati kz leplz nidr. ¹³ A’ leplz kxdrka’-ngrng badr kxnzpokia-ngrdr kxnzlxngitilr Jiszs, nztrka-krdr sa naetunepx zvz. X sa naesabrtilr leplz murde nzesabrti-kaing.

¹⁴ Timoti, krlzq kx nzalvztr-krgr ngi da angidr, murde krlz-zpwxq nigr kcng tzalvztrlr nim. Delc, navz zvz mz nzlxngiti-krmle. ¹⁵ Abzo mzli kc tqtopwzbe-ngrn, krlz-zpwxq Nzryrngrkxtr. X zmatq ngrde alvztrpele nim kx nabrti drtwrm Mevalu Jiszs mz nzarlapx-krde nim. ¹⁶ Gct kaomle natq amrlx mz Nzryrngrkxtr mz zmatq ngr Mqngrkxtr, murde natq lcng naokatrlr leplz mz nzalvztr-krdr nidr, mz nzlc-apqbz-krdr nidr, mz nzatubqti-krdr nidr, x mz nzaelwapx-krbzlr badr nzmncngr kxtubqbz mz nzobqkr Gct. ¹⁷ Murde doa nedeng, naoliqting mz nzale-krbzlr da kxmrlz mz leplz.

Nzwz-krm Navz Zvz

¹ Timoti, mz nzwz-krm, naoliq-zvzq mz nzyapwxtipx-krm Nrpakxmrlz, kxmule-esz’ mrlzbz bam o mrlzbz mz leplz o trtingr. Nzalvztr-krm naokatrle leplz mz nzaopx-krde da kx vz-rbr, x mz nzatubqti-krde nidr x mz nzapqtr-krbzle drtwrdr. X aenzli-zpwxbz badr mz nzvz-nqblq-krdr natqm. Murde Mevalu Jiszs x Gct Trte sa tzobqlvz-ngrdr nzwz-krm. X mzli kc Mevalu Jiszs navz-ngrmle mz nzngini-krde King r nrlc, sa napipxbzle mz leplz amrlx nztubq-krdr o trtingr, kxmule-esz’ kxnzlubeng o kxnzbzpeng.

³ Murde kalr, leplz trnavz-nqblqlru nzalvztrngr angidrng. A’ sa navz-nqblq-txpwzlr me pnz drtwrdr x nalalztq-lzbzng mz kxnzalvztrng kcng drtwrdr tqesz’ti badr. ⁴ X sa naesablqtilr da angidr mz nzo-lxlvrti-krdr be ngr nqmq krdr kcng trngiu da angidr x da kx trpnzngr drtwr ngrde. ⁵ A’ nim, kx Timoti, namnc-nrwx-ngrn mz da amrlx. Kxmule-esz’ nzaetqbz drtqm, a’ navz zvz mz nzale-krm nzwzngr kcng tqaprcbo bam. Ryapwxpxbz Nrpakxmrlz mz leplz kcng trnzlxngitikalr Jiszs, mz nzrlrpx-lzbq-krbzme mz Kxetu rgu, da kc tqwaix.

⁶ Murde rlrpx-lzbqpe-ngrbo mz Gct, kxmule-esz’ ycpe pipz nznibq-krdr ninge. X angidatipex nzwzngr kc tqaprcmle bange mz nzngini-krnge ncblo ngr vea kxmrlz ne Kraes. Murde ota-zpwxpex mz nztu-amqngi-krnge mz nzrlxngitingr. X vo-angidr-kzx mz nzesangr kc tqyrlqmle bange x sc tqayrkrpxpex. + 4:6-7 2 Timoti 2:4-5 ⁸ X krlzx kx sa natwzx da kxmrlzting Heven kx nzvzpxmqng mz nzabrtzlvzkr Gct nzmnc-krnge mz nrlc ka. Murde Kxetu rgu tubq zvz mz nzayzlu-krbzle da mz leplz. X mzli kc nayzlu-ngrmle, sa nakamle bange da lcng tqmrlzting. X leplz amrlx kcng tzaenzli-kzlr nzyzlu-krmle x tqabrtzlvz-kzle nidr, sa natwz-kzlr da lcng tqmrlzting.

Natq Ngr Nzarlr-lzbqngr

⁹ Sutitx zlwz drtwrnge nzvz-ani-krme Rom mz nzmnc-lxblr-krgi. ¹⁰ Murde Demas mrlz zlwz bade dalr nrlc. X rlaszpele ninge x vzpe taon kc Tesalonika. Kresen vzpe mz nzwz-krde mz Galesia Provins, x Taetus vzpe kz mz Dalamasia Provins. ¹¹ Atwzlrpe-ngrbo Tikikzs bam mz nztekqtr-alzu-krde nim mz taon kc Efiszs. A’ Luk kx mnc-txpwzkr ncdr mzli ka. Oti Jon Mak x vzmamu ncdr, murde krlzle nzokatr-krde ninge mz nzwzngr mrka. ¹³ Mzli kc navz-ngrme, twzm du dztungeng. Twzm kot scnge, ycbz mz mzlegi Kapzs mrkc mztea Troas. X twz-kzp buk scngeng, myapxbz krkcng tzwzngr mz be kzu.

¹⁴ Nzmu kx tqrmctiq Aleksada kc tqrwzngr aian, aclvetio nide. Murde rpwa’-ngrde nzalvztr-krgu, x yctxbz nzatrkati-krde ninge. A’ krlz-angidrx kx Gct sa na-ayrplapxle nide.

¹⁶ Mzli kc tqkot-ayrnr-ngrne mrka Rom, trpnzngr kztegung kx okatrle ninge. Murde nzrlasz-ngrdr ninge mz nzmwxlr-krdr. A’ krka’-ngrne kx Kxetu rgu naipqle nidr. ¹⁷ Murde Kxetu txpwz kx tum mz nibrnge x abrmle nelznge. Delc tqyapwxtipx-zpwx-ngrbo Nrpakxmrlz mz leplz amrlx kcng trngiulrJiu tzmncng mz kot. X Gct arlapxle ninge murde trnznibqkalr ninge. ¹⁸ X krlzx kx Kxetu sa na-arlapxbzle ninge mz da kxtrka amrlx. X sa na-aprtrle ninge mrnyzde Heven.

X naglqpx zvz nide. Eu, angida.

¹⁹ Eu, sutitx-zlwzbz drtwrnge kx navz-kaipe’ x mzli r nenq kzprla kc ate. Murde Erastzs sc tqmnc taon kc Korint x Trofimzs sc tqamnctxne mrkc mztea Miletzs, murde yagox.

Timoti, rpibz “Nimu la,” mz Prisila ncdr Akwila, x lr ma nyz Onesiforzs. Doa lrmakxtr amrlx mrka, myapxbz Yubulzs, Prudens, Linzs, x Klaodia, nzrpibzlr bam kx, “Nim la.”

²² Krka’-ngrne kx Kxetu rgu namnc zvz mz nabzm. X naokatrle nimu amrlx mz zmrlz ngrde kxmyalz. Eu, angida.

Delape. Ninge Pol.