Nzryrkr Pita Kx Ayrnrngr
Natq Ngr Nzaplxtqngr Mz Nzryrkr Pita Kx Ayrnrngr
Aposol Pita yrle letz lc mz mzlir yiz 62—64 AD mz nibr nzrmcngr mz Jiszs, mzli kc tqmnc-ngrde Rom. Zbz mz yiz 67 AD sc tztqlvztrpe nide mz kros. Mzli lc Niro nide king kxetu kc Rom, x leplz kxtrnzrlxngitiung nzpibqtilr x nzaetqbzlr drtq kxnzvz-nqblqlr Jiszs.
Pita ryrbz mz lrJiu x kxtrngiulrJiu kcng tzrlxngiting mz provins kcng Pontzs, Galesia, Kapadosia, Esia x Bitinia, mz kandre kc Trki mzli ka. Pita krlzle kx leplz nzatrkatilr nidr x nzaetqbzlr drtqdr. X ryrbz badr mz nzapqtr-krbzle drtwrdr x mz nzrpi-krbzle badr kx namnclzbzng mz zmatq ngr kxetu rdrng x navz-nqblq-zvzlr me pnz drtwr Gct, kxmule-esz’ da kx prtz. X rpi-kzpzle badr kx Gct rlr-ngrbzle da kxtrka nzprtilz-krdr nigu, mz nzaxplr-krde nzbrtikr drtwrgu nide.
11 Ninge Pita, aposol ne Jiszs Kxnzmcpx. Ryrbo bamu nimu leplz kcng tqmcpx Gct mz nzngini-krmu lr mrkzbleng mz nrlc ka, murde mrnyzmu angidr Heven. Nimu kcng tzakiting nrlc mz provins kcng Pontzs, Galesia, Kapadosia, Esia x Bitinia. 2 Yrlq pnz Gct Trte drtwr kx namcpxle nimu mz nzngini-krmu doa kxnztr nedeng. X Mqngrkxtr atrle nimu x okatrle nimu mz nzvz-nqblq-krmu Jiszs Kxnzmcpx. Murde suti drtwr Gct kx naipqpxbzle alwx ngrmung mz mepyr ngr nzbzkr Jiszs. Krka’-ngrne kx Gct sa navz zvz nzkao-krbzle bamu zmrlz ngrde kxmyalz x nzmnc-zpwxngr.
Drtwrgu Elalzm Mz Nzobqtipx-krgu Nzlungr Kxboi
3 Na-awibzku mz Gct kc tqngi Trte Kxetu rgu Jiszs Kxnzmcpx. Murde mz zmrlz ngrde kxmyalz batrple bagu nzprtr-krgu mz nzlungr kxmrna. Lxngitiku Jiszs Kxnzmcpx kc tqatulz-mop Gct mz nzbzngr x prtr-kzku mz nzlungr kxboi. X obqtipxku da kxmrlzting amrlx kx nzyrlq-bekapxlr mz nzka-krmlrleng bagu Heven. Murde da lcng trnayrkrpxu x trnatekqtru, a’ sa nayc-along. 5 A’ mzli ka mz nrlc ka, zmatq ngr Gct o-ngalelvzpele nimu murde abrtrpzmu drtwrmu bade mz nzarlapx-krde nimu. X sa na-aclve-angidrle nimu navz nakrlzbzle nzyzlu-krm Jiszs. X mzli lcde, sa na-aelwapx-ate-ngrbzle bamu da kxmrlzting amrlx lcng tzvzpxmqng mz nzarlapxpe-krde nimu.
6 Delc kxmule-esz’ prtramu mz da kxtrka kxnzkqlung mzli kxmrbcne, a’ sc tqabrtzpe-ngrnamu da lcng. 7 X da kxtrka lcng nzokatr-kzlr nimu, mz nzapu-krdr nyr kc tqayrleni-ebirngr gol, mz nzrkatx-krde zblqki rde. Murde nztu-amqngi-krmu axplrle nzrlxngiti-krmu x Gct rlr-ngrbzle nzprtzkr da lcng mz nzaxplrngr nzrlxngiti-krmu. Murde mz drtwrde nzrlxngiti-angidr-krmu myaszpx-zlwzle gol kxlqngi kx trnayc-alou. X mzli kc nayzlu-ngrm Jiszs Kxnzmcpx mz nrlc, nzrlxngiti-angidr-krmu lc nabatrpzle mz Gct nzabrtzlvz-krde nimu, nzglqpx-krde nimu, x nzamatq-krde nimu. 8 Murde kxmule-esz’ trmcwamuu Kxnzmcpx, a’ mrlztiamu nide x brti drtwrmu nide, mz nzelalz-zlwz-krm drtwrmu. X rblx nzrpingr nzetukr nzabrtz-krmu lc. 9 Murde kalr mrkc Heven, sa naprtramu mz bz ngr nzlxngiti-krmu Jiszs, mzli kc tqarlapx-alo-ngrde nimu.
10 Profet kcng bqnc, nzpipx-pnzlr kx Gct naokatrle nimu mz zmrlz ngrde kxmyalz. Kxmule-esz’ nzsuti zlwz drtwrdr nzkrlz-krdr drtwr ngr nzarlapxngr lc, a’ trnzkrlzlru drtwr ngr da amrlx kcng tzpipxlr. 11 Mqngr Kraes kc tqmncpxm badr pipx-zvzle nzetqkr drtq Kxnzmcpx x da kxmrlz-esz’ngr kcng naprtzting mz nibrde. X profet lcng nasuti drtwrdr nzkrlz-krdr ncblo kznike kx nanginide Kxnzmcpx lc x myx mzli kx naprtzngr da lcdeng x nike naprtzm mz nrlc ka mzli lcde. 12 X aelwapx-ngrbz Gct badr kx natq kcng tzpipxlr trngiu dalr nzokatr-krde nidr esz’-krdr, a’ ngi dalr nzokatr-krde nimu lcng tzvzmqng mz nibr nzngidatikr natqdr. Murde Mqngrkxtr kc tqatwzlro-ngrm Gct Heven rpibzle bamu kx natq profet lcng nzngidatipeng mz Jiszs Kxnzmcpx, kc tzyapwxtipxbzlr bamu mz Nrpakxmrlz. X mzli boipe enjrl nzsuti-kzngr drtwrdr nztwz-krdr drtwr ngr da lcdeng.
Gct Kqlele Nigu Mz Nzmncngr Kxtr
13 Mz nzmu-krde lcde, oliqtiamu drtwrmu mz nzvz-nqblqngr me pnz drtwrde x aclve-lzbqamu. X na-aoti txpwz drtwrmu da kxmrlzting kcng tqobqtipxamu nzrka-ngrbz bamu mzli kc nayzlu-ngrm Jiszs Kxnzmcpx. 14 X mz nzngini-krmu doa neng Gct kx nzvz-nqblqlr natqdeng, bzkq vz-nqblqamu nqmq nr nabzmu kxtrka kcng tqaleamu ena, mzli kc trkrlzkalamu nzalvztrngr angidr. 15 A’ mzli ka, nzmnc-krmu natr, da kc tqwai nztrkr Gct kc tqkqlele nimu. 16 Murde rpile mz Nzryrngrkxtr kx, “Nzmnc-krmu natr, murde nzmnc-krnge tr.” + 1:16 Livae 11:44-45;19:2;20:7
17 Na-aoti drtwrmu kx Gct Trtemu kc tqkrka’bzmu bade, nzmc-krde leplz rsakrlrngr. Murde sa na-ayzlubzle bam nike aleq mz nrlc ka. Mz nzmu-krde lcde, namyatitramu nide mz da amrlx kcng tqaleamu mz nzngini-krmu lr mrkzble mz nzmnc-krmu mz nrlc ka. + 1:17 Nzamatq-krgu Gct namyaszpxle nzamatq-krgu da x leplz, kxmule-esz’ mrnyzgu o lr mrnyzgu. Murde mz nzngini-krgu doa nedeng, apuku lr mrkzbleng mz nrlc ka. X na-aoti zvz drtwrgu kx mrnyzgu angidr Heven.
18 Na-aoti kz drtwrmu kx trngiu trau o silvz o gol kc tqxpengr Gct nimu mz nzkapx-krmle nimu mz nqmq kx trmatqu kc tzaprcbz melrmqmung bamu. Murde trau x silvz x gol nzkrlzlr nztrkangr. 19 A’ xpetrle nimu mz da kx myapx-esz’ngr, krlcde mepyr ngr Kxnzmcpx. Murde bz-ngrde nimu mz nzngini-krde blz kxmyapx-esz’ngr x nei sip kx lqngipx-esz’ngr. 20 Kxnzmcpx lc tqngi nei sip kx nangi blz kc tqmcpx pnz Gct mzli kc nrlc trnzwzka-ngrde. X mzli ka, sc tqaelwapxpe-ngrbz Gct bamu kx Jiszs nide lrpzki r nzarlapxngr nimu. 21 X mz nzaxvctr-krbzmu mz Jiszs, brtipe drtwrmu Gct kc tqatulz-mople nide mz nzbzngr x kabzle bade me matq-esz’ngr Heven. Mz nzmu-krde lcde, Gct txpwz kc tqabrtrpzmu drtwrmu bade x tqobqtipxamu mz nzatutr-krde da amrlx kcng tqesalz-ngrbzle bamu.
22 Mz nzlxngiti-krmu Nrpa Angidr, katxpxbzle da amrlx kcng tzrpwa’-ngrdr nzmrlzti-lzbq-krmu mz nzapupe-krmu mzle-lzbqng x ile-lzbqng. X mzli ka, na-aelwapx-zvz-ngrbzmu nivz angidr lc mz kztemung mz nabzmu atwrnrngr. 23 Murde prtrpeamu mz nzlungr kxmrna, kx trpnzngr nzyrkrpx-krde. Murde vzpxm mz Jiszs Kxnzmcpx kc tqngi Natq Gct kc tqlu-alo. + 1:23 Jon 1:1-14 24 Da kc tqwai, nzpikr Nzryrngrkxtr le kx, “Leplz amrlx sa nayrkrpxng mz nzapu-krdr nabr kxglr. X zluli rdr apule nrpq nounc kcng tzplclqtiong. 25 A’ natq Kxetu yctx alo.” + 1:25 Asaea 40:6-8 X natq lcde ngi Nrpa ngr Kxnzmcpx kc tzyapwxtipxpebz bamu.
21 Mz nzmu-krde lcde, yrlqpx-lzbqamu mz drtwr kx mwa, nzpokiangr, nzrkcmnzngr x nzrpibqtingr. 2 A’ nasutitx zlwz drtwrmu nztwz-krmu drtwr ngr natq Gct, mz nzapu-krmu itoto kx suti txpwz drtwrde nei pqde. Murde dekc nzbrtikr drtwrmu kx rlapx-angidrpeamu naetunepx zvz. 3 X krlzpeamu kx Kxetu rgu mrlz-esz’ngr.
Kxnzmcpx Badr Leplz Nedeng Nidr Mrkc Tqtr Nyz Gct
4 Namnc-aepztr-zvzbzmu mz Kxnzmcpx kc tqngi Nou Rplz kc tqlu-alo. Murde apu-kzamu rplz kcng tqbatrpzle nzmwitr-lxblr-krdr mz drkq ngr ma nyzde kc tqtr, mrkc tqmncpx-ngrm Gct. A’ nimu rplz kcng tzlung. X nimu kz pris kxnztr nede kcng tzwztrpzng bade, mz nzrlrpx-krbzmu bade blz ngr nzrglqlzngr nide, nzawi-ngrbz bade, nzangiongr nide x nzmnclz-ngrbz bade. X blz lcng nzmrlzng mz nzobqkr Gct murde nzaxvctrpzmu mz Jiszs Kxnzmcpx. + 2:4-5 Asaea 61:6;Rom 12:1;Filipae 4:18;Hibru 13:15-16 X kxmule-esz’ Jiszs nide rplz kx myatxpx-zlwzbz kc tqmcpx Gct, a’ kzdung leplz nzpxtxpx-ngrdr nide. + 2:4-5 Matiu 21:42;Mak 12:10;Luk 20:17;Aposol 4:11;2 Korint 6:16;Efiszs 2:20-22 6 Gct ycmnetr-ngrde Mrlxde mz Nzryrngrkxtr mz nzrpi-krde kx, “Obqmamu! Murde yrlqpex kc doa mrkc Jerusalem kx apule rplz kx myatxpx-zlwzbz, murde nide kc tqngi rplz kc tzatuo kai, tqngi nou bute’ kc tqmcpxx. Doa kx lxngitile nide drtqde trnamyau mz nzbrtikr drtwrde nide.” + 2:6 Asaea 28:16 7 Delc, nimu kcng tzrlxngiting tqkrlzamu kx nide kxmyapxbz. A’ Nzryrngrkxtr rpibzle mz leplz kcng trnzrlxngitiung kx, “Rplz kc etu tzpxtxpx-ngrdr ncblo kcng tzrwz-ngrng ma, nzaelwapxngr kx nide nou rplz kc tqmyatxpx-zlwzbz.” + 2:7 Sam 118:22 + 2:7 Rplz lc drtwr ngrde Jiszs Kxnzmcpx. X kxnzpxtxpx-ngrdr nide drtwr ngrde ncblo kx nzmailzlr lr Israel. [Asaea 28:14]
8 X rpi-kzle kx, “Nide rplz kx nayrputrngr leplz mz nzobqszo-krdr nide.” + 2:8 Asaea 8:14;Rom 9:33 X nztaong murde nzpxtxpx-ngrdr nrpa kc tqycmnetr-ngrde nide mz Nzryrngrkxtr. Krlc vz-nqblqle drtwr kc tqyrlq pnz Gct mz leplz lcng mzli kc bqnc.
9 A’ nimu “nqvi kc tqmcpx Gct,” x “pris kcng tzwztrpzng mz King rgu” Jiszs. X ni-kzpu’ “dzbede kxtr kc tzamnc-bekapx Gct,” murde nanginimu “angidr leplz ne Gct esz’-krde.” X kqlele nimu mz nzyapwxtipx-krbzmu mz leplz zmrlz ngrde kxmyalz. X kapxmle nimu mz zmatq ngr alwx, murde naprtramu mz nzkrlz-angidr-krmu nide. + 2:9 Nzrlaszngr 19:5-6;Asaea 43:21;Jeremaea 13:11;Malakai 3:17 10 Murde Nzryrngrkxtr alvztr-ngrde nigu kx “mzli kc trnginipwa’muu leplz nedeng,” a’ mzli ka “nipemu leplz neng Gct.” X mzli kc “trprtrwamuu mz nivz lrde,” a’ mzli ka “mrlzti-zlwzpele nimu.” + 2:10 Hosia 1:10;2:23
Navz-nqblqku Nqmq Kr Gct Mz Nzmnc-krgu Mz Mzlir Kxtrnzrlxngitiung
11 Mzlengeng x inwengeng, na-apuamu lr narnrlc x lr mrkzbleng mz nzmnc-krmu mz nrlc ka, murde mrnyzmu angidr Heven. Mz nzmu-krde lcde, bzkq rlr-lzbq-ngrbzmu mz da kxtrka kx suti drtwr nrkrdrtqmu, murde ma tzaovxiolr nimu. 12 A’ nqmq krmu natubq zvz mz nzmnc-krmu mz mzlir leplz kxtrnzrlxngitiung. Murde kxmule-esz’ nzycmne-atrkatilr nimu, a’ sa namclr nztubqkr nqmq krmu. X kzdung nidr mwx sa nalxngiti-kzlr Jiszs x naglqpxlr Gct mzli kc nayzlu-ngrm Jiszs. + 2:12 Matiu 5:16
Namnclzbzmu Mz Zmatq Ngr Kxnzetung
13 X mz nzamatq-krmu Kxetu rgu Jiszs, namnclzbzmu mz zmatq amrlx kcng tzyrlqbz bamu. Abzo mz king o gzpman kc tqaclvele nimu, 14 nakrlzbzle leplz kznike nzatwzlr-ngrdr mz nzayrplapx-krdr kxnzvz-rbrng x mz nzamatq-krdr kxnzaleng da kxmrlz. 15 Murde nzale-krmu da kxmrlz awx-nabule leplz kxdrka’ngr kcng tzpibqtilr nimu. X krlc me pnz drtwr Gct. 16 Kxnzmcpx arlapxle nimu mz nzmnclz-krbzmu mz zmatq kxtrka amrlx. Mz nzmu-krde lcde, bzkq ale-mouamu da kxdrka’ngr, a’ rlrpx-lzbqamu mz nzwztr-krbzmu mz Gct. 17 Amrlueamu leplz amrlx. Mrlztiamu kztemung kxnzrlxngiting. Myatitramu Gct. X amatqamu king.
18 Nimu kcng tzawz-nrbalqng, namnclzbzmu mz zmatq ngr kxetu rmung mz nzamatq-krmu nidr, kxmule-esz’ nzaclve-zpwxlr nimu o nzatrkatilr nimu. 19 Trabrtzlvzu Gct nimu mz nzetqkr drtqmu mzli kc kxetu rmung nzayrplapx-ngrdr nimu mz nzvz-rbr-krmung. Murde takitrde nzale-krdr da lc. A’ Gct sa na-abrtzlvzle nimu mz nzamatq-zvz-krmu kxetu rmung murde mrlztiamu Gct. Myapxbz mz nzetqkr drtqmu kxmule-esz’ nzatrkati-krdr nimu trpnzngr noude.
21 Murde suti drtwr Gct kx navz-nqblqamu Kxnzmcpx kc drtqde tqetq mz nzarlapx-krde nimu. 22 Murde Profet Asaea ycmnetr-ngrde nide mz nzrpi-krde kx, “Trpnzngr alwx ngrde. X trpnzngr nzpokia-krde.” + 2:22 Asaea 53:9 23 A’ mzli kc tzpibqti-ngrde, trpnzngr natq kx ayzlubzle badr. + 2:23 Asaea 53:7 X mzli kc tzaetq-ngrbz drtqde, trpnzngr natq ngr nzamwxlrngr kx pi-mopwzle badr, a’ abrtr-zvzbzle drtwrde mz Gct kc tqtubq mz nzayzlu-krbzle da mz leplz. 24 X tekqtrle nigu mz nzxpe-krde alwx rgung mz nzrtqlvztrngr nrkrdrtqde mz kros. X arlapxle nigu mz zmatq ngr alwx, murde nzmnc-krgu natubq-esz’ngr. Delc nzatakingr nide tqamrlzpe-ngrde nigu. + 2:24 Asaea 53:4-5 25 Mzli kc apuamu sip kx nzmrbrng kcng tzmnc-rlrubzng mz kxetu rdr. A’ mzli ka yzlupebzmu mz Kxetu kc tqaclve-angidrle nimu mz nznginipe-krmu sip nedeng. + 2:25 Asaea 53:6
Olvz Kxnzyrlzng X Ncblo Ngrdrng
31 Mz nqmq lcpwz, nimu olvz kxnzyrlzng namnclzbzmu mz ncblo ngrmung. Murde kzdung nimu kcng ncblo ngrdrng trnzlxngitikalr natq Gct, kxmule-esz’ tryapwxtipxpwzmuu Nrpakxmrlz badr, a’ mwx nzmc-krdr nzmrlzkr nqmq krmung x nztubq-krdr, sa navectrple nidr mz Gct. 3 Bzkq angrlo-txpwzmu nrkrdrtqmu kx nalxngipx-esz’ngr, mz nzrbx-krmu nqngi narmu, nzrluti-krmu da kx ngi gol x nzpxi-krmu lrpz kx mzte luli. Murde da lcng trnzmyapxpwzung. 4 A’ nzlxngipx-krmu navzpxm mz nabzmu. Murde nzlxngipxkr nabz rblx nzyrkrpx-krde mzli kc nanginipe-ngrmu blang. A’ nzlxngipxngr kx vzpxm mz nabz kx vz-nabu x avzo-lzbq ngi da kx myapx-esz’ngr mz nzobqkr Gct. 5 Krlc nqmq krdr olvz kxnztrng kcng bqnc tzabrtrpzlr drtwrdr mz Gct. Murde nzlxngipx-krdr vzpxm mz nzmnclz-krbzlr mz ncblo ngrdrng. 6 Da kc tqwai Sera mz nzvz-nqblq-angidr-krde natq Ebraam, x mz nzamatq-krde nide mz nzrpi-krbzle bade nide kxetu rde. X sa na-apuamu Sera, nzmu trnamwxlrwamuu nzatrkatingr nimu mz nzale-krmu da kxmrlz.
7 X mz nqmq lcpwz, nimu ncblo kxnzyrlzng namnc-zpwxamu badr olvz ngrmung, mz nzkrlz-krmu kx nzxplrkr ncblo myaszpxle nzxplrkr olvz. A’ na-amatq-kzamu nidr mz nzngini-krdr kztemung kcng tzprtr-kzng mz nzlungr kxboi. Nzmnc-krmu nakxmule lc, murde Gct na-ayzlubzle nzkrka’-krmung.
Kzdung Mzli Drtqgu Nzaetq Mz Nzale-krgu Da Kxmrlz
8 X mou, nimu amrlx ngrmu namnc-zpwx-lxblramu, naycngr drtwrmu kztemung, namrlztiamu kztemung na-apulr kx mzlemung angidr, na-avzo-lzbqbzmu badr, x naokatramu nidr. 9 Bzkq ayzlubzmu da kxtrka mz da kxtrka. X bzkq pibqtiamu krkcng tzpibqtilr nimu. A’ rlxtibzmu mz Gct nzamrlz-krde nidr. Murde krlc me pnz drtwrde x sa na-amrlz-kzle nimu mz nzale-krmule. 10 Murde Nzryrngrkxtr rpile kx, “?Nike suti drtwrm? ?Nzlungr kxmrlz kxboi? Obq-angidr x bzkq ycmne-atrkatiq leplz. X bzkq pokiaq. 11 Prszpx nqmq kxtrka. X ale zvz da kxmrlz. X nasuti drtwrm nzmnc-zpwx-krmu badr leplz mz nrwx. 12 Rlxtibz ncblo kxtubq mz Yawe nzokatr-krde nide. X Yawe sa naxlrbzle nzkrka’-krde mz nzaclve-krde nide. Sa napnanatile leplz kxnzale-zvzng da kxtrka.” + 3:12 Sam 34:12-16
13 Nzmu kx tqvqti drtqmu nzalengr da kxmrlz, mwx trpnzngr kx na-aetqbzle drtqmu. 14 A’ nzmu kx tzaetqngr drtqmu mz nzale-krmu da kxmrlz, sa namrlzbz bamu kalr. + 3:14 Matiu 5:10;Luk 6:22 Murde Nzryrngrkxtr rpile kx, “Bzkq kxne drtqmu natq ngr nzamwxlrkr leplz nimu.” + 3:14 Asaea 8:12-13 15 A’ abrtrpzmu drtwrmu mz Jiszs Kxnzmcpx mz nzngini-krde Kxetu rmu. X oliq-zvzamu nzayzlu-krbzmu natq krkcng tzveatibzlr kx memule tqlxngiti-ngrnamu Jiszs x nike tqobqtipx-ngrnamu nzlungr kxboi. A’ amatqamu nidr x ayzlu-ngrbzmu natqdr mz nivz. 16 Na-ale-zvzamu da kxtubq, murde narmu naopx angidr mz da amrlx. Mz nzmu-krde lcde, nzmu leplz kx tzpibqtilr nimu mz nqmq krmu kxmrlz mz nzvz-nqblq-krmu Kxnzmcpx, bzkq da kx nakxne drtqmu, murde sa na-amyatibz Gct drtqdr kalr. 17 Nzaetqngr drtqmu mz nzale-krmu da kxmrlz kx pnz drtwr Gct myaszpxle nzaetqngr drtqmu mz nzale-krmu da kxtrka. 18 Murde Kxnzmcpx kc tqtubq nzaetq-ngrbz drtqde nzwrde esz’txu mz nzxpe-krde alwx rgu, nigu leplz kxtrnztubqung, murde navzmibzle nigu mz Gct. Nrkrdrtqde nznibq, a’ lu-mop mz zmatq ngr Mqngrkxtr.
19 X mz zmatq ngr Mqngrkxtr lc, Kxnzmcpx sc tqycmnekipxpele Noa mz nzyapwxtipx-krbzle mz leplz kx suti drtwr Gct nzplzpx-krdr alwx ngrdr. A’ nzpxtxpx-ngrdr nzvz-nqblq-krdr Gct. Krlc mzli kc bqnc tqwzngr Noa lcsu kc etu. Mzli lcde Gct kabzle badr mzli r nztekqtr-krdr nqmq nr drtwrdr. A’ trtingr, x mzli ka mqngr leplz lcng nzatolvape-ngrng mrnyz mqngr kxnzbzpeng. X leplz nzrtqmzng kx nzrlatxpxpwzng mz nubla ngr lue. + 3:19-20 Ngalrde lcng 19-20 nzalvztr-ngrdr nigu kx nayapwxtipxbzku Nrpakxmrlz mz leplz, kxmule-esz’ nzpxtxpx-ngrdr nigu, da kc tzwai-kzpzlr mz Noa. X kxmule-esz’ nigu kcng tzvz-nqblqlr Gct pipzku, a’ krlzle nzarlapx-krde nigu, da kc tqwaibzle mz Noa badr lr ma nyzdeng. X mou, Kxnzmcpx sa na-aovxiole enqmi rdeng amrlx x sa na-ayrplapxle krkcng tzpxtxpx-ngrdr nide, da kc tqwaibzle mz leplz kcng tzbzng mz nubla.
21 Leplz lcng nzrlapxng mz nubla ngr lue, da kc tqwai-kzku mz nzrlapx-krgu mz lue ngr nzwrkxtrngr, murde mzli lc brti drtwrgu nztulz-kr-mop Kxnzmcpx mz nzbzngr. Nzwrkxtrngr trngiu dalr nzrwztipxngr zblqki mz nrkrdrtqgu. A’ ngi dalr nzkrka’-krbzku mz Gct nzatubqti-krde nigu x nzaopx-krbzle nargu, mz nike alem Jiszs bagu. 22 Mzli ka sc tqwxbupe me matq-esz’ngr Heven mz nrlar Gct kxrtc. X krkcng amrlx Heven, tzmnclzbzng bade, kxmule-esz’ enjrl, o kxnzetung, o kxnzmatqng.
Vz-nqblqamu Lrpzki R Kxnzmcpx
41 Mz nzmu-krde lcde, navz-nqblqamu lrpzki r Kxnzmcpx mz nzmnc-krmu. X drtwrmu badr naesz’ti mz nzrlrpx-lzbq-krbzmu mz nzaetqngr drtqmu, da kc tqwaile. Murde krkc tzaetq-zlwzpebz drtqde mz nzvz-nqblq-krde Kraes, aovxiopele nzatalzngr nide mz alwx. 2 X mrlx lc, krlzle nzma-nqblq-krde me pnz drtwr Gct vz-krlzbzle nzbz-krde. X trpengr nzvz-nqblq-krde drtwr kxdrka’ngr. 3 Mzli kc ena trlxngitika-ngrnamu Jiszs, mzli kang kqlu prtramu mz drtwr kxdrka’ngr sc kxtrnzrlxngitiung. Murde rmwimiamu doa kx trngiu krnalzmu, vz-nqblqamu drtwr kxtrka, rmnq-zlwzamu, trcluwamuu mz da kx myangr drtqmu, x angioamu mqngr drka’ kxnzlz kxkqlu. 4 A’ kztemu kcng tqprtrpzmu badr mzli kc, nzpikitipelr nimu murde trnzkrlzlru nike trprtrpe-ngrpwzmuu badr mz nqmq kxdrka’ngr lcng mzli ka. 5 Kxmule-esz’ a’ mz Mzli Kxmatq kc navzm, sa natutrpzng mz mz Kxnzmcpx. X sa napibzle mz leplz amrlx kxnztubqng o trtingr, kxmule-esz’ kxnzlubeng o kxnzbzpeng. X sa napipxbzlr bade drtwr ngr da amrlx kcng tzalelr mz nzlu-krdr. 6 A’ kztemung kcng tzbzpeng, mzli kc tzlube-ngrdr nzlxngitilr Nrpakxmrlz kc tzyapwxtipxbz badr. Krlc drtwr ngrde kx kxmule-esz’ nzprtrng mz nzayrplapxngr mz nzbzkr nrkrdrtqdr, da kc tzwai leplz amrlx, a’ mqngrdr nzlu-alobzng mz Gct, mz nzvz-nqblq-krde me pnz drtwrde. + 4:6 Mz nibr nzbz-krdr, kxnzrlxngiting trnzprtrpeung mz nzaryplapxkr Gct nidr.
Nqmq Krmu Natubq Mzli Ka Tqaenzli-ngrnamu Nzyzlu-krm Jiszs
7 Ycpe pipz nzyrkrpx-krbz nrlc ka. Mz nzmu-krde lcde, aclvetio-lzbqamu murde nzkrka’-krmu nawz-angidrng. 8 X da kx myapxbz mz da amrlx, namrlzti-lzbqamu. Murde Nzryrngrkxtr rpile kx, “Nivz batrple mz nabzgu nzipq-krgu leplz mz nzkqlukr alwx ngrdr.” + 4:8 Nzyrplapxngr 10:12 9 Abrtzlvzamu nzadwatr-krm kztemung ma nyzmung. 10 Doa kxesz’ mz nimu, nawztrpz mz kztedeng mz zmatq kxmyapxbz kc tqkabz Gct bade. Murde zmatq kxmyapxbz kx bletipx lxblr lcng nawz-lxblrng mz nzaelwapx-krdr zmrlz ngrde kxmyalz. 11 Nzmu kx tqkabzle bam zmatq ngr nzryapwxtipxngr natqde, ryapwxpxbz mz leplz mz nzkrlz-krm kx Gct kc tqrkabz natq kcng tqpiq. X nzmu kx tqngi nzwztr-ngrbz mz leplz le, wztrpz badr mz nzkrlz-krm kx Gct kc tqrkabz nzxplrngr bam. Aleamu da lcng murde leplz naglqlz-zvz-ngrdr Gct mz da kx wzngr Jiszs mz nimu. Murde mz nzngini-krde king kc tqmatq takitrde nzrglqlzngr nide tqyc tqyc. Eu, angida.
Na-abrtzlvzamu Nzaetq-ngrbz Drtqmu Da Kc Tqwai Nzaetq-ngrbz Drtq Kxnzmcpx
12 Mzlengeng x inwengeng, bzkq kctipxamu nzprtr-krmu mz nzkxpu-zlwzngr mzli ka, murde da kxtrka nzprtz-zvzng. X Gct rlr-ngrbzle da lcng mz nzaxplrngr nzrlxngiti-krmu. 13 A’ na-abrtzlvzamu nzaetq-ngrbz drtqmu murde vzpxm mz nzvz-nqblq-krmu me pnz drtwrde, da kc tqwai nzaetq-ngrbz drtq Jiszs Kxnzmcpx. Murde mzli kc nayzlu-ngrm Jiszs mz nzmyalz-krde, na-abrtzlvz-kzamu nzprtr-krmu mz nzmyalz-krde lc. 14 Nzmu kx tzpikiti leplz nimu murde vz-nqblqamu Kxnzmcpx, mrlz nzabrtzlvz-krmu da lc. Murde aelwapx-ngrde kx Mqngr kxmatq kc tqvzpxm mz Gct sc tqmncbz bamu. 15 A’ trmrlzu nzmu nzaetq-ngrbz drtqmu mz nzngini-krmu ncblo kxayo, kxpna da, kxale da kxdrka’ngr, x kxrpikiti leplz. 16 A’ nzmu nzaetqbz drtqmu mz nzngini-krmu Kristin, naglqpx-ngrnamu Gct nzngini-krmu nabolr Kraes, mz nztwz-krmu drtqde. X bzkq myangr drtqmu. 17 Murde mz nzayrplapxkr Gct lr nrlc, yzutrpele mz nzayrplapx-krde nigu leplz nedeng. Murde suti drtwrde nzatubqti-krde nigu mz da kxtrka kcng tzprtzmqng bagu. X opx angidr kx nzmu na-ayrplapxle leplz nedeng, sa na-ayrplapx-zlwzle krkcng trnzlxngitilru Nrpa ngrde. 18 Murde Nzryrngrkxtr rpile kx, “?Nzmu kx rblxtx-zlwzbz mz leplz kxnztubqng nzrlapx-krdr, a’ myx kxnamu-alzule mz leplz kxnztrkang kxnzale-zvzng alwx?” + 4:18 Nzyrplapxngr 11:31 + 4:18 Gct atubqti-kaile leplz nedeng mz nzrlr-krbzle nzprtr-krdr mz nzetqkr drtqdr, x sc tzprtr-ateng Heven. A’ kxnzpxtxpx-ngrdr nide, trnztubqung mz nzobq-krde. X dekc trnaprtr-ngrdru Heven.
19 Mz nzmu-krde lcde, nimu kcng tzaetqbz drtqdr mz nzvz-nqblq-krde me pnz drtwr Gct, navz zvz nzale-krmu da kxtubq, mz nzabrtr-zvz-krbzmu drtwrmu mz Kxrpalz kc tqwz-ngrde nrlc x na-angidatile natqdeng amrlx.
Da Kx Na-ale Kxnzaclvelr Dzbe Leplz Neng Gct
51 Napibo du da bamu, nimu kxnzaclvelr dzbe leplz neng Gct, mz nzngini-kz-krnge kxaclve. Murde krlc tqyapwxtipxx nzmc-krnge nzetqkr drtq Kxnzmcpx mz kros. X sa naprtr-kzx mz nzmyalz-krde mzli kc nayzlu-ngrmle. 2 Na-aclve-angidramu leplz neng Gct kcng tqkatrpzle mz mqmu, mz nzvz-nqblq-krde me pnz drtwrde. Drtwr ngrde kx nzaclve-krmu nidr navzpxm mz nabzmu, a’ trngiu da kx nzrtulrtr-ngrbz bamu. X navqti drtqmu nzwztr-krbzmu mz Gct, a’ trngiu dalr nzngini-krmu bcnyr o mz nzamatqngr nimu. 3 X bzkq glqpx-lzbqbzmu badr, a’ nangini-zvzbzmu lrpzki mz leplz nemung. + 5:3 Matiu 20:25-27;23:8-12;Mak 9:35;10:42-44;Luk 22:25-26 4 Murde Jiszs nide kxetu r kxnzaclvelr sip nedeng. X mzli kc nayzlu-ngrmle, sa nakabzle bamu da kxmrlz kx nayc alo mz nzprtr-krmu mz nzmyalz-krde.
Da Kx Na-ale Kxnzrlxngiting
5 Mz nqmq lcpwz, nimu obla x olvi namnclzbzmu mz kxnzaclvelr nimu mz makxtr. X nimu amrlx ngrmu na-avzo-lzbqbzmu mz kztemung kxnzrlxngiting. Murde Nzryrngrkxtr rpile kx, “Gct esablqtile kxnzglqpx-lzbqng, a’ tubz mz nibr kxnzavzo-lzbqng.” + 5:5 Nzyrplapxngr 3:34;Jemes 4:6
6 Mz nzmu-krde lcde, avzo-lzbqbzmu mz Gct kc tqmyalz-esz’ngr, murde na-avzdzle nimu nzkrlz-krbzle mzli kc tqyrlqle. 7 X twzbzmu mz Gct nikeng nzatalvzobzlr nabzmu, murde sa tqaclve-angidrle nimu.
8 Aclvetio-lzbqamu x oliq-zvzamu, murde enqmi rmu Setzn kc tqotaamu badr apule laion kc tqamwxlr-ngrde leplz mz nztukr natqde. X sc tqvz zvz nzrtangrti-krde doa mz nzatrkati-krde nide. 9 A’ esablqtiamu nide x tu-amqngiamu mz nzbrtikr drtwrmu Jiszs. Murde nakrlz-kzamu kx kztemung kxnzrlxngiting amrlx mz nrlc nzprtr-kzng mz nzetqkr drtq mz nzvz-nqblq-krdr Jiszs, da kc tqwaiamu.
10 A’ mz nibr mzli kxmrbc kcng tqetqti drtqmu, Gct esz’-krde sa na-amrlz-moule nimu, sa na-amqngile nzbrtikr drtwrmu nide, x sa na-axplrle nabzmu, murde navz zvz nzyatr-krbzmu. Murde zmrlz x nzokatrngr amrlx nzvzpxmqng bade. X kqlele nimu mz nzaxvctr-krbzle nimu mz Kxnzmcpx, murde rpile naprtr-alo-kzamu mz nzmyalz-krde. 11 Murde nide king kc tqmatq tqvzpe tqvzpe. Eu, angida.
Natq Ngr Nzarlr-lzbqngr
12 Saelas okatrple ninge mz nzryr-krbo bamu letz lc mrbcne. Krlz-angidrx nzngini-krde mzlegu kx nzbrti drtwr leplz. Yrbo letz lc mz nzapqtr-krbo drtwrmu x mz nzrpi-krbo bamu kx kxmule-esz’ nike prtzbz bamu, a’ suti zvz drtwr Gct nzokatr-krde nimu mz zmrlz ngrde kxmyalz. Lolvz-amqngiamu nzbrtikr drtwrmu nide.
13 Lr makxtr kztemung kcng tzmncng Rom, tqmcpx-kzng Gct, nzrpibzlr bamu kx, “Nimu la.” X Mak kz kc tqapubo bade trtede, rpibzle bamu kx, “Nimu la.” 14 Male-lxblramu mqmu mz nivz mzli kc tqrmcti-lzbq-ngrnamu. Krka’-ngrne kx nimu leplz neng Jiszs Kxnzmcpx amrlx namnc-zpwxng mz nrwx.
Delape. Ninge Pita.