ПАУЛДАН ТИТКЕ ХАТ
Сосы хат, белки, Тимотейге язылган биринши хаттай болып, Паул ман оны Урымда тутнактан босатканлары сонъ язылган.
Тит Паулдынъ ювык ярдамшысы болган. Ол Коринтте Паул ман христиан ямагатынынъ ярасувында маьнели орынды туткан. Паул Титты Крит аралында янъы христиан ямагатынынъ басшысы этип калдырган эди. Хаттынъ уьш темасы бар: 1) христиан ямагатынынъ басшысы кайдай болмага тийисли; 2) ямагатта туьрли куьп аьдемлер (эсейген эм яс аьдемлер, эрлер эм хатын-кызлар, куллар) оьзлерин калай юргистпеге тийислилер; 3) Иса Масих акында акыйкат окувдынъ негизи.
11 Алладынъ кулы эм Иса Масихтинъ элшисиннен Паулдан Титке – бир иманда акыйкат улыма салам!
2 Мен Алла сайлап алганлардынъ иманын эм Алладынъ йолында барып акыйкатлыкты анълавын оьстирмеге йиберилгенмен. Элшилигим оьмирлик яшавга уьмит этуьвге негизленген. Этпеге айтканын туьрлендирмей туратаган Алла, дуныя туьзилгениннен де алдын бу яшавды ваьде эткен эди. Куткарувшымыз Алла оьз буйырыгы ман мага тапшырган уваз аркалы Оьзи белгилеген заманында Соьзин ашыклады. Атамыз Алладан эм Куткарувшымыз Иса Масихтен сага шапагат эм тынышлык болсын!
Титтинъ Крит аралында этеек иси
5 Баьри шешилмей калган ислерди сонъына еткер эм, мен сага буйыргандай, аьр бир шахарда иман ямагатларына тамадаларды айырып сал деп, сени Критте калдырганман.
6 Сайланган тамада кемшиликсиз яшайтаган, бир кере уьйленген аьдем болмага тийисли. Онынъ балалары кылыксызлыкта эм тынълавсызлыкта шуьшленмеген иманлы болмага керек.
7 Неге десе ямагаттынъ етекшиси, Алла уьйининъ ис юргистуьвшиси болганыннан себеп, кемшиликсиз яшамага тийисли. Ийнат, ашувшан, ишкиши, тоьбелескиш, непсукар болмаска керек.
8 Керисинше, конакшыл, яхшылыкты суьювши, туьз акыллы, аьдил, сыйлы, оьзин ыслап билуьвши,
9 баскаларды дурыс уьйретуьв мен насихатламага эм сол уьйретуьвге карсылык эткенлерди туьсиндирмеге куьши болар уьшин, оьзи уьйренген уьйретуьвге келисли, ынанымлы соьзди каты тутып билсин.
10 Неге десе бойсынмайтаганлар, бос соьзлилер эм алдавшылар боьтен де ювыт ынанувшылардынъ ишинде коьп.
11 Сондайлардынъ авызларын яппага керек: непсукарлыктан кайбир аьеллерде, тийисли болмаганды уьйретип, баьрисин бузадылар.
12 Олардынъ халкыннан, оьзлерининъ пайхамбарларыннан бирев: «Критшилер аьр дайымда да ялган соьзлилер, ашувлы айванлар, эриншек суганаклар», – деген.
13 Ол шаатлав дурыс. Сол себепли, иманында берк болдырар уьшин оларды аявсыз шуьшле.
14 Ювытлардынъ бос таварыхларына эм акыйкатлыктан кери кагатаган аьдемлердинъ буйырыкларына эс этпесинлер.
15 Таза яшавшыларга баьриси де таза, ама кир эм имансыз аьдемлерге эш бир зат та таза тувыл, неге десе олардынъ анъламлары да, намысы да кирленген.
16 Олар Аллады билемиз дейдилер, ама эткен ислери мен Оннан кери таятаганларын коьрсетедилер: шийкендиргиш, бойсынмайтаган эм эш бир ийги иске яравсызлар.
2Акыйкат уьйретуьвге тийисли яшав
1 Ама сен дурыс уьйретуьвге келисли болганды анълат:
2 Карт кисилер айык, тебентели, туьз акыллы, иманында, суьювинде, тоьзимлигинде берк болсынлар.
3 Карт кыскаяклылар болсалар Аллады оьрметлейтаганларга тийисли болганын кийсинлер; соьз юргистуьвши болмасынлар, ишкишиликке карыспасынлар, ийгиликке уьйретсинлер.
4 Алла соьзи яманланмас уьшин, яс хатынларга эсли болып, эрлерин яратувды, балаларын суьювди,
5 туьз акыллы, танъ, уьйине яныплы, хайырлы эм оьз эрлерине бойсынувшы болувды коьрсетсинлер.
6 Яс кисилерге де солай ок аьр исте туьз акыллы болувды насихатла.
7 Оьзинъ де, ийгиликлер этип, оларга уьлги бол. Окытувшылыгынъда аьдилликти эм тебентеликти коьрсет.
8 Карсы турганлар бизге бир яман соьз де айталмастай, уялткандай этип, бирев де шуьшлеп болмастай, дурыс соьзлер соьйле.
9 Куллар да, аьр исинде иелерине бойсынувшы болсынлар, олардынъ коьнъиллерине етпеге шалыссынлар. Терисиннен явапламай,
10 урламай, буьтинлей сенимли аьдемлер болганларын коьрсетсинлер деп, уьйрет. Солай этселер, Куткарувшымыз Алладынъ окувы аьр ягыннан калай аьлемет экенин коьрсетерлер.
11 Неге десе куткарувды беруьвши Алла шапагаты баьри аьдемлерге де ашылды.
12 Бу шапагат бизди, алласызлыктан эм дуныядынъ (айыплы) куьсевлериннен кери таювга, оьзимизди ыслап билуьвге эм бу оьмирде ойлы-эсли, туврашыл эм Алладынъ йолына келисли яшавга уьйретеди.
13 Сол вакытта, муьбарек уьмитимиздинъ толувын, уллы Алла эм Куткарувшымыз Иса Масихтинъ данък ишинде келуьвин саклаймыз.
14 Масих, бизди аьр туьрли куьнадан куткарып эм тазалап, Оьзине байыр, яхшылык этип шалыскан халк кеплестирер уьшин, Оьзин курман этти.
15 Булардынъ баьрисин каныгыслы билдир, тынълаганларды анъламага шакыр, насихатлап, тувра йолга сал. Сага эш бирев де мисетсинмей карамасын.
3Тувра болганды этуьв
1 Басшыларга, аькимлерге бойсынмага эм тынъламага, аьр дайым да ийги ислерди толтырмага аьзир болып турмага керегин иманлылардынъ эслерине туьсирип тур.
2 Биревди де яманламасынлар, татым болсынлар, яныплы айкассынлар, аьр заман баьри аьдемлерге ювас аьрекетленсинлер.
3 Неге десе бир заманларда биз де анъламсыз, тынълавсыз, алданган, туьрли (айыплы) куьсевлерге эм завыкларга кул болып, яман ниет пен куьншиликтинъ ишинде яшадык. Аьдемлер бизден шийкенетаган эдилер, биз де бир биримизди коьрип болмайтаган эдик.
4 Куткарувшымыз Алла танълыгын эм аьдемлерге болган суьйимин ашык коьрсеткен заманда,
5 бизди, эткен ийгиликлеримиз уьшин болмай, Оьзининъ рагимлиги мен янъыдан тувып тазаланувымыз бан эм Куткарувшымыз Иса Масих аркалы уьстимизге мол тоьгилген Кие Рухтынъ янъыртувы ман куткарды.
7 Энди биз, Онынъ шапагаты ман акланып, уьмитимиз беркип, оьмирлик яшавдынъ асабалары болдык.
8 Сосы соьзлер сенимли. Аллага иман эткенлерге, оьзлерин ийги ислерге багысламага эс берсинлер деп, сосы затлардынъ акында, бегитип, айтканынъды суьемен. Бу затлар аьдемлерге ийги эм пайдалы болар.
9 Тек керексиз соьз эрисуьвлерден, тукым тарихлериннен эм Таурат акында даваласувлардан, урсыслардан саклан, неге десе олар пайдасыз эм маьнесиз.
10 Боьлинуьвди излегенге бир-неше кере айтып кара, оннан сонъ ога заманынъды йиберме.
11 Бу аьдем туьз йолыннан адасып, куьналы болып, оьзи оьзине оьким шыгарганын бил.
12 Мен сага Артемасты яде Тихикти йибергенлей ок, асыгып Никополга касыма кел, неге десе сонда кысламага токтастым.
13 Законшы Зенас пан Аполлоска ярдам эт деп, тилеймен, олардынъ элгезерлигинде йол кереклерин толысынша аьзирле.
14 Бизикилер, яшавлары пайдасыз болмасын деп, оьзлерин ийгиликлер этпеге багысласынлар. Соьйтип, олар баскалардынъ керек затларын канагатлап билерлер.
15 Мени мен бирге болганлардынъ баьриси де сага салам йибередилер. Бизди суьйгенлердинъ баьрисине де салам айт. Алладынъ шапагаты баьринъиз бен бирге болсын!