1 Tɛsalonikə tɩ̀án

Təntən sagɩ tə, Polə nə pʋ́pʋ́nɩ́ ʋ pa

Tɛsalonikə

Kərisə lɩ̀à tə nə

Tɛsalonikə tɩ̀án təntən sagɩ tə yuu wa sʋgʋ

Lìù tə, ʋ nə pʋ́pʋ́nɩ́ sagɩ kʋ tə

Kʋ yɩ *tʋntʋnʋ Polə nə pʋ́pʋ́nɩ́ kʋ.

Lɩ̀à tə nə, Polə nə pʋ́pʋ́nɩ́

Sagɩ kʋ yɩ təntən sagɩ tə, Polə nə pʋ́pʋ́nɩ́ ʋ pa *Kərisə lɩ̀à tə nə, ba nə wulə Tɛsalonikə nə. Tɛsalonikə yɩ kʋ wulə Masedwanə nagwanaa tə wa.

Sagɩ tə wa sʋgʋ

Nəŋə kʋ tə yɩrɩ, Polə nə pʋ́pʋ́nɩ́ ba nə: Polə nə dɩga *Kərisə lɩ̀à púlí təntə də̀ń Tɛsalonikə nə. Yá ʋ dàń yà mɛ, sə ʋ dəri ʋ jén *Zwifə-ba duən yáá nə, ba nə wà ʋ kàrà tə sɛ̀e, ba ga zɩga ʋ nə. Polə dàń pʋ́pʋ́nɩ́ sagɩ kʋ tə, ʋ pa Kərisə lɩ̀à púlí tə nə, sə kʋ pa ʋ tʋtʋŋɩ tə kwɛn kʋ tʋn kʋ va yáá wuuu.

Polə pɩ̀à ʋ bɩrɩ də, ʋ pùə́ poli, yoo mama nə vəli zəni, Kərisə lɩ̀à púlí nədʋn təntə wa yɩrɩ. Polə bwɩ ba nə, ba nə vəli yáá tə yɩrɩ, ʋ dàń ga daŋa ba jɩ̀àn, sə ba tə kwɛn ba tʋn kʋ ba doni nətʋ. Ba cɩ́gá yà dànɩ̀ *Yuu-Tiu Zwezi-Kərisə túrí tə. Yá twara yà jə Kərisə lɩ̀à tə duən, ba duən yà nə tɩ də Yuu-Tiu tə wà twi tə yɩrɩ. Polə pɩ̀à, sə ʋ bɩrɩ ba tɩga təntə yoo nə wá ya nətə.

Polə jʋ̀nɩ̀ Kərisə lɩ̀à tə Tɛsalonikə nə

¹À mʋ̀ Polə də Siləvɛn də Timote nə pʋ́pʋ́nɩ́ nə pɩn *Kərisə lɩ̀à púlí tə nə, kʋ nə wulə Tɛsalonikə nə. Kʋ púlí təntə də nyɩna Yɩɩ də *Yuu-Tiu Zwezi-Kərisə nə vwə duən nə. Yɩɩ nə wá fwa pubwanʋ á yɩra, ʋ ga pa aba bɩcan sìə́.

Nətʋ tə Tɛsalonikə lɩ̀à nə ken ba waa Zwezi nə

(Filipə tɩ̀án 1.3-6; Kolosə tɩ̀án 1.3-8; 1 Tɛsalonikə tɩ̀án 2.13-14)

²Nə yɩjʋnɩ mama wa, nə yàá lòrì Yɩɩ nə pɩn aba, na ga kəni Yɩɩ lɛ̀eɛ̀e máŋá mama, á mama yɩrɩ. ³Nə yàá lìí á yoo máŋá mama, nə nyɩna Yɩɩ yáá con. Nə lìí nə tɩ̀àn tʋtʋŋɩ tə, á nə keni á waa Zwezi nə, wuuu á ma tʋn. Nə lìí nə tɩ̀àn də kʋ tə á sonu, tə nə tʋŋa də, á nə zɩga dɩ̀àn yala tə wa, á nə jə nə *Yuu-Tiu Zwezi-Kərisə con. ⁴Nə nubɩa-ba, nə yə̀ə́ də, Yɩɩ sóní aba. Ʋ kúrí aba, sə á ya ʋ mʋ̀ lɩ̀à. ⁵Nə swɩ̀n sʋywáŋʋ́ tə nə bɩrɩ aba. Kʋ tà də nii sʋ̀ràn cɩcɩ, kʋ yɩn də Yɩɩ dɩ̀àn tə də Yɩɩ-*Siŋu tə tʋtʋŋɩ tə. Yá nə yà ba bɛ̀eé də, sʋywáŋʋ́ tə yɩ cɩ́gá. Á yə̀ə́ nə nə jɩn nə tɩ̀àn nətʋ, nə ja yà á tətəŋi wa, sə nə ma san aba. ⁶Kʋ mʋ̀ nə pɩn, á yɩ ndə nə mʋ̀ də Yuu-Tiu nə yɩ nətʋ. Á dí càn zənzən, á ma jon Yɩɩ sʋgʋ tə. Yɩɩ-Siŋu tə nə pɩn aba pupwən. ^7-8Yuu-Tiu sʋgʋ tə zɩgɩ á con, kʋ ma yí Masedwanə nagwanaa də Akayi nagwanaa. Kʋ nətʋ dàń pɩn á jì lɩ̀à tə, Masedwanə də Akayi Kərisə lɩ̀à tə mama nə mɛ, sə ba jì ndə á nə. Kʋ tə nə súrí lá, ba swɩ̀n nətʋ tə, á nə keni á waa Yɩɩ nə, bwálɩ́ mama nə. Kʋ mʋ̀ nə pɩn, nə mʋ̀ con, kʋ ba də̀ń jə, sə nə kʋ́ʋ̀ swɩ̀n ka yoo. ⁹Lɩ̀à tə mama yàá swɩ̀n nə yoo. Ba maŋa nətʋ tə, á nə sɛ̀e á ja nəba, máŋá tə wa, nə nə twi á con. Ba maŋa nətʋ tə, á nə lwàń pubʋŋɩ á bà Yɩɩ con, kʋ pa á sɛ̀e á dʋgʋ woŋwanan, sə á ga tʋn á pa Yɩɩ nə. Yɩɩ təntə nə wulə mɩɩ wa, ʋ ga yɩ cɩ́gá. ¹⁰Yá á dàń dànɩ̀ də, ʋ bìú Zwezi tə, ʋ pìí ʋ bwin ʋ zɩ̀n tɩan wa, pìí ʋ naŋa yɩɩ ʋ bɩ̀àn. Ʋ mʋ̀ Zwezi tə nə jon nəba Yɩɩ bʋ̀rà tə wa, kʋ nə bɩ̀àn.

Tʋtʋŋɩ tə, Polə nə tʋn, Tɛsalonikə nə yoo

(Tʋtʋnan 20.18-21, 31-35; 2 Korɛntə tɩ̀án 4.1-2, 5; 6.3-10; 12.12-15)

¹Nə nubɩa-ba, á tətə yə̀ə́ kʋ zəni də, nə nə twi á con tə, kʋ wà tʋtʋ yɩn. ²Á yəni də, nə dí càn də ba fɩfɩn nəba Filipə nə, kʋ tə wà dàn. Kʋ kwa nə, nə nyɩna Yɩɩ pɩn fən kʋ́ʋ̀ ba nəba jə, sə nə swɩ̀n sʋywáŋʋ́ tə, nə bɩrɩ aba də, yìə̀n nə swə tə zɩga, sə tə cɩ̀ kʋ yáá nə də. ³Nə kwìə̀ tə, nə nə kwè lɩ̀à tə nə wà kʋnkʋn, nə à yə̀ə́ pubʋnkʋkwɩʋn sʋ̀ràn, nə twá nə ma kwè ba. Yá nə wà sírí ken, sə nə pa ba jén. ⁴Yɩɩ dàń nə nɩ də, nə mɛ, sə ʋ pa nəba sʋywáŋʋ́ tə, ʋ ma pa kʋ nəba. Kʋ mʋ̀ nə pɩn, nə dàń nə swɩ̀n kʋ tà, sə nə ma poli ləzoni pwìí, kʋ ya, sə nə ma poli Yɩɩ pùə́. Ʋ mʋ̀ nə yə̀ə́ nə pubʋŋɩ tə də̀ń, nə lù nətʋ. ⁵Ndə á nə yə̀ə́ kʋ nətʋ, nə tə wà gɩgara sʋ̀ràn swɩ̀n á con mama, nə ga tə wà sʋ̀ràn swɩ̀n, sə nə ma pɩ̀à səbɩa. Yɩɩ yə̀ə́ yoo təntə zəni. ⁶Nə wà pɩ̀à, sə nə na dun ləzoni yáá con, kʋ nə yɩ á mʋ̀ yáá con, nə à yə̀ə́ ba duən yáá con. Yá nə yà ga nə ya Zwezi-*Kərisə *tʋntʋna tə, nə yà wàá dɩ̀àn nə də́ á yuu wa. ⁷Kʋ ga wà nətʋ yɩn. Nə waa yɩn bwànɩ̀ á yuu wa máŋá tə wa, nə nə yɩn á con, ndə nuu nə ywàŋá ʋ bɩa yuu nətʋ. ⁸Nə wʋbwanʋ təntə nə pɩn nə wà sóní, sə nə swɩ̀n Yɩɩ sʋywáŋʋ́ tə cɩcɩ nə bɩrɩ aba. Nə sóní də, kʋ nə yɩ tɩan də, sə nə sɛ̀e nə tɩ á yɩrɩ. Kʋ nətʋ tə bɩrɩ də, á yoo cà kʋ pa nəba. ⁹Nə nubɩa-ba, á dàń wàá á tɩ̀àn á lìí tʋtʋncaran tə, nə nə yàá tʋn, də gwarʋ tə kʋ nə yàá yí nəba yoo. Nə yàá tʋn tɩtɩn də yɩcaʋ, sə kʋ pa nə dàn ká ya á lìù mama yuu zɩlɩ. Yá nə swɩ̀n Yɩɩ sʋywáŋʋ́ tə nə bɩrɩ aba.

¹⁰Nə yɩn də á mʋ̀ lɩ̀à tə, á nə keni á waa Zwezi nə wuuu, nə bɩrɩ aba də, nə yɩ lɩ̀à tə, ba nə yɩ Yɩɩ nə tɩ, nə yɩ cɩ́gá tɩ̀án Yɩɩ yáá con. Yoo mama yà tə̀lə́ nə yuu wa, lìù nə wàá nə nii nə ʋ caga kʋ yɩrɩ. Á mʋ̀ nɩ kʋ tə, nə nə yɩn, Yɩɩ də ga na kʋ. ¹¹Á yə̀ə́ də, kʋ tə, nə nə tʋn də á lìù mama, kʋ ya ndə nyɩna də ʋ bɩa nə. ¹²Nə kwè aba, nə pa á bɩcanɩ zùrì. Nə zɩgɩ dɩ̀àn nə lòrì aba, sə á yà lɩ̀à tə, á nə mɛ, də Yɩɩ kúrí aba, sə á twá á ya ʋ pàrɩ̀ tə wa, də ʋ dun tə wa.

(1 Tɛsalonikə tɩ̀án 1.6-10; 2 Tɛsalonikə tɩ̀án 1.4-5)

¹³Nə nə swɩ̀n Yɩɩ sʋgʋ tə á con, á ken á waa kʋ nə ndə Yɩɩ sʋgʋ nə. Á wà kʋ cɩ́gá pɩn ndə ləzoni sʋgʋ nə. Kʋ cɩ́gá ga ya Yɩɩ sʋgʋ tə, kʋ nə tʋŋa á mʋ̀ lɩ̀à tə, á nə ken á waa Zwezi nə bɩcanɩ wa. Kʋ mʋ̀ nə pɩn, nə kəni Yɩɩ lɛ̀eɛ̀e wuuu. ¹⁴Nə nubɩa-ba, á də yɩ ndə Kərisə lɩ̀à púlə́ tə nə yɩ nətʋ, tə nə wulə *Zwide nagwanaa wa, tə də Zwezi-Kərisə nə vwə duən yɩra. Kʋ mʋ̀ nə pɩn, á tətə dwíí tɩ̀án tə ma kə càn á nə, ndə *Zwifə-ba də nə ken càn ba nə nətʋ. ¹⁵Mə ba mʋ̀ nə gʋa *Yuu-Tiu Zwezi də Yɩɩ nii *sʋ̀sʋ̀nà tə, ba ga fɩfɩn nəba. Ba mʋ̀ ba Yɩɩ pùə́ poli, ba ga ya lìù mama dʋŋʋ. ¹⁶Ba mʋ̀ nə kəni dɩ̀àn ba cɩ̀ nə nə, sə nə dàn ká swɩ̀n Yɩɩ sʋgʋ tə nə bɩrɩ lɩ̀à tə, ba nə tà Zwifə-ba, sə kʋ jon ba ba cʋna tə wa. Ba fwa nətʋ, ba ma súrí ba cʋna tə wuuu. Yɩɩ bʋ̀rà tə dàń twi kʋ ja ba, də máŋá don wa.

Polə swə, sə ʋ pìí ʋ va Tɛsalonikə

(Romə tɩ̀án 1.9-13; Tʋtʋnan 17.14-16; 14.22)

¹⁷Nə nubɩa-ba, nə mʋ̀ də á mʋ̀ pwɛ̀e nə yá duən, máŋá mancɩn wa. Nə kʋ́ʋ̀ tə̀lə́ duən nə, yá nə bɩcanɩ ga tə bʋŋa á yoo wuuu. Á fɩra jɩn nəba zənzən! Yá nə yà sóní, sə nə pìí nə na aba nə yɩ́á wa. Kʋ mʋ̀ nə pɩn, nə dàń ma bɩbarɩ, sə kʋ yoo təntə wànɩ́ kʋ tʋn. ¹⁸Nə yà pɩ̀à, sə nə pìí nə bà á con. À mʋ̀ Polə də́də́n, sə à bà á con, kʋ nɛɛ cé duən, yá *Sɩtana cɩ̀ nə yáá nə, kʋ wà wànɩ́. ¹⁹Nə jə yala nə wulə pupwən wa á yɩrɩ. Máŋá tə wa, nə *Yuu-Tiu nə wá pìí ʋ bà, á wá ya ndə dun yupuu nə, ʋ nə wá pa nəba. ²⁰Á mʋ̀ cɩ́gá nə ya nə dun də nə pupwən.

¹Nə dàn wuuu nə ga, nə kʋ́ʋ̀ wàrɩ̀ nə dànɩ̀. Nə nɩ də nə mɛ, sə nə ya Atɛnə wa yəbə cɩcɩ. ²Kʋ mʋ̀ nə pɩn, nə ma tʋn Timote á con. Ʋ yɩ nə nubiu Kərisə yɩrɩ, ʋ nə tʋŋa ʋ pɩn Yɩɩ nə. Ʋ də swɩ̀n Zwezi-Kərisə sʋywáŋʋ́ tə ʋ bɩrɩ. Nə tʋn wá á con, sə ʋ bà ʋ kwè aba ʋ pa á zɩgɩ dɩ̀àn, sə á kə á waa Zwezi nə wuuu. ³Nə pɩ̀à, sə á lìù mama dàn ká dʋgʋ Yɩɩ cwəŋə tə, càn zənzən tə yɩrɩ, nə nə wulə tə wa. Á tətə yə̀ə́ də, kʋ yoo təntə mɛ, sə kʋ tʋn nə mʋ̀ lɩ̀à tə yɩra, Yɩɩ nə kúrí. ⁴Máŋá tə wa, nə nə yɩn á con, nə yà dí yáá nə swɩ̀n á con də, ba wá kə càn zənzən nə nə. Á də yə̀ə́ də, kʋ mʋ̀ máŋá təntə dàń nə yí. ⁵À dàń nə kʋ́ʋ̀ wàrɩ̀ à pɩ́nɩ́, à dànɩ̀ á yoo wa. Kʋ mʋ̀ nə pɩn, à ma tʋn Timote á con. À tʋn wá, sə ʋ bà, ʋ na nətʋ tə, á tə nə keni á waa Zwezi nə wuuu. Fən yà jə nə də, *Sɩtana nə wá bà ʋ də́də́n aba, sə ʋ yigu aba ʋ pa á tʋn yokʋkwɩʋn. Də kʋ nə jigə nətʋ, ʋ wá pa nə tʋtʋŋɩ tə mama jì tʋtʋ.

⁶Sɩ́ʋ́n nə, Timote pìí ʋ nan á con, ʋ bà nə con. Ʋ swɩ̀n ʋ bɩrɩ nəba də, yìə̀n tə mama ziən á con. Ʋ swɩ̀n də, á keni á waa Zwezi nə wuuu. Ʋ bɩrɩ nəba, nətʋ á nə sonu də, nətʋ tə á nə tə lìí nə yoo zəni zəni máŋá mama. Ʋ bɩrɩ nəba, nətʋ tə, á nə pɩ̀à, sə á pìí á na nəba, ndə nə də nə pɩ̀à, sə nə na aba nətʋ. ⁷Nə nubɩa-ba, kʋ mʋ̀ dàń nə pɩn, nə wʋwalʋ tə mama wa, də nə càn zənzən tə mama wa, nə bɩcanɩ zùrì, də á nə ken á waa Zwezi nə. ⁸Á zɩga dɩ̀àn *Yuu-Tiu nyiən tə wa. Kʋ mʋ̀ nə pɩn sɩ́ʋ́n nə, nə mɩɩ kʋ́ʋ̀ pìí kʋ siŋə cɩ́gá cɩ́gá. ⁹Bɛ̀eɛ̀e won nə, nə wá tʋn, nə ma kə Yɩɩ lɛ̀eɛ̀e á yɩrɩ? Nə wàrɩ̀ nə nyɩna Yɩɩ lɛ̀eɛ̀e nə kəni nə zwɛ̀e, pupwən tə yɩrɩ, nə nə jə á yuu wa Yɩɩ yáá con. ¹⁰Tɩtɩn də yɩcaʋ mama, nə yàá lòrì Yɩɩ cɩ́gá cɩ́gá, sə ʋ pa nəba cwəŋə, sə nə pìí nə na aba nə yɩ́á wa. Nə pɩ̀à nə súrí won tə, kʋ tə nə mùrì aba, á nə keni á waa Zwezi nə, yoo wa.

¹¹Nə nyɩna Yɩɩ tətə, də nə Yuu-Tiu nə wá kwɛn cwəŋə, sə nə wànɩ́ nə bà nə na aba. ¹²Yuu-Tiu wá pa á sonu tə, á nə swə duən tə súrí wuuu. Yá, sə kʋ sonu tə wànɩ́ kʋ yí lɩ̀à tə duən tə mama, ndə nə sonu tə yiri tə nə, nə nə swə aba. ¹³Yuu-Tiu nə wá pa á zɩgɩ dɩ̀àn. Ʋ wá pa, á ya ʋ lɩ̀à tə ʋ nə tɩ, cʋna dàn ká ya á yuu wa, lìù nə wá cəgə aba kʋ yɩrɩ, ba nə wá caga á nii nə tə yɩrɩ, nə nyɩna Yɩɩ yáá con kʋ máŋá tə wa, nə Yuu-Tiu Zwezi nə wá pìí ʋ bà də lɩ̀à tə mama, ba nə yɩ Kərisə nə tɩ.

Nətʋ tə Yɩɩ nə swə, sə ʋ lɩ̀à ya yoo

(1 Piyɛrə 1.14-16, 22; 4.1-5; 1 Korɛntə tɩ̀án 6.13-20)

¹Nə nubɩa-ba, kʋ tə nə nə kʋ́ʋ̀ wá swɩ̀n, nə súrí lá, nə bɩrɩ aba nətʋ tə, á nə mɛ, sə á ya, sə kʋ poli Yɩɩ pùə́. Á cɩ́gá twá kʋ nii nə. Nə dàń tə lòrì aba pwəpwə, nə ga kwè aba də *Yuu-Tiu Zwezi yɩrɩ tə, sə á tə tʋn kʋ, á doni nətən. ²Á yə̀ə́ kwìə̀ tə, Yuu-Tiu Zwezi nə pɩn, nə ma kwè aba. ³Kʋ tə Yɩɩ nə pɩ̀à, kʋ mʋ̀ nə yɩ, sə á yà lɩ̀à tə, ʋ nə yá á tɩ̀àn mɩ́ámɩ́án Yɩɩ jɩ̀àn wa. Ʋ pɩ̀à, sə á cɩ̀ á tɩ̀àn nə, á dànà ká pəni duən nə vɛɛ vɛɛ. ⁴Ʋ pɩ̀à, sə á lìù mama lwarɩ, ʋ nə mɛ, sə ʋ ja ʋ tɩ̀àn nətʋ, ʋ ma swe ʋ kan, sə kʋ bɩrɩ də ʋ yɩ Yɩɩ nə tɩ, ndə lìù tə, ʋ nə Yɩɩ tə nə mɛ, sə zìlə́ ga ya kʋ wa. ⁵Á dànà ká twá á pùə́ yokʋkwɩnan fɩra tə nə, ndə lìù tə nə, ʋ nə yə̀rì Yɩɩ, nə yáá fwa nətʋ. ⁶Kʋ mʋ̀ yoo təntə wa, sə lìù mama dàn ká fwa yoo tə, kʋ nə wà mɛ ʋ don yɩra ʋ nə yɩ ʋ nubiu *Kərisə yɩrɩ. Ʋ wà mɛ, sə ʋ cʋ̀gʋ̀ ʋ yìə̀n. Nə dí yáá nə swɩ̀n kʋ yoo tə á con cɩ́gá cɩ́gá, nə tún lá. Yuu-Tiu wá kə càn lɩ̀à tə nə, ba nə tʋŋa tə yolwana təntə. ⁷Á yə̀ə́ də, Yɩɩ wà nəba kúrí, sə nə tún durən yìə̀n. Ʋ kúrí nəba, sə nə yà lɩ̀à tə, nə nə yá nə tɩ̀àn mɩ́ámɩ́án. ⁸Kʋ mʋ̀ nə pɩn, lìù tə, ʋ nə vɩga kàrà kʋ tə, kʋ ya Yɩɩ nə ʋ vɩga. Kʋ tà ləzwənə nə ʋ vɩga. Yá Yɩɩ nə pɩn aba ʋ *Siŋu tə.

⁹Kʋ nə yɩ nətʋ tə, á nə mɛ, sə á sóní duən yoo wa, kʋ kʋ́ʋ̀ ba də̀ń jə, sə nə pʋ́pʋ́nɩ́ kʋ nə bɩrɩ aba. Yɩɩ tətə nə dí yáá ʋ bɩrɩ aba nətʋ, á nə mɛ, sə á sóní duən. ¹⁰Mə kʋ mʋ̀ sonu təntə nə, á swə lɩ̀à tə mama, ba nə yɩ à nubɩa Kərisə yɩrɩ, ba nə wulə Masedwanə nagwanaa tə mama wa. Nə nubɩa-ba, nə tə lòrì aba, sə á tʋn kʋ, á doni nətən. ¹¹Á kəni dɩ̀àn, sə á ya duən nə də sìə́, sə á lìù mama ywàń ʋ tətə tʋtʋnan yuu, sə á tətə nə tʋn də á tətə jɩ̀àn, á ma pɩ̀à á nii wodiu, ndə nə nə bɩrɩ kʋ aba nətʋ. ¹²Kʋ nətʋ tə nə wá pa lɩ̀à tə, ba nə tà Kərisə lɩ̀à zìlí aba. Yá á kʋ́ʋ̀ ba ya lìù mama yuu zɩlɩ.

Ka pìí ka bwin ka nan tɩan wa yoo

(1 Korɛntə tɩ̀án 15.19-58)

¹³Nə nubɩa-ba, nə pɩ̀à, sə á lwarɩ cɩ́gá tə, ka nə wulə lɩ̀à tə, ba nə tɩga tə yoo wa. Kʋ nətʋ wá pa, á dàń ká ya pucʋnɩ wa, ndə lɩ̀à duən nə, ba nə ba yala jə, də ba wá ya də Yɩɩ. ¹⁴Nə pɩn cɩ́gá də, Zwezi tɩga, ʋ pìí ʋ bwin ʋ nan tɩan wa. Yá mə nətʋ tətə nə, Yɩɩ wá bwin tɩga tə, ba nə keni ba waa Zwezi nə, ʋ súrí Zwezi nə.

¹⁵Á nəŋə kʋ tə, *Yuu-Tiu nə kàrɩ̀ nəba, nə nə pɩ̀à, nə swɩ̀n nə bɩrɩ aba. Kʋ mʋ̀ nə yɩ, máŋá tə wa, Yuu-Tiu nə wá pìí ʋ bà, nə mʋ̀ lɩ̀à tə, nə nə tə wà tɩ tə, nə bá də́ tɩga tə yáá. ¹⁶Yɩɩ wá pa nii. *Malɩkɛ pɩ̀ʋ́ tə wá swɩ̀n də kori nəfarʋ. Ba wá wúrí Yɩɩ nabwana. Kʋ máŋá tə wa, Yuu-Tiu tətə wá nan Yɩɩ nə ʋ cú. Yá *Kərisə lɩ̀à tə, ba nə tɩga, wá dí yáá ba bwin ba nan tɩga wa. ¹⁷Kʋ kwa nə, nə mʋ̀ lɩ̀à tə, nə nə wulə mɩɩ wa, nə dàń wá zàn, nə twá ba nə. Nə wá dɩ̀ bakwan tə wa, nə jə́rí Yuu-Tiu lanworu tə wa. Yá nə dàń wá ya də Yuu-Tiu máŋá mama wuuu. ¹⁸Á twá sʋ̀ràn tə tə nə, á ma zùrì duən bɩcanɩ.

Ka kə sírí máŋá mama, ka dàn Zwezi yoo

(Matiə 24.36-51; Likə 12.35-40; 21.34-36; Romə tɩ̀án 13.11-14)

¹Nə nubɩa-ba, kʋ kʋ́ʋ̀ ba də̀ń jə, sə ba pʋ́pʋ́nɩ́ ba pa aba, sə á lwarɩ máŋá tə də dɩɩn tə, nə *Yuu-Tiu nə wá pìí ʋ bà. ²Á tətə yə̀ə́ kʋ zəni də, Yuu-Tiu túrí dɩɩn tə wá ya, ndə ŋwɩ̀àn nə yàá ŋʋ, tɩtɩn nə máŋá tə wa, ba nə ba ʋ yoo bʋŋa. ³Máŋá tə wa, ləzoni nə wá swɩ̀n, ba wʋ́: «Lʋʋ zùrì! Yolwan kʋ́ʋ̀ bá bà». Mə kʋ máŋá tə wa, nə ba wá cʋ̀gʋ̀ mɩ́ámɩ́án naa nədʋ. Kʋ wá dɩ̀ ba yuu, ndə kan pùə́ nə yàá yɩ nətʋ, ʋ lʋrɩ máŋá wa. Yá ba lìù mama bá jén. ⁴Nə nubɩa-ba, á mʋ̀ tà yikunu wa lɩ̀à, sə kʋ dɩɩn təntə ma twi kʋ dɩ̀ á yuu ndə ŋwɩ̀àn nə. ⁵Á mʋ̀ mama yɩ poni lɩ̀à, á yɩ yɩcaʋ lɩ̀à. Nə tà yikunu lɩ̀à, nə yɩ poni lɩ̀à. ⁶Kʋ mʋ̀ yɩrɩ nə, nə mʋ̀ dànà ká dwɛ̀e, ndə lɩ̀à duən nə. Nə mʋ̀ kʋ́ʋ̀ wà mɛ, sə nə dwɛ̀e, sə nə ya lɩ̀à tə, nə nə bʋŋa zəni. ⁷Mə tɩtɩn nə nə, lɩ̀à yàá dwɛ̀e. Mə tɩtɩn nə nə, lɩ̀à yàá nyʋ swana ba sú. ⁸Nə mʋ̀ lɩ̀à tə, nə nə yɩ yɩcaʋ lɩ̀à, nə mɛ, sə nə ya lɩ̀à tə, nə nə bʋŋa zəni. Nə mɛ, sə nə kəni nə waa Zwezi nə wuuu, nə ga sóní lɩ̀à tə, kʋ mʋ̀ nə wá ya ndə pamana lugu gànʋ̀ nə, nə nə zʋa. Nə ga jə yala də Yɩɩ wá jon nəba nə cʋna tə wa. Nə tì yala təntə nə, ma fwa ndə pamana lugu yupuu nə. ⁹Yɩɩ nə kúrí nəba, sə ʋ twá də nə *Yuu-Tiu Zwezi-*Kərisə, ʋ jon nəba. Ʋ wà nəba kúrí, sə ʋ cʋ̀gʋ̀ nəba də ʋ lɩŋa tə, tə nə dáá zənzən. ¹⁰Kʋ mʋ̀ yɩrɩ nə, Zwezi-Kərisə tɩga nə yɩrɩ, sə nə vwə nə tɩ̀àn ʋ nə ma ya mɩɩ wa, də nə nə tɩga, nə à yə̀ə́ də nə mɩɩ nə wulə máŋá tə wa, ʋ nə wá bà. ¹¹Kʋ mʋ̀ yɩrɩ nə, sə á dàn duən jɩ̀àn, sə á san duən nə, ndə nətʋ tə á nə dí yáá, á tʋŋa kʋ.

Sagɩ tə yígúrə́ sʋ̀ràn

(Ebərə-ba 13.7, 17, 20-21; Galasi tɩ̀án 6.1-2; Romə tɩ̀án 12.17-21; 1 Korɛntə tɩ̀án 1.8-9)

¹²Nə nubɩa-ba, nə lòrì aba, sə á zìlə́ lɩ̀à tə, ba nə tʋŋa á pwərə wa. Ba mʋ̀ lɩ̀à tə *Yuu-Tiu nə tún, sə ba ywàń á yuu wa, sə ba kwè aba. ¹³Á zìlə́ ba zənzən, sə á sóní ba ba tʋtʋŋɩ tə yɩrɩ, ba nə tʋŋa. Á pɩan bɩcan sìə́ ya á pwərə wa.

¹⁴Nə nubɩa-ba, nə kwè aba, sə á caga yayɩnyɩna tə nii nə, sə á zùrì ba tə, fən nə jə ba jɩ̀àn. Á saŋa labwana tə nə, á jana pɩ́nʋ́ ba mama yoo wa. ¹⁵Á cɩa á tɩ̀àn nə, sə lìù mama dàn ká tʋn lwanɩ, ʋ ma ŋwɩ́n lwanɩ. Máŋá mama, sə á tʋn zəni duən yɩra də ləzoni tə mama yɩra.

¹⁶Dɩɩn mama, sə á ya pupwən wa. ¹⁷Á jʋ̀ná Yɩɩ máŋá mama, á dànà ká yá. ¹⁸Á kəni Yɩɩ lɛ̀eɛ̀e won mama wa. Yɩɩ nə swə kʋ nətʋ tə, á nə vwə *Kərisə yɩra tə yɩrɩ.

¹⁹Á dànà ká cɩ̀ Yɩɩ-*Siŋu tə tʋtʋŋɩ yáá nə. ²⁰Yɩɩ yàá twá ʋ nii *sʋ̀sʋ̀nʋ̀ nə, ʋ kàrɩ̀ aba. Á dànà ká mun kàrà təntə. ²¹Yoo mama wa, sə á dí yáá á ywàń kʋ wa, á kúrí kʋ tə, kʋ nə ziən, á lɩ á pa á tɩ̀àn nə. ²²Yoo mama wa, cɩa á tɩ̀àn nə də lwanɩ yiri mama.

²³Yɩɩ tə, ʋ nə pɩn bɩcan sìə́ pa, sə á ya ʋ mʋ̀ nyiən mɩ́ámɩ́án. Ʋ mʋ̀ nə wá cɩ̀, sə á tətə mama, də á pubʋŋa tə, də á jə̀rə́ tə, də á yɩra tə dàn ká ja lwanɩ, ba nə wá swɩ̀n tə yoo, dɩɩn tə nə nə Yuu-Tiu Zwezi-Kərisə nə wá pìí ʋ bà. ²⁴Yɩɩ kúrí aba. Yá ʋ mʋ̀ ga nə yɩ pùə́ nədʋ. Yá ʋ mʋ̀ nə wá tʋn kʋ yoo təntə.

²⁵Nə nubɩa-ba, á jʋ̀ná Yɩɩ də á pa nəba. ²⁶Á jʋ̀ná lɩ̀à tə duən tə mama, ba nə yɩ á nubɩa Kərisə yɩrɩ, də zìlə́ zənzən də sonu, ndə Kərisə lɩ̀à nə mɛ, sə ba fwa nətʋ. ²⁷À lòrì aba pwəpwə də Yuu-Tiu yɩrɩ tə, sə á kàrɩ̀ sagɩ kʋ tə lɩ̀à tə mama yáá con, ba nə yɩ nubɩa Kərisə yɩrɩ. ²⁸Nə Yuu-Tiu Zwezi-Kərisə nə wá fwa pubwanʋ á yɩra.