UGUBULO

UGUBULO

ENK’HIGWE YOHANA

ULONGOELO

Kitabu cho Ugubulo nicho kitabu cho uheelo mwe Ndagano Imp’ya, naho nekinda kitabu cho uheelo mwo kuwandikwa. Chawandikagwa ni Mwigala Ulosi Yohana mwo mwaka wa milongo kenda na mishano kulawa aho Yesu eze elekwe. Ugubulo 1:1. Uyu niye awandike Mbuli Yedi iwandikwe ni Yohana ne baluwa ziya zint’hatu baluwa ya nk’hongo ya Yohana na baluwa ya kaidi ya Yohana na baluwa ya katatu ya Yohana. Iviyaiviya Yohana amanyikaga kugamba niye mwana mp’hina “aungisagwa ni Yesu.” Yohana awandikaga kitabu iki cho Ugubulo mwo lupisi aho akanda uko kwe kisiwa cha Patimo, nakagelwa uko enga mvugailwa kwaviya naakabilikiza Mbuli Yedi ya Yesu Kilisito, Ugubulo 1:9.

Yohana awandikaga kitabu iki akataila kuwagela moyo awo awawandikile vileke wasigale kunda wahuwilwa kwa Yesu Kilisito, na kuwenk’ha kawiilo kwa viya kuuya kwa Yesu Kilisito kwi hagihi, Ugubulo1:3; 22:7. Awawandikilaga want’hu wose wamhuwile Kilisito na kwa mafyo mfungate ya wahuwila wa Kilisito yalagiswe mwo mnango 2-3. Yohana agamba, baluwa ino ni ulotezi, Ugubulo 1:3, naho atambalisa Ulosi mwe kitabu iki chose kwa vint’hu alagiswe. Kitabu kiligana na mafungu yamwenga ye mwe Ndagano ya Kale, vitendese mwe kitabu cha Zakalia 6:1-8. Iviyaiviya magunda mfungate ne viziga mfungate, valigana kwa hagihi na mavuma ayo Mnungu awatoelaga Wamisili Kulawa 7-9. Kitabu cho Ugubulo chasimuila mbuli zo lupisi lwo uheelo ulo Yesu naande mhumi, na wose wamhuwile nawekale naye ulo na ulo. Haluse kitabu iki chataila kukukanya weye na kukwink’ha kawiilo kugamba Yesu ehagihi kuuya.

Yemndani

Yohana akonga kwa kuketambula na kulonga ivo ahokele sozi izi ze kiulotezi 1:1-20.

Ayenk’ha mafyo mfungate Ulosi wawe kulawa kwa Yesu mwenye.

Akajika, atambalisa mbuli ya maduha mfungate 4:1-8:5 na magunda mfungate 8:6-11:19.

Naho Yohana atambalisa mbuli ye nk’hondo ikutowanwa ni mwana kilume kudihiga dizoka dye mitwi mfungate 12:2-14:20.

Kulawa aho, awandika mbuli ye viziga mfungate va maya 15:1-16:18.

Naho Yohana asimuila ivo Mnungu akuwahuma wank’hongo wakwe uko kwe mbingu 17:1-20:15.

Abindiliza kwa kutambalisa mwe mbuli ye mbingu mp’ya ne isi mp’ya vikuunga vize kwo uheelo 21:1-22:21.

¹Yesu Kilisito nakenk’higwa Ugubulo uno ni Mnungu, vileke awalagise wandima wakwe mbuli zikuunga zisunguze kulaila. Kilisito amtumaga mtumigwa ywakwe ywa kwe mbingu amgambile Yohana mtumwa ywakwe zimbuli izo, ²uyo alongaga uwona mwe zimbuli zose aone no ulosi wa Mnungu we kindedi ugubulwe ni Yesu Kilisito. ³Kavikilwa yudya naasome ikitabu iki cho ulosi we kilotezi na yudya akwiva no kuyatoza ayo yawandikwe umu, kwaviya mbuli izi zihagihi kulaila.

Ndamsa kwe mafyo mfungate ya wahuwila wa Kilisito.

⁴Miye Yohana nawawandikila mafyo mfungate ya wahuwila wa Yesu Kilisito uko Asia.

Uwedi wa Mnungu no utondowazi wakwe, yehe Mnungu eyaho naho uyo andaga uuko, naho akuunga eze, naho kulawa kwe miuye mfungate ihameso ho ukalo we kiseuta, ⁵naho kulawa kwa Yesu Kilisito muwona mhuwilwa, mwelekwa ywa nk’hongo ywa wabanike, naho yehe niye mkulu wa maseuta mwe isi.

Yehe kakiungisa naho kakitenda walekelwa kulawa mwo wavu wetu kwa sakame yakwe. ⁶Kakitenda kunda walava nt’hambiko kwa Mnungu uyo ise dya Yesu. Uwedi utendese wa Mnungu no udahi wa ulo na ulo unde wakwe Yesu Kilisito! Taile.

⁷Kauleni eza mwa mavunde, want’hu wose hamwenga na wadya wamtungile mkuki nawamuwone, makabila yose mwe isi nawahongeze umwo wakamuona yehe. Heiye. Taile.

⁸Zumbe Mnungu Mta Udahi Wose agamba, ni miye ywa nk’hongo na ywe nk’homelezo we vint’hu vose, uyo eyaho naho andaga uuko naho akuunga eze.

Yohana alagiswa maona mwa Kilisito

⁹Miye Yohana ndugu ywenyu, naho mwe kulunganywa na Yesu, chanda ndala na nyuwe mwe makunt’ho no useuta wa Mnungu kwa kufinyiliza kutendese mwe kulungana na Kilisito. Miye nehigelwa mwe kisiwa kikwitangwa Patimo handa mvugailwa kwaviya nehabilikiza Ulosi wa Mnungu, no kulonga uwona wa Yesu. ¹⁰Zuwa dimwenga dya kumvika Zumbe, nehitozwa ni Muye ywa Mnungu, niyo neva izwi kulu dikuila enga gunda. ¹¹Dikanigamba, “Wandika mwe kitabu zimbuli izo ukuziona, naho zigale kwa mafyo mfungate ya wahuwila wa Kilisito uko Efeso na Similina na Peligamo na Tiatila na Salidi na Filadelifia hamwenga na Laodekia.”

¹²Niyo nahituka nikaule ni ani naakalonga na miye, nize nihituke niyo naona vinala mfungate va vimuli vidamanywe kwa zahabu. ¹³Naho mgati mwe vinala ve vimuli, mwandaga na yumwenga enga mnt’hu availe nk’hazu nt’hali, na kukakilizwa mkoa wa zahabu mwe kifua chakwe. ¹⁴Fili zakwe zang’alaga mbee enga sufi naho enga balafu, meso yakwe yandaga enga moto ukulimbija, ¹⁵viga vakwe neving’ala enga shaba isunt’higwe vitendese enga yokigwa mwe dikawa dya moto, izwi dyakwe nadyo dyandaga enga bohelo dya mazi. ¹⁶Mwo mkono wakwe wa kulume atozaga nt’hondo mfungate, mwo mnomo wakwe mwalawaga bamba dikutwa kosekose, uso wakwe noukamweka enga zuwa dikwalikisa kwa ludole. ¹⁷Nize nimuwone niyo nagwa he viga vakwe enga mnt’hu abanike, mna yehe niyo anigeleka mkono wakwe wa kulume akagamba, Usekogoha! Ni miye ywa nk’hongo naho ywe nk’homelezo. ¹⁸Miye ni mgima! Nehibanika, mna ivi haluse ni mgima ulo na ulo, naho nnanazo zink’homoelo ze file ne isi ya want’hu wabanike. ¹⁹Naho uwandike ayo uone, aya ukuona ivi haluse hamwenga na yadya yakuunga yalaile. ²⁰Kinyele kiya che zint’hondo mfungate izo uzione mwo mkono wangu wo kulume ne kinyele che vinala mfungate ve vimuli ve zahabu ni iki. Zint’hondo ziya mfungate ni watumigwa wa kwe mbingu wa mafyo ya wahuwilwa wa Kilisito naho vinala viya mfungate ve vimuli ve zahabu ni mafyo mfungate ya wahuwila wa Kilisito.

Ulosi kwa Waefeso

¹Umuwandikile mtumigwa ywa kwe mbingu ywe difyo dya wahuwila wa Kilisito uko Efeso.

Ino niyo milosi ya yudya atozile zint’hondo mfungate mwo mkono wakwe wo kulume naho yudya akugenda mgati mwe vinala mfungate ve vimuli ve zahabu. ²Hiumanya udamanyi wako wose naho himanya kukombeka kwako na kufinyiliza kwako. Naho himanya kugamba hukudaha kuwafinyiliza want’hu wavu, naho kuwahima wadya wakukegamba ni wegala ulosi wa Mnungu mna hiyo ivo, kubunk’hula kugamba wadant’hi. ³Himanya kugamba nokunda na ugoji no kufinyiliza kwajili ye dizina dyangu, naho husokele. ⁴Mna nna mbuli imwenga ya kukulonga, kugamba kululeka lukunde lwako lwa nk’hongo. ⁵Elo kumbukila ivo wandaga umwo wandile ukei kugwa, ukweiile wavu wako ukayadamanye yadya noukadamanya aho nk’hongo. Mna hunadamanye ivo neza kwako, name nenikikiuse ikinala chako aho kili. ⁶Mna mbuli ino unanayo, ni kugamba wauihiya udamanyi wa Wanikolai udya name huuihiya.

⁷“Mta magutwi eve vedi ayo Muye akuyagambila mafyo ya wahuwila wa Kilisito!

“Akuunga ande mhumi nenimtende adye matunda yo mti wo ugima uhandigwe mwe kiunga cha Mnungu.

Ulosi kwa Similina

⁸“Umwandikile mtumigwa ywa kwe mbingu ywe difyo dya wahuwila wa Kilisito uko Similina kugamba,

“Aya nayo akulonga uyo ywe nk’hongo na ywe nk’homelezo, uyo abanike no kunda mgima. ⁹Hiyamanya makunt’ho yako, no ukiwa wako, mna ikindedi weye wi mgoli! Himanya ivo wakukukalaliza wadya wakukegamba Wayahudi mna hiyo Wayahudi we kindedi, woho ni we difyo dya want’hu wo Mwavu! ¹⁰Usekwogoha kint’hu chochose kwa yadya yakuunga yakusulumize. Tegeleza! Mwavu naawagezeni wose no kuwagela wamwenga wenyu mwe divugailo naho makunt’ho yenyu nayande mazuwa mlongo. Mnde wahuwilwa hata mnaungwa kubanika. Miye neniwek’he nt’hunyo dyo ugima.

¹¹“Mta magutwi eve vedi yadya muye akuyagambila mafyo ya wahuwila wa Kilisito.

“Mhumi haalumizwe mbwitu ni file ya kaidi.

Ulosi kwa Wapeligamo

¹²“Umuwandikile mtumigwa ywa kwe mbingu ywe difyo dya wahuwila wa Kilisito dya Peligamo kugamba,

“Uno nuwo ulosi kulawa kwa yudya endile na sime. ¹³Hihamanya aho ukwikala aho he difumbi dyo Mwavu akulongoza kunda seuta. Naho kugendeela kunda mhuwilwa kwangu, naho hulekile umhuwi wangu, hata mwa mazuwa ya Antipa muwona ywangu mhuwilwa akomigwe mwa nyuwe aho akwikala Mwavu. ¹⁴Mna nna mageke ya kulonga na nyuwe. Weyuko wageke mwa nyuwe wakutimila mahinizo ya Balaamu, yehe amhinize Balaki kuwatenda want’hu wa Izilaeli wadamanye wavu, naho wadye nk’hande za nt’hambiko zilavilwe mahili hamwenga na kudamanya uhabwasi. ¹⁵Naho una want’hu wakutimila mahinizo ya Wanikolai. ¹⁶Elo kweiile, hunatendile ivo, nasunguza kwiza kwako, no kutoana na awo want’hu kwa bamba dikutwa kosekose dyo mnomo wangu.

¹⁷“Mta magutwi eve vedi ayo Muye akulonga ne difyo dya wahuwila wa Kilisito!

“Naho mnt’hu yeyose mhumi nenimwink’he ink’hande ifisigwe ikwitangwa mana. Naho nenimwink’he iwe ding’aile naho mnanga mwe idyo diiwe ding’aile diwandikwa zina hya naho hakuli adimanyize mna ni wadya du akudihokela.

Ulosi kwa Tiatila

¹⁸“Umwandikile mtumigwa ywa kwe mbingu we difyo dya wahuwila wa Kilisito ukwo Tiatila kugamba,

“Uno nuwo ulosi wa mwana ywa Mnungu, uyo andile na meso enga moto ukulimbija, viga vakwe navo vandaga enga shaba isunt’higwe vitendese enga yokigwa mwe dikawa dyo moto. ¹⁹Himanya undima wako yose. No lukunde lwako no mhuwi wako no undima wako no kufinyiliza kwako. Ivi haluse weye wadamanya vedi mna hiyo enga viya nk’hongo. ²⁰Mna nna mbuli huunga hugambile, weye wamzumila yudya mvele Yezebeli yehe akuketanga mlotezi, uyo akuwahiniza na kuwadant’hiliza wandima wangu wadamanye uhabwasi no kudya nk’hande zilavigwe nt’hambiko kwa mahili. ²¹Himwin’ka lupisi lwa kweiila, mna hakuunga kweiila kwo uhabwasi wakwe. ²²Tegeleza! Haluse nenimtende ande mnyonge yehe na wose wakudamanya uhabwasi nawabwiilwe ni masulumizo yatendese uneva hawana kweiile udamanyi wawe. ²³Naho neniwakome wadya wakumtimila, niho mafyo ya wahuwila wa Kilisito wamanye kugamba miye ni miye hupelemba mioyo na fanyanyi za want’hu, name nenimlihe kila yumwenga viligane no udamanyi wakwe.

²⁴“Mna nawagambila nyuwe watuhu uko Tiatila, wowose heweina mahinizo ayo, hewemanyize kinyele cha Mwavu, enga viya wakulonga, heniwauze naho mbuli nt’huhu yeyose mwa nyuwe. ²⁵Tozeseni kiya mnanacho, kubula aho nenize. ²⁶Naho mhumi, na yudya akugendeela kuzumila mbuli izo niwagambile kudamanya kubula kwo uheelo, nenimwink’he udahi wa kulongoza want’hu we ziisi, ²⁷naye naawadime kwa ngoda ya chuma, na kutulatila enga vint’hu va ulongo vikutulika. ²⁸Enga ivo miye nihokele kwa Tate, name nenimwink’he idya int’hondo ya macheelwa.

²⁹“Mta magutwi eve vedi ayo muye akuwagambila mafyo ya wahuwila wa Kilisito!

Ulosi kwe difyo dya wahuwila wa Kilisito wa Salidi

¹“Umwandikile mtumigwa ywa kwe mbingu ywe difyo dya wahuwila wa Kilisito ukwo Salidi kugamba,

“Aya nayo yakulongwa ni yudya mta miuye mfungate ya Mnungu, hamwenga ne zint’hondo mfungate. Himanya udamanyi wako, naho kumanyika enga umgima mna kumbe kubanika! ²Hake zinduka, uzitende zitoge mbuli zisigale, izo zihagihi no kubanika, kwaviya hione kugamba udamanyi wako ukint’ha hameso ha Mnungu ywangu. ³Elo ukumbukile yadya uhinizwe hamwenga na yadya wivile, naho kweiile wavu wako. Hunandile meso, nenize kwako enga mbavi, naho houmanye mbwitu lupisi nenizile kukusengela. ⁴Mna weyuko wageke ukwo Salidi hewegeile usavu zisuke zawe. Awo nekigendanye hamwenga na miye wakanda wavala suke zing’aile kwaviya wawagilwa kunda ivo. ⁵Mhumi naavikwe suke zing’aile, name hikudiusa dizina dyakwe mbwitu mwe kitabu cho ugima, naho nenimgombele hameso ha Tate na hameso ya watumigwa wakwe wa kwe mbingu kugamba ywangu.

⁶“Mta magutwi eve vedi ayo Muye akuyagambila mafyo ya wahuwila wa Kilisito!

Ulosi kwe difyo dya wahuwila wa Fidalelifia

⁷“Umuwandikile mtumigwa ywa kwe mbingu ywe difyo dya wahuwila wa Kilisito ukwo Filadelifia kugamba,

“Ulosi uno walawa kwa yehe akukile naho mkindedi uyo mta ink’homoelo ya Daudi, akukomola haheina akudaha kuvugala, naho akuvugala haheina akudaha kukomola. ⁸Hiyamanya udamanyi wako. Kaula, hikwiikila mnango ukomolwe hameso hako, naho hahali akudaha kuuvugala. Himanya una ludole ludodo mna kuitoza imbuli yangu, naho hudilemele dizina dyangu. ⁹Kaula, neniwegale want’hu we difyo dya Mwavu kwako, wadya wakukegamba Wayahudi mna hiyo ivo, mna walonga udant’hi. Neniwegale kwako nokuwatenda wafunamize mitwi yawe heviga hako, niho nawamanye kugamba miye name hikuunga. ¹⁰Kwaviya weye kuitoza imbuli yo kufinyiliza, miye nohwamile mwo lupisi lwa makunt’ho yakwiza mwe isi yose, mwo lupisi lwo kugezigwa kwa want’hu wose. ¹¹Nasunguza kwiza kwako! Elo tozesa icho unanacho vileke mnt’hu yeyose asekukuhoka nt’hunyo yako. ¹²Mhumi nenimtende ande mikola mwe nyumba ya Mnungu ywangu naho aungwa asekufosa umwo eli. Mnanga mwake neniwandike zina dya Mnungu ywangu ne dizina dyo mzi wa Mnungu ywangu, Yelusalemu imp’ya, mzi udya ukuunga useele kulawa kwe mbingu kwa Mnungu ywangu. Naho neniwandike mnanga mwake zina dyangu idihya.

¹³“Mta magutwi eve vedi ayo Muye akuwagambila mafyo ya wahuwila wa Kilisito!

Ulosi kwe difyo dya wahuwila wa Loadikia

¹⁴“Umuwandikile mtumigwa ywa kwe mbingu ywe difyo dya wahuwila wa Kilisito ukwo Laodekia kugamba.

“Aya nayo yakulongwa ni yudya Amina, muwona mhuwilwa naho ywe kindedi, chotoko che viumbwa va Mnungu. ¹⁵Himanya mbuli zako zose! Himanya kugamba weye hwi mph’eho naho hegu hwi moto, nevinda vedi wandile umph’eho hegu moto. ¹⁶Elo kwaviya ulufufunk’honde, nuko kugamba hwi mp’heho naho hwi moto, ni hagihi kukutahika ufose mwo mnomo wangu. ¹⁷Kwaviya wakegamba weye wi mgoli naho unanavo vose viya ukuunga. Mna humanyize kugamba weye wi mnt’hu ywa kinyulu naho mnt’hu ywa kituletule naho umkiwa naho wi nt’hunt’hu naho wikimbwigili! ¹⁸Nakulangiliza ugule zahabu kwangu, zahabu isunt’higwe mwo moto, vileke unde mgoli. Naho ugule suke zing’aile uvale usekunda kimbwigili. Naho nakulangiliza ugule miti ugele mwa meso yako vileke uone. ¹⁹Miye nawakanya no kuwaogola wose wadya huwaunga. Elo kweiile uwavu wako kwa moyo wako wose. ²⁰Tegeleza! Hikimala mwo mnango nagamba kuno, mnt’hu yeyose uneva akomola mnango, neningile kwakwe naho nenidye nae yehe nae naadye na miye. ²¹Akuunga ande mhumi nekikalanye mwo ukalo wangu we kiseuta, enga viya miye nindile mhumi niyo nekala hamwenga na Tate mwo ukalo wakwe we kiseuta.

²²“Mta magutwi eve vedi ayo Muye akuyagambila mafyo ya wahuwila wa Kilisito!”

Uviki wa kwe mbingu

¹Niyo naona naho, mnango ukomolwe kwe mbingu naho nehiva izwi diya nadiivaga aho nk’hongo dyandile enga izwi dya gunda, dyandile dikanigamba, “So uku hulagise yadya yakuunga yalaile umwo yanajika aya.” ²Aaho nehitozigwa ni Muye, naonaga fumbi dya kiseuta diikwa kudya kwe mbingu naho kwandaga na yumwenga ekalaga he difumbi dya kiseuta. ³Naho yehe ekale he diya difumbi ang’alaga enga iwe dyedi dikwitangwa yasipi na kaneliani. Luta mwasi lung’aile enga iwe dyedi dikwitangwa amalodi lwazungulukaga he diya difumbi dye kiseuta. ⁴Naho kwandaga na mafumbi matuhu milongo miidi na mane yazunguluke idyo difumbi dye kiseuta, kwandaga na wadala milongo miidi na wane wekale mwe ayo mafumbi, awo wavalaga suke zing’aile hamwenga na taji ze zahabu. ⁵Mwe mafumbi yadya ya kiseuta mwalawaga lumwemwe na mtint’hilo hamwenga na lukuwa. Naho kwandaga na magala mfungate va moto vandaga halongole he difumbi dya kiseuta. Iyo yandaga ni miuye mfungate ya Mnungu. ⁶Naho kulongole kwe difumbi idyo dya kiseuta kwandaga na kint’hu nekikaoneka enga bahali ye kioo yang’alisiga enga iwe dikupulika.

Naho na diya difumbi dya kiseuta hadya hagati nedizungulukwa t’hendelo zose na viumbwa vine vina ugima vandaga vigubikwa na meso mwili mgima kunyuma na kulongole. ⁷Kiumbwa cha nk’hongo andaga enga simba, cha kaidi enga jeku, kiumbwa cha katatu chandaga na futa ya mnt’hu, kiumbwa cha kane chandaga enga mp’hungu dikupuluka. ⁸Kila yumwenga mwe wadya wata ugima wane andaga na mawawa mtandatu yamemile meso, kundani na kuse. Haheina kuhumula kilo na msi wakakema wila,

“Akukile, Akukile, niye Zumbe Mnungu mta udahi,

andagaga uuko naho eyaho, naho akuunga eze.”

⁹Viya viumbwa vine ivi ugima umwo vandile vikakema wila wa kumwink’ha ukulu na kumtunya no kumtogola Mnungu yudya ekalaga mwe difumbi dye kiseuta uyo akwikala ulo na ulo, ¹⁰wadya wadala milongo miidi na wane nawafunamiza mitwi yawe kubula hasi halongole ya yudya akwikala kulanga he difumbi dya kiseuta, wakamvika uyo akwikala mgima ulo na ulo. Wakaduula taji zawe halongole he difumbi dya kiseuta wakagamba,

¹¹“Kuwagilwa weye Zumbe ywetu na Mnungu ywetu,

kuhokela ukulu na nt’hunyo, na ludole.

Kwaviya ni weye uumbile vint’hu vose,

naho kwa kuunga kwako kuvitenda vinde naho niyo vaumbwa.”

Ikitabu na Mwanangoto

¹Naho namuonaga yudya ekale mwe difumbi dya kiseuta mwo mkono wo kulume katoza kitabu kiwandikwe kosekose, naho kigeligwa maduha mfungate.²Niyo naona mtumigwa ywa kwe mbingu mta udahi mkulu, akabilikiza kwa izwi kulu, “Niani awagilwe kunamatula maduha aya no kukigubula ikitabu?” ³Mna hakwandile na yeyose ukwo kwe mbingu na kwe isi na hasi ye isi adahaga kugubula kitabu hegu kukikaula mndani. ⁴Niyo nailisa kwa usungu kwaviya hakwandile mnt’hu aoneke kuwagilwa kugubula ikitabu na kukaula mndani mwakwe. ⁵Niyo yumwenga mwe wadya wadala anigamba, “Usekuila. Kaula, simba ywa kabila dya Yuda, ywo lukolo lwa Daudi, niye mhumi, naho yehe niye akudaha kunamatula yadya maduha mfungate no kukigubula kiya kitabu.”

⁶Niyo naona Mwanangoto kakimala hadya hagati he difumbi dya kiseuta andaga enga kachinjigwa, azungulukwe ni viya viumbwa ivi gima vine na wadya wadala. Andaga na mp’hembe mfungate hamwenga na meso mfungate, iyo niyo miuye mfungate ya Mnungu itumigwe mwe isi yose. ⁷Mwanangoto agendaga kukiguha kiya kitabu mwo mkono wakwe wo kulume wa yudya ekale mwe difumbi diya dya kiseuta. ⁸Eze akiguhe kiya ikitabu, viya viumbwa ivi ugima vine hamwenga na wadya wadala milongo miidi na wane wakefunamizaga mitwi yawe kubula hasi hameso ha Mwanangoto naho kila yumwenga andaga na sindamgunda hamwenga na viziga va zahabu vimemile ubani. Uwo wandaga ni malombezo ya want’hu wa Mnungu. ⁹Niyo watula wila wakagamba,

“Kuwagilwa weye kukiguha kitabu,

no kukigubula maduha vakwe.

Kwaviya nokuchinjigwa, naho kwa sakame yako kumkomboela Mnungu

want’hu mwe makabila na milosi yose na want’hu na isi zose.

¹⁰Kuwatenda kunda maseuta na walava nt’hambiko kwa ndima ya Mnungu ywetu,

naho nawaikaile isi.”

¹¹Umwo nandile hakaula niyo neva izwi dya watumigwa wa kwe mbingu wabindile wingi, wazunguluke difumbi dye kiseuta, na wadya viumbwa wata ugima na wadya wadala, ¹²naho nawakakema kwa izwi kulu,

“Mwanangoto uchinjigwe, kawagilwa

kuhokela ludole na ugoli na ubala na udahi,

nt’hunyo no ukulu na nt’hogola!”

¹³Niyo neva kila kiumbwa kwe mbingu, na mwe isi na hasi ye isi hamwenga na mwe bahali, heiye, naho viumbwa vyose vimwe isi yose vikagamba,

“Kwa yudya ekale mwe difumbi dye Useuta hamwenga na Mwanangoto,

Uvikilwa na nt’hunyo no ukulu no udahi vinde kwakwe

ulo na ulo!”

¹⁴Viya viumbwa ivine ivi ugima niyo vagamba, “Taile!” Niyo wadya wadala wafunamiza mitwi yawe hasi no kuvika.

Mwanangoto ayabendula maduha

¹Niyo namuona Mwanangoto akabendula duha dimwenga mwe maduha yadya mfungate, niyo neva yumwenga mwe viya viumbwa ivine akalonga kwa izwi enga lukuwa kikagamba, “So!” ²Naho nehikaula niyo naona falasi ing’aile, naho yudya aikaile nakatoza uta. Naho nakenk’higwa taji, andaga mhumi naho agendeela kunda mhumi.

³Niyo Mwanangoto abendula duha dya kaidi, niyo neva yudya kiumbwa mta ugima wa kaidi akagamba, “So!” ⁴Niyo falasi nt’huhu ink’hundu gu yafosa kuse. Yudya akuilongoza nakenk’higwa udahi kuusa utondowazi mwe isi vileke want’hu wachinjane. Niyo enk’higwa bamba kulu.

⁵Niyo Mwanangoto abendula duha dya katatu, niyo neva kiya kiumbwa cha katatu kino ugima kikanigamba, “So!” Nize nikaule niyo naona falasi nt’hitu, yudya akuilongoza atozaga kihimilo mwo mkono. ⁶Niyo neva enga izwi dikulawa mwe viya viumbwa vine ivi ugima dikagamba, “mp’hishi ya ngano kwa maliho ya zuwa dimwenga, hamwenga na mp’hishi nt’hatu za shayili kwa dinali imwenga. Mna usekubananga mavuta ne divai!”

⁷Niyo Mwanangoto abendula duha dya kane, niyo neva kiya kiumbwa cha kane kino ugima kiketanga, “So!” ⁸Nakaulaga niyo naona falasi ya luivu, yudya akuilongoza etangagwa File, naho naakatimilwa ni isi ya wafile, niyo wenk’higwa udahi mwe lobo ya want’hu we isi vileke wawakome kwa nk’hondo na sala na maine hamwenga na makala ya kwe mbago.

⁹Mwanangoto niyo abendula duha dya shano, hadya hasi he kilingo cha kumvika Mnungu naonaga miuye ya wadya wachinjigwe kwaviya nawakabilikiza Mbuli Yedi ya Mnungu, naho nawanda wahuwilwa mwo uwona wawe. ¹⁰Nawakaila kwa usungu kwa izwi kulu wakagamba, “Zumbe, ukukile naho mkindedi. Nowize ini uwalahe want’hu wakwikala mwe isi no kuwasengela kulihiza kwa kukikoma suwe?” ¹¹Kila yumwenga ywawe enk’hagwa nk’hazu ing’aile, naho nawagambigwa wagojele lupisi ludodo kubula aho ukuunga ukint’he uwazilo wa wandima weyawe hamwenga na wandugu zawe wakuunga wakomigwe enga viya wakomigwe woho.

¹²Niyo naona Mwanangoto akabendula duha dya mtandatu, naho handaga na kisingisa kikulu, zuwa niyo dyanda enga gunia titu, mnenge wose nao niyo wanda wink’hundu gu. ¹³Nt’hondo nazo za mwo ulanga niyo zagwa mwe isi, enga nk’huyu zandile zikei kutoga yakugwa kulawa mwe diziti dyakwe dikasingiswa ni nk’hung’unt’ho. ¹⁴Naho ulanga no utatuke vihande viidi enga kilago kikuzigwa, kila mnima nakila kisiwa nevisingiswa niyo vamoka. ¹⁵Niho maseuta wa mwe isi na want’hu wakulu wa mwe isi na wakulu wa watowani na wagoli na wata ludole na kila mtumwa na walekelwa, nawakefise woho wenye mgati mwe maiwe ya kwo mnima. ¹⁶Naho nawaigambe milima hamwenga na maiwe, “Kigweleni vileke mkifise kimnyilike yudya ekale mwe diya difumbi dyo useuta hamwenga na maya ya Mwanangoto. ¹⁷Kwaviya zuwa dya mank’huto dibula naho ni ani naadahe kuhona?”

Want’hu 144,000 wa Izilaeli wageligwe viwalo

¹Yeze yomboke ayo niyo naona watumigwa wa kwe mbingu wane wakimale mwe zimp’hembe zine ze isi, wakukindila nk’hungunt’ho ikulawa mwe zint’hendelo izo nne ze isi vileke ink’hung’unt’ho esekukung’unt’ha mwe isi na mwe bahali na mwe mti wowose. ²Niyo naona mtumigwa ywa kwe mbingu mtuhu akwiza kulawa ulailo wa zuwa andile na kiwalo cha Mnungu mta ugima. Niyo awetanga kwa izwi kulu wadya watumigwa awane wenk’higwe udahi wo kuibananga isi hamwenga ne bahali. ³Uyo mtumigwa ywa kwe mbingu niyo agamba, “Msekuibanaga isi na bahali hamwenga ne miti, mpaka kinde kugela viwalo mwe vihanga va wandima wa Mnungu ywetu.” ⁴Hiva kugamba wadya waikigwe viwalo mwe vihanga vawe nawanda want’hu laki imwenga na milongo mine na kane kulawa mwe makabila yose ya wana wa Izilaeli, ⁵Mwe dikabila idyo dya Yuda weyuko want’hu milongo gana mlongo na mbili waikigwe viwalo, mwe dikabila idyo dya Lubeni weyuko want’hu milongo gana mlongo na mbili waikigwe viwalo, mwe dikabila idyo dya Gadi weyuko want’hu milongo gana mlongo na mbili waikigwe viwalo. ⁶Mwe dikabila idyo dya Asheli weyuko want’hu milongo gana mlongo na mbili, mwe dikabila idyo dya Nafutali weyuko want’hu milongo gana mlongo na mbili, mwe dikabila idyo dya Manase weyuko want’hu milongo gana mlongo na mbili. ⁷Mwe dikabila idyo dya Simioni weyuko want’hu milongo gana mlongo na mbili waikigwe viwalo, mwe dikabila idyo dya Lawi weyuko want’hu milongo gana mlongo na mbili, mwe dikabila idyo dya Isakali weyuko want’hu milongo gana mlongo na mbili waikigwe viwalo. ⁸Mwe dikabila idyo dya Zabuloni weyuko want’hu milongo gana mlongo na mbili waikigwe viwalo mwe dikabila dya Yusufu weyuko want’hu milongo gana mlongo na mbili waikigwe viwalo, mwe dikabila idyo dya Benjamini weyuko want’hu milongo gana mlongo na mbili waikigwe viwalo.

Difyo kulu dya want’hu wakulawa kila isi

⁹Hamwenga na ayo hiona fyo kulu dya want’hu naho hakwandile na mnt’hu adahile kuwawaza, want’hu wa kila isi, na kabila na mp’huga na milosi, naho wakimala hameso he difumbi dya kiseuta, na hameso ya Mwanangoto, wavaile nk’hazu zing’aile, naho wana matambi ye mitende mwe mikono yawe, ¹⁰Wakalonga kwa izwi kulu wakagamba, “Uyokozi una Mnungu ywetu, ekale mwe diya difumbi dye kiseuta na Mwanangoto!” ¹¹Watumigwa wose wa kwe mbingu nawakimala kuzunguluka he diya difumbi dye kiseuta, hamwenga na wadala na viya viumbwa vine ivi ugima. Naho wafika madi no kufunamiza mitwi yawe hameso ya diya difumbi dye kiseuta, no kumvika Mnungu, ¹²wakagamba, “Taile, ukulu na nt’hogola na mizungu na nt’hunyo hamwenga na udahi na ludole, vina Mnungu ywetu ulo na ulo, Taile!”

¹³Yumwenga mwa wadya wadala anizilaga niyo aniuza, “Want’hu awa wavikigwe nk’hazu zing’aile ni wahi naho walawa hii?”

¹⁴Niyo namhitula, “Mkulu himanyize, mna weye wamanya,”

Niyo anigamba, “Awa ni wadya wahonile mwa yadya masulumizo makulu, naho wafuile zink’hazu zawe mwe sakame ya Mwanangoto no kuzitenda zinde zing’ala. ¹⁵Nicho kilekile wakakimala hameso he difumbi dye kiseuta dya Mnungu, naho wamvika kilo na msi mwe nyumba yakwe ukwo kwe mbingu. Yudya akwikala mwe difumbi dye kiseuta naande nawo na kuwamila. ¹⁶Hawaone sala hegu nk’hilu naho, zuwa nadyo hediwalikile naho, hegu zihuye ditendese. ¹⁷Kwaviya Mwanangoto eli hagihi na difumbi dye kiseuta dindile hadya hagati, naende mdimi ywawe, naho naawalongoze he n’choko ya mazi yo ugima. Naho Mnungu naawahanguse masozi yawe yose.”

Duha dya mfungate

¹Aho Mwanangoto eze anamatule diduha dya mfungate, uko kwe mbingu kwandaga na kinyamaile kwa lupisi ludodo. ²Niyo nawaona wadya watumigwa mfungate wa kwe mbingu wakukimala hameso ha Mnungu, naho nawanda na nguli mfungate.

³Mtumigwa mtuhu ywa kwe mbingu andaga na kaziga kakwe zahabu akimaalaga he nc’hanja ya kulavila nt’hambiko. Niyo enk’higwa ubani mwingi vileke auhanganye hamwenga na malombezo ya want’hu wa Mnungu wose mwe kilingo che zahabu cha kumvika Mnungu chandile hameso he difumbi dye kiseuta. ⁴Umosi wo ubani udya na malombezo ya want’hu wa Mnungu nevikwela kulanga hameso ha Mnungu, kulawa mwo mkono wa yudya mtumigwa ywa kwe mbingu. ⁵Naho yudya mtumigwa ywa kwe mbingu niyo aguha kadya kaziga, niyo agela moto wa he kilingo cha kulavila nt’hambiko, niyo aduula mwe isi niyo kwalaila lukuwa na tint’hilo na lumwemwe na kisingisa.

Nguli mfungate

⁶Niyo wadya watumigwa mfungate wa kwe mbingu wezile na nguli mfungate niyo wakeikila lumwe vileke watowe.

⁷Mtumigwa ywa kwe mbingu ywa nk’hongo niyo atoa gunda dyakwe. Niyo kwalaila fula ya maiwe hamwenga na moto vihanganywe na sakame, vaduulagwa mwe isi. Imwenga ya nt’hatu ye isi yahyaga, naho imwenga ya nt’hatu ya maziti yahyaga, naho mani yose nayo yahyaga.

⁸Mtumigwa ywa kwe mbingu wa kaidi niyo atowa digunda dyakwe. Kit’hu enga mnima mkulu ukukweela moto chaduulwa kwe bahali. Niyo imwenga kwa nt’hantu ye bahali yahituka sakame, ⁹Imwenga kwa nt’hantu yaivo viumbwa vina ugima vikwikala mwe bahali vafaga, naho imwenga kwa nt’hatu ye zingalawa niyo zabanangwa.

¹⁰Niyo mtumigwa ywa kwe mbingu ywa katatu atowa nguli yakwe. Nt’hondo nk’hulu yandile ikaka enga lumuli niyo yagweela mwe imwenga ya nt’hatu ye mito hamwenga na mwa mazi yakuseela. ¹¹Naho zina dye int’hondo iyo yetangwa, “Mumbula”. Nuko kugamba usungu utendese. Imwenga ya nt’hatu ya mazi niyo yanda Yesungu. Want’hu wengi wafaga weze wanywe mazi ayo kwaviya yandaga Yesungu.

¹²Niyo naona mtumigwa ywa kwe mbingu ywa kane atowa nguli yakwe, imwenga ya katatu ye dizuwa no umnenge ne zint’hondo vose nevibanangwa, imwenga ya katatu yo ung’azi niyo yanda ziza. Imwenga ya katatu ya nomsi na nekilo niyo zanda ziza.

¹³Umwo nandile hakaula niyo neva izwi dya mp’hungu ikapuluka kulanga vitendese, ikalonga kwa izwi kulu, “Hangi wenye, Hangi wenye, Hangi wenye want’hu wakwikala mwe isi kwa yadya maizwi matuhu ye zinguli zisigale za wadya watumigwa watatu wa kwe mbingu wakukeika lumwe wazitowe!”

¹Niyo mtumigwa ywa kwe mbingu ywa shano atowa inguli yakwe, niyo naona nt’hondo igwele kulawa kwe mbingu no kugwela kwe isi, naho niyo enk’higwa nk’homoelo yo mwina wo mnyongomela howina uheelo. ²It’hondo niyo yakomola mwina wo mnyongomela howina uheelo niyo mosi wakwela kulawa mwo mwina uwo, enga mosi ukulawa mwe dikawa kulu, udya umosi niyo wagela lwiza mwe dizuwa no ulanga. ³Sige niyo zalawa mwo udya mosi niyo zagwa mwe isi naho nezink’higwa ludole enga ludole lwa visuse va mwe isi. ⁴Niyo zagambigwa zisekubananga mani na miti yeyose hegu kint’hu chochose kikwani, mna ziwabanange want’hu wose wandile haweina viwalo va Mnungu mwe vihanga vawe. ⁵Sige zigambigwa zisekuwakoma want’hu, mna ziwasulumize kwa lupisi lwa miezi mishano. Naho masulumizo ayo yandaga enga mnt’hu alumigwe ni kisuse. ⁶Mwe mazuwa ayo want’hu nawaunge ukubanika mna hawabanike, file neiwanyilike.

⁷Sige ziya zandaga enga falasi zikiilwe lumwe kwa nk’hondo, mwe mitwi yawe mwandaga na vint’hu vikale enga taji za zahabu, naho futa zawe zandaga enga futa za want’hu. ⁸Naho zandaga na fili enga fili za wavele, meno yawe yandaga enga meno ya simba. ⁹Mwe vifuwa vawe nomgubikwa na vint’hu enga valo dya chuma. Izwi dya mawawa yawe dyandaga enga tint’hilo dya magali yakuvutigwa ni falasi nyingi zikuguluka kwiita kwe nk’hondo. ¹⁰Zandaga na mikila na miwa enga visuse wandaga na ludole mwe mikila yawe yo kuwaluma want’hu kwa lupisi lwa miezi mishano. ¹¹Naho wananaye seuta ywawe, uyo ni mtumigwa ywo Mwavu, uyo niye mkulu ywa mnyongomela howina uheelo, zina dyakwe kwa Kiibulania etangwa Abadoni, naho kwa Kigiliki etangwa, Apolioni, nuko kugamba, “Mkomi.”

¹²Idya hangi wenye ya nk’hongo ilongigwe yomboka kale, kaula iyuko hangi wenye mbili zikwiza zikajika izi.

¹³Mtumigwa ywa kwe mbingu ywa mtandatu atoaga inguli yakwe niyo neva izwi kulawa mwe vihembe ivine ve he kilingo cha kulavila nt’hambiko che zahabu chandile hameso ha Mnungu. ¹⁴Izwi niyo dyamgamba yudya mtumigwa ywa kwe mbingu ywa mtandatu endile na nguli ikagamba, “Wakomoele watumigwa wa Mwavu wane wavugailwe hagihi no mto mkulu wa Fulati!” ¹⁵Na wadya watumigwa wane wa Mwavu, waikilwe lumwe mwe sa iyo na zuwa na mnenge na mwaka, vileke wakome imwenga ya nt’hatu ya want’hu, niyo wakomoelwa. ¹⁶Naho nehiva uwazilo wawe wadya wank’hondo wakweile falasi nawanda milioni magana maidi. ¹⁷Naho ivi nivo nazionaga zifalasi ziya mwa maona. Wadya wandaga wekale mnanga wavalaga valo dya chuma mwe vifuwa vawe, zina langi zink’hundu enga moto na zabuluu enga ulanga na ya njano enga unga wa chola. Imitwi ye zifalasi izo neinda enga mitwi ya simba, na mwe milomo yawe kwalawa moto na mosi na chola. ¹⁸Imwenga ya nt’hatu ya want’hu nawakomigwa na mavuma matatu ni udya umoto na umosi hamwenga na chola ilaile mwe milomo ye zifalasi. ¹⁹Kwaviya ludole lwe zifalasi izo lumwe milomo yawe na mwe mikila yawe. Mikila yawe neioneka enga nyoka naho neinda na mitwi na izo nizo zikuwalumila awant’hu.

²⁰Want’hu wadya wasigale hewekomigwe na moto na mosi na chola hawakweiile kuvika mahili yawe wakedamanyile wenye, naho hawalekile kuvika zimp’hepo na mahili ya zahabu na ya masawa na ya shaba na ya maiwe na ya maziti heyekuona naho heyekwiva naho heiye kugenda. ²¹Want’hu wadya hawa kweiile ukomi wawe na usai wawe no uhabwasi wawe no ubavi wawe.

Mtumigwa ywa kwe mbingu mta katabu

¹Niyo naona mtumigwa mtuhu ywa kwe mbingu mta udahi akaseela kulawa kulanga kwe mbingu. Kavikigwa vunde na utamwasi mwo mtwi wakwe, futa yakwe neinda enga zuwa, viga vakwe navo enga mikola ya moto. ²Mwo mkono wakwe andaga na katabu kagubulwe. Aikaga kiga chakwe cha kulume mwe bahali, kiga chakwe cha kumoso nacho aikaga mwe isi, ³abongelaga kwa izwi kulu dyandaga enga mbumo we simba. Eze etange kwevikaga nk’huwa mfungate. ⁴Zize zivike naungaga niwandike. Mna nevaga izwi kulawa kwe mbingu dikagamba, “Mbuli zilongigwe, ni kinyele use kuyawandika!”

⁵Niyo yudya mtumigwa ywa kwe mbingu nimuwone akimale mwe bahali na mwe isi enula mkono wakwe wa kulume kuhingika kwe mbingu, ⁶niyo akelisa kwa dizina dya Mnungu akwikala ulo na ulo, yehe aumbile mbingu ne isi ne bahali na vose vikwikala umwo. Mtumigwa ywa kwe mbingu niyo agamba, “Hahande na lupisi lwa kugoja naho. ⁷Mna mwe mazuwa ayo mtumigwa ywa kwe mbingu ywa mfungate eze ande hagihi kutoa nguli yakwe, Mnungu naatende yadya yakefisile yalaile viligane na ivo awabilikizaga wandima wakwe awo walotezi.”

⁸Niyo diya diizwi nivile kulawa kwe mbingu dyalonga namiye vituhu dikagamba, “Kaguhe kiya kitabu kigubulwe kimwo mkono wa mtumigwa ywa kwe mbingu akimale mwe bahali na mwe isi.”

⁹Ivo naitaga kwa mtumigwa ywa kwe mbingu no kumgamba anink’he katabu. Niyo anigamba, “Kaguhe, ukadye, nakande ke mwile mwo mnomo wako enga uki mna nakakugele usungu mwe inda yako.”

¹⁰Niyo naguha kadya katabu mwo mkono wa uyo mtumigwa ywa kwe mbingu niyo akadya, kandaga na mwiile enga uki, mna nize nikamele, niyo naona usungu mwe zinda zangu. ¹¹Niyo wanigamba, “Waungigwa ulonge ulosi wa Mnungu naho kwa want’hu wengi, isi zose ne milosi hamwenga na kwa maseuta wengi.”

Waona waidi

¹Niyo nenk’higwa dete enga ngoda ya kuhimila, niyo nagambigwa, “Ita ukaihime nyumba ya Mnungu hamwenga ne kilingo cha kulavila nt’hambiko na kuwawaza want’hu wakuvika mwe nyumba ya Mnungu. ²Mna unase uhime hant’hu ha kuse ye nyumba ya Mnungu, kwaviya wenk’higwa want’hu hi wayahudi vileke waujatangize mzi ukukile kwa lupisi lwa miezi milongo mine na miidi. ³Neniwenk’he udahi walotezi wangu waidi wakanda wavala magunia, nawo nawabilikize mbuli yedi ya Mnungu kwa mazuwa 1,260.”

⁴Awo waona waidi ni vinala viidi va mizaituni vikukimala hameso ha Zumbe ywe isi. ⁵Mnt’hu yeyose anaunga kuwalumiza, moto naulawe mwe milomo yawe na kuwalumiza wank’hondo wawe, naho kila akuunga ageze ivo nivo ikumuwagila kukomwa. ⁶Awo wananawo udahi wa kuvugala zimbingu vileke fula isekunya mwa mazuwa yadya walava ulotezi. Naho wana udahi wa kuhitula mazi kunda sakame, no udahi wakuitowa isi kwa makunt’ho yoyose wakuunga woho.

⁷Wanajika kubilikiza mbuli yedi ya Mnungu, diya dikala dikulawa kwo mnyongomela howina uheelo neditowane nawo, naho nediwahume na kuwakoma. ⁸Vimba vawe nevilambale mwe sila yo mzi mkulu, kwa ulosi we kilotezi ukwitangwa Sodoma hegu Misili, naho aho niho Zumbe ywawe awambagwa. ⁹Want’hu kulawa kila isi na makabila na milosi na mp’huga, nawakaule vimba vawe mazuwa matatu na nusu, naho hawazumile vimba ivo vimoswe. ¹⁰Mna want’hu wakwikala mwe isi nawande na kinyemi kwa mbuli ye file ya waona waidi. Nawenk’hane mageleko woho kwa woho, kwaviya wadya walotezi waidi nawaka wasulumizisa want’hu wakwikala mwe isi. ¹¹Mwe mazuwa matatu na nusu, nawengilwa ni Muye wo ugima kulawa kwa Mnungu, vimba ivo niyo wakimala, niyo wogofi mkulu wawengila wadya nawaka wakaula. ¹²Niyo wadya walotezi waidi weva izwi kulu dikulawa kwe Mbingu dikagamba, “Kweleni uku!” Niyo wakwela kwe mbingu wakazungulukwa ni vunde, iviya wank’hondo wawe wakawakaula. ¹³Mwo lupisi uludya halailaga kisingisa kikulu mwe isi, imwenga yo mlongo yo mzi niyo yagwa, wabanikaga want’hu wakubula mlongo magana mfungate. Want’hu wasigale wogohaga niyo wamwink’ha Mnungu ywa kwe mbingu ukulu.

¹⁴Idya hangi wenye ya kaidi nehalonga yomboka, kaula, hangi wenye ya katatu ihagihi kwiza.

Nguli ya mfungate

¹⁵Niyo mtumigwa ywa kwe mbingu ywa mfungate atoa nguli yakwe, niyo kwanda na izwi kulu uko kwe mbingu dikagamba, “Useuta wa mwe isi unda wa Zumbe ywetu na yudya asagulwe kunda mlokozi, naho naasigale kunda Seuta ulo na ulo!” ¹⁶Niyo wadya wadala milongo miidi na wane wekale ha mafumbi ye kiseuta, na hameso ha Mnungu nawakafika madi nokufunamiza imitwi yawe hasi wakamvika Mnungu, ¹⁷wakagamba,

“Chakutogola Zumbe Mnungu Mta Udahi, weye wiyaho naho nokunda aho!

Kwaviya kulagisa udahi wako mkulu

naho kukonga kulongoza.

¹⁸Want’hu we ziisi wengilwa ni maya,

Mna maya yako yabula,

no lupisi lwa kusengela wadya wabanike.

Lupisi lubula lwa kuwaliha watumwa wako na walotezi na want’hu wa Mnungu

hamwenga na want’hu wose wandile wakukwiva,

woseni wabeligwe na wanant’hogola no lupisi lwa wadya wakuibananga isi!” ¹⁹Niyo nyumba ya Mnungu ya uko kwe mbingu yakomolwa, disanduku dye ndagano yakwe niyo dyaoneka mndani mwakwe, naho kwandaga na lumwemwe na mitint’hiilo, na lukuwa na kisingisa hamwenga na fula nk’hulu ya maiwe.

Mvele ne dizoka dikulu

¹Niyo kilagiso chakwehela chaoneka kwe mbingu. Na handa na mvele avikile zuwa naho andaga na mnenge mwe viga vakwe hamwenga ne taji ye zint’hondo mlongo na mbili mwo mtwi wakwe. ²Mvele yudya andaga mbovu naho andaga akaguta kwo usungu wo kwingila nyumba.

³Niyo halaila kilagiso kituhu kwe mbingu. Handaga na zoka kulu dink’hundu dyandile na mitwi mfungate na mahembe mlongo hamwenga na taji ze kiseuta mfungate mwe mitwi yakwe. ⁴Naho mkila wakwe wabulumula imwenga ya nt’hatu ye zint’hondo za kwe mbingu nakuzidula kwe isi. Niyo idizoka dyakimala kulongole kwa yudya mvele vileke dimmele yudya mwana aho akelekwa. ⁵Niyo eleka mwana kilume aikilwe lumwe kulongoza si zose kwa ngoda ye kilama. Na yudya mwana niyo aguhigwa kwa Mnungu he difumbi dya Mnungu dye kiseuta. ⁶Mvele yudya niyo anyilikila kwe nyika, hant’hu aikilwe lumwe ni Mnungu, vileke aleligwe kwa mazuwa mlongo na magana maidi na milongo mtandatu.

⁷Niyo kwalaila nk’hondo kwe mbingu, mtumigwa mkulu ywa kwe mbingu Mikaeli hamwenga na watumigwa wa kwe mbingu watuhu watoanaga ne dizoka diya dikulu hamwenga na wandima wakwe. ⁸Mna diya dizoka niyo dyahumwa hamwenga na wandima wakwe, niyo waguluswa uko kwe mbingu. ⁹Ivo zoka diya dikulu niyo dyaguluswa. Dyoho ni diya dizoka dya kale dikwitangwa Mwavu hegu Mwavu, dikuwadant’hiliza want’hu wose we mwe si zose. Niyo dyaduulwa mwe isi hamwenga na wandima wakwe.

¹⁰Niyo neva izwi kulu kulawa kwe mbingu dikagamba, “Haluse uyokozi no ludole no useuta wa Mnungu ywetu, na udahi wa yudya asagulwe kunda mlokozi vibula. Kwaviya yudya naakakimala kwa Mnungu ywetu na kuwalongeleza wandugu zetu hameso ha Mnungu ywetu kilo na msi kaduulwa hasi. ¹¹Wandugu zetu, waihuma ink’hondo kwa sakame ya Mwanangoto na kwa uwona wawe, naho hawauungise wikazi wawe hata niyo wazumila kubanika. ¹²Na ivo yangeni, nyuwe mbingu na nyose mkwikala umo. Naho hangi nyuwe wenye mkwikala mwe isi na mwe bahali kwaviya yudya Mwavu kaselezwa kwenyu, naye kaihiiswa kwaviya kamanya lupisi lwakwe lusigale luguhi.”

¹³Zoka dize dione diduulwa mwe isi niyo dyakonga kumgulusa yudya mvele eleke mwana kilume. ¹⁴Mna yudya mvele niyo enk’higwa mawawa maidi ya mp’hungu nk’hulu vileke anyilikile hant’hu aikilwe lumwe kwe nyika, kudya akuleligwa kwa lupisi lwa myaka mitatu na nusu, no kunda hale na diya dizoka. ¹⁵Diya dizoka dikulu niyo dyatahika mazi mengi enga lao kunyuma kwa yudya mvele vileke akubigwe ni yadya mazi. ¹⁶Mna isi niyo yamwambiza yudya mvele, isi niyo yagubula enga mnomo na kumela diya dilao dya mazi yalaile kwe mlomo wa diya dizoka. ¹⁷Zoka niyo dyamwiihiya yudya mvele niyo dyaita vileke dikatoane na cheleko cha yudya mvele wasigale, wadya nawo wakutoza sigilizi za Mnungu na wadya wahuwiligwe mwe uwona wa Yesu. ¹⁸Naho dizoka diya niyo dyakimala mnk’handa ye bahali.

Makala maidi

¹Naho naonaga kala dikakwela kulawa mwe bahali, dyandaga na mp’hembe mlongo. Mwe zimp’hembe zakwe mwandaga na taji za kiseuta mlongo, naho mwe mitwi yakwe mwandaga na mazina ya kumhomola Mnungu. ²Idikala dyandaga enga sui mna viga vakwe vandaga enga viga va sangalugembe naho mnomo wakwe naukaoneka enga mnomo wa simba. Diya dizoka dyadink’haga ludole diya dikala hamwenga ne difumbi dye kiseuta no udahi mkulu. ³Mtwi umwenga we dikala diya nouoneka enga wandaga ugelwa nk’hwenge ya kutisa, mna idya ink’hwenge neihona. Want’hu wose we isi yose naweehelwa no kuditimila dikala diya. ⁴Want’hu niyo wadivika idizoka diya kwaviya dink’hiza udahi wakwe kwe diya dikala. Naho nawadivika dikala wakagamba, “Niani enga idikala idi? Niani akudaha kutoana nadyo?”

⁵Dikala dyalekelagwa kulonga mbuli za weduvi na kumhomola Mnungu, nedink’higwa udahi wa mazuwa wa miezi milongo na miidi. ⁶Dyakongaga kumhomola Mnungu ne dizina dyakwe na hant’hu hakwe akwikala, hamwenga na wose wakwikala kwe mbingu. ⁷Nedilekelwa kudamanya k’hondo na want’hu wa Mnungu naho niyo dya wahuma. Dyenk’hagwa udahi kwa kila kabila na si na milosi na kila nk’holo. ⁸Want’hu wose wakwikala mwe isi nawadivike dikala, mna hiyo wadya wawandikagwa mwe kitabu cho ugima cha Mwanangoto achinjigwe, kukongela aho isi yandaga ikei kuumbwa,

Dyakongaga kumligita Mnungu ne dizina dyakwe na hant’hu hakwe akwikala na wadya wakwikala kwe mbingu. ⁹“Mta magutwi yo kwivila eve! ¹⁰Yeyose aikilwe kutahigwa naatahigwe, aikilwe kukomwa kwa bamba, naakomigwe ne dibamba. Aha want’hu wa Mnungu waungwa kufinyiliza nokunda na mhuwi.”

¹¹Niyo naona kala tuhu, dikalaila mwe isi, nedinda na mahembe maidi enga ya mwanangoto, mna nedikalonga enga dizoka dikulu. ¹²Naho nedikadamanya ndima kwa udahi dyenk’hagwa ne dikala diya dya nk’hongo hant’hu ha dyoho. Nadyo nediwatenda want’hu we isi yose na vose vikwikala umwo kudivika dikala diya dya nk’hongo dyahonile ink’hwenge yakwe ikukoma. ¹³Kala idi dya kaidi dyadamanya vihungi vakwehela, niyo dyatenda moto useele mwe isi kulawa kwe mbingu hameso ha want’hu. ¹⁴Niyo awazaganya wose wakwikala mwe isi kwa vihungi, dyalekelagwa kudamanya hant’hu he dikala dya nk’hongo. Dyawagambaga wakwikala mwe isi wadamanye hili dye dikala diya dyasengagwa ne dibamba mna niyo dyanda gima. ¹⁵Niyo dikala diya dyenk’higwa udahi wa kuditenda dya dihili dikehe naho dilonge no kuwatenda wadya wose hewedivikile dihili wakomigwe. ¹⁶Dikala niyo dyatigiza want’hu wose, wakulu na wadodo na wakiwa na wagoli, watumwa na wadya walekelwa wageligwe kiwalo mwe mikono yawe ya kulume hegu mwe vihanga vawe. ¹⁷Hokunde na yeyose akuunga atage kint’hu chochose hegu kugula kint’hu chochose uneva hanandile ne kiwalo icho idyo ni dizina dye dikala hegu uwazilo ukukink’hanana hant’hu he dizina dyakwe.

¹⁸Aha naho hakuungwa mizungu, mta ubala niye naadahe kuubunk’hula uwazilo we diya dikala. Kwaviya uwazilo uwo ni wa kimnt’hu. Naho uwazilo wenye ni magana mtandatu na milongo mtandatu na mtandatu.

Mwanangoto na want’hu wakwe

¹Nize nikaule naonaga Mwanangoto kakimala mwo Mnima wa Sayuni, akanda hamwenga na want’hu laki imwenga na mlongo magana mane na kane, wandaga ne dizina dyakwe na dya Ise yawandikwe mwe vihanga vawe. ²Niyo neva izwi kulawa kwe mbingu enga izwi dya bohelo, naho enga izwi dya lukua lukulu. Izwi nadivaga dyandaga enga watoi wa masinda mgunda wakutowa masinda mgunda yawe. ³Naho awo want’hu wandaga wakakema wila mhya hameso ye difumbi dye kiseuta na hameso yawe viumbwa wane wata ugima na hameso ya wadala. Hakwandile na yeyose adahile kuuhina uwila uwo mna ni wadya du gana dimwenga na milongo mine na kane alufu wakombolagwa mwe isi. ⁴Awa ni wadya na zuwa hewekegeile usavu na wavele, awa wamtimila Mwanangoto kokose kudya akuita. Awa wakombolwa mwa want’hu wakanda enga malavo ya ulozo yatogile nk’hongo kuiva, kwa Mnungu na Mwanangoto. ⁵Hawamanyize kulonga lulimi naho hawakukalalizwa.

Watumigwa wa kwe mbingu watatu

⁶Niyo naona mtumigwa ywa kwe mbingu mtuhu akapawa mwe mbingu, akanda na Mbuli Yedi ya ulo na ulo, ya kuwabilikiza want’hu wa mwe isi, kwa want’hu wa kila isi na kabila na ulosi na kila nk’holo. ⁷Niyo alonga kwa izwi kulu, “Mwogohe ukulu wa Mnungu na kumtunya, kwaviya lupisi lwakwe lwa kusengela lubula. Mvikeni yehe adamanye zimbingu na isi, bahali hamwenga na nc’hoko!”

⁸Niyo mtumigwa ywa kwe mbingu ywa kaidi amtimila yudya ywa nk’hongo, uku akagamba, “Ugwa, ugwa mzi udya mkulu wa Babiloni, katenda want’hu wa si zose wanywe divai yakwe, divai ya kuungisa kwakwe uhabwasi!”

⁹Mtumigwa ywa katatu ywa kwe mbingu awatimilaga awo waidi akalonga kwa izwi kulu, “Mnt’hu yeyeso akuunga afunamize mtwi wakwe hasi hameso ye idyo dikala ne dihili dyakwe, na kuhokela kiwalo mwe kihanga chakwe, hegu mwo mkono wakwe, ¹⁰naye naanywe divai ya maya ya Mnungu idamanywe haheina kugeligwa mazi, mwe kikombe cha maya yakwe na kwiihiwa. Naasulumizwe kwa moto na maiwe ya chola ikulibuka, hameso ya watumigwa wa kwe mbingu na hameso ya Mwanangoto. ¹¹Naho mosi wa moto ukuwasulumiza wakwela kwe mbingu ulo na ulo. Naho hawakuhumula kilo na msi, wadya nawakafunamila diya dikala hamwenga na dihili dyakwe, na kila ageligwe kiwalo che dizina dyakwe.”

¹²Kwa ivo, want’hu wa Mnungu wakutoza miko ya Mnungu na kumhuwila Yesu, waungigwa kufingiza.

¹³Niyo neva izwi kulawa kwe mbingu dikagamba, “Wandika aya, wana kinyemi wose wakubanika wakamhuwila Zumbe kukongela ivi haluse!”

“Heiye!” Ivo, nivo Muye ywa Mnungu akulonga. “Nawenk’hwe kuhumula wakabinda makunt’ho yawe, kwaviya mbuli zo udamanyi wawe neziwatimile!”

Ulozo we isi

¹⁴Nehikaula naho, niyo naona vunde ding’aile, kulanga kwe divunde idyo kuna yumwenga ekala enga Mwana Mnt’hu, naho nakavala taji ye zahabu mwo mtwi wakwe naho mwo mkono wakwe katoza hengo ikutwa. ¹⁵Niyo mtumigwa ywa kwe mbingu mtuhu keza akalaila kwe nyumba ya Mnungu, niyo agutila kwa izwi kulu kwa yudya ekale kwa mavunde akagamba, “Guha hengo yako uvune kwaviya lupisi lwo kuvuna lubula, ulozo we isi utoga!” ¹⁶Ivo yudya ekale mwe divunde niyo aduula hengo yakwe mnanga mwe isi, isi niyo yavunwa.

¹⁷Niyo naona mtumigwa ywa kwe mbingu mtuhu akeza kulawa kwe nyumba ya Mnungu ukwo kwe mbingu, yehe naye andaga na hengo ikutwa.

¹⁸Niyo mtumigwa ywa kwe mbingu mtuhu yudya andile no udahi wo moto eza kulawa kwe kilingo cha kulavila nt’mbiko. Niyo yudya mtumigwa ywa kwe mbingu andile na hengo ikutwa akabongela, akamgamba, “Yaha zizabibu za mwe isi ne hengo yako kwaviya zizabibu zakwe ziiva!” ¹⁹Niyo yudya mtumigwa ywa kwe mbingu niyo azegeta zizabibu ne hengo yakwe mwe isi, niyo azikupula hant’hu ho kujatangila divai dya maya makulu ya Mnungu. ²⁰Zizabibu nezijatangilwa hant’hu ho kujatangila divai handaga kuse yo mzi niyo sakame yalawaga hant’hu ho kuminyila yaseelaga utali ubuile mikono miidi kuita hasi na uhale wakwe ukubula maili magana maidi.

Makunt’ho mfungate yo kukomeleza kulawa kwa mtumigwa ywa kwe mbingu

¹Naho naonaga kilagiso kituhu kikulu kikwehela, kwandaga na watumigwa mfungate wa kwe mbingu watozaga makunt’ho ayo mtandatu ye nk’homelezo naho, kwa ayo maya ya Mnungu nayande yasila.

²Niyo naona kint’hu enga bahali ye kioo ihangane na moto, wadya wahumi walaile kwe dikala diya ne dihili dyakwe na kwe uwazilo we dizina dyakwe wakimalaga hank’handa ye idya bahali ye kioo watozile masinda mgunda wenk’higwe ni Mnungu, ³naho nawakakema wila wa Musa mtumwa ywa Mnungu no wila wa Mwanangoto wakagamba,

“Weye Zumbe Mnungu mta udahi,

udamanyi wako ni mkulu na wa kwehela!

Seuta ywa si zose

sila zako ni za kindedi na zikaka enga ivo zikuungwa kunda.

⁴Zumbe niani hakukogoha na kuditogola dizina dyako?

Kwaviya weye wimkulu

si zose nezize

na kufunamiza mitwi yawe kubula hasi hameso hako.

Kwaviya udamanyi wako uwagile ukelaviliza kale.”

⁵Yeze yajike ayo naonaga Nyumba ya Mnungu, idyo nidyo Dihema dya uwona dikomolwa kwe mbingu. ⁶Wadya watumigwa mfungate kwe mbingu wandile na makunt’ho yakutisa mfungate niyo weza kulawa kwe nyumba ya Mnungu wavaligwe suke zing’aile na zisunt’hike na zikumweka mweka, mwe vifuwa vawe nawavaligwa misipi ya zahabu. ⁷Niyo yumwenga mwe viumbwa vine wata ugima awenk’ha watumigwa wa kwe mbingu wadya mfungate nyiga ze zahabu, zimemile maya makulu ya Mnungu akwikala ulo na ulo. ⁸Nyumba ya Mnungu niyo yamema mosi kulawa ukulu wa Mnungu no ludole lwakwe, naho hakwandile na yeyose adahile kwingila kundani kwe nyumba ya Mnungu kubula aho makunt’ho yakutisa mfungate kulawa kwa wadya watumigwa wa kwe mbingu mfungate yande yasila.

Nyiga za maya ya Mnungu

¹Niyo neva izwi kulu kulawa kwe nyumba ya Mnungu dikawagamba wadya watumigwa mfungate wa kwe mbingu, “kakupuleni mwe isi zinyiga mfungate za maya makulu ya Mnungu.”

²Mtumigwa ywa kwe mbingu ywa nk’hongo agendaga kukupula nyiga yakwe mwe isi, niyo halaila ihu diihile kwa wadya wose wandile ne dihili dye diya dikala hamwenga na wadya nawakavika hameso ha diya kala.

³Niyo mtumigwa ywa kaidi kakupula nyiga yakwe mwe bahali, mazi niyo yanda enga sakame ya mnt’hu abanike, niyo kila kina ugima kikwikala mwe bahali niyo chabanika.

⁴Mtumigwa ywa kwe mbingu wa katatu niyo kakupula nyiga yakwe mwe mito na nch’hoko za mazi, niyo yose yanda sakame. ⁵Niyo neva mtumigwa ywa kwe mbingu akukimaila mazi akagamba, “Weye niwe ukudamanya yakwelela, weye wiyaho naho wandaga uuko. Weye niwe ukukile kwaviya kusengela si enga ivo viwagilwe. ⁶Kwaviya nawetila isakame ya walotezi ya want’hu wa Mnungu, naivo weye kuwenk’ha vileke wainywe, ivo nivo wawagilwe!” ⁷Niyo neva izwi kulawa kwe kilingo cha kulavila nt’hambiko dikagamba, “Zumbe Mnungu Mta udahi! Heiye, usengelo wako ni wa kindedi na wakudamanya yakwelela!”

⁸Mtumigwa ywa kwe mbingu ywa kane niyo kakupula nyiga yakwe kwe dizuwa, niyo dyalekelwa kuwoka want’hu wose kwa zihuye dikoka. ⁹Want’hu niyo wahya kwa zihuye dikoka, niyo wadihomola dizina dya Mnungu Mta udahi mwa makunt’ho yadya. Naho hawakweiile uwavu wawe na kumwink’ha Mnungu ukulu wakwe.

¹⁰Niyo mtumigwa ywa kwe mbingu ywa shano kakupula nyiga yakwe mwo difumbi dye kiseuta we diya dikala. Ziza niyo dyasela mwo useuta we diya dikala, naho niyo want’hu wafunc’ha zinyimi zawe kwa usungu udya waonaga, ¹¹naho niyo wamhomola Mnungu ywa kwe mbingu kwa udya usungu nawakauona, na kwa maihu yawe, naho hawakweiile udamanyi wawe.

¹²Niyo mtumigwa ywa mtandatu kakupula nyiga yakwe mwo mto udya mkulu ukwitangwa Fulati. Amazi ya udya mto niyo yanyala uleke yeikile lumwe sila kwa maseuta wakulawa ulailo wa zuwa. ¹³Niyo naona miuye mitatu misavu yandaga enga majula. Umwenga walaga mwo mnomo we dizoka, imwenga ilawa mwo mnomo we diya dikala, imwenga nayo ilawa mwo mnomo wa yudya mlotezi wo lulimi. ¹⁴Iyo niyo miuye ye kimp’hepo ikudamanya vilagiso. Miuye iyo niyo ikuita kwa maseuta wose we ziisi vileke wawalunganye kwa nk’hondo mwe dizuwa diya dya Mnungu Mta Udahi.

¹⁵“Tegeleza! Neza enga mbavi! Ana kinyemi akwikala meso akavala zisuke zakwe anase kugenda kimbwigili na kukupata soni niyo want’hu wamuona!”

¹⁶Miuye iyo yawaduganyaga maseuta we ziisi hamwenga, hant’hu hakwitangwa kwa Kiibulania Halimagedoni.

¹⁷Niyo mtumigwa ywa kwe mbingu ywa mfungate akupula lwiga lwakwe mwo ulanga. Niyo izwi kulu dyevika kulawa kwe difumbi dye kiseuta mwe nyumba ya Mnungu, dikagamba, “Idamanyika kale!” ¹⁸Handaga na lumwemwe na matint’himo na nk’huwa, na kisingisa kikulu cha isi, naho ikisingisa icho hakinati kilaile kukongela aho isi yaumbagwa kwaivo chandaga kikulu. ¹⁹Mzi mkulu niyo wakepanga hant’hu hatatu ye mizi yose ye isi niyo yabanika naho udya mzi wa Babiloni niyo wakumbukilwa hameso ha Mnungu kunywesigwa kikombe che divai ya maya makulu ya Mnungu. ²⁰Visiwa vose niyo vadidimila, naho hakwaonekaga mnima wowose. ²¹Naho fula nk’hulu ya maiwe makuku yazamile yakujink’ha kihimo cha kilo milongo mine kulawa kwe mbingu yawanyeelaga want’hu, niyo wamhomola Mnungu kwe dikunt’ho dikutisa diya dye fula ink’hulu ya maiwe, kwaviya kunt’ho idyo nedikulisa.

Pamp’he umkulu ne dikala

¹Mtumigwa ywa kwe mbingu yumwenga mwe wadya mfungate andaga ne zinyiga mfungate aniziilaga no kunigamba, “So uku vileke hulagise usengelo wa yudya pamp’he mkulu akwikala mnk’handa ya mazi mengi. ²Maseuta wengi we isi watenda uhabwasi na yehe. Na want’hu wa mwe isi wakolwa ni divai yo uhabwasi wakwe.”

³Niyo nehitozigwa ni Muye ywa Mnungu anigalaga kwe nyika. Uko namuonaga mvele ekale mnanga mwe dikala dink’hundu amemile mazina yakumhomola Mnungu, dikala dyandaga na mitwi mfungate hamwenga na mp’hembe mlongo. ⁴Mvele yudya na kavala suke za zambalau na zink’hundu naho nakahambigwa kwa zahabu na vint’hu vidamanywe kwa maiwe ya utana utendese na usalu, naho andaga ne kikombe che zahabu mwo mkono wakwe kimemile mbuli zikwiihiza hamwenga na usavu wo uhabwasi wakwe. ⁵Mwe kihanga cho uso wakwe mwawandikagwa dizina dye kinyele, “Babiloni Mkulu, mamiyawe dya mapamp’he ne zimbuli zikwiihiza za mwe isi.” ⁶Niyo namuwona yudya mvele kakolwa na sakame ya want’hu wa Mnungu hamwenga na sakame ya waona wa Yesu.

Nize nimuwone niyo neheeleswa. ⁷Mtumigwa ywa kwe mbingu niyo aniuza, “Nii kwehelwa? Nohugambile kinyele cha uyo mvele hamwenga na idi dikala dine mitwi mfungate na mahembe mfungate na yudya mvele ekale mnanga mwakwe. ⁸Dikala diya udione dyandaga uuko, mna ivi haluse hadihali naho ivi haluse dyaunga dihagihi kulawa kwo mnyongomela howiina uheelo no kuita ko ubanangi, wadya nawo wakwikala mwe isi wata mazina hayewandikwe mwe kitabu cho ugima kukongela aho isi yandaga ikei kuumbigwa, nawehelwe wakeza kudiona diya idikala kwaviya dyandaga uuko naho ivi haluse hadihali mna nedize naho.

⁹“Aho naho kuungwa mizungu no kukombaganya. Idya imitwi mfungate ni ngulu mfungate ziya ekaile yudya mvele, nayo ni maseuta mfungate, ¹⁰washano mwa awo wabanangwa kale, yumwenga eyaho, naho umtuhu akei kwiza, naho akeza kwiza naaungwe kulongoza kwa lupisi luguhi du. ¹¹Diya dikala dyandaga uuko naho ivi haluse hadikuli idyo nidyo dya mnane, naho dyoho ni dimwenga mwa wadya mfungate, nadyo nedikomigwe.

¹²“Yadya mahembe mlongo uyaone ni maseuta mlongo, naho wakei kukonga kulongoza, mna nawenk’higwe udahi kwa sa dimwenga du ne diya dikala. ¹³Wose awa nawazumilana kwink’hiza ludole no udahi wawe kwe diya dikala. ¹⁴Nawatoane na Mwanangoto, mna Mwanangoto hamwenga na wadya awetange na kuwasagula awo wahuwilwa, naawahume kwaviya Mwanangoto ni Zumbe ywa mazumbe naho Seuta ywa maseuta.”

¹⁵Naho mtumigwa ywa kwe mbingu anigambaga, “Mazi ayo uyaone hadya akwikala yudya pamp’he, ni mafyo ya want’hu na si na nk’holo na milosi. ¹⁶Yadya mahembe mlongo uyaone na diya dikala woho nawamwihiye yudya pamp’he naho nawaguhe kila kint’hu ananacho nakumwasa kimbwigili. Nawamdye nyama yakwe no kumwoka pele mwo moto. ¹⁷Kwaviya Mnungu kagela mwe mioyo yawe kiya aungile kidamanywe kugamba wazumilane kudink’ha diya dikala useuta wawe kubula hadya alongile Mnungu yakelavilize.

¹⁸“Naho yudya mvele umuwone ni udya mzi mkulu, ukulongoza maseuta wose mwe isi.”

Ukugwa kwa Babeli

¹Yeze yomboke ayo naonaga mtumigwa mtuhu ywa kwe mbingu akaseela kulawa kwe mbingu, mta udahi mkulu naho isi neing’azwa kwo ukulu wakwe. ²Abongeelaga kwa izwi kulu akagamba, “Ugwa, Babiloni mkulu ugwa pele. Inda ukalo we zimp’hepo na gomela dya kila miuye iihile na chaila dya kila madege masavu heyekwelela. ³Kwaviya want’hu we si zose zikolwa divai nk’hali yo kuungisa kwakwe uhabwasi. Maseuta we isi wakehabwasa naye, wakuchuuza wanda wagoli kwa ludole lwo kumunk’wamunk’wa kwakwe.”

⁴Niyo neva izwi tuhu kulawa kwe mbingu dikagamba,

“Foseni mlaweni mwakwe nyuwe want’hu wangu!

Msekunda ndala mwo uwavu wakwe,

naho msekuhokela makunt’ho yakwe.

⁵Kwaviya wavu wakwe ukeumbika kubula kwe mbingu,

naho Mnungu akumbukila maihi yakwe.

⁶Mtendeleni enga viya yehe awatendeleni nyuwe,

mliheni nk’hanana mbili kwa yadya yose atendile.

Naho mwe kikombe kiya ahanganyile divai yakwe mhanganyileni divai nk’hali nk’hanana mbili,

kujink’ha idya awenk’hileni nyuwe.

⁷Naho mwink’he masulumizo ne kinyulu

viligane na viya naakaketogola na kukeunga,

kwaviya naakagamba mwo moyo wakwe. ‘Nalongoza enga seuta ywa kivele

Miye hiye mvele afiilwe ni mgosi,

henione kinyulu!’

⁸Kwaivo makunt’ho nayeze zuwa dimwenga,

file na kuhongeza na sala.

Naho yehe nookigwe pele nu moto

kwaviya Zumbe Mnungu akusengela yehe ni mta udahi.”

⁹Wadya maseuta we ziisi wakehabwase na kukebwedeza hamwenga naye, nawaile na kuhongeza wanaona umosi wo kokigwa kwakwe. ¹⁰Nawakimale hale kwa wogofi wa masulumizo yakwe, “Hangi wenye naho hangi wenye mzi udya mkulu, Babeli, Mzi udya wandile na ludole kwaviya mwe sa imwenga usengelo wako ubula!”

¹¹Wachuuzi we isi nawaile na kunda na kinyulu kwaviya hakuli mnt’hu akugula uchuuzi wawe naho, ¹²vint’hu va zahabu na masawa na maiwe ya utana utendese na usalu wa lulu na suke zidamanywe kwa kitani na suke za zambalau na za halili na suke zink’hundu na viziti vose va mhemp’he na vint’hu vose vidamanywe kwa mahembe ya nt’hembo na vint’hu vidamanywe kwa maziti ya utana utendese na va shaba na va chuma na va maiwe, ¹³mdalasini ne iliki no uvumba ne malihamu no ubani ne divai na mavuta yo mzeituni no unga wedi wa ngano ne ngano na ng’ombe na ngoto na falasi na magali yakukokotwa na watumwa na hata ugima wa want’hu. ¹⁴“Viya noukamunk’hilwa kunda navo vikufosa, vint’hu vose va utana utendese na vakukefenyela vaga houvione naho!”

¹⁵Wadya wachuuzi wandaga wakadamanya uchuuzi we vint’hu ivo, wapataga ugoli kwakwe, nawakimale hale kwaviya nawakogoha ivo akusulumila. Nawaile na kunda na kinyulu, ¹⁶wakagamba, “Hangi wenye naho hangi we wenye, umzi udya mkulu! Noukavaligwa suke za kitani na zambalau na zink’hundu no kuhambwa kwa vint’hu vidamanywe kwa zahabu na vidamanywe kwa maiwe ya utana utendese na usalu wa lulu! ¹⁷Kwaviya mwe sa imwenga ugoli wakwe wose waga!”

Walongoza ngalawa wose we zingalawa na want’hu wose wakagamba mwe bahali na wakudamanya ndima mwe ngalawa na wachuuzi wakuchuuza kwa sila ya bahali nawakimale hale, ¹⁸Weze wauone umosi wo kuhya kwakwe, wagutilaga wakagamba, “Mzi wani ukudaha kuligana no mzi uno mkulu!” ¹⁹Wakefilisilaga divumbi mwe mitwi yawe wakalagisa kunda na kinyulu wakagutila na kuhongeza wakagamba, “Hangi wenye mzi udya mkulu hangi wenye, umwo want’hu wandaga na ngalawa mwe bahali wandaga wagoli kulawa mwo ugoli wakwe. Kwa sa imwenga ugoli wakwe wose waga!”

²⁰“Nyuwe mbingu, na want’hu wa Mnungu na wegala ulosi wa Mnungu na walotezi wakwe indeni na kinyemi kwa yadya yakulaila mwo mzi uwo, kwaviya Mnungu kamsengela kwa yadya awatendeleni nyuwe!”

²¹Mtumigwa ywa kwe mbingu yumwenga andaga mdahi enulaga iwe kulu dyandaga enga iwe dya kusagila, adiduula mwe bahali akagamba, “Ivi nivo umzi mkulu wa Babiloni ukuunga umoligwe pele, hauoneke naho. ²²Izwi dya watowa zeze na wakemi na watowa miluli na watowa magunda hedivike naho. Weye Babiloni mndani mwako haaoneke fundi yeyose mbwitu, hamwenga na izwi dya iwe dya kusagila hedivike naho kwako. ²³Ung’azi we kimuli houoneke naho kwako, naho kwanga kwa wila wa ndoza hokwivike kwako mbwitu. Kwaviya wachuuzi wako wandaga ni want’hu wakula mwe isi, naho kwo usai kuwazaganya want’hu wose mwe si zose!”

²⁴Mzi uwo wa Babiloni nousengelwe kwajili una masa ya sakame ya walotezi na sakame ya want’hu wa Mnungu na ya wose wachinjigwe mwe si zose.

¹Yeze yajike ayo nevaga izwi kulu enga izwi dya fyo kulu dya want’hu kwe mbingu dikagamba, “Zumbe atogolwe, uyokozi no ukulu no ludole vina Mnungu ywetu! ²Kwaviya usengelo wakwe ni wa kindedi na wa uwagilwa, kwaviya kumsengela yudya pamp’he mkulu aibalange isi kwa uhabwasi wakwe. Mnungu alihizaga kwaviya awakomaga wandima wakwe.” ³Walongaga naho wakagamba, “Zumbe atogolwe! Mosi wo moto ukuwoka udya mzi wakwela kulanga ulo na ulo!” ⁴Wadya wadala milongo miidi na kane na wadya wata ugima wane wakafunamiza mitwi yawe hasi no kumvika Mnungu akwikala mwe difumbi dye kiseuta wakagamba, “Taile, Mnungu atogolwe!”

Wila we ndoza ya Mwanangoto

⁵Mwe difumbi dye kiseuta kwevikaga izwi dikagamba, “Nyuwe watumwa wakwe wose mtogoleni Mnungu ywetu, nyuwe mkumogoha, mkutunywa na hewekutunywa!” ⁶Niyo neva izwi enga fyo kulu dya want’hu, naho enga izwi dya mazi mengi, naho enga izwi dya lukua lukali dikagamba, “Zumbe atogolwe kwaviya vint’hu vose ni va Zumbe Mnungu ywetu mta udahi. ⁷Kinde na kinyemi no kwanga naho kimtunye Mnungu mta ukulu kwaviya ndoza ya Mwanangoto ibula naho mlombigwa kakeika lumwe. ⁸Naho kalekelwa kuvala suke zidamanywe kwa nyuzi zing’aile.” Suke izo zisunt’hike zing’aile ni udamanyi ukumwelela Mnungu ukudamanywa ni want’hu wa Mnungu.

⁹Niyo mtumigwa ywa kwe mbingu anigamba, “Yawandike aya, kinyemi kina wadya walalikwe kwo ludyo lwe ndoza ya Mwanangoto.” Naho niyo mtumigwa ywa kwe mbingu agendeela akagamba, “Izi ni mbuli za kindedi za Mnungu.”

¹⁰Miye name niyo nafika madi he viga vakwe vileke nifunamize mtwi wangu hasi hameso hakwe, mna niyo anigamba, “Usekutenda ivo, miye ni mtumwa miyao du enga weye na wanduguzo, chose chalonga uwona mwa Yesu. Mvike Mnungu!”

Kwaviya want’hu wakulonga uwona mwa Yesu walongozwa ni Muye akuwalongoza walotezi.

Yudya akuilongoza ifalasi inga’ile

¹¹Naonaga mbingu igubuka, naho kwandaga na falasi ing’aile naho yudya ekale mnanga mwakwe etangwa, Mhuwilwa na Mkindedi, naho akasengela want’hu no kutoana nk’hondo adamanya enga ivo vikuungwa. ¹²Naho meso yakwe nayanda enga lulija lwa moto, naho mwo mtwi wakwe mwandaga na taji nyingi za kiseuta, naho ana zina diwandikwe hedikumanywa ni mnt’hu yeyose ila yehe mwenye du. ¹³Avalaga suke yatufikagwa mwe sakame, naho dizina dyakwe etangagwa “Mbuli ya Mnungu”. ¹⁴Naho watoani wa kwe mbingu wandaga wavaligwa suke zisunt’hike zing’aile naho nt’hana, Awo wakweile falasi zing’aile. ¹⁵Mwo mnomo wakwe mwandaga mkalawa bamba dikutwelesa, akuunga awatoele want’hu we isi. Naye naawalongoze kwa ngoda ya kilama, na kuminya zabibu mndani mwe kiminyilo kimemile maya makulu ya Mnungu Mta Udahi. ¹⁶Naho ana zina diwandikwe mwe suke yakwe na mwe diwambo dyakwe, “Seuta ywa maseuta na Zumbe ywa mazumbe.”

¹⁷Niyo namuona mtumigwa ywa kwe mbingu yumwenga akimale mwe dizuwa, niyo aila kwa izwi kulu, akayagamba madege yose yakupuluka mwo ulanga, “Soni mdugane kwo ludyo lukulu lwa Mnungu! ¹⁸Soni mdye zinyama za Maseuta, hamwenga na wakulu wa watowani, hamwenga na nyama za want’hu wata ludole, na nyama ze falasi na za awo wakuzilongoza na wose wakanda watumwa hegu walekelwa, wana nt’hogola hegu hewena nt’hogola!”

¹⁹Niyo nadiona diya dikala hamwenga na maseuta wa mwe isi hamwenga na wank’hondo wawe, wadugana vileke watowane na yudya akuilongoza ifalasi ing’aile akanda na watowani wakwe. ²⁰Diya dikala niyo dyagwiligwa hamwenga na yudya mlotezi wo lulimi yehe adamanye vilagiso hant’hu hakwe naho kwa ivo nakawazaganya wadya want’hu wahokele ikiwalo che diya dikala hamwenga na wadya wadivikile dihili dyakwe. Idikala idyo na mlotezi nawaduulwa mwe dikawa dimemile maiwe ya chola yakukweela moto, ²¹na wadya wank’hondo wasigale nawo wachinjagwa ne dibamba dya yudya akuilongoza ifalasi ing’aile, sime ikulawa mwo mnomo wakwe, niyo wadege yose yeguta kwa kudya nyama ze vimba va awo wakomigwe.

Mwavu naavugailwe myaka magana mlongo

¹Naho naonaga mtumigwa ywa kwe mbingu akaseela kulawa kwe mbingu, andaga ne zink’homoelo za kwo mnyongomela howiina uheelo hamwenga na mnyololo mkulu mwo mkono wakwe. ²Adigwilaga dizoka diya, dizoka dya kale dikwitangwa Mwavu hegu Mwavu no kudikakiliza mnyololo kwa myaka milongo gana. ³Niyo adiduula kwo mnyongomela howiina uheelo no kudivugaila, niyo agela kiwalo dinase kuwazaganya naho want’hu wa mwe isi mpaka aho myaka idya milongo gana isile. Myaka iyo inasila nedilekelwe kwa lupisi ludodo.

⁴Naonaga mafumbi ya kiseuta, nawo wadya wayekaile wenk’hagwa udahi wa kusengela enga maseuta, naonaga miuye yawe wadya wakant’higwe mitwi kwa uwona mwa Yesu no kubilikiza Mbuli Yedi ya Mnungu. Na wadya walemele kudivika diya dikala ne dihili dyakwe naho hawageligwe kiwalo mwe vihanga ve zinyuso zawe na mwe mikono yawe niyo wanda wagima wakekala mwo useuta hamwenga na Kilisito kwa myaka magana mlongo. ⁵Wadya watuhu wabanike hawauyuke naho kubula usiilo we iyo myaka milongo gana. Uwo nuwo uuyulo wa nk’hongo. ⁶Wavikilwa na want’hu wa Mnungu ni wadya nawauyulwe nk’hongo. File ya kaidi haina ludole mwa woho, mna nawande walava nt’hambiko wa Mnungu na wa Kilisito, naho nawalongoze hamwenga naye mwo useuta kwa myaka magana mlongo.

Mwavu avugailwa kwa myaka magana mlongo

⁷Myaka magana mlongo ikeza kusila, Mwavu naakomoelwe mwe divugailo dyakwe, ⁸naivo naande kuse akawazaganya want’hu wa kila hant’hu mwe zimp’hembe ze isi want’hu awo wetangwa Gogu na Magogu, awaduganye watowane nk’hondo, uwazilo wawe wandaga enga msanga wa kwe bahali. ⁹Wenelaga mwe isi yose, niyo waizunguluka ink’hambi ya want’hu wa Mnungu no mzi udya auungile. Mna moto kulawa kwe mbingu niyo wawoka taka. ¹⁰Naho Mwavu awazaganye, naadulwe mwe dikawa dimemile maiwe ya chola dikukweela moto, mdya dili dikala na yudya mlotezi wo lulimi, awo nawasulumizwe kilo na msi, ulo na ulo.

Kubanangwa kwa Mwavu

¹¹Naho naonaga difumbi dye kiseuta ding’aile na uyo ekale umwo. Isi ne mbingu niyo vanyilika ho undiilo wakwe, naho havioneke naho. ¹²Mna niyo nawaona want’hu wabanikaga, wakulu na wadodo, wakimala hameso he difumbi dye kiseuta. Niyo vitabu vagubulwa, naho niyo kwagubulwa kitabu kituhu, ikitabu cho ugima. Awo wabanike niyo walahigwa viligane na yadya wadamanye enga ivo yawandikwe mwe viya ivitabu. ¹³Bahali niyo yawalava kuse wadya wabanike wandile mndani mwakwe, file ne dibome hediina uheelo viwalava wabanike wandile mndani mwao. Wose nawasengelwe viligane na ivo wadamanyaga mwe isi. ¹⁴File ne dibome hediina usengelo niyo vaduulwa mndani mwe dikawa dya moto. Iyo niyo file ya kaidi. ¹⁵Naho mnt’hu yeyose zina dyakwe hadina oneke diwandikwa mwe kitabu iki cho ugima, nakaduulwa mwe dikawa dyo moto.

Mbingu mp’hya na isi mp’hya

¹Niyo naona mbingu mp’hya na isi mp’hya. Mbingu ziya za nk’hongo na isi idya ya nk’hongo zandaga zomboka kale, naho bahali nayo hayandile uko naho. ²Niyo naona mzi udya ukukile, Yelusalemu imp’ya ukaseela kulawa kwe mbingu kwa Mnungu wiikilwe lumwe enga mvele mlombigwa ahambigwe aite kwa mgosiwe. ³Niyo neva izwi kulu kulawa mwe difumbi dye kiseuta dya Mnungu dikagamba, “Kaula! Kaya ya Mnungu ni hamwenga na want’hu, naho nawande want’hu wakwe. Naye mwenye naande Mnungu ywawe. ⁴Naawahanguse masozi yawe, hahande na file naho, hahande na kuhongeza hegu ndilo hegu usungu, kwaviya mbuli za kale nezinde zomboka.”

⁵Niyo yudya ekale mwe difumbi dye kiseuta agamba, “Kaula, nayatenda yose kunda mahya!” Naho agambaga, “Yawandike aya kwaviya zimbuli izi ni za kuhuwilwa naho za kindedi.” ⁶Niyo anigamba, “Idamanyika kale! Miye ni unk’hongo no uheelo, ywe nk’hongo na ywe nk’homelezo. Mta nk’hilu nenimwink’he mazi yakulawa kwe nch’hoko yo ugima haheina maliho. ⁷Wadya wakuunga wande wahumi nawahokele aya, neninde Mnungu ywawe nawo nawande wanangu. ⁸Mna, wata wogofi na hewe kuhuwila na wakwiihiza na wakomi na wahabwasi na wasai hamwenga na wakuvika mahili na wadant’hi wose, want’hu awa hant’hu hawe ni he dikawa dimemile maiwe ya chola yakukweela moto. Ino niyo ifile ya kaidi.”

Yelusalemu imp’ya

⁹Yumwenga mwe wadya watumigwa mfungate wa kwe mbingu uyo andaga ne zinyiga mfungate zimemile yadya makunt’ho yo uheelo ezaga akanigamba, “Soo! Nohulagise yudya mlombigwa, mkaziwe dya Mwanangoto.” ¹⁰Natozagwa ni Muye niyo mtumigwa ywa kwe mbingu anigala kwo mnima mtali no kunilagisa mzi ukukile, Yelusalemu ukaseela kulawa kwe mbingu kwa Mnungu. ¹¹Wandaga ukang’ala kwa ukulu wa Mnungu. Ung’azi wakwe wandaga enga iwe dya utana utendese, enga iwe dikwitangwa yasipi naho enga iwe dikupulika. ¹²Kwandaga nagomela kulu naho tali dyandaga na nk’hili mlongo na mbili, naho mwe zink’hili ziya kwandaga na watumigwa mlongo na waidi wa kwe mbingu, naho kwandaga na mazina mlongo na maidi ye zikabila mlongo na mbili za Waizilaeli yawandikwe mwe izo zink’hili. ¹³Kwandaga na nk’hili nt’hantu mwe nt’hendelo zakwe zose zint’hatu zandaga ulailo wa zuwa naho zint’hatu zandaga kwa mkoma mahanya naho zint’hatu zandaga kwa mwenye mzi, mitatu ivihungihu yandaga kwo usweelo wa zuwa. ¹⁴Digomela dyo mzi dyandaga na maiwe ya nk’hongelo mlongo na mbili naho mnanga mwe kila iwe idyo mwawandikagwa zina dya mwigala ulosi yumwenga mwa wadya wegala ulosi mlongo na waidi wa Mwanangoto. ¹⁵Yudya mtumigwa ywa kwe mbingu alongile na miye andaga na mwanzi wa zahabu wo kuhimila udya mzi hamwenga ne zink’hili zakwe ne digomela dyakwe. ¹⁶Mzi udya waligananga kosekose, utali wakwe no uzangalamu wakwe valiganaga wakwe, niyo auhima udya mzi kwa mwanzi wakwe, wandaga enga maili magana milongo miidi na magana mane uhale wakwe na uzangalamu wakwe no utali wakuita kulanga kwakwe vose viligana. ¹⁷Niyo adihima diya digomela dyakwe, nadyo dyandaga ni mp’hima milongo mtandatu na mtandatu viligane ne vihimo va want’hu ivo wahimilaga mtumigwa ywa kwe mbingu. ¹⁸Digomela diya dyazengagwa kwa iwe dikwitangwa yasipi, mzi wenye wazengagwa kwa zahabu yedi enga iwe dikulangaza. ¹⁹Naho ink’hongelo ye digomela dyo udya mzi dyahambwagwa kwa maiwe ye hengi ya utana utendese Iwe dya nk’hongo dyetangagwa yasipi, dya kaidi dyetangagwa safaya, dya katatu dyetangagwa kalikedoni, dya kane nadyo dyetangagwa zumalidi, ²⁰iwe dya shano dyetangagwa Sadoniki, dya mtandatu dyetangagwa akiki, iwe dya mfungate dyetangagwa kilisolito, na dya manane dyetangagwa zabalajadi, iwe dya kanda dyetangagwa yakuti injano, dya mlongo dyetangagwa kilisopulaso, iwe dya mlongo na imwenga dyetangagwa hiakinto, iwe dya mlongo na mbili dyetangagwa amesisto. ²¹Zink’hili ziya mlongo na miidi zadamanyagwa kwa lulu mlongo na mbili, naho mnango umwenga noudamanywa kwa lulu imwenga. Vizila vakwe vetiilagwa zahabu yandaga ikamweka enga kioo kikulangaza kisunt’hike.

²²Mwo mzi uwo hione nyumba ya Mnungu kwaviya Zumbe Mnungu Mta Udahi na Mwanangoto weyumo hant’hu hakwe.

²³Naho mzi udya houunge zuwa hegu mnenge va kuugela ung’azi kwaviya ukulu wa Mnungu nougele ung’azi naho Mwanangoto nulo lumuli lwakwe. ²⁴Want’hu wa mwe isi nawekale mwo ung’azi uwo. Maseuta wa si nawagele ugoli wawe mkulu mwe isi idya. ²⁵Naho nk’hili zakwe hezize zivugalwe nomsi, kwaviya mdya hamna kilo. ²⁶Mndani mwakwe nawagele ukulu hamwenga ne nt’hogola ye zi si. ²⁷Naho chochose kikwiihiza hekingile mndani mwakwe, hegu wadya wakudamanya yakwiihiza na wadant’hi, mna nawengile wadya du wawandikwe mwe kitabu cho ugima cha Mwanangoto.

Mto wo ugima

¹Naho niyo mtumigwa ywa kwe mbingu anilagisa mto wa mazi yo ugima wandaga ukalawa kwo ukalo we kiseuta wa Mnungu na wa Mwanangoto, wandaga enga iwe dikapulika enga kioo. ²Mto udya noukaseela mgati mwe sila ink’hulu yo mzi uwo. Mnk’handa yo umto uwo kwandaga no mti ukweleka matunda, naho mti uwo ukweleka mhilimo wose. Mani yakwe yandaga yakawahonya want’hu we si zose. ³Hahande na ligito dyodyose naho.

Difumbi idyo dye kiseuta wa Mnungu hamwenga na Mwanangoto nounde mwo mzi uwo naho wandima wakwe nawamvike. ⁴Naho nawauone uso wakwe, dizina dyakwe nediwandikwe mwe vihanga ve zinyuso zawe. ⁵Hokunde na kilo, hokuungwe kimuli hegu zuwa kwaviya Zumbe Mnungu naawamulikile. Nawalongoze enga maseuta ulo na ulo.

Kwiza kwa Yesu

⁶Niyo mtumigwa ywa kwe mbingu anigamba, “Mbuli izi ni zakindedi na za kuhuwilwa, Naho Zumbe Mnungu akugela muye wakwe kwa walotezi wakwe kamtuma mtumigwa ywa kwe mbingu amlagise mtumwa ywakwe yadya yakuungwa yasunguze kulaila.”

⁷Yesu niyo agamba. “Tegelezeni!” “Nasunguza kwiza! Nawande wavikilwa wakuzitegeleza zimbuli zo ulotezi we kitabu iki!”

⁸Miye Yohana, hiva nokuona zimbuli izi zose, nize ninde hiva kale no kuziona nehiunga kumvika yudya mtumigwa ywa kwe mbingu anilagisaga zimbuli izi. ⁹Mna niyo anigamba, “Usekutenda ivo! Miye ni mtumwa miyao na wanduguzo walotezi na wadya wakutoza zimbuli ze kitabu iki. Mvike Mnungu.”

¹⁰Naho niyo anigamba, “Usekuugela maduha ulosi udya umwe kitabu iki kwaviya mbuli izi zihagihi kulaila. ¹¹Yudya akudamanya wiihi agendeele kudamanya wiihi wakwe, yudya msavu agendeele no usavu wakwe, yudya akudamanya yakumwelela Mnungu agendeele kudamanya yakumwelela Mnungu, naho yudya akukile agendeele kunda akukile.”

¹²Yesu niyo agamba, “Kaula, nasunguza ukwiza na mageleko ye mwo mkono wangu, neniwageleke want’hu wose viligane no udamanyi wawe aho heza kwiza. ¹³Ni miye nk’hongo na nk’homelezo, ywa nk’hongo na ywa nk’homelelzo akukonga vint’hu vose no kuvibuza kwo uheelo.”

¹⁴Wana kinyemi wafuile zisuke zawe, walekelwe kwingila kwe zink’hili zo mzi no kudya matunda yo mti wo ugima. ¹⁵Mna uko kuse yo mzi uwo weyuko wakudamanya mbuli zikwihiza na wasai na wahabwasi na wakomi, hamwenga na wadya wakuvika mahili na kila yumwenga akuungisa kulonga udant’hi no kuudamanya.

¹⁶“Miye Yesu himwigala mtumigwa ywa kwe mbingu ywangu vileke alonge uwona we zimbuli izi kwa difyo dya wahuwila wa Kilisito. Miye ni mwelekwa mwe cheleko cha Daudi, ne Int’hondo ya Macheelwa ikung’ala.”

¹⁷Muye ywa Mnungu na Mlombigwa wagamba, “So!”

Kila yumwenga evile zimbuli izi aungigwa nae agambe, “So!”

Naho yeyose mta nk’hilu neeze! Yeyose akuunga neeze aguhe mazi yo ugima heyeina maliho.

Nk’homelezo

¹⁸Miye Yohana nawakanya wakwiva zimbuli zo uwona we kitabu iki, mnt’hu akuunga awongezele chochose, Mnungu naye naamsulumize kwa makunt’ho yadya yawandikwe mwe iki kitabu. ¹⁹Naho uneva mnt’hu yeyose anausa chochose mwe zimbuli zo ulotezi we kitabu iki, Mnungu naye naamuusile difungu dyakwe dya matunda yo udya mti wa ugima hamwenga na mwo udya mzi ukukile udya uwandikwe mwe kitabu iki.

²⁰Yudya akulonga uwona mwa aya agamba, “Ikindedi nasunguza ukwiza.”

Taile. Zumbe Yesu, So.

²¹Wedi wa Zumbe Yesu unde na nyuwe nyose. Taile.