WAEFESO

BALUWA YA PAULO KWA

WAEFESO

ULONGOELO

Baluwa kwa Waefeso yawandikagwa mwo lupisi luligane na ulo lupisi iwandikwe ibaluwa kwa Wakolosai mwo mwaka wa milongo mtandatu kulawa aho Yesu eze elekwe. Awandike baluwa ino, aketambula mwenye kugamba ni Mwigala Ulosi Paulo 1:1. Wamanyi wengi wazumilana kugamba Paulo niye awandike ibaluwa ino hamwenga na kugamba yaswesa imilamsile yakwe enga ivo ili mwe baluwa kwa Wakolosai. Kwaivo elo baluwa ino yadahika neitailwa yenezwe mwa mafyo yamwenga ya want’hu wakumhuwila Kilisito mwo mkowa uwo. Naho Paulo atambalisa kugamba umwo andaga akawandika ibaluwa ino andaga mwe divugailo 3:1;1:1 na 6:20. Paulo amwink’haga Tikiko ibaluwa ino aigale kwa mafyo ya wahuwila wa Kilisito ya uko Efeso umwo andaga mwe nt’hambo yakwe ya kuita uko, 6:21-22.

Efeso wandaga ni mzi mkulu vitendese, naho nuwo wandaga mzi mkulu wo useuta wa Kiloma mwo mkowa wa Asia ndodo. Naho Efeso noumanyikisa kugamba uko kwandaga na nyumba ya mnungu mvele ywe Kigiliki etangagwa Atemi, Imitendele 19:23-31. Difyo dya wahuwila wa Kilisito dya uko Efeso dyakongaga kwa ludole mna mazuwa ivo yagendeelaga dyonyelaga. Ugubulo 2;1-7

Paulo atambalisa mwe hant’hu ha nk’hongo ye baluwa yakwe, ivo Mnungu awasagule want’hu wakwe na kuwayokola kulawa mwo wavu wawe kwa sila ya Yesu Kilisito. Naho adiliganya difyo dya wahuwila wa Kilisito no mwili, na Kilisito akanda nuwo mtwi wakwe. Naho aliganyiza zengo na Kilisito, naye mwenye niye diiwe dikulu dya hank’handa. Mwe hant’hu ha kaidi ye baluwa, Paulo alangiliza kwa wikazi ukuungwa kwa wahuwila wa Kilisito.

Yemndani

Mwo 1:1-2 Paulo aketambula mwenye na kuwalamsa Waefeso.

Akajika, atambalisa mbuli yo undugu uwo wiyaho mgati mwe difyo dya want’hu wakumhuwila Kilisito na Kilisito mwenye. 1:3-3:21

Naho Paulo awandika ivo want’hu wakumhuwila Kilisito ivo wakuungwa kwikala. 4:1-6:20.

Kwo uheelo Paulo alonga mbuli za kubindiliza 6:21-24.

¹Miye Paulo, Mwigala ulosi ywa Yesu Kilisito kwaviya aungile Mnungu, nawawandikilani nyuwe want’hu wa Mnungu wa Efeso, wahuwilwa mwo kulunganywa na Yesu Kilisito.

²Nawalombezelani uwedi no utondowazi kulawa kwa Mnungu Tati yetu na Zumbe ywetu Yesu Kilisito,

Uvikilwa wa kimp’heho mwa Kilisito

³Atogolwe Mnungu eli Ise dya Yesu Kilisito, kwaviya mwo kulunganywa na Kilisito kakivikila na kukink’ha mageleko yose ye kimp’heho uko kulanga. ⁴Kukongela aho isi ino ikei kuumbigwa, Mnungu nakakisagula kinde wakwe mwo kulunganywa na Kilisito, vileke kinde wasuntigwa hameso hakwe haheina lema.

⁵Kukongela aho kale mwenye Mnungu nakakitalazila suwe kinde wanawe kwa sila ya Yesu Kilisito, nivo aungile ne kitalo chakwe. ⁶Ivo kimtogoleni Mnungu kwa wedi wakwe mkulu akink’hile kwombokela mwanawe amuungise. ⁷Kugamba kwa sakame yakwe Yesu, suwe kikombolwa, kiusilwa wavu wetu. Nuko kugamba wavu wetu wauswa, nivo wili ukulu we uwedi wakwe, ⁸akink’hile haheina kihimo!

Kwa ubala wose na umanyi. ⁹Mnungu adamanyaga kiya aungaga, niyo akink’ha kumanya mzungu wandaga ukei kumanyika uwo aungaga kuudamanya kombokela kwa Yesu Kilisito. ¹⁰Mzungu uwo nowize ukintizwe ni Mnungu aho lupisi lwakwe lukabula, ni kuwaduganya viumbwa vose kwo ulanga na mwe isi, wose wakanda walongozwa ni Yesu Kilisito.

¹¹Mwo kulunganywa na Yesu, suwe kitendigwa wakipe wo ukombolwa kuligana naivo kiikilwe mizungu, kwa diya Mnungu aungile kudamanya kila kint’hu kwa ulamuzi wakwe no kuunga kwakwe. ¹²Suwe kilongole kumhuwila Kilisito chaungwa kuutunya ukulu wa Mnungu. ¹³Nanywe wa mataifa matuhu, mnda want’hu wa Mnungu aho mwize mwive ulosi we kindedi, Imbuli Yedi iyo iwegaileni ukombolwa. Mumhuwila Kilisito, Mnungu naye niyo awagelani kiwalo kwa kumink’hani Muye ywa Mnungu uyo alaganaga naawenk’heni. ¹⁴Uyu Muye msuntilwa nicho kiwalo kugamba nekihokele kiya Mnungu agambile naawenk’he want’hu wakwe, no kukink’ha ikindedi kugamba Mnungu naawenk’he ukombolwa ukint’hile awant’hu wakwe. Nekiitunyeni uwedi wakwe mkulu vitendese!

Paulo awalombezela Waefeso

¹⁵Kwa ivo kukongela aho nevaga umhuwi wenyu mwa Zumbe Yesu na lukunde lwenyu kwa want’hu wose wa Mnungu, ¹⁶higendeelesa kumtogola Mnungu kwajili yenyu. Nawakumbukilani kila hamvika Mnungu, ¹⁷na kumlombeza Mnungu ywa Zumbe ywetu Yesu Kilisito, Tate mta ukulu awenk’heni Muye ywakwe akuunga awenk’heni umanyi na kumgubuilani adahe kummanya Mnungu. ¹⁸Naho namlombeza Mnungu agubule mioyo yenyu idahe kuwona ung’azi wakwe vileke mmanye dikawiilo diya awetangileni no ukulu utendese wo uvikilwa awaikile want’hu wakwe, ¹⁹naho mmanye ivo udahi wakwe wili mkulu vitendese kwetu suwe kikuhuwila. Udahi uno ukudamanya ndima mndani mwetu, uligana no ludole ludya lukulu lutendese, ²⁰ulo lumuuyule Kilisito, niyo lwamwiika kulume kwakwe uko kwe mbingu. ²¹Uko, Kilisito kanda niye mkulu wakila uzumbe na udahi na ludole na ukulu, niye mkulu kujink’ha ukulu wose umanyike mwe isi ino na mwe isi iyo ikwiza. ²²Mnungu kaika vint’hu vose hasi yo udahi wa Yesu, niyo amwink’hiza kwe difyo dya wahuwila wa Kilisito ande mkulu mwe vint’hu vose. ²³Wakumhuwila Kilisito wose, nuwo umwili wakwe Kilisito, naho nuko kukint’ha kwakwe yehe akugela kukint’ha kila kint’hu na kila hant’hu.

Kulawa mwe file no kuuyuka

¹Nyuwe mwandaga mfa kwajili ya malema no wavu wenyu. ²Amazuwa yadya, mwekalaga mkatimila ivo wiihi we isi ino, niyo mwanda mwawategeleza wakulu wa mp’hepo yano udahi kwo ulanga, yadya ivi haluse yakuwekaila want’hu hewe kumhuwila Mnungu. ³Naivo suwe chose nekinda enga woho, kikekala kutimila kumunk’wamunk’wa munk’hwa kwiihile kwe isi, no kudamanya mbuli zikuibwedeza imili yetu ne zifanyanyi zetu. Naswe ivo kili mwo wavu, kinda enga woho, nekiwagilwa kusulumizwa ni maya ya Mnungu. ⁴Mna Mnungu ni mta mbazi zitendese kakiunga kwa lukunde lukulise, ⁵hata uneva nekinda kibanika kwajili yo wavu, kakitenda wagima hamwenga na Yesu Kilisito. Nyuwe myokolwa kwa uwedi wa Mnungu. ⁶Kwa kulunganywa na Yesu Kilisito, Mnungu kakiuyula hamwenga naye kinde mazumbe hamwenga naye uko kulanga. ⁷Nivo aungile kukilagisa kwa want’hu wa mazuwa yakwiza, ukulu wa uwedi wakwe uwo akink’hile kwa kise mwo kulungana kwetu na Yesu Kilisito. ⁸Kwaviya myokolwa kwa mbazi za Mnungu kombokela umhuwi. Mbuli ino hailaile kwa kukombeka kwenyu, idi ni ngeleko kulawa kwa Mnungu. ⁹Naho hiyo kwa udamanyi wenyu, mnt’hu yeyose anase kukeduvya. ¹⁰Mnungu niye akiumbile ivi kili, naho kwa kulunganywa hamwenga na Yesu Kilisito, nakakiumba vileke kikale wikazi we mitendele iyedi akiikile lumwe vileke kiidamanye.

Uhamwenga mwa Yesu

¹¹Nyuwe want’hu mwelekwe hi Wayahudi, mkwitangwa, hewe vinilwe, ni Wayahudi wakuketanga wenye, wavinilwe, kwa kiya wakuitendela imili yawe, kumbukileni ivo mwandaga aho nk’hongo. ¹²Lupisi udya nyuwe mwandaga homwiinanaye Kilisito. Nomnda kuse ya Waizilaeli, naho hamwandaga want’hu wasagulwe ni Mnungu. Mwandaga homwiina chochose mwe ndagano, mwe yadya Mnungu alongaga na want’hu wakwe kukawiila, naho mwekalaga mwe isi ino homwiina makawiilo, naho enga want’hu hewe mmanyize Mnungu aha he isi. ¹³Mna haluse kwa kulungana na Yesu, nyue mwandile hale aho nk’hongo, mnda hagihi kwombolela sakame ya Kilisito. ¹⁴Kwaviya, Kilisito mwenye kakigaila utondowazi, kwa kuwatenda Wayahudi, na want’hu hi wayahudi kunda kint’hu kimwenga. ¹⁵Yesu ausaga miko ya Wayahudi, ne miko ne nk’hanana, inde kugamba, mwe nk’holo izo zimbuli, adamanye lukolo lumwenga mwo kulunganywa naye, mwe kuudamanya ivo kegala utondowazi. ¹⁶Kwa file yakwe, Kilisito auusaga unk’hondo wawe, naho kwa msalaba wakwe, Yesu kazilunganya zink’holo izo zinde kint’hu kimwenga, no kuwavuza kwa Mnungu. ¹⁷Ivo, Yesu ezaga kubilikiza Mbuli Yedi yo utondowazi kwa nyuwe want’hu hi Wayahudi mwandagaga hale na Mnungu, naho kwa Wayahudi awo wandaga hagihi na Mnungu. ¹⁸Haluse kwasila ya Yesu Kilisito, suwe chose, Wayahudi na hi Wayahudi, chadaha kuita kwa Tate kombokela Muye ywa Mnungu yumwenga.

¹⁹Ivo elo, nyuwe hi wayahudi hiyo wageni naho, naho hiyo want’hu wa kuse. Nyuwe mwi want’hu wa hamwenga na want’hu wa Mnungu, naho nyuwe ni want’hu wa mp’huga ya Mnungu. ²⁰Nyuwe nanywe mzengigwa mwe zink’hongelo ziikigwe ni wegala ulosi na walotezi, Yehe mwenye Kilisito Yesu niye diiwe dikulu dye nk’hongelo. ²¹Yehe niye akudinula dizengo dyose no kudiluganya mpaka dinde nyumba ya Mnungu suntilwa aikilwe Zumbe. ²²Kwa kulunganywa hamwenga na Yesu, nyuwe nanywe mwazengwa hamwenga na watuhu wose mnde ukalo wa Mnungu kwombokela Muye ywa Mnungu ywakwe.

Mabilikizi ya Paulo kwa want’hu hi Wayahudi

¹Kwaivo, Miye Paulo mvugailwa ywa Yesu Kilisito, nalombeza Mnungu kwajili yenyu want’hu hi Wayahudi. ²Ikindedi mwiva kugamba kwa mbazi zakwe Mnungu nakanink’ha indima ino niidamanye kwajili yenyu. ³Mnungu kanigubuila mzungu wakwe ukefisile no kunitenda nimanye kwa sila ya magubuilo. Hiwandika kwa uguhi mwe mbuli ino, ⁴Naho mnasoma ayo niwandike nomdahe kumanya ivo nikimanyize kinyele cha Kilisito. ⁵Aho kale want’hu hawagambilagwa kinyele icho, mna haluse Mnungu kawagubula wegala ulosi na walotezi wa Mnungu wakwe wasuntilwa, kwa sila ya Muye msuntilwa. ⁶Ikinyele chenye ni iki. Kwe sila ye Mbuli Yedi, want’hu hi Wayahudi wapata ndala hamwenga na Wayahudi mwo kuvikilwa ni Mnungu, woho nawo ni vilungo mwo mwili uudya, naho kwa hamwenga wahokela mwa yadya Mnungu awenk’hile lagano kwa sila ya Yesu Kilisito.

⁷Miye hitendigwa kunda mndima we Mbuli Yedi, no uwedi anink’hile Mnungu kwa udahi wakwe mkulu. ⁸Miye ni mdodo vitendese mwa want’hu wose wa Mnungu mna Mnungu kanilagisa uwedi wakwe vileke niwabilikize want’hu hi Wayahudi ugoli wakwe Kilisito hewiina kihimo, ⁹naho niwatende want’hu waone mzungu wa Mnungu ukefisile ivo ukudamanywa, Mnungu muufi we vint’hu vose nakafisa kinyele iki kukongela aho nk’hongo ye vint’hu vose, ¹⁰vileke inde haluse, kwe sila ya want’hu wamhuwile Kilisito, wakulu wa kulanga na wata udahi, wadahe kubunk’hula mzungu wa Mnungu ivo wili wi hengi. ¹¹Mnungu nakadamanya imbuli iyo kutimila dia alongaga dya mazuwa ya ulo na ulo, idyo atendile kwa sila ya Kilisito Yesu Zumbe ywetu. ¹²Kwaviya chamhuwila Kilisito, chakeduvya, naho kina udahi wa kuita hameso ya Mnungu kikanda ne kindedi akukihokela. ¹³Naivo namlombeza Mnungu msekusokezwa kwa masulumizo hupata kwajili yenyu kwaviya ayo ni kwajili ye nt’hogola yenyu nk’hulu.

Lukunde lwa Yesu

¹⁴Kwaivo nafika madi kulombeza hameso ha Tate, ¹⁵uyo ichotoko che zink’holo ze vint’hu vose mwe isi na kwo ulanga. ¹⁶Namlombeza Mnungu viligane no ukulu we wedi wakwe utendese, awenk’heni nguvu kwa udahi wa Muye ywa Mnungu ywakwe, mtoge mioyo yenyu, ¹⁷naho nalombeza Kilisito atende kaya mwe mioyo yenyu kwa kumhuwila. Naho mnde mtoga na nk’hongelo mwo lukunde, ¹⁸vileke nyuwe hamwenga na want’hu wose wa Mnungu, mdahe kumanya ivo lukunde lwa Yesu lukwenela kwa uzangalamu, naho kwa uhale, na utali kuita kulanga, naho kwa utali wa hasi. ¹⁹Heiye, mdahe kumanya lukunde lwa Kilisito lukujink’ha umanyi wose, mmemezwe vitendese ukintizi wo ugima no udahi za Mnungu.

²⁰Mnungu, adaha kudamanya kujink’ha yadya kikulombeza hegu kubanikanyanya, kuligana no ludole lwakwe zikudamanya ndima mndani mwetu. ²¹Ukulu unde kwa Mnungu na mwe difyo dya wahuwila wa Kilisito na mwa Kilisito Yesu mazuwa yose na ulo na ulo. Taile

Uhamwenga mwo Mwili wa Kilisito

¹Haluse, miye mvugailwa kwa kudamanya ndima ya Zumbe, nawalobezani mwikale kuligana no lwitango mwitangilwe ni Mnungu. ²Mnde wakweseleza mioyo, naho wajalamu, naho want’hu wano ugoja, mkafinyiliza kila yumwenga kwa miyawe kwa sila yo lukunde. ³Kombekeni kuulela umwenga ukwigalwa ni Muye ywa Mnungu kwa kuuwamila utondowazi ukuwaikani hamwenga. ⁴Wiyuko mwili umwenga wa Kilisito na Muye ywa Mnungu yumwenga, enga ivo mwili na kawiilo dili kawiilo dimwenga mwitangilwe ni Mnungu. ⁵Eyuko Zumbe yumwenga na mhuwi umwenga, no ubatizo umwenga, ⁶naho eyuko Mnungu yumwenga uyo Tate ywa wose, naho Zumbe ywa wose, adamanya ndima mwa yose, naho mwa wose.

⁷Naho kila yumwenga ywetu kenk’higwa geleko hediina maliho kuligana na viya Kilisito amwink’hile. ⁸Enga ivo viwandikwe mwa Mawandiko Akukile kugamba.

Umwo apawaga kulanga vitendese,

aitaga na wengi watahigwe,

niyo awenk’haga want’hu mageleko.

⁹Haluse niyo imbwai, ikalongwa kugamba, nakaita kulanga? Nuko kugamba, nk’hongo nakaseelesa hasi ye isi. ¹⁰Naivo uyo aseele aha he isi, ni yehe aitile kulanga kwe zimbingu zose, vileke Useuta wakwe wenele isi yose. ¹¹Niye awenk’hile want’hu mageleko, wamwenga kawatenda kunda wegala ulosi, wamwenga walotezi, wamwenga walotezi, wamwenga nawo kawatenda wadimi wamwenga nawo kawatenda wahinizi. ¹²Nakatenda ivo vileke awaike lumwe want’hu wa Mnungu kwa ndima ya Kilisito vileke umwili wa Kilisito ukule, ¹³naivo suwe chose kiubwiile umwenga kwa mhuwi wetu na mwo kummanya Mwana Mnungu, naswe hamwenga kikule mpaka kinde kikint’hile enga Kilisito mwenye ivo eli. ¹⁴Hekinde naho enga wana wakembe, kikajubwaniswa uko na uko ni nk’hung’uto ya mahinizo yakuhinizwa ni want’hu wadant’hi vileke wawazaganye watuhu kwa nyambi zawe. ¹⁵Mna kina ubilikiza ikindedi kwa moyo wa lukunde nekikule mwe kila kint’hu vileke kinde enga Kilisito, uyo eli mtwi wa wahuwila wose. ¹⁶Mwo ulongozi wakwe, mwili wose walunganywa hamwenga aho kila nk’hwali ikawambiza umwili, naho kila nk’hwali na kilungo kikadamanya indima yakwe. Ivo umwili wakula no kukezenga wenye kwa lukunde.

¹⁷Haluse nalonga uwona no kuwakanyani kwa zina dya Zumbe, mse kwikala enga want’hu hewe mmanyize Mnungu, wata fanyanyi zawe heziina kint’hu, ¹⁸naho ubala wawe umwo lwiza. We hale no ugima wa Mnungu kwa ivo weli wahezi, ne zink’hani mwe mioyo yawe. ¹⁹Waganika, naho heweina soni, wengila mwe kuhuja, wadamanya kipump’ha kila mbuli za usavu, naho waungisa kudamanya usavu.

²⁰Mna nyuwe hivo ivo mhinile mwa Kilisito. ²¹Kindedi nomwiva zimbuli za Yesu, niyo mwahinizizwa mwa yehe kugamba ukindedi umwakwe. ²²Haluse, lekeni lugendo lwenyu lwa kale, enga mnt’hu akuhambula suke, udya unt’hu wenyu wa kale wandaga ukabanangwa ni kumunk’wamunk’wa munk’hwa kwakwe. ²³Ketendeni uhya mwe mioyo yenyu ne zifanyanyi zenyu, ²⁴valeni unt’hu uhya enga viya mnt’hu akuvala suke mp’hya, uumbigwe ukeigile Mnungu, udya ukukelavanya mwo wikazi wo uwagilwa no ukuki no ukindedi.

²⁵Elo haluse, lekeni udant’hi, kila yumwenga amgambile mhuwila miyawe ikindedi, kwaviya kila yumwenga ni kilungo cho umwili wa Kilisito. ²⁶Uneva mnafa maya, msekuzumila amaya yenyu yaleke mdamanye wavu, naho zuwa dise kuswa maya yenyu yande yamlawani. ²⁷Mnase kumwink’ha Mwavu luneka lolose. ²⁸Mbavi ase kubawa, akonge kudamanya ndima yedi kwa mikono yakwe vileke ande ne vint’hu va kumwambiza mkiwa. ²⁹Msekulonga milosi iihile, mna inde niidya iyedi ikuwazenga watuhu, vileke yadya mkulonga yegale uwedi kwa wose wakuyeva. ³⁰Msekumgela kinyulu Muye ywa Mnungu ywa Mnungu, kwaviya Muye ywa Mnungu ni kiwalo cha Mnungu kwenyu kugamba nyuwe ni want’hu wakwe, naho ni kiwalo cha kugamba dizuwa dyeza dya Mnungu kuwaikani walekelwa. ³¹Haluse, lekeni nkwasi na maya na vugo na kulonga vihile na wiihi wa namna zose. ³²Mnde na moyo wedi wakufiilana mbazi, kila yumwenga amuusile miyawe wavu wakwe, enga viya Mnungu awausileni nyuwe wavu wenyu kwo mbokela Zumbe Yesu.

Kwikala mwo un’gazi

¹Mkeige na Mnungu kwakila kint’hu mkudamanya, kwaviya nyuwe mwi wanawe awaungise. ²Wikazi wenyu ulongozwe ni lukunde enga viya Kilisito akiungise, niyo akelava yehe mwenye akomwe kwajili yetu, enga malavo yana mhemp’he wedi yakumwelela Mnungu.

³Kwaviya nyuwe mwi want’hu wa Mnungu, haviwagilwe mbuli za uhabwasi na usavu hegu ugubaguba, vise kugeza kutambulwa mwenyu. ⁴Naho mbuli za soni, ubwalasi, uhungu, ayo yose hayawagilwe kwenyu, mbuli za kumtogola Mnungu nizo zikuwagila. ⁵Manyeni kugamba mhabwasi yoyose na msavu na mgubaguba, uko nako ni enga kuvika mahili, hegu mnt’hu yeyose ywa ivo haande na hant’hu kwo Useuta wa Kilisito na Mnungu.

⁶Msekuzumila kudant’hilizwa ni mnt’hu kwa milosi ya uhezi, naho kwajili ye zimbuli enga izo maya ya Mnungu nayawezile wose wakulemela kumhuwila. ⁷Ivo msekunda hamwenga na woho. ⁸Hadya nk’hongo mwandaga mwo lwiza, mna mwize mnde want’hu wa Mnungu, mmwo ung’azi, ivo mwaungwa kwikala viwagile want’hu wo ung’azi, ⁹kwaviya ung’azi wegala kila kint’hu chedi, no kutendigwa kunda wedi no ukindedi. ¹⁰Kombekeni kumanya yadya yakumuwagila Zumbe. ¹¹Mnasekudamanya mbuli ziihile za mwo lwiza heziina wambizi wowose, vituhu vakwe zitendeni zimanyike kwa want’hu. ¹²Mbuli zikudamanywa kifiso ni want’hu hewe mmanyize Mnungu, zagela soni hata kuzisimuila. ¹³Mna zimbuli zikudamanywa ho ung’azi, ikindedi chakwe chalavanywa, ¹⁴naho kila kiya kilavilizwe, kizangazwa. Ung’azi nuwo ukulaviliza kila kint’hu. Nivo vikuleka igambigwa,

Inuka weye ugonile,

naho uuyuke,

yehe mwenye Kilisito naakuzangazile.

¹⁵Mndilise na wengele mwo wikazi wenyu. Mse kwikala enga wabwalasi, vituhu vakwe mwikale enga wata umanyi. ¹⁶Mtendele vedi luneka mnanalo, kwaviya mazuwa aya yaihisa. ¹⁷Mse kunda wahezi, mna mgeze kuzungula kiya Mnungu akumuungani mdamanye. ¹⁸Msekukolwa, kwaviya neiwatendeni mmanye mbuli hezikumanyika na haheina kumanya nokulailei, mna mlongozwe ni Muye ywa Mnungu mwo wikazi wenyu. ¹⁹Simuileni kwa milosi ya zabuli ne mila, naho mmuimbile Zumbe mila na zabuli kwa nt’hogola mwe mioyo yenyu. ²⁰Mtogoleni Mnungu mazuwa yose kwa kila kint’hu, kwa sila ya zina dya Zumbe ywetu Yesu Kilisito.

Walume na Wakazi wawe

²¹Kila yumwenga amtegeleze miyawe kwa kumtegeleza Kilisito.

²²Nyuwe wavele muwategeleze walume zenyu, enga kumtegeleza Zumbe.

²³Kwaviya mgosi ana udahi kwa mkaziwe, enga viya Kilisito naye eli na udahi mwa want’hu wamhuwile, naho niye Mlokozi wa want’hu wamhuwile Kilisito, uwo nuwo umwili wakwe. ²⁴Enga want’hu wamhuwile Kilisito ivo wakumtegeleza Kilisito, enga iivo wavele nao wawategeleze wagosi zawe mwe zimbuli zose. ²⁵Wagosi nanywe waungiseni wavele wenyu enga viya Kilisito awaungisaga want’hu wamhuwile, niyo aulava ugima wakwe kwajili yawe, ²⁶vileke awasunt’he wamzumile Kilisito kwa mbuli ya Mnungu, akawatenda wahuwila wose wakukizwe kwa mazi na ulosi. ²⁷Na ivo awatende want’hu wamhuwile Kilisito wande wakwe wakanda want’hu wa Mnungu, naho heweina malema, heena mabalo hegu usavu wowose. ²⁸Ivo wagosi wawaungise wavele wawe enga viya wakuiungisa imili yawe, naho yeyose akumuungisa mkaziwe akeungisa yehe mwenye. ²⁹Hakuna mnt’hu yeyose akuwiihiya umwili wakwe mwenye, vituhu vakwe awink’ha nk’hande na kuuvala suke. Ivo nivo Kilisito akudamanya kwa want’hu wose wamhuwile, ³⁰kwaviya suwe ki vilungo vo mwili wakwe. ³¹Enga ivo iwandikwe mwo Mawandiko Usuntike, Kwa mbuli ino Mgosi naamleke ise na nine, naalungane na mkaziwe, naho waidi awa nawande ni wamwenga. ³²Hana kindedi kikefisile, kigubulwe mwa maandiko uno, mna naona kugamba imbuli ino ni ya Kilisito na wahuwila wakwe wose. ³³Mna naho aya ni ya nyuwe, kila mnume aungwa amuungise mkaziwe enga ivo akukeungisa mwenye, naho kila mvele aungwa kumtegeleza mgosiwe.

Wana na welesi wawe

¹Nyuwe wana, weveni welesi wenyu kwaviya nyuwe ni wa Zumbe, naho icho ni kint’hu chedi. ²Iwandikwa mwa Mawandiko Akukile, uwategeleze welesi wenyu. Ino niyo miko ya nk’hongo ine ndagano, ³vileke unde na uvikilwa mwo wikazi wako, naho wikale mazuwa mengi mwe isi. ⁴Na nyuwe watate, mse kuwasogola wana wenyu mna waleleni enga ivo vikumwelela Zumbe kwa kulagisa na mahinizo yedi.

Watumwa na wakulu wawe

⁵Nyuwe watumwa, weveni wakulu wenyu aha he isi kwa wogofi na moyo wose, damanyeni ivo kwa moyo wedi vikuligana na kumdamanyila Kilisito. ⁶Naho mse kudamanya du umwo wakamkaulani vileke muwelele want’hu, mna mwaungwa mdamanye kwa moyo, enga viya akuunga Mnungu, kwaviya nyuwe mwi watumwa wa Kilisito. ⁷Damanyeni ndima ya Zumbe kwa kinyemi, naho hiyo kwa kuwawagila want’hu. ⁸Kumbukileni kugamba yeyose akudamanya uwedi, ande mtumwa hegu mlekelwa, naahokele nt’hunyo ya Zumbe.

⁹Nyuwe wakulu nanywe, damanyeni aayo kwa watumwa wenyu naho msekuwatisa. Mmanye kugamba nyuwe na watumwa wenyu nyose mwi wa uuyo mkulu yumwenga ywa kwe mbingu, akuwasengela wose haheina kwazagula.

Nk’hondo ye kimuye

¹⁰Nabindiliza kwa kugamba, Mnungu awenk’heni kutoga mwo kulungana na Zumbe naho kwa wambizi wo udahi wakwe. ¹¹Kekakeni vitowanilo vose mkwink’higwa ni Mnungu, vileke mdahe kuzihuma zinyambi ziihile zo Mwavu. ¹²Kwaviya hakikuhigana na want’hu wa mwe isi, mna chahigana na useuta na udahi na wakulu we diziza idi, naho chahigana na mafyo ya mp’hepo ziihile mwe isi ye kimuye. ¹³Kwaivo, kekakeni vitowanilo vose mkwink’higwa ni Mnungu vileke mnde wadahi mwe dizuwa dyo wiihi dikeza kuwezilani naho mkabinda ukuhina, msigale mtogile.

¹⁴Naho keikeni lumwe, naho mkekake ukindedi, unde enga mkoa mwe vigudi venyu, naho kutendigwa wedi kwenyu kunde enga nk’hindo mwe vifuwa venyu, ¹⁵no kumunk’wamunk’wa kubilikiza Mbuli Yedi yo utondowazi inde enga vilatu mwe viga venyu. ¹⁶Kwa kongezela, mhuwi unde enga nk’hindo mwe mikono yenyu, mdahe kuizima misale yo moto yo Mwavu. ¹⁷Hokeleni ukombolwa enga taji yenyu ye chuma, Ulosi wa Mnungu nawo unde sime mkwink’higwa ni Muye ywa Mnungu. ¹⁸Mlombezeni Mnungu mazuwa yose, mkamlombeza wambizi wakwe. Mnde mkamvika Mnungu kwa udahi wa Muye ywa Mnungu. Kwaivo kauliseni haheina kusokela mkawamlombezela Mnungu want’hu wose. ¹⁹Naho mnilombezele kwa Mnungu anink’he cho kulonga, nidahe kuwagambila want’hu ikinyele che Mbuli Yedi haheina wogofi. ²⁰Miye ni msigiilwa ywa Mbuli Yedi, hamwenga na kugamba ivi haluse ni mwe divugailo. Lombezeni vileke ninde mdahi mwo kuibilikiza Mbuli Yedi enga ivo huungwa kuibilikiza.

Ndamsa zo mzigilizo

²¹Tukiko, ndugu yetu kikumuungisa, mtumwa mhuwilwa mwe kudamanya ndima ya Zumbe, naawagambileni zimbuli zangu zose vileke mmanye ivo nili. ²²Namwigala kwenyu vileke mmanye zimbuli zetu naho awageleni moyo.

²³Mnungu Tate na Zumbe Yesu Kilisito awenk’heni nyuwe wahuwila weetu wose utondowazi na lukunde hamwenga na mhuwi. ²⁴Wedi wa Mnungu unde na want’hu wose wakumuunga Zumbe ywetu Yesu Kilisito kwa lukunde holwiina uheelo.