3 Yohana

BALUWA YA KATATU YA

YOHANA

ULONGOELO

Baluwa ya katatu ya Yohana yawandikagwa ni Mwigala Ulosi Yohana mwo mwaka wa milongo kenda kulawa aho Yesu eze elekwe. Yohana hakuketambula yehe mwenye kugamba niye awandike ibaluwa ino, mna aketanga mwenye enga mdala. 3 Yohana 1:1. Kadamanya iivo mwe 2 Yohana 1:1. Yahuwilwa kugamba, Uyo niye awandike Mbuli Yedi iwandikwe ni Yohana, na baluwa ya nk’hongo ya Yohana na baluwa ya kaidi ya Yohana na baluwa ya katatu ya Yohana umwo andaga akekala uko Efeso.

Yohana amuwandikilaga baluwa ino mhuwila yumwenga akwitangwa Gayo. Kamtambula Gayo enga mbwiyaye naho kamsigiila ande mkise kwa wandugu wakumhuwila Kilisito wandaga wakutamba mwe isi iyo.

Yemndani

Yohana aitambula baluwa yakwe 3 Yohana 1:1.

Akajika amgela moyo Gayo na kumsigiila awatendele ukise wandugu 3 Yohana 1:2-8.

Naho, asimuila mwe mbuli ya want’hu watuhu waidi, Diotilefe na Demetilio 3 Yohana 1:9-12.

Akajika, abindiliza ibaluwa yakwe 3 Yohana 1:13-14.

¹Miye mdala kilongozi nakuwandikila mbuyangu Gayo hukuunga mwe kindedi. ²Mbuyangu, nalombeza kugamba mph’eho yedi kwako mwe zimbuli zose, unde mgima mwo mwili enga ivi wili mgima mwo muye. ³Ne hyelelwa vitendese aho wandugu wamwenga weze wabule aha niyo weza kunigambila ivo wili mhuwilwa mwe kindedi, heiye weye wagendeela mwe kindedi. ⁴Hakihali kint’hu kikulu kikunik’ha kinyemi kikujink’ha ukwiva kugamba wanangu wekala mwe kindedi.

Nt’hogola kwa Gayo

⁵Mbwiyangu, weye umhuwilwa vitendese kwa chochose ukudamanya kwa wanduguzo wahuwila, hata uneva wakanda wageni. ⁶Woho wadigambila idifyo dya wahuwila wa Kilisito imbuli yo lukunde lwako. Nevinde vedi uneva nouwambize viya vikumwelela Mnungu wagendeele ne nt’hambo yawe. ⁷Kwaivo wakonga int’hambo yawe kwo undima wawe kwa Kilisito haheina kwambizwa chochose ni want’hu hi wahuwila. ⁸Naswe kiwambiza want’hu awa vileke kinde hamwenga nawo mwe ndima yawe kwajili yo ukindedi.

Diotilefesi na Demetilio

⁹Nehiwawandikila fyo dya wahuwila wa Kilisito, mna Diotilefe uyo akuungisa kunda kilongozi ywawe, hakuunga kukitegeleza. ¹⁰Elo, heza kwiza nenizibunk’hule zimbuli zakwe zose akudamanya ne milosi ya udant’hi akukiziga. Naho hiyo ayo du mna hakuwahokela wandugu awo naho wawafingiza wadya wakuwahokela no kuwagulusa mwe difyo dya wahuwila wa Kilisito.

¹¹Mbwiyangu, unase kutimila mliganyizo wiihile mna utimile mliganyizo uwedi. Yeyose akukudamanya ayedi uyo ni ywa Mnungu, mna akudamanya yaihile akei kummanya Mnungu.

¹²Kila mnt’hu amtogola Demetilio, naho ikindedi chenye chamtogola, suwe naswe chalonga uwona wetu mwakwe, weye nawe kumanya kugamba iki kikulonga ni kindedi.

Nabindiliza na ndamsa

¹³Nna mbuli nyingi nehaunga kukugambila, mna hikuunga kuwandikila mwe ibaluwa. ¹⁴Nakawiila kwiza kwako mazuwa aya ya hagihi, niho nekize kisimuile mnomo kwa mnomo.

¹⁵Utondowazi unde na weye, wambuyazo wakulamsa, walamse wambuya zetu wose.