WAKOLINSO

BALUWA YA KAIDI YA PAULO KWA

WAKOLINSO

ULONGOELO

Baluwa ya kaidi kwa Wakolinso yawandikagwa ni mwigala ulosi Paulo, yagambigwa yadahika neiwandikwa mwo mwaka wa milongo mishano na mishano Kulawa aho Yesu eze elekwe 1:1. Ino ni baluwa ya kaidi mwe zibaluwa zimbili kinanazo izo Paulo aziwandikaga kwa fyo dya Wahuwila wa Kilisito wa uko Kolinso. Wamanyi wahuwila kugamba, Paulo uko kunyuma awandikaga baluwa ya kuwakanya Wakolinso. Hakina baluwa iyo enga ivo ilagiswe mwo 2:3-4. Baluwa ino ya kaidi ya Paulo kwa Wakolinso yaoneka yawandikagwa umwo andaga akekala Makedonia. 2:13

Baluwa ino ya kaidi kwa Wakolinso Paulo atambalisa kinyemi chakwe mwe mbuli zedi izo apatile kulawa kwa Tito mwe mbuli ye difyo dya wahuwila wa Kilisito dya Kolinso. Mwe baluwa ino chaona mahinizo yawandikwe vedi mwe mbuli yo kulava kuligana ne ndagano imp’ya, hadya hant’hu Paulo alagizaga kuduganya matundu no kwigalwa kwajili yo kuwambiza wahuwila wa Kilisito uko Yelusalamu 8-9. Yaoneka kugamba, wamwenga wa wegala Ulosi wa udant’hi kulawa kuse ye difyo dya wahuwila wa Kilisito, waguhaga luneka lwigalwe ni want’hu wandaga hawakuivana na Paulo kwajili yawe wenye. Wandaga wakalonga mbuli za kinyume mwe mbuli ya udahi wa Paulo, mbuli iyo niyo yamtendaga Paulo kulagisa kwa ludole, udahi wakwe enga mwigala ulosi wa Yesu Kilisito mwo kubindiliza ibaluwa ino ya kaidi kwa Wakolinso.

Yemndani

Paulo akonga baluwa yakwe kwa kuwalamsa want’hu wamhuwile Kilisito. 1:1-7

Akajika, Paulo alonga kuhitula mizungu ye nt’hambo yakwe na uhituzi wawe kwa yadya ayapatile mwe mbuli kulawa kwa Wakolinso. 1:8-7:16

Naho Paulo alangiliza mwe mbuli yo kuduganya matundu kwajili ya kuwambiza want’hu wakumhuwila Kilisito uko Yelusalemu.

Kwo uheelo Paulo augombela wigala ulosi wakwe na kuwagambila mwe mbuli ya yehe kuwatalamkila naho. 10:1-13:10.

¹Miye Paulo mwigala ulosi ywa Yesu Kilisito, nitangwe ni Mnungu mwenye. Nihamwenga na ndugu yangu Timoseo chawegailani baluwa mwo mkowa wa Akaya.

Chawegailani baluwa, want’hu wamhuwile Kilisito uko Kolinso, na want’hu wa Mnungu wose kila hant’hu uko kwo mkowa wa Akaya. ²Chawalombezelani kwa Mnungu Tati yetu na Zumbe ywetu Yesu Kilisito awenk’heni uwedi no utondowazi.

Paulo amtogola Mnungu

³Kimtogole Mnungu, Ise dya Zumbe ywetu Yesu Kilisito, Tate mta mbazi, Mnungu akukink’ha kusangaala kwose. ⁴Akisangalaza suwe mwa makunt’ho yetu yose, vikukink’ha udahi wo kuwasangalaza want’hu watuhu mwe kila makunt’ho, kwo kuwagela ludole ukudya suwe wenye kiuhokele kulawa kwa Mnungu. ⁵Suwe naswe niivo kikwingila mwa masulumizo ya Kilisito, iviyaiviya kombokela kwa Kilisito kusangalazwa kwetu kwanda kwingi. ⁶Uneva suwe chakunt’ha, inde chakunt’ha vileke nyuwe msangalazwe naho mkombolwe. Uneva suwe kikasangalazwa, nyuwe nanywe mwasangalazwa no kwinkwa ludole lwo kufinyiliza makunt’ho naayadya suwe kikuyafinyiliza. ⁷Naivo makawiilo yetu mwa nyuwe yatoga kwaviya kimanya kugamba mnanda hamwenga na suwe mwa makunt’ho yetu, nomnde hamwenga na suwe iviyaiviya mwe kusangalazwa kwetu.

⁸Wandugu zetu chaunga umanye makunt’ho chapataga kudya kwo mkowa wa Asia. Makunt’ho nayanda makulu niyo chaona hakikudaha kufinyiliza, niyo chanda hakikukawiila kunda wagima, chamanyaga kugamba chabanika. ⁹Nekiva mwe mioyo yetu kugamba, enga kisengelwa kubanika. Mna aya yalaila vileke kise kukehuwila suwe wenye, mna kimhuwile Mnungu akuwauyula wabanike. ¹⁰Uyo akikombole mwo mtuso wo kubanika, naho nagendeele kukikombola, suwe kiika kukawiila kwetu mwakwe kugamba naakikombole naho. ¹¹Nanywe mkachambiza mwo kulombeza kwenyu. Naivo kulombeza kwenyu kwingi kwajili yetu nokuhitulwe, kwaivo want’hu wengi nawenule maizwi yawe kumtogola Mnungu.

Paulo ahitula int’hambo yakwe

¹²Suwe chakeduvya kwaviya, mioyo yetu heiina kiyangayanga yalonga uwona kugamba, kikala mwe isi ino, vitendese kwa kunda hamwenga na nyuwe kwa ujalamu na moyo wedi kink’higwe ni Mnungu. Hakilongozwe na mzungu wa mnt’hu ila kwa mbazi za Mnungu. ¹³Chawawandikilani yadya mkudaha kuyasoma na kuyakombaganya, nakawiila kugamba, nomkombaganye vedi, ¹⁴hata uneva nommanye ludodo. Kimanya kugamba mwe dizuwa dya Zumbe Yesu, nomndahe kukefenyela suwe, enga naswe ivo kikukefenyela nyuwe.

¹⁵Handa ne dikawiilo idyo, aho nk’hongo nehinda na mizungu kuwatalamkilani, vileke mhokele uwedi wa Mnungu kaidi. ¹⁶Kwaviya mna mizungu ya kuwatalamkila umwo handa mwe utafi kuita kwo mkowa wa Makedonia, na mwo kuuya, vileke nipate wambizi kulawa kwenyu kwo utafi wangu wa Uyahudi. ¹⁷Haluse, umwo handa mwo mzungu uwo, hinda enga mnt’hu mta mahitu hitu? Hegu mwaona nadamanya kwa fanyanyi za kimnt’hu kugamba, “Heiye” na aaho kwa aaho nagamba “Bule”! ¹⁸Mnungu ni mhuwilwa, makawiilo yangu kwenyu hayandile, “Heiye” Aaho naho nigambe “Bule” ¹⁹Kwaviya Yesu Kilisito mwana Mnungu, uyo andaga akabilikiza mwenyu, na kwa Siliwano, Timoseo na miye mwenye hiye ywo kugamba “Heiye” akajika naho, “Bule,” mna Yesu handile mnt’hu ywa “Heiye” na aaho aho ande mnt’hu ywa bule. Mna yehe mazuwa yose ni “Heiye” ya Mnungu. ²⁰Kwaviya yadya yose alagane Mnungu ni “Heiye”. Kwa ivo, chagamba “Taile” kwa kwombokela Kilisito kwa kumwink’ha ukulu Mnungu. ²¹Ni Mnungu mwenye akukitenda suwe na nyuwe kukimala kitogile, mwo kulunganywa na Kilisito, naho niye akisagule, ²²yehe akigeile kiwalo chakwe kugamba suwe ki want’hu wakwe, naho niye akink’hile Muye ywakwe Akukile mwe mioyo yetu, inde kilagiso kugamba vint’hu vose akiikile ni kindedi.

²³Mna Mnungu niye muwona ywangu, yehe kaumanya umoyo wangu! Hizile naho Kolinso vileke niwageleni kinyulu. ²⁴Hakikugeza kuwakant’hamizani mwo mhuwi wenyu, kimanya kugamba mtoga mwo mhuwi, mna chadamanya ndima hamwenga na nyuwe kwa kinyemi chenyu.

¹Ivo hiona nisekwiza kwenyu vituhu nnase kuwagela kinyulu. ²Kwaivo uneva nnawatendani mnde na kinyulu, niani anisangalaze? Hiyo wadya nawageile kinyulu! ³Nivo vilekile hawegailani baluwa, hiungile kwiza kwenyu, no kugeligwa kinyulu ni wadya want’hu waungigwe kunda kinyemi changu. Nimwe kindedi kugamba nnanda na kinyemi, nanywe nomnde na kinyemi. ⁴Nehiwa wandikilani aho nk’hongo handa na makunt’ho mengi na kinyulu mwo moyo, na masozi mengi, icho nehaunga hiyo kuwagelani kinyulu, mna ni kuwatenda mbunk’hule ivo lukunde lwangu lwili kwenyu.

Kujala malema ya mnt’hu abanange

⁵Uneva mnt’hu kamgela mt’hu mtuhu kinyulu, hanigeile kinyulu miye du, mna kawageleni kinyulu nyuwe nyose, naho hikuunga kundilisa mkali. ⁶Usulumizo uwo enk’higwe ni want’hu wengi umkint’ha. ⁷Isigale nomkadaha kuyajala yadya adamanye, no kumsangalaza vileke msekunda na kinyulu niyo engila usoka vitendese. ⁸Ivo nalombeza kwenyu kugamba, mlagiseni ivo mkumuungisa. ⁹Nawa wandikilagani baluwa idya, Kwaviya naungaga kumanya ivo nomkadaha kwiva kwa kila mbuli. ¹⁰Uneva mnajala malema ya mnt’hu, name nayajala malema ya mnt’hu uyo. Naho uneva hajala malema ya mnt’hu uyo, nayajala malema ayo hameso ya Kilisito kwajili yenyu. ¹¹Vileke kise kumwink’ha Mwavu luhenyo akidant’hilize, kwaviya kimanya upapala wakwe.

Kiyangayanga cha Paulo kwe mzi wa Toloa

¹²Nize nibule kwo mzi wa Toloa, kubilikiza Mbuli Yedi ya Kilisito, nehibwiila mnango kwajili ye indima ya Zumbe ukomolwa. ¹³Mna hikeivile vedi mwo moyo wangu, kwaviya nehinda na kwanga yanga kwaviya hyamuwone Tito ndugu yangu. Nivo valekaga nawalaga wose hadya niyo naita Makedonia.

Uhumi kwa wambizi wa Kilisito

¹⁴Mna Mnungu atogolwe yehe akukilongoza kunda wahumi mwo ludongo lukwanga uhumi wa Kilisito. Mnungu akitenda kiigendeze mbuli ye kindedi cha Kilisito enga mhemp’he kila hant’hu. ¹⁵Kwaviya kinda enga mhemp’he wo ubani uwo Kilisito akumlavila Mnungu, ukufunk’hizwa kwa wose wakuyokolwa, na wadya wa kwaga. ¹⁶Kwa wose wadya wakwaga ni mp’hofa ya file, mna kwa wose wadya wakuyokolwa, ni mhemp’he ukugela ugima. Niani elo akuunga ande mwe ndima enga iyo? ¹⁷Suwe hiyo enga wengi watuhu, wakuitendela yombe Mbuli ya Mnungu, suwe cha bilikiza Mbuli ya Mnungu mwe kindedi kwaviya kitumigwa ni Mnungu, kikanda kilunganywa mwa Kilisito.

Wandima we ndagano imp’ya

¹Togoleni, chakonga naho kukeduvya suwe wenye? Chaunga baluwa ya kuketambalisa kwenyu, hegu kulawa kwenyu enga watuhu? ²Nyuwe wenye mwi baluwa yetu iwandikwe mwe mioyo yetu, kila yumwenga aione na kuisoma. ³Imanyika kugamba nyuwe mwi baluwa ya Kilisito, aigale kwa mikono yetu. Ibaluwa yenye haiwandikwe kwa wino mna iwandikwa kwa Muye ywa Mnungu eli mgima. Haiwandikwe mwo luwe mna iwandikwa mwe mioyo ya want’hu.

⁴Chalonga ivi kwa kukawiila kinanadyo kwa Mnungu kombokela kwa Kilisito. ⁵Hiyo kugamba chadaha kudamanya dyodyose kwa nguvu zetu wenye, mna udahi wetu wose walawa kwa Mnungu. ⁶Naye niye akitendile kinde wandima we ndagano imp’ya, naho hiyo ndagano yo mwiko uwandikwe, ila kwa ndagano ya Muye ywa Mnungu. Kwaviya mwiko uwandikwe wegala file, mna Muye ywa Akukile egala ugima.

⁷Mwiko wawandikilagwa mwe vibesu va maiwe. Hamwenga na kugamba kwo uheelo wakwe unda file, naho ung’azi wakwe mkulu noukulisa hata wana wa Izilaeli wasekudaha kukaula kihanga cha Musa kwo ung’azi wakwe. Naho ung’azi uwo nounda wa lupisi du. ⁸Togoleni kiya kikudamanywa kwa sila ya Muye ywa Mnungu nekinde na ung’azi mkulu wa vivihi? ⁹Inanda zindima zikwigala file zina ukulu, togoleni, nezinde na ukulu wa vivihi zindima zikwigala ukombola! ¹⁰Ikindedi kiya chandile na ukulu aho kale, niyo chaza ukulu wakwe kwa mbuli ya ukulu utendese wizile ¹¹Uneva kiya chandaga cho lupisi du chandaga na ung’azi wakwe, ikindedi kiya kikwikala ulo na ulo nekinde na ung’azi mkulu utendese.

¹²Kwaviya idi nidyo dikawiilo dyetu, chalonga kwa weduvi mkulu. ¹³Suwe hiyo enga Musa akegubikaga kitambala mwo uso wakwe vileke Waizilaeli wase kuuona ung’azi wandaga ukagiila mp’halahole. ¹⁴Ubala wawe ugeligwa ubwalasi. Hata ivi dielo ikasomigwa indagano ya kale, kitambala icho kikei aaho. Kitambala icho nekiuswe du ukalungana na Kilisito. ¹⁵Hata dielo hohose hakusomigwa miko ya Musa, ubala wawe ukei ugubikwe. ¹⁶Mna umwo yeyose akamhitukila Zumbe, kitambala icho kimgubike chauswa. ¹⁷Haluse “Zumbe” niye Muye, naho hohose aho eli Muye ywa Mnungu, naho heli no ulekelwa. ¹⁸Basi suwe wose vihanga vetu hevigubikwe, chanda enga kioo kikalagisa ukulu wa Zumbe, cha hitulwa kikeige na vitendese na uwo mliganyizo wakwe kwa ukulu ukulise. Iyo ni ndima ya Muye ywa Zumbe.

Kindolo

¹Mnungu kwa mbazi zakwe, kakink’ha suwe indima ino kiidamanye, na ivo hakikuuya kunyuma. ²Kileka zimbuli zose ze kinyele na zikugela soni, hakikwikala naho kwa udant’hi hegu kwazaganya Mbuli ya Mnungu. Mna kwa kuulagisa ukindedi chakeika hasi ya ulamuzi wa want’hu haheina mahituhitu hameso ya Mnungu. ³Kwaviya uneva Mbuli Yedi kikubilikiza ikefisa, ikefisa kwa wadya wakwaga du. ⁴Hawakuhuwila kwaviya ubala wawe ugeligwa lwiza ni yudya Mwavu mnungu we isi ino. Wasekuona vedi ungazi we Mbuli Yedi ya ukulu wa Kilisito, uyo mliganyizo ukint’hile wa Mnungu. ⁵Kwaviya hakikuhungukilwa kukebilikiza suwe wenye, mna chambilikiza Yesu Kilisito uyo Zumbe, suwe wenye kikanda wandima wenyu kwa ajili ya Yesu. ⁶Mnungu uyo agambile, “Ung’azi umweke kulawa mwo lwiza!” Nu uuyo Mnungu akuimwekeza mioyo yetu, kukink’ha mmweko wa ung’azi wa ukulu wa Mnungu ukung’ala mwo kihanga cha Yesu Kilisito.

⁷Haluse, suwe kine kindolo che kimuye, kinda enga nyungu za ulongo, vileke kilagise kugamba ludole ulo lukulu ni lwa Mnungu, hiyo lwe suwe. ⁸Mazuwa yose chakunt’ha, mna hakikukant’hamizwa, chanda na jakamoyo mna hakikuuya kunyuma, ⁹chakunt’ha mna hakikuswesa wambizi, naho hata kikakinywa hasi, mna hakomwa. ¹⁰Mazuwa yose chaiguha ifile ya Yesu mwe miili yetu yo kubanika, vileke ugima wakwe nao uonekele mwe mili yetu. ¹¹Mwo wikazi wetu chadugana no kubanika mazuwa yose kwajili ya Yesu, vileke ugima wakwe ukaulwe mwe mili ino iyetu yo kubanika. ¹²Uku nuko kugamba, ukubanika kwadamanya ndima mndani mwetu, mna ugima wadamanya ndima mwenyu.

¹³Mawandiko Akukile wagamba, “Hilonga kwaviya nehihuwila.” Naswe kikanda no mhuwi uuwo, chahuwila, naho kwaivo chalonga. ¹⁴Kimanya kugamba Mnungu uyo amuuyule Zumbe Yesu, naakiuyule naswe hamwenga na Yesu, no kukiika ho undiilo wakwe hamwenga na nyuwe. ¹⁵Yose aya ni kwa ajili yenyu, naho enga viya uwedi wa Mnungu ukuwabwiila want’hu wengi vitendese, nt’hogola nazo zongezekele vitendese, kwa ukulu wa Mnungu.

Kwikala kwa Mhuwi

¹⁶Kwaivo, hakikuuya kunyuma, hata uneva mili yetu yasakala, mna muye wetu watendigwa uhya zuwa kwa zuwa. ¹⁷Makunt’ho aya kikupata madodo, ni ya lupisi du, mna yakink’ha ukulu ukuyajink’ha makawiilo yose, nt’hogola ya ulo na ulo. ¹⁸Kwaivo chakawiila kwa wengele hiyo kwa vint’hu vikukaulika, ila viya hevikuoneka, Viya vikuoneka vekela lupisi ludodo, mna viya hevikuoneka vekala mazuwa yose.

¹Kwaviya kimanya kugamba, heha kikwikala ivi haluse aha he isi, umwili wetu, dikeza kubanangwa, Mnungu naakink’he nyumba akiikile lumwe uko kwe mbingu, nyumba ya ulo na ulo heidamanywe kwa mikono. ²Haluse mwe hali ino chalugumila, kukawiila kwa kunyemwa nyemwa kukulu kwink’higwa mili ya kwe mbingu, ³kwa kwink’higwa imili iyo hekioneke kunda hekiina mili. ⁴Umwo kikekala mwo mwili uno we kimtu, chaila kwa makunt’ho. Hiyo kwa kuileka imili yo kubanika, mna chaunga kinde ne mili ya kwe mbingu, vileke mwili wo kubanika uhitulwe pele no ugima wa mazuwa yose. ⁵Mnungu mwenye niye akiikile lumwe mahitulo aya, naho kakink’ha Muye ywakwe Akukile kulagisa kindedi kwa yose yadya akiikile.

⁶Ivo mazuwa yose kitoga. Kimanya kugamba, kwikala mwe mwili uno, ni kwikala hale na kwetu kaya na Zumbe. ⁷Kwaviya chekala kwa mhuwi, hiyo kwa yadya kikukaula. ⁸Mna kitoga, naho chaona ni vedi kusama nyumba ino yo mwili, kikasamile kwe nyumba yetu hamwenga na Zumbe. ⁹Kwa ivo chaunga kimuwagile Mnungu, kikanda mwe nyumba yetu aha he isi, hegu uko. ¹⁰Kwaviya suwe chose nekiungwe kukimala hameso ha Kilisito, kihokele usengelo kulawa kwakwe. Kila yumwenga naahokele kiya awagilwe kulawa mwa yadya kidamanye umwo kikanda kikei mwe isi, yande ayedi hegu yaihile.

Umbwiya na Mnungu kwombokela Kwa Yesu

¹¹Kwaviya kimanya kiya kikuugwa mwo kumwogoha Zumbe, naivo chakombeka kuwavuta watuhu. Mnungu akimanya pele, naho chakawiila kugamba miye name nomnimanye mwe mioyo yenyu mwanimanya vedi. ¹²Hiyo kugamba chakehamp’hikiza kwenyu. Mna chawenk’hani luneka kukeduvya kwajili yetu, vileke mdahe kuwahitula wadya wakukeduvya, kwaivo wakuoneka kwa kuse, kujink’ha ivo weli kwe mioyo yawe. ¹³Uneva kikaoneka wahezi, ni kwa ajili ya Mnungu, mna inanda kiwabala, iyo ni kwajili ya kuwambiza nyuwe. ¹⁴Kwaviya chalongozwa nu lukunde lwa Kilisito, naho haluse chakombaganya kugamba, mnt’hu yumwenga abanikaga kwa ajili ya kila yumwenga, nuko kugamba wose kibanika hamwenga na yehe. ¹⁵Abanikaga kwa ajili ya want’hu wose, vileke wose wakwikala mwo ugima wasekunda wagima kwa kukehuwila wenye, mna kwa kumhuwila yehe abanike niyo auyulwa naho.

¹⁶Kukongela ivi haluse, hakikugeza yeyose kimnt’humnt’hu, hamwenga na kugamba lupisi lumwenga chamgeza Kilisito kwa kimnt’hu mnt’hu, mna ivi haluse hakikumgeza ivo. ¹⁷Yeyose alungane na Yesu Kilisito kanda kiumbwa kihya, ya kale yomboka, kila kint’hu kinda kihya. ¹⁸Yano yose yadamanywa ni Mnungu, yehe awavuzile kwakwe want’hu wavu, kwombokela Yesu Kilisito, niyo akink’ha suwe ndima yo kuwavuza watuhu nawo kwakwe. ¹⁹Ulosi wetu ni uno, Mnungu andaga akawatenda want’hu wose kunda wambuyaze kombokela kwa Yesu Kilisito. Mnungu haukaule wavu wawe, naho kakink’ha ulosi wa kuwatenda want’hu wande wambuyaze.

²⁰Suwe kiwalotezi wa Kilisito, enga naho Mnungu mwenye akulonga na nyuwe. Kwa zina dya Kilisito chawalombezani mtendigwe kunda wambuya wa Mnungu. ²¹Yesu handaga mwavu, mna kwa ajili ya suwe Mnungu nakamtwika wavu wetu, mwo kulunganywa hamwenga naye kinde naye mwo uwagilwa wa Mnungu.

¹Elo, kikanda wandima hamwenga na Mnungu chawaungani digeleko dya Mnungu kulawa kwa Mnungu disekwaga bule. ²Kwaviya Mnungu agamba,

“Aho wize uunge wambizi

Nehikwiva,

Mwe dizuwa dyo kukukombola,

Nakwambizaga.” Tegelezeni!

Ho ukombola wa Mnungu ni haluse.

³Vileke kise kunda na nk’hindilo kwa yeyose mwe ndima yetu, hakikuunga kudamanya ivo vileke indima yetu ise kukalalizwa. ⁴Mna mwe zimbuli zose kikudamanya chalagisa kugamba, suwe kiwandima wa Mnungu, mwo kufinyiliza kwingi mwa masulumizo yose, mwe makunt’ho na mwa maihi yose, ⁵kitoigwa, kivugailwa, kitoigwa, kitigizwa kudamanya ndima ndala, naho nekiswesa ugono, na kuswesa nk’hande. ⁶Mwo uwedi, umanyi, mwo kufinyiliza, no ukise, kilagisa kugamba suwe kiwandima wa Mnungu, kwa Muye ywa Mnungu, na kwa lukunde lwetu lwa kindedi, ⁷kwo ulosi we kindedi, na kwo udahi wa Mnungu. Kuoneka kwetu hameso ya Mnungu kunda wawagilwa niyo int’hoanilo yetu, kulume na kumoso. ⁸Kikala lumwe kutunywa no kubeligwa, kwa kusezengwa na kutogolwa. Chagambigwa chadant’ha, kumbe chalonga kindedi, ⁹enga want’hu hewemanyike, mna kimanyika kwa want’hu wose, enga want’hu wabanike, mna enga ivi mkuona haluse chagendeela no ugima. Hamwenga na kusulumizwa mna hakikomigwe. ¹⁰Hata uneva kisulumizwa, hakibanike, hakikomigwe, hata uneva kina kinyulu mazuwa yose, mna kina kinyemi mazuwa yose, chaonwa kunda wakiwa, mna chawatenda want’hu wose kunda wagoli, wakikaula enga want’hu waswesile, mna kina kila kint’hu. ¹¹Wandugu zetu Wakolinso! Kilonga kwa mioyo ikomolwe kwenyu, kiitende mioyo yetu inde ikomolwa pwilili. ¹²Uneva mwaona kuna nk’hindilo yoyose idya, nk’hindilo iyo ikwenyu nyuwe wenye, naho hiyo kwetu suwe. ¹³Haluse nalonga na nyuwe enga wanangu, kilagiseni kugamba Kikomoeleni mioyo yenyu enga ivo suwe kili.

Mafundo kise kunda hamwenga na hewe kumhuwila Mnungu

¹⁴Mse kutimilana na hewekuhuwila. Togoleni wedi no wavu vazumilana? Mmweko no lwiza vadaha vivihi kwila hamwenga? ¹⁵Kilisito na mwavu wadaha kuivana vivihi? Mhuwila aivana vivihi na hakuhuwila? ¹⁶Vadahika vivihi Nyumba ya Mnungu kunda ya mahili ya udant’hi? Kwaviya suwe kinyumba ya Mnungu! Saviya Mnungu mwenye alongile,

“Nenidamanye wikazi wangu hamwenga na want’hu wangu

naho neni kale mwawe,

Neninde Mnungu nywawe akuvikwa ni want’hu,

naho nawande want’hu wangu.”

¹⁷Naivo Zumbe agamba,

“Foseni mwawe,

naho mkepagule kulawa mwawe,

Mse kudosa kint’hu kisavu, name neni wazumileni.

¹⁸Neninde Tati yenyu,

naho nomnde wanangu wakilume na wakike,

ivi nivo akulonga Zumbe ywo Udahi.”

¹Wandugu zangu, kikanda kink’higwa zindagano izi zose, kikesunt’he na chochose kikudaha kugela usavu imili ne mioyo yetu kinde want’hu wa Mnungu na kwikala kwa kumwogoha Mnungu.

Kinyemi cha Paulo

²Kikomoeleni mioyo yenyu, hakitendile wiihi kwa mnt’hu yeyose, hakibanange chochose, naho hahana kint’hu kiungile kulawa kwa yeyose kwa kumdant’hiliza. ³Hikuyalonga aya vileke niwageleni mwo usengelo, enga viya nalongile hadya nk’hongo, muwandugu zetu, naho kiwose mazuwa yose, kikanda wagima hegu hata mwo kubanika.

⁴Himanya nyuwe mkimala mtogile, nna wefenyi kwa ajili yenyu! Mwa makunt’ho yetu yose, nakeink’ha moyo, naguluka handa mkinyemi. ⁵Hachahumulaga hata kize kibule Makedonia. Ntendelo zose nokunda na makunt’ho, kwandaga na nk’humbizi na want’hu watuhu, mwe mioyo yetu chandaga na wogofi. ⁶Mna Mnungu akuwasangalaza wasokele mioyo, kakisangalaza kwa kwiza kwakwe Tito. ⁷Hiko ukwiza kwakwe Tito du nuko kukisangalaze suwe, mna iviyaiviya ivo mumgeile moyo. Yehe kakigambila ivo mkuungisa kuniyona miye, kwa ivo mkunionela kinyulu, naivo mkuunga kunamila, naivo mbuli ino inink’ha kinyemi kitendese.

⁸Hata uneva baluwa yangu idya iwagelani kinyulu, hikuona nii nde na usungu kwa kuwaandikilani. Naona kugamba baluwa idya iwatenda mnde na kinyulu mna kwa lupisi. ⁹Haluse nna kinyemi, hiyo kwaviya mnda na kinyulu, mna kwaviya kinyulu chenyu kiwatendani mmuuiye Mnungu. Ivo Mnungu kawatendani mhitule sila zenyu kwa icho kinyulu, naivo suwe hakiwalumizeni kwa dyodyose. ¹⁰Kugamba mwe kinyulu icho Mnungu kegala uhituzi wo moyo ukwigala ukombola. Ivo hakuna chochose kikuleka kione usungu. Mna kinyulu che isi chegala file. ¹¹Kauleni kiya kidamanywe ni Mnungu mwe kinyulu chenyu, mwakombeka kukelagisa hemwiina malema! Mna maya, mwazinduka, na kogoha, mna nkwina ya kuwona, kukombeka na kuwasulumiza waihi! Kwakila sila mkelagisa wenye kugamba mkuka mwe mbuli iyo.

¹²Ivo hata uneva hiwagondelani ibaluwa idya, neinda hiyo kwa yudya adamanye wiihi, hegu kwa yudya adamanyilwe. Ne hiwandika vileke vimanyike pwilili hameso ya Mnungu kugamba mwakombekesa kwajili yetu. ¹³Nivo vikuleka nekisangalazwa vitendese. Hiyo kugamba nekigelwa moyo du, mna Tito nakakigela kinyemi kwa yadya yose mmwabize kumsangalaza. ¹⁴Miye hiwatogolesa nyuwe hameso hakwe, naho mwe mbuli ino hamkigeile soni. Kilonga ikindedi kwenyu mazuwa yose, sa iivo kukeduvya kwetu hameso ya Tito kunda mbuli ya kindedi. ¹⁵Naivo lukunde lwakwe kwenyu lugenyelesa, akakumbukila ivo nyuwe nyose mwadahile mkategeleza, na ivo mwamhokele kwa wogofi na kuzingiza. ¹⁶Nna kinyemi, kwaviya nadaha kuwahuwila kindedindedi kwa kila mbuli.

Kulava kwa ukise

¹Wandugu zangu chaunga mmanye, mageleko heyeiina maliho yadya Mnungu awenk’hile want’hu wamhuwile Kilisito wa Makedonia. ²Wahuwila wa kudya nawagezigwa vitendese kwa makunt’ho, mna kinyemi chawe nekinda kikulise, no kongezekelesa mwo ukise wo kulava kwawe, hamwenga na kugamba nawanda wakiwa vitendese. ³Nadaha kulava uwona kugamba nawanda wakise kuligana no udahi zawe hata kujink’ha. Kwa kuunga kwawe wenye, ⁴nawa kilombezesa wenk’higwe luneka mwe mbuli ya uwedi uno, mwo kunda ndala mo kuwambiza want’hu wa Mnungu uko Uyahudi. ⁵Ayo yajink’ha yadya nekikakawiila! Nk’hongo wakelava woho wenye kwa Zumbe, akajika naho kwa kuunga kwakwe Mnungu wakelava woho wenye kuchambiza suwe. ⁶Ivo kimgambila Tito yehe akongile indima ino kui gendeleza no kuwambizani kubindiliza indima ino kwa lukunde. ⁷Nyuwe mna kila kint’hu mwo mhuwi, mwo kulonga, no umanyi na kukombeka kose mo kudamanya uwedi na lukunde lwenyu kwetu, na ivo chawakawiila mpate mbazi yabindile wingi.

⁸Hikuwalagiza, mna naunga du kulagisa wamwenga ivo waku kombeka kwambiza vileke nimanye ivo lukunde lwenyu ivo lwili lwa kindedi. ⁹Kwaviya mmanya ukwinkwa kiya hemwiwagilwe cha Zumbe ywetu Yesu Kilisito, ivo eli mgoli, kaketenda yehe mwenye kunda mkiwa, kwa kuwazungulani nyuwe, vileke awatendeni nyuwe kunda wagoli kwo ukiwa wakwe. ¹⁰Fanyanyi zangu ni kugamba, ni vedi vitendese, kwa nyuwe kubinda haluse kiya mkongile mwo mwaka womboke. Hiyo kugamba nomnda wank’hongo du kudamanya, mna ni hamwenga no kuunga kuidamanya. ¹¹Mbindilize indima iyo, na kwa ivo mkeikile lumwe kuunga kudamanya ivo, sa iivo mkakeike lumwe kukint’hiza kuligana na ivo no mdahe. ¹²Uneva mwakombeka mwo kulava, Mnungu na azumile malavo yenyu mwa kiya mnt’hu ananacho, hiyo kiya mnt’hu henanacho.

¹³Hikuunga vinde kugamba wamwenga wande na kint’hu wamwenga nawo waswese, mna kwaungwa kunde na kuligana. ¹⁴Kwaviya ivi haluse mnanavo, niho mkuungwa kuwambiza wadya wose heweina kint’hu, niho Umwo mkanda hemwiina, watuhu wananavo nawa myambizeni, mwe kutenda ivi wose nawande waliganywa. ¹⁵Saviya enga ivo viwandikwe kugamba yudya akuduganya vint’hu vingi, hana navo vikumkint’ha, na yudya akuduganya vigeke ananavo vikumkint’ha. ¹⁶Namtogola Mnungu ageile nkwina mwo moyo wa Tito, nkwina izia nnanazo zo kuwambizani. ¹⁷Kazumila viya kimgambile, naho kwaviya ana nkwina kujink’ha ayo keza kwenyu kwa kuunga kwakwe. ¹⁸Chegala ndugu ywetu akuhuwiliswa ni want’hu wamhuwile Kilisito, hamwenga na Tito, kwa ivo akudamanya ndima yo kubilikiza Mbuli Yedi. ¹⁹Naho hiyo ivo du, mna kasagulwa ni mafyo ya want’hu wamhuwile Kilisito, kunda na suwe mwo uwedi uno wa kwigala undima uno kikudamanya kwaajili ya ukulu wa Zumbe na kulagisa ivo ivedi kikuunga. ²⁰Chanda na wengele kise kwingila mwe kulabila mwe kukimaila kwetu digeleko idi ditana. ²¹Ukawiilo wetu hiyo kudamanya vedi kwa Mnungu du, mna iviya iviya mwa meso ya want’hu. ²²Kwaviya chamwigala ndugu ywetu, kimgeza nk’hanana nyingi, na kumuwona nk’hanana zose aungisa kuwambizani, naho haluse kanihuwilisa kujink’ha hadya nk’hongo. ²³Tito ni miyangu, naho chadamanya ndima hamwenga naye kwajili yenyu, mna mwa awo ndugu zetu watuhu wakwiza hamwenga nawo, awo ni wegala ulosi wa mafyo ya wahuwila wa Kilisito, ukulu unde kwa Kilisito. ²⁴Ivo lagiseni ikindedi cho lukunde lwenyu kwawe hameso ya want’hu wamhuwile Kilisito, no kukeduvya kwetu kwajili yenyu.

Wambizi kwa wahuwila wa Kilisito

¹Haviihile hata hina waandikileni mwe mbuli yo wambizi wigalwe kwa wasuntilwa. ²Himanya kugamba mwaungisa kwambiza, naho hikeduvya kwajili yenyu hameso ya want’hu wa Makedonia, Nehigamba, “Wandugu zetu wa Akaya wakeika lumwe kulava kukongela mwaka womboke”. Kudya kukombeka kwenyu kuwasongeza want’hu wengi wa Akaya. ³Haluse nehiwegala wandugu awa vileke kukeduvya kwetu mwa nyuwe mwe mbuli ino kusekunda kwa milosi du, mna inde enga viya nilongile kugamba, nomkeike lumwe no wambizi wenyu. ⁴Kwa vovose, uneva want’hu kulawa Makedonia kinezanya niyo wawabwiilani kugamba hamkeikile lumwe, nekikeivise soni, hi mwe zisoni za nyuwe, mna kwa kudya kuwahuwilisa nyuwe. ⁵Ivo hiona kugamba neiungigwa kuwalombeza wandugu, wanilongoele, no kuika lumwe mwe digeleko dyenyu mgambile nomlave. Naivo neinde iikwa lumwe Umwo habula, naho neilagise kugamba mwalava kwaviya mwaunga ukulava, hiyo kwaviya mgambigwa mlave.

⁶Mkumbukile kugamba akuhanda mbeyu ngeke naalozole vigeke, akuhanda mbeyu nyingi naalozole uvikilwa. ⁷Kila mnt’hu alave enga viya akuona kunda ni vedi, kwa moyo hiyo kwa kutigizwa, kwaviya Mnungu awaunga wakulava kwa kinyemi. ⁸Naye Mnungu adaha kumink’hani nyuwe kujink’ha viya mkuunga, vileke mazuwa yose mnde navo viya mkuviunga, vikuwegusani, mdahe kwambiza mwe vingi kwa kila ndima yedi. ⁹Enga ivo iwandikwe,

“Awenk’ha kwa ukise wadya heweina kint’hu,

uwagilwa wakwe ni wa ulo na ulo.”

¹⁰Naye Mnungu akuwenk’hani mbeyu zo kuhanda, ne mikate yo kudya naamink’heni naho mbeyu zose mkuziunga, naho naazitende zihote, zikule, no kweleka cheleko cha ugoli, kulawa mwo uwedi wenyu. ¹¹Mazuwa yose naawenk’heni ugoli wa kwigusa, kuwatenda mnde wakise mazuwa yose, vileke awengi wamtogole Mnungu, kwa amageleko yenyu wakuyahokela kulawa kwetu. ¹²Undima uno mkudamanya hiyo kuwegaila du want’hu wa Mnungu viya wakuviunga, mna iviyaiviya neinde watende want’hu kumtogola Mnungu. ¹³Kwajili yo wambizi mkudamanya, muwatenda, want’hu wamtogole Mnungu kwa uhuwilwa udya mnanao, na kukeiila kwenyu mwe Mbuli Yedi ya Kilisito, no udya ukise mnanawo kwa want’hu wose. ¹⁴Naho nawa wavikileni nyuwe kwa moyo, kwajili yo udya uwedi, udya Mnungu amlagiseni. ¹⁵Kimtogole Mnungu ko uwedi wakwe hakikudaha hata kuusimwiila ivo vikuwagilwa.

Paulo agombela undima wakwe

¹Miye Paulo want’hu wamwenga wanigamba ni mkali Umwo handa hale na nyuwe, mna ni mjalamu handa na nyuwe nt’humba na nt’humba kwe digeleko dya Mnungu no uwedi wa Kilisito. ²Kiya huunga kwenyu ni iki, mse kunitenda ninde mkali Umwo heza, Kwaviya himanya kindedi kugamba nadaha kunda mkali kwa wadya wose wakugamba chekala kwa kulongozwa ni mbuli za mwe isi. ³Ni kindedi chekala mwe isi, mna hakikutoana nk’hondo enga want’hu we isi ivo wakutoana. ⁴Vitoanilo vetu va nk’hondo hiyo vitoanilo va kimnt’hu, mna ni vitoanilo va nguvu za Mnungu, kwa uwo, chamola magomela, chamola uhigani wa udant’hi, ⁵chakinya hasi weduvi wowose ukukeinula kinyume na umanyi wa Mnungu, fanyanyi zose chazitaha na kuzitenda zimtegeleze Kilisito. ⁶Mnajika kunda kindedi want’hu waivi, nekidahe kusulumiza kila mnt’hu heekwiva.

⁷Nyuwe mwavikaula vint’hu kwa kuse du! Eyuko mnt’hu yeyose akukegamba yehe mnt’hu ywa Kilisito? Vedi! Mlekeni afanyanye mwenye kugamba enga viya yeye eli ywa Kilisito, suwe naswe nivo kili. ⁸Du hikuona soni hata uneva hiketogolesa, mwo udahi udya kink’higwe ni Mnungu, kakink’ha udahi wa kuwazengani, hiyo kuwamolani. ⁹Hikuunga inde kugamba nawogofyani mwe zibaluwa zangu. ¹⁰Wamwenga wagamba, “Baluwa za Paulo zaluma naho zina milosi mikali, mna akanda hamwenga na suwe ni msokezi, naho milosi yakwe haina dyodyose”. ¹¹Want’hu enga awo waungwa kumanya kugamba, yadya huwandika mwe zibaluwa handa hale na nyuwe, na yadya hulonga mwo mnomo kikandanya, yose ni ya mwenga.

¹²Kwa vovose hakikugeza kukeliganyiza na wadya kuketogola woho wenye. Want’hu wakutenda woho wenye kunda kihimo cho kukehimila, wakeliganya woho wenye kwa wenye, awo ni wahezi.

¹³Wefenyi wetu haujink’hile kihimo, kukefenya kwetu nokunde mwe kihimo che ndima kink’higwe ni Mnungu, indima kiku idamanya hata kwenyu. ¹⁴Ivo hakijink’hile mihaka mwo widuvi wetu umwo chezaga kwenyu. Kwaviya ni suwe chandaga we nk’hongo kwiza kwenyu kuwegailani Mbuli Yedi ya Kilisito. ¹⁵Hakikukefenyela ndima idya idamanywe ni want’hu watuhu kujink’ha kihimo kiya kink’higwe ni Mnungu. Ila chakawiila kugamba mhuwi wenyu nougenyele mwa nyuwe kwa mihaka akiikile Mnungu. ¹⁶Aho nekidahe kubilikiza Mbuli Yedi mwe ziisi zint’huhu hale na nyuwe, naho hiyo mbuli ya kukefenya kwa ndima aidamanywe ni want’hu watuhu na kunt’hu kutuhu.

¹⁷Saviya enga ivo viwandikwe, “Yeyose akuunga kukefenya akefenye mwa yadya yadamanywe ni Zumbe.” ¹⁸Kwaviya akuzumilwa hiyo yudya mnt’hu akukeona mwenye kugamba kazumilwa, ila ni yudya akuonwa ni Mnungu kugamba kazumilwa, uyo niye azumilwe.

Paulo na wegala ulosi wadant’hi

¹Finyilizeni ludodo kwajili yangu, hata uneva ni mhezi vihi!. Finyilizeni du! ²Nawaonelani finyu, enga ivo Mnungu akuwaonela, nyuwe mkeiga kigoli mtana nikitumizile kwe mgosi yumwenga du, uyo Yesu Kilisito. ³Mna nogoha kugamba ubala wenyu no wazaganywe kuuleka uhuwilwa wenyu we kindedi kwa Kilisito, Sa iivo, dizoka kwo upapala wakwe dyamdant’hilizaga Hawa. ⁴Kwaviya kwa kinyemi mwamhokela mnt’hu yeyose akumiziilani, no kuwabilikiza mbuli ya Yesu mtuhu, hiye yudya Yesu kibilikize ulosi wakwe, naho mwazumila Muye na Mbuli Yedi na ulosi hewiligane na udya suwe kibilikize!

⁵Hangi uneva kugamba miye ni mdodo kwa dyodyose, mwa wadya wose wakwitangwa wegala ulosiwenyu wakulu. ⁶Vadahika hidahile kulonga, hina umanyi, kiitenda imanyike kwenyu mwo lupisi lwose, naho kwavovose. ⁷Togoleni nehibalanga miye kweseleza vileke nyuwe mkwezwe, kwaviya nehi wabilikizani Mbuli Yedi ya Mnungu haheina kulihigwa? ⁸Umwo nandaga hadamanya ndima kwajili yenyu, nandaga haleligwa ni mafyo ya wahuwila wa Kilisito matuhu. Nadaha kugamba nawahokaga vint’hu vawe vileke niwadamanyilani ndima nyuwe. ⁹Naho Umwo nandile na nyuwe, hyegame mwenyu haunga chochose. Wandugu zangu kulawa Makedonia nawakanigaila kila kia nehaunga enga. Nehinda na wengele vitendese nise kwegamila kwenyu kwa dyodyose diya, naho neni gendeele kutenda ivo. ¹⁰Kwe kia ikindedi cha Yesu Kilisito nnanacho, hahali yeyose akuunga anitende nise kukeduvya hant’hu hohose mwe Akaya. ¹¹Nigambe kugamba hikumuungani? Mnungu kamanya kugamba namiungani.

¹²Nanigendeele kudamanya kiya hudamanya ivi haluse, vileke wadya wakuzumngula luneka wase kulupata, ludya luneka lwa kukeduvya kugamba wadamanya enga ivo suwe kikudamanya. ¹³Kwaviya want’hu awo ni wegala ulosi wo udant’hi, wakudamanya ndima kwa nyambi, wakukehitula woho wenye kunda enga wegala ulosiya Kilisito. ¹⁴Nivedi! Suwe hakikwehelwa kwaviya hata Mwavu mwenye adaha kukehitula no kunda enga watumigwa ywo ung’azi. ¹⁵Elo uneva wandima wakwe wakehitula woho wenye kunda enga wandima we kindedi hiyo kint’hu cha kwahela, kwo kubindiliza nawahokele kiya kiwagilwe izindima zawe.

Paulo akunt’ha mwo utume wakwe

¹⁶Navuzagiza, mnt’hu asekunigamba miye ni mhezi, mna uneva mwagamba miye ni mhezi, nizumileni ludodo enga mhezi, vileke name ninde na kukeduvila ludodo. ¹⁷Naivo kiya hulonga ivi haluse, hiyo kiya Zumbe anilagize nilonge, mwe imbuli ino yo kukeduvya, kindedi nalonga enga mhezi. ¹⁸Kwaviya awengi wakukeduvila mbuli ze isi, miye name neni keduvye. ¹⁹Nyuwe wenye muwabala, naivo kwa kinyemi mwafinyiliza hata awahezi. ²⁰Naho mwafinyiliza hata mt’hu akuwatumagizani, akumyonk’hani, akawatahani, akuwabelani, akuwasant’hulani vibao mwo uso. ²¹Nazumila kugamba nekindilisa wasokezi kuyadamanya ayo. Mna yeyose akugeza kukeduvila kint’hu, nalonga enga mnt’hu mhezi, miye name nakeduvya kwa icho. ²²Woho Waibulania? Miye name ni Muibulania. Woho Wazilaeli? Hata miye ni Mzilaeli. Wowo ni welekwa wa Ibulahimu? Hata miye. ²³Woho ni wandima wa Yesu Kilisito, nalonga enga mkilalu, mna mtumwa ywedi kujink’ha woho! Hidamanyisa ndima, hivugailwa mwe mavugailo nk’hanana nyingi, hitoeswa, nk’hanana zose hinda hagihi no kubanika. ²⁴Nkanana shano Wayahudi wanitoa ngoda milongo mitatu na kanda, ²⁵Nkanana nt’hatu hitoigwa ni Walumi, naho hitoigwa maiwe nk’hanana imwenga, ngalawa yangu inivunikila nk’hanana nt’hatu mwa mazi, naho nezaga kunda mwa mazi kilo kimwenga na msi umwenga. ²⁶Mwe zint’hambo zangu zinyingi nakaulagwa ni nk’hondo ya nk’hananao na wahoki, mwe nk’hondo ya Wayahudi na want’hu hi Wayahudi, nakaulagwa na nk’hondo za mwe mizi, naho kwa makala yaihile, mwe bahali, naho nk’hondo yangu neinda kwa wambuya wa wadant’hi. ²⁷Hidamanya ndima no kwangadika, nk’hanana nyingi hicheleza, sala na nk’hilu nehinda navo, nk’hanana nyingi nehafunga no kwikala mwe mp’heho hiina suke. ²⁸Haheina kujala mbuli zimwenga nyingi, kila zuwa hitozigwa na ndima za mafyo ya wahuwila wa Kilisito yose. ²⁹Yumwenga akanda hakudaha, name nanda hikudaha, uneva yumwenga anagwizwa, moyo wangu waluma.

³⁰Uneva hakeduvya nakeduvya kwa vint’hu vikunilagisa ivo nili msoka. ³¹Mnungu na Tati yakwe Zumbe Yesu zina dyakwe neditogolwe ulo na ulo, yehe kamanya kugamba miye hikudant’ha. ³²Umwo nandaga Damesiki mkulu weisi ehasi ya zumbe Aletasi, aikaga wamizi mwe zink’hili zo mzi vileke wanigwile. ³³Mna naselezelagwa mwedi langa kwa molukazi kwa gahu niyo namsumka.

Maona no Ugubulo wa Paulo

¹Nakeduvya hata uneva hina icho nenihokele mwo kukeduvya uko, mna neniwagambileni amaona no ugubulo, nink’higwe ni Zumbe. ²Miyaka mlomgo na mine yomboke, kwandaga na mhula ywa Kilisito yumwenga aguhagwa mpaka mbingu ya katatu, hikumanya kugamba, mnt’hu uyo aitaga no umwili wakwe, hegu aitaga kimp’heho, mna Mnungu kavimanya ivo. ³Navuzagiza kulonga, himmanya mnt’hu uyu kugamba egalagwa kulanga, navuzagiza kulonga, hikumanya kugamba yandaga kindedi hegu wandaga ulagiswa, Mnungu mwenye niye amanyize ⁴na uko evaga vint’hu va kinyele, ni vint’hu mnt’hu heekudaha kuvilonga. ⁵Kwa ivo nakeduvila umnt’hu uyu, mna heni keduvye, miye mwenye, mna neni keduvye mwe viya vint’hu vikunilagisa usokezi wangu. ⁶Naungile kukeduvya, hegu hyandile mhezi kwaviya nenilonge ni kindedi, mna henikeduvye kwaviya hikuunga yeyose akaniwona miye ni mkulu kujink’ha ivo akuniyona, na ivo akuniva hulonga. ⁷Mna vileke ninde kuse yo kukeduvya kwe vint’hu ivingi nivione, nigelwa mbagi mo mwili wangu, nikwinga mtumigwa ywa Mwavu, anitumize no kuketenda nise kukeduvya. ⁸Namlombezaga Mnungu nk’hanana nt’hatu, mweidi, no kumuila adilave mo mwili wangu. ⁹Mna uhituzi wakwe wandaga. “Uwedi wangu wakwigusa Kwaviya udahi wangu ukulisa Umwo ukanda kusokela.” Naonesa kinyemi kukeduvila kwo usokezi wangu vileke udahi wa Kilisito wikale mwangu. ¹⁰Miye neguswa ni usokezi, kuhomola, kukunt’ha, kusulumila, madala, kwa kumzungula Kilisito kwaviya Umwo handa msokezi niho hunda no udahi.

Kiyangayanga cha Paulo mwa wakolinso

¹¹Neketenda enga mhezi, mna nyuwe ninyuwe we mkuleka handa ivo. Mna ni nyuwe nomkawagilwa mnitogole. Hata uneva miye hikint’hu, kwavovose miye hiyo mdodo kwe wegala ulosiwenyu wose wadya wakugambigwa wakulu. ¹²Vihungi vingi na mbuli za kweehela vikunilagisa kugamba miye ni mwigala ulosi vidamanywa mwenyu hamwenga no kufinyiliza kwingi. ¹³Nyuwe mhungukilwai kujink’ha want’hu wamhuwile Kilisito watuhu mna miye hiwazamileni. Nioneleni mbazi kwa idi! ¹⁴Aka ni katatu kangu kugamba hikeika lumwe kwiza kuwatalamkilani naho heninde nt’wika dya kwetwika kwenyu. Namiungani nyuwe hiye matundu yenyu. Yakujink’ha ayo wana wadodo hiyo woho wo kuwambiza welesi ila welesi nao wakuungwa kuwambiza wana wawe wadodo. ¹⁵Neni na kinyemi kutimila vose nnanavo, na miye mwenye, vileke nimyambizeni. No mniunge Kwaviya miye namiungisani? ¹⁶Nomzumile naho kugamba, hyamizamileni wamwenga wagamba nehinda mbala no upapala. ¹⁷Togoleni nehiwadant’hilizani woho nawatumile kwenyu? ¹⁸Nihi mlombeza Tito kwiza uko, nuyo natuma na ndugu ywetu mtuhu, mhuwila ywa Kilisito hamwenga na yehe mwadaha kugamba Tito amidant’hilizagani? Miye na yehe hakidamanye yahamwenga, mwa Muye msuntilwa? ¹⁹Mafa mwadaha kugamba, suwe chakegombela mwa meso yenyu bule! Chalonga enga viya Kilisito akukikawiila kulonga mwo udahi wa Mnungu, naho kila kikudamanya ni kwa kuwambizani nyuwe wambuya zenyu. ²⁰Nogoha kugamba heza kwiza aho, neniiwabwileni kinyume na viya nehaunga nyuwe mnde naho nomnione name kunda vituhu na viya nomkaunga ninde. Nogoha kugamba nenize nibwiile nk’humbizi na finju na maya no kukeunga nyuwe wenye du, kwinuilana mbuli no kutetana weduvi na nk’humbizi. ²¹Nogoha kugamba heza kwiza naho Mnungu wangu naanitende kunda wa hasi mwa meso yenyu, naho nihongeze kwa wadya wengi wadamanyaga wavu aho nk’hongo ni hawaungile kweiila kwe zimbuli zawe ziihiye, no wavu wo uhabwasi.

Makanyo na ndamsa ya mzigilizo

¹Ino ni nk’hanana ya katatu yangu kwiza kuwa talamkilakila. Mawandiko wagamba, “Kila gambilizo dyafaha ditalaulwe he uwona wa want’hu waidi na kugendeela.” ²Nehilonga kale kwa wadya wose watendaga wavu nk’hongo, aluse nalonga naho handa hale nihale, wose wadya watendile wavu haheina kweiila, na wadya watuhu, heza kwiza heni waonele mbazi. ³Kwaviya mwaunga mmanye kugamba Kilisito alonga kombokela miye, Umwo akawadamanyilani ndima, yehe hi msoka, ila udahi wakwe wadamanya ndima mgati mwenyu. ⁴Kwaviya hata uneva awambagwa mwo msalaba kwajili yo usoka, mna haluse ekala kwa udahi wa Mnungu. Suwe naswe kiwasokezi, mna nekikale naye kwa udahi wa Mnungu kwajili yenyu.

⁵Kehimeni wenye mdahe kumanya kugamba mna mhuwi. Viya nyuwe hamanyize kugamba Yesu Kilisito emndani mwenyu? Uneva hiyo ivo nyuwe mdunduga pele. ⁶Mna nakawiila kugamba nyuwe mmanya kugamba suwe hakidunduge. ⁷Suwe chamlombeza Mnungu kugamba mse kudamanya wavu wowose, hiyo kilagise kugamba suwe kiwant’hu wedi, mna mdahe kudamanya ayedi, hata kinaoneka kunda kihumigwe. ⁸Kwaviya hakikudaha kukihiga ikindedi, ila chekala mwe kindedi. ⁹Kwaviya suwe chelelwa kunda wasokezi, mna nyuwe mwi wadahi, naivo chalombeza kugamba mnde wakint’hile. ¹⁰Ivi nivo vikuleka nawa wandikilani ivi haluse handa hale na nyuwe, naivo heza kwiza uko, hikwiza kunda mkali kwenyu kwo udahi nink’higwe ni Zumbe, udahi wa kuwazengani, hiyo kuwakinyani.

¹¹Elo haluse wandugu zangu chalagana! Damanyeni zimbuli zenyu, tegelezeni yadya huwagambila, ivaneni, ikaleni kwa utondowazi, naye Mnungu wo lukunde no utondowazi naande hamwenga na nyuwe.

¹²Mkelamse kwa kilagiso cha lukunde msuntilwa. ¹³Want’hu wose wa Mnungu wa uku wawalamsani.

¹⁴Geleko dya Zumbe Yesu Kilisito lukunde lwa Mnungu no uhamwenga wa Muye ywa Mnungu nowikale na nyuwe nyose.