2 Petulo

Petulo

BALUWA YA NK’HONGO YA

1 PETULO

ULONGOELO

Baluwa ino ya nk’hongo ya Petulo yawandikagwa ni mwigala Ulosi Petulo. Petulo kakonga baluwa yakwe kwa kuketambula kugamba yehe niye yuhi naho niani akumuwandikila baluwa ino, kawawandikila want’hu wose wamhuwile Kilisito weli wageni mwe isi ino 1Petulo 1:1 naho kavuzagiza kuwagambila ivo nk’hanana nyingi awo awawandikile. Kwaviya baluwa ino yaliganaligana na baluwa ya Paulo kwa Waefeso, wengi wahuwila kugamba baluwa ino yawandikagwa aho baluwa ya Waefeso ize inde iwandikwa kale, yandaga mwo mwaka milongo mtandatu na mishano kulawa aho Yesu eze elekwe. Petulo awandikaga baluwa ino akanda ukwo Loma ukwo akwitange Babeli, 5:13

Petulo awandikaga baluwa ino vileke akugele moyo na kulava uwona kugamba uno nuwo uwedi wa Mnungu we kindedi, 5:12 Kuna kuligana kwingi mwa mafungu aya, 1 Petulo 2;11-3:7; Waefeso 5:18-6:9 na Wakolosai 3:18-4:6, mafungu yose aya matatu yalava malagizo mwo wikazi wedi mwe mp’huga na kuwiva udahi. Naho awagela moyo want’hu wakumhuwila Kilisito wande na kufinyiliza kukalaila makunt’ho kwaviya uheelo wi hagihi 4:1

Yemndani

Petulo aketambula mwenye no kuwatambalisa awo akuwawandikila 1 Petulo 1:1-2

Akajika amtogola Mnungu kwo uyokozi uwo wose wauhokele na ivo wili mkulu mwo wikazi wawe 1 Petulo 1:3-2:10

Naho awalagiza want’hu wakumhuwila Kilisito mwe mbuli zo wikazi wawe mwe isi, na kutambalisa mbuli za mwivano kwa mgosi na mvele na wakulu na watumwa1 Petulo 2:11-4:11

Petulo naho awagela moyo wafinyilize makunt’ho 4:12-5:11

Eze ajike abindiliza baluwa yakwe 1Petulo 5:12-14

¹Miye Petulo mwigala ulosi ywa Yesu Kilisito.

Nawawandikila nyuwe msagulwe ni Mnungu Tate, nyuwe msambaale mwe isi yose naho hiyo wakaya uko Ponto na Galatia na Kapadokia na Asia hamwenga na Besania. ²Mnungu Tate nakawasagulani akataila yadya aungile, naho mtendigwa want’hu wa Mnungu ni Muye, vileke mdahe kumtegeleza Yesu Kilisito no kumyagilwa sakame yakwe.

Uwedi no utondowazi vindilise kwenyu.

Kawiilo dya kindedi

³Atogolwe Mnungu, naho Ise dya Zumbe ywetu Yesu Kilisito, kwa mbazi zakwe zitendese nakakitenda chelekwe uhya, kwa kumuuyula Yesu Kilisito, kakink’ha kawiilo dina ukindedi. ⁴Naho chakawiila kuhokela vint’hu vedi vingi vinde vetu, hevikugeligwa usavu naho hevikuchucha naho ni vakwikalisa Mnungu naye kawaikilani uko kwe mbingu. ⁵Nanywe mwamilwa ni ludole lwa Mnungu kwa kuhuwila, vileke mhokele uyokozi wiikilwe lumwe kugubulwa mwe dizuwa dyo uheelo.

⁶Indiliseni na kinyemi ne mbuli iyo, hamwenga na kugamba kwa lupisi lugihi nomuungigwe kunda na kinyulu kwa magezo ye hengi. ⁷Kitalo cha magezo ayo ni kihimo cho mhuwi wenyu. Hata zahabu yenye ikubanika yagezagwa mwo moto, iviya iviya mhuwi wenyu wili mtana vitendese kujink’ha zahabu, waungwa kugezigwa vileke umanyike kugamba ni wa kindedi, niho nomhokele nt’hogola no ukulu, wogofi mwe dizuwa diya Yesu Kilisito akeza. ⁸Hamwenga na kugamba hammuwone mwamuunga, naho mwamhuwila no kunda na kinyemi kitendese, kinyemi kikulu hekikulongeka, ⁹Kwaviya ikitalo cho mhuwi wenyu ni uyokozi wenyu.

¹⁰Walotezi wa Mnungu walotele mwo uwedi uwo hegu wandile wenyu, nawo wapelemba kwa wengele mwe mbuli yo uyokozi. ¹¹Wazungulaga kugamba ni kwa vivihi na ni lupisi luhi lulongigwe ni Muye ywa Kilisito andaga mwawe, uyo awagambilaga kale masulumizo yakuunga yamwiziile Kilisito, no ukulu wa Mnungu uwo ukuunga ulaile yakajika ayo. ¹²Mnungu nakawagubuila kugamba, wandaga hawa kukedamanyila ndima wenye, mna nawawadamanyilani nyuwe, umwo wandile wakalonga mwe mbuli izo haluse mzivile kulawa kwa want’hu wakubilikiza Mbuli Yedi kwa sila ya Muye ywa Mnungu atumigwe kulawa kwe mbingu. Mbuli izo hata watumigwa wa kwe mbingu wamunk’hwa wazimanye.

Lwitango lwa kwikala wikazi ukukile

¹³Naivo, keikeni lumwe no ubala mkakawiila mwo uwedi wa Mnungu ukuunga mwink’higwe mwo kwiza kwakwe Yesu Kilisito. ¹⁴Mkanda wana wakwiva mse kwikala kutimila kumunk’wamunk’wa kwa mbuli ziihile mwandile nazo aho mwandaga hammanyize ikindedi cha Mnungu. ¹⁵Mna mwaungwa kunda want’hu wakukile mwo lugendo lwenyu lwose viligane na yudya awetangeni ivo akukile. ¹⁶Iwandikwa mwa maandiko ya Mnungu kugamba, “Mnde wakukile kwaviya miye hikuka.”

¹⁷Na ikanda mwamwitanga Tate, mwe mbuli iyo manyeni kugamba yehe amsengela kila yumwenga mwe yadya adamanye hehaina kwazagula. Naivo mgendeele vedi kwa lupisi lusigale aha he Isi mtile kwiza kwa kumwogoha Mnungu. ¹⁸Kwaviya mmanya kugamba nyuwe nomkombolwa mwo lugendo lwenyu helwikwelela ludya mumhokele kulawa kwa wadala wenyu. Mna hamkombolwe kwa vint’hu vikubanika enga viya matundu hegu zahabu, ¹⁹mna myokolwa kwa sakame ina utana utendese ya Yesu Kilisito, yehe andile enga Mwanangoto heena lema hegu madoa. ²⁰Yehe nakasagulwa ni Mnungu, umwo isi yandaga ikei kuumbigwa, niyo agubulwa kwa ajili yenyu mazuwa aya yo uheelo. ²¹Kwa sila yakwe mwamhuwila Mnungu amuuyule no kumwink’ha ukulu, kwaivo mhuwi ne dikawiilo dyenyu vinde kwa Mnungu.

²²Nyuwe mkukizwa kale umuye kwa kuzumila ikindedi, kwa kuwaunga weenyu haheina utondwe, ivo kombekeni kunda na lukunde kwa moyo wenyu wose. ²³Kwaviya mwink’higwa ugima mhya, hiyo udya ukulawa mwe mbeyu ikubanika, mna kulawa mwe mbeyu heikubanika, kwa sila ya ulosi wa Mnungu wili mgima naho wekala mazuwa yose. ²⁴Iwandikwa kugamba,

“Want’hu wose enga mani,

naho ukulu wawe utendese, ni enga bwali dya kwe mbago.

Mani yanyuluka, niyo mabwali yahugutuka.

²⁵Mna Mbuli ya Zumbe yekala ulo na ulo.”

Ulosi wa Mnungu uwo ni idya Mbuli Yedi ibilikizwe kwenyu.

Iwe dina ugima, na want’hu wa Mnungu

¹Lekeni wiihi wose, naho kusekunda na lulimi na utondwe, finju hamwenga na mbuli zikuihiya. ²Enga viya wana wakembe wakuungisa mele, nyuwe nanywe muungise mele yedi ye kimuye vileke mkule na kuyokolwa kwa ludole lwakwe. ³Kwaviya iwandikwa kugamba, “Uneva mluma kugamba Zumbe ni ywedi.”

⁴Iteni kwakwe, yehe niye iwe dina ugima dilemelwe ni want’hu, mna kwa Mnungu disagulwe naho tana ditendese. ⁵Iteni kwakwe enga maiwe yano ugima, mkazengeke nokunda nyumba ye kimuye mdamanye ndima ya ulava nt’hambiko ukukile, mkalava nt’hambiko ya kimuye yakumwelela Mnungu kwa sila ya Yesu Kilisito. ⁶Kwaviya Mawandiko yakukile yagamba,

“Kaula naika iwe mwe Sayuni,

iwe disagulwe dya nk’hongelo dya mwe mp’hembe, tana vitendese,

naho akuunga amhuwile yehe, hengile soni.”

⁷Kwenyu nyuwe mkuhuwila, iwe idyo ni tana vitendese, mna kwa wadya hewekuhuwila, enga ivo Mawandiko Yakukile yakulonga

“Iwe wadilemele awazesi,

dinda iwe kulu dya mwe mp’hembe.”

⁸Iviya iviya yagamba,

“Iwe idyo ni iwe dya kukobadikila want’hu,

ni luwe lukuwakinya want’hu.”

Want’hu wakobadika kwaviya nawalemela kuhuwila ulosi wa Mnungu, naho niivo waikilagwa kukongela aho nk’hongo.

⁹Mna nyuwe ni lukolo lusagulwe, mnda ni ulava nt’hambiko wa kiseuta na fyo dya want’hu wa Mnungu mwenye, vileke mbilikize udamanyi mkulu wa Mnungu awetangeni kulawa kwo lwiza, niyo awegalani kwo ung’azi wakwe wakwehela. ¹⁰Uko kale nyuwe mwandaga hiyo want’hu wa Mnungu, mna haluse mwi want’hu wakwe, aho nk’hongo hamwenk’hagwa mbazi za Mnungu, mna haluse mhokela mbazi zakwe.

Wandima wa Mnungu

¹¹Wambwiya zangu, nalonga na nyuwe enga wageni naho watafi aha he isi, lekeni kumunk’wamunk’wa ne zimbuli ziihile ze kiunt’hu zikuhigana na miuye yenyu. ¹²Mnde na lugendo lwedi mgati mwa want’hu hewemmanyize Mnungu, vileke wakawazigani kugamba mwadamanya mbuli ziihile, mna wakakaula udamanyi wenyu wedi wamtunye Mnungu mwe dizuwa akeza kuwasengela want’hu.

¹³Elo, zumileni kulongozwa ni wata udahi kwa mbuli ya Zumbe akanda ni seuta mkulu mta udahi mkulu, ¹⁴hegu wakanda ni wakulu wakutumwa na yehe kuwalihiza wose wakudamanya yaihile no kuwatunya wadya wakudamanya ayedi. ¹⁵Kwaviya Mnungu aunga mdamanye udamanyi wedi vileke mfupe milomo ya want’hu wahezi hewemanyize kiya wakulonga. ¹⁶Ikaleni enga want’hu walekelwa, mna msekuuguha ulekelwa uwo enga kint’hu cha kuziga wiihi, mna mwikale enga wandima wa Mnungu. ¹⁷Weveni want’hu wose, naho waungeni wandugu zenyu wose wahuwila, iviya iviya mwogoheni Mnungu na kumwiva seuta.

Mliganyizo wa masulumizo ya Kilisito

¹⁸Nyuwe wandima wa mwe nyumba, weveni wakulu wenyu wose, hiyo wadya awedi na wajalamu du, mna ni hamwenga na wadya wata lung’wangu. ¹⁹Kwaviya Mnungu elelwa na mnt’hu akufinyiliza makunt’ho hewagilwe, akamanya kugamba mazuwa yose amfanyanya Mnungu. ²⁰Elo nompatei mnafinyiliza kutoigwa kwa kudamanya wavu? Mna uneva mwafinyiliza masulumizo hamwenga na kugamba mwadamanya ayedi, Mnungu neelelwe na nyuwe. ²¹Ayo nayo mwitangilwe, kwaviya Kilisito mwenye nakasulumila kwa ajili yenyu, niyo awalekela mliganyizo vileke mdamanye enga viya yehe adamanye. ²²Yehe hadamanye wavu, naho hana zuwa alongile lulimi lwolwose. ²³Aho eze ahomolwe, yehe hahitule, aho asulumizagwa yehe hawatisile want’hu. Mna nakakeika mwe mikono ya yudya akusengela mwe kindedi. ²⁴Yehe mwenye nakaguha wavu wetu mwo umwili wakwe halanga he msalaba, vileke kileke kudamanya wavu no kwikala kwa kudamanya ayedi hameso ha Mnungu, kwa kulumizwa kwakwe nyuwe mhona. ²⁵Nyuwe nomnda enga ngoto zagile, mna ivi haluse muuya kwo mdimi no mkimalizi ywo ugima wenyu.

Wavele na wagosi

¹Wavele mlombigwe weveni wagosi wenyu, kugamba uneva weyuko wagosi wowose hewekuhuwila, wahuwile kwa kukaula ivo wavele awo wakudamanya, haheina kuwagambila dyodyose, ²kwaviya nawaone lugendo lwenyu ivo lwili lwedi, naho lwa kumwogoha Mnungu. ³Kukehamba kwenyu kusekunda kwa mbuli za kuse, enga milukile yakweheela ya fili, na mwo kuvika vint’hu va zahabu hamwenga na suke za utana utendese. ⁴Mna kwehamba kwenyu kunde kwa kundani kwo moyo hakukudaha kubanika, kwa muye wa ujalamu no utondowazi, uwo ni utana utendese hameso ha Mnungu. ⁵Aho nk’hongo wavele wamvikile Mnungu kwa kindedi, naho wamkawiilaga Mnungu, niivo wakehambaga wenye kwa wikazi wa kuwategeleza wagosi wawe. ⁶Sala naye andaga ivo, amtegelezaga Ibulahimu niyo amwitanga Zumbe. Haluse nyuwe mwi wanawe uneva mwadamanya ayedi haheina kogoha dyodyose.

⁷Wagosi iviyaiviya, mwikale na wavele wenyu mkamanya kugamba woho ni want’hu heweina ludole. Mwaungigwa mwikale nawo haheina kuwabela na kuwadamanyila ayedi, vileke msekulemelwa umwo mkamlombeza Mnungu, kwaviya woho nawo nawahokele nt’hunyo yo ugima hamwenga na nyuwe.

Ni vedi kusulumila kwa kudamanya ayedi

⁸Nabindiliza kwa kugamba, mnde na fanyanyi imwenga na kuonelana usungu naho mkeunge enga ndugu, mwivane naho mnde wajalamu. ⁹Msekulihiza wiihi kwa wiihi hegu kuhomola kwa kuhomola mna hant’hu hakwe muwavikile, kwaviya ayo niyo mwitangilwe vileke mhokele uvikilwa. ¹⁰Enga Mawandiko Yakukile yakugamba,

“Akuunga kwelela wikazi

no kuyaona mazuwa yedi,

akedime asekulonga yaihile

naho asekulonga lulimi.

¹¹Aleke kudamanya yaihile, adamanye ayedi.

Azungule utondowazi kwa moyo wakwe wose.

¹²Kwaviya Zumbe awakaulisa want’hu wakudamanya yakumwelela Mnungu

no kwiva yadya wakulombeza,

mna awahiga wadya wakudamanya yaihile.”

¹³Niani akuunga awalumizeni mkanda mkamunk’hwiswa kudamanya yedi? ¹⁴Mna indeni na kinyemi uneva mnaungigwa kusulumizwa mwe kudamanya ayedi yakuungwa! Msekumwogoha mnt’hu yeyose naho msekunda na mahituhitu. ¹⁵Mna mtunyeni Kilisito kunda Zumbe mwe mioyo yenyu, ikaleni lumwe kumhitula yeyose akuwauzani mbuli mwe dikawiilo mnanadyo, mna mdamanye kwa ujalamu na wogofi, ¹⁶na kwa mioyo heikuwagambila mna malema, vileke mwe mbuli idya mkuzigigwa na kuhomolwa mwo lugendo lwenyu lwedi kwa kulunganywa na Kilisito, wakudamanya ivo wageligwe soni. ¹⁷Kwaviya ni vedi kusulumila kwa kudamanya ayedi, ikanda niivo akuunga Mnungu, kujink’ha kusulumila kwa kudamanya yaihile. ¹⁸Kwaviya Kilisito naye nakasulumizwa no kubanika lumwenga du kwa ajili ya wavu, yehe uyo akudamanya yakumwelela Mnungu nakasulumizwa no kubanika kwa ajili ya wadya hewekumwelela Mnungu, vileke awegale nyuwe kwa Mnungu. Nakakomigwa mwo umwili wakwe, mna nakauyulwa kimuye. ¹⁹Na kwe kimuye uko, agendaga kuibilikiza idya miuye yandile mwe divugailo. ²⁰Awo ni wadya walemele kwiva, umwo Mnungu awagojaga kwa kufinyiliza mwe mazuwa Nuhu andaga akadamanya ngalawa ikwitangwa safina, umwo wengilaga want’hu mnane du mwe ngalawa ikwitangwa safina wayokolagwa kwa sila ya mazi, ²¹mazi ayo ni mliganyizo we zimbuli zo ubatizo ukuwayokolani nyuwe ivi haluse. Ubatizo udya hiyo wa kuukukiza umwili, mna ni kilagane kwa Mnungu kikudamanywa mwo moyo heikukigambila kina malema. Wawayokolani nyuwe kwa kuuyuka kwakwe Yesu Kilisito, ²²yehe aitaga kwe mbingu naho kekala kulume kwa Mnungu, alongoza watumigwa wa kwe mbingu na wata udahi na wakulu.

Wikazi Mhya

¹Kwaviya Kilisito nakasulumizwa mwo mwili wakwe, ivo nanywe mkombeke kwa fanyanyi enga zakwe, kwaviya uneva mnt’hu anasulumila mwo mwili wakwe, yehe haande mnt’hu ywo wavu vituhu. ²Kukongela ivi haluse, wikazi wenyu usigale aha he isi, ulongozwe viligane na viya akuunga Mnungu, hiyo viya umwili ukuunga. ³Ukwo kunyuma mwandaga na lupisi lutali lwa kudamanya mbuli ziya wakuunga kuzidamanya, want’hu hewemmanyize Mnungu, nomuunga kudamanya uhabwasi na kumunk’wamunk’wa kwiihile na ukozi na fugo zimemile ukozi na uhabwasi na miviko ya kwiihiya ya kuvika mahili. ⁴Haluse, want’hu hewe mmanyize Mnungu wehelwa wakawaonani hamlunganywe nawo mwo wikazi wiihile vitendese, nawo wawahomolani. ⁵Mna nawalave zimbuli zawe wadamanye wenye hameso ha yudya ekale lumwe kuwasengela want’hu wose, wagima na wabanike. ⁶Ivi nivo vilekile Mbuli Yedi neibilikizwa iviya iviya kwa wadya wabanike, vileke wasengelwe mwe mili yawe enga ivo wakusengelwa want’hu wose, vileke wekale kimuye enga viya Mnungu eli.

Mkimaila ywedi wa nt’hunyo za Mnungu

⁷Mna, kusila kwe zimbuli zose kwihagihi, elo fanyanyeni vedi naho mnde meso vileke mdahe kumlombeza Mnungu. ⁸Hamwenga na ayo yose, mnde no lukunde kwa kila yumwenga, kwaviya lukunde lwagubika wavu mwingi. ⁹Hokelaneni nyuwe kwa nyuwe, haheina kulabila. ¹⁰Kila yumwenga aungwa adamanyile ndima ikipe kiya enk’higwe ni Mnungu, akanda mkimalizi ywedi we vipe vihengi va Mnungu ¹¹Mnt’hu akubilikiza, milosi yakwe inde enga milosi ya Mnungu. Na yudya akuwambiza want’hu watuhu, awambize kwa ludole enk’higwe ni Mnungu, vileke Mnungu atunywe kwa sila ya Yesu Kilisito. Ukulu no udahi ni vakwe yehe, ulo na ulo. Taile.

Masulumizo ya kunda mhuwila ywa Kilisito

¹²Wambwiya zangu, mse kweehelwa kwa magezo yakuluma vitendese, mkayaona enga kint’hu kigeni kikulaila kwenyu. ¹³Mna indeni na kinyemi, mkasulumila enga ivo Kilisito asulumile, vileke mwize mnde na kinyemi kitendese mwo ukulu wakwe ukeza kugubulwa. ¹⁴Mvikilwa uneva mkahomolwa kwajili ya kumtimila Kilisito, kwaviya Muye wo ukulu wa Mnungu ekale na nyuwe. ¹⁵Mnt’hu yeyose asekusulumizwa kwaviya yehe mkomi, hegu ni mwavu, hegu ni mbavi, hegu akwingiila mbuli za want’hu watuhu. ¹⁶Mna uneva mnt’hu akasulumizwa kwa kumhuwila Kilisito, ivo asekunda na soni, mna amtogole Mnungu, kwaviya want’hu wamwitanga yehe, kwa zina dya Kilisito. ¹⁷Kwaviya lupisi lwa usengelo lubula, naho usengelo uwo ukonga mwe want’hu wa Mnungu. Uneva usengelo wakonga mwa suwe, nevinde vivihi kwa want’hu walemele kuihuwila Mbuli Yedi ya Mnungu? ¹⁸Naivo enga Mawandiko Yakukile yakugamba,

“Uneva ni vidala kuyokolwa wadya wakudamanya yakumwelela Mnungu,

Nevinde vivihi kwa want’hu hewekumvika Mnungu na want’hu wavu?”

¹⁹Elo, wadya wakusulumila enga ivo Mnungu akuunga, wagendeele kudamanya ayedi no kukelava kwa Mnungu muumbi mhuwilwa.

Ludimo we difyo dya want’hu wa Mnungu

¹Miye mdala miyenyu mwa nyuwe, wadala vilongozi weyangu. Miye ni muwona ywa masulumizo ya Yesu Kilisito, naho neninde na uhamwenga kwo ukulu wa Mnungu ukuunga ugubulwe, nawalombezani, ²mnde wadimi wa want’hu we difyo idyo mwink’higwe ni Mnungu, indeni na wengele nawo kwa kuunga kwenyu, enga ivo Mnungu akuunga mnde, hiyo kwa kutigizwa. Mse kudamanya ndima heikuungwa kwa kuunga kupata matundu. ³Mna msekuwalongoza kwa ukwank’hwalu wadya mkuwakimaila, mna nyuwe wenye mnde mliganyizo kwe difyo dya want’hu. ⁴Naho Mdimi Mkulu akeza kwiza, nomhokele nt’hunyo yo ukulu wa Mnungu idya heiikwaza utana wakwe.

⁵Iviya iviya, wabwanga na wandele, weveni wadala vilongozi. Naho nyuwe nyose keselezeni nyuwe kwa nyuwe mkambizana kila yumwenga, kwaviya mawandiko yagamba. “Mnungu awahiga wadya wakukekweza, mna awalagisa uwedi wakwe wadya wakukeseleza. ⁶Keselezeni kwa Mnungu, vileke awatendeni kunda wakulu mwo lupisi lwakwe luligane. ⁷Mduileni mahituhitu chenyu chose, kwaviya yehe niye akuwalelani.”

⁸Mkedime naho mkaulise! Kwaviya mk’hondo wenyu uyo Mwavu, ni enga kala dikubuma, dikugendagenda mwe isi, ongola mnt’hu amdye pele. ⁹Mtoge naho mnde na mhuwi naho mumhige, mkamanya kugamba, wandugu zenyu mwe isi yose wabwiilana na masulumizo aayo. ¹⁰Naho mkabinda kusulumila kwa lupisi, Mnungu ywo uwedi akuwetangani mnde ndala mwo ukulu wa ulo na ulo mwo kulungana na Kilisito, yehe mwenye naawatendeni mnde wagima naho no kuwenk’hani ludole no kuwatendani mtoge, naawenk’heni nk’hongelo lutogile. ¹¹Udahi unde wakwe ulo na ulo! Taile.

Ndamsa za nk’homelezo

¹²Hiwa wandikilani kwa uguhi kwa kwambizwa ni Siliwano, mndugu nimuwone kugamba ni mhuwilwa. Nawagambani msekubanika chevu, no kuwagambilani uwona wangu kugamba uno ni uwedi wa Mnungu we kindedi. ¹³Wahuwila wa Kilisito wasagulwe ni Mnungu aha Babiloni, hamwenga na Maliko mwanangu ywe kindedi mwo mhuwi, wawalamsani. ¹⁴Mlamsane kwa kilagiso cha lukunde. Utondowazi unde na nyuwe nyose mlunganywe na Kilisito.