Fìlípì

Páwòlò cu wáràgà ji ndâ mbe kû kili ta ṛè mì Bìndi-Mbíṛì gbí gbata

FÌLÍPÌ

¹A ze tí ndâ Páwòlò ta Tìmàtéyò, tí ndâ bòò mì Bìndi-Mbíṛì tí Jézù ká kû cu wáràgà tí nó ji ndâ tó ꞌduù mì Mbíṛì mbe ꞌvala toko ta Bìndi-Mbíṛì tí Jézù gbí gbata Fìlípì. Ze kû cu wáràgà tí nó ji yo ta ndâ kpo-kpò ꞌduù kùṛo yo, ta ndâ ꞌduù tí nó mbe kû konì ndâ kpo ꞌduù kùṛo yo ta nèté yo, tí ndâ mbe kû kili ta ṛè mì Bìndi-Mbíṛì kà nó ꞌdáá gî. ²Ze kû cu wáràgà tí nó ta bà ꞌdeke tí ze ji Mbíṛì tí Bu ndoo, delè ta bà ꞌdeke tí ze ji Mbe tí ndoo Jézù tí Bìndi-Mbíṛì, máa, ndú ꞌví bàkà nambeè ji yo, ndú delè ꞌví si ꞌbí i ꞌví ba muu yo lá.

Páwòlò ꞌdeke tí wó ji Mbíṛì tacó tí ndâ mbe ꞌdeke wáràgà tí nô

³Ye tí Páwòlò ta o ꞌdáá gî kû ꞌdè nìkì maa ji Mbíṛì mì ye ta o tí nó náa ye má kû koṛo có tí yo. ⁴Ye ta o ꞌdáá gî kû ꞌdeke tí ye ji Mbíṛì tacó tí yo ta líkíꞌo tí ye. ⁵Tàkòcò ye delè peteke gítí yo ngé ma, tacó bà dù yo tí ndâ mbe konì ye ta bà je wotí ji ye gítí bà ma Banga-Ngú-Có ꞌdo tí o bà ꞌbìtà bà ꞌdi Banga-Ngú-Có mì yo, yee gbí ṛi tí nó wúnó nô. ⁶Ye ŋò ni gî, máa, Mbíṛì tí mbe ꞌbìtà bà tè kùṛo yo tí kpokèjì tí nò nó bà tè kùṛo yo yee tí o bà gì yo tí ndâ ꞌdóó ŋìnó mì wó ta ṛi bà gì Bìndi-Mbíṛì tí Jézù wúnò gî.

⁷Àá mì ye a yúcó tacó bà dù ta tàkòcò ye pétékèꞌi gítí yo énò, tacó có tí yo ta o ꞌdáá gî kuu gbí njembí ye, tacó yo a ndâ ka ye, náa Mbíṛì kû bàkà nambeè ji ndoo ta ndoo kpónó si ye kuu gbí zàà nô. Yí delè táánò bàkà nambeè ji ndoo ta ndoo ta o tí nó náa ye táánò kuu sè, kû tì muu Banga-Ngú-Có, ta bà ꞌdè ndâ có ŋìnó náa à tí  á gítí  nô. ⁸Mbíṛì ŋò ni gî, máa, kôꞌo tí yo ꞌdáá gî bà zi ye gî. Tàkòcò ye peteke gítí yo ꞌdáá gî ká go bà peteke tàkòcò Bìndi-Mbíṛì tí Jézù gítí yo.

⁹Ye kû ꞌdeke tí ye tacó tí yo ji Mbíṛì énó máa, yo ta o ꞌdáá gî ꞌví zè tí yo gbí òkò tí yo nìkì túkàꞌi. Yí delè ꞌví je cèe muu tacó bà ꞌviiki gbí có ji yo. ¹⁰Tacó wàa, yo ꞌví dù tí ndâ ꞌduù ŋìnó ta bà lê tí yo wálá nó kû ù ta ndi o bà co Ṛi bà gì Bìndi-Mbíṛì, ¹¹tí ndâ ꞌduù mbe ꞌde tó i tí nó náa Jézù bà gì tí  nó me gbolò. Tó i tí nó tí bà dù jáá kùṛo Mbíṛì, tacó bà wu ṛè Mbíṛì, ta bà ùlù yí nô.

ꞌVálá a Bìndi-Mbíṛì

¹²Có tí nó ta go bà ꞌdè ji yo tí ye nó a có gítí i tí nó mbe ꞌde ye nô, ndâ náꞌvindí. I tí nó tí bà te ye mí gbí zàà nó njaanga a kpokèjì bà ma Banga-Ngú-Có ji ndâ ꞌduù. ¹³Tacó ndâ àsìkérì mbe kû kpolo tí ꞌbá mì ngáángbá gba mì ndâ Ròmánò ꞌdáá gî, ta sè ndâ ꞌduù gbí gbata Rómà ꞌdáá gî, kpónó ŋò ni gî, máa, à te ye mì gbí zàà nó a i muu Bìndi-Mbíṛì. ¹⁴Bà dù ye gbí zàà nó kû yù a njembí ndâ ꞌbí náꞌvindí ndoo gítí bà koṛo có lì mítí Mbe tí ndoo. Ndú kpónó kû ma có mì Bìndi-Mbíṛì ta gúku tí ndú wálá.

¹⁵À dú káa yúcó, máa, a go bà tò kiì, ta go bà gbòòꞌbè ta ye ká kû te ndâ ꞌbí ꞌduù gítí nèté bà ma có gítí Bìndi-Mbíṛì. Káa ndâ ꞌbí ꞌduù kû bàkà ꞌdo gbí có mì tó njembí. ¹⁶Ndâ ꞌduù ŋìnó mbe kû bàkà ꞌdo gbí có mì tó njembí nó kû bàkà tacó ndú zè ye nìkì maa. Ndú delè kû bàkà tacó ndú ŋò ni gî, máa, à te ye mí gbí zàà nó a i tacó bà tì muu Banga-Ngú-Có. ¹⁷Káa ndâ ꞌduù tí nó mbe kû ma có gítí Bìndi-Mbíṛì tacó bà tò kiì ta ye, delè tacó bà gbòòꞌbè ta ye nó, kû bàkà káa ꞌdóó nèté mì ndú gítí miṛi ndú. Ye tà kpêtí má kû ꞌde gbí zàà kàá káa kpo se muu gbí ndâ i tí nò náa ndú kû bàkà nò, ŋìnò a i ŋìnó mbe nìkì tí ndú. ¹⁸Káa à ꞌdáá nò me có ji ye ká nò lá! Tacó ꞌbè gbí òkò tí ndâ mbe tiṛì ta ndâ mbe tó njembí kùṛo ye wálá. Tàkòcò ye kû peteke gítí ndú ꞌdáá gî ká dúú kû ya tí , tacó ndú ꞌdáá kû bàkà káa nèté bà ma có gítí Bìndi-Mbíṛì.

À énò! Tàkòcò ye ta o ꞌdáá gî ká pétékèꞌi, ¹⁹tacó ye ŋò ni gî, máa, bà ꞌdeke tí yo ji Mbíṛì, giì je bà konì tí mì Bèṛi-mì-Jézù tí Bìndi-Mbíṛì, bà ꞌvala ye gî. ²⁰I ŋìnó ta go  tí ye ngé má, tí i ŋìnó náa ye kpónó kû koṛo có lì mítí  nó, a có máa, ꞌbí i ꞌví te gúku mítí ye lá, ye ꞌví dù ta yú njembí ye kpónó á go ŋìnó cóó-cóó nô. Tacó wàa, ndâ ꞌduù ꞌví ùlù ta Bìndi-Mbíṛì á ꞌdo gbí có mì ye. À má a ku, a ku! À má a ꞌválá, a ꞌválá! ²¹Káa à má gítí ye, i tí nó náa a kû nì ꞌválá mítí  nó, tacó tí ye a Bìndi-Mbíṛì. Káa ye bà ꞌde i gbí bà cì ye me gbolò. ²²Káa ꞌbí có a ŋìnó máa, ye má kû bàkà a nèté ŋìnó náa à tí  nó, ye ꞌví je a ꞌválá, wèè, ye ꞌví je a ku wè? ²³Ye kpónó yee tí bà njèè kpokèjì mì ndâ ꞌválá ta ku gî, káa ye ŋò ꞌdóó kpokèjì ŋìnó náa ye ꞌví co tí  nó ni lá. Go bà co tí kpokèjì mì ku, wàa ye ꞌví ya gí mì ze ta Bìndi-Mbíṛì tí ye ndii go bà co tí kpokèjì mì ꞌválá gî. ²⁴Káa ye koṛo có máa, yo bà ꞌde i me gbolò a i ꞌdo gbí bà ꞌvala ye. ²⁵Ŋìnò a i ŋìnó náa ye ŋò ni ngbáṛángàꞌi gî nó ká nò. À má énò, ye bà co tí kpokèjì mì ꞌválá. Ye ŋò ni gî, máa, ye bà dù tí wuù tacó bà konì yo ꞌdáá gî, tacó wàa yo ꞌví tee njembí yo mítí Bìndi-Mbíṛì ta peteke tàkòcò yo dúú kû ya tí . ²⁶Bà dù ye tí wuù, tacó wàa ye ꞌví dele ta ndi ye ya gí mì yo nò, ꞌví dù ji yo tí gbolò ndeṛè bà ùlù Bìndi-Mbíṛì tí Jézù.

²⁷Yo ta o ꞌdáá gî ꞌví kììꞌbà á ꞌdo tí ndâ i ŋìnó mbe kû co ta yo me tí kpokèjì mì Banga-Ngú-Có mì Bìndi-Mbíṛì lá nô. Tacó wàa, ye kpêtí má ya gí mì yo kà lá, ye ꞌví dù me ꞌdú kû ꞌdi có tí yo, máa, yo kû ṛò tíyò tí ndâ ꞌdakò ta có mì yo ká gbaànjé kû konì tí yo tacó bà ṛu ndi kpokèjì mì Banga-Ngú-Có. ²⁸Yo ꞌví cì gúku tí ndâ mbe kû jòò gbí có ta yo tacó bà ꞌvìsì muu yo ꞌdo tí kpokèjì mì Bìndi-Mbíṛì nò lá. Yo dù ta o ꞌdáá gî ká tí ndâ yú ꞌdakò. Bà eṛe gba có mì yo gbaànjé nò ꞌví dù ji ndú tí seṛè, náa Mbíṛì bàkà tacó bà tùbà bà mìì ndú ji ndú, káa à ꞌví dù tí i bà tùbà  ji yo énó máa, yo bà dù tí ndâ ꞌválá. ²⁹À wu ji yo sàà gî, máa, yo bà dù me ká tí ndâ mbe ùnje gítí Bìndi-Mbíṛì cuki lá. Yo delè bà mbu muu wó. ³⁰Yo kpónó yuu tí yo mí gbí gó tí nó náa yo táánò ŋò ye kû gò nó gî. Ye delè kpónó kpòò kû gò káa gó, á go có tí nò náa yo kû ꞌdi nò.

Bà si tí Bìndi-Mbíṛì tí i lá

¹Bà ꞌvala ta ṛè mì Bìndi-Mbíṛì dú má káa i ŋìnó mbe kû je wotí ji yo, bà zè yo nìkì maa mì Bìndi-Mbíṛì dú má káa i mbe kû yìì yo, gbèe Bèṛi tí nó mì Mbíṛì nó má kuu gbí njembí yo ꞌdáá gî, njembí yo dú má káa ꞌdê njembí, tí njembí ndâ mbe ŋò yê ṛo ꞌduù, ²yo tò muu líkíꞌo tí nó tí ye nó ta bà koṛo gbèe có. Yo ꞌvala toko gbaànjé ta tó njembí yo. Ndeṛè bà ꞌvala yo ta ŋa bà koṛo có mì yo ꞌví dù ká gbaànjé. ³Yo ꞌví tò kiì gbí òkò tí yo lá. Yo delè ꞌví bàkà ꞌviya gbí òkò tí yo lá. ꞌBí ꞌduù gbí òkò tí yo ꞌví bàkà tí wó máa yì ma nò ji ndâ ꞌbí ka wó lá, yí ꞌví si ndâ ꞌbí ka wó ta o ꞌdáá gî tí ndâ kpóló-kpolo ꞌduù ndii yí gî. ⁴ꞌDuù ꞌví koṛo có me ká gítí miṛi wó cuki lá, yí ꞌví koṛo có gítí ndâ ꞌbí ka wó. ⁵À ꞌví dù gbí muu yo káa gbèe ŋa có tí nó gbí muu Bìndi-Mbíṛì tí Jézù nô:

⁶Tú Jézù táánò a tú Mbíṛì,

káa yí zèè có gítí bà dù yí tí Mbíṛì nò me kácá-kácá lá.

⁷Yí giì jee bà dù tú wó tí tú Mbíṛì nó mí to,

yí giì je tú bòò.

À giì jò yí je cè kózò tí ndâ ꞌduù.

⁸Yí mâ giì ꞌde tú wó tí tú ꞌduù,

yí giì si tí wó tí i kùṛo Mbíṛì lá,

ta bà ꞌdi có mì Mbíṛì gí mì ku,

náa à kpêtí káa bà cì yí mí tí njèèkpè mû,

yí giì ùnje gítí  gî.

⁹Tacó énò, Mbíṛì giì te yí ngéé gí yaà,

bìndi  yí giì gbì ṛè ŋìnó mbe wu co tí ndâ ꞌbí ṛè ꞌdáá gî nó mí muu wó.

¹⁰Tacó wàa, ndâ i tàṛì,

ta ndâ i muu to tí nó,

ta ndâ i tà to ꞌdáá gî ꞌví ùlù ṛè Jézù.

¹¹Delè tacó wàa, ndâ ꞌduù ꞌví ꞌdè có ta nje ndú gbí ŋa ndâ nje có ꞌdáá gî,

máa, Bìndi-Mbíṛì tí Jézù a Mbe tí ndoo,

tacó bà wu ta ṛe Mbíṛì tí Bu ndoo.

Bà tòngbaà go ngbaꞌo muu to tí nô

¹²Yo ꞌdo sàà káa ndâ mbe kû ꞌdi có mì ye ta o ꞌdáá gî, ndâ tó ꞌduù mì ye. Káa yo ꞌví dù tí ndâ mbe ꞌdi có mì ye nò me ká ta o tí nó náa ndoo má kuu ta ndoo a bà gbèe to nó lá. Yo dù kácáá nje nèté, tacó bà ꞌvala miṛi yo ꞌdo gbí vò i ta ꞌdì á nje yo wálá. ¹³Tacó a Mbíṛì ká kû bàkà nèté gbí njembí yo, tacó wàa yo ꞌví dù ta go bà bàkà i tí nó mbe kû peteke tàkòcò wó nô.

¹⁴Yo ꞌví bàkà ndâ i ꞌdáá gî me ta bà ꞌdè ngùṛù-ngùṛù có lá. Yo delè ꞌví bàkà ndú me ta bà ꞌdè kòlòwò lá, ¹⁵tacó wàa, yo ꞌví tù ta bà tí yo tí ndâ yê ta vò i mì yo wálá, ta njembí yo ngbáṛángàꞌi, tí ndâ ꞌviì mì Mbíṛì ta bà lê tí yo wálá, gbí òkò tí ndâ vóló-volo ꞌduù tí nó kpónó mbe kû co tí lókó-loko kpokèjì nô. Yo koṛo muu yo énó máa, yo kû ꞌvala gbí òkò tí ndú go ngbaꞌo. ¹⁶Yo zèè có tí nó mbe kû je ꞌválá ji yo nó tí kpoò. Tacó wàa, à má wúnò ta o bà co ṛi tí nó tí ṛi bà gì Bìndi-Mbíṛì gí bà waa có nó, ye ꞌví cè ta cè-ꞌbì énó máa, ye táánò ì me kù ngèlè lá. Ye delè ka wuꞌo me sínò lá.

¹⁷À kpêtí kpónó má ꞌdè có énó máa, à ci mbelè ye ji Mbíṛì á go bà ci njembí yo ji yí nò, tàkòcò ye bà peteke gî. Có gbí njembí ye delè énó máa, tàkòcò yo ꞌví peteke á go bà peteke tàkòcò ye. ¹⁸À má énò, tàkòcò yo delè ꞌví dù pétékèꞌi, wàa tàkòcò ndoo ꞌdáá gî ꞌví peteke toko gbaànjé.

Ndâ Tìmàtéyò ta Èpàfòròdítù

¹⁹Ye kû koṛo có lì mítí Mbe tí ndoo Jézù énó máa, yí ꞌví si ye ꞌví tuu Tìmàtéyò ya tí  gí mì yo kà gálà, tacó wàa ye má ꞌdi vò ŋa ŋìnó náa à tí yo kà nó gî, njembí ye ꞌví ki ta tí to. ²⁰Ye ŋò ꞌbí ꞌduù kákáꞌi ta tó njembí wó, mbe kû koṛo có ta njembí wó gbaànjé gítí yo bìndi wó, wàa ye ꞌví tuu yí ji yo nò lá, ²¹tacó ndâ ꞌduù mì ze kàá ꞌdáá gî kû bàkà káa ndâ ꞌdóó nèté mì ndú. Ndú kû bàkà me ndâ nèté mì Jézù lá. ²²Káa yo ta kpéétí yo ŋò ni gî máa, Tìmàtéyò me có ꞌdì lá. Yí kû bàkà nèté toko ta ye gítí Banga-Ngú-Có, go ꞌviì mbe kû bàkà nèté ta bu wó. ²³À má énò, ye má ŋò ŋa ŋìnó náa à tí ye nó gî, ye ngé kû tuu yí ji yo. ²⁴ꞌDóó ye ta miṛi ye ngbá kû koṛo có bà ya gí mì yo kà, náa Mbe tí ndoo má je nó ji ye gî nò.

²⁵Káa à kpêtí ká énò, ye kû koṛo có énó máa, bà tuu Èpàfòròdítù mì ye ji yo a kpóló-kpolo có ngé ndii gî. Yí a náꞌvindí ye, yí a ka nèté mì ye, yí a ka ye àsìkérì, yí delè a ꞌduù tí nó náa a yo táánò ká tuu yí gì tí , tacó bà kpolo tí ndâ ꞌbí i ŋìnó náa à tí  nó tacó tí ye. ²⁶Ye kû tuu yí ji yo, tacó kôꞌo tí yo tí wó ngé. Njembí wó delè wálá ta go bà ŋò yo, tacó yo ꞌdi có séꞌi tí nó táánò mbe bàkà yí nó gî. ²⁷Séꞌi tí nò dú me yí tí vò bà i. Yí ŋò ndâ ku ta ṛo wó, káa Mbíṛì giì ŋò yê ṛo wó gî. Tacó bà cì yí táánò bà zi a ndi mbugo tí nó náa ye kpónó kuu gbí  nô. ²⁸Ye kû tuu yí ji yo gálà tacó wàa njembí ye ꞌví ꞌdèè tí  gàà, wàa njembí yo delè ꞌví ꞌdèè ta bà ŋò yí. ²⁹À má énò, yo te wiṛi mítí wó ta líkíꞌo tí yo. Yo tègàṛà ŋa ndâ ꞌduù ŋìnó go yí nò tí kpoò, ³⁰tacó yí táánò ŋò ndâ ku ta ṛo wó tacó bà bàkà nèté mì Mbe tí ndoo. Yí delè giì yuu miṛi wó mí gbí kpalà kû konì ta ye tacó tí yo.

Cèe kpokèjì ꞌválá mì ndâ mbe kû kili ta ṛè mì Bìndi-Mbíṛì

¹Ndòngbú có mì ye ji yo go énó máa, yo dù ta tàkòcò yo pétékèꞌi tacó yo a ndâ ꞌdóó ŋìnó mì Mbe tí ndoo, ndâ náꞌvindí ye. Bà cu wáràgà ji yo kákáꞌi gítí gbèe ndâ i tí nó me nèté mbe te ṛíki mí gbímbí ye lá. Káa àá bà dù a nèté tacó bà kpolo tí yo.

²Yo kpolo tí yo ꞌdo tí ndâ bô tí nó tí ndâ mbe bàkà vò i, tí ndâ mbe kû waaka nje kú tí ndú nô. ³Tacó ndoo me go ndú lá. A ndoo ká ya gí gbí cèe gàzâ, a ndoo ká kû bàkà i-Mbíṛì ta wotí mì Bèṛi-mì-Mbíṛì. Ndoo delè kû cè cè-ꞌbì a i ta ṛè mì Bìndi-Mbíṛì tí Jézù, ndoo tee njembí ndoo mítí dìì ndoo lá. ⁴Ta ndâ ŋa ŋìnó ꞌdáá gî, àá kùtàá bà dù á mì ye a ndeṛè tacó bà tee njembí ye mítí dìì ye. ꞌBí ꞌdakò má ꞌdè có énó máa, àá mì yì a ndeṛè tacó bà tee njembí yì mítí dìì yì, ndeṛè mì wó nò bà ndii ndeṛè mì ye wálá. ⁵Tacó à má gítí ye, à ya ta ye gí gbí gàzâ ta sili bìndi bà jò ye vô-nje taꞌô, go i gbí tàkìì mì ndâ Jùdéyà gî. Ŋa ye a Ìzìrìyélì, tí ꞌviì kòtí Bènjàmínò, tí Ìzìrìyélì gbúú-gbuu, náa ndâ bu ye ta nawu ye só káa ndâ Ìzìrìyélì. À má gítí có bà ṛu ndi tàkìì mì ndâ Jùdéyà, ye táánò a mbe kpolo tí tàkìì mì ndâ Jùdéyà ⁶À má gítí có bà tì muu tàkìì mì ndâ Jùdéyà, ye táánò a mbe kû mèèkèꞌi tí ndâ mbe kû kili ta ṛè mì Bìndi-Mbíṛì. À mâ giì gì gítí có bà co jáá tí kpokèjì mì có mì Mòze, bà lê táánò tí ye gbaànjé wálá.

⁷Ye táánò sàà kùṛo bà ꞌde tí ze ta Bìndi-Mbíṛì kû si ndâ i tí nò tí ndâ tó i mbe konì ye, káa ye kpónó giì ŋò ni gî máa, ndú a ndâ i mbe kû ya ta ye gí nje vò i. ⁸Ye kpónó ŋò ꞌbí i gbaànjé ꞌdo gbí òkò tí ndâ i tí nò ꞌdáá gî ṛo ye tí i mbe konì ye lá, tacó ye ŋò Bìndi-Mbíṛì tí Jézù tí Mbe tí ye ni ngé ndii gî. Ye ùnje gítí bà bè gbí ndâ i ꞌdáá gî tacó tí wó gî. Ye kpónó kû ŋò ndâ i ṛo ye ꞌdáá gî ká go ndâ zùkùmèè, i gbí bà ŋò Bìndi-Mbíṛì ni mì ye ndii i gbí ndâ i ꞌdáá gî gî; ye delè giì ŋò ndâ i ṛo ye ꞌdáá gî tí i lá, ⁹tacó wàa ye ꞌví ꞌde tí  ta bàndò bà dù ye ngbé mì ze ta Bìndi-Mbíṛì. Ye kû pà me ꞌdóó kpokèjì mì ye, tí kpokèjì tí nó mbe si ye kû ṛu a ndi có mì Mòze, tacó wàa ye ꞌví dù tí  tí ꞌduù jáá kùṛo Mbíṛì nó lá. À tí ye kpónó káa go bà dù tí ꞌduù jáá kùṛo Mbíṛì ꞌdo gbí bà tee njembí ye mítí Bìndi-Mbíṛì. Ŋìnò a ŋa kpokèjì bà dù tí ꞌduù jáá kùṛo Mbíṛì, mbe ꞌbì ꞌdo tí bà tee njembí ꞌduù mítí Mbíṛì. ¹⁰Ye kùtàá má ŋò Bìndi-Mbíṛì ni go có tí nó gbí njembí ye nó gî! Ye má ŋò wotí tí nó mbe ꞌvala yí ꞌdo gbí muuꞌdú wó nó ni gî! Ye má kònò ŋa bà kònò séꞌi tí nó náa yí táánò kònò nó, bìndi  ye ꞌví cì ŋa ku mì wó nò gî, ꞌbí có mì ye bà dù kákáꞌi wálá. ¹¹Ŋìnò a kpokèjì tí nó náa ye kû koṛo có gítí bà ꞌvala ndi ye ꞌdo gbí muuꞌdú ye go i mì Bìndi-Mbíṛì lì mítí  nó ká nò.

Bà ya ndírí gítí i ŋìnó náa a tí

¹²Ye kpónó kû bàkà me tí ye, máa, bà lê cee ꞌdo tí ye gî nò lá; ye kû kpòkò a tí ye tacó bà ꞌde tó i tí nó náa Bìndi-Mbíṛì zèè ye tí ꞌduù mì wó, wàa ye ꞌví dù go yì nô. ¹³Ye kû bàkà me tí ye, máa, ye ꞌde i tí nò gî nò lá, ndâ náꞌvindí ye. Káa gbèe i ŋìnó náa ye kû bàkà nó a bà ò-bà-mbí ndâ i ŋìnó mbe ndii gî nô. Ye kpónó kû bàkà wotí a i gítí ndâ i ŋìnó kùṛo ye nô. ¹⁴Ye kû jòò tí ye a i gítí bà ya gí kùṛo tacó bà yee tà é tí nó mì Mbíṛì, náa yí kû tè ta é tí ndoo ta ṛè mì Bìndi-Mbíṛì tí Jézù gítí ꞌválá tí nó gbíṛì nô.

¹⁵Ŋìnò a có náa à ꞌví dù gbí muu ndoo tí ndâ ꞌduù ŋìnó ta gbí dìì ndoo mbe yù gî nó ká nò. Káa ndâ ꞌbí có mbe co tende má kuu gbí muu yo, Mbíṛì bà ꞌdè gbí ndú ji yo gî. ¹⁶Káa ndoo ꞌví ṛu káa ndi kpokèjì tí nó náa ndoo kpónó kuu tí  nô.

¹⁷Yo mèlè ndi ŋa ꞌválá mì ye nó toko gbaànjé, ndâ náꞌvindí ye. Yo delè ꞌví kpolo ṛo yo mítí ndâ ꞌduù ŋìnó mbe kû ꞌvala go ŋìnó náa yo ŋò ꞌdo mì ze nô. ¹⁸Ye ꞌdè có tí nó ji yo ꞌvílí-ꞌvìlì, káa ye kpónó kû bùù nó a gbí ndí  ta ngo-ṛo tà ṛo ye ji yo, máa, a ŋa bà ꞌvala ndâ ꞌduù me mbè ká kû njèè gbí òkò tí ndú ta njèèkpè mû mì Bìndi-Mbíṛì. ¹⁹Ndòngbú i tacó tí ndâ mbe kû ꞌvala gbí ŋa kpokèjì tí nò káa bà mìì ndú. Mbíṛì mì ndú káa i-zó-zò. Ndú kû cè cè-ꞌbì ká ta ṛè ndâ i-nô mì ndú náa ndú kû bàkà nô. Njembí ndú delè ká tí ndâ i muu to tí nô. ²⁰Káa à má gítí ndoo, ꞌbá mì ndoo a i gbíṛì. Mbe ꞌvala ndoo, tí Mbe tí ndoo Jézù tí Bìndi-Mbíṛì bà gì a i ꞌdo gbíṛì. Ndoo kpónó léngé-lenge kû ù nó a ndi bà gì yí ²¹gí bà ꞌvìsì jóꞌdókò dìì ndoo tí nó tí i mì ku nó tí wu dìì á go dìì wó, á ta wotí tí nó mbe si yí ꞌví dù tí Mbe tí ndâ i ꞌdáá gî nô.

Páwòlò kpo-gbí-tà-tù ndâ mbe kû kili ta ṛè mì Bìndi-Mbíṛì gbí gbata Fìlípì

¹À má énò, yo tí ndâ náꞌvindí ye, ye zè yo nìkì ma, kôꞌo tí yo bà zi ye gî! Yo a ndâ mbe kû peteke tàkòcò ye! Yo a ndâ mbe kû njè muu ye! Yo tee njembí yo mítí Mbe tí ndoo tí kpoò, ndâ tó kómbe ye.

²Ye kû ꞌdeke tí ye ji ndâ Èvódìyà ta Síndìkè máa, ndú ꞌviindi gbí òkò tí ndú ta ṛè mì Mbe tí ndoo. ³Ye delè kû ꞌdeke tí ye ji wò tí Sìzìgúsù tí ꞌdóó ka ye mbe te koṛi á go gbí ṛè lo tí nò, máa, wò ꞌví konì ndâ niì tí nò náa ye nì ṛè ndú sósòꞌô nò, tacó a ndú táánò ká ṛò tíyò seè tí ye gbí gó muu Banga-Ngú-Có, ndú sósòꞌô nò, giì je Kèlèméndè, giì je ndâ ꞌbí ka nèté mì ye ꞌdáá gî. Ṛè ndú nò ꞌdáá gî kû gbí wáràgà mì ndâ ꞌválá.

⁴Có gbí njembí ye ji yo énó máa, yo ꞌvala ta Mbe tí ndoo ta pétékè tàkòcò yo. Ye bà bùù gbí ndi có tí nò ji yo. Có mì ye ji yo énó máa, yo dù ta pétékè tàkòcò yo. ⁵Yo ꞌví ꞌvala ta ndâ ŋa ndâ ꞌduù ꞌdáá gî ta tó njembí yo, tacó Mbe tí ndoo kpónó-kpónó kèjì. ⁶Njembí yo ꞌví mù tacó ꞌbí ŋa i ngé gî lá. I má mì yo wálá, yo ꞌví ꞌdeke tí yo ji Mbíṛì, yo tù ꞌbì yo ji yí, yo ꞌdeke ṛè ndâ i tí nó náa ndú mì yo wálá nó ji yí, yo ꞌdè nìkì maa ji yí. ⁷Bìndi  ŋa ꞌdê njembí tí nó mì wó tí Mbíṛì náa ŋa  mì ꞌbí ꞌduù muu to tí nó ngé gî wálá nó ꞌví kpolo tí njembí yo, yí delè ꞌví kpolo tí bà koṛo có mí yo tacó yo a ndâ ŋìnó mì Bìndi-Mbíṛì tí Jézù.

⁸Ndòngbú có mì ye ji yo énó máa, yo ꞌví si à ꞌví yè gbí njembí yo káa yúcó, ndâ náꞌvindí ye. Yo si à ꞌví dù gbí muu yo káa cèe có, ta có ŋìnó jáá, ta có ŋìnó tí tó có, ta ngbáṛángà có, ta tó ṛè. Yo ꞌví koṛo có ká gítí ndâ i ŋìnó mbe ꞌvii tí ndâ i náa à ꞌví ùlù ndú nô. ⁹Yo ya gí kùṛo ta bà bàkà ndâ i tí nó náa yo táánò tala bà bàkà ndú ꞌdo mì ye, ta ndâ i ŋìnó náa ye nìbà ndú ji yo nô. Yo bàkà go ndâ có ŋìnó náa yo ꞌdi ꞌdo gbí nje ye, ta ndâ i ŋìnó náa yo táánò ŋò ye kû bàkà nô, bìndi  Mbíṛì tí mbe je ꞌdê njembí ji yo bà si yo ꞌví dù nìkì maa dúú bà ya tí .

Páwòlò ꞌdè nìkì maa tacó ndâ i-nambeè náa à je ji yí

¹⁰ꞌBí có mì ye tacó bà ꞌdè ji yo a ŋìnó máa, tàkòcò ye peteke gítí yo tacó bà konì ye mì yo ngé ndii gî. Tàkòcò ye delè giì peteke gítí Mbe tí ndoo ngé ndii gî, tacó yo kpónó ꞌbìtà bà koṛo có gítí bà tù ꞌbì yo ji ye kákáꞌi gî. Yo táánò kû koṛo có tí ye, káa a i náa yo ꞌde kpokèjì bà tùbà tí yo tí  gí sè lá. ¹¹Ye kû ꞌdè có tí nò me tacó máa ye kû ce a célè yê tí ye á ji yo nò lá. Tacó ye ni bà ꞌvala miṛi ye ta ŋa i ŋìnó náa à kuu mì ye nó gî. ¹²Ye ni bà ꞌvala gbí yê gî. Ye delè ni bà ꞌvala gbí dà gî. Ye a ká gàzâ, ye ŋò tiṛì gítí bà ꞌvala tí ndâ bàndò ꞌdáá gî ni gî. Ye giì ŋò tiṛì gítí bà ꞌvala gbí tó o, ta bà ꞌvala gbí vò o ni gî. Ye má ta yéŋì, có mì ye wálá. Ye delè má ta go tí ye, có mì ye wálá. I má mì ye wálá, ye ŋò lìꞌvì gítí bà ꞌvala ye gî. I delè má jee tí mítí ye á to, ye ŋò lìꞌvì gítí bà ꞌvala ye delè gî. ¹³Wotí bà bàkà ndâ i ꞌdáá ta ṛè ꞌDuù tí nò mbe je wotí á ji ye nó kuu tí ye.

¹⁴Kpêtí ká énò, yo táánò bàkà ji ye a nambeè, náa yo konì ta ye gbí vò i tí nò mbe ꞌde ye, náa ye kpónó tí  kuu gbí zàà nô. ¹⁵Yo tí ndâ ꞌduù gbí gbata mì Fìlípò ŋò ta kpéétí yo ni gî, máa, ta o tí nó náa ye táánò kû njè nó ꞌdo gbí to Mèsìdónìyà ta o bà ꞌbìtà bà ma Banga-Ngú-Có mì ye kà nó, ndâ ꞌbí mbe kû kili ta ṛè mì Bìndi-Mbíṛì ꞌdo bà ꞌbí to jé mbe tù ꞌbì ndú ji ye, máa, «À nô» káa ye giì lì ꞌbì ye gí tà ꞌbì ndú gî nò, wálá. Àá táánò káa yo ká kû ŋò yê tí ye. ¹⁶Tacó à kpêtí ká ta o tí nó táánò náa ye tí  kuu gbí gbata Tèsàlónìkà nó, ye kì ꞌbì ye gítí bà konì ye mì yo yee gbí sósòꞌô. ¹⁷Gbí có tí nò me énó máa, ye kû mòkò a tàkò i-nambeè nò lá; ye kû mòkò a tàkò i ŋìnó mbe kû jò mboo ji yo nô. ¹⁸Ndâ i ŋìnó ta go ndú tí ye nó kpónó ꞌdáá gî kuu mì ye. Yì ye kpónó yè ngé yee tàkòcò ye. Tacó ndâ i-nambeè tí nó náa yo tuu ta Èpàfòròdítù á ji ye nó yee tí ye gî. Ndú go ndâ i ta banga pó ndú, náa à kû ci ji Mbíṛì, tí ndâ i-cí-ci mbe nìkì tí Mbíṛì, náa yí lì ꞌbì wó gí tà ndú gî.

¹⁹Mbíṛì mì ye bà ko mboo nambeè mì yo náa yo bàkà ji ye nò ji yo me gbolò ta ṛè mì Bìndi-Mbíṛì tí Jézù, tacó Mbíṛì kû ꞌva ꞌbì wó ká mí gbí i. ²⁰À ùlù Mbíṛì tí Bu ndoo kpòò ya tí . Go-i-tí-nò.

Ndòngbú bà ꞌvee ꞌvé mì Páwòlò

²¹Ye ꞌvee ndâ ꞌduù ŋìnó mì yo kà tí ndâ tó ꞌduù mì Mbíṛì nó gbaànjé-gbaànjé ꞌdáá gî. Ndâ náꞌvindí ndoo ŋìnó mbe kû dù toko ta ye kàá nó delè ꞌvee yo ma. ²²Ndâ ꞌduù mì ze kàá ꞌdáá gî, ꞌdóó ndâ ꞌduù ꞌbá mì ngáángbá gba mì ndâ Ròmánò, ꞌvee yo ngé ndii gî.

²³Ye kû ꞌdeke tí ye ji Mbíṛì máa, nambeè mì Mbe tí ndoo Jézù tí Bìndi-Mbíṛì ꞌví dù gbí njembí yo ꞌdáá gî.