2 Tèsàlónìkà

BÀ SÓ TÈSÀLÓNÌKÀ

Bà só bà cu wáràgà mì Páwòlò ji ndâ mbe kû kili ta ṛè mì Bìndi-Mbíṛì gbí gbata Tèsàlónìkà

¹Muu ze tí ndâ mbe kû cu wáràgà tí nó a ndâ ꞌduù taꞌô: ŋìnó a ye tí Páwòlò, giì je ndâ Sìlìvánò ta Tìmàtéyò. Ze kû cu wáràgà tí nó ji yo tí ndâ ꞌduù mì Mbíṛì tí Bu ndoo, tí ndâ ꞌduù mì Mbe tí ndoo Jézù tí Bìndi-Mbíṛì, mbe kû kili ta ṛè mì Bìndi-Mbíṛì mí gbí gbata Tèsàlónìkà. ²Ze kû ꞌdeke tí ze ji Mbíṛì tí Bu ndoo, ze delè kû ꞌdeke tí ze ji Mbe tí ndoo Jézù tí Bìndi-Mbíṛì, máa, ndú ꞌví cù ꞌdê ngo cù ndú mítí yo, ndú delè ꞌví si yo ꞌví dù nìkì maa.

Bà waa có ta o bà gì Bìndi-Mbíṛì wúnò

³Àá mì ze a ndeṛè tacó bà ꞌdè nìkì maa ji Mbíṛì go ŋìnó náa à tí  tacó tí yo ꞌdáá gî, ndâ náꞌvindí ze, tacó yo kpónó kû tee njembí yo mítí Mbíṛì ta wotí tí  ndii ŋìnó sàà kùṛo gî. Yo delè kû zè tí yo gbí òkò tí yo nìkì ta banga tí  ngé ndii gî. ⁴Ze kû mba tí ze ta ṛè yo kùṛo ndâ ꞌbí mbe kû kili ta ṛè mì Bìndi-Mbíṛì, tacó à tà kpêtí má kû pèè mbí yo ta bà mèèkèꞌi tí yo, yo kpòò kû tee káa njembí yo mítí Mbíṛì.

⁵Gbí có bà tee njembí yo kácáá mítí Mbíṛì nò énó máa, yo ŋò ni gî máa, yí a mbe waa yúcó. Káa mboo tàkò ŋa i tí nò náa yo kû me nò a bà bàkà yo mì Mbíṛì tí ndâ bòò-gba mì wó tí Mbíṛì. ⁶Mbíṛì bà waa có ta yúcó, yí bà kèèndè mbugo tí nó náa yo kuu gbí  nó á mítí ndâ mbe kû mbu yo nó gî. ⁷Bìndi  yí bà kaa yo tí ndâ ꞌduù tí nó náa à kpónó kû mèèkèꞌi tí yo nó mítí tó bàndò tí nó náa yí bà kaa ze mítí  nó ta o bà tùbà tí Jézù mì wó ꞌdo gbíṛì ta ndâ basìlì mì wó tí Mbíṛì, náa yí je wotí ji ndú. ⁸Jézù ta o tí nò bà da nó gì co gbí ngba wu gí bà kèèndè có ndâ vò i mì ndâ mbe si Mbíṛì tí có lá, ta ndâ mbe biya bà ùnje gítí Banga-Ngú-Có mì wó tí Jézù tí Mbe tí ndoo, ji ndú. ⁹Ndâ ŋa ndâ ꞌduù tí nò bà mbu ji bà waa có mítí ndú, énó máa, ndú ꞌví dù tí ndâ vóló-volo ꞌduù dúú bà ya tí , giì je bà mò ndú ꞌdo kùṛo Mbe tí ndoo gî, à delè bà mò ndú ꞌdo gbí ngba wotí mì wó gî. ¹⁰Yí bà me ndâ i tí nò a i ta o tí nó náa yí bà gì tí , tacó wàa, ndâ ꞌduù tí nó náa yí kaa ndú mò gí mì wó gî nó ꞌví ùlù yí, ta bà te duù mítí wó nô. Yo ta o tí nò delè bà dù kuu gbí òkò tí ndâ mbe kû ùlù Jézù, tacó yo ùnje gítí yúcó tí nó náa ze táánò ꞌdè ji yo nó gî.

¹¹Ŋìnò a ndeṛè bà ꞌdeke tí ze ji Mbíṛì ta o ꞌdáá gî ká nò. Ze kû yù nambeè ꞌdo mì wó, máa, yí ꞌví si yo ꞌví dù tí ndâ ꞌduù mbe ꞌvii tí ndâ ꞌduù ŋìnó náa yí tèꞌé tí ndú gî, yí delè ta wotí mì wó ꞌví si yo ꞌví bàkà go ndâ tó có tí nó ꞌdáá gbí njembí yo nô, tacó wàa, yo ꞌví cee ta nèté tí nó náa yo kû bàkà yee tí kpónó nó ꞌdo gbí có mì bà tee njembí yo mítí wó. ¹²Gbí ŋa kpokèjì tí nò, ndâ ꞌduù bà ùlù ṛè Mbe tí ndoo Jézù ꞌdo gbí có mì yo, ndú delè bà ùlù ṛè yo ꞌdo gbí có mì wó, á ꞌdo gbí nambeè mì Mbíṛì, delè ꞌdo gbí nambeè mì Mbe tí ndoo Jézù tí Bìndi-Mbíṛì.

Vò-ꞌduù-tí-nò

¹À má gítí Ṛi bà gì Mbe tí ndoo Jézù tí Bìndi-Mbíṛì, ta có gítí bà kili ndoo toko gbaànjé mí mì ndoo ta ndú ta Ṛi tí nò, ²kòcò ze ji yo énó máa, yo ꞌví co ká ngé kû gu ta gúku ꞌdo gbí có mì ꞌbí ꞌduù mbe bàkà tí wó tí mbe ꞌdè-kòcò ta wotí mì Bèṛi-mì-Mbíṛì, ta ndâ mbe kû fiini có énó máa, Ṛi tí nò co sàà gî nó lá. Njembí yo delè ꞌví mù ꞌdo gbí có mì ꞌbí ꞌduù mbe ꞌdè ꞌvéṛè ji yo énó máa, a ze ká cu wáràgà ji yì ta ŋa có tí nò nò lá.

³Yo si ꞌbí ꞌduù ꞌví eendi yo gítí bà koṛo ŋa ndâ có tí nò lá. Tacó Ṛi tí nò tí Ṛi bà gì Mbe tí ndoo nò bà co a i bìndi bà gì ꞌduù tí nó tí gbolò mbe kû gbì gbí njembí wó gítí vò i ta Mbíṛì nô. ꞌDuù tí nò náa muu wó bà ꞌva tí to nò, ⁴a mbe kû jòò gbí có ta ndâ bààcì ꞌdáá gî. Yí delè a mbe si tí wó tí i ndii ndâ i tí nó náa ndâ ꞌduù kû ci i ji ndú nó ꞌdáá gî. Yí si tí wó tí gbolò i tí ŋa ŋìnó náa ndú kpónó nje bá ta Mbíṛì ká gbaànjé. Yí delè kpónó kû kò kò ji ndâ ꞌduù máa, yì lá a Mbíṛì.

⁵Bà mbí yo ó-ò? Ye táánò ꞌdè có gítí bà co Ṛi bà gì Bìndi-Mbíṛì nò ji yo ta o tí nó náa ye táánò kuu mì yo kà nó lá? ⁶Yo delè ŋò i tí nó mbe kû zèè ꞌduù tí nó ta yúcó mì wó wálá nó, tii mí to, di tí o bà co Ṛi tí nó náa à ci nó, ni gî. ⁷Bà jòò gbí có ta Bìndi-Mbíṛì kpónó kuu tí , káa, a i náa à kû bàkà tí a i gbí ŋa kpokèjì ŋìnó náa bà ꞌdi gbí  kpò ndâ ꞌduù muu to tí nó gî, yee tí o tí nó náa à má mò i tí nó mbe kû nè kpokèjì ꞌdo tí  nó á ꞌdo tí kpokèjì má kózò gî, ⁸bìndi  ꞌduù tí nò tí mbe kû gbì gbí njembí wó gítí vò i ta Mbíṛì nò bà giì co gí gbí ngbàà ṛi. Bìndi  Mbe tí ndoo Jézù bà giì zi yí, ta bà òlò woò gbí nje wó mítí wó, bà co Jézù ta ngba wó bà zi yí gî.

⁹Bà gì ꞌduù tí nò tí mbe kû gbì gbí njembí wó gítí vò i ta Mbíṛì nò bà dù a i ta wotí mì Vò-ꞌduù-tí-nò. Yí bà gì gí bà bàkà ndâ mbù seṛè ta gbí ndú wálá, ta bà tùbà ndâ mbó, ta bà bàkà ndâ kpo-kpò i, ¹⁰ta bà bàkà ndâ vo-vò tiṛì tacó bà ee ta ndi ndâ ꞌduù ŋìnó tí ndâ kánjí ku nô, tacó ndú biya bà dù ta go yúcó, tacó wàa ndâ yì ꞌví ꞌde tí  ta ꞌválá nò gî. ¹¹Tacó énò, Mbíṛì kû tuu vò muu ji ndú, tacó wàa, ndú ꞌví ùnje ká gítí ꞌvéṛè. ¹²Mbíṛì bàkà énò tacó bà waa có mítí ndâ mbe si bà co tí kpokèjì ŋìnó jáá nó mí to, káa àá giì nìkì tí ndú a bà co tí lókó-loko kpokèjì nô.

Mbíṛì cu ꞌbì wó mítí yo tacó bà ꞌvala yo

¹³Káa àá mì ze a ndeṛè tacó bà ꞌdè nìkì maa ji Mbíṛì tacó tí yo ta o ꞌdáá gî, ndâ náꞌvindí ze, tí ndâ wú-gbí-ṛé Mbe tí ndoo. Tacó Mbíṛì táánò cu ꞌbì wó mítí yo ꞌdo tí o bà ꞌbìtà bà suu to tí nó tacó bà ꞌvala yo ta bà bàkà yo mì Bèṛi-mì-Mbíṛì tí ndâ ngbáṛángà ꞌduù, delè ta ba ùnje mì yo gítí yúcó. ¹⁴Mbíṛì tèꞌé tí yo tacó bà ꞌvala yo nò a i ꞌdo gbí bà ma Banga-Ngú-Có mì ze ji yo, tacó wàa yo ꞌví ꞌde tí  ta bàndò bà dù yo ŋìndi yo gbí ngba Mbe tí ndoo Jézù tí Bìndi-Mbíṛì. ¹⁵À má énò, yo ꞌdò kò yo mí to tí kpoò, wàa yo ꞌví kpolo tí có tí nó náa ze táánò ꞌdè ji yo ta nje ze, ze delè giì cu ji yo ta wáràgà nô, ndâ náꞌvindí ze.

¹⁶Ze kû ꞌdeke tí ze tacó tí yo ji Mbe tí ndoo Jézù tí Bìndi-Mbíṛì, ze delè kû ꞌdeke tí ze ji Mbíṛì tí Bu ndoo, tí mbe kû zè ndoo nìkì maa, náa yí giì je tí  ta ꞌdê njembí ji ndoo dúú kû ya tí , giì toko ta bà koṛo tó có gítí ꞌválá bìndi ku mì ndoo, á ꞌdo gbí nambeè mì wó, ¹⁷énó máa, ndú ꞌví si njembí yo ꞌví dù tí yú njembí gbí bà bàkà ŋa ndâ tó i ꞌdáá gî, delè gbí bà ꞌdè yúcó.

Yo ꞌdeke tí yo ji Mbíṛì tacó tí ze

¹Ndòngbú có mì ze ji yo ꞌví énó máa, yo ꞌdeke tí yo ji Mbíṛì tacó tí ze, ndâ náꞌvindí ze. Yo ꞌdeke tí yo ji Mbíṛì, tacó wàa, yí ꞌví si có mì Mbe tí ndoo ꞌví ꞌvèè gálà-gálà, wàa ndâ ꞌduù tí nó mbe ꞌdi nó ꞌví te duù mítí , á go ŋìnó náa yo kpónó kû te ta duù mítí  nô. ²Yo delè ꞌví ꞌdeke tí yo énó máa, yí tí Mbíṛì ꞌví ꞌvala ze á ꞌdo ꞌbì ndâ mbe vò muu tí nó tí ndâ vóló-volo ꞌduù nó, tacó ndâ mbe tee njembí ndú mítí Mbíṛì lá nó ògbù ngé. ³Káa Mbe tí ndoo me mbe ꞌdè có gî, wàa yí giì ŋònòkò gbí ꞌbá wó ꞌdo tí po ngo nje wó gî nò lá. Yí bà je wotí ji yo gî, yí delè bà kpolo tí yo ꞌdo tí Vò-ꞌduù-tí-nò gî.

⁴Káa à má gítí yo, ze bà be tí Mbe tí ndoo gî, máa, yo kpónó kû bàkà ndâ i tí nó náa ze táánò ꞌdè có gítí ndú ji yo nô, yo delè bà bàkà ndú kpòò kû ya tí  gí kùṛo. ⁵Ze kû ꞌdeke tí ze ji Mbe tí ndoo énó máa, yí ꞌví ꞌvìsì njembí yo tí njembí ndâ mbe ŋò tó bà zè tí mì Mbíṛì ni , yí delè ꞌví si yo ꞌví dù tí ndâ ꞌduù ŋìnó mbe kû kònò vò i go i mì Bìndi-Mbíṛì nô.

Kózò tí yo ꞌví bàkà nèté

⁶Ze kû ꞌdè có ji yo ta ṛè mì Mbe tí ndoo Jézù tí Bìndi-Mbíṛì, ndâ náꞌvindí ze, énó máa, yo dù gí ndiì ꞌdo tí ndâ náꞌvindí ndoo ŋìnó ta go bà bàkà nèté tí ndú wálá, mbe kû ꞌvala me go ŋa bà ꞌvala ndò tí nó náa ze táánò kpili ji yo nó lá nô. ⁷Tacó yo ta kpéétí yo ŋò ni gî, énó máa, nèté mì yo a bà mèlè ndi ze. Káa yo ŋò ta ṛo yo gî máa, ze táánò ta o tí nó náa ze kuu mì yo kà nó me ndâ mbe kê-ṛo lá. ⁸Ze táánò me ndâ mbe kû lì ꞌbì ze gí tà i ꞌdo mì ꞌbí ꞌduù sínò lá. Jé lá! Ze táánò kû zò i ꞌdo ká gbí bà ka wuꞌo mì ze. Ze táánò wu gbí gó ṛi gítí nèté mì ze lá, ze delè wu gbí bèbìlì lá. Ze bàkà énò tacó wàa, ze ꞌví ba gbímbí yo ta bà zò-mítí-yo nò lá. ⁹Ze táánò kû ziki tí ze ta bà bàkà nèté ṛéꞌbè-ṛéꞌbè ta wuꞌo nò, me tacó máa yúcó mì ze tacó bà ꞌdè có ji yo énó máa, yo je i ŋìnó ji ze, yo bàkà énó ji ze, wálá nò, lá. Ze bàkà énò a i tacó bà tùbà bà bàkà nèté ji yo, tacó wàa yo ꞌví bàkà go yí . ¹⁰Ze táánò ꞌdè có ji yo si ze kuu mì yo kà nó énó máa, ꞌduù má biya bà bàkà nèté gî, yí ꞌví zò i lá, nò gî. ¹¹Káa ze kpónó kû ꞌdi có énó máa, ndâ ꞌbí ꞌduù ꞌdo gbí òkò tí yo kà a ndâ vo-vò mbe kpó, ta go bà tee ꞌbì ndú mítí nèté tí ndú wálá. À tí ndú káa go bà yuu nje ndú gí gbí có mì ndâ ꞌbí ꞌduù ta ṛè ndú gbí  wálá. ¹²Ze kû ꞌdè có ji ndâ ŋa ndâ ꞌduù tí nò ta ṛè mì Mbe tí ndoo Jézù tí Bìndi-Mbíṛì énó máa, ndú si ŋa nèté tí nò mí to, wàa ndú ꞌví bàkà a nèté tacó bà ꞌde ta i bà ko ta tí ndú.

¹³Wo yo ꞌví co ta bà bàkà i ŋìnó náa à tí  nó lá, ndâ náꞌvindí ze. ¹⁴ꞌBí ꞌduù gbaànjé gbí òkò tí yo má biya bà ꞌdi có tí nó náa ze cu mí gbí wáràgà tí nó nó gî, yo ꞌví kììꞌbà ꞌdo tí ꞌduù tí nò. Nèté mì yo ꞌví dù ta yí kákáꞌi wálá. Tacó wàa, yí ꞌví ŋò tí  ni énó máa, kpokèjì tí nò náa yì kû co tí  nò a lókó-loko kpokèjì. ¹⁵Káa yo ꞌví mèèkèꞌi tí wó go bà mèèkèꞌi tí kuꞌdì nó lá. Yo kpo-gbí-tà-tù wó, tacó yí a náꞌvindí yo, tacó wàa, yí ꞌví dele ta ndi wó gítí jáá kpokèjì.

Ndòngbú có

¹⁶Ze kû ꞌdeke tí ze ji Mbe tí ndoo, tí mbe kû si ndâ ꞌduù kû dù nìkì maa, énó máa, yí ꞌví si yo ꞌví dù nìkì maa ta o ꞌdáá gî, gbí ŋa ndâ kpokèjì ꞌdáá gî. Mbe tí ndoo ꞌví dù ta yo ta o ꞌdáá gî.

¹⁷Ŋìnó a ye tí Páwòlò ká kû cu ndâ ꞌvé tí nó ji yo mí gbí wáràgà tí nó ta ꞌdóó ꞌbì ye. Ŋìnó a mbó ndi ꞌbì ye gbí ndâ wáràgà mì ye ꞌdáá gî ká nô. Ŋìnó a cè ŋa bà cu wáràgà mì ye ká nô.

¹⁸Ye kû yù nambeè ꞌdo mì Mbe tí ndoo Jézù tí Bìndi-Mbíṛì tacó tí yo ꞌdáá gî.