Téerëe bíníyú unna won Pool Tít ɗë
Kúnsëe
Ƴee daa unna bíní Pool Tít ɗë. Ɗi fi Tít, ɓani Pool daa na húmú boku légéyírí Koope. Ɗi húmú gëerté habraˈi Pool lool bee lahaˈ Pool tolof-tolof a ɓëy Korente ra (Saame 2 Korente 12.18). Na bíní Pool Tít unni ƴee ra nék, ɗeef ɗi fi Tít ín Keret na habraˈ ɓëy ílí jaŋaa ɗee nay waa tílée rë (1.5).
Filiɓ unna ɓal, Pool líkínté Tít biti ɗi lah fayda níi ow ɓan ɗii heef (2.7-8, 15). Tít waɗti yëeddë ɓëy ílí jaŋii Keret ɗee ñeyaˈ Koope Ruuh-Peseŋ a Yéesú-Kiristaa sëmlëˈté yen bakaaɗɗi yen ra (2.4-6 ; 4.6-8). Ɗi nahte ri woni ɓëewë di nay sehuu ayi Kiristaa (2.11-13).
Pool wonte ri :
- yii leŋke di waɗti man njíit jaŋi (1.5-9),
- yii leŋke yëeddëh yí paɗɗah ya (1.10-16),
- yii leŋke líkíní ɓaha ya a ɓitiffa (2.2-3),
- yii leŋke líkíní wahambaane ya a jéegí teɓ-teba (2.4-8),
- a yii leŋke líkíní ɓëewë habu ñaam ra (2.9-10).
Ɓëyí fí jaŋi téeríi bee ɓéeɓ ay ot biti ow fi ow ɓéeɓ waɗtee súugëh iñi ɓossi ëldúnë, ɗi pes pesaɗ has Kiristaa na.
1Wodohi Pool Tít
1-4Ɗo fi Tít, ɗo fa habaˈ mi koy soˈ kah-kah filiɓ ngémë boku yen ɗa, soˈ mi Pool, soˈ mi súrgíi Koope a apootari Yéesú-Kiristaa, daa mi na wodoh ro. Mi nahu habraˈi ɓëewë Koope tanis wa ra wa ham ngémë, mi teeɓ wa kaaf ka, kaaf ka ñéerëˈ a pesadi ɓëewí pokuute Koope na. Hen ɗaa raa, ay waa wëer biti wa ay haal pesa na ɗúméh, gapaˈ Koope ɗeef ëldúnë sakuy doom ra, ɗi fa na woneh yii lahay ra. Lahaˈ wahtaa fahaˈ ri ra, ɗi fi Koope Sëmlëhí yen teeɓaˈte yii leŋke pesi baa filiɓ Unee ke ri túuƴ ɗí sëˈ waare ra. Kon book Tít, Baap-Koo a Yéesú-Kiristaa Sëmlëhí yen líhún ɗë mal, on ɗo jaamma !
Ɗee waɗti man njíit jaŋi ra
5Soˈ nék, fu ot mi hel ro Keret, fahaˈi biti fu lúsíɗ yee húmú tas légéyë rë níi iña ɓéeɓ tíkëh waal, te gin fi gin ɓéeɓ fu fal na i njíit jaŋi ti di nahaˈ mi ro ri nen. 6Njíit jaŋi nék, waɗti hena ɓëyí lahay yii wonun sun fi, teem ɓeleɓi na kut, koyya ƴahun ɓëewí gémúté Kiristaa1.6 ɓëewí gémúté Kiristaa :Lahte ɓëewí habuu ri ɗeh : ɓëewí mitute lekoh., ow ɓan waa habaˈ walaŋkaane, wa hen ɓëewí koruute. 7Njíit jaŋi daa na tooppitoh yii leŋke iñi Koope, daa tah ɗi waɗti hen ɓëyí lahay yii wonun sun fi. Ɗi waray hen ɓëyí gaan-gaanlaˈ gaan-gaanloo, waray hen ɓëyí keeña wuneh, waray hen ɓëyí han kep daa afa, waray hen ɓëyí fahaˈte haaˈ, waray hen ɓëyí pagaˈ yii waray, saame na alal. 8Ɗi waɗti hena ɓëyí mínté haneel, fahaˈ yin wun, ɗi hen ɓëyí teeyte, júɓpé, ɗi hen ɓëyí lante te mín ham afi. 9Ɗi waɗti hena ɓal ɓëyí pokohte híin Una mit lekoh ra ti di yëeddúu rí nen. Hen ɗaa raa, ɗi ay mín yëedíɗ ɓëewí kayya kaah, ɗi on wa doole, teeɓ ɓëewë na haaˈuu ri iña na yëeddëˈ rí rë biti wa homuy kaah.
Yëeddëh yí paɗɗah ya
10Caakute ɓëewí fí yúhté biti faaliyuuy yii na wonu wa, níi lukaˈ yëwúɗɗë haalu ngémë rë, wa anti homuu daaha nofee ɓëewë a wonni lahay njiriñña waa na. 11Lah feheye níi wa nís wonni ƴaa ɓúkkí wë, ndah wa powute faam caak. Wa yëeddúu iñi yéŋké biti waray, wa saame na alal. 12Húmú lahte ɓëyí dék Keret, bi ɓëy gin wa húmú habuu ri yonente. Ɓëyí baa húmú won tih : « Ɓëy Keret mësúu hen i feloh, wa ɓëewí ɓosute ti raɓɓa luufa nen, wa ɓëewí ɗapasute te kamute », 13te yee won ɗi baa ra kaah. Yii baa daa tah lah wonee ɓëewë në a unni diŋke nda wa lah ngémí híinté. 14Wa ɓanuy síkírëh yëwúɗɗë na wonu wonni saku sako ra, wa ɓanuy ñee iña na túuƴú wë ɓëewí súugúuté kaaf ka. 15Ɓëewí ladute, yin na sobeyeh waa na. Ɓëewí laduy nék, ƴee gémúy rë, iña ɓéeɓ sobeyaˈ sobeyoo waa na ndah níɓɓí wë na ladeh, wa na lëhíh jom. 16Wa digiruu biti wa yúhú Koope, te pagaɗɗi wa teeɓaˈte biti wa wonuy yin ɗii na. Wa ɓëewí ɓosute ɓosi woneeh, faaliyuuy yii na wonu wa te wa míníh paŋ dara yii wunte.
2Di waɗti man ɓëyí gémpé
1Ɗo fi Tít nék, lah yëeddé ɓëewë iñi ñéerëˈ kaah. 2Lah wone ɓaha ya biti wa hen ɓëewí teeyute, ɓëewí mitu yeɗ cér, ɓëewí mínú ham affi wa, wa ham ngémë híin, wa fahaˈ ow, wa mín múñ.
3Ti ɗaaha nen, wone ɓitiffa biti wa pes pesi neɓaˈte Koope, wa ɓanti won ɓos sun ow, wa ɓanti hen ɓëewí han kep daa affi wa te wa yëeddée yin wun. 4Wa yëeddún jéegí teɓ-teba fahaˈi ƴaalli wa a koyyi wa, 5wa won wa mín ham affi wa, wa lan íllí Koope, wa tooppitoh faammi wa, wa baah, wa on ƴaalli wa cér. Hen ɗaa raa, ɓos ii wonu sun fi Un Koope.
6Ti ɗaaha nen ɓal, lah wone wahambaane ya biti wa hen ɓëewí mínú ham affi wa. 7Ɗo fi baa nék, lah page yin wun di yii mín ɗíi hen ɓéeɓ ndín, ɓëewë yeele ɗoo na wa ñee kottu. Fu ƴahti yëeddëˈ rëe, lah núhée rí keeñu ñéerëˈ a fayda, 8fu ñee kaaf ka toŋ nda ow laheh dara yii wona ri na. Hen ɗaa raa, kaaˈoh yi yen ii mín won ɓos sun fi yen. Tígí daaha, wa ay sopoh.
9Lah wone ɓëewë habu ñaam ra ɓal biti wa on kélfë yí wë cér di yii mín ɗíi hen ɓéeɓ. Wa paŋ yee neɓaˈ wa ra, ɓanti capaˈ a wa 10mbée lohre wa. Wa henun ɓëewí mitute lekoh faraah. Hen ɗaa raa, wa ay tah ɓëewë on iña na yëeddúu yen sun fi Koope, ɗi fi Sëmlëhí yen ɗa cér.
Di tosaˈ yen Yéesú
11Ɗi fi Koope teeɓpe ɓëewë biti onte wa mal. Mali baa daa kúnsíɗ wë ɓéeɓ íl múcëe, 12yëedíɗté yen yeris kaañ Koope a súugëh iñi ëldúnë, te yen pesaˈ ëldúnée woteh a júɓ, pokoh Koope na, yen ham affi yen, 13yen sehaaloh bisa yaakaaru yen, nay sosle keeññi yen ɗa. Bisi baa daa bisa nay aye Yéesú-Kiristaa a ndam ra, ɗi fa daa Koope fi gaana lahuu yen na sëmlëˈ yen ɗa. 14Ɗi yeraˈte ñíiní tosi yen tooññi yen ɓéeɓ a ladli yen, yen hen ɓëewí sah-sah, ɓëewí saamuun paŋ yin wun kep.
15Iña waɗ fuu yëedíɗ ɓëy ílí jaŋaa ra, daa wa ƴah. Lah wonee wa a sañ-sañi mitte, fu on ɓëewë në síkírúu rë rë doole, fu won affi ƴee kaaˈuu síkírëhú rë. Ow ɓanay roo heef !
3Yee waɗ ɓëyí gémpé rë
1Lah nérsé ɓëewë biti wa warutee on njíittí gina cér a ɓëewë homru nguur ka ra, wa ñee iña na wonu wa ra, wa caŋ paŋ yii hente wun ɓéeɓ. 2Wa henun ɓëewí në wëníh ɓos sun ow a ɓëewí në íñíih. Wa henun ɓëewí sosute níi sos, wa lah jaamma a ɓëewë ɓéeɓ. 3Yee tah mi won ɗo yii baa ra bitih : filoon, yeni wa ɓéeɓ húmú lahuy af. Yen húmú kaaˈuute ñee yee won Koope ra, yen húmú ɓëewí múuƴú múuƴë. Fah-neɓ a pagaɗ ɓos húmú hampe yen ñaam, yen na tasuu pesaˈ ɓos nuf a iñaan. Ow húmú fahaay yen tík íl te yen húmú fahuuy tíkëntëˈ íl. 4Ndaa, teeɓaˈ Koope fa daa Sëmlëhí yen naaˈi keeñi a ɗee fahaˈ ri ɓëewë rë, 5ɗi sëmlëˈté yen. Biti yen pagu yii júɓpé neh daa tah ɗi sëmlëˈ yen ; ɗi yérém yen yérmë. Ɗi hosse keeññi yen sëmlëˈté yen. Ɗi ñeyaˈ doolii Ruuh-Peseŋ yen límëetúté, yen lahute pes has. 6Ɗi ñeyaˈte Yéesú-Kiristaa Sëmlëhí yen na, líifíɗté yen a Ruuhi baaha. 7Ɗaaha, on-Koo tahte ɗi habaˈte yen ɓëewí júɓúté nda yen hen ɓëewí ay haal pesa na ɗúméh, na yaakaaru yen ɗa.
8Woni wëerté abah, te mi fahaˈte biti fu ɓaat naa wone nda ɓëewë gémú Koope ra ɓéeɓ pokoh paŋ yin wun. Baa daa yee wun te lahiɗ ɓëewë ɓéeɓ njiriñ ra. 9Ndaa nék, lah moytee capaˈ pëtíh, cabi tii yi caacci mínéh ɗúm, íñëˈ a taasantaˈ di yii leŋke Kootaa. Ƴaa ɓéeɓ wonni lahay af a lúk te lahay njiriñ. 10Lah ɓëyí fí yéŋké biti hom ɗaralsaˈ ɓëewë ɗaralsoo raa, lah dëeké rí fu won ɗii na. Ɗi kaaˈ síkírëhú rëe, fú dëekëet ɗí fú wonaat ɗii na. Ɗi kaaˈ síkírëhú waali ana fa raa nék, lah ɗúhé ɗii na níi lan, 11te fu yúh biti ɓëyí baa helte waala wun ɗa te bakaaɗɗi teeɓaˈte biti daan waɗte ri, te daa ri komaˈ ri afi.
Unna míllëˈ líkín Pool Tít ɗë
12Soˈ nék, may roo wolaˈ Artemaas mbée Tísík. Ow di waa na ac ɗaa, lah yípée ac fu ɗeef soˈ Nikopolis, may líƴée në. 13Lah page yii mín fú ɓéeɓ sun fi ɓaaba na suu Senaas fi layoha a Apolos ra, fu waaƴiɗ wa níi iñi wa ɓéeɓ mit. 14Koy-yaayya filiɓ ngémë ɓal warutee pokoh paŋ yin wun nda wa lah njiriñ, wa dímlëˈ ɓëewë homu coono ra.
15Ɓëewë funi wa homu dee ra ɓéeɓ na woduu ro. Lah wodee kooƴƴee ke yen filiɓ ngémë.
Koope líhë rën mal ɓéeɓ !