Téeríi feeñiyoha bíní Saŋ ra
Kúnsëe
Téeríi beh, Saŋ daa bíní rí. Ɗi won tih : iña won ɗi na ra ɓéeɓ, ɗi tíkké ílí në te kelohte wa a nufi. Ɗi wonte biti ɓal Ruuhi Koope daa cép sun fi, ɗi na an waa bíní.
Jamanaa na waariyaˈ ri ɗeef buuri Rom na mokil kerceenna bín fë mokli misikke ra, ɗi habute kúrúté gin filiɓ muluɓ hínú Patmos, helute dín fë. Homaˈ ri daaha ra, Ruuha cépëˈ sun fi na, ɗi na bíní iña feeñal ri Yéesú te ɗúhëˈ Koope na ra. Unna bíní rí rë, yuliɗ wa íl jaŋi paana di Aasi ti di wonaˈ ri ri Yéesú filiɓ feeñiyoha feeñiyoh ri ri ra. Ɗi wonte :
- yii leŋke ɗee yeeliyaˈ Yéesú ndam ra (5.6-14),
- yii leŋke Har fa yeraˈ Koope sarah ra, ɗi fi Yéesú (7.9-17),
- a yii leŋke aattiyaˈi Koope a ɓëewë ɓéeɓ (20.11-15).
Ɓëyí fí jaŋi téeríi bee ɓéeɓ ay ot biti iña wonu filiɓ ra saamu toñi yen fi kerceenna nda yii mín yen daɓ ɓéeɓ, yen ham ngémí yen híin ndah ɓëyí fí ham níi ɗúmëenë rëe, tiyi ay bíníyú filiɓ téeríi pesa na ɗúméh rë.
1Iña feeñal Yéesú Saŋ ɗa
1Téeríi bee ëmbë iña feeñal Yéesú-Kiristaa te kolaˈ Koope na ra, teeɓi súrgë yí yee na saañ lahe te wulay wulay ra. Yéesú nék wol malaakii Saŋ na, Saŋ fa súrgíi rë, teeɓi baaha. 2Ɗi fi Saŋ nék seede seedeyo dee biti iña ot ɗi ra ɓéeɓ Unni Koope, te ri wonte biti Yéesú-Kiristaa seedete ri. 3Kon ɓëyí jaŋi téeríi bee a ɓëyí síkírëh rí ɓéeɓ te tík ɗí nufi, ay lah sos-keeñ ndah iña wonu filiɓ ra leŋ lah.
Unna bíníyú jaŋi yi paana ya ra
4Soˈ mi Saŋ, daa mi bíní ɗon fi ɓëy íllí jaŋi yi paana ya deyi Aasi unni ƴeh : Koope fa húmú në, ee na, te ac ayo ra líhë rën mal, on ɗon jaamma ! Ruuh yi paana yi, ƴee hom fíi ñaani nguur ki ra líhún rën mal, on ɗon jaamma ! 5Yéesú-Kiristaa, ɗi fi seedii kah-kah fa ɗéɓpí koloh ɓúudé rë, te ri buuri buurra feey fa ra líhë rën mal, on ɗon jaamma !
Kiristaa fahaˈte yen te ri múcëlté yen bakaaɗɗi yen a ñif mi1.5 múcëlté yen bakaaɗɗi yen a ñif mi :Ɓëewë húmú ñeyaatu unni ƴee bín fë woraˈi wa ɓëewë rë, lahte na ƴi húmú bíníyú yii beh : hosse bakaaɗɗi yen a ñif mi.. 6Ɗi paŋke níi yen henute ɓëewí nonu Nguur ki Koope, yen henute seeƴoh yi Koope, ɗi fi Boffi. Ɗi laha ndam, ɗi lahe doole dee níi kiri fi kirih ! Ɗémíin !
7Ëlsíi, ɗi ee ac ɗa, ñéerëˈté a nérrë ! Ɓëewë ɓéeɓ ay rii ot níi lukaˈ ɓëewë jabu ri ra. Ɓëewë feey fa ɓéeɓ ay foŋ, hawoh af ri. Ahaŋkay ! Ɗémíin !
8Koo-Yíkëe won tih : « Daa mi Alfaa daa mi Omegaa1.8 Daa mi Alfaa daa mi Omegaa :Alfaa daa koy una ɗéɓ di gerek ra, omegaa daa míllëˈ. Iti fi wa tígí dee daa ri bitih : Koope daa ɗéɓ te daa ri míllëˈ, mbée daa ri dalaana te daa ri ɗúmëenë., daa mi húmú në, mi ee na, te mi ac ayo, soˈ fa mín ɓéeɓ rë. »
Feeñiyohi Yéesú a Saŋ
9Daa mi koy-yaafon Saŋ fa bok a ɗon, yen henute yínë Yéesú në rë di coono, nguur a múñ. Mi húmú kúrú kúrë gina na wonuu Patmos hom filiɓ kísí fë rë mi betute daaha, af waaraa na waare mi Unni Koope ra a yee na seedeyiɗ mi Yéesú rë. 10Bisi Yíkëe ín, Ruuh-Peseŋ haalte soˈ, mi kelohte un ɗofohte filoon soˈ saleet man kúlúɓ kí na lúuɓ nen won tih : 11« Bíníyé iña ot fu ra, fu kéyrëˈ wë ɓëy íllí jaŋi yi paana yi ƴeh : bi Efes, Simirne, Pergaam, Catiir, Sardes, Filadelfi a bi Lawodise. »
12Soˈ mi heeltoh oli ɓëeˈ na won soo na ra, mi ot lampa úrís paana. 13Lahte mbínéefí madaˈ a ow húmú leelii lampa ya, ɓekoh sabidoor, pokohte geñu úrís kinohi. 14Fen fa afa naaˈ dúr, naaˈ ti lékít nen, íllë na ñah ti kíi nen ; 15kotta man përëmí teƴute, séewísúté níi lante, moosute níi na tiriñ nen, una man di na tiilaˈ mboowaanna kísí fë nen. 16Ɗi hampe hul paana yaˈi ñamaa fi, jépílí lahaˈ kañaa ana yi dahasute na ɗúh ɓúgë. Kanama man ndiŋ-ndiŋ naˈ nen taac.
17Olaˈ mi ri ra, mi yíppée keen kotta ti húlíɗ nen. Ɗi tíkké yaˈi ñamaa fi sun fi soˈ tígí daaha, won soˈ tih : « Ngana tíit ! Daa mi ɗéɓ te daa mi míllëˈ. 18Daa mi ɓëeˈ na pes ɗa. Mi húmú húlté, ndaa mi ee pes ɗa ee, te may pese peso faraah. Daa mi lah sañ-sañ sun fi kúl kë a sun fi gin ɓëewë húlú rë. 19Kon bíníyé iña ot fu ra : ƴee lah ƴee ra a ƴee na ac fayu ra ɓéeɓ. 20Síkírée mi won iti fi hulli paana ya ot fu yaˈi ñamaa fi soˈ ra, a iti fi lampa yi úríssí paana ya : hulli paana ya daa malaaka yi jaŋi yi paana ya, te lampa yi paana ya daa jaŋi yi paana ya. »
2Unna bíníyú yuliɗ ɓëy ílí jaŋii Efes ra
1Ɓëeˈ won soˈ tih : « Bíníyé malaakii jaŋii Efes fu won ɓëewë tih : soˈ mi ɓëeˈ ham hulli paana ya yaˈi ñamaa fi soˈ, ma na tíl hanndal ki lampa yi paana yi úríssë rë, mi won tee : 2soˈ mi otte yee pagu ron ra, légéyí ron, a míní múñën. Mi yúhté biti ɗon míníh dék a ɓëyí ɓosse. Ɓëewë në wonu biti wa i apootar te wa apootar neh ra, ɗon semantaluute wa níi ɗon yúhúté biti wa i feloh. 3Ɗon lahute múñ : af soˈ tahte ɗon ñeyute coono, te ɗon yeɗɗuuy. 4Di filiɓ ƴaaha ɓéeɓ nék, soˈ mi otte yin ɗon na : di húmú fahuu ɗon soˈ ɗéɓëenë daal, henlay ɗaaha ! 5Ëlsíi di daluu ron wun a ɗee míllúu ron ra, ɗon lof pesaɗ ɗon nimil di na húmú pesuu ron merees nen. Henay bah, may ac mi pah lampaa mi këlíɗ ɗí tígë hom ɗi ra. 6Di filiɓ ƴaaha ɓéeɓ nék, mi otte yii neɓaˈte soˈ ɗon na : ɗon wonuy yin iña na pagu ɓëewí Nikol ra dalaa ti soˈ nen.
7« Ɓëyí lah nuf, kelaa yee won Ruuh-Peseŋ ɓëy ílí jaŋaa ra. Ɓëewë nay ɓage ra, may waa on wa ñam na di koyyi kilka na onaˈ pes hom filiɓ meey Koope ra. »
Unna bíníyú yuliɗ ɓëy ílí jaŋii Simirne ra
8Ɓëeˈ wonil soˈ tih : « Bíníyé malaakii jaŋii Simirne fu won ɓëewë tih : soˈ mi ɓëeˈ ɗéɓ te daa mi míllëˈ rë, soˈ fa húmú húl mi nimilte ma na pes ɗa, mi won tee : 9soˈ mi otte súfúñ fon a ñagon, añcaŋ ɗon lahute kat ! Mi kelohte iñi ɓossa na wonu ɓëewë sun fi ron ra, ɓëewë na damuu biti wa i yëwúɗ, wa ɓëewí Koope, ɗeefa kaah neh. Wa goomal ɓëewí Seytaane doŋ ! 10Yee na sayu ron súfúñé rë, ngënë néehí yin na. Síkíríi, Seytaane ay ɓekroh i ow ɗon na kasu olsohi ron, ɗon moklu níi hen waal sabboo. Hëbí híin níi húlën. May ron ɓek baanii ndami pesa na ɗúméh rë.
11« Ɓëyí lah nuf, kelaa yee won Ruuh-Peseŋ ɓëy ílí jaŋaa ra. Ɓëewë nay ɓage ra ii ñee húlí ana fa. »
Unna bíníyú yuliɗ ɓëy ílí jaŋii Pergaam ra
12Ɓëeˈ wonil soˈ tih : « Bíníyé malaakii jaŋii Pergaam fu won ɓëewë tih : soˈ mi ɓëeˈ lahaˈ jépílë lahaˈ kaañaa yi ana ya dahasu ra, mi won tee : 13soˈ mi yúh tígë dékú ron ra. Ɗon dékú tígë yípëˈ Seytaane nguur ki ra, kaaˈeeh ɗon habute soo na híin. Ɗon taasuuy biti ɗon gémúté sëˈ, níi lukaˈ na húmú hawu Antipaas, ɗi fa húmú seede kah-kah soo na, húl ginon ra, gina dék Seytaane ra. 14Di filiɓ ƴaaha ɓéeɓ nék, mi otte yin ɗon na : lahte ɓëewí ewu filiɓ fon ñeyuu iña yëeddëˈ Baalam ra, Baalam fa húmú ɓek Balak nuf na fíir ɓëy Israyel, tah wa ñame boˈ yúul, wa na njaaliyuu ra.2.14 Saame Kíní ɓëy Israyel 25.1-2 ; 31.1615Lahte ɓëewí ewu filiɓ fon ɓal ñeyuu iña na yëeddúu ɓëewí Nikol ra. 16Kon lëfí pesaɗ, henay baa mi ac ayo waalli ƴee mi haaˈ ɓëewí ƴaa a jépílë na ɗúh ɓúk sëˈ rë.
17« Ɓëyí lah nuf, kelaa yee won Ruuh-Peseŋ ɓëy ílí jaŋaa ra. Ɓëewë nay ɓage ra, may waa naa on maana2.17 maan :daa ñama on Koope ɓëy Israyel homuu wa luufa ra. Tikki fi maan daa : « Ƴee yi ɓal ! » ɗapoh ra, mi yeɗ wa laˈi naaˈi bíníyú tii hasi ow yéeh rí henay ɓëeˈ nay rii liile ra. »
Unna bíníyú yuliɗ ɓëy ílí jaŋii Catiir ra
18Ɓëeˈ wonil soˈ tih : « Bíníyé malaakii jaŋii Catiir fu won ɓëewë tih : soˈ mi Koy Koope, soˈ fa íllí sëˈ na ñah ti kíi nen te kotti soˈ man përëmí moosu mooso níi na tiriñ nen ra, mi won tee : 19soˈ mi otte yee pagu ron ra : ɗee fahuu ron ow ra, ɗee gémúu ron soˈ ra, iñi wunna na pagiru ron morommon ra a míní múñën. Mi otte biti ɗee sawooruu ron légéyë leegi ra luk bee ɗéɓëenë. 20Di filiɓ ƴaaha ɓéeɓ nék, soˈ mi otte yin ɗon na : ɗon yeɗɗute ɓelaa na wonuu Sesabel tík afi yonente ra, na múuƴíɗ súrgë yí sëˈ. Daa ri ɓek wa njaaliyoh a ñam boˈ yúul. 21Añcaŋ mi onte ri, mi yerisse heeƴce ɗi lof pesaɗ, ndaa ɗi kaaˈaˈte yeris njaaliyoh. 22Síkírée ! May rii fëníɗ, ɗi hen misikiɗ ; te ɓëewë fanuu a ri ra, may waa tík coono fi misikke hém wa lofuy pesadi ɓosa na ɓek wa ɓelaa ra. 23Mii teem daa kep, may hap koyyi ɓelaa húl, hen ɗaa raa ɓëy ílí jaŋaa ɓéeɓ yúh biti yii hom nuf a yii hom keeñ ow ɓéeɓ, soˈ mi yúh rí ; te yii paŋ ow ɗon na ɓéeɓ, may ri rii yíníl. 24Ɗon fi ɓëy Catiir nék, ɗon fa ɓekuy affon iñi ɓossi ƴaa na yëeddúu ƴaa ra, te ɗon yooduy yee na wonuu ɓëewë “iñi lakoh yi Seytaane” ra, mi won ɗon tee : mi tíkëy ron yin kay. 25Mi won ɗon biti kep ɗon ham yee habu ron ra híin níi mi nimil.
26-28« Ɓëewë nay page yee fahaˈ mi ra níi míllëenë rë, ɓëewí ƴaa daa ɓagu. May wa yeɗ sañ-saña kolaˈ mi Baasoˈ na ra, mi tík wë sun fi heetti kayya wa kúɗ wë kúrí híinté, wa ɗakaƴaˈ wa ti yaaɗ nen.2.26-28 Saame Kañaa ya 2.8-9 May waa yeɗ hula na niiñ hagaɗ ɗa ɓal. 29Ɓëyí lah nuf, kelaa yee won Ruuh-Peseŋ ɓëy ílí jaŋaa ra. »
3Unna bíníyú yuliɗ ɓëy ílí jaŋii Sardes ra
1Ɓëeˈ wonil soˈ tih : « Bíníyé malaakii jaŋii Sardes fu won ɓëewë tih : soˈ mi ɓëeˈ kúɗ Ruuh yi paana yi Koope a hulli paana ya ra, mi won tee : mi otte yee pagu ron ra : ɓëewë habuu biti ɗon homu pes ɗeef ɗon húlúté. 2Kon yúuníi ɗon ham yee na waaƴ húl ɗon na ra híin, toñeh ɗon ñak ɗi faf, ndée mi otte biti iñi wunna pagu ron ra tasaˈte fíi Koope. 3Nérsíi iña húmú yëeddú ɗon a ɗee húmú keluu ron Unni Koope ra ; hëbí në te ɗon lof pesaɗ. Ɗon yúunúuy, soˈ may ac bis ɗon ii yéŋ, mi beetti ron ti lohoh nen. 4Di filiɓ ƴaaha ɓéeɓ, i ow ewu filiɓ fon Sardes dee sísíɓílúy búuɓɓí wë. Wa fi ƴah, funi wa ay ñéerëˈ ɓani búuɓɓí naaˈ yi wa, ndah wa mitu ri mito.
5« Ɓëewë nay ɓage ra ay ɓekee búuɓ naaˈ ti ɗaa nen. Mii nís tii yi wa téerëe bíníyú tii yi ɓëewë nay haale pesa na ɗúméh rë, mi won fíi Baasoˈ a fíi malaaka ya biti wa nonu soo na.
6« Ɓëyí lah nuf, kelaa yee won Ruuh-Peseŋ ɓëy ílí jaŋaa ra. »
Unna bíníyú yuliɗ ɓëy ílí jaŋii Filadelfi ra
7Ɓëeˈ wonil soˈ tih : « Bíníyé malaakii jaŋii Filadelfi fu won ɓëewë tih : soˈ mi ɓëyí selaa te daa mi kaaf ka ra, soˈ fa ham céebíi Dawit buura, mi kúnís ɗëe ow mínéh téƴ, te mi téƴ ɗëe ow mínéh kúnís rë, mi won tee : 8soˈ mi otte yee pagu ron ra. Mi yúhté biti ɗon lahuy doole níi, ndaa ɗon habute unni soˈ híin, ɗon kaaˈuute súugëhí sëˈ. Síkíríi ! Mi kúnsíɗté ron íl fíiyën abah, bi fí yúhté biti ow mínéh ríi won. 9Ɓëewë nonu goomal ɓëewí Seytaane ra nék, feloh yi ƴaa damuu biti wa i yëwúɗ, wa ɓëewí Koope te ɗeefa kaah neh ra, may paŋ níi wa ac ƴek fíiyën, wa yúh biti mi fahaˈte ron. 10Hém ɗon daa habu unni soˈ híin ti di nahaˈ mi ri nen, wahtaa nay mii cépíré loola ëldúnë ɓéeɓ olsohi ɓëewë feey fa ra, soˈ ɓal may ron sëmlëˈ. 11Mi leŋ nimil, hëbí yee habu ron ra híin toñeh ow ay aye ɓeɓ baanii ndamon.
12« Ɓëewë nay ɓage ra, may waa yíp filiɓ Faam fi gaani Koope fi soˈ ti cíp nen, te wa ii naa koloh taˈ. May bíní tii Koope fi soˈ sun fi wa, mi bíní tii gin Koope fi soˈ na ɓal, gini baa daa Yerusalem fi hasa kolaˈ sun, Koope fi soˈ cépíɗ ɗí feey ra. May bíní tii hasi soˈ sun fi wa ɓal.
13« Ɓëyí lah nuf, kelaa yee won Ruuh-Peseŋ ɓëy ílí jaŋaa ra. »
Unna bíníyú yuliɗ ɓëy ílí jaŋii Lawodise ra
14Ɓëeˈ wonil soˈ tih : « Bíníyé malaakii jaŋii Lawodise fu won ɓëewë tih : soˈ mi ɓëeˈ në wonuu Ɗémíin ɗë, soˈ mi seedii kah-kah fa mit wëelíyëh rë, soˈ fa iña sak Koope ra ɓéeɓ ñeyaˈ soo na ra, mi won tee : 15soˈ mi otte yee pagu ron ra. Ɗon madu muluɓ nen : ɗon sosuuy ɗon woƴuy. Ɗon sosaˈ mbée ɗon woƴ koon daa nay géné ! 16Ndaa ɗon sosuuy ɗon woƴuy, ɗon homu leelaa te yii baa ay tah may ron hok feey ! 17Ɗon habuu affon biti ɗon lahute yin, iñon ɓéeɓ ee tíl rë, ɗon ñakuy dara ; ɗon anutee yíih ɗee mokuu ron a ɗee súfúñúu ron ra ! Ɗon i ñëkíɗ, ɗon i búumíɗ te ɗon lahuy yii ɓekun ɗon faannon ! 18Yee nay mi ron wone ra daa ri biti ndék tee, ɗon ac ɗon lom úrís kah-kah soo na, ɗon caak yin. Ɗon lomaaloh yéré naaˈ ɓal ɗon ɓekoh, ɗon ɓanilti hen faan holoŋ fíi ɓëewë ɗon sopoh. Ɗon saamaloh kilki ay paƴe íllën, ɗon yeel. 19Mi hom wonaˈ affi ɓëewë fahaˈ mi ra mi tík wë waal. Kon këlíi, ɗon lof pesaɗ. 20Síkíríi, mee caŋke ílí faam fa ra ma na laɓ ílë ; ɓëyí keloh un soˈ te kúnsíɗ sëˈ, may haal faami, funi bok loon.
21« Ɓëewë nay ɓage ra, may waa yeris wa took hëbís sëˈ ñaani nguur ki soˈ ti bee ɓagaˈ mi, mi payte mi tookke a Baasoˈ ñaani nguur ki ra nen.
22« Ɓëyí lah nuf, kelaa yee won Ruuh-Peseŋ ɓëy ílí jaŋaa ra. »
4Koope a ñaani nguur ki
1Filoon fi baaha, lahaatte yii feeñiyohte soˈ : Hom homo níi mi otte íl kúnsëhté sun-Koo. Una na húmú won soo na man kúlúɓ kí na lúuɓ nen ra won soˈ tih : « Lawe dee mi teeɓ ɗo yee waɗ naa tíkëh rë. » 2Ɗee a ɗeh, Ruuha haalte soˈ, mi otte ñaan nguur sun-Koo daaha ow tookke sun. 3Ɓëeˈ na tak ti laˈi miriñ luum a hilil nen. Kuɗ ki Koo na tak ti laˈi na miriñ nen ɓal, gíiwté ñaani nguur ka. 4Ñaan sabay ana a ñaan iniil (24) kay gíiwúté ñaani nguur ka, ƴi fí yúhté biti ɓaha sabay ana a ɓaha iniilli (24) ɓekuu búuɓ naaˈ, ɓekuute baane úrís daa tooku sun. 5Lahte héléƴƴí ɗofaˈ ñaani nguur ka ñéerëˈté a i un a pilliŋŋi na tiil. Lampa paana na njaaroh fíyí, daa wa Ruuh yi paana yi Koope. 6Yii manti kísí, heleŋ ti pilaatu nen hompe fíi ñaana. Mbínéeffí iniilli faanni wa ɓéeɓ líiffé íl ow, homute leelaa gíiwúté ñaana. 7Bee ɗéɓ ɗë man gaynde nen, bee tíkëh në rë man yuuh fana nen, bee ñee na ra kúɗ kanam ow, bee míllëˈ rë man njaaŋ fi hom pún nen. 8Mbínéeffí iniilla, bina-bina waa na ɓéeɓ lahte paɓ pëenë yí líiffé íl. Wa dékúu ƴeek naˈ a elek wone tih :
« Fu peseŋ ! Fu peseŋ ! Fu peseŋ
ɗo fi Yíkëe, Koope fa mín ɓéeɓ rë,
ɗo fa húmú në,
fu ee na,
te fu ac ayo ra. »
9Wahtii homuun mbínéeffí iniilla kañe, wa ɓéyré, wa símé ɓëeˈ took ñaani nguur ka na pes faraah ra, 10ɓaha yi sabay ana a iniilla (24) ƴek fíi ɓëeˈ took ñaana ra, jaamiyee ɓëeˈ na pes faraah ra, wa bet baane yi wa fíi ñaana wone tih :
11« Yíkëe Koope fi fun,
daa fu yeeliyoh ndam,
daa fu mit ɓéyíɗ,
daa fu yeeliyoh doole di yee sakaˈ fu iña ɓéeɓ rë.
Daa fu fahaˈ ri,
daa tah wa hen. »
5Téerëe yaˈ Har fi Koo
1Filoon fi baaha, mi otte téeríi túlúñú túlúñë hompe yaˈi ñamaa fi ɓëeˈ took sun fi ñaani nguur ka ra ; hatinna ɓéeɓ ana bíníyúté, ɗi antee túlúñú síitɗúté sondeel, leewute leew paana. 2Mi otte malaakii mitte, ɓéyíɗté uni sun won tih : « Daa yeeliyoh këcísí leewwa, kúnís téerëe ? » 3Ndaa sun-Koo neh, feey fa neh, filiɓ feey fa neh, lahay ɓëyí mín kúnís téerëe, olsoh yee filiɓ. 4Olaˈ mi biti lahay ɓëyí yeeliyohte kúnsí téerëe olsoh yee filiɓ ra, mi looyte looyi misikke. 5Ow di ɓaha ya won soˈ tígí daaha tih : « Ngana looy ƴaal ! Ole, gaynde fa tali Yudaa, sédí Dawit daa ɓaŋ ; ɗi nay këcísé leewwi paana ya, kúnís téerëe. »
6Filoon fi baaha, mi otte Har caŋke leelii ñaani nguur ka, mbínéeffí iniilla a ɓaha ya gíiwúté rí. Har fa man oolu oolo nen, lahte wic paana a íl paana yi daa Ruuh yi paana yi Koope, ƴee wolu feey fa ɓéeɓ rë. 7Har fa acce ɓeɓpe téerëe yaˈi ñamaa fi ɓëeˈ took ñaana ra. 8Ɓeyaˈ ri téerëe rë, mbínéeffí iniilla a ɓaha yi sabay ana a iniilla (24) yípútée ƴek fíyí. Ow fi ow waa na ɓéeɓ hampe koraa a i annda úrís ƴi líiffé a cuuraay. Cuuraayi ƴaa nam daa maanam ɗaŋŋi ɓëewí Koope. 9Wa na anuu ƴeek ƴeekaa has tabuu tih :
« Daa fu yeeliyoh ɓeyi téerëe,
daa fu yeeliyoh këcísí leewwa.
Daa fu húmú hawu sarah,
ñif mu tosiɗte Koope ow,
ɓëewí koluu talla ɓéeɓ,
wonaɗɗa ɓéeɓ,
heetta ɓéeɓ,
ginna ɓéeɓ.
10Fu tahte wa nonute Nguur ki Koope
wa henute heet seeƴoh yi Koope fi fun,
wa hen buur feey fa ɓéeɓ. »
11Mi homilte maa yeel, mi keloh i un malaaka caak gíiwúté ñaani nguur ka, mbínéeffë a ɓaha ya. Wa madu pep feey nen caak, 12ɓéyrúté unni wa sun na ƴeeku, tabuu tih :
« Har fa húmú hawu sarah ra
yeeliyohte doole,
yeeliyohte alal,
yeeliyohte hereñ a katan,
yeeliyohte ɓéyíɗ,
yeeliyohte ndam a kañ ! »
13Mi keliilte mbínéeffë ɓéeɓ : ƴee sun neh, ƴee feey fa neh, ƴee filiɓ feey fa neh, ƴee filiɓ kísí fë neh ; mbínéeffë ëldúnë ɓéeɓ na ƴeeku, tabuu tih :
« Ɓëeˈ took ñaani nguur ka ra a Har fa
daa ron mitu kañ,
daa ron mitu ɓéyíɗ,
daa ron yeeliyuu ndam,
daa ron yeeliyuu sañ-sañ dee níi kiri fi kirih ! »
14Mbínéeffí iniilla tabuu : « Ɗémíin ! » Ɓaha ya na ƴeku na jaamiyuu rek.
6Har fa këcíssé téerëe
1Homilte níi mi ot Har fa këcíssé leewa ɗéɓ ɗë, mi kelohte un mbínéef yínë di mbínéeffí iniilla ɗofohte ti pilliŋ nen won tih : « Aye ! » 2Mi hen ɗeh, mi ot pënís naaˈ, ɓëeˈ yaagoh ri ra hampe hél kas, ɗi yerute baane ɓagoh, saañce a ndam, saañ ɓagaat.
3Har fa këcíssé leewi ana fa, mi kelohte mbínéefí ana fa foŋke won tih : « Aye ! » 4Pënís kay yíppée ɗúh, luum cuƴ ti ƴuƴ kíi nen ; ɓëeˈ yaagoh ri ra yerute sañ-sañ ɗi lík jaamma feey fa, ɓëewë bëemëntée filiɓ fi wa. Ɗi yeru jépílí gaante !
5Har fa këcíssé leewi éeyë fë, mi kelohte mbínéefí éeyë fë foŋke won tih : « Aye ! » Mi henil ɗeh, mi ot pënís kay yíppée ɗúh, ɗi súul ; ɓëeˈ yaagoh ri ra hampe peeseyaa. 6Mi kelohte yin ti un nen ɗofohte leelii mbínéeffí iniilla na won tih : « Kílë súuné yínë daa ganjarma légéy ow bis múlgús, kílë bësí éeyë daa ganjarma légéy ow bis múlgús, yii leŋke dúuléenë a béeñë nék, ngana leɓ na ! »
7Har fa këcíssé leewi iniil fa, mi kelohte un mbínéefí iniil fa won tih : « Aye ! » 8Mi olilte pënís kay yíppée ɗúh, ɗi hilil ; ɓëeˈ yaagoh ri ra dëekúu kúl kë, gin ɓëewë húlú rë ñeete filooni. Wa onute sañ-sañ sun fi hatin yínë di hatinni iniilla feey fa, wa hap ɓëewë dékú në rë ɓéeɓ húl a jépíl, a yaaɓ, a jér ɓos a raɓɓi sohoorute.
9Har fa këcíssé leewi iip fa, mi otte i coonaa fëgërëh fí tígë na hawruu ra, coonaa yi ɓëewë húmú bëemú ndah Unni Koope a yee húmú waariyuu wa Unna ɓëewë rë. 10Coonaa ya na fogu sun wonu tih : « Koo-Yíkëe, ɗo fa sela te daa fu kaaf ka ra, fu seh yi aattiyaˈi ɓëewë feey, fu yíllíɗ fun di yee kéenɗúu wë ñif mi fun feey ra ? » 11Tígí daaha, ow fi ow waa na ɓéeɓ yerute sabidoor naaˈ, wa wonute biti wa sehaaloh ƴutuuɗ níi koy-yaayyi wa, ɓëewë wani wa húmú boku légéy rë hawu húl ti wa nen paaƴ, ac mitsiɗ wa.
12Mi henil ɗeh, mi ot Har fa këcísílté leewi pëenë fë, feey fa yíppée hégíƴëh hégíƴëhí misikke ; naˈa súulté kúk ti bílëes nen, di teem céyín fë ɓéeɓ luumpe cuƴ ti ñif nen ; 13hulla sun na keen feey ti koy eenni hililli ngilaaw gaan hégíƴ tala nen. 14Sun-Koo hente fur saañce ti téeríi túlúñú túlúñë nen ; daŋŋa a ginna kísí fë ɓéeɓ ɗofute ílíƴƴë húmú wë rë. 15Buurra feey fa, njíittë, kélfë yí soldaarra, yíkëe yí alalla, jammbaarra, ñaamma a ɓëewë lahuu affi wa ra, ɓëewë ɓéeɓ na ɗapuu filiɓ killa, na lakuu laˈ yi gaanna daŋŋa, 16wa na wonu daŋŋa a laˈ yi gaanna tih : « Bëpí sun fi fun, ɗon ɗap fun fun lakoh íllí ɓëeˈ took ñaani nguur ka ra, fun wuloh haayi keeñ Har fa, 17ndah bisi gaana lahte, bisa haayaˈ keeñi níi haay ra ! Daa nay naa múcé ? »
7Ɓëewë tíinndúu rë
1Filoon fi baaha, mi otte malaaka iniil cagute hatinni iniilla feey fa, fútúté ngilaaw ma na haalaˈ ílíƴƴí iniilla ra, kaaˈ ri laɓ sun fi feey fa, sun fi kísí fë a sun fi kilikka. 2Mi otte malaaka kay ɓal, bi kolaˈ waal púlëen naˈ na ac. Ɗi kúɗté tiiŋ ñaasaa, bee Koope fa na pes ɗa hom tíinndëˈ rí rë, ɓéyíɗté uni sun na won malaaka yi iniilla yeru sañ-sañi yahun wa feey fa a kísí fë rë tih : 3« Bëyít, cëgí ! Ngënë léɓí feey fa, ngënë léɓí kísí fë, te ngënë léɓí kilikka te ɗeefa yen ñëesíh súrgë yí Koope púk, yen tíinndëˈ wë. » 4Tígí daaha, mi kelohte ɗee teyu ɓëewë ñaasu púk tíinndúuté rë : wa henute ow júnní tíméer a ow júnní sabay iniil a ow júnní iniil (144.000). Tal fi tal di talli sabboo a ana ya Israyel ɓéeɓ, ow júnní sabboo a ow júnní ana tíinndúuté (12.000) : 5ow júnní sabboo a ow júnní ana di tali Yudaa ; ow júnní sabboo a ow júnní ana (12.000) di tali Ruben ; ow júnní sabboo a ow júnní ana (12.000) di tali Gaat ; 6ow júnní sabboo a ow júnní ana (12.000) di tali Aseer ; ow júnní sabboo a ow júnní ana (12.000) di tali Neftali ; ow júnní sabboo a ow júnní ana (12.000) di tali Manase ; 7ow júnní sabboo a ow júnní ana (12.000) di tali Simewoŋ ; ow júnní sabboo a ow júnní ana (12.000) di tali Léwí ; ow júnní sabboo a ow júnní ana (12.000) di tali Isakaar ; 8ow júnní sabboo a ow júnní ana (12.000) di tali Sabuloŋ ; ow júnní sabboo a ow júnní ana (12.000) di tali Suseef ; ow júnní sabboo a ow júnní ana (12.000) di tali Beŋsame.
Ɓëewë ɓekuu búuɓɓí naaˈ ya ra
9Filoon fi baaha, mi otte dúukëlí ɓëewí ow yéeh ɗee teyu wa ra caak, dúukëlí ɓëewí ɗúhúu ginna ɓéeɓ, talla ɓéeɓ, heetta ɓéeɓ a wonaɗɗa ɓéeɓ. Wa cagute fíi ñaani Nguur ka, fíi Har fa yeraˈ Koope sarah ra, ɓekuute búuɓ naaˈ, habute soor-soor yaˈ yi wa. 10Wa ɓéyrúté unni wa sun na wonu tih :
« Múc kolaˈ Koope fi yen na,
ɗi fa took ñaani Nguur ka ra,
múc kolaˈ Har fa yeraˈ ri sarah ra ! »
11Malaaka ya ɓéeɓ gíiwúté ñaani Nguur ka, gíiwúté ɓaha ya a mbínéeffí iniilla, yeɗɗuute líhúuté kíp feey fíi ñaana na jaamiyuu Koope 12na wonu tih :
« Ahaŋkay ! Koope fi yen daa mit kañ,
daa ri yeeliyoh ndam,
daa ri yeeliyoh hereñ,
daa ri mit sím,
daa ri mit ɓéyíɗ,
daa ri yeeliyoh doole a katan dee níi kiri fi kirih !
Ɗémíin ! »
13Ow di ɓaha ya meelte soˈ won tih : « Ɓëewí ƴee ɓéeɓ ɓekuu búuɓ naaˈ ra, fu yúh daa wa i wa a tígë koluu wa ra a ? » 14Soˈ mi won ɗi tih : « Daa fu gisaˈ soˈ na kat ɓahaa ! » Ɗi won soˈ tígí daaha tih : « Ƴee daa ɓëewë ñeyu mogi misiga ra ; wa hosu búuɓɓí wë hoso, wa ɓukutu wa ɓukuto a ñif mi Har fa yeraˈ Koope sarah ra níi naaˈte. 15Yii baa daa tah wa hom fíi ñaani Nguur ki Koope, wa na jaamiyuu ri naˈ a elek filiɓ Faam fi gaani Koope. Ɓëeˈ took ñaani Nguur ka ra ay waa uuf. 16Wa wocute yaaɓ a sifiroh ; naˈ wocce tami wa, op wocce mokli wa, 17ndah Har fa yeraˈ Koope sarah hom sun fi ñaani Nguur ka ra daa nay hene níirëhí wë, kúɗ wë culli mulaa na onaˈ pesa na ɗúméh rë. Te Koope ay moos muun ma íllí wë níi lan. »
8Leewi paana fa
1Har fa këcíssé leewi paana fa, sun-Koo hente tiɗ níi mitte genwal wahtu. 2Mi otte malaaka yi paana ya na homu fíi Koo ra ; wa yerute kúlúɓ paana.
3Malaaka kay acce caŋke hëbís tígë na hawruu ra, hampe annda cuuraay, bi tíɓúu úrís. Ɗi yerute cuuraay caak, ƴi ɗi ay waa yeree sarah sun fi tígë na hawruu ra fíi ñaani nguur ka, ñéerëˈ a ɗaŋŋi ɓëewí Koope. 4Ɗúukíi cuuraaya hom yaˈ malaakaa ra ɓéyrëhté na saañ Koope na ñéerëˈté a ɗaŋŋi ɓëewí Koope. 5Filoon fi baaha, malaakaa toffe na kíi kë sun fi tígë na hawruu ra túmpé anndaa, bette ri feey fa. Tígí daaha, pilliŋŋa tiilte, i un ɗofohte, héléƴƴë takke, feey fa na hégíƴëh.
Kúlúɓɓë
6Malaaka yi paana ya kúrú kúlúɓɓí paana ya ra cagute na waaƴu fiisi kúlúɓɓë.
7Malaakaa ɗéɓ ɗë fiisse, i ɗiŋ galaas a kíi ñéerëˈ a ñif na keen feey fa : hatin yínë di hatinni éeyë yë feey fa tampe níi muuyte, hatin yínë di hatinni éeyë yí kilikka tampe níi muuyte, gaaw fi hilila ɓéeɓ tampe níi muuyte ɓal.
8Malaakii ana fa fiisse, yin júndëŋ ti daŋi njaaroh kíi nen betute filiɓ kísí fë, hatin yínë di hatinni éeyë yí kísí fë yíssëhté ñif. 9Hatin yínë di hatinni éeyë yí mbínéeffë na pesu kísí fë rë húlúté, hatin yínë di hatinni éeyë yí gaalla filiɓ kísí fë yahte.
10Malaakii éeyë fë fiisse, huli gaani na kaɗ ti njaar kíi nen kolaˈte sun keente feey : ɗi keen sun fi hatin yínë di hatinni éeyë yí laah ya, a culli muluɓɓa. 11Hula wonuu Beedok. Hatin yínë di hatinni éeyë yí mulaa hente haay, te ow caak di ɓëewë hanu na mulaa ra húlúté ndah haayi mulaa.
12Malaakii iniil fa fiisse kúlúɓ kí, hatin yínë di hatinni éeyë yí naˈa laɓute, hatin yínë di hatinni éeyë yí céyín fë laɓute, hatin yínë di hatinni éeyë yí hulla laɓute níi hatin yínë di hatinni éeyë yí niiñi wa ɓéeɓ ƴímpé : hatin yínë di hatinni éeyë yí niiñi naˈa a elga ɓéeɓ ƴímpé.
13Mi homilte maa yeel, mi kelohte njaaŋ fi na pún sunaa-sun, una hente sun daŋ won tih : « Mas ! Mantee mas ! Mas ɓëewë feey fa nay maasee fiisi malaaka yi éeyë yë tasu fiisi kúlúɓɓí wë rë ! »
9Kúlúɓ kí iip fa
1Hompe níi malaakii iip fa fiisse kúlúɓ kí. Tígí daaha, mi otte huli kolaˈ sun keente feey, yerute céebíi ngaara mi nuŋi nooda. 2Ɗi kúníssé ngaara ma, ɗúukíi man ɗúukëe njaar kíi nen ɗofohte na, naˈa a deyi baa ɓéeɓ ñúussé. 3Lahte paƴƴi ɗúhúté ɗúukëe, hasaluute feey fa ɓéeɓ ; wa onute doole tawaa ti dagal nen. 4Wa túuƴúté biti wa ɓanti leɓ gaaw fa feey fa, gañcaha, a kilikka ; wa túuƴú yejohi ɓëewë púkkí wë tíinndúuy a ñaasii Koope ra kut. 5Wa nahuy biti wa ay waa hawe húl, wa nahu biti wa ay waa page iñi misikke níi hen céyín iip. Te yii misiga nay wa waa page ra, ay made biti dagal tap ow nen. 6Waalli ƴaaha, ɓëewë ay fahaˈ húl, wa ii rii ot ; wa ay saam kúl kë ndaa kúl kë ay waa hegee hegoo !
7Paƴƴa madu pëníssí cagute saañ haaˈ nen. Mante ti baane úrís nen hompe affi wa, kanammi wa man kanam ow nen ; 8fen fi wa man fen ow ɓeleɓ nen, síssí wë man sís gaynde nen ; 9búuɓ tiiŋ daa húun araalli wa, yodadi paɓɓi wa man yodaɗ sareetti pënís caakki homu múkë na suu haaˈ daa na hécú wë nen. 10Wa lahuu lúk, ñéerëˈ a suut ti dagal nen, te wa onute sañ-sañ wa mokle ɓëewë a lúkkée ké wë ƴaa níi hen céyín iip. 11Malaakii ngaara mi nuŋa daa buuri paƴƴa. Ɗi hínú « Abadon » di ébrë, mbée « Apoliyon » di gerek, daa ri « bee na yah ra ».
12Ɗaaha, loola ɗéɓ ɗë gétté, lool ana kay ee ayil ra.
Kúlúɓ kí pëenë fë
13Malaakii pëenë fë nampee fiis kúlúɓ kí ɓal, mi kelohte uni kolaˈ wicci iniilla tígí hawraa yugusuu úrís hom fíi Koope ra. 14Una won malaakii pëenë fë kúɗ kúlúɓ kë rë tih : « Pëkísé malaaka yi iniilla pokalsuu hëbís Efarat, laahi gaana ra. » 15Ɗaaha, malaaka yi iniilla pëkísúté. Daa wa malaaka ya húmú waaƴɗu kíilí baa koon ɗa, di céyín fi bah, bisi baa a wahtii baa koon ɗa kep, wa hap hatni yínëe di hatinni éeyë yí ɓëewë feey fa ra. 16Goomali soldaarra yaaguu pëníssë ñéerúu a wa ra henute ow miliyoŋ tíméer ana (200.000.000). Ɗee teyu wa ra, mi wonuu ri ɗaaha. 17Yii leŋke pëníssë a soldaarra nék, wa feeñiyuu soˈ ɗeh : wa ɓekuu búuɓ tiiŋ luum cuƴ ti ƴuƴ kíi nen, ƴi tappe búlëh ti sun-Koo nen, mbaasaante ti pënndël tuutaabi ɗúukísírú ɗúukísírë nen ; wa fi pëníssë nék, affi wa man af gaynde nen, ɓúkkí wë na ɗúh kíi, ɗúukëe a gél-kíi. 18Ɗaaha, hatin yínë di hatinni éeyë yí ɓëewë húlúté loolli éeyë yí ƴah : kíi kë, ɗúukëe a gélë dúh ɓúkkí pëníssë rë. 19Doolii pëníssë ɗúhëˈ ɓúkkë ndaa na ɗúh në lúkkí wë ɓal, ndah lúkkí wë man goŋ nen te kúɗté af. Te wa mokluu ɓëewë a affi ƴaaha.
20Di filiɓ ƴaaha ɓéeɓ nék, ɓëewë fúsú loolli ƴaa ra kaaˈuute lofisoh di iña yugusuu wa a yaˈ yi wa ra. Wa habute na jaamiyuu ala ya, a ala yi tíɓúu úrís, tiiŋ hélíis, përëm, ƴee peluu laˈ a kilik ra : ala yi na ëlíh, na kélíih te na tílíh. 21Wa kaaˈuute woc bëemëntëˈ, pagaɗɗi luunni wa, paŋ yii tappe njaaliyoh ɓéeɓ, a loh.
10Malaakaa a téeríi ƴutuuda
1Mi henil ɗeh, mi otte malaakii mitte kolaˈte sun na cép, lambohte nér, kuɗ ki Koope hompe afa ; kanama man naˈ nen, kotta man cíp kíi nen. 2Ɗi hampe téeré ƴutuuɗ, bi kúnsúté yaˈi, tíkké kodi ñamaa fi sun fi kísí fë, kodi sugu fa hompe sun fi feey fa. 3Ɗi ɓéyíɗté uni sun na ɗaañnjoh ti gaynde fi na foŋ nen. Una na lús, pilliŋŋi paana ya na tiil. 4Soˈ mi saañ bíníi yee won pilliŋŋa ra koon, mi kelohte un kolaˈte sun won soˈ tih : « Yee won pilliŋŋi paana ya ra ɓanay ɗúh ɓúkú, te ngana bíní ! »
5Tígí daaha, malaakaa ot mi caŋke sun fi kísí fë a sun fi feey fa ra, ɓéyíɗté yaˈi ñamaa fi sun, 6na añoh di tii Koope fa na pes faraah, sak sun, sakke feey, sakke kísí fë a iña hom filiɓ fi wa ɓéeɓ rë, won tih : « Leegi seha doyte ! 7Malaakii paana fa fiise kúlúɓ kë rek, Koope page yee nufi, ti di húmú wonaˈ ri súrgë yí, yonente ya ra nen. »
8Filoon fi baaha, una na húmú keloh mi ɗúhëˈ sun ra wonil soˈ tih : « Paye fu ɓeɓ téerëe kúnsú hom yaˈ malaakaa caŋ sun fi kísí fë a feey fa ra. » 9Mi leɓohte malaakaa mi meelte ri téerëe, ɗi won soˈ tih : « Ɓeye fu ñam, ay made kúum nen neɓ ɓúkú ndaa lah lowu raa ay haay déˈ ! » 10Mi tahte téerëe yaˈ malaakaa, mi ñampe ri. Ɗi man kúum nen neɓ ɓúk sëˈ, ndaa honaˈ mi ri ra, loo soˈ ɓéeɓ na haayaˈ.
11Tígí daaha, mi wonu tih : « Fu waɗtee waareyaat di tii Koope yii leŋke heet caak, gin caak, wonaɗ caak a buur caak. »
11Seede yi ana ya
1Filoon fi baaha, mi yerute duuɗ bëhëer, bi saamu nataa, una won soˈ tih : « Paye fu nat Faam fi gaani Koope a tígë na hawruu ra, fu kín ɓëewë në jaamiyuu filiɓ ra. 2Ndaa ngana nat baylii ëssí Faam fi gaana, ndah ɗi yeɗɗuute ɓëewë nëníh ɓëewí Koope ra. Ɓëewí ƴaa nay togisee Yerusalem gini selaa níi hen céyín sabay iniil a céyín ana (42). 3Soˈ may wol seede yi ana yi soˈ, wa ay ɓekee saaku ti jëtíɗ nen, wa léhín unni soˈ níi hen bis júnní a bis tíméer ana a bis sabay pëenë (1.260). » 4Seede yi ana ya daa talli ëlíiffí ana ya a lampa yi ana ya hom fíi Yíkíi ëldúnë rë. 5Ɓëyí fí nar waa paŋ yin ɓos, kíi nay ɗúhé ɓúkkí wë muuyil kaaˈoh yi wa. Ahaŋkay, ɓëyí nar waa paŋ yin ɓos rek ay húlée ɗaaha. 6Wa lahute sañ-sañ wa téƴ sun-Koo, Koo ɓanti toɓ wahtaa nay waa léhínée unni kolaˈ Koope na ra. Wa lahute sañ-sañ wa yídís muluɓɓa ñif, wahtii neɓaˈ wa wa cépíɗ loolli caakki bokaay feey fa.
7Wa woc seedii wa raa, raba nay ɗúhé ngaara mi nuŋa ra ay wa yejoh, ɓaŋ wa, hap wa húl. 8Ɓúudé yí wë ay tase këemí gini gaana sëeddúu « Sodom » mbée « Ésíp », tígë daaƴuu Yíkíi wë kurwah ra. 9Ay hen yii mit bis éeyë a caan, ɓúudé yí wë ay home daaha, heetta ɓéeɓ, talla ɓéeɓ, wonaɗɗa ɓéeɓ a ginna ɓéeɓ ole wa, kaaˈ biti wa hacu. 10Keeññi ɓëewë feey fa ay sos di húlë húlú wë rë, wa ay yerantaˈ kuun ndah yonente yi ana yi ƴaa moklute wa.
11Ndaa filoon fi bissi éeyë yë a caan fa, Koo wolte coonaa, ɓekke ri ɓúudé yí yonente yi ana ya, wa koluute. Ɓëewë olu wa ra ɓéeɓ tíitú tíitë níi tíit ! 12Yonente yi ana ya keluute uni ɓéyrëhté kolaˈte sun won wa tih : « Lëwí sun dee ɗon ! » Tígí daaha, lahte nérí húunté wë, wa na lawu sun, kaaˈoh yi wa na tíkú íllí wë në ngëeƴ. 13Ɗee a ɗeh, feey fa hégíƴëhté hégíƴëhí misikke ; hatin yínë di hatinni sabboo yi gina bëppé, ow júnní paana (7.000) tíkké húlúté në. Ɓëewë múcú në rë tíitúté, wa na kañu Koope fa sun.
14Ɗaaha, looli ana fa gétté, éeyë fë leŋ ac !
Kúlúɓ kí paana fa
15Malaakii paana fa fiisse kúlúɓ kí, lahte unni ɓéyrëhté keluute sun-Koo na won tih : « Nguur ki ëldúnë ee yaˈ Yíkíi yen leegi a yaˈ Buura ɗi fal ri ra, te ii naa koloh taˈ ! » 16Tígí daaha, ɓaha yi sabay ana a ɓaha yi iniilla (24) tooku ñaanni nguur ki wa hëbís Koope ra yeɗɗuute líhúuté kíp feey na jaamiyuu Koope 17na wonu tih :
« Koo-Yíkëe fë mín ɓéeɓ rë
ɗo fa ee na te fu húmú në rë,
fun na símú rë di yee míllëˈ fuu caŋ
fu ɓeɓpe dooluu fu yíppé nguur ku ra.
18Heetta húmú dee na haayluu,
ndaa daa fu haayloh woteh.
Wahtaa nay fuu aattiyee ɓëewë húlú rë lahte,
wahtaa nay fuu waafe súrgë yú,
wa fa yonente yu ra,
wahtaa nay fuu waafe ɓëewú,
wa fa ɓëewë neehu ro ra,
wa ƴahun ow gaan mbée baadoole ɓéeɓ ;
daa ri wahtaa nay fuu ɗakaƴee ɓëewë rë,
ɓëewë yahu ëldúnë rë. »
19Tígí daaha, Faam fi gaani Koope sun kúnsëhté, wahandii Kootaa feeñce filiɓ. Héléƴƴë tiilte, i un na won, pilliŋŋa na faaɗ, feey fa na hégíƴëh, ɗi na bacal i ɗiŋ galaas.
12Ɓëyí ɓelaa a niŋkinaŋka fa
1Filoon fi baaha, lahte yii éemílëˈté feeñiyohte sun : yaa ow ɓeleɓ, ɗi ɓekoh naˈa, céyín fë hompe kotti feey, baanii lahaˈ hul sabboo a hul ana hompe afa. 2Ɓelaa húmú loo. Bi ham lowa nék, ɗi na foŋ ndah misik.
3Tígí daaha, yin kay feeñiyaatte sun : niŋkinaŋka gaan, luum cuƴ, bi lahaˈ af paana a wic sabboo. Affi paana ya ɓéeɓ ɓekute baane-buur. 4Hatin yínë di hatinni éeyë yí hulla sun ɓéeɓ lúk niŋkinaŋka fa paɗte wa, lasse wa feey fa. Ɗi fi niŋkinaŋka fa nék, hompe fíi ɓelaa na saañ ɓëslé rë na woh biti ɗi ɓësíil rëe ndín, ɗi ñam baakera.5Ɓelaa ɓësíilté, lahte koy ƴaal. Koy ki ƴaali baa daa ri bee nay kúré heetta ɓéeɓ kúrí híinté rë. Bi hom niŋkinaŋka fa na seh, límúu kúkëyë, ɗi yíppée pahu kúrúté hompe hëbís Koope a ñaani nguur ki. 6Ɗi fi ɓelaa nék, hegohte saañce luufin, ɗeef Koope liiltee rii saamiɗ tígí homa ri daaha, ɗi tooppituu níi hen bis júnní a bis tíméer ana a bis sabay pëenë (1.260).
7Tígí daaha, haaˈa takke sun-Koo : malaakii gaana na wonuu Misel ra a këewí na haaˈuu a niŋkinaŋka fa a këewí. 8Misel a këewí ɓagute niŋkinaŋka fa a këewí. Ɓaguu niŋkinaŋka fa a këewí rë, wa ɗëmlíh sun-Koo. 9Puŋkal mi niŋkinaŋka fa líkúté. Ɗi fi goŋ fee kíilë na húmú wonuu tuumaloh mbée Seytaane ra, ɗi fa na húmú nofaˈ ɓëy ëldúnë ɓéeɓ rë líkúté betute feey, ɓani këewí.
10Mi yíppée keloh uni ɓéyrëhté kolaˈte sun-Koo won tih :
« Wahtu múc lahte leegi,
wahtaa teeɓaˈ Koope fi yen doolii ra,
wahtaa teeɓaˈ ri nguur ki ra,
wahtaa haalaˈ sañ-saña yaˈ Buura ɗi fal ri ra lahte leegi,
ndah tuumalohi koy-yaayya filiɓ ngémë líkúté betute feey,
ɗi fa na húmú tuumal wa naˈ a elek fíi Koope fi yen ra.
11Koy-yaayya daa míllúu ríi ɓaŋ,
daa míllúu ríi ɓaŋ yúfëhë yúfëh ñif mi Har fa ra,
Har fa yeraˈ Koope sarah ra,
a di yee seedeyuu wa Unni Koope ra.
Wa húmú kaaˈuuy na dara pesi wa,
kaaˈuuy na dara níi húl ɗeef wa na sah.
12Mi won tee ɓal :
bíƴíi ɓëy sun-Koo,
bíƴíi ɗon fa dékú në rë !
Ndaa mas ɗon fi ɓëy feey fa,
mas ɗon fi ɓëy kísí fë,
ndah Seytaane céppé ɗon na a ŋaŋ,
céppé ɗon na a ŋaŋ ndah ɗi yúhté biti ɗi talla ƴutuuɗ ɗúmël. »
13Olaˈ niŋkinaŋka fa biti ɗi betu feey fa ra, ɗi yampe na ɓoorsoh ɓelaa húmú lah koy ƴaal baa ra. 14Ndaa ɓelaa saamɗute paɓ ana ti paɓ dúut nen, ƴi nay rii kúré tígë saamiɗ ɗi Koope luufin, ɗi hom daaha tooppituu níi hen kíil éeyë a caan, wuloh niŋkinaŋka12.14 niŋkinaŋka saari beh, a saar 15 : Di gerek, bíníyú ɗeh : goŋ. fa. 15Niŋkinaŋka fa púussé muluɓ caak ti húlbí na bas nen filoon ɓelaa, na fahaˈ biti mulaa pah ri. 16Ndaa feey fa hílíppé ɓelaa, haaŋke, hante mulaa púus niŋkinaŋka fa ra ɓéeɓ. 17Bi haay keeñ niŋkinaŋka fa ɓelaa níi haay, ɗi saañce yejohi koyyi kay yi, ƴee na ñeyu túuƴëˈ yí Koope ra te dékúu seedeyidi Yéesú rë.
18Kolaˈ niŋkinaŋka fa dah, ɗi payte caŋke ɓúk kísí na seh.
13Raɓɓi ana ya
1Filoon fi baaha, mi otte raɓ ɗúhté kísí fë. Ɗi lahte af paana a wic sabboo. Baane-buur sabboo hompe wicca ; tii yi soluu Koope bíníyúté affa. 2Raba ot mi ra man baade nen, kotta man kot raba na wonuu úrsë rë nen, ɓúgë man ɓúk gaynde nen. Niŋkinaŋka fa déŋéenté rí doolii a nguur ki, onte ri sañ-sañi gaante. 3Af yínë di affi raba gaañohte gaañohi misigi fí yúhté biti man ay rii hap húl nen, ndaa gaaña yíppée wah. Ɓëewë feey fa ɓéeɓ éemúté, wa ñeyute tal raba. 4Wa ɓéeɓ na jaamiyuu niŋkinaŋka fa di yee onaˈ ri raba sañ-sañ ra. Wa na jaamiyuu raba ɓal na wonu tih : « Bee raɓ lahay man kan ! Daa mín ɗíi tíkëˈ af ? »
5Ɗi fi raba onute biti ɗi gaan gaanloh ɗi sole Koope ; ɗi ay homee sañ-sañi baaha níi hen céyín sabay iniil a céyín ana (42). 6Ɗaaha, ɗi yampe na sol Koope, na won yin ɓos sun fi tiyi, sun fi tígë dék ɗí rë a sun fi ɓëewë dékú sun ɗa. 7Ɗi onute sañ-sañi haaˈaa ri ɓëewí Koope ɗi ɓaŋ wa ; ɗi onute sañ-sañ sun fi ɓëewë ɓéeɓ : talla ɓéeɓ, heetta ɓéeɓ, wonaɗɗa ɓéeɓ, a ginna ɓéeɓ. 8Ɓëewë feey fa ɓéeɓ ay jaamiyee ri : ɓëewë tiyi wa bíníyúy dalaani pesa filiɓ téerëe bíníyú tii yi ɓëewë nay haale pesa na ɗúméh rë, téerée ké Har fa yeraˈ Koope sarah hawute húl rë.
9Ɓëyí lah nuf, kelaa na ! 10Ɓëyí Koope won biti ay habu ñaam, ii fús ; ɓëyí Koope won biti nék ay húlée jépíl, ay húlée në. Yii baa daa tah ɓëewí Koope warutee múñ, wa ham ngémë.
11Filoon fi baaha, mi olilte raɓ kay na ɗúh feey. Ɗi lahaˈ wic ana man wic koy har nen, ndaa ri wonaˈ wonaɗ niŋkinaŋka. 12Sañ-saña lahaˈ raba ɗéɓ ɗë ɓéeɓ, ɗi lahaˈ ri te ri pagaˈ ri hëbísí, anti túuƴé feey fa a ɓëewë feey fa ɓéeɓ jaamiyohi ɗi fi raba ɗéɓ húmú gaañoh gaañohi misiga níi wahte ra. 13Ɗi fi rabi ana fa paŋke i kimtaan gaan ; ɗi na kalaˈ njaar kíi sun-Koo, cépíɗ ɗí feey íllí ɓëewë ɓéeɓ. 14Ɗaaha, ɗi hompe na nofaˈ ɓëewë feey fa kimtaanna na paŋ ɗi ra fíi raba ɗéɓ ɗë. Ɗi luk waa nah yugus netli raba ɗéɓ ɗë húmú gaañoh a jépílë, te míllëˈtée koloh ra. 15Ɗi fi rabi ana fa onute sañ-sañi ɓekaa ri netli raba ɗéɓ ɗë coonaa ɗi pes níi wone ndín, hawroh ɓëewë nay kaaˈee jaamiyohi netla ra húl. 16Ɗi túuƴcé ɓëewë ɓéeɓ samɗu tíinndëe yaˈ ñamaa mbée púk : ow gaan mbée baadoole, yíkëe alal mbée ñëkíɗ, fu lahaˈ afu mbée fu ñaam ɓéeɓ fay tíinndúu. 17Ow waray lom mbée yaay te laheh tíinndëˈí bah : tíinndëˈë, ɗi tii raba mbée síifërë ñéerëˈ a tiya ra.
18Tígí dee nék, meelaˈ ñaañ : ɓëyí fí hereñ raa, fay mín kín síifërí raba, ndah síifërë ñéerëˈté a tii ow, te daa ri beh : tíméer pëenë a sabay pëenë a pëenë (666).
14Ƴeekii ɓëewë tosu ra
1Mi homilte maa yeel, mi otte Har fa yeraˈ Koope sarah ra caŋke sun fi daŋi Siyoŋ, ñéerëˈté a ow júnní tíméer a ow júnní sabay iniil a ow júnní iniil (144.000), ƴi fí yúhté biti tii ɗi fi Har fa a tii Boffi daa bíníyú púkkí wë. 2Mi kelohte un kolaˈte sun-Koo tiilte man pagaɗ mboowaanna kísí nen, man híndíŋí ɓídí baa nen. Una keloh mi ra man un koraa, bee i ɓëelú homute típ rë nen. 3Ɓëewë homute fíi ñaani nguur ka a fíi mbínéeffí iniilla a ɓaha ya, na ƴeeku ƴeekaa has. Ƴeekaa mínéh haal af ow kay gét nëe wa fi ɓëewí júnní tíméer a júnní sabay iniil a júnní iniilla (144.000) Koope tos wa feey fa ra. 4Wa fi ɓëewí ƴaa daa wa ƴee mësúy leɓ ɓeleɓ níi wa sobeye ra ndah wa yíih ɓeleɓ. Daa wa ƴee fí yúhté biti tígí ñee Har fa ɓéeɓ wa ñee na ra. Ɓëewí ƴaa daa wa ƴee tosu filiɓ fi ɓëewë henute ƴi Koope a ƴi Har fa ra. Daa wa maanam iña ɗéɓúu lec meeyya jébëlúté Koope ra. 5Fel mësëy ɗúh ɓúkkí wë, wa lahuy síkkë.
Yii leŋke bis-këem
6Filoon fi baaha, mi otte malaaka kay feeñiyohte na pún sunaa-sun. Ɗi kúɗ Uni Neba na ɗúméh rë. Ɗi ay rii waareye ɓëewë feey fa ɓéeɓ : ginna ɓéeɓ, talla ɓéeɓ, wonaɗɗa ɓéeɓ a heetta ɓéeɓ. 7Ɗi ɓéyíɗté uni sun won tih : « Néehí Koope ɗon kañ ɗí, ndah wahtaa nay rii aattiyee ɓëewë rë lahte ! Jëemíyíi ɓëeˈ sak sun-Koo, sakke feey fa, kísí fë a culli muluɓɓa ra ! »
8Malaaka kay feeñiyohte filoon bee ɗéɓ ɗë won tih : « Babilon ɗakaƴaˈte ! Babilon fi gaana ɗakaƴaˈte, ɗi fa ɓek heetta ɓéeɓ pagaɗɗi ɓossi ra, ɗi fa ɓek wa hani gulii njaaliyohi misiga homaˈ ri ra ! »
9Malaakii éeyë fë feeñiyohte filoon fi ana ya ɗéɓ ɗë, ɓéyíɗté uni sun won tih : « Ɓëyí fí jaamiyoh raba a netli, ɓëyí fí lah tíinndëˈë púkí mbée yaˈi, 10ɗi fi ɓëyí baaha ay naa han béeñí neeɓi Koope, ƴi fí yúhté biti rahay dara yíidúté gulii neebi. Ɓëyí baa, Koope ay rii ɓek filiɓ kíi a gél. Ɗi ay pítípée misik ɗaaha fíi malaaka yi sela ya a fíi Har fa yeraˈ Koope sarah ra. 11Te ɗúukíi kíi kë nay rii tame ra ay kolee koloo faraah. Ɓëyí fí jaamiyoh raba a netli, ɓëyí fí lah tíinndëˈë bíníyú tiyi ra, naˈ neh elek neh, ɓëyí baa wocce hílsëh. »
12Yii baa daa tah ɓëewí Koope, ƴee na ñeyu túuƴëˈ yí te gémúté Yéesú rë, warutee múñ.
13Henil ɗeh, mi kelohte uni kolaˈte sun won soˈ tih : « Bíníyé unni ƴee fu won tih : “Dalaˈte woteh, lahute sos-keeñ ɓëewë húlúu ngémí wë di Yíkëe në rë ! Ruuh-Peseŋ won tih : Ahaŋkay, wa lahute sos-keeñ, leegi wa mínú hílsëh légéyí misigi wa, ndah wa kúrëelúuté iñi wunna pagu wa ra.” »
Wahtu lec
14Mi homilte maa yeel, mi otte nér naaˈ lahte yii tookke sun man ow nen. Yaa ɓekoh baane úrís afi, hampe sarcii kaañce yaˈi. 15Malaaka kay ɗúhté Faam fi gaani Koope ɓéyíɗté uni sun won ɓëeˈ took sun fi nérë rë tih : « Ɓeye sarcuu fu lec, wahtaa lahte : tooka nonte gina ɓéeɓ, tas lec. » 16Tígí daaha, ɓëeˈ took sun fi nérë rë ɓeɓpe sarcii laɓpe héccé, tooka feey fa ɓéeɓ lecce.
17Malaaka kay ɗúhté Faam fi gaana sun, ɗi fi baaha ɓal hampe sarcii kaañce yaˈi.
18Malaaka kay ɓal, bi daa lah sañ-sañ sun fi kíi kë ɗúhté tígë na hawruu ra foŋke af bee ham sarcii kaaña ra won tih : « Ɓeye sarcuu fu lec goññi reseña meeyi béeñë feey fa, wa nonte. » 19Malaakaa ɓeɓpe sarcaa laɓpe héccé, lecce goññi reseña meeya feey fa, yíinté wë ndoŋi neeɓi Koope na lopotuu ra, 20goññi reseña ɗúhrúté gina lopotute, ñif na ɗúh ndoŋa na hút na lap níi lahte pënís ɓúk, na laɗ níi mitte kilomet tíméer éeyë (300).
15Malaaka yi paana ya a loolla míllëˈ rë
1Filoon fi baaha, mi otte yin kay, yii gaante te éemílëˈté sun-Koo : mi ot malaaka paana yi kúrú lool paana, loolli paana ya míllëˈ, teeɓaˈ Koope ɓëewë neebi ra. 2Mi olaatte yin ti kísí fí mulaa heleŋ ti pilaatu nen ñéerëˈté a kíi. Ɓëewë ɓagu raba, ɓagute netli a síifërí tiyi ra cagute sun fi kísí fë na tiriñ ra, wa habute koraa yi Koope daa yeɗ wa wa, 3wa na ƴeeku ƴeekii Mëyíis súrgíi Koope a ƴeekii Har fa yeraˈ Koope sarah ra na wonu tih :
« Ɗo fi Koo-Yíkëe fë mín ɓéeɓ ɗë,
fu gaante pagaɗ,
fu éemílëˈté pagaɗ.
Ɗo fi Buuri heetta,
waallu júɓpé,
waallu kaah.
4Daa kaañ roo neeheh Yíkëe ?
Daa kaañ roo kañeh ?
Ɗo kep daa fu sela !
Heetta ɓéeɓ ay ac fíyú,
heetta ɓéeɓ ay ac jaamiyohu.
Iña paŋ fu ra júɓpé,
iña paŋ fu ra teeɓaˈte affi wa. »
5Filoon fi baaha, mi otte Faam fi gaani Koope, bee ëmbë taantaa na nédís ɓëewë biti Koope ee leelii wa ra, kúnsëhté sun-Koo. 6Malaaka yi paana ya kúrú loolli paana ya ra ɗúhúté Faam fi gaana ; wa ɓekuu búuɓ naaˈ peyeɓ, ƴi yugusuu píisí kofeelte, pokuute geñu úrís kinoh yi wa. 7Mbínéef yínë di mbínéeffí iniilla yeɗte malaaka yi paana ya guluŋŋi úríssí paana ya túm neeɓi Koope ra níi líiffé, Koope fa na pes faraah ra. 8Faam fi gaana yíppée líif a ɗúukëe, teeɓaˈi ndami Koope a doolii. Te ow mínéh haal Faam fa te ɗeefa loolli paana ya kúrú malaaka ya ra laɓeh níi gét.
16Guluŋŋi paana ya
1Filoon fi baaha, mi kelohte un ɓéyrëhté sun kolaˈ filiɓ Faam fi gaani Koope na won malaaka yi paana ya tih : « Pëyí ɗon yíin guluŋŋi paana ya túm neebi Koope ra feey fa ! »
2Malaakaa ɗéɓ ɗë payte yíinté gulii feey fa. Ɓëewë húmú lahuu tíinndëˈí raba, na jaamiyuu netli ra ɓéeɓ faanni wa lecce puulli ɓosse te misikke.
3Malaakaa tíkëh në rë payte yíinté bii kísí fë. Mulii kísí fë yíppée yíssëh, man ñif ɓúudé nen. Yii na pes kísí fë ɓéeɓ húlté.
4Malaakii éeyë fë payte yíinté gulii laah ya a culli muluɓɓa ɓéeɓ. Muluɓɓa ɓéeɓ yíssëhté ñif. 5Tígí daaha, mi kelohte un malaakaa lah sañ-sañ sun fi muluɓɓa ra na won tih :
« Ɗo fa Sela ra,
ɗo fa júɓ ɗë,
ɗo fa húmú në aaˈ,
daa fi na woteh ra,
daana daan fu wa ra ñeete waal.
6Fu onte ɓëewë han,
ɓëewë kéenɗú ñif mi ɓëewú rë,
ɓëewë kéenɗú ñif mi yonente ya ra,
fu onte wa han.
Fu on wa ñif wa hanute,
te wa yeeliyuu ri ! »
7Filoon fi baaha, mi kelohte uni kolaˈ tígë na hawruu ra na won tih :
« Ahaŋkay ɗo fi Koo-Yíkëe,
ɗo fa mín ɓéeɓ rë,
fu aattiyaˈ kaah,
te aattiyaˈu júɓpé. »
8Malaakii iniil fa yíinté gulii sun fi naˈa, naˈa onute sañ-sañ fetlohte na bërëɓ ɓëewë. 9Naˈa tampe ɓëewë tami misikke, wa na solu Koope fa na cépíɗ loolla a sañ-sañi ra. Ɓëewë kaaˈuute lof pesaɗ, kaaˈuute kañi Koope.
10Malaakii iip fa yíinté gulii sun fi ñaani nguur ki raba, nguur ki yíppée ñúus túɗ. Ɓëewë na pataaƴuu misik, 11wa na solu Koope fa sun di misiga homuu wa a puulla faanni wa ra, wa kaaˈuute súugëh pagaɗɗi ɓossi wa.
12Malaakii pëenë fë yíinté gulii filiɓ laahi gaana na wonuu Efarat ra, mulaa filiɓ síiñcé, heliɗ buurra koluu púlëen naˈ ra waal. 13Filoon fi baaha, mi otte yébítëh éeyë yí madu mbook nen : yínë ɗúhté në ɓúk niŋkinaŋka fa, kay ɗúhté ɓúk raba, lahte bi ɗúhëˈ ɓúk yonentii paɗɗah fa. 14Wa yébítëh yí Seytaane daa wol wa, ƴi na hoñuu paŋ kimtaan. Wa na payu buurra feey fa ɓéeɓ, négírée wë nda wa waaƴ haaˈa nay lahe bisi gaani Koope fa mín ɓéeɓ rë.
15Yíkëe won tih : « Síkírée, soˈ may ac mi beetti ron ti lohoh nen ! Ɓëyí neeˈay, yeffe búubí kaaˈ biti tílëˈ faan holoŋ toñeh ay sopee, ɓëyí baa lahte sos-keeñ. »
16Ɗaaha, yébítëh yë négírúuté buurra ílíƴ, tígë në wonuu Armagedoŋ ra di ébrë.
17Malaakii paana fa hasalte gulii sun, un ɓéyrëhté sun ɗúhëˈ Faam fi gaana, kolaˈ ñaani nguur ka won tih : « Iña ɓéeɓ paamaˈte ! » 18Tígí daaha, héléƴƴë a i un a pilliŋŋa ñéerëˈté a hégíƴëhí feey fi misikke takke. Hégíƴëhí feey fa misikke misigi fí yúhté biti lëhírëy henaˈ ow pot ëldúnë níi a baaha. 19Gini gaana lecsaˈte éeyë, ginni heetta feey fa ɓéeɓ bëppé. Koope halay Babilon, Babilon fi gaana : ɗi hëndíɗté rí në gulii, gulii neebi misigi ! 20Ginna hom filiɓ kísí fë rë ɓéeɓ sooƴce, ow mínléh olil daŋ. 21Ɗiŋŋi galaassi gúussé kolaˈte sun na toɓ sun fi ɓëewë. Ɓëewë na solu Koope di yee na toɓaˈ ri ɗiŋ galaas ra, ndah yee lah ra misikke níi misik.
17Tílëhí gaana
1Filoon fi baaha, malaaka di malaaka ya habu guluŋŋi paana ya yaˈ yi wa ra acce won soˈ tih : « Aye mi teeɓ ɗo daana na saañ keene sun fi ɓelii tílëhí gaana ra, daa ri gini gaana hom ɓúk laah yi caakka ra. 2Buurra feey fa fanuute a ri, te ɓëewë hanute na gulii njaaliyohi níi maniyute. »
3Ruuh-Peseŋ haalte soˈ, malaakaa yíppée sëe kúɗ luufin. Ɗee a ɗeh, mi otte ow ɓeleɓ yaagohte raɓ luum cuƴ bi faana ɓéeɓ bíníyú tii yi soluu Koope. Raba kúɗté af paana a wic sabboo. 4Ɓelaa ɓekoh yéré yi kofeelte ot, luum cuƴ, pokohte takkaay úrís a jamaa, a feme. Ɗi hampe guluŋ úrís yaˈi, bi líiffé pagaɗ ɓos, a sobii njaaliyohi. 5Tiyi léehúu léehëe bíníyúté púgë. Tiya daa ri beh : « Babilon fi gaana, yaafi tílëh yë a iñi ɓossa feey fa. » 6Mi otte biti ɓelaa han ñif mi ɓëewí Koope níi ɗi manite, ñif mi ɓëewë hawu húl af yee seedeyuu wa Yéesú rë.
Olaˈ mi di man ɗi, af soˈ kúnëhté. 7Malaakaa won soˈ tígí daaha tih : « Afu kúnëh yi ɗeeha ? Síkírëh sëˈ, may roo teeɓ iti fi ɓelii beh, a iti fi raba kúɗ ɗí, lahaˈ affi paana ya a wicci sabboo ya ra. 8Raba ot fu bee ra húmú yéelíɗ, ndaa ri peslay. Ɗi leŋ ɗúhé ngaara mi nuŋa, ndaa ɗi saañ saŋkuye saŋkuyo. Te ɓëewë feey fa tii yi wa íníh téerëe bíníyú tii yi ɓëewë nay haale pesa na ɗúméh rë dalaˈte dalaani pesa ra, wa fi ƴaa nay éemé biti wa ot raba. Ndée nagajek, raba húmú yéelíɗ, ndaa peslay, te ri ay nimil pes kéy.
9« Tígí dee nék, meelaˈ ñaañ a hereñ : affi paana ya daa daŋŋi paana ya took ɓelaa ra. Wa buur paana ɓal. 10Filiɓ fi buurri paana ya, iippa keenute, lahte bi líssí took, paana fa aay doom ; te ri ac ɗaa, toogi ii maañ. 11Raba húmú yéelíɗ te peslay ra, ɗi fi baaha daa ri buuri peeye fa ; ɗi non buurri paana ya ɓal te ri saañ saŋkuye saŋkuyo.
12« Wicci sabboo ya ot fu ra, wa buur sabboo yi tookuy nguur doom, ndaa wa ay yeru sañ-sañi tookuun wa a raba nguur ka níi hen wahtu. 13Yee níɓú wë rë ɓéeɓ yínë : wa yeɗ doole yi wa a sañ-saññi wa raba. 14Wa ay yejoh Har fa haaˈ, ndaa ɗi ay waa ɓaŋ ndah daa ri Yíkëe fë lukki gaan ɗa, daa ri Buuri buurra ; ɗi ay ñéerée a ɓëewë ɗi tanis wa dëekké wë rë, ɓëewë gémú rí rë, ɗi ɓaŋ wa. »
15Malaakaa wonil soˈ tih : « Mulaa ot fu ƴee ra, tígë took ɓelii tílëhë rë, wa i heet, wa dúukël i ow, wa i gin a i wonaɗ. 16Wicci sabboo ya ot fu ra nék a raba, ay míllëˈ kaaˈ ɓelii tílëhë : wa ay ɓeɓ iña lahaˈ ri ra ɓéeɓ níi lukaˈ yéré yë ɗi hen faan holoŋ, wa ñam ɗi, wa tam caan fa kíi. 17Koope daa soɗ wa nufi paguun wa yee fahaˈ ri ra : wa négírëˈ sañ-sañi nguur ki wa légéyíɗ raba níi yee won Koope ra lah.
18« Ɓelaa ot fu ra nék, daa ri gini gaana ílíf buurra feey fa ra. »
18Looli Babilon
1Filoon fi baaha, mi otte malaaka kay kolaˈ sun na cép feey. Ɗi lahte sañ-sañ gaan te ndami hawaante feey fa ɓéeɓ. 2Ɗi ɓéyíɗté uni sun won tih : « Babilon ɗakaƴaˈte ! Babilon fi gaana ɗakaƴaˈte ! Ɗi tas gin yébítëh leegi, ɗi tas ɗapaa yébítëh, ɗi tas gin ƴakki ɓossa wúníh hawiɗ ɗa, ɗi tas gin raɓɓi ɓossa wúníh hawiɗ ɗa. 3Ginna ɓéeɓ hanute na gulii njaaliyohi misiga homaˈ ri ra : buurra feey fa fanuute a ri te yiikoh ya líifrúté nafa yi wa, af biti ɓëewë míníh doyloh neɓ. »
4Mi keliilte un kolaˈte sun won tih : « Ɗúhí gina, ɗon fa henu heedi soˈ ra, toñeh ɗon ay bakaare ti wa nen, loolla na ac ɗa laɓ ɗon na. 5Bakaaɗɗi caak caako níi lahte sun, te Koope halay pagaɗɗi ɓossi. 6Yínlí rí iña paŋ ɗi ɓëewí kayya ra, yínlí rí wë ana. Éfí rí guluŋ líifíɗ, éfí rí hani luk ƴee yeɗ ɗi ɓëewí kayya ra ɗah ana, ɗon yeɗ ɗi han. 7Tíkí rí coono, ɗon tík ɗí súfúñ ti di húmú lahuu wa neɓ a ndam, ndah ɗi húmú won nufi tih : “Soˈ mi buur. Soˈ mi jëtíɗ neh te mii mëssí yúh luuy.” 8Yii baa daa tah loolla waaƴɗu ri ra ay keenee sun fi waal yínë : jérí misikke, luuy a yaaɓ ; ɗi tam níi muuy. Koo-Yíkëe fë aattiyaˈ ri ra gaante doole. »
9Buurra feey fa ñéerúu a ri njaaliyoh a yin neɓ ra ay looy, te wa ay hawoh biti wa séen ɗúukëe biti gina tame. 10Wa ay tíit níi wa caŋ, wa wuloh af yee kat gina ra, wa wone tih :
« Wëey looli yaafi !
Looli yaafi kan taan !
Wahtaa yíníi baa kut,
Babilon, ɗi fi gini gaana aattiyuute haat ! »
11Tígí daaha, yiikoh ya feey fa na looyu na capituu ɓal ndah ow lomlay iña na yaayu wa ra : 12tiiŋŋi úríssë, tiiŋŋi hélíssë, jamaa ya a feme ya ; píissí kofeella, cúuppë a píissí suwaa ya ; kilikki heeñce, barngalli kofeelte, përëmmë, tiiŋŋa, iñi yugusuu a luk caaˈ, a laˈ yi marbe ya ; 13liiɓɓi kilikki heeñce, laakkoloñña, cuuraayya a iñi heeñlaa ya ɓéeɓ ; hanna, dúuléennë, múnnë a bele ya ; fañnja a harra, pëníssë a sareetta ; ñaamma a ɓëewë habu ra ɓéeɓ, ow lomlay wa. 14Ay wonu tih : « Iña na yaakaar gina koon ra ɓéeɓ sooƴce teempe ɗaaha. Ɗi ñakke alal mi a iñi wunni ɓéeɓ te ri wocce oli wa taˈ ! » 15Yiikoh ya na húmú yaayu te caakuu yin daaha ra ay tíit níi wa caŋ, wa wuloh af yee kat gina ra. Wa ay looy wa capitoh 16wone tih :
« Wëey looli yaafi !
Looli yaafi kan taan !
Ɗi fi gini gaana húmú ɓekaˈ
búuɓɓí yugusuu píisí kofeelte, a cúup luum cuƴ,
pokoh takkaay úrís, laˈi na miriñ, a feme,
17wahtaa yíníi baa kut
alal mi ƴaa ɓéeɓ hente dureet ! »
Ɓëewë në kúrú gaalli gaanna kísí fë rë a ɓëewë sayu ɓaaɓ homu filiɓ ra ɓéeɓ, ƴee na légéyú filiɓ a ƴee na légéyú kísí rë ɓéeɓ cagute, wuluute 18bee séenúu wë ɗúukëe gina na tam ra, na fogu wonu tih : « Gini teemmaˈ gini bee gaan lëhírëy kan ! » 19Wa homute na túmú affi wa feey, na looyu, na capituu, na fogu wonu tih :
« Wëey looli yaafi !
Looli yaafi kan taan !
Moo yíkëe yí gaalla kísí fë
caakuu yin gini gaana ee !
Wahtaa yíníi baa kut
gin hente dureet ! »
20« Këlíi ɗon bíƴëh ɗon fa sun, yaha yah gini gaana ra ! Bíƴíi ɗon fi ɓëewí Koope, bíƴíi ɗon fi apootarra a yonente ya, ndah Koope daa aattiyaˈ ri di iñi ɓossa paŋ ri ɗon ra ! »
21Tígí daaha, lahte malaakii mitte, ɓeɓpe laˈ gaan bette filiɓ kísí fë na won tih : « Ɗee keenaˈ laˈi bee filiɓ mulaa ra, ɗo fi Babilon fi gini gaana fay henee ɗaaha júmmúƴ, te ow ii roo ollil taˈ.
22Un koraa yi na típ, un ƴeekoh,
un kiis a un kúlúɓ,
ow wocce waa keloh ɗoo na taˈ ;
ɓëyí hereñce yugus yin
a di mín ɗíi hen ɓéeɓ,
ow wocce rii ot ɗoo na taˈ ;
un kuɗ wocutee keloh ɗoo na taˈ.
23Lampa wocce niiñ ɗoo na taˈ ;
ƴeekaa kílëek wocutee keloh ɗoo na taˈ,
ndah yiikoh yu
daa húmú lukuu lah tii ëldúnë,
te pagaɗɗi ɓonnu
kúrëelëhté heetta ɓéeɓ.
24Ñif mi yonente ya,
ƴi ɓëewí Koope
a ƴi ɓëewë hawu feey fa ra ɓéeɓ
keenaˈ yaˈ yu. »
19Alleeluyaa !
1Filoon fi baaha, mi kelohte uni ɓéyrëhté man un dúukël i ow nen, kolaˈ sun-Koo na won tih :
« Alleeluyaa19.1 Alleeluyaa wonaɗ ébrë. Iti fi daa ri : njëeɓí Yahwee. !
Koope fi yen daa na sëmlëˈ,
daa ri yeeliyoh ndam,
daa ri yeeliyoh doole !
2Aattiyaˈi kaah !
Aattiyaˈi júɓpé !
Ɗi keente sun fi ɓelii tílëhí gaana,
ɓelii tílëhí gaana na húmú yah ɓëewë feey fa ra,
na húmú yah ɓëewë feey fa a njaaliyoh yi ra ;
ɗi yíllíɗté súrgë yí,
yíllíɗté wë ñif mee ke wa keen ɗa. »
3Una tíkëetté won tih :
« Alleeluyaa !
Ɗúukíi gini gaana kolohte !
Ɗúukíi gini gaana tamu ra kolohte faw ! »
4Ɓaha yi sabay ana a iniilla (24) a mbínéeffí iniilla ƴekute na jaamiyuu Koope fa took ñaani nguur ka ra, na wonu tih : « Ɗémíin ! Alleeluyaa ! »
5Tígí daaha, un ɗofohte ñaani nguur ka na won tih :
« Njëeɓí Koope fi yen ɗon fi súrgë yí ɓéeɓ ;
njëeɓí rí, ɗon fa neehu ri ra !
Njëeɓí rí, baadoole neh ow gaan neh ! »
6Mi henil ɗeh, mi keliilte un man un dúukël i ow nen. Una man di na laɓaˈ mboowaanna kísí fë nen, man di na tiilaˈ piilliŋ nen, na won tih :
« Alleeluyaa !
Koo-Yíkëe fí yen fa mín ɓéeɓ rë
cëgíɗté nguur ki !
7Yen lahun sos-keeñ
yen bíƴëh,
yen kañ ɗí
ndah kílëegí Har fa lahte
te ɓelaa caŋke na seh,
8onute biti ɗi ɓekoh yéré,
ɓekoh yéré yí ɗíisúu píisí kofeelte,
ɗíisúu píisí na miriñ-miriñ,
ɗíisúu píis naaˈ peyeɓ, hente peseŋ. »
(Píisí kofeeli baa teeɓaˈ iñi júɓɓë pagu ɓëewí Koope ra.)
9Filoon fi baaha, malaakaa won soˈ tih : « Bíníyé yii beh : lahute sos-keeñ ɓëewë gapu ñami kílëegí Har fa ra. » Ɗi tíkké won tih : « Unni ƴaa Unni Koope sah-sah ! »
10Mi yeɗɗohte kotta ma na saañ jaamiyohi, ndaa ɗi won soˈ tih : « Bëyít ! Ngana paŋ ɗi ! Soˈ mi súrgë ti ɗo a koy-yaayyee ke ro filiɓ ngémë nen, ƴee na seedeyu unni Yéesú rë. Fu waɗti jaamiyaa Koope kep, ndah iña seede Yéesú rë daa ɓaat yonente ya nuf. »
Ɓëeˈ yaagoh pënís fí naaˈa ra
11Filoon fi baaha, mi otte sun-Koo kúnsëhté, pënís naaˈ feeñiyohte. Ɓëeˈ yaagoh ri ra wonuu Ɓëyí-mit-wëelíyëh a Kaah ; ɗi aattiyaˈ júɓ, te júɓ daa tah ɗi na haaˈ. 12Íllë na ñah ti kíi nen, afa ɓéeɓ baane-buur ! Tiyi daa ri yúh rí kut bíníyúté faana. 13Ɗi ɓekohte paltii líiffé a ñif ; ɗi hínú : « Un Koope ». 14Jammbaarra sun-Koo ɓekuute yéré yí ɗíisúu a píisí kofeelte, naaˈ peyeɓ hente peseŋ, yaaguute pënís naaˈ, ñeyute tala. 15Jépílí kaañce na ɗúh ɓúgë, jépílë nay laɓe ginna ra. Ɗi ay waa kúɗ kúrí híinté, ɗi lopot wa ti reseñi lopotuu ndoŋi neeɓi misigi Koope fa mín ɓéeɓ rë nen. 16Yii bee daa bíníyú sun fi paltii a koti : « Buuri buurra a Yíkëe fë lukki gaan ɗa. »
17Filoon fi baaha, mi otte malaaka caŋke naˈa, ɓéyíɗté uni sun dëekké ƴakka na njuŋkaanu sun-Koo ra won wa tih : « Ëyí ɗon teeˈaˈ ñami ndaje mi Koope ! 18Ëyí ɗon ñam boˈ yi soldaarra, ƴi kélfë yí wë a ƴi buurra ; ëyí ɗon ñam boˈ yi pëníssë a ƴi yíkëe yí wë, boˈ yi ɓëewë ɓéeɓ : bi lahaˈ afi a ƴi ñaamma, ƴi baadoole ya a ƴi ɓëewí gaanna ɓéeɓ. »
19Mi henil ɗeh, mi otte raba, buurra feey fa a soldaarri wa teeˈuute, ay yejee ɓëeˈ yaagoh pënís fí naaˈa a soldaarri ra haaˈ. 20Tígí daaha, raba a yonentii paɗɗah fa habute. Yonentii paɗɗah fi baa daa paŋ kimtaana fíi raba, múuƴɗí ɓëewë kúrú ñaasi raba faanni wa, na húmú jaamiyuu netli ra. Raba a yonentii paɗɗah fa betute filiɓ laahi gélë yéelíɗ. 21Soldaarri wa ɓéeɓ hawute a jépílë ɗúh ɓúk ɓëeˈ yaagoh pënís fí naaˈa ra, ƴakka ɓéeɓ ñamute boˈ yi wa níi beniyute.
20Kíillí júnní (1.000) yí nguur ka
1Filoon fi baaha, mi otte malaaka kolaˈte sun na cép feey. Ɗi hampe céebíi ngaara mi nuŋa a níh tiiŋki gúussé yaˈi. 2Ɗi hampe niŋkinaŋka fa, goŋ fee kíilë, tuumaloha daa Seytaane ra, pokalsaˈte ri yuliɗte ri kíil júnní fíi (1.000). 3Malaakaa bette ri ngaara ma, kúnté rí, téƴcé a céebí, leewte sun nda ri ɓanti bet heetta níi kíillí júnní (1.000) yë mit. Bín fë rëe, ɗi pëkísú yeɗɗu ƴutuuɗ.
4Filoon fi baaha, mi otte i ñaan nguur. Ɓëewë tooku na ra onute sañ-sañ aattiyaˈ. Mi otte coonaa yi ɓëewë húmú hawu húl di yee húmú seedeyuu wa Yéesú rë, a di yee na húmú waariyuu wa Unni Koope ra. Daa wa ɓëewë húmú jaamiyuuy raba a netli ra, ɓëewë húmú kúrúy ñaasi raba púkkí wë mbée yaˈ yi wa ra. Ɓëewí ƴaa daa nimilu na pesu, tookute a Kiristaa nguur ka, na suu kíil júnní (1.000) fíi. 5Ƴaa daa ɓëewë ɗéɓúu koloh ɓúudé rë. Ɓëewí kayya húlú rë nék ii koloh dee níi kíil júnní (1.000) fíi. 6Lahute sos-keeñ ɓëewë ɗéɓúu koloh ɓúudé ƴaa ra ! Wa ɓëewí Koope te húlëˈí ana fa mínléh wë dara. Daa wa nay hene seeƴoh yi Koope a Kiristaa, wani Kiristaa hom nguur ka yuliɗ ɗi kíil júnní (1.000) fíi.
Daani Seytaane
7Kíillí júnní (1.000) yë gét ɗëe, Seytaane ay yeɗɗu ɗúh ngaara mi nuŋa, 8ɗi saañ nofee heetta ginna ɓéeɓ, ginna na wonuu Gok a Magok ra. Ɗi négírëˈ wë wa caak níi ti peppi feey fa kísí nen, wa saañ haaˈ. 9Wa hasluute filiɓ gina ɓéeɓ, wa gíiwúté tígë homu ɓëewí Koope ra, gina fahaˈ Koope ra, ndaa lahte kíi kí kolaˈ sun-Koo, muuyilte wa. 10Te Seytaanaa nofaˈ wa ra betute laahi gélë, tígë hom raba a yonentii paɗɗah fa ra. Wa ay home daaha wa pítípée misik kíi kë, naˈ a elek níi kiri fi kirih.
Bis-këem
11Filoon fi baaha, mi otte ñaan-nguur naaˈ gaan, a ɓëeˈ took sun ɗa. Feey fa a sun-Koo yípútée hegoh, wuluute ri, te ow ollilay wa. 12Mi henil ɗeh, mi ot ɓëewí gaanna a baadoole ya húlú rë ɓéeɓ cagute fíi ñaana, lahte téeré yí kúnsúté. Lahaatte téeríi kúnsúté kay, daa ri téerëe bíníyú tii yi ɓëewë nay haale pesa na ɗúméh rë. Ɓëewë húlú rë aattiyuu di iña pagu wa ra ti ɗee bíníyúu rí téeré yí ƴaa ra nen. 13Kísí fë hokke ɓúudé yë filiɓ fi, kúl kë a gin ɓëewë húlú rë kúrúté ƴi wa ɓal, ow fi ow waa na ɓéeɓ aattiyuu iña paŋ ɗi ra. 14Tígí daaha, kúl kë a gin ɓëewë húlú rë betute filiɓ laahi kíi kë. Laahi baaha nék daa húlëˈí ana fa. 15Ɓëyí tiyi homay téerëe bíníyú tii yi ɓëewë nay haale pesa na ɗúméh rë ɓéeɓ betute filiɓ laahi kíi kë.
21Ëldúnë fi hasa
1Filoon fi baaha, mi ot feey has a sun-Koo has. Feey fa ɗéɓ ɗë a sun-Koo fa ɗéɓ ɗë sooƴce, kísí fë múkké në ɓal. 2Mi hen ɗeh, mi otte gini selaa, Yerusalem fi hasa kolaˈte sun na cép feey. Koope daa wol ri. Ɗi man kílëegë yugusoh níi wunte baa saañ téebílëhí ƴaali ra nen. 3Mi kelohte un ɓéyrëhté sun kolaˈ ñaani nguur ka won tih : « Ëlí kan ! Koope dék filiɓ fi ɓëewë leegi ! Ɗi ay déké a ɓëewë, wa hen ɓëewí. Ɗi fi Koope ay déké waa na, ɗi hen Koope fi wa. 4Ɗi ay moos muun ma íllí wë ɓéeɓ : húl wocce, luuy ɗúmpé ; hawoh wocce, misik ɗúmpé. Iña ɗéɓ ɗë ɓéeɓ ɗúmpé ! »
5Tígí daaha, ɓëeˈ took ñaana ra won tih : « Olsee, mi yugusse iña ɓéeɓ hente has. » Ɗi antee tík won soˈ tih : « Bíníyé yii bah, ndah unni ƴaa wëerté te wa kaah. » 6Ɗi tíkílté won soˈ tih : « Iña ɓéeɓ paamaˈte ! Daa mi Alfaa daa mi Omegaa21.6 Daa mi Alfaa daa mi Omegaa :Alfaa daa koy una ɗéɓ di gerek ra, omegaa daa míllëˈ., daa mi dalaana daa mi lúsëenë. Ɓëyí fí sifiraˈ han, may rii on ɗi han di culi mulaa na onaˈ pesa na ɗúméh rë, te mi sehay na yin. 7Ɓëewë nay ɓage ra ay liil waafi baa soo na ; te may hen Koope fi wa, wa hen koyyi soˈ. 8Neehoh ya nék, ƴee gémúy Yéesú rë, pagoh yi iñi ɓossa, bëemëh yí ɓëewë, ƴee na pagu yii tappe njaaliyoh ɓéeɓ ɗë, luunna, ɓëy yúullë a feloh ya ɓéeɓ ay míllée laahi gélë daa húlëˈí ana fa ra. »
Yerusalem fi hasa
9Filoon fi baaha, malaaka di malaaka yi paana ya habu guluŋŋi paana ya líif a loolli paana ya míllëˈ rë acce won soˈ tih : « Aye mi teeɓ ɗo kílëegë, kílëegí Har fa. »
10Ruuh-Peseŋ haalte soˈ, malaakaa kúɗté sëˈ jibi daŋi utte, teeɓpe soˈ gini selaa, Yerusalem fi hasa Koope wol ri, kolaˈ sun na cép rë. 11Gina na ñah a ndami Koope ti laˈi na miriñ nen ; ɗi heleŋ ti pilaatu nen, na tak wiriñ wiriñ ti jamaa hilil nen. 12Ɗi wërúté a míirí udi lahaˈ íl sabboo a íl ana yi malaaka sabboo a malaaka ana daa na wohu wa. Sun fi íllë bíníyú tii yi talli sabboo a ana yi ɓëy Israyel. 13Íllë ɗúhrúu ɗeh míirë : íl éeyë hompe waal púlëen naˈ, íl éeyë hompe waal ƴuuŋ, íl éeyë hompe waal haalaan naˈ, íl éeyë hompe waal feey-feey. 14Míirí gina tíkëh sun laˈ sabboo a laˈ ana yi tii yi apootarri sabboo a apootarri ana yi Har fa daa bíníyú në.
15Malaakaa na won soo na ra hampe duuɗ úrís, bi ay natuu gina, míirë a íllë. 16Gina koñ-kaare, utaa fa a hagaa ka daa teyu. Malaakaa yampe na nat gina a duuda : utaa fa hente estaat21.16 estaat :Ɗi húmú nataa. Estaat yínë waɗti hena ganjarma jaak tíméer ana (200). júnní sabboo a estaat júnní ana (12.000), hagaa ka ɗaaha, cagaa ka ɗaaha ɓal. 17Ɗi ɓeyaatte duuda natte míirë ɓal : utaa ka hente suŋ tíméer a suŋ sabay iniil a suŋ iniil (144). Ɗi nataˈ ɗaaha ti di na nataˈ ow nen. 18Míirí gina taɓahuu a jamaa, gina taɓahuu a úrís kah-kah, heleŋ ti pilaatu nen. 19Yii hente laˈi wunte te kofeelte rek daa wunaaluu ílíƴƴë yípëh míirí gina ra : bee ɗéɓ ɗë jamaa hilil ; ana fa man sun-Koo nen, wonuu safiir ; éeyë fë hilil, wonuu kalseduwaan ; iniil fa hilil na tak, wonuu émërëet ; 20iip fa luum, wonuu sardonikse ; pëenë fë luum cuƴ, wonuu sarduwaan ; paana fa mbaasaan ti tutaaɓ nen, wonuu kirisolit ; peeye fa hilili tappe búlëh ti kísí nen, wonuu béríl ; payniil fa mbaasaan ti tutaaɓ nen, wonuu topaas ; sabboo fa hilil, wonuu kirisoparaas ; sabboo a yínë fë búlëh, wonuu yasente ; sabboo a ana fa luum luumaɗ feey tagu, wonuu ametiste21.20 Kúlëerrí laˈ ya bíníyú dee ra, fun oluu wa ɗeeha, ndaa ɗee man laˈ ya ra tasaˈte lan af.. 21Íllí sabboo a ana ya, wa i koy suumi. Íl fí íl ɓéeɓ yugusuu koy suumi yínë kut. Këemí gina nék yugusuu úrís kah-kah, heleŋ ti pilaatu nen.
22Mi olay Faam Koope gina nék, ndah ɗi fi Koo-Yíkëe daa ri Faam fa, Koope fa mín ɓéeɓ rë, ɓani Har fa. 23Gina sohlaay naˈ sohlaay céyín niiñlaa, ndah ndami Koope daa na niiñil ri te Har fa daa lampaa. 24Heetta ay tílée niiñi, te buurra feey fa ay kúɗ ndami wa gina. 25Íllí gina ay wërsée wërsëe bisa ɓéeɓ, wa ii lukki wodlu wodlo sah ndah elek wocce. 26Ndami heetta a alal mi wa ay kúrú daaha. 27Yin ii haal gini bah : yii sobete neh, ɓëyí na paŋ yin ɓos neh, ɓëyí na fel neh. Ɓëewë nay naa haale ra daa wa ƴee tii yi wa hom téerëe bíníyú tii yi ɓëewë nay haale pesa na ɗúméh rë, daa ri téeríi Har fa.
221Filoon fi baaha, malaakaa teeɓpe soˈ laahi mulaa na onaˈ pesa na ɗúméh rë, bi hente heleŋ ti pilaatu nen, kolaˈ ñaani Nguur ki Koope a Har fa, 2na hút këemí gina. Hanndal ki salli laaha, tal kilka na onaˈ pesa na ɗúméh rë hompe na, bee na límëˈ waal sabboo a waal ana kíilë rë, lahaa céyín ɓéeɓ ɗi lah koy ra. Saaffa daa na paƴ heetta. 3Alkoh wocce, ñaani Nguur ki Koope a Har fa ay home filiɓ gina, súrgë yë jaamiyee ri. 4Wa ay ot kanama, te tiyi ay bíníyú púkkí wë. 5Elek wocce, wa ii sohliil lampii nay waa niiñle, sohluuy naˈa, ndah Koo-Yíkëe ay waa niiñil, wa hom nguur ka faw.
Nimili Yéesú
6Filoon fi baaha, malaakaa won soˈ tih : « Unni ƴaa wëerté te wa kaah. Koo-Yíkëe fë në soɗ yonente ya Ruuhi ra daa wol malaakii teeɓi súrgë yí yee na saañ lahe te wulay wulay ra. »
7Yéesú won tih : « Síkíríi ! Soˈ may nimil te ii maañ ! Lahute sos-keeñ ɓëewë helu nuf unnee ke Koope filiɓ téeríi bee ra ! »
8Soˈ mi Saŋ, mi kelohte te mi otte iñƴaaha. Filoon fi bee kelaˈ mi wa mi otte wa ra nék, mi yeɗɗohte kotti malaakaa teeɓ soˈ wa ra, ma na saañ jaamiyohi, 9ndaa ɗi won soˈ tih : « Bëyít ! Ngana paŋ ɗi ! Soˈ mi súrgë ti ɗo a koy-yaayyu yonente ya, a ɓëyí fí helte nuf unna filiɓ téeríi bee ra nen. Fu waɗti jaamiyaa Koope kep ! »
10Malaakaa ɓaatte won tih : « Ngana ɗap yin unnee ke Koope filiɓ téeríi beh, ndah wahtii wa ee saañ lahe ra. 11Ɓëyí ɓosse haba paŋ yin ɓos ; ɓëyí sobete homaa a sobii ; ɓëyí júɓpé haba paŋ yin júɓ ; ɓëyí selate, súhë në. »
12Yéesú won tígí daaha tih : « Síkíríi ! Soˈ may nimil te ii maañ, mi yíníl ow fi ow ɓéeɓ yee légéy rí rë. 13Daa mi Alfaa daa mi Omegaa22.13 Daa mi Alfaa daa mi Omegaa :Alfaa daa koy una ɗéɓ di gerek ra, omegaa daa míllëˈ., daa mi ɗéɓ daa mi míllëˈ, daa mi dalaana daa mi lúsëenë. 14Lahute sos-keeñ ɓëewë na hosu búuɓɓí wë rë, wa ay mín ñam na koy kilka na onaˈ pesa na ɗúméh rë, wa ñeyaˈ íllë, wa haal filiɓ gina. 15Ɓëewí ɓossa nék : wa fi luunna, ɓëewë na njaaliyuu ra, ƴee na bëemú ow ra, ɓëy yúullë a ɓëewë fahuu fel te dékúu në rë homun ëssín.
16« Soˈ mi Yéesú, daa mi wol malaakii soˈ teeɓi ɗon fi ɓëy ílí jaŋaa iñƴeh : Soˈ mi sédí Dawit, te daa mi hula na niiñ hagaɗ ɗa. »
17Ruuh-Peseŋ a kílëegí Har fa wonu tih : « Aye ! »
Ɓëyí fí keloh uni baa rek wona : « Aye ! »
Ɓëyí fí sifiroh aya !
Ɓëyí fí fahaˈ na mulaa na onaˈ pesa na ɗúméh rë meeluy na dara !
18Soˈ mi Saŋ, mi won a ɗon, ɗon fi ɓëewë keluu Unni Koope filiɓ téeríi bee ra ɓéeɓ në : ɓëyí fí ɓaat na yin, Koope ay rii ɓaat loolla wonu filiɓ ra. 19Te ɓëyí nís në yin, Koope ay rii nísíɗ wodi di koyyi kilka na onaˈ pesa na ɗúméh rë, nísíɗ ɗí tígí di gini selaa na wonuu filiɓ téeríi bee ra.
20Ɓëeˈ won biti iñƴaa ɓéeɓ kaah ra won tih : « Mantee : Soˈ may nimil te ii maañ ! »
Ɗémíin ! Aye Yéesú-Yíkëe !
21Yéesú-Yíkëe líhë rën ɓéeɓ mal !