Téerëe bíní Saak ra
Kúnsëe
Filiɓ téeríi beh, Saak won a ɓëewë gémú Yéesú, hasluu filiɓ ëldúnë ɓéeɓ rë.
Ɗi wonte affi wa di yii leŋke ɗee na pesuu wa ra, ndaa ɗi yëedíɗté wë yin caak ɓal.
Iña bíní Saak ƴee ra mín yúun ow fi ow ɓéeɓ. Saak wonte sun fi :
- yii leŋke múñ a ɗaŋ Koope (1.2-8 ; 5.13-18),
- yii leŋke ñëkíɗ a yíkëe alal (1.9-11 ; 5.1-6),
- yii leŋke súfúñ a fíir (1.12-18),
- yii leŋke síkírëh a ñeyi Unni Koope (1.19-27),
- yii leŋke génëntélëˈ (2.1-13),
- yii leŋke ngémí teeɓuuy pagaɗ (2.14-26),
- yii leŋke ɓúk (3.1-12),
- yii leŋke ñaañ a neɓ nuf (3.13-18),
- yii leŋke iñi ëldúnë (4.1-10),
- yii leŋke heefaˈ (4.11-12),
- yii leŋke gaan-gaanloh (4.13-17),
- a yii leŋke nimili Yíkëe (5.7-11).
Ɓëyí fí jaŋi téeríi bee ɓéeɓ ay ot biti ɓëyí won biti ɗi gémpé Kiristaa waɗtee rii teeɓaˈ pagaɗɗi.
1Wodohi Saak ɓëewí Koope
1Ɗon fi talli sabboo a ana ya, ɗon fi ɓëewí Koope ya hasluu ëldúnë ɓéeɓ rë, soˈ mi Saak súrgíi Koope a Yéesú-Kiristaa Yíkëe ma na wodoh ron.
Woni Saak yii leŋke múñ
2Ɗon fi koy-yaayyi ƴeh, keeññon sosa níi sos biti ɗon ñee coono fi mín ɗíi hen ɓéeɓ, 3ndah ɗon yúhúté biti coono fi ñéerëˈ a ngém daa na kúɗ múñ. 4Te múñí baa homa ɗon na faraah raa, ɗon ay hen ɓëewí lahuy síkkë te nonute, ɗon hen ɓëewí mitute sëk. 5Ndaa nék, ƴaha biti ow di ɗon na yéeh yii paga ri raa, ɗi ɗaga, Koope ay rii teeɓ yee nay ri page ra. Koope yéwénté, na oneeh onaˈi lahay keeñi, ɗi onaˈ ɓëewë ɓéeɓ. 6Ɓëeˈ ɗaga a ngém rek, ɓanti lah nuf ana, ndée ɓëyí na lah nuf ana madaˈ a mboowaana kísí fë baa ngilaaw ma na ɓéyíɗ ɗí, na jaay ri hatinna ɓéeɓ rë nen. 7Ɓëyí baa ɓanay habaˈ biti ɗi ay lah yin Yíkëe në, 8ndah ɗi lahaˈ nuf ana. Ɗi laɓaˈ laɓoo rek.
Yii leŋke ñëkíɗ a yíkëe alal
9Ɓëyí fí hente ñëkíɗ te gémpé Yéesú, damaa ndah Koope ɓéyíɗté rí. 10Ɓëyí fí hente yíkëe alal, bíƴëe ɓal ndah Koope cépíɗté rí, ɗi ay muuy. Ɗi ay made ti capussi gaaw fa luufa nen : 11naˈa fetlee rek, gaaw fa tam, capussa yookoh, wuni teem daaha. Ti ɗaaha nen, ɓëeˈ hen yíkëe alal ra ay muuy ɗeefa ɗi takañaˈ légéyí.
Yii leŋke súfúñ a fíir
12Lahte sos-keeñ, ɓëeˈ nay home coono ɗi múñ ɗí rë ! Ɗi ham híin níi ɗi ɗúh në rëe, ɗi ay ɓeku baanii ndami pesa na ɗúméh rë, bee gap Koope ɓëewë fahuu ɗi fi Koope ra.
13Ɓëyí paŋ yin ɓos hom nufi ɓanan won biti Koope daa fíir rí, ndah ow mínéh fíir Koope te Koope na fíiréh ow. 14Yee na fíir ow ra kay, daa ri biti ɓëeˈ fahaˈ pes-neɓ níi neba hécé rí. 15Te fahaˈ pes-neɓ madaˈ loo-koy nen te límëˈ bakaaɗ, te koy ki baa hen gaan raa límëˈ húl. 16Kon ɗon fi koy-yaayyi ƴeh, ɗon fa fahaˈ mi níi fahaˈ ra, ngënë nëfíi affon. 17Yii wunte a yii ñeete waal ɓéeɓ kolaˈ sun-Koo. Wa kolaˈ Koope na, ɗi fa sak naˈa, céyín fë a hulla ra. Ɗi na lofiseeh, na laayeh níi ñúusɗé ow. 18Di coobarii, ɗi ñeyaˈte Unee ke ri daa kaaf ka ra yen límëetúté, nda yen hen ɓëewë këllúu di iña sak ri ra ɓéeɓ ti iña ɗéɓpí lecu meeyya jébëlúté Koope ra nen.
Yii leŋke síkírëh a ñeyi Un Koope
19Koy-yaayyi ƴeh, ɗon fa fahaˈ mi níi fahaˈ ra, yúhí biti ɓëyí në ɓéeɓ síkírëh waɗtee rii yooɓ. Won mbée neeɓ nék waray rii yooɓ ; 20ndah ɓëyí neeɓ, na pageh yii júɓpé fíi Koope. 21Kon, hégíi sobe a kaañ paŋ yin ɓos, ɗon cépíɗ affon, ɗon tah Una soh Koope ɗon na ra. Uni baa daa mín ɗën sëmlëˈ. 22Uni baa nék, ngënë téyí síkírëhí kut ndaa lah ñéyí në, henay bah, ɗon ay nofaˈ affon. 23Ɓëyí fí síkírëh Una te fu ñeyay na, fu madaˈ a ɓëeˈ caŋ seetaan baa na olsoh afi ra nen. 24Olsaˈ ri afi níi wocce ra, saañce yíppée hal ɗee man ɗi ra. 25Ɓëyí kúnís nuffi ɓéeɓ síkírëh Kootaa júɓ na tah ow lahaˈ afi te haleh iña keloh ri ra, pokoh na ñee na raa nék, ɓëyí baa ay lah sos-keeñ di yii paŋ ɗi ɓéeɓ.
26Ɓëyí habaˈ afi biti ɗi ɓëyí gémpé te ɗeefa ɗi mínéh ham ɓúkí, ɓëyí baa nofaˈte afi, ngémí lahay njiriñ. 27Di fíi Baap-Koo, ɓëeˈ gém kah-kah te ngémí lante ra, daa ɓëeˈ në dímlëˈ baayu ya a jëtíɗɗë súfúñ fí wë, te hampe afi yii na sobeyil ow ëldúnë rë.
2Yii leŋke génëntélëˈ
1Koy-yaayyi ƴeh, ɗon fa gémú Yéesú-Kiristaa Yíkëe fë líif a ndam ra, ngënë génëntélíi ɓëewë. 2Mín hen ɗon lah teyaˈ, lah ɓëewí ana yi ac teyaˈi baaha, ɓëyí yínëe ɓekoh supi úrís a búuɓɓí wunte, ɓëyí yínëe hen ñëkíɗ ɓekoh sif. 3Ɗon yeɗ ɓëeˈ ɓekoh búuɓɓí wunna cér ɗon won ɗi ac took paaˈ fíi, ɗon won ñëkdë caŋ dín mbée ɗon won ɗi took kotton feey raa, 4ɗeef ɗon génëntélúuté hanndal kon. Ɗon oluun ri ɗaaha raa, ɗeef baa af neh ! Te ɗon daa i wa níi sah ɗon ɓíssée ɓëewë ?
5Kon ɗon fi koy-yaayyi ƴee fahaˈ mi níi fahaˈ ra, kúnsí nuffon ɗon síkírëh ! Koope tanis ɓëewë henu ñëkíɗ ëldúnë rë nda wa lah ngémí híinté hen alal mi wa neh a ? Ɗi tanis wa ɓal nda wa haal nguur ka gap ɗi ɓëewë fahuu ɗi fi Koope ra ! 6Ndaa ɗon, ɗon heefuu ñëkíɗ heefoo. Te añcaŋ, yíkëe yí alalla daa na moklu ron, daa na tëekɗú ɗën këem. 7Wa fi yíkëe yí alalli ƴaa daa na solu tii neɓee ke Kiristaa fa ɗon teyu ɗii na ra.
8Bíníyúté Téerëe bitih : « Di fahuu ron affon, lah fëhíi moroommon ɗaaha. »2.8 Saame Tali Léwí 19.18 Ɗon ñee túuƴëˈée ké Koope Buur baa raa, ɗeef ɗon pagute yii wunte. 9Ɗon génëntélëˈ rëe nék, ɗeef ɗon bakaarute te Kootaa ay keen sun fon, ndah ɗon ñeyuy na. 10Ɓëyí ñeyay yin yínë kut di túuƴëˈ yí Kootaa, wuti ɗi ñee ƴee tas ɗa ɓéeɓ rëe sah ɗeef ɗi tooñce, daa ri biti ɗi ñeyay wa ɓéeɓ. 11Koope daa won tih : « Ngënë mësíi njaaliyoh. »2.11 Saame Kolohi koyyi Israyel Ésíp 20.14 Daa ri won ɓal tih : « Ngënë mësíi bëem ow. »2.11 Saame Kolohi koyyi Israyel Ésíp 20.13 Kon ɓëyí bëem ow, wuti ri njaaliyaay raa sah, ɗeef ɗi ñeyay Kootaa. 12Ɗon ƴahti paŋ yin mbée ɗon ƴahti won yin raa, lah hélí nuf biti Koope ay ron aattiyee Kootaa na tah ow lahaˈ afi ra. 13Ɓëyí në yérméeh, ii yérmú. Yermaande daa lukki lah solo aattiyaˈ.
Yii leŋke ngém
14Koy-yaayyi ƴeh, ow won biti ɗi gémpé te na teeɓeeh ri pagaɗɗi raa, ngémí baa lahte njiriñ a ? Ngémí baa ay rii sëmlëˈ ë ? 15Mín hen ow di koy-yaayyon filiɓ ngémë ɓekaa sif te laheh líif-loo. 16Ow di ɗon na won ɓëyí baa bitih : « Toge mbook ! Lah ɓekee níi fu wun, fu ñam níi lowu maƴ, sos siɓ ! » Ɗi won ɓëeˈ unni ƴaa te yereh ri yee waɗ ɗii na raa, woni baa ɗeef lahte njiriñ a ? 17Ti ɗaaha nen, ngémí ay teye ɓúk ii teeɓuu pagaɗ, ngémí baa lahay njiriñ, saatate.
18Heeƴce ow ay won biti lahte ɓëewí gémú Koope, lahte ƴi paguu yin wun. Yee nay mii wone ɓëyí baa ra daa ri biti rek tee : ow mínéh teeɓaˈ biti ɗi gémpé Koope te ɗeef ɗi na pageh yin wun. Iñi wunna nay rii page ra kay daa nay teeɓee biti ɗi gémpé. 19Ɗi gémëy biti Koope yínë kut woo ? Baa yii wunte, ndaa ɗi yúhë biti yébítëh yë ɓal gémúté baaha te tíitúté në níi na saaku ! 20Ɗi yúhë biti ɓal ɗi lahay af ! Caa nék mi won ɗi yee tah ngémí teeɓuuy pagaɗ lahay njiriñ ra, hém ɗi fahaˈ yúh. 21Ɗi fi ɓëyí baa nérsëe bitih : Koope habaˈ caac Abraham ɓëyí júɓpé bee tahraˈ ri ri, ɓeɓpe koohi Isaak na waaƴ jébëlí sarah sun fi tígë na hawruu ra neh a ?2.21 Saame Dalaana 22.1-1922Kon, ɓëyí baa otte biti ngémí Abraham a yii wuna paŋ ri, tahiɗte Koope ra daa ñéerëˈ, te yii baa tahte ngémí mitte sëk. 23Yee húmú bíníyú Téerëe rë lahaˈte ɗah. Húmú bíníyú Téerëe bitih : « Abraham gémpé Koope, te ngémí baa daa tah Koope habaˈte ri ɓëyí júɓpé. »2.23 Saame Dalaana 15.6 Yii baa daa tah ɗi na dëekúu kooji Koope.
24Leegi, ɗon olute biti ɓëeˈ júɓ fíi Koo ra, ɗi ɓëeˈ teyay gém kep ra, ndaa ɗi ɓëeˈ na paŋ yin wun ɗa. 25Ti ɗaaha nen, ɓelii tílëhë hínú Rahap ra, ɓekke i wolu-wolu di ɓëy Israyel faami sompe wa, ñéyíɗté wë waal kay wa heguute.2.25 Saame Yosuwe 2.1-21 Yii baa daa tah ɓal Koope habaˈ ri ɓëyí júɓpé. 26Faan lahay coonaa raa, ɗeef ɗi húlté. Ti ɗaaha nen, ngémí ñéerëey a pagaɗ wun, ngémí baa lahay njiriñ, saatate.
3Yii leŋke ɓúk
1Koy-yaayyi ƴeh, ngënë héní yëeddëh ɓéeɓ. Ɗon yúhúté biti fun fi yëeddëh yí ƴeh, aattiyaˈi fun nay luke bi ɓëewë ɓéeɓ misik te ay yooɓ. 2Yen ɓéeɓ yen na pagu yii tíkëey waal, a di mín ɗii man ɓéeɓ neh a ? Ɓëeˈ na won yii tíkëh waal faraah ra nék, ɓëyí baa ow kah-kah, te ri mín ham afi iña ɓéeɓ. 3Yen ɓekuu pënís lakaaɓ ɓúk, yen héc ɗi a daa teem ɗi ɓéeɓ hatni neɓaˈ yen ɗi ñee na neh a ? 4Ëlsíi ɓal gaalli gaanna kísí fë, ƴee yéŋké biti ngilaaw mi gaante daa na yeñ wa ra ! Añcaŋ, wa kúrúu a duuɗ ƴutuuɗ. Bina-bina waa na ɓéeɓ, ɓëeˈ në kúɗ ɗí rë hécëˈ duuda hatna neɓaˈ ri ra kep, gaala a daa teem ɗi ɓéeɓ ñee hatni baaha. 5Ti ɗaaha nen, ƴinaˈ ɓúk níi, mínëˈ won yii gaante ɗaaha.
Te ɗon yúhúté biti kíi wuti ƴin ƴin, mín tam luufa ɓéeɓ. 6Ɓúk man kíi nen kep ! Ɗi non faan, iñi ɓossa ɗúhëˈ në ti kíi kí kolaˈ safara nen, kaɗ cérrí yen, kaɗ pesi yen ɓéeɓ. 7Ow mín ílíf raɓɓa ɓéeɓ : ƴee luufa, ƴakka, fasoh fa, a raɓɓa kísí fë te daa ri yee lah ra, 8ndaa ɓúk ow mínéh ríi ílíf. Ɓúk wuneh, na hílséeh, te iña na ɗúh në rë na hawaˈ. 9Yen símúu Yíkëe Boffi yen a ɓúk, yen ƴujuu ow fa Koope daa sak ɗi ti di man ɗi fi Koope nen ra a ɓúk. 10Sím a ƴujaˈ ɓéeɓ ɗúhëˈ ɓúgë yínë. Koy-yaayyi ƴeh, yii baa waray lahaˈ ɗaaha ! 11Mulii neɓeh a mulii neɓpe na ɗúh cula yínë ë ? 12Koy-yaayyi ƴeh, tal een na lím ëlíif ë ? Tal béeñ na lím een a ? Ti ɗaaha nen, culi na ɗúhíɗ mulii neɓeh mínéh ɗúhíɗ mulii neɓpe.
Yii leŋke nufi kolaˈ Koope na
13Ɓëeˈ habaˈ afi biti ɗi ɓëyí ñaañce te neɓpe nuf ɗon na ra wa ? Ɓëyí ñaañce cépírëˈ afi cépírëe paŋ iñi wunte, pes pesi wunte. Ɗon ay teeɓee biti ɗon ñaañute ɗaaha. 14Ndaa, ƴaha biti ɗon ɓëewí pesuu eeñnjaˈ ow, fahiru affi wa kep yin wun raa, ngënë dëmíi biti ɗon ñaañute, te ngënë këeˈíi kaaf ka ! 15Ñaañadi baa kolaay Koope na, ɗi non iñi ëldúnë, ɗi pagaɗ ow kep te kolaˈ Seytaane na. 16Tígí lahte ɓëewí eeñnjuu ow, fahiru affi wa kep yin wun ra, tígí daa dara ii naa ñee waal, henay yii hente ɓos. 17Ñaañada kolaˈ Koope na ra nék, ladilaˈ keeñ ow ladiloo níi woc, ɓëeˈ lah jaamma a moroommi, ɗi sos, neɓ woniɗ, ɗi naaˈ-keeñ níi naaˈ, ɗi líif a pagaɗ wun, ɗi ɓanti génëntélëˈ ɓëewë, ɓanti hen ɓëyí në poos fíi poos filoon. 18Ɓëewë na sohu jaamma hanndal ki ɓëewë te paguu ri a jaamma ra, jaammaa sohu wa baa ra, pesi júɓpé daa nay naa púlée.
4Yii leŋke iñi ëldúnë
1Haaˈ ya a íñëˈ yë filiɓ fon haalaˈ yih ? Wa haalaˈ fahaˈi pesi nebi na woƴ faannon neh nagajek a ? 2Ɗon na fahuu lah yin ɗon lëhíh yaa, ɗon këeˈíih në sah hap ow húl. Ɗon na ɓosu íl yin ow, ɗon míníh rii lah. Hen ɗaa raa nék ɗon íñée, ɗon haaˈee filiɓ fon. Ɗon míníh lah yee fahuu ɗon ɗa, ndah ɗon ɗaguy ri Koope ! 3Te wuti ɗon ɗaŋ Koope raa sah, ɗon líilíh dara, ndah ɗee na ɗaguu ɗon ɗa etay. Ɗon ɗaguu yii nay neɓle peson kep ! 4Ɗon yégúy Koope ! Ɗon yíih biti ɓëyí pokoh iñi ëldúnë, ɓëyí baa kaaˈohi Koope a ? Kon, yúhí biti ɓëyí fí fahaˈ pokoh iñi ëldúnë, ɓëyí baa hente kaaˈohi Koope. 5Ngënë hëbíi biti iña bíníyú Téerëe rë bíníyú pëtíh ee ! Bíníyúté filiɓ Téerëe bitih : « Koope fiiraˈte yen, fiiraˈte coonaa fa ɓek ɗi yen ɗa, te fahaˈ biti yen tíkún nuffi yen ɗii na kut. » 6Ndaa kaaˈeeh biti ɗi onte yen mali mitte sëk ndée bíníyúté biti ɓal : « Koope ñéerëey a ɓëewë na gaan-gaanluu ra, ɗi onaˈ ɓëewë cépírú affi wa ra mal. »4.6 Saame Léeh yë 3.347Kon, ñéyí yee fahaˈ Koope ra ! Hëeˈíi Seytaane, ɗi ay ron wuloh ! 8Léɓíi Koope, ɗi ay ron leɓoh ! Ɗon fi bakaaroh ya, ɓëeñnjíi bakaaɗɗon ! Ɗon fa lahuu nuf ana ra, hësí keeññon ! 9Pésí pes súfúñíɗ ! Fëgí ɗon hawoh ! Ƴennon yíssëe looy, sosi keeññon yíssëh súfúñ. 10Cépírí affon fíi Yíkëe, ɗi ay ron ɓéyíɗ.
Yii leŋke heefaˈ
11Koy-yaayyi ƴeh, ngënë wënëntíi ɓos sun fon. Ɓëyí won ɓos sun fi moroomi mbée heef ri, ɗeef ɗi won ɓosa sun fi kootii Koope te ri heef Kootaa. Ɓëyí heef Kootaa nék, ɗeef ɗi aattiyaˈ ri aattiyoo, ɗi ñeyay yee won Kootaa ra. 12Koope kut daa yeraˈ Kootaa, Koope kut daa na aattiyaˈ, Koope kut daa mín sëmlëˈ ow, Koope kut daa mín saŋku ow. Ɗon fa na heefu moroommon ƴaa ra nék, ɗon homuu biti daa ron i wah sah ?
Yii leŋke gaan-gaanloh
13Leegi nék, síkíríi sëˈ ɗon fa na wonu biti woteh mbée kéy, ɗon ay pay gini man naŋam, ɗon baana-baana dín fë níi hen kíil, ɗon lah hélíis ɗë. 14Ɗon yúhú yin kéy fën ë ? Ɗon yíih biti peson man maal nen kep a ? Maal lahaˈ wahtu ɗee rek, ɗi yíppí gét. 15Ɗon kay, ɗon waɗti wonun biti ɗon ay pes, ɗon paŋ yii man naŋam, hém neɓaˈ Yíkëe. 16Ndaa, tígë homuu ɗon bee ra, ɗon tasuu gaan-gaanloh gaan-gaanloo a wonni dëmíiɗɗë ɗon na, te gaan-gaanloh ti ɗaa nen wuneh. 17Kon ɓëyí yúh yii wunte te pageh ri, ɗeef ɗi bakaaɗte.
5Saak a yíkëe yí alalla
1Leegi nék, ɗon fi yíkëe yí alalla síkíríi sëˈ ! Fëgí, ɗon hawoh ndah súfúñ fë nay keene sun fon ɗa ! 2Alal mon yahte, búuɓɓën maasse, 3úríssën a tiiŋŋi hélíissën homaakke te homaagi baa daa teeɓaˈ biti ɗon homuy kaah te ri ay ron saŋku ti di na muuylaˈ kíi gaawa nen. Ɗon homute ɗon na garu alal, te ëldúnë túkkíté níi wocce. 4Ɗon kaaˈuute yínlí ɓëewë légéyírú rën meeyyon ɗa, te hélsë warun ɗon waa yíníl koon ɗa daa teeɓaˈ níi lante biti ɗon homuy kaah. Ɓëewë légéyírú rën ƴaa ra fogute, te Koo-Yíkëe Kélfíi gaana kelohte wa. 5Ɗon pesuu caaklaˈ a neɓ feey fi beh, ɗon na yefaluu ti júrí suu hawu hawo nen. 6Ɗon daanute ɓëewí júɓúté, ɗon hawute wa húl te wa hécëntúuy a ɗon.
Yii leŋke nimili Yíkëe
7Koy-yaayyi ƴeh, lah híinndíi níi yiin nimili Yíkëe. Ɗon olute ɗee na híinndëˈ línëh sehe iña nay rii lece meeyi ra maan ? Te añcaŋ, ɗi ay seh mulaa nay ɗéɓée tap Koo feey níi ƴee nay míllée rë paaƴ, ɗi anti lec. 8Kon ɗon fi ƴaa ɓal, lah mújí ɗon ham híin, nimili Yíkëe wullilay.
9Ɗon fi koy-yaayyi ƴeh, ngënë cëpítíi hanndal kon toñeh Koope ay ron daane. Aattiyoha aa saañ haale ra aa sah faf ! 10Koy-yaayyi ƴeh, yonente ya na húmú wonu di tii Koo-Yíkëe rë deƴute coono ndaa mújúté. Kon, lah mëdí ti wa nen. 11Ɗon yúhúté biti ɓëewë në mújú coono yi wa ra, yen dëekúu wë « sos-keeññi ƴeh ». Ɗon keluute ɗee mújëˈ Yop coono fi ra a tígë míllúu ɓani Koo-Yíkëe rë maan ? Ɗon olute ɗee naaˈaˈ Koo-Yíkëe keeñ a ɗee baahaˈ ri ra maan5.11 Saame Téeríi Yop : Yop húmú ɓëyí caakke alal. Koope yerisse Seytaane na yakka alal mi, happe koyya níi iña lahaˈ ri ra ɓéeɓ ɗúmpé tak, antee tík soɗte ri jérí misikke, faana ɓéeɓ paasse. Ndaa taheh ɗi yeris ngémí, hampe Koope na híin níi míllëˈ lah sos-keeñ. ?
12Koy-yaayyi ƴeh, yee lukki lah solo ra nék daa ri bitih : ngënë ëñíi ! Ngënë ëñíi níi ɗon cap sun-Koo mbée feey fi beh. Ƴaha biti ɗon ay wone « íi » rëe, wëní « íi » kut ɗon teem daaha. Ƴaha biti ɗon ay wone « ëe-ëeˈ » rëe, wëní « ëe-ëeˈ » kut ɗon teem daaha. Ngënë ëñíi añohi mín ɗíi man ɓéeɓ ! Hen ɗaa raa, ɗon ii daanu fayu.
13Ɓëeˈ hom coono ɗon na ra ɗaga ! Ɓëeˈ lah sos-keeñ ɗon na ra laɓɗa Koope kañaa ! 14Ɓëeˈ jér ɗon na ra dëekrëe njíittí jaŋaa, wa leef ɗi díw di tii Yíkëe, ɗagiɗ ɗi. 15Ɗaŋi mannaˈ ɗah, ñéerée a ngém rek sëmlée jérdë, Yíkëe cëgíɗ ɗí cot. Ƴaha biti ɗi bakaaɗte raa, Koo-Yíkëe baal ri. 16Kon, wëní bakaaɗɗon hanndal kon, ɗon ɗagirantaˈ ndín, ɗon wah këlëŋ. Ɗaŋi ɓëyí júɓpé hom lahaˈ doole. 17Éelí húmú ow ti yen nen ndaa ɗagaˈ ri biti Koo ɓanti toɓ híinté ɗaŋi ra, muluɓ taway feey fa níi hente kíil éeyë a caan. 18Filoon fi baaha ɗi ɗaŋke biti Koo dalaat toɓ, bacala lasse, gañcaha paalte níi meeyya nonte.
19Koy-yaayyi ƴeh, ow di ɗon na hel waali, ow kay habraˈ ri wëegísíɗ ɗí kaaf ka raa, 20ɓëeˈ wëegísíɗ ɗí kaaf ka baa ra hela nuf biti ɓëyí habraˈ bakaaroh wëegísíɗ ɗí waala wun ɗa, ɗeef ɗi sëmlëˈté rí kúl kë te ri ay tah bakaaroha baalu bakaaɗ caak.