Téeríi éeyë fë bíní Saŋ ra
Kúnsëe (Saame : Kúnsëe 1 Saŋ)
1Wodoha
1Soˈ mi njíidí jaŋaa, daa mi na wodoh ɗo fi Gayus fa fahaˈ mi kah-kah ra. 2Kooja, daa mi na ɗagiɗ ɗo nda yii koloh fuu paŋ ɓéeɓ Koo ñéerëˈ në, faanu sos lah jaamma, ti di lahaˈ keeñu jaamma Koope na ra nen.
3Lahte i ow di koy-yaayya filiɓ ngémë ayute, ɓíllúté sëˈ ɗee habaˈ fu kaaf ka te fu pesaˈ ri ra. Keeñ soˈ sosse yii baaha níi sos. 4Lahay yii lukki sosil keeñ soˈ bee mi kelohte biti koyyi soˈ pesuu kaah toŋ ra.
Pesaˈi Gayus kaaf ka
5Kooja, fu paŋke ɓéeɓ fu hompe fa na habraˈ koy-yaayya filiɓ ngémë, níi lukaˈ ƴee fu yéeh wë rë sah. Yii baa daa teeɓaˈ biti fu gémpé. 6Wa seedeyute ɗee fahaˈ fu ow ra fíi ɓëy ílí jaŋii fun. Soˈ mi ɗaŋ ro biti fu ɓaat waa habraˈ habraˈi neɓaˈte Koope, wa lúsíɗ waali wa. 7Wa fi ƴaa nagajek, wa koluu légéyírí Yéesú-Kiristaa, kaaˈuute tah yin yaˈ ɓëyí noneh ɓëewí Koope. 8Kon waɗte yen biti yen habraˈ mani ɓëewí ƴah. Hen ɗaa raa yen ɓal, yen bok légéyë nay tahe kaaf ka ɓaatti líiwëlsëˈ rë.
Di man Joteref
9Soˈ mi kéyrëˈté ɓëy jaŋii ron un, ndaa bi fahaˈ Joteref këllëh, kaaˈaˈte kelohi woni fun fi njíittí jaŋaa. 10Mi ac daa raa, may won iñi ɓossa paŋ ɗi ra, ɗi fa na yakka tii yi yen na feliɗ yen ɗa. Teyay baaha doŋ : ɗi kaaˈaˈte koy-yaayya na waariyu ra haal faami, kaddaˈte ɓëewí kayya fahuu waa kúɗ faammi wa ra, líkké wa fi ɓëewí ƴaaha jaŋaa.
11Mantee kooja, ngana mëllëˈ pagaɗ ɓos, lah mëllée pagaɗ wun. Ɓëyí fí pagaˈ wun, non ɓëewí Koope ; ɓëyí fí pagaˈ ɓos nék yéeh Koope.
12Ɗi fi Démétíríyús nék, ɓëewë ɓéeɓ seedeyute biti ɗi pagaˈ wun, pesadi kaaf ka homaˈ ri ra sah teeɓaˈte ri. Fun fi ƴee sah fun seedeyirute ri, te fu yúhté biti fun wonuu kaah.
Takantaˈa
13Lahte iñi caakki mi mín ɗon waa won koon, ndaa daa mi fahaay waa bíní kéet. 14Mi lahte yaakaari biti leŋ mi olaat ro yen won.
15Koope ona ro jaamma ! Kooƴƴa dee na woduu ro. Wodiiɗ fun kooƴƴee ke yen daaha, ow fi ow waa na ɓéeɓ di tiyi a símíi.