Téeríi ana fa bíníyú unni kayya won Pool ɓëy Tesalonik ra
Kúnsëe
Pool daa bíní ɓëy ílí jaŋii Tesalonik unni ƴeh. Filiɓ unna, ɗi ɗéɓpí gérém Yíkëe di gémë gémú ɓëy Tesalonik ra (1.3), ɗi ɗagiɗte wa, wa ham légéyë nahu wa ra. Fu ot Pool bíní wë unni ƴeh, nísí níɓɓë na yah jaŋii Tesalonik ra. Woni ban fi nimili Kiristaa daa ɓaatti kúɗ wona filiɓ Tesalonik, ndah lahte ɓëewí wonuu biti nagajek bisi baa lahte níi gétté. Lahte ƴi wonu tih bisi baa lahay doom ndaa leɓohte. Ƴaa aa na waa na kaaˈuute légéy, ñamuu yaˈ yi ɓëewí kayya.
Ɗi wonte wa :
- yii leŋke ayi Yíkëe yiin bis-këem (1.3-10),
- yii leŋke yee nay këllée Yéesú rë (2.1-12),
- yii leŋke híinndëh, ñee waali Koope (2.13-17),
- a yii leŋke ɗee lahaˈ légéy solo ow na ra (3.6-15).
Ɓëyí fí jaŋi téeríi bee ɓéeɓ ay ot biti légéy daa wun ow na, ɓëeˈ ɓanti sehaa iñi ɓéeɓ yaˈ ow, ɗi sehaalee nimili Yíkëe.
1Wodohi Pool ɓëy Tesalonik
1Ɗon fi ɓëy ílí jaŋii Tesalonik fa nonu ɓëewí Baap-Koo a Yéesú-Kiristaa Yíkëe rë, soˈ mi Pool, funi Silaas a Timoote fun na woduu ron. 2Baap-Koo a Yéesú-Kiristaa Yíkëe líhún ron mal, on ɗon jaamma !
Ayi Yíkëe yiin bis-këem
3Koy-yaayyi ƴeh, fun míníh ɓanti dékëˈ símí Koope ndah ɗon. Fun warutee ri sím ndah ngémën ɓaatohte caak, te fahantaˈa hom hanndal kon ɗa ɓaatoh ɓaatoo na saañ. 4Yii baa daa tah ílí jaŋii pay fun ɓéeɓ, fun sawoor won ɓëewë filiɓ yii leŋke ɗon na, ndah filiɓ mokla na moklu ɗon ɗa a súfúñ fën ɓéeɓ, ɗon habute ngémën híin.
5Baa daa nay teeɓee biti aattiyaˈi Koope tíkëˈ waal, nda ɗon habuu ɓëewí Nguur ki Koope waɗte wa, nguur ka tah ɗon na súfúñú rë. 6Koope, ɗi fa júɓ ɗë ay mokil ɓëewë moklu ɗon ɗa ti di mokluu wa ɗon nen, te nagajek baa daa kaah. 7Ɗi ay hílsíɗ ɗon fa na súfúñú rë, hílsíɗ fun na ɓal. Yiin nay feeñiyee Yéesú-Yíkëe sun-Koo, ñéerëˈ a doolii malaaka yi ra, iñƴaa ay lahee na. 8Ɗi ay ayee filiɓ njaar kíi, keen sun fi ɓëewë kaaˈuu yúhí Koope, te kaaˈuute ñeyi Uni Nebi Yéesú-Yíkëe rë. 9Daana nay keene sun fi wa ra ay dékée saŋkii wa, wa wulliru tígí etaˈ Yíkëe, wulliru tígí etaˈ ndami gaani. 10Yii baa ay lahe yiin nay nimile Yíkëe rë. Yiin fi baaha, ɓëewë nonu ɗii na te gémúté ɗii na ra ɓéeɓ ɓéyíɗ ɗí, ɗi neɓaˈ wa yeel. Ɗon fi ƴaa ɗon ay none ɓëewí ƴaaha na, ndah ɗon gémúté unna komu fun ɗon ɗa.
11Yii baa daa tah fun na ɗagiru ron faraah. Fun ɗaguu Koope biti ɗi on ɗon, ɗon yeeliyoh pesa dëek ɗi ɗon ɗa. Fun ɗagu biti di doolii, ɗi habraˈ ron ɗon paŋ yee fahuu ɗon paŋ di yin wun ɗa ɓéeɓ, te ri habraˈ ron yee na pagu ɗon filiɓ ngémën ɗë. 12Ɗaaha, ɗon ɓaatti ɓéyíɗ tii Yéesú Yíkíi yen, ɗi ɓéyíɗ ɗon fi ƴaa ɓal. Ƴaa ay kolee mala nay onee Koope fi yen a Yéesú-Kiristaa Yíkëe rë.
2Yee nay këllée Yéesú rë
1Koy-yaayyi ƴeh, di yii leŋke nimili Yéesú-Kiristaa Yíkíi yen a négírëˈí yen fíyí, fun ɗagu ɗon na yin yínë : 2affon ɓanay gaawti kúnëh te ngënë tíití biti ow won ɗon biti wahtii nimili Yíkëe lahte. Wuti ow won ɗon biti ɗi léhín unni kolaˈ Koope na, mbée ɗon keloh ri ɓëewë na waariyu Unni Koope ra, mbée bíníyún bíníyë wonu biti kolaˈ fun na, ngënë gémí. 3Di mín ɗíi man ɓéeɓ, ow ɓanay ɗon nofaˈ yínë sah. Balaa bisa nay nimile Yíkëe baa ra, ow caak ay tíkëˈ Koope af paaƴ, ɓëeˈ na ñeyeh woni Koope ra, bee nay saŋkuye ra teekiroh. 4Ɓëyí baa ay ɓéyíɗ afi kaddaˈ ɓëewë haanoh ala a yii na haanuu wa merees ɓéeɓ. Ay pay níi ɗi haal Faam fi gaani Koope took, ɗi won biti daa ri Koope. 5Ɗon nérsúuy biti mi húmú wonte ron baaha homaˈ mi leeloon ra a ? 6Ɗon yúhú yee ham ɓëyí baa tígë homaˈ ri bee ra, te yii baa tahte wahtii ay lahe laho ɗi anti ɗúh. 7Doolaa ɗapoh ɓëewë në ñéyíh woni Koope ra ee teekiroh ra haat ; ɗi ay lukee teekiroh biti nék ɓëeˈ lís ɗíi ham ɗa këllú tígí daaha. 8Ɓëyí baa këllú tígë rëe, ɗi fi ɓëeˈ na ñeyeh woni Koope ra ay teekiroh, te Yéesú-Yíkëe ay rii saŋku a ngilaaw mi ɓúkí, hap ri húl a niiña nay rii ñéerée biti ɗi nimil ra. 9Ɗi fi ɓëyí baaha, doolii Seytaane nay rii yeje ɗi ac, ɗi paŋ kawtéef gaan, kimtaan a iñi éemílëˈté ɓéeɓ, ƴi ay nofee ɓëewë. 10Ɗi ay paŋ pagaɗ ɓos ɓéeɓ nofaˈi ɓëewë në suu saŋkuye ra. Wa ay saŋku ndah wa tahuy kúnsí keeññi wa kaaf ka waɗ waa sëmlëˈ koon ɗa. 11Yii baa daa tah Koope yeñ wa yii ay waa múuƴíɗ, wa gémé fel. 12Ɗaaha, ɓëewë gémúy kaaf ka ra ɓéeɓ, te oluu neɓ pagaɗ ɓos ɗa, Koope ay keen sun fi wa.
Híinndëh, ñee waali Koope
13Koy-yaayyi ƴeh, fun nék fun míníh ɓanti dékëˈ símí Koope ndah ɗon, ɗon fa Yíkëe fahaˈ ɗon ɗa ndah Koope daa tanis ɗon dalaana, nda ɗon múc. Ɗi ñeyaˈ Ruuha ladil ɗon ra, a gémë gémú ɗon kaaf ka ra, ɗi múcëlté ron. 14Koope ñeyaˈ Uni Neba waariyu fun ɗon ɗa dëekké ɗon yii baaha nda ɗon mit na ndami Yéesú-Kiristaa Yíkíi yen. 15Koy-yaayyi ƴeh, kon híinndíi te ɗon ham iña yëeddú fun ɗon ɗa : ƴee wonu fun mbée ƴee bíníyú fun ɗa ɓéeɓ.
16Koo Boffi yen fahaˈte yen, onte yen mal níi yen lahute míní múñí na ɗúméh a yaakaari neɓpe. Ɗémíin ɗi fi Yéesú-Kiristaa Yíkíi yen a Koo Boffi yen 17on ɗon doole, on ɗon keeñi paguun ɗon yin wun faraah : ƴaha yii ay pagu pago mbée yii ay wonu wono ɓéeɓ.
3Nahaˈi Pool ɗagiɗ
1Leegi nék koy-yaayyi ƴeh, ɗëgírí fun nda unni Yíkëe yíppí líiwëlsëˈ gina te wa lah ndam ti di man wa ɗon na nen. 2Ɗëgírí fun Koope nda ri sëmlëˈ fun ɓëewë ɓosu níi ɓos ra na, ndah ɓëewë ɓéeɓ neh daa gémú iña na wonu fun ra.
3Te añcaŋ Yíkëe daa mit gém. Ɗi ay ron on doole, níiɗ ɗën níi Seytaane ii ron leɓoh. 4Yíkëe onte fun níi fun lekuute ron : fun olute biti ɗon ee pagu iña wonu fun ɗon ɗa, te ɗon ay lúsɗée ɗaaha. 5Yíkëe ona ron keeñi fahuun ɗon Koope, on ɗon ɗon múñ ti ɗi fi Kiristaa nen.
Ɗee lahaˈ légéy solo ow na ra
6Koy-yaayyi ƴeh, lahte ɓëewí ɗapasute filiɓ fi yen, na ñéyíh iña yëeddú fun wa ra. Fun na nahu ron di tii Yéesú-Kiristaa Yíkëe, ɗon wuloh wa. 7Ɗon yúhrúté affon ɗee waɗti ñeyuun kotti fun ɗa. Homuu fun ginon ɗa fun mësúy tídëh. 8Fun yeekuy ow ñam. Fun húmú légéyúu yii ñamun fun légéyëe naˈ a elek, kaaˈ fun mokil ow yínë sah ɗon na. 9Fun paguuy ri biti ɗon waruy fun pagiɗ yin pagiro, ndaa fun fahuu biti ɗon ñee kotti ƴaaha, 10ndah húmú homuu fun gin ɗon ɗa, fun wonute ron biti ɓëyí kaaˈ légéy waray ñam. 11Fun nék, fun keluute biti lahte ɓëewí awu ɗon na pesuu tídëh, në pëgíh yin gét nëe haal yii waal fi wa íníh në. 12Di tii Yéesú-Kiristaa Yíkëe, fun túuƴú ɓëewí ƴaa fun na caguu wa bitih, wa koloh affi wa yuloh légéy nda wa kúɗ affi wa.
13Ɗon fi koy-yaayyi soˈ nék, lah hëbí híin ɗon dékëˈ paŋ yin wun. 14Hena biti lahte ɓëyí kaaˈ ñee unna bíníyú fun ƴee ra raa, lah wëní rí sun, ɗon ɓan ɗii leɓoh nda ri sopoh ndín, koloh afi. 15Di filiɓ ƴaa ɓéeɓ nék, ngënë hëbíi rí kaaˈohon, lah hëbíi rí koy-yaafon, ɗon líkín ɗí.
Ɗaŋa téƴ unna ra
16Ɗémíin Yíkëe fë në onaˈ jaamma ra on ɗon jaamma faraah, a yii mín ɗon homaˈ. Yíkëe ñéerëe a ɗon ɓéeɓ.
17Soˈ mi Pool daa mi bíní unna míllëˈ ƴee ra3.17 Bín fë, ow daa na húmú bíníyíɗ Pool. Unna ƴahti téƴú rëe, Pool a faanaŋ fi daa na bíní a yaˈi nda ɓëewë yúhsëˈ unna bíní rí rë ɓéeɓ.. Mi ƴahti téƴ unni soˈ raa, mi henaˈ ɗeh : soˈ mi Pool daa mi na bíní a yaˈ soˈ. Hen ɗaa raa, ɓëewë ay yúhsëˈ bíníyí sëˈ. 18Yéesú-Kiristaa Yíkíi yen líhë rën ɓéeɓ mal !