Téeríi ana fa bíní Saŋ ra
Kúnsëe (Saame : Kúnsëe 1 Saŋ)
1Wodoha
1Soˈ mi njíidí jaŋaa déˈ, mi na wodoh ɗo fi Ɓelaa1.1 Ɓelaa :Ɓelaa na wonuu dee ra, ɓëewë habuu ri biti ɗi jaŋii hom filiɓ gin. Koyya daa wa ɓëy ílí jaŋii baaha. Koope tanis ro ra ɗoni koyyu, ɗon fa fahaˈ mi kah-kah ra. Funi af soˈ neh kep daa fahuu ron, ndaa ɓëewë yúhú kaah ra ɓéeɓ fahuute ron, 2ndah kaaf ka ee yen na te ri ay home na faraah.
3Koo Boffa a Yéesú-Kiristaa Koy Boffa ay yen líh mal, teeɓ yen naaˈ-keeñ, on yen jaamma yen fa na pesuu filiɓ kaaf ka ñéerëˈ a fahantaˈ ra.
Kaaf ka a fahantaˈ
4Keeñ soˈ sosse níi sos olaˈ mi biti filiɓ fi koyyu, lahte na ƴi pesuu kaah ti di túuƴëˈ rí yen Boffa nen. 5Leegi daa mi na ɗaŋ ɗo yii bee Yaa ow : yen bokun ɓéeɓ yen fahantaˈ hanndal ki yen. Yee bíní mí rë baa ra nék ɗi túuƴëˈ has neh ; ɗi bee liilu yen dalaanin ɗa. 6Fahantaˈ, daa ri pesaˈ túuƴëˈ yí Koope, te túuƴëˈë yoodu ɗon dalaanin ɗa nahaˈ biti ɗon pesuun fahantaˈ.
7Ɗon ot mi won ɗon yii bah, biti i feloh caak tasaaruute feey fa, wa kaaˈuute biti Yéesú-Kiristaa acce hente ow. Wa fi ƴaa i feloh, wa kaaˈoh yi Kiristaa. 8Këlíi affon toñeh ɗon ay ñake iña légéyú yen ɗa. Ɗon waɗti liilun waafon liilo níi mit sëk !
9Ɓëyí fí pokaay yëeddëˈ yí Kiristaa ñeya yin kay raa, noneh Koope na. Ɓëyí fí pokoh yëeddëˈ yí nék, non Boffa a Koy ka na. 10Ow ac ɗon na yëeddí ron yin kay raa nék, ngënë hëbí rí faamon, ngënë tëhí ɗii na sah, 11ndah ɓëyí tah ɗii na ɗeef habraˈte ri iñi ɓossa na paŋ ri ra.
Takantaˈa
12Lahte iñi caakki mi mín ɗon waa won koon, ndaa daa mi fahaay waa bíní kéet. Mi lahte yaakaari biti may ac ginon, yen olantaˈ yen won, hen ɗaa raa keeññi yen bok sos níi sos.
13Koyyi koy-yaafee1.13 Koyyi koy-yaafee na wonuu dee ra daa wa ɓëy ílí jaŋaa non Saŋ ra. ke ro Koope tanis ri ra ɓal na woduu ro.