Téerëe ɗéɓpí bíní Peer ra
Kúnsëe
Ƴee daa unna ɗéɓpí bíní Peer ra. Ɗi bíní wë kerceenni dékú ginni iippi non Aasi. Kerceenna bíní rí ƴee ra húmú moklu moklo di yee gémú wë Yéesú-Kiristaa Yíkëe në rë (3.14-17). Peer bíní wë unni ƴee woni wa biti wa ham ngémë híin, wa múñ coono fa daɓ wa ra, nda wa bok ndamee ke ɗi fi Yéesú na ac fayu ra (5.10). Ɗi wonte wa ɗee waɗti man pesi wa bee henluy wa ɓëewí nëníh ɓëewí Koope leegi, wa nonute heeda tansu ra (2.9-10 ; 4.2-3).
Ɗi wonte wa :
- yii leŋke mújë waaƴiɗ yen Koope ra (1.8-12),
- yii leŋke pesaɗ kerceen filiɓ ɓëewë nëníh ɓëewí Koope ra (2.11-17),
- yii leŋke coono fa ñee Kiristaa ra (2.21-25),
- yii leŋke di waɗti pesuun ƴaal a ɓeleɓi (3.1-7),
- yii leŋke ɓaŋi Kiristaa kúl kë (3.18-22),
- yii leŋke lof pesaɗ (4.1-6),
- a yii leŋke di waɗti pesaa ow a moroomi (4.7-11).
Ɓëyí fí jaŋi téeríi bee ɓéeɓ ay ot biti balaa tígë teem ngém ow ra olu, ɓëeˈ ay ñee misik. Ɗi ñee misik ɗi ham híin níi lúsëenë rëe nék, ɗi ii rii réeccíyëh.
1Wodoha
1Koy-yaayyi ƴeh, ɗon fi ɓëewë Koope tanis wa ra, ɗon fi doha-ndéemmë tasaaruu ginna na wonuu Ponto, Galasi, Kapados, Aasi a Bítíní rë, soˈ mi Peer apootari Yéesú-Kiristaa, daa mi na wodoh ron. 2Koo Boffa daa tanis ɗon ti di húmú maañaˈ ri ri fahaˈ nen. Ruuhi tahte ɗon henute ɓëewí, nda ɗon ñee yee won Yéesú-Kiristaa ra ndín, ñif mi ɓukut ɗon.
Koope hëpë rën mal, on ɗon jaamma !
Mújë waaƴiɗ yen Koope ra
3Yen sím Koope, ɗi fi boffi Yéesú-Kiristaa Yíkíi yen ! Di naaˈi keeñi, ɗi onte yen pes has bee këllëˈ rí Yéesú ɓúudé rë. Ɗaaha, yen lahute yaakaari mínéh ɗúm, 4yen na sehaaluu iña yefiɗ Koope ɓëewí rë. Daa wa iña mínéh yah ra, ƴee na sísíɓéeh rë, ƴee henaˈ has faraah ra. Koope yefiɗte ron wa ín sun. 5Ɗi ñeyaˈ gémë gémú ron ra, ɗi na níiɗ ɗon a doolii nda ɗon múc, te yii baa ay yúhúu yiin nay ɗúmé pesa ra.
6Iña yefiɗ ɗon Yíkëe ƴaa ra daa tah keeññon sos. Tígë homuu ɗon bee ra kep, wuti coono fi mín ɗíi man ɓéeɓ tah ɗon ñee mok ƴutuuɗ ɗaa sah, keeññon sos. 7Úrís sah na yah, ndaa balaa ow yúh biti ɗi kah-kah, ɗi ay ñee kíi. Ti ɗaaha nen, ngémën lukaˈ ri úrís lah solo níi, balaa ow yúh biti ɗi kah-kah, ɗon ay ñee misik. Hen ɗaa raa, yiin nay nimile Yéesú-Kiristaa ra, ɗon ay yeeliyoh kañ, ndam a ɓéyíɗ. 8Ɗon fahuute ri te ɗon oluy ri, ɗon gémúté ɗii na te ɗon oluy ri doom. Yii baa daa tah ɗon lah sosi keeñi gaani ow yéeh daa teem, 9ndah ɗon homute liili yee na saamu ɗon ngémën ɗë : daa ri mújí rën.
10Merees, yonente ya húmú saamute yúhí yii leŋke mújí baa níi saam, te wa húmú léhínúté ɓëewë mala nay ron one Koope ra. 11Ruuhi Kiristaa húmú waa na, teeɓpe wa biti ɗi fi Kiristaa ay ñee coono, te ri lah ndam filoon fi baaha. Yii baa daa tah wa fi yonente ya saam níi saam yúhí wahtaa a ɗee nay lahee iñƴaa ra. 12Koope teeɓpe yonente ya biti iña na wonu wa ra húmú yullay wa fi ƴaaha na, wa yuliɗ ɗon na. Waariyoh yi Uni Neba komute ron wonni ƴaa leegi, te wa wonuu ri doolii Ruuh-Peseŋ fa kolaˈ sun-Koo ra. Malaaka ya sah fahuute yúhí wë níi fahaˈ.
Koope dëekëˈ lan
13Ɗon lahute mali na seh ron sun-Koo yiin nay nimile Yéesú-Kiristaa raa kay, kon këlíi affon ɗon yeel, ɗon tík yaakaaron ɓéeɓ në. 14Ñéyí yee nahaˈ Koope ra, ti di na ñeyaˈ koy yee nah ri boffi ra, ɗon yeris iña húmú neɓaˈ ron merees na húmú yíih rën rë. 15Yii paŋ ɗon ɓéeɓ lah lëdí në ti di ladaˈ Koope fa dëek ɗën ɗë nen, 16ndah Koope won filiɓ Téerëe tih : « Héní ɓëewí ladute, ndah soˈ mi lante. »1.16 Saame Tali Léwí 19.2
17Bee ɗon homute ɗaŋ ɗa, ɗon hom wonuu Koope Baap te daa ri na aattiyaˈ ow fi ow ɓéeɓ di iña paŋ ɗi ra, te ri na lúukíréeh ow. Kon yee talluu ron pesa feey fa ɗon haneel na bee ra, pesadon teeɓaa neeha neehu ron ri ra. 18Ɗon yúhrúté affon ɗee tosaˈ ri ron pesada lahay njiriñ koruu ron caaccon ɗa maan ? Ɗi tosaay ron a yii ay yahe yaho ti tiiŋ hélíis mbée úrís nen. 19Ëe-ëeˈ ! Ɗon sëmlúu a ñif mi cëllúuy a dara, ñif mi Kiristaa fa lahay dara yii wonun sun fi ti har fi lahay síkkë nen ra. 20Koope daa tanis ri, tíkké rí yii baaha balaa ri sak ëldúnë, te ri cépíɗté rí feey fa nda ɓëewë yúh rí jamanu ya míllëˈ ƴee ra, ndah ɗon. 21Ɗon ñeeˈuu ɗii na ɗon gémúté Koope fa këlíɗ ɗí ɓúudé, onte ri ndam ra. Ngémën a yaakaaron, ɗon tíkúu wë Koope na ɗaaha.
22Ɗon ɓukutuute ndah ɗon ñéerúuté a kaaf ka. Yii baa daa tah ɗon fahaˈ koy-yaayyon filiɓ ngémë fahaˈ kah-kah. Kon, fëhëntíi hanndal kon níi fahantaˈ di keeññon ɓéeɓ. 23Yúhí biti unni Koope tahte ɗon límëetúté. Ow neh daa límëet ɗën, ndah ow man tal gañcahi ay húlé húlë nen. Unni Koope nék, man tal gañcahi ii húl nen. Ɗi ee pes ɗa te ay home na faraah. 24Ndah bíníyúté Téerëe bitih :
« Ow ɓéeɓ man gaawa nen,
ndami man capussi gaaw fa meeyya nen :
gaawa súhëˈ súhëe,
capus yookaˈ yookoo.
25Unni Yíkëe nék ay home na faraah. »1.25 Saame Isayii 40.6-8
Te unni ƴaa daa Uni Neba húmú waariyu ron ra.
21Hém unni Koope tahte ɗon límëetúté rëe kay, kon yii hente ɓos ɓéeɓ hégíi rí, ɗon hegoh fel, paŋ yii bokaay a yee na wonu ron ra, iñaan a won yin ɓos sun ow. 2Di na sesaˈ baaker ɓabi miis mi yaafi daa kah-kah fa ra, sésíi síkírëhí unni Koope ɗaaha, ndah daa wa kah-kah fa. Ɗon pesaˈ na raa, ɗon ay ooɗ te ɗon ay múc. 3Nagajek, bíníyúté Téerëe bitih : « Ɗon ɗíkísúuté Yíkëe, ɗon olute ɗee neɓaˈ ri ra ! »2.3 Saame Kañaa ya 34.9 Ɗon pesuu yii baa neh a ?
Tígë yípëh faam fa ra a faam fa
4Ëyí Yéesú-Yíkëe në, ɗi fa daa laˈa na pes habuu ɓëewë biti lahay njiriñ, ndaa daa ri bee Koope tanis ɗi otte biti ɗi laˈi lahte njiriñ ra. 5Ɗon fi ƴaa ɓal nëní taɓahi faam fa nay déké Ruuh-Peseŋ ra ti laˈ yi na pesu nen. Hen ɗaa raa, ɗon ay hen goomali seeƴoh yi jébëlú Koope, ɗon yeɗ ɗi sarahi neɓaˈte ri di nay ron rii nahee Ruuha, ƴi ay ñeeˈee Yéesú-Kiristaa na. 6Ndah bíníyúté Téerëe bitih :
« Ëlsíi !
Mee yíp laˈ Siyoŋ ra,
laˈi nay habe faam fa,
laˈi daa mi tanis ɗi,
laˈi lahte njiriñ,
ɓëyí fí gém ɗii na,
fii mëssí sopoh. »2.6 Saame Isayii 28.16
7Kon ɗon fa gémú rë, ɓéyrí affon sun, ndaa ƴaha ɓëewë gémúy rë rëe, bíníyúté bitih :
« Laˈa habuu taɓahoh ya biti lahay njiriñ ra,
daa míllëˈ ham lasa. »2.7 Saame Kañaa ya 118.22
8Lahte tígí bíníyúté biti ɓal :
« Ɗi laˈi na kabinaˈ,
laˈi gaani na kéenɗëˈ. »2.8 Saame Isayii 8.14
Ɗon ot ɓëewí ƴaa kabinoh, biti wa kaaˈuute ñeyi unni Koope, te nagajek, Koope daa fahaˈ ri ɗaaha waa na.
9Ndaa ɗon, ɗon daa heeda tansu ra, seeƴoh yi Buura, heeda jébëlú Koope ra, ɓëewí Koope. Ɗi tanis ɗon nda ɗon mín waare iñi éemílëˈ yë paŋ ɗi ra, ɗi fa dëek ɗën, ɗúhíɗté rën ñúusë kúɗté rën niiñee ke ri hen saw ra. 10Ɗon húmú ɓëewí neh merees, ndaa woteh ɗon ɓëewí ; naaˈi keeñ Koope ɗon húmú bëkíh në, ndaa ɗi tahiɗte ron ɗi leegi.
Pesaɗ kerceen filiɓ ɓëewë nëníh ɓëewí Koope ra
11Ɗon fa fahaˈ mi níi fahaˈ ra, ɗon fa nëníh ɓëy ëldúnë fi bee ɗon haneel kut waa na ra, mi ɗaŋ ɗon biti ɗon moytoh fahaˈi pesi-neba na yuloh yahi nuffon ti mbërí na fahaˈ kéenɗí moroomi nen ra. 12Lah pésíi wun leelii ɓëewë nëníh ɓëewí Koope ra ; ɗon henaˈ ri ɗaaha raa wuti wa tík ɗon yin ɓos, won biti ɗon i pagoh ɓos raa sah, wa ay ot biti ɗon pagu yin wun, wa kañ Koope yiin nay ri waa feeñiyee ra.
13Af Yíkëe taha ɗon on kélfë yë cér : maanam buur fa daa ílíf ɓëy gina ɓéeɓ rë, 14a gëernëerrë buur wol wa daani pagoh yi ɓossa a ɓëyí fí paŋ yin wun wa gérém rí rë. 15Nagajek, Koope fahaˈ biti ɗon pagun yin wun ɗon téƴ ɓúkkí ɓëewë yíih yin ra, ƴee na wëníh wonaɗ ow ra. 16Koope onte ron ɗon lahuute affon. Kon lah pésíi pesi ɓëyí daa lahaˈ afi. Di filiɓ baaha ɓéeɓ nék, baa ɓanay tah ɗon ɗap ɓos ɗon na. Ɗon súrgë Koope na, kon lah pésíi ɗaaha. 17Lah ëní ɓëewë ɓéeɓ cér, ɗon fahaˈ koy-yaayyon filiɓ ngémë, ɗon neeh Koope, ɗon on buuri gina cér.
Coono fa ñee Kiristaa ra
18Ɗon fi súrgë yë, lah ñéyí woni ɓëewë në légéyírúu ron ra, ɗon on wa cér. Wa wun keeñ te wa baah, wa sohoor ɓéeɓ, lah ëní wë cér. 19Ndée nagajek, ɗon múñ súfúñ fí waray ɗon koon ndah Koope raa, baa yin wun. 20Ɗon tooñ níi ɗon laɓaa ɗon múñ ɗí rëe nék, ɗon sehu laasi bih na ? Ndaa hena biti ɗon pagun yin wun ɗon laɓaa ɗon múñ ɗí rëe, baa yii wunte íllí Koope. 21Koope dëekëˈ ɗën baaha, ndah Kiristaa ñeete coono af ɗon, nda ɗon ƴíiɗ yee paŋ ri baa ra, ɗon ñee kotti. 22Ɗi mësëy bakaaɗ, fel mësëy ɗúh ɓúgë.2.22 Saame Isayii 53.923Soluu ri bín fë rë, ɗi yíllëey ; mokluu ri ra, ɗi gapaay yíllëh. Ɗi yerisse ɓéeɓ yaˈ Koope fa aattiyaˈi júɓpé rë. 24Homaˈ ri sun fi kurwaha2.24 kurwah :Di gerek, bíníyú ɗeh : kilik. Téerëe won tih : ɓëyí fí yéŋké biti na hawu ri húl rë keru sun kilik, ɓëyí baa alkohte. Saame Nérsí Kootaa 21.22-23. ra, ɗi a faanaŋ fi séfëhté bakaaɗɗi yen, nda yen ɓísëˈ a bakaaɗ yen pes pesi júɓpé. Gaañ-gaaññi Kiristaa daa paƴ yen. 25Ɗon húmú madu harri múuƴú múuƴë nen, ndaa ɗon nimilirute níirëhée ké ron na tooppitoh ron ra.
3Di waɗti pesuun ɓeleɓ a ƴaali
1Ɗon fi ɓeleɓɓa ɓal, ëní ƴaallon cér ! Hen ɗaa wa ot ɗon pagee ri ɗaaha raa, wuti ɗeef wa gémúy unni Koope merees raa, yii baa ay tah wa ay gém te ɗon ii waa won dara : 2wa ot tílëdën lan a ɗee koruu ron níi koroh raa rek, wocce ! 3Ngënë mëkí wunaaloh ɗon múukée garaŋ, ɗon pokee takkaayyi úríssën, ɗon ɓekee búuɓɓí píisë kofeelte. 4Wunon kay homa filiɓ keeññon, ɗon teey ɗon sos. Wuni baa homaˈ na faraah. Baa daa yee lah solo íllí Koope ra. 5Ɓeleɓɓa húmú gémú filoon tíkúté yaakaari wa yaˈ Koope ra, húmú teeɓuu wuni wa ɗaaha. Wa húmú onute ƴaalli wa cér, 6ti di húmú onaˈ Saara Abraham cér, na dëekëˈ rí nijaay ra nen. Ɗon ay hen koyyi Saara biti ɗon page yin wun te ɗon néehíh në dara.
7Ɗon fi ƴaalla nék, lah kúrí ɓeleɓɓon ɗon homaˈ wun, ɗon yúh biti ɗoni wa maduy. Ëní wë cér, ndah pesa na ɗúméh nay ron one Koope ra, waɗte wa ɓal. Héníi rí ɗaaha nda Koope ɓanti kaaˈ ɗaŋŋon.
Ow neɓpi paga wun
8Kon sëyíi nuf yínë, ɗon bok keeñ ; fëhëntíi filiɓ fon ti i koy-yaay nen ɗon naaˈantaˈ keeñ, ɗon cépíɗ affon fíi moroommon. 9Ɓëyí paŋ ɗon yin ɓos mbée sol ron, ngënë yíllíi. Ɗon kay, lah ɗëgírí rí biti Koope barkel ri, ndah Koope dëekëˈ rën baaha. Hen ɗaa raa, Koope barkel ron. 10Ndée bíníyúté Téerëe bitih :
« Ɓëyí fí fahaˈ lah keeñi sosse,
lah jaamma pesi,
waɗtee moytoh won ɓos,
fel ɓanti ɗúh ɓúgë.
11Ɓëyí baa waɗtee hegoh ɓos.
Ɗi waɗti paga yin wun,
waɗti dékëe saam jaamma.
12Íllí Yíkëe yípëh sun fi ɓëewë júɓú rë,
ɗi kúníssé nufi na síkírëh ɗaŋŋi wa ;
Yíkëe botaˈ ɓëewë na pagu ɓos ɗa botoo. »3.12 Saame Kañaa ya 34.13-17
13Daa nay ron page yin ɓos biti ɗon saamuun paŋ wun kep ? 14Wuti ɗon ñee mok koon ndah biti ɗon pagu yii júɓpé rëe sah, ɗon ay lah sos-keeñ. Ngënë néehí ɓëewí kayya, ngënë sídíi yin. 15Ɗon kay, ɓékí affon biti kep Kiristaa daa Yíkëen. Cëgíi faraah ɗon mín lof ɓëyí meel ɗon yee tah ɗon tík yaakaaron Yíkëe në rë. 16Ɗon ƴahti rii lof raa nék, lah pëgíi rí a teey, ɗon on ɗi cér. Lah sëyíi nufi lante, nda ɓëewë na yahu tii yon af pesadi wunon Kiristaa na ra sopoh wonni wa. 17Ow mokluun paŋ yin wun, te ɗeefa Koope fahaa ri ɗaaha raa, daa gén biti ɗi mokluun paŋ yin ɓos.
Ɓaŋi Kiristaa kúl kë
18Ɗi fi Kiristaa, af bakaaɗɗi yen tahte ɗi ñeete mok, te mogi baa ri mokaˈ waal yínë, teempe waali yíníi baaha faw ; ɗi fa júɓ ɗë tahte húl ndah yen fa júɓúy rë nda ri kúɗ yen Koope na. Faana daa hawu húl, ndaa Ruuh-Peseŋ këlíɗté rí, ɗi na pes. 19Doolii Ruuhi baa nék daa tah ɗi pay waare coonaa ya húmú kasu ra. 20Daa wa ɓëewë húmú ñéerúuy a Koope jamanaa na húmú yugusaˈ Nowe gaala ra, te ɗeef ɗi fi Koope múñëlté wë, na seh. Ɓëewë húmú múcú mulii mbënë më rë húmú caakuy, wa húmú ow peeye daa haalu gaala. 21Baa daa maanam bëtsée ké yen woteh ; mulii bëtsí baa wonay biti hosse sísíɓ fë faanni yen déˈ, iti fi bëtsë daa ri biti yen pokoh Koope na a nufi lante3.21 iti fi bëtsë daa ri biti yen pokoh Koope na a nufi lante :Lahte ɓëewí habuu ri ɗeh : iti fi bëtsí baa daa ri biti yen ɗaŋ Koope ɗi on yen nufi lante.. Bëtsë múcël yen múcëlë ndah kolohi Yéesú-Kiristaa ɓúudé, 22ɗi fa saañ sun-Koo tookke hëbís Koope, hompe yaˈi ñamaa fi ra. Malaaka ya, mbínéeffí lahu un a yii lahte doole sun ɓéeɓ onute ri cér.
4Lof pesaɗ
1Koy-yaayyi ƴeh, hém faan Kiristaa daa ñee coono raa, tëhí ñee coono ti Kiristaa nen ; ndah ɓëyí faana híssí ñee coono, wocaˈte a bakaaɗ. 2Kon tígë homuu ɗon bee ra kep, yee talluu ron peson ɗa waɗti hena yee fahaˈ Koope ra ndaa fah pes-neɓ neh. 3Pesee ke ron filoon ɓéeɓ, na húmú dékúu ɗon paŋ yii neɓaˈ ɓëewë nëníh ɓëewí Koope ra doyte ɗon na leegi : ɗon húmú pesuu pagaɗ ɓos a fah pes-neɓ, mani, mbumbaay níi ɗon ɗúmëlúté mbumbaay. Ɗon na yúulúu ala ɓal, pagadi sëpírëˈí bah. 4Woteh fee Koo bee nék, ɓëewë nëníh ɓëewí Koope ra éemúté di yee wocuu ron a wa di pesadi ɓosi misigi baa ra, wa na solu ron. 5Ndaa wani Koope fa caŋ aattiyaˈi ɓëewë na pesu a ƴee húlú rë ay naa teeyaˈ. 6Yii baa daa tah Uni Neba waariyu sah ɓëewë húlú rë. Wa aattiyuu iña pagu wa bee na húmú pesuu wa feey ra naam ti ɓëewë ɓéeɓ nen, ndaa af Ruuha tahte wa pesuu ti di na pesaˈ Koope nen.
Di waɗti pesaa ow a moroomi
7Ëldúnë ɗúmpé níi wocce. Kon téeyí ɗon yeel, nda ɗon mín ɗaŋ Koope. 8Yee lukki lah solo ra ɓéeɓ nék, daa ri biti ɗon fahantaˈ hanndal kon di keeññon, ndah fahaˈ ow daa na múur bakaaɗ caak. 9Kúnsírëntíi íllí faammon, ɓanti ñéerëˈ a capitoh.10Ow fi ow ɗon na ɓéeɓ, habraa moroomi di yee on ɗon Koope ra. Hen ɗaaha raa, ɗeef iñi bokuuy ya on ɗon Koope ra ɓéeɓ, ɗon kúrúté wë kúrí wunte. 11Ɓëyí fí yúhté biti ay wone wono, ɓeka woni baa waarii unni Koope ; ɓëyí ay habree ow, pagaa ri a mín-mínë déŋéen ɗí Koope ra. Hen ɗaaha raa, ɓëewë ñeyaˈ Yéesú-Kiristaa na kañ Koope di iña ɓéeɓ, ɗi fa lahaˈ ndam a doole dee níi kiri fi kiri ra ! Ɗémíin !
Ow neɓpi ñeya coono fi Kiristaa
12Ɗon fa fahaˈ mi níi fahaˈ ra, coono fi misiga homuu ron ra ɓanay tah affon kúnëh níi ɗon won biti yii baa waray ɗon kat. 13Keeññon kay waɗti sosa soso biti ɗon bok a Kiristaa coono. Hen ɗaa raa, yiin nay rii teeɓe ɓëewë ɓéeɓ ndami ra, keeññon sos níi sos. 14Af Kiristaa tah ɗon solu raa, ɗon lahute sos-keeñ ndah Ruuhi Koope, ɗi fi Ruuha lah ndam ra ee ɗon na. 15Coono fon ɓanay ñeyaˈ biti ɗon hawun ow húl, mbée biti ɗon lohun loho, ɗon pagun yin ɓos, mbée ɗon haalun yii waal fon íníh në. 16Ndaa hena henu ron kerceen ra daa taha ɗon hom coono raa, ngënë sëpíi në ; ɗon warun naa kañ Koope kaño di yee nonuu ron Kiristaa na ra.
17Wahtaa nay dale aattiyaˈa ra lahte, te ay ɗéɓúu yen fi ɓëy Faam Koope na. Daluun yen na raa nék, lah ɓëewë yéŋké biti gémúy Uni Nebi Koope raa, ay made ɗíh waa na ? 18Ndah bíníyúté Téerëe bitih :
« Hém mújí ɓëeˈ júɓ ɗë
daa misik raa,
lah bakaaroha na,
ɗi fa kaañ Koope ra raa,
ay made ɗíh ? »4.18 Saame Léeh yë 11.31
19Kon, ɓëewë Koope daa fahaˈ biti wa ñee coono ra, pagun wun rek saye, wa tík pesi wa yaˈ Koope fa daa sak wa ra, ɗi fa yii won ɗi ɓéeɓ ɗi paŋ ri ra.
5Njíittí jaŋaa
1Ɓëewë homu filiɓ fon te wa i njíit jaŋi ra, soˈ mi won ɗon na, soˈ fa njíit jaŋi ti ɗon nen ra. Soˈ mi tíkké íllí sëˈ coono fi Kiristaa ngëeƴ te may non ndamee ke ri nay teeɓuu ra. Soˈ mi won ɗon tee : 2tëeppítíi yuba déŋéen ɗën Koope ra. Yéelí në, ɗon ɓan ɗii pagaˈ biti ɗon túuƴú rí túuƴë, pëgí rí ɗon núhëˈ rí keeññon, ɗee fahaˈ ri Koope ra. Ngënë pëgíi rí biti ɗon ay naa saame alal, pëgíi rí a sawoor. 3Ngënë mëklí ɓëewë déŋéenú ɗon ɗa. Ɗon kay, wa waɗti ƴíirún ɗon na ! 4Hen ɗaa raa, yiin nay nimile kélfíi níirëh yë rë, ɗon ɓeku baane-ndam, bi ay hene has faraah.
Ow neɓpi cépírë afi cépírë, ham ngémë
5Ɗon fi tuŋka nék, lah ëní ɓëewë ɓahayu ron ra cér. Ɗon ɓéeɓ nék, cépírí affon hanndal kon, ndah bíníyúté Téerëe bitih : « Koope ñéerëey a ɓëewë na gaan-gaanluu ra, ɗi onaˈ ɓëewë cépírú affi wa ra mal. »5.5 Saame Léeh yë 3.346Kon, cépírí affon fíi Koope fi Sërndëŋë, nda wahtaa lah raa, ɗi ɓéyíɗ ɗon. 7Hélí iña na sídúu ɗon ɗa ɓéeɓ yaˈi, daa ri na tooppitoh ɗon.
8Téeyí ɗon yeel ! Seytaane, kaaˈohon ee yídëelëh rë, man gaynde fi na híigëh, na ɓoorsoh ɓëyí ñama ri nen. 9Hëbí ngémë híin ɗon haaˈ a ɗi fi Seytaane, ɗon yúh biti koy-yaayyon filiɓ ngémë homu feey fa ra ɓéeɓ ñeyuu coono ɗaaha. 10Ɗon lísúu hom coono kaah, ndaa Koope fa na onaˈ ɓéeɓ rë dëekké ɗon ɗon haal ndamee ke ri na ɗúméh rë, af biti ɗon nonu Yéesú-Kiristaa na. Tasse ƴutuuɗ ɗi ay ron ɓaatti yugus, habraˈ ron, on ɗon doole, tík ɗon ɗon cagaˈ a kotti híinté. 11Koope laha doole dee níi kiri fi kirih ! Ɗémíin !
Takoha
12Silaas5.12 Silaas :Di gerek bíníyú ɗeh : Silwee. Daa ri tii yíníi Silaas. fa habaˈ mi koy-yaafi pokohte Kiristaa na ra daa habraˈ soˈ bíníi ɗon koy unni ƴeh. Ɓeddaˈi ron a woni ron biti mali Koope kaah te ɗon ham na híin, daa tah mi bíní ron unni ƴeh. 13Ɓëy Babilonna5.13 Babilon :Rom daa na léehúu ɗah. dee nonu jaŋaa ra, ƴee Koope tanis wa ti di tansaˈ ri ron nen ra, a Marka fa habaˈ mi koy kah-kah soo na ra na woduu ron. 14Wëdëntíi hanndal kon níi wodantaˈ5.14 Di ɓaahi ɓëewí ƴaaha, wa ƴahti wodoh ɓëewë mboko yi wa mbée ɓëewë meeru wa raa, wa fëenúu wë fëenëe..
Koope ona ron fa nonu Kiristaa na ra ɓéeɓ jaamma !