Téerëe ɗéɓpí bíní Saŋ ra
Kúnsëe
Saŋ fa na suu yen wonee bee ra, daa ri Saŋ fa non ɓëewí iniilla bíníyú Uni Nebi Yéesú-Kiristaa ra. Ɗi bíníyílté un éeyë kay, yuliɗte wa ɓëewí bokuuy. Bee ɗéɓ ɗë nék, ɓëewë ɗi bíní wë unna ra capuy. Bee ñee na ra, bíníyú ɓëy íl jaŋi hom filiɓ gin, ɗi wonaˈte jaŋii baaha yaa-ow. Bee míllëˈ rë, bíníyú ɓëyí hínú Gayus. Ɗi fi Gayus fi baa nék daa na húmú habraˈ koy-yaayya filiɓ ngémë, níi lukaˈ ƴee ri yéeh wë rë sah, ndah gémë gém ɗí rë.
Jamanii Saŋ bín fë, lahte ɓëewí húmú kaaˈuute biti Yéesú-Kiristaa acce feey hente ow. Wa tíkúté wonute biti ɓal yii neɓaˈ ow mín paŋ, Koope ii rii habaˈ yin.
Yii baa daa tah Saŋ bíní ɓëewë gémú Kiristaa na ra, na ɓaat waa teeɓ wa daa Yéesú, na won wa biti wa pokoh kaaf ka.
Ɗi wonte wa :
- yii leŋke tílëˈ niiñ (1 Saŋ 1.7, 2.9-11),
- yii leŋke túuƴëˈí hasa (1 Saŋ 2.3-8),
- yii leŋke kaaˈohi Yéesú-Kiristaa (1 Saŋ 2.18-23),
- yii leŋke di waɗti pesuun koyyi Koope (1 Saŋ 2.28 níi 3.3),
- yii leŋke di waɗti fahaa ow koy-yaafi filiɓ ngémë (1 Saŋ 3.11-18),
- yii leŋke ɗee fahaˈ Koope ow ra (1 Saŋ 4.7-21),
- yii leŋke di nay faasuu pesi ëldúnë (1 Saŋ 5.1-5),
- yii leŋke iña seedeyiru Yéesú-Kiristaa ra (1 Saŋ 5.6-12),
- yii leŋke pesa na ɗúméh rë (1 Saŋ 5.13-21),
- yii leŋke kaaf ka a fahantaˈ (2 Saŋ 1.4-11),
- yii leŋke pesaˈi Gayus kaaf ka (3 Saŋ 1.1-6),
- a yii leŋke di madu Joteref a Démétíríyús (3 Saŋ 1.9-12).
Ɓëyí fí jaŋi téeríi bee ɓéeɓ ay yúh di nay rii tílée filiɓ ëldúnë fí beh, a di nay rii pesee a moroomi.
1Una na onaˈ pes ɗa
1Koy-yaayyi ƴeh, mi bíní ron unni ƴee teeɓi ɗon yii leŋke Una na onaˈ pesa ra. Dalaana, Una húmú në. Fun keluute ri filoon fe, fun tíkúté rí íl ngëeƴ, fun yeelute ri te yaˈ yi fun tíkëhté sun fi.
2Pesi baa feeñiyohte, fun olute ri. Fun homu seedeyidi, fun na wonu yii leŋke pesee na ɗúméh baa ra. Ɗi húmú hëbís Boffa, te ri feeñiyohte fun. 3Yee olu fun, fun keluute ri ra, fun homu woni ɗon fi ƴaa ri, hen ɗaa raa, ɗon non fun na yen hen yínë, ɗon non Boffa a Koy ka Yéesú-Kiristaa na ti di nonuu fun waa na nen. 4Ɗon ot fun bíní ron unni ƴeh, fun saamu biti sosi keeññi fun mit sëk.
Tíl neɓaˈ niiñ
5Una liilu fun Yéesú-Kiristaa, fun na wonu ron ri ra daa ri beh : « Koope niiñ koceec, yii ñúussé íníh ɗii na. » 6Yen won biti yen nonu ɗii na, yen anti pesuun ñúus rëe, ɗeef yen felu felo, yen ñeyuy kaaf ka. 7Yen pesuun niiña ti di homaˈ ɗi fi Koope niiña nen raa nék, ɗeef yen henute yínë hanndal ki yen, ñif mi Yéesú Koohi hosse bakaaɗɗi yen ɓéeɓ.
8Yen won biti yen lahuy bakaaɗ ɗaa, ɗeef yen nofuute affi yen, yen yíih kaah. 9Hena biti raa nék yen tahute biti yen bakaarute, yen ɗúhíɗ ɗí ɓúkkí yen raa, yii ɓosi hom yen na ɓéeɓ, Koope ay yen ɗii baal, ladil yen. Koope júɓpé te yii won ɗi ɓéeɓ paŋ ɗi. 10Yen won biti yen bakaaruy raa, ɗeef yen tíkúté Koope feloh, te unni haalay keeññi yen.
21Ɗon fi koyyi soˈ, ɗon ot mi bíní ron unni ƴeh, nda ɗon ɓanti bakaaɗ. Ndaa tíl níi lah ɓëyí bakaaɗ ɗon na raa, yen lahute ɓëyí nay yen layre fíi Boffa : daa ri Yéesú-Kiristaa, ɗi fa júɓ ɗë. 2Ɗi fi Yéesú-Kiristaa fi baaha daa yeraˈ afi sarah nda yen baalu bakaaɗɗi yen. Af yen neh kep daa tah ɗi yeraˈ afi sarah, ndaa af ɓëewë ëldúnë ɓéeɓ.
Túuƴëˈí hasa
3Yii bee daa teeɓ yen biti yen yúhúté Koope : ñeya ñeyu yen túuƴëˈ yí Koope ra daa teeɓaˈ baaha. 4Ɓëyí won biti yúh Koope te ɗeef ɗi na ñeyeh túuƴëˈ yí rëe nék, ɓëyí baa feloh, yéeh kaah. 5Ɓëyí ñee woni Koope raa nék, ɗeef fahaˈi ɓani Koope mitte sëk. Yii baa daa teeɓ yen biti yen pokuute Koope na. 6Ɓëyí fí won biti pokohte Koope na, waɗti pesaa ɗee pesaˈ Yéesú rë.
7Ɗon fa fahaˈ mi níi fahaˈ ƴee ra, túuƴëˈë bíní mí ron bee ra has neh ; ɗi túuƴëˈí maañce, bi ɗon liilute ri dalaanin. Túuƴëˈí baa daa una mësúu ron keloh ra. 8Di filiɓ fi baaha ɓéeɓ, lahte yin has filiɓ túuƴëˈë bíní mí ron bee ra. Kaaf ka hom na ra feeñce Yéesú në, feeñce ɗon na ɓal. Yee teeɓaˈ ri ra daa ri biti ñúusë hompe gét te niiñi kah-kah fa acce níi wocce.
9Ɓëyí fí won biti pesaˈ niiña te ɗeefa faheeh tík koy-yaafee ke ri filiɓ ngémë íl, ɗeef ɗi lís ñúusë. 10Ɓëyí fí fahaˈ koy-yaafee ke ri filiɓ ngémë nék, ɗeef ɗi pesaˈ filiɓ niiña, te lahay yii mín ɗíi ɓek bakaaɗ. 11Ɓëyí fí fahaay tík koy-yaafee ke ri filiɓ ngémë íl nék, ɗeef ɗi aa ñúusë ; ɗi tílëˈ ñúusë, yéeh tígë në saañ ɗi ra, ndah ñúusë búumílté rí.
12Ɗon fi koyyi soˈ,
ɗon ot mi bíní ron unni ƴeh,
biti bakaaɗɗon baalute ron
ndah Yéesú-Kiristaa.
13Ɗon ot mi bíní ɗon fi baappi ƴeh,
biti ɗon yúhúté
ɓëeˈ húmú në dalaana níi a ɗee ra.
Ɗon ot mi bíní ɗon fi wahambaane ya
a cafaƴƴi ƴeh,
biti ɗon ɓagute Seytaane.
14Ɗon ot mi bíní ɗon fi tuŋki ƴeh,
biti ɗon yúhúté Boffa.
Ɗon ot mi bíní ɗon fi baappi ƴeh,
biti ɗon yúhúté
ɓëeˈ húmú në dalaana níi a ɗee ra.
Ɗon ot mi bíní ɗon fi wahambaane ya
a cafaƴƴi ƴeh,
biti ɗon maanute filiɓ ngémë :
Unni Koope ee ɗon na,
te ɗon ɓagute Seytaane.
15Ngënë fëhíi ëldúnë níi lukaˈ iña filiɓ. Ɓëyí fí fahaˈ ëldúnë, mínéh fahaˈ Baap-Koo, 16ndah iñi ëldúnë daa wa ƴeh : paŋ yii ɓosi meelaˈ faannon, fahaˈ yii fu ot ɗi, a gaan-gaanloh af iñi feey fi beh. Te iñƴaaha ɓéeɓ kolaay Boffa na, wa kolaˈ ëldúnë. 17Ëldúnë a iña neɓaˈ ow filiɓ ɗa ɓéeɓ hompe ɗúm, ndaa ɓëyí fí pagaˈ yii neɓ Koope ay pes faraah.
Kaaˈohi Yéesú-Kiristaa
18Ɗon fi koyyi soˈ, yen homute míllëen jamanu ! Ɗon keluute biti kaaˈohi Kiristaa ac ayo maan ? Tígë homuu yen bee ra kep, caakke kaaˈoh yi Kiristaa yi ayute. Yii baa daa teeɓ yen biti yen homute míllëen jamanu. 19Wa fi ƴaa koluu yen na, ndaa nagajek wa nëníh yen na. Wa nonun yen na koon, wa tasun yen na. Ndaa míntí hena ɗaaha, nda lan biti ow yínë sah waa na noneh yen na. 20Ɗon nék, ɗon liilute Ruuh-Peseŋ Ɓëyí selaa na, daa tah ɗon ɓéeɓ ɗon yúh kaaf ka. 21Ɗon ot mi bíní ron nék, biti ɗon yíih kaaf ka yúhë neh. Yúhë yúhú ron kaaf ka ra kay daa tah mí bíní ron ! Ɗon yúhúté biti ɓal fel a kaah míníh ñéerëˈ.
22Kon daa feloha ? Daa ri ɓëeˈ kaaˈ ra, ɓëeˈ won biti Yéesú Buura Koo fal ri ra neh. Ɓëyí baa daa kaaˈohi Kiristaa ! Ɗi boollaˈ Boffa a Koy ka ɓéeɓ kaaˈaˈte, 23ndah ɓëyí kaaˈ Koy ka, kaaˈaˈte Boffa, te ɓëyí tah Koy ka ɗeef tahte Boffa ɓal.
24Daa tah mi won ɗon tee : pëkíi iña keluu ron dalaanin ɗa. Ɗon pokoh iña keluu ron dalaanin ɗa raa, ɗon ɓal ɗon ay pokoh Boffa a Koy ka na. 25Kiristaa gappe yen biti nagajek ɗi ay yen on pesa na ɗúméh rë.
26Ɓëewë na fahuu múuƴɗí ɗon ra daa tah mi bíní ron iñƴeh. 27Ndaa ɗon nék, mi yúhté biti Ruuha liilu ron Kiristaa na ra pokohte ɗon na, tahte níi sohlaay ow teeɓle ron. Ruuha daa na teeɓ ɗon yin ɓéeɓ. Ɗi teeɓaˈ yii hente kaah, na yëeddéeh yii hente fel. Kon pëgí yee nah ri ron ra : hëmí ɗon pokoh Kiristaa na.
Ɗee waɗti pesuun koyyi Koope ra
28Mi won ɗon tee koyyi soˈ : hëmí ɗon pokoh Kiristaa na, nda yen lëhíh dara yii sídúun yen biti ri nimil. Hen ɗaaha raa, yen ii húl a sopoh fíyí yiin fi baaha. 29Ɗon yúhúté biti Kiristaa júɓpé, kon ɗon waɗtee yúh biti ɓëyí fí tíl kotti júɓpé, ɗeef ɗi koy Koope ɓal.
3Koyyi Koope
1Koy-yaayyi ƴeh, ëlí ɗee fahaˈ yen Boffa ra kan ! Ɗi fahaˈ yen fahoo níi tahte yen na dëekúu koyyi Koope, te yen koyyi ɓal ! Bi ɓëy ëldúnë yíih Koope, daa tah wa yíih yen. 2Ɗon fa fahaˈ mi níi fahaˈ ƴee ra, yen henute koyyi Koope níi wocce. Di nay yen made fayu nék, feeñiyuy yen níi lante doom, ndaa yen yúhún biti yiin nay feeñiyee Koy Koope ra, yeni nay made ndah yen ay ot di man ɗi. 3Te ɓëyí fí tík yaakaari yii baa Koy Koope na, ɓukutaˈ afi ɓukutoo, dékëˈ lan ti di ladaˈ ɗi fi Koy Koope nen.
4Ɓëyí fí bakaaɗ nék, ɗeef ɗi kaaˈ ñee woni Koope, ndah bakaaɗ daa ri kaaˈ ñee woni Koope. 5Ɗon yúhúté biti Yéesú-Kiristaa ac hosi bakaaɗɗi yen, te ɗi fi baa bakaaɗ íníh ɗii na. 6Yii baa tahte níi ɓëyí fí pokohte ɗii na, na bakaareh ; ɓëyí fí dékëˈ bakaaɗ nék, ɗeef teeɓaˈte biti olay Yéesú-Kiristaa te yéeh rí.
7Ɗon fi koyyi soˈ, ow ɓanay ron múuƴíɗ ! Ɓëyí fí paŋ yii júɓpé, ɗeef ɓëyí baa júɓpé ti di júɓëˈ Yéesú-Kiristaa nen. 8Ɓëeˈ dékëˈ bakaaɗ ɗa non ɓëewí Seytaane, ndah Seytaane dal bakaaɗ dalaanin níi a ɗeh. Koy Koope nék ac yahi légéyí Seytaane !
9Ɓëyí fí hente koy Koope, na dékéeh bakaaɗ ndah yee hom Koope na ra daa hom ɗii na. Koope daa Boffi raa kay, ɗi mínéh dékëˈ bakaaɗ ! 10Yii bee daa na teeɓaˈ ɓëyí hen koy Koope a bee hen koy Seytaane na ra : ɓëyí na dékéeh paŋ yii júɓpé mbée fahaay koy-yaafee ke ri filiɓ ngémë, noneh koyyi Koope.
Ow waɗti fahaa koy-yaafi filiɓ ngémë fahoo
11Nagajek, una keluu ɗon dalaanin ra daa ri beh : yen fahantuun hanndal ki yen. 12Yen ɓanuy madaˈ Kayeŋ3.12 Saame Dalaana 4.1-16 múk ! Ɗi húmú non ɓëewí Seytaane bëempé koy-yaafi. Yi tah ɗi bëem ɗí nék ? Biti pagaɗɗi wuneh te ƴi koy-yaafa húmú júɓpé daa tah ɗi bëem ɗí.
13Koy-yaayyi ƴeh, dara waray kún affon biti ɓëewë feey fi bee kaaˈ ɗon. 14Fahaˈa fahantuu yen ɗa daa teeɓ yen biti yen koluute kúl kë, yen ayute pesa. Ɓëyí fí fahaay koy-yaafee ke ri filiɓ ngémë, ɗeef ɗi pokoh kúl kë. 15Ɓëyí fí fahaay tík koy-yaafee ke ri filiɓ ngémë íl ɓéeɓ, ɗeef ɗi bëemëh ow. Te ɗon yúhúté biti bëemëh ow lahay pesa na ɗúméh rë. 16Yii bee daa teeɓ yen ɗee waɗti fahaa ow koy-yaafi ra : Yéesú-Kiristaa yeraˈte ñíiní ndah yen. Kon yen warutee yeraˈ ñíinní yen ndah koy-yaayyi yen. 17Lah ɓëyí caaklaˈte anti ot koy-yaafi laheh yin, ɗi faaliyeeh ri raa, ɓëyí baa ay mínúu won biti ɗi fahaˈte Koope ɗíh ? 18Mantee ɗon fi koyyi soˈ, yen fahantaˈ hanndal ki yen : won a ɓúk rek teeɓaay fahaˈ ow ; koloh paŋ kep daa mín teeɓaˈ fahaˈ ow kaah.
19Yen henaˈ ri ɗaaha raa, yii baa daa nay yen teeɓe biti yen nonu ɓëy kaaf ka, te affi yen ay took biti yen home ɗaŋ Koope. 20Wuti affi yen tookay ndah pagaɗɗi yen raa, yen yúhún biti Koope luk yen lah yermaande, te ri yúh ɓéeɓ. 21Ɗon fi ƴee fahaˈ mi níi fahaˈ ƴee ra, affi yen took raa nék, yen ii sídëˈ biti yen ɗage Koope. 22Ɗi ay yen on yii yen ɗaŋ ɗi ri ɓéeɓ, ndah yen ñeyuu túuƴëˈ yí te yen paguu yii neɓaˈ ri. 23Yee túuƴ ɗí yen ɗa daa ri beh : yen gém Yéesú-Kiristaa Koohi na, te yen fahantaˈ hanndal ki yen ti di nahaˈ ri yen Kiristaa nen. 24Ɓëyí fí ñee túuƴëˈ yí Koope, ɗeef ɓëyí baa pokohte Koope na te Koope pokohte ɗii na. Yii bee daa teeɓ yen biti Koope pokohte yen na : Ruuh-Peseŋ fa on ɗi yen ɗa daa teeɓaˈ baaha.
4Yonente yi paɗɗah ya
1Ɗon fa fahaˈ mi níi fahaˈ ra, ngënë gëewí gém ɓëyí won ɗon biti Ruuh-Peseŋ ee ɗii na. Lah síkíríi rí a nuf, ɗon ay yúh nda Ruuhi Koope ee ɗii na mbée íníh ɗii na, ndah yonente paɗɗah caak tasaaruute feey fa. 2Yii bee daa na teeɓaˈ ɓëyí Ruuhi Koope ee ɗii na : ɗi won biti Yéesú-Kiristaa acce hente ow raa, ɗeef Ruuhi Koope aa ɓëyí baa na. 3Ndaa ɓëyí fí kaaˈ yii baa Yéesú në, Ruuhi Koope íníh ɓëyí baa na, bi kaaˈohi Kiristaa daa ɗii na. Ɗon húmú keluute biti kaaˈohee ke Kiristaa baa ac ayo neh a ? Tígë homuu yen bee ra kep, ɗi ee ëldúnë nék.
4Ndaa ɗon fi koyyi soˈ, ɗon nonu ɓëewí Koope te ɗon ɓagute yonente yi paɗɗah ya, ndah Ruuha hom ɗon na ra luk bee hom wa fi ƴaa nonu ɓëy feey fi bee ra doole. 5Wa fi yonente yi paɗɗah ya, wa ɓëy feey fi beh. Yii baa tahte gonli wa ɓéeɓ yullaˈ yii neɓaˈ ɓëy ëldúnë te ɓëewë nonu ëldúnë rë daa na síkírúu wë. 6Yen nék, yen nonu ɓëewí Koope. Ɓëyí fí yúh Koope ay yen síkírëh ; ɓëyí noneh ɓëewí Koope ii yen síkírëh. Yii baa daa nay teeɓee Ruuhi Koope fa na yeñ ow kaah ra a Seytaane fa na múuƴíɗ ow ra.
Di na fahuu
7Ɗon fa fahaˈ mi níi fahaˈ ra, yen fahantuun hanndal ki yen, ndah fahaˈ kolaˈ Koope na. Ɓëyí fí fahaˈ moroomi, ɗeef ɗi koy Koope te ri yúh Koope. 8Ɓëyí fí fahaay moroomi nék, ɗeef yéeh Koope ndah fahaˈ ow teem Koope na. 9Koope teeɓaˈ biti ri fahaˈte yen ɗeh : ɗi cépíɗté Koy ka lahaˈ ri yínë kut ɗa feey fa, nda yen ñeyaˈ ɗii na, yen lah pesa na ɗúméh rë. 10Fahaˈ gétëy beh : yen neh daa fahuu Koope fahaˈa gén ɗë. Ɗi fi baa kay daa fahaˈ yen fahaˈa gén ɗë, wolaˈte yen Koohi hawute sarah nda yen baalu bakaaɗɗi yen.
11Ɗon fa fahaˈ mi níi fahaˈ ra, Koope daa fahaˈ yen ɗaaha raa, yen warutee fahantaˈ hanndal ki yen ɓal. 12Ow ëllëy Koope ! Ndaa yen fahantaˈ hanndal ki yen ɗaa, daa ri biti Koope pokohte yen na, te fahaˈa fahaˈ ri yen ɗa feeñce yen na níi mitte sëk.
13Yii bee daa teeɓ yen biti yen pokuute ɗii na ɗi pokohte yen na : ona on ɗi yen Ruuha ra daa teeɓaˈ baaha. 14Te fun olute, fun seedeyute biti Boffa wolte Koy ka sëmlëˈí ɓëy ëldúnë. 15Ɓëyí fí won biti Yéesú Koy Koope, ɗeef Koope pokohte ɗii na, te ɗi pokohte Koope na. 16Yen nék, yen yúhúté te yen gémúté biti Koope fahaˈte yen. Ahaŋkay, fahaˈ ow teem Koope na ! Ɓëyí fí fahaˈte ow pokoh na, ɗeef ɓëyí baa pokohte Koope na te Koope pokohte ɗii na.
17Fahaˈi yen ow mit sëk rëe, yiin bis-këem, yen ay wëelíyëh affi yen, ndah ɗeef ɗee pesuu yen feey fi bee ra a ɗee pesaˈ Yéesú-Kiristaa ra daa madu. 18Fahaˈ na ñéeréeh a neeh ; fahaˈ mit sëk rëe, botaˈ neeh botoo. Ɓëyí fí neeh, ɗeef séentëh daan, te fahaˈa fahaˈ yen Koope ra feeñay ɗii na níi mitte sëk.
19Yen nék, Koope daa ɗéɓ yen fahaˈ daa tah yen fahaˈ ɓani ɓëewë ɓéeɓ. 20Ɓëyí fí kaaˈ koy-yaafee ke ri filiɓ ngémë anti won biti fahaˈte Koope ɗeef ɓëyí baa fel felo, ndah ɓëyí fahaay koy-yaafee ke ri tík ɗí íl rë, mínéh fahaˈ Koope fa ɗi tíkëy rí íl rë. 21Túuƴëˈë heliɗ yen Kiristaa ra daa ri beh : Ɓëyí fí fahaˈ Koope waɗtee fahaˈ koy-yaafi ɓal.
5Di nay faasuu pesi ëldúnë
1Koy-yaayyi ƴeh, ɓëyí fí gém biti Yéesú daa Buura Koo fal ri ra, ɗeef ɓëyí baaha koy Koope ; te ɓëyí fahaˈ baap ɗeef fahaˈte koyyi. 2Yii bee daa teeɓ yen biti yen fahuute koyyi Koope : fahaˈa fahuu yen Koope, yen na ñeyu túuƴëˈ yí rë daa teeɓaˈ baaha. 3Nagajek, yen fahaˈ Koope raa daa ri biti yen ñeyuu túuƴëˈ yí. Túuƴëˈ yí misikay, 4ndah ɓëyí fí hente koy Koope rek, fu faasse pesi ëldúnë. Yee tah yen faas pesi ëldúnë rë nék, ee ngémí yen. 5Kon daa faas pesi ëldúnë henay ɓëeˈ gém biti Yéesú Koy Koope ra ?
Iña seedeyu sun fi Yéesú-Kiristaa ra
6Yéesú-Kiristaa daa ɓëeˈ ayaˈ muluɓ a ñif ra. Ɗi ayay a muluɓ doŋ, ndaa ɗi ayaˈ muluɓ a ñif. Ruuh-Peseŋ seedete yii baaha, te ɗi fi Ruuh-Peseŋ daa kaaf ka. 7Kon seede ya henute éeyë : 8Ruuha, mulaa a ñif ma, te wa fi éeyë yë ɓéeɓ daa boku una yínë. 9Hém ow daa na won iña ot ɗi, yen gém rí rëe kay, assumaa wonni Koope neh, ƴee seedeyiɗ ɗi Koohi ra ! 10Ɗaaha, ɓëyí fí gém Koy Koope na, kúɗté seedii baa ɗii na ; ndaa ɓëyí gémëy Koope, ɗeef yampe ri fel ndah ɗi gémëy yee won Koope sun fi Koohi ra. 11Yee wonu ra daa ri beh : Koope onte yen pesa na ɗúméh rë, te pesi baa ee Koohi na. 12Ɓëyí fí non Koy Koope na, lahte pesa ; ɓëyí fí noneh Koy ka na nék, lahay pesa.
Pesa na ɗúméh rë
13Ɗon fa gémú Koy Koope ra, ɗon ot mi won ɗon unni ƴah, nda ɗon yúh biti ɗon lahute pesa na ɗúméh rë. 14Wëerté yen biti yen ɗaŋ yii ñéerëˈté a yee fahaˈ Koope raa, ɗi ay naal nufi yen na. Yii baa daa tah yen ƴahti ɗaŋ Koope raa, yen na sídíih dara ! 15Kon wëer yen biti ɗi naalte nufi yen na raa kay, yen yúhún biti rek yen ay liil yee ɗagu ri yen ra.
16Ɓëyí ot koy-yaafi filiɓ ngémë paŋ bakaadi kúréh ow safara raa, ɗi ɗagira ri, Koope ay on koy-yaafee ke ri baa pesa na ɗúméh rë. Baa wonuu ɓëyí paŋ bakaadi kúréh ow safara. Ndaa ƴaha bakaadi ay kúré ow safara raa, mi wonay biti ɓëyí baa daa nay ɗagiru ! 17Yin ɓos ɓéeɓ bakaaɗ naam, ndaa bakaaɗ ɓéeɓ neh daa na kúɗ ow safara.
18Yen yúhúté biti ɓëyí fí hente koy Koope na bakaareh saye, ndah Koy ka kolaˈ Koope na ra daa na níiɗ ɗí níi Seytaane mínléh rí yin. 19Yen yúhúté biti yen nonu ɓëewí Koope te ɓëy ëldúníi bee Seytaane lahaˈte wa. 20Yen yúhúté biti Koy Koope acce te daa ri on yen afa tah yen yúh Koope fi kah-kah fa ra. Yen henute yínë a Koope fi kah-kah fa af Koohi Yéesú-Kiristaa. Daa rii Koope fi kah-kah fa, daa ri pesa na ɗúméh rë. 21Mantee ɗon fi koyyi soˈ, mëytíi ala ya !