PILIPAI

Ane’

PILIPAI-nupoong

Paula’ke Daarievuru’nane’

Pilipai-nupoonge Paula’ Tampa’ Navuaio’ Dotuaru’na’

(1:1–4:23)

¹ Aung ane’ karavoto˜ ninge Paula’ke minkuanko Timoti’ke daarivuma nee’ Karistoo’ bakanaanka botovotonaa’kai dii’anko botoampemang nantoong Kumponing bakaning meekupoong Pilipai-navuntu’ke Jiisuu’ Karistoo’koo kuunge otorimaing-anko, tanatanuka ee’noko pakupakunuka-anko nari’. ² Biraanke ee’noko mooa dii’koo otoaing Kumponing Niuma-itaing ee’noko teieta Ovoring Jiisuu’ Karistoo’.

Tampa’ Tang Ee’noko Napo’ Tee Kunsi

³ Ninge tee dii’ noru’dampima tee-koo nkaang Kumponing-koo tampa’ tampamaung ookara batei-koo. ⁴ Ee’noko nkaang kunsi-koo dii’ ookara pakurampima tee ning ookara batei-koo doturotu ninka kunsimaramaung, dii’ke tampa’ pakumerimaung-koo tee doorenang tampara bereng-anta-koo, teketa tutung komperu’noo’keta bera e’munung doong-koo basinoo’koo. ⁶ Ninge masika’ tasi’pansi o’nong teie Kumponinge tee nko-nko tampara dii’koo tutung-antavuu’nunge be’nu’antavui otoaing tee, bera te’mung tee Jiisuu’ Karistoo’ toroaravaina’mung-koo basi.

⁷ Bakei makosi ninge dii’ ookara tee’ noru’koo, ai’ dii’ teing ning-koo domang-koo otoring, dii’ ni’ninka narung-pina’ o’norimaing. Bane tenang ning kiimatanava-koo o’noi ee’noko napo’ tenang ninge doorenang tampara pakuansi puring-antavamanang, dii’ teing ni’ninka nari’ tampa’nko Kumponing-etaing kompampimaing. ⁸ Kumponinge masika’antamupeu’ naurampiko tee’ ninge dii’ piaarampimana’ teie piaae Jiisuu’ Karistoo’koo pankaruntoong-koong-eta pomaunge. ⁹ Ee’ pina’ kunsimaramaung dii’koo: tee diikaang piaa tee’ nari’ deto aa’na’ dupui otoaing, tee ninka norunoru’ masikung ee’noko tee matau tampara. ¹⁰ Aa’noaina’, dii’ke ookara aarumonanka tampa’ simpe’eri kiiroraa’dariri tuumpiropanuka otoriaing bera Karistoo’ poainoo’ke basi. ¹¹ Ee’noko teinge aarumo koonto’ bakaninge sinanankai maanto’duri otoriaing Jiisuu’ Karistoo’keta pomainge Kumponing pankaing-antavui daangang-kooninge.

Paula’ Kiimata-koo Otoko Tampara Doorenang Beremparu’na’

¹² Ee mmaikori’, enang kiimatamainoo’koo dii’ke aung noru’erii’naang piamoing, teie kapoo’ke ning-koo nkoarinunge tee doorenang tampara tampa’ aa’na’ masika’ beremparu’nung. ¹³ Bera tee ookarai amono-koo otoroininge aa’noko teing kiimatanuka ee’noko tanatanuka nari’ tee ee’ noru’aing: Ning tee tamung boturopa kiimatamaava’, teka ning Karistoo’koo botovotonaa’ deemarako kiimatamaing. ¹⁴ Ee’noko ning tee ee’ dai’mari o’noko daping ookara nantoong mmaikori’ Ovoring-koo purimpariri bia’oromaung bakaang kara aroo’keta sira’paama avoreaava’.

¹⁵ Masika’ nii’ninge tee doorenang tampara mamairo ninka daankiaamaung ning Karistoo’ke siong-antamumana’koo mamairoarima. ¹⁶ Teka nii’ning tampara onou ee’noko piaa ninka daankiarimaung tee’ tasi’mai a’ kiimatanoo’ si’mau’nung tee doorenang tampara puring-antavanko. ¹⁷ Teinge mamairo ninka daankiaamainge tee Karistoo’ onou kiiroraa’keta daankiaava’, teka aing aa’ning onou-koo otoko daankiaakoo’: baka-noru’, baka daangang, maroita ning aa’na’ manki’antamaava’naang kiimata-koo o’noko. ¹⁸ Teka tee makosi, kapoo’ otoa’. Tee kapoo’ pankaing tee Karistoo’ daankiaamaung bane teie teinge ookenge taunge, aa’noko daang noru’ariri ee’noko aarumo masikung ninka. Teka ning tee dotumari o’nomaung teinge Karistoo’ daankiaamaung-koo.

Paula’ Domampari Otoo’naang Noru’aru’na’ Pilipai-nupoong Paku-koo

¹⁹ Ee’noko tee’ nari’ dotumari o’noaing, ai’ ninge tee noru’ansi o’nong dii’ke kunsi-koo ning pakumerimaung-koo ee’noko napo’ Jiisuu’ Karistoo’ bakaang tanuaange pakumumaung-koo botue tee unaa-anta kompampaing. ²⁰ Ee’noko ning aa’na’ dotumari nemari o’nong tee kapoo’ tavo’kuaing-koo, maia’moauka’na’ noru’mari, teka amanampa’ monoi ookutununge Karistoo’ pankaing-antavampaing tee’ nari’ uripo’keta nkomaramana’, bane aa’noainge: domang o’noi o’noaing deeko’, ee’noko dupisi’maavaing deeko’. ²¹ Ai’ domamari o’noi Karistoo’ tee ning nkaang domaang, ee’noko moomira deeko’ tee dupeari otoko kompampaing. ²² Teka ning nkaang mono tee’ nari’ domamari o’noaing deeko’ tee ee’ oro’pari otong, nko-nko doma ninge tampara sinang-po’nung nkoampaing, teka tee ning meu’ ke’me’mari o’nong kenaanka noru’koo. ²³ Boo’koo pia o’nong Karistoo’ ninka nari’ o’noreaina’koo, tee’ tee’ bakei aa’na’ tampa’ masika’. ²⁴ Teka kapoo’ pankaing dau basi tee domamari anke kansi’koo oto’koong dii’ iri’antarampima. ²⁵ Ee’noko ninge enang to’biimari tee ee’ tasi’pansing: ning doma dii’ ninka nari’ o’noi pakurampiri puring-antarampimatoaing diikaang masika’anta-koo ee’noko napo’ tee-koo diikaang doturotu. ²⁶ Tee’koo ning napo’ dii’anko basimarako dii’ ning-koo doturarima dii’ke tee Karistoo’ daangamperiaing.

Pilipai-nupoong Arikung-koo Kuunge Tampa’ Otoroo’naang Nauvuru’na’

²⁷ Otori tee’ teie doorenang tamparai Karistoo’ bakaange tampui otoina’ nari’ otorimaatoai, bane ninge moma beero’dampiko ee’noko beero’dampia’ dii’keta taapo’ke o’noko deeko’, ai’ ninge dii’ teing narung onou-koo purintariri otoriko taara-koo piamoi o’nong, ee’noko narung noru’ ninka pakureeri iveka’doriai tee doorenang tampara masika’antaveri. ²⁸ Diikaning kare-nupoonge bane arekee’ tokoona’ nkoraariko aroreria’ otorimaatoai. Tee’ taa’ni’antarariri otoriko teinge tasi’paavaing doong asi’na’mung kera’pariaing-koo dii’ domantariko, Kumponinge ee’nunge pakururio’. ²⁹ Ai’ Kumponinge tampara otooto’koo bokururima Karistoo’ masika’anta narung-koo miru’duria’, teka ookeng-koo masika’anta ninka arikananka nari’ kune’koo Jiisuu’ bakaang miring-koo. ³⁰ Ai’ dii’ ninge tasi’dampiri otong dii’ teing arikananka kune’erima pore’dorimaing tee’ ninge arikananka-koo pore’ kompanko oomeriko’na’ ee’noko enang napo’ tee’ nari’ pore’moko taaramerimaang.

Tampa’ Pakumeeri Daangamaria’ O’noriai

¹ Ee aing, ning dotumari o’nong dii’ aing aa’ning oto’derurimaung-koo: tee domang kuaa’anta Karistoo’ ninka narung deentarira nkaveru’nung, ee’noko napo’ tee bakaang piaae dunsirunsi˜anta-koong, ee’noko tee bakaang Tanuaang-koo kuunge navunavu, ee’noko napo’ dii’ka pankaruntoong-eta piaareeri otorimaung-koo; ² makosi, dii’ke nkaang doturotu dupe-antaveriaing narung noru’koo otori, nari’ piaareeri, napo’ nari’ onourariri kapoo’nanka nari’ nkoverima. ³ Deikoo’na’ ee’noko baka daangana’ nkorariauka’, teka dii’ka boonko noru’dariri deto pankaing-antareerimatoai. ⁴ Dii’ naruna’ naruna’ mintoontarima nii’ning nari’ paku-koo mintoontariaing dii’ka dii’ naing noru’daria’.

Tee Karistoo’ Boonko Noru’ari Otoko Kumponinge i’ampuu’na’

⁵ Diikaang aarumo tee’ nari’ Jiisuu’ Karistoo’ bakaang-pina’ noru’dariri otorimaatoai. ⁶ Bane Kumponing-pina’ nari’ oro’ke, teka baka etuarava’ Kumponing-pina’ nari’ basi otoo’naang. ⁷ Baka naning tamunsi’nung deeng-antavaru’, tee naning botovotonaa’pina’ oto’antavarara. ⁸ Ee’noko bakei naning-pina’ masika’ oro’paru’noo’keta baka boonko noru’ari Kumponing meumpuitaa’ boo’koo taura’paru’, bane aa’barata’koo oroo’ke boo’koo. ⁹ Tee’koo Kumponinge kansi’keta deto a’dei’ ookara-koo dau i’ampura teka tee miring pankaing deto basi ookara-koo mirinanka-koo avuu’. ¹⁰ Ee’noko ookara nantoong aa’noko paning-koo-nupoong ee’noko kansi’koo-nupoong, napo’ kansi’koo boong-nameng-nupoong, teing tee-koo Jiisuu’ bakaang miring-koo kinkinaavaing. ¹¹ Ee’noko napo’ teinge ookarai Jiisuu’ Karistoo’ tee Ovoring sirakura’ tampaavaing, Bauma Kumponing meenasi oko-antavai.

Aa’na’ Arakamariaina’ Mutaananoo’ke

¹² Tee’koo, ee mmaikori’, tee’ nari’ ookara batei-koo Karistoo’ bakaang kara meumperiko’na’ enang napo’ tee’ nari’ meumperimaatoainge, tenang ning dii’ankoi o’noko naro’ deea’, teka baru’noo’ tenang ning dii’ankoi o’noaruko tee’ nkorariaing, monkeena’dariri tee diikaang domanturiaing tampa’ dupe-antasiiriaina’ aroo’eri mintoontarima. ¹³ Ai’ tee dii’koo mintoompari otomaung tee Kumponing, dii’ paku-antaruri tee aroo’erira bakaang pia siomperii’naang.

¹⁴ Ookara kapoo’nanka nkoverima minkuminkunanka nii’noo’ tata’deerima nkoveriauka’ tuumpiropanuka otoriaina’ ee’noko kiiroraa’nuka, Kumponing baurukaa’ kararopanuka anke kansi’koo oroo’ke koomparia’navitu ninka otorimaing. ¹⁵ Teing-koo ee’ning-koo meu’ke arakarariri otoriaing beento’nanka paning-kooning-pina’ tee kara domantoo’ deto komperi ookarai ooaavaina’. ¹⁶ Tee’ nkoveriko dii’koo aa’na’ dotumaravaing Karistoo’ poaina’mung ee’ noru’ama: dii’koo amari mintoomarakotaa’ tamung pore’moaruu’nung. ¹⁷ Diikaang baito tee boontunang tampara makosi Kumponing-koo, ee’noko ning dupisi’maavaing deeko’ nkaang ereng tee-koo boontunang-koo dau dakoaravainang ning tee dotumaravaing dii’ ninka nari’ dotumariaina’ noru’ansitaa’. ¹⁸ Ee’noko napo’ dii’ teinge ni’ninka nari’ doturariaining.

Paula’ke Timoti Naanka Epaparodaitas Botovuretu’na’

¹⁹ Ovoringe Jiisuu’ke taura’puko tee Timoti dii’ Pilipai-nupoong-anko namu’ke botoama’naang, ning-koo dooreruriko doturarii’naang ee’noko toroarako diikaang doorenang taaravamira dotumaravaina’ nari’. ²⁰ Nii’nung naning noru’ampa’ Timoti-pina’ mantong, napo’ dii’koo onou aa’na’ otoing. ²¹ Nii’ning nantoong teing kapoo’nanka biikaning naing tanata-koo otoromaing, Karistoo’ bakaning sipai. ²² Teka dii’ke Timoti bakaang aarumo tampa’ noru’eri otoring tee teing pina’ deea’, ai’ naninge bauma pakuvumaatopeu’na’ nari’ teie ning aa’na’ pakumumaung tee doorenang tampaara bereng-anta-koo. ²³ Enang tee dii’anko namu’ke botoama’naang piamomaang, tokoona’ ning o’noaina’ baakeenemarara. ²⁴ Ee’noko ning tee’ke Ovoring-koo aroo’mari aa’pamaang, “Ning da’deng simpiri’antamaako dii’anko dama’ke moo’naang.”

²⁵ Teka io’ tutung tee Epaparodaitas dii’anko napo’ botoama’naang tee ninge mmaiko’, nari’ mintoomaremaung ee’noko nari’ ni’ninka nee’ piatoorora˜ baito-koo kuunge. Teenoo’ tee diikaang naning, kapoo’koo ning apuka’maramaing-koo pakumuu’naang botoveru’nung. ²⁶ Ee’noko tee dii’ aa’na’ oo-koo piavoi otong. Ai’ tee tee enang manki’antavari otong siipavou’na’ taaraverira mi’miinki’doriko noru’durima. ²⁷ Ee’, masika’, tee tee dapi’ boo’paru’nung, teka tee Kumponinge piaavura domang-antavuu’nung. Teka tee narung deea’, tee aa’noko ning piaamura Epaparodaitas domampuu’, orarunsi ning-koo pau’eere’neeng-koo. ²⁸ Tee’koo dau basina’ dii’anko boto-koo piamoi o’nong dii’ke napo’ ooverira doturoturariaina’, ee’noko nkaang orarunsi birimpuai. ²⁹ Emu’ tee te’ dii’anko basiarako bakei aa’na’ onkeonke’eriaing Ovoring bakaang miring-koo aa’na’ doturariri. Ee’noko nantoong tee-pina’ oro’nuka pankaing-antaverererimaatoai. ³⁰ Ai’ tee tee dapi’ boo’paru’nung tee-koo Karistoo’ bakaang-koo nko-nko-koo kuunge; boo’koo taura’paru’ ning pakumuma dii’ isipo’ otori makosiriaruko.

Paula’ Tee Karistoo’koo Kuung Masipo’ Oto’koo To’biiarako’na’

¹ Asi’noo’ka ee mmaikori’ aa’dampimang, Ovoring-koo doturoturarimatoaing.

Aung tee kara anaare napo’ unampama daariamatomaung ninge daari-koo pore’ deea’ ee’noko dii’ tampa’ koono-koonge. ² Tee’ ee’: Tarerariri otorimaatoai teing-koo nantoong-koo Ju’ biikana’ dootuu’ koong taa’ni’anta kong-koo eturaarimaing-koo, ai’ teing nkaunanka makosinanka, kapoo’ oreng nkoaama mono-nameng-koong taa’ni’antai daang meeka’parimaing dopa’ napu’ dovang nkoarima. ³ Teka nii’ ee’ning Kumponing bakaning masikeng-pina’ taa’ni’antanii’nuka, bakaang Tanuaang ninka dootuu’marimaing Jiisuu’ Karistoo’ baitoampiri daangampampima, mono bakanameng-koo aroo’ o’noria’.+ 3:3 Tee’ teie taa’ni’antai dopa’toto’koonge miru’ui otoina’.⁴ Mono bakanameng-koo aroo’ o’noi dei ning makosi avitoitoi-koo biivimarapeu’, ee’noko napo’ nii’nung naning mono-aapenameng-koo biivimparamaung deeko’ ning puru’muarupeu’. ⁵ Ai’ ning tee naning meekung taa’ni’antanii’ dopa’ toto’mau’nung-koo ˜beenang-taa doong tankinuio’ ponto’maru’noo’keta. Ee’noko ning bakei Isireeli-nupoong-koo narung, Kumponing bakaning-koo, teing Bensimani bakanaving-koo kuunge ponto’marara. Napo’ biikaang kara ee’noko aarumo kompansi o’nong, Iiburuna’. Ee’noko boto sionameng-koo ning tee Boto Keperuu’navitu-koo narung aa’nung. ⁶ Napo’ toomo-nameng donkompansi ning tee iri’moi dootuu’nupoong manki’antavaranko’nunge. Ee’noko koompari oto’nairu-koo ning naninge tuumpimupeu’noo’ otoa’.

⁷ Teka teing aing kapoo’nanka tero ning puring-antananka-pina’ noru’anko’ning enang teing tamunsi’ning noru’ansira dua’arantu’ning ookara, Karistoo’ narung-koo noru’ sipamira. ⁸ Ee’noko teing naing deea’, ookara kapoo’nanka daang-antavaramira opansi dua’arantu’ nung tee kapoo’ pankaing masikung kompama’naang. Tee nkaang Ovoring Jiisuu’ Karistoo’ noru’koo piamora tee bakaang miring-koo ookara kapoo’nanka dama’duarantu’ tamunsi’ning tampamira, tee Karistoo’ nkateema’naang. ⁹ Ee’noko ning tee-koo kuung o’noi pinka’maravai Kumponinge ning naning koonto’ tammuu’naang, boto siompama ninka koomario’ deea’, teka Karistoo’ masika’antavansio’. Ai’ Kumponing ninka koompari oto’ tee Kumponing-eta nka-koo miru’nii’, ee’na baito narunge nka-koo makosi. ¹⁰ Ning tee Karistoo’ bakei aa’na’ noru’koo piamoi o’nong ee’noko tee bakaang iri’ tee domang-antavuu’nung; napo’ tee baike teie kompuu’nung tee’ nari’ kompampainge; ¹¹ Ee’noko boo’koo tee’ moompai tee-pina’, dama’ke boo’keta daa’maravaina’ piamora tee’ naumuru’na’.

Paula’ Bono’aape Aa’na’ Kua’paru’na’ Nii’ke Tee Siong-koo Makosina’

¹² Ning aa’maravaroo’nang, “Ning tee’ Karistoo’pina’ dupeario’ kompansing ookara aarumo.” Otoa’. Ning mme’ makotumpa’. Teka ning aa’na’ kevi’maramatoaing temurii’ aarumo okomuu’naang Jiisuu’ke ning okovui miru’muu’na’. ¹³ Ee mmaikori’, ninge tee tero nkavantu’nung-pina’ noru’ampa’, teka aung kapoo’ narung ninge nkoampaing: Teing kapoo’nanka dama’duaransining ampa’mora kapoo’ uro’kanoo’ke otoing kevi’ama mintoomari o’noaing bera boo’ke basi, nkavama’naang tee moo’. ¹⁴ Tee moo’ tee aung ee’ oro’: Kumponinge Jiisuu’ Karistoo’ karantavuko˜ a’dei’ be’koo bokumuaing ning.

¹⁵ Enang tee nii’ ookara tanuaang nameng-koo petaa’nuka tee tee’ nari’ noru’mariaing. ¹⁶ Ee’noko dii’koo nii’ninge oovuna’ noru’eriko deeko’, tee Kumponinge dii’koo siraka’antavuaing bakaang kara-koo noru’erimanoo’ tampa’ nari’ siomperimatoaing deeko’. ¹⁷ Ee mmaikori’, tee’ nari’ otoritaa’ ning o’nomana’ otoriaing ee’noko napo’ teing ninge nauarantu’na’ otoromaing-koo barerariri otorimaatoai. ¹⁸ Ai’ aung tee mmau’namu’pie teroita naurampiko’na’ ee’noko enang tee’ nari’ piaarampima ta’du ninka unampansi aa’dampimang: Mmau’ nantoong dootuu’nupoong teing turani’nuka-pina’ otorong tee’ Karistoo’ aa’barata’koo bou’na’ siong-koo. ¹⁹ Ai’ teing teing biikaang kumponing-pina’ noru’ tee biikaang mono bakaang pia narung, kapoo’nanka maimaia’arimaing, ee’noko biikaang noru’ kapoo’nanka kansi’kooning-koo otokoo’. Tee’ nkoarima mosianung-aape otorong. ²⁰ Teka nii’ niikanoo’ osi te’ paning. Ee’noko nii’ teing tee niikaang Domang-anta tee Jiisuu’ Karistoo’ teketa poaing domange etuvuko nempampiri o’norining. ²¹ Ee’noko pora teie tee aung niikaang kansi’koong mononanka aruaru’ paari-antamuriaing bakaang mono meenasi-po’nung-pina’ oro’antamurima teie iri’ke ookara kapoo’nanka bakaang tanata-koo kuung si’koo makosi-antavuu’nunge.

Navumariri Dotumariaina’ Tampa’ Noru’ Ninka

¹ Tee’koo bakei tee’ nari’ Ovoring-koo masika’antarariri otoriaing, ee mmaikori’, ai’ dii’ teing ninge aa’na’ piaarampimaing, ee’noko aa’na’ oo-koo piamokoo’ dii’ nkaning doturotunuka ee’noko nkaang nko-nko-koo moo’ makosinanka deentaririo’.

² Dee’ Iuodia naanka ee’noko da’ Sintiki aa’dampemang, dee’ tee-koo Ovoring-koo kuunge napo’ navurareaing. ³ Napo’ dake Sisikusie pakueresio’ tenaanka manikumaara nari-antaveereai beekaang mankimanki’keta, ai’ tenaanka tenaanka ni’ninka nari’ manta’marimanaanka doorenang tampara bereng-anta-koo ee’noko tee Kelemeni nari’ teing ninka nii’ning nari’ mintoomarimaing, aa’ning niikaang miring tee tene’koo buukunane’ domamariaining o’norinane’koo daariariri otong.

⁴ Doong kante Ovoring-koo doturoturariri otorimaatoai, napo’ unampama aa’pamaang, Doturariri otorimaatoai! ⁵ Ookara kapoo’ nkoveriaining-koo nantoong-koo dutakanoo’ke onou tampara oro’antaverimatoai, ee’ noru’eri, Ovoring poainoo’ tee due’ui otong. ⁶ Kapoo’nanka-koo baru’ noru’ otoriauka’, teka ookara kapoo’nanka-koo tee Kumponing eentaveriai kunsirarima tampa’ tamperima diikaang domang-eta. ⁷ Ee’noko teie Kumponing-nung mooai pankainge nantoong biikaang matau-koo dau basie mankimanki’keta unaa-anta aruriaing tee diikaang domang ee’noko diikaang onou Jiisuu’ Karistoo’koo kuunge.

⁸ Ee mmaikori’, asi’namoora’koo aa’dampimang, “Aing ee’ oro’ning minkuama’naang dii’ke norunoru’eriaining aa’ning: tee kapoo’ masikung, tee kapoo’ pankaing-anta-koo makosi, tee koonto’, tee kiiroraa’, kapoo’ piaa-koo makosi, tee miring tampara-po’nung. Nii’ning kapoo’ tampeng daangang-koo makosining otoko deeko’ makosie dii’ke teing norunoru’koo. ⁹ Ee’noko teing teing kapoo’nanka ninge naurampiko taaraverira noru’ke pinka’eru’ning ee’noko teing ning-koo ooverira barerariru’ning teing tee’ nari’ napo’ dii’ke nko-koo paaraveriaining. Tee’ nkoveriko tee Kumponing mooa-po’nung tee dii’ ninka nari’ otoaing.”

Paula’ Biikaang Avuavu’koo Dotuaru’na’

¹⁰ Bakei aa’na’ dotumaring tee-koo Ovoring-koo diikaang piaa ning-koo napo’ daa’antaverieeng-koo mmau’ batei tamung tankinuio’. A’noo’koo tee dii’ke piaameri paararariko’ diikaang avuavu’ boto-koo, teka taung otoaruko ning-koo da’deng tavo’aravaruu’. ¹¹ Teka aa’peri’neenga, “Tee pa bakei aa’na’ papovura tee’ minkuvuing.” A, ning aa’ tee bakei datamoi o’nomaung bane aremurii’ batei-koo. ¹² Ai’ ning tee kapoo’koo apuka’mari oto’na’koo datamou’nung ee’noko napo’ mmau’ oto’memui oto’na’koo. Ning baremaru’nung tee kapoo’ makensi’nung amutemurii’ batei-koo tampa’ nari’ datavoi oto’na’koong, aa’noko poomui deeko’ nii’noo’ peeramoi deeko’, nii’na’ mmau’ oto’memui deeko’ nii’noo’ apuapuka’koo o’noi deeko’. ¹³ Ninge tee ookara kapoo’nanka Karistoo’ bakaang purinto’koo kuunge nko-koo makosi.

¹⁴ Teka tee makosi tampara dii’ke nkaang arikananka-koo ning pakumerimaung-koo. ¹⁵ Napo’ dii’ke Pilipai-nupoonge tee tampa’ noru’eri otong, tenang urikamu’ tutuna’ ninge tee doorenang tampara daankianko’nang, Masedonia’keta tenkenansio’ dii’ nainge avuavu’nanka tankaamperima ning makosi-antameru’. ¹⁶ Napo’ teie, bane osi pankamono Tesalonaika’namono-koo basimarako, mmau’namu’pie diikaang pakupaku be’antaveru’ papoansi o’noko. ¹⁷ Teka ninge avuavu’nanka nkavampaina’ besi’ampaung. Tee kapoo’ pankaing ninge oo-koo piamoi o’noing tee sinang tampara, Kumponinge diikaang tampara nko-nkonanka-koo deeru-koo dau be’nu’umaung. ¹⁸ Tee diikaang avuavu’ tee Epaparodaitas averio’ nkavui pou’nung tee enang nkavansing. Tee bakei mmau’ masikeng bono’ divu’ui otong. Aa’na’ maanto’muing. Tee avuavu’ tee boontunang makosi tampa’ nuuraa’ Kumponing-koo, ai’ Kumponing tee boontunang temurii’koo dotuaramaung. ¹⁹ Ee’noko teie nkaang Kumponinge teing ookara kapoo’nanka dii’ apuka’dariaining aruriaing, mmau’ aa’na’ makotui otoko teieta bakaang paning-koong o’meeva-ita Jiisuu’ Karistoo’koo kuunge. ²⁰ Bakei daangang Niuma Kumponing-koo otoi otoaing ookara batei-koo. Ee’.

Paula’ke Si’nara’uru’na’

²¹ Nkaang tampa’ tang nauereriai teing ookara meekupoong Jiisuu’ Karistoo’koo kuunge. Ainge mmaikori’ke ni’ninka nari’ o’norimainge dii’anko biikaang tampa’ tang botoaamang. ²² Ookarai Kumponing bakaning meekupoonge anke Rooma’ke otoromainge tampara tampaamaang dii’koo, baru’noo’ teinge botovotonaa’nukai tee daurarong˜ Siisa’ bakanava’kooninge.

²³ Tee biraanke tee Ovoring Jiisuu’ Karistoo’ bakaang diikaang tanuaang ninka nari’ otomatoaing.

Masikung.