JEEMISI

Ane’ Karavotonane’

JEEMISIE

Daarivuu’nane’

Kara Baavootunanka Ane’kooning

1:1 Parapaarananka Kune’ampira Kumponing-koo Ima’mariri Tampa’ O’noriaina’

1:19 Nii’ke Kumponing-koo Aroo’marimainge Nantoong Tampa’ Nkoarampiaing

5:7 Purimariri Kunsimariaing Ovoring Toroaravaina’mung Nempampima

Parapaarananka Kune’ampira Kumponing-koo Ima’mariri Tampa’ O’noriaina’

(1:1-18)

¹ Aung ane’ karavoto˜ ninge Jeemisie daariamang tee Kumponing ee’noko tee Jiisuu’ Karistoo’daang beekaang botovotonaa’ke. Tampa’ tampamang dii’koo kivora-ita kenaanka muu’ Isireeli-nupoong-koo avitoitoi purarenka’dariri otorimaing-koo.

Parapaarai Baito Purimarimaung Noru’ampima Keekoo’mariauka’

² Ee mmaikori’, ni’ninka nari’ Jiisuu’koo baitorarimaing, doturoturariri otorimaatoaing tenang kapoo’ avutevu’ parapaarananka kune’erima. ³ Ai’ dii’ke tee noru’eri otong tenang diikaang masika’anta teie parapaarai paararuriko tee, da’deng apukaruu’kiria’ otorimaatoai. ⁴ Ee’noko tee’ pinka’dariri otorikotaa’ koonto’ ima’dariai Kumponing bakaang pia narung tampa’ siomperima ookusii’eri, nii’noo’ siperia’.

Naning Matau-koo Apuka’parara Deeko’ Kunsiaravaing

⁵ Dii’koo naning narung matau-koo apuka’parara tee Kumponing nia’uaing, tee ookara nantoong-koo avusiro’, domang manki’oa’, ee’noko teie avuaing tee. ⁶ Teka tee baito ninka eentavaravaing noru’ keekoo’arava’, ai’ tee keekoo’aramaung tee tee-pina’ boo’a dovinge avitoitoi bereravumaung. ⁷ Teie naninge ee’ noru’uai: Naning noru’ kenaankai tee kapoo’ nkavuarupeu’ Ovoring-eta, bakaang aarumo ookara naro’ke pinka’aravaung deemparako.

Tautau Aa’ning-koo Kapoo’koo Apuka’parimaing Ee’noko Maneearimaing

⁹ Teing ata’oinku nii’maikorori’ teing dotuariai Kumponinge deto kompurimaung-koo. ¹⁰ Ee’noko teing nantoong mmau’po’nupoong tee dotuariai Kumponinge doonko otoromanoo’ tasi’antavuru’nung-koo, ai’ teing tee-pina’ kaakaa’ napo’ namu’ke boomaung. ¹¹ Duaa’ tee uipaarii’ naapu ninka daa’aramaung ee’noko baa’nanka mara’antavukoo’, napo’ kaakaa’nanka dua’arikoo’ ee’noko tampa’ oro’noo’ tenang paa’arakoo’. Tee’ nari’ napo’ teing nantoong mmau’ kavo-po’nupoong paa’ariaing teing biikaning nko-nkonanka nkoaamaing.

Kumponinge Nii’ Tampa’ Nkomurimaung, Oraka’ Nko-koo Baramuriaung

¹² Biraanke-nupoong teing nantoong parapaaranankai apukaruu’antavuriaung-koo, ai’ te’mung ookara parapaarananka puru’aara teing tee biikaang moo’ nkasiiaavaing, tee domang-anta Kumponinge maraka-antavuru’nung teing-koo tee pankaruntoompaamaing-koo. ¹³ Tenang naninge parapaara kune’uma tosiarama aa’puauka’, “Kumponinge orara nko-koo paaramumaang,” ai’ naninge Kumponing orara nko-koo paaravuarupeu’ ee’noko teie baka naning tee’ paaravuarupeu’. ¹⁴ Teka tee nantoonge kantena’ parapaara kune’aako teie biikaang karaa’ orarai narunge teing tosivurima barampurikoo’ orara aarumo nko-koo. ¹⁵ Teka tee karaa’ domang-koo nare’ukotaa’ oraka’nko basi-antavuu’naang, ee’noko teketa otokotaa’ orara aarumo panka’parara boo’ basiaraa’naang. ¹⁶ Ee mmaikori’ piaarampimaing, tarerariai dii’ka tosirarima nii’na’ noru’eri’neeng, ai’ Kumponing tee orara nko-koo paaramuriaung. ¹⁷ Ookara kapoo’ paning-eta pomaing teing tampeng naing, ee’noko ookara avuavu’nanka tampeng masikeng teing Kumponinge nii’koo depeto po’antavumaing tee Ookara Araka Okonara deempario’. Tee aampari’arava’ araka narung naumurimaung. Mutaananameng tee-koo otoa’. ¹⁸ Teie nii’ baurukaa’ deeng-antamuru’ bakaang kara masikung taara-antamurira. Baka piavora tee’ nkomuru’ nii’ tutuna’nupoong o’norii’naang ookara bakaning nkovuru’nanka-koo.

Nii’ke Kumponing-koo Aroo’marimainge Nantoong Tampa’ Nkoarampiaing

(1:19–5:6)

Kara Taaravampira Meumpampiaing

¹⁹ Ee mmaikori’ piaarampimaing, tee aung noru’eriaing: Ookara naruna’ naruna’ namu’ke kara taaraverimaatoai, teka maku’koo ee’noko iira-koo iri’naruntaria’ otoai, ²⁰ ai’ naning bakaang iirai aarumo koonto’ Kumponing bakaang narung tavo’antavuaung. ²¹ Tee’koo teing aing aa’ning enang siperiai: aarumo ku’mi’ ee’noko domang orarai maanto’ui oto’; ee’noko tee kara Kumponing bakaang dii’koo keempuko baroromperira aroo’eriai, tee tenaarei dii’ domang-anta-koo makosinaare.

²² Tee kara tamung taaraverima tosirariauka’, teka taaraverima nkoverimatoai. ²³ Ai’ dii’ke ampa’dori siomperiaung deeko’ dii’ teing tee-pina’ naning bakaang oing oorara-koo ooarama tenkenura namu’ke ampa’opeu’ bakaang oing oro’oro’na’. ²⁵ Teka tee Kumponing bakaang kara koonto’ unaa-anta-koong, ee’noko baa tee naning tee kara kuung oovumatoaing kapoo’ nauvumaung nko-koo ampa’oa’, teie tee bakaang nko-nko-koo kuunge biraanke nkavuaing.

²⁶ Naning dootuu’nung tamparama bakaang karang makosina’ minkuvuaung tee, bakaang domang tosi-antavarapeu’ ee’noko bakaang dootuu’ daange. ²⁷ Tee dootuu’koong aarumo kiiroraa’ masikung ee’noko pituaravaung Niuma Kumponing-koo uro’kanoo’ke tee aung: Naning maantuaara’ ee’noko teing naaroonku beero’urima pakuvurimatoai ee’noko naning baka tanatavari otoai kansi’ bakaang aarumo orari-antavu’neeng-koo.

Amutemurii’koo Tampa’ Nari’ Nkoarampima Siivenke’meeriauka’

¹ Ee mmaikori’, niikaang Ovoring Jiisuu’ tee ee’nara urikamu’keta Kumponinge Pako’pari’nii’ domamurira taremuriainoo’koong, tee daurarong˜ meenasi okora’. Tee’ masika’antaveri otori nantoong daunaro’ oovererima siivenke’ereria’ otoriaing. ² Aa’noko deeko’, naning tampa’ nepunepu’nii’ diing tovang kooro-kooning kurunii’ dootuu’nava-koo kuung poko, napo’ naning ata’oi’ nari’ porepeu’ te’, mononopa’ dere’ kurunii’. ³ Ee’noko tenaanka-koo tee tampa’ nepunepu’nii’koo doororaripeu’ ee’noko mooni’ mmau’ dua’upeu’na’ noru’erima aa’peripeu’, “Pinau, aa’ pora tampa’ ba’naniai,” tee ata’oi’ aa’perima, “A, duuku’darava’ basi ba’naniai.” ⁴ Tee’ nkoverima nantoong tankaamperima makotua’na’ simpe’ nkonuka˜ deeng-antararimaung daang matau oraka’ siomperi siivenke’ererima. ⁵ Ee mmaikori’, taarameriai, nantoong kansi’nupoonge ata’oi’nuka tampaarimaing bii’ka duuku’nuka deea’, ai’ Kumponinge teing miru’uru’nung tee-koo aa’na’ baito-nii’nuka otoroo’naang ee’noko tee’koo bakaang muu’ okovuriaing tee’ maraka-antavuru’na’ teing-koo tee pankaruntoompaamaing-koo. ⁶ Teka dii’ke tamunsi’nupoong tamperererikoo’ teing ata’oi’nuka. Teka io’ noru’eriai, teing mmau’ kavopo’nupoong teing iki’antaraarimaing ee’noko diikaang komaaru˜ namu’ke maku’eriaruko tuutunang˜koo donkong-antaraarikoo’. ⁷ Ee’noko Jiisuu’ bakaang miring pankaing akapeu’aakoo’, tee miring dii’ biraankerariru’nung.

⁸ Daari Meekung-koo narung boto pankaing otong aa’pumaung,

“Dake tee naning da’koo due’nung daka piaararamana’ nari’ tee’ piaaveaing.” (Boontu 19:18)

Tee tenaare makosina’ dupe-antaverira deeko’ tampa’. ⁹ Teka siivenke’ nkoveriaing deeko’ tee dii’ oraka’ nkoraririning ee’noko teie botoi tompinturi otong tee toto’perining deentariko. ¹⁰ Ai’ baa tee naning ootukunung boto tampa’ siompuma nii’navu’ toto’pura deeko’ teie tee ootukunung boto naro’ka toto’puinung. ¹¹ Tee ee’pina’, Kumponing bakaang boto-koo nampeesi orarieauka’naare nanaare minkuvua’, napo’ naning tavema dupisi’eauka’naare minkuvuu’. Teka dake teing-koo aa’nopeu’ nampeesi orariea’ naning tavema dupisi’epeu’, tee’koo da’ tee boto toto’ deentaring.

¹² Dii’ teing Karistoo’ bakaang boto-koo kuunge unaarori otorimaing, tee’koo tampa’ karerima unaa-antareerimatoaing, ai’ dii’ teing teie botoi Karistoo’ bakaange simpe’ruriaining. ¹³ Kumponinge tee piaavuria’ kiimatavuriaing teing nantoong piaa oro’antavaavauka’ning. Teka piaa oro’antavaako deeko’ teie napo’ piaavurira baari’antavuriaing kiimata-ita.

Baito Nko-nko Ninkaing

¹⁴ Ee mmaikori’, naninge aa’pui dei, “Ning masika’anta oto’memung,” teka nko-nko otoa’, tee-koong sinang aming? Temurii’ masika’antai ee domang-antavupeu’? ¹⁵ Nii’noo’ naning narung Karistoo’koo nii’maiko’ aa’ning-koo apuka’parako duaana-koo ee’noko taamang-koo, ee’noko dii’koo narunge tamung aa’pupeu’ tee, “Pinau, bera duaanararavai ee’noko pooruai,” teka kapoo’ avua’ tee mono-nameng-koo apuka’pari otoining-koo, tee-koo aming basiarapeu’? ¹⁷ Tee’koo tee masika’anta nko-nko oto’evuaung tee boo’. ¹⁸ Naninge aa’muko “Tamung masika’antavanko Kumponinge domang-antamuaing,” ninge aa’pampeu’, “Aia’ io’ dakaang masika’anta nko-nkoropa baito masikung deeko’ naumeai, ee’noko ninge nkaang masika’anta naurampai nkaang nko-nko-koo sira’pario’.” ¹⁹ Dake tamung masika’antavei aa’pemaung, “Kumponing tee narung,” teka temurii’ masika’anta makosi deea’. Teinge ma’narie tee’ nari’ masika’antavai otorong, ee’noko Kumponing meumeevanuka tasi’pariri dankusi’kaamaunge kera’pariaina’ noru’ai.

²⁰ Da’ tee naning masika’anta-koo daunaa’anta oto’derung arekee’, nau-antarama’naang piaromaang tee temurii’ masika’anta manta’paravaung tamung sinangropa? ²¹ Noru’ea’ ee tee niuma Eebaraami’ nko-nko-koo Kumponinge naning koonto’ tampuu’nung tenang tee bauring Aisake’ boontunampuu’naang nkoaru’nang? ²² Ooveko teie nko-nkoi masika’anta dupe-antavura makosi-antavuu’. ²³ Tee’ meumpuio’ tee Daari Meekung-koong kara dupearu’ aa’pumaung,

“Eebaraami’ke Kumponing masika’antavuio’ Kumponinge naning koonto’ tampuu’.” (Pupu’ 15:6)

Ee’noko tee Kumponing bakaang navumai tampari otomaung. ²⁴ Ooveko, naning tee nko-nko ninka nari’ masika’antavuko deeko’ Kumponinge naning koonto’ tampupeu’, masika’anta narung-koo deea’. ²⁵ Ee’noko napo’ teni Reeapi, orani, tee’ nari’ke, nko-nko ninka nari’ masika’antavui tenaanka Kumponing bakanaanka botovotonaa’ka bokuvureta napo’ beekaning kare-nupoong-koo koono-antavuresi mo’minge sivuresio’ Kumponinge koonto’nani tampuu’. ²⁶ To’biiario’ aa’pamaang, tee’ nari’ tee mono domaangropa tee boo’ tee-pina’ masika’anta tee’ke, nko-nkoropa tee boo’.

Karang Tampa’ Taremariaing

¹ Ee mmaikori’, nantoong mmau’ nau-antananka deeng-antarariauka’, ai’ dii’ke tee noru’eri otong nii’ nau-antanuka teing deepo’ simpe’muriaining. ² Nii’ke ookarai amutemurii’ke bekoi’ampimaung kara sikuri’ke minkuampima, ee’noko naninge karoma kapoo’ orara minkuvuauka’nung deeko’ tee tee naning koonto’ masikung, bakaang mono ootukunung tampa’ tarearamaung. ³ Napo’ tevoro’ oosinavoro’ deeko’, nii’ke aini oki’navu’ karang-koo dusi’ampiko tevoro’koo koinampira tee ootukunavoro’ nii’ piamorimana’ nanukoo’ tevu’ beeto’ampima botoampipeu’nairue. ⁴ Napo’ aarerinanka˜ ooveriai, aa’na’ pankenanka, piong purinto’ke bii’urimaing, teing tee’ke, oki’navento’koo boo’e-navento’koo kaputeninukai koong-antavaario’ nanaamaunge piavoromanoo’ke. ⁵ Napo’ meneng tee’ke, tee oki’naa kapoo’, teka kapoo’ pankeng nkovuma daangamparapeu’. Pora’ pankaing tee oki’namo’keta nta’ke taivumaung. ⁶ Tee meneng teie nta’ke. Kapoo’ orarai maanto’ mono-koo meu’ke otomaung. Teke otoi toko-ita doompeto ookara mono orari-antavukoo’ paro’uma mosianung okora’ario’.

⁷ Ookara kapoo’nanka amutemurii’ kau’ karenaumo ee’noko barennanka napo’ kakanaamaunanka ee’noko pirung-koonanka teing data-anta-koo makosi; data-antavaarimaung nantoonge. ⁸ Teka naning otoa’ meneng data-antavupeu’nung, tee dooroompari oto’ deeaung, orara, ee’noko boo’kooninge doparopai maanto’ke. ⁹ Teie narunge menenge nii’ke Kumponing tee Niuma tampara tampampimaung ee’noko napo’ teie narunge menenge nantoong barakosi’arampikoo’, teing Kumponing-pina’ oro’antavuri nkovuru’ning. ¹⁰ Teka tee narung karang-eta tampa’ minkuampikoo’; napo’ barakosi’ minkuampikoo’. Ee mmaikori’, tee’ makosina’ deea’. ¹¹ Arekee’ tee pu’anta, dinkung narinkung-eta ntong tarii’ ee’noko ntong tokaa’ naro’ke bakoarepeu’? ¹² Arekee’, mmaikori’, tuare-navari-koo ee mou-koong sinang bi’upeu’? Napo’ mo’ming-naving-koo ee bia-namoni’ teke bi’upeu’? Makotua’. Napo’ pirung-eta ntong tarii’ nke’koo makosi deea’.

Mataumariri O’noriaing Boonko Noru’mariri Nantoong Pakuarampima

¹³ Baa naning matau ee’noko norukasi’ dii’koo? Makosi, tampa’ otoi tee bakaang matau oro’antavuaing matauna’ dooroompari tampa’ nkovuma. ¹⁴ Teka diikaang domang-koo mamairo ee’noko pankaing-pina’ noru’ otoko deeko’, dii’ matau-po’nupoong-pina’ daangantarima kara masikung daka’periauka’. ¹⁵ Tee’ oro’ noru’nanka teing paning-eta poa’, teka teing aing kansi’kooning noru’; Tanuaang Meekung-etaning deea’, Sietani’ketaning. ¹⁶ Ai’ are’ tokoo mamairo, baka-noru’, ee’noko pankaing-pina’ noru’ oro’paravainoo’ke teke turang otong ee’noko amutemurii’ oraka’nko otong. ¹⁷ Teka tee temurii’ noru’ matau paning-etaing tutuna’ tee pituari oto’ deeaung, teketa mooa-anta, banainge oto’, noru’ barorompari oto’, piaae maanto’, ee’noko nii’ning sinang tampeng, siivenke’ari noru’ otoaruko, ampirinung dovang nari’. ¹⁸ Ee’noko teinge mooa nkonukai tee mooa-koong sinang keempaakotaa’ tee koompari oto’ sinang kavaavaing.

Kansi’koong Aarumo Piamoriauka’ Ovoring-koo Turanii’nuka O’nori’neenga

¹ Aminankai tee tata’ dovang turanturang, kare tavo’antavumaung dii’koo meu’ke? Tee aa’ tee teinge diikaning karaa’ke naruna’ naruna’ domang manki’antaruriko kare basiaramaung. ² Dii’ke karaa’erimaing nka-koo makosiriaruma nii’ning mamairorarima dupisi’erererimaung. Napo’ dii’ke nii’ning oto’evoromaing kong-koo kevi’erima tavu’ tutumperimaung pari’ererii’naang teing. Teka dii’ke nkaveriaung aa’noma: nii’nang Kumponing-koo eentarariaruma. ³ Ee’noko nii’nang bane nia’eriko Kumponinge aruriaung tamung karakaraa’koo oto’derurii’naang piarorimaung-koo, Kumponing dotu-antana’ noru’eriaruma. ⁴ Dii’ bakei nampeesi orariaamaing-pina’ makosinuka, ai’ dii’ke Kumponing bakaning miru’nii’nukai kansi’ bakaang aarumo karaa’erima Kumponing ninka aa’na’ munte’nupoong deeng-antararimaung. Ee’, baa tee naning kansi’aapening piaavuaing tee baka Kumponing ninka turani’ deemparing. ⁵ Arekee’ noru’erimang? Daari Meekunge ee daang minkuvuu’ aa’puma,

“Tee Tanuaang Meekung Kumponinge nii’koo otoo’naang amuru’nunge tee nii’ karaa’muri pia-antamurimaung Kumponing-koo narung-koo aroo’mariri o’norii’naang.”?

⁶ Ee’noko Kumponinge tee’ tampa’ nkomurima teie napo’ piaamuri bakanavung siong-koo pakumurimaung bakaning tampa’ nkonanka-koo dau pau’ui. Tee’koo Daari Meekunge aa’pumaung,

“Kumponinge turampurimaung teing baka daanganuka, ee’noko piaavuri pakuvurikoo’ teing boonko noru’ariri otoromaing.” (Mirumiru’ 3:34)

⁷ Tee’koo Kumponing-koo boonko otori tee Sietani’ turamperimatoai dii’ankoita mmaruaina’. ⁸ Kumponing-koo due’antarariai ee’noko tee Kumponing due’aravai dii’koo. Dii’ oraka’ nkorarimaing bere’darira tampa’ nari’ nkorarimatoaing, ee’noko dii’ tunsi paakanuka noru’ narung deentariri domang kiiroraa’po’nupoong otorimaatoai. ⁹ Orarunsirarima birontarimatoai diikaang oraka’ nkonanka tasi’perima. Teing-koo benkeng siperi maia’doriai. Doturotu siperima napo’ mi’miinkirorimatoai. ¹⁰ Ee’noko Ovoring-koo tee’ amaiaa’doriko teie deto i’anturiai.

Oraka’ Minkumeeriauka’

¹¹ Ee mmaikori’, dii’ka oraka’ minkureeria’ otoai. Baa tee naning ba’maiko’ oraka’ minkuvuma simpe’umaunge tee boto oraka’ minkuvuma simpe’umaung. Teka dake tee boto simpe’eaing deeko’ da’ boto siong deea’, da’ makotua’na’ boto simpe’ deeng-antararamang. ¹² Nii’ narung daurarong˜ boto amurimaung oto’memuring, ee’noko teie deeko’ simpe’muriaing. Napo’ teie deeko’ makosi nantoong domang-anta-koo nii’noo’ orari-anta-koo. Ai’ da’ Kumponing-pina’ basi noru’darama ee tee’ simpe’erimaunge nantoong?

Nii’ka Daangamariauka’

¹³ Arerai da’ aa’pemaatomaung, “E’mung nii’noo’ tane’ deeko’ temono-ita temono-koo mee’naang ee’noko namare’ teke o’noai baavenang-koo mooni’ barampama.” ¹⁴ Dake aa’ tane’ noru’ea’ dakaang otooto’koo otoaina’, ai’ da’ tee tee-pina’ kamo’ batei oki’namu’koo oro’parama namu’ke paa’aramaung-pina’. ¹⁵ Teka dake aa’pei dei makosi, “Ovoring bakaang pia-koo deeko’ nii’ domamariri aunanka nkoarampiaing.” ¹⁶ Teka dii’ ee’ nkorarimaung, miring pankaintarima daangantarimaung. Tee tee’ oro’ baka daangang tee orara. ¹⁷ Tee’koo tee naning aarumo koonto’ noru’ui, teka nkovua’ otong, tee tee oraka’ nkoaramang.

Kavo Mmau’po’nupoonge Moo’ Orara Nkavaavaina’

¹ Enang ooveriko dii’ kavo mmau’po’nupoong, enang bairarima birontariaing arikananka kune’eriaining-koo. ² Ookara kapoo’ diikaning teing dera’oroaining ee’noko diikaning mononopa’nanka pumpu’ke taiaavaininge. ³ Ee’noko diikaang kooro ee’noko siliva’nanka takarau’oroaing, ee’noko teie takarau’noo’ke tee diikaang mosii’ sira’duriko tora’kiriaing nta’ke kate’during-pina’. Dii’ke tamung oosierimaung-koo teinankai tuumpiruriaing asi’na’mung Ovoringe simpe’ nkovuko. ⁴ Ooveriko, teing dii’koo mintoomparimaing mintoong daaka’deraariko tosiererima moo’ pinka’evurererikoo’, ee’noko tee ee’nara mooni’ baku’erimaung Ovoring Iirakuta-koo punkang-koo biromparamang, teing kavu’nupoong biikaang birovirong ninka. ⁵ Ee’noko dii’ teing nantoong koonto’nuka tuutunampererima dupisi’erererimaing bii’ka avo’avo’daariaruko; ⁶ Anke kansi’koo otoritaa’ tee dii’ ookara kapoo’nanka piarorimaing oto’derurimaung, ee’noko teing-koo doturarima otorikoo’ Ovoringe tuutunanturima mosianung-aape botoruriaina’mung nemperi, pooro’ pina’ tamung doreng-antavarima te’mung domang tampe’aariaina’mung nempaamana’.

Purimariri Kunsimariaing Ovoring Toroaravaina’mung Nempampima

(5:7-20)

Manki’ Puru’ampiri Purimariai Ovoring Nempampima

⁷ Tee’koo, ee mmaikori’, teinge tee’ oraka’ nkoraariko mii’kiri otoriai poaina’mung nemperi. Ooverimang tee naning mintoong bauko sinang petaa’oainoo’ nempui ka’duuari otomaung tee taamang tampara kansi’keta nkavuaina’mung noru’ui. Tutuntoma-ita bera o’domai basi tampa’ tarevumaung. ⁸ Dii’ tee’ke, ima’dariri ka’duurariri otorimaatoai, ai’ Ovoring poaina’mung tee doong due’uing. ⁹ Minkuminkureeria’ otoai, ee mmaikori’, tuumpiruri’neenga. Ooveriko, tee Simpe’nko˜ tee karanaang-koo donkonui otong. ¹⁰ Ee mmaikori’, teing urikupoong nakaro-nupoong˜ io’ oovereriaing, tee Ovoring bakaang miring ninka kareaako’ning. Teinge arikung kune’aama ka’duuariri otoroko’na’ tampa’ tasi’perira siomperiaing. ¹¹ Enang noru’ereriaing, teing turampaariko domang tampa’ nari’ otoroko’ning biraankenuka tamparampimaing. Narung tee Jop, bakaang domang maamuari otoko’na’ taaraverimaunge amutemurii’ manki’anta ninka, ee’noko tee’ Ovoringe tampa’ botu basi-antavuu’na’ tasi’peri otong. Teie Ovoringe nii’ napo’ tee’ nkomurimaung piaae maanto’ deemparitaa’.

Marakamariauka’

¹² Ee mmaikori’, ookara-koo daua ee’ noru’eriai, o’nori marakamaria’ otoai paning-aape ee’noko kansi’aape nii’noo’ nii’ning kapoo’ tampampima, teka masikung deeko’ tamung “ee’” tamperiai, ee’noko masikung deeaung deeko’ tamung “a” tamperiai, tuumpi kune’eri’neenga.

Naning Koompari Otomaung Bakaang Kunsi Tee Purinto’

¹³ Dii’koo nii’nung manki’ kune’umaung deeko’ kunsiaravaing. Napo’ nii’nung domang kuaa’oi oto’ otomaung deeko’ Ovoring kenavuma daangampuaing. ¹⁴ Napo’ dii’koo nii’nung siipavomaung deeko’ dootuu’koo urantanuka-koo botoaravaing, ee’noko teinge tee kunsiaavaing duunie sisi’aama Ovoring bakaang miring-koo. ¹⁵ Ee’noko baitoariri kunsiariko Ovoringe domampura deto i’ampuai tee. Ee’noko orara nko-nko nkovuu’nung deeko’ tonta’antavevuai. ¹⁶ Tee’koo diikaang oraka’ nkonanka sirasira’darimatoai nii’ning dii’maikorori’koo. Ee’noko napo’ kunsi-koo pakureerimaatoai taarevoroaina’. Ai’ tee kunsi naning koonto’ bakaang tee aa’na’ purinto’po’nung kapoo’ nko-koo. ¹⁷ Eliasi tee naning tee’ oro’ nii’pina’ bakaang aarumo, nii’na’mung tee aa’na’ kunsiaru’ apo’uaroo’naang beenaumo mare’koo bera ˜nau-taa kaara, ee’noko tee’ nari’ apo’uaruu’ kansi’. ¹⁸ Teketa napo’ dama’ke kunsiario’ paning-eta apo’ pou’, ee’noko kansi’ke bakaning sinananka tavo’antavuru’.

Baa Tee Kumponing Bakanavung Sipupeu’nung Tee Napo’ Bere’antavampiai

¹⁹ Ee mmaikori’, dii’koo narung tampara aarumo sipui pooarako deeko’, narunge koong-antavuaing tee. ²⁰ Noru’eriaing, baa tee naninge tee pooaru’nung koong-antavuaing teie tee bakaang tanuaang boo’parapeu’noo’keta domampuing. Bakaning mmau’ orananka tonta’aravaing deeng-antavuing.

Basi te’.