EPESES

Ane’

EPESES-nupoong

Paula’ke Daarievuru’nane’

Kara Baavootunanka Ane’kooning

1:1 Kumponinge Nii’ Neraka’antamuru’na’ Karistoo’koo kuunge

4:1 Nii’ Karistoo’nung Mono O’nori Kumponing Bakaang Aarumo Oro’antavampiaing

Kumponinge Nii’ Neraka’antamuru’na’ Karistoo’koo kuunge

(1:1–3:21)

¹ Aung ane’ karavoto˜ ninge Paula’ke Jiisuu’ Karistoo’ bakaang kara-okomui-nkai Kumponinge miru’muio’ dii’ bakaning meekupoong Epesesie otorimaing daarirerompimang, dii’ ee’ning Karistoo’koo baitorarimaatomaing. ² Biraanke ee’noko mooa dii’koo otoaing Kumponing Niuma-itaing ee’noko teieta Ovoring Jiisuu’ Karistoo’.

Kumponinge Biraankemuru’na’ Karistoo’koo kuunge

³ Tampara tampampiaing tee-koo tee Kumponing ee’noko Bauma teie niikaang Ovoring Jiisuu’ Karistoo’ke, tee ee’nara Karistoo’koo kuunge biraankemuru’ ookara biraankenankai Tanuaang Meekung-etaning paning-koo otoromainge. ⁴ Aa’nong teroita kansi’ mme’ pupu’aravaruko-ita miru’muru’ Karistoo’koo kuung o’noritaa’ meeka’mariri o’norii’naang tuumpimaria’ tee-koo dutakanoo’ke. ⁵ Tee tee piaamuritaa’ miru’muru’ baurukaa’ deemarii’naang Jiisuu’ Karistoo’ke makosi-antamurio’ baka bakaang piai, maroita. ⁶ Teie tee’ nkomuru’ daangampampiaina’ tee-koo avuavu’ maneenung-koo Bauring Piaaru’koo kuunge avusiro’ari amuru’nung-koo. ⁷ Karistoo’ke bakaang erenge moo’murira makosi-antamuriko Kumponinge niikaang oraka’ nkonanka tonta’memurira unaa-antamuru’nung; ⁸ Tee’koo bakei aa’na’ maanto’ bakaang piaae nii’koo piampuu’nunge, ⁹ tee ee’nara bakaang mataue tavo’antavuu’ bakaang noru’ ninka Kumponinge sirapo’antamemurima kapoo’ makensi’nung teie tavo’anta-koo piavoko’ Karistoo’koo kuunge. ¹⁰ Tee aung ee’nara: Uripo’keta teie marovuko’ tee Karistoo’koo ookara naro’urii’naang bateinang makotuko aa’ning paning-nupoong ee’noko kansi’nupoong, ookara-koo bore’ deempari. ¹¹ Ookara kapoo’ tee Kumponinge matauvuma miru’umana’ nkoaramaung, ee’noko nii’ tee’ke Kumponinge bakaning deemarii’naang miru’muru’ Karistoo’ankoi tutuntomaa tampuu’na’. ¹² Bakaang matau ee’: Nii’ urompiri Karistoo’ nempampimainge nantoong daangang-antavarampiaing bakaang meenasi-koo. ¹³ Ee’noko dii’ ee’ning nari’ke, Karistoo’ankoi baitorariru’ning kara masikung taaraverira tee doorenang tampara dii’ domanturiaing-koong. Ee’noko bakaning deentariko date’antaruri Tanuaang Meekung aruru’ bakaning avurii’naang maraka-antavuu’nung. ¹⁴ Tee Tanuaang Meekung nii’ amuru’nung tee tasi’anta-koo nii’ke nkavampiaing ootukunung barenku tero naumuru’na’. Tee kompampirio’ Kumponinge asi’na’mung dupe-antavui oko-antamuriaing, nii’ke tee daangampampiaina’ meenasi-po’nung.

Nii’ Tee Biraanke-koo Tantemariaing-koong Kunsi

¹⁵ Tee’koo ninge taaravamira dii’ masika’anta oto’deruring Ovoring Jiisuu’koo ee’noko diikaang piaa ookara Kumponing bakaning meekupoong-koo, ¹⁶ tenang-eta deto taararampira dotumaramaung kunsi-koo tantampima. ¹⁷ Ee’ eentamaramaung: Teie Kumponinge niikaang Ovoring Jiisuu’ Karistoo’ bakaange, Baumai Meenasi Okovenunge aruriaing tee Tanuaang matau dii’koo siraka’antavuaing bakaang kara-koo miru’noo’ dii’ke tasi’peria’naang tee Kumponing. ¹⁸ Ning eentamaramaung diikaang domang-koong dutai siraka’antaruriko dii’ke tasi’perii’naang tee barenku bokumurira bamuru’nung, ee’noko bakei aa’na’ maanto’ meenasi-po’ning otoromana’ teing biraankenanka bakaning-koo meekupoong-koo maraka-antavuru’ning tankee’eeaining. ¹⁹ Ee’noko napo’ eentamaramaang tasi’perii’naang iri’ aa’na’ pankaing nii’koo baitomarimaing-koo sipuing, paaranang-koo makosi deeaung. ²⁰ Tee aa’nung iri’ baukoni’ke kompui Karistoo’ boo’keta daa’antavura tampavine-koo Kumponing-koo ba’nang-antavuu’ paning-koo Ovoring-antavui. ²¹ Teenoo’ Ovorinoo’ tee deu basi anantenaung-koo: ookara tare-nupoong, pankainuka, purinto’po’nupoong, ovontung ee’noko ootukunung amutemurii’ miring-po’nupoong, enanariong ee’noko dama’nariong napo’ nari’. ²² Tee tee Kumponinge ookara kapoo’nanka Karistoo’koong kau’koo boong sipuma Karistoo’ tee bore’ deeng-antavuu’ ookara kapoo’nanka-koo dootuu’nupoong tampa’ pakuvuriaina’, teing tee bakaang mono makosinuka. ²³ Ee’noko tee-pina’ bore’ mono ninka be’nu’ura dupearapeu’na’ tee’ nari’ Karistoo’ dupe-anta baka dupearavaing ootukuarara.

Kumponinge Domamuru’na’ Karistoo’koo Kuunge

¹ Nii’nang tee dii’ doori otoriko’ boto-toto’ ee’noko oraka’nko nkoverima. Tee’ nkoverima kansi’kooning biikaang aarumo narung siomperiko’. ² Sietani’ siomperiko’, ovonturi biikaang bore’ auvi’au-eta bakaang muu’ tareaamaing, tee ee’nara Kumponing siomeevanuka-koo meu’ke mintoomparamaung. ³ Nii’ ookara tee’ke tero niikaang orara aarumo-koo amarima karaa’ dovange boo’koo niikaang mono ee’noko onou piavoko’na’ nari’ siompampiko’ning. Tee tee nii’ domang oraka’ o’norikotaa’ Kumponing-nung kiimata kompampiaining akoing-pina’ nari’. ⁴ Teka teie Kumponinge piaae maanto’ke aa’na’ piaamurikotaa’ bane nii’ boto toto’ke moompiri o’noriko domang-antamuru’ Karistoo’ ninka nari’; ⁵ Tee tee Kumponing bakaang avusiro’ke tee’ domamuru’. ⁶ Ee’noko domamurira Karistoo’ ninka nari’ napo’ daa’muru’ nari’ tare-nupoong o’norii’naang tee ninka paninaumariri. ⁷ Aing ookara kapoo’nanka tampa’ nkomurima tavo’antavuu’ tee-koo Jiisuu’ Karistoo’koo dama’navarang nau-anta-koo bakaang avusiro’ke maanto’ari otomana’ paaranang-koo makosi deeaung. ⁸ Ai’ Kumponinge avusiro’ari domang-anta masika’antaveru’noo’ deeko’ domantariru’ning, dii’ka deea’, bauta’durima. ⁹ Kapoo’ nkoveriko tee’ domanturia’ maku’koo. Maroita, naning daangampara’neeng-koo. ¹⁰ Kumponinge tee nii’ o’norina’ nari’ nkomuru’. Teie Jiisuu’ Karistoo’ bakaning deemuri nkomuru’ tampara nko-nko nkoevompimaa’noo’naang o’nori tero miru’muru’na’.

Kumponinge Nii’ Avitevitu Tapo’muru’na Karistoo’koo

¹¹ Tee’koo tero oraka’ otoriko’noo’koo ampa’doriauka’nung. Dii’ teroita Ju’deea’, dopa’ toto’dariaruko’ning, tamunsi’nupoong tantaariko’ning, a’noo’ teing tamung dau naro’ dopa’ toto’ke meeka’antavarima. ¹² Ampa’doriauka’nung tero tee dii’ Karistoo’koong noru’ otoriaruko’, Isireeli-nupoong-eta taapo’ otoriko’ninge, Kumponinge kara maraka-antavui naroompuu’na’koo damisimainkue, kansi’koo naro’ bi’dariri domaang isikung nkana’ noru’ otoa’, Kumponing pakurupeu’nung otoa’. ¹³ Teka enang dii’ tee teroita Pako’pari’nii’ domanturira tareruriaing-koong ninka tapo’darira Kumponing-anko po’antarurining bakaang erenge tero taapo’ isipo’ otoriko’noo’keta. ¹⁴ Tee tee Karistoo’ tee niikaang mooa-nko. Teie tee naro’ka tapo’muring aa’ning Ju’nupoong ee’noko Ju’ deeaing. ¹⁵ Bakaang mono boo’koo avaru’noo’ke teie tee teteva’uu’ tee ku’nung turanturang-koong siivenke’muri otoko’nung nii’. Moosesi-nung boto teka bakevui, mono etu-koong. Aing ookara kapoo’ ee’ oro’ nkovuu’ning nerakariong nkovurii’naang aa’ning-eta Ju’nupoong ee’noko Ju’deeaing teie baka naro’kavurira pinau-anta-koo. ¹⁶ Aa’barata’koo boo’paru’noo’ tee turanturang bake-antavuu’naang naro’kamurira ookavitura Kumponing-koo navitu-pina’. ¹⁷ Teketa’ pora teie karantavurima˜ daankivuu’ tee doorenang tampara mooa-po’nung ookavitura-koo aa’noko Ju’deeaing ee’noko Ju’nupoong, dii’ isipo’ke taapo’ke otoriko’ning-koo ee’noko teing Ju’nupoong tee-anko due’nupoong-koo. ¹⁸ Ai’ tee tee teie taung nkomemurio’ nii’ ookavitura Bauma-anko be’koo makotumpiri otong tee narung Tanuaang Meekung-koo kuunge.

¹⁹ Enang tee dii’ akoing damisimainku otoria’, teka dii’ osikaiaang deentariri otoring teing ninka nii’ning bakaning meekupoong ninka nari’, ee’noko Kumponinge tarevurimaing-kooning dii’. ²⁰ Dii’ Kumponing-nava kani-nupoong tee’ pau’deeri otoring teing-koo kara okovuri nkanuka ee’noko nakaronuka˜koo dau, Jiisuu’ Karistoo’ tee ee’nara ookara-koo e’manianare’ makosi, tumanung. ²¹ Tee-koo ootukunung nari’ be’nu’ariri otoi kaniari otomaung dootuu’nava pankava deempari Ovoring-koo. ²² Ee’noko dii’ nari’ tee-koo otoritaa’ tee-koo kanirariri otoring Kumponing oto’doma deentariri Tanuaang Meekung-koo kuunge.

Paula’ Ju’deeaing-anko Kara-okovui-nka

¹ Tee’koo eentamaramaung dii’koo, ning ee’nara Paula’, dii’ pakurampimaung-koo dai’nisi Jiisuu’ Karistoo’ bakaang. ² Dii’ke taarameru’ dee’ma tee kapoo’ makensi’nung daarirerompiring-koonaare ning-koo sira’pura Kumponinge makosi-antamuu’na’ bakaang piaa dii’ nau-anta-koo. ⁴ Anka deeruerima ooveriaing tampa’ tasi’pamana’ tee kapoo’ makensi’nung Karistoo’koong. ⁵ Urikavarang pankaraamuriko tee sira’paravaruko’ tee aung tee’ enang Tanuaang Meekunge sira’antavuina’ teing-koo bakaning-koo kara okovuri nkanuka-koo ee’noko nakaronuka-koo. ⁶ Tee ee’nara makensi’nung tee aung kapoo’ teing ee’ning Ju’ deeaing nii’ ninka tapo’meering Ju’nupoong ninka nari’ barenku nkavampii’naang narung mono-kooning deemariri ee’noko narung maraka-anta-kooning Kumponinge deing, tee ee’nara Jiisuu’ Karistoo’ke dupe-antavuu’nung tampara doorenang tavo’ura. ⁷ Kumponinge tee maneenung taura’ amuu’ aung ee’nara doorenang tampara ookara nantoong nau-koong, makosi-antamui bakaang iri’ke. ⁸ Ning-koo ee’nung-koo bakaning meekupoong ootukunung-eta asiranung masikung-koo Kumponinge tampa’ taura’mui amuu’nung daankiama’naang teing-koo Ju’deeaing-koo tee doorenang tampara Karistoo’nung avuavu’koong bono’dopa. ⁹ Ee’noko naumuu’ siraka’antavama’naang ookara-koo tee Kumponing bakaang miru’ makensi’nung. ¹⁰ Uripo’keta tee teie ee’narai ootukunung kapoo’ nkovuu’nunge tee baka noru’ui otoko’ enang bakaning dootuu’nupoong donkompurinamu’ sira’paraa’naang avatevaro mataunanka aa’ning-koo ovontung ee’noko iri’po’nupoong paning-nairu-kooning-koo. ¹¹ Tee ookara nkoaru’ning tee dupe-anta-koo tee Kumponing bakaang onou pupu’doma dopa-ita marovuu’ tee-koo Jiisuu’ Karistoo’ niikaang Ovoring-koo teke taavoarara oparaa’naang. ¹² Ee’noko tee ninka narung deemariri masika’antavampima tasi’pampiri Kumponing-anko due’marira karavampiaing amaiaa’moria’. ¹³ Tee tee enang kontampiri si’damping aa’dampima, tarua’doriauka’ teing arikananka ninge dii’ pakurampima kune’amaing-koo dii’ meenasi-koo basi-anta-koong onoueri.

Karistoo’ Kenkumpampaing-koong Kunsi

¹⁴ Tee tee tee tutumpama naurampirina’ Kumponinge tampa’ nkoruru’nung-koo tee’koo ning kinkinama eentamaramaung Niuma-koo aa’nung-koo ootukuna’kantu paning-kooning ee’noko kansi’kooning miring tampariri otong. ¹⁶ Kunsimarama ee’ eentamaramaung: Teie bakaang avuavu’ maanto’ui oto’keta aruriaing tee purinto’ ee’noko iri’ tanuaang Meekung-etaing diikaang pankaruntoong-koo otoaing, ee’noko Karistoo’ diikaang domang-koo unaavoi otoi otoaing baitoverio’. ¹⁷ Napo’ eentamaramaang piaa-koo daue du’durira ari’aruritaa’ iveka’darii’naang, ¹⁸ ee’noko tee’ nari’ makosirariri otoritaa’ tampa’ tasi’perii’naang ookara ninka Kumponing bakaning meekupoong ninka ookanairu-eta paaranang-koo makotua’ tee piaa Karistoo’nung. ¹⁹ Tee dii’ke mantomperi noru’erii’naang tee piaa punkaang˜paa’ dii’ maanto’duri otoriaina’ Kumponing-pina’ nari’ nariari oto’ke ookarai.

²⁰ Daangang otoaing Kumponing-koo deekoronoo’ basiropa nkovumaung-koo eenta ee’noko noru’marimanoo’keta dau basinoo’ tee ninka bakaang iri’ nii’koo mintoomparamaung ninka. ²¹ Ee’nara daangampampimaatoaing dootuu’koo naro’marima Jiisuu’ Karistoo’ke pakumurio’, ookavarantue doomeeritaa’ botu kong paa’na’. Ee’, tee’ ee’na’.

Nii’ Karistoo’nung Mono O’nori Bakaang Aarumo Oro’antavampiaing

(4:1–6:24)

Narung Onou Ninka O’noriaing Meeka’mariri

¹ Tee tee ninge Ovoring bakaang dai’nisie kontampiri botoramping makosina’ bokururu’na’ otorii’naang. ² Boonko noru’dariaing, banainge otori da’deng iiraroria’. Piaa oro’antaveri otorimaatoai tokoona’ noru’deeria’. ³ Tanuaang Meekunge tee dii’ narung deeng-antarurining, teka aa’na’ paarararimaatoai narung deentariri oto’koo mooareeri otorima. ⁴ Mono tee narung otong nii’ke nko-antavampimaung Karistoo’nung, ee’noko Tanuaang Meekung tee narunge tee’ nari’ narung noru’koo oto’koo bokururu’nung. ⁵ Ovoring narung otong, kapoo’ masika’antavampimaung narunge, ntong-koo minkie meeka’anta narunge; ⁶ Kumponing narunge tee Niuma nii’ ookarai, nii’ ookara taremuri niikaang birenge mintoomparama nii’koo kuung otomaung.

Pakumeeriaina’ Avuavu’nanka Ninka

⁷ Teka teieta bakaang maanto’ui oto’keta Karistoo’ke nii’ kantemuru’ namarana’ teing avuavu’nanka tee’ Daari Meekunge minkuvuu’na’ aa’puma:

⁸ “‘Tenang paning-koo deto koinura barampuri dai’nisinuka teie Ovoringe tankaampuru’ tee avuavu’nanka teing nantoong.” (Kena 68:18)

⁹ Tee “deto koinuu’”-naare miru’ aming? Tee aa’ miru’ ee’: Tee tero napo’ siaru’nung depeto kansi’koo boonavaro-koo. ¹⁰ Tee ee’nara narung siaru’nung tee ee’nara napo’ deto koinuu’nung paning-koo daunavaro-koo isipo’ masipo’ ootukunairu-koo maanto’antavaraa’naang. ¹¹ Ee’noko tee “avuavu’ tankaampuru’”-naare miru’ aming? Miru’ aa’ ee’ oro’: Nii’ning kara okovuri nkanuka deempuru’, napo’ nii’ning nakaronuka deempuru’, nii’ning doorenang tampara daankivuma nanu’nuka deempuru’ ee’noko nii’ning tanata nkonanka nau-antavaarima. ¹² Biikaang nko-nko Kumponing bakaning meekupoong bare-anta-koong dootuu’nupoong kake’iiariaina’ ee’noko Karistoo’ bakaang mono makosinuka panka’antavaavaina’. ¹³ Bera tee nii’ ookara narung deemariaing masika’anta-koo ee’noko Kumponing Bauring noru’na’koo, ee’noko naning-naummariri petaa’moriaing nari’ basina’ Karistoo’ dakaosi’na’ dupeari petaa’omana’. ¹⁴ Teketa tee nantoong onou tasi’paa’nukai daang ampirinumparima˜ aavamaariko toire’ oki’nareka’pina’ o’noriauka’nung amutemurii’ daang-koong nau-anta siompampiritaa’, aa’na’ boo’ai nankara avitoitoi bii’urimana’ dovinge uupuvuriko. ¹⁵ Otoa’, masikung narung minkuampima piaameeritaa’ ootukumariri panka’mariaing Karistoo’naummariri, tee-koo kuung o’nori, niikaang bore’ deemparako. ¹⁶ Teie taremuriko nii’ teing bakaang mono-koo-navio’nanka-pina’ matauna’ be’nu’mariri o’noring ee’noko naruna’ makotumpiri pakumeeriaing nii’ ookara tee ee’nara mono panka’antavampiri ee’noko purimariri piaae.

Urikung Aarumo Sipampira Nerakung-koo Baremariaina’

¹⁷ Aung tee nkaang naunau dii’ naurampimang Ovoring bakaang miringe dii’ date’antarampima: Akoing tamunsi’nanka-pina’ nkorariauka’ kapoo’ masikung deeaung siompaamaing-pina’. ¹⁸ Teing biikaang noru’ tee mutaanang, damisimainku teing tee-koo domaang Kumponinge amurimaung-koo. Aming-koo, nna’ papaaranuka koonto’, bore’ke deerenuka otorokotaa’. ¹⁹ Anutua nkoarima maimaia’na’ nko-koo avariri oto’nuka, naro’keta oko’okovurima aarumo ku’mi’ nkoaamaing. ²⁰ Teka tee Karistoo’koo barerariru’na’ tee’ deea’. ²¹ Dii’ke tee koonto’ tampa’ taaraveru’ tee, ee’noko dii’ tee-koo kuung otoritaa’ bakaang kara masikung nauraariko barorontariru’. ²² Urikanaung enang bakei kiru’dariaing teronung aarumo-koo otoriko’na’koong, mono narung bakaang noru’ karaa’ke boo’ tositosi-koong siompui otomaung dii’ orari-anta-koona’. ²³ Diikaang onou ee’noko tanuaang neraka’antarariaing. ²⁴ Nerakanaung kuruntariai Kumponinge nkonii’naung, tee-pina’ oro’naung, koonto’nuka, meeka’dariri otoriaina’ masikung siomperi.

²⁵ Tee’koo enang bakerariaing tosi minku-eta. Masikung narung minkuerimatoaing tapo’deeri otorimaing ninka, ai’ dii’ teing narung mono-koo manta’deeri otong. ²⁶ Dii’ iirarorima deeko’ tee iira oramuriau deeng-antaveriauka’. Bointuriai duaa’ mme’ tumparavaruko. ²⁷ Sietani’ doona aveauka’ tee’. ²⁸ Tee bakisipung bakiaa’ nko-ita bakearara bakaang birenge mintoong tampara kake’iiari nkovuai apuka’paravaing ninka tankaampuaina’. ²⁹ Kara orarananka minkueria’ otoai, teka tampara to’biiari kara narung, pakureeri navureerima. Tee’koo taararaariaininge tee tampa’ taararaariaing biraankeario’. ³⁰ Tee’ nari’ Tanuaang Meekung Kumponing bakaang orarunsi-antaveria’ otoai, ai’ tee Tanuaang Meekung tee Kumponing bakaang taa’ni’anta nii’ moo’muriaing-koong asi’na’mung. ³¹ Donta’dariri otorimaatoai aing aa’ning-eta’, domang oraka’ noru’, iira, ioo’, peusi’, minkuminku ee’noko napo’ too’de. ³² Teka navureeri otorimaatoai dunsirunsi˜antareerima, tonta’antareerima dii’ka Kumponinge Karistoo’koo kuunge tonta’antareruru’na’.

Arakamariri O’noriaing Kumponing-nung Arakai

¹ Tee’koo dii’ Kumponing baurukaa’, teie piaarurimaing, paararariaing tee-pina’ nari’ oto’koo. ² Piaareeri otomatoai tee’ Karistoo’ke piaamuru’na’ ee’noko tee baka nii’koo avaru’ tee boontunang tampa’ nuuraa’ Kumponing-koo. ³ Kaukauro-nko, ee’noko noru’ ku’mi’ siong, nii’noo’ makosi deea’na’ karaa’ bakei dii’koo otoauka’nung; minkueria’ otoai Kumponinge meeka’antanisinuka deentariri. ⁴ Napo’ kara sikuri’ke si’, kara kanu’ ee’noko deu’ makotua’ dii’ke minku-koo. Tampa’ tang narung dii’ke minku-koo makosi. ⁵ Koonto’ tasi’peri noru’eriaing naning tee kaukauro-nko, naning kiiroraa’ deeaung, nii’noo’ mamaironto’ tee oto’evuauka’nung barenku-koo Karistoo’ke ee’noko Kumponinge tareaaremaing ninka. Temurii’ karaa’ siong kumponing daang-koong boontuvuma-nko. ⁶ Ee’namurii’koo Kumponinge iira basi-antavumaung teing-koo bakaang kara siompaavaing-koo. Taaraveriauka’ nii’ninge nii’na’ nauraariko kara menaankavoroma. ⁷ Tee tee teing ninka nari’ manta’deeri otoriauka’.

⁸ Tero tee dii’ mutaanange maanto’duri otoriko’ning, teka enang arakai Ovoring-etainge maanto’duri otong. Tee tee enang araka siraka’antaveri nanirimaatoaing. ⁹ Noru’eriaing tee ee’nara arakai aing aa’ning tavo’antavumaung: tampara aarumo, aarumo koonto’ ee’noko kara masikung amutemurii’ari. ¹⁰ Ee’noko io’ paaraverira ooveriaing aming-koo Ovoring dotuaramaunge. ¹¹ Temurii’ mintoong mutaanang-koong kapoo’ basiaravaing-koo kanto’daria’ otoaing, teka sira’periai temurii’ aarumo orara. ¹² Kapoo’ makempario’ nkoaamaing bakei maremaare, maimaia’na’ taara minku-koo. ¹³ Teka tenang sira’pevurereriko teie arakai tee biikaang oraka’nko orara-pina’ tasi’pario’ sira’puaing. Ee’noko daamparimana’ tasi’parira nii’ning tee arakavariaing napo’. ¹⁴ Tee’ ee’na’ kenai minkuvumana’ aa’puma,

“Tanteraravai da’ aasi’ bauko. Boo’keta daa’darako Karistoo’ke da’ araka-antaruaing.” (Aisaia’ 26:19; 60:1)

Aampari’marima Tanuaang Meekunge Maanto’mariri O’noriaina’

¹⁵ Enang tee araka-koo otoritaa’ tarerariri otoriaing dii’ otoriaina’koo, tampa’ mataurariri, kanu’aapena’ deea’. ¹⁶ Tee’ nkorarima doona siperiauka’, ai’ enang batei orara, doong arikung. ¹⁷ Tee’koo kanu’dariauka’, teka paaraveriai noru’koo Ovoring bakaang pia. ¹⁸ Purinto’naru’ke baru’ naikirima kanu’anta-koo bakerariai diikaang domang ootukunavaro orari-antarari’neeng, teka Tanuaang Meekunge maanto’duri otoaing. ¹⁹ Tee’ otoritaa’ kenanankai karareerimaatoai aa’ninge Daari Meekung-koo daarinii’ninge, Ovoring daangang-koo nantoonge toroaamainge ee’noko Tanuaang Meekunge karantavuko˜ kenanankai. Diikaang domang-eta kenararima amutemurii’ ninka kovirariaing Ovoringe taararuriaina’. ²⁰ Ookara batei-koo tampara tamperimaatoai tee-koo Kumponing tee Niuma, niikaang Ovoring Jiisuu’ Karistoo’ bakaang miring-koo. ²¹ Ee’noko aroo’antareeri otorimaatoaing Karistoo’koo mee’du’pirariri.

Nii’darintu

²² Dii’ bii’ankaaru’ dii’unkaampi-koo aroo’dariri otorimaatoai Ovoring bakaang kara aroo’erimana’, ²³ ai’ donkaani tee manikuma bakaang bore’ tee’pina’ nari’ Karistoo’ dootuu’nupoong-koo bore’ deempari otomana’, bakaang mono, ee’noko tee tee baka domang-anta tee mono-koo. ²⁴ Tee tee tee’ nari’ dootuu’nupoong Karistoo’koo aroo’ariri otoromana’ tee’ nari’ dii’ bii’ankaaru’ dii’unkaampi-koo aroo’dariri otoriaing.

²⁵ Dii’ke bii’unkaampie dii’ankaampi piaaverereri otomatoai tee’ nari’ Karistoo’ke dootuu’nupoong piaavuri bakaang mono avaru’na’. ²⁶ Tee’ nkovuu’ teing naro’ka ba’aang makosinavitu deempariko tevitu kiiroraa’antavui meeka’antavuu’naang aa’noma ntonge duu’ kara meeka’anta-koong ninka. ²⁷ Karistoo’ke tee’ nkovuu’ tevitu bakanavitu tee-anko pipiraari donkonuu’naang nerampari, ku’mi’ dovang dopai, naankuviraa’, meeka’nisi, dakaosi’. ²⁸ Tee’ nari’ bii’unkaampie bii’ankaampi piaavaarimatoaing, tee’ biikaang mono bii’ka piaavarimana’ nari’. Baa tee naning ba’aang piaavumaung tee baka piaavaramaung teni piaavui. ²⁹ Naning bakaang mono munte’aramaung otoa’, teka tee mono bau’aramaung piaavari tanatavarama, tee’ nari’ Karistoo’ke bakanavitu dootuu’nupoong tanatavurimana’. ³⁰ Tee’ nkorariaing dii’ bakaang mono-koo manta’deeri bi’dariri otorining deentariko. ³¹ Tee’ Daari Meekunge minkuvumana’ aa’puma,

“Tee’koo naninge baumararing sipureta tee ba’aang ninka dai’arara tenaanka narung deempareaing.”

³² Kapoo’ pankaing masikung aung-koo baku’ari miru’ari otong, nka ninge ee’ ooamaang: Aung kapoo’ Karistoo’ ninka bakanavitu dootuu’nupoong miru’uri otoing. ³³ Teka sira’pari otoina’koo ee’ otong: Dii’ke naruna’ naruna’ dii’ankaampi piaaverererimaatoai tee’ diikaang mono dii’ka piaararimana’ nari’. Ee’noko ba’aang ba’ung-koo mee’du’piari otomatoai.

Nii’ Biurukaa’ Ee’noko Nii’ Biumaraang

¹ Toire’ke tee diumaraang Ovoring-koo tampa’ taaraverererimaatoaing, ai’ aung tee dii’ diikaang nko-nko. ² Daari Meekung-koo ee’ otong,

“Daumararing deto noru’eresi pakuereaing. Tee’ nkorarama tee anke kansi’koo pankaroong tampa’ otoaing.” (Boto 5:16)

³ Aung tee tutuna’nung boto Kumponing-etaing maraka-anta ninka mavo’pari otoing. ⁴ Dii’ke biumaraange diurukaa’ iirang-antana’ nkovereria’ otoai, teka tampa’ tanataverereriai Karistoo’ bakana’ kake’ii-antavereri, bakaang kara bare-antavererima.

Botovotonaa’nuka Ee’noko Teing Tare-nupoong

⁵ Dii’ dai’nisinukai teing dii’ tanataraarimaing anke kansi’koo makosina’ ankampereri mataa’irariri siompererimaatoai tunsi paakararia’, tee’ Karistoo’ dotu-antana’ noru’eri. ⁶ Nantoonge ooraarii’naang tampa’ nari’ mintoontaria’ otoai ako’ dotu-anta-koo, teka dii’ Karistoo’ bakaning botovotonaa’nuka deentariko domange tampa’ noru’eri mintoontariaing Kumponing-koo. ⁷ Doturoturariri pakuereriaing kara siomperi – Kumponing noru’eri, nantoong noru’ ereria’. ⁸ Noru’eri otong Ovoringe tee nantoong ookara kapoo’ tampa’ nkoaamana’koo tampa’ maku’uriaing aa’ning dai’nisinuka ee’noko dai’ariaing nari’. ⁹ Dii’ oko-nupoonge tee tampa’ tarevereriainge teing diikaning tee’ nari’, mau’mau’ereria’ ee’ noru’erima: “Nii’ ookara taremurimaung otong teke paning-koo nari’ noru’muri, duukung sipuaunge.”

Nopa’mariri O’noriaing Kare-koo Makotumpiri

¹⁰ Asirang-koo ee’ naurampii’naang: Purintariri otoriaing Ovoring-koo bakaang iri’ iirakuta ninka. ¹¹ Nopa’dariaing ootukununge Kumponing bakaang mononopa’ tavu’koonge tee ninka nari’ Sietani’ke aavaruriko dimpa’eriaina’. ¹² Aming-koo, nna’ nii’ tee nantoong tumuusinanka ninka tameeria’, teka aa’ning ninka: ma’nari-koo ovontung avatevaatang-koo neriariri otoroi Sietani’koo kuunge, paning-nairu-kooning-koo oravitu bakei maare ninka tameering, mutaanang-aapei ootukunung kansi’ booni’antanuka enanaroong-koo. ¹³ Tee’koo nopa’dariaing teie Kumponing bakaang mononopa’ke ootukununge dii’ dimpa’dariaina’ doong ora’mung basiarako, ee’noko kare oparako dii’ tee tee’ nari’ tampa’ donkoniri otoriaing. ¹⁴ Tee tee tampa’ pinka’dariri donkoniriaing. Kara masikunge tokoni’pina’ tokorariai. Koompari oto’ si’daravai murukeu-nee’pina’. ¹⁵ Maamurariri otoriai tee tampara doorenang mooa-koong nkavui nanu’koo tee’ piatooronuka˜koo tutung kau’koo boonamante˜ baraa’arimana’ maamuariri. ¹⁶ Napo’ teing ookara ninka baito komperiai kapatau kompaamana’ tumpari’ nta’po’ning sirivaa’uko taamparavaing teie orarai, Sietani’ke, bai’uko. ¹⁷ Ee’noko deto komperiaing tee domang-anta Kumponinge aruru’nung tee-pina’ diikaang baakopo. Napo’ komperiai tee Kumponing bakaang kara tee-pina’ bainatu tavu’koong Tanuaang Meekung-etaing. ¹⁸ Tee’ Tanuaang Meekunge pakururimana’koo ookara batei-koo kunsirarimatoai amutemurii’ paku nka-koo baitorarima. Ee’noko tee’ nkorarima muung ee’noko doong mantontariri eentaevurerereriai Kumponing bakaning meekupoong ootukunairu-koo. ¹⁹ Ning tee’ke kunsi-koo pakumeriai tenang ninge kara daankiama’naang nkomarako naumuaining-koo, tampara doorenang makempari otoko’nung noru’antavarampaina’ amaiaa’moa’. ²⁰ Temurii’ kara nka-koo botomuu’nung deemarako entamemuriaing amorompa’ daankiampaina’ makosina’ bane dai’mari o’noitaa’.

Asi’naare

²¹ Enang tee ninge Tikikas dii’anko botoamaang tee mmaiko’ masikung ee’noko Ovoring-koo mintoomparama mutekaro’arakoo’. ²² Teie naururiaing nii’ o’norina’ ee’noko ninge nkoamaing kapoo’, ee’noko diikaang domang kuaa’antaruriaing.

²³ Mooa ee’noko piaa tee ninka masika’anta tee dii’koo ntara’mainkaang-koo otoaing Kumponing Niuma-ita ee’noko tee Ovoring Jiisuu’ Karistoo’keta. ²⁴ Biraanke otoaing dii’koo niikaang Ovoring Jiisuu’ Karistoo’ piaa o’paa’ke piaaverimaing-koo ookara-koo. Tee’ nari’.