KOLOSI

Ane’

KOLOSI-nupoong

Paula’ke Daarievuru’nane’

Kara Baavootunanka Ane’kooning

1:1 Karistoo’ke Ookara Kapoo’ Kumponing Bakaang Maneenanka Okovui Otomaung

3:5 Karistoo’ Nii’koo Domang-koo Otoko Nii’ Neraka’mariri O’norimana’

Karistoo’ke Ookara Kapoo’ Kumponing Bakaang Maneenanka Okovui Otomaung

(1:1–3:4)

¹ Ning tee Paula’ Jiisuu’ Karistoo’ke kara okomui nkavama’naang miru’muu’nung Kumponing piavou’na’. Aung Timoti mmaiko’ nari’ pakumui daarirerorompimang dii’ nee’maikorori’ teke Kolosi-navuntu’koo otorining, dii’ Karistoo’koo mutekaro’dariri baitorarimaing, Kumponing bakaning meekupoong; ² Biraanke ee’noko mooa dii’koo otoaing Kumponing Niuma-itaing.

Paula’ Dotuaru’na’ Biikaang Baito-koo

³ Epaparasie naumuresio’ taaravampetu’ tee diikaang masika’anta Jiisuu’ Karistoo’koo ee’noko napo’ tee diikaang piaa nari’ teing-koo nii’ning Kumponing bakaning meekupoong-koo ookara-koo. Tee’koo nee’ke tee neekaang kunsi-koo ookara batei-koo tampara tampampemaung tee-koo Kumponing tee niikaang Ovoring Jiisuu’ Karistoo’ Bauma-koo. ⁵ Dii’ke nemperimaung nooruupieri tee biraanke Kumponinge te’ paning-koo kinkonteruru’nung dama’ke komperiaing, ee’noko tee nooruupi te’ okora’ario’ dii’ tee’ baitorariri piaareerimaung tenang tee doorenang masikung ee’noko tampara tutung nauraario’ taaraveru’nang-eta. ⁶ Ookara kansi’koo teie doorenang tamparai mmau’ nantoong bere’antavurima biikaang aarumo paari-antavurimaung tee’ nari’ dii’koo mintoomparamaatomana’ te’mung-eta doompeto tee Kumponing-nung piaa otoina’ masika’ punkaamperitaa’ tutung taaraveru’na’mung-eta. ⁷ Tee tee aung doorenang tampara dii’ke teie Epaparasie, nii’ ninka nari’ narung botovotonaa’ke aa’na’ piaavampimaunge, naururio’ taaraveru’nung, tee nkaang noru’ siompui dii’ankoi kake’iiari mintoomparamaung Karistoo’koo kuunge. ⁸ Teie napo’ nee’ naumuretu’ tee’ piaareerimana’ Tanuaang Meekung-koo kuunge.

Paula’ Kunsiaru’na’ Kumponinge Puring-antavurii’naang

⁹ Tee’koo nee’ke dii’koo tutung taaravampetu’noo’keta kunsi-koo uaamoreaung dii’ke noru’erii’naang tee bakaang pia dii’ke dupe-anta-koo, ee’noko maanto’antararii’naang teie Tanuaang-aapenung noru’ke ee’noko mataue. ¹⁰ Tee’ kunsimarekoo’ dii’ke aa’noo’naang: tampa’ Ovoring-koo makosina’ otoriai ookamentai tee dotu-antaveriaina’, sinang tampara nkaveriai tee-koo ookara nko-nko tampara-koo, ee’noko Kumponing aa’na’ punkaamperi˜ noru’eriai. ¹¹ Napo’ tee’ke nee’ kunsimaremaunge dii’ puring-antarurii’naang teie iri’ke deto basie Kumponing-etainge meenasi-po’nunge tee kapoo’ ivekeng tavo’kuaining-koo tampa’ nari’ purintariri dotu ninka mii’kiri otorii’naang. ¹² Ee’noko doturariri Niuma-koo tampa’ tamperimaatoai nii’ ookara makosi-antamuru’nung-koo tee barenku nka-koo, teing ninka nii’ning Kumponing bakaning meekupoong ninka nari’ araka-kooning ninka. ¹³ Ai’ Kumponinge tee nii’ Sietani’ bakaang muu’ mutaanang-eta moo’muru’nung ee’noko teie Bauring aa’na’ piaavumaung bakaang muu’aape kuung po’antamuru’. ¹⁴ Teie bakaang erenge boorimurima orara aarumo bakaang iri’keta unaa-antamuru’.

Karistoo’ Bakaang Aarumo Tee Ninka Bakaang Nko-nko

¹⁵ Tee tee Karistoo’ tee Kumponing oro’paravaung-koong siuraampi˜ tee Kumponing masika’ otoina’ oro’antavumaung, Karistoo’, tee Ovoring, uro’mara’ makosi, ookara kapoo’nanka Kumponinge nkovuru’ning-koo dau basi. ¹⁶ Ai’ Karistoo’ke tee Kumponing-koo kuunge ookara kapoo’nanka nkovuru’nung kansi’ kooning ee’noko paning-kooning, ooarampimaing ee’noko oo-paa’ning, teing tanuaananka ee’noko biikaang ovontunanka nari’, piatooronuka˜ pina’ avatevaatang-koo otoroining. Teing Karistoo’ke nkovuru’ning, ee’noko Kumponinge Karistoo’koo boong oto’koo miru’uru’ning. ¹⁷ Tee tee ookara kapoo’nanka nkoaravaruko otoko’, ee’noko ookara kapoo’nanka teie kompuri otoko deeko’ otoromaung. ¹⁸ Ee’noko tee tee bore’ bakanavitu dootuu’nupoong-koo. Ee’noko bakanavitu teing tee-koong mono makosinuka. Ee’noko tee tee ookara-koo okora’. Tee tutuna’nung boo’keta daa’koo. Tee’koo tee tee ookara-koo bore’ deempari otomaung. ¹⁹ Ai’ Kumponinge tee bakaang tampara aarumo ookara Bauring-koo miru’ura tee-koo dupeario’ oto’antavuu’. ²⁰ Ee’noko tee-koo Jiisuu’koo kuunge Kumponinge ookara kapoo’nanka osikoimpuru’, aa’noko kansi’kooning ee’noko paning-kooning, mooa tavo’ura bakaang erenge aa’barata’koo booma.

²¹ Ee’noko dii’ tee’ke nari’ osikointuru’ninge, tero tee Kumponing-eta isipo’ otoriko’ning tee-koo kare-nupoong deentariri, diikaning norunoru’nanka siomperima ee’noko nko-nko oreng. ²² Ee’ dii’ teing enang Kumponing ninka napo’ navu-antanii’nuka bauring bakaang monoi naning-naumpario’ boo’koo taura’puu’nung-koo, dii’ kiiroraa’daririo’ meeka’nisinuka baka-koo uro’kanoo’ po’antarurii’naang. ²³ Teka dii’ teing enang be’nu’antarariri otoriaing diikaang masika’anta ninka, tampa’ e’maniri pinka’dariri. Teieta nempampimaung-koong noorupi-eta diiri’dariauka’ tenang tee doorenang tampara taaraveru’nang nkaveru’nung-eta. Ai’ tee tee doorenang tampara ookara-koo nantoong Kumponinge paninga boonamenge nkovuru’ning-koo daankiampimaung. Ning Paula’ teie tee doorenang nkavui nanu’ deemaru’nung.

Paula’ke Kolosi-nupoong Pakuvuru’na’

²⁴ Ning tee enang dotumaramang teing manki’nanka kune’amaing-koo dii’ pakurampima, ai’ tee’ nkomarama nkaang monoi dupe-antavamaung teing sisikeerananka Karistoo’ke miru’muu’ning tora’koo bakanavitu dootuu’nupoong pakuarama, bakaang mono makosinavitu. ²⁵ Ning tee Kumponinge baka botomuio’ dootuu’nupoong biikaang kara-pare’ deemaru’nung dii’ paku-koo, tee Kumponing bakaang kara opansi sira’panko dii’ke noru’erii’naang. ²⁶ Tee kapoo’ makensi’nung otomaung mare’ mmau’koo ee’noko napo’ teing-koo nantoong kansi’koo-nupoong-koo, teka enang asi’namu’ sira’paring teing-koo bakaning meekupoong. ²⁷ Kumponing bakaang pia tee teing ookara nantoong amutemurii’ noru’anta-koo tee kapoo’ makensi’nung tampara masikung, Ju’ naing deea’. Tee kapoo’ makensi’nung tee aung ee’ oro’, Karistoo’ tee dii’koo kuung otong ee’noko dii’ke tee enang nemperi otong bokururira paning-koo be’antarurii’naang. ²⁸ Nii’ke tee tee doorenang Karistoo’koong ookara nantoong sirakura’ nau-antavarampimaung amutemurii’ noru’nanka-koo pakuarampima, teing ookara Karistoo’koo petaa’oroaina’ tautauarampima. ²⁹ Tee’koo ning pore’ kompamaung aa’na’ mintoomarama Ovoring bakaang iri’koo e’manansi tukomuko mintoomaramaung-koo.

Masika’anta-koo E’manampiri Daang Minkunanka Dimpa’ampiaina’

¹ Ninge tee dii’ke noru’koo piamoing tee dii’koo ning pore’momana’ dii’ pakurampima ee’noko napo’ teing-koo Leodesia’nupoong-koo nari’, ee’noko napo’ teing-koo nkaang oing mme’ oomaavaing-koo. ² Dii’ diikaang domang kuaa’dori otorii’naang pore’momaung, teie piaae naro’ka dai’durii’naang ee’noko noru’ dupenii’ nkaverii’naang dii’ke Karistoo’ kenkumperiaina’ tero Kumponinge makempuko’nung pako’pari’uu’noo’keta. ³ Ai’ tee ookara noru’ ee’noko mataunanka aa’na’ tamparananka Karistoo’koo kuunge otoko nkaveru’nung. ⁴ Ee’noko ninge tee’ naurampimang naninge nii’nunge kara menaankai kanu’antarurira tosiruri’neeng-koo. ⁵ Ai’ ning tee bane isipo’ o’nong nkaang mono, teka tee nkaang domange punkaantampiri otong. Ee’noko bakei aa’na’ dotumaramaung diikaang otooto’ tampa’ otori mintoontarimaung-koo, Karistoo’koo e’maniri baitorariritaa’.

⁶ Tee tee, dii’ke tee Jiisuu’ Karistoo’ diikaang Ovoring masika’antaveru’na’koo, tee’ nari’ tee-koo kuung otoriaing. ⁷ Ee’noko napo’ tee-koo kuunge pinka’dariri ari’arurira du’duriai, ee’noko tee masika’antaveri pinka’dariri otoriai tee’ ee’na’ bare-antaraaru’na’, ee’noko aa’na’ dotu-eta tampa’ tamperimaatoai Kumponing-koo.

Kansi’ Bakaang Norukasi’ Tee Tamunsi’nung

⁸ Dii’ tarerariri otoriai, nantoong-etaing daang-koong matau ninka aavaraarima kanu’antaraari’neenga, aa’ning ninka toomo ee’noko norunoru’nanka kanto’puaing kansi’aapening, Karistoo’ bakana’ nauraaria’. ⁹ Ai’ Karistoo’ tee nii’koo narung deempari otoi ookara aarumo Kumponing bakaang tee-koo dupeario’ otoi otomaung, ee’noko tee tee ookara tanuaananka-koo ovontung-koo dau basi biikaning piatooronuka ninka nari’; ¹⁰ Tee’koo dii’ tee-koo Karistoo’koo kuung porimaing teing kapoo’koo apuka’daria’ otorimaing Kumponinge dii’ ba’maikori’ tanturiaina’koong. ¹¹ Aa’noko tenang dii’ Karistoo’koo poru’nang teie tee dii’ dopa’ toto’nii’nuka pina’ makosinuka deeng-antaruru’ urikung onou orara mono-aapenung toto’antarurima, Ju’pina’ birenge nkona’ deea’, teka teie Tanuaang-aapenung nko-nkoi. ¹² Ee’noko tenang dii’ teie ntong-koo minkie meeka’antaraaru’nang dii’ teing Karistoo’ ninka nari’ Kumponinge dako’duru’ning tee urikung aarumo onoue komperiko’ning ninka. Ee’noko napo’ tee Karistoo’ ninka nari’ daa’duru’, Kumponing bakaang iri’ tasi’peri masika’antaveriko, Jiisuu’ boo’keta daa’uu’nung-koong. ¹³ Aa’noko tero mme’ bere’daria’ dii’ teing tanuaang boo’nuka otoriko’ urikung onou toto’daria’ otoriko’nung-koo, diikaning oraka’ nkonanka ninka dai’dariri, teka enang Kumponinge dii’ teing Karistoo’ ninka nari’ domanturining ee’noko diikaning oraka’ nkonanka tonta’deruri ookara. ¹⁴ Ee’, Moosesi bakaang botoi nii’ orara aarumo-po’ning boo’numpo’nuka tammuriko, Kumponinge piaamurira niikaang oraka’ nkonanka-koong deeru kuivuu’ kara tumpituumpi-koong ninka nari’. Bakei, taapo’ tonta’ura aa’barata’koo taakavuu’. ¹⁵ Napo’ teie teka ma’nari-koong ovontung biikaning piatooronuka ninka nari’ orari-antavuru’ ookara-koo dutakanoo’ka sira’antavui, ai’ Karistoo’ke biikaang iri’ kiru’urira tamunsi’nuka deeng-antavuru’ aa’barata’koo boo’paru’noo’ke.

¹⁶ Tee’koo teinge aava nkonukai Ju’ biikana’koo tuumpiraariko taaraverereriauka’ taamang tovang ntong nai dovang-koo, nii’noo’ doong pankeng-koo aa’ning-koo: dootuu’kooning doong pankeng, kaara neraku dupumanang, ee’noko Doong Uaana’mung. ¹⁷ Ai’ aing teing tamunsi’ning uu’aa’ makosining urikupoong nau-antavuriko’ning kapoo’ tavo’kuaining-koong, teka enang teing ookara Karistoo’koo kuunge dupenii’nanka deemparirio’ Karistoo’ narung tee mono masikung nii’ke noru’koo makosi.

¹⁸ Napo’ teinge aava nkonukai dii’ dootuu’nupoong makosinuka deeaing tantaariko taaraverereriauka’, aa’paako, “Dii’ oki’nareka’ Kumponinge taara-koo makosinuka deea’, bakaning koosinunanka-anko kunsirariko deeko’ makosi.” Teing tee’ nauraarimaing daang noone-koo ooaamaing-koo e’manaama deravarimaung, ee’noko biikaange monoi noru’ oraka’ siong-antavurio’ tamung boturopa daangamparikoo’. ¹⁹ Ee’noko teing nantoong tee’ oro’nuka teing Karistoo’koo be’nu’aria’, tee Bore’ nii’koo ee’noko nii’ bakaang mono makosinuka. Teie narunge bau’uma tanatavuio’ bakaang mono panka’paramaung anairu-tenairu karu dovange be’nu’antavari tee Kumponing bakaang miru’ siompario’.

Karistoo’ Ninka Nari’ Moompirio’ Boto Amutemurii’ke Pakumuriarupeu’na’

²⁰ Dii’ teing Karistoo’ ninka nari’ dooru’ning deentariritaa’ norunoru’nanka kanto’puaing kansi’aapening-koo enang dai’daria’ otoring. ²¹ Tee’koo biikaning dootuu’koong botonanka-koo noru’ kato siperiauka’ taamang tovang bio’ kereng-koong. ²² Teing aing kapoo’nanka teing tamung namu’ke paa’numpo’ kompampiko, temurii’ boto nantoong-etaning tamunsi’ning nau-antananka deemparako. ²³ Masika’, oo-koo tee matauna’ oro’pari otong boto tampeng-pina’, teka teinge nii’ mono bakaang pia-ita unaa-anta-koo pakumaariarupeu’. Tamung daang dootuu’ avutevu’anta-kooning, ee’noko baru’ boonko noru’arama baka mono sisikeera-anta-kooning.

Nii’ Teing Kumponinge Karistoo’ ninka Nari’ Daa’antamurining

¹ Dii’ teing Kumponinge Karistoo’ ninka nari’ daa’antarurining nerakung domaang-koo. Tee’koo dii’ke kapoo’ning paning-aapening naing piarori otoriai te’ ee’noo’ Karistoo’ otoinoo’ning, Kumponing-koo tampavine-koo daurarompari ba’nanui. ² Diikaang noru’ke deto basina’ kapoo’ paning-kooning noru’eri otomatoai, kapoo’ kansi’kooning noru’eria’. ³ Ai’ dii’ teing kansi’nameng-koo dooru’ning pina’ oro’nuka, ee’noko diikaang domaang tee Karistoo’ ninka baku’ari otong Kumponing-koo. ⁴ Karistoo’ tee diikaang domaang okovenung, ee’noko tenang Karistoo’ napo’ oro’paravainang dii’ tee’ nari’ke tee ninka nari’ oro’dariainge teke sirapo’ke Kumponing bakaang meenasi komperi.

Karistoo’ Nii’koo Domang-koo Otoko Nii’ Neraka’mariri O’norimana’

(3:5–4:18)

Tee Urikung Aarumo Orara Nii’keta Tonta’ampiai

⁵ Tee’koo kapoo’ kansi’aapening dii’koo otoining boo’antaveriai aa’ning: kaukauro nko, noru’ ku’mi’, karakaraa’, mamairo, ee’noko onou oko’oko-koong, tee’ tee’ kumponing daang-koong siona’. ⁶ Tee temurii’ kapoo’ nkoaamaung-koo tee Kumponinge teing taarapiikanuka kiimata-koo iira ninka poaing te’mung. ⁷ Aing teing aarumonanka dii’ke tero nkoveriko’ning tenang dii’ temurii’ aarumo-koo kuung otori. ⁸ Teka enang aing aarumo ee’ oro’ dii’keta tonta’eriai: iira, turang, oraka’ mantong, poore’ ee’noko deu’. ⁹ Tosireeria’ otoai, ai’ dii’ke tee, tee urikung onou tero tonta’eru’nung teing ninka bakaning aarumonanka ninka. ¹⁰ Enang tee dii’ onou nerakung deentaririning Kumponinge nkovuing, ee’noko teie doong kante paari-antavumaung tee-pina’ oro’paraa’naang tee masika’ kenkumperiaina’. ¹¹ Enang tee neraka’darira tankatankaang dii’koo meu’ke otoa’. Kiriki’nupoong, Ju’nupoong-eta tankaamparia’, dopa’ toto’nii’nuka toto’pariaing-eta tankaamparia’. Ee’noko nantoong amutemuu’ namuu’pina’ otorong. Botovotonaa’nuka ee’noko osikaiaang nari’ otorong – ai’ Karistoo’ tee ookara-koo nari’ otong ee’noko teie narunge nii’ bakaning ookara komuri otomaung.

Otori Piaa Oro’antaveri otoriai.

¹² Dii’ teing piaarurira Kumponinge bakaning meekupoong deentariri otorii’naang miru’durining. Tee’koo aing aa’ning aarumo kuruntariri otoriaing: domang-eta piaa bauko, tampa’nko, boonko oto’, dooroonto’, ee’noko mii’kui oto’. ¹³ Naruna’ naruna’ oraka’ noru’deeria’ otorimaatoai. Nii’nung ninka minkuminku otoko deeko’ tonta’antareereai tee’ Ovoringe tonta’antaruru’na’, ee’noko dii’ka tee’ nari’ tonta’antareerimaatoai. ¹⁴ Ee’noko ookara-koo daua piaa oto’deruriai, dii’ ookara naro’ka dupeari narung onou deeng-antaruriaina’. ¹⁵ Ee’noko tee Karistoo’ketaing mooa taura’periaing teie tanataruriaina’ tee diikaang domang, dii’ ee’ning Kumponinge bokururu’ning tee-koo mooa-koo kuunge narung mono makosinuka deentariri, ee’noko ookara batei-koo tampa’ tamperimaatoai.

¹⁶ Napo’ tee’ Karistoo’ bakaang karai maanto’duri otoriai, aa’noko dii’ tee matauna’ nau-antareeriai ee’noko tautaureeriai pakureerima, ee’noko kenararimatoai teinge aa’ninge: Daari Meekung-koo daarinii’nankai, nantoonge toroaamainge ee’noko Tanuaang Meekunge karantavuko˜ kenanankai tampara tamperima Kumponing-koo diikaang domange. ¹⁷ Ee’noko aming kapoo’nanka dii’ke nkoveriaining, karai ee’noko nko-nkoi, Ovoring Jiisuu’ Karistoo’ bakaang miring-koo nkoverima Kumponing tee bauma-koo tampa’ tamperimaatoaing Jiisuu’koo kuunge.

Nampeesinii’nuka Otoroaina’, Biurukaa’ Nari’

¹⁸ Dii’ manii’ nampeesinii’nuka, dii’unkaampi biikaang kara aroo’erimaatoai tee’ Ovoringe pia-antaruri otoina’. ¹⁹ Napo’ dii’ donkaang nampeesinii’nuka dii’ankaampi piaaverererimaatoai booni’ antavereria’. ²⁰ Napo’ dii’ biurukaa’ke diumaraang taaraverererimaatoai ookara kapoo’nanka-koo, ai’ tee’koo tee Ovoring dotuaramaung. ²¹ Dii’ke biumaraange diurukaa’ iirang-antaverereria’ otoai konte-antavereri’neenga.

Mintoong-nupoong Ee’noko Tanata Nkonuka

²² Napo’ dii’ botovotonaa’nuka diikaning kansi’kooning ovontung taaraverererimaatoai ookara kapoo’nanka-koo, tenang dutai ooraario’ naro’ deea’ tampa’ ooraariaina’ noru’eri, teka aroo’dariri mintoontarimaatoai Ovoring-koo mintoona’ nari’, naning-koo deea’. ²³ Kapoo’ nko-nko nkoveriaing tampa’ diikaang domang-eta nkoverimatoai Ovoring-koo mintoompevurimaung-pina’ noru’eri, naning-koo deea’, Ovoring-eta barenku nkaveriaina’ noru’eri tee diikaang moo’; ²⁴ Ai’ dii’ teing tee-koo Ovoring Karistoo’koo dai’dariri mintoontarimaing. ²⁵ Teie naninge kapoo’ orara nkovumaatoainge tee maku’noo’koo tee orara nkavuaing, tee moo’ tee kapoo’ orara nkovumaung-koo ee’noko naninge baari’uauka’nung.

¹ Dii’ tanata nkonuka, teing diikaning dii’koo mintoomparimaing makosina’ tampa’ nkovererimaatoai, ee’ noru’eri, “Nii’ tee’ke niikaang Tanata-nko paning-koo oto’memuring.”

Kunsiarama Matauari Oto’na’

² Kunsi-koo uaaroria’ otoai onou tanterariri Kumponing-koo tampa’ tamperima. ³ Ee’noko nii’ kunsi-koo pakumererimaatoai, Kumponinge nii’ karanaang daate’memurii’naang tee doorenang tampara Karistoo’ bakaang tero baku’ari otoko’nung daankiampiaina’, tee tenaare aa’naare ning anke kiimatamari o’nong. ⁴ Napo’ ning kunsi-koo pakumeriai ninge tee kara tampa’ siraka’antavampaina’ tee’ ninge minku-koo makosina’ minkuama.

⁵ Teing ninka mutaanang-nupoong ninka otori mataurariri nanirimaatoai batei tamung kera’peria’. ⁶ Kara-koo mataurariri nari’ karerima aroo’antana’ karerimaatoai, ee’noko maku’erima to’biirariri karerimaatoaina’.

Tikikas Naanka Onesimas Karavoto˜ Nkara

⁷ Tikikasie tampa’ naururiaing dii’ teing ookara kapoo’ ninge nkoamaing. Tee aung Tikikas tee nii’maiko’ masikung, tee nii’ ninka nari’ Ovoring bakaang botovotonaa’ kake’iiari mintoomparamaung Ovoring-koo. ⁸ Ninge dii’anko botoamaang dii’ke nii’ o’norina’ noru’erii’naang ee’noko teie dii’ napo’ kuaa’antaruriai diikaang domang. ⁹ Napo’ Onesimas nari’ Tikikas ninka botoamaang, tee napo’ tee’ke tee narung nii’maiko’ kake’iinung, tee diikanavuntu’nung narung. Tenaankai nauraariaing kapoo’ ookara anke nkoaramaing.

Si’noora’naare

¹⁰ Aristakasie tampa’ tang botovumaang dii’anko teie ni’ninka kiimatanava-koo nari’ o’noremaunge, napo’ teie Maaka’ke, Baanabas baara’ma’nunge, tampara tampumang dii’koo. Tee aung Maaka’ tee dii’anko beko tee tampa’ onkeonke’eriaing tee’ naurampiru’na’. ¹¹ Narung napo’ teie Jiisuu’ Jasitasie tampa’ tang dii’anko botovumaang. Anaanka nanaanka Ju’koonaanka masikaanka teing-koo mintoong-koo pakumaarimaing-koo Kumponing bakaang muu’ kani-anta-koo. Tenaanka mmarang-koonaanka deempareko nari’ o’noritaa’ tampa’ mantomaramaung. ¹² Napo’ diikanavuntu’nunge Epaparasie dii’anko tampa’ tang botovumaang, teie Jiisuu’ Karistoo’ bakaang botovotonaa’ke. Teie tee dii’ kunsi-koo aa’na’ iri’oi pakururimaung, dii’ purintariri otorii’naang petaa’dori, ee’noko Kumponing bakaang pia koonto’ tasi’periai dii’ke. ¹³ Ninge tee tampa’ masika’ noru’ansi o’nong tee, tee’koo ninge ee’ naurampimang: Tee tee bakei pore’omaung dii’ Kolosi-nupoong tovang paku-koo, Leodesia’nupoong ee’noko Aiaapolis-nupoong. ¹⁴ Napo’ teie Luuke’ke niikaang dokutai domang-eta aa’na’ piaavampimaunge Dimas ninka nari’ tampa’ tampuremaang dii’koo. ¹⁵ Enang tee dii’ke nkaang tampa’ tang teing nii’maikorori’ Leodesia’ke otoromaing nauereriaing ee’noko teni Nimpa teing ninka nari’ bakanava-koo dootuu’arimaing ninka.

¹⁶ Aung ane’ karavoto deeruaako taareverirai’nange dii’ke napo’ dootuu’nupoong Leodesia’ke otoromaing-aape botoveriai teinge napo’ deeruaavaina’, ee’noko napo’ tene’ Leodesia’aape botoantu’nane’ tee’ke, dii’ke napo’ deerueriai. ¹⁷ Ee’noko Akipas nauerima aa’periai, “Dake tee nko-nko Ovoringe aruu’nung tampa’ dupe-antaveaing.”

¹⁸ Aung tee anairu karavoto-koo basinairu ninge ninka ane’ kompansi nkaang birenge daariamang tampa’ tang botoanko nkaang taa’ni’anta ooverira tasi’memurii’naang. Kunsi-koo norunoru’merimatoai, ai’ ning tee kiimata-koo sieenai dai’mari o’nong.

Tee biraanke tee dii’ ninka nari’ otoaing. Ee’, tee’ nari’.