Ane’ kenaanka-nane’
TESALONAIKA’nupoong
Paula’ke Daarievuru’nane’
Kara Baavootunanka Ane’kooning
1:1 Paula’ke Doong Asi-koo Nau-antavuru’na’
3:1 Paula’ke Botovuru’na’ Teing Mintoong-koo Kontevoromaing Daa’aarii’naang
1Paula’ke Doong Asi-koo Nau-antavuru’na’
(1:1–2:17)
1 Tee ning Paula’. Sailas naankai Timoti pakumuresitaa’ daarirerompimang dii’ Kumponing ee’noko Ovoring Jiisuu’ Karistoo’ beekaning dootuu’nupoong Tesalonaika’ke otorimaing. Maikori’ Kumponinge biraankeruri mooa ninka otorii’naang. 2 Biraanke ee’noko mooa dii’koo otoaing Kumponing Niuma-itaing ee’noko teieta Ovoring Jiisuu’ Karistoo’.
Paula’ke Tampara Tampuu’na’ Kumponing-koo Tampa’ Donkonaio’ Oovurira
3 Mmaikori’ ee, nii’ke tee nau’ka tampara tampampimaung Kumponing dii’koo. Tee’ nari’ makosina’ nko-koo, ai’ diikaang masika’anta tampa’ dupui otomaung-koo, ee’noko tee diikaang piaa dii’ka bereng-antaverimaung-koo. 4 Tee’koo nii’ doturotumarimaung sira’anta-koo Kumponing bakaning dootuu’nupoong-koo osi kantena’. Nauarampimaung dii’ purintariri ee’noko baitorariri otorimaung-koo tenang nantoonge turantaarima pore’antaraariko.
Kumponinge Nii’ Simpe’murimaung Aarumo Koonto’koo
5 Aung ee’nara taa’ni’anta Kumponing aarumo koonto’koo simpe’anta-koong, aa’noko teie nerirurimang makosi-antarurii’naang tee-koo bakaang muu’koo kuung be’koo baike ninka kavi’erimaung-koo. 6 Teka teie enang kiimata makosina’ maamu-antavui otong teing-koo nantoong dii’ oraka’ nkoraarimaing-koo, mero’anta-koo. 7 Tee taa’ni’anta napo’ ee’ oro’: Teie aa’ nii’ oraka’ nko-nko-ita unaa-anta amurima dii’ napo’ unaa-antaruriainge pore’anta tora’perimaing, te’mung Ovoring Jiisuu’ tavo’aravaina’mung; 8 Teka tee tavo’aravaing paning-eta teing ninka bakaning koosinung˜ purinto’nanka ninka nta’ aa’na’ urumpari mero-anta-koo teing Kumponing noru’aavaing ee’noko teing Ovoring Jiisuu’ bakaang kara tampara siompaavaing. 9 Kiimata avuriaing ee’ oro’: Ovoringe bakaang dutakanoo’keta bata’uriai, bakaang iirakuta-koong meenasi ooaavauka’nung ee’noko orari-anta kompaavaing oparavauka’nung. 10 Tee’ nkoaravaing te’mung poaina’mung meenasi nkavuu’naang teing-eta’ bakaning meekupoong-eta, deto basi-antavai masika’antavaamaing-eta. Dii’ tee-pina’ teing-koo meu’ otoriainge ai’ dii’ke tee masika’antaveru’nung tee, kara bakaang dii’ naurarampirio’ nii’ke.
11 Poaina’mung noru’ampima nii’ke niikaang Kumponing-koo kunsirerorompimaung dii’ teie dupe-antarurii’naang miru’duru’na’ ee’noko napo’ dupe-antareruriaing bakaang iri’ke teing tampara aarumonanka ee’noko nko-nkonanka Kumponing masika’anta-itaning daruerimaing. 12 Tee’ nari’ tee miring niikaang Ovoring Jiisuu’ bakaang pankaimparaa’naang dii’koo kuunge, ee’noko dii’ tee’ nari’ tee-koo, bakaang piaae makosina’ niikaang Kumponing ee’noko Ovoring Jiisuu’ Karistoo’.
2Jiisuu’ Poaina’mung Due’uko Naning Orara Tavo’aravaina’
1 Enang napo’ dii’ nii’maikorori’ naurampimang niikaang Ovoring Jiisuu’ Karistoo’ napo’ toroaravaing-koo ee’noko tee niikaang naronaro’ tee, kune’ampiaing-koong. 2 Aa’na’ pia-antararampimaang dii’ nii’maikorori’ paapaa’darima domang puraaniriauka’ nii’namurii’ kara tavo’arako, Ovoring bakaang doong tavo’kuing, poing, tampaako, bane Tanuaang Meekunge karantanuka˜ tamparima ai’ daankiarima minkuaako dootuu’koo ai’ karavoto-koo˜ minkuaako ning-etaing tampaama. 3 Tee’ avutevu’ai tosiraariko masika’antavereriauka’. Ee’ noru’eriai, kenaanka kapoo’ nkoaravaruko Ovoring bakaang doong tavo’kuauka’nung, aa’noko tutung mmau’ke Kumponing-eta bere’arima too’dempaavai ee’noko tee naning Kumponing-nung Boto Meekung daang-anta-koo piavoainung oro’paravaing, teenoo’ tee mosianung kuuntu’uaing. 4 Tee ee’nara naning taarapiika deto basi tamparavaing ookara ovontung-koo nantoonge boontuaarimaing-koo. Ovontung turampuriainge bera dootuu’nava pankava Kumponing-nava koinurai’nange ba’namparara ee’ minkuvuaing: “Ning tee Kumponing.” 5 Aung kara tero naurampiru’ dii’ ninka o’noritaa’, ai’ ampa’doru’nunge? 6 Dii’ke tee noru’eri otong tee doomo’ui otomaung. Teie doomo’ui otoo’naang bera tee bateinang Kumponinge taura’puko oro’paravaina’mung. 7 A’noo’ tee taarapiika aarumo enang makensi’na’ nko-nkoaramang doomo’uio’ bera Kumponinge tee doomo’ui otomaung daate’uaina’mung. 8 Karistoo’ ee’nara aa’na’ araka-po’nung tavo’kura paro’uu’naang bakaang domaange karang-eta, ee’noko teka bake-antavuai bakaang aarumo.
9 Enang napo’ naurampiaing tee-koo naning taarapiika Kumponing-nung Boto Meekung daang-anta-koo piavoainung-koo; 10 Sietani’ke ee’narai tee taarapiika tavo’antavuu’naang tee ninka bakaang iri’ amutemurii’ taa’ni’anta tositosi-koong, ta’nimpaarii’, ee’noko amutemurii’ aarumo orarananka tosi-koong dua’anta-koo teing paa’arimaing kasiaavaruma tee kara masikung domampuripeu’nung. 11 Tee’koo, kasiaavaruko Kumponinge taura’puaing tositosi pankaing teing-koo tavo’araa’naang, daang-koong masika’antavaako ookara kiimata-kooning tampuriaina’, orara aarumo piavoroma kara masikung masika’antavaavaruko.
Kumponinge Dii’ Miru’duru’nung Domang-anta-koo
13 Nii’maikorori’ ee, Ovoringe piaaruri otorining, teka nii’ke tampa’ tampampiaing Kumponing-koo dii’ ee’ning-koo. Ai’ dii’ teing Kumponinge tanturu’ning tutuna’noo’keta domantarii’naang Tanuaang Meekunge meeka’antarurio’ ee’noko dii’ke kara masikung masika’ antaverima. 14 Kumponinge temurii’ otooto’koo bokururu’ tee doorenang tampara daankiampiko dii’koo. Dii’ bokururu’nung nkaverii’naang tee meenasi niikaang Ovoring Jiisuu’ Karistoo’ bakaang. 15 Tee’koo dii’ nii’maikorori’ purintariri tampa’ donkoniri otoriai, komperi otoriaing tee kara masikung nii’ke naurarampiru’ ookenge daankimarima ee’noko karavoto-koo daariampima.
16 Tee niikaang Ovoring Jiisuu’ Karistoo’ ee’noko Niuma Kumponing piaamaarimanakang ee’noko biraanke-antamaari domang kuaa’anta boturopa amaarinakang, kapoo’ tampara-koo neng-antamaarima – enang tee tekange ee’nakange domang kuaa’antaraariai. 17 Dii’ke ookara kapoo’ tamparananka minku-koo ee’noko nko-koo iri’antaraariaing.
3Paula’ke Botovuru’na’ Teing Mintoong-koo Kontevoromaing Daa’aarii’naang
(3:1-18)
Paula’ke Nia’uru’na’ Kunsievaarii’naang Bakaning Pakupaku-nupoong Nari’
1 Nii’maikorori’ ee, asi’nanaare anaare: Dii’ke kunsi-koo pakumereriai Ovoring bakaang kara iri’narung beremparara kuung deempuriaina’ tee’pina’ dii’koo meu’ke nkoaru’na’. 2 Ee’noko napo’ kunsi-koo pakumereriai Kumponinge pakumuriaina’ teing nantoonge oravoonge tamaari’neeng. Ai’ ookarai tee masika’antavaavaung. 3 Ovoringe tee dii’ si’duriauka’nung, puring-antaruriaing ee’noko ueeng-antaruriaing tee orara-koo. 4 Ee’noko tee nii’ke noru’darampiri otong dii’ke tampa’ nkoverimaung ee’noko tee’ nari’ nkoverimatoaing tee’ nari’ naurarampiru’na’, dii’ Ovoring-koo kuung otorimaung-koo. 5 Ovoringe koonturiaing diikaang domang Kumponing bakaang piaa tasi’perira oro’antaveriaina’ ee’noko Karistoo’ bakaang pinkapinka’ napo’ tasi’perima nari’ nkoverii’naang toroaravaina’mung nemperi.
Paula’ke Ookara Nantoong Tampa’ Mintoong-koo Botovuru’na’
6 Nii’maikorori’ ee, enang nii’ke naurarampimaang dii’ tee-koo Ovoring Jiisuu’ Karistoo’ bakaang miring-koo kuunge: Tonta’dariri otoriai teing-eta nii’ning dii’maikorori’ kakapotonuka, kake’iirariri mintoontariaina’ naurarampiru’nung-koo kanto’pariaing-eta. 7 Dii’ke tee noru’eri otong nii’koo bi’antarariaina’. Nii’ teing kakapotonuka deea’ dii’ ninka o’noritaa’ 8 Nii’ teing nii’nunge tamung bau’muriaruko’ning moo’dopai, teka nii’ aa’na’ mintoomariko’ doong ee’noko muung nii’ke dii’ manki’antararampiaroo’naang. 9 Tee makosi dii’ke nii’ tamung bau’koo, nka niikaang mintoong nii’ke nkoampiko’nung tee dii’ke ooveri nii’koo bi’antararii’naang. 10 Tenang dii’ nii’ ninka nari’ o’noritaa’ nii’ke tee tee’ nari’ napo’ tautaurarampiru’ ee’pina’: Naning kakarua’oaing tee taamang-koo do’de’eriauka’. 11 Tee’ naurarampimaang taarararampira dii’koo nii’ning teing kakapotonuka tamung nii’ning biikaning mintoong-koo papuraanka’antaverererimaing, diikaning mintoong nkosiiria’. 12 Enang tee temurii’ nantoong nii’ke botorarampima tautaurarampimaang Ovoring Jiisuu’ Karistoo’koo kuunge mintoontarii’naang dooroontariri. Diikaang iri’keta’ taamaniriaing. 13 Dii’ nii’maikorori’ iri’ o’dariauka’ tee-koo nko-nko tampara-koo. 14 Naning tee kupi’oko taara-koo aung kara nii’ke minkuampiring ane’ karavotonane’koo noru’erira tonta’dariaing tee-ankoita, ee’noko maia’oaing tee. 15 Karenung pina’ noru’eriauka’nung tee, teka tautaueriaing tee-pina’ dii’maiko’.
Si’noora’naare
16 Enang tee Ovoring mooa okovenung ee’narai mooa aruriaing uatepa ootukunung taung-koo. Tee dii’ ookara ninka otoriaing.
17 Enang tee, ninge Paula’ke napo’ tampara minkurampimang anaare ninge koonto’ daariama nkaang birenge miring taa’ni’antamari. Tee taa’ni’anta ookara karavotonane’pi-koo taa’ni’antamaramaung nkana’ daarimaramana’.
18 Tee biraanke niikaang Ovoring Jiisuu’ Karistoo’ bakaang dii’ ninka nari’ otomatoaing. Ee’, tee’ nari’.