2 PIITA

Ane’ Kene’ka-nane’

PIITAI

Daarivuu’nane’

Tampara Aarumo-koo Bia’antamarira Oreng Biikaang Kara Sirakaapuampiai

(1:1–3:18)

Baito-koo Kani-antarariaing

¹ Aung tee ane’ karavoto˜ ninge Saimoni’ Piitai daariamang Jiisuu’ Karistoo’ bakaang botovotonaa’ke, ee’noko tee bakaang kara-okomui-nka ning. Dii’ ee’ning daarirerompimang tee aung amurii’ masika’anta nii’pina’ nari’ oto’derurining Jiisuu’ Karistoo’ bakaang aarumo koonto’koo kuunge oko-antamuru’nung, ee’nara niikaang Kumponing ee’noko Domang-anta. ² Tee biraanke ee’noko mooa dii’koo beremparavaing Kumponing tampa’ kenkumperi otoriko ee’noko tee niikaang ovoring Jiisuu’. ³ Ai’ tee tee nii’ke tee tampa’ kenkumpampiko teie tee teieta bakaang iri’ pankaing-eta ookara kapoo’nanka makosina’ amuriaing tampa’ domamariri siompampiaing-koo. Ai’ teie bakaang meenasi ee’noko bakaang tampara aarumo nii’ ninka nari’ oro’anta-koo bokumuru’. ⁴ Ee’noko tee’ nkomurima teing bakei pankeng avuavu’nanka moo’dopa amuru’ tero maraka-antamuru’ning. Kansi’ bakaang dera’keta mmarumpia’naang amuru’, tero karaa’ampiko doomamuriko’nung-eta bera Kumponing-pina’ nari’ datamori o’noriai. ⁵ Tee’koo ee’na’koo dii’ aa’na’ paararariaing diikaang masika’anta ninka tampa’ oto’koo, ee’noko tee’ tampa’ otori Kumponing tampa’ kenkumperi otoriaing. ⁶ Ee’noko tee’ noru’eritaa’ diikaang mono bakaang pia daka’peri tanatarariai. Ee’noko teieta napo’ tee’ nari’ nko-koo pinka’dariri otorimaatoai, ee’noko pinka’darima Kumponing-koo arariri otoriaing. ⁷ Ee’noko Kumponing-koo arariri otori teing dii’maikorori’koo napo’ navurariri otoriai, ee’noko tee’ navurariri otoritaa’ piaa oro’antaverimatoai. ⁸ Ee’koo, teing aing aarumo oro’antaveri otoaing deeko’ ee’noko dii’koo berempari otoai, teinge tee dii’ tanataruriaing tamung sinangropanuka iri’ o’dari’neeng-koo tee Ovoring Jiisuu’ Karistoo’ noru’eri. ⁹ Ai’ tee naning aing ee’ning oto’evuauka’nung tee kaputu’, noru’ apukung, ee’noko noru’ua’ otong teie tee urikeng oreng aarumonanka-ita kiiroraa’antavuu’na’. ¹⁰ Tee’koo, dii’ mmaikori’, oko’okoruriaing tee Kumponinge miru’duri bokururu’nung taa’ni’antarariri. Tee’ ee’na’ nkorariaining deeko’ dii’ teing dua’dariauka’ning. ¹¹ Ee’noko dii’ teing maneena’ onkeonke’duriaing teka ee’noo’ka paning-koo niikaang Ovoring Domang-antai Jiisuu’ Karistoo’ke tee’ nari’ taremurimato-ainoo’ka.

Tampara Doorenang Masikeeari Otoina’

¹² Tee’koo ninge maroita uatepa noru’antarampimatoaing dii’ teing aing ookara kapoo’nanka naurampimaing, bane dii’ke noru’erio’ ee’noko tee kara masikung oto’derurimaung-koo ima’dariri otorikoo’. ¹³ Ee’ noru’amaang, makosi ninge dii’ enang ning aung mono ninka o’noitaa’ tee ninge dii’ tante-antarampimatoai napo’ noru’antarampima. ¹⁴ Ninge ee’ noru’ansitaa’: Batei tee nkaang mono tonta’uaina’mung due’ari otong tee’ nari’ niikaange Ovoring Jiisuu’ Karistoo’ke naumuu’na’. ¹⁵ Tee’koo ninge aa’na’ tautaurampimang ning tenkenanko tee dii’ makosiri otoriaina’ aing kapoo’nanka napo’ noru’koo batei piaroriaining-koo. ¹⁶ Niikaang Ovoring Jiisuu’ Karistoo’ iri’ ninka pou’na’koong minkunaa naurampiru’nung kumponaang-koo bi’arava’, nantoonge aavamaari minkuaapeu’ning-koo, teka nii’ke tee niikaange dutai ooampiru’nung minkuampimaung tee’ meenasi ninka daurarong˜ otomanoo’keta neramparu’na’. ¹⁷ Ai’ tenang teie tee pankaing-anta ee’noko meenasi Bauma Kumponing-eta nkavuko teie auronge narunge karavuu’ teketa paning-eta daurarompari bakaang meenasi oro’antavumanoo’keta ee’ minkuvuma,

“Aung tee nnuring ninge piaavamaung. Ee’nara-koo ning tampa’ dotumaramaung.” (Mat 17:5)

¹⁸ Aung kara anaare nii’ke paning-eta poko taaravampiru’, ai’ nii’ teing tee ninka nari’ o’noru’ning teke meekamii-koo. ¹⁹ Ee’noko nakaro-nupoong˜ urikupoong biikaang kara Jiisuu’ke dupe-antavuio’ aa’na’ masikung oro’pario’ kompampiri otong niikaang kara puring-anta-koo. Dii’ tee noru’ e’maniri otoriaing tee-koo biikaang kara-koo tee-pina’ araka mutaananoo’ke arakavaramaung-pina’ noru’eritaa’ bera tane’puko tee maatara daa’aravainoo’ke basi diikaang domang-koo. ²⁰ Tutuna’ tee aung tasi’perira e’maniriaing Daari Meekung-koo: Ookara kara Daari Meekung-koo nakaro-nupoonge tarampeeaako’ning˜ teing nantoonge bii’ka sira’koo makosi deeaing. ²¹ Ai’ nanaare otoa’ naninung pia-ita tavo’kuu’naare Daari Meekung-koo, teka Tanuaang Meekunge karantavuriko˜ Kumponing-eta nantoonge minkuaama daariaako’.

Tositosinuka Nakaro-nupoong˜ Kera’pariaina’

(Jud 1:4-13)

¹ Teka nii’ning nakaro-nupoong daang Kumponing-etaining tamparima daa’ariko’ Ju’nupoong-koo meu’ke, ee’noko napo’ tee’ nari’ daang-koonanka nau-antanuka daa’ariainge dii’koo meu’ke. Tee’ nkoarima nantoong makenge orari-antavaariaing biikaning noru’keta daang nau-antavaarima, biikaang Ovoring teing moo’uru’nung sipai. Tee’koo bii’ka namu’ke orari-anta kune’aavaing. ² A’noo’ tee mmau’ke siompaariaing biikaang aarumo amutemurii’ maimaia’nanka-po’nung. Teketa’ teing tee’ nkoariko tevung Karistoo’nung kara masikung sionavung nii’ninge oraka’ minkuaavaing. ³ Ee’noko tee’ nkoarima mooni’ barang-koo okovuriai kara menaankavarima. Nka tee teie Simpe’nkoi˜ tuutunang˜ miru’evuru’nung nempari otong. Teing orari-antavuriainge keeroorovuri otong.

⁴ Nii’ke noru’ampiri otong tee’ nkoaravainoo’ aa’nung-koo: Nii’ning koosinunanka oraka’ nkoariko tamung oovuriaruu’, teka kansi’koo tumang dua’uru’ isipo’ masipo’ mutaananoo’ doonko teke dai’ariri otoroo’naang bera simpe’uriaina’mung-koo basi. ⁵ Napo’ urikavarang orara aarumo ninka nari’ kansi’ maanto’aako’ning tamung oovuriaruu’, teka doua-koo minki-antavurira opuru’, Nooa’ narung deeko’ aarumo koonto’ daankivuko’nung domampuu’, nii’ning nantoong ˜kenaanka-taa ninka nari’. ⁶ Napo’ osi pankeng kevuntu’ka Sodom ee’noko Komora’ sipung deeng-antavuretu’ otorearoo’naang tampureta dama’navarange Kumponing siompaavauka’ninge nkovuriaina’ ooaava’naang. ⁷ Ee’noko teka napo’ naning koonto’, Loote’, domang-antavuu’, tee ee’nara oraka’ dee’oko’nung teing oreng Sodom-nupoong maimaia’na’ nkoariko. ⁸ Tee ee’nara naning koonto’ deempari domang manki’oko’nung teing tee ninka otoroko’ning boto-koo kuung otoroa’pina’ noru’ai nkoariko’ning ninka doong kante oovurima ee’noko teing-koo taaravuma. ⁹ Tee’ nkovuru’na’koo tee sira’pari otong tee Ovoring noru’kui otong nantoong tee siompaamaing parapaara arikung-eta domang-antana’koo ee’noko napo’ teing siompaavauka’ning kiimatavurii’naang pinka’uri oto’na’koo bera te’mung simpe’uriaina’mung-koo basi. ¹⁰ Deepo’ masipo’ bakei kiimatavuriaing teing nau-antanuka daang Kumponing-etaining tamparimaing. Mono bakaang pia orara dera’ siompaamaing Ovoring tompimpai.

¹¹ Aing amurii’ nantoong derareranuka, bore’ kapanuka, anutua avoreaava’ avutevu’ari dauraronanka oraka’ minkuaarimaing, teka teing ookara noru’po’nupoong, bane koosinunanka deeko’, tee’ nkoariaung. Bane teing koosinunanka nantoong-koo dau basina’ iri’ ee’noko iirakutapo’nupoonge oraka’ minkuaarima tuumpiaariaung biikaning kare-nupoong Ovoring-koo uro’kanoo’ke. ¹² Teka aing tosi nkonuka kau’ karenaumonanka-pina’ oro’nuka, noru’ papaaravari oto’nuka, matauropanuka, tamung doonko tavu’koo makosinanka-pina’ oro’nuka. Noru’aava’ poore’ nkoaamaing. Biikaang dera’ke boo’antavuriko kera’pariaining. ¹³ Tee tee ee’nara biikaang moo’ orara oraka’ nkoariko’nung-koo, aa’noma: doong ookutuna’mung maia’oroa’ tamung sirakura’ mono bakaang pia orara siong-koo kei’orokoo’. Teing teing dii’ ninka nari’ otori diikaang miring orari-antaraarimaung ee’noko diikaang navunavu daang deeng-antavaakoo’. Dii’ ninka nari’ Ovoring bakaang taamang naierima aavaraarikoo’ moru-pina’ noru’ai. ¹⁴ Biikaang duta tee karakaraa’ke maanto’nuka maniku’koo, orara aarumo besi’ui oto’nuka, aruaru’nuka da’deng dua’antavaarimaing, ee’noko biikaang domang aarumo oko’oko-koo bareari oto’nukai. Kumponinge barakosi’nii’nuka teing. ¹⁵ Koonto’navung sipaara pooariru’ning. Tee nakaronara Baalamu, Beeoo bauring, bakanavung siompaamaing, mooni’ nka-koo piavora oraka’ nkoaru’nung. ¹⁶ Teka tee bakaang doonkii’ke amakoi naning-pina’ karoma orokovuu’nung danto nari’ oraka’ nkoara’neeng-koo, tee nakaronara bakaang aarumo kanukanu’ potevui.

¹⁷ Teing daang-koong nau-antanuka tee tee-pina’ ntong dakau-pina’ oro’nuka, ee’noko napo’ tee kamo’ dovinge avitoitoi nkavui nanumaung-pina’ oro’nukai, Kumponinge mutaananoo’ tumang masipo’ miru’evuru’ning teke oto’koo. ¹⁸ Ai’ teing daang pankaing-antavarima buia’arimaing maimaia’na’ nkoarima, ee’noko baanka’ nempaama mono bakaang piai beana-antavaakoo’ nii’ning nantoong teing-eta oraru’kiai otoromanavitu-eta koo’ariko bi’anta-koo. ¹⁹ Opampaarima tuumpi-eta unaavoroi otoroaining tampaarimaung, teka teing bii’ka dera’antanameng-koo dai’ariri otoroi, ai’ aming kapoo’ tee naning kuung deempui otoing-koo, tee tee, tee-koo ee’nung-koo dai’ari otong. ²⁰ Ee’noko enang teing aa’na’ dai’ariri otorong, io’ teieta kansi’ bakaang aarumo orara-ita mmariaara, tee niikaang Ovoring ee’noko Domang-anta Jiisuu’ Karistoo’ siompaakotaa’, teketa napo’ enang kuung dua’arira dai’aririnamu’ oramu’. Tutuna’namu’ divu’ui otong. ²¹ Baru’ tampa’na’ deea’ tee teing koonto’navung-koo noru’kaavarupeu’nung-koo, ee’noko bakei oraka’ tutung noru’aara napo’ bere’ariring-koo teieta doorenang aa’na’ tampara, Karistoo’ketaing boto meekung tutung taaravau’nung-eta. ²² Tee tee’ teing-koo nkoaramaung tee niikaang mirumiru’ tampui otoina’, aa’pumana’, “Mosi’ke tee napo’ bakaang kurina’koo toroarama maa’umaung,” nii’na’ ee’, “Pooro’ duu’paako napo’ meto’koo novuuaramaung.”

Ovoring Poaina’mung-koo Keekoo’dariauka’

¹ Aung ane’ karavoto kene’ka-nane’ dii’ mmaikori’ masikupoong daarirerompimang. Ee’noko aing-koo ookane’ka-koo ninge diikaang noru’ tante-antarampimang nari’ pituraria’ otorii’naang. ² Tee’koo aing kapoo’ unampansi naurampimang teinge urikupoonge nakaro-nupoonge Kumponing-etaininge miru’ai minkuau’ning napo’ norunoru’eriai ee’noko niikaang Ovoring Domang-anta bakaang boto nari’ tero nii’ke kara okomuri nkanukai naurarampiru’na’. ³ Aming-koo tee’ naurampimang? Nna’ doong asi’ due’uko teing nantoonge tee bakei benkentaariaining dii’, biikaang mono-koong pia siompai. ⁴ Aa’paavaing, “Tee napo’ toroaravaing tamparu’nung arerai? Ai’ teing niikakatauro tee’ nari’ naumaariko’ning boorou’noo’keta ookara kapoo’ nari’ otong kansi’ pupu’aru’noo’keta otomana’.” ⁵ Teka tee’ minkuaama narung kapoo’ maroita bei’bei’aamaung aa’nou’nung: Kumponinge karoko paning tavo’aru’ tero, ee’noko kansi’ pirung-eta bakoarara ta’namparu’. ⁶ Napo’ Kumponing karoko tee kansi’ tero otoko’nung douai pirung-pina’ dunkumpura orarivuu’ Nooa’ bakaang batei-koo. ⁷ Ee’noko tenaarei ee’naarei napo’ paning ee’noko kansi’ enang otomatomaing nta’ke paro’koo miru’ura sipuu’, ee’noko teka pinka’ui otong bera te’mung doong nantoong oreng simpe’urira kera’antavuriaina’mung-koo basi.

⁸ Teka ee mmaikori’, bei’bei’eriauka’ aung kapoo’: Ovoring-koo tee mare’ kivora daaku’ na’mung doong-pina’ otong, ee’noko na’mung doong tee mare’ kivora daaku’pina’ otong. ⁹ Ovoringe tee bakaang maraka-anta dupe-koo tamung ana’aravaung nii’ninge tampaamana’. Teka teie piaavuri nempuri otong teing bei’bei’arimaing-koo naning narung kera’para’neeng-koo, teka ookara bere’arii’naang piavorora batei makosinoo’ avurii’naang.

Kansi’ Ee’noko Paning Paa’aravaina’ Ovoring Toroarako

¹⁰ Ai’ te’mung Ovoring bakana’mung bateinana’mung te’mung bakiaa’ nko-pina’ poaina’mung, ee’noko tenang paning kurunkurunkaanang paa’aravai ee’noko ookara kapoo’ paning-koonanka nta’ke taivurira ta’da’purira ntong deeng-antavuriaing, ee’noko kansi’ teing ninka bakaning nko-nkonanka naro’ka parosinampurira opuriaing. ¹¹ Enang tee dii’ aing-koo ookara kapoo’nanka-koo bakei oki’noo’ bi’dariauka’ taivurira tara’puriaining noru’eritaa’, ee’noko meeka’dariri Kumponing-koo arariri otoriai. ¹² Tee’ nari’ nemperi Kumponing poaina’mung duerue’antaveri otoriai, te’mung ee’na’mung Kumponinge paning paro’uko tara’pura tuuvuaina’mung, teing ookara kapoo’nanka teke otoromaing nari’. ¹³ Teka tee kapoo’ masikung nempampiri o’norimaung tee paning ee’noko kansi’ nerakeng tavo’kureaing maraka-antamuru’na’, te’ aarumo koonto’ narung otoainoo’.

Taremariri Ovoring Nempampimaatoaing

¹⁴ Tee’koo dii’ mmaikori’ masikupoong, te’mung nemperimaing deentariko ee’ naurampimang, purintariri otoriaing ku’mi’dopanuka, nii’noo’ tuumpi otoriaing, Kumponinge tee ninka mooa-koo oto’nuka meu’duriaina’. ¹⁵ Ee’noko noru’eriaing aming-koo tee’ pankaroong nemurimaunge. Tee aa’ batei amurima bakaang doorenang domang-anta-koong noru’anta-koo tee’ nemurimaung. Tee’ ee’na’ nii’maiko’ piaavampimaunge, Paula’ke daarirerurima naururu’na’ Kumponinge onou avuio’. ¹⁶ Ookara karavoto bakaning-koo tee’ nari’ daarivukoo’. A’noo’ tee nii’ning kapoo’ teing-koo karavotonanka-koo ivekeng otong noru’koo, ee’noko teinge noru’dopanukai teing mare’aama bii’ka orari-antavarimaung tee’ napo’ nii’ning Daari Meekung-kooning kara mare’aamana’ nari’. ¹⁷ Tee’koo dii’ke mmaikori’ masikupoonge tutung aing ee’ oro’ kapoo’nanka tasi’perira tarerariri otoriaing boto siompaavaininge taapo’ke barantaari’neenga kara koonto’ deeaung nauraarima e’mantoma dekopi’antaraari. ¹⁸ Teka deto du’duriaing Karistoo’ noru’koo, tee niikaang Ovoring Domang-anta, ee’noko bakaang piaa nka-koo. Tee ee’nara meenasi ookara okovui otoaing enang-eta deto bera te’mung doong oparavauka’na’mung. Ee’, tee’ nari’.