2 JOONI

Ane’ Kene’ka-nane’

JOONIE

Daarivuu’nane’

Kumponing Bakaang Kara Pinka’ampiri Oovuna’ Kareaamaing Bei’bei’arampiai

(1:1-13)

¹ Aung ane’ karavoto˜ ninge dootuu’koo urantai daariamang da’ ee’nani ovorinaang Kumponinge miru’duu’nani-anko ee’noko teing daurukaa’.+ 1:1 Ani ovorinaang nani masikani deea’ pa. Navitu dootuu’navitu miru’ui tee’ daarivuu’ dee’ma, baurukaa’ teing dootuu’nupoong miru’ui.² Dii’dovo tevo ninge aa’na’ masika’ piaarampimanavo ee’noko ning narunge deea’, teka teing nari’ tee kara masikung noru’aining, ai’ tee kara masikung nii’ ookara-koo dupui otomaung ee’noko tee’ nari’ nii’ ninka otomatoai ookara doong-koo.

³ Teie Kumponing Niumai tee ninka Bauring Jiisuu’ Karistoo’ ninka aa’ning oko-antamaariaing: biraanke moo’dopa, piaa unaa-anta, ee’noko mooa, tee ninka kara masikung ee’noko tee aarumo piaa.

Piaa Masikung Siompampimatoai

⁴ Ning tee bakei dotumaramang ninge ooaramira nii’ning teing-koo daurukaa’koo tampa’ siompaako tee kara masikung, tee’ ee’na’ nari’ Niumai botomuru’na’. ⁵ Ee’noko enang tee aa’damaang da’ ee’nani, nii’ ookara naruna’ naruna’ piaameerimatoai. Aung tee nerakung boto deea’ da’ daarireromaatomaung, teka tee aung tee boto tutuntoma-ita oto’memurimaung: Naruna’ naruna’ piaameeriaing. ⁶ Kumponing-koo piaa ee’ sira’koo makosi: Nii’ke tee’ nkoampiaing tee kapoo’ naumurimaung. Ee’noko teie tee nii’ tutuntoma-ita naruna’ naruna’ piaameerimatoo’naang naumuru’.

Karistoo’ Bakaang Kara Tampa’ Pinka’ampiaing

⁷ Bakei, mmau’ nantoong tosi nkonuka aunge kansi’ke avitoitoi nanaamaung, teing tana’eriko penkemparima aa’paamaing, “A, tee Jiisuu’ Karistoo’ naning-naumpui poaruu’nung.” Teing teing ee’ning tosi nkonuka ee’noko Karistoo’koo too’de-nupoonge teing. ⁸ Tarerariri otoriai tee kapoo’ pore’dorimaung nkaveriaru’neenga, aa’na’ teka ootukuario’ tee moo’ nkaveriai. ⁹ Baa tee naning Karistoo’ bakaang naunau divu’ui nii’nung siompumaung tee Kumponing bakaning-koo narung deea’, teka baa tee naning tee kara pinka’ui otoing tee, tee tekang ookakang beekaning-koo narung deempari otong aa’noko Bauma ee’noko tee Bauring. ¹⁰ Nii’nung naning oovunamurii’ naunau ninka dii’anko poko deeko’ diikanoo’ pava-koo bokueriauka’, ee’noko onkeonke’eriauka’. ¹¹ Baa tee naning tee onkeonke’uaing tee, tee bakaang oraka’ nko-koo kanto’paramaung.

Jooni Teing Oo-koo Piavou’na’

¹² Ning tee kapoo’nanka mmau’ dii’ daarirerompipeu’ning oto’memung, teka ninge teing ookara ane’koo daari-koo piamoa’. Teka ee’ noru’amaang dii’anko pa due’ka mora oing oomeeri karompiaing doturotue maanto’muriaina’. ¹³ Teinge toire’ke teni da’maiko’ Kumponinge miru’uu’nani baurukaa’ke tampa’ tang da’anko botoaamang. Otoko, ee.