Ane’ Kene’ka-nane’
KOORIN-nupoong
Paula’ke Daarievuru’nane’
Kara Baavootunanka Ane’kooning
1:1 Kumponinge Kara Okovuri Nkanuka Mintoompari Oto’koo Miru’uru’na’
8:1 Paula’ke Avuavu’ Neri-koo Tante-antavuru’na’ Judia’nupoong Paku-koong
10:1 Nii’ninge Paula’ Daraumeempaio’ Daang Noru’aako Siraka’antavuru’na’
1Kumponinge Kara Okovuri Nkanuka Mintoompari Oto’koo Miru’uru’na’
(1:1–7:16)
1 Aung karavoto˜ tee ninge Paula’ke daariamaang, Jiisuu’ Karistoo’koong kara-okomui-nkai Kumponinge bamuio’, ee’noko tee Timoti nii’maiko’ nari’, dii’aape Kumponing bakaning-aape teke Koorin-navuntu’koo dootuu’darimaing-aape, napo’ teing ookara Kumponing bakaning meekupoong Akaia’namensi’kooning dii’anko otoromaing. 2 Biraanke ee’noko mooa dii’koo otoaing Kumponing Niuma-itaing ee’noko teieta Ovoring Jiisuu’ Karistoo’.
Paula’ke Tampa’ Tampuu’na’ Kumponing-koo Pakuvuko’nung-koo
3 Kumponing tee Ovoring Jiisuu’ Karistoo’ Bauma tee bakei nii’ke deto biraankeampiri oto’koo makosi, tee piaa ee’noko domang kuaa’anta-koo okora’. 4 Teie nii’ dunsirunsi˜antamurimaung teing-koo niikaning arikananka-koo nii’ke napo’ teing arikung-po’nupoong dunsirunsi-antavarampii’naang tee’ nari’ nii’ Kumponinge dunsirunsi-antamurimana’. 5 Nii’ teing Karistoo’ ninka nari’ arikung deepo’ kune’ampimaing deemariri tee napo’ tee’ nari’ Karistoo’ ninka aa’na’ domang kuaa’antai maanto’murima nii’ning-koo pare’ampikoo’. 6 Ee’, kapoo’ke manki’antamuriko tee makosi, dii’ Koorin-nupoong domang unaarori domantariaina’ tee’. Ee’noko tenang nii’ke domang kuaa’morimanang dii’ napo’ domang kuaa’dorikoo’, ee’noko puring nkaverikoo’ ookara batei-koo teing manki’nanka puru’koong nii’ke nari’ mantompampimaing. 7 Dii’ e’maniriaina’ masika’ noru’darampiri otong, ai’ tee’ arikung kune’ampiko domang kuaa’antamurimana’ Kumponinge napo’ dii’ domang kuaa’antaruriainge.
8 Ee mmaikori’, arikung Eesia-nameensi’koo kune’ampiru’nung-koo papaararariaroo’naang naurarampimang. Nii’ teing aa’na’ masika’ arikunge pakusi’murio’ domamariauka’ning-pina’ noru’mariru’ning. 9 Bakei boo’koo bamuru’ning-pina’ noru’mariru’, teka teie Kumponinge tee arikung nii’koo taura’puu’nung nii’ tee narung-koo baitomarii’naang boo’nuka domang-antavurimaung-koo, ee’noko niikaang puring-koo bi’maria’. 10 Ee’, teie Kumponinge kapoo’ nii’ dupisi’koong-pina’ oro’keta domang-antamuru’nunge tee’ nari’ taremuri otong. Tee’koo tee’ nari’ tee-koo aroo’marimaung daanto nari’ moo’murimatoaing-koo. 11 Dii’ke teie kunsi-koo nari’ pakumereriaing, ai’ dii’ke mmau’ke pakumereriko deeko’ tee nantoong mmau’ke Kumponing-koo tampa’ tampaavaing tenang Kumponinge nii’ pakumuriko.
Paula’ke Siraka’antavuru’na’ Tosiaru’nung-pina’ Noru’au’nung-koo
12 Nii’ tee dotumarimaung domang kiiroraa’mariri ee’koo: ai’ nii’ke tee aarumo koonto’ narung nkoampimaung Kumponing piavomana’ ookara nantoong ee’noko dii’koo meu’ke, nii’nung kapoo’ makempampia’, ee’noko tee’ oro’noo’koo kansi’ bakaang matau siompampia’, Kumponing bakaang piaae kake’ii-antamuriko bakaang aarumo siompampikoo’.+ 1:12 Nii’ning daang-koong nau-antanuka porora Paula’ poore’aako mmau’ke Koorin-nupoonge sipaara siompaariko’. Paula’ke taaravurai’nange onou paariarara napo’ beero’uria’, teka Taitas teing koong-anta-koo botovuu’.13 Ookara kapoo’ ninge daarirerompimaing teing makensi’ning deea’, deeruerima tasi’peripeu’. 14 Dii’koo nii’ninge nii’ tampa’ tasi’mereri otoina’ tasi’merii’naang ookarai piamomaang.+ 1:14 Teing-koo mmau’ Taitas tampa’ taaravaara bere’ariko nii’ning mme’ kontevoroi otoroko’. Ee’noko niikaang miring meena’antaveriai tee’ nii’ke diikaang miring meena’antavampiaina’ te’mung Ovoring Jiisuu’ poaina’mung.
15 Dii’ke ning masika’antamerimaung noru’ansi ning dii’ankoi tutung mee’naang tammaru’ ee’noko toromarama napo’ beero’dampiri kemu’kana’ paku-antarampii’naang. 16 A’noo’ tee ninge tenang Masedonia’ mema dii’ oorampiri be’koo noru’antu’ ee’noko Masedonia’keta napo’ dii’anko meko pakumeriko Judia’aape mee’naang. 17 Teketa maromaru’na’ dii’anko mearuko tamung akapeu’marama minkuantu’nung-pina’ noru’meriauka’, ai’ ning akapeu’marama maromaravaung naning kansi’koong bakana’ tosiro’marama. 18 Kumponing masikung minku deemparako niikaang kara tee’ke dii’koo nii’ tosiro’maria’. 19 Ai’ tee Kumponing Bauring Jiisuu’ Karistoo’ tee Pako’pari’nii’ nii’ke dii’koo daankiampimaung, aa’ninge Sivenus, Timoti ee’noko ning tee tosiro’koong deea’, teka tee-koo kuunge ookara batei-koo tee nii’ masikung narung minku-koo makosinuka. 20 Ai’ ookara maraka-antananka Kumponinge deining Jiisuu’koo kuunge teing masika’paravainanka. Tee’koo Kumponing daangampampima Jiisuu’koo kuunge aa’pampimaung, “Ee’, masikung, nkoaravaing!” 21 Enang tee Kumponing narunge ookeng dii’ ee’noko nii’ ima’antamurimaung Karistoo’koo. 22 Bera pako’pari’murima bakaning deeng-anta-koong taa’ni’anta tee bakaang Tanuaang Meekung niikaang domang-koo sipuu’ tee kore’nang tasi’anta tee-koo biraanke dama’ ooampiaing-koong.
Paula’ Maroita Ana’aru’na’ Teing Baike-antavuriaroo’naang
23 Enang tee masika’anta-koo Kumponing bakaang miring tampamang aa’pama: Ning tee dii’ oraka’ mantong-antarampi’neeng-koo dii’anko te’ Koorin napo’ toromarava’. 24 Tenang ning mora tee diikaang baito booni’anta-koo piamoa’ diikaang baito-koo tampa’ donkoniri otoriko, teka ninge doturotu-aape-nameng-koo deeko’ pakurampii’naang.
21 Tee tee napo’ kemu’kana’ dii’ orarunsi-antarampima beero’koo kasiamparuu’nung. 2 Ai’ dii’ orarunsi-antarampiko deeko’ ning baie napo’ dotu-antamupeu’? Otoa’. Tee tee dii’ke deeko’ ninge orarunsi-antarampiaruko dotu-antameripeu’. 3 Tee’koo ninge tee tutuna’nung karavoto dii’anko daariantu’nung dii’anko tamung mora dii’ orarunsi-antarampiaroo’naang, dii’ ning dotu-anta-koo narung-koo makosinuka-pina’ noru’dampimaing. Ai’ ninge ee’ noru’dampiru’nung, ookara kapoo’ koomparako deeko’ dotumari dii’anko meaing, ee’noko ning dotumarako dii’ ookara doturariai nari’. 4 Koonto’ sisikeera ninka domang manki’moi daarirerompiru’nung ta’due duu’marama. Dii’ manki’anta-koo deea’, teka dii’ke ninge piaae maanto’mui piaarampimana’ noru’erii’naang.
Paula’ke Nauvuru’na’ Naning Oraka’ Nkoaru’nung Tonta’antaevaava’naang
5 Teka teie naninge tee orarunsi-anta basi-antavuu’nunge ning narung orarunsi-antamua’, teka dii’ ninka nari’ orarunsi-antamuru’nung, teka aa’pamaang, dii’ ookara nari’ orarunsi-antaruria’, kara baru’ manki’ minkuami’neeng-koo. 6 Dii’koo mmau’ke kiimata averu’nung makosina’ tee naning. 7 Tee’koo enang tee dii’ke bere’darima tonta’antaverima domang kuaa’antaveriaing, baru’ manki’orai’nange orarunsie booni’u’neeng. 8 Tee’koo ning dii’koo eentamarang piaa nau-antaverii’naang tee. 9 Tee tero tautaurampiri daarirerompiru’nung tee dii’ paara-anta-koo dii’ ookara kara aroo’nuka masikeng deeko’ sira’darii’naang. 10 Enang tee baa naning dii’ke tonta’antavering ninge teie tee’ tonta’antavansinge. A’noo’ tee kapoo’ ninge tee tonta’antavansing tee ning-aape nkovua’, tamung dii’ pakurampiri tonta’antavansing Karistoo’koo uro’kanoo’ke. 11 Tee’ nkomarima tee Sietani’ doona avompiaroo’naang nii’ barang-koo, ai’ nii’ teing amakonanka deea’ tee maroaramana’ tasi’koo.
Kara Okovuri Nkanuka Kumponing Ninka Purimpariri Kara Berempaamana’
12 Tenang ning Toroasi-navuntu’koo basimarama tee doorenang Karistoo’ bakaang daankiama doona ning-koo daate’ari otoko ooantu’ tee Ovoring bakaang nko-nko nko-koo. 13 Nka nkaang noru’ baru’ tampa’ o’noa’ tee Taitas, mmaiko’, teka ooamparura dii’koong doorenang ninka mme’ poaruko. Tee’koo tee besi’ama Toroasi-nupoong teka siparamira Masedonia’nameensi’aape mou’.
14 Teka tampara masikung tee-koo Kumponing, ai’ teie tee Karistoo’koo kuunge aroo’antamurira siong-antamurimaung ookara batei-koo ookara kapoo’ puru’uu’na’ sirakura’ oro’antavuma. Ee’noko nii’koo kuunge tee Karistoo’ noru’koong noru’ avitoitoi bereng-antavukoo’ nuuraa’ tampa’ ka’mi’pina’. 15 Ai’ nii’ teing Karistoo’koong numponuponanka ookara nantoong-koo meu’ke Kumponinge bamuru’na’; 16 Teing nantoong boo’pariaing-koo tee niikaang doorenang tee oraka’ ka’mi’pina’ nuu, ee’noko teing-koo domampariaining-koo tee boo’antana’ nuuraa’ niikaang kara. Ee’noko baa naning baka tee’ tampa’ nuuraa’arapeu’ Kumponing-koo taapo’ke? 17 Ai’ nii’ke tee Kumponing bakaang kara mooni’ nka-koo daankiampiaung nii’ning nkoarimana’, teka nii’ nantoong aroo’po’nupoong masikeng, Kumponinge botomurio’ Kumponing-koo dutakanoo’ke Karistoo’koo kuunge karompimaung.
3Nerakung Kara Naroong-anta Berempaamaung Tee Iirakuta Nantoong Paku-koo
1 Teing mooni’ nka-koo daankiarimaing teing kara tasi’anta-koong tutung uro’ke nauraariko taaraverererimaing. Ee’noko napo’ tenkenaama karavoto˜ eentaraarimaung tasi’anta-koong averereriko nii’ning napo’ nauaarii’naang. Teka nii’ke kara nau-antararampiko namu’ke tasi’mererima taaramerererimaung, Ovoring-etaing kara okomuri nkanuka deemariko. 2 Ee’noko nii’ninge nantoonge tee’ke taa’ni’anta-koong kara besi’aava’ taaramaarimaung, ai’ teinge noru’ai otong dii’ nii’ke pankaruntoonge noru’darampimana’. Ee’noko teing tampara aarumonanka Karistoo’ketaing nii’ke dii’koo pare’antavampiru’ning ooaama tasi’maarikoo’. 3 Ai’ nii’ke tamung karonge siinkirarampia’, ee’noko tamung dama’du teka’darampia’ tee’ Moosesie Kara Kivora kapang-koo teka’puu’na’, teka Kumponing taa’ni’poio’ bakaang Tanuaang ninka diikaang domananka-koo Karistoo’ bakaang kara pare’darampiru’. 4 Karistoo’ke makosi-antamurio’ nii’ke aa’na’ masika’antavampiri tee’ minkuampimang Kumponing-koo aroo’mariri. 5 Nii’ nii’kamai’ makosinuka tammaria’. Kapoo’ tavo’arako nii’keta pupu’nii’ tampampiarupeu’, teka Kumponing narung okovuio’ deeko’ nii’ makosinuka. 6 Teie ee’narai makosi-antamuru’nung tee nerakung kara nantoong Kumponing ninka naroong-anta-koong pare’arampii’naang. Moosesi bakaang boto keperuu’ui domaang besi’na’ minkuampiaung, teka Tanuaang Meekung uroio’ siona’ nauarampimaung. Tee boto tee nantoonge toto’paako tang boo’koo tuutunampurikoo’, teka teie Tanuaang Meekunge nantoong daa’urima domang-antavurimaung.
7 Tenang tee boto Kumponinge kapang-koo teka’pui daarivuu’naare avuriko tee bakaang meenasi aa’na’ siisioi oro’paru’. Moosesi bakaang oing aa’na’ pipi’davou’, ee’noko bane tee araka sirisiri’arako teinge Isireeli-nupoonge bakaang oing ooai oto’koo makosiaavaruu’. 8 Nka tee boto, bakaang aarumo nantoong boo’anta-koong, meenasi pankaing ninka sira’paako ooampira ee’ noru’ampiai: Tanuaang Meekunge domang-anta-koong kara sira’na’ napo’ aa’na’ deto puring ninka meena’poi otong. 9 Aa’nomaung: tee temurii’ aarumo Moosesi bakaang, boto sionge nantoong tamung kiimata-antavurimaung miring pankaimpo’nung deeko’ tee, tee aarumo nii’ke tareampimaung, nantoong Kumponing-ankoi koong-anta-koong, miring bakei aa’na’ deto basi. 10 Tee Moosesi bakaang meenasi temu’ aa’na’ arakavaru’nung tee enang otoa’ aunge e’mununge meenasie Tanuaang Meekung bakaange nari’ donkonuresi apoo’uio’. 11 Ee’noko tee urikung aarumo paa’arama beu’nung meenasi-po’nung deemparako tee, ee’ noru’ampiaing: aung aarumo tee’ nari’ tampa’ otoi oto’koong aa’na’ meenasi-po’nung deempari otoaing.
12 Enang tee, tee kara domang-anta-koong purinto’ masika’antavampiri nii’ke tee aa’na’ to’biiampiri daankiampimaung. 13 Nii’ teing Moosesi pina’ araka niikaang avo’ampiaung teka sira’pampimaung ookarai ooverii’naang. Moosesi tee bakaang oing daka’paru’nung Isireeli-nupoonge ooai siisioroko bane doonko siri’arama nanuko tee araka. 14 Ee’noko tee tenang biikaang onou nari’ avo’ariru’ koonto’ tasi’pai taaravaa’neeng-koo. Ee’noko e’mung-koo basinoo’ tee urikung kara nantoong Kumponing ninka naroong-anta-koong deeruaama noru’ biikaang tee tee’ nari’ avo’ariri papaaravarimaung Kumponinge domampuriaina’ oo-koo. Siraka’paria’, ai’ tee Karistoo’koo kuunge deeko’ makosiaapeu’. 15 Ee’, e’mung-koo basinoo’ tee Moosesi bakaang kara taaravaama biikaang domang mme’ daate’aria’. 16 Nka tenang nantoong Ovoring-anko bere’ariko deeko’ tee noru’ biikaang papaaranii’nanka siraka’antavurimaung Kumponinge domampuriaina’ tasi’koo. 17 Enang tee, tee Ovoring minkuampimaung tee Tanuaang Meekung, ee’noko teing nantoong Ovoringe Tanuaang Meekunge kuung deempuriaining teing teieta boto-koong tuutunang˜ eta unaavoroi otoroaining. 18 Ee’noko nii’ke ookarai ee’ninge niikaang onou avo’maria’ o’norimainge tee Ovoring bakaang araka tampa’ ooampiri oorara-pina’ oro’antavampimaung, ee’noko paarimarima tee’ Karistoo’pina’ oro’marimaung deto bia’morima meenasi-aape. Tee aung aarumo tee Ovoring-eta pomaung, tee ee’nara Tanuaang Meekung.
4Kara Okovuri Nkanuka Teing Tamung Kansi’koong Utaunanka Makosinuka
1 Tee’koo Kumponinge piaamurira tee araka oko-antamuri bereng-anta-koo botomurio’ tee nii’ iri’ o’maria’ sira’pampimaung. 2 Nii’ke nantoong daua’arampiaunge niikaang minkunaa masika’anta-koo. Naning tosi-koo piamoriaunge. Kara Kumponing bakaang mare’ampiaunge. Teing maimaia’na’ oro’nanka tee dama’duampiru’ning. Kumponing narung-koo uro’kanoo’ke donkonampiri kara masikung narung siraka’antavampiri nantoong nauarampimaung teinge tampa’ tasi’maarira domang-eta aroo’aava’naang.
3 Ee’noko tee doorenang tampara daankiampimaung aa’na’ siraka’pari otong, teka teing-koo boo’aape nameng-koo otoroining-koo deeko’ tasi’parava’. 4 Teing ee’ning masika’anta oto’evoroaing teie daang-koong kumponinge kansi’koonge siompaamaunge noru’ kaputu’antavuru’ning. Tee’koo tee Karistoo’ tee Kumponing siuraampi˜ meenasi-po’nung bakaang doorenang tampara arakavarako ooaavarukoo’. 5 Ai’ nii’ nii’ka minkumarima daankimaria’, teka Jiisuu’ Karistoo’ Ovoring deempari otoing sira’pampimaung, ee’noko nii’ teing dii’ diikaning botovotonaa’nuka Jiisuu’ Karistoo’koo. 6 Ai’ teie Kumponinge kansi’ pupu’uma aa’puu’nunge, “Araka, arakararavai mutaanang-koo meu’ke,” tee bakaang arakai niikaang domang siisi-antavuu’nung nau-antamurima tee meenasi Kumponing bakaang, Karistoo’ bakaang oing-koo oro’parako tasi’pampira aa’pampii’naang tee tee Ovoring, Kumponinge tero Pako’pari’nii’ nii’ domamuri taremuriainoo’koo.
7 Nka bane tampeng meenasi nii’koo kuung otoko, nii’ teing utau aaveta’nanka kansi’koo nkonii’pina’ oro’nuka. Kumponinge tee’ miru’muru’nung iri’ dau basie puring-antamuriko nantoonge tee bakaang iri’ tasi’paava’naang, niikaang deea’. 8 Ookamenta-ita tee aa’na’ iinkunumaarimaung, teka naka’mariaung. Bane papaaramariko, nka oraru’kampiaung. 9 Turamaarimaunge, teka Kumponinge si’muriaung. Na’namaarima orari-antamaariarukoo’. 10 Niikaang moni’ke doong kante boo’ kune’umaung tee’ Jiisuu’koo nkoaru’na’ nari’ Jiisuu’ bakaang iri’ tampa’ oro’paraa’naang niikaang mono-koo. 11 Ee’, nii’ domamariri o’noriko teie Kumponinge taura’murimaung boo’ kune’koo Jiisuu’koo, Jiisuu’ bakaang iri’ taa’ni’poi oro’paraa’naang niikaang mono boo’dumpaa’ deemparako. 12 Enang tee nii’ke Karistoo’ daankiampima boo’ kune’ampiko dii’ke unaa-anta mantomperikoo’.
13 Tee’ Daari Meekung-koo narunge aa’puu’na’, “Ninge masika’antavamira karontu’nung,” teie narunge Tanuaange masika’anta-koonge daa’muriko masika’antavampima karompimaung. 14 Aming-koo, nna’ ee’ masika’ noru’ampiri o’noring, teie narunge Ovoring Jiisuu’ boo’paru’noo’keta domampuu’nunge domamuriaing tee ninka, ee’noko dii’ ninka nari’ tavo’antamuriaing Kumponing-anko. 15 Kumponinge aing ookara kapoo’ nkoarampimaing tee dii’ paku-anta-koo miru’uu’ning ee’ noru’uitaa’: mmau’ nantoonge tee biraanke nkavaama tee napo’ teinge Kumponing daangampaavai, ee’noko Kumponinge meenasi nkavuai tee-koo.
Kara Okovuri Nkanuka Aa’na’ Masika’antavai Purimparimana’
16 Tee’koo tarua’moriaung. Bane dama’du insimarima, nka nii’koo kuunoo’ tee doong kante neraka’mariri o’norimaung. 17 Aing niikaning arikananka teing a’noo’ kuaa’ning, pankaroong oto’numpo’ning deea’, teka teinge nerimemurimaung tee moo’ aa’na’ manki’ tee meenasi otoi oto’. 18 Tee’koo nii’ teing-koo kapoo’nanka-koo e’mung oro’pariri otoroining-koo ookampiri o’noria’, teka teing-koo oro’pariaing-koo aroo’mariri o’noring. Teing kapoo’ oro’pari otoining oto’numpo’ning deea’, teka teing oro’pariaing teing otoi otoaining.
51 Enang tee nii’ke noru’ampiri o’noring tee niikaang mono anke kansi’koo o’noring bare-pina’ pesi’arako nii’ teing tee pava Kumponing-etaing oto’memuring teing paning-koo otoi oto’ aa’ning naninge birenge kanivua’. 2 Enang nempampiri nii’ teing baimarima o’noring tee mono Kumponing-etaing amurii’naang piamorima, 3 tee mono nkomemuru’nunge duaanamuriko simpenoi’nuka deemariaroo’naang. 4 Ee’, enang mono kansi’ bakaang-koo o’nori manki’morima baimarimaung. Mono tamung si’koo piamoria’, teka niikaang mono boo’koong namu’ke mono boo’paa’ke daka’pui paari-antamurii’naang piamorimaung. 5 Nii’ nii’ka tee’ nko-koo noru’maria’, teka Kumponinge nii’ pia-antamuru’ mono boo’paa’ nka-koo, ee’noko bakaang Tanuaang amuru’ taa’ni’antamuri, tasi’anta-koo tee maraka-antamuru’nung tavo’kuaing-koo.
6 Tee’koo ee’ noru’ampiri ookara batei-koo aroo’mariri o’norimaung: Enang tee aung kansi’ bakaang mono ninka o’nori Ovoring-eta taapo’ o’noring. 7 O’noritaa’ baitoi masika’anta ninka o’nori tee’ noru’ampimaung, kapoo’ dutai oo-koong deea’. 8 Aa’pamaang, aa’na’ purimariri o’noring, teka aa’na’ deepo’ aung mono sipampira Ovoring-anko o’norii’naang piamori otong. 9 Ookara-koo dau basinoo’ka tee dotu-antavampii’naang piamori o’noring, anke mono ninka o’nori, nii’noo’ aung mono sipampira deeko’. 10 Ai’ nii’ teing ookara Karistoo’koo dutakanoo’ka teie simpe’muriaining, naruna’ naruna’ moo’ kante nkavampiaing tenang mono-koo o’nori nkoampiru’na’ siompario’, tampa’ deeko’ ai’ oraka’ nkoampiru’nung deeko’.
Tee Nko-nko Nantoong Kare-nupoong Kumponing Ninka Nari’ Navu-anta-koong
11 Tee’koo nii’ke Kumponing-koo amorompiri nantoong pia-antavarampimaung tee-koo aroo’arii’naang. Nii’ kuung o’norimana’ Kumponinge koonto’ noru’ui otong, ee’noko bakei tampa’ dii’ke tee’ nari’ tasi’mereripeu’ diikaang domang pankaruntoonge. 12 Dii’ke baru’ biivimerererii’naang etumaria’, teka dii’ke nii’ tasi’mereriaina’koo pakurarampimaang, ee’noko tenang teinge dii’ barantaarimainge bii’ka tampeng tamparima nka biikaang domang tasi’paria’ kararaariko, tampa’ kake’ii-eta maku’ereriai. 13 Nii’ nii’ning-koo kanu’nuka-pina’ auromarimaung deeko’ tee tee kapoo’ Kumponing bakaang, teka nii’ tampa’ taaramerererimaung deeko’ makosi, dii’ paku-koo tee’ auromarimaung. 14 Ai’ nii’ tee Karistoo’ bakaang piaae aa’na’ siong-antamuri o’noring tasi’antamuri tee narung nii’koo boo’paru’nung ookara-koo, ee’noko tee’koo ookara tee moompiru’ning-pina’ o’noring. 15 Ee’noko tee tee ookara-koo boo’paru’nung teing tee-koo napo’ domampariaining bii’ka dotu-anta-koo deea’, teka Karistoo’ narung dotu-anta-koo, tee teing-koo boo’parara napo’ domamparu’nung. 16 Tee’ tasi’pampiru’noo’keta nii’ke naning bakaang oo’oo-koo noru’ampiaung, kansi’ bakaang noru’pina’. Karistoo’ tee’ noru’ampiko’nung deeko’ enang tee’ noru’ampia’. 17 Tee’koo tee naning Karistoo’koo otoing tee neraka’puing. Urikung onou otoa’, teka ookutunung neraka’puing. 18 Aing teing ookara Kumponing-etaning tee ee’nara nii’ baka-koo napo’ navu-antamuru’nung Karistoo’koo, ee’noko navu-antamurira tee nko-nko nantoong napo’ navu-anta-koong amuru’ nii’ke nkoampii’naang. 19 Tee’ aa’na’ Kumponinge ookara kansi’nupoong napo’ navu-antavuru’ baka-koo Karistoo’koo kuunge biikaang oraka’ nkonanka deeruevurima tuumpivuria’. Ee’noko teie baremuru’ nii’ke tee minkunaa daankiampii’naang napo’ Kumponing ninka navuariaina’. 20 Ee’noko nii’ teing enang Karistoo’ bakaning kara okomuri nkanuka Kumponing nii’koo kuunge karoko nantoong bokuarampimaing, ee’noko nii’ke ookara Karistoo’koo aa’na’ kevi’arampiri bokuarampimaang aa’pampima: Aarumo orara siperira Kumponing ninka navurariai. 21 Kumponinge tee Jiisuu’ oraka’nko noru’uaung oraka’ nkonanka-po’nung deeng-antavuu’ nii’ pari’anta-koo, tee-koo kuunge nii’ Kumponing bakaang aarumo koonto’po’nupoong deemarii’naang.
6Kara Okovuri Nkanukai Manki’nanka Puru’aamana’
1 Tee’koo nii’ Kumponing-koo nari’ mintoomarimaing deemarima nii’ke pia-antararampimaang doona otoko dii’ke Kumponing bakaang piaa tampa’ komperimaatoaina’. 2 Ai’ Daari Meekung-koo ee’ minkuvuu’nung,
“Ninge tee nkaang piaa tenang oro’paramanang makotuio’ taararampiring, ee’noko te’mung domang-antana’mung-koo tee ninge pakurampiring.” (Aisaia’ 49:8)
Tee batei Kumponinge piaa oro’anta-koo minkuvuu’nung aung e’mung makotuio’ naurampimang. E’mung ee’na’mung te’mung nii’ domang-antana’mung.
3 Ee aing, pinaunuka taarameriaing, ai’ nii’ke aarumo naning tupang-antavampipeu’nung dii’koo uro’kanoo’ke oro’antavampia’ teing niikaning kara daang-antavupeu’nung. 4 Nka ookara nko-nkonankai niikaninge tee sira’murimaung nii’ teing Kumponing bakaning botovotonaa’nuka. Oomereriaing nii’ tee aa’na’ iveka’mori mintoomarimaung, bane ainge ee’oro’nankai paaramuriko: arikanankai ee’noko pore’nankai, napo’ papaaranankai meu’muriko teka niikaang mintoong-koo meu’ka. 5 Napo’ teie aa’na’ mura’maarimaunge, kiimatanava-koo si’maarikoo’, totopurumaarima˜. Ee’noko napo’ takaa’morikoo’, aasi’koo tora’kampiarukoo’, peera ninka, dii’koo ookara-koo. 6 Napo’ tasi’mereriai nii’ teing domang kirokainku, napo’ mataunukai, ee’noko napo’ iira ninka mintoomariaunge, nka nantoong tampa’ nari’ tarearampimaung Tanuaang Meekung-koo kuunge piaa masikung ninka. 7 Nii’ teing kara masikung narung minkuampimaung Kumponing bakaang purinto’ kompampiri, ee’noko tampara aarumo ookanaantai kaa’ba-pina’ kompampiritaa’. 8 Amutemurii’ otooto’koo nii’ Kumponing bakaning bautaranuka-pina’ oro’antamarimaung: tenang tampa’ nkomaariko nii’noo’ poore’maariko, tenang daangamaariko nii’noo’ daang-koo tuumpimaariko. Bane teie koomariri o’noriko nka tee tokomaarimaatoo’naang. 9 Bane ookarai noru’maaritaa’, nka nii’ninge noru’maariaung-pina’ nkomaarikoo’. Bane ampankeena’ boo’nanka-pina’ noru’maariko nka tee mme’ domamariri o’noring. Tenang mura’maarima teie domang dupisi’maariaung. 10 Bane orarunsi-antamaarikoo’, teka ookara batei-koo nii’ dotumariri o’norimaung. Bane ata’kampiri, teka nantoong aa’na’ biraankei maanto’antavarampimaung. Bane kapoo’navu’ oto’memuria’, teka kapoo’ ookara okomuri otong.
11 Dii’ nii’maikorori’ Koorin-nupoong, nii’ke tee sira’mariri naurarampimaung niikaang domang aa’na’ daate’mariri. 12 Niikaang navunavu dii’koo avo’maria’, teka dii’ deeko’ nii’koo avo’darimaung. 13 Ninge tee dii’ nkaning toirekaa’pina’ kararampimang. Tampa’ maku’meriaing diikaang domang daate’dariri.
Nii’ Teing Kumponing Bakanava Meekava Makosinuka
14 Teing ninka nantoong masika’anta oto’evoroaing ninka nari’ pake’deeriauka’, ai’ tampara aarumo orara aarumo ninka arekee’ nari’ meena’poresi oro’parepeu’? Ee’noko araka naanka mutaanang arekee’ nari’ otoresitaa’ oro’parepeu’? 15 Ee’noko Karistoo’ naanka Sietani’ arekee’ marieerepeu’? Naning Karistoo’koo baito-nung ee’noko naning baitoropa aremeng-koo onou narung deemparepeu’? 16 Arekee’ teing daang-koong kansi’koong kumponinanka Kumponing deto basi domampari otomaung bakaang pava dootuu’nava-koo makosiai teke otoropeu’? Ai’ nii’ teing Kumponing domaang okonara bakanava makosinuka, Kumponinge aa’puu’na’koo,
“Ning tee teing ninka nari’ o’noaing ee’noko teing ninka nari’ meu’ke nanama’noai, ee’noko ning tee biikaang Kumponing deemari o’noaing ee’noko teing teing napo’ nkaning nantoong deempariri otoroaing.” (Boontu 26:11-12; Esikiela’ 37:27)
17 Tee’koo Ovoringe napo’ aa’puu’:
“Oravitu-eta tonta’darira taapo’ke otoriai. Kapoo’ ku’mi’po’ning komperia’ ee’noko dii’ ninge onkeonke’dampiaing.
18 Ee’noko ning tee dii’ Diuma deemari o’noaing ee’noko dii’ teing nnurukaa’ deentariri otoriaing, ookeng donkaang ee’noko maniku’. Tee’ minkuvuing teie Ovoring Purinto’ke.” (Aisaia’ 43:6; 52:11; Esikiela’ 20:34,41)
71 Ee mmaikori’, teing aing maraka-antananka nkavampirinoo’keta kiiroraa’mariri o’noriaing teing-eta ookara kapoo’ niikaang mono ee’noko tanuaang ku’mi’antavumaing-eta, ee’noko aa’na’ paaramariai koonto’ meeka’mariri oto’koo Kumponing-koo amorompiri.
Koorin-nupoong Bere’aririo’ Paula’ Dotuaru’na’
2 Domang daate’dariri otoriai nii’koo, ai’ nii’ke naning orari-antavampia’; oraka’ nkoampia’; napo’ auraimaria’. 3 Aung tee kara ninge dii’ tompintampima minkuampa’, teka tee’ tero naurampiru’na’ naurampimang dii’ teing nii’ke domange dai’darampiritaa’ o’noriaininge, ee’noko moompima deeko’ moompiaininge dii’ ninka nari’. 4 Ning koonto’ dii’koo aroo’ pankaing o’nong. Aa’na’ doturotumaramaung dii’koo. Napo’ domang aa’na’ kuaa’antamerimaunge. Ee’noko ookara niikaang-koo arikananka-koo tee doturotue maanto’muma piampumaung.
5 Tenang ee’nang Masedonia’nameensi’aape meru’nang nii’ tee niikaang mono uaa-koo koonto’ makotuaruu’. Ookutunairu-koo meriko’noo’ka pore’anta kune’ampiko’, aa’ning dama’due turang, kuunge avoro’. 6 Teka teie Kumponinge domang manki’nuka kuaa’antavurimaunge kuaa’antamuru’ Taitas tampa’ nii’anko po’antavura. 7 Taitas pou’nung narung-koo deea’, teka dii’ke domang kuaa’antaveriko’ning pora ee’ oro’ning naumurio’: ning piaamerimaunge ee’noko nkaang tautau taaraverima aa’na’ orarunsi ninka bere’dariru’nunge. Tee’ taaramararai’nange dau basinoo’ dotumarieeng!
8 Bane tero nkaang karavoto daariantu’nunge orarunsi-antarampiru’nunge, teka ninge enang baru’ noru’ampa’. A’noo’ tutung manki’mou’nung tee’ daarirerompiru’nung-koo, teka enang tasi’pansi o’nong teie karavotoi tamung oki’noo’koo orarunsi-antaruru’nung. 9 Nka enang dotumaramaung, teka dii’ orarunsi-antarampiru’noo’koo deea’, teeo teie diikaange orarunsie orara aarumo-ita bere’antaruru’nung-koo. Ai’ tee temurii’ orarunsi dii’ke oro’antaveru’nung tee Kumponinge miru’uu’nung dii’koo. Tee’koo tee’ oki’noo’ nii’ke baike-antararampia’. 10 Tenang nantoong Kumponing piavomana’ orarunsiarima bere’ariko tee domang-antavurimaung, ee’noko tee-koo domang manki’oroarupeu’, teka kansi’ bakaang aarumo siompai orarunsiarima Kumponing-koo domang-anta nkavaavaung. 11 Ooveriai, Kumponing piavomana’ orarunsirariko kapoo’ arekee’ oro’ basiaru’ dii’koo. Bakei dii’ namu’ke avoro’ ninka tanterarira Kumponing-koo maia’dorira aa’na’ aroo’eri kake’iirariru’ tee orara aarumo naninge nkovuu’nung ampankeena’ ooveri otoko koomperira simpiri’darii’naang tee’ naurampiru’na’. Bakei aa’na’ ning dii’anko mora pakurampii’naang piaroru’. Napo’ aa’na’ noru’eru’ ee’noko motekaro’dariri tee kapoo’ koonto’ deeaung koomperu’. Ookutunairu-koo dii’ masikeerariru’nung dii’ koonto’nuka deentarii’naang tenai’koo tee naning bakanai’koo.
12 Ninge dii’anko temu’ daariantu’noo’ tee dii’ke nii’ aa’na’ deto noru’mererimana’ Ovoringe sira’puu’naang. Tee naning oraka’ nkoaru’nung baru’ koong-anta-koo deea’, napo’ tee naning oraka’ nkovuu’nung baru’ paku-koo deea’. 13 Tee’ deto noru’mererimana’ naumererira nii’ tee aa’na’ domang kuaa’antamerereru’nung. Ee’noko daua napo’ tee Taitas doturotuari poio’ ooampira dotumariru’ dii’ke ookarai teing kapoo’ naurarampiru’ning siomperima domang kuaa’antaveru’noo’koo. 14 Temu’ tee aa’na’ daangantampiko’nung dii’ tee-ankoi ee’noko dii’ beero’durima tampa’ ooruru’noo’koo dotu-antamuu’. Dii’ke masikee-antaverira maia’antameria’ daangantampiko’ noo’koo. Ookara kapoo’ dii’ daangantampima minkuantu’ning teing masikeng deemparu’ning tee’ ookara kapoo’ minkurampimaing masika’paramana’. 15 Ee’noko Taitasie bakei aa’na’ noru’durimaung dii’ aroo’keta onkeonke’eru’nung-koo amaiaa’dori dankuranku’darima. 16 Tee’koo ning bakei dotumaramaung dii’ aroo’dariaining-pina’ noru’dampima.
8Paula’ke Avuavu’ Neri-koo Tante-antavuru’na’ Judia’nupoong Paku-koong
(8:1–9:15)
Mooni’ Oosiaavaina’ Nauvuru’na’ Paula’ke
1 Enang tee mmaikori’, nii’ke pia-antararampimaang tee’ avusiro’ari oto’na’ Kumponinge piaavurima teing Masedonia’nameensi’koo osi kante-koo dootuu’nupoong avuru’nung noru’erii’naang. 2 Bane aa’na’ arikanankai paaravuriko ee’noko aa’na’ ata’kai, teka doturotue maanto’uri avusiro’ariri avuavu’ nkoaako’. 3 Koonto’ ooamira ninge sira’pamaang makosiau’na’ biikaang avuavu’ nkoau’nung-koo, ee’noko bono’ divu’au’ avu’koo makosi-pina’ oro’noo’. 4 Maroita bii’ka aa’na’ tana’maako’ nii’ke taura’parampiko nii’ning ninka nari’ pakuei nantoong Kumponing bakaning meekupoong teka Judia’ka pakuaarii’naang. 5 Nii’ke ee’ noru’ampiko’, “Ai’ pang tang nii’ning mooni’ sipaava’naang,” teka teing bii’ka tutung avariru’ Ovoring-koo ee’noko napo’ nii’koo Kumponing bakaang pia-koo kuunge. 6 Tee’koo Taitas tana’ampiko aroo’ario’ botoampiru’ teie koompaara’durii’naang temurii’ pakupaku piaa-koong dupeverii’naang, ai’ dii’ teing ee’narai tutung-antaruru’ning tee’ nko-koo. 7 Dii’ bakei dau basinoo’ amutemurii’ aarumo Kumponing-etaning tampa’ nko-koo bia’dorimaung aa’ning-koo: masika’anta-koo, kara-koo, noru’koo, ookutuari aroo’koo ee’noko nii’ piaa-koo. Enang napo’ tanatarariai nari’ dau basinoo’ avusiro’dariri nko-koo.
8 Ninge eturampia’ naurampimang diikaang piaa taa’ni’poaina’ oo-koo nii’ning ninka. 9 Ai’ dii’ke tee noru’eri otong tee piaa niikaang Ovoring Jiisuu’ Karistoo’ bakaang. Tee aa’ bane maanto’ari otoitaa’, teka dii’ noru’duri boonko batari’arara ata’kuu’ dii’ teie bakaang ataata’ke maanto’antararii’naang. 10 Ee’noko ning nkaang tautau aung dii’koo, aung amurii’ aarumo avuavu’koong nkoveriaina’koo: Boonamare’koo tee dii’ ee’ning dootuu’nupoong ookara osi-koo avuavu’koo tutuna’ tutuntariru’ning, ee’noko tee narung-koo deea’, tee avuavu’ nko-koong pia tee dii’keta tutumparu’. 11 Enang tee tampa’na’ ee’: dupeveriaing temurii’ nko-nko nari’ dompirompi’doritaa’ otori tutuntariru’na’ tee’ dii’ka-koo makosina’ noru’darimana’. 12 Kapoo’ oto’deruriaung-eta deea’, nka oto’derurining-eta avu’koo makosi. Arekee’ basi tee avuavu’ averiko tee Kumponing dotuaravaing diikaang aroaroo’ oovui.
13 Nii’ tee dii’koo manki’ pante’koo piamoria’ teing pakuererimaing tamung kuaa’oroi otoroko, teka ookamenta nari’ basi-koo piamori otong. 14 Enanung batei-koo tee mmau’ oto’derurining-eta nii’ning pakuereriaing apuka’pariko tenang dii’ apuka’dariko pakuraariaina’. Ee’noko ookara naro’ basinoo’ oto’deruriai. 15 Tee’ Daari Meekunge maana’ ukuau’na’ minkuvuma aa’pumana’,
“Bane tee naning mmau’ oosivuu’nung, nka baru’ deepo’ oto’evua’, ee’noko bane tee naning oki’ning oosivuu’nung nka apuka’parava’.” (Toro 16:18)
Paula’ke Taitas Dovang Botovuriko Onkeonke’aarii’naang Nauvuru’na’
16 Ninge tampara tampamang Kumponing-koo tee Taitas napo’ Kumponinge siong-antavumaung-koo dii’ aa’na’ pakururii’naang tee’ ee’na’ nari’ ninge dii’ noru’dampimana’. 17 Ai’ tee Taitas tee aa’na’ dotuari otong nkaang pia siompui napo’ dii’ beero’durii’naang, teka ee’ noru’amaang, ninge nauamparuko dei baka beero’duripeu’, ai’ tee tee bakei dii’ oo-koo aa’na’ piavomaung. 18 Teka nii’ke Taitas ninka narung nii’maiko’ nari’ botoampimang dii’anko uroresi beree’naang, tee ee’nara ookarai dootuu’nupoonge osi kante-koo tampa’ noru’aamaung doorenang tampara tampa’ bereng-koo pakuvuriko. 19 Aung tee naning tampara, ai’ ookarai dootuu’nupoonge osi kante-koo miru’au’nung nii’ ninka nari’ nanu’koo tee mooni’ Karistoo’ siompaamainge amaarimaung nari’ kompampira dama’ Jerusalema’ke tankaampampii’naang. Tee’ ookara avuavu’nanka tavo’ampima tee Kumponing bakaang miring pankaing-antavampii’naang ee’noko niikaang paku-koong pia oro’antavampii’naang tee’ pakumeeri. 20 Nii’ke bokuampiru’nung aung naning pakumurii’naang nantoonge tee mooni’ avusiro’ariri sipau’nung oraka’ tankaang-koo tuumpimaari’neeng-koo. 21 Nii’ke tampa’ pukeampiri nkoampimaung kapoo’ tampa’ nari’ nko-koo, Kumponing-koo dutakanoo’ke naro’ke deea’, teka aa’ nantoong-koo dutakanoo’ke tee’ nari’ nkoampimaunge.
22 Napo’ tenaanka ninka nari’ narung nii’maiko’ motekaro’ dii’anko botoampimang tee ookara batei-koo kake’iiari amutemurii’ manki’nanka-koo pakumuriko tampa’ ooampimaung, ee’noko dii’ tampa’ noru’duritaa’ aa’na’ masika’ pakururii’naang noru’durimang.
23 Taitas tee ni’ninka manta’maresi pakumeeremaung dii’ paku-koo ee’noko anaanka nii’maikorori’ka tenaanka ainge dootuu’nupoonge osi kante-kooninge anke otoromainge miru’aaretu’naanka biikaang noru’ sira’puree’naang. Napo’ teie tee Karistoo’ pankaing-antavuremanaanka. 24 Tee’koo dii’ke diikaang piaa oro’antaveriaing aing-koo, ai’ nii’ke tee diikaang piaa pankaing-koo biivintarampimaung, ee’noko ookarai dootuu’nupoonge ooaava’naang piamomaang.
9Koorin-nupoonge Judia’nupoong Pakuaariaina’
1 Ee aing, aung a’noo’ tamung dii’ke noru’eri otoing daariamang teing nii’ning Kumponing bakaning meekupoong paku-koo. 2 Ninge noru’ansi otong dii’ Koorin-nupoong aa’na’ paku-koo piarori otong, ee’noko tee’koo ninge dii’ Akaia’nameensi’nupoong daangantampimaung aing Masedonia’nameensi’nupoong-ankoi ee’ nauarama: dii’ boonamare’keta maamurariru’ning tee avuavu’ nko-koo ee’noko dii’ tee’ dompirompi’doriko ooraarira teing-koo mmau’ daa’ariru’ tee’ nari’ nko-koo. 3 Teka ninge teing aing nii’maikorori’ botoaransinoo’ tee nkaang kara biivintampimaung-koong tamunsi’nung deemparavaroo’naang diikaang avuavu’koong ee’noko dii’ maamurariri tampa’ nkoveriko ooraarii’naang tee’ nari’ minkuamana’. 4 Teka dii’ daangantampimanoo’koo ning maia’mo’neenga tenang Masedonia’nameensi’nupoong ni’ninka nari’ merira dii’ maamurariaruko oorarampira. Ee’noko dii’ teie, maia’doripeu’. 5 Tee’koo ninge ee’ noru’ansing: ainge nii’maikorori’ke tutung beero’daarima pakuraarii’ naang tampa’ maamurariri dupe-anta-koo tee avuavu’ avusiro’dariri nko-koo mau’dariru’nung. Bera ning moma tampa’ maamuari otoko ooampai tee diikaang avuavu’ domang-eta avusiro’ari avu’ deempari otoko, minkuminku-po’nung deea’.
6 Aung kapoo’ dii’ke noru’eriaing: Naning tee oki’ning sinang keempumaung tee oki’ning kavumaung. Ee’noko baa naning mmau’ keempumaung tee mmau’ kavumaung. 7 Narunge baka bakaang domange miru’uaina’ avuai, domang manki’dori averi’neenga. Nii’narai botovuaina’ avuauka’, ai’ Kumponinge tee naning aroo’keta avu’ nkovumaung piaavumaung. 8 Ee’noko Kumponinge tee aa’na’ aruripeu’ apuka’darimanoo’keta deto, ee’noko bera teie teing-koo apuka’darimaing-koo ookara batei-koo makosiri oto’deruriaing, ee’noko enang tee dau basinoo’ oto’deruriaing ookara tampeng nko-nkonanka-koo nii’ning paku-anta-koo makosina’. 9 Tee’ Daari Meekung-koo aa’puu’noo’ka daariari otoina’,
“Teie bakaang avuavu’nanka bereng-antavuu’nung teing-koo ata’oi’nuka-koo, ee’noko tee bakaang aarumo koonto’ tee tee’ nari’ otoi otomatoaing.” (Kena 112:9)
10 Kumponinge tee keenkeeng nkonuka sinang avurimaung ee’noko dama’ke keenavaang tampeng avurikoo’ nantoonge nai-koo, ee’noko tee’ nari’ teie ee’narai deepo’ amutemu’ke sinananka du’antarerurimatoaing, mmau’ kaverima tankaamperimaatoaina’ tampara aarumoi meena’dori. 11 Ee’noko dii’ teing anatenairu-koo maanto’duri otoriaing tampa’ avusiro’dariri otoriaina’ ookara batei-koo, ee’noko tee’ nari’ avusiro’dariri tee diikaang avuavu’ niikaang bireng-koo siperiko teinge Judia’nupoonge Kumponing-koo tampa’ tampaavaing. 12 Tee aung pakupaku dii’ke nkoveriaing tee, teing Kumponing bakaning meekupoong naing paku-koong deea’ kapoo’koo apuka’pariko, teka tee Kumponing dotuaravai amutemu’ke teinge napo’ Kumponing-koo tampa’ tampaako. 13 Ee’noko teie nko-nko tamparai dii’ka tasi’antarariaing-koo nantoonge tee Kumponing pankaing-antavaavaing, dii’ke tee doorenang tampara Karistoo’ bakaang mavo’peri sira’perimaung-koo tee meumperi. Enang tee diikaang avusiro’dariri avuavu’ teing-koo ee’noko nii’ning-koo averereriaing ooaara Jerusalema’nupoonge Kumponing daangampaavai. 14 Ee’noko biikaang kunsi-koo dii’ pakuraarima pankaruntoonge noru’daariaing tee-koo Kumponinge aa’na’ deto basinoo’ avusiro’antaruru’nung-koo.
15 Tampara masikung Kumponing-koo tee-koo bakaang avuavu’ minku-paa’koo.
10Nii’ninge Paula’ Daraumeempaio’ Daang Noru’aako Siraka’antavuru’na’
(10:1–13:13)
Paula’ke Teing Daviraa’au’ning Maku’uru’na’
1 Enang tee, kontampiri ning eentamaramaang dii’koo, ning ee’nara Paula’, tee naning nkaning too’de-nupoonge aa’maamaung, “Tenang nari’ karompima aa’na’ karoarukoo’, teka tenang isipo’ otoitaa’ aa’na’ karamurikoo’;” 2 Teka enang ninge daarirerompima Karistoo’ doonko noru’ari navu ninka karomana’ dii’koo eentamaramaang teing-eta tonta’dariaing. Tenang ning mora teing ning too’demaamaing turamparama dii’koo nii’ning nari’ turantampi’neenga. Ai’ teinge ning tasi’maavainge ning kansi’nung aarumo siompamaung-pina’ noru’maama aa’maamaung, “Paula’ke kiimatamuriarupeu’.” 3 Teka tee bane kansi’koo o’noring, teka turang tovang kansi’nupoonge nkoaamana’ nkoampiaung. 4 Tee iri’ nii’ oto’memurimaung tee kansi’nupoong biikaning kapatau-pina’ oro’ deea’, teka tee Kumponing-etaing ee’noko Sietani’ bakaang e’maniang pesi’koo makosie. 5 Tee Kumponing bakaang iri’ ninka nii’ke siinka’parampimaung teing kara dairai’kooning ee’noko ookara daang minkunanka maavai’arima Kumponing tampa’ noru’koo parapara’aama minkuaamaing. Ee’noko ookara biikaang mataunanka nii’ke pinka’ampiri bere’antavampimaung Karistoo’ bakaang kara narung siompaava’naang. 6 Enang tee teing-eta tonta’dariri otoriko ning mora teing ning too’demaamaing kiimatavarampaing ookara biikaning taarapiikananka-koo.
7 Kapoo’ diikaang duta-koo uro’kanoo’ke otoing ee ooveria’ otong? Arekee’koo ning Kumponinge dii’ tare-koo miru’muu’nung-koo ampankeena’dorimaang nii’ninge tosiraariko? Naning Karistoo’ bakaang kara-okovui-nka-pina’ noru’ari otoing deeko’ tee ning tee’ Karistoo’ bakaang kara-okovui-nka-pina’ noru’muainge tee’ baka noru’aramana’ nari’. 8 Ai’ Kumponinge taa’ni’antamui pakumumaung, ee’noko naninge maia’antamuarupeu’ bane deepo’ daangamaramaung-pina’ noru’mura, Kumponinge makosi-antamumana’ nantoong tare-koo minkuanko. 9 Teka aa’dampimang, tee dii’ tare-koong iri’ Kumponinge amuu’nung tee dii’ orari-anta-koong deea’ nka dii’ puring-anta-koong, nkaang karavoto dii’ avoro’anta-koong-pina’ noru’eri’neeng. 10 Ai’ dii’koo nii’ninge aa’perikoo’, “Paula’ke bakaning karavotonanka-koo aa’na’ purimpari ivekung kara daarivukoo’, teka nii’ ninka o’nori amaiaa’omaung ee’noko bakaang kara tarii’oarukoo’.” 11 Teinge tee’ kareaamainge ee’ tasi’paavaing: Tee aa’ kapoo’ oovunamurii’ otoa’ teing-koo aing-koo aa’ning-koo, karavoto daariamaung tenang isipo’ o’noitaa’ ee’noko tee kapoo’ ninge nkoampaing tenang dii’ ninka nari’ o’nori.
12 Ning tee makosi-pina’ dooremaravaung teing-koo maavai’arima nau-antanuka tamparimaing ninka navaatang-koo oto’koo, ee’noko teing ninka naro’ basi tang-koo bii’ka pankenanka tamparimaing ninka. Teka teing matauna’ nkoaria’ bii’ka miru’aamana’ ooai paaravarima daang makosi-antavarikoo’. 13 Ning tee, teing-pina’ deea’. Ninka doore karoma Kumponinge miru’muu’noo’ divu’ampauka’nung. Teka miring-koo biivimaravaing deeko’ tee makosi miru’muu’noo’ basiario’ biivimaravaing nantoong tare-koo miru’muu’noo’koo, ee’noko dii’ teinge nkaang tanata-koo kuunge otoring. 14 Ning taapo’ toonampa’ Ovoringe miru’muu’noo’keta tenang dii’ tautaurampima, ai’ tenang tutung ning dii’anko mera tampara doorenang Karistoo’koong naurampiru’nang Ovoring bakaang iri’ oro’paravaruu’nung dei ning Ovoringe miru’muu’noo’keta taapo’ toonamaung tammeripeu’. Teka tee’ nkomarava’, ai’ tenang tutung mou’nang Ovoringe iri’ amuu’nung tee taa’ni’poi ning-koo oro’parako dii’ke ooverima domang bere’dariru’nung Ovoring-aape. 15 Ee’noko dii’koo mintoomaramana’koo daangamarama nii’ning biikaang nko-nko noru’ansi deepo’ daangamaravaung. Nkaang pia tee diikaang masika’anta deto nari’ dupui oto’koo bera niikaang mintoong dii’koo aa’na’ kato panka’paravainge. 16 Aa’noaina’, doorenang tampara napo’ daankiampiai dii’ankoita kato anatenairu-koo. Ai’ ning nii’nung bakaang nko-nko-koo daangang-koo piamoa’ bakanoo’ke nkovuing-koo. 17 Teka Daari Meekunge ee’ minkuvui otong,
“Naning daangang-koo piavora deeko’ tee-koo Ovoring-koo daangamparavaing.” (Jeremaia 9:24)
18 Ai’ naning baka daangamparama makotuarupeu’, teka Ovoringe daangampuko deeko’ makosi.
11Paula’ke Kara Okovuri Nkanuka Daang Tampariko’ning Sirakaapuvuru’na’
1 Io’ taura’meri otoko oki’nanaare nkaang minkunaa-koo minkuampai. Bane biivimaring-pina’ minkumarako teka dii’ke daangamaring-pina’ taaraverima domang ima’dariauka’. 2 Ninge dii’ bakei Kumponing-koo kuunge tokontampimaing dii’ orarirari’neeng-koo. Ai’ ninge tee dii’ narung naning-koo konteerii’naang miru’dampiru’ning tee ee’nara Karistoo’. Ee’noko tee-anko tavo’dampii’naang dii’ manikuma nerai’na’ kuukuma˜pina’ kiiroraa’oi otoko ba’ung-anko nampeesina’mung taavo’aamana’. 3 Teka amoromaang ning tee’ Iivi aavavuu’na’ teie boru’ke ampirinunge˜ dii’ tee’ nari’ naninge diikaang onou tokoona’ kaake’antaruri’neeng Karistoo’koo pinka’dariri otorimanoo’keta. 4 Ai’ dii’ teing ou’ou’nuka-pina’ oorampimaing. Naninge dii’anko pora nii’namurii’ Jiisuu’ minkuvuma nii’na’ daankivuko teieta’ ninge dii’ankoi daankiantu’nung-eta tee tamung danto siomperikoo’. Napo’ tee onou Tanuaang Meekung-etaing tero nkaveru’nung siperima oovunamurii’ onou siomperikoo’. Napo’ doorenang tampara mare’ai nii’na’ daankiaako tero daankianko’na’keta tee napo’ domang ima’dariarukoo’ tee-koo. 5 Ning tee bakei teing-koo boong basi-pina’ noru’marava’ teing-koo diikaning nau-antanuka-koo kara okovuri nkanuka pankeng tamparimaing-koo. 6 Ning tee bane matau-pina’ karompaunge, teka ning noru’ o’nong. Ninge tee temu’keta avuntevunge tee’ dii’ tasi’antarampimaung.
7 Arekee’koo pa ning tee’ tokomerimaunge? Tero ninge Kumponing bakaang doorenang tampara dii’koo daankiama moo’ eentamarava’. Ai’ tee’ tompimari pankaing-antarampiko orara aarumo nkoamaung-pina’ oomerimaunge? 8 Ninge tee mooni’ nii’ning dootuu’nupoong-eta nkavantu’nung tee dii’ paku-antarampii’naang. 9 Tenang ning dii’ ninka o’noritaa’nange kapoo’ piamoma nii’nung naning manki’antavampa’, teka teinge nii’maikorori’ke Masedonia’keta porora pakumau’ piamoko’ning-koo. Ninge dii’ ookara taung-koo manki’anta avu’koo para’maramaung, ee’noko tee’ nari’ nkomaramatoaing. 10 Jiisuu’ bakaang kara masikung ning-koo otoina’ masika’ minkuamaang, naninge dii’ Akaia’nameensi’nupoong-koonge napu’muauka’nung tee’ daangamaramaung-koo. 11 Aming-koo, ai’ dii’ piaarampia’ ee? A, tee aa’ Kumponinge noru’ui otong aa’na’ piaarampimana’. 12 Ee’noko tee si’maravauka’nung tee’ nari’ nkoamana’ nko-nko nko-koo. Teing nantoong ning-pina’ basinuka tamparima moo’ piavoroma bii’ka daangamparimaing e’mantoma oto’antavevorompauka’nung.
13 Teing aing nantoong teing daang kara okovuri nkanuka tamparima, oovunung kara nau-anta-koo mintoomparikoo’, daang tosie Karistoo’ bakaning-pina’ oro’antavarima. 14 Ai’ Sietani’ tee’ke, baka nantoong tosivurima daang avitoitoi bere’aramaung maroita nantoonge koosinung˜ araka-koong Kumponing-etaing-pina’ noru’aara siompaava’naang. 15 Tee’koo kapoo’ ta’nimpaarii’ deea’ tenang bakaning botovotonaa’nukai tee bakaang aarumo siompai nantoong tosiaariko, tee’ Kumponing bakaning-pina’ oro’antavarima kara nau-antaraariko. Aing nantoong tee’ oraka’ nari’ nkoarima botu basiariainoo’ke moo’ makosina’ kompaavaing.
Paula’ke Manki’nanka Bakei Mmau’ Kune’uu’na’ Kara Okovui Nkavuma
16 Napo’ unampama aa’pamaang, naninge ning baru’ biivimaramaung-pina’ noru’meauka’, teka tokomerira deeko’ tang taura’meriaing nii’ning taura’perererimana’, ee’noko oki’noo’ dooremaravaing dii’koo. 17 Aung ee’ oro’ aarumo ninka biivimaramana’ tee Ovoringe baka nko-antavuaung ee’noko tee’koo tee’ amako-pina’ nkomaramang. 18 Teka tee aing nantoong daangamparimaung deeko’ tee’ kansi’nupoong daangamparimana’ ning teie tee’ daangamaravaing. 19 Makosi ape’ aing? Amakonuka doturariri taura’perererimaung avutevu’daarimaatoo’naang dii’ norukasi’nuka deentarima. 20 Napo’ tang ooveri otoriko aa’na’ deto bia’oroi biikaning botovotonaa’nuka deeng-antaraarikoo’, ee’noko opantaarimaatoo’naang. Daua’daarima miita’daarii’naang, napo’ maavai’arima botoraarikoo’. Ee’noko oing-koo tanko’daarimaatoo’naang. 21 Aming-koo tee’ taura’daririo’ oraka’ nkoraarimaunge? Ai’ tee’ tampa’pina’ noru’erimaunge? Ee’noko tee’ teinge taura’daririo’ nkoraarimana’ ninge nkorampiri dei ee doturaripeu’? Tee’ ee maimaia’na’ tamperiarupeu’?
Teka teing aing bii’ka biivimparimana’koo deeko’ ning tee’ke, ninka biivimarapeu’, teka tee’ minkumarama ning makotua’na’pina’ karomang. 22 Teing Iiburu-nupoong deeko’ ning tee’ke teing ninka nari’ Iiburu-koonge. Teing Isireeli-nupoong deeko’ ning tee’ke Isireeli-nunge. Teing Eebaraami’ bakanaving-koo-nupoong deeko’, ning tee’ke, Eebaraami’ bakanaving-koonge. 23 Teing Karistoo’ bakaning botovotonaa’nuka deeko’ ninge noru’dopa-pina’ karoma aa’dampii’naang: Ning tee teing-koo dau basinoo’ puru’aransitaa’ aa’na’ mintoomaramaung. Tee’koo kiimatanava-koo mmau’namu’pie be’antamaakoo’; mura’maariko ninge aa’na’ dau basinoo’ sisikeera tora’pankoo’; dapi’ moonkoo’ amutemu’ke. 24 Nii’nang pa’noko’namu’pie Ju’nupoonge aa’na’ oraka’ tora’antamau’, deerunoo’koo asi’namu’ otoa’ teing mura’mau’ning karenaumo kivora deemparaa’naang (39) te’ taura’nii’noo’ nantoong mura’koo. 25 Beemu’pie teinge Ju’deeainge bana’ke mura’mau’. Napo’ nii’na’mung Ju’nupoonge kapange dupisi’maava’naang too’maako’. Beemu’pie aarerie˜ nananko aareri naka’aru’. Teing-koo nii’na’mung aa’nou’ muung na’mung ee’noko doong na’mung maiara’koo tamung koi’koo komari naampemarama o’nou’. 26 Ookara batei-koo tee diiri’mari o’nomaung. Tee’ nanama aing aa’ning-koo koraposimarakoo’: doua dovang-koo minki-koo, bakisipunankai tavu’koo, nkaning nantoonge ee’noko Ju’deeainge dapi’ tamaakoo’, osi pankeng-koo ee’noko pora’ka dapi’ tamaakoo’. Pirung-koo dapi’ minkimarakoo’, ee’noko daang mmaikori’ tamparimainge dapi’ orari-antamaakoo’. 27 Aa’na’ pore’moi mintoomaramaung. Nii’nang baru’ aatumparukoo’. Peeramoma ntong-koo nukaa’mokoo’. Nii’nang taamang-koo ata’ankoo’. Kamaarie dupisi’mukoo’ baarong nopa’maravaing oto’memuaruko. 28 Napo’ aing baikenanka-koo daua ookara dootuu’nupoong osi kante-koo manki’moi aa’na’ noru’arankoo’. 29 Tenang nii’ning amutemurii’ parapaaranankai aruaru’oroko ning tee’ aruaru’ mantomarakoo’. Ee’noko nii’ninge orara aarumo-koo dua’antavaariko ning tee napo’ iirang-antamaramaung.
30 Ning biiving-koo etumerimatomanoo’koo makosi biivimaravaing teing-koo nkaning aruaru’nairu sira’pumaing-koo Ovoring bakaang puring ning-koo oro’paraa’naang. 31 Teie Kumponinge tee niikaang Ovoring Jiisuu’ Karistoo’ Baumai ookara batei-koo biraankeampimaatoainge noru’mui otong ning tosimarava’. 32 Tenang ning teke Damaskasie o’noko teie ovo’ma’ke, tee daurarong˜ Aretasi bakaange piatooronuka˜ botovuru’ ning osi-koo parang-koo karanaanga tenkenanko nemaara dai’maava’naang. 33 Bera koo’marapeu’na’ papaaravanko mmaikori’ke ning mmari’antamaama burunge doonko osi-koong parang-koo dama’due sing-antamau’ ka’baraa’koo o’noko. Ee’noko tee’ koo’maru’ tee ovo’ma’ bakaang bireng-eta.
12Paula’ke Mmau’ Kapoo’ Makensi’ning Nii’naung-koo˜ Bere’arara Oovuu’na’
1 Tee’ nari’ daangamaramaa’noaing. Bane kapoo’ basiaravauka’, teka io’ temurii’ danga’daangang sipamira nii’namurii’ danga’daangang-koo pare’maravaing aa’ning-koo nii’naung-koo bere’marama ooamaing ee’noko teing kapoo’ makensi’ning Ovoringe sira’ antavumaing ning-koo. 2 Mare’ kivora-ita karenaumo divu’uu’ning-koo ning tee Kumponinge paning-koo koonto’ bakanoo’ a’dei’ beenaumo-navaro-koo deto bokumuu’ beroveero’koo. 3 Teka ning noru’marava’ moni’naung meu’nung deeko’ ai’ pang tanuaanoo’ke meu’. Kumponinge narunge noru’ui otong. 4 Teka noru’ansi o’nong ning deto a’dei’ basimaru’nung te’ osi tampoo’, ee’noko kapoo’nanka ta’nimpaarii’nanka taaravarantu’ naninge minkuvuma punkaam˜ puarupeu’ aa’nanka, ee’noko minku-koo taura’parava’. 5 Ning tee’ ookamira biivimarapeu’, teka ning tee’ nkomaravauka’nung, teka nkaang aruaru’nanka-koo deeko’ biivimaravaing. 6 A’noo’ tee biivimarama deeko’ makotuio’ biivimarapeu’ kapoo’nanka masikeng minkumarama. Teka tee’ nkomaravaung nantoonge baru’ ning deto basi-pina’ noru’maa’neeng-koo nii’naung-koo bere’marama ooamaing-koo, teka kapoo’ ninge nkoamaing ee’noko minkuamaing-koo deeko’ noru’aitaa’ tasi’maavaing.
7 Teka ning biivimara’neeng-koo teing kapoo’ makensi’ning aa’na’ pankeng ooantu’ning-koo tee teie Sietani’ke mono-koo too’mung si’muu’ teketa tora’antamumaatoo’naang Ovoringe taura’puio’. 8 Bera tee teketa beemu’pie eentamaru’ Ovoring-koo tonta’uu’naang ning-eta. 9 Teka teie aa’muu’ ning maku’muma, “Ninge da’ piaaransi pakuramana’ tee’ makosina’ da’koo, ai’ nkaang iri’ tee dupeari oro’paramaung teing-koo aruaru’nuka-koo.” Tee’koo ning aa’na’ deto basinoo’ dotumari daangamaravaing aruaru’momanoo’koo tee Karistoo’ bakaang iri’ ning-koo oro’paravaina’ aroo’ansi. 10 Tee’koo ee’na’koo Karistoo’ siompansi ning dotumaramaung aing aa’ning kune’ama: puring mantomaravaruma, deu’dovamaako, pore’ kompama, turamaako ee’noko arikananka kune’ama, ai’ tenang aing sisikeerananka kune’amanang tee Karistoo’ke puring-antamumaung bakaang mintoong nko-koo.
Paula’ke Koorin-nupoong Biikaang Masika’anta Puring-anta-koo Piavou’na’
11 Tee kara ninka biiving-koong kanu’pina’ karoma minkuansing tee dii’ke daangameripeu’ninge pore’antameriko minkuansing. Bane ning tamunsi’nunge, teka teinge kara okovuri nkanuka pankeng tamparimainge ning koonto’ puru’maava’. 12 Tenang teke dii’ ninka o’noi ninge ookara kapoo’nanka-koo iri’ o’marava’ doong kante taa’ni’antamaru’nung koonto’ Kumponing bakaang kara okovuri nkanuka-koong masikung-pina’, tasi’antamarama aing aa’ning dii’koo meu’ke nkoarako: amutemurii’ ta’ning-antananka, taa’ni’antananka ee’noko nko-nko purinto’nanka. 13 Ee’noko ninge dii’ tampa’ dootuu’koo donkong-antarampiru’ nii’ning osi-koo donkong-antavarantu’na’ nari’, teka manki’ dii’koo sipampa’ nii’ning-koo sipantu’na’, ai’ teinge taamang tovang-koo pakumau’nunge. Nka ning dii’ ninka o’noi kapoo’nanka nkaang moni’ paku-anta-kooning-koo apuka’marama ninge dii’ eentarampia’. Teka ninka taremaru’nung-koo oraka’ noru’meriauka’!
14 Enang tee ning maamumaramaang dii’ beero’dampii’naang beemu’pina’, teka ninge dii’ manki’antarampiauka’nung nkaang apuapuka’koo, ai’ ning tee dii’ naing-koo piamomaung, diikaang kapoo’nanka mooni’ dovang-pina’ oro’nanka deea’. Noru’eriaing, toirekaa’ke tee biuma kapoo’ kore’aavaung, teka biumai baurukaa’ kapoo’ kore’urimaung. 15 Tee’koo ninge dii’ dotumarama pakurampiri ookara kapoo’ nkaning dua’ampaing ee’noko napo’ boo’koo taura’mari otong dii’ pakurampima. Ai’ pa ninge dii’ aa’na’ piaarampimaung-koo ee oki’noo’ piaa-koo maku’meriaing? 16 Dii’koo nii’ninge aa’merimaung, “Masikung manki’antamuriaung-pina’ oro’paramaung, teka daua’murima ooampia’na’ mooni’ nkavumaung.” 17 Arekee’koo tee’merimaunge? Ai’ ninge teing botoarama mooni’ eentaraarii’naang botoarampa’ ee’noko teing porora mooni’ dii’koo nkavaava’. 18 Ninge tee Taitas botoantu’nung dii’anko bee’naang, nii’nung ninka nii’maiko’ ninka. Ee’noko Taitasie mooni’ nkareruria’, ape’ aing? Ai’ nee’ke tee narung taung siompampemaung narung noru’ ninka.
19 Enang ning ee’ minkumarako dii’ke pa ee’ noru’merimang: “Aung Paula’ baka pakuaramanoo’koo nii’koo dutakanoo’ke maroita tampa’ oro’paraa’naang ee’ karomang.” Teka tee’ deea’, ee mmaikori’. Kumponinge narunge simpe’muaing noru’ansi Karistoo’koo kuunge tee’ karomang ookara karananka taaraverima koontariri otorii’naang. 20 Ai’ ninge avoro’antarampimaang tenang dii’anko mera ning piamoa’na’ otoriko oorampi’neeng-koo, ee’noko dii’ doturariarupeu’ ning mora turantampiri dei aing oreng aarumonanka-koo ee’ oro’ning-koo: tata’naang, mamairo, peusi’kuma iira, siivenke’nanka, deu’ dovang, minkuminkuru, baka kirokaiari oto’, ee’noko onou betoveeto’ ninka oto’. 21 Ee’noko napo’ ee’koo ning amoromaang: nkaang Kumponinge oomui otoko maia’mo’neenga tenang dii’anko mora napo’ biromarako tenang karingai oreng nko-nkonanka mme’ sipaavaruko ee’noko bere’aria’ teieta biikaang aarumo ku’mi’po’nanka-ita ee’ oro’nanka-ita: kaukauro, ee’noko anutua maimaia’na’nko.
13Koorin-nupoong Biikaang Masika’anta-koo Tareariaing Nauvuru’na’ Paula’ke
1 Enang tee ning maamumaramaang dii’ beemu’pina’ beero’dampii’naang. Ookara kapoo’ simpe’kooning tavo’erii’naang nerirarira masikee-anta-nupoonge beenaumoi nii’noo’ kenaankarai tavo’koo makosi. 2 Tenang ning dii’ ninka nari’ kemu’kana’ o’noru’nang tero koono-antarampiri tautaurampiru’. Enang taapo’ o’noi napo’ unampama naurampima aa’pamaang: Ninge tee teing temu’keta oraka’ nkoarimaing ee’noko napo’ nii’ning nari’ nkoariaining mora ookara naro’ka turamparampaing. 3 Dii’ke taa’ni’anta ning-koo oo-koo piarori otong tee Karistoo’ ning-koo kuunge karomaung-koong. Bakei ooverii’naang tenang turamparampainang, ai’ tee Karistoo’ tee aruaru’oa’ dii’ koong-antarurima, teka tee tee iri’oi otong dii’koo meu’ke. 4 Nii’ke tasi’koo ee’ ooampiaing, bane teie aruaru’oio’ aa’barata’koo bi’aara dupisi’au’nunge, teka tee tee domampari otong Kumponing bakaang iri’ke. Ning teie tee-pina’ nari’ aruaru’ke tee aruaru’oi otoko’na’, teka tee Kumponing bakaang iri’ke ning tee tee ninka nari’ o’noremaatoaing dii’ koong-anta-koo.
5 Dii’ dii’ka paararariai diikaang domang-eta baito-koo otorimana’ masika’ oo-koo dii’ka Karistoo’ bakaning masika’antarariaina’. Dii’ke ee tasi’peria’ tee Pako’pari’nii’ Jiisuu’ dii’koo otoing? Teka a’noo’ parapaara-koo dua’darimaung deeko’ dii’koo otoa’ tee. 6 Ee aing, ninge tampa’ tasi’meripeu’na’ noru’amaung, ai’ ning tee parapaara-koo dua’maravaung. 7 Teka enang tee ning kunsimaramaang Kumponing-koo dii’ke kapoo’ orara nkoveriaroo’naang, nantoonge ning kara-okomui-nka-koo makosi-pina’ oomaava’naang deea’, teeo dii’ke tampara aarumo siomperii’naang piamoi. Ee’noko bane turantampiaruma aruaru’pina’ oro’marako ning makosi deeaung-pina’ oomaapeu’, teka dotumarapeu’ dii’ tampa’ otoriko oorampira. 8 Ai’ ninge tampara aarumo-koo nantoong turamparamparupeu’, teka deto puring-antavarampeu’ kara masikung siong-koo. 9 Ning dotumaramaung tenang ning aruaru’pina’ oro’maramanang dii’ purintariri otoriko diikaang masika’anta-koo, ee’noko nkaang kunsi tee dii’ paku-koo nkoamaung dii’ petaa’dori otorii’naang. 10 Tee’koo enang ning taapo’ o’noi ane’ daarirerompimang tenang ning dii’anko mera iiramoaroo’naang tee ninka iri’ Ovoringe amuu’nung ninka. Ai’ teie iri’ ning amuu’nung tee dii’ deto du’anta-koong, dii’ kepu’koong deea’.
Kara-koo Asi’naare
11 Asi’namoora’koo aa’dampimang ee mmaikori’: Tampara, otoriko! Petaa’doriai. Tautau taaraveri domang kuaa’doriai, ee’noko napo’ narung noru’ ninka mooa-koo otoriai. Bera tee Kumponing piaa bauko mooa-po’nung dii’ ninka nari’ otoaing. 12 Ee’noko tampa’ nari’ onkeonke’deeriaing Kumponing-koo meekupoong-pina’ otori. 13 Ookarai Kumponing bakaning meekupoonge anke otoromainge biikaang doturotukoong tampa’ tang botoaamang dii’anko.
14 Tee biraanke Ovoring Jiisuu’ Karistoo’ bakaang ee’noko napo’ tee piaa Kumponing bakaang ee’noko tee navunavu Tanuaang Meekung bakaang dii’ ninka nari’ otomatoaing. Ee’, masikung.