1 PIITA

Ane’ Tutuna’nane’

PIITAI

Daarivuu’nane’

Kara Baavootunanka Ane’kooning

1:1 Nii’ Kumponing Bakaning Deemarira Tampa’ O’nori Nempampiaing

2:11 Nii’ka Koomariri O’noriaing Sirakura’

4:1 Purimariai Parapaara Pankainge Manki’antamuriko

Nii’ Kumponing Bakaning Deemarira Tampa’ O’nori Nempampiaing

(1:1–2:10)

¹ Ninge Piitai teie Jiisuu’ Karistoo’koong kara-okomui-nkai daarirerompimang dii’ Kumponing bakaning miru’nisinuka-anko, damisimainku deentariri otorimaing anke kansi’koo, Jerusalema’keta bata’daariko aa’nairu-koo otori: Poontusi, Kalesia, Kapadosia’, Eesia ee’noko Bitinia. ² Dii’ teing Kumponinge Niumai temu’keta tasi’durira miru’ruru’ning, ee’noko teie Tanuaang Meekunge meeka’antaruru’, Jiisuu’ Karistoo’ meumperii’naang, ee’noko bakaang erenge kiiroraa’ antarurii’naang. Biraanke ee’noko mooa dii’koo beremparavaing.

Paning-koo Maneena’ O’noriaina’

³ Biraankeampiai tee Kumponing, Bauma teie niikaang Ovoring Jiisuu’ Karistoo’. Teie aa’na’ piaamurira baurukaa’ deeng-antamuri ponto’antamuru’ nerakung domaang-koo domang purimariri nooruupiampii’naang maneena’ o’noriaina’. ⁴ Teie tee, Jiisuu’ boo’keta daa’antavuu’noo’ka tee’ nkomuru’, baurukaa’koong barenku kompampiaina’ tasi’antamurima, tee ee’nung dera’paa’, orariaravaung ee’noko paa’aravaunge. Kumponinge tee tampa’ tarereruri otokoo’ teka paning-koo. ⁵ Ee’noko masika’antaveriko teie bakaang iri’ke dii’ napo’ tarerurimatoo’naang bera tee domaang otoi-oto’ oko-antaruriainoo’ke basi. Aa’nung neriari otomaung Kumponinge sira’koo te’mung asi’na’mung sirakura’ oko-antamurira. ⁶ Tee’koo doturoturariri otoriaing tee doturotu pankaing dama’nung noru’eri bane parapaara arikananka kune’erima anke kansi’koo. ⁷ Teing arikananka teing diikaang masika’anta paara-kooning, dii’ diikaang baito taa’ni’poi otoaing deeko’. Kooro tee paa’koo makosi bane nta’ke ivai’uma paara-antavaamaunge tee taa’ni’anta-koo, teka diikaang masika’anta kooro-koo dau basinoo’ tampara Kumponing-koo, ee’noko tee’koo teie parapaarai nta’pina’ paararuriko diikaang baito taa’ni’poi otoaing deeko’ tee aa’noaing: daangang, meenasi ee’noko miring pankaing aruriaing Jiisuu’ Karistoo’ toroaravaina’mung.

⁸ Dii’ke tee, bane ooveriaruko’nunge, nka pankaruntomperimaung tee. Napo’ tee’ke enang ooveria’ otoring tee, teka masika’antaveri otong ee’noko karange minku-paa’na’ deto doturarima doturoturarimaung. ⁹ Ai’ dii’ teing tee kapoo’ Jiisuu’koo baitorarima piarorimaung nkaverimaing, tee tee diikaang uraang˜koong domang-anta.

¹⁰ Tee domang-anta tee, teinge nakaro-nupoonge˜ urikupoonge Kumponinge avusiro’ari biraankemuriaina’ naumaariko’ninge tampa’ tasi’koo eentavarima besi’aako’. ¹¹ Tanuaang Meekunge Karistoo’ketainge ee’nara baikearara ee’noko dama’ke meenasi nkavuaina’ sira’puma karantavuriko˜ bateinang ee’noko naninoo’ noru’koo piavoroko’. ¹² Teka Kumponinge nauvuru’ tavo’kuaroo’naang tenang teing otoroko, teka dama’ke, enang-pina’ dii’ otorimaatomanang makosinang. Ee’noko enang Kumponinge tee Tanuaang Meekung paning-eta botovuio’ pakuvuriko nii’ninge tee doorenang tampara sira’paama nauraarieeng, teing nakaro-nupoong biikaang minkunaa ninka manta’pai. Aing teing, bakei, koosinunankai aa’na’ tampa’ oo-koo piavorokoo’.

Kumponinge Bokumuri Miru’muru’na’ Bakaning Meekupoong O’norii’naang

¹³ Tee’koo diikaang onou maamurariri otoriaing Kumponing dotu-antaveriaina’ besi’eri, tarerariritaa’, te’mung Jiisuu’ Karistoo’ sira’pari poaina’mung Kumponinge avusiro’ari biraankemuriaing tee narung nooruupieri. ¹⁴ Ee’noko Kumponing baurukaa’ kara sionuka deentariri tee aarumo mono bakaang pia siong tero amakorariri nkorariko’nung nkoveriauka’. ¹⁵ Teka tee’ ee’na’ tee ee’nara dii’ bokururu’nung meeka’pari otomana’ nari’ dii’ meeka’dariri otoriaing ookara nkoveriaining-koo. ¹⁶ Tee’ Daari Meekung-koo Kumponinge aa’pumana’koo,

“Dii’ meeka’dariri otoriaing, ai’ ning tee meekung.” (Boontu 11:44)

Moo’ Bakei Pankainge Moo’muru’na’ Kumponinge

¹⁷ Kumponing Diuma tamperima tee tanatarariaing, ai’ tee tee ee’nara Kumponing Simpe’nko˜ ookara-koo biikaang nko-nkonanka-koo makosina’, bane aremurii’ naning. Aing batei-koo ootukuning-koo damisimainoo’ke otorimaing-koo diikaang aarumo koontariri otoriaing tee-koo meerupirariri. ¹⁸ Dii’ke noru’eriaing dii’ teing napo’ moo’duru’ning tevung-eta tampoo’ be’koo kaari’dariko’navung-eta diikakatauro biikaang minkunaa sintokosintoi-koong siomperiko, ee’noko tamung moo’duria’ kapoo’ke orariaramaing-pina’ oro’ke, aa’noko kooro ee’noko siliva’. ¹⁹ Teka teie erenge maku’paa’ Jiisuu’ Karistoo’koonge moo’duru’ teu kampianu oroo’dopanu kiiroraa’nu ereng parekavaako’nu-pina’ nari’ miru’ari. ²⁰ Tee tee temu’keta miru’nii’ kansi’ pupu’aravaruko-ita, teka teie Kumponinge oro’antavuu’ tenang tee-koo batei-koo asi’noo’ke dii’ paku-koo. ²¹ Tee-koo ee’nung-koo dii’ke Kumponing masika’antaverimaung, tee aa’nung tee Jiisuu’ boo’keta daa’antavura meenasi avuu’. Tee’koo diikaang masika’anta ee’noko nenneng Kumponing-koo otoaing.

Nii’maikorori’ Aa’na’ Masika’ Piaavarampiai

²² Enang tee dii’ tee kara masikung siomperira diikaang domang tee kiiroraa’dariring ee’noko dii’ piaa masikung ninka piaareeri otoring. Tee’koo naruna’ naruna’ aa’na’ piaareeriai diikaang domang-eta namaia’pina’. ²³ Dii’ teing neraka’daririning, tee booauka’nung-eta ponto’dariru’ning, booaing-eta deea’, teka teieta Kumponing bakaang kara-ita domampari oto’keta. ²⁴ Daari Meekunge aa’pumana’,

“Ookara nantoong biikaang domaang tee baa’ pina’ namu’ke boo’, ee’noko biikaang meenasi tee iioo’ pina’ namu’ke mara’oma tankavarakoo’, teka tee Kumponing bakaang kara tee tee’ nari’ otomatoaing.” (Aisaia’ 40:6-8)

²⁵ Tee aung kara tee ee’nung doorenang tampara dii’koo daankiampimaung.

Ovoring Tee Boia’ Domantoo’ Makosi

¹ Tee’koo dii’ke taapo’ tonta’eriaing teing aing aa’ning: too’deng, tositosi, kara narunge navu, mamairo ee’noko amutemurii’ miring orari-anta. ² Teka dii’ aa’na’ peera-antarariaing tee-koo kara-koo pituaravaung-koo nerakau’nuka noonoo’koo narung-koo peeravoromana’, tee dii’ panka’antaruriaing diikaang nerakung domaang-koo makosina’. ³ Ai’ teie domang-antaruriko dii’ke tee Ovoring tampa’ mantomperu’nung. ⁴ Tee-anko pori otomatoaing tee ee’nara boia’ domantoo’anko nantoonge tompimpau’nung-anko, teka Kumponing-koo dutakanoo’ka tee miru’nisi ee’noko domange dai’. ⁵ Ee’noko dii’ tee’ke tee-pina’ kapang domantoo’nuka otoriaininge tanuaang-aapenava pava-koo tee ninka nari’ kanirariri meeka’nisinuka piristi’navitu deentariri tee’ tanuaang-aapena’ boontunantarima Kumponing dotu-antaveriaina’ Jiisuu’ Karistoo’koo kuunge. ⁶ Ai’ Daari Meekunge ee’ minkuvui otong,

“Ee aing, Saioni-namono-koo tee boia’ domantoo’ e’maniang tumanung bempansing, tere’ ee’nare’ kunku’doi’koo miru’nisi-nare’ ee’noko maku’paa’nare’ke, ee’noko baa tee naning tee masika’antavuaing tee maia’anta-koong deea’.” (Aisaia’ 28:16)

⁷ Dii’koo ee’ning-koo tee, Jiisuu’ Karistoo’, masika’antaverimaing-koo tee ee’nara domange dai’ ee’noko maku’paa’, teka teing-koo tee masika’antavaavaing-koo tee tee maia’anta, tee’ Daari Meekunge aa’pumana’,

“Tere’ ee’nare’ kapanare’ pava kaninukai poore’aama dua’au’nare’ ookutunava-koo e’manianare’ tumanare’ deempario’ tasi’pau’ dama’ke.” (Kena 118:22)

⁸ Ee’noko

“Tere’ tere’ ee’nare’ nantoong tupang-antavurira dua’antavuriainare’ teing.” (Aisaia’ 8:14)

Teing tupampariainoo’ tee teinge kara meumpaavaung-koo tee’, teing tee’ oro’nuka dua’koo miru’uru’na’. ⁹ Teka dii’ teing ee’ning Dauraronge˜ miru’nii’nuka piristi’koo, meekavitu, Kumponing baka bakanupoong, dii’ke kapoo’ bakaang nko-nkonanka tampeng sira’antaevurimatoaining, tee ee’nara dii’ mutaanang-eta bokururira bakaang araka ta’nimpaarii’aape si’duru’. ¹⁰ Tero tee dii’ nantoong deeaing, teka enang tee dii’ teing Kumponing bakaning nantoong deentaririning. Tenang ee’nang tee Kumponing bakaang piaa komperiaruko’ning, teka enang komperi otong tee piaa.

Koomariri O’noriaing Sirakura’

(2:11–3:22)

Kumponing Bakaang Botovotonaa’nuka Makosina’ O’noriaing

¹¹ Ee mmaikori’, dii’ teing tavora-nupoong ee’noko damisimainku-pina’ anke kansi’koo otoriko ninge eturampiri aa’dampimang: Donta’dariri otoriai mono-aapening piananka-ita teing dii’ domang turanturi otorimaing-eta. ¹² Mutaanang-nupoong-ankoi tampa’ mataurariri otorimaatoai ee’noko oraka’ nkonuka tantaariaing deeko’ tenang Kumponinge kansi’ beero’uainang diikaang nko-nko tampara tasi’paara Kumponing daangampaavaing teinge.

¹³ Ookara-koo teing-koo nantoong-koo pankenanka-koo boong otorimaatoai Kumponing dotu-antaverii’naang, aa’noko tee daurarong, ee’noko teing ovo’ma’nuka, ¹⁴ ai’ teing teing Kumponinge botovuru’ning oreng mero’aarima ee’noko tampeng daangampaarii’naang. ¹⁵ Ai’ Kumponing bakaang pia tee ee’ otong’: Dii’ke tampa’nkoi dooroong-antavereriaing teing mutaanang-nupoong kara tamunsi’nung minkuaamaing. ¹⁶ Masika’ dii’ Moosesi bakaang botoi dai’daria’ otong, teka ninge aa’dampimang dii’ke kapoo’ orara nkoveriauka’ dakaraka’peri aa’perima, “Karistoo’ke Moosesi bakaang boto-ita unaa-antamuio’ ning taura’mari o’nong.” A, tee’ deea’. Karistoo’ke unaa-antamuru’nung nii’ke kapoo’ tampeng naing nkoampii’naang. Kumponing bakaning botovotonaa’nuka makosina’ otorimaatoaing. ¹⁷ Nantoong ookara makosina’ deto basi-antavererimaatoai. Teing Karistoo’koo dii’marang piaaverererimaatoai. Kumponing-koo aa’na’ amaiaa’dori otoriai, ee’noko kansi’koong daurarong deto basi-antaverimatoai.

Sisikeera Tora’koo Taura’mariaing Karistoo’ Bakaang Aarumo Siompampiri

¹⁸ Dii’ bautaranuka diikaning pankeng tanataraarimaing-ankoi boong-koo otorimaatoai teing pankaing-antaverereri, tampa’ nkoraarimaing naing-koo deea’, teka teing oraka’ nkoraarimaing-koo nari’. ¹⁹ Naning tamung sisikeera-antavaako taura’paravaing deeko’ Kumponing dotu-anta-koo noru’ui, Kumponinge tee biraankevuaing tee. ²⁰ Moo’ aming nkaveriaing kapoo’ orara nkoveriko mura’daariko taura’dariaing deeko’? Teka kapoo’ tampara nkoverima baike kune’erii’naang dooroontariri otoriaing deeko’ Kumponinge biraankeruriaing tee-koo. ²¹ Ai’ dii’ teing tee’koo Kumponinge bokururu’ning. Karistoo’ tee dii’koo baike kune’uu’nung dii’ tee’ nari’ tee siomperi nkorarii’naang nau-antarurima. ²² Teie tee oraka’nko nkovua’, bakaang be’duu’koo tosi minkuvuko taaravaava’. ²³ Tenang teinge tee poore’aako teie tee teing poore’uria’ maku’koo. Sisikeera napo’ tora’pura mau’uria’ teing, teka tee Kumponing-koo baka aroo’aru’ koonto’na’ simpe’nko˜ noru’ui. ²⁴ Teie tee baka bakaang monoi ookara oraka’ nkonanka nkavuu’ teka aa’barata’koo, nii’ tee-koo oraka’ nko-koo moompira tee-koo aarumo koonto’ narung-koo domamariri o’norii’naang. Dii’ teing teie dato’nankai tee-koonge unaa-antarurining. ²⁵ Ai’ dii’ teing poorariru’ning sipisipi’pina’, teka enang tororaririning tee-anko diikaang tanuaang sipisipi’pina’ tanatarurimaung-anko.

Nii’ Nampeesinii’nuka Tampara Aarumo Ninka O’noriaina’

¹ Dii’ maniku’ tee’ke, dii’unkaampi-koo boong otorimaatoainge ee’noko teing-koo nii’ning Kumponing bakaang kara siompaavaing deeko’ teie tampara aarumoi dii’ bii’ankaampi diikaange Kumponing-aape barampereriaing, karai deea’. ² Tenang teinge ooaama tee diikaang mee’du’piari nari’ oto’ teing bere’ariaing. ³ Diikaang tampa’ oro’na’ mono-koo dama’dunoo’ deemparavauka’ tampa’ simpi’dovantarima diikaning dapo ee’noko kapoo’ tampeng kooro dovang-kooning si’darima napo’ mononopa’ tampa’ oro’ kuruntarima. ⁴ Teka nepunepu’ diikaang tee tee-koo naning-koo domang-koo kuung otoai teing ninka kapoo’ aarumo tampeng paa’koo makosi deeaing ninka aa’ning ninka: banainge oto’ ee’noko domang dooroonto’. Aing teing ee’ning Kumponing-koo dutakanoo’ke bakei dakausi’ masikeng. ⁵ Tee’ nari’ otorimaatoaing teing temu’nupoong maniku’ meekupoong Kumponing-koo baitoariko’ning nepu’ariko’na’ bii’unkaampi-koo boong otoroi. ⁶ Tee’ ee’na’ Seera’ke Eebaraami’ kara taaravuma siompuko’na’ ovoring tampuma tee. Ee’noko dii’ teing ee’ning teni baurukaa’ dii’ke tampa’ nkorarimatoaing deeko’ baru’ aroreria’ otori.

⁷ Napo’ tee’ nari’ dii’ bii’unkaampi teing ninka dii’ankaampi ninka mataurariri otorimaatoai makosina’ deto deeng-antavereri teing baru’ iri’oroaing deempariko, ai’ teing teinge dii’ ninka nari’ tee barenku okovuriaining biraankerurira domang-antaruriaing-koo. Tee’ nkorariaing diikaang kunsi avo’aravaroo’naang.

Doong Kante Teing Nii’ning Nantoong Tampa’ Nkoarampimaatoaing

⁸ Tee-koo asi’noo’ke aa’dampimang: Dii’ ookara nari’ marireeri otorimaatoaing, nari’ mantonteeri namaia’pina’ mantontariri tampa’ domang piaareerima ee’noko doonko noru’dariri. ⁹ Orara orarai maku’eriauka’, barakosi’ barakosi’ke maku’eriauka’, teka aampari’eri biraanke-antareerimaatoai, ai’ dii’ teing tee’ nko-koo bokururu’ning dii’ke bakaang biraanke nkaverii’naang. ¹⁰ Tee’ Daari Meekunge aa’pumana’,

“Baa tee naning domampari oto’koo piavoi otoing doong tampeng oovuu’naang piavora, tee oraka’ karoauka’ ee’noko teie tee daang minkuvuauka’. ¹¹ Ee’noko oraka’ nko-eta bere’arara tampa’nko nkovuaing, ee’noko teie tee mooa besi’uma siompui otoaing. ¹² Ai’ teie Ovoringe teing koonto’nuka tampa’ oovuri tarevurimaung ee’noko bakaang punkaa’ tee daate’ari otomaung teing biikaang kunsi tampa’ taara-koo. Teka Ovoring bakaang oing tee teing-eta kapoo’ orara nkoaamaing-eta munte’uri ako’ toroari otong.” (Kena 34:12-16)

Tampa’ Nkoarampiko Sisikeera Tora’antamaariko Deeko’ Makosi

¹³ Dii’ enang baie baikerurii’naang dii’ kapoo’ tampara narung siomperimaing deeko’? ¹⁴ Teka bane kapoo’ tampara nkoverima baike kune’eriaing deeko’ dii’ teing Kumponinge tee-koo biraankeruriaining. Tee’ Daari Meekunge aa’pumana’,

“Nantoonge mau’daariko arorerima domang manki’doriauka’.” (Aisaia’ 8:12)

¹⁵ Teka diikaang domange Karistoo’ pankaing-antaveri otorimaatoai diikaang Ovoring deeng-antaveri. Ookara batei-koo maamurariri otorimaatoai nantoong nia’daariaining nauereriaina’ okora’noo’ dii’ke tee Ovoring bokururiaing nemperi otorimaung-koo, teka dooroontariri doonko noru’dariri tee’ nauereriai. ¹⁶ Ee’noko tarerariri otoriai diikaang domang kiiroraa’ari oto’koo teing diikaang tampara aarumo Karistoo’koo kuunge nkoverimaung oraka’ minkuaamaing maia’oroaina’ tee’ nkoraarimaung-koo. ¹⁷ Kapoo’ tampara nkoverima baike Kumponinge taura’puing kune’koo tee tampa’, teka kapoo’ orara nkoverima deeko’ oraka’. ¹⁸ Ai’ Karistoo’ tee tee’ nari’ bou’ nantoong biikaang oraka’ nkonanka-koo. Terong-koo ookara daka’pui namu’ke pareka bakevuu’, tee ee’nara koonto’ deemparitaa’ nii’ koonto’nuka deeaing Kumponing-koo tavo’murii’naang teie. Mono nameng dupisi’aio’ tee’ boo’paru’, teka Kumponing bakaang Tanuaange daa’uio’ domampari otong.

¹⁹ Tenang bakaang mono boo’pari otoko tanuaang-naung tee boo’nuka-koo daankiaru’ kiimatanoo’ke. ²⁰ Aing teing ee’ning tanuaananka nantoong urikupoong-kooning Kumponing taaravaavaruko’ ning, teing bere’arii’naang Kumponinge pankaroong nempuriko’ning tenang Nooa’ke tee aaka’nareng ta’nampuko’nang. Teka oki’ning nantoong ˜beenaumo-taa naing aareri˜koo ntong-koo daue otorou’ning domampariru’. ²¹ Ntonge aareri-koo kuung otoroko tampoo’aape domampariainoo’ taa’bakavuru’na’ nii’ tee’ nari’ kompampima Karistoo’koo kuung o’nori domamariainoo’ basimarii’naang bakaang iri’ke boo’keta daa’antavuu’nunge pakumuriko. Tee tee ntong-koo minkie meeka’anta nkavampimaung ku’mi’ mono-ita kui-anta-koong deea’ Kumponinge tampeng-pina’ oomurii’naang, teka tee domang kiiroraa’keta maraka-anta Kumponing-koo Karistoo’ baitoampiri nari’ oto’koong teie domang-antamurii’naang. ²² Tee tee ee’nara boo’keta daa’arara paning-koo deto bera Kumponing-koo tampavine-koo otomaung, ookara kapoo’koo dau, aa’ning-koo: koosinunanka, arekee’ oro’ning ovontung ee’noko iri’po’nupoong.

Purimariai Parapaara Pankainge Manki’antamuriko

Urikung Onou Sipampiaing Orara Aarumo Nari’

¹ Enang tee, Karistoo’ke bakaang monoi baike tora’puu’nung-koo dii’ tee’ nari’ uro’kanoo’ka purintariri aroo’dariaing temurii’ baike kune’koo, ai’ baa tee naning baike kune’uma tee tee enang oraka’ nko-ita bakearing. ² Tee tee enang bakaang mono ninka domampari otoi emu’keta deto mono bakaang pia siompuauka’, teka Kumponing bakaang pia siompuaing. ³ Tee tee dii’ke teing-pina’ nari’ mutaanang-nupoong piavoromana’ aing aa’ning nkoveriauka’ temu’ nkoveriko’na’: maimaia’na’ oto’, mono bakaang pia siong, purinto’ naru’ke kanu’anta, taamang tovang nainai nai-koo deikoo’, ee’noko daang-koong dootuu’, tee maarekusi’. Batei temurii’ nko-koo tero tankinuing botu te’. ⁴ Teing teing enang ta’nimparirining dii’ teing ninka nari’ tapo’dariaruio’ tamung iri’ o’anta-koo, ee’noko oraka’ minkuraarikoo’. ⁵ Teka teinge tee teka dama’ toosiaavaing Kumponing ninka ookara nantoong simpe’koo maamuari otoing ninka: boo’nuka ee’noko domantoo’nuka nari’. ⁶ Ai’ teie Kumponinge teing temu’ boorou’ning tee’ nari’ tampara doorenang taara-antavuru’ teing teing biikaang tanuaang domampariri otoroo’naang Kumponing domampari otomana’ nari’. Ookara nantoong ninka nari’ biikaang mono boo’koo barakosi’nii’nuka deempariko teie tee daankinang taara-antavuru’nung.

Teing Avuavu’ Kumponing-etaing Kompampiri Tampa’ Mintoomariaing

⁷ Ookara kapoo’nanka aung kansi’koonanka o’doma due’umaang. Tee’koo mataurariri tarerariri otoriaing tampa’ kunsirariaina’. ⁸ Ookara-koo daua naruna’ naruna’ diikaang domang-eta tampa’ piaareeri otorimaatoai, ai’ nii’ke nantoong piaavarampima deeko’ biikaang oraka’ nkonanka mmau’ daka’pampipeu’. ⁹ Diikaning pavananka-koo tampa’ onkeonke’deerimaatoaing baru’ pore’pina’ noru’erima munkumunkureeria’. ¹⁰ Kumponinge avuavu’ naruna’ naruna’ aruru’na’ makosina’ komperi pakureerimaatoai. Tee’koo dii’ teing kapoo’ amutemurii’ Kumponinge aruru’ning tampeng tare-nupoong deentariaing. ¹¹ Kara sira’perima deeko’ tee’ Kumponinge naururiaina’ masika’ sira’periai. Nantoong pakuererima deeko’ Kumponinge iri’ arurimana’ siomperi pakuereriai, ookara-koo kapoo’ nanka-koo Kumponing pankaimparavaina’ Jiisuu’ Karistoo’koo kuunge. Miring ee’noko meenasi pankaing okovui otomatoaing ookutunung batei-koo o’domaropa-koo. Ee’, masikung.

¹² Ee maikori’, ta’niniriauka’ dii’ tee-koo nta’pina’ mantong-koo parapaara-koo dii’koo poing-koo paararurima. Tee kapoo’ ta’nimpaarii’pina’ noru’eriauka’. ¹³ Teka baru’noo’ doturariaing dii’ke Karistoo’ siomperima arikung kune’uu’na’ nari’, ee’ noru’erima tee’ nkomarimaung-koo dotumariaing tenang tee bakaang meenasi oro’paravainang.

Nii’ Dotumariaing Makosi Sisikeera Tora’pampira Karistoo’ke Tora’puu’na’

¹⁴ Karistoo’nung miring komperimaung-koo oraka’ minkuraariko tee doturariaing, ai’ tee’ minkuraarima sira’paamaung tee Tanuaang Meekung Kumponing bakaang meenasi-po’nung dii’koo otomaung. ¹⁵ Teka dii’ orara aarumo siomperi sisikeerang-antarariko taara-koo bakei piamoa’ aing ee’ oro’ nkoverima: dupisi’anta, bakiaa’nko, oraka’nko, nii’noo’ kakarua’dorima. ¹⁶ Teka Karistoo’koo kuung otoritaa’ baike kune’erima maia’doria’ Kumponing pankaing-antaveriaing Karistoo’ bakaang miring komperimaung-koo. ¹⁷ Ai’ batei tee poi otong teie bakanava’kooning paara-anta-koong. Ee’noko nii’keta tutumparavaing deeko’ teing Kumponing bakaang doorenang tampara siompaava’ otomaing are’ke botu deempariaing? ¹⁸ Tee’ Daari Meekunge aa’pumana’,

“Teing koonto’nuka kakaue domampariaing deeko’, teing nantoong oreng Kumponing piavoroaing are’ke oro’pariaing?” (Mirumiru’ 11:21)

¹⁹ Tee’koo teing nantoong Kumponing bakaang pia-koo otoroi baike kune’aavaining, makosi tampa’ nari’ nkoaamatoaing bii’ka avariri tee-koo teing nkovuru’nung bakaang tare-koo, biikaang tarenara mutekaro’ masika’antavai.

Teinge Dootuu’koo Pankenge Tampa’ Tanatavaariai Kumponing Bakanaving

¹ Tee’koo dii’ dootuu’koo urantanuka tasi’antarampimang nkorariaina’ ninge dii’ ninka nari’ oro’ke dootuu’koo urantai, ninge ee’nara Karistoo’ bakaang baike koonto’ ooamira sira’pamaunge, ee’noko napo’ tee’ nari’ dii’ ninka kompampainge tee meenasi Karistoo’ bakaang oro’antavuainang. ² Aa’dampimang: Kumponing bakanavitu tampa’ tanataverererimaatoai teing dii’ke tanata-koo si’duru’ning, tamung konteroritaa’ deea’, teka pia-ita nkoveriai Kumponinge piavomana’. Moo’ narung noru’eri tanataverereriauka’, teka aroo’keta tanataverereriai. ³ Apoapoo’erereriauka’ teing tanataverererimaing teka tampa’ ooraari siontaariaina’ nkorariai. ⁴ Ee’noko tenang tee Tanatanara Pankaing oro’paravainang dii’ke moo’ tee meenasi-po’nung paa’aravauka’nung nkaveriaing. ⁵ Ee’noko dii’ napo’ nemaa’ teie diikaning urantanuka-koo boong otorimaatoai amaiaa’dori dii’ka-koo meu’ke, ai’ Daari Meekunge ee’ minkuvui otong:

Kumponinge tee teing bii’ka daangamparimaing too’dempurima teing boonko noru’arimaing avusiro’ari pakuvurikoo’. (Mirumiru’ 3:34)

Boonkomariri o’norimaatoai Kumponing Bakaang Tanka’koo O’nori

⁶ Boonkorariri otorimaatoai dii’ka-koo tee-koo Kumponing-koo tanka’ purinto’koo kuung otori, tee batei makotuko tee deto si’duriaing dii’. ⁷ Diikaang ookara manki’nanka tee narung-koo siperimaatoai, ai’ dii’ teing teie piaaruri tanataruri otong. ⁸ Teka tanatarariri ee’noko tarerariri otorimaatoai. Tee diikaang karenung Sietani’ tee laioni-pina’ kururuu’kuma avitoitoi nanumaung besi’uma naning avoro’antavura dunkumpuaing. ⁹ Tanka’ni’periai tee diikaang masika’anta-koo e’maniri, ee’ noru’erima Karistoo’koo nii’maikorori’ tee’ nari’ sisikeera kune’aama Sietani’ bakaang avoro’anta dimpa’aakoo’. ¹⁰ A’noo’ oki’ning batei-koo sisikeera tora’periaing. Teketa teie Kumponinge piaa baukoi baka unaa-antarurira ee’noko e’mang-antarurira puring-antaruriaing dii’, ai’ teie tero bokururu’nung dii’ke domaang oparavaung meenasi-po’nung nkaverii’naang Karistoo’koo kuunge. ¹¹ Tee tee tee’ nari’ tanatavari otoaing ootukunung batei-koo o’domaropa-koo. Masikung.

Si’nara’naare

¹² Aung ane’ karavoto˜ apukane’ ninge minkuanko Sivanusie pakumui daarivuing, teie mmaiko’ke ninge masika’antavamaunge, dii’ puring-anta-koo ee’noko aung tee Kumponing bakaang piaa dii’koo sira’anta-koo. Ee’nung-koo purintariri otoriaing.

¹³ Aing dootuu’nupoong Karistoo’navitu anke Babiloni’ke o’norimanavitue, Kumponinge dii’pina’ nari’ miru’muru’navitue tampara tampampimaang dii’koo, tee ninka nnuring tampamaung ninka Maaka’ ninka nari’. Onkeonke’deeriai dii’ naruna’ naruna’ piaa taa’ni’antaveri. ¹⁴ Mooa tee dii’koo ookara-koo tee’ nari’ otoaing dii’koo Karistoo’koo otorining-koo. Tee’ nari’.