Maki

MAKI

é sanmankanmɛɛ mín nzɛ́wɛ

Ɛnza Ngílisi kó ó lɔ́

Kunnanfwee ŋo

Maki yɛ kitabu o sɛ́wɛnin ndɛ́ɛ Kílisi kwɔmɔɔn wée lúman. Ólu bɛ́ tɛ́ɛ Yawudhyaa le lé. Kitabu miin ngɔɔnnɔn, Maki é yáala án nan ko Yaya Bátizelikɛbhaa é Ɛnza mbátize. Aa yáala án nan ikwɔ ko kɛ Ɛnza ndó i kéenan dhyɛ́ o lɔ, Sɔtaannan é a lɔ́swaan kɛ dɛ́sɛ. O kwɔ, Ɛnza ndɛ́ɛ mɔɔn olu kíila óni kɛ í kála óni kɛ yangalotɔ olu lakɛ́ɛnya. A tɛ́ɛ o bháala olu bɛ́ kɛ́la ni kúnndiiya le lé.

Kitabu miin ngɔɔnnɔn, mɔɔn olu tɛ́ bhɔ́la Ɛnza ŋan kó olu ɲánle cɛ́ɛne ne. Kɛ mansɔɔ, aa káwananngo olu kɛla tó mɔɔn olu ɲáanli olu kɛ́. O lɔ, a tɛ wɛ́ɛ a kwɔmɔɔn olu lasowi fɔ síɲan sawa, olu man o mánfa. O kó olu tínminnin ngwɔ, Yawudhyaa olu yɛ́ ɲɛ́nmɔɔn olu i wíi Ɛnza nganman, kɛ a kɔɔ fɔ́. Aa sayakɛ yíi o man, íi a sú o lo. A tée sawaɲɔɔnlo ŋo, aa kúun kɛ bhɔ́ sú olu cɛ́man.

Wáa, a sayakɛnin ŋo kwɔ, swáasi lɔ é fɔ́ ko: «Síka tɛ́ lɔ, cɛ miin ndɛ́ɛ Ala dhyé ne lé tinɲan ín ne» (15.39).

Maki yɛ́ Kitabu o lɔ́taaɲan ó

Yaya Bátizelikɛbhaa yɛ́ lakawanin ó 1.1-8

Ɛnza bátizenin ngwɔ, Sɔtaannan é a lɔ́swaannan kɛ dɛ́sɛ 1.9-13

Ɛnza ɲɛ́n bháala o Galile mala o lɔ 1.14--9.50

Ɛnza ŋé bhɔ́la Galile kɛ táa Yeluzalɛmu10.1-52

Ɛnza ɲɛ́n dínɲanlɔtɛɛ o tɔ́ óni a sayako o 11.1--15.47

Ɛnza ngúun ngó o 16.1-8

Ɛnza nguunnin ŋóo i yɛ́ɛ yáala a yɛ́ kaamɔɔndhye ŋolu lá óni kɛ í bhyáashaa 16.9-20

Yaya Bátizelikɛbhaa yɛ lakawaninkan ŋo

Matiyu 3.1-12; Luka 3.10-18; Yaya 1.19-28

¹Sanmankanmɛɛ mín ŋé ƐnzaNgílisi kofɔla, Ala dhyénjɛ o, oo í lámyaanla tá ne. ²Kóman míin né sɛwɛnin ndɛ́ɛ céla Ezayi yɛ́ kitabu o kɔ́ɔnnɔn kó:

«Né Ala yáa ɲɛ́n céladhye ŋó cé í ɲɛn,

Kɛ i yɛ́ sháa ó lɔ́bhyɛ.

³Mɔɔn lɔ́ é gbáanan dhyɛ́ ó lɔ kó:

‹Áa Mantii ó yɛ́ sháa ó lálaa,

áa a tínminnaa ólu látee.› »

⁴Yaya Bátizelikɛbhaa é a yɛ́ɛ yáa dhyɛ́ o lɔ o bhóo ó lé mán. A tɛɛ a lásela mɔɔn ólu mán kó íi díminsa kɛ́ fala í yɛ́ kóyoo ŋólu la kɛ́ bátize ké í yɛ́ yúumu ólu a yafa i mán. ⁵Zude mála o mɔɔn olu bɛ́, óni Yeluzalɛmuka ólu tɛ́ɛ nánla a saala. I tɛɛ í lálabhɔ la í yɛ́ yúumu olu mán bɛ́ ɲankɔɔ lé, tó Yaya tɛ́ɛ i bátize bhá ó lɔ, mín ndɔ́ɔ kó Zuludɛn.

⁶Deeke mín ndɛ́ɛ Yaya kannan, o lálaanin ndɛ́ɛ ɲɔ́ɔnmɛɛnshe le la, a yɛ cɛ́siiyaa o tɛ́ɛ gboo lé le. A tɛɛ a yɛ́ɛ bhálola gɔ́tiba ó léelu la, óni wówoninnduu o. ⁷A tɛɛ a lásela yaman o mán kó: «Mín ngáa nan né kwɔ, ó yɛ́ sébhaaya o á bwó né tá ó lé. Né mánngan kɛ́ manyii kɛ́ a yɛ́ sawaa o yúu ó fwée. ⁸Née a bátize jí lé lɔ, wáa ale káa a bátize Ala Ní Sɛnnɛnyanin ŋó lé la.»

Ɛnza ɲɛn bátizeliko óni a yɛ lɔswaannin o

Matiyu 3.13--4.11; Luka 3.21-22; 4.1-13

⁹O wáati o lɔ, Ɛnza ŋé nan kɛ bhɔ́ Galile só lɔ la, mín ndɔ́ɔ kó Nazalɛti. Tó Yaya é a bátizeZuludɛn o lɔ. ¹⁰A tɛ́ɛ bhɔ́la jí ó lɔ́ wáati o mínnɔn, aa sángboo o yé í lákala, tó kɛ Ala Ní Sɛnnɛnyanin ŋó yé yíila a ka ŋóyoo biininngbɛ. ¹¹Kómankan nɔ é bhɔ́ sá ŋó lɔ kɛ fɔ kó: «Íle lée nyenjɛ óle, mín ŋan dí ɲɛn koyoongɛ. Íle lée né tá nisɔdhyaa o le.»

¹²Oo kɛ́ tɛ́nmɛn, Ala Ní Sɛnnɛnyanin ŋóo a lataa dhyɛ́ o ka. ¹³Aa tee bínaannin le kɛ́ dhyɛ́ o ka, ké Sɔtaannan é a lɔ́swaannan. A tɛ́ɛ a yɛ dínɲanlɔtɛɛ ó kɛ́la bínnɔnsoo ó léelu cɛ́man. Malɛɛka olu tɛ́ɛ gbáamyaanla a lá.

Ɛnza ɲɛn kaamɔɔndhye njónan ólu

Matiyu 4.12-22; Luka 4.14-15; 5.1-11

¹⁴Yaya bhyáanin ŋó kwɔ́ kasola, Ɛnza ŋé táa Ala yɛ sanmankanmɛɛ ó láse Galile mála o lɔ. ¹⁵A tɛɛ fɔ́la kó: «Wáati mín ŋé sii, o wáati o wɛ́ɛ sé. Ala yɛ́ Mansaya ó wɛ́ɛ í mángbaa án nan. Áa a yóo ólu yɛ́ɛman, áa sɔ́n sanmankanmɛɛ ó mán.»

¹⁶A tínminndɔ o lé Galile bhá lá o la, aa yɔfiibhaa fyáa yé, Simɔn ní a lɔɔcɛ Andele. I tɛ́ɛ yɔ́ɔ myáan bhá ó lɔ. ¹⁷Ɛnza é fɔ i yɛ kó: «Áa bhyáa ngwɔ́, ɲáan a kɛ́ mɔɔn ɲíinmaa lu le ké áa i lanan né mán.» ¹⁸O ywáaninngee ŋo lɔ ii í kwɔ́ kɛ́ i yɛ yɔ ólu lá téeman kɛ bhyáa Ɛnza ngwɔ.

¹⁹Ɛnza ŋé í cɛ́bhɔ o ywáa ó lá mínngɛ dɔ́ɔnin, aa Zebede dhyénjɛ fyáa ó yé, Zaki óni a lɔɔcɛ Yaya. I tɛɛ i yɛ yɔ ólu lɔ́bhyɛnan kúun ŋó kɔ́ɔnnɔn. ²⁰O lée kɛ i kíi ó lé Ɛnza ngwɔ, o ywáaninngee ŋó lɔ. Ii í kwɔ́ kɛ́ i facɛ Zebede óni bháalakɛdhye ŋolu lá kúun ŋó kɔ́ɔnnɔn, tó kɛ í bhyáa Ɛnza ngwɔ́ka.

Ɛnza ŋé lámansayoo ngbɛnan cɛ lɔ́ fɛ́

Luka 4.31-37

²¹Ɛnza ni a yɛ kaamɔɔndhye ŋólu táa só lɔ́la mín ndɔ́ɔ kó Kapɛnamu. Lɔnwɛɛnlilo ŋo la, aa lo sɛ́ɛbho ŋo kɔ́ɔnnɔn, tó kɛ lakawanin kɛ. ²²Ii káwakoya a yɛ́ mɔɔn kalanzeɲan ó kósɔn, kɛ mansɔɔ a tɛ́ɛ lakawanin kɛla óyoo fáan é mɔɔn mín móo, wáa a tɛ tɛ́ a kɛ́la óyoo sɛliya kaamɔɔn olu.

²³Aa tó mɔɔn ólu kalanan í yɛ́ sɛ́ɛbho ŋo kɔ́ɔnnɔn, tó cɛ lámansayoondɔ lɔ́ é í wíi kɛ gbáa, tó kɛ fɔ kó: ²⁴«Ee! ƐnzaNazalɛtika, Mínnɛɛn lée né ní i lé cɛ? I wɛ́ɛ nan kɛ́ án hálaki a? Ii mɔɔn mín né, ní ó lɔ. Ile lée Ala yɛ́ céladhye nzɛ́nnɛnyanin ŋó lé.»

²⁵Ɛnza ŋé jáman a kunnan kɛ́ fɔ a yɛ kó: «I lúmandhye! Bhɔ́ cɛ míin nɔ́n!» ²⁶Lámansayoo ŋóo cɛ o lámaanmaan o le lɔ, tó kɛ bhɔ́ a fɛ́ ni gbáa ne. ²⁷O lée mɔɔn bɛ́ kɔɔnnɔnfii, fɔ́ ii ɲɔ́ɔn mánɲaankɛla kó: «Ɛ́ɛ, aa fɔ́la míin mán díi? Kaangwaa lée nín nɛ́, aa a kɛ́la ni sébhaaya le lé! Aa nɔn lála lámansayoo nú bɛ́ ka, a kɛ mín nvɔ i yɛ, ii o kɛ.» ²⁸O ywáaninngee ŋo lɔ, Ɛnza ndɔ́ɔ óo búubhɛɛ Galile mála o kɔ́ɔnnɔn ywáa ó bɛ́ lɔ.

Ɛnza ŋé yangalotɔ shɛ́ɛman nakɛɛnyala

Matiyu 8.14-17; Luka 4.38-41

²⁹Ɛnza ni Zaki óni Yaya lúu bhɔ́ sɛ́ɛbho ŋo lá tɛ́nmɛn, ii táa Simɔn ní Andele bhóo lúman. ³⁰Simɔn bhyáamuso o lánin ndɛ́ɛ fásigban lɔ́ gbála ŋo ka. Ɛnza nuu nan tɛ́nmɛn, ii muso o kofɔ a yɛ. ³¹Aa í mángbaa yangalotɔ o la, kɛ a myaan a bhóo ó mán, tó kɛ a láwii. O lée kɛ́ fásigban o bhɔ́ o lé muso o fási o lɔ. Muso óo gbáamyaan í lá.

³²Ywáa oo sé mínngɛ, teekun ŋóo bénin ngwɔ́, mɔɔn olu nan yangalotɔ olu ní lámansayoondɔ ólu lé a saala. ³³Só mɔɔn olu bɛ́ ládhyɛnin ndɛ́ɛ bhó ŋo lákɔɔ. ³⁴Ɛnza ŋé yangalotɔ shɛ́ɛman nákɛɛnya, óni aa lámansayoo ngbɛ́ mɔɔn shɛ́ɛman nvɛ́. A tɛ́ tɛ́ lámansayoo ŋólu tóla yénɔn ké ii kóman, kɛ mansɔɔ olu tɛ́ɛ a lɔ.

Ɛnza ŋé Galile yamaanlɔ mɔɔn olu lákawaninla

Luka 4.42-44

³⁵Fáyidiwi ó mán, Ɛnza ŋé bhɔ́ kɛ́ táa ywáamanfanin nɔ́ lɔ́, kɛ í sɛ́ɛ. ³⁶Simɔn ní a táamanɲɔɔn ólu táa a ɲíin. ³⁷Ii a yé mínngɛ, ii fɔ a yɛ kó: «Mɔɔn olu bɛ́ɛ í ɲíinan.» ³⁸Aa i yawi kó: «Án ndáa ywáa gbɛ́ɛ lɔ án namiinnzo olu la ké ndáa sanmankanmɛɛ ó láse yénɔn, kɛ mansɔɔ né nankun ŋó lée wé.» ³⁹O lée kɛ́ a táa ó lé Galile yamaan o ywáa bɛ́ lɔ. A tɛɛ lakawanin kɛla í yɛ́ sɛ́ɛbho ŋólu kɔ́ɔnnɔn, óni kɛ lámansayoo ŋólu gbɛ́.

Ɛnza ŋé kwáantɔ lɔ́ lákɛɛnyala

Matiyu 8.1-4; Luka 5.12-16

⁴⁰Tee lɔ́ mán, kwáantɔ lɔ́ é nan í kúnmɛɛn nɔkɛɛ Ɛnza ngɛɛnnan kɛ a dɛ́li, kɛ fɔ a yɛ kó: «Ni i kɛ́ sɔ́n, ii sé kɛ́ né kɛ́ɛnya.» ⁴¹A mánɲwaan lo ngóyoo ŋó mán Ɛnza nɔn, aa í bhóo láwii kɛ í bhóo túu a lá, tó kɛ fɔ a yɛ kó: «Ŋwɛ́ɛn sɔ́n, kɛ́ɛnya!» ⁴²Í kɔ́lɔ téeman, kwáan óo bhɔ́ cɛ ó fási o lɔ́, aa sɛ́nnɛnya. ⁴³Aa fɔ cɛ o yɛ kɛ́ a mangbɛya, tó kɛ a lakwɔsɛɛ í kɔ́lɔ kó: ⁴⁴«Í kɛ́nan fɔ mɔɔn sí yɛ́ kó né lée í lakɛ́ɛnya lɛ. Waa táa i yɛ́ɛ yáa faanlɛɛɲansebhaa ó lá. Musa é faanlɛɛ mín ngófɔ sɛ́nnɛnyali ó ta fa nvɛ́, ii ó bhɔ́ kɛ́ a yáa mɔɔn ólu lá kó i wɛ́ɛ kɛ́ɛnya.»

⁴⁵Ó cɛ o mán sé í lúmandhyela o kó ó mán. Aa táa o kó ó búubhɛɛ ywáa bɛ́ lɔ. O lé yɛ́ɛ kósɔn, Ɛnza ndɛ́ tɛ́ sháa lónan só lɔ́ látee lɔ́ bhée. A tɛ́ɛ tóla só ólu kwɔ́ka né, waa mɔɔn ólu tɛ́ɛ bhɔ́la lé fán ŋo bɛ́ kɛ́nan a saala.

Ɛnza ŋé kuugba lɔ́ lákɛɛnyala

Matiyu 9.1-8; Luka 5.17-26

¹Tee láman tínminnin ŋó kwɔ, Ɛnza ŋé í kwɔ́sɛɛ Kapɛnamu. Mɔɔn ólu myɛ́n mínngɛ kó aa bhónan, ²yaman óo nan í fá bhó ŋó kɔ́ɔnnɔn, óni bhó ŋo lákɔɔ, yáanin tínminnaa tɛ́ tɛ́ bhée. A tɛ́ɛ Ala saaninkan ŋo fɔ́la í yɛ. ³O lée tó í lɔ́, mɔɔn lɔ́luu í kún nanbhɔ ni kuugbacɛ kéene. O tɛ́ɛcɛ náannin bhóokɔɔ. ⁴Yaman o kósɔn lá o kɔɔ, i man sháa sɔɔ kɛ táa a yáa Ɛnza nan. Ii í yɛ́ɛ bhó ŋó kúnnɔn, kɛ jáan bhɔ́ sánzaa ŋo lá Ɛnza nziilaa o lɔ, tó kɛ kuugba óni a yɛ láfe ŋo láyii bhó ŋó kɔ́ɔnnɔn Ɛnza ngɛ́ɛnnan. ⁵Ɛnza ŋé a yé kó ó mɔɔn ólu wɛɛ lá ale la mínngɛ, aa fɔ kuugba ó yɛ kó: «Nyenjɛ, i yɛ́ yúumu ólu wɛ́ɛ yafa i man!» ⁶Sɛliya kaamɔɔn lɔ́lu síininndɛ́ɛ yénɔn, olu yacesii lú kɛ́ í kɔ́ɔnnɔn kó: ⁷«Mínnɛɛn lée cɛ míin lónan kóman súu míin nvɔ́ ó lɔ? A wɛɛ Ala tɔ́ɔ o cáan. Yɛ́ɛtii sé kɛ́ mɔɔn ó yɛ́ yúumu ólu yafa á mán ni Ala kée ndɛ́?» ⁸Ɛnza ŋé lɔ́gbɛ a yɛ́ɛ fɛ í kɔ́lɔ óyoo o míliya súu oo mɔɔn olu la mínngɛ, aa fɔ i yɛ kó: «Mínnɛɛn la aa í milila tá? ⁹Kɛ́ a fɔ kuugba ó yɛ́ kó: ‹I yɛ́ yúumu ólu wɛ́ɛ yafa i man,› wáman kɛ́ fɔ a yɛ́ kó: ‹I wíi kɛ́ i yɛ gbasa ó ta kɛ́ táamankɛ,› o kóman fyáa ó lɔ́, a mínnɛɛn lé fɔ a dí? ¹⁰Waa ní í fɛ́ ké aa lɔ kó sé é mɔɔn Dhyénjɛ ó yɛ́ kɛ́ mɔɔn o yɛ́ yúumu ó yafa kɛ́ tó dínɲan lɔ́.» O lɔ, aa fɔ kuugba ó yɛ́ kó: «Ní fɔ́la i yɛ́, í wíi kɛ́ í yɛ́ gbasa ó tá kɛ́ táa lúman: ¹¹Íle, í wíi, í yɛ́ gbasa ó tá, íi táa i bhóo lúman!»

¹²Bɛ́ ɲánkɔɔ téeman, cɛ óo í wíi tó kɛ a yɛ́ gbasa ó tá kɛ bhɔ́ kɛ́ɛnman. Óo i bɛ́ kɔɔnnɔnfii, i bɛ́ bɛ́ é Ala tando: «Kɛ fɔ́ko án ndɛ́ mán míin ɲɔ́ɔnɲe bhá.»

Ɛnza ŋé Levi kíila

Matiyu 9.9-13; Luka 5.27-32

¹³O kó ólu wɛ́ɛnin ŋó kwɔ, Ɛnza ŋé í kwɔ́sɛɛ Galile bhá lá o la. Yaman o tɛ́ɛ nánla a saala, tó a tɛɛ i lákawanan. ¹⁴Óo bhɔ́ í lá mínngɛ, a tínminndɔ óo táa nísɔɔnmyaanbhaa lɔ síinin ɲé nísɔɔnmyaanbhaa ólu yɛ́ bháalakɛlaa ó lɔ́. A tɔ́ɔ kó Levi, a fa ó tɔ́ɔ kó Alife. Aa fɔ o yɛ kó: «Bhyáa ngwɔ́!» O lɔ Levi é i wíi kɛ í bhyáa a kwɔ.

¹⁵O kwɔ, Ɛnza ndɛ́ɛ lɔ́min kɛ́ Lévi yɛ́ bhó ŋó lá; nísɔɔnmyaanbhaa shɛ́ɛman óni yuumutɔ shɛ́ɛman ngbɛɛ lúu nan í síi ni ale ní a yɛ kaamɔɔndhye ŋolu fɛ́; o mɔɔn súu o léelu tɛ́ɛ sháa a kwɔ́ka. ¹⁶Sɛliya kaamɔɔn mínnu tɛ́ɛ Falizɛn ŋólu tá sɛ́ɛ ó lɔ, ólu Ɛnza yé lɔ́min kɛla ni o mɔɔn súu ólu lé mínngɛ, ii fɔ a yɛ kaamɔɔndhye ŋolu yɛ kó: «Mínnɛɛn lé kósɔn a yɛ kaamɔɔncɛ óni nísɔɔnmyaanbhaa olu ní yuumutɔ olu lɔ́min kɛla kéene?» ¹⁷Ɛnza ŋé o dhyáa ŋó myɛ́n mínngɛ, aa fɔ i yɛ kó: «Mɔɔn mínnu kɛ́ɛnyanin ɲé, ólu manko tɛ́ lɔɔtɔlɔ lá, yangalotɔ o lé manko é a lá. Né mán nán mɔɔn téenin ŋólu kíi, ni nán yúumu tɔ ó lée lú kíi.»

Kaamɔɔndhye ŋolu yɛ́ sunnongo ó

Matiyu 9.14-17; Luka 5.33-39

¹⁸Tee kéeman, Yaya Bátizelikɛbhaa yɛ́ kaamɔɔndhye ŋólu ní Falizɛn ŋólu tɛ́ɛ sún nɔ́n. Lɔ́luu nan Ɛnza mánɲaankɛ kó: «Mínnɛɛn lé kósɔn Yaya Bátizelikɛbhaa yɛ́ kaamɔɔndhye ŋolu ní Falizɛn ŋólu yɛ kaamɔɔndhye ŋólu sún nonan tó í tá kaamɔɔndhye ŋolu tɛ́ sún nonan?»

¹⁹Ɛnza é i yawi kó: «Kwɛ́ɛnkwaa o cɛ ó tɛ́ɛcɛ ólu sé kɛ súnno kɛ́ íle ní kwɛ́ɛnkwaa o cɛ ó tó ɲɔ́ɔn nvɛ́ kwɛ́ɛnbho ŋo la a? Kwɛ́ɛnkwaa o cɛ ó kɛ́ kɛ́ i bhóoka sán o mínnɔn, i tɛ́ sé í bánan sunman ŋo lɔ. ²⁰Waa ló nɔ́ yáa sé, kwɛ́ɛnkwaa o cɛ ó yáa bwási i lá, í yáa súnno o ló ŋó la.

²¹Mɔɔn sí tɛ́ sé faani kɔɔ ó lábɛɛnan faaninguun ngwáa o la; kɛ mansɔɔ o faaninguun ŋó yáa fáanin kɔɔ ó ywáa lɔ́ fála tó jáan ó tɔ́ é bwóɲan. ²²Mɔɔn sí tɛ́ lɛ́zɛnnji kwáa ó kɛ́la bhwée kɔɔ ó kɔ́ɔnnɔn. Ni ó kɛ́ kɛ, lɛ́zɛnnji ó yáa bhwée ó cé, tó bɔɔn é kɛ́ lɛ́zɛnnji kwáa óni bhwée ó lɔ́ kéene. Wáa mɔɔn lɛ́zɛnnji kwáa o kɛ́la bhwée kwáa le kɔɔnnɔn.»

Ɛnza ni lɔnwɛɛnlilo ŋo

Matiyu 12.1-8; Luka 6.1-5

²³Lɔnwɛɛnlilo nɔ́ la, Ɛnza ní a yɛ́ kaamɔɔndhye ŋólu tɛ́ɛ tínminnan bélefyɛ ólu kɔɔnnɔn. Kɛ́ í tó táalaa a yɛ́ kaamɔɔndhye ŋólu béle tínnza ŋo lɔ́lu bhɔ́. ²⁴Falizɛn ŋólu a mánɲaankɛ kó: «A mánfɛɛ nín, kó mín mánngan kɛ kɛ́ lɔnwɛɛnlilo ŋó lá, mínnɛɛn le lá i yɛ́ kaamɔɔndhye ŋólu o kɛ́la?»

²⁵Ɛnza ŋé í yawi kó: «Laula é kó mín ngɛ a mán o ywáa ó kála má ŋan? Kɔ́ɔn ó ale ní a táamanɲɔɔn ólu myáan mínngɛ ké súnman nzí tɛ́ í bhóo. ²⁶Abiyata tɛ́ɛ faanlɛɛɲansebhaa olu kúnndiiba lé wáati mínnɔn, aa lo ɲán min mán Ala yɛ́ bhó ŋo kɔɔnnɔn, faanlɛɛbulu mínnu síininndɛ́ɛ yénɔn kɛ ólu lɔɔ tó kɛ́ a lɔ dí a táamanɲɔɔn ólu mán. Kɛ́ɛke mɔɔn gbɛ́ɛ tɛ́ mánngan kɛ́ o búlu ólu lɔɔ fɔ́ faanlɛɛɲansebhaa ólu.»

²⁷Ɛnza ŋé i yawi íkwɔtun kó: «Ala mán mɔɔn ó lá lɔnwɛɛnlilo ŋo kanman, Waa lɔnwɛɛnlilo ŋóo lá mɔɔn lé yɛ. ²⁸O lé kósɔn mɔɔn Dhyénjɛ ó lé gbú é lɔnwɛɛnlilo ŋó kunndii lé.»

Ɛnza ŋé cɛ bhóo fáaninman nɔ́ lákɛɛnyala

Matiyu 12.9-14; Luka 6.6-11

¹Ɛnza ŋé í kwɔ́sɛɛ sɛ́ɛbho ŋo kɔɔnnɔn íkwɔtun. Cɛ lɔ́ tɛ́ɛ yénɔn, o bhóo tɛ́wɛɛ fáa a man, ²Falizɛn mínnu tɛ́ɛ yénɔn, ólu tɛ́ɛ Ɛnza nakɔɔsila ní a yáa o cɛ o lákɛɛnya lɔnwɛɛnlilo ŋó lá, ké o wáa kɛ́ i bhóo kún ne ké ii sɔ nzɔ́ɔ a lá. ³Aa fɔ cɛ bhóofaaninman ó yɛ kó: «Í wíi, íi nan cɛ́man!»

⁴O lɔ aa mɔɔn ólu mánɲaankɛ kó: «Tɔ́ ŋo kɔ́ɔnnɔn, a láanin ɲé kɛ́ kóɲwaan a kɛ́ lɔnwɛɛnlilo ŋó la bháa, wáman kɛ́ kóyoo ne kɛ́? Kɛ mɔɔn bwási bháa, wáman kɛ́ mɔɔn fáa?» Wáa i mán a yawi. ⁵Ɛnza ŋé mwɛ́nnɛn i man koyoongɛ, aa í ɲányoo ngbáan i bɛ́ lɔ́ ni kannankwaanya lé, i yɛ níyooɲan óni í yɛ yósolagbɛya o kósɔn. Aa fɔ o lé lɔ́ cɛ ó yɛ kó: «Í bhóo ó lɔ́sawa!» Aa a bhóo ó lɔ́sawa, a bhóo o kɛ́ɛnya. ⁶O lée kɛ́ Falizɛn ŋolu bhɔ́ o lé kɛ́ɛnman téeman óni Elɔdi tá sɛ́ɛ lɔ́ mɔɔn ólu, ké i káa kɛ tɛ́nmɛn kɛ Ɛnza nváa, ke ii bhɔ́ o ɲánle.

Yaman óo Ɛnza kwɔka

⁷Ɛnza ni a yɛ kaamɔɔndhye ŋólu bhɔ́ i cɛ́man o lé lɔ, kɛ táa Galile bhá lá o la. Yamanba é nan i kwɔka. Mɔɔn ólu tɛ́ɛ bhɔ́la Galile mála óni Zude mála o lɔ, ⁸lɔ́luu bhɔ́ Yeluzalɛmu, Idume mála o lɔ, Zuludɛn fán ŋo óni Tili mala ó lɔ óni Sidɔn. O mála ó bɛ́ a kɛ́ko bhɛ́ɛ óo myɛ́n mínngɛ, bɛ́ tɛ́ɛ nánla a saala. ⁹Aa fɔ a yɛ kaamɔɔndhye ŋolu yɛ kó ii kúun ngée nɔ́bhyɛ a yɛ ké yaman o kɛ́nan a gbɛ́nnɛn. ¹⁰A yɛ mɔɔn lákɛɛnya kóyoo ŋó kósɔn, yangalo tɛ́ɛ mɔɔn súu óo súu la, o bɛ́ tɛ́ɛ fɛ́ kɛ í bhóo túu a lá, ké ii kɛ́ɛnya. ¹¹Waa ni lámansayoondɔ ólu tɛ́ɛ a yé, i tɛɛ í lá a se ngɔ́ɔ lúu mán, tó kɛ gbáa ni fɔ le kó: «Ala dhyénjɛ óo íle lé le!» ¹²Wáa Ɛnza ŋé fɔ í yɛ kɛ́ a mangbɛya koyoongɛ kó, kó i kɛ́nan ale kófɔ mɔɔn ólu ɲánla.

Ɛnza ŋé céladhye ndá ni fyáa tála a yɛ kaamɔɔndhye ŋolu cɛ́man

Matiyu 10.1-4; Luka 6.12-16

¹³O wɛ́ɛnin ŋó kwɔ, Ɛnza ŋé í yɛ́ɛ tii ó kúnnɔn. Aa mɔɔn mínnu fɛ́, aa olu kíi tó ii nan a saala. ¹⁴Kɛ́ mɔɔn tá ni fyáa lɔ́tɔnmɔn i cɛ́man kɛ́ ólu tɔ́ɔla kó ɲɛ́n céladhye ŋólu, ké ii kɛ́ a tɔ́ɔfɛ óni ké ii táa Ala saaninkan ŋo láse, ¹⁵tó kɛ lámansayoo ŋólu gbɛ́ ŋó sébhaaya ó dí i man. ¹⁶Aa céladhye ndá ni fyáa mín ndá, olu tɔ́ɔ ó lée nín: Simɔn, aa o min ndɔ́ɔ la kó Piyɛli. ¹⁷Zebede dhyénjɛ fyáa o, Zaki óni Yaya, aa o mínnu tɔ́ɔla kó Bowanɛsi, o kɔ́ɔ o tɔ́ɔ kó sángbɛlɛman o dhyé ŋólu. ¹⁸A tɔ ólu tɔ́ɔ kó Andele, Filipu, Batelemi, Matiyu, Tomasi, Alife dhyénjɛ Zaki, Tade, Simɔn Zelɔti3.18 Zelɔti tɔ́ɔ o kɔ́ɔ yáa nan kɛ́ lé kó a wɛɛ í wíi Lomɛn olu kanman., ¹⁹óni Zudasi Sikaliyɔti mín ngáa Ɛnza ɲanva.

Ɛnza ɲɛn bhónanbhaa ólu nánla a myáan tɔ́ɔ lɔ

²⁰O kwɔ, Ɛnza ni a yɛ kaamɔɔndhye ŋólu í kwɔ́sɛɛ lúman íkwɔtun. Yaman o sháaya kóyoo ŋó mán i mán sé lɔ́minkɛlaa sɔ́ɔla. ²¹A yɛ bhónanbhaa ólu ó myɛ́n mínngɛ, ii í wíi a myáan tɔ́ɔ lɔ, kɛ mansɔɔ i tɛɛ fɔ́la lé kó: «Fa wɛ́ɛ bhyáa a lɔ.»

Ɛnza ŋé yáala kó ale tá fáan ó tɛ́ fáanan Sɔtaannan la

Matiyu 12.22-32; Luka 11.14-23; 12.10

²²Sɛliya kaamɔɔn mínnu tɛ́wɛɛ nan kɛ bhɔ́ Yeluzalɛmu o lɔ́lu tɛ́ɛ fɔ́la lé kó: «Bɛlizebuli lée Ɛnza nvɛ́.» Kó: «O lámansayoo ŋólu kunndii ó lé bhaaka lɔ, tó aa lámansayoo ŋólu gbɛnan.»

²³Ɛnza ŋé i kíi tó kɛ saanan lá i yɛ kɛ fɔ kó: «Sɔtaannan é sé á yɛ́ɛ gbɛnan díi? ²⁴Ní yamaan kée nɔn mɔɔn ólu kɛ́ kɛ́ ɲɔ́ɔn ngɛlɛla, o yamaan o tɛ́ si sɔ́ɔla. ²⁵Ní bhó mín nanbhaa lu kɛ́ kɛ́ ɲɔ́ɔn ngɛlɛla, o bhó ŋo tɛ́ sé si sɔ́ɔla. ²⁶Ní Sɔtaannan kɛ́ kɛ́ a yɛ́ɛ kɛ́lɛla o lɔ, ké a wɛ́ɛ a yɛ́ɛ lɔtaa a tɛ́ sé si sɔ́ɔla, ké a tá o wɛ́ɛ cáan ne wé. ²⁷Mɔɔn sí tɛ́ sé lónan fáangbii ó bhóo bhónan, kɛ táa o bhóofe ŋolu tá ní i man o mɔɔn fáangbii ó síli, ní a kɛ sé kɛ a síli, aa sé kɛ a yɛ bhónanfe ŋo bɛ́ ta.»

²⁸Aa fɔ i yɛ íkwɔtun kó: «Ní tinɲan le fɔ́la a yɛ́ ngó, yafa é sé kɛ́la yúumu o bɛ́ man, yáanin Ala tɔ́ɔ cáan ngóman olu lá mɔɔn yɛ. ²⁹Wáa mɔɔn óo mɔɔn kɛ́ kóman yóo nvɔ́ Ní Sɛnnɛnyanin ŋó mán, yafa táa kɛ́ o tíi o man fɛ́sɛ fɛ́sɛ, kɛ mansɔɔ la ndɛ́ yúumu o mínnan wáati o bɛ́ lɔ, a wɛɛ o lé kɛ́ wé.» ³⁰Aa kóman i yɛ cé, kɛ mansɔɔ i tɛɛ fɔ́la a man le kó lámansayoo née a fɛ́.

Ɛnza ŋwóobhaa ní a lɔ́ɔnin ŋolu

Matiyu 12.46-50; Luka 8.19-21

³¹Ɛnza ŋwóobhaa ní a lɔ́ɔcɛ ólu nan mínngɛ, ii tó kɛ́ɛnman tó kɛ mɔɔn bhyáa a kíila. ³²Yaman o síininndɛ́ɛ a lamiin ŋo lɔ́ wáati o mínnɔn, ii nan fɔ a yɛ kó: «Í yáakɛ tó, í wóobhaa, óni lɔ́ɔcɛ ólu ní í lɔ́ɔmuso ólu kɛ́ɛnman. Íi i ɲíinan.»

³³Aa o yawi kó: «Ŋwóobhaa bhɛ́ɛbhɛɛ ní nɔ́ɔnnin mɛ́ɛbhɛɛ é yɛ́ɛtii lú le?» ³⁴Mɔɔn mínnu síinin ndɛ́ɛ kɛ Ɛnza namiin, aa í ɲán gbáan olu lɔ, tó kɛ fɔ kó: «Ŋwóobhaa óni nɔ́ɔcɛ ó lée lúu nín. ³⁵Tinɲan ín né, mɔɔn óo mɔɔn kɛ kɛ́ Ala sáo o kɛ́la, o tíi ó lée nɔ́ɔcɛ ní nɔ́ɔmuso, óni ŋwóobhaa le.»

Kɔ́ɔlamandhyaa mín ŋé sífiibhaa o ka

Matiyu 13.1-9; Luka 8.4-8

¹O wɛ́ɛnin ŋo kwɔ, Ɛnza ŋé í kwɔ́sɛɛ bhá lá o lá kɛ mɔɔn olu kala ko kwáa kɛ. Yamanba é nan í mínnin a lá. Mɔɔn ó sháaya kóyoo ŋó mán, aa í yɛ́ɛ kúun nɔ kɔɔnnɔn kɛ í síi. Yaman o bɛ́ lɔ́nin ndɛ́ɛ tíinnan. ²A tɛ́ɛ kaa nzhɛ́ɛman díla í man saanan bhóoman. A tɛɛ fɔ́la a yɛ kaa ŋo lɔ kó:

³«Áa í tóomanlɔ! Sɛɛnkɛbhaa oo bhɔ́ kɛ́ táa sí ó fíi a bhóo sɛ́ɛn man. ⁴Kɛ́ tó sí fíi ó la, sí o koo o lɔ́lu táa bé sháa ó lafɛ. Kɔ́ɔn ólu nan kɛ ólu lakuun. ⁵Á lɔ́luu bé káwa ywáa o lɔ. Fíibhɛɛ tɛ́ tɛ o ywáa o lɔ, ólu í fɛ́ɛ njónan, kɛ mansɔɔ fíibhɛɛ tɛ́ tɛ ólu ɲánman. ⁶Tée óo máan mínngɛ, o fɛ́ɛ ŋólu bɛ́ já kɛ fáa, kɛ mansɔɔ i díin ŋolu tɛ́ tɛ́ lúu lɔ́ cɛ́ɛne ne. ⁷A lɔ́lu ŋé táa bé ŋwɛ́ɛn ywáa o lɔ. Óni ŋwɛ́ɛn ŋólu í wíi ɲɔ́ɔn nvɛ, ŋwɛ́ɛn ŋólu í sɔ́ɔsii fénvɛɛ ŋó ka, tó a man dhyé ngɛ́. ⁸A koo o lɔ́lu bé lúu dhyáanin nga. Ólu í fɛ́ɛ kɛ ɲan kɛ dhyé ngɛ́. Kée ŋé dhyé mbisawa kɛ, a lɔ gbɛ́ɛ é dhyé mbiwɔɔlɔ kɛ, a lɔ bgɛ́ɛ é dhyé ngɛnmɛn kɛ.» ⁹Tó, a tɛ́ɛ fɔ́la kó: «Tóo é mín ngúnman kɛ́ myɛnnin kɛ́, o á myɛnnin kɛ.»

Kɔ́ɔlamandhyaa ŋolu kɔ́ɔ o

Matiyu 13.10-17; Luka 8.9-10

¹⁰Ɛnza ŋé í cɛ́bhɔ yaman o lá mínngɛ, a yɛ kaamɔɔndhye ndá ni fyáa olu ni a fongamaa mínnu tɛ́ɛ a tɔ́ɔfɛ, olu a mánɲaankɛ a yɛ saanan ólu kɔ́ɔ o mán. ¹¹Aa i yawi kó: «Ala yɛ́ mansaya ó gbondoya o lángɛɛnman wɛ́ɛ kɛ Álee yɛ́. Wáa kɛ́ɛnman bháa ólu, a bɛ́ɛ fɔ́la ólu yɛ́ saanan bhóo lé man. ¹²O lé kósɔn:

Kó óo ko é kɛ́, kɛ í tó mánfɛɛli kɛ́ o la cɛ́ɛne né í kɛ́nan fósi yé.

Óni kɛ́ í tó lɔmyɛnni kɛ́ o la cɛ́ɛne né, í kɛ́nan fósi myɛ́n.

Ké í kɛ́nan i kwɔ́sɛɛ Ala man,

ké ó á yafa i yúumu ólu man.»

Kɔ́ɔlamandhyaa mín ŋé sífiibhaa o ka o kɔ́ɔ o

Matiyu 13.18-23; Luka 8.11-15

¹³Ɛnza ŋé fɔ i yɛ ikwɔ kó: «A man saanan míin ngɔ́ɔ o lɔ ŋan? Áa sé saanan tɔ́ ólu kɔ́ɔ o lɔnan díi? ¹⁴Sífiibhaa oo Ala saaninkan ŋo lé fíila. ¹⁵Sháa ó lafɛ láa óo mɔɔn lɔ́ léelu lé mínnuu Ala saaninkan ŋo myɛ́nnan, wáa Sɔtaannan kɛ́nan o ywáaninngee ŋo lɔ, aa o bhɔ́ í yóso ó lɔ. ¹⁶Sí mínnuu bé gbófaaywaa o lɔ, óo mɔɔn léelu le, ní ólu kɛ́ ó kóman ó myɛ́n, íi sɔ́n a mán ni nisɔdhyaa le íkɔlɔ. ¹⁷Wáa Ala sáaninkan ŋo díin ngbáannin ndɛ́ kɛ́la o tíi ólu yóso ó lɔ. Dínɲan tɔ́lɔya lɔ́ kɛ́ sii o tíi ólu la wáati mínnɔn, wáman gbɛ́ya lɔ́ kɛ́ i sɔɔ Ala sáaninkan ŋo kósɔn, o tíi ólu lánanya ó bhyá. ¹⁸Sí mín núu bé ŋwɛ́ɛn ŋólu cɛ́man, ólu mɔɔn léelu lé mín núu Ala sáaninkan ŋo myɛ́nnan, ¹⁹wáa dínɲan hánminnanngo olu ní nanfooɲiin ŋó nɛ́li o, óni mánnyaa ólu tá hánmin ŋo lée Ala sáaninkan ŋo náansila, í yóso o lɔ tó nafa tɛ́ sɔ́ɔ o lá. ²⁰Sí mín núu bé lúudhyaanin ŋó ka, óo mɔɔn lɔ́ léelu lé, mín núu Ala sáaninkan ŋó myɛ́n, tó íi sɔ́n a man, tó aa í dhyé ngɛ, kée mbisawa, lɔ́ é bíwɔɔlɔ sɔ́ɔ, lɔ́ gbɛ́ɛ é kɛnmɛn sɔ́ɔ.»

Kɔ́ɔlamandhyaa míin laman ŋó ka

Luka 8.16-18

²¹Ɛnza ŋé fɔ i yɛ í kwɔ́ kó: «Yɛ́ɛtii laman ŋo lámaannan, tó kɛ gbóngbo mbíin a kúnnan, wáman kɛ a sii gbála ŋo kɔɔ? Ɲɔ́ɔn aa síilaa lamannziife ne ka ne? ²²Kɛ mansɔɔ fénoonaankɛnin nzí tɛ́ yé mín ndáa yé. Gbondo sí tɛ́ yé mín ndáa bhɔ́ kɛ́ɛnman. ²³Ní Tóo é mín ngúnman kɛ́ myɛnnin kɛ́, o á myɛnnin kɛ.»

²⁴Aa fɔ i yɛ í kwɔ́ kó: «Áa kóman mínnu myɛ́nnan, áa í yáakii síi olu mán. Kɛ mansɔɔ aa dɔ ólu tá ó swáan swáannikɛfe mín nɔ́n, Ala káa a tá ó swáan o lé lɔ́. A yɛ́ɛ yáa a ta o móo kɛ. ²⁵Aa céne, lɔ́ kɛ́ kɛ́ mɔɔn mín móo, lɔ yáa bhyáa o tíi ó tá ó ka; Waa fé ndɛ́ mín móo, miin a bhóo, o yáa bwási a lá.»

Sí mín ŋé í fɛ́ɛnan í yɛ́ɛman

²⁶Ɛnza ŋé fɔ íkwɔtun kó: «Ala yɛ́ Mansaya ó bhɔ́nin yé kó mínnan o lée nín: mɔɔn mín sí fíila lúuman. ²⁷Sífiibhaa o kɛ́ súnnɔɔn kɛ́ sú lɔ oo, a kɛ tó í ɲán látee lɔ oo, sí ó yáa í fɛ́ɛ kɛ bwóɲan kɛ́ a yíimankoondo. ²⁸Lúu ó gbú ó lée sunman ŋo láfɛɛnan í yɛ́ɛman, tó aa í tínnza ngɛ, tó a kɛ́wɛɛ, aa í kóo kɛ. ²⁹Wáa a kɛ kɔ́ɔ, kɛ ywɛ́, án ní cɛla ŋó tá a fɛ́, ké a cɛ wáati o wɛ́ɛ sé.»

Kɔ́ɔlamandhyaa min ŋé sí ó bɛ́ lɔ fítiinin ŋo ka

Matiyu 13.31-32,34; Luka 13.18-19

³⁰Ɛnza ŋé fɔ íkwɔtun kó: «Án ní sé Ala yɛ́ Mansaya ó lá lá mínnɛɛn lé mán? Án ní sé o saanan o kɛ́la ɲán mínnɛɛn lé mán? ³¹A bhɔ́nin ɲé yíi lɔ́ lé kóo la mín ndɔ́ɔ kó mútaali. Ní í kɛ́ a lo, ale lé a lɔ́ɔ kɛ tínmin dínɲan lɔ́ fé ngóo ó bɛ́ ka. ³²Wáa í kɛ́wɛɛ a lónan, aa í fɛ́ɛ, aa bwóɲan kɛ tínmin nánkwɔfe nónin ŋó bɛ́ ka. Áa í bhóokaa bá lu kɛ́ fɔ́ sámankɔɔn ólu a nan í bhó ngɛ́ a lwée ŋó kɔɔ.»

³³Ɛnza ndɛ́ɛ bɛ́ lakawanila o bhóo ó lé mán ni saanan lu le óyoo míin ŋé tɛ́nmɛn. A tɛɛ saanan ólu fɔ́la kɛ bhyɛ a lɔmyɛnmaa olu séngan o lé mán. ³⁴A tɛ́ tɛ́ dhyáa ngɛ́la i yɛ ní a tɛ tɛ́ saanan la, wáa ale kée ndɛ́ɛ tó a yɛ kaamɔɔndhye ŋolu cɛ́man, a tɛ́ɛ a bɛ́ kɔ́ɔ fɔ́ í yɛ.

Ɛnza ŋé fwɛ́ɛnba lɔ́ lálɔla

Matiyu 8.23-27; Luka 8.22-25

³⁵O tée kée ŋó ywáa o la, Ɛnza ŋé fɔ a yɛ kaamɔɔndhye ŋolu yɛ kó: «Án ni bhá ó tɛ́ɛ, kɛ táa a ɲan dɔ́ o mán.» ³⁶Kaamɔɔndhye ŋolu bhɔ́ yaman o cɛ́man, kɛ́nan í yɛ́ɛ a fɛ́ kúun ŋó lɔ. Kúun ngbɛ́ɛ lúu táa í bhyáashaa. ³⁷O lée bhyɛ fwɛ́ɛnba lɔ́ bhyáa mán. Kwɔ ó tɛ́ɛ kúu, jí ó tɛ́ɛ kɛ́ kúun ŋó kɔ́ɔnnɔn. A tɛ wɛɛ bhyáa kúun ŋó kɔ́ɔnnɔnlaa ó fá le. ³⁸Ɛnza ndɛ́ɛ súnnɔɔn lɔ́ kúun ŋo kwɔ́shaafɛ. A kún ŋó lánin ndɛ́ɛ kunnanbhɔɔ lɔ́ ka. A yɛ kaamɔɔndhye ŋolu a lakuun ŋo le lɔ súnnɔɔn o lɔ, tó kɛ fɔ a yɛ kó: «Kaamɔɔn, án ngáa fáa o tɛ́ í láhanminan an?»

³⁹Aa kúun kɛ yaman ngɛ́ fwɛ́ɛn ó mán. Aa fɔ bháji o yɛ kó: «A jalɔ! Í lúmandhye!» O lée kɛ́ fwɛ́ɛn ó lɔ́ o le, tó kɛ lúmandhye myáan twée. ⁴⁰Óo wɛɛ mínngɛ, aa fɔ a yɛ kaamɔɔndhye ŋolu yɛ kó: «Áa sháannan mínnɛɛn lé la? Bháa a mán limɛliya ó sɔ́ɔ bhá ŋan?» ⁴¹Kaamɔɔndhye ŋolu sháan ngóyoo ŋó mán, i tɛ́ɛ ɲɔɔn mánɲaankɛla kó: «Ɛɛ, mɔɔn mínnɛɛn lée cɛ míin ne, yáanin fwɛ́ɛn óni jí ó bɛ́ɛ a bwóɲanla.»

Ɛnza ŋé lámansayoondɔ lɔ́ lákɛɛnyala

Matiyu 8.28-34; Luka 8.26-39

¹O kó ólu wɛ́ɛnin ŋó kwɔ, Ɛnza ni a yɛ kaamɔɔndhye ŋolu sé bhá ó ɲán dɔ́ o mán. Zelazaka olu yɛ mála o lɔ. ²Aa í yíi kúun ŋó kɔ́ɔnnɔn tɛ́nmɛn, cɛ lɔ é bhɔ kábulu o lɔ téeman kɛ́nan a kunmyɛ, lámansayoo ne tɛ́ɛ o cɛ o fɛ́. ³A tɛɛ a ta dínɲanlɔtɛɛ ó kɛ́la kábulu o léelu lɔ. Mɔɔn sí tɛ́ tɛ́ sháa a silila bhée yáanin nɛɛnyɔlɔkɔ la. ⁴I tɛɛ a myaanla lé sɔ́, kɛ kúun nu bhyáa a sénan, kɛ a bhóo ó síli nɛɛnyɔlɔkɔ lu la. Wáa a tɛ́ɛ kúun ŋólu céla lé, kɛ nɛɛnyɔlɔkɔ olu tɛ́ɛ. Mɔɔn sí fáan tɛ́ tɛ́ a mannɔnla bhée. ⁵Sú ni tee, a tɛ́ɛ kɛ́la kábulu o léelu lɔ óni tii ólu mán. A tɛ́ɛ gbáanan, kɛ a yɛ́ɛmandiin káwa olu la.

⁶O cɛ óo Ɛnza nantɔ ó yé mínngɛ ywáaja nɔn, aa bwée kɛ táa í kúnmɛɛn nɔ́kɛɛ a kɛɛnnan, ⁷kɛ gbáa fáanla kó: «Mínnɛɛn án njɛ, Fé mbɛ́ kúnndii Ala dhyénjɛ Ɛnza. Ní í dɛ́lila Ala kósɔn, í kɛ́nan kólatɔ nan.» ⁸Aa fɔ a yɛ kó: «Lámansayoo ŋó, bhɔ́ cɛ míin nvɛ́!» ⁹Ɛnza ŋé a mánɲaankɛ kó: «Í tɔ́ɔ díi?» Aa a yawi kó: «Ndɔ́ɔ kó yaman, kɛ mansɔɔ án ni sháa.» ¹⁰Aa Ɛnza dɛ́li koyoongɛ, kó a kɛ́nan lámansayoo ŋólu cɛ́bhɔ yamaan o la.

¹¹Gbóyoonin nzɛ́ɛ lɔ́lu tɛ́ɛ lɔ́min kɛla tii ó mán. ¹²Lámansayoo ŋólu Ɛnza dɛ́li kɛ fɔ a yɛ kó: «Án nataa gbóyoonin ŋólu lɔ, ké án ni ló olu lɔ.» ¹³Aa sɔ́n o mán i yɛ. Lámansayoo ŋólu bhɔ́ o lé lɔ cɛ ó fɛ́, kɛ táa lo gbóyoonin ŋólu lɔ. Oo kɛ́ mínngɛ, gbóyoonin nzɛ́ɛ óo í cɛ kɛ́ yɛ́ɛ tíi ó ka kɛ́ táa í bé bháji ó lɔ kɛ́ fáa. I tɛ́ɛ gbóyoonin wáa fyáa lú sí bhɔ́la.

¹⁴Gbóyoonin ngunnansiibhaa olu bɛ́ɛ bwée kɛ táa o kó ó búubhɛɛ só o kɔɔnnɔn, óni kanman ŋolu la, oo kɛ́ mínngɛ mɔɔn ólu nan o mánfɛɛ. ¹⁵Ii nan Ɛnza ndɔ́ɔfɛ, ké lámansayoo nzhɛ́ɛman ndɛ́ɛ cɛ mín nvɛ́ o síinin ɲe, fáanin óo a kannan, a wɛ́ɛ í ɲánmanlɔ. Ii sháan gbútuukɛ. ¹⁶O kó ólu bɛ́ɛ kɛ́ mɔɔn mínnu ɲánla, olu tɛ́ɛ o ɲánfɔla mɔɔn tɔ́ ólu yɛ, lámansayoo ŋólu bhɔ́ cɛ ó fɛ́ se ŋó mín ne, óni kó mín ŋé kɛ́ gbóyoonin ŋólu la. ¹⁷Mɔɔn ólu Ɛnza dɛ́li kó aa bhɔ́ i ta mála o lɔ.

¹⁸Ɛnza ndɛ́ɛ í yɛ́ɛla kúun ŋó lɔ Wáati mínnɔn, Lámansayoo ŋó tɛ́ɛ cɛ mín nvɛ́ oo a dɛ́li kɛ fɔ a yɛ kó ní aa sé kɛ́ táa ni a le. ¹⁹Wáa Ɛnza mán sɔ́n. Aa fɔ a yɛ kó: «Í kwɔ́sɛɛ í bhóo lúman í yɛ́ dhyémaya ólu cɛ́man, Mantii Ala o wɛ́ɛ kó mín ngɛ í yɛ́, a yɛ bhɛ́ɛbhɛɛya ó kɔ́ɔnnɔn, íi o bɛ́ fɔ i yɛ.» ²⁰Cɛ óo táa óle lɔ Dekapɔli. Ɛnza ŋé kó óo kó kɛ́ a yɛ, aa táa o bɛ́ lɔ́sɔɔ. Mɔɔn óo mɔɔn é a kómankan ŋo myɛ́n, o bɛ́ kɔɔnnɔn é fii.

Zayilusi dhyémuso óni muso mín ŋé í bhóo túula Ɛnza ɲɛn déeke o la

Matiyu 9.18-26; Luka 8.40-56

²¹Ɛnza ŋé í kwɔ́sɛɛ kúun ŋó kɔ́ɔnnɔn kɛ bhɔ́ bhá ó ɲán dɔ́ o mán mínngɛ yamanba é nan a saala bhá lá o la. ²²Sɛ́ɛbho ŋó kúnndii kée ŋé nan. A tɔ́ɔ kó Zayilusi. Aa Ɛnza ɲé tɛ́nmɛn, aa nan í bíin a kɔɔ lúu mán, ²³kɛ a dɛ́li koyoongɛ kó: «Nyémuso ó káa saya kɛ́ lé wé, nan í bhóo lá a ka ké aa kɛ́ɛnya, kɛ tó i níla.» ²⁴Ɛnza ni cɛ óo táa. Yaman é bhyáa a kwɔka. I tɛ́ɛ a gbɛ́nnɛnnan.

²⁵Muso lɔ tɛɛ i cɛ́man, mín ɲɛn káakwo tɛ tɛ wɛɛla tó a wɛɛ kɛ a lá yangalo le kabiini sanɲin tá ni fyáa, a tɛ tɛ́ í lálɔla. ²⁶Muso óo sé bhwɛ́ɛkɛbhaa shɛ́ɛman nvɛ́ yénɔn, yangalo óni bhwɛ́ɛ kɛ́ ó tɛ́wɛɛ a mansɛɛ koyoongɛ. A kunman wɛ́ɛ o bɛ́ɛ wɛɛ. Wáa a tɛ mán kɛ́ɛnya bhá. Yangalo o móo lé tɛ́ɛ kɛ́la a lɔ. ²⁷O muso óo Ɛnza ngomyɛn mínngɛ, aa tínmin yaman o cɛ́man kɛ táa í bhóo túu a yɛ́ deeke o lá a kwɔ́man. ²⁸Kɛ mansɔɔ, a tɛɛ fɔ́la í kɔ́ɔnnɔn kó: «Ní ngɛ́ sé kɛ móo túu a yɛ déeke o la gbɛnnzɛn ngɛ, ɲáan kɛ́ɛnya.» ²⁹Muso óo í bhóo túu a yɛ déeke o lá tɛ́nmɛn, a yɛ́ káakwo óo í lɔ́, o wáati kée ŋó lɔ. Aa lɔgbɛ a fási ó lɔ óyoo a wɛɛ kɛ́ɛnya. ³⁰O ywáanin ngée ŋo lɔ, Ɛnza ŋé a lɔgbɛ í kɔ́lɔ óyoo a yɛ faan o lɔ́ wɛ́ɛ bhɔ́ a fási o lɔ. Aa í kwɔ́yɛɛman óle lɔ yaman o cɛ́man, kɛ ɲaankɛli kɛ kó: «Yɛ́ɛtii í bhóo túu ɲɛ́n déeke o la?» ³¹A yɛ kaamɔɔndhye ŋolu a yawi kó: «Íle gbú ɲán é yaman o lá í gbɛ́ɛndɛla, tó íi ɲaanli kɛ kó yɛ́ɛtii í bhóo túunan?» ³²Wáa aa í ɲánlakaa a lamiin ŋo lɔ cɛ́ɛne ne, kɛ cé aa o kɛ́bhaa o yé. ³³Muso o sháan ngóyoo ŋó mán, a tɛɛ yáayaala, kɛ mansɔɔ a tɛɛ lɔ ŋóyoo kó mín ŋwɛ́ɛn a sɔɔ. Aa nan i kúnmɛn ŋó lɔkɛɛ Ɛnza nzé ngɔ́ɔ lúu mán tó kɛ tinɲan o bɛ́ fɔ́ a yɛ. ³⁴Ɛnza ŋé fɔ a yɛ kó: «Ndhyémuso, í yɛ́ lánanya ó wɛ́ɛ í lákɛɛnya, táa hɛ́lɛ lɔ́, ké o a kɛ í yɛ́ díin ŋo nɔ́ɔnyanin ne.»

³⁵A tɛ́ɛ ó kóman o fɔ́la wáati mínnɔn, o lée kɛ́ mɔɔn lɔ́lu nán le kɛ bhɔ́ sɛ́ɛbho ŋó kúnndii Zayilusi fɛ́ yénɔn, kɛ́nan fɔ Zayilusi yɛ kó: «Í dhyémuso wɛ́ɛ wɛɛ saya kɛla, íi kaamɔɔn ó kannankwaanyala mínnɛɛn lá bhée?» ³⁶Wáa Ɛnza é o kóman o myɛ́n mínngɛ, a mán ó yace. Ɛnza ŋé fɔ sɛ́ɛbho ŋó kúnndii ó yɛ kó: «Í kɛ́nan sháan, lá a lá i yóso o lɔ cé dɔlɔun.» ³⁷A mán í sɔ́n ké mɔɔn sí a táa a manlɔ, fɔ́ Piyɛli, Zaki óni Zaki lɔɔcɛ Yaya. ³⁸Ii lo sɛ́ɛbho ŋó kúnndiicɛ o yɛ lúkɔɔn ó mán mínngɛ, Ɛnza ŋé táa yaman ó sɔ́ɔ ké ii ɲɔɔn nɔnkaanminnan ni kási, ní gbáa ne. ³⁹Aa lo tó kɛ fɔ i yɛ kó: «Mínnɛɛn lé kósɔn tó áa ywáa ó lásɔɔnnan, tó áa kásila? Dhyé ŋó sayakɛnin ndɛ́, aa súnnɔɔn le lɔ.» ⁴⁰Ii yɛ́ɛbhɔ Ɛnza nɔn. Aa i bɛ́ lábhɔ, fɔ́ dhyé ŋó fá óni a wóobhaa, óni a yɛ kaamɔɔndhye nzawa ó, o lée lúu nan a manlɔ. Dhyé ŋó tɛ́ɛ bhó mín ngɔɔnnɔn, ii lo yénɔn. ⁴¹Ɛnza ŋé dhyé o myáan a bhóo mán, kɛ fɔ a yɛ kó: «Talita kumi!» O kɔ́ɔ o tɔ́ɔ kó: «Sínngbiinin, í wíi, ngó í yɛ́ cé!» ⁴²O lée kɛ́ sínngbiinin o wíi o lé téeman, kɛ táamankɛ. A sanɲin tá ni fyáa lé tɛɛ. O lée bháa i bɛ́ lɔ, kɛ i kɔɔnnɔnfii koyoongɛ. ⁴³Ɛnza ŋé fɔ i yɛ kɛ a mangbɛya kó: «A kɛ́nan míin nvɔ́ mɔɔn sí yɛ.» O kwɔ, aa fɔ i yɛ kó: «Aa lɔ́min di sínngbiinin ŋo mán.»

Nazalɛtika olu tɛ́ lála Ɛnza nan

Matiyu 13.53-58; Luka 4.16-30

¹Ɛnza ŋé bhɔ́ o ywáa ó lɔ kɛ táa a fɛso. A yɛ kaamɔɔndhye ŋolu tɛ́ɛ a kwɔka. ²Lɔnwɛɛnlilo ŋoo sé mínngɛ, aa mɔɔn olu kála námyaan sɛ́ɛbho ŋo lá. Oo bhɔ́ bɛ́ kɔ́ɔman, fɔ́ ii fɔ́la kó: «Ɛɛ, aa bhɔ́ míin mbɛ́ lé mín? Yɛ́ɛtii hákiimanɲan ni sébhaaya míin ndí a man? Tó káwananngo shɛ́ɛman ŋé kɛ́la a bhóolɔ nín? ³Bháa ale tɛ Mwɛnyamu dhyénjɛ yíimanlɛsɛbhaa o le a? Óni Zaki, Zose, Zuda óni Simɔn lú bhádhye ne a? Ɲɔ́ɔn ngo án ne ní a lɔ́ɔmuso ó léelu bɛ́ síinin ɲé só kée nán nín né?» I sikaseɲan mín ŋé wé, oo kɛ́ sɔ́ɔbu le tó i man lá Ɛnza nan. ⁴Ɛnza ŋé fɔ i yɛ kó: «Bwóɲan lée Céla o yɛ́ ywáa bɛ́ lɔ fɔ́ a fɛsobhaa olu cɛ́man, a bhádhye ŋólu cɛ́man, óni a yɛ bhónanbhaa olu cɛ́man.» ⁵Ɛnza mán sé káwananngo sí kɛ́la fɔ́ aa í bhóo lá yangalotɔ dámandaman mínnu ka tó kɛ́ i lákɛɛnya. ⁶I yɛ lánanbhɛɛya o lée a kɔɔnnɔnfii.

Ɛnza ŋé a yɛ kaamɔɔndhye ndá ni fyáa ólu bhyáashaala

Matiyu 10.5-15; Luka 9.1-6

Ɛnza ndɛ́ɛ táala lakawanin kɛ siiɲɔɔnso dhyénin olu la. ⁷Aa a yɛ kaamɔɔndhye ndá ni fyáa ólu kíi, kɛ i bhyáashaa fyáafyaa só ólu la. Aa lámansayoo ŋólu gbɛ́ ŋó sébhaaya dí i man. ⁸Aa nɔn lá i ka kɛ fɔ kó: «Á kɛ́nan fósi tá táamanlataa míin nɔ fɔ́ gbéle kée. A kɛ́ sunman ndá, a kɛ́ bhɔɔ tá, a kɛ́nan shaanɛɛn wɛ́ɛ bhyáa a yɛ cɛ́siiyaa o lɔ. ⁹Áa sawaa ló wáa deeke fyáa mánngan kɛ táa a bhóo.» ¹⁰Aa fɔ i yɛ íkwɔtun kó: «A kɛ́ sé só mínnan, i kɛ a yɛ́tiiya kɛ bhó mín ne, áa tó o lé la fɔ kɛ táa sé a bhɔ́ ó mán o só ó la. ¹¹Ní só mínnan mɔɔn lu kɛ í bá kɛ́ í ɲán sii a kɔ́ɔ, wáman i mán a kómankan ŋo lɔ́myɛn, a bhɔ́tɔ ó aa a sé o mangbasi kɛ a sénan gbángba ŋo tó yé, o yáa kɛ́ tɔɔmansii lé kɛ́ í lasowi.»

¹²«Oo wɛɛ mínngɛ kaamɔɔndhye ŋólu táa a láse mɔɔn ólu mán, kɛ fɔ i yɛ kó ii i yóo ólu yɛ́ɛman.» ¹³Ii lámansayoo nzhɛ́ɛman ngbɛ́, ii túu bwɔ́ yangalotɔ shɛ́ɛman ngúnnɔn, kɛ i lákɛɛnya.

Yaya Bátizelikɛbhaa yɛ́ sayako o

Matiyu 14.1-12; Luka 9.7-9

¹⁴O wáati o lɔ, Ɛnza ndɔ́ɔ tɛ́wɛɛ gbáan ywáa bɛ́ lɔ. A manngan ŋó lée sé mansacɛ o mán, mín ndɔ́ɔ kó Elɔdi. Lɔ́lu tɛ́ɛ a yéla Yaya Bátizelikɛbhaa le lé. Kó o wɛɛ kúun kɛ bhɔ́ sú ólu cɛ́man! O lé kósɔn káwananngo ólu kɛ́ sé é a yɛ. ¹⁵Lɔ́gbɛɛ lu yɛ́ɛ tɛ́ɛ a yéla Céla Eli lé le. Lɔ́gbɛɛ lu tɛ́ɛ a yéla jónan jónan céla o lé lɔ́ le. ¹⁶Elɔdi é Ɛnza ngomyɛn mínngɛ, aa fɔ kó: «Ŋwɛ́ɛn Yaya Bátizelikɛbhaa mín ngún ndɛ́ɛla, o lé wɛ́ɛ kúun wé.» ¹⁷Wáa, Elɔdi gbú tɛ́ wɛ́ɛ fɔ kó ii Yaya lálɔ, kɛ a sili, kɛ́ a bhyáa kasola. A tɛ wɛɛ o fɔ kɛ a kun ngɛ́ a bhádhyemannjɛ Filipu muso Elodiyadi yɛ ko o lé fɛ. ¹⁸O kó ó lɔ, Yaya tɛ́wɛɛ fɔ Elɔdi yɛ́ lé kó a mánngan kɛ a bhádhyemannjɛ o muso Elodiyadi tá kɛ o kɛ́ a muso le. ¹⁹Elodiyadi mwɛ́nnɛnnin ndɛ́ɛ Yaya mán, a tɛɛ fɛ́ kɛ Yaya fáa, wáa a tɛ́ tɛ se ²⁰kɛ mansɔɔ. Elɔdi ó tɛ́ɛ sháannan Yaya ɲɛn ne, a tɛɛ lɔ ŋóyoo mɔɔnteenin né tɛ́ɛ ale, kɛ a sɛ́nnɛnya. A ló ndɛ́ɛ í yáakii tóla Yaya lɔ. Yaya kómankan ŋo lɔ́myɛn ŋó tɛ́ tɛ́ Elɔdi tóla sii lɔ. A kan ŋó lɔ́myɛn ŋó ló ndɛ́ɛ dí a yɛ.

²¹Elodiyadi é nán ló mɛɛ lɔ́ sɔ́ɔ, o lée kɛ́ Elɔdi wóolo ŋo sámyɛ ŋó le. O tée ó mán, Elɔdi é sunmannvemba dí a latuunnan ólu mán, a yɛ swáasi olu kúnndii ólu, ní Galile mála mɔɔnba ó shɛ́ɛman mán. ²²Elodiyadi dhyémuso é nan lo bhó ŋó kɔ́ɔnnɔn tó kɛ lɔ ngɛ. A ko é dhyáa Elɔdi ní a latuunnan ólu yɛ. Mansacɛ óo fɔ sínngbiinin ŋó yɛ́ kó: «Íi fé ŋóo fé nvɛ́, o fɔ́ ɲɛ́n ké ní ó di í mán.» ²³Elɔdi é laheli ta sínngbiinin ó yɛ kɛ́ í shɛ́n kɛ fɔ kó: «Ní í kɛ fé ŋóo fé ngófɔ ɲɛ́n, ɲáan o dí í mán, háanin a kɛ kɛ́ ɲɛ́n yamaan o fán ngée ŋo lé.» ²⁴Dhyémuso ó bhɔ́ tó kɛ́nan a fɔ a wóobhaa yɛ kó: «Ní mínnɛɛn lé kófɔ?» A wóobhaa é a yawi kó: «Yaya Bátizelikɛbhaa kún ŋó.» ²⁵Aa í kwɔ́sɛɛ lɔgbannin né kɛ́nan fɔ mansacɛ o yɛ kó: «Ní fɛ́ ké íi Yaya Bátizelikɛbhaa kún ŋó bhyáa tása lɔ lɔ kɛ́nan a di mán kwáakwaalenin.»

²⁶O kóman óo mansacɛ o ɲánlasii gbútuukɛ. Wáa a tɛ tɛ́ se kɛ í bá mée, a yɛ láheli ta ni ólu ni a latuunnan ólu kósɔn. ²⁷O ywáaninngee ŋo lɔ, mansacɛ óo a yɛ swáasi o kée myáa kó o a táa Yaya kún ŋó tɛ́ɛ kɛ́nan o di a man. O lée kɛ́ céladhye ŋo táa ó lé kasobho ŋo la, kɛ táa Yaya kún ŋó tɛ́ɛ. ²⁸Aa nan Yaya kún ŋó lé tása lɔ kɛ́nan ó lo sínngbiinin ŋó bhóo, tó sínngbiinin ŋo a lo a wóobhaa bhóo. ²⁹Yaya yɛ́ kaamɔɔndhye ŋólu o myɛ́n mínngɛ, ii nan Yaya fée ó tá kɛ a sutaa kábulu lɔ lɔ́.

Ɛnza ŋé cɛ wáa lóo bhálola

Matiyu 14.13-21; Luka 9.10-17; Yaya 6.1-14

³⁰Céladhye ŋólu í kwɔ́sɛɛ Ɛnza man. Ii kó óo kó kɛ, óni ii kaa mínnu kɛ, ii nan o bɛ́ kwaan kɛ́ a yɛ. ³¹Nanbhaa olu ní táabhaa ólu sháaya kóyoo ŋó mán, ale ni a yɛ kaamɔɔndhye ŋólu mán lɔ́minkɛlaa sɔ́ɔ. Ó lé yɛ́ɛ kósɔn, aa fɔ i yɛ kó: «Aa nan án ndáa só o kwɔ́ka, ké án ndáa án nɔ́nwɛɛn yénɔn dɔ́ɔnin.»

³²Ii táa kúun ŋó lɔ́ kɛ táa í kéenan ywáa cɛ́bhɔnin nɔn. ³³Mɔɔn shɛ́ɛman ŋé i yé tó kɛ i táalaa ó lɔ. Mɔɔn ólu bhɔ́ só ó bɛ́ lá í sénan i ɲángbannin ne kɛ táa Ɛnza ni a yɛ kaamɔɔndhye ŋolu kunmyɛ o ywáa ó lɔ. ³⁴Ɛnza ŋé bhɔ́ kúun ŋó lɔ́ mínngɛ, aa yamanba ó yé mɔɔn ólu mánɲwaan é lo a lɔ, kɛ mansɔɔ i tɛ́ɛ lé óyoo kunnansiibhaa tɛ́ saa mínnu la. Tó aa i kála kó shɛ́ɛman nan.

³⁵Wáati o tɛ́wɛɛ wɛɛ yanvala, a yɛ kaamɔɔndhye ŋolu í mángbaa a lá tó kɛ fɔ a yɛ kó: «Ya ŋó cɛ́bhɔnin ɲé, wáati o ló ŋwɛ́ɛn yánva, ³⁶Yaman ó lábhyaa ké ii táa sunman nzá kanman ŋólu ní i lafɛso olu la.» ³⁷Waa Ɛnza ŋé i yawi kó: «Ále gbúlu a sunman dí i man.» Ii fɔ a yɛ kó: «Íi fɛ́ ké án ndáa wɛ́ɛgbannan déniye kɛnmɛn fyáa sa sunman nan i yɛ a?» ³⁸Aa i mánɲaankɛ kó: «Búlu yée lée a bhóolɔ? Áa táa o mánfɛɛ.» Ii táa ɲaanli kɛ́ mínngɛ, ii nan fɔ kó: «Búlu lóo lée án móo, óni yɔ́ɔ dhyé nvyáa.»

³⁹Ɛnza ŋé nɔ lá a yɛ kaamɔɔndhye ŋolu ka kó ii mɔɔn ólu bɛ́ lasii bínngɛnnɛn o ka dhyɛ bhóoman. ⁴⁰Mɔɔn ólu í síi kɛnmɛn kɛnmɛn, óni bíloolu lóolu. ⁴¹Ɛnza ŋé búlu lóo óni yɔ́ɔ dhyé nvyáa ó tá, kɛ í ɲán layɛɛ sángboo o mánshaa fɛ́ kɛ Ala bálika bhɔ́. Aa búlu ólu kúunndɛɛtɛɛ kɛ i lo nó a yɛ kaamɔɔndhye ŋolu bhóo. Kó ii a lɔtaa. Aa yɔ́ɔ dhyé nvyáa ó lɔtaa bɛ́ lá o ɲán kée ŋó mán. ⁴²Mɔɔn ólu bɛ́ é lɔ́minkɛ kɛ fá. ⁴³Tó ii nán seenin ndá ni fyáa láfanin né búluguun ni yɔ́ɔ la. ⁴⁴Mɔɔn mínnu tɛ́ɛ lɔ́minkɛsɛɛ o lɔ ólu tɛ́ɛ cɛ wáa lóo lé le.

Ɛnza ŋé táaman kɛ́la bháji o ka

Matiyu 14.22-33; Yaya 6.15-21

⁴⁵O ywáaninngee ŋo lɔ, Ɛnza ŋé fɔ a yɛ kaamɔɔndhye ŋólu yɛ kó ii í bhyáa kúun ŋó lɔ, kɛ bhá ó tɛ́ɛ a ɲɛn kɛ táa a ɲan dɔ́ o mán Bɛtisayida só ó tɔ́ɔfɛ. Sánnin ale a yaman o lábhyaa. ⁴⁶Aa wɛɛ i sáanan í lá mínngɛ, aa táa tii ó ka, kɛ í sɛ́ɛ. ⁴⁷Ywáa ó séla wáati mínnɔn, ké kúun ŋó wɛ́ɛ lo bhá ó cɛ́man, kɛ ale kée ndó lúuman. ⁴⁸Fáyi o mán, aa yé óyoo fwɛ́ɛn ó wɛ́ɛ a yɛ kaamɔɔndhye ŋólu mánsɛɛ kúunnanbwee o lɔ. Kúun ŋó tɛ́ tɛ́ séla táala cɛ́ɛne ne bhée, kɛ mansɔɔ fwɛ́ɛn ó tɛ wɛɛ gbíiya i ka. Aa táaman kɛ́ bhá ó ka, kɛ táa i saala. A tɛ káa tínmin i ka. ⁴⁹Kaamɔɔndhye ŋólu a yé táaman kɛ́la bhá ó ka mínngɛ, i tɛ́ɛ a yéla mɔɔn lɔ́ lé sáula lé. Ii gbáa ngbáa. ⁵⁰Kɛ mansɔɔ í bɛ́ ɲán tɛ́ɛ a lá, ii sháan koyoongɛ, o ywáaninngee ŋo lɔ, aa kóman i yɛ aa fɔ i yɛ kó: «Áa í lɔ́ja! Né lée wé, a kɛ́nan sháan.» ⁵¹Tó aa í yɛ́ɛ kúun ŋó lɔ́ i fɛ́, tó fwɛ́ɛn óo í mánla. O lée i bɛ́ kɔɔnnɔnfii koyoongɛ.

⁵²Kɛ mansɔɔ Ɛnza ŋé káwananngo mín ngɛ búlu ó la, i mán bhɔ́ o ɲánle. Hákii tɛ́ tɛ́ i la.

Ɛnza ŋé yangalotɔ lú lákɛɛnyala Zenezalɛti mála o lɔ

Matiyu 14.34-36

⁵³Ii wɛɛ bhá ó tɛ́ɛla tó kɛ í bhyáa lúuman Zenezalɛti mála o lɔ. ⁵⁴Ii í yíi kúun ŋó lɔ́ tɛ́nmɛn, mɔɔn ólu Ɛnza manlɔ. ⁵⁵Ii bwée ó lé lɔ kɛ táa a nanko o fɔ́ o mála o ywáa bɛ́ lɔ. Ɛnza ndɛ́ɛ táa só óo só lá o mála o lɔ, mɔɔn óo mɔɔn tɛ́ɛ a kolamyɛn, olu bɛ́ tɛɛ a kɛla o ɲán kée ŋó lé mán. Ólu tɛ́ɛ nánla ni i ta yangalotɔ ólu lé láfe ŋolu ka a saala. ⁵⁶A tɛɛ táa ywáa súu óo súu lɔ, lúukɔɔnnɔn o, só olu la o, tóola olu la o, mɔɔn ólu tɛ́ɛ nánla i yɛ yangalotɔ ólu díla a mán bháa lɔ́ lé, tó kɛ a dɛ́li kó aa jɛn ké yangalotɔ ólu a í bhóo túu a yɛ deekeba ó lágboo lá. I súu óo súu é í bhóo túu a lá, o mɔɔn ó bɛ́ bɛ́ é kɛ́ɛnya.

Ɛnza ni Falizɛn ŋólu kíti kɛ́la náanmun kɔɔ ólu ka

Matiyu 15.1-9

¹Falizɛn ŋolu ní sɛliya kaamɔɔn ólu dáman é bhɔ́ Yeluzalɛmu kɛ́nan í mínin Ɛnza nan. ²Ii nan yé óyoo a yɛ kaamɔɔndhye ŋo lɔ́luu lɔ́min kɛla ni i bhóo sɛ́nnɛnyabhɛɛ ó lé, o kɔ́ɔ o tɔ́ɔ kó kɛ lɔ́min kɛ́ ni í bhóo kwóbhɛɛ óle, kɛ kɛ óyoo Falizɛn ŋolu yɛ́ nánmun óo fɔ́la tɛ́nmɛn. ³Falizɛn ŋolu ni Yawudhyaa o tɔ́ ólu tɛ́ lɔ́min kɛla ni i bhóo kwóbhɛɛ o le, kɛ mansɔɔ ii i bhyɛ́man ólu tá nánmun o lé ka. ⁴Í kɛ́nan kɛ bhɔ́ lɔ́ɔ o lɔ, i tɛ́ɛ í kwó ótun kɛ í sɛ́nnɛnya kɛ tó lɔ́min kɛla. Náanmun kɔɔ ó shɛ́ɛman ɲé, i tɛɛ olu láteenan lé, mín ŋé nan kɛ́ bhɔ́ɔlaa o lɔ́kwo ólu le, yáafyɛ olu, óni sháanɛɛnlaa ólu. ⁵Falizɛn ŋólu ní sɛliya kaamɔɔn ólu Ɛnza mánɲaankɛ kó: «Mínnɛɛn lé kósɔn tó í yɛ́ kaamɔɔndhye ŋolu tɛ́ bhyáala i bhyɛ́man ólu yɛ́ laanan ó kwɔ, tó ii lɔ́min kɛla ni i bhóo kwóbhɛɛ óle?» ⁶Aa i yawi kó: «Céla Ezayi é célaya mínngɛ a ka, a jó lé tɛ́ɛ a mán, fyáangafo ólu. Aa sɛwɛnin ɲé kó Ala tɛ́ɛ fɔ́la kó:

mɔɔn míinnu bwóɲanla í lá lɔ́ lé,

wáa i yóso o ywáa a já nán.

⁷Ii mátola gbɛ́ɛgbɛɛ lé wé,

Í lée min núu mɔɔn ólu kalanan

tɔ́ nu la, mín núu fáanan

mɔɔndhye ŋólu la.»

⁸Aa fɔ i yɛ íkwɔtun kó: «Áa Ala yɛ tɔ́ ŋo tóla yénɔn, kɛ mɔɔn olu tá nánmun o lé látaaman.»

⁹Aa wɛɛ kɛ fɔ íkwɔ kó: «Á lée i bánan Ala yɛ́ tɔ́ ŋo mán tó kɛ a yɛ́ laanan ó léelu tá a? ¹⁰Waa Céla Musa é fɔ kó: Í fá ní í Wóobhaa bwóɲan, kó ni mɔɔn mínngɛ kómanyoo nvɔ́ a fa wáman a wóobhaa man, kó i kákan kɛ o tíi o fáa lé.¹¹Wáa Álee lú kó ní mɔɔn lɔ́ kɛ fɔ a fa yɛ wáman a wóobhaa yɛ kó: ‹Ndɛ́ káa móota mín dí í mán kɛ́ í lɔdhyɛman, óo kɔlɔba ne le. O kɔ́ɔ o tɔ́ɔ kó ŋwɛ́ɛn wɛɛ o díla Ala man.› ¹²Áa o tíi ólu láfiila lé wé. I tɛ́ fósi díla i wóobhaa ni i facɛ mán bhée. ¹³Ále tá nánmun olu kósɔn, Ala saaninkan ŋolu nánfa tɛ́ la mɔɔn ólu ɲánla bhée. A yɛ́ɛ é ó bhɔ́ɲɔnngo shɛ́ɛman ngɛ́la.»

Fé mín núu sé mɔɔn lánɔɔnla

Matiyu 15.10-20

¹⁴Ɛnza ŋé yaman ó kíi ko kwáa kɛ tó kɛ fɔ i yɛ kó: «A bɛ́ a í tóomanlɔ nɔn, ké áa bhɔ́ kóman míin ɲánle. ¹⁵Lɔ́minfe ŋo súu óo súu, ní a táala mɔɔn kɔ́ɔnnɔn lé, o sí tɛ́ sé mɔɔn lánɔɔnla, fɔ́ fé mín ŋé bhɔ́la mɔɔn yóso o lɔ, o lée mɔɔn lánɔɔnla. ¹⁶[Tóo kɛ́ kɛ́ mɔɔn mín ngún mán, o a lɔ́myɛn.]» ¹⁷Ɛnza ŋé bhɔ́ mínngɛ yaman o cɛ́man kɛ lo bhónan, a yɛ kaamɔɔndhye ŋolu a manɲaankɛ o saanan o kɔ́ɔ o mán. ¹⁸Aa fɔ i yɛ kó: «Ále, yáanin bí Ále mán yáakii sɔ́ɔ bhá ŋan? A tɛ́ myɛnnan kó fé nzúu óo súu é lónan mɔɔn kɔ́ɔnnɔn o si tɛ́ mɔɔn lánɔɔnla a? ¹⁹Kɛ mansɔɔ o lɔ́minfe ŋo tɛ́ lónan mɔɔn yóso o lɔ, waa a lónan mɔɔn kɔ́ɔnnɔn le tó kɛ́wɛɛ kɛ bhɔ́ sháa kunmantaa fɛ́.» O bhóo ó mán, áa yáa i la óyoo sunman ŋo bɛ́ sɛ́nnɛnyanin née. ²⁰Aa fɔ íkwɔ kó: «Fé mín ŋé bhɔ́la mɔɔn o yóso ó lɔ, o lée mɔɔn lánɔɔnla. ²¹Kɛ mansɔɔ míliya yóo ŋólu bɛ́ bhɔ́la mɔɔn o yóso óle lɔ: ‹Káanngɛ ólu, soɲan ólu, mɔɔn fáa ólu, ²²ɲɔnmɔɔnya ólu, ɲánbhɔnvɛ olu, yóoɲan ólu, lanɛɛnni o, kɛ dínɲanlɔtɛɛ kɛ cɛ́yoo ne, ɲanngboya o, mɔɔn tɔ́ɔ cáan ŋó, kɛ í yɛ́ɛ lɔ́bwoɲan, yáakiindaɲan o. ²³O kóyoo ŋó bɛ́ɛ bhɔ́la mɔɔn yóso ó lé lɔ tó kɛ mɔɔn lánɔɔn.› »

Lónanmuso lɔ é lála Ɛnza nan

Matiyu 15.21-28

²⁴Oo wɛɛ mínngɛ, Ɛnza ŋé bhɔ́ o ywáa ó lɔ, tó kɛ táa Tili mála ó lɔ. Aa lo bhó nɔ́ la. A tɛ tɛ́ fɛ́ ké mɔɔn sí a lɔgbɛ óyoo aa yénɔn, wáa a mán sé tóla loo nɔn. ²⁵Lámansayoo ndɛ́ɛ muso lɔ́ dhyémuso fɛ́, oo a tɔ́ɔ myɛ́n mínngɛ, aa nan a saala téeman tó kɛ í kúnmɛɛn nɔkɛɛ a kɔɔ. ²⁶O muso ó tɛ́ tɛ Yawudhyaa le, Gɛlɛki le tɛ́ɛ ale, Fenisika kɛ bhɔ Sili mála o lɔ. Aa Ɛnza mandhyaa kó aa lámansayoo ŋó gbɛ́ a dhyémuso o fɛ́. ²⁷Wáa Ɛnza ŋé fɔ a yɛ kó: «Dhyémuu ólu tó yénɔn ótun ké ii fá, kɛ mansɔɔ kɛ dhyémuu ólu yɛ́ sunman ŋó ta kɛ a lafii ŋwúunnin ŋólu kɔɔ o mánɲin!» ²⁸Aa Ɛnza ɲawi kó: «Oo tinɲan Mantii ó, wáa sunman mín ŋé bhɔ́la dhyémuu ólu bhóo kɛ bé tabɛli o kɔɔ ŋwúunnin ŋólu o lɔ́ɔnan.» ²⁹Ɛnza ŋé fɔ a yɛ, «O láfaɲan kée ŋó kósɔn ko: táa lúman, lámansayoo ŋó wɛ́ɛ bhɔ́ í dhyémuso o fɛ́.» ³⁰Aa í kwɔ́sɛɛ a bhóo lúman, kɛ táa a dhyémuso o lánin nzɔ́ɔ gbála ŋo ka, ké lámansayoo ŋólu wɛ́ɛ bhɔ́ a fɛ́.

Ɛnza ŋé cɛ tóogbee nɔ lákɛɛnyala

³¹Ɛnza ŋé bhɔ́ Tili mála o lɔ, kɛ bhyáa Sidɔn só ó fɛ́, kɛ í kwɔ́sɛɛ Galile bhá lá o la Dekapɔli mála o lɔ. ³²Ii nan cɛ tóogbee nɔ́ lé a yɛ ó le lɔ. A kóman kó o gbánnin ndɛ́ɛ. Ii Ɛnza ndɛ́li kó aa í bhóo lá a ka. ³³Aa táa ale ywáa já nɔn, kɛ í cɛ́bhɔ ale yaman o la. Aa í bhóokwɛɛnnin ŋolu bhyáa cɛ ó tóo ólu lɔ, kɛ í láyi bhyáa cɛ ó nyɛ́n ŋo ka. ³⁴Aa í ɲán lɔ sáman, kɛ í ɲáankii láyii, kɛ fɔ cɛ ó yɛ kó: «Efata!» O kɔ́ɔ o tɔ́ɔ kó: «Í láka!»

³⁵O ywáaninngee ŋo lɔ, cɛ ó tóo óo í láka, a nyɛ́n ŋo yúu o tɛɛ, kɛ a nyɛ́n ŋo fwɛ́ɛnya a lá lɔ. Aa kóman cɛ́ɛne ne. ³⁶Ɛnza ŋé fɔ i yɛ kɛ a mangbɛya kó i kɛ́nan ó kóman ó fɔ́ mɔɔn sí yɛ: Wáa a tɛ́ɛ kɛ́ o fɔ́la mɔɔn ólu yɛ́, kó i kɛ́nan la fɔ́ mɔɔn sí yɛ, ó lé yɛ́ɛ tɛ́ɛ í sɛwɛ lónan kóman ó láse ó mán ywáa bɛ́ lɔ. ³⁷Óo mɔɔn bɛ́ kɔɔnnɔn é fii, i tɛ́ɛ fɔ́la lé kó: «Aa kó mínnu kɛ́la o bɛ́ káɲin kɛ tínmin. Aa tóogbee ŋólu tóo ó lákala, tó kɛ bhóbho ólu lákoman.»

Ɛnza ŋé sunman díla mɔɔn wáa náannin mán

Matiyu 15.32-39

¹O tée ó mán, yaman bá tɛ́ɛ Ɛnza ndɔ́ɔfɛ sunman ndɛ́ tɛ i bhóo bhée. Ɛnza ŋé a yɛ kaamɔɔndhye ŋolu kíi kɛ́ fɔ i yɛ kó: ²«Yaman míin mánɲwaan é nɔ́n, kɛ mansɔɔ i tée sáwa lée ngwɔ́ka nín, sunman ndɛ́ i bhóo. ³Ni ngɛ́ i kɔ́ɔntɔ ó lábhyaa ké ii táa i fɛ́ yé, i yáa dɛ́sɛ sháala, kɛ mansɔɔ i lɔ́lu bhɔ́laa a já.»

⁴Ɛnza ɲɛn kaamɔɔndhye ŋólu a yawi kó: «Í káa bhɔ́ míin nú láfa búlu o lé mín ne dhyɛ́ míin nɔn?» ⁵Ɛnza ŋé i mánɲaankɛ kó: «Búlu yée lée a bhóo?» Ii fɔ kó: «Wóonvyaa.»

⁶Aa fɔ yaman o yɛ kó ii í síi lúu mán. O kwɔ, aa búlu wóonvyaa ó tála, kɛ Ala bálika bhɔ́ Ala yɛ, aa i kúunndɛɛtɛɛ kɛ di a yɛ kaamɔɔndhye ŋolu mán ké ii a lɔtaa yaman ó la. ⁷Yɔ́ɔdhye mɛ́nsɛn dáman tɛ́ɛ i bhóo. Ɛnza ŋé yɔ́ɔ ólu tá kɛ Ala bálika bhɔ́ íkwɔtun kɛ a di a yɛ kaamɔɔndhye ŋolu mán íkwɔtun kó ii a lɔ́taandaa yaman o la. ⁸Mɔɔn olu bɛ́ɛ lɔ́minkɛ kɛ fá. Tó ii nán see wóonvyaa lé sunman ndɔto o lɔ. ⁹Yaman o tɛ́ɛ mɔɔn wáa náannin lú síya bhɔ́la. O lé kwɔ, to aa i lábhyaa. ¹⁰O ywáaninngee ŋo lɔ, Ɛnza ni a yɛ kaamɔɔndhye ŋolu í bhyáa kúun ŋó lɔ tó kɛ táa Dalimanuta mala ó lɔ.

Falizɛn ŋolu fɔ́la kó Ɛnza ŋan káwananngo lɔ́ kɛ́

Matiyu 16.1-4

¹¹Falizɛn ŋolu nan, ii lágban bhyáa Ɛnza nan a lɔswaan ndɔ́ɔ lɔ́: Tó íi fɔ a yɛ kó aa káwako kée ngɛ́ i ɲánla, kɛ́ bhɔ́ sángboo o lɔ. ¹²Aa í ɲáankiiba láyii tó kɛ fɔ kó: «Mínnɛɛn lé kósɔn tó án ɲɛ́n wáati miin mɔɔn min núu káwako ɲíinnan? Ní fɔ́la a yɛ́ tinɲan in ne ngó, káwako gbɛ́ɛ táa kɛ́ a lé wáati miin mɔɔn ólu yɛ́!» ¹³O kwɔ, aa í kwɔ́sɛɛ ni a yɛ kaamɔɔndhye ŋolu le kúun ŋó lɔ kɛ táa bhá ó ɲán dɔ́min ŋo mán.

Falizɛn ŋólu ní Elɔdi yɛ́ mɔɔn ólu yɛ́ kaangoo o

Matiyu 16.5-12

¹⁴Kaamɔɔndhye ŋolu ɲan kɛ́ búlu lú tá. Búlu kée ngbóto lé tɛ́ɛ i bhóo kúun ŋó lɔ. ¹⁵Ɛnza ŋé i sɛ́ɛmansɔɔ í yɛ́ kɛ fɔ kó: «Áa a yáakii tó a yɛ́ɛ lɔ́ Falizɛn ŋólu ní Elɔdi yɛ́ lévu o mán.» ¹⁶Kaamɔɔndhye ŋolu tɛ́ɛ kómanla ɲɔ́ɔnɲɛn kɛ mansɔɔ búlu tɛ́ tɛ i bhóo. ¹⁷A tɛɛ i kɔɔnnɔnkan ŋo lɔ́ mínngɛ, aa i mánɲaankɛ kó: «Áa fɔ́la ɲɔ́ɔnɲɛn kun mínnɛɛn lé la kó búlu tɛ́ a bhóo? A mán hákii sɔ́ɔ bhá ŋan? A mán bhɔ́ a ɲan lé bhá ŋan? Bháa a yáakii o gbénenin née a? ¹⁸Ɲán é a kún mán, a tɛ́ yéli kɛla a? Tóo é a kún mán a tɛ́ myɛ́nnin kɛla a? Kó tɛ́ tóla a kɔ́ɔnnɔn a? ¹⁹Ní búlu lóo ó lɔ́tɛɛtɛɛ cɛ wáa lóo ó lá mínngɛ, áa see ɲée lé láfa búluguun ŋó tɔ́ ólu la?» Ii a yawi kó: «Tá ni fyáa.» ²⁰«Tó ní búlu wóonvyaa ó lɔ́tɛɛtɛɛ mínngɛ mɔɔn wáa náannin ó la, áa nan see náfanin ɲée lé lé a tɔ́ ólu lɔ?» Ii a yawi kó: «Wóonvyaa.» ²¹Ɛnza ŋé fɔ i yɛ kó: «Yáanin sán, a mán bhɔ́ o ɲán lé bhá ŋan?»

Ɛnza ŋé fyóonjɛ lɔ lákɛɛnyala Bɛtisayida

²²Oo wɛɛ mínngɛ, Ɛnza ni a yɛ kaamɔɔndhye ŋolu táa Bɛtisayida só o la. Yénɔn, mɔɔn ólu nan fyóonjɛ lɔ lé a yɛ, kɛ a dɛ́li kó aa í bhóo túu o lá, kɛ a lákɛɛnya. ²³Ɛnza ŋé fyóonjɛ o myáan a bhóo o mán, kɛ táa ale só o kwɔ́ka. Tó aa a láyi o bhyáa a ɲanman, kɛ í bhóo lá a ka, kɛ a mánɲaankɛ kó: «Íi fé nɔ́ yéla a?» ²⁴Fyóonjɛ óo í ɲánlaka ó lé lɔ tó kɛ fɔ kó: «Ní mɔɔn ólu yéla táaman kɛ́la wáa i bhɔ́nin ɲé yíi lée lú la.» ²⁵Aa í bhóo lá a ɲan ó ka ko kwáa kɛ. Óo kɛ́ mínngɛ, cɛ óo í ɲánlaka, aa kɛ́ɛnya kɛ ywáa yé cɛ́ɛne. ²⁶Ɛnza ŋé fɔ a yɛ kó aa táa a bhóo lúman wáa kó a kɛ́nan lo só ó kɔ́ɔnnɔn.

Piyɛli é mín nvɔla Ɛnza man

Matiyu 16.13-20; Luka 9.18-21

²⁷Ɛnza ni a yɛ kaamɔɔndhye ŋolu tɛ́ɛ táala Filipu, Sezale lámiin nzó nɔ́lu lá. I tɛ́ɛ sháakun ŋo lɔ́ mínngɛ, aa a yɛ kaamɔɔndhye ŋolu mánɲaankɛ kó: «Mɔɔn ólu tá fɔli o lɔ, née yɛ́ɛtii lé?» ²⁸Ii a yawi kó: «Lɔ́lu kó íi Yaya Bátizelikɛbhaa lé le, lɔ́gbɛɛ lu kó íi Eli lé le, tó lógbɛɛ lu yɛ́ɛ kó íi céla ólu lɔ́ lé le.» ²⁹Aa a yɛ kaamɔɔndhye ŋolu mánɲaankɛ kó: «Tó Ále ɲánla, ní yɛ́ɛtii lé?» Piyɛli é a yawi kó: «Íle lée Kílisi o le.» ³⁰Ɛnza ŋé fɔ i yɛ kɛ a mangbɛya kó i kɛ́nan á yɛ kó ó fɔ́ mɔɔn sí yɛ.

Ɛnza ŋé a yɛ sayako óni a yɛ kúunniko o fɔ́la

Matiyu 16.21-28; Luka 9.22-27

³¹Óo wɛɛ mínngɛ, Ɛnza ŋé a yɛ kaamɔɔndhye ŋolu kála ŋó lámyaan kɛ fɔ i yɛ kó: «Mɔɔn Dhyénjɛ ó kákan né kɛ́ tɔ́lɔya lé myáan koyoongɛ. Cɛba ólu ní faanlɛɛɲansebhaa olu kúnndii ólu ní sɛliya kaamɔɔn ólu yáa í bá a lɔ́. I yáa a fáa, a tee sawa a saya kɛ́nin ŋo kwɔ, a yáa kúun kɛ bhɔ́ saya o lɔ.» ³²Aa tɛ́ɛ o fɔ́la i bɛ́ le yɛ. O lɔ, Piyɛli é Ɛnza ngíi í kéenan, kɛ kóman a yɛ kɛ a mangbɛya. ³³Ɛnza ŋé í ɲán yɛ́ɛman kɛ a yɛ kaamɔɔndhye ŋolu mánfɛɛ tó kɛ kóman Piyɛli yɛ kɛ mangbɛya kó: «Táa kɛ bhɔ́ ngwɔ́ Sɔtaannan! Kɛ mansɔɔ í tɛ́ i mílila óyoo Ala, wáa óyoo mɔɔn ólu.»

Kɛ bhyáa Ɛnza ngwɔ oo kɛ́la díi?

³⁴Oo kɛ́ mínngɛ, Ɛnza ŋé yaman o kíi óni a yɛ kaamɔɔndhye ŋolu kɛ fɔ i yɛ kó: «Ní mɔɔn mín ŋé fɛ́ kɛ́ í bhyáa né kwɔ́, fɔ́ o tíi ó a í bá a yɛ́ɛ lɔ lé, kɛ a yɛ́ɛ gbáanɲii o tá kɛ́ bhyáa né kwɔ́. ³⁵Kɛ mansɔɔ mɔɔn óo mɔɔn é fɛ́ kɛ a ní o kísi, o tíi ó yáa bɔɔn a ni o lɔ. Wáa mɔɔn óo mɔɔn kɛ bɔɔn a ni o lɔ́ né ni sanmankanmɛɛ o kósɔn, o tíi ó yáa kísi. ³⁶Óo mínnɛɛn lé ɲánla mɔɔn mán kɛ́ dínɲanmanfe ŋó bɛ́ sɔ́ɔ tó kɛ táa bɔɔn a ní o lɔ́? ³⁷Mɔɔn ó sé kɛ́ fé mínnɛɛn lé dí a ní o kunmanka lé? ³⁸Ni mɔɔn mín ngɛ maloya né lá, óni kɛ maloya ngómankan ŋolu lá bímɔɔn Ala kanmyaanbhɛɛ olu ní yuumutɔ ólu cɛ́man, mɔɔn Dhyénjɛ o yáa maloya o tíi ó lá ni a kɛ́nan tée mín man a Fá yɛ nɔ́lɔya ó lɔ́ ni malɛɛka sɛ́nnɛnyanin ŋólu le.»

¹Ɛnza ŋé fɔ i yɛ o lé lɔ íkwɔtun kó: «Tó ní fɔ a yɛ́ tinɲan in ne ngó: Mɔɔn mín núu yánun nín, o lɔ́lu yɛ́ɛ táa sayakɛ ní i mán Ala yɛ́ mansaya ó yé nánla ní sébhaayale.»

Ɛnza ngɛseɲan óo yɛ́ɛmanla

Matiyu 17.1-13; Luka 9.28-36

²Tee wɔ́ɔlɔ tínminnin ngwɔ, Ɛnza ŋé Piyɛli ní Zaki ní Yaya kíi kɛ táa ile i kéenan tíiba lɔ́ ka. A kɛseɲan oo yɛ́ɛman i ɲanla, ³a yɛ déeke óo gbɛ́ fɔ́ kɛ a mannan mannan bhɔ́. A gbɛ́ kóyoo ŋó mán, mɔɔn sí tɛ́ lúukolo ó ka yánun, mín ŋé sé fáanin kwola cé kɛ gbɛ. ⁴O kwɔ, kaamɔɔndhye nzawa óo tɛɛ céla Eli ní céla Musa yéla kóman kɛ́la ni Ɛnza ne. ⁵Piyɛli é fɔ Ɛnza ɲɛn kó: «Kaamɔɔn, án ngɛ o yánun ŋóo wɛ́ɛ físaya. Án ní tóo sawa lɔ́ ya. Í tá kée, céla Musa tá kée óni céla Eli tá kée.» ⁶Piyɛli kɔ́ɔnnɔn tɛ́wɛɛ múu, kɛ mansɔɔ i bɛ́ man tɛ́wɛɛ sháan. ⁷Káwa lɔ́ é nan i mantuun tó saaninkan nɔ é bhɔ́ káwa ó cɛ́man kɛ fɔ kó: «Míin lée nyénjɛ óle mín ŋan dí ɲɛ́n koyoongɛ. Áa a kómankan ŋo lɔ́myɛn!» ⁸Kaamɔɔndhye ŋolu bɛ́ɛ í ɲánlakaa í tɔ́ɔfɛ téeman, wáa i mán mɔɔn gbɛ́ɛ yé bhée fɔ́ Ɛnza ngée le tɛ́ɛ i fɛ́.

⁹I tɛ́ɛ bhɔ́la tii ó ka mínngɛ, Ɛnza ŋé fɔ i yɛ kɛ a mangbɛya kó: «A wɛ́ɛ kó min yé nín, a kɛ́nan o lábhɔ mɔɔn sí ɲánla sánnin mɔɔn Dhyénjɛ ó kúunnzan o cɛ kɛ bhɔ́ sú ólu cɛ́man.» ¹⁰Ii o kóman ó lamala i kɔɔnnɔn, wáa ii ɲɔ́ɔn mánɲaankɛ kó: «Kɛ kúun kɛ bhɔ́ sú ólu cɛ́man o kɔ́ɔ o tɔ́ɔ díi?» ¹¹Kaamɔɔndhye ŋolu a mánɲaankɛ kó: «Mínnɛɛn le kósɔn sɛliya kaamɔɔn olu fɔ́la kó fɔ́ céla Eli lé á nan ótun?» ¹²Aa i yawi kó: «Fɔ céla Eli lé a nan ótun kɛ́nan kó ó bɛ́ lɔ́bhyɛ. Wáa mínnɛɛn lé kósɔn tó Ala bhóonɔn ólu fɔ́la kó mɔɔn Dhyénjɛ ó yáa tɔ́lɔya myáan koyoongɛ, tó kɛ í bá a lɔ? ¹³Wáa Í lé le wɛ́ɛ o fɔ́ wé céla Eli wɛ́ɛ nan wáa Kó min é dhyáa i yɛ, ii o lá a ka, óyoo a sɛwɛnin ngɔɔ tɛ́ɛ Ala bhóonɔn o lɔ se mín ne.»

Ɛnza ŋé dhyénin lámansayoondɔ lɔ lákɛɛnyala

Matiyu 17.14-21; Luka 9.37-43a

¹⁴Ɛnza ni a yɛ kaamɔɔndhye nzawa ólu sé kaamɔɔndhye ŋo tɔ́ ólu tɔ́ɔfɛ mínngɛ, ii yamanba yé i lamiin ŋó lɔ. Sɛliya kaamɔɔn olu ní kaamɔɔndhye ŋo tɔ́ ólu lámansɔsɔya la. ¹⁵Yaman ó Ɛnza nantɔ o yé mínngɛ, óo bháa i bɛ́ lɔ. Ii bwée téeman kɛ́nan a labhyɛ tó kɛ a twáa. ¹⁶Aa i mánɲaankɛ kó: «Áa mínnɛɛn lé lámansɔsɔya kɛla ni ile?»

¹⁷Cɛ lɔ́ é tó yaman o cɛ́man kɛ a yawi kó: «Kaamɔɔn, ŋwɛ́ɛn nan dhyénjɛ lé í sáala kɛ mansɔɔ lámansayoo ŋé a fɛ́, o lée a kɛla bhóbho le. ¹⁸Ni o lámansayoo ŋó kɛ́ wíi a fɛ́ ywáa óo ywáa lɔ, aa a labe lúuman, kɛ a láyigaan ŋo lábhɔ, kɛ a ɲin ó lákomanɲɔ́ɔn man, kɛ ale gbú lɔ́ɔya. Ni í yɛ́ kaamɔɔndhye ŋolu mándhyaa ké ii lámansayoo ŋó gbɛ́, i mán sé.» ¹⁹Ɛnza ŋé fɔ i yɛ kó: «Ále wáati miin mɔɔn ólu lánanbhɛɛ lé le! Né káa tó a fɛ́ yánun kɛ táa sé fɔ́ɔ wáati mínnɛɛn lé mán? Né káa Ále lɔ́myaan kɛ sé fɔ́ɔ wáati mínnɛɛn lé mán ósɔ? Áa nan dhyé ŋó lé ɲɛ́n.»

²⁰Ii nan dhyé ŋó lé a yɛ. Lámansayoo ŋóo Ɛnza yé mínngɛ, aa dhyé ŋó lámaanmaan fáanba la, kɛ a labe lúuman kɛ a laginniman fɔ́ kɛ a láyigaan ŋo bhɔ́. ²¹Ɛnza ŋé a fa ó mánɲaankɛ kó: «Míin ŋé i lamyaan a lá wáati mínnɛɛn lé lɔ?» Tó fá óo yawi kó: «Fɔ́ a yɛ dhyémuuya wáati o lɔ. ²²Wáati lɔ́lu lɔ lámansayoo ŋóo a lafii tá mán wáman jí lɔ, ké aa a fáa. Wáa án mánɲwaan mánfɛɛ ké íi án dhyɛman, ní o sé kɛ́ kɛ́ í yɛ́.» ²³Ɛnza é a yawi kó: «Mínnɛɛn lé kósɔn íi fɔ́la kó nín í kɛ́ sé? Lánanbhaa o kwéeko tɛ.» ²⁴O ywáaninngee ŋo lɔ, dhyé ŋó fá óo gbáa kɛ fɔ kó: «Nanin ŋé a lá, wáa ndhyɛman kɛ mansɔɔ ɲɛ́n lánanya ó láfanin ndɛ́.»

²⁵Ɛnza ŋé yaman o yé bwéela mínngɛ kɛ́nan a tɔ́ɔfɛ, aa í táan fɔ́ lámansayoo ŋó yɛ kɛ fɔ a yɛ kó: «Íle lámansayoo min é bhóbhoya óni toogbeeɲan kɛla mɔɔn la, ngó í yɛ́ ngó íi bhɔ́ dhyé ŋó fɛ́, í kɛ́nan a fɛ́ bhée fɛ́sɛfɛsɛ.» ²⁶Lámansayoo ŋóo gbáangbaa kɛ dhyé ŋó lámaanmaan bhɛ́ɛbhɛɛ le tó kɛ bhɔ́ a fɛ́. Dhyé ŋó lánin ŋé tó óyoo mɔɔn wɛ́ɛ sayakɛ. Mɔɔn shɛ́ɛman ndɛ́ɛ fɔ́la lé kó: «A wɛɛ sayakɛ.» ²⁷Wáa Ɛnza ŋé a myaan a bhóo mán, kɛ a láwii. Dhyé ŋóo í wíi kɛ í lɔ́ í sénan.

²⁸Ɛnza ŋé lo bhónan mínngɛ, a yɛ kaamɔɔndhye ŋolu a mánɲaankɛ í kéenan kó: «Mínnɛɛn le kósɔn án née mán sé o lámansayoo ŋó gbɛnan?» ²⁹Aa i yawi kó: «Mɔɔn sé lámansayoo nzúu míin gbɛnan fé mínnan, o lée Ala dɛ́li óle.»

Ɛnza ŋé a yɛ sayako óni a kúunngo o fɔ́la íkwɔtun

Matiyu 17.22-23; Luka 9.43b-45

³⁰Ii bhɔ́ yénɔn kɛ tínmin Galile mála o lɔ. Ɛnza ndɛ́ tɛ́ fɛ́ ké mɔɔn ólu á a ywáa lɔ. ³¹Kɛ mansɔɔ a tɛɛ a yɛ kaamɔɔndhye ŋolu kalanan lé tó kɛ fɔ kó: «Mɔɔn Dhyénjɛ o yáa ló mɔɔn ólu bhóo, í yáa a fáa, tee sáwa kwɔ, a yáa kúun kɛ bhɔ́ sú ólu cɛ́man.» ³²Wáa kaamɔɔndhye ŋolu tɛ́ tɛ́ bhɔ́la o kóman ólu kɔ́ɔ o ɲánle, i lo ndɛ́ɛ sháannan kɛ a mánɲaankɛ.

Yɛ́ɛtii kúnndii óle?

Matiyu 18.1-5; Luka 9.46-48

³³Ɛnza ni a yɛ kaamɔɔndhye ŋolu nan sé ó lé lɔ Kapɛnamu. I tɛ́ɛ bhó ŋó kɔ́ɔnnɔn wáati mínnɔn, Ɛnza ŋé i mánɲaankɛ kó: «A tɛ́ɛ mínnɛɛn lé kiti lá sháa o la?» ³⁴Wáa i bɛ́ɛ í lúmandhye, kɛ mansɔɔ i tɛ wɛ́ɛ wɛɛ ɲɔ́ɔn lamansɔsɔya la kó yɛ́ɛtii ŋé bɛ́ lɔ mɔɔnba óle. ³⁵Oo kɛ́ mínngɛ, Ɛnza ŋé í síi kɛ kaamɔɔndhye ndá ni fyáa ólu kíi, kɛ fɔ i yɛ kó: «mɔɔn mín ŋé fɛ́ kɛ kɛ́ ɲɛ́nmɔɔn le, fɔ́ ó tíi ó a tó bɛ́ kwɔ́ lé, kɛ kɛ́ bɛ́ tá bháalakɛdhye ne.» ³⁶Ɛnza ŋé dhyémuu lɔ́ myáan a bhóo mán, kɛ a lalɔ i cɛ́man, kɛ a ta kɛ a lá í sísi la, kɛ fɔ i yɛ kó: ³⁷«Mɔɔn mínngɛ í bhóo síi dhyémuu míin súu o kɔ́ɔ né kósɔn, o tíi óo í bhóo síila né lé kɔ́ɔ wé. Tó ni mɔɔn mínngɛ í bhóo síi ngɔ́ɔ, o tɛ́ í bhóo síila né gbú kɔ́ɔ o le, wáa o tíi o i bhóo síila njɛ́bhaa o le kɔ́ɔ.»

Mɔɔn min ndɛ́ án yúu le án ɲíin née wé

Luka 9.49-50

³⁸Yaya é fɔ Ɛnza ɲɛn kó: «Kaamɔɔn, án wɛɛ cɛ lɔ́ yé lámansayoo ŋólu gbɛnan í tɔ́ɔla. Án ní fɔ a yɛ kó a kɛ́nan o lɔ́gbɛɛ kɛ́ bhée, kɛ mansɔɔ a tɛ́ án ndá sɛ́ɛ ó lɔ.» ³⁹Wáa Ɛnza ŋé a yawi kó: «A kɛ́nan a lása a man, kɛ mansɔɔ mɔɔn lɔ́ tɛ́ sé káwananngo kɛ́la ndɔ́ɔ ó la, tó kɛ́wɛɛ kɛ dhyaayoo ngɛ mán. ⁴⁰Kɛ mansɔɔ mɔɔn min ndɛ́ án yúu le, oo án ɲíin ne le. ⁴¹Ní mɔɔn mínngɛ jífyɛ ɲan kée ndí a mán kɛ mansɔɔ kó áa Kílisi tá le le, ní tinɲan le fɔ́la a yɛ́ ngo, o tíi táa bɔɔn a sáa o lɔ.»

Yúumu o tá gbɛ́ya ó

Matiyu 18.6-9; Luka 17.1-2

⁴²«Dhyémuu mínnu wɛ́ɛ lá né la ní mɔɔn mín ngɛ kɛ́ sɔ́ɔbu le kɛ o kée kúnnɔn cáan, min ndɛ́ɛ físaa o tíi o mán o lée kɛ káwaguun belebeleba lɔ́ ngúun o tii o kannan, kɛ a lafii kɔɔji o lɔ. ⁴³Ní í bhóo kée ŋó kɛ́ kɛ́ sɔ́ɔbu le kɛ́ í bhyáa yúumukɛ ó lɔ, a tɛɛ i la, kɛ mansɔɔ í ló ŋó Ɛliyanan o lɔ́ ni í bhóo kée ŋó le, o ŋá físaa í mán ní í táa ó lé yaananmanta o lɔ́ ni í bhóo fyáa o le, tá min ndɛ́ sala. ⁴⁴[Tunmuun min núu yénɔn olu tɛ́ faala, tá ó ló ndɛ́ sala fɛ́sɛfɛsɛ.] ⁴⁵Ní í sé ŋo kɛ́ kɛ́ sɔ́ɔbu le kɛ́ í bhyáa yúumukɛ ó lɔ, a tɛɛ i la, kɛ mansɔɔ í ló ŋó Ɛliyanan o lɔ́ ni í sé ngée o le o a físaa í láfii ó lé yaananmanta ó lɔ́ ni í sé nváa óle. ⁴⁶[Tunmuun mínnuu yénɔn ólu tɛ́ faala, tá ó ló ndɛ́ sala fɛ́sɛfɛsɛ.] ⁴⁷Tó ni í ɲandhye ŋó kɛ́ kɛ́ sɔ́ɔbu le kɛ í bhyáa yúumukɛ ó lɔ, a bhɔ́ í lá, kɛ mansɔɔ í ló ŋó Ala yɛ́ Mansaya o lɔ́ ni í ɲándhye ngée ŋo le, o a físaa í mán í láfii ó lé yaananmanta o lɔ́ ni í ɲándhye nvyáa óle. ⁴⁸Tunmuun mínnuu yénɔn olu tɛ́ faala, tá ŋo ló ndɛ́ sala fɛ́sɛfɛsɛ. ⁴⁹Kɛ mansɔɔ tá ó yáa kɔɔ kɛ bɛ́ la. ⁵⁰Kɔɔ óo femɛɛ lé le. Wáa ní kɔɔ ó dhyáalaa ó kɛ́ bhɔ́ a lá, mɔɔn ó kɛla ɲán mínnɛɛn lé mán tó aa dhyáa ko kwáa kɛ? Áa kɔɔ kɛ́ a yɛ́ɛla. Áa í yóso swáanya ɲɔ́ɔn nvɛ́.»

Ɛnza ŋé kaa ngɛla fúusako o ka

Matiyu 19.1-12; Luka 16.18

¹Ɛnza ŋé bhɔ́ o ywáa ó lɔ kɛ táa Zude mála o lɔ, óni Zuludɛn bha ó ɲán dɔ́ o mán. Yaman ó nan í mínnin a lá íkwɔtun tó aa í kála ŋó lámyaan óyoo a tɛɛ a kɛla tɛ́nmɛn ne kɔ́ɔ. ²Falizɛn nɔ́luu í mángbaa a lá, tó kɛ a mánɲaankɛ lɔswaanni bhóoman kó: «A láanin ɲé ké cɛ o á a muso o fúu o sá a?» ³Aa i yawi kó: «Céla Musa é tɔ́ mínnɛɛn lé dí a man?» ⁴Ii fɔ kó: «Céla Musa é fɔ kó ní í kɛ́ fúusa sɛ́wɛ o dí muso ó mán, kó íi sé kɛ í bá a lɔ.» ⁵Ɛnza ŋé fɔ i yɛ kó: «A yɛ́ tóolagbɛya lé kósɔn tó Céla Musa é o fúusasɛwɛ o kɛ a yɛ́. ⁶Wáa dinɲan lamyaan ó lɔ, Ala é cɛ ní muso lé la. ⁷O lé kósɔn, cɛ óo bhɔ́la a wóobhaa ni a fa lú ka kɛ í gbɛ́nnɛn a muso mán, ⁸tó i fyáa ó kɛ́ fasisoo kéene. O ɲán o mán, i tɛ́ mɔɔn fyáa lé bhée fɔ́ fasisoo kéembe. ⁹O lé kósɔn Ala wɛ́ɛ fé mín ngɛ kéene mɔɔn sí mánngan kɛ olu fála.»

¹⁰Ɛnza ni a yɛ kaamɔɔndhye ŋolu lo bhó nán mínngɛ, a yɛ kaamɔɔndhye ŋolu a manɲaankɛ ko kwáa kɛ́ o kó kée ŋó mán. ¹¹Aa fɔ i yɛ kó: «Ní cɛ óo cɛ kɛ í bá a muso lɔ, kɛ muso gbɛ́ɛ ta, ké o tíi o wɛ́ɛ ɲɔnmɔɔnya lé kɛ wé, ké a wɛɛ yáacɛ sɔ́ɔ a muso jónan ó la. ¹²Ó bhóo kée ŋó mán, ní muso mínngɛ í bá a cɛ ó lɔ kɛ sii cɛ gbɛ́ɛ kúnman, ké o wɛ́ɛ ɲɔnmɔɔnya lé kɛ wé.»

Ɛnza ŋé lwáau kɛ́la dhyémuu ólu yɛ

Matiyu 19.13-15; Luka 18.15-17

¹³Mɔɔn ólu nan dhyémuu léelu lé Ɛnza ɲɛn ké aa í bhóo túu i la. Wáa a yɛ kaamɔɔndhye ŋólu yámanngɛ mɔɔn ólu mán kɛ i sɛ́ɛmansɔɔ i yɛ. ¹⁴Ɛnza ŋé o yé mínngɛ, o mán dhyáa a yɛ. Aa fɔ a yɛ kaamɔɔndhye ŋolu yɛ kó: «Áa dhyémuu ólu tó yé ké ii nan né mán, a kɛ́nan í síi i ɲan lɔ. Kɛ mansɔɔ mɔɔn mínnuu óyoo dhyémuu míinnu Ala yɛ́ Mansaya ó ólu ta le. ¹⁵Tó ní fɔ a yɛ́ tinɲan in né ngó, ní mɔɔn mín mán í bhóo síi Ala yɛ́ mansaya ó kɔɔ óyoo dhyémuu ólu, o tíi o táa lo tún.» ¹⁶Óo wɛɛ mínngɛ, aa dhyémuu ólu tá kée ngée kɛ í bhóo lá i kúnnɔn, kɛ lwáau bhyáa i fɛ́.

Nanfootiicɛ o

Matiyu 19.16-30; Luka 18.18-30

¹⁷Ɛnza ndáatɔ óle, cɛ lɔ́ é bwée kɛ́nan í kúnmɛɛn nɔkɛɛ a kɔɔ tó kɛ a mánɲaankɛ kó: «Kaamɔɔnbhɛɛ o, ngákan kɛ mínnɛɛn lé kɛ kɛ ɲáanmanɲan wɛ́ɛbhɛɛ ó sɔ́ɔ?» ¹⁸Ɛnza ŋé fɔ a yɛ kó: «Mínnɛɛn lé kósɔn tó íi ngíila kó kaamɔɔnbhɛɛ? Mɔɔn sí tɛ́ mɔɔnbhɛɛ le fɔ́ Ala kéembe. ¹⁹Íi Ala yɛ tɔ́ ŋolu lɔ: Í mánngan kɛ mɔɔn fáa, í mánngan kɛ ɲɔnmɔɔnya kɛ, í mánngan kɛ soɲan kɛ, í mánngan kɛ fwɔnɲan la í mɔ́ɔnninnvinɲɔɔn ó la, í mánngan kɛ tɔnɲɔɔnli kɛ, í fá ní í wóobhaa bwóɲan.»²⁰Cɛ óo Ɛnza ɲawi kó: «Kaamɔɔn kɛ myaan nyémuuya tɔ́ɔ o mán, ŋwɛ́ɛn o tɔ́ ŋo bɛ́ bɛ́ sháa lataaman.» ²¹Ɛnza ŋé cɛ ó mánfɛɛ ni dhyáaɲan le tó kɛ fɔ a yɛ kó: «Fé ngée ne kó wɛ́ɛ tó í mán. Táa í bhóofe ŋo bɛ́ fele kɛ o wɛ́ɛ o dí fáannda ŋólu mán. O kɛ́ kɛ́, í yáa nanfooba sɔ́ɔ sá ŋó lɔ. Í kɛ́wɛɛ o la, íi i bhyáa ngwɔ́.» ²²O kóman ó lée cɛ ó nílafin. Aa bhɔ́ yénɔn a ɲanlasiinin ŋó le, kɛ mansɔɔ nanfooba lé tɛ́ɛ a bhóo.

²³Ɛnza ŋé í ɲán gbáan a lamiin ŋo lɔ, kɛ fɔ a yɛ kaamɔɔndhye ŋolu yɛ kó: «Nanfootii ó lo ŋo Ala yɛ́ mansaya ó lɔ ó ló ŋan gbɛ́ɛ ósɔ.» ²⁴O kóman ó lée kaamɔɔndhye ŋolu bɛ́ kɔɔnnɔnfii. Ɛnza ŋé fɔ i yɛ íkwɔtun kó: «Nyé ŋólu, ló ŋó Ala yɛ́ Mansaya ó lɔ o ló a gbɛ́ɛ ósɔ! ²⁵Ɲɔ́ɔnmɛɛn ó lo ŋo nɔɔnyanin ɲé kɛ́ɛla ŋó jáan ó fɛ́ kɛ tínmin nanfootii ó lo ŋó ka Ala yɛ́ Mansaya ó lɔ.» ²⁶Ó lée kaamɔɔndhye ŋolu tɔ́ kɔɔnnɔnfii fɔ́ i tɛɛ ɲɔ́ɔn mánɲaankɛla kó: «O lɔ, yɛ́ɛtii é sé kɛ́ kísi?» ²⁷Ɛnza ŋé i mánfɛɛ, kɛ fɔ kó: «Kísili o sé tɛ́ Adamandhye ŋó yɛ, wáa Ala é sé, kɛ mansɔɔ Ala kweeko tɛ.»

²⁸Piyɛli é fɔ a yɛ kó: «Án nee wɛɛ án ngwɔ kɛ fé ŋó bɛ́ la tó kɛ bhyáa í kwɔ́ka.» ²⁹Ɛnza ŋé a yawi kó: «Tó ní fɔ a yɛ́ tinɲan in né ngo, mɔɔn min ngɛ í kwɔ́kɛ a yɛ bhó ŋó la, a bhádhyenjɛman ŋólu la, a bhádhyemuso ŋolu la, a wóobhaa la, a fa la, a dhyé ŋólu ní sɛ́ɛn ólu lá, né ní sanmankanmɛɛ ó kósɔn, ³⁰o tíi ó yáa o sí kɛnmɛn sɔɔ wáati míin nɔn. A yáa bhó nú sɔ́ɔ, kɛ bhádhyenjɛman nú sɔ́ɔ, kɛ́ bhádhyemuso lú sɔ́ɔ, kɛ wóobhaa lu sɔɔ, kɛ dhyé nú sɔɔ, kɛ sɛ́ɛn lú sɔ́ɔ, wáa o tíi ó yáa tɔ́lɔya myáan íkwɔtun. O kwɔ, o tíi ó yáa ɲáanmanɲan wɛ́ɛbhɛɛ ó sɔ́ɔ síin, la ndɛ́ mínnan. ³¹Mɔɔn mínnu é ɲɛ́n bí nín, o shɛ́ɛman ɲáan tó kwɔ́, tó mín núu kwɔ́, olu shɛ́ɛman ɲáan bhyáa ɲɛ́n.»

Ɛnza ŋé a yɛ sayako óni a kúunngo o fɔ́la kosawaɲɔɔn o kɛ

Matiyu 20.17-19; Luka 18.31-34

³²Ɛnza ni a yɛ kaamɔɔndhye ŋolu tɛɛ táala Yeluzalɛmu mínngɛ, a tɛ́ɛ táaman kɛ́la i ɲɛ́nnzhaafɛ. Ólu hánminnin ndɛ́ɛ. Mɔɔn mínnu tɛ́ɛ i kwɔka, ólu tɛ́ɛ sháannan. Aa a yɛ kaamɔɔndhye ndá ni fyáa ólu kíi íkwɔtun, kɛ í cɛ́bhɔ yaman o la, tó kó mín ngáa kɛ́ a lá, kɛ o fɔ́ i yɛ. ³³Aa fɔ i yɛ kó: «Áa í tóomanlɔ. Án ni táala Yeluzalɛmu lé wé; mɔɔn Dhyénjɛ o káa ló faanlɛɛɲansebhaa olu kúnndii ólu ní sɛliya kaamɔɔn ólu bhóo yénɔn lé ké olu á kíti bé a ka kó kɛ a fáa. O kwɔ, i yáa a lábhyaa káafii olu la. ³⁴Ólu yáa yɛ́ɛ bhɔ́ a lɔ, kɛ í láyi bwɔ́ a ka, kɛ a gbasi gbɛnɲɛn la, kɛ a fáa. Wáa tee sáwa kɛ́ tínmin, a yáa kúun kɛ bhɔ́ sú ólu cɛ́man.»

Zaki ní Yaya yɛ́ ɲaanli o

Matiyu 20.20-28

³⁵Oo wɛɛ mínngɛ, Zebede dhyénjɛ fyáa ó Zaki ní Yaya ólu í mángbaa Ɛnza nan kɛ fɔ a yɛ kó: «Kaamɔɔn, án ni í dɛ́lila kó mínnan, án ní fɛ́ ké íi o lɔ́ko ó kɛ́ án ɲɛn.» ³⁶Aa fɔ i yɛ kó: «Áa fɛ́ ké ní mínnɛɛn lé kɛ́ a yɛ́?» ³⁷Ii a yawi kó: «Ní í kɛ́ kɛ í yɛ́ mansaya ó nɔ́lɔya ó lɔ́ wáati mínnɔn, dyɛn ké íi án nansii í tɔ́ɔfɛ. Mɔɔn kée ŋan í síi í bhóobhɛɛkɔɔ, ké a kée ŋan í síi í bhóonwaan ngɔɔ.» ³⁸Ɛnza ŋé i yawi kó: «Áa fé mín ɲiinnan, a mán o lɔ. Né káa tɔ́lɔya súu mín myaan, Ále yáa sé o lɔ́kunnan an? Bháanin né káa fáa ɲɛ́n bátizeli o lɔ́ sé mín ne, a yáa sé o sí kɛla a?» ³⁹Ii a yawi kó: «Án ɲáan sé.» Ɛnza é fɔ i yɛ kó: «Tɔ́lɔya mín ngɛ lánga, o sí yáa lá a ka, né káa saya kɛ́ bátizeli o lɔ́ se mín ne, a tá o yáa kɛ́ cé. ⁴⁰Wáa a síi ó né bhóobhɛɛkɔɔ wáman móonwan ngɔɔ, o látɛɛbhaa o tɛ́ né le. Ala é o síilaa ólu lɔ́bhyɛ mɔɔn mínnu yɛ, a káa a dí o léelu mán.»

⁴¹Kaamɔɔndhye ndá ŋo tɔ ólu o myɛ́n mínngɛ, ii mwɛ́nnɛn Yaya ní Zaki mán. ⁴²Ɛnza ŋé i bɛ́ kíi tó kɛ fɔ i yɛ kó: «Áa lɔ ŋóo síya gbɛ́ɛ mɔɔn olu tá kúnndii ólu kúnndiiyafaan lála olu ka. Mɔɔn mín núu i yɛ yamaan o lɔ, ii nɔn lála olu ka. ⁴³Wáa a tɛ́ kɛ́la cé Álee lú cɛ́man. Ní mɔɔn mín ŋé fɛ́ kɛ kɛ́ mɔɔnba lé a cɛ́man, fɔ́ o tíi ó a kɛ́ bɛ́ tá bháalakɛdhye ne. ⁴⁴Tó ní mɔɔn óo mɔɔn é fɛ́ kɛ bhyáa bɛ́ ɲɛn, o tíi o kákan né kɛ kɛ́ a bɛ́ ta yɔ né le. ⁴⁵Kɛ mansɔɔ mɔɔn Dhyénjɛ o mán nan ké lɔ́ a kɛ́ a yɛ bháalakɛdhye ne, wáa aa nan lé kɛ bháalakɛ mɔɔn olu yɛ́, óni kɛ a yɛ́ɛ ní o dí mɔɔn shɛ́ɛman ngunmanka le.»

Ɛnza ŋé fyóonjɛ lɔ lákɛɛnyala

Matiyu 20.29-34; Luka 18.35-43

⁴⁶Ii sé Zeliko. Ɛnza ni a yɛ kaamɔɔndhye ŋolu ní yamanba tɛ́ɛ bhɔ́la Zeliko só ó kɔ́ɔnnɔn mínngɛ, fyóondɔ lɔ síininndɛ́ɛ lɛ́ɛli kɛ́ sháa o gboo nvɛ́. Time dhyénjɛ le kó Batime. ⁴⁷Aa myɛ́n mínngɛ kó ƐnzaNazalɛtika lée tínminnan wé, aa gbáa kɛ fɔ kó: «Ɛnza, Laula Bhɔ́nzɔ ŋo, manɲwaan nán.» ⁴⁸Mɔɔn ólu yáman ngɛ a man kó aa í lúmandhye, wáa a tɛ́ɛ gbáanan í fáan lá o bɛ́ kwɔ kɛ fɔ kó: «Laula Bhɔ́nzɔ ŋo, manɲwaan nán.» ⁴⁹Ɛnza ŋé í lɔ́ kɛ fɔ kó: «Áa a kíi.» Mɔɔn ólu fyóondɔ o kíi kɛ táa fɔ lé a yɛ kó: «Í yóso swáanya, i lɔ́ja, í wíi, aa í kíila.» ⁵⁰O ywáaninngee ŋo lɔ, aa a yɛ deekeba o láfii téeman kɛ í gbán kɛ í lɔ́, kɛ́nan Ɛnza nzaala. ⁵¹Ɛnza ŋé a mánɲaankɛ kó: «Ii fɛ́ ké ní mínnɛɛn lé kɛ́ í yɛ́?» Fyóondɔ óo yawi kó: «Kaamɔɔn, ní fɛ́ kɛ yéli kɛ́ ko kwáa kɛ.» ⁵²Ɛnza ŋé fɔ a yɛ kó: «Táa, í yɛ́ lánanya ó wɛ́ɛ í lákɛɛnya.» O ywáaninngee ŋó lɔ, a ɲán oo í láka, aa yéli kɛ, kɛ í bhyáa Ɛnza ngwɔ sháa o ka.

Ɛnza ŋé lónan Yeluzalɛmu

Matiyu 21.1-11; Luka 19.28-40; Yaya 12.12-19

¹Ii gbaa mínngɛ Yeluzalɛmu la, Bɛtifaze ní Betani ndɔ́ɔfɛ, Olivyetii ó tɔ́ɔfɛ, aa a yɛ kaamɔɔndhye ŋo fyáa bhyáashaa, ²tó kɛ fɔ i yɛ kó: «Só mín ŋé ɲɛ́nnzhaa fɛ́ nín áa táa o la. A kɛ́ lo ndɛ́nmɛn, a yáa sofɛɛnin dhyé nɔ́ gúunnin ɲé. Mɔɔn sí mán í síi a ka má. Áa a fwée kɛ́nan ale. ³Ní mɔɔn lɔ́ kɛ́ fɔ́ kó áa o kɛ́la mínnɛɛn lé kósɔn, áa fɔ a yɛ kó: ‹Mantii óle manko é a lá.› Waa a káa nan a manlɔ lé kwáalenin.»

⁴Ii táa ó lé lɔ kɛ táa sofɛɛnin ngbee nɔ́ gúunnin nzɔ́ɔ bhónaa lɔ lá sháa o tɔ́ɔfɛ. Ii a fwée. ⁵Mɔɔn mínnu tɛ́ɛ yénɔn, o lɔ́luu i mánɲaankɛ kó: «Ále! Áa mínnɛɛn lé kɛ́la? Mínnɛɛn lé kósɔn áa sofɛɛnin gbee ŋó fwéenan?» ⁶Ɛnza ŋé fɔ i yɛ tɛ́nmɛn né, ii mɔɔn ólu yawi o la. Mɔɔn ólu i tó yénɔn. ⁷Ii nan o sofɛɛnin ngbee ŋó lé Ɛnza nzaala. Ii i yɛ faani olu lá lá a kwɔ lɔ, tó aa í síi a kwɔ lɔ. ⁸Mɔɔn shɛ́ɛman ŋé i yɛ faani olu lɔ́woo sháa o ka, tó lɔ́ lúu yíibhoo lú tɛ́ɛ sɛ́ɛn olu mán kɛ́nan olu lala sháa o ka. ⁹Mínnu tɛ́ɛ a ɲɛn óni mínnu tɛ́ɛ a kwɔ, olu tɛ́ɛ gbáanan kó: «Ozana, tando é Ala yɛ́. Mɔɔn mín ŋé nánla Mantii o tɔ́ɔla, tando é o yɛ. ¹⁰Laula yɛ mansaya mín é nánla, tando é ó yɛ́. Ozana Ala yɛ́ sá ŋó lɔ.» ¹¹Ɛnza ŋé lo Yeluzalɛmu, aa táa lo Ala bhatobhomba ó kɔ́ɔnnɔn, tó kɛ fé ŋó bɛ́ mánfɛɛ. O kwɔ, ale ní a yɛ kaamɔɔndhye ndá ni fyáa ólu táa Betani, kɛ mansɔɔ sú tɛ wɛɛ bhyáa kwó le.

Ɛnza ŋé dáan bhyáala fígisun nɔ fɛ́

Matiyu 21.18-19

¹²O lúsɔgbɛ o, i tɛ́ɛ bhɔ́la mínngɛ Betani, kɔ́ɔn é Ɛnza myaan. ¹³Aa fígisun nɔ búu yé a lá ywáa já nɔn. Aa í mángbaa a lá kɛ a mánfɛɛ sáan a yáa a dhyé nzɔ́ɔ a lá. Waa aa sé mínngɛ yíi o tɔ́ɔfɛ, aa a búu gbɛɛgbɛɛ lé sɔ́ɔ a lá, kɛ mansɔɔ a dhyé ngɛ́ wáati o tɛ́ mán sé bhá. ¹⁴Ɛnza ŋé fɔ o le lɔ kó: «Mɔɔn sí táa í dhyé ŋó lɔ́ɔ mée fɛ́sɛ fɛ́sɛ.» A yɛ kaamɔɔndhye ŋolu o kóman ó lé myɛ́n.

Ɛnza ŋé feekɛbhaa olu gbɛnan Ala bhatobhomba ó la

Matiyu 21.12-17; Luka 19.45-48; Yaya 2.13-22

¹⁵Ii lo Yeluzalɛmu. Ɛnza ŋé lo Ala bhatobhomba ó kɔ́ɔnnɔn, aa lámyaan kɛ feekɛbhaa olu ní sanikɛbhaa olu gbɛ́. Aa wɛ́ɛfɛɛmaa olu tá tabɛli ólu bé, kɛ biinin nvelebhaa olu tá gbaanin ŋo bɛ́ bé bé. ¹⁶A mán sɔ́n mée ké lɔ́ a tínmin ni feefe né Ala bhatobhomba ó kɔ́ɔnnɔn. ¹⁷Aa wɛɛ mínngɛ, aa mɔɔn ólu kála kó: «Aa sɛwɛ le kó:

Ɲɛ́n bhó ŋó káa kíi lé kó síya o bɛ́ yɛ Ala bhatobho.

Wáa Ále wɛ́ɛ o lé kɛ́ so nú lóonaankɛlaa lé nín!»

¹⁸Faanlɛɛɲansebhaa olu kúnndii ólu ní sɛliya kaamɔɔn ólu o myɛ́n mínngɛ, ii ɲánɲiin Ɛnza nvaako ó mán. I tɛ́ɛ sháannan a ɲɛn, kɛ mansɔɔ a yɛ lakawanikan ŋo tɛ́ɛ bɛ́ ɲán myaanla lé. ¹⁹Ywáa oo sé mínngɛ, ale ni a yɛ kaamɔɔndhye ŋolu bhɔ́ só ó kɔ́ɔnnɔn.

Fígisun njanin ŋóo lɔ́ni mín dila án man

Matiyu 21.20-22

²⁰Fáyi o mán, i tínminndɔ o le, ii fígisun ŋo yé ké a wɛɛ já kɛ sé fɔ́ɔ a díin ŋo mán. ²¹Kó mín ŋé kɛ́ oo bhyáa Piyɛli kɔ́ɔnnɔn. Aa fɔ Ɛnza ɲɛn kó: «Kaamɔɔn, í ɲán gbáan, íi fígisun mín dáan a wɛɛ já.»

²²Ɛnza ŋé fɔ a yɛ kaamɔɔndhye ŋolu yɛ kó: «Áa lá Ala la. ²³Tó ní fɔ a yɛ́ tinɲan in né ngó, ní mɔɔn mín ngɛ fɔ tii míin ɲɛn kó: Bhɔ́ ywáa míin nɔn yánun, íi táa í láfii kɔɔji o lɔ, ní a mán síka a yóso o lɔ́, ní kɛ lá a lá, kó a wɛ́ɛ mín nvɔ́ o yáa kɛ, o yáa kɛ a yɛ. ²⁴O lé kósɔn ní fɔ́la a yɛ́ ngó: A kɛ́ kɛ́ fé ŋóo fé ngofɔla sɛ́ɛ o lɔ, a lánin ŋan kɛ́ a lá óyoo á wɛ́ɛ o fé ŋó sɔ́ɔ, Ala yáa ó fé ŋó dí a man. ²⁵A lɔ́nin ngɛ́ kɛ́ sɛ́ɛ o la, ni o kɛ́ kɛ́ ké mɔɔn lɔ́ wɛ́ɛ yáacɛ táa lá, áa yafa, o kɛ́ kɛ́, án Nvá mín ŋé sá ŋó lɔ, o yáa yafa Álee mán. ²⁶[Wáa ní Ále mán yafa mɔɔn tɔ́ ólu mán, a fá míin sá ŋo lɔ o táa yafa Álee mán.»]

Yɛ́ɛtii Ɛnza móosii o kó ólu la?

Matiyu 21.23-27; Luka 20.1-8

²⁷O wɛ́ɛnin ŋó kwɔ, Ɛnza ni a yɛ kaamɔɔndhye ŋolu í kwɔ́sɛɛ Yeluzalɛmu. A tɛ́ɛ táaman kɛ́la Ala bhatobhomba ó lúkɔɔn ó kɔ́ɔnnɔn mínngɛ, faanlɛɛɲansebhaa olu kúnndii ólu ní sɛliya kaamɔɔn olu ní cɛba ólu í mángbaa a lá. ²⁸Ii a mánɲaankɛ kó: «Íi kó míinnu kɛ́la sébhaaya mínnɛɛn lé la? Yɛ́ɛtii o sébhaaya ó dí í mán?»

²⁹Ɛnza ŋé í yawi kó: «Ngáa a mánɲaankɛ láfaɲan kée ne man, aa ɲáwi, o kɛ́ kɛ́, ní bhɔ́la kó míin nú kɛ́ ó sébhaaya ó lé ywáa mínnɔn, ní o fɔ́ a yɛ́. ³⁰Yɛ́ɛtii Yaya Bátizelikɛbhaa bhyáashaa kɛ́nan mɔɔn ólu bátize, Ala bháa bháa mɔɔn ólu? Áa ɲáwi.» ³¹Oo fɔ́ mínngɛ, i tɛ́ɛ fɔ́la ɲɔ́ɔnɲɛn kó: «Ní án ngɛ a yawi kó Ala lée a bhyáashaa, a yáa án mánɲaankɛ kó mínnɛɛn lé kósɔn tó án mán lá Yaya la? ³²Tó ní án ngɛ fɔ kó mɔɔn lée lúu a bhyáashaa!» I tɛ́ɛ sháannan yaman o ɲɛn, kɛ mansɔɔ mɔɔn bɛ́ tɛ́ɛ Yaya yacela Céla bhɛ́ɛbhɛɛ lé lé. ³³Íi Ɛnza ɲawi kó: «Án mán lɔ.» Ɛnza ŋé i yawi kó: «Hun, née kó mínnu kɛ́la nín, ní ólu kɛ́la sébhaaya minnan ndáa o fɔ́ a yɛ́.»

Kɔ́ɔlamandhyaa mín ŋé bháalakɛdhyeɲoo ŋólu ka

Matiyu 21.33-46; Luka 20.9-19

¹Ɛnza ŋé saanan lá i yɛ ó lé lɔ kɛ fɔ kó: «Cɛ lɔ́ lée lɛ́zɛn no, kɛ yɔ́sɔ kɛ́ a man. Aa fáajaan lɔ́ bhɔ́, kɛ o kɛ́ lɛ́zɛn ŋó jíbhɔlaa o le, tó kɛ gbáta lɔ́ lɔ́ sɛɛnkunnansiibhaa olu yɛ. Aa sɛ́ɛn ó kɛ́ɛfa ó lé lɔ bháalakɛdhye ŋolu mán, tó kɛ táa táamanla. ²Lɛ́zɛn mɔ́ wáati oo sé mínngɛ, aa a yɛ bháalakɛdhye ŋo kée myáashaa lɛ́zɛnmaalakɛbhaa olu mán ké ii a ta nin ŋó di. ³Wáa lɛ́zɛnmaalakɛbhaa olu o myáan, kɛ a gbasi, kɛ a bhóolɔkoo ŋó lákwɔsɛɛ. ⁴Lɛ́zɛnnvyɛtii oo bháalakɛdhye ngbɛ́ɛ bhyáashaa íkwɔ. Ii o gbási a kúnnɔn, kɛ a nɛɛn. ⁵Lɛ́zɛnnvyɛtii oo bháalakɛdhye ngbɛ́ɛ bhyáashaa íkwɔ, kɛ ii o fáa. Ii o kɛ bháalakɛdhye nzhɛ́ɛman nán cé. Ii lɔ́lu gbási tó kɛ lɔ́lu fáa. ⁶Mɔɔn kée mín ndɛ́ wɛɛ tó lɛ́zɛnnvyɛtii ó bhóo o lé tɛ́ɛ a dhyénjɛ óle mín ŋan dí a yɛ. Aa o kɛ́ céladhye nábha ŋo lé i man, a tɛɛ fɔ́la kó i yáa nyénjɛ ó bhɛ́ɛsii. ⁷Wáa lɛ́zɛnmaalakɛbhaa olu fɔ ɲɔɔnɲɛn kó: ‹Cɛ́ntabhaa ó lée nín, áa nan án ní a fáa ké cɛ́n o á tó án móo.› ⁸Ii cɛ o dhyénjɛ ó myáan ó lé lɔ, kɛ a fáa, kɛ a sú ó láfii lɛ́zɛnnvyɛ o kwɔ́ka.

⁹O bhóo ó mán, lɛ́zɛnnvyɛtii o kaa kɛ́ o lɔ díi? A yáa nan, kɛ lɛ́zɛn ŋo bháalakɛdhye ŋólu fáa, tó kɛ lɛ́zɛnnvyɛ ó kɛ́ɛfa lɛ́zɛnmaalakɛbhaa gbɛ́ɛlu mán! ¹⁰A mán tínminnaa míin ngála kitabu o lɔ bha ŋan? Mín ŋé fɔ́la kó:

Bhónɔbhaa olu tɛ́wɛɛ í bá tɛfɛ mínnɔn

o lé wɛ́ɛ kɛ́ tɛfɛ kúugbɛɛ ŋo le.

¹¹Oo fáanan Mantii ó lé la.

Oo kóba lé lé án née bhóo.

¹²Yawudhyaa ólu kúnndii ólu tɛ́ɛ ɲánɲiinnan Ɛnza myaanko ó mán, í tɛ́wɛɛ bhɔ́ ɲan le óo Ɛnza ndɛ́ɛ saanan o lala ile lée lu man. Wáa i tɛ́ɛ sháannan yaman o ɲɛn. Oo kɛ́ mínngɛ, ii a tó yénɔn kɛ́ táa.»

Ɲaanli mín ŋé nísɔɔnbhɔko ó ka

Matiyu 22.15-22; Luka 20.20-26

¹³Yawudhyaa olu kúnndii ólu ni Falizɛn ŋo lɔ́lu ni Elɔdi dhyáaɲɛnmɔɔn ó lɔ́lu bhyáashaa Ɛnza man kɛ táa a lɔswaan ni ɲaanli kéene. ¹⁴Ii nan fɔ a yɛ kó: «Kaamɔɔn, án ni lɔ ŋóo íi tinɲan le fɔ́la. Í tɛ́ sháannan í mɔ́ɔnɲɔɔn ó ɲán o ɲɛn, í ló ndɛ́ lɔ́ bhɔ́la lɔ́lɔ, Íi Ala sháa o yáala tinɲan le ka. A fɔ án ɲɛn ní á láanin ɲé kó mɔɔn a nísɔɔn bhɔ́ Mansacɛ Sezali yɛ bháa bháanin a laanin ndɛ́? Án ngákan kɛ a sala bháa án mánngan kɛ a sala?» ¹⁵Wáa Ɛnza ndɛ́ɛ i yɛ fyaangafoya ó lɔ́, aa i mánɲaankɛ kó: «Mínnɛɛn lé kósɔn tó áa nɔ́swaannan? Áa nan wɛ́ɛgbannan ngée né ɲɛ́n ké ní a yé.» ¹⁶Ii nan wɛ́ɛgbannan ngée ne. Aa i mánɲaankɛ kó: «Yɛ́ɛtii yáa ni a tɔ́ɔ é a mán nín?» Ii a yawi kó: «Mansacɛ Sezali.» ¹⁷O bhóo o mán, Ɛnza ŋé fɔ i yɛ kó: «Fé mín ŋé mansacɛ Sezali tá le, áa o dí mansacɛ Sezali mán; tó fé mín ŋé Ala tá le, áa o dí Ala man.» A yɛ kóman o yawi seɲan o lée bháa mɔɔn olu bɛ́ lɔ.

Ɲaanli mín ŋé sú ólu kúunngo o ka

Matiyu 22.23-33; Luka 20.27-40

¹⁸Mɔɔn lɔ́lu tɛ́ɛ yénɔn kó Sadusi, mínnu tɛ́ɛ fɔ́la kó sú ólu táa kúun. Ii í mángbaa Ɛnza nan tó kɛ a mánɲaankɛ kó: ¹⁹«Kaamɔɔn, céla Musa é sɛwɛ a yɛ Kitabu o lɔ kó: Ní cɛ mínngɛ muso tá, kɛ sayakɛ ké a man dhyé nzɔɔ a lá, o tíi ó bhádhye ŋo kákan né kɛ o muso o tá ké aa dhyé nzɔ́ɔ táabhaa o yɛ.²⁰Bhádhyemannjɛ wóonvyaa lé tɛɛ. A jónan óo muso tá, wáa a mán dhyé nzɔ́ɔ aa sayakɛ. ²¹A fyáaɲɔn oo muso kée ŋó tá. O mán dhyé nzɔ́ɔ, óo sayakɛ íkwɔtun. A sawaɲɔn óo kɛ o ɲán kée ŋó lé mán. ²²O kɛ́ ɲán o le mán cé, bhádhyemannjɛ wóonvyaa ó bɛ́ sayakɛ, i lɔ mán dhyé nzɔ́ɔ. I bɛ́ saya kɛ́nin ŋó kwɔ, muso óo saya kɛ́ íkwɔ. ²³Sú ólu kúunno ŋo kɛ́ sé wáati mínnɔn, ké i bɛ́ wɛ́ɛ kúun, muso ó káa kɛ́ a mínnɛɛn lé tá lé? Kɛ mansɔɔ aa sii i mɔɔn wóonvyaa ó bɛ́ le kunman kée ngée.»

²⁴Ɛnza ŋé i yawi kó: «Miin né kósɔn aa á yɛ́ɛ láfiila, a mán Kitabu o lɔ, a ló mán Ala yɛ sébhaaya ó lɔ. ²⁵Tinɲan ní án ngɛ kúun wáati mínnɔn kɛ́ bhɔ́ saya bhóo ó mán, cɛ lɔ́ táa muso tá, muso lɔ́ ló ndáa sii cɛla; I bɛ́ káa kɛ́ lé óo malɛɛka lu, sángboo o lɔ. ²⁶Wáa míin nan kɛ́ sú ólu tá kúun ŋó lé, tínminnaa mín ŋé fɔ́la Céla Musa yɛ́ kitabu o lɔ kó tá é máannan yíitunin ŋó la, a mán o ywáa ó kála ŋan? Ala é fɔ́la céla Musa yɛ́ o ywáa ó lɔ kó: Né lée Bulaaman yɛ Ala o le, Shaaka yɛ́ Ala o, óni Yangubha yɛ Ala o.²⁷Ní a kɛ kɛ́ a yíiman óyoo sú ólu kúunngo o tɛ́ tinɲan le, ké a wɛ́ɛ a yɛ́ɛ lafii koyoongɛ. Ala tɛ́ sú ólu yɛ́ Ala le, waa ɲáanman ŋólu yɛ́ Ala.»

Tɔ́ nguugbɛɛ ŋó

Matiyu 22.34-40; Luka 10.25-28

²⁸Sɛliya kaamɔɔn lɔ é i kómankan ŋo lɔ́myɛn. Aa lɔgbɛ mínngɛ óyoo Ɛnza ŋwɛ́ɛn Sadusi olu yawi cɛ́ɛne ne, aa í mángbaa a lá kɛ a mánɲaankɛ kó: «Tɔ́ ŋo mínnɛɛn lé kúu a gbɛ́ɛ tɔ́ ŋo bɛ́ le?» ²⁹Ɛnza ŋé a yawi kó: «Tɔ́ mín ngúu a gbɛ́ɛ tɔ́ ŋo bɛ́ le o lée nín: Izalayɛlika ólu áa í tóomanlɔ! Mantii ó, án ɲɛn Ala o, o kée née Mantii óle. ³⁰Í yɛ Mantii Ala o waa dhyáa í yɛ́ í yóso ó bɛ́ la, í ní o bɛ́ la, í míliya ó bɛ́ la, óni í fáan ó bɛ́ la. ³¹A fyáaɲɔn o lée nín: Í mɔ́ɔnɲɔɔn ó a dhyáa í yɛ́ óyoo íle gbú o a dí í yɛ́ɛ yɛ ɲán mín man. Tɔ́ ŋo lɔ́ kúu mán ngbɛ́ɛ o fyáa o le.» ³²Sɛliya kaamɔɔn oo fɔ a yɛ kó: «Cɔ́! Í ní cé kaamɔɔn, o wɛ́ɛ bhyɛ cɛ́ɛne ne, í wɛ́ɛ tinɲan fɔ: Mantii ó kée née Ala le. Ala gbɛ́ɛ tɛ́ ale kwɔ. ³³Óni a dhyáa í yɛ́ í yóso ó bɛ́ la, í miliya ó bɛ́ la, í fáan o bɛ́ la, í mɔɔnɲɔɔn ó a dhyáa í yɛ́ óyoo íle gbú o a dí í yɛ́ɛ yɛ ɲán mín man. O a físaa faanlɛɛ ólu le.» ³⁴Ɛnza ŋé lɔ ŋóyoo cɛ ó wɛ́ɛ a yawi yáakiimanɲan la, aa fɔ a yɛ kó: «Í ywáa mán njá Ala yɛ́ Mansaya ó la.» Aa o fɔ́ mínngɛ mɔɔn sí lo mán í swáan Ɛnza ɲaankɛ la bhée.

Mantii ó lée Kísibhaa o le ale lée Laula bhɔ́nzɔ ŋó le

Matiyu 22.41-46; Luka 20.41-44

³⁵O wɛ́ɛnin ŋo kwɔ, Ɛnza ndɛ́ɛ lakawanin kɛ Ala bhatobhomba ó la. Aa ɲaanli kɛ kó: «Ɲán mínnɛɛn lé mán tó sɛliya kaamɔɔn olu fɔ́la Kílisi o mán kó Laula Bhɔ́nzɔ. ³⁶Kɛ́ɛke Ní Sɛnnɛnyanin ŋó Laula gbú lo a fɔ o lɔ́ ko:

Mantii Ala é fɔ ɲɛ́n Mantii o yɛ kó:

Í síi móobhɛɛ kɔɔ,

fɔ́ ní í yúu olu bhyáa í sé ngɔɔ.

³⁷Laula gbú yɛ́ɛ é Kísibhaa o kíi kó Mantii ó, tó óo sé kɛ́la Laula bhɔ́nzɔ né díi í kwɔ́?» Yamanba tɛ́ɛ a kan ŋó lɔ́myɛnnan ni nisɔdhyaa le.

Áa a yɛ́ɛ myaan sɛliya kaamɔɔn olu mán

Matiyu 23.1-36; Luka 20.45-47

³⁸A yɛ kaa ŋo kɔ́ɔnnɔn aa fɔ kó: «Áa a yɛ́ɛ myáan sɛliya kaamɔɔn olu mán, kɛ́ í yaakɛla deekeba ólu lɔ, mɔɔn kɛ́ kɛ́ í fola bhɛ́ɛsili bhóoman yamanywaa olu lɔ óni, ³⁹Siilaa bhɛ́ɛ mín núu kála ɲɛ́nnzhaafɛ, o léelu dhyáa é kála i lɔ sɛ́ɛbho o la óni lɔ́minkɛlaa ólu lɔ, ⁴⁰Muso mínnu cɛ wɛ́ɛ sayakɛ, íi olu bhóofe ŋo bɛ́ myaanla i la; kéni a ló ŋé sɛ́ɛ kannanja olu kɛ́la ké mɔɔn olu a a lásaa. Oo lɔ mínngɛ, í tá kíti o yáa gbɛ́ya mɔɔn tɔ́ ólu tá lé síin!»

Finɲanmuso bhóokoo ŋó yɛ́ yáa ó

Luka 21.1-4

⁴¹Wɛ́ɛ o tɛ́ɛ bhyáala késu mín ngɔ́ɔnnɔn Ala bhatobhomba o la, Ɛnza ŋé í síi mínngɛ, aa í ɲán bhyɛ o mán, kɛ mɔɔn ólu yɛ́ wɛ́ɛ bhyáa seɲan o mánfɛɛ. Nanfootii olu shɛ́ɛman ndɛ́ɛ wɛ́ɛ shɛ́ɛman díla. ⁴²Finɲanmuso bhóokoo nɔ́ é nan kɛ wɛ́ɛgbannan nvyáa bhyáa. O tɛ́ tɛ́ tínminnan tánman nvyáa ka. ⁴³Ɛnza ŋé a yɛ kaamɔɔndhye ŋolu kíi tó kɛ fɔ i yɛ kó: «Ní tinɲan le fɔ́la a yɛ́ ni ngó, finɲanmuso bhóokoo míin née wɛ́ɛ shɛ́ɛman myáa wɛ́ɛ bhyáa késu o lɔ kɛ tínmin mɔɔn tɔ́ ó bɛ́ ka. ⁴⁴Kɛ mansɔɔ mɔɔn tɔ́ ólu wɛ́ɛ mínnu di, i manko tɛ́ tɛ́ olu lá bhée i yɛ dínɲanlɔtɛɛ o lɔ. Wáa finɲanmuso o, a yɛ bhóokooɲan o lɔ, mín ndɛ́ɛ a yeeya lé bhálo bhóo o man a yɛ dínɲanlɔtɛɛ ó lɔ, aa o lé di.»

Ɛnza ŋé Ala bhatobhomba ó céko ó fɔ́la

Matiyu 24.1-2; Luka 21.5-6

¹Ɛnza ndɛ́ɛ bhɔ́la Ala bhatobhomba ó lá mínngɛ, a yɛ kaamɔɔndhye ŋo kée ŋé fɔ a yɛ kó: «Kaamɔɔn, a mánfɛɛ! Káwa míin nú ló njáaɲiin, Ala bhatobhomba míin ŋé lɔ́ í sɛ́wɛla lɛ.» ²Ɛnza ŋé fɔ a yɛ kó: «Í ɲán é bhómba mínnu lá a? Káwa ó sí táa tó a siilaa lɔ́ ya. Bhó ŋó yáa wéyaa pépe.»

Tɔ́lɔya ólu lámyaan ó

Matiyu 24.3-14; Luka 21.7-19

³Ɛnza ŋé táa í síi Olivyetii ó ka mínngɛ, kɛ í ɲán bhyɛ Ala bhatobhomba ó mán. Piyɛli, Zaki, Yaya óni Andele mínnu tɛ́ɛ a tɔ́ɔfɛ, olu a mánɲaankɛ í kéenan kó: ⁴«Íi kó mín nvɔ sɛ́n ŋwé, o káa kɛ́ wáati mínnɛɛn lé lɔ? Dínɲan ó lábhanzan o tɔɔmansii o káa kɛ́ mínnɛɛn ní mínnɛɛn lu le?»

⁵Ɛnza ŋé fɔ í yɛ kó: «Áa í yáakii tó a yɛ́ɛ lɔ ké mɔɔn lɔ́ kɛ́nan a láfii. ⁶Mɔɔn shɛ́ɛman ɲáan nan nín ndɔ́ɔ óle, kɛ́ fɔ kó: ‹Né lée kísibhaa o le!› I yáa mɔɔn shɛ́ɛman náfii o bhóo ó mán. ⁷A kɛ́ kɛ́ɛkɛkan nu myɛ́n, óni kɛɛko lu mánngan myɛ́n wáati mínnɔn; O sí kɛ́nan a mánshaan. Fɔ́ olu a kɛ́ lé, wáa o táa kɛ́ dínɲan labha ŋo sénin ne. ⁸Síya lɔ yáa í wíi síya gbɛ́ɛlu kanman, yamaanlɔ yáa í wíi yamaan gbɛ́ɛlu kanman. Lúukolo ó yáa yaayaa ywáa shɛ́ɛman nɔn. Óni kɔ́ɔn lú yáa kɛ́ ywáa shɛ́ɛman nɔn. O lé káa kɛ́ tɔ́lɔya ó lámyaan o le, óyoo muso tínndɔ óo tɔ́lɔya myáanla tɛ́nmɛn.»

⁹«Ále kákan né kɛ a yáakii tó a yɛ́ɛ lɔ, kɛ mansɔɔ mɔɔn ólu yáa á ló kítitɛɛbhaa ólu bhóo. I yáa a gbási sɛ́ɛbho ŋolu kɔ́ɔnnɔn. I yáa táa á lé yamaantii ólu ní mansa ólu kɛ́ɛnnan né kósɔn. O yáa kɛ́ tɔɔmansii lé í yɛ. ¹⁰Fɔ́ sanmankanmɛɛ ó lé a í láse síya ó bɛ́ man ótun. ¹¹I kɛ a myáan sán mínnɔn kɛ táa á lé yamaan o kítitɛɛlaa ólu lɔ, a káa mín nvɔ a kɛ́nan hánmin o la. Kóman mín ngɛ bhyáa a kɔ́ɔnnɔn o wáati o lɔ, áa o fɔ, kɛ mansɔɔ a káa dhyáa mínnu fɔ, olu táa kɛ́ Ále gbúlu fɔ́dhyaa ne. A Fá Ní sɛnnɛnyanin ŋo lé káa o kóman ólu ló a lálɔ. ¹²Bhádhyeman ŋólu yáa kɛ́ ɲɔ́ɔnɲɛn saya ó sɔ́ɔbu le. Fa ólu yáa o sí kɛ́ i dhyé ŋólu la. Dhyé ŋólu yáa í ɲányɛɛman í fa ólu mán kɛ i fáa. ¹³Bɛ́ yáa a mánbhɔ né tɔ́ɔ ó kósɔn. Wáa mɔɔn mín ngɛ í lɔ́ja kɛ táa sé a lá ŋó mán, o yáa kísi.»

Tɔ́lɔyaba mín ngáa mɔɔn ólu sɔ́ɔ

Matiyu 24.15-28; Luka 21.20-24

¹⁴«A kɛ́ fé nzúu yóo hálamutɔ ó síinin ɲé ywáa lɔ́lɔ, mín ndɛ́ a síilaa le, mɔɔn óo mɔɔn kɛ́ kɛ́ Zude mala ó lɔ, áa bwée kɛ táa a lóonaan bhɔ́ tii ólu mán. ¹⁵Mɔɔn mín ngɛ kɛ́ a yɛ bhó ŋó kúnnɔn, o tíi o kɛ́nan í yíi bhó ngɔ́ɔnnɔn kɛ a bhóofe ŋolu tá. ¹⁶Mɔɔn mín lo ngɛ́ kɛ́ sɛ́ɛn mán, o tíi o kɛ́nan í kwɔ́sɛɛ lúman táamanlataafaani tá tɔ́ɔ lɔ. ¹⁷Bɔɔn yáa kɛ́ muso kɔ́ɔnman ŋólu ní dhyémbatii olu ta lé o lo ŋó la. ¹⁸Áa Ala dɛ́li ké o kó ólu kɛ́nan bhyɛ nɛ́nnɛnbawaati o man. ¹⁹Kɛ mansɔɔ ó lo ŋolu yáa kɛ tɔ́lɔya lomba lu le, kɛ mansɔɔ kɛ myáan dínɲan lámyaan ó mán Ala bhóo kɛ́nan sii bí la, o tɔ́lɔya ó yáa bwóɲan, a si tɛ́man kɛ́ bhá. A lo nzí táa kɛ́ bhée. ²⁰Ní Mantii ó tɛ́man o wáati o kánnansunɲan, mɔɔn sí tɛ́ táa bwási. Wáa aa o kánnansunɲan a yɛ mɔɔn lɔ́tɔnmɔnnin ŋó léelu kósɔn.»

²¹«Ní mɔɔn lɔ́ kɛ́ fɔ a yɛ́ o sán olu lɔ kó: ‹Kílisi óo ya!›, wáman kó ‹aa yéenɔn!› A kɛ́nan lá o tíi o la. ²²Kílisi kóo ngóo ni céla kóo ngóo nzhɛ́ɛman ɲáan í wíi; I yáa tɔɔmansii ní káwananngo lú kɛ́ mɔɔn lafii tɔ́ɔ lɔ; Háanin Ala yɛ mɔɔn lɔ́tɔnmɔnnin ŋólu, i yáa olu láfii ɲán ɲíin. ²³Áa a yɛ́ɛ myaan, kɛ mansɔɔ ŋwɛ́ɛn a tóo lasowi o bɛ́ la.»

Mɔɔn Dhyénjɛ ó nánko o

Matiyu 24.29-31; Luka 21.25-28

²⁴«Wáa ni o tɔ́lɔya wáati ólu kɛ́ bhɔ́ í lá tɛ́nmɛn, tee ó yáa í mánfin. Káa ó ló ndáa gbɛ́ bhée. ²⁵Lóodhye ŋólu yáa bhɔ́ sáman kɛ bé, óni sébhaaya mín núu sá ŋó lɔ olu yáa maanmaan. ²⁶O lɔ, án ɲáan mɔɔn Dhyénjɛ o nántɔ ó yé káwa ólu ka ni sébhaayaba óni nɔ́lɔyaba óle. ²⁷A yáa malɛɛka ólu bhyáashaa dínɲan nɔ́ɔn náannin ó bɛ́ la, kɛ a yɛ mɔɔn lɔ́tɔnmɔnnin ŋólu ládhyɛ, kɛ a lámyaan dínɲan kún mín ŋé nín, fɔ́ kɛ táa sé sángboo o la ŋo la.»

Kɔ́ɔlamandhyaa mín ŋé fígisun ŋo ka

Matiyu 24.32-35; Luka 21.29-33

²⁸«Áa a yɛ́ɛ sɔ́ hákii lá, saanan míin lá fígisun ŋo tá lákɔɔsi ó fɛ́. Ní a kɛ́ yé kó a bhóokaa óo táa í mánnuun ne, ké aa táa í búu bhɔ́ le áa lá a lá óyoo sanmanyi o wɛ́ɛ gbaa. ²⁹O ɲán kée ŋó mán a kɛ́ kɛ́ o kó ólu yéla wáati mínnɔn, aa lɔ ŋóo mɔɔn Dhyénjɛ ó nán wáati o wɛ́ɛ gbaa. Óo aa sháala. ³⁰Tó ní fɔ a yɛ́ tinɲan in ne ngó, án ɲɛ́n wáati míin mɔɔn ó bɛ́ táa sayakɛ, ké kó míinnu bɛ́ mán kɛ́ bhá. ³¹Sángboo óni lúukolo ó yáa tínmin, wáa ɲɛ́n kóman ólu táa tínmin tún.»

Ala kéembe lé a dínɲan lábha ŋo lɔ

Matiyu 24.36-44

³²«O ko ólu káa kɛ́ ló mínnan, wáman wáati kée mínnɔn, mɔɔn óo mɔɔn mán o lɔ, malɛɛka olu mán lɔ, háanin Dhyénjɛ ó mán lɔ. Ala mín ŋé Fá óle, o kéembe lé a lɔ. ³³Áa a yɛ́ɛ myaan, áa tó í ɲánla, kɛ mansɔɔ a mán wáati o sé sán o lɔ. ³⁴Áa le óyoo cɛ lɔ́ táatɔ lé táamanla, áa a yɛ bhó ŋó kɛ́ɛfa a yɛ bháalakɛdhye ŋolu mán, tó kɛ i bɛ́ tá bháala dí i man, kɛ fɔ bhó ngunnansiibhaa ó yɛ kó aa tó í ɲánla. ³⁵Oo lɔ mínngɛ, áa tó í ɲánla, kɛ mansɔɔ a mán bhóndii o nánlo ŋó lɔ, a káa nan ywáa lá lé bháa, sú cɛ́man bháa, lónan njonan ó kómansan o lɔ bháa wáman sɔɔ mán bháa. ³⁶Ní a kɛ́nan í kɔ́lɔ tee mín man, a kɛ́nan nán a sɔ́ɔ súnnɔɔn lɔ. ³⁷Ní mín nvɔla a yɛ́ nín, ní o lé fɔ́la bɛ́ yɛ: Aa tó í ɲánla!»

Kúnndii ólu dún nɔ́siila Ɛnza man

Matiyu 26.1-5; Luka 22.1-2; Yaya 11.45-53

¹Tee fyáa lé tɛ́wɛɛ tó Yawudhyaa ólu yɛ́ Hɔ́lɔɲanli o ɲánlagbɛ lo ŋo, óni Búlufuunmɛɛ ó ɲánlagbɛ lo ŋo ɲánman. Faanlɛɛɲansebhaa olu kúnndii ólu ní sɛliya kaamɔɔn olu tɛ́ɛ ɲánɲiinnan Ɛnza myaanko o mán loo nɔn ké i tɛɛ a fáa. ²I tɛ́ɛ fɔ́la o bhóo ó mán kó: «Án ndɛ́ sé a myáanla ɲánlagbɛ lo míin mán ní o tɛ, yaman ó yáa ɲáanmin.»

Muso lɔ́ é latikɔlɔ kɛ́la Ɛnza ngúnnɔn

Matiyu 26.6-13; Yaya 12.1-8

³Ɛnza ndɛ́ɛ Betani só ó kɔ́ɔnnɔn, Simɔn kwáantɔ yɛ́ bhó ŋó la. A tɛɛ lɔ́min kɛ́ tabɛli o ka wáati mínnɔn, muso lɔ́ é lo ni bháanin ngúugbɛɛ nɔ le min nálaanin ndɛ́ɛ káwa kúugbɛɛ nan. A fanin ndɛ́ɛ latikɔlɔ sɔɔn gbɛ́ɛ ne la. Aa káwa ó cé tó kɛ latikɔlɔ ó bwɔ́ Ɛnza ngúnnɔn. ⁴Mɔɔn mínnu tɛ́ɛ yénɔn, o lɔ́lu díminsa. I tɛ́ɛ ɲɔɔn ɲáankɛla kó: «Aa latikɔlɔ kúugbɛɛ nzúu míin lɔ́nɔɔnla mínnɛɛn lé kósɔn nín? ⁵Mɔɔn tɛ́ɛ sé ale latikɔlɔ ó felela wɛ́ɛgbannan ngɛnmɛn sáwa la tó kɛ o wɛ́ɛ o dí bhóokoo ŋólu mán.» I tɛɛ lákɔɔkoman lu kɛ́la muso ó mán.

⁶Wáa Ɛnza ŋé fɔ kó: «Áa muso ó tó a súu la! Áa a kánnankwaanyala mínnɛɛn lé la? A wɛɛ kóbhɛɛ lé kɛ́ ɲɛ́n nín. ⁷Kɛ mansɔɔ Ále ní bhóokoo ŋólu yáa kɛ́ kéene yánun wáati o bɛ́ lɔ. Kóbhɛɛ kɛ́ kɛ́ dhyáa a yɛ́ i yɛ sán mínnɔn, a yáa o kɛ́ i yɛ. Wáa né ní Ále táa kɛ́ kéene yánun wáati o bɛ́ lɔ. ⁸Mín nze é kɛ́ a yɛ, a wɛɛ o kɛ. A wɛɛ múun latikɔlɔ la, kɛ nvásisoo ó lɔ́bhyɛ kábulu o yɛ. ⁹Tó ní fɔ a yɛ́ tinɲan in né ngó, sanmankanmɛɛ ó káa í láse dínɲan ywáa óo ywáa lɔ, muso ó kɛ́ko míin ɲáan fɔ́ o ywáa ó bɛ́ lɔ tó a ko é bhyáa mɔɔn olu yáakii la.»

Zudasi é Ɛnza yanvala

Matiyu 26.14-16; Luka 22.3-6

¹⁰Ɛnza ɲɛn kaamɔɔndhye ndá ni fyáa ó kée mín ndɔ́ɔ tɛ́ɛ kó Zudasi Sikaliyɔti oo táa faanlɛɛɲansebhaa olu kúnndii ólu fɛ́ yé, ké á Ɛnza no i bhóo. ¹¹Ii o kóman ó myɛ́n mínngɛ, oo dhyáa i yɛ, ii láheli ta a yɛ kó i káa wɛ́ɛ dí a man. Zudasi tɛɛ ɲánɲiinnan Ɛnza no bhóo lɔ́ ó man.

Ɛnza ni a yɛ kaamɔɔndhye ŋolu Hɔ́lɔɲanli o ɲánlagbɛ sunman ŋo lɔ́ɔnan

Matiyu 26.17-25; Luka 22.7-14,21-23; Yaya 13.21-30

¹²Búlufuunmɛɛ ó ɲánlagbɛ14.12 Búlufuunmɛɛ ó ɲánlagbɛ: O ɲánlagbɛ o lée Izalayɛlika olu bhɔ ó yɔɲan ó lɔ o ko bhyaa lá i kɔɔnnɔn. Í ɲángban kóyoo ŋó man íi búlufuunmɛɛ ó lɔɔ ŋó lé lɔ. Íi ó ɲanlagbɛ o kíila i kwɔ́ ko Hɔ́lɔɲanli ó ɲánlagbɛ ó. o tée jónan ó, mɔɔn ólu tɛ́ɛ saayii ó kɛ́la faanlɛɛ lé tee mín man, Ɛnza ɲɛn kaamɔɔndhye ŋolu a mánɲaankɛ kó: «Íi fɛ́ ké án ndáa Hɔ́lɔɲanli o ɲánlagbɛ ó gbá ó kɛ́ ywáa mínnɛɛn lé lɔ?» ¹³Aa a yɛ kaamɔɔndhye ŋo fyáa bhyáashaa kɛ fɔ i yɛ kó: «Áa táa só ó kɔ́ɔnnɔn, a yáa bhyɛ cɛ lɔ́ le ké jílaa fanin jí lá é a kúun mán. Áa í bhyáa a kwɔka. ¹⁴Ní a kɛ táa lo bhó mínnan, áa fɔ o lútii ó yɛ́ kó: ‹Kaamɔɔn ó kó a yɛ́tiiyabho ŋoo mín? Ale ní a yɛ kaamɔɔndhye ŋolu káa Hɔ́lɔɲanli o lɔ́min ó kɛ́ bhó mínnan.› ¹⁵A káa bhóngɔɔnnɔnba lɔ́ lé yáa a lá, sangaso ó lá sa mán wé. Fé ŋó bɛ́ é a kɔɔnnɔn. A káa gbá ó kɛ́ án ɲɛn yénɔn le.» ¹⁶Kaamɔɔndhye ŋolu bhɔ́ kɛ táa só ó kɔ́ɔnnɔn kɛ táa kó ó bɛ́ sɔɔ óyoo aa fɔ i yɛ ɲán mín man. Ii Hɔ́lɔɲanli o ɲánlagbɛ ó gbá ó kɛ.

¹⁷Ywáa óo sé mínngɛ, Ɛnza ni a yɛ kaamɔɔndhye ndá ni fyáa ólu nan lo. ¹⁸Í tɛ́ɛ lɔ́min kɛ́ ó lá wáati mínnɔn, Ɛnza ŋé fɔ kó: «Tó ní fɔ a yɛ́ tinɲan in né ngó, Ále mín núu lɔ́min kɛla ni né nín, a kée ngéenan yáa ɲánva.» ¹⁹Kaamɔɔndhye ŋolu bɛ́ í ɲánlasii o kóman ó kósɔn, i bɛ́ɛ a mánɲaankɛ kée ngée ndá kó: «Né kó tɛ lɛ, bháa díi?» ²⁰Ɛnza ŋé i yawi kó: «A mɔɔn tá ni fyáa ó lé kée ngáa kɛ. Né ní mɔɔn mín ngáa í bhóo ló sunmannve ŋó lɔ́ kéene, o tíi ó lé káa ɲánva. ²¹Mɔɔn Dhyénjɛ ó yáa sayakɛ óyoo a sɛwɛnin ŋé a ta fa nvɛ́ tɛ́nmɛn. Wáa mɔɔn mín ngwɛɛn ngáa mɔɔn Dhyénjɛ ó yánva wé, kunnangboya é o tíi ó yɛ! Yáanin o tíi o wóobhaa yɛ́ɛ tɛ́ mán a bhyáa fwɛ́ɛn ka, o tɛ́ɛ físaa a mán!»

Dhyáaɲɔɔnya súnman ŋo

Matiyu 26.26-30; Luka 22.14-20

²²I tɛɛ lɔ́min o kɛ́la mínngɛ, Ɛnza ŋé búlu ó tá, kɛ Ala bálika bhɔ́, kɛ a lɔ́tɛɛtɛɛ, kɛ a di í mán, tó kɛ fɔ i yɛ kó: «Áa a tá, nvásisoo ó lée wé.» ²³O kwɔ, aa wɛɛ kɛ lɛ́zɛnnjifyɛ lɔ tá tó kɛ Ala bálika bhɔ́ kɛ o lɛ́zɛnnji o di í man. I bɛ́ é o lɔ́ mín. ²⁴Aa fɔ i yɛ ó lé lɔ kó: «Ɲee ó lée wé, Ala yɛ dhyáaɲɔɔnya ó láheli o tɔɔmansii ó. Mín ŋé bwɔ́ mɔɔn shɛ́ɛman ngósɔn.» ²⁵O kwɔ, aa fɔ i yɛ kó: «Tó ní fɔ a yɛ́ tinɲan in né ngó, ndáa lɛ́zɛnnji min bhée fɔ́ ngɛ́ kɛ́ lɛ́zɛnnji kwáa minnan Ala yɛ́ Mansaya ó lɔ.»

Ɛnza ŋé fɔ́la kó Piyɛli yáa fɔ ale mán kó a mán a lɔ

Matiyu 26.31-35; Luka 22.31-34; Yaya 13.36-38

²⁶Ii wɛɛ Ala tándo lɔ́ ŋolu lá lá mínngɛ, ii bhɔ́ kɛ táa Olivyetii ó mánshaa fɛ́. ²⁷Ɛnza ŋé fɔ a yɛ kaamɔɔndhye ŋolu yɛ kó: «A bɛ́ yáa í kwɔ́kɛ nán, kɛ mansɔɔ a sɛwɛnin ŋé kó: Ɲáan saamangbɛngbɛmaa o fáa, tó saa ólu ɲɛ́nɲɛn.²⁸Wáa ngɛ́ kúun kɛ bhɔ́ sú ólu cɛ́man, ɲáan bhyáa a ɲɛ́n sɔ́ kɛ táa Galile lánga ŋo lɔ.» ²⁹Piyɛli é fɔ a yɛ́ kó: «Yáanin mɔɔn tɔ́ ólu kɛ́ í kwɔ́kɛ í la, né táa ngwɔ́kɛ í lá.» ³⁰Ɛnza ŋé a yawi kó: «Tó ní fɔ í yɛ́ tinɲan in né ngó, bí sú míin ɲɛ́ɛ lɔ, sánnin lónan ŋó a kóman ko fyáa kɛ́, íle yáa fɔ síɲan sawa kó í mán nɔ́.» ³¹Wáa Piyɛli é í lámangbɛya kó: «Yáanin ngɛ́ saya kɛ́ í fɛ́, wáa ndáa fɔ ngó mán í lɔ́ fɛ́sɛfɛsɛ.» Kaamɔɔndhye ŋo tɔ́ ólu bɛ́ tɛɛ fɔ́la o ɲán kée ŋó lé mán.

Ɛnza ŋé í sɛ́ɛla Zesemane

Matiyu 26.36-46; Luka 22.39-46

³²Ii sé ywáa lɔ́lɔ, o tɔ́ɔ kó Zesemane. Ɛnza ŋé fɔ a yɛ kaamɔɔndhye ŋolu yɛ kó: «Áa í síi ya, ngɛ́ɛ tɛ́ɛ nzɛ́ɛ.» ³³Aa Piyɛli, Zaki ní Yaya lú tá kɛ i bhyáa a fó nan. Ɛnza ndɛ́wɛɛ bhyá sháan ne, óni kɛ a ní ó tɔ́lɔ. ³⁴Aa fɔ i yɛ kó: «Né ní o wɛ́ɛ tɔ́lɔ koyoongɛ fɔ́ kɛ kɛ́ óo ngáa sayakɛ a bhóo. Áa tó yánun; áa tó í ɲánla. ³⁵Ɛnza ŋé í lɔ́nin manbhɔ tó kɛ í cé ngbáan lúu lɔ kɛ Ala dɛ́li ni fɔ le kó: Ní aa sé o tɔ́lɔya wáati ó látinminnan a ka.» ³⁶A tɛ́ɛ fɔ́la kó: «Nvá ó, kó ó bɛ́ se é íle lé yɛ, tɔ́lɔyaba míin cɛ́bhɔ nán. Óni o ta ó bɛ́, í kɛ́nan a kɛ né sao óle, wáa í lé sao ó.» ³⁷Oo wɛɛ mínngɛ, aa í kwɔ́sɛɛ a yɛ kaamɔɔndhye nzawa ó mán. Aa nan i sɔɔ súnnɔɔn lɔ. Aa fɔ Piyɛli yɛ kó: «Simɔn, íi súnnɔɔn le lɔ a! Yáanin í yɛ́ɛ mán sé lɛ́ɛlɛ kée ngɛla í ɲánla a! ³⁸Áa tó í ɲánla, kɛ Ala dɛ́li ké á kɛ́nan lo lɔ́swaannin ó lɔ. Kóbhɛɛ kɛ́ yóso é Adamandhye ŋó kɔ́ɔnnɔn, wáa sé tɛ́ a yɛ.» ³⁹Aa í cɛ́bhɔ i la ko kwáa kɛ, kɛ táa Ala dɛ́li ni dhyáa ngée ŋolu le. ⁴⁰Aa í kwɔ́sɛɛ kaamɔɔndhye ŋolu mán íkwɔtun, kɛ́nan i sɔɔ súnnɔɔn lɔ. Kɛ mansɔɔ i bɛ́ ɲánfaa tɛ́wɛɛ gbíiya gbíiya i la. I tɛman lɔ ŋóyoo i káa kan mín nvɔ Ɛnza ɲɛn. ⁴¹Aa í kwɔ́sɛɛ síɲan sawaɲɔn o kɛ́ mínngɛ, aa fɔ i yɛ kó: «Áa súnnɔɔn le lɔ́ bhée kɛ a lɔ́nwɛɛn a? A wɛɛ kɛ́! Mɔɔn Dhyénjɛ ó, o káa ló yuumukɛbhaa olu bhóo wáati mínnɔn, o wɛ́ɛ sé. ⁴²Áa í wíi ké án ndáa! Ɲánvabhaa o lée nánla nín.»

Ɛnza myaanko o

Matiyu 26.47-56; Luka 22.47-53; Yaya 18.3-12

⁴³O ywáa nín ngée ŋó lɔ, kɛ́ Ɛnza ndó kóman o la, a yɛ kaamɔɔndhye ndá ni fyáa ó kée mín ndɔ́ɔ kó Zudasi, oo í kunnanbhɔ ni yaman lé a kwɔ́ka. Fá ni gbéle lú tɛ́ɛ yaman o bhóo. Faanlɛɛɲansebhaa olu kúnndii ólu ní sɛliya kaamɔɔn ólu ní Yawudhyaa cɛba ó léelu tɛ́wɛɛ o mɔɔn ólu bhyáashaa. ⁴⁴Ɛnza ɲanvabhaa o tɛ́ káa a tɔɔmansii ɲán mín man, a tɛ wɛɛ o ɲányaa yamandhye ŋó lá tá kó: «Ngaa nvínin cɛ mín man wé, ale lée wé. Áa ale lé myáan! Áa í yáakii tó a lɔ cɛ́ɛne ne.» ⁴⁵Aa lo ndɛ́nmɛn, Aa í mánlo Ɛnza nán téeman kɛ fɔ a yɛ kó: «Ní í fola, kaamɔɔn ó!» Aa o fɔ tó kɛ kɛ́ í fínin a man. ⁴⁶Oo kɛ́ mínngɛ, mɔɔn ólu Ɛnza myaan kɛ táa ale. ⁴⁷Ɛnza fongamaa o kée ŋé a ta fá ŋó bhɔ́ a foo ŋo lɔ kɛ a láyii faanlɛɛɲansebhaa olu kúnndiiba ó yɛ́ bháalakɛdhye ŋo ka kɛ o tóofaa ó tɛɛ man téeman. ⁴⁸Ɛnza ŋé fɔ i yɛ kó: «Áa nánla ni fá nu ní gbéle lú lé né lé myáan tɔ́ɔ lɔ óyoo kóyoongɛbhaa lɔ a? ⁴⁹Ló ŋó bɛ́, ndɛ́ɛ mɔɔn ólu kalanan a cɛ́man Ala bhatobhomba ó kɔ́ɔnnɔn, a mán myáan. Wáa sɛ́wɛli o wɛ́ɛ mín nvɔ, fɔ́ o a kɛ́ le.»

⁵⁰Oo kɛ́ mínngɛ, a yɛ kaamɔɔndhye ŋolu bɛ́ɛ bwée kɛ í kwɔ́ kɛ́ a lá. ⁵¹Káweenin ngée nɔ é í bhyáa Ɛnza ngwɔ. Bíifaanin kée ngbóto lé tɛ́ɛ o mán. Íi o myáan. ⁵²Wáa oo bwée ni a gbóomankoo ŋó le kɛ bíifaanin o tó yénɔn.

Ii táala Ɛnza né kíti tɛ́ɛlaa o lɔ

Matiyu 26.57-68; Luka 22.54-55,63-71; Yaya 18.13-14,19-24

⁵³Mɔɔn ólu táa Ɛnza né faanlɛɛɲansebhaa olu kúnndiiba ó fɛ́ yénɔn. Faanlɛɛɲansebhaa olu kúnndii olu, óni cɛba ólu, óni sɛliya kaamɔɔn ólu bɛ́ɛ ɲɔ́ɔn nadhyɛ yénɔn. ⁵⁴Piyɛli tɛ́ɛ wɛɛ Ɛnza nzúukutaaman kɛ, fɔ́ kɛ táa lo faanlɛɛɲansebhaa olu kúnndiiba ó yɛ lúkɔɔn o man. Yénɔn, aa í síi ni swáasi ólu lé tá o fɛ́ kɛ í bhóo lája. ⁵⁵Faanlɛɛɲansebhaa olu kúnndii ólu ní Yawudhyaa olu yɛ́ kítitɛɛmɔɔnba ó bɛ́ tɛ́ɛ fwɔnɲankan nɔn ɲíinan sɛ́ɛya bhóoman ké i tɛɛ o bɛ́ɛ Ɛnza nan, kó óo kó é kɛ o tɛ́ɛ kɛ́ a faakun né i bhóo, Wáa i man kan nzɔ́ɔ, mín ndɛ́ɛ sé kɛ́la Ɛnza nvaakun ne. ⁵⁶Sɛ́ɛyaladibhaa shɛ́ɛman ndɛ́ɛ fwɔnɲan le lála a lá, wáa i kan ŋo tɛ́ tɛ́ kéene. ⁵⁷Mɔɔn dáman ŋé í wíi tó kɛ fwɔnɲan lɔ lá Ɛnza nan kó: ⁵⁸«Án ní myɛ́n kó a tɛɛ fɔ́la kó mɔɔn ólu wɛ́ɛ Ala bhatobhomba mín nɔ í bhóola, kó ale káa ó cé kɛ a lɔgbɛɛ lɔ́ tee sáwa kɔ́ɔnnɔn ké mɔɔn bhóo tɛ́ a lɔ.» ⁵⁹Yáanin o ywáa ó mán mɔɔn ólu tɛ́ɛ ɲɔɔn mansɔsɔla lé.

⁶⁰Faanlɛɛɲansebhaa olu kúnndiiba óo í wíi o lé lɔ́ yaman o cɛ́man tó kɛ Ɛnza mánɲaankɛ kó: «Kóman súu súu tɛ́ í fɛ́ kɛ mɔɔn míinnu yawi a?» ⁶¹Ɛnza ŋé lumandhye myán a yɛ́ɛ ka, a mán a yawi. Faanlɛɛɲansebhaa olu kúnndiiba óo a mánɲaankɛ íkwɔtun kó: «Íle lée Kílisi o le a, án ní Ala mín bhátola o dhyénjɛ a?» ⁶²Ɛnza ŋé a yawi kó: «Ɔɔn, óo né lé le. A yáa mɔɔn Dhyénjɛ ó síinin ɲé sétii ó bhóobhɛɛkɔɔ. A ló ɲáan o yáa a yé nánla sángawa ólu cɛ́man.»

⁶³Faanlɛɛɲansebhaa olu kúnndiiba óo a yɛ́ɛla kannanfaanin o fála mwɛ́nnɛn o mán tó kɛ fɔ kó: «Án manko é sɛ́ɛya mínnɛɛn le lá bhée! ⁶⁴A wɛɛ Ala lɔ́ɔya, a wɛ́ɛ o myɛ́n nɛ́. Ále kó án ni mínnɛɛn lé kɛ́ a lá o lɔ?» I bɛ́ kó o lé lɔ kó a sɔ née a lɔ, áa á fáa. ⁶⁵Oo kɛ́ mínngɛ, lɔ́lu í láji bwɔ́ Ɛnza nga. Kɛ fé nzíli a ɲánla, kɛ táa a gbú gbú le, tó kɛ fɔ a yɛ ko aa célayakɛ, kɛ a mánɲaankɛ kó: «Mɔɔn mín íi gbási o tíi ó tɔ́ɔ fɔ.» Swáasi olu Ɛnza myaan tó kɛ a tóo cé cé.

Piyɛli kó ale mán Ɛnza nɔ

Matiyu 26.69-75; Luka 22.56-62; Yaya 18.15-18,25-27

⁶⁶Piyɛli tɛ́ɛ lúkɔɔn ó lúulafa ŋo fɛ́, faanlɛɛɲansebhaa olu kúnndiiba ó yɛ́ bháalakɛdhye musoman ŋó kée ŋé nan. ⁶⁷Oo Piyɛli yé í bhóo lájala tá ó fɛ́. Aa a mánfɛɛ cɛ́ɛne tó kɛ fɔ a yɛ kó: «Íle ni ƐnzaNazalɛtika cɛ o tɛ́ɛ kéene.» ⁶⁸Wáa aa í lámangbɛya kɛ fɔ kó: «Í yɛ́ɛ é dhyáa mínnan nin mán o lɔ, né tɛ́ bhɔ́la o ɲánle.» Piyɛli é bhɔ́ o le lɔ kɛ táa lúkɔɔn ó lona o la tó lónan ŋoo kóman. ⁶⁹Ale bháalakɛdhye musoman ngée ŋóo Piyɛli yé íkwɔtun, aa fɔ mɔɔn olu yɛ kó: «Cɛ míin nín, ale mɔɔn ó lɔ́ lée wé.» ⁷⁰Wáa Piyɛli é í lámangbɛya ko kwáa kɛ. Wáati dɔ́ɔnin ŋé tínmin mínngɛ, mɔɔn mínnu tɛ́ɛ yénɔn ólu fɔ Piyɛli yɛ́ íkwɔtun kó: «Síka tɛ́ lɔ, íi Ɛnza nvongamaa o lé lɔ́ le, kɛ mansɔɔ íle, Galileka lée íle.» ⁷¹Piyɛli é í shɛ́n kɛ fɔ kó: «Ala a ndáan, a kan ŋé cɛ mín man nín, mán o lɔ fɛ́sɛfɛsɛ.» ⁷²Í kɔ́lɔ, lónan ŋoo kóman ko fyáaɲɔn o kɛ. Ɛnza ŋé kóman mín nvɔ Piyɛli yɛ oo bhyáa a kɔɔnnɔn téeman kó: «Sánnin lónan ŋó a kóman ko síɲan fyáaɲɔn o kɛ, íle yáa fɔ né mán síɲan sawa kó í mán nɔ́.» Piyɛli é kási kɛ́.

Ii táala Ɛnza né Lomɛn ŋólu tá faanman ó kɛ́ɛnnan

Matiyu 27.1-2,11-14; Luka 23.1-5; Yaya 18.28-38

¹Sɔɔ jónan ó mán, faanlɛɛɲansebhaa olu kúnndii ólu ɲɔ́ɔn ɲé kɛ́ ní cɛba ólu ní sɛliya kaamɔɔn ólu ní kítitɛɛbhaa o tɔ́ ó bɛ́ le. Ii wɛɛ Ɛnza nzilila mínngɛ, ii táa ale kɛ táa a lo Lomɛn ŋolu tá faanman ŋó bhóo mín ndɔ́ɔ kó Pilati. ²Pilati é a mánɲaankɛ kó: «Íle lée Yawudhyaa ólu yɛ́ mansacɛ o le a?» Ɛnza ŋé a yawi kó: «Í lé le wɛ́ɛ o fɔ́ wé.» ³Faanlɛɛɲansebhaa olu kúnndii ólu kómanyoo nzhɛ́ɛman nvɔ́ Ɛnza man. ⁴Pilati é a mánɲaankɛ íkwɔtun kó: «Í tɛ́ í yawila a? Ii kómanyoo nzúu súu lála í lá nín, í tɛ́ o myɛ́nnan ŋan?» ⁵Wáa Ɛnza mán la fɔ, o lée bháa Pilati lɔ kɛ tínmin.

Ɛnza maa Baanabasi

Matiyu 27.15-26; Luka 23.13-25; Yaya 18.39--19.16

⁶Sa ŋóo sa, Hɔ́lɔɲanli o ɲánlagbɛ lo ŋo tɛ́ɛ sé, Pilati tɛ́ɛ kasodhye ngée ne lábhyaala. Yaman ó tɛ́ɛ kasodhye mín ngófɔ. ⁷Waa cɛ lɔ́ tɛ́ɛ kasola, o tɔ́ɔ tɛɛ kó Baanabasi. Ale ní a taamanɲɔɔn ólu múluti fɔ kɛ mɔɔn lɔ́ fáa. ⁸Yaman óo táa Pilati fɛ́ yé, tó kɛ fɔ a yɛ kó: «Íi kó mín ngɛla án ɲɛn Hɔ́lɔɲanli ɲánlagbɛ lo ŋo lá sa ŋóo sa o kɛ́ án ɲɛn.» ⁹Pilati é i mánɲaankɛ kó: «Áa fɛ́ ké ní Yawudhyaa olu yɛ́ mansacɛ o lé lábhyaa a?» ¹⁰Kɛ mansɔɔ Pilati tɛ́ɛ lɔ ŋóo ɲángbeya le kósɔn faanlɛɛɲansebhaa olu kúnndii ólu, Ɛnza no bhóolɔ.

¹¹Wáa faanlɛɛɲansebhaa olu kúnndii ólu tɛ́ɛ yaman ó lɔ́lonan, kó ii fɔ kó kɛ́ Baanabasi lé lábhyaa. ¹²Pilati é i mánɲaankɛ íkwɔtun kó: «Tó fɔ́ é kɛ́la mín man kó Yawudhyaa lú yɛ mansacɛ o, áa fɛ́ ké ní mínnɛɛn lé kɛ́ o la?» ¹³Ii gbáa kó: «A gbáan yíi ó mán!» ¹⁴Pilati é i mánɲaankɛ kó: «Aa kó yóo mínnɛɛn lé kɛ wɛ́?» Wáa ii gbáa ko kwáa kɛ kó: «A gbáan yíi ó mán!» ¹⁵Pilati é yaman o sáo ó kɛ, aa Baanabasi lábhyaa, ii Ɛnza gbasi gbɛ́nɲɛn la, aa Ɛnza no i bhóo kó ii táa a gbáan yíi ó mán.

Swáasi ólu yɛ́ɛbhɔla Ɛnza nɔn

Matiyu 27.27-31; Yaya 19.2-3

¹⁶Swáasi olu táa Ɛnza né i yɛ faanmannjɛ o yɛ́ lúkɔɔn ó mán, tó ii swáasi ólu tɔ́ o bɛ́ kíi. ¹⁷Ii tɔɔya ɲánlaywɛ nɔ́ bhyáa a kannan, kɛ ŋwɛ́ɛn ŋo kɛ́ mansayagɔ ne, kɛ a bíin a kúnnan. ¹⁸Ii a lákɔɔbhɔ kó: «Yawudhyaa olu yɛ́ mansacɛ o, án ni í fola.» ¹⁹I tɛ́ɛ a gbasila kaakaa ó lá a kúnnɔn, kɛ í láji bwɔ́ a ka, kɛ í kúnmɛɛn nɔ́kɛɛ a kɔɔ óyoo ii a bwóɲanla. ²⁰Ii wɛɛ yɛ́ɛbhɔla a lɔ mínngɛ, ii a yɛ tɔɔya ywɛ́ ŋo bhɔ́ a kannan, kɛ ale gbú yɛ faani o bhyáa a kannan. Ii bhɔ́ ale kɛ́ɛnman, kɛ táa a gbáan yíi ó mán.

Ii Ɛnza ngbáannan yíi ó mán

Matiyu 27.32-44; Luka 23.26-43; Yaya 19.17-27

²¹I taatɔ óle, swáasi ólu cɛ lɔ́ yé bhɔ́la sɛ́ɛn mán tó kɛ fáan lá o ka kó aa Ɛnza gbáanɲii ó tá. A tɔ́ɔ tɛɛ kó Simɔn, Silɛninnga lé tɛ́ɛ ale. Alɛsandi ní Lufu fácɛ le. ²²Ii táa Ɛnza né ywáa lɔ́lɔ, o tɔ́ɔ kó Gɔligota. O kɔ́ɔ o tɔ́ɔ kó: «Kunngɔɔngoo ywáa.» ²³Ii sé mínngɛ yénɔn, ii bhwɛ́ɛ lɔ́ ɲáanmin lɛ́zɛnnji o lɔ kɛ́ o dí Ɛnza man, wáa a mán kɛ́ o fɛ́. ²⁴Swáasi olu a gbáan yíi ó mán tó kɛ gbámantɛɛ a yɛ faani olu ka, tó bɛ́ a ta fa ndá. ²⁵Ii a gbáan yíi ó mán siinndee ó lé la. ²⁶Ii a fáa kún mínnan o sɛ́wɛnin ndɛ́ɛ yíifɛɛn nɔ ka kó: «Yawudhyaa ólu yɛ́ mansacɛ ó.» ²⁷Kɛ ii bénganikɛbhaa fyáa gbáan yíi ó mán a tɔ́ɔfɛ, kée ndɛ́ɛ a bhóobhɛɛkɔɔ, kée ndɛ́ɛ a bhóonwaan ngɔɔ. ²⁸[O bhóo ó mán, mín nzɛwɛnin ndɛ́ɛ Ala saaninkan o lɔ, óo i lafa: «I wɛɛ a yacesii kóyoongɛbhaa o lɔ́ le.»]

²⁹Tínminmaa olu tɛ́ɛ í kún lámaanla nɛɛnnin bhóoman Ɛnza ndá fa nvɛ́ kɛ táa fɔ lé a man kó: «Ɲɔ́ɔn ngo íle lée fɔ kó íi sé kɛ Ala bhatobhomba ó cé kɛ́wɛɛ kɛ a lɔko kwáa kɛ́ tee sáwa mán lé? ³⁰Í ló ŋan í yɛ́ɛ bwási kɛ í yíi kɛ bhɔ́ i gbáanɲii ó mán nín né!» ³¹Faanlɛɛɲansebhaa olu kúnndii ólu ní sɛliya kaamɔɔn ólu tɛ́ɛ yɛ́ɛbhɔla a lɔ́ kɛ fɔ ɲɔ́ɔnɲɛn kó: «A wɛɛ mɔɔn olu bwási, wáa a tɛ sháa a yɛ́ɛ bwásila!» ³²I tɛɛ fɔ́la íkwɔtun kó: «Kó Kílisi ó, Izalayɛli mansacɛ o! Í yíi kwáalenin kɛ bhɔ́ í gbáanɲii ó mán, án ɲán kɛ́ lɔ o lɔ, án ɲáan lá í lá.» Mɔɔn mínnu gbáannin ndɛ́ɛ yíi ó mán Ɛnza ndɔ́ɔfɛ, olu tɛ́ɛ a nɛɛnnan ikwɔ.

Ɛnza ɲɛn sayako o

Matiyu 27.45-56; Luka 23.44-49; Yaya 19.28-30

³³Teelatee ŋwáati o lɔ, diwiba é lo ywáa ó bɛ́ lɔ́ yamaan o ka fɔ́ kɛ táa se ywáatee ó mán. ³⁴Ywáatee ó mán o lɔ, Ɛnza ŋé gbáa fáan lá kó: «Eloyi, Eloyi, laman sabataanin.» O kɔ́ɔ o tɔ́ɔ kó: «Ɲɛ́n Ala o, ɲɛ́n Ala o, í wɛ́ɛ í kwɔ́kɛ nán mínnɛɛn lé la?» ³⁵Mɔɔn mínnu tɛ́ɛ yénɔn, o lɔ́luu o myɛ́n, ii fɔ kó: «Áa í tóomanlɔ, aa Eli kíila!» ³⁶Mɔɔn kée ŋé bwée kɛ táa fu ó bhyáa lɛ́zɛnnji kuunnin nɔ́lɔ kɛ o dhyɛ́ kaakaa lɔ la, kɛ a di Ɛnza man kó aa o min, tó kɛ fɔ kó: «Aa tó yé, án ni a mánfɛɛ ní Eli yáa nan a láyii kɛ a bhɔ́ yíi o man!» ³⁷Wáa Ɛnza ŋé gbáa fáan lá tó kɛ sayakɛ.

³⁸Oo kɛ́ mínngɛ, Ala bhatobhomba ó sácɛ ó fala fyáa le kɛ a lamyaan sáman fɔ́ɔ lúu mán. ³⁹Lomɛn swáasi kúnndii mín ndɛ́ɛ yénɔn, oo Ɛnza saya kɛ́ seɲan o yé mínngɛ, aa fɔ o lé lɔ kó: «Kɛ fɔ tinɲan in né, cɛ míin ndɛ́ɛ Ala dhyénjɛ gbú le le!»

⁴⁰Muso lɔ́lu tɛ́ɛ kólɔgbɛla ywáa já nɔn. O muso ólu cɛ́man: Mwɛnyamu Magidalaka, Zaki fítiinin ni Zose wóobhaa Mwɛnyamu, óni Salome. ⁴¹O muso ó léelu tɛ́ɛ Ɛnza ngwɔ́ka Galile yamaan o lɔ, kɛ a dhyɛman bháala olu mán. Muso shɛ́ɛman ndɛ́ɛ yénɔn o kwɔ, olu nan a kwɔka né fɔ́ Yeluzalɛmu.

Ɛnza nzúlongo o

Matiyu 27.57-61; Luka 23.50-56; Yaya 19.38-42

⁴²Ywáatee ó mán, o ló ŋó lúsɔgbɛ ó lé tɛ́ɛ lɔnwɛɛnlilo ŋo le. ⁴³Yusufu Alimateka é nan. Ale tɛ́ɛ kítitɛɛbhaa olu mɔɔnba ó lé lɔ le. A tɛ́ɛ Ala yɛ́ Mansaya ó nán wáati o mánkɔɔnnan. Aa í yóso lágbɛya kɛ táa Ɛnza nvée ó kófɔ Pilati yɛ, kó o a dyɛn kɛ a lo a bhóo. ⁴⁴Ɛnza ɲɛn sayakɛ jónan óo Pilati kɔɔnnɔnfii. A yɛ swáasi kúnndii mín ndɛ́ɛ bháala la, aa o kíi o lé lɔ tó kɛ a mánɲaankɛ ní Ɛnza nzayakɛnin ŋwɛ́ɛn myɛ́n. ⁴⁵Swáasi kúnndii óo wɛɛ a yawila mínngɛ, Pilati é í kan mɔ́ fée o ka Yusufu yɛ. ⁴⁶Yusufu é féngbɛ sá, kɛ Ɛnza nvée o láyii yíi o man, kɛ féngbɛ ó ló a man. Kábulu mín shɛn fáa o lɔ́ ale gbú yɛ, aa táa Ɛnza nzútaa o kábulu o lɔ. Kɛ́wɛɛ kɛ káwagbuba lɔ́ gínninman kɛ kábulu o lá ó látuun ŋo la. ⁴⁷Mwɛnyamu Magidalaka ní Zose wóobhaa Mwɛnyamu lu tɛ́ɛ sutaalaa ó mánfɛɛla.

Ɛnza nguunngo o kɛ bhɔ́ sú ólu cɛ́man

Matiyu 28.1-8; Luka 24.1-12; Yaya 20.1-10

¹Lɔnwɛɛnlilo ŋoo tínmin mínngɛ, Mwɛnyamu Magidalaka ní Zaki wóobhaa Mwɛnyamu óni Salome lúu táa latikɔlɔ sá kɛ táa a kɛ́ Ɛnza nvée o ka. ²Kookɔɔ ló ŋó sɔ́ɔ jónan ó mán, ii nan kábulu o ka. ³I tɛɛ fɔ́la ɲɔɔnɲɛn kó: «Yɛ́ɛtii káa káwagbuba ó gínninman án ɲɛn kɛ a bhɔ́ kábulu o lá lá?»

⁴I káa í ɲán gbáan, káwagbuba ó gínninmannin ɲé kɛ a bhɔ́ kábulu o lála. ⁵Ii lo ŋo lé lɔ kábulu o kɔ́ɔnnɔn, kɛ táa káweenin ngée nziinin ɲé i bhóobhɛɛ kɔ́ɔ fán ŋo fɛ́, deekebagbɛ lé a kannan. O yé óo sháanɲan bhyáa i lɔ koyoongɛ. ⁶Wáa aa fɔ i yɛ kó: «A kɛ́ sháan! Áa ƐnzaNazalɛtika lé ywáaɲiinnan, mín gbáan yíi ó mán. A wɛɛ kúun kɛ bhɔ́ saya bhóo o mán, a tɛ yánun. Á lanin ndɛ́ɛ ywáa ó mínnɔn, áa o mánfɛɛ. ⁷Áa táa fɔ Piyɛli ní a yɛ kaamɔɔndhye ŋólu yɛ kó a wɛɛ bhyáa i ɲɛ́n Galile lánga ŋo lɔ. A kɛ́ɛ tɛ́ɛ a ɲɛn yénɔn óyoo aa fɔ a yɛ́ tɛ́nmɛn.»

⁸Muso ólu bwée kɛ bhɔ́ kábulu ó kɔ́ɔnnɔn. I sháanngoyoo ŋo mán, i tɛɛ yáayaala, i mán sé fósi fɔ́la mɔɔn sí yɛ.

Ɛnza ŋé í yɛ́ɛ yáala Mwɛnyamu Magidalaka la

Matiyu 28.9-10; Yaya 20.11-18

⁹[«Ɛnza ŋé kúun mínngɛ kɛ bhɔ́ saya bhóo o mán, kookɔɔ ló ŋó sɔ́ɔ ó mán, aa í yáa Mwɛnyamu Magidalaka lé lá ótun. Aa lámansayoo wóonvyaa gbɛ́ muso mín nvɛ́. ¹⁰Aa mín nvɔ Mwɛnyamu Magidalaka yɛ, óo táa o fɔ́ a fongamaa olu yɛ. Aa nan i bɛ́ ɲánlasiinin nzɔ́ɔ ké ii kásila. ¹¹Wáa ii myɛ́n muso ó la mínngɛ kó Ɛnza ŋé í ɲánla, kó ale wɛ́ɛ a yé, i mán lá a lá.»

Ɛnza ŋé í yɛ́ɛ yáala a yɛ kaamɔɔndhye ŋo fyáa la

Luka 24.13-35

¹²O kwɔ, a yɛ kaamɔɔndhye nvyáa tɛ́ɛ táala sháakun nɔn, Ɛnza ŋé í yɛ́ɛ yáa olu lá se nɔ́ le. ¹³Ii í kwɔ́sɛɛ mínngɛ, ii o fɔ́ kaamɔɔndhye ŋo tɔ́ ólu yɛ wáa olu mán lá i la.

Ɛnza ŋé í yɛ́ɛ yáala a yɛ kaamɔɔndhye ndá ni kée ŋó la

Matiyu 28.16-20; Luka 24.36-49; Yaya 20.19-23

¹⁴O kwɔ, Ɛnza ŋé í yɛ́ɛ yáa a yɛ kaamɔɔndhye ndá ni kée ŋó la ké ii lɔ́min kɛ́ o la. Aa i yáayii i yɛ lánanbhɛɛya óni i yɛ yáakiilagbeya o kósɔn. Kɛ mansɔɔ mɔɔn mín núu fɔ kó i wɛɛ Ɛnza ngúunnin ŋó yé, i mán lá olu la. ¹⁵Tó Ɛnza ŋé fɔ i yɛ kó: «Áa táa dinɲan ó fán ŋo bɛ́, kɛ táa sanmankanmɛɛ ó láse mɔɔn bɛ́ man. ¹⁶Mɔɔn mín ngɛ lá a lá, kɛ í bátize, o yáa kísi, wáa mín mán lá a lá, Ala tá kíti o yáa bé o tíi o ka. ¹⁷Sébhaaya mín ngɛ se káa kɛ́ lánanbhaa olu yɛ, o lée lúu nin: I yáa lámansayoo nú gbɛ́ mɔɔn olu fɛ́ né tɔ́ɔla, i yáa kanngbɛɛ lu fɔ. ¹⁸Yáanin i kɛ san ó myáan í bhóola, wáman i kɛ minife nɔ mín, mín ŋé sé mɔɔn fáala, o táa fósi kɛ́ i la. Ní i lo ngɛ́ í bhóo lá yangalotɔ mín nga, olu yáa kɛ́ɛnya.»

Ɛnza ŋé í kwɔ́sɛɛla Ala fɛ́ yé

Luka 24.50-53

¹⁹Aa wɛɛ o kóman ó kɛ́la i yɛ mínngɛ, kɔ́ɔtali é kɛ́ Mantii Ɛnza ɲɛn kɛ alayɛɛ sá ŋó lɔ, tó kɛ í síi Ala bhóobhɛɛkɔɔ. ²⁰Kaamɔɔndhye ŋólu táa sanmankanmɛɛ ó láse ywáa bɛ́ lɔ. Mantii Ɛnza ndɛ́ɛ i dhyɛmanla o bháala o lɔ. Aa sébhaaya lú dí i man ké ii káwananngo lú kɛ, kɛ yáa óyoo i yɛ lakawanikan ŋoo tinɲan le le.]