Matiyu

MATIYU

é sanmankanmɛɛ mín nzɛ́wɛ

Ɛnza Ngílisi kó ó lɔ́

Kunnanfwee ŋó

Matiyu yɛ́ kitabu oo sanmankanmɛɛ mín nvɔla án ɲɛn, o lée Ɛnza Ngílisi yɛ kó ó lé Ala tɛ wɛɛ i lákan ndí mín ngo lɔ. Sanmankanmɛɛ mín ndɛ́ wɛ́ɛ sɛwɛ Yawudhyaa ólu yɛ́.

Kitabu miin ŋe Ɛnza ŋwóoko óle fɔ́la án ɲɛn, óni aa bhɔ́ búluyi mínnɔn kɛ tá Bulaaman man kɛ táa bhyáa Laula man. Aa yáala án nan ko Ala tɛ wɛ́ɛ lákan ndí a yɛ́ mɔɔn lɔtɔnmɔnnin mín ngo lɔ́, ko ale Ɛnza ne ko yé.

Matiyu é kitabu kɔɔ o kɔɔnnɔn kóman o tá kɛ́ a yáa ko Ɛnza ŋwɛ́ɛn nan ó láfa. Ɛnza ŋe káwananngo mínnu óni lákawanin mínnu kɛ́ aa ó yáala án nan. Láanvyaa óo sɔ́ɔla ɲán mín man aa ó yáala án nan.

Matiyu é yáala án nan a yɛ́ kitabu o kɔɔnnɔnko Ɛnza née Ala dhyénjɛ o lé mín ngáa nan mansaya kwáa o síi. Aa fɔ́la án ɲɛn ko: «O lɔ, áa táa síya ólu bɛ́ kɛ né yɛ́ kaamɔɔndhye nu lé kɛ́ í bátize Fá o, dhyénjɛ o, óni Ní Sɛnnɛnyanin ŋo tɔ́ɔ lá, kɛ́ í kála, ké íi né yɛ́ kóman o bháto. Né yáa tó ni ále ló ŋóo ló fɔ́ kɛ táa sé dínɲan lábha ŋo man» (28.19-20).

Matiyu yɛ́ Kitabu o lɔ́taaɲan ó

Ɛnza mbúluyi óni a wóo ko ó 1.1--2.23

Yaya Bátizelikɛbhaa yɛ́ bháala ó 3.1--3.17

Sɔtaannan é Ɛnza nɔswaannan 4.1--4.11

Ɛnza ŋe bháala mínngɛ Galile mala o lɔ́ 4.12--18.35

Ɛnza ŋan táaman o kɛ́ bhɔ́ Galile kɛ táa Yeluzalɛmu 19.1--20.34

Ɛnza ŋan bháala óni a sayako o Yeluzalɛmu 21.1--27.66

Ɛnza ŋwɛ́ɛn kúun kɛ i yɛ́ɛ yáa a yɛ́ kaamɔɔndhye ŋolu lá 28.1-20

Ɛnza Ngílisi búluyi o

Luka 3.23-38

¹ƐnzaNgílisi é bhɔ́ mɔɔn mínnu lɔ, kó mín nzɛ́wɛnin ŋé o mɔɔn ólu ka, o lée lúu nín: Ɛnza ŋé Laula Bhɔ́nzɔ né le; Laula lo ŋé Bulaaman bhɔ́nzɔ ne le. ²Bulaaman é Shaaka fá le le, tó Shaaka é Yangubha fá le le; Yangubha lée Zuda ní a kɔ́ɔcɛ ní a lɔ́ɔcɛ lú fá le. ³Zuda lée Pelɛsi ní Zela lú fá le. Aa i sɔɔ a muso Tamaa lé la. Pelɛsi lée Ɛsilɔn fá le, Ɛsilɔn née Alamu fá le. ⁴Alamu lée Aminadabu fá le, Aminadabu lée Naasɔn fá le, tó Naasɔn née Salimɔn fá le. ⁵Salimɔn ŋé Boozi sɔ́ɔ a muso Lahabu le la, Boozi é Obɛdi sɔ́ɔ a muso Luti le la; Obɛdi lée Yese fá le, ⁶tó Yese é mansacɛ Laula fa le.

Laula é Swɛmannan sɔ́ɔ Uli fúumuso o lé la. ⁷Swɛmannan lée Lehabamu fá le, Lehabamu lée Abiya fá le, tó Abiya lée Asafu fá le. ⁸Asafu lée Zozafati fá le, Zozafati lée Zolamu fá le; Zolamu lée Wuziya fá le. ⁹Wuziya lée Zotamu fá le, Zotamu lée Ahazi fá le, Ahazi lée Ezekiyasi fá le. ¹⁰Ezekiyasi lée Manase fá le, Manase lée Amɔn fa le, tó Amɔn lée Zoziyasi fá le. ¹¹Zoziyasi é Yekoniya ni a kɔ́ɔcɛ ní a lɔ́ɔcɛ lú sɔ́ɔ í wóobhaa la. O wáati kée ŋó lɔ, Babilɔninnga ólu táa ni Izalayɛlika ólu lé Babilɔnin mála o lɔ́ i myaannin ngwɔ Izalayɛli.

¹²Izalayɛlika ólu táa mínngɛ Babilɔnin, Yekoniya tɛ́ɛ Babilɔnin ndáa sɛɛ o lɔ. Ale lé lée Sheyatɛli fá le. Sheyatɛli lée Zolobabɛli fá le. ¹³Zolobabɛli lée Abiyudi fá le, Abiyudi lée Eliyakimu fá le; Eliyakimu lée Azɔɔ fá le, ¹⁴Azɔɔ lée Sadɔki fá le, tó Sadɔki lée Akimu fá le le, Akimu lée Eliyudi fá le. ¹⁵Eliyudi lée Eleyazaa fá le, Eleyazaa lée Matan fá le, tó Matan lée Yangubha fá le. ¹⁶Yangubha lée Yusufu fá le; Mwɛnyamu é sii Yusufu lé kunman. Ale Mwɛnyamu lée Ɛnza ŋwóo. Fɔ́ é kɛ́la o Ɛnza ŋo le mán kó Kílisi o.

¹⁷Wóosɛɛ tá ni náannin lée lo Bulaaman ni Laula cɛ; tó kɛ ta Laula ta sán o mán kɛ táa sii Izalayɛlika ólu myáansan ŋo man tó ii táa Babilɔnin, wóosɛɛ tá ni náannin lée ló o wáati fyáa ó cɛ; wóosɛɛ tá ni náannin lée ló í gbɛnzan óni Kílisi o wóosan o cɛ.

Mantii Ɛnza ŋwóoko o

Luka 2.1-7

¹⁸ƐnzaNgílisi é wóo ɲán mín man, o lée kɛ́ nín: Mwɛnyamu lée Ɛnza ŋwóo; óo kɛ́la sán mínnɔn, Mwɛnyamu mánmyaannin ndɛ́ɛ Yusufu lé kwɔ; bhó ɲɛ́ɛ tɛ́ mán ló i cɛ bhá tó Mwɛnyamu é kɔ́ɔn tá. Aa kɔ́ɔn ó tá Ní Sɛnnɛnyanin ŋó lé tá fwɛ́ɛnseya lɔ. ¹⁹Mwɛnyamu mánmyaan cɛ mín Yusufu, o tɛ́ɛ mɔɔn téenin né le; a lo ndɛ́ tɛ́ fɛ́ ké Mwɛnyamu tɔ́ɔ o a cáan. O kósɔn, ale Yusufu é a yace síi kó a káa o fúu ó lábhyaa lóonɔn. ²⁰A tɛɛ o kó ó lɔ́kiila bhée, tó Mantii o yɛ́ malɛɛka lɔ é í kíbhalokan ná a ɲanman kɛ fɔ a yɛ kó: «Laula Bhɔ́nzɔ Yusufu, í kɛ́nan sháan Mwɛnyamu ta kɛ a kɛ í muso le; kɛ mansɔɔ a kɔ́ɔnman ŋé dhyé mínnan wé, óo bhɔ́la Ní Sɛnnɛnyanin ó lé lɔ. ²¹A yáa wóo dhyénjɛ la. Dhyé ŋó tɔ́ɔla kó Ɛnza, kɛ mansɔɔ ale lé káa a yɛ mɔɔn ólu kísi kɛ i bhɔ́ i yɛ yúumu olu lɔ.»

²²Mantii o tɛ́wɛɛ tínmin a yɛ céla ó mán kɛ saanin mínngɛ, óo í láfa céne. A fɔnin ndɛ́ɛ Mantii o kwɔ́ tá ne kó:

²³Sínngbiinin mín man cɛko kɛ́ bhá ŋwé,

o yáa kɔ́ɔn tá kɛ í yɛ́ɛ mansɔɔ dhyénjɛ la;

fɔ́ yáa kɛ́ dhyé ŋó mán kó Emannuwɛli.

O tɔ́ɔ ó kɔ́ɔ tɔ́ɔ tá kó: Ala é án nvɛ́.

²⁴Yusufu é kúun mínngɛ kɛ bhɔ́ sunnɔɔn o lɔ, Mantii o yɛ́ malɛɛka óo kó mín nvɔ́ a yɛ́, áa ó kɛ: Yusufu é Mwɛnyamu táa muso le. ²⁵Wáa bhó mán lo i cɛ fɔ́ kɛ táa sé Mwɛnyamu wóo ó man. Mwɛnyamu é í yɛ́ɛ mansɔɔ dhyénjɛ la, tó Yusufu é dhyé ŋó tɔ́ɔla kó Ɛnza.

Kólɔmaa lu wɛ́ɛ nan dhyéɲɛɛnninngwaa o bháto

¹Ɛnza ŋé wóo Bɛtelɛmu só o lá Zude mála o lɔ́ mansacɛ Elɔdi tá tee o lé kɔɔ. Ɛnza ŋwoonin ŋó kwɔ, kólɔmaa lɔ lúu bhɔ́ kɔ́ɔ ŋo lɔ kɛ́nan Yeluzalɛmu. ²Ii ɲaankɛli kɛ kó: «Yawudhyaa olu yɛ́ mansacɛ mín ŋé wɛɛla wóola nín, aa mín ne? Án ni a wóoko o lóodhye ŋó yé kɔ́ɔ ŋó lɔ. Án nánnin ŋé a bháto tɔ́ɔ le lɔ.» ³Mansacɛ Elɔdi é o kóman ó myɛ́n mínngɛ, ale ní Yeluzalɛmuka ólu bɛ́ kɔɔnnɔn é fii. ⁴Elɔdi é faanlɛɛɲansebhaa olu kúnndii ólu ní sɛliya kaamɔɔn ólu bɛ́ ládhyɛ kɛ i manɲaankɛ kó Kílisi o káa wóo mín ne? ⁵Íi fɔ a yɛ kó: «Kísibhaa o káa wóo Bɛtelɛmu só o lé lá Zude mála o lɔ, kó céla Mishe é o lé sɛ́wɛ kó:

⁶Íle Bɛtelɛmu, tó íi Zude lúu ó ka,

íle tɛ́ Zude mála só o bɛ́ lɔ fítiinin ŋo le tún,

kɛ mansɔɔ kunndii lɔ́ yáa bhɔ́ íle lɔ,

o yáa í síi ɲɛ́n Izalayɛlika ólu kúnnan.»

⁷Elɔdi é o myɛ́n mínngɛ, aa kólɔmaa olu kíi lóo nɔ́n kɛ i manɲaankɛ lóodhye ŋó bhɔ́san gbúnigbu o mán, ⁸tó kɛ i lɔ cé lá Bɛtelɛmu kɛ fɔ i yɛ kó: «Áa táa ɲaankɛli kɛ́ cɛ́ɛne dhyé ŋó tá sháa fɛ́, á kɛ́ a ywáa yé, áa nan fɔ ɲɛ́n, ké né a táa a bháto íkwɔ.»

⁹Mansacɛ oo wɛɛ o kóman ólu fɔ́la kólɔmaa olu yɛ mínngɛ, olu táa, tó i tɛ wɛɛ lóodhye mín yé kɔ́ɔ ŋo lɔ́ wé, oo bhyáa i ɲɛn. Dhyé ŋó tɛ́ɛ bhó mínnan, lóodhye ŋó sé o téeman tó kɛ í lɔ́. ¹⁰Ii lóodhye ŋó lɔ́nin ɲé o ywáa ó téeman mínngɛ, i nisɔ é dhyáa kɛ tínmin. ¹¹Ii lo bhó ŋó la, tó ii dhyé ŋó yé a wóobhaa Mwɛnyamu bhóo. Ii í manyii tó kɛ dhyé ŋó bháto, kɛ i yɛ lwée ŋólu láfwee kɛ sɛ́ɛn ni wúsulan óni miili2.11 miili: Oo swáandhyaafe nzíya lɔ lé le. Ii a bhɔ́la yíi lé lɔ; miili ó tɛ́ɛ Yawudhyaa olu bhóo fé ngúugbɛɛ né le óyoo wúsulan o kúu tɛ́ɛ gbɛ́ɛ i man tɛ́nmɛn. lú kɛ́ a yɛ kóɲwaan le. ¹²O kwɔ́, Ala é i lasowi kibhalo lɔ kó i kɛ́nan í kwɔ́sɛɛ Elɔdi fɛ́ yénɔn. Oo kɛ́ mínngɛ, ii sháa gbɛ́ɛ ta kɛ táa i yɛ yamaan o lɔ.

Yusufu wɛ́ɛ Mwɛnyamu ni Ɛnza ndá kɛ bwée kɛ táa Misila

¹³Kólɔmaa olu táanin ngwɔ, Mantii o yɛ́ malɛɛka lɔ é í kíbhalokan na Yusufu ɲánman kɛ fɔ a yɛ kó: «Í wíi, dhyé ŋó ní a wóobhaa ta kɛ bwée kɛ táa i ɲánmanloonaan kɛ́ Misila yamaan o lɔ. Tó yénɔn sɔ́ fɔ ngɛ fɔ í yɛ́ wáati mínnɔn ngó íi í kwɔ́sɛɛ, kɛ mansɔɔ Elɔdi káa dhyé ŋó ywáa ɲíin ne wé ké aa a fáa.» ¹⁴Yusufu é o lé kɛ́ í wíi lé sú o lɔ kɛ dhyé ŋó ní a wóobhaa o tá kɛ táa Misila. ¹⁵Aa tó Misila kɛ́nan sé fɔ Elɔdi yɛ́ saya ó mán. Mantii o tɛ́wɛɛ tínmin a yɛ céla ó lɔ́ mán kɛ saanin mín ngɛ, oo í láfa céne. A fɔnin ndɛ́ɛ Mantii o kwɔ́ tá ne kó: Ŋwɛ́ɛn nyénjɛ ó kíi ké aa bhɔ́ Misila.

Elɔdi kó kɛ Bɛtelɛmu dhyénjɛman ŋólu fáa

¹⁶Elɔdi é yé mínngɛ óo kólɔmaa olu wɛ́ɛ ale lánɛɛn, aa fundɛli gbúnigbukɛ, aa céla látaa Bɛtelɛmu só óni a lamiin ŋo só ólu la kó dhyénjɛman mínnu mán tínmin sánɲin fyáa ka má, kó kɛ olu bɛ́ fáa. Aa o sánɲinla o fɔ kɛ mansɔɔ kólɔmaa olu tɛ́wɛɛ lóodhye ŋó bhɔ́san mín nvɔ a yɛ, o tɛ́ mán tínmin sanɲin fyáa ka má. ¹⁷Céla Zelemi é kóman mín nvɔ, oo í láfa céne. A fɔnin ndɛ́ɛ a kwɔ tá ne kó:

¹⁸Lɔ́ mánngan ŋé bhɔ́la Lama só ó la,

saankasikanmba é bhɔ́la:

Lashɛli lée kásila a dhyé ŋólu kósɔn,

a man sɔ́n ké lɔ́ a í bhóo lá a yóso la,

kɛ mansɔɔ a dhyé ŋólu tɛ́ í ní lá bhée.

Yusufu wɛ́ɛ í kwɔ́sɛɛ Izalayɛli yamaan o lɔ

¹⁹Elɔdi é wɛɛ saya kɛ́la mínngɛ, Mantii o yɛ́ malɛɛka lɔ é í kíbhalokan na Yusufu ɲánman Misila yamaan o lɔ ²⁰kɛ fɔ a yɛ kó: «Í wíi, dhyé ŋó ní a wóobhaa ta kɛ í kwɔ́sɛɛ Izalayɛli yamaan o lɔ, kɛ mansɔɔ mɔɔn mínnu tɛ́ɛ dhyé ŋó kwɔ kɛ a fáa, o mɔɔn ólu wɛ́ɛ sayakɛ.» ²¹Yusufu é o lé kɛ́ í wíi le kɛ dhyé ŋóni a wóobhaa ta kɛ í kwɔ́sɛɛ Izalayɛli yamaan o lɔ́. ²²Wáa aa myɛ́n mínngɛ kó Akelayosi wɛ́ɛ kɛ́ Zude mála ó mansa lé ale Akelayosi fá Elɔdi ɲɔ́ɔn lɔ, Yusufu é sháan táa ó lɔ́ yénɔn. Ala é a lasowi kibhalo lɔ, tó aa táa Galile mála ó lɔ ²³kɛ táa í síi só lɔ lá yénɔn kó Nazalɛti. Céla ólu kóman mín nvɔ, olu í láfa céne. A fɔnin ndɛ́ɛ ikwɔ kó fɔ́ yáa kɛ́ Ɛnza man kó: «Nazalɛtikacɛ.»

Yaya Bátizelikɛbhaa é Ala yɛ́ Mansayako ó lásela

Maki 1.1-8; Luka 3.1-18; Yaya 1.19-29

¹Ló nɔ la, Yaya Bátizelikɛbhaa é nan Zude dhyɛ́ o lɔ tó kɛ táa a lásele kó: ²«Áa a yóo ólu yɛ́ɛman, kɛ mansɔɔ sángboo ó Mansaya ó lángɛɛnman wáati o wɛ́ɛ bhyáa sé le!» ³Céla Ezayi é fɔ Yaya lé mán kó:

Mɔɔn lɔ́ é gbáanan dhyɛ́ o kɔɔnnɔn kó:

Áa Mantii ó yɛ́ sháa ó lálaa,

áa a tínminnaa ólu látee.

⁴Deeke mín ndɛ́ɛ Yaya kannan, o lálaanin ndɛ́ɛ ɲɔ́ɔnmɛɛnshe le la, tó kɛ cɛ́siigboo lɔ́ síi a soola. A bhálo ó tɛ́ɛ gɔ́tiba óni wówonin ndúu le le. ⁵Yeluzalɛmuka ólu ní Zude mála ó ywáa bɛ́ lɔ mɔɔn ólu ní Zuludɛn bha ó lánga o mɔɔn ó bɛ́ é táa Yaya saala ⁶kɛ táa í lálabhɔ i yɛ́ yúumu olu mán tó Yaya tɛ́ɛ i bátize Zuludɛn bha ó lɔ.

⁷Yaya é yé mínngɛ óo Falizɛn ŋólu ní Sadusi olu táala a saala ké aa i bátize, aa fɔ i yɛ kó: «Álee santutudhye ŋólu, yɛ́ɛtii é álee lasowi kó álee a bwée Ala yɛ́ kíti nantɔ ó ɲɛn? ⁸Aa kóbhɛɛ ólu kɛ́, kɛ́ a yáa kó a wɛ́ɛ díminsa kɛ́ fala a yɛ́ kóyoo ŋólu lá. ⁹A kɛ́nan í míli kó Ala yáa a kísi kɛ mansɔɔ Bulaaman é a fá lé. Ni fɔ́la a yɛ́ ngó Ala é sé kɛ́ káwaguun míinnu yɛ́ɛman kɛ ólu kɛ́ Bulaaman dhyé ŋólu lé. ¹⁰Tɛ́ɛla ŋó lɔ́bhyɛnin ɲé kɛ́ bhá kɛ yíi ólu tɛ́ɛ i díin ŋólu man. Yíi ó yíi tɛ́ dhyémɛɛ kɛ́la, ó bɛ́ yáa tɛ́ɛ kɛ́ láfii tá ó lɔ́. ¹¹Née a bátizela jí la, kɛ a yáa kó a wɛ́ɛ a yóo ólu yɛ́ɛman; Waa mín ngáa nan né kwɔ, ó yɛ́ sebhaaya o á bwó né tá ó lé. Né yɛ́ɛ mánngan kɛ a yɛ sawaa ó bhɔ́ a se nan. Ale yáa a bátize Ní Sɛnnɛnyanin ŋóni tá ó la. ¹²A yɛ́ zɛɛ óo a bhóo. A yáa a yɛ́ maan gbasinin ŋó lɔ́fyɛ kɛ́ a dhyé ŋólu bhyáa a yɛ́ mɔɔnnin ŋó kɔɔnnɔn kɛ́ a foo ŋólu ɲɛɛn tá sábhɛɛ ó man.»

Ɛnza ŋé bátize tɛ́nmɛn

Maki 1.9-11; Luka 3.21-22

¹³Ɛnza ŋé bhɔ́ o wáati o lé lɔ́ Galile mála ó lɔ kɛ́nan Zuludɛn bha ywáa o lɔ, kɛ́nan Yaya saala kó aa fɛ́ ké o a ale bátize. ¹⁴Wáa Yaya é í bá kɛ fɔ kó: «Íle lé kákan kɛ né bátize, tó íle nánla né saala ko né a íle bátize kó kɛ́ díi?» ¹⁵Ɛnza ŋé a yawi kó: «Sɔ́n ké aa kɛ́ cé ŋótun, kɛ mansɔɔ án ngákan kɛ Ala dhyáaɲɛnngo ó kɛ́ ɲán mín man ó lée wé.» Óo kɛ́ mínngɛ, Yaya e sɔ́n. ¹⁶Ɛnza ŋé wɛɛ bátize lá, áa bhɔ́ jí ó lɔ tɛ́nmɛn. O wáati kée ŋó lɔ, sángboo óo í lá láka, tó aa Ala yɛ́ Ní sɛnnɛnyanin o yé yíila óyoo biinin ngɛ kɛ́nan í síi a ka. ¹⁷Tó saaninkan nɔ é bhɔ́ sángboo o lɔ kɛ fɔ kó: «Nyénjɛ ó lée nin, mín ŋan dí ɲɛ́n koyoongɛ. Ale lée né tá nisɔdhyaa o le.»

Sɔtaannan é Ɛnza nɔswaannan

Maki 1.12-13; Luka 4.1-13

¹Kwɔ́ o la, Ní Sɛnnɛnyanin ŋóo kɛ tó Ɛnza ŋé táa dhyɛ́ o lɔ, kó óo kó é kɛ ke Sɔtaannan o tɛ́ɛ táa a lɔ́swaan. ²Ɛnza ŋé tee bínaannin ni sú bínaannin kɛ́ sún nɔn mínngɛ, kɔ́ɔn é a myaan. ³Sɔtaannan mín ŋé lɔ́swaannikɛbhaa o le, oo í mángbaa Ɛnza nan kɛ fɔ a yɛ kó: «Ní íi Ala Dhyénjɛ le, a fɔ káwaguun míin nú yɛ kó ii i yɛ́ɛman kɛ kɛ́ búlu lé í yɛ́.» ⁴Ɛnza ŋé a yawi kó: «A sɛwɛnin ɲé Ala yɛ kitabu o lɔ kó: Mɔɔn tɛ́ bhálola lɔ́minfe ngbɛ́ɛgbɛɛ la; wáa saanin súusuu é bhɔ́la Ala káa lɔ, oo mɔɔndhye ŋó bhálola.»

⁵Oo kɛ́ mínngɛ sɔtaannan é táa nín Ɛnza né fɔ Yeluzalɛmu, só sɛ́nnɛnyanin ŋó la, kɛ alalɔ Ala bhatobhomba ó kúnnɔn ⁶tó kɛ fɔ a yɛ kó: «Ni íi Ala Dhyénjɛ le, í gbán kɛ i yíi lúuman, kɛ mansɔɔ a sɛwɛnin ɲé Ala yɛ́ Kitabu o lɔ kó:

Ala yáa cé dí a yɛ malɛɛka ólu mán i kósɔn,

tó íi í tá í bhóo ó lɔ́,

ké i se ŋó kɛ́nan gbasi káwaguun nɔ la.

Kɛ́nan gbasi káwa lɔ́la.»

⁷Ɛnza ŋé a yawi kó: «A sɛwɛnin ɲé íkwɔ kó: Í kɛ́nan Mantii o, í yɛ́ Ala o lɔ́swaan.»

⁸Sɔtaannan é táa ni ale tii yámba lɔ́ ka íkwɔ, tó kɛ dínɲan mansaya o ywáa olu ní olu cɛ́ɲanlaa ólu bɛ́ yáa a lá, ⁹tó kɛ fɔ a yɛ kó: «Ɲáan míin bɛ́ di í mán ní ile kwɛ́nnin ngɛ i kúnmɛɛn nɔ́kɛɛ né kɔ́ɔ kɛ́ né bháto.» ¹⁰Ɛnza ŋé fɔ a yɛ kó: Í mánbhɔ nán, Sɔtaannan! Kɛ mansɔɔ a sɛwɛnin ɲé Ala yɛ́ Kitabu o lɔ kó i manyii i yɛ́ Mantii o i yɛ́ Ala ó le yɛ́, kɛ́ ale kéengboto lé bháto.¹¹O fɔ́nin ngwɔ, Sɔtaannan oo a mankɛnin ndo. Malɛɛka ólu o lé kɛ́ nán lé Ɛnza nzaala kɛ lɔ́min dí a man.

Ɛnza ŋé í kwɔ́sɛɛla Galile

Maki 1.14-15; Luka 4.14-15

¹²Ɛnza ŋé myɛ́n mínngɛ kó i wɛɛ Yaya bhyáa kasola, aa táa Galile lánga ŋo lɔ. ¹³A man í lá ngɛ́ Nazalɛti, aa táa í síi Galile bhá ó tɔ́ɔfɛ Kapɛnamu só ó la, o só óo mala mínnɔn, fɔ́ é kála o mala ó mán kó Zabulɔn ní Nɛfutali. ¹⁴Oo kɛ́ lé, ke kó óo kó é kɛ ke céla Ezayi é kóman mín nvɔ, o a í láfa. A fɔnin ndɛ́ɛ a kwɔ tá ne kó:

¹⁵Álee Zabulɔn ní Nɛfutali mála mɔɔn olu,

óni álee mɔɔn mínnuu kɔɔji o tɔ́ɔfɛ,

óni mínnuu Zuludɛn bhá ó kwɔ́man;

álee síya mínnu Galile mala ó lɔ áa í tóo mánlɔ!

¹⁶Mɔɔn mínnu tɛ́ɛ dínɲanlɔtɛɛla diwi lɔ,

olu wɛ́ɛ kɛ́ɛnɲanba o yé.

Diwi lɔdiwiyaninmba ó tɛ́ɛ yamaan mín mɔɔn lú ka,

kɛ́ɛnɲan o wɛ́ɛ bhɔ́ olu yɛ.

¹⁷Kɛ ta o wáati o mán, Ɛnza ndɛ́ɛ lakawanin kɛ́la kó: «Áa a yóo ólu yɛ́ɛman, kɛ mansɔɔ Ala yɛ́ Mansaya ó lángɛɛnman wáati o wɛ́ɛ bhyáa sé le!»

Ɛnza ŋé a yɛ kaamɔɔndhye njónan ólu kíila

Maki 1.16-20; Luka 5.1-11

¹⁸Ɛnza ŋé tó táamanla Galile bhála o la kɛ bhádhyenjɛman nvyáa yé: Simɔn mín ndɔ́ɔ íkwɔ kó Piyɛli, óni a lɔɔcɛ Andele. I tɛɛ yɔ fíi bhá ó lɔ kɛ yɔ́ɔ myáan. ¹⁹Ɛnza ŋe fɔ i yɛ kó: «Áa nan í bhyáa né kwɔ́, ɲáan a kɛ́ mɔɔn ɲíinmaa le ké áa i lanan ne mán.» ²⁰O ywáaninngee ŋo lɔ ii í kwɔ́ kɛ́ i yɛ yɔ ólu lá téeman kɛ i bhyáa a kwɔ.

²¹Aa táa ɲɛ́nnzhaafɛ, aa bhádhyemannjɛ fyáa gbɛ́ɛ yé yénɔn: Zebede dhyénjɛ Zaki ní o lɔ́ɔcɛ Yaya. I tɛɛ i yɛ yɔ ólu lɔ́bhyɛnan Kúun ŋó kɔ́ɔnnɔn ni i facɛ Zebede le. Ɛnza ŋé i kíi; ²²Ii í kwɔ́ kɛ́ i facɛ lá téeman, óni Kúun ŋó la, tó kɛ bhyáa Ɛnza ngwɔ.

Ɛnza ŋé lakawanin kɛla óni kɛ lákɛɛnyalikɛ

²³Ɛnza ndɛ́ɛ Galile mála ó ywáa ó bɛ́ lɔyaalala kɛ táa mɔɔn olu kála né í yɛ́ sɛ́ɛbho ŋólu la, óni kɛ táa Ala yɛ sanmankanmɛɛ ó láse lé Ala yɛ́ Mansaya ó tá fa nvɛ́, o kwɔ, a tɛɛ yangalo bɛ́suu lákɛɛnyala. ²⁴A tɔ́ɔ é lá Sili yamaan o ywáa bɛ́ ka. Yangalo bɛ́suu tɛ́ɛ mɔɔn mínnu la, ii táa o mɔɔn ó bɛ́ lé a saala: Lámansayoo ndɛ́ɛ mɔɔn mínnu fɛ́ óni benzhaayatɔ ólu ní mɔɔn mínnu sé ndɛ́wɛɛ fáa i man, Ɛnza ŋé i lákɛɛnya. ²⁵Yaman gbɔ́gbɔ é bhyáa a fonan, kɛ ta Galile mán kɛ sii Dekapɔli la, óni Yeluzalɛmu ní Zude ní Zuludɛn bhá ó kwɔ́man.

Ɛnza ŋé lakawanin mín ngɛ tii ó ka

Luka 6.20-23

¹Ɛnza ŋé yaman o yé mínngɛ, aa í yɛ́ɛ tii lɔ́ ka kɛ í síi yénɔn. A yɛ kaamɔɔndhye ŋolu táa a saala ²tó aa i kála námyaan tá ko:

³«Mɔɔn mínnu a lɔ ŋóo íi faannda né i yóso o lɔ,

olu yeemanfanin ɲé,

kɛ mansɔɔ í yáa sángboo ó Mansaya o sɔ́ɔ!

⁴Mɔɔn mín núu kásila, yeemanfaa é olu yɛ,

kɛ mansɔɔ Ala yáa i yóso láyii!

⁵Mɔɔn mínnu sáwɛɛnin ŋe, yeemanfaa é olu yɛ,

kɛ mansɔɔ lúukolo ó yáa kɛ́ i ta le!

⁶Téleɲan ó nɛ́li é mɔɔn mínnu la, yeemanfaa é olu yɛ,

kɛ mansɔɔ Ala yáa i dhyáaɲɛnngo kɛ!

⁷Hínnɛn é mɔɔn mínnu yóso lɔ, yeemanfaa é olu yɛ,

kɛ mansɔɔ Ala yáa hínnɛn olu la!

⁸Mɔɔn mínnu yóso ó gbɛ́nin ɲe, yeemanfaa é olu yɛ,

kɛ mansɔɔ olu yáa Ala yé!

⁹Mɔɔn mín núu mɔɔn ólu cɛ́lɔbhyɛnan,

yeemanfaa é olu yɛ, kɛ mansɔɔ fɔ́ yáa kɛ́ olu man kó Ala dhyé nú!

¹⁰Ii mɔɔn mínnu tɔ́lɔla i yɛ téleɲan o kósɔn,

yeemanfaa é olu yɛ, kɛ mansɔɔ i yáa Ala yɛ́ Mansaya ó hɛ́lɛ o sɔ́ɔ.

¹¹Ni mɔɔn ólu kɛ́ kɛ́ a nɛ́ɛnnan, wáman kɛ́ kɛ́ a tɔ́lɔla, wáman kɛ táa fwɔnɲan yóo mbɛ́ súu la lé a lá kɛ kun ngɛ́ a yɛ́ lánanya ó lé né la, álee yeemanfanin ɲé.

¹²Áa í ɲáanli, kɛ a nisɔdhyaa gbúnigbukɛ, kɛ mansɔɔ bhaayeba é a yɛ́ sá ŋó lɔ. Sɔ́, ii céla ólu tɔ́lɔ céne íkwɔ.»

Saanan mín ŋé kɔɔ óni kɛ́ɛnɲan ó ka

¹³Ɛnza ŋé fɔ íkwɔ kó: «Ále lée lúu kɔɔ o lé dínɲan la. Wáa ni kɔɔ ó tá dhyáalaa ó kɛ́ bhɔ́ a lá, a káa mínnɛɛn lé ɲán bhée? Ké tɔɔn gbɛ́ɛ le tɛ́ a lá bhée ŋwé, o ɲán o mán, fɔ́ kɛ a lafii kɛ́ɛnman lé tó mɔɔn ólu í sé gbáan gbáan a ka.

¹⁴Ále léelu é kɛ́ɛnɲan lé dínɲan mɔ́ɔndhye ŋólu yɛ. Só mín nziinin ngɛ́ kɛ́ tii o ka, o só ó tɛ́ sé lóonan; ¹⁵Oo lɔ mínngɛ, mɔɔn tɛ́ tá bhyáala laman ŋo la tó kɛ pála ŋó mbíin a kunnan. Wáa mɔɔn é a siila lamannziife ne ka ké aa kɛ́ɛnɲan lábhɔ bhóngɔɔnnɔnbhaa olu bɛ́ yɛ. ¹⁶A yɛ́ kɛ́ɛnɲan ó kákan kɛ máan njé ne mɔɔndhye ŋólu ɲánla ké ii a kɛ́ko bhɛ́ɛ ólu yé, tó a Fá mín ŋé sá ŋó lɔ, ii o bwóɲan.»

Lakawanin mín ŋé tɔ́ ŋolu ka

¹⁷«A kɛ́nan kɛ́ a kɔ́ɔnnɔn kó ní nan Musa yɛ́ sɛliya óni céla ólu yɛ́ kóman o lafadi tɔ́ɔ le lɔ. Mán nan o lafadi tɔ́ɔ lɔ, waa ní nán o kó ŋólu láfa tɔ́ɔ le lɔ. ¹⁸Tó ní fɔ a yɛ́ tinɲan in ne ngó: Sannin sángboo óni lúukolo ó a tínmin, sɛ́wɛdhye nvítiinin wáman dhyaa nvítiinin nzí táa bhɔ́ tɔ́ ŋólu lɔ́kan ŋólu la. Fɔ tɔ́ ŋólu lɔ́kan ŋó a kɛ́ lé.5.18 Fɔ́ tɔ́ ŋolu lɔ́kan ŋó a kɛ́ lé: O ywáa ó fɔ́nin ŋé Ala saaninkan nɔyɛɛmanbhaa lɔ́lu kwɔ́ lé kó sánnin dínɲan a fáa.¹⁹O le kósɔn ni mɔɔn mínngɛ sɛliya o bɛ́ lɔ fítiinin ŋó kée njáan, óni kɛ́ mɔɔn olu kála o kée ngɛla, o tíi ó yáa kíi ko bɛ́ lɔ fítiinin ŋo sángboo ó Mansaya o lɔ. Wáa mɔɔn mín ngɛ sɛ́liya o látaaman óni kɛ mɔɔn olu kála o kɛ́la, o tíi o yáa kíi ko mɔɔn bá sángboo ó Mansaya o lɔ. ²⁰Tó ní fɔ a yɛ́ ngo: Ni a yɛ́ téleɲan ó mán tínmin sɛliya kaamɔɔn ólu ní Falizɛn ŋolu tá o ka, a táa Ala yɛ́ Mansaya ó hɛ́lɛ o sɔ́ɔ.»

Lakawanin mín ŋé mwɛ́nnɛnli o ka

²¹«A wɛ́ɛ myɛ́n kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋo tá fa nvɛ́ kó: Í kɛ́nan mɔɔn ní ó bhɔ́, mɔɔn óo mɔɔn kɛ́ a mɔɔnɲɔɔn ó ní ó bhɔ́, kíti kákan kɛ tɛɛ o tíi o ka. ²²Wáa née fɔ́la a yɛ ngó: Mɔɔn óo mɔɔn kɛ mwɛ́nnɛn a mɔɔnɲɔɔn ó mán, kíti kákan kɛ tɛɛ o tíi ó ka, mɔɔn mín ngɛ fɔ a mɔɔnɲɔɔn ó mán kó ‹kúnda!› Kíti kákan kɛ tɛɛ o tíi ó ka kítitɛɛbhaa ólu bhóo, mɔɔn mínngɛ fɔ a mɔɔnɲɔɔn o mán kó ‹san!› O tíi ó kákan né kɛ táa yaananman tá ó lɔ. ²³O ɲán o mán, ni í kɛ́ fáa kóɲwaan kɛ́ Ala yɛ́ faanlɛɛbhɔlaa ó ka, ni a kɛ bhyáa í hákiila óo í wɛ́ɛ í sɔ́ ngɛ́ í mɔɔnɲɔɔn lɔ́la, ²⁴í kwɔ́kɛ í yɛ́ kóɲwaanfe ŋo lá faanlɛɛbhɔlaa ó lɔ́ yénɔn kɛ táa íle ní í mɔɔnɲɔɔn o cɛ o lɔ́bhyɛ ŋótun, tó kɛ tó í kwɔ́sɛɛla kɛ́nan í yɛ́ kóɲwaan ó kɛ́ Ala yɛ.

²⁵Ni íle ní mɔɔn lɔ́ kɛ́ kɛ́ táala ɲɔɔn ne kititɛɛlaalɔ, i ɲángban kɛ íle ní o tíi ó cɛ o lɔ́bhyɛ ké áa sháa o lá bhée. O ɲán o mán, í kɛ́ɛkɛɲɔɔn ó táa táa í ló kítitɛɛbhaa o bhóo, kítitɛɛbhaa o táa í lábhyaa kasobho ŋo kunnansiibhaa ó bhóo, tó óo táa í bhyáa kasola. ²⁶Tó ní fɔ í yɛ́ tinɲan in ne, ni í mán o yúu ó saa féfe, í táa bhɔ́ o kaso o la.»

Lakawanin mín ŋé káanngɛ ó ka

²⁷«A wɛ́ɛ myɛ́n kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋo lɔ́ kó: Í kɛ́nan ɲɔnmɔɔnya kɛ.²⁸Wáa né kó a yɛ́ ngó mɔɔn óo mɔɔn kɛ́ í ɲán bhɔ́ a mɔɔnɲɔɔn o muso fɛ́, o tíi ó wɛ́ɛ wɛɛ ɲɔnmɔɔnya lé kɛ́la a yóso ó lɔ́ wé. ²⁹Í bhóobhɛɛkɔɔ ɲán ó, ni o kɛ kɛ sɔ́ɔbu lé kɛ́ í ló yúumukɛ ó lɔ, a bhɔ́ í la kɛ a lafii. Í bɔɔn ó í fásimanlaa ó ywáa kéembe lɔ, o a físaa í mán í ywáa bɛ́ lafii ó lé yaananman o lɔ. ³⁰Ni í bhóobhɛɛ ó lée í lónan yúumukɛ ó lɔ, a tɛɛ í lá kɛ a lafii: Í bɔɔn ó í fásimanlaa ó ywáa kéembe lɔ, o a físaa í mán í ywáa bɛ́ lafii ó lé yaananman o lɔ.»

Lakawanin mín ŋé fúusa ó ka

³¹«A wɛ́ɛ myɛ́n kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋó lɔ kó: Mɔɔn óo mɔɔn kɛ́ í bá a muso lɔ, o tíi o kákan né kɛ fúusasɛwɛ le ló a muso bhóo.³²Tó ni a fɔ a yɛ́ ngó: Cɛ óo cɛ kɛ́ í bá a muso lɔ kéni o muso ó mán ɲɔnmɔɔnya kɛ, ni o kɛ́ sii cɛ kwáa la, ké a wɛɛ ɲɔnmɔɔnya lé kɛ́ wé, o ɲán kée ŋó mán a cɛ kɔɔ ó lée a yɛ ɲɔnmɔɔnya kɛ ó sɔ́ɔbu lé wé. Muso mín no ɲɛ́n fúu sáni ŋé a cɛ kwɔ, cɛ mín ngɛ o muso ó tá, ké o tíi ó wɛ́ɛ ɲɔnmɔɔnya lé kɛ́ íkwɔ wé.»

Lakawanin mín ŋé shɛ́nnin o ka

³³«A wɛ́ɛ myɛ́n kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋo tá fa nvɛ́ kó: Í kɛ́nan bhɔ́ í yɛ́ shɛ́nninkan ŋo ka, wáa í kɛ́ í shɛ́n kan mínnan Mantii o koowaan la, o kan ŋó bhɔ́ a sháa man. ³⁴Wáa née fɔ́la a yɛ́ ngó a kɛ́nan shɛ́n mantɛɛ fɛ́sɛ fɛ́sɛ, a kɛ́nan shɛ́n mantɛɛ sángboo o la, kɛ mansɔɔ Ala nɔ́nmɔnnaa ó lée wé, ³⁵a ló ngɛ́nan shɛ́n mantɛɛ lúukolo ó la, kɛ mansɔɔ Ala tónan ólu kɔ́ɔtalaa ó lée wé, a kɛ́nan shɛ́n mantɛɛ Yeluzalɛmu la, kɛ mansɔɔ mansaba Ala tá lée wé. ³⁶A yɛ́ɛ ló ngɛ́nan shɛ́n mantɛɛ a kúnngɔɔ ŋo la, kɛ mansɔɔ a tɛ́ sé kɛ a kúnzhe o kɛ́ɛ kée nangbɛ wáman kɛ a lafin. ³⁷Mɔɔn mín ngɛ fɔ kó ɔɔn, o a kɛ ɔɔn ne, ni a lo ngɛ́ fɔ kó ɔn-ɔn, o a kɛ́ ɔn-ɔn ne. Kóman tɔ́ mín núu fálala olu ka, o bɛ́ é sɔtaannan bhyáafo ne le.»

Lakawanin mín ŋé kóɲɔɔnbhɔ ó ka

³⁸«A ló ŋwɛ́ɛn myɛ́n íkwɔ kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋo lɔ kó: Nvɔn ɲɔ́ɔn lée nvɔn le! Ɲán lée ɲán o yúu saala, ɲín ŋo lée ɲin ŋó yúu saala.³⁹Wáa née fɔ́la a yɛ́ ngó mɔɔn mín ngɛ kóyoongɛ a lá, a kɛ́nan a tá ɲɔɔn bhɔ́. Ni mɔɔn lɔ́ kɛ́ í tóoce í bhóobhɛɛ tóo o kɔɔ, í bhóonwaan ndoo o síi a yɛ íkwɔ. ⁴⁰Ni mɔɔn lɔ́ kɛ́ i kíi kítitɛɛlaa lɔ ké aa í yɛ deeke o myáan í lá, í yɛ́ deekeba ó yɛ́ɛ lo a bhóo. ⁴¹Ni mɔɔn lɔ kɛ́ fáan lá í ka kó íi í séngwɔko wáa kée ngɛ́ ni a yɛ lwée ŋó le, í séngwɔko wáa fyáa kɛ́ a yɛ. ⁴²Ní mɔɔn lɔ kɛ́ fé nɔ́n kófɔ i yɛ́, ii a di mán, ni í bhóofe o sháannɔɔ kɛ́ kɛ́ mɔɔn lɔ́la, í kɛ́nan í bá a tíi yɛ.»

Á yúumɔɔn olu a dhyáa a yɛ

⁴³«A ló ŋwɛ́ɛn myɛ́n íkwɔ kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋo lɔ kó: Í ɲíin o a dhyáa í yɛ́, í yúu o a gbéya í yɛ́.⁴⁴Wáa née fɔ́la a yɛ́ ngó a yúu ólu kó á dhyáa á yɛ́, áa Ala dɛ́li a tɔ́lɔbhaa olu yɛ. ⁴⁵A Fá mín ŋé sá ŋó lɔ, a káa kɛ́ o dhyénjɛ lú lé o ɲán o lé mán, kɛ mansɔɔ aa a yɛ tee ó lábhɔla mɔɔn yóo ŋóni mɔɔnbhɛɛ olu bɛ́ le yɛ, aa sá ŋo lánanla téemaa óni téemɛɛ ólu bɛ́ le ka. ⁴⁶Á kó a dí mínnu yɛ́, ní ó kée ŋolu kɛ dhyáa á yɛ́, áa tɔɔn mínnɛɛn lé sɔ́ɔla o la? Nísɔɔnmyaanbhaa olu tɛ́ o kɛ́la a? ⁴⁷Ni a kɛ́ kɛ́ a yɛ́ɛlamɔɔn kée ŋó léelu fola, áa kó kɛ́ gbɛ́yanin né kɛ́la o lé wé ŋan? Háanin káafii olu o súu o kɛla! ⁴⁸Oo lɔ mínngɛ a yɛ́ kó o bɛ́ télenin ŋan kɛ́ o yóo a Fá mín ŋé sángboo ó lɔ, o yɛ́ kó ólu télenin ŋé tɛ́nmɛn.»

Yáa o kákan kɛ bhɔ́ ɲán mín man

¹«Áa a yɛ́ɛ myaan! A kɛ́nan á yɛ́ Ala sháa o téenin ŋó kɛ́ tɔ́ɔɲiinnze né yaman o ɲánla. Ní o tɛ, a Fá mín ŋé sá ŋó lɔ, á táa tɔɔn sɔ́ɔ o la. ²Í kɛ́ kɛ́ yáa o bhɔ́la faannda ŋólu la, í kɛ́nan kɛ ké mɔɔn olu ɲán o a lá í ká, óyoo fyáangafo ólu o kɛla tɛ́nmɛn sɛ́ɛbho ŋólu ní yamanywaa olu lɔ. Ii o kɛ́la lé ké mɔɔn ólu a i tando. Tó ní fɔ a yɛ́ tinɲan in ne ngó í wɛɛ wɛɛ í ta tɔɔn ó sɔ́ɔla. ³Wáa ni í kɛ́ kɛ́ yáa ó bhɔ́la faannda ŋo lá í bhóobhɛɛ ó la, í bhóonwaan ŋo mánngan kɛ kósɔɔ o lɔ. ⁴O ɲán o mán, í yɛ́ yáa ó óo tó loo nɔn, tó Ala mín ŋé í Fá le, o mín ŋé í yɛ́ fé nóonaankɛnin ŋó yéla, o yáa i sála.»

Mɔɔn kákan kɛ í sɛ́ɛ ɲán mín man

Luka 11.2-4

⁵«Ni í kɛ́ kɛ́ í sɛ́ɛla, a kɛ́nan kɛ óo fyáangafo ólu: Olu kɛ́ kɛ́ í lɔ́la sɔ́ kɛ í sɛ́ɛ, yɛ́ɛ yáa o lé a dí i yɛ sɛ́ɛbho ŋólu ní sókɔɔnnɔn sháafaa né a ólu ka. Tó ní fɔ a yɛ́ tinɲan in ne ngó í wɛɛ wɛɛ í ta tɔɔn ó sɔ́ɔla. ⁶Wáa ni íle kɛ́ fáa í sɛ́ɛ, lo í fɛ́ta kɛ lá ó látuun í yɛ́ɛman kɛ í Fá Ala dɛ́li. O ɲán o mán, mɔɔn ɲán tɛ́ í Fá Ala mín ɲela wé, o mín ŋé kó lóonaankɛnin ŋólu bɛ́ yéla, o yáa í sála.

⁷Ni a kɛ́ kɛ́ í sɛ́ɛla, a kɛ́nan táa kóman kée ŋolu lɔ́kuukuu lé ɲɔ́ɔnnga óyoo káafii olu kɛla tɛ́nmɛnne, aa kɛla olu kɔ́ɔnnɔn kó ni i kɛ́ kóman shɛ́ɛman nvɔ, kó i yɛ sɛ́ɛ o káa myaan o ɲán o lé mán. ⁸A kɛ́nan kɛ́ óyoo i léelu, kɛ mansɔɔ Ala mín ŋé a Fá le, á mánko é kó óo kó la, o a o bɛ́ lɔ ké álee mán a dɛ́li bhá ɲɛ́ɛ. ⁹A kákan kɛ í sɛ́ɛ tɛ́nmɛn, o lée nin:

Án Nvá mín ŋé sá ŋó lɔ,

Í tɔ́ɔ ó a sɛ́nnɛnya,

¹⁰Í yɛ́ Mansaya o wáa nan.

Í dhyáaɲɛnngo ó a kɛ́ lúukolo ó ka

óyoo aa tɛ́nmɛnne sá ŋó lɔ.

¹¹Bí bhálo ó dí án man.

¹²Án yúumu ólu mánkoto,

óyoo mín núu yuumu kɛ́la án nan,

án ni olu mánkotola tɛ́nmɛn.

¹³Í kɛ́nan án ɲóso o lɔ lɔ́swaannin kɛ sháayoo ŋó la,

án ngísi Sɔtaannan o mán;

[kɛ mansɔɔ, mansaya ó, sébhaaya ó, óni kunnanwee ŋo ó bɛ́ bɛ́ é íle lé tá lé wáati o bɛ́ lɔ. Amiinan!]

¹⁴Aa céne, ni a kɛ́ yafa a mɔɔnɲɔɔn ólu mán, tó a Fá mín ŋé sángboo ó lɔ, oo yafa álee mán. ¹⁵Wáa ni a mán yafa a mɔɔnɲɔɔn ólu mán, a Fá táa yafa álee lu mán.»

Sún ŋo kákan kɛ ló ɲán mín man

¹⁶«A kɛ́ kɛ́ sún nɔn, a kɛ́nan a ɲán lɔkuun óyoo fyáangafo ólu kɛla tɛ́nmɛnne, olu i yɛ́ɛ lábhyaala lé ké bɛ́ a lɔ ŋóo ii sún nɔn. Tó ní fɔ a yɛ́ tinɲan in ne ngó, ilee wɛ́ɛ wɛɛ i ta tɔɔn ó sɔ́ɔla. ¹⁷Wáa ni íle kɛ́ kɛ́ sún nɔn, í ɲán o kwó kɛ túu swáandhyaanin ngɛ́ í kúnnɔn, ¹⁸ké mɔɔn ólu kɛ́nan lɔ óyoo íi sún nɔn, fɔ́ mɔɔn ɲán tɛ́ í Fá Ala mín ɲela wé, tó í Fá Ala mín ŋé kó lóonaankɛnin ŋólu yéla, o yáa í sála.»

Ala bháa, bháa wɛ́ɛ o: í tá ta

Luka 12.33-36

¹⁹«A kɛ́nan nanfoo ládhyɛ dínɲan míin nɔn, kɛ mansɔɔ bháabhaa óni sóo ŋó o cáannan lúukolo ó ka, so ŋólu lónan bhó nú la kɛ soɲan kɛ. ²⁰Áa nanfoo ládhyɛ sángboo o lé lɔ, bháabhaa ni tunmuun ndɛ́ yénɔn kɛ cáanni kɛ, so ndɛ́ yénɔn kɛ lá o kɛɛ tó kɛ soɲan kɛ. ²¹Kɛ mansɔɔ í yɛ́ nanfoo ó kɛ́ kɛ́ ywáa mínnɔn, í yóso óo kɛ́la yénɔn lé. ²²Mɔɔn ɲándhye ŋó lée lúu mɔɔn fási ó laman ŋo le: Ni mɔɔn ɲándhye ŋólu bhɛ́ɛbhɛɛ kɛ́ kɛ́, mɔɔn ywáa bɛ́ é kɛ́ kɛ́ɛngbɛ lɔ, ²³wáa ni fyɛ́n kɛ kɛ́ mɔɔn ɲándhye ŋólu la, mɔɔn fási o bɛ́ é kɛ́la diwi le lɔ. O ɲán o mán, fé mín ngákan kɛ kɛ́ɛnɲan bhyáa mɔɔn ka, ni o kɛ́ kɛ́ diwi lɔ, diwiko o lá ŋó lée wé nɛ!

²⁴Mɔɔn súusuu tɛ́ sé kɛ́la kunndii fyáa yɛ́ yɔ né kéene: Kée ŋó yáa gbéya a yɛ, tó a tɔ kée ŋó o dhyáa a yɛ, wáman a yáa í gbɛ́nnɛn kée ŋó mán kɛ í mánbhɔ a tɔ kée ŋó la. Ala ko o tɛ́ sé dhyáala a yɛ́ ké wɛ́ɛ kó o a dhyáa a yɛ́ o ɲán kée ŋó mán íkwɔ.»

Fɔ́ kɛ lá Ala la

Luka 12.22-31

²⁵O lé kósɔn ní fɔ́la a yɛ́ ngó: A mánko é lɔ́minfe ni mínninfe mínnu la kɛ sé dínɲanlɔtɛɛ kɛ́la, wáman a káa faani mínnu bhyáa a kannan, a kɛ́nan hánmin ŋolu la. Mɔɔn ní o kúu mán ngbɛ́ɛ kɛ tínmin lɔ́min o ka ŋan, tó mɔɔn fási ó kúu mán ngbɛ́ɛ fáanin olu le a, bháa díi? ²⁶Kɔ́ɔn mínnuu sáman, áa í míli olu mán: I tɛ sɛɛn kɛ́la, i lo ndɛ́ sɛɛnmanfe ngɛ́ɛnan, i yɛ́ɛ ló ndɛ́ sɛɛnmanfe ndála kɛ a bhyáalaa bhɔ́ mɔɔnnin nɔn, wáa a Fá mín ŋé sángboo ó lɔ, oo i bhálola! Tɔɔn tɛ́ álee la kɛ tínmin kɔ́ɔn ólu ka ŋan? ²⁷A kée ngéenan ó mínnɛɛn lé wɛ́ɛ tó hánminan háanin kɛ hánmin ŋo a lɔ bhyáa a yɛ dínɲanlɔtɛɛ ó lɔ́bhɛɛya ó ka.

²⁸«Mínnɛɛn le kósɔn áa faaniko o hánmin nzíila a lá? Áa í míliya lá bínnvee olu mán: I tɛ bháalakɛla, i lo ndɛ́ fáanin lálaanan. ²⁹Waa tó ní fɔ a yɛ́ ngó háanin mansacɛ Swɛmannan ní a yɛ nanfoobatiiya ó lɔ, a man fáanin sɔɔ nín mín njɛ́ɛ ndɛ́ɛ bínnvee o lɔ́ le. ³⁰Bínnvee mín ŋé bín nɔn, o cáaɲiin Ala kwɔ, kéni síin, o bínnvee o yáa kɛ́ tá lɔ: Tó Ala táa ále léelu fɛ́ɛya bhɔ́ a? A yɛ́ lánanya ó ŋa lɔ́ɔ! ³¹A kɛ́nan hánmin kɛ táa fɔ le kó: ‹Án ngáa mínnɛɛn lé lɔɔ, án ngáa mínnɛɛn lé mín, án ngáa mínnɛɛn lé bhyáa án ngánnan?› ³²Síya gbɛ́ɛ o léelu kála o fé ŋólu ɲíinnan kúdɛyi. Wáa a Fá mín ŋé sángboo ó lɔ, a mánko é o fé mín nan o a ŋólu lɔ. ³³Oo lɔ mínngɛ, áa í lɔ́ja kɛ í mányii Ala yɛ́ Mansayafaan ó lé kɔ́ɔ ótun, a ló ŋan sháa téenin ŋó lé ɲíin ŋótun, o kɛ́ kɛ́ Ala é fé ndɔ́ ólu bɛ́ di a mán. ³⁴O ɲán o mán, a kɛ́nan hánmin síin ŋó la: Síin ŋó yáa hánmin ale gbú la. Bí ta sɛɛ ó lá née bí le.»

Mɔɔn mánngan kɛ ɲɔ́ɔn ngítitɛɛ

Luka 6.37-38,41-42

¹«A kɛ́nan kiti tɛ́ɛ lɔ ka, kó óo kó é kɛ ke Ala kɛ́nan kíti tɛ́ɛ a ka. ²Kɛ mansɔɔ a kɛ́ mɔɔn tɔ́ ólu ta kíti o tɛ́ɛ tɛ́nmɛnne, Ala káa álee ta kíti o tɛ́ɛ céne. Aa dɔ ólu tá ó swáan swáannikɛfe mín nɔ, Ala káa a tá ó swáan o lé lɔ́. ³Tíkoo mín ŋé í bhádhye ŋó ɲán o mán, mínnɛɛn lé kósɔn ii ó mánfɛɛla, lɔ́ɔguun mín ŋé í tá ó mán, i tɛ́ ó yéla a? ⁴I lo ŋé sé kɛ́ fɔ i bhádhye ŋó yɛ́ díi kó: ‹Í lɔ́ tíkoo é í ɲán mán, i lɔ́ ké ní a bhɔ́›, kɛ́ɛ ké lɔɔguun ŋé íle tá ɲán o mán? ⁵Fyáangafo ó, lɔɔguun mín ŋé í tá ɲán ó mán, o bhɔ́ ótun. O lɔ, i yáa yéli kɛ́ cɛ́ɛne, kɛ́ tíkoo ó bhɔ́ i bhádhye ŋó ɲán o mán.

⁶A kɛ́nan fé nzɛ́nnɛnyanin ŋó bhyáa wúu ólu kɔɔ, ní o tɛ i yáa í ɲán yɛ́ɛman a mán kɛ a lɔ́falanvala. A kɛ́nan a yɛ́ kɔ́ɔnngoo ólu bhyáa gbóyoonin nú kɔɔ, ní o tɛ i yáa táaman kɛ́ a ka.»

Dɛ́liliko o

Luka 11.9-13

⁷«Á kɛ́ fé ŋóo fé ndɛ́li Ala fɛ́, á yáa o sɔ́ɔ, a kɛ́ fé ŋóo fé ɲíin a fɛ́, a yáa o yé, a kɛ́ í ka nányɛɛ Ala man kó óo kó la, Ala yáa o kó ó dhyáa ló a lɔ́. ⁸Áa céne, mɔɔn óo mɔɔn kɛ́ dɛ́lili kɛ, o yáa sɔɔ, mɔɔn mín ngɛ ɲíinnin kɛ, o yáa yéli kɛ, mɔɔn mín ngɛ lá ó mangbasi, i yáa lá ó láka o tíi ó yɛ. ⁹Álee mínnɛɛn le dhyénjɛ wɛ́ɛ búlu kófɔ a yɛ́ tó áa káwa di a man, ¹⁰Wáman kɛ san di a man kɛ́ɛke dhyé ŋóo yɔ́ɔ lé kófɔ? ¹¹Áa yóo né wé kpán, wáa áa sháa fémɛɛ lú díla a dhyé ŋolu mán! Tó a Fá mín ŋé sá ŋó lɔ, o yáa sé í bánan kɛ́ fémɛɛ lú díla a mán, ni a kɛ́ a dɛ́li a?

¹²Álee fɛ́ ké mɔɔn tɔ ólu a kó mínnu kɛ́ a yɛ́, ále a o kɛ́ ilee lu yɛ: Musa ní céla tɔ́ ólu kó mínnu sɛ́wɛ kitabu o lɔ, olu lɔ́kan ŋó lée wé.»

Ɛliyanan o sɔ́ɔ a gbɛ́ɛ

Luka 13.24

¹³«Lá mín ŋan lɔ́ɔ, áa lo ŋo lé fɛ́, kɛ mansɔɔ lá mín ŋé mɔɔn lásela yaananman lɔ, o lá ó a bwó, a sháa o ló ndáaman fwáayanin ɲe. Tó mɔɔn mín núu o sháa o tála, o léelu a sháa. ¹⁴Wáa ɲáanmanɲan óo sɔɔla ywáa mínnɔn, o lá ó lé a lɔ́ɔ, o sháa o lé táamankɛ a gbɛ́ɛ. Tó mɔɔn mín núu o sɔ́ɔla, olu mán nzháa.»

Céla kóo ŋolu

Luka 6.43-44

¹⁵«Áa í yɛ́ɛ myaan céla kóo ŋolu man. Ii nánla a saala lé óyoo Saadhye nú, waa ké kóngowuu lée lúu wé. ¹⁶Á yáa lɔ i dhyé ŋó lée lúman. Mɔɔn é sháa lɛ́zɛnnye mɔ́la ŋwɛ́ɛnnzu ó lá díi, wáman kɛ tólodhye mɔ́ lɛ́ɛninɲii ó lá? ¹⁷Yíibhɛɛ óo dhyé mɛ́ɛbhɛɛ lé kɛ́la, tó yíi yóo ŋóo dhyé ɲóo née lú kɛ́la. ¹⁸Yíibhɛɛ o súu óo súu tɛ́ sé dhyéɲoo ngɛ́la, yíiyoo nzúu óo súu tɛ́ sé dhyémɛɛ kɛ́la. ¹⁹Yíi súu óo súu man kɛ́ dhyé mɛ́ɛ kɛ́la, fɔ́ kɛ o tɛ́ɛ lé kɛ a lafii tá lɔ. ²⁰O ɲán o mán, á yáa lɔ i dhyé ŋólu mán.»

Kaamɔɔndhye mín ŋé Ala dhyáaɲɛnngo ó kɛ́la óni mín ndɛ́ kɛla

Luka 13.25-27

²¹«Mɔɔn mín mbɛ́ɛ fɔ́la mán kó: Mantii ó, Mantii ó, o bɛ́ táa Ala yɛ́ Mansaya ó hɛ́lɛ o sɔ́ɔ dhyaalagbeyala la lɛ! Nvá mín ŋé sá ŋó lɔ, mɔɔn mín núu o dhyáaɲɛnngo ó kɛ́la, o léelu káa Ala yɛ́ Mansaya ó hɛ́lɛ o sɔ́ɔ.» ²²Ala yɛ kítitɛɛlo ŋo kɛ́ sé, mɔɔn shɛ́ɛman ɲáan fɔ ɲɛ́n kó: Mantii ó, Mantii ó, án ni célayakoman lu láse íle lé tɔ́ɔla, án ni lámansa yóo nú gbɛ́ íle lé tɔ́ɔla, án ni káwananngo shɛ́ɛman ngɛ́ íle lé tɔ́ɔla, bháa díi? ²³Ɲáan a láse o mɔɔn ólu mán ngó: «Mán a lɔ́ tún; Áa í cɛ́bhɔ nán, ále kóyoongɛbhaa olu.»

Bhó nvyaa olu

Luka 6.47-49

²⁴«Oo lɔ mínngɛ, ŋwɛ́ɛn kóman mínnu fɔ́ nín, mɔɔn ó mɔɔn kɛ́ ó kóman ó lɔ́myɛn kɛ́ a bháto, o tíi ó yáa kɛ́ óyoo mɔɔn hákiiman mín ŋwɛ́ɛn a yɛ bhó ŋo lɔ́ fáa ó ka. ²⁵Sá ŋóo bé, kwɔ ólu fá fɔ́ kɛ waawaa, fwɛ́ɛnba é bhyáa o bhó ŋó ka. Wáa a man bé, kɛ mansɔɔ bhónzu ó gbáannin ndɛ́ɛ fáa o le ka. ²⁶Wáa ní wɛɛla dhyaa mínnu fɔ́la nín, ni mɔɔn mínnu kɛ́ olu myɛ́n kɛ í bá i lataaman ó mán, o tíi ó káa kɛ́ lé wé ŋóo mɔɔn Hákiinda mín wɛɛ bhó nɔ́ cɛnfuywaa lɔ. ²⁷Sá ŋóo bé, kwɔ ólu waawaa, fwɛ́ɛnba é bhyáa o bhó ŋó ka tó óo bé kɛ wéyaa féfe.»

Ɛnza ɲɛn sébhaaya ó

²⁸Ɛnza é wɛɛ a yɛ kóman olu la wáati mín nɔn, a yɛ kaangbɛseɲan o tɛ wɛɛ yaman o kɔ́ɔnnɔn bha. ²⁹Kɛ mansɔɔ a tɛ́ɛ lakawanin kɛla óo fáan é mɔɔn mín móo, wáa a tɛ tɛ́ a kɛ́la óyoo í yɛ́ sɛliya kaamɔɔn olu.

Ɛnza ŋé kwáantɔ lɔ́ lákɛɛnyala

Maki 1.40-45; Luka 5.12-16

¹Ɛnza ŋé í yíi kɛ bhɔ́ tii ó mán, tó yaman bá é bhyáa a fo nan. ²Cɛ kwáantɔ lɔ́ é í mángbaa kɛ í kúnmɛɛn ngbáan lúu lɔ́ a kɛɛnnan tó kɛ fɔ kó: «Mantii ó, ni i kɛ́ sɔ́n, ii sé kɛ́ né kɛ́ɛnya.» ³Ɛnza ŋé í bhóo láwii kɛ í bhóo túu a lá tó kɛ fɔ kó: «Ŋwɛ́ɛn sɔ́n, kɛ́ɛnya!» Íkɔlɔ téeman, cɛ óo kɛ́ɛnya, a yɛ kwáan óo bhɔ́ a man. ⁴Tó Ɛnza ŋé fɔ a yɛ kó: «Í tóomanlɔ: í kɛ́nan fɔ mɔɔn sí yɛ́ kó né lée í lákɛɛnya lɛ. Waa táa i yɛ́ɛ yáa faanlɛɛɲansebhaa ó lá. Musa é fáanlɛɛ mín ngófɔ sɛ́nnɛnyali ó ta fa ŋo fɛ́, ii ó bhɔ́ kɛ́ a yáa mɔɔn ólu lá kó i wɛ́ɛ kɛ́ɛnya.»

Ɛnza ŋwɛ́ɛn swaasikunndii lɔ́ yɛ́ bháalakɛdhye nakɛɛnya

Luka 7.1-10; Yaya 4.43-54

⁵Ɛnza ndɛ́ɛ lónan Kapɛnamu só ó lá sán mínnɔn, Lɔmu swaasikunndii lɔ́ é í mángbaa Ɛnza nan kɛ a dɛ́li tá kó: ⁶«Mantii o, ɲɛ́n bháalakɛdhye ŋó sé ŋólu wɛ́ɛ fáa a man, a lanin ŋé lúman, tɔ́lɔya óo a ka kóyoongɛ.» ⁷Ɛnza ngó a yɛ kó: «ɲáan táa a lákɛɛnya.» ⁸Wáa swaasikunndii óo fɔ kó: «Kaamɔɔn, i kɛ́nan i yɛ́ɛ sɛɛ, kó i káa lo né yɛ́ bhó ŋó kɔɔnnɔn, né mánngan ni ó lé. Oo lɔ mínngɛ, kóman kée nvɔ dɔ́lɔun, ké o kóman ó a ɲɛ́n bháalakɛdhye ŋo lákɛɛnya.8.8 Swaasikunndii ó a lɔ ŋóo álee káafii le le; o bhóo ó mán, Yawudhyaa olu tá laanan o lɔ, Ɛnza ndɛ́ tɛ́ sé táala a fɛ́ta.⁹Kɛ mansɔɔ kunndii lɔ́luu né bhóo, né ló ŋé swaasi lɔ́lu kunnan. Ní sé kɛ́ a fɔ o kée ɲɛ́n kó: ‹Táa yánun›, aa táa. Kɛ́ fɔ a lɔ́gbɛɛ yɛ́ kó: ‹Nan yánun›, aa nan. Kɛ́ fɔ ɲɛ́n yɔ ŋó yɛ́ kó: ‹Miin ngɛ́ ta›, aa ó kɛ.» ¹⁰Ɛnza ŋé o dhyáa ŋólu myɛ́n mínngɛ, aa káwakoya, tó aa fɔ a fongamaa olu yɛ kó: «Tó ní fɔ a yɛ́ tinɲan la ngó, né mán mɔɔn yé Izalayɛli mɔɔn olu lɔ bhá mín nanin ŋé né la kɛ tínmin cɛ míin nga. ¹¹Aa céne, kíyamanwiilo ŋo kɛ́ bhɔ́ í lá, dínɲan ó fa mbɛ́ mɔɔn shɛ́ɛman ɲáan Ala yɛ́ Mansaya ó hɛ́lɛ o sɔ́ɔ, tó ilee ní Bulaaman ni Shaaka ní Yangubha lúu lɔ́min kɛ́ kéene ɛliyanan o lɔ. ¹²Wáa Ala yɛ́ Mansaya ó hɛ́lɛ o láanin ndɛ́ɛ mɔɔn mínnu yɛ, olu táa a sɔɔ, i yáa olu gbɛ́ kɛ i lábhɔ kɛ́ɛnman diwiba ó lɔ, tó ii kási kɛ́ yénɔn ké i dinmisaninmba8.12 Dinmisaninmba: O ywáa ó sɛ́wɛnin ŋé gɛlɛkikan nɔ́n tá ne kó ii í ɲín ŋó lákomankoman ɲɔ́ɔnman. ó yé.»

¹³Ɛnza ŋé wɛɛ kɛ fɔ swaasikunndii ó yɛ kó: «Í kwɔ́sɛɛ í fɛ́taa, íi kó mín dɛ́li lánanya bhóoman, o a kɛ́ o kó ó sɔ́ɔnin né í kwɔ́!» Swaasikunndii ó yɛ́ bháalakɛdhye ŋó kɛ́ɛnya o wáati kée ŋó lé lɔ.

Ɛnza ŋé yaangalotɔ shɛ́ɛman nákɛɛnyala

Maki 1.29-34; Luka 4.38-41

¹⁴Ɛnza ŋé táa Piyɛli bhóo lúman. Aa táa o bhyáamuso lánin nzɔ́ɔ, kɛ mansɔɔ a fási tɛ́wɛɛ gban. ¹⁵Ɛnza ŋé í bhóo túu muso ó bhóola, tó fásigban óo wɛɛ, muso óo í wíi kɛ́ gbáamyaan í lá.

¹⁶Ywáa óo sé mínngɛ, mɔɔn ólu nan lámansayoondɔ shɛ́ɛman ne Ɛnza ɲɛn. Aa lámansa yóo ŋólu gbɛ́ i fɛ́ a kómankan ŋo la, tó kɛ yaangalotɔ ó bɛ́ lákɛɛnya. ¹⁷Aa o kɛ́ lé kó óo kó é kɛ céla Ezayi é kóman mín nvɔ, o a í láfa. A fɔnin ndɛ́ɛ céla Ezayi kwɔ́ tá ne kó: Aa í kún nó án ɲɛn shaaya ólu kɔɔ óni kɛ án ɲɛn yangalo olu bhɔ́ án nga.

Mɔɔn kákan kɛ bhyáa Ɛnza ngwɔ́ tɛ́nmɛnne

Luka 9.57-62

¹⁸Ɛnza ŋé yamandhye ŋó yé a lamiin ŋo lɔ́ mínngɛ, aa fɔ a yɛ kaamɔɔndhye ŋolu yɛ kó ii táa bhá ó ɲán dɔ́ o mán. ¹⁹Sɛliya kaamɔɔn ó lɔ́ é í mangbaa kɛ fɔ a yɛ kó: «Mantii o, í kɛ́ táa ywáa óo ywáa lɔ, ɲáan kɛ́ í kwɔ́ka yénɔn.» ²⁰Ɛnza ŋé a yawi kó: «Jáan é kuunwoosa ólu bhóo kɛ si lɔ, bhó ŋé sámankɔɔn ólu bhóo. Wáa mɔɔn Dhyénjɛ ó silaa tɛ́ o bhóo.»

²¹A yɛ kaamɔɔndhye ŋo lɔ́ é fɔ a yɛ kó: «Mantii o, í lɔ́ ké ndáa nvá sú ló ŋótun.» ²²Ɛnza ŋé a yawi kó: «Bhyáa ngwɔ́ka, íi tó ké su ólu a i yɛ su ólu ló.»

Ɛnza ŋwɛ́ɛn fwɛ́ɛnba lɔ́ lálɔ

Maki 4.35-41; Luka 8.22-25

²³Ɛnza ŋé í bhyáa kúun nɔ lɔ tó a yɛ kaamɔɔndhye ŋolu í yɛ́ɛ a saala. ²⁴Íkɔlɔ téeman, fwɛ́ɛnba lɔ́ é wíi jí ó ka ndéeman, háanin fɔ́ kɛ kɛ́ óo jífwɛɛn o a Kúun ŋó láfa. Oo í lɔ́ ké Ɛnza ŋé sunnɔɔn lɔ́ Kúun ŋó lɔ. ²⁵A yɛ kaamɔɔndhye ŋolu í mangbaa a lá kɛ a lakuun ni fɔ le kó: «Mantii o, án ngála! Án ngáa fáa!» ²⁶Ɛnza ŋé i yawi kó: «Áa sháannan mínnɛɛn lé la? A ló ɲɛn lánanya ó a lɔ́ɔ kɛ́yi?» Aa í wíi téeman kɛ í táan fɔ́ fwɛ́ɛn óni jí ó yɛ. Oo kɛ́ mínngɛ fwɛ́ɛn óni jí óo í mányii lwɛ́hi. ²⁷Oo í bɛ́ káwakoya, fɔ́ ii fɔ́la kó: «Cɛ míin ŋé mɔɔn síya mínnɛɛn le kɛɛ, yáanin fwɛ́ɛn óni jí ó bɛ́ɛ a bwóɲanla!»

Ɛnza ŋé cɛ lámansayoondɔ fyáa lákɛɛnyala

Maki 5.1-20; Luka 8.26-39

²⁸Ɛnza ŋé lo mínngɛ bhá ó ɲán dɔ́ o mán, Gadalaka olu yɛ́ lánga ŋo lɔ, cɛ lámansayoondɔ fyáa é bhɔ́ kábulu ó lɔ kɛ́nan a kunmyɛ. I yɛ lámansa ólu fɛ́ɛya kóɲan o man, mɔɔn sí tɛ tɛ́ sɔnnan kɛ o sháa o ta. ²⁹Ale lámansayoondɔ fyáa óo gbáa ndéeman ni fɔ le kó: «Mínnɛɛn án njɛ́, Ala dhyénjɛ ó? Í nánnin ŋé yánun án ndɔ́lɔ tɔ́ɔ le lɔ a, kéni wáati mín ŋé sii, o mán sé bhá ŋan?»

³⁰Oo í lɔ́ ké gbóyoonin nzɛ́ɛ lɔ́lu tɛ́ɛ lɔ́minkɛla tii ó mán. O gbóyoonin ŋólu ywáa tɛ́ɛ já i la. ³¹Lámansa yóo ŋólu Ɛnza dɛ́li kó ni a kɛ i gbɛ́ kó aa i lalo o gbóyoonin ŋólu lɔ. ³²Ɛnza ngó i yɛ kó: «Áa táa.» Oo kɛ́ mínngɛ ii bhɔ́ cɛ fyáa ó lɔ kɛ táa gbóyoonin ŋólu lɔ, tó gbóyoonin nzɛ́ɛ ólu í cɛ kɛ́ yɛ́ɛ tíi ó ka kɛ́ táa í bé bháji ó lɔ kɛ́ túun. ³³Gbóyoonin ngunnansiibhaa olu bɛ́ɛ bwée, tó kɛ táa o kó o bɛ́ lɔsɔɔ só o kɔ́ɔnnɔn, óni lámansayoondɔ ólu tá kó óo tínmin ndɛ́nmɛn. ³⁴O fɔ́nin ŋó kwɔ, sómɔɔn ó bɛ́ɛ bhɔ́ kɛ Ɛnza ngunmyɛ. Ii a yé mínngɛ, ii a dɛ́li kó aa táa kɛ bhɔ́ i yɛ lúu ó ka.

Ɛnza ŋwɛ́ɛn cɛ sénvaaniman nɔ́ lákɛɛnya

Maki 2.1-12; Luka 5.17-26

¹Ɛnza ŋé í yɛ́ɛ Kúun ŋó lɔ kɛ í kwɔ́sɛɛ bhá ó ɲán dɔ́ o mán a fɛso Kapɛnamu. ²Mɔɔn lɔ́ lúu nan cɛ lɔ́ lé a saala, o cɛ ó sé ŋólu tɛ́wɛɛ fáa a man. O yaangalotɔ ó lánin ndɛ́ɛ gbasa o ka. Ɛnza ŋé a yé kó ó mɔɔn ólu wɛɛ lá ale la mínngɛ, aa fɔ kuugba ó yɛ kó: «Nyénjɛ i lɔ́ja, i yɛ́ yúumu ólu wɛ́ɛ yafa i mán!» ³O fɔ́nin ŋó kwɔ, sɛliya kaamɔɔn lɔ́ lúu fɔ í kɔ́ɔnnɔn téeman kó: «Cɛ míin wɛ́ɛ Ala tɔ́ɔ ó cáan!» ⁴Ɛnza ŋé bhɔ́ i kɔɔnnɔnkan ŋo ɲánle. Aa fɔ i yɛ kó: «Mínnɛɛn le kósɔn míliya yóo nzúu miin núu a kɔ́ɔnnɔn? ⁵A fɔ ó kó: ‹I yɛ́ yúumu ólu wɛ́ɛ yafa,› wáman kɛ́ fɔ a yɛ́ kó: ‹I wíi kɛ́ táamankɛ,› o kóman fyáa ó lɔ́, a mínnɛɛn lé fɔ a dí? ⁶Waa ní fɛ́ ké aa lɔ kó sé é mɔɔn Dhyénjɛ ó yɛ kɛ́ mɔɔn yɛ́ yúumu ó yafa kɛ́ tó dínɲan lɔ́.» O lɔ, aa fɔ kuugba ó yɛ́ o lɔ kó: «Ní fɔ́la i yɛ́, í wíi kɛ́ í yɛ́ gbasa ó tá kɛ́ táa lúman.» ⁷Cɛ óo í wíi kɛ táa a fɛ́taa. ⁸Yaman ó ɲán é lɔ o kó ó lɔ́ mínngɛ, i man é sháan gbúnigbukɛ. Ii Ala tando, kɛ a kún ngɛ́ o sé o súu o dí lé mɔɔndhye ŋólu mán.

Ɛnza ŋé Matiyu kíila

Maki 2.13-17; Luka 5.27-32

⁹Ɛnza ŋé bhɔ́ o ywáa ó lɔ kɛ táa. A tínminndɔ óo Matiyu tɔ́ɔ lɔ síininndɛ́ɛ nísɔɔnmyaanbhaa ólu yɛ́ bháalakɛlaa ó lɔ́. Aa fɔ o cɛ ó yɛ kó: «Bhyáa ngwɔ́!» Matiyu é i wíi kɛ í bhyáa a kwɔ.

¹⁰Kwɔ́ o la, Ɛnza ndɛ́ɛ lɔ́min kɛ́ Matiyu yɛ́ bhó ŋó lá, nísɔɔnmyaanbhaa shɛ́ɛman óni kóyoongɛbhaa shɛ́ɛman gbɛ́ɛ lúu nan í síi ni ale ní a yɛ kaamɔɔndhye ŋolu fɛ́. ¹¹Falizɛn ŋólu ɲán é lɔ o kó ó lɔ́ mínngɛ, ii fɔ Ɛnza ɲɛn kaamɔɔndhye ŋolu yɛ kó: «Mínnɛɛn le kósɔn a kaamɔɔncɛ ni nísɔɔnmyaanbhaa olu ní kóyoongɛbhaa olu lɔ́minkɛla kéene?» ¹²Ɛnza ŋé o dhyáa ŋó myɛ́n mínngɛ, aa fɔ kó: «Mɔɔn mínnu kɛ́ɛnyanin ɲé, ólu manko tɛ́ lɔɔtɔlɔ lá, yangalobhaatɔ o léelu manko é lɔɔtɔlɔ lá. ¹³Ala é fɔ a saaninkan ŋo lɔ kó ní hínnɛn le fɛ́, ndɛ́ faanlɛɛ fɛ́. Áa táa í míli o kóman ólu mán. Né mán nan mɔɔnteenin ŋólu kíila, waa née nan yuumutɔ o léelu kíila.»

Ɛnza ŋé dhyáa mín nvɔ sún ŋo tá fa nvɛ́

Maki 2.18-22; Luka 5.33-39

¹⁴Yaya yɛ́ kaamɔɔndhye ŋólu í mángbaa o lé lɔ́ Ɛnza nan kɛ a manɲaankɛ kó: «Mínnɛɛn le kósɔn án nee ní Falizɛn ŋólu sún nonan swáaswaa, ké ile ni í yɛ́ kaamɔɔndhye olu tɛ́ sún nonan?» ¹⁵Ɛnza ngó i yɛ kó: «Kwɛ́ɛnkwaa o cɛ ó tɛ́ɛcɛ olu tɛ́ sé í ɲán lasiila ké i lé ní kwɛ́ɛnkwaa o cɛ óo ywáa kée nɔn lɛ! Waa ló nɔ́ yáa sé, kwɛ́ɛnkwaa o cɛ ó yáa bwási i lá, i yáa súnno.

¹⁶Mɔɔn sí tɛ́ sé faani kɔɔ ó lábɛɛnan faaninguun ngwáa o la, kɛ mansɔɔ o faaninguun ngwáa ŋó yáa fáanin kɔɔ ó ywáa lɔ́ fála tó jáan ó tɔ́ é bwóɲan. ¹⁷O kwɔ, mɔɔn tɛ́ lɛ́zɛnnji kwáa kɛ́la bhwée kɔɔ ó kɔ́ɔnnɔn, ni ó kɛ́ kɛ, bhwée ó yáa cé tó lɛ́zɛnnji óo bwɔ́ lúuman, ké bɔɔn wɛ́ɛ kɛ́ bhwée ó lɔ́ lé wé. Wáa mɔɔn é lɛ́zɛnnji kwáa ó kɛ́la bhwée kwáa óle kɔ́ɔnnɔn, tó i bɛ́ lamalanin ŋé tó.»

Ɛnza ŋwɛ́ɛn káakwo yaangalotɔ lɔ́ lákɛɛnya óni kɛ síngbiinin nɔ lákuun

Maki 5.21-43; Luka 8.40-56

¹⁸Ɛnza ŋé tó kómanla i yɛ tó Yawudhyaa kunndii lɔ́ é í kunnanbhɔ. Aa í kúnmɛɛn nɔ́kɛɛ Ɛnza ngɔɔ kɛ fɔ kó: «Nyémuso wɛ́ɛ saya kɛ́ kwáa kwáa le nín, wáa dyɛn íi táa í bhóo lá a ka. O kɛ́ kɛ́ a yáa kúun.» ¹⁹Ɛnza ŋé í wíi tó ale ní a yɛ kaamɔɔndhye ŋolu bhyáa cɛ ó kwɔ. ²⁰O lɔ́ muso lɔ tɛɛ i cɛ́man, mín ŋán káakwo tɛ tɛ wɛɛla tó a wɛɛ kɛ a lá yangalo le Kanbiini sanɲin tá ni fyáa. O muso óo í mángbaa Ɛnza nán a kwɔ́man kɛ í bhóo túu o yɛ́ deeke o lágboo o lá. ²¹Kɛ mansɔɔ, a tɛɛ fɔ́la í kɔ́ɔnnɔn lé kó: «Ni ngɛ́ sé móo túula a yɛ deeke o lá, ɲáan kɛ́ɛnya.» ²²Ɛnza ŋé í kwɔ́ yɛ́ɛman, a ɲan é lá muso ó ka, tó aa fɔ a yɛ kó: «Í kɛ́nan sháan, nyémuso! Í lɔ́ja, i yɛ́ lánanya ó wɛ́ɛ í lákɛɛnya.» O wáati kée ŋó lɔ, muso óo kɛ́ɛnya.

²³Ɛnza no nin ngwɔ́ Yawudhyaa kunndii ó bhóo bhónan, aa yaman yé yénɔn: O lɔ́lu tɛ́ɛ fyóo fɔ́la, i lɔ gbɛ́ɛlu tɛ́ɛ saankasi kɛ. ²⁴Aa fɔ i yɛ kó: «Áa bhɔ́ kɛ́ɛnman, síngbiinin ŋo sayakɛnin ndɛ́, aa sunnɔɔn le lɔ.» Wáa ii yɛ́ɛbhɔ Ɛnza nɔn. ²⁵Yaman oo bhɔ́ kɛ́ɛnman wáati mínnɔn, Ɛnza ŋé lo sibho ŋo la kɛ síngbiinin ŋo tá a bhóo mán tó síngbiinin ŋoo í wíi. ²⁶O kó óo bhúubhɛɛ o só ó lánga ŋo ywáa bɛ́ lɔ.

Ɛnza ŋwɛ́ɛn fyóondɔ fyáa ɲánlaka

²⁷Ɛnza ŋé bhɔ́ o ywáa ó lɔ, a táatɔ óle, fyóondɔ fyáa é táa a kwɔ́ kɛ táa gbáa né kó: «Manɲwaan án nan, Laula Bhɔ́nzɔ o!»

²⁸Ɛnza ŋé lo bhó ŋó la, fyóondɔ ŋólu í mángbaa a lá tó aa i manɲaankɛ ko: «A lánin ŋé la óo née sé a ɲán o lakala a?» Ii a yawi kó: «Ɔɔn, Mantii o.» ²⁹Oo kɛ́ mínngɛ aa í bhóo túu i ɲán ólu la tó kɛ fɔ kó: «Kɛ́ kéeɲan ní á yɛ lánanya ó lé, a ɲán o a í láka!» ³⁰I ɲan o í láka. Ɛnza ŋé fɔ i yɛ kɛ a mangbɛya kó mɔɔn sí kɛ́nan lɔ ŋóo ale lée i ɲan olu laka. ³¹Wáa i bhɔ́nin ngwɔ́ kɛ́ɛnman, ii kóman mɔɔn olu yɛ́ cɛ́bɛ cɛ́bɛ lɔ Ɛnza ndá fán nvɛ́ o lánga ŋó lɔ.

Ɛnza ŋwɛ́ɛn bhóbhocɛ lɔ lákoman

³²I taatɔ óle, ii nan cɛ lɔ́ lé Ɛnza ɲɛn, Lámansa yóo né tɛ́wɛɛ o cɛ ó kɛ́ bhóbho le. ³³Ɛnza ŋé o lámansa yóo ŋó gbɛ́ ndɛ́nmɛn, bhóbhocɛ oo kóman. O kó óo bɛ́ kawakoya yaman o lɔ fɔ́ ii fɔ́la kó: «Káwananngo súu miin mán kɛ́ Izalayɛli kɔ́ɔ bhá!» ³⁴Wáa Falizɛn ŋolu tɛ́ɛ táa fɔ le kó: «Lámansa yóo ŋólu kunndii ó lé bhaaka lɔ, tó aa lámansa yóo ŋólu gbɛnan!»

Yaman o mánɲwaan wɛ́ɛ lo Ɛnza nɔn

³⁵Ɛnza ndɛ́ɛ sóba ólu ní só dhyénin ŋo bɛ́ lɔyaalala kɛ táa mɔɔn olu kála né sɛ́ɛbho ŋólu la, óni kɛ táa Ala yɛ́ mansaya ó sanmankanmɛɛ ó láse lé, o kwɔ, a tɛɛ yangalo bɛ́suu lákɛɛnyala. ³⁶Aa yaman o yé mínngɛ i mánɲwaan é lo a lɔ, kɛ mansɔɔ i mansɛɛnin né tɛɛ, óni kɛ i yée tɛ́ɛ óyoo kunnansiibhaa tɛ́ saa mínnu la. ³⁷Óo kɛ mínngɛ aa fɔ a yɛ kaamɔɔndhye ŋolu yɛ kó: «Sunman ndɛ́ɛ tá o waa sháa, waa bháalakɛbhaa ólu man nzháa. ³⁸Óo lɔ mínngɛ áa sɛɛntii ó dɛ́li ké aa bháalakɛbhaa ólu bhyáa kɛ́ táa a yɛ́ sunman ŋó tɛ́ɛ.»

Ɛnza ŋé a yɛ kaamɔɔndhye ndá ni fyáa ó bhyáashaala

Maki 3.13-19; Luka 6.12-16

¹Ɛnza ŋé a yɛ kaamɔɔndhye ndá ni fyáa ólu kíi tó kɛ lámansa yóo ŋólu gbɛ́ ŋó sébhaaya o dí i man, kɛ yangalo óni shaaya bɛ́suu lákɛɛnya sé dí i man. ²Aa céladhye ndá ni fyáa mín myáashaa, olu tɔ́ɔ ó lée lúu nín: Jónan ó tɔ́ɔ tɛɛ kó Simɔn, o mín ŋe kíila kó Piyɛli, o lɔ́ɔcɛ Andele; Zebede dhyénjɛ fyáa ólu: Zaki ní Yaya; ³Filipu ní Batelemi, Tomasi ní Matiyu, nísɔɔnmyaanbhaacɛ o; Alife dhyénjɛ Zaki, óni Tade; ⁴Simɔn Zelɔti10.4 Zelɔti tɔ́ɔ o kɔ́ɔ yáa nan kɛ́ lé kó a wɛɛ í wíi Lomɛn olu kanman. ní Zudasi Sikaliyɔti mín ngáa Ɛnza ɲanva.

Ɛnza ŋé a yɛ kaamɔɔndhye ŋolu bhyáashaa cé mínnan

Maki 6.7-13; Luka 9.1-6

⁵Ɛnza ŋé a yɛ kaamɔɔndhye ndá ni fyáa ólu bhyáashaa cé mínnan o lée nín: A kɛ́nan sé káafii olu yɛ só ólu la, a kɛ́nan sé Samali só ó sí la. ⁶Áa táa Izalayɛlika o léelu fɛ́ yé, o mínnu e óo saa túunnin nú lé. ⁷A kɛ́ kɛ́ táala, áa táa lakawanin kɛ́ le kó: «Ala yɛ́ Mansaya ó lágɛɛnman wáati o wɛ́ɛ bhyáa sé le! ⁸Áa yaangalotɔ ólu lákɛɛnya, áa su ólu lákuun, áa kwáantɔ ólu lákɛɛnya, áa lámansa yóo ŋólu gbɛ́. Ŋwɛ́ɛn o kó ólu kɛ́ ó sé dí a man gbɛ́ɛgbɛɛ, oo lɔ mínngɛ, áa o kó ólu kɛ́ gbɛ́ɛgbɛɛ. ⁹Á kɛ́nan sɛ́ɛn, wáman wɛ́ɛ, wáman shaanɛɛn wɛ́ɛ bhyáa a jífa lɔ. ¹⁰Á kɛ́nan bhɔɔ, wáman deeke fyáa, wáman sawaa lú, wáman gbéle ta. Kɛ mansɔɔ bháalakɛdhye ó kákan kɛ a yɛ́ sunman ŋo sɔɔ.

¹¹A kɛ́ lo só óo só la, áa ɲaanli kɛ kó yɛ́nee e sé kɛ́la a yɛ́tii lé yénɔn. Áa tó o yɛ́tiiya ó la fɔ kɛ táa sé a táasan o mán. ¹²A kɛ́ fáa lo bhó nɔ́ la, áa fóli kɛ. ¹³Ni o bhónanbhaa olu kɛ́ í bhóo síi a kɔ́ɔ, i yáa o hɛ́lɛ o sɔ́ɔ, wáa ni i man í bhóo síi a kɔ́ɔ, i táa a yɛ́ fóli o hɛ́lɛ o sɔ́ɔ. ¹⁴Ni i man í ɲán sii a kɔ́ɔ, wáman kɛ í tóo sii a kómankan kɔ́ɔ bhó mín ní só súusuu la, áa táa kɛ bhɔ́ o ywáa ó lɔ. A táatɔ ó, áa sé mangbasi kɛ a sénan gbánbga ŋo tó yé.10.14 A sénan gbánbga ŋo tó yénɔn: Oo Yawudhyaa olu yɛ́ kókɛse né le; o kɔɔ o tɔ́ɔ lé kó kaamɔɔndhye ŋolu ni o sómɔɔn ólu mán bhyɛ né wé. Ko mín ngɛ́ táa i sɔɔ i gbu lu bhyaa fɔ née wé.¹⁵Tó ní fɔ a yɛ́ tinɲan in ne ngó, kítitɛɛ ló ŋo la, bhóo yáa gban o sómɔɔn olu lá kɛ tínmin Sodɔmu yamaan ólu ní Gomɔɔ yamaan ó ka.»

Lɔbhawili mínnu káa kɛ́ kwɔ́la

Maki 13.9-13; Luka 21.12-17

¹⁶«Áa í tóomanlɔ! Ní a bhyáashaala óyoo saa lú kɛ táa kóngowuu olu cɛ́man. Oo lɔ mínngɛ, áa i yáakii tó a yɛ́ɛ lɔ óyoo san olu, a yɛ́ kó ó ló mbɛ́ a gbɛ́ óyoo biininngbɛ o. ¹⁷Áa í yáakii tó a yɛ́ɛ lɔ, kɛ mansɔɔ mɔɔn ólu yáa á ló kítitɛɛbhaa ólu bhóo, óni kɛ a gbási gbɛ́nɲɛn lá i yɛ sɛ́ɛbho ŋolu la. ¹⁸I yáa táa ni ále yamaantii ólu ní mansa ólu kɛ́ɛnnan né kósɔn. O kó ó yáa kɛ́ sɛ́ɛyaman lé ilee ní káafii olu yɛ́. ¹⁹Wáa í kɛ a ló mɔɔn ólu bhóo, a kɛ́nan hánmin a fɔ́dhyaa ŋólu ní a kómanseɲan o tá fa nvɛ́. A káa dhyaa mínnu fɔ, olu yáa yíi a mán o wáati o lɔ, ²⁰kɛ mansɔɔ a káa dhyaa mínnu fɔ, olu táa kɛ́ ále gbúlu fɔ́dhyaa ne. A Fá Ní Sɛnnɛnyanin ŋo lé káa o kóman ólu ló a lálɔ.

²¹Bhádhyeman ŋólu yáa kɛ́ ɲɔ́ɔn yɛ saya ó sɔ́ɔbu le. Fa ólu yáa o sí kɛ́ i dhyé ŋólu la. Dhyé ŋólu yáa í ɲányɛɛman í fa ólu mán kɛ i fáa. ²²Bɛ́ yáa a mánbhɔ né tɔ́ɔ ó kósɔn. Wáa mɔɔn mín ngɛ í lɔ́ja kɛ táa sé a la ŋó mán, o yáa kísi. ²³I kɛ a tɔ́lɔ só lɔ́la, áa bwée kɛ táa a lɔ gbɛ́ɛ la. Tó ní fɔ a yɛ́ tinɲan in ne ngó, a táa wɛɛ Izalayɛli só ó bɛ́ lɔyaalala sánnin mɔɔn Dhyénjɛ ó nán ó cɛ.

²⁴Kaamɔɔndhye ŋo sí mán nvísaa a kaamɔɔn o le, bháalakɛdhye nzí mán nvísaa a kunndii o le. ²⁵Kaamɔɔndhye mín ndá tɔ́lɔya mán tínmin a kaamɔɔn o tá o ka, o kaamɔɔndhye ŋo kákan né kɛ í ɲáanli, tó bháalakɛdhye mín ndá tɔ́lɔya mán tínmin a kunndii o tá o ka, o kákan né kɛ í ɲáanli. Fɔ́ kɛ́ kɛ́ lútii gbú o mán kó Bɛlizebuli, lúmanbhaa olu tá o mánfaa yóoɲan kɛ tínmin o ka ŋan!

Luka 12.2-7

²⁶A kɛ́nan sháan mɔɔn sí ɲɛn. Kɛ mansɔɔ fénoonaankɛnin nzí tɛ́ yé mín ndáa yé. Gbondo sí tɛ́ yé mín ndáa bhɔ́ kɛ́ɛnman. ²⁷Ngɛ́ fé ŋóo fé nvɔ a yɛ́ diwi o lɔ, áa o lábhɔ tée lɔ. Kóman mín ngɛ fɔ́ a tóo lɔ, o kóman ó yáa lá bhó ŋó kúnnɔn. ²⁸Mɔɔn mín núu mɔɔn fáala tó í tɛ́ sé kɛ a ni o fáa! A kɛ́nan sháan ólu ɲɛ́n. Áa sháan Ala le ɲɛn, Ala lée sé kɛ mɔɔn fásisoo óni í ní o fyáa bɛ́ láfii yaananman o lɔ kɛ i lahalaki yé. ²⁹Mɔɔn tɛ́ kɔ́ɔn dhyénin nvyáa felela dáasi kéembe la a? O ló mbɛ́ kwɔ, kɔɔnnin ŋo sí tɛ́ í bénan lúuman ni á Fá Ala mán dyɛn o man. ³⁰Sáanko ále a! Háanin a kúnzhe ó yɛ́ɛ, Ala á ó bɛ́ lá nɔ. ³¹Oo lɔ mínngɛ, a kɛ́nan sháan. Álee a físaa kɔ́ɔn dhyénin ŋólu lé.»

Ɛnza ngó kɛ í lɔ́la bɛ́ ɲánla kó íi a yɛ kaamɔɔndhye ne

Luka 12.8-9

³²«Mɔɔn mín ngɛ í lɔ́ a lá bɛ́ ɲánla kó álee né yɛ́ kaamɔɔndhye ne, né yáa nɔ́ la Nvá ɲánla o míin sá ŋó lɔ ngó o tíi óo ndá le. ³³Wáa ni mɔɔn mínngɛ í bá né lɔ mɔɔn ólu ɲánla, né yáa bá o tíi ó lɔ Nvá míin sá ŋó lɔ o ɲánla.»

Ɛnza mán nan láha lálo ndɔ́ɔ lɔ, a nánnin ŋé kɛɛ lé lálo ndɔ́ɔ lɔ

Luka 12.51-53; 14.26-27

³⁴«A kɛ́nan kɛ́ a kɔ́ɔnnɔn kó nánnin ɲé hɛ́lɛ o lé lálo ndɔ́ɔ lɔ́ lúukolo ó ka, nánnin ndɛ́ hɛ́lɛ lalo ndɔ́ɔ lɔ. Nánnin ŋé kɛɛ lé lálo ndɔ́ɔ lɔ. ³⁵Kɛ mansɔɔ nánnin ɲe lé kɛ cɛ lo dhyénjɛ óni a fa cɛ, dhyémuso óni a man cɛ, muso óni a manmuso cɛ.³⁶Mɔɔn yɛ́ɛla bhónanbhaa o léelu káa kɛ́ í yúu le.³⁷Mɔɔn mín nva wáman a man kɛ́ dhyáa a yɛ kɛ tínmin né ka, o tíi ó mánngan kɛ kɛ́ né yɛ́ kaamɔɔndhye ne, mɔɔn mín dhyénjɛ wáman a dhyémuso kɛ́ dhyáa a yɛ kɛ tínmin né ka, o tíi ó mánngan kɛ kɛ́ né yɛ́ kaamɔɔndhye ne. ³⁸Mɔɔn mín man a gbáanɲii o tá kɛ bhyáa né kwɔ́ kɛ mansɔɔ a tɛ fɛ́ ké ii ale fáa né kósɔn, o tíi ó mánngan kɛ kɛ́ né yɛ́ kaamɔɔndhye ne. ³⁹Mɔɔn mín ŋé fɛ́ kɛ a ni o lámala, o tíi ó yáa bɔɔn a ní o lɔ, waa mɔɔn mín ngɛ bɔɔn a ni o lɔ́ né kósɔn, o tíi ó yáa ɛliyanan o sɔ́ɔ.»

Bhaaye é kóbhɛɛkɛ ó la

Maki 9.41

⁴⁰«Mɔɔn mín ngɛ í ɲán sii a kɔ́ɔ, oo í ɲán siila né lé kɔ́ɔ wé. Mɔɔn mín ngɛ í ɲán sii né kɔɔ, oo í ɲán siila né bhyáashaabhaa o lé kɔ́ɔ wé. ⁴¹Mɔɔn mín ngɛ í ɲán sii Ala yɛ céla ó kɔ́ɔ o yɛ́ célaya ó kósɔn, o tíi o yáa o céla o yɛ́ bhaaye o ɲɔ́ɔn nzɔ́ɔ, mɔɔn mín no ngɛ́ í ɲán sii Alamɔɔn o kɔ́ɔ o yɛ́ Alamɔɔnya ó kósɔn, o tíi ó yáa bhaaye sɔɔ Alamɔɔn o la. ⁴²Tó ní fɔ a yɛ́ tinɲan in né ngó, mɔɔn óo mɔɔn kɛ́ jíswaan ó jífyɛ ɲan kée dí ɲɛ́n kaamɔɔndhye ŋo bɛ́ lɔ fítiinin ŋo mán kó kɛ mansɔɔ aa né yɛ́ kaamɔɔndhye ne, o tíi o táa bɔɔn a saa o lɔ.»

¹Ɛnza ŋé wɛɛ í saanan mínngɛ a yɛ kaamɔɔndhye ŋolu lá cé, aa bhɔ́ yénɔn kɛ táa Galile lánga ŋo só ólu lámɔɔn ólu kála, óni kɛ Ala yɛ sanmankanmɛɛ ó láse.

Ɛnza ŋé Yaya kwɔ́kɔɔdhyɛla

Luka 7.18-35

²Yaya Bátizelikɛbhaa é tó kaso o la kɛ Kílisi o kɛ́wɛɛ ólu kolamyɛn. Oo kɛ́ mínngɛ aa a yɛ kaamɔɔndhye ŋo lɔ́lu bhyáashaa ³kɛ táa Ɛnza manɲaankɛ kó: «Mɔɔn mín ngákan kɛ́nan, íle lée ó lé a? Wáman án ngákan kɛ́ mɔɔn gbɛ́ɛ lé mankɔɔn?» ⁴Ɛnza ŋé i yawi kó: «Álee mín myɛ́nnan, óni álee mín ɲéla, aa táa o lákɛɛ Yaya Bátizelikɛbhaa yɛ́ kó: ⁵Fyóondɔ ólu yéli kɛ́la, kuugba ólu táaman kɛ́la, kwáantɔ ólu bɛ́ wɛ́ɛ sɛ́nnɛnya, tóogbee ŋólu myɛnnin kɛ́la, su ólu kúunnan, tó sanmankanmɛɛ ó í lásela faannda ŋólu mán. ⁶Mɔɔn mín man í bá ne a lánanya ó lɔ́, o tíi ó yeemanfanin ɲé.»

⁷Í táanin ŋó kwɔ́, Ɛnza ŋé lámyaan kɛ́ kóman yaman ó yɛ́ Yaya kó lɔ́ kó: «Ale tɛ́ wɛ́ɛ táa mínnɛɛn lé mánfɛɛ dhyɛ́ ó kɔɔnnɔn? Fwɛ́ɛn ó támuu mín námaanmaan ŋan? ⁸Áa táa mínnɛɛn lé yé tɔ́ɔ lɔ wɛ́? Cɛ mánsiinin féndiiya fáanin lɔ́ lá a? Waa mín núu féndiiya fáanin ólu lónan, olu kɛ́la mansabho ŋo léelu lá! ⁹Áa táa mínnɛɛn lé yé tɔ́ɔ lɔ wɛ́? Céla a? Tinɲan o lée wé, a yɛ́ɛ a bwó céla le. ¹⁰Yaya lée céla ó lé mín ngó é fɔ Kitabu ó lɔ. Ala é fɔ kó: A mánfɛɛ, né yáa ɲɛ́n céladhye ŋó cé í ɲɛn, a yáa i yɛ́ sháa ó lɔ́bhyɛ¹¹Tinɲan in ne ní fɔ́la a yɛ́ ngó, mɔɔn sí mán wóo dínɲan lɔ míin kɛ́ mɔɔnba lé kɛ́ tínmin Yaya Bátizelikɛbhaa ka. Waa sángboo ó Mansaya ó lɔ, mɔɔn mín ŋan lɔ́ɔ í bɛ́ lé, o tíi ó á bwó Yaya lé. ¹²Kɛ ta Yaya Bátizelikɛbhaa ta wáati o mán kɛ́nan sé bí mán, sángboo ó Mansaya kó o wɛ́ɛ kɛ́ fáan ko lé le, mɔɔn oo mɔɔn kɛ́ í lɔ́ja, o léelu káa a sɔɔ. ¹³Kɛ ta o sán o man kɛ́nan sii Yaya Bátizelikɛbhaa ta wáati o la, Musa yɛ́ sɛ́liya óni céla tɔ́ ó bɛ́ é Ala yɛ́ Mansayako o láse. ¹⁴Ni áa fɛ́ kɛ lá o kó ó la, fɔ́ é kɛ́ kó Eli mín ngáa nan, o lée Yaya le. ¹⁵Tóo kɛ́ kɛ mín ngúnman, ó á myɛnnin kɛ.

¹⁶Ní sé kɛ bímɔɔn ólu lá yɛ́ɛtii mán? I bhɔ́nin ɲé dhyémuu o léelu la ké olu síinin ɲé bháa lɔ kɛ táa fɔ lé ɲɔ́ɔnɲɛn kó: ¹⁷‹Án ŋwɛ́ɛn búu fɔ́ a yɛ́, wáa a mán a lɔ ngɛ. Án ní í saan kási kɛ́, wáa a mán kásikɛ!› ¹⁸Kɛ mansɔɔ, Yaya Bátizelikɛbhaa é nan, a tɛ́ tɛ́ lɔ́min kɛ́la, a tɛ́ tɛ́ lɛ́zɛnnji mínnan. I lo ŋé fɔ a man kó: ‹Lámansa yóo ŋé a fɛ́!› ¹⁹Mɔɔn Dhyénjɛ o nan, aa lɔ́min kɛ́la kɛ́ mínnin kɛ́. Ii fɔ́la a man kó: ‹Cɛ miin ŋé lɔ́minkɛbhaa ni dɔlɔtɔ le lé. Nísɔɔnmyaanbhaa ólu ni yuumukɛbhaa ólu táamanɲɔɔn lé lé!› Wáa hákiitiiya ó lɔ́nan a yɛ́ kɛ́wɛɛ ó léelu fɛ́.»

Só mín núu í bá lánanya ó mán

Luka 10.13-15

²⁰Ɛnza ndɛ́wɛɛ káwananngo shɛ́ɛman ngɛ́ só mínnu la, aa olu yáayii kɛ mansɔɔ o só ólu lábhaa olu mán i yóo ó yɛ́ɛman. Aa fɔ o só ólu mán tá ne kó: ²¹«Kunnangboya é íle Sholazɛn ɲɛn! Kunnangboya é íle Bɛtisayida yɛ! Kɛ mansɔɔ káwananngo mínnu é kɛ́ ále fɛ yé, ni o súu tɛ́ɛ kɛ́ Tili óni Sidɔn, o sólabhaa ólu tɛ́ɛnan díminsa, kɛ bhɔɔ ó bhyáa i kannan kɛ́ i síi búulu o lɔ kɛ í yóso ólu yɛ́ɛman kɔ́ɔkɔɔ. ²²O lé kósɔn, tó ní fɔ a yɛ́ ngó kítitɛɛ ló ŋo la, bhóo yáa gban ále la kɛ tínmin Tili ní Sidɔn11.22 Tili ní Sidɔn: O só ó lábhaa olu tɛ́ɛ káafii léelu le. lú ka. ²³Ale Kapɛnamuka ólu, aa kɛ́la á kɔ́ɔnnɔn kó á yɛ só o káa i kɔ́ɔ tá lé kɛ́ sé fɔ sángboo o lɔ a? Fɛ́sɛ fɛ́sɛ o! A káa yíi lé fɔ́ɔ yaananman lɔ, kɛ mansɔɔ káwananngo mínnu wɛ́ɛ kɛ́ a fɛ́ yénɔn, ni o síya tɛ́ɛ kɛ́ Sodɔmu11.23 Sodɔmu: Ala é o só ó lé cé pépe kɛ kun ngɛ́ o sómɔɔn ólu yɛ́ yúumukɛ kóyoo ne., bí tɛ́ɛnan Sodɔmu sɔ́ɔ a siilaa ó lɔ. ²⁴O lé kósɔn, tó ní fɔ a yɛ́ tinɲan in ne, kítitɛɛ ló ŋo la, bhóo yáa gban í lé lá kɛ tínmin Sodɔmu yamaan ólu ka.»

Laanvyaa o sɔ́ɔɲan o

Luka 10.21-22

²⁵O wáati o lɔ, Ɛnza ŋé fɔ kó: «ní bálika bhɔ́la i yɛ́ Nvá, sángboo óni lúukolo ó tíi ó, kɛ mansɔɔ, í wɛ́ɛ kó mínnu lóonaankɛ lɔnikɛbhaa ólu ní hákiiman ŋólu mán, í wɛ́ɛ ólu lá gbɛ́ lá dhyémuu ólu yɛ. ²⁶Nvá í wɛ́ɛ kɛ́ cé kɛ mansɔɔ a wɛ́ɛ dhyáa í yɛ tinɲan in né.

²⁷Nvá wɛ́ɛ fé ŋó bɛ́ lo móo. Mɔɔn sí mán Dhyénjɛ ó lɔ, fɔ́ Fa ó, mɔɔn sí lo mán Fa ó lɔ fɔ́ Dhyénjɛ ó. Óni Dhyénjɛ ó kɛ́ dyɛn kɛ yáa mínnan.

²⁸Álee mɔɔn sɛ́ɛbhaatɔ ólu ní mínnu kúnmanlwee ŋan gbii, áa nan né saala ké ní laanvyaa o dí a mán. ²⁹Áa í kúnnzii né tá fɛ́ɛn ŋo11.29 fɛ́ɛn ŋo: Oo yíi gúunmba lɔ́ lé le, mín ŋé lála sɛɛnkɛnisi fyáa kánman, kɛ sɛɛnkɛlawa wáman wotolo o sanman. kɔɔ ké ní a kála, kɛ mansɔɔ ɲóso swáanyanin ɲe, nó sáwɛɛnin ɲe. A yáa laanvyaa o sɔ́ɔ a yɛ́ɛ yɛ. ³⁰Né tá fɛ́ɛn ŋo táko o nɔɔnyanin ɲe, ɲɛ́n lwée ŋó ló mán ngbíi.»

Ɛnza ŋé kan mín nvɔ lɔnwɛɛnlilo ŋo ko o lɔ

Maki 2.23-28; Luka 6.1-5

¹Ó wáati o lɔ́, lɔnwɛɛnlilo nɔ́ la, Ɛnza ndɛ́ɛ tínminnan belefyɛ ólu kɔɔnnɔn. Kɔ́ɔn é a yɛ kaamɔɔndhye ŋolu myáan tó olu béle tínnza ŋo lɔ́lu bhɔ́ kɛ i lɔɔ. ²Falizɛn ŋólu i yé o lá mínngɛ, ii fɔ Ɛnza ɲɛn ko: «Ɲɔ́ɔn nín, kó mín mánngan kɛ́ kɛ́ lɔnwɛɛnlilo ŋó lá, i yɛ kaamɔɔndhye ŋólu o lé kɛ́la.» ³Ɛnza ŋé í yawi kó: «Kɔ́ɔn é Laula ní a táamanɲɔɔn ólu myaan mínngɛ, aa mínngɛ, a mán ó kála kɛ́ a yé a? ⁴Aa lo ɲán mín mán Ala yɛ́ bhó ŋo kɔɔnnɔn, óni faanlɛɛbulu mín nziinin ndɛ́ɛ yénɔn, aa o lɔɔ ɲán mín man kɛ́ɛke ále ní a táamanɲɔɔn ólu si tɛ́ mánngan kɛ o búlu o lɔɔ, fɔ faanlɛɛɲansebhaa olu kéembe. ⁵Bháanin a mán yé Musa yɛ́ tɔ́ ŋo lɔ kó faanlɛɛɲansebhaa olu bháala kɛ́ Ala bhatobhomba ó lá lɔnwɛɛnlilo ŋo la a? Waa í tɛ́ yacela oo mɔɔn mínnu tɛ́ lɔnwɛɛnlilo ŋo tɔ́ ŋo látaaman lá a? ⁶Tó ní fɔ a yɛ́ ngó kó é yánun, mín nguu a gbɛ́ɛ kɛ tínmin Ala bhatobhomba ó ka! ⁷Ala e fɔ a yɛ kitabu o lɔ kó Ní hínnɛn le fɛ, ndɛ́ faanlɛɛ fɛ. Ni a tɛ́ɛ o kóman o kɔ́ɔ o lɔ, a tɛ́ táa jótii olu yaayii. ⁸Kɛ mansɔɔ mɔɔn Dhyénjɛ ó lée lɔnwɛɛnlilo ŋó kunndii o lé.»

Ɛnza ŋé cɛ bhóofaaninman lɔ́ lákɛɛnyala

Maki 3.1-6; Luka 6.6-11

⁹Ɛnza ŋé bhɔ́ yénɔn kɛ táa Yawudhyaa olu yɛ́ sɛ́ɛbho ŋo kɔɔnnɔn. ¹⁰Cɛ lɔ́ tɛ́ɛ yénɔn, o bhóo tɛ́wɛɛ fáa a man. Falizɛn ŋolu tɛ́ɛ fɛ́ ké ii sɔ nzɔ́ɔ Ɛnza nán, o kósɔn ii Ɛnza manɲaankɛ kó: «Án ɲɛn tɔ́ ŋo lɔ, án ngákan kɛ́ lákɛɛnyalikɛ lɔnwɛɛnlilo ŋo la?» ¹¹Ɛnza ŋé i yawi kó: «Saa kéembe kɛ́ kɛ́ a lɔ́ bhóo ké o saa ó a í bé jáan lɔ́ lɔnwɛɛnlilo ŋo la, a tíi o táa táa o saa ó lábhɔ a? ¹²Mɔɔndhye ŋó kúu a gbɛ́ɛ kɛ tínmin saa ó ka! Óo lɔ mínngɛ, án ɲɛn tɔ́ ŋóo fɛ ké án ni kó bhɛ́ɛ le kɛ́ án mɔɔnɲɔɔn o yɛ́ lɔnwɛɛnlilo ŋo la.» ¹³Aa fɔ o lé lɔ́ cɛ ó yɛ kó: «Í bhóo ó lɔ́sawa.» Cɛ o a bhóo o lɔ́sawa, a bhóo o kɛ́ɛnya kɛ kɛ́ a bhóo tɔ́ kée ŋó súu le. ¹⁴O lée kɛ́ Falizɛn ŋolu bhɔ́ o lé kɛ́ɛnman kɛ táa ɲɔ́ɔnɲe, ké i káa kɛ tɛ́nmɛn kɛ Ɛnza nváa, ii bhɔ́ o ɲánle.

Ala wɛ́ɛ í kwɛ́ɛn síi a yɛ bháalakɛdhye mín ngɔɔ

¹⁵Ɛnza ŋé o kó ó myɛ́n mínngɛ, aa bhɔ́ i cɛ́man óle lɔ kɛ táa. Yamanba é táa a fo nan. Aa yaangalotɔ ólu bɛ́ lákɛɛnya, ¹⁶wáa aa fɔ í yɛ́ kɛ́ a mangbɛya kó i kɛ́nan ale kófɔ mɔɔn ólu ɲánla. ¹⁷Aa o kɛ́ lé ke kó óo kó é kɛ Céla Ezayi é kóman mín nvɔ, o a í láfa. A fɔnin ndɛ́ɛ o kwɔ́ tá ne kó:

¹⁸Ɲɛ́n bháalakɛdhye ŋo lée nín,

ŋwɛ́ɛn ale lé bhɔ́, ale lé kó a dí ɲɛn.

Né wɛ́ɛ Ní o ló a lɔ, a yáa téeɲan ó láse síya gbɛ́ɛ olu mán.

¹⁹A táa kɛɛ bhyáa mɔɔn sí la, a táa í ka nányɛɛ,

a lo ndáa kɛ́dhyaa nzhɛɛman ngɛ́bhaa lé yamanywaa olu lɔ.

²⁰A táa kaakaa o kúnmanyiinin ŋó tɔ́ kɛɛ,

tɔ bhɛ́ɛ tɛ́ laman mín nzala, a táa o tɔ́ lása.

A yáa tó o la fɔ́ kɛ́nan fáan dí téeɲan ó mán.

²¹A tɔ́ɔ o yáa kɛ́ síya ólu bɛ́ yeeya le.

Ɛnza ŋé Falizɛn ŋolu yawila

Maki 3.22-30; Luka 11.14-23

²²Ii nan cɛ lɔ́ lé Ɛnza nzáala, Lámansa yóo né tɛ́wɛɛ o cɛ ó kɛ́ bhóbho óni fyóo ne. Ɛnza ŋé o cɛ ó lákɛɛnya tó óo kóman, óni kɛ ywáa yé. ²³O kó óo yaman o káwakoya fɔ́ ii fɔ́la kó: «Bháanin Ɛnza Laula Bhɔ́nzɔ o tɛ́ míin ne a?» ²⁴Falizɛn ŋolu o dhyáa ŋó myɛ́n mínngɛ, olu fɔ kó: «Cɛ míin ŋé lámansa yóo ŋólu gbɛnan lámansa yóo ŋólu kunndii Bɛlizebuli lé bhaaka lɔ!» ²⁵Ɛnza ndɛ́ɛ i miliya olu lɔ, aa fɔ i yɛ kó: «Yamaan mín mɔɔn lúu ɲɔ́ɔn ngɛlɛla, o yamaan oo céla lé. Só wáman bhó mín nanbhaa lu kɛ́ kɛ́ ɲɔ́ɔn ngɛlɛla, o só ó, wáman o bhó ŋó tɛ́ sé si sɔ́ɔla. ²⁶Ní Sɔtaannan kɛ́ kɛ́ Sɔtaannan gbɛnan, ké aa a yɛ́ɛ le kɛ́lɛla wé ne, o ɲán o mán, a yɛ́ yamaan ó káa sé si sɔ́ɔla díi? ²⁷Ní née Lámansa yóo ŋólu gbɛnan Bɛlizebuli lé bhaaka lɔ, o wáati ó lɔ, á dhyénjɛ ólu i gbɛnan yɛ́ɛtii bhaaka lɔ? O lé kósɔn ólu yáa kɛ́ a yɛ́ kítitɛɛbhaa ólu lé! ²⁸Wáa ni née Lámansa yóo ŋólu gbɛnan Ala Ní o le bhaaka lɔ, oo a yáala le kó Ala yɛ́ mansaya ó wɛ́ɛ sé a mán.

²⁹Mɔɔn e sé lónan mɔɔn faangbii lɔ́ yɛ́ bhónan, kɛ o bhóota o bɛ́ ta ni a man o mɔɔn faangbii ó síli a? Ní a kɛ sé kɛ a síli, aa sé kɛ a yɛ bhónanfe ŋo bɛ́ ta. ³⁰Mɔɔn mín ndɛ́ né ɲíin lé, oo né yúu lé le. Óni mɔɔn mín ndɛ́ ládhyɛli kɛ́la ni né lé, o tíi ó ɲɛ́nɲɛnnin né kɛ́la! ³¹O lé kósɔn ní fɔ́la a yɛ́ ngó yafa é sé kɛ kɛ́ mɔɔndhye ŋólu yɛ yúumu o bɛ́suu man, háanin mín ŋé nan kɛ́ Ala lɔ́ɔya óle, wáa mɔɔn óo mɔɔn kɛ́ Ní Sɛnnɛnyanin ŋó lɔ́ɔya, yafa táa kɛ́ o tíi ó mán. ³²Mɔɔn óo mɔɔn kɛ́ kóman yóo nvɔ́ mɔɔn Dhyénjɛ o mán, yafa é sé kɛ́la o tíi ó mán, wáa mɔɔn óo mɔɔn kɛ́ kóman yóo nvɔ́ Ní Sɛnnɛnyanin ŋó mán, yafa táa kɛ́ o tíi ó mán tún, yafa ló ndáa kɛ́ a man kíyaman.»

Sáanan míin yíi óni yíidhyengo o ka

Luka 6.43-45

³³«Yíi mín ngáɲin, o lé dhyé ngáɲin. Yíi mín mánɲin, o dhyé ŋó mánɲin. Aa céne, mɔɔn é yíi ó lɔnan a dhyé ŋó lé mán. ³⁴Álee santutudhye ŋolu! Ále a yóo ɲán mín man álee káa sé kómanbhɛɛ fɔ́la díi? Kɛ mansɔɔ mɔɔn yóso ó fánin ɲé fé ŋó mínnan, i lá ó o le fɔ́la. ³⁵Mɔɔnbhɛɛ ó fémɛɛ ó bhɔ́la a yɛ́ nanfoobhɛɛ o lé lɔ mín ŋé a yóso ó lɔ. Mɔɔnyoo ŋó féɲoo ne bhɔ́la a yɛ́ nanfooyoo ŋó lɔ. ³⁶Ní fɔ a yɛ́ ngó kítitɛɛlo ŋo kɛ́ sé, mɔɔndhye ŋólu wɛ́ɛ kóman kúnnda nzúusuu fɔ, i tɛɛ o fɔ́la kun mínnan, i yáa o fɔ. ³⁷Kɛ mansɔɔ mɔɔn é jó sɔɔla i yɛ́ɛla kóman ó lé fɛ, wáman mɔɔn ló ŋe yaayiila i yɛ́ɛla kóman ó lé fɛ́.»

Kó Ɛnza ŋan tɔɔmansii lɔ kɛ

Maki 8.11-12; Luka 11.29-32

³⁸Sɛliya kaamɔɔn lɔ́lu ni Falizɛn nɔ́lu fɔ Ɛnza ɲɛn kó: «Kaamɔɔn, án ni fɛ́ kɛ́ i yɛ́ tɔɔmansii kée ɲé.» ³⁹Ɛnza ŋé i yawi kó: «Án ɲɛ́n wáati miin mɔɔn míinnu manɲin. Ala kanmyaanbhɛɛ ó lé lúu tɔɔmansii ɲíin. Tɔɔmansii gbɛ́ɛ táa kɛ́ i yɛ́ bhée ní céla Zonasi yɛ́ tɔɔmansii o tɛ́. ⁴⁰O lɔ Zonasi é tee sáwa ní sú sawa kɛ́ yɛ́ɛba ó kɔ́ɔnnɔn ɲán mín mán wé, mɔɔn Dhyénjɛ, o yáa tee sáwa ní sú sawa kɛ́ o ɲán kée ŋó mán kábulu o lɔ lúukolo o kɔ́ɔ. ⁴¹Kíti tɛ́ɛlo ŋó la, Ninivuka ólu yáa i wíi kɛ́ kíti bé án ɲɛ́n wáati miin mɔɔn ólu ka, kɛ mansɔɔ Zonasi é lakawanin mín ngɛ́ Ninivu só ó kɔ́ɔnnɔn, Ninivuka ólu sɔ́n o mán. Ii díminsa kɛ́ fala í yɛ́ kóyoo ŋólu lá. Waa, mɔɔn é yánun mín a bwó ní Zonasi lé! ⁴²Kíti tɛ́ɛlo ŋó la, kíinmoo fán ŋó fɛ́ mansamuso ó yáa í wíi ní án ɲɛ́n wáati míin mɔɔn ólu lé kɛ́ kíti bé í ka, kɛ mansɔɔ a lée bhɔ́ fɔ lúukolo ó lá ŋó la kɛ́nan Swɛmannan yɛ́ hákiimanɲandhyaa ólu lɔ́myɛn. Waa, mɔɔn é yánun mín ŋe Swɛmannan ɲɛ́n!»

Lámansa yóo ŋó kwɔ́sɛɛ ó

Luka 11.24-26

⁴³«Ní Lámansa yóo ŋó kɛ́ bhɔ́ mɔɔn lɔ́ lɔ, aa táa í yáalayaala lá wúla ó le kɔɔnnɔn, kɛ́ lɔnwɛɛnlikɛlaa ɲíin yénɔn. Waa á tɛ́ o ywáa sɔ́ɔla mínngɛ, ⁴⁴O lɔ aa fɔ a yɛ́ fɛ́ kó: ɲáan ngwɔ́sɛɛ ɲɛ́n bhó ŋó la, ní bhɔ́ ywáa mínnɔn. Ní a kɛ́ í kwɔ́sɛɛ wáati mínnɔn, kɛ táa o ywáa ó lɔkoo ŋo mancɛnin ní lɔ́bhyɛnin ŋó yé. ⁴⁵O lɔ, aa táa Lámansa yóo wóonvyaa gbɛ́ɛ kíi, mínnu a yóo ale lé. Ii nan lo o tíi ó lɔ kɛ́ í síi. A tíi ó kɛ́ɲan ó yáa yóoɲan kɛ́ tínmin a jónan ó ka. A lo ngáa kɛ́ wáati miin mɔɔn ólu lá céne.»

Ɛnza ŋwóobhaa ni Ɛnza nɔ́ɔcɛ ólu

Maki 3.31-35; Luka 8.19-21

⁴⁶Kɛ a tó kómanla yaman o yɛ́ bhó ŋó la, a wóobhaa ní a lɔ́ɔcɛ ólu í lɔ́ ndɛ́ɛ kɛ́ɛnman. I tɛɛ fɛ́ kɛ kóman a yɛ. ⁴⁷Lɔ́ é fɔ a yɛ kó: «Í wóobhaa ní í lɔ́ɔcɛ ólu lɔ́nin ɲé kɛ́ɛnman, ii fɛ́ kɛ kóman lɔ́ fɔ́ í yɛ́.» ⁴⁸Wáa Ɛnza ŋé o tíi ó yawi kó: «Yɛ́nee ŋwóobhaa le? Yɛ́nee lú é nɔ́ɔcɛ ólu le?» ⁴⁹Ɛnza ŋé í bhóo sú a yɛ kaamɔɔndhye ŋolu la kɛ fɔ kó: «Ŋwóobhaa óni nɔ́ɔcɛ ó lée lúu nín. ⁵⁰Tinɲan in ne, Nvá mín ŋé sá ŋó lɔ, mɔɔn óo mɔɔn kɛ kɛ́ o sáo o kɛ́la, o tíi ó lée nɔ́ɔcɛ óni nɔ́ɔmuso, óni ŋwóobhaa le.»

Sáanan mín ŋé sífiibhaa o ka

Maki 4.1-9; Luka 8.4-8

¹O ló ŋó la, Ɛnza ŋé bhɔ́ bhó ŋó la kɛ táa í síi bhá o lá lá tó kɛ kalanin kɛ. ²Yamanba é nan í mínnin a lá. Mɔɔn ó sháaya kóyoo ŋó mán, aa í yɛ́ɛ Kúun ŋó lɔ kɛ í síi. Yaman o bɛ́ lɔ́nin ndɛ́ɛ tíinnan. ³Aa kóman shɛ́ɛman nvɔ í yɛ́ saanan bhóoman. Aa fɔ i yɛ kó: «Sɛɛnkɛbhaa o bhɔ́ kɛ́ táa a yɛ́ sí ó fíi a bhóo sɛɛn man. ⁴Kɛ́ sɛɛnkɛbhaa o tó sí fíi ó la, a koo o lɔ́lu táa bé sháa ó lafɛ: Kɔ́ɔn ólu nan kɛ ólu lakuun. ⁵Á lɔ́luu bé káwa ywáa lú lɔ. Fíibhɛɛ tɛ́ tɛ ywáa mínnɔn, ólu í fɛ́ɛ jónan, kɛ mansɔɔ fíibhɛɛ tɛ́ tɛ ká. ⁶Tée óo máan mínngɛ, o fɛ́ɛ ŋólu bɛ́ɛ já kɛ fáa, kɛ mansɔɔ i díin ŋolu tɛ́ tɛ́ lúu lɔ́ cɛ́ɛne. ⁷A lɔ́lu ŋé táa bé ŋwɛ́ɛn ywáa lɔ. O ŋwɛ́ɛn ŋólu wili kɛ í sɔ́ɔsii fénvɛɛ ndɔ́ ólu ka. ⁸A lɔ́lu bé lúu dhyáanin nga, olu í fɛ́ɛ kɛ í yɛ́ɛ sɔɔ kɛ í dhyé ngɛ. Kée ŋé dhyé ngɛnmɛn kɛ, a lɔ gbɛ́ɛ é dhyé mbíwɔɔlɔ kɛ, a lɔ é dhyé bísawa kɛ.» ⁹«Tóo kɛ́ kɛ mín ngúnman, o a myɛnnin kɛ!»

Ɛnza ŋé saanan o fɔ́la kun mínnan

Maki 4.10-12; Luka 8.9-10

¹⁰Kaamɔɔndhye ŋolu í mángbaa Ɛnza nan kɛ a manɲaankɛ kó: «Mínnɛɛn lé kósɔn íi kómanla i yɛ saanan bhóoman?» ¹¹Aa i yawi kó: «Bhɔ́ɲɛn wɛ́ɛ kɛ ale yɛ́ kɛ́ sángboo ó Mansaya ó gbondoya ólu lɔ, wáa ilee mán o sɔ́ɔ. ¹²Aa céne, lɔ́ kɛ́ kɛ́ mɔɔn mín móo, lɔ yáa bhyáa o tíi o tá ó ka fɔ́ kɛ wasa a lɔ, waa fé ndɛ́ mín móo, mín ŋé a bhóo, o yáa bwási a lá. ¹³O lé kósɔn ní kómanla i yɛ́ saanan bhóoman: Ké íi mánfɛɛli kɛ́ wáa i kɛ́nan yéli kɛ, ké íi myɛnnin kɛ́ wáa i kɛ́nan bhɔ́ a ɲánle. ¹⁴O ɲán o mán, Ezayi é célayakoman mín nvɔ, oo í láfala i yɛ tá ne kó:

Ále yáa á lɔ́myɛn cɛ́ɛne, wáa á táa bhɔ́ ɲánle fɛ́sɛ fɛ́sɛ,

Ále yáa mánfɛɛli kɛ́ cɛ́ɛne, wáa á táa fósi yé fɛ́sɛ fɛ́sɛ.

¹⁵Kɛ mansɔɔ, síya mínnu wé, olu wɛ́ɛ i yóso o lágbɛya;

I wɛ́ɛ i tóo olu látuun, I wɛ́ɛ i ɲan olu látuun,

Kó óo kó é kɛ ké i kɛ́nan yéli kɛ í ɲán olu la,

Ké í kɛ́nan myɛ́nninkɛ í tóo olu la,

Ké i yóso o kɛ́nan a bhɔ́ a ɲánle.

Ké í kɛ́nan yɛ́ɛman kɛ i kwɔ́sɛɛ né mán, ké ní i lakɛɛnya.

¹⁶Wáa a lé ɲán ólu nisɔdhyaa lɔ́, kɛ mansɔɔ aa yéli kɛla, óni a tóo ólu myɛ́nnin kɛla. ¹⁷Tó ní fɔ a yɛ́ tinɲan in ne ngó: Álee fé mín mánfɛɛla, o yélɔɔ tɛ́ɛ céla shɛ́ɛman ní mɔɔnteenin shɛ́ɛman nan, wáa i lo man o yé, áa kó mín myɛnnan, o myɛ́nnɔɔ tɛ́ɛ i la, wáa i lo man o myɛ́n.»

Ɛnza ŋé sífiibhaa o yɛ saanan o kɔ́ɔ o fɔ́la

Maki 4.13-20; Luka 8.11-15

¹⁸«Saanan mín ŋé gbɛngbɛnan kɛ sii sífiibhaa o la, áa o kɔ́ɔ o lɔ́myɛn: ¹⁹Ale kwɛnnin, áa sɛɛnkɛbhaa o yɛ saanan o kɔ́ɔ o lɔ́myɛn. Ni mɔɔn lɔ kɛ́ Ala yɛ́ mansaya o kóman o lɔ́myɛn, tó a tɛ́ bhɔ́ a ɲán lé, Sɔtaannan lée nánla o bhɔ́la o tíi o yóso lɔ. Sí miin bé sháa o láfɛ, o lée wé. ²⁰Sí mínnuu bé gbófaaywaa o lɔ, óo mɔɔn lé le: Ní ó kɛ́ ó kóman ó myɛ́n, áa sɔ́n a mán ni nisɔdhyaa le íkɔlɔ. ²¹Wáa Ala saaninkan ŋo díin ngbáannin ndɛ́ kɛ́la o tíi ó yóso lɔ. Dínɲan tɔ́lɔya o lɔ́ kɛ́ sii o tíi ó la wáati mínnɔn, wáman gbɛ́ya lɔ́ kɛ́ a sɔɔ Ala saaninkan ŋo kósɔn, o tíi ó lánanya ó bhyáa. ²²Sí míin bé ŋwɛ́ɛn ŋólu cɛ́man, ó mɔɔn lé lé míin Ala saaninkan ŋo myɛ́nnan, wáa dínɲan hánminnanngo olu ní nanfooɲiin ŋó nɛ́li o Ala saaninkan ŋo náansila o tíi o yóso lɔ tó nafa tɛ́ sɔ́ɔ o lá. ²³Sí míin bé lúu dhyáanin ŋo ka, óo mɔɔn lɔ́ lé lé, míin Ala saaninkan ŋó myɛ́n kɛ bhɔ́ a ɲan le. Aa í dhyé ngɛ, kée ŋé kɛnmɛn sɔ́ɔ, lɔ́ é bíwɔɔlɔ sɔɔ lɔ́ gbɛ́ɛ é bísawa sɔ́ɔ.»

Sáanan mín ŋé bínɲoo ŋó ka

²⁴Ɛnza ŋé saanan gbɛ́ɛ lá i yɛ kó: «Ala yɛ́ Mansaya óo tɛ́nmɛn, o lée nín: Cɛ lɔ́ é sí bhɛ́ɛ fíi a bhóo sɛɛn mán. ²⁵Sú lɔ lɔ ké bɛ́ é sunnɔɔn lɔ, ale cɛ ó yúumɔɔn lɔ é táa bínɲoo ngoo fíi a yɛ béle fíinin ŋó lɔ, tó kɛ táa. ²⁶Béle óo wili kɛ í tínnza ngɛ́ mínngɛ, bínɲoo ŋé yé belefyɛ ó lɔ. ²⁷Sɛɛntii o yɛ́ bháalakɛdhye ŋolu nan fɔ a yɛ kó: ‹Án ngunndii o, í tɛ́wɛɛ sí bhɛ́ɛ lé fíi í yɛ́ sɛ́ɛn ó mán! Tó bínɲoo míin núu bhɔ́ mín ne wɛ́?› ²⁸Aa i yawi kó: ‹Yúumɔɔn lɔ lé káa kɛ́ o kɛ́ wé njɔ́.› Bháalakɛdhye ŋolu a manɲaankɛ kó: ‹Íi fɛ́ ké án ndáa béle ó lɔ́bwɔ a?› ²⁹Aa i yawi kó: ‹Ɔn-ɔn, ní o tɛ, a yáa tó bínɲoo ŋólu bwɔ́la kɛ bélezu ólu bwɔ́. ³⁰Oo lɔ mínngɛ, áa i tó yénɔn ké ii wíi ɲɔ́ɔn nvɛ́ kɛ sé bélekɛɛnzan o mán, tó ní fɔ bélekɛɛmaa olu yɛ ngó ii bínɲoo ŋólu bwɔ́ ótun kɛ i sili síli bínnzii bhóoman tó kɛ i ɲɛɛn, kɛ́wɛɛ tó kɛ béle ó lálo ɲɛ́n mɔɔnnin ŋó lɔ.› »

Sáanan mín ŋé mútaalikoo ó ka

Maki 4.30-32; Luka 13.18-19

³¹Ɛnza ŋé saanan gbɛ́ɛ lá i yɛ kó: «Sángboo ó Mansaya óo tɛ́nmɛn, o lée nín: Yíi mín ndɔ́ɔ kó mútaali cɛ lɔ́ wɛ́ɛ ó koo o tá kɛ́ a lo a yɛ sɛɛn ó mán. ³²Ale lé a lɔ́ɔ kɛ tínmin fé ngóo ó bɛ́ ka, wáa ni a kɛ í fɛ́ɛ, aa bwóɲan kɛ tínmin nánkwɔfe nónin ŋó bɛ́ ka, kɛ kɛ́ yíi le, tó sámankɔɔn ólu nan í bhó ngɛ́ a bhóo ólu la.»

Sáanan mín ŋé sɛ́ɛ o ka

Luka 13.20-21

³³Ɛnza ŋé saanan gbɛ́ɛ lá i yɛ kó: «Sángboo ó Mansaya óo tɛ́nmɛn, o lée nín: Muso lɔ́ wɛ́ɛ sɛ́ɛ tá kɛ a kɛ fálininmuu bhɔɔ tálanjɛ yacela. Sɛ́ɛ fítiinin ŋóo fálininnɛɛ lágbɛɛn ŋó láfuun.»

Ɛnza ndɛ́ɛ saanan olu lála ɲán mín man

Maki 4.33-34

³⁴Ɛnza ŋé o kó ó bɛ́ fɔ́ yaman o yɛ́ saanan bhóoman, a tɛ tɛ́ kómanla i yɛ ni a tɛ tɛ́ saanan la. ³⁵Aa o kɛ́ lé kó óo kó é kɛ céla óo kóman mín nvɔ, o a í láfa. A fɔnin ndɛ́ɛ céla ó kwɔ́ tá ne kó:

ɲáan kóman saanan lɔ,

kɛ tá dínɲan ó a lá, Ala é kó mínnu tó loo nɔn, ɲáan olu fɔ.

Sáanan mín ŋé bín ɲóo ŋó ka, o kɔ́ɔ o

³⁶Ɛnza ŋé yaman o mánkɛnin ndo kɛ táa bhó ŋó la. A yɛ kaamɔɔndhye ŋolu í mángbaa a lá kɛ fɔ a yɛ kó: «Saanan mín ŋé bínɲoo ŋó ka, o kɔ́ɔ o fɔ́ án ɲɛn.» ³⁷Ɛnza ŋé i yawi kó: «Mɔɔn Dhyénjɛ o lée sí bhɛ́ɛ ó fíila, ³⁸sɛɛn ó lée dínɲan le, mɔɔn mínnu bhóo é Ala yɛ́ Mansaya ó kɔɔ, sí bhɛ́ɛ ó lée lúu wé. Tó mɔɔn mínnu bhóo é sɔtaannan tá o kɔɔ, bínɲoo ŋó lée lúu wé. ³⁹Yúumɔɔn mín ŋé bínɲoo ngóo fíila wé, Sɔtaannan o lée wé. Bélekɛɛnzan o lée dínɲan lábha ŋo le, tó bélekɛɛmaa olu lée malɛɛka olu le. ⁴⁰Mɔɔn é bínɲoo ŋó bwɔ́la tɛ́nmɛn kɛ a bé tá o lɔ, a káa kɛ́ céne dínɲan lábha ŋo la: ⁴¹Mɔɔn Dhyénjɛ, o yáa a yɛ malɛɛka olu lánan. Mɔɔn mín núu kɛ́la i mɔɔnɲɔɔn ólu lálongun né yúumukɛ ó lɔ, malɛɛka olu yáa nan o mɔɔn ólu ní kóyoongɛbhaa o bɛ́ cɛ́bhɔ mɔɔn télenin ŋólu la, o mínnu wɛ́ɛ í bhóo síi Ala yɛ́ Mansaya ó kɔɔ. ⁴²A yáa kóyoongɛbhaa olu láfii yaananmanta o lɔ, tó ii kási kɛ́ yénɔn ké i dinmisaninmba ó yé.⁴³O káa kɛ́ í lɔ́ le ké mɔɔn téenin ŋólu mánnan mánnan ŋé bhɔ́la i Fá Ala yɛ ɛliyanan o lɔ óyoo teemaan. Tóo kɛ́ kɛ mín ngúnman, o a myɛnnin kɛ!»

Sáanan mín ŋé nanfoo lóonaankɛnin ka

⁴⁴«Ala yɛ́ Mansaya óo tɛ́nmɛn, o lée nín: Aa lé óo nanfoo lóonaankɛnin ŋé sɛɛn lɔ́ mán. Mɔɔn mín ngɛ a yé, oo a lóonaankɛ ko kwáa kɛ. A dhyaakoɲan o mán a yɛ, aa táa a bhóota o bɛ́ fele kɛ o wɛ́ɛ o tá kɛ́nan ale sɛɛn ó sá.

Sáanan mín ŋé kɔɔnngoofelebhaa o ka

⁴⁵Ala yɛ́ Mansaya óo tɛ́nmɛn íkwɔ, o lée nín: Aa lé óo kɔ́ɔnngoofelebhaa mín ŋé kɔ́ɔnngoo cɛ́ɛ ɲíin. ⁴⁶Kɔ́ɔnngoofelebhaa o kɛ́ kɔ́ɔnngoo kúugbɛɛ ɲe, aa táa a bhóota o bɛ́ fele kɛ o wɛ́ɛ o tá kɛ́nan o kɔ́ɔnngoo ó sá.»

Sáanan mín ŋé yɔ́ɔmyaanjɔ ó ka

⁴⁷«Ala yɛ́ Mansaya óo tɛ́nmɛn íkwɔ, o lée nín: Jɔfiibhaa o kɛ́ jɔ ó láfii, aa yɔ́ɔ bɛ́suu le myáanla. ⁴⁸Jɔ ó kɛ́ fá, jɔfiibhaa olu tó tíinnan kɛ jɔ ó sánman tó kɛ í síi yénɔn kɛ yɔ́ɔ ólu lɔ́tɔnmɔn: Yɔ́ɔ mínnu káɲin, ii olu kɛ́ fénɔnkoo nɔn tó mínnu mánɲin, ii olu láfii. ⁴⁹A káa kɛ́ céne dínɲan lábha ŋo la: Malɛɛka olu yáa nan mɔɔn téenin ŋólu ní mɔɔn yóo ŋólu bhɔ́ ɲɔ́ɔnnga, ⁵⁰kɛ mɔɔn yóo ŋólu láfii yaananmanta o lɔ, tó ii kási kɛ́ yénɔn ké i dinmisaninmba ó yé.»

Nanfoo kɔɔ óni nanfoo kwáa o

⁵¹Ɛnza ŋé a yɛ kaamɔɔndhye ŋolu mánɲaankɛ ní i wɛɛ bhɔ́ o kóman ólu kɔ́ɔ o ɲánle. Ii a yawi kó i wɛɛ bhɔ́ ɲan le. ⁵²Oo kɛ́ mínngɛ, aa fɔ i yɛ kó: «Sísan, sɛliya kaamɔɔn mín ngalanin ɲé Ala yɛ́ Mansaya ó tá fa ŋo fɛ, o mɔɔn ólu bhɔ́nin ɲé lútii lɔ le lá: O lútii oo fé ngɔ́ɔ lú ní féngwaa lu lábhɔla a yɛ nanfoobhyaalaa ó lɔ.»

Nazalɛtika ólu mán lá Ɛnza nan

Maki 6.1-6; Luka 4.16-30

⁵³Ɛnza ŋé wɛɛ o saanan olu fɔ́la mínngɛ, aa bhɔ́ o ywáa ó lɔ ⁵⁴kɛ táa a fɛso Nazalɛti. Aa mɔɔn olu kála námyaan sɛ́ɛbho ŋo lá yénɔn. Oo bhɔ́ i bɛ́ kɔ́ɔman fɔ́ ii fɔ́la kó: «Aa bhɔ́la hákiimanɲan míin né mín ne? Aa kɛla díi kɛ káwananngo míin nú kɛ? ⁵⁵Bháa ale lé tɛ́ yíimanlɛsɛbhaa o dhyénjɛ o le a? Bháa i tɛ a wóobhaa lé kíila lá ko Mwɛnyamu a? Bháa a bhádhye ŋólu tɛ́ Zaki ní Yusufu ní Simɔn ní Zuda lú le a? ⁵⁶Ɲɔ́ɔn án nee ní a lɔ́ɔmuso ó léelu bɛ́ siinin ɲé só kée nán nín né? Yɛ́nee hákii míin myáa a man, óni kɛ sékoya míinnu kɛ́ ó sé kɛ́ a yɛ?» ⁵⁷I sikaseɲan mín é wé, oo kɛ́ sɔ́ɔbu le tó i man lá Ɛnza nan. Oo kɛ́ mínngɛ Ɛnza ŋé fɔ i yɛ kó: «Bwóɲan lée Céla o yɛ́ ywáa bɛ́ lɔ fɔ́ a fɛsobhaa olu cɛ́man, óni a yɛ bhónanbhaa olu cɛ́man.» ⁵⁸I yɛ lánanbhɛɛya o kósɔn, Ɛnza ŋé káwananngo dɔ́ɔnin ne kɛ́ yénɔn cé.

Yaya Bátizelikɛbhaa yɛ saya ó

Maki 6.14-29; Luka 9.7-9

¹O wáati o lɔ, cɛ mín ndɛ́ɛ fáan lá Galile mála ó lɔ tó ale cɛ ó tɔ́ɔ tɛɛ kó Elɔdi, aa Ɛnza ngodhyaa ŋó myɛ́n. ²Aa fɔ a yɛ bháalakɛdhye ŋolu yɛ kó: «Yaya Bátizelikɛbhaa lée wé, a wɛɛ kúun kɛ bhɔ́ su ólu cɛ́man! O lé kósɔn káwananngo lú kɛ́ ó sé é a yɛ.»

³Wáa Elɔdi tɛ́wɛɛ fɔ kó kɛ Yaya lálɔ kɛ a sili tó kɛ a bhyáa kaso la. A tɛ wɛɛ o fɔ kɛ a kun ngɛ́ a bhádhyemannjɛ Filipu muso Elodiyadi ta ko o lé lɔ. ⁴Kɛ mansɔɔ, Yaya tɛ́wɛɛ fɔ Elɔdi yɛ kó a mánngan kɛ Elodiyadi tá a muso le. ⁵Elɔdi tɛ́ɛ fɛ́ kɛ Yaya fáa, wáa a tɛɛ sháannan yaman o ɲɛn, kɛ mansɔɔ yaman o tɛ́ɛ Yaya yacela céla lé le. ⁶Wáa Elɔdi wóolo ŋo sámyɛ ŋo la, mɔɔn mínnu kíinin ndɛ́ɛ súnmannɔɔ ndɔ́ɔ o lɔ, Elodiyadi dhyémuso é lɔ ngɛ́ olu kɛ́ɛnnan. A ko é dhyáa Elɔdi yɛ. ⁷Kó ólu kɛ́ɲan man cé, aa láheli ta o síngbiinin ŋo yɛ kó o kɛ́ fé ŋóo fé ngófɔ a yɛ, kó a yáa o kɛ́ a yɛ. ⁸A lɔsunin ngwɔ a mán bhóo, Elɔdi dhyémuso é fɔ kó: Yaya Bátizelikɛbhaa kún ŋó bhyáa tása lɔ kɛ́nan a di mán yánun. ⁹O kóman óo mansacɛ o ɲánlasii. Wáa a yɛ láheli ta ni ŋólu ni a latuunnan ólu kósɔn, aa fɔ kó kɛ Yaya kún ŋo dí dhyé ŋó mán. ¹⁰Aa mɔɔn bhyáa kɛ táa Yaya kún ndɛ́ɛ kasobho ŋo la. ¹¹Ii a kún ŋo bhyáa tása lɔ kɛ́nan a lo síngbiinin ŋo bhóo, tó síngbiinin óo Yaya kún ŋó ló a wóobhaa bhóo. ¹²Yaya yɛ́ kaamɔɔndhye ŋolu nan Yaya fée ó tá kɛ a sutaa, tó kɛ táa saan o láce Ɛnza nan.

Ɛnza ŋé lɔ́min dila cɛ wáa lóo mán

Maki 6.30-44; Luka 9.10-17; Yaya 6.1-14

¹³Ɛnza ŋé Yaya sáyako o myɛ́n mínngɛ, aa í bhyáa kúun nɔn kɛ bhɔ́ yénɔn kɛ táa í kéenan ywáa cɛ́bhɔnin nɔ lɔ. Mɔɔn ólu a táako o myɛ́n, tó yamandhye ŋé bhɔ́ só ólu lá kɛ bhyáa Ɛnza nɔn fɛ́ i sénan. ¹⁴Ɛnza ŋé bhɔ́ Kúun ŋó lɔ́ mínngɛ, aa yamanba ó yé, i mánɲwaan é lo a lɔ tó aa i yɛ yaangalotɔ ólu lákɛɛnya. ¹⁵Ywáala é sé mínngɛ, a yɛ kaamɔɔndhye ŋolu í mángbaa a lá kɛ fɔ a yɛ kó: «Ya ŋó cɛ́bhɔnin ɲé, wáati o ló ŋwɛ́ɛn yánva. Yaman ó lábhyaa ké ii táa sunman nzá an ndɔ́ɔfɛ só ólu la» ¹⁶Waa Ɛnza ŋé fɔ i yɛ kó: «I mánngan kɛ táa, ále gbúlu a sunman ndí i man!» ¹⁷Ii fɔ Ɛnza ɲɛn kó: «Búlu lóo ní yɔ́ɔ dhyé nvyáa gbóto lée án móo yánun.» ¹⁸Ɛnza ngó i yɛ kó: «Áa nan olu lé ɲɛ́n.» ¹⁹Ɛnza ŋé fɔ kó yaman o a í síi lúu man bín ŋó ka. Oo kɛ́ mínngɛ Ɛnza búlu lóo ólu ní yɔ́ɔ dhyé nvyáa ó tá, kɛ í ɲán layɛɛ sángboo o mánshaa fɛ́ kɛ Ala bálika bhɔ́, tó kɛ búlu ólu kúunndɛɛtɛɛ kɛ i lo ló a yɛ kaamɔɔndhye ŋolu bhóo. Ólu búluguun ŋólu lɔ́taandaa yaman o la. ²⁰Mɔɔn ólu bɛ́ é lɔ́minkɛ kɛ fá. Tó ii nán seenin ndá ni fyáa láfanin né sunman ndɔto ó la. ²¹Mɔɔn mínnu tɛ́ɛ lɔ́minkɛsɛɛ o lɔ ólu tɛ́ɛ cɛ wáa lóo lú siya bhɔ́la ó tɛ́ muso ólu ní dhyémuu ólu la.

Ɛnza ŋé táaman kɛ́la bhá ó ka

Maki 6.45-52; Yaya 6.15-21

²²O kó óo bhɔ́ í lá tɛ́nmɛn, Ɛnza ŋé fɔ a yɛ kaamɔɔndhye ŋólu yɛ kó ii í bhyáa Kúun ŋó lɔ kɛ bhá ó tɛ́ɛ a ɲɛn kɛ táa a ɲan dɔ́ o mán sánnin ale a yaman ólu lábhyaa. ²³Aa yaman ólu lábhyaa mínngɛ, aa í yɛ́ɛ í kéenan tii ó ka kɛ í sɛ́ɛ. Ywáa ó sé ké aa yénɔn bhée. ²⁴Kúun ŋó wɛ́ɛ í ywáa yáɲan bhákaan ŋo la. Wáa fwɛ́ɛn ó bhyáa kóɲan o mán, jífwɛɛn o tɛ́ɛ Kúun ŋó láfinzanvinzanan kɛ mansɔɔ fwɛ́ɛn ó tɛ wɛɛ gbíiya i ka. ²⁵Fáyi o mán, Ɛnza ŋé táaman kɛ́ bhá ó ka kɛ táa a yɛ kaamɔɔndhye ŋólu saala. ²⁶Kaamɔɔndhye ŋólu a yé táaman kɛ́la bhá ó ka mínngɛ, ii sháan koyoongɛ fɔ́ ii fɔ́la kó: «Mɔɔn lɔ́ lé sáula káa kɛ́ wé!» Ii gbáa ngbáa sháanɲan bhóo. ²⁷Ɛnza ŋé fɔ i yɛ o ywáaninngee ŋo lɔ kó: «Áa í lɔ́ja! Né lée wé, a kɛ́nan sháan!» ²⁸Oo kɛ́ mínngɛ, Piyɛli é kóman ó tá kɛ fɔ kó: «Mantii o, ni íle lée wé, a fɔ kó ní táaman kɛ́ jí ó ka kɛ táa í saala.» ²⁹Ɛnza ngó a yɛ kó: «Nan!» Piyɛli é bhɔ́ Kúun ŋó lɔ tó kɛ táaman kɛ́ lámyaan jí ó ka kɛ táa Ɛnza manshaafɛ.

³⁰Wáa Piyɛli é yé mínngɛ óo fwɛ́ɛn ó wɛ́ɛ bwóɲan, aa sháan. O kɛ́ɲan o mán, aa táa yíi lé jí ó kɔɔ. Aa gbáa ndéeman kó: «Mantii o, ngála!» ³¹Íkɔlɔ téeman, Ɛnza ŋé í bhóo lábhɔ kɛ a myaan tó kɛ fɔ a yɛ kó: «Í ló yɛ lánanya ó lo ŋa lɔ́ɔ! Íi síkala mínnɛɛn le la?»

³²I bɛ́ é í yɛ́ɛ Kúun ŋó lɔ, fwɛ́ɛn óo í mánla. ³³Kó ólu kɛ́ɲan man cé, kaamɔɔndhye mínnu tɛ́ɛ Kúun ŋó lɔ, ólu í kúnmɛɛn nɔ́kɛɛ Ɛnza ɲɛn ni fɔ lé a yɛ kó: «Kɛ fɔ tinɲan in ne, íle lée Ala dhyénjɛ óle!»

Ɛnza ŋé Zenezalɛti lánga ŋo yaangalotɔ ólu lákɛɛnyala

Maki 6.53-56

³⁴Ii wɛɛ bhá ó tɛ́ɛla kɛ sé Zenezalɛti mála o lɔ. ³⁵O ywáa ó mɔɔn ólu Ɛnza manlɔ, ii táa o kóman ó láse o mála ywáa bɛ́ lɔ, tó mɔɔn olu nan yaangalotɔ ó bɛ́ lé Ɛnza ɲɛn, ³⁶Tó kɛ a dɛ́li kó aa dyɛn ké yaangalotɔ ólu a í bhóo túu a yɛ deekeba ó lágboo o lá. I súu súu é í bhóo túu a lá, o mɔɔn ó bɛ́ é kɛ́ɛnya.

Laanan kɔ́ɔkɔɔ ólu

Maki 7.1-13

¹Falizɛn nɔ́lu ní sɛliya kaamɔɔn lɔ́lu bhɔ́ Yeluzalɛmu kɛ táa Ɛnza nzaala kɛ fɔ a yɛ kó: ²«Mínnɛɛn lé kósɔn í yɛ́ kaamɔɔndhye ŋolu tɛ́ án myɛ́man olu yɛ laanan ó bhɔ́la a sháa mán? Kɛ mansɔɔ i tɛ́ i bhóo kwóla kɛ tó lɔ́minkɛla.» ³Ɛnza ŋé i yawi kó: «Tó álee lu wɛɛ, mínnɛɛn lé kósɔn álee í kwɔ́ kɛla Ala yɛ tɔ́ ŋo la kɛ a yɛ́ laanan o léelu bhɔ́ a sháa mán dɔ́lɔun? ⁴Wáa Ala é fɔ le kó: Í fá ní í wóobhaa bwóɲan, kó ní mɔɔn mín ngɛ kómanyoo nvɔ́ a fa wáman a wóobhaa man, o tíi ó kákan kɛ fáa lé. ⁵Wáa álee lu kó ní mɔɔn lɔ́ kɛ́ fɔ a fa yɛ wáman a wóobhaa yɛ kó: Ndɛ́ káa móota mín ndí í mán kɛ́ í lɔdhyɛman, ŋwɛ́ɛn wɛɛ o díla Ala man; ⁶kó dhyaalagbeya tɛ́ o lɔ́ bhée kó mɔɔn a í fá lú sɔ́ fé nzɔ́. Álee Falizɛn ŋolu kɛla céne kɛ Ala saaninkan ŋo bhɔ́ fila tó kɛ bhyáa álee gbúlu yɛ́ laanan dɔ́lɔun ŋó lé kwɔ. ⁷A fyáangafo ólu! Jó gbú le tɛ́ɛ céla Ezayi fɛ́ a láse ó lɔ́ a tá fa nvɛ́ kó

⁸Ala kó: Mɔɔn míinnu bwóɲanla í lá lɔ́ lé,

wáa i yóso o ywáa a já ne lá.

⁹Ii mátola gbɛ́ɛgbɛɛ lé wé,

í lée mín núu mɔɔn ólu kalanan tɔ́ nu la,

mín núu fáanan mɔɔndhye ŋolu la.»

Fé mín núu mɔɔn lánɔɔnla Ala koowaan la

Maki 7.14-23

¹⁰Ɛnza ŋé yaman o kíi kɛ́ fɔ i bɛ́ yɛ kó: «Áa í tóomanlɔ ké áa bhɔ́ kóman míin ɲánle: ¹¹A tɛ kó fé mín ŋé lónan mɔɔn lálɔ kó o lée mɔɔn lánɔɔnla Ala koowaan la. Kóman mín ŋé bhɔ́la mɔɔn lálɔ, o lée mɔɔn lánɔɔnla.» ¹²A yɛ kaamɔɔndhye ŋolu í mángbaa a lá kɛ fɔ a yɛ kó: «Íi lɔ ŋóo í yɛ́ kóman míin ŋwɛ́ɛn díin Falizɛn ŋolu la a?» ¹³Ɛnza ngó: «Né Fá mín ŋé sángboo ó lɔ, o mán yíi mínnu ló, o bɛ́ yáa bwɔ́. ¹⁴Áa Falizɛn ŋolu tó yénɔn lɛɛ! Fyóo née lúu wé mínnuu bhyaala fyóo ngbɛ́ɛlu ɲɛ́n. Ni fyóo ngɛ́ kɛ sháaɲɛn ne fyóo ngbɛ́ɛ ɲɛn, i fyáa o bɛ́ yáa í bé jáan kɔɔnnɔn!» ¹⁵Piyɛli é kóman ó tá kɛ fɔ a yɛ kó: «Saanan mín ŋé mɔɔnlanɔɔnko o ka, o kɔ́ɔfɔ án ɲɛn.» ¹⁶Ɛnza ŋé fɔ kó: «Ále yáanin bí ále mán yáakii sɔ́ɔ bhá ŋan? ¹⁷A mán lɔ kó fé ŋóo fé ngɛ́ lo mɔɔn lálɔ, aa tínminnan mɔɔn kɔ́ɔnnɔn lé kɛ tó bhɔ́la sháa kunmantaa fɛ́ a? ¹⁸Wáa fé mín ŋé bhɔ́la mɔɔn lálɔ, oo bhɔ́la mɔɔn yóso ó lé lɔ, o lée mɔɔn lánɔɔnla. ¹⁹Kɛ mansɔɔ míliya yóo ŋólu, mɔɔnfaa ólu, ɲɔnmɔɔnya ólu, játɔya ólu, soɲan olu, sɛ́ɛya ládi fwɔnɲan ŋólu ka ní mɔɔntɔɔcaan ŋólu bhɔ́la mɔɔn yóso ó lé lɔ. ²⁰O lée lúu mɔɔn lánɔɔnla! Wáa kɛ lɔ́min kɛ́ í bhóo kwóbhɛɛ o la, o tɛ́ mɔɔn lánɔɔnla.»

Lónanmuso lɔ é lála Ɛnza nan

Maki 7.24-30

²¹Ɛnza ŋé bhɔ́ o ywáa ó lɔ, tó kɛ táa Tili mála óni Sidɔn mála o lɔ. ²²Kananngamuso lɔ síininndɛ́ɛ o lánga ŋo lɔ, o muso óo nan Ɛnza nzaala kɛ í kan nányɛɛ kɛ fɔ kó: «Mantii o, Laula Bhɔ́nzɔ manɲwaan nán! Lámansa yóo nɔ́ é nyémuso ó fɛ́, a man ngɛ́nnɛn féu!» ²³Wáa Ɛnza mán a yawi. A yɛ kaamɔɔndhye ŋólu í mángbaa a lá kɛ a mánɲaankɛ kó: «Í tɛ́ kóman muso míin nvɛ́ a! Ɲɔ́ɔn a lɔ gbáanan án ngwɔ́ka ndá nín.» ²⁴Ɛnza ŋé i yawi kó: «Myáanin ɲe kɛ́nan Izalayɛlika ó léelu bwási, o mínnu e óo saa túunnin nú.»

²⁵Wáa muso óo nan í kúnmɛɛn nɔ́kɛɛ Ɛnza ngɛɛnnan kɛ fɔ kó: «Mantii o, nɔ́dhyɛman!» ²⁶Ɛnza ŋé a yawi kó: «Kɛ dhyémuu ólu yɛ sunman ŋó ta kɛ a lafii ŋwúunnin ŋolu kɔɔ o mánɲin!» ²⁷Muso óo fɔ a yɛ kó: «Tinɲan lée wé, Mantii o, wáa háanin sunman mín ŋé buunnan ŋwuunnindii ólu yɛ tabɛli o kɔɔ, ŋwúunnin núu o lɔ́ɔnan.» ²⁸Óo kɛ́ mínngɛ, Ɛnza ŋé a yawi kó: «Í yɛ́ lánanya ó a bwó, muso o! Íi fé mín ɲiinnan, Ala a o dí í mán!» Muso ó dhyémuso óo kɛ́ɛnya o wáati kée ŋó lɔ.

Ɛnza ŋé yaangalotɔ shɛ́ɛman nákɛɛnyala

²⁹Ɛnza ŋé bhɔ́ o ywáa ó lɔ kɛ táa Galile bhála o la. Aa í yɛ́ɛ tii lɔ́ ka kɛ í síi yénɔn. ³⁰Yamandhye nzhɛɛman ŋé nan a saala ni kuugba lú ní fyóo nú ní nanmaannin nú ní bhóbho lú ní yaangalotɔ súu gbɛ́ɛ shɛ́ɛman nú le. Ii nan i lala Ɛnza nze nvɛ́ tó aa i lákɛɛnya. ³¹Mɔɔn ólu bhóbho ólu yé kómanla mínngɛ, kɛ nanmaannin ŋólu lákɛɛnyanin ɲe, kɛ kuugba ólu yé táaman kɛ́la, kɛ fyóo ŋólu yé ywáa yéla, óo bháa i lɔ gbúnigbukɛ tó ii Izalayɛli yɛ Ala o tando téeman.

Ɛnza ŋé lɔ́min dila cɛ wáa náannin mán

Maki 8.1-10

³²Ɛnza ŋé a yɛ kaamɔɔndhye ŋolu kíi kɛ fɔ i yɛ kó: «Yaman míin mánɲwaan é ne lɔ́, kɛ mansɔɔ i tee sáwa lée ngwɔ́ka nín, sunman ndɛ́ i bhóo. Ndɛ́ fɛ́ kɛ i kɔ́ɔntɔ ó lábhyaa, ké i dɛ́sɛ sháala.» ³³Kaamɔɔndhye ŋólu fɔ a yɛ kó: «Yaman bá míin ngáa fá búlu mínnan, án ngáa bhɔ́ o búlu ó lé mín ne dhyɛ́ míin nɔn?» ³⁴Ɛnza ŋé i manɲaankɛ kó: «Búlu yée lée a bhóo?» Ii a yawi kó: «Búlu wóonvyaa, óni yɔ́ɔ fítii fítiinin nɔlu.» ³⁵Oo kɛ́ mínngɛ, aa fɔ yaman o yɛ kó kɛ í síi lúu mán. ³⁶Aa búlu wóonvyaa ólu ní yɔ́ɔ ólu tá kɛ Ala bálika bhɔ́, kɛ ale búlu ólu kúunndɛɛtɛɛ óni yɔ́ɔ ólu, tó kɛ i di a yɛ kaamɔɔndhye ŋólu mán. A yɛ kaamɔɔndhye ŋolu a lɔ́taandaa yaman ó la. ³⁷Mɔɔn bɛ́ɛ lɔ́minkɛ kɛ fá. Tó ii nán seenin wóonvyaa láfanin né sunman ndɔto ó la. ³⁸Mɔɔn mín núu lɔ́minkɛ, olu tɛ́ɛ cɛ wáa náannin né le, muso ólu ní dhyémuu ólu tɛ́ o la. ³⁹Ɛnza ŋé yaman o lábhyaa tó kɛ í bhyáa Kúun ŋó lɔ kɛ táa Magadan mala ó lɔ.

Falizɛn ŋolu ní Sadusi olu kó kɛ tɔɔmansii lɔ yáa i la

Maki 8.11-13; Luka 12.54-56

¹Falizɛn ŋolu ní Sadusi ólu í mángbaa Ɛnza nan a lɔswaan ndɔ́ɔ lɔ́: Tó íi fɔ a yɛ kó aa tɔɔmansii kée ngɛ́ i ɲánla, kɛ́ bhɔ́ sángboo o lɔ. ²Ɛnza ŋé i yawi kó: «Tee ó kɛ́ kɛ́ bénan wáati mínnɔn, áa fɔ́la kó: ‹Síin, tée ó táa í ɲánlasii, kɛ mansɔɔ sámanlaa ó mánywɛnin ɲe.› ³Tó a kɛ́ sámanlaa ó mánywɛnin ɲé sɔɔ mán, áa fɔ kó: ‹Sá ɲáa nan bí, fwɛ́ɛn ló ɲáan bhyáa, kɛ mansɔɔ sámanlaa óo táa í mánfin ne.› Áa sháa sámanlaa ó kó ólu ɲánfɔla, wáa tɔɔmansii mínnu é yáala wáati míin nú lɔ, a tɛ sháa olu ɲánfɔla! ⁴Án ɲɛ́n wáati miin mɔɔn mínnu manɲin. Ala kanmyaanbhɛɛ ó lée lúu tɔɔmansii ɲíinnan. Tɔɔmansii gbɛ́ɛ táa kɛ́ i yɛ́ bhée ní céla Zonasi yɛ́ tɔɔmansii o tɛ́.» Tó aa i lábhyaa, ii táa.

Kaamɔɔndhye ŋolu tɛ́ bhɔ́la Ɛnza ɲɛn kóman ó ɲánle

Maki 8.14-21

⁵Kaamɔɔndhye ŋolu táatɔ ó lé bhá ó ɲán dɔ́ o mán íi ɲan kɛ́ búlu lú tá. ⁶Ɛnza ŋé fɔ i yɛ kó: «Áa a yáakii tó a yɛ́ɛ lɔ́ Falizɛn ŋólu ní Sadusi ólu yɛ́ lévu o mán!» ⁷Kaamɔɔndhye ŋolu fɔ ɲɔ́ɔnɲɛn kó: «Ɛnza ŋé o fɔ́la kɛ mansɔɔ án man búlu tá!» ⁸I tɛɛ kóman mínnan, Ɛnza ndɛ́ɛ o lɔ, aa i manɲaankɛ kó: «Áa fɔ́la ɲɔ́ɔnɲɛn kun mínnɛɛn lé la kó búlu tɛ́ a bhóo? A yɛ́ lánanya ó ló ŋan lɔ́ɔ! ⁹A mán hákii sɔ́ɔ bhá ŋan? Búlu lóo mín ŋé í lɔ́taa cɛ wáa lóo ólu la, o kó ó tɛ́ a ɲán lá bhée ŋan? Áa seenin ɲée lé láfa o búlu ólu tɔ́ ólu la? ¹⁰Tó búlu wóonvyaa mín ŋé í lɔ́taa cɛ wáa náannin ó la, óni áa nán seenin ná mín né o búlu ólu tɔ́ ólu la, o kó ó tɛ́ a ɲán lá bhée íkwɔ a? ¹¹Aa kɛ́ díi tó a mán bhɔ́ ɲan le kó ngan ndɛ́ tɛ́ búlu mán? Wáa á i yáakii tó a yɛ́ɛ lɔ́ Falizɛn ŋolu ní Sadusi olu yɛ́ lévu o mán.» ¹²Oo kɛ́ mínngɛ, kaamɔɔndhye ŋolu bhɔ́ ɲan le kó Ɛnza mán kɛ́ fɔ́la kó ii í yáakii tó i yɛ́ɛ lɔ́ búlulafuunnzɛɛ o tá fa nvɛ́, wáa kó ii í yáakii tó i yɛ́ɛ lɔ́ Falizɛn ŋolu ní Sadusi olu yɛ́ kaa ŋo lé tá fa nvɛ́.

Piyɛli é lásela kó Ɛnza née Kísibhaa o le

Maki 8.27-30; Luka 9.18-21

¹³Ɛnza ŋé táa Filipu Sezale mála o lɔ. Aa a yɛ kaamɔɔndhye ŋolu mánɲaankɛ kó: «Mɔɔn ólu tá fɔli o lɔ, mɔɔn Dhyénjɛ ó yɛ́ɛtii lé?» ¹⁴Ii a yawi kó: «Lɔ́lu kó íi Yaya Bátizelikɛbhaa le le, lɔ́gbɛɛ lu kó íi Eli le le, tó lɔ́gbɛɛ lu yɛ́ɛ kó íi Zelemi le le wáman kó Ala yɛ céla gbɛ́ɛ.» ¹⁵Ɛnza ŋé a yɛ kaamɔɔndhye ŋolu mánɲaankɛ íkwɔ kó: «Tó álee ɲánla, ní yɛ́ɛtii le?» ¹⁶Simɔn mín ndɔ́ɔ íkwɔ kó Piyɛli, oo fɔ kó: «Íle lée Kílisi o le, Ala ɲáanman ŋó Dhyénjɛ ó.» ¹⁷Oo kɛ́ mínngɛ Ɛnza ŋé fɔ a yɛ kó: «Nisɔdhyaa é í yɛ, Yaya dhyénjɛ Simɔn, kɛ mansɔɔ mɔɔn mán o tínɲankoman míin nábhɔ í ɲánla. Nvá mín ŋé sá ŋó lɔ, o lée a lábhɔ í ɲánla. ¹⁸Tó ní fɔ í yɛ́ ngó íle Piyɛli16.18 Piyɛli tɔ́ɔ o kɔ́ɔ o tɔ́ɔko fáa o. i lée fáa gbɛ́yanin né le. Mɔɔn é bhó ŋo lɔ́la fáa man tɛ́nmɛn, ɲáan ɲɛ́n lánanbhaa olu kwɔ́sii íle lá o ɲán o mán. Háanin saya ó ɲán o táa lá o lánanbhaa olu mán. ¹⁹Ɲáan sángboo ó Mansaya ó lákeli ólu dí i mán. O ɲán o mán, íle kɛ́ fé ŋóo fé nzíli lúukolo ó ka, o sílinin ɲáan kɛ́ sá ŋó lɔ, í kɛ́ fé ŋóo fé nvwée lúukolo ó ka, o yáa fwée sá ŋó lɔ.» ²⁰Ɛnza ŋé wɛɛ kɛ fɔ a yɛ kaamɔɔndhye ŋolu yɛ kɛ mangbɛya kó i kɛ́nan fɔ mɔɔn sí yɛ kó ale lée Kílisi o le.

Ɛnza ŋé a yɛ tɔ́lɔya óni a sayako o fɔ́la

Maki 8.31--9.1; Luka 9.22-27

²¹Kɛ ta o wáati o mán, Ɛnza ŋé fɔ ó lámyaan a yɛ kaamɔɔndhye ŋolu yɛ́ cɛ́ɛne kó: «Fɔ́ ndáa Yeluzalɛmu kɛ táa tɔ́lɔya myáan gbúnigbu kɛ́ cɛba ólu ní faanlɛɛɲansebhaa olu kúnndii ólu ní sɛliya kaamɔɔn ólu bhóo. I yáa kɛ ké ní saya mánsɔɔ, wáa tee sawaɲɔɔnlo ŋó ɲáan kúun kɛ bhɔ́ saya bhóo o mán.»

²²Oo kɛ́ mínngɛ Piyɛli é Ɛnza ngíi í kéenan kɛ kóman a yɛ kɛ mangbɛya kó: «Fɛ́sɛ, Mantii o! O kó ólu táa í sɔ́ɔ tún!» ²³Wáa Ɛnza ŋé í ɲán yɛ́ɛman Piyɛli lɔ́ ni fɔ lé a yɛ kó: «Táa kɛ bhɔ́ ngwɔ́, Sɔtaannan! Ílee né yɛ́ kó ólu cáannzhaa lé ɲíinnan, Kɛ mansɔɔ í tɛ́ i mílila óyoo Ala, wáa óyoo mɔɔn ólu.»

²⁴O lɔ Ɛnza ŋé fɔ a yɛ kaamɔɔndhye ŋolu yɛ kó: «Ní mɔɔn mín ŋé fɛ́ kɛ́ í bhyáa ngwɔ́, fɔ́ o tíi o a í bá a yɛ́ɛ lɔ. Kɛ a yɛ́ɛ gbáanɲii o tá kɛ́ bhyáa né kwɔ́. ²⁵Kɛ mansɔɔ mɔɔn oo mɔɔn é fɛ́ kɛ a ni o kísi, o tíi o yáa bɔɔn a ní o lɔ. Wáa mɔɔn óo mɔɔn kɛ bɔɔn a ní o lɔ́ né kósɔn, o tíi o yáa ɛliyanan o sɔ́ɔ. ²⁶Oo mínnɛɛn le ɲánla mɔɔn mán kɛ́ dínɲanmanfe ŋó bɛ́ sɔ́ɔ tó kɛ táa bɔɔn í ní o lɔ́? Mɔɔn ó sé kɛ́ fé mínnɛɛn lé dí a ní o kunmanka lé? ²⁷Mɔɔn Dhyénjɛ, óni a yɛ malɛɛka olu yáa nan a Fá Ala yɛ nɔ́lɔya ó lɔ, tó kɛ mɔɔn bɛ́ kée ngéenan saa o di kɛ kéeɲan ni i kɛ́ko olu le.²⁸Tó ní fɔ a yɛ́ tinɲan la ngó: Mɔɔn mín núu yánun nín, o lɔ́lu yɛ́ɛ táa sayakɛ sánnin mɔɔn Dhyénjɛ ó a nan a yɛ́ mansaya ó lɔ.»

Kaamɔɔndhye nzawa wɛ́ɛ Ɛnza nɔ́lɔyaman ŋó yé

Maki 9.2-13; Luka 9.28-36

¹Tee wɔ́ɔlɔ tínminnin ngwɔ, Ɛnza ŋé Piyɛli ní Zaki ní Zaki bhádhyemannjɛ Yaya lú kíi kɛ táa ni ile i kéenan tíiba lɔ́ ka. ²Ɛnza ngɛseɲan oo yɛ́ɛman i ɲanla, a ɲanlɔshaa ó mannan mannan ŋé bhɔ́ óyoo teemaan, tó a yɛ déeke olu gbɛ́nin ndɛ́ɛ óyoo kɛ́ɛnɲan. ³Tó kaamɔɔndhye nzawa ólu céla Musa ní céla Eli yé ké ólu ní Ɛnza ŋé kómanla. ⁴Piyɛli é fɔ Ɛnza ɲɛn kó: «Mantii o, án ngɛ yánun ŋó wɛ́ɛ físaya. Ni í kɛ́ sɔ́n, ɲáan tóo sáwa lɔ́ ya: Í tá kée, céla Musa tá kée, óni céla Eli tá kée.» ⁵Aa tó kóman ó la tó káwa lɔ́ é nan i mantuun. O káwa o mannan mannan ndɛ́ɛ bhɔ́la. Saaninkan nɔ é bhɔ́ káwa ó cɛ́man kɛ fɔ kó: «Míin née nyénjɛ óle, mín ŋan dí ɲɛ́n koyoongɛ. Áa a kómankan ŋo lɔ́myɛn!» ⁶Saaninkan mín ŋé wé, kaamɔɔndhye ŋolu o myɛ́n mínngɛ, i man é sháan fɔ́ íi í kɛ́la lúuman kɛ í cé gbáan lúu lɔ. ⁷Ɛnza ŋé í mángbaa i la kɛ í bhóo túu i la tó kɛ fɔ kó: «A kɛ́nan sháan, áa í wíi.» ⁸Ii í kún nánwii o lé lɔ, wáa kɛ bhɔ́ Ɛnza nɔn, i man mɔɔn gbɛ́ɛ yé. ⁹I tɛɛ bhɔ́la tii ó ka mínngɛ, Ɛnza ŋé fɔ i yɛ kɛ a mangbɛya kó: «Áa kó mín ɲé nín, a kɛ́nan o lábhɔ mɔɔn sí ɲánla sánnin mɔɔn Dhyénjɛ ó kúunnzan o cɛ kɛ bhɔ́ su ólu cɛ́man.»

Kaamɔɔndhye ŋolu ɲaanli kɛla Eli ta fa ŋo fɛ́

¹⁰Kaamɔɔndhye ŋolu Ɛnza manɲaankɛ kó: «Mínnɛɛn le kósɔn sɛliya kaamɔɔn olu fɔ́la kó fɔ́ céla Eli lé á nan ótun?» ¹¹Aa i yawi kó: «Aa céne, céla Eli le káa nan ŋótun kɛ́nan kó ŋólu bɛ́ lɔ́bhyɛ. ¹²Wáa tó ní fɔ a yɛ́ ngó céla Eli wɛ́ɛ wɛɛ nan la, wáa mɔɔn ó léelu mán a mánlɔ. Kó mín ɲé dhyáa i yɛ, ii o lá a ka. Mɔɔn Dhyénjɛ, o gbú yɛ́ɛ káa tɔ́lɔya myáan i bhóo o ɲán kée ŋó lé mán.» ¹³Kaamɔɔndhye ŋolu bhɔ́ a ɲan lé o lé lɔ óo a kan ndɛ́ɛ Yaya Bátizelikɛbhaa le man.

Ɛnza ŋé kaweenin benzhaayatɔ lɔ́ lákɛɛnyala

Maki 9.14-29; Luka 9.37-43a

¹⁴Ɛnza ni a yɛ kaamɔɔndhye ŋolu sé yaman ó tɔ́ɔfɛ mínngɛ, cɛ lɔ́ é í mángbaa Ɛnza nan kɛ í kúnmɛɛn nɔkɛɛ a kɔɔ ¹⁵tó kɛ fɔ a yɛ kó: «Mantii o, nyénjɛ ó manɲwaan mánfɛɛ. Benzhaaya lée a lá, óo a tɔ́lɔla kóyoongɛ. A kɛ wíi nín aa a labe tá lɔ wáman jí lɔ. ¹⁶Ní nán a le í yɛ́ kaamɔɔndhye ŋolu fɛ́ wáa i man sé a lákɛɛnyala» ¹⁷Ɛnza ŋé fɔ kó: «Ále wáati miin mɔɔn lánanbhɛɛ ólu! Ále mínnu tɛ́ Ala sháa o ka. Né káa tó a fɛ́ yánun kɛ táa sé fɔ́ɔ wáati mínnɛɛn lé mán? Né káa ále lɔ́myaan kɛ sé fɔ́ɔ wáati mínnɛɛn lé mán ósɔ? Áa nan dhyé ŋó lé ɲɛ́n ya.» ¹⁸Ɛnza ŋé í táan fɔ́ lámansayoo ŋó yɛ, lámansa yóo ŋóo bhɔ́ dhyé ŋó fɛ́. Aa kɛ́ɛnya íkɔlɔ. ¹⁹Kaamɔɔndhye ŋolu í mángbaa o lé lɔ́ Ɛnza nán í kéenan kɛ a manɲaankɛ kó: «Mínnɛɛn kósɔn án nee mán sé o lámansa yóo ŋó gbɛnan?» ²⁰Ɛnza ŋé i yawi kó: «A yɛ́ lánanya ó a lɔ́ɔ lé koyoongɛ. Tó ní fɔ a yɛ́ tinɲan in ne ngó, ní a tɛɛ kɛ́ óo a yɛ́ lánanya ó a lɔ́ɔ óyoo mútaalikoo, a tɛ́ɛnan sé fɔ́la tii míin ɲɛn kó aa bhɔ́ ya kɛ táa yeenɔn tó a tɛɛ o kɛ. A tɛ́ táa kwee kó óo kó mán. ²¹[Wáa mɔɔn tɛ́ sháa lámansa yóo nzúu míin ngbɛnan ni mɔɔn mán í sɛ́ɛ óni kɛ súnno.]»

Ɛnza ŋé a sayako óni a kuunngo o fɔ́la íkwɔ

Maki 9.30-32; Luka 9.43-45

²²Ló nɔ́ la ké kaamɔɔndhye ŋo bɛ́ ládhyɛnin ɲé Galile, Ɛnza ŋé fɔ i yɛ kó: «Mɔɔn Dhyénjɛ, o yáa ló mɔɔn ólu bhóo ²³kó óo kó é kɛ olu a a fáa. Wáa a yɛ saya ó tée sáwaɲɔn lo ŋo kɛ́se, a yáa kúun kɛ bhɔ́ su ólu cɛ́man.» O kóman óo kaamɔɔndhye ŋolu nílafin ngbúnigbu kɛ.

Ala bhatobhomba ó bhóobhɔko

²⁴Ɛnza ni a yɛ kaamɔɔndhye ŋolu lo mínngɛ Kapɛnamu, mɔɔn mínnu tɛ́ɛ Ala bhatobhomba ó bhóobhɔ ó myáanla, olu í mángbaa Piyɛli la kɛ a manɲaankɛ kó: «A kaamɔɔncɛ tɛ́ Ala bhatobhomba ó bhóobhɔ ó lɔ a?» ²⁵Piyɛli kó: «Aa a bhɔ́la kɛɛ!» Piyɛli tɛ́ɛ lónan bhó ŋó lá wáati mínnɔn, Ɛnza ŋé kóman ó tá kɛ fɔ kó: «Simɔn, í tá ɲánla ó lɔ yɛ́ne kákan kɛ bhóobhɔ ólu ní nísɔɔn ólu sála dínɲan míin mansa ólu yɛ? I yɛ́ɛlamɔɔn ólu bháa mɔɔn gbɛ́ɛ olu?» ²⁶Piyɛli kó mɔɔn gbɛ́ɛ olu. Ɛnza ngó a yɛ o lé lɔ kó: «O ɲán o mán, mansa yɛ́ɛlamɔɔn ólu mánngan kɛ fé mɔ́. ²⁷Wáa án ngɛ́nan lo mɔɔn míinnu la. Oo lɔ mínngɛ, táa í yɛ́ lwée ó bhyáa kɔ́ɔji ó lɔ. Yɔ́ɔ jónan mín ngɛ í tá íi o lábhɔ kɛ a lá láka, í yáa wɛ́ɛgbannan nɔ yé a lálɔ. O yáa nan kɛ́ íle ní né tá bhóobhɔ óle. Í kɛ́nan, íi a lo i bhóo ndá bhóobhɔ le.»

Yɛ́nee kaamɔɔndhye ŋo bɛ́ lɔ mɔɔnba óle?

Maki 9.33-37; Luka 9.46-48

¹O wáati kée ŋó lɔ, kaamɔɔndhye ŋolu í mángbaa Ɛnza nan kɛ a manɲaankɛ kó: «Yɛ́ɛtii é bɛ́ lɔ mɔɔnba óle sángboo ó Mansaya ó lɔ?» ²Ɛnza ŋé dhyémuu lɔ́ kíi kɛ alalɔ i cɛ́man ³tó kɛ fɔ kó: «Tó ní fɔ a yɛ́ tinɲan in ne ngó, ni a mán yɛ́ɛman kɛ kɛ́ óyoo dhyémuu lú, a táa lo sángboo ó Mansaya ó lɔ tún. ⁴Mɔɔn mínnu wɛ́ɛ í bhóo síi Ala yɛ́ Mansaya ó kɔɔ, mɔɔn mín ŋé fɛ́ kɛ kɛ́ o mɔɔn ó bɛ́ lɔ mɔɔnba óle, o tíi ó kákan kɛ í mányii lé kɛ kɛ́ óyoo dhyé mín ɲé nín. ⁵O kwɔ, ni mɔɔn mín ngɛ í ɲán síi dhyémuu míin nzúu o kɔ́ɔ né tá ɲiinɲan mán, o tíi óo í ɲán síila né lé kɔ́ɔ wé.»

Ɛnza ngó kɛ í yɛ́ɛ myaan

Maki 9.42-48; Luka 17.1-2

⁶«Dhyémuu mínnu wɛ́ɛ lá né la, ní mɔɔn mín ngɛ kɛ́ sɔ́ɔbu le kɛ o kée ngúnnɔn cáan, mín ndɛ́ɛ físaa o tíi o mán o lée kɛ káwaguun mbelebeleba le gúun o tíi o kannan kɛ a tii o bé kɔɔji o cɛ́man. ⁷Dínɲan ó mɔɔn mín núu kɛ́la sɔ́ɔbu le kɛ i mɔɔnɲɔɔn ólu kúnnɔn cáan, kunnangboya lo ɲé olu yɛ kɛ́yi! Dhyaalagboya lé sɔ́ɔbu yáa kɛ́ mɔɔn ólu kúnnɔn cáan ŋó la. Wáa íle mɔɔn mín ngɛ kɛ́ o sɔ́ɔbu le, kunnangbeya é í yɛ́! ⁸Ni í bhóo ó wáman í sé ŋó kɛ́ kɛ́ sɔ́ɔbu le kɛ́ í bhyáa yúumukɛ ó lɔ, a tɛɛ í lá kɛ a lafii. Í bhóokeenanman ŋó wáman í séngeenanman ŋó kɛ́ lo ɛliyanan o lɔ, o a físaa í mán í bhóo fyáa óni í sé nváa ó tó ó lé í lá kɛ́ í láfii yaananman tá o lɔ. ⁹Tó ni í ɲándhye ŋó kɛ́ kɛ́ sɔ́ɔbu le kɛ í bhyáa yúumukɛ ó lɔ, a bhɔ́ í lá kɛ a lafii. Í ɲánkeeman ŋó ló ŋó ɛliyanan o lɔ, o a físaa í mán í ɲandhye nvyáa ó tó ó lé í lá kɛ́ í láfii yaananman tá o lɔ.»

Saa mín ŋwɛ́ɛn túun kɛ́wɛɛ kɛ yé

Luka 15.3-7

¹⁰«Áa í yɛ́ɛ myaan! Ŋwɛ́ɛn dhyémuu mínnu yɛ kóman kɛ sɛ́n ni ŋwé, a kɛ́nan o súu súu lɔ́ɔya. Tó ní fɔ a yɛ́ tinɲan in ne ngó i yɛ malɛɛka olu sé kɛ táa nvá fɛ́ yénɔn kúdɛyi sá ŋó lɔ. ¹¹[Mɔɔn mínnu tɛ́wɛɛ túun, mɔɔn Dhyénjɛ óo nan o lée lú kísi tɔ́ɔ lɔ.] ¹²A tá ɲánla ó lɔ, ni saa kɛnmɛn kɛ́ kɛ́ mɔɔn lɔ́ bhóo ké o kée ŋan túun, o tíi ó mánfaa saa bíkɔɔnndɔ ni kɔɔnndɔ ŋo tó tii o ka kɛ táa kée mín wɛɛ túun wé kɛ táa ó ɲiin ŋan? ¹³Tó ní fɔ a yɛ́ tinɲan la ngó, ni a kɛ saa túunnin ŋó yé, a nisɔ yáa dhyáa kɛ tínmin saa bíkɔɔnndɔ ni kɔɔnndɔ ŋólu tuunmɛɛya ó ka. ¹⁴Aa céne, a Fá mín ŋé sá ŋó lɔ, o tɛ́ fɛ́ ké dhyémɛnsɛn ŋó sí a túun.»

Yúumu mín ngɛ kɛ́ lánanbhaa olu cɛ

¹⁵«Ni í mɔɔnɲɔɔn o kɛ́ i yáacɛ tá, táa a saala kɛ ó fɔ a yɛ́ i kéenan. Ni a kɛ í kómankan ŋo lɔ́myɛn, ké í wɛ́ɛ ale ní íle cɛ o lɔ́bhyɛ né wé. ¹⁶Wáa ni a kɛ í bá kɛ i lɔ́myɛn, íi mɔɔn kée ni mɔɔn fyáa lú sí la í ka kɛ táa a ládhye, kɛ mansɔɔ Musa yɛ́ tɔ́ ŋo kó kó ó bɛ́ a í lɔ́bhyɛ sɛ́ɛya fyáa wáman sawa ɲánla.¹⁷Ni a man sɔ́n o bɛ́ kwɔ, aa á cɛ o lɔ́ko ó lábhɔ lánanbhaa olu ɲánla. Ni a lo mán sɔ́n kɛ lánanbhaa olu lɔ́myɛn, aa á yace lánanbhɛɛ le wáman nísɔɔnmyaanbhaa le. ¹⁸Tó ní fɔ a yɛ́ tinɲan in ne ngó, álee kɛ́ fé ŋóo fé nzíli lúukolo ó ka, o sílinin ɲáan kɛ́ sá ŋó lɔ, á kɛ́ fé ŋóo fé nvwée lúukolo ó ka, o yáa fwée sá ŋó lɔ.

¹⁹Tó ní fɔ a yɛ́ tinɲan in ne íkwɔ ngó, ni mɔɔn fyáa kɛ́ bhyɛ kée mán lúukolo míin nga kɛ kó lɔ́ ɲíin Ala fɛ́ sɛ́ɛ o lɔ, Nvá mín ŋé sá ŋó lɔ, o yáa o kó ó kɛ́ í yɛ. ²⁰Aa céne, ni mɔɔn fyáa wáman mɔɔn sawa kɛ́ ɲɔ́ɔn nadhyɛ né kósɔn ywáa óo ywáa lɔ, ní olu fɛ́ yénɔn lé wé.»

Bháalakɛdhye mín ndɛ́ yafala

²¹Piyɛli é í mángbaa Ɛnza nan kɛ a manɲaankɛ kó: «Mantii o, ní mɔɔnɲɔɔn lɔ kɛ ɲáacɛ tá, ngákan kɛ yafa a man síɲan yée lé kɛ? Síɲan wóonvyaa a?» ²²Ɛnza ngó: «Ɔn-ɔn, ndáa fɔ í yɛ́ ngó íi yafa síɲan wóonvyaa lɛ́, wáa fo síɲan bíwoonvyaa síilaaman wóonvyaa. ²³O ɲán o mán, Ala yɛ́ Mansaya óo tɛ́nmɛn, o lée nín: Ló nɔ́ la, kunndii lɔ é fɔ kó a yɛ wɛ́ɛ mín ŋé yúu la, a yɛ bháalakɛdhye ŋolu la, kó aa fɛ́ kɛ o lá nɔ́. ²⁴Aa o kóɲanbhɔ ó lámyaan wáati mínnɔn, ii yuutii o kée lánan a saala, wɛ́ɛ mín ɲúu tɛ́ɛ o la, o tɛ́ɛ sháa gbúnigbukɛ. ²⁵Fé ndɛ́ tɛ́ o yuutii o bhóo kɛ a yɛ yúu ó sala. Kó ólu kɛ́ɲan man cé, a kunndii óo fɔ kó kɛ ale ní a muso ní a dhyé ŋó bɛ́ fele yɔɲan bhóoman tó kɛ a bhóota o bɛ́ fele ké aa sé a yɛ yúu ó sálala o ɲán o man. ²⁶Bháalakɛdhye ŋóo í kúnmɛɛn ngɛ́ lúu lɔ́ a kunndii o kɔɔ kɛ fɔ a yɛ kó: ‹Mánkoto! Í yóso swáanya nvɛ́, ɲáan í yɛ́ yúu ó bɛ́ sala!› ²⁷A mánɲwaan é lo a kunndii o lɔ, tó óo yúu o lábe kɛ cɛ ó bhyáa kɛ táa. ²⁸O cɛ ó bhɔ́nin ŋó kwɔ, óo bhyɛ a bháalakɛɲɔɔn ó lɔ́ le. Ale yɛ́ wɛ́ɛgbannan déniye kɛnmɛn tɛ́ɛ o la. Aa o bháalakɛdhye ŋo myáan a kan ŋo man kɛ a já kɛ a ɲaankii gbɛ́nnɛn ni fɔ lé a yɛ kó: ‹Ɲɛ́n yúu ó sala!› ²⁹Bháalakɛdhye ŋó o í kúnmɛɛn ngɛ́ lúu lɔ́ a kɔɔ kɛ a dɛ́li tá kó: ‹Mánkoto! Í yóso swáanya nvɛ́, ɲáan í yɛ́ yúu ó sála!› ³⁰Wáa cɛ óo ó í bá ngbáan tó kɛ a bháalakɛɲɔɔn ó láfii kaso lá sánnin a yɛ yúu ó sála sán o cɛ. ³¹Bháalakɛdhye ndɔ ólu ɲán é lɔ o kó kɛ́se ŋó lɔ mínngɛ, óo i diin ngbúnigbu kɛ tó ii táa o kó ó bɛ́ lábhɔ i yɛ kunndii o ɲánla. ³²Oo kɛ́ mínngɛ, kunndii oo bháalakɛdhye ŋo kíi kɛ fɔ a yɛ kó: ‹Íle bháalakɛdhye ɲóo ŋó, ɲɔ́ɔn née í tá yúu ó lábe kɛ kúun ngɛ́ ndɛ́li ó lá í kwɔ́ lé. ³³Aa kɛ́ díi tó íle mán í bháalakɛɲɔɔn ó manɲwaan mánfɛɛ óyoo née mánɲwaan íle lá tɛ́nmɛn?› ³⁴Kunndii o mwɛ́nnɛnkoɲan o mán, aa bháalakɛdhye ŋo bhyáa kaso lá tɔ́lɔya kɔɔ, kó ni ale kunndii o yɛ́ yúu ó mán sála féfe, kó o bháalakɛdhye ŋo táa bhɔ́.» ³⁵Ɛnza ŋé wɛɛ kɛ fɔ kó: «Nvá mín ŋé sángboo ó lɔ, o káa a bɛ́ kée ngéenan myáan o ɲán kée ŋó lé mán ni a mán kɛ́ yafala a mɔɔnɲɔɔn mán i yóso ó bɛ́ lá.»

Ɛnza ngó fúusa ó mánɲin

Maki 10.1-12

¹Ɛnza ŋé wɛɛ o ládhyelikɛ ólu lá mínngɛ, aa bhɔ́ Galile kɛ táa Zude mála ŋo lɔ́ Zuludɛn ma ó ɲán dɔ́ o mán. ²Yamanba é táa a kwɔ́ka ó ywáa ó lɔ́, aa i lákɛɛnya o ywáa o lɔ. ³Falizɛn nɔ lúu í mángbaa a lá á lɔswaan móo man, ii a manɲaankɛ tá kó: «A láanin ɲe ké cɛ o waa a muso o fúu sá kún mbɛ́ súu la a?» ⁴Ɛnza ŋé i yawi kó: «Á man ó kála ma ŋan? Ko dínɲan lamyaan ó lɔ, Ala é cɛ ní muso lé la ⁵tó kɛ fɔ kó: O lé kósɔn cɛ óo bhɔ́la a wóobhaa ni a fa lú ka kɛ í gbɛ́nnɛn a muso mán, tó i fyáa óo kɛ́ fásisoo kéene.⁶O ɲán o mán, i tɛ́ mɔɔn fyáa lé bhée, fɔ́ fasisoo kéembe. O lé kósɔn Ala wɛ́ɛ fé mín ngɛ kéene mɔɔn sí mánngan kɛ olu fála.» ⁷Falizɛn ŋolu a manɲaankɛ kó: «Aa kɛ́ díi ló tó Musa é fɔ kó ni cɛ ólu fɛ́ kɛ i muso ólu fúu o sá, kó i kákan né kɛ fúusa sɛ́wɛ tɛɛ kɛ a lo i muso ólu bhóo?» ⁸Ɛnza ŋé i yawi kó: «Céla Musa é fɔ kó áa sé kɛ fúu o sá, á yɛ́ tóolagbɛya lé kósɔn. Ni o tɛ, a tɛ tɛ́ kála cé kɔ́ɔ. ⁹Wáa, tó ní fɔ a yɛ́ ngó cɛ óo cɛ kɛ́ í bá a muso lɔ kéni ó mán ɲɔnmɔɔnya kɛ, kɛ muso gbɛ́ɛ ta, o cɛ ó wɛ́ɛ ɲɔnmɔɔnya lé kɛ́ wé.»

¹⁰Ɛnza ɲɛn kaamɔɔndhye ŋolu kó a yɛ kó: «Ni fúu ó wɛ́ɛ tó o lé mán, musota ó tɛ́ í lábhyaa o lɔ́ kéene a?» ¹¹Ɛnza ŋé i yawi kó: «Ŋwɛ́ɛn a kála kó mínnan wé, cɛ o bɛ́ tɛ́ sé í bhóo síila o kɔɔ, fɔ́ Ala kɛ́ o ní ó bhyáa mɔɔn mín ngɔɔnnɔn. ¹²Kún gbɔ́gbɔ lée musotabhɛɛya o lɔ: Cɛ lɔ́ lúu wóo ké i tɛ cɛya lɔ, mɔɔn ólu lɔ́ gbɛ́ɛlu bhɔ́la cɛya lɔ́, tó lɔ́ lúu í kúnnzii la musotabhɛɛya o kɔ́ɔ kɛ́ a kún ngɛ sángboo ó Mansaya o le! Mɔɔn mín ŋé sé í bhóo síila o kóman ólu kɔɔ, o tíi o a í bhóo síi a kɔɔ!»

Ɛnza ni dhyémɛnsɛn ŋólu cɛ o

Maki 10.13-16; Luka 18.15-17

¹³Mɔɔn olu nan dhyémuu lɔ́lu lé Ɛnza ɲɛn kó aa í bhóo lá i kúnnɔn kɛ í sɛ́ɛ i yɛ, wáa kaamɔɔndhye ŋólu yámanngɛ o mɔɔn ólu mán. ¹⁴Oo kɛ́ mínngɛ Ɛnza ŋé fɔ kó: «Áa dhyémuu ólu tó yé ké ii nan ne mán, a kɛ́nan í síi i ɲan lɔ. Kɛ mansɔɔ mɔɔn mín núu óyoo dhyémuu míinnu sángboo ó Mansaya ó ólu ta le le.» ¹⁵Ɛnza é í bhóo lá i kúnnɔn, kɛ bhɔ́ ó ywáa ó lɔ.

Nanfoo tɛ́ɛ káweenin mín móo

Maki 10.17-31; Luka 18.18-30

¹⁶Cɛ lɔ́ é í mángbaa Ɛnza nan kɛ a manɲaankɛ kó: «Kaamɔɔn, ngákan kɛ kóbhɛɛ mínnɛɛn lé kɛ kɛ ɲáanmanɲan wɛ́ɛbhɛɛ ó sɔ́ɔ?» ¹⁷Ɛnza ŋé a yawi kó: «Íi mánɲaankɛla kóbhɛɛ ó tá fa nvɛ́ mínnɛɛn lé la? Ala kéembe lé káɲin. Ni íi fɛ́ kɛ ɲáanmanɲan wɛ́ɛbhɛɛ o sɔ́ɔ, tɔ́ ŋolu bhɔ́ sháa man.» ¹⁸Cɛ óo a manɲaankɛ kó tɔ́ mínnɛɛn lu? Ɛnza ngó: Í mánngan kɛ mɔɔn fáa, í mánngan kɛ ɲɔnmɔɔnya kɛ, í mánngan kɛ fwɔnɲan la í mɔ́ɔnninnvinɲɔɔn ó la, í mánngan kɛ soɲan kɛ.¹⁹Í fá ní í wóobhaa bwóɲan. Í mɔ́ɔnɲɔɔn ó a dhyáa í yɛ́ óyoo íle gbú a dí í yɛ́ɛ yɛ ɲán mín man.²⁰O káweenin ŋoo fɔ kó: «Ŋwɛ́ɛn o tɔ́ ŋo bɛ́ bɛ́ sháa lataaman. Ngákan kɛ mínnɛɛn lé kɛ́ o kwɔ?» ²¹Ɛnza ŋé a yawi kó: «Ni í tɛ́ fɛ́ ké sɔ ŋan sɔɔ í lá, táa í bhóofe ŋo bɛ́ fele kɛ a wɛɛ o dí faannda ŋólu mán, o kɛ́ kɛ í yáa nanfooba sɔ́ɔ sá ŋó lɔ. Í kɛ́wɛɛ o la, íi bhyáa ngwɔ́.» ²²Wáa káweenin ŋoo o kóman ó myɛ́n mínngɛ, aa bhɔ́ yénɔn a ɲanlasiinin ŋó le, kɛ mansɔɔ nanfooba lé tɛ́ɛ a bhóo.

²³Oo kɛ́ mínngɛ, Ɛnza ŋé fɔ a yɛ kaamɔɔndhye ŋolu yɛ kó: «Tó ní fɔ a yɛ́ tinɲan in ne ngó, nanfootii ó lo ŋo sángboo ó Mansaya ó lɔ, o lo a gbɛ́ɛ ósɔ! ²⁴Ní fɔ́la a yɛ́ íkwɔ ngó ɲɔ́ɔnmɛɛn ó lo ŋó nɔɔnyanin ɲé kɛ́ɛla ŋó jáan ó fɛ́ kɛ tínmin nanfootii ó lo ŋó ka Ala yɛ́ Mansaya ó lɔ.» ²⁵Kaamɔɔndhye ŋolu o kóman ó myɛ́n mínngɛ, oo i kɔɔnnɔnfii fɔ́ ii ɲɔ́ɔn manɲaankɛla kó: «Yɛ́ɛtii é sé kɛ́ kísi o lɔ wɛ́?» ²⁶Ɛnza ŋé i mánfɛɛ kɛ fɔ i yɛ kó: «Kísili o sé tɛ́ Adamandhye ŋó yɛ, wáa a sé é Ala le yɛ!» ²⁷O lɔ Piyɛli é fɔ a yɛ kó: «Án née mínnu wɛ́ɛ án ngwɔ kɛ fé ŋó bɛ́ la tó kɛ bhyáa í kwɔ́ka, án née káa kɛ́ díi o lɔ wɛ́?» ²⁸Ɛnza ŋé i yawi kó: «Tó ní fɔ a yɛ́ tinɲan in ne ngó, mɔɔn Dhyénjɛ o yáa í síi a yɛ́ mansayagbaanin nɔ́lɔman ŋó ka dínɲan kwáa o lɔ. O kɛ́ kɛ́, ále mín núu ngwɔ́ka, ále yáa í síi mansayagbaanin ndá ni fyáa o ka kɛ Izalayɛli síya tá ni fyáa ólu ta kíti o tɛ́ɛ. ²⁹Tó mɔɔn óo mɔɔn é í kwɔ́ kɛ́ i yɛ bhó ní i bhádhyenjɛman ŋóni bhádhyemusoman ní i fa ní i wóobhaa ni i dhyé nú ní i yɛ sɛɛn ólu lá né kósɔn, o tíi ó yáa olu súu kɛnmɛn sɔ́ɔ, tó a nin ŋé kɛ́ ɲáanmanɲan wɛ́ɛbhɛɛ o le. ³⁰Mɔɔn mínnu é ɲɛ́n bí nín, o shɛ́ɛman ɲáan tó kwɔ́, tó mín núu kwɔ́, olu shɛ́ɛman ɲáan bhyáa ɲɛ́n.»

Kɔndalakɛbhaa mín núu bháalakɛla lɛ́zɛnnvyɛ ó lɔ

¹«Ala yɛ́ Mansaya óo tɛ́nmɛn, o lée nín: Sɛɛntii o wɛ́ɛ bhɔ́ sɔɔjonan o mán kó a káa kɔndalakɛbhaa lu tá kɛ táa bháala kɛ́ a yɛ lɛ́zɛnnvyɛ ó lɔ. ²Ale ní olu bhyɛ kó o bháala o kákan kɛ bhyɛ wɛ́ɛgbannan ngée ne mán, tó aa i lataa bháalakɛlaa ó lɔ́ a yɛ lɛ́zɛnnvyɛ ó lɔ. ³Aa wɛɛ kɛ bhɔ́ kokwaakɛ siinndee wáati o lɔ. Aa kɔndalakɛbhaa gbɛ́ɛlu yé bhálo kɛ bháalaɲiimaa olu síilaa ó lɔ, la tɛ́ tɛ́ olu mán. ⁴Aa fɔ i yɛ kó: ‹Ále a táa bháala kɛ́ ɲɛ́n lɛ́zɛnnvyɛ ó lɔ́ íkwɔ, á kákan ni saa mín né, ɲáan o dí á man.› ⁵Ii táa. Teelatee ŋó fɛ́, sɛɛntii oo bhɔ́ íkwɔ, óni teefaan ŋwáati o lɔ kɛ kɔndalakɛbhaa gbɛ́ɛlu látaa a yɛ lɛ́zɛnnvyɛ ó lɔ́ o ɲán kée ŋó mán. ⁶Teebe ŋó fɛ, aa bhɔ́ kɛ kɔndalakɛbhaa gbɛ́ɛlu yé bhálo kɛ íkwɔ. Aa i manɲaankɛ kó: ‹Mínnɛɛn le kósɔn áa tee ó bɛ́ kɛla yánun lakɛbhɛɛya lɔ?› ⁷Ii a yawi kó: ‹Mɔɔn lé mánsɔɔ bhá kɛ kɔndala di án man.› Aa fɔ i yɛ kó: ‹Ále a táa bháala kɛ́ ɲɛ́n lɛ́zɛnnvyɛ ó lɔ́ íkwɔ.›

⁸Ywáa o la, lɛ́zɛnnvyɛtii oo a yɛ bháalakunndii ó kíi kɛ fɔ a yɛ kó: ‹Bháalakɛdhye ŋolu kíi kɛ i bɛ́ ta saa lo i bhóo. Mín núu bháala o lámyaan bɛ́ kwɔ, aa lamyaan olu mán kɛ a lafaa mɔɔn jónan ólu mán.› ⁹Mín núu bháala o lámyaan teebe ŋó fɛ́, olu nan i ta bháalakɛsaa ó myáan o lé lɔ: Bɛ́ ta wɛ́ɛgbannan kée ngée. ¹⁰Tó mín núu kɛ́ bháalakɛdhye jónan olu lé lɛ́zɛnnvyɛ ó lɔ, aa sé olu mán mínngɛ, a tɛɛ kɛ́la olu kɔ́ɔnnɔn kó ilee tá wɛ́ɛ o káa sháaya bɛ́ tá le. Wáa i bɛ́ bɛ́ é wɛ́ɛ lákee ŋo lé sɔ́ɔ: Bɛ́ ta wɛ́ɛgbannan kée ngée. ¹¹Wɛ́ɛ o myáansan o lɔ́ íkwɔ, ii kóman sɛɛntii o mán ¹²tá kó: ‹Kɔndalakɛbhaa mín núu bháala o lámyaan bɛ́ kwɔ, olu lɛ́ɛlɛ kéembe lé kɛ́ bháala o la, aa kɛ́ díi tó íi olu ní án née saa o kéeɲan, án née mín núu tee kée ŋó bɛ́ kɛ́ bháala lá teegban ó kɔɔ.› ¹³Sɛɛntii oo fɔ a mɔɔn o kée ɲɛn kó: ‹Ndwáanva, mán í tɔ́nɲɔɔn lɛ́. Ɲɔ́ɔn ngo an ni bhyɛ ne kó ní í sála wɛ́ɛgbannan ngée nán tee ó kɔɔnnɔn lé? ¹⁴Oo lɔ mínngɛ, í saa o tá kɛ bhɔ́ ná la. Kɔndaladhye mín ŋé bháala o lámyaan kwɔ́ o la, ngáa saa kée ŋó lé dí íle ní o mán. ¹⁵Nzáo lé tɛ́ ɲɛ́ɛla wɛ́ɛ o lɔ a. Bháa móolafwee nin ɲé mínngɛ, O lé ɲángbeya é í lɔ́ a?› » ¹⁶Ó bhóo óle mán tó: «Mɔɔn mín núu kwɔ́, olu yáa bhyáa ɲɛ́n tó mín núu ɲɛ́n, olu yáa bhyáa kwɔ́.»

Ɛnza ŋé a sayakɛko óni a kuunngo o fɔ́ ko sawaɲɔn o kɛla

Maki 10.32-34; Luka 18.31-34

¹⁷I táatɔ ó lé Yeluzalɛmu, Ɛnza ŋé a yɛ kaamɔɔndhye ndá ni fyáa ó kíi í kéenan ké ii táala, kɛ fɔ i yɛ kó: ¹⁸«Áa í tóomanlɔ. Án ni táala Yeluzalɛmu lé wé, mɔɔn Dhyénjɛ o káa ló faanlɛɛɲansebhaa olu kúnndii ólu ní sɛliya kaamɔɔn ólu bhóo yénɔn lé ké olu a kíti bé a ka kó kɛ a fáa. ¹⁹O kwɔ, i yáa a lábhyaa káafii olu la tó olu yɛ́ɛ bhɔ́ a lɔ kɛ a gbasi gbɛ́nɲɛn la tó kɛ a gbáan yíi o mán. A tee sawaɲɔɔnlo ŋo a saya ó kwɔ, a yáa kúun kɛ bhɔ́ su ólu cɛ́man.»

Zaki ní Yaya lú wóobhaa é ɲaanli kɛla olu tá fa nvɛ́

Maki 10.35-45

²⁰Oo bhɔ́ í lá mínngɛ, Zebede muso é í mángbaa ni a dhyénjɛ fyáa ólu lé Ɛnza nan. Aa í kúnmɛɛn nɔ́kɛɛ Ɛnza ɲɛn kó o a ɲan a man. ²¹Ɛnza ngó a yɛ kó: «Íi mínnɛɛn lé kwɔ?» Aa Ɛnza ɲawi kó: «Ní fɛ́ ngó ni í kɛ́ í síi í yɛ́ mansaya ó lɔ, nyénjɛ míin ngée ŋan í síi í bhóobhɛɛkɔɔ ké a kée ŋan í síi í bhóonwaan ngɔɔ.» ²²Ɛnza ŋé fɔ a kó: «Áa fé mín ɲiinnan, a mán o lɔ. Né káa tɔ́lɔya súu mín myaan, ále yáa sé o lɔ́kunnan ŋan?» Ii a yawi kó: «Án ɲáan sé!» ²³Ɛnza ngó i yɛ kó: «Ale lée wé, né káa tɔ́lɔya mín myaan, a yáa o tɔ́lɔya súu o myáan, wáa a síi ó né bhóobhɛɛkɔɔ óni móonwaanngɔɔ, o látɛɛbhaa o tɛ́ né le. Nvá é o síilaa ólu lɔ́bhyɛ mɔɔn mínnu yɛ, a káa a dí o léelu mán.»

²⁴Kaamɔɔndhye ndá ŋo tɔ ólu o myɛ́n mínngɛ, ii mwɛ́nnɛn bhádhyenjɛman nvyáa ólu mán. ²⁵Kó ólu kɛ́ɲan o man cé, Ɛnza ŋé i bɛ́ kíi tó kɛ fɔ i yɛ kó: «Áa lɔ ŋóo síya gbɛ́ɛ olu tá kunndii ólu kunndiiyafaan lála olu ka. Mɔɔn mín núu i yɛ yamaan o lɔ, ii nɔn lála olu ka. ²⁶Wáa a táa kɛ́ cé álee lú cɛ́man. Ní mɔɔn mín ŋé fɛ́ kɛ kɛ́ mɔɔnba lé a cɛ́man, fɔ́ o tíi ó a kɛ́ bɛ́ tá bháalakɛdhye ne; ²⁷Tó ní mɔɔn oo mɔɔn é fɛ́ kɛ bhyáa bɛ́ ɲɛn, o tíi o kákan né kɛ kɛ́ a yɛ́ yɔ né le. ²⁸Ó ɲán kée ŋó mán, mɔɔn Dhyénjɛ o mán nan ké lɔ́ a kɛ́ a yɛ bháalakɛdhye ne, wáa aa nan lé kɛ bháalakɛ mɔɔn olu yɛ́, óni kɛ a yɛ́ɛ ní o dí mɔɔn shɛ́ɛman ngunmanka le.»

Ɛnza ŋé fyóonjɛ fyáa ɲán lakala

Maki 10.46-52; Luka 18.35-43

²⁹Ii bhɔ́ Zeliko mínngɛ, yamanba é bhyáa Ɛnza ngwɔ. ³⁰Fyóondɔ fyáa lɔ́ síininndɛ́ɛ sháa o gboo nvɛ́, olu Ɛnza ndínmin ngo o myɛ́n mínngɛ, ii gbáa ngbáa ni fɔ le kó: «Mantii ó, Laula Bhɔ́nzɔ manɲwaan án nan!» ³¹Yaman o yámanngɛ i man kó ii í lúmandhye, wáa i tɛ́ɛ gbáanan í fáan lá o bɛ́ kwɔ kɛ fɔ kó: «Mantii ó! Laula Bhɔ́nzɔ, manɲwaan án nan!» ³²Ɛnza ŋé í lɔ́ kɛ fyóondɔ ólu kíi tó kɛ i manɲaankɛ kó: «Aa fɛ́ ké ní mínnɛɛn lé kɛ́ a yɛ́?» ³³Ii a yawi kó: «Mantii ó, a kɛ ké án ni ywáa yé.» ³⁴I mánɲwaan é lo Ɛnza nɔn, aa í bhóo túu i ɲán ólu la tó íi ywáa yé í kɔ́lɔ téeman, tó ii bhyáa Ɛnza ngwɔ.

Ɛnza ŋé lónan Yeluzalɛmu

Maki 11.1-11; Luka 19.28-40; Yaya 12.12-19

¹Ii gbaa mínngɛ Yeluzalɛmu la ké i wɛɛ lo Olivyetii óni Bɛtifaze tɔ́ɔfɛ, Ɛnza ŋé kaamɔɔndhye ŋo fyáa bhyáashaa. ²Tó kɛ fɔ i yɛ kó: «Só mín ŋé a ɲɛ́nnzhaafɛ nín, áa táa o la. A kɛ́ lo ndɛ́nmɛn, a yáa táa sofɛɛnin ngbee nɔ́ ní a dhyé ŋó ngúunnin ɲé. Áa i fwée kɛ́nan ni ile ɲɛ́n. ³Ní mɔɔn lɔ́ kɛ kóman, áa fɔ o yɛ kó: ‹Mantii óle manko é a lá.› O kɛ́ kɛ́ i yáa a lábhyaa íkɔlɔ.»

⁴Oo kɛ́ lé ke kó óo kó é kɛ céla óo kóman mín nvɔ, o a í láfa. A fɔnin ndɛ́ɛ a kwɔ tá ne kó:

⁵Áa fɔ Siyɔn dhyémuso21.5 Siyɔn dhyémuso: Ala bhatobhomba ó lɔ́nin ndɛ́ɛ tii mínnga Yeluzalɛmu, o lé tɔ́ɔ tɛɛ kó Siyɔn. Lɔ́lu tɛ́ɛ Yeluzalɛmu kíila Siyɔn tɔ́ɔ o lá wáati lɔ́lu lɔ. olu yɛ kó:

Ɲɔ́ɔn nín, a yɛ́ mansacɛ oo nánla a saala,

a wɛɛ a yɛ́ɛmanyii, a siinin ɲé sofɛɛnin nɔ ngwɔ́ lɔ,

sofɛɛnin ngbee nɔ, sofɛɛninmuso lɔ dhyé.

⁶Kaamɔɔndhye ŋolu táa o lé lɔ́ Ɛnza ɲɛn cé o la. ⁷Ii nan sofɛɛnin ngbee ŋo ní sofɛɛninnye ŋó le kɛ i yɛ faani olu lá olu kwɔ́lɔ tó Ɛnza ŋé í síi a kwɔ lɔ. ⁸Yaman o mɔɔn shɛ́ɛman ɲé i yɛ faani olu lɔ́woo sháa o ka, lɔ́ lúu yíibhoo lu tɛ́ɛkɛ i la lá sháa o ka. ⁹Yaman mínnu tɛ́ɛ Ɛnza ɲɛn óni mínnu tɛ́ɛ a kwɔ́, o bɛ́ tɛ́ɛ táa gbáa ne kó: Tando é Laula Bhɔ́nzɔ ŋó yɛ́! Mɔɔn mín ŋé nánla Mantii o tɔ́ɔla, tando é o yɛ! Tando é Ala yɛ́ sá ŋó lɔ!

¹⁰Ɛnza ŋé lo mínngɛ Yeluzalɛmu só ó la, só óo ɲáanmin. I tɛɛ fɔ́la kó: «Cɛ míin ŋé yɛ́ɛtii le?» ¹¹Mɔɔn olu tɛ́ɛ i yawila kó: «Céla Ɛnza née wé kɛ bhɔ́ Nazalɛti, Galile mala ó lɔ.»

Ɛnza ŋé feekɛbhaa olu gbɛnan Ala bhatobhomba ó lú o kɔ́ɔnnɔn

Maki 11.15-19; Luka 19.45-48; Yaya 2.13-22

¹²Ɛnza ŋé lo Ala bhatobhomba ó kɔ́ɔnnɔn, aa lámyaan kɛ feekɛbhaa olu ní sanikɛbhaa olu gbɛ́, aa wɛ́ɛfɛɛmaa olu tá tabɛli ólu bé, kɛ biinin nvelebhaa olu tá gbaanin ŋo bɛ́ bémbe. ¹³Aa fɔ i yɛ kó: A sɛwɛnin ɲé kó, ɲɛ́n bhó ŋó káa kíi lé kó Ala bhatobho. Wáa: «Ále wɛ́ɛ o bhó ŋó lé kɛ́ so nú lóonaankɛlaa lé nín!»

¹⁴Fyóo ŋolu ní kuugba lɔ́ lúu í mángbaa Ɛnza nán Ala bhatobhomba o lú o kɔ́ɔnnɔn yénɔn, aa olu lákɛɛnya. ¹⁵Faanlɛɛɲansebhaa olu kúnndii ólu ní sɛliya kaamɔɔn ólu ɲán é lɔ o káwananngo ólu lɔ́ mínngɛ, óni kɛ dhyémuu ólu yé gbáanan Ala bhatobhomba ó lú o kɔ́ɔnnɔn kó: «Tando é Laula Bhɔ́nzɔ ŋó yɛ!» Ii mwɛ́nnɛn. ¹⁶Ii fɔ Ɛnza ɲɛn kó: «Í tóo é i kan ŋo lɔ a?» Ɛnza ŋé i yawi kó: «Ɔɔn! Bháanin ále mán a fɔnin ɲé kitabu o lɔ́ bhá ŋan kó: Í wɛ́ɛ kɛ háanin dhyémuu lú ní dhyéɲɛɛnninngwaa lu bɛ́ bɛ́ í tándo la?»¹⁷O fɔ́nin ŋó kwɔ, aa i tó yénɔn kɛ bhɔ́ só ó la kɛ táa si Betani.

Ɛnza ŋé fígisun nɔ dáanla

Maki 11.12-14,20-24

¹⁸Sɔ́ɔ ó mán, i tɛɛ í kwɔ́sɛɛla mínngɛ Yeluzalɛmu, kɔ́ɔn é Ɛnza myaan. ¹⁹Aa fígisun nɔ yé sháa o gboo nvɛ́, aa í mángbaa a lá, wáa a man dhyé nzɔ́ɔ o la fo búu gbɛɛgbɛɛ. Oo kɛ́ mínngɛ aa fɔ fígisun ŋo mán kó: «Íle táa í dhyé ngɛ́ bhée!» Íkɔlɔ téeman, fígisun ŋóo já. ²⁰Kaamɔɔndhye ŋolu ɲán é o kó ó yé, óo bhɔ́ i kɔ́ɔman gbúnigbukɛ, kó: «Aa kɛ́ díi tó fígisun míin ŋé já íkɔlɔ cé?» ²¹Ɛnza ŋé i yawi kó: «Tó ní fɔ a yɛ́ tinɲan in ne ngo, ni lánanya kɛ́ kɛ́ a yóso o lɔ, óni ní síka mán kɛ́ a yóso ó lɔ, ní kó mín ngɛ fígisun míin nan, a yáa sé o lɔ́ kɛ́la, a yɛ́ɛ ló ɲáan sé fɔ́la tii míin ɲɛn kó ‹bhɔ́ ywáa míin nɔn yánun, íi táa í yɛ́ɛ láfii kɔɔji o lɔ,› tó óo o kɛ́. ²²Ni lánanya kɛ́ kɛ́ a yóso o lɔ, a kɛ́ fé ŋóo fé ngófɔ sɛɛ o lɔ, a yáa o sɔ́ɔ.»

Yɛ́nee kó ólu kɛ́ ó sé kɛ́la Ɛnza ɲɛn?

Maki 11.27-33; Luka 20.1-8

²³Ɛnza ŋé táa Ala bhatobhomba ó la. A tɛ́ɛ mɔɔn ólu kalanan mínngɛ. Faanlɛɛɲansebhaa olu kúnndii ólu ní só o cɛba ólu í mángbaa o lé lɔ kɛ a manɲaankɛ kó: «Íi kó míinnu kɛ́la sébhaaya mínnɛɛn lé la? Yɛ́ɛtii o sébhaaya ó dí í mán?» ²⁴Ɛnza ŋe í yawi kó: «Né káa ále mánɲaankɛ láfaɲan kéene la, kéembe, ni a kɛ́ ɲáwi, o kɛ́ kɛ́, ní bhɔ́la kó míin nú kɛ́ ó sébhaaya ó lé ywáa mínnɔn, ní o fɔ́ a yɛ́: ²⁵Yɛ́ɛtii é Yaya Bátizelikɛbhaa bhyáashaa kɛ́nan mɔɔn ólu bátize, Ala bháa, bháa mɔɔn ólu?» Ii fɔ ɲɔ́ɔnɲɛn kó: «Ní án ngɛ a yawi kó Ala lée a bhyáashaa, a yáa án mánɲaankɛ kó mínnɛɛn lé kósɔn tó án mán lá Yaya la? ²⁶Tó ní án ngɛ fɔ kó mɔɔn lée lúu a bhyáashaa, án ngákan kɛ sháan yaman o ɲɛn, kɛ mansɔɔ mɔɔn bɛ́ tɛ́ɛ Yaya yacela céla lé le.» ²⁷Kó ólu kɛ́ɲan man cé, íi Ɛnza ɲawi kó: «Án mán lɔ.» Ɛnza ŋé i yawi o le lɔ kó: «Ni a kó cé, née kó mínnu kɛ́la nín, née ólu kɛ́la sébhaaya mínnan ndáa o fɔ́ a yɛ́.»

Sáanan mín ŋé dhyénjɛ fyáa ólu ka

²⁸Ɛnza ŋé fɔ íkwɔ kó: «Ngáa kó mín nvɔ a yɛ́ nín, áa a tá ɲánla ó fɔ́ ɲɛ́n o kó ó tá fa nvɛ́: Dhyénjɛ fyáa tɛ́ɛcɛ lɔ́ bhóo. Aa fɔ jónan ó yɛ kó: ‹Nyénjɛ, táa bháala kɛ́ lɛ́zɛnnvyɛ ó lɔ́ bí.› ²⁹O kó a yɛ kó a táa kɛ, wáa kwɔ́ o la, aa nan caanlɔngii tó kɛ táa bháala kɛ́ lɛ́zɛnnvyɛ ó lɔ. ³⁰Facɛman ŋóo o kóman kée ŋó fɔ́ dhyénjɛ tɔ́ kée ŋó yɛ. Oo fɔ kó: ‹Mantii o, ŋwɛ́ɛn myɛ́n, ɲáan táa›, wáa a man táa.» ³¹Ɛnza ŋé i manɲaankɛ kó: «O dhyénjɛ fyáa ó mínnɛɛn lée i fa sáonanngo ó kɛ?» I ko Ɛnza ɲɛn kó: «Aa jónan mín nje.» Ɛnza ŋé fɔ ale faanlɛɛɲansebhaa olu kúnndii ólu ní Yawudhyaa cɛba ólu yɛ́ o lé lɔ kó: «Tó ní fɔ a yɛ́ tinɲan in ne ngó, háanin nísɔɔnmyaanbhaa olu ní tútu olu yáa Ala yɛ́ Mansaya ó hɛ́lɛ o sɔ́ɔ álee ɲɛn, ³²kɛ mansɔɔ Yaya Bátizelikɛbhaa é nan a saala nin sháa téenin ŋó le, a mán lá a lá. Wáa nísɔɔnmyaanbhaa olu ní tútu olu lá a lá. Tó ále gbúlu ɲán é lɔ o kó ó lɔ, wáa a mán díminsa tó kɛ lá a lá.»

Sáanan mín ŋé lɛ́zɛnmaalakɛbhaa yóo ŋólu ka

Maki 12.1-12; Luka 20.9-19

³³Ɛnza ŋé fɔ kó: «Áa í tóomanlɔ saanan gbɛ́ɛ lɔ: Lɛ́zɛnnvyɛtii lɔ lée lɛ́zɛn no kɛ yɔ́sɔ kɛ́ a man. Kɛ lɛ́zɛnjibhɔjaan lɔ́ bhɔ́, kɛ o kɛ́ lɛ́zɛn ŋó jíbhɔlaa le, tó kɛ gbáta lɔ́ lɔ́ sɛɛnkunnansiibhaa olu yɛ. Aa sɛɛn ó kɛ́ɛfa o lé lɔ bháalakɛdhye ŋólu mán, tó kɛ táa táamanla. ³⁴Lɛ́zɛn bhɔ́ wáati oo sé mínngɛ, aa a yɛ bháalakɛdhye ŋolu bhyáashaa lɛ́zɛn ŋo bháalakɛbhaa olu saala kó ii a ta fa ŋo di. ³⁵Wáa lɛ́zɛnmaalakɛbhaa olu a yɛ bháalakɛdhye ŋolu myáan kɛ a kée gbasi, kɛ kée ŋó fáa tó kɛ a sawaɲɔn o bwó káwa la. ³⁶Lɛ́zɛnnvyɛtii oo bháalakɛdhye ngbɛ́ɛlu bhyáashaa. Olu tɛ́ɛ sháa mɔɔn jónan ólu le. Wáa lɛ́zɛnmaalakɛbhaa olu o kó kée ŋó lé lá olu la íkwɔ. ³⁷Alabha ŋo la, aa a dhyénjɛ bhyáashaa. A tɛɛ fɔ́la kó i yáa nyénjɛ ó bhɛ́ɛsii. ³⁸Wáa lɛ́zɛnmaalakɛbhaa olu cɛ ó dhyénjɛ o yé mínngɛ, íi fɔ ɲɔɔnɲɛn kó: ‹Cɛ́ntabhaa ó lée nín! Áa nan, án ní a fáa ké cɛ́n o a tó án bhóo.› ³⁹Ii a myaan o lé lɔ kɛ a lafii lɛ́zɛnnvyɛ o kwɔ́shaafɛ tó kɛ a fáa.»

⁴⁰Ɛnza ŋé ɲaanli kɛ kó: «Lɛ́zɛnnvyɛtii o kɛ́nan, a káa mínnɛɛn lé kɛ́ lɛ́zɛnmaalakɛbhaa olu la?» ⁴¹Ii a yawi kó: «A yáa o kóyoongɛbhaa olu fáa, a táa mánɲwaan i la. A yáa a yɛ lɛ́zɛnnvyɛ ó kɛ́ɛfa lɛ́zɛnmaalakɛbhaa gbɛ́ɛlu mán mínnu káa a yɛ lɛ́zɛn ŋó tɔɔn ó ló a bhóo a san lɔ.»

⁴²Ɛnza ŋé fɔ i yɛ kó: A mán tínminnaa míin ngála Kitabu o lɔ bhá ŋan?

Bhónɔbhaa olu tɛ́wɛɛ í bá tɛfɛ mínnɔn,

o lé wɛ́ɛ kɛ́ tɛfɛ kúugbɛɛ ŋo le.

O fáanan Mantii ó lé la,

oo kóba lé lé án née bhóo!

⁴³Ɛnza ŋé wɛɛ kɛ fɔ kó: «O lé kósɔn, tó ní fɔ a yɛ́ ngó: Ala yɛ́ Mansaya ó hɛ́lɛ o táa dí a mán bhée, a yáa ló lananbhɛɛ olu bhóo, mín núu sé a lɔko o kɛ́la. ⁴⁴[Mɔɔn óo mɔɔn kɛ́ í bé o tɛ́fɛ ó ka, o tíi o kóo olu yáa í lɔ́kɛɛngɛɛ, ni o tɛfɛ ó ló ngɛ́ bé mɔɔn mínnga, o tíi o yáa í lɔ́muɲuu.]»

⁴⁵Faanlɛɛɲansebhaa olu kúnndii ólu ní Falizɛn ŋolu Ɛnza ɲɛn saanan olu myɛ́n mínngɛ, ii bhɔ́ ɲan le óo Ɛnza ngan ndɛ́ɛ ile léelu mán wé. ⁴⁶Oo kɛ́ mínngɛ, í tɛ́ɛ ɲánɲiinnan Ɛnza myaanko ó mán, wáa i tɛɛ sháannan yaman o ɲɛn, kɛ mansɔɔ bɛ́ tɛ́ɛ Ɛnza ɲacela Ala yɛ céla lé le.

Sáanan mín ŋé kwɛ́ɛnyako o súnmanngo o ka

Luka 14.15-24

¹Mɔɔn mínnu tóo tɛ́ɛ Ɛnza ngómankan ŋo lɔ, aa saanan gbɛ́ɛ fɔ́ olu yɛ́ tá kó: ²«Sángboo ó Mansaya óo tɛ́nmɛn, o lée nín: Mansacɛ lɔ é sunmanmba kɛ́ a dhyénjɛ yɛ́ kwɛ́ɛnyako o fɛ́ ³Aa a yɛ bháalakɛdhye ŋolu bhyáashaa kó kwɛ́ɛnyako oo fɔ́ mɔɔn mínnu yɛ, kó ii táa olu kíi lɔ́minko o lɔ. Wáa o mɔɔn ólu mán sɔ́n kɛ́nan lɔ́minkɛlaa ó lɔ. ⁴Aa bháalakɛdhye ngbɛ́ɛlu bhyáashaa ké a wɛɛ wɛɛ fɔ́la olu yɛ kó: ‹Áa táa fɔ mɔɔn ólu yɛ kó ɲɛ́n sunman ŋo wɛ́ɛ sii, kó ní ɲɛn tóla ólu ní ɲɛ́n bhyáa njɛ́man ŋó léelu fáa o súnmanngɛko o lɔ. Áa fɔ i yɛ kó a bɛ́ wɛ́ɛ mwɔn.› ⁵Wáa kwɛ́ɛnyako oo fɔ́ mɔɔn mínnu yɛ ólu mán táa kíili o lɔ́gbɛ. I bɛ́ é táa i taashaa lá í yɛ́: Lɔ́ lúu táa sɛɛn mán, lɔ́ lúu táa i yɛ féekɛlaa o lɔ, ⁶lɔ́ gbɛ́ɛ lúu bháalakɛdhye ŋolu myáan kɛ mala i man hádi, tó kɛ i fáa. ⁷Mansacɛ ó mwɛ́nnɛn. Aa a yɛ swaasi olu bhyáashaa kɛ táa o mɔ́ɔnfaabhaa olu fáa tó kɛ tá bhyáa i yɛ só ó la. ⁸Aa wɛɛ kɛ fɔ a yɛ bháalakɛdhye ndɔ ólu yɛ kó: ‹Kwɛ́ɛnyako o súnman ŋo wɛ́ɛ sii, wáa mɔɔn mínnu kíinin ŋé kɛ́, olu kíikun mán kɛ́ la. ⁹Oo lɔ mínngɛ, áa táa sháafaa ŋólu la, a kɛ́ mɔɔn súu súu yé, áa o bɛ́ kíi sunman ŋo mán.› ¹⁰Bháalakɛdhye ŋolu táa sháafaa ŋólu la, ii mɔɔn súu súu yé, ké aa kɛ́ mɔɔnbhɛɛ le bháa wáman mɔɔn yóo ne bháa, ii o bɛ́ ládhyɛ kɛ́nan ni olu le. Lɔ́minkɛbho ŋóo fá mɔɔn o la, o bhóo ó lé mán. ¹¹Mansacɛ oo lo kó a kɛ́ɛ tɛ́ɛ mɔɔn kíinin ŋólu mánfɛɛ. Aa cɛ lɔ́ yé yénɔn, mansiifaani tɛ tɛ́ o kannan. ¹²Aa o cɛ ó mánɲaankɛ kó: ‹Ndwáanva, aa kɛ́ díi tó ílee lo yánun kéni mansiifaani tɛ́ í kannan?› Cɛ ó mán fé nvɔ. ¹³Oo kɛ́ mínngɛ, mansacɛ oo fɔ bháalakɛdhye ŋolu yɛ kó: ‹Áa a se ŋó ní a bhóo olu síli kɛ a lafii kɛ́ɛnman diwi o lɔ. A yáa kási kɛ́ yénɔn ké a dinmisaninmba ó yé.› ¹⁴Ɛnza ŋé wɛɛ kɛ fɔ íkwɔ kó: ‹Aa céne, mɔɔn shɛ́ɛman ngíinin ɲé, wáa mínnu lɔ́tɔnmɔnnin ɲé kɛ lo, olu mán nzháa.› »

Bhóobhɔ o kákan kɛ kɛ́ mansacɛ ó yɛ a?

Maki 12.13-17; Luka 20.20-26

¹⁵Falizɛn ŋolu táa ɲɔ́ɔnɲe, i tɛ káa kɛ tɛ́nmɛn ké Ɛnza ngbú lákan ŋo a kɛ́ a lalɔkun ne, ii o kó ó ɲánɲiin. ¹⁶Ii wɛɛ kɛ i yɛ kaamɔɔndhye ŋo lɔ́lu ní Elɔdi dhyáaɲɛnmɔɔn ó lɔ́lu bhyáashaa kó kɛ táa fɔ Ɛnza ɲɛn kó: «Kaamɔɔn, án ni lɔ ŋóo íi tinɲan le fɔ́la: Íi Ala sháa o yáala tinɲan le ka, í tɛ́ sháannan í mɔ́ɔnɲɔɔn ó ɲán o ɲɛn, í ló ndɛ́ lɔ́ bhɔ́la lɔ́lɔ. ¹⁷Oo lɔ mínngɛ, án ngáa kó mín nvɔ nín, í tá ɲánla ó fɔ́ án ɲɛn o ka: A láanin ɲe kó mɔɔn a nísɔɔn o bhɔ́ Mansacɛ Sezali ó yɛ bháa bháanin a laanin ndɛ́?» ¹⁸Wáa aa kɛ́ mínngɛ óo Ɛnza ndɛ́ɛ bhɔ́la i miliya yóo ŋó kɛ́laman, aa fɔ i yɛ kó: «Ále fyáangafo ólu! Mínnɛɛn lé kósɔn tó áa nɔ́swaannan? ¹⁹Áa wɛ́ɛgbannan nɔ yáa nán, o mín ŋé tála kɛ kɛ́ nísɔɔn lé mansacɛ ó yɛ.» Ii wɛ́ɛgbannan ngée yáa a lá, ²⁰tó Ɛnza ŋé i manɲaankɛ kó: «Yɛ́ɛtii yáa óni a tɔ́ɔ é wɛ́ɛ míin mán nín?» ²¹I ko a yɛ kó: «Mansacɛ Sezali.» Oo kɛ́ mínngɛ, Ɛnza ŋé fɔ i yɛ kó: «Oo lɔ mínngɛ, fé mín ŋé mansacɛ ó tá le, áa o dí mansacɛ ó mán, tó fé mín ŋé Ala tá le, áa o dí Ala man.» ²²O yawili óo bháa i lɔ kɛ tínmin. Ii Ɛnza mankɛnin ndo kɛ táa.

Sadusi olu Ɛnza ɲaankɛla su ólu kúunngo o la

Maki 12.18-27; Luka 20.27-40

²³O ló ngée ŋo la, Sadusi lɔ lúu nan Ɛnza ndɔ́ɔfɛ. O mɔɔn ó lée lúu fɔ́la kó su ólu táa kúun. Ii Ɛnza manɲaankɛ ²⁴kó: «Kaamɔɔn, Musa é fɔ kó: Ní cɛ mín ngɛ muso tá, kɛ sayakɛ ké a man dhyé nzɔ́ɔ a la, o tíi ó bhádhye ó kákan kɛ o muso o tá ké aa dhyé nzɔ́ɔ táabhaa o yɛ.²⁵Kɛ́ɛke bhádhyemannjɛ wóonvyaa ló tɛ́ɛ án nvɛ́ yánun, jónan óo muso tá óo sayakɛ ké a man dhyé nzɔ́ɔ bhá. Tó kɛ a muso tó a bhádhye ŋó lɔ́ bhóo. ²⁶Bhádhyemannjɛ wóonvyaa ó bɛ́ é muso kée ŋó tá o ɲán o lé mán. I mɔɔn wóonvyaa ó bɛ́ é sayakɛ, i si mán dhyé nzɔ́ɔ muso ó la. ²⁷I bɛ́ saya kɛ́nin ŋó kwɔ, muso óo saya kɛ́ íkwɔ. ²⁸Su ólu kúunno ŋo kɛ́ sé wáati mínnɔn, muso ó káa kɛ́ a mínnɛɛn lé tá lé? Kɛ mansɔɔ aa sii i bɛ́ kunman kée ngée!» ²⁹Ɛnza ŋé i yawi kó: «A wɛ́ɛ fii, kɛ mansɔɔ a mán Kitabu o lɔ, a ló mán Ala yɛ sébhaaya ó lɔ. ³⁰Kɛ mansɔɔ su ólu kɛ́ kúun wáati mínnɔn, cɛ lɔ́ táa muso tá, muso lɔ́ ló ndáa sii cɛla, i bɛ́ káa kɛ́ lé óo malɛɛka lu, sángboo o lɔ. ³¹Mín ŋé nan kɛ́ su ólu tá kúun ŋó le, a mán o kó ó sɛ́wɛnin ɲé kitabu o lɔ a? Ala é álase tá ne kó: ³²Ne lée Bulaaman yɛ Ala o le, óni Shaaka yɛ́ Ala o, óni Yangubha yɛ́ Ala o. Ɛnza ŋé wɛɛ kɛ fɔ kó Ala tɛ́ sú ólu yɛ́ Ala le, waa ɲáanman ŋólu yɛ́ Ala. ³³Mɔɔn óo mɔɔn é Ɛnza ɲé o kóman ólu fɔ́la, óo bhɔ́ o mɔɔn ólu bɛ́ kɔ́ɔman.»

Tɔ́ mín nguu a gbɛ́ɛ kɛ tínmin

Maki 12.28-34; Luka 10.25-28

³⁴Falizɛn ŋolu myɛ́n mínngɛ kó Ɛnza ŋwɛ́ɛn kɛ tó kóman tɛ́ Sadusi olu bhóo bhée, ii ɲɔ́ɔnɲe. ³⁵Sɛliya kaamɔɔn lɔ́ tɛ́ɛ ale Falizɛn ŋolu lɔ, o tɛ́ɛ fɛ́ kɛ Ɛnza nɔ́swaan. O ɲán o mán, aa Ɛnza manɲaankɛ kó:

³⁶«Kaamɔɔn! Ala yɛ tɔ́ ŋolu lɔ, tɔ́ ŋó mínnɛɛn lé kúu a gbɛ́ɛ kɛ tínmin?» ³⁷Ɛnza ngó a yɛ kó: Í yɛ Mantii Ala o a dhyáa í yɛ́ í yóso ó bɛ́ la, í ní o bɛ́ la, í míliya ó bɛ́ la.³⁸Tɔ́ mín nguu a gbɛ́ɛ kɛ tínmin tó aa tɔ́ njónan óle, o lée wé. ³⁹Tɔ́ mín ŋé túunan o la, tó a kuu a gbɛ́ɛ íkwɔ, o lée nín: Í mɔ́ɔnɲɔɔn ó a dhyáa í yɛ́ óyoo íle gbú a dí í yɛ́ɛ yɛ ɲán mín man.⁴⁰Musa yɛ́ tɔ́ ŋolu ní céla ólu yɛ́ kaangɛkan ŋo bɛ́ kwɔ́ sɛnmɛnnin ŋé o tɔ́ nvyáa ó lé la.

Cɛ míin Kísibhaa óni Laula cɛ

Maki 12.35-37; Luka 20.41-44

⁴¹Falizɛn ŋolu tɛ́ɛ ɲɔ́ɔnɲe la, tó Ɛnza ŋé i manɲaankɛ kó: ⁴²«A tá ɲánla ó lɔ, Kílisi oo yɛ́ɛtii le? Aa yɛ́ɛtii bhɔ́nzɔ ne?» Ii a yawi kó: «Aa Laula le bhɔ́nzɔ ne.» ⁴³Ɛnza ngó i yɛ kó: «Aa kɛ́ díi tó Ní Sɛnnɛnyanin ŋóo Laula lo a fɔ o lɔ́ a bhɔ́nzɔ ŋó mán kó Mantii ó? Laula é fɔ lé kó:

⁴⁴Mantii Ala é fɔ ɲɛ́n Mantii o yɛ kó:

Í síi móobhɛɛ kɔɔ,

fɔ́ ní í yúu olu bhyáa í sé ngɔɔ.

⁴⁵O ɲán o mán, ni Laula kó Kísibhaa o mán kó Mantii ó, Kísibhaa oo sé kɛ́la Laula Bhɔ́nzɔ né díi?» ⁴⁶Mɔɔn mánsɔɔ Falizɛn ŋolu lɔ kɛ Ɛnza ɲawikan ngée nzɔɔ. Kɛ ta o ló ŋó mán, mɔɔn sí lo mán í swáan Ɛnza ɲaankɛ lɔ́ bhée.

Ɛnza ngó lɔ́ kɛ́nan sɛ́liya kaamɔɔn ólu ní Falizɛn ŋolu yɛ́ kókɛse ŋólu kɛ

Maki 12.38-39; Luka 11.43,46; 20.45-46

¹Ɛnza ngó a yɛ kaamɔɔndhye ŋolu ní yaman o yɛ kó: ²«Sɛliya kaamɔɔn ólu ní Falizɛn ŋo lée lúu Musa yɛ́ tɔ́ o ɲánlɔsɔɔbhaa le. ³Oo lɔ mínngɛ, áa i fɔkan ŋó bɛ́ lataaman, wáa a kɛ́nan i yɛ kókɛse ŋólu kɛlɛ! Kɛ mansɔɔ, ii kó mín nvɔla, i gbúlu tɛ́ táamanla o sháa o fɛ́. ⁴Ii lwée ngbíiyanin ne siila mɔɔn ólu kunman, waa í tɛ́ í bhóokwɛɛnnin ŋo túula o lá yáanin dɔ́ɔnin ne kɛ́ a lá maanmaan. ⁵Ii kɛwɛli o bɛ́ kɛla lé ké mɔɔn ŋolu a i lasaa. O lé kósɔn, sɛ́wɛ mín ŋé kɛ́la ilee lú ce nan, óni i bhóola, o bwóɲannin née kɛ́la mɔɔn tɔ́ o bɛ́ tá le. O kwɔ, ii mansiife nzháayala i ta deekeba ólu man lé. ⁶Siilaa bhɛ́ɛ mín núu kɛ́la ɲɛ́nnzhaafɛ, o lée lú dhyáa é kɛ́la i lɔ lɔ́minkɛlaa ólu lɔ, óni sɛ́ɛbho ŋólu la. ⁷Mɔɔn olu kɛ́ kɛ́ i fola ni bhɛ́ɛsiili le yamanywaa olu lɔ, óni kɛ táa i kíi le kó ‹kaamɔɔn ó!› O lé dhyáa é kála i lɔ. ⁸Wáa álee kɛ́nan sɔ́n ké mɔɔn olu a kɛ́ fɔ́la a mán kó ‹kaamɔɔnba›. A bɛ́ɛ lé óo bhádhyenjɛman nú, kaamɔɔn kée ŋó lée ále bɛ́ la. ⁹A kɛ́nan fɔ mɔɔn óo mɔɔn mán lúukolo ó ka kó ‹án Nvá›. Fa kéembe lée a lá, o lée sángboo ó lɔ. ¹⁰A kɛ́nan tó ké mɔɔn olu ló ŋan táa a kíi le kó ‹cɔ́ɔnba›, kɛ mansɔɔ cɔ́ɔnba kéembe lée a lá, mín ŋé Kílisi o le. ¹¹Mɔɔn mín ngɛ kɛ́ a bɛ́ kunndii le, o lé kákan kɛ kɛ́ á yɛ́ bháalakɛdhye ne. ¹²Mɔɔn mín ngɛ a yɛ́ɛ lɔ́bwoɲan, o tíi o yáa i manyiili shɔɔ, wáa mɔɔn mín ngɛ í mányii, Ala yáa ó tíi ó bwóɲan.»

Ɛnza ngó Falizɛn ŋolu ní sɛ́liya kaamɔɔn ólu fyáangafo bhóo a bwó

Maki 12.40; Luka 11.39-52; 20.45-47

¹³Ɛnza ŋé wɛɛ kɛ fɔ kó: «Bɔɔn é álee tá le, álee sɛliya kaamɔɔn ólu ní Falizɛn ŋólu! A fyáangafo ólu! Áa mɔɔn olu lábanan kó i kɛ́nan í bhóo síi sángboo ó Mansaya ó kɔɔ, álee gbú olu tɛ́ a bhóo síila a kɔɔ, bhóosiikɔɔlɔɔ lo ŋé mɔɔn mínnu la, a tɛ́ olu tó yénɔn ké olu a i bhóo síi a kɔɔ a. ¹⁴[Bɔɔn óo álee tá le, álee sɛ́liya kaamɔɔn ólu ní Falizɛn ŋolu! A fyáangafo ólu! Muso mínnu cɛ wɛ́ɛ sayakɛ, áa olu bhóofe ŋolu bɛ́ myaanla i la, ké a ló ŋé sɛ́ɛ kannanja ŋolu kɛ́la ké mɔɔn olu a a lásaa. Oo lɔ mínngɛ, a tá kíti o yáa gbɛ́ya mɔɔn tɔ́ ólu tá o lé síin!] ¹⁵Kunnangboya é a yɛ́, ále sɛliya kaamɔɔn ólu ní Falizɛn ŋólu! A fyáangafo ólu! Áa kɔɔji óni lúukolo ó lɔ́yaalala mɔɔnɲiin ndɔ́ɔ lɔ kó aa lo a tá dínnan o lɔ, wáa a kɛ́wɛɛ o sɔ́ɔla, áa o láyɛɛman yaananmanmɔɔn lé álee síya le, háanin o tíi ó tá yaananmanmɔɔnya óo tínmin a tá o ka.

¹⁶Kunnangboya é a yɛ, álee mínnu é fyóondɔ le! Ále lée lúu fɔ́la kó ni mɔɔn kɛ́ í shɛ́n kɛ Ala bhatobhomba ó kɛ́ i sɛ́ɛya le, kó o shɛ́nnin o tɛ́ la. Wáa kó sɛ́ɛn mín ŋé Ala bhatobhomba ó la, ni mɔɔn mínngɛ í shɛ́n o sɛ́ɛn ŋo la, kó shɛnnin bhɛ́ɛ ó lée wé. ¹⁷A ló nánloman ɲe kɛɛ, a ló ɲán o latuunnin ɲé! Sɛ́ɛn ŋo lé kúu a gbɛ́ɛ bháa, bháa Ala bhatobhomba ó? Ɲɔ́ɔn ngó sɛ́ɛn ŋo wɛ́ɛ sɛ́nnɛnya Ala bhatobhomba ó lé sɔ́ɔbu lá lé? ¹⁸Áa fɔ́la íkwɔ kó ni mɔɔn kɛ́ í shɛ́n kɛ faanlɛɛbhɔlaa ó kɛ́ sɛ́ɛya le, kó o shɛ́nnin o tɛ́ la, wáa kó mɔɔn kɛ́ í shɛ́n faanlɛɛfe ŋo lé la, kó shɛ́nnin bhɛ́ɛbhɛɛ ó lée wé. ¹⁹A ló ɲán latuunnin ɲe! Faanlɛɛ ó lé kúu a gbɛ́ɛ bháa, bháa faanlɛɛbhɔlaa ó? Ɲɔ́ɔn ngo faanlɛɛfe ŋo wɛ́ɛ sɛ́nnɛnya faanlɛɛbhɔlaa ó lé sɔ́ɔbu lá? ²⁰Oo lɔ mínngɛ, mɔɔn mín ngɛ í shɛ́n faanlɛɛbhɔlaa ó la, ké o tíi o wɛ́ɛ í shɛ́n faanlɛɛbhɔlaa óni faanlɛɛfe ŋo le bɛ́ lá kéene wé. ²¹Mɔɔn mín ngɛ í shɛ́n kɛ Ala bhatobhomba ó kɛ́ sɛ́ɛya le, ké o tíi óo í shɛ́nnan o bhó ŋóni Ala le lá kéene wé, Ala mín bhátobho ngo yé! ²²Mɔɔn mín ngɛ í shɛ́n sángboo o la, ké o tíi óo í shɛ́nnan Alataannan nɔ́nmɔnnaa óni ale Ala le lá wé, kɛ mansɔɔ ale lé nɔ́nmɔnnaako e. ²³Bɔɔn é álee tá le, ále sɛliya kaamɔɔn ólu ní Falizɛn ŋólu! A fyáangafo ólu! Nánkwɔfe mɛ́nsɛn mínnu é nan kɛ́ nannanye ni anɛti ní kumɛn ŋolu le, áa yáa bhɔ́la o bɛ́ lɔ lɔ. Tó tɔ́ ŋo ywáa kúugbɛɛ mín núu nan kɛ́ téleɲan óni hínnɛn óni lánanya óle, a tɛ́ olu yacela. Ké a mánngan kɛ o léelu bhɔ́ sháa man. Kɛ́ dɔ́ ólu fala o ka. ²⁴Álee sháaɲɛn fyóondɔ ólu! Áa a yɛ́ jíminnda o mánsɛɛnnɛnla kó háanin sóso fítiinin ngɛ́nan táa a kɔ́ɔnnɔn, ké áa ɲɔ́ɔnmɛɛn ó lákuunnan cɔ́!

²⁵Bɔɔn é álee tá le, ále sɛliya kaamɔɔn ólu ní Falizɛn ŋolu! A fyáangafo ólu! Áa yáafyɛ olu ní tása olu kwɔ́manlaa ó lé kwóla tó kɛ i kɔ́ɔnnɔnlaa ó nɔɔnninmba ó tó. Áa a ywáa ólu mánkwola sɛ́nnɛnya bhóoman ké natabaya óni yɛɛlɔmyaanbhɛɛya oo a yóso ó lɔ. ²⁶Falizɛn fyóondɔ ó! Yáafyɛ óni tása olu kɔ́ɔnnɔnlaa ólu kwó ótun, o kɛ́ kɛ́ í kɔ́ɔmanlaa ó yáa sɛ́nnɛnya.

²⁷Bɔɔn é ale tá le, álee sɛliya kaamɔɔn ólu ní Falizɛn ŋolu! A fyáangafo ólu! Pɛ́nndulu gbɛ́ lánin ɲé kábulu mínnu mán, a bhɔ́nin ɲé o kábulu síya o léelu la: I kanaa ó bhɔ́nin ŋé kála fé njɛ́ɛ ne la, ké su kóoguun ŋólu ní fé ndwéenin bɛ́suu fanin ɲé í kɔɔnnɔn. ²⁸Álee céne! Mɔɔn olu kɛ́ a yé, íi fɔ kó áa mɔɔn télenin né le, ké a yóso ó fánin ɲé fyaangafoya óni níyooɲan o la.

²⁹Bɔɔn é ale tá le, álee sɛliya kaamɔɔn ólu ní Falizɛn ŋolu! A fyáangafo ólu! Áa kábulu lu lɔ́la Ala yɛ céla ólu yɛ́, óni kɛ mɔɔn télenin ŋolu tá kábulu olu mánsii cɛ́ɛne, ³⁰tó kɛ fɔ kó: ‹Ni án ndɛ́ɛ kɛ́ án myɛ́man ólu tá sán o lɔ, án ne ni olu tɛ táa bhyɛ kéeman céla ólu fáa ó mán.› ³¹O ɲán o mán, á gbúlu wɛ́ɛ kɛ a gbú sɛ́ɛya le kɛ a gbúlu yáayii, kɛ a yáa kó mínnu wɛɛ céla ólu fáa, kó áa ólu bhɔ́nzɔ ne le. ³²Áa wá cɔ́! A bhyɛ́man lúu kó mín lamyaan, áa o tɔ́ o lábha né téeman! ³³Ále santutudhye ŋólu! Ále káa sé bwásila yaananmanlɔtaa kíti o mán díle? ³⁴O lé kósɔn ɲáan céla lú ní kólɔmaa lu ní sɛliya kaamɔɔn lú cé a mán: A yáa i lɔ́lu fáa, a yáa i lɔ́lu gbáan yíi mán, a yáa i lɔ gbɛ́ɛlu gbási gbɛ́nɲɛn lá a yɛ́ sɛ́ɛbho ŋolu la, a yáa kɛ́ i tɔ́lɔla só ó bɛ́ la. ³⁵Mɔɔnteenin mín núu fáa lúukolo ó ka, kɛ ta cɛ télenin Abɛli yée bwɔ́nin ŋó mán fɔ kɛ́nan sé Balaki dhyénjɛ Zakali tá ó mán, olu yáacɛ yáa bhɔ á álee lu lɔ. Áa Zakali fáa Ala bhatobhomba óni faanlɛɛbhɔlaa ó cɛ. ³⁶Tó ní fɔ a yɛ́ tinɲan in ne ngó, o kóyoo ŋó bɛ́ yáacɛ yáa bhɔ́ álee bímɔɔn míin nú lɔ!»

Kóman mín ŋé Yeluzalɛmu só ó tá fa nvɛ́

Luka 13.34-35

³⁷Ɛnza ŋé fɔ íkwɔ kó: «Yeluzalɛmuka ólu, Yeluzalɛmuka ólu, ale mín núu Ala yɛ́ céla ólu bwónan káwa la kɛ́ í fáa, síɲan yée né tɛ́ɛ fɛ́ kɛ́ a ládhyɛ ndɔ́ɔfɛ óyoo shishɛ óo a dhyé ŋólu ladhyɛla a káwa ó kɔ́ɔ ɲán mín man, waa a mán sɔ́n! ³⁸Oo lɔ mínngɛ, a yɛ́ bhó ŋó lɔ́koo ɲáan tó féfe. ³⁹Kɛ mansɔɔ tó ní fɔ a yɛ́ ngó a táa ɲé bhée. Fɔ́ a kɛ́ fɔ kó: Mɔɔn mín ŋé nánla Mantii ó tɔ́ɔla, tando é ó yɛ.»

Ɛnza ŋé Ala bhatobhomba céko ó lásela

Maki 13.1-2; Luka 21.5-6

¹Ɛnza ŋé bhɔ́ Ala bhatobhomba ó lá, a taatɔ óle, a yɛ kaamɔɔndhye ŋolu í mángbaa a lá kɛ fɔ a yɛ kó: «Íi Ala bhatobhomba míin nɔ́ í sɛ́wɛla lɛ!» ²Aa i yawi kó: «A ló ɲán é o bɛ́ lá nin, wáa tó ní fɔ a yɛ́ tinɲan in ne ngó, o káwa ó sí táa tó a siilaa o lɔ́ ya. Bhó ŋó yáa wéyaa féfe.»

Tɔ́lɔya ólu lámyaan ó

Maki 13.3-13; Luka 21.7-19

³Ɛnza ŋé táa í síi Olivyetii ó ka mínngɛ. A yɛ kaamɔɔndhye ŋolu í mángbaa a lá kɛ a manɲaankɛ í kéenan tá kó: «Kaamɔɔn, íi kó mín nvɔ sɛ́n wé, o káa kɛ́ wáati mínnɛɛn lé lɔ? Í tá kwɔsɛɛsan óni dínɲan ó lábhanzan o tɔɔmansii o káa kɛ́ mínnɛɛn ní mínnɛɛn lu le?» ⁴Ɛnza ŋé i yawi kó: «Áa í yáakii tó a yɛ́ɛ lɔ, a kɛ́nan tó ké mɔɔn lɔ́ a a láfii ⁵Kɛ mansɔɔ mɔɔn shɛ́ɛman ɲáan nan nín ndɔ́ɔ óle kɛ́ fɔ kó: Né lée Kílisi o le. I yáa mɔɔn shɛ́ɛman náfii o bhóo ó mán. ⁶A yáa kɛ́ɛkɛkan nu myɛ́n, óni kɛɛko lu mánngan, o sí kɛ́nan a mánshaan: Fɔ́ olu a kɛ́ lé, wáa o táa kɛ́ dínɲan labha ŋo sénin ne. ⁷Síya lɔ yáa í wíi síya gbɛ́ɛlu kanman, yamaanlɔ yáa í wíi yamaan gbɛ́ɛlu kanman. Kɔ́ɔn yáa kɛ́ ywáa shɛ́ɛman nɔn, lúukolo ó yáa yaayaa ywáa shɛ́ɛman nɔn. ⁸O kó ó bɛ́ yáa kɛ́ tɔ́lɔya ólu lámyaan o le óyoo muso tínndɔ ó ó tɔ́lɔya myáanla tɛ́nmɛn ne.

⁹Mɔɔn ólu yáa a ló bhóolɔ, i yáa a fáa. A yáa gbóya yamaanlɔ mɔɔn ólu yɛ né tɔ́ɔ ó kósɔn. ¹⁰Lánanya o yáa bhɔ́ mɔɔn shɛ́ɛman móo, i yáa bhɔ ɲɔ́ɔn ngwɔ́kɔɔ, i yáa gbéya ɲɔ́ɔnɲɛn. ¹¹Céla kóo ngóo nzhɛ́ɛman ɲáan yé, i yáa mɔɔn gbɔ́gbɔ láfii. ¹²Kóyoongɛ ó yáa fáan sɔ́ɔ, tó dhyáaɲɔɔnya óo lɔ́ɔya mɔɔn gbɔ́gbɔ yóso lɔ. ¹³Wáa mɔɔn mín ngɛ í lɔ́ja kɛ táa sé a la ŋó mán, o yáa kísi. ¹⁴Sanmankanmɛɛ mín nvɔnin ŋé Ala yɛ́ Mansaya ó tá fa nvɛ́ nín, o sanmankanmɛɛ ó yáa í láse dínɲan ó ywáa bɛ́ lɔ, kɛ kɛ́ sɛ́ɛya lé síya ólu bɛ́ yɛ, tó dínɲan é tó í lábhanan.»

Mantii Ɛnza ngó tɔ́lɔya ó yáa í lánantinmin

Maki 13.14-23; Luka 21.20-24

¹⁵Ɛnza ŋé fɔ kó: «Céla Daniyɛli é sɛwɛ kó fé nzúu yóo hálamutɔ lɔ́ síi Ala bhatobhomba ó la kɛ o ywáa ó bhɔ́ sɛ́nnɛnya bhóoman. Mɔɔn mín ngɛ o ywáa ó kála, o tíi o yáa bhɔ́ o kó ó ɲánle. A kɛ́ o kó ó yé kɛ́la, ¹⁶ále mɔɔn óo mɔɔn kɛ́ kɛ́ Zude mala ó lɔ, áa bwée kɛ táa a lóonaanbhɔ tii ólu mán. ¹⁷Mɔɔn mín ngɛ kɛ́ a yɛ bhó ŋó kúnnɔn, o tíi o kɛ́nan í yíi bhó ŋo kɔ́ɔnnɔn kɛ a bhóofe ŋolu tá. ¹⁸Mɔɔn mín no ngɛ́ kɛ́ sɛɛn mán, o tíi o kɛ́nan í kwɔ́sɛɛ lúman táamanlataafaani tá tɔ́ɔ lɔ. ¹⁹Bɔɔn yáa kɛ́ muso kɔ́ɔnman ŋólu ní dhyémbatii olu ta lé o lo ŋó la! ²⁰Áa Ala dɛ́li ké a bwéesan o kɛ́nan bhyɛ nɛ́nnɛnbakowaati o man wáman lɔnwɛɛnlilo ŋo man. ²¹Tɔ́lɔya o yáa bwóɲan gbúnigbukɛ. Kɛ myáan dínɲan lámyaan ó mán, kɛ́nan sii bí la, a sí tɛ́man kɛ́ bhá, a lo nzí táa kɛ́ bhée. ²²Ní Mantii ó tɛ́man o wáati o kánnansunɲan, mɔɔn sí tɛ́ táa bwási. A káa o wáati o kánnansunɲan a yɛ mɔɔn lɔ́tɔnmɔnnin ŋó léelu kósɔn. ²³Ní mɔɔn lɔ́ kɛ́ fɔ a yɛ́ o sán olu lɔ kó: ‹Kílisi óo ya!›, wáman kó ‹aa yeenɔn!› A kɛ́nan lá o tíi o la. ²⁴Kílisi kóo ngóo ni céla kóo ngóo nzhɛ́ɛman ɲáan í wíi, i yáa tɔ́ɔmansiibaba ní káwananngo bá bá lú kɛ mɔɔnlafii tɔ́ɔ lɔ, háanin Ala yɛ mɔɔn lɔ́tɔnmɔnnin ŋólu, i yáa olu láfii o ɲánɲiin. ²⁵Ŋwɛ́ɛn a tóo lasowi o bɛ́ la!

²⁶Ni lɔ́lu kɛ́ fɔ a yɛ́ kó: ‹Kísibhaa oo dhyɛ́ o lɔ́!› A kɛ́nan táa yé. Ni i lo ngɛ́ fɔ a yɛ́ kó: ‹Aa ywáa lóonaankɛnin nɔ́ lɔ́ yée nɔn!› A kɛ́nan lá i la. ²⁷Tinɲan sá ŋó í bhóo lábhɔ kɔ́ɔ ŋóni teebe ŋo lɔ tɛ́nmɛn ne, mɔɔn Dhyénjɛ o káa nan o ɲán o lé mán. ²⁸Ní fénzu é ywáa mínnɔn, lwaa ólu í ladhyɛnan o ywáa o le lɔ́.»

Mɔɔn mín ŋé mɔɔn Dhyénjɛ óle o kwɔ́sɛɛɲan o

Maki 13.24-27; Luka 21.25-28

²⁹O tɔ́lɔya wáati ólu kɛ́ bhɔ́ í lá tɛ́nmɛn,

tee ó yáa í mánfin,

káa ó ló ndáa gbɛ́ bhée,

lóodhye ŋólu yáa bhɔ́ sáman kɛ bé,

óni sébhaaya mín núu sá ŋó lɔ olu yáa maanmaan.

³⁰«O kɛ́ kɛ́ o lɔ, mɔɔn Dhyénjɛ ó, tɔɔmansii mín ŋé o nánko fɔ́la, o kó ó yáa yé sángboo o lɔ, tó síya súu súu é lúukolo ó ka, olu yáa kásikɛ. I bɛ́ yáa Mɔɔn Dhyénjɛ ó nántɔ ó yé káwa ólu ka ni sébhaayaba óni nɔ́lɔyaba ó le. ³¹Búufyɛkanmba ó yáa bhɔ́, tó mɔɔn mín ŋé mɔɔn Dhyénjɛ ó le, oo a yɛ malɛɛka olu bhyáashaa dínɲan nɔ́ɔn náannin ó fá ŋó bɛ́ kɔɔ kɛ myáan sángboo kún míin mán kɛ́ táa sé kún dɔ́ ó mán kɛ́ a yɛ mɔɔn lɔ́tɔmɔnnin ŋólu ládhyɛ.»

Saanan míin la fígisun ŋo man

Maki 13.28-31; Luka 21.29-33

³²«Áa a yɛ́ɛ sɔ́ hákii lá, saanan míin lá fígisun ŋo man. Ní a kɛ́ yé kó yíi bhóo óo táa í mánnuun ne, ké aa táa í búu kwaa bhɔ́ le, áa lála óyoo sanmanyi24.32 Izalayɛlika ólu ta wáati óni án ndá o man ngée. I lée lú fɛ yé yíi olu tɛ i búu kwaa kɛ́la sanmanyi o lɔ, ó wáati o tɛ́ kɛ́la an néelu fɛ ya. o wɛ́ɛ gbaa. ³³O ɲán kée ŋó mán, a kɛ́ kɛ́ o kó ólu yéla wáati mínnɔn, aa lɔ ŋóo mɔɔn Dhyénjɛ ó nán wáati o wɛ́ɛ gbaa. Óo aa sháala. ³⁴Tó ní fɔ a yɛ́ tinɲan in ne ngó, án ɲɛ́n wáati mín mɔɔn ó bɛ́ táa sayakɛ, ké kó míinnu bɛ́ mán kɛ́ bhá. ³⁵Sángboo óni lúukolo ó yáa tínmin, wáa ɲɛ́n kóman ólu táa tínmin tún.»

Mɔɔn Dhyénjɛ ó nán ó yáa bháa bɛ́ lɔ

Maki 13.32-37; Luka 17.26-30,34-36

³⁶«O kó ólu káa kɛ́ ló mínnan, wáman wáati kée mínnɔn, mɔɔn óo mɔɔn mán o lɔ, malɛɛka olu mán lɔ, háanin Dhyénjɛ ó mán o lɔ. Ala mín ŋé Fá óle, o kéembe lé a o lɔ. ³⁷Kó míin kɛ́ Nuwo yɛ́ tée ó lɔ, o ɲɔ́ɔn ɲáan kɛ́ íkwɔ mɔɔn Dhyénjɛ nan wáati ó lɔ: ³⁸Tinɲan o wáati o lɔ, ké sámba ó mán nan bhá, mɔɔn ólu tɛ́ɛ lɔ́minkɛla, i lo ndɛ́ɛ í mínnan, i tɛɛ muso fúu kɛ́la óni kɛ i dhyémuso lú ló fúu la. Fɔ kɛ́ táa sé Nuwo lo no ŋó mán kúunmba ó kɔ́ɔnnɔn. ³⁹I mán sówi fósi mán, fɔ sámba óo bé lo mínnan kɛ mɔɔn bɛ́ látuun. Mɔɔn Dhyénjɛ ó, ó nánlo ŋó káa kɛ́ céne íkwɔ.

⁴⁰O ɲán o mán, cɛ fyáa yáa kɛ́ sɛɛn kéeman, kée ɲáan tá kɛ́ tɔ kée ŋó tó yé. ⁴¹Muso fyáa yáa tó koonduu, kée ɲáan tá kɛ́ tɔ kée ŋó tó yé. ⁴²Oo lɔ mínngɛ, áa tó í ɲánla, kɛ mansɔɔ a mán a yɛ́ Mantii o nánlo ŋo lɔ. ⁴³Aa lɔ kó ní bhóndii ó tɛ́ɛ kɛ́ so ŋó nánwaati lɔnan, a tɛɛnan tó í ɲánla ké so ŋó kɛ́nan ló a bhóo bhónan. ⁴⁴O kósɔn, Álee lɔ́bhyɛnin ŋán kɛ́, kɛ mansɔɔ a tɛ́ í milila wáati mín mán, mɔɔn Dhyénjɛ ó káa nan ó wáati ó lé lɔ.»

Bháalakɛdhye hákiiman ŋóni bháalakɛdhye ɲóo ŋó

Luka 12.41-48

⁴⁵«Bháalakɛdhye ndélenin ŋó hákiiman mínnɛɛn lé yé, ní a kunndii ó wɛ́ɛ a lásii a yɛ́ bháalakɛdhye ndɔ ólu kunnan ké aa i yɛ́ lɔ́min ó di í mán a diwaati lɔ? ⁴⁶Yeemanfa yáa kɛ́ o bháalakɛdhye ŋo yɛ ni a kunndii o kɛ́nan a sɔɔ o bháala olu kɛ́la. ⁴⁷Tó ní fɔ a yɛ́ tinɲan in ne ngó, a kunndii ó yáa o bháalakɛdhye ŋo lásii a bhóofe ŋo bɛ́ kunnan. ⁴⁸Wáa ni a kɛ kɛ́ bháalakɛdhyeɲoo ne, tó aa fɔ́la a yɛ́ɛ kɔ́ɔnnɔn kó: Ngunndii ó táa nan jónan, ⁴⁹O lɔ, tó aa a bháalakɛdhyeɲɔɔn tɔ ólu gbasi, kɛ́ tó lɔ́minba kɛ ó la, óni mínninba ó la ní dɔlɔtɔ olu le. ⁵⁰O bháalakɛdhye ŋó tɛ́ í milila ló mín man, óni wáati mín mán, a kunndii ó káa nan o ló ŋó lé lá. ⁵¹A yáa o bháalakɛdhye ŋó bhɔ́ yé kɛ́ a tɔ́lɔ fyáangafo ólu tɔ́lɔseɲan ó lá, olu kási kɛ́la yénɔn ké i dinmisaninmba ó yé.»

Sáanan míin sínngbii tá ŋolu ka

¹Ɛnza ŋé fɔ i yɛ kó: «Ala yɛ́ Mansaya ó káa kɛ́ tɛ́nmɛn, o lée nín: sínngbiinin ndá ŋé laman nu myáan í bhóokɔɔ kɛ táa kwɛ́ɛncɛ lɔ saala ló nɔ́ la kó ii táa kéene kwɛ́ɛnyakoywaa o lɔ. ²Sínngbiinin lóo tɛ́ɛ yénɔn hákii tɛ́ tɛ olu mán, tó lóo tɛ́ɛ yénɔn hákii tɛ́ɛ olu mán. ^3-4Hákiinda ŋólu i yɛ laman ŋo tá, wáa i man táyi ta minnan nɔ kɔɔnnɔn. Táyi25.3-4 Táyi: A fɔnin ŋé gɛlɛki kitabu o lɔ́ lé kó túu. déde tɛ́ tɛ́ olu bhóo.

⁵Kwɛ́ɛn ó tɛ́ɛ díla cɛ mín man, o cɛ ó mán nan mínngɛ jónan, sunnɔɔn é tínmin sínngbiinin ndá ŋolu ka. ⁶Lúutaa ó mán, mɔɔn lɔ́ é fɔ ni gbáa ne kó: ‹Kwɛ́ɛncɛ o wɛ́ɛ nan! Áa bhɔ́ kɛ́nan a labhyɛ!› ⁷Oo kɛ́ mínngɛ, sínngbii tá ŋolu o í wíi téeman kɛ i yɛ laman ŋolu lɔ́bhyɛ ŋo lámyaan. ⁸Tó hákii tɛ́ tɛ́ sínngbii mínnu mán i sɛɛ lɔ́ wé, olu fɔ hákiiman ŋólu yɛ kó: ‹Án ɲɛn laman ŋólu fɛ kɛ sa, áa án nzɔ a yɛ́ táyi o lɔ́ sɔ́ lé!› ⁹Hákiiman ŋólu fɔ i yɛ kó: ‹Ni o kɛ́ kɛ́, táyi o táa án nee ní ále tá laman ŋo bɛ́ bhɔ́. Oo lɔ mínngɛ, áa táa táyifelebhaa olu fɛ́ yénɔn kéene le kɛ táa a lɔ sá.› ¹⁰O fɔ́nin ŋó kwɔ, ii bhɔ́ kɛ́ɛnman kɛ táa táyisanaa o lɔ. Kɛ i tó o sháa o la, kwɛ́ɛncɛ oo nan i kwɔshaafɛ tó sínngbii lóo mínnu tɛ́wɛɛ i ta laman ŋo lɔ́bhyɛ ŋwé, ale ní olu táa kéene kɛ táa lo kwɛ́ɛnyakoywaa o lɔ. Ii lá ó sɔ́ɔ.

¹¹Kwɔ́ kwɔ́ o la, tó sínngbii mín ŋolu í kunnanbhɔ ósɔ kɛ́nan lá ó mángbasi ni fɔ le kó: ‹Mantii o, Mantii o, lá ó láka án ɲɛ́n!› ¹²Wáa kwɛ́ɛncɛ ó í yawi kó: ‹Tó ní fɔ́ á yɛ́ ngó, mán á lɔ fɛ́sɛ fɛ́sɛ féu!› »

¹³Ɛnza ŋé o saanan o láfaa ni fɔ le kó: «Oo lɔ mínngɛ, áa tó í ɲánla, kɛ mansɔɔ mɔɔn Dhyénjɛ o, o káa nan tee mín man, óni wáati kée mínnɔn, a mán o lɔ.»

Sáanan mín ŋé bháalakɛdhye nzawa ólu ka

Luka 19.11-27

¹⁴Ɛnza ŋé wɛɛ kɛ fɔ kó: «Ala yɛ́ Mansaya ó káa kɛ́ tɛ́nmɛn íkwɔ, o lée nín: Aa lé óyoo cɛ lɔ́ táatɔ lé táamanla, aa a yɛ bháalakɛdhye ŋolu kíi kɛ a yɛ nanfoo ó kɛ́ɛfa i man. ¹⁵Aa nanfoo ó lɔ́taa kɛ kéeɲan ní í bɛ́ kée ngéenan faan o lé. Aa sɛ́ɛnmɔɔ lóo dí a lɔ mán, kɛ sɛ́ɛnmɔɔ fyáa dí a kée ngbɛ́ɛ mán, tó kɛ sɛ́ɛnmɔɔ kée ndí a tɔ kée ŋó mán, tó kɛ táa. ¹⁶Bháalakɛdhye ŋo mín ŋé sɛ́ɛnmɔɔ lóo sɔ́ɔ wé, oo a ta sɛ́ɛn ŋo kɛ́ mánnanngun né íkɔlɔ kɛ sɛ́ɛnmɔɔ lóo gbɛ́ɛ sɔɔ o julaya ó lɔ. ¹⁷Sɛ́ɛnmɔɔ fyáa é dí mín man, oo mɔɔn jónan ó tá kó ó sí kɛ sɛ́ɛnmɔɔ fyáa gbɛ́ɛ sɔɔ tɔɔn le o ɲán o mán. ¹⁸Tó sɛ́ɛnmɔɔ kée ŋé dí mín man, oo táa jáan shɛ́n tó kɛ a kunndiicɛ o, o yɛ kɛ́ɛfaman mín ŋé wé, kɛ o ɲánmanloonaan kɛ́ jáan ó lɔ.

¹⁹Wáati já ŋé tínmin, tó bháalakɛdhye ŋolu kunndii ó tó nánla kɛ bhɔ́ táaman o la. Aa fɔ i yɛ kó: ‹Ní kɛ́ɛfaman mínnu ló a bhóolɔ, áa nan ó kwaan kɛ́ ɲɛ́n.› ²⁰Sɛ́ɛnmɔɔ lóo é dí mín man wé, oo í mángbaa kɛ sɛ́ɛnmɔɔ lóo gbɛ́ɛ di kɛ fɔ kó: ‹Mantii o! Í táatɔ óo sɛ́ɛnmɔɔ lóo lé dí mán. Ní bhɔɔ lóo gbɛ́ɛ sɔɔ kɛ fala o ka, i bɛ́ lakafonin ŋó lée nín!› ²¹Kunndii ó fɔ a yɛ́ kó: ‹Í wɛ́ɛ bháala bhɛ́ɛ kɛ! Íi bháalakɛdhye mín ne, í káɲin, mɔɔn ló ŋé sé kɛ lá í lá. Í wɛ́ɛ kɛ́ lánanmɔɔn lé kó fítiinin ŋolu lɔ. Ni wɛɛ kɛ́ cé, ɲáan í bhóo síi kóba shɛ́ɛman nán kwɔ́ ín nan! Nan ké ní nan an ɲaanli ɲɔ́ɔn nvɛ́!› ²²Sɛ́ɛnmɔɔ fyáa é dí mín man, óo í mángbaa tó kɛ fɔ kó: ‹Mantii o! Íi sɛ́ɛnmɔɔ fyáa mín dí ne mán, ŋwɛ́ɛn sɛ́ɛnmɔɔ fyáa gbɛ́ɛ sɔɔ kɛ fala olu ka. I bɛ́ lakafonin ŋó lée nín!› ²³Kunndii ó fɔ a yɛ́ kó: ‹Í wɛ́ɛ bháala bhɛ́ɛ kɛ! Íi bháalakɛdhye mín ne, í káɲin, mɔɔn ló ŋé sé kɛ lá í lá. Í wɛ́ɛ kɛ́ lánanmɔɔn lé kó fítiinin ŋolu lɔ. Ni wɛɛ kɛ́ cé, ɲáan í bhóo síi kóba shɛ́ɛman nán kwɔ́ ín nan! Nan kéni nan an ɲaanli ɲɔ́ɔn nvɛ́!› ²⁴Sɛ́ɛnmɔɔ kée ŋó dí mín mán, oo í mángbaa kɛ fɔ kó: ‹Mantii o! Ní lɔ ŋóo í yɛ́ kó o a gbɛ́ɛ, í mán fé mín na cɛ mínnɔn, íi o tála o ywáa ó lé lɔ! I mán sɛ́ɛn kɛ́ ywáa mínnɔn, ii sunman ndɛ́ɛla o ywáa ó le lɔ ²⁵O lé kósɔn ní sháan tó kɛ táa í yɛ́ nanfoo ó ɲánmanloonaan kɛ́ jáan lɔ. A yé nín!› ²⁶A kunndii ó kó a man kó: bháalakɛdhye yóoɲannin ŋo, sálabhaatɔ ó! Í tɛ́ɛ lɔ ŋóo mán fé mín na cɛ mínnɔn, ni o tála o ywáa ó lé lɔ, mán sɛ́ɛn kɛ́ ywáa mínnɔn, ni sunman ndɛ́ɛla o ywáa ó le lɔ, bháa díi? ²⁷Tó aa kɛ́ díi tó í mán táa ɲɛ́n nanfoo ó ló nanfoolamalabhaa lu bhóo ké ndɛ́ɛ tɔɔn sɔ́ɔ a ka nánnin míin ne? ²⁸Áa a ta sɛ́ɛnmɔɔ kée ŋó myáan a lá kɛ o di sɛ́ɛnmɔɔ tá ndíi o mán. ²⁹Aa céne, lɔ́ kɛ́ kɛ́ mɔɔn mín móo, lɔ yáa bhyáa o tíi o tá ó ka fɔ́ kɛ wasa a lɔ, waa fé ndɛ́ mín móo, míin móo, o yáa bwási a lá. ³⁰Bháalakɛdhye ngólo míin ngwɛ́nnin, áa o tá kɛ a lafii kɛ́ɛnman diwiba ó lɔ ké aa kási kɛ́ yénɔn ké a dinmisaninmba ó yé.»

Kíyamanwiilo ŋo

³¹Ɛnza ngó íkwɔ kó: «Mɔɔn mín ŋé mɔɔn Dhyénjɛ ó le, o kɛ́nan wáati mínnɔn, a nɔlɔyalaman ŋó yáa nan ni malɛɛka olu bɛ́ le, a yáa nan í síi a nɔnmɔnnaa mansayalaman ŋó lɔ. ³²Síya olu bɛ́ yáa i ládhyɛ a ɲánkɔɔ, a yáa i lɔtɔnmɔn óyoo bhyáamangbɛngbɛmaa óo saa ólu ní bhá ólu bhɔ́la ɲɔ́ɔnnga tɛ́nmɛn né. ³³Mansacɛ o yáa saa ólu bhyáa í bhóobhɛɛkɔɔ, tó kɛ bhá ólu bhyáa í bhóonwaan ngɔɔ. ³⁴Mɔɔn mínnu káa kɛ́ a bhóobhɛɛkɔɔ, mansacɛ ó yáa fɔ olu yɛ kó: ‹Nvá Ala wɛ́ɛ hɛ́lɛ kɛ́ ále mínnu yɛ, áa nan lo Mansaya o lɔ! Ala é o lɔ́bhyɛ a yɛ́ dínɲan lámyaan wáati o lé lɔ. ³⁵Kɛ mansɔɔ kɔ́ɔn é myáan mínngɛ, áa lɔ́min dí mán, jíminnɔɔ é myáan mínngɛ, áa nzɔ́ jíminnda la, ndɛ́ɛ lónan né mínngɛ, áa a bhóo síi ngɔ́ɔ a fɛ́ yé. ³⁶Ngbóomankoo ndɛ́ɛ mínngɛ, áa nán nvɛ́ɛya bhɔ́, ndɛ́ mán ngɛ́nnɛn mínngɛ, áa í bhóo bhyáa nɔ́n, tó ndɛ́ɛ kaso lá mínngɛ, áa táa nvo.› ³⁷O kɛ́ kɛ́, mɔɔn télenin ŋólu yáa fɔ mansacɛ o yɛ kó: ‹Mantii o, án ni í kɔ́ɔntɔ yé wáati mínnɛɛn lé lɔ tó kɛ lɔ́min di í mán, wáman kɛ í jímínnɔɔtɔ ó yé kɛ jí dí í mán? ³⁸Án ni í yé lónanɲan bhóoman wáati mínnɛɛn le lɔ kɛ án móo síi í kɔ́ɔ, wáman kɛ í mánkoo ɲe tó kɛ í fɛ́ɛya bhɔ́? ³⁹Án ni í mánngɛnnɛnbhaatɔ yé wáati mínnɛɛn lé lɔ wáman kɛ í yé kasola tó kɛ táa í fo?› ⁴⁰Mansacɛ o yáa í yawi kó: Amiinan. ‹Ní fɔ́la a yɛ́ tinɲan in ne, ngo mɔɔn oo mɔɔn wɛ́ɛ o kɛ́ mándhyenjɛman ŋolu bɛ́ lɔ fítiinin ŋo yɛ́, o tíi o tɛ́ɛ o kɛla né lé yɛ́ wé!›

⁴¹O kɛ́ wɛɛ, a yáa fɔ a bhóonwaanngɔɔbhaa olu yɛ kó: ‹Áa táa kɛ í cɛ́bhɔ nán, ále mɔɔn dáannin ŋólu! Yaananman tá mín ŋé í lákin sɔtaannan ni a yɛ malɛɛka yóo ŋólu yɛ, áa táa o tá ó lɔ, ⁴²kɛ mansɔɔ kɔ́ɔn é myáan, a mán lɔ́min di mán, jíminnɔɔ é myáan, a mán nzɔ́ jíminnda la, ⁴³ndɛ́ɛ lónan ne, a mán i bhóo síi ngɔ́ɔ a fɛ́ yé. Ngbóomankoo ndɛ́ɛ, a mán nvɛ́ɛya bhɔ́, ndɛ́ mán ngɛ́nnɛn sán mínnɔn, óni ndɛ́ɛ kaso lá mínngɛ, a mán táa nvo.› ⁴⁴O kɛ́ kɛ́, i yáa fɔ kó: ‹Mantii o, án ni í kɔ́ɔntɔ yé wáati mínnɛɛn lé lɔ, wáman kɛ jíminnɔɔ yé í lá, wáman kɛ í yé lónanɲan bhóoman, wáman kɛ í mánkoo ɲe, wáman kɛ í mánngɛnnɛnbhaatɔ yé, wáman mán kɛ́ í yé kasola tó án man í mángbɛ ŋo lɔ́lɔ?› ⁴⁵Mansacɛ o yáa i yawi kó: Amiinan. ‹Tó ní fɔ a yɛ́ tinɲan in ne ngó mɔɔn oo mɔɔn mán o kɛ́ mádhyenjɛman ŋolu bɛ́ lɔ fítiinin ŋo yɛ́, o tíi o mán o kɛ́ né lé yɛ́ wé!› ⁴⁶Ɛnza ŋé wɛɛ kɛ fɔ kó: La ndɛ́ tɔ́lɔya mínnan, o mɔɔn yóoɲannin ŋólu yáa táa o tɔ́lɔya ó lɔ, tó ɲáanmanɲan wɛ́ɛbhɛɛ oo ywáa mínnɔn, mɔɔn télenin ŋólu yáa táa yénɔn.»

Kúnndii ólu fɛ́ kɛ Ɛnza nváa

Maki 14.1-2; Luka 22.1-2; Yaya 11.53-54

¹Ɛnza ŋé wɛɛ o kóman ó bɛ́ fɔ́la mínngɛ, aa fɔ a yɛ kaamɔɔndhye ŋolu yɛ kó: ²«Mɔɔn mín ŋé mɔɔn Dhyénjɛ óle, o yáa ló a yúu olu bhóo tó olu a gbáan yíi o mán. Tee fyáa lé wɛ́ɛ tó o kó ó ɲánman, a ló ŋan lɔ ŋóo a káa kɛ́ Hɔ́lɔɲanli o ɲánlagbɛ ló ŋo lé la.»

³O fɔ́nin ŋó kwɔ, faanlɛɛɲansebhaa olu kúnndii ólu ní Yawudhyaa cɛba ólu ɲɔ́ɔnɲe faanlɛɛɲansebhaa olu kúnndiiba Kayife yɛ́ lúkɔɔn ó mán. ⁴Ii bhyɛ kée mán kó kɛ Ɛnza myáan loo nɔn kɛ a fáa. ⁵I tɛ́ɛ fɔ́la o bhóo ó mán kó: «Án ndɛ́ sé a myáanla ɲánlagbɛ lo míin mán ní o tɛ, yaman ó yáa ɲáanmin.»

Muso lɔ́ é latikɔlɔ kɛ́la Ɛnza ngúnnɔn

Maki 14.3-9; Yaya 12.1-8

⁶Só mín ndɔ́ɔ kó Betani, Ɛnza ndɛ́ɛ yénɔn, Simɔn kwáantɔ yɛ́ bhó ŋó la. ⁷Muso lɔ́ é í mángbaa a lá ni bháanin ngúugbɛɛ nɔ le mín nálaanin ndɛ́ɛ káwa kúugbɛɛ nan, mín ŋe kíila ko Alibatili. Tó a fanin ndɛ́ɛ latikɔlɔ sɔɔn gbɛ́ɛ nan. Aa o latikɔlɔ ŋo kɛ́ Ɛnza ngúnnɔn ké oo lɔ́min kɛ́. ⁸Ɛnza ɲɛn kaamɔɔndhye ŋolu o kókɛse ŋó yé mínngɛ, oo i lamwɛnnɛn, tó ii fɔ kó: «Aa latikɔlɔ ngúugbɛɛ nzúu míin nɔ́nɔɔnla mínnɛɛn lé gbú lá nín? ⁹Mɔɔn tɛ́ɛ sé ale latikɔlɔ ó felela wɛ́ɛ lágbɛɛn nan kɛ o wɛ́ɛ o dí bhóokoo ŋólu mán!»

¹⁰O kóman ólu bhyáa Ɛnza ndóo lɔ́ mínngɛ, aa fɔ a yɛ kaamɔɔndhye ŋolu yɛ kó: «Mínnɛɛn le kósɔn áa muso míin ngannankwaanyala? A wɛɛ kóbhɛɛ lé kɛ́ ɲɛ́n nín! ¹¹Kɛ mansɔɔ ále ní bhóokoo ŋólu yáa kɛ́ kéene yánun wáati bɛ́ lɔ, wáa né ní ále táa kɛ́ kéene yánun wáati bɛ́ lɔ. ¹²Muso míin ŋé latikɔlɔ ó kɛ́ nga nzúlongo o lé kósɔn. ¹³Tó ní fɔ a yɛ́ tinɲan in ne ngó, sanmankanmɛɛ míin ngáa í láse dínɲan ywáa óo ywáa lɔ, muso ó kɛ́ko míin ɲáan fɔ́ o ywáa ó bɛ́ lɔ tó a ko é bhyáa mɔɔn olu hákiila.»

Ɛnza ɲanvalɔɔ é Zudasi la

Maki 14.10-11; Luka 22.3-6

¹⁴Kaamɔɔndhye ndá ni fyáa ó mín ngée ndɔ́ɔ tɛɛ kó Zudasi Sikaliyɔti, oo táa faanlɛɛɲansebhaa olu kúnndii ólu fɛ́ yé ¹⁵Tó aa fɔ i yɛ kó ni ngɛ́ Ɛnza lo á bhóo, á káa mínnɛɛn lé dí mán. Olu wɛ́ɛgbannan bísawa dí a man. ¹⁶Kɛ ta o wáati o mán, Zudasi tɛɛ ɲánɲiinnan kɛ Ɛnza no í móo.

Hɔ́lɔɲanli sunman ngo o

Maki 14.12-21; Luka 22.7-14,21-23; Yaya 13.21-30

¹⁷Búlufuunmɛɛ ó ɲánlagbɛ26.17 Búlufuunmɛɛ ó ɲánlagbɛ: O ɲánlagbɛ o lée Izalayɛlika olu bhɔ ó yɔɲan ó lɔ o ko bhyaa lá i kɔɔnnɔn. Í ɲángban kóyoo ŋó man íi búlufuunmɛɛ ó lɔɔ ŋó lé lɔ. Íi ó ɲanlagbɛ o kíila i kwɔ́ ko Hɔ́lɔɲanli ó ɲánlagbɛ ó. o tée jónan ó mán, kaamɔɔndhye ŋolu Ɛnza manɲaankɛ kó: «Íi fɛ́ ké án ni í yɛ́ Hɔ́lɔɲanli o ɲánlagbɛ ó gbá ó kɛ́ ywáa mínnɛɛn lé lɔ?» ¹⁸Ɛnza ngó i yɛ kó: «Áa táa lɔ fɛ́ yénɔn lúukɔɔnnɔn kɛ fɔ a yɛ kó: ‹Án ngáamɔɔn kó kɛ́nan fɔ kó tɔ bhɛ́ɛ tɛ́ a ta wáati o sé o lá bhée, oo lɔ mínngɛ, ale ní a yɛ kaamɔɔndhye ŋolu káa nan Hɔ́lɔɲanli o ɲánlagbɛ ó kɛ́ í fɛ́yanun.› » ¹⁹Ɛnza ŋé kó mín nvɔ kaamɔɔndhye ŋolu yɛ, ii o kɛ tó kɛ Hɔ́lɔɲanli o ɲánlagbɛ ó gbá ó kɛ.

²⁰Ywáa óo sé mínngɛ, Ɛnza ni a yɛ kaamɔɔndhye ndá ni fyáa ólu dhyɛ kɛ. ²¹Í tɛ́ɛ lɔ́min kɛ́ ó lá wáati mínnɔn Ɛnza ŋé fɔ kó: «Tó ní fɔ a yɛ́ tinɲan in ne ngó, a kée ngéenan yáa ne yánva.» ²²O kóman óo kaamɔɔndhye ŋolu ɲánlasii tó ii Ɛnza manɲaankɛ kée ngée ndá kó: «Né kó tɛ lɛ, bháa díi Mantii o?» ²³Ɛnza ŋé i yawi kó: «Né ní mɔɔn mín ngáa í bhóo ló sunmannve ŋó lɔ́ kéene, o tíi ó lé káa ɲánva. ²⁴Mɔɔn Dhyénjɛ ó yáa sayakɛ óyoo a sɛwɛnin ɲé a ta fa nvɛ́ tɛ́nmɛn né. Wáa mɔɔn mín ngwɛnnin ngáa mɔɔn Dhyénjɛ ó yánva, kunnangboya é o tíi ó yɛ! Yáanin o tíi ó wóobhaa yɛ́ɛ tɛ́ mán a bhyáa fwɛ́ɛn ka, o tɛ́ɛnan físaya!» ²⁵Zudasi, o mín ndɛ́ɛ Ɛnza ɲanvasii lɔ, oo ale Ɛnza manɲaankɛ kó: «Né kó tɛ lɛ, bháa díi kaamɔɔn ó?» Ɛnza ŋé a yawi kó: «Íle lé kó cé ŋwaa.»

Ɛnza ŋé lɔ́min lábha mín ngɛ ni a yɛ kaamɔɔndhye ŋolu le

Maki 14.22-26; Luka 22.14-20

²⁶I tɛɛ lɔ́min o kɛ́la mínngɛ, Ɛnza ŋé búlu ó tá, kɛ Ala bálika bhɔ́, kɛ a lɔ́tɛɛtɛɛ kɛ́ a di a yɛ kaamɔɔndhye ŋolu mán, tó kɛ fɔ i yɛ kó: «Nvásisoo ó lée wé, áa a tá kɛ a lɔɔ.» ²⁷Aa wɛɛ kɛ lɛ́zɛnnjifyɛ lɔ tá tó kɛ Ala bálika bhɔ́ kɛ o lɛ́zɛnnji o ló i bhóo kɛ fɔ kó: «A bɛ́ a a lɔ mín, ²⁸ɲee ó lée wé, yée mín ŋé bwɔ́ yúumu yafa o bhóoman mɔɔn shɛ́ɛman ngósɔn. Yée mín ŋé wé, o lé káa kɛ́ Ala yɛ dhyáaɲɔɔnya ó láheli o tɔ́ɔmanse ne. ²⁹Tó ní fɔ a yɛ́ tinɲan in ne ngó, ndáa lɛ́zɛnnji mín bhée fɔ́ ngɛ́ kɛ́ lɛ́zɛnnji kwáa mínnan ní ále Nvá yɛ́ Mansaya ó lɔ.» ³⁰Ii wɛɛ Ala tándo lɔ́ ŋolu lá lá mínngɛ, ii bhɔ́ kɛ táa Olivyetii ó mánshaa fɛ́.

Ɛnza ngó Piyɛli yáa fɔ kó a man ale lɔ

Maki 14.27-31; Luka 22.31-34; Yaya 13.36-38

³¹Ɛnza ŋé fɔ a yɛ kaamɔɔndhye ŋolu yɛ kó: «Bí sú míin nɔ́n, a bɛ́ yáa í kwɔ́kɛ nán, kɛ mansɔɔ a sɛwɛnin ɲé kitabu o lɔ́ kó: Ɲáan saamangbɛngbɛmaa o fáa tó saa sɛ́ɛ ólu ɲɛ́nɲɛn.³²Wáa ngɛ́ kúun kɛ bhɔ́ su ólu cɛ́man, ɲáan bhyáa a ɲɛ́n nzɔ́ kɛ táa Galile lánga ŋo lɔ.» ³³Piyɛli é fɔ a yɛ́ kó: «Yáanin mɔɔn tɔ́ ólu kɛ́ í kwɔ́kɛ í la, né táa ngwɔ́kɛ í lá tún.» ³⁴Ɛnza ŋé a yawi kó: «Tó ní fɔ í yɛ́ tinɲan in ne ngó, bí sú míin ɲɛ́ɛ lɔ, sánnin lónan ŋo a kóman, í yáa fɔ síɲan sawa kɛ kó í mán né lɔ.» ³⁵Piyɛli kó a yɛ kó: «Dínɲan lɔ, ndáa fɔ ngó mán í lɔ́, yáanin ngɛ́ saya kɛ́ í fɛ́.» Kaamɔɔndhye ŋo tɔ́ ólu bɛ́ɛ o fɔ o ɲán kée ŋó mán.

Ɛnza ŋé í sɛ́ɛla Zesemane

Maki 14.32-42; Luka 22.39-46

³⁶Fɔ́ é kɛ́la ywáa mín man kó Zesemane, Ɛnza ni a yɛ kaamɔɔndhye ŋolu sé ó ywáa ó lɔ mínngɛ aa fɔ i yɛ ko: «Áa í síi ya ké ndáa nzɛ́ɛ yéenɔn.» ³⁷Aa Piyɛli ní Zebede dhyénjɛ fyáa ó bhyáa í fonga kɛ táa. Ɛnza ndɛ́wɛɛ bhyáa í ɲánlasii le, óni kɛ a ní ó tɔ́lɔ. ³⁸Tó aa fɔ i yɛ kó: «Né ní o wɛ́ɛ tɔ́lɔ koyoongɛ fɔ́ kɛ kɛ́ óo ngáa sayakɛ a bhóo. Áa tó yánun, áa tó í ɲánla ní ne.» ³⁹Ɛnza ŋé í cɛ́bhɔ i la dɔ́ɔnin tó kɛ í cé ngbáan lúu lɔ kɛ Ala dɛ́li ni fɔ le kó: «Nvá Ala, tɔ́lɔyaba míin nín, ni íi sé kɛ ó cɛ́bhɔ ne lá. Waa ó bɛ́ kwɔ, í kɛ́nan a kɛ ne sao óle, fɔ́ í légbu sao ó!» ⁴⁰Aa í kwɔ́sɛɛ a yɛ kaamɔɔndhye nzawa ólu saala. Aa táa ké olu sunnɔɔn lɔ. Aa i lakuun kɛ fɔ Piyɛli yɛ kó: «Ɲɔ́ɔn ngó ále mán sé lɛ́ɛlɛ kéembe kɛla a ɲán lá ni né le kɛ́ɛ! ⁴¹Áa tó í ɲánla, kɛ Ala dɛ́li ké á kɛ́nan lo lɔ́swaannin ó lɔ. Kóbhɛɛ kɛ́ yóso é Adamandhye ŋó kɔ́ɔnnɔn, wáa a sé tɛ́ a yɛ.» ⁴²Aa í cɛ́bhɔ i la ko síɲan fyáaɲɔn o kɛ kɛ́ táa Ala dɛ́li íkwɔ kó: «Nvá Ala, tɔ́lɔya mín ŋé nánla nín, ni ngákan kɛ ngúnnzii o kɔ́ɔ lé, ni a táa sé í cɛ́bhɔla nan, í sáo ó a kɛ́!» ⁴³Aa í kwɔ́sɛɛ kaamɔɔndhye ŋolu mán íkwɔ, kɛ́nan i sɔɔ sunnɔɔn lɔ ikwɔ, kɛ mansɔɔ i bɛ́ ɲánfaa tɛ́wɛɛ gbíiya i la. ⁴⁴Aa i tó yénɔn kɛ í lɔ́nin manbhɔ íkwɔ tó kɛ í sɛ́ɛ síɲan sawaɲɔn kɛ óyoo aa í sɛ́ɛ dɔ́ olu lɔ tɛnmɛn. ⁴⁵Aa wɛɛ kɛ í kwɔ́sɛɛ a yɛ kaamɔɔndhye ŋolu saala. Aa fɔ i yɛ kó: «Áa sunnɔɔn le lɔ́ bhée kɛ a lɔ́nwɛɛn a? Mɔɔn Dhyénjɛ ó, o káa ló yuumukɛbhaa olu bhóo wáati mínnɔn, o wɛ́ɛ bhyáa sé lé. ⁴⁶Áa í wíi ké án ndáa! Ɲanvabhaa o lée nánla nín!»

Ɛnza myaanko o

Maki 14.43-50; Luka 22.47-53; Yaya 18.3-12

⁴⁷Kɛ́ Ɛnza ndó kóman o la, a yɛ kaamɔɔndhye ndá ni fyáa ó kée ŋó mín ndɔ́ɔ kó Zudasi, oo í kunnanbhɔ ni yamandhye ngbɔ́gbɔ lé a kwɔ́ka. Fá ŋóni gbéle lú tɛ́ɛ yaman o bhóo. Faanlɛɛɲansebhaa olu kúnndii ólu ní Yawudhyaa cɛba ó léelu tɛ́wɛɛ o mɔɔn ólu bhyáashaa. ⁴⁸Ɛnza ɲanvabhaa o tɛ́ káa a tɔɔmansii ɲán o mín man, a tɛ wɛɛ o ɲányaa yamandhye ŋó lá tá kó: «Ngáa nvínin cɛ mín man wé, ale lée wé. Áa ale lé myáan!» ⁴⁹Aa í mánlo Ɛnza nán íkɔlɔ téeman kɛ fɔ a yɛ kó: «Ní í fola, kaamɔɔn ó!» Aa o fɔ tó kɛ́ í fínin a man. ⁵⁰Ɛnza ŋé a yawi kó: «Ndwáanva, í nánnin ŋé kó mín ngɛ tɔ́ɔ lɔ, o kɛ.» Mɔɔn ólu í mánlo Ɛnza nan kɛ a myaan. ⁵¹Ɛnza nvongamaa o kée ŋé a ta fá ŋó bhɔ́ a foo ŋo lɔ kɛ a láyii faanlɛɛɲansebhaa olu kúnndiiba ó yɛ́ bháalakɛdhye ŋo ka kɛ a tóofaa ó tɛɛ man téeman. ⁵²Oo kɛ́ mínngɛ, Ɛnza ŋé fɔ a yɛ kó: «Í yɛ́ fa ŋo ló a foo ŋo lɔ, kɛ mansɔɔ mɔɔn óo mɔɔn é fa ndála mɔɔn lu fɛ́, fa ne káa o tíi ó fáa. ⁵³Í mán lɔ ŋóo né tɛ́ɛ sé kɛ Nvá dɛ́li ngó aa malɛɛka wáa gbɔ́gbɔ lánan ɲɛ́n nín íkɔlɔ a? ⁵⁴Wáa ni o ló ngɛ́ kɛ́, Kitabu o lɔ́kan ŋó káa í láfa o lɔ́ díi bhée? Kó mín núu nzɔ́ɔla nín, a fɔnin ngɔɔ lée Kitabu o lɔ kó olu tɛ́ káa nzɔ́ɔ le kɔ́ɔ!»

⁵⁵Ɛnza ŋé wɛɛ kɛ fɔ yaman o yɛ kó: «Áa nánla ni fá nu ní gbéle lú lé né lé myáan tɔ́ɔ lɔ óyoo kóyoongɛbhaa lɔ a? Ló ŋóo ló, ndɛ́ɛ nzíila Ala bhatobhomba ó kɔ́ɔnnɔn kɛ mɔɔn olu kála, a mán myáan. ⁵⁶Kó míin ngwɛ́ɛn mbɛ́ é nzɔ́ɔ ke céla ólu saaninkan mín núu Kitabu o lɔ, olu a í láfa.» Oo kɛ́ mínngɛ, a yɛ kaamɔɔndhye ŋolu bɛ́ é bwée kɛ í kwɔ́kɛ a lá.

I wɛɛ táa ni Ɛnza né kítitɛɛlaa o lɔ

Maki 14.53-65; Luka 22.54-55,63-71; Yaya 18.13-14,19-24

⁵⁷Ɛnza myaanbhaa olu táa ni ale faanlɛɛɲansebhaa olu kúnndiiba Kayife lé fɛ́ yénɔn, ké sɛliya kaamɔɔn ólu ní cɛba ólu ɲɔ́ɔn nadhyɛ yénɔn. ⁵⁸Piyɛli é Ɛnza nzúukutaaman kɛ, kɛ táa lo fɔ́ faanlɛɛɲansebhaa olu kúnndiiba ó fɛ́ yé. Aa lo lú o kɔ́ɔnnɔn tó kɛ í síi kunndiiba ó yɛ́ bháalakɛdhye ŋolu tɔ́ɔfɛ. Ɛnza myaanko o tɛ́ káa í lábha ndɛ́nmɛn, a tɛɛ fɛ́ ké o a kɛ́ a ɲanla.

⁵⁹Faanlɛɛɲansebhaa olu kúnndii ólu ní Yawudhyaa olu yɛ́ kítitɛɛmɔɔnba ó bɛ́ tɛ́ɛ fwɔnɲankan nɔ ɲíinnan sɛ́ɛya bhóoman ké i tɛɛ o bɛ́ɛ Ɛnza nan, kó óo kó é kɛ ke o tɛ́ɛ kɛ́ a faakun né i bhóo. ⁶⁰Wáa i man kan nzɔ́ɔ, mín ndɛ́ɛ sé kɛ́la Ɛnza nvaakun ne, kɛ́ɛke sɛ́ɛya fwɔ́ɲanfɔ gbɔ́gbɔ tɛ́ɛ i bhóoka. Kwɔ́ o lá ósɔ, cɛ fyáa é táa i saala ⁶¹kɛ fɔ kó Ɛnza ndɔ́ɔ míin ŋé fɔ kó álee sé Ala bhatobhomba ó céla kɛ́wɛɛ kɛ a lɔ́ ko kwáa kɛ́ tee sáwa kɔ́ɔnnɔn. ⁶²O sɛ́ɛya ó ládinin ŋó kwɔ, faanlɛɛɲansebhaa olu kúnndiiba óo í wíi kɛ fɔ Ɛnza ɲɛn kó: «Kóman súu súu tɛ́ í fɛ́ kɛ mɔɔn míin nú yawi a?» ⁶³Ɛnza ŋé lumandhye myáan a yɛ́ɛ ka. Oo kɛ́ mínngɛ, faanlɛɛɲansebhaa olu kúnndiiba óo fɔ a yɛ kó: «Í shɛ́n Ala ɲáanman ŋó la kɛ fɔ án ɲɛn ni íle lée Kílisi o le, Ala Dhyénjɛ ó.» ⁶⁴Ɛnza ngó a yɛ kó: «Í légbu lé wɛ́ɛ o fɔ́ wé. Waa, tó ní fɔ a yɛ́ ngó a yáa mɔɔn Dhyénjɛ ó, síinin ɲé Sétii ó bhóobhɛɛkɔɔ, a ló yáa a yé nánla sángawa ólu ka.» ⁶⁵Ɛnza ŋé o kóman ólu fɔ́ mínngɛ, faanlɛɛɲansebhaa olu kúnndiiba óo a yɛ́ɛla kannanfaani o fála mwɛ́nnɛn o mán tó kɛ fɔ kó: «A wɛɛ Ala lɔ́ɔya! Án manko tɛ́ sɛ́ɛya gbɛ́ɛ ɲiin nán bhée! A bɛ́ wɛ́ɛ a kómankan ŋo myɛ́n ké aa Ala lɔɔyala lɛ? ⁶⁶Álee kó án ni mínnɛɛn lé kɛ́ a lá o lɔ?» Mɔɔn ólu fɔ kó: «Áa á fáa lé!» ⁶⁷Oo kɛ́ mínngɛ, íi i láji bwɔ́ a ɲán lɔ óni kɛ a gbú gbú, lɔ́luu a tóo cé ⁶⁸tó kɛ táa fɔ lé a yɛ kó: «Célayakɛ Kílisi! Yɛ́ɛtii i gbasi ó fɔ́ án ɲɛn?»

Piyɛli é í lámangbɛyala kó ale mán Ɛnza nɔn

Maki 14.66-72; Luka 22.56-62; Yaya 18.15-18,25-27

⁶⁹Oo í lɔ́ ké Piyɛli síinin ɲé kɛ́ɛnman lú o kɔ́ɔnnɔn. Bháalakɛdhye musoman nɔ́ é í mángbaa a lá kɛ fɔ kó: «Íle ní ƐnzaGalileka cɛ o tɛ́ɛ kéene.» ⁷⁰Wáa Piyɛli é í lámangbɛya ni a fɔ lé bɛ́ ɲánla kó: «Í yɛ́ɛ é dhyaa mínnan wé, né tɛ́ bhɔ́la o ɲánle.» ⁷¹Aa o fɔ tó kɛ táa lú o lákɔɔlaa ó lɔ. Bháalakɛdhye musoman ngbɛ́ɛ é a yé yénɔn, oo fɔ yé ŋó mɔɔn ólu yɛ kó: «Cɛ míin ní Ɛnza Nazalɛtika cɛ o tɛ́ɛ kéene.» ⁷²Piyɛli é í lámangbɛya ko kwáa kɛ́ ni í shɛ́n ne kó: «Mán ale cɛ ó lɔ.»

⁷³Wáati dɔ́ɔnin ŋé tínmin mínngɛ, mɔɔn mínnu tɛ́ɛ yénɔn, olu í mángbaa Piyɛli la kɛ fɔ a yɛ kó: «Síka tɛ́ lɔ, íi Ɛnza nvongamaa o lé lɔ́ le, í kómankan ŋo bɛ́ é yáala mɔɔn la kó íi bhɔ́la Galile le.» ⁷⁴Piyɛli é í shɛ́n kɛ fɔ kó: «Ala a ndáan, ni ngɛ́ kɛ́ fwɔnɲan la! Ngó mán ale cɛ ó lɔ!» O wáati kée ŋó lɔ, lónan ŋóo kóman téeman. ⁷⁵Oo kɛ́ mínngɛ, Ɛnza ŋé kóman mín nvɔ Piyɛli yɛ oo bhyáa a kɔɔnnɔn téeman kó: Sánnin lónan ŋo á kóman, íle yáa fɔ né mán síɲan sawa kó í mán né lɔ́. Aa bhɔ́ kɛ́ɛnman kɛ kási kɛ́ bhɛ́ɛbhɛɛ le.

I wɛɛ táa Ɛnza ne Pilati saala

Maki 15.1; Luka 23.1-2; Yaya 18.28-32

¹Sɔɔ jónan ó mán, faanlɛɛɲansebhaa olu kúnndii ó bɛ́ bɛ́ ní Yawudhyaa cɛba ólu ɲɔ́ɔn yé kɛ́ Ɛnza ngánman. ²Ii wɛɛ Ɛnza nzilila mínngɛ, ii táa ale kɛ táa a lo Lomɛn olu tá faanman ŋó bhóo mín ndɔ́ɔ kó Pilati.

Zudasi é a yɛ́ɛ fáala

³Zudasi míin Ɛnza ɲanva, oo yé mínngɛ oo í wɛ́ɛ kíti bé Ɛnza nga ko í káa a fáa, ale Zudasi é a kɛ́ko o caanlɔngii, oo kɛ́ mínngɛ aa táa faanlɛɛɲansebhaa olu kúnndii ólu ní cɛba ólu fɛ́ yénɔn kɛ wɛ́ɛgbannan bísawa ó lákwɔsɛɛ. ⁴Aa fɔ i yɛ kó ale wɛ́ɛ yúumukɛ, kɛ mansɔɔ ale wɛ́ɛ mɔɔn sɔ́nda ŋó lo mɔɔn olu bhóo kɛ a fáa, ké a lo mán kóyoo gbɛ́ɛ lɔ kɛ. Ii Zudasi yawi ko: Ílee tá fósi tɛ́ o lɔ, kó a ta kó lée wé! ⁵Zudasi é wɛ́ɛ o láfii Ala bhatobhomba ó kɔ́ɔnnɔn kɛ táa a yɛ́ɛ fáa. ⁶Faanlɛɛɲansebhaa olu kúnndii ólu wɛ́ɛ o tá tó kɛ fɔ kó: «A láanin ndɛ́ kó mɔɔn a wɛ́ɛ súu míin bhyáa Ala bhatobhomba ó wɛ́ɛkesu o lɔ, kɛ mansɔɔ wɛ́ɛ naansinin ɲéeman née wé.» ⁷Ii ɲɔ́ɔnɲe tó kɛ o wɛ́ɛ o tá kɛ laalalaamaa o yɛ́ sɛ́ɛn ó sá kɛ o kɛ́ lónan ŋólu yɛ́ kábulu só o le. ⁸Ó lée kɛ, kɛ ta o wáati o mán kɛ sii bí la, fɔ́ é kála o sɛ́ɛn ó mán kó «yée sɛ́ɛn.» ⁹Céla Zelemi é kóman mín nvɔ, oo í láfa céne. A fɔnin ndɛ́ɛ a kwɔ tá ne kó: Ii o wɛ́ɛgbannan bísawa ó tá,Izalayɛli mɔɔn o lɔ́ lúu wɛ́ɛ mín ɲace síi cɛ ó kósɔn,¹⁰tó ii laalalaamaa o yɛ́ sɛ́ɛn ó sá ŋo wɛ́ɛ o la, óo Mantii o o fɔ ɲɛ́n kó ní a láse i man tɛ́nmɛn ne cɔ́.

Pilati é Ɛnza manɲaankɛla

Maki 15.2-5; Luka 23.3-5; Yaya 18.33-38

¹¹Ɛnza nalɔnin ngwɔ́ kunndiiba ó kɛ́ɛnnan, oo a mánɲaankɛ kó: «Íle lée Yawudhyaa ólu yɛ́ mansacɛ o le a?» Ɛnza ŋé a yawi kó: «Í legbu le wɛ́ɛ o fɔ́ wé.» ¹²Faanlɛɛɲansebhaa olu kúnndii ólu ní cɛba ólu kómanyoo mín nú fɔ́ Ɛnza man, a man olu yawi kan ŋóo kan nan. ¹³Oo kɛ́ mínngɛ, Pilati é fɔ a yɛ kó: «Ii kómanyoo nzúu súu lala i la nín, í tóo tɛ́ olu lɔ a?» ¹⁴Ɛnza mán a yɛ kóman ó sí yawi. O lée bháa kunndiiba ó lɔ kɛ tínmin.

Pilati wɛ́ɛ í kan mɔ́ Ɛnza nga kó kɛ a fáa

Maki 15.6-15; Luka 23.13-25; Yaya 18.39--19.16

¹⁵Hɔ́lɔɲanli o ɲánlagbɛ o mán sa ŋóo sa, laanan bhóoman, kunndiiba ó tɛ́ɛ kasodhye ngée ne lábhyaala, yaman o tɛ́ɛ kasodhye mín ngofɔ, a tɛɛ o lé lábhyaala. ¹⁶Mɔɔn lɔ́ tɛ́ɛ kaso lá Lomɛn olu kwɔ. O kasoladhye ŋo mánlɔnin ndɛ́ɛ koyoongɛ le mán, a tɔ́ɔ tɛɛ le kó Ɛnza Baanabasi. ¹⁷Pilati é yaman ládhyɛnin ŋó mánɲaankɛ kó: «Álee fɛ́ ké ní yɛ́ne lábhyaa: Baanabasi bháa, bháanin Ɛnza tó fɔ́ é kɛ́la a man kó Kílisi o?» ¹⁸Kɛ mansɔɔ Pilati tɛ́ɛ lɔ ŋóo ɲángbeya le kósɔn íi Ɛnza no a móo lɔ. ¹⁹Pilati é tó kítitɛɛ ó lá kítitɛɛlaa ó lɔ kɛ a muso a sanmankan nɔ bhyaa a man kɛ fɔ a yɛ kó: «Cɛ míin ŋé mɔɔn télenin né le, í sé mɔ́ a yɛ kíti o lɔ, kɛ mansɔɔ sú o lɔ, ní tɔ́lɔyala kibhalo lɔ́ a ta fa nvɛ́.»

²⁰Faanlɛɛɲansebhaa olu kúnndii ólu ní cɛba ólu yaman o lɔ́lo kó ii fɔ kó kɛ Baanabasi lábhyaa kɛ Ɛnza nváa. ²¹Kunndiiba óo kóman ó tá kɛ yaman o mánɲaankɛ íkwɔ kó: «Áa fɛ́ ké ní i mɔɔn fyáa ó kéengeenan mínnɛɛn lé lábhyaa?» I ko a yɛ kó Baanabasi. ²²Pilati é i manɲaankɛ o lé lɔ kó: «Tó fɔ́ é kɛ́la Ɛnza mín man kó Kílisi o, ní mínnɛɛn lé kɛ́ o la?» I bɛ́ é a yawi kó: «O a gbáan yíi ó mán, a gbáan yíi ó mán!» ²³Pilati kó i yɛ kó: «Aa kó yóo mínnɛɛn lé kɛ wɛ́?» Wáa ii gbáa ko kwáa kɛ kó: «A gbáan yíi ó mán!» ²⁴Pilati é yé mínngɛ óo ale tɛ́ cóoya sɔɔla, óo wɔyɔ óo táa í móo kɛ́ le, aa jí tá kɛ í bhóo kwó yaman o ɲánla kɛ fɔ kó: «Nze ndɛ́ cɛ míin nváako o lɔ, móo tɛ́ lɔ. A gbúlu kúnngo lée wé!» ²⁵Bɛ́ bɛ́ é a yawi kó: «Aa kɛ́ cé! A fáako o yáacɛ a kɛ́ án nee ní án mɔ́zɔ ŋólu ka njé!» ²⁶Ii o fɔ́ mínngɛ, Pilati é í bhóo kɛ́ Baanabasi la. Ii Ɛnza gbasi gbɛ́nɲɛn la, aa Ɛnza no i bhóo kó ii táa a gbáan yíi ó mán.

Swaasi olu yɛ́ɛbhɔla Ɛnza nɔn

Maki 15.16-20; Yaya 19.2-3

²⁷Kunndiiba ó yɛ́ swaasi olu táa Ɛnza né faanmannjɛ lɔ yɛ́ lúkɔɔn ó mán, tó ilee ni i swaasiɲɔɔn tɔ́ ó bɛ́ é nan í mínnin Ɛnza nan. ²⁸Ii a yɛ faani o bhɔ́ a kannan tó kɛ tɔɔya ɲánlaywɛ nɔ́ bhyáa a kannan. ²⁹Ii wɛɛ kɛ ŋwɛ́ɛn ŋo kɛ́ mansayagɔ ne, kɛ o bíin a kúnnan, ii kaakaa lɔ́ ló a bhóobhɛɛ ó lɔ́ mansayagbele bhóoman. Ii táa í kúnmɛɛn ngbáan né lúu lɔ́ a ɲɛn kɛ táa a lákɔɔbhɔ le tá kó: «Yawudhyaa olu yɛ́ mansacɛ o, án ni í fola!» ³⁰I tɛ́ɛ í láji bwɔ́nan a ka, óni kɛ kaakaa ó myáan a lá kɛ táa o fɛ́lɛ né a kúnnɔn. ³¹Ii wɛɛ yɛ́ɛbhɔla a lɔ mínngɛ o ɲán o mán cé, ii a yɛ tɔɔya ŋo bhɔ́ a kannan kɛ ale gbú yɛ faani o bhyáa a kannan tó kɛ táa a le kó i kɛ́ɛ tɛ́ɛ a gbáan yíi ó mán.

I wɛɛ táa Ɛnza ngbáan yíi o mán

Maki 15.21-32; Luka 23.26-43; Yaya 19.17-27

³²I bhɔ́tɔ ó lé só ó kɔ́ɔnnɔn, ii bhyɛ Silɛninnga cɛ lɔ le o tɔ́ɔ tɛ́ɛ kó Simɔn. Swaasi olu fáan lá o cɛ ó ka kó aa Ɛnza gbáanɲii ó tá. ³³Fɔ́ é kɛ́la ywáa mín man kó Gɔligota, ii táa lo yénɔn. Gɔligota o kɔ́ɔ o tɔ́ɔ ta kó «Kunngɔɔngoo ywáa.» ³⁴Ii bhwɛ́ɛyi kwaanyanin nɔ́ ɲáanmin lɛ́zɛnnji o la kɛ o dí Ɛnza man. Aa í lá túu o lá wáa a man sɔ́n kɛ a mín. ³⁵Ii a gbáan yíi ó mán tó kɛ gbámantɛɛ a yɛ faani olu ka kɛ olu lɔ́taa ɲɔ́ɔnnan.³⁶Ii wɛɛ kɛ í síi yénɔn kɛ í hákii tó a lɔ. ³⁷Yíifɛɛn nɔ gbáannin ndɛ́ɛ a kúnnɔn, ii ale Ɛnza nváa kúun mínnan, o Kúun ŋó sɛ́wɛnin ndɛ́ɛ o yíifɛɛn ŋo mán tá kó: «Cɛ míin née Ɛnza ne, Yawudhyaa ólu yɛ mansacɛ ó.» ³⁸O lɔ, ii bénganikɛbhaa fyáa gbáan yíi o mán Ɛnza ndɔ́ɔfɛ, kée ndɛ́ɛ a bhóobhɛɛkɔɔ, kée ndɛ́ɛ a bhóonwaan ngɔɔ.

³⁹Tínminmaa olu tɛ́ɛ í kún námaanla nɛ́ɛnnin bhóoman Ɛnza ndá fa ŋo nvɛ́ ⁴⁰kɛ táa fɔ lé a man kó: «Ɲɔ́ɔn ngo íle lée fɔ kó íi sé kɛ Ala bhatobhomba ó cé kɛ́wɛɛ kɛ a lɔko kwáa kɛ́ tee sáwa kɔɔnnɔn lé? Ni íi Ala dhyénjɛ le cɔ́, í ló ŋan í yɛ́ɛ bwási kɛ í yíi kɛ bhɔ́ i gbáanɲii ó mán nín né!» ⁴¹Faanlɛɛɲansebhaa olu kúnndii ólu ní sɛliya kaamɔɔn ólu ní cɛba ólu tɛ́ɛ yɛ́ɛbhɔla a lɔ tá kó: ⁴²«A wɛɛ mɔɔn lu bwási wáa a tɛ sháa a yɛ́ɛ bwásila. Ɲɔ́ɔn ngo Izalayɛli mansacɛ o lée wé né! A lo ŋan í yíi kɛ bhɔ́ gbáanɲii ó mán nín né! Ni o kɛ́ kɛ́ án ni lá a lá. ⁴³Ɲɔ́ɔn ngo aa lá Ala la tó kɛ fɔ kó álee Ala dhyénjɛ le le. Ni aa dí Ala yɛ, Ala a nan a bhɔ́ kó bhóo kwáa le nín ne!» ⁴⁴Bénganikɛbhaa mínnu gbáannin ndɛ́ɛ yíi ó mán Ɛnza ndɔ́ɔfɛ, olu tɛ́ɛ a nɛɛnnan o ɲán kée ŋó mán.

Ɛnza ɲɛn saya o

Maki 15.22-41; Luka 23.44-49; Yaya 19.28-30

⁴⁵Teelatee wáati o lɔ, diwiba é lo ywáa ó bɛ́ lɔ́ yamaan o ka fɔ́ kɛ táa se ywáatee ó mán. ⁴⁶Ywáatee ó mán, Ɛnza ŋé gbáa fáan lá kɛ fɔ kó: Eli, Eli, laman sabataanin. O kɔ́ɔ o tɔ́ɔ ta kó: Ɲɛ́n Ala o, ɲɛ́n Ala o, í wɛ́ɛ í kwɔ́kɛ nán mínnɛɛn lé la?⁴⁷Mɔɔn mínnu tɛ́ɛ yénɔn, o lɔ́lu o myɛ́n mínngɛ, ii fɔ kó: «Cɛ óo Eli kíila!» ⁴⁸Mɔɔn kée ŋé bwée téeman kɛ fu lɔ́ tá tó kɛ o díin lɛ́zɛnnji kuunnin nɔ́lɔ tó kɛ o fú ó dhyɛ́ kaakaa lɔ la kɛ a di Ɛnza man kó aa a mín. ⁴⁹Wáa mɔɔn tɔ́ ólu kó o yɛ kó: «A tó yé, án ni a mánfɛɛ ní Eli yáa nan a bwási.»

⁵⁰Ɛnza ŋé gbáa fáan lá ko kwáa kɛ, tó kɛ sayakɛ. ⁵¹O wáati kée ŋó lɔ, Ala bhatobhomba ó sácɛ ó fala fyáa le kɛ a lamyaan sáman fɔ́ɔ lúuman, lúukolo óo yaayaa, fáa olu ce cé, ⁵²kábulu olu í láka tó safee mínnu tɛ́ɛ mɔɔn sɛ́nnɛnyanin ne, o shɛ́ɛman ŋé kúun kɛ bhɔ́ saya bhóo o mán. ⁵³Ii bhɔ́ kábulu olu lɔ kɛ táa Yeluzalɛmu, ó míin kíila kó só sɛ́nnɛnyanin. Ii táa yénɔn ké Ɛnza wɛ́ɛ wɛɛ kúunnan kɛ bhɔ́ saya bhóo o mán. Mɔɔn shɛ́ɛman ŋé i yé yénɔn. ⁵⁴Lomɛn swáasikunndii ó ní a yɛ swaasi mínnu síininndɛ́ɛ Ɛnza ngunnan, olu ɲán é lɔ lúukolo ó yaayaa seɲan o lɔ, óni kó mín núu kɛ́. I man é sháan gbúnigbukɛ tó ii fɔ kó: «Kɛ fɔ tinɲan la, cɛ míin ndɛ́ɛ Ala dhyénjɛ gbú le le!» ⁵⁵Muso shɛ́ɛman ndɛ́ɛ yénɔn olu tɛ́ɛ kólɔgbɛla ywáa já nɔn. Olu bhyáa Ɛnza ngwɔ́ka Galile le háan fɔ́ Yeluzalɛmu, i tɛɛ a lɔdhyɛmanla lé. ⁵⁶O muso ólu cɛ́man: Mwɛnyamu Magidalaka, óni Zaki ní Yusufu lú wóobhaa Mwɛnyamu, óni Zebede dhyénjɛ ólu wóobhaa o.

Ɛnza nzúlongo o

Maki 15.42-47; Luka 23.50-56; Yaya 19.38-42

⁵⁷Ywáatee ó mán, Alimateka nanfootiicɛ lɔ é nan. Ale cɛ ó tɔ́ɔ tɛ́ɛ lé kó Yusufu, ale tɛ́ɛ Ɛnza ɲɛn kaamɔɔndhye ne lé. ⁵⁸Aa táa Pilati fɛ́ yé kɛ Ɛnza nvée ó kófɔ o yɛ. Pilati é fɔ kó kɛ sú ó ló cɛ ó bhóo. ⁵⁹Yusufu e táa su ó tá tó kɛ a kásange ⁶⁰tó ale cɛ ó tɛ́wɛɛ fɔ kó kɛ kábulu mín nzhɛn fáa o lɔ́ ale gbú yɛ, aa táa Ɛnza nzútaa o kábulu kwáa kwáa o lɔ. Aa wɛɛ kɛ káwagbuba lɔ́ gínninman kɛ o lá kábulu o lála tó kɛ táa. ⁶¹Mwɛnyamu Magidalaka ní Mwɛnyamu dɔ́ mín ŋo síininndɛ́ɛ yé, kábulu o ɲánkɔɔlaa ó lɔ.

Ɛnza ngábulu o kúnnansiiko o

⁶²Ló mín ŋé túun lɔnwɛɛnlilo ŋo lɔ́bhyɛndee ó la, faanlɛɛɲansebhaa olu kúnndii ólu ní Falizɛn ŋolu táa kéene Pilati fɛ́ yé. ⁶³Ii fɔ o yɛ kó: «Mantii ó, a wɛɛ bhyáa án ɲáakii la óo Ɛnza mɔɔn lanɛɛnmaa míin ndɛ́ɛ í ɲánla mínngɛ, aa fɔ kó ale yáa kúun kɛ bhɔ́ saya bhóo o mán a sayakɛnin ŋó tée sáwaɲɔn ló ŋo mán. ⁶⁴Oo lɔ mínngɛ, dhyɛ́n íi mɔɔn lásii a kábulu o kúnnan ké tee sáwa ó a í láfa ótun, ní o tɛ, a yɛ kaamɔɔndhye ŋolu sé kɛ táa a su ó tá loo nɔn tó kɛ fɔ bɛ yɛ́ kwɔ́la kó: ‹Ɛnza ŋwɛ́ɛn kúun kɛ bhɔ́ saya bhóoman.› O mɔ́ɔnlanɛɛnnze ŋó táa cɛ́yooɲan lé wé kɛ tínmin jónan ó ka ŋan?» ⁶⁵Pilati kó i yɛ kó: «Áa swaasi míin nú tá ké ii táa kábulu o kunnansii, óo aa dí a yɛ́ ɲán mín man.» ⁶⁶Oo kɛ́ mínngɛ, ii táa swaasi lɔ́lu lásii kábulu o kúnnan. Ii tɔɔmansii lɔ́ bhyáa káwagbuba ó mán, kó óo kó é kɛ mɔɔn lɔ́ kɛ́nan o káwa ó bhɔ́ kábulu o lála.

Ɛnza ŋwɛ́ɛn kúun kɛ bhɔ́ saya o bhóo o man

Maki 16.1-10; Luka 24.1-12; Yaya 20.1-10

¹Lɔnwɛɛnlilo ŋó o bhɔ́ í lá mínngɛ, Mwɛnyamu Magidalaka óni Mwɛnyamu dɔ́ mín ŋoo nan kábulu o mánfɛɛ kookɔɔ lo ŋo sɔ́ɔ jónan ó mán. ²Íkɔlɔ téeman, lúukolo óo yaayaa fáan la, Mantii o yɛ́ malɛɛka lɔ é bhɔ́ sá ŋó lɔ kɛ́nan káwagbuba ó gínninman kɛ a bhɔ́ kábulu o lála tó kɛ í síi ale káwagbuba ó ka. ³Malɛɛka o mannan mannan ne tɛ́ɛ bhɔ́la óyoo sá ŋé í bhóo lábhɔla. Faani gbɛ pépe lé tɛ́ɛ ale malɛɛka o mán. ⁴Mɔɔn mínnu tɛ́ɛ kábulu o kúnnan o lɔ, olu mán é sháan gbúnigbukɛ, ii yaayaa kɛ kilo fɔ́ kɛ kɛ́ óo mɔɔn wɛ́ɛ sayakɛ.

⁵Malɛɛka oo fɔ muso ólu yɛ kó: «Ále kɛ́nan sháan! Ní lɔ ŋóo áa Ɛnza ne ywáaɲiinnan, ii mín gbáan yíi ó mán. ⁶A tɛ yánun, a wɛɛ kúun kɛ bhɔ́ saya o lɔ, óyoo a tɛ wɛɛ fɔ kó a káa kɛ́ tɛ́nmɛn njɔ́. Á lanin ndɛ́ɛ ywáa ó mínnɔn áa nan o mánfɛɛ. ⁷Áa í láteeya kɛ táa o fɔ a yɛ kaamɔɔndhye ŋólu yɛ kó a wɛɛ kúun kɛ bhɔ́ saya o lɔ, kɛ bhyáa i ɲɛn nzɔ́ kɛ táa Galile langa ŋo lɔ, i káa tɛ́ɛ a yé yénɔn lé. Ndɛ́wɛɛ nan o lé fɔ́ a yɛ́.»

⁸Muso ólu í láteeya kɛ bhɔ́ kábuluywaa o lɔ kɛ táa i sháannin ŋó le, o kwɔ, i nisɔdhyaanin ndɛ́ɛ gbúnigbu kɛ́ íkwɔ. Ii bwée kɛ táa sánmankan ŋo fɔ́ Ɛnza ɲɛn kaamɔɔndhye ŋolu ɲánla. ⁹Muso ólu táatɔ óle, Ɛnza ŋé i kunmyɛ téeman tó kɛ i fo. Muso ólu í mángbaa a lá kɛ í kúnmɛɛn ngbáan lúu lɔ tó kɛ a se nvyáa ó myáan. ¹⁰Ɛnza ŋé fɔ i yɛ kó: «A kɛ́nan sháan! Áa táa fɔ Mándhye ólu yɛ ko ii táa Galile langa ŋo lɔ, kó i káa ɲé yénɔn lé.»

Faanlɛɛɲansebhaa olu kúnndii ólu fɛ́ kɛ Ɛnza nguunngo o manloonaan kɛ

¹¹Muso ólu yɛ́ɛ tɛ́ɛ sháa lá bhée, tó swaasi mínnu tɛ́ɛ kábulu o kunnan o lɔ́lu í kwɔ́sɛɛ só ó kɔ́ɔnnɔn kɛ o kó ó bɛ́ lɔsɔɔ faanlɛɛɲansebhaa olu kúnndii ólu yɛ. ¹²Faanlɛɛɲansebhaa olu kúnndii ólu ní cɛba ólu ɲɔ́ɔnɲe kɛ tó kɛ bhyɛ kée mán kɛ longa ngɛ́ swaasi olu ka ni wɛ́ɛ lágbɛɛn ndí lé olu mán, ¹³tó kɛ fɔ olu yɛ́ tá kó: «Áa fɔ kó Ɛnza ɲɛn kaamɔɔndhye ŋo lée lúu táa a su ó tá loo nɔ́n sú o lɔ ké án ni sunnɔɔn lɔ. ¹⁴Ni kunndiiba ó kɛ́ táa myɛ́n kó su ó tɛ́ kábulu o lɔ́ bhée, án ɲáan kó ó bɛ́ kɛ ké a kɛ́nan kunngo sɔ́ɔ.» ¹⁵Swaasi olu wɛ́ɛ o tá tó mɔɔn ólu fɔ i yɛ tɛ́nmɛn, ii kɛ cé. Kɛ ta o sán o mán kɛ́nan sii míin nan, o kóman óo búubɛɛ Yawudhyaa olu cɛ́man.

Ɛnza ŋé a yɛ kaamɔɔndhye ŋolu lɔ́la céla

Maki 16.14-18; Luka 24.36-49; Yaya 20.19-23

¹⁶Kaamɔɔndhye ndɔ tá ni kée ŋolu táa Galile langa ŋo lɔ, Ɛnza ndɛ́wɛɛ tii mín ndɔɔmansii i yɛ, ii táa o ka. ¹⁷Ii Ɛnza ɲé mínngɛ, ii í kúnmɛɛn ngbáan lúu lɔ a yɛ, wáa síka tɛ́ɛ i lɔ́lu yóso lɔ́ bhée. ¹⁸Ɛnza ŋé í mángbaa i la kɛ fɔ kó: «Sébhaaya ó bɛ́ wɛɛ dí né mán sá ŋó lɔ óni lúukolo ó ka. ¹⁹Oo lɔ mínngɛ, síya súu óo súu é dínɲan lɔ, áa táa o bɛ́ fɛ́ yé ké ii kɛ́ ɲɛ́n kaamɔɔndhye nu le, áa i bátize Fá ó tɔ́ɔla, Dhyénjɛ ó tɔ́ɔla, óni Ní Sɛnnɛnyanin ŋó tɔ́ɔla, ²⁰ŋwɛ́ɛn kó óo kó láse a mán wé, áa i kála o bɛ́ la ké ii o bɛ́ sháa lataaman. Né kwɛ́ɛn nin ŋé a fɛ lé wé ló ŋóo ló, sánnin dínɲan lábha ŋó cɛ.»