Luka

LUKA

é sanmankanmɛɛ mín nzɛ́wɛ

Ɛnza Ngílisi kó o lɔ́

Kunnanfwee ŋó

Luka yɛ́ kitabu ó kɔɔnnɔn, Mwɛnyamu é sɔ́n Ala sao o mán ɲán mín mán malɛɛka ó yɛ́ kóman ó kósɔn, óni Ɛnza ŋé wóo ɲán mín mán, a wóo ó kibhalo ó fɔ ɲán mín mán, o bɛ́ é yáala án nan.

Luka é yáala án nan kó Ɛnza ŋé a yɛ́ɛmanyii kɛ́ sɔ́n tɔ́lɔya ó mán óni ni íi a gbáan yíi ó mán, aa sayakɛ. Waa a tée sawaɲɔɔnlo ŋó, aa kúun kɛ́ bhɔ́ su ólu cɛ́man kɛ́ a yɛ́ɛ yáa a kwɔmɔɔn ólu lá. O kwɔ, a kɔ́ɔ é tá i ɲánla kɛ́ táa sángboo ó lɔ.

Luka é Ɛnza ɲɛ́n saanan ó shɛ́ɛman nvɔla án ɲɛ́n: Bhó nɔ́bhaa fyáa ó yɛ́ɛ saanan ó (6.46-49), Saanan miin lá sɛɛnkɛbhaa ó mán (8.5-8), mɔɔn min núu kíi tó í man nan ólu yɛ́ saanan ó (14.15-24), dhyé min ŋé a fá cɛ́n ó tá kɛ́ táa a cáan tó kɛ́ i kwɔ́sɛɛ kɛ́nan (15.1-32), kítitɛɛbhaayoo ŋóni finɲanmuso ó yɛ́ saanan ó (18.1-8). Aa saanan shɛ́ɛman gbɛ́ɛlu lá ó kwɔ. O saanan ólu fɛ́, aa án ngálanan kó shɛ́ɛman nan Ala yɛ́ mansaya ó tá fa ŋo fɛ́.

Luka yɛ́ Kitabu o lɔ́taaɲan ó

Kitabu ó sɛ́wɛkun ŋó 1.1-4

Yaya Bátizelikɛbhaa óni Ɛnza ndá wóoko ó 1.5--2.52

Yaya Bátizelikɛbhaa yɛ́ lákawanin ó 3.1-20

Sɔtaannan é Ɛnza nɔswaan kɛ́ kwée a bátizenin ŋó kwɔ́ 3.21--4.13

Ɛnza ɲɛ́n bháala ó Galile mala ó lɔ́ 4.14--9.50

Ɛnza ŋé bhɔ́la Galile kɛ́ táa Yeluzalɛmu 9.51--19.27

Ɛnza myaan ó kɛ́ a kiti tɛ́ɛ óni kɛ́ a fáa 19.28--23.56

Ɛnza ngúunngo ó 24.1-12

Ɛnza ŋé a yɛ́ɛ yáala a kwɔ́mɔɔn ólu lá kɛ́ táa sángboo ó lɔ́ 24.13-53

Kitabu míin nzɛ́wɛ kún ŋo

¹Kó mín núu kɛ́ án nvɛ́ ya, mɔɔn lɔ́lu lamyaan kɛ ó kibhalo ólu sɛ́wɛ. ²O kó ólu kɛ́ mínnu ɲánla Kanbiini ólu lamyaan wáati ó man, tó ii nan kɛ́ Ala yɛ́ kóman ó bháalakɛdhye ŋólu le, ólu o kó ólu lákɛɛ án ɲɛ́n ɲán min mán, a sɛ́wɛ bháa ólu a sɛ́wɛ kɛ́ kéeɲan nin i yɛ́ sɛ́ɛya ólu lé. ³Né lo ŋé ɲíinin kɛ́ cɛ́ɛne o kó ólu ka Kabiini o kó ólu lamyaan wáati ó lɔ, ó lée kɛ́ tó, ní míli ngó a káɲin ké né a o kó ólu sɛ́wɛ kɛ i túunnduun ɲɔ́ɔnnan, nva Teofili, ⁴ké ii a lɔ kó ii í kála kó mínnu lá, kó óo tinɲan gbú le lé.

Malɛɛka lɔ́ é Yaya Bátizelikɛbhaa wóoko ó fɔ́la

⁵Zude mala ó mansacɛ Elɔdi tá tée ó lɔ́, faanlɛɛɲansebhaa lɔ́ tɛ́ɛ yé mín ndɔ́ɔ tɛɛ kó Zakali. Abiya tɔ́ɔ ó lá faanlɛɛɲansebhaa mínnu tá sɛ́ɛ ó ka, ó lɔ́ lé tɛ́ɛ a le. A muso tɛɛ faanlɛɛɲansebhaa ólu kunndii Alɔn mwáannin né le. A muso ó tɔ́ɔ tɛ́ɛ kó Elizabɛti. ⁶Í fyaa bɛ́ téenin ndɛ́ɛ Ala ɲánkɔɔ, i tɛ́ɛ Mantii ó yɛ́ sɛliya ólu bɛ́ bhátola a ɲán ó mán. ⁷Dhyé ndɛ́ tɛ́ i bhóo, kɛ mansɔɔ Elizabɛti tɛ́ɛ muso wóobhɛɛ lé lé, ó kwɔ́, í fyaa ó bɛ́ tɛ wɛ́ɛ kɔ́ɔ.

⁸Ló nɔ lá, Zakali tɛ́ɛ faanlɛɛɲanse ó la ni a yɛ́ sɛ́ɛ lɔ mɔɔn ólu lé Ala bhatobhomba ó kɔ́ɔnnɔn, kɛ mansɔɔ i yɛ́ bháalakɛ wáati lé tɛ́ɛ wé. ⁹Kɛ́ kéeɲan ní faanlɛɛɲansebhaa ólu yɛ́ laanan óle, i tɛ́ɛ tóla kɛ́ mɔɔn kée mɔ́, ó tɛ́ɛ lo Mantii ó yɛ́ ywáa sɛ́nnɛnyanin ŋó kɔ́ɔnnɔn kɛ́ wúsulan ŋó ɲɛ́ɛn, óo bhyɛ́ Zakali le mán. ¹⁰Kɛ́ Zakali tó wúsulan ɲɛ́ɛn ŋó lá, yaman ó tɛ́ɛ Ala dɛ́li ó la Ala bhatobhomba ó kɛ́ɛngbɛ ó lɔ́.

¹¹Mantii ó yɛ malɛɛka o lɔ́ é i yɛ́ɛ yáa Zakali la, malɛɛka ó lɔ́nin ndɛ́ɛ wúsulan faanlɛɛbhɔlaa ó bhóobhɛɛ fán ŋó fɛ́. ¹²Zakali é a yé mínngɛ, a hákii ó ɲáanmin, aa sháan koyoongɛ. ¹³Wáa malɛɛka ó fɔ a yɛ kó: Zakali, í kɛ́nan sháan, kɛ mansɔɔ i yɛ sɛ́ɛ ó wɛ́ɛ myaan. Í muso Elizabɛti yáa dhyénjɛ wóo i yɛ, ii a tɔ́ɔla kó Yaya. ¹⁴A wóoko ó yáa kɛ́ nisɔdhyaa láfanin né i bhóo, óni mɔɔn shɛ́ɛman nisɔ yáa dhyáa ó kó ó lɔ́. ¹⁵A yáa kɛ́ mɔɔnba lé Mantii ó ɲánkɔɔ. A táa lɛ́zɛnnji, wáman minife nvɛ́ɛyanin nzí mín. A yáa fá Ní Sɛnnɛnyanin ŋó lá kɛ́ tá a kɔ́ɔnta wáati ó mán. ¹⁶A yáa kɛ́ sɔ́ɔbu lé Izalayɛlidhye ŋólu shɛ́ɛman ɲáan í kwɔ́sɛɛ kɛ́ sɔ́n Mantii ó mán i yɛ́ Ala ó. ¹⁷A yáa táaman Ala ɲánkɔɔ ni Ní Sɛnnɛnyanin ŋó yɛ sébhaaya óle, mín ɲɔ́ɔn ndɛ́ wɛ́ɛ di céla Eli mán, kɛ mansɔɔ ké bhyɛ ŋan ló fa ólu ní i dhyé ŋólu cɛ. A yáa mɔɔn mwɛnnɛnin ŋólu hákii ó yɛ́ɛman kɛ a kɛ mɔɔnteenin ŋólu hákii ó lé. A yáa yaman ó lɔ́bhyɛ kɛ a bhyáa Mantii ó yɛ́. ¹⁸Zakali é malɛɛka ó manɲaankɛ kó: «Ngáa bhɔ́ ó ɲánle díi? Kɛ mansɔɔ né ní muso bɛ́ wɛ́ɛ kɔɔ.»

¹⁹Malɛɛka ó a yawi kó: «Né lée Jibilili lé. Né lée nɔ́la Ala ɲánkɔɔ kɛ́ a yɛ́ cé ólu lɔ́myɛn. A wɛ́ɛ né cé kɛ́nan sanmankanmɛɛ míin nvɔ i yɛ́. ²⁰A mánfɛɛ, i yáa kɛ́ bhóbho lé, fɔ kɛ́ táa sé ó kó ólu kɛ́ wáati ó mán, kɛ mansɔɔ í mán la né yɛ́ kóman ó lá, kɛ mansɔɔ ó kó ólu kɛ́ lo ŋó kɛ sé ólu yáa kɛ́.»

²¹O wáati ó lɔ yaman ó tɛ́ɛ Zakali mánkɔɔnnan. I tɛ wɛ́ɛ káwakoya, kɛ mansɔɔ a wɛ́ɛ myɛ́n Ala bhatobhomba ó ywáa sɛ́nnɛnyanin ŋó lɔ kɛ́ tínmin. ²²Waa Zakali é bhɔ́ sán min nɔn, a mán sé kɛ́ kóman i fɛ́. Ii bhɔ́ a ɲánle kó a wɛ́ɛ yélife nɔ yé Ala bhatobhomba ó ywáa sɛ́nnɛnyanin ŋó kɔ́ɔnnɔn. Aa kóman i fɛ́ ní a bhóo ó lé le. Aa tó bhóbhoya ó lɔ.

²³Zakali yɛ́ bháalakɛlo ŋólu í lafa lo mín nán, aa i kwɔ́sɛɛ kɛ́ táa a bhóo lúman. ²⁴O kó ólu tínminnin ŋó kwɔ́, Zakali muso Elizabɛti é nan kɔ́ɔn tá. Waa, aa ó kɔ́ɔn ó lóonaankɛ kɛ́nan sé fɔ́ɔ a káa lóo ɲɔ́n o man. ²⁵A tɛ́ɛ fɔ́la a yɛ́ɛ kɔɔnnɔn kó: «Mantii ó wɛ́ɛ kó mínngɛ né yɛ́, o mánfɛɛ nin: A wɛ́ɛ né mánfɛɛ sísan kɛ́ né tá maloyako ó bhɔ́ ngunnan mɔɔn ólu bɛ́ ɲánla.»

Malɛɛka lɔ́ é Ɛnza ŋwóo ko ó fɔ́la

²⁶Elizabɛti kɔ́ɔn ó káa wɔ́lɔɲɔn ó la Ala é malɛɛka Jibilili cé Galile mala ó só ó lɔ lá mín ndɔ́ɔ kó Nazalɛti. ²⁷Ala é Malɛɛka o cé yénɔn sínngbii lɔ́ mán mín ndɔ́ɔ tɛ́ɛ kó Mwɛnyamu. Yusufu muso sínngbii lé tɛ́ɛ a lé mín mbuluyi é bhɔ́ mansacɛ Laula lɔ́. ²⁸Malɛɛka o sé a mán kɛ́ fɔ a yɛ́ kó: «I nisɔdhyaa, Mwɛnyamu! I kó wɛ́ɛ dhyáa Ala yɛ́, Mantii Ala é i fɛ́.»

²⁹O kóman óo Mwɛnyamu kɔɔnnɔnfii, aa a yɛ́ɛ manɲaankɛ kó ó fóli súu ó kɔɔ o mínnɛɛn lé le. ³⁰Malɛɛka óo fɔ a yɛ kó: «Í kɛ́nan, sháan, Mwɛnyamu, kɛ mansɔɔ Ala wɛ́ɛ nɛ́nmɛn kɛ i yɛ. ³¹A mánfɛɛ, i yáa kɔ́ɔn tá kɛ́ dhyénjɛ kée ŋwóo, i yáa a tɔ́ɔla kó Ɛnza. ³²A yáa kɛ́ mɔɔnba lé, a yáa kíi kó Fé ŋó bɛ́ kúnndii ó dhyénjɛ o. Mantii Ala yáa a kɛ́ mansa lé óyoo a fá Laula. ³³A yáa i síi mansaya lá Izalayɛli yɛ mɔɔn olu kunnan fɔ wáati ó bɛ́, a yɛ́ mansaya ó táa wɛ́ɛ fɛ́sɛ fɛ́sɛ.»

³⁴Mwɛnyamu é malɛɛka ó manɲaankɛ kó: «Né káa kɔ́ɔn tá dí lé? Kɛ mansɔɔ né mán cɛ lɔ ŋótun.»

³⁵Malɛɛka óo a yawi kó: «Ní Sɛnnɛnyanin ŋó yáa yíi i ka, Fé ŋó bɛ́ kunndii yɛ́ sébhaaya ó yáa kɛ́ i ka. O kósɔn, i káa Dhyé nzɛ́nnɛnyanin mín ŋwóo, a yáa kíi kó Ala dhyénjɛ. ³⁶A mánfɛɛ, i bhádhyemuso Elizabɛti wɛ́ɛ kɔ́ɔn tá ále ní a yɛ́ kɔ́ɔya ó bɛ́, a káa wɔ́lɔɲɔn ó lée nin. A yáa dhyénjɛ kée ŋwóo, ale mín ndɛ́ wɛ́ɛ yacesii muso wóobhɛɛ lé. ³⁷Ala tɛ́ kwéela fósi mán.»

³⁸O lɔ, Mwɛnyamu é fɔ a yɛ́ kó: «Née Mantii ó yɛ́ bháalakɛdhye ne lé, i wɛ́ɛ fɔ ɲán mín mán, Ala a kɛ́ né yɛ́ cé. O kwɔ́, malɛɛka óo bhɔ́ a tɔ́ɔfɛ kɛ́ táa.»

Mwɛnyamu é táa bhɔ́la Elizabɛti fɛ́ yé

³⁹O tée fyáa ó lɔ, Mwɛnyamu é i wíi kɛ́ í lateeya kɛ́ táa só lɔ lá Zude mala ó lɔ, tíi ólu a sháa ywáa mínnɔn. ⁴⁰Aa táa lo Zakali yɛ́ bhó ŋó kɔɔnnɔn kɛ́ Elizabɛti twáa. ⁴¹Elizabɛti é Mwɛnyamu a twaalikan ŋó myɛ́n mínngɛ, dhyé ŋó í maanmaan a kɔɔnnɔn. Aa fá Ní Sɛnnɛnyanin ŋó lá, ⁴²kɛ gbáa kɛ́ a fɔ kó: «I wɛ́ɛ lwáau sɔ́ɔ Ala fɛ́ kɛ́ tínmin muso ólu bɛ́ ka, óni dhyé mín ŋé i kɔɔnnɔn, o wɛ́ɛ lwáau sɔ́ɔ. ⁴³Née yɛ́ɛtii lé fɔ né yɛ́ Mantii ó wóobhaa ó gbú é nánla bhɔ́la né fɛ́ yé? ⁴⁴A mánfɛɛ, ni í yɛ́ twaalikan ŋó myɛ́n mínngɛ, né dhyé ŋó i maanmaan nisɔdhyaa ó fɛ́ né kɔɔnnɔn. ⁴⁵I nisɔdhyaanin ɲé, kɛ mansɔɔ malɛɛka o Mantii ó yɛ́ kóman mín nvɔ i yɛ́, ii wɛ́ɛ lá o la.»

Mwɛnyamu yɛ́ tándoli lɔ ŋó

⁴⁶O lɔ, Mwɛnyamu kó:

«Né ní o Mantii ó bwóɲanla ɲóso ó lɔ.

⁴⁷Né ní o nisɔdhyaa o lɔ né Kísibhaa Ala kósɔn,

⁴⁸kɛ mansɔɔ, a wɛ́ɛ i hákii tó a yɛ́ yɔ́muso manyiinin ŋó lɔ́.

Kɛ́ta míin man, mɔɔn ólu yáa fɔ wáati ó bɛ́

kó né nisɔdhyaanin ɲé.

⁴⁹Kɛ mansɔɔ Sétii o wɛ́ɛ kóbabalu kɛ́ né yɛ́,

a tɔ́ɔ ó sɛ́nnɛnyanin ɲé.

⁵⁰Ala é hínnɛnla a ɲɛ́nnzhaanmaa ólu la wáati ó bɛ́.

⁵¹A wɛ́ɛ káwako ólu kɛ́ ni a yɛ́ sébhaaya ó lé,

a wɛ́ɛ yɛ́ɛlɔbwoɲanbhaa ólu hákii ó ɲáanmin.

⁵²A wɛ́ɛ faanman ólu láyii i yɛ mansayagbaanin ŋólu ka,

kɛ́ dɛ́sɛbhaatɔ ólu kɛ́ mɔɔnba lu lé.

⁵³A wɛ́ɛ fémɛɛ shɛ́ɛman di kɔ́ɔntɔ ólu mán

kɛ́ féndii ólu bhóolɔkoo bhyáa kɛ́ táa.

⁵⁴A wɛ́ɛ Izalayɛli dhyɛman, a yɛ bháalakɛdhye ŋó,

kɛ́ i hákii tó a yɛ́ hínnɛn ó lɔ́,

min núu a yɛ́ bháalakɛbhaa lé,

⁵⁵Bulaaman ni a kwɔ́mɔɔn ólu tá fán nvɛ́,

óyoo a tɛ́wɛɛ fɔ án nva ólu yɛ́ ɲán mín mán kúdɛyi.»

⁵⁶Mwɛnyamu é tó Elizabɛti fɛ́ yé kɛ́ káa sawa ɲɔ́ɔnnɔn kɛ́, o kwɔ́, aa í kwɔ́sɛɛ kɛ táa a bhóo lúman.

Yaya Bátizelikɛbhaa wóo ko ó

⁵⁷Elizabɛti wóolo ŋó nan sé, aa dhyénjɛ kée ŋwóo. ⁵⁸A siiɲɔɔn ólu ní a yɛ́ mɔɔn ólu ó myɛ́n mínngɛ ko Mantii ó wɛ́ɛ a yɛ́ hínnɛn ó bwóɲan a fán nvɛ́, i nisɔ é dhyáa kɛ́ fala Elizabɛti ka. ⁵⁹A tée sɛ́ɲin ɲɔ́n lo ŋó, íi nan dhyé ŋó bhɔ kɛ́ɛn lɔ́, i tɛ́ɛ fɛ́ kɛ́ a facɛ tɔ́ɔla a lá kó Zakali. ⁶⁰Waa a wóobhaa é fɔ kó: «Ɔn-ɔn, a tɔ́ɔ káa la lé kó Yaya.»

⁶¹Íi a yawi kó: «I yɛ́ mɔɔn sí tɔ́ɔ tɛ́ cé. ⁶²Íi dhyé nvá ó mánɲaankɛ bhóbho ólu yɛ́ kómanseɲan ó lɔ kó aa fɛ́ ké tɔ́ɔ mínnɛɛn a lá a dhyé ŋó lá.»

⁶³Zakali é fénɔn kófɔ i yɛ́ kɛ́ sɛ́wɛli kɛ ó ka kó: «A tɔ́ɔ kó Yaya.» I bɛ́ káwakoya. ⁶⁴O ywáaninngee ŋó lɔ, Zakali yɛ́ bhóbhoya óo wɛ́ɛ, aa lámyaan kɛ́ kóman kɛ́ Ala tando. ⁶⁵I siiɲɔɔn ólu bɛ́ sháan, Zude mala ó tíi ywáa ó bɛ́ mɔɔn ólu tɛ́ɛ o kó ólu lákɛɛ lá ɲɔ́ɔn ɲɛ́n. ⁶⁶Mɔɔn min núu o kibhalo kan ŋó myɛ́n, ólu bɛ́ tɛ́ɛ i milila o mán kɛ i yɛ́ɛ mánɲaankɛ kó: «O lɔ, ó dhyé ŋó káa kɛ́ mínnɛɛn lé le wɛ́?» Tinɲan in ne, Mantii Ala tɛ́ɛ a fɛ́.

Zakali yɛ́ tandoli ó óni célaya lɔ ŋó

⁶⁷Dhyé ŋó facɛ Zakali wɛ́ɛ fá Ní Sɛnnɛnyanin ŋó lá, kɛ́ célaya kóman ó fɔ kó:

⁶⁸«Tandoli a kɛ́ Mantii ó yɛ, Izalayɛli yɛ Ala ó,

kɛ mansɔɔ a wɛ́ɛ í yáakii tó a yɛ mɔɔn ólu lɔ́ kɛ i hɔ́lɔɲan.

⁶⁹A wɛ́ɛ Kísibhaa báakaman náwii án ɲɛ́n,

kɛ bhɔ́ a yɛ bháalakɛdhye Laula búluyi ó lɔ,

⁷⁰óyoo a tɛ́ wɛ́ɛ o kóman ó lo a yɛ́ jónan jónan céla sɛ́nnɛnyanin ŋólu lalɔ ɲán mín mán

⁷¹kó a yáa án ngísi án ɲúu ólu mán,

kɛ́ án nataan kɛ́ án mɔ́ án ndɔ́lɔbhaa ólu bɛ́ bhóo.

⁷²O ɲán ó mán, aa hínnɛn án nvá ólu lá,

a wɛ́ɛ í hákii tó a yɛ́ láheli sɛ́nnɛnyanin ŋó lɔ́.

⁷³A tɛ wɛ́ɛ láheli ta án Nvá Bulaaman yɛ́, tinɲan in ne,

⁷⁴kó a yáa án mbwási án ɲúu ólu bhóo,

sáan án ɲóso swáanyanin ɲáan Ala bháto,

⁷⁵a yáa án ngɛ́ mɔɔn sɛ́nnɛnyanin nu lé óni mɔɔn téenin nu lé

a yɛ́ bhátoli ó lɔ́ án nzí ó bɛ́ lɔ́.

⁷⁶Ile kwɛnnin, nyé,

i yáa kíi kó Ala kɔ́ɔtanin mba yɛ́ céla,

kɛ mansɔɔ i yáa táaman Mantii ó ɲánkɔɔ kɛ́ a yɛ́ sháa ó lɔ́bhyɛ.

⁷⁷I yáa Kísili sháa ó yáa a yɛ́ mɔɔn ólu lá

i yɛ́ yúumu ólu yafali sháa fɛ́,

⁷⁸án ɲɛ́n Ala ó yɛ hínnɛn óni a yɛ sébhaaya ó bhaaka lɔ.

A yáa kɛ́ɛnɲan ó cé án ɲɛ́n kɛ bhɔ́ sáman,

óyoo tée ó bhɔ́tɔ ó kɛ́ɛnɲan ó,

⁷⁹kɛ́ kɛ́ɛnɲan ó bhɔ́ diwilɔmɔɔn ólu yɛ́,

óni mín núu sháannan saya ó ɲɛ́n,

óni kɛ́ án bhyáa hɛ́lɛ sháa ó ka.»

⁸⁰Sísan, dhyé ŋó tɛ́ɛ bwóɲanla, ale ní a hákii ó tɛ́ɛ bwóɲanla kéene. Aa tó dhyɛ́ ó kɔɔnnɔn fɔ kɛ́ táa sé a yɛ́ɛ yáa lo ŋó mán Izalayɛlidhye ŋólu lá.

Ɛnza ŋwóoko ó

Matiyu 1.18-25

¹O wáati ó lɔ, Lɔmu mansacɛ Ogusiti tɛ́ɛfɛ kɛ a yɛ́ mɔɔn ólu lá nɔ́. O lɔ, aa sanman bhyáa kó a yɛ́ yamaanlɔ mɔɔn ólu bɛ́ tɔ́ɔ o a sɛ́wɛ. ²O tɔ́ɔsɛwɛ ko jónan ó kɛ́ le ké Kiliniyusi lée Sili mala ó yamaan tíi o lé. ³Mɔɔn ólu bɛ́ tɛ́ɛ táala i yɛ́ só óle la ké i tɔ́ɔ o a sɛ́wɛ yé.

⁴Yusufu ŋé bhɔ́ Nazalɛti, Galile mala ó lɔ, kɛ́ táa Zude mala só ó lɔ́la mín ndɔ́ɔ kó Bɛtelɛmu, o lée mansacɛ Laula yɛ́ só ó lé, kɛ mansɔɔ a búluyi ó bhɔ́ Laula lé lɔ́. ⁵Aa táa yé ni Mwɛnyamu lé a muso mánmyaannin ŋo, ké i tɔ́ɔ o a sɛ́wɛ yé. Mwɛnyamu kɔ́ɔnman né tɛ́ɛ. ⁶Kɛ́ í tó Bɛtelɛmu, Mwɛnyamu wóolo ŋó nan sé. ⁷Aa wóo dhyénjɛ kée nán, o lée a dhyé njónan ó lé. Aa fáani ó mínnin mínnin a mán kɛ́ a lálaa soo ólu yɛ́ lɔ́minkɛfe ŋó kɔɔnnɔn, kɛ mansɔɔ i mán ywáa sɔ́ɔ lonannayiibho ŋólu kɔ́ɔnnɔn.

Malɛɛka lɔ́ é táala saamangbɛngbɛmaa ólu fɛ́ yé

⁸Saamangbɛngbɛmaa lɔ́lu tɛ́ɛ ó mala ó lɔ, ólu tɛ́ɛ síla í ɲánla sɛɛn ólu kɔɔnnɔn kɛ i yɛ saa ólu kunnansii. ⁹Mantii o yɛ malɛɛka lɔ é i yɛ́ɛ yáa i la. O ywáa ŋó lɔ, Ala nɔ́lɔya óo mánnan mánnan kɛ i lámiin. Ii sháan koyoongɛ. ¹⁰Waa malɛɛka óo fɔ i yɛ́ kó: «A kɛ́nan sháan, kɛ mansɔɔ né wɛ́ɛ nan sanmankanmɛɛ lɔ́ lé fɔ a yɛ́ mín ngáa a yɛ́ yamaanlɔ mɔɔn ólu bɛ́ nisɔdhyaa. ¹¹A mánfɛɛ, bí sú míin nɔ́n, Kísibhaa ó wɛɛ wóo a yɛ́ Laula yɛ́ só ó lá, ale lée Ala yɛ́ Kílisi lɔtɔnmɔnnin ŋó lé, án Mantii ó lée wé. ¹²A káa a lɔ tɔɔmansii mín mán, o lée nin: A káa dhyéɲɛɛnninngwaa lɔ́ lánin ɲé soo ólu yɛ́ lɔ́minkɛfe nɔ́ kɔɔnnɔn, fáanin ó mínnin mínnin nín ɲé a mán.»

¹³O ywáaninngee o lɔ, malɛɛka shɛ́ɛman ŋé bhɔ́ sángboo ó lɔ́ kɛ́nan fala malɛɛka dɔ ó ka. I tɛ́ɛ Ala tandola kó:

¹⁴«Ala á tando sáman ywáakɔɔtaninmba ó lɔ́,

hɛ́lɛ o á kɛ́ lúukolo ó ka a dhyáaɲɛnmɔɔn ólu yɛ́.»

Saamangbɛngbɛmaa ólu táa Bɛtelɛmu

¹⁵Malɛɛka ólu í kwɔ́sɛɛ kɛ́ táa sángboo ó lɔ́ wáati mín nɔ́n, saamangbɛngbɛmaa ólu fɔ ɲɔ́ɔn ɲɛ́n kó: «Án ndáa Bɛtelɛmu, malɛɛka oo kó mín nángɛɛnman kɛ́ án ɲɛ́n kɛ́ bhɔ́ Mantii Ala fɛ́ yé, án ndáa o mánfɛɛ.»

¹⁶Ii í láteeya kɛ́ táa. Ii táa Mwɛnyamu ni Yusufu óni dhyéɲɛɛnninngwaa ó sɔ́ɔ yé. Dhyéɲɛɛnninngwaa ó lánin ndɛ́ɛ soo ólu yɛ́ lɔ́minkɛfe nɔ́ kɔɔnnɔn. ¹⁷Dhyéɲɛɛnninngwaa ó yénin ŋó kwɔ, kóman mín ŋé fɔ i yɛ́ dhyé ŋó ta kó ó lɔ, íi ó lɔsɔɔ. ¹⁸Min núu saamangbɛngbɛmaa ólu yɛ́ kóman ó myɛ́n, olu bɛ́ é káwakoya. ¹⁹Waa Mwɛnyamu tɛ́ɛ ó kóman ólu bɛ́ málala a kɔɔnnɔn kɛ́ í mili ólu mán. ²⁰O kwɔ́, saamangbɛngbɛmaa ólu kwɔ́sɛɛtɔ ó i yɛ́ ywáa ó lɔ́, i tɛ́ wɛ́ɛ kó mínnu bɛ́ myɛ́n kɛ́ kó mínnu bɛ́ yé, i tɛ́ɛ Ala bwóɲanla kɛ́ a tando o bɛ́ kósɔn, kɛ mansɔɔ a bɛ́ɛ kɛ́ le óyoo a tɛ́ wɛ́ɛ fɔ i yɛ́ ɲán mín mán.

Ɛnza ndɔ́ɔ é lá

²¹Dhyé ŋóo wóo, a tée sɛ́ɲinɲɔn ó, íi a bhɔ kɛ́ɛnlɔ, a tɔ́ɔ é lá kó Ɛnza óyoo malɛɛka ó tɛ́ wɛ́ɛ a fɔ ɲán mín mán ké a mán a kɔ́ɔnta bha.

Ɛnza ŋé kɛ́ɛfala Ala mán

²²Sɛ́nnɛnyali mín ngákan kɛ kɛ́, kɛ́ kéeɲan ní Musa yɛ́ sɛliya ó lé, o lo ŋóo í lafa mínngɛ, Yusufu ni Mwɛnyamu é táa ní Ɛnza né Yeluzalɛmu kɛ́ a kɛ́ɛfa Mantii o mán. ²³Kɛ mansɔɔ aa fɔ Ala yɛ sɛ́liya ó lɔ kó ní dhyé njónan mínngɛ kɛ cɛ lé, kó o kákan kɛ dí Mantii o mán.²⁴Óni kɛ́ biininngbela fyáa, wáman biinin nvyáa bhɔ́ faanlɛɛ lé

óyoo Mantii o a fɔ ɲán mín mán.

Simeɔn wɛ́ɛ Kísibhaa ó yé

²⁵O wáati ó lɔ cɛ lɔ tɛ́ɛ Yeluzalɛmu o tɔ́ɔ tɛ́ɛ kó Simeɔn. O tɛ́ɛ mɔɔnteenin né le, a tɛ́ɛ Ala yɛ sɛliya ólu bɛ́ lábhatola. A tɛ́ɛ Izalayɛli kunmankabhaa ó nánli ó mankɔɔnnan. Ní Sɛnnɛnyanin ŋó tɛ́ɛ a fɛ. ²⁶Ní Sɛnnɛnyanin ŋó tɛ́ wɛ́ɛ yáa a lá kó a táa sayakɛ ní a ɲán mán la Ala yɛ́ Kílisi lɔtɔnmɔnnin ŋó ka. ²⁷Ní Sɛnnɛnyanin ŋó yɛ́ sébhaaya ó lée kɛ́ tó Simeɔn é táa Ala bhatobhomba ó kɔɔnnɔn o wáati o lɔ. Ɛnza ŋwóobhaa ni a facɛ é táa ni a lé ó ywáa ó lɔ́ kɛ́ a kɛ́ɛfa Ala mán, óni kɛ ó fáanlɛɛ ólu bhɔ́ kɛ́ kéeɲan ni sɛliya ó lé. ²⁸Simeɔn é a tá i bhóo lɔ́ kɛ́ Ala tando kɛ fɔ kó:

²⁹«Mantii ó, ii mín nvɔ, o wɛ́ɛ kɛ́.

Ii sé kɛ́ i yɛ́ kɛ́ɛfaman ó myáan í yɛ́ yɔnjɛ o lá sísan,

ní táa hɛ́lɛ lɔ óyoo íi sannin kɛ a la tɛnmɛn,

³⁰kɛ mansɔɔ i wɛ́ɛ Kísibhaa ó mín njé, né ɲán o wɛ́ɛ lá ó ka,

³¹i wɛ́ɛ mín nɔ́bhyɛ mɔɔn ólu bɛ́ yɛ́.

³²A yáa kɛ́ɛnɲan ó bhɔ́ dínɲan mɔɔn ólu bɛ́ yɛ́ kɛ́ í yáa i lá.

A yáa kɛ́ Izalayɛli yɛ́ kunnanwee ŋó lé,

án nee mín núu í yɛ́ mɔɔn olu lé.»

³³Simeɔn é kóman mínnu fɔ Ɛnza ɲɛ́n kó ó lɔ, dhyé ŋó facɛ ní a wóobhaa é káwakoya ólu lɔ. ³⁴Simeɔn é lwáau bhyaa i fɛ, aa fɔ a wóobhaa Mwɛnyamu yɛ kó: «A mánfɛɛ, dhyé míin ɲáan kɛ sɔ́ɔbu le Ala yáa Izalayɛlidhye ŋólu shɛ́ɛman nánbe, kɛ shɛ́ɛman náwii. A yáa kɛ tɔɔmansii le, mɔɔn ólu káa ɲɔ́ɔn mán sɔ́sɔ mínnga. ³⁵O ɲán ó mán, mɔɔn shɛ́ɛman miliya ó yáa bhɔ́ kɛ́ɛnman. Ile kwɛnnin, i ní ó yáa tɔ́lɔ óyoo i wɛ́ɛ í sɔ́ɔ muun nán.»

Céla muso Anɛn é bálika bhɔ́la Ala yɛ́

³⁶Céla muso lɔ́ tɛ́ɛ Yeluzalɛmu, a tɔ́ɔ tɛ́ɛ kó Anɛn. A facɛ Fanuwɛli búluyi ó bhɔ́ Azɛli lé lɔ. Anɛn tɛ́ wɛ́ɛ kɔɔ koyoongɛ. A sínngbiitɔɔ ó fúukɛnin ngwɔ, sánɲin wóonvyaa, a cɛ é sayakɛ. ³⁷Aa tó finɲanbho ŋó la fɔ a sí ó nan sé sánɲin bísɛɲin ní náannin lɔ́. Wáati óo wáati a tɛ́ɛ táala Ala bhatobhomba ó kɔɔnnɔn. A tɛ́ɛ sún nonan kɛ́ Ala dɛ́li wáati ó bɛ́. O ɲán ó mán, a tɛ́ɛ Ala bhátola sú ni tée. ³⁸Ɛnza ngɛ́ɛfa wáati ó Ala mán, o wáati ó yɛ́ɛ lɔ Anɛn é lo Ala bhatobhomba ó kɔɔnnɔn. Aa lámyaan kɛ́ bálika bhɔ́ Ala yɛ́. Mɔɔn mínnu tɛ́ɛ Yeluzalɛmu kunmankabhaa ó nánli ó mankɔɔnnan, aa Ɛnza ngófɔ ólu bɛ́ yɛ́.

Ɛnza ŋwóobhaa ni a facɛ é í kwɔ́sɛɛla ní a lé Nazalɛti

³⁹Ɛnza ŋwóobhaa ni a facɛ é Mantii ó yɛ́ sɛliya ó mánfa kɛ́ wɛ́ɛ wáati ó mínnɔn, íi i kwɔ́sɛɛ ní a lé Nazalɛti, Galile mala ó lɔ, kɛ mansɔɔ i síininndɛ́ɛ yénɔn lé.2.39 Matiyu 2.23.⁴⁰Sísan, dhyé ŋó tɛ́ɛ bwóɲanla, lɔ tɛ́ɛ bhyáala a bhaaka ó ka kɛ́ táa. Hákiitii lé tɛ́ɛ a lé, Ala yɛ́ nɛ́nmɛn ó tɛ́ɛ a ka.

Ɛnza ŋwóobhaa ni a facɛ é a ɲíinan Yeluzalɛmu

⁴¹Ɛnza ŋwóobhaa ni a facɛ tɛ́ɛ táala Hɔ́lɔɲanli o ɲánlagbɛ ó la Yeluzalɛmu sa ŋóo sa. ⁴²Ɛnza ŋé sa ndá ni fyáa sɔ́ɔ wáati mínnɔn, í bɛ́ɛ táa ɲɔ́ɔn nvɛ́ Yeluzalɛmu kɛ́ kéeɲan ni ɲánlagbɛ ó laanan ó lé. ⁴³Ɲánlagbɛ ó wɛɛ ló mínnan, mɔɔn ólu só sháa ólu tá. Wáa dhyé ŋó tó Yeluzalɛmu, a wóobhaa ni a facɛ mán bhɔ́ o ɲan le. ⁴⁴I tɛ́ɛ i milila kó aa a táamanɲɔɔn ólu fɛ́ sháa ó ka. Ii tée kée ndáaman kɛ́, tó kɛ́ lámyaan kɛ́ a ɲíi i bhádhye ŋólu ni i lɔmaa ólu cɛ́man. ⁴⁵I mán Ɛnza ɲé ywáa sí lɔ tó íi i kwɔ́sɛɛ kɛ́ táa a ɲíi Yeluzalɛmu. ⁴⁶Tée sáwaɲɔn lo ŋo ɲánlagbɛ ó wɛ́ɛnin ngwɔ, íi táa a sɔ́ɔ Ala bhatobhomba ó kɔɔnnɔn. A síininndɛ́ɛ sɛliya kaamɔɔn olu cɛ́man kɛ́ i lɔ́myɛn óni kɛ́ i mánɲaankɛ kó lɔ́lu lá. ⁴⁷A lɔ́myɛnmaa ólu bɛ́ɛ káwakoya a yɛ́ hákiimanɲan óni a yɛ́ yawili séɲan ó lá. ⁴⁸A wóobhaa ni a facɛ é a yé mínngɛ, íi káwakoya. A wóobhaa é a mánɲaankɛ kó: «Nyé, mínnɛɛn lée kɛ́ tó ii míin ngɛ́ án nán tá? A mánfɛɛ, né ni i facɛ hákii ó ɲaanminnin ndɛ́ɛ i ywáa ɲíinan.»

⁴⁹Aa i yawi kó: «Áa né ywáa ɲíinan mínnɛɛn le kósɔn? Álee mán lɔ kó né kákan né kɛ kɛ́ Nvá yɛ́ bhó ŋó kɔɔnnɔn a. ⁵⁰Waa aa kóman mín nvɔ i yɛ́, í mán bhɔ́ ó ɲánle.»

⁵¹O kwɔ, íi i kwɔ́sɛɛ kɛ́ táa ɲɔ́ɔn nvɛ́ Nazalɛti. A tɛ́ɛ i bwóɲanla koyoongɛ. A wóobhaa tɛ́ɛ ó kóman ólu bɛ́ mala a hákii lá. ⁵²Lɔ tɛ́ɛ bhyáala Ɛnza nɔ́bhɛɛya óni a hákii ó ka. Ala yɛ́ nɛ́nmɛn o tɛ́ɛ a ka, a kó é dhyáa mɔɔn ólu yɛ́.

Yaya Bátizelikɛbhaa yɛ́ lakawani ó

Matiyu 3.1-6; Maki 1.1-6; Yaya 1.19-28

¹Lɔmu mansacɛ Tibɛli Sezali yɛ́ mansaya ó sa ndá ni lóoɲɔɔn ó, o wáati ó lɔ Pɔnsi Pilati lé tɛ́ɛ Zude mala ó kunnan, Elɔdi tɛ́ɛ Galile mala ó kunnan, a bhádhyemannjɛ Filipu tɛ́ɛ Itule ni Talakoniti mala ólu kunnan, óni Lizaniyasi tɛ́ɛ Abilɛni mala ó kunnan. ²O wáati kée ŋó lɔ, Anɛn ni Kayife tɛ́ɛ faanlɛɛɲansebhaa ólu kúnndiiba ó lé. O wáati ó lɔ, Ala é kóman Zakali dhyénjɛ Yaya yɛ́ kɛ́ tó dhyɛ́ ó kɔɔnnɔn. ³O lɔ, Yaya Bátizelikɛbhaa é Zuludɛn bháji ó lafɛ só ólu bɛ́ yáala kɛ́ á láse mɔɔn olu man kó íi díminsa kɛ́ fala í yɛ́ kóyoo ŋólu la kɛ́ bátize ké í yɛ́ yúumu ólu a yafa i man. ⁴Oo kɛ́ óyoo céla Ezayi tɛ́ wɛ́ɛ sɛ́wɛ a yɛ́ kitabu ó kɔɔnnɔn ɲán mín mán kó:

Mɔɔn lɔ́ é gbáanan dhyɛ́ ó ka kó:

Aa Mantii ó yɛ́ sháa ó lálaa,

áa a tínminnaa ólu látee.

⁵Jáan ólu bɛ́ yáa fá,

tíi ólu ni tiininngbeya ŋólu bɛ́ yáa cé kɛ́ í látee.

Tínminnaa lɔ́kuunin ŋólu yáa i látee,

sháayoo ŋólu yáa i lálaa.

⁶Ala é Adamandhye ŋólu kísi ɲán mín mán, bɛ́ yáa o yé.

⁷Yaman ó tɛ́ɛ táala Yaya saala ké aa i bátize, waa a tɛ́ɛ a fɔ́la ólu yɛ́ kó: «Ale santutudhye ŋólu, yɛ́ɛtii é álee lasowi kó ale a bwée Ala yɛ́ kíti nantɔ ó ɲɛn. ⁸Aa kóbhɛɛ ólu kɛ́, kɛ́ a yáa kó a wɛ́ɛ dímisa kɛ́ fala a yɛ́ kóyoo ŋólu lá. A kɛ́nan kɛ́ fɔ́la á yɛ́ɛ kɔɔnnɔn kó Ala yáa a kísi kɛ mansɔɔ Bulaaman é a fá lé. Ní fɔ́la a yɛ́ ngó Ala é sé kɛ́ káwaguun míin nú yɛ́ɛman kɛ ólu kɛ́ Bulaaman dhyé ŋólu lé. ⁹Tɛ́ɛla ŋó lɔ́bhyɛnin ɲé kɛ bhá yíi óni a díin ŋólu tɛ́ɛ ó kánman. Yíi óo yíi tɛ́ dhyémɛɛ kɛ́la, ó bɛ́ yáa tɛ́ɛ kɛ a láfii tá ó lɔ́.»

¹⁰Yaman ó tɛ́ɛ a mánɲaankɛla kó: «O sán lɔ, án ngákan kɛ́ mínnɛɛn le kɛ?»

¹¹A tɛ́ɛ i yawila kó: «Ni deeke fyaa é mɔɔn mín móo, déeke tɛ́ mín móo, o a kée ndí ó tíi ó mán. Ni lɔ́minfe ŋé mɔɔn mín móo, o waa lɔ́taa ní kɔ́ɔntɔ ó lé.»

¹²Nísɔɔnmyaanbhaa lɔ́lu é táa Yaya saala kó aa i bátize. Ólu a mánɲaankɛ kó: «Kaamɔɔn, án née kákan kɛ́ mínnɛɛn le kɛ?»

¹³Aa ólu yawi kó: «Wɛ́ɛ ó yaceya míin fɔ a yɛ́, aa o lé myáan, a kɛ́nan a lɔ́gbɛɛ myáan kɛ́ fala ó ka.»

¹⁴Swaasi lɔ́lu ŋé a mánɲaankɛ kó: «Án née wɛ́, án née kákan kɛ́ mínnɛɛn lé kɛ?»

Aa ólu yawi kó: «A kɛ́nan mɔɔn sí yɛ́ wɛ́ɛ myáan a lá fáan lá, a kɛ́nan mɔɔn sí tɔ́nɲɔɔn, a sáa o wáa a wasa.»

¹⁵Mɔɔn ólu tɛ́ɛ Kísibhaa ó nánli ó mankɔɔnnan mínngɛ, i bɛ́ tɛ́ɛ i yɛ́ɛ manɲaankɛla kó kɛ́dhyaa Yaya lée Ala yɛ́ Kílisi lɔtɔnmɔnnin ŋó lé. ¹⁶O lɔ, Yaya é fɔ i bɛ́ yɛ́ kó: «Née a bátizela ni jí lé le, waa mín ngáa nan né kwɔ, ó yɛ́ sébhaaya o waa bwó ni né tá ó lé. Kɛ́ a yɛ́ sawaa o yúu ó fwée, né kún ŋo wáa lɔ́ɔ ó mán. Ale yáa a bátize ní Ní Sɛnnɛnyanin ŋóni tá ó lé. ¹⁷A yɛ́ zɛɛ óo a bhóo. A yáa a yɛ́ maan gbasinin ŋó lɔ́fyɛ kɛ́ a dhyé ŋó bhyáa a yɛ́ mɔɔnnin ŋó kɔɔnnɔn kɛ́ a ɲanman ó ɲɛɛn tá sábhɛɛ ó mán.»

¹⁸Yaya tɛ́ɛ mɔɔn ólu lɔ́jala ó kóman ó ɲɔ́ɔn nzhɛ́ɛman né la. A tɛ́ɛ sanmankanmɛɛ ó fɔ́la mɔɔn ólu yɛ o ɲán ó lé mán.

¹⁹Waa Yaya tɛ́ wɛ́ɛ Galile mala ó kunndii Elɔdi kɔ́ɔ fɔ́, kɛ mansɔɔ a tɛ́ wɛ́ɛ a bhádhyemannjɛ ó muso Elodiyadi bwási a lá kɛ́ o kɛ́ a gbú tá lé. A tɛ́ɛ kóyoo ngbɛ́ɛlu kɛ́la o yɛ́ɛ kwɔ. ²⁰A mán lángɛ olu mán, aa Yaya gbú myaan kɛ́ a bhyáa kaso lá.

Ɛnza bátizeko ó

Matiyu 3.13-17; Maki 1.9-11

²¹Yaya é mɔɔn ólu bɛ́ bátize, kɛ Ɛnza bátize. Kɛ Ɛnza ndó Ala dɛ́li ó la, sángboo óo i lálaka, ²²Ní Sɛnnɛnyanin ŋó i yíi óo fasisoo kɛ kɛ́ óyoo biinin ngɛ kɛ́ í yíi a ka. Kómankan nɔ́ é bhɔ́ sángboo ó lɔ kó: «Ile lée né dhyaaɲɛn dhyé ŋó lé, i kó a dí né yɛ́.»

Ɛnza búluyi ó

Matiyu 1.1-17

²³Ɛnza ŋé a yɛ́ bháala ó lámyaan wáati mínnɔn, a sí ó tɛ́ɛ sa bísawa sí bhɔ́la. Mɔɔn ólu tɛ́ɛ i milila kó Ɛnza ŋé Yusufu dhyé né lé Yusufu é Eli dhyé né lé. ²⁴Eli é Matati dhyé né lé, Matati é Levi dhyé né lé, Levi é Mɛliki dhyé né lé, Mɛliki é Zannayi dhyé né lé, Zannayi é Yusufu dhyé né lé. ²⁵Yusufu é Matatiyaasi dhyé né lé, Matatiyaasi é Amɔsi dhyé né lé, Amɔsi é Naumu dhyé né lé, Naumu é Esili dhyé né lé, Esili é Nagayi dhyé né lé. ²⁶Nagayi é Maati dhyé né le, Maati é Matatiyaasi dhyé né le, Matatiyaasi é Semeyi dhyé né le, Semeyi é Yozɛki dhyé né le, Yozɛki é Yooda dhyé né le. ²⁷Yooda é Yowanan dhyé né le, Yowanan é Leza dhyé né le, Leza é Zolobabɛli dhyé né le, Zolobabɛli é Sheyatɛli dhyé né le, Sheyatɛli é Neli dhyé né le. ²⁸Neli é Mɛliki dhyé né le, Mɛliki é Adi dhyé né le, Adi é Kosamu dhyé né lé, Kosamu é Ɛlimadan dhyé né le, Ɛlimadan é Ɛli dhyé né le. ²⁹Ɛli é Jozɛsi dhyé né le, Jozɛsi é Eliyezɛli dhyé né le, Eliyezɛli é Jolimu dhyé né le, Jolimu é Matati dhyé né le, Matati é Levi dhyé né le. ³⁰Levi é Simeɔn dhyé né le, Simeɔn é Juda dhyé né le, Zuda é Yusufu dhyé né le, Yusufu é Jonamu dhyé né le, Jonamu é Eliyakimu dhyé né le. ³¹Eliyakimu é Meleya dhyé né le, Meleya é Mɛnna dhyé né le, Mɛnna é Matata dhyé né le, Matata é Natan dhyé né le, Natan é Laula dhyénjɛ lé le. ³²Laula é Yese dhyé né le, Yese é Obɛdi dhyé né le, Obɛdi é Boozi dhyé né le, Boozi é Sala dhyé né le, Sala é Naasɔn dhyé né le. ³³Naasɔn é Aminadabu dhyé né le, Aminadabu é Adimɛn dhyé né le, Adimɛn é Alini dhyé né le, Alini é Ɛsilɔn dhyé né le, Ɛsilɔn é Pelɛsi dhyé né le, Pelɛsi é Zuda dhyé né le. ³⁴Zuda é Yangubha dhyé né le, Yangubha é Shaaka dhyé né le, Shaaka é Bulaaman dhyé né le, Bulaaman é Tela dhyé né lé, Tela é Nakɔli dhyé né le. ³⁵Nakɔli é Selugi dhyé né le, Selugi é Leu dhyé né le, Leu é Pelɛki dhyé né le, Pelɛki é Ebɛli dhyé né lé, Ebɛli é Shela dhyé né le. ³⁶Shela é Kenan dhyé né le, Kenan é Alipasadi dhyé né le, Alipasadi é Sɛmu dhyé né le, Sɛmu é Nuwo dhyé né le, Nuwo é Lemɛki dhyé né lé. ³⁷Lemɛki é Matusalɛmu dhyé né le, Matusalɛmu é Enɔki dhyé né le, Enɔki é Yelɛdi dhyé né le, Yelɛdi é Malaleyɛli dhyé né le, Malaleyɛli é Kenan dhyé né le. ³⁸Kenan é Enɔsi dhyé né le, Enɔsi é Sɛti dhyé né le, Sɛti é Adaman dhyé né le, Adaman é Ala dhyé né le.

Sɔtaannan é Ɛnza nɔ́swaannan kɛ́ kwee

Matiyu 4.1-11; Maki 1.12-13

¹Ɛnza nvánin ndɛ́ɛ Ní Sɛnnɛnyanin ŋó lá. Aa bhɔ́ Zuludɛn bháji lá ó lá kɛ́ táa dhyɛ́ o lɔ́. Ní Sɛnnɛnyanin ŋóo táa a lé. ²Sɔtaannan é a lɔ́swaan tée bínaannin kɔ́ɔnnɔn. A mán lɔ́min sí kɛ́ ó tée bínaannin ó kɔ́ɔnnɔn. O ló ŋólu tínminnin ngwɔ́, kɔ́ɔn é a myaan.

³O wáati ó lɔ, Sɔtaannan é fɔ a yɛ́ kó: «Ní i Ala dhyénjɛ lé, a fɔ kó káwaguun míin ŋan yɛ́ɛman kɛ o kɛ́ búlu lé.»

⁴Ɛnza ŋé a yawi kó: «A sɛ́wɛnin ɲé Ala yɛ kitabu o lɔ kó: Mɔɔn tɛ́ bhálola lɔ́minfe ngbɛ́ɛgbɛɛ la.»

⁵O kwɔ́, Sɔtaannan é táa nín ale tii já nɔ́ ka kɛ́ lúukolo ó mansaya o bɛ́ yáa a lá ywáaninngee nɔn, ⁶kɛ́ fɔ a yɛ́ kó: «Né yáa míin bɛ́ kunndiiya óni a nanfootiiya ó di i mán. Ni née fɛ́ kɛ́ a di mɔɔn mín mán, née dila o tíi o le mán, kɛ mansɔɔ a bɛ́ é né tá lé lé. ⁷O lɔ, ní ile kwɛ́nnin ngɛ i kúnmɛɛn nɔ́kɛɛ né kɔ́ɔ kɛ́ né bháto, a bɛ́ yáa kɛ́ i tá lé.»

⁸Ɛnza ŋé a yawi kó: «A sɛwɛnin ŋe Ala yɛ́ Kitabu o lɔ kó: I mányii i yɛ́ Mantii o i yɛ́ Ala ó kée né yɛ́, kɛ́ ale kéengboto le bháto.»

⁹Alabha ŋó, Sɔtaannan é táa ni a le Yeluzalɛmu, kɛ alalɔ Ala bhatobhomba ó kúnnɔn, kɛ́ fɔ a yɛ́ kó: «Ni í Ala dhyénjɛ lé, í gbán kɛ́ í bhyáa lúuman, ¹⁰kɛ mansɔɔ a fɔnin ɲé Ala saaninkan ŋó lɔ kó:

A yáa cé dí a yɛ́ malɛɛka ólu mán i kósɔn,

kó íi i yáakiito i lɔ.

¹¹Aa fɔ yé kó:

I yáa i tá i bhóo ó lɔ́,

ké i se ngɛ́nan gbasi káwaguun nɔ́ la.»

¹²Ɛnza ŋé a yawi kó: «A fɔnin ɲé Ala yɛ́ Kitabu ó lɔ́ kó: ‹Í kɛ́nan Mantii o, í yɛ́ Ala o lɔ́swaan.› »

¹³Sɔtaannan é a lɔ́swaan ɲán ó bɛ́ mán kɛ́ kwée wáati mín nɔ́n, aa táa kɛ́ a tó yé ŋótun.

Ɛnza ŋé a yɛ́ bháala o lámyaanla Galile

Matiyu 4.12-17; Maki 1.14-15

¹⁴Ɛnza nvánin ŋó Ní Sɛnnɛnyanin ŋó yɛ́ sébhaaya ó lá áa í kwɔ́sɛɛ kɛ́ táa Galile mala ó lɔ́. A tɔ́ɔ é bhɔ́ o mala o ywáa ó bɛ́ lɔ́. ¹⁵A tɛ́ɛ mɔɔn ólu kalanan ólu yɛ́ sɛ́ɛbho ólu kɔ́ɔnnɔn, mɔɔn ólu bɛ́ tɛ́ɛ a tɔ́ɔɲwaan fɔ́la.

Ɛnza ɲɛ́n sómɔɔn ólu mán lá a lá

Matiyu 13.54-58; Maki 6.1-6

¹⁶Ɛnza ŋé táa Nazalɛti aa i lámwɔn só mín nán. Lɔnwɛɛnlilo ó lá, aa lo sɛ́ɛbho ó lá óyoo a tɛ́ɛ a kɛ́la ɲán mín mán. Aa i wíi kɛ́ kitabu ó kála. ¹⁷Céla Ezayi é kitabu mín nzɛ́wɛ, oo dí a mán. Aa a lalaka kɛ́ a ywáa lɔ́ fɔ. A sɛ́wɛnin ŋe yé kó:

¹⁸«Mantii ó yɛ́ Ní ó né fɛ́,

kɛ mansɔɔ a wɛ́ɛ né múun kɛ sanmankanmɛɛ ó fɔ faannda ŋólu yɛ.

Aa né cé kó ní a fɔ yɔ ŋólu yɛ́ kó i yáa hɔ́lɔɲan,

kó ní a fɔ fyóondɔ ólu yɛ́ kó i ɲán ó yáa i láka,

kó ní mɔɔntɔlɔnin ŋólu bhɔ́ i yúu ólu bhóo kɛ́ i bhyáa.

¹⁹Mantii ó káa a yɛ́ kóɲwaan ó kɛ́ sán mín nán,

kó ní ó fɔ mɔɔn ólu yɛ́.»

²⁰O kwɔ́, Ɛnza ŋé kitabu ó látuun kɛ́ a di sɛ́ɛbho ŋó kunnansiibhaa ó mán kɛ́ i síi. Mɔɔn mínnu tɛ́ɛ yé, ólu bɛ́ é í ɲán gbáan a lɔ́. ²¹O sán ó lɔ́, aa kóman ó tá kɛ́ fɔ i yɛ́ kó: «A wɛ́ɛ Kitabu míin ngɔ́ɔnnɔnkoman mínnu myɛ́n nín, o kó ólu wɛ́ɛ í lafa bí.»

²²I bɛ́ tɛ́ɛ a tɔ́ɔɲwaan fɔ́la. Ɛnza ɲɛn kómanbhɛɛ o i bɛ́ káwakoya, fɔ i tɛ́ɛ fɔ́la kó: «Bháa míin ndɛ́ Yusufu dhyénjɛ o lé a?»

²³Ɛnza ŋé fɔ i yɛ́ kó: «Síka tɛ́ lɔ́, a yáa saanan míin ná né yɛ́ kó: ‹Bhwɛ́ɛkɛbhaa, i yɛ́ɛ kɛ́ɛnya.› A yáa fɔ né yɛ́ kó: ‹I wɛ́ɛ kó mínnu kɛ Kapɛnamu, án ŋwɛ́ɛn ó myɛ́n, ii ó ɲɔ́ɔnnzilu kɛ́ yánun i gbú yɛ́ só ó la.› »

²⁴«Tinɲan in ne ní fɔ́la a yɛ́ ngó, céla sí tɛ́ myaanla cɛ́ɛne a gbú yɛ́ só ó la.» ²⁵O kwɔ́, aa fɔ i yɛ́ kó: «Tinɲan in ne, ní fɔ́la a yɛ́ ngó, céla Eli yɛ́ tée ó lɔ́, sánɲin ó í bá kɛ́nan sá nzawa ni tɔ́ kɔɔnnɔn, kɔ́ɔnba é lo yamaan ó ywáa ó bɛ́ lɔ́. Finɲanmuso shɛ́ɛman ndɛ́ɛ Izalayɛli yamaan ó lɔ́. ²⁶Waa Ala mán céla Eli cé i sí mán. Aa a cé finɲanmuso lɔ́ lé mán Salɛputa, Sidɔn mala ó lɔ́. ²⁷Céla Elize tá tée ó lɔ́ kwáantɔ shɛ́ɛman ndɛ́ɛ Izalayɛli, waa i si mán kɛ́ɛnya, fɔ Naman kɛ́ bhɔ́ Sili yamaan ó lɔ́.»

²⁸Sɛ́ɛbho ŋó kɔɔnnɔn mɔɔn ólu ó kóman ólu myɛ́n mínngɛ, íi mwɛ́nnɛn koyoongɛ. ²⁹Ii i wíi kɛ́ Ɛnza myaan kɛ́ bhɔ́ ní ále só ó kɔɔnnɔn ni fáan lé. I yɛ́ só ó síininndɛ́ɛ tii mín ndɔ́ɔfɛ, íi táa ní ále o kúnnɔn. I tɛ́ɛ fɛ́ kɛ́ í síi á man kɛ́ a lá bé lúuman. ³⁰Waa Ɛnza ŋé tínmin i cɛ́man kɛ́ táa.

Ɛnza ŋé Lámansatɔ lɔ́ kɛ́nnɛnyala

Matiyu 7.28-29; Maki 1.21-28

³¹Ɛnza ŋé táa Galile mála ó só lɔ́ lá, mín ndɔ́ɔ kó Kapɛnamu. A tɛ́ɛ mɔɔn ólu kalanan lɔnwɛɛnlilo ó lá yé. ³²Ii káwakoya a yɛ́ mɔɔn kalanzeɲan ó lá, kɛ mansɔɔ a tɛ́ɛ kóman lá óyoo sébhaaya é mɔɔn mín móo. ³³Cɛ nɔ́ɔnnin nɔ tɛ́ɛ ni ile sɛ́ɛbho ŋó kɔ́ɔnnɔn Lámansayoo ndɛ́ɛ o fɛ́. O cɛ ó gbáa koyoongɛ kó: ³⁴«Ée! ƐnzaNazalɛtika, mínnɛɛn lée né ní i lé cɛ? I wɛ́ɛ nan kɛ́ án hálaki a? Ii mɔɔn mín né, ní ó lɔ. Ile lée Ala yɛ́ céladhye nzɛ́nnɛnyanin ŋó lé.»

³⁵Ɛnza ŋé yaman a kunnan kɛ́ fɔ a yɛ kó: «A jalɔ! Bhɔ́ cɛ míin nvɛ́.» Lámansa oo cɛ ó tá kɛ́ a bé lúuman i cɛ́man kɛ́ bhɔ́ a fɛ́. Waa fósi mán kɛ́ cɛ ó lá.

³⁶Mɔɔn bɛ́ é káwakoya fɔ í tɛ́ɛ ɲɔ́ɔn mánɲaankɛla kó: «Ɛ́ɛ, kóman súu mínnɛɛn lée nin? Aa kóman lámansayoo ŋólu fɛ́ ní fáan ní sébhaaya lé. Ii bhɔ́la mɔɔn ólu fɛ́.» ³⁷O sɔ́ɔbu ó fɛ́, Ɛnza ndɔ́ɔ é búubɛɛ ó mala o ywáa ó bɛ́ lɔ.

Ɛnza ŋé yaangalotɔ shɛ́ɛman ngɛ́nnɛnyala

Matiyu 8.14-17; Maki 1.29-34

³⁸Ɛnza ŋé bhɔ́ sɛ́ɛbho ó kɔ́ɔnnɔn kɛ́ táa Simɔn yɛ́ bhó ŋó la. Simɔn bhyáamuso tɔ́lɔnin ndɛ́ɛ fásigban ó bhóo koyoongɛ. Ii Ɛnza ndɛ́li kó aa a kɛ́ɛnya. ³⁹Ɛnza ŋé táa i bíin a kunnan kɛ fɔ kó fásigban o bhɔ́. Fásigban óo wɛɛ. Aa i wíi ó ywáanin ngée ŋó lɔ kɛ bháalakɛ i yɛ.

⁴⁰Teekun ŋó bénin ngwɔ́, mɔɔn ólu táa Ɛnza nzaala ní yaangalotɔ bɛ́suu lé. Aa í bhóola i bɛ́ kée ngéenan ka kɛ́ i lákɛɛnya. ⁴¹Lámansa ólu tɛ́ɛ bhɔ́la mɔɔn shɛ́ɛman nvɛ́. I bhɔ́tɔ ó, i tɛ́ɛ gbáanan kó: «Ii Ala dhyénjɛ le lé.» Wáa Ɛnza ŋé í táan fɔ́ i yɛ. A tɛ́ tɛ́ sɔ́nnan ko ii kóman, kɛ mansɔɔ ólu tɛ́ɛ lɔ ŋóo Ala yɛ́ Kílisi lɔtɔnmɔnnin ŋó lée wé.

Ɛnza nankun ŋó

Maki 1.35-39; Matiyu 4.23

⁴²Kɛ́ɛn óo bhɔ́ mínngɛ, Ɛnza ŋé bhɔ́ kɛ́ táa ywáamanfanin nɔ́ lɔ́. Yaman óo lámyaan kɛ́ a ywáa ɲíin. Ii táa a yé mínngɛ, ii a dɛ́li kó aa tó i tɔ́ɔfɛ, kó a kɛ́nan táa ywáayanɔn. ⁴³Wáa aa fɔ i yɛ kó: «Né kákan né kɛ́ Ala yɛ́ mansaya ó sanmankanmɛɛ ó fɔ só tɔ ólu la, kɛ mansɔɔ njé kún ŋó lée wé.»

⁴⁴O lɔ, a tɛ́ɛ lakawanin o kɛ́la sɛ́ɛbho ólu kɔ́ɔnnɔn Zude mala ó lɔ́.

Ɛnza ŋé a yɛ́ kaamɔɔndhye njónan ólu kíila

Matiyu 4.18-22; Maki 1.16-20; Yaya 21.1-11

¹Lo nɔ lá, kɛ́ Ɛnza ndó Genezalɛti bhála ó lá, yaman ó tɛ́ wɛ́ɛ a lamiin tó í tɛ́ ɲɔ́ɔn díin ndíin nan kɛ́ Ala yɛ́ kóman ó lɔ́myɛn. ²Aa kúun nvyáa yé bhála ó lá. Sɔnmɔnnin ŋólu tɛ́ wɛ́ɛ bhɔ́ ó kɔ́ɔnnɔn, i tɛ́ɛ i yɛ́ jɔ ólu kwóla. ³Ɛnza ŋé ló kúun ŋólu kée ngɔ́ɔnnɔn mín ndɛ́ɛ Simɔn tá lé. Aa fɔ́ Simɔn yɛ́ kó aa kúun ŋó manbhɔ tíin ŋó lá dɔ́ɔnin. O kwɔ́, kɛ Ɛnza síinin ndó kúun ŋó kɔɔnnɔn, aa lámyaan kɛ mɔɔn ólu kála.

⁴Aa wɛ́ɛ kóman ó la sán mín nɔ́n, aa fɔ Simɔn yɛ́ kó: «Jí ó dún nún ŋé ywáa mín nɔ́n, táa ní kúun ŋó lé ó ywáa ó lɔ́ kɛ́ i yɛ́ yɔ ó láfii.»

⁵Simɔn é a yawi kó: «Kaamɔɔn, án ŋwɛ́ɛn bháala ó kɛ́ kɛ́ kɛ́ɛn bhɔ́, án mán fósi sɔ́ɔ. Waa i yɛ́ saanin ó kósɔn, né yáa yɔ ó láfii jí ó lɔ́.» ⁶O lɔ, íi yɔ ó láfii. I yɛ́ yɔ o yɔ́ɔ shɛ́ɛman myáan fɔ yɔ ó lamyaan kɛ́ fála nvála. ⁷Ii i bhóo láwii kɛ́ i táamanɲɔɔn ólu kíi kúun ndɔ́ ó kɔɔnnɔn kó ii nan i dhyɛman. Ólu táa, ii kúun nvyaa ólu bɛ́ láfa yɔ́ɔ ó lá fɔ kúun ólu tɛ́ fɛ́ kɛ́ yíi jí ó kɔ́ɔ. ⁸Simɔn Piyɛli é ó yé mínngɛ, aa i kúnmɛɛn nɔ́kɛɛ Ɛnza ngɔɔ kɛ́ fɔ kó: «Mantii ó, í kɛ́nan í mangbaa né la, kɛ mansɔɔ née yuumutɔ le lé.»

⁹Aa ó fɔ le kɛ mansɔɔ a tɛ́ɛ sháannan lé. Ale ní mínnu tɛ́ɛ ɲɔ́ɔn nvɛ́ kúun ó kɔɔnnɔn, i bɛ́ tɛ́ɛ sháannan kɛ mansɔɔ i wɛ́ɛ yɔ́ɔ shɛ́ɛman nzɔ́ɔ. ¹⁰Zebede dhyénjɛ ólu, Zaki ní Yaya tɛ́ɛ Simɔn bháalakɛɲɔɔn le lé, ólu tɛ́ɛ sháannan. Waa Ɛnza ŋé fɔ Simɔn yɛ́ kó: «I kɛ́nan sháan. Kɛ́ta bí mán, i káa mɔɔn lé ɲíin Ala yɛ́.»

¹¹Oo kɛ́ mínngɛ, ii i kwɔ́sɛɛ kɛ́nan i yɛ́ kúun ólu bhyáa bhála ó la, kɛ́ í yɛ́ fé ŋólu bɛ́ tó yé kɛ́ bhyáa Ɛnza ngwɔ.

Ɛnza ŋé kwaantɔ lɔ́ kɛ́nnɛnyala

Matiyu 8.1-4; Maki 1.40-45

¹²Lo nɔ la Ɛnza ndɛ́ɛ só lɔ́ la, cɛ kwaantɔ lɔ é nan lo o só o la, a yɛ kwaan o tɛ́ wɛ́ɛ tínmin a lɔ. Aa Ɛnza ɲé mínngɛ, aa táa i bíin a kɔɔ kɛ́ a dɛ́li kó: «Mantii ó, ni i kɛ́ sɔ́n, ii sé kɛ́ né kɛ́ɛnya.» ¹³Ɛnza ŋé í bhóo láwii kɛ í bhóo túu a lá, kɛ́ fɔ kó: «Ŋwɛ́ɛn sɔ́n, kɛ́ɛnya.» O ywáaninngee ŋó lɔ́, kwáantɔ óo kɛ́ɛnya. ¹⁴O kwɔ, Ɛnza ŋé fɔ cɛ o yɛ́ kɛ́ a mangbɛya a yɛ́ cɛ́ɛne kó: «Í kɛ́nan fɔ mɔɔn sí yɛ́ kó né lée i lákɛɛnya lɛ. Waa táa i yɛ́ɛ yáa faanlɛɛɲansebhaa ó lá. Musa é fáanlɛɛ mín ngófɔ sɛ́nnɛnyali ó ta fa nvɛ́, ii ó bhɔ́ kɛ́ a yáa mɔɔn ólu lá kó i wɛ́ɛ kɛ́ɛnya.»

¹⁵O bɛ́ kwɔ́, Ɛnza ndɔ́ɔ é bhɔ́ kɛ́ táa ɲɛ́n fɔ mɔɔn shɛ́ɛman ndɛ́ɛ tóla kɛ́ táa i ládhyɛ a tɔ́ɔfɛ ké íi a yɛ́ kóman ó lɔ́myɛn, wáman ké aa i lákɛɛnya. ¹⁶Waa Ɛnza ngée ndɛ́ɛ táala dhyɛ́ ó lɔ́ kɛ́ Ala dɛ́li yé.

Ɛnza ŋé kuugba lɔ kɛ́ɛnyala

Matiyu 9.1-8; Maki 2.1-12

¹⁷Lo nɔ lá, kɛ́ Ɛnza ndó mɔɔn ólu kálanan, Falizɛn ŋólu ni sɛ́liya kaamɔɔn lɔ́lu síininndɛ́ɛ yé. I tɛ́ wɛ́ɛ nan kɛ́ bhɔ́ Galile mála sódhyenin ŋólu bɛ́ lá, óni Zude mala ó lɔ́ óni Yeluzalɛmu kɔ́ɔnnɔn. Mantii Ala yɛ́ sébhaaya ó tɛ́ɛ Ɛnza nvɛ́ kɛ yaangalotɔ ólu lákɛɛnyala. ¹⁸Cɛ lɔ́lu táa kuugba lɔ́ lé o ywáa ó lɔ́. A lánin ndɛ́ɛ gbasa o ka. I tɛ́ɛ ɲán ɲíinan kɛ́ lo ni ó cɛ ó lé bhó ŋó kɔɔnnɔn kɛ́ a lá lá Ɛnza ɲánkɔɔ. ¹⁹I mán ɲán sɔ́ɔ a mán kɛ ló ní ale yaman ó kósɔn. O lɔ, ii táa i yɛ́ɛ bhó ŋó kúnnɔn kɛ ó ywáa lɔ wáa. Kɛ kuugba ó tó gbasa ó ka, íi a láyii o jáan ó fɛ́ yaman ó cɛ́man ni yúu lɔ lá Ɛnza ɲánkɔɔ. ²⁰Ɛnza ŋé a yé kó ó mɔɔn ólu wɛ́ɛ lá ale la mínngɛ, aa fɔ kó: «Cɛ, i yɛ yúumu ólu wɛ́ɛ yafa i mán.»

²¹Sɛliya kaamɔɔn ólu ní Falizɛn ŋólu a lámyaan kɛ́ fɔ i kɔ́ɔnnɔn kó: «Míin ŋé yɛ́ɛtii le tó aa Ala tɔ́ɔ cáannan tá? Yɛ́ɛtii é sé kɛ mɔɔn ó yɛ yúumu ólu yafa a mán ni Ala kée ndɛ́?»

²²Waa Ɛnza ŋé i míliya ó lɔ kɛ́ fɔ i yɛ́ kó: «Mínnɛɛn le kósɔn aa í milila tá? ²³A fɔ ó kó: ‹I yɛ́ yúumu ólu wɛ́ɛ yafa,› wáman kɛ́ fɔ a yɛ́ kó: ‹I wíi kɛ́ táamankɛ,› o kóman fyaa ó lɔ́, a mínnɛɛn lé fɔ a dí? ²⁴Waa ní a fɛ́ ké aa lɔ kó sé é mɔɔn Dhyénjɛ ó yɛ́ kɛ́ mɔɔn ó yɛ́ yúumu ó yafa kɛ́ tó dínɲan lɔ́.» O lɔ, aa fɔ kuugba ó yɛ́ kó: «Ní fɔ́la i yɛ́, í wíi kɛ́ í yɛ́ gbasa ó tá kɛ́ táa lúman.»

²⁵O ywáaninngee ŋó lɔ́, cɛ óo i wíi mɔɔn ólu ɲánla kɛ́ a yɛ́ gbasa ó tá kɛ́ táa a bhóo lúman. A táatɔ ó tɛ́ɛ Ala tando lá. ²⁶I bɛ́ é káwakoya. Íi Ala tando. I sháanninba óo fɔ kó: «Án wɛ́ɛ káwananngo yé bí lɛ́!»

Ɛnza ŋé Levi kíila

Matiyu 9.9-13; Maki 2.13-17

²⁷O kwɔ́, Ɛnza ŋé bhɔ́ yé, aa nísɔɔnmyaanbhaa lɔ́ yé mín ndɔ́ɔ kó Levi, a síininndɛ́ɛ nísɔɔnmyaanbhaa ólu yɛ́ bháalakɛlaa ó lɔ́. Ɛnza ŋé fɔ a yɛ́ kó: «Bhyáa ngwɔ́.» ²⁸Levi é a yɛ́ bháala ó tó yé kɛ́ i wíi kɛ́ i bhyáa Ɛnza ngwɔ.

²⁹O kwɔ́, Levi é sunmanmba lɔ́bhyɛ a yɛ́ bhó ŋó lá Ɛnza ɲɛ́n. Nísɔɔnmyaanbhaa shɛ́ɛman ní mɔɔn gbɛ́ɛlu tɛ́ɛ yé. I tɛ́ɛ lɔ́min kɛ́ ni Ɛnza ní a kwɔ́mɔɔn ólu lé. ³⁰Falizɛn ŋólu ní í yɛ́ sɛliya kaamɔɔn ólu tɛ́ɛ í mankomankomanla. Ii Ɛnza ɲɛ́n kaamɔɔndhye ŋólu mánɲaankɛ kó: «Mínnɛɛn le kósɔn áa lɔ́min kɛ́la kɛ minin kɛ ni nísɔɔnmyaanbhaa ólu ní kóyoongɛbhaa ólu le?»

³¹Ɛnza ŋé kóman ó tá kɛ í yawi kó: «Mɔɔn mínnu kɛ́ɛnyanin ɲé, ólu manko tɛ́ lɔɔtɔlɔ lá, yaangalotɔ héelu manko é lɔɔtɔlɔ lá. ³²Né mán nan mɔɔnteenin ŋólu kíila, waa née nan yuumutɔ héelu kíila ké íi i yósoguun ŋó yɛ́ɛman kɛ́ fala i yɛ́ kóyoo ŋólu lá.»

Ɛnza ŋé kómanla súnno ngó ó lɔ́

Matiyu 9.14-17; Maki 2.18-20

³³Falizɛn nɔlu fɔ Ɛnza ɲɛ́n kó: «Yaya yɛ́ kaamɔɔndhye ŋólu ní Falizɛn ŋólu yɛ́ kaamɔɔndhye ŋólu sún nonan wáati shɛ́ɛman kɛ́ Ala dɛ́li, wáa i tá ólu lɔ́min kɛ́la kɛ́ mínnin kɛ.»

³⁴Ɛnza ŋé í yawa kó: «Fúu síi lo ŋo la aa sé kɛ́ fɔ kwɛ́ɛnkwaa cɛ ó tɛ́ɛcɛ ólu yɛ́ ko íi súnno kɛ́ íle ní kwɛ́ɛnkwaa cɛ ó tó ɲɔ́ɔn nvɛ́ a? ³⁵Waa ló nɔ́ yáa sé, kwɛ́ɛnkwaa cɛ ó yáa bwási i lá, i yáa súnno o ló ŋolu la.»

³⁶Ɛnza ŋé saanan míin na i yɛ́ kó: «Mɔɔn sí tɛ́ faanikwaa ó fálanan kɛ́ o gúun ŋo tá kɛ́ fáani kɔɔ ó jáan ó lábɛɛ ó lá. Ni ó kɛ́ kɛ, faanikwaa ó wɛ́ɛ cáan, a gúun ŋó táa bhyɛ ní faani kɔɔ ó lé. ³⁷O ɲán ó mán mɔɔn sí tɛ́ lɛ́zɛnnji kwáa ó kɛ́la bhwée kɔɔ ó kɔ́ɔnnɔn. Ni ó kɛ́ kɛ, lɛ́zɛnnji ó yáa bhwée ó cé, lɛ́zɛnnji ó yáa bwɔ́ lúuman; ké bɔɔn wɛ́ɛ kɛ́ bhwée ó lɔ́ lé wé. ³⁸Lɛ́zɛnnji kwáa o kákan né kɛ́ kɛ bhwée kwáa lé kɔ́ɔnnɔn. ³⁹Ni mɔɔn mín nɛ́ɛnin ngɛ́ kɛ́ lɛ́zɛnnji kɔɔ ó mínnan, o tíi ó tɛ́ kɛ́la lɛ́zɛnnji kwáa ó fɛ́, kɛ mansɔɔ aa fɔ́la le kó lɛ́zɛnnji kɔɔ ó lé káɲin.»

Ɛnza ŋé mín nvɔ lɔnwɛɛnlilo ŋó kó ó lɔ

Matiyu 12.1-8; Maki 2.23-28

¹Lɔnwɛɛnlilo nɔ́ la, Ɛnza ní a yɛ́ kaamɔɔndhye ŋólu tɛ́ɛ tínminnan sɛ́ɛn lɔ́lu kɔɔnnɔn. A yɛ́ kaamɔɔndhye ŋólu tínnza nɔ́lu tɛ́ɛ kɛ́ fɔ́nɲɔɔn i tɛ́ɛ ólu lɔ́ kɛ́ a lɔɔ. ²Falizɛn nɔ́lu a fɔ i yɛ́ kó: «Kó mín mánngan kɛ kɛ́ lɔnwɛɛnlilo ŋó lá, mínnɛɛn lá álee ó kɛ́la?»

³Ɛnza ŋé í yawa kó: «Kɔ́ɔn é Laula ní a táamanɲɔɔn ólu myaan mínngɛ, aa mínngɛ, a mán ó kála bha ŋan? ⁴Aa lo ɲán min mán Ala yɛ́ bhó ŋo kɔɔnnɔn, faanlɛɛbulu mín nziinin ndɛ́ɛ yénɔn kɛ́ o lɔɔ tó kɛ́ a lɔ dí a táamanɲɔɔn olu mán; Kɛ́ɛke faanlɛɛɲansebhaa ó léelu kákan kɛ o búlu ólu lɔɔ.»

⁵Ɛnza ŋé fɔ i yɛ́ i kwɔ́ ko: «Mɔɔn Dhyénjɛ ó lée lɔnwɛɛnlilo ŋó kunndii o lé.»

Ɛnza ŋé cɛ bhóofaanin mán lɔ́ lákɛɛnyala

Matiyu 12.9-14; Maki 3.1-6

⁶Lɔnwɛɛnlilo ŋó lɔ gbɛ́ɛ lá, Ɛnza ŋé lo sɛ́ɛbho o kɔɔnnɔn kɛ́ a lámyaan kɛ́ mɔɔn ólu kála. O wáati ó lɔ́, cɛ lɔ́ tɛ́ɛ yénɔn, o bhóobhɛɛ o tɛ́wɛɛ fáa a man. ⁷Sɛliya kaamɔɔn ólu ní Falizɛn ŋólu tɛ́ɛ Ɛnza nakɔɔsila ní a yáa mɔɔn lɔ lákɛɛnya lɔnwɛɛnlilo ŋó lá, ké ii sɔ nzɔ́ɔ a lá. ⁸Wáa Ɛnza ndɛ́ɛ i míliya ó lɔ, o lɔ́, aa fɔ cɛ bhóofaaninman ó yɛ kó: «I wíi kɛ́ i lɔ mɔɔn ólu cɛ́man yánun.» Aa i wíi kɛ́ i lɔ. ⁹O kwɔ́, Ɛnza ŋé fɔ i yɛ́ kó: «Ní a manɲaankɛla, mínnɛɛn lé kákan kɛ kɛ́ lɔnwɛɛnlilo ŋo lá? Kɛ́ kóɲwaan kɛ́ lɔnwɛɛnlilo ŋó la bháa, wáman kɛ́ kóyoo ne kɛ́? Kɛ́ mɔɔn bwási bháa, wáman kɛ́ a hálaki?» ¹⁰Ɛnza ŋé i bɛ́ mánfɛɛ tó kɛ́ fɔ cɛ ó yɛ kó: «Í bhóo ó lɔ́sawa.» Cɛ ó a bhóo o lɔ́sawa, a bhóo o kɛ́ɛnya.

¹¹Falizɛn ŋólu mwɛ́nnɛn koyoongɛ, i tɛ́ɛ ɲɔɔn mánɲaankɛla kó ii sé kɛ́ mínnɛɛn lé kɛ́ Ɛnza nán.

Ɛnza ŋé kaamɔɔndhye ndá ni fyáa lɔ́tɔnmɔn

Matiyu 10.1-4; Maki 3.13-19

¹²Ó wáati kée ŋó lɔ́, Ɛnza ŋé táa tíi ó kúnnɔn kɛ́ Ala bháto. Aa si í ɲánla Ala bháto ó la. ¹³Kɛ́ɛn ó bhɔ́ mínngɛ, aa a yɛ kaamɔɔndhye ŋólu kíi, kɛ́ mɔɔn tá ni fyáa lɔ́tɔnmɔn i cɛ́man kɛ ólu kíi kó céladhye ŋólu: ¹⁴O kaamɔɔndhye ŋólu tɔ́ɔ ó mánfɛɛ: Simɔn, aa o mín ndɔ́ɔ la íkwɔ kó Piyɛli, óni a lɔ́ɔcɛ Andele, Zaki óni Yaya, Filipu, Batelemi, ¹⁵Matiyu, Tomasi, Alife dhyénjɛ Zaki, Tade, Simɔn Zelɔti6.15 Zelɔti tɔ́ɔ o kɔ́ɔ yáa nan kɛ́ lé kó a wɛɛ í wíi Lomɛn olu kanman., ¹⁶Zaki dhyénjɛ Zudasi óni Zudasi Sikaliyɔti mín ngáa Ɛnza ɲanva.

Ɛnza ŋé yaangalotɔ ólu lákɛɛnyala

Matiyu 4.23-25; Maki 3.7-11

¹⁷Ɛnza yíitɔ óni a yɛ́ kaamɔɔndhye ŋólu lé kɛ́ bhɔ́ tii ó ka, aa sé kɛ́ɛngbɛba lɔ́lɔ kɛ́ í lɔ yé. Yamanba tɛ́ɛ o ywáa ó lɔ́. A yɛ kaamɔɔndhye ŋólu tɛ́ɛ sháa i cɛ́man. Lɔ́lu tɛ́ bhɔ́la Yeluzalɛmu ní Zude mala ó bɛ́ lɔ́. Lɔ́lu tɛ́ɛ bhɔ́la kɔɔji lá ó sóbaba ólu lá, Tili óni Sidɔn. ¹⁸I tɛ́ wɛ́ɛ nan ké ii Ɛnza ɲɛ́n kóman ó lɔ́myɛn óni ké áa i lákɛɛnya. Mínnu tɔ́lɔyanin ndɛ́ɛ Lámansa ólu bhóo, ólu é kɛ́ɛnya. ¹⁹Yaman ó bɛ́ tɛ́ɛ ɲán ɲíinan a mán kɛ́ í túu Ɛnza nán, kɛ mansɔɔ sébhaaya lɔ́ tɛ́ɛ bhɔ́la a lɔ́ kɛ́ í bɛ́ lákɛɛnya.

Yɛ́ɛtii nisɔdhyaanin ɲé?

Matiyu 5.1-12

²⁰O wáati ó lɔ́, Ɛnza ŋé a yɛ kaamɔɔndhye ŋólu mánfɛɛ, kɛ́ a fɔ kó:

«Ale min núu faannda né, ale yeemanfanin ɲé,

kɛ mansɔɔ Ala yɛ́ mansaya ó ale tá lé.

²¹Kɔ́ɔn é ale mínnu lá sísan, ale yeemanfanin ɲé,

kɛ mansɔɔ ale yáa fá.

Ale min núu kásila sísan, ale nisɔdhyaanin ɲé,

kɛ mansɔɔ ale yáa yɛ́ɛkɛ.

²²Ni a ɲángbeya kɛ́ kɛ́ mɔɔn ólu lɔ́

ké íi i bá a lɔ́, kɛ́ a nɛɛn

óni kɛ́ a tɔ́ɔyoo nvɔ mɔɔn Dhyénjɛ ó kósɔn,

o wáati ó lɔ́, ale yeemanfanin ɲé.

²³Ni ó kɛ kɛ́ wáati mínnɔn,

aa í ɲáanli kɛ́ í gbángban nisɔdhyaa ó bhóo,

kɛ mansɔɔ bhaayeba é a yɛ́ sá ŋó lɔ

ale yeemanfanin ɲé.

I fá ólu tɛ́ɛ céla ólu tɔ́lɔla cé né.

²⁴Wáa bɔɔn o ale nanfootii ólu tá lé,

kɛ mansɔɔ ale wɛ́ɛ a yɛ́ heeyɔɔ ó sɔ́ɔ kɛ́ bhá.

²⁵Ale min núu lɔ́min kɛ́la kɛ́ fá sísan,

bɔɔn ó ale tá lé,

kɛ mansɔɔ kɔ́ɔn yáa álee myaan.

Ale min núu yɛ́ɛkɛla sísan,

bɔɔn ó ale tá lé,

kɛ mansɔɔ a ní ó yáa í lafin, a yáa kási kɛ́.

²⁶Ni mɔɔn bɛ́ é ale tɔ́ɔɲwaan fɔ́la,

bɔɔn ó ale tá lé,

kɛ mansɔɔ i fá ólu tɛ́ɛ céla fɔnɲanfɔ ólu bwóɲanla cé né.»

Án yúu ólu yɛ́ dhyáaɲɔɔnya ó

Matiyu 5.39-47

²⁷«Waa ale mín núu nɔ́myɛnnan, ní i fɔ́la a yɛ́ ngó a yúu ólu kó á dhyáa á yɛ́, kɛ́ kóɲwaan kɛ́ a tɔ́lɔbhaa ólu yɛ́. ²⁸Aa lwáau kɛ́ a dáanbhaa ólu yɛ́, áa Ala dɛ́li a tɔ́lɔbhaa olu yɛ. ²⁹Ní mɔɔn lɔ kɛ i tóo kée ŋó cé, ii i tɔ́ kée ŋó sii a yɛ́. Ní lɔ kɛ í yɛ́ déekeba ó myaan i lá, i kɛ́nan fɔ kó a kɛ́nan í yɛ́ deeke ó tá. ³⁰Ní mɔɔn ó mɔɔn kɛ́ fé nɔ́ kófɔ i yɛ́, ii a di mán. Ní mɔɔn lɔ kɛ́ í yɛ́ fé nɔ́ myaan i lá, i kɛ́nan a kó mánɲaankɛ a la. ³¹Álee fɛ́ ké mɔɔn tɔ ólu a kó min ngɛ́ a yɛ́, aa ó ɲɔ́ɔn ngɛ́ olu yɛ́.»

³²«Á kó a dí mínnu yɛ́, ní ó kée ŋólu kɛ dhyáa á yɛ́, ale káa tɔɔn mínnɛɛn lé sɔ́ɔ o lɔ́? Kɛ mansɔɔ, yuumutɔ ólu ŋé ó ɲɔ́ɔn ngɛ́la. ³³Mɔɔn min núu kóɲwaan kɛ́la a yɛ́, ní aa kóɲwaan kɛ́la o gbɛɛgbɛɛ o lé yɛ́, a káa tɔɔn mínnɛɛn sɔ́ɔ o lɔ? Kɛ mansɔɔ, yuumutɔ ólu é ó ɲɔ́ɔn ngɛ́la. ³⁴A yíi é mɔɔn mínnu ka kó i yáa a yɛ́ yúu ó saa, ní ale yúu dila ólu gbɛɛgbɛɛ o le mán, ale káa tɔɔn mínnɛɛn le sɔ́ɔ o lɔ? Kɛ mansɔɔ, yuumutɔ ólu ŋé yúu dila ɲɔ́ɔn mán kɛ́ í hákii tó a ɲɔ́ɔn nzɔ́ɔ kó lɔ́ kwɔla. ³⁵Waa, á yúu ólu a dhyáa á yɛ́ kɛ́ kóɲwaan kɛ́ i yɛ́. Áa yúu lá mɔɔn ólu lá, kɛ́ ɲán o kwɔ́. O lɔ, a yáa tɔɔnba sɔ́ɔ. Ale yáa kɛ́ Fé mbɛ kunndii ó dhyé ŋólu lé, kɛ mansɔɔ, aa kóɲwaan kɛ́la kóɲwaanlɔmɛɛ ólu ni mɔɔnyoo ŋólu yɛ́. ³⁶Áa hínnɛn mɔɔn ólu lá óyoo a Fá é hínnɛnla ɲán mín mán.»

Ale kɛ́nan ɲɔ́ɔn ndɔ́nɲɔɔn

Matiyu 7.1-5

³⁷«A kɛ́nan kíti tɛ́ɛ lɔ ka, o ɲan o man Ala táa kíti tɛ́ɛ ale ka. A kɛ́nan dɔ ólu yaayii, o ɲan o man Ala táa ale yaayii. Áa yafa dɔ ólu mán, o ɲan o man Ala yáa yafa álee mán. ³⁸Aa dɔ ólu sɔ, o ɲan o man Ala yáa álee sɔ. Í yáa mínnan mɛ́ɛbhɛɛ tá kɛ́ a tá ó swáan kɛ́ a díinndiin kɛ́ a yúuyuu kɛ́ a fá fɔ kɛ́ bwɔ́, kɛ ó yɛ́ɛman a yɛ́ fáanin ó jífa ó lɔ́. Kɛ mansɔɔ aa dɔ ólu tá ó swáan swáanninkɛfe mín nɔ́n, Ala káa a tá ó swáan o kée ŋó lé lɔ́.»

³⁹Ɛnza ŋé saanan lá i yɛ́ kó: «Fyóondɔ lɔ é sé kɛ́ fyóo ngbɛ́ɛ lɔ yɛ gbéle myáan an? I fyaa ó bɛ́ táa í bé jáan lɔ kɔɔnnɔn an? ⁴⁰Kaamɔɔndhye ŋo sí mán nvísaa a kaamɔɔn o le. Waa kaamɔɔndhye ŋóo kaamɔɔndhye ŋé kaa ŋó kɛ́ cɛ́ɛne, óo kɛ́la lé óyoo a kaamɔɔn ó.»

⁴¹«Tíkoo mín ŋé í bhádhye ŋó ɲán mán, mínnɛɛn lé kósɔn ii ó mánfɛɛ lá, kɛ́ɛ ké lɔ́ɔguun mín ŋé í tá ɲán ó mán, i tɛ́ ó yéla a? ⁴²I lo ŋé sé kɛ́ fɔ i bhádhye ŋó yɛ́ dí lé kó: ‹Bhádhye, i lɔ́ ké tíkoo mín ŋé í ɲán mán, ké ní o bhɔ́ a man. Kɛ́ɛ ké lɔɔguun mín ŋé í tá ó mán, i tɛ́ ó yéla.› Fyáangafo o, lɔ́ɔguun mín ŋé í tá ó mán, o bhɔ́ ótun. O lɔ, i yáa yéli kɛ́ cɛ́ɛne, kɛ́ tíkoo ó bhɔ́ i bhádhye ŋó ɲán ó mán.»

Yíi ó lɔnan a dhyé ŋé mán

Matiyu 7.16-20; 12.33-35

⁴³«Yíibhɛɛ súusuu tɛ́ dhyéɲoo ngɛ́la, yíiyoo nzúusuu tɛ́ dhyémɛɛ kɛ́la. ⁴⁴Yíi bhɛ́ɛ ó lɔnan a dhyé ŋó le mán. Tólodhye ŋó tɛ́ bhɔ́la ŋwɛ́ɛnnzu ŋó la, lɛ́zɛn ŋó tɛ́ bhɔ́la lɛ́ɛninɲii ó la. ⁴⁵Mɔɔnbhɛɛ ó fémɛɛ ni nanfoobhɛɛ lé lábhɔla a yóso o lɔ. Tó mɔɔnyoo ŋó féɲoo ni nanfooyoo né lábhɔla a yóso lɔ. Kɛ mansɔɔ mɔɔn yóso ó fánin ɲé fé ŋó mínnan, a lá ó óle fɔ́la.»

Bhónɔbhaa fyaa ó yɛ́ saanan ó

Matiyu 7.24-27

⁴⁶«Mínnɛɛn lé kósɔn aa ngíila kó Mantii ó, Mantii ó, waa ké née mín nvɔla, a tɛ́ ó kɛ́la?»

⁴⁷«Mɔɔn óo mɔɔn kɛ́nan né fɛ́ kɛ́ né yɛ́ kóman ó lɔ́myɛn kɛ́ a bháto, o bhɔ́nin ŋé mín nán, né yáa o fɔ a yɛ́. ⁴⁸O bhɔ́nin ɲé bhónɔbhaa lɔ lé lá mín ŋé lúukolo ó shɛ́n kɛ́ a láyii fɔ kɛ́ sé fáa ó mán, tó kɛ́ a yɛ́ bhó ŋó zúsii o ka. Bhá ó kɛ fá jí ó lá wáati mínnɔn, jí ó wée kɛ́ táa lá o bhó ŋó kɔɔ, waa a mán sé kɛ́ maanmaan, kɛ mansɔɔ cɛ ó a yɛ́ bhó ŋó lɔ cɛ́ɛne lé. ⁴⁹Waa mɔɔn mín ŋé né yɛ́ kóman ó lɔ́myɛnnan tó a tɛ́ a lá bhátola, o tíi ó bhɔ́nin ɲé bhónɔbhaa lɔ lé la mín ŋwɛ́ɛn a yɛ́ bhó ŋó lɔ́ lúukolo gbáannza o ka, a man a zúsii fáa ka. Sá ŋó nan, jí óo wée kɛ ló bhó ŋó zúkɔɔ, o ywáaninngee ŋó lɔ aa bé, a bénzeɲan óo yóoɲan lé.»

Swáasikunndii ó yɛ́ lánanya ó

Matiyu 8.5-13; Yaya 4.46-54

¹Ɛnza ŋé wɛ́ɛ kómanla yaman ó yɛ́ mínngɛ, aa táa Kapɛnamu só o kɔ́ɔnnɔn. ²Lomɛn swaasikunndii lɔ tɛ́ɛ yé, o yɛ́ bháalakɛdhye o tɛ́manngɛnnɛn, fɔ́ a tɛ́ɛfɛ kɛ́ sayakɛ. O bháalakɛdhye kó tɛ́ɛ dí a kunndii ó yɛ́ koyoongɛ. ³O cɛ oo Ɛnza ngó myɛ́n mínngɛ, aa Yawudhyaa ó cɛba lɔ́lu cé a man kɛ́ táa a dɛ́li kó aa nan a yɛ́ bháalakɛdhye ŋó lákɛɛnya. ⁴Ii Ɛnza yé mínngɛ, íi a dɛ́li koyoongɛ kó: «I kákan kɛ́ cɛ míin dhyɛman. ⁵Kɛ mansɔɔ án ɲɛ́n síya ó kó a dí a yɛ́. Ale lée í lɔ́ án ɲɛ́n sɛ́ɛbho ó lɔ ó bhóobhɔ ó bɛ́ lá.»

⁶O lɔ, Ɛnza ŋé táa ní ile. Ii sunɲan bhó ŋó la mínngɛ, swaasikunndii ó a táamanɲɔɔn lɔ́lu cé kɛ táa fɔ Ɛnza ɲɛ́n kó: «Kaamɔɔn, i kɛ́nan i yɛ́ɛ sɛɛ, né télenin ndɛ́ ké íi lo né yɛ́ bhó ŋó kɔɔnnɔn, né mánngan ni o le. ⁷O lé kósɔn, né gbú mán táa i sáala. Wáa kóman kée nvɔ, né yɛ́ bháalakɛdhye ŋó yáa kɛ́ɛnya. ⁸Kɛ mansɔɔ kunndii lɔ́lu né bhóo, né yɛ́ɛ yé swaasi lɔ́lu kunnan. Ni sé kɛ a fɔ kée ɲɛ́n kó: ‹Táa yánun›, aa táa. Kɛ́ fɔ a lɔ́gbɛɛ yɛ́ kó: ‹Nan yánun›, aa nan. Kɛ́ fɔ ɲɛ́n yɔ ŋó yɛ kó: ‹Míin ngɛ́ tá›, tó aa ó kɛ.»

⁹Ɛnza ŋé ó kóman ó myɛ́n mínngɛ, aa káwakoya cɛ ó kósɔn. Aa í ɲán yɛ́ɛman kɛ́ fɔ a táamanɲɔɔn ólu yɛ kó: «Tó ní fɔ a yɛ ngó yáanin Izalayɛli mɔɔn olu lɔ, né mán mɔɔn yé bhá mín nanin ŋé né la kɛ tínmin cɛ míin nga.»

¹⁰Swáasikunndii o yɛ́ céladhye ŋólu í kwɔ́sɛɛ lúman mínngɛ, ii táa sɔ́ɔ ké bháalakɛdhye ŋó wɛ́ɛ kɛ́ɛnya.

Ɛnza ŋé finɲanmuso lɔ́ dhyé nzu lakuunnan

¹¹O kwɔ, Ɛnza ŋé táa só lɔ lá mín ndɔ́ɔ kó Nayiini. A yɛ́ kaamɔɔndhye ŋólu ni yamanba tɛ́ɛ táa ní ale. ¹²Ii sunɲan só ó lona ó lá mínngɛ, íi mɔɔn lɔ́lu kunmyɛ i tɛ́ɛ táa sú lɔ lé kábulu só o lá. Finɲanmuso lɔ lé dhyénjɛ kéengboto tɛ́ɛ ó lé. Yamanba tɛ́ɛ táala ikwɔ. ¹³Mantii ó muso ó yé mínngɛ, a hínnɛn é lo a lɔ koyoongɛ. Aa fɔ a yɛ́ kó i kɛ́nan kási kɛ́. ¹⁴O kwɔ, Ɛnza ŋé i mangbaa kɛ́ í bhóo túu gbasa o la. Su ó tábhaa ólu i lɔ. Ɛnza ŋé fɔ kó: «Káweenin ŋó í wíi.» ¹⁵Su ó kúun, aa i wíi kɛ́ i síi aa a lámyaan kɛ́ kóman. Ɛnza ŋé dhyé ŋó dí a wóobhaa man.

¹⁶Mɔɔn olu bɛ́ɛ sháan, i tɛ́ɛ Ala tanola kɛ fɔ kó: «Célaba lɔ wɛ́ɛ wíi án njɛ́man, Ala wɛ́ɛ sɔ́n kɛ́ a yɛ́ yamaan ó lɔdhyɛman.»

¹⁷O kóman ó búubɛɛ Zude fa ŋó bɛ́ lɔ, óni a lamiin ŋó bɛ́ lɔ.

Yaya Bátizelikɛbhaa yɛ́ ɲáankɛli ó

Matiyu 11.2-19

¹⁸Yaya Bátizelikɛbhaa yɛ kaamɔɔndhye ŋólu Ɛnza ɲɛ́n kókɛnin ŋó bɛ́ lákɛɛ a yɛ. O lɔ, Yaya Bátizelikɛbhaa é a yɛ́ kaamɔɔndhye ŋólu mɔɔn fyáa kíi ¹⁹kɛ́ í cé Mantii ó mánko íi táa a mánɲaankɛ kó: «Mɔɔn mín ngákan kɛ́nan, íle lée o le á? Wáman án ngákan kɛ́ mɔɔn gbɛ́ɛ le mankɔɔn?»

²⁰Íi sé Ɛnza mán mínngɛ, ii fɔ a yɛ́ kó: «Yaya Bátizelikɛbhaa é án myáashaa kó án ní nan i mánɲaankɛ kó mɔɔn mín ngákan kɛ́nan, íle lée o le á? Wáman án ngákan kɛ́ mɔɔn gbɛ́ɛ le mankɔɔn?» ²¹O wáati ó yɛ́ɛ lɔ, Ɛnza ŋé yaangalotɔ shɛ́ɛman nákɛɛnya, kɛ́ Lámansa ólu gbɛ́ kɛ́ bhɔ́ mɔɔn ólu fɛ, kɛ́ fyóondɔ shɛ́ɛman ɲán láka. ²²O kwɔ, Ɛnza ŋé i yawi kó: «Álee wɛ́ɛ mín ɲé, óni álee wɛ́ɛ mín myɛ́n, aa táa o lákɛɛ Yaya Bátizelikɛbhaa yɛ́, kó fyóondɔ ólu yéli kɛ́la, kuugba ólu táamanla, kwáantɔ ólu bɛ́ wɛ́ɛ sɛ́nnɛnya, tóogbee ŋólu myɛnnin kɛ́la, su ólu kúunnan, sanmankanmɛɛ ó í lásela faannda ŋólu mán. ²³Ni ne man kɛ mɔɔn mín ɲɛ́n lánanya ó cáan o sɔ́ɔbu le, o tíi ó yeemanfanin ɲé.»

Ɛnza ŋé Yaya kɛ́ɲan ó fɔ́la

Matiyu 11.7-11

²⁴Yaya bátizelikɛbhaa yɛ́ céladhye ŋólu táanin ŋó kwɔ, Ɛnza ŋé lámyaan kɛ́ kóman yaman o yɛ Yaya tá sháa o fɛ́ kó: «Álee tɛ́ wɛ́ɛ táa mínnɛɛn le mánfɛɛla dhyɛ́ ó kɔɔnnɔn? Fwɛ́ɛn ó támuu mín námanman á? ²⁵Áa táa mínnɛɛn le yé tɔ́ɔ lɔ wɛ́? Cɛ mánsiinin féndiiya faani lɔ́lɔ á? Wáa mín núu féndiiya fáani ólu lónan kɛ́ faanmanlɔmin o kɛ́, ólu kɛ́la mansabho ŋólu le la. ²⁶Áa táa mínnɛɛn lé yé tɔ́ɔ lɔ wɛ́? Céla á? Tinɲan o lée wé; a yɛ́ɛ a bwó céla le! ²⁷Yaya lée céla óle mín ngó é fɔ Kitabu ó lɔ. Ala é fɔ kó:

A mánfɛɛ, ɲáan ɲɛ́n céladhye ŋó cé í ɲɛn,

a yáa i yɛ́ sháa ó lɔ́bhyɛ.»

²⁸Ní fɔ́la a yɛ́ ngó mɔɔn sí mán wóo dínɲan lɔ míin kɛ́ mɔɔnba le kɛ́ tínmin Yaya Bátizelikɛbhaa ka. Wáa Ala yɛ́ mansaya ó lɔ, mɔɔn mín ŋan lɔ́ɔ i bɛ́ le, ó tíi ó á bwó Yaya le.

Yaya ni Ɛnza ngɛ́ ɲán ó

Matiyu 11.16-19

²⁹«Mɔɔn mínnuu Yaya lɔ́myɛn, yáanin nísɔɔnmyaanbhaa ólu, ólu bɛ́ɛ a lɔ ŋóo Ala télenin ɲé. O lé kósɔn íi sɔ́n tó Yaya é í bátize. ³⁰Wáa Falizɛn ŋólu ni sɛliya kaamɔɔn ólu mán sɔ́n Ala yɛ kó látɛɛnin ŋólu mán. O lɔ, í mán sɔ́n ké Yaya a i bátize.»

³¹Ɛnza ŋé fɔ íkwɔ kó: «Ó lɔ ní sé kɛ bímɔɔn ólu lá yɛ́ɛtii mán? I bhɔ́nin ɲé yɛ́ɛtii la? ³²I bhɔ́nin ɲé dhyémuu léelu la mínnu síinin ɲé bháa lɔ kɛ́ í kan nánbhɔ ɲɔɔn mán kó: ‹Án wɛɛ búu o fɔ a yɛ, wáa a mán lɔ ngɛ́. Án ní saan kási kɛ́, a mán kási kɛ́.› ³³Kɛ mansɔɔ, Yaya Bátizelikɛbhaa é nan, a tɛ tɛ́ lɔ́min kɛ́la, a tɛ tɛ́ lɛ́zɛnnji minnan. Álee kó Lámansayoo ŋé a fɛ́. ³⁴Mɔɔn Dhyénjɛ óo nan, aa lɔ́min kɛ́la kɛ́ mínnin kɛ́, a kó: ‹Cɛ miin ŋé lɔ́minkɛbhaa ni dɔlɔtɔ le lé. Nísɔɔnmyaanbhaa ólu ni yuumukɛbhaa ólu táamanɲɔɔn lée ale.› ³⁵Wáa hákiitiiya ó lɔnan a dhyé ŋó bɛ́ lé fɛ́.»

Muso yuumutɔ ó yɛ kaamɛɛ ó

³⁶Falizɛn nɔ́ é Ɛnza ngíi kɛ táa lɔ́minkɛ ni ale. Ɛnza ŋé táa o yɛ bhó ŋó la kɛ́ i síi sunman ŋó mán. ³⁷Muso yuumutɔ lɔ tɛ́ɛ o só o la, óo myɛ́n mínngɛ kó Ɛnza ŋé lɔ́min kɛ́ Falizɛn ŋó bhóo lúman, óo nán ni bháanin ngúugbɛɛ nɔ le mín nálaanin ndɛ́ɛ Alibatili o la. O fánin ndɛ́ɛ latikɔlɔ swáandhyaanin nan. ³⁸Aa tó Ɛnza ngwɔ́man kɛ́ i la a se ŋó kɔɔ kɛ kási kɛ́, fɔ kɛ Ɛnza nzé ŋó láɲiin a ɲánji ó la. O kwɔ aa Ɛnza nzé ŋó jɔsi ní a kúnzhe óle, óni kɛ a susu, tó kɛ latikɔlɔ swáandhyaanin ŋó bwɔ́ a ka. ³⁹Falizɛn min ndɛ́ wɛ́ɛ Ɛnza ngíi lɔ́min kɛ́ ó la, óo o yé mínngɛ, aa fɔ́ i kɔɔnnɔn kó: «Ni cɛ míin ndɛ́ɛ kɛ́ céla le, a tɛ́ɛ nán a lɔ ŋóo muso mín ŋé í túula a lá nín, kó yuumutɔ lée o le.»

⁴⁰Ɛnza ŋé fɔ a yɛ kó: «Simɔn, kóman é nvɛ́ kɛ fɔ i yɛ.»

Simɔn é a yawi kó: «Kaamɔɔn, a fɔ.»

⁴¹Ɛnza ngó: «Cɛ lɔ́ yɛ yúu tɛ́ɛ mɔɔn fyaa la. Kée ŋó ta yúu ó tɛ́ɛ wɛ́ɛgbannan déniye kɛnmɛn lóo le lé, a tɔ́ kée ŋó tá ó tɛ́ɛ wɛ́ɛgbannan déniye bíloolu le lé. ⁴²I fyaa sí mán sé kɛ i yɛ yúu ó sala mínngɛ, cɛ o kó: ‹Né wɛ́ɛ yafa ŋwɛ́ɛn a yɛ yúu o lábe.› » Ɛnza ŋé Simɔn manɲaankɛ kó: «Ó cɛ ó kó káa dhyáa yuutii o fyaa mínnɛɛn le yɛ kɛ tínmin?»

⁴³Simɔn é a yawi kó: «Né tá miliya ó lɔ, mín ndá yúu tɛ́ɛ sháa.»

Ɛnza ngó: «I wɛ́ɛ tinɲan fɔ.» ⁴⁴O kwɔ, Ɛnza ŋé i ɲán yɛ́ɛman muso o manshaa fɛ́ kɛ fɔ Simɔn yɛ kó: «I ɲán é muso miin nan kɛ́ɛ? Née lo í yɛ bhó ŋó la, í mán semankwoji dí né mán. Wáa ale wɛ́ɛ né se ŋó kwó ní a ɲánji óle kɛ a jɔsi a kúnzhe o la. ⁴⁵I mán né twáa kɛ i fínin né mán, wáa ale, kɛ́ tá ne lo ŋó mán ya, a mán né se ŋó susu o lábhyaa. ⁴⁶I mán túu bwɔ́ né kúnnɔn, wáa ale wɛ́ɛ túu swáandhyaanin bwɔ́ né se ŋó ka. ⁴⁷O kósɔn, ní fɔ́la i yɛ ngó, a yɛ yúumu óni a sháaya o bɛ́ o bɛ́ wɛ́ɛ yafa a mán, kɛ mansɔɔ a yɛ dhyáaɲɔɔnya o á bwó. Ní yúumu dɔ́ɔnin ngɛ́ yafa mɔɔn mín mán, dhyáaɲɔɔnya dɔ́ɔnin ne káa kɛ́ ó tíi ó yóso ó lɔ.»

⁴⁸O kwɔ́, Ɛnza ŋé a fɔ muso o yɛ kó: «Í yɛ yúumu ólu wɛ́ɛ yafa i mán.»

⁴⁹Ɛnza ni mínnu tɛ́ɛ lɔ́minkɛ ó la ɲɔ́ɔn nvɛ́, ólu lamyaan kɛ a fɔ i yɛ́ɛ kɔɔnnɔn kó: «Miin ŋé yɛ́ɛtii le, fɔ aa yúumu ólu yafala mɔɔn mán?»

⁵⁰Wáa Ɛnza ŋé a fɔ muso o yɛ íkwɔ kó: «I wɛ́ɛ kísi i yɛ lánanya o kósɔn, táa hɛ́lɛ lɔ́.»

Muso mínnu tɛ́ɛ Ɛnza dhyɛmanla

¹O kwɔ, Ɛnza ndɛ́ɛ yáala lá sóba óni só dhyénin ŋólu la kɛ́ lakawanin kɛ́, kɛ́ Ala yɛ́ mansaya ó sanmankanmɛɛ o láse. A yɛ́ kaamɔɔndhye ndá ni fyaa ó tɛ́ɛ ni a le, ²óni muso láman láman, Ɛnza ndɛ́ wɛ́ɛ Lámansa gbɛ kɛ́ bhɔ́ mínnu fɛ, kɛ́ lɔ́lu kɛ́ɛnya. Olu tɔ́ɔ ó lée nin: Mwɛnyamu Magidalaka, Ɛnza ndɛ́ wɛ́ɛ Lámansayoo wóonvyaa gbɛ́ kɛ́ bhɔ́ min nvɛ́, ³óni Zaani min ŋé Elɔdi yɛ́ nanfoo ó kúnnansiibhaa Shuza muso le, óni Suzani, óni muso gbɛ́ɛlu, mínnu tɛ́ɛ Ɛnza ni a yɛ́ kaamɔɔndhye ŋólu dhyɛmanla ní í bhóofe ŋólu lé.

Sɛɛnkɛbhaa o yɛ saanan ó

Matiyu 13.1-9; Maki 4.1-9

⁴Yaman é bhɔ́ só ólu bɛ́ lá kɛ́ nán í mínnin Ɛnza nán. Aa saanan míin ná kó:

⁵«Sɛɛnkɛbhaa o bhɔ́ kɛ́ táa a yɛ́ sí ó fíi a bhóo sɛɛn man. Kɛ́ tó sí fíi ó la, a koo ó lɔ́lu táa bé sháa ó lafɛ. Tínminmaa ólu o dɔ́, tó sámankɔɔn ólu í lakuun. ⁶Á fán nɔ́lu bé fáa ó ka. Olu i fɛ́ɛ mínngɛ, íi fáa kɛ mansɔɔ swáan tɛ tɛ́ i kɔɔ. ⁷A lɔ́lu é táa bé ŋwɛ́ɛn ŋólu cɛ́man, ólu i fɛ́ɛ, óni ŋwɛ́ɛn ŋó wili ɲɔɔn nvɛ́, ŋwɛ́ɛn ŋólu í sɔ́ɔsii olu ka. ⁸A lɔ gbɛ́ɛlu táa bé lúu dhyáanin ŋó ka. Olu i fɛ́ɛ kɛ́ wili kɛ́ dhyé nzhɛ́ɛman ngɛ́. Ólu í ɲɔɔn ngɛnmɛn kɛnmɛn sɔɔ.»

O kóman ó fɔnin ngwɔ, Ɛnza ŋé gbáa kó: «Tóo é min ngúnman kɛ́ myɛnnin kɛ́, o á myɛnnin kɛ.»

Mínnɛɛn le kósɔn Ɛnza ŋé saanan lá lá?

Matiyu 13.10-13; Maki 4.10-12

⁹Ɛnza ŋé saanan min ná, a yɛ́ kaamɔɔndhye ŋólu a manɲaankɛ o kɔɔ ó mán. ¹⁰Aa i yawi kó: «Ala yɛ́ mansaya ó gbondo ó lɔninya ó wɛ́ɛ dí ále léelu man. Wáa mɔɔn tɔ́ ólu tá o fɔ í yɛ́ saanan bhóo le man, kó óo kó e kɛ́ ke íi mánfɛɛli kɛ́ wáa ke i kɛ́nan fósi yé, ké íi myɛnnin kɛ́ wáa ke i kɛ́nan bhɔ fósi ɲánle.»

Ɛnza ŋé sɛɛnkɛbhaa o yɛ saanan ó kɔɔ o fɔ́la

Matiyu 13.18-23; Maki 4.13-20

¹¹«Ni saanan min na, o kɔɔ ó lée nín: Ala saaninkan ŋó lée sí o lé. ¹²Sháa ó lafɛ láa óo mɔɔn lɔ́ léelu lé mín núu Ala sáaninkan ŋo myɛ́nnan, wáa Sɔtaannan é nan o bhɔ́ i yóso lɔ, kó óo kó é kɛ́ ke i kɛ́nan lá a lá kɛ́ kísi. ¹³Sí mín núu bé gbófaa ywáa o lɔ, óo mɔɔn lɔ́ léelu lé, ní ólu kɛ́ ó kóman ó myɛ́n, íi sɔ́n a mán ni nisɔdhyaa le. Wáa Ala saaninkan ŋó díin gbáannin ndɛ́ kɛ́la o tíi ólu yóso o lɔ, íi lá lá o kóman ó la wáati dɔ́ɔnin ngɔ́ɔnnɔn, ní lɔ́swaannin ó kɛ́nan wáati min nɔn, íi i íkwɔ lo. ¹⁴Sí míin bé ŋwɛ́ɛn ŋólu cɛ́man, óo mɔɔn lɔ́ léelu lé, mínnu wɛɛ Ala saaninkan ŋó myɛ́n, hánminnanngo ólu, ní nanfoo kó ólu, ní dínɲankɛdhyaa óo o kóman ó gbɛ́nnɛn fɔ́ i tɛ dhyé ngɛ́. ¹⁵Sí mín núu bé Lúudhyaanin ŋó ka óo mɔɔn lɔ́ léelu lé, mín núu Ala saaninkan ŋó myɛ́nnan, íi a myaanla ni yósobhɛɛ lé kɛ́ í lɔ́ja tó kɛ́ dhyé ngɛ.»

Laman ŋó tá sáanan ó

Maki 4.21-25

¹⁶Ɛnza ŋé fɔ íkwɔ kó: «Mɔɔn sí tɛ́ laman ŋó lamaannan kɛ́ a bhyáa pála ŋó kɔ́ɔ, wáman láfe ŋó kɔ́ɔ. Wáa aa síilaa lamannziife ne ka ké mɔɔn mínnu kɛ kɛ́ lónan bhó ŋó kɔɔnnɔn, olu a yéli kɛ́.»

¹⁷«Kɛ mansɔɔ fénoonaankɛnin nzí tɛ́ yé mín ndáa yé. Gbondo sí tɛ́ yé mín ndáa bhɔ́ kɛ́ɛnman.»

¹⁸«Áa a yɛ́ myɛnnin kɛ́ɲan ó lákɔɔsi, kɛ mansɔɔ aa céne, lɔ́ kɛ́ kɛ́ mɔɔn mín móo, lɔ yáa bhyáa o tíi ó tá ó ka; Waa fé ndɛ́ mín móo, yáanin a í milila kó míin a bhóo, o yáa bwási a lá.»

Ɛnza ŋwóobhaa ní a bhádhye ŋólu

Matiyu 12.46-50; Maki 3.31-35

¹⁹Ɛnza ndɛ́ɛ ywáa min nɔn, a wóobhaa ní a lɔ́ɔcɛ ólu nan. Wáa i tɛ tɛ́ sé kɛ́ í mángbaa a lá yaman ó kósɔn, ²⁰lɔ é fɔ a yɛ kó: «Í wóobhaa ní í lɔ́ɔcɛ ólu lɔ́nin ɲé kɛ́ɛnman íi fɛ́ kɛ́ í yé.»

²¹Wáa aa i yawi kó: «Mɔɔn mínnu é i tóo manlɔla Ala saaninkan ŋó lɔ kɛ́ a sháa ó táaman, o lée lúu né wóobhaa óni nɔ́ɔcɛ lú lé.»

Ɛnza ŋé fwɛ́ɛnba ó lalɔla

Matiyu 8.23-27; Maki 4.35-41

²²Ló nɔ́ la, Ɛnza ŋé ló kúun ŋó kɔɔnnɔn ní a yɛ́ kaamɔɔndhye ŋólu le. Aa fɔ i yɛ kó: «Án ndáa bhá ó kwɔ́man.» ²³Kɛ́ i tó bhá ó cɛ́man kúunnanbwee ó la, Ɛnza ŋé sunnɔɔnkɛ. Fwɛ́ɛnba lɔ é bhyáa, fɔ kúun ŋó tɛ́ɛ fɛ́ kɛ́ fá jí ó la. Tɔnin njɛ́lɛlɛ tɔnin njóun ké íi tó ji ó lɔ. ²⁴O lɔ, íi i mangbaa Ɛnza nan kɛ́ a lá kúun kɛ́ fɔ a yɛ́ kó: «Kaamɔɔn, kaamɔɔn, án ngáa fáa.»

Ɛnza ŋé kúun kɛ́ jámanngɛ fwɛ́ɛn óni jí ó kunnan. Fwɛ́ɛn ó i lɔ́, jí óo í mánla, ywáa ó í mánla. ²⁵O kwɔ, Ɛnza ŋé fɔ a yɛ́ kaamɔɔndhye ŋólu yɛ kó: «A yɛ́ lánanya óo mín?»

Kaamɔɔndhye ŋólu káwakoya, fɔ sháanɲan é lo i yóso lɔ tó í tɛ́ɛ ɲɔ́ɔn mánɲaankɛla Ɛnza ndá fa ŋo fɛ kó: «Cɛ míin ŋé yɛ́ɛtii le? Yáanin fwɛ́ɛn óni bháji óo a bwóɲanla?»

Ɛnza ŋé Lámansatɔ lɔ́ lákɛɛnyala

Matiyu 8.28-34; Maki 5.1-20

²⁶Ɛnza ní a yɛ́ kaamɔɔndhye ŋólu sé Zelaza mala ó lɔ, bhá ó ɲán dɔ́ o mán o min ŋé Galile mala ó ɲán ó lɔ. ²⁷Ɛnza ŋé í yíi kɛ́ bhɔ́ kúun ó kɔɔnnɔn kɛ í bhyáa lúu mán tɛ́nmɛn! Cɛ lɔ́ tɛ́ɛ o só ó lá, oo nán a kunmyɛ. Lámansayoo néelu tɛ́ɛ o cɛ ó fɛ́. Kabiini wáatija, a tɛ tɛ́ faani lónan bhée. A tɛ tɛ́ síla bhó ngɔɔnnɔn bhée fɔ kábulu só ó la. ²⁸Cɛ o Ɛnza ɲé mínngɛ, a gbáa fáanla kɛ́ táa i kúnmɛɛn nɔkɛɛ Ɛnza ngɔɔ kɛ́ fɔ kó: «Mínnɛɛn lée án njɛ, Ala kɔɔtaninmba o dhyénjɛ Ɛnza? Née i dɛ́lila, í kɛ́nan né tɔ́lɔ.» ²⁹Cɛ óo ó fɔ lé, kɛ mansɔɔ Ɛnza ndɛ́ɛ a fɔ́la kó Lámansa o á bhɔ́ a fɛ. Lámansa ó tɛ́ɛ a tɔ́lɔla wáati shɛ́ɛman, mɔɔn ólu tɛ́ɛ a bhóo óni a se ŋólu silila ní nɛɛnyɔlɔkɔ óle lé kɛ́ a bhyáa. Wáa a tɛ́ɛ tóla kɛ́ ólu tɛ́ɛtɛɛ, Lámansa ó tɛ́ɛ táala ní ale wúla ó kɔɔnnɔn.

³⁰O kwɔ, Ɛnza ŋé a mánɲaankɛ kó: «Í tɔ́ɔ díi?»

Lámansa ó Ɛnza ɲawi kó: «Ndɔ́ɔ kó yaman.» Aa ó fɔ lé kɛ mansɔɔ Lámansa shɛ́ɛman né tɛ́ɛ a fɛ. ³¹Lámansa ólu é Ɛnza dɛ́li kó a kɛ́nan i gbɛ́ kɛ́ táa ile ɲangbanywaa lɔ.

³²O wáati ó lɔ gbóyoonin nzɛ́ɛ lɔ́lu tɛ́ɛ lɔ́minkɛla tii ó mán. Lámansa ólu Ɛnza dɛ́li kó aa sɔ́n ké íi táa lo ó gbóyoonin ŋólu lɔ. Ɛnza ŋé sɔ́n. ³³Lámansayoo ŋólu bhɔ́ o lé lɔ cɛ ó fɛ́, kɛ táa lo gbóyoonin ŋólu lɔ. Gbóyoonin nzɛ́ɛ ó í cɛ kɛ́ yɛ́ɛ tíi ó ka kɛ́ táa í bé bháji ó lɔ kɛ́ fáa.

³⁴Gbóyoonin ngunnansiibhaa olu bɛ́ɛ bwée kɛ táa o kó ó búubhɛɛ só o kɔɔnnɔn, óni kanman ŋolu la. ³⁵Kó míin kɛ́, mɔɔn ólu bhɔ́ kɛ́ táa ó mánfɛɛ. Ii sé Ɛnza mán. Ii a yé kó Lámansa ó wɛ́ɛ bhɔ́ cɛ ó fɛ, a síinin ŋé Ɛnza nzé ngɔ́ɔ, fáani é a kannan, a wɛ́ɛ í ɲánmanlɔ. Ii sháan gbútuukɛ. ³⁶O kó ólu kɛ́ mɔɔn mínnu ɲánla, lámansayoo ŋólu bhɔ́ ɲanmin mán tó aa bwási í tɛ́ɛ o ɲánfɔla mɔɔn tɔ́ ólu yɛ. ³⁷O lɔ, Zelazaka ólu Ɛnza dɛ́li kó aa bhɔ́ í yɛ́ mala ó lɔ, kɛ mansɔɔ a sháanɲan ó wɛ́ɛ bwóɲan i mán. Ɛnza ŋé lo kúun ŋó kɔɔnnɔn tó kɛ táa, ³⁸Lámansayoo ŋolu bhɔ́ cɛ min nvɛ́, óo Ɛnza ndɛ́li kó ní aa sé kɛ́ táa ni ale.

Wáa Ɛnza ŋé a yawi kó: ³⁹«Í kwɔ́sɛɛ kɛ́ táa i bhóo lúman, Ala wɛ́ɛ kóba mínngɛ i yɛ, ii ó bɛ́ lɔ́sɔɔ.»

Ɛnza ŋé kó óo kó kɛ́ a yɛ, aa táa o lɔsɔɔ só ó kɔɔnnɔn.

Ɛnza ŋé muso lɔ́ lákɛɛnya kɛ́ sínngbiinin nɔ sú lákuun

Matiyu 9.18-26; Maki 5.21-43

⁴⁰Ɛnza ŋé í kwɔ́sɛɛ kɛ́ bhɔ́ bhá ó kwɔ́man wáati min nɔn, yamanba é a kunmyɛ ni nisɔdhyaa le, kɛ mansɔɔ i bɛ́ tɛ́ɛ a mankɔɔnnan. ⁴¹O wáati ó lɔ, cɛ lɔ́ é nan min ndɔ́ɔ kó Zayilusi. Sɛ́ɛbho ó kunndii lé tɛ́ɛ ále. Aa táa i kúnmɛɛn nɔkɛɛ Ɛnza ngɔɔ, kɛ́ a dɛ́li kó aa a mankoto ké áa táa a bhóo lúman, ⁴²kɛ mansɔɔ a dhyémuso mánngɛnnɛn, kó aa fɛ́ kɛ́ sayakɛ, kó ó dhyémuso kée ŋó lée a dhyé ne. Dhyé ŋó sísa ó tɛ́ɛ sanɲin tá ni fyáa si bhɔ́la.

Ɛnza ndáatɔ ó o ywáa ó lɔ, mɔɔn ólu tɛ́ɛ a díinndiinnan fɔ kɛ́ a gbɛ́nnɛn. ⁴³O wáati ó lɔ, muso lɔ tɛ́ɛ i cɛ́man, mín ɲɛ́n káakwo tɛ́wɛɛ kɛ́ a la yangalo lé sanɲin tá ni fyáa kɔ́ɔnnɔn. A bhóota ŋó bɛ́ wɛ́ɛ wɛɛ, kɛ mansɔɔ a tɛ́wɛɛ táa bhwɛ́ɛkɛbhaa shɛ́ɛman nvɛ́ yé. Wáa a yɛ́ yangalo ó mán kɛ́ɛnya. ⁴⁴Aa í mángbaa Ɛnza nán a kwɔ́man kɛ í bhóo túu o yɛ́ deeke ó lágboo o lá. O ywáanin ŋó lɔ, a yɛ́ káakwo yangalo óo í lɔ́. ⁴⁵Ɛnza ŋé ɲaankɛli kɛ́ kó: «Yɛ́ne wɛɛ i bhóo túunan?»

Mɔɔn sí man sɔ́ɔ kɛ́ fɔ kó ale. Piyɛli é kóman ó tá kɛ́ fɔ kó: «Kaamɔɔn, i ɲán é a lá kó mɔɔn ólu í díinndiinnan fɔ́ kɛ í gbɛ́nnɛn.»

⁴⁶Wáa Ɛnza ngó: «Mɔɔn lɔ wɛ́ɛ í bhóo túunan, kɛ mansɔɔ né wɛ́ɛ a lɔgbɛ kó faan lɔ́ wɛ́ɛ bhɔ́ ne lɔ.» ⁴⁷Muso o a lɔ kó ó kó ó tɛ́ sé kɛ́ í lóonaankɛ mínngɛ, a yaayaatɔ ó táa i kúnmɛɛn nɔkɛɛ Ɛnza nzé ngɔɔ. Aa í túu a lá kún mínnan, óni a kɛ́ɛnya ywáaninngee nɔn ɲán mín mán, aa ó bɛ́ lɔsɔɔ Ɛnza ɲɛ́n mɔɔn ólu ɲánla. ⁴⁸Ɛnza ŋé fɔ a yɛ́ kó: «Nyémuso, i yɛ́ lánanya ó wɛ́ɛ í lákɛɛnya. Táa hɛ́lɛ lɔ́.»

⁴⁹Kɛ Ɛnza ndo ó kóman ó la, mɔɔn lɔ é bhɔ́ sɛ́ɛbho kunndii Zayilusi yɛ́ lú ó mán kɛ́nan fɔ a yɛ́ kó: «I dhyémuso wɛ́ɛ sayakɛ, í kɛ́nan kaamɔɔn ó tɔ́lɔ bhée.»

⁵⁰Ɛnza ŋé ó kóman ó myɛ́n mínngɛ, aa fɔ Zayilusi yɛ́ kó: «Í kɛ́nan sháan, lá Ala la dɔlɔun, i dhyémuso yáa kísi.»

⁵¹Ii sé Zayilusi yɛ́ lú ó man wáati min nɔn, Ɛnza mán sɔ́n ké mɔɔn lɔ a lo ni ále bhó ŋó kɔɔnnɔn fɔ Piyɛli, óni Yaya, óni Zaki, óni dhyémuso ó fá óni a wóobhaa dɔlɔun. ⁵²Mɔɔn bɛ́ tɛ́ɛ kásila kɛ́ gbáa sínngbiinin ŋó sayako ó lɔ. Ɛnza ŋé a fɔ i yɛ kó: «A kɛ́nan kásikɛ, dhyémuso ó sayakɛnin ndɛ́, aa sunnɔɔn le lɔ.»

⁵³Mɔɔn ólu a lɔ kó sínngbiinin ŋó wɛ́ɛ sayakɛ tinɲan in ne mínngɛ, ii yɛ́ɛbhɔ Ɛnza nɔn. ⁵⁴Wáa aa lo kɛ́ dhyémuso ó myáan a bhóo mán kɛ́ fɔ a yɛ kó: «Nyé, í wíi.» ⁵⁵O ywáaninngee ŋo lɔ, dhyé ŋó ní óo i kwɔ́sɛɛ a man, aa i wíi. Ɛnza ŋé fɔ́ko ii lɔ́min di a man. ⁵⁶Dhyé ŋó wóobhaa ólu káwakoya koyoongɛ. Wáa Ɛnza ŋé fɔ i yɛ kɛ́ a mangbɛya ko i kɛ́nan o kó ó ɲánfɔ mɔɔn sí yɛ.

Ɛnza ŋé a yɛ́ kaamɔɔndhye ŋólu céla

Matiyu 10.5-15; Maki 6.7-13

¹Ɛnza ŋé a yɛ kaamɔɔndhye ndá ni fyáa ólu kíi kɛ́ sébhaaya ni fáan dí í man kɛ́ lámansayoo ŋólu gbɛ́, óni kɛ́ yaangalotɔ ólu lákɛɛnya. ²O kwɔ́, aa i cé kɛ́ táa Ala yɛ́ mansaya kó o fɔ, kɛ́ yaangalotɔ ólu lákɛɛnya. ³Aa fɔ i yɛ kó: «Á kɛ́nan fósi tá, gbéle, wáman táamanlataalwee, wáman lɔ́min, wáman wɛ́ɛ, á kɛ́nan o sí tá. Á kɛ́nan deeke fyáa tá. ⁴Ní a kɛ yɛ́tiiya sɔ́ɔ bhó ŋóo bhó nan, aa tó yénɔn fɔ a bhɔ́waati ó kɛ́ sé ó só ó kɔɔnnɔn. ⁵Ní mɔɔn man í ɲán sii a kɔ́ɔ, aa bhɔ́ yénɔn, áa a sé ó lagbasi kɛ a sénan gbángba ŋó tó yénɔn. O yáa kɛ́ a sɛ́ɛya le.» ⁶Kaamɔɔndhye ŋólu táa í yáala la só ólu bɛ́ la kɛ́ Ala yɛ́ sanmankanmɛɛ o láse óni kɛ́ yaangalotɔ ólu lákɛɛnya o ywáa ó bɛ́ lɔ.

Elɔdi hákii ó wɛ́ɛ ɲáanmin

Matiyu 14.1-2; Maki 6.14-29

⁷Elɔdi min ndɛ́ɛ fáan lá Galile mála ó lɔ, kó mínnu tínmin aa ólu myɛ́n mínngɛ, a hákii óo ɲáanmin, kɛ mansɔɔ lɔ́lu tɛ́ɛ fɔ́la kó Yaya Bátizelikɛbhaa le wɛ́ɛ kúun kɛ bhɔ́ su ólu cɛ́man. ⁸Lɔ́lu kó céla Eli le wɛ́ɛ í kwɔ́sɛɛ kɛ nan. Lɔ gbɛ́ɛlu kó céla kɔ́ɔ ólu lɔ́ lé wɛ́ɛ kúun. ⁹Wáa Elɔdi kó: «Né lée kɛ tó ii Yaya kún ŋó tɛ́ɛla. Née min ɲɛ́n kó kɛ́nin mánngan myɛ́nnan ni, óo yɛ́ɛtii lé?» O lɔ, a tɛ́ɛfɛ ké a ɲán a lá Ɛnza ngá.

Ɛnza ŋé lɔ́min dila yaman ó mán

Matiyu 14.13-21; Maki 6.30-44; Yaya 6.1-14

¹⁰Ɛnza ɲɛ́n céladhye ŋólu í kwɔ́sɛɛ sán mín nɔ́n, íi kó mínnu kɛ́, íi ó bɛ́ lɔ́sɔɔ Ɛnza ɲɛ́n. Aa táa ní íle í kée nan ywáa lɔ́lɔ. O ywáa ó tɛ́man já Bɛtisayida la. ¹¹Wáa yaman ó bhɔ́ o ɲánle mínngɛ, íi táa íkwɔ. Ɛnza ŋé í labhyɛ ní nisɔdhyaa le, óni kɛ́ i kála Ala yɛ́ mansaya ó kó ó la. Mínnu tɛ́ɛ kɛ́ɛnya fɛ, aa ólu lákɛɛnya.

¹²Tée ó tɛ́ɛ bénan, a yɛ́ kaamɔɔndhye ŋólu í mangbaa a lá kɛ́ fɔ a yɛ́ kó: «Yaman ó lábhyaa ké íi táa só ólu ni kanman ólu la kɛ́ sunman ni lálaa ɲíin kɛ mansɔɔ án ní ywáa cɛ́bhɔnin né lɔ yánun.»

¹³Wáa Ɛnza ŋé fɔ i yɛ kó: «Álee gbúlu á sunman ndí í man.»

Ii fɔ a yɛ́ kó: «Fósi tɛ́ án móo ni búlu dhyé nóo óni yɔ́ɔ dhyé nvyáa gbóto tɛ́. Fɔ ní án ngɛ́ táa sunman nzá kɛ́ nan a di yaman ó mán.» ¹⁴Kɛ mansɔɔ, cɛ wáa lóo lú síya le tɛ́ɛ yénɔn.

Ɛnza ŋé fɔ a yɛ́ kaamɔɔndhye ŋólu yɛ kó: Áa mɔɔn ólu lásii mɔɔn bíloolu lóolu.

¹⁵Kaamɔɔndhye ŋólu ó kɛ́ kɛ kéeɲan ní a yɛ kóman óle, yaman ó bɛ́ɛ í síi. ¹⁶Ɛnza ŋé búlu lóo óni yɔ́ɔ dhyé nvyáa ó tá, kɛ í ɲán layɛɛ sángboo ó mánshaa fɛ kɛ Ala bálika bhɔ́. Aa búlu ólu kúunndɛɛtɛɛ kɛ i ló a yɛ kaamɔɔndhye ŋólu bhóo, kó ii a lɔ́taa yaman o la. ¹⁷Mɔɔn ólu bɛ́ɛ lɔ́min kɛ́ kɛ fá. Búlu gúun mínnu é tó, ii seenin ndá ni fyáa láfa sunman ndɔ́to ó la.

Piyɛli é fɔ́la kó Ɛnza née Kísibhaa ŋó le

Matiyu 16.13-19; Maki 8.27-29

¹⁸Ló nɔ́ la, Ɛnza ndɛ́ɛ Ala dɛ́li o lá í kée nán, a yɛ́ kaamɔɔndhye ŋólu tɛ́ɛ a tɔ́ɔfɛ. Aa i manɲaankɛ kó: «Yaman ó tá fɔli o lɔ, née yɛ́ɛtii lé?»

¹⁹Ii a yawi kó: «Lɔ́lu kó íi Yaya Bátizelikɛbhaa le lé. Lɔ́lu kó íi Eli le lé. Lɔ́gbɛɛ lú kó íi céla kɔɔ ólu lɔ́ le lé min wɛ́ɛ kúun kɛ́ bhɔ́ saya ó lɔ.»

²⁰Ɛnza ngó: «Tó álee ɲánla, née yɛ́ɛtii le?»

Piyɛli é a yawi kó: «Íi Ala yɛ Kílisi ó le lé.»

²¹Ɛnza ŋé fɔ kɛ a mangbɛya í yɛ́ kó í kɛ́nan o fɔ mɔɔn si yɛ́.

²²Aa fɔ i yɛ́ í kwɔ́ kó: «Mɔɔn Dhyénjɛ ó kákan kɛ́ tɔ́lɔya lé myáan koyoongɛ. Cɛba ólu ní faanlɛɛɲansebhaa olu kúnndii ólu ní Sɛliya kaamɔɔn ŋólu yáa í bá a lɔ́. I yáa a fáa, wáa a tee sawaɲɔɔnlo ŋó, a yáa kúun kɛ bhɔ́ saya o lɔ.»

I kákan kɛ́ bhyáa Ɛnza ngwɔ́ ɲán mín mán

Matiyu 16.21-28; Maki 8.30--9.1

²³O kwɔ́, aa fɔ yaman ó yɛ kó: «Ní mɔɔn míin fɛ́ kɛ́ bhyáa né kwɔ́, fɔ́ o tíi ó a í bá a yɛ́ɛ lɔ, kɛ a yɛ́ɛ gbáanɲii ó tá ló ŋóo ló kɛ́ bhyáa né kwɔ́. ²⁴Kɛ mansɔɔ mɔɔn óo mɔɔn é fɛ́ kɛ a ní o kísi, o tíi ó yáa bɔɔn a ní o lɔ. Wáa mɔɔn óo mɔɔn kɛ bɔɔn a ní o lɔ né kósɔn, o tíi ó yáa kísi. ²⁵Óo mínnɛɛn ɲánla mɔɔn mán kɛ́ dínɲanlɔtɛɛ fé ŋó bɛ́ sɔ́ɔ tó kɛ táa bɔɔn a ni o lɔ́, wáman kɛ́ a yɛ́ɛ hálaki? ²⁶Ní mɔɔn mínngɛ maloya, né ní ɲɛn kóman ó mán, mɔɔn Dhyénjɛ ó kɛ́ nán ni a yɛ sébhaaya ó lé, óni a Fá, óni malɛɛka sɛ́nnɛnyanin ŋólu yɛ nɔlɔya óle wáati mín nɔ́n, a yáa maloya o tíi ó ɲɛ́n. ²⁷Tó ní fɔ a yɛ́ tinɲan in né ngó: Mɔɔn mínnuu yánun nín, o lɔ́lu yɛ́ɛ táa sayakɛ ní i mán Ala yɛ́ mansaya o yé.»

Ɛnza ɲɛ́n nɔ́lɔya ó wɛ́ɛ yáa

Matiyu 17.1-8; Maki 9.2-8

²⁸Tée sɛyin ŋó kwɔ́ o kóman ólu fɔnin ngwɔ́ Ɛnza bhóo, áa i yɛ́ɛ tíi lɔ́ ka ní Piyɛli ní Yaya ní Zaki lu lé kɛ́ Ala dɛ́li. ²⁹Kɛ Ɛnza ndó Ala dɛ́li ó lá, a ɲánlɔshaa ó yɛ́ɛman, a yɛ faani ó gbɛ́ pépe fɔ aa mánnan mánnan nan. ³⁰O ywáaninngee ŋó lɔ, cɛ fyáa tɛ́ɛ kómanla ní ale. Céla Musa óni céla Eli lé tɛ́ɛ wé. ³¹Nɔ́lɔya tɛ́ɛ i ka. Ɛnza ngɛ́ɛ tɛ́ɛ Yeluzalɛmu kɛ sayakɛ ɲán ó mín mán kɛ́ a yɛ bháala ó lafa, i tɛ́ɛ ó kóman ó lé la. ³²Sunnɔɔn tɛ́ɛ Piyɛli ní a táamanɲɔɔn ólu la. Ii kúun mínngɛ, íi Ɛnza ɲɛn Alaya ó nɔ́lɔya ó yé, óni cɛ fyáa mín nú tɛ́ɛ a tɔ́ɔfɛ. ³³Cɛ fyáa ólu táatɔ ó kɛ bhɔ́ Ɛnza ndɔ́ɔfɛ, Piyɛli é fɔ a yɛ kó: «Mantii ó, án ngɛ́ ó yánun ó wɛ́ɛ físaya. Án ní tóo sawa lɔ́, í tá kée, céla Musa tá kée, óni céla Eli tá kée.» Piyɛli tɛ́ɛ mín nvɔ́ la, a tɛ́ mán ó lɔ.

³⁴Kɛ́ Piyɛli tó o kóman ó la, káwa lɔ́ é yíi kɛ́ i mantuun. I tɛ́ɛ káwa ó lɔ́ mínngɛ, íi sháan. ³⁵Saaninkan nɔ́ é bhɔ́ káwa ó lɔ kɛ́ fɔ kó: «Míin née né dhyénjɛ óle ŋwɛ́ɛn mín mɔ́, áa a kómankan ŋó lɔ́myɛn.»

³⁶Kómankan ó bhɔ́ wáati ó lɔ, Ɛnza ngée ne tɛ́ɛ yé. Kaamɔɔndhye ŋólu mín ɲé, íi ó mala i kɔɔnnɔn, i mán ó lɔsɔɔ mɔɔn sí yɛ́ o wáati ó lɔ́.

Ɛnza ŋé Lámansa lɔ́ gbɛ́

Matiyu 17.14-18; Maki 9.14-27

³⁷O lusɔgbɛ ó, íi i yíi mínngɛ kɛ́ bhɔ́ tíi o ka, yamanba lɔ é nán Ɛnza ngunmyɛ. ³⁸Cɛ lɔ é tó yaman ó cɛ́man kɛ́ gbáa kó: «Kaamɔɔn, ní i dɛ́lila, ii nyénjɛ kɛ́ɲan ó mánfɛɛ, kɛ mansɔɔ ale kée née dhyé né. ³⁹Lámansayoo nɔ́ é tóla kɛ́ wíi a fɛ, ní a kɛ́ wíi a fɛ, aa baabaa kɛ́ gbáa, aa láyuuyuu koyoongɛ fɔ a láyi o fá a lálɔ. Aa tɔ́lɔla koyoongɛ, a tɛ́ bhɔ́la a fɛ́ jónan. ⁴⁰Ŋwɛ́ɛn i yɛ kaamɔɔndhye ŋólu mándhyaa ké íi a gbɛ́, wáa i man sé.»

⁴¹Ɛnza ŋé fɔ kó: «Álee mɔɔnyoo ŋólu lánanbhɛɛ ólu! Né káa tó a fɛ yánun kɛ táa sé wáati mínnɛɛn lé mán? Né káa álee lɔmyaan kɛ sé fɔ wáati mínnɛɛn lé mán ósɔ? Nan ní í dhyénjɛ ó lé yánun.»

⁴²Dhyé ŋó mángbaatɔ ó, Lámansa ó a tá kɛ́ a bé lúuman kɛ́ a lámaanmaan bhɛ́ɛbhɛɛ le. Wáa Ɛnza e í táan fɔ́ lámansayoo ŋó yɛ kɛ́ a gbɛ́. Dhyé ŋó kɛ́ɛnya, Ɛnza dhyé ŋó dí a fá man. ⁴³Mɔɔn ólu bɛ́ káwakoya Ala yɛ sébhaaya ó kósɔn.

Ɛnza ŋé a saya kó ó fɔ́la íkwɔ

Matiyu 17.22-23; Maki 9.30-32

Ɛnza ŋán kókɛnin ŋólu tɛ́ɛ mɔɔn ólu káwakoya la mínngɛ, aa fɔ a yɛ kaamɔɔndhye ŋólu yɛ́ kó:

⁴⁴«Áa í tóo mánlɔ cɛ́ɛne: Mɔɔn dhyénjɛ o yáa ló mɔɔn ólu bhóo.» ⁴⁵Wáa kaamɔɔndhye ólu mán bhɔ́ ó kóman ó ɲánle, o kóman o kɔ́ɔ ó lóonaankɛnin ŋé tó i mán ké i kɛ́nan bhɔ́ o ɲánle. I tɛ́ɛ sháannan kɛ́ a mánɲaankɛ o kóman ó kɔ́ɔ ó mán.

Yɛ́ɛtii é mɔɔnba óle?

Matiyu 18.1-5; Maki 9.33-37

⁴⁶Kaamɔɔndhye ŋólu tɛ́ɛ kómanla ɲɔ́ɔnɲɛn kó yɛ́ɛtii bɛ́ lɔ mɔɔnba óle i cɛ́man. ⁴⁷Ɛnza ŋé i miliya ó lɔ́ mínngɛ, aa dhyémuu lɔ́ tá kɛ́ alalɔ a tɔ́ɔfɛ, ⁴⁸kɛ́ fɔ i yɛ́ kó: «Mɔɔn mín ngɛ í ɲán síi dhyémuu míin nzí kɔ́ɔ né tá ɲiinɲan mán, o tíi óo í ɲán síila né lé kɔ́ɔ wé. Tó ni mɔɔn mínngɛ í ɲán síi né kɔɔ, o tíi ó wɛ́ɛ í ɲán síi né bhyáashaabhaa o lé kɔ́ɔ wé. Mɔɔn míin bɛ́ lɔ fítiinin ŋó le a cɛ́man, o tíi ó lée bɛ́ lɔ mɔɔnba óle.»

Mín ndɛ́ án yúu lé oo án ɲíin né le

Maki 9.38-40

⁴⁹Yaya é kóman ó tá kɛ́ fɔ Ɛnza ɲɛn kó: «Kaamɔɔn, án ni cɛ lɔ́ yé aa lámansayoo ólu gbɛ́nan kɛ́ bhɔ́ mɔɔn ólu fɛ ní í tɔ́ɔ óle. Án ndɛ́ɛ fɛ kɛ a lálɔ, kɛ mansɔɔ án nɔ́ tɛ́ le.»

⁵⁰Ɛnza ŋé a yawi kó: «A kɛ́nan a lálɔ, kɛ mansɔɔ mɔɔn min ndɛ́ a yúu le, óo a ɲíin ne lé.»

Lɔ́lu é í bá kɛ́ Ɛnza nɔ́bhyɛ

⁵¹Ɛnza kákan kɛ́ bhɔ́ dínɲan lɔ́ wáati mín nɔ́n, oo súnɲan mínngɛ, áa a látɛɛ kó a kɛ́ɛ tɛ́ɛ Yeluzalɛmu. ⁵²O lɔ, aa céladhye ŋólu bhyáa kɛ́ táa a ɲɛ́n. Ólu táa ló Samali tɔ́ɔfɛ só lɔ́ kɔɔnnɔn kɛ yɛ́tiiya ɲíin Ɛnza ɲɛn. ⁵³Wáa o sómɔɔn ólu mán sɔ́n ké Ɛnza ŋán i yíi i fɛ́ yé, kɛ mansɔɔ a tɛ́ɛ táala Yeluzalɛmu. ⁵⁴Ɛnza ɲɛ́n kaamɔɔndhye Zaki ní Yaya é ó yé mínngɛ, íi fɔ Ɛnza ɲɛn kó: «Mantii ó, ii fɛ́ ké án ní tá láyii kɛ́ bhɔ́ sángboo ó lɔ́ kɛ́ í hálaki a?»

⁵⁵Ɛnza ŋé í ɲán yɛ́ɛman i lɔ kɛ́ kóman i man. ⁵⁶O kwɔ́, íi tínmin kɛ́ táa só gbɛ́ɛ la.

Lɔ́luu fɛ́ kɛ́ bhyáa Ɛnza ngwɔ́

Matiyu 8.19-22

⁵⁷Kɛ́ í tó sháala, cɛ lɔ é fɔ Ɛnza ɲɛ́n kó: «I kɛ táa ywáa óo ywáa lɔ, né yáa bhyáa íkwɔ.»

⁵⁸Ɛnza ŋé fɔ a yɛ́ kó: «Jáan é kóngowuu ólu bhóo, bhó ŋé sámankɔɔn ólu bhóo, wáa lálaa tɛ́ mɔɔn Dhyénjɛ ó bhóo lɛ́.»

⁵⁹Ɛnza ŋé fɔ mɔɔn gbɛ́ɛ yɛ kó: «Bhyáa né kwɔ́.»

Wáa cɛ ó kó: «Mantii ó, i lɔ́ né kɛ́ɛ tɛ́ɛ nvacɛ su ló ótun.»

⁶⁰Ɛnza ŋé fɔ a yɛ́ kó: «A tó ké su ólu a i yɛ su o ló. Ile kwɛ́nnin, ile a táa Ala yɛ́ Mansaya ó kó o láse.»

⁶¹Mɔɔn gbɛ́ɛ é fɔ Ɛnza ɲɛ́n kó: «Née fɛ́ kɛ bhyáa íkwɔ, Mantii ó. Wáa í lɔ́ ké né a táa nzáa ɲɛ́n lumanmɔɔn ólu la ótun.» ⁶²Ɛnza ŋé ó yawi kó: «Mɔɔn óo mɔɔn é nisilawa ó myaanla ké aa sɛɛn kɛ, tó a ɲángbaannin ŋé a kwɔ́man, o tíi ó mánngan ní Ala yɛ́ mansaya óle.»

Ɛnza ŋé kaamɔɔndhye shɛ́ɛman céla

Matiyu 9.37-38; 10.7-16; Maki 6.8-11; Luka 9.3-5

¹O kwɔ, Mantii óo kaamɔɔndhye bíwoonvyaa ní fyáa gbɛ́ɛ bhɔ́. A gbú kákan kɛ́ táa sóba ní sódhyenin mínnu la, aa i cé kɛ́ táa o ywáa ólu lɔ́ mɔɔn fyáa fyáa. ²Aa fɔ i yɛ́ kó: «Sunman ndɛ́ɛ tá o waa sháa, wáa bháalakɛbhaa ólu mán nzháa. Óo lɔ mínngɛ áa Mantii ó dɛ́li ké aa bháalakɛbhaa ólu bhyáa kɛ́ táa a yɛ sunman ó tɛ́ɛ. ³Sísan, aa táa! Ní a bhyáashaala óyoo Saadhye ŋólu kɛ́ táa kóngowuu ólu cɛ́man. ⁴Á kɛ́nan wɛ́ɛ tá, wáman táamanlataalwee, wáman sawaa. Á kɛ́nan í lɔ kɛ mɔɔn twáa sháala. ⁵Ní a kɛ́ ló bhó minnan, a kákan kɛ fɔ ótun kó hɛ́lɛ o a kɛ́ bhó míin ngɔɔnnɔn mɔɔn ólu yɛ. ⁶Ní ó kɛ kɛ́ ké mɔɔn lɔ́ é ó bhó ŋó kɔɔnnɔn ní aa hɛ́lɛ ɲíinan, o tíi ó yáa a yɛ́ hɛ́lɛ o twaali ó lwáau ó sɔ́ɔ. Ni ó tɛ́, a yɛ́ lwáau ó yáa í kwɔ́sɛɛ a mán. ⁷Aa tó o bhó ó kɔɔnnɔn. I kɛ fé óo fé di a mán, aa ó lé lɔ́ɔ kɛ ó mín, kɛ mansɔɔ bháalakɛbhaa ó kákan ní a yɛ́ saa ó lé. A kɛ́nan bhɔ́ yɛ́tiiya lɔ́la kɛ́ yɛ́ɛman a lɔ́gbɛɛ la. ⁸Ní a kɛ́ ló só lɔ́ kɔɔnnɔn, ní i kɛ a labhyɛ cɛ́ɛne, i kɛ lɔ́minfe mín ndí a mán, aa ó lɔ́ɔ. ⁹Áa o só ó yaangalotɔ ólu lákɛɛnya, kɛ́ fɔ sómɔɔn ólu yɛ́ kó: ‹Ala yɛ́ mansaya ó wáati ó wɛ́ɛ sé a tɔ́ɔfɛ.› ¹⁰Wáa ní a kɛ́ ló só óo só la, ní i man í ɲán síi a kɔ́ɔ, aa bhɔ́ kɛ i lɔ́ sháa ó la kɛ́ fɔ i yɛ́ kó: ¹¹‹Yáanin a yɛ́ só ó gbángba míin kɛ́ án nzé mán, án ŋwɛ́ɛn ó mangbasigbasi kɛ́ bhɔ́ án nzé mán kɛ́ ó tó a mán. Aa lɔ́ ŋóo Ala yɛ́ mansaya ó wáati ó wɛ́ɛ sé a tɔ́ɔfɛ.› »

¹²«Ní fɔ́la a yɛ́ ngó kítitɛɛ ló ŋó la, bhóo yáa gban o só ó mɔɔn ólu lá kɛ tínmin Sodɔmu yamaan ó ka.»

Bɔɔn é bámaa ólu tá le

Matiyu 11.20-24

¹³«Kunnangbeya é íle Sholazɛn yɛ! Kunnangboya é íle Bɛtisayida yɛ! Kɛ mansɔɔ káwananngo mínnu é kɛ́ álee fɛ́ yé, ni o súu tɛ́ɛ kɛ́ Tili ní Sidɔn, o só lábhaa ólu tɛ́ɛnan díminsa, kɛ bhɔɔ ó bhyáa i kannan kɛ́ i síi búlu o lɔ kɛ́ í yóso ólu yɛ́ɛman kɔ́ɔkɔɔ. ¹⁴O le kósɔn, kítitɛɛ ló ŋó la, bhóo yáa gban álee lá kɛ tínmin Tili ní Sidɔn lú ka. ¹⁵Álee, Kapɛnamuka ólu, aa kɛ́la álee kɔɔnnɔn le kó á yɛ só o káa i kɔ́ɔ tá le kɛ́ sé fɔ sángboo ó mán an? Fɛ́sɛ fɛ́sɛ o! A káa yíi lé fɔ yaananman o lɔ.»

¹⁶O kwɔ́, aa fɔ a yɛ́ kaamɔɔndhye ŋólu yɛ kó: «Mɔɔn mínngɛ a lɔ́myɛn, o tíi ó wɛ́ɛ né le lɔ́myɛn wé. Mɔɔn mínngɛ í bá kɛ í ɲán síi á kɔɔ, o wɛ́ɛ í bá kɛ í ɲán síi né lé kɔ́ɔ wé. Ní mɔɔn mínngɛ í bá kɛ́ í ɲán síi né kɔɔ, ké o wɛ́ɛ í bá né bhyáashaabhaa o lé lɔ́ wé.»

Kaamɔɔndhye ŋólu wɛ́ɛ i kwɔ́sɛɛ

¹⁷Kaamɔɔndhye bíwoonvyaa ní fyáa ólu í kwɔ́sɛɛ ni nisɔdhyaa le kɛ́ nan fɔ Ɛnza ɲɛ́n kó: «Mantii ó, i tɔ́ɔ ó bhaaka lɔ́, yáanin Lámansayoo ŋólu tɛ tɛ́ sé kɛ́ i bá án ɲɛ́n kóman ó mán.»

¹⁸Aa fɔ i yɛ́ kó: «Ní Sɔtaannan béndɔ ó yé kɛ́ bhɔ́ sángboo ó lɔ óyoo sa mannan mannan. ¹⁹Né kwɛ́nnin é sé di álee mán kɛ́ táaman san ólu ní wéende ólu ka, óni kɛ́ sé di a mán kɛ́ a yúu Sɔtaannan yɛ́ sébhaaya ó náansi a se ngɔɔ. Féɲoo nzí yɛ labhɛɛ táa sé a lá. ²⁰Wáa álee kɛ́nan í nisɔdhyaa kɛ mansɔɔ Lámansayoo ŋólu tɛ tɛ́ sé kɛ́ í bá a yɛ́ kóman ó mán. Wáa aa i nisɔdhyaa kɛ mansɔɔ Ala wɛ́ɛ álee tɔ́ɔ sɛ́wɛ a fɛ́ sángboo ó lɔ́.»

Ɛnza ŋé bálika bhɔ́la a Fá yɛ́

Matiyu 11.25-27; 13.16-17

²¹O wáati ó yɛ́ɛ lɔ, Ɛnza nisɔ é dhyáa koyoongɛ Ní Sɛnnɛnyanin ŋó bhaaka lɔ kɛ́ a fɔ kó: «Ní bálika bhɔ́la í yɛ́, Nvá, sángboo óni lúukolo ó Mantii ó, kɛ mansɔɔ, í wɛ́ɛ kó mínnu lóonaankɛ lɔnikɛbhaa ólu ní hákiiman ŋólu mán, í wɛ́ɛ ólu lá gbɛ́ lá dhyémuu ólu yɛ. Nvá, í wɛ́ɛ kɛ́ cé kɛ mansɔɔ a wɛ́ɛ dhyáa í yɛ tinɲan in né.»

²²«Ne Fá wɛ́ɛ fé ó bɛ́ lo ne bhóo. Mɔɔn sí mán dhyénjɛ ó lɔ́ ní Fá ó tɛ, mɔɔn sí mán Fa ó lɔ́, ní Dhyénjɛ ó tɛ́. Fɔ́ Dhyénjɛ ó kɛ́ dyɛn kɛ yáa mínnan.»

²³O kwɔ́, aa i ɲán yɛ́ɛman a yɛ́ kaamɔɔndhye ŋólu lɔ́ kɛ fɔ í yɛ lóonɔn kó: «Álee mínnu yéla, ní mɔɔn gbɛ́ɛlu kɛ́ o yé, nisɔdhyaa é ólu yɛ. ²⁴Kɛ mansɔɔ ní fɔ́la a yɛ́ ngó: Álee fé mín mánfɛɛla ni, o yélɔɔ tɛ́ɛ céla shɛ́ɛman ní mansacɛ shɛ́ɛman nan, wáa olu mán o yé; áa kó mín myɛ́nnan ni, o myɛ́nnɔɔ tɛ́ɛ olu la, wáa olu mán ó myɛ́n.»

Né mɔɔnɲɔɔn é yɛ́ɛtii lé?

Matiyu 22.34-40; Maki 12.28-31

²⁵Sɛliya kaamɔɔn lɔ́ tɛ́ɛ fɛ́ kɛ Ɛnza nɔ́swaan. O lɔ, aa i wíi kɛ́ a mánɲaankɛ kó: «Kaamɔɔn, ngákan kɛ́ mínnɛɛn lé kɛ́ kɛ ɲáanmanɲan wɛ́ɛbhɛɛ ó sɔ́ɔ?»

²⁶Ɛnza ŋé a yawi kó: «Mínnɛɛn sɛ́wɛnin ŋé Sɛliya ó kɔɔnnɔn? Íi ó kalanan díi?»

²⁷Áa a yawi kó: «Í yɛ Mantii Ala o a dhyáa í yɛ́ í yóso ó bɛ́ lá, í ní o bɛ́ lá, í míliya ó bɛ́ lá, óni í fáan ó bɛ́ la. Í mɔ́ɔnɲɔɔn ó wáa dhyáa í yɛ́ óyoo íle gbú a dí í yɛ́ɛ yɛ ɲán mín mán.»

²⁸Ɛnza ŋé fɔ a yɛ́ kó: «I yɛ́ yawili ó wɛ́ɛ bhyɛ. O kɛ́, í yáa ɲáanmanɲan ó sɔɔ.»

²⁹Wáa Sɛliya kaamɔɔn ó tɛ́ɛ fɛ́ lé kɛ́ jó di a yɛ́ɛ mán. O lɔ, aa Ɛnza mánɲaankɛ kó: «Yɛ́ɛtii né mɔɔnɲɔɔn ó lé?»

³⁰Ɛnza ŋé a yawi kó: «Cɛ lɔ́ tɛ́ɛ bhɔ́la Yeluzalɛmu kɛ́ táa Zeliko. Sháatɛɛbhaa ólu bé a ka, kɛ́ a yɛ́ fáani ólu ni a bhóofe ŋólu bɛ́ bwási a lá, tó kɛ́ wɛ́ɛ kɛ́ a gbasi fɔ kɛ́ a kilo, kɛ́ táa kɛ́ a tó sháa ó la. ³¹O kɛ́nin ngwɔ faanlɛɛɲansebhaa lɔ́ tɛ́ɛ tínmin nán o sháa kée ó ka. Aa cɛ mandiinnin ŋó yé mínngɛ, aa í fáan kɛ tínmin sháa ó fán ndɔ ó fɛ́. ³²Ala bhatobhomba o bháalakɛdhye ó lɔ́ ŋé nan sé cɛ ó mán, aa a yé kɛ́ tínmin sháa ó fán ndɔ ó fɛ́. ³³Wáa Samalika cɛ lɔ́ tɛ́ɛ táa táamanla aa sé cɛ ó mán mínngɛ, cɛ ó hínnɛn é ló a lɔ́ koyoongɛ. ³⁴Aa í mangbaa a lá kɛ a yɛ lá ólu kwó, kɛ́ túu ní lɛ́zɛnnji kɛ́ lá o la, kɛ́ a síli. O kwɔ́, aa a tá kɛ a lá a yɛ́ sofɛɛnin ŋó ka kɛ́ táa ní ale lónannayii bhó nɔ́ la, kɛ i yáakii tó a lɔ́. ³⁵O lusɔgbɛ o, aa wɛ́ɛgbannan déniye fyáa di yɛtiicɛ ó mán kɛ́ fɔ a yɛ kó aa í yáakii tó cɛ o lɔ́. Kó ní a kɛ́ bhóobhɔ mínnu kɛ́ ó kɛ́ tínmin ó wɛ́ɛ ó yaceya ó ka, kó ní a kɛ í kwɔ́sɛɛ wáati mínnɔn, a yáa o sala a yɛ́.»

³⁶Ɛnza ŋé Sɛliya kaamɔɔn ó mánɲaankɛ kó: «Sháatɛɛbhaa ólu é cɛ min mandiin wé, i tá miliya ó lɔ, mɔɔn sawa míin mínnɛɛn lée cɛ ó mɔɔnɲɔɔn óle?»

³⁷Aa a yawi kó: «A hínnɛn é ló mín nɔ́n.»

Ɛnza ŋé a yawi kó: «Ile á táa o ɲɔ́ɔn ngɛ.»

Mati ní Mwɛnyamu yɛ́ kó ó

³⁸Kɛ́ i tó táaman ó la, Ɛnza ŋé ló só lɔ́ kɔɔnnɔn ní a yɛ kaamɔɔndhye ŋólu le. Ii i yíi muso lɔ fɛ́ yé mín ndɔ́ɔ kó Mati. ³⁹Mati lɔ́ɔmuso lɔ́ tɛ́ɛ yé mín ndɔ́ɔ kó Mwɛnyamu. Oo táa i síi Mantii ó tɔ́ɔfɛ tó kɛ́ a yɛ́ kaa ŋó lɔ́myɛn. ⁴⁰Oo kɛ́la ké Mati ɲángbannin ɲé Gbakɛ ó la. Aa i mangbaa Ɛnza nan kɛ fɔ a yɛ kó: «Mantii ó, nɔ́ɔmuso é i síila kɛ né kée ndó bháala ó lá, o káɲin ŋán? A fɔ a yɛ kó aa i wíi kɛ́nan né dhyɛman.»

⁴¹Wáa Mantii ó a yawi kó: «Mati, Mati, ii bwéebweela kɛ́ i hákii ó ɲáanmin ko shɛ́ɛman nán gbɛ́ɛgbɛɛ, ⁴²wáa fé ngée né kúu á gbɛ́ɛ. Mwɛnyamu wɛ́ɛ o lé kɛ́, mɔɔn sí táa ó bwási a lá.»

Ɛnza ŋé min nvɔla Ala dɛ́li kó ó lɔ

Matiyu 6.9-13; 7.7-11

¹Ló nɔ lá, Ɛnza ndɛ́ɛ Ala dɛ́lila ywáa lɔ́lɔ. Aa wɛ́ɛ sán mín nɔ́n, a yɛ́ kaamɔɔndhye ŋó kée ŋé a mánɲaankɛ kó: «Mantii ó, án ngala Ala dɛ́li ó la óo Yaya é a yɛ kaamɔɔndhye ŋólu kala ɲán mín mán.»

²Ɛnza ŋé fɔ i yɛ kó: «Ní a kɛ kɛ́ Ala dɛ́lila sán mínnɔn, áa fɔ kó:

‹Án Nvá, i tɔ́ɔ ó wáa sɛ́nnɛnya.

I yɛ mansaya ó wáa nan.

³Án ɲɛ́n ló ŋóo ló lɔ́min ó dí án mán.

⁴Án ɲɛ́n yúumu ólu yafa án mán,

kɛ mansɔɔ án ni yafala an ɲáacɛtabhaa ólu mán.

I kɛ́nan tó ké lɔ́swaannin o wáa sé án mán.› »

⁵Ɛnza ŋé fɔ i yɛ íkwɔ kó: «Ní ale lɔ kɛ i wíi kɛ́ táa a tɛ́ɛcɛ ó fɛ́ yé lúutaaman kɛ́ fɔ a yɛ kó: ‹Ndwáanva, ɲan né mán ní búluguun nzawa le, ⁶kɛ mansɔɔ né tɛ́ɛcɛ lɔ wɛ́ɛ bhɔ́ só kɛ́nan nvɛ́, sunman ndɛ́ móo kɛ́ di a mán,› ⁷ní a táamanɲɔɔn ó kɛ tó bhó ŋó kɔɔnnɔn kɛ́ a yawi kó: ‹Í kɛ́nan ndɔ́lɔ, lá ó wɛ́ɛ wɛɛ sɔɔla, né ní dhyé ŋólu wɛ́ɛ án ná, né tɛ́ sé kɛ ŋwíi kɛ́ búlu di í mán,› ⁸ní fɔ́la a yɛ́ ngó yáanin a mán í wíi kɛ́ búlu ó dí a mán twáanvaya ó kósɔn, ní a kɛ a ɲángban a yáa í wíi kɛ́ a manko é fé ŋóo fé nan, a yáa ó bɛ́ di a mán.»

⁹«O ɲán ó mán ni fɔ́la a yɛ ngó aa kófɔli kɛ, i yáa di a mán, ni a kɛ ɲíinnin kɛ, a yáa a sɔɔ. Ni a kɛ lá o mangbasi, i yáa í láka a yɛ. ¹⁰Kɛ mansɔɔ ní mɔɔn óo mɔɔn kɛ kófɔli kɛ o tíi ó yáa a sɔɔ kɛ, ní mɔɔn mínngɛ ɲíinnin kɛ́, o tíi ó yáa sɔɔlikɛ, ní mɔɔn mínngɛ lá o mangbasi, i yáa lá o laka o tíi ó yɛ. ¹¹Dhyénva mínnɛɛn lée sɔ́nnan kɛ san ó di a dhyé ŋó mán, kɛ́ɛ ké a wɛ́ɛ yɔ́ɔ le kófɔ a yɛ? ¹²Wáman dhyénva mínnɛɛn lée sɔ́nnan kɛ wéende ó di a dhyé ŋó mán, kɛ́ɛ ké dhyé ŋó wɛ́ɛ shishɛkii lé kófɔ a yɛ́? ¹³Álee mínnu a yóo, ní álee lu é sɔ́nnan kɛ fémɛɛ ólu di a dhyé ŋólu mán, a Fá mín ŋé sángboo ó lɔ, o táa Ní Sɛnnɛnyanin ŋó di a dɛ́libhaa ólu mán an?»

Ɛnza ŋé a kɔɔfɔbhaa ólu yawila

Matiyu 9.32-34; 12.22-30; Maki 3.22-27

¹⁴Ló nɔ la, Ɛnza ndɛ́ɛ lámansayoo nɔ́ gbɛ́nan mín ndɛ́ɛ cɛ ó kɛ́la bhóbho le. Lámansayoo ŋó bhɔ́ cɛ ó fɛ mínngɛ, bhóbhocɛ oo a lamyaan kɛ kóman, tó yaman ó káwakoya. ¹⁵Wáa mɔɔn lɔ́luu fɔ kó: «Lámansayoo ŋólu kunndii Bɛlizebuli le bhaaka lɔ, aa lámansayoo ŋólu gbɛ́nan.»

¹⁶Lɔ́lu, a lɔ́swaan ndɔ́ɔ lɔ, Íi fɔ a yɛ kó aa tɔɔmansii kée ngɛ́ i ɲánla, kɛ bhɔ́ sángboo ó lɔ. ¹⁷Ɛnza ndɛ́ɛ i miliya ólu lɔ́; aa fɔ i yɛ kó: «Yamaan mín mɔɔn lúu ɲɔ́ɔn ngɛlɛla, o yamaan óo céla lé. I yɛ bhó ŋólu yáa bémbe ɲɔ́ɔnnga. ¹⁸Ní Sɔtaannan kɛ́ a yɛ́ɛ lɔ́taa, a yɛ yamaan ó káa sé si sɔ́ɔla díi lé? Kɛ mansɔɔ aa fɔ́la kó Bɛlizebuli le bhaaka lɔ ko née lámansayoo ŋólu gbɛnan. ¹⁹Ní née Lámansayoo ŋólu gbɛnan Bɛlizebuli le bhaaka lɔ, o wáati ó lɔ, a dhyénjɛ ólu i gbɛnan yɛ́ɛtii bhaaka lɔ? O lé kósɔn ólu yáa kɛ a yɛ kítitɛɛbhaa ólu lé. ²⁰Wáa ní née Lámansayoo ŋólu gbɛnan Ala yɛ sébhaaya óle bhaaka lɔ, óo a yáala kó Ala yɛ́ Mansaya ó wɛ́ɛ sé a mán.»

²¹«Ní mɔɔn faangbii o lɔ́bhyɛnin ngɛ́ kɛ a yɛ bhó ŋó kunnansiila ni malamafe né, a yɛ bhónanfe ŋólu bɛ́ɛ sutaa lɔ́. ²²Wáa ní lɔ gbɛ́ɛ fáan kɛ́ gbíiya ale ta o le, o kɛ sé ale la, o faangbii o yáa a yɛ malamafe ŋó bɛ́ bwási a lá, a yée lánin ndɛ́ɛ mínnga. A yáa o bhóofe ŋólu bɛ́ cɛ kɛ́ ó dí mɔɔn gbɛ́ɛlu mán.

²³Mɔɔn mín ndɛ́ né ɲíin né, óo né yúu lé le. Óni mɔɔn mín ndɛ́ ládhyɛli kɛ́la nín né le, o tíi ó ɲɛ́nɲɛnli lé kɛ́la.»

Lámansayoo ŋó kwɔ́sɛɛ kó o

Matiyu 12.43-45

²⁴«Ní Lámansayoo ŋó kɛ́ bhɔ́ mɔɔn lɔ́ fɛ, aa táa i yáala wúla o kɔɔnnɔn, kɛ́ lɔ́nwɛɛnlikɛlaa ɲíin yé. Ní a mán o ywáa sɔ́ɔ, aa fɔ kó: ‹Ní bhɔ́ bhó mín ngɔɔnnɔn, ngáa ngwɔ́sɛɛ yénɔn.› ²⁵Ní a kɛ́ i kwɔ́sɛɛ, kɛ táa yé ko bhó ŋó mancɛnin ŋé mɔɔn tɛ a lá. ²⁶O lɔ aa táa Lámansayoo wóonvyaa gbɛ́ɛ ɲíin mínnu a yóo ale lé. Ii nan o tíi ó fɛ kɛ́ i síi, O tíi ó tɛ́ɛ ɲán mín mán jónan o yáa yóoɲan kɛ́ tínmin ó ka.»

Yɛ́ɛ yeemanfanin ɲé?

²⁷Ɛnza ŋé ó kóman ólu fɔ kɛ́ wɛ́ɛ mínngɛ, muso lɔ é i kannan bhɔ́ yaman ó cɛ́man kɛ́ fɔ a yɛ kó: «Muso míin í wóo kɛ́ sín ndí i man, o yeemanfanin ɲé.»

²⁸Wáa Ɛnza ŋé a yawi kó: «Mɔɔn mín ŋé Ala yɛ kóman ó lɔ́myɛnnan, kɛ́ a lá bháto, o lé yeemanfanin ɲé.»

Mɔɔn ólu i bánan Ɛnza nɔn

Matiyu 12.38-42

²⁹Yaman ó tɛ́ɛ sháaya la Ɛnza ndɔ́ɔfɛ mínngɛ, aa fɔ i yɛ kó: «Wáati míin mɔɔn ólu mɔɔnyoo néelu le: Íi tɔɔmansii le ɲíin nán. Tɔɔmansii gbɛ́ɛ táa kɛ́ i yɛ́ bhée ní céla Zonasi yɛ́ tɔɔmansii o tɛ́. ³⁰O lɔ Zonasi é kɛ tɔɔmansii lé Ninivuka ólu yɛ́ ɲán mín mán wé, mɔɔn Dhyénjɛ ó káa kɛ́ tɔɔmansii lé án ɲɛ́n wáati míin mɔɔn ólu yɛ́ o ɲán kée ŋó lé mán. ³¹Kítitɛɛlo ó la, mansamuso míin bhɔ́la kíinmoo fa ŋó fɛ́ o yáa i wíi ní wáati míin mɔɔn ólu lé kɛ kíti bé í ka, kɛ mansɔɔ álee bhɔ́ fɔ lúukolo ó lá ŋó la kɛ́nan mansacɛ Swɛmannan yɛ hákiitiiya kóman ólu lɔ́myɛn. Kɛ́ɛ ké, mɔɔn é yánun mín ŋé Swɛmannan ɲɛ́n. ³²Kítitɛɛlo ó la, Ninivuka ólu yáa i wíi kɛ kíti bé wáati míin mɔɔn ólu ka, kɛ mansɔɔ Zonasi é lakawanin mín ngɛ́ Ninivu só ó kɔ́ɔnnɔn, Ninivuka ólu sɔ́n o mán. Ii díminsa kɛ fála i yɛ́ kóyoo ŋólu la. Kɛ́ɛ ké, mɔɔn é yánun mín ŋé Zonasi ɲɛ́n.»

Fási ó kɛ́ɛnɲan ó

Matiyu 5.15; 6.22-23; Maki 4.21; Luka 8.16

³³«Mɔɔn sí tɛ́ laman ŋó lamaannan kɛ a bhyaa ywáaloonaankɛnin nɔn, wáman kɛ a bhyaa pála ŋó kɔ́ɔ, wáa aa síilaa lamannziife né ka ké mɔɔn mínnu kɛ kɛ́ lónan bhó ŋó kɔɔnnɔn, ólu a yéli kɛ́.

³⁴Mɔɔn ɲán ó lée a fási ó laman ŋó le. Ní i ɲán ó káɲin, í fási ó bɛ́ é kɛ́ɛnɲan o lɔ. Wáa ní i ɲán ó mánɲin, í fási ó bɛ́ɛ kɛla diwi lɔ le. ³⁵O lɔ, i yɛ́ɛ myaan ké kɛ́ɛnɲan míin í ka o kɛ́nan kɛ diwi le. ³⁶Ní i fási ó bɛ́ kɛ kɛ́ kɛ́ɛnɲan ó lɔ, ní diwi súusuu tɛ́ yé, a yáa tó kɛ́ɛnɲan ó lɔ óyoo laman ŋó kɛ́ɛnɲan o bhɔ́la ɲán mín mán.»

Ɛnza ŋé Falizɛn ŋólu ní Sɛliya kaamɔɔn ólu kɔ́ɔfɔla

Matiyu 23.4,6-7,13,25-27,29-31,34-36; Maki 12.38-40

³⁷Ɛnza ŋé wɛ́ɛ a yɛ́ kóman ó la mínngɛ, Falizɛn nɔ é a kíi kó aa táa lɔ́minkɛ ni ale yɛ lú ó mán. Aa táa, aa i síi lɔ́min ó mán. ³⁸Falizɛn mín ŋé a kíi óo a lákɔɔsi mínngɛ kó Ɛnza mán a bhóo o kwó kɛ́ kéeɲan ní i yɛ laanan óle kɛ́ tó i síila sunman ŋó mán, oo a káwakoya. ³⁹Mantii ó fɔ a yɛ kó: «Álee Falizɛn ŋólu kwɛ́nnin ŋé cé né. Áa yáafyɛ ólu ní tása ólu kɔ́ɔmanlaa ó lé kwóla kɛ i gbɛ́, kɛ́ɛ ké béngani óni yóoɲan óle fánin ŋé álee yóso ó lɔ. ⁴⁰Nánloman ŋólu! Mɔɔn mín ŋé a kɔ́ɔmanlaa ó lálaa, óle mán kɔ́ɔnnɔnlaa ó lálaa ŋán? ⁴¹Aa yóoɲan ó bhɔ́ a yóso ó lɔ, kɛ faannda ŋólu sɔ́, a yɛ kó o bɛ́ yáa sɛ́nnɛnya.

⁴²Álee Falizɛn ŋólu, bɔɔn é álee tá le, kɛ mansɔɔ aa i lɔ́jala kɛ nannanye óni nánfe ŋó bɛ́ súu yáa bhɔ́la. Wáa Ala yɛ téeɲan óni a yɛ dhyáaɲɔɔnya mín nvɔ́, aa ólu tóla yé. A kákan kɛ o le kɛ́, kɛ́ dɔ́ ólu fala o ka.

⁴³Bɔɔn yáa álee Falizɛn ŋólu sɔɔ, kɛ mansɔɔ sɛ́ɛbho ŋólu kɔɔnnɔn, siilaabhɛɛ ó láa dí álee lú yɛ. Mɔɔn tɔ ólu kɛ kɛ́ a fola bhɛ́ɛsili bhóo mán yaman ywáa ólu lɔ o léelu dhyáa é kɛ́la a lɔ. ⁴⁴Bɔɔn yáa álee Falizɛn ŋólu sɔɔ, kɛ mansɔɔ a wɛ́ɛ kɛ́ óyoo kábulu ólu, mínnu tɛ́ yéla, mɔɔn ólu táamanla a ka ké i tɛ́ bhɔ́la a ɲánle.»

⁴⁵O lɔ, sɛliya kaamɔɔn lɔ́ é fɔ Ɛnza ɲɛ́n kó: «Kaamɔɔn, ní i wɛ́ɛ kóman cé, ii wɛ́ɛ ló án née la.»

⁴⁶Ɛnza ŋé i yawi kó: «Bɔɔn yáa álee sɛliya kaamɔɔn ólu sɔɔ, kɛ mansɔɔ áa lwée ngbíiyanin né siila mɔɔn ólu kunman, tó a tɛ́ i bhóo túula a la yáanin dɔ́ɔnin ne. ⁴⁷Bɔɔn yáa álee sɔɔ! Kɛ mansɔɔ áa céla ólu yɛ́ kábulu ólu lɔ́la, kɛ́ɛ ké a fá léelu i fáa. ⁴⁸Áa yáa céne kó a fá ólu tɛ́ɛ mín ngɛ́la, kó o a dí álee lú yɛ, kɛ mansɔɔ, íi céla ólu fáa, tó álee, áa ólu kábulu ólu lɔ́la. ⁴⁹O lé kósɔn Ala yɛ́ hákiitiiya ó fɔ kó: a yáa céla lú ní céladhye nú cé i mán. I yáa i lɔ́lu fáa, kɛ i lɔ́lu tɔ́lɔ. ⁵⁰O le kósɔn, kíti yáa bé bímɔɔn ólu ka céla ólu fáa o kósɔn, o yée míin bwɔ́ kabiini dínɲan lamyaan wáati ó mán, ⁵¹kɛ tá Abɛli yée bwɔ́ ŋó mán fɔ́ kɛ́nan sé Zakali yée ó mán, íi mín nváa Ala bhatobhomba ó ywáa sɛ́nnɛnyanin ŋó ní faanlɛɛbhɔlaa ó cɛ. Tinɲan in ne, ní fɔ́la a yɛ ngó Ala yáa bímɔɔn ólu manɲaankɛ o bɛ́ mán.»

⁵²«Álee sɛliya kaamɔɔn ólu, bɔɔn yáa álee sɔɔ, kɛ mansɔɔ álee wɛ́ɛ Ala yɛ lɔ́ninya ó lákeli ó tá. Álee gbúlu tɛ́ ló, wáa lónɔɔ é mínnu la áa ólu lábanan kɛ ló.»

⁵³Ɛnza ŋé bhɔ́la o ywáa ó lɔ sán mínnɔn, ké sɛliya kaamɔɔn ólu ní Falizɛn ŋólu mwɛnnɛn a mán koyoongɛ. I tɛ́ɛ gée mbɛ́ súu ɲíinan. O lɔ, i tɛ́ɛ ɲaankɛli shɛ́ɛman ngɛ́la kɛ a lákɔɔbhɔ ké aa kóman, ⁵⁴i tɛ́ɛfɛ ké aa kóman lɔ fɔ́ ké ó waa kɛ́ a myaan kun ne.

Gbondo ó bɛ́ yáa bhɔ́ kɛ́ɛnman

Matiyu 10.26-27; 19.20

¹O wáati ó lɔ, yamanba tɛ́wɛɛ i ládhyɛ, fɔ́ i tɛ́ɛ táamankɛla ɲɔ́ɔn nzé nga. Ɛnza ŋé lámyaan kɛ́ fɔ a yɛ kaamɔɔndhye ŋólu yɛ kó: «Áa a yáakii tó a yɛ́ɛ lɔ Falizɛn ŋólu yɛ́ lévu o mán ó míin fyaangafoya óle. ²Fénoonaankɛnin nzí tɛ yé mín ndáa yé. Gbondo sí tɛ́ yé mín ndáa bhɔ́ kɛ́ɛnman, ³kɛ mansɔɔ a káa fé ŋóo fé nvɔ́ diwi ó lɔ, o yáa myɛ́n kɛ́ɛnman. A káa fé ŋóo fé nvɔ́ ɲɔ́ɔn ndóo lɔ bhó ŋó kɔɔnnɔn, o kóman ó yáa bhɔ́ bhó ŋó kúnnɔn kɛ́ɛnman.»

Án ngákan kɛ́ sháan Ala ɲɛ́n?

Matiyu 10.28-31

⁴«Álee mín núu né twáanva ólu le, ní fɔ́la a yɛ ngó: mɔɔn mín núu mɔɔn fási ólu fáala tó í tɛ́ sé kɛ kó gbɛ́ɛ kɛ o kwɔ́, a kɛ́nan sháan ŋólu ɲɛ́n. ⁵A kákan né kɛ sháan mín ɲɛ́n, né yáa o fɔ a yɛ. Sé é mín ɲɛn kɛ́ mɔɔn ní ó myáan, o kwɔ́, aa sé kɛ́ a ní o láfii yaananman o lɔ, aa sháan o lé ɲɛ́n.

⁶Mɔɔn tɛ́ kɔ́ɔn dhyénin nóo felela pɔpɔlɔ fyáa la a? O ló mbɛ́ kwɔ́ Ala tɛ́ ɲánla ólu sí kwɔ́. ⁷Yáanin a kúnzhe ó yɛ́ɛ o bɛ́ lá nɔn nin née Ala kwɔ́. Oo lɔ mínngɛ, a kɛ́nan sháan. Álee a físaa kɔ́ɔnnin ŋólu le.»

Kɛ́ sɔ́n bháa, bháa kɛ́ í bá

Matiyu 10.32-33; 12.32; 10.19-20

⁸«Ní fɔ́la a yɛ́ ngó, ní mɔɔn mínngɛ i lɔ́ a lá bɛ́ ɲánla kó álee né yɛ́ mɔɔn le lé, mɔɔn Dhyénjɛ ó yáa i lɔ a lá Ala yɛ́ malɛɛka ólu ɲánla kó ó tíi ó a tá le lé. ⁹Wáa ní mɔɔn mínngɛ í bá né lɔ mɔɔn ólu ɲánla, né yáa mbá o tíi ó lɔ Ala yɛ́ malɛɛka ólu ɲánla.

¹⁰Mɔɔn óo mɔɔn kɛ́ kóman yóo nvɔ́ mɔɔn Dhyénjɛ o mán, yafa é sé kɛ́la o tíi ó mán; wáa ní mɔɔn óo mɔɔn kɛ́ kóman yóo nvɔ́ Ní Sɛnnɛnyanin ŋó mán, yafa táa kɛ́ o tíi ó mán tún.

¹¹Ní i kɛ á myáan kɛ táa ni ale sɛ́ɛbho ŋólu kɔɔnnɔn, wáman kítitɛɛbhaa ólu fɛ́ yé, wáman faanman ŋólu fé yé, a káa mín nvɔ́ kɛ jó sɔɔ, a kɛ́nan hánmin o lá. ¹²Kɛ mansɔɔ a káa kóman nvɔ́ Ní Sɛnnɛnyanin ŋó yáa ó ló a lálɔ o ywáanin ngée ŋó lɔ.»

Nanfootii nánloman ŋó yɛ́ saanan ó

¹³Cɛ lɔ é fɔ Ɛnza ɲɛ yaman ó cɛ́man kó: «Kaamɔɔn, a fɔ ngɔ́ɔcɛ yɛ kó aa án nvá cɛ́n ó lɔ́taa.»

¹⁴Wáa Ɛnza ŋé a yawi kó: «Cɛ, yɛ́ɛtii né síi kɛ né kɛ́ a yɛ́ kítitɛɛbhaa óle? Wáman kɛ́ né kɛ́ a yɛ́ cɛ́n lɔ́taamaa óle?» ¹⁵O kwɔ́, Ɛnza ŋé fɔ yaman ó yɛ́ kó: «Áa a yɛ́ɛ kɔ́ɔsi, áa a yɛ́ɛ myaan nanfoo ko ó dhyaaɲɛnkoyoo ŋó mán, kɛ mansɔɔ yáanin ní nanfoo ó kɛ́ sháaya mɔɔn bhóo ɲán óo ɲán mán, o tɛ́ sé kɛ́la ké aa ɲaanmanɲan ó sɔ́ɔ.»

¹⁶O lɔ, áa saanan lɔ fɔ i yɛ kó: «Nanfootii lɔ tɛ́ɛ yé, a yɛ́ sɛɛn ó ɲan gbútuukɛ. ¹⁷Aa fɔ a yɛ́ɛ kɔɔnnɔn kó: ‹Né yɛ́ sunman ŋó bhyáalaa tɛ́ móo. Né káa kɛ́ díi?› ¹⁸Aa fɔ kó: ‹Né káa min ngɛ́, ní o lɔ́. Ngáa ɲɛ́n mɔɔnnin ŋólu cé, kɛ́ belebeleba ólu lɔ. Né yáa ɲɛ́n béle óni móofe ŋólu bɛ́ ládhyɛ ólu kɔɔnnɔn. ¹⁹O kwɔ́ né yáa fɔ ngɔɔnnɔn ngó: Ndwáanva, sá dáman míin nɔ́n i wɛ́ɛ bhóofe nzhɛ́ɛman nzɔ́ɔ. I lɔ́nwɛɛn sísan, kɛ lɔ́min kɛ́, kɛ minin kɛ́, i nisɔdhyaa i yɛ ɲaanmanɲan o lɔ.› ²⁰Wáa Ala é fɔ a yɛ kó: ‹I nánloman ŋó, bí sú míin ɲɛ́ɛ lɔ, ɲáan ɲɛ́n kɛɛfaman ó myáan i la. I wɛ́ɛ nanfoo mín nadhyɛ i yɛ́ɛ yɛ, o káa kɛ yɛ́ɛtii tá le?› »

²¹Ɛnza ŋé fɔ kó: «Mɔɔn mínngɛ nanfoo ládhyɛ a gbú yɛ kɛ́ Ala tó yé, o tíi ó kɛ́la céne.»

Án ni lá Ala la kɛ án yée síi a la

Matiyu 6.19-21,25-33

²²O kwɔ́, Ɛnza ŋé fɔ a yɛ́ kaamɔɔndhye ŋólu yɛ́ kó: «O kósɔn, ní fɔ́la a yɛ ngó: A kɛ́nan hánmin a yɛ dínɲanlɔtɛɛ ó la, kó a káa mínnɛɛn lé lɔ́ɔ? A kɛ́nan hánmin a fásisoo ó tá sháa o fɛ́, kó a káa mínnɛɛn ló? ²³Kɛ mansɔɔ a ní ó kúu a gbɛ́ɛ ní lɔ́min fé ŋó le, fási ó kúu a gbɛ́ɛ ní faani óle. ²⁴Aa bwɔ́ ŋólu yace myaan kɛ́ a mánfɛɛ. I tɛ́ sɛɛn kɛ́la, i tɛ́ sunman ndɛ́ɛla. Mɔɔnnin ndɛ́ í bhóo. Wáa Ala é í bhálola. Álee mán nvísaa kɛ́ tínmin kɔ́ɔn ŋólu ka ŋán? ²⁵Álee lɔ, yɛ́ɛtii é sé kɛ́ tee kée nvala a sí ó ka hánmin ŋó kósɔn? ²⁶Sísan, o mín ŋé kofitiinin né, ní álee tɛ́ sé kɛ ó kɛ́, mínnɛɛn la aa hánminan kó tɔ ólu la? ²⁷Aa bínnvee ólu cɛ́ɲan séɲan o mánfɛɛ. I tɛ́ bháala kɛ́la, i tɛ́ fwáani kɛ́la. Née fɔ́la a yɛ ngó mansacɛ Swɛmannan ní a yɛ faanmanɲan ó bɛ́ lɔ, a mán fáani sɔ́ɔ mín njɛ́ɲan é bínnvee ólu bhɔ́. ²⁸Bín míin sɛɛn ó mán, ní tá yáa ó ɲɛɛn síin, ni Ala é i hákiitola o lɔ cé, a táa i hákiito álee lɔ́ kɛ tínmin olu ka ŋán? Yeenda ŋólu!

²⁹A káa fé mín nɔ́ɔ, wáman a káa fé mín min, a hákii o kɛ́nan ɲáanmin ólu kósɔn. ³⁰Alalɔmɛɛ mín núu dínɲan míin nɔn ólu o fé ólu bɛ́ ɲíinnan. Wáa a Fá ó á a mankoyafe ŋólu lɔ. ³¹Áa Ala yɛ́ Mansaya ó ɲíin ŋó tún, ni ó kɛ kɛ́, Ala yáa fé ó tɔ ólu di a mán.

³²A kɛ́nan sháan né yɛ saawɛɛfitiinin ŋó, kɛ mansɔɔ a wɛ́ɛ dhyáa Fá Ala yɛ kɛ́ a yɛ́ Mansaya ó di a mán.

³³Áa a bhóofe ŋólu fele kɛ a wɛ́ɛ ó lɔ́taa faannda ŋólu la. Nanfoo míin Ala fɛ sángboo ó lɔ, aa ó ɲíin. O nanfoo ó táa cáan yé, só ndɛ́ séla yé, bháabhaa tɛ́ séla yé. ³⁴Kɛ mansɔɔ i yɛ́ nanfoo ó ywáa mínnɔn, i yóso óo o ywáa ó lé lɔ.»

A lɔ́bhyɛnin ŋán tó wáati o bɛ́

³⁵«Áa i lɔ́bhyɛ, kɛ í cɛ́sii, a yɛ́ laman ŋó lamaannin ŋan kɛ́. ³⁶Aa mánkɔɔnnin kɛ́ óyoo bháalakɛdhye nu, mín núu i kunndii ó kwɔ́sɛɛ ó mánkɔɔnnan kɛ́ bhɔ́ kwɛ́ɛnyako ywáa o lɔ. Ní a kɛ́ i kwɔ́sɛɛ wáati óo wáati lɔ kɛ lá ó mángbasi, ké ii lá ó láka a yɛ́. ³⁷Ní bháalakɛdhye mínnu kunndii kɛ́nan i sɔ́ɔ a mánkɔɔnnan nisɔdhyaanin lé. Tinɲan in ne ní fɔ́la a yɛ ngó, a kunndii ó gbú yáa i cɛ́sii kɛ́ o bháalakɛdhye ŋo yɛ́ lɔ́min o dí a mán. ³⁸Ní a kunndii o kɛ́ i kwɔ́sɛɛ sú ó cɛ́man, wáman lónan ngásiwaati ó lɔ kɛ́nan bháalakɛdhye ŋólu sɔɔ a mankɔɔnnan, o bháalakɛdhye ŋólu yáa i nisɔdhyaa. ³⁹Aa lɔ kó ní bhóndii ó tɛ́ɛkɛ so ŋó nánwaati ó lɔnan, a tɛ táa tó yé ké so ŋó á ló a yɛ bhóo ŋó la. ⁴⁰Álee lɔ́bhyɛnin ŋán kɛ́, kɛ mansɔɔ a tɛ́ i milila wáati mín mán, mɔɔn Dhyénjɛ ó káa nan ó wáati ó lé lɔ.»

Bháalakɛdhyemɛɛ ó yɛ́ɛtii le

Matiyu 24.43-51

⁴¹O wáati ó lɔ, Piyɛli é Ɛnza mánɲaankɛ kó: «Mantii ó, íi saanan míin lála án nee kaamɔɔndhye ŋó lée lú mán bháa, wáman mɔɔn bɛ́?»

⁴²Mantii ó a yawi kó: «Bháalakɛdhye ndéenin hákiiman mínnɛɛn o le, ní a kunndii o wɛ́ɛ lá a lá kɛ a lásii a yɛ bháalakɛdhye ŋó tɔ ólu kunnan ké aa i yɛ sunman ó dí i mán a di wáati lɔ? ⁴³Nisɔdhyaa yáa kɛ́ o bháalakɛdhye ŋó yɛ ní a kunndii o kɛ́nan a sɔɔ o bháala o kɛ́la. ⁴⁴Tó ní fɔ a yɛ tinɲan in né ngó kunndii ó yáa o bháalakɛdhye ŋó lásii a bhóofe ŋó bɛ́ kunnan. ⁴⁵Wáa ní ó bháalakɛdhye ŋó kɛ́ i mili kó: Ngunndii ó táa i kwɔ́sɛɛ jónan, tó kɛ kɛ́ a bháalakɛdhyeɲɔɔn cɛ́man ŋólu ní musoman ŋólu gbasi le, kɛ tó kɛ lɔ́minkɛ, óni kɛ́ gbɛ min kɛ i ɲan ó lamiin, ⁴⁶o bháalakɛdhye ŋó tɛ́ i milila ló mín mán, óni wáati mín man, a kunndii ó káa nan o ló ŋó lé la. A yáa o bháalakɛdhye ŋó bhɔ́ yé kɛ a tɔ́lɔ mɔɔn téemɛɛ ólu sí le.

⁴⁷Bháalakɛdhye mín ŋán a kunndii ó sao o lɔ́, ní a mán í lɔ́ja kɛ o kɛ́, a kunndii o yáa a gbasi koyoongɛ. ⁴⁸Wáa bháalakɛdhye mín mán a kunndii ó sao o lɔ́, ní a kɛ kó kolo nɔ kɛ mín ŋé a gbasili kun ne, o bháalakɛdhye ŋó kunndii o yáa a gbasi dɔ́ɔnin. Kɛ mansɔɔ, shɛ́ɛman ŋwɛ́ɛn kɛ́ɛfa mɔɔn mín mán, shɛ́ɛman ɲáan ɲíin o tíi ó fɛ́. Shɛ́ɛman ŋwɛ́ɛn kɛ́ɛfa mín mán, shɛ́ɛman ɲáan i mánɲaankɛ o tíi ó lá.»

Mɔɔn ólu yáa í wíi ɲɔ́ɔn nganman

Matiyu 10.34-36

⁴⁹«Née nan tá le kɛ lúukolo o ka. Ndɛ́ɛ fɛ ké o tá o lámaannin ndɛ́ɛ kɛ. ⁵⁰Wáa tɔ́lɔyaba míin mankɔɔnnan, ngɔ́lɔtɔnin ɲé kɛ tínmin ó bátizeli ó lɔ.

⁵¹Aa álee kɔ́ɔnnɔn kó né nánin ɲé ni hɛ́lɛ le lé lúukolo ó ka ŋán? Ɔn-ɔn! Ní fɔ́la a yɛ ngó, née nan le kɛ bhyɛmɛɛya le ló mɔɔn ólu cɛ. ⁵²Óo lɔ́ mínngɛ, kɛ tá kwáa le nin man, ní mɔɔn lóo kɛ kɛ́ bhó mín ngɔ́ɔnnɔn, ólu yáa í lɔ́taa. Mɔɔn sawa yáa í wíi mɔɔn fyáa o kanman. Mɔɔn fyáa yáa í wíi mɔɔn sawa ó kanman. ⁵³Fá ó yáa í wíi a dhyénjɛ o kanman, dhyénjɛ o yáa í wíi a fá o kanman. Wóobhaa o yáa í wíi a dhyémuso o kanman, dhyémuso o yáa í wíi a wóobhaa o kanman. Manmuso o yáa í wíi a maanmuso o kanman, maanmuso o yáa í wíi a manmuso o kanman.»

Kɛ tɔɔmansii ólu kɔ́ɔ o lɔ́

Matiyu 16.2-3

⁵⁴Ɛnza ŋé fɔ yaman o yɛ íkwɔ kó: «Ní a kɛ́ sánvin ŋó wiitɔ o yé kɔ́ɔ ŋó lɔ, áa a fɔ́la ko sá né káa nan. Tó aa kɛ cé. ⁵⁵Ní fwɛ́ɛn o kɛ bhyáa kɛ bhɔ́ kíinmoo fán ŋó fɛ, áa fɔ́la kó táa ó yáa gbaan. Tó aa kɛ cé. ⁵⁶Álee fyáangafo ólu! Áa sé kɛ lúukolo óni sángboo o mánfɛɛ kɛ bhɔ́ wáati o ɲánle. Mínnɛɛn le kósɔn ko mínnuu kɛ́la a cɛ́man wáati míin nɔn, a tɛ́ bhɔ́la ólu ɲánle?»

Bhyɛ ŋó ɲíin ní i kɛ́ɛkɛɲɔɔn o le

Matiyu 5.25-26

⁵⁷«Mínnɛɛn le kósɔn kó mínnu téenin ɲé, a tɛ́ o yace myáanla a yɛ́ɛ fɛ kɛ o kɛ? ⁵⁸Ní kó kɛ kɛ́ íle ní mɔɔn lɔ cɛ́, ni o tíi o fɛ kɛ táa ní íle faanman nzó, i lɔ́ja kɛ íle ní ale cɛ́ o bhyɛ ké a mán sé faanman ŋólu fɛ́ yénɔn bhá, ké a kɛ́nan táa í ló faanman ŋólu bhóo, ké ólu kɛ́nan i ló swáasi ólu bhóo, ké swáasi ólu kɛ́nan í bhyaa kaso o lá. ⁵⁹Ní fɔ́la i yɛ ngó i táa bhɔ́ kaso o la ní i mán i yɛ yúu o bɛ́ sala.»

Áa a yóso ólu yɛ́ɛman!

¹O wáati o lɔ, Pilati é Galileka lɔ́lu fáa kɛ i tó faanlɛɛbhɔ o la Ala yɛ, fɔ́ ólu yée o ɲáanminnan faanlɛɛ yée óle. Mɔɔn lɔ́lu nan o lákɛɛ Ɛnza ɲɛn. ²Ɛnza ŋé fɔ i yɛ kó: «Áa i milila kó Galileka mínnuu fáa wé, kó ólu yɛ yúumu o tɛ́ɛ bwó kɛ tínmin Galileka ólu tɔ́ ólu bɛ́ ta ó ka ŋán? ³O tɛ́, ní fɔ́la a yɛ ngó. Wáa ní a mán niminsa kɛ a yóo ólu yɛ́ɛman kɛ fala a yɛ kóyoo ŋólu la, a bɛ́ káa saya kɛ́ o ɲan óle mán. ⁴Silowe sangaso óo bé mɔɔn tá ni sɛ́ɲin mínnu ka kɛ i fáa, áa i milila kó ólu tɛ́ɛ yuumukɛbhaa le lé kɛ tínmin Yeluzalɛmuka ólu ka ŋán? ⁵O tɛ́, Ní fɔ́la a yɛ ngó. Ní a mán niminsa kɛ a yóo ólu yɛ́ɛman, a bɛ́ káa sayakɛ o ɲan o le mán.»

Fígisun dhyéngɛbhɛɛ ó yɛ saanan o

⁶O lɔ, Ɛnza ŋé saanan míin ná i yɛ kó: «Fígisun ndɛ́ɛ cɛ lɔ bhóo a yɛ lɛ́zɛnnvyɛ o lɔ. Ló nɔ́ la, cɛ óo táa dhyé ɲíin fígisun o la, wáa a mán dhyé nzɔ́ɔ a lá. ⁷Oo kɛ mínngɛ, aa fɔ a yɛ bháalakɛdhye ŋo yɛ kó: ‹Né sanɲin sawa lée nín, ní nánla dhyé ɲíinnan fígisun míin nan, wáa né tɛ́ dhyé nzɔ́ɔla a lá. A tɛ́ɛ! A tó kún ndɛ́ a lá sɛɛn o mán.› ⁸Wáa bháalakɛdhye ŋóo fɔ a yɛ kó: ‹Mantii o, a tó yénɔn ɲán. Né yáa jáan shɛ́n kɛ a lamiin kɛ nɔ́ɔn kɛ́ a kɔɔ. ⁹Kɛ́dhyaa a yáa i dhyé ngɛ́ sá gbɛ́ɛ. Ní a mán i dhyé ngɛ́, ii a tɛ́ɛ.› »

Ɛnza ŋé muso lɔ lákɛɛnyala lɔnwɛɛnlilo nɔ́la

¹⁰Lɔnwɛɛnlilo nɔ́ la, Ɛnza ndɛ́ɛ mɔɔn ólu kalanan sɛ́ɛbho nɔ́ kɔɔnnɔn. ¹¹Muso lɔ tɛ́ɛ o ywáa ó lɔ, Lámansayoo né tɛ́ɛ o fɛ kabiini sánɲin tá ní sɛ́ɲin. A tɛ́ wɛ́ɛ a kwɔ́ ó lɔ́kuu, a tɛ tɛ́ sháa í láteenan bhée. ¹²Ɛnza ŋé a yé sán mínnɔn, áa a kíi kɛ́ fɔ a yɛ kó: «Muso o, í wɛ́ɛ kɛ́ɛnya kɛ bhɔ́ i yɛ yangalo o lɔ.» ¹³Aa i bhóo lá muso ó ka. O ywáaninngee ŋó lɔ, a kwɔ́ óo i látee, aa a lamyaan kɛ́ Ala tando.

¹⁴Wáa sɛ́ɛbho ŋó kúnndii ó mwɛ́nnɛn kɛ mansɔɔ Ɛnza ŋé mɔɔn lákɛɛnya lɔnwɛɛnlilo ŋó la. Aa kóman ó tá kɛ́ fɔ yaman ó yɛ kó: «Án ngákan kɛ́ bháala kɛ́ tee wɔ́ɔlɔ le kɔɔnnɔn. Aa nan o ló ŋólu lá, ké aa álee lákɛɛnya. A kɛ́nan nán lɔnwɛɛnlilo ŋó la.»

¹⁵Mantii ó a yawi kó: «Álee fyáangafo le lé! A bɛ́ kée ngéenan tɛ́ a yɛ nisi ó, wáman a yɛ sofɛɛnin ŋó fwéenan kɛ́ táa i sɔ jí lá lɔnwɛɛnlilo ŋó la a? ¹⁶O san ó lɔ muso míin ndɛ́ Bulaaman dhyémuso o lɔ le a, tó Sɔtaannan tɛ́ wɛ́ɛ a sili ní yangalo le kabiini sánɲin tá ní sɛ́ɲin, a tɛmanngan kɛ muso míin nvwée lɔnwɛɛnlilo ŋó la a? ¹⁷Ɛnza ŋé o kóman ó fɔ mínngɛ, a yúu ólu bɛ́ɛ maloya. Yaman ó bɛ́ nisɔ é dhyáa Ɛnza ɲɛ́n kóbhɛɛ kɛnin ŋólu kósɔn.»

Mutaalikoo óni búlufunnunnve ŋó sáanan ólu

Matiyu 13.31-33; Maki 4.30-32

¹⁸Ɛnza ŋé fɔ íkwɔ kó: «Ala yɛ́ Mansaya ó bhɔ́nin ŋé mínnɛɛn le lá? Né káa a lá mínnɛɛn le mán? ¹⁹A bhɔ́nin ŋé yíi lɔ le kóo lá mín ndɔ́ɔ kó mútaali13.19 A koo waa lɔ́ɔ lé o yóo fwée koo., cɛ lɔ́ é o kóo o kée ndá kɛ́ a lo a yɛ nánkwɔ ó lɔ. Áa i fɛ́ɛ kɛ́ bwóɲan kɛ kɛ́ yíi le. Tó sámankɔɔn ólu nan í bhó ngɛ́ a bhóo ólu la.»

Matiyu 13.33

²⁰Ɛnza ŋé fɔ íkwɔ kó: «Né káa Ala yɛ́ Mansaya ó lá mínnɛɛn le mán? ²¹Aa lée óyoo muso lɔ wɛ́ɛ sɛ́ɛ tá kɛ́ a kɛ fálininmuu bhɔɔ tálanjɛ yaceya la, sɛ́ɛ fítiinin ŋóo fálininnɛɛ ó funnun.»

Kóyoongɛbhaa ólu táa lo Ɛliyanan lɔ

Matiyu 7.13-14,21-23

²²Ɛnza ndáatɔ ó Yeluzalɛmu, a tɛ́ɛ sóba óni sódhyenin ŋólu lɔtinminan, ké aa mɔɔn ólu kalanan.

²³Mɔɔn lɔ é a manɲaankɛ kó: «Mantii ó, mɔɔn shɛ́ɛman ndáa kísi a?»

Mantii ó a yawi kó: ²⁴«Aa i lɔ́ja kɛ́ ló lafitiinin ŋó fɛ, kɛ mansɔɔ ni fɔ́la a yɛ ngó mɔɔn shɛ́ɛman yáa ɲánɲiin a mán kɛ́ ló, wáa i táa sé.

²⁵Ní bhóndii ó kɛ́ i wíi kɛ́ la ó sɔ́ɔ sán mínnɔn kɛ́ a tó kɛ́ɛnman, a yáa lámyaan kɛ la ó mángbasi kɛ́ fɔ kó: ‹Mantii ó, lá ó láka án ɲɛ́n.› A yáa a yawi kó: ‹Mán á bhɔ́laa ó lɔ́.›

²⁶O wáati ó lɔ, á yáa fɔ a yɛ kó: ‹Án ŋwɛ́ɛn lɔ́min kɛ́ ní íle, i wɛ́ɛ án ngála án ɲɛn só ó yaman ywáa ólu lɔ.› ²⁷Mantii ó yáa fɔ a yɛ íkwɔ kó: ‹Mán a bhɔ́laa ó lɔ́, álee kóyoongɛbhaa ólu áa bhɔ́ ndɔ́ɔ fɛ́.›

²⁸O ywáa ó lɔ, ní a kɛ́ Bulaaman, ní Shaaka, óni Yangubha óni céla ólu bɛ́ yé Ala yɛ́ Mansaya ó lɔ wáati mínnɔn, kɛ mansɔɔ álee tónin ŋé kɛ́ɛnman, o wáati o lɔ, a yáa kási kɛ́, kɛ a bhóo ó kin. ²⁹Mɔɔn lɔ́lu yáa nan kɛ bhɔ́ kɔ́ɔn ŋó lɔ́, óni teebe ŋó lɔ́, óni kíinmoo o fɛ́, óni nwaanmoo fán ŋó fɛ́. I yáa í síi lɔ́min ó man Ala yɛ́ Mansaya ó lɔ.

³⁰O lɔ, mɔɔn mín núu kwɔ́shaafɛ, ólu yáa kɛ́ ɲɛnmɔɔn ólu le, tó min núu ɲɛnmɔɔn ólu le, ólu yáa kɛ́ kwɔ́shaafɛ bháa ólu le.»

Ɛnza ŋé Yeluzalɛmu kó fɔ́la

Matiyu 23.37-39

³¹O wáati ó lɔ́, Falizɛn nɔ́luu í mangbaa Ɛnza nan kɛ́ fɔ a yɛ kó: «Táa ywáa gbɛ́ɛ lɔ ya ŋó bhyáa, kɛ mansɔɔ Elɔdi é fɛ́ kɛ i fáa.»

³²Ɛnza ŋé i yawi kó: «Aa táa fɔ o kóngowuu ó yɛ kó: Née Lámansa ólu gbɛ́nan kɛ bhɔ́ mɔɔn ólu fɛ́, kɛ́ yaangalotɔ ólu kɛ́ɛnya bí óni síin, óni a tee sawaɲɔɔnlo ŋó, né yáa wɛ́ɛ ɲɛ́n bháala ó la. ³³Wáa dhyaalagboya lée né táa o lé ní ɲɛ́n sháa ó ka bí, síin óni siinngɛnɛn, kɛ mansɔɔ céla ó kákan kɛ́ saya kɛ́ Yeluzalɛmu le.

³⁴E, Yeluzalɛmu, Yeluzalɛmu, íle mín ŋé Ala yɛ céla ólu fáala óni Ala yɛ mɔɔn bhyáashaanin ŋólu bwónan káwa la, síɲan yée lée nín ní fɛ́ kɛ a ládhyɛ óyoo shishɛ óo a dhyé ŋólu ladhyɛla a káwa ó kɔ́ɔ ɲán mín mán, Wáa a mán sɔ́n! ³⁵Oo lɔ mínngɛ, a yɛ bhó ŋó lɔkoo ɲáan tó. Ní fɔ́la a yɛ ngó: a táa ɲé bhée fɔ ló mínnan a káa fɔ kó: Mɔɔn mín ŋé nánla Mantii ó tɔ́ɔla, tando é ó yɛ.»

Ɛnza ŋé yaangalotɔ lɔ lákɛɛnya lɔnwɛɛnlilo ó la í kwɔ́

¹Lɔnwɛɛnlilo nɔ la, Ɛnza ŋé táa Falizɛn ŋólu yɛ kunndii ó lɔ yɛ lú ó mán kɛ́ lɔ́minkɛ. Mɔɔn mínnu tɛ́ɛ yé, ólu tɛ́ɛ a lakɔɔsila. ²Cɛ lɔ́ tɛ́ɛ Ɛnza ɲánkɔɔ, fúunnvuu yangalo lé tɛ́ɛ o lá. ³Ɛnza ŋé kóman ó tá kɛ sɛliya kaamɔɔn ólu ní Falizɛn ŋólu mánɲaankɛ kó: «A láanin ɲé kɛ yaangalotɔ ó lákɛɛnya lɔnwɛɛnlilo ŋó la á, wáman a laanin ndɛ́?»

⁴Wáa i mán a yawi. O wáati ó lɔ, Ɛnza í bhóo túu yaangalotɔ ó la kɛ a lákɛɛnya. O kwɔ́, cɛ mín ndɛ́manngɛnnɛn Ɛnza ŋé fɔ ó yɛ kó: «Ii sé kɛ táa.» ⁵O kwɔ́ Ɛnza ŋé fɔ i yɛ kó: «Yɛ́ɛtii é a cɛ́man ní a dhyénjɛ, wáman a yɛ nisi o kɛ́ i bé kɔlɔ ŋó kɔ́ɔnnɔn lɔnwɛɛnlilo ŋó la, a táa i lateeya kɛ táa ó lábhɔ jónan?»

⁶I man sé kɛ ó ɲaankɛli ó yawi.

Yɛ́ɛlɔbwoɲanbhaa ólu yáa i manyii

⁷Ɛnza ŋé yé mínngɛ óo i wɛɛ mɔɔn mínnu kíi kɛ́nan lɔ́minkɛlaa ó lɔ, ko óluu siilaabhɛɛ ólu lɔtɔnmɔn nan. Áa saanan miin nvɔ́ i yɛ kó: ⁸«Ní mɔɔn lɔ kɛ́ i kíi fúusiilaa lɔ lɔ́min o mán, í kɛ́nan í síi siilaabhɛɛ ó lɔ. Kɛ́dhyaa, mɔɔn kíinin ŋólu cɛ́man, i wɛ́ɛ mɔɔn gbɛ́ɛ kíi íi mín nvísayala íle lé. ⁹Mɔɔn mín ŋé a fyáa ó bɛ́ kíi, ní ó kɛ́nan fɔ i yɛ kó íi i wíi kɛ́ siilaa o dí ó tíi ó mán, o lɔ, íle yáa wíi ní maloya lé, kɛ́ táa í síi bɛ́ kwɔ́man. ¹⁰Wáa ní i kɛ́ i kíi, táa i síi siilaa lɔ lɔ́ bɛ́ kwɔ́man, mɔɔn mín ŋwɛ́ɛn i kíi ní ó kɛ́nan wáati mínnɔn, o waa a fɔ i yɛ kó: ‹Ndwáanva, nan i síi ɲɛ́n!› O wáati ó lɔ, i yáa kunnanwee nzɔ́ɔ i lɔ́minkɛ ɲɔ́ɔn ŋólu cɛ́man. ¹¹Tinɲan in né, ní mɔɔn óo mɔɔn kɛ́ a yɛ́ɛ lɔ́bwoɲan, ó tíi o yáa i mányii shɔɔ; wáa ní mɔɔn óo mɔɔn kɛ́ a yɛ́ɛ mányii, Ala yáa ó tíi ó bwóɲan.»

¹²Cɛ mín ndɛ́ wɛ́ɛ Ɛnza ngíi lɔ́min ó mán, áa fɔ o yɛ kó: «Ní i kɛ́ sunmanmba lɔ́bhyɛ mɔɔn ólu yɛ, i kɛ́nan i tɛ́ɛcɛ ólu, wáman i bhádhye ŋólu, wáman kabhyaa ŋólu, wáman i síiɲɔɔn nanfootii ólu kíi. Kɛ mansɔɔ íi sé kɛ́ i kíi lɔ́min mán kɛ i yɛ́ yúu ó saa. ¹³Wáa, ní i fɛ kɛ sunman dí mɔɔn ólu mán, ii faannda ŋólu óni séngee ŋólu óni nanmaannin ŋólu óni fyóondɔ ólu kíi. ¹⁴Ní i kɛ o kɛ́, i yáa lwáau sɔ́ɔ, kɛ mansɔɔ i táa sé kɛ i yɛ yúu ó saa, Wáa Ala yáa í saa o dí síin mɔɔn téenin ŋólu kúunno ŋó lá.»

Saanan míin lá lɔ́min ó ka

Matiyu 22.1-10

¹⁵Mɔɔn mínnu tɛ́ɛ ni ale lɔ́min kɛ́ o lá, olu o kóman ó myɛ́n mínngɛ, o kée ŋé Ɛnza mánɲaankɛ kó: «Mɔɔn mínnu káa lɔ́minkɛ Ala yɛ́ mansaya ó lɔ, nisɔdhyaa é ólu yɛ́!»

¹⁶Ɛnza ŋé a yawi kó: «Ló nɔ lá cɛ lɔ́ tɛ́wɛɛ sunmanmba lɔ́bhyɛ kɛ́ mɔɔn shɛ́ɛman ngíi. ¹⁷Lɔ́minkɛ wáati óo sé mínngɛ, aa a yɛ bháalakɛdhye ŋó bhyáashaa kɛ́ táa mɔɔn kíinin ŋólu kíi kó: ‹Aa nan sísan, sunman ŋó bɛ́ wɛ́ɛ í lɔ́bhyɛ.› ¹⁸Wáa lɔ́min kó óo fɔ́ mɔɔn mínnu yɛ ólu bɛ́ɛ yafaman dɛ́li kée ngée. Mɔɔn jónan óo fɔ bháalakɛdhye ŋó yɛ kó: ‹Né wɛ́ɛ sɛɛn lɔ́ sá, né kɛ́ɛ tɛ́ɛ o mánfɛɛ. Ní i dɛ́lila, táa fɔ a yɛ kó aa yafa né mán.› ¹⁹Lɔ́gbɛɛ é fɔ a yɛ kó: ‹Né wɛ́ɛ sɛɛnkɛnisi tá nzá, ní táala bháala kɛ́la ólu la kɛ í mánfɛɛ. Ní i dɛ́lila, táa fɔ a yɛ kó aa yafa né mán.› ²⁰Lɔ́gbɛɛ é fɔ a yɛ kó: ‹Né wɛ́ɛ muso fúu kɛ kwáalenin, o lé kósɔn né táa sé kɛ́ táa.›

²¹Bháalakɛdhye ŋó i kwɔ́sɛɛ kɛ táa o bɛ́ ɲánfɔ a kunndii ó yɛ. A kunndii ó mwɛ́nnɛn kɛ fɔ a yɛ kó: ‹I lateeya kɛ táa só ó yaman ywáa ólu lɔ, óni sháaba ólu la, kɛ́ faannda ŋólu ní nanmaannin ŋólu ní fyóondɔ ólu ní sengee ŋólu kíi kɛ́nan ni íle yánun.› ²²Bháalakɛdhye ŋó fɔ a yɛ kó: Mantii ó, ‹Íi mín nvɔ́ né wɛ́ɛ ó kɛ, wáa bhó ŋó mán fá bhá.› ²³Bháalakɛdhye ŋó kunndii ó fɔ a yɛ kó: ‹Bhɔ́ kɛ́ táa sháafɛɛ ŋólu lá óni só ó láfɛ tóo ólu la, i kɛ́ mɔɔn mínnu sɔ́ɔ yé, ii kó bɛ́ kɛ ké ii nan, sáan ɲɛ́n bhó ŋó yáa fá. ²⁴Ní fɔ́la a yɛ ngó mɔɔn mínnu tɛ́wɛɛ kíi jónan, ó lɔ táa né yɛ́ lɔ́min ó lɔ lɔ́ɔ.› »

Ɛnza ɲɛ́n kaamɔɔndhye ŋó kákan kɛ kó mínnu kɛ

Matiyu 10.37-38

²⁵Yaman ó táatɔ ó ni Ɛnza né. Ɛnza ŋé i ɲán yɛ́ɛman i lɔ, tó kɛ fɔ i yɛ kó: ²⁶«Ní mɔɔn óo mɔɔn kɛ́nan né mán, ní a lɔ́bhɛnin ndɛ́ kɛ i bá a fá lɔ, óni a wóobhaa lɔ, óni a muso, óni a dhyé ŋólu, óni a bhádhyemannjɛ ólu, óni a bhádhyemusoman ŋólu, óni a gbú ní o lɔ, o tíi ó tɛ́ sé kɛ kɛ́ né yɛ kaamɔɔndhye né. ²⁷Ní mɔɔn mín mán a yɛ gbáanɲii ó tá kɛ bhyáa né kwɔ́, o tíi ó tɛ́ sé kɛ kɛ́ né yɛ kaamɔɔndhye né.

²⁸A cɛ́man ní mɔɔn lɔ é fɛ kɛ sangaso já nɔ, a yáa i sii ó tún kɛ a lɔsaa ó yacesii kɛ a mánfɛɛ ní a yɛ wɛ́ɛ ó yáa sé kɛ ó bháala ó lábha. ²⁹Ni ó tɛ́, ní a kɛ ó sangaso ó zúsii, ní a man sé kɛ́ a lábha, mɔɔn mínnu káa ó yé, ólu yáa yɛ́ɛ bhɔ́ a lɔ, ³⁰kɛ́ fɔ kó: ‹Cɛ míin ŋwɛ́ɛn bhó nɔ́ ó lámyaan, wáa a man sé kɛ a lábha.›

³¹Ni mansacɛ lɔ kɛ i wíi kó a kɛ́ɛ tɛ́ɛ kɛɛ bé mansacɛ gbɛ́ɛ ka, aa í síila lé ótun kɛ́ í míli kɛ́ mánfɛɛ ni a yáa sé cɛ wáa mwaa (20.000) ŋó kɛlɛla ní a yɛ cɛ wáa tá (10.000) ŋó lé. ³²Ní a kɛ́ táa yé kó a tɛ́ sé, aa yáa céla bhyáa kɛ́ táa ɲíin a fɛ kó ii kɛɛ o lábhyaa ké ii ywáaja nɔn. ³³O ɲán ó mán álee cɛ́man ní mɔɔn mín mán i bá a bhóofe ŋólu lɔ o tɛ́ sé kɛ́la né yɛ kaamɔɔndhye né.»

Ní Kɔɔ ó tínminya ó kɛ bhɔ́ a lá

Matiyu 5.13; Maki 9.50

³⁴«Kɔɔ ó fémɛɛ le lé, wáa ni kɔɔ ó tínminya ó kɛ́ bhɔ́ a lá, mínnɛɛn lée sé kɛ́ a tínminya bhée? ³⁵O sán ó lɔ, a tɛ́ sé kɛ́la nɔ́ɔn le, a tɛ́ fósi ɲán lúukolo ó mán. Aa í láfii lá kɛ́ɛnman le. Tóo é mín ngún kɛ́ myɛ́nninkɛ, o á myɛ́nninkɛ.»

Saanan míin la saa túunnin ŋó ka

Matiyu 18.12-14

¹Nísɔɔnmyaanbhaa ólu ní kóyoongɛbhaa ólu bɛ́ tɛ́ɛ i mangbaala Ɛnza nan kɛ a yɛ kóman ó lɔ́myɛn. ²Falizɛn ŋólu ní Sɛliya kaamɔɔn ólu tɛ́ɛ i mánkomankomanla. I tɛ́ɛ fɔ́la kó: «Cɛ míin ŋé yuumukɛbhaa ólu myaanla cɛ́ɛne kɛ lɔ́minkɛ ní íle.»

³Wáa Ɛnza ŋé saanan lɔ lá i yɛ́ kó:

⁴«Mɔɔn mínnɛɛn lée á sɛ́ɛ lɔ, tó saa kɛnmɛn é a bhóo, ni o kée ngɛ́ túun, a táa a tɔ bíkɔɔnndɔ ni kɔɔnndɔ ŋólu bhyáanin ndó la dhyɛ́ ó ka kɛ́ táa kée ŋó ɲíinnaa lɔ fɔ kɛ́ a yé a? ⁵Ni a kɛ a yé wáati mínnɔn, aa a tá kɛ a lá i kanman ni nisɔdhyaa lé. ⁶Ni a kɛ í kwɔ́sɛɛ kɛ sé lúman wáati mínnɔn, aa a tɛ́ɛcɛ ólu ní a siiɲɔɔn ólu kíi kɛ fɔ i yɛ kó: ‹Án ni án nisɔdhyaa ɲɔ́ɔn nvɛ́, kɛ mansɔɔ ŋwɛ́ɛn ɲɛ́n saa túunnin ŋó yé.› ⁷O ɲán ó mán ní fɔ́la a yɛ ngó ní yuumutɔ ó kée ngɛ́ díminsa kɛ fála a yɛ kóyoo ŋólu la kɛ a yóo ó yɛ́ɛman, nisɔdhyaa yáa kɛ́ sángboo ó lɔ o tíi ó kósɔn, kɛ tínmin mɔɔnteenin bíkɔɔnndɔ ni kɔɔnndɔ mínnu mánko tɛ́ díminsali ó lá.»

Saanan míin lá wɛ́ɛgbɛ túunnin ŋó ka

⁸«Wáman ní wɛ́ɛgbɛ dhyé ndá ngɛ́ kɛ muso lɔ́ bhóo, ní ó kée ngɛ́ túun, a tɛ́ laman ŋó lamaan kɛ bhó ŋó máncɛ kɛ ɲíin cɛ́ɛne fɔ kɛ a yé a? ⁹Ní a kɛ yé wáati mínnɔn, a yáa a táamanɲɔɔn ólu ní a siiɲɔɔn ólu kíi kɛ fɔ i yɛ kó: ‹Án ni án nisɔdhyaa ɲɔ́ɔn nvɛ́, kɛ mansɔɔ né yɛ wɛ́ɛgbɛ dhyé ngée mín ndɛ́ wɛ́ɛ túun, né wɛ́ɛ ó yé.› ¹⁰O ɲán ó mán, ní fɔ́la a yɛ ngó ní yuumutɔ kée ngɛ́ díminsa kɛ́ fála a yɛ kóyoo ŋólu la kɛ a yóo ó yɛ́ɛman, o ɲán ó mán nisɔdhyaa ó yáa kɛ́ Ala yɛ malɛɛka ólu cɛ́man o tíi ó kósɔn.»

Saanan míin lá dhyé ndúunnin ŋó ka tó a wɛɛ yé

¹¹Ɛnza ŋé fɔ íkwɔ kó: «Dhyénjɛ fyáa tɛ́ɛ cɛ lɔ bhóo. ¹²Lɔ́ɔcɛ man ŋóo fɔ a fácɛ yɛ kó: ‹Nvá, né káa wɛ́ɛ mín nzɔ́ɔ í cɛ́n ó lɔ, o dí né mán.› Oo kɛ́ mínngɛ a fá é a yɛ nanfoo ó lɔ́taa i cɛ. ¹³Tée dáman tínminnin ŋó kwɔ́, lɔ́ɔcɛ man ŋó fé mínnu sɔ́ɔ cɛ́n ó lɔ, aa ólu fele kɛ táa ní ó wɛ́ɛ ó lé yamaan já nɔ lɔ, kɛ a bɛ́ lɔ cáan kakaaya ó lɔ. ¹⁴A yɛ wɛ́ɛ óo wɛɛ wáati mínnɔn, kɔ́ɔnba é ló o yamaan ó lɔ, a yɛ lɔ́min ó dɛ́sɛ. ¹⁵A táa kɛ́ ó yamaan ó lúudhye ŋó lɔ́ yɛ́ bháalakɛ dhyé né, óo a tá kɛ a yɛ́ gbóyoonin ŋólu kúnnansii. ¹⁶A tɛ́ɛfɛ kɛ gbóyoonin ŋólu yɛ lɔ́min ó lɔ lɔ́ɔ kɔ́ɔn ó bhóo, wáa mɔɔn sí tɛ tɛ́ ó dila a mán. ¹⁷Aa i míli o wáati ó lɔ́ kɛ́ fɔ i kɔɔnnɔn kó: ‹Bháalakɛdhye nzhɛ́ɛman ŋé né fá bhóo, óluu lɔ́minkɛla fɔ kɛ́ a tɔ́ tó, née káa fáa kɔ́ɔn lá ya.› ¹⁸Né káa ŋwíi kɛ táa nvá fɛ yé kɛ fɔ a yɛ ngó: ‹Nvá, né wɛ́ɛ Ala yáacɛ tá, kɛ íle yáacɛ tá. ¹⁹Né mánngan kɛ kíi bhée kó í dhyé. Ii né myaan óyoo í yɛ bháalakɛdhye.› ²⁰Aa i wíi kɛ́ sháa ó tá kɛ́ táa a fácɛ saala.

Kɛ a tó ywáaja nɔn, a fácɛ é a yé, a hínnɛn é ló a lɔ. Aa bwée kɛ́ táa í fínin a dhyénjɛ mán. ²¹Aa fɔ a fácɛ yɛ kó: ‹Nva, né wɛ́ɛ Ala yáacɛ tá kɛ íle yáacɛ tá. Né mánngan kɛ kíi bhée kó i dhyénjɛ.› ²²Wáa a fá é fɔ a yɛ bháalakɛdhye ŋólu yɛ kó: ‹Aa í lateeya kɛ́nan ni deeke ó bɛ́ lɔ cɛ́ɛ ŋó le, kɛ́ a bhyaa a kannan. Aa bhóolanɛɛ bhyáa a bhóo ó la kɛ sawaa ló a sénan. ²³Aa nan ní nisidhye nvánin yɛ́ɛla óle kɛ́ a fáa. Án ní lɔ́ɔ kɛ án ɲáanli, ²⁴kɛ mansɔɔ né dhyé míin mánfɛɛ nín, a tɛ́ wɛ́ɛ sayakɛ, a wɛ́ɛ kúun. A tɛ́wɛɛ túun, ŋwɛ́ɛn a yé.› Ii i ɲáanli kɛ i nisɔdhyaa.

²⁵O wáati o lɔ, dhyénjɛ jónan ó tɛ́ɛ sɛɛn mán. A kwɔ́sɛɛtɔ ó, aa sunɲan lú ó lá mínngɛ, aa lɔnakan ŋó myɛ́n, óni lɔngɛkan ŋó. ²⁶Aa bháalakɛdhye ŋólu kée ngíi kɛ́ a mánɲaankɛ kó mínnɛɛn lée wɛ́ɛ kɛ́ lúman. ²⁷Bháalakɛdhye ŋó a yawi kó: ‹I lɔ́ɔcɛ wɛ́ɛ í kwɔ́sɛɛ kɛ́ nán, i fá wɛ́ɛ nisidhye nvánin yɛ́ɛla o kée nváa, kɛ mansɔɔ a wɛ́ɛ í kwɔ́sɛɛ kɛ́ɛnya lɔ.›

²⁸Oo kɛ́ mínngɛ dhyénjɛ jónan óo mwɛ́nnɛn, a tɛ́ tɛfɛ kɛ́ ló lú ó mán. A fá é bhɔ́ kɛ táa a dɛ́li kó aa ló. ²⁹Wáa áa fɔ a fá yɛ kó: ‹A mánfɛɛ, né sánɲin shɛ́ɛman née nín, née bháala kɛ́la i yɛ. Né mán mbá i yɛ kóman o kée mán bha. Yáanin i mán bhamuso kée ndí né mán bhá, ké né ni ndwáanva ólu a án ɲáanli ɲɔ́ɔn nvɛ́. ³⁰Wáa í dhyé míin mánfɛɛ nín, a wɛ́ɛ táa i yɛ nanfoo ó bɛ́ cáan ní sínngbiiba ólu le. Ale kósɔn íi nisidhye nvánin yɛ́ɛla ó fáa a yɛ.› ³¹Wáa a fá é fɔ a yɛ kó: ‹Nyé ŋó, íi né tɔ́ɔfɛ wáati bɛ́, fé mínnuu né bhóo, ó bɛ́ é í tá lé le. ³²Wáa án ngákan kɛ án nisɔdhyaa kɛ́ án ɲáanli, kɛ mansɔɔ í lɔ́ɔcɛ mín ŋé nín, a tɛ wɛ́ɛ túun, wáa a wɛɛ yé, a wɛɛ kɛ óyoo a wɛɛ sayakɛ kɛ kúun.› »

Ɲɛ́nmɔɔn ó yɛ́ saanan ó

¹Ɛnza ŋé fɔ a yɛ kaamɔɔndhye ŋólu yɛ kó: «Nanfootii lɔ tɛ́ɛ yé. A tɛ wɛɛ mɔɔn lɔ tá kɛ́ bhyáa a yɛ nanfoo ó kunnan. Mɔɔn ólu nan fɔ a kunndii ó yɛ kó cɛ míin i yɛ nanfoo ó kunnan, aa a mán kɛ a cáan. ²A kunndii óo a kíi kɛ́ fɔ a yɛ kó: ‹Ní mín myɛnnan í yɛ kó ó lɔ, o mán ndí. Ii bháala ó kɛ́la ɲán mín mán, nan o ɲánfɔ né yɛ, kɛ mansɔɔ í tɛ́ sé kɛ tó né yɛ nanfoo ó kunnan bhée.› ³Nanfoo kunnansiibhaa óo fɔ́ ko: ‹Né káa mínnɛɛn lé kɛ, kɛ mansɔɔ né kunndii ó káa né bhɔ́ a yɛ nanfoo ó kunnan. Faan tɛ́ né lɔ kɛ́ sɛɛn kɛ. Kɛ dɛ́lili kɛ, ó yáa kɛ́ maloya le né bhóo. ⁴Né káa mínngɛ ní o lɔ, ní a kɛ né gbɛ́ kɛ bhɔ́ bháala míin ngunnan, ké mɔɔn lɔ́lu a né labhyɛ i bhóo lúman.›

⁵O lɔ, a kunndiicɛ o yɛ yúu tɛ́ɛ mɔɔn óo mɔɔn lá, aa ólu bɛ́ kíi kée ngée. Míin nan jónan, aa ó mánɲaankɛ kó: ‹Né kunndiicɛ ó yɛ́ yúu mín ŋé í la, yée lée o le?› ⁶Óo fɔ kó: ‹Túu gbóngbo ngɛnmɛn.› Áa fɔ o yɛ kó: ‹I yɛ yúu ta sɛ́wɛ ó mánfɛɛ nín, i síi kɛ túu gbóngbo bíloolu sɛ́wɛ jónan.› ⁷O kwɔ́, aa fɔ lɔ́gbɛɛ yɛ kó: ‹Ile wɛ́, yée lée ile tá o le?› Oo fɔ kó: ‹Béle16.7 Béle ó lée kɛ́la faanimuu ó lé. bhɔɔ kɛnmɛn.› Aa fɔ o yɛ kó: ‹I yɛ yúu ta sɛ́wɛ ó mánfɛɛ nín, i síi kɛ bhɔɔ bísɛɲin nzɛ́wɛ.›

⁸A kunndiicɛ óo o kóman ó myɛ́n aa nanfoo kunnansiibhaa kóyoongɛbhaa ó tando a yɛ gée ŋó kósɔn. Kɛ mansɔɔ dínɲan mɔɔn ólu á ɲɔɔn myaan séɲan ó lɔ kɛ tínmin Ala dhyé ŋólu ka mínnuu kɛ́ɛnɲan ó lɔ.»

Nanfoo ó myáanseɲan ó

⁹Ɛnza ngo: «Ní fɔ́la a yɛ ngó aa a táamanɲɔɔn ólu ɲíinnan dínɲan nanfooyoo ŋó le cɛ́man kɛ mɔɔn ólu dhyɛman, kɛ twáanva ɲiin ó lé, ní a kɛ́wɛɛ wáati mínnɔn, ké ólu a sé kɛ a labhyɛ ɛliyanan ó lɔ́. ¹⁰Mɔɔn mín ngɛ kɛ mɔɔn téenin né kófitiinin ŋó lɔ́, oo mɔɔn téenin né lé kóba ó lɔ́ ikwɔ. Wáa ní mɔɔn mín ngɛ kɛ mɔɔn téemɛɛ le kófitiinin ŋó lɔ́, oo mɔɔn téemɛɛ le lé kóba ó lɔ́ ikwɔ. ¹¹Ni álee mán kɛ́ mɔɔnbhɛɛ lé dínɲan nanfooyoo nɔ́ɔnnin ngó o lɔ, yɛ né káa lá álee la kɛ a yɛ nanfoobhɛɛ o kɛ́ɛfa álee mán? ¹²Ni álee mán kɛ́ mɔɔn téenin né mɔɔn olu ta wɛ́ɛ ó tá sháafɛ, míin nan kɛ álee gbúlu tá o le yɛ́ɛtii káa ó di a mán?

¹³Mɔɔn sí tɛ sé kɛ bháalakɛ kunndii fyáa yɛ, kɛ mansɔɔ kée ɲáan gbóya a yɛ a tɔ kée ŋó yáa dhyáa a yɛ, wáman a yáa í gbɛ́nnɛn kée ŋó mán kɛ í mán bhɔ́ a tɔ kée ŋó la. A tɛ́ sé kɛ bháalakɛ Ala yɛ, tó kɛ bháalakɛ nanfoo ó yɛ ikwɔ.»

Ɛnza ɲɛ́n ládhyeli lɔ́lu

Matiyu 11.12-13; 5.31-32; Maki 10.11-12

¹⁴Falizɛn ŋólu ó kóman ólu myɛ́n mínngɛ, i tɛ́ɛ yɛ́ɛkɛla Ɛnza mán, kɛ mansɔɔ nanfoo ó ko tɛ́ɛ dí í yɛ. ¹⁵Wáa Ɛnza ŋé fɔ i yɛ kó: «Áa a yɛ́ɛ kɛ́la mɔɔnteenin nu lé mɔɔn ólu ɲanla, wáa Ala á yósokun ŋó lɔ, kɛ mansɔɔ Adamandhye ŋólu fé mín yacela fémba lé, óo fé nɔ́ɔnnin né le Ala ɲánla.

¹⁶Ɛnza ngó: Kɛ́ tá Musa yɛ sɛliya, óni céla ólu yɛ kitabu ó kóman ó man, fɔ́ kɛ́nan sé Yaya Bátizelikɛbhaa yɛ wáati ó mán. Kɛ tá o mán, Ala yɛ́ Mansaya sanmankanmɛɛ óo í lásela. Óni bɛ́ é fɛ kɛ́ i lɔ́ja kɛ ló o mansaya ó lɔ.

¹⁷Sángboo óni lúukolo ó yáa tínmin, wáa sɛliya ó sɛwɛli kóo fítiinin ŋó kée ndáa bé.

¹⁸Cɛ óo cɛ kɛ́ í bá a muso lɔ tó kɛ́ muso gbɛ́ɛ tá o tíi ó ɲɔnmɔɔnya le kɛ́la wé. Ní cɛ óo cɛ kɛ muso fúusanin ŋó fúu kɛ, o tíi ó ɲɔnmɔɔnya le kɛ́la wé.»

Nanfootii óni Lazali yɛ ko ó

¹⁹«Nanfootii lɔ tɛ́ɛ yé, a tɛ́ɛ i féndiiya faani le lónan kɛ́ faanman nɔ́mi kɛ kɛ́ i ɲáanli ló ŋóo ló. ²⁰Faannda nɔ́ tɛ́ɛ yé a tɔ́ɔ kó Lazali. A fási ó ywáa bɛ́ tɛ́wɛɛ kɛ lá le. A tɛ́ɛ í la lá nanfootii ó yɛ bhónaa ó lé lá. ²¹Lɔ́min múumuu mínnu tɛ́ɛ bénan nanfootii ó yɛ tabɛli ó kɔɔ, a tɛ́ɛfɛ kɛ́ ólu lɔɔ, wáa a tɛ tɛ́ ó sɔ́ɔla kɛ́ ó lɔɔ. Ó kwɔ́, wúu ólu tɛ́ɛ nánla kɛ a yɛ lá ólu mánnɔn.

²²Faannda ŋóo sayakɛ, malɛɛka ólu a tá kɛ táa siilaa di a mán Bulaaman tɔ́ɔfɛ. Nanfootii óo sayakɛ, íi a sú ló. ²³Nanfootii ó tɛ́ɛ tɔ́lɔya ó lɔ́ yaananman ó lɔ́, aa i ɲánla yɛ́ɛ kɛ Bulaaman yé ywáaja nɔn ké Lazali é a tɔ́ɔfɛ. ²⁴O wáati ó lɔ, nanfootii ó gbáa kɛ fɔ́ ko: ‹Nvá Bulaaman, hínnɛn né la. A fɔ Lazali yɛ kó aa táa a bhóokwɛɛnnin ŋó sú jí ó lɔ kɛ́nan né kan ŋó láɲiin, kɛ mansɔɔ né tɔ́lɔyanin ɲé kóyoongɛ tá ó kɔɔnnɔn.›

²⁵Wáa Bulaaman é fɔ a yɛ kó: ‹Nyé, i gbú á lɔ ŋóo i tɛ́ɛ dínɲan lɔ mínngɛ, fémɛɛ shɛ́ɛman ndɛ́ɛ i bhóo, ké Lazali é sɛɛ ó lɔ́. Sísan, Lazali é hɛ́lɛ o lɔ, ílee sɛɛ ó lɔ́. ²⁶Yáanin o tɛ́, jáanbelebeleba é án né ní álee cɛ. O lɔ, ni mɔɔn mín ŋé fɛ́ kɛ bhɔ́ yánun kɛ táa a fɛ́ yé, o kɛ́nan sé kɛ táa, óni ké mɔɔn lɔ́ kɛ́nan sé kɛ bhɔ́ álee fɛ́ yé kɛ́nan an née fɛ́ ya.› ²⁷Nanfootii óo fɔ kó: ‹O sán ó lɔ, nvá, ní i dɛ́lila, Lazali bhyáashaa kɛ táa né yɛ lúmanmɔɔn ólu fɛ́ yé, ²⁸kɛ mansɔɔ bhádhye nóo é né fɛ́ yé. A tó ké Lazali á táa ólu lasowi, ké ólu kɛ́nan nan ó tɔ́lɔya ywáa míin nɔn.›

²⁹Bulaaman é a yawi kó: ‹Musa yɛ sɛliya óni céla ólu yɛ sɛ́wɛ ólu é i bhóo, ii ólu kɔ́ɔnnɔn kóman ó lɔ́myɛn.› ³⁰Nanfootii ó kó: ‹Ɔn-ɔn, o táa bhyɛ nvá Bulaaman, wáa ní mɔɔn sayakɛnin nɔ́ kɛ kúun kɛ táa kóman i fɛ́, i yáa díminsa i yɛ́ kóyoo ŋólu la.› ³¹Bulaaman é wɛ́ɛ kɛ fɔ a yɛ kó: ‹Ní i mán Musa yɛ sɛliya óni céla ólu yɛ sɛ́wɛ ólu kɔ́ɔnnɔn kóman o lɔ́myɛn, yáanin mɔɔn sayakɛnin nɔ́ kɛ kúun kɛ táa kóman i yɛ, i táa lá o la.› »

Yafali ó kúnnɔn cáan ó

Matiyu 18.6-7,21-22; Maki 9.42

¹Ɛnza ŋé fɔ a yɛ kaamɔɔndhye ŋólu yɛ kó: «Dhyaalagboya lée a le lɔ́lu yáa kɛ sɔ́ɔbu le kɛ́ mɔɔn ólu kúnnɔn cáan, wáa mɔɔn mín ngáa kɛ o sɔ́ɔbu óle, kunnangboya é ó tíi ó yɛ. ²Ní mɔɔn lɔ kɛ kɛ sɔ́ɔbu le kɛ́ dhyémuu míin ngée ngúnnɔn cáan kɛ́ a láfii, mín ŋán físaa o tíi ó mán o lée kɛ káwaguun mbelebeleba lɔ gúun a kannan kɛ a lafii kɔɔji ó lɔ. ³Áa a yɛ́ɛkɔɔsi o kó ólu mán.

Ní í bhádhye ŋó lɔ kɛ́ i yáacɛ tá, íi a kíi kɛ́ a yɛ fii ó yáa a lá. Ní a kɛ díminsa, yafa a mán. ⁴Ní a kɛ i yáacɛ tá síɲan wóonvyaa kɛ́ tée kée ŋó kɔɔnnɔn, ní a kɛ́ i kwɔ́sɛɛ i mán a síɲan wóonvyaa ó bɛ́ lɔ kó íi yafa a mán, kó ale wɛɛ díminsa, íi yafa a mán.»

Ɛnza ɲɛn kaamɔɔndhye ŋólu yɛ lánanya ó

Matiyu 17.20

⁵Ɛnza ɲɛn céladhye ŋólu fɔ a yɛ kó: «Mantii ó, lɔ́ fala án ɲɛ lánanya ó ka.»

⁶Mantii ó fɔ i yɛ kó: «Ní a yɛ lánanya ó bwóɲan ó tɛ́ɛkɛ óyoo mútaalikoo o, a tɛ́ɛnan sé fɔ́la yíiba míin ɲɛn kó aa bwɔ́ kɛ bhɔ́ ya kɛ́ táa í gbáan kɔɔji ó lɔ. A tɛ́ɛnan sɔ́n ó mán.

⁷Ní bháalakɛdhye ngɛ́ kɛ a lɔ́ bhóo, ní áa sɛ́ɛn kɛ́la í yɛ, wáman ní aa i yɛ bhyáa ŋólu kunnansiila, ní a kɛ́ i kwɔ́sɛɛ kɛ bhɔ́ sɛɛn mán wáati mínnɔn, a yáa fɔ a yɛ kó aa í lateeya kɛ́nan lɔ́minkɛ! ⁸Ɔn-ɔn. A káa fɔ ó bháalakɛdhye ŋó yɛ le kó: Aa í lɔ́bhyɛ kɛ́nan a yɛ súnman ŋó dí a mán. Ní ale kɛ́wɛɛ lɔ́minkɛ ó la wáati mínnɔn, o kwɔ́ bháalakɛdhye ŋóo tó lɔ́min kɛ́la kɛ mínnin kɛ. ⁹Bháalakɛdhye ŋó kunndii ó yáa a tɔ́ɔɲwaan fɔ a yɛ bháala kɛ́nin ŋó kósɔn an? Mán lá o la. ¹⁰O ɲán ó mán, álee lu, bháala mín ŋwɛ́ɛn kɛ́ɛfa álee mán ní a kɛ́wɛɛ ó kɛ́la, aa fɔ kó: Án néelu án ni bháalakɛdhye née lú le cé. Án ngákan kɛ mín ngɛ́ án ŋwɛ́ɛn ó lé kɛ.»

Ɛnza ŋé kwaantɔ tá nákɛɛnya la

¹¹Ɛnza ndɛ́ɛ táala Yeluzalɛmu, aa Samali mala óni Galile mala ó lɔ́tinmin. ¹²A ló ndɔ́ ó só ó kɔɔnnɔn, kwáantɔ tá ŋé nan a lɔ́bhyɛ. Ii í lɔ́ ywáaja nɔn kɛ́ cɛ dɔ́ɔnin ndó ile ní Ɛnza njɛ́. ¹³Íi gbáa kɛ fɔ kó: «Kaamɔɔn Ɛnza, hínnɛn án nan.»

¹⁴Ɛnza ŋé i yé mínngɛ, aa fɔ i yɛ́ kó: Áa táa a yɛ́ɛ yáa faanlɛɛɲansebhaa ólu la. Kɛ́ i tó táala sháa ó ka, í bɛ́ɛ kɛ́ɛnya. ¹⁵I cɛ́man Kée ŋé yé mínngɛ óo a wɛɛ kɛ́ɛnya, oo i kwɔ́sɛɛ kɛ táa Ɛnza nzaala, ké áa Ala tandola ni kannanyɛɛnin ne. ¹⁶Aa sé Ɛnza ndɔ́ɔfɛ mínngɛ, aa i kúnmɛɛn nɔ́kɛɛ a kɛɛnnan kɛ i ɲán ó bíin lúuman kɛ́ bálika bhɔ́ a yɛ, o cɛ ó tɛ́ɛ Samalika lé le. ¹⁷Ɛnza ŋé fɔ a yɛ kó: «Mɔɔn tá ŋó bɛ́ mán kɛ́ɛnya a? A tɔ́ kɔɔnndɔ ŋólu mín? ¹⁸Mɔɔn sí mánsɔɔ kɛ i kwɔ́sɛɛ kɛ́nan bálika bhɔ́ Ala yɛ fɔ́ lónannjɛ míin ngée ŋán!» ¹⁹O kwɔ́, aa fɔ cɛ ó yɛ kó: «I wíi íi táa, i wɛ́ɛ kísi í yɛ lánanya ó bhaaka lɔ.»

Mɔɔn Dhyénjɛ ó kwɔ́sɛɛ ko ó

Matiyu 24.23-28,37-41

²⁰Falizɛn ŋólu Ɛnza mánɲaankɛ kó Ala yɛ́ Mansaya ó káa nan wáati mínnɛɛn lé lɔ. Aa i yawi kó: «O táa kɛ óyoo mɔɔn ólu i tá ó yéla ɲán mín mán. ²¹A táa fɔ kó: ‹Aa ya› wáman: ‹Aa yéenɔn.› Kɛ mansɔɔ Ala yɛ́ Mansaya óo a cɛ́man kɛ bhá.»

²²O kwɔ́, aa fɔ kaamɔɔndhye ŋólu yɛ́ kó: «Ló nɔ́ yáa sé, mɔɔn Dhyénjɛ ó yélɔɔ yáa kɛ́ a lá tée kée mán, wáa a táa a yé.

²³I yáa fɔ a yɛ kó: ‹A mánfɛɛ, aa ya,› wáman: ‹Aa yéenɔn.› A kɛ́nan táa, a kɛ́nan bwée, ²⁴kɛ́ mansɔɔ sá ŋóo í bhóo lábhɔla sángboo ó kún ndɔ́ o la ɲan mín mán, kɛ táa sé a kún ndɔ́ ó mán ɲan mín mán, mɔɔn Dhyénjɛ ó káa nan o ɲan ó lé mán. ²⁵Wáa sannin o ló ŋó á sé, dhyáalagboya lée ké mɔɔn Dhyénjɛ ó á tɔ́lɔya kóyoongɛ óni ké bímɔɔn ólu á í bá a lɔ.

²⁶Kó míin kɛ Nuwo yɛ tée ó lɔ, o ɲɔ́ɔn né káa kɛ́ mɔɔn Dhyénjɛ ó nan wáati ó lɔ. ²⁷Mɔɔn ólu tɛ́ɛ lɔ́min kɛ́la, i tɛ́ɛ mínnin kɛ́la, cɛ ólu ní muso ólu tɛ́ɛ fúu kɛ́la, fɔ kɛ́nan sé Nuwo ló ŋó mán kúunmba ó kɔ́ɔnnɔn. Tó sámba óo nan kɛ i bɛ́ látuun. ²⁸A káa kɛ o ɲan kée ŋó le mán óo Lɔti ta wáati o. Mɔɔn ólu tɛ́ɛ lɔ́min kɛ́la, kɛ mínnin kɛ́la, i tɛɛ sannin kɛ́la, kɛ fée kɛ́, kɛ sɛɛn kɛ́, kɛ́ bhó ŋólu lɔ. ²⁹Wáa Lɔti é bhɔ́ Sodɔmu só ó kɔɔnnɔn ló mínnan, Ala é tá óni fɔlɔ ó bhɔ́ sángboo ó lɔ kɛ mɔɔn ólu bɛ́ hálaki. ³⁰A káa kɛ céne mɔɔn Dhyénjɛ o kwɔ́sɛɛ ló ŋó la.

³¹O ló ŋó la, Mɔɔn mín ngɛ kɛ bhó ŋó kúnnɔn, ké a bhóofe ŋólu bhó ŋó kɔɔnnɔn, o tíi ó kɛ́nan i yíi kɛ a bhóofe ŋólu tá. Ni mɔɔn mín ngɛ kɛ sɛɛn mán, o tíi ó kɛ́nan i kwɔ́sɛɛ a bhóo lúman. ³²Kó míin kɛ́ Lɔti muso la, aa í mili ó mán. ³³Mɔɔn míin fɛ kɛ́ a ní ó látaan, o tíi ó yáa bɔɔn a ní ó lɔ. Wáa ní mɔɔn mínngɛ bɔɔn a ní ó lɔ, o tíi ó yáa a ní ó sɔ́ɔ. ³⁴Ní fɔ́la a yɛ ngó, o sú ó lɔ́, mɔɔn fyáa yáa kɛ́ láfe ngée ŋó ka, kée ɲáan tá kɛ́ tɔ kée ŋó tó yé. ³⁵Muso fyáa yáa tó koonduu ó la kée né, kée ɲáan tá kɛ́ a tɔ kée ŋó tó yé. ³⁶[Cɛ fyáa yáa kɛ sɛɛn kée ngɔɔnnɔn, kée ɲáan tá, kɛ a tɔ kée ŋó tó yé.]»

³⁷Kaamɔɔndhye ŋólu Ɛnza manɲaankɛ kó: «Mantii ó, o káa kɛ ywáa mínnɛɛn lé lɔ?» Ɛnza ŋé i yawi kó: «Fénzu kɛ́ kɛ ywáa mínnɔn, lwaa ólu í ladhyɛla o ywáa ó lé lɔ.»

Kítitɛɛbhaa óni finɲanmuso ó yɛ́ saanan ó

¹Ɛnza ŋé saanan lɔ lá kaamɔɔndhye ŋólu yɛ, kɛ yáa i la kó i kákan né kɛ Ala dɛ́li wáati bɛ́, ko í kɛ́nan i gbɔ́ɔ nɔ́n fáa. ²Aa fɔ́ ko: «Kítitɛɛbhaa lɔ tɛ́ɛ só lɔ la. O kítitɛɛbhaa ó tɛ́ tɛ sháannan Ala ɲɛn, a tɛ́ tɛ mɔɔn sí bwóɲanla. ³O só kée ŋó kɔ́ɔnnɔn, finɲanmuso lɔ tɛ́ɛ yé o tɛ́ɛ táala a saala kɛ́ fɔ a yɛ kó: Aa a dhyɛman kɛ a yɛ kíti ó tɛ́ɛ ale ní a kɛ́ɛkɛɲɔɔn ó cɛ. ⁴Muso óo myɛ́n o lɔ́. Kítitɛɛbhaa o tɛ́ tɛ fɛ kɛ sɔ́n. Wáa aa sé wáati lɔ mán, aa fɔ a yɛ́ɛ kɔ́ɔnnɔn kó: ‹Yáanin né mán kɛ sháannan Ala ɲɛn óni né tɛ́ mɔɔn sí bwóɲanla. ⁵Né yáa finɲanmuso míin dhyɛman kɛ a yɛ́ kó ó ɲanbhɔ a yɛ, kɛ mansɔɔ áa ne sɛ́ɛla kɛ́timin, ní ó tɛ́, a yáa nan né ní ó tɔ́lɔ wáati bɛ́.› »

⁶O lɔ, Mantii ó fɔ kó: «Aa kítitɛɛbhaa téemɛɛ míin ɲɛn kóman ó lɔ́myɛn. ⁷Sísan, Ala wɛ́ɛ mɔɔn mínnu lɔ́tɔnmɔn kɛ́ kɛ a tá le, tó ólu dhyɛmanli ɲíinnan a fɛ sú ni tée, a yáa myɛ́n kɛ́ ólu dhyɛman ŋán? ⁸Ní fɔ́la a yɛ ngó a yáa i yɛ́ ko ó ɲanbhɔ jónan. Wáa mɔɔn Dhyénjɛ ó káa í kwɔ́sɛɛ wáati mínnɔn, a yáa nan lánanya sɔ́ɔ lúukolo ó ka ŋán?»

Falizɛn ŋó ni nísɔɔnmyaanbhaa ó yɛ saanan ó

⁹Mɔɔn mínnu tɛ́ɛ i yɛ́ɛ yacesiila mɔɔnteenin nu le, tó í tɛ́ tɛ mɔɔn tɔ ólu yacesiila, Ɛnza ŋé saanan gbɛ́ɛ la ólu yɛ kó: ¹⁰«Ló nɔ́ la, cɛ fyáa é táa Ala bhatobhomba ó kɔ́ɔnnɔn kɛ́ Ala dɛ́li. Kée ndɛ́ɛ Falizɛn né, a tɔ kée ŋó tɛ́ɛ nísɔɔnmyaanbhaa lé le.

¹¹Falizɛn ŋó í wíi kɛ i lɔ, kɛ́ i sɛ́ɛ a yɛ́ɛ kɔ́ɔnnɔn kó: Aa Ala, née bálika bhɔ́la i yɛ kɛ mansɔɔ ne tɛ́ óyoo mɔɔn tɔ ólu, mínnu soɲan kɛ́la, óni téemɛɛyako ólu kɛ́la, óni ɲɔnmɔɔnya ó, né tɛ́ óyoo nísɔɔnmyaanbhaa míin nin. ¹²Née sún nónan lɔ́ɔwoocɛ ó kɔɔnnɔn síɲan fyáa kɛ. Ní fé ŋóo fé nzɔ́ɔla, ní o bɛ́ yáa bhɔ́la.

¹³Nísɔɔnmyaanbhaa ó lɔ́nin ndɛ́ɛ a kwɔ́man ywáaja nɔn. A mán sɔ́n kɛ á ɲan o láwii sáman, wáa a tɛ́ɛ a sísi ó mángbasigbasila nílafin ŋó kósɔn, kɛ fɔ kó: ‹Ée Ala, hínnɛn né la, née yuumutɔ lé le.› » ¹⁴Ɛnza ŋé fɔ kó: «A tó ké ní fɔ a yɛ ngó Ala é nísɔɔnmyaanbhaa ó yacesii mɔɔnteenin ne sannin aa í kwɔ́sɛɛ lúman. Wáa a mán Falizɛn ŋó yacesii mɔɔnteenin ne, kɛ mansɔɔ mɔɔn óo mɔɔn kɛ́ a yɛ́ɛ lɔ́bwoɲan, o tíi ó yáa i manyii, wáa mɔɔn óo mɔɔn kɛ́ a yɛ́ɛ mányii, Ala yáa ó tíi ó bwóɲan.»

Ɛnza ŋé lwáau bhyáala dhyéɲɛɛnnin ngwáa ólu fɛ

Matiyu 19.13-15; Maki 10.13-16

¹⁵Mɔɔn lɔ́lu tɛ́ɛ nánla ni dhyéɲɛɛnnin ngwáa ólu le Ɛnza nzaala ké aa í bhóo túu i la. A yɛ kaamɔɔndhye ŋólu ó yé mínngɛ, íi yámanngɛ i mán. ¹⁶Ɛnza ŋé fɔ́ ko íi nan dhyémuu ólu le, tó kɛ fɔ kó: «Aa dhyémuu ólu tó yé ké íi nan né mán, a kɛ́nan i lá bá. Kɛ mansɔɔ mɔɔn mínnu é óyoo dhyémuu lu, Ala yɛ́ Mansaya óo o lée lú tá le. ¹⁷Ní fɔ́la a yɛ tinɲan in né ngó, Ní mɔɔn óo mɔɔn mán í bhóo síi Ala yɛ́ Mansaya ó kɔɔ óyoo dhyémuu ólu, o tíi ó táa ló tún.»

Ɛnza é kómanla nanfootii ólu yɛ

Matiyu 19.16-30; Maki 10.17-31

¹⁸Yawudhyaa ólu Kunndii lɔ é Ɛnza mánɲaankɛ kó: «Kaamɔɔnbhɛɛ, né kákan kɛ mínnɛɛn le kɛ́ kɛ ɲáanmanɲan wɛ́ɛbhɛɛ ó sɔ́ɔ?»

¹⁹Ɛnza ŋé fɔ a yɛ kó: Mínnɛɛn le kósɔn tó íi ngíila kó kaamɔɔnbhɛɛ? Mɔɔn sí tɛ́ mɔɔnbhɛɛ le fɔ́ Ala kéembe. ²⁰Íi Ala yɛ tɔ́ ŋólu lɔ́: Í manngan kɛ ɲɔnmɔɔnya kɛ, í manngan kɛ mɔɔn fáa, í manngan kɛ soɲan kɛ, í manngan kɛ fwɔnɲan la í mɔɔnɲɔɔn ó la, í fá ní í wóobhaa bwóɲan.

²¹Aa Ɛnza yawi kó: «Né wɛ́ɛ o sháa ó látaaman Kanbiini né dhyémuu ya tɔ́ɔ o le.»

²²Ɛnza ŋé o kóman ó myɛ́n mínngɛ, aa fɔ a yɛ kó: «Fé ngée ne wɛ́ɛ í jɛn. Táa í bhóofe ŋó bɛ́ fele kɛ a wɛ́ɛ ó lɔ́taandaa faannda ŋólu la, o kɛ́ kɛ, i yáa nanfooba sɔ́ɔ sá ŋó lɔ. Í kɛ́wɛɛ o la, íi nan bhyáa né kwɔ́.» ²³Wáa cɛ óo o kóman ó myɛ́n mínngɛ, aa i ɲanlasii, kɛ mansɔɔ nanfoobatii lé tɛ́ɛ ale.

²⁴Ɛnza ŋé nanfootii ó ɲanlasiinin ɲé mínngɛ, aa fɔ kó: «Nanfootii ó ló ŋó Ala yɛ́ Mansaya ó lɔ, o lo an gbɛ́ɛ ósɔ! ²⁵Ɲɔ́ɔnmɛɛn ó ló ŋó nɔɔnyanin ŋé kɛ́ɛla ŋó jáan ó fɛ́ kɛ tínmin nanfootii ó ló ŋó ka Ala yɛ́ Mansaya ó lɔ́.»

²⁶Ɛnza nɔ́myɛnmaa ólu fɔ kó: «O lɔ, yɛ́ne káa kísi sa?»

²⁷Ɛnza ŋé i yawi kó: «Kó mín nzé ndɛ́ Adamandhye ŋó yɛ, o sé é Ala yɛ.»

²⁸Piyɛli é fɔ Ɛnza ɲɛn kó: «Án née wɛɛ, án ŋwɛ́ɛn an ngwɔ́kɛ án bhóofe ŋó bɛ́ la tó kɛ bhyáa íkwɔ.»

²⁹Ɛnza ŋé a yawi kó: «Tó ní fɔ a yɛ tinɲan in né ngó, ní mɔɔn óo mɔɔn kɛ́ jɛn kɛ i kwɔ́kɛ a yɛ bhó ŋó la, óni a muso la, óni a mándhyeman ŋólu la, óni a wóobhaa ni a fa la, óni a dhyé ŋólu la, Ala yɛ́ mansaya ó kósɔn, ³⁰o tíi ó yáa ó fé ŋó ɲɔ́ɔn shɛ́ɛman nzɔ́ɔ dínɲan míin nɔn. A yáa ɲáanmanɲan wɛ́ɛbhɛɛ ó sɔ́ɔ síin.»

Ɛnza ŋé a saya óni a kúunngo ó fɔ́la í kwɔ́

Matiyu 20.17-19; Maki 10.32-34

³¹Ɛnza ŋé a yɛ kaamɔɔndhye ndá ni fyáa ó kíi kɛ fɔ i yɛ kó: «Áa a mánfɛɛ, án ní táala Yeluzalɛmu. O ywáa ó lɔ, céla ólu tɛ́ wɛ́ɛ kóman mínnu sɛ́wɛ mɔɔn Dhyénjɛ ó yɛ kó ó lɔ, o yáa i lafa o ɲán ó mán. ³²I yáa a myaan kɛ a ló síya gbɛ́ɛ olu bhóo, ólu yáa yɛ́ɛbhɔ a lɔ, kɛ́ a nɛ́ɛn, kɛ́ í láji bwɔ́ a ka, ³³kɛ́ a gbasi ni gbɛ́nɲɛn óle kɛ́ tó a fáala. Waa tée sawa a fáanin ŋó kwɔ́, a yáa kúun.»

³⁴A yɛ kaamɔɔndhye ŋólu mán bhɔ́ fósi ɲánle ó kóman ó lɔ. O kóman ó kɔɔ ó lóonaankɛnin ŋé tó i man, i mán bhɔ́ o kóman o ɲánle.

Ɛnza ŋé fyóondɔ lɔ ɲán lákala

Matiyu 20.29-34; Maki 10.46-52

³⁵Ɛnza ŋé súnɲan Zeliko la mínngɛ, oo wáati ó lɔ fyóonjɛ lɔ síininndɛ́ɛ sháa gbóo nvɛ́ a tɛ́ɛ lɛ́ɛli kɛ. ³⁶Fyóonjɛ ó yaman ó mánngan ŋó myɛ́n ké íi tínminnan, aa mánɲaankɛli kɛ́ kó: «Mínnɛɛn lé wɛ́ɛ kɛ́?»

³⁷Ii fɔ a yɛ kó ƐnzaNazalɛtika lée tínminnan.

³⁸Oo kɛ mínngɛ, aa gbáa kó: «Laula Bhɔ́nzɔ Ɛnza, manɲwaan né la!»

³⁹Mɔɔn mínnu tɛ́ɛ i ɲɛn, ólu yámanngɛ a man kó aa í lúmandhye, wáa aa lɔbhyaa a gbáanzeɲan ŋó ka kɛ fɔ kó: «Laula Bhɔ́nzɔ ŋó, manɲwaan né la!»

⁴⁰Ɛnza ŋé í lɔ, kɛ fɔ kó ii nán ní fyóonjɛ óle a saala. Ii nán ale Ɛnza nzaala mínngɛ, Ɛnza ŋé a manɲaankɛ kó: ⁴¹«Ii fɛ ké ní mínnɛɛn le kɛ í yɛ?»

Aa Ɛnza yawi kó: «Mantii ó, ní fɛ kɛ yéli lé kɛ ko kwáa kɛ.»

⁴²Ɛnza ŋé fɔ a yɛ kó: «Yéli kɛ. I yɛ lánanya ó wɛ́ɛ i lákɛɛnya.»

⁴³O ywáaninngee ŋó lɔ, aa yéli kɛ, aa i bhyáa Ɛnza ngwɔ ké áa Ala tando o la. Mɔɔn ólu ó yé mínngɛ, íi Ala tando íkwɔ.

Ɛnza ŋé táala Zashe yɛ lú ó man

¹Ɛnza nónin ŋó kwɔ́ Zeliko só ó kɔɔnnɔn. A tɛ́ɛ só ó lɔ́tinminnan. ²Nísɔɔnmyaanbhaa ólu yɛ ɲɛ́nmɔɔn lɔ tɛ́ɛ yé, o tɔ́ɔ kó Zashe. Nanfoo shɛ́ɛman ndɛ́ɛ a bhóo. ³Zashe tɛ́ɛfɛ kɛ Ɛnza ɲé, wáa a tɛ́ tɛ sé kɛ a yé yaman ó kósɔn, kɛ mansɔɔ a tɛ́ɛ sún né. ⁴Aa bwée kɛ táa i yɛ́ɛ fígisun nɔ la ɲɛ́nnzhaafɛ ké aa Ɛnza ɲé, kɛ mansɔɔ Ɛnza ngákan kɛ tínmin yé. ⁵Ɛnza ŋé sé o ywáa ó lɔ mínngɛ, aa í ɲángbaan sáman kɛ fɔ kó: «Zashe, i láteeya kɛ i yíi jónan. Kɛ mansɔɔ né kákan kɛ ɲíi i bhóo lúman bí.»

⁶Zashe é i láteeya kɛ i yíi jónan, kɛ́ Ɛnza nɔ́bhyɛ ni nisɔdhyaa le. ⁷Mɔɔn ólu ó yé mínngɛ, í bɛ́ɛ Ɛnza mankomankoman kó: «Cɛ míin wɛɛ sɔ́n kɛ táa í yíi yuumutɔ ó fɛ yé.»

⁸Wáa Zashe lɔ́nin ŋé tó Mantii ó ɲánkɔɔ kɛ fɔ kó: «Mantii ó, né yáa mbóofe ŋó fán ngée ndí faannda ŋólu mán, ni kɛ kɛ́ ké né wɛ́ɛ mɔɔn lɔ tɔ́nɲɔɔn kɛ a bhóofe ŋó myáan a lá, né yáa o ɲɔ́ɔn náannin lákwɔsɛɛ o tíi ó mán.»

⁹Ɛnza ŋé fɔ i yɛ kó: «Kísili ó wɛ́ɛ sé bhó míin ngɔɔnnɔn bí, kɛ mansɔɔ cɛ míin ŋé Bulaaman dhyé ŋó lɔ le lé. ¹⁰Mɔɔn Dhyénjɛ ó wɛ́ɛ nan kɛ́ mɔɔn túunnin ŋólu ɲíin kɛ́ i kísi.»

Mansacɛ ó dhyénjɛ o yɛ́ saanan ó

Matiyu 25.14-30

¹¹Mɔɔn mínnu tɛ́ɛ Ɛnza nɔ́myɛnnan, áa saanan lɔ lá i yɛ, kɛ mansɔɔ i tɛ́wɛɛ súnɲan Yeluzalɛmu la. Óni mɔɔn ólu tɛ́ɛ í mílila kó Ala yɛ́ Mansaya ó káa yáa o wáati ó lé lɔ. ¹²A kó: «Faanman nɔ dhyé ndɛ́ɛ táala yamaanja nɔ lɔ, ké íi a kɛ mansa lé o yamaan ó lɔ, kɛ í kwɔ́sɛɛ. ¹³Sánnin aa táa, aa a yɛ bháalakɛdhye ndá ngíi kɛ sɛ́ɛnnguu kée ngée ndí i bɛ́ kée ngée mán, kɛ fɔ i yɛ kó: Áa feekɛ ni o le sánnin ni ngwɔ́sɛɛ kɛ́nan. ¹⁴Wáa a kó ó tɛ́ mán ndí a yɛ yamaanlɔ mɔɔn ólu yɛ. Ólu mɔɔn bhyáa kɛ́ táa fɔ mansacɛba ó yɛ kó: i tɛ́fɛ ké cɛ míin ŋán i síi i kúnnan.

¹⁵A kɛnin ŋó kwɔ́ mansacɛ le, aa í kwɔ́sɛɛ a yɛ yamaan ó lɔ. A tɛ́wɛɛ wɛ́ɛ ó dí a yɛ bháalakɛdhye mínnu mán, áa ólu kíi kɛ́nan. Kó ii tɔɔn mín nzɔ́ɔ, ii nan ó yáa. ¹⁶Bháalakɛdhye njónan óo nan, óo fɔ kó: ‹Mantii o, ii sɛ́ɛnnguu mín ndí né mán, né wɛɛ ó si tá né sɔ́ɔ tɔɔn le.› ¹⁷Kunndii ó fɔ a yɛ kó: ‹Í wɛ́ɛ bháalabhɛɛ kɛ! Íi bháalakɛdhyemɛɛ lé le, í wɛ́ɛ kɛ́ mɔɔn téenin ne kó fítiinin nɔn, né yáa í síi só tá ngunnan.› ¹⁸Bháalakɛdhye nváaɲɔɔn óo í mángbaa, óo fɔ kó: ‹Mantii o, ii sɛ́ɛnnguu mín ndí né mán, né wɛ́ɛ ó si lóo sɔ́ɔ tɔɔn le.› ¹⁹A kunndii ó fɔ a yɛ kó: ‹Né yáa íle lásii só lóo kunnan.›

²⁰Bháalakɛdhye gbɛ́ɛ é nan kɛ fɔ a kunndii ó yɛ kó: ‹Mantii ó, ii sɛ́ɛnnguu mín ndí né mán, né tɛ́wɛɛ a bhyáa faani lɔ́lɔ kɛ́ a mala a mánfɛɛ nin. ²¹Né tɛ́ɛ sháannan í ɲɛ́n kɛ mansɔɔ í yɛ kó ó a gbɛ́ɛ. I mán fé mín bhyáa, ii ó lé tála. I mán sɛɛn mín ngɛ́, ii o sunman ŋó le tɛ́ɛla.› ²²A kunndii óo fɔ a yɛ kó: ‹Bháalakɛdhye ɲóo, né yáa kíti tɛ́ɛ í ka í gbú yɛ kóman ó kósɔn. I tɛ́ɛ lɔ́ ŋóo ɲɛ́n kó ó a gbɛ́ɛ. Mán fé mín bhyáa, ní óle tála. Mán sɛɛn mín ngɛ́, ní o sunman ŋó le tɛ́ɛla. ²³Mínnɛɛn lé kósɔn i mán ɲɛ́n wɛ́ɛ ó ló wɛ́ɛlamalabhaa ólu bhóo, ké ndɛ́ɛ nan a tɔɔn ó sɔ́ɔ a ka.›

²⁴O kwɔ, mɔɔn mínnu tɛ́ɛ yé, a kunndii ó fɔ ólu yɛ kó: Aa sɛ́ɛnnguu ó myáan a lá, kɛ a dí sɛ́ɛnnguu tá ndíi ó mán. ²⁵Ii fɔ a yɛ kó: ‹Mantii ó, sɛ́ɛnnguu tá ŋé ale bhóo kɛ bhá!› ²⁶‹I kunndii óo fɔ kó: lɔ́ é mɔɔn mín móo, lɔ yáa bhyáa o tíi ó tá ó ka; lɔ́ tɛ́ mín móo, yáanin fítiinin míin a bhóo, o yáa myáan a lá. ²⁷Sísan, né yúu mínnu tɛ tɛ́ fɛ kéni kɛ í yɛ mansacɛ óle, aa i myaan kɛ́nan ní i bɛ́ le né ɲánkɔɔ kɛ í fáa né ɲanla.› »

²⁸Ɛnza ŋé kóman ó fɔ kɛ́wɛɛ wáati mínnɔn, aa tínmin i ɲɛ́n, ii sháa ó myáan kɛ́ táa Yeluzalɛmu.

Ɛnza ŋé lónan Yeluzalɛmu

Matiyu 21.1-11,15-17; Maki 11.1-11; Yaya 12.12-16

²⁹Ii gbaa Bɛtifaze ní Betani lá Olivyetii ó tɔ́ɔfɛ mínngɛ. Aa a yɛ kaamɔɔndhye ŋó fyáa bhyáashaa. ³⁰Kɛ fɔ i yɛ kó: «Só míin an ɲɛ́nnzhaafɛ nín, áa táa o la. A kɛ ló ndɛ́nmɛn, a yáa sofɛɛnin dhyé nɔ́ gúunnin ɲé. Mɔɔn sí mán í síi o ka mbá. Áa a fwée kɛ́nan ale. ³¹Ní mɔɔn lɔ kɛ́ a mánɲaankɛ kó mínnɛɛn la aa a fwéenan, aa ó tíi ó yawi kó Mantii ó lé manko é a lá.»

³²Céladhye nváa óo, Ɛnza ndɛ́wɛɛ fɔ i yɛ ɲán mín man, ii táa sofɛɛnin ngbee ŋó sɔ́ɔ cé. ³³I tɛ́ɛ sofɛɛnin ngbee ŋó fwéenan mínngɛ, sofɛɛnin ndíi ó i mánɲaankɛ kó: «Mínnɛɛn la áa sofɛɛnin ngbee ŋó fwéenan?»

³⁴Ii a yawi kó: «Mantii ó lé manko é a lá.» ³⁵Ii táa sofɛɛnin ngbee ŋó le Ɛnza nzaala. Íi i yɛ faani nɔ́lu lá a kwɔ́lɔ, tó kɛ Ɛnza náyɛɛ a ka. ³⁶Ɛnza ndáa tɔ ó, mɔɔn ólu tɛ́ɛ i yɛ faani ŋólu lɔ́woo lá sháa o ka.

³⁷I tɛ́ɛ wɛɛ súnɲan Yeluzalɛmu lá mínngɛ, ké ii Olivyetiilayii ó la, ale ní a yɛ kaamɔɔndhye nzhɛ́ɛman ŋó, i bɛ́ tɛ́ɛ nisɔdhyaa o lɔ, íi lámyaan kɛ Ala tando í kánnanyɛɛnin né a yɛ káwako kɛ́nin ŋólu bɛ́ kósɔn. ³⁸I tɛ́ɛ fɔ́la kó:

«Mansacɛ míin nánla Mantii ó tɔ́ɔla,

tando óo o yɛ.

Hɛ́lɛ ó waa kɛ́ sángboo ó lɔ,

nɔ́lɔ ó waa lá Ala tɔ́ɔ ó ka sámanlaa ó bɛ́ lɔ!»

³⁹Falizɛn nɔ́lu tó yaman ó cɛ́man kɛ fɔ Ɛnza ɲɛn kó: «Kaamɔɔn, a fɔ í yɛ kaamɔɔndhye ŋólu yɛ kó íi i lumandhye!»

⁴⁰Ɛnza ŋé i yawi kó: «Ní í fɔ́la a yɛ ngó: Ní í kɛ í lumandhye, káwaguun ŋólu yáa gbáangɛ i lée ɲɔ́ɔn ná.»

Ɛnza ngó Yeluzalɛmu káa cé

⁴¹Ɛnza ŋé súnɲan Yeluzalɛmu lá mínngɛ, aa só ó yé mínngɛ, aa kásikɛ. ⁴²A kó: «Ní ile tɛ́ɛ a lɔ bí, ko i káa hɛ́lɛ ó sɔɔ ɲan mín mán. Wáa sísan o wɛɛ i lóonaankɛ i man. ⁴³Kɛ mansɔɔ Ló nɔ yáa sé, i yúu ólu yáa i lamiin ni kówi ólu lé, i yáa a lamiin kɛ a gbɛ́nnɛn fán ŋó bɛ́ fɛ. ⁴⁴I yáa a yɛ só ó cé, kɛ ile ni í dhyé ŋólu bɛ́ hálaki, i yáa bhó ŋólu bɛ́ cé káwa ó sí táa tó ɲɔ́ɔnnga. Kɛ mansɔɔ Ala tɛ́ɛ fɛ́ kɛ a dhyɛman wáati mínnɔn, a mán sɔ́n ó man.»

Ɛnza ŋé Ala bhatobhomba ó sɛ́nnɛnyala

Matiyu 21.12-17; Maki 11.15-19; Yaya 2.13-22

⁴⁵Ɛnza ŋé ló Ala bhatobhomba ó kɔ́ɔnnɔn, aa a lámyaan kɛ feekɛbhaa ólu gbɛ́. ⁴⁶Aa fɔ i yɛ kó: A sɛwɛnin ɲé kó, ɲɛ́n bhó ŋó káa kɛ́ Ala yɛ sɛ́ɛbho ne le. Wáa álee wɛ́ɛ o kɛ so ŋólu lóonaankɛlaa lé!

⁴⁷Ɛnza ndɛ́ɛ mɔɔn ólu kalanan Ala bhatobhomba ó kɔ́ɔnnɔn ló ŋóo ló. Faanlɛɛɲansebhaa olu kúnndii óni sɛliya kaamɔɔn ólu ní yaman ó ɲɛ́nmɔɔn ólu tɛ́ɛ Ɛnza nváa kó o ɲanɲiinan. ⁴⁸Wáa i tɛ́ káa kɛ ɲán mín man, i tɛ́ mán ó lɔ, kɛ mansɔɔ mɔɔn ólu bɛ́ tɛ́ɛ a kómankan ŋó lɔ́myɛnnan.

Yɛ́nee fáan dí Ɛnza mán?

Matiyu 21.23-27; Maki 11.27-33

¹Ló nɔ la, Ɛnza ndɛ́ɛ mɔɔn ólu kalanan Ala bhatobhomba ó kɔ́ɔnnɔn, óni kɛ sanmankanmɛɛ ó fɔ i yɛ. Faanlɛɛɲansebhaa olu kúnndii ólu ní sɛliya kaamɔɔn ólu ní cɛba ólu táa Ɛnza nzaala, ²kɛ a manɲaankɛ kó: «A fɔ án ɲɛn, íi kó míinnu kɛ́la sébhaaya mínnɛɛn lé bhaaka lɔ? Yɛ́ɛtii o sébhaaya ó dí í mán?»

³Ɛnza ŋé i yawi kó: «Né yáa álee mánɲaankɛ láfaɲan kée nán. Aa né yawi. ⁴Yɛ́ɛtii Yaya Bátizelikɛbhaa bhyáashaa kɛ́nan mɔɔn ólu bátize, Ala bháa, bháa mɔɔn ólu?»

⁵O kɛ mínngɛ íi táa ɲɔ́ɔn yé, kɛ i miliya ólu yáa ɲɔ́ɔnnan, ii bhyɛ́ a lɔ kɛ fɔ kó: «Ní án ngɛ́ fɔ ngó Ala lée a bhyáashaa, a yáa án mánɲaankɛ kó: Mínnɛɛn lé kósɔn á mán lá Yaya la. ⁶Ní án ngɛ́ fɔ kó mɔɔn ólu, mɔɔn ólu yáa án bwó káwa la, kɛ mansɔɔ i bɛ́ lánin ŋé a lá kó Yaya tɛ́ɛ céla le lé.» ⁷Íi Ɛnza yawi kó i mán lɔ́.

⁸Ɛnza ŋé i yawi kó: «Ní ó lée, míin fáan dí né mán kɛ kó míinnu kɛ́, né táa o sébhaaya ó fɔ a yɛ.»

Saanan míin lá sɛɛnkɛbhaayoo ŋó mán

Matiyu 21.33-46; Maki 12.1-12

⁹O kwɔ́, Ɛnza ŋé saanan míin ná yaman ó yɛ, a kó: «Cɛ lɔ́ lée lɛ́zɛnnvyɛ kɛ, tó kɛ ó kɛ́ɛfa bháalakɛdhye ŋólu mán, kɛ táa táamanja nán. ¹⁰Lɛ́zɛn mɔ́ wáati óo sé mínngɛ, áa a yɛ bháalakɛdhye ŋó kée myáashaa lɛ́zɛnmaalakɛbhaa ólu mán ké ii a tá nin ŋó di. Wáa lɛ́zɛnmaalakɛbhaa ólu o myáan, kɛ a gbasi, kɛ a bhóolɔkoo ŋó bhyaa kɛ́ táa. ¹¹Lɛ́zɛnnvyɛtii ó bháalakɛdhye ngbɛ́ɛ ce i man. Ii ó gbási kɛ a nɛɛn kɛ a bhóolɔkoo ŋó bhyaa kɛ́ táa. ¹²Lɛ́zɛnnvyɛtii ó bháalakɛdhye nzawaɲɔɔn ce i man, íi ó gbási kɛ́ a manndiin, kɛ́ a gbɛ́. ¹³Oo kɛ́ mínngɛ lɛ́zɛnnvyɛtii ó fɔ kó: ‹Né káa mínnɛɛn le kɛ́? A kó o: Né dhyénjɛ mín ŋan dí né yɛ gbútuukɛ, né yáa o bhyáashaa i man, kɛ dhyáa, i yáa ó bhóɲan.› ¹⁴Wáa lɛ́zɛnmaalakɛbhaa ólu sɛɛntii ó dhyénjɛ ó yé mínngɛ, íi fɔ ɲɔ́ɔnɲɛn kó: ‹A cɛ́n ó tábhaa ó lée nín, án ní a fáa ké cɛ́n ó á kɛ́ án ndá lé.› ¹⁵Ii a myáan kɛ́ bhɔ́ ni ale sɛɛn ó kɔ́ɔnnɔn kɛ́ a fáa.»

Ɛnza ŋé fɔ kó: «Lɛ́zɛnnvyɛtii ó káa mínnɛɛn lé kɛ́ i la sá? ¹⁶A yáa nan, kɛ lɛ́zɛnmaalakɛbhaa ŋólu fáa, tó kɛ lɛ́zɛnnvyɛ ó kɛ́ɛfa lɛ́zɛnmaalakɛbhaa gbɛ́ɛlu mán!» Mɔɔn ólu ó kóman ó myɛ́n mínngɛ, íi fɔ kó: «Ala án ngísila o mán!»

¹⁷Ɛnza ŋé i mánfɛɛ kɛ fɔ kó: «Mín nzɛ́wɛnin ŋé Kitabu ó kɔ́ɔnnɔn, o kɔɔ ó mínnɛɛn le? A kó:

‹Bhónɔbhaa ólu wɛ́ɛ í bá tɛfɛ mínnɔn,

o lé wɛ́ɛ kɛ́ tɛfɛ kúugbɛɛ ŋó le.›

¹⁸Mɔɔn óo mɔɔn kɛ í bé o tɛfɛ ó ka, o tíi ó kóo ó yáa í lɔ́kɛɛngɛɛ; ni ó tɛfɛ ó kɛ bé mɔɔn min ngá, o tíi ó yáa í lɛ́ɛbhɔ.»

¹⁹O wáati ó yɛ́ɛ lɔ, Sɛliya kaamɔɔn ólu ni faanlɛɛɲansebhaa olu kúnndii ólu tɛ́ɛfɛ kɛ́ Ɛnza myáan, kɛ mansɔɔ i tɛ́wɛɛ bhɔ́ a ɲan le óo Ɛnza ndɛ́ɛ saanan ó la lá ile léelu mán. Wáa i tɛ́ɛ sháannan yaman o ɲɛn.

A láanin ŋé kɛ́ nísɔɔn ó sála a?

Matiyu 22.15-22; Maki 12.13-17

²⁰Oo kɛ mínngɛ, íi lámyaan kɛ́ Ɛnza nákɔɔsi. O lɔ, íi mɔɔn lɔ́lu bhyáashaa kɛ táa Ɛnza nákɔɔsi kán ŋó mán, í tɛ́ɛ i yɛ́ɛ kɛ́la mɔɔnteenin nú le, ké ii a myáan a gbú lákan ŋó mán. Ké ii sɔ́ɔbu lɔ sɔ́ɔ kɛ́ a ló Mansacɛ ó bhóo, óni faanman ŋólu bhóo. ²¹O mɔɔn ólu táa Ɛnza manɲaankɛ kó: «Kaamɔɔn, án ni a lɔ́ ŋóo i yɛ kóman ólu ní i yɛ kaa ŋólu téenin ɲé, í ló ndɛ́ mɔɔn bhɔ́la mɔɔn lɔ, Íi Ala sháa o le yáala an nán tinɲan le ka. ²²Á láanin ɲé kɛ nísɔɔn ó sála mansacɛ Sezali yɛ bháa bháanin a laanin ndɛ́?»

²³Wáa Ɛnza ŋé bhɔ́ i yɛ naanfiiya ó ɲánle, aa fɔ í yɛ kó: ²⁴«Áa wɛ́ɛgbannan ngée yáa né la.» A kó: «Yɛ́ɛtii yáa ní tɔ́ɔ é wɛ́ɛ míin mán?» I kó mansacɛ Sezali.

²⁵Ó lɔ, Ɛnza ŋé fɔ i yɛ kó: «Fé mín ɲé mansacɛ Sezali tá le, áa o dí mansacɛ ó mán; mín ɲé Ala tá ó le, áa o dí Ala mán.»

²⁶I man sé kɛ Ɛnza myáan a yɛ́ɛ lákan ŋó mán yaman ó ɲánkɔɔ, wáa a yɛ yawili ó bháa i lɔ, i mán kóman sɔɔ kɛ́ a yawi.

Sadusi lɔ́luu Ɛnza mánɲaankɛla su ólu kúun ŋó mán

Matiyu 22.23-33; Maki 12.18-27

²⁷Sadusi ólu tɛ́ɛ fɔ́la kó su ólu táa kúun. I lɔ́luu i mángbaa Ɛnza nan kɛ a mánɲaankɛ kó: ²⁸«Kaamɔɔn, Musa é mín nvɔ́ án ɲɛn kó: Ní cɛ lɔ kɛ́ muso tá, kɛ sayakɛ ké a mán dhyé nzɔ́ɔ muso ó la, a lɔ́ɔcɛ kákan kɛ́ muso o fúu kɛ́ kɛ dhyé nzɔ́ɔ a lá á bhádhye ŋó yɛ.²⁹O ɲan ó mán, bhádhyemannjɛ wóonvyaa lé tɛ́ɛ yé. Jónan óo muso fúu kɛ, wáa aa sayakɛ, a mán dhyé nzɔ́ɔ muso o la. ³⁰Fyáaɲɔn ó o muso ó tá, ³¹a sawaɲɔn óo a tá. O ɲan ó mán, dhyénjɛ wóonvyaa ó bɛ́ é sayakɛ, i sí mán dhyé nzɔ́ɔ muso ó la. ³²Ó kwɔ, muso óo sayakɛ. ³³Su ólu kúun nó ŋó kɛ́ sé, muso ó káa kɛ́ yɛ́ɛtii tá le? Kɛ mansɔɔ dhyénjɛ wóonvyaa ó bɛ́ é a fúu kɛ.»

³⁴Ɛnza ŋé i yawi kó: «Dínɲan míin ngɔɔnnɔn, cɛ óni muso ó fúu kɛla. ³⁵Wáa Ala wɛ́ɛ kítitɛɛ mɔɔn mínnu ka kɛ i yacesii mɔɔnteenin nu lé dínɲan kwáa o lɔ, ní ólu kɛ kúun kɛ bhɔ́ saya ó lɔ, cɛ ó táa muso fúu kɛ́, muso ó ló ndáa sii cɛ la; ³⁶Ólu táa sayakɛ bhée, kɛ mansɔɔ ólu káa kɛ́ lé óo malɛɛka ólu. Ala káa i yacesii a dhyé néelu le, kɛ mansɔɔ i yáa kúun kɛ bhɔ́ saya ó lɔ. ³⁷Ní su ólu kɛ kúun. Céla Musa gbú é a yáa kɛ tá ó tó yíitunin ŋó la. Aa Mantii ó kíi kó Bulaaman yɛ Ala o, óni Shaaka yɛ Ala o, óni Yangubha yɛ Ala o. ³⁸O kɔ́ɔ ó tɔ́ɔ kó Ala tɛ́ su ólu yɛ Ala óle, wáa ɲáanman ŋólu yɛ Ala lée a le, kɛ mansɔɔ Ala fɛ yé mɔɔn ólu bɛ́ɛ ɲáanman ne lé.»

³⁹Sɛliya kaamɔɔn lɔ́luu fɔ Ɛnza ɲɛn kó: «Kaamɔɔn, í wɛ́ɛ kóman cɛ́ɛne.» ⁴⁰Kɛ tá ó mán, i mán Ɛnza manɲaankɛ bhée.

Kílisi ní Laula

Matiyu 22.41-45; Maki 12.35-37

⁴¹Ɛnza ŋé i manɲaankɛ kó: «Án ni sé kɛ fɔ ɲán mínnɛɛn lé mán kó Kílisi óo Laula bhɔ́nzɔ ne lé? ⁴²Laula gbú é fɔ Zabulu ó kitabu ó kɔɔnnɔn kó:

Mantii Ala é fɔ ɲɛn Mantii o yɛ kó:

Í síi móobhɛɛ kɔɔ,

⁴³fɔ́ né a í yúu ólu myaan kɛ i bhyáa í sé ngɔɔ.

⁴⁴O ɲán o mán, ni Laula é Kísibhaa ó kíila kó Mantii ó, Kísibhaa óo sé kɛ́la Laula Bhɔ́nzɔ né díi?»

Ɛnza ŋé í sɛɛmansɔɔla a yɛ kaamɔɔndhye ŋólu yɛ

Matiyu 23.1-36; Maki 12.37-40

⁴⁵Kɛ yaman ó tó Ɛnza nɔ́myɛnnan áa fɔ a yɛ kaamɔɔndhye ŋólu yɛ kó: ⁴⁶«Áa a yɛ́ɛkɔɔsi sɛliya kaamɔɔn ólu mán, deekeba ló ŋó lé a dí i yɛ kɛ í yáala, íi fɛ ké mɔɔn tɔ ólu a kɛ́ i fola yamanywaa ólu lɔ, óni sɛ́ɛbho ŋó kɔ́ɔnnɔn, ɲɛ́nnzhaafɛ síilaa ó lée lu a dí i yɛ, sɛ́ɛbho ŋólu ní lɔ́minkɛlaa ólu lɔ. ⁴⁷Muso mínnu cɛ wɛ́ɛ sayakɛ, íi ólu bhóofe ŋó bɛ́ myaanla i la; ii sɛ́ɛ kannanja ólu kɛ́la ké mɔɔn ólu a i lásaa. O le kósɔn, i tá kíti o yáa gbɛ́ya kɛ tínmin mɔɔn tɔ́ ólu tá ó ka!»

Finɲanmuso lɔ́ é a bhóo tá ó bɛ́ bhyáa késu ó kɔ́ɔnnɔn

Maki 12.41-44

¹Kɛ Ɛnza ndó Ala bhatobhomba ó kɔ́ɔnnɔn, aa i ɲán láwii kɛ nanfootii ólu yé sɔɔtabhɔ ó bhyáala Ala bhatobhomba ó késu ó kɔ́ɔnnɔn. ²Aa finɲanmuso dɛ́sɛbhaatɔ lɔ yé wɛ́ɛgbannan nvyáa bhyáala késu o kɔ́ɔnnɔn. ³Ɛnza ŋé fɔ o lé lɔ kó: «Tinɲan in ne, ní fɔ́la a yɛ ngó finɲanmuso dɛ́sɛbhaatɔ míin ŋwɛ́ɛn wɛ́ɛ mín myáa késu ó kɔ́ɔnnɔn, ó a sháa a bɛ́ tá le, ⁴kɛ mansɔɔ ílee lu fítiinin né bhɔ́ i yɛ nanfoo ó la kɛ ó bhyáa késu ó kɔ́ɔnnɔn, wáa ale ní a yɛ faanndanɲan ó bɛ́, mín ndɛ́ɛ a bhóo kɛ kɛ́ lɔ́min sɔ́ɔn le, a wɛ́ɛ óle bɛ́ bhyáa késu ó kɔ́ɔnnɔn.»

Ɛnza ŋé Ala bhatobhomba céko ó fɔ́la

Matiyu 24.1-2; Maki 13.1-2

⁵Mɔɔn lɔ́lu tɛ́ɛ kóman lá kó Ala bhatobhomba ó cáaɲiin, kó aa lɔ́ ni káwa cɛ́ɛ ne le, a mánsiinin ɲé ní fémɛɛ léelu lá, mɔɔn ólu mín ndí Ala mán. Ɛnza ŋé fɔ i yɛ kó: ⁶A ɲán é bhó mínnan nín; «Ló nɔ́ yáa sé, bhó ŋó bɛ́ yáa cé, káwa ó sí táa tó ɲɔ́ɔn ngá.»

Dínɲan lábha ŋwáati ó sɛ́ɛya ó

Matiyu 24.3-14; Maki 13.3-12

⁷Ii Ɛnza mánɲaankɛ kó: «Kaamɔɔn, o kó ólu káa kɛ́ wáati mínnɛɛn lé lɔ? O tɔɔmansii ó káa kɛ́ mínnɛɛn le kɛ yáa kó a wáati ó wɛ́ɛ sé?»

⁸Ɛnza ŋé i yawi kó: «Áa a yɛ́ɛkɔɔsi, a kɛ́nan tó mɔɔn lɔ a a láfii. Kɛ mansɔɔ Mɔɔn shɛ́ɛman ɲáan nan nín né tɔ́ɔ óle, kɛ fɔ kó: Ile lée Kísibhaa óle, kó dínɲan labha ŋwáati ó wɛ́ɛ sé. A kɛ́nan bhyáa olu íkwɔ. ⁹Ní a kɛ kɛ́ɛkɛkan ŋólu myɛ́n, óni fíɲaanli kó ólu mánngan myɛ́n wáati mínnɔn, a kɛ́nan sháan. Kɛ mansɔɔ dhyaalagboya lée fɔ o kó ólu a kɛ́, wáa o sí tɛ́ dínɲan labha ŋo le.»

¹⁰O kwɔ́, aa fɔ i yɛ kó: «Síya lɔ yáa í wíi síya gbɛ́ɛ kanman, yamaanlɔ yáa í wíi yamaan gbɛ́ɛ kanman. ¹¹Lúukolo yaayaa ó yáa kɛ ywáa shɛ́ɛman nɔn. Fwɛ́ɛnyangalo ó, óni kɔ́ɔn ó. Óni yeetɛɛko ólu, óni tɔɔmansii lɔ́lu yáa kɛ sángboo ó lɔ.

¹²Wáa sannin o kó ólu bɛ́ a kɛ, i yáa a myáan kɛ́ a gbási, i yáa a tɔ́lɔ. I yáa á ló sɛ́ɛbho ŋó kunndii ólu bhóo, i yáa a bhyáa kaso la. I yáa táa ní ále mansacɛ ólu ɲánkɔɔ, óni yamaantii ólu ɲánkɔɔ né tɔ́ɔ ó kósɔn. ¹³O yáa kɛ́ sɔ́ɔbu le, ké an ní ale sɛ́ɛya ládi. ¹⁴Aa lɔ́ ko a mánngan kɛ kóman lɔ lɔ́bhyɛ, á káa kóman mín nvɔ́ í ɲánkɔɔ kɛ a yɛ́ɛ dhyɛman, ¹⁵kɛ mansɔɔ, né gbú le káa kóman ó ló a lálɔ, kɛ hákiitiiya dí a mán, o sɔ́ɔbu la a yúu ólu sí táa sé kɛ kóman ní ale, wáman kɛ a sɔ́sɔ. ¹⁶A wóobhaa ólu yáa a ló bhóolɔ, óni a bhádhye ŋólu, mínnu mángbaanin ŋé a lá, óni a twáanva ólu, ólu yáa a shɛ́ɛman nó a yúu ólu bhóo kɛ́ a lɔ́lu fáa. ¹⁷Mɔɔn ólu bɛ́ yáa a yúuya né tɔ́ɔ ó kósɔn. ¹⁸Wáa yáanin a kúnzhe ó kɛ́ɛ kée ndáa túun. ¹⁹Ní a kɛ í lɔ́ja, a yáa ɲaanmanɲan ó sɔ́ɔ.»

Yeluzalɛmu hálaki ko ó

Matiyu 24.15-21; Maki 13.14-19

²⁰«Ní a kɛ Yeluzalɛmu laminninnin ɲé kɛ́ɛkɛbhaa ólu lá a yúu ólu bhóo wáati mínnɔn, aa lɔ kó só ó cé wáati ó wɛ́ɛ sé. ²¹Mɔɔn mínnu káa kɛ́ Zude mala ó lɔ, ólu á bwée kɛ táa tii ólu kúnnɔn. Mínnu kɛ kɛ́ Yeluzalɛmu só ó kɔ́ɔnnɔn, ólu á bwée kɛ bhɔ́. Mínnu kɛ kɛ́ sɛɛn mán, ólu kɛ́nan ló só ó kɔ́ɔnnɔn. ²²Kɛ mansɔɔ o ló ŋó Ala yɛ kítitɛɛlo ŋó lée wé Yeluzalɛmu ka, ké kóman mínnu wɛ́ɛ sɛ́wɛ kitabu ó kɔ́ɔnnɔn, ké o á i láfa. ²³O ló ŋó la kunnangboya yáa muso kɔ́ɔnman ŋólu sɔɔ, óni mínnu sín ndí lá dhyé ŋólu mán, tɔ́lɔya ó yáa sé yamaan ó mán, kɛ mansɔɔ Ala yɛ díminsa ó yáa bé yaman ó ka. ²⁴I yáa lɔ́lu fáa fá ŋó lá, i yáa a myaan kɛ́ táa ní ale síya gbɛ́ɛ olu yɛ yamaan ó lɔ. Síya ólu yáa Yeluzalɛmu cé pépe fɔ wáati min ŋwɛ́ɛn dí i mán, o á í lafa.»

Mɔɔn Dhyénjɛ ó kwɔ́sɛɛko ó

Matiyu 24.29-31; Maki 13.24-27

²⁵«Tɔɔmansii lɔ́lu yáa kɛ́ tee lɔ, óni káa óni lóodhye ŋólu ka, óni lúukolo ó ka. Mɔɔn ólu yáa ó yáa tɛɛ yamaan ó lɔ fɔ́ kɛ i kɔɔnnɔn bhá, kɔɔji ó mannganba ó kósɔn. ²⁶Mɔɔn shɛ́ɛman yáa sayakɛ sháanngoyoo ŋó bhóo, káwako ó miliya ó kósɔn lúukolo ó ka. Kɛ mansɔɔ sébhaaya míin kɛ́la sá ŋó lɔ ólu yáa mannan mannan. ²⁷O ɲán o mán, án ɲáan mɔɔn Dhyénjɛ ó nántɔ ó yé sángawa ó lɔ ní a yɛ sébhaayaba óni a yɛ nɔ́lɔyaba óle. ²⁸Ni ó kó ólu kɛ́ i lámyaan wáati mínnɔn, áa í látee kɛ́ a kúnnanwii sáman, kɛ mansɔɔ a yɛ Hɔ́lɔɲanli wáati ó wɛ́ɛ sé.»

Ɛnza ɲɛn kóman ó táa tínmin fɛ́sɛ fɛ́sɛ

Matiyu 24.32-35; Maki 13.28-31

²⁹O kwɔ, Ɛnza ŋé saanan lɔ́ la i yɛ kó: «Aa fígisun ŋó mánfɛɛ, óni yíi o tɔ ólu bɛ́. ³⁰Ní a kɛ́ a yé ké aa í búu kwáa bhɔ́la, aa bhɔ́la a ɲánle kó sanmanyi o wɛ́ɛ gbaa. ³¹O ɲán kée ŋó mán, álee lu, ní a kɛ kɛ́ o kó ólu yéla kɛ́la wáati mínnɔn, aa lɔ́ ŋóo Ala yɛ́ Mansaya ó wáati ó lé wɛ́ɛ gbaa.

³²Tó ní fɔ a yɛ tinɲan in né ngó, án ɲɛn bí wáati míin mɔɔn ólu bɛ́ táa sayakɛ, fɔ́ kó míinnu bɛ́ a kɛ́ kɛ i lafa. ³³Sángboo óni lúukolo ó yáa tínmin, wáa né yɛ kóman ólu táa tínmin tún.»

Áa a yɛ́ɛkɔɔsi

³⁴«Áa a yɛ́ɛkɔɔsi, a kɛ́nan tó lɔ́minba kɛ ólu la, óni minin ó la, óni kɛ tó dínɲan hánminnanngo ólu ɲíin ŋó mán, ké dínɲan labha nó ŋó kɛ́nan bháa a lɔ, ³⁵kɛ mansɔɔ nánlo ŋó kaa bháa dínɲan mɔɔn ólu bɛ́ lɔ lé, óyoo jɔ óo fé ŋó myaanla ɲán min mán. ³⁶Aa í hákii tó a yɛ́ɛ lɔ, kɛ́ a tíinnandhyaa Ala dɛ́li ó la wáati bɛ́, ké áa fáan sɔ́ɔ, kóyoo mínnu é nánla ké aa sé kɛ bwási ó bɛ́ mán, ké aa sé kɛ í lɔ mɔɔn Dhyénjɛ ó ɲánkɔɔ.»

³⁷Ɛnza ndɛ́ɛ mɔɔn ólu kalanan Ala bhatobhomba ó kɔ́ɔnnɔn tee lɔ. Ní sú ó tɛ́ɛ kwó, a tɛ́ɛ bhɔ́la só ó kɔ́ɔnnɔn kɛ táa sú o tínmin Olivyetii o ka. ³⁸Sɔɔ jónan ó mán, mɔɔn bɛ́ tɛ́ɛ táala Ɛnza nzaala Ala bhatobhomba ó kɔ́ɔnnɔn kɛ a lɔ́myɛn.

Ii wɛɛ yánva sii Ɛnza nán

Matiyu 26.1-5; Maki 14.1-2; Yaya 11.45-53

¹Búlufuunmɛɛ ó ɲánlagbɛ22.1 Búlufuunmɛɛ ó ɲánlagbɛ: O ɲánlagbɛ o lée Izalayɛlika olu bhɔ ó yɔɲan ó lɔ o ko bhyaa lá i kɔɔnnɔn. Í ɲángban kóyoo ŋó man íi búlufuunmɛɛ ó lɔɔ ŋó lé lɔ. Íi ó ɲánlagbɛ o kíila i kwɔ́ ko Hɔ́lɔɲanli o ɲánlagbɛ ó. ó, ó mín ndɔ́ɔ kó yɔɲan wɛɛ Hɔ́lɔɲanli o ɲánlagbɛ ó, o tɛ́ wɛ́ɛ súnɲan. ²Faanlɛɛɲansebhaa olu kúnndii ólu ní sɛliya kaamɔɔn ólu tɛ́ɛ ɲánɲiinnan Ɛnza nváa o man, wáa i tɛ́ɛ sháannan yaman ó ɲɛn.

Zudasi é Ɛnza yanvala

Matiyu 26.14-16; Maki 14.10-11

³O lɔ, Sɔtaannan é ló Zudasi lɔ, mín ŋé kíila i kwɔ́ kó Sikaliyɔti, Ɛnza ɲɛ́n kaamɔɔndhye ndá ni fyáa ó lɔ lé tɛ́ɛ o le. ⁴Zudasi é táa faanlɛɛɲansebhaa olu kúnndii ólu ní Ala bhatobhomba ó kunnansiibhaa ólu kúnndii ólu fɛ́ yé. A káa Ɛnza myaan kɛ a ló í bhóo ɲan mín mán, íi kóman kɛ bhyɛ ó lɔ́. ⁵Ó kóman óo i nisɔdhyaa. Ii bhyɛ a lɔ kó í yáa wɛ́ɛ dí a mán. ⁶Zudasi é sɔ́n. Aa a lamyaan kɛ ɲánɲiin ké aa Ɛnza nó í bhóolɔ ké yaman ó kɛ́nan kósɔɔ o lɔ.

Hɔ́lɔɲanli fɛ́ti ó lɔ́bhyɛ ŋó

Matiyu 26.17-25; Maki 14.12-21; Yaya 13.21-30

⁷Búlufuunmɛɛ ó ɲánlagbɛ ló ŋó lá. I kákan kɛ Hɔ́lɔɲanli o ɲánlagbɛ fáanlɛɛ saa ó fáa o ló ŋó lé la. ⁸Ɛnza ŋé Piyɛli ni Yaya bhyáashaa kɛ fɔ i yɛ kó: «Áa táa Hɔ́lɔɲanli o ɲánlagbɛ ó sunman ŋó lɔ́bhyɛ án ɲɛ́n.»

⁹Ii a mánɲaankɛ kó: «Ii fɛ́ ké án ni a lɔ́bhyɛ ywáa mínnɛɛn lé lɔ́?»

¹⁰Ɛnza ŋé i yawi kó: «Ní a kɛ́ ló só ó kɔ́ɔnnɔn, a yáa bhyɛ cɛ lɔ́ le ké jílaa lɔ é a kúnman. Áa i bhyáa o kwɔ. A kaa ló lú mín ngɔ́ɔnnɔn áa ló yé. ¹¹Áa fɔ lútii ó yɛ kó: Kaamɔɔn, Án ngáamɔɔn ó kó: kó Ale ní a yɛ kaamɔɔndhye ŋólu káa Hɔ́lɔɲanli o ɲánlagbɛ ó lɔ́min ó kɛ bhó mín ngɔ́ɔnnɔn, kó o bhó ŋóo mín? ¹²A yáa bhómba lɔ yáa a lá sangaso ó ka. Án manko káa sé fé mínnu mán, o bɛ́ é a kɔ́ɔnnɔn. Aa ɲánlagbɛ ó súnman ŋó lɔ́bhyɛ o kɔ́ɔnnɔn.»

¹³Piyɛli ni Yaya é táa, Ɛnza ŋé fɔ ɲán mín mán ii táa kó ó bɛ́ sɔɔ ó ɲán o le mán. Ii Hɔ́lɔɲanli o ɲánlagbɛ ó súnman ŋó lɔ́bhyɛ yénɔn.

Mantii ó yɛ tabɛli ó

Matiyu 26.26-30; Maki 14.22-26

¹⁴Lɔ́minkɛ wáati óo sé mínngɛ, Ɛnza ní a yɛ céladhye ndá ni fyáa óo í síi súnman ŋó mán. ¹⁵Aa fɔ i yɛ kó: «Né tɛ́ɛ fɛ́ cɛ́ɛne kɛ́ Hɔ́lɔɲanli o ɲánlagbɛ ó lɔ́min ó kɛ́ ní ale sannin ní tɔ́lɔ, ¹⁶kɛ mansɔɔ ní fɔ́la a yɛ ngó né táa Hɔ́lɔɲanli ó ɲánlagbɛ ó lɔ́min o gbɛ́ɛ kɛ́ ní ale bhée fɔ o a í lafa Ala yɛ́ Mansaya ó lɔ.» ¹⁷O wáati ó lɔ, aa lɛ́zɛn jífyɛ ó tá kɛ bálika bhɔ́ Ala yɛ kɛ fɔ kó: «Aa a myáan kɛ a lɔ́taa a cɛ, ¹⁸kɛ mansɔɔ ní fɔ́la a yɛ ngó: Ne táa lɛ́zɛnnji min mée fɔ́ Ala yɛ́ Mansaya ó kɛ́nan.»

¹⁹O kwɔ́, Ɛnza ŋé búlu ó tá, kɛ Ala bálika bhɔ́, kɛ a tɛ́ɛ tɛ́ɛ, kɛ o di í mán, tó kɛ fɔ i yɛ kó: «Nvásisoo ó lée nín [Mín ŋwɛ́ɛn dí álee kósɔn. Áa ó kɛ́ kɛ í míli né mán.» ²⁰Lɔ́min ó kɛnin ŋó kwɔ́, aa lɛ́zɛnnjifyɛ ó tá kɛ Ala bálika bhɔ́ kɛ fɔ kó: «Míin née dhyáaɲɔɔnya kwáa ó jífyɛ óle, Ala é dhyáaɲɔɔnya kwáa mín nzíi né yée ó ka, ó mín ŋé bwɔ́ a kósɔn.]»

Ɛnza ŋé a yánvabhaa ó kó fɔ́la

Matiyu 26.20-25; Maki 14.17-21

²¹«Mɔɔn mín ngáa né yánva, o tíi ó lɔ́min kɛ́la ní né le. ²²Mɔɔn Dhyénjɛ ó yáa sayakɛ óyoo a sɛ́wɛnin ŋé tɛ́nmɛn né. Wáa mɔɔn mín ngáamɔɔn Dhyénjɛ ó yánva, kunnangboya é o tíi ó yɛ.»

²³Kaamɔɔndhye ŋólu a lámyaan kɛ́ ɲɔ́ɔn mánɲaankɛ kó ó káa kɛ́ yɛ́ɛtii lé i cɛ́man.

Yɛ́ɛtii a bwó bɛ́ lé?

Matiyu 18.1; 20.25-28; Maki 9.34; 10.42-45

²⁴Lalɔsɔɔn ŋé ló Kaamɔɔndhye ŋólu cɛ, kɛ mansɔɔ i tɛ́ɛfɛ kɛ a lɔ́ kó yɛ́ɛtii bɛ́ lɔ mɔɔnba ó lé i cɛ́man. ²⁵Ɛnza ŋé fɔ i yɛ kó: «Yamaan gbɛ́ɛ ólu yɛ mansa ólu mansayafaan ó lála ólu ka, óni faan é mínnu bhóo, ólu fɛ ké yamaan ó dhyé ólu a i kíi kó kobhɛɛkɛbhaa ólu. ²⁶Álee tá ó kákan kɛ kɛ́ céne. Wáa a cɛ́man mín ŋé mɔɔnba le, o tíi ó á kɛ́ óyoo a bɛ́ lɔ́ dhyémuu ó, mín ŋé ɲɛ́nmɔɔn lé, o tíi ó á kɛ́ óyoo bháalakɛdhye. ²⁷Álee tá miliya o lɔ, yɛ́ɛtii mɔɔnba le? Mín nzíinin ŋé tabhali ó la, wáman míin díla a man? Mín nzíinin ŋé tabhali ó la o lé mán bwó ŋán? Tó né wɛ́, née a cɛ́man óyoo bháalakɛdhye.

²⁸Álee kwɛ́nnin, a wɛ́ɛ i lɔ́ja kɛ tó ni né lé ɲɛ́n sɛɛ ó wáati o lɔ. ²⁹O lé kósɔn, né Fá é Mansaya ó dí né mán ɲán mín mán, née sé a dila a léelu mán cé, ³⁰ké aa lɔ́minkɛ óni kɛ mínnin kɛ́ ni né le ɲɛ́n Mansaya ó lɔ, óni kɛ́ í síi mansayagbaanin ŋó ka kɛ Izalayɛli síya tá ni fyáa ó yɛ́ kíti ó tɛ́ɛ.»

Ɛnza ŋé fɔ́la kó Piyɛli yáa fɔ ale mán kó a mán a lɔ

Matiyu 26.31-35; Maki 14.27-31; Yaya 13.36-38

³¹Ɛnza ŋé fɔ Simɔn yɛ kó: «Simɔn, Simɔn, Sɔtaannan tɛ́ɛ ɲiin kɛ́ i lɔ́swaan óyoo ii muu ó tɛ́nnɛnnan ɲán min mán. ³²Wáa né wɛ́ɛ Ala dɛ́li i yɛ, ké í yɛ lánanya ó kɛ́nan cáan. Ní ile kɛ́ díminsa kɛ́nan né mán wáati mínnɔn, íi í bhádhye ŋólu yóso lágbɛya.»

³³Piyɛli é fɔ a yɛ kó: «Mantii ó, né lɔ́bhyɛnin ŋé kɛ táa ní íle kaso ó lá, wáman kɛ sayakɛ ní íle.»

³⁴Ɛnza ŋé a yawi kó: «Piyɛli, ní fɔ́la í yɛ ngó lónan ŋó táa kóman bí, ní íle mán fɔ né mán síɲan sawa kɛ́ bha kó i mán né lɔ.»

Ɛnza ngó a yɛ kaamɔɔndhye ŋólu á í lɔ́bhyɛ

³⁵Ɛnza ŋé fɔ a yɛ́ kaamɔɔndhye ŋólu yɛ íkwɔ kó: «Ní a bhyaa céla ké wɛ́ɛ, óni bhɔɔ, óni sawaa tɛ́ a bhóo mínngɛ, fé mínnɛɛn é dɛ́sɛ á lɔ?»

Ii a yawi kó fósi. ³⁶Ɛnza ŋé fɔ i yɛ íkwɔ kó: «Wáa sísan, ní wɛ́ɛ kɛ kɛ́ mín móo, o waa ó tá. O ɲán kée ŋó mán, ní bhɔɔ kɛ kɛ́ mín móo, o waa ó tá. Ní fá ndɛ́ mín móo, o tíi ó a yɛ deeke ó fele kɛ a lɔ sá. ³⁷Kɛ mansɔɔ, ní fɔ́la a yɛ ngó, mín nzɛ́wɛnin ɲé né tá sháa ó fɛ, o kákan né kɛ kɛ dhyaalagboya la. A sɛ́wɛnin ɲé kó: ‹I wɛ́ɛ a yace kóyoongɛbhaa ólu lɔ́ le,› sísan, o wáati ó wɛ́ɛ súnɲan.»

³⁸Kaamɔɔndhye ŋólu fɔ Ɛnza ɲɛ́n kó: «Mantii ó, fá nvyáa mánfɛɛ.»

Ɛnza ŋé i yawi kó: Á káɲin njé.

Ɛnza ŋé táala Olivyetii ó ka kɛ Ala dɛ́li

Matiyu 26.36-46; Maki 14.32-42

³⁹Ɛnza ŋé bhɔ́ kɛ táa Olivyetii ó ka, óyoo a tɛ́ wɛ́ɛ lɛɛ a kɛ́la ɲán mín mán. A yɛ kaamɔɔndhye ŋólu i bhyáa a kwɔ́. ⁴⁰Aa sé o ywáa ó lɔ mínngɛ, aa fɔ i yɛ kó: «Aa í sɛ́ɛ ké á kɛ́nan ló lɔ́swaannin ó lɔ.»

⁴¹O kwɔ́, aa bhɔ́ i tɔ́ɔfɛ kɛ́ i mángbaa ɲɛ́nnzhaa fɛ dɔ́ɔnin, kɛ i kúnmɛɛn nɔ́kɛɛ kɛ Ala dɛ́li kó: ⁴²«Nvá, ní íi fɛ́, íi sé tɔ́lɔya míin njɛ́bhɔla né la, wáa né sao o kɛ́nan kɛ, fɔ́ íle sao ó.» ⁴³[O wáati ó lɔ, malɛɛka lɔ é bhɔ́ sángboo ó lɔ kɛ́nan bhaaka ló a lɔ. ⁴⁴Ɛnza ní ó tɔ́lɔnin ndɛ́ɛ koyoongɛ. Áa a lɔ fala Ala dɛ́li ó ka fɔ́ kɛ tála bhɔ́ a lá. Fɔ́ tála jí óo kɛ́la óo yée, kɛ tɔ́ndɔ lúuman.]

⁴⁵Aa wɛɛ Ala dɛ́li ó lá mínngɛ, aa i wíi kɛ́nan a yɛ kaamɔɔndhye ŋólu tɔ́ɔfɛ, aa táa ólu sɔ́ɔ ké íi súnnɔɔn lɔ nílafin ŋó bhóo. ⁴⁶Aa fɔ i yɛ kó: «Mínnɛɛn kósɔn aa súnnɔɔn lɔ? Áa i wíi kɛ Ala dɛ́li, ké a kɛ́nan ló lɔ́swaannin kɛ́bhaa ó bhóo.»

Ɛnza myaanko ó

Matiyu 26.47-56; Maki 14.43-50; Yaya 18.3-11

⁴⁷Kɛ Ɛnza ndó kóman ó la, yaman gbɔ́gbɔ é í kúnnan bhɔ́, Ɛnza ɲɛn kaamɔɔndhye ndá ni fyáa ó kée, mín ndɔ́ɔ kó Zudasi, ó tɛ́ɛ yaman ó ɲɛ́n. Aa í mangbaa Ɛnza nan kɛ í fínin á mán. ⁴⁸Ɛnza ŋé fɔ a yɛ kó: «Zudasi, íi i fíninnan né mán kɛ o kɛ́ sɛ́ɛya lé kɛ mɔɔn Dhyénjɛ ó ló bhóolɔ kɛɛ?»

⁴⁹Mínnu tɛ́ɛ ni Ɛnza né kó mín ngbáa kɛ ólu o yé mínngɛ, íi fɔ a yɛ kó: «Mantii ó, án ni i gbási ní fá ŋó le a?» ⁵⁰O ywáaninngee ŋo lɔ, kée ŋé faanlɛɛɲansebhaa olu kúnndiiba ó yɛ bháalakɛdhye ŋó bhóobhɛɛ tóo ó tɛ́ɛ a mán.

⁵¹Wáa Ɛnza ŋé fɔ kó: «Á tó cé, o wɛ́ɛ soo» Aa í bhóo túu bháalakɛdhye ŋó tóo ó la kɛ a lákɛɛnya.

⁵²O kwɔ́, Ɛnza ŋé fɔ faanlɛɛɲansebhaa olu kúnndii ólu yɛ, óni Ala bhatobhomba ó kunnansiibhaa ólu kúnndii ólu yɛ, óni cɛba mínnu tɛ́ wɛ́ɛ nan a kanman, a kó o: «Áa nánla ní fá ŋóni gbéle ólu lé né kanman, óyoo née kóyoongɛbhaa le lé. ⁵³Né tɛ́ɛ ní ale Ala bhatobhomba ó kɔ́ɔnnɔn ló ŋóo ló, wáa a mán né myáan, a yɛ wáati óle wɛ́ɛ sé sísan, diwi ó tá wáati ó lée wé.»

Piyɛli kó ale mán Ɛnza nɔ́

Matiyu 26.57-58,69-75; Maki 14.53-54,66-72; Yaya 18.12-18,25-27

⁵⁴Ii Ɛnza myáan kɛ táa ní ale faanlɛɛɲansebhaa olu kúnndiiba ó yɛ́ lú ó kɔ́ɔnnɔn. Piyɛli é í súuku táamankɛ, kɛ cɛ́ba tó í cɛ. ⁵⁵I tɛ́ wɛ́ɛ tá lákin lúkɔɔn ó cɛ́man kɛ í síi o fɛ. Piyɛli é táa í síi i cɛ́man.

⁵⁶Bháalakɛdhye musoman nɔ́ é Piyɛli síinin ɲé tá ó fɛ, aa i ɲán gbáan a lɔ, tó kɛ fɔ kó: «Cɛ míin ndɛ́ɛ ní Ɛnza né.» ⁵⁷Piyɛli é i lámangbɛya kɛ fɔ kó: «Né mán a lɔ́.» ⁵⁸Wáati dɔ́ɔnin ŋé tínmin, cɛ lɔ́ é a yé kɛ fɔ kó: «Ile tɛ́ɛ ni ale.» Wáa Piyɛli é fɔ kó: «Né tɛ́ i lɔ le lɛ́.» ⁵⁹Lɛ́ɛlɛ kée ndinminnin ngwɔ́, cɛ lɔ é fɔ kɛ mangbɛya kó: «Síka tɛ́ lɔ, cɛ míin ndɛ́ɛ ní ale, kɛ mansɔɔ Galileka lée a le.» ⁶⁰Wáa Piyɛli é a yawi kó: «Ii min nvɔla, né mán ó lɔ́ nɛ́.» Kɛ a tó o kóman ó la, o ywáaninngee ŋó lɔ́ lónan ŋóo kóman. ⁶¹Mantii ó í ɲán yɛ́ɛman kɛ Piyɛli mánfɛɛ. Mantii ó tɛ́ wɛ́ɛ kóman min nvɔ́ Piyɛli yɛ, Piyɛli hákii é bhyáa ó lɔ. Kó: «Sannin lónan ŋó á kóman bí, i yáa fɔ né mán síɲan sawa kɛ kó í mán né lɔ́.» ⁶²Piyɛli é bhɔ́ kɛ́ɛnman, kɛ kásikɛ bhɛ́libhɛli.

⁶³Ɛnza kunnansiibhaa ólu tɛ́ɛ a lákɔɔbhɔ la, kɛ tó a gbásila. ⁶⁴Ii a ɲán ó sili, tó kɛ́ a mánɲaankɛla kó: «Célayakɛ yɛ́ɛtii i gbási, ó fɔ́ án ɲɛ́n?» ⁶⁵Ii a nɛ́ɛn kɛ kómanyoo ngbɛ́ɛ lú fɔ a mán.

Ɛnza ŋé Yawudhyaa ólu yɛ kítitɛɛlaa ó lɔ

Matiyu 26.59,63-65; Maki 14.55,61-64; Yaya 18.19-24

⁶⁶Kɛ́ɛn óo bhɔ́ mínngɛ, só o cɛba ólu, ní faanlɛɛɲansebhaa olu kúnndii ólu, ní sɛliya kaamɔɔn ólu ɲɔ́ɔn nadhyɛ. Ii táa ni Ɛnza né i yɛ kítitɛɛlaaba ó lɔ. ⁶⁷Ii a mánɲaankɛ kó: «Ní íle lée Kílisi óle, ó fɔ án ɲɛ́n.» Ɛnza ŋé í yawi kó: «Ní né kɛ́ fɔ a yɛ, a táa lá ó la. ⁶⁸Ní né kɛ́ álee mánɲaankɛ, a táa né yawi. ⁶⁹Wáa kɛ tá bí mán, mɔɔn Dhyénjɛ ó yáa í síi Sétii Ala bhóobhɛɛ o kɔɔ.» ⁷⁰I bɛ́ɛ fɔ kó: «O sán ó lɔ, íle lée Ala Dhyénjɛ ó lé a?» Aa i yawi kó: «A gbú lée lú wɛ́ɛ ó fɔ, kó né lée o le.» ⁷¹Ii fɔ kó: «Án manko tɛ́ sɛ́ɛya la bhée, á gbú lá ó wɛ́ɛ mín nvɔ́, án ŋwɛ́ɛn o kóman ó myɛ́n.»

Ii táa ni Ɛnza né Pilati fɛ́ yé

Matiyu 27.2,11-14; Maki 15.1-5; Yaya 18.28-38

¹Oo kɛ́ mínngɛ, yaman ó bɛ́ɛ í wíi kɛ́ táa ni Ɛnza né Pilati fɛ yé. ²Ii a lámyaan kɛ́ Ɛnza yáayii, kɛ fɔ kó: «Án ŋwɛ́ɛn yé kó cɛ míin ŋé án ɲɛ́n yamaanlɔ mɔɔn ólu kúnnɔn cáannan kɛ i lamuluti. Kɛ i lába nísɔɔn sala ó mán mansacɛ Sezali yɛ. A kó kó ale lée Kílisi ó lé, kó álee mansa le lé.»

³Pilati é a mánɲaankɛ kó: «Ile lée Yawudhyaa ólu yɛ mansacɛ o le a?»

Ɛnza ŋé a yawi kó: «Ile le wɛ́ɛ o fɔ.»

⁴Pilati é fɔ faanlɛɛɲansebhaa olu kúnndii ólu ní yaman ó yɛ kó: «Né mán kún ɲé cɛ míin nan mín ŋé sé kɛ́la a hálaki kún né.»

⁵Wáa í tɛ́ɛ fɔ́la kɛ mangbɛya kó: «Aa yaman ó lámulutila ní a yɛ káa ŋó le Zude mala ó ywáa bɛ́ lɔ, kɛ lámyaan Galile, fɔ kɛ́nan sé ya.»

I wɛɛ táa ni Ɛnza né Elɔdi fɛ́ yé

⁶Pilati é myɛ́n mínngɛ kó aa bhɔ́la Galile, áa i manɲaankɛ kó: «Cɛ míin ŋé Galileka le lé a?» ⁷Aa myɛ́n mínngɛ kó Ɛnza ŋé mansacɛ Elɔdi yɛ fáan le kɔ́ɔ, aa fɔ i yɛ kó íi táa ni ale Elɔdi fɛ yé, kɛ mansɔɔ Elɔdi tɛ́ɛ Yeluzalɛmu o ló ŋó lá. ⁸Elɔdi é Ɛnza ɲé mínngɛ, oo dhyáa a yɛ koyoongɛ. Kabiini wáatija, a tɛ́ɛfɛ kɛ Ɛnza ɲé, kɛ mansɔɔ a tɛ́ wɛ́ɛ Ɛnza ngó myɛ́n. A tɛ́ɛ fɛ ké Ɛnza ŋán káwananngo lɔ kɛ́ ale ɲánla. ⁹Elɔdi é Ɛnza manɲaankɛ kó shɛ́ɛman nan, wáa Ɛnza mán a yawi. ¹⁰Faanlɛɛɲansebhaa olu kúnndii ólu ni sɛliya kaamɔɔn ólu tɛ́ɛ yé. I tɛ́ɛ kóman yóo nvɔla a mán kɛ a yánva. ¹¹Elɔdi ni a yɛ swaasi ólu tɛ́ɛ yɛ́ɛbhɔla Ɛnza nɔ́n, áa mansaya faani cɛ́ɛ nɔ bhyáa a kannan kɛ yɛ́ɛbhɔ a lɔ, kɛ tó álakwɔsɛɛ Pilati mán. ¹²Pilati ní Elɔdi bhyɛnin ndɛ́ tɛ́ a lɔ, wáa ii kɛ́ twáanva ɲɔ́ɔnman ne o ló ŋó la.

Ɛnza nváa kó ó wɛ́ɛ i la tɛ́ɛ

Matiyu 27.15-26; Maki 15.6-15; Yaya 18.39--19.16

¹³Pilati é faanlɛɛɲansebhaa olu kúnndii ólu, ní Yawudhyaa ólu yɛ ɲɛ́nmɔɔn ólu ní yaman ó kíi. ¹⁴Aa fɔ i yɛ kó: «A wɛ́ɛ nan ní cɛ míin né kó aa mɔɔn ólu lɔ́su la. Wáa, né wɛ́ɛ a manɲaankɛ a bɛ́ ɲanla, né mán kóman sɔ́ɔ a lá míin kɛ a yáayii kun né kɛ a fáa. ¹⁵Elɔdi mán yáayii kun nzɔ́ɔ a lá, kɛ mansɔɔ a wɛ́ɛ a lá kwɔ́sɛɛ né mán. O lɔ, né mán cɛ míin nváa kun ɲé. ¹⁶O lɔ, né yáa a gbasi gbɛ́nɲɛn lá. O kwɔ́, kɛ a lábhyaa.»

¹⁷[Sá ŋóo sá, Yawudhyaa ólu yɛ́ Hɔ́lɔɲanli ó ɲánlagbɛ ó lɔ, Pilati tɛ́ɛ kasodhye ngée nábhyaala.]

¹⁸Yaman ó bɛ́ɛ gbáa kɛ fɔ kó: «Cɛ míin nváa, íi Baanabasi bhyáa.» ¹⁹Kɛ mansɔɔ Baanabasi tɛ́ wɛ́ɛ bhyáa kasola mulutili ó kósɔn só ó kɔ́ɔnnɔn. Óni mɔɔn fáa o kósɔn.

²⁰Wáa Pilati tɛ́ɛfɛ kɛ Ɛnza nábhyaa, aa yaman ó manɲaankɛ í kwɔ́. ²¹Wáa íi gbáa kó: «A gbaan yíi ó mán! A gbáan yíi ó mán!»

²²Pilati é i manɲaankɛ a síɲan sáwaɲɔn ó lɔ kó: «Aa kóyoo mínnɛɛn lé kɛ wɛ́? Né mán kun nzɔ́ɔ míin kɛ́ a fáakun ne. O lɔ, né yáa fɔ kó íi a gbasi ní gbɛ́nɲɛn lá, O kwɔ́ kɛ a lábhyaa.»

²³Wáa yaman ó gbáa kó aa Ɛnza gbáan yíi ó mán. I mánngan ŋóo bwóɲan fɔ kɛ́ fáan sɔ́ɔ. ²⁴I tɛ́ɛ mín ɲiinnan, Pilati é fɔ kó a yáa ó kɛ́ i yɛ. ²⁵Baanabasi mín ndɛ́ɛ kaso ó la múlutili óni mɔɔn fáa ó kósɔn, aa ó lábhyaa. Kɛ Ɛnza nó i bhóolɔ ké íi i sao kɛ́ a lá.

Ɛnza ngbaan ngó ó

Matiyu 27.32-44; Maki 15.21-32; Yaya 19.17-27

²⁶I táatɔ ó lé ní Ɛnza ne, ii cɛ lɔ́ kunmyɛ a tɛ́ɛ bhɔ́la sɛɛn mán, a tɔ́ɔ kó Simɔn, Silɛninnga lée ó le. Ii Ɛnza gbáanɲii ó lá o kunman, kó aa bhyaa Ɛnza kwɔ́.

²⁷Kɛ i táatɔ o tó, yamanba é bhyaa íkwɔ, muso shɛ́ɛman ndɛ́ɛ táa íkwɔ, ólu tɛ́ɛ i sísi ólu mángbasigbasila kɛ i mánkoman kóman la. ²⁸Ɛnza ŋé í ɲán yɛ́ɛman kɛ fɔ i yɛ kó: «Yeluzalɛmu muso ólu, a kɛ́nan kási né kósɔn. Aa kási a gbúlu kósɔn óni a dhyé ŋólu kósɔn, ²⁹kɛ mansɔɔ ló nɔ́ yáa sé, mɔɔn ólu yáa fɔ kó: ‹Muso mínnu mán dhyé nzɔ́ɔ, óni mínnu mán dhyé ŋwóo, óni mínnu mán sín ndí dhyé mán, ólu yeemanfanin ɲé.› ³⁰O sán ó lɔ, i yáa fɔ tíi ólu yɛ kó: ‹Áa bé án ngá!› I yáa fɔ tiininngbeya ólu yɛ kó: ‹Áa án mátuun!› ³¹Ní í kɛ kɛ́ míin ngɛ́la yíi kɛ́nnɛn ó lá ta ŋó, yíi yáa ŋó tá ó káa kɛ́ díi?»

³²I tɛ́ɛ táa ni mɔɔn fyáa gbɛ́ɛ le, kóyoongɛbhaa le tɛ́ɛ ólu le, ké ii ólu ní Ɛnza nváa ɲɔ́ɔn nvɛ́.

³³Ii ywáa min ngíila kó Kunngɔɔngoo ywáa, ii sé o ywáa o lɔ mínngɛ. Ii Ɛnza gbáan yíi ó mán yé, óni kɛ kóyoongɛbhaa fyáa ólu gbaan yíi mán, kée ndɛ́ɛ a bhóobhɛɛkɔɔ, tɔ kée ŋó tɛ́ɛ a bhóonwaan ngɔɔ. ³⁴Wáa Ɛnza ŋé fɔ kó: «Nvá, yafa i mán, kɛ mansɔɔ íi min ngɛ́la i mán ó lɔ́.»

Swaasi ólu gbámantɛɛ Ɛnza ɲɛ́n faani ólu ka kɛ ólu lɔ́taandaa ɲɔ́ɔnnan. ³⁵Yaman ó lɔ́nin ndɛ́ɛ yé i tɛ́ɛ mánfɛɛli kɛ. Yawudhyaa ólu yɛ kunndii ólu tɛ́ɛ yɛ́ɛbhɔla Ɛnza nɔn. Kɛ fɔ kó: «Ní ale lée Kílisi óle, Ala wɛ́ɛ mín lɔ́tɔnmɔn a wɛ́ɛ mɔɔn tɔ́ ólu bwási, aa a yɛ́ɛ bwási le.»

³⁶Swaasi ólu tɛ́ɛ yɛ́ɛbhɔla a lɔ. Ii í mangbaa a lá ko í káa lɛ́zɛnnji kuunnin ŋó dí a mán. ³⁷Kɛ fɔ a yɛ kó: «Ní ile lée Yawudhyaa ólu yɛ mansacɛ ó lé, i yɛ́ɛ bwási.»

³⁸Ii sɛ́wɛli kɛ Yíifɛɛn nɔ mán kɛ o gbaan Ɛnza ngúnnɔn sáman a sɛwɛnin ndɛ́ɛ o man kó: «Cɛ míin née Yawudhyaa ólu yɛ mansacɛ óle.»

³⁹Kóyoongɛbhaa fyáa mínnu gbaan yíi ó mán, ó kée ndɛ́ɛ a nɛɛnnan kɛ fɔ kó: «Ile lé tɛ́ Kílisi óle a? I yɛ́ɛ bwási, kɛ́ án née bwási!»

⁴⁰Wáa kóyoongɛbhaa tɔ́ kée ŋóo kóman dɔ ó mán kɛ fɔ a yɛ kó: «I tɛ́ sháan Ala ɲɛn ŋán! ⁴¹Án née kwɛ́nnin ngákan ni tɔ́lɔya míin né, kɛ mansɔɔ án wɛ́ɛ kóyoo ne kɛ, wáa ale mán kóyoo nzí kɛ.» ⁴²O kwɔ, aa fɔ kó: «Ɛnza, ní í kɛ́ i síi i yɛ́ Mansaya ó lɔ wáati mínnɔn, íi i hákii tó né lɔ.»

⁴³Ɛnza ŋé a yawi kó: «Tinɲan in né ní fɔ́la i yɛ ngó: Bí i yáa kɛ ni né lé ɛliyanan ó lɔ.»

Ɛnza nzáyako ó

Matiyu 27.45-56; Maki 15.33-41; Yaya 19.28-30

⁴⁴Teelatee ŋwáati ó tɛ́wɛɛ bhyaa sé le, diwi é ló yamaan ó ywáa bɛ́ lɔ fɔ́ kɛ táa sé ywáatee ó mán. ⁴⁵Tée ó tɛ tɛ́ yéla bhée. Ala bhatobhomba ó sácɛ ó fála fyáa le. ⁴⁶Ɛnza ŋé gbáa kɛ fɔ kó: «Nvá, né wɛ́ɛ né ní ó ló í bhóo.» Aa ó fɔ mínngɛ, aa sayakɛ.

⁴⁷Lomɛn ólu yɛ́ swaasi kúnndii óo o kó ólu yé mínngɛ, aa Ala tando kɛ fɔ kó: «Kɛ fɔ tinɲan la, cɛ míin ndɛ́ɛ mɔɔnteenin ne lé.»

⁴⁸Yaman mín nádhyɛnin ndɛ́ɛ kɛ o kó ólu mánfɛɛ, kó mínnu é tínmin ólu o yé mínngɛ, ólu kwɔ́sɛɛtɔ ó tɛ́ɛ i sísi ó mangbasi la nílafin ŋó bhóo. ⁴⁹Ɛnza ndwáanva ólu, óni muso mínnu tɛ́wɛɛ bhyáa a kwɔ́kɛ bhɔ́ fɔ Galile, ólu i lɔ kɛ kólɔgbɛ ywáa já nɔ́n.

Ɛnza nzúlongo ó

Matiyu 27.57-61; Maki 15.42-47; Yaya 19.38-42

⁵⁰Yawudhyaa ólu yɛ kítitɛɛbhaa ólu lɔ, cɛ lɔ tɛ́ɛ yé, a tɔ́ɔ kó Yusufu. Mɔɔnteenin né tɛ́ɛ o le, óni mɔɔnbhɛɛ le tɛ́ɛ o le. ⁵¹A mán sɔ́n a táamanɲɔɔn ólu yɛ kó látɛɛnin ŋólu mán. Óni ii kó mínnu kɛ, A tɛ́ɛ bhɔ́la Yawudhyaa ólu yɛ só lɔ la mín ndɔ́ɔ kó Alimate. A tɛ́ɛ Ala yɛ́ Mansaya ó nán o mánkɔɔnnan. ⁵²Aa táa Pilati saala kɛ Ɛnza nzú ó kófɔ a yɛ. ⁵³O kwɔ́, aa Ɛnza nzú ó láyii kɛ a bhɔ́ yíi o mán, kɛ féngbɛ ló a mán, kɛ a bhyáa kábulu lɔ kɔ́ɔnnɔn, o kábulu ó shɛ́nnin ndɛ́ɛ fáa o le lɔ, i tɛ́ mán mɔɔn sútaa yénɔn bhá. ⁵⁴Aa ó kɛ sannin lɔnwɛɛnlilo ŋó síɲanla óle mán. Lɔnwɛɛnlilo ó tɛ́ɛfɛ kɛ i lámyaan.

⁵⁵Muso mínnu tɛ́wɛɛ bhyáa Ɛnza ngwɔ́ kɛ bhɔ́ Galile, ólu táa ni Yusufu le Ɛnza nzútaalaa ó lɔ. Ii kábulu ó mánfɛɛ kɛ Ɛnza nzú ó láseɲan ó mánfɛɛ. ⁵⁶O kwɔ́, íi i kwɔ́sɛɛ kɛ táa só ó kɔ́ɔnnɔn. Ii wúsulan ŋó ní túu swáandhyaanin ŋó lɔ́bhyɛ.

Ii lɔnwɛɛnlilo ŋó bwóɲan óyoo aa fɔ ɲán mín mán Ala yɛ sɛliya ó lɔ.

Ɛnza ngúunngo ó

Matiyu 28.1-10; Maki 16.1-8; Yaya 2.1-10

¹Kookɔɔ ló ŋó sɔ́ɔ jónan ó mán, muso ólu tɛ wɛ́ɛ túu swáandhyaanin mín nɔ́bhyɛ, ii i wíi kɛ táa ni óle kábulu só ó la. ²Káwagbuba mín ndɛ́ɛ kábulu ó lála, ii táa sɔ́ɔ ké ó tɛ́ kábulu ó la lá bhée. ³Ii ló kábulu ó kɔ́ɔnnɔn, i mán Mantii Ɛnza nzú ó yé. ⁴Kɛ́ í hákii ɲáanminnin ŋó tó, íi bháa kɛ cɛ fyáa lɔnin ɲé i ɲánkɔɔ, faani gbɛ́ é i kannan. ⁵Muso ólu sháan kɛ í kún mánbiin lúuman, cɛ fyáa ólu fɔ i yɛ kó: «Mɔɔn míin i ɲánla mínnɛɛn lé kósɔn aa ó ɲíinan sú ólu cɛ́man? ⁶A tɛ́ yánun, a wɛ́ɛ kúun. A tɛ wɛ́ɛ kóman mín nvɔ́ a yɛ ké aa ní ale Galile, aa i hákii tó o lɔ. ⁷A tɛ́ wɛ́ɛ a fɔ kó fɔ́ mɔɔn Dhyénjɛ ó yáa ló yuumukɛbhaa ólu bhóo, ké íi a gbáan yíi ó mán, á tée sáwaɲɔn ló ŋó a yáa kúun.»

⁸O wáati ó lɔ, muso ólu hákii é bhyaa Ɛnza ɲɛn kóman ó lɔ. ⁹Muso ólu i kwɔ́sɛɛ kɛ bhɔ́ kábulu só ó la kɛ táa o kóman ólu lɔ́sɔɔ kaamɔɔndhye ndá ni kée ŋólu yɛ, óni kɛ a lɔ́sɔɔ mɔɔn tɔ́ ólu yɛ. ¹⁰O muso olu tɛ́ɛ Mwɛnyamu Magidalaka, óni Zaani, óni Zaki wóobhaa Mwɛnyamu. Muso tɔ́ mínnu tɛ́ɛ ní íle, ólu ŋé kó o lɔ́sɔɔ céladhye ŋólu yɛ. ¹¹Wáa muso ólu kóman mín nvɔ́, céladhye ŋólu mán lá o la. ¹²O bɛ́ kwɔ́, Piyɛli é i wíi kɛ bwée kɛ táa kábulu só o la. Aa í bíin kɛ kábulu ó kɔ́ɔnnɔnlaa ó mánfɛɛ, aa fáani gbɛ́ ó lé lánin ŋé lúuman, aa í kwɔ́sɛɛ kɛ táa a bhóo lú mán. Kó mín ŋwɛ́ɛn kɛ o wɛ́ɛ a káwakoya.

Ɛnza e í yɛ́ɛ yáala Kaamɔɔndhye nvyáa la

Maki 16.12-13

¹³Wáa, o ló ŋó la, kaamɔɔndhye ŋó fyáa tɛ́ɛ táala só lɔ́la mín ndɔ́ɔ kó Emayusi. O só óni Yeluzalɛmu cɛ ó tɛ́ɛ kilo tá ni fyáa ɲɔ́ɔnnɔn bhɔ́la. ¹⁴Kó mínnu kɛ i tɛ́ɛ ólu bhálo ó kɛ́la ɲɔ́ɔn nvɛ́. ¹⁵Kɛ i tó bhálo óni sɔ́sɔli ó la, Ɛnza ŋé i mangbaa í la tó kɛ táamankɛ ni íle. ¹⁶Wáa aa kɛ le óo i ɲán ó sílinin ɲé, i mán bhɔ́ Ɛnza ɲan le. ¹⁷Ɛnza ŋé i mánɲaankɛ kó: «Aa mínnɛɛn lé bhálo lá ɲɔ́ɔn nvɛ́?»

Oo kɛ́ mínngɛ, ii i lɔ. I ɲánlasiinin ndɛ́ɛ. ¹⁸Kée ndɔ́ɔ kó Kilopasi, óo a yawi kó: «Kó mínnu wɛ́ɛ kɛ́ tée fyáa míin ngɔ́ɔnnɔn, mɔɔn sí tɛ́ Yeluzalɛmu ní mín ɲé sé kɛ fɔ kó ale mán o kó ólu lɔ́.»

¹⁹Ɛnza ŋé i mánɲaankɛ kó: «Oo kó mínnɛɛn lé?»

Ii a yawi kó: «Kó míin kɛ Ɛnza Nazalɛtika lá! A tɛ́ɛ céla báakaman né le, aa káwakolu kɛ, óni kɛ kóman ni sébhaaya le Ala ní mɔɔn ólu bɛ́ ɲánkɔɔ. ²⁰Wáa faanlɛɛɲansebhaa olu kúnndii ólu ní án ɲɛ́n só ó ɲɛ́nmɔɔn ólu é a ló mɔɔn yóo ŋólu bhóo ké íi a fáa. Ólu a gbáan yíi ó mán. ²¹Án ɲii tɛ́ɛ a man óo ale lé káa Izalayɛlidhye ŋólu kunmanka. Wáa, kó míinnu kɛnin ŋó tée sawa lée bí le. ²²Án née kaamɔɔndhye ŋólu cɛ́man, muso lɔ́lu yé. Ólu tɛ́ wɛ́ɛ táa kábulu so ó la sɔ́ɔ jónan ó mán, kɛ́nan kóman lɔ fɔ án ɲɛn mín ɲé an ngɔ́ɔnnɔn bhá. ²³Kó i mán a su o yé. Ii fɔ án ɲɛn kó malɛɛka lɔ́lu i yɛ́ɛ yáa i lá, kɛ fɔ i yɛ kó Ɛnza ŋé i ɲánla. ²⁴Án ndáamanɲɔɔn lɔ́lu ŋé táa kábulu só o lá kɛ a mánfɛɛ. Muso ólu fɔ i yɛ ɲán mín mán, íi táa a sɔ́ɔ cé né, wáa i mán ale gbú o yé.»

²⁵Oo kɛ mínngɛ, Ɛnza ŋé fɔ i yɛ kó: «Áa hákiinda yé lɛ́! Céla ólu kóman mín nvɔ́, a lánin ndɛ́ o la a? A yóso o tɛ́ bhɔ́la o ɲánle jónan. ²⁶Fɔ́ Kílisi o tɛ́ɛ tɔ́lɔya lé myáan cé kɛ tó lónan a yɛ nɔ́lɔya ó lɔ.» ²⁷Kɛ lámyaan céla Musa yɛ sɛ́wɛ o mán, óni céla o tɔ́ ólu yɛ kitabu ó kɔ́ɔnnɔn, kó óo kó sɛ́wɛnin ndɛ́ɛ a tá sháa o fɛ aa ólu bɛ́ lɔ́sɔɔ i yɛ.

²⁸I tɛ́ɛ táala só mínnan, íi súnɲan o lá mínngɛ, Ɛnza ŋé kɛ óo aa fɛ kɛ tínmin kɛ táa ɲɛ́n. ²⁹Wáa íi a dɛ́li kó tó ni an ne, tée ó káa bé né wé, ywáa ó wɛ́ɛ sé. Ɛnza ŋé ló ni ile bhó ŋó kɔ́ɔnnɔn. ³⁰Ɛnza ŋé i síi ní íle tabhali ó la mínngɛ, aa búlu ó tá kɛ bálika bhɔ́ Ala yɛ, kɛ́ a lɔ́taandaa kɛ a di di i mán. ³¹Oo kɛ́ mínngɛ, i ɲan ó i láka, íi a lɔ́ ŋóo ale lée wé, wáa aa túun i ɲánkɔɔ. ³²Ii fɔ ɲɔ́ɔnɲɛn kó: «A tɛ́ɛ kómanla án ɲɛn sháa o lá wáati mínnɔn, óni a tɛ́ɛ Ala yɛ kitabu o sɛ́wɛli o ɲan fɔ́la án ɲɛn wáati mínnɔn án ɲóso o tɛ tɛ́ án nvyɛ́fyɛ la a?»

³³O ywáaninngee ŋó lɔ, íi i wíi kɛ i kwɔ́sɛɛ kɛ táa Yeluzalɛmu. Ii táa céladhye ndá ni kée ŋolu ládhyɛnin nzɔ́ɔ yé óni mínnu tɛ́ɛ ni ile. ³⁴Ólu fɔ mɔɔn fyáa ólu yɛ kó: Tinɲan ín ne Mantii ó wɛ́ɛ kúun, a wɛ́ɛ i yɛ́ɛ yáa Simɔn la.

³⁵Kó míin kɛ kaamɔɔndhye nváa o lá sháa o la, óni ii Ɛnza nɔ́ ɲán mín man súnman nɔ́ɔ wáati ó lɔ, íi o lɔ́sɔɔ kaamɔɔndhye ŋó tɔ ólu yɛ.

Ɛnza ŋé a yɛ́ɛ yáala a yɛ kaamɔɔndhye ŋólu la

Matiyu 28.16-20; Maki 16.14-18; Yaya 20.19-23

³⁶Kɛ i tó ó kóman ó la, ii bháa kɛ Ɛnza nɔnin ɲé i cɛ́man. Aa fɔ i yɛ kó: «Ala a hɛ́lɛ o kɛ a yɛ́.»

³⁷I yóso é bwɔ́ ii sháan koyoongɛ kɛ mansɔɔ i tɛ́ɛ a yéla lɔ lé yáa é le. ³⁸Wáa Ɛnza ŋé fɔ i yɛ kó: «Mínnɛɛn lé kósɔn a kɔ́ɔnnɔn wɛ́ɛ múun? Mínnɛɛn lé kósɔn aa síka lá? ³⁹Aa né bhóo óni né sé ŋólu mánfɛɛ, né lée wé. Aa i bhóo túunan kɛ mánfɛɛ, kɛ mansɔɔ fásisoo óni koo tɛ́ ní ó lɔ́, wáa óo né lɔ.»

⁴⁰Ɛnza ŋé o fɔ mínngɛ, aa a bhóo ólu ní a sé ŋólu yáa i la. ⁴¹I nisɔ é dhyáa koyoongɛ, yáanin o bɛ́ kwɔ́ i tɛ́ mán lá a lá bhá. O lɔ, Ɛnza ŋé i mánɲaankɛ kó: «Lɔ́minfe nɔ tɛ́ sɔ́ɔ a bhóo ya ŋán?» ⁴²Ii yɔ́ɔyaanin nɔ dí a mán. ⁴³Aa o myáan kɛ o lɔ́ɔ i ɲanla.

⁴⁴O kwɔ aa fɔ i yɛ kó: «Né tɛ́ɛ ni ale wáati mínnɔn, né tɛ́ɛ o kó ólu le fɔ́la a yɛ, fé ŋóo fé ŋé sɛ́wɛ Musa yɛ sɛliya ó lɔ, óni céla ólu yɛ kitabu o lɔ, óni zabulu ólu kitabu o lɔ né tá sháa o fɛ́, fɔ ó kó o bɛ́ tɛ́ɛ kɛ́ lé.»

⁴⁵Oo kɛ mínngɛ, áa i hákii ó láka ké ii bhɔ́ kitabu o kɔ́ɔnnɔnkan ŋó ɲánle. ⁴⁶O kwɔ, aa fɔ i yɛ kó: «A sɛ́wɛnin ɲé Kitabu ó lɔ kó Kílisi ó yáa tɔ́lɔya myáan, a tee sáwaɲɔn ló ŋó a yáa kúun kɛ bhɔ́ saya o lɔ. ⁴⁷Ké yɛ́ɛmanli ó wáa kɛ, ké yúumu yafa ó sɔɔ wáa i láse síya ólu bɛ́ mán ale tɔ́ɔla, kɛ lámyaan Yeluzalɛmu mán. ⁴⁸Ale léelu o kó ólu sɛ́ɛya lé. ⁴⁹Né Fá é fé mín náheli tá, né yáa o lanan a mán. Wáa ále, áa tó só o kɔ́ɔnnɔn, fɔ́ o sébhaaya o wáa yíi kɛ bhɔ́ sá ŋó lɔ.»

Ɛnza ŋé yɛ́ɛla sángboo ó lɔ

Maki 16.19-20

⁵⁰O kwɔ, aa táa ni ile fɔ Betani fán ŋó fɛ. Aa a bhóo fyáa olu láwii kɛ lwáau kɛ i yɛ. ⁵¹Kɛ a tó lwáau kɛ ó lá i yɛ, aa bhɔ́ i ɲánkɔɔ kɛ yɛ́ɛ sángboo ó lɔ. ⁵²Ilee kwɛ́nnin, ii wɛ́ɛ a bhátola mínngɛ. O kwɔ́, ii i kwɔ́sɛɛ Yeluzalɛmu ní nisɔdhyaaba le. ⁵³I tɛ́ɛ ɲɔ́ɔn nádhyɛla Ala bhatobhomba ó kɔ́ɔnnɔn wáati o bɛ́ kɛ Ala tando.