TITUS

TITUS

¹ Kei Paul, Khanpughi ah changshäm la Jesuh Khrit ah ng’düihpüi naw ca ka gu lawk ci nei. Khanpughi naw a ghü ah chang gui ah zum nak shawihkhem gui vai la mi zum nak ah düng ciah m’theithang nak lam shüm gui vai ah kei cu ghü ne ana tüih ah kiak ci. ² Cun ah zum nak cu ang täi ghin nak ah mawng ngaih u nak ung phung ci. Kä hleeihlak ciah Khanpughi naw cau akhin kä a ng’tüi pha ge ung, ang täi ghin nak cu na pe gui khai ah shai a taak nak om ci. ³ Akhin küm law khätah, cun ah ang täi ghin nak cu, ang thu awn dang law sak ci. Cun ah Thu Ni cu kei am ana ap ah kia sei, mi Hunbawi Khanpughi ah k’bäi nak awn kei naw ka shäu ci nei. ⁴ Kei awn zum nak täng ne ka hta akcang ah kiak ciah Titus am ca ka guk lawk ci nei. Pa Khanpughi la mi Hunbawi Khrit Jesuh naw geinsei nak la dimdeeih nak cu ning pe sä. ⁵ Kei naw Crete ung ka ning nawng shüt cu, bi vai om ba ci gui avan ang khän khai ah na bi vai la api gaw päng ung khritha k’tahnga gui nam düih vai ah hmawk ah kiak ci. Tuhbäi ka ning m’shüm thein gui cu na shüm vai nei: ⁶ Khritha k’tahnga cu m’kat vai ah kä om ciah chang ah kiak khai, tumat bäng chu nak khai, ahta gui cu zum ciah chang gui ah kiak khai, Om she m’gäi m’cik ci gui, beit kä ng’zak ci gui ah kä kiäen khai. ⁷ Khritha k’tahnga cu Khanpughi ah khuut kutshum ne bik ciah kia sei m’kat vai kä om-en ciah chang ah kiak khai. Ani cu m’ghämce ci, m’lungshe ci, awktat ci, ng’tuk ghüh ci, ngui ng’za hlü aih ciah kä kia-en khai. ⁸ Ani cu khin m’htei ci, ak ni m’hni ciah chang ah kiak khai. Ani cu htingling ci, düng ci, theingcim ci, pyein ah om ci--ah chang ah kiak khai. ⁹ Ani cu bä ciah thu, zum nak awn ät ci cu, khäng khai ah kutshum ciah chang ah kiak khai. Cun ung vah ani naw düng ciah m’thei thang nak awn chang hei gui cu m’hläm gui hlawt khai, hnu ng’tuk püi ci gui ah cheishoh nak phi tawk pe hlawt khai. ¹⁰ A i kä ami hmat su ah cun ah thu cu hnu ng’tuk püi ne, chang gui k’fikfaih ciah chang ak da om ci nei, ak tung pi ah Judah zum nak ung ka ng’lat lawk ci gui ung da pi ci. ¹¹ Ngahmi cu thu kä ami pyein ba vai ah khin lawk ci nei, a i ah kia sei ci ung ngahmi cu kä m’theithang khin vai m’theithang u ne, kyongkhui gui cu shetkat sak ci gui, lü ng’aa nak vai kiak ciah ngui ng’zak nak hlü awn ami bi ah kiak ci. ¹² Cretan chang ami mät ah profet tumat naw, “Cretan chang gui cu ang täi sei hleeihlak ci gui, ngetngawng m’ghämce ci gui, damduh ci gui,” nei ci ne pyein ci. Cun ah kia sei ak ghaat ah nami m’cäi gui vai, cun ung ami zum nak khänghtek lawk khai. ¹⁴ Cun kawn ah Jew chang gui ah puma la düng nak hnu ng’tuk püi ciah chang gui ah thukhän cu kä ami kutshum men ba vai nei. ¹⁵ Amät ah m’lung kyong theingcim ciah chang ah hmawk ah a i phi avan theingcim ci;cun ung phi amät kä theingcim ne a zum nak kä om ciah chang ah hmawk ah a i phi kä theingcim ci. A i ah kia sei ci ung ngahmi ah lung kyong la ami ngaih tüh nak cu kä ah theingcim nak awn ah kiak ci. ¹⁶ Ngahmi naw Khanpughi kami hmat ci nei ami ci ung phi ami hnün thawh naw maa na gui ci. Ngahmi cu thüi nak vai kia u ne, thu kä ngai u ne, akni phung api phi, kä bi tu hning ciah chang gui ah kiak ci.

¹ Cun ung phi nang naw bä ciah thu m’hnüt awn ng’müi khai ah nam theithang vai nei. ² Pami ng’vai ba gui cu ami lunglang vai, ami küikaa vai, ami htingling vai la bä ciah zum nak, m’hni nak la khüighaat nak ami kümbe vai ah nam cäi gui vai nei. ³ A cun ah mäih ah hnumi ng’vaiba gui phi theingcim ciah ghin nak a om vai ah nam cäi gui vai nei. Ngahmi cu chang ah thang m’shet ci gui, kä cun ung zu ah khleihtein gui ah kä ami kiak en vai nei. Akni phung m’theithang ba thei ciah ami kiak vai nei. ⁴ Cun ung vah ak hmawba gui ah hnumi gui cu, ami cei la hta ami m’hni vai, ⁵ Ami htingling vai, ami theingcim vai;kyongkhui m’htei ciah hnumi ah ami kiak vai, a cei ah beit ng’zak ciah hnumi ah ami kiak vai cu, m’shümthein gui thei khai gui nei. Cun ah a kiak ung Khanpughi ung kaa lawk ciah thu cu a u naw ak she ah kä pyein ba khai nei. ⁶ A cun ah mäih ah ak hmaw chang gui cun phi ami htingling vai ah nam cäi gui vai nei. ⁷ Na mät cun phi amawng ama avan ung chang ah ning thei nak vai ah na hnün om vai nei. Htinling ne ak küikyang ah nam theingthang vai nei. ⁸ A u naw kä a täitawk-en thei vai ah bä ciah thu lung gui na pyein vai nei, cun ung na ga gui naw mik mi ah khan ah a i ung phi kat nak kä hmu u netah lü ng’aa khai gui nei. ⁹ Changshäm gui cu ami bawi ah ng’thu ami ngaih vai, amawng avan ung ami bawi ami zei sak vai, ling ne kä ami thu en tu ba vai, ¹⁰ kä ami m’guuk-en vai. Cun ah kä kia ne, ami nikiom nak la ami bekhüt nak ah mawng ami dang sak vai. Cun ung vah ngahmi cu ami bilawh nak phung ung, Hunbawipa Khanpughi ah mawng m’theithang nak cu dang law sak pi khai gui. ¹¹ Khanpughi naw hnicim chang avan, hun nak a gah nak vai ah am gein nak cu dang sak pyi ci nei. ¹² Cun ah m’gein nak naw kä zum ne ghin nak la m’dek khan ng’zak hlü nak cu, näng nak vai nam shümthein gui ne, a htingling ah ghin nak, düng nak, la m’dek khan ung zum ne ghin nak vai gui phi nam shüm gui ci. ¹³ Cun cu hlüngtai säih Khanpughi la Mi Hunbawipa Jesuh Khrit ah bämang nak adang law nak vai ah, mi ngaih u ah zeikiai nak ah Hnüüp mi ngäng nak ah kiak ci. ¹⁴ Ani naw amät cu mik mi ah hmawk ah pek ci, cun cu shetkat nak phung ung anak phiawn nak gui vai la amät khäm ciah ak chang theing ah mi kia ne, ak ni kiom ah mi hnün thawh nak thei vai ah hmawk ah kiak ci. ¹⁵ Shin ah a mawng cu m’theithang gui ne, thagui na peit nak gui la nam cäi m’ä nak gui ung, na huham cu ak be ah na mang vai nei. A u chang naw phi nang cu kä ning zokshe en ah sä.

¹ Kho uk ci gui la huham ah gui cu kyih aa ne, ami ng’thu ami ngaih vai la nik ciah bi phung bi ge vai ah ami om vai ah nak chang gui cu nam cäi gui vai nei. ² Ak she ah kä ng’thu phung ne, dimdeih nak la khawtsheng nak awn om u ne, ang täi sei ng’awi gi ne ami om vai ah nam cäi gui vai nei. ³ Azan ä mik mi mi mät phi mi gu aang ne, thu kä ngai ne, mi cheishoh ne mi om man te ci. Ng’zak nak hlü hlü la hlim tui nak a hnga hnga ah khleihtein ah mi kia man ci. Mi ghin nak cu m’thüi m’khang nak la vamneng nak awn mi ng’pyi sak ci;chang naw phi na gen gui ci, chang phi mi gen man ci. ⁴ Cun ung phi mi Hunbawi Khanpughi ah chihna nak la m’gein nak cu a dang law ah a kiak ung, ⁵ mik mi cu hun nak mi gah ci. Cun cu mik mi naw mi bi ah nikiom nak awn nah kä kiak ci, ak thai ah ng’tüi nak la tui hnim nak awn ghin nak thai nak pe gui ciah Mumcha Theing ung amät ah chihna nak awn ana hun gui ah kiak ci. ⁶ Khanpughi naw mi Hunbawi Jesuh Khrit awn, Mumcha Theing cu mik mi ah khan ah be ne pleip khai ah na zuk m’kyum gui ci nei. ⁷ Cun ah kia sei mik mi cu am gein nak awn Khanpughi ung düng nak mi gah ne, mi ngaih u ah ang täi ghin nak cu mi gah vai ah kiak ci. ⁸ Shin cu ng’düng ciah thu ah kiak ci. Shin ah a mawng gui cu nang naw ak tung ah nam thein gui vai ah kei naw ka ng’za hlük ci nei. Cun ung Khanpughi ngaih u ci gui cun naw, ak ni ah hnün thawh nak vai ung akhin pe u ne, chang phung ah phäh ah nik khai la bä khai cu, bi thei khai gui nei. ⁹ Cun ung phi shekhak ciah ng’cuhcan nak, ng’shon lam ang sau ah guh ne pian nak, ng’tuk vok nak, thukhän ah mawng ng’cuhcan nak gui cu na hlawi vai nei. Cun gui cu ei mang vai kä kia ne, a i phi kä ak pawih ciah a mawng gui ah kiak ci. ¹⁰ Ng’phyeek ng’pai nak bik ciah chang cu, hnih vei nami m’cä kawn ah, api ah phi kä nami ng’gui ng’phaa püi ba vai nei. ¹¹ Cun ah mäih chang cu hnu ng’hlat ma pem thei ciah nang naw na hmat ci nei, ani ah shetkat nak ani ah cheishoh nak cu dang sak ci nei. ¹² Artemas baw, Tichikus baw ka tüih law ung, Nikopolis gawnu ah na law vai ah nak tha nak vai nei, a cu ah kho sik kho pum ka om khai ah kak bäi ci nei. ¹³ Thukhän bawi Zenas la Apollos ah htehhton nak vai cu k’tha nah ne m’hteihtang goi ä, a ni ng’zak hlü gui cun phi küm khai ah teng m’kein goi ä. ¹⁴ Mi chang gui naw sui ei vai ng’zak hlü gah nak vai ah, ak ni bi nak ung akhin cu mang thei vai ah, ng’thei sak gui ä. Ngahmi cu akholä düt ah kä ghing om men u sä. ¹⁵ Kei awn atäng ah kami om ciah chang gui naw ning zavaih nak ci gui nei. Zum nak ung teihpüi gui-am ning zavaih nak ah mawng m’thein tu ba gui ä. Khanpughi ah m’gein nak cu nami van ah khan ah om "sa.