ROMAN

ROMAN

¹ Khanpughi naw Thu Ni shäu khai ah ghü ne am’düih, Jesuh Khrit ah chang shäm, kei Paul naw ca ka gu lawk ci. ² Cau pui ge ung Khanpughi naw, Thu Ni cu a purofet gui ung pek khai ah a shaitaak cu Cacim Theing ung om ci. ³ Cun cu Khanpughi ah Htapa, mi Bawipa Jesuh Khrit ah mawng ah kya ci; Ani cu ak hnicim chang nak ah David ah ng’shon ung ng’tüi lawk ci; ⁴ Ak khan chang theing nak ah, Khanpughi ah Htapa ah a kiak cu ang dang vai ah Khanpughi naw abämang hlüngtai nak awn sih nak ung kaa thawh ba sak ci. ⁵ Khanpughi naw ani ung ang düihpüi ah kyak nak vai ah akhin k’ni cu na pe ne, kho avan ung, chang avan naw Khanpughi cu zum ne ami läk vai ah kei cu m’düih ne na tüi ci. ⁶ Rom gawnu ung nami om ciah nang mi cun phi Jesuh Khrit ah chang gui ah Khanpughi naw a ning khü gui pyi ah ka sei, cun ah chang gui ah k’um ah nami kia pyi ci. ⁷ Cun ah kia sei Khanpughi naw ning m’hni gui ne aning khü gui pyi ah Rom Khrithabum am shin ah ca cu ka ning guk law gui nei. Mi Pa Khanpughi la Bawipa Jesuh Khrit naw m’geinsei nak la dimdeeih nak cu ning pe gui sä. ⁸ Khomdek khan avan ung nang mi ah zum nak ng’za pyi ci gui ah kia sei, ak htük bäih ah Zesuh Khrit ah ming ung Khanpughi cu kam hlüngtai ci. ⁹ Ahtapa ah mawng Thu Ni shäu ne pyein ne, kam lung kyong avan ap ne, Khanpughi ah khuut cu ka bik ci. ¹⁰ Kei naw ka taigü khin päng ung ka ning shüm gui cu Khanpughi naw hmat ci. Khanpughi naw ang zak hlü a om ung kä shou pha sei nang mi ah om nak ah ka gawk law vai ah ka taigü ci nei. ¹¹ Nami k’thamah nak vai ah mumcha hrilham cu ning pai tu gui hlü ne, ang htei ah ka ning hmu gui hlü khäät ci. ¹² Cun ah ka pyein cu nangmi la kei, atäng ah mi ng’hmuh law ung, kei naw ka zum nak awn, nang mi naw nami zum nak awn, mi ng’hteihtang tu vai hmawk ah kyak ci. ¹³ Nami shüm ba vai nei, phäinau gui aw, nangmi ah om nak ah ka lawk khai ah akda vei ka pawng ci nei, cun ung phi apipi cüngvawn nak om ci, chang pakhui hei gui ah lung ah ka bi nak ung ami ng’hlah law nak a om ah mäih ah nang mi ung phi a om vai ah ka ng’za hlük ci nei. ¹⁴ Ng’awigi ci la ghaatghum ci, hmuhmat ci la kä hmuhmat ci, chang avan ah hmawk ah kei naw ka mawng nak ci kia sei; ¹⁵ Rom gawnu ung nami om ciah nangmi am phi Thu Ni cu shäu ne ka ning m’thein gui hlü aih ci nei. ¹⁶ Kei cu Thu Ni ung kam lung üp ngaih gep ci; cun ah Thu Ni cu zum ci gui ah, Jew chang gui la chang pakhui hei gui cu, a hun nak ah Khanpughi ah hlüngtai nak ah kia ci. ¹⁷ Khanpughi naw chang gui, a i chaa ang düng sak gui ah mawng cu, Thu Ni naw m’dang ci: cun cu tün nak ung kaa naw khüt nak ung phleh khai ah zum nak bäng awn ah kia ci. Cun na kia sei, cacim ung, “Zum nak awn Khanpughi ung düng ciah chang cu ghing ne om khai,” ci ah om ci. ¹⁸ Düng nak cu chang gui naw kä ami hmat vai ah cheishoh, shetkat nak gui ah khan ah, khankhaw ah khanpughi ah m’lung k’she nak a gawk ah mawng cu dang law pyi ci nei. ¹⁹ Khanpughi ah mawng hmat vai gui phung cu, Khanpughi amät naw ahmat sak gui nak awn Khanpughi naw ngahmi cu m’kat gui ci. ²⁰ Khanpughi naw shin ah khomdek khan a tüi pian ung tün ne ani ah ng’täi ciah kä hmuh hningah hlüngtai nak la Khanpughi ah a kiak nak ah ang zung cu chang gui naw ang dang ah hmuk hmat ci gui. Cun ah ami hmuhmat cu Khanpughi ah tüi pian gui ami hmuhmat nak awn ah kia ci. Cun ah kia sei chang gui cu ami kat nak ah hmawk ah kä küi hlawt ci gui. ²¹ Ngahmi cu Khanpughi hmat ci gui, cun ung phi Khanpughi ah bäkhäk nak m’hlüngtai khin ah kä m’hlüngtai ci gui. Ami m’hlüngtai nak vai sü ung a kholä ah kiak khai gui düt ngaih tüh ci gui, ngahmi ah ghawng ciah m’lung kyong cu hmüp nak naw küp zawp ci. ²² Ngahmi naw ami mät cu hmuhmat ci gui ah ami pyein ung phi, akcang ah a i kä hmuhmat ci gui ah kiak ci: ²³ Kä si hning ciah Khanpughi khawihmah nak vai sü ung, si hning ciah chang, ni, k’phyu kha, khisa ni, k’phyu m’khaw ni gui ah müi gup gui düt piang ne khawihnah ci gui. ²⁴ Cun ah a mawng ung Khanpughi naw cun ah chang gui cu, ami m’lung kyong ah ng’zak hlü ah ami kyak nak vai la, tumat la tumat thui hmai nak ami bi nak vai ah nawng gui ci. ²⁵ Ngahmi naw Khanpughi ah ng’düng nak cu ak she awn m’thawng ci gui,ngahmi naw tüi sho ciah Khanpughi cu nawng en u ne, a tüi sho gui düt cu khawihnah ci gui. Cun ah Bawimang cu ang täi sei hlüngtai sä! Amen. ²⁶ Cun ah kya sei Khanpughi naw chang gui cu shekat pi ciah thuihmai nak ung ami hteh vai ah nawng gui ci. Hnumi gui cu pami la hnumi aè ng’zaw ng’koh man ah kä kya u ne, ami mät ng’zaw ng’koh ci gui. ²⁷ Pami gui cun phi hnumi awn ng’zaw ng’koh man ah kä kya u ne, ami htuktui naw ui gui sei, ami mät ng’zaw koh ci gui. Pami gui cu tumat la tumat thuihmai nak vai bi ne ami shekat ah hmawk ah hma m’kat nak cu gah ci gui. ²⁸ Cun ah chang gui cu Khanpughi kä shüm hmat u khätah, Khanpughi naw shekat nak ung nawng gui sei, kä a khin kä ak khaa ah kya lawk ci gui. ²⁹ Ngahmi cu shekat nak ahlühlü bi u ne, ngetngawng nak, shemshai nak, ng’zak hlü aih nak, om k’she nak, m’thüikhang nak, chang ngawn nak, ng’tuk nak, hleeihlak nak, ng’u hngeit nak, gui cu m’chei m’shoh ci gui. Ngahmi cu khleei u ne; ³⁰ chang ah mawng cu ak she ah pyein sak ci gui. Ami mät ng’shedam na tu u ne, chang ah ng’shei ne, khähgah ci gui. Shekha law pi k’täi khai ah ngaih tüh u ne, ami nupa ah thu phi kä ngai ci gui. ³¹ A mi om she zawp sei, ami shaitaak ah phi kä om ci gui, ami paw chang phi kä chimgein ci gui. ³² Cun ah om ciah chang gui cu sih nak ung hteit khai gui ciah Khanpughi ah thukhän cu ngahmi naw hmat ci gui. Cun ung phi, ami mät naw shin ah shekhaa gui ami bi bäng ah kä kyak ciah, a cun ah mäih bik ci gui cun phi k’cang nak ci gui.

¹ Cun ah kya sei teihpüi aw, nang naw chang ah kat nak nam khoichaa ung phi, na mät ah kat nak kä nam zih hlawt khai. Nang cu kat nak bik ciah chang ah kya lang ne, na paw chang cu nam khoichaa tu ah a kyak ung na mät naw na mät nam kat ciah kyak ci. ² Cun ah mäih ah bik ciah chang Khanpughi naw am kat cu, ng’düng ciah mi hmat ci nei. ³ Cun ung phi teihpüi aw, paw chang m’khoichaa nak ah kat nak cu nang na mät naw nam cheishoh pyi ci nei. Nang cu Khanpughi ah m’khoichaa nak na phiawn nak khai ah na ngai ci maa! ⁴ Kä cun ung Khanpughi ah chimgein nak, m’lung sau nak la hnimgei nak gui cu a i ah kä na sui ci maa!Khanpughi naw nang cu nang zu ba vai ah lam ning m’shüm ne, a ning m’gein ah mawng cu, nang naw akcang ah na hmat ci nei. ⁵ Cun ung phi nang cu lingkeng ciah nam lung om ci, Cun ah kya sei, Khanpughi ah m’lung she nak la düng ciah m’khoichaa nak a gawk law hnüüp ung, nang cu nuipai ciah shet m’kat nak na gah khai. ⁶ A cu hnüüp ung Khanpughi naw chang nüng nüng cu amät ah bi lawh a ci ah, m’khoichaa nak pek khai. ⁷ Ak ni ah om ne, bämang nak, m’kümtou nak la sih nak kä om ciah ghin nak shui ciah chang gui am, Khanpughi naw ang täi ghin nak cu pek khai. ⁸ Amät ah bä nak vai bäng teng ne, ng’düng nak cu hnu na ne, shet nak lam ah läk ciah chang gui cu Khanpughi ah m’lung k’she nak hmuk khai gui. ⁹ Shetkat nak bik ci gui ah Jew chang gui ung tün ne, khui hei chang gui van ah khan ah zaica nak la nat nak cu om khai. ¹⁰ Cun ung phi ni kiom nak bik ciah Jew chang gui ung tün ne, khui hei chang gui van ah khan ah Khanpughi naw bämang nak, m’kümto nak la dimdeeih nak cu pe gui khai. ¹¹ Khanpughi naw chang nünç nüng cu, kä m’khoi hnga ne, m’khoi m’cha gui khai. ¹² Mose ah thukhän kä hmat ci gui ah chang khui hei gui cu, kat nak ami bi ung thukhän ah k’pung ah dimaih ci gui kyak ci. Thukhän hmat ci gui ah Jew chang gui cu, kat nak ami bi ung thukhän ah m’khoichaa nak cu gah ci gui. ¹³ Chang cu thukhän ng’zak nak düt awn Khanpughi ah ma ah ng’düng ciah kä kyak ci, thukhän ah pyein läk ciah chang cun vah, Khanpughi ah ma ah ng’düng ciah kyak ci. ¹⁴ Chang pakhui hei gui cu ngahmi ung thukhän kä a om ung phi, thukhän awn ng’läk khai ah ami om ih ah a kyak ung, ngahmi cu thukhän läk ci gui ah kyak ci. ¹⁵ Thukhän ah pyein gui cu ami m’lung kyong ung guk ah mäih ah ami om ih naw m’dang ci.Ami m’lung kyong ung phi cun cu ng’düng ci ciah m’dang ci. Ami m’lung ngaih naw ak hngü ät m’kat gui ne, ak hngü ät k’bää gui ci. ¹⁶ Cun ah kya sei, kei naw ka shäu ah Thu Ni ah pyein ah m’khoichaa nak ah kho hnüüp ung Khanpughi naw, Bawipa Jesuh Khrit awn chang gui naw m’zih ne ami ngaih tüh gui phung cu, m’khoi m’cha ne m’dang zawp khai nei. ¹⁷ Nang a i hawkcha ang? Nang cu na mät naw, kei cu Jew chang nei ci ne, thukhän ung khüng ne, Khanpughi awn na khähgah ci. ¹⁸ Nang cu Khanpughi ah ng’zak hlü na hmat ciah kyak ci. Thukhän ah m’theithang nak awn, ng’düng ci la kä cun phi na ghü thei ciah kyak ci: ¹⁹ Nang cu na mät naw na mät, amik m’dauh gui ah lam shüm, hmüp khui ah om ci gui ah ak dei: ²⁰ Chang k’she gui ah lam piang, a i kä hmat ci gui ah ng’thei nak ah ka kyak ci ciah akcang ah na ngai ci. Thukhän cu hmuhmat nak la ng’düng nak ah küm nak ah kyak ciah phi akcang ah na hmat ci. ²¹ Nang naw chang m’theithang lang ne, a i ah kya sei na mät naw na mät kä nam theithang ang! Nang cu chang kä a m’guuk vai ah m’theithang lang ne, a i ah kya sei na mät nam guuk ang! ²² Nang naw chang kä a plet beng vai ah m’theithang lang ne, a i ah kya sei na mät na plet beng ang! Nang cu a gup m’tüih lang ne, a i ah kya sei a gup ah om nak ah taigü im cu na ng’guhtep tu ang! ²³ Nang cu Khanpughi ah Thukhän ung khähghah lang ne, a i ah kya sei cun ah thukhän cu m’chei m’shoh ne, Khanpughi ah thang nam shet ang! ²⁴ Cacim ung, “Jew chang gui ah om ah chang khui hei gui naw, Khanpughi ah ming cu päipih ci gui nei,” ci ne om ciah mäih ah kya lawk ci nei. ²⁵ Nang cu thukhän na läk ah a kyak ung, vun-ah nak na bi cu ak küikyang ah kyak ci, cun ung phi nang cu thukhän nam shet ciah a kyak läi ung, vun-ah nak kä na bi tu ling te ung ni pi khai sü ah kyak ci nei. ²⁶ A vaisü ah vun-ah nak kä bi tuk ciah khui hei chang tumat cu, thukhän ah pyein gui avan a läk tu ah a kyak ung, Khanpughi naw vun-ah nak bik ciah chang ah mäih ah dou khai ah kä kya ne ang! ²⁷ Nang mi Jew chang gui cu, gu ne tai ah thukhän la vun-ah nak cu gah tu pang u ne phi, thukhän cu nami m’shet ci nei. Chang khui hei gui cu pumsa awn vun-ah nak kä a mi bi ung phi, thukhän cu läk ci gui nei.Cun ah kya sei nangmi Jew chang gui cu, chang khui hei gui naw nami kat nak ning m’khoichaa gui khai gui nei. ²⁸ Cun kawn ah Jew chang ah chang naw ang ngaih phung cu Jew chang ah kä kyak ci.Chang tumat cu vun-ah nak a bi nak düt awn Jew chang ah kä kya lawk ci nei. ²⁹ Jew chang akcang läi cu am lung kyong ah vun-ah nak bi pyi ciah chang ah kyak ci nei. Cun ah chang Jew chang ah kyak sak ci cu gu ne tai ah thukhän ah kä kyak ci, Khanpughi ah Mumcha naw vah chang cu am lung kyong ung Jew chang ah kyak sak ci. Ani cu chang ah m’hlüngtai nak gah ciah kä kyak ci, Khanpughi ah m’hlüngtai nak gah ciah kyak ci.

¹ Cun ah a kyak ung Jew chang gui cu khui hei chang gui ah mä bä tu ba u ne ang! Ngahmi naw vun-ah nak ami bi cu, a phuma mä om ne ang! ² A phuma läi cu akda om ci, a htük bäih ah Khanpughi ah ng’thu m’than cu Jew chang gui ung gawk law ma ci. ³ Chang am shah cu pyein ah kä ami om ah a kyak ung,a cun ah phäh ah Khanpughi phi pyein ah kä om ciah kya thei khai ang! ⁴ Cun ah kä kyak ci, chang ah hta van a hleeihlak ung phi Khanpughi cu ng’düng khenggeng ne om ci.Cacim ung, “Thu na pyein cu ng’düng bäbä ne, M’khoichaa nak na aut ung phi näng nak om khai nei,” ciah om ci. ⁵ Mik mi ah cheishoh nak naw Khanpughi ah düng nak cu dang sak pi ciah a kyak ung, a i ah mi pyein khai ang! Khanpughi naw mi kat ana m’kat gui cu, Khanpughi cheishoh ciah mi pyein khai ang! (Cun cu chang gui ah thu man düt ah thu ah kyak ci). ⁶ Cun ah kä kyak ci, Khanpughi kä a ng’düng ah a kyak ung, a i chaa khomdek khan cu m’khoichaa hlawt khai ang! ⁷ A vaisü ah kei ah kä ng’düng nak naw, Khanpughi ah ng’düng nak cu dang sak pi ne, hlüngtai sak pi ciah a kyak ung, a i ah kya sei kei cu shekat ciah chang ah kya ne, hma m’kat nak cu ka gah ang! ⁸ “Ak ni a gawk law vai ah ak she cu mi bi vai,” ci ne mi pyein khai ang! A cun ah mäih ah kei naw ka pyein ah pyein u ne chang am shah naw ng’thu gu na k’bün ne na kat nak ci gui nei. Cun ah chang gui cu ami gah vai ah mäih ah m’khoichaa nak gah khai gui nei. ⁹ Cun ah a kyak ung mik mi Jew chang gui cu, chang khui hei gui ah mä mi ni kiom nak tuba ah a mawng om ne ang! A i phi mi nikiom nak tuba kä om ci, Jew chang gui la chang khui hei gui avan cu, kat nak ah hlüngtai nak kaa ah mi om ah mawng cu kei naw ka pyein pyi ah kiak ci . ¹⁰ Cacim theing ung; “Ng’düng ciah chang tumat phi kä om ci, ¹¹ Akcang ah hmuhmat ciah chang tumat phi kä om ci, Khanpughi khawihnah ciah chang tumat phi kä om ci. ¹² Chang avan cu lam hma zawp ci gui nei, Chang avan cu atäng ah shekat zawp ci gui nei; Chang k’ni tumat phi kä om ci, tumat hta phi kä om ci nei. ¹³ Ngahmi ah ami ng’thu m’kha cu, sih nak ng’cim hmun ah kyak ci; Ami m’lei awn thuvi hleeihlak ci gui, Ami m’gawng m’lei cu k’phyu m’äm ah mäih ah am äm om ci: ¹⁴ Ami m’gawng cu shaila ng’plahtang, nget ngawng nak awn be ci, ¹⁵ Ami khawlek cu chang ngawn nak vai ung zangkhai aih ci; ¹⁶ Ami gawk nak päng ah ngahmi ah kut awn shetkat dimaih nak om ci; ¹⁷ Ngami cu dimdeeih nak ah lam kä hmuk ci gui, ¹⁸ Ngami ung Khanpughi kyih-aa nak ah m’lung api phi kä om ci,” ciah om ci. ¹⁹ Thukhän ung om ciah thu gui phung cu, thukhän ah kaa ah om ci gui ah hmawk ah kyak ci, ci cu mi hmat ci. Cun cu hnicim chang gui naw thu m’kha ät phi kä pyein u sei, khomdek khan avan cu Khanpughi ah m’khoichaa nak ung a gawk vai ah kyak ci. ²⁰ Thukhän läk nak awn a u chang phi Khanpughi ah maa ah kä ng’düng hlawt ci; Thukhän cu chang gui ah shetkat nak dang sak ciah kyak ci. ²¹ Cun ung phi Khanpughi ung chang gui ami ng’düng nak vai ah lam cu dang pyi ci nei. Khanpughi ung düng nak cu thukhän nawn na kä kyak ci, cun ah amawng cu Mose ah Thukhän la puorfet gui naw saksi m’dang ci gui. ²² Khanpughi naw chang gui cu ami zum nak awn, Jesuh Khrit ung düng sak gui ci. Cun cu Khanpughi naw Bawi Khrit zum ciah chang phung ung abi ah kyak ci, a i ah kya sei ci ung, chang gui ung ng’lakmah nak a i kä om ci: ²³ Chang nüng nüng cu shekat u ne, Khanpughi ah bäkhäk nak cu kä gah ci gui. ²⁴ Cun ung phi chang gui hun gui ciah Jesuh Khrit ung, Khanpughi naw, aphu kä peit ah m’gein nak awn chang gui cu düng sak gui ci. ²⁵ Jesuh Khrit ah a sih nak awn chang gui cu, kat nak ung kaa ami phiawn vai ah Khanpughi naw, ani cu chang m’küi nak ah m’hnüt ne k’bäi ci. Chang gui cu ani ami zum nak awn kat nak ung kaa phiawn nak gah ci gui. Khanpughi naw cun ah abi cu, a i chaa ah chang gui ang düng sak gui ah mawng am dang nak ah kyak ci. Zanä akhin ung chang gui ah kat nak cu, Khanpughi naw hnimgei nak awn m’düm gui ci. ²⁶ Cun ung phi tuk bäi akhin ung Khanpughi naw, amät ah ng’düng nak cu am dang nak ah, chang gui ah kat nak cu, m’hnih sak gui ci. Cunah a bi nak awn Khanpughi naw, amät cu ng’düng ciah a kyak ah mawng la, Bawipa Jesuh zum ciah chang phung ang düng sak ah mawng cu m’dang ci. ²⁷ Cun ah kya sei mik mi mi khähghah nak vai om khai ang! a i kä om ci nei. A i ah kya sei ang! Thukhän mi läk u sei ang! Cun ah kä kyak ci, Khanpughi mi zum ah hmawk ah kyak ci. ²⁸ Chang cu a zum nak bäng awn vah Khanpughi ung ng’düng nak gah ci, thukhän läk nak awn gah ah kä kyak ci, ci cu mi hmat ci. ²⁹ Khanpughi cu Jew chang gui ah Khanpughi bäng ah kya ne ang! Chang khui hei gui ah Khanpughi ah kä kya tu ne ang! Akcang ah van ah Khanpughi ah kyak ci nei. ³⁰ Khanpughi cu tumat bäng om ci, Jew chang gui cu ami zum nak awn amät ung düng sak gui khai; a cun ah mäih ah chang khui hei gui cun phi ami zum nak awn amät ung düng sak gui khai. ³¹ Cun ah a kyak ung mik mi naw Khanpughi zum nak awn thukhän cu mi nawng en ah kyak khai ang! Cun ah kä kyak ci, thukhän cu mi khän htek sak nak ah kyak ci nei.

¹ Cun kawn ah mi pughi Abraham ah mawng cu mi ngaih tüh khai. Ani ah buiaut law gui cu a i ang! ² Abraham cu amät a bilawh om ih nak awn Khanpughi ung ng’düng ciah a kyak vai sü ung, a ni ung khähghah nak vai om khai sü te; cun ung phi ani cu Khanpughi ah ma ah kä khähghah hlawt ci. ³ Cacim theing ung, “Abraham cu Khanpughi zum ci, a zum nak awn Khanpughi naw, chang düng ah k’bäi ne dou ci,” ciah om ci. ⁴ Chang tumat cu bi bi ne, ng’cheng a gah ah a kyak ung, cun ah ng’cheng cu ghüh ci naw a peit tu düt ah kä kyak ciah, gah khin ne a gah ah kyak ci. ⁵ Chang cu amät ah bilawh om ih düt kä ngaih u ne, Khanpughi zum ne a ngaih u ah a kyak ung, Khanpughi naw ani ah zum nak cu ngaih pe ne, ani cu kat nak kä om ciah m’hnüt ne k’bäi ci. A cu chaa ah Khanpughi naw chang cu düng sak ne dou ci. ⁶ Amät ah bilawh nak awn kä kyak ciah Khanpughi naw düng ciah chang ah a dou cu zeikiai nak om ci, ci ah mawng cu, David naw; ⁷ “Cheishoh nak ung m’geinsei nak gah ci gui la, Shetkat nak ung hun phiawn nak gah ci gui cu, zeikiai nak om ci! ⁸ A shetkat nak Bawipa naw kä a khei peit ah chang cu zeikiai nak om ci!” ciah guk ci. ⁹ Shin ah David ah pyein ah zeikiai nak cu, vun-ah nak bik ci gui bäng ah gah ah kya ne ang! Cun ah kä kyak ci, vun-ah nak kä bi tuk ci gui naw phi gah tuk ci gui nei. Mik mi naw mi hmuh pyi ah cacim ung, “Abraham cu Khanpughi zum ci, a zum nak awn Khanpughi naw chang düng ah k’bäi ne dou ci. ¹⁰ Cun ah Abraham cu chang düng ah Khanpughi naw k’bäi ne a dou nak ah khin cu, Abraham naw vun-ah nak abi kawn ah ang! kä a bi pha ung ang!, abi kawn ah kä kyak ci, kä abi pha ung ah kyak ci. ¹¹ Cun ah Abraham cu Khanpughi naw k’bäi ne a dou kawn ah vun-ah nak cu bik ci. Cun ah vun-ah nak abi ah mawng cu, Khanpughi naw Abraham ah zum nak cu hmu netah, vun-ah nak kä abi pha ung, chang düng ah k’bäi ne a dou cu saksi ah ng’dang khai ah am hnüt nak ah kyak ci. Cun ah kya sei Abraham cu vun-ah nak kä abi ung phi, Khanpughi a zum nak awn, chang düng ah k’bäi ne dou nak gah ci gui ah Pa ah kya lawk ci. ¹² Ani cu vun-ah nak bik ci gui ah Pa ah phi kyak ci. Cun kawn ah ani cu vun-ah nak bik ci gui bäng ah kä kya ne, mi pughi Abraham naw vun-ah nak kä a gah pha ung, Khanpughi cu zum ne, ghing ne om te ci gui cu thei tu gui ci gui ah Pa ah phi kyak ci. ¹³ Khanpughi naw Abraham la a hta ng’shon am, khomdek khan a van cu na khäm khai ci ne shaitaak nak pek ci. Cun ah shai a taak cu, Abraham naw thukhän a läk ah hmawk ah kä kyak ci, Khanpughi a zum nak awn ani cu, Khanpughi naw chang düng ah k’bäi ne a dou ah hmawk ah kyak ci. ¹⁴ A vaisü ah thukhän läk ciah chang naw vah shaitaak cu küm sei gah khai ah a kyak läi ung, chang ah zum nak phi a kholä ah kya ne, Khanpughi ah shaitaak phi a kholä ah kyak khai. ¹⁵ Thukhän naw Khanpughi ah m’lung k’she nak cu m’dang ci; cun ung phi thukhän kä a om ung m’shekat nak phi kä om khai kyak ci. ¹⁶ Cun ah kya sei Abraham ah hta ng’shon gui naw Khanpughi ah shaitaak, a phu kä peit ah ami gah vai cu ngaih gep khai ah, Khanpughi naw Abraham ah zum nak ah khan ah shaitaak nak a peit ah kyak ci. Cun ah shaitaak cu thukhän läk ci gui ah hmawk bäng ah kä kyak ci, Abraham ah mäih ah Khanpughi zum ciah chang gui ah hmawk ah phi kyak ci; a i ah kya sei ci ung Abraham cu mi van ah pa ah akyak ah hmawk ah kyak ci. ¹⁷ Cun cu cacim theing ung, “Kei naw nang cu chang pakhui-van ah pa ah ka ning piang ci nei,” ci ne a pyein ah mäih ah kya ci. Cun ah kya sei Khanpughi ah shaitaak cu kümbe ci. Khanpughi cu Abraham ah ngaih u, sik ciah chang gui ghin ba sak ci la, kä ng’tüi om man ci gui ng’tüi om sak ciah Khanpughi ah kyak ci. ¹⁸ Abraham cu a khaw m’vui ne a kyak zah ung phi Khanpughi cu zum ne ngaih u ci. Cun ah kya ne ani cu chang pakhui avan ah pa ah kya lawk ci. Cacim theing ung, “Nang ah hta ng’shon gui cu aisi k’chü ah püi khai nei,” a ci ah mäih ah kyak ci. ¹⁹ Abraham cu a khokum phyaa law pyi sei a pumsa cu ak si ah mäih ah kyak ci, Sarah cun phi kä hta hning khai ah ghi pyi ci, cun ung phi Khanpughi a zum nak cu khäng htek aih ci. ²⁰ Ani cu a zum nak kä ng’hlat phung ci, Khanpughi ah shaitaak phi kä a ngaih gep nak kä om ci; a zum nak naw hlüngtai nak awn be sak sei, Khanpughi cu m’hlüngtai ci. ²¹ Khanpughi naw a shaitaak ah mäih ah bik khai ci cu Abraham naw ak be ah zum ci. ²² Cun ah a zum ah hmawk ah Khanpughi naw ani cu, chang düng ah k’bäi ne adou ah kyak ci. ²³ “Khanpughi naw ani cu chang düng ah k’bäi ne dou ci,” ciah thu cu Abraham ah hmawk bäng ah kä kyak ci; ²⁴ Mik mi ah hmawk ah phi kyak ci, a i ah kya sei ci ung, Jesuh mi Bawipa sih nak ung kaa thawh ba sak ciah Khanpughi cu, mi zum nak awn Khanpughi naw chang düng ah na k’bäi gui ne a na dou gui ah hmawk ah kyak ci. ²⁵ Khanpughi naw Bawipa Jesuh cu mik mi ah kat nak ah hmawk ah sih nak ung gawk sak ci, Khanpughi naw mik mi cu chang düng ah k’bäi ne ana dou gui vai ah hmawk ah sih nak ung kaa thawh ba sak ci.

¹ Tuk bäi mik mi cu mi zum nak awn Khanpughi ung mi ng’düng pyi ci kya ne, mi Bawipa Jesuh Khrit awn Khanpughi ah ma ah dimdeeih nak cu mi gah ci. ² Mik mi naw Jesuh Khrit cu mi zum ci kya sei, ani naw mik mi am, Khanpughi ah m’geinsei nak cu na hmat sak gui ci. Tuk bäi cun ah m’geinsei nak cu mi gah u ne, Khanpughi ah hlüngtai nak gah vai cun-phi ngaih gep nak om sei mi zeikiai ci. ³ Mik mi cu zaica zah ung phi mi zeikiai ci, a i ah kya sei ci ung zaica nak naw hnimgei nak; ⁴ Hnimgei nak naw m’khütnäng nak, m’khüt näng nak naw m’lung üp ngaih u nak cu dang sak ci, ci cu mi hmat ci. ⁵ Mik mi cu cun ah m’lung üp ngaih u nak a om ung a i zah ung phi mi m’lung kä häu vang khai. A i zah kya sei ci ung Khanpughi naw ana peit gui ah Mumcha Theing awn, anam hni nak gui cu, mi m’lung kyong ah anglih pyou sak pyi ah kyak ci. ⁶ Mik mi cu am gein kaa ah mi kyak zah ung, Bawi Khrit cu Khanpughi ah k’bäi nak ah khin ung, mik mi la chang k’she gui ah hmawk ah sik ci nei. ⁷ Düng ciah chang tumat ah hmawk ah sih pek khai a u kä om ci, chang k’ni tumat ah hmawk läi ah sik khai cu a om ung om hman khai. ⁸ Cun ung phi mik mi naw kat nak mi bi k’chung ung Bawi Khrit naw mik mi ah hmawk ah si nak awn Khanpughi naw a i hlawk ah anam hni gui cu m’dang ci. ⁹ Mik mi cu Jesuh Khrit ah sih nak awn Khanpughi ung mi ng’düng pyi ci kya sei, Khanpughi ah m’lung k’she nak ung a na k’phiawn gui cu ngaih gep vai kyak ci. ¹⁰ Mik mi cu Khanpughi ah gaa ah mi kya te ci, cun ung phi Ahtapa a sih nak awn A teihpüi ah na piang gui ci. Tuk bäi mik mi cu Khanpughi ah teihpüi ah mi kya pyi ci, cun ah kya sei, ghing ciah Bawi Khrit ung hun nak mi gah vai cu ngaih gep ah kyak ci. ¹¹ Cun bäng ah kä kyak ciah Khanpughi naw mik mi cu, Bawi Khrit ung a teihpüi ah ana pian gui pyi ah kya sei, zeikiai nak phi mi gah ci. ¹² Shetkat nak cu khomdek khan ah chang tumat awn gawk law ci, ani ah kat nak awn sih nak phi gawk lawk ci. Cun ah kya sei hnicim chang van cu kat nak bi u ne, sih nak ung gawk ci gui. ¹³ Thukhän kä a om pha ung khomdek khan ah kat nak om pyi ci; cun ung phi cun zah ung thukhän kä om ci kya sei, Khanpughi naw chang gui ah kat nak cu kä khei pe gui ci. ¹⁴ Cun ung phi Adam ung tün ne Mose ung khüt khai ah hnicim chang gui cu sih nak naw küm gui ci. Cun ah chang gui cu Adam ah mäih ah Khanpughi ah thukhän m’cheishoh ne kat nak kä a mi bi ung phi, sih nak naw küm gui ci. Adam cu a ngawi ah gawk lawk khai ah Bawipa ah mawng m’dang ciah kyak ci. ¹⁵ Cun ung phi ngahni cu kä täng ci goi, Khanpughi ah m’gein nak cu Adam ah kat nak ah mäih ah kä kyak ci. Cun ah chang tumat ah kat nak awn chang khli van naw a sih nak ah kyak ci, ci cu akcang ah kyak ci. Cun ung phi Khanpughi ah m’gein nak la Khanpughi naw chang gui am a peit ah, chang tumat ah kyak ciah Jesuh Khrit ah m’gein nak cu cun ah kat nak ah mä küikyang hlüngtai pi ci. ¹⁶ Khanpughi ah peit ah m’gein nak la chang tumat ah kat nak cu, ang lak mah nak om ci. Khanpughi naw Adam naw kat nak a bi cu kat nak ah ng’khän ci ci ne m’khoi m’chak ci. Cun ung phi cun kawn ah chang gui naw kat nak ami bi cu kä ami khin pang ung phi, kat nak kä om ci ci ne m’khoi m’chaa gui ci. ¹⁷ Chang tumat ah kat nak naw sih nak awn uk ne ak küm ah a kyak ung, A hei chang tumat ah kyak ciah Jesuh Khrit ah bilawh ah mawng cu a i hlawk ah hlüngtai khai ang! Khanpughi ah bäkhäk ciah am gein nak la, Khanpughi ah ma ah düng nak ah am gein nak, gah ciah chang gui cu, Jesuh Khrit ung ghing ne, näng ne om khai gui nei. ¹⁸ Cun ah kya sei, chang tumat ah kat ah hmawk ah hnicim chang avan cu hma m’kat nak ami gah a mäih ah, ahei chang tumat naw ng’düng nak abi nak awn, hnicim chang avan naw kat nak phiawn ah ne, ghin nak gah ci gué nei. ¹⁹ Chang tumat naw Khanpughi ah ng’thu kä a ngaih nak awn chang gui avan cu kat nak bik ciah ami kyak zawp ah mäih ah, chang tumat naw Khanpughi ah ng’thu a ngaih nak awn, chang gui avan cu Khanpughi ung ng’düng nak gah ci gui. ²⁰ Cheishoh nak ada law pi vai ah Khanpughi naw thukhän cu am hnüt ah kyak ci. Cun ung phi kat nak ada law pi ung Khanpughi ah m’gein nak cun phi däm law pi ci. ²¹ Kat nak naw sih nak awn a uk ah mäih ah, mi Bawipa Jesuh Khrit ung ang täi ghin nak mi gah vai ah, Khanpughi ah m’geinsei nak naw ng’düng nak awn na uk gui ci.

¹ Cun ah a kyak ung a i ah pyein vai ang! Khanpughi ah m’geinsei nak a däm law pi vai ah kat nak cu bi lä vai maa! ² Cun ah kä kyak ci nei, kat nak mi hnu nah pyi ciah chang cu, a i ah kya sei kat nak ung mi ng’len ba lä vai ang! ³ Nang mi naw akcang ah nami hmat vai cu, mik mi cu Bawi Khrit Jesuh awn kawng ät nak ah tui mi ng’hnim nak awn, ani awn atäng ah mi si tuk ci ah kyak ci. ⁴ Cun ah kya sei mik mi cu tui hnim nak awn Bawi Khrit awn atäng ah mi ng’phuh ne, ani awn atäng ah mi sik ci. Cun ah ani awn atäng ah mi sih ah mawng cu, Pa Khanpughi naw abäkhäk hlüngtai nak awn Bawi Khrit cu sih nak ung kaa a thawh ba sak ah mäih ah, mik mi cu ghin nak thai ung mi om vai ah hmawk ah kyak ci. ⁵ A i ah kyah sei ci ung, ani awn atäng ah mi sih tu ung, ani awn atäng ah sih nak ung kaa mi thawh tu ba vai ah hmawk ah kyak ci. ⁶ Mi ghin nak k’phyim cu Bawi Khrit awn atäng ah kutlam tung ngawn pyi ah kyak ci. Cun ah kya sei kat nak awn be ciah mi m’lung kyong cu dimaih pyi ci kya ne, mik mi cu kat nak ah khlei-htein ah kä mi kya ba ci, ci cu mi hmat pyi ci. ⁷ Bawi Khrit ung sik ciah chang cu shetkat nak phiawn nak ciah kyak ci. ⁸ Mik mi cu Bawi Khrit awn atäng ah mi si pyi ci kya sei, ani awn atäng ah mi ghing khai ah, mi zum ci. ⁹ Bawi Khrit cu sih nak ung kaa tho ba pyi ci kya sei, ani ung sih nak kä om ba phung khai, sih nak naw ani cu kä uk ba hlawt khai. ¹⁰ Cun ah kya sei ani cu sih nak näng ci kya ne, kat nak ah hlüngtai nak naw ani cu kä uk ba hlawt sei, tuk bäi Khanpughi awn lünlawi ne ghing ne om ci. ¹¹ A cun ah mäih ah nang mi cun phi, sih nak näng ne, kat nak nawng shüt ne, Bawi Khrit Jesuh awn, Khanpughi ung lünlawi ne nami om vai. ¹² Cun ah kya sei nami pumsa ah ng’zak hlü ah kä nami läk en hlawt vai ah, kat nak naw nami pumsa cu käm khüt ten hlawt sä. ¹³ Nami pumsa cu a i zah ung phi shetkat nak ah hmawk ah kä nami mang en vai. Cun nak vaisü ung, sih nak ung kaa ghing ba ciah chang gui ah kya ne, nami pumsa cu Khanpughi am nami ap vai, Düng nak ah amawng ung a ning mang gui vai ah pumsa la ghin nak avan cu, Khanpughi ung nami ng’ap vai nei. ¹⁴ Kat nak cu nami bawimang ah kä kya en sä; nang mi cu thukhän ah kaa ah kä nami om ci, Khanpughi ah m’gein nak ah kaa ah nami om ci nei. ¹⁵ Cun ah kya sei mik mi cu, kat nak ah kaa ah kä om ba ne, Khanpughi ah m’geinsei nak ah kaa ah mi om ci kya sei, kat nak mi bik khai ah mi pyein khai ang!cun ah kä kyak ci. ¹⁶ Nang mi cu chang tumat ah khlei-htein ah kya ne nami ng’ap ung, a cun ah bawi ah khlei-htein ah nami kyak cu ak cang ah nami hmat ci. Nang mi cu kat nak ah khlei-htein nah nami kyak ung, nang mi ah gah vai cu sih nak ah kyak ci, Khanpughi ah ng’thu nami ngaih ung nang mi cu Khanpughi naw chang düng ah ning dou gui khai. ¹⁷ Nang mi cu kat nak ah khlei-htein ah nami kyak man ung phi, tuk bäi nami gah ah m’theithang nak cu, nami m’lung kyong avan nawn nami läk ah hmawk ah Khanpughi cu kam hlüngtai ci. ¹⁸ Nang mi cu kat nak ah khlei-htein nami phiawn nak kawn ah, ng’düng nak ah khlei-htein ah nami kya lawk ci. ¹⁹ (Nang mi cu ng’thu thuuk kä hmat man uk ci sei, chang ah hmat zäi vai ah thu awn ka guk nei). A zan ä nang mi cu, cheishoh nak a hlühlü bi nak vai ah shetkat nak ah khlei-htein ah ng’khäm ne nami ng’ap ci. A cun ah mäih ah tuk bäi nangmi cu, theing cim ciah bi bi nak vai ah, ng’düng nak ah kaa ah khlei-htein ah kya ne ng’khäm ne nami ng’ap vai. ²⁰ Nang mi cu kat nak ah khlei-htein ah nami kyak zah ung ng’düng nak awn nami ng’tai ci. ²¹ Cun zah ung nami bi lawh gui naw a i ah phi kä ning khüi ng’vong gui ci, cun naw tuk bäi ning lü ng’aa sak gui ne, ak hnu ah sih nak ung ning gawk sak gui ci. ²² Cun ung phi nang mi cu tuk bäi kat nak ung kaa phiawng ne, Khanpughi ah khlei-htein ah nami kya pyi ci. Nang mi ah gah ah bämang nak cu, Bawipa am nami ghin nak ak be ah ap ne, ak hnu ah ang täi ghin nak nami gah ah kyak ci. ²³ Shetkat nak ah a phu cu sih nak ah kyak ci;Cun ung phi Khanpughi naw a phu kä m’hnüt vai ah am gein nak cu, mi Bawipa Jesuh Khrit ung kawng ät nak awn gah ah ang täi ghin nak ah kyak ci.

¹ Phäi nau gui aw, nang mi cu thukhän nami hmat pyi ci kia ne tuk bäi ka pyein vai ah a mawng gui cu nami hmat khai nei. Chang cu a ghin zah ak chuih thukhän ah kyong ung om ci. ² Ceimah pyi ciah hnumi tumat awn m’tumtäng ah a kyak ung, cun ah hnumi cu a cei a ghin zah ak chuih ng’chungla nak ah thukhän ah kaa ah om ci. Cun ung phi a cei a sih ah a kyak läi ung ng’chu laa nak thukhän phiawn nak ciah kyak ci. ³ Cun ah kya sei ani cu a cei ghing ne om lang sei, a hei pami awn ani om ba ah a kyak ung ani cu thuihmai chang ah pyein vai kyak ci. Cun ung phi a cei a sih läi ung, ani cu thukhän phiawn na pyi ci kya sei, a hei pami awn ani ng’chulaa ba ung thuihmai chang ah pyein vai ah kä kyak ci. ⁴ Phäi nau gui aw, shin ah mawng cu nang mi awn phi ng’lüng ci nei. Nang mi cu Bawi Khrit ah pumsa ah nami kya pyi ci kya ne, thukhän ung nami ghin nak cu si pyi ci nei. Khanpughi ah khuut bi nak ung hnüntho ciah mi kyak nak vai ah sih nak ung ka tho ba ciah BawiKhrit ah chang ah nami kya pyi ci nei. ⁵ Mik mi cu khomdek pumsa ah ng’zak hlü ah ghing ne mi om zah ung thukhän awn lawk ciah shetkat nak hlü ah m’lung naw mi pumsa kyong ah bi bi ne, mik mi cu na sih sak gui ci. ⁶ Zanä na khitpawng gui man ciah thukhän cu mi sih püi pyi ci kya sei, tuk bäi mik mi naw thukhän cu mi phyawn ah pyi ci nei. Tuk bäi mik mi cu gu ne pian ah thukhän lam k’phyim awn kä kyak ciah, Mumcha ah pian ah lam k’thai awn Khanpughi ah khuut cu mi bik ci nei. ⁷ Cun ah a kyak ung thukhän amät cu kat nak ah mi pyein khai ang!Cun ah kä kyak ci!Cun ung phi kat nak cu a i ang, ci cu thukhän naw na hmat sak ci. A vaisü ah, “chang ah khawh kä ng’zak hlü düt vai,” ciah thukhän naw kä a pyein vai sü ung, ng’zak hlü nak düt ah mawng cu kei naw kä ka hmat khai sü te, ⁸ Kat nak naw mik mi am cun ah thukhän cu na shüm sak gui ne, mi m’lung kyong ah ng’zak hlü nak a hlühlü cu dang sak ci. Thukhän kä a om ung kat nak cu ak si ah kyak ci. ⁹ Kei ka mät phi thukhän cu kä ka hmat man ci, thukhän ka hmat law vai am tün ne, kat nak cu kei ung ghing lawk ci. ¹⁰ Cun kawn ah kei cu ka sik ci. Kei naw ka ghing nak vai ah pyein ah thukhän naw kei cu na sih sak ci nei. ¹¹ Kat nak naw lam shui ne thukhän am’dang nak awn kei cu na sih sak ci nei. ¹² Cun ah kya sei thukhän cu theing cim ci, thukhän cu ng’cim ne, ng’düng ne, nik ci. ¹³ Cun ah a kyak ung akni naw kei cu na sih sak ne ang! Cun ah kä kyak ci, Kei na sih sak ci cu kat nak ah kyak ci, kat na cu kei ah ka nupuk ng’tüipüi ah ang dang vai ah, ak ni cu mang ne kei cu ana sih sak ah kyak ci. Cun ah kya sei kat nak a i hlawk ah ashetkat ah mawng cu thukhän awn hmat ah kyak ci. ¹⁴ Thukhän cu mumcha lam ah kyak ciah mi hmat ci, cun ung phi kei cu kat nak ah khlei-htein, chang ah hta ah ka kyak ci. ¹⁵ Kei naw a i ka bi cu kä ka hmat ci. A i ah kya sei ci ung, kei naw ka bi hlü cu kä bi phung ne, kä ka ng’zak hlü bängbäng cu ka bik ciah kyak ci. ¹⁶ Kei naw kä ka bi hlü bängbäng te, ka bik ciah a kyak nak awn, thukhän cu ng’düng ciah kak bäi ci. ¹⁷ Cun ah kya sei kei naw ka bilawh gui bik ci cu kei akcang ah kä kyak ci;kei ah m’lung kyong ung ghing ciah kat nak ah bi ah kyak ci. ¹⁸ Hnicim chang ah ka kyak ciah kei ung akni kä om ciah kei naw ka hmat ci. A i ah kya sei ci ung kei naw akni ka bi hlü ung phi, akni cu kä ka bi hlawt ci. ¹⁹ Kei naw ka ng’zak hlü ah akni cu kä bi hlawt ne, kä ka ng’zak hlü ah akshe bängbäng cu ka bik ci. ²⁰ Kei naw kä ka ng’zak hlü bängbäng ka bi cu, kei ah bi ah kä kyak ci, kei ah m’lung kyong ung ghing ne om ciah kat nak ah bi ah kyak ci. ²¹ Cun ah kya sei thukhän ah bi nak ung kei naw ka hmuh cu, Kei naw akni ka bi hlü nak awn, akshe bängbäng ghü ne ka bik ciah kyak ci. ²² Khanpughi ah thukhän cu kei ah m’lung kyong naw zeikiai ne dou ci. ²³ Cun ung phi kei ah pumsa kyong ah kei ah m’lung ngaih ah ng’zak hlü awn ng’kükneet ng’tu ng’aat ciah thukhän ah mawng tumat om ci. Cun cu kei ah pumsa kyong ah hnüntho law ne, kei cu kat nak ah thawng khui ah na chum ci. ²⁴ Kei cu ang htei ah kam lung thüi aih ci nei, Kei na sih sak ciah shin ah pumsa ung kaa a u naw kei cu na hun tuk khai ang! ²⁵ Mi Bawipa Jesuh Khrit awn na hun gui ciah Khanpughi ah m’gein nak cu hlüngtai aih ci nei. Ak hnu ah ka mät ah mawng ka pyein hlü cu, Ka m’lung kyong awn Khanpughi ah khuut ka bi sang ung, ka hnicim chang nak naw kat nak ah bi cu ka bik ci nei.

¹ Cun ah kya sei Jesuh Khrit ung kawng ät ne om ciah chang gui cu Khanpughi ah shet m’kat nak phiawn nak ci gui. ² Cun ah kya sei Jesuh Khrit ung na kawng ät sak ciah Mumcha ah thukhän naw, kat nak la sih nak ah thukhän ung, kei cu na phiawn sak pyi ci nei. ³ Hnicim chang ak tha kä om sei, thukhän naw kä a bi peit hlawt cu Khanpughi naw bi pyi ci nei. Khanpughi naw hnicim chang ung om ciah kat nak cu m’kat khai ah Ahtapa cu zuk m’kyum lawk ci. Ahtapa cu kat nak k’täm ne m’di khai ah, hnicim chang ah mäih ah kat nak nupuk nah ne ng’tüi lawk ci. ⁴ Khanpughi naw cun ah abi cu hnicim chang nupuk nak ciah kä kya ne, Mumcha ung ghing ciah, mik mi naw thukhän ah ng’düng sei mi läk vai ah hmawk ah kyak ci. ⁵ Hnicim chang nupuk nah ne ghing ciah chang gui cu, hnicim chang ah ng’zak hlü bängbäng ngaih tüh ci gui, Mumcha ah m’cäi m’ä ah ghing ciah chang gui cu, Mumcha ah ng’zak hlü bängbäng ngaih tüh ci gui, ⁶ Hnicim chang ah ng’zak hlü bäng ngaih tüh ciah chang cu sih nak ung gawk ci, Mumcha ah ng’zak hlü ngaih tüh ciah chang cu ghin nak la dimdeeih nak gah ci. ⁷ Hnicim chang ah ng’zak hlü bäng ngaih tüh ciah chang cu Khanpughi ah gaa ah kyak ci, ani naw Khanpughi ah thukhän kä läk hlawt ci, akcang ah kä läk hlawt ci. ⁸ Amät ah hnicim chang ah ng’zak hlü ah läk ciah chang cu, Khanpughi naw kä m’tamkhah hlawt ci. ⁹ Cun ung phi Khanpughi ah Mumcha cu nang mi ung akcang ah om ciah a kyak ung, hnicim chang ah m’cäi ah kä om u ne, Mumcha Theing ah m’cäi ah nami om vai. Bawi Khrit ah Mumcha ah kä om nak ah chang cu Bawi Khrit awn kä ng’phaa ci. ¹⁰ Nangmi ung Bawi Khrit cu akcang ah om ciah a kyak ung, nami pumsa cu kat nak awn sik khai ah a kyak tu pang ung phi. Mumcha naw ning ghin sak gui khai, a i ah kya sei ci ung nang mi cu Khanpughi ung ng’düng nak nami gah pyi ciah a kyak ah hmawk ah kyak ci. ¹¹ Bawi Jesuh sih nak ung kaa thawh ba sak ciah Khanpughi ah Mumcha cu nang mi ung akcang ah om ciah a kyak ung, Bawi Khrit sih nak ung kaa thawh ba sak ciah Bawipa naw, amät ah Mumcha awn sih thei ciah nami pumsa cun phi ghin sak khai nei. ¹² Cun ah kya sei phäi nau gui aw, mik mi cu hnicim chang ah ng’zak hlü ah kä mi om ne, Khanpughi ah Mumcha ah m’cäi ah mi om khai nei. ¹³ Nang mi cu hnicim chang ah ng’zak hlü ah nami om ah a kyak ung nami sik khai nei, cun ung phi nami shetkat nak cu Mumcha Theing awn nami sih sak ah a kyak ung ghin nak nami gah khai nei. ¹⁴ Khanpughi ah Mumcha ah lam shüm nak läk ciah chang cu Khanpughi ah Hta ah kyak ci. ¹⁵ Khanpughi ah ning peit gui ah Mumcha naw nang mi cu Khlei-htein ah kä ning k’hmoh gui ci, kyih ah phi kä ning kyihkyawk sak gui ci. Mumcha naw mik mi cu Khanpughi ah hta gui ah na piang gui sei, Mumcha ah na peit gui ah hlüngtai nak awn Khanpughi cu, “Ka Pa, Ka Pa,” ci ne khü tu vai ah mi khin tuk ci. ¹⁶ Mik mi cu Khanpughi ah hta gui ah mi kyak ah mawng ang dang vai ah Khanpughi ah Mumcha naw, mi mumcha cu ng’khap püi ci. ¹⁷ Mik mi cu Khanpughi ah hta gui ah mi kyak ci kya sei, aë chang gui ah hmawk ah Khanpughi naw am hnüt ah hrilham cu mi khäm khai. Bawi Khrit ah hmawk ah Khanpughi naw am hnüt ah bäkhäk nak cun phi mi khäm tuk khai. Mik mi cu Bawi Khrit awn atäng ah gein vai nak mi gah ah a kyak ung, ani awn atäng ah bämang nak phi mi gah khai. ¹⁸ Tuk bäi chü mi bui aut ah gein vai nak cu, Khanpughi naw a na peit law gui vai ah bämang nak awn kä tutäng khai ciah kei naw ka zum ci. ¹⁹ Khanpughi naw ahta gui am, am dang gui vai ah amawng gui cu, a tüi pian avan naw ang htei ah ging co ci gui. ²⁰ Khanpughi naw a tüi pian avan cu alä k’ding ah kyak khai ah m’shetkat ci. Cun ah abi cu khomdek khan ah ng’zak hlü ah kä kyak ci, Khanpughi ah ang zak hlü ah kyak ci. Cun ung phi ngaih u nak om ci; ²¹ Cun ah ngaih u nak cu, kho hnüüp ät ung a tüi pian gui naw khihpawn didap nak ung kaa phiawng ne, Khanpughi ah hta gui awn atäng ah bämang lünlawi nak ami gah vai ah hmawk ah kyak ci. ²² Mi van naw mi hmat zawp ah tuh bäichü a khin ung, a tüi pian gui avan cu, nau poi m’neh ah mäih ah nat nak om ci. ²³ A tüi pian ah khomdek khan bäng ah kä kyak ciah, Khanpughi naw ak htük bäih ah a peit ah Mumcha gah ciah mik mi cun phi, Khanpughi ah hta ah kyak nak vai la, mi pumsa avan hun nak a gah nak vai cu, mi ging ne mi geinvai ci. ²⁴ Mik mi cu ngaih u nak awn hun nak mi gah ci. Cun ah mi ngaih u cu mik mi naw kä mi hmuk ci, mi hmuh ah a kyak ung cun cu akcang ah mi ngaih u ah kä kyak ci. Mik awn hmuh ei cu a u naw ngaih u khai ang! ²⁵ Mik mi naw kä mi hmuh cu m’lung üp ne mi ngaih u ne, hnimgei nak awn mi ngäng ci. ²⁶ A cun sang ung Mumcha naw ak tha ken ciah mik mi cu nam htei gui khai ah gawk lawk ci. Mik mi naw a i chaa taigü vai kä mi hmat ci;m’gawng shai awn kä pyein thei vai ah ak aw awn, Mumcha amät naw, mik mi ah hmawk ah Khanpughi ah na ng’zoih pe gui ci. ²⁷ Chang gui ah m’lung kyong hmu thei ciah Khanpughi naw Mumcha ah m’lung ngaih cun phi hmat zawp ci. A i ah kya sei ci ung Mumcha naw Khanpughi ah ang zak hlü ah, ak chang gui ah phäh ah ang zoih ah hmawk ah kyak ci. ²⁸ Khanpughi m’hni u sei ang zak hlü ah a khü gui ah chang gui naw, ami bilawh nak ung kaa ng’dang lawk khai ah, Khanpughi naw ngahmi awn atäng ah abilawh cu mi hmat ci. ²⁹ Khanpughi naw a ghü ah chang gui cu, Ahta ah mäih ah ami kyak vai ah m’cha ne m’hnüt ne om sak gui ci. Ahta cu ng’phäi nau gui akda ung, ang vai pi ah a kyak vai ah hmawk ah cun ah a ci ah kyak ci. ³⁰ Cun ah kya sei Khanpughi naw ghü ne ak pai gui cu khü gui ci;a khü gui ah chang gui cu amät ung chang düng ah k’bäi gui netah, amät ah bäkhäk nak cun phi gah sak gui ci. ³¹ Shin ah amawng gui avan cu teng ah a kyak ung, Khanpughi cu mik mi lam ah a om ung a u naw na hnu ng’tuk püi gui hning khai ang! ³² Khanpughi naw amät ah Htapa cu kä ng’vang nah ne, chang van ah hmawk ah pe ne, na küikyan gui ci nei. Ahtapa hngaw mik mi ah hmawk ah pek ciah Khanpughi naw, apäng avan cu, kä ng’vangca ah kä na pe gui ne kä om khai nei. ³³ Khanpughi naw a ghü ah chang gui cu a u naw m’kat gui khai ang! Ngahmi ung kat nak kä om ciah Khanpughi amät naw m’dang pyi ci nei. ³⁴ Cun ah kya sei ngahmi cu a u naw kä m’kat gui hlawt ci. Sih nak bäng ah kä kyak ciah sih nak ung kaa tho ba ciah Jesuh Khrit naw Khanpughi ah ak pat lam ah ngoh netah, mik mi ah hmawk ah ng’hui ng’paa ne om ci. ³⁵ Cun ah kya sei a u naw mik mi cu Bawi Khrit ah m’hni nak awn nam chaa gui hlawt khai ang! Zaica nak, cümbawng nak, k’dukdeiu nak, cawigha nak, pyamthaam nak, gaa kyih nak la sih nak; cun gui naw Bawipa ah m’hni nak awn nam chaa gui hlawt khai maa! ³⁶ Cacim Theing ung; “Bawipa ah Hmawk ah Kei mi cu, ak hnüüp pum ung, sih nak gaa awn kami ng’aut ci nei; Ngawn vai ah ami k’bäi ah htome ah mäih ah, Chang naw kei mi cu na ngai gui ci nei”, ciah om ciah mäih ah kyak ci. ³⁷ Kä ng’chaa bäng ah kä kyak ciah, a cun ah mawng gui avan awn ng’aut law nak ung, mik mi nam hni gui ciah Bawipa naw khüt sei, näng nak cu mi gah ci. ³⁸ Cun ah kya sei, a i naw phi mik mi cu Bawipa ah m’hni nak awn kä nam chaa gui hlawt khai:sih nak la ghin nak ka phi kya, khan chang gui la khankhaw uk ne hlüngtai ci gui ah phi kya, tuh chü mawng nak ah phi kya, ngawi ah ma nak vai ah phi kya, ³⁹ m’dek ah khan ah phi kya, m’dek ah kaa ah phi kya, kho ah kaa ung a tüi sho avan naw phi kya; a i naw phi mi Bawipa Jesuh Khrit awn Khanpughi naw ana peit gui ah m’hni nak awn kä nam chaa gui hlawt khai, ci cu kei naw akcang ah ka hmat ci nei.

¹ Kei naw akcang ka pyein cu;kei ung Bawi Khrit om ci kya sei kei kä ka hleei ci. Mumcha Theing ah uk nak awn om ciah kam lung kyong naw kei kä ka hleei ah mawng cu dang sak ci. ² Kei cu ang htei ah ka thüi ci. Kam lung kyong ah ang täi sei zaica nak om ci. ³ Ka chang gui, ka k’chi ng’chüng gui ah hmawk ah Khanpughi ah m’kyuk nak la Bawi Khrit awn ng’pai nak phi ka aut hlük ciah m’lung om ci nei. ⁴ Ngahmi cu Khanpughi ah chang ah kyak ci gui;Khanpughi naw ngahmi cu a hta ah piang gui ne abämang nak cu hmuh sak gui ci:Bawipa naw ngahmi awn thukhän bik ci, ngah mi am thukhän pe gui ci;Ngah mi naw ak cang ah khawihnah ci gui;Ngahmi naw Khanpughi ah shaitaak gah ci gui; ⁵ Ngah mi cu mingthang ciah Hebru hta ng’shon ah kyak ci gui. Bawi khrit cun phi hnicim chang pumsa ung ngah mi ah pakhui ah kyak ci. Ang tüi avan uk ciah Ka Khanpughi cu ang täi sei hlüngtai nak om sä! Amen. ⁶ Khanpughi ah shaitaak cu zu kyavük düt ciah ka pyein ah kä kyak ci;a i ah kya sei ci ung Israel chang gui bäng Khanpughi ah chang gui ah kä kyak ci, chang khui hei gui phi Khanpughi ah chang gui ah kyak ci. ⁷ Abraham ah hta ng’shon avan cun phi Khanpughi ah hta gui ah kä kyak ci gui. Khanpughi naw, “Nang cu Isaak bäng awn vah na ng’shon ba khai, ciah shaitaak ka ning pek ci,” ci ne Abraham cu kyak nak ci. ⁸ Abraham ah hta ng’shon avan cu Khanpughi ah hta gui ah kä kyak ci, Khanpughi ah shaitaak awn ng’tüi lawk ciah chang gui cun vah, Abraham ah hta ng’shon akcang ah kyak ci gui. ⁹ Khanpughi naw, “A khin a küm law ung kei ka lawk khai, Sarah cu k’pami hta ah hta lawk khai nei,” ci ne Abraham am shaitaak nak pek ci. ¹⁰ Cun kawn ah Rebekka ah hta goi cu Mi pughi Issak awn ani hta goi ah kyak ci. ¹¹ Ngahni kä ng’tüi law pha ni ne, ak ni ak kaa kä a ni bilawh pha ung Khanpughi naw, Rebekka am, “Na hta ng’vai pi naw, ak hmaw pi cu hnün thawh pek khai nei,” ci ne kyak nak ci. Cun ah a pyein cu Khanpughi naw amät ah ng’zak hlü ah a hta tumat a ghü a mawng cu am dang ah kyak ci. Khanpughi naw cun ah abi cu, chang ah bilawh nak teng ne a ghü ah kä kyak ci, amät ah m’hni ah ghü ne a khü ah kyak ci. ¹³ Cacim theing ung; “Kei naw Jakop cu ka m’hni ci, Cun ung phi Esau cu ka gen ci,” ciah om ci. ¹⁴ Cun ung Khanpughi kä taga ciah mi pyein khai ang!Cun ah kä kyak ci. ¹⁵ Khanpughi naw Mose am, “Kei naw ka chimgein hlü cu ka chimgein khai, Kei naw kam hteihtang hlü cu kam hteihtang khai,” ci ne kyak nak ci. ¹⁶ Cun ah kya sei Khanpughi ah ghü nak cu, chang ah ng’zak hlü la bilawh nak awn ah kä kyak ci, Khanpughi ah chimgein nak awn ah kyak ci. ¹⁷ Khanpughi naw Egypt ghangpughang Pharaoh am, “Kei naw nang ghangpughang ah ka ning m’düih cu, nang awn ka hlüngtai nak cu m’dang ne, m’dek ah khan avan ung kei ah ka hluicang nak cu a gawk vai ah hmawk ah kyak ci,” ciah a kyak nak cu cacim theing ung om ci. ¹⁸ Cun ah kya sei Khanpughi naw ak chimgein hlü cu chimgein ne, a lingkeng sak hlü cu lingkeng sak ci. ¹⁹ “Cun ah a kyak ung Khanpughi naw a i chaa chang gui cu m’kat gui khai ang! A u naw Khanpguhi ah ng’zak hlü cu hnu ng’tuk püi hlawt khai ang!” ci ne na ng’shi hlük ciah chang om khai nei. ²⁰ Teih püi aw, nang cu a u ah kya ne, Khanpughi cu, cuk chaa na ng’shi hning vai ang!A tüi sho ah chang naw, tüi sho ciah Bawipa cu, “A i ah kya sei, nang naw kei cu shin chaa ah na na tüi sho ang,” ci ne ng’shi hning khai ang! ²¹ K’am sheh ci naw k’am m’dek cu amät ah ng’zak hlü ah piang hning ciah kä kya ne ang! Ani naw k’am m’dek tumat awn, akni akshe, am hni ah sheh hning ciah kä kya ne ang! ²² Khanpughi ah bi cu a shin ah mäih bä ah kyak ci. Khanpughi naw am lung k’she nak cu ng’dang sak ne, a hlüngtai nak cu ang thang vai ah ng’za hlük ci. Cun ung phi am lung k’she nak ung di maih ci gui ah khan ah ang htei ah hnimgein nak om ci. ²³ Cun kawn ah Khanpughi cu ak chimgein gui ah chang gui naw, chünla ciah a bämang nak ami hmuh vai ah ng’za hlük ci. Cun ah chang gui cu Khanpughi ah bämang nak ami gah tu vai ah Khanpughi naw a pian tham gui ah kyak ci. ²⁴ Mik mi cu Khanpguhi ah na khü ah chang gui ah mi kyak ci. Khanpughi naw mik mi a na khü nak gui ung, Jew chang gui ung kaa bäng ah kä kyak ciah, chang khui hei gui ung kaa phi khü gui ci. ²⁵ Hosea ah ca guk ung Khanpughi naw; “Kei ah ka chang ah kä kyak ci gui cu ka chang ah ka khü gui khai; Kä ka m’hni ah chang pakhui gui cu, Ka m’hni ah chang pakhui ah ka khü gui khai; ²⁶ “A i kho ah phi nang mi cu kei ah chang ah kä nami kyak khai, ci ne a kyak nak gui ah chang gui cu, Ghing ciah Khanpughi ah hta gui nei, ciah khü gui vai nei,” ci ne pyein ci. ²⁷ Israel chang gui ah mawng cu Isaiah naw, “Israel chang gui cu, tuinu kem ah laigin k’chü ah ami da ung phi, ngahmi ung kaa chang api naw vah hun nak cu gah khai gui. ²⁸ A i ah kya sei ci ung Khanpughi naw khomdek khan ah chang gui cu, ang ghit ah m’khoi m’chaa gui khai, ci ah mawng ah kyak ci,” ci ne pyein ci. ²⁹ Cun kawn ah Isaiah naw, “Hlüngtai pi k’bäih ciah Khanpughi naw, mi pakhui kä a maih vai ah mi hta ng’shon gui cu kä a nam gein gui vaisü ung, mik mi cu Sodom la Komorah ah mäih ah mi kyak khai süte,” ci ne a pyein ah mäih ah kyak ci. ³⁰ Kei mi ah pyein hlü cu shin ah kyak ci, Khanpughi ah ma ah ng’düng vai ah kä k’tha nak ciah khui hei chang gui cu, ami zum nak awn Khanpughi ung ng’düng nak gah ci gui. ³¹ Cun ung phi Khanpughi naw a ghü ah chang gui cu, Khanpughi ah ma ah ng’düng nak vai ah thukhän cu shui u ne phi kä hmuk ci gui. ³² A i ah kya sei ci ung ngahmi cu Khanpughi ami zum nak ung kä ng’düi u ne, ami mät ah bilawh nak ung ami ng’düih ah phäh ah kyak ci. Cun ah kya sei ngahmi cu cacim theing ung om ciah lung ung ng’vawn ne ng’täng ci gui. ³³ Cacim Theing ung; “Teng vä, chang gui naw ami ng’vawn nak vai ah, lung tumat cu Zion m’htung khan ah ka m’shän khai nei, Chang gui cu cun ah lung ung ng’vawn ne ng’täng khai gui nei. Cun ung phi Lung ah kyak ciah Bawi Khrit zum ciah chang gui cu, a i zah ung phi ami thüisei nak kä om khai nei,” ci ah om ci.

¹ Phäi nau gui aw, kei naw ka chang gui hun nak ami gah vai cu ka m’lung kyong avan awn ng’za hlü aih netah, ngahmi ah hmawk ah Khanpughi ah ka taigü ci nei. ² Ngah mi naw Khanpughi ami kyih aa ah mawng cu kei naw akcang hmat ne ka pyein ci nei. Cun ung phi ngahmi ah kyih aa nak ah lam cu kä ng’düng ci nei. ³ Ngahmi naw, Khanpughi naw chang gui ang düng sak nak gui ah lam cu kä hmu u netah, cun ah lam ung kä hteh ah, ami mät naw k’tha na ne ami pian ah lam ung hteit ci gui. ⁴ Bawi Khrit naw thukhän ah a khin cu ang pyi sak pyi ah kya sei, zum ciah chang nüng am Khanpughi ung ng’düng nak cu pe pyi ci nei. ⁵ Mose naw thukhän läk nak awn, Khanpughi ung düng nak ah mawng a guk cu; “Thukhän ung thu küi läk ciah chang phung cu ghing khai,” ciah kyak ci. ⁶ Cun ung phi cacim theing naw, zum nak awn Khanpughi ung düng nak ah mawng a pyein cu, “A u-ang khankho ah a hang kai kaw! (Cun cu Bawi Khrit hang khü vai ah kyak ci); ⁷ “A u ang kaa khaw ah a zu kyum kaw! (Cun cu Bawi Khrit sih nak ung a thawh ba vai ah phawng vai ah kyak ci), ci ne nami mät naw nami mät kä nami ng’shi en vai. ⁸ Cacim theing ah pyein hlü cu:Khanpughi ah ng’thu cu nami pei ah om ci; Cun ah thu cu nami m’gawng awn pyein ne, nami m’lung ung nami m’küm ci,” ciah kyak ci. Cun ah thu cu kei naw ka ning m’thein gui ah Khanpughi zum nak ah mawng ah kyak ci. ⁹ Bawi Jesuh cu Bawipa nei, ci ne ng’kyaa ne, Ani cu Khanpughi naw sih nak ung kaa thawh ba sak ci nei, ci ne nami m’lung ung nami zum ah a kyak ung, nang mi cu hun nak nami gah khai. ¹⁰ Mi zum ak awn Khanpughi ung ng’düng nak mi gah ne, mi ng’kyaa nak awn hun nak mi gah ci. ¹¹ Cacim theing ung, “A u chang phi Bawipa zum ciah chang cu thüisei nak kä om khai,” ciah om ci. ¹² Khanpughi cu hnicim chang van ah Bawipa ah kya ne, ani khü ne ng’zoi ciah chang phung am bämang ciah hrilham zuk m’kyum lawk ci. Cun ah kya sei, Jew chang, khui hei chang ciah m’khoichaa nak kä om ci. ¹³ Cacim theing naw “Bawipa khü ne ng’zoi ciah chang phung cu hun nak gah khai,” ci ne pyein ci. ¹⁴ Cun ung phi ngahmi naw kä ami zum ung a i chaa khü ne ng’zoi khai gui ang! Thu pyein kä a mi ng’zak ung, a i chaa zum khai gui ang! Thu shäu ne pyein ci kä a om ung, a i chaa ng’zak khai gui ang! ¹⁵ Thu shäu khai a u naw kä a tüih ung, a u naw thu shäu ne pyein khai ang! Cacim theing naw, “Thu Ni zon lawk ciah thukpüi gui ah law nak cu ng’khän häih häih ci nei”, ¹⁶ Cun ung phi Thu Ni cu chang van naw kä dou ci gui. Isaiah amät naw, “Bawipa, Keimi ah thu pyein cu a u naw zum ci ang!” ci ne pyein ci. ¹⁷ Cun ah kya sei thu ng’zak nak awn zum nak cu lawk ci, Bawi Khrit ah mawng shäu ne pyein nak ung, thu cu chang naw ng’zak ci. ¹⁸ Cun ung phi chang gui naw cun ah thu cu kä ng’za u ne ang! ka ning ng’shi gui hlük ci:Ngahmi naw akcang ah ng’zak ci gui.Cacim theing ung; “Thu Ni shäu ci gui ah k’aw cu khomdek khan avan ung Thang ne gawk ci; Ngah mi ah Thu m’kha cu kho cawi kheng ah khüt ne gawk pyi ci nei;” ciah om ci nei. ¹⁹ Cun kawn ah ka ning shi ba gui hlü cu, ’Israel chang gui naw cun ah a mawng cu kä hmuhmat man u ne maa!Khanpughi naw Mose ung ak htük bäih ah am hlan nak cu; Kei naw ka khü ah chang pakhui gui cu mang ne Ka chang gui cu kam thüi sak gui khai; Chang pakhui k’she gui awn Ka chang gui cu kam lung k’she sak gui khai,” ci ah kyak ci. ²⁰ Khanpughi naw Isaiah am cun ah tai pi khai ah a thu pyein cu; Kei kä na shui ciah chang gui naw Kei cu na hmuk ci gui; Kei ah mawng kä k’tä, kä shui ciah chang gui naw Kei cu na khawihnah ci gui,” ciah kyak ci. ²¹ Cun ung phi Israel chang gui ah mawng ung, “Kei na hnu ng’tuk püi ne, kei ah ng’thu kä läk ciah chang gui cu, kei naw amü ak hnüüp ka kut shäng ne ka na dou gui ci nei”, ciah Khanpughi ah ng’thu om ci, ci ne Isaiah naw pyein ci.

¹ Cun ah kya sei kei naw ka ning shi gui hlük ci:Khanpughi naw amät ah chang gui cu hnu ng’tuk püi gui ne maa! Kä hnu ng’tuk püi gui ci. Kei ka mät cu Israel chang, Abraham ah hta ng’shon, Benjamin pakhui ah ka kyak ci. ² Khanpughi naw ak htük ge ung a ghü ah ak chang gui cu kä hnu ng’tuk püi ci. Cacim theing ung Elijah naw, Israel chang gui cu hnu ng’tuk püi gui ne, Khanpughi ah maa ah ng’thu a pyein cu nami hmat khai nei. ³ Cun ah ng’thu ung Elijah naw, “Khanpughi aw, cän ah chang gui naw, na purofet gui cu ngawn ci gui nei;Na mang kiang phi plawh ci gui nei;Kei ka mät bäng ka om ba ci, kei cun phi na ngawn khai gui ah k’tha nak ci gui nei,” ciah pyein ci. ⁴ Cun ung phi Khanpughi naw Elijah ah ma ah thu a pyein ba cu, “Kei naw Baal khoshe ah gup kä khawihnah ciah, chang tämkäp chih cu, ka mät ah hmawk ah ka k’pawih na pyi ci nei,” ciah kyak ci. ⁵ Tuk bäi phi a cun ah mäih ah Khanpughi naw am gein nak awn a ghü ah chang api k’pawih ba ci nei. ⁶ Khanpughi ah ghü nak cu amät ah m’gein nak awn ah kyak ci, cun ah chang gui ah bilawh nak awn ah kä kyak ci. Khanpughi ah ghü nak cu chang ah bilawh om ih nak awn ah a kyak vaisü ung, ani ah m’gein nak cu m’gein nak akcang ah kä kyak khai süte. ⁷ Cun ah kya sei á i ah pyein vai ang!Israel chang gui naw ami shui cu kä hmuk hlawt ci gui nei. Cun ah ami shui cu Khanpughi ah ghü, chang apihta bäng naw hmu hlawt ci gui nei;k’pawih ba ciah chang gui naw Khanpughi ah ng’khü k’aw cu kä ng’zak ci gui nei. ⁸ Cacim theing ung, “Khanpughi naw cun ah chang gui ah m’lung k’hnga cu aung ang sak gui ci, tuh ngawi güt ung ngahmi cu a i kä hmu ng’za thei ci gui. ⁹ Cun ah kya sei David naw; “A mi mang ei cu ngah mi ah hmawk ah, ami ng’awh gui la ami ng’cawh nak ah kya sei, Khanpughi naw m’shekat gui sä! ¹⁰ Teng ne kä ami hmuh nak thei vai ah ami mik mü sä; Ami zaica nak ah phuih gih awn, amik khei phi ang täi sei ng’khun sä,” ci ne pyein ci. ¹¹ Cun ah kya sei Jew chang gui cu, ami dimaih nak ung khüt khai ah plawh kheih gui ne maa! ciah ka ning ng’shi gui hlük ci. Cun ah kä plawh kheih gui ci. Ngah mi cu ami shetkat ah hmawk ah hun nak cu chang khui hei gui naw gah ci gui, cun ah kya sei Jew chang gui naw chang khui hei gui cu m’thüi nak ci gui. ¹² Jew chang gui ah shetkat nak naw, m’dek ah khan chang van am, bühmang ciah hrilham cu gah sak ci, Ngahmi ah mumcha ghawipai nak naw, chang khui hei gui am bühmang ciah hrilham cu gah sak gui ci. Cun ah kya sei Jew chang gui ami van Bawi Khrit ung ami ng’khäm law hnüüp ung, ngah mi naw hlüngtai pi ciah hrilham cu gah khai gui nei. ¹³ Kei naw nang chang khui hei gui ah maa ah ng’thu ka pyein ci nei. Kei cu chang khui hei gui ah hmawk ah ang düih püi ah ka kyak ci kya sei, ka mät ah bi nak awn ka khähghah ci nei. ¹⁴ Kei naw ka mät ah pakhui chang gui ung m’thüi nak ah m’lung om khai ah ka bi nak awn, ngahmi ung kaa chang am shah naw bawtah hun nak gah tuk khai gui nei. ¹⁵ Khanpughi naw ngahmi cu a nawng gui zah ung, hnicim chang gui cu, a gaa ah ami kyak nak ung kaa naw a teihpüi ah ng’thon sak gui zawp ci. Cun ah kya sei Jew chang gui cu Khanpughi naw a dou ba gui zah ung a i ah mäih ah kyak khai ang! Ak si gui ghin sak gui ah mäih ah cäicat vai ah kyak khai nei. ¹⁶ M’htut pum ät cu k’bou ne Khanpughi am ap ah a kyak ung m’htut pum avan cu ap ah kyak ci, Singghing tumat ah ang zung cu Khanpughi am ap ah a kyak ung ang ban avan phi ap ah kyak ci. ¹⁷ Chang gui naw olive sing k’tui ah ng’ban cu m’chün u netah, pyupying k’thui ah ng’ban awn m’dün ne ng’ling ci gui. Pyupying k’thui naw, pyupying k’tui ah ang’zung la a ghing ung kaa, a ei auk tu ah mäih ah, nang mi khui hei chang gui naw cu Jew chang gui ung kaa mumcha ghin nak cu nami gah tuk ci. ¹⁸ Cun ah kya sei nang mi naw chuk pit ah mäih ah kyak ciah ang ban gui cu kä nami päipih vai. Nang mi nami khähghah nak vai a i kä om ci, Nang mi cu ang ban ah nami kyak ci, nang mi naw ang zung a pyaa cu kä nami tu m’bei ci, ang zung a pyaa naw vah nang mi cu ning tu m’bei gui ci. ¹⁹ Cun ung phi nang mi naw, “Kei mi naw hmun kami gah vai ah hmawk ah pyupying ah ng’ban gui cu tu pit zawp ciah kä kya ne ang!” na mi cik khai. ²⁰ Nang mi ah pyein cu ng’düng ci. Ngah mi chuk pit nak gui cu Khanpughi kä ami zum ah hmawk ah kyak ci. Nang mi cu Khanpughi na mi zum ah hmawk ah ang ban ah nami kya lawk ci. Cun ung phi nang mi chang ah kä nami ng’shei vai¬ chang kyih aa ne nami om vai. ²¹ Khanpughi naw ami nupuk ah ang ban gui ah kyak ciah Jew chang gui hngaw kä am düm gui ung, nang mi läi kä ning m’düm gui khai nei. ²² Shin ung Khanpughi cu a i hlawk ah chang m’gein ci la, a i hlawk ah nget ngawng ciah mi hmuk ci. Khanpughi naw kat nak bik ciah chang gui cu ak nuipai ah m’khom chaa gui ci. Cun ung phi nang mi cu a ning m’gein gui khin vai ah nami om ah a kyak ung, Khanpughi naw ning m’gein gui khenggeng ci; cun ah kä nami om ah a kyak ung nang mi cun phi chu pit ne ning ghawt gui khai. ²³ Jew chang gui cu ami m’lung thawng sei Khanpughi ami zum ah a kyak ung, ak hmui cu m’dün ba ne geit kaw nak cu om khai, Khanpughi naw cun ah bi hning ci. ²⁴ Chang pakhui hei ah kyak ciah nang mi ah nami ng’tüipüi ah kyak ciah pyupying k’thui cu chu pit ne, nami ng’tüipüi ah kä kyak ciah pyupying k’tui ung m’dün ne geit hning ah a kyak ung; pyüpying k’tui ah ang tüipüi ah ang ban ah kyak ciah Jew chang gui cu, ang tüipüi ah pyupying ung a zäihta ah m’dün ne geit ba khai ah kä kya ne ang! ²⁵ Phäi nau gui aw, nami mät naw nami mät kami hmuhmat tei pyi ci, ciah kä nami ngaih en vai ah thuuk ne ng’kau ciah a mawng cu ka ning m’thein gui hlük ci. Cun cu, Jew chang gui cu ang täi sei ang laam khai gui ah kä kyak ci, Khanpughi ah lawk khai ah khui hei chang gui ami ng’küm ung khüt khai ah kyak ci. ²⁶ Cun kawn ah Israel chang avan cu hun nak gah khai gui nei, cun ah mawng cu cacim theing ung: “Hun Bawipa cu Zion khomhtung ah kaa kyum law ne, Jakop ah hta ng’shon gui ah shetkat nak avan cu nawt heng zawp khai nei. ²⁷ Kei naw ngahmi ah shetkat nak cu ka k’phiuawn gui hnüüpung ngahmi awn shin ah thukhän cu ka bik khai nei,” ciah om ci. ²⁸ Jew chang gui cu Thu Ni hnu ng’tuk püi u ne, Khanpughi ah gaa ah kya lawk ci gui. Cun cu nang mi khui hei chang gui ah zei nak vai ah hmawk ah kyak ci. Cun ung phi ngahmi cu Khanpughi naw a ghü gui te ah kya ne, ami pupa gui ung thukhän a peit nak gui awn ngahmi cu m’hni gui lä ci. ²⁹ Khanpughi naw a u chang phi ghü ne hrilham a peit kawn ah, Khanpughi naw am lung kä m’thawng ba ci. ³⁰ Nang mi khui hei chang gui cu a zan ä, Khanpughi kä nami läk man ci; cun ung phi nang mi naw tuk bäi m’gein nak nami gah cu, Jew chang gui naw Khanpughi kä ami läk ah hmawk ah kyak ci. ³¹ Cun ah nang mi naw m’gein nak nami gah ah mäih ah, Jew chang gui cun phi, Khanpughi ah m’gein nak ami gah vai ah Khanpughi cu kä läk ne om ci gui. ³² Khanpughi naw hnicim chang avan cu, thu kä läk ciah thawng k’cum ah piang gui zawp ci. Cun ah abi cu chang ah hta avan am am gein nak am dang nak hlü ah kyak ci. ³³ Khanpughi ah bämang nak cu hlüngtai aih ci nei! Khanpughi ah lu ng’lang nak la hmuhmat nak cu thuuk aih ci nei! Khanpughi naw m’hnüt ne ak bäi cu a u naw a cangkha a m’dang hning khai ang! Khanpughi ah bilawh mawnglam cu a u naw shüm hmat hlawt khai ang! ³⁴ Cacim theing ung; “Bawipa ah m’lung ngaih cu a u naw hmat ci ang! Bawipa cu a u naw m’shüm hmuh tu hning ci ang! ³⁵ Bawipa naw a thung sah ba vai ah a u naw ani-am k’pu m’hnih khai ang! ciah om ciah mäih ah kyak ci. ³⁶ Ang tüi avan cu Bawipa ah tüi sho ah kyak ci. Ang tüi avan cu ani awn ghing ne, ani ah hmawk ah om ci gui. Khanpughi ah bämang nak cu ang täi sei cüi vai sä! Amen.

¹ Cun ah kya sei phäi nau gui aw, Khanpughi naw a nam gein nak gui cu däm aih ci kya sei, kei naw ka ning m’cäi gui hlü cu: Ak ghing ah m’küi m’khän nak ah Khanpughi ung ng’ap une, a khuut bi nak ung ngün kyük ne nami zei vai nei. Cun cu nang mi naw nami ng’ap nak cu akcang ah khawihnah nak ah kyak ci nei. ² Khomdek khan ung zodäm nak ung kä nami ng’kü ng’neet tu vai, Khanpughi ung nami m’lung kyong avan ng’thawng sak u ne, m’lung ngaih ak thai awn nami om vai. Cun ung vah ni kiom nak, amät ung zeikiai nak la kümbe nak gui ah Khanpughi ah ang zak hlü cu nami hmat khai. ³ Khanpughi ah na peit ah bä mang nak awn, ak chang sing ka ning m’cäi gui hlü cu; na mi mät ung ng’müi ciah tha ah hlüng pi khai ah m’lung kä nami m’däm vai. Khanpughi naw a ning peit gui ah zum nak ah azun ak bawng ah ciah, nami mät awn khinkhaa khai ah, nami mät naw nami mät nami m’khoichaa vai nei. ⁴ Pumsa tumat ung ang phyeek akda om ci, cun ah ang phyeek gui päng ung ami bi vai om phäh phäh ci. ⁵ A cun ah mäih ah mik mi cu mi da ung phi, Bawi Khrit ung mi kawng ät nak awn pumsa tumat ah mi kyak ci, Mik mi cu ng’phyeek ng’pai ciah pumsa tumat ah mäih ah mi ng’khih ng’kaih zawp ci. ⁶ Cun ah kya sei Khanpughi naw m’geinsei nak a na peit gui ah ci ah, mi mät phäh phäh naw mi gah ah m’gein nak cu mi mang khai. Mik mi ah gah ah m’gein nak cu Khanpughi ah ng’thu pyein nak hning ah a kyak ung, mik mi naw mi zum nak ah ci ah, cun ah m’gein nak awn mi bik khai ah kyak ci. ⁷ Mik mi ah gah m’gein nak cu, chang gui m’theithang nak gui vai a kyak ung mi m’theithang gui khai. ⁸ Chang gui k’thamah nak peit nak gui vai a kyak ung, mi pe gui khai. Chang am pektaak ciah chang naw, ng’khai ng’lang nak awn a pektaak vai, huham om sei ng’vai pi ci naw k’tha nak cang ne abilawh vai; geinvai ciah chang m’gein tuk ci naw m’lung gei zeikiai nak awn am hteihtang tu vai. ⁹ M’hni nak cu akcang ah zumhni nak ah a kyak vai nei. Shetkat nak cu thüi na u ne, ni kiom nak cu k’pang khüp vä. ¹⁰ Nang mi cu tumat la tumat khritha phäi nau ah mäih ah nami ng’khawtsheng vai, tumat la tumat chang m’sui nak tu cu ang ghit ah nami bi vai. ¹¹ Kä damduh ne k’tha na ne bi nami bi vai. Nami m’lung kyong avan ap ne Khanpughi ah khuut nami bi vai. ¹² Nami ngaih u om ci kya sei nami zeikiai vai, zaica geinvai nak nami aut law ung hnimgein nak om sä, ang täi sei nami k’taigü vai nei. ¹³ Pyam thaam ciah khrihta phäi nau gui am nami khawhchaam nami tei pai tu gui vai, lam hteit ciah chang gui am nami im kawt nami k’hmawn peit gui vai. ¹⁴ Nang mi ning k’shedam na gui ciah chang ah hmawk ah Khanpughi naw hrilham a peit vai ah nami ng’zoih peit vai, cun ah chang gui cu kä züigen u ne, hrilham nami peit vai. ¹⁵ Zeikiai ci gui nami zeikiai püi gui vai, thüikyap ci gui nami thüikyah püi gui vai. ¹⁶ Tumat la tumat nami ng’hteinghtang tu vai, kä nami m’ghäm’ce vai, zawken ciah bi phi nami bi vai, nami mät naw nami mät, nami hmuhmat aih ciah kä nami ngaih vai. ¹⁷ Nami khan ah akshe bi lawk ciah a om ung akshe awn kä nami thung ba vai, chang gui ah maa ah ni kiom nak nami bi vai ah nami k’tha nak vai. ¹⁸ Chang nüng nüng awn ng’gei gaan ne nami om vai nei, ¹⁹ Teihpüi gui aw, phu kä nami tuk nüng nüng vai, Khanpughi amät naw kat nak cu m’htei khai nei. Cacim theing ung, “Kei naw phu ka tuk khai, kat nak ah ciah kei naw ka thung khai,” ci ne Bawipa naw pyein ci. ²⁰ Cun ah kya sei, phu nami tuk nak vaisü ung nami bilawh vai ah cacim theing naw a pyein cu, “Nami gaa cu ei a cawi ung ei nami m’bei tu vai, tui a gha ung tui nami tuu tu vai, cun ah na bi nak awn nang naw na gaa cu na ng’aa sak khai nei,” ciah kyak ci. ²¹ Shetkat nak awn kä na ng’zom men vai, akni awn akshe cu na näng vai nei.

¹ Chang päng naw kho uk ciah bawi ah huham cu a läk vai nei. A i huham phi Khanpughi naw kä a m’hnüt ung kä om ci nei. Huham gah ne uk ciah khobawi cu Khanpughi naw m’hnüt ne am düih ah kyak ci. ² A u chang phi huham gah ne uk ciah bawi hnu ng’tuk püi ci cu, Khanpughi ah ng’thukhän hnu ng’tuk püi ciah kyak ci:cun ah bik ciah chang cu m’shetkat nak gah khai nei. ³ Akni ah kä om ci naw a kyih vai kyak ci akni ah om ci naw akyih vai kä kyak ci. Huham om ciah bawi cu kä na kyih hlü ung akni ah na om vai nei, cun ung ani naw ning m’hlüngtai khai nei. ⁴ A i ah kya sei ci ung, ani cu nang ah ni nak vai ah Khanpughi naw ak chang ah am düih ah kyak ci. Cun ung phi kat nak na bi ah a kyak ung ani cu na kyih vai, aniung akcang ah shet m’kat nak vai ah huham nak cu om ci. Ani cu Khanpughi ah chang shäm ah kya ne, kat nak bik ciah chang gui cu Khanpughi ah huham awn m’shetkat gui ci ah kyak ci. ⁵ Cun ah kya sei nang cu Khanpughi ah m’shetkat nak kyih nak bäng awn ah kä kyak ciah namät ah m’lung kyong theing cim nak awn, uk ciah bawi ah huham cu na läk vai nei. ⁶ Shin ah a mawng ung nang mi cu kphlam phi nami m’cu ci. A i ah kya sei ci ung, uk ciah bawi gui cu ami bi m’htei ne ami bi ah a kyak ung Khanpughi ah khuut bik ci gui ah kyak ci. ⁷ Cun ah kya sei nang mi naw nami peit vai ah khin ci phung cu nami peit vai, a khawn m’cu vai ah a mawng om ciah phäh phung ah nami m’cu vai nei, uk ciah bawi gui ami van cu m’tamkhah gui ne nami chang m’sui gui vai nei. ⁸ Nang mi tumat la tumat nami ng’zumhni tu ah kawn ah a i pupawn phi kä om men sä. A paw chang m’hni ciah chang cu thukhän läk ciah kyak ci. ⁹ A i ah kya sei ci ung, “chang ah k’chuhta kä na kat püi vai, chang kä na ngawn vai, kä na m’guuk vai, chang ah khawh kä na ng’zak hlü düt vai,” ciah thukhän gui la a hei thukhän avan cu, “Na chang paw cu na mät awn m’täng ne nam hni vai,” ciah thukhän naw avan ak küm zawp ah kyak ci. ¹⁰ Ak chang paw m’hni ciah chang cun naw, a i zah ung phi am hni ah shetkat nak vai cu kä bik khai nei. Cun kya sei ak chang paw m’hni ciah chang cu thukhän a van läk ciah kyak ci. ¹¹ Nang mi cu nami ih nak ung kaa nami thawh nak ba vai ah a khin gawk law ciah nami hmat pyi ci kya sei, ng’zumhni tu ne nami om vai. A i ah kya sei ci ung mik mi naw hun nak mi gah nak vai ah khaw hnüüp cu, mi zum law nak htük ah mä, ang et law pi k’täi ah hmawk ah kyak ci. ¹² Khaw ah mü nak ng’pyi law ne, khaw cu thai law ghi ghi ci nei. Cun ah kya sei mik mi cu, hnüp khui ah ng’zak hlü ah om ih nak gui cu mi nawng shüt ne, akdei ung gaa tuk nak vai ah li khim cu mi pawng püi khai nei. ¹³ Mik mi cu akdei ung om ciah chang gui ah mäih ah ak ni ah mi om ih khai nei; auk tat nak, om k’she nak, plet beng nak, lü ng’aa nak, ng’tuk ng’ah nak, m’thüi m’khang nak gui cu avan mi nawng zawp khai nei. ¹⁴ Bawipa Jesuh Khrit cu li khim ah mäih ah nami suisak vai nei, ng’tüipüi ah nami shetkat nak cu nawt heng u ne, mät ah ng’zak hlü düt ah kä nami om ih ba vai nei.

¹ A zum nak ken ciah chang cu nami dou vai, cun ung phi ani ah m’lung ngaih ah mawng ung kä nami ng’cuh ng’can nen püi vai. ² Azum nak khäng ciah chang naw a i ei phi ei hning ci, a zum nak kä khäng ciah chang naw, thui an bäng vah ei thei ci. ³ A i ei phi ei thei ciah chang naw cun ah kä ei tu thei ciah chang cu kä a zokshe nak vai; Thui an bäng ei thei ciah chang naw phi, a i ei phi ei thei ciah chang cu kä ah m’shetkat vai; a i ah kya sei ci ung a i ei phi ei thei ciah chang cu Khanpughi naw a dou pyi ah kyak ci. ⁴ Nang a u ah kya ne chang hei ah chang shäm cu nam khoichaa tu vai ang! Cun ah chang shäm naw abilawh a näng la kä a näng cu, amät ah bawi naw m’khoichak khai nei. Ani cu näng khai nei, a i ah kya sei ci ung Bawipa naw ani cu näng khai ah am htei ah kyak ci. ⁵ Chang am shah naw kho hnüüp ät cu a hei kho hnüüp gui ah küikyang pi ciah ngai ci, chang am shah naw kho hnüüp gui avan cu täng ciah ngai ci. Ngahmi cu a i ah ami ngaih ung phi, cun ah ami ngaih cu düng ciah ngaih gep u sä. ⁶ Kho hnüüp k’ni ngaih tüh ciah chang cu Bawipa am tamkhah nak ah a ngaih tüh ah kyak ci;a i ei phi ei thei ciah chang cu Bawipa am tamkhah nak ah a ei ah kyak ci, a i ah kya sei ci ung ani naw cun ah ei ah hmawk ah Khanpughi cu m’hlüngtai ci. Ei am shah hlawi ciah chang cun phi Bawipa am tamkhah nak ah a hlawi ah kyak ci, ani naw phi cun ah a hlawi ah hmawk ah Khanpughi cu m’hlüngtai ci. ⁷ Mik mi ung kaa a u chang phi amät ah hmawk bäng ah kä ghing ci, amät ah hmawk bäng ah kä sik ci. ⁸ Mik mi mi ghin ah a kyak ung mi ghin nak cu Bawipa ah hmawk ah kyak ci, mik mi mi sih ah a kyak ung mi sih nak cu Bawipa ah hmawk ah kyak ci. Cun ah kya sei mik mi cu, mi sih ung phi, mi ghin ung phi, Bawipa cu mi khäm ci. ⁹ A i ah kya sei ci ung Bawi Khrit cu, ghing ci la sik ci gui ah Bawipa ah a kyak nak vai ah sih nak ung kaa a thawh ba pyi ah hmawk ah kyak ci. ¹⁰ Cun ah kya sei, thui am bäng ei hning ciah chang gui, a i ah kya sei nami phäi nau nami m’khoichaa ang!A i ei phi ei thei ciah chang gui, a i ah kya sei nami phäi nau na mi zokshe nak ang!Mik mi mi van cu a nam khoichaa gui vai ah Khanpguhi ah maa ah mi ng’düi zawp khai nei. ¹¹ Cacim theing ung Khanpughi naw; “Kei cu akcang ah ghing ciah Khanpughi ah ka kyak ci, ci ne Bawipa naw pyein ci, Chang ah hta van cu kei ah maa ah m’khuuk khodoong khai nei. Chang ah hta avan naw Kei Khanpughi ah ka kyak ah mawng cu ng’kyaa ne pyein khai nei,” ci ne pyein ci. ¹² Cun ah kya sei chang ah hta mi van naw, mi bilawh om ih phung cu, Khanpughi ah maa ah pyein ne mi m’thein khai nei. ¹³ Cun ah kya sei tumat naw tumat am khoichaa nak cu nawng shüt ne, nami phäi nau ah cheishoh nak vai la shetkat nak ung a luh nak vai cu, kä kami bi phung phung khai ci ne, nami m’lung ngaih nami phukpit vai nei. ¹⁴ Bawipa Jesuh ung ka kawng ät nak naw, a i ei phi ang tüi püi ah kä ah theingthap nak kä om ci, ci cu na hmat sak ci; cun ung phi, shin ah ei cu kä theing ci ciah zum ciah chang ah hmawk ah cun ah ei cu kä theing ci. ¹⁵ Ei tumatmat na ei nak awn na phäi nau cu ngaih na khak sak ah a kyak ung, nang naw ani ah khan ah na om k’she nak ah kyak ci. Bawi Khrit ah sih nak cu cun ah chang ah hmawk ah phi kya tuk ci kya sei, tumatmat ah ei nami ei nak awn cun ah chang ah ngaih cu kä khak en sak vä. ¹⁶ Nang mi naw nik ciah nami ngaih cu chang ah hmawk ah shetkat nak ah kä kya en sä. ¹⁷ Khanpughi ah uk nak ah kho cu ei nak la auk nak awn kä ng’phaa ci, Mumcha Theing ah peit ah ng’düng nak, dimdeeih nak la zeikiai nak awn vah ng’phaa ci. ¹⁸ Ashin ah mäih ah Bawi Khrit ah khuut bik ciah chang cu Khanpughi naw zei nak ci, chang naw phi m’hlüngtai ci. ¹⁹ Cun ah kya sei mik mi ung dimdeeih nak na pe gui khai la tumat la tumat k’thagui ming peit nak tu vai ah nam hteihtang gui khai cu, ang täi sei mawng nah ne mi bi vai kyak ci. ²⁰ Ei auk vai ei auk nak awn Khanpughi ah bi cu kä m’shet en vä. Ei vai phung cu ei vai kyak ci, cun ung phi cun ah ei ei nak awn chang tumatmat kat nak ung luh sak khai a kyak ung, cun ah ei ei cu m’cheishoh nak ah kyak ci. ²¹ Nami phäi nau naw shetkat nak khai a kyak ung, asa phi bäi sapyit tui phi bäi, a hmün a i ei auk phi bäi, avan nami hlawi vai. ²² Shin ah a mawng ung nang naw a i ah zum ne na bi cu, na mät la Khanpughi ung vah ng’shing khai. A mät naw ng’düng ciah a zumnak awn bilou m’khoicha ne, a ngaih gep nak om ciah chang cu zeikiai nak om ci. ²³ Cun ung phi amät ah ei nak ah khan ah ngaih gep nak kä om ciah chang cu, a cun a ei ah hmawk ah Khanpughi naw m’shetkat ci, a i ah kya sei ci ung ani ah bi cu zum nak awn a bi kä kyak ci. Zum nak awn kä kyak ciah bilawh phung cu shetkat nak ah kyak ci.

¹ Mi zum nak khäng htek ciah chang gui naw, azum nak ken ciah chang gui cu m’hteihtang gui vai kyak ci. Mi mät ah zeikiai nak bäng vai ah mi bi khai ah kä kyak ci. ² Mik mi mi van naw azum nak kä khäng htek tu phak ciah phäi nau gui, ami zum nak a khän htek law tu vai ah, ngahmi ah zeikiai nak la ni kiom nak cu mi piang khai. ³ Bawi Khrit cu amät ah zeikiai nak vai a i kä bik ci, cun ah abi nak vaisü ung cacim theing ung om ciah; “Chang gui naw Bawipa ami k’shedam nak cu kei ami na k’shedam nak ah kyak ci nei,” a ciah mäih ah chang gui ah k’shedam nak cu gah ci. ⁴ Cacim ung ami guk phung cu mik mi ami nam theithang nak gui ah kyak ci. Cun ah ami guk ah mawng cu, mik mi naw cacim ah na peit gui ah hnimgei nak la k’thamah nak awn m’lung üp ngaih gep nak a om vai ah hmawk ah kyak ci. ⁵ Nang mi naw Bawi Khrit Jesuh ah lam shüm cu läk ne, m’lung ät ngaih ät awn nami om vai ah hnimgei nak la k’thamah nak ning pe gui ciah Khanpughi naw, nangmi cu ning m’htei gui sä. ⁶ Cun ung vah nang mi naw mi Bawipa Jesuh Khrit ah Pa, Khanpughi cu k’aw tumat awn a kawng ät ah nami m’hlüngtai khai. ⁷ Bawi Khrit naw nangmi cu a ning dou gui ah mäih ah, Khanpughi ah bämang nak ang dang vai ah tumat la tumat nami ng’dou tu vai. ⁸ Kei naw ka ning m’thein gui cu, Bawi Khrit naw a ghin zah ung khuut abi nak cu, Jew chang gui ah hmawk ah kyak ci. Cun cu khanpughi bä ne ang khän ah mawng am dang nak la pu pa gui am khanpughi naw shaitaak nak a peit gui cu ng’düng ne bä khai ah abi nak ah kyak ci. ⁹ Cun bäng ah kä kyak ciah Chang Pakhui hei gui naw phi amät ah chim’gein nak awn Khanpughi ami m’hlüngtai tu hlawt vai ah hmawk ah ani cu kyum lawk ciah kyak ci. Cacim Theing ung; “Cun ah kya sei kei naw chang khui hei gui ah ng’lung ah Khanpughi cu kam hlüngtai khai nei; Ng’äi awn ka m’hlüngtai khai nei,” ciah om ci. ¹⁰ Cun kawn ah a pyein ba mä cu; “Chang pakhui hei gui, Khanpughi ah chang gui awn atäng ah Zeikiai vä,” ciah kyak ci. ¹¹ Cun kawn ah; Chang khui hei gui nami van naw Bawipa cu m’hlüngtai vä, Chang ah hta avan naw Bawipa cu m’hlüngtai vä,” ci ne pyein ba mä ci. ¹² Cun kawn ah Isaiah naw; “Jesse ah hta ng’shon tumat cu dang lawk khai nei: Ani cu khui hei chang gui uk gui khai ah lawk khai nei, Cun ah chang gui naw ani cu ak be ah ngaih u khai gui nei,” ci ne pyein ba ci. ¹³ Zum ne ngaih u nak ah ang zung ah kyak ciah Khanpughi naw, ani ung nami zum nak awn, zeikiai nak la dimdeeih nak cu ning k’be gui sä. Cun ah kya sei zum ne nami ngaih u nak cu, Mumcha Theing hlüngtai nak awn, phung ghing ne ng’ghotai khai nei. ¹⁴ Phäi nau gui aw, nang mi cu ni kiom nak awn be ne, hmuhmat nak phi küm sei, tumat la tumat m’theithang nak hning phi a om ah phäh ah ning ngaih gep gui ne ka zeikiai ci. ¹⁵ Cun ung phi shin ah ca ung, am shah amawng ama gui ah mawng ung nang mi ka ning m’cäi nak gui ung, kei naw Khanpughi ah na peit ah akhin k’ni cu mang ne m’gäi nak awn ka guk nei. ¹⁶ Cun ah m’gäi nak cu chang khui hei gui ah hmawk ah a khuut bi vai ah Bawi Khrit Jesuh ah chang shäm ah kyak nak ah kyak ci. Chang pakhui hei gui cu Khanpughi ah dou hlü ah khawihnah nak ah kyak ci. Chang pakhui hei gui cu Khanpughi ah dou hlü ah khawihnah nak ah kyak ciah, Mumcha Theing naw Khanpughi am a ap ah ami kyak law vai ah, keinaw k’taigü ah bi bi ne, Khanpughi ah kaa lawk ciah Thu Ni cu shäu ne ka pyein ci nei. ¹⁷ Bawi Khrit Jesuh ung kawng ät nak awn, Khanpughi ah khuut ka bi hning ah phäh ah, kei cu khähghah ne ka zei ci nei. ¹⁸ Chang khui hei gui naw Khanpughi ah ng’thu ami läk tu vai ah, Bawi Khrit naw ana bilawh sak ah mawng cu, kei naw m’gäi ne ka pyein khai nei. Cun ah Khanpughi ah ng’thu ami läk law tu cu, kei ah thu pyein la bilawh nak ¹⁹ Cäicat vai ah cäi aih gui vai la ngaih khit gui vai, Mumcha Theing ag hlüngtai nak gui awn ah kyak ci. Cun ah kya sei kei cu, Jerusalem ung kaa naw Illirikam ung khüt sei, ka hteh nak phung la ka gawk nak phung ung, Bawi Khrit ah mawng Thu Ni cu ak be ah shäu ne ka pyein ci. ²⁰ Kei cu chang gui ah cawh nak pyi ah im hmun ung kä ka cokyang hlük ci, kei ah ng’bü nak cu, Bawi Khrit ah mawng kä ng’za tu phak ciah khohmun ung ah, Thu Ni cu shäu ne pyein vai ah kyak ci. ²¹ Cacim theing ung; “Cun ah Bawi ah mawng cu, a u naw kä a pyein man ung phi, Ngahmi naw hmu tuk khai gui nei, Kä ng’za tuh man ciah chang gui naw phi hmat tuk khai gui nei,” ciah a pyein ah mäih ah kyak ci. ²² Shin ah a mawng awn nang mi ah ka gawk law vai ah kei naw akda vei kak tha nak ci. ²³ Cun ung phi cun ah kho ung ka bi gui vai cu, tuk bäi ka bi pyi ci nei. Nang mi ah ka law vai ah cau pui tüi ne ka ngaih tüh ah mäih ah, ²⁴ tuk bäi ka law hning khai ah ka ngai ci nei. Kei cu Spain kho ah ka hteh lam ah, nang mi ah ka lawk khai ah ka ngai te ci, nang mi ah om nak ah a shäng ka om tu kawn ah, Spain kho ah ka hteh hlawt vai ah nami na m’hteihtang tu vai ka ng’za hlük ci nei. ²⁵ Cun ung phi tuk bäi hta kei cu, Khanpughi ah chang gui m’hteihtang gui vai ah, Jerusalem ah ka hteit khai nei. ²⁶ A i ah kya sei ci ung Macedonia kho la Achaia kho ah Khritha bum gui naw, Jerusalem ah pyamthaam ciah Khanpughi ah chang gui cu m’hteihtang peitaak gui vai ah ami k’bäi pyi ah hmawk ah kyak ci. ²⁷ Cun ah ami k’bäi cu, chang ah bi sak gui ah kä kyak ci, ami mät ah ngaih ah, ami mät ah m’gein nak awn ami bi ah kyak ci, pyamthaam ci m’gein tu vai cu ngahmi ah bi ah kyak ci. Jew chang gui naw, khui hei chang gui am, ami mumcha hrilham cu ami teipai tu gui ah kya sei, khui hei chang gui naw phi, Jew chang gui am ami pumsa hrilham cu, ami teipai gui vai ah kyak ci. ²⁸ Cun ah kya sei kei naw cun ah gahtang ah ngui gui cu, ngahmi am pe gui ne, ap nak gui ah mawng cu ka bi zawp kawn ah, Spain khaw ah ka hteh nak lam ah, nang mi ah om nak ah phi ka lawk khai nei. ²⁹ Kei cu nang mi ah om nak ah ka law ah a kyak ung, Bawi Khrit ah hrilham ak be law püi ne ka lawk khai ah kei naw akcang ah ka hmat ci nei. ³⁰ Phäi nau gui aw, Bawipa Jesuh Khrit mi zum nak la, Mumcha Theing ah na peit gui ah zumhni nak awn; kei ah hmawk ah kei awn atäng ah Khanpughi ah nami taigü tu vai ah ka ning khü gui ci nei. ³¹ Judea kho ah kä zum ci ah chang gui ka phiawn nak gui vai ah kei ah m’hteihtang nak gui cu, Jerusalem a kaa Khanpughi ah chang gui naw zeikiai ne ami dou nak hning vai ah, nami taigü vai nei. ³² Cun kawn ah Khanpughi naw ang zak hlü a om ung, zeikiai nak awn nangmi ah om nak ah law ne nang mi awn atäng ah lünlawi ne ka om tuk khai nei. ³³ dinggei nak ung mi zum ah kyak ciah Khanpughi cu, nami van awn atäng ah om sä, Amen.

¹ Kei naw mi be Phoebe ah mawng cu küikyan ne ka pyein hlük ci. Ani cu Cenchreae gawnu, khritha bum ung bi bik ci. ² Khanpughi ah chang gui ah mi kyak ci kya sei ani cu Bawipa ah ming awn nami dou vai nei. Nami m’hteihtang tu vai a hlü ah a kyak ung nami m’hteihtang tu vai nei. Ani cu chang akda m’hteihtang tuk ciah teihpüi k’ni ah kyak ci, kei phi nam hteihtang tuk ci. ³ Bawi Khrit Jesuh ah khuut bi nak kami bi ät ciah Pricilla la Aquila cu ka zavaih na goi ci nei. ⁴ Ngah ni cu kei ah hmawk ah ani hnun gui pe ne bi bik ci goi nei. Ngah ni cu kei bäng ah kä kyak ciah khui hei chang khritha bum avan naw zei na goi ci gui nei. ⁵ Ami mät ah im ah ng’bum ne pum ci gui ah khritha bum gui cun phi ka zavaih na gui ci nei. Asia kho ung Bawi Khrit zum law maa ciah ka teihpüi k’ni Epaenetus cun phi khaih na ne, ka zavaih nak ci nei. ⁶ Nang mi ah hmawk ah k’tha nah ne bi bik ciah Mari cun phi zavaih nak nei. ⁷ Andronikas la Juniasr cun phi ka zavaih na goi ci nei. Ngah ni cu kei awn atäng ah thawng kyum ci goi ah Jew chang goi ah kyak ci: ngah ni cu ang düihpüi gui ah ng’lung ah chang khli naw hmat goi sei, kei ah kä zum tu pha ung Khritha ah kya pyi ci goi ah kyak ci. ⁸ Bawipa ung kawng ät ne ka teihpüi k’ni ah kyak ciah Ampliatus phi ka zavaih nak ci nei. ⁹ Bawi Khrit ah khuut atäng ah mi bik ciah Urbanus la ka teihpüi Stachis phi ka zavaih na goi ci nei. ¹⁰ Bawi Khrit ung khäng ciah Apelles la Aristobulus ni kyong cun phi ka zavaih na gui ci nei. ¹¹ Jew chang ah kyak ciah Herodion la Narcissus ni kyong, Khritha phäi nau gui cun phi ka zavaih na gui ci nei. ¹² Bawipa ah khuut bik ci goi ah Tryphaena la Tryphosa la, Bawipa ah hmawk ah akda bik ciah ka teihpüi Persis gui cun phi ka zavaih na gui ci nei. ¹³ M’hlüngtai vai ah Bawipa ah khuut bik ciah Rufus la ahta ah mäih ah ang täi sei nam hteihtang ciah anu ah khan ah ang htei ah ka zavaih ci nei. ¹⁴ Asinchritus, Phlekon, Hermes, Patrobas, Hermas, la ngah mi awn om ci gui ah khritha phäi nau gui avan cu ka zavaih na gui ci nei. ¹⁵ Philolokus la Julia, Nereus la abe, Olympas la ngahmi awn om ci gui ah Khanpughi ah chang gui avan cu ka zavaih na gui ci nei. ¹⁶ Phäi la nau ah ng’ui ng’hnam ne, tumat la tumat ng’zavaih na tu vä. Bawi Khrit ah Khritha bum avan naw nang mi cu ning zavaih gui ci nei. ¹⁷ Phäi nau gui aw, nang mi naw nami gah ah m’theithang nak gui cu hnu ng’tuk püi ne, chang gui ah m’lung ngaih ng’pai sak ne, chang gui ah zum nak lam hma sak ciah chang gui cu, nami geing nak gui vai nei, ngahmi cu nami hlawi gui vai nei! ¹⁸ Cun gui cu mi Bawipa Jesuh Khrit ah khuut bik ci gui ah kä kyak ci, a i ei ei ung bä khai ciah ngaih tüh ne bik ci gui ah kyak ci. Ngahmi naw tuihlim ciah ng’thu la m’hlüngtai ah k’chiu awn ng’düng ciah chang gui cu m’hleeihlak ci gui nei. ¹⁹ Nang mi naw Thu Ni cu a i hlawk ah nami m’lung ung nami khän htek sak cu chang avan naw hmat ci nei. Cun ah kya sei nang mi ah hmawk ah ang htei ah ka zei ci. Nang mi cu ni kiom nak hmat ne lunglang ciah chang ah kya u ne, shetkat nak phiawn nak ciah nami kyak vai ah ka ng’za hlük ci. ²⁰ Mi dinggei nak ah ng’zung ah kyak ciah Khanpughi naw Satan cu ang ghit ah m’hnoi ne nami khophaa ’ka ah gawk sak khai nei. Mi Bawipa Jesuh ah m’geinsei nak cu nang mi ah khan ah om sä. (Aí shah naw shin ah ca kyawng cu nawng shüt ci). ²¹ Kei awn atäng ah kani bik ciah Timothi la kei ah mäih ah Jew chang ah kyak ciah Lucius, Jason la Sosipater gui naw phi Khritha zavaih na gui ci gui nei. ²² Kei, Tertius, naw shin ah ca cu läk ne ka guk nei, kei naw phi Khritha zaviah nak cu ka ning m’khäh law gui ci nei. ²³ Kei na khinchah nak ci, khritha gui naw ami pum nak im nak ciah Kaius naw phi ning zavaih na gui ci nei. Gawmang ah nguimküm, Erastus la mi phäi nau Kuartus naw phi ning zavaih na gui ci goi nei. ²⁴ (Mi Bawipa Jesuh Khrit ah m’geinsei nak cu nami van ah khan ah om sä¬ Amen. ²⁵ Khanpughi ah bämang nak cu mi m’hlüngtai khai nei! Ani naw nang mi ah zum nak cu ning khänhtek sak gui ci nei. Kei naw Bawi Jesuh Khrit ah mawng Thu Ni ka shäu nak ung shin ah ka pyein ci, cau puipui tüi ne ng’thup ne om ciah ng’zih ciah ng’düng nak naw phi a cun na m’dang ci. ²⁶ Cun ung phi tuh bäi chü, cun ah ng’zih ciah ng’düng nak cu profet gui ah guk ah cacim ung dang zawp pyi ci nei. Ang täi ah ghing ciah Khanpughi ah thukhän awn, kho avan ung chang avan naw hmat ne, zum ne, ami läk vai ah cun ah ng’düng nak cu shäu ne pyein pyi nei. ²⁷ Tumat bäng nak ciah Khanpughi nah ne, apäng avan lunglang hmuhmat ciah Khanpughi cu, Bawipa Jesuh Khrit awn ang täi sei bämang ne om sä! Amen.