THU PHLAAN

¹ Shin ah cauk cu Bawi Khrit ah m’dang ah muimang thu phlaan gui guk ah kiak ci. Khanpughi naw shin ah Thu Phlaan a peit ah mawng cu, ak changshäm gui-am kä shou pha sei gawk law ge khai ah amwang gui am thein nak gui ah kiak ci. Bawi Khrit naw ak khankhaw chang cu Johan ah om nak ah tüi law netah, shin ah Thu phlaan cu a hmat sak ah kiak ci. ² Johan naw Khanpughi ah ng’thu la Jesuh Khrit ah m’dang ah düng nak cu a hmuh ah mäih bä bä ah a guk ba ah kiak ci. ³ Shin ah mawng gui aküm law nak vai ng’et law pi ci kiasei, shin ah ca phat ciah chang phung la shin ah ng’cäi nak ah ng’thuthuuk ngai ng’zak ciah chang phung ni, shin ung guk ah thuthuuk läk ciah chang gui phung cu, zeikiai nak om ci nei. ⁴ Johan naw Asia khaw gawnu pachih ung khrihtabum gui-am ca aning guk law gui cu; Zanta, tuhngawi, ngawi zä ang täi sei om ciah Khanpughi, amang kiang ah maa ah ng’tän ciah mumcha pachih la; ⁵ bekhüt ne saksi ne, sih nak ung kaa tho ba htük ne, mdek la khan ghangpughang nüng nüng uk ciah Bawipa Jesuh Khrit ah m’geinsei nak la dimdeeih nak cu nangmi ung om sä. Mik mi na m’hni gui ne, asi huk ne asih nak awn, mi kat nak ung nak phiawn gui netah; ⁶ Apa Khanpughi ah khuut bi vai ah a uknak khaw ung Taigü ah na m’düih gui ciah Bawipa Jesuh Khrit cu, hta ng’shon ung bämang ne hlüngtai ne om sä! Amen. ⁷ Teng tu vä, Bawipa cu khawmei ung cum ne kyum lawk ci nei, chang nüng nüng naw hmuk khai gui nei, amät k’htei awn shun te ci gui naw phi hmu tuk khai gui nei. Khomdek ah khan ung chang ah hta avan cu haala zawp khai gui nei. Cun cu akcang ah kia sä!. ⁸ “Kei cu Alpha la Omeka, tün nak la khüm nak ah ka kiak ci” ci ne zanta, tuhngawi ngawi zä angtäi sei om ne hlüngtai pi säih ciah Bawipa Khanpughi naw pyein ci. ⁹ Kei cu a khaw päng ciah chang gui naw ami bui awt ah geinvai nak awt ciah nami paw, Bawipa Jesuh ah chang, nami phäi Johan ah ka kiak ci. Kei cu Bawi Khrit ah düng nak la Khanpughi ah ng’thu ka shäu ah hmawk ah, patmos ng’lei ung ami na üüp ah kiak ci. ¹⁰ Bawipa khawihnah nak hnüüp ung Mumcha cu kei ah khan ah kyum law khätah, k’phyungheng tum ah mäih ah ng’thu k’aw cu ka hnu lam ah ng’shan law sei ka ng’zak ci. ¹¹ A cun ah k’aw naw, “Na hmuh ng’zak gui phung cu ca ung guh ne, Ephesus, Smina, Pakamos, Thiara, Sadis, Philadephia, Laodicea gawnu gui ung Khrithabum gui-am na peit gui vai nei” ci ne pyein ci. ¹² Cun ah na ng’thu püi ci cu a u ah a kiak ah ng’hlat ne va teng ba netah, ghui mei ng’düi pachih la; ¹³ cun ah mei-im gui ah ng’lung ah hnicim chang ah mäih tumat cu ka hmuk ci. Ani cu akhawphaa zuk pha khai ah suinu sui ne, ghui m’ciu vawp ci. ¹⁴ Alusam cu htome ah mu ah mäih, khlüi toi mäih ah bawk ne, amik cu meidäi ah mäih ah ng’shü ci. ¹⁵ A khaw cu mei ung m’hling ne m’tui ah kyeicee ah mäih ah tui ne ak aw cu tuinu gaai ne ang hüüt ah mäih ah ng’hmum ci. ¹⁶ Ani cu akpat lam ah aisi pachih kawt ne, am gawng ung vangah-vei ghaat ciah khim lut lawk ci. A hmai cu hnüüp lunglai ung hni ng’liing ah mäih ah ng’shü ci. ¹⁷ Ani ka hmuh vai-am kei cu chang k’sii ah mäih ah a khaw pei ah kiu ne ka ng’zän ci. Ani naw ka khan ah akpat lam akut taih netah,” Kä kyikyawk ä! Kei cu tün nak la khüm nak ah ka kiak ci. ¹⁸ Kei cu ghing ne om ciah ka kiak ci, kei cu ka si te ci, cun ung phi tuhbäi hta ng’shon ung ghing ne ka om ci. Sih nak la sihnak ah khaw ah khan ah kei ah huham cu om ci. ¹⁹ Tuhbäi kaa gui la ngawi ah gawk lawk khai gui na hmuh phung avan cu, na guk vai nei. ²⁰ Ka k’pat lam ka kut ung om sei na hmuh ah aisi pachih la ghui mei ng’düi pachih ah thuuk ciah a mawng cu;mei ng’düi pachih cu khrihtabum gawnu pachih ah kiak ci, aisi pachih cu khrihtabum gawnu pachih ngäng ciah khanchang pachih ah kiak ci.

¹ Ephesus khrihtabum ah khankhaw chang-am ca peit law nei;shin ah ca cu akpat lam ah aisi pachih kawt ne, ghui mei ng’düi pachih ah ng’lung ah hteit shüi shüi ciah m’cäi nak ah kiak ci. ² Nang ah bilawh cu ka hmat ci, nang naw a i hlawk ah nak tha nak, a i hlawk ah na ling k’tha la hniimgei nak a om cu kei naw ka hmat ci. Nang naw chang she gui kä na hniim gei nak gui hlawt la ang düihpüi ah kä kia lang ne, ana ng’düihpüi nei cik ci gui ah chang gui cu, ami hleeihlak dang khai ah nami k’tä gui cun phi kei naw ka hmat ci. ³ Nang cu hniimgei nak om ci, kei ah hmawk ah ang htei ah na zaica ci, kä nam lungksi ci, ⁴ Cun ung phi ak h"tuk ung kaa ah mäih ah nang naw kei cu kä na na m’hni ba ci kia sei, ning pyein m’sheet vai om ci. ⁵ A i hlawk ah na zu kiak vü cu ngaih tüh ba shüm ä, na kat nak ung kaa ng’zu ba ne, ak htük ung na bi ah mäih ah na bi ba vai nei. Na kat nak ung kaa kä na ng’zu ba ah a kiak ung na om nak ah kei cu law netah, na mei ng’düi cu a hei ah ka ning hen pek khai nei. ⁶ Cun ung phi Nikolaitan ah chang gui ah bilawh cu kei naw ka thüi nak ah mäih ah nang naw phi thüi na tuk ci sei, ka ning zei nak ci nei. ⁷ “Khrihtabum gui-am Mumcha naw am thein gui cu nami hnga a om ung ngai ne nami ng’zak vai nei. “Näng nak gah ciah chang-am Khanpughi ah chaam kyong ah phung ciah, ghin nak sing ah aktheih ei nak hning cu ka pek khai nei. ⁸ “Smirna Khrithabum ah khankhaw chang-am ca peit law nei; “Shin ah ca cu tün nak la khüm nak ah kia ne, sihnak ung ka tho ba ciah m’cäi nak ah kia ci. ⁹ Kei naw na zaica nak la na geinvai nak cu ka hmat ci, cun ung phi nang cu akcang ah na ng’bühmang ci. Keimi Jew chang nei cik ci gui naw ning m’kat gui ne ami ng’thu cu ka hmat ci, ngami cu Jew chang ah kä kiak ci gui, Satan ah chang ah kiak ci gui. ¹⁰ Zaica nak na awt vai ah api ah phi kä na kyih-en vai nei. Nangmi am shah gui cu khawshe naw thawng ung ning chum gui netah, ning k’cet gui khai nei, hnüüp gha ah kyong ung zaica ne na om khai nei. Na sih ung khüt sei bekhüt ne om ä, kei naw näng nak ah ng’cheng ghin nak ka ning pek khai. ¹¹ “Khrihtabum gui-am Mumcha naw am thein gui cu nami hnga a om ung ngai ne nami ng’zak vai nei! “Näng nak gah ciah chang gui cu akhnih vei nak sihnak phiawn nak khai gui nei. ¹² “Perkamum Khrihtabum ah khankhaw chang-am ca gu ne peit law ne; “Shin ah ca cu vang ah vei ghaat ciah khim shäm ci naw amcäi nak ah kiak ci. ¹³ Nang a hawi na om cu ka ning hmat ci, nang cu satan ah kiaang ung na om ci. Bekhüt ciah ka chang Antipas cu Satan ah om nak ung ami ngawn zah ung, nang cu kei ung ng’düng ne na zum nak kä na nawng ci. ¹⁴ Cun ung phi Balaam ah m’theithang läk ciah chang api cu pyein m’shet vai om ci nei: a gup-am sonkcan ah ei ei vai la, pletbeng vai ah Israel chang gui-am lam shüm gui ciah Balak khawshe cu Balaam naw am theithang ah kiak ci. ¹⁵ A cun ah mäih ah nangmi ung Nikolaitan ah chang gui ah m’theithang nak läk ciah chang gui phi om ci. ¹⁶ Tuhbäi nami kat nak ung ng’zu ba vä! Kä nami ng’zu ba ung kam gawng ung lut lawk ciah vang ah vei ghaat ciah khim awn ka ning tu gui khai nei. ¹⁷ “Khihtabum gui-am Mumcha naw am thein gui cu nami hnga a om ung ngai ne nami ng’zak vai nei! “Näng nak gah ciah chang-am thup ne ghim ah manna m’htut cu ka pek khai, k’toulung bawk phi ka pek khai. Cun ah k’toulung bawk ung guk ah ming thai cu, a u naw kä hmat khai, a cun ah lung gah ci bäng naw hmat khai. ¹⁸ “Thiatira Khrihtabum ah khankhaw chang-am ca gu ne peit law nei! “Shin ah ca cu, a mik meidäi ah mäih ah ng’shü ne, kyei m’tui ah mäih ah pyü sei khaw nak ciah, Khanpughi ah Htapa ah m’cäi nak ah kiak ci. ¹⁹ Kei naw a i na bi cu ka hmat ci. Na m’hni nak, na bekhütnak, khuut na bi nak, la na hniimgei nak cu ka hmat ci. A htük ung na bi ah tah bä law pi ni law pi khai ah na bi cun phi ka hmat ci. ²⁰ Cun ung phi nang ka ning pyein m’sheet nak cu, amät naw amät Khanpughi ah ng’shä ah pyein ciah hnumi nu Jezebel cu na dou ah hmawk ah kia ci. Ani naw kei ah chang gui cu ami pletbeng vai la a gup-am sonkcan ah ei nami ei vai ah m’theithang ne lam k’she m’shüm gui ci. ²¹ Kei naw ani ang zu ba vai ah akhin ka pek ci, cun ung phi ani ashet kat nak ung kä ng’zu ba hlük ci. ²² Cun ah kia sei ani cu a ih phak ung ng’zän sak ne ka geinvai sak khai nei, ani awn ng’zawng’pawm ciah chang gui phi ang htei ah zaica khai gui. Ngami cu cun ah hnumi awn ami shetkat ah hmawk ah kä ami ng’zu ba ah a kiak ung kei naw a tuhbäi ge ka zaica sak gui khai. ²³ Ani läk ciah chang gui cu ka ngawn gui khai, cun kawn ah kei cu chang nüng ah m’lung ngaih la ng’zak hlü ka hmu hmat ciah, khrihtabum avan naw hmat khai gui nei. ²⁴ "Cun ung phi ngami ah kawn ah Thiatira ung chang gui naw cun ah shekak ciah m’thei nak cu kä läk ci gui. chang a hei gui naw Satan ah thuuk ciah a mawng gui ah ami pyein gui cun phi, nangmi naw kä nami m’thei tuk ci. Nangmi ah khan ah a hei phuih gih kä ka taih khai. ²⁵ Kei kä ka law pha ah chuih nami kut ung om ci cu, htek sei nami shum vai. ²⁶ Näng nak gah ne, kei ah ka ng’zak hlü ah khaw khüt sei om ciah chang-am Kapa ung ka gah ah huham cu ka pek khai. Cun ah huham cu, chang pakhui avan m’si k’hteipawng awn uk gui ne, m’sitawn awn m’dek k’am thah gep ah mäih ah dep nak ah kiak ci. Kei naw ngami-am thaihke aisi phi ka pe gui khai nei. ²⁹ “Khrihtabum gui-am Mumcha naw am thein gui cu, nami hnga a om ung ngai ne nami ng’zak vai nei!

¹ Sadis khrihtabum ah khankhaw chang-am ca gu ne peit law nei: “Shin ah ca cu Khanpughi ah Mumcha pachih la aisi pachih ah om nak naw amcäi nak ah kiak ci. Nang ah bilawh cu kei naw ka hmat ci:Nang cu ghing ciah na ng’ming thang pang sei phi na sik ci. ² Cun ah kia sei tho law ä, nang ung om ba ciah ghin nak kä a maih pha ung, nak tha be sak ä. Nang ah bilawh cu Kapa Khanpughi ah maa ah kä kümbe phak ciah kei naw ka hmuk ci nei. ³ Nami ng’thei tu la nami ng’zak tu gui cu shüm ba ne läk u ne, nami kat nak ung kaa ng’zu ba vä. Kä na thawh law ah a kiak ung m’gui-ei ah mäih ah na om nak ah kei ka lawk khai nei, kei ka law nak vai ah a khin cu nang naw kä na hmat khai. ⁴ Cun ung phi Sadis gawnu ung asui theing sak ci api om ci. Nangmi cu nami khin khaa ci kia sei, sui bawk sui ne kei awn, nami hteit hton tu ghawm khai nei. ⁵ Näng nak gah ciah chang gui cu sui bawk sui khai gui, kei naw ngami ah ming cu ghin nak cauk ung kaa kä ka heeng khai. Ani cu kei ah chang ah a kiak ah mawng, Kapa la ak khan chang gui ah maa ah kei naw ng’kiaa ne ka pyein khai nei. ⁶ “Khrihtabum gui-am, Mumcha naw am thein gui cu, nami hnga a om ung ngai ne nami ng’zak vai nei! ⁷ “Philadelphia Khrihtabum ah khankhaw chang-am ca gu ne peit law nei: “Shin ah ca cu ng’ciim ne ng’düng ciah ng’cäi nak ah kiak ci. Ani naw David ah m’kawt k’hnawn nak cu kawt ci, ani naw m’kawt ak hnawn ung a u naw kä khai hlawt ci, ani naw m’kawt a khai ung a u naw kä k’hnawng hlawt ci. ⁸ Nang ah na bi cu kei naw ka hmat ci, Nang ung hlüngtai nak api a om ung phi, kei ah m’thei cu läk ne kei ah khan ah na bekhüt cu kei naw ka hmat ci. Kei naw na maa ah m’kawt cu ka hnawng ci, cun ah m’kawt cu a u naw kä khai hlawt khai. ⁹ Ngai vä! Keimi cu Jew chang nei ci ne hleei ci gui ah Satan ah chang gui cu na khaw kaa ah kawp ne ka ng’phah sak gui khai. Kei naw ka ning m’hni gui cu ami van naw hmat khai gui. ¹⁰ A i ah kia sei ci ung nang naw ka ng’thu cu na k’püüi ne na khäm ci, m’dek ah khan ah chang gui phawtcam gui khai ah zaica nak a gawk law hnüüp ung, nang cu kei naw ka ning ngung khai nei. ¹¹ Kei ka gawk law ge vai ci nei, nang ung om ci cu m’htek ne khäm ge ä, cun ung nang ah näng nak ng’chuh cu a u naw kä ning gut hlawt khai. ¹² Näng ciah chang cu Kapa Khanpughi ah pum im ung mang k’tung ah ng’düi khai, ani cu ngawi ah phi a cun ung kaa kä ng’nawn ba khai. Kapa Khanpughi ah ming la Kapa Khanpughi ah khankhaw ah kaa kia lawk khai ah Kapa Khanpughi ah manggaw, Jerusalem gawnu k’thai ah ming cu, kei naw ani ah khan ah ka guk khai. Ani ah khan ah kei ah ming thai cun phi ka guk khai. ¹³ “Khrihtabum gui-am Mumcha naw am thein gui cu nami hnga a om ung ngai ne nami ng’zak vai nei! ¹⁴ “Laodicea Khrihtabum ah khankhaw chang-am ca gu ne peit law nei: “Shin ah ca cu Khanpughi ah tüisho gui ung om-maa ah kia ne, bekhüt ne, saksi akcang ah kiak ciah Amen ah m’cäi nak ah kiak ci. ¹⁵ Nang ah bilawh cu kei naw ka hmat ci, kei naw nang cu kä na ng’liing kä na khiing ciah ka ning hmat ci. Nang cu na ng’liing baw vai, na khiing baw vai, ah kei naw ka ng’za hlük ci. ¹⁶ Cun ung phi nang cu, kä ng’liing sagei, kä khing sagei ne, na awh pawlat ciah kia sei ka m’gawng ung kaa ka ning k’phüi lawk khai! ¹⁷ ‘Kei cu ka ng’bühmang ci, kei ung a i phi kä hlü ci’ na cik ci, cun ung phi nang cu a i hlawk ah dukhaih ne m’gein vai ah na kiak cu kä na hmat ci. Nang cu dukhaih ne a i kä suisa ne, a i kä hmuteng ne na om ciah chang nei. ¹⁸ Cun ah kia sei na bühmang nak vai ah kei ah ghui akcang cu na k’hleih law vai ah ka ning m’cäi ci nei. Na k’plui ci kia ne nang aa nak na shung nak vai ah sui k’theing la namik am dei nak vai ah mik m’tui nak cu kei ah na khleih law vai nei. ¹⁹ Kei naw kam hni ah chang phung cu akat nak m’kyuk ne ka mcäi ci. Cun ah kiasei kat nak ung kaa ng’hlat law ba ne, chang na ne na om vai nei. ²⁰ Ngai ä! Kei cu m’kawt ung ng’düi ne shoh ka khäk ci, kei ah k’aw ng’za ne shoh ak hmawng ciah im ung, kei cu va lut ngä sei, ani awn atäng ah kani ei awk khai, ani phi kei awn atäng ah ei awk khai. ²¹ Kei cu näng nak gah ne Kapa ah mang kiaang ung ani awn atäng ah kani ngoh ah mäih ah näng nak gah ciah chang cu ka mang kiaang ung ka pei ah a ngoh nak vai ah a khin cu ka pek khai nei. ²² “Khrihtabum gui-am Mumcha naw am thein gui cu nami hnga a om ung ngai ne ng’za vä!

¹ Cun kawn ah ka mang ung Khanmawpi ah m’kawt ng’hmawng sei ka hmuk ci. ² Kei naw ka ng’zak htük ah phyungheng ah ng’gin ah mäih ah ng’ging ciah k’aw naw”, shin ung law ä, ngawi ah ng’dang lawk khai gui ah a mawng cu ka ning hmuh sak khai” ci ne pyein ci. A cun vai-am Mumcha cu kei ah khan ah gawk lawk ci. Khanmawpi ah mang kiaang tumat om ci, Cun ah kiaang ung mang tumat ngok ci. ³ Ani ah hmai cu pyüü m’htak vai ah mäih ah pyü ci. Mang kiaang ah ang veing ung cüi ne ng’kah ciah zapi pawk ci. ⁴ Cun ah mang kiaang ah ng’veing ung a hei mang kiaang m’ku-lei-phli om ci. Cun ah kiaang gui ung aghaampa sing m’ku-lei-phli ngok ci gui. Ngami cu a bawk bäng bäng sui u ne, ghui lukhu ng’büng bäng bäng ci gui. ⁵ Mang kiaang ah kyong ung khaw lailäp ne ng’thüi ne ng’hmum kyeek ciah ak aw gui lut lawk ci. Mang kiaang ah maa ah Khanpughi ah Mumcha pachih ah kiak ciah mei im pachih cu däi ne khang ci. ⁶ A cun ah mang kiaang ah maa ung pyüülung ah mäih ah vai ci cu om ci. Mang kiaang ah ng’veing ak kit päng ung khiküi paphli om ci. Cun gui cu ami hnu ami maa ah mik bäng ah kia ci gui. ⁷ Ak htük bäih tumat cu phongkawng ah mäih lawk ci, ak hnih nak cu vantang ah mäih lawk ci;ak thum nak cu chang ah hmai ah mäih hmai nak ci, ak phli nak cu zong ciah vanbuk hmu ah mäih lawk ci. ⁸ Cun ah khiküi paphli cu, ami ng’phia pachuk ci lawk ci, ami pum akpung akyong avan ung mik bäng ah kiak ci. Amü ak hnüüp ngami cu kä ng’düm phung ne ng’äi m’cu u ne; “Aktheing, aktheing, aktheing cu Bawipa nei, Hlüngtai pi säih ne, Zanta, tuhngawi, ngawi zä angta"i ghing ciah Khanpughi nei,” ci ne m’kümtou ci gui. ⁹ Mang kiaang ung ngo ne, angtäi sei ghing ne om ciah Bawimang ah bühmang nak, hlüngtai nak, küikyang nak gui cu, khiküi paphli naw ng’äi m’cu ne m’kümtou ci gui. A cun päng ung, ¹⁰ aghaampa m’ku-lei-phli naw angtäi ah ghing ne mang kiang ung ngok ciah, Bawimang ah maa ah m’khuukdong ne, khawihnah ci gui. Ngami naw mang kiaang ah maa ah ami lukhu gui cu m’shän u netah; ¹¹ “Kami Bawipa, Khanpughi, Nang naw ang tüi avan cu na tüisho ciah kia sei, Nang ah ng’zak hlü ah ang tüi cu ghing om ciah kia ci. Cun ah kia sei bühmang nak, küikyang nak, hlüngtai nak gui cu Nang awn khinkhaa ci nei” ci ne pyein ci gui.

¹ Mang kiaang ung ngok ciah akpat lam akut ung cakchaw cu ka hmuk ci: cun ah cakchaw cu vang ah vei ah ca be sei gu ne, m’hnüt nak chih awn m’hnüt ah kiak ci. ² Cun kawn ah hlüngtai säih ciah khankhaw chang naw, “A u chang naw, shin ah m’hnüt nak gui cu khawk ne, cakchaw cu k’phian hning khai ang? ci ne m’lau sei ka hmuk ci. ³ Cun ung phi khankhaw la khomdek, khomdek ah kaa avan ung cun ah cakchaw k’phian ne teng khai cu a u phi kä om ci. ⁴ Cun ah cakchaw cu k’phian khin khai, teng khin khai, a u kä om khätah, kei cu m’lau ne ka kyap ci. ⁵ Cun kawn ah aghaampa gui ung kaa tumat naw, “Kä kyap ne teng ä, Judah pakhui ung kaa phongkawng ah mäih ah kiak ciah David ah hta ng’shon cu näng nak gah pyi ci nei, ani naw m’hnüt nak chih cu khawk ne, cakchaw cu k’phian hning ci nei,” ci ne pyein ci. ⁶ Cun kawn ah htomehta cu khiküi paphli la aghaampa gui ah ng’lung ah mang kiaang ah lai ung ng’düi sei ka hmuk ci. Ani cu küikyan nak vai ngawn pyi ah htomehta awn täng ci. Ani ung aki chih la amik chih om ci. Cun gui cu khomdek khan avan ung a tüih ah Khanpughi ah Mumcha chih ah kiak ci. ⁷ Cun ah htomehta naw law ne mang kiaang ung ngok ciah k’pat lam kut ung kaa cakchaw cu lak ci. ⁸ Cun ah a lak vai-am khiküi paphli la aghaampa m’ku-lei-phli cu, htomehta ah maa ah kawp zawp u ne, ak chang sing naw tingtäu bäng bäng la Khanpughi ah chang gui ah taigü nak ah kia ciah tui ng’uui awn be ciah ghui eikbei gui cu kawt sek sek u netah, ⁹ ami m’cu ah ng’äi k’thai cu; “Nang cu shin ah cakchaw la ne, M’Hnüt nak gui khawk ne k’phian khai ah na khin ci nei, Nang cu ami ning ngawn nak la küikyan khai ah Na sih nak awn, khaw nüng ung thu a hlü hlü ah ng’thu ciah, Chang pakhui, ng’shon law phung cu, Khanpughi ah hmawk ah Na khleih ci nei. ¹⁰ Nang naw ngami cu Khanpughi ah khuut bik khai gui ah ngung nak ah taigü ah na k’hmoh gui ci. Ngami naw m’dek khan ah uknak cu gah khai gui nei,” ciah kiak ci. ¹¹ Cun kawn ah han teng ba netah tämkäp phiakhak da ciah khankhaw chang gui cu ka hmuk ci. Ngami cu mang kiaang ‘koi ne, khiküi paphli la aghaampa gui’ koi ne, ng’düi u netah, ¹² m’lau ne ng’äi ami m’cu cu; “Ami ngawn ah htomehta cu, Hlüngtai nak, bühmang nak, cüivai nak, khüighaat nak, Chang m’sui nak, bäkhäk nak, la m’kümtou nak, gui cu gah khai ah khin khaa ci nei” ciah kiak ci. ¹³ Cun kawn ah khankhaw, khomdek, khomdek ah kaa la tuinu ung la khaw ah kaa, m’dek ah khan ung om ciah akghing ak’om nici naw; “Mang kiang ung ngok ciah Bawimang la Htomehta cu, M’kümtou nak, chang m’sui nak, bämang nak, hlüngtai nak, cu ng’shon päng ung om sä” ci ne ng’äi ami m’cu cu ka ng’zak ci. ¹⁴ Khiküi paphli naw, “Amen” ci ne m’shang gui ci gui. A ghaampa gui naw, kawp ne khawihnah ci gui.

¹ Cun kawn ah Htomehta naw mhnüt nak pachih ung kaa ak htük bäih cu khawk ne hmawng sei ka hmuk ci. Khiküi paphli ung kaa tumat naw khaw hmum ah mäih ah ng’shan ciah ak aw awn, “Lawä” a ci cu ka ng’zak ci. ² Kei naw teng netah ng’se bawk tumat cu ka hmuk ci. Cun ah ng’se ung ng’cum ci cu li kawt ne lukhu gah ciah kiak ci. Ani cu näng pyi netah näng ba khai ah pawng ci. ³ Htomehta naw ak hnih nak ah mhnüt nak cu khawk ne hmawng khätah, ak hnih nak ah khiküi naw, “Lawä” a ci cu ka ng’zak ci. ⁴ Cun kawn ah ng’se asen tumat lut lawk ci. Cun ung cun ci-am chang gui tumat la tumat ngawn nak tu vai ah khomdek khan ung ng’tuk bi nak huham cu ami peit ah kiak ci. Ani-am khim asen lu ät phi ami peit ah kiak ci. ⁵ Htomehta naw ak thum nak ah mhnüt nak cu khawk ne hmawng khätah, ak thum nak ah khiküi naw, “Lawä” a ci cu ka ng’zak ci. Kei naw teng netah ng’se ale tumat cu ka hmuk ci. Cun ung ng’cum ci naw khiin nak tumat akut ung kawt ci. ⁶ Khiküi paphli ah ng’lung ung kaa lut lawk ciah k’aw tumat cu kei naw ka ng’zak ci. Cun ah k’aw naw, “htang a them cu hnüüp ät ng’cheng nak, püm them thum cu hnüüp ät ng’cheng nak ah kiak ci. Cun ung phi olive sing chaam la sapyit chaam cu kä m’di en vä” ci ne pyein ci. ⁷ Htomehta naw ak phli nak ah mhnüt nak cu khawk ne hmawng khätah, ak phli nak ah khiküi naw, “Lawä” a ci cu ka ng’zak ci. ⁸ Kei naw teng netah, ng’se amvaw tumat cu ka hmuk ci. Cun ung ng’cum ciah ang ming cu sihnak ah kiak ci. Ani ah hnu ah m’htei khaw naw läk lawk ci. Ngami naw khomdek ah khan, k’bum phli ung kaa k’bum ät ung om ci gui cu, ng’tuk nak, khaw ah zaw nak, lei ah sou nak, ng’plouh ah kiun nak, gui awn sihnak vai ah huham cu gah ci gui. ⁹ Htomehta naw ak hma nak ah mhnüt nak cu khawk ne hmawng khätah, Khanpughi ah ng’thu ami shäu ah hmawk la bekhüt ne ami saksi ah hmawk ah ami ngawn gui ah mumcha gui cu, sonkiaang ung om u sei ka hmu gui ci. ¹⁰ Cun ah mumcha gui naw, “Ng’ciim ne, ng’düng ne, hlüngtai pi bäih ciah Bawipa, keimi ami na ngawn gui ah hmawk ah khomdek khan ah chang gui cu kä m’khoichaa, kä m’shetkat gui ah a i güt na om khai ang?” ci ne m’lau ci gui. ¹¹ Cun gui-am suinu a bawk bäng bäng pe gui netah, ngami ah mäih ah ami ngawn gui vai ah, ami teihpüi gui la ami phäi nau gui, ah ming a küm güt, a shäng hta ami ng’düm vai ah m’cäi gui ci. ¹² Htomehta naw ak chuk nak ah mhnüt nak cu khawk ne hmawng khätah, khawhni cu, pyon ale ah mäih ah ng’lat ne le ci, chaa phi sisen ah mäih ah ng’lat ne sen ci, ¹³ Khankhaw ah aisi gui cu khinu ah khawkhi khätah, k’thei ang kang kiawi ne ang phlu ah mäih ah m’dek ung kia lawk ci gui. ¹⁴ Khankhaw mik cu cakchaw ah mäih ah ng’chaw ne maih ci. Mhtung küi la khawgui avan phi ami om nak ung kaa ng’nawn zawp ci gui. ¹⁵ Cun ah kia khätah, m’dek khan ung ghangpughang gui, uk ciah mang gui, gakaap bawi gui, bühmang ci gui, hlüngtai ci gui, la khleihtein gui, khuimah gui chang avan cu lung khui gui la khomhtung khan lung k’song gui ung ng’thup zawp ci gui. ¹⁶ Ngami naw khomhtung gui la lung k’song gui-am, “Mangkiaang ung ngok ciah mik hmai kä kami hmuh vai la Htomehta ah m’lung k’she nak kä kami gah vai ah, kami khan ah kia law ne keimi cu na thup gui ä! ¹⁷ Ngami ah m’lungshe nak ah khaw hnüüp gawk law pyi ci nei, cun cu a u naw ng’düi ne awt hlawt khai zaw?” ci ne ng’khü ci gui.

¹ Cun kawn ah khankhaw chang paphli cu khomdek khocawi akit phli ung ng’düi u sei ka hmu gui ci. Ngami naw m’dek khan, tuinu ah khan la singghing gui cun phi khawkhi naw kä zon hlawt khai ah k’pang ci gui. ² Cun kawn ah ghing ciah Khanpughi ah mhnüt nak cu law püi ciah khankhaw chang cu hnilaw lam ah kaa law sei ka hmuk ci. Ani naw m’dek khan la tuinu ung lei ng’hlui thawh sak hning khai ah Khanpughi naw huham a peit ah khankhaw chang paphli-am, ³ “Khanpughi ah chang gui cu ami m’calai ung kä mhnüt pha gui ah chuih, khomdek, tuinu la singghing gui cu, kä nami zaica sak-en gui cang vai nei” ci ne m’lau ci gui. ⁴ Cun kawn ah Khanpughi ah mhnüt nak awn ami m’calai ung ami mhnüt gui cu 144,000 lawk ci, ci cu ka ng’zak ci. Ngami cu Israel pakhui gha-lei-goi ung kaa ah kiak ci gui. ⁵ Cun ah pakhui gha-lei-goi ah kiak ciah Judah, Reuben, Kad, Asher, Naphtali, Manasseh, Simeon, Levi, Issachar, Zebulum, Josef la Benjamin gui ung kaa, pakhui ät ung täm ät la phia m’ku (12000) ciah am hnüt gui ah kia ci. ⁹ Cun kawn ah teng ba netah a u naw kä ak khei zawp hlawt vai ah maw ng’nään khli ng’peeih cu ka hmuk ci. Ngami cu akhui päng, apa päng, a khaw päng, ak chang päng ung kaa lawk ci gui ah kiak ci. Ngami cu suinu a bawk bäng bäng sui u ne, hliip ah ng’baan kawt sek sek u ne, mangkiaang la Htomehta ah maa ah ng’düi ci gui. ¹⁰ Ngami naw, “Hun nak cu mangkiaang ung gok ciah mi Khanpughi la Htomehta ung kaa lawk ci nei” ci ne m’lau ci gui. ¹¹ Khankhaw chang gui ami van naw, mangkiaang ni, aghaampa gui ni, khiküi paphli ni gui cu, ‘Kium na ne ng’düi ci gui. Cun kawn ah ngami cu mangkiaang ah maa ah kawp u ne, Khanpughi cu khawihnah u netah, ¹² “Amen! Mi Khanpughi cu hlüngtai nak, bämang nak, cüivai nak, zeikiai nak, chang m’sui nak, m’kümtou nak la küikyang nak gui awn, ang shon päng ung kümbe ne om sä, Amen!” ci ne m’lau ci gui. ¹³ Ahgaampa gui ung kaa tumat naw, “suinu a bawk bäng bäng sui ci gui cu, a u gui ang? A hawi kaa lawk ci gui ang? ci ne nang shik ci. Kei naw, “Bawipa aw, kei naw kä ka hmat ci nei, nang naw va na hmat ci” ci ne ka m’shang tu ba ci. ¹⁴ Ani naw, “Ngami cu geinvai nak ah dukdeiu nak ung kaa phiawng lawk ci gui ah kiak ci nei. Ngami cu ami suinu gui avan Htomehta ah si ung bawk khai ah pheet pyi ci gui ah kiak ci. ¹⁵ Cun ah kia sei ngami cu Khanpughi ah mangkiaang ah maa ah ng’düi u ne, amü ak hnüüp pum im kyong ah om ne khawihnah ci gui. Mangkiaang ung ngok ci naw ngami cu ngung gui ne, küikyaan gui ci. ¹⁶ Ei ah cawi nak, tui ah gha nak, hni ah ng’liing nak, mei ah ng’kyeng nak, ngami ah khan ah kä om ba khai. ¹⁷ A i ah kia sei ci ung mangkiaang ah lai ung om ciah Htomehta naw, ngami cu ngung gui ne, ghin nak tui k’gei ah khawng nak ah khah püi gui khai. Khanpughi naw phi ngami ah mik ung kaa ng’phli tui phung cu ghu pe gui khai” ci ne pyein ci.

¹ Htomehta naw apachih nak ah mhnüt nak cu khawk ne hmawng khätah, khanmawpi ah shei-ä-kiawm vai ung ding ne kyiip ci. ² Cun kawn ah Khanpughi ah maa ah ng’düi ci gui ah khankhaw chang pachih cu ka hmu gui ci. Ngami cu phyungheng pachih ami peit gui ah kiak ci. ³ Cun kawn ah ghui tawnglang kawt ciah, khankhaw chang a hei cu law ne, sonkiaang ah pei ah ng’düi lawk ci. Ani cu mangkiaang ah maa ah ng’düi ciah ghui sonkiaang ah khan ah Khanpughi ah chang gui naw ami taigü nak vai la m’khih ne ami sonkiaan nak vai ah tui ng’uui akda ami peit ah kiak ci. ⁴ M’khih ne ami sonkiaan ah ak khu cu, Khanpughi ah maa ah ng’düi ciah khankhaw chang ah kut ung kaa, Khanpughi ah chang gui awn atäng ah hang kai ci. ⁵ Cun kawn ah khankhaw chang naw, tawnglang cu la ne, sonkiaan ung kaa mei cu la ne m’khäp netah, khomdek khan ah zuk chah lawk ci. A cun vai-am khaw ng’thüi ne ng’hmum ne ng’kyeek ne, lailäp ne, shihpi thüng ne kia lawk ci. ⁶ Cun kawn ah phyungheng chih kawt ciah khankhaw chang pachih cu, tum ge vai ne pawng ci gui. ⁷ Ma lawk bäih ciah khankhaw chang naw ak phyungheng cu tum khätah, si awn ng’caw ciah mei la khawgoh gui cu m’dek khan ah kia lawk ci gui. Khomdek bumthum bum ät, singghing bumthum bum ät ui zawp ne, khu m’kim gui avan chawng zawp khai ah ui ci. ⁸ Akhnih nak ah khankhaw chang naw ak phyungheng cu tum khätah, mei ah däi ciah khomhtung nu tuinu ah khan ah zuk chah law ah mäih ah kia law khätah tuinu bumthum bum ät cu si ng’hlui ah ng’lat ci. ⁹ Tuinu ung om ciah a hnun k’ghing bumthum bum ät cu si zawp u ne, hteinpaw bumthum bum ät cun phi di zawp ci gui. ¹⁰ Akthum nak ah khankhaw chang naw ak phyungheng cu tum khätah, ng’laam ne däi ciah mei m’lei ah mäih ah aisi nu cu khan ah kaa, tuinu bumthum bum ät la tuihta gui ah khan ah kia lawk ci. ¹¹ (Cun ah aisi cu ak kha ming nak ci). Bumthum bum ät ah tui gui cu tui kha ah ng’lat zawp ci gui. Chang khli cu cun ah tui ak kha cu aw u ne si zawp ci gui. ¹² Akphli nak ah khankhaw chang naw ak phyungheng cu tum khätah, hni ah bumthum bum ät, chaa ah bumthum bum ät, aisi gui ah bumthum bum ät, cu ng’ziin zawp sei, ami dei nak ah bumthum bum ät cu ng’heiu zawp ci. Mü ah bumthum bum ät, hnüüp ah bumthum bum ät ung akdei kä om ba ci. ¹³ Cun kawn ah kei naw han teng netah, khankhaw k’häu ung zong ne ng’väi ciah vanbuuk hmu cu ka hmuk ci. Cun ah hmu naw, “A hei khankhaw chang pathum naw ami tum law vai ah phyungheng thum ah k’aw awn khomdek khan ah om ciah ak ghing gui cu, kyihkyawk nak, kyihkyawk nak, kyihkyawk nak om khai nei” ci ne pyein sei ka ng’zak ci.

¹ Cun kawn ah akhma nak ah khankhaw chang naw ak phyungheng cu tum khätah khomdek khan ah aisinu tumat kia law sei ka hmuk ci. Cun ah aisi cu m’htei lungkhui hmawn nak vai ami peit ah kia ci. ² Cun ah aisi naw m’htei lungkhui cu hmawng khätah khawvah ng’ai m’khih ung akhu ah mäih ah meikhu tawt ne shung sei hnimik la khankhaw avan hmüp zawp ci. ³ Cun ah meikhu ung kaa khanpeh gui cu law u ne, khomdek khan ah kia lawk ci gui. Cun gui cu khawm-ai ah mäih ah ami m’äm om ci. ⁴ Ngami cu singghing khu m’sai kä plawhkheih khai gui, ami m’calai ung Khanpughi ah mhnüt nak kä om ciah chang gui bäng ami plawhsheh vai ah ami m’cäi gui ah kiak ci. ⁵ Khanpeh gui naw cun ah chang gui cu ami lawh gui vai ah kä kiak ci, chaa hma ah kyong bäng ung ami dukdeiu nak gui vai ah kiak ci. Khanpeh naw htui ne ak dukdeiu nak cu khawm-ai naw a htuih ah mäih ah m’so m’leik khai. ⁶ Cun ah chaa hma ah kyong ung chang gui naw sih nak vai shui khai gui, cun ung phi kä hmuk khai gui, ngami cu si hlük khai gui, cun ung phi sih nak naw lek gui khai. ⁷ Cun ah khanpeh gui cu ng’tuk bi ge khai pawng ciah ng’se ah mäih lawk ci gui. Ami lu ung ghui lukhu ng’büng ci gui ah mäih lawk ci, ami hmai cu chang ah hmai ah mäih lawk ci, ⁸ Ami lusam cu hnumi ah lusam ah mäih lawk ci, ami haa cu phongkawng ah haa ah mäih lawk ci. ⁹ Ami ng’kyaang cu m’si shawiphaw k’bah ciah mäih ah kiak ci, ami ng’phia ami khääp cu ng’tuk bik khai ah ng’phäi lawk ciah ng’se gui ah mäih ah ng’hmum ci. ¹⁰ Ngami ung khawm-ai ah mäih ah ami ng’mei la ami mawng om ne, ami ng’mei ung chang gui chaa hma ung dukdeiu na gui khai ah huham om ci. ¹¹ Ngami ah ghangpughang cu m’htei lungkhui ah khan chang ah kiak ci. Ani ah ming cu Hebrew ng’thu awn Abaddon, Karik ng’thu awn Apollyon ah kiak ci, (cun cu m’di ci, ciah kiak ci). ¹² Kyihkyawk vai tumat ng’pyi pyi ci, cun kawn ah kyihkyawk vai hnih gawk law ba khai. ¹³ Akchuk nak ah khankhaw chang naw ak phyungheng tum khätah, Khanpughi ah maa ah ng’düi ciah ghui sonkiaang ah ak kit phli ung kaa, ng’thu k’aw cu gawk law sei ka ng’zak ci. ¹⁴ Cun ah k’aw naw akchuk nak ah khankhaw chang-am, “Eupharatis tuinu pei ah khit ne ami k’pawn ah khankaw chang paphli cu k’phian tu ba gui vä” ci ne kiak nak ci. ¹⁵ Cun ah kia sei khankhaw chang paphli cu k’phian tu ba gui ci gui. Ngami cu a i kum, a i chaa, a i hnüüp, a i ah khin ung phi, hnicim chang avan ah bumthum bum ät cu ngawn ge vai ah om ci gui ah kiak ci. ¹⁶ Ng’tuk khai gui ah ng’se awn lawk ci gui ami van cu tämkäp phia goi lawk ci gui ah ka hmat ci. ¹⁷ Ka mang ung ka hmuh ah cun ah ng’se ng’cum ci gui ah ami awi k’bah ah shawiphaw gui cu, ak’ai amkim ah mei ah mäih ah sen ne züi ci gui. Ng’se gui ah ami lu cu phongkawng ah lu ah mäih lawk ci, ami m’gawng ung mei k’däi, meikhu la ami m’äm gui lut lawk ci. ¹⁸ Cun ah ng’se gui ah m’gawng ung lut lawk ciah meikdäi, meikhu la m’äm gui naw, chang ah hta avan ah bumthum bum ät cu sih sak zawp ci. ¹⁹ Ng’se gui ah huham cu ami m’gawng la ami ng’mei ung om ci. Ami ng’mei gui ung k’phyu ah mäih ah ami lu om sei, acun naw chang gui cu m’so m’leik sak gui khai. ²⁰ Cun ah lei ung kä si tu ne k’pawih ba ciah chang gui cu, ami kat nak ung kä ng’zu ba ci gui. Khawshe gui la ghui ni, kyei ni, lung ni, sing ni awn ami mät naw ami pian ah, kä hmu thei ci, kä ng’za thei ci, kä hteit thei ciah agup gui cu khawihnah lä ci gui. ²¹ Chang ami ngawn nak, ami ng’pluhkheih nak, ami m’guuk nak, ami plet nak ah phäh ah phi kä ng’zu ba ci gui.

¹ Cun kawn ah khankhaw ah kaa m’gääi ciah khankhaw chang tumat kyum law sei ka hmuk ci. Ani cu khongmei sui ne ng’hlawp ci, alu cu zapi naw koi ci, a hmai cu khohni ah mäih lawk ci, akhaw gui cu mei ah däi ciah k’tung gui ah mäih lawk ci. ² Ani cu k’phiaat pyi ah cakchaw hta akut ung kawt ci. Akpat lam a khaw awn tuinu ung ng’leh ne, ak eng lam a khaw awn khaw kawng ung ng’leh ne ng’düi netah; ³ phongkawng ah m’ngaw ah mäih ah thüng sei ng’khü ci. ⁴ Cun ah ng’hmumkyeek ciah ng’thu cu ka guk khai ah pawng ngätah, “kä na guk-en vai nei, chih vei ng’hmumkyeek ciah ng’thu cu na m’zih vai nei” ciah khankhaw ah k’aw cu ka ng’zak ci. ⁵ Cun kawn ah tuinu la khaw kawng ung ng’düi ciah khankhaw chang naw, ak pat lam akut khankhaw ah han shäng ne, ⁶ ng’shon päng ung ghing ne, khankhaw la khomdek, tuinu la apäng avan tüi sho ciah Khanpughi ah ming cu han be netah, “Cän kawn ah kä shou shü ba khai nei! ⁷ akchih nak ah khankhaw chang naw pyungheng a tum law ung, Khanpughi naw ak chang, purofet gui amcäi gui ah mäih ah, thuuk ciah apawng püi gui cu pyi phleh sak gui khai nei,” ci ne pyein ci. ⁸ Khankhaw ah ng’thu sei ka ng’zak ah k’aw naw kei-am, “Hteit ne tuinu la khomdek ung ng’leh ne ng’düi ciah, khankhaw chang ah kut ung k’phiaat ah cakchaw cu na lak vai nei” ci ne pyein ci. ⁹ Cun ah kia sei kei naw, cun ah khankhaw chang ah hteit netah, cakchaw hta cu ana peit vai ah ka k’thäh ci. Cun ah khankhaw chang naw, “La netah ei ä, tui khai nei” ci ne pyein ci. ¹⁰ Kei naw khankhaw chang ah kut ung kaa cakchaw cu la ne ka ei ci. Cun ah cakchaw cu ka m’gawng ung khawitui ah mäih ah tui pang ne phi, ka zuk düh kawn ah ka chikyong ah kha ne ng’liit ci. ¹¹ Cun kawn ah khankhaw chang naw, “Nang cu khaw akda ung, ahlü hlü ah ng’thu ciah khui päng pa päng la ghangpughang gui ah ma ah Khanpughi ah ng’thu cu shäu ne na pyein ba khai nei” ci ne na kiak nak ci.

¹ Khankhaw chang naw kei-am nüt nak vai htung tumat na pe netah, “Hteit ne Khanpughi ah pum im la sonkiaang cu na nüt vai nei, pum im ung khawihnah ci gui phi na khei gui vai nei. ² Cun ung phi pum im ah ak pung lam cu kä na nüt vai, a i ah kia sei ci ung, cun cu chang pakhui hei gui-am ap gui ah kiak ci. Ngami naw Manggaw Theing cu cha phlikip lei-goi ung ami khaw awn leh m’hnep khai gui nei. ³ Kei naw ka saksi pahnih ka tüi lawk khai nei. Ngani cu ng’zu nak sui sui ni ne, hnüüp 1,260 ah kyong ung Khanpughi ah ng’thu cu shäu khai goi nei,” ci ne pyein ci. ⁴ Cun ah saksi pahnih cu khomdek uk ciah ma ah ng’düi ciah olive singghing pahnih la mei im pahnih ah kiak ci. ⁵ Ngami cu plawsheh law gui ci a om ah a kiak ung, ami m’gawng ung mei lut law ne ami gaa gui cu m’khih zawp ci. A cun ah mäih ah ngami ci gui khai ah k’tha nak ci phung cu ngawn ghäm ghäm ci gui. ⁶ Khanpughi ah ng’thu ami pyein sangung khaw kä a aa vai ah khankhaw khai nak hning ah huham ngami ung om ci, tui cu si ah ami lat nak hning ah huham phi ngami ung om ci, ami ng’zak hlü ah khomdek khan ah khaw zaw tui shek khai ah ami bi nak hning ah huham phi ngami ung om ci. ⁷ Ngami ah ng’thu shäu ang pyi ah a kiak ung, m’htei lungkhui ung kaa khiküi lut law ne, ngami cu ng’tuk püi gui ne, näng gui ne ngawn gui khai. ⁸ Ami gook cu ami Bawipa kutlamtung ung ami ngawn nak ah mang gaw, lam k’cawih ung ng’zän shüt khai. Cun ah mang gaw ah ming m’hlün cu Sodom, kä cun ung Egypt ah kiak khai. ⁹ A khaw päng ung kaa a hlü hlü ah ng’thu ciah khui päng pa päng naw law ne, ami gook gui cu kä m’cim düt vai ci ne, hnüüp thum la am cawt ung teng khai gui nei. ¹⁰ Cun ah purofet goi ani sih ah hmawk ah khomdek chang gui cu, zeikiai u ne, khawhchaam ng’khih ng’bah tu u ne, näng nak bik khai gui nei. A i ah kia sei ci ung cun ah purofet goi naw, chang ah hta gui cu ang htei ah ani geinvai sak ah hmawk ah kiak ci. ¹¹ Hnüüp thum la am cawt lüng khätah, Khanpughi ung kaa hnun ghin nak cu kyum law ne, ngani ung lut khätah, ngani cu tho law ne ng’düi ci goi. Cun hmuk ciah chang gui cu ang htei ah cäicat ci gui. ¹² Cun kawn ah purofet goi-am, “Shin ung kai law nä” ciah khankhaw ah m’lau ne ng’khü ah k’aw cu thang lawk ci. Ngani cu gaa gui naw ami teng goi ah chung ung, khawmei ng’cum ne khankhaw ah kai ci goi. ¹³ A cun vai-am shihpi thüng ne ng’hmum law sei, mang gaw ah bumghaa ung bum ät cu di zawp ci, chang phia chih-kip phi si zawp ci gui. K’pawih ba ciah chang gui cu cäicat u ne, khanmawpi ah Khanpughi ah hlüngtai nak cu m’kümtou ci gui. ¹⁴ Akhnih nak ah kyuihkyawk nak cu ng’pyi pyi ci, akthum nak ah kyihkyawk nak cu gawk law ba ge khai. ¹⁵ Cun kawn ah akchih nak ah khankhaw chang naw ak phyungheng cu tum khätah, “Khomdek uk nak ah hlüngtai nak cu mi Bawipa la a Messiah naw khäm pyi ci nei, ani naw ngawi zä uk lä khai nei” ci ne khankhaw ah k’aw naw pyein ci. ¹⁶ Khanpughi ah maa ah mangkiaang gui ung ngok ci gui ah a ghaampa m’ku lei-phli naw, Khanpughi cu khawihnah u netah, ¹⁷ “Zanta, tuhngawi, ngawi zä ghing ne om ciah Hlüngtai pi bäih ciah Bawipa Khanpughi Küikyang ciah na hlüngtai nak awn na uk pyi ciah kia sei, Kami ning zeikiai nak ci nei! ¹⁸ Na m’lungshe nak ah a khin cu gawk law ne, Si pyi ci gui m’khoichaa nak ah akhin cun phi gawk law sei, m’dek chang gui cu m’lungshe ci gui nei. Bawipa ah akchangshäm gui, purofet gui, nak chang gui la ning kyih aa ci gui naw, a zaw a däm ah ci ah, m’cümhnah nak ami gah nak vai ah khin gawk lawk ci nei. Khomdek shekat sak ciah chang gui, m’shet m’kat nak gui vai ah, a khin gawk lawk ci nei” ci ne Khanpughi ah maa ah ng’thu pyein ci gui. ¹⁹ Cun kawn ah khanmawpi ah pum im cu ng’hmawng law khätah, Thukhän M’küm cu ka hmuk ci. A cun zah ung khaw lailäp ne ng’hmumkyeek ne, shipi thüng ne, gääi nu bawh ne khawshe ne aa lawk ci.

¹ Cun kawn ah khankhaw mik ung küikyang ciah ng’cä ng’bang nak dang law sei ka hmuk ci. A cun ung om ciah hnuminu cu hni liing sui ne, chaa ung ng’leh ne, aisi ghalei-goi kawp ciah lukhu ng’büng ci. ² Ani cu hta law ge khai kia ne, a nau poi m’neh ne m’lau ci. ³ Cun kawn ah khankhaw mik ung a hei ng’cä ng’bang nak dang law ba mä ci, cun cu shawk asennu tumat ah kiak ci. Ani cu alu chih, aki ghaa law sei, alu päng ung lukhu ng’büng ci. ⁴ Ani naw khankhaw mik ah aisi gui bumthum bum ät cu ang mei awn hang kui ne m’dek ah zuk chah gui ci. Cun ah shawk sennu cu hnuminu ah maa ah ng’düi ne, ahta law nak ge vai ah ak hmaw cu, ei khai ah ngäng ci. ⁵ Cun kawn ah cun ah hnuminu naw, chang ah hta avan m’si hteipawng awn uk khai ah, htapa cu hta nak ci. Cun ah htapa cu anu ah k’coi ung kaa Khanpughi ah om nak amangkiaang ung zu chaang ci gui. ⁶ Hnuminu cu bunghmu ah Khanpughi naw a pian nak peitah hteit ci. A cu ah hnüüp 1,260 ung ani cu ami m’hteihtang ah kiak ci. ⁷ Cun kawn ah khanmawpi ah ng’tuk bi nak om ci. Michael la ak khanchang gui naw, shawk cu ng’tuk püi ci gui. Shawk la ak khanchang gui naw phi ng’tuk tu ba püi ci gui. ⁸ Cun ung phi shawk la ak khanchang gui cu m’khüt gui u sei, khankhaw ah kä om tuba ci gui. ⁹ Khomdek chang gui m’zaw gui ciah khoshe, kä cun ung Satan ming nak ciah shawknu cu ak khanchang gui awn atäng ah khomdek khan ah ami zuk täm law gui ah kiak ci. ¹⁰ Cun kawn ah khanmawpi ah ng’shan ciah k’aw naw, “Tuhbäi Khanpughi ah hun nak cu gawk law pyi ci nei! Tuhbäi Khanpughi naw Ghanpughang ah a kiak ah mawng dang sak pyi ci nei! Tuhbäi a Messiah naw ahuham dang sak pyi ci nei! Mi Khanpughi ah maa ah ng’düi netah, amü ak hnüüp mi phäi nau gui shetkat sak gui ci cu khankhaw ah kaa k’täm pyi ci gui nei. ¹¹ Mi phäi nau gui naw Htomehta ah si awn la ami shäu ah ng’düng nak awn Satan cu m’khüt pyi ci gui nei. Ngami cu ami hnun gui apit ung phi kä ng’hlat khai gui nei. ¹² Cun ah kia sei khanmawpi la khankhaw chang gui zeikiai vä. Khomdek la tuinu ah phäh ah thüisei vai ah kiak ci nei. A i ah kia sei ci ung khoshebawi cu amät ah akhin apihta bäng om ba ciah hmat netah, ang htei ah m’lungshe ne ngami ah om nak ah a gawk law pyi ah hmawk ah kiak ci nei” ci ne a pyein cu ka ng’zak ci. ¹³ Shawk naw ani cu k’täm ne m’dek khan ah ami zuk gawt ah mawng cu hmat netah, pamihta ah hta ciah hnumi cu shui ne phak ci. ¹⁴ Cun ah hnumi cu khaw k’häu ung a zawn nak thei vai ah vanbuk hmu ah ng’phia hnih cu gah ci. Ani cu acu ah kum thum la avang ung shawk kphyunu ah gaa phiawn nak khai ah m’hteihtang khai gui ah kiak ci. ¹⁵ Shawk naw, cun ah hnumi cu tui naw ahteh vai ah am gawng awn tuinu ah ng’tat ne lawng khai ah muh ci. ¹⁶ Cun ung phi khomdek naw am gawng m’aan ne, shawk ah m’gawng ung lut lawk ciah tui avan cu m’zaw zawp netah hnuminu cu phiawn sak ci. ¹⁷ Cun kawn ah shawk cu ang htei ah m’lungshe netah, k’pawih ba ciah hnuminu ah ahta ng’shon gui ah kiak ciah Khanpughi ah ng’thukhän läk ci gui la, Bawipa Jesuh ah dang sak ah düng nak ung bekhüt ci gui cu, ng’tuk püi gui khai ah ng’düi law ne hteit ci. ¹⁸ Cun kawn ah shawk cu tuinu kem ah ng’düi ne om ci.

¹ Cun kawn ah alu chih aki ghaa lawk ciah khiküi tumat cu tuinu ung kaa lut law sei ka hmuk ci. Aki päng ung lukhu büng ne, alu päng ung Khanpughi ah thang shet sak ciah ming om ci. ² A müi cu pupi kawng ah mäih law ne, a khaw gui cu khawm ah khaw ah mäih lawk ci. Am gawng cu phongkawng ah m’gawng ah mäih lawk ci. Shawk naw ahlüngtai nak, amangkiaang la m’gäi nak ah a huham cu khiküi-am ap ci. ³ Khiküi ah lu tumat cu sih nak vai hlawk ah leim pang ne phi, khan ba pyi ci. Khomdek khan ah chang avan cu cäicat u ne khiküi ah hnu ah läk zawp ci gui. ⁴ Shawk naw a huham cu khiküi-am a ap pyi ah kia sei, chang avan naw shawk cu khawhnah ci gui. Chang gui naw khiküi cun phi khawihnah u ne, “Khiküi ah mäih a u om khai ang? Ani ng’tuk püi hning ci a u om khai ang?” ci ne pyein ci gui. ⁵ Khiküi cu m’ghämce ne Khanpughi ah thang shet sak nak vai la cha phlikip-lei-goi ung uk nak vai ah huham cu gah ci. ⁶ Ani naw Khanpughi ni, Khanpughi ah angming ni, a om nak ah khanmawpi ni gui cu tün ne shetkat sak pyi ci. ⁷ Ani cu Khanpughi ah chang gui tu ne näng nak gui vai la akhaw päng ung ahlü hlü ah ng’thu ciah khui päng pa päng uk nak vai ah huham cu gah ci. ⁸ Ami ngawn ah Htomehta ah ghinnak cauk ung khomdek khan kä a tüisho pha ge ung a guk ah, ming gui ah kawn ah k’pawih ba ciah chang phung naw khiküi cu khawihnah ci gui. ⁹ Akhnga om ci phung naw ngai ne ang zak vai nei! ¹⁰ Ami phaa vai cu pha tuk cang khai gui, khim awn ami ngawn vai cu ngawn tuk cang khai gui, shin ah a mawng ung Khanpughi ah chang gui cu ng’düng ne bekhüt zawp ne ami om vai nei. ¹¹ Cun kawn ah khiküi tumat cu m’dek ung kaa lut law sei ka hmuk ci. Ani cu htome ah mäih ah aki hnih om ne, shawk ah mäih ah ng’thu pyein ci. ¹² Ani naw dang law htük ciah khiküi ah m’gäi nak huham cu amät ah ma ah mang zawp ci. Ani naw asih nak vai ah aleim khan ba ciah khiküi cu, khomdek la khomdek chang avan-am liing ne khawihnah sak gui ci. ¹³ Akhnih nak ah khiküi naw küikyang ciah cäi aih vai gui m’dang ci. Chang gui ah maa ah khankhaw ah kaa mei cu khomdek khan ah kiak law sak ci. ¹⁴ Ani naw ak htükbäih ah khiküi ah maa ah abi hning ah cäi aih vai gui cu m’dang ne khomdek chang gui cu hmühma sak gui ci. Ani naw khim awn leim ne phi kä si ne ghing ciah khiküi m’tamkhah nak ah agup cu pian sak gui ci. ¹⁵ Ak htük ung khiküi ah agup-am ghin nak peit nak hning cu akhnih nak ah khiküi ung om ci. Cun ah kia sei agup cu ng’thu ne ani kä khawihnah tuk ci gui cu m’sih gui hning ci. ¹⁶ Cun ah khiküi naw, zaw däm ci, pyam mang ci, khleihtein la khuimah chang avan cu ami k’pat lam kut ung, kä cun ung ami m’calai ung m’hnüt nak awn liing ne m’hnüt gui ci. ¹⁷ Cun ah m’hnüt nak ah kiak ciah khiküi ah ming, kä cun ung ang ming dang sak ciah khei nak, awn kä ami m’hnüt tu ah chang phung cu sumlei ng’dong’pe ne kä gah tuk ci. ¹⁸ Shin ah amawng ung cüivai vai hlü ci. Lunglang ciah chang naw acun ah khiküi ah khei nak gui ah mawng cu khei thei ci. Cun ah khei nak cu chang tumat ah ming ah phäh ah ng’düi ci. Cun ah khei nak cu 666 ah kiak ci.

¹ Cun kawn ah han teng ba netah Zion khomhtung khan ah Htomehta ng’düi sei ka hmuk ci. Amät ah ming la Apa ah ming ami m’calai ung ami guk ah chang 144,000 gui cu ani awn atäng ah om ci gui. ² Khanmawpi ah ng’güüt ciah tuinu la khaw ng’hmum ah mäih ah ng’shan ciah k’aw cun phi ka ng’zak ci. ³ Cun ah chang 144,000 gui cu mangkiaang ni, khiküi paphli ni, aghaampa ni gui ah maa ah ng’düi u ne ng’äi ak thai cu m’cu ci gui. Hniciim chang avan ung kaa ngami bäng cu a ghü gui ah kiak sei cun ah ng’äi cu ngami bäng naw m’cu thei ci gui. ⁴ Ngami cu hnumi awn kä ng’etsheng man ciah ng’piangmi hta gui ah kia ne, htomehta ah hteh nak päng ah läk tuk ci gui. Ngami cu chang ah hta avan ung kaa a ghü gui ah kia sei, Khanpughi la Htomehta ung ng’ap ma ci gui ah kiak ci. ⁵ Ngami cu a i sang ung phi kä hleei ci gui, m’kat nak gui vai a i kä om ci. ⁶ Cun kawn ah khankhaw ah khankhaw chang tumat cu zong shüi shüi sei ka hmuk ci. Ani naw mdek ah khan akhaw päng ung kaa ahlü hlü ah ng’thu ciah khui päng pa päng-am m’thein vai ah ang täi ah om ciah Thu Ni cu law püi ci. ⁷ Cun ah khankhaw chang naw, “Khanpughi cu m’tamkhah vä, a hlüngtai nak cu m’kümtou vä! Chang am khoichaa nak vai ah akhin cu gawk law pyi ci nei. Khankhaw khomdek, tuinu tuihta avan, tüisho ciah Khanpughi cu khawihnah vä” ci ne m’lau ci. ⁸ Akhnih nak ah khankhaw chang naw ahnu ah läk law netah, “Babilon gawnu di pyi ci nei! di pyi ci nei!Ani naw ng’zaw ng’pawm nak ah kiak ciah zu cu chang ah hta avan-am tu pyi ci nei!” ci ne pyein ci. ⁹ Akthum nak khankhaw chang naw maa lawk ci goi cu läk law goi netah, “Khiküi la ani ah gup khawihnah ne ani ah m’hnüt nak cu alu ung baw, akut ung baw gah ciah chang cu; ¹⁰ Khanpughi ah m’lungshe nak ah khap ung kaa, nuipi ciah am lungshe nak ah kiak ciah sapyit tui cu awk khai nei. Cun awk ciah chang cu theing ciim ciah khankhaw chang la Htomehta ah maa ah zaam mei awn huut ne dukdeiu nak gah khai gui nei. ¹¹ Cun ah meidäi ung kaa meikhu cu ang täi ah khu ne kai khai nei. Khiküi la agup khawihnah ne ani ah ming awn m’hnüt nak gah ciah chang gui cu, amü ak hnüüp dinggei nak kä om khai nei” ci ne m’lau ci. ¹² Khanpughi awn ng’thu k’bääi ne, Bawipa Jesuh ung bekhüt ciah Khanpughi ah chang gui cu, acun ah khin ung m’khüt näng nak vai hlü ci nei. ¹³ Cun kawn ah khankhaw ah kaa k’aw naw, “Tuhbäi ung tün ne Bawipa ah khuut bi netah, sik ci gui cu zeikiai nak om ci nei, cun cu na guk vai nei” ci sei ka ng’zak ci. Mumchaa naw, “ä! cun cu akcang nei! k’tha na ne bilo ciah chang gui cu zeikiai ne ng’düm khai gui nei, ami bi ah akchaw cu ami mät awn ng’khap ci nei” ci ne pyein ci. ¹⁴ Cun kawn ah han teng ba netah, khongmei bawk tumat cu ka hmuk ci. Cun ah ng’mei bawk ung chang ah mäih lawk ci, tumat ngok ci. Ani cu alu ung lukhu ng’büng ne, akut ung ghaat ciah sangsawn kawt ci. ¹⁵ Ahei khankhaw chang tumat cu pum im ung kaa lut law netah, ng’mei bawk ung ngok ci-am, “Khomdek khan ah geit hmin pyi ci, khäm vai ah khin gawk lawk ci kia sei, na sangsawn awn aat ne khäm ä” ci ne m’lau ne pyein ci. ¹⁶ Cun ah kiasei ng’mei bawk ung ngok ci naw, a sangsawn awn khomdek khan cu zuk pai ne geit cu khäm ci. ¹⁷ Cun kawn ah khanmawpi pum im ung kaa, ahei khankhaw chang cu lut lawk ci. Ani naw phi ghaat ciah sangsawn cu kawt ci. ¹⁸ Cun kawn ah mei ah däi ciah khankhaw chang tumat cu sonkiang ung kaa lut lawk ci. Ani naw sangnawn kawt ciah khankhaw chang-am, “Na sangsawn awn khomdek khan ah sapyit gui cu zuk khäm ä, up zawp pyi ci gui nei” ci ne m’lau ci. ¹⁹ Cun ah kia sei cun ah khankhaw chang naw, a sangsawn awn khomdek khan ah sapyit gui cu aat ne k’bit ne, am theih gui cu Khanpughi ah m’lungshe nak ah kiak ciah sapyit neen nak ah khui ung m’tawk zawp ci. ²⁰ Sapyit cu manggaw ah akpung ah neen u sei, neen nak ah khui ung kaa si ng’hlui lut law ne long ci. Cun ah si cu mäng phiaa goi ung long ne, dawng hmaa ah thuuk ci.

¹ Cun kawn ah kei naw, khankhaw ah küikyang ciah cäicat vai cu ka hmu ba ci. Cun cu leigaai mawng chih law püi ci gui ah khankhaw chang pachih ah kiak ci. Cun ah leigaai gui cu Khanpughi ah m’lungshe nak akhnubäih ah ang dang nak ah kiak ci, akhnubäih ah gawk lawk ciah lei ah kiak ci. ² Cun kawn ah mei awn ng’caw ne k’tolung k’phlai nu ah mäih lawk ci cu ka hmuk ci. Khiküi ni, amät ah gup ni, ming khei nak khäm ci gui ni, ah khan ah näng nak gah ci gui cun phi ka hmu gui ci. Ngami cu Khanpughi ah peit gui ah tingtäu kawt u ne, ktoulung k’phlai ah mäih tuinu pei ah ng’düi ci gui. ³ Ngami naw Khanpughi ah changshäm Mose ah ng’äi la Htomehta ah ng’äi cu m’cu ci gui. Cun ah ng’äi cu; “Küikyang hlüngtai ciah Bawipa Khanpughi, Na bilawh gui cu hlüngtai ne cäicat vai kia ci nei! Khaw päng ung chang nüng ah Ghangpughang, Na lam cu düng ne cangnak ah kiak ci nei! ⁴ Nang cu kä ning kyih aa ne, A u kä om hlawt khai nei, Bawipa! Nang ah küikyang hlüngtai nak cu ng’hlahta ne, A u om hlawt khai ang? Nang bäng na theing ciim ci nei. Nang ah bilawh cu chang avan naw hmu pyi ciah kia sei, Khaw päng ung kaa chang nüng law ne, Ning khawihnah lawk khai gui nei” ciah kiak ci. ⁵ Cun kawn ah khanmawpi ah om ciah pum im kawt cu ng’hmawng sei ka hmuk ci. ⁶ Leigaai mawng chih law püi ciah khankhaw chang pachih cu pum im ung kaa lut lawk ci gui. Ngami cu pä suinu a bawk sui u ne, ghui m’ciu bäng bäng vawp ci gui. ⁷ Khiküi paphli ung kaa tumat naw, hta ng’shon ung om ciah Khanpughi ah m’lungshe nak awn be ciah ghui khawk chih cu khankhaw chang pachih-am pe gui ci. ⁸ Pum im cu Khanpughi ah bämang nak la hlüngtai nak ah akkhuu awn be ci. Cun ah kiasei khankhaw chang pachih naw ami law püi ah leigaai mawng chih ang pyi güt ung, pum im kyong ah a u phi kä lut ba hlawt ci.

¹ Cun kawn ah pum im ah kyong ung kaa naw khankhaw chang pachih-am “Khanpughi ah m’lungshe nak be ciah eikbei chih cu khomdek khan ah zuk hukä ci ne ng’hawh ne a pyein cu ka ng’zak ci. ² Akhtük bäih ah khankhaw chang naw a eikbei ung kaa cu m’dek khan ah zuk huk khätah ah m’hnüt nak gah ci gui la ani ah agup khawihnah ciah chang gui cu, ang htei ah ami m’neh m’awh vai ah hlut ne khei lawk ci gui. ³ Akhnih nak ah khankhaw chang naw a eikbei ung kaa cu tuinu ah khan ah zuk huk khätah, tuinu avan aksi ah si ah mäih ah ng’hlat zawp ne, cun ung om ciah akghing phung avan si zawp ci gui. ⁴ Akthum nak ah khankhaw chang naw a eikbei ung kaa cu tuinu tuihta avan ah khan ah zuk huk khätah, cun ah tui gui avan cu si ah ng’lat zawp ci. ⁵ Cun kawn ah tui ngäng ciah khankhaw chang naw “tuhngawi la ngawi zä om ne, theingciim ciah Bawipa, nam khoichaa nak cu bä ne chün ci nei. ⁶ Ngami naw Khanpughi ah chang gui la purofet gui ah si cu huk sak ci gui nei, cun ah kiasei ami awk vai ah si cu na peit gui ah kiak ci nei. Ngami cu ami bi ah mäih ah gah ba ci gui ah kiak ci nei” ci ne a pyein cu ka ng’zak ci. ⁷ Cun kawn ah sonkiaang ung kaa lut lawk ciah k’aw naw, “A hlüngtai säih Bawipa, Khanpughi! Nang ah m’khoichaa nak cu ak cang ah ng’düng ne chün ci nei” ci ne a pyein cu ka ng’za ba ci. ⁸ Akphli nak ah khankhaw chang naw a eikbei ung kaa cu khohni ah khan ah zuk huk khätah hnii cu mei ah ng’ai ne cang ne chang ui zawp khai ah kia lawk ci. ⁹ Chang gui cu cun ah ng’ling aih ci naw ui law gui khätah, leigaai gui ah khan ah a huham om ciah Khanpughi cu m’shetkat ne ng’thu ci gui. Cun ung phi ngami cu ami kat nak ung phi kä ng’zu ba u ne, Khanpughi phi kä m’kümto ci gui. ¹⁰ Akhmaa nak ah khankhaw chang naw a eikbei ung kaa cu khiküi ah mangkiaang ah khan ah zuk huk khätah, khiküi ah uknak khaw avan cu mü ne hmüp zawp ne, cun ung om ciah chang gui cu geinvai u ne, ami haa htui ne kawp zawp ci gui. ¹¹ Cun ah ami hlut khei nak la ami m’neh m’awh nak ah hmawk ah mawpi Khanpughi cu m’shetkat ci gui. Cun ung phi ami mät ah cheishoh nak ung ka kä ng’hlat law ba ci gui. ¹² Akchuk nak ah khankhaw chang naw a eikbei ung kaa cu Euphratis tuinu ah khan ah zuk huk khätah cun ah tuinu cu kawi ne ket sei, hnii law lam ah kaa ghangpughang gui ah law nak vai ah lam cu ng’hmawng lawk ci. ¹³ Cun kawn ah k’u ah mäih lawk ciah mumcha she pathum cu ka hmuk ci. Cun gui cu shawk, khiküi la purofet she gui ah m’gawng ung kaa lut lawk ci gui ah kiak ci. ¹⁴ Ngami cu khawshe ah mumcha gui ah kia ne cäi aih vai phi m’dang hning ci gui. Khaw nüng ung ghangpughang päng cu, hlüngtai pibäih ciah Khanpughi ah ng’tuk bi nak hnüüp ung ng’cut lawk khai gui ah khü gui vai ah ngami cu hteit ci gui. ¹⁵ “Ngai vä, kei cu m’guk-ei ah mäih ah ka lawk khai nei! cii m’gang ne asui them ngäng ciah chang cu akplui ah kä om khai, chang ah hmu ah kä lüng’aa khai, zeikiai nak om khai nei.” ¹⁶ Cun kawn ah mumcha gui naw ghangpughang gui cu khü gui zawp u ne, Hebrew ng’thu awn Armakeddon ami ci nak ah hmun ah k’bum gui ci gui. ¹⁷ Akchih nak ah khankhaw chang naw, a eikbei ung kaa cu khawkhi ung zuk huk khätah pum im kyong ah mangkiaang ung kaa “Bi pyi ci nei” ciah k’aw cu ng’shan lawk ci. ¹⁸ A cun ung khaw lailäp ne ng’hmum ne ng’kyeek ne, shihpi ng’thüi ne thüng lawk ci. Chang ah ng’tüi kawn ung shin ah mäih ah shihpi kä thüng man ci. Cun cu akshekha pibäih ah kiak ci. ¹⁹ Mang gawnu cu thum ah ng’pai ci. Khomdek ah khan ah mang gaw avan phi di zawp ci. Khanpughi naw Bibilon mang gaw cu shüm ba netah, a khap ung kaa, am lungshe nak ah sapyit tui cu awk sak ci. ²⁰ Ng’lei avan piawn ne m’htung avan maih ci. ²¹ Khan ah kaa chuih vawh teih teih lawk ciah khawk’aa ng’ma gui kia lawk ci. Cun ah khawk’aa ung geinvai aih u netah, chang gui naw Khanpughi cu m’shetkat ne ng’thu ci gui.

¹ Khankhaw chang pachih ung kaa eikbei chih kawt ciah khankhaw chang tumat cu kei ah law netah, “Lawä! Tuinu gui ah pei ah ami sak ah mang gaw ah kiak ciah pletbeng ciah hnumi ami m’shetkat law cu ka ning hmuh sak khai nei. ² Khomdek ah khan ah ghangpughang gui cu, ani awn ng’zaw ng’pawm lä ci gui nei. Chang ah hta gui avan cun phi ani awn ng’zaw ng’pawm nak ah kiak ciah zu cu awktat ci gui nei,” ci ne pyein ci. ³ Cun kawn ah khankhaw chang naw mumchaa awn kei cu bung ah na hteh püi ci. A cu ah khiküi asen ung ngok ciah hnumi nu cu ka hmuk ci. Cun ah khiküi ah pum avan ung Khanpughi ah thang shetsak ciah ming cu be ne ng’guk ci, khiküi cu alu chih law ne aki ghaa lawk ci. ⁴ Hnumi nu cu asen la akshon ah kiak ciah sui cu sui ne, ghui ni, ng’mo ni, k’cünglung mi gui cu awi ci. Ani cu pletbeng nak ah kiak ciah m’shemshai nak awn be ciah ghui khap cu kawt ci. ⁵ Ani ah amcalai ung, “Khaw ah kaa ung shemshai ne pletbeng ci gui ah nu, Babilon gawnu” ci ne thuuk ciah ng’thu awn ami guk ah kiak ci. ⁶ Cun ah hnumi nu naw Khanpughi ah chang gui ah si la Bawipa Jesuh ung bekhüt u sei, ami ngawn gui ah chang gui ah si cu aw ne, awktat sei ka hmuk ci. Ani hmu netah kei cu ang htei ah cäi ne ka tu ci. ⁷ Khankhaw chang naw, “A i ah kiasei na cäi ang? Cun ah hnumi nu ah thuuk ciah amanwg la ang cum nak ah alu chih law ne aki ghaa lawk ciah khiküi ah manwg cu ka ning m’thein khai nei. ⁸ Cun ah khiküi cu, azan a ghin te ung phi tuhbäi kä ghing ba ci nei. Ani cu m’hteilung khui ung kaa lut law netah, m’di nak gah lawk khai nei. Khomdek khan kä a tüisho pha ge ung, ghin nak cauk ung ami ming kä guk tu ah khomdek chang gui naw, cun ah khiküi ami hmuh ah a kiak ung cäicat khai gui nei. Ani cu azan ghing te ci, tuhbäi kä ghing ba ci, cun ung phi ghing ne dang law ba khai. ⁹ “Shin ah amawng ung cüivai vai la lunglang vai hlü ci. Lu chih cu hnumi nu ah ngoh nak ah m’htung chih ah kiak ci. Ghangpughang chih ah phi kiak ci. ¹⁰ Ghangpughang pahmaa cu sih pyi ci gui, tumat ghing ne om zah ci, tumat cu kä dang law phak ci, ang dang law ung phi a shänghta vah uk tuk khai. ¹¹ Azan ghing te ci, tuhbäi kä ghing ba ciah khiküi cu akcheit nak ah ghangpughang ah kiak ci. Cun ung phi ani cu chih ung kaa tu ah kia ci, ani cu di law ge khai ah kiak ci. ¹² “Nang ah na hmuh ah aki ghaa cu, kä uk tu phak ci gui ah ghangpughang ghaa ah kiak ci. Ngami cu khiküi awn atäng ah nazi ät hta ung huham gah tuk khai gui ah kiak ci. ¹³ Cun ah ghaa gui cu ami ng’bü nak täng ci, Ngami naw ami hlüngtai nak la huham cu khiküi-am ap ci gui. ¹⁴ Ngami naw Htomehta cu ng’tuk püi khai gui. Cun ung phi Htomehta cu bawi nüng ah Bawi, mang nüng ah Mang (Ghangpughang nüng ah Ghangpughang) ah kiak ciah kia ne, ngami cu näng gui khai. Bawipa ah a ghü gui la bekhüt ne läk ci gui cu ani awn atäng ah näng nak gah khai gui,” ci ne pyein ci. ¹⁵ Cun kawn ah khankhaw chang naw kei-am, “Nang naw na hmuh ah pletbeng ciah hnumi ah ngoh nak ah tui cu khaw nüng ung ahlü hlü ah ng’thu ci gui ah khui päng pa päng, chang khli gui ah kiak ci. ¹⁶ Nang naw na hmu ah khiküi la aki ghaa naw pletbeng ciah hnumi nu cu thüi nak khai gui nei. Ngami naw cun ah hnumi cu asui sak avan suh pe u sei akplui ah om khai nei. Asa cu ei u ne, ani cu mei awn m’khih khai gui nei. ¹⁷ Ngami naw Khanpughi ah ng’thu düng a gawk law güt ami huham cu khiküi-am ami ap vai ah, Khanpughi naw ngami ah m’lung cu pian pe gui ne, amät ah ng’bü nak ah mäih ah bilawh sak gui ci. ¹⁸ “Nang ah na hmuh ah hnumi nu cu khomdek khan ah ghangpughang gui uk gui ciah mang gawnu ah kiak ci,” ci ne pyein ci.

¹ Cun kawn ah khanmawpi ah kaa kyum lawk ciah khankhaw chang tumat cu ka hmuk ci. Ani ung küikyang ciah huham om sei, ani cu khomdek khan avan ung dei ne khang ci. ² Ani naw m’lau ne Babilon mang gaw cu di pyi ci nei! Di pyi ci nei! Cun ah gawnu cu khawshe gui, mumchashe gui ah om nak, shemshai ciah khoshe gui ah ng’zi nak ah kiak ci nei. ³ A i ah kiasei ci ung chang pakhui akda naw acun ah gawnu awn ng’zaw ng’pawm nak ah kiak ciah zu cu awktat ci gui nei. Khomdek ah khan ah ghangpughang gui cun phi ani awn ng’zaw ng’pawm ci gui nei. Khomdek ah khan ah sumlei ci gui cun phi acun ah gawnu ah pletbeng nak awn ng’bühmang pyi ci gui nei” ci ne pyein ci. ⁴ Cun kawn ah khanmawpi ah kaa k’aw ahei cu ka ng’za ba ci. Cun ah k’aw naw; “Lut law ba vä! Kei ah chang gui, Ani ung kaa lut law ba vä! Ani awn atäng ah kä nami cheishoh tu vai, Ani awn atäng ah m’shetkat nak kä nami gah tu-en vai! ⁵ A i ah kiasei ci ung ani ah kat nak cu khanmawpi k’phaa ne hlüng ne, Ani ah cheishoh nak ah lam cu, Khanpughi naw a shüm hmat zawp pyi ah hmawk ah kiak ci. ⁶ Ngami ah khan ah abi ah mäih ah, Ani ah khan ah bi tu ba vä; Ani ah bi ah mä goi khai ah, Ani ah khan ah phu tu ba vä; Nangmi ah hmawk ah a ning pian peit gui ah mä, a goi ah kha pi khai ah a khap cu pian pe vä. ⁷ Ani cu amät bämang ne ang päi ng’ze awn khin khai ah, zaica nak la geinvai nak ung gawk sak vä. A i ah kiasei ci ung, ani naw, “Kei cu mangnu ah ka kiak ci, hmeinu ah kä ka kiak ci, Kei ung a i zah ung phi thüisei nak kä om khai” ci ne a kiak ah hmawk ah kiak ci. ⁸ A cun gui ah phäh ah leigaai gui, gawpai nak gui, thüisei nak gui, cawigha nak gui cu ani ah khan ah hnüüp ät ge awn gawk lawk khai nei. A i ah kiasei ci ung, ani m’khoichak ciah Bawipa Khanpughi cu, m’hlüngtai pi bäih ah hmawk ah kiak ci,” ci ne pyein ci. ⁹ Ani awn ng’zaw ng’pawm lä mante ciah khomdek khan ung ghangpughang gui naw, ani ui ciah mei ah akhu cu ami hmuh ung kyap ne m’lau khai gui nei. ¹⁰ Ngami naw ani ah geinvai nak cu hmu u ne, ang htei ah kyikyawk u ne, asho nak ah ng’düi u netah, “Hlüngtai küikyang ciah mang gaw, Babilon! Cäi aih vai thüi aih vai kiak ci nei. Nang cu nazi ät hta ah kyong ung m’shetkat nak na gah pyi ci nei” ci ne kiak khai gui nei. ¹¹ Sumlei ciah chang gui cun phi ami khawh khleih khai a u phi kä om ba sei, kyap ne thüi khai gui nei. ¹² Ngami ah khawh gui cu ghui, ngui ng’mo, zih, pää, ng’hlo pyai, tui ng’ui ahlü hlü, m’vuihaa, sing ahlü hlü, cheeipai, m’si k’tolung; ¹³ Sing ng’ui, phakphai, phaknan, situi, mura, sapyit tui, khitui, püm, htang, sei, htome, ng’se zatha, khleihtein la chang hnun ghing gui ah kiak ci. ¹⁴ Sumlei ciah chang gui naw cun ah mang gaw-am, “Nang naw na ng’zak hlü ah khawh gui cu kä om ba ci nei, bämang hlüngtai nak gui phi maih zawp pyi ci nei, cun gui cu nang naw ngawi ah phi kä na gah ba khai nei” ci ne pyein ci gui. ¹⁵ Babilon mang gaw ung sumlei u ne bühmang lawk ci gui ah sumlei chang gui cu, cun ah gawnu ah dishum nak hmu u ne, kyikyawk u netah, asang ah ng’düi u ne, ¹⁶ “Shin ah mang gaw ah hmawk ah cäi aih vai, thüi aih vai, kiak ci nei; Ani cu k’phla sui, ng’hlo sui, pää sui gui sui ne ghui, ng’mo la k’cünglung gui cu awi man ci nei. ¹⁷ A khawh chaam avan cu nazi ät ah kyong ung dishum zawp ci nei” ci ne kyap ne m’lau khai gui nei. Hteinpaw keptain gui la hteinpaw ung ng’cum tuk ci gui, hteinpaw ung bi bik ci gui la sumlei ci gui cu a sho nak ah ng’düi u ne; ¹⁸ Cun ah mang gaw ui ciah meikdäi meikhu gui cu hmu u netah, “Shin ah mang gaw ah mäih ahei mang gaw a i sang ung phi kä man khai nei” ci ne m’lau ci gui. ¹⁹ Ngami cu m’vut kaw ne ami lu khan ah phiang u netah, “Cäicat aih vai, thüi sei aih vai kiak ci nei, hteihpaw k’ta, sumlei chang phung bämang sak ciah mang gaw cu nazi ät hta ah kyong ung di ne maih ci nei” ci ne kyap ne m’lau ci gui. ²⁰ Khankhaw chang gui cun ah mang gaw adi ah phäh ah zei vä, Khanpughi ah chang gui ang düihpüi gui, purofet gui zeikiai vä! Ani naw nangmi ah khan ah abi phung phung ah hmawk ah Khanpughi naw ani cu m’kat pyi ci nei. ²¹ Cun kawn ah k’thamah pi ciah khankhaw chang naw lungsum teih lawk ciah lungnu cu, la ne tuinu ung zuk shum netah “Babilon mang gaw cu a shin ah mäih ah tui ung zuk shum khai gui nei, a ngawi ah phi kä dang law ba khai nei. ²² Nang ung kaa tingtäu tum k’aw, phiphät phyungheng k’aw gui phi kä ng’zak ba vai nei. Bi bik ci gui phi kä hmuh ba vai, lungkhiing ah ng’ghin phi kä ng’zak ba vai nei! ²³ Ngawi ah phi nang ung mei im ah dei cu kä hmuh ba vai nei. Ng’puui ng’khap khai ah ng’piangmi, ng’laami ah k’aw phi kä ng’zak ba vai nei. Nang ah sumlei chang gui cu khomdek ah khan ung hlüngtai pi ci gui nei. Nang naw chang ah hta avan cu ng’zo hleip nak awn na cheishoh sak pyi zawp ci nei,” ci ne pyein ci. ²⁴ Babilon mang gaw ah dishum nak ah mawng cu purofet gui ah si, Khanpughi ah chang gui ah si, m’dek khan ung ami ngawn gui ah si gui cu cun ah mang gaw ung ali ah hmawk ah kiak ci.

¹ Cun kawn ah khanmawpi ah chang khli ah k’aw ah mäih cu ka ng’zak ci. Cun ah k’aw naw Khanpughi m’kümtou vä, Khanpughi cu hun nak, bämang nak la hlüngtai nak awn be ci nei. ² Ani ah m’khoichaa nak cu ng’düng ne ng’khän ci nei. Ashetkat nak awn khomdek chang gui cheishoh sak gui ciah pletbeng ciah hnumi cu m’kat pyi ci nei. Ani naw Khanpughi ah chang gui a ngawn ah phäh ah Khanpughi naw am kat ah kiak ci nei” ci ne m’lau ci gui. ³ Leng ba mä ne “Khanpughi cu m’kümto vä, cun ah mang gaw ui ciah meikhu cu ang täi sei khu ci nei” ci ne m’lau ci gui. ⁴ A ghaampa m’kulei-phli la khiküi paphli naw, mangkiaang ung ngok ciah Khanpughi cu khawihnah u netah “Amen, Khanpughi cu m’kümto vä” ci ne m’lau ci gui. ⁵ Cun kawn ah mangkiaang ung ka lut lawk ciah k’aw naw, “Khanpughi ah a shäm gui la ak chang gui avan, Khanpughi kyih aa ciah akhmaw ang vai avan naw Khanpughi cu m’kümto vä” ci ne pyein ci. ⁶ Cun ung chang khli ng’nään ah k’aw, tuinu ah ng’hmum k’aw la kho ng’hmum ah mäih k’aw cu ka ng’zak ci. Cun ah k’aw naw, “Khanpughi cu m’kümto vä, hlüngtai pi k’bäih ciah Bawipa mi Khanpughi cu Ghangpughang ah kiak ci nei. ⁷ Htomehta ah hta m’um nak gawk law pyi ciah kiasei, mi zeikiai ne ahlüngtai nak cu mi m’kümto khai nei. Ceimah khai ah ng’laamihta cu pawng ge ne om ci nei. ⁸ Ani cu a suisak vai ah theing ne ng’ciim ciah sui phi gah pyi ci nei. (Sui k’ni ci cu Khanpughi ah chang gui ah om ih k’ni ah kiak ci). ⁹ Cun kawn ah khankhaw chang naw, “Shin cu na guk vai nei, Htomehta ah hta m’um nak ung ami khü gui ah chang gui cu zeikiai nak om ci nei.”, ci netah leng ba mä ne, “Shin ah ng’thu cu Khanpughi ah ng’thu akcang ah kiak ci nei” ci ne na kiak nak ci. ¹⁰ Cun ah kiasei kei naw a khaw pei ah kawp ne ka khawihnah khai pawng ngätah, khankhaw chang naw, “Kä na bi vai! kei cu nang ni, na phäi nau gui ni, Bawipa Jesuh ah m’dang ah ang thu düng läk ciah chang gui ni ah püipaw changshäm ah ka kiak ci, Khanpughi vah na khawhnah vai” ci ne na kiak nak ci. Bawipa Jesuh ah m’dang ah ng’thu düng awn vah purofet gui cu hnün thawh nak gah ci gui. ¹¹ Cun kawn ah khankhaw m’kawt ng’hmawng sei ka hmuk ci. Cun ung ng’se bawk tumat om ci. Cun ah ng’se bawk ung ng’cum ci cu bekhüt la ng’düng nak ming nak ci. Ani cu ng’düng khai ah ng’thu m’chaa ne, ng’düng khai ah ng’tuk bik ci. ¹² Amik cu meidäi ah pying ne, alu ung lukhu akda ng’büng ci. Amät kawn ah a u naw kä a hmat ah ang ming cu ani ah khan ah ng’guk ci. ¹³ Asuisak cu si ng’hlui ah kiak ci. Ani ah ming cu, “Khanpughi ah ng’thu” ah kiak ci. ¹⁴ Khankhaw gakaap gui naw, ak theing bäng bäng sui u ne, ng’se bawk bäng bäng ng’cum u ne a hnu ah läk ci gui. ¹⁵ Khaw nüng chang päng a heem nak vai ah am gawng ung khim k’ghaat lut lawk ci. Ani naw chang gui cu m’si k’htei pawng awn uk gui khai. Ak hlüngtai pi k’bäih Khanpughi ah m’lungshe nak ah kiak ciah sapyit neen nak ah khui ung sapyit cu neen khai nei. ¹⁶ Ani ah asuinu la a phei khaw ung, “Bawi nüng ah Bawi, mang nüng ah Mang” ciah ming cu ng’guk ci nei. ¹⁷ Cun kawn ah khohni ung khankhaw chang tumat ng’düi sei ka hmuk ci. Ani naw khan ah zawng ciah kha gui-am, “Law vä, Khanpughi ah mang ei cu ei law vä! ¹⁸ Law u ne ghangpughang gui, gabawi gui la gakap gui ah ami sa, ng’se gui la ng’se ung ng’cum ci gui ah ami sa, khleihtein khuimah, akzaw ak"dam chang avan ah sa cu ei vä.” ci ne m’lau ci. ¹⁹ Cun kawn ah khiküi ni, khomdek khan ung ghangpughang gui la, ami gakap gui ni naw, ng’se bawk ng’cum ci la a gakap gui cu ng’tuk vai ah ng’cut law u sei ka hmuk ci. ²⁰ Khiküi la ani ah maa ung cäi aih vai m’dang ciah purofet cu pha ne chum ci gui. (Cun ah purofet she cu khiküi ah m’hnüt nak gah ci gui la ani khawihnah ci gui-am cäi aih vai m’dang gui ne, cheishoh sak gui ciah kiak ci). Khiküi la purofet she ani nik hnih cu, zam mei ah däi ciah meidäi ung zuk shum goi ci gui. ²¹ A gakap gui cu ng’se bawk ung ng’cum ciah m’gawng ung lut lawk ciah khim ghaat awn ngawn gui ci gui. Kha gui naw ami sa gui cu ami phü ah ei ci gui.

¹ Cun kawn ah khankhaw chang tumat cu m’htei lungkhui k’hmawn nak la m’si guinu cu kawt ne khanmawpi ah kaa kyum law sei ka hmuk ci. ² Ani naw shawk k’phyu ng’hlui cu pha netah, khawkum phiaa ghaa ung pin ne khit ci. Cun ah khawshe bawi kä cun ung Satan ah kiak ci. ³ Khankhaw chang naw shawk cu m’htei lungkhui ung zuk chah netah, khokum phiaa ghaa ang pyi güt ung chang gui kä ah cheishoh-en sak gui hlawt vai ah m’hnüt ne choh awn khai shi ci. Khokum phiaa ghaa ang pyi kawn ah ani cu a shäng hta k’hmawn tu ba khai. ⁴ Cun kawn ah mangkiaang gui cu ka hmuk ci. Cun ung ngok ci gui cu m’khoichaa nak vai ah huham ami peit gui ah kiak ci. Cun kawn ah Bawipa Jesuh ah m’dang ah düng nak la Khanpughi ah ng’thu ami pyein ah hmawk ah ami ngawn gui ah, ami mumcha gui cu ka hmuk ci. Ngami naw khiküi la ani ah gup cu kä khawihnah ci gui. Ami m’calai la ami kut ung phi khiküi ah m’hnüt nak cu kä la tuk ci gui. Ngami cu ghing ne tho law ba u ne, Bawi Khrit awn atäng ah khokum phiaa ghaa ung ghangpughang ah mäih ah uk tuk ci gui. ⁵ (Cun ung k’pawih ba ciah sik ci gui läi cu khokum phiaa ghaa ang pyi kawn ah ghing ne tho ba ci gui). Shin cu ak htük bäih ah sik ci gui ah thawh ba nak ah kiak ci. ⁶ Cun ah ak htük ung tho ba ci gui cu zeikiai nak la hlüngtai nak awn kümbe ci gui. Hnih vei sih nak naw ngami kä k’phaa tu ba gui khai. Ngami cu Khanpughi la Bawi Khrit ah k’taigüi ah kia u ne, Bawi Khrit awn atäng ah khokum phiaa ghaa ung uk tuk khai gui. ⁷ Khokum phiaa ghaa ang pyi kawn ah Satan cu lut law ba netah; ⁸ m’dek ah khan ung chang avan cu cheishoh sak ne, kok la Makok ah ming ciah ng’tuk bi vai ah ng’cut sak gui khai. Ngami cu tuinu kem ah laigin chü ah da ci gui. ⁹ Ngami cu khomdek khan avan ung püi u ne, Khanpughi ah chang gui ah ng’düm hmun la ani ah m’hni ah mang gaw cu khaai zawp ci gui. Cun ung phi khankhaw ah kaa meidäi kia law ne, ngami cu ui gui zawp ci. ¹⁰ Chang gui cheishoh sak gui ciah khoshe cun phi zam meidäi ung zuk shum ci gui. Acun ah mei ung khiküi la purofet she phi ami zuk shum pyi ah kiak ci. Ngami cu amü ak hnüüp hta ng’shon ung dukdeiu nak gah khai gui. ¹¹ Cun kawn ah mangkiaang a bawknu la acun ung ngok ciah Bawimang cu ka hmuk ci. Acun ah Bawimang ah maa ung khankhaw la khomdek cu ng’kawn ne maih lawk ci. ¹² Cun kawn ah sik ci gui cu ak zaw akdäm ah a ci ah mangkiaang ah maa ah ng’düi lawk ci gui. Cun ung cachaw gui phi ng’phian lawk ci gui, cun kawn ah ghin nak ah cauk ah kiak ciah ahei cachaw phi ng’phian lawk ci. Sik ciah chang gui cu, cun ah cauk gui ung gu ne ami m’hnüt gui ah ami mät ah om ih ah ci ah m’khoichaa nak gah ci gui. ¹³ Tuinu naw ani ung om ciah aksi gui cu ap lawk ci. Sik nak la sihnak ah khaw naw phi ngami ung om ciah aksi gui cu ap lawk ci gui. Aksi gui ami van cu ami mät ah bilawh a ci ah m’khoichaa nak gah ci gui. ¹⁴ Cun kawn ah sihnak la sihnak ah khaw avan cu meidäi ung zuk shum ci gui. (Cun ah meidäi cu akhnih vei nak sihnak ah kiak ci). ¹⁵ Ghin nak cauk ung ang ming kä ng’gu tuk ciah chang gui phung cu cun ah meidäi ung zuk shum gui zawp ci gui.

¹ Cun kawn ah khamkhaw thai la khomdek thai cu ka hmuk ci. Zän nä khankhaw la khomdek cu maih pyi ci. Tuinu phi kä om ba ci. ² Khanpughi ah khanmawpi ung kaa theingcim ciah Jerusalem mang gaw thai cu a cei awn ng’hmu lawk khai goi ah ng’laamihta ah ng’bilaw ah mäih ah kyum law sei ka hmuk ci. ³ Cun kawn ah mangkiaang ung kaa ng’shan sei m’lau ah k’aw cu ka ng’zak ci. Cun ah k’aw naw, “Tuhbäi ung Khanpughi ah im cu hnicim chang ah im ah kiak ci. Ani cu ngami ung om sei ngami cu ani ah chang ah kiak ci gui. Khanpughi amät cu ngami awn atäng ah om ne, ngami ah Khanpughi ah kiak khai nei. ⁴ Ani naw ami ng’phli tui avan cu ghu pe gui khai nei. Cun kawn ah sihnak, thüisei nak, kyah nak, m’neh m’awh nak kä om ba khai nei. Akphyim gui avan cu maih zawp pyi ci nei” ci ne pyein ci. ⁵ Cun kawn ah mangkiaang ung ngok ci naw, “Tuhbäi ung apäng avan cu akthai ah ka piang ba ci nei” ci ne pyein ci. Bawipa naw, “A shin ah ng’thu cu ng’düng ne zum vai ah kiak ci kiasei gu ne nami m’hnüt vai nei” ci ne pyein ci. ⁶ Ani naw leng ba mä ne, “Bi ng’pyi ci nei, kei cu Alpha la Omeka, tün nak la khüm nak ah ka kiak ci, tui gha ciah chang-am ghin nak ah tui cu alä ah ka awk sak khai. ⁷ Näng ciah chang naw shin ah ng’thukhän cu gah khai, kei cu ani ah Khanpughi ah ka kiak khai, ani cu kei ah htapa ah kiak khai. ⁸ Cun ung phi kyik ciah chang, pyaai ciah chang, chang ngawn ciah chang, chang shemshai, chang om kaa, ng’pluh ciah chang, a gup khawihnah ciah chang la hleeihlak ciah chang gui cu zam mei cang ung lut zawp khai gui. Cun cu ak hnih vei nak sihnak ah kiak ci” ci ne pyein ci. ⁹ Leigaai mawng chih awn be ciah eikbei chih kawt ciah khankhaw chang pachih ung kaa tumat cu kei ah law netah, “Law ä, Htomehta ah k’chu vai ah ng’laamihta cu ka ning m’hnuh khai nei” ci ne pyein ci. ¹⁰ Ani naw mumcha awn kei cu ang htei ah hlüng ciah khomhtung khan ah na hteh püi netah, Khanpughi ah khanmawpi ah kaa kyum lawk ciah theingciim ciah Jerusalem mang gaw thai cu nam hnuh ci. ¹¹ Cun ah mang gaw cu Khanpughi ah bämang nak awn pyü ciah lung, vai ng’mo ah mäih ah ng’shü ne khang ci. ¹² Cun ah mang gaw chaam nak cu hlüngtai aih ne, m’kawt gha-lei-goi om ci. Cun ah m’kawt gui cu khankhaw chang gha-lei-goi naw ngäng u sei, m’kawt päng ah khan ah Israel pakhui gha-lei-goi ah ming cu guk ci gui. ¹³ Hni law lam ah m’kawt thum, hni kiaak lam ah m’kawt thum, htum lam ah m’kawt thum, siip lam ah m’kawt thum om ci. ¹⁴ Mang gaw k’chaam nak ung lung k’tung gha-lei-goi ng’ling ci gui. Cun ah lung k’tung gha-lei-goi ung Htomehta ah ng’düihpüi gha-lei-goi ah ming gui cu guk ah kiak ci. ¹⁵ Kei nang thu püi ciah khankhaw chang ah kut ung mang gaw ni, mang gaw m’kawt gui ni, la mang gaw päng gui nüt nak vai ah ghui ng’mui pum om ci. ¹⁶ Mang gaw cu azun akdang ng’cawih ne, ng’hniing ne ng’aai ci. Khankhaw chang naw ghui ng’mui pum awn cun ah mang gaw cu nüt khätah, azun akdang ahlüng ni cu mäng phiaa gha-lei-hmaa bäng bäng lawk ci. ¹⁷ Cun kawn ah khankhaw chang naw chaam k’pang nak cu nüt ba sei, chang gui ah nüt nak awn 216 pei hlüng ci. ¹⁸ Cun ah k’pang cu k’tolung pyü ci awn ami cawih ah kiak ci, mang gaw cu püüi dang ne vai khai ah ghui bäng awn ami cawih ah kiak ci. ¹⁹ Mang gaw chaam cu k’toulung ahlü hlü k’süm ne ami cawih ah kiak ci. Ami k’süm htük cu, k’tolung, akhnih nak cu k’toulung sen, akthum nak cu m’liu lung, akphli nak cu vailung; ²⁰ Akhmaa nak cu m’silung, akchuk nak cu k’pyü lung, akchih nak cu ng’ailung, akcheit nak cu cüilung, akkaw nak cu ng’shülung, aghaa nak cu lungkyiing, agha-lei-ät nak cu lung m’kim, a hga-lei-goi nak cu zapilung ah kiak ci. ²¹ M’Kawt tumat cu zapi ng’mo tumat awn ami pian ah kia ne, m’kawt gha-lei-goi ung zapi ng’mo gha-lei-goi lawk ci. Mang gaw ah lam gui cun phi ghui bäng ah kia ne püüi dang ne vai ci. ²² Cun ah mang gaw ung pum im cu kä ka hmuk ci. A i ah kiasei ci ung, cun ah pum im cu hlüngtai pi bäih ciah Bawipa, Khanpughi la Htomehta ah kiak ci. ²³ Cun ah mang gaw ah khan ah Khanpughi ah bämang nak cu dei ne Htomehta cu amei im ah kiak ci kisei a cun ah mang gaw ung hni la chaa ah akdei kä hlü ci. ²⁴ Chang ah hta avan cu cun ah mang gaw ah akdei ung hteit-hton khai gui. M’dek ah khan ghangpughang gui naw ami ng’bühmang nak cu cun ah mang gaw ah law püi khai gui. ²⁵ Mang gaw m’kawt gui cu hnüüp pum hmawngkhai gui. Cun ah mang gaw ah khaw amü nak kä om ci kia sei m’kawt cu a i zah ung phi kä khaai khai gui. ²⁶ Chang avan naw ami hlüngtai nak la bühmang nak cu cun ah mang gaw ah avan law püi khai gui. ²⁷ Cun ung phi kä theingcim ci phung api ah phi, cun ah mang gaw ah kä lut tuk khai. Thui ng’aa nak vai bik ci la hleeihlak ciah chang gui phi kä lut tuk khai gui. Htomehta ah ghin nak cauk ung angming guk ah chang gui bäng vah cun ah mang gaw ung lut tuk khai gui.

¹ Khankhaw chang naw kei-am ghin nak tui ah lon nak ah tuinu phi na m’hnuh ci. Cun ah tui nu cu k’pyülung ah mäih ah vai ne, Khanpughi ah Htomehta ah mang kiaang ung kaa mang gaw ah gaw ng’lung lam nu ung zu long vük ci. ² Cun ah tuinu ah tuikam vang veing ung ghin nak ah sing ghing om ci. Cun ah sing cu cha ät ung hnü ät m’theih ne, kum ät ung gha lei-goi vei m’theih ci. Cun ah hnah gui cu chang avan ah gai nak vai ah kiak ci. ³ Khanpughi ah m’shetkat nak gah ci phung cu api ah phi cun ah mang gaw ung kä hmuh vai nei. Khanpughi la Htomehta ah mangkiaang cu cun ah mang gaw ung om sei, ak chang gui naw khawihnah khai gui nei. ⁴ Ngami naw Bawipa ah hmai cu hmuk khai gui, ani ah ming cu ami m’calai ung guk pe gui khai. ⁵ Khaw amünak kä om ba khai. Mei im la hni ng’shü kä hlü ba khai, a i ah kiasei ci ung Bawipa Khanpughi cu ngami ah akdei ah kiak khai, ngami naw ghangpughang ah kia ne ngawi zä uk khai gui. ⁶ Cun kawn ah khankhaw chang naw kei-am, “Shin ah ng’thu cu ng’düng ne ng’ciim ciah ng’thu ah kiak ci. Purofet gui cu ang mumcha awn be sak gui ciah Khanpughi naw kä shou pha sei kia lawk khai ah amawng gui cu, ak chang gui-am m’dang gui khai ah, khankhaw chang cu tüi law pyi ci nei” ci ne pyein ci. ⁷ Bawipa Jesuh naw, “Ngai vä, kei ka kyum lawk khai nei, shin ah cauk ung om ciah ng’cäi nak gui läk ciah chang cu zeikiai nak om ci nei” ci ne pyein ci. ⁸ Shin ah amawng ama gui hmu ng’zak ci cu kei Johan ah ka kiak ci nei. Kei naw shin ah amawng gui ka hmuh ng’zak kawn ah kei cu khankhaw chang ka khawihnah khai ah a khaw pei ah ka kawp ci. ⁹ Khankhaw chang naw, “Shik cha ah kä na bi vai, kei cu nang ah püipaw ah ka kiak ci, na phäi nau purofet gui la shin ah cauk ung om ciah cacim läk ciah chang gui ah püipaw ah phi ka kiak ci, Khanpughi bäng na khawihnah vai nei” ci na kiak nak ci. ¹⁰ Cun kawn ah khankhaw chang naw, “Shin ah a mawng gui a bä law nak vai ng’et law pyi ci kiasei, shin ah cauk ung kaa ng’cäi nak ah ng’thu gui cu kä na m’zih en vai nei. ¹¹ Akshe bik ciah chang cu akshe bi lä sä, cheishoh ciah chang cu cheishoh lä sä, akni bik ciah chang cu akni bi lä sä, theingciim ciah chang cu theingciim lä sä” ci ne na kiak nak ci. ¹² Bawipa Jesuh naw, “Ngai vä, kei ka kyum law ge ci nei. Chang gui-am ami mät ah bi ah ci ah peit gui vai ah m’cümhnah nak cu ka law püi khai nei. ¹³ Kei cu Alpha la Omeka, akhtük bäih la akhnu bäih, tün ka la khüm nak ah ka kiak ci.” ci ne pyein ci. ¹⁴ Ami suisak theing khai ah m’suk ci gui cu zeikiai nak om ci, ngami cu ghin nak ah sing ah m’theih ei nak hning la mang gaw ah m’kawt ung luh nak hning cu gah khai gui. ¹⁵ Cun ung phi chang shekha gui, ng’plukheih ci gui, pletbeng ci gui, chang ngawn ci gui, agup khawihnah ci gui, hleeihlak cheishoh ci gui cu ami van Manggaw ah ak’pung ah om khai gui. ¹⁶ “Kei Jesuh naw nangmi Khrihtabum gui-am shin ah amawng gui cu shäu ne ning m’thein gui khai ah ka khankhaw chang cu ka tüi lawk ci nei. Kei cu David ah hta ng’shon ah ka kiak ci, ng’shü ne khang ciah thaihke aisi ah phi ka kiak ci.” ¹⁷ Mumcha Theing la Ceimah khai ah ng’laamihta naw, “Law ä” cik ci goi. Cun ah ng’thu ng’zak ciah chang nüng naw phi, “Law ä” ci ne pyein sä, Tui gha ciah chang cu law sä, ghin nak ah tui ng’za hlük ciah chang phung naw a lä ah dou sä! ¹⁸ Shin ah cauk ung ng’cäi nak ah ng’thu ng’zak ciah chang phung-am kei Johan naw khen ne ka pyein ci nei, a u chang phi shin ah caciim heikbe tuk ciah chang cu, Khanpughi naw shin ah cauk ung om ciah leigaai gui awn shetkat sak khai nei. ¹⁹ A u chang phi shin ah cauk ung kaa caciim heikpai tuk ciah chang cu, Khanpughi naw shin ah caciim ung guk ah ghin nak sing ah am theih ei nak hning la theingciim ciah mang gaw ung luh nak hning cu k’phleeng pek khai nei. ²⁰ Shin ah amawng gui zuk pyein ciah Bawipa naw, “Kei akcang ah ka kyum law ge vai ci nei,” ci ne pyein ci. Cun cu akcang ah kia sä, Bawipa Jesuh zu kyum law ä! ²¹ Bawipa Jesuh am geinsei nak cu nami changsing ah khan ah om sä! Amen.