PHILIPPIAN

PHILIPPIAN

¹ Bawi Khrit Jesuh ah chang shäm ah kyak ciah Paul la Timohti naw Philippi gawnu ung Khrihtabum uk ci gui la bi püi gui ci gui ni, Bawi Khrit Jesuh ung kawng ät ci gui ah Khanpughi ah chang gui ni am, ca guk law ci goi nei. ² Mi Pa Khanpughi la Bawipa Zesuh Khrit naw m’geinsei nak la dimdeeih nak cu ning pe gui sä. ³ Nangmi ah mawng ka ngaih tüh päng ung Khanpughi cu kam hlüngtai ci: ⁴ ang täi sei nami van ah hmawk ah ka taigü ci. ⁵ A htük ung tün ne tuh bäi ung khüt khai ah Thu Ni shäu ne bilawh nak ung atäng ah nami na bilawh püi ah hmawk ah ka taigü päng ung ka zeikyai ci nei. ⁶ Cun ah kya sei nang mi ung bi ak ni tün ne bik ciah Khanpughi naw Bawi Khrit Jesuh ah kyum law nak vai ah hnüüp kä a gawk phaa ung, cun ah bi cu ng’pyi khai ah bik khai ah ka zum ci nei. ⁷ Kei naw cun ah nangmi ah mawng ka ngaihtüh cu ng’düng ci, a i ah kya sei ci ung, nangmi naw kei cu nami m’lung awn nami na k’pan na phäh ah kyak ci. Tuk bäi thawng ung ka kyum zah ung la Thu Ni cu a kho k’ding ah pyeinsa ne,ka k’süm pian zah ung nangmi cu, Khanpughi naw ana peit ah akhin k’ni ung, nami bilawh tu ah hmawk ah phi kyak ci. ⁸ Bawi Khrit Jesuh ah m’gein nak awn, nangmi ang htei ah ka ning khaih nak gui ah mawng pyein ung, Khanpughi cu saksi ah kyak ci. ⁹ Kümbe ciah m’khoichaa nak la ng’düng ciah hmuhmat nak awn atäng ah nami zumhni nak cu ang ghotai law pi pi vai ah kei ka taigü ci nei. ¹⁰ cun ah kya sei nangmi naw ak ni pi cu nami ghü hning khai nei. Cun ung vah nangmi cu Bawi Khrit a law ba hnüüp ung, m’kat nak kä om ciah kä theingthap nak cu nami phiawn nak khai. ¹¹ Khanpughi ah bämang nak la m’hlüngtai nak vai ah hmawk ah Bawi Jesuh Khrit ung lawk ciah düng ciah ni kiom naknaw, nami ghin nak cu ning kümbe sak gui khai nei. ¹² Phäi nau gui aw, kei naw ka buitang law gui naw, Thu Ni ka shäu nak ung ak cang ah, a na zu chaan ah mawng cu ka ning hmat sak gui hlük ci nei. ¹³ Bawi Khrit ah changshäm ah ka kyak ah hmawk ah thawng ung ka kyum ah mawng cu, mang im ngäng ciah gaakap gui ami van la chang akda naw hmat ci gui nei. ¹⁴ Kei cun ah thawng ung ka kyum ah hmawk ah phäi nau gui akda pi naw, Bawipa ami zum nak cu khängtek law pi ci. Cun ah kya sei ng’thu, am shah ung Khanpughi ah ng’thu ami pyein nak ung ngahmi cu kä kyikyawk ne k’thamah law pi ci gui. ¹⁵ Chang am shah gui naw m’thüikhang nak ah m’lung ng’tukvook nak hlü ah m’lung awn Bawi Khrit ah mawng cu pyeinsak ci gui, cun ung phi chang am shah naw m’lung ngaih k’ni awn pyeinsak ci gui. ¹⁶ Cun ah chang gui cu, Thu Ni küikyan ne ka pyeinsak khai ah Khanpughi naw anam düih ah mawng cu,hmat u netah, zumhni nak awn pyeinsak ciah chang gui ah kyak ci. ¹⁷ Chang am shah gui naw Bawi Khrit ah mawng cu m’lung ngaih k’ni awn ah kä kyak ciah ami mät ami m’hlüngtai nak hlü awn pyeinsak ci gui. Ngahmi naw thawng ka kyum ci ah kei cu ka zaica nak pi vai ah ami bi ah kyak ci. ¹⁸ Thu pyein cu kä küikyang hnga ci,m’lung ngaih k’ni awn pyein ung phi,m’lung ngaih she awn pyein ung phi, Bawi Khrit ah mawng pyein ah kya sei, ka zeikyai ci, m’täi ne ka zeikyai lä khai. ¹⁹ Nang mi ah taigü nak la Bawi Jesuh Khrit ah Mumcha ah nam hteihtang nak awn cun cu kei ah phyawn law nak vai ah kyak ci. ²⁰ Kei naw ak tung ah ka ng’zak hlü la ka ngaih u nak cu, kei naw a i zah ung phi ka bi mawng cu kä ka nawng khai, a i khin ung phi, a tuh bäi chü phi, kei cu khüighaat nak awn be ne, ka sih ung phi, ka ghin ung phi, ka ghin nak avan awn Bawi Khrit kam taamkhah khai, ciah kyak ci. ²¹ Ghin nak ci cu a i ang! Kei ah hmawk ah, ka ghin nak cu Bawi Khrit ah kyak ci, ka sih nak cu ka bä nak pi ah kyak ci. ²² Cun ung phi kei cu ka ghin lä ung bi ak däm pi ka bi ba khai a kyak ung, sih nak la ghin nak ung kaa a i ka ghü khai ang! ²³ Kei naw hnih ah ka ngaih nak om ci, kei cu shih ah ghin nak nawng shüt ne Bawi Khrit ung ang htei ah ka om hlük ci, cun cu kei ah hmawk ah bä pi ci. ²⁴ Cun ung phi nang mi ah hmawk ah kei ghing ne ka om vai cu ak küikyang pi ah kyak ci. ²⁵ Cun ah a mawng cu ka hmat ci kya ne, kei cu nang mi awn atäng ah ka om khai nei. Nami bühmang nak vai la zum nak ung nami zeikyai vai ah hmawk ah kei cu namg mi awn atäng ah ka om khai nei. ²⁶ Cun ah kya sei nami om nak ah ka gawk law ba hnüüp ung, Bawi Khrit Jesuh ung nami ghin nak awn, kei ah hmawk ah nami khäghah nak pi vai kyai khai nei. ²⁷ Tuk bäi ak küikyang pi cu Bawi Khrit ah Thu Ni awn ng’müi khai ah nami ghin om vai ah kyak ci. Cun ah kya sei kei ka law ba hlawt ung phi, kä ka law ba hlawt ung phi, Thu Ni zum nak ung, tumat ah khäng khai ah m’lung ngai u ne, ng’bü nak ung tumat ah htek khai ah ng’düi u ne, khüighaat ne nami kyak ah mawng cu ka ng’za hlük ci nei. ²⁸ Nami gaa gui cu kä nami kyih en vai;ang täi sei nami lingtha vai, Cun cu nami gaa gui ah dawng nak vai la nang mi ah näng nak vai ah mawng m’dang nak ah kyak ci, a i ah kya sei ci ung nangmi am näng nak ning pe gui ci cu Khanpughi ah kyak ci. ²⁹ Nang mi cu ani nami zum nak bäng awn ah kä kyak ciah ani ah hmawk ah zaica nak nami gah nak awn Bawi Khrit ah khuut bi nak vai ah a khin k’ni cu nami gah ci. ³⁰ Tuh bäi nang mi cu kei awn atäng ah ng’tuk nami bi hning pyi ci nei. Azan pui tüi ne kei naw ng’tuk ka bi cu nang mi naw nami hmuk ci. Tuh bäi phi nami ng’zak ah mäih ah kei cu ng’tuk ka bi gäkgäk ci nei.

¹ Bawi Khrit ung nami ghin nak naw ning khüighaat sak gui ne, ani ah m’hni nak naw nami m’lung ning üp sak gui ci. Nang mi cu Mumcha awn ng’geicam nak om ci; tumat la tumat chimgein nak la m’hteihtang nak tu phi om ci. ² Cun ah kya sei atäng ah nami ngaih tüh nak, nami zum hni nak la nami m’lung ngaih a kawng ät nak awn, kei cu kümbe khai ah nami na zeikyai sak vai ah ka pyein hlük ci. ³ Khäghah nak hlü la mät ah ng’zak hlü shui nak awn a i phi kä nami bi vai, chang cu mät ah mä, bä tu ba ci, ciah ngaih tüh ne, nami m’lung nami ng’neim sak vai nei. ⁴ Nami mät ah hmawk bäng ah kä ng’ä ne, nami pawchang ah hmawk ah phi nami ng’ä vai nei. ⁵ Bawi Khrit ung om ciah m’lung ngaih cu nang mi ung phi om sä: ⁶ Ani cu ang täi sei Khanpughi nupuk nak ci, Cun ung phi Khanpughi ah mäih ah ka kyak khai ciah ling ne kä k’tha nak ci. ⁷ Cun ah a kyak nak vaisü ung amät ah bämang nak cu a bü ah nawng shüt ne, changshäm cu nupuk nak ci. Ani cu chang ah mäih ah law ne, ak hnicim chang nak cu m’dang ci. ⁸ Ani cu am lung neim sak ne kutlam tung ung asih nak ung khüt sei, Khanpughi ah ng’thu cu läk ci. ⁹ Shin ah a mawng ung Khanpughi naw Bawipa cu, thawh ba sak ne, Ak hlüng pi k’bäih ah Khankho hmun ung, ming thang ni ci ah hlüngtai pi ciah, ming cu pek ci. ¹⁰ Cun ah kia sei khankho la khomdek ung om ci nüng ni, khomdek ah ka ah om ci nüng ni naw, Bawi Zesuh ah ming cu m’tamkhah u ne, ¹¹ M’khuukdoong ne bawihma u netah, Ak ghing om avan naw, “Zesuh Khrit cu Bawipa nei,” ci ne shäu u ne, Pa Khanpughi ah bämang nak cu m’dang khai gui. ¹² Cun ah kya sei teihpüi gui aw, kei ka om zah ung ka ng’thu nakmi ngaih ah mäih ah, tuh bäi kei kä ka om zah ung ka ng’thu nami ngaih vai cu ak küikyang pi ah kyak ci. Nangmi naw hun nak ak be ah nami gah nak vai ah kyih aa nak awn nami bilawh vai, ¹³ A i ah kya sei ci ung Khanpughi naw ang zak hlü ah nami bi vai la ng’thu nami läk nak hning vai ah nang mi ung ang täi sei bi bik ci. ¹⁴ Nami bi vai om ci phung cu kä ng’sutsi kä ng’cuhcan ne nami bi vai nei. ¹⁵ Cun ung nangmi cu cheishoh ne kat nak bik ci gui ah om nak ah khaw ung Khanpughi ah kümbe ciah hta gui ah kya ne, kat nak kä om ne theingthap ciah chang gui ah nami kyak khai. ¹⁶ Nangmi naw ang täi ghin nak ah mawng ng’thu cu pyein u ne, cun ah chang gui ah ng’lung ah khomik ung aisi ah ng’shü ah mäih ah nami khang khai nei. Cun ah nami bi ah akyak ung kei naw k’tha na ne ka bilawh gui cu a kholä ah kä kya sei, Bawi Khrit a kyum law Hnüüp ung, nangmi ung kei ah khäghah nak vai cu om khai nei. ¹⁷ Nami zum nak awn Khanpughi am nami peit ah khawihnah nak ah khan ah, kei ah ka hnun si cu kam soi ah a kyak ung phi kei cu ka zei ci nei, nangmi phi ka ning zei sak gui ci nei. ¹⁸ Cun ah mäih ah nang mi phi nami zeikyai vai nei, nang mi awn atäng ah kei phi nami na zeikyai sak vai nei. ¹⁹ Bawipa naw ang zak hlü a om ung kä shou pha sei, Timothi cu nangmi ah ka tüi lawk khai ah ka ngai ci nei. Cun ung kei naw nangmi ah mawng ng’za ne k’thamah nak ka gah khai nei. ²⁰ Ani bäng cu kei awn kani m’lung ngaih kawng ät sei, nang mi ah hmawk ah bi bi hlük ciah chang ah kyak ci nei. ²¹ A hei chang gui läi cu ami mät ah hmawk bäng ngaih tüh u ne Bawi Jesuh Khrit ah bi cu kä k’tha nak ci gui nei. ²² Nang mi naw Timothi ah hnün thawh la kei ni naw ng’pahta goi ah mäih ah Thu Ni shäu ne kani bilawh cu nangmi naw nami hmat ci nei. ²³ Cun ah kya sei kei ah ka mawng cu a i ah kyak ciah ka hmat vai am, ani cu nang mi ah ka tüi lawk khai ka ngai ci nei. ²⁴ Kei ka mät cun phi kä shou pha sei nang mi ah ka law hning vai ah Bawipa ung ka ng’ap ci nei. ²⁵ Kei awn atäng ah kani bik ci, kei awn atäng ah ng’düi ne ng’khüi ci, kei nam hteihtang khai ah nami tüih law ah, mi nau Epaphroditus cun phi nang mi ah ka tüih law vai ah hlü ciah ka ngai ci nei. ²⁶ Ani naw nang mi cu ning khaih na gui ci, ani ah gawpai ah mawng nami ng’zak ah hmawk ah ani cu am lung kä ni ngai ngai ci nei. ²⁷ Ani cu akcang ah si ghepghep ne gawpai te ci nei. Cun ung phi ani cu Khanpughi naw m’htei ci nei, ani bäng ah kä kyak ci kei phi nam htei ci nei. Cun ah kya sei kei cu thüisei nak kä ka buitang ba ci. ²⁸ Cun ah kya sei nang mi naw ani cu hmu ba ne nami zeikyai nak vai la kei ah thüi sei nak gui ang kawn nak vai ah, kei naw ani cu nang mi ah ak zä ah ka tüi law hlük ci nei. ²⁹ Nangmi naw ani cu Bawipa ung phäinau ah zeikyai ne nami dou vai nei. Ani ah mäih ah chang phung cu nami chang m’sui vai nei. ³⁰ Ani naw Bawi Khrit ah khuut cu a sih ü-aung ah k’tha nah ne bik ci nei. Cun cu nang mi naw kä nami peit hlawt ah bi cu kei am ana pei vai ah hmawk ah a bi ah kyak ci nei.

¹ Phäi nau gui aw, ak hnu ah ka pyein hlü cu, Bawipa ung zeikiai vä. Ka guk pyi te ka pyein ba cu kei ah phäh ah zaica nak vai kä kyak ci nei, cun cu nangmi ah m’lung üp nak vai ah kyak ci nei. ² Chang shekha gui, ui ah mäih gui, pumsa-ah vai cik ci gui cu nami geing nak gui vai nei. ³ Vun-ah nak bik ci gui ah chang cu ngahmi ah kä kyak ci, mik mi ah kyak ci. A i ah kya sei ci ung mik mi cu Mumcha awn Khanpughi cu mi khawihna u ne, Bawipa Jesuh Khrit awn mi kawng ät u ne, zeikiai nak mi gah ciah kyak ci. Mik mi cu a hei a i baw düt kä mi ngaih u ci. ⁴ A i baw düt ngaih u vai a hlü ung cun cu kei ung om ci. Ak pung ah kiomsang nak ngaih u ciah chang a om ah a kyak ung phi, cun ah chang cu kei aè om man hlawk ah kä kyak khai nei. ⁵ Kei cu khaw hnüüp chih ka law zah ung vun-ah nak ka gah ci. Kei cu Israel chang, Benjamin pakhui, Hebru nupa nah ne ka ng’tüi lawk ci.Jew gui ah thukhän läk nak pyein law ung kei cu Pharisee tumat ah ka kyak ci. ⁶ Kei cu ang htei ah m’thüikhang ne Khrithabum phi ka k’dukdei na man ci. Thukhän awn ng’düng vai ci ne, thukhän läk nak pyein law ung kei cu pyein vai kä om khai ah ka läk ci. ⁷ Cun ung phi ka mät ah hmawk ah aungtang ciah ka ngaih man phung cu Bawi Khrit ah hmawk ah a kholä ah ka hmat ci. ⁸ Cun bäng ah kä kyak ciah Bawipa Khrit Jesuh ka hmat nak tu cu apäng avan ah küikyang pi ci kya sei, azan kaa gui cu kei na ghawi sak ci gui ah ka hmat ci. Kei naw Bawipa ah hmawk ah apäng avan cu ka ghawt shüt ci. Bawi Khrit kei ung a gawk law vai la ⁹ Bawipa awn kawng ät nak vai ah hmawk ah, apäng avan cu ap ah mäih ah ka hmuk ci. Kei naw thukhän ka mät ah läk nak awn chang düng ah kä ka kya ba ci nei. Kei cu tuh bäi Bawi Khrit ka zum nak awn chang düng ah ka kyak ci, cun ah chang düng ah kyak nak cu Khanpughi ung kaa law ne, zum nak ung phung ci. ¹⁰ Kei naw ka ng’zak hlü cu Bawi Khrit hmat vai, sih nak ung kaa a thawh nak ba ah hlüngtai nak gah vai la ani awn atäng ah zaica nak gah ne, ani ah sih ah mäih ah sih tu vai bäng ah kyak ci. ¹¹ Cun ung vah kei cu sih nak ung kaa ka tho ba khai ciah m’lung üp nak om khai. ¹² Kei naw cun a ng’cheng cu ka gah pyi ci, ka kümbe pyi ci ciah pyein ah kä kyak ci. Cun ung phi cun ah ng’chuh cu na pek khai ah Bawi Khrit naw kei cu na k’pang pyi ci kya sei, cun ah m’kawt ung gawk ne ng’chuh cu ka dou vai ah kei naw ka k’tha nak ci nei. ¹³ Phäi nau gui aw, kei naw cun kä dou pha cu ka hmat ci nei:tumat kei naw ka k’tha nak cu ka hnu ah kaa gui phung cu m’hnih shüt ne, ka ma ah ng’dang lawk ci ung ka gawk vai ah kyak ci. ¹⁴ Cun ah kya sei kei cu ng’chuh dou vai ah m’kawt bü ne ka dawng ci nei. Cun ah ng’chuh cu khankho ah ghin nak vai ah Bawi Khrit Jesuh ung Khanpughi ah ng’khü nak ah kyak ci. ¹⁵ Mik mi mi van ung Mumcha lam ah k’thamah lawk ci phung naw a shikchaa a ngaih vai nei. Cun ung phi am shah ung a hei ah ngaih nak a om ah a kyak ung, cun cu Khanpughi naw ng’tei khai ah m’dang khai nei. ¹⁶ A i ah a kyak ung phi, mik mi naw tuh bäi ung khüt khai ah ng’cäi nak mi läk ah mäih ah mi läk lä khai nei. ¹⁷ Phäi nau gui aw, kei cu na thei vä. Nang mi ah hmawk ah kei mi ah m’dang, na thei tu gui ciah chang cu nami m’hteihtang vai nei. ¹⁸ Shin ah a mawng cu kei naw akda vei ka pyein pyi ci nei, tuh bäi phi leng ba ne ka ng’plitui awn ka pyein ba khai nei: Bawi Khrit Jesuh kutlam tung ung asih nak ah mawng cu hnu ng’tuk püi ne ani ah gaa ah kya ne ghing ciah chang akda om ci nei. ¹⁹ Cun ah chang gui cu m’htei kho khüt ne hteit ci gui ah kyak ci. Ngahmi ah Khanpughi cu pumsa a ng’zak hlü ah om ih nak ah kyak ci. Ngahmi cu thui ng’aa nak vaisü ung khähghah ci gui, ami m’lung kyong ung phi khomdek khan ah amawng ama bäng be ci. ²⁰ Mik mi cu khan im gaw chang ah mi kya u ne, khankho ah kaa mi Hunbawi Jesuh Khrit a kyum law vai cu mi ngäng ci. ²¹ Bawipa naw amät ah uk nak kaa ah, ang tüi avan a gawk nak sak ah, ahlüngtai nak awn shetka thei ciah pumsa cu bämang ciah amät ah pumsa ah mäih ah na ng’thawng sak gui khai nei.

¹ Phäi nau gui aw, ang htei ah ning m’hni gui ne ka ning khaih na gui ci nei. Nang mi ah hmawk ah ang htei ah ka zeikiai ci nei. Kam hni ah phäi nau gui aw, Bawipa ung nami ghin nak khäng htek khai ah nami ng’düih vai nei. ² Euodia la Sintiche, nang ni cu Bawipa ung ng’pai nau goi ah kya ne, m’lung ngaih a kawng ät vai ah ka ning pyein na goi ci nei. ³ Ka ngaih u, ka ning paw nang naw, cun ah hnumi gui cu nam hteihtang tu gui vai nei. Ngah mi cu Thu Ni shäu ne pyein nak ung kei awn atäng ah k’tha nah ne bilo ci gui ah kyak ci. Cun ah bi nak ung Clement la Khanpughi ah ghin nak cauk ung a ming om pyi ciah, a hei bilo tuk ciah chang gui phi om ci gui. ⁴ Nang mi cu Bawipa ung nami ghin nak awn zeikiai vä, ka pyein ba mä cu zeikiai vä! ⁵ Nami hniphnoi ng’awi ng’gi nak cu chang avan am hmuh sak vä. Bawipa a kyum law nak vai ng’et law pyi ci nei. ⁶ A i amawng ama ung phi kä nami ng’ä ai vai, ang täi sei m’hlüngtai nak ah m’lung awn k’taigü u ne, nami ng’zak hlü gui cu Khanpughi ah nami ng’zoih vai. ⁷ Cun ah nami bi ung, hnicim chang naw ngaitüh ne kä k’phaa ah Khanpughi ah dimdeeih nak naw, Bawi Khrit Jesuh ung nami kawng ät nak awn, nami m’lung la nami ngaih avan cu ning m’htei gui khai nei. ⁸ Phäi nau gui aw, khüm nak ah ka pyein hlü cu, ni kiom nak, bäkhäk nak, cang nak, küika nak, ng’düng nak, theingcim nak, zumhni nak la m’tamkhah nak awn nami m’lung kyong cu be sak vä. ⁹ Kei ah ka ng’thu ung nami theithang la kei ah ka bilawh nami hmuhteng ah mäih ah nami bilawh vai nei. Cun ung dimdeeih nak na pe gui ciah Khanpughi cu nangmi awn atäng ah om khai nei. ¹⁰ Akhin shou hta khätah kei nami nam hteihtang nak cu nami m’dang law ba mä ah hmawk ah, Bawi Khrit ung ka ghin nak awn ang htei ah ka zeikiai ci nei. Cun cu nang mi naw kei nami nam hteihtang nak kä om ba ciah ah ka pyein ah kä kyak ci, cun ah nami nam hteihtang nak vai ah khin kä om te ciah ka pyein ah kyak ci. ¹¹ Kei nami na nawng düt ciah ngai ne shin ka pyein ah kä kyak ci nei, kei cu ka mät ung om ci awn, ka ng’büh vai ah ka thei pyi ciah kyak ci. ¹² Kei cu ka phü ung phi ka cawi ung phi, apihta a om ung phi, akdäm nu a om ung phi,;a i a khin ung, a hawi ka om ung phi, a i ah mäih ah ka kyak ung phi, ng’büh thei ne ka om vai ah ka ng’thei pyi ci nei. ¹³ Bawipa Jesuh Khrit ah na peit ah k’thagui awn kei naw ang’tüi avan kam khüt hning ci nei. ¹⁴ Cun ung phi kei ka zaica zah ung nang mi naw nami nam htei cu ang htei ah bä ci nei. ¹⁵ Nang Philippian chang gui, Kei cu Macedonia kho ung pawng ne Thu Ni cu shäu ne ka pyein law htük zah ung, nang mi ah Khrithabum tumat hta bäng naw nam hteihtang ci, nang mi bäng naw van shin ah bi ung, a ghawi law, abä law ung phi, kawng ät ne, nami na bi püi cu na mi mät naw nami hmat ci nei. ¹⁶ Thessalonika gawnu ung ka om zah ung kei ung hlü ci gui cu nang mi naw, hngü ät bäng ah kä kyak ciah nami nam khäh lawk ci nei. ¹⁷ Cun cu kei naw m’cümhnah ng’za hlü ne ka pyein ah kä kyak ci, nang mi ah camhnüt ung a tang law pi vai ah ka pyein ah kyak ci. ¹⁸ Nang mi naw nami nam khäh law avan ka gah ah manwg cu shin ung kam dang ci nei.- cun gui cu kei ung hlü ciah mä däm pi ci nei! Nang mi ah m’cümhnaè tu Epaphroditus ah law püi gui cu kei ung däm pui khai ah ka gah ci nei. Cun cu tuihlim ne ng’ui ciah Khanpughi bawihma nak la Khanpughi naw m’hni häihhäih ne a dou ah khawihnah nak ah mäih ah kyak ci nei. ¹⁹ Cun ah kya sei kei ah ka Khanpughi cu bühmang nak la bäkhäk nak awn kümbe ciah kya ne, nangmi am Bawi Khrit Jesuh awn, nami ng’zak hlü avan cu ning pe gui khai nei. ²⁰ Mi Pa Khanpughi ung abä khäk nak cu ang täi sei om sä! Amen. ²¹ Khanpughi ah chang gui ah kyak ciah Bawi Jesuh Khrit zum ci gui avan cu ka ning zavaih na gui ci nei. Kei awn atäng ah om ciah phäi nau gui naw phi ning zavaih gui ci gui nei. ²² Khanpughi ah chang gui ami van naw ning zavaih gui ci gui nei;Ghangpughang ah mang im kyong ah om ci gui ah Khritha gui naw ak tung pi ah ning zavaih na gui ci gui nei. ²³ Bawipa Jesuh Khrit ah m’geinsei nak cu nami van ah khan ah om sä.