MAKUH

MAKUH

¹ Shin cu Khanpughi ah Htapa, Bawipa Jesuh Khrit ah amawng Thu Ni ah kiak ci. ² Cun ah ang tün law ah mawng profet Isaiah ah caguk ung om ci cu; `Khanpughi naw, nang ah lam cu m’awng khai ah ³ Bungpuk ah ng’shä ci cu na ma ung ka tüi khai nei, ‘Bawipa ah law nak vai ah lam cu piang tham ge vä; Ani ah hteh nak vai ah lam cu düng sak ge vä’ cine pyein ci. ⁴ Cun ah kia sei Tuihnim Johan cu bungpuk ah dang law netah, tuihnim nak pe ne ng’thu a shäu law cu “Nami kat nak gui ung ng’zu ba ne tuihnim zawp vä, cun ung Khanpughi naw nami kat nak ning m’gein gui khai nei” ciah kiak ci. ⁵ Judea kho la Jerusalem mang gaw ung kaa chang akda cu law ne Johan ah thu ngai lawk ci gui, ngahmi cu ami kat nak ung ng’zu ba u ne, Jordan tuinu ung tuihnim ci gui. ⁶ Johan cu kala-uk ah mu awn tah ah sui cu sui ne, mehvun cu m’ciu ah vawp ci.Ani ah ei awk cu khingkhighi la khoitui ah kiak ci. ⁷ Ani naw chang gui ah ma ah thu a shäu cu, “Kei ah hlüngtai pi ciah Bawipa cu kei ah hnu ah dang lawk khai nei.Kei cu ani ah phahnak gui k’phian khai a phi kä ka khin ci nei. ⁸ Kei naw nangmi cu tui awn hnim nak ka ning pe gui ci, cun ung phi ani naw Mumcha Theing awn hnim nak ning pe gui khai nei”. ciah kiak ci. ⁹ Kä shou pha sei Bawipa Jesuh cu kalile kho, Nazaret gawnu ung kaa law ne, Jordan tuinu ung Johan ah tuihnim nak cu lak ci. ¹⁰ Tui ung kaa a thawh law ba vai-am khankho m’kawt hmawng khätah Mumcha Theing cu Müm bawk ah mäih ah ak khan ah kyum law sei hmuk ci. ¹¹ Cun kawn ah khankho ah kaa k’aw cun phi, “Nang cu kam hni aih ah ka ning Htapa nei, nang ung kei ka zeikiai ci nei” ciah thang lawk ci. ¹² A cun vai-am Mumcha naw Bawipa cu bungpuk ah hteh püi ci. ¹³ Cun ah bungpuk ah khoshe naw Bawipa cu kho hnüüp phli-kip ung tüihtok ci.Cun ah bung ah kiung ciah khisa gui om ci gui, cun ung phi khanchang gui naw Bawipa cu m’hteihtang ci gui. ¹⁴ Johan thawng ung ami chum kawn ah Bawipa Jesuh cu Kalile kho ah law ne Khanpughi ung kaa lawk ciah Thu Ni cu pyein ci. ¹⁵ Bawipa Jesuh naw, “Akhin cu küm pyi ci nei, Khanpughi ah uknak kho cu ng’et lawk ci nei, nami kat nak gui nüng ung ng’zu ba ne Thu Ni cu zum tu vä” ci ne pyein ci. ¹⁶ Bawipa Jesuh cu Kalile tuinu kam zung ah a hteh zah ung nga shui ne ng’vai vawi ci goi ah Simon la anau Andru cu hmu goi ci. ¹⁷ Bawipa Jesuh naw, “Law nä, ka hnu ah na läk nä, nangni cu chang phak ciah ngak’pha ah ka ning piang goi khai” ci ne kiak na goi ci. ¹⁸ Ngani naw a cun vai-am ani ng’vai nawng shüt ni ne Bawipa ah a hnu ah läk ci goi. ¹⁹ Bawipa Jesuh cu hteit ba shäng shäng netah, Zebedee ah hta goi James la Johan cu hmu ba goi ci. Ngani cu hleiko ung ng’vai kiang ne om ci goi. ²⁰ Bawipa Jesuh naw ngani cu a hmu goi vai-am khü goi sei, ngani naw ani pa Zebedee la ak chang gui cu hleiko khan ah nawng shüt ne ahnu läk tuk ci goi. ²¹ Bawipa Jesuh la ang düihpüi gui cu Kapernaum gawnu ah gawk law u netah, kyin hnüüp ung Bawipa Jesuh naw pum im ah hteit ne m’theithang gui ci. ²² Bawipa Jesuh naw thukhän saza gui ah mäih ah kä kiak ciah, m’gäi ciah chang ah mäih ah m’theithang gui ci.Cun ah kia sei chang gui cu ang htei ah cäicat ci gui. ²³ Cun zah ung pum im ah khoshe ah kai ah chang tumat om ci ²⁴ Cun ah chang naw, “Nazaret chang Jesuh Bawipa, nang naw keimi a i ah na na ci gui hlük ci ang? Keimi na nam di gui khai ah na lawk ci ang? Nang a u ah na kiak cu ka ning hmat ci nei, nang cu Khanpughi ah Theingcim ciah shä tüih ah na kiak ci nei”. ci ne m’lau ci. ²⁵ Bawipa Jesuh naw, “kä chawkchek ne, chang ung kaa lut law ne ahei ah hteit ä” ci ne taam ci. ²⁶ Khoshe naw chang cu ng’tum ne ng’khlet khai ah ghu shüt netah, ng’shan sei m’lau ne lut law ne hteit ci. ²⁷ Chang gui cu ang htei ah cäicat u netah, “shin ah amawng cu a i hawkcha ah ang?, m’theithang nak ak thai ahei ang? Ani naw khoshe gui cu k’täm gui sei, ngami naw ang thu cu ngai ci gui nei” ci ne ami mät ng’cecäk ci gui. ²⁸ A cun vai-am Bawipa Jesuh ah amawng cu Kalile kho avan ung pigaw gui zung pum ah thang lawk ci. ²⁹ Cun kawn ah Bawipa Jesuh la ang düihpüi gui cu pum im ung kaa lut law ba ne Simon la Andru ah im ah hteit ci gui. James la Johan phi hteit tuk ci goi. ³⁰ Simon ah akchu ah nu cu gaw ne ih phak ung ng’zän sei, Bawipa Jesuh a gawk law vai-am a nam thein ci gui. ³¹ Bawipa Jesuh naw a pei ah hteit netah, akut ung pang ne m’tho ne gai sak sei, cun ah hnumi naw ngami cu khin chah na gui ci. ³² Khohni sip ne khomü hun law khätah, chang gui naw gawpai ci gui la khoshe ah kai gui cu Bawipa Jesuh ah om nak ah law püi ci gui. ³³ Cun ah pigaw ung kaa chang gui ami van law u ne, cun ah im pei ah ng’bum lawk ci gui. ³⁴ Bawipa Jesuh naw nat nak a hlü hlü ah gaw ci gui cu gai sak gui ne, khoshe gui phi k’täm gui zawp ci. Khoshe gui naw ani cu a u ah akiak ah hmat pyi ci gui ah kia sei, Bawipa Jesuh naw ng’thu ami pyein vai ah akhin cu kä pe gui ci. ³⁵ A ngawi ung khongawi kho thai ghi ghi sei, Bawipa Jesuh cu tho ne lut law ne, a ding gei nak ah hteit ne taigü ci. ³⁶ Cun zah ung Simon la apaw gui naw Bawipa cu shui ba ci gui. ³⁷ Shui ne hmu ba u netah, “chang akda naw ning shui ci gui nei” ci ne m’thein ci gui. ³⁸ Bawipa Jesuh naw, “a shin ah pigaw k’et, pigaw gui zung ah mi hteit khai.Cun ah pigaw gui zung ah phi thu ka pyein khai, a cun vai ah kei ka lawk ci” ci ne ang düihpüi gui-am kiak na gui ci. ³⁹ Bawipa Jesuh cu Kalile kho avan ung hteit ne, pum im gui ung thu pyein ne, khoshe gui phi k’täm gui ci. ⁴⁰ Kheilei ung gaw ciah chang tumat cu Bawipa Jesuh ah pei ah law ne, m’khukdong netah, “Bawipa nang zak hlü a om ung kei cu na theek gai sak ä” ci ne ng’zoi ci. ⁴¹ Bawipa Jesuh naw m’gein netah, akut awn nüm ne tawk ne, “Kei naw kang zak hlü om ci nei, theek ne gai ä” cik ci. ⁴² A cun vai-am a nat nak maih sei, cun ah chang cu theek ne gai ba ci. ⁴³ Acun vai-am Bawipa Jesuh naw ak zä ah a hteh ba vai ah m’cäi netah, ⁴⁴ “Shin ah amawng cu a u-am kä nam thein-en vai, taigü ng’vai ah ang ghit ah hteit ne na pumsa cu na vam hnuh vai.Cun kawn ah na theek gai ah mawng chang gui naw ami hmat vai ah Moses ah thukhän ah mäih peitnak cu na bi vai” ci ne m’cäi ne tüi ba ci. ⁴⁵ Cun ah chang cu hteit ba netah, a theek gai ah mawng cu van-am m’thein ne ngak ci. Cun ah amawng cu chang van naw zat sei, ng’za pyi ciah kia sei, Bawipa Jesuh cu a i pigaw ah phi akdei ang dang ah kä hteit hlawt ci.Ang thuh nak pigaw k’pung lam ah hteit ne om ci ci.Cun ung phi apigaw päng ung kaa chang akda cu a om nak ah gawk lawk ci gui.

¹ Hnüüp api shou hta khätah, Bawipa Jesuh cu Kapernaum gawnu ah gawk law ba ne om sei, ‘im ah gawk law ba ne om ci’ ci cu chang gui naw ng’zak ci gui. ² Cun ah kia sei chang gui ng’bum law u ne, im kyong ung m’kawt law ah khüt khai ah be ci gui. Bawipa Jesuh naw cun ah chang gui-am Thu Ni cu m’thein gui ci. ³ Cun zah ung chang phli naw shuum ciah chang tumat cu kawt law ci gui. ⁴ Chang da aih sei kä luh law püi hlawt u netah, im khan ah kai püi ne m’dikcih kaih pawk netah, Bawipa Jesuh ah ma ah gui shawn ne zuk chah ci gui. ⁵ Bawipa Jesuh naw ngami ah zum nak a i hlawk ah a däm cu hmu netah, shuum ciah chang-am, “Ka hta, na kat nak cu ning phiawn sak pyi nei” cik ci. ⁶ Cun ung phi cun ung om tuk ci gui ah thukhän saza gui naw, “a i ah kia sei shin ah chang naw, shikcha ah a pyein ang? ⁷ Ani naw Khanpughi cu kat na pyi ci nei. Khanpughi bäng naw vah chang ah kat nak cu phiawn sak hning ci”. ci ne ngaih tüh ci gui. ⁸ Bawipa Jesuh naw cun ami ngaih tüh cu hmat netah, “Nangmi a i ah kia sei, cän ah nami ngaih tüh ang? ⁹ Shuum ciah chang-am, ‘Na kat nak cu ning k’phiawn nei ci ang a zäi tu ba kaw?, kä cun ung ‘Tho law ne na ih phak look ne hteit ä’ ci ang a zäi tu ba kaw? ¹⁰ “Chang ah Htapa naw khomdek khan ung kat nak ak phiawn hning ah mawng cu ka ning hmuh sak gui khai” ci netah; akut kho shuum ci-am, ¹¹ “Tho law ne, na ih phak look ne im ah hteit baä” ci ne kiak nak ci. ¹² Chang khli ah ma ah cun ah chang cu tho law ne, a ih phak kawt ne hteit ba ci. Cun ah tho law ne a hteh ba cu hmu u netah, chang gui cu ang htei ah cäicat ci gui. “Shin ah mäih cu a i zah ung phi kä hmuh ng, zak man nei” ci ne Khanpughi cu m’hlüngtai ci gui. ¹³ Bawipa Jesuh cu Kalile tuinu kam zung ah a htehhton ba zah ung, chang khli cu a om nak ah law u sei m’theithang gui ci. ¹⁴ Cun kawn ah Bawipa Jesuh naw a hteh nak ba ah khon ami loh nak ah zung ung ngok ciah Alphaeus ah hta Levi cu hmu netah, “Ka hnu ah na läk ä” ci ne khü khätah, Levi naw ng’düi law ne ahnu ah läk ci. ¹⁵ Bawipa Jesuh cu Levi ah im ah ei a ei tu sangung khan look ci gui la changshe ah ami khoikhei gui ah chang khli naw läk law u ne, am shah gui cu amät la ang düihpüi gui awn atäng ah ei an tuk ci gui. ¹⁶ A cun ah khon look ci gui la changshe ah ami khoikhei gui awn atäng ah ami ei awk cu pharisee ah kiak ci gui ah thukhän saza gui naw hmu u netah, “A i ah kia sei shin ah changshe gui awn atäng ah a ei awk ang” ci ne ang düihpüi gui cu ng’shi gui ci gui. ¹⁷ Cun ah ami ng’shi gui cu Bawipa Jesuh naw ng’za gui netah, “Gai ciah hmawk ah sei bawi kä hlü ci, gaw ciah hmawk ah hlü ci, Kei cu chang k’ni gui ka khü gui khai ah ka lawk ciah kä kiak ci, changshe gui ka khü gui khai ah ka lawk ci” ci ne kiak na gui ci. ¹⁸ Kho hnüüp ät ung Johan ah khahpüi gui la pharisee gui cu ei hlawi ci gui. Chang am shah gui cu Bawiapa Jesuh ah law u netah, “Tuihnim Johan ah ang khahpüi gui la pharisee gui cu ei hlawi ci gui, a i ah kia sei nangah düihpüi gui naw ei kä ami hlawi tu ang?” ci ne ng’shik ci gui. ¹⁹ Bawipa Jesuh naw, “Chumah ciah pamihta ah akhin gui cu, amät awn atäng ah ami om zah ung ei hlawi hning khai gui ang? Chumah ciah pamihta a om ah chuih ei kä hlawi khai gui nei. ²⁰ Cun ung phi ngami ung kaa, cun ah pamihta ng’pai ne ahteh nak ba vai ah hnüüp a gawk law ung, ngami cu ei hlawi khai gui nei. ²¹ A u naw phi sui akheei teek ci cu, tahsa akthai awn kä k’dawn man ci. Cun ah dawn ung sui kheei cu zün ne teek na pi ci. ²² A cun ah mäih ah sapyit tui asü cu um she ung u naw kä than man ci. Um she ung tha ung sapyit tui asü naw um she cu k’poh teek sei sapyit tui la um avan di zawp khai. Sapyit tui asü cu um akthai ung than vai’ ci ne kiak na gui ci. ²³ Kyin hnüüp ung Bawipa Jesuh cu ang düihpüi gui awn atäng ah htanglo gui sun pah ne ami hteh nak ah, ang düihpüi gui naw htang vui gui cu dü ne shui ci gui. ²⁴ Cun hmuk ci gui ah pharisee gui naw, “Teng ä, nang düihpüi gui naw thukhän awn hnungtuk khai ah kyin hnüüp ung bi bik ci gui nei” ci ne Bawipa Jesuh cu kiak nak ci gui. ²⁵ Bawipa Jesuh naw, “David naw amät la ak chang gui cawigha law aih u netah abilawh ah mawng cu kä nami hmat tu man ne ma? ²⁶ Taigütung Abiatha a om zah ung David cu Khanpughi ah pum im ah lut ne, Khanpughi ami khawihnah nak ah, taigütung bäng naw a ei man ah m’htut cu, amät naw ei ne, ak chang gui-am phi m’bei gui ci ah kä kia ne ang?” ci ne kiak na gui ci. ²⁷ Cun kawn ah Bawipa Jesuh naw akhnu ah, “Chang ah ni nakvai ah hmawk ah kyin nak hnüüp cu m’hnüt ah kiak ci, kyin nak hnüüp ah hmawk ah chang cu tüisho ah kä kiak ci. ²⁸ Cun ah kia sei chang ah Htapa cu kyin nak hnüüp ah Bawipa ah kiak ci” ci ne kiak na gui ci.

¹ Cun kawn ah Bawipa Jesuh cu pum im ah hteit ba ci.Cun ah pum im ah akut vangtäng shum ciah chang tumat om ci. ² Cun ung om ciah chang gui naw Bawipa Jesuh ah a kat nak cu hmu hlü u netah, kyin hnüüp ung cun ah akut shuum ciah chang cu a gai sak la kä a gai sak ah teng kheng ci gui. ³ Bawipa Jesuh naw akut shuum ci-am, “Chang gui ah ma ah law ne ng’düi ä” ci ne kiak nak ci. ⁴ Cun kawn ah Bawipa Jesuh naw, “mik mi ah thukhän a i ah mäih ah ang a om? kyin hnüüp ung akni bi vai ang, akshe bi vai ang? chang phiawn sak vai ang, m’di m’dap vai ang?’ ci ne ng’shi gui ci. Ngami cu api ah phi kä chiu ne om ci gui. ⁵ Cun ah chang gui ah shekha m’ghämce ah hmawk ah, Bawipa Jesuh cu thüi ah phi thüi ne, am lung phi she khätah, ngami lam ah ng’hlat ne teng gui netah, akut shuum ciah chang-am, “Na kut cu hei phiäih ä” ci ne kiak nak ci.Ani naw akut hei phiäih khätah akut cu akni ah kia ba ci. ⁶ Pharisee gui cu acun vai-am lut law ba u ne, Bawipa Jesuh cu ngawn vai ah k’bäi ci gui. ⁷ Bawipa Jesuh cu ang düihpüi gui awn atäng ah Kalile tuili pei ah hteit ba u sei, chang khli naw ahnu ah läk lawk ci gui. ⁸ Cun ah chang gui cu Kalile ah kaa gui ni, Judea ah kaa gui ni, Jerusalem ah kaa gui ni, Idumea ah kaa gui ni, Jordan tuinu ah van ga täng ah ka gui ni, Taiah la Sidon ah apei zung ah kaa gui ni ah kiak ci.Cun ah chang gui cu Bawipa Jesuh ah bilawh gui ng’za tu u netah cun ah gawk lawk ci gui ah kiak ci. ⁹ Chang gui da aih u khätah cun ah chang gui naw Bawipa Jesuh cu kä ami müt pah-en vai ah, amät ah phäh ah hleiko ami m’shei peit ge vai ah ang düihpüi gui cu m’cäi gui ci. ¹⁰ Bawipa Jesuh naw gawipai ciah chang akda gai ba sak ci kia sei, gawpai ciah chang gui cu Bawipa Jesuh va tawn khai gui ah vang tawn vük ci gui. ¹¹ Khoshe ah kai gui ah chang gui naw Bawipa Jesuh cu hmu u netah, ama ah ng’dawkphah u ne “Nang cu Khanpughi ah ning Htapa nei” ci ne m’lau ci gui. ¹² Bawipa Jesuh naw mumcha she gui cu, ani a u ah akiak ah mawng m’dang ne kä ami pyein vai ah khän ne k’bäi gui ci. ¹³ Cun kawn ah Bawipa Jesuh cu khomhtung khan ah hang kai netah, ahnu ah läk khai ah ang zak hlü ah chang gui cu khü gui ci. ¹⁴ Ngami cu apei ah gawk law u khätah, chang sing gha-lei-goi cu ghü gui netah, ang düihpüi gui ah ami min cu sui gui ci. Bawipa Jesuh naw, “Kei naw nangmi cu kei awn atäng ah nami om khai ah ka ningghü gui ci, thu nami pyein khai ah ka ning tüi gui khai. ¹⁵ Khoshe nami k’täm nak vai ah huham phi ka ning pe gui khai” ci ne m’cäi gui ci. ¹⁶ Bawipa Jesuh naw a ghü gui ah chang sing gha-lei-goi ah ami ming cu; Simon (Bawipa Jesuh naw Peter ah ang ming asui), ¹⁷ James la anau Johan, Zebedee ah hta goi (Bawipa Jesuh naw Boanerake ah ani ming a sui goi, kho hmum chang ciah ming ci); ¹⁸ Andru, Philip, Bartholome, Matthe, Thomas, James (Alphaeus ahhta), Thaddaeus, Simon (küi khän nak om ci), la ¹⁹ Bawipa Jesuh ga kut ung ap ciah Judas Iskariot ni gui ah kiak ci. ²⁰ Cun kawn ah Bawipa Jesuh cu im ah hteit ba ci.Chang gui akda ng’bum law ba u sei, Bawipa Jesuh la ang düihpüi gui cu ei ami ei nak vai phi akhin kä gah ci gui. ²¹ Chang gui naw, Bawipa Jesuh-am, “gu lawk ci nei” ci ne kia u sei ng’za u netah,Bawipa Jesuh ah ak kyong ung kaa gui cu,ani m‘hteihtang khai gui ah apei ah lawk ci gui. ²² Jerusalem ah kaa lawk ciah thukhän saza am shah gui naw, “Ani cu Beelzebulah naw a kai nei, ani cu khoshe gui ah ng’vai pi ah kia sei a cun ah ming awn khoshe gui cu m’khütnäng ci nei” ci ne pyein ci gui. ²³ Bawipa Jesuh naw ngami cu khü gui netah, m’tumtäng nak awn “A i hawkcha ah khoshe naw khoshe cu k’täm hning khai ang? ²⁴ Chang gui ami m’lung ngaih ng’pai sei ami küüt-neet nak ah kho cu a hei hei ah ng’pai zawp khai nei. ²⁵ Kyong khui ät ung chang gui ami m’lung ngaih ng’pai sei ami küüt-neet ung ami kyong khui cu ng’pai zawp khai nei. ²⁶ A cun ah mäih khoshe gui cun phi ami ng’pai ah a kiak ung, ami kho ng’pyi sei maih khai gui ah kiak ci nei. ²⁷ M’gäi ciah chang cu khit ne pawng cang ci naw vah, a im ung lut ne a khawh cu gut hlawt khai, kä cun ung a u naw kä gut hlawt khai. ²⁸ Kei naw akcang ka pyein cu, chang gui cu ami mät ah kat nak ah khan ah phi bäi, Khanpughi kat na ne ami thu chiu ah khan ah phi bäi, m’geinsei nak om ci. ²⁹ Cun ung phi Mumcha Theing kat nak ciah chang ah khan ah m’geinsei nak kä om ci. A i ah kia sei ci ung ani cu ang täi ah kat nak bik ciah chang ah kiak ci,” ci ne kiak na gui ci. ³⁰ Cun ah Bawipa Jesuh naw a pyein ah mawng cu, chang am shah naw “ani cu khoshe ah kai nei” ci ne ami kiak nak ah hmawk ah kiak ci. ³¹ Bawipa Jesuh ah anu la anau gui cu gawk law u ne, im ah ak pung ah düi u netah, Bawipa Jesuh cu va khü sak gui ci gui. ³² Chang gui naw, Bawipa Jesuh cu k’bui ne ngok ci gui. Ang khü lawk ci gui naw, “Na nu la na nau gui naw, ak pung ah düi ne ning khü ci gui nei” ci ne m’thein ci gui. ³³ Bawipa Jesuh naw, “Kei ah kanu la kanau gui cu a u gui ang?” ci ne kiak na gui ne, k’bui ne ngok ci gui cu teng gui netah, ³⁴ “Kei ah kanu la kanau gui cu a shin gui nei! ³⁵ Khanpughi ah ang zak hlü ah bilo ciah chang phung cu, kei ah nau, kei ah be, kei ah nu ah kiak ci nei” ci ne kiak na gui ci.

¹ Bawipa Jesuh naw Kalile tuili kem ah chang gui cu m’thei thang ba gui ci, Chang khli cu a pei ah law ne ng’bum lawk ci gui. Chang gui da law aih u sei Bawipa Jesuh cu tuili kam ah hleiko ung kai ne ngok ci. ² Chang gui cu tui kem ah ng’düi ci gui. Bawipa Jesuh naw amawng alam akda cu m’tumtäng ne m’theithang gui ci. ³ Cun ah am theithang nak gui ung Bawipa Jesuh naw, “Ngai vä, hnü ät ung m’shi phu ciah chang cu m’shi phu khai ah loma ah hteit ci. ⁴ M’shi a phu law ung m’shi am shah cu lam ung kia law sei kha gui naw ei zawp ci gui. ⁵ M’shi am shah cu m’dek ng’pam ciah lung ah khan ah kia law ne, ak zang ah ang lih pyo law pang ung phi, ⁶ kho ang ling law ung a pya kä khüi ci sei ng’zai ne chawng zawp ci gui. ⁷ M’shi am shah cu ng’hling hmu ah kia law ne, ang lih pyo ung phi ng’hling naw k’düi sei kä vuipai hlawt ci. ⁸ M’shi am shah cu am dek ah ni nak ung kia law ne, akni ah ng’lih pyo ne ghing gong ne, a thumkip, ak chuk-kip, a phia ah vuipai ne m’theih tak ci” ci ne m’thein gui ci. ⁹ Cun kawn ah Bawipa Jesuh naw, “Ng’zak nak vai hnga om ci phung naw ng’za sä” cik ci. ¹⁰ Bawipa Jesuh amät a om zah ung ang düigpüi chang gha-lei-goi la ahnu ah läk lawk ciah chang gui naw am tumtäng nak ah mawng cu ng’shi lawk ci gui. ¹¹ Bawipa Jesuh naw, “Nangmi naw thuuk ne kau ciah Khanpughi ah uknak kho ah mawng cu nami hmat pyi ci. Cun ah kä hmat tu hning ci gui cu m’tumtäng ne m’thein gui ah kiak ci. ¹² A i ah kiak sei ci ung; “Ngami cu teng ne phi kä hmuk ci gui, Ngai ng’za ne phi kä hmat ci gui, Ami teng cu hmu u ne, 2 Ami ng’zak cu hmat u ne, ami kiak vai sü ung, Khanpughi lam ah ng’hlat lawk khai sü gui te, Cun ung ngami ah kat nak phi m’gein gui khai sü te, Ci ah cacim ung om ci” ci ne m’thein gui ci. Gui ci. ¹³ Bawipa Jesuh naw, “Nangmi cu shiî ah m’tumtäng nak hngaw kä nami hmat ung, a i awn m’tumtäng nak nami hmat hlawt khai ang? ¹⁴ M’shi phu ci naw Khanpughi ah ng’thu m’shi cu phu ci. ¹⁵ Chang am shah gui cu lam ung kia lawk ciah geit m’shi awn täng ci gui, Khanpughi ah thu ng’za te ci gui, cun ung phi a cun vai-am khoshe naw lak pe gui zawp ci. ¹⁶ Chang am shah gui cu lung hmu ah kia lawk ciah geit m’shi awn täng ci gui, ngami cu Khanpughi ah ng’thu ami ng’zak vai-am zeikiai ne dou ci gui. ¹⁷ Cun ung phi cun ah ng’thu cu kä khäng htek ne a shäng hta bäng om ci. A cun ah ng’thu ah hmawk ah zaica nak la shedam nak ami bui awt law ung ang ghit ah ng’hlat ba ci gui. ¹⁸ Chang am shah gui cu ng’hling hmu ah kia lawk ciah m’shi awn täng ci gui, Ngami cu Khanpughi ah ng’thu ngai ng’zak ci gui. ¹⁹ Cun ung phi pumsa ah ghin nak vai ah hmawk ah ng’ä ai nak gui, ng’bühmang nak hlü gui, la a hei ng’zak nak hlü gui naw ang thu ng’zak cu shungshet ci gui. Cun ah kia ne kä m’theih tak hlawt ci. ²⁰ Chang am shah gui cu m’dek ni ung kia lawk ciah geit m’shi awn täng ci gui, ngami cu Khanpughi ah ng’thu ngai ng’za u ne dou ci gui ah kiak ci. Ngami cu a thum-kip, ak chuk-kip, a phia ah vuipai m’theih tak ci gui” ci ne m’thein gui ci. ²¹ Bawipa Jesuh naw, “Meidäi cu dawn awn uk vai ah kä kiak ci ih phak ah kaa ah thoi vai ah phi kä kiak ci. Meidäi cu lungk’pei ah khan ah m’däi vai ah kä kia ne ma? ²² Thuh phung dang zawp khai, küm phung cu ng’hmawng zawp khai. ²³ ng’zak nak vai ah hnga om ci phung naw ng’za sä” ci ne kiak na gui ci. ²⁴ Cun kawn ah bawipa Jesuh naw, “Nami ng’zak cu ng’htei khai ah ngai vä! Nangmi naw chang-am nän ne nami peit nak ung, Khanpughi naw nangmi-am nän ne ning pe ba gui khai; Cun ah däm pi khai ah phi nän ne ning k’bäi pe gui khai. ²⁵ Khawh mah ci-am län ne k’be pek khai, a i kä om ciah kaa ak om hta phi lak pe zawp khai. ²⁶ Cun kawn ah mä Bawipa Jesuh naw, “Khanpughi ah uknak kho cu shin ah mäih ah kiak ci, ²⁷ Chang tumat cu loma ah m’shi geit ci. A geit kawn ah mü ah ip ne, hnüüp ah om ne a kiak zah ung, geit m’shi cu m’set law ne ng’lih pyo lawk ci. A i hawkcha ah ang lih pyo law cu ani naw kä hmat ci. ²⁸ Khomdek amät naw ng’lih pyo sak ne vuipai sak ci. Ak htük ung m’guh sak ci, cun kawn ah vuipai sak ci, Cun kawn ah ak htang ah phü ne dang lawk ci. ²⁹ Htang vui a hmin law ung, htang ah vai ah akhin gawk lawk ciah kia sei, chang naw tün ne aat ge ci” ci ne m’thein gui ci. ³⁰ Cun kawn ah Bawipa Jesuh naw, “Khanpughi ah uknak kho cu a i awn m’tumtäng vai ang? A i awn m’tumtäng ne m’dang vai ang? ³¹ Khanpughi ah uknak kho cu anhta ui awn täng ci.Anhta ui cu m’dek ung geit zah ung geit m’shi gui nüng ah zaw pi bäih ci. ³² Geit ung a ghing ghong law kawn ah a hei sing-ghing aläm gui avan ah däm pi ci . Ang ban gui akda ah pang law sei, kha gui naw phi ng’bu tu ne ami ng’zi nak hmuh lawk khai kiak ci” ci ne m’thein gui ci. ³³ A shin ah mäih ah Bawipa Jesuh naw, chang gui naw ami hmat zäi vai awn m’tumtäng ne Khanpughi ah ng’thu cu m’theithang gui ci. ³⁴ kä m’tumtäng ah a i phi kä m’theithang gui ci. Cun ung phi ami mät ami om zah ung ang düih püi gui-am a päng avan cu m’dang ne m’thein gui ci. ³⁵ A cu hnüüp khomü hun lam ah Bawipa Jesuh naw ang düihpüi gui-am, “Tuili ah vantäng ga ah mi vang kat khai” ci ne kiak na gui ci. ³⁶ Ang düihpüi gui cu chang gui nawng shüt u ne, Bawipa Jesuh ah ngoh nak ah hleiko ung kai law tu u sei, vang ga ah vang kat vük ci gui. ³⁷ A hei hleilo gui phi hteit tuk ci gui. Cun zah ung ak ten ah puikho khi ne tuinu ng’hnawk law sei, hleiko ung tui be law hlük ci. ³⁸ Bawipa Jesuh cu hleiko ah ahnu lam ah aknep ah khum ne ip ci. Ang düihpüi gui naw Bawipa Jesuh cu m’tho ba u netah, “Bawipa, mik mi tui ung lut ne mi si lawk khai kiak ci nei kä na hmat tuk ci ma?” ci ne ng’shik ci gui. ³⁹ Bawipa Jesuh cu tho ne ng’düi law netah, “Khokhi aw ng’düm ä, tui hnawk aw kyeim ä” ci ne khämtam ne pyein ci. A cun vai-am kho khi cu ng’düm ne, tui hnawk cun phi kyeim ci. ⁴⁰ Cun kawn ah Bawipa Jesuh naw ang düihpüi gui-am, “A i ah kia sei shin hlawk ah nami kyihkyawk ang? Tuhbäi güt ung nangmi naw, kei cu nami na zum nak kä om ne ma?” ci ne ng’shi gui ci. ⁴¹ Cun zah ung ngami cu ang htei ah kyikyawk u netah, “Shin ah chang cu a u ah mäih chang ang? Khokhi la tui hnawk naw phi ani ah ng’thu cu ngai ci gui nei” ci ne ami mät gui ng’htau ci gui .

¹ Bawipa Jesuh la ang düihpüi gui cu Kalile tuili ah vang ga, Keras kho ah gawk ci gui. ² Bawipa Jesuh hleiko ung kaa a kyum law vai-am, khoshe ah kai chang tumat cu, ng’cim hmun ung kaa lut law ne, ³ Bawipa Jesuh cu hmu lawk ci. Ani cu ng’cim hmun gui ah lung ah om ci. Ani cu a u naw phi m’si gui awn khit ne kä pawng m’khüt ci. ⁴ Ani cu akda vei akut akho m’si gui awn khit ne, ami pawn man te, cun ung phi ami khih nak ah m’si gui düt pit zawp ci ci. Ani cu a u naw pang ne kä am khüt vai ah gaigawng ci. ⁵ Ani cu ng’cim hmun gui ah ng’lung la khomhtung zung ah, amü ak hnüüp viik ne m’lau ne, amät ah sa amät naw lung awn shudeng ne om ci. ⁶ Cun ah chang naw Bawipa Jesuh cu ang shawng ah a hmuh vai-am, dawng law ne ama ah kawp netah, ⁷ “Hlüngtai pibäih ciah Khanpughi ah Htapa, Jesuh Bawipa, Kei cu nang naw a i cha ah ang na na ci hlü?, kä na k’dukdeiu-en na bäi Khanpughi ah ming awn ka ning zoi ci nei” ci ne ng’shan khai ah m’lau ci. ⁸ (Cun ah am lau cu, Bawipa Jesuh naw, khoshe kha, shin ah chang ung kaa lut law ne maih ä’ ci ne khämtam ne ak täm ah phäh ah kiak ci) ⁹ Cun kawn ah Bawipa Jesuh naw, “Nang ming a u ang” ci ne ng’shik ci. Cun ah chang naw, “Kei ka ming cu Mob nei, keimi cu ang htei ah kami da aih ci nei,” ci ne m’thein netah; ¹⁰ ngami gui cu cun ah kho ung kaa kä aktäm gui vai ah ng’huipa ne ng’zoi ci. ¹¹ Cun zah ung khomhtung nawi ah lum ci gui ah vawk mak gui cu om ci gui. ¹² Khoshe gui naw, “Keimi vawk ung kami luh vai ah nam gein gui ä” ci ne ng’zoi ci gui. ¹³ Bawipa Jesuh naw zum khätah, khoshe gui cu, chang ung kaa lut law u ne, vawk gui ung lut ci gui. Phia m’ku vai lawk ciah vawk khli cu tuikam k’täi ung dawng law u ne, tuili ung lut ne di zawp ci gui. ¹⁴ Vawk shäm ci gui cu dawng zawp u ne, gawnu gawhta avan ung a cun ah mawng cu ngak ne pyein ci gui. Cun ah mawng ng’zak ciahchang gui naw law ne teng law tuk ci gui. ¹⁵ Chang gui cu Bawipa Jesuh ah pei ah ami gawk law ung, khoshe ah kai te ah Mob cu, akni ah ng’sui ng’sak ne, chang k’ni ah kia ne ngoh sei hmu u netah, kyikyawk ci gui. ¹⁶ A cun gui hmu tuk ciah chang gui naw, khoshe ah kai te ah chang la vawk gui ah mawng cu, lawk ciah chang gui-am m’thein tu gui ci gui. ¹⁷ Cun ah kia sei chang gui naw, Bawipa Jesuh cu, ami kho ung kaa naw a hei ah a hteh ba vai ah k’thäh ci gui. ¹⁸ Bawipa Jesuh cu hleiko ung a hang kai vü ba zah ung, khoshe ah kai te ah chang naw, ahnu ah läk tuk khai ah pyein ne ng’zoi ci. ¹⁹ Bawipa Jesuh naw maa nah netah, “Na im ah hteit ba ne, Khanpughi naw nang ah khan ah a i hlawk ah bi abi ah mawng la nang a ning m’gein ah mawng cu nak kyong ung kaa gui-am m’thein tu ba gui ä” ci ne kiak nak ci. ²⁰ Cun ah chang cu hteit ba ne Dekapoli kho gawnu gha avan ung hteit ne, Bawipa Jesuh naw ani ak khan ah abi lawh ah mawng gui cu ngak ne pyein ci. Ng’za tuk cia chang gui cu cäicat ci gui. ²¹ Bawipa Jesuh cu hleiko awn tuili vang ga ah vang kat ba khätah, chang gui akda cu a pei ah law ne ng’bum lawk ci gui. ²² Tuikem ung a om zah ung Zairus ming nak ciah pum im uk ciah chang vai tumat cu gawk lawk ci. ²³ Ani naw Bawipa Jesuh cu hmu netah, akho pei ah kawp ne, “Kei ah ka htahnumi hta cu gaw ne si law ge vai ci nei, na bä ni, law ne ak khan ah na kut taih ne, nak taigü law pe ä, cun ung gai ba ne ghing ba khai nei” ci ne ng’huipa ne ng’zoi ci. ²⁴ Cun ah kia sei Bawipa Jesuh cu Zairus awn atäng ah hteit tuk ci. Chang khli naw a hnu ah läk law u ne, Bawipa Jesuh cu net hngaw ne hteit ci gui. ²⁵ A cun zah ung kho kum gha-lei-goi ung asi ng’chawt sei gaw ciah hnumi tumat om ci. ²⁶ Ani cu seibawi akda naw phi ami m’htei tu khit, a khawcham akda ng’pyi khai ah phi ng’pün khit ci, cun ung phi kä gai hlawt ne ka law piktäi ci. ²⁷ Cun ah hnumi cu Bawipa Jesuh ah amawng ng’za tu netah, ²⁸ “Bawipa ah a sui pang ka tawn ung ka gai khai” ci ne, amät ng’htau ne, chang gui ah ng’lung ah ng’tawn tu ne, Bawipa ah hnu ah gawk lawk netah; ²⁹ Bawipa Jesuh ah asui cu va tawk ci, a cun vai-am asi cu kik ne a gaw nak maih sei a gai ah mawng cu ang ghit ah hmat ci. ³⁰ A cun vai-am Bawipa Jesuh naw amät ung ahuham lut lawk ciah hmat netah, chang gui lam ah ng’hlat ne, “Kei ah ka suinu a u naw ang a tawn” ci ne ng’shi gui ci. ³¹ Ang düihpüi gui naw, “Nang ning tawn ne, ning net ne, hteit ciah chang khli cu hmu lang ne, Kei u naw ang a na tawn’ ci ne na na ng’shi gui ci ma?” cik ci gui. ³² Cun ung phi Bawipa Jesuh naw, a u naw a tawn ah a hmat vai ah mang shüi ne teng ci. ³³ A suinu tawn ciah hnumi cu amät ah gai ah mawng hmat netah, ng’khlet ne kyi ne, ama ah law ne kawp netah, amawng avan akcang cu m’thein zawp ci. ³⁴ Bawipa Jesuh naw, “Kahta hnumi na zum nak naw ning gai sak pyi ci, dimdeeih nak awn hteit baä, na kat nak maih zawp sä” ci ne kiak nak ci. ³⁵ Cun zah ung Zairus ah im ah kaa chang gui cu law u netah, “Na hta hnumi si pyi ci nei, Bawipa kä khü ling ä” ci ne kiak nak ci gui. ³⁶ Bawipa Jesuh naw cun ah ami pyein law cu ng’za netah, “Kä ng’ä ai zä, a zum bäng ah zum ä” ci ne pum im uk ciah ang vai-am kiak nak ci. ³⁷ Cun kawn ah Peter, James la anau Johan gui bäng khah püi gui ne hteit ci. ³⁸ Zairus ah im ah ami gawk ung chang gui cu, kyap ne m’lau ci ni, cäicat ui cai ci ni ah kiak ci gui. ³⁹ Bawipa Jesuh cu im kyong ah va lut netah, cun ah chang gui-am, “a i ah kia sei nami ung-cang dük-chaak ang? A i ah kia sei nami thüi kyah ang? Shin ah hnumi hta cu sik ciah kä kiak ci, ip ci nei” ci ne pyein ci. ⁴⁰ Cun ci khätah chang gui naw Bawipa Jesuh cu päipih ci gui. Bawipa Jesuh naw chang gui avan ak pung ah hteh sak gui netah, cun ah hnumi hta ah anu la apa ni, ang düihpüi chang sing thum bäng khü gui ne, hnumi hta ami m’shän nak ah kyong ah va lut ci gui. ⁴¹ Bawipa Jesuh naw hnumi hta cu akut ung k’pang netah, “Talitha, koum” ci ne kiak nak ci (Cun cu hnumi hta, na thawh law vai, kei naw ka pyein ci, a ci ah kiak ci). ⁴² Bawipa Jesuh naw cun a ci vai-am, hnumi hta cu tho law ne hteit ci. (Cun ah hnumi hta cu akho kum gha-lei-goi lawk ci), Cun hmu netah chang gui cu ang htei ah cäicat ci gui. ⁴³ Bawipa Jesuh naw, “Shin ah amawng cu a u-am phi kä nami m’thein-en vai” ci ne ak tung ah khän gui netah, “hnumi hta-am ei m’bei vä” ci ne kiak na gui ci.

¹ Bawipa Jesuh cu ang düihpüi gui awn atäng ah acun ung kaa ng’düi law ba u ne; amät ah pigaw ah gawk lawk ci gui. ² Kyin hnüüp ung Bawipa Jesuh naw pum im ah hteit ne m’theithang gui ci. Cun ah am theithang gui cu ng’za u netah chang gui cu cäicat u ne, “Shin ah chang naw shin ah hmuhmat nak a hawi kaa ang a gah? Ani ah hmuhmat nak cu a i hmuhmat nak ang? Cäi aih vai gui mä a i hawkcha ah am dang hning ang? ³ Shin ah chang cu Mari ah hta, im co ciah chang, James, Josef Judas la Simon ni ah ami phäi ah kä kia ne ang? Ani be gui phi mi pigaw chang gui ah maw? ” ci ne ami mät ng’htau ci gui. Cun ah kia sei ngami naw Bawipa Jesuh cu maa nak ci gui. ⁴ Bawipa Jesuh naw, cun ah chang gui-am, “Profet cu amät ah pigaw, amät ah mätzah, amät ah kyongkhui ah kawn ah, a hawi phi chang m’sui nak om ci nei” ci ne kiak na gui ci. ⁵ Bawipa Jesuh cu cun ah pigaw ung gawpai ci gui api akut taih ne a gai sak gui ah kawn ah cäi aih vai a i phi kä m’dang hning ci. ⁶ Bawipa Jesuh cu ngami ung zum nak kä a om ah phäh ah cäi ng’ä ci. ⁷ Cun kawn ah Bawipa Jesuh cu apigaw ah pei ng’et zung pigaw gui ah hteit ne m’theithang gui ci. Ang düihpüi gha-lei-goi cu khü gui netah, sing goi ci ah ng’khap sak gui ne, pigaw gui ah tüi gui ci. Ngami-am khoshe m’khütnäng nak ah huham phi ap gui ci. ⁸ Cun kawn ah Bawipa Jesuh naw, “Nami hteh nak ah ng’sho pawng ah kawn ah a i phi kä nami hteh püi vai, sho ei, ng’za k’bah, ngui ng’ip gui a i phi kä nami hteh püi vai. ⁹ Phahnak nami ng’cum vai, cun nung phi k’htu ng’zung kä nami m’shawih vai. ¹⁰ A i pigaw ah phi nangmi ning dou gui htük ciah im cu, kä nami ng’plon taak vai. Kä nami hteh ba pha ah chuih a cun ah im ung nami om tu vai. ¹¹ Nangmi ning maa na gui ciah pigaw ung kä nami om tu vai. Nami ng’thu kä ngai ciah chang gui nami hteh taak gui vai. Cun ah nami hteh taak gui ung nami kho pha ung kaa, m’vut nami khawn shüt vai, cun cu ngami ah hmawk ah ng’thu m’shi nami sho shüt ah kiak khai” ci ne m’cäi gui ci. ¹² Ang düihpüi gui cu hteit u ne chang gui ami kat nak ung kaa ami ng’zu ba vai ah ng’thu pyein ci gui. ¹³ Khoshe akda phi k’täm ci gui. Gawpai ciah chang akda cu khitui awn hluk ne gai sak ci gui. ¹⁴ Bawipa Jesuh ah amawng cu kho nüng ung thang law sei, Herod ghangpughang naw phi ng’za tuk ci. Chang am shah naw Bawipa Jesuh-am, “Tuihnim Johan sih nak ung kaa tho ba ci nei, cun ah kia ne cäi aih vai gui phi m’dang ci nei” ci ne kiak ci gui. ¹⁵ Chang am shah naw ani cu, “Elijah nei” cik ci gui. Chang am shah naw, “ani cu, cäu profet gui man ah mäih ah kiak ciah profet nei” cik ci gui. ¹⁶ Herod naw Bawipa Jesuh ah bilawh gui ah amawng cu ng’za netah, “Ani cu Tuihnim Johan nei, kei naw alu kam chün te tuhbäi ghing ba pyi ci nei” cik ci. ¹⁷ Herod naw anau Philip ah chu Herodias cu gut ne akchu nak ah mawng ung Johan cu pha ne thawng ung a chum ah kiak ci. ¹⁸ John naw, Herod-am, “Na nau ah chu gut ne nak chu nak cu, kä bä ci nei” ci ne a pyein tu laih laih ah hmawk ah kiak ci. ¹⁹ Cun ah kia sei Herodias naw, Johan cu ang htei ah ngawn hlük ci, cun ung phi kä ngawn hlawt ci. ²⁰ Johan cu chang k’ni la chang theing ah a kiak ah mawng cu Herod naw hmat netah, ani cu kyih ne akni ah om sak ci. Herod cu Johan ah ng’thu pyein ang zak tu päng ung, am lung kyong cäi ng’ä ne a kiak pang ung phi, zeikiai ne ngai tu hlük ci. ²¹ Herod ah ng’tüi nak hnüüp ung Herodias ah bi bi nak hlü ah lam cu ng’dang lawk ci. Cun ah hnüüp ung Herod naw, Kalile kho ung kaa bawi ng’vaipi gui, gakap bawi gui, la mangpa gui nüng cu khü gui ne, mü-ei aktung ah piang m’tham ne khin na gui ci. ²² Cun ah mü-ei ami ei nak ung, Herodias ah hta hnumi cu law ne akni akiom ah ng’lam ci. Cun ah kia sei Herod la akhin gui cu ang htei ah zeikiai u netah, ghangpughang naw cun ah hnumihta-am, “Nam hni a i phi nang zoih vai, kei naw ka ning pek khai nei, ²³ Kei naw ka uk nak ah kho a teih phi k’bou ne ka ning pek khai nei” ci ne ng’thu khän ne pyein ci. ²⁴ Cun ah hnumi hta cu anu ah va dawng ba netah, “kei naw a i ang kang zoih ung ani kaw” ci ne vang shi ba ci. Anu naw, “Tuihnim Johan ah alupum ng’zoi ä” ci ne kiak nak ci. ²⁵ Hnumi hta cu a cun vai-am ghanpughang ah ma ah dawnglaw ba netah, “Tuihnim Johan ah lupum cu tawnglawng ung m’khäp netah atuhbäi na na peit vai ka zum ci nei” ci ne pyein ci. ²⁶ Cun ng’za netah ghangpughang cu ang htei ah a zä ci, cun ung phi khin gui khli ah ma ah, ng’thu khän ne a pyein pyi ah kia sei, kä peit ah kä om hlawt ci. ²⁷ Cun ah kia sei Johan ah lupum law püi khai ah gakap tumat cu tüi ci. Gakap naw thawng kyong ah hteit ne Johan ah lupum cu m’chün ci. ²⁸ Cun kawn ah tawnglang ung m’khäp ne law püi, khätah, cun ah hnumi hta-am pek ci gui, cun kawn ah ani naw anu-am pe ba mä ci. ²⁹ Johan ah ang khah püi gui naw cun ah amawng cu ng’za u netah, law u ne Johan ah a gook cu k’phuh ne m’cim ci gui. ³⁰ Ang düihpüi gui cu Bawipa Jesuh ah law ba u ne, ami bilawh gui la ami m’theithang gui cu pyein law ba ci gui. ³¹ Cun zah ung chang khli gui cu hteithton lut lang ne kia u sei, Bawipa Jesuh la ang düihpüi gui cu ei ami ei vai phi akhin kä gah ci gui. Cun ah kia sei Bawipa Jesuh naw, “Mik mi a u ah kä om nak ah hteit ne ashäng ming düm cang khai nei” ci ne pyein sei, ³² Bawipa Jesuh la ang düihpüi gui cu, ang thuh nak lam ah hleiko awn pawng ne hteit ci gui. ³³ Cun ah ami hteh cu chang gui naw hmu gui u netah, Bawipa Jesuh la ang düihpüi gui ah hmat gui ci gui. Cun ah kia sei apigaw päng ung kaa lawk ciah chang gui cu, Bawipa Jesuh ah hteh nak vai lam ah, ng’zung lam ung ak zang ah ana ma u ne, Bawipa Jesuh la ang düihpüi gui kä gawk pha u sei, ana gawk ci gui. ³⁴ Bawipa Jesuh cu hleiko ung hang kai netah, chang khli cu hmu gui ci. Chang gui cu htoshäm kä om ciah hto gui ah mäih ah kia u sei m’gein gui netah, ng’Thu Ni akda cu pyein ne m’theithang gui ci. ³⁵ Khomü hun law khätah ang düihpüi gui cu Bawipa Jesuh ah pei ah law u netah, “Tuhbäi khomü law pyi ci, ³⁶ Shin zah ah chang a u phi kä om ci, ei awk vai khleih khai gui ah pigaw imlo zung ah chang gui cu tüi gui ä” ci ne pyein ci gui. ³⁷ Bawipa Jesuh naw, “Nangmi nami mät naw shin ah chang gui ei m’bei gui vä” ci nekiak na gui ci. Ang düihpüi gui naw, “Keimi naw tangka phia goi phu, ei vai khleih ne shin ah chang gui-am kami m’bei gui vai ma?” ci ne ng’shi ba ci gui. ³⁸ Bawipa Jesuh naw, “Nangmi ung ei vai m’htut a i chü ang a om, hteit ne teng ba vä” ci ne kiak na gui ci. Ngami naw hteit ba ne ei vai hmuh u netah, “M’htut pum hma la nga pahnih om ci nei” ci ne pyein ba ci gui. ³⁹ Bawipa Jesuh naw ang düihpüi gui-am, chang gui cu kho adou nak ung ang bum phäh phäh ah ami ngoh sak gui vai ah m’cäi gui ci. ⁴⁰ Chang gui cu hma-kip ni, phia ni ah ang bum phäh phäh ah ngoh sak gui ci gui. ⁴¹ Cun kawn ah Bawipa Jesuh naw m’htut pum hma la nga pahnih cu la netah khankho dang ne Khanpughi ah bämang nak cu m’hlüng tai ci. Cun kawn ah m’htut cu k’bou ne chang gui-am ami tei gui vai ah ang düihpüi gui-am pe gui ci. A cun ah nga pahnih cun phi ang düihpüi gui-am pe gui ci. ⁴² Chang gui ami van naw ami phü ciah ei ci gui. ⁴³ Cun kawn ah ang düihpüi gui naw m’htut la nga ami ei ah ak pawih cu, m’dawn ba u sei them dawn ung a gha-lei-goi lawk ci. ⁴⁴ Cun ung ei tuk ciah chang pami ng’vai bäng cu phia hma-kip lawk ci. ⁴⁵ Cun kawn ah Bawipa Jesuh naw chang gui cu ami im ah tüi ba gui netah, a cun vai-am ang düihpüi gui cu hleiko ung kai ba sak gui ne, tuili ah vang ga Bethsaida ah heik hma ba gui ci. ⁴⁶ Bawipa Jesuh cu chang gui gidam gui shüt netah taigü khai ah khomhtung ah kai ci. ⁴⁷ Kho amü hun law zah ung ang düiphüi gui ah hleiko cu tuili lai ah om ci. Bawipa Jesuh läi cu amät kawng ah om shüt ci. ⁴⁸ Hleiko khan ah kho naw ng’pheet ne khi gui sei, ami zaica cu hmu gui netah Bawipa Jesuh cu tui khan ah m’khan ne hteit ne ami om nak ah lawk ci. Cun ah akhin cu ai khon htük ah kiak ci. Bawipa Jesuh cu ami pei ah phlän gui ne hteit khai ah pawng ci. ⁴⁹ Ngami naw tui ah khan ah Bawipa Jesuh ahteh cu hmu u netah, ⁵⁰ m’cha ah ngai u ne, kyi ne m’lau ci gui. A cun vai-am Bawipa Jesuh naw, “Kä ng’ä vä, kä kyikyawk vä, kei nei” ci ne kiak na gui ci. ⁵¹ Cun kawn ah ami om nak hleiko ah khan ah hang kai tuk ci. Ang düihpüi gui cu ang htei ah cäicat ne ngaih tüh khit ci gui. ⁵² A i ah kia sei ci ung, Bawipa Jesuh naw m’htut am bei gui zah ung ami hmuh te ah cäicat vai ah amawng cu kä ami hmat ah hmawk ah kiak ci. Ngami ung cun ah mawng hmuhmat nak hlawt vai a i kä om ci. ⁵³ Bawipa Jesuh la ang düihpüi gui cu tuili vang ga ah vang kat u ne, Kennesaret ah ami hleiko m’düm ci gui. ⁵⁴ Ngami hleiko ung kaa ami kyum law vai-am chang gui naw Bawipa Jesuh cu hmat ba ci gui. ⁵⁵ Apigaw päng avan ung dawng shüi shüi u ne, gawpai ci gui cu shui u netah, Bawipa Jesuh ah gawk nak vai ah ami ngaih nak päng ah, ak gaw gui cu kawt ne law püi ci gui. ⁵⁶ Bawipa Jesuh a hteh nak vai ah gawnu gui, lo gui la lam gui nüng ung ak gaw gui cu m’shän gui ci gui. A suinu ah pyai mawng hta pang ami tawn tu hlawt vai ah ng’coipa ne ng’zoi ci gui. Va tawn tu hta hlawt ciah chang phung cu ang ghit ah gai ci gui.

¹ Pharisee gui la Jerusalem ah kaa lawk ci gui ah thukhän saza gui naw, Bawipa Jesuh cu veing ne k’bui ci gui. ² Cun zah ung ang düihpüi gui naw ami kut kä theingthap ci awn ei ami ei cu hmuk ci gui. ³ Pharisee gui la Jew chang gui cu pupa gui ah thungzo läk ci gui ah chang gui ah kiak ci. Ami kut m’za avan kä ami m’si ung ei kä ei man ci gui. ⁴ Ei vai ami khleih ung phi m’si züm züm netah ei ci gui. Um k’am koi m’zak gui m’si m’säi nak ung tün ne pupa gui ah thungzo cu läk ci gui. ⁵ Cun ah kia sei pharisee gui la thukhän saza gui naw, “A i ah kia sei nang düih püi gui naw pupa gui ah thungzo kä läk u ne, ami kut kä m’si ah ei ami ei ang?” ci ne Bawipa Jesuh cu ng’shik ci gui. ⁶ Bawipa Jesuh naw, “Nangmi ah mawng profet Isaiah naw a pyein cu bä ne ng’khän ci nei Nangmi cu thuvi ciah chang gui nei, Cun ah kia sei Isaiah naw nangmi ah mawng a guk cu; “Shin ah chang gui naw kei cu, ami m’gawng shai awn nam hlüngtai ci gui nei, Cun ung phi ngami ah m’lung kyong cu, Kei awn ng’shawng aih ci nei. ⁷ Ngami naw kei ah ami taigü cu A kholä ah kiak ci nei. A i ah kia sei ci ung ngami naw chang ah Pian ah thukhän gui cu, Khanpughi ah thukhän ah mäih ah m’theithang ci gui nei” ci ah kiak ci nei. ⁸ Nangmi cu Khanpughi ah thukhän nawng-en u ne, chang ah thungzo m’theithang düt cu nami läk ci nei” ci ne kiak na gui ci. ⁹ Cun kawn ah mä Bawipa Jesuh naw, “Nangmi naw nami mät ah m’theithang nami läk hlawt vai ah Khanpughi ah thukhän cu, k’phiui hnawk ne nami theileh aih ci nei. ¹⁰ Moses naw ang thukhän ung, “Nanu la napa cu nak chang m’sui goi vai, anu pa züigen ciah chang cu sih nak ung hteit sä,” ci ne pyein ci. ¹¹ Cun ung phi nangmi naw chang tumat cu anu pa am htei nak vai khawhcham a om ah a kiak ung, “cun cu Corban” (Khanpughi naw a khäm pyi) ah a kiak ah khoi ung, ¹² ani naw anu pa am hteihtang vai kä hlü ba khai” ciah nami m’thei thang ci. ¹³ A cun ah nangmi naw nami thungzo gui bäng bäng ng’dou ne nami m’theithang nak awn Khanpughi ah thukhän cu nami m’shet ci. A cun ah mäih ah ahei thungzo gui phi nangmi naw akda nami läk ba ci” ci ne kiak na gui ci. ¹⁴ Cun kawn ah Bawipa Jesuh naw chang gui cu apei ah khü ba gui netah, a pyein ba mä cu, “Kei ah ng’thu cu nami van naw ngai ne, hmat zawp vä. ¹⁵ Ak pung ah kaa chang ung lut ci naw, chang cu kä shetkat sak hlawt ci, chang ah puk kyong ung kaa lut lawk ci naw chang cu shetkat sak ci. ¹⁶ (Ak hnga om ci naw ng’za sä) ci ne kiak na gui ci. ¹⁷ Cun kawn ah Bawipa Jesuh cu chang gui ah ng’lung ah kaa ng’düi law ba ne, kyong ah lut ba khätah, ang düihpüi gui naw am tumtäng nak ah mawng cu am thein gui vai ah ng’shik ci gui. ¹⁸ Bawipa Jesuh naw, “Nangmi shin hlawk hngaw kä nami hmat hlawt ci ma? ¹⁹ Ak pung lam ah kaa chang ah akyong ah lut ci phung cu chang ah m’lung kyong ung kä gawk hlawt ci, chi-khawn ung gawk netah pumsa ah ak pung ah lut law ba zawp ci. Cun ah kia sei chang ah pumsa kyong ah zulut vük ci naw chang kä shetkat sak hlawt ci, ci cu kä nami hmat ci ma?” ci ne kiak na gui ci. (shin ah a pyein nak ung ei man gui phung cu avan ei vai ciah am dang nak ah kiak ci). ²⁰ Cun kawn ah mä Bawipa Jesuh naw, “Chang ah puk kyong ung kaa lut lawk ci naw chang cu shetkat sak ci. ²¹ Chan ah pukhui m’lung kyong ung kaa shetkat ciah ngaih tüh nak gui cu lut lawk ci;cun gui cu ng’zo ng’pawm hlü nak, m’guk nak, chang ngawn nak; ²² chang ah chu chang ah hta kat püi nak, ng’zak hlü aih nak, nget ngawng nak, hleei hlak nak, ng’zak hlü düt ah om nak, m’thüimkhang nak, chang ah ming m’shet nak, chang ah ng’shei nak, gu-ang nak, gui ah kiak ci. ²³ Shin ah shetkat nak gui nüng cu chang ah puk kyong ung kaa lut lawk ciah kia ne, chang cu shetkat sak ci” ci ne m’thein gui ci. ²⁴ Bawipa Jesuh cu cun ung kaa Taiah gawnu ah hteit ci. Cu ah a gawk ung im tumat ah kai netah, ani a gawk ah mawng a u naw phi a hmat vai kä ng’za hlük ci. ²⁵ Cun ung phi ng’thup ne kä om hlawt ci. Ahta hnumi khoshe ah kai ah hnumi nu tumat cu, Bawipa Jesuh a gawk law ah mawng ng’za tu netah, a cun vai-am dawng law ne a kho pei ah kawp lawk ci. ²⁶ Ani cu Siria kho Phoenicia gawnu ung kaa Karik hnumi ah kiak ci. Ani naw ahta hnumi ung kaa khoshe cu, Bawipa Jesuh naw ak täm peit vai ah law ne ng’huipa ci. ²⁷ Bawipa Jesuh naw, “Hta hmaw gui cu ak htük ung phü khai gui ah m’bei gui vai kiak ci, hta hmaw gui ah ei vai sü la ne, ui-am kä vuh vai nei” ci ne kiak nak ci. ²⁸ Cun ah hnumi naw, “Bawipa, cun cu hman ci nei, cun ung phi hta hmaw gui ah k’book theh, ei dawn ka ah ng’zaih ci cu, ui gui naw ei tu man ci gui nei” ci ne pyein tu ba ci. ²⁹ Cun ci khätah Bawipa Jesuh naw, “Nang naw cun ah nam hlan tu ba cu bä ci nei, na im ah hteit baä, na hta ung kaa khoshe cu dawng pyi sei na hmuk khai nei” ci ne kiak nak ci. ³⁰ Cun ah hnumi nu cu a im ah hteit ba netah, a hta hnumi hta ung kaa khoshe cu dawng pyi sei, ani cu adüm hta ah ng’zän ne ip sei hmuk ci. ³¹ Bawipa Jesuh cu Taiah gawnu ung kaa pawng ba ne Sidon gawnu la Dekapoli kho gawnu gha cu sun ba pah ne Kalile tuilinu ah gawk ba ci. ³² Chang gui naw pang ne ang ciah chang tumat cu law püi u netah, “Ani ah khan ah na kut taih pe ä” ci ne ng’zoi ci gui. ³³ Bawipa Jesuh naw chang gui ah ng’lung ah kaa cun ah chang cu chang ah kä om naë ah khü netah, ak hnga khui ah akut m’dawng awn hei tawk ci. Am shi awn m’thawh ne am lei phi tawk pek ci. ³⁴ Cun kawn ah khan mawpi dan ne, “Ephphatha” ci ne pyein ci, cun cu “Ng’lang sä” a ciah kiak ci. ³⁵ A cun vai-am cun ah chang cu ak hnga ng’lang ne am lei düng law sei, akni ah htu law thei ci. ³⁶ Bawipa Jesuh naw cun ah amawng gui cu, a u-am phi kä ami m’thein-en vai ah m’zih sak gui ci. Cun ah Bawipa Jesuh naw m’zih sak gui sei phi, chang gui naw acun ah mawng cu pyein law pi k’täi ci gui. ³⁷ Cun ah a mawng ng’za tuk ciah chang gui cu ang htei ahcäicat u netah, “Bawipa naw a päng avan cu düng khai ah bi pyi ci nei, ak hnga pang ci gui ng’lang sak gui ne, awng ang ci gui ng’thu thei sak gui ci nei” ci ne pyein aih ci gui.

¹ Kä shou pha sei chang khli cu ng’bum law ba ci gui. Cun ah chang gui ami ei vai kä om khätah; ² Bawipa Jesuh naw ang düihpüi gui khü gui netah, “Shin ah chang gui cu kei awn atäng ah kho hnüüp thum om lawk ci gui kia ne ami ei vai kä om ba ci. Cun ah kia sei kei naw kam gein gui ci. ³ Chang am shah gui cu lam a shou nak ah kaa lawk ci gui, ngami cu a i kä m’bei gui ah tüih ba gui ung, lam ah cawi ne ng’zän zawp khai gui nei” ci ne pyein ci. ⁴ Ang düihpüi gui naw, “Shin ah bungnu ah chang shikchü am m’bei vai, ei vai a hawi gah vai ang?” ci ne ng’shi ba ci gui. ⁵ Bawipa Jesuh naw, “Nangmi ung m’htut a i chü ang a om” ci ne ng’shi gui ci. Ang düihpüi gui naw, “M’htut pum chih om ci nei” ci ne pyein ci gui. ⁶ Bawipa Jesuh naw chang gui cu m’dek ung ngok sak gui netah, m’htut pum chih cu la ne, Khanpughi m’hlüngtai netah, m’htut cu k’bou ne chang gui-am ami tei gui vai ah ang düihpüi gui-am pe gui ci. Ang düihpüi gui naw chang gui-am tei gui ci gui. ⁷ Ngami ung nga phi api om ci. Bawipa Jesuh naw Khanpughi m’hlüngtai netah, nga cun phi chang gui-am ami tei gui vai ah ang düihpüi gui cu täk gui ci. ⁸ Chang gui ami van naw ami phü ah ei ci gui. Ami ei ah pawih gui cu them dawn chih ung k’bum ne m’khäp ci gui. ⁹ M’htut ei ciah chang gui cu phia phli-kip lawk ci gui. Bawipa Jesuh naw cun ah chang gui cun ung kaa tüi ba gui ci. ¹⁰ A cun vai-am amät cu ang düihpüi gui awn atäng ah hleiko ung kai ba ne, Dalamanutha kho ah hteit ci gui. ¹¹ Pharisee am shah gui cu law u netah, Bawipa Jesuh cu ng’kütneet ne ng’cuhcan püi ci gui. Ngami naw ami thuvi nak awn, “Khanpughi naw a ning m’hni nak saksi dang khai ah cäi aih vai tumat cu m’dang law shüm ä,” ci ne thäh ci gui. ¹² Bawipa Jesuh naw ngai shäng netah, “Tuhchü chang gui naw a i ah kia sei cäi aih vai ami thäh ang? Kei naw akcang ka pyein cu, shin ah chang gui-am, cun ah cäi aih vai gui cu, kä m’dang gui vai nei” ci ne kiak na gui ci. ¹³ Bawipa Jesuh cu cun ung kaa ng’düi law ba ne, hleiko ung kai ba netah, tuili vang täng ga ah vang kat vü ba ci. ¹⁴ Ang düihpüi gui naw hleiko khan ah ei vai akda kä law püi ah m’htut pum ät bäng law püi ci gui. ¹⁵ Bawipa Jesuh naw, “Nang mi naw Pharisee gui ah k’caw la Herod ah k’caw cu geing nah ne nami hlawi vai nei” ci ne ang düihpüi gui cu m’cäi gui ci. ¹⁶ Ang düihpüi gui cu ei vai kä ami shaw a mawng pyein ne ami mät ng’cengcäk ci gui. ¹⁷ Cun ah ami ng’cengcäk cu Bawipa Jesuh naw hmat gui netah, “Nangmi naw ei vai kä nami shaw ah mawng cu a i ah kia sei nami pyein ang? Tuhgüt kä nami hmuhmat phak ci ma? A i ah kia sei nami m’lung hnga a pang aih ang?. ¹⁸ Nami mik om lang sei kä nami hmuk ci ma? Nami hnga om lang sei kä nami ng’zak ci ma? ¹⁹ Kei naw chang phia hma-kip-am m’bei vai m’htut pum hma kak bou cu kä nami shüm ba ci ma? Cun ung m’htut ak pawih gui them dawn ung a i chü ang nami kaw ba?” ci ne ng’shi gui ci. Ang düihpüi gui naw, “them dawn unç a gha-lei goi ah kami kaw ba ci nei” cik ci gui. ²⁰ Cun kawn ah Bawipa Jesuh naw, “Kei naw chang phia phli-kip-am m’bei vai m’htut pum chih kak bou zah ung, m’htut ak pawih cu dawn a i chü ung ang nami kaw ba?” ci ne ng’shi ba gui ci. Ang düihpüi gui naw, “Them dawn ung ak chih ah kami kaw ba ci nei” cik ci gui. ²¹ Bawipa Jesuh naw, “Cun ah kia lang sei nangmi cu tu ä güt a i kä hmuhmat ne nami om ci ma?” ci ne ng’shi gui ci. ²² Bawipa Jesuh la ang düihpüi gui cu Bethsaida pigaw ah gawk lawk ci gui. Cun zah ung chang gui naw a mik m’dauh tumat cu law püi u netah, ani cu akut awn tawk ne a gai sak vai ah ng’zoi ci gui. ²³ Bawipa Jesuh naw a mik m’dauh cu akut awn k’pang ne pigaw k’pung ah hteh püi ci. A cun ah mik cu am shi awn m’thawh netah, ak khan ah akut taih ci. Cun kawn ah, “Tuhbäi na hmuk ci ang?” ci ne ng’shik ci. ²⁴ Ani naw täu law netah, “Kei cu chang gui ka hmuk ci nei, ngami cu sing ghing gui awn täng ci gui, cun ung phi hteit hton ci gui” ci ne ptein ci. ²⁵ Cun kawn ah Bawipa Jesuh naw ani ah mik khan ah akut taih ba mä ci. Cun kawn ah ani cu k’tha na ne m’dei khätah amik cu m’dei law sei, a i phi ng’htei khai ah hmu lawk ci. ²⁶ Bawipa Jesuh naw ani cu, “Pigaw ng’lung ah kä na hteh-en ba vai” ci ne m’cäi netah, a im ah tüi ba ci. ²⁷ Bawipa Jesuh la ang düihpüi gui cu Caesarea Philippi pigaw zung ah hteit shüi ci gui. Lam ami hteh zah ung Bawipa Jesuh naw, “Chang gui naw kei cu a u ah ka kiak ciah ang, ami pyein, pyein vä,” ci ne ang düihpüi gui cu ng’shi gui ci. ²⁸ Ang düihpüi gui naw, “Chang am shah naw nang cu; Tuihnim Johan nei cik ci gui, chang am shah naw,’Elijah’ nei cik ci, chang am shah naw ’profet tumat nei’ cik ci” ci ne pyein ci gui. ²⁹ Bawipa Jesuh naw, “Nangmi naw mä kei cu a u ah ang nami na ngaih” ci ne ng’shi gui ci. Peter naw, “Nang cu Messiah nei” ci ne ng’kiaa ne pyein ci. ³⁰ Cun kawn ah Bawipa Jesuh naw, “Kei a u ah ka kiak ah mawng cu a u-am kä nami m’thein-en vai nei” ci ne khän ne m’cäi gui ci. Mawng Pyein ci. ³¹ Cun kawn ah Bawipa Jesuh naw ang düihpüi gui-am, “Chang ah Htapa cu zaica nak akda bui awt khai, chang ng’vaigui, taigüpa gui la thukhän saza gui naw hnu ng’tuk püi khai gui. Ani cu ngawn khai gui, cun ung phi ak hnüüp thum hnüüp ung tho ba ne ghing ba khai” ci ne m’thein thang gui ci. ³² Cun gui cu Bawipa Jesuh naw akdei dang ah m’thein gui ci. Cun ah kia sei Peter naw Bawipa Jesuh cu ang thuh nak ah khü netah, m’kat ne ng’thu püi ci. ³³ Bawipa Jesuh naw ang düihpüi gui cu teng gui netah, Peter- am, “Nang khoshe a hei ah hteit ä, nang ah ngaih tüh cu Khanpughi ung ka lawk ciah kä kiak ci, chang ung ka lawk ciah kiak ci” ci ne k’she na ne m’cäi ci. ³⁴ Bawipa Jesuh naw ang düihpüi gui la chang khli gui cu a pei ah khü gui netah, “Kei ah chang ah kia hlük ciah chang naw, amät ah hmawk cu nawng ne, amät ah kutlamtung kawt ne, ka hnu ah ana läk vai. ³⁵ Amät ah hnun gui k’phiawn hlük ciah chang cu dimaih khai, kei la ThuNi ah hmawk ah a hnun gui pek ciah chang cu hun nak gah khai. ³⁶ Chang cu khomdek khan avan a uk ung phi, a hnun gui adi maih ung ninak bänak a i om khai zaw? ³⁷ Amät ah hnun gui ghin nak adi maih ung a i awn m’thawng ba hlawt khai-aw? ³⁸ Khanpughi kä shüm ne shetkat nak ah tuhchü akhin ung, kei ah hmawk la kei ah m’theithang ah hmawk ah lü ng’a ciah chang cu, Apa Khanpughi ah bämang nak awn, chang ah Htapa, khan chang theing gui naw ’kiuung u sei a kyum law ba hnüüp ung ani ah hmawk ah lü ng’a nak om khai nei” ci ne kiak na gui ci.

¹ Cun kawn ah Bawipa naw, “Kei naw akcang ka pyein cu, hlüngtai nak awn Khanpughi ah uk nak kho gawk law sei, kä ami hmuh phaa ah chuih, shin ah kho ung om ciah chang am shah gui cu kä sik khai gui nei” ci ne kiak na gui ci. ² Cun ung ka naw hnüüp chuk lüng khätah Bawipa Jesuh naw, Peter, James la Johan ni bäng khah püi gui ne, hlüng ciah khomhtung ah kai püi gui ci. A cun vai-am ami hmuh ge ah Bawipa Jesuh ah müi hmai cu ng’khuk hlat lawk ci. ³ A suisak cu pyü ne ng’shü ne bawk ne khang lawk ci, a cun ah mäih ah bawk khai ah khomdek khan chang naw a u naw kä m’sumsäi hlawt khai. ⁴ Elijah la Moses cu dang law ni ne, Bawipa Jesuh awn atäng ah ng’cengcäk u sei, ang düihpüi thum gui naw hmuk ci gui. ⁵ Cun ah kia khätah Peter naw, “Bawipa, shin ah hmun cu om nak vai ah nik ci nei, nang ah phäh ah k’pyu tumat, Moses ah phäh ah k’pyu tumat, Elijah ah phäh ah k’pyu tumat, k’pyu tung thum ah kami co khai nei” ci ne Bawipa Jesuh ah ma ah pyein ci. ⁶ Ang düihpüi gui cu ang htei ah kyikyawk u ne, Peter naw a i a pyein vai phi kä hmat netah, a cun ah a pyein ah kiak ci. ⁷ Cun kawn ah khomei tumat dang law ne ami khan ah hnim law gui ci. “Shin cu kei ah m’hni ah Ka Htapa nei, ani ah ng’thu cu ngai vä” ciah k’ow cu khomei ung kaa ng’thang lawk ci. ⁸ Cun ah kia khätah ang düihpüi gui naw ami pei zung ah mang shüi ne teng ci gui, cun ung phi Bawipa Jesuh ah kawn ah a u phi a om kä hmu ba ci gui. ⁹ Cun kawn ah Bawipa Jesuh la ang düihpüi gui cu khomhtung khan ah kaa kyum law ba ci gui. Cun ah ami kyum law ba zah ung Bawipa Jesuh naw, “Nangmi naw tuhbäi nami hmuh cu, chang ah Htapa sih nak ung kaa kä a thawh ba pha ah chuih, a u-am phi kä nami m’thein-en vai” ci ne ang düihpüi gui cu khän ne m’cäi gui ci. ¹⁰ Ngahmi naw cun ah thu khän cu ami ngaih pang ung phi, “Sih nak ung kaa tho ba ci cu a i ang” ci ne ami mät ng’shi ng’thäh tu ne ng’cengcäk ci gui. ¹¹ Cun kawn ah thukhän saza gui naw, Bawipa Jesuh cu, “A i ah kia sei Elijah kyum law ba khai ci ne ami pyein ang” ci ne ng’shik ci gui. ¹² Bawipa Jesuh naw, “Apäng avan cu ana piang m’tham ma khai ah Elijah cu akcang ah kyum law ma khai. Cun ung phi cacim naw, “Chang ah Htapa cu zaica nak la shedam nak khan khai” ci ne a i ah kia sei a pyein ang? ¹³ Elijah cu kyum law pyi ci nei, cacim ung lawk ciah mäih ah chang gui naw ani cu, ami ci-cum hlü hlü ah ci-cum pyi ci gui nei, ci ne nangmi-am ka ning m’thein gui ci,” ci ne kiak nak gui ci. ¹⁴ Bawipa Jesuh la ang düihpüi thum gui cu, a hei ang düihpüi gui ah om nak ah gawk law ba u netah, chang khli naw anak bui gui sei hmuk ci gui. Am shah thukhän saza gui la ana om ciah ang düihpüi gui cu ng’kük net ne ng’thu pyein ci gui. ¹⁵ Chang gui cu Bawipa Jesuh a law ba hmu u netah cäicat u ne, zavaih ne ana dou ci gui. ¹⁶ Bawipa Jesuh naw ang düihpüi gui-am, “Nangmi cu ngami awn a i ah mawnglam ang thu nami pyein?” ci ne ng’shi gui ci. ¹⁷ Chang khli ah ng’lung ah ka chang tumat naw, “Bawipa, ka hta cu nang ah om nak ah ka law püi ci nei, khoshe naw a kai law ba päng ung, ¹⁸ kiuh ne ng’zän ne, am shi phawp gui lut law sei, a ha kyeet ne, kiai ne ng’zän ci ci nei. Nang ah nang düihpüi gui naw cun ah khoshe cu ami k’täm vai ah khü gui ung phi, ngami naw käm khüt ci gui nei,” ci ne ng’zawi ne pyein ci. ¹⁹ Bawipa Jesuh naw, “Nangmi cu a i hlawk ah a zum nak kä om ciah chang gui ang? Kei cu nangmi awn atäng ah a i güt ka om vai ang? A i güt nangmi ka ning ngaih peit gui vai ang?, cun ah akhmaw kei ah om nak ah law püi vä” ci ne kiak na gui sei, ²⁰ Cun ah akhmaw cu a pei ah law püi ci gui. Khoshe naw Bawipa Jesuh a hmuh vai-am, ak hmaw cu ci cum law ba sei, ani cu ng’tum ne ng’khlet ne, am shi phawp hmoh ne, m’dek ung kiu ne ng’zän ne ng’taih shüé shüi ci. ²¹ Bawipa Jesuh naw, “Shin ah a kiak law shou law ne ang” ci ne apa cu ng’shik ci. Apa naw, “a zoh hta zah ge ung a cän ah kiak ci nei, ²² Khoshe naw akhmaw asih vai ah, mei ung phi, tui ung phi akda vei luh sak ci nei. Nang Bawipa naw nam khüt hning vai a kiak ung nam gein gui ne nam htei tu pe gui ä” ci ne pyein ci. ²³ Bawipa Jesuh naw, “Nam khüt hning vai a kiak ung ci ne a i ah kia sei na pyein ang? A zum nak om ciah chang naw kä am khüt a i kä om ci” ci ne kiak nak ci. ²⁴ A cun vai-am akhmaw ah pa naw, “Kei naw akcang ah a zum ci nei, ka zum nak kä be ci kia sei, nam gein tu hta ä” ci ne m’lau ne ng’paa nak ci. ²⁵ A pei ah chang gui dawng law u sei, Bawipa Jesuh naw hmu gui netah, “ang ne pang ciah khoshe, tuhbäi akhmaw ung kaa lut law ne a hei ah na hteh vai, a i zah ung phi kä na ng’et-en law ba vai, kei naw ka ning k’täm ci nei” ci ne khoshe cu k’täm ci. ²⁶ Khoshe cu m’lau ne, akhmaw cu ng’tum ne ng’thüng khai ah ng’khlet sak netah, lut law ne a hei ah hteit ci. Cun ah ak hmaw cu aksi vai sü ah ng’zän sei, chang gui naw, “ak hmaw sik ci nei” cik ci gui. ²⁷ Cun ung phi Bawipa Jesuh naw, ak hmaw cu akut ung k’pang ne m’tho sei tho law ba ci. ²⁸ Bawipa Jesuh im ah law ba ne a om zah ung ang düihpüi gui naw, “Keimi naw cun ah khoshe cu a i ah kia sei kä kami k’täm hlawt ang?” ci ne ng’shik ci gui. ²⁹ Bawipa Jesuh naw, “Taigü nak bäng awn nei, shin ah mäih khoshe cu k’täm hlawt vai, cun kawn ah k’täm nak vai a hei kä om ci” ci ne kiak na gui ci. ³⁰ Bawipa Jesuh la ang düihpüi gui cu, acun ung kaa naw Kalile kho cu sun pah ne hteit ci gui. Cun ah ami sun pah cu a u naw phi a hmat vai kä ng’za hlük ci. ³¹ A i ah kia sei ci ung, “Chang gui ah kut ung chang ah Htapa cu ap khai gui, ani cu ngawn khai gui, cun ung phi ak hnüüp thum hnüüp ung sih nak ung kaa tho ba khai” ci ne ang düihpüi gui-am am thei thang gui su ah kiak ci. ³² Cun ung phi ang düihpüi gui naw, Bawipa Jesuh ah m’theithang cu kä hmat ci gui, cun ung phi ami ng’shi vai ah kyik ci gui. ³³ Bawipa Jesuh la ang düihpüi gui cu Kapernaum gawnu ah gawk u ne, ami im kai ah im kyong ah gawk u netah, Bawipa Jesuh naw, “Nangmi lam cawih ah a i ah mawng ang nami pyein?” ci ne ng’shi gui ci. ³⁴ Ang düihpüi gui cu kä shipdep ne om ci gui, a i ah kia sei ci ung, ami mät gui ung kaa a u ak hlüngtai pi ah kiak ci, ci ah lam cawih ah ng’thu ami pyein te ah hmawk ah kiak ci. ³⁵ Bawipa Jesuh cu ngoh netah, ang düihpüi gha-lei-goi cu khü gui ne, “ak hlüng pi ung gawk hlük ciah chang cu, ang neim pi ung om khai, chang avan naw atäk phan pi ah phi kiak khai” ci ne kiak na gui ci. ³⁶ Cun kawn ak hmaw tumat cu khü ne ang düihpüi gui ah ma ah m’düih netah, ak hmaw cu zäk ne chang ne, ³⁷ ’Kei ah ming awn shin ah mäih ah ak hmaw dou ciah chang cu kei na dou ciah kiak ci. Kei na dou ciah chang cu kei bäng na dou ciah kä kiak ci, kei na tüi lawk ci phi dou ciah kiak ci” ci ne kiak na gui ci. Kiak ci. ³⁸ Johan naw, “Bawipa, nang ah ming awn chang tumat naw, khoshe cu k’täm sei kami hmuk ci. Ani cu keimi awn atäng ah kä hteit tuk ci. Cun ah kia sei keimi naw, nang Bawipa ah ming kä a pyein vai ah kami maa nak nei” ci ne m’thein lawk ci. ³⁹ Bawipa Jesuh naw, “Ani kä nami maa nak vai, kei ah ming awn cäi aih vai gui cu bi netah, kei nam shetkat khai ah chang a u kä om ci. ⁴⁰ Mik mi kä na hnu ng’tuk püi gui ciah chang cu mik mi ah chang ah kiak ci. ⁴¹ Kei naw akcang ka pyein cu, kei ah ng’düihpüi ah nami kiak cu a hmat nak awn nangmi-am tui m’zak ät ning tu gui ci cu, akcang ah m’khum taih ne gah tang nak om khai. ⁴² “Kei a na zum nak di maih khai ah, shin ah mäih ak hmaw tumat lam hma sak ciah chang cu, ak hnü-gawn ung lungsum nu khit ne, m’awi netah, tuinu ung buhtawn ung ani ah phäih ah bä tuba khai. ⁴³ Na kut naw na zum nak adi maih sak ung, cun ah kut cu na tukpit vai, na kut avan küm sei, ang täi ah däi ciah m’htei-mei ung, na luh akdam, na kut vangtäng pit sei ang täi ghin nak nagah cu bäpi khai. ⁴⁵ Na kho naw na zum nak adi maih sak ung, cun ah kho cu na tukpit vai, na kho avan küm sei ang täi ah däi ciah m’htei-mei ung na luh akdam, na kho vangtäng pit sei ang täi ghin nak na gah cu bäpi khai. ⁴⁷ Na mik-ui naw na zum nak adi maih sak ung, cun ah mik cu kawih ne na ghawh vai, geinvai vai ah m’kyiit naw shawk ne a ei nak la ang täi sei däi ciah m’thei-mei ung namik-ui küm sei na gawk ah k’dam, na mik vangtäng m’dauh sei Khanpughi ah uknak kho ung na gawk cu bä pi khai. ⁴⁹ “Ng’ghu-tha nak cu m’shi shum ne theingthap sak ah mäih ah, chang nüng nüng cu mei naw theingthap sak khai nei. ⁵⁰ “M’shi cu nik ci, cun ung phi a tuui amaih ah a kiak ung, nangmi naw a i cha tuui khai ah kä nami piang ba hlawt khai. “Nangmi ung teihpüi mah nak ah m’shi cu om sak u netah, nami mät gui dimdeeih nak awn om vä” ci ne m’cäi gui ci.

¹ Cun kawn ah Bawipa Jesuh cu, cun ung kaa ng’düi law ne Judea kho ah hteit netah, Jordan tuinu hei kat ci. Chang gui cu Bawipa Jesuh ah pei ah ng’cut law ba u sei, am theithang man ah m’theithang ba gui ci. ² Cun zah ung Pharisees gui cu law u ne, “Chang naw amät ah chu cu ng’chaa püi hning khai, ci ah thukhän ung om ne ang?” ci ne thuvi ne ng’shik ci gui. ³ Bawipa Jesuh naw, “Moses naw a i cha ah ang thukhän a ning peit gui” ci ne ng’shi tu ba gui ci. ⁴ Ngami naw, “Chu cu nawng nak ca pe ne, ng’cha püi hning nei, ci ne Moses naw pyein ci” ci ne pyein tu ba ci gui. ⁵ Bawipa Jesuh naw, “Nangmi cu ng’thu käng za u ci sei, Moses naw cun ah ng’thukhän gu ne a nawng shüt ah kiak ci. ⁶ Cacim ung om ciah mäih ah ak htük ung Khanpughi naw pami la hnumi cu tüisho ci. ⁷ Cun ah kia sei shin ah mawng ung pami naw anu la apa cu nawng shüt ne akchu awn ng’puikhap ci goi, ⁸ ngani cu sisa tumat ah kia lawk ci goi. Cun ah kia sei ngani cu hnih ah kä kia ba ci, tumat ah kiak ci. ⁹ Khanpughi naw ang puikhhah sak cu chang naw kä am chaa-en vai nei” ci ne m’cäi gui ci. ¹⁰ Ang düihpüi gui cu im ah gawk ba u netah, a cun ah mawng cu län ne Bawipa Jesuh cu ng’shi ba mä ci gui. ¹¹ Bawipa Jesuh naw, “Akchu nawng ne ahei hnumi chu na tu ba ciah pami cu akchu ah khan ah kat nak bik ciah kiak ci. ¹² A cun ah mäih ah a cei nawng ne ahei pami cei na tu ba ciah hnumi cu, a cei ah khan ah kat nak bik ciah kiak ci” ci ne m’thein gui ci. ¹³ Chang am shah gui naw ak hmaw hta gui cu, Bawipa Jesuh naw ami khan ah akut taih ne m’shumphyuk nak a peit gui vai ah law püi ci gui. Cun ung phi ang düihpüi gui naw ma na gui ci gui. ¹⁴ Bawipa Jesuh naw hmu gui netah, m’lung she ne, “Akhmaw hta gui cu kei ah law u sä, kä ma na gui vä, Khanpughi ah uk nak kho cu ngami ah kho ah kiak ci nei. ¹⁵ Kei naw akcang ka pyein cu, akhmaw hta gui ah mäih ah Khanpughi ah uknak kä dou ciah chang cu khankho ah kä gawk tuk khai” ci ne kiak na gui ci. ¹⁶ Cun kawn ah Bawipa Jesuh naw akhmaw hta gui cu chang ne k’pawm gui netah, ami khan ah akut taih ne m’shumphyuk nak pe gui ci. ¹⁷ Bawipa Jesuh cu a hei lam ung hteit khai ah a pawng zah ung chang tumat cu a pei ah law ne, m’khukdong netah, “Nik ciah sazapa, ang täi ghin nak ka gah vai ah a i ang ka bi kaw?” ci ne ng’shik ci. ¹⁸ Bawipa Jesuh naw, “A i ah kia sei kei-am chang k’ni ah na na pyein ang? Khanpughi ah kawn ah nik ciah chang a u kä om ci nei. ¹⁹ Chang kä ngawn vai, chang ah chu kä kat püi vai, käm guk vai, käng düng ciah kä saksi vai, kä hleeihlak vai, nupa m’htei vai, ciah thukhän gui cu na hmat ciah kä kia ne ang?” ci ne kiak nak ci. ²⁰ A cun ah chang naw, “Bawipa, Cun ah thukhän gui cu kei naw kak hmaw zah ge ung tün ne ka läk ci nei” ci ne pyein ba ci. ²¹ Bawipa Jesuh naw ani cu am hni nak awn kheing ne teng netah, “Nang ung tumat nabi vai hlü ba ci, hteit ba ne na khawh avan zoi netah ghawi-pyam ci gui-am na peit gui vai, cun ung nang cu khankho ah bühmang nak om khai. Cun kawn ah ka hnu ah na na läk vai” ci ne m’cäi ci. ²² Cun ah chang cu ang htei ah bühmang ciah chang ah kia ne, Bawipa Jesuh ah ng’thu cu ng’za netah, a hmai m’kyum ne thüi ne hteit ba ci. ²³ Bawipa Jesuh naw ang düihpüi gui cu teng gui netah, “Bühmang ciah chang gui Khanpughi ah kho ah ami gawk vai cu khak aih ci nei” ci ne kiak na gui ci. ²⁴ Ang düihpüi gui cu Bawipa Jesuh ah ng’thu ng’za u netah, ngai khit ci gui. Cun kawn ah Bawipa Jesuh naw, “Ka hta gui aw, Khanpughi ah kho ah gawk vai cu khak aih ci nei! ²⁵ Ng’pyüm mik ung seikong a luh vai zäi hngaw khai, cun ung phi Khanpughi ah kho ah ng’bühmang ciah chang a luh vai cu kä zäi ci nei” ci ne m’thein gui ci. ²⁶ Cun ci khätah ang düihpüi gui naw, cäicat ne ngai khit u netah, “Cun ah a kiak ung a u naw hun phiawn nak gah hlawt khai ang?” ci ne ami mät gui ng’ceng’cäk ci gui. ²⁷ Bawipa Jesuh naw ngami cu kheing ne teng gui netah, “Cun cu chang naw kä am khüt hlawt ung phi Khanpughi naw m’khüt hlawt ci. Ang tüi avan cu Khanpughi naw m’khüt hning ci nei” ci ne m’thein gui ci. ²⁸ Cun ci khätah Peter naw, “Keimi naw ang tüi avan nawng shüt u netah na hnu ah kami ning läk ci nei” ci ne pyein tu ba ci. ²⁹ Bawipa Jesuh naw, “Kei naw akcang ka pyein cu, kei ah hmawk la Thu Ni ah hmawk ah a im lo, a phäi nau, a pai nau, anupa, a hta nau nawng shüt ciah chang cu; ³⁰ a ghin zah ung shedam nak cu näng ne, a phia ah däm ciah im lo, phäi nau, pai nau, nupa, hta nau gui cu gah ba khai. Cun kawn ah gawk lawk khai ah kho ung phi ang täi ghin nak cu gah khai. ³¹ Cun ung phi tuhbäi ma lawk ciah chang gui cu hnu lawk khai gui, tuhbäi hnu ciah chang gui cu ma lawk khai gui” ci ne m’thein gui ci. ³² Bawipa Jesuh la ang düihpüi gui cu, Jerusalem ah ami hteh ba lam ah, Bawipa Jesuh cu ma ne hteit ci. Cun ah ami hteh zah ung ang düihpüi gui cu kyikyawk ci gui, a hei law tuk ciah chang gui phi kyikyawk ci gui. Bawipa Jesuh naw ang düihpüi gui cu khü gui netah, a bui awt law vai ah amawng ama gui cu m’thein gui ci. ³³ Bawipa Jesuh naw, “Ngai vä mik mi cu Jerusalem ah mi hteit lawk ci. Jerusalem kho ung chang ah Htapa cu, taigüpa gui la thukhän saza gui ah kut ung ap lawk khai gui nei. Ngami naw chang ah Htapa cu sih nak ung tüi u ne, chang khui hei gui-am ap khai gui nei. ³⁴ Chang khui hei gui naw chang ah Htapa cu päipih u ne, ami m’shi awn m’thui khai gui, that khai gui, ngawn khai gui; cun ung phi ak hnüüp thum hnüüp ung sih nak ung kaa tho ba khai nei” ci ne m’thein gui ci. ³⁵ Zebedee ah hta goi James la Johan cu Bawipa Jesuh ah om nak ah law ni netah, “Bawipa, keini naw ka ni ng’zoih hlü api om ci” ci ne pyein ci goi. ³⁶ Bawipa Jesuh naw, “A i ang nani ng’zak hlü” ci ne ng’shi goi ci. ³⁷ Ngani naw, “Bawipa, bämang nak awn mang kiang ung ngo ne na uk law hnüüp ung, keini cu nak eng lam la nak pat lam ah na ngoh sak goi ä” ci ne ng’zoi ci goi. ³⁸ Bawipa Jesuh naw, “Nangni naw a i nani ng’zoih cu kä nani hmat ci, kei ah awk vai ah zaica nak ah khap cu nani aw tu hlawt khai ang? Kei ah tui hnim ah mäih ah nani ng’hnim tu hlawt khai ang?” ci ne ng’shi goi ci. ³⁹ Ngani naw, “kani m’khüt khai nei” ci ne pyein ci goi. Bawipa Jesuh naw, “Nangni cu akcang ah kei ah awk vai ah khap cu nani aw tuk khai, Kei ah tui hnim ah mäih tui nani ng’hnim tuk khai, ⁴⁰ Cun ung phi kei naw k’eng la k’pat ah ngoh nak vai kä ka ning pe goi hning khai. Cun cu Khanpughi naw a pian tham peit gui ah chang ah hmawk ah vah kiak ci” ci ne kiak na gui ci. ⁴¹ Cun ah a mawng cu a hei ang düihpüi chang sing gha naw ng’za u netah, ngani ah khan ah m’lung she ci gui. ⁴² Cun ah kia sei Bawipa Jesuh naw ang düihpüi avan cu khü gui netah, “Chang uk ciah chang gui naw chang ah khan ah ami hlüngtai nak m’dang u ne, ng’vai pi ciah chang gui naw ami m’gäi nak awn bik ci gui. ⁴³ Nangmi läi ung cun ah mäih kä om-en sä. Nangmi ung kaa ng’vai pi hlük ciah chang cu nami van ah ngaih u vai ah a kiak vai nei. ⁴⁴ Nangmi ung kaa hlüngtai pi hlük ciah chang cu nami van ah chang shäm ah a kiak vai nei. ⁴⁵ Chang ah Htapa cun phi chang tüitäk khai ah lawk ciah kä kiak ci, chang ah tüihtäk vai la amät ah hnun gui pe ne chang khli hun m’htei khai ah kyum lawk ciah kiak ci” ci ne m’thein gui ci. ⁴⁶ Bawipa Jesuh la ang düihpüi gui cu Jerikho gawnu ah ami gawk kawn ah, chang khli awn atäng ah a cun ung kaa naw ng’düi ne hteit ba ci gui. Cun ah ami hteh ba nak ah ng’zoi ne ei ciah Timaeus ah hta Bartimaeus cu lam pei ah ana ngok ci. ⁴⁷ Ani naw Nazaret ah kaa Bawipa Jesuh a gawk law cu ng’za tu netah, “Jesuh Bawi, David ah Htapa, kei cu nam gein ä,” ci ne m’lau ci. ⁴⁸ Chang gui naw, kä m’lau ne a düm ah a om vai ah ng’li ne züi ci gui. Cun ung phi ani cu, “David ah Htapa, kei cu nam gein ä” ci ne m’lau law pi k’täi ci. ⁴⁹ Bawipa Jesuh cu ng’düi netah, “Cän ah chang, khü ne law püi vä” ci ne kiak na gui ci. Chang gui naw a mik m’dauh-am, “Kä ng’ä ne, ng’düi law ä, Bawipa naw ning khü ci nei” ci ne kiak nak ci gui. ⁵⁰ Cun ah chang cu a zih ng’vai lim ne phluh shüt netah, zong ne ng’düi law ne, Bawipa Jesuh ah pei ah lawk ci. ⁵¹ Bawipa Jesuh naw, “Nang ah phäh ah a i ka ning bi peit vai ang nang zak hlü” ci ne ng’shik ci. A mik m’dauh ciah chang naw, “Bawipa, ka mik nam dei ba sak ä” ci ne pyein ci. ⁵² Bawipa Jesuh naw, “Hteit ba ä, na zum nak naw na nat nak cu maih sak pyi ci nei” ci ne kiak nak ci. A cun vai-am cun ah chang cu a mik m’dei ba sei, Bawipa Jesuh ah hteh nak ah lam ung a hnu ah läk tuk ci.

¹ Bawipa Jesuh la ang düihpüi gui cu Jerusalem mang gaw k’et law u ne, Betfeit la Bethani gawnu pei Olive m’htung ah gawk lawk ci gui. ² Cun kawn ah Bawipa Jesuh naw ang düihpüi chang sing goi cu, shin ah m’cäi ne lam ma sak goi ci. “Mi hei ma ah om ciah pigaw ung ma ne ana hteit nä, pigaw ah nani luh vai-am a u naw phi kä ang cum nak man ah ng’se hta, gui awn khit ne ami k’pawn cu nani hmuk khai. ³ Gui cu k’phian ne cun ah ng’se hta cu nani law püi vai. Chang naw ‘a i vai ng’se gui nani k’phian ang’ ci ne aning shi goi ung, “Shin ah ng’se cu kami Bawi naw ng’za hlük ci, ang ghit ah ning thak law ba gui vai nei’ ci ne nani pyein vai” ci ne m’cäi goi ci. ⁴ Ang düihpüi goi cu hteit ni ne, im kawt pei ah lam ung ami k’pawn ah ng’se hta cu hmu ni netah, gui cu k’phian ci goi. ⁵ Lam ung düi ciah chang am shah gui naw, “Ng’se gui cu a i vai nani k’phian ang” ci ne ng’shi goi ci gui. ⁶ Ang düihpüi goi naw Bawipa Jesuh ah m’cäi goi ah mäih ah pyein ni khätah, ng’se cu k’phian ne ani hteh püi vai ah pyein ci gui. ⁷ Ang düihpüi gui naw ng’se hta cu Bawipa Jesuh ah om nak ah law püi u netah, ami suisak gui cu ng’se ah khan ah phah ci gui. ⁸ Cun kawn ah Bawipa Jesuh cu ng’se ung ng’cum ne hteit ci. Chang gui naw ami zih ng’vai gui cu lam ung ana phah ci gui. Am shah naw sing hnah gui tuh ne lam ung ana phah ci gui. ⁹ Bawipa Jesuh ah a hnu ah hteit ci gui la ama ah hteit ci gui naw, “Khanpughi cu m’hlüngtai vä, Khanpughi ah ang ming awn kyum lawk ci cu zeikiai nak om sä. ¹⁰ Gawk lawk khai ah mipa David Ghanpughang ah uk nak kho cu zeikiai nak om sä, Khanpughi cu m’hlüngtai vä” ci ne m’lau ci gui. ¹¹ Bawipa Jesuh cu Jerusalem mang gaw ah gawk law netah, pum im kyong ah hteit ne apäng k’tä ne teng ci. Cun kawn ah khomü hun law khätah ang düihpüi gui awn Bethani pigaw ah hteit ba ci gui. ¹² A ngawi ung Bawipa Jesuh la ang düihpüi gui cu, Bethani ahkaa ami law ba lam ah, ei cawi lawk ci. ¹³ Cun zah ung a hnah khlum sei ghing ciah baangging cu hmu netah, m’theih hman khai ci ne, a pei ah hteh shi ci. Am theih khin ah kä kia sei a ghing cu a hnah gui bäng om ci. ¹⁴ Cun ah kia khätah Bawipa Jesuh naw, “A ngawi ah phi nang ah m’theih a u naw kä ei-en sä” ci ne k’phyun ne taam shüt ci. Cun ah a pyein cu ang düihpüi gui naw ng’zak ci gui. ¹⁵ Bawipa Jesuh la ang düihpüi gui cu Jerusalem mang gaw ah gawk u netah, Bawipa Jesuh cu pum im ah hteit ne, pum im kyong ah sumlei ci gui cu k’täm gui ci. Ngui m’thawng ci gui ah tawnglang la müm kha zoi ci gui ah ngoh nak gui cu lat pe gui ci. ¹⁶ Pum im sun pah ne khawh cham, a u naw phi kä am kawn m’hteh ba vai ah phi pyein ci. ¹⁷ Cun kawn ah Bawipa Jesuh naw, “Cacim ung Khanpughi naw, ‘Kei ah pum im cu kho nüng ung, chang päng ah taigü nak ah mang im ah sui vai’ ciah om ci. Cun ung phi nangmi naw m’guk ei ah ng’thuh nak ah im ah nami piang pyi ci nei” ci ne chang gui cu m’cäi ne m’thein gui ci. ¹⁸ Taigü ng’vai gui la thukhän saza gui naw, a cun a ci cu ng’za u netah, Bawipa Jesuh ngawn nak vai ah lam cu shui ci gui. Chang gui naw cun ah am theithang gui cu cäicat ne ngai khit u netah Bawipa Jesuh cu kyihkyawk ci gui. ¹⁹ Khomü hun k’awi law sei Bawipa Jesuh la ang düihpüi gui cu a hei lam ah hteit ba ci gui. ²⁰ A ngawi ung kho ngawi hta ah Bawipa Jesuh la ang düihpüi gui cu lam ami hteh zah ung baangghing cu hmu ba ci gui. Cun ah baangghing cu a phyaa ah khüt khai ah ng’zai ne chawng ci. ²¹ Peter naw shüm law ba netah, ‘Bawipa, Teng ä, nang naw na taam shüt ah baangghing cu ng’zai ne chawng pyi ci nei” ci ne pyein ci. ²² Bawipa Jesuh naw, “Khanpughi cu zum vä, ²³ Kei naw akcang ka pyein cu, kam lung kyong ah kä ngaih gep nak kä om ciah kang thu cu, akcang ah bä khai, ciah zum ciah chang naw,‘Shin ah m’htung cu ng’nawn ne tuinu ung lut sä’ ci ne a pyein ung, a pyein ah mäih ah kiak khai nei. ²⁴ Cun ah kia sei kei naw ka ning m’thein gui cu,’ Taigü ne kami ng’zoih cu, kami gah ci, ciah nami zum vai, cun ung nami ng’zoih phung nami gah khai. ²⁵ Nangmi cu ng’düi law ne nami taigü ung kat nak gui nüng nami m’gein vai. Cun ung khankho ah om ciah nami pa naw nami kat nakgui cu ning m’gein gui khai. ²⁶ (Nangmi naw chang ah kat nak gui cu kä nami m’gein ung, khankho ah om ciah nami pa naw, nami kat nak cu kä ning m’gein gui khai)” ci ne ang düihpüi gui cu m’thein gui ci. ²⁷ Bawipa Jesuh la ang düihpüi gui cu Jerusalem mang gaw ah gawk law ba u netah, Bawipa Jesuh cu pum im lam ah a hteh zah ung, taigüpa gui, thukhän saza gui la chang ng’vai gui cu Bawipa Jesuh ah pei ah law u netah, ²⁸ “Nang naw shin ah amawng ama gui cu a i huham awn ang na bi? Cun ah huham cu a u naw ang a ning peit?” ci ne ng’shik ci gui. ²⁹ Bawipa Jesuh naw, “Kei naw tumat ka ning shi gui khai, cun nami pyein kawn ah, shin ah amawng ama gui cu, a i huham awn ka bi ah ka ning m’thein gui khai. ³⁰ Johan naw tuihnim nak a peit cu, Khanpughi ah huham awn ang a peit, chang ah huham awn ang a peit, nami pyein vai” ci ne kiak na gui ci. ³¹ Ngami naw ami mät ng’teng tu u netah, “A i mi cik khai ang, Khanpughi ah huham awn mi ci ah a kiak ung, a i ah kia sei Johan kä nami zum ang? ci ne nang shi ba gui khai. ³² chang ah huham awn ci ne mi pyein khai ang?” ci ne ngahtüh khit ci gui. (Chang gui naw Johan cu Profet ah k’bäi ne zum ci gui ah kia sei, chang gui cu ngami naw kyih ci gui). ³³ Cun ah kia sei ngami naw, “Kä kami hmat ci nei” ci ne pyein ci gui. Cun ah kia sei Bawipa Jesuh naw, “a cun ah mäih ah kei naw phi, shin ah amawng ama gui cu a i huham awn ka bi ah, kä ka ning m’thein gui khai” ci ne kiak na gui ci.

¹ Cun kawn ah Bawipa Jesuh naw ngami-am m’tumtäng ne am thein gui cu, “Chang tumat naw sapyit lo cu bi ne, geit ne ng’vong ci. Sapyit m’theih m’seh nak vai ah khui phi shawk ne, tängkyäng phi co ci. Cun kawn ah ani cu a sapyit lo khah gui ne bi sak gui netah, a kho hei zung ah hteit ci. ² sapyit bih nak vai ah a khin gawk lawk khätah, ak chang shäm tumat cu lo ng’vat ne bik ci gui ah tüi ne, k’phlam cu ng’zoih sak ci. ³ Lo ng’vat ne bik ci gui naw cun ah ak chang tüih cu pha ne that u netah a i kä peit ah tüi ba ci gui. ⁴ Kho mah naw ak chang shäm tumat cu tüi ba mä ci. Lo ng’vat ci gui naw alu ung that pawk pawk ne ng’a khai ah cik ci gui. ⁵ Kho mah naw a hei ak chang shäm tumat tüi ba mä sei lo ng’vat ci gui naw cun ah chang shäm cu ngawn ci gui. A cun ah mäih ah a hei ak chang shäm am shah gui cun phi am shah that ne, am shah ngawn ci gui. ⁶ Kho mah ung ahta pami tumat om ci. Cun ah kia sei, ‘ka hta läi cu kyih aa khai gui’ ci ne ak hnu ah a hta pami cu tüi ci. ⁷ Cun ung phi ngami naw, “Shin cu kho mah ah pakhui m’düng ciah kiak ci, law vä, ani cu mi ngawn khai nei, cun ung vah ani ah khomdek mik mi naw mi khäm khai” ci ne ng’ge u netah; ⁸ Ani cu pha ne ngawn u ne, ng’vong pung ah ghawt ci gui. ⁹ Cun ah a kiak ung kho mah naw a i cha ah bi bik khai ang? ani cu law ne lo ng’vat ci gui ngawn gui zawp netah, cun ah lo cu a hei gui-am bi sak gui khai nei. ¹⁰ Cacim ung om ci cu nami phat man khai nei; ‘Lung im co ci gui naw, ami nawng düt ah lung cu, Ak küikyang pibäih ah lungtung ah kia lawk ci nei. ¹¹ Shin cu Khanpughi ah bi bi ah kiak ci, Mik mi ah ma ah cäicat aih vai kiak ci nei” ci ne kiak na gui ci. ¹² Bawipa Jesuh naw ngami a pyein nak gui ah am tumtäng cu Jew chang gui ah ami ng’vai gui naw hmat u netah, Bawipa Jesuh cu phak khai gui ah k’tha nak ci gui. Cun ung phi chang khli cu kyih u netah a hei lam ah hteit ba ci gui. ¹³ Cun kawn ah pharisee am shah gui la Herod ah pati chang am shah gui cu Bawipa Jesuh ah tüi law u ne, phawtcam nak ah ng’shi sak gui ci gui. ¹⁴ Cun ah chang gui cu Bawipa Jesuh ah law u netah, “Bawipa, nang naw ng’düng nak awn thu na pyein ci, chang ah ngaih kä nam tung ci, chang ah hmai kä na teng ci, Khanpughi ah ang zak hlü ah ng’düng ciah nam theithang nak cu kami hmat ci nei. Cun ah kia sei Roman ghangpughang-am k’phlam peit vai ang, kä peit vai ang, keimi naw mä kami pek khai ang kä kami pek khai ang? ci ne phawtcam nak awn ng’shik ci gui. ¹⁵ Bawipa Jesuh naw ngami ah phawtcam nak cu hmat netah, “Nang mi naw a i ah kia sei kei ka shetkat vai ah nami ng’zak hlü ang? Tangka tumat ka teng vai law püi vä” ci ne kiak na gui ci. ¹⁶ Law püi u khätah Bawipa Jesuh naw, “Shin ah gup, shin ah ming cu a u ah gup, a u ah ming ah ang a kiak?” ci ne ng’shi gui ci. Ngami naw, “Ghanpughang ah gup, ghangpughang ah ming ah kiak ci nei” ci ne pyein ci gui. ¹⁷ Bawipa Jesuh naw, “Ghanpughang ah kaa cu ghangpughang-am ap ba vä, Khanpughi ah kaa cu Khanpughi-am ap ba vä” ci ne kiak na gui khätah ang htei ah cäicat ci gui. ¹⁸ Sih nak ung kaa thawh ba nak kä om khai cik ci gui ah Sadducee am shah gui cu, Bawipa Jesuh ah law u netah; ¹⁹ “Bawipa, ’chang tumat cu kä hta phah ne a sih ah a kiak ung akchu cu a phäi nau naw akchu nak tu ba vai. Sik ciah pakhui cu khäm tu ba ciah ahta anau naw m’düng khai’ ci ne Moses naw nam thein gui shüt ci. ²⁰ Hngü-ät ung ng’phäi nau gui chang sing chih om ci gui. Ami phäi ang vaipi cu chumah netah kä hta pha ne sik ci. ²¹ Akchu cu a nau ang vai tuba naw khäm tu ba netah, ani phi kä hta pha ne sik ci. A cun ah mäih ah anau ba tumat cun phi a cun ah a phäi ah chu khäm tu ba netah kä hta pha ne sih ba mä ci. ²² A cun ah mäih ah ang phäi nau gui chang sing chih cu ami van naw cun ah hnumi cu chu na u netah, ami van kä hta ne sih zawp ci gui. ²³ Ak hnu ah cun ah hnumi phi sik ci. Ang phäi nau gui chang sing chih ami van naw cun ah hnumi cu chu nak ci gui kia sei, sih nak ung kaa thawh ba nak ah kho hnüüp ung, cun ah hnumi cu a u ah chu ah kiak khai ang?” ci ne ng’shi ci gui. ²⁴ Bawipa Jesuh naw, “Nangmi cu cacim phi kä nami hmat ci, Khanpughi ah hlüngtai nak phi kä nami hmat ci, cun ah kia ne nangmi cu lam nami hma ci. ²⁵ Chang gui cu sih nak ung kaa ami thawh law ba hnüüp ung kä chu cei mah ba khai gui, khankho ah khan chang gui ah mäih ah kiak khai gui. ²⁶ Sih nak ung kaa thawh nak ba ah mawng Moses ah cacim cu kä nami phat man ne ma? Cun ah cacim, mei ah däi ciah cap-plum ah amawng ung, Khanpughi naw, “Kei cu Abraham ah nak Khanpughi, Isak ah nak Khanpughi, Jakop ah nak Khanpughi nei” ci ne Moses ah ma ah thu pyein ci. ²⁷ Ani cu sik ci gui ah Khanpughi ah kä kiak ci, ghing ci gui ah Khanpughi ah kiak ci, nangmi cu akcang ah cheishoh nak ung nami hteit pyi ci nei” ci ne kiak na gui ci. ²⁸ Cun ah Bawipa Jesuh la Sadducee gui ami ng’thu zah ung, ami pei ah thukhän saza tumat om tuk ci. Ani naw Sadducee gui-am Bawipa Jesuh naw akni ah m’hlan ne am thein gui cu ng’za netah, Bawipa Jesuh ah pei ah law ne, “Thukhän gui nüng ung ak küikyang pi cu a i ang?” ci ne ng’shik ci. ²⁹ Bawipa Jesuh naw, “Israel chang gui, ngai vä, mik mi ah Bawipa Khanpughi cu tumat bäng nak ciah Khanpughi ah kiak ci. ³⁰ Ak küikyang pibäih ah thukhän cu,‘Na Bawipa nak Khanpüghi cu, nam lung kyong avan, na hmuhmat nak avan, na ngaih tüh nak avan la nak thagui avan awn nam hni vai’ ciah kiak ci. ³¹ Ak hnih nak ah ak küikyang pibäih ah thukhän cu, na mät ah paw chang cu na mät awn m’täng ne nam hni vai’ ciah kiak ci. Shin ah thukhän goi ah kawn ah ahei thukhän kä om ba ci” ci ne m’thein gui ci. ³² Cun ah thukhän saza naw, “Bawipa, nang ah thu pyein cu ang htei ah bä aih ci nei, Khanpughi cu tumat bäng om ci, Khanpughi ah kawn ah a hei kä om ba ci nei. ³³ Khanpughi cu m’lung kyong avan, hmuhmat nak avan la k’tha gui avan nawn m’hni vai, mät ah paw chang cu mät awn m’täng ne m’hni vai’ ciah thukhän hnih läk cu Khanpughi-am ak ghing ngawn ne m’khih ne khawihnah nak la Khanpughi-am a hei gui peit nak nüng ah tah bä pi ci nei” ci ne pyein tu ba ci. ³⁴ Ani naw cun ah hmuhmat nak awn a pyein cu Bawipa Jesuh naw hmat netah, “Nang cu Khanpughi ah kho awn kä nani ng’shawng ba ci nei” ci ne kiak nak ci. Cun kawn ah a u naw phi Bawipa Jesuh cu kä ng’shi ba zäi ci gui. ³⁵ Bawipa Jesuh naw pum im ah am theithang gui zah ung, ani naw ang shi gui cu, ‘Messiah cu David ah hta ng’shong ung kaa ah kiak khai’ ci ne, a i hawk cha ah thukhän saza gui naw ami pyein hning ang? ³⁶ Mumcha Theing naw David ang thu m’sak cu; ‘Khanpughi naw ka Bawipa-am, Nang ah na ga gui cu, na kho pha kaa ah, Kä ka gawk sak pha ah chuih, Kei ah kak pat lam ah na ngoh vai nei’ ci ne kiak nak ci” ciah kiak ci. ³⁷ Shin ung David amät naw Messiah-am Bawipa ci ne khü ciah kia sei, a i cha ah Messiah cu David ah hta ng’shon ah kia hning khai ang?” ci ne m’theithang gui sei chang gui naw zeikiai ne ngai zak ci gui. ³⁸ Cun ah am theithang gui zah ung Bawipa Jesuh naw, “Thukhän saza gui cu nami geing nak gui vai, ngami cu suinu sui ne, chang ah ng’shei ne hteithton hlük ci gui. Sumlei hmun ung phi chang naw ak chang m’sui gui vai ng’za hlük ci gui. ³⁹ Pum im kyong ah phi ng’khoikhei hlük ci gui, ng’bum law nak ung phi ani nak pibäih ung ngo hlük ci gui, ⁴⁰ Hmeinu gui ah khawh cham gui gut u netah, chang naw ang ngaih ung ani vai düt ah akshonu taigü ci gui. Cun ah kia sei ngami ah khan ah Khanpughi naw am kat nak gui cu khak pibäih khai” ci ne kiak na gui ci. ⁴¹ Bawipa Jesuh cu pum im kyong ah khawh ami peit nak ah m’küm pei ah ngoh netah, cun ah m’küm ung chang gui naw ami peit ah ngui ami ghawn law cu teng gui ci. Bühmang ciah chang gui naw ngui akda ghawn ne pek ci gui. ⁴² Ghawi-pyam ciah hmeinu tumat cun phi law tu ne,pia-gha phu nak khai ah ngui pia goi cu zuk ghawn tuk ci. ⁴³ Cun kawn ah Bawipa Jesuh naw, ang düihpüi gui khü gui netah, “Shin ah pyamtham ciah hmeinu naw, pum im ah peit nak ah m’küm ung ghawn ne pek ci gui nüng ah da pi sei pek ci nei’ ciah akcang ah ka ning m’thein gui ci nei. ⁴⁴ Chang hei gui cu ami ei-mang ah k’pawih ami ngui pek ci gui, cun ung phi shin ah hmeinu naw, am hu awi ne bi ne a gah, avan pek ci nei” ci ne m’thein gui ci.

¹ Bawipa Jesuh cu pum im kyong ah kaa a luh law ba zah ung ang düihpüi tumat naw, “Bawipa, teng tuä, lung nu gui phi däm ne, im nu phi chün aih ci nei” ci ne pyein ci. ² Bawipa Jesuh naw, “Shin ah chün aih ciah im nu cu tuhbäi nang naw na hmuk ci. Shin ah im ung kaa lung gui cu avan she ne ng’gäi zawp khai, lung tumat phi amät ah om nak ung kä om ba khai” ci ne pyein ci. ³ Bawipa Jesuh cu Olive khomhtung ah pum im lam ah va mang ne amät a ngoh zah ung, ⁴ Peter, James, Johan la Andru ni cu a pei ah law u netah, “Bawipa, nang naw na pyein ah amawng gui cu a i zah ung küm lawk khai ang? Cun ah amawng ama gui a küm law zah ung a i gui dang lawk khai ang? Nam thei gui ä” ci ne ng’shik ci gui. ⁵ Bawipa Jesuh naw, “Chang naw kä a ning m’hleei m’hlak-en gui vai ah nami ngaih nak vai. ⁶ Chang akda cu kei ah mäih ah ng’hlawk ne lawk khai gui. Ngami naw ami mät cu Messiah ah pyein u ne chang khli cu m’hleei m’hlak khai gui. ⁷ Nangmi naw a shou nak, ang et nak ung ng’tuk nak ah mawng nami ng’zak ung kä nami kyih kyawk vai, Cun gui cu akcang ah küm khai, cun ung phi kho ah khüt nak vai cu kä gawk law phak ci. ⁸ Chang pakhui tumat la tumat, kho päng tumat la tumat ng’tuk bi nak om khai. A kho pääng ung shihpi thüng khai, ei awk vai maih ne kho zo khai. Cun gui cu hta lawk khai naw nau poi am neh law ma ah mäih ah ma lawk khai ah dukdeiu nak ah kiak khai. ⁹ Nangmi cu ngaih na ne nami om vai. Chang gui naw nangmi cu zung ah m’kawt ung ning ap gui khai gui. Pum im ah k’caw ah ning that gui khai gui. Nangmi cu kei ah hmawk ah bawimang gui la ghanpughang gui ah ma ah gawk u ne, Thu Ni pyein ne nami ng’shä khai. ¹⁰ Kho kä a khüt pha ung nangmi naw Thu Ni cu shäu ne chang pakhui avan-am nami m’thein khai. ¹¹ Nangmi cu ning pha gui u ne zung ah ami ning ap gui ah a kiak ung, a i cha ng’thu vai ang, ci ne ng’dawt ne kä nami ng’ä vai. A cun ung nami m’lung kyong ah dang lawk ci cu nami pyein vai. Cun ah ng’thu gui cu nangmi ah ng’thu ah kä kia ne, Mumcha Theing ah ng’thu ah kiak khai. ¹² Chang gui cu ami mät ng’phäi nau goi sih nak vai ah ng’ap tuk khai gui. Apa naw ahta cu a sih vai ah ap khai, ami hta gui naw phi ami nupa cu ng’küknet püi u ne, ami sih vai ah ap khai gui. ¹³ Kei ah hmawk ah chang van naw nangmi cu ning gen gui khai, cun ung phi akhnu ah khüt sei düng ciah chang cu hun nak gah khai nei. ¹⁴ “Tükyai shemshai ci cu kä om nak khin ung om sei nami hmuk khai. (Shin ah amawng cu ca phat ci naw ngai thei sä). Cun nami hmuh law ung Judea kho ung om ciah chang gui cu khomhtung ah dawng u sä. ¹⁵ Im m’kiung khan ah om ciah chang cu, im kyong ah lut ba ne, a i baw la ba khai ah kä a zu kyum men ba cang vai. ¹⁶ Lai ah om ciah chang phi zih sui la ba khai ah im ah kä hteit-en ba sä. ¹⁷ Cu hnüüp ung käu mah ci gui la htazüt shäm ciah chang gui cu zaica aih khai gui nei. ¹⁸ Cun ah akhin cu khosik kho ah kä a kiak-en vai ah nami taigü vai nei. ¹⁹ Khanpughi naw khomdek a tüi pian ung tün ne, a i zah ung phi shin ah mäih zaica nak cu, a u naw kä awt man ci, ngawi ah phi a u naw kä bui awt ba khai. ²⁰ Khanpughi naw cun ah akhin cu kä a tawi sak ah a kiak läi ung a u naw sih nak cu kä phiawn ah hlawt khai nei. Cun ung phi, Khanpughi naw aghü pyi ah chang gui ah hmawk ah cun ah khin cu tawi sak khai nei. ²¹ “Cun ah khin ung chang tumat mat naw,‘Teng law tu vä, shi ah Messiah om ci nei, cä ah Messiah om ci nei,’ ci ne a pyein ung kä nami zum-en vai. ²² Messiah ah ng’hlawk ci gui la profet ah ng’hlawk ci gui cu, akda ng’dang lawk khai gui nei. Ngami naw ami näng ah akiak ung Khanpughi naw a ghü ah chang gui hngaw m’hleei m’hlak nak gui hning vai ah cäicat nak gui vai la cäi aih nak gui vai cu m’dang khai gui nei. ²³ Nangmi cu ngaih na ne nami om vai, shin ah amawng gui kä ang dang law pha ung ng’dawt ne ka ning m’thein gui nei. ²⁴ Zaica nak gui a gawk law kawn ah khohni cu mü ne hmüp khai, Cha phi kä vai ba khai. ²⁵ Aisi gui phi khankho ah kaa kiawi ne kia law zawp khai gui. Khankho mik ung hlüngtai ci gui ah hmun-lam gui phi ng’phleng zawp khai gui. ²⁶ Cun kawn ah khomei gui ah ng’lung ah hlüngtai nak la bämang nak awn kyum lawk ciah chang ah Htapa cu nami hmuk khai. ²⁷ Cun kawn ah chang ah Htapa naw, khankho chang gui cu tüi gui ne, khomdek khan kho cawi ung kaa naw, khankho, kho cawi ung khüt khai ah, a ghü pyi ah chang gui cu, khäm ne k’bum sak gui khai . ²⁸ “Baang ghing ung kaa theithang vai tumat cu ka ning m’thei gui khai. Cun ah a ghing ung ang ban tawt ba ne a hnah am khek law ba ung kho cha lawk khai ah nami hmat ci. ²⁹ A cun ah mäih ah ka pyein gui ah amawng ama gui a küm law ung, chang ah Htapa cu nangmi ah pei ah m’kawt ung gawk law pyi ciah nami hmat vai. ³⁰ Kei naw akcang ka pyein cu, shin ah amawng ama gui kä a küm pha ung, tuhbäi chü chang gui kä si zawp phak khai gui nei, ³¹ Khankho la khomdek a maih ung phi kei ah ng’thu cu kä maih khai nei. ³² “Cun ung phi cun ah akhin cu a u naw kä hmat ci. Khankho chang naw phi kä hmat ci, Ahtapa naw phi kä hmat ci. ³³ Pa Khanpughi amät bäng naw vah hmat ci. Cun ah akhin cu a i zah ung gawk lawk khai ah kä nami mi hmat ci kia sei, ngaih nah ne nami ngäng vai nei, ci m’gang ne nami om vai nei. ³⁴ Cun ah mawng cu shin ah m’tumtäng nak awn täng ci; Chang tumat cu a kho hei ah hteit vai netah, a im cu ak chang shäm gui-am ap gui shüt ci. Ngami-am ami bi phäh phäh vai ah bi cu phäh m’sak gui ne ap gui shüt ci. M’kawt ngäng ci-am phi geing na ne a ngäng vai ah m’cäi shüt ci. ³⁵ Nangmi naw imah a i zah ung a gawk law ba vai cu kä nami hmat ci, mü lam ung phi gawk law hning ci, kho cawih ding ah phi gawk law hning ci, ai khong k’htük ung phi gawk law hning ci, kho thaih hta ung phi gawk law hning ci. ³⁶ Cun ah kia sei imah a gawk law ghet ung, ip uk ci sei kä a ning hmuh en gui vai ah ngaih nah ne nami ngäng vai nei. ³⁷ Nangmi ka ning m’cäi gui ah mäih ah chang avan kam cäi ci nei, ngaih na ne ngäng vä” ci ne kiak na gui ci.

¹ Phiawn nak pawi la k’caw kä shum ne m’htut den nak ah pawi a gawk law nak vai hnüüp goi m’hni ba khätah, taigüpa gui la thukhän saza gui cu Bawipa Jesuh adüm ah pha ne ngawn nak vai ah lam shui ci gui. ² Ngami naw, “Chang gu thüngphyong ne ami kiak law vai ah ng’ä ah kia sei pawi ah ak kyong ung kä nami pha vai” ci ne m’cäi gui ci gui. ³ Bawipa Jesuh cu Bethani pigaw ah khei-lei ung gaw man-te ciah Simon ah im ah kai ne om tuk ci. Ani ei a ei tu zah ung hnumi hta tumat naw, ang htei ah a phu küi ciah Naduh tui ng’ui cu k’doulung tui-um ung law püi netah, a cun ah tui-um cu shu zauh ne, cun ah tui ng’ui awn Bawipa Jesuh ah lu cu shawi ci. ⁴ Chang am shah gui cu m’lungshe u ne, “a i ah kia sei tui ng’ui cu akholä ah a plawh-m’htah ang? ⁵ Shin ah tui ng’ui cu ngui pit thum ah zoi ne, ghawi pyam ci gui-am peit gui vai ah kha te ci nei” ci ne ami mät gui ng’htau u ne, cun ah hnumi cu m’kat ci gui. ⁶ Bawipa Jesuh naw, “Cän ah hnumi naw amät ah m’hni ah bi bi sä, a i ah kia sei nami tüihtok ang? Ani ah bi cu kei ah phäh ah ang htei ah nik ci nei. ⁷ Ghawi pyam ciah chang gui cu nangmi awn ang täi ah atäng ah nami om ci. Nangmi naw nami ng’zak hlü päng ung nami m’htei gui hning ci. Kei läi cu nangmi awn ang täi ah kä ka om khai. ⁸ Shin ah hnumi naw amät ah m’khüt nak bäät awn kei cu nam htei ci nei. Kei ah ka gook cu m’cim vai ah ng’dawt ne tui ng’ui awn shawi pyi ci nei. ⁹ Kei naw akcang ka pyein cu, Thu Ni shäu nak ah kho nüng ah shin ah hnumi cu chang naw a shüm vai ah, ani ah bilawh cu pyein sak khai gui nei” ci ne kiak na gui ci. ¹⁰ Ang düihpüi gha-lei-goi ung kaa ah kiak ciah Judas Iskariot cu Bawipa Jesuh ami kut ung ap gui khai ah taigüpa gui ah om nak ah hteit ci. ¹¹ Cun ah chang gui naw Judas a law ah mawng cu ng’za u netah, ang htei ah zeikiai u ne, ani-am ngui pek khai gui ah ng’thu khän ci gui. Cun ah kia sei Judas naw, Bawipa Jesuh cu ga gui ah kut ung a ap nak gui vai ah lam cu ngaih tüh ne shui ci. Gui Ci ¹² Phiawn nak Htome hta cu ngawn ne k’caw kä shum ah m’htut den nak ah pawi tün htük hnüüp ung, ang düihpüi gui naw, Bawipa Jesuh-am, “Nang Bawipa ah hmawk ah phiawn nak mü-ei cu a hawi ang kami pian kaw?” ci ne ng’shik ci gui. ¹³ Bawipa Jesuh naw ang düihpüi pahnih-am, “Nangni pigaw kyong ah nami hteh vai, a cu ah tui khlüng kawt ne ana lawk ciah chang tumat cu nami hmuk khai, a cun ah chang cu ahnu ah nami läk vai. ¹⁴ Ani ah luh nak ba ah im ah hteit tu ni netah, im-ah-am, “Bawipa naw, ‘Kei la kang düihpüi gui naw phiawn nak mü-ei ei nak vai ah kyong khui a hawi ang? ci ne nang ng’shi sak gui ci’ ci ne nani pyein vai ¹⁵ Ani naw a khan kyong khui cu ning mihmuh goi khai, a cun ung apäng küm be khai nei,” ci ne m’cäi goi ci. ¹⁶ Ang düihpüi goi pahnih cu pigaw kyong ah hteit ni ne, Bawipa Jesuh naw am cäi goi ah mäih aè apäng cu hmu ni netah, phiawn nak mü-ei ei vai cu piang m’tham ci goi. ¹⁷ Khomü hun law khätah Bawipa Jesuh cu ang düihpüi gha-lei-goi awn atäng ah, gawk lawk ci gui. ¹⁸ Ngami cu atäng ah vun vai ne ami ei zah ung Bawipa Jesuh naw, “Kei naw akcang ka pyein cu, tuhbäi atäng ah vun ne mi ei ciah nangmi ung kaa chang tumat naw, kei cu ga ah kut ung na ap khai nei” ci ne kiak na gui ci. ¹⁹ Ang düihpüi gui cu ami m’lung thüi zawp khätah, “Cun cu kei na na pyein ah kä kiak ci ang?” ci ne ami van naw ng’shi lawk ci gui. ²⁰ Bawipa Jesuh naw, “Cun ah chang cu kang düihpüi gha-lei-goi ung kaa ah kiak ci. Kei ah ka ei nak ah k’bei ung phyom ne ei tuk ciah kiak ci. ²¹ Cacim ung om ciah mäih ah chang ah Htapa cu sik khai, cun ung phi chang ah Htapa ap ciah chang cu ang htei ah thüi sei nak om ci. A ni cu kä ang tüi tu ge vai sü ung ani ah hmawk ah bä pi khai süte” ci ne pyein ci. ²² Bawipa Jesuh la ang düihpüi gui cu mü-ei ami ei zah ung, Bawipa Jesuh naw m’htut cu la netah Khanpughi m’hlüngtai ne taigü ci. Cun kawn ah m’htut cu k’bou ne, “Shin ah m’htut cu kei ah ka pumsa ah kiak ci, la ne nami ei vai” ci ne ang düihpüi gui-am tei gui ci. ²³ Cun kawn ah khap cun phi la ne Khanpughi m’hlüngtai netah, ang düihpüi gui-am tei gui sei, ngami ami van naw awk ci gui. ²⁴ Bawipa Jesuh naw, “Shin ah khap cu Chang akda ah hmawk ah kei, naw ka huk ah ka si, Khanpughi naw ang thukhän am hnüt nak ah ka si, ah kiak ci. ²⁵ Kei naw ka ning m’thein gui cu, Khanpughi ah kho ung sapyit tui awk nak ah kho hnüüp kä a gawk law pha ah chuih, cän kawn ah kei cu sapyit tui kä ka aw tu ba khai” ci ne ang düihpüi gui-am kiak na gui ci. ²⁶ Cun kawn ah Bawipa Jesuh la ang düihpüi gui cu, m’hlüngtai nak ng’äi m’cu u ne Olive khomhtung lam ah hteit ci gui. ci ²⁷ Bawipa Jesuh naw, “Nangmi nami van cu kei na nawng ne nami dawng zawp khai nei, a i ah kia sei ci ung cacim ung,‘Khanpughi naw hto shäm cu ngawn khätah, hto gui cu püi piang zawp khai gui nei” ciah om ci. ²⁸ Cun ung phi kei cu sih nak ung kaa tho ba ne, Kalile kho ah ma ne ka na hteit khai nei,” ci ne ang düihpüghi gui-am kiak na gui ci. ²⁹ Peter naw, “A hei gui ami van naw ami ning nawng ung phi, kei naw kä ka ning nawng khai nei” ci ne pyein ci. ³⁰ Bawipa Jesuh naw Peter-am, “Kei naw akcang ka pyein cu, tuhmü ai kä a khon pha ung, nang naw kei cu, ‘ani kä ka hmat ci nei’ ci ne na na mak khai nei” ci ne kiak nak ci. ³¹ Cun ung phi Peter naw, “Kei cu nang Bawipa awn atäng ah ka sih tu vai ung phi, nang kä ka ning hmat ciah kyein ne, kä ka ning mak khai nei” ci ne ak thuuk ah pyein ci. A hei ang düihpüi gui cun phi a cun ah mäih ah pyein tu zawp ci gui. ³² Bawipa Jesuh la ang düihpüi gui cu, Ketsemane kho hmun ah gawk law u netah, Bawipa Jesuh naw, “Kei ka taigü zah ung shin ung ana ngo vä” ci ne m’cäi gui ci. ³³ Cun kawn ah Peter, James la Johan ni gui cu, a hteh nak ah khah püi gui ci. Bawipa Jesuh cu ang htei ah zaica ng’ä ng’ai netah, ³⁴ “Kei cu kam lung kyong na aih khai ah ka zaica ci. Nangmi naw shin ung ngaih na ne nami na gin vai nei” ci ne ang düihpüi thum gui cu m’cäi gui shüt ci. ³⁵ Bawipa Jesuh cu cun ung kaa api vang nawn ne, m’dek ung m’khukdong netah, ³⁶ “Kapa Khanpughi, nang cu ang täi avan nam khüt hning ci kia sei, shin ah zaica nak ah khap cu na phiawn ah sak ä. Cun ung phi kei ah ng’zak hlü ah kä kia-en ne, na mät ah ng’zak hlü ah kia sä” ci ne ani naw a bui awt law vai ah zaica nak cu, bä khai a kiak ung a phiawn nak hning vai ah taigü ci. ³⁷ Cun kawn ah Bawipa Jesuh cu ng’hlat law ba netah, ang düihpüi gui thum cu ip u sei hmu gui ci. Cun ah kia sei Bawipa Jesuh naw, Peter-am, “Simon, na ip ci ma? Nazi khat hta bäng ah kyong hngaw ung kä ih ah kä na om hlawt ci ma?” ci ne kiak nak ci. ³⁸ Cun kawn ah Bawipa Jesuh naw, “Nangmi naw tüihtok nak nami phiawn nak vai ah taigü ne ana ging vä, mumcha naw ng’za hlü sei phi, pumsa thagui kä om ci nei” ci ne kiak na gui ci. ³⁹ Cun kawn ah Bawipa Jesuh cu hteit ba ne a cun ah mäih ah taigü ba mä ci. ⁴⁰ Taigü zawp ne law ba sei ang düihpüi thum gui cu, a cun bä ah ana ip ba u sei hmu gui ci. Ngami cu käm dei law hlawt ne ngam u netah, Bawipa Jesuh ah ma ah a i ami pyein vai kä hmat ci gui. ⁴¹ Bawipa Jesuh cu ak thum vei nak ah taigü ne law ba netah, “Nangmi cu tuhgüt ip ne, ng’te ne, nami om ci ma? Bä khai nei, akhin gawk lawk ci nei, chang ah Htapa cu chang she gui ah kut ung ap lawk khai gui nei. ⁴² Law vä, mi hteit kaw, ga ah kut ung kei na ap khai ah chang cu gawk law pyi ci nei” ci ne kiak na gui ci. ⁴³ Cun ah Bawipa Jesuh naw ng’thu a pyein zah ung ang düihpüi chang gha-lei-goi ung kaa Judas cu gawk lawk ci. Ani awn atäng ah khim ni, htung tawn ni kawt ci gui ah, chang akda cu law tuk ci gui. Cun gui cu taigü pa gui, thukhän saza gui la Jew chang vai gui ah tüih law gui cu ah kiak ci. ⁴⁴ Bawipa Jesuh cu ga ah kut ung ap khai ah chang naw, “Kei naw kang ui ah chang cu Jesuh ah kiak ci nei. Ani cu pha netah ngäng ne shäm ne hteh püi vä” ci ne ngami cu a nüt gui shüt ah kiak ci. ⁴⁵ Judas cu a gawk law vai-am Bawipa Jesuh ah pei ah law netah, “Ka Bawipa, ci ne Bawipa Jesuh cu ng’ui ci. ⁴⁶ A cun vai-am chang gui naw Bawipa Jesuh cu pha ne k’pang ci gui. ⁴⁷ Cun zah ung a pei ah ng’düi ciah chang tumat naw, ak khim phawnç ne taigüpa ah ak chang shäm cu tuh sei, ak hnga vang täng hlang ci. ⁴⁸ Bawipa Jesuh naw, “Nangmi cu m’guk ei pha ah mäih ah kei nami na phak khai ah khim la htung tawn gui khawt ne nami lawk ci ma? ⁴⁹ Kei cu ak hnüüp tä sei nami ma ge ung pum im ah m’theithang gui ne ka om ci. Cun zah ung nangmi naw kä nami na phak ci.Cun ung phi cacim cu akcang ah küm khai nei” ci ne kiak na gui ci. ⁵⁰ Cun zah ung ang düihpüi gui cu Bawipa Jesuh nawng shüt ne püi ne dawng zawp ci gui. ⁵¹ Zih lang hta ng’vai ciah ak hmaw chang tumat cu Bawipa Jesuh ah hnu ah läk lawk ci. Chang gui naw ani cu pha hlü u khätah, ⁵² ani cu a zih ng’vai nawng shüt ne ak plui ah dawng ne maih ci. ⁵³ Ngami naw Bawipa Jesuh cu Taigütung ah im ah hteh püi ci gui. Taigüpa gui, Jew chang ng’vai gui la thukhän saza gui cu a cun ah im ah ng’cut lawk ci gui. ⁵⁴ Peter cu ng’shawng pipi ne taigütung ah im cham kyong ah khüt ne, Bawipa Jesuh cu läk lawk ci. Ani cu taigütung ah a gakap gui awn atäng ah mei awm ne ngo tuk ci. ⁵⁵ Taigüpa gui la kawngsi zung bawi gui naw Bawipa Jesuh ngawn nak hning ah kat nak saksi cu k’tha na ne shui ne phi kä hmuk ci gui. ⁵⁶ Acun ah mawng ung chang akda naw ami hleei pyein ne saksi ci gui. Cun ung phi ngami ah saksi gui cu a hei ah kiak ci. ⁵⁷ Chang am shah gui naw ng’düi law ne huttaap ne ng’thu ami pyein cu, ⁵⁸ “Chang ah kut awn cawh ah shin ah pum im cu kei naw ka plawh khai, cun kawn ak hnüüp thum hnüüp ung chang ah kut awn kä cawh ah pum im cu kei naw ka co khai” ci ne a pyein cu kami mät naw ⁵⁹ kami ng’zak ci nei,“ciah mäih gui pyein ne hleehlak ci gui. Cun ung phi cun ah ami pyein gui cu kä kawng ät ci. ⁶⁰ Taigütung naw chang gui ah ng’lung ah ng’düi law netahBawipa Jesuh-am, “Ngami naw ng’thu nikbün ne ning huttaap ne ami kiak cu, a i ah phi kä nam hlan tuba gui ci ma?” ci ne ng’shik ci. ⁶¹ Cun ung phi Bawipa Jesuh cu m’kha ät ah phi ng’thu kä pyein ne a düm hta ah om ci. Taigütung naw, “Nang cu zeikiai nak ah Khanpughi ah Htapa Messiah ah na kiak ci ma?” ci ne ng’shi ba mä ci. ⁶² Bawipa Jesuh naw, “Kei cu a cun nei, nangmi naw chang ah Htapa cu ahlüngtai säih ah Bawimang ah k’pat lam ah ngoh sei phi bäi, khomei ung cum ne kyum law ba sei phi bäi, nami hmu lawk khai nei” ci ne kiak nak ci. ⁶³ Cun kawn ah taigütung cu azih sui akut awn shum netah, “Mik mi naw saksi mi shui baksai vai kä hlü ci. ⁶⁴ Kat nak awn ang thu cu nami ng’za pyi ci, nangmi naw a i ah phupit ne nami k’bäi khai ang?” ci ne ng’shi gui ci. Cun ah chang gui ami van naw, “akat nak dang ci kia sei, sih nak peit vai ah khin ci nei” ci ne m’lau ci gui. ⁶⁵ Chang am shah gui naw Bawipa Jesuh cu ami m’shi awn m’thui ci gui. A hmai uk ne tuthat u netah, “A u ning tuthat ci ang pyein shüm ä” ci ne kiak nak ci gui. Taigütung ngäng ciah gakap gui naw a hmai cu k’beeih ci gui. ⁶⁶ Peter cu im cham kyong ah a om zah ung, taigütung ah a shäm hnumi hta cu gawk lawk ci. ⁶⁷ Peter mei awm ne a ngoh tu cu ani naw hmu netah kheing ne, “Nang phi Nasaret Jesuh ah chang ah na kiak ci” ci ne kiak nak ci. ⁶⁸ Peter naw, “Nang naw na pyein cu kei naw kä ka k’shing ci, hmat ah phi kä ka hmat ci,” ci ne ma ne pyein ci. Cun kawn ani cu im cham ah m’kawt pei lam ah hteit ci. A cun zah ung ai khong law htük ci. ⁶⁹ Ami shäm ah hnumi hta naw Peter cu hmu ba mä netah, a pei ah ng’düi ci gui-am, “Shin ah chang cu ngami ah ami paw nei” ci ne kia ba mä ci. ⁷⁰ Peter naw, “Kaa nei” ci ne ma ba mä ci. Shou hta shang khätah cun ung düi ci gui naw Peter-am, “Nang cu Kalile chang ah na kiak ci, ngami ah ning paw nei, kä na ma hlawt khai nei” ci ne kiak nak ci gui. ⁷¹ Cun ung phi Peter naw, “akcang ka pyein nei, nangmi ah pyein ah chang cu kä hmat ci nei, Khanpughi naw phi hmat sä” ci ne ma ba mä ci. ⁷² Cun zah ung ai ak hnih vei nak ah khong ba ci. Cun ah kia khätah, “ai hnih vai kä a khon pha ung, nang naw kei cu kä na nak shing ciah pyein ne, thum vei na na mak khai nei” ci ne Bawipa Jesuh a pyein te ah ng’thu cu shüm law ba netah Peter cu ang htei ah thüi ne kyap ci.

¹ A ngawi ung khongawi htaksiik ah taigüpa gui cu, Jew chang ng’vai gui, thukhän saza gui la, kawngsi zung bawi gui awn ng’hmu ne ng’ge u netah, Bawipa Jesuh cu khit u ne Pilat bawi ah hteh püi ci gui. ² Pilat bawi naw, “Nang cu Jew chang gui ah ghangpughang akcang ah na kiak ci ma?” ci ne ng’shik ci. Bawipa Jesuh naw, “Nang ah pyein ah kiak ci nei” ci ne pyein ci. ³ Taigüpa gui naw Bawipa Jesuh cu aktung ah m’kat ne huttaap ci gui. ⁴ Cun ah kia sei Pilat bawi naw Bawipa Jesuh-am, “Nang cu a i ah phi käng thu ne na om düt ci ma? Nang cu a i hlawk ah ning m’kat ne ami ning huttaap cu na hmat khai nei” ci ne kiak nak ci. ⁵ Cuî ung phi Bawipa Jesuh cu kä chiü ne a düm ah om khätah, Pilat bawi cu ang htei ah ngaihtüh khit ci. ⁶ Phiawn nak pawi ah a khin päng ung Pilat bawi naw, chang gui ah ng’zak hlü ah, thawng cum tumat cu m’hlawt ci man ci. ⁷ A cun zah ung Barabbas ming nak ciah chang ni, bawi gui hnungtuk püi ciah chang gui ni, m’guk-ei gui ni cu thawng ung cum ci gui. ⁸ Chang gui naw phiawn nak pawi päng ung ami thäh man ah thäh ba khai gui ah Pilat bawi ah law u khätah, Pilat bawi naw, ⁹ “Nangmi naw Jew chang gui ah ghangpughang cu m’hlawt vai ah nami ng’zak hlük ci ang?” ci ne ng’shi gui ci. ¹⁰ Cun ah ang shi gui ah mawng cu, taigüpa gui naw Bawipa Jesuh cu kä ng’za hlü u netah, ani ah om nak ah law püi ne ami ap law cu hmat netah a pyein ah kiak ci. ¹¹ Taigüpa gui naw ni püi gui u sei, chang gui naw Bawipa Jesuh ah a hnün ung Barabbas cu m’hlawt vai ah k’thäh ci gui. ¹² Pilat bawi naw, “Jew chang gui ah ghanpughang nami ci cu a i ah ka ci vai ang? ci ne ng’shi ba gui ci. ¹³ Ngami naw kutlam tung ung tai ne ngawn vai nei”ci ne m’lau ci gui. ¹⁴ Pilat naw, “Ani naw shetkat nak a i ang abi? ci ne ng’shi ba gui ci. Chang gui naw, “Cun ah chang cu kutlamtung ung tai ne ngawn vai nei” ci ne m’lau law piktäi ci gui. ¹⁵ Pilat naw, amät cu chang gui naw ami zum vai ng’za hlü netah Barabbas cu k’phiawn ne Bawipa Jesuh cu tuhthat netah, kutlam tung ung tai ne ami ngawn vai ah ap gui ci. ¹⁶ Gakap gui naw Bawipa Jesuh cu gawnu bawi ah im ah hteh püi u netah gakap nawng ät naw ’koi ci gui. ¹⁷ Cun kawn ah Bawipa Jesuh-am sui asen hlui bäng m’sui u ne, ng’hling lukhu k’bün u netah, ¹⁸ “Jew Chang gui ah ghanpughang ghi ne ghing sä” ci ne ngüm täu ne päipih ci gui. ¹⁹ Cun kawn ah alu ung htung awn that ci gui, ami m’shi awn m’thui ci gui, ama ah m’khukdoong ne kawp ne taigü ng’hlawk ci gui. ²⁰ Cun ah päipih u netah asen hlui ah sui cu suh ba sak u ne, amät ah sui te cu m’sui ba ci gui. Cun kawn ah kutlam tung ung tai ne, ngawn vai ah Bawipa Jesuh cu hteh püi ci gui. ²¹ Cun zah ung lam ah Sairin kho ah kaa (Aleksandä la Rufus ah ani pa) Simon cu ana law sei k’pang u netah, Bawipa Jesuh ah kutlam tung cu kaw sak ci gui. ²² Cun kawn ah Bawipa Jesuh cu (Lukoi k’am) ah ming ciah Kolkotha kho hmun ah hteh püi ci gui. ²³ Ngami naw muran naw ami k’caw ah sapyit tui cu tu ci gui, cun ung phi Bawipa Jesuh naw kä awk ci. ²⁴ Cun kawn ah Bawipa Jesuh cu kutlamtung ung tai ne ngawn ci gui. A suisak gui cu chang gui naw m’shüih tawk ne ng’pai ci gui. ²⁵ Bawipa Jesuh kutlamtung ung tai ne ami ngawn nak ah khin cu, kho plang k’tai nazi kaw a khin ah kiak ci. ²⁶ Bawipa Jesuh ami m’kat nak ah kutlamtung ung gu ne ami tai ah ca cu, “Jew Chang gui ah Ghanpughang” ciah kiak ci. ²⁷ Bawipa Jesuh awn atäng ah m’guk-ei pahnih cun phi akpat lam ah tumat ak eng lam ah tumat ah kutlamtung ung tai ne ngawn tuk ci gui. ²⁸ (A cun gui naw, ‘Bawipa cu kat nak bik ciah ng’louh sak ci gui’ ciah cacim ung om ci cu küm sak ci.) ²⁹ Lam ung hteit hton ciah chang gui naw Bawipa Jesuh cu m’hai ne dan u netah, “Pum im cu gäi netah hnüüp thum ung co ba khai ah chang can ah maw! ³⁰ Kutlamtung ung kaa kyum law ba ä, na mät naw na mät hun law shüm ä” ci ne päihpih ci gui. ³¹ A cun ah mäih ah taigüpa gui la thukhän saza gui naw phi päihpih u ne, “Shin ah chang cu chang a hei gui läi hun gui hning ci, cun ung phi amät naw amät läi kä hun hning ci nei. ³² Israel Ghanpughang, Messiah Bawipa, kutlamtung ung kaa kyum law ba sä, cun kami hmuh ung kami zum khai nei” ci ne kiak nak ci gui. Bawipa Jesuh awn atäng ah kutlamtung ung ami ngawn goi naw phi Bawipa Jesuh cu päipih ci goi. ³³ Kho hnüüp lunglai ung tün ne kho k’awi nazi thum güt ung khomdek khan avan cu mü ne hmüp zawp ci. ³⁴ Kho k’awi nazi thum ah khin ung Bawipa Jesuh cu, “Eloi, Eloi, lema sabachthani?” ci ne m’lau ci. Cun cu, “Ka Khanpughi, Ka Khanpughi, a i ah kia sei kei na na nawng nei” a ci ah kiak ci. ³⁵ Apei ah ng’düi ci gui naw cun ah ng’thu cu ng’za u netah, “Ngai tu vä, Elijah khü ci nei” ci ne kiak ci gui. ³⁶ Cun zah ung chang tumat cu dawng law ne, sapyit tui pyeng ci cu, m’zak awn sook ne, ng’lawi ung m’sawi ne, han tu netah, “Ani la lawk khai ah Elijah a law la kä a law ah mi teng shüm kaw” ci ne kiak ci gui. ³⁷ Bawipa Jesuh cu shalawng khai ah m’lau netah kät lawk ci. ³⁸ Acun vai-am pum im kyong ah ami zai ah zih cu vang mawng ah kaa vang mawng ah khüt khai ah hnih ah teek ne ng’chak ci. ³⁹ Bawipa Jesuh ah sih nak ah ma ah ng’düi ciah gakap bawi naw, Bawipa Jesuh asih law cu hmu netah, “shin ah chang cu akcang ah Khanpughi ah Htapa ah kiak ci nei”ci ne pyein ci. ⁴⁰ Hnumi am shah gui naw ng’shawng pipi netah Bawipa Jesuh cu teng ci gui. Cun ah chang gui cu, Mari Makdalene, Ak hmaw ba James la Josef ah nu Mari la Salome ni gui ah kiak ci. ⁴¹ Ngami cu Bawipa Jesuh Kalile kho ah a om zah ge ung tün ne, ahnu ah läk ne m’hteihtang ci gui ah kiak ci. Ngami ah kawn ah Bawipa Jesuh awn atäng ah Jerusalem ah kaa ng’läk law tuk ciah hnumi gui phi om ci gui. ⁴² A cun ah hnüüp mühun lam ah Arimathea ah kaa, Josef ming nak ciah chang tumat cu gawk lawk ci. Ani cu chang ah kyih aa tu ah bawimang chang vai ah kiak ci. Ani cu Khanpughi ah uk nak kho a gawk law vai cu zum ne ngäng ciah kiak ci. (Cu hnüüp cu a ngawi ung kyin vai kia sei ami pawng m’hteim nak ah kiak ci). A cun ah chang naw Pilat ah ang ghit ah va hteit ne Bawipa Jesuh ah a gook cu htüm vai ah vak thäh ci. ⁴⁴ Pilat naw Bawipa Jesuh a kät pyi cu ng’za ne cäicat netah, gakap bawi cu khü ne Bawipa Jesuh a kät nak a i güt a lüng law ah ng’shik ci. ⁴⁵ Ani naw gakap bawi ah m’thein ba ang zak kawn ah Josef am a gook cu htüm vai ah ap ci. ⁴⁶ Josef naw Bawipa Jesuh ah a gook cu kutlamtung ung kaa, chang ba netah zih bawk awn hlawp ne k’tom ci. Cun kawn ah lung ami shawk ah ng’cim hmun khui ung k’phuh netah, khui m’kawt cu lungnu m’hlat ne khai shüt ci. ⁴⁷ Cun ah ami khai cu Mari Makdalene la Josef ah nu Mari naw hmu tuk ci goi.

¹ Kyin nak hnüüp ang pyi kawn ah Mari Makdalene la, James ah nu Mari ni, Salome ni gui cu Bawipa Jesuh ah a gook hluk nak vai ah tui ng’ui khleih ci gui. ² Ng’len hnüüp khongawi htasiik ah khohni aluh law zah ung ngami cu ng’cim hmun ah hteit ci gui. ³ Ami hteh lam ah ngami cu, khui m’kawt khai nak ah lungnu a u naw m’hlat ne nak hmawn tu gui khai ang?’ ci ne ami mät ng’htau ci gui. (Cun ah lung nu cu ang htei ah däm aih ci).Ngami naw gawk ne teng law u khätah, cun ah lungnu cu m’hlat ne k’hmawn pyi ah kia sei hmuk ci gui. ⁵ Cun kawn ah ngami cu khui m’kawt ung va lut u netah, a bawk pükpük sui ciah akhmaw chang tumat k’pat lam ung ngo sei hmuk ci gui. Cun ah kia sei ngami cu cäicat ci gui. ⁶ Cun ah chang naw, “Kä kyikyawk vä, nangmi naw kutlamtung ung tai ne nami ngawn ah Nazaret chang Jesuh cu nami shui ciah kä kia ne ang? Ani shin ung kä om ba ci nei, sih nak ung kaa tho ba pyi ci nei. Teng shüm vä, shin cu ani ah a gook phuh nak te ah kiak ci nei. ⁷ Nangmi cu Peter la ahei ang düihpüi gui ah hteit ne, “Bawipa cu hteit ma ne Kalile kho ah ana gawk khai nei, azan a ning m’thein gui ah mäih ah Bawipa cu Kalile kho ah nami hmu ba khai nei” ci ne pyein ci. ⁸ Cun ah hnumi gui cu cäicat kyikyawk aih u netah, ng’cim hmun ah kaa dawng ba ci gui. Ngami cu kyikyawk aih u netah a u phi kä thu püi ba ci gui. ⁹ Ng’len hnüüp khongawi htasiik ah Bawipa Jesuh cu sih nak ung kaa a thawh ba kawn ah Mari Makdalene ah ma ah ng’dang ba ma ci. Ani cu khoshe pachih naw kai sei Bawipa Jesuh naw ak täm peit te ah chang ah kiak ci. ¹⁰ Ani cu Bawipa Jesuh ah ang düihpüi gui ah om nak ah hteit ne, a cun ah amawng cu m’thein gui ci. Ang düihpüi gui cu cun zah ung thükyap ne om ci gui. ¹¹ Cun ah kia sei Bawipa Jesuh ghing ne a om la Mari naw a hmuh ah mawng ng’za u ne phi kä zum ci gui. ¹² Cun kawn ah ang düihpüi pahnih cu pigaw zung ah ani hteh zah ung, Bawipa Jesuh cu amüi agü ahlü ah kia ne ani ma ah dang lawk ci. ¹³ Ngani naw a hei ang düihpüi gui ah ma ah hteit ba ne a cun ah mawng cu pyein ci goi, cun ung phi ngami naw kä zum ci gui. ¹⁴ Cun kawn ah ang düihpüi chang sing gha-lei-ät naw ei vai ne ami ei zah ung, Bawipa Jesuh cu ami ma ah ng’dang lawk ci. Ngami cu ami zum nak kä a om ah hmawk la Bawipa Jesuh sih nak ung kaa a thawh ba kawn ah Bawipa Jesuh hmuk ciah chang gui ah ami pyein cu kä ami zum nak hning ah hmawk ah züi gui ne m’cäi gui ci. ¹⁵ Bawipa Jesuh naw, “Khomdek khan avan ung hteit ne chang nüng nüng-am Thu Ni cu m’thein vä. ¹⁶ Zum ne tuihnim nak lak ciah chang phung cu hun phiawn nak gah khai hei; kä zum tuk ciah chang phung cu shetkat nak om khai nei. ¹⁷ Zum ciah chang gui cun naw cäi aih vai bi nak hning ah hlüngtai nak gah khai gui. Kei ah ming awn khoshe phi k’täm khai gui, thu a hlü hlü phi pyein hning khai gui, ¹⁸ Ngami naw k’phyu k’nget ami k’pan ung phi bäi, sih nak vai ah ng’tuui tui ami awk ung phi bäi, ngami ung sih nak kä om khai. Gawpai ci gui ah khan ah ami kut taih ne gai sak gui khai gui” ci ne m’thein gui ci. ¹⁹ Cun ah Bawipa Jesuh cu ang düihpüi gui ang thu püi gui, kawn ah khankho ah kai püi ba u sei Khanpughi ah k’pat lam ung hang zong ne ngok ci. ²⁰ Ang düihpüi gui cu kho nüng ah hteit ne Thu Ni cu pyein ci gui. Ngami cu Bawipa naw atäng ah om püi gui ne, ami ng’thu pyein ang düng ah mawng saksi dang khai ah cäi aih nak gui vai ami m’dang nak hning vai ah hlüngtai nak cu pe gui ci.) [