MATTHE

MATTHE

¹ Shin cu Abraham ah hta ng’shon, David ah pakhui, Jesuh Krit ah ng’shon law ang tän ah kiak ci. ² Abraham ung tün ne David ghangpughang ung khüt ciah ng’shon ang täm law cu: Abraham ah hta Isak, Isak ah hta Jakop, Jakop ah hta Judah, Judah la a nau gui; ³ Judah ah hta goi Perez la Zerah (ani nu cu Tamar), Perez ah hta Heron, Heron ah hta Ram; ⁴ Ram ah hta Amminadap, Amminadap ah hta Nahshon, Nahshon ah hta Salomon; ⁵ Salomon ah hta Boaz (anu cu Rahap) Boaz ah hta Obet (anu cu Ruth), Obet ah hta Jesse, Jesse ah hta David ghangpughang ah kiak ci. ⁶ David ung kaa naw Israel chang gui Babilon kho ah ami hteh püi gui ung khüt ciah ng’shon ah ng’täm law gui cu; David ah hta Solomon (anu cu Uriah ah chu David ah khäm tu ba); ⁷ Solomon ah hta Rehaboam, Rehaboam ah hta Abijah, Abijah ah hta Asa; ⁸ Asa ah hta Jehoshaphat, Jehoshaphat ah hta Jehoram; ⁹ Jehoram ah hta Uzziah, Uzziah ah hta Jotham, Jotham ah hta Ahaz, Ahaz ah hta Hezekiah; ¹⁰ Hezekiah ah hta Manasseh, Manasseh ah hta Amon, Amon ah hta Josiah; ¹¹ Josiah naw Babilon ah pha ne ami hteh püi gui zah ung ahta nak gui cu Jehoiachin la anua gui ah kiak ci. ¹² Babilon kho ah ami hteh püi gui ung kaa naw, Jesuh Khrit ang tüi law ung khüt ciah ng’shon ang täm law gui cu: Jahoiachin ah hta Shealtiel, Shealtiel ah hta Zerubabel, Zerubabel ah hta Abiud; ¹³ Abiud ah hta Eliakim, Eliakim ah hta Azor; ¹⁴ Azor ah hta Zadok, Zadok ah hta Achim, Achim ah hta Eliud; ¹⁵ Eliud ah hta Eleazar, Eleazar ah hta Matthan, Matthan ah hta Jakop; ¹⁶ Jakop ah hta cu Mari ah cei Josef ah kiak ci. Mari cu Messiah ah ming ciah Jesuh ah anu ah kiak ci. ¹⁷ Cun ah kia sei Abraham ung kaa naw David ung khüt ciah ng’shon gha-lei-phli, David ung kaa naw Israel chang gui pha ne Babilon ah ami hteh püi gui ung khüt ciah ng’shon gha-lei-phli, Babilon ah pha ne ami hteh püi nak gui ung kaa naw Messiah ang tüi law ung khüt ciah ng’shon gha-lei-phli ah kiak ci. ¹⁸ Jesuh Khrit ang tüi law ah mawng cu shin ah kiak ci; Mari cu Josef ung ami beit kawn ah, kä ani ni om ng’chungla pha ung, Mumcha Theing awn käü mah lawk ci. ¹⁹ Josef cu düng ciah chang k’ni ah kia ne, chang ah ma ah Mari a lü ng’ va kä ng’za hlü netah, ng’häng ba vai ah ngaih tüh ci. ²⁰ Cun ah a ngaih tüh sang ung Khanpughi ah khankho chang naw, a ih mang ung, “David ah hta ng’shon Josef aw, Mari nakchu nak vai ah mawng cu kä na ng’ä ng’ai vai nei, ani cu Mumcha Theing naw vang na sei, käü mah ciah kiak ci. ²¹ Ani cu pamihta ah hta lawk khai. Cun ah Htapa cu ak chang gui ami kat nak ung kaa hun phiawn gui khai ah kia sei, ‘Jesuh’ ah ang ming nami sui vai cine kiak nak ci. ²² Shin ah amawngma gui cu profet gui-am Khanpughi naw am cäi nak gui ah ng’thu aküm nak ah kiak ci. ²³ Cun ah ng’Thu cu; “Ng’Lamihta cu käü mah ne, Pamihta ah hta lawk khai. Ani cu Immanuel ah ang ming sui khai gui.(Immanuel ci cu mik awn atang ah om ciah Khanpughi ah kiak ci). ²⁴ Cun ah kia sei Josef cu a ih nak ung kaa, a thawh law ba kawn ah Khanpughi ah khankho chang ah a pyein ah mäih ah Mari cu akchu ah khäm ci. ²⁵ Cun ung phi Mari kä ahta pha ah chuih Josef naw kä ih om püi ci. Cun ah hta cu Josef naw Jesuh ah ang ming sui ci.

¹ Bawi Jesuh cu Judea kho, Bethlehem gawu ah, Herod ghangpughang ah uk zah ung ami hta nak ah kiak ci. Cun zah ung hnilaw lam ah kaa, aisi läk lawk ciah hmuhmat chang gui cu, Jerusalem ah gawk law u netah, ² “Tuhbäi ng’tüi lawk ciah Jew chang gui ah ghangpughang cu a hawi ang? Hnilaw lam ah ani ah aisi dang sei hmu u ne, ani cu khawihnah vai ah kami lawk ci nei,” ci ne ng’shi gui ci gui. ³ Acun ng’za u netah Herod ghangpughang la Jerusalem ah chang gui cu cäicat zawp ci gui. ⁴ Herod ghangpughang naw taigüpa gui la thukhän saza gui cu khü gui netah, “Messiah cu a hawi ah ng’tüi khai ang?” cine ng’shi gui ci. ⁵ Ngahmi naw, “Judea kho, Bethlehem gawnu ah ng’tüi khai nei, Profet ah guk ah cacim ung: ⁶ ‘Judea kho ung om ciah Bethlehem gawnu, Nang cu Judea kho gawnu gui ung, Ak zaw pibäih ah kä na kiak ci nei, Ka chang Israel gui, lam shüm gui khai cu, Nang ung kaa dang lawk khai nei’ ciah om ci,” ci ne m’thein ba gui ci. ⁷ Cun kawn ah Herod ghangpughang naw hmuhmat chang gui cu a düm ah khü gui netah, aisi ah ang dang law nak ah akhin cu, ang khai ah ng’shi gui ci. ⁸ Cun ah ghangpughang naw, “Nangmi hteit ne akhmaw cu nami hmuh vai ah nami shui vai, nami hmuh ung nami nam thein law ba vai, kei phi hteit ne ka khawihnah tuk khai,” ci ne m’cäi gui ci. ⁹ Cun ah kia sei ngahmi cu ng’düi law ne hteit ba u ne, ami hmuh te ah aisi cu hmuh ba u netah ang htei ah zeikiai ci gui. ¹⁰ Cun ah aisi naw ngahmi cu lam shüm gui lä ne, ak hmawhta ah omnak ung gawk netah ng’düm ci. ¹¹ Ngahmi cu im kyong ah va lut u netah, ak hmawhta cu anu Mari awn atäng ah hmuk ci gui. Cun kawn ah ngahmi cu m’khuukdoong ne kaup u netah, ami law püi ah ghui ni, Frankinsen tui ng’ui ni, mura tui ng’ui ni gui awn khawihnah ci gui. ¹² Herod ghangpughang ah om nak lam ah kä ami hteh ba vai ah Khanpughi naw ami ng’mang ung m’thein gui khätah, ngahmi cu alam hei ung ami kho ah hteit ba ci gui. ¹³ Hmuhmat chang gui ami hteh ba kawn ah Khanpughi ah khankho chang cu Josef ah ih mang ung dang law netah, “Herod naw ak hmaw cu ngawn vai ah shui lawk khai nei, tho law ne ak hmaw la anu cu Ejip kho ah dawng püi goi ä, Kei naw ‘Law ba vä,’ kä ka ci pha ah chuih a cu ah na om pu"i goi vai nei,” ci ne pyein ci. ¹⁴ Josef cu tho law ne, ak hmaw la anu cu khomü ung Ejip kho ah hteh püi gou netah, Herod a sih güt a cu ah om püi goi ci. ¹⁵ Cun ah mawng gui cu, “Ka Htapa cu Ejip kho ah kaa, ka law püi ba ci,” ciah profet gui ung gawk lawk ciah Khanpughi ah ng’thu aküm nak ah kiak ci. ¹⁶ Herod cu hmuhmat chang gui naw ami theileh nak hmat netah ang htei ah m’lungshe ci. Cun ah kia sei ngahmi ah m’thein tu ah aisi ang dang nak ah khin cu m’khin ba netah, Bethlehem gawnu la apei ung pigaw gui ung kaa, a khokum kum goi la kum goi ah k’hmaw ba ciah ak hmaw gui cu avan ngawn sak gui ci. ¹⁷ Cun cu profet Jeremiah ah ng’thu pyein aküm nak ah kiak ci. Ani ah ng’thu pyein cu: ¹⁸ “Ramah kho kyong ah thüi kyah nak ah k’aw cu thang lawk ci, Rachelah cu ahta gui ah hmawk ah viik ne kyap ci, Ahta gui cu sihnak ung kä phiawn sak gui hlawt ci,” ciah kiak ci. ¹⁹ Herod asih kawn ah Khanpughi ah khankho chang naw, Ejip kho ah Josef ah ih mang ung, ²⁰ “Tho law ne akhmaw la anu cu Israel kho ah hteh püi ba goi ä, akhmaw ngawn hlük ciah chang gui cu si pyii ci gui nei,” cine pyein ci. ²¹ Josef cu tho law ne, akhmaw la anu cu Israel kho ah hteh püi ba goi ci. ²² Cun ung phi Judea kho ung Archelaus cu apa Herod ah hnün ung ghangpughang ah ngoh ba ne om ci. A cun cu ng’za netah Josef cu Judea kho ah ahteh ba vai ah kyik ci. Cun ah kia sei ani cu Khanpughi naw ang mang ung ak phlan ah mäih ah Kalile kho ah hteit ne, ²³ Nazaret gawnu ah om tuk ci. Cun cu profet gui ah ng’thu pyein ung, “Ani cu Nazareth chang ah kiak khai nei” ciah om ci cu aküm nak ah kiak ci.

¹ Cun zah ung Tuihnim Johan cu Judea kho bung puk ah dang law ne, ² “Nami shetkat nak ng’nü ung ng’zu ba vä, Khanpughi ah uk nak kho cu ng’et law pyii ci nei” ci ne ng’thu pyein ci. ³ Profet Isaiah naw, “Bawipa ah law nak vai lam piang vä, Ani ah hmawk ah lam cu düng sak zawp vä, ci ne, chang tumat bungpuk ah ng’shäü ci nei” a ci cu Johan a pyein ah kiak ci. ⁴ Johan cu kala-uk mu awn tah ah suinu sui ne, saphaw m’züi awn ak khei k’htün ci. A ei awk cu khoitui la khoi htalung ah kiak ci. ⁵ Jerusalem gawnu ung kaa gui, Judea kho ung kaa gui la Jordan tuinu pei zung ah om ciah chang gui cu Johan ah gawk lawk ci gui, ⁶ Ngahmi cu ami shekat nak ng’nü ng’zu ba u ne, ng’paá na u sei, Johan naw Jordan tuinu ung tuihnim gui ci. ⁷ Pharisee gui la Sadducee gui cu tui ng’hnim tuk khai gui ah ami law hmu gui netah Johan naw, “K’Phyu m’äm ah gui aw! Gawk lawk khai ah Khanpughi ah m’lungshe nak phiawn nak vai ah mawng cu a u naw ang aning m’thein gui? ⁸ Akcang ah nami ng’zu ba ah mawng cu nami om ih awn nami m’dang vai nei. ⁹ Abraham cu kami pa ah kiak ci nami ci nak düt awn, nangmi cu kat nak ung nami phiawng khai ah kä nami ngaih-en vai nei. Khanpughi naw shin ah lung gui cu la ne, Abraham ah hta gui ah tüi piang hning ci, ci cu ka ning m’thein gui ci nei. ¹⁰ Sing ghing gui ah kung ah chuk nak vai ah ghei cu, m’shän pyii ah kia sei, akni ah kä m’theih ciah a ghing phung cu, chu pit ne mei ung k’bum zawp vai nei. ¹¹ Nangmi nami ng’zu ba ah hmawk ah tui awn tuihnim nak ka ning pe gui ci, Kei ah ka hnu ah lawk ciah Bawipa naw Mumcha Theing la mei awn hnim nak ning pe gui khai. Ani cu kei ah mä hlüngtai pi ci, Kei cu ani ah phahnak phi ka kawt khai ah kä ka khin ci. ¹² Akut ung htang akchü nak vai ah chüdawn kawt ci. Amät ah geitkaw gui cu khäm zawp netah htang ang tak gui cu khei ung thun zawp khai. Ang shi gui läi cu m’sih ne käm khüt vai ah mei awn m’khih zawp khai,” ci ne m’thein gui ci. ¹³ Cun sang ung Bawipa Jesuh cu Kalile kho ah kaa, Jordan tuinu pei ah Johan ah om nak ah tuinim khai ah gawk lawk ci. ¹⁴ Cun ung phi Johan naw, “Kei cu nang naw tuinim nak na na pek khai ah kiak ci, cun ung phi kei ah nang na lawk ci ma?” ci ne ana maa nak ci. ¹⁵ Bawipa Jesuh naw, “Khanpughi ah a pyein ah bi mi bik khai kia sei, a cun ah na bi vai” ci ne kiak na khätah, cun kawn ah Johan naw zum ci. ¹⁶ Bawipa Jesuh cu tuinim pyii ne a Luh law ba kawn ah, khankho cu zung hmawng law khätah, Khanpughi ah Mumcha Theing cu müm bawk ah mäih ah zawng law ne, ak khan ah ngo law sei hmuk ci. ¹⁷ Cun kawn ah, “Shin cu kei ah ka m’hni ah Ka Htapa nei, ani cu ang htei ah ka zei nak ci nei,” ciah khankho ah k’aw ng’shan lawk ci.

¹ Cun kawn ah khoshe ah tüihtok nak a aut vai ah Bawipa Jesuh cu Mumcha naw bung ah hteh püi ci. ² Bawipa Jesuh cu hnüüp phli-kip la mü phli-kip ung a ei kaa ah om netah, ei ah cawi lawk ci. ³ Cun kawn ah khoshe naw law shi netah, “Nang cu Khanpughi ah Htapa ah na kiak ung shin ah lung gui shi, m’htut ah kiaë khai ah pyang ä,” ci ne kiak nak ci. ⁴ Cun ung phi Bawipa Jesuh naw, “Chang cu ei bäng awn ghing ciah kä kiak ci, Khanpughi ah ng’thu awn hnun m’ghin vai, ciah cacim ung om ci,” ci ne kiak nak ci. ⁵ Cun kawn ah khoshe naw Bawipa Jesuh cu Jerusalem, theingcim pi ciah gawnu ung, ak hlüng pibäih pum im khan ah hteh püi netah; ⁶ “Cacim ung,” Khanpughi naw nang ning m’hteihtang khai gui ah khankho chang gui zuk tüi law sei, ngahmi naw nang ah kho cu lung naw kä ning tawn-en khai ah ning chang khai gui’ ciah om ci. Cun ah kia sei nang cu Khanpughi ah Htapa akcang ah na kiak ung zu ng’htoü shüm ä, ci ne kiak nak ci. ⁷ Bawipa Jesuh naw, “Na Bawipa Khanpughi cu kä na tüihtok vai, ci ne cacim ung om ci,” ci ne kiak nak ci. ⁸ Cu kawn ah khoshe naw Bawipa Jesuh cu, hlüngtai pibäih ciah khohtung khan ah hteh püi ne, khomdek khan ah chang ah uk nak kho avan la ami bämang nak avan cu m’hnuh netah, ⁹ “Kei cu m’khuukdong ne na na khawihnah ung shin gui avan ka ning pek khai,” ci ne kiak nak ci. ¹⁰ Bawipa Jesuh naw, “khoshe a hei ah hteit ä! Cacim ung, ‘Na Bawipa Khanpughi bäng na khawhnah vai, ani ah bi bäng na bi vai’, ciah om ci nei, ci ne k’täm ci. ¹¹ Cun kawn ah khoshe cu a hei ah hteit khätah, khankho chang gui kyum law u ne, Bawipa Jesuh cu m’hteihtang ci gui. ¹² Bawipa Jesuh cu Johan pha ne ami chum ng’za netah, kalile kho ah hteit ci. ¹³ Ani cu Nazareth kho ung kä om ne, Zebulun la Nahtali kho ah ng’lak Kalile tuili pei, Kapernaum gawnu ah hteit ne om ci. ¹⁴ Cun ah abi cu profet Isaiah ah ng’thu aküm nak vai ah kiak ci. Profet Isaiah naw; ¹⁵ “Zebulun khaw la Naphtali kho, Tuinu ah hteh nak lam ung om ci gui ah Jordan tuinu vang ga kho, Chang pakhui hei gui ah om nak ah Kalile kho! ¹⁶ Ak hmüp nak ung om ciah chang gui naw, akdei khang hmu lawk khai gui; Sih nak ah khomü ung om ciah chang gui ah khan ah, Akdei khang cu gawk lawk khai nei,” ci ne pyein ci. ¹⁷ Cun ung tüi ne Bawipa Jesuh naw, “Nami shetkat nak ng’nü ung ng’zu ba vä, khankho uk nak ng’et law pyii ci nei” ci ne ng’thu pyein lawk ci. ¹⁸ Bawipa Jesuh cu Kalile tuili nu pei ah a hteh sang ung ngakpha ng’phäi nau goi cu hmu goi ci. Cun goi cu Simon (Peter ah phi ami khü) la anau Andru ah kiak ci. Ngani cu tuili ung ng’vai vawi ne om ci goi. ¹⁹ Bawipa Jesuh naw, “Ka hnu ah na läk nä, chang phak ciah ngakpha ah ka ning pyang goi khai,” ci ne khü goi ci. ²⁰ Ngahni cu acun vai-am ani ng’vai nawng shüt ni ne, Bawipa Jesuh ah hnu ah läk ci goi. ²¹ Cun ung kaa hteit ba netah, Zebedee ah hta goi James la Johan ng’phäi nau goi cu hmu ba goi ci. Ngahni cu ani pa Zebedee awn atäng ah ’hleiko ung ng’vai kiang ne om ci goi. Bawipa Jesuh naw ngahni cu ahnu ah ani läk vai ah khü goi khätah, ²² ani hleiko la ani pa nawng shüt ne läk tuk ci goi. Gui ²³ Bawipa Jesuh cu Kalile kho avan ung hteit ne pum im gui ung m’theithang gui ci. Khankho ah mawng ng’thu phi pyein ci, ahlü hlü ah gawpai ci gui phi gai sak gui ci. ²⁴ Bawipa Jesuh ah mawng cu Siria kho avan ung thang law khätah, chang gui naw khoshe ah kai gui, mangtak ci gui, akut kho shum ci gui la agü ahlü ah gawpai ciah chang gui cu a om nak ah law püi ci gui. Bawipa Jesuh naw cun gui ami van gai sak gui ci. ²⁵ Kalile kho, kho pagha ah ming ciah Dekapoli kho, Jerusalem gawnu, Judea kho la Jordan tuinu vang ga ah om ciah chang khli naw Bawipa Jesuh cu ahnu ah läk lawk ci gui.

¹ Bawipa Jesuh cu chang gui akda hmu gui netah, m’htung khan ah hang kai ci. ² A ngoh nak pei ah ang düihpüi gui naw veing ne k’bui u khäta shinah theithang gui ci; ³ “Mumcha geinvai ah mawng hmat ciah chang gui zeikiai vä; Khankho cu nangmi ah kho ah kiak ci! ⁴ “Am lung thüisei ci gui zeikiai vä; Khanpughi naw m’lung üp nak ning pe gui khai. ⁵ “Am lung hnip ne a om nik ciah chang gui zeikiai vä; Nangmi ung Khanpughi ah shaitaak cu kümbe khai! ⁶ “Khanpughi ah ng’zak hlü ah bilo hlük ciah chang gui zeikiai vä; Nangmi cu Khanpughi naw nami ng’zak hlü ning ’be sak gui khai! ⁷ “M’geinsei nak om ciah chang gui zeikiai vä; Nangmi cu Khanpughi naw ning m’geinsei gui khai ⁸ “Am lung kyong theingthap ci gui zeikiai vä; Nangmi naw Khanpughi nami hmuk khai! ⁹ “Dimdeeih nak bik ci gui zeikiai vä; Khanpughi naw ahta ah ning khü gui khai! ¹⁰ “Khanpughi ah düng nak abi nak awn, Shedam nak gah ciah chang gui zeikiai vä; Khankho cu nangmi ah kho ah kiak khai! ¹¹ “Kei ah hmawk ah chang gui naw ning shedam na gui ne, käng düng ci awn ahlü hlü ah a ning m’kat law gui ung, nangmi cu zeikiai nak om sä, nangmi cu kei na läk ciah nami kiak ci nei. ¹² Zeikiai ne lünlawi vä, khankho ah nangmi ah gah vai ah m’cümhnah nak cu däm aih ci nei. Caü profet gui phi a cun ah mäih ah shedam nak gah pyi ci gui nei. ¹³ Nangmi cu chang nüng ah hmawk ah m’shii ah mäih ah nami kiak ci. M’shii cu atui a maih kawn ah tui ba khai ah kä pyan ba hlawt nei. Kä ei mang ba phia sei, k’tai ah ghawh ung chang gui naw kai nak ci gui. ¹⁴ Nangmi cu m’dek khan avan ung akdei ah mäih ah nami kiak ci. M’Htung lai ah k’süm ah pigaw cu a i naw kä shung hlawt ci. ¹⁵ Mei m’däi netah a u naw dawn awn kä uk man ci. Im kyong ah chang avan adei vai ah lung k’pei ung vah mei m’däi man ci gui. ¹⁶ A cun ah mäih ah chang gui naw akni ah nami om cu ning teng gui u ne, khankho ah om ciah nami Pa cu ami m’hlüngtai vai ah, chang gui ah ma ah nami dei nak cu va deikhang sak vä. ¹⁷ Moses ah Thukhän la profet gui ah cacim cu ka plawh sheh khai ah ka lawk ciah kä nami ngaih-en vai. Ka plawh sheh khai ah ka lawk ciah kä kiak ci, a cun gui ka kümbe sak khai ah ka lawk ci nei. ¹⁸ Kei naw akcang ka pyein cu, khomdek la khankho a om zah ah chuih cacim ung kaa, ca ng’lung ät, ca ng’ma ät phi kä dimaih düt khai. Cacim ung om ci phung avan küm zawp khai nei. ¹⁹ Akzaw pibäih ah thukhän kä läk vai ah m’theithang tuk ciah chang cu, khankho ah akzaw ken pibäih ah kiak khai. Cun ung phi thukhän gui cu läk ne, chang-am phi a läk vai ah m’theithang tuk ciah chang cu, khankho ah hlüngtai pi khai. ²⁰ Kei naw akcang ka pyein cu, Khanpughi ah ang zak hlü ah om nak ung, Pharisee gui la thukhän saza gui ah mä, kä nami bä pi ah a kiak ung khankho ah kä nami gawk hlawt khai. ²¹ ‘Chang kä nami ngawn vai, chang ngawn ci cu thawn kium khai,’ ciah thukhän cu nami hmat pyii ci. ²² Cun ung phi kei naw tuhbäi ka pyein cu, a mät ah phäi nau m’lungshe nak ciah chang cu, thawng kium khai nei. Tumat la tumat ng’vawng shang ne ng’plah tang tuk ciah chang cu, zung ah m’kawt ung m’kat nak gah khai nei. A mät ah phäi nau chang k’she ah m’keih ciah chang cu, m’htei-mei ung lut khai nei. ²³ Cun ah kia sei nang cu Khanpughi ah mangkiang ung, khawhcham na peit vai na pawng law püi ung, na phäi nau awn kä nani ng’gei nak a om ah a kiak ung, ²⁴ na peit vai ah khawh cu, mangkiang ah ak ka ah nawng shüt netah, ani ah hteit ne nang gei püi ba cang vai, cun kawn ah law ba ne na peit vai ah khawh cu Khanpughi-am na ap vai. ²⁵ ‘Chang naw zung ah a ning chaak ah a kiaë ung, ani awn atäng ah lam ung nani ng’gui zah ung, ani awn akzä ah nani ng’gei ba vai ah na bi vai. Cun ah kä na bi ung ani naw zung bawi ah ning ap sei, zungbawi naw mä thawngbawi ah ning ap ba khätah, thawng ung ning chum khai gui. ²⁶ Na thung vai om ci avan kä na thung pha ah chuih, nang cu thawng ung kaa, kä na lut law ba khai,’ ciah kei naw ka pyein ci. ²⁷ ‘Chang ah chu hta kä kat püi vai,’ ciah thukhän cu nami ng’za pyii ci. ²⁸ Cun ung phi tuhbäi kei ah pyein cu, “Ng’zak nak hlü ah m’lung awn hnumi tumat cu nami teng ah a kiak ung, nami m’lung kyong ah a cun ah hnumi awn kat nak nami bi pyii ci. ²⁹ Nakpat lam ah na mik naw a ning hmühma sak ung, a cun ah mik cu kawih ne na ghawh vai, na pumsa avan m’hteimei ung a luh ah k’dam ah na mik vangtäng am dauh cu bä tu ba khai. ³⁰ Nak pat lam na kut naw a ning hmühma sak ung, cun ah kut cu tupit ne na ghawh vai. Na pumsa avan m’hteimei ung a luh ah k’dam ah na kut vangtäng a pit cu bä tu ba khai. ³¹ ‘Akchu ng’chaa püi hlük ciah chang naw ng’chaa nak ah ca gu ne a peit vai’ ciah thukhän om ci. ³² Cun ung phi chang tumat naw akchu cu, ahei awn akat nak kä om ciah ang chaa püi ah a kiak ung akchu ah khan ah kat nak bik ciah kiak ci. A cun ah hnumi chu na tu ba ci cun phi, chang ah chu kat püi ciah kiak ci’ ci cu ka ning m’thein gui ci. ³³ ‘Cun kawn ah, thukhän shaitaak kä plawh vai, Khanpughi ah ma ah thukhän shaitaak ah mäih ah bilawh vai’ ci cu nami hmu ng’za pyii ci. ³⁴ Cun ung phi nangmi naw thukhän shaitaak nami bi ung kä nami ng’phyun en vai. Khankho khü ne kä nami ng’phyun vai, khankho cu Khanpughi ah mangkiang ah kiak ci. ³⁵ Khomdek khü na kä nami ng’phyun vai, khomdek cu Khanpughi ah kho ng’leh nak ah kiak ci. Jerusalem gawnu khü ne kä nami ng’phyun vai, Jerusalem cu ghangpughang ah mang gaw ah kiak ci. ³⁶ Nami mät ah lu phi taam ne khü ne kä nami ng’phyun vai, a i ah kia sei ci ung lumu ng’ma ät phi le khai, bauk khai ah kä nami pyang thei ci. ³⁷ Akcang la kä akcang cu düngnak awn nami pyein vai, cun ah kawn ah nami ng’thu cu khoshe ah ning thu sak gui ah kiak ci. ³⁸ ‘Mik ah hmawk ah mik, ha ah hmawk ah ha,’ ciah thukhän cu nami ng’za pyii ci. ³⁹ Cun ung phi nangmi ning kat na gui ciah chang ah khan ah phu kä nami tuk vai, ci ne kei naw ka pyein ci. Nak pat lam nang being ami ning k’beeih ung, nak eng lam nang being mä na cun ba vai. ⁴⁰ Nak htu ng’zung ät ami ning guh ung, na zih ng’zung phi na pek gui vai. ⁴¹ Ning shedam nah ne mäng ät ami ning hteh sak ung, mäng goi na läk tu vai. ⁴² Ning zawi lawk ci-am na peit tu vai, ning pu lawk ci-am nak pu tu vai. ⁴³ ‘Nami teihpüi nami m’hni vai, nami gaa nami gen vai,’ ciah thukhän cu nami ng’za pyii ci. ⁴⁴ Cun ung phi nami gaa nami m’hni vai, ning shedam nah gui ci nami taigü peit vai, ciah kei naw ka pyein ci. ⁴⁵ Cun ung vah nangmi cu Khanpughi ah hta ah nami kiak khai. Khanpughi naw chang k’ni, chang k’she van ah khan ah kho zuk so sak ci, akni akshe bik ci van ah khan ah kho phi zuk aa sak ci. ⁴⁶ Ning m’hni gui ci bäng nami m’hni tu ba ung, a i chaa ah Khanpughi naw m’cümhnah nak ning pe gui khai ang? Akhawn look ciaè chang gui naw phi a cun ah mäih ah bik ci gui nei. ⁴⁷ Nami teihpüi bäng nami ng’cengcäk püi ung, nami om ih cu a i chaa ah dang khai ang? Khanpughi kä hmat ci gui phi a cun ah mäih ah om ci gui nei. ⁴⁸ Khankho ah nami Pa akümbe ah mäih ah nangmi phi nami kümbe vai nei.

¹ ‘Chang ah ma ah chang gui ah ning hmuh gui vai ah peit taak nak cu kä nami bi vai.Chang gui ah ning hmuh gui vai ah nami bi ah a kiak ung, khankho ah om ciah nami Pa naw a i phi kä ning m’cümhnah gui khai. ² ‘Cun ah kia sei peit taak nak nami bi ung ming thang hlük ci gui ah bi ah mäih ah pum nak im gui la lam kyum gui ung, dang khai ah kä nami bi vai.Ngahmi cu chang naw am hlüngtai gui vai ng’za hlü u ne, ami bi ah kiak ci. Kei naw akcang ka pyein cu, ngahmi cu ami mät ah ng’zak hlü gah pyii ci gui ah kiak ci nei. ³ ‘Peit taak nak nami bi ung kä ng’dang khai ah nami bi vai. ⁴ Nak pat lam naw abi cu nak eng lam naw phi kä a hmat ten vai nei, kängdang ciah bi cu hmuh thei ciah napa naw m’gein nak m’cümhnah ning pek khai nei. ⁵ ‘Nangmi cu nami taigü ung ming thang hlük ciah chang gui ah mäih ah kä nami taigü vai.Ngahmi cu chang ah hmuh gui vai ah, pum im kyong ung la lam kyum gui ung ng’düi ne taigü ci gui.Kei naw akcang ka pyein cu, ngahmi cu ami mät ah ng’zak hlü gah pyii ci gui nei. ⁶ Cun ah kia sei nangmi cu na mi taigü ung, kyong ah lut ba ne shoh khai netah, mik awn kä hmuh ah nami pa ah nami taigü vai. Kä dang khai ah bi cu hmuh thei ciah nami pa naw m’cümhnah nak ning pe gui khai. ⁷ ‘Nami taigü ung Khanpughi kä zum ci gui ah taigü ah mäih ah lawmkaam düt ne kä nami taigü vai. Ngahmi cu aksho ang sau ah taigü ung gah vai ah ngai ci gui. ⁸ Ngahmi ah mäih ah kä nami bi-en tu vai. Nami Pa naw kä nami ng’zawih pha ung nami ng’zak hlü avan cu hmat pyii ci. ⁹ Cun ah kia sei nami taigü ung; ‘Khankho ah om ciah kami Pa; Na ming theing thang sä; ¹⁰ Na uk nak gawk law sä; Khankho ah mäih ah m’dek khan ah phi nang zak hlü cu kümbe sä: ¹¹ Ak hnüüp tä ng’büh nak vai ei na pe gui ä. ¹² Na kat na gui ci kami m’gein ah mäih ah, Kami kat nak nam gein gui ä. ¹³ Tüihtok nak ung kä gawk vai ah, Kä nik ci phung ung nam htei gui ä. Uknak, hlüngtai nak la Bawimang nak cu, Nang ung ang täih ah om sä, Amen,’, ci ne nami taigü vai. ¹⁴ ‘Nami khan ah kat nak bi lawk ci phung nami m’gein ung khankho ah om ciah nami Pa naw nami kat nak cu ning m’gein gui khai. ¹⁵ Cun ung phi nangmi naw chang ah kat nak kä nami m’gein ung,nami Pa naw nami kat nak cu kä ning m’gein gui khai. ¹⁶ ‘Nangmi cu ei nami hlawi ah a kiak ung,ming thang hlük ci gui ah mäih ah müi ng’haam khai ah kä nami om vai. Ngahmi cu ei ami hlawi ah mawng ang dang vai ah ei cawi ciah müi hmai awn hteit hton ci gui.Kei naw akcang ka pyein cu, cun ah chang gui cu ami mät ah ng’zak hlü gah pyii ci gui nei. ¹⁷ Nangmi cu ei nami hlawi ah a kiak ung nami m’hmai m’hla ne, nami lu huih ne, nami säimai vai nei. ¹⁸ Cun ung vah mik awn kä hmuh thei ah nami Pa ah kawn ah a u naw phi ei nami hlawi ah mawng kä hmuhmat khai. Kä dang ciah bi cu hmuh thei ciah nami Pa naw, m’gein nak m’cümhnah ning pe gui khai. ¹⁹ ‘Thu kaa m’pyiit zaup ne, m’guk ei ah m’guuk nak thei ah, khomdek khan ung khawh chaam kä nami m’cun m’seh vai. ²⁰ Kä thukaa kä m’kyiit zaup ne, m’guk ei ah kä m’guk nak thei ah, khankho ah khawh chaam cu nami m’cun m’seh vai. ²¹ A i ah kia sei ci ung nami khawh chaam ah om nak ah, nami m’lung cu gawk thei ci. ²² ‘Mik ui cu pumsa ah hmawk ah meidäi ah mäih ah kiak ci. Nami mik ui a ci ung nami pumsa avan dei zawp khai. ²³ Nami mik ui a mü ung nami pumsa avan hmüp zawp khai. Cun ah kia sei nangmi ung om ciah akdei cu, ak hmüp ah a kiak lä ung, cun ah hmüp cu anghtei ah mü ne hmüp khai nei. ²⁴ ‘A u chang phi bawi hnih ah chang shäm ah kä kia hlawt khai, a bawi tumat cu gen ne tumat cu m’hni khai; tumat ah pyein ah om-ne, tumat cu a i ah kä sui khai. Nangmi cu Khanpughi ah chang la ghui ngui ah chang ah akawng ät ah kä nami kia hlawt khai. ²⁵ ‘Kei naw akcang ka pyein cu, a i ei auk vai ci ne, nami hnun gui ah hmawk ah kä nami ng’ä vai, a i suibei vai ci ne, nami pumsa ah hmawk ah kä nami ng’ä vai. Hnun ghin nak cu ei ah mä bä pi ne, pumsa cu suibei ah mä bä pi ciah kä kia ne ang? ²⁶ Zong shüi shüi ciah, kha gui cä teng shüm vä, ngahmi cu m’shi kä phu ci gui, geit kä khäm ci gui, im khei ung ei käm sep ci gui; Cun ung phi khankho ah om ciah mi Pa naw ngahmi cu tumbei gui ci. Nangmi cu kha gui ah mä nami hlüngtai pi ciah kä kia ne ang? ²⁷ Nangmi ung kaa a u naw, ang’ä ai nak awn, a hnun ghin nak ng’sau sak pi hning khai ang? ²⁸ ‘A i ah kia sei nami suisak vai ah nami ng’ä ang? M’ghaw hmu ah chei pai gui cä teng shüm vä. Ngahmi cu bi phi kä bik ci gui, sui phi kä tah ci gui. ²⁹ Cun ung phi ang htei ah bühmang ciah ghanpughang Solomon naw phi, cheipai tumat hta ah mäih ah kiom ci cu kä suisa man ci nei, ci cu ka ning m’thein gui ci. ³⁰ Zum nak ken ciah chang gui, tuhngawi ching ne ngawi ung chawng sei mei ah uih vai ah, khu m’ghaw gui pang hngaw Khanpughi naw cun ah a müisa sak gui ung, nangmi läi cu, cun ah dämda hlüngtai pi khai ah, ning müisa sak gui khai ah kä kia ne ang? ³¹ ‘Cun ah kia sei a i ung kaa, ei auk vai, suibei vai, ci ne kä nami ng’ä ai vai. ³² (Khanpughi kä zum ci gui cu a cun ah ng’ä ai ci gui nei). Khankho ah om ciah nami Pa naw, cun gui nangmi naw nami ng’zak hlü cu avan hmat ci. ³³ Khanpughi ah uk nak kho la ang düng nak cu akhtük bäih ah nami shui vai, cun kawn ah apäng avan cu ning pe gui khai. ³⁴ Cun ah kia sei ngawi ung ah hmawk ah kä nami ng’ä vai, ngawi ung ah hmawk ah amät ah ng’büh nak vai ng’ä ai nak om tu hnga ci. Tuhngawi bui aut ng’ä ai nak gui cu, tuhngawi ah hmawk ah bä pyii ci nei.

¹ ‘Pawchang kä nami m’khoi m’chaa vai, cun ung Khanpughi naw kä ning m’khoi m’chaa gui khai. ² Chang nami m’khoi chaa ah mäih ah Khanpughi naw ning m’khoi chaa gui khai. Chang nami m’khoi chaa nak ung nami bi ah mäih ah Khanpughi naw nami khan ah bi bik khai. ³ A i ah kia sei nami mät ah mik ung kaa, mik eek cu kä hmuh ah, nami phäi nau ah mik ung ng’voihta cu nami hmuh peit ang? ⁴ Na mät ah mik ung kaa mik eek cu nawng-en ne, a i ah kia sei na phäi nau ah mik ung kaa, ng’voihta cu, ning ghu pe vang na ci ang? ⁵ Nang thuvichang, na mät ah mik ung kaa mik eek cu, na ghu ma vai; cun ung vah na phäi nau ah mik ung kaa ng’voihta cu ang htei ah hmuh ne na ghu pe hlawt khai. ⁶ ‘Ak theingcim cu ui gui-am kä nami peit vai, cuh ah nami peit ung ng’hlat law ba ne ning htui gui khai. Ghui k’cünglung cu vawk gui ah ma ah kä nami m’shän vai, nami m’shän ung ami kho awn leh ne kai na khai gui. ⁷ ‘Ng’zoi vä nami gah khai, shui vä nami hmuk khai, kshoh cu khäk vä ning hmawn pe gui khai. ⁸ Ng’zoi ci naw gah ci, shui ci naw hmuk ci, kshoh khäk ci phi hmawn pek ci. ⁹ Nangmi ung ka, ahta naw m’htut ang zoih ung lung pek khai ah chang; ¹⁰ nga ang zoih ung kphyu pek khai ah chang, om ne ang? ¹¹ Nangmi chang kaa gui hngaw naw nami hta gui-am ak ni peit vai nami hmat ung, khankho ah om ciah nami Pa naw, ama ah ng’zoi lawk ciah chang gui-am ak ni pi gui cu pek khai ah kä kia ne ang? ¹² Nami mät ung chang naw abi vai nami ng’zak hlü ah mäih ah chang ung phi nami bi vai. Cun cu Moses ah thukhän la profet gui ah m’theithang nak ah kiak ci. ¹³ ‘Ng’hteik ciah m’kawt ung lut tu vä, m’hteikho ah hteh nak ah lam la m’kawt cu ng’shawng ciah kia sei, cun ah lam ung hteit ci gui cu da ci gui. ¹⁴ Ang täi ghin nak ah lam la m’kawt cu ng’hteik ciah kia sei, cun ah lam hmuk ci gui cu ken ci gui. ¹⁵ ‘Htome ah vun awn ng’hlawp ciah hngei ah mäih ah hleeihlak ne lawk ciah profet gui cu nami geing nak vai. ¹⁶ Ngahmi cu hleeihlak ciah profet ah ami kiak ah mawng cu, ami bilawh awn nami hmat khai. Ng’hling shun ung sapyit kä m’theih man ci, ng’hling ghing ung k’thei phi kä m’theih man ci. ¹⁷ A ghing nik ci cu akni ah m’theih ci, a ghing shek ci cu akshe ah m’theih ci. ¹⁸ A ghing nik ci cu akshe ah käm theih ci, a ghing shek ci cu akni ah käm theih ci. ¹⁹ Chang gui naw akni ah käm theih ciah a ghing gui phung cu, chupit ne mei ung k’bum man ci gui. ²⁰ Cun ah kia sei hleeihlak ciah profet gui cu, ami mät ah bilawh awn nami hmat gui khai. ²¹ ‘Bawipa, Bawipa,’ ci ne na khü ciah chang van düt, khankho ah kä lut hlawt khai, khankho ah om ciah ka Pa ah ang zak hlü ah om ciah chang bäng vah gawk hlawt khai. ²² M’khoichaa nak ah hnüüp a gawk law ung chang akda naw, ‘Bawipa, Bawipa, nang ah ming awn Khanpughi ah ng’thu cu ka pyein ci nei, nang ah ming awn khoshe khogam phi kami ktäm ci nei, nang ah ming awn cäi aih gui vai phi kami m’dang ci nei, ci ne kiak khai gui. ²³ Cun ung phi cun ah chang gui-am, ‘Chang she gui aw, nangmi a i zah ung phi kä ka ning hmat gui man ci nei, ka pei ah kä om ne a hei ah hteit vä,’ ci ne ka kiak na gui khai. ²⁴ ‘Kei ah ng’thu cu ngai ne ng’za ne läk ciah chang cu, lung khui shawk ne im co ciah Lunglang ciah chang awn täng ci. ²⁵ Khokhe aa ne, tuinu ng’güt ne, puikho khi ne ang tum law ung phi cun ah im cu, lung ung cawh ah kia ne kä ng’gäi hlawt ci. ²⁶ ‘Kei ah ng’thu ngai ne ng’za lang ne, kä läk ciah chang cu bigin ung khui shawk ne im co ciah chang k’ang awn täng ci. ²⁷ Khokhe aa ne, tuinu ng’güt ne, puikho khi ne ang tum law ung, cun ah im cu ng’gäi ne maih ci. Cun ah im adi-dam nak cu nui aih aih ci nei!”. ²⁸ Cun ah Bawipa Jesuh naw ng’thu a pyein kawn ah, chang gui cu ani ah m’theithang ah hmawk ah cäicat ci gui. ²⁹ A i ah kia sei ci ung ani naw thukhän saza gui ah mäih düt ah kä kiak ciah ah huham mah ne am theithang ah hmawk ah kiak ci.

¹ Bawipa Jesuh cu m’htung khan ah kaa kyum law ba khätah, chang khli naw läk lawk ci gui. ² Cun sang ung kheilei ung gaw ciah chang tumat cu, Bawipa ah ma ah m’kuukdoong netah, “Bawipa na ng’zak hlü a om ung kei ah gaw nak cu na theek sak ä,” cik ci. ³ Bawipa Jesuh naw akut k’phiaat ne hei tawn netah, “Ka ng’zak hlü om ci nei, theingthap sä,” cik ci. A cun vai-am cun ah chang cu theek ne gai ba ci. ⁴ Bawipa Jesuh naw, “Shin ah mawng cu a u-am kä nam thein-en vai, cun ung phi taigü ng’vai ah hteit ne na pumsa cu nam hnuh vai, cun kawn ah na gai nak ah mawng ang dang vai ah Moses ah thukhän ah mäih ah peit taak nak na bi vai,” ci ne kiak nak ci. ⁵ Bawipa Jesuh cu Kapenaum gawnu ah a gawk law zah ung, Roman gabawi cu a pei ah law netah, ⁶ “Bawipa, kei ah ka chang tumat cu ang htei ah gawpai ne, a ih phak ung ng’zän ci nei,” ci ne ng’hui paa nak ci. ⁷ Bawipa Jesuh naw, “Kei naw law ne ka gai sak khai nei,” ci khätah; ⁸ Gabawi naw, “Nang cu kei awn kä ni khin ciah kiak sei, ka im kyong ah na law vai ah kä khin pang ci nei, m’khüt näng nak thu bäng na pyein ung ka chang cu gai ba khai nei. ⁹ Kei cu kang vai ah ng’thu ka ngai ci, kei ah kaa ah phi gakap gui om ci gui. Gakap tumat cu hteit ä, ka ci ung hteit ci, law ä, ka ci ung lawk ci, ka chang shäm cun phi cun bi ä, ka ci ung bik ci,” ci ne pyein ci. ¹⁰ Cun a ci ah thu cu Bawipa Jesuh naw ng’za ne cäicat netah, chang gui-am, ¹¹ Kei naw akcang ka pyein cu, shin ah mäih zum nak cu Israel chang gui ung kä ka hmu man ci. Chang akda cu hni law lam la hni kiaak lam ah ka Law u ne, Abraham ni, Isak ni, Jakop ni gui awn atäng ah vunvai ne ei auk khai gui. ¹² Cun ung phi uknak kho ung khai shi ah chang gui läi cu thüi kyah nak, ha htui ne geinvai nak ah ak pung lam kho hmüp khui ah k’täm gui khai,” ci ne pyein ci. ¹³ Cun kawn ah Bawipa Jesuh naw, gabawi-am, “Na im ah hteit ba ä,na zum ah mäih ah kiak khai nei,” ci ne kiak nak ci. A cun zah ung gabawi ah chang cu gai ba pyii ci. ¹⁴ Bawipa Jesuh cu Peter ah im ah hteit netah, Peter ah kawinu gaw ne ih phak ung ng’zän sei hmuk ci. ¹⁵ Bawipa naw cun ah hnumi ah kut cu tawn khätah, ani cu a cun vai-am gai ba ne, Bawipa Jesuh cu khin nak ci. ¹⁶ Khomü lam ah chang gui naw khoshe ah kai, chang akda law püé u sei, khoshe gui cu k’de ne k’täm gui ci. ¹⁷ Cun ah abi gui cu profet Isaiah ah ng’thu ung, “Kami gaw nak gui näng ne, kami nat nak gui hteh püi zawp ci nei” ci cu a küm nak ah kiak ci. ¹⁸ Bawipa Jesuh naw a pei ung ah om ciah chang gui teng gui netah, tuili nu hei gaa ah vah kai vai ah, ang düihpüi gui cu khü gui ci. ¹⁹ Thukhän saza tumat cu law netah, “Bawipa na hteh nak päng ah ka ning läk tuk khai nei,” ci ne kiak ci. ²⁰ Bawipa Jesuh naw, “Sa-ui cu a khui om ne, kha cu ang bu om ci, cun ung phi chang ah Htapa cu ang düm nak vai a i kä om ci,” ci ne kiak nak ci. ²¹ Ahei ang düihpüi tumat naw, “Bawipa, kapa ah gook ka va htüm ba cang khai,” ci ne pyein ci. ²² Cun ung phi Bawipa Jesuh naw, “Ka hnu ah na läk ä, ak si cu ak si gui naw htüm u sä,” ci ne kiak nak ci. ²³ Bawipa Jesuh cu hleiko khan ah hang kai ba sei, ang düihpüi gui cun phi hteit tu ba ci gui. ²⁴ Tuilinu ung akten ah puikho khinu ng’pheet ne khi ne, hleiko cu tui ng’hnawk naw k’plüm lawk ci. Cun ung phi Bawipa Jesuh cu abü ah ip ci. ²⁵ Ang düihpüi gui naw Bawipa Jesuh cu m’tho u netah, “Bawipa na hun gui ä, kami si lawk khai kiak ci nei,” ci ne pyein ci gui. ²⁶ Bawipa Jesuh naw, “A i ah kia sei nami kyih aih ang? Nami zum nak ken aih ci nei,” ci ne kiak na gui netah, khokhi tui ng’hnawk cu k’de ne ng’düm sak sei, a cun vai-am khokhi cu ng’düm zawp ci. ²⁷ Ang düihpüi gui cu cäicat u netah, “Shin ah chang cu a i chang leng leng ang, khokhi tui ng’hnawk naw phi ang thu ngai ci nei,” ci ne kiak ci gui. ²⁸ Cun kawn ah Bawipa Jesuh cu tuilinu ah vang-gaa, Kadra kho lam ah vah kai ci. Cun zah ung khoshe ah kai chang sing goi cu, ng’cim hmun ung kaa lut law ni ne, Bawipa Jesuh cu hmu lawk ci goi. Ngahni cu ngetngawng aih ni sei cun ah lam ung a u kä hteit ba ci. ²⁹ Ngahni naw, “Khanpughi ah Htapa, Bawipa, nang naw keini cu a i ah na na ci goi hlük ci ang? Akhin kä gawk law pha sei keini cu, na nam kat goi khai ah na lawk ci ma?” ci ne m’lau ci goi. ³⁰ Cun ah chang goi awn api ang shawng nak ung, vawk mak ät cu ei ei ne om ci gui. ³¹ Khoshe gui naw, “Bawipa, keimi na na k’täm gui vai ung, vawk gui ung kami luh vai ah nam gein gui ä,” cik ci gui. ³² Bawipa Jesuh naw,“Hteit vä,” ci khätah, khoshe gui cu chang goi ung kaa lut law u ne, vawk gui ung lut ci gui. Vawk gui mak ät lüng cu, tuikam zung ah ng’täm tu ne dawng u ne, tuili ung lut ne si zawp ci gui. ³³ Vawk shäm ci gui cu gawnu kyong ah dawng ba u netah, khoshe ah kai ah chang goi ah mawng la ami hmuh nüng avan cu pyein ne ngak ci gui. ³⁴ Cun ah kia sei pigaw ah chang avan cu Bawipa Jesuh ah om nak ah gawk lawk ci gui. Bawipa Jesuh cu hmuh law u netah, ami kho ung kä a om ba lä vai ah ng’ge püi ci gui.

¹ Bawipa Jesuh cu ’hleiko ng’cum ne, tuili ah vang-gaa ah va kai ba netah, amät ah pigaw ah hteit ba ci. ² Cun zah ung chang gui naw akshum tumat kawt ne law püi ci gui. Bawipa Jesuh naw cun ah chang gui ah zum nak cu hmu netah, shum ciah chang-am, “Kahta, kä na ng’ä vai, na kat nak cu ning k’phiawn pyii nei,” cik ci. ³ Thukhän saza am shah gui naw, “Shin ah chang cu Khanpughi ah khan ah kat nak awn ng’thu pyein ci nei,” ci ne ami mät ng’cengcäk ci gui. ⁴ Bawipa Jesuh naw, ngahmi ah ngaih cu hmat netah, “Nangmi a i ah kia sei cän ah akshe ah nami ngaih tüh ang? ⁵ Na kat nak ning k’phiawn pyii nei, ci ang a zäi tu ba, tho law ne hteit ä, ci vai ang a zäi tu ba? ⁶ Cun ung phi chang ah Htapa naw, khomdek khan ah kat nak ak phiawn hning cu, ka ning hmuh sak gui khai nei; ci netah shum ciah chang-am, “Tho law ne na ih phak look ne, na im ah hteit ba ä,” ci ne kiak nak ci. ⁷ Cun ah chang cu tho law ne a im ah hteit ba ci. ⁸ A cun ah mawng hmuh teng tuk ciah chang gui cu cäicat u netah, chang gui-am shin ah mäih ah huham pek ciah Khanpughi cu m’hlüngtai ci gui. ⁹ Bawipa Jesuh naw cun ung kaa a hteh nak ba lam ah, azung kyong ah ngok ciah, akhawn look ciah Matthe cu hmu netah, “Ka hnu ah na läk ä,” ci ne kiak na sei, Matthe cu tho law ne a hnu ah läk tuk ci. ¹⁰ Bawipa Jesuh cu Matthe ah im ah mü ei a ei tu zah ung, akhawn look ci gui la ami shadam nak ah chang gui phi vun ne ei tuk ci gui. ¹¹ A cun gui cu Pharisee gui naw hmuh u netah, “Nami saza cu a i ah kia sei, shin ah changshe gui awn vun vai ne a ei awk tu ang?” ci ne ang düihpüi gui cu ng’shik ci gui. ¹² Cun ah ami ng’shi gui cu Bawipa Jesuh naw ng’zah netah, “Akgai ah hmawk ah seisaza kä hlü ci, akgaw ah hmawk ah vah hlü ci, ¹³ Kei cu peit taak ah mä m’gein nak kam hni pi ci,ciah cacim cu teng ne vang ngaih tüh ba vä. Kei cu chang k’ni gui ka hun gui khai ah ka lawk ciah kä kiak ci, chang she gui ka hun gui khai ah ka lawk ei nei,” ci ne kiak na gui ci. ¹⁴ Cun kawn ah Johan ah ang düihpüi gui cu Bawipa Jesuh ah pei ah law u netah, “Keimi la pharisee gui cu a shäng shäng ei kami hlawi ci, cun ung phi nang Bawipa ah düihpüi gui cu, a i ah kia sei ei kä ami hlawi tu ang? ci ne ng’shik ci gui. ¹⁵ Bawipa Jesuh naw, “Chumah khai ah pamihta ah a teihpüi gui cu, cun ah pamihta awn atäng ah ami om zah ung, thüisei khai gui ang? Cun ung phi cun ah pamihta cu ngahmi ung kaa la ne ami hteh nak püi vai ah a khin gawk lawk khai nei. Cun kawn ah ngahmi cu ei hlawi khai gui nei. ¹⁶ A u naw phi sui ak kheei cu sui akthai awn kä k’dawm man ci nei. K’dawm ah a kiak ung akthai naw kaih sei ak kheei cu teek law pi ci. ¹⁷ Sapyit tui asü phi a u naw um akshe ung kä than man ci, than ah a kiak ung um pawk sei sapyit tui phi ng’chawt zawp khai. Cun ah kia sei um phi kä sheka ne sapyit tui phi kä ah dimaih vai ah sapyit tui asü cu um akthai ung than man nei,” ci ne m’cäi gui ci. ¹⁸ Bawipa Jesuh naw cun ah ng’thu a pyein zah ung, Jew chang zungbawi tumat cu Bawipa Jesuh ah pei ah law ne m’khuukdoong netah, “Ka hta hnumi cu tuhbäi hta sik ci nei, cun ung phi nang Bawipa law ne ak khan ah na kut na taih ah a kiak ung, ani cu ghing ba khai nei,” ci ne ng’hui ng’paa ne pyein ci. ¹⁹ Cun ah kia sei Bawipa Jesuh cu ng’düi law ne ani awn atäng ah hteit tuk ci. Ang düihpüi gui phi hteit tuk ci gui. ²⁰ Kho kum gha-lei-goi ung asi ng’chawt sei gaw ciah hnumi tumat cu, Bawipa Jesuh ah hnu ah hei k’et netah, ²¹ “A suinu ah a pyai hta pang ka va tawk ung kei ka gai khai,” ci ne ngai ne, a zih pyai cu va tawk ci. ²² Bawipa Jesuh naw ng’hlat ne va teng ne cun ah hnumi cu hmu netah, “Ka hta hnumi kä ng’ä ai ä, na zum nak naw ning gai sak pyii ci nei,” cik ci. A cun vai-am cun ah hnumi cu gai ci. ²³ Bawipa Jesuh cu zungbawi ah im ah gawk law netah, gook htüm ne, tum ng’lam ci gui cu hmu gui ci. ²⁴ Cun kawn ah Bawipa Jesuh naw, “Ng’nawn vä, shin ah hnumi hta sik ciah kä kiak ci, ip ci nei,” ci ne kia khätah, chang gui naw päipih ci gui. ²⁵ Bawipa Jesuh naw chang gui akpung ah tüi gui netah, kyong ah va lut ne, cun ah hnumi hta ah kut cu k’pang ne, m’hto ba khätah hnumi hta cu tho law ba ci. ²⁶ Cun ah a mawng cu cun ah kho avan ung thang zawp ci. ²⁷ Bawipa Jesuh cu cun ung kaa hteit ba khätah, amik m’dauh ciah chang pakhnih naw läk law ni netah, “David ah Htapa nam htei goi ä,” ci ne m’lau ci goi. ²⁸ Bawipa Jesuh cu im tumat ung a gawk law zah ung, cun ah chang goi cu gawk lawk ci goi. Bawipa Jesuh naw, “Kei naw nani mik ka ning m’dei sak goi hning ciah nani zum ci ang?” ci ne ng’shi goi khätah, “Kani zum ci nei,” ci ne pyein ci goi. ²⁹ Bawipa Jesuh naw, ani mik tawk goi netah, “Nani zum ah mäih ah kia sä,” ci ne kiak na goi khätah, ³⁰ ani mik cu a cun vai-am m’dei lawk ci. Bawipa Jesuh naw, “Shin ah a mawng cu a u-am kä nani m’thein-en vai,” ci ne khän ne m’cäi goi ci. ³¹ Cun ung phi ngahni cu ani hteh ba vai-am Bawipa Jesuh ah a mawng cu, cun ah kho avan ung thang khai ah pyein ci goi. ³² Ngahni ani hteh ba kawn ah chang gui naw khoshe naw kai sei, ang ciah chang tumat cu Bawipa Jesuh ah law püi ci gui. ³³ Bawipa Jesuh naw khoshe ak täm vai-am cun ah ak ang cu ng’thu law thei sei, cun hmuk ciah chang gui cu cäicat u netah, “Shin ahmäih ah amawng ama cu Israel kho ung kä hmuh man nei,” ci ne pyein ci gui. ³⁴ Pharisee gui naw, “Shin ah chang naw, khoshe bawi ah peit ah huham awn, khoshe cu k’täm ci nei,” ci ne pyein ci gui. ³⁵ Bawipa Jesuh cu gawnu, gawhta apigaw päng ung hteit ne, pum im gui ung m’theithang gui ci. Khanpughi ah uknak kho amawng thu k’ni gui cu m’theithang gui ne, gawpai nak ahlü hlü ung gawpai ci gui phi gai sak gui ci. ³⁶ Chang gui cu htoshäm kä om ciah htome gui ah mäih ah, ami ngaih u vai kä om sei, ami ng’ä ai cu hmuh gui netah, chang gui cu m’gein gui ci. ³⁷ Cun ah kia sei Bawipa Jesuh naw, “Khäm vai htangmguh da pang sei phi, khäm ciah chang gui cu ken aih ci gui. ³⁸ Cun ah kia sei htangmguh khäm khai a tüih law vai ah, htangmguh nak ciah taigü vä,” ci ne ang düihpüi gui cu m’cäi gui ci.

¹ Bawipa Jesuh naw ang düihpüi chang sing gha-lei-goi cu khü gui netah, khoshe gui ami k’täm nak hning vai la gaw nak phung ami gai sak nak hning vai ah, huham cu pe gui ci. ² Ang düihpüi gha-lei-goi ah ami ming gui cu; (Peter ami ciah) Simon la anau Andru; Zebedee ah hta goi James la Johan; ³ Philip la Bartolome; Thomas la Matthe akhawn look; Alphaeus ah hta James la Thadaeus; ⁴ M’lungling ciah Simon; la Bawipa Jesuh gaa-am ap ciah Judas Iskariot gui ah kiak ci. ⁵ Ang düihpüi chang gha-lei-goi cu Bawipa Jesuh naw shikchaa m’cäi ne tüi gui ci; “Chang pakhui hei gui ah kho gui ung la Samaritan gui ah pigaw gui ung kä nami hteh vai. ⁶ Maih ciah hto gui ah kiak ciah Israel chang gui ah om nak ah hteit ne, ⁷ ‘Khankho uk nak ng’et lawk ci nei,” ci ne ng’thu pyein vä! ⁸ Akgaw gai sak vä, aksi m’ghin ba vä, kheei lei ah ei gui theek sak vä, khoshe gui k’täm vä, Khanpughi ah m’gein nak kä khleih ah nami gah ci kia sei, chang gui am aphu kä lak ah vah pe vä. ⁹ Ghui la ngui ni, khawh cham ni gui m’khäp ne kä nami k’bah vai. ¹⁰ Ng’zoih nak ah ng’ip, k’htu ang zung akda, phahnak la ng’shopawng gui phi kä nami hteh püi vai. A i ah kia sei ci ung bi bik ciah chang ah ang zak hlü cu peit taak vai ah kiak ci. ¹¹ A i pigaw ung nami gawk law ung phi, ning dou gui khai ah chang nami shui vai. Cun ah pigaw ung kaa kä nami hteh ba pha ah chuih nami kai nak ah im ung nami om tu vai. ¹² Im kyong ah nami gawk ung zeikiai nak om sä’ ci ne nami zavaih vai. ¹³ Im mah gui naw zei ne ami ning dou gui ung, nangmi ah zeikiai zavaih nak cu ngahmi ung gawk khai, kä ami ning dou gui ah a kiak ung nami zeikiai zavaih nak cu, nami mät ung law ba khai. ¹⁴ Kä ning dou gui ne nami ng’thu kä ngai ciah im, pigaw a om ah a kiak ung, a cun ung kaa lut law ba ne, nami kho ung m’vut phi nami khawn shüt vai. ¹⁵ Kei naw akcang ka pyein cu, m’khoichaa nak ah hnüüp ung cun ah pigaw gui cu, Sodom la Komorrah ahtah nui pi ciah m’shet nak cu hmuk khai nei. ¹⁶ ‘Ngai vä! Hngei khli ah ng’lung ah htome hta chah ah mäih ah, kei naw ka ning tüi gui ci nei. Cun ah kia sei, k’phyu ah mäih ah theileh u ne, am äm kä om ciah müm kha ah mäh ah nami m’lung gei sä. ¹⁷ Geing nah ne nami om vai, chang gui naw ning pha gui ne zung ah m’kawt ung ning hteh püi gui khai gui. ¹⁸ Mang ah im ung ning tuthat gui khai gui. Nangmi cu kei ah hmawk ah uk-chuk ci gui la ghangpughang gui ah ma ah ning hteh püi gui khai gui. Cun ah kia sei ngahmi gui la a pakhui hei gui-am ng’thu k’ni cu nami m’thein gui khai. ¹⁹ Cun gui ah kut ung ami ning ap gui ung, a i pyein ne ng’thu vai, a i ah ng’thu vai cu kä nami ng’ä vai; ²⁰ A khin a gawk law ung nami ng’thu vai gui cu gawk lawk khai. Cun ah ng’thu gui cu nangmi ah thu ah kä kiak ci, nami Pa Khanpughi naw mumcha awn nangmi ung ang thu ah kiak ci. ²¹ ‘Chang phäi nau gui tumat la tumat sih nak ung ng’ap tuk khai gui, nupa gui naw ami hta gui sih nak ung ap khai gui, ami hta gui naw phi, ami nupa ah m’cäi kä ngai ne ngawn phak khai gui. ²² Kei ah hmawk ah chang naw ning gen gui khai, cun ung phi ak hnubäih ah khüt sei, düng ciah chang cu, hun phiawn nak gah khai. ²³ Pigaw tumat ung ami ning shedam nak gui ung, a hei pigaw ah nami dawng vai. Kei naw ak cang ka pyein cu, Israel kho pigaw päng ung bilawh vai kä nami bi zawp pha ung, chang ah Htapa cu kyum lawk khai nei. ²⁴ ‘Ng’thei tuk ci cu, m’thei tuk ciah kä hlüngtai pi ci, ²⁵ Changshäm cun phi a bawi ah kä hlüngtai pi ci. Cun ah kia sei ng’thei tuk ci naw m’thei tuk ci k’pha ne, changshäm cu a bawi ah mäih ah a kiak tu ung zeikiai vai kiak ci. Im kyong ung ang vai pi cu, Beelzebul ah mi khü ung, im kyong ung om ciah chang hmün gui läi cu, akshe pi ah khü gui vai kiak khai. ²⁶ ‘Cun ah kia sei chang kä nami kyih vai, küp gui phung avan ng’hmawng zawp khai, m’zih gui phung avan ng’hmat zawp khai. ²⁷ Hmüp khui ung ka ning m’thein gui ah ng’thu cu khodei ung nami pyein ba vai. Adüm ah nami ng’zak ah ng’thu cu m’kiung khan ah kai ne nami shäü vai. ²⁸ Pumsa a ngawn hlawt ung phi Mumcha kä ngawn hlawt ci cu kä nami kyih vai; pumsa la mumcha avan m’htei kho ah m’di hning ciah Khanpughi bäng nami kyih vai. ²⁹ Biithta hnih cu ngui phe awn khleih hning vai ah kiak ci, cun ung phi biithta tumat phi Pa Khanpughi ah kä hmat ah kä chük maih düt khai. ³⁰ Khanpughi naw nami lu ung lumu avan cu khei ne khän ci. ³¹ Cun ah kia sei kä nami kyih vai, nangmi cu biithta akda ah mä nami küikyang pi ci. ³² ‘Chang gui ah ma ah kei cu ana Bawipa ah pyein ne, m’dang ne ng’kiaa ciah chang cu, kei naw khankho ka Pa ah ma ah, kakchang nei ci ne m’dang ne ka pyein khai. ³³ Cun ung phi chang gui ah ma ah kei na hnu ng’tuk püi ciah chang cu, khankho ka Pa ah ma ah kei naw ka hnu ng’tuk püi khai. ³⁴ ‘Khomdek khan ah dimdeeih nak ka pek khai ah, ka lawk ciah kä nami ngaih-en vai.Dimdeeih nak ka pek khai ah ka lawk ciah kä kiak ci, ng’tai nak vai ah ka lawk ciah kiak ci. ³⁵ Pa la hta, nu la hta, kawinu la a hta gui, ami ng’tai nak vaiah kei ka lawk ci. ³⁶ Chang tumat ung ak nget pi bäih ah agaa cu, amät ah kyong ung kaa ah kiak khai nei. ³⁷ ‘Kei ah mä, anu apa m’hni pi ciah chang cu kei ah düihpüi ah kä kia hlawt khai.Kei ah mä, ahta m’hni pi ciah chang cu, kei ah düihpüi ah kä kia hlawt khai. ³⁸ Amät ah kutlamtung kawt ne ka hnu ah kä na läk ciah chang cu, kei ah düihpüi ah kä kia hlawt khai. ³⁹ Amät ah hnun ghin nak vai k’tha nak ciah chang cu, a ghin nak maih khai, kei ah hmawk ah a hnun ghin nak pek ciah chang cu ghin nak gah khai. ⁴⁰ ‘Nangmi ning dou gui ci cu kei na dou ciah kiak ci. ⁴¹ Kei na dou ci cu, kei na tüi lawk ci dou ciah kiak ci. Khanpughi ah ang shä tüih m’hni ne dou ciah chang cu, chang k’ni ah gah ah m’cümhnah nak gah tuk khai. ⁴² Kei naw akcang ka pyein cu, kei ah kang khahpüi gui ung kaa, akhmaw pi-am tui k’gei m’zak ät tu ciah chang cu, kei ah kang khahpüi ah gah ah m’cümhnah nak cu, kä gah ah kä om khai.

¹ Bawipa Jesuh naw cun ah ang düihpüi gha-lei-goi cu m’cäi gui netah, acun ah kho pei zung pigaw gui ah ng’thu pyein ne m’theithang gui khai ah hteit ci. ² Bawipa Jesuh ah bilawh gui cu Tuinim Johan naw thawng kyong ah a om nak ah ng’za netah, ang khahpüi gui am shah cu tüi law ne, ³ “Nang cu Johan naw lawk khai, a ci ah Bawipa ang?, kä cun ung a hei Bawipa kami ngäng ba khai ang? ciah ng’shi vä, ci ne, ng’shi sak gui ci. ⁴ Bawipa Jesuh naw, “Hteit ba ne nami hmuh nami ng’zak cu Johan-am m’thein ba vä. ⁵ Amik m’dauh gui, m’dei ba ci gui, shumkhem ci gui hteithon ba ci gui, kheilei ah ei gui theek ba ci gui, akpang ak ang gui ng’lang ba ci gui. Aksi gui ghing ba ci gui. Chang pyaam gui naw ng’thu k’ni ng’za pyii ci gui. ⁶ Kei ah khan ah ngaih gep ciah chang gui cu zeikiai nak om ci nei” ci ne m’cäi gui ci. ⁷ Johan ah a tüih law gui ami hteh ba kawn ah Bawipa Jesuh naw Johan ah mawng cu chang gui-am m’thein gui ci. “Nangmi cu a i vai Johan ah om nak k’pya lün nu ah nami hteh ang? Kho khi sei hnün ciah khu m’sai gui nami teng khai ang? ⁸ Kä cun ung a i vai nami hteit ci ang? Ak kyom suisak ci gui nami teng khai ang? Ak kyom suisak ci gui cu mang im kyong ah nei ami om. ⁹ Kä cun ung profet nami teng khai ang nami hteh? Akcang ah nangmi naw profet ah hlüngtai pi ci cu nami hmu pyii ci nei. ¹⁰ Johan ah mawng cu cacim ung; ‘Khanpughi naw, nang ah hteh nak vai ah lam cu pyang khai ah, kei naw ka ng’shä ka tüi law ma khai,” cik ci ciah om ci. Johan cu a cun ah kiak ci. ¹¹ Kei naw akcang ka pyein cu, khomdek khan ung Johan ah hlüngtai pi ci, a u kä om ci. Cun ung phi khankho ung akhmaw pibäih cu, Johan ah mä hlüngtai pi ci nei. ¹² Tuihnim Johan naw ng’thu a pyein law ung tün ne, tuhngawi ung khüt sei khankho cu, changshe gui naw ng’tuk ng’ah püi ci gui. Cun ah kho cu changshe gui naw khäm zawp vai ah k’tha nak ci gui. ¹³ Johan ah ng’dang law nak ung khüt lawk khai ah profet gui la Moses ah ng’thukhän naw khankho ah mawng cu pyein pyii ci gui. ¹⁴ Ngahmi ah ng’thu pyein cu nami zum ah a kiak ung, Johan cu dang lawk khai ciah Elijah ah kiak ci, ci cun phi nami zum khai. ¹⁵ Cun gui cu ak hnga om ci phung naw ngai ne ng’za u sä. ¹⁶ ‘Tuhngawi chang gui cu a i awn m’tumtäng gui vai ang? Ngahmi cu sumlei hmun ung ngok ciah akhmaw hta awn täng ci gui. Ak hmawhta gui am shah naw, ahei am shah-am, ¹⁷ Keimi tumkhawng u ngä sei phi, nangmi kä nami ng’lam ci, keimi ng’äi kyap u ngä sei phi nangmi kä nami kyap ci’ ci ne ng’hawh tuk ci gui. ¹⁸ Tuihnim Johan cu ei phi hlawi ne, zu phi kä aw ne, nangmi ah om nak ah gawk law sei, nangmi naw “Shin ah chang cu khoshe ah kai nei,” nami cik ci. ¹⁹ Chang ah Htapa cu ei ne, aw ne law sei phi, nangmi naw, ‘Teng tu vä, shin ah chang cu, ei aih aw aih ci nei. Akhawn look ci gui la chang she gui ah teihpüi ah kiak ci nei,’ ci ne nami pyein ci. Khanpughi ah hmuhmat nak akcang ah a kiak cu, a cun ah hmuhmat nak ung kaa gawk lawk ciah, amawng gui naw ng’dang sak ci gui nei”. ci ne pyein ah gui ci. ²⁰ Bawipa Jesuh naw cäi aih gui vai am dang nak pyii ah pigaw gui cu, kat nak ung kaa ng’zu ba nak kä om khätah, shin ah züi ne m’cäi gui ci. ²¹ “Aw Khorazin gawnu, nang cu thüisei nak om ci. Aw Bethsaidah gawnu, nang phi thüisei nak om ci. Nangmi ung kamdang ah cäi aih gui vai cu, Taia la Sidon ung kamdang vai sü ung, ngahmi cu cau pui, kat nak ung kaa ng’zu nak ah sui sui ne, m’vut awn ng’hluk ne ami kat nak ung kaa ng’zu ba khai sü gui te. ²² Cun ung phi Khanpughi naw am khoichaa law nak ah hnüüp ung, nangmi cu, Taia la Sidon ah mä däm pi ciah, hma m’kat nak cu nami gah khai. ²³ Aw Kapernaum gawnu, nang cu khankho ah khüt khai ah, m’hlüngtai nak na gah khai ah na ngai ci ma? Nang cu m’hteikho ah khüt sei zuk buh nak na gah khai nei. Nang ung kamdang ah cäi aih gui vai cä, Sodom gawnu ung kamdang vai sü ung, cun ah gawnu cu tuhgüt om khai süte. ²⁴ M’khoichaa nak ah kho hnüüp ung nang cu,Sodom ah mä däm pi ciah hma m’kat nak cu na gah khai nei,” ci ne pyein ci. ²⁵ Cun kawn ah Bawipa Jesuh naw, “Khankho la khomdek van uk ciah kapa, hmuhmat nak om ci gui-am kä nam dang gui cu, hmuhmat nak kä om ci gui-am m’dang gui ci sei ka ning m’hlüngtai ci. ²⁶ Kapa Khanpughi, cun gui cu nang na mät ah ng’zak hlü ah kiak ci,” ci ne pyein ci. ²⁷ Bawipa Jesuh naw, “Kapa naw apäng avan na pe pyii ci, Kapa ah kawn ah ahta hmat ci, a u kä om ci. Ahta la ahta naw am dang gui ah chang ah kawn ah apa hmat ci a u kä om ci. ²⁸ ‘A phuih gih sei cümbawng ciah chang gui kei ah law vä, kei naw ka ning hüizang sak gui khai. Kei cu hnip hnoi ng’awi ng’gi ne, kamlung neim ci. ²⁹ Kei ah ka kawh cu kawt ne, kei ah ng’thei law vä, Nangmi cu hüizang nak nami hmuk khai. ³⁰ Kei ah ning kawh sak gui ah kawh nak cu zäi ne, kei ah ning phuih sak gui ah phuih cu zang ci,” ci ne m’cäi gui ci.

¹ Cun kawn ah kä shou pha sei Bawipa Jesuh cu kyin hnüüp ung ami loma sun pah ne hteit ci. Ang düihpüi gui cu cawi law u netah, ami kiung htang cu m’zawt ne ei ci gui. ² Cun cu pharisee gui naw hmu u netah, “Teng shüm ä, na düihpüi gui naw kyin hnüüp ung ami bilawh cu ng’thukhän awn hnu ng’tuk ci nei,” cik ci gui. ³ Bawipa Jesuh naw, “David ghangpug hang naw, amät la ak chang gui ei cawi law u netah, bi abi cu kä nami phat tu man ci ma? ⁴ Ani la apaw gui cu Khanpughi ah pum im kyong ah lut u netah, taigü gui bäng naw ami ei man ah Khanpughi-am peit ah m’htut cu ei ci gui ah kä kia ne ang? ⁵ Cun kawn ah taigü gui naw kyin hnüüp päng ung kyin nak ah thukhän gui cu m’shet u sei phi m’kat nak gui kä om ci’ ciah Moses ah thukhän ung om ci cu kä nami phat tu man ci ma? ⁶ Kei naw ka ning m’thein gui cu, shin ung pum im ah tah hlüngtai pi ci om ci nei. ⁷ Cacim ung ‘Kei naw ngawnsheh vawihpeh ah mä, m’gein nak cu kamhni pi ci,’ ciah om ciah amawng cu nami hmat vai sü ung, kat nak kä bik ciah chang gui düt thüi nah ne kä nami m’kat gui khai sü te. ⁸ Chang ah Htapa cu kyin hnüüp ah Bawipa ah kiak ci nei,” ci ne kiak na gui ci. ⁹ Bawipa Jesuh cu a cun ung kaa naw pum im tumat ah hteit ci. ¹⁰ Pum im kyong ah akut vangtäng shum ciah chang tumat om ci. Bawipa Jesuh naw kat nak abi vai cu däät ne m’kat hlük ci ah chang gui naw, “Kyin hnüüp ung gaw nak gai sak hning vai ang?” ci ne ng’shik ci gui. ¹¹ Bawipa Jesuh naw, “Nangmi ung kaa chang tumat ah htome tumat cu, kyin hnüüp ung khui ung ang kiak ah a kiak ung, kä zu chaan tu ba ah nawng khai ah chang om ne ang? ¹² Chang cu htome ah mä hlüngtai pi ci. Cun ah kia sei m’htei phyak ci m’htei tu vai cu, thukhän naw phi khüng ci,” ci ne kiak na gui ci. ¹³ Cun kawn ah Bawipa Jesuh naw akut shum ci-am, “Na kut m’cün ne k’phiäih ä,” ci ne kiak nak ci.Akut shum ciah chang naw akut cu k’phiäih khätah, shum ciah akut cu vangtäng ah mäih ah akni ah kia ba ci. ¹⁴ Pharisee gui cu pum im ung kaa hteit ba u netah Bawipa Jesuh cu ngawn vai ah ng’ge ci gui. ¹⁵ Bawipa Jesuh cu cun ah ami ng’ge ah mawng ng’zah netah, ahei lam ah hteit ba sei chang akda naw a hnu ah läk ci gui. ¹⁶ Ani naw gawipai ci gui cu gai sak gui ci. Cun ung phi ani ah mawng kä ami pyein-en vai ah m’zih sak gui ci. ¹⁷ Cun ah m’cäi ne am zih sak gui cu Khanpughi naw profet Isaiah-am a pyein sak ah ng’thu abäi nak ah kiak ci. Cun ah ng’thu cu: ¹⁸ “Shin cu kei naw ka ghü ah ka changshäm, Kam hni, ka zeikiai nak nei. Kei ah ka mumcha cu ani ah khan ah ka gawk sak khai, Ani naw kei ah k’bäi ah m’khoichaa nak cu kho nüng ung shäu khai nei. ¹⁹ Ani naw a i kä ng’cuh tuk khai, käm lau ng’pyang khai, Lam zung ah phi ak’aw m’can ne ng’thu a pyein nak kä om khai. ²⁰ Ani naw ak thagui kä om ci cu k’dükdawm ne, a zi-hnei vai kä om ci cu chimgein khai. Ani cu düng nak awn näng nak ung khüt khai ah bi bik khai. ²¹ Chang pakhui avan naw phi ani cu ngaih u khai gui,” ciah kiak ci. ²² Khoshe naw kai sei a i kä hmu ba ne, kä ng’thu ba hlawt ciah chang tumat cu, chang gui naw Bawipa Jesuh ah law püi ci gui. Bawipa Jesuh naw khoshe k’täm khätah cun ah chang cu, amik m’dei ba sei ng’thu law ba thei ci. ²³ Chang gui cu ang htei ah cäicat u netah, “Shin ah chang cu David ah htapa ah kiak khai ang? ci ne kiak ci gui. ²⁴ Cun ami ci cu pharisee gui naw ng’za u netah, “Shin ah chang naw khoshe gui ah bawimang Beezelbul ah ming awn nei khoshe gui cu ak täm hning,” ci ne kiak ci gui. ²⁵ Ngahmi ah m’lung ngaih cu hmat netah Bawipa Jesuh naw, “Khopäng tumat ung chang gui cu ami m’lung ngaih hnga hnga sei, ami mät gui ami ng’tuk-ah a kiak ung, cun ah khopäng cu kä shou pha sei, dimaih khai. Acun ah mäih ah m’lung ngaih kä kawng ät ciah pigaw, kä cun ung kyong khui cu kä khäng htek khai. ²⁶ Cun ah kia sei,satan ah uk nak kho ung om ci gui cu ami mät gui ng’tu ng’aat u ne, ami kiak ung ani ah kho cu ng’phyeekpai pyii ci kia ne, dimaih khai ah kiak ci. ²⁷ Nangmi naw kei cu Beelzebul ah na peit ah k’thagui awn khoshe ka k’täm ciah nami pyein ci, cun ah a kiak ung nangmi ah chang gui naw mä a u ah peit ah k’thamah nak awn, khoshe cu ami k’täm hning ang? Nangmi nami kat nak mawng cu nami chang gui ah bilawh naw ng’dang sak ci nei. ²⁸ Kei naw Beelzebul ah na peit ah k’thamah nak awn kä kiak ciah, Khanpughi ah Mumcha ah na peit ah bämang thamah nak awn, khoshe gui cu ka k’täm ci. Cun ah kia sei Khanpughi ah uk nak kho cu nami khan ah gawk law pyii ci nei. ²⁹ A u chang naw phi k’thagui mah ciah chang cu khit ne kä ak pawng cang ung, a im kyong ah lut ne a khawhcham kä lak pe hlawt khai, khit ne ak pawng kawn ah vah lak pe hlawt khai. ³⁰ ‘Kei täng ah kä om ciah chang cu na hnu ng’tuk püi ciah kiak ci.Kei awn atäng ah kä ng’bum tuk ci cu ng’zaih-zam düt ciah kiak ci. ³¹ Cun ah kia sei kei naw ak cang ka pyein cu, kat nak ah hmawk ah phi bäi, akshe ah thu ng’htau ah hmawk ah phi bäi, chang gui cu m’gein nak hning om ci. Cun ung phi Mumcha Theing m’shetkat ne ng’thu ah hmawk ah m’gein nak kä om hning ci. ³² Chang ah Htapa m’shetkat ne ng’thu ci cu m’gein hning ung phi, Mumcha Theing m’shetkat ne ng’thu ci läi cu, ngawi zä güt m’gein nak kä om hlawt khai. ³³ ‘Ak theih ak ni ng’zak hlü ung a ghing ak ni geit vai, a ghing shek ci cu ak she ah m’theih ci, ak theih awn a ghing ah mawng cu hmat vai kiak ci. ³⁴ K’pyu m’äm mah gui, nangmi cu chang she ah nami kiak ci kia ne, a i hawk chaa ah ak ni ah nami ng’thu hlawt khai aw? M’lung kyong ah be ne om ci cu m’gawngshai ung ng’thu ah lut lawk ci. ³⁵ Chang ni naw akni m’lung nane akni dang sak ci, chang she nak akshe m’lung nane akshe dang sak ci. ³⁶ Kei naw akcang ka pyein cu, “m’khoichaa nak ah hnüüp ung chang gui cu ami ng’thu m’gawng düt düt ah hmawk ah k’cet ne ng’shi nak om khai. ³⁷ Nangmi m’shekat nak nami gah vai la kä nami gah vai cu, nami mät ah ng’thu m’gawn awn m’khoichaa nak om khai nei,”. ci ne kiak na gui ci. ³⁸ Am shah Thukhän saza gui la pharisee gui naw, “Sazapa, keimi am cäi-aih vai tumat nam hnuh gui ä,” ci ne k’thäh ci gui. ³⁹ Bawipa Jesuh naw, “Shetkat nak awn om ne, Khanpughi kä zum ci gui ah tuhchü chang gui naw, cäi-aih vai cu k’thäh ci gui nei. Nangmi naw profet Jonah ah cäi-aih vai ah kawn ah, a hei nami hmuh vai a i kä om khai nei. ⁴⁰ Jonah cu nganu ah puk khui ah hnüüp thum la mü thum a om ah mäih ah, chang ah Htapa cun phi m’dek khui ah hnüüp thum la mü thum om khai nei. ⁴¹ Nineveh chang gui cu Jonah ah ng’thu ngai u ne, kat nak ung kaa ng’zu ba ci gui ah kia sei, m’khoichaa nak ah hnüüp ung, ngahmi cu ng’düi law u ne, nangmi cu ning k’taap gui khai gui nei. Kei naw akcang ka pyein cu, shin ung tuhbäi Jonah ah hlüngtai pi ci gawk law pyii ci nei. ⁴² Sheba kho päng ciah ghanpughangnu cu, hmuhmat pi ciah Solomon ghangpughang ah ng’thu ngai tuk khai ah gawk law pyii ci nei. M’khoichaa nak ah hnüüp ung ani naw ng’düi law ne, nangmi cu ning k’taap gui khai nei. Kei naw akcang ka pyein cu, shin ung tuhbäi Solomon ghangpughang ah mä hlüngtai pi ci, gawk law pyii ci nei. ⁴³ ‘Khoshe cu a om nak ah chang ung kaa lut law ne ahei ah a hteh ung, kiangma kho ng’gau zung ah a om nak vai shui shüi shüi ci. Cun ah shui shüi ne kä hmu law hlawt netah, ⁴⁴ ‘azan ka om nak man ah ka hteit ba khai,’ ci ne,amät ng’htau ci. Azan a om nak man ah hteit ba khätah, a om nak man cu aung ne, theingthap khai ah pheih phai ah kia sei hmuk ci. ⁴⁵ Cun kawn ah amät ah mä shekha pi ciah khoshe pachih cu va khü tu ba gui sei, a cun ung atäng ah om ci gui. Cun ah kia sei khoshe ah kai ah chang, ak hnu ah a shetkat nak cu, ak htük ung kaa ah mä, shekha law pi ci. Shin cu tuhbäi shekha ciah chang gui ung gawk lawk khai aè amawng ah kiak ci nei.”, ci ne kiak na gui ci. ⁴⁶ Bawipa Jesuh naw chang gui am theithang gui zah ung, anu la anau gui cu gawk law u neh, ani awn ng’hmuh hlü u netah akpung ah ng’düi ne ak ngäng ci gui. ⁴⁷ Chang tumat naw, “Bawipa, nanu la na nau gui naw ning hmu hlü u ne, akpung ah ning ngäng ci gui nei,” ci ne m’thein lawk ci gui. ⁴⁸ Bawipa Jesuh naw, “Kei ah nu cu a u ang? Kei ah phäi nau gui cu a u gui ang? ci ne ng’shi gui netah, ⁴⁹ ang düihpüi gui cu tawk gui ne, “Teng gui vä, shin gui cu kei ah kanu la ka phäi nau gui nei. ⁵⁰ Khankho ah om ciah Kapa Khanpughi ah ang zak hlü ah bik ciah chang phung cu,kei ah phäi, kei ah nau, kei ah be, kei ah nu ah kiak ci nei,” ci ne m’thein gui ci.

¹ A cu hnüüp Bawipa Jesuh cu im ung kaa lut law ne, am thei nak gui vai ah tuili kam pei ah hteit ne ngok ci. ² Gawk lawk ciah chang gui cu da aih u khätah, Bawipa Jesuh cu hleiko khan ah kai ne ngok ci. Chang gui cu tui kam ah ng’düi ci gui. ³ Bawipa Jesuh naw cun ah chang gui-am, m’tumtäng bäng bäng ne amawng akda m’thein gui ci. Bawipa Jesuh naw, “Hnüüp ät ung chang tumat cu m’shi phu khai ah hteit ci. ⁴ Loma ung aphu ah geit m’shi am shah cu, lam ung va kia sei kha gui naw law ne ei ci gui. ⁵ M’shi amshah cu, m’dek ah ng’pam nak lung khan ah kia lawk ci. ⁶ Ng’lih pyo pang ne phi, m’dek ng’pam ci kia ne, kho naw a so law ung kä pya hlawt ne si ba zawp ci. ⁷ M’shi amshah cu ng’hling hmu ah kia lawk ci, ng’lih pyo tupang ne phi, ng’hling gui naw k’düi u sei, si ba zawp ci. ⁸ M’shi amshah cu, am dek ah ni naë ung kia law ne, akni ah ng’lih pyo ghing gong sei, a phiaa, akchuk-kip.athum-kip ah ng’sep khawi ci. ⁹ Bawipa Jesuh naw akhnu ah, “Nami hnga a om ung ngai ne ng’zah vä,” ci ne kiak na gui ci. ¹⁰ Ang düihpüi gui cu Bawipa Jesuh ah pei ah law u netah, “A i ah kia sei chang gui-am m’tumtäng bä bä ne namthein gui ang?” ci ne ng’shik ci gui. ¹¹ Bawipa Jesuh naw, “Nangmi naw Khanpughi ah kho ah mawng thuuk ne ng’kau ci cu hmuhmat nak thei vai nami gah ci. Chang hei gui cu cun kä gah tuk ci gui. ¹² Khawh tak ciah chang cu k’be ba mä sei da law pi khai, khawh kä tak ciah chang cu ak om hta phi lak pe zawp khai. ¹³ Ngahmi-am a i ah kia sei m’tumtäng ne kam thein gui ang ci ung;ngahmi cu teng ne phi kä hmuk ci gui, ngai ne phi kä ng’zak ci gui, a i kä ami hmuhmat su ah kiak ci. ¹⁴ Cun ah kia sei Isaiah ah ng’thu thuuk ung; ‘Shin ah chang gui cu ngai ne, ngai ne phi kä hmat khai gui, Teng ne teng ne phi kä hmuk khai gui, ¹⁵ A i ah kia sei ci ung, ami m’lung cu ang ne, amik hnga cu pang ne, ami mik cu m’shing ciah kiak ci. Ami mik m’dei ne ami hnga ng’lang sei, ami m’lung kyong awn hmuhmat u ne ami kiak vai sü ung, Kei lam ah ng’hlat law u ne, na zi hnei u sei, Kei naw phi kam gein gui khai süte,” ci ne Khanpughi naw pyein ci ciah kiak ci. ¹⁶ Nangmi ah hmawk ah a i hlawk ah zeikiai vai kiak ci ang? Nangmi cu nami mik m’dei ne nami hnga ng’lang ci. ¹⁷ Kei naw akcang ka pyein cu, profet gui la Khanpughi ah chang akda gui naw, nangmi ah mäih ah hmuh hlü u ne phi, kä hmuh hlawt ci gui, nangmi ah ng’zak ah mäih ah ng’za hlü ne phi kä ng’za hlawt ci gui nei. ¹⁸ “Cun ah kia sei m’shi phu ci awn m’tumtäng nak ah mawng cu ngai kheng shüm vä. ¹⁹ Lam ung kia lawk ciah m’shi ci cu, Khankho uk nak ah mawng ng’thu k’ni cu ng’zak tu lang ne phi, kä hmat ci awn täng ci. Ami m’lung kyong ung phu ah ng’thu m’shi cu, khoshe naw la ne hteh püi zawp ci. ²⁰ Lung ung kia lawk ciah m’shi ci cu, ng’thu k’ni cu ami ng’zak tu vai-am zeikiai ne dou tuk ci gui ah kiak ci. ²¹ Cun ung phi ng’thu ni cu ngahmi ah m’lung kyong ung kä khäng htek ci, ashäng hta bäng gawk ne om ci. Ami dou ah ng’thu ni ah hmawk ah zaica nak la shedam nak ami aut law ung, a cun vai-am ng’hlat ba ci gui. ²² Hliing hmu ah kia lawk ciah m’shi ci cu, ng’thu ni cu ng’za tulang ne phi, ami ng’ä ai nak gui la ami bämang nak hlü gui naw, shung shet gui sei ng’thu ni cu kä vui pai hlawt ciah kiak ci. ²³ M’dek ni ung kia lawk ciah m’shi ci cu, ng’thu ni cu ngai ng’za tu ne hmuhmat ci gui ah kiak ci. Ngahmi cu amshah aphiaa, amshah ak chuk-kip, amshah athum-kip ah vuipai ci gui,” ci ne m’thein gui ci. ²⁴ Bawipa Jesuh naw ahei tumat awn m’tumtäng ne am thein ba gui cu, “Khankho uk nak cu shin ah mäih ah kiak ci. Chang tumat naw aloma ah m’shi k’ni cu geit ci. ²⁵ Khomü ät ung chang van ip zawp kh"tah, gaa tumat law ne m’ghaw m’shi cu phu shüt netah hteit ba ci. ²⁶ Geit gui lut law ne ghing gong law u sei, m’ghaw gui phi lut law tuk ci gui. ²⁷ Loma ah ak chang ghüh gui law u netah, ‘Bawipa, na loma ah geit m’shi k’ni na geit ciah kä kia ne ang? Khu m’ghaw gui a hawi kaa ang ami gawk law,” ci ne ng’shik ci gui. ²⁸ Lo mah naw, shin cu gaa ah bi ah kiak ci nei,’ ci khätah, a ghüh gui naw, “Cun ah a kiak ung m’ghaw avan kami mawih züm züm vai ang?’ cik ci gui. ²⁹ Lo mah naw, ‘Kaa, kä mawi zawp hnga vä, khu m’ghaw avan nami mawih zawp ung, geit gui phi ng’mawi tuk khai gui nei. ³⁰ Geit khäm khin ung khüt sei, geit la m’gho cu atäng ah phung ghing cang ni sä. Geit khäm khin a gawk law ung geit khäm ci gui-am; khu m’ghaw gui cu mawih sak gui ma netah, k’bum ne mei ung m’khih vä, cun kawn ah geit gui cu aat u ne, ka khei ung thun vä,’ ci ne kam cäi gui khai,’ cik ci,” ci ne m’thein gui ci. ³¹ Bawipa Jesuh naw ahei tumat awn m’tumtäng ne a pyein cu, “Khanpughi ah uk nak ah kho cu shin ah mäih ah kiak ci. Chang tumat naw anhta ui cu la ne aloma ah geit ci. ³² Cun ah anhta ui cu geit m’shi gui nüng ung zaw pibäih ci. Cun ung phi ng’lih pyo ne a ghing gong law ung, a ghing gui avan ung akdäm pibäih ah kia lawk ci. Cun ah kia sei khahta gui cu ang ban gui ung ng’bu tuk ci gui” ciah kiak ci. ³³ Bawipa Jesuh naw ahei awn m’tumtäng ne am thein ba mä gui cu, “Khanpughi ah uk nak kho cu shin ah mäih ah kiak ci. Hnumi tumat naw k’co cu la netah, m’htut den pyii taang ät ung k’caw sei, m’htut den avan cu tho ne pai ci,” ciah kiak ci. ³⁴ Bawipa Jesuh naw chang gui-am m’tumtäng bäng bäng ne m’thein gui ci. Kä m’tumtäng ah a i ah mawng phi kä pyein ci. ³⁵ Cun ah a pyein sak ah mawng cu, profet gui ah ng’thu aküm nak vai ah hmawk ah kiak ci. Cun ah thu cu; “Kei naw nangmi ah ma ah ng’thu ka pyein ung m’tumtäng bäng bäng ne ka pyein khai: Khanpughi naw khomdek atüi ung tün ne, a u ah kä hmat man cu kei naw m’dang ne ka pyein khai,” ciah kiak ci. ³⁶ Bawipa Jesuh cu chang gui ah ng’lung ah kaa, ng’dü law ne kyong ah lut ba ci. Cun zah ung ang düihpüi gui naw apei ah law u netah, “Khumgho awn am tumtäng nak ah mawng cu m’dang ne nam thein gui ä,” cik ci gui. ³⁷ Bawipa Jesuh naw, “M’shi k’ni phu ciah chang cu chang ah Htapa ah kiak ci. ³⁸ Loma cu khomdek khan ah kiak ci. M’shi k’ni cu khankho uk nak khäm ciah chang gui ah kiak ci. ³⁹ Khumghaw m’shi cu khoshe ah chang gui ah kiak ci. Geit khäm khin cu kho ah khüt nak vai ah khin ah kiak ci. Geit khäm ciah chang gui cu khankho chang gui ah kiak ci. ⁴⁰ Khu m’ghaw gui cu aat ne k’bum ne mei ung m’khih ah mäih ah, kho a khüt hnüüp ung khoshe ah chang gui cu mei awn m’khih ne m’di nak gui om khai nei. ⁴¹ Chang ah Htapa naw ak khankho chang gui tüi law ne, chang gui shetkat lam hma sak ci gui la shetkat nak bik ciah chang gui cu, a uk nak kho ung kaa, ghü gui ne la gui netah, ⁴² Caang ne ng’ai ciah mei ung k’htawm gui khai. Cun ah chang gui cu kyap ne m’lau ne, ami ha htui ne gein vai khai gui. ⁴³ Cun zah ung Khanpughi ah chang gui cu ami pa ah uk nak kho ung, khohni ah mäih ah khang ne om khai gui. Ng’zak nak vai ah hnga om ci phung naw ng’za sä,” ci ne m’thein gui ci. ⁴⁴ “Khanpughi ah uk nak kho cu shin ah mäih ah kiak ci, Chang tumat naw, lai ah phuh ne gimah khawh ng’peeih cu hmu netah, lin ne phuh ba shüt ci. Cun kawn ah zeikiai ne hteit ba ne, akhawh avan zoi zawp netah, cun ah lai cu khleih ba ci,” ci ne m’thein gui ci. ⁴⁵ “Cun kawn ah phi Khanpughi ah uk nak kho cu shin ah mäih ah kiak ci. Chang tumat cu ghui cünglung gui shui lä netah, ⁴⁶ Ang htei ah aphu küi ciah ghui cünglung cu hmuk ci. Cun kawn ah hteit ba ne akhawh avan zoi zawp netah ghui cünglung gui cu khleih ci. ⁴⁷ “Cun kawn ah phi Khanpughi ah uk nak kho cu shin ah mäih ah kiak ci. Nga shui ci gui cu tuili ung ng’vai ami vawih ung nga ahlü hlü uk ne phak ci gui. ⁴⁸ Ng’vai ung nga be ne awk khätah ng’vai Cu kawng ah kai püi ba ci gui. Ng’vai ung kaa nga gui cu ghü u netah, Nga ak ni gui cu ami pem ung m’kang u ne, nga ak she gui cu set ne ghawt ci gui. ⁴⁹ Kho ang pyii hnüüp ung acun ah mäih ah kia lawk khai. Khankho Chang gui kyum law u ne, chang ni gui ah lung ung kaa, chang she gui cu ghü u netah, ⁵⁰ Caang ne ng’ai ciah mei ung htawm khai gui. Cun gui cu kyap ne m’lau ne ami ha htui ne geinvai khai gui. ⁵¹ “Bawi Jesuh naw, “Shin ah amawng gui cu nami hmat ci ang?” ci ne ng’shi gui khätah, ang düihpüi gui naw,” kami hmat ci nei,” cik ci gui. ⁵² Cun ah kia sei Bawi Jesuh naw, “Khankho uk nak kho ung düihpüi tumat ah kia lawk ciah chang phung cu, a im khei ung kaa, akhawh ak phyim akthai k’plawk ne law püi ciah, imah awn täng ci,” ci ne m’thein gui ci. ⁵³ Bawi Jesuh cu cun ah tumtäng nak am thein gui kawn ah, acun ung kaa pawng ne, ⁵⁴ amät ah pigaw ah hteit ba ci, Pum im ah m’theithang gui sei, Cun hmuk ciah chang gui cu cäicat u netah, “Shin ah chang naw shin ah hmuhmat nak gui ahawi a gah ang? cäi aih gui vai mä a i hawkcha abi hning ang?, ⁵⁵ Ani cu m’si sheh a hta ah kä kia ne ang?,ani cu Mary ah hta, a nau gui cu James, Josef, Simon la Judas ah kä kia ne ang? ⁵⁶ Abe gui cu a shin ah pigaw ung om ci gui ah kä kia ne ang?, ani naw shin ah hlüngtai nak gui ahawi kaa ang agah ve, ⁵⁷ Cun gui ah thu pyein ne ngahmi naw hnungtuk püi ci gui. Bawipa Jesuh naw, ngahmi-am, “Profet cu amät ah pigaw la amät ah kyongkhui ah tha ah a u naw phi kä hnu ng’tuk püi ci,” ci ne kiak na gui ci. ⁵⁸ Cun ah Nazaret chang gui cu ami zum nak kä om khätah, Bawi Jesuh naw cäi aih vai ai phi käm dang ling ci.

¹ Cun zah ung Kalile kho uk ciah Herod naw Bawipa Jesuh ah a mawng cu ng’za netah, ² “Ani cu sih nak ung ka tho ba ciah Tuihnim Johan akcang ah kiak khai. Cun ah kia ne ani ung cäi aih nak vai m’dang nak hning ah hlüngtai nak gui om ciah kiak ci,” ci ne ak chang vai gui-am kiak na gui ci. ³ Herod naw Johan cu anau Philip ah chu, Herodias ah mawng awn pha ne thawng ung a chum te ah kiak ci. ⁴ A i ah kia sei ci ung Johan naw, “Na nau ah chu Herodias, cu na khäm tu ba vai ah kä nik ci,” ci ne a kiak nak ah phäh ah kia ci. ⁵ Herod naw Johan cu ngawn hlü te ci, cun nung phi Jew chang gui naw Johan cu profet ah k’bäi u khätah, ngah mi cu kyih gui ne kä ngawn ci. ⁶ Herod ah ang tüi nak hnüüp ung Herodias ah hta hnumi hta cu mang khin gui ah ma ah ak ni ah lam khätah, Herod cu ang htei ah zei ci. ⁷ Cun ah kia sei Herod naw cun ah hnumi hta-am, “Nam hni a i phi ng’zoi ä, ka ning pek khai,” ci ne khän ne kiak nak ci. ⁸ Cun ah hnumi hta naw anu ah m’cäi ah, “Tuihnim Johan ah lu cu tawnglang ung khäp ne, atuh bäi na peä,” ci ne pyein ci. ⁹ Herod mang cu ang htei ah a zä pang ne phi, khin chang gui ah ma ah khän ne a pyein pyi ah kia sei, hnumi hta naw a pyein ah mäih ah pek vai ah bäi ci. ¹⁰ Cun ah kia sei Johan ah lupum cu thawng kyong ah chün sak gui netah, tawnglan ung khäp ne hnumi hta-am pek sak gui ci. ¹¹ Hnumi hta naw cun ah lupum cu anu ah om nak ah hteh püi ci. ¹² Johan ah ang khahpüi gui naw law ne, a gook cu hteh püi ba u ne, phuh ci gui. Cun kawn ah Bawipa Jesuh ah hteit ne amawng avan cu m’thein tuk ci gui. ¹³ Cun ah amawng gui cu Bawipa Jesuh naw ng’za hetah, amät bäng hleiko awn ading gei nak ah hteit ci. A pigaw päng ung chang gui naw, Bawipa Jesuh ah a hteh cu ng’za u netah, kawnglam ung hteit ne läk ci gui. ¹⁴ Bawipa Jesuh naw hleiko ung a kai kawn ah chang gui cu teng gui ne m’gein gui netah gawpai ci gui cu gai sak gui ci. ¹⁵ Kho mühun law khätah ang düihpüi gui cu Bawipa Jesuh ah pei ah law u netah, “Shin zah cu chang ah kä om nak ah kia ci, kho phi mü lawk khai kiak ci, shin ah chang gui pigaw gui ah hteit ne, ami mü-ei vai ami hleih vai ah tüi gui ä,” ci ne pyein ci gui. ¹⁶ Bawipa Jesuh naw, “Ngahmi kä hteit u sä, nangmi naw ami ei vai pe gui vä,” ci ne kiak na gui ci. ¹⁷ Ang duihpüi gui naw, “Keimi ung m’htut pum hma la nga pahnih bäng om ci nei,” cik ci gui. ¹⁸ Bawipa Jesuh naw, “Cun ah m’htut la nga cu kei ah law püi vä,” cik ci. ¹⁹ Bawipa Jesuh naw chang gui cu, taa ng’phan khan ah ngoh sak gui netah, m’htut, pum hma la nga pahnih cu la ne, khankho dan ne Khanpughi m’hlüngtai ci. Cun kawn ah m’htut cu bou ne ang düihpüi gui-am pe gui ci, ngahmi naw chang gui-am tei gui ci gui. ²⁰ chang gui avan naw ami ei kawn ah ak pawih cu them-dawn ung a gha-lei-goi ah kaw ba ci gui. ²¹ Hnumi gui la ak hmaw hta gui kä khei tu ah m’htut ei ciah pami ng’vai bäng cu phia hma-kip lawk ci. ²² Cun kawn ah Bawipa Jesuh naw chang gui cu ami im ah tüi ba gui netah, ang düihpüi gui cu hleiko ung kai sak gui ne, tuili vangtäng ga ah vang kah sak gui ci. ²³ Cun ah chang gui a tüih ba gui kawn ah amät cu taigü khai ah khomhtung khan ah kai ci. Kho mü law güt sei a cu ah amät om ci. ²⁴ Cun zah ung ang düihpüi gui ah hleiko cu tuili lai ah gawk pyi ci. Kho khi ng’hlat sei hleiko cu tui naw hnawk püi ci. ²⁵ Ngawilam ai khong htük ung Bawipa Jesuh cu ang düihpüi gui ah om nak ah lawk khai ah tui khan ah ana a vük ci. ²⁶ Cun ah tui khan ah düi ne ana avü cu hmu u netah, ang düihpüi gui cu cäicat u ne, “m’cha nei,” ci ne m’lau ci gui. ²⁷ A cun vai-am Bawipa Jesuh naw, “Kä cäicat vä, kei nei, kä kyikyawk vä,” ci ne kiak na gui ci. ²⁸ Cun kawn ah Peter naw, “Bawipa, nang ah na kiak ung, kei cu tui ah khan ah hteit ne nang ah ka law hning vai ah k’bäi ne pyein nä ci ne pyein ci. ²⁹ Bawipa Jesuh naw, “Law ä,” ci khätah Peter cu hleiko ung kaa kyum law ne, Bawipa Jesuh ah hteit khai ah tui ung ana a pawng vük ci. ³⁰ Cun ung phi kho akhi law hmu netah, cäicat ne tui ung zu hnim vü netah, “Bawipa aw, na khui ei tu ba ä,” ci ne m’lau ci. ³¹ cun vai-am Bawipa Jesuh gawk law ne, akut awn Peter cu pang netah, “Na zum nak ken aih ci nei, a i vai kä na ngaih gep ang,” ci ne kiak nak ci. ³² Bawipa Jesuh la Peter hleiko khan ah ani gawk ba ung kho phi kä khi ba ci. ³³ Hleiko khan ah om ciah ang düihpüi gui cu Bawipa Jesuh ah kawp ne ngüm zawp u netah, “Nang cu ak cang ah Khanpughi ah Htapa ah na kiak ci nei,” cik ci gui. ³⁴ Bawipa Jesuh la ang düihpüi gui cu hleiko awn tui-kam vangtäng ah vang kat u ne, Kennesaret ah gawk ci gui. ³⁵ Cun ah gawnu ung chang gui naw Bawipa Jesuh cu hmat ba u netah, pigaw pei zung avan ung chang gui tüi ne khü sak gui netah gawipai ci gui cu law püi ci gui. ³⁶ Cun kawn ah gawpai ci gui naw Bawipa asui pyai hta bawtah ami tawn tu vai ah ng’zoi lawk ci gui. Cun ah tawh tuk ciah chang gui phung cun phi, gai ba ci gui.

¹ Cun kawn ah Jerusalem ah kaa pharisee gui la thukhän saza gui cu Bawipa Jesuh ah law u netah, ² “A i ah kia sei nang düihpüi gui naw pupa gui ah thungzo man cu kä ami läk ang? ngahmi cu thungzo man ah kut käm si ah ei ei ci gui nei,” ci ne pyein ci gui. ³ Bawipa Jesuh naw, “Nangmi a i ah kia sei Khanpughi ah thukhän nawng-en ne, nami mät ah thungzo man düt nami läk ang? ⁴ Khanpughi naw, ‘Nanu la napa cu nak chang m’sui vai, anu pa züi gen ciah chang cu sih nak gah sä,” ci ne thu khän ci. ⁵ Cun ung phi nangmi naw, chang tumat ung anu pa-am a peit vai khawh cham a om ung, cun cu Khanpughi-am peit pyi ah kiak ci, anu pa-am a peit vai kä hlü khai, ci ne nami theithang ci. ⁶ A cu cha ah nangmi cu Khanpughi ah thukhän nawng-en u ne, nami mät ah thungzo cu nami läk ci. ⁷ Thuvi chang gui, nangmi ah mawng Isaiah naw a pyein cu, akcang ah bä ci nei, cun ah thu cu; ⁸ Khanpughi naw, ‘shin ah chang gui naw, ami shai awn Kei cu nam hlüngtai ci gui, Cun ung phi ami m’lung cu kei awn ng’shawng aih ci. ⁹ Ngahmi naw kei ami na khawihnah cu akholä ah kiak ci, A i ah kia sei ci ung, ngahmi naw chang ah pyan ah thukhän gui cu, Khanpughi ah thukhän ah mäih ah, m’theithang ci gui!,” ci ne kiak na gui ci. ¹⁰ Bawipa Jesuh naw chang gui cu a pei ah khü gui netah, “Ka thu cu ngai netah hmat vä, ¹¹ Chang shetkat sak ci cu m’gawnglei ung zulut vük ciah kä kiakci, m’gawnglei ung kaa lut lawk ciah kia ci,” ci ne kiak na gui ci. ¹² Ang düihpüi gui naw a pei ah law u netah, “Nang Bawipa naw thu na pyein ah phäh ah pharisee gui m’lungkshe ci gui nei, na hmat ci ang?,” ci ne pyein lawk ci gui. ¹³ Bawipa Jesuh naw, “Khankho Kapa ah geit ah kä kiak ciah a ging phung cu mawi ne ghawh vai nei. ¹⁴ Cun ah kia sei ngahmi ah hmawk ah kä nami ng’ä vai, ngahmi cu amik käm dei ci lam shüm tuk ciah amik m’dauh gui ah kiak ci gui. Amik m’dauh naw amik m’dauh cu lam am shüm ah a kiak ung, ani nik hnih cu m’ghawng ah lut khai goi nei,” ci ne m’cäi gui ci. ¹⁵ Peter naw,“Shin ah tumtäng nak cu phlan ne nam thein gui ä,” ci ne ng’zoi khätah; ¹⁶ Bawipa Jesuh naw, “Nangmi phi tuhgüt chang hei gui ah mäih ah a i kä nami hmat phak ci ma? ¹⁷ M’gawnglei ung zulut vük ci phung avan cu, chikhawn ung zu gawk netah, cun kawn ah ak pung ah aluh law ba cu kä nami hmat ci ma? ¹⁸ Cun ung phi m’gawnglei ung lut lawk ci cu m’lung kyong ung kaa lawk ciah kia ne, a cun naw chang cu shetkat sak ci nei. ¹⁹ Chang ngawn nak, chang ah chu hta kat püi nak, chang she awn ih om nak, m’guk-ei hleei pyein nak, la chang m’thüi khang nak gui ah kä nik ciah ngaih tüh gui phung cu, m’lung kyong ung kaa lut lawk ciah kiak ci. ²⁰ Cun gui naw chang cu shetkat sak ci gui. Kut käm si ah ei ei naw chang cu kä shetkat sak ci nei,” ci ne m’thein gui ci. ²¹ Bawipa Jesuh cu cun ung kaa hteit ba ne Taia la Sidon kho ah gawk ci. ²² A cu ah om ciah Kanan Hnuminu tumat cu law netah, “David ah Htapa, kei cu nam gein ä, kei ah hta hnumi cu khoshe naw kai sei, geinvai ne ng’zän ci nei,” ci ne ng’pa ne zoi ci. ²³ Cun ung phi Bawipa Jesuh naw a i ah phi käm shang ci. Ang düihpüi gui cu a pei ah law u netah, “Shin ah hnumi cu mi hnu ah na läk law gui ne, pamcai ci nei, züi ne gawt ba ä,” ci ne pyein ci gui. ²⁴ Bawipa Jesuh naw, “Kei cu maih ciah htome bum ah kiak ciah Israel chang gui ah hmawk bäng ah ka lawk ci nei,” ci ne m’shang gui ci. ²⁵ Cun ci khätah cun ah hnuminu naw akho pei ah khuukdong netah, “Bawipa, kei cu nam gein ä,” ci ne ng’zoi ba ci. ²⁶ Bawipa Jesuh naw, “Hta hmaw gui ah ei vai cu la ne, ui gui-am kä vuh vai nei,” ci ne pyein ba ci. ²⁷ Cun ah hnuminu naw, “hman ci nei Bawipa aw, cun ung phi ui gui cun naw, ami mah ah ei nak ung ng’theh ciah ei-book cu ei tu man ci gui nei,” ci ne pyein ba mä ci. ²⁸ Cun ci ba khätah, Bawipa Jesuh naw, “Nang hnumi, nang cu na zum nak däm aih ci nei,nang zak hlü ah mäih ah kia sä,” ci ne kiak nak ci. A cun zah lung ung cun ah hnuminu ah hta cu gai ba ci, ²⁹ Bawipa Jesuh cu cun ung kaa pawng ba ne, Kalile tuilinu kem zung ah hteit ba ci, Cun kawn ah m’htung ah hang kai ne ngok ci. ³⁰ Chang gui naw akho khem, amik m’dauh, ak shum, ak ang gui la gawpai ci gui akda a pei ah law u sei, gai ba sak gui ci. ³¹ Ak ang gui thu thei ci gui,apumsa kä küm ci gui küm ba ci gui, akho khem gui hteit thei ci gui, amik m’dauh gui m’dei lawk ci gui, a cun gui cu chang gui naw hmu u netah, ang htei ah cäicat u neh Israel gui ah Khanpughi cu m’hlüngtai ci gui. ³² Bawi Jesuh naw ang düihpüi gui cu khü gui netah, “Shin ah chang gui kei awn atäng ah ami om tu cu hnüüp thum lüng lawk ci nei, Ngahmi ung ei vai kä om ci, kam gein gui ci nei. A i kä tumbei gui ung ami hteh ba ung lamah ami thagui maih khai nei,” ci ne kiak na gui ci. ³³ Ang düihpüi gui naw, “Shin ah bung hmu k’pyama ah, chang shi chü ah ei vai, a hawé shui ne gah vai ang?,” cik ci gui. ³⁴ Bawipa Jesuh naw, “Nangmi ung m’htut a i chü ang a om,” ci ne ng’shi gui sei, “M’htut pum chih la nga api om ci nei,” ci ne m’thein ba ci gui. ³⁵ Cun kawn ah Bawipa Jesuh naw chang gui cu m’dek ung ngoh sak gui ci. ³⁶ M’htut pum chih la nga api cu la ne, Khanpughi ah taigü netah, m’htut la nga cu bou ne ang düihpüi gui-am pe gui sei ang düihpüi gui naw chang gui-am tei gui ci gui. ³⁷ Chang gui naw ami phü ah ami ei kawn ah ami ei ah ak pawih cu them dawn ung ak chih ah kaw ba ci gui. ³⁸ M’htut ei ci gui cu ak hmaw la hnumi kä khei tu ung phia phli-kip lawk ci gui. ³⁹ Cun kawn ah chang gui cu Bawipa Jesuh naw tüi ba gui netah, amät cu Makadon kho lam ah hteit ci.

¹ Pharisee gui la Sadducee gui cu Bawipa Jesuh ah pei ah law u netah, ami phawtcam nak ah, Khanpughi a tüih law ah mawng cäi aih vai cu am dang vai ah k’thäh ci gui. ² Bawipa Jesuh naw, “Khohni a hang luh vü vai ung, khosing ang theh ung, kho shen khai ci ne phi bäi, ³ Kho ngawi hta ung hni law lam ah meile a tawt ung kho aa khai ci ne phi bäi, nami pyein man ci. Nangmi cu khomik teng ne kho akhi aa vai cu hmat lang u ne, tuhbäi chü akhin ah a mawng cu m’khoicha ne kä nami hmat ci ma?. ⁴ Tuhchü chang gui cu ang htei ah shetkat u ne, düng nak kä om aih ci gui nei. Nangmi naw cäi aih vai nami thäh ci, cun ung phi Jonah ah m’dang ah cäi aih vai ah kawn ah a i nami hmuh vai kä om ci nei,” ci ne kiak na gui ci. Cun kawn ah Bawipa Jesuh cu pawng ne ahei lam ah hteit ba ci. ⁵ Ang düihpüi gui cu tuili ah vang ga ah ami vah kai ba zah ung, m’htut ami sho vai sü cu m’hnih shüt ci gui. ⁶ Bawipa Jesuh naw, “Nangmi cu pharisee gui la Sadducee gui ah k’caw cu ngaih na ne nami hlawi vai,” ci ne m’cäi gui ci. ⁷ Ang düihpüi gui naw, “Mik mi naw ei vai kä mi sho khätah, cun ah a pyein ah kiak khai,” ci ne ami mät ng’cecäk ci gui. ⁸ Cun ah ami ng’cecäk cu Bawipa Jesuh naw ng’za gui netah, “A i ah kia sei ei kä nami sho ah mawng pyein ne nami ng’htau ang? ⁹ Zum nak ken ciah chang gui, tuhgüt kä nami hmuhmat lawk ci ma?, m’htut pum hma, chang phia hma-kip-am ka tei gui la, ami ei ah pawih dawn ung a i chü nami kaw ba cu, kä nami shüm ba ci ma? ¹⁰ m’htut pum chih, chang phia phli-kip naw ami ei ah mawng la ami ei pawih dawn ung a i chü nami kaw ba cu, kä nami shüm ba ci ma? ¹¹ Ei ei vai ah mawng ka pyein ah kä kiak ci, ci cu kä nami hmat ci ma? Pharisee gui la Sadducee gui ah k’caw cu geeik na ne nami hlawi vai nei,” ci ne kiak na gui ci. ¹² Cun kawn ah ang düihpüi gui naw, m’htut pian nak ah k’caw ami hlawi vai ah kä kia ne, pharisee gui la Sadducee gui ah theithang cu kä ami läk-en vai ah Bawipa Jesuh naw am cäi gui cu, hmat lawk ci gui. ¹³ Ceasarae Philippi kho ah ami gawk law zah ung Bawipa Jesuh naw ang düihpüi gui cu,“Chang gui naw chang ah Htapa-am a u ah nei ami pyein?” ci ne ng’shi gui ci. ¹⁴ Ang düihpüi gui naw, “Chang am shah naw ‘Tuihnim Johan’ cik ci, am shah naw, ‘Elijah’ cik ci, am shah naw Jeramaih kä cun ung profet ah kiak khai,’ ci ne pyein ci gui nei,” cik ci gui. ¹⁵ Bawipa Jesuh naw, “Nangmi naw mä, kei cu a u ah nei nami na pyein,” ci ne ng’shi gui ci. ¹⁶ Simon Peter naw, “Nang cu ang täi ghing ciah Khanpughi ah Htapa, Messiah ah na kiak ci,” ci ne pyein ci. ¹⁷ Bawipa Jesuh naw, “Johan ah hta Simon, nang ung zeikiai nak om ci, shin ah düng ciah amawng cu chang naw kä hmat hning ci, Khankho ah om ciah Kapa naw a ning m’thein ah kiak ci. ¹⁸ Cun ah kia sei nang cu, “Kheng lung,” ah ming ciah “Peter” ah na kiak khai, a cun ah kheng lung ah khan ah ka pum im ka k’süm khai, cun cu sihnak naw phi kä näng hlawt khai. ¹⁹ Kei naw nang-am khankho hmawn nak ah htawh gui cu ka ning pek khai. Khomdek khan ung nang naw na khih pawn cu, khankho ah phi khih pawn nak om khai. Khomdek khan ung nang naw na chah cu khankho ah phi chah nak om khai,” ci ne kiak nak ci. ²⁰ Cun kawn ah Bawipa Jesuh naw amät Messiah ah a kiak ah mawng cu, a u-am kä ami m’thein-en vai ah ang düihpüi gui-am m’zih sak gui ci. Pyein Ci. ²¹ Cun ah akhin ung tün ne Bawipa Jesuh naw ang düihpüi gui am akdei angdang ah am thein gui cu, “Kei cu Jerusalem ah hteit ne, pum im ung ang vai gui, taigüpa gui la thukhän saza gui ah kut ung dukdeiu nak ka gah khai, cun kawn ah sih nak ung na gawksak khai gui, cun ung phi ak hnüüp thum hnüüp sih nak ung kaa ka tho ba khai,” ciah kiak ci. ²² Peter naw Bawipa Jesuh cu a pei ah khü netah, “Bawipa, na pyein gui cu akcang ah kä ah bä-en vai ah, Khanpughi naw shungshet sä. Nang Bawipa cu a cun ah amawng ama gui-awn, a i zah ung phi kä bui awt-en ä,” ci ne pyein ci. ²³ Bawipa Jesuh naw Peter lam ah vang hlat netah, “Nang khoshe a hei ah hteit ä, nang cu vawntam nak vai ah na kiak ci, nang ah ngaih tüh gui cu Khanpughi lam ah kä kiak ci, chang lam ah kiak ci,” ci ne kiak nak ci. ²⁴ Cun kawn ah Bawipa Jesuh naw ang düihpüi gui-am, “Kei awn atäng ah hteit tu hlük ciah chang cu, amät ah ng’zak hlü nawng shüt ne, amät ah kutlam tung kawt netah, ka hnu ah a na läk vai. ²⁵ amät ah hnun ghin nak phiawn hlük ciah chang cu sih nak hmuk khai, kei ah hmawk ah sih nak gah ciah chang cu, ghin nak hmuk khai. ²⁶ Chang cu khomdek khan avan a uk ung phi amät ah ghin nak a maih ung a i ah mawng mei ba khai ang?, amät ah hnun ghin nak cu a i awn thong ne gah khai ang? ²⁷ Chang ah Htapa cu apa Khanpughi ah bämang nak awn ak khankho chang gui awn atäng ah kyum lawk khai. Cun kawn ah chang gui-am, ami mät ah om ih ah ci ah, m’cümhnah nak cu pe gui khai. ²⁸ Kei naw akcang ka pyein cu, shin ung om ciah chang avan kä a sih pha ung chang ah Htapa cu Ghangpughang ah kia ne law ba khai nei” ci ne m’cäi gui ci.

¹ Ak hnüüp chuk nak ung Bawipa Jesuh naw, Peter ni, James la anau Johan ni cu khah püi gui ne khomhtung ah kai püi gui ci. ² Ngahmi naw ami hmuh ge ah Bawipa Jesuh ah amüi cu ng’khukhlat lawk ci, a hmai cu khohni ah mäih ah pyü ne, asui sak gui cu bawk-en phäng phäng ne khang ci. ³ Cun kawn ah ang düihpüi gui naw, Moses la Elijah dang law ni sei, Bawipa Jesuh awn düi ne thu ng’htau u sei hmuk ci gui. ⁴ Cun ah kia khätah Peter naw, “Bawipa, shin ah hmun cu om nak ah ni aih ci nei, nang naw nang zak hlü ung, nang ah hmawk ah tumat, Moses ah hmawk ah tumat, Elijah ah hmawk ah tumat, k’pyu thum ah ka co khai nei, ci ne pyein ci. ⁵ Cun ah Peter naw thu a pyein zah ung a bawk phäng phäng ah khang ciah khomei naw küm law gui ci. Cun ah khomei ung kaa ng’shan lawk ciah k’aw cu, “Shin cu kei ah Htapa nei, ani awn ka zei kiai ci nei, ang thu cu ngai vä,” ciah kiak ci. ⁶ Cun ah k’aw cu ang düihpüi gui naw ng’za u netah ang htei ah kyi kyawk u ne, m’dek ung kaup zawp ci gui. ⁷ Bawipa Jesuh naw law ba ne akut awn hnün gui netah, “Tho law ba vä, kä kyi kyawk vä,” ci ne kiak na gui ci. ⁸ Ngahmi naw täu law ba ne teng u khätah Bawipa Jesuh ah kawn ah a u kä om ba ci. ⁹ Cun kawn ah Bawipa Jesuh la ang düihpüi gui cu, khomhtung ah kaa kyum law ba ci gui. Ami kyum law ba zah ung Bawipa Jesuh naw, “Tuhbäi nami hmuh gui cu, chang ah Htapa sih nak ung kaa a thawh law ba ung khüt sei, a u-am kä nami m’thein vai,” ci ne ang düihpüi gui-am m’zih sak gui ci. ¹⁰ Ang düihpüi gui naw, “a i ah kia sei a htük bäih ah ‘Elijah kyum law ba khai,’ ci ne thukhän saza gui naw ami pyein ang?” ci ne ng’shik ci gui. ¹¹ Bawipa Jesuh naw, “Elijah cu law ba ma ne amawng ama avan anam khüp ma khai,’ ci cu akcang ah kiak ci nei. ¹² Kei naw akcang ah ka pyein cu Elijah cu gawk law pyi ci nei. Cun ung phi chang gui naw ani cu kä hmat u ne, ani ah khan ah ami bi hlü hlü ah bik ci gui nei. A cun ah mäih ah chang ah Htapa cun phi chang gui ah kut ung shedam nak gah khai nei. ¹³ A cun kawn ah ang düihpüi gui naw tuihnim Johan ah mawng a pyein ah hmat lawk ci gui. ¹⁴ Bawipa Jesuh la ang düihpüi gui cu chang gui ah om nak ah gawk law ba u khätah, chang tumat cu Bawipa Jesuh ah ma ah law ne khuukdong netah, ¹⁵ “Bawipa, ka hta cu nam gein pe ä, ani cu mangtak ne, a shäng shäng tui ung phi lut ci, mei ung phi lut ci ci nei. ¹⁶ Ani cu nang düihpüi gui ah hteh püi ung phi kä gai sak hlawt ci gui nei,” ci ne pyein ci. ¹⁷ Bawipa Jesuh naw, “Nangmi cu nami zum nak kä om sei nami ng’lihlak zawp ci nei. Kei naw nangmi a i güt ka ning om püi gui vai ang, a i güt ka ning ngaih peit gui vai ang, ak hmaw cu ka pei ah law püi vä,” ci ne kiak na gui ci. ¹⁸ Bawipa Jesuh naw ak hmaw ung kaa khoshe cu täm khätah khoshe cu dawng sei, a cun vai-am ak hmaw cu gai ci. ¹⁹ Cun kawn ah ang düihpüi gui cu Bawipa Jesuh amät a om zah ung a pei ah law u netah, “Keimi naw khoshe cu a i ah kia sei kä kami täm hlawt ang?” ci ne ng’shik ci gui. ²⁰ Bawipa Jesuh naw, “Cun cu nami zum nak a ken su ah kiak ci nei, kei naw akcang ka pyein cu, nangmi ung, anhta ui teih pang zum nak a om ung, shin ah khomhtung cu ‘ng’nawn ä,’ nami ci ung ng’nawn khai nei. Zum nak awn kä nami m’khüt cu a i kä om khai nei. ²¹ (Khoshe cu, taigü nak la ei hlawi nak ah kawn ah a i awn kä nami m’khüt khai nei),” ci ne kiak na gui ci. ²² Bawipa Jesuh la ang düihpüi gui cu Kalile kho ah ami hteh hton zah ung Bawipa Jesuh naw, “Chang ah Htapa cu chang gui ah kut ung ap khai gui. ²³ Ani cu ngawn khai gui, cun ung phi ak hnüüp thum hnüüp ung sih nak ung kaa tho law ba khai,” ci ne m’thein gui ci. Ang düihpüi gui cu ang htei ah cäi ng’ä ci gui. ²⁴ Bawipa Jesuh la ang düihpüi gui cu Kapernaum ah ami gawk law zah ung khawn look ci gui law u netah, Peter-am, “na saza naw pum im ah khawn m’cu ne ang?” ci ne ng’shik ci gui. ²⁵ Peter naw, “"A! Pek ci nei,” ci ne pyein ci. Cun kawn ah Peter cu kyong ah va lut ba khätah Bawipa Jesuh naw, “Simon, nang naw a i ah nei na ngaih, m’dek khan ghanpughang gui naw, ami mät ah kho chang gui-am ang a khawn ami m’cu sak?; a kho hei ah kaa om tuk ciah chang gui-am ang a khawn ami m’cu sak?” ci ne ma ne ng’shik ci. ²⁶ Peter naw, “a kho hei ah kaa om tuk ci gui-am a khawn m’cu sak ci gui nei,” ci ne pyein ci. Bawipa Jesuh naw, “Cun ah kia sei mät ah kho chang gui cu a khawn käm cu ci gui. ²⁷ Cun ung phi ngahmi kä a mi m’lung she vai ah, tuili ah hteit ne nga vam htuih ä. Ngah na pha ung na pha ma ah m’gawng cu m’aan ne na teng vai. A cun ung tangkaa tumat na hmuk khai, cun cu kei la nang ah hmawk ah büh khai kia sei, la ne pum im khawn ah nam cu vai,” ci ne m’cäi ci.

¹ Cun kawn ah ang düihpüi gui cu Bawipa Jesuh ah pei ah hteit u netah, “Khankho uk nak ung ak hlüngtai pibäih cu a u ang?” ci ne ng’shik ci gui. ² Bawipa Jesuh naw ak hmaw hta tumat cu khü ne ama ah m’düih netah, ³ “Kei naw akcang ka pyein cu, nangmi cu ak hmawhta ah mäih ah nami m’lung kä nami m’thawng ung, khankho uk nak ung kä nami gawk khai. ⁴ Shin ah ak hmaw ah mäih ah am lung thawng ne neim sak ciah chang cu khankho uk nak ung ak hlüngtai pibäih ah kiak ci. ⁵ Kei ah ming awn shin ah mäih ah ak hmawhta dou ciah chang cu, kei na dou ciah kiak ci. ⁶ “Kei na zum ciah ak hmaw tumat a zum nak maih khai ah bik ciah chang cu, a gawn ung gawtlung khit ne m’awi netah, tuili thuuk ung shum ung ani ah phäh ah bä tuh ba khai. ⁷ Chang gui ah zum nak dimaih sak ciah amawng ama gui om sei, chang gui ung thüi sei nak om ci. Zum nak dimaih sak ci cu akcang ah om khai, cun ung phi zum nak dimaih sak ciah chang cu ang htei ah thüi sei nak om khai. ⁸ “Na kut naw phi bäi, na kho naw phi bäi na zum nak a dimaih sak ung, a cun ah kut kho cu m’chün ne na ghawh vai, kut kho küm sei m’htei mei ung luh ak dam, kutkho kä küm sei khankho ah kai cu nang ah hmawk ah bä pi ci. ⁹ Na mik ui naw na zum nak a dimaih sak ung cun ah mik cu kawih ne na ghawh vai, mik ui küm sei m’htei mei ung luh akdam, mik ui vangtäng m’dauh sei khankho ah kai cu, nang ah hmawk ah bä pi ci. ¹⁰ “Nangmi naw a u ak hmaw hta phi kä nami zoshe nak vai. Kei naw ka ning m’thein gui cu, ngahmi ah khankho chang gui cu, khankho kapa Khanpughi ah ma ah ang täi sei om ci gui. ¹¹ (Chang ah Htapa cu maih ciah chang gui hun khai ah lawk ci). ¹² “Nangmi naw a i cha ah ang nami ngaih: chang tumat naw htome phia a vuh ung kaa, tumat a maih ung ani naw ko-kip-lei-kaw cu khongnawi khu li hmu ah nawng shüt netah, maih ciah htome cu shui ba ci. ¹³ Maih ciah htome cu shui ne hmu ba netah, kä maih tuk ciah kokip lei-kaw ah mä, maih ciah tumat ah hmawk ah zeikiai pi ci nei, ci cu akcang ah ka pyein ci. ¹⁴ A cun ah mäih ah khankho ah nami Pa naw phi ak hmaw hta tumat lam hma ne adimaih vai cu käng za hlük ci. ¹⁵ Na phäi nau naw a ning kat nak ung, kat nak am dang thei vai ah a om nak ah na hteh vai. Nani mät ng’hmu ni ne na ning lak mah nak cu naning ge nak vai. Na thu ang ngaih ung naning gei ba khai. ¹⁶ Cun ung phi ani naw nang ah thu kä ang ngaih ah a kiak ung, na thu pyein ang düng vai ah cacim ung om ciah mäih ah, saksi tuk khai chang hnih thum na khü tu vai. ¹⁷ Ngami ah thu mä kä ang ngaih ah a kiak ung, amawng ama avan pyein ne pum im ung nami ap vai. Cun ung phi m’cäi kä ang ngaih ah a kiak ung, ak hnu bäih ah Khanpughi kä zum ciah chang khawn look ciah chang ah mäih ah namik bäi vai. ¹⁸ “Kei naw akcang ka pyein cu khomdek khan ung nami khihpawn cu khankho ah khihpawn nak om khai, khomdek khan ung nami chah cu Khankho ah chah nak om khai. ¹⁹ “Kei naw akcang ka pyein cu khomdek khan ung chang hnih hta naw phi zum ne, atäng ah nami taigü ung khankho ah om ciah Kapa naw nami ng’zoih phung cu ning pe gui khai. ²⁰ A i ah kia sei ci ung chang hnih thum hta phi kei ah ming awn ami bum ah a kiak ung ngahmi awn atäng ah kei cu ka om ci,” ci ne m’cäi gui ci. ²¹ Cun kawn ah Peter naw a pei ah law netah, “Bawipa, ka phäi nau naw ana kat nak ung a i chü vei kam gein vai ang?, chih vei m’gein vai ang!” ci ne ng’shik ci. ²² Bawipa Jesuh naw, “Chih vei bäng m’gein vai ah kä kiak ci, chih-kip chih vei m’gein vai ah kiak ci. ²³ A i ah kia sei ci ung khankho uk nak cu shin awn täng ci; Kho hnüüp ät ung ghangpughang tumat cu ak chang shäm gui täih kiang gui khai k’bäi ci. ²⁴ Ani naw tün ne k’tä gui netah ngui tämkäp phiaa khak a pu om ciah chang cu khü sak gui ci. ²⁵ Ani naw a pu cu kä thung hlawt khätah, amät la ak chu a hta ni, a khawh cham ni avan cu zoi ne a thung vai ah ghangpughang naw k’bäi ci. ²⁶ Cun ah kia khätah cun ah chang cu ghangpughang ah ma ah m’khukdong ne kawp netah, ‘Kei ah khan ah na ngaih peä, ka pu cu avan ka thung hlawt vai ah ka tha nak khai nei,’ ci ne ng’hui paa nak ci. ²⁷ Ghangpughang naw ani cu m’gein netah, a pu avan nawng pe ne amät phi phiawn ci. ²⁸ “Cun ung phi ani cu phiawng ne a hteh ba kawn ah, lam ah ngui api ak pu tu ah ak changshäm paw cu hmu ne, a gawn ung pha ne k’pang netah, ‘Ka ngui na pu tu cu a tuhbäi na thung law ba ä,’ ci ne k’ceet ci. ²⁹ Cun ah chang cu m’khuukdong netah, ‘Kei ah khan ah na ngaih peä,’ ka pu avan ka ning thung khai nei,” ci ne ng’hui paa nak ci. ³⁰ Cun ung phi ani naw kä ngaih pe ne, a pu avan kä a thung pha ah chuih a kium vai ah thawng ung chum ci. ³¹ Cun gui cu ami changshäm a paw gui naw hmu ng’za u netah, ang htei ah m’lung she ci gui. Cun ah kia sei ghangpughang ah hteit u ne a mawng avan cu m’thein ba ci gui. ³² Cun kawn ah ghangpughang naw cun ah changshäm cu khü netah,’ nang chang shekha, nang naw kei nang paa nak ci sei, na na thung vai om ciah na pu avan cu ning nawng pe ne, ka ning k’phiawn ci. ³³ Kei naw nang ka ning m’gein ah mäih ah na chang paw kä nam gein tu ba ci ma? ci ne, ³⁴ ghangpughang cu m’lung she netah, cun ah chang cu a pu kä a thung zawp pha ah chuih kium khai ah thawng ung chum ci. ³⁵ Cun ah kia sei nangmi cu phäi nau gui nami mät, tumat ah kat nak cu tumat naw, akcang ah kä nam m’gein tu ah a kiak ung, khankho ah kapa naw nami kat nak cu kä ning m’gein gui khai nei,” ci ne m’cäi gui ci.

¹ Bawipa Jesuh cu cun ah thu a pyein zawp kawn ah Kalile kho ung kaa naw, Jordan tuinu ah vang gaa Judea kho ah hteit ci. ² Chang gui akda naw ahnu ah läk law u sei, gawpai ci gui cu gai sak gui ci. ³ Pharisee gui cu a pei ah law u netah, ami phawtcam nak ah, “Chang tumat cu a i ah a mawng awn phi bäi, ak chu awn ng’chaa hning ci goi ang?” ci ne ng’shik ci gui. ⁴ Bawipa Jesuh naw, “Ak htük ge ung Pushipi naw pami la hnumi cu tüi piang goi ci. ⁵ Cun ah kia sei Khanpughi ah thu pyein cu, ‘Shin ah a mawng ung pami naw anu apa cu nawng shüt ne ak chu awn ng’puikhap ci goi, ngah ni cu sisa tumat ah kia ci goi. ⁶ Cun ah kia sei ngahni cu hnih ah kä kia ba ci, tumat ah kiak ci. Khanpughi naw ang puikhah sak cu chang naw kä am chaa-en vai nei’ ci ah cacim cu kä nami phat man ne ma?” ci ne kiak na gui ci. ⁷ Pharisee gui naw, “Cun ah a kiak ung a i ah kia sei, ‘Chang naw ak chu cu ca pe ne m’cha hning ci,’ ciah Mose naw thukhän abi ang?” ci ne ng’shik ci gui. ⁸ Bawipa Jesuh naw, “Nangmi cu pyein kä nami ng’zak ciah chang gui ah kia uk ci sei, Mose naw nami chu awn nami ng’chaa hning ciah a pyein ah kiak ci, cun ung phi ng’tüi law htük zah ung cun ah kä kia man te ci. ⁹ Kei naw akcang ka pyein cu, pami naw ak chu cu, ak pami hei awn ani shetkat nak kä a om ah khawi ung, a i kat nak a om ung phi kä ang chaa-en püi vai, ak chu ng’chaa püi ne, a hei chu na tu ba ci cu, ak chu ah khan ah kat nak bik ciah kiak ci,” ci ne m’thein gui ci. ¹⁰ Ang düihpüi gui naw, “Chungla goi ah ng’lak cun ah a kiak läi ung käng chula ne om ung bä tu ba khai,” ci ne pyein ci gui. ¹¹ Bawipa Jesuh naw, “Chang päng kä chu cei mah ah om hlawt ciah kä kiak ci, Khanpughi naw a om sak ah chang vah om hlawt ci. ¹² Chang gui kä ami chu cei mah hlawt ah mawng akda om ci; am shah gui cu aming tüi püi ge ah kä chu cei mah hlawt ci gui, am shah gui cu chang naw plawh gui sei kä chu cei mah hlawt ci gui, am shah gui cu Khanpughi ah kho ah hmawk ah kä chu cei mah ci gui, kä chu cei mah ah om hlawt ci cu a cun ah om sä,” ci ne kiak na gui ci. ¹³ Chang gui am shah naw akhmaw hta gui cu Bawipa Jesuh naw ami khan ah akut taih ne, hrilham apeit gui vai ah, a pei ah law püi ci gui. Cun ung phi ang düihpüi gui naw, ma na gui ci gui. ¹⁴ Bawipa Jesuh naw, “Akhmaw hta gui cu kei ah law u sä, kä ma na gui vä, khankho uk nak cu shin ah mäih ah akhmaw hta gui ah kho ah kiak ci nei,” ci ne kiak na gui ci. ¹⁵ Bawipa Jesuh naw akhmaw hta gui cu ami khan ah akut taih ne, hrilham pe gui netah, a hei lam ah hteit ba ci. ¹⁶ Kho hnüüp ät ung chang tumat cu Bawipa Jesuh ah law netah, “Sazapa, ang täi ghin nak gah vai ah nik ciah bi a i nei ka bi kaw?” ci ne ng’shik ci. ¹⁷ Bawipa Jesuh naw, “Nang naw nik ciah bi ah mawng a i ah kia sei kei na nang shi ang? Chang ni tumat bäng nei om ci, Nang cu ang täi ghin nak na gah hlü ung thukhän cu na läk vai,” ci ne kiak nak ci. ¹⁸ A cun ah chang naw, “a i thukhän gui ang?” ci ne ng’shi ba khätah, Bawipa Jesuh naw, “Chang kä na ngawn vai, chang ah chu hta kä na kat püi vai, kä nam guuk vai, käng düng ciah kä na saksi vai; ¹⁹ Na nupa cu nak chang m’sui vai, nak chang paw cu na mät awn m’täng ne nam hni vai,” ci ne kiak nak ci. ²⁰ Cun ah changnong naw, “Shin ah thukhän gui cu kei naw ka hmaw zah ung tün ne ka läk ci nei, cun kawn ah kei naw ka bi ba vai a i ang a hlü ba kaw,” ci ne ng’shi ba ci. ²¹ Bawipa Jesuh naw, “Nang cu kümbe ciah chang ah na kiak hlü ung, hteit ba ne na khawhcham avan cu zoi netah, dukhaih ci gui-am na ngui avan cu na peit gui vai. Cun ah na bi ung nang cu khankho ah bühmang nak na hmuk khai, cun kawn ah ka hnu ah na na läk vai,” ci ne kiak nak ci. ²² Cun ah chang cu ang htei ah bühmang ci kia ne, Bawipa Jesuh naw cun ah a pyein cu ng’za netah, kä zei nüng ne hteit ba ci. ²³ Bawipa Jesuh naw ang düihpüi gui-am, “Kei naw akcang ka pyein cu, bühmang ciah chang gui cu Khanpughi ah uk nak kho ah ami gawk vai kä zäi ci. ²⁴ Kei naw ka pyein ba mä cu bühmang ciah chang Khanpughi ah uk nak kho ah a gawk vai ah tah, ng’pyüm mik ung seikong a luh vaé cu zäi tu ba khai,” ci ne kiak na gui ci. ²⁵ Ang düihpüi gui naw Bawipa Jesuh ah thu ami ng’zak cu ang htei ah ngaih tüh khit u netah, “Cun ah a kiak ung a u chang naw hunnak cu gah hlawt khai ang?” ci ne ng’shik ci gui. ²⁶ Bawipa Jesuh naw ngahmi cu kheing ne teng gui netah, “chang naw a i phi käm khüt näng ci, cun ung phi Khanpughi naw a päng avan m’khüt näng ci,” ci ne m’thein gui ci. ²⁷ Cun kawn ah Peter naw, “Keimi naw a päng avan nawng shüt ne na hnu ah kami ning läk ci, keimi a i kami gah khai ang?” ci ne ng’shik ci. ²⁸ Bawipa Jesuh naw, “Kei naw akcang ka pyein cu, kho akthai a gawk law hnüüp ung chang ah Htapa cu, bämang nak awn kümbe ciah mang ah kiang ung ngok khai, Cun zaè ung kei ah kang düihpüi ah nami kiak ciah nangmi cu, mang ah kiang gha-lei-goi ung ngoh u ne, Israel pakhui gha-lei-goi cu nami uk khai. ²⁹ Cun kawn ah phi kei ah hmawk ah a im, am dek, anu apa, a phäi a nau, akchu ahta, tumat mat nawng shüt ciah chang cu, a nawng shüt ah khan ah a phiaa ah däm pi sei gah ba khai, ang täi ghin nak phi gah khai. ³⁰ Cun ung phi maa ciah chang gui cu hnu lawk khai gui, hnu ciah chang gui cu maa lawk khai gui nei.

¹ “Khankho uk nak cu shin ah mäih ah kiak ci. Kho hnüüp ät ung sapyit lo tak ciah chang tumat cu lo bi ah ng’ghüh khai ah kho ngawi hta ah hteit ngawi ci. ² Ghüh ah ng’cheng man ah hnüüp ät ung tangka aphe ci awn cheng gui vai ah ghüh gui ne lo ah tüi gui ci. ³ Ani cu khoplang taai,nazi kaw ung sumlei hmun ah hteit netah, a i kä bi ah düi shüi ciah chang gui cu hmu gui ci. ⁴ Cun gui-am, ‘sapyit lo ah hteit ne bi bi tu vä, akhin vai ah ka ning cheng gui khai nei,’ cik ci. ⁵ Cun ah chang gui cun phi hteit ne bi tuk ci gui. Ani cu kho hnüüp lung ung phi bäi, kho k’awi lam ah phi bäi, a cun ah sumlei hmun ah hteit ne ng’ghüh ci. ⁶ Mühun k’awi nazi hma ung hteit ne ng’ghüh ba sei phi cun ah chang gui cu anang düi ba u sei hmu gui netah, ‘Nangmi a i ah kia sei a i kä bi ah mü ne nami om ang?’ ci ne ng’shi gui ci. ⁷ Ngahmi naw, ‘A u naw kä na ghüh gui sei nei,’ ci ne kiak ci gui. Cun kawn ah lo mah naw, ‘ka sapyit lo ah hteit ne bi tu vä,’ ci ne kiak na gui ci. ⁸ Kho mühun law khätah lo mah naw ak chang vai cu khü netah, ‘aghüh gui cu khü gui netah, ak hnu ah bi law tuk ci ung tün ne, bi law ma ci gui ung khüt khai ah ng’cheng cu pe gui ä’ ci ne m’cäi ci. ⁹ Cun ah ak chang vai naw mühun nazi hma ung bi law tuk ci gui ah ghüh gui-am tangka aphe ci pe gui ci. ¹⁰ Ak htük bäih ah bi lawk ci gui ah ghüh gui ah khin gawk law khätah, nangmi cu a hmün gui ah däm pi sei gah khai gui ah ngai ci gui. ¹¹ Cun ung phi, ngami phi tangka aphe ci bä gah tuk ci gui. ¹² Cun ah kia khätah ami ghüh gui naw, shin ah chang gui cu nazi ät ashäng hta vah bi bi tuk ci gui, keimi mü ne khohni ling ung kami bik ci. Cun ung phi nang naw ngami awn atäng düt ah na na cheng gui ci nei,’ ci ne lo mah ah pyein ba ci gui. ¹³ Lo mah naw a ghüh gui ung kaa tumat-am, ‘teihpüi aw, kei naw nang ka ning she nak ah kä kiak ci, hnüüp ät ung tangka aphe ah ng’cheng vai ah na zum cite can ah maw. ¹⁴ Nang cheng cu dou ne hteit baä. Ak hnu ah ka ghüh gui cun phi nang awn täng ne kak cheng gui hlük ci nei. ¹⁵ Ka mät ah ngui cu ka mät ah m’hni ah kä ka mang vai maa! Kei ah kang khai-lang ah phäh ah nam thüi ci maa!’ ci ne kiak nak ci,” ci ne m’cäi gui ci. ¹⁶ Cun kawn ah Bawipa Jesuh naw, “Cun ah kia sei hnu lawk ciah chang gui cu ma u ne, ma ciah chang gui cu hnu khai gui nei,” ci ne kiak na gui ci. ¹⁷ Bawipa Jesuh naw Jerusalem ah a hteh nak lam ah, ang düihpüi gui cu ami mät bäng ng’gui püi gui netah, ¹⁸ “Ngai vä, mik mi cu Jerusalem ah mi hteit lawk ci, a cun ah mang gaw ung chang ah Htapa cu, taigüpa gui la thukhän saza gui ah kutung ap khai gui nei. ¹⁹ Ngami naw ani cu ngawn vai ah k’bäi u netah chang pakhui hei gui-am ap khai gui. Chang pakhui hei gui naw ani cu päipih u ne, htung awn that u netah, kutlam tung ung tai ne ngawn khai gui nei. Cun ung phi chang ah Htapa cu ak hnüüp thum hnüüp ung sih nak ung kaa tho ba khai nei,” ci ne pyein ci. ²⁰ Cun kawn ah Zebedee ah chu cu ahta hnih ng’khah püi ne law ne, Bawipa Jesuh ah ma ah khuukdong netah ng’huipaa khai ah kawp ci. ²¹ Bawipa Jesuh naw, “a i nang za hlük ci ang?” ci ne ng’shi khätah; Cun ah hnumi naw, “Nang Bawipa Ghangpughang ah na kiak law ung shin ah ka hta goi cu, nak eng lam lah nak pat lam ah ngoh sak goi ä,” ci ne ng’huipaa ne pyein ci. ²² Bawipa Jesuh naw, “Nangmi a i nami ng’zoih ah nami mät naw kä nami hmat ci, Kei ah awk nak zaica nak ah khap cu, nami aw tu hlawt khai ang?” ci ne ahta goi cu ng’shi goi ci. Ngani naw, “Kani aw tu hlawt khai nei,” cik ci goi. ²³ Bawipa Jesuh naw, “Nangni cu kei ah khap ung akcang ah nani awk khai, cun ung phi kei ah k’eng la k’pat ah nani ngoh vai cu, kei naw kä ka ning pe goi hning ci, cun ah ngoh nak gui vai cu Kapa naw a pian gui ah chang gui ah hmawk ah kiak ci,” ci ne kiak nagoi ci. ²⁴ Cun ah a mawng gui cu ang düihpüi gui chang ghaa naw ng’za u netah, cun ah phäi nau goi ah khan ah m’lung k’she ci gui. ²⁵ Bawipa Jesuh naw, ang düihpüi gui ami van khü gui netah, “Ghangpughang gui cu chang gui ah khan ah ami hlüngtai nak ang dang ah mawng la chang vai gui cu ami chang gui ah khan ah khüt näng nak abe ah mawng cu, nami hmat pyi ci. ²⁶ Nangmi läi ung cun ah mäih kä a om-en vai nei. Nangmi ung kaa ng’vai pibäih ciah chang cu nami chang shäm ah kiak khai. ²⁷ Ak hlüngtai pi ah kia hlük ciah chang cu nangmi ah chang shäm ah kiak khai. ²⁸ Chang ah Htapa cu chang ah m’htei vai ah lawk ciah kä kiak ci, chang m’htei khai la, a hnun gui pe ne chang avan hun phiawn khai ah lawk ciah kiak ci, nangmi cu a cun ah mäih ah nami kiak vai,” ci ne m’cäi gui ci. ²⁹ Bawipa Jesuh la ang düihpüi gui cu Jericho ah kaa ami ng’düih law ba ung chang khli naw läk law gui ci. ³⁰ Bawipa Jesuh a law cu lam pei ah ngok ciah a mik m’dauh goi naw ng’za ni netah “Bawipa, David ah htapa, Keini nam gein goi ä,” ci ne m’lau ci goi. ³¹ Chang gui naw adüm ah ani om vai ah k’she na goi ci gui.Cun ung phi ngami naw, “Bawipa, David ah htapa, keini cu nam gein goi ä,” ci ne m’lau law pi ci goi. ³² Bawipa Jesuh naw, ng’düi ne cun ah chang goi cu a pei ah khü goi netah, “A i ka ning bi peit goi vai ang, nani ng’zak hlü,” ci ne ng’shi goi ci. ³³ Ngani naw, “Bawipa, Kani mik na nam dei sak goi vai, kani ng’za hlük ci nei,” ci ne pyein ci goi. ³⁴ Bawipa Jesuh naw, ngani cu m’gein goi netah, ani mik cu akut awn tawk goi ci. Ngani cu a cun vai-am ani mik m’dei law sei, Bawipa Jesuh ah hnu ah läk tuk ci goi.

¹ Bawipa Jesuh la ang düihpüi gui cu Jerusalem k’et lawk ciah Olives khomhtung pei Bethphage gawnu ah gawk law ci gui. Bawipa Jesuh naw ang düihpüi hnih cu khü goi netah, ² “mi hei ma ah om ciah pigaw ah ma ne na ni na hteh vai, a cu ah ng’se hta awn atäng ah ami pawn ah ng’senu cu na ni hmuk khai. Gui k’phian ne cun ah ng’se goi cu na ni law püi vai. ³ Chang tumat mat naw, ‘a i vai na ni k’phian ang? a ci ung, ‘Bawipa naw ng’za hlük ci nei,’ ci ne na ni pyein vai, cun ung ani naw ng’se cu nani law püi vai ah pyein khai nei,” ci ne m’cäi ne tüi goi ci. ⁴ Shin ah a mawng gui cu profet ah thu pyein abä nak ah kia ci. Cun ah thu cu; ⁵ “Zion mang gaw-am thu nami m’thein vai cu, ‘Teng tu vä, nami ghangpughang cu nami om nak ah gawk law ci nei! Ani cu hniphnoi ng’awi gi ne, Phuih näng ciah ahta ng’sehta ung cum ci nei,” ciah kia ci. ⁶ Ang düihpüi goi cu ana ma ni ne Bawipa Jesuh ah am cäi goi ah mäih ah bik ci goi. ⁷ Ngani naw ng’se ang nuhta cu law püi ni ne, ani zih sui gui cu ak khan ah taih lawk ci goi. ⁸ Bawipa Jesuh cu cun ah ng’se ung cum ci. Chang akda naw ami zih sui gui cu lam ung ana phah ci gui, chang am shah naw sing hnah gui shui ne lam ung phah ci gui. ⁹ Bawipa Jesuh ah ahnu ama ung ana dou law ne läk lawk ciah chang gui cu, “David ah Htapa cu m’hlüngtai vä! Bawipa ang ming awn kyum lawk ci cu Khanpughi naw zeikiai nak pe sä! Khanpughi cu m’hlüngtai vä,” ci ne m’lau ci gui. ¹⁰ Jerusalem gawnu kyong ah Bawipa Jesuh gawk law khätah, agawnu pum chang gui cu thüngkyüng zawp ci gui. Cun ah kia khätah chang gui naw, “Shin ah chang cu a u ang?” ci ne ng’shi tuk ci gui. ¹¹ Chang khli gui naw, “Shin ah chang cu Kalile kho, Nazaret gawnu ah kaa profet Jesuh nei” ci ne ng’shäu ci gui. ¹² Bawipa Jesuh naw pum im kyong ah hteit netah, pum im kyong ah sumlei ci gui cu k’täm gui ci. Ngui m’thawng ci gui ah tawnglan la mümkha zoi ci gui ah m’küm gui cu gäi ne lat zawp ci. ¹³ Cun kawn ah Bawipa Jesuh naw, “Cacim ung Khanpughi naw, ‘Ka pum im cu taigü nak ah im ah kia ci nei,’ cik ci. Cun ung phi nangmi naw m’guk ei ah ng’thuh nak ah nami piang ci nei,” ci ne kiak na gui ci. ¹⁴ Pum im ah amik m’dauh gui la akho shum gui law u sei, Bawipa Jesuh naw gai sak gui ci. ¹⁵ Taigüpa gui la thukhän saza gui cu cäicat vai kiak ciah Bawipa Jesuh ah bi lawh gui cu hmu u ne, pum im kyong ah akhmaw gui naw, “David ah Htapa cu m’hlüngtai vä,” ci ne a ming shäu cu zak u netah, ang htei ah m’lungshe ci gui. ¹⁶ Ngami naw Bawipa Jesuh-am “akhmaw gui a i ci ne ami m’lau cu nang zak ci ang?” ci ne ng’shik ci gui. Bawipa Jesuh naw,“Akcang ah kang zak ci nei. Cacim ung, ‘Bawipa naw, htahmaw gui la nau hmaw gui cu ami m’hlüngtai thei vai ah Theithang gui ci nei,’ ciah om ci cu, Kä nami phat man ci ma?” ci ne kiak na gui ci. ¹⁷ Cun kawn ah Bawipa Jesuh cu cun ah gawnu ung kaa naw, hteit ba ne Bethani ah mü ip ci. ¹⁸ Kho ngawihta ah mang gawnu ah ami hteh ba lam ah Bawipa Jesuh cu ei cawi lawk ci. ¹⁹ Lam pei ah baangghing tumat om sei apei ah hteit ne teng ci. Cun ah baangghing cu käm theih ah ahnah gui bäng om ci. BawipaJesuh naw cun ah baangghing cu tawk ne, “Nang cu a ngawi ah phi kä nam theih khai,” ci ne taam khätah, a cun vai-am cun baangghing cu ng’zai ne chawng ci. ²⁰ A cun cu ang düihpüi gui naw hmu u ne, ang htei ah cäicat u netah, “Shin ah baangging cu a i hawkcha, a cun vai-am ng’zai ne ak chawng ang?” ci ne ng’shik ci gui. ²¹ Bawipa Jesuh naw, “Kei naw akcang ka pyein cu, nangmi cu ngaih hnga nak kä om ciah zum nak a om ung baangghing ung kei ah bi ah mäih ah nami bi tu hning khai. Cun bäng ah kä kiak ciah shin ah m’htung cu ‘shin ung kaa ng’nawn ne tui ung lut ä,’ nami ci ung nami pyein ah mäih ah kiak khai nei. ²² Nangmi naw zum nak awn nami zoih ung nami zoih phung cu nami gah khai nei” ci ne pyein ci. ²³ Bawipa Jesuh naw pum im ah law ba ne am theithang gui zah ung taigüpa gui la ang vai gui cu Bawipa Jesuh ah pei ah law u netah, “Nang naw shin gui cu a i m’khüt näng nak awn na bi ang? Cun ah m’khüt näng nak cu a u naw a ning peit ang?” ci ne ng’shik ci gui. ²⁴ Bawipa Jesuh naw, “Kei naw tumat ka ning shi gui khai, Cun cu nami m’hlan ba hning ah a kiak ung shin ah a mawng gui cu, a i m’khüt näng nak awn ka bi ah ka ning m’thein gui khai. ²⁵ Zohan naw tuihnim nak a peit cu, Khanpughi ah peit ah m’khüt näng nak awn ang a peit, chang ah peit ah m’khüt näng nak awn ang a peit?” ci ne ng’shi gui ci. Ngami naw, “Khanpughi ah peit ah m’khüt näng nak awn pek ci mi ci ah a kiak ung, Zohan a i ah kia sei kä nami zum ang’ci ne nang shi ba gui khai, ²⁶ Chang ah peit ah m’khüt näng nak awn pek ci mi ci ah a kiak ung chang gui naw Zohan cu profet tumat ah zum ci gui kia ne, cun ah chang gui cu kyih gui vai kiak ci,” ci ne ami mät ng’cecäk ci gui. ²⁷ Cun ah kia sei ngami naw, “Kä kami hmat ci nei,” ci ne m’hlan ba ci gui. Cun kawn ah Bawipa Jesuh naw, “Kei naw kabi ah mawng gui phi a i m’khüt näng nak awn kabi ah kä ka ning m’thein gui khai,” ci ne kiak na gui ci. ²⁸ Cun kawn ah Bawipa Jesuh naw, “Nangmi naw a i hawkcha ah nami ngai ci ang? Chang tumat ung ahtapa pahnih om ci. Ani cu ahta ng’vai ba ah hteit netah, ‘Ka hta tuhngawi sapyit lo ah hteit ne bi na bi vai,’ ci nak ci. ²⁹ Ahta ng’vaipi naw, ‘Kä ka hteit khai,’ cik ci. Cun ung phi a hngeng ah am lung thawng ba netah hteit ne bik ci. ³⁰ Ani pa cu ahta hmawpi ah mä hteit ne a cun ah mäih ah pyein ci. Ahta hmawpi naw, ‘Ka hteit khai nei, pa oi,’ cik ci. ³¹ Cun ung phi kä hteh ah om ci. Cun ah chang goi ung kaa a u naw ang apa ah beit ng’zak ciah a kiak kaw!” ci ne ng’shi gui ci. Ngami naw, “Hta vaipi naw beit zak ci nei,” cik ci gui. Bawipa Jesuh naw, “Kei naw akcang ka pyein cu, khawn look ci gui la chang hlawhlang gui cu, nangmi ah mä ma pi ne, Khanpughi ah uk nak kho ah gawk khai gui nei. ³² Zohan naw nangmi ah law ne lam düng cu ning m’shüm gui sei phi, nangmi naw kä nami zum ci. Cun ung phi khawn look ci gui la chang hlawhlang gui naw zum ci gui nei. Shin ah amawng ama gui nami hmuhmat kawn ah phi, nangmi cu nami m’lung thawng ne Zohan cu kä nami zum hlawt ci. ³³ “A hei tumtäng nak tumat cu ngai vä, sapyit akda geit ciah khomdek mah tumat om ci. Ani cu lo avan ng’vong ne sapyit neen nak vai khui phi shawk ci, shaam tumat phi co ci. Cun kawn ah a sapyit lo cu chang gui-am ak phlam a ei vai ah m’kai ne khah gui netah, a kho hei ah hteit ci. ³⁴ Sapyit khäm vai akhin gawk law sei, ak chang shäm gui cu lo ng’vat ci gui ah tüi gui ne, a gah vai ah ak phlam cu lak sak gui ci. ³⁵ Lo ng’vat ci gui naw ak chang shäm a tüih gui cu pha u netah am shah cu that ne, am shah cu ngawn ne, am shah cu lung awn vawi ne cik ci gui. ³⁶ Cun kawn ah lo mah naw chang akda pi tüi ba gui sei, cun gui cun phi a cun bä ah ci ba ci gui. ³⁷ Cun kawn ah ani naw, ‘Ka mät ah hta läi cu kyih aa khai gui,’ ci ne ngai netah a mät ah hta cu tüi ne k’phlam cu soh sak gui ci. ³⁸ Cun ung phi ngami naw lo maè ah hta cu hmu law u netah, ‘shin ah chang cu lo mah ah pakhui m’düng khai ah chang ah kiak ci, lawvä, ani cu mi ngawn u ne, ak chaw vai a khawh cham avan mi lak khai nei,’ ci ne ng’ge u netah, ³⁹ A hta cu pha u netah lo ng’naw ah hteh püi ne ngawn ci gui. ⁴⁰ Cun ah a kiak ung lo mah a law ung lo ng’vat ne bik ci gui cu, a i ah ci gui khai ang,” ci ne ng’shi gui ci. ⁴¹ Ngami naw, “Lo mah naw cun ah chang she gui cu ngawn ne ghawt gui khai nei. Lo cun phi sapyit khäm khin ung akcang ah phlam sook khai ah ahei gui-am bi sak gui khai nei,” ci ne pyein ci gui. ⁴² Bawipa Jesuh naw, “Shin ah cacim cu kä nami phat tu man ci kia ne maa? “Lung im co ci gui naw ghü ne ami ghäih ah lung cu, Ak tung pibäih ung düi ciah lung ah kia lawk ci. Cun cu Bawipa ah bi ah kia ne, ang htei ah cäicat vai ah kia ci. ⁴³ “Cun ah kia sei kei naw akcang ka pyein cu, Khanpughi ah uk nak kho cu nangmi ung kaa la ba ne, düng nak awn vuipai khai ah chang gui-am pe gui khai. ⁴⁴ (Cun ah lung ah khan ah kia lawk ciah chang cu hngetbät khai, ak khan ah cun ah lung naw a kiak ah chang cun phi deng ne khui khai)” ci ne kiak na gui ci. ⁴⁵ Bawipa Jesuh naw, cun na m’tumtäng nak am thein gui cu taigüpa gui la pharisee gui naw, ng’za u netah, ngami k’ü nak gui ah a pyein ah hmat ci gui. ⁴⁶ Cun ah kia sei ngami naw Bawipa Jesuh cu phaa vai ah k’tha nak ci gui. Cun ung phi ngami naw, “Bawipa Jesuh cu profet nei,’ ci ne zum ciah chang gui cu kyih gui ci gui.

¹ Bawipa Jesuh naw ahei tumat awn m’tumtäng ne am cäi ba gui cu, ² “Khanpughi ah uk nak kho cu shin ah mäih ah kia ci. Hngü ät ung ghangpughang tumat cu, ahta ah chu la ne m’um khai ah pawng hteim ci. ³ Ani naw ak chang shäm gui tüi gui ne, akhü tu ah chang gui cu khü sak gui ci. Cun ung phi a u kä law hlü khätah, ⁴ ghangpughang naw ak chang shäm gui tüi ba mä gui ne,’ mü ei ei vai kia lawk ci nei, sei gui phi ngawn pyi nei, ei awk ghet vai kiak ci kia sei, hta m’um nak ah law tuh hlah vä,” ci ne ng’khü sak gui ci. ⁵ Cun ung phi ami khü gui ah chang gui cu, khü lawk ciah chang gui a i ah kä tä ne, tumat cu lo ah hteit ci. ⁶ Ahei tumat cu sumlei khai ah hteit ci, am shah gui naw khü lawk ciah chang gui cu pha ne tuthat ci gui. ⁷ Ghangpughang cu ang htei ah m’lung she netah, gakap gui cu tüi gui ne, cun ah chang gui cu ngawn sak gui ne, ami pigaw phi mei awn m’khih gui ci. ⁸ Cun awn ah ak chang shäm gui khü ba gui netah, ‘Hta m’um nak ei awk vai cu küm pyi te ci, cun ung phi khü ah chang gui cu kä khinkha ci gui ah kiak ci. ⁹ Cun ah kia sei lam tung ung hteit ne, nami hmuh ah chang phung nami khü law vai nei’ ci ne m’cäi gui ci. ¹⁰ Chang shäm gui cu lam tung ung hteit u ne, ami hmuh phung chang ni chang she avan khü lawk ci gui. Cun ah kia sei hta m’um nak ah im ung khin gui be ci gui. ¹¹ “Ghangpughang cu khin gui teng gui khai ah law netah, hta m’um nak ung sui vai ah sui kä sui tuk ciah chang tumat cu hmuk ci. Ghangpughang naw, ‘Teihpüi aw, a i ah kia sei, htam um sui sui ne kä ng’bilawh ah na law tu ang?’ ci ne ng’shik ci. ¹² “Cun ah chang cu a i ah phi käng thu tu ba thei netah om düt ci. ¹³ Cun kawn ah ghangpughang naw, ak chang shäm gui-am, ‘shin ah chang cu akut kho pin ne khit netah, ak pung ah hmüp khui ah m’shän vä, a cu ah ani cu kyap ne m’lau ne, aha htui ne om sä’ ci ne kiak na gui ci,” ci ne pyein ci. ¹⁴ Cun kawn ah Bawipa Jesuh naw, “Khü ah chang gui läi da ci gui te, ghü ah chang gui cu ken ci gui nei,” ci ne kiak na gui ci. ¹⁵ Cun kawn ah pharisee gui cu hteit ba u netah, ani cu a i i ah thuvi ne ng’shi vai ang’ ci ne ng’gepai ci gui. ¹⁶ Ngami naw a ming khah püi gui la Herod ah pati chang gui cu, tüi gui u netah, Bawipa, nang naw akcang pyein ne chang ah hmawk ah Khanpughi ah ng’zak hlü cu nam theithang ci, chang gui ah m’lung ngaih cu kä nam tung ci, chang ah hmai phi kä na teng ci. ¹⁷ Cun ah kia sei nang naw a i ah na ngaih cu nam thein gui ä, ‘ghangpughang-am khon look ne peit vai ang, kä peit vai ang?” ci ne ng’shik ci gui. ¹⁸ Cun ung phi Bawipa Jesuh naw ngami ah shekat ciah ami ngaihtüh cu hmat netah, “Thuvi chang gui, a i ah kia sei nangmi naw thuvi ne nami nang shi ang? ¹⁹ Khon nami loh vai ah tangka tumat cä nam hnuh law vä,” cik ci. Cun ah kia sei ngami naw tangka tumat law püi u khätah, ²⁰ Bawipa Jesuh naw, “Shin cu u ah müi, a u ah ming ang,” ci ne ng’shi gui ci. ²¹ Ngami naw, “Ghangpughang ah müi, ghangpughang ah ming nei,” cik ci gui. Cun kawn ah Bawipa Jesuh naw, “Ghangpughang ah kaa cu ghangpughang-am ap ba vä, Khanpughi ah kaa cu Khanpughi-am ap ba vä,” ci ne kiak na gui ci. ²² Ngami cu cun ah a pyein ng’za u netah, ang htei ah cäcat ci gui. Cun kawn ah a hei lam ah hteit ba ci gui. ²³ A cu hnüüp ung Sadducee gui cu Bawipa Jesuh ah gawk lawk ci gui. Ngami cu ‘Sihnak ung kaa thawh banak kä om ci,’ ciah zum ci gui ah kiak ci. ²⁴ Ngami naw, “Bawipa, chang tumat cu kä hta pha ne asih ah a kiak ung, ani ah chu hmei cu anau naw khäm tu ba sä, ani hta law ung cun ah akhmaw naw, a phäi ah kyong khui cu m’htei khai,’ ci ne Moses naw pyein ci. ²⁵ Keimi ung phäi nau gui singchih om ci gui. Ami phäi ang vaipi cu chumah thai ne sik ci. Kä hta phak ci kia sei akchu cu anau naw khäm tu ba ci. ²⁶ Ak pahnih nak anau, ak thum nak anau la anau gui ami van cu, a cun ah hnumi chu na tuba bäng bäng u netah, a u phi kä hta ne si zawp ci gui. ²⁷ Ak hnu ah cun ah hnumi phi sik ci. ²⁸ Cun ah kia sei sih nak ung kaa thawh ba nak kho hnüüp ung, cun ah hnumi cu a phäi nau gui chih ung kaa a u ah chu ah kiak khai ang?’ ci ne ng’shik ci gui. ²⁹ Bawipa Jesuh naw, “Nangmi cu cacim phi kä nami hmat ci, Khanpughi ah hlüngtai nak phi kä nami hmat ci, cun ah kia sei nami m’lung ngaih cu ng’lat ci. ³⁰ Chang gui cu sih nak ung kaa ami thawh law ba ung chungla nak kä om ba khai. Ngami cu khankho chang gui ah mäih ah kiak khai gui. ³¹ Sih nak ung kaa thawh nak ba vai ah mawng Khanpughi ah thu cu kä nami phat man ne maa? ³² Khanpughi naw, ‘Kei cu Abraham ah Khanpughi, Issak ah Khanpughi, Jakop ah Khanpughi ah ka kiak ci nei. Ani cu aksi gui ah Khanpughi ah kä kiak ci, ghing ci gui ah Khanpughi ah kiak ci,” ci ne m’thein gui ci. ³³ Cun ah am theithang cu chang gui naw ng’za u netah, ang htei ah cäicat ci gui. ³⁴ Sadducee gui naw kä ami m’hlan tuba hlawt vai ah Bawipa Jesuh ah thu pyein cu, pharisee gui naw ng’za u netah, a pei ah ng’bum lawk ci gui. ³⁵ Ngami ung kaa thukhän saza tumat naw, thuvi ne ngaihtüh netah; ³⁶ Bawipa ah thukhän gui ung, a i thukhän ang a hlüngtai pi,’ ci ne ng’shik ci. ³⁷ Bawipa Jesuh naw, “Na Bawipa Nak Khanpughi cu, nam lung kiong avan, na ngaihtüh avan La na hmuhmat nak avan nawn nam hni vai. ³⁸ Shin cu ak hlüngtai pibäih la ak küikyang pibäih ah thukhän ah kiak ci. ³⁹ Ak hnih nak ah ak hlüngtai pibäih la ak küikyang pi bäih ah thukhän cu, ‘Nak chang paw cu na mät awn m’täng ne nam hni vai,’ ciah thukhän ah kiak ci. ⁴⁰ Shin ah thukhän goi cu Moses ah thukhän avan la profet gui ah m’theithang nak avan khäm ciah kiak ci. ⁴¹ Pharisee gui ng’htawi law u khätah Bawipa Jesuh naw, “Messiah ah mawng cu a i ah ang nami ngaih? ani cu a u ah ng’shon ung kaa ah kiak khai ang?” ci ne ng’shi gui ci. Ngami naw, “David ah ng’shon ah kiak khai nei,” ci u khätah, ⁴³ Bawipa Jesuh naw, “Cun ah a kiak ung a i ah kia sei mumcha Theing ah thawh let nak awn David naw, ‘Messiah Bawipa’ ci ne akhü ang? ⁴⁴ Bawipa naw ka Bawipa-am, Na ga gui na kho kaa ah kä ka gawk sak pha ah chuih, Na ngoh vai,’ ciah David Ghangpughang naw pyein ci. ⁴⁵ David naw Messiah-am Bawipa ci ne a khü ah a kiak ung Messiah cu a i cha ah David ah ng’shon ah kiak khai ang?” ci ne ng’shi gui ci. ⁴⁶ Cun ung phi Bawipa Jesuh cu a u naw käm hlan ba ci. Cu hnüüp ung tün ne Bawipa Jesuh cu, a u naw phi käng shi law ba ci.

¹ Cun kawn ah Bawipa Jesuh naw ang düihpüi gui la chang hei gui-am, ² “Thukhän saza gui la Pharisee gui cu, Moses ah thukhän gui m’dang ne pyein nak hning gah ci gui ah kia ci. ³ Cun ah kia sei ngami ah m’theithang m’cäi ä gui cu nami läk vai. Cun ung phi ngami cu ami pyein ah mäih ah kä om ci gui ah kia sei, ngami ah om ah mäih ah kä nami om-en tu vai. ⁴ Ngami naw chang gui-am gih ne phuih khit vai kiak ci cu phuih sak ci gui, ami mät läi naw cun ah phuih cu ami kut m’dawng awn phi kä tawn hlük ci gui. ⁵ Ami bilawh phung chang naw a hmat vai ah bik ci gui. Ami m’cakau la ami baan ung akdäm nu gui ah cacim guh ne m’kawh ci gui. Ami sui ung phi akdäm ang sau nu gui ah cacim guh ne m’kawh ci gui.Ami sui cun phi akdäm ang sau nu gui ah chui ne sui ci gui. ⁶ Ei awk nak pawi ung ani nak pi ung ngoh u ne, pum im gui ung phi ng’khoi tu hnga ne om hlük ci gui. ⁷ Sumlei hmun gui ung phi chang gui naw ami chang m’sui vai ng’za hlük ci gui. ‘Sazapa’ ciah chang naw a khü gui vai m’hni ci gui. ⁸ Cun ung phi nangmi nami van cu ng’phäi nau gui ah nami kiak ci kia ne nangmi ung sazapa tumat bäng om ci kia sei, ‘Sazapa’ ciah khü vai kä nami ng’zak hlü vai. ⁹ Khomdek khan ah a u phi ‘Pa’ ah kä nami khü vai, nangmi ung khankho ah nami pa tumat bäng om ci. ¹⁰ Nangmi naw ang vaipi ciah khü phi kä nami ng’zak hlü vai, Nangmi ung Messiah ciah nami ng’vaipi tumat bäng om ci. ¹¹ Nangmi ung ka hlüngtai pi ci cu nami chang shäm ah kiak khai. ¹² Amät naw amät m’hlüngtai ci cu ng’neim pibäih khai, amät naw amät ng’neim sak ci cu hlüngtai nak gah khai. ¹³ “Thuvi ciah Pharisee gui la thukhän saza gui, nangmi ung thüinak aih om ci. Nangmi cu khankho ah chang gui naw ami kai nak vai ah m’kawt nami khai ci. Nami mät phi kä nami lut ci,lut hlü ne tha nak ciah chang phi kä nami luh sak ci. ¹⁴ (Thuvi ciah pharisee gui la thukhän saza gui, nangmi ung thüisei nak om ci. Nangmi naw hmeinu gui ah khawh chaam gui cu käng düng ciah lam awn lak pe u netah, chang naw a hmuh ng’zak ung nik khai ah ang sau aih ah nami taigü ci. A cun ah phäh ah nangmi cu nui pi ciah m’kat nak nami gah khai). ¹⁵ “Thuvi ciah ah pharisee gui la thukhän saza gui, nangmi ung thüisei nak om ci. Chang tumat a zum law tu vai ah tui ’kat ne, ng’zung khum ne nami hteit ci. Zum nak ung nami m’hluh tu kawn ah, cun ah chang cu, nami mät ah mä a goi ah shekat pi ne, m’htei kho ah hteit ciah nik khai ah nami piang ci. ¹⁶ “Lam shüm ciah chang mik m’dauh gui, nangmi ung thüisei nak om ci. Chang tumat naw pum im awn m’kyuk ne ang phyun ung, cun ah ng’pyun nak cu kä bä ci, cun ung phi im ung ghui awn m’kyuk ne ang phyun läi ung bä ci nei’ ci ne nami pyein ci. ¹⁷ Chang she mik m’dauh gui ngai shüm vä, ghui ang, a küikyang pi, ghui theing thap sak ciah pum im ang a küikyang pi? ¹⁸ Chang tumat naw mangkyang awn m’kyuk ne ang phyun ung kä bä ci, mangkyang ah khan ah kaa, peit taak awn m’kyuk ne ang phyun vah bä ci,” nami cik ci. ¹⁹ Changshe mik m’dauh gui, peit taak nak ang a küikyang pi, peit taak gui theing thap sak ciah mangkyang ang a küikyang pi? ²⁰ Mangkyang awn m’kyuk ne ng’phyun ciah chang cu, mangkyang la ak khan ah om ci avan awn m’kyuk ne ng’phyun ciah kiak ci. ²¹ Pum im awn m’kyuk ne ng’phyun ciah chang cu, pum im la pum ung om ciah Khanpughi awn m’kyuk ne ng’phyun ciah kiak ci. ²² Khankho khü ne ng’phyun ci cu Khanpughi ah mangkyang ah khan ah ngok ciah Khanpughi cu khü ne ng’phyun ciah kiak ci. ²³ “Thuvi ciah pharisee gui la thukhän saza gui, nangmi ung thüisei nak om ci. Nangmi cu m’lui, k’bei, an mai nüng bum gha bum ät nami peit ung phi, taga nak, m’gein nak, düngnak gui ah thukhän ung küikyang pi ci gui cu nami nawng ci. Nangmi naw bum gha bum ät phi pe khenggeng ne thukhän phi nami läk vai. ²⁴ “Lam shüm ciah a mik m’dauh gui, nangmi cu k’pi kä nami K’düh-en vai ah, tui m’cim ne nami awk ci, cun ung phi kala-uk läi nami k’düük ci nei. ²⁵ “Thuvi ciah pharisee gui la thukhän saza gui, nangmi ung thüisei nak om ci, nangmi cu nami eik-bei la nami m’zakkoi gui ak pung ah theing khai ah nami m’si ung phi, nami m’lung kyong ah ng’zak nak hlü aih la ngetngawng nak cu be ci nei. ²⁶ A mi m’dauh ah pharisee gui, nami tui m’zak ah ak kyong cu theingthap sak ma vä, cun ung ak pung phi theingthap lawk khai nei. ²⁷ “Thuvi ciah pharisee gui la thukhän saza gui, nangmi cu bawk khai ah hluk ah guh-am awn nami täng ci nei, guh-am gui cu ak pung ah teng ung ami kiom ung phi, ak kyong ah gook ah a guh, ak thu gui awn be ci. ²⁸ A cun ah mäih ah nangmi cun phi, ak pung ung chang ah ma ah, chang k’ni gui ah nami ng’shei ung phi, nami m’lung kyong ah thuvi nak la shetkat nak gui awn nami be ci. Pyein ci. ²⁹ “Thuvi ciah pharisee gui la thukhän saza gui, nangmi ung thüsei nak om sä. Nangmi cu profet gui ah ng’cim hmun lung gui nami cawih pe gui ci. Chang ni gui ah cim hmun lung gui nami m’tui m’thau pe gui ci. ³⁰ Cun kawn ah nangmi naw, ‘Keimi cu pughi pa gui ah om zah ung kami om vai sü ung ngami ah mäih ah profet gui cu kä kami ngawn sheh gui khai sü,’ nami cik ci. ³¹ Cun ah kia sei nangmi cu profet gui ngawn ci gui ah hta nau gui ah nami kiak aè mawng, nami ng’kiaa pyi ciah kiak ci nei. ³² Nami pughi pa gui naw tün ne ami bi ah kat nak cu, ang pyii ung khüt khai ah nami bi vai nei. ³³ K’phyu m’äm ah gui lah k’phyu m’äm-ah ah hta gui, nangmi cu m’hteimei ung luh nak vai ung kaa, a i chaa nami phiawng khai ang? ³⁴ Kei naw akcang ka pyein cu, nangmi ah om nak ah profet gui, saza gui la hmuhmat ciah chang gui ka tüi lawk khai. Nangmi naw cun ah chang gui cu am shah nami ngawn khai, am shah kutlam tung ung nami tai khai, am shah pum im ah k’caw ah nami tuthat khai, am shah gui cu apigaw päng ung hteit ne nami pha gui khai. ³⁵ Cun ah kia sei kat nak kä bik ci gui ah Abel ung tün na, pum im la mamgkiang ah ng’lak ung nami ngawn ah Berachiah ah hta Zachariah ung khüt khai ah, nami ngawn gui ah hmawk ah shetkat nak nami gah khai. ³⁶ Kei naw akcang ka pyein cu, shin ah amawng ama gui ah hmawk ah tuhchü chang gui cu shetkat nak gah khai gui. ³⁷ “Aw Jerusalem! nang naw profet gui cu ngawn ne Khanpughi ah ng’shä tüih gui cu lung awn na vawi ci nei, ainu naw ang phiaa awn aihta gui ak boop gui ah mäih ah nak chang gui kei naw ka kut ng’hnim ung ka koi nak gui cu sho law aih ci nei, cun ung phi nang naw kei cu kä na na dou ci. ³⁸ Cun ah kia sei na pum im cu Khanpughi naw nawng sei, im ghawng ah kia lawk khai nei. ³⁹ kei naw tuhbäi ka pyein cu, ‘Bawipa ming awn kyum lawk ci cu Khanpughi naw phyutheh nak be sä,’ ci ne kä pyein pha ah chuih nang naw kei cu kä na na hmu ba khai nei,” ci ne pyein ci.

¹ Bawipa Jesuh cu pum im ung kaa a luh law ba zah ung ang düihpüi gui naw a pei ah law u netah, “Pum im ami cawh cu m’hnuh tuk ci gui. ² Bawipa Jesuh naw, “Shin ah cawh kyan gui cu nangmi naw nami hmuk ci nei, kei naw akcang ka pyein cu shin ah pum im cu cawh nak ah lung tumat phi a mät ah om nak ung kä ng’zän ba khai ah ng’gäi ne maih lawk khai nei,” ci ne pyein ci. ³ Bawipa Jesuh cu Olive khohtung ah amät a ngoh zah ung ang düihpüi gui cu a pei ah law u netah, “Tuhbäi na pyein ah a mawng gui cu a i ah khin ung kia lawk khai ang? Nang Bawipa kyum law ba nak khin la kho ang pyi law nak vai ah khin ung a i gui dang lawk khai ang?, nam thein gui ä,” ci ne ng’shik ci gui. ⁴ Bawipa Jesuh naw, “Nangmi a u naw kä a mi ning m’hleeihlak-en gui vai ah geing na ne om vä. ⁵ Kei cu Messiah nei,’ ci ne chang akda naw kei ah ng’hlawk ne chang khli m’hleeihlak lawk khai gui nei. ⁶ Nangmi naw ang et nak ung ng’tuk nak ah k’aw gui nami ng’zak khai, a shou nak ah ng’tuk ah mawng gui nami ng’zak khai, cun ung phi kä nami kyih kyawk vai. A cun gui cu om lawk khai, cun ung phi kho a khüt nak kä gawk law phak ci. ⁷ Chang pakhui tumat la tumat uk nak khopäng tumat la tumat, ng’tuk nak om khai. Akho päng ung ei vai maih khai, shihpi thüng khai, ⁸ cun gui cu gawk lawk khai ah zaica nak gui vai ah, lam ma lawk ciah kiak ci. ⁹ “Cun kawn ah chang gui naw nangmi cu ning pha gui u ne ami ning m’kat gui vai la ami ning ngawn gui vai ah ning ap gui khai gui. Chang gui naw kei ah hmawk ah ning gen gui khai gui. ¹⁰ Cun ah khin ung chang gui cu ami zum nak nawng u ne, tumat la tumat ng’cha tuk khai gui, ng’gen tuk khai gui nei. ¹¹ Profet ah ng’hlawk ci chang akda om law ne, chang gui cu m’hleeihlak lawk khai gui nei, ¹² chang shekha da law pi täi ne khawk sheng nak cu maih lawk khai nei. ¹³ Cun ung phi ak hnu ah khüt sei düng ciah chang cu hunphiawn nak gah khai nei. ¹⁴ Khankho uknak ah mawng thu ni cu khodek khan avan ung chang nüng ah ma ah saksi ne pyein zawp kawn ah, kho ah ng’pyi nak vai ah khin cu gawk lawk khai nei. ¹⁵ “Profet Daniel ah pyein ah kyihkyawk tükyai vai kiak ci cu a theingcim nak ung ng’düi sei nami hmuk khai.(Ca phat ci naw, shin ah mawng cu ang ngaih thei vai). ¹⁶ Cun ah ami hmuh law ung Judea kho ah chang gui cu, khomhtung ah dawng u sä. ¹⁷ Im kiung khan ah om ciah chang cu im kyong ah khawh la ba khai ah kä lut-en ba sä. ¹⁸ Lai ah om ciah chang cun phi suisak la ba khai ah im ah kä hteit-en ba sä. ¹⁹ Cun ah akhin ung käumah ci gui la htazüt shäm ci gui cu zaica khai gui nei. ²⁰ Nami dawng nak vai ah khin cu khosik kho la kyin hnüüp ung kä ng’awt-en vai ah, nami taigü vai nei. ²¹ Cun ah a khin ung ang htei ah shekak ciah zaica nak gawk lawk khai. Cun hlawk ah shekak ciah zaica nak cu khodek ang tüi law ung tün ne a i zah ung phi chang gui naw kä bui awt man khai gui. Ngawi ah phi bui awt ba vai ah kä kiak ci. ²² Khanpughi naw cun ah khin cu kä a tawi sak ah a kiak ung a u phi ghing ne kä om ba hlawt khai. Cun ung phi Khanpughi naw a ghü ah chang gui ah hmawk ah cun ah a khin mü hnüüp cu tawi sak khai nei. ²³ “Cun zah ung chang gui naw, ‘shi ah Messiah om ci nei, cä ah Messiah om ci nei,’ ami ci ung phi kä nami zum phung vai. ²⁴ Messiah ah ng’hlawk ci gui, profet ah ng’shei ci gui cu dang lawk khai gui nei.Cun gui naw ami m’khüt hning ung, Khanpughi ah ghü ah chang gui pui ami m’hleeihlak nak vai ah cäi aih vai gui la küikyang ciah amawng gui cu m’dang lawk khai gui nei. ²⁵ Ngai vä bäi, shin ah amawng gui kä a gawk law pha ung kei naw ng’daut ne ka ning m’thein gui ah kiak ci nei. ²⁶ “Chang gui naw, ‘Teng vä, Messiah cu bungpuk ah om ci nei,’ ami ci ung phi kä nami teng-en vai, im kyong ah om ci nei’ ami ci ung phi kä nami zum-en vai. ²⁷ Hnilaw ung kaa naw hni kiaak ung khüt khai ah khankho mik avan deikhang sak ciah kholailäp ah mäih ah chang ah Htapa cu kyum lawk khai nei. ²⁸ “Chang si gui ah om nak ah langta gui ng’bum khai gui nei’. ²⁹ “Cun ah zaica nak ah khin a gawk law kawn ah, a cun vai-am hni mü ne hmüp khai, chaa phi kä khang ba khai, aisi gui phi khankho ah kaa kiawi ne kia law zawp khai gui. Khankho ah kumkü aisi gui ah lam cu ng’thawng zawp khai. ³⁰ Cun zah ung chang ah Htapa a kyum law nak vai ah a mawng cu khankho ung dang lawk khai nei. Chang ah Htapa cu khankho ah meibawk ung cum ne, chünla ciah hlüngtai nak la küikyang ciah bämang nak awn a kyum law cu khomdek chang gui naw ami hmuh ung kyap ne m’lau khai gui nei. ³¹ Cun kawn ah chang ah Htapa naw chünla ciah phyungheng tum sak gui netah, ak khankho chang gui cu hnilaw hnikiaak, ahtum asiip ah tüi gui ne, khomdek vang kem ah kaa naw vang kem ah khüt khai ah a ghü ah chang gui cu m’cut sak gui khai nei. ³² “Theighing ah mawng ung m’theithang nak tumat cu nami ngaih vai. Cun ah theighing ah ang ban gui cu m’khek law ne ak thai ah a lim law ung kho a chaa vai ng’et lawk ciah nami hmat ci. ³³ A cun ah mäih ah ka pyein pyi ah amawng ma gui gawk law sei nami hmuh ung, chang ah Htapa cu nami m’kawt pei ah gawk law pyi ciah nami hmat vai. ³⁴ Kei naw akcang ka pyein cu, shin ah mawng avan cu tuhbäi ghing ciah chang gui kä ami sih pha ung gawk lawk khai nei. ³⁵ Khankho la khomdek a maih ung phi kei ah thu cu kä maih khai nei. ³⁶ “Cun ung phi cun ah hnüüp la cun ah akhin cu a u naw kä hmat ci. Khankho chang naw phi kä hmat ci, Ahtapa naw phi kä hmat ci, PaKhanpughi bäng naw hmat ci. ³⁷ Chang ah Htapa a kyum law ung Noah ah khin ung a kiak ah mäih kiak khai nei. ³⁸ A cun zah ung tui naw kä ak plüm pha ah chuih Noah hteinpaw im ung aluh ung khüt sei Chang gui cu ei ne aw ne, chungla ne om ci gui. ³⁹ Cun ah chang gui cu tui naw plüm gui sei dimaih law güt u ne, a i kä hmat ne om ci gui. Chang ah Htapa a kyum law zah ung phi a cun ah mäih ah kiak khai nei. ⁴⁰ Cun zah ung lai ah chang hnih ani om ung tumat cu hteh püi sei tumat cu pawih shüt khai. ⁴¹ Sum suk ci goi ah hnumi hnih ung kaa tumat cu hteh püi sei tumat cu pawih shüt khai. ⁴² Cun ah kia sei geing nah ne nami ngäng vai, nami Bawipa a i zah ung alaw vai kä nami hmat ci. ⁴³ Im ah naw m’guk ei a law vai ahmat ung, geing ah ne om sei, m’guk ei naw a im cu hmawng ne käm gu hlawt khai ah nami hmat ci. ⁴⁴ Chang ah Htapa cu nangmi naw kä nami ngaih zah ah akhin ung kyum lawk khai kia sei, nangmi cun phi ang täi zah ngaih nah ne nami om vai. ⁴⁵ “Düng ciah chang shäm cu a u ang? Cun ah chang cu a hei chang shäm gui uk khai la a khin päng ung ei awk vai tei gui khai ah a bawi naw am düih ah kiak ci. ⁴⁶ Ani naw a mät ah a bi lawh gui vai phung akni ah abi cu a bawi law ba ne a hmuh ung zeikiai nak om ci. ⁴⁷ Kei naw akcang ka pyein cu, ‘a bawi ah akhawh chaam avan m’hteihtang vai ah cun ah chang-am ap khai nei. ⁴⁸ Cun ung phi cun ah chang shäm cu changshe ah a kiak ung, ka bawi kä law ba zäk khai shou ba cang khai ci ne, ⁴⁹ chang shäm hnumi pami gui cu tuthat gui ne, ei awk ci gui awn atäng ah ei awk tat ne om khai nei. ⁵⁰ Cun kawn ah ani naw kä ang ngaih nak khin, kä ah hmuh zah ung a bawi cu law ba ne, ⁵¹ ak nui ah tuthat sei thuvi chang gui ah gah ah mäih ah gah khai nei. Ani cu kyap ne m’lau ne aha htui ne geiî vai khai nei.

¹ “Cun ah akhin ung Khanpughi ah uk nak kho cu shin ah mäih ah kiak khai. Hnü ät ung lamihta singhga cu chumah khai ah pamihta dou khai gui ah mei im kawt sek sek ne hteit ci gui. ² Cun gui ung kaa sing hma cu lunglang ci gui, sing hma cu kä lunglang ci gui. ³ Kä lunglang ci gui cu mei im law püi pang u ne phi zinan akdäm kä kei ci gui. ⁴ Lunglang ci gui cu ami mei im ung be khai ah zinan kei ne, law püi ci gui. ⁵ Chumah khai ah pamihta cu kä law zä sei, ngahmi cu ami van ngam ne ip zawp ci gui. ⁶ Kho cawih ding law khätah, “Chumah khai ah pamihta gawk law ci nei, law ne dou law vä,’ ciah ng’khü k’aw cu ng’zak ci gui. ⁷ Lamihta sing gha cu tho law ba u ne, ami mei im piang ne pawng m’hteim ci gui. ⁸ Kä lunglang ci gui cun naw, kä lunglang ci gui-am ‘Kami mei si lawk khai kiak ci, zanan api na pe tu gui vä,’ ci ne ng’zoi tuk ci gui. Kä lunglang ciah lamihta gui naw, ⁹ ‘Nangmi ah phäh la keimi ah phäh ah zinan kä ng’büh khai, cun ah kia sei ami zoih nak ah vak hleih ba cang vä,’ cik ci gui. ¹⁰ Kä lunglang ci gui cu zinan hleih khai gui ah ami hteh zah ung chumah khai ah pamihta cu gawk lawk ci. Ana ngäng ge ciah lamihta gui cu ani awn atäng ah hta m’um pawi kyong ah lut u netah shoh cu ak khai shüt ci gui. ¹¹ Hmuhmat nak kä om ciah ng’lamihta gui cun phi gawk law ba u ne, ‘saza, saza, shoh nak hmawn tu gui vä,’ ci ne ng’khü ci gui. ¹² Cun ung phi chumah ciah pamihta naw, ‘Nangmi a u gui ang, shoh kä ka ning ak hmawn gui khai nei,’ ci ne kiak na gui ci. ¹³ “Cun ah kia sei nangmi cun phi cun ah hnüüp, cun ah khin cu kä nami hmat ci kia sei, ngaih na ne nami ngäng vai nei!’ ¹⁴ “Cun ah khin ung khankho uk nak cu shin ah mäih ah kiak khai. Hnüp ät ung chang tumat cu lam hteit khai ah pawng m’hteim ci, ani naw ak chang shäm gui khü gui netah, a khawh cu ap gui ci. ¹⁵ Cun ah khawh cu ami mät ah näh ci vai ah k’pai ne, tumat-am ghui pit hma-kip, tumat-am pit m’ku, tumat-am pit gha, ciah ap gui ci. ¹⁶ Cun kawn ah ani cu akho hei ah hteit ci. Ghui pit hma-kip gah ciah chang cu a cun vai-am sumlei ne, ghui pit hma-kip ah khan ah pit hma-kip ak pawih khai ah gah ci. ¹⁷ A cun ah mäih ah pit m’ku gah ciah chang cun phi pit m’ku ah khan ah pit m’ku ak pawih khai ah gah ci. ¹⁸ Cun ung phi pit gha gah ciah chang cu ang thuh nak ung m’dek co netah a bawi ah ghui cu m’dek ung phuh ci. ¹⁹ “Shou hta khätah ami bawi cu law ba ne ak chang shäm gui cu k’tä gui ci. ²⁰ Ghui pit hma-kip gah ciah chang cu ghui pit hma-kip ak pawih ci cu law püi ne, ‘Bawi aw, nang naw ghui pit hma-kip na na ap shüt cu tuhbäi pit hma-kip ak pawih khai ah ka bik ci nei,’ ci ne pyein ci. ²¹ A bawi naw, ‘Na bä ci, nang cu düng ciah chang ni ah na kiak ci. Bi api ung nang düng ciah kia sei, bi ak däm cu ka ning ap khai, kei ah law ne kei awn atäng ah zeikiai ne na om khai nei,’ ci ne kiak nak ci. ²² “Ghui pit m’ku gah ciah chang cun phi law ne, ‘bawi aw, nang naw ghui pit m’ku na na ap shüt ci, tuhbäi pit m’ku ak pawih khai ah ka bik ci nei,’ ci ne pyein ci. ²³ A bawi naw ‘na bä ci nang cu düng ciah chang ni ah na kiak ci. Bi api ung nang düng ci kia sei bi akdäm cu ka ning ap khai, kei ah law ne kei awn atäng ah zeikiai ne na om khai nei,’ ci ne kiak nak ci. ²⁴ “Cun ung phi pit gha gah ciah chang cu law ne, ‘Bawi aw, kei cu nang bawi ah mawng ka hmat ci, nang cu na nget-ngawng ci kia ne kä na geit phi na khäm ba man ci, kä na phu geit phi nam sep ba man ci. ²⁵ Kei naw ning kyih netah na ghui cu m’dek co ne kak phuh ci nei, teng ä, shin ung na ghui om ci nei’ cik ci! ²⁶ “A bawi naw, ‘shekak ciah changdam, kei naw kä ka geit phikhäm ne, kä ka phu phi kam sep man ciah na hmat ung, ²⁷ Kei ah ghui cu pan ah na ap vai sü. Cun ung vah kei ka law ba ung ak pawih mah ah na gah hning khai süte,’ cik ci. ²⁸ Cun kawn ah ‘ani ah ghui pit gha cu la ba ne¬ ghui pit phiaa om ci-am pe vä. ²⁹ Bühmang ci cu peit ba mä ung bühmang law pi täi khai, cun ung phi ghawi-pyam ciah kaa cu, ak om hta phi lak peit zawp vai. ³⁰ A i ah kä mawng ciah shin ah chang shäm cu, ak pung ah hmüp khui ung hteh püi vä, a cu ah kyap ne m’lau ne aha htui ne om sä’, ci ne kiak na gui ci. ³¹ “Chang ah Htapa cu khankho chang gui naw kiung u sei ghangpughang ah kia ne a kyum law ba ung näng nak mangkiang ung ngok khai. ³² Cun zah ung kho nüng ah kaa chang pakhui avan cu ama ah ng’cut lawk khai gui. Htoshäm naw hto la me khoichaa ah mäih ah chang ah Htapa naw phi chang gui cu k’pai ne m’khoichaa gui khai. ³³ Düng ciah chang ni gui cu ak pat lam ah k’bum gui ne, changshe gui cu ak eng lam bum gui khai. ³⁴ Cun kawn ah ghangpughang naw akpat lam ah om ciah chang gui-am, ‘law vä, Kapa ah phyutheh nak nami gah ciah chang gui, khomdek a tüi pian ung tün ne nangmi ah hmawk ah a pian ah uk nak kho ung om vä. ³⁵ Nangmi cu kei ei ka cawi zah ung ei nami nam bei ci, tui ka gha zah ung tui nami na tu ci, kei cu khin ah ka kiak zah ung nami na khin nak ci. ³⁶ Kei ka sui vai kä ah om zah ung sui nami nam sui ci. Ka gawpai ung nami htei ci, thawng ung ka kium zah ung nami na teng m’kein lawk ci’ ci ne pyein ci. ³⁷ “Cun ci khätah changdüng gui naw, ‘Bawipa, nang ei na cawi cu ning hmu ne, a i zah ung ei kami ning m’bei, nang tui na gha cu ning hmu ne a i zah ung ang tui kami ning tui, ³⁸ khin ah na kiak a i ah ung ang ning hmu ne, kami ning khin nak, sui kä na sui a i ah ung ang ning hmu ne sui kami ning m’sui. ³⁹ Na gawipai, thawng ung na kium a i zah ung ang ning hmu ne kami ning m’hteihtang’ ci ne pyein ci gui. ⁴⁰ Ghangpughang naw, ‘kei naw akcang ka pyein cu, shin ah ka nau gui ung kaa, zoken pi ciah chang, nam hteihtang tu phung avan cu kei na nam hteihtang ah kiak ci nei’ ci ne kiak nak khai. ⁴¹ “Cun kawn ah ghangpughang naw ak eng lam ah om ciah chang gui-am, ‘thüi sei nak om ciah chang gui, shin ung kaa düi law ne, hteit vä, khoshe gui la ami khah püi gui ah hmawk ah pian ah m’hteimei lam ung zu kia vä. ⁴² Kei ei ka cawi zah ung ei kä na mi nam bei ci, tui ka gha zah ung tui kä nami tu ci, ⁴³ kei khin ah ka kiak zah ung kä nami na khin nak ci, kei ka sui vai kä a om zah ung kä nami nam sui ci, kei ka gawpai zah ung, thawng ung ka kium zah ung kä nami nam hteihtang ci,’ ci ne kiak na gui ci. ⁴⁴ “Cun ah chang gui naw, ‘Bawipa, nang ei na cawi, tui na gha khin ah na kiak, sui ah nak kheei, na gawpai, thawng ung na kium cu ning hmu lang ne. a i zah ung ang kä ning tu m’bei, kä ning m’hteihtang ah kami om’ ci ne pyein tu ba khai gui. ⁴⁵ Cun kawn ung ghangpughang naw, ‘kei naw akcang ka pyein cu shin ah chang gui ung kaa ak zoken pi ah chang käm hteihtang ne nami om phung cu, kei kä nam hteihtang ne nami om ah kiak ci’ ci ne kiak na gui khai. ⁴⁶ Cun na kia sei ngami cu ang täi ah shetkat nak gah khai gui. Düng ciah chang ni gui läi cu ang täi ghin nak kho ah gawk khai gui.

¹ Bawipa Jesuh naw cun ah am theitang gui kawn ah ang düihpüi gui-am, ² “Ak hnüüp hnih nak ung phiawn nak pawi om khai ah nami hmat ci. Cun zah ung Chang ah Htapa cu kutlam tung ung tai ne ami ngawn vai ah ga ah kut ung ap khai gui nei,” ci ne pyein ci. ³ Cun zah ung taigüpa gui la chang vai gui cu taigütung Kaiaphas ah mang im ah ng’bum ci gui. ⁴ Ngami naw Bawipa Jesuh cu adüm ah pha netah ngawn vai ah ng’ge ci gui. ⁵ Cun ah chang gui naw, ‘chang gui thüngphyong püipawng vai u sei, pawi ah kyong ung kä pha vai’ ci ne kiak ci gui. ⁶ Bawipa Jesuh cu Bethani gawnu ah kheilei ung azan gaw te ciah Simon ah im ah kai ci. ⁷ Bawipa Jesuh ei a ei tu zah ung hnumi tumat naw ang htei ah a phu küi ciah tuing’ui cu lung-um ung law püi netah, cun ah tuing’ui awn Bawipa Jesuh ah lu cu shawi ci. ⁸ Cun cu ang düihpüi gui naw hmu u netah, m’lung she u ne, “A i ah kia sei shin ah tuing’ui na plawh m’htah düt ang?; ⁹ Shin ah tuing’ui cu ngui akda ah zoi netah, ghawipyam ci gui-am peit ung bä khai süt te nei,” cik ci gui. ¹⁰ Bawipa Jesuh naw, cun ami ci cu ng’za netah, “A i ah kia sei shin ah hnumi na mi tüitok ang, ani ah bi cu ang htei ah ni ne kiom ci nei! ¹¹ Ghawipyam ci gui cu nangmi awn atäng ah nami om lä khai, kei läi cu nangmi awn atäng ah kä ka om law ba khai. ¹² Shin ah hnumi naw kei tuing’ui awn ana shawi cu, kei ah pumsa a gook m’cim vai ah piang m’tham ah kiak ci nei. ¹³ Kei naw akcang ka pyein cu, Thu Ni cu khomdek khan avan ung ami pyein law ung, shin ah hnumi cu chang naw a shüm vai ah, ani ah bi lawh cun phi pyein sak khai gui nei,” ci ne kiak na gui ci. ¹⁴ Ang düihpüi gha-lei-goi ung ka Judas Iskariot cu taigüpa gui ah hteit netah; ¹⁵ “Jesuh cu nami kut ung ka ning ap gui ung, a i nami na pek khai ang,” ci ne ng’shi gui ci. Ngami naw tangka thumkip khei ne pek ci gui. ¹⁶ Cun ung tün ne Judas naw, Bawipa Jesuh cu ga ah kut ung ap nak vai ah akhin ni cu shui ci. Mü-ei ei ci Gui. ¹⁷ K’caw kä shum ah m’htut ei nak ah pawi tün nak ah hnüüp ung ang düihpüi gui cu Bawipa Jesuh ah pei ah law u netah, nang Bawipa ah hmawk ah Passakha mü-ei cu a hawi ah pian vai ang? ci ne ng’shik ci gui. ¹⁸ Bawipa Jesuh naw, “Gawnu kyong ah chang vai tumat ah hteit ne nami pyein vai, Bawipa naw ‘kei ah ka khin cu gawk lawk ciah kia sei, kang düihpüi gui awn atäng ah nang ah im ung passkha pawi kami bi hlük ci’ ci ne nam cäi gui ci” ci ne nami pyein vai cik ci. ¹⁹ Ang düihpüi gui naw Bawi Jesuh ah m’cäi gui ah mäih ah bi u ne, passkha mü-ei cu piang m’tham ci gui. ²⁰ Khaw mü hun law khätah Bawipa Jesuh cu ang düihpüi gui gha-lei-goi awn atäng ah ngo u ne, mü-ei cu ei ci gui. ²¹ Ei ami ei zah ung Bawipa Jesuh naw, “Kei naw akcang ka pyein cu, chang tumat naw, kei cu ga ah kut ung na ap khai nei,” ci ne kiak na gui ci. ²² Ang düihpüi gui cu ang htei ah ami m’lung thüi sei, cun cu kei ana pyein ah kä kia ci ang’ ci ne tumat la tumat ng’shi tuk ci gui. ²³ Bawipa Jesuh naw, “Kei awn atäng ah ei-bei ät ung ei ciah chang naw kei cu ga ah kut ung na ap khai nei. ²⁴ Cacim ung om ciah mäih ah chang ah Htapa cu sik khai nei, cun ung phi chang ah Htapa ga ah kut ung ap ci cu, thüisei nak om ci nei. Kä ang tüi tu ge vai sü ung ani ah hmawk ah ni pi khai süte,” ci ne pyein ci. ²⁵ Bawipa Jesuh ga ah kut ung ap khai ah Judas naw, “Bawipa, cun ah chang cu kei ah kä kia naw? ci ne ng’shi khätah, Bawipa Jesuh naw, “Na pyein ah mäih ah hman ci nei,” ci ne kiak nak ci. ²⁶ Bawipa Jesuh naw ang düihpüi gui awn atäng ah mü-ei ami ei zah ung, m’htut cu la ne Khanpughi m’hlüngtai netah, m’htut cu bou ne, “Shin ah m’htut cu kei ah pumsa ah kiak ci, la ne ei vä,” ci ne ang düihpüi gui-am tei gui ci. ²⁷ Cun kawn ah khap cun phi la ne, Khanpughi m’hlüngtai netah ang düihpüi gui-am pe gui ne, “Shin ah khap cu nami van naw la ne aw vä, shin cu Khanpughi naw aning m’hnüt nak gui ah thukhän thai; ²⁸ Hnicim chang ah cheishoh nak m’si nak ah, ka huk ah ka si ng’hlui ah kiak ci nei. ²⁹ Kei naw akcang ka pyein cu tuhbäi ung tün ne, kapa ah uk nak kho ah nangmi awn atäng ah sapyit tui ak thai kä awk pha ah chuih, kei naw cun kawn ah sapyit tui kä ka aw tuba khaé nei,” ci ne pyein ci. ³⁰ Cun kawn ah ngami cu ng’äi m’cu u ne Olive khomhtung lam ah hteit ci gui. ³¹ Cun kawn ah Bawipa Jesuh naw, “Khanpughi naw htoshäm cu ngawn khätah, hto gui cu püipiang zawp khai gui ciah, cacim ung a om ah mäih ah, tuhmü nangmi cu kei na nawng ne nami dawng zawp khai nei. ³² Cun ung phi kei cu sih nak ung kaa ka thawh ba kawn ah, nangmi ah ma ung Kalile kho ah ka gawk ma khai nei,” ci ne ang düihpüi gui-am kiak na gui ci. ³³ Peter naw, “A hei gui avan naw ami ning nawng ung phi, kei läi naw a i zah ung phi kä ka nin nawng hlawt khai nei,” ci ne khän ne pyein ci. ³⁴ Bawipa Jesuh naw, “Kei naw akcang ka pyein cu, atuhmü ai kä a khon pha ung, nang naw kei cu, ‘ani kä ka hmat ci nei,’ ci ne thum-vei na na mak khai nei,” ci ne Peter cu kiak nak ci. ³⁵ Peter naw, “Kei cu nang awn atäng ah ka sih vai ung phi kä ka ning hmat ciah pyein ne kä ka ning mak khai nei,” ci ne pyein ci. Ahei ang düihpüi gui cun naw phi, a cun bäng bäng ah pyein tuk ci gui. ³⁶ Cun kawn ah Bawipa Jesuh cu ang düihpüi gui awn Ketsemane ami ciah kho hmun ah htei ci gui. Bawipa Jesuh naw, “Nangmi shin ung ana ngo vä, kei ahei ah hteit ne ka taigü khai,” ci ne ang düihpüi gui cu m’cäi gui netah; ³⁷ Peter la Zebedee ah hta goi cu khah püi gui ci. Bawipa Jesuh cu ang htei ah am lung kä ding gei sei zaica aih netah; ³⁸ “Kei cu ka sih awn täng sei kam lung thüisei ci, nangmi cu kei awn atäng ah shin ung om vä,” ci ne ang düihpüi chang sing thum-am kiak na gui ci. ³⁹ Cun kawn ah ama lam ah api vang nawn ne, khomdek ung ng’bawk netah, “Oh, Kapa bäpi khai a kiak ung shin ah zaica nak ah khap cu na hen pe ba ä, cun ung phi kei ah ng’zak hlü ah kä kiak ci, na mät ah ng’zak hlü ah kia sä,” ci ne taigü ci. ⁴⁰ Cun kawn ah Bawipa Jesuh cu ang düihpüi gui ah om nak ah law ba ne, ip u sei hmu gui netah, Peter-am, “Nangmi thum cu nazi ät hta phi kä nami na ngäng hlawt ci ma, ⁴¹ Tüihtok nak nami khütnäng nak vai ah taigü ne nami na ngäng vai nei. Mumcha naw ang zak hlü ung phi pumsa thagui kä om ci nei,” ci ne kiak nak ci. ⁴² Bawipa Jesuh cu ang hnih vei nak ah hteit ba mä netah, “Oh Kapa shin ah zaica nak ah khap cu kei naw kä ka awk ung käng phlän khai ah a kiak ung, nang ah ng’zak hlü ah kiak sä,” ci ne taigü ci. ⁴³ Cun ah Bawipa Jesuh a law ba ung phi ang düihpüi gui cu ami mik käm dei hlawt ah ip u sei hmu gui ci. ⁴⁴ Bawipa Jesuh cu cun kawn ah hteit ba mä ne acita ak taigü ah mäih ah ak thum-vai nak ah taigü ba mä ci. ⁴⁵ Cun kawn ah ang düihpüi gui ah om nak ah law ba netah, “Nangmi cu ip ne ng’düm ne nami om ci ma? Chang ah Htapa cu chang she gui ah kut ung ap vai ah akhin gawk lawk ci nei. ⁴⁶ Tho law vä mi hteit kaw, ga ah kut ung kei na ap khai cu gawk law pyi ci nei,” ci ne kiak na gui ci. ⁴⁷ Cun ah Bawipa Jesuh naw thu a pyein zah ung, ang düihpüi gha-lei-goi ung kaa, Judas cu, htung tawn ni, khim ni, kawt ci gui ah chang khli awn atäng ah gawk lawk ci gui. Cun ah chang gui cu taigüpa gui la ami ng’vai gui naw ami tüih law gui ah kiak ci. ⁴⁸ Bawipa Jesuh ga am ap ciah chang naw, ani awn atäng ah lawk ciah chang gui-am, “Kei naw m’hnam ne kang ui ah chang cu Jesuh ah kiak ci, ani cu nami phaa vai nei,” ci ne am cäi gui ah kiak ci. ⁴⁹ Judas cu Bawipa Jesuh ah zäih ne dawng law netah “Bawipa Zeikiai nak om sä,” ci ne Bawipa Jesuh cu m’hnam ne ng’ui ci. ⁵⁰ Bawipa Jesuh naw, “Teihpüi aw, nabi vai cu ang ghit ah nabi vai nei,” ci ne kiak nak ci. Chang gui naw law u ne, Bawipa Jesuh cu pha ne k’pang ci gui. ⁵¹ Cu zah ung Bawipa Jesuh läk lawk ciah chang tumat naw ak khim phawng ne, taigü ng’vai ah changshäm tumat cu tu sei, ak hnga vang täng hlang ci. ⁵² Bawipa Jesuh naw, “Na khim cu bun baä, khim awn väih ciah chang cu khim awn sih ba khai nei. ⁵³ Kei naw kapa ah kang zoih ah a kiak ung Kapa naw ga-mo mawng gha-lei-goi ah däm ciah khankho chang gui cu, tüi lawk khai ci cu, kä nami hmat ci maa? ⁵⁴ Cun ung phi kei naw cun ah ka bi ung a i hawk-cha ah cacim cu kümbe hlawt khai ang,” ci ne kiak na gui ci. ⁵⁵ Cun kawn ah Bawipa Jesuh naw, chang gui-am, “Nangmi cu m’gut ei pha ah mäih ah kei nami na phak khai ah, htung tawn ni khim ni kawt ne nami lawk ci ma? Kei naw ak hnüüp tä pum im ung ngo ne kam theithang zah ung nangmi naw kei kä nami na phak ci maw? ⁵⁶ Cun ung phi shin ah amawng gui a kiak law nak cu cacim ung profet gui ah pyein ah mäih ah ang dang law vai ah hmawk ah kiak ci nei,” ci ne pyein ci. Cun zah ung ang düihpüi gui ami van cu Bawipa Jesuh nawng shüt ne dawng zawp ci gui. ⁵⁷ Pha lawk ci gui ah chang gui naw Bawipa Jesuh cu taigü tung Kaiaphas ah im ah hteh püi ci gui. A cun ah thukhän saza gui la ami ng’vai gui cu ng’cut ne om ci gui. ⁵⁸ Peter cu ng’shawng pi pi ne Kaiaphas ah im vong pei ah khüt ne, Bawipa Jesuh cu läk lawk ci.Cun kawn ah vong kyong ah lut law tu ne, Bawipa Jesuh ah mawng a i ah ami pyein ah a hmat vai ah phäh ah taigü tung ah gakap gui awn, atäng ah ngo tuk ci. ⁵⁹ Taigüpa gui la kawngsi ng’vai gui naw Bawipa Jesuh ngawn nak hning vai ah käng düng ciah saksi cu shui ci gui. ⁶⁰ Cun ung phi kä hmu hlawt ci gui. A hleei pyein ciah saksi läi cu akda om ci. ⁶¹ Ak hnu ah chang hnih cu ng’düi law ni netah, “shin ah chang naw, kei naw Khanpughi ah pum im cu, gäi netah, hnüüp thum ah kyong ung ka cou ba hning ci cik ci nei, ci ne saksi ci goi. ⁶² Taigütung cu düi law netah, “Shin ah chang gui naw nang cu a i ng’gu ang, ami ning bün, nang naw m’hlan ne na pyein tu ba vai kä om ba ne ma, ci ne Bawipa Jesuh cu ng’shik ci. ⁶³ Cun ung phi Bawipa Jesuh cu kä chiu phung ne om ci. Taigü tung naw nang cu Khanpughi ah Htapa, Messaiah ah na kiak ci ma, kei-am nam thein-ä. Ghing ne om ciah Khanpughi ung thukhäm ne ka ning shik ci nei,” ci ne pyein ci. ⁶⁴ Bawipa Jesuh naw, “Nang naw na pyein cu hman ci nei, kei naw akcang ka pyein cu, ngawi ah chang ah Htapa cu hlüngtai pibäih ciah Bawimang ah k’pat lam ah a ngoh la khomei bawk cum ne a kyum law ba cu nami hmu lawk khai nei,” ci ne pyein ci. ⁶⁵ Cun ci khätah taigütung naw, amät ah zih sui shum ne pang netah, “shin ah chang naw Khanpughi kat na ne, thu pyein ci nei, saksi kä hlü ba te ci nei. Khanpughi kat na ne ang thu cu tuhbäi nami ng’za zawp ci nei. ⁶⁶ a i cha phupit ne k’bäi vai ang? ci ne ng’shi gui ci. Cun ah chang gui naw, “A kat nak dang ci kia sei, sihnak peit vai nei,” cik ci gui. ⁶⁷ Cun kawn ah chang gui naw Bawipa Jesuh cu a hmai ung m’thui u ne, am shah gui naw thäk u sei, am shah gui naw a hmai ung k’beeih u netah, ⁶⁸ Messaiah Bawi, a u naw a ning pung beeih cu pyein law shümä,” ci ne kiak nak ci gui. ⁶⁹ Peter cu zung im vong kyong ah k’pung lam ah a ngoh tu zah ung ami chang shäm hnumi hta cu law netah, “Nang phi Kalile ah kaa, Jesuh ah apaw ah na kiak ci,” cik ci. ⁷⁰ Peter naw, “Nang ah pyein cu kä ka hmat ci nei,” ci ne ma netah, düi law ne vong kawt lam ah hteit ci. ⁷¹ Ahei ami chang shäm hnumi hta naw mä hmu netah, cun ung om ciah chang gui ah ma ah shin ah chang cu Nazaret chang Jesuh ah paw nei,” cik ci. ⁷² Peter naw, “Cun ah chang kä ka hmat ci nei,” ci ne ng’cim ne pyein ne ma ba mä ci. ⁷³ Cun kawn ah shängshäng hta khätah a pei ung ah düi ciah chang gui cu Peter ah pei ah law u netah, “Nang cu akcang ah ani ah paw ah na kiak ci, nang thu chi awn hmat phyak ci nei,” ci ne kiak nak ci gui. ⁷⁴ Peter naw, “kei naw cun ah chang cu kä ka hmat ci nei, ka hleei ka pyein ung Khanpughi naw na hmu sä,” ci ne pyein ne ma ba mä ci. ⁷⁵ A cun vai-am ai khong law khätah,’ ai kä a khon pha ung nang naw kei cu, ani kä ka hmat ci nei, ci ne thum-vei na na mak khai,” ci ne Bawipa Jesuh naw a kiak nak te cu, shüm law ba netah, ak pung ah hteit ne ang htei ah thüi ne kyap ci.

¹ Kho ngawi hta sik ah taigüpa gui la ami ng’vai gui cu Bawipa Jesuh ngawn vai ah ng’ge ci gui. ² Cun kawn ah Bawipa Jesuh cu khit netah, Roman bawi Pilat ah hteh püi ci gui. ³ Cun kawn ah Bawipa Jesuh ga ah kut ung ap ciah Judas cu Bawipa Jesuh ami ngawn vai ah a mawng ng’za ne, ang htei ah ng’zu ba netah, tangka thum-kip cu taigüpa gui la ami ng’vai gui ah ma ah law püi ba ci. ⁴ Cun kawn ah ani naw, “Kei naw kat nak kä om ciah chang cu sih nak vai ah ap ne, kat nak bäih ka bik ci nei,” cik ci. Cun ung phi nangmi naw, “Shin ah mawng ung keimi kä na nak phaa gui vai, na mät ah bi ah kiak ci,” ci nak ci gui. ⁵ Cun kawn ah Judas cu Pum im kyong ah tangka thumkip cu ghawt shüt netah hteit ba ci. Cun kawn ah ahei lam ah hteit netah gui awn ng’awk ne sik ci. ⁶ Taigüpa naw cun ah tangka cu kaw netah, “shin cu sikplai ngui ah kiak ci, mi thukhän awn hnung tuk ci kia sei, pum im ngui m’küm ung käm dawn tu vai,” cik ci. ⁷ Ngami cu ng’ge zawp u netah cun ah ngui awn am sheh ciah khomdek cu khleih ci gui. Cun ah dek cu chang pakhui hei gui ah ng’cim hmun vai ah k’bäi ci gui. ⁸ Cun ah kia sei cun ah khomdek cu, “siplai hmun,” ah tuhgüt pyein ci gui. ⁹ Cun cu profet Jeremiah naw, “Israel chang gui naw ani ah phu nei ci ne ami k’bäi ah mäih ah tangka thum-kip cu la u netah, ¹⁰ Khanpughi naw kei a nam cäi ah mäih ah amsheh ciah khomdek cu khleih ci gui,” ciah thu cu aküm nak ah kiak ci. ¹¹ Bawipa Jesuh cu Roman bawi ah ma ah gawk law khätah, ani naw, “Nang cu Jew chang gui ah ghangpughang ah na kiak ci ma?,” ci ne ng’shik ci. ¹² Bawipa Jesuh naw, “Na pyein ah kiak ci nei,” ci nak ci. Cun ung phi taigüpa gui la ami ng’vai gui naw m’kat ne ami ng’shi nak gui cu, a i ah phi kä m’hlan tuba gui phung ci. ¹³ Cun ah kia sei Pilat naw, “Chang gui naw shin hlawk ah ning m’kat ne ami ning huutaap cu kä na ng’zak ci ma?,” ci ne kiak nak ci. ¹⁴ Cun ung phi Bawipa Jesuh cu m’kha ät ah phi käng thu tu ba ne om ci. Cun ah kia sei Pilat cu ang htei ah ngaih tüh khit ci. ¹⁵ Roman bawi naw passakha pawi päng ung, chang khli naw ak phiawn hlü a thawngkium tumat cu k’phiawn ci ci. ¹⁶ Cun zah ung Jesuh Barabbas ming nak ciah chang gui naw ami hmat ah thawngkium tumat om ci. ¹⁷ Cun ah kia sei chang gui akda gawk law u khätah Pilat naw, “Nangmi naw a u ang k’phiawn vai nami ng’zak hlü, Jesuh Barabbas ang?, Messiah ami ciah Jesuh ang?” ci ne ng’shi gui ci. ¹⁸ Jew chang ng’vai gui naw ami thüi nak su ah, Bawipa Jesuh cu akut ung ami ap ah ani naw hmat ci. ¹⁹ Pilat cu m’khoicha nak zung ah a ngoh zah ung akchu naw chang tumat tüi law ne, “cun ah kat nak kä bik ciah chang cu, a i ah phi kä na ci-en vai nei, zanmü kang mang ung ani ah phäh ah kam lung kyong ang htei ah zaica ci nei,” ci ne pyein law sak ci. ²⁰ Taigüpa gui la aming vai gui naw, “Barabbas cu k’phiawn ne Jesuh cu ngawn vä”, ci ne ami m’lau vai ah, chang gui cu m’cäi gui ci gui. ²¹ Pilat naw, “shin ah chang sing goi ung kaa, a u ang k’phiawn vai nami ng’zak hlü?” ci ne ng’shi gui ci.Chang gui naw, “Barabbas cu k’phiawn vai nei,” cik ci gui. ²² Pilat naw, “Cun ah a kiak ung Messiah ami ci ah Jesuh cu a i ah ci vai ang,” ci ne ng’shi gui ci. Chang ami van naw, “Kutlamtung ung tai ne ngawn vai nei,” cik ci gui. ²³ Pilat naw, “ani naw a i kat nak ang a bi?” ci ne ng’shi guici. Cun ung phi chang gui naw, “kutlamtung ung tai ne ngawn vai nei,” ci ne ami k’aw m’can ne m’lau ci gui. ²⁴ Pilat naw, a pyein ba gäk gäk ung kä bä khai, thüngphyong m’lau pyang law pi khai gui ah hmu netah, tui cu la ne ami ma ah “shin ah chang ah sih nak cu kei ah bi ah kä kiak ci, nangmi ah bi ah kiak ci nei,” ci netah, akut cu m’si ci. ²⁵ Chang gui naw, “Shin ah chang asih nak cu, keimi la keimi ah hta nau gui naw kamik chaw nak khai nei,” cik ci gui. ²⁶ Cun kawn ah Pilat naw, Barabbas cu k’phiawn ne Bawipa Jesuh cu tuthat netah, kutlamtung ung tai ne ami ngawn vai ah ap gui ci. ²⁷ Pilat ah gakap gui naw, Bawipa Jesuh cu bawi ah mang im ah hteih püi ci gui. Gakap-mo mawng ät ami van naw Bawipa Jesuh cu k’bui ci gui. ²⁸ Gakap gui naw Bawipa Jesuh ah a suisak cu suh pe u netah, hlui sen ciah suinu cu m’sui ci gui. ²⁹ Cun kawn ah ng’hling awn sak ah lukhu cu k’bün ci gui. Htung tawn tumat cu ak pat lam kut ung pek ci gui. Cun kawn ah ama ah m’khuukdoong u netah, “Jew ghangpughang cu ghi ne ghing sä,” ci ne päipih ci gui. ³⁰ Ngami naw Bawipa Jesuh cu ami m’si awn m’thui ci gui. Htung tawn la u ne alupum ung that ci gui. ³¹ Cun ah päipih u netah hlui ne sen ciah suinu cu suh pe ba u ne, amät ah sui cu m’sui ba ci gui. Cun kawn ah kutlamtung ung tai ne ngawn vai ah Bawipa Jesuh cu hteh püi ci gui. ³² Ngami naw ami hteh püi nak lam ah Kerene kho ah kaa, Simon ming nak ciah chang tumat cu hmu u netah, ani cu ang cet ah khü u ne, Bawipa Jesuh ah kutlamtung cu kawh sak ci gui. ³³ Lu k’am päng ah ming ciah Kolkotha ami ci nak ah gawk law u netah, ³⁴ Seikha awn ami k’caw ah sapyit tui cu Bawipa Jesuh-am tu gui. Bawipa Jesuh naw, m’dep shüm netah kä awk ah nawng ci. ³⁵ Ngami naw Bawipa Jesuh cu kutlamtung ung tai ne ngawn ci gui. A suisak cu m’shüih tawk ne ng’pai ci gui. ³⁶ Cun kawn ah ngoh ne ngäng ci gui. Ani ami m’kat nak ah a mawng cu alu khan ah. ³⁷ “Shin cu Jesuh, Jew Chang gui ah ghangpughang nei” ci ah ca gu ne tai ci gui. ³⁸ Cun zah ung m’guk-ei hnih cun phi Bawipa Jesuh awn atäng ah tumat ak pat lam, tumat ak eng lam ah kutlamtung ung tai ne ngawn ci gui. ³⁹ A cun ah pei ah hteit ciah chang gui naw, ami lu tum ne Bawipa Jesuh cu k’shedam nak ci gui. ⁴⁰ “Pum im gäi ne hnüüp thum ah kyong ung co ba khai ah chang, Khanpughi ah Htapa ah na kiak ung na mät naw namät k’phiawn ä, kutlamtung ung kaa a tuhbäi kia law baä,” ci ne k’shedam nak ci gui. ⁴¹ A cun ah mäih ah taigüpa gui, thukhän saza gui la ami ng’vai gui cun naw phi, ⁴² “Shin ah chang cu, chang hei lä k’phiawn hning ci, amät läi kä k’phiawn hning ne maw, ani cu Israel ghangpughang ah kä kia ne ma, kutlamtung ung kaa a tuhbäi a kyum law ba ung keimi naw kami zum khai nei. ⁴³ Ani cu Khanpughi zum ciah Khanpughi ah Htapa ah pyein ci maw! cun ah kia sei Khanpughi naw am hni ah akiak ung a tuhbäi k’phiawn sä,” ci ne shedam nak ci gui. ⁴⁴ Bawipa Jesuh awn atäng ah kutlamtung ung ami ngawn ah m’guk-ei goi naw phi a cun ah mäih ah päipih tuk ci goi. ⁴⁵ Kho hnüüp lung ung tün ne nazi thum lüng khai ah kho ah khan avan cu mü ne hmüp zawp ci. ⁴⁶ Kho k’awi nu nazi thum akhin ung Bawipa Jesuh cu, “Eli.Eli, Lama sabachthani,” ci ne ng’shan sei m’lau ci. A cun cu “Ka Khanpughi a i ah kia sei kei na na nawng ang” ci ne a pyein ah kiak ci. ⁴⁷ A pei ah ng’düi ciah chang gui naw cun a ci cu ng’za u netah, “Eliah cu khü ci nei,” cik ci gui. ⁴⁸ Nga mi ung kaa chang tumat naw dawng ne m’zak awn sapyit tui aktai cu va sok netah, ng’lawi ung m’sawi ne Bawipa Jesuh-am han pek ci. ⁴⁹ Cun ung phi tumat naw, “Om-ei sä, Eliah naw law ne ahun la kä ahun ah mi teng cang kaw,” cik ci. ⁵⁰ Bawipa Jesuh cu ng’shan khai ah m’lau netah si lawk ci. ⁵¹ Cun zah ung pum im kyong ah ami m’cha nak ah khingzih cu khan mawng ah kaa naw ka mawng ah khüt khai ah hnih ah ng’bou ne teek ci.Shihpi thüng ci, lung song gui piawn ne kia lawk ci gui. ⁵² Ng’cim hmun gui ng’hmawng sei Khanpughi ah chang gui akda tho law ba ci gui. ⁵³ Bawipa Jesuh sih nak ung kaa a thawh ba kawn ah cun ah chang gui cu, ng’cim hmun ung kaa lut law u ne, theingthap ciah mang gaw ung lut tu u sei, chang akda naw hmuk ci gui. ⁵⁴ Bawipa Jesuh ngäng ci gui ah gabawi la gakap gui naw, shihpi a thüng la ahmün cäicat vai gui cu hmu law u ne, ang htei ah kyikyawk u netah, “Shin ah chang cu akcang ah Khanpughi ah Htapa ah kiak ci nei,” cik ci gui. ⁵⁵ A cun zah ung shawng ne dan ci gui ah hnumi gui phi om ci gui. Ngami cu Kalile ah tün ne Bawipa Jesuh cu läk u ne, m’htei htang ci gui ah kiak ci gui. ⁵⁶ Cun gui cu Mari Magdalene, James la Josef ah anu Mari la Zebedee ah chu ni gui ah kiak ci. ⁵⁷ Kho mühun law khätah Arimathea gawnu ah kaa Josef ming nak ciah bühmang ciah chang cu gawk lawk ci. Ani cu Bawipa Jesuh ah ang khah püi tumat ah kiak ci. ⁵⁸ Ani cu Pilat ah hteit netah, Bawipa Jesuh ah a gook cu lak khai ah, va pyein ci. Pilat naw, Bawipa Jesuh ah a gook cu Josef-am peit vai ah zum ci. ⁵⁹ Josef naw a gook cu la netah zih bawk awn k’tom ci. ⁶⁰ Cun kawn ah kä shou phak ciah lung kheng ami shawk ah amät ah ng’cim hmun khui ung chum ne phuh netah, khui m’kawt cu lungnu tumat k’täng ne khai shüt netah hteit ba ci. ⁶¹ Ng’cim hmun pei ah Mari Magdalene la a hei Mari ni cun phi ngo ne om ci gui. ⁶² A cun ah ngawi ung kyin hnüüp ah kia sei taigüpa gui la Pharisee gui cu Pilat ah hteit u netah, ⁶³ “bawi aw, cän ah hleei ciah chang a ghin zah ung ‘Kei ak hnüüp thum hnüüp sih nak ung kaa ka tho ba khai,’ a ci cu kami shüm ba ci nei. ⁶⁴ Cun ah kia sei a hnüüp thum ung khüt khai ah ng’cim hmun cu akni ah khai ne, ami ngäng vai ah k’bäi gui ä, Kä cun ung ak chang gui naw a gook cu m’gu u netah, sih nak ung kaa tho ba ci nei ci ne, chang gui-am m’thein khai gui nei. Cun ung ak hnu ah hleeihlak nak cu ak htük ah tah shekha law pi khai nei,” ci ne vah pyein ci. ⁶⁵ Pilat naw, “Gamo mawng ät khü ne ng’cim hmun cu akni ah ngäng sak gui vä,” cik ci. ⁶⁶ Cun ah kia sei nagmi cu ng’cim hmun ah hteit u netah, Khai nak ah lung cu, ca gei ne m’hnüt ne, phuh hmun m’kawt cu khäng htek khai ah khai ci gui. Cu kawn ah gakap gui-am ngäng sak ci gui.

¹ Kyin hnüüp ah ngawi ung ng’leen hnüüp kho thai ghi ghi sei, Mari Magdalene la ahei Mari cu ng’cim hmun ah hteit ci goi. ² Cun zah ung shihpi ak tung ah thüng lawk ci. Khanpughi ah khankho chang cu khankho ah kaa kyum law ne, phuh hmun khui m’kawt khai nak ah lungnu cu lat netah, ak khan ah ngok ci. ³ Ani ah müi cu kho alai läp ah mäih ah kia ne, ani ah sui cu khlüi toi ah mäiè ah bawk ci. ⁴ Ngäng ciah gakap gui cu ang htei ah kyikyawk u ne, ak si ah mäiè ah kiak ci gui. ⁵ Khankho chang naw hnumi gui-am, “Kä kyikyawk vä, kutlamtung ung tai ne, ami ngawn ah Jesuh cu nami shui ciah ka ning hmat gui ci nei. ⁶ Ani shin ung kä om ci, a cäu a pyein ah mäih ah tho ba pyi ci nei. ⁷ Law ne ang zän nak te cu teng law vä, a tuhbäi ak zang ah hteit ne ang düihpüi gui-am m’thein-gui vä. Ani cu sih nak ung kaa tho ba pyi ci, tuhbäi Kalile kho ah ma ne, ana hteit pyi ci kia sei, a cu ah ani cu nami hmuk khai nei. Kei ah ning m’thein gui cu käm hnihen vä,” ci ne kiak na gui ci. ⁸ Cun ah hnumi gui cu ami kyihkyawk pang ung phi ang htei ah zeikiai u ne, a cun gui cu ang düihpüi gui-am m’thein ba khai gui ah dawng ba ci gui. ⁹ A cun zah ung Bawipa Jesuh cu a mi ma ah dang law ne “Nangmi ah khan ah ding gei nak om sä,” ci ne kiak ci. Cun ah hnumi gui naw a pei ah k’et u ne, a kho ung k’pang u netah, khawihnah ci gui. ¹⁰ Bawipa Jesuh naw, “Kä kyikyawk vä, hteit ba ne ka phäi nau gui-am Kalile kho ah ami hteh vai ah m’thein gui vä, ngami naw a cu ah na hmuk khai gui nei,” ci ne m’cäi gui ci. ¹¹ Hnumi gui ami hteh law ba zah ung ngäng ciah gakap gui naw pigaw kyong ah hteit u ne, taigüpa gui-am a mawng ama avan cu m’thein gui ci gui. ¹² Taigüpa gui la aming vai gui cu ng’cut u netah gakap gui-am ngui akda pe ne, ¹³ “kho mü ah kami ih zah ung ang düihpüi gui naw a gook cu m’gu ne hteh püi ci gui nei,” ci ne nami pyein vai. ¹⁴ Cun ah mawng cu Pilat bawi naw ang zak ba ung nangmi kä aning gen gui vai ah, keimi naw kami pyein khai nei,” ci ne m’cäi gui ci gui. ¹⁵ Gakap gui cu ngui la u netah, ami m’cäi gui ah mäih ah pyein ci gui. Gakap gui ah pyein ah thu cu tuh ngawi güt Jew chang gui ah ng’lung ah thang lä ci. ¹⁶ Ang düihpüi chang sing gha-lei-ät gui cu Bawipa Jesuh ah m’cäi gui ah mäih ah Kalile kho m’htung ah khan ah hteit ci gui. ¹⁷ Ngami naw Bawipa Jesuh cu hmu u netah, kawp ne khawihnah ci gui. Cun ung phi am shah gui naw, kä ngaih gep ci gui. ¹⁸ Bawipa Jesuh cu ang düihpüi gui ah pei ah law netah, “Khankho la khomdek ung huham nak avan cu kei naw ka gah pyi ci nei, ¹⁹ nangmi htei ne kho nüng ung chang van cu, kei ah ng’khah püi ah kiak sak zawp vä.Cun ah chang gui cu Apa, Ahta la Mumcha Theing ah ming ung tuinim nak pe vä. ²⁰ Kei naw nangmi-am ka ning peit gui ah thukhän phung cu ami läk vai ah, m’theithang gui vä. Kei naw kho a khüt güt ung nangmi cu ang täi ah ka ning om püi gui khai nei,” ci ne m’cäi gui ci.