LUKA

LUKA

¹ Teihpüi Theophilus aw: Mik mi ah zum nak ung dang pyi ciah amawng tung gui cu chang akda naw akni pi ah gu ne piang pyi ci gui. ² Cun ah ami guk cu akhtük ung hmuhmat ci gui la pyeinsak ci gui ah m’thein m’kan ba gui ah kiak ci. ³ Cun ah kia sei shin ah mawng gui cu, kei naw va tün ne teng kheng netah, na hmat thei vai ah guk ung nik khai ah ngai ne ka guk nei. ⁴ Shin cu nang naw na hmuh ng’zak man phung akcang ah küm khai ah na shüm hmat vai ah ka guk ah kiak ci nei. ⁵ Judea kho ung Herod ghangpughang naw a uk sang ung Taigü kyong chang Zechariah ming nak ciah taigü om ci. Ak chu cun phi taigü kyong ung kaa Elizabeth ming nak ciah kiak ci. ⁶ Ngani cu Khanpughi ah ng’zak hlü ah om ni ne, Bawipa ah thukhän shaitaak cun phi läk ci goi. ⁷ Ngani cu ghi law pyi ci goi, Elizabeth kä hta sei ani hta kä om ci. ⁸ Hnüüp ät ung Zechariah cu Taigü im kyong ah taigü ah bi cu bi ba ci. ⁹ Taigü gui ah thung man ah mang kiang ung phyuh vawi khai ah ghü u sei, Bawipa ah Taigü im ah hteit ci. ¹⁰ Ani naw kyong ah vawihpeh vai m’khih ne ak phyuh theh zah ung chang gui akpung ah taigü ci gui. ¹¹ M’khih ne vawihpeh nak mang kiang k’patlam ung Bawipa ah khankho chang dang law sei; ¹² Zechariah naw hmu netah cäi ne kyik ci. ¹³ Cun ung phi khankho chang naw, “Zechariah aw, kä na kyih vai nei, Khanpughi naw na k’taigü cu ng’zak ci, na k’chu Elizabeth cu pamihta ah hta lawk khai, ang ming cu Johan ah na sui vai. ¹⁴ Ani ang tüi law ung a i hlawk ah na zeikiai khai ang?, na püipaw gui mä a i hlawk ah zeikiai tuk khai gui ang? ¹⁵ Ani cu Khanpughi lam ah chang m’gäi ah kia ci. Awktat man phung kä ei awk khai, anu puk ge ung Mumcha Theing awn kümbe khai. ¹⁶ Ani naw Israel chang van cu ami Bawipa Khanpughi ah law püi ba gui khai. ¹⁷ Ani cu Bawipa ah lam ung lam ma ciah kia ne, profet Elijah ah mäih ah khüighaat ne hlüngtai khai. Ani naw pa la hta atäng ah om ba sak goi khai; ani naw ng’thu kä ngai ciah chang gui düng ciah lu ng’lang nak ung ng’hlah law ba sak gui khai; Khanpughi ah hmawk ah ng’düi ge khai gui ah Bawipa ah chang gui cu ana m’cäi gui khai,” ci ne pyein ci. ¹⁸ Zechariah naw khankho chang-am, “Cun ah a kiak vai cu a i hawk cha ka hmat khai ang? Kei phi ka ghi lawk ci, ani phi ghi lawk ci” ci ne pyein ci. ¹⁹ Khankho chang naw, “Kei cu Khanpughi ah ma ah ng’düi ciah Kabriel nei; shin ah ng’Thu Ni nang-am ka ning m’thein khai ah Khanpughi naw ana tüih law nei. ²⁰ Cun ung phi akhin a küm law ung bä khai ah ng’thu kei ah pyein cu nang naw kä na zum ci. Cun kä na zum ah hmawk ah nang cu na aang khai, kei ah ng’thu bä ne kä ang dang pha güt käng thu phung ah na om khai” ci ne kiak nak ci. ²¹ Cun ah khin pum ung Zechariah cu chang gui naw ging law zai u netah, a i haw ne shin güt leng leng pum im kyong ah a ding ang? ci ne cäicat ci gui. ²² Ani cu a luh law ba ung kä ng’thu ba thei ci. Cun ah kia sei ngami naw Taigü im kyong ah mikhmuk ciah ah hmat ci gui. Kä ng’thu ba thei netah akut awn nüt püi gui ci. ²³ Taigü im kyong ah taigü nak a khin ng’pyi sei, Zechariah cu a im ah hteit ba ci. ²⁴ Cun kawn ah shou hta khätah Elizabeth cu m’gai law ne cha hma ung kä luh law ah om ci. ²⁵ Elizabeth naw, “Khanpughi naw kei cu nam gein pyi ci, Chang ah ma ah lü ng’aa nak ung kaa nak phiawn pyi ci” cik ci. ²⁶ Elizabeth am gai nak ak cha chuk nak ung, Khanpughi naw khankho chang Gabriel cu Kalile kho Nazareth gawnu ah tüi lawk ci. ²⁷ Khankho chang naw David ghangpughang ah ng’shon Josef ah k’chu vai ami beit ah Mari-am ng’thu m’thein lawk ci. ²⁸ Khankho chang naw Mari ah ma ah, “Na khan ah ding gei nak om sä, Bawipa naw atäng ah ning om püi ne, küikyang ciah hrilham ning k’be sä.”, ci nak ci. ²⁹ Mari cu khankho chang ah ng’thu ng’za ne cäicat netah, “a i a pyein ni mä” ci ne ngai ci. ³⁰ Khankho chang naw, “Mari awi, kä kyikyawk ä, Khanpughi naw ning m’hlüngtai pyi ci nei. ³¹ Nang cu m’gai ne pami hta ah na hta lawk khai. ³² Ang ming cu Jesuh ah na sui vai. Ani cu hlüngtai ne hlüngtai pi ciah Khanpughi ah hta ah kiak ci. Ani cu David ghangpughang ah ang shon ah kia sei, Khanpughi naw ghangpughang ah ngoh sak ba khai. ³³ Ani cu Jakop ah hta ng’shon ung ngawi zä ghangpughang ah kiak khai, a uk nak cu kä düt hlawt khai” ci ne pyein ci. ³⁴ Mari naw khankho chang-am, “Kei cu ng’lamihta nei shin ah na pyein gui cu a i hawk cha ah kia thei khai ang?” ci ne ng’shik ci. ³⁵ Khankho chang naw Mumcha Theing nak khan ah gawk lawk khai, Khanpughi ah hlüngtai nak phi nakkhan ah gawk lawk khai. Cun na kia sei theingthap ciah ak hmaw cu Khanpughi ah Htapa ah ming khai. ³⁶ Na paw Elizabeth ah mawng cu ngai shüm ä, ng’züü ciah ami pyein, ghi law pyi ciah chang ani cu, tuhbäi cha chuk m’gai pyi ci nei. ³⁷ Khanpughi ah kä m’khüt a i kä om ci nei” ci ne pyein ci. ³⁸ Mari naw, “Kei cu Khanpughi ah changshäm ah ka kiak ci, na pyein ah mäih ah kia sä” ci khätah, khankho chang cu maih ba ci. ³⁹ Cun kawn ah Mari cu pawng m’hteim ne, Judea kho, khosiip lam gawnu tumat ah hteit ci. ⁴⁰ Mari cu Zechariah ah im ah hteit ne Elizabeth cu zavaih nak ci. ⁴¹ Elizabeth naw Mari ah zavaih nak ang zak sang ung a puk kyong ah ak hmawhta cu hnün ci. Elizabeth cu Mumcha Theing awn be netah, ⁴² “Nang cu hnumi gui nüng ung hlüngtai nak om pi bäih ci, na hta law nak vai ah ak hmaw cun phi hlüngtai nak om ci! ⁴³ A i ah kia ne, kei ah khan ah shin ah hlüngtai nak gui a gawk law ang? ⁴⁴ Ka Bawipa ah anu cu kei ah gawk lawk ci nei. Nang ah zavaih nak kang zak vai-am kei ah puk kyong ah ak hmaw cu zeikiai ne hnün ci nei. ⁴⁵ Khanpughi ah ng’thu akcang ah bä lawk khai ci ne, na zum ah hmawk ah nak khan ah zeikiai nak om ci nei” ci ne m’lau ne pyein ci. ⁴⁶ Mari naw, Ka m’lung naw Bawipa m’hlüngtai ci; ⁴⁷ Khanpughi Hunbawi hmawk ah ka mumcha zeikiai ci, ⁴⁸ Ani naw zoken ciah akchang shäm cu na shüm ci nei, Tuhbäi tün ne chang van naw zeikiai chang ah na khü Khai gui nei, ⁴⁹ A i ah kia sei ci ung hlüngtai säih ciah Khanpughi naw kei ah hmawk ah aküikyang cu bi pyi ci nei. Ani ah Ming cu theingcim ci; ⁵⁰ Ani m’tamkhah ci gui ah khan ah ang shon päng ung am gein nak cu dang sak ci. ⁵¹ Am gäi nak ah akut awn am lung m’däm ci gui cu, m’taai gui zawp ci. ⁵² M’gäi ciah ghangpughang gui mang kiang ung kaa zuk chah gui ne, zoken ciah chang gui han chaang gui ci. ⁵³ Cawigha ci gui-am tuihlim ci tumbei gui ne, bämang ci gui cu ami züng ah hteh sak gui ci. ⁵⁴ Pupa gui ah ma ah a shaitaak cu kümbe sak ne, ak chang shäm Israel chang gui cu m’htei gui khai ah law pyi ci nei. ⁵⁵ Ani naw Abraham-am am dang ah am gein nak cu, hta ng’shon ung dang lä ci nei” ci ne ng’äi ci. ⁵⁶ Mari cu Elizabeth ni ah cha thum om tu netah, a im ah hteit ba ci. ⁵⁷ Elizabeth cu akcha küm law sei pami hta ah hta lawk ci. ⁵⁸ A im ng’phei la a mät zah gui naw, ani ah khan ah Khanpughi naw cäicat vai abi cu hmu u netah, ani awn atäng ah zeikiai tuk ci gui. ⁵⁹ Ak hmawhta hnüüp chih lüng sei, vun-ah pawi ami bi nak ung law tuk ciah chang gui naw, apa ah ming, Zechariah bä ah sui ba vai ah ng’za hlük ci gui. ⁶⁰ Cun ung phi anu naw “Johan ah sui vai nei” cik ci. ⁶¹ Ngami naw “nangmi ung cun ah ming kä om man ci” cik ci gui. ⁶² Cun kawn ah apa naw a i ah a sui hlü ah nüt ne ng’shik ci gui. ⁶³ Zechariah naw guk nak vai k’thäh gui netah, “Aming cu Johan nei” ci ne gu khätah, chang gui cu cäicat ci gui. ⁶⁴ A cun vai-am Zechariah cu ng’thu law ba thei netah, Khanpughi cu m’hlüngtai ci. ⁶⁵ Ami im ng’phei gui cu ami van kyikyawk ci gui. ⁶⁶ Cun ah a mawng gui cu Judea kho, khosiip lam avan ung thang zawp ci. Cun ah mawng ng’za tuk ciah chang gui naw, “Cun ah ak hmaw cu a i ah mäih chang ah kia lawk khai ang?” cik ci gui. Cun ah ang htei kawn ah Bawipa ah hlüngtai nak cu ani ah khan ah om ci. ⁶⁷ Johan ah pa Zechariah naw Mumcha Theing awn be netah, Khanpughi ah ng’thu a pyein cu: ⁶⁸ “Israel gui ah Khanpughi Bawipa cu m’hlüngtai tu vä, Ani cu akchang gui m’htei gui khai ah law ne, phiawn sak gui pyi ci nei. ⁶⁹ Ak changshäm David ah hta ng’shon ung, hlüngtai ciah Hunbawi cu dang sak pyi ci nei. ⁷⁰ Cau theingthap ciah profet gui-am shaitaak nak a peit gui ah mäih ah, ⁷¹ Ani naw ga ah kut kyong ung kaa la, na thüi na gui ciah kut kyong ung kaa na hun gui pyi ci nei. ⁷² Ani naw mi pupa gui am gein nak gui cu pyein ne, ang thu khän theing cun phi shüm ci nei. ⁷³ Mik mi cu ga ah kut ung nak phiawn gui ne, kä kyikyawk ne abi mi bi vai ah mipa Abraham ah ma ah shaitaak nak pe pyi ci. ⁷⁵ Cun ah kia sei mik mi cu theingcim nak la düng nak awn Khanpughi ah ma ah mi ghin nak chuih mi om khai. ⁷⁶ “Nang, kei ah chang hmaw, ahlüngtai säih Khanpughi ah profet ah ning khü vai nei. Nang cu Bawipa ah ma ung law ne, ani ah hmawk ah lam na piang khai. ⁷⁷ Bawipa ah ak chang gui-am, ami kat nak m’gein gui sei, hun nak ami gah vai ah mawng m’thein gui khai nei. ⁷⁸ Mik mi ah Khanpughi cu m’gein nak la k’dük nak awn be ci. Ani naw a hun nak ah akdei cu mi khan ah ng’shü law sak ne, ⁷⁹ Sihnak ah ang hnim ka ah om ci gui ah khan ah khankho ah akdei cu khang lawk khai, mik mi-am phi ding gei nak lam nam shüm gui khai” ciah kiak ci. ⁸⁰ Ak hmaw cu däm ng’vai law ne pumsa, mumcha avan ung kümbe lawk ci. Ani cu Israel chang gui ah ng’lung ah dang khai ah bi kä abi pha güt ung kho ng’gau kho ah om cang ci.

¹ Cun zah ung ghangpughang Aukustus naw Roman khopäng avan ung chang sing avan khei vai ah k’bäi ci. ² Cun ah chang sing khei nak cu Kuirinius naw Siria kho a uk sang ung atün law htük ah kiak ci. ³ Chang avan cu ami ming ng’khei tuk khai gui ah ami pigaw phäh phäh ah hteit ci gui. ⁴ Josef cu Kalile kho Nazareth ung kaa naw, Ghanpughang David ah ng’tüi nak Judea kho Bethlehem gawnu ah hteit ci. Josef cu David ah hta ng’shon ah kiak ciah kia ne acu ah hteit ciah kiak ci. ⁵ Josef cu ng’khei tuk khai ah, akchu nak vai ah shai ami taak ah Mari awn hteit ci goi. Mari cu käu mah ci, ⁶ ngani cu Bethlehem ah ani om tu zah ung ahta nak vai ah hnüüp ng’päng law sei, ⁷ Mari cu pamihta ah hta lawk ci. Ngani cu ani im kai nak vai im kä awng ci kia sei, ak hmawhta cu zih awn hlawp ne vantang ei-ko ung m’ih ci goi. ⁸ Cun ah kho ung htomeshäm gui cu khomü ah khodo zung ah htome ngäng ne om ci gui. ⁹ Cun sang ung Khanpughi ah khankho chang dang law ne, Khanpughi ah bämang nak cu khang law sei htoshäm gui cu ang htei ah kyik ci gui. ¹⁰ Khankho chang naw, “Kä kyikyawk vä, chang avan naw ang htei ah a zeikiai nak vai ah ng’thu Ni cu nangmi ah hmawk ah ka law püi ci nei. ¹¹ Tuhngawi David ah gawnu ung Khrit Bawipa, nami Hunbawi cu ng’tüi pyi ci nei. ¹² Ak hmawhta cu zih awn hlawp ne, vantang ei-ko ung ami m’ih cu nami hmuk khai, cun nami hmuh ung ani cu nami hmat khai nei” cik ci. ¹³ Cun vai-am chünla ciah khankho gakap gui cu khankho chang veing ne ng’dang law u netah; ¹⁴ “Ahlüngtai säih Khanpughi ah bämang nak cu, khankho ah be sä, khomdek khan ung phi ding gei nak om sä, am hni ah chang gui ah khan ah m’gein nak om sä” ci ne Khanpughi m’hlüngtai ne ng’äi m’cu ci gui. ¹⁵ Khankho chang gui khankho ah ami hteh ba kawn ah, htoshäm gui cu ami mät ng’htau u ne, “Mik mi Bethlehem ah mi hteit khai, Khanpughi naw anam thein gui cu hteit ne mi teng khai” ci ne ng’ge u netah Bethlehem ah hteit ci gui. ¹⁶ Gawk u netah, Mari la Josef la vantang ko ung ami m’ih ah ak hmawhta cu hmuk ci gui. ¹⁷ Htoshäm gui naw akhmawhta hmu u netah, ak hmaw ah mawng khankho chang ah ng’thu cu m’thein gui ci gui. ¹⁸ Htoshäm gui ah ng’thu pyein ng’za tuk ci gui cu cäicat ci gui. ¹⁹ Cun ung phi Mari cu acun ah mawng gui avan ngai ne shüm ba ci. ²⁰ Htoshäm gui cu Khankho chang ah pyein ah mäih ah hmu ng’za u netah, Khanpughi ng’äi ne m’hlüngtai ne hteit ba ci gui. ²¹ Ak hmawhta cu hnüüp chih lüng sei vun-ah nak ami bi nak ah hnüüp ung “Jesuh” ah ang ming sui ci gui. Cun cu kä ami m’gai nak pha ge ung khankho chang naw sui vai ah a pyein ah kiak ci. ²² Mose ah thukhän ah mäih ah theingcim nak bi vai akhin gawk lawk ci kia sei, ak hmawhta cu Mari la Josef naw Jerusalem ah law püi ni ne, Taigü im ah Bawipa am ap ci goi. ²³ Bawipa ah thukhän ung, “Hta htük phung cu Khanpughi-am nami ap vai, ²⁴ müm kha hnih la cholung hnih phi Khanpughi-am pe ne nami taigü vai” ciah om ci kia sei, acun ah taigü ci gui. ²⁵ Cun zah ung Jerusalem ah Simeon ming nak ciah chang om ci. Ani cu Khanpughi kyih-aa ciah chang k’ni ah kiak ci. Israel chang gui hun nak ami gah vai ah ngäng ciah chang ah kiak ci. ²⁶ Mumcha Theing cu ani awn atäng ah om ne, “Nang cu Khanpughi ah shaitaak ah Messiah kä na hmuh pha ung kä na sik khai” ci ne am cäi ah kiak ci. ²⁷ Simeon cu Mumcha Theing ah lam shüm nak awn Taigü im kyong ah lut ci. Thukhän ung om ciah mäih ah bi vai ah anu la apa naw ak hmaw ani law püi cu hmu netah, ²⁸ Simeon naw ak hmaw cu chang ne, Khanpughi am hlüngtai ah ng’thu cu; ²⁹ “Bawipa, tuhbäi na shaitaak küm pyi ci kia sei, na chang shäm cu dimdeeih nak ah hteh sak ä. ³⁰ Ka mät ah mik awn na hun phiawn nak cu ka hmu pyi ci nei, ³¹ Cun cu chang van ah ma ah nang naw na pian m’tham ah; ³² Na ng’zak hlü dang sak ciah akdei cu chang hei gui ah hmawk ah ak khang vai la; na chang gui Israel chang gui ah bämang nak a gawk law ah hmawk ah kiak ci” cik ci. ³³ Ak hmawhta ah anu la apa cu cun ah Simeon ah ng’thu ng’za ni netah cäicat ci goi. ³⁴ Simeon naw hrilham pe gui netah, Nu Mari-am a pyein nak cu; Israel chang da gui ami didap vai la hun nak ami gah vai ah hmawk ah shin ah ak hmawhta cu Khanpughi naw a ghü pyi nei. Ani cu Khanpughi m’hnüt nak ah kia ne, chang gui naw hnu ng’tuk püi ne ami ng’thu nak awn, ami mät ah m’lung kyong cu dang sak khai gui nei. ³⁵ Nang ah m’lung kyong cu khim ghaat awn k’tawk ah mäih ah nak khai nei” ci ne Mari-am kiak nak ci. ³⁶ Asher pakhui ung kaa Phanuel ah hta Anna ming nak ciah profet hnumi tumat om ci. Ani cu ghi law pyi ci, ak hmaw chang zah ung ceimah ne, kum chih bäng ung a cei awn om ci goi. ³⁷ Ani cu tuhbäi a khokum cheit-kip-lei-phli law pyi ci. Ani cu amü ak hnüüp taigü im ah om ne ei hlawi ne taigü ci. ³⁸ Ak hmaw ami ap law sang ung cun ah hnumi cu gawk law netah, Khanpughi m’hlüngtai ci!Cun kawn ah Jerusalem cu hun lawk khai’ ciah ngäng ci gui ah chang gui-am, ak hmawhta ah mawng cu m’thein gui ci. ³⁹ Josef la Mari cu Bawipa ah thukhän ami bi kawn ah ami pigaw Kalile kho Nazareth ah hteit ba ci gui. ⁴⁰ Ak hmaw cu däm ng’vai ne gaigawng ci. Ani cu cüivai lunglang ci, Khanpughi ah m’shumphyuk nak cu ani ah khan ah be ci. ⁴¹ Bawipa Jesuh ah anu la apa cu phiawn nak pawi akhin päng ung akum tä sei, Jerusalem ah hteit ci ci goi. ⁴² Jesuh akhokum kum gha-lei-goi a law zah ung phi, Jerusalem ah phiawn nak pawi ung hteit ba ci gui. ⁴³ Cun ah pawi ng’pyi sei chang gui cu ami im ah hteit ba ci gui. Cun ung phi ak hmawhta Jesuh cu, Jerusalem ah om shüt ci. A om shüt cu anu la apa naw kä hmat ci goi. ⁴⁴ Chang gui ah ng’lung ah hteit tuk ciah ngai ci goi. Hnüüp ät mü ne hteit u netah, ami mätzah teihpüi gui ah ng’lung ah shui ba ci goi. ⁴⁵ Cun ung phi kä hmu ba ni netah, Jerusalem ah hteit ne shui ba ci goi. ⁴⁶ Ak hnüüp thum hnüüp taigü im kyong ah Jew saza gui awn ngo u ne, ami ng’thu ngai ne, ng’shi ca gui ne kia sei hmu ba ci goi. ⁴⁷ Ani ah hmuhmat nak la ang thu gui ng’zak ciah chang gui cu ang htei ah cäicat ci gui. ⁴⁸ Josef la Mari cun phi ani hmu law ne cäicat ni netah, Anu naw, “Ka hta, a i ah kia sei shikchaa ah na kiak ang? Napa la kei naw ang htei ah ng’ä ne ka ni ning shui ba ci nei” cik ci. ⁴⁹ Jesuh naw, “Nang nu la pa, a i vai na ni na shui ba ang? Kei Kapa ah im ung ka om khai ah kä nani hmat ne ma?” cik ci. ⁵⁰ Cun a ci cu ngami naw kä hmat ci gui. ⁵¹ Cun kawn ah ak hmawhta Jesuh cu anu la apa awn atäng ah Nazareth ah hteit ba u netah, anu la apa ah ng’thu ngai ne om ci. Cun ah a kiak ah mawng gui cu anu Mari naw am lung kyong ung avan htin ci. ⁵² Ak hmaw Jesuh cu däm ng’vai law ne a hmuhmat nak dämda law pi sei, Khanpughi la chang ah ma ah a hmai kiang sei om ci.

¹ Ghangpughang Tiberius ah uk nak khokum gha-lei-hma alaw sangung Pontius Pilat naw Judea uk ci. Herod naw Kalile uk ci, a nau Philip naw Iturea la Trachonitis uk ci, Lisanias naw Abilene uk ci, ² Annas la Kaiaphas cu taigü tung ah kiak ci goi. Cun zah ung Khanpughi ah ng’thu cu, bung puk ah om ciah Zechariah ah hta Johan ung gawk lawk ci. ³ Cun ah kia sei Johan cu Jodan Tuinu lawngzung pigaw avan ung hteit netah, “Nami kat nak ng’zu ba ne tui ng’hnim zawp vä;Khanpughi naw nami kat nak ning m’gein gui khai nei” ci ne ng’thu pyein ci. ⁴ A cun ah mawng profet Isaiah ah guk ah ca uk ung om ci cu; “Bungpuk ah chang tumat ah ng’shäu law cu: ‘Bawipa ah lam cu ngaih na ne piang ge vä, A hteh nak vai ah lam düng sak vä, ⁵ Kho kawk kho ng’nawi k’be zawp vai, Kho gui khomhtung ng’tei zawp khai. Lam ng’khep lam ng’koi ng’düng zawp khai, Lam m’gho lam k’ghat k’sei pian vai. ⁶ Hnicim chang avan naw Khanpughi ah hun nak cu hmuk khai nei” ciah kiak ci. ⁷ Chang am shah gui cu tui ng’hnim khai gui ah Johan ah law u khätah, “Chang m’äm mah gui, gawk lawk khai ah Khanpughi ah m’lung she nak, phiawn nak vai ah mawng a u naw ang a ning m’thein gui? ⁸ Kat nak ung kaa phiawn vai ah ng’zu ba zawp vä, Abraham cu kami pughi ci ne kä khähghah vä, Khanpughi naw lung gui phi la ne Abraham ah ng’shon ah piang hning ci nei. ⁹ Singghing päng ah kung cu ghei akghaat awn m’täh ci nei, kä m’theih ciah sing phung cu chu pit ne, mei k’cang ung k’bum khai nei. ¹⁰ Chang gui naw, “cun ung a i ah kiak vai” ci ne ng’shi u khätah; ¹¹ Johan naw, “k’htu ng’zung goi om ci naw kä om ci-am ng’zung ät m’thuh tu sä, ei vai om ci naw kä om ci-am m’bei tu sä. ¹² A khawn look ciah chang gui cu tuihnim khai gui ah law u netah, “Saza, a i kami bi vai ang?” ci ne ng’shik u khätah, ¹³ “Nami bawi ah m’hnüt ah kawn ah m’däm ne akhawn kä nami loh vai” ci ne kiak na gui ci. ¹⁴ Gakap gui naw phi, “keimi mä a i ah kami kiak khai ang?” ci ne ng’shi u khätah; Johan naw, “Chang ah ngui kä nami guh vai, chang kä nami zawkshe nak vai, nami gah awn nami ng’büh vai” ci nah gui ci. ¹⁵ Chang gui naw Johan cu “Messiah ah kiai bawk ci ni” ci ne ngai law u khätah, ¹⁶ Johan naw, “Kei naw tui awn ng’hnim nak ka ning pe gui ci. Cun ung phi kei ah hlüngtai pi ci cu lawk khai, Kei cu ani ah phahnak gui phi kä ka k’phian hning ci, ani naw Mumcha Theing la mei awn hnim nak ning pe gui khai; ¹⁷ Ani naw alo ma ah geit khäm ne chüdawn awn chü netah, ang tak cu khei ah thun ne, ang shi cu kä phät hlawt ciah mei awn m’khih khai. ¹⁸ Johan naw chang gui cu lam k’ni ung ami hteh vai ah ng’thu ahlü hlü m’thein gui ci. ¹⁹ Cun kawn ah Johan naw, anau ah chu Herodias phi chu na ne, kat nak akda bik ciah Herod cu, akat nak dang zawp khai ah m’cäi ci. ²⁰ Cun ah kia khätah Herod naw Johan pha ne thawng ung chum ne, akat nak ah khan ah kat nak m’taih ne kat nak bik ci. ²¹ Chang gui akda tui ami ng’hnim kawn ah Bawipa Jesuh phi tui ng’hnim tuk ci. Ani ak taigü sang ung khankho m’kawt ng’hmawng sei, ²² Mumcha Theing cu mümbawk ah mäih ah zong law ne, ak khan ah ngo law khätah, “Nang cu ka ning m’hni aih ah ka ning Htapa nei” ciah khankho ah ng’thu k’aw cu thang lawk ci. ²³ Abi tün ne abi law sang ung Bawipa Jesuh cu akhokum thumkip lawk ci. Ani cu Josef ah hta ah chang gui naw ngai ci gui. ²⁴ Josef cu Heli ah hta, Heli cu Matthat ah hta, Matthat cu Levi ah hta, Levi cu Melchi ah hta, Melchi cu Jannai ah hta, Jannai cu Josef ah hta; ²⁵ Josef cu Mattathias ah hta, Mattathias cu Amos ah hta, Amos cu Nahum ah hta, Nahum cu Esli ah hta, Esli cu Nakai ah hta; ²⁶ Nakai cu Maath ah hta, Maath cu Mattathias ah hta, Mattathias cu Semein ah hta, Semein cu Josech ah hta, Josech cu Joda ah hta; ²⁷ Joda cu Joanan ah hta, Joaanan cu Rhesa ah hta, Rhesa cu Zerubbabel ah hta, Zerubbabel cu Shealatiela ah hta, Shealatiela cu Nari ah hta; ²⁸ Nari cu Melachi ah hta, Melachi cu Addi ah hta, Addi su Kosam ah hta, Kosam cu Elamadam ah hta, Elamadam cu Erah ah hta; ²⁹ Erah cu Joshua ah hta, Joshua cu Eliezerah ah hta, Elizerah cu Jorim ah hta, Jorim cu Matthat ah hta, Matthat cu Levi ah hta; ³⁰ Levi cu Semeon ah hta, Semeon cu Judah ah hta, Judah cu Josef ah hta, Josef cu Jonam ah hta, Jonam cu Eliakim ah hta; ³¹ Eliakim cu Melea ah hta, Melea cu Menna ah hta, Menna cu Mattatha ah hta, Mattatha cu Nathan ah hta,Nathan cu David ah hta; ³² David cu Jesse ah hta, Jesse cu Obed ah hta, Obed cu Boaz ah hta, Boaz cu Salamon ah hta, Salamon cu Nahshon ah hta; ³³ Nashon cu Amminadap ah hta, Amminadap cu Admin ah hta, Admin cu Arni ah hta, Arni cu Hezron ah hta, Hezron cu Perez ah hta, Perez cu Judah ah hta; ³⁴ Judah cu Jakop ah hta, Jakop au Isaac ah hta, Isaac cu Abraham ah hta, Abraham cu Terah ah hta, Terah cu Nahor ah hta, ³⁵ Nahor cu Seruk ah hta, Seruk cu Pelek ah hta, Pelek cu Eber ah hta, Eber cu Shelah ah hta; ³⁶ Shelah cu Kainam ah hta, Kainan cu Araphasat ah hta, Araphasat cu shem ah hta, Shem cu Noah ah hta, Noah cu Lamech ah hta; ³⁷ Lamech cu Methuselah ah hta, Methuselah cu Enoch ah hta, Enoch cu Jered ah hta, Jared cu Mahalaleelah ah hta, Mahalaleelah cu Kenan ah hta; ³⁸ Kennan cu Enosh ah hta, Enosh cu Seth ah hta, Seth cu Adam ah hta, Adam cu Khanpughi ah hta ah kia ci.

¹ Bawipa Jesuh cu Mumcha Theing awn be ne Jordan tuinu ah kaa law ba khätah, Mumcha naw bungbuk ah khah püi ci. ² Acu ah hnüüp phli-kip ung khoshe ah tüihtok nak gah ci. Hnüüp cun gütung Bawipa cu ei kä ei ah om ci kia ne ang htei ah ei cawi lawk ci. ³ Cun kawn ah khoshe naw, “Nang cu Khanpughi ah hta ah na kiak ung shin ah lung cu m’htut ah piang ä” ci ne kiak nak ci. ⁴ Bawipa Jesuh naw, “Cacim naw pyein ci, chang cu ei ei bäng awn ghing ciah kä kiak ci.” ci ne kiak na ci. ⁵ Akhnih vei nak ah khoshe naw, Bawipa Jesuh cu chaang ne, khomdek khan ung Bawimang uknak avan cu m’hnuh netah; ⁶ “Shin ah bämang hlüngtai nak avan kei naw ka ning pek khai, shin gui avan cu kei ah kut ung om ci, a u-am phi kei naw ka pe hning ci. ⁷ Kei na na khawihnah ung shin gui avan ka ning pek khai” ci ne kiak nak ci. ⁸ Bawipa Jesuh naw, “Cacim naw pyein ci, ‘Na Bawipa na Khanpughi bäng khawihnah taigü ne, ani ah bi bäng na bi vai” ci ne kiak nak ci. ⁹ Cun kawn ah Bawipa Jesuh cu Jerusalem ah hteh püi ne, ahlüng nak pi k’bäih ah ngoh sak netah, “Nang cu Khanpughi ah htapa akcang ah na kiak ung, shin ung na ng’phäi khai; ¹⁰ Cacim naw pyein ci,’ Nang ning m’htei khai gui ah Khanpughi anw khankho chang gui cu m’düih gui khai; ¹¹ Ngami naw ami kut naw ning chaang u sei, na kho phi lung naw kä ning plawh khai’ ciah om ci, ci ne pyein ci. ¹² Bawipa Jesuh naw, “Cacim naw pyein ci,’ Na Bawipa la Na Khanpughi cu kä na phawtcam vai” ci ne kiak nak ci. ¹³ Khoshe naw Bawipa Jesuh cu akda vei tüihtok netah ng’hlah ta ne a hei ah hteit ci. ¹⁴ Bawipa Jesuh cu Mumcha Theing awn be ne, Kalile kho ung law ba khätah, ani ah mawng cu cun ah kho avan ung thang ci. ¹⁵ Ani naw chang gui ah pum nak päng ah hteit ne m’theithang gui sei, chang gui naw m’hlüngtai ci gui. ¹⁶ Cun kawn ah Bawipa Jesuh cu a däm ng’vai law nak Nazaret gawnu ah hteit ba ci. Ani cu kyin hnüüp ung ahteh man ah, pum im ah hteit ne, cacim cu phat khai ah ng’düi law khätah; ¹⁷ Pum im ngäng ciah chang naw profet Isaiah ah guk ah ca-uk cu pe lawk ci. Bawipa Jesuh naw cun ah ca-uk cu kawt netah; ¹⁸ “Khanpughi ah Mumcha cu kei khan ah gawk law pyi ci, Geinvai ci gui-am Thu Ni m’thein gui vai ah Kei cu na ghü pyi ci, Thawng ung kium ci gui ah phiawn nak vai, A mik m’dauh ci gui ah m’dei ba nak vai la Shedam nak gah ci gui ah phiawn nak vai ah mawng shäu ne pyein vai ah kei cu ghü ne na tüi pyi ci ¹⁹ Khanpughi naw akchang gui a hun nak gui ah khin a gawk law ah mawng shäu ne pyein vai ah, Kei cu ana tüih law nei’ ciah cacim cu phat ci. ²⁰ Bawipa Jesuh cu, aphat ah ca-uk chaw ne pum im ngäng ci-am pe be netah ngoh ba ci. Pum im kyong ah lawk ciah chang avan naw cäi ne teng ci gui. ²¹ Bawipa Jesuh naw, “Shin ah cacim ung om ci cu, tuhbäi nami ng’zak ah mäih ah küm pyi ci nei” ci ne pyein ci. ²² Chang gui naw ani cu m’tamkhah u ne, ang thu pyein cun phi ngaihtüh u netah, “Ani cu Josef ah hta ah kä kia ne ang?” ci ne kiak ci gui. ²³ Bawipa Jesuh naw, “Nangmi naw, ‘nang seibawi, na mät ah nat nak, na mät naw na gai vai ah m’htei ä’ ciah khuishui ah mäih ah nami na ng’thu püi khai, Kapernaum ah na bi ah mäih ah, na mät ah pigaw ung phi na bi vai, ci ne nami kiak khai; ²⁴ Bawipa Jesuh naw khen gui netah “Kei naw akcang ka pyein cu, a u profet phi amät ah pigaw ung a u naw m’tamkhah ne kä dou man ci nei” ci ne kiak na gui ci. ²⁵ Ka pyein cu ngai vä, Eliah a om zah ung Israel kho ung hmeinu akda om man ci. Cun zah ung kho kum thum la avang ung kho ng’kyang sei chang gui cawigha geinvai ci gui. ²⁶ Cun ung phi profet Eliah cu Khanpughi naw a u ah om nak ah phi kä tüih ah, hmeinu tumat ah om nak Sidon khopäng Zarephat pigaw bäng ung tüi ci. ²⁷ Profet Elisha ah om zah ung phi Israel chang gui akda khei-lei ung gaw u sei, a u phi kä gai sak ci, Sirian ah kaa Naaman bäng gai sak ci” ci ne m’thein gui ci. ²⁸ Cun ah ng’thu ng’za u netah pum im kyong ah chang gui cu, m’lung she ci gui. ²⁹ Ami van ng’düi law u netah, Bawipa Jesuh cu ami pigaw m’htung lai ah kheing ung, buh hlit vai ci ne, hteh püi ci gui. ³⁰ Cun ung phi Bawipa Jesuh cu chang gui ah ng’lung ah lut ne, ahei lam ah hteit- ei ci. ³¹ Bawipa Jesuh cu Kalile kho Kapenaum gawnu ah hteit ne, pum hnüüp ung pum im ah hteit ne m’theithang gui ci. ³² Bawipa Jesuh ah ang thu k’aw cu huham ah aih khätah chang gui cu cäi ci gui. ³³ Cun zah ung zarat ung khoshe ah kai chang tumat om ci. Acun ah chang naw m’lau ne, ³⁴ Nazaret ah kaa Jesuh awi, nang cu keimi awn a i ah na ng’mäihzah ci ang? Na na m’di gui khai ah ang na law? Kei naw, nang cu a u ah na kiak ah ka ning hmat ci nei, nang cu Khanpughi ah theingcim ciah ng’shä k’ni ah na kiak ci nei” ci ne pyein ci. ³⁵ Bawipa Jesuh naw khoshe cu huuttaap ge ne, “Khoshe, kä chawkchek ne, shin ah chang ung kaa lut law ne, ahei ah hteit ä” ci ne k’täm ci. Acun vai-am, ami ma ge ung khoshe cu, chang a i ah phi kä plawh kheih shüt ah lut law ne dawng ci. ³⁶ Chang gui cu cäicat u netah, “a ni a i hlawk ah huham ah ne ang, khoshe hngaw aktäm hning? ci ne ami mät ng’ce ng’cäk u netah hteit ba ci gui. ³⁷ Bawipa Jesuh ah amawng cu acun ah kho avan ung thang zawp ci. ³⁸ Bawipa Jesuh cu pum im ung kaa kyum law ba ne, Simon ah im ah hteit khätah, Simon ah akchu ah anu, ang htei ah gaw sei anam htei ci gui. ³⁹ Bawipa Jesuh naw akgaw ah pei ah hteit netah, gawnak cu k’taap ge ne k’täm ci. Gaw nak maih sei, acun vai-am ani cu tho law ba ne, ngami cu khin na gui ci. ⁴⁰ Khohni a sip kawn ah chang gui naw akgaw gui akda law püi u sei, ak gaw gui ah khan ah tän ne akut taih ne gai sak gui ci. ⁴¹ Khoshe gui cu chang gui ung kaa lut law zawp u netah, “nang cu Khanpughi ah Htapa ah na kiak ci nei” ci ne ng’shäu u ne dawng zawp ci gui. Bawipa Jesuh Messiah ah a kiak cu khoshe gui naw hmat ci gui ah kia sei, acun ah mawng kä ami pyein vai ah m’cäi gui ci. ⁴² Kho thai law khätah Bawipa Jesuh cu, pigaw ung kaa ading gei nak ah hteit ci. Chang gui naw shui ba ne hmu law u netah, kä a hteh taak gui vai ah cho ci gui. ⁴³ Cun ung phi Bawipa Jesuh naw, “Kei cu Khanpughi naw ka hteit khai ana tüih law ah kia sei, Khanpughi ah uknak ah mawng ng’Thu Ni cu, akho hei zung ah phi hteit ne ka pyein khai nei” cik ci. ⁴⁴ Cun kawn ah Bawipa Jesuh cu Judah kho avan, pum im päng ung hteit ne ng’thu pyein ci.

¹ Kho hnüüp ät ung Bawipa Jesuh cu Kennesaret tuili kem ah ang düih zah ung Khanpughi ah ang thu ngai khai gui ah gawk lawk ci gui. ² Cun zah ung tui kem ah hleiko hnih gawk lawk ci;hleiko ung kaa nga shui ciah chang gui cu kyum law u ne, ami ng’vai m’si ba ci gui. ³ Bawipa Jesuh cu Simon ah hleiko ung vah kai ne tui lam ah hei m’hnawn ba sak gui netah, chang gui-am ng’thu m’thein gui ci. ⁴ Ng’thu pyein zawp netah, Simon-am, “Tui a thuuk nak ah va ng’nawn ne, ng’vai vawi vä” ci ne kiak na gui ci. ⁵ Simon naw, “Bawipa, Keimi amü pum ng’vai vawi ne nga kä ka mi phak ci nei, cun ung phi na na vawih sak gui ung kami vawi shüm khai nei” cik ci. ⁶ Ngami naw vang nawn ne ng’vai vawi u netah ng’vai teek ghep ghep khai ah nga akda phak ci gui. ⁷ Cun ah kia sei a hei hleiko ung kaa ami paw gui väk ne khü gui u ne, ami van ah hleiko ung be ne hnim ghep ghep khai ah nga phak ci gui. ⁸ Simon Peter cu acun gui hmu netah Bawipa Jesuh ah ma ah m’kuukdong ne, “Bawipa, kei cu kat nak bik ciah chang ah ka kiak ci kia sei, kä na k’et ne a hei ah hteit tei-ä” cik ci. ⁹ Ani la apaw gui cu nga akda aih pha u netah cäcat ci gui. ¹⁰ Simon ah apaw goi Zebedee ah hta goi James la Johan phi cäi tuk ci goi. Bawipa Jesuh naw, Simon-am, “Kä kyi kyawk vä, tuhbäi ung tün ne nangmi cu chang phak ciah nga k’pha ah nami kiak khai nei” ci ne kiak na gui ci. ¹¹ Ngami cu ami ng’hleiko tui kam ah m’hnawng ba u netah, ami khawh nüng nawng shüt u ne Bawipa Jesuh ah hnu ah läk ci gui. ¹² Kho hnüüp ät ung Bawipa Jesuh cu pigaw tumat ung gawk lawk ci. Cun ah pigaw ah kheilei ung gaw ciah chang tumat om ci. Ani naw Bawipa Jesuh cu hmu netah, ama ah kawp ne, “Sazapa, na ng’zak hlü a om ung na theingthap sak ä” cik ci. ¹³ Bawipa Jesuh naw akut awn tawk netah, “Kei ah ng’zak hlü om ci nei, tuhbäi theingthap sä” ci khätah, acun vai-am ak khei gui cu khan zawp ci. ¹⁴ Bawipa Jesuh naw, “Shin ah mawng cu a u-am kä nam thein-en vai nei, taigüpa ah zäih ne hteit ne, na pumsa na teng sak vai, cun ung chang van naw na gai ah mawng hmat tuk khai gui. Cun kawn ah Moses ah thukhän ah mäih ah peit taak nak na bi vai nei” ci ne kiak nak ci. ¹⁵ Cun ung phi Bawipa Jesuh ah mawng cu thang law pi k’täi khätah, ang thu ngai hlük ci gui la gai nak gah hlük ci gui cu da law pi k’täi ne gawk lawk ci gui. ¹⁶ Cun kawn ah Bawipa Jesuh cu a ding gei nak ah amät hteit ne k’taigü ci. ¹⁷ Kho hnüüp ät ung Bawipa Jesuh naw am theithang gui zah ung, Kalile, Judah la Jerusalem khaw, pigaw päng ung kaa lawk ciah Pharisee gui la tuhkhän saza gui cu ngo tuk ci gui. Ak gaw a gai sak nak ah Khanpughi ah huham cu Bawipa Jesuh ung om ci. ¹⁸ Chang gui naw shum ciah chang tumat cu kawt law u ne, kyong ah luh püi vai ah k’tha nak ci gui. ¹⁹ Cun ung phi chang da aih sei kä luh püi hlawt u netah, im khan ah kai püi ne, m’di k’sih kaih pawk u netah, Bawipa Jesuh ah ma ah zuk chah ne m’shän ci gui. ²⁰ Bawipa Jesuh naw ami zum nak adäm aih cu hmu netah, shum ciah chang-am,” “Teihpüi awi, na kat nak ning k’phiawn pyi nei” ci ne kiak nak ci. ²¹ Pharisee gui la Saza gui naw, “Khanpughi bäng naw vah shetkat nak phiawn hning ci, shin ah mäih ah ng’thu lawk ci, shin ah chang a u ang?” ci ne ngai ne ami mät ng’ce ng’cäk ci gui. ²² Bawipa Jesuh naw cun ah ami ngaih tüh cu hmat gui netah, “A i ah kia sei cun ah nami ngaih tüh ang?. ²³ Na shetkat nak ning k’phiawn nei ci la na gaw thawh ne tho ne hteit ä, ci cu zäi ciah hmat u ne ang? ²⁴ Kei naw akcang ka pyein cu, hmakat nak k’phiawn hning ciah huham cu Chang ah Htapa ung om ne, khomdek khan ah gawk law pyi ci nei,” ci netah, shum ciah chang-am, “Tuhbäi tho law ne, na ih phak lok ne kawt ne, na im ah hteit ba ä” ci ne kiak nak ci. ²⁵ Acun vai-am ak shum cu, ami ng’lung ah ng’däi lawk phäi ne, a ih phak lok ne kawt ne, Khanpughi m’hlüngtai netah, a im ah hteit ba ci. ²⁶ Cun hmuk ciah chang gui ami van cäicat kyikyawk u netah, “tuhngawi mi hmu teng cu ang htei ah küikyang aih ci nei” ci ne kiak ci gui. ²⁷ Cun kawn ah Bawipa Jesuh cu ahteh ba nak lam ah azung ah ngok ciah, akhon look ciah Levi cu hmu netah “Na läk ä” ci ne khü ci. ²⁸ Levi naw ng’düi law ne a khawh avan nawng shüt netah, Bawipa Jesuh cu läk ci. ²⁹ Cun kawn ah Bawipa Jesuh cu Levi naw a im ah aktung ah khin nak ci. Acun ung akhon look ci gui la chang hei gui khin akda law tuk ci gui. ³⁰ Pharisee gui la Thukhän saza gui naw, “a i ah kia sei a khon look ci gui la changshe gui awn atäng ah nami ei awk ang?” ci ne k’she na gui ci gui. ³¹ Bawipa Jesuh naw, “ak gai naw seibawi kä ng’za hlük ci, ak gaw naw vah ng’za hlük ci. ³² Kei cu chang k’ni gui ng’zu ba khai gui ah ka khü gui khai ah ka lawk ciah kä kiak ci, changshe gui ng’zu ba khai gui ah ka khü gui khai ah ka lawk ci” ci ne kiak na gui ci. ³³ Chang am shah gui naw, Bawipa Jesuh-am, “Johan ah ng’khah püi gui la pharisee gui ah ng’khah püi gui cu, ashäng shäng ei hlawi ne taigü ci gui, cun ung phi nang ah ng’düihpüi gui läi ei aw ne om ci gui nei” cik ci gui. ³⁴ Bawipa Jesuh naw, “Hta m’um nak ung chumah ciah pami a om ah chuih khin gui cu ei hlawi sak gui khai ang? ³⁵ Cun ung phi chumah ciah pami cu nagmi ung kaa ami hteh nak püi vai ah hnüüp gawk lawk khai nei, cun kawn ah ngami cu ei hlawi khai gui nei” ci ne kiak na gui ci. ³⁶ Bawipa Jesuh naw m’tumtäng nak tumat am thein ba gui cu,” a u naw phi sui akthai k’teek ne, sui akkheei kä k’dawm man ci, cun ah k’dawm ah a kiak ung sui akthai phi di ne, sui akkheei naw phi kä kiom nak khai. ³⁷ Cun kawn ah sapyit tui asü cu um akkheei ung a u naw kä than ci, cun ah than ung sapyit tui phi um k’pawk ung zut zawp ne um phi di khai. ³⁸ Cun ah kia sei sapyit tui asü cu um akthai ung than vai, ³⁹ sapyit tui ak phyim aw pyi ci naw ak thai kä aw ba hlük ci, ak phyim cu ni pi ci,” ci ne kaik na gui ci.

¹ Kyin hnüüp ung Bawipa Jesuh htang loma sun pah ne a hteh zah ung, ang düihpüi gui naw kiung htang cu m’ghawt ne m’hnoi ne ei ci gui. ² Cun cu pharisee gui naw hmu u netah, “Thukhän ung kyin hnüüp ung a i kä bi vai om ci maw, a i ah kia sei bi nami bi ang?” ci ne ng’shi gui ci gui. ³ Bawipa Jesuh naw, “David la ak chang gui naw ei ah cawi u netah ami bilawh gui cu kä nami phat tu man ne ma? ⁴ Ani cu Khanpughi ah pum im kyong ah lut ne, Khanpughi-am ami vawih cu ei ci, ak chang gui phi m’bei gui ci. Cun cu taigü bäng naw a ei vai’ ciah thukhän om te ci maw” ci ne kiak na gui ci. ⁵ Cun kawn ah Bawipa Jesuh naw, “Chang ah Htapa cu Kyin Hnüüp ah Bawipa ah kiak ci” ci ne kiak na gui ci. ⁶ Kyin ba hnüüp ung Bawipa Jesuh cu pum im ah hteit ne m’theithang gui ci. A cu ah ak patlam akut shum ciah chang tumat om ci. ⁷ Pharisee gui la thukhän saza gui cu, Bawipa Jesuh ami m’kat nak vai amawng shui hlü u netah, kyin hnüüp ung cun ah akut shum gai sak hman khai ci ne teng ci gui. ⁸ Bawipa Jesuh naw cun ah ami ngaih hmat netah, akut shum-am, “Ng’düi law ne ma lam ah lawä” ci khätah, cun ah chang cu tho law ne ama lam ah law ne ng’düi ci. ⁹ Cun kawn ah Bawipa Jesuh naw, “Ming’thukhän ung, kyin hnüüp ung ak’ni bi vai ang, akshe bi vai ang, a om? Chang phiawn sak vai ang? chang ngawn vai ang?, ka ning shi gui ci nei” ci na gui ci. ¹⁰ Bawipa Jesuh naw, cun ah chang gui avan teng gui netah, akut shum ci-am, “Na kut k’phiäih ä” ci nak ci. Cun ah chang naw a kut cu k’phiäih khätah, akut cu akni ah kia ba ci. ¹¹ Pharisee gui cu ang htei ah thüi ne m’lungshe u netah Bawipa Jesuh ah khan ah a i hawk cha ah bi bi vai ciah ng’ge ci gui. ¹² Cun kawn ah Bawipa Jesuh cu m’htung ah kai ne, Khanpughi ah mü lüng ne k’taigü ci. ¹³ Khaw thai law khätah ak chang gui ami van khü gui netah, ami van ung kaa gha-lei-goi ghü gui ne, ang düihpüi gui ah, ami ming cu sui gui ci. ¹⁴ Cun ah gha-lei-goi gui cu; (Peter ah a sui ah (Simon, anau Andrew, James la Johan, Philip la Batholome; ¹⁵ Matthe la Thomas, Alphaeus ah hta James, la apakhui m’hni pi ciah Simon, ¹⁶ James ah hta Judas la a ngawi ah Bawipa ga-am ap khai ah Judas Iskariot gui ah kia ci. ¹⁷ Bawipa cu ang düihpüi gui awn khomhtung ah kaa kyum law ba u ne ak chang khli gui awn ng’düi gi cui. Cun kawn ah Judea khaw ah kaa, Jerusalem ah kaa, la Tai-ar la Sidon pigaw gui ung kaa chang akchün om ci gui. ¹⁸ Ngami cu Bawipa Jesuh ah ng’thu ngaih tu vai la gai nak gah tu vai ah lawk ci gui ah kiak ci. Khawshe ah kai gui phi law u ne, gai ne hteit ba ci gui. ¹⁹ Bawipa Jesuh ung kaa hlüngtai nak naw chang khli gai sak khätah, chang gui naw Bawipa Jesuh ami tawn tu hning vai ah k’tha nak ci gui. ²⁰ Bawipa Jesuh naw ang düihpüi gui tän ne teng gui netah, “Pyam tham ciah chang gui zeikiai vä, Khanpughi ah Uknak khaw cu nangmi ah khaw ah kia ci. ²¹ “Cawigha ciah chang gui zeikiai vä, Nangmi cu nami Phü m’ghüm khai nei. “Ang phli li ciah chang gui zeikiai vä, nami zeigaih nak gawk lawk khai nei. ²² “Chang ah Htapa ah hmawk ah chang gui naw, ami ning hnu ng’tuk püi gui ung, ami ning nawng gui ung, chang she ah ami ning pyein gui ung, nami zeikiai vai, ²³ Cun ah mäih nami bui awt law ung nami zeikiai vai, zeikiai ne nami ng’lam vai;khankho ah nangmi ah gah vai cu däm aih ci. Ngami ah pughi gui naw profet gui ah khan ah phi acun ah bi man ci gui. ²⁴ “Cun ung phi, ng’bühmang ciah chang gui ding gei sei nami om ci, Nangmi ung thüi sei nak om ci nei! ²⁵ “Tuhbäi nami plumshau ci gui thüi sei nak om ci. Nangmi, ung cawi gha nak gawk lawk khai nei. “Tuhbäi nami zei gaih ci gui thüi sei nak om ci, ng’phli li sei Nami thüisei nak gawk lawk khai nei. ²⁶ “Chang ah ning m’hlüngtai gui cu thüi sei vai kia ci, Ngami ah pupa gui naw, hleeihlak ciah profet gui phi acun ah M’hlüngtai man ci gui. ²⁷ Cun ung phi ka ng’thu ngai ciah chang gui aw, nami gaa cu m’hni vä, ning thüi na gui ciah khan ah akni bi vä, ²⁸ Ning züi-gen gui ci-am, ng’thu k’ni m’khäh vä, ning hleip taap gui ci-am k’taigü pe vä. ²⁹ Nang being vangtäng ami ning k’beeih ung, vangtäng phi na cuun ba vai, na suinu ami ning guh peit ung, na sui hta phi na peit gui vai. ³⁰ Nang ah ng’zoi lawk ci phung-am na peit vai, na khawhchaam ning lak pek ciah kä na shan-en ba vai. ³¹ Chang naw na khan ah abi vai na ng’zak hlü ah mäih ah, chang ah khan ah na bi vai. ³² “Ning m’hni gui ci bäng nami m’hni tu ba ung, a i hawkcha ah Khanpughi ah hrilham nami gah khai ang? Katnak bik ci gui naw phi m’hni gui ci cu m’hni tu ba ci gui nei. ³³ Nami khan ah akni bik ciah chang ah khan bäng ah akni nami bi tu ba ung a i hawkchaa ah Khanpughi ah hrilham nami gah khai ang? Kat nak bik ci gui phi acun ah mäih ah bik ci gui nei. ³⁴ Ning thung ba gui hlawt khai ah nami ngaih ah chang bäng-am nami k’pu m’hnih ah a kiak ung a i hawk chaa ah Khanpughi ah hrilham nami gah khai ang? Kat nak bik ciah gui ah chang gui phi, Na thung law ba khai ciah ngaih u nak awn chang-am k’pu tuk ci gui nei. ³⁵ Nangmi cu nami gaa nami m’hni vai, chang ah khan ah akni nami bi vai. Gah ba vai ciah kä ngaih u en ah nami ng’pu tu vai. Cun ah nami bi ung nangmi cu hlüngtai ciah m’tamkhah nak gah ne, hlüng pik’bäih ciah Khanpughi ah hta ah nami kiak khai. Cun ah Khanpughi cu m’gein nak kä hmat ci gui la changshe gui ah khan ah akni bik ci. ³⁶ Nami Pa Khanpughi naw a ning m’gein gui ah mäih ah nami ng’gein tu vai. ³⁷ Chang ah kat nak kä na pyein peit vai, cun ung Khangpughi naw na kat nak kä ning pyein Pek khai. Chang kä nami m’shuk chaak vai, cun ung Khanpughi naw kä ning m’shukcha gui khai. Chang ah kat nak nami m’gein vai, cun ung Khanpughi naw nami kat nak ning m’gein gui khai. ³⁸ Chang-am nami peit vai, cun ung Khanpughi naw ning pe ba gui khai. Det ne, khuk ne, m’htung chah ne nami peit ung, a cun ah nami gah ba khai. Nän ne chang-am nami peit nak ung, Khanpughi naw nän ne ning pe ba gui khai” ci ne m’cäi gui ci. ³⁹ Bawipa Jesuh naw am tumtäng nak cu, a mik m’dauh ci naw, amik m’dauh cu lam kä m’shüm hlawt khai, lam am shüm ung ani nik hnih ghem ah lut khai goi. ⁴⁰ Ng’thei tuk ci cu m’thei tuk ciah kä ng’vai pi ci, Cun ung phi ang thei tu zawp kawn ah a saza cu k’phaa hning ci. ⁴¹ Na mät ah mik ek kä hmuh ah na paw ah mik mu ung ng’väi hta cu kä na teng peit vai. ⁴² Na mät ah mik ek kä ghu ah a i cha ah na paw-am na mik ek ning ghu pe vang ci ne, na pyein thei khai zaw? Limmaa ciah chang gui ngai vä, na mät ah mik ek na ghu kawn ah vah na paw ah mik ek hmu ne a ghu vai ah nam thein thei khai ah kiak ci. ⁴³ Aghing nik ci cu shek ci ah kä m’theih ci. Aghing akshe cu akni ah kä m’theih ci. ⁴⁴ Sing am theih awn aghing cu hmat vai kiak ci. Ng’hling sing ung k’thei m’theih sei kä chan man, ng’hlo ma ah sapyit up kä k’bih man. ⁴⁵ Am lung ngaih nik ci cu akni ah ng’thu ng’htau ci, am lung ngaih shek ci cu akshe ah ng’thu ng’htau ci. A i ah kia sei ci ung, chang naw am lung ung om ci vah, a shai awn pyein ci. ⁴⁶ “Ka ng’thu kä ngai lang ne a i ah kia sei Bawipa, Bawipa ci ne nami na khü ang? ⁴⁷ Kei ah law ne ka ng’thu theing ng’za ne läk ciah chang cu lung ung khui shawk ne, k’tung ling ne, im co ci awn täng ci. ⁴⁸ Kho khi ne aa sei tuinu ang güüt law ung phi cun ah im cu khäng khai ah cawh ah kia ne, kä ng’gäi hlawt ci. ⁴⁹ Kei ah pyein ah ng’thu theing cu ng’za lang ne, kä läk ciah chang cu bigin ung khui shawk ne im co ci awn täng ci. Ani cu kho khi ne aa ne tuinu ang güüt law ung ng’gäi ne maih zawp khai” ci ne m’cäi gui ci.

¹ Bawipa Jesuh cu cun ah chang gui am cäi guikawn ah Kapernaum ah hteit ba ci. ² A cu ah Roman gabawi ung beit ng’zak ciah akchangshäm om ci. Ani cu si ghep ghep ne gaw ci. ³ Gabawi naw Bawipa Jesuh ah mawng ng’za netah law ne am gai law tu ba vai ah Judah ng’vai gui tüi ne khü sak gui ci. ⁴ Bawipa Jesuh ah gawk u netah, “Shin ah gabawi cu nang naw nam gein vai ah bä ci nei. ⁵ Ani cu keimi pakhui nam hni gui ne pum im tumat phi na cawh pe gui ci nei” ci ne ng’coi ng’pa ne pyein ci gui. ⁶ Bawipa Jesuh cu ngami awn atäng ah hteit tu ne, gawk law ghep ghep u khätah, gabawi naw chang gui am m’cäi law gui ne, “Bawipa, bawngbai ne kä law hnga ä, kei ah kyong khui cu nang awn kä khin ci nei, ⁷ kei ka mät phi nang ah law khin ciah chang ah kä ka kiak ci, cun ah kia sei, ‘gai sä’ na ci ah khoi ung kak chang cu gai khai nei. ⁸ Kei cu ang vai ah ak ka ung ka om ci, kei ah ka ung phi gakap gui om ci gui. Ngami ung kaa “Htiet ä” ka ci ah chang cu hteit ci, “Law ä” ka ci ah chang cu lawk ci. Ka changshäm cun phi “shin na bi vai” ka ci ung acun cu bik ci” ci ne pyein ci. ⁹ Gabawi ah ng’thu ng’za netah, Bawipa Jesuh cu cäicat ne chang gui teng gui netah, ani ah mäih ah zum ci cu, Israel chang gui ung phi kä ka hmu phak ci nei” cik ci. ¹⁰ Gabawi ah tüih gui cu im ah ami gawk law ba ung changshäm cu ana gai ba pyi sei hmuk ci gui. ¹¹ Cun kawn ah Bawipa Jesuh cu ang Düihpüi gui awn ng’khap ne chang khli naw läk sei Nain gawnu ah hteit ci. ¹² Gaw m’kawt pei ah ami gawk law zah ung chang gui naw gook kawt ne ana luh law püi u sei chang akda naw ana läk lawk ci gui. Cun cu hmeinu ah ahta tumat hta te sik ciah kiak ci. ¹³ Bawipa Jesuh naw cun ah hmeinu cu hmuh ne m’gein aih netah, “Kä kyap ä” ci ne kiak nak ci. ¹⁴ Cun kawn ah gook cu akut awn tawk sei, kawt ci gui cu ng’düm ci gui. Bawipa Jesuh naw, “Phäi hta, tho ba ä” ci khätah, chang k’si cu tho ne ngoh ne ng’htau ci. ¹⁵ Cun kawn ah Bawipa Jesuh naw anu-am ap ba ci. ¹⁶ Chang gui cäicat u netah mik mi ung profet mang tumat dang law pyi ci nei, Khanpughi cu akchang gui hun khai ah law pyi ci nei” ci ne Khanpughi cu m’hlüngtai ci gui. ¹⁷ Bawipa Jesuh ah a mawng cu Judah khopäng la a pei leng avan ung gawk zawp ci. ¹⁸ Johan-am ang khahpüi gui naw, amawng avan m’thein tu u khätah ang khahpüi sing goi khü ne, ¹⁹ Bawipa Jesuh ah tüi netah, “Nang cu kyum lawk khai ci ne kami gin ah Bawipa ah na kiak ci ang? Kä cun ung a hei kami ging ba khai ang?” ci ne ng’shi sak goi ci. ²⁰ Ngani cu Bawipa Jesuh ah om nak ah law ni netah, “Nang cu Kyum lawk khai ci ne Johan naw a pyein ah Bawipa ah na kiak ci ang? Kä cun ung a hei kami ging ba khai ang?’ ci ne ning shi vai ah Tuihnim Johan naw ana tüih law goi nei” ci ne m’thein ci goi. ²¹ Cun zah ung Bawipa Jesuh naw chang akda cu gawpai nak natnak gui ung gai sak gui ne, khoshe phi k’täm ci, amik m’dauh phi m’dei ba sak ci. ²² Bawipa Jesuh naw Johan ah tüih law gui-am, “Hteit ba ne nami hmuh nami ng’zak cu Johan-am m’thein ba vä; amik m’dauh ci gui m’dei ba ci gui, akho ng’khem ci gui hteit ba thei ci gui, kheilei ung gaw ci gui theek ba ci gui, ak hnga pang ci gui ng’za ba ci gui, sik ci gui ghing ba ci gui, dukhaih ciah chang gui naw ng’Thu Ni ng’za pyi ci gui nei. ²³ Kei ah khan ah ang ngaih gep ci cu zeikiai nak akda om ci nei” ci ne m’thein goi ci. ²⁴ Johan ah tüih law goi ani hteh ba kawn ah Bawipa Jesuh naw chang gui-am Johan ah mawng am thein gui cu, “A i nami teng khai ah ang, Johan ah om nak k’pya lün ah nami hteh?, kho khi sei hnün ciah m’long kyai gui nami teng khai ma?, ²⁵ Kä cun ung akni sui sa ne ng’bilawh ci gui nami teng khai ma? Akni sui ei ci gui cu bawimang ah im ung om ci gui nei. ²⁶ Kä cun ung profet nami teng khai ma? Akcang ah profet ah bä pi ci cu nami hmuk khai nei. ²⁷ Cacim theing ung Khanpughi naw, “Na law nak vai ah lam ung ma lawk khai ah ka ng’shä ka tüi lawk khai nei” a ci cu Johan ah kiak ci nei. ²⁸ ‘Anu ah puk ung ng’tüi lawk ciah chang gui nüng ung, Johan ah bämang pi ci cu a u kä om ci nei” ci ne ka ning m’thein gui ci. Cun ung phi Khanpughi ah Uknak kho ung akzaw pi k’bäih cu Johan na mä bämang ba pi ci nei” ci ne m’thein gui ci. ²⁹ Khanpughi ah ng’thu ngai ne Johan ah tuihnim nak gah ci gui ah akhawn look ci gui la chang akda cu, acun ah ng’thu ng’za u netah zeikiai ci gui nei. ³⁰ Cun ung phi Pharisee gui la ng’thukhän hmat ci gui läi cu, Khanpughi ah ng’zak hlü nawng ci gui ah kia ne, Johan ah tuihnim nak cu maa nak ci gui. ³¹ Bawipa Jesuh naw, “Tuhchü chang gui cu a i awn ka m’tumtäng gui khai ang? Ngami cu a i awn täng ci gui ang? ³² Ngami cu sumlei lam ung ngoh u neh, ‘akni ah tum ung kä nami ng’lam ci, thüi kyah nak ng’äi m’cu ung phi kä nami thüi kyap ci’ ci ne ng’htau ci gui ah ak hmawhta gui awn täng ci gui. ³³ A i ah kia sei ci ung Tuihnim Johan law ne, ei kä ei ne, sapyeit tui kä aw ne om sei, ‘ani ung khoshe om ci nei’ nami cik ci. ³⁴ Chang ah Htapa law ne, ei ne aw sei, ‘ei aw aih ci, chang she gui la akhawn look ci gui ng’khawtsheng püi gui ci’ nami cik ci. ³⁵ Cun ung phi Khanpughi ah hmuhmat nak gah pyi ci gui naw, cun ang düng ah mawng cu dang sak ci gui nei” ci ne pyein ci. ³⁶ Pharisee Simon naw Bawipa Jesuh cu mü-ei am bei tu vai ah khü sei, Bawipa Jesuh cu Simon ah im ah hteit ne ei ei vai ah ngo tuk ci. ³⁷ Cun ah gawnu ung kat nak bik ciah hnumi tumat om ci. Ani cu Pharisee ah im ah Bawipa Jesuh ei ei tu ne a om tu ng’za netah, tuing’ui um ät law püi ne, Bawipa Jesuh ah kho pei ah kyap ne ng’düi ci. ³⁸ Ang phli tui gui cu Bawipa Jesuh ah kho khan ah zu hteu khätah, alu sam awn ghu ba ci. Cun kawn ah a khaw cu ng’ui netah tuing’ui awn hluk pek ci. ³⁹ Pharisee Simon naw cun cu hmu netah, “Shin ah chang shi profet akcang ah a kiak läi ung, akhaw k’pan pek ciah hnumi cu a u ah a kiak, a i kat nak bik ciah a kiak ah hmat khai süte” ci ne ngai ci. ⁴⁰ Cun zah ung Bawipa Jesuh naw ani-am, “Simon, ka ning m’thein vai om ci nei” ci ne pyein ci. Simon naw, “Bawipa nam thein ä” cik ci. ⁴¹ Bawipa Jesuh naw, “Ngui ng’pu ciah chang tumat ung ngui pu tuk ciah chang sing goi om ci. Tumat naw phia hma, tumat naw hma-kip ciah pu tuk ci goi. ⁴² Ani nik hnih naw kä thung law ba hlawt ni sei, ngui ng’pu ci naw nawng pe goi ci. Cun ung ngani ung kaa a u naw ngui ng’pu ci cu zei na pi khai ang?” ci ng’shik ci. ⁴³ Simon naw, Ngui akdäm pi a nawng peit ah chang naw zei na pi khai ah ka ngai ci” ci ne pyein ci. ⁴⁴ Bawipa Jesuh naw, “Nang ah ngaih cu hman ci nei,” ci nak ci. Cun kawn ah hnumi lam ah ng’hlat netah, Simon-am, “Shin ah hnumi na hmuk ci ang? Kei cu na im kyong ah ka luh law zah ung khaw m’si nak vai kä na na pek ci. Cun ung shin ah hnumi naw ang phli tui awn ka khaw nam si ne, alusam awn ghu pyi ci nei. ⁴⁵ Nang naw kei kä na na ng’ui ci, cun ung phi shin ah hnumi naw shin ah im ung ka luh law ung tün ne kei ah khaw cu na ng’ui ci nei. ⁴⁶ Nang naw kei ah lu cu kä na na hluk ci, cun ung phi ani naw tuing’ui awn kei ah lu cu hluk pyi ci nei. Cun ah kia sei nang-am ka ning m’thein cu,’ shin ah hnumi cu hmakat nak akda ung kaa phiawng pyi ci nei. ⁴⁷ Cun ah a phiawn ah mawng cu, ani ah däm aih ciah a zum nak naw dang sak ci nei. Akat nak apihta bäng phiawn nak ciah chang cu a zum nak apihta bäng om ci.” ci ne kiak na gui ci. ⁴⁸ Cun kawn ah Bawipa Jesuh naw, “Na kat nak ka ning phiawn sak pyi ci nei” ci ne cun ah hnumi-am kiak nak ci. ⁴⁹ Bawipa awn atäng ah ei ei ci gui ah chang gui naw, “kat nak hngaw phiawn sak hning ci, shin ah chang cu a u ang?” ci ne ami mät ng’cecäk ci gui. ⁵⁰ Cun ung phi Bawipa Jesuh naw, cun ah hnumi-am, “Na zum nak naw ning phiawn sak pyi ci nei, zeikiai ne hteit ba ä” ci ne kiak nak ci.

¹ Api a shou hta kawn ah Bawipa Jesuh cu gawnu gawhta apigaw päng ung hteit ne, Khanpughi ah uknak khaw ah mawng Thu Ni cu shäu ne pyein ci. ² Ang düihpüi gha-lei-goi cun phi ani awn atäng ah hteit tuk ci gui. Khoshe ah kai gui la nat nak ung kaa ak phiawn gui ah hnumi gui cun phi Bawipa Jesuh cu läk tuk ci gui. Cun gui cu; Ng’zo pachih naw a om nak man te phiawn nak gah ciah Mari Makdalen; ³ Herod ah mangkyong ung bawi ah kiak ciah Chuza ah chu Joanna; Susanna la Bawipa Jesuh la ang düihpüi gui-am tu m’bei gui vai ah ami mät ah ei awk phui ne law tuk ci gui ah ahei hnumi akda gui ah kiak ci. ⁴ Apigaw päng ung kaa gawk lawk ciah chang gui cu, apei ah ng’bum law u khätah, Bawipa Jesuh naw shin ah m’tumtäng ne m’thein gui ci: ⁵ Hnü ät ung chang tumat cu loma ah hteit ne m’shi phu ci. A phu ah m’shi am shah cu lam ung kia lawk ci, cun ah m’shi cu chang naw kai na ne, k’phiu kha naw ei zawp ci. ⁶ M’shi am shah cu lung hmu ah kia lawk ci, ng’lih pyou te ci, cun ung phi kä ghing hlawt ne si ba zawp ci. ⁷ M’shi am shah cu ng’hling hmu ah kia lawk ci. Ang lih pyou, a ghing gong pang ung phi ng’hling naw k’düi sei kä vuipai hlawt ci. ⁸ M’shi am shah cu ng’lei k’ni ung kia law ci, cun cu akni ah ng’lih pyou ne, ghing gong ne, phia ciah vuipai m’theih tak ci” ci ne m’thein gui ci. Cun kawn ah “ak hnga om ci naw ng’za sä” ci ne m’lau ci. ⁹ Ang düihpüi gui naw cun ah m’tumtäng ne a pyein hlü ah mawng cu ng’shi u khätah, ¹⁰ Bawipa Jesuh naw, “Nangmi läi cu Khanpughi ah thuuk ne ng’kau ciah khankho ah mawng cu nami hmat pyi ci. Cun ung phi chang akda cu teng lang ne kä hmuk ci gui, ng’za lang ne kä hmat ci gui kia sei, m’tumtäng ne m’thein gui ah kiak ci nei” ci ne pyein ci. ¹¹ Shin ah m’tumtäng ne pyein nak hlü cu; m’shi cu Khanpughi ah ng’thu ah kiak ci. ¹² Lam ung kia lawk ciah m’shi ci cu, Khanpughi ah ng’thu ng’zak ci, cun ung phi ng’zak ci gui naw zum law ne hun nak ami gah vai ah khogam cu ng’ä law netah, ami m’lung kyong ung kaa Khanpughi ah ng’thu cu lak pe gui zawp ci. ¹³ Lung hmu ah kia lawk ciah m’shi ci cu, Khanpughi ah ng’thu ng’za ne zeikiai ne zum ci gui ah kiak ci. Cun ung phi ngami ah m’lung kyong ah Khanpughi ah ng’thu cu kä khäng ne, ashäng hta düt lüng sei tüihtok nak a bui awt law ung maih zei ba ci. ¹⁴ Ng’hling hmu ah kia lawk ciah m’shi ci cu, Khanpughi ah ng’thu ang zak kawn ah kyikyawk ng’ä ng’ai nak, bühmang nak la hlimtui nak gui naw m’khüt sei kä hnün tho hlawt ciah kiak ci. ¹⁵ Ng’lei k’ni ung kia lawk ciah m’shi ci cu, Khanpughi ah ng’thu ang zak kwn ah nik ci la ng’düng ciah, m’lung khäng htek khai ah zum ne, vuipai m’theih tak ciah kiak ci. ¹⁶ “Mei m’däi netah a u naw dawn awn kä uk ci, ih phak kaa ah phi a u naw kä hmoh man ci. Kyong ah lut lawk ci gui naw a deikhang ami hmuh vai ah lung k’pei ung taih ne m’däi ah kiak ci. ¹⁷ Thuh phung ng’dang khai, küp phung ng’hmawng khai, akdei cu khang khai. ¹⁸ Cun ah kia sei nami ngaih ng’zak cu geing na vä, om ciah kaa län ne k’be ba khai, kä om ci ah kaa, a taak hta phung avan lak pek khai” ci ne pyein ci. ¹⁹ Bawipa Jesuh ah anu la anau gui cu a om nak ah lawk ci gui. Cun ung phi chang da aih sei kä hmu hlawt ci gui. ²⁰ Chang gui naw, “Na nu la na nau gui naw ning hmu hlü u ne ak pung ah ning ging ci gui nei” ci ne m’thein lawk ci gui. ²¹ Bawipa Jesuh naw, “Khanpughi ah ng’thu ngai ne ng’za ne läk ciah chang gui cu kei ah ka nu la ka nau ah kiak ci gui nei.” cik ci. ²² Kho hnüüp ät ung Bawipa Jesuh cu ang düihpüi gui awn Hleiko ung ng’cum unetah “Tuili hei gaa ah mi va kai khai nei” ci sei, va pawng vük ci gui. ²³ Hleiko awn cun ah ami vang kah vü sang ung Bawipa Jesuh cu ip ci. Cun zah ung tuili khan ah puikho khi ne ng’pheet law sei, ami hleiko ung tui be law hmet hmet ci. Ngami cu tui ung lut ne di lawk khai gui ah kia lawk ci. ²⁴ Ang düihpüi gui naw Bawipa Jesuh cu m’tho ba u ne, “Bawipa, kami si lawk khai kiak ci nei” ci ne m’lau ci gui. A ih nak ung kaa tho law ba netah, Bawipa Jesuh naw kho khi la tui ng’hmawk cu ng’düm sak ci, kho khi ng’düm ne tui hnawk pyei ci. ²⁵ Bawipa Jesuh naw, “A hawi ang nami zum nak?” ci ne ang düihpüi gui cu kiak na gui ci. Ang düihpüi gui cu cäicat kyikyawk u netah, “Shin ah chang cu a u ang? Kho khi la tui hnawk naw ani ah ng’thu ngai ci gui nei” ci ne ami mät ng’htau ci gui. ²⁶ Bawipa Jesuh la ang düihpüi gui cu Kalile kho hei ga, Kerasa gawnu ah va kai ci gui. ²⁷ Tui kem ah ami va gawk vai-am pigaw ah kaa chang tumat cu Bawipa Jesuh ah om nak ah lawk ci. Ani cu khoshe naw a kai shou law pyi ci kia ne, im ah phi kä om ba ne, ng’cim hmun zung ah ak plui tawn ah om ci. ²⁸ Ani naw Bawipa Jesuh cu hmu netah, kyap ne m’lau ne m’khuukdong ne, “Hlüngtai pi säih ciah Khanpughi ah Htapa, Jesuh Bawi! Kei cu a i hawk cha ah ang na na kiak sak hlü? Kei kä na sheit kat-en sak kä bäi” ci ne ng’paa nak ci. ²⁹ Cun ah a pyein cu Bawipa Jesuh naw ani ung om ciah khoshe a dawng vai ah aktäm ah hmawk ah kiak ci. Ani cu khoshe naw akda vei a kai man ah kiak ci. Ani cu akut khaw avan m’si gui awn khit ne ami k’pawn ung phi, m’si gui kaih pit pit ne khoshe ah khah püi nak, bung puk ah hteit ci man ciah kiak ci. ³⁰ Bawipa Jesuh naw, “Na ng’ming a u ang?” ci ne ng’shik ci. Ani naw, “Kei ka ming cu Mob nei” cik ci. Ani cu khoshe akda naw a kai ah kia sei cun ah a pyein ah kiak ci. ³¹ Khoshe gui naw, “keimi cu m’htei lung khui ung kami gawk khai ah kä na k’täm men gui ä” ci ne ng’cawi ng’paa nak ci gui. ³² Cun zah ung vawk mak ät cu kho gui ng’nawi zung ah lum ci gui. Khoshe gui naw vawk gui ung ami luh hning vai ah Bawipa Jesuh ah ng’cawi ng’pa ci gui. ³³ Bawipa Jesuh naw ä za pe gui sei, chang ung kaa lut law ne vawk gui ung lut ci gui. Acun vai-am vawk gui cu tui kam keing ung ng’hlü ne dawng u ne, tuili ung lut zawp ci gui. ³⁴ A cun gui hmuk ci gui ah vawk shäm ci gui cu, püi ne dawng ne gawnu gawhta akda ung acun ah mawng gui cu ngak ci gui. ³⁵ A cun gui teng tuk khai gui ah chang akda gawk law u ne, Bawipa Jesuh ah pei ah law u netah, Bawipa Jesuh ah pei ah, ng’suisak kha thüüp ne, chang k’ni ah kia ne ngok ciah, khoshe ah kai te ah chang cu hmu u netah ami van kyikyawk ci gui. ³⁶ Khoshe ah kai a phiawn sak hmu tuk ciah chang gui naw gawk law ba ci gui-am amawng avan m’thein tu gui ci gui. ³⁷ Cun ah kho ung chang gui cu ang htei ah kyikyawk u netah Bawipa Jesuh cu akzang ah ahei ah a hteh vai ah pyein u sei, Bawipa Jesuh cu hleiko ung kai ba ne a hei ah hteit ba ci. ³⁸ Khoshe phiawn nak ciah chang naw Bawipa a hnu ah läk tuk khai ah pyein lawk ci. ³⁹ Cun ung phi Bawipa Jesuh naw, “Na im ah hteit ba ne, Khanpughi ah m’gein nak na gah ah mawng cu m’thein tu gui ä” ci nak ci. Cun ah chang naw pigaw avan ung hteit ne ani ah khan ah Bawipa Jesuh naw abi ah mawng cu zei ne ngak ci. ⁴⁰ Bawipa Jesuh cu tuili vang gaa ah gawk law ba khätah ana ging ciah chang gui naw, ana dou ci gui. ⁴¹ Cun zah ung Jairus ming nak ciah chang cu gawk lawk ci. Ani cu pum im uk ciah chang ah kiak ci. Bawipa Jesuh ah khaw pei ah m’khukdong ne a im ah a hteh tu vai ah khü ci. ⁴² A kho kum gha-lei-goi lüng ciah tumat hta ah a hta hnumi cu si ghep ghep ne gaw khätah cun ah a khü ah kiak ci. Bawipa Jesuh cu ani awn atäng ah hteit tu khätah chang akda naw net ne hteit ci gui. ⁴³ Cun gui ah ng’lung ah kho kum gha-lei-goi ung asi ng’chawt sei gaw ciah hnumi tumat om ci. Amät ung om ciah ngui ghui avan ng’pyi khai ah sei saza akda ghüh ne ng’pün ne phi kä gai ba ci. ⁴⁴ Cun ah hnumi cu Bawipa Jesuh ah ahnu ah law netah, azih sui ah a pyai hta tawk khätah, acun vai-am asi ng’chawt ci cu ng’düm ci. ⁴⁵ Bawipa Jesuh naw, “A u ang na tawk ci” ci ne ng’shi gui ci. Chang gui naw, “Kä ka mi ning tawk ci nei” ci ne pyein u khätah, Peter la a paw gui naw, “Bawipa, chang akda naw ning hnet ne hteit ci gui maw a u ang na tawk ci, ci ne a i ah kia sei na pyein ang?” cik ci gui. ⁴⁶ Cun ung phi Bawipa Jesuh naw, “Chang tumat naw kei na tawk ci nei, kei ung ka hlüngtai nak aluh law ka hmat ci nei” ci ne pyein ci ⁴⁷ Cun ah hnumi cu ani naw a tawk hmat law khätah Bawipa Jesuh ah ma ah law ne kawp ci. Cun kawn ah a i ah kia sei Bawipa Jesuh atawk ah mawng la atawk vai-am a gaw nak a maih ah mawng cu chang gui ah ng’zak tu ah pyein ci. ⁴⁸ Bawipa Jesuh naw, “Ka hta hnumi, na zum nak naw ning gai sak pyi ci nei, zeikiai ne hteit baä” ci ne kiak nak ci. ⁴⁹ Cun ah Bawipa Jesuh naw thu a pyein zah ung pum im uk ciah im ah kaa chang tumat gawk law ne, “na hta hnumi si pyi ci nei, saza ng’vai kä khü ling ä” ci ne Jairus-am kiak nak ci ⁵⁰ Bawipa Jesuh naw, cun a ci ng’za netah, Jairus-am, “Kä kyi kyawk kä, azum bäng ah zum ä, na hta hnumi gai ba khai nei” ci ne kiak nak ci. ⁵¹ Bawipa Jesuh cu pum im uk ciah im ah ahteh zah ung Peter, Johan, James la cun ah ak hmaw ah nu la pa bäng kyong ah luh püi gui ci. Cun ah hnumi hta sik ci kia sei chang akda cu kyap ci gui. ⁵² Bawipa Jesuh naw, “Kä kyap vä, shin ah ak hmaw cu kä sik ci nei, ip ci nei” cik ci. ⁵³ Hnumi hta si pyi ciah hmat ciah chang gui naw, Bawipa Jesuh cu m’lep nak ci gui. ⁵⁴ Bawipa Jesuh naw hnumi hta ah kut cu k’pang netah, ⁵⁵ “Paihta, tho lawä” cik ci. Hnumi hta cu ghing law ba ne acun vai-am ng’düi lawk ci. Bawipa Jesuh naw cun ah hnumi hta-am ei ami m’bei vai ah m’cäi gui ci. ⁵⁶ Anu pa gui cu ang htei ah cäicat ci gui. Cun ung phi shin ah amawng gui kä ami pyein sak vai ah ng’thu khän gui ci.

¹ Bawipa Jesuh naw ang düihpüi sing gha-lei-goi cu a pei ah khü gui netah, khoshe m’khüt nak la nat nak näng nak ah hlüngtai nak la m’khüt näng nak cu ap gui ci. ² Cun kawn ah Khanpughi ah uknak kho ah mawng ami pyein vai la gawpai ci gui ami gai sak vai ah mawng m’cäi ne tüi gui ci. ³ “lam ah ei-mang vai a i phi kä nami hteh püi vai; ng’sho htung, awi k’bah, sho-ei, ngui ghui a i phi kä nami hteh püi vai. Sui phi kä nami m’shawih vai. ⁴ Nami gawk nak ah pigaw ah ning dou gui sei nami kai nak ma ah im ung kä nami hteh ba pha ah chuih nami om tu vai. ⁵ Nami gawk nak ah pigaw ah a u naw kä a ning dou gui ah akiak ung, cun ah pigaw ung kaa nami ng’düih law ba ung, ng’thu m’shi sho ah nami khawpha ung kaa, m’vut nami khawn ba shüt vai” ci ne m’cäi gui ci. ⁶ Ang düihpüi gui cu ng’düi law ne hteit ne apigaw päng ung hun nak Thu Ni shäu ne pyein u ne, gawpai ci phi gai sak ci gui. ⁷ Kalile kho uk ciah Herod mang cu Bawipa Jesuh ah bi ng’za netah ang htei ah ang ngaih awng-aa ci, A i ah kia sei ci ung chang am shah naw, “Tuihnim saza Johan tho ba ci nei” cik ci. ⁸ Am shah naw, “Elijah law ba ci nei” cik ci, am shah naw, “cau profet tumat ghing ba ne law ba ci nei” cik ci ah ami pyein gui cu Herod mang naw ng’za netah, ⁹ “Kei naw Johan ah lu ka m’chün pyi ci, tuhbäi a ming ka ng’zak ah chang cu a u ang?” ci ne Bawipa Jesuh cu ahmuh vai ah k’tha nak ci. ¹⁰ Ang düihpüi gui cu law ba u ne ami bilawh gui avan cu Bawipa Jesuh-am m’thein law ba ci gui. Bawipa Jesuh naw ngami cu Bethsaida gawnu ah khü ne hteh püi gui ci. ¹¹ A cun ah mawng cu ng’za u netah, chang akda naw a hnu ah läk lawk ci gui. Bawipa Jesuh naw chang gui cu dan gui ne Khanpughi ah uknak kho ah mawng cu m’thein gui ci. Gawpai ci gui phi gai ba sak gui ci. ¹² Khohni sip ne kho mü hun law khätah, ang düihpüi gui cu Bawipa Jesuh ah law u ne, shin ah chang gui shi, pigaw gui la lo k’pyu gui zung ah ami ih om tu vai la ami ei awk tu vai ah tüih gui vai nei, shin zah cu chang ah kä om nak ah kiak ci nei” ci ne pyein ci gui. ¹³ Bawipa Jesuh naw, “Na mi mät naw ei m’bei gui vä” cik ci. Ang düihpüi gui naw, “Keimi ung m’htut pum hma la nga hnih hta bäng vah om ci, Shin ah chang gui avan ah ei vai cu hteit ne kami khleih vai ang?” ci ne ng’shik ci gui. ¹⁴ (Cun ung chang avan phia-hma-kip lawk ci gui). Bawipa Jesuh naw ang düihpüi gui-am, “Chang hma-kip ciah ng’bum khai ah ngoh sak gui vä” ci ci. ¹⁵ A cun ah ami ngoh sak gui kawn ah, ¹⁶ Bawipa Jesuh naw m’htut pum hma la nga hnih cu la netah, M’htut la nga cu k’bou ne chang gui-am ami tei gui vai ah ang düihpüi gui-am pe gui ci. ¹⁷ Chang ami van naw ami phü ah ei ci gui. Ami ei k’pawih avan m’dawn ba u sei, them dawn gha-lei-goi ung be lawk ci. ¹⁸ Kho hnüüp ät ung Bawipa Jesuh cu amät taigü ne a om zah ung ang düihpüi gui cu a pei ah law u khätah, Bawipa Jesuh naw, “Chang gui naw kei cu a u ah ang ami na ngaih” ci ne ng’shi gui ci. ¹⁹ Ang düihpüi gui naw, “Chang am shah naw tuihnim Johan nei cik ci, chang am shah naw Elijah nei ci ci, chang am shah naw cau kaa ghing ne law ba ciah Profet nei cik ci” ci ne pyein ci gui. ²⁰ Cun kawn ah Bawipa Jesuh naw, “Nangmi naw mä, kei cu a u ah ang nami na ngaih?” ci ne ng’shi gui ci. Peter naw, “Nang cu Khanpughi ah Messiah nei” ci ne ng’kiaa ne pyein ci. ²¹ Bawipa Jesuh naw acun ah mawng api ah phi kä ami ngak-en vai ah m’cäi gui ci. ²² Cun kawn ah Bawipa Jesuh naw, “Chang ah Htapa naw zaica nak akda awt khai, chang ng’vai gui, taigüpa gui, thukhän saza gui naw, shedam nak khai gui. Ani cu sih nak phi awt khai, cun ung phi ak hnüüp thum hnüüp tho ba ne ghing ba khai” ci ne ang düihpüi gui-am m’thein gui ci. ²³ Cun kawn ah Bawipa Jesuh naw chang gui-am, “Kei ah ng’khahpüi ah kia hlük ciah chang naw, amät ah hmawk nawng shüt ne, amät ah kutlam tung cu, ak hnüüp tä kawt netah ka hnu ah na läk sä. ²⁴ A ghin nak ka ng’vang ci cu, a ghin nak maih khai, kei ah hmawk ah a ghin nak pek ci cu, ghin nak gah khai. ²⁵ Chang cu khomdek khan avan akhäm ung phi a ghin nak amaih ung a kholä ah kiak ci. ²⁶ Kei la kei ah ng’thu ah hmawk ah lü ng’aa ciah chang cu, chang ah Htapa amät ah bämang nak la Apa ah bämang nak, khankho chang theing gui ah bämang nak awn, a kyum law ba hnüüp ung, ani ah hmawk ah lü ng’aa nak om khai. ²⁷ Kei naw nangmi-am akcang ka pyein cu, shin ah kho ung chang am shah cu Khanpughi ah uknak kho kä mi hmuh pha ung kä sik khai gui nei.” cik ci. ²⁸ Cun ah ng’thu a pyein nak, ak hnüüp chih nak ung Bawipa Jesuh cu Peter, Johan, James, ni gui awn taigü vai ah khomhtung ah kai ci gui. ²⁹ Ak taigü zah ung a müi hmai cu ng’khuk hlat ne, asuisak phi a bawk ah pyü ne khang lawk ci. ³⁰ Chang hnih cu ang ghit ah ng’dang law ni ne, Bawipa Jesuh awn ng’thu ci goi. Ngani cu Moses la Elijah ah kiak ci. ³¹ Ngani cu Khankho bämang nak awn kyum law ni ne, Khanpughi ah ng’zak hlü ah Jerusalem ung kä shou pha seih Bawipa Jesuh asih law vai ah mawng cu pyein ci goi. ³² Peter la apaw gui cu ngam ne ip ci gui. Cun ung phi ami ng’shüm law ba ung Bawipa Jesuh ah pyü khang nak la ani awn atäng ah ng’düi ciah chang goi cu hmuk ci gui. ³³ Cun ah chang goi maih law ba ni khätah Peter naw, “Bawipa, shin zah cu om nak ah nik ci nei, nang ah hmawk ah phung tumat, Moses ah hmawk ah phung tumat, Elijah ah hmawk ah phung tumat, phung tung thum ah kami co khai nei ci ne, ang shüm kang ah pyein ci. ³⁴ Cun ah a pyein zah ung khomei kai ne ami khan ah ng’hniim law gui sei ang düihpüi gui cu kyikyawk ci gui. ³⁵ Cun zah ung khankho ah kaa k’aw cu, “Shin cu kei ah Htapa nei, ani cu ghü ne ka m’düih pyi nei, ani ah ng’thu nami ngaih vai nei” ciah thang lawk ci. ³⁶ Cun ah k’aw ang thang law kawn ah Bawipa Jesuh amät bäng ng’düi sei, ang düihpüi gui naw hmuk ci gui. Cun ung phi cun ah ami hmuh ah mawng cu cun zah ung api ah phi kä pyein ah adüm ah om ci gui. ³⁷ Angawi ung Bawipa Jesuh la ang düihpüi gui cu m’htung ah kaa kyum law ba u sei, chang akda naw ana dou ci gui. ³⁸ Chang gui ah ng’lung ah kaa tumat naw, “Bawipa, Kahta na teng law tu peä, tumat hta bäng ah ka hta nei, khoshe naw kai sei, akten ah m’lau ci ci. ³⁹ Khoshe naw ani cu m’lau ne ng’tat khai ah ci sei, am shi phawp phi hmoh ci ci nei. Ani cu ang htei ah bawngbai zaica khai ah ci ne tah khoshe cu lut law ba ci ci. ⁴⁰ Na ng’düihpüi gui cu khü ne ka k’täm sak gui ung phi ngami naw kä m’khüt ci gui nei” cik ci. ⁴¹ Bawipa Jesuh naw, “Zum nak kä om ciah hmu ah ng’hlat ba thei ciah chang gui, kei naw nangmi a i güt ka ning ngäng gui khai ang? ci netah a cun ah chang-am, “Na hta cu law püi zä” ci nak ci. ⁴² Cun ah ak hmaw a gawk law zah ung khoshe naw m’gaw law ba sei m’dek ung ng’tat ne, ng’khlet ne ng’zän ci. Bawipa Jesuh naw khoshe cu k’täm ne, ak hmaw cu gai sak netah, apa-am ap ba ci. ⁴³ Chang gui cu Khanpughi ah küikyang hlüngtai nak cu hmu u netah cäicat ci gui. Chang gui naw abilawh gui ah phäh ah ami cäicat zah ung, Bawipa Jesuh naw, ⁴⁴ “Chang ah Htapa cu chang gui ah kut ung ap khai gui nei, Cun cu kä nami m’hnih-en vai nei.” ci ne ang düihpüi gui-am kiak na gui ci. ⁴⁵ Cun ung phi ang düihpüi gui naw kä hmat ci gui. Shin ah ng’thu cu kä ami hmat vai ah ng’zih ci, cun ung phi Bawipa Jesuh cu kä ng’shi veing ci gui. ⁴⁶ Ang düihpüi gui cu ami mät gui zung kaa a u ang ak bä pi k’bäih ci ne, ng’cuh ci gui. ⁴⁷ Bawipa Jesuh naw, cun ah ami ng’cuh cu ng’za netah, ak hmaw tumat khü ne a pei ah m’düih ci. ⁴⁸ Cun kawn ah Bawipa Jesuh naw, “Kei ah ming awn shin ah ak hmaw dou ci cu, kei na dou ci ah kiak ci, kei na dou ciah chang cu, kei na tüi lawk ci dou ciah kiak ci, Nangmi ung kaa ak zaw pi k’bäih cu ak bä pi k’bäih ah kiak ci” cik ci. ⁴⁹ Johan naw, “Bawipa nang ah ming awn khoshe k’täm ciah chang tumat kami hmuk ci, ani cu mik mi ah paw ah kä kiak ci, keimi naw ani am nang Bawipa Jesuh ah ming awn, kä abi vai ah kami maa nak shüt nei” cik ci. ⁵⁰ Bawipa Jesuh naw, “Cun ah chang kä maa-en na vä, nangmi kä ning hnungtuk püi gui ci cu, nami chang ah kiak ci nei.” ci na gui ci. ⁵¹ Khankho ah a kai ba vai ng’et law khätah Bawipa Jesuh cu Jerusalem ah hteh vai ah k’bäi ci. ⁵² Cun ah kia sei ak chang gui cu, a i baw ana bi lawk khai gui ah Samaria pigaw tumat ah hei k’hma gui ci. ⁵³ Cun ung phi Bawipa Jesuh naw Jerusalem ah a hteh lam ah kia sei, pigaw ah kaa gui naw ana maa nak ci gui. ⁵⁴ Cun gui cu ang düihpüi James la Johan naw hmu ni netah, “Bawipa, Khankho ah kaa, mei k’däi kia law ne a uih gui vai ah, nang ng’zäk hlü om ne ang?” ci ne ng’shik ci goi. ⁵⁵ Bawipa naw ngani cu akni ah m’cäi goi ci. ⁵⁶ Cun kawn ah Bawipa Jesuh la ang düihpüi gui cu a hei pigaw tumat ah hteit ci gui. ⁵⁷ Cun ah ami hteh zah ung chang tumat naw Bawipa Jesuh-am, “Na hteh nak päng ah ka ning läk khai nei” cik ci. ⁵⁸ Bawipa Jesuh naw, “Sa ui cu a khui om ci, kha phi ang bu om ci, cun ung phi chang ah Htapa alu m’chim ne ang düm nak vai phi kä om ci. ⁵⁹ Bawipa Jesuh naw, a hei chang tumat-am, “Na läk law ä” ci nak ci. Cun ung phi ani naw, “Kapa ah gook cu ka va m’cim ba cang khai nei” cik ci. ⁶⁰ Bawipa Jesuh naw, “Aksi cu aksi gui naw m’cim u sä, nang hteit ne Khanpughi ah Uknak kho ah mawng cu na pyein vai nei” ci nak ci. ⁶¹ A hei tumat naw, “Bawipa, ka ning läk khai nei, cun ung phi ka kyong ung kaa gui ka va gidam ba gui cang khai” cik ci. ⁶² Bawipa Jesuh naw, “Vintang, m’hachaa kawt ne, ahnu ah va mang ba ci cu Khanpughi ah Uknak kho ah hmawk ah a i ah kä mawng ci nei” ci na gui ci.

¹ Cun kawn ah Bawipa Jesuh naw ang khah püi chang sing chih-kip-lei-goi cu ghü ba gui netah, chang sing goi ci ah ng’khap sak gui ne, amät ah a hteh law nak vai ah pigaw gui ung tüi gui ci. ² Bawipa Jesuh naw, “Htang m’guh ah vai akda om ci, cun ung phi aat ciah chang cu ken aih ci. Cun ah kia sei htang m’guh aat khai akda tüih vai ah htang m’guh nak ciah ma ah taigü vä. ³ Hteit vä! Hngei khli ah ng’lung ah htome chah mäih ah ka ning tüi gui ci nei. ⁴ Ngui ng’ip, ng’za, phahnak a i phi kä nami hteh püi vai. Lam ah ng’düi ne a u phi kä nami zavaih vai. ⁵ A u ah im ung phi nami luh ah a kiak ung, “Shin ah kyong khui ung ding gei nak om sä” ci ne nami taigü vai. ⁶ Cun ah im ung dim deeih nak ng’za hlük ci a om ung, nangmi ah taigü cu ani ah khan ah gawk khai. Cun ah mäih ah chang a u kä ah om ung nami k’taigü nak cu nami mät ung gawk law ba khai. ⁷ Nami om nak tu ah im ung ami ning m’bei m’awk tu gui nami ei awk tu vai, a i ah kia sei ci ung bi bik ci naw ng’cheng gah khai ah kiak ci. Nami om nak tu htük ah im ung kaa naw, a hei im ah kä nami ng’plon-en vai. ⁸ Nangmi ning dou gui ciah pigaw ung ami ning tu m’bei tu gui nami ei awk vai. ⁹ Cun ah pigaw ung gawpai ci gui nami gai sak gui vai. Cun kawn ah ngami ung, “Khanpughi ah Uknak kho gawk law pyi ci” ci ne nami m’thein gui vai. ¹⁰ Nangmi kä ning dou gui ciah pigaw ung lam ung ng’düi netah, “Nangmi ah ma ah ng’thu m’shi sho ah kami kho ung kaa m’vut kami khawng shüt ci. ¹¹ Cun ung phi Khanpughi ah Uknak kho cu nangmi ah pei ah gawk law pyi ci, nami hmat vai nei” ci ne nami m’thein gui vai. ¹² Kei naw akcang ka pyein cu, m’khoichaa nak ah hnüüp ung cun ah gawnu cu Sodom gawnu ah mä she tu ba khai nei. ¹³ Aw Chorazin! nang ah phäh ah kyikyawk aih vai kiak ci nei, Aw Bethsaida! nang ah phäh ah phi kyikyawk aih vai kiak ci nei. Nangmi ung bilawh gui ah cäi aih vai gui cu, Tai-ar la Sidon gawnu gui ung bilawh vai sü ung, cun ah gawnu gui cu a cau ä pui ge ung ng’zu nak sui sui ne m’vut khui ung ngo ne ng’zu ba pyi khai sü gui ah kiak ci. ¹⁴ M’khoichaa nak ah hnüüp ung nangmi ah mä Tai-ar la Sidon ah khan ah Khanpughi ah m’gein nak cu ng’dang tu ba khai nei. ¹⁵ Aw Kapernaum gawnu! Nang cu khankho ah gawk khai ah m’hlüngtai vai na ng’za hlük ci ang? nang cu m’htei kho ah ning zuk buh hlit vai nei” cik ci. ¹⁶ Bawipa Jesuh naw, Ang düihpüi gui-am, “nangmi ah ng’thu ngai ci cu kei ah ng’thu ngai ci, nangmi ning nawng gui ci cu, kei na nawng ci, kei na nawng ci cu, kei na tüi lawk ci cu nawng ciah kiak ci” ci ne m’thein gui ci. ¹⁷ Ang khah püi chih-kip-lei-goi cu ang htei ah zeikiai ne law ba u netah, “Bawipa, nang ah ming awn khoshe gui phi kami näng ci nei” ci ne pyein law ba ci gui. ¹⁸ Bawipa Jesuh naw, “Khankho ah kho alai-läp ah mäih ah Satan cu kia law sei ka hmuk ci. ¹⁹ Ngai vä, nangmi-am m’khüt näng nak ka ning pe gui pyi ci nei. Am äm-ah k’phyu m’khaw gui la Satan khoshe ga nüng nüng nami m’khüt näng khai nei. ²⁰ A i gaa phi nami khan ah gawk lawk khai, cun ung phi khoshe nami m’khüt näng ah phäh ah kä zeikiai vä, khankho ah nami ming guk pyi ah phäh ah zeikiai vä” cik ci. ²¹ Cun zah ung Bawipa Jesuh cu Mumcha Theing awn zeikiai nak gah netah, “Khankho la khomdek ah Pa Khanpughi, hmuhmat tatlah ci gui ah ma ah, nam zih cu kä hmuhmat ci gui ah ma ah ng’dang sei ka ning m’hlüngtai ci. Aw Kapa cun cu na mät ah ng’zak hlü ah kiak ci. ²² Kapa Khanpughi naw apäng avan na pyi ci. Ahtapa cu a u ciah hmat ci cu Kapa ah kawn ah a u kä om ci. Kapa cu a u ciah hmat ci cun phi Ahtapa la Ahtapa naw m’dang khai ah a ghü ah chang ah kawn ah a u kä om ci. ²³ Cun kawn ah Bawipa cu ang düihpüi gui lam ah ng’hlat netah, “tuhbäi nami hmuh teng gui hmuh teng nak cu ang htei ah zeikiai vai kiak ci. ²⁴ Kei naw akcang ka pyein cu, profet gui la ghangpughang gui naw, nangmi ah hmuh gui shi hmu hlü te ci gui, cun ung phi kä hmu hlawt ci gui. Nangmi ah ng’zak gui shi ng’za hlü te ci gui, kä ng’za hlawt ci gui” cik ci. ²⁵ Thukhän saza tumat cu Bawipa Jesuh ah pei ah law netah, “Sazapa, ang täi ghin nak ka gah vai ah a i ang ka bi kaw?” ci ne a phawtcam nak ah ng’shik ci. ²⁶ Bawipa Jesuh naw, “Cacim ung a i ah nei a om? Nang naw a i ah nei na hmat?” ci ne ng’shi tu ba ci. ²⁷ A cun ah chang naw, “Na Khanpughi na Bawipa cu, na m’lung kyong avan, na hmuhmat nak avan, na k’thagui avan la na ngaih tüh nak avan nawn na m’hni vai; na ng’kho chang cu na mät awn m’täng ne nam hni vai” ciah om ci nei cik ci. ²⁸ Bawipa Jesuh naw, “nang cu na hman ci, a cun ah na bi ung ang täi ghin nak na gah khai nei” cik ci. ²⁹ Thukhän saza naw amät ah hmuhmat nak m’dang hlü netah, “Kei ah ka ng’kho chang cu a u ang?” ci ne ng’shi ba ci. ³⁰ Bawipa Jesuh naw, “Hnüüp ät ung chang tumat cu Jerusalem ah kaa Jerikho ah a hteh nak lam ah, m’guk ei gui naw hmu u netah asuisak a khawh avan gut u ne, m’ghuih zät zät ne m’shäm shüt u sei, kä sih kä ghin ah a na ng’zän ci. ³¹ Taigüpa tumat cu cun ah lam ung hteit ne ani cu hmuk ci, Cun ung phi lek ne hteh tak ci. ³² A cun ah mäih ah levi chang tumat cun phi law ne, leim ciah chang cu hmu ne teng netah lek ne hteh tak ci. ³³ Cun ung phi Samaritan chang tumat cu cun ah lam ung a hteh nak lam ah leim ne ng’zän ciah chang cu hmu netah, ang htei ah m’gein ci. ³⁴ Ani cu a pei ah hteit ne ak hma leim gui cu tui la sapyit tui gui awn, m’si pe ne akni ah hlawp tu netah, ang se ung taih ne ng’et ciah im ah hteh püi ne m’hteit tuk ci. ³⁵ A ngawi ung hteit law ba vai netah, im mah-am ngui phe m’ku pe shüt ne, “shin ah a leim cu akni ah m’htei tu vä, ng’pyi ciah a phu avan ka law ba lam ah ka ning pe gui khai nei” cik ci. ³⁶ Cun ah thum gui ung kaa, m’guk ei ah k’phleim ah chang ah ng’khochang cu a u ah kiak khai ah na ngai ci ang?” ci ne ng’shik ci. ³⁷ Thukhän saza naw, “Ak leim cu m’gein ne m’htei tuk ciah chang ah kiak ci nei” cik ci. Bawipa Jesuh naw, “Nang hteit ba ne ani ah mäih ah na bi vai” ci ne kiak nak ci. ³⁸ Bawipa Jesuh la ang düihpüi gui cu lam ami hteh nak ah pigaw tumat ung gawk lawk ci gui. Cun ah pigaw ung Mahta ming nak ciah hnumi tumat naw dou ne khin na gui ci. ³⁹ Mahta ung Mari ming nak ciah a nau tumat om ci. Ani cu Bawipa ah pei ah ngo ne ang thu ngai ci. ⁴⁰ Mahta cu khinchah nak gui vai bilo tawtlaw aih netah Bawipa ah ma ah, “Bawipa, ka nau Mari cu khin chah nak vai bilawh avan, kei bäng am na bilawh sak ci kia sei, law ne ana bilawh law püi vai ah pyein ä,” cik ci. ⁴¹ Bawipa Jesuh naw, “Mahta, Mahta, nang cu bilawh gui vai ah nang ä aih ci, nang ung hlü ci tumat om ci. ⁴² Mari naw akni pi ghü pyi ci, cun cu a u naw kä gut hlawt khai” cik ci.

¹ Kho hnüüp ät ung Bawipa Jesuh cu amät taigü ne om ci. Ak taigü zawp kawn ah ang düihpüi tumat naw, “Bawipa, Johan, naw ang khahpüi gui-am am thein gui ah mäih ah taigü vai na m’thein gui ä” cik ci. ² Bawipa Jesuh naw, “Nami taigü ung shi chaa ah nami taigü vai; “Khankho ah om ci kami Pa, Na ming theing thang sä, Na uknak gawk law sä, Khankho ah mäih ah m’dek khan ah phi Na ng’zak hlü cu be sä, ³ “Ak hnüüp tä kami ng’büh nak vai Ei na pe gui ä. ⁴ “Na kat na gui ci kami m’gein ah mäih ah Kami kat nak na m’gein gui ä, Tüihtok nak ung kä gawk vai ah, Kä nik ci phung ung na m’htei gui ä”, ci ne nami taigü vai cik ci. ⁵ Cun kawn ah Bawipa Jesuh naw, “Nangmi ung kaa chang tumat cu kho cawih ding ah a teihpüi ah im ah hteit ne,’ m’htut pum thum na k’pu toä, ⁶ lam hteit te ci ka teihpüi ka im ah gawk law sei ka m’bei tu vai kä om ci nei” ci ne va pyein khai. ⁷ Im mah naw “Kä na k’pam cai gui ä, choh kami khai pyi ci nei, kei ka hta gui awn kami ip pyi ci nei, let law ba ne m’htut kä ka ning hang pe ba hlawt khai nei” ci ne kyong ah om ne ak pyein khai. ⁸ Im mah naw ka teihpüi ah kiak ci, ci ne let law ba ne m’htut kä hang pe ba khai. Cun ung phi ani cu kä lü ng’aa ne ang zawih laih laih ah a kaik ung im mah naw let law ba ne m’htut cu hang pe ba ling khai. ⁹ Kei naw akcang ka pyein cu, ng’zoi vä nami ng’zoih ung nami gah khai, shui vä nami shui ung nami hmuk khai, choh cu khäk vä nami khäk ung choh cu ng’hmawng khai. ¹⁰ Ng’zoi ci naw gah khai, shui ci naw hmuk khai, choh khäk ci cu hmawn pek khai. ¹¹ Nangmi ung kaa a u naw a hta-am nga ang zoih ung k’pyu pek khai ang? ¹² Ai m’tui ang zoih ung m’khaw pek khai ang? ¹³ Nangmi cu changshe ah kia pang u ne phi nami hta gui-am akni nami peit gui ung, khankho ah om ciah nami Pa Khanpughi naw ng’zoi ciah chang gui-am Mumcha Theing cu akbä ah pek khai nei” cik ci. ¹⁴ Bawipa Jesuh naw, chang awng-ang ung kaa khoshe k’täm sei, khoshe a dawng kawn ah cun ah chang cu ng’thu law thei ci. ¹⁵ Chang gui cu cäicat ci gui, cun ung phi chang am shah naw, shin ah Bawipa cu kho gui ah ng’vaipi Beelzebulah ah peit ah k’thagui awn khoshe k’täm ci nei” cik ci gui. ¹⁶ Chang am shah naw, ami phawtcam nak ah, “Khanpughi ah cäicat vai tumat m’dang law ba ä” cik ci gui. ¹⁷ Bawipa Jesuh naw, ngami ah ngaih hmat gui netah, “Khopäng tumat ung chang gui ami ngaih ang pai ah a kiak ung cun ah kho cu kä shou pha sei dimaih khai, kyong khui tumat tung chang gui cu ami ngaih ang pai ung cun ah kyong khui cu kä shou pha sei dimaih khai. ¹⁸ Khoshe gui ah kho ung ami ngaih ang pai ung kä kawng ät thei khai gui. Nangmi naw Beelzebulah ah na peit ah k’thagui awn khoshe ka K’täm ciah nami pyein ci. ¹⁹ Kei naw Beelzebulah ah angming awn khoshe ka k’täm ciah a kiak ung nangmi ah chang gui mä a u ah ming awn nei khoshe cu ami k’täm? Nami mät ah chang gui naw nami hma ah mawng m’dang ci gui nei. ²⁰ Cun ung phi kei naw Khanpughi ah hlüngtai nak awn Khoshe ka k’täm ci kia sei, Khanpughi ah uknak ah kho cu nangmi ung gawk law pyi ci nei” cik ci. ²¹ “K’thamah ciah chang naw ak pyu a im a ngäng ung akhawh cham cu ngaih gep ci. ²² Cun ung phi ani ah mä k’thagui däm tu ba ciah chang law ne ani cu am khüt näng ah a kiak ung ani ah ngaih u ah likhim gui phi gut zawp ne akhawh cham gui phi gut zawp ne, amät ah chang gui- am k’pai gui khai. ²³ “Kei lam ah kä om ciah chang cu kei na hnungtuk püi ciah kiak ci. Kei awn atäng ah kä ng’bum tuk ciah chang cu pyäi pyah ciah kiak ci. ²⁴ Khoshe cu chang ung kaa lut law ne, a hei ah a hteh ung khopuk ung hteit ne a om nak vai shui ci, shui ne kä a hmuh ung, “Ka om nak man ah ka hteit ba khai” ci ne ngaih tüh ba ci. ²⁵ Cun ah kia sei ani cu a om nak man nah law ba ne teng law ba netah theingthap sei hmuk ci. ²⁶ Cun kawn ah a mät ah mä sheka tu ba ci khoshe sing chih va khü tu ba netah, lut ne om ci gui. Cun ah kia sei khoshe ah kai ah chang ah a khüt nak cu, ak htük ah mä ka law pi ci” ci ne m’cäi gui ci. ²⁷ Bawipa Jesuh naw, cun ah am cäi gui kawn ah chang khli ah ng’lung ung kaa hnumi tumat naw, “Nang ning hta na ne, ning m’ghin ciah hnumi ah khan ah zeikiai nak om sä” cik ci. ²⁸ Cun ung phi Bawipa Jesuh naw, “Khanpughi ah ng’thu ngai ne läk ciah khan ah zeikiai nak om sä, ci ung ni pi khai nei” cik ci. ²⁹ Chang gui akda ng’bum law u khätah Bawipa naw, “Tuhchü chang gui cu ang htei ah shekha ci gui nei. Ngami naw cäi aih vai m’dang vai k’thäh ci gui. Cun ung phi Jonah naw cäiaih vai abi ah kawn ah a hei kä m’dang vai nei. ³⁰ Nineveh chang gui ah hmawk ah Jonah cu cäiaih vai ah a kiak ah mäih ah tuhchü chang gui ah hmawk ah chang ah Htapa cu cäiaih vai ah kiak khai nei. ³¹ Thu m’chaa nak ah hnüüp ung Sheba kho ah Bawinu cu ng’düi ne tuhchü chang gui cu ning m’kyuk gui khai. A i ah kia sei ci ung ani cu Solomon ghangpughang ah ng’thu thuuk ngai khai ah khocawi ah kaa gawk lawk ciah kiak ci. Tuhchü shin ung Solomon ah tah hlüngtai pi ci gawk lawk ci nei. ³² Ng’thu m’chaa nak ah kho hnüüp Nineveh chang gui naw ng’düi law u neh nangmi cu ning k’shedam na gui khai gui nei, a i ah kia sei ci ung ngami cu Johan ah ng’thu ng’za u ne, ami kat nak ung kaa ng’zu ba pyii ci gui ah kiak ci. Kei naw akcang ka pyein cu, thubäi shin ung Jonah ah hlüngtai pi ci gawk law ci nei. ³³ Mei m’däi ci naw kä thup man ci, dawn awn phi kä uk man ci. Kyong ah lut lawk ci gui naw akdei ami gah vai ah lung k’pei zung taih ne m’däi man ci gui. ³⁴ Mik cu pumsa ah akdei ah kiak ci. Nami mik a ci ah akiak ung nami pumsa avan khang khai. Nami mik kä a ci ah a kiak ung nami pumsa avan hmüp khai nei. ³⁵ Cun ah kia sei nangmi ung om ciah akdei cu ak hmüp ah kä a kiak- en vai ah nami geing nak vai nei. ³⁶ Akcang ah nami pumsa avan cu ak hmüp kä om ne akdei khang ah a kiak ung, mei k’däi cu nami khan ah dei ne akhang ah mäih ah nami pumsa avan cu dei ne khang khai nei.” cik ci. M’kyuk Gui Ci. ³⁷ Bawipa Jesuh cu cun ah ng’thu a pyein kawn ah a im ah ei ei vai ah pharisee tumat naw khü law sei hteit tu ne ei ei vai ah ngo tuk ci. ³⁸ Bawipa Jesuh naw kut kä m’si ah ei ei vai ne pawng sei, pharisee gui naw hmu u ne ngai khit u khätah. ³⁹ Bawipa Jesuh naw, “Nangmi pharisee gui, nami ei bei, um-k’am gui akpung ah theing khai ah nami m’si ung phi, nami m’lung kyong läi cu ng’tuk ng’ah nak hlü la shetkat nak awn be ci nei. ⁴⁰ Chang shekha gui aw, akpung piang ci naw akyong phi piang ciah kä kia ne ang? Nami eikbei, um k’am avan cu dukhaih ci gui-am pe gui vä. ⁴¹ Cun ah nami bi ung nangmi ah hmawk ah avan theingthap khai nei. ⁴² “Pharisee gui aw, nangmi ung shetkat nak om ci, nangmi cu thuilim, am-hnah avan ung bum ghaa bum ät, Khanpughi-am nami peit ung phi, m’tara nak la Khanpughi zum hni nak cu nangmi naw kä nami zuk ngai lawk ci nei. Peit taak nak phi nami bi vai, ahei bilawh vai gui phi kä nami nawng vai ah kiak ci nei. ⁴³ “Pharisee gui aw, nangmi ung shetkat nak om ci, nangmi cu pum im kyong ung hlüng pi ciah ngoh nak la sumlei hmun ung chang ah chang m’sui nak cu nami ng’za hlük ci. ⁴⁴ Nangmi ung shekat nak om ci. Nangmi cu a hnün kä om ciah ng’cim hmun awn nami täng ci. Cun ah ng’cim hmun cu chang gui naw akhan ah kai na u ne phi, ng’cim hmun bä ah kä hmat ci gui.” ci ne kiak na gui ci. ⁴⁵ Thukhän saza tumat naw, Sazapa, nang naw cun ah na pyein cu, keimi na na k’shedam nak gui ah kiak ci” ci ne pyein ci. ⁴⁶ Bawipa Jesuh naw, “Thukhän saza gui aw, nangmi ung phi shetkat nak om ci nei, Phuih khit vai ah phuih gih chang-am k’phuih u netah, nami mät läi naw nami kut m’dawng awn phi kä nami tawn hlük ci. ⁴⁷ Nangmi cu shetkat nak awn nami be ci, nami pughi pa gui naw ami ngawn gui vai ah profet gui ah hmawk ah nangmi cu ng’cim hmun nami piang ciah kiak ci. ⁴⁸ Nangmi cu nami pughi pa gui ah kut nak ung nami kawng ät tuk ciah kiak ci. Ngami naw profet gui ngawn u sei, nangmi naw ng’phuh hmun nami co ci. ⁴⁹ Ashin ah mawng Khanpughi naw ng’thu thuuk ung a pyein cu, “Kei naw ngami ah ng’lung ah profet gui la ng’shä gui cu ka tüi gui khai, ngami naw am shah cu ngawn u ne, am shah cu k’shedam nak khai gui. ⁵⁰ Tuhchü chang gui cu khomdek ang tüi law ung tün ne, profet gui ami ngawn gui ah hmawk ah hma m’kyuk nak gah khai gui. ⁵¹ Abelah ami ngawn ung kaa naw, mang kiang la hmun theingcim ah ng’lak ung ami ngawn ah Zecharaiah ung khüt khai ah ami ngawn gui ah hmawk ah tuhchü chang gui cu hma m’kyuk nak gah khai gui nei. ⁵² Thukhän saza gui nangmi ung shetkat nak om ci nei, nangmi cu hmuhmat nak ah im kawt hmawn nak cu gim mei u netah, nami mät phi kä nami lut ci, lut hlük ci phi nami maa nak ci” ci ne kiak na gui ci. ⁵³ Cun ung kaa Bawipa Jesuh cu ng’düi law ne a hteh ba kawn ah thukhän saza gui la pharisee gui naw, Bawipa Jesuh cu akshe ah süsawng ne pyein sak ci gui. ⁵⁴ Ng’thu a pyein nak ung a hmakat nak ang dang vai ah akda ah ng’shi ne phawtcam ci gui.

¹ Cun zah ung phiaa m’ku-gha ah chang gui cu ng’tawn ne, ng’hnet tu ne gawk law u khätah, Bawipa Jesuh naw ang düihpüi gui-am, “Pharisee gui ah k’caw ah mäih ah ami thuvi cu nami geing nak vai, ² Küp phung ng’hmawng khai, m’zih phung ng’phleh khai nei. ³ Cun ah kia sei, hmüp khui ung nami ng’htau ah ng’thu cu kho dei ung chang naw ng’zak khai nei, kyong khui ah adüm ah nami pyein ah ng’thu cu im khan ah ng’shan sei ng’shäu khai nei” ci ne pyein ci. ⁴ “Ka teihpüi gui aw, pumsa bäng ngawn ne a hmün a i phi kä ci hning ci cu kä nami kyih vai. ⁵ Nami kyih vai cu ka ning m’thein gui khai, ngawn netah mä m’htei ah tüi hning ci, huham mah ciah Khanpughi cu nami kyih vai nei, ka pyein cu nami zun vai, kyih vai cu ani bäng om ci nei. ⁶ “Biit hta hma cu ngui phe goi ah zoih ah kä kia ne ang? Cun ung phi Khanpughi naw biit hta tumat phi kä m’hnih ci nei. ⁷ Nami lumu ng’ma phi avan khei pyi ci nei, cun ah kya sei kä nami kyih vai, nangmi cu biit hta akda ah mä nami küikyang pi ci nei. ⁸ “Kei naw akcang ka pyein cu, chang ah maa ah, kei ah chang ah pyein ne, amät ng’kiaa ciah chang cu;khankho chang ah maa ah, Chang ah Htapa naw, amät ah chang ah pyein ne ng’kiaa pek khai. ⁹ Chang ah ma ah kei na hnungtuk püi ciah chang cu Khanpughi ah khankho chang ah maa ah Chang ah Htapa naw hnungtuk püi khai. ¹⁰ “Chang ah Htapa m’kat ne ng’thu ciah chang ah khan ah kat m’gein nak a om ung phi, Mumcha Theing m’kat ne ng’thu ciah khan ah kat m’gein nak kä om khai nei. ¹¹ “Chang gui naw nangmi cu, zung ah m’kawt mang ah khlaak ung phi bäi, bawi ah maa mang ah maa ah phi bäi, khaw ne ami ning düih sak gui ung, a i chaa ah ka ng’thu khai, ci ne kä nami ng’ä vai, ¹² Nangmi a i chaa ah nami ng’thu vai cu, acun zah ung Mumcha Theing naw ning m’thein law gui khai” ci ne kiak na gui ci. ¹³ Chang khli ung kaa chang tumat naw, “Sazapa, kami pa ah khawh kami ng’pai vai ah kei ah hmawk ah na pyein peä” ci ne Bawipa Jesuh ah k’thäh ci. ¹⁴ Bawipa Jesuh naw, “Teihpüi aw, nangmi ah ng’lak ung ng’shä ne nami pa khawh ning k’pai gui vai ah, a u naw kei cu na ghüh ne ang? ¹⁵ Cun kawn ah chang gui avan-am, “Ng’zak hlü nak a hlü hlü cu nami ngaih nak vai, chang ah ghin nak cu ngui ghui khawh cham ung kä om ci nei” ci ne kiak na gui ci. ¹⁶ Cun kawn ah Bawipa Jesuh naw, shin ah m’tumtäng ne m’cäi gui ci, “Hngü ät ung bühmang ciah chang tumat ung ang htei ah nik ciah a kholo om ci. ¹⁷ Cun ah kia sei ka geitkaw gui ni aih ci, a zung ka m’sep khai ang? ci ne ngaih tüh khit ci. ¹⁸ Cun kawn ah, “Ka khei ak pyim gui phye ne, khei akthai akdäm nu gui ah ka co ba khai. Ka geitkaw gui la ka khawhchaam gui cu, cun ah khei akthai gui ung ka gim khai. ¹⁹ Cun kawn ah khawkum akda ei mang vai, khei ung kaa m’küm hmawng sei, zeikiai ne ei aw ne na om vai ci ne ka mät naw ka mät ka pyein khai” cik ci. ²⁰ Cun ung phi Khanpughi naw, “Chang shekha aw, atuhmü si ne shing gui na nawng shüt khai nei, cun ung nang ah m’küm ah khawh chaam gui a u naw khäm khai ang?” ci ne kiak nak ci. ²¹ Cun kawn ah akhnu ah Bawipa Jesuh naw, “Ngui ghui khawhchaam akda am küm ung phi, Khanpughi ah maa ah ghawipyam ciah chang cu, ashin ah bühmang ciah chang awn täng ci nei” ci ne m’thein gui ci. ²² Cun kawn ah Bawipa Jesuh naw, ang düihpüi gui-am, “Cun ah kia sei, a i ei ne ghin vai ci ne hnun ah hmawk ka kä nami ng’ä vai, a i sui ne om vai ci ne pumsa ah hmawk ah phi kä nami ng’ä vai. ²³ Hnun ghin nak cu ei awk ah ta bä pi ci, pumsa cu suisak ah tah bä pi ci. ²⁴ Kha gui cu teng gui vä, ngami cu m’shi kä geit ci gui, kä khäm tawng ci gui, im khei kä co ci gui, cun ung phi Khanpughi naw ngami cu tumbei gui ci. ²⁵ Nangmi ung kaa a u naw ang’ä ai nak awn amät ah ghin nak cu ng’sau ba pi khai ah bi hning khai ang? ²⁶ Cu cha ah apihta phi kä m’khüt hning ah a kiak ung a i vai a hei hei gui ah nami ng’ä ang? ²⁷ M’ghaw ma ah cheipai gui cu teng shüm vä, ngami cu hmui kä bik ci gui, tah kä tah ci gui, cun ung phi Solomon ghangpughang naw phi acun ah mäih ah kä suisa hning ciah nami hmat vai nei. ²⁸ Zum nak ken ciah chang gui! Tuh ngawi ghing ne hnah ci a ngawi ung chawng sei mei maw a uih ah khu m’ghaw gui hngaw Khanpughi naw cun ah am sui m’sak gui ung, nangmi cu a cun ah mä bä pi khai ah ning m’sui m’sak gui khai ah kä kia ne ang? ²⁹ Cun ah kia sei ‘a i ei awk vai’ ci ne kä nami ng’ä vai, (Khongzo zum ci gui phi ang täi sei a cun ah ng’ä ci gui nei). ³⁰ Cun gui nangmi naw nami ng’zak hlü cu nami Pa Khanpughi naw hmat pyi ci. ³¹ Cun ah kia sei, Khanpughi ah uknak kho cu akhtük bäih ah nami shui vai, cun ung shin gui cu ning pe gui khai. ³² “Htome ng’bum hta, kä kyi vä, nami Pa naw a uk nak a ning peit gui vai ah, ang zak hlü om ci. ³³ Nami khawh chaam gui zoi ne ghawipyam ci gui-am pe gui vä, kä thu ka thei ciah ngui ng’ip kawt ne, m’guk-ei ah kä m’guk nak, ca ah kä ei nak hlawt ah khankho ah kä ng’pyi hlawt ciah bühmang nak cu shui vä. ³⁴ A i ah kia sei ci ung nami khawhchaam ah om nak ah nami m’lung phi gawk thei ciah kiak ci. ³⁵ Nangmi cu ng’düih law ghet vai ah sui-sa u ne, mei m’däi ge ne om vä. ³⁶ Hta m’um nak ah kaa ami bawi law ba ne choh akhäk law ung ng’ghit ah law ne, choh hmawn vai ah ngäng ci gui ah changshäm gui ah mäih ah nami om vai. ³⁷ Akchang shäm gui naw ami ngäng cu ami bawi alaw ba ung hmu gui ci. Changshäm gui cu zeikiai ci gui. Kei naw akcang ka pyein cu, bawi naw cun ah changshäm gui cu khin ah khän gui ne, atäng ah ngoh püi gui ne, m’sui msak gui ne, tumbei khin chah na gui khai. ³⁸ Ani cu khocawih ding ah phi bäi, ai khong k’htük ung phi bäi, a law ba ung ngäng ciah chang gui cu zeikiai ci gui. ³⁹ Akcang ah im ah naw m’guk-ei a law nak vai ah akhin cu ahmat ung ani ah im ung m’guk-ei kä lut hlawt khai ci cu nami hmat khai. ⁴⁰ Changah Htapa cu nangmi naw kä nami ngaih tüh ah akhin ung gawk lawk khai kia sei, geing na ne, ngaih na ne nami om vai” ci ne m’cäi gui ci. ⁴¹ Peter naw, “Bawipa, shin ah m’tumtäng nak cu keimi ah hmawk ah ang? Kä cun ung chang avan ah hmawk ah ang?” ci ne ng’shik ci. ⁴² Bawipa Naw, “Bekhüt ne cüivai ciah changshäm cu a u ang? Khuimah tumat naw akchangshäm gui khawngmang gui ne, uk gui ne, ei-awk phi tei gui khai ah changshäm tumat cu ghü ne m’düih khai. ⁴³ Khuimah naw law ba ne am cäi atäng ah abi a hmuh ah akiak ung, akchangshäm ah khan ah zeikiai nak om ci. ⁴⁴ Kei naw akcang ka pyein cu, khui mah naw, cun ah changshäm-am khawhchaam avan m’hteihtang vai ah ap khai nei. ⁴⁵ Cun ung phi cun changshäm khawngmang ci cu ka bawipa kä law ba zäk khai ci ne ngai ne, abü bü ei-aw ne ak changshäm hnumi pami gui, m’ghuih teeuh gui ne a kiak ung, ⁴⁶ ani naw kä a ngaih tüh nak ah a khin ung khui mah cu law ba ne a vuuk nak vai tan pe sei, changshäm cu kä bekhüt ne kä ng’düng ciah chang ah chaw vai cu ma nak ci. ⁴⁷ “A bawi ah ng’zak hlü hmat lang ne ng’dawt ne kä bilo ne a bawi ah ng’zak hlü phi kä läk ciah chang shäm cu aktung ah geinvai nak gah khai. ⁴⁸ Cun ung phi a bawi ah ng’zak hlü kä hmat netah kat nak bik ciah chang läi cu geinvai nak api gah khai. Chimgein nak akdäm gah ciah chang cu abi vai akda om khai. Zum ne ngaih gep nak pi gah ciah chang cu abi vai akda pi om khai. ⁴⁹ “Kei cu khomdek khan mei awn ka m’khih khai ah ka lawk ci. Acun ah mei atuhbäi a gawk law vai ah ka ng’za hlük ci. ⁵⁰ Kei naw tuihnim nak ka lak vai om ci, cun ah bi cu kä ka pyi pha ah chuih kei ah m’lung cu zaica ci. ⁵¹ Shin ah khomdek khan ung dimdeeih nak ka pek khai ah ka lawk ciah nami ngai ci ma? Dimdeeih nak vai ah kä kiak ci, chang gui ami ng’phyeekpai nak vai ah kei ka lawk ci. ⁵² Tuhbäi ung tün ne chang sing hma om ciah kyong khui ung, sing goi vangtäng, sing thum vangtäng ah ng’pai khai gui. ⁵³ Apa la ahta, anu la ahta, ahta la akchu la acei ah nu ami van ng’phyeekpai zawp khai gui nei” cik ci. ⁵⁴ Cun kawn ah Bawipa Jesuh naw, “Hni kiak lam ah ng’mei a kai law ung kho aa law ge khai nami cik ci. Nami pyein ah mäih ah aa tuk cang ci. ⁵⁵ Htum lam ah kho akhi law ung kho shek khai nami cik ci, nami pyein ah mäih ah she tuk cang ci. ⁵⁶ Thuvi ciah chang gui, nangmi cu khomdek la khan kho teng ne kho khi kho k’aa nami hmat ci. A i ah kia sei tuhchü ah a khin m’khoi m’cha ne kä nami hmat hning ang? ⁵⁷ “Düng nak dang khai ah a i ah kia sei nami mät naw kä nami m’khoichaa ang? ⁵⁸ Nani kei-nang ciah chang goi, m’khoichak ciah suki ah nani hteh law ung, lam ah ng’gei ba vai ah na ng’ge püi vai. Cun ah kä na bi ung ani naw nang cu, m’khoichak ciah suki ah saw ne ning hteh püi khai. Cun ah suki naw bawi ah kut ung ning ap sei, bawi naw thawng ung ning chum khai. ⁵⁹ Na puu kä na thung zawp phaa ah chuih thawng ung kaa kä na lut law ba hlawt khai, ci ne kei naw ka pyein ci” ci ne chang gui-am m’thein gui ci.

¹ Cun zah ung chang am shah gui cu Bawipa Jesuh ah law u ne, Khanpughi ah ami taigü zah ung Pilat naw a ngawn gui ah Kalile chang gui ah amawng pyein lawk ci gui. ² Bawipa Jesuh naw, “Cun ah chang gui cun ah ami ngawn gui cu, a hei Kalile chang gui ah mä kat nak bi pi ci gui ah nami ngai ci ma? Ngami cu kat nak bi pi ci gui ah kä kiak ci nei. ³ Cun ah mäih ah nangmi phi kä nami ng’zu ba ung sih maih nak ung nami gawk khai. ⁴ Siloam tänghän ng’gäi sei sik ciah chang sing gha-lei-cheit mä Jerusalem ah om ciah chang gui zah tah kat nak bi pi ci gui ah nami ngai ci ma? ⁵ Ngami cu kat nak bi pi ci gui ah kä kiak ci, ci cu ka ning m’thein gui hlük ci. Cun ung nangmi phi kä nami ng’zu ba ah a kiak ung ngami ah mäih ah nami si tuk khai” cik ci. ⁶ Cun kawn ah Bawipa Jesuh naw shin ah m’tumtäng nak pe gui ci. Chang tumat ah chaam kyong ah ami geit ah k’thei ghing tumat om ci. Ka mah law ne teng law netah, cun ah thei ghing ah am theih cu kä hmuk ci. ⁷ Ka mah naw, “Kei law ne, shin ah thei ak theih la kä ak theih ah ka teng law nak kum thum law lawk ci. Cun ung phi pum ät ah phi kä m’theih ci, cun ne ghawt-en ä, khomdek tai düt ci nei” ci ne chaam ngäng ci-am kiak nak ci. ⁸ Chaam ngäng ci naw, “shin ah thei ghing kum ät om ba cang sä, m’dek ni awn vui ne ka m’htah ba cang khai nei. ⁹ Hngeng kum läi m’theih khai nei, kä a m’theih ah a kiak ung chu pit ne ghawh vai nei, ci ne pyein tu ba ci” cik ci. ¹⁰ Pum hnüüp ung Bawipa Jesuh cu pum im ah m’theithang gui ne om ci. ¹¹ A cun ah khoshe naw kai sei, khokum gha-lei-cheit ung ng’khem ne ng’zän ciah hnumi tumat om ci. ¹² Ani cu ak khei ng’khun sei kä zäih ba hlawt ci. Bawipa Jesuh naw cun ah hnumi cu hmu netah, a pei ah khü ne, “hnumi aw, na gaw nak maih pyi ci nei.” ci netah ¹³ ak khan ah a kut taih sei, ani cu acun vai-am ak khei zäih ba sei gai ba ne, Khanpughi m’hlüngtai ci. ¹⁴ Cun ah Bawipa Jesuh naw pum hnüüp ung ak gaw am gai ba ah, phäh ah pum im ngäng ci cu m’lung k’she netah, “Bi bi nak vai kho hnüüp chuk om ci. A cun zah ung law ne gai nak nami ng’zoih law vai, Pum hnüüp ung kä nami law-en vai,” ci ne chang gui- am kiak na gui ci. ¹⁵ Bawipa Jesuh naw, “Chang thuvi gui, ‘nangmi cu pum hnüüp ung nami sei gui, nami k’se gui gui k’phian ne saw ne tui nami tu man ci ah kä kia ne ang? ¹⁶ Abraham ah hta ah kä kiak ciah shin ah hnumi cu khokum gha-lei- cheit ung satan ah khih pawn nak gah ci. Ani cu cun ah khih pawn nak ung kaa pum hnüüp ung kä m’hlawt vai ma?” cik ci. ¹⁷ Cun ci khätah, Bawipa Jesuh ah a gaa gui cu ng’aa ci gui. Chang gui akda cu Bawipa Jesuh naw cäi aih vai abi gui ah hmawk ah zeikiai ci gui. ¹⁸ Bawipa Jesuh naw, “Khanpughi ah uk nak ah kho cu a i awn täng ci ang? ¹⁹ A i awn m’tumtäng vai ang? Khanpughi ah uknak kho cu shin ah mäih ah kiak ci. Anhta ui cu chang tumat naw la netah, a lo ma ah geit ci. A ui cu ng’lih pyou ne phung ghing law sei, ang ban ung kha gui ngo ne ng’bu tuk ci gui.” cik ci. ²⁰ Cun kawn mä Bawipa Jesuh naw, “Khanpughi ah uknak ah kho cu a i awn m’tumtäng vai ang? ²¹ Cun cu shin ah mäih ah kiak ci. Hnumi tumat naw k’caw la netah m’htut den pyi them thum ung k’caw sei m’htut avan tho ne pai ci” ci ne pyein ci. ²² Bawipa Jesuh cu Jerusalem ah a hteh nak lam ah gawnu gawhta a gawk nak päng ah hei m’hteihtang vü gui ne hteit ci. ²³ Chang tumat naw, “Sazapa, chang api naw ma hun nak ami gah kaw?” ci ne ng’shik ci. Bawipa Jesuh naw, ²⁴ “Nangmi cu ng’hteik ciah m’kawt ung nami luh vai ah k’tha na vä. Chang akda naw cun ah m’kawt ung luh vai ah k’tha nak ci gui. Cun ung phi ami luh nak hlawt vai ah k’thagui kä om ci. ²⁵ Im ah naw choh khai sei, nangmi akpung ah nami om khai. Nangmi naw choh hei khäk ne, “Im mah aw, choh na ak hmawn tu gui ä,” ci ne nami kiak ung phi im mah naw, “Nangmi a hawi kaa nak mi lawk ci ang? Kä ka ning hmat gui ci nei” cik khai. ²⁶ Nangmi naw, “Keimi cu nang awn atäng ah mi ei awk ciah chang nei, keimi ah pigaw ung nang naw na na m’hteihtang gui te ci nei,” nami cik khai. ²⁷ Cun ung phi ani naw, “nangmi a hawi kaa nami lawk ciah kä ka ning hmat gui ci, chang k’she gui a hei ah hteit vä” ²⁸ Nangmi naw Khanpughi ah uknak kho ah Abraham, Isak la Jakop ni, profet ni gui cu, hmu tu lang u ci sei, akpung ah ami ning k’täm gui ung nami haa kyeet ne, kyap ne m’lau ne nami kiak khai nei. ²⁹ Chang gui cu a htum a siip ak khei ak kiang ah kaa law u ne, Khanpughi ah uknak pawi ung hteit khai gui. ³⁰ Cun ah kho hnüüp ung tuhbäi hnu ciah chang cu ma khai, tuhbäi ma ciah chang cu hnu khai” ci ne m’cäi gui ci. ³¹ Cun zah ung Pharisee gui law u ne, “A hei lam ah hteit ne om mei ä, Herod mang naw ning ngawn khai pawng ci nei” cik ci gui. ³² Bawipa Jesuh naw, “Kei cu tuh ngawi la ngawi zung khoshe gui k’täm ne, ak gaw gui ka gai sak gui khai. Ak hnüüp thum ung ka bi cu ka pyi khai nei ci ne kiak ci, ci ah sa ui-am m’thein ba vä. ³³ Cun ung phi tuh ngawi, ngawi ung la cituh cu, ka lam ung ka hteit gäk gäk khai. Profet nak ci cu Jerusalem ah kawn ah a hawi phi chang naw a ngawn vai ah kä ng’hlawi ci nei” ci ne pyein ci. ³⁴ “Aw Jerusalem, Jerusalem, Profet gui na ngawn ci, Khanpughi ah ng’shä chang gui lung awn na vawi ci, ai nu naw ai hta gui ak boop gui ah mäih ah kei naw nang ah hta gui ka k’bum nak hlü gui cu da lawk ci, cun ung phi nang naw, kä na ng’za hlük ci. ³⁵ Cun ah kia sei, nang ah pum im cu Khanpughi naw nawng lawk khai, kei naw akcang ka pyein cu, Khanpughi ah ang ming awn lawk ci cu, ang ming thang sä! ci ne na kiak nak ah hnüüp kä a gawk pha ah chuih kei cu kä na na hmuk khai nei” ci ne m’thein gui ci.

¹ Kyin nak ah hnüüp ät ung Bawipa Jesuh cu Pharisee ang vai tumat ah im ah ei ei tuk khai ah hteit ci: cun zah ung Bawipa Jesuh cu chang gui naw adäm ah m’kein ci gui. ² Bawipa Jesuh ah a pei ah khonu ung gaw ciah chang tumat cu gawk law khätah, ³ Bawipa Jesuh naw, “Kyin hnüüp ung gawpram ci gai sak vai ang?” ci ne pharisee gui la thukhän saza gui cu ng’shi gui ci. ⁴ Cun ung phi ngami cu kä chiü ne om ci gui. Bawipa Jesuh naw akgaw cu khü ne gai sak netah, hteh ba sak ci. ⁵ Cun kawn ah Bawipa Jesuh naw, “Nangmi ung kaa a hta baw, asei baw, gheem ah a luh ung kyin ah hnüüp ci ne kä khui tu ba ah a u om khai ang?” ci ne ng’shi gui ci. ⁶ Cun ung ngami naw a i ah phi m’hlan ne kä pyein ba ci gui. ⁷ Cun ah ei awk nak ung gawk lawk ciah khin gui cu, akni nak pi bäng bäng ghü ne ngo u sei hmu gui netah, Bawipa Jesuh naw, shin ah m’tumtäng ne m’thein gui ci. ⁸ “Nangmi cu hta m’um nak pawi ung ning khü tu gui u sei, nami ng’khäh tu ah a kiak ung, akni nak pi bäih ung kä nami ngoh tu ma vai. Nangmi ah bä ng’vai pi ci ami lak tu a law ah a kiak ung; ⁹ im mah naw nang ah law ne, khin ah ngoh nak vai ng’nawn tu pe ä, ci lawk khai. Cun ung nang cu ng’aa ne ang neim nak ung na ngo ba khai. ¹⁰ Cun ah kia sei nang cu ning khü tu u sei, na ng’khäh tu ah a kiak ung ang neim nak pi ung na ngoh vai. Cun ung im mah naw nang ah law ne, “Teihpüi aw, ani nak pi ung hteit ne ngo tuä” ci ne ning khü ne ning ngoh tu sak khai. Cun ung nang cu khin chang ah ma ah aa-mah ne na om tuk khai. ¹¹ Amät naw amät m’hlüngtai ci cu, neim sak nak gah khai, amät naw amät neim sak ci cu, m’hlüngtai nak gah khai” ci ne m’cäi gui ci. ¹² Cun kawn ah Bawipa Jesuh naw, im mah-am, “Nang cu ngawi ei, mü ei chang-am tumbei ne na khin chah law nak ung, na teihpüi gui, na phäi nau gui, na mätzah gui, bühmang ciah na paw chang gui, cu khü ne kä na tumbei gui vai. Cun ah na tumbei gui ung nang phi ning khü tuba ne acun ah ning tumbei tu ba khai gui. ¹³ Cun ah kia sei khin chah nak pawi na bi law ung;ghawipyam ci gui, akut khaw ng’khem ci gui, amik hna kak ci gui, khü gui ne na tumbei gui vai. ¹⁴ Cun ung nang ah khan ah zeikiai nak om khai, a i ah kia sei ci ung ngami naw nang cu kä ning tumbei tuba hlawt khai gui. Chang k’ni gui sih nak ung kaa ami thawh law ba hnüüp ung na bi nak cu Khanpughi naw ning m’thung ba khai. ¹⁵ Bawipa Jesuh awn atäng ah pawi ung om tuk ciah chang tumat naw, cun ah ng’thu cu ng’za netah, “Khanpughi ah uknak kho ah khin ei vai tuk ciah chang cu, zeikiai nak om ci” ci khätah; ¹⁶ Bawipa Jesuh naw, “Kho hnüüp ät ung chang tumat cu, ak tungchün ah khin ei shong ne chang ui akda khü gui ci. ¹⁷ Ei awk vai a khin gawk law sei chang tumat cu tüi ne, akhü tu gui ah chang gui ami law ba vai ah khaw ba sak gui ci. ¹⁸ Ngami ami van naw kä kami law hlawt khai nei, ci ne kia zawp ci gui. Akhtük ung tumat naw, “Lai ka khleih hteit ne ka teng tuk khai kia sei, kä ka law hlawt khai nei, kä na gen vä” cik ci. ¹⁹ Ahei chang tumat naw phi, “Seipat hmaa ka khleih ci kia sei, hteit ne ka teng tuk khai, kä ka law hlawt khai, kä na gein sä” cik ci. ²⁰ Ahei tumat naw phi, “Kei tuhbäi ka chumah thai ci kia sei, kä ka law hkawt khai nei, kä na gen sä” cik ci. ²¹ Ak chang tüih cu law ba ne, acun gui avan cu im mah-am m’thein law ba ci. Im mah cu m’lungshe netah, “Lam kyum lam k’cawh, k’htawk-kem zung ah hteit ne, ghawipyam ci gui, akutkho ng’khem ci gui, amik hnga kak ci gui, khü gui ne law püi gui ä,” ci ne tüi ba ci. ²² Kä shou pha sei, akchang tüih cu gawk law ba ne, “Na pyein nah mäih ah, ka khü gui pyi ci nei, cun ung phi ngoh nak vai awng ba ci nei” cik ci. ²³ Im mah naw, “Pigaw im lo zung nüng ah hteit ne, ka im ung be khai ah, chang gui khü law gui zä, azan khü gui ma ah chang tumat naw phi; ²⁴ Shin ah khin ei kä ami ei-en law tu vai nei, ci ne ka ning m’cäi gui ci nei” cik ci. ²⁵ Hnü ät tung chang khli cu ani awn atäng ah law tu u khätah, va mang ba netah, Bawipa Jesuh naw, ²⁶ “Kei ah alaw tu pang ung phi, kei ana m’hni ah mä, anupa, achu hta, aphäi nau la amät m’hni pi ciah chang cu, kei ah ng’düihpüi ah kä kia hlawt khai. ²⁷ Amät ah kutlam tung kawt ne ka hnu ah kä na läk ci phung cu, kei ah ng’düihpui ah kä kia hlawt khai. ²⁸ Nangmi ung kaa chang tumat naw, tänghän tumat co khai ah apawnng m’hten ung, cawh kyan nak vai a i chü ng’pyi khai, cawh kyan nak vai ngui ghui a i chü om khai ang?” ci ne ngaih tüh cang khai kiak ci nei. ²⁹ Cun ah kä ngaih tüh kä pawng m’htein ah, co law ghet netah, kä am üp law hlawt ung, chang gui naw gaih tuk khai gui nei. ³⁰ Shin ah chang cu tün ne läi co law te ci, kä m’üp hlawt ci nei” ci ne päipih khai gui nei. ³¹ “Ghangpughang tumat cu, gakap phia-ghaa ng’khahpüi ne, gakap phiaa m’ku khah püi ciah, ahei ghangpughang cu, tuk khai ah ang düih law ung kam khüt khai ang? kä ka m’khüt khai ang! ci ne, ngo ne ngaih tüh cang khai ah kä kia ne ang? ³² Avaisü ah tuh ne kä m’khüt khai ah a kiak ung, ng’shä hei tüi ne, ng’khawt ng’gei vai ah ng’ge khai nei. ³³ A cun ah mäih ah nangmi ung kaa a u phi amät ung om ci nüng kä nawng shüt zawp hlawt ci cu, kei ah ng’düihpüi ah kä kia hlawt khai” ci ne m’cäi gui ci. ³⁴ “M’shi cu nik ci, cun ung phi a tuui a maih kawn ah a tuui nak a hawi hmuh ba hlawt vai ang? ³⁵ Lai ah hmawk ah phi bäi, m’dek ani vai ah hmawk ah phi bäi, kä mang ba phyak ci. Cun ah kia sei chang gui naw, fit ghawt düt ci gui, akhngaa om ci naw ng’za sä” cik ci.

¹ Akhawn look ci gui la changshe gui cu, Bawipa Jesuh ah ng’thu ngai tuk khai gui ah, a pei ah ng’et lawk ci gui. ² Pharisee gui la ng’thukhän saza gui naw, “Shin ah chang cu changshe gui dou gui ne, atäng ah ei awk püi gui ci nei” ci ne pyeinsak ci gui. ³ Cun ah kia khätah Bawipa Jesuh naw, shin ah m’tumtäng nak cu pe gui ci. ⁴ “Nangmi ung kaa, chang tumat ung htome phiaa om ci ung kaa, tumat a maih ung a i ah kiak khai ang? Ani naw k’pawih ba ciah ko-kip-lei-ko cu khu ah li nak ah nawng gui shüt netah, maih ciah htome cu, kä ah hmuh ba pha ah chuih shui ba khai nei. ⁵ Cun ah htome a hmuh ba ung, ak phleing ung taih ne, zeikiai ne law ba khai nei. ⁶ A im ah a gawk law ba ung a teihpüi gui la, a im pei ah kaa gui cu khü gui ne, “maih ciah htome ka hmu ba ci nei, kei awn atäng ah zeikiai tu vä” cik khai nei. ⁷ Acun ah mäih ah kei naw akcang ka pyein cu, ang zu ba vai kä hlü ciah chang k’ni ko-kip-lei-ko ah mä, changshe tumat ang zu ba ah hmawk ah zeikiai nak däm pi khai nei” cik ci. ⁸ Cun kawn ah hnumi tumat ah ngui phe ghaa ung kaa, ngui phe a maih ung, ani cu mei m’däi netah kyong zung avan pheikphai ne shui ba khai nei. ⁹ A cun ah ngui a hmuh ba ah a kiak ung a teihpüi gui la a im pei ah kaa gui cu khü gui ne, maih ciah ngui, ka hmu ba ci nei, kei awn atäng ah zeikiai tu vä,” cik khai nei. ¹⁰ A cun ah mäih ah Khanpughi ah khankho chang gui cu, changshe tumat ang zu ba ah hmawk ah zeikiai ci gui nei” cik ci. ¹¹ Cun kawn ah Bawipa Jesuh naw, “chang tumat ung ahta hnih om ci. Ahta ak hmaw pi naw, apa-am, ¹² “kei naw ka gah tu vai ah khawh cu k’pai ne na pe ä” cik ci. Cun ah kia sei apa naw, a khawh cu ahta goi-am k’pai goi ci. ¹³ Kä shou pha sei ahta ak hmaw pi cu, apa ah khawh chaam avan zoi ne, a gah ah ngui avan hteh püi ne, a kho hei ah hteit ci. Ani cu a gawk nak ah kho ah a ngui gui cu a i baw düt ah ci ne ei mang zawp ci ¹⁴ A ngui avan ng’pyi khätah acun ah kho ah cawi khaih nak kho zaw sei ani cu ang htei ah cawi gha lawk ci. ¹⁵ Cun ah kia sei, cun ah chang tumat cu pan ne om tuk ci. Cun ah chang naw, ani cu lo ah vawk gui ngäng sak ci ¹⁶ Ani cu vawk gui-am vuh ah m’lui tawi gui düt ei law hluk ci. Cun ung phi ani-am a u naw a i phi kä m’bei tuk ci. ¹⁷ Cun ah kho ah ani cu akcang ah ng’zu ba netah kapa ah im ah bi bik ci gui ah chang gui hngaw ami phü ah ei awk ci gui. Kei läi shin ung ang htai ah cawi gha ne ka gein vai ci. ¹⁸ A tuhbäi ng’düi law ne, kapa ah hteit ba netah, Kapa aw, Khanpughi la nang Kapa ah khan ah katnak ka bi pyi ci nei, ¹⁹ Nang kapa ah na hta ah kä ka khin ba ci nei, ci ne ka pyein khai” cik ci. ²⁰ Cun kawn ah ng’düi law ne apa ah om nak ah hteit ba ci. Ashou nak pui ah ana a vü ba cu apa naw hmu netah, ang htei ah m’gein ne dou law ne kyap ne ng’ui ci. ²¹ Ahta naw, “Kapa aw, kei cu Khanpughi la nang Kapa ah khan ah kat nak ka bi pyi ci nei. Cun ah kia sei, nang kapa ah hta ah kä ka khin ba ci nei” cik ci. ²² Apa naw, “Akzang ah shui ne suisak akni m’sui m’sak law vä, kutcüp akni m’hnak law vä, phahnak akni ng’cum law sak vä, ²³ Ak plan pi bäih ah seipat ngawn vä, ei aw ne mi zeikiai khai nei. ²⁴ Ka hta cu azan asih te ung phi tuhbäi ghing ba ci nei, azan a maih te ung phi tuhbäi hmuh ba pyi nei” ci ne akchang gui-am pyein ah gui ci. Cun kawn ah ngami cu ei aw ne zeikiai zawp ci gui. ²⁵ Cun zah ung ahta ang vai pi cu lo ah hteit ci. Lo ah kaa law ba ne, im pei ah ang et law ba ung ami tum ng’lam gui ah k’aw cu ng’za netah, ²⁶ ami chang tumat khü ne, “A i cik ci gui ang?” ci ne ng’shik ci. ²⁷ A cun ah chang naw, “Na nau cu ghing gai ne gawk law ba sei, napa naw seipat ak plan pi ngawn pek ci nei” cik ci. ²⁸ Ahta ng’vai pi m’lungshe ne, kyong ah kä luh tu ba ah om ci. Apa cu akpung ah lut law ne ahta ng’vaipi kyong ah aluh law tu ba vai ah ng’ge püi ci. ²⁹ Ahta ng’vaipi naw, “Kei cu khokum akda ung nang pa ah pyein ah om ne bi ka bik ci. Nang pa ah ng’thu hngü ät phi kä ka heng man ci. Cun ung phi ka teihpüi gui awn zeikia ne kami ei vai ah mehta tumat phi kä na na ngawn pe man ci. ³⁰ Nang pa ah khawchaam gui la ne hteh püi ne, chang pawmzam gui awn atäng ah m’di m’dap zawp netah, law ba ciah ani läi-am seipat ak plan pi na ngawn pek ci nei” cik ci. ³¹ Apa naw, “Kahta aw, nang cu kei awn ang täi sei, atäng ah na om ci. Kei ah khawhchaam avan nang naw na khäm ci. ³² Cun ung phi nang na nau cu azan si te ci, tuhbäi ghing law ba ci, azan maih te ci tuhbäi mi hmu ba ci. Cun ah kia sei mik mi cu mi zeikiai ne, ei awk nak mi bi püi ah kiak ci,” ci ne m’cäi gui ci.

¹ Bawipa Jesuh naw ang düihpüi gui-am, “Hngü ät ung bühmang ciah chang ung a changvai tumat om ci. Ani naw mang ah khawhchaam gui cu ei mang m’di m’dap zawp ci, ci ne chak ci gui. ² Mang naw ani cu khü netah, ‘Nang ah mawng akda ah kang zak ci, na bilawh nak gui cu apüh akheh ah piang ne law püi ä, nang cu kei ah changvai ah kä na kia ba khai” ci ne kiak nak ci. ³ Cun ah kia khätah changvai cu, “Kei a i ah ka kiak khai, kei nang naw changvai ung kaa na na k’täm pyi ci, kei ung m’dek cawh nak hning vai k’thagui kä om ci, ng’zoi ne ka ei vai phi ka ng’aa ci. ⁴ Cun ung phi kei cu changvai ung kaa ka ng’plawt kawn ah kei na dou ne na ng’khawt püi khai ka hmat pyi ci” ci ne amät ng’htau netah, ⁵ a mang ah pu ng’zoi tu man ciah chang gui avan khü gui ci. Ahtük bäih ah chang tumat-am, “kei ah mang-am na thung ba vai a i chü ang a om?” ci ne ng’shik ci. Ani naw, “Khitui pit phiaa om ci” cik ci. ⁶ Changvai naw, “A tuhbäi ngo ne pit hmakip ah ca uk ung na hei guk vai” ci na khätah acun ah guk ci. ⁷ Cun kawn ah a hei tumat mä khü ne, “nang mä na thung vai a i chü nei a om?” ci ne ng’shik ci. Ani naw, “Htang m’guh tang phia ghaa ka thung vai om ci” ci khätah, “A tuhbäi na ca uk la ne phiaa cheit ah na guk vai nei” ci sei, a cun ah guk ci. ⁸ Cun ah theileh ne abilawh ah hmawk ah kä ng’düng cih changvai cu amang naw m’hlüngtai ci. A i ah kia sei ci ung khomdek chang gui cu, khomdek khan ah mawng bilawh nak ung akdei ah hta gui ah mä ami theileh pi ah hmawk ah kiak ci. ⁹ “Cun kawn ah kei naw ka ning m’cäi gui cu, khomdek khawhchaam bühmang nak kawn m’gein sei ng’khawtsheng nak cu bi vä. Cun ung vah cun ah bühmang nak ang pyi law ung, Khanpughi naw nangmi cu ang täi ghin nak ghui im ah ning na dou gui khai. ¹⁰ Api bi ung bekhüt ciah chang cu akdäm bi ung phi bekhüt ci. Api bi ung düng ciah chang cu akdäm bi ung phi düng ci. ¹¹ Cun ah kia sei nangmi cu khomdek khawhchaam bühmang nak ung, bekhüt nak kä a om ung, bühmang nak akcang cu, a u naw nangmi- am ning ap gui khai aw? ¹² Nangmi cu chang ah khawhchaam ah khan ah bekhüt nak kä a om ung a u naw nami mät ah khäm ah khawhchaam cu ning ap gui khai aw? ¹³ A u chang phi bawimang hnih ah changshäm ah kä kia hning ci, Ani cu tumat gen ne tumat m’hni lawk khai. Tumat ah khan ah ng’düng nak awn om ne, tumat cu a i ah kä sui ba khai. Nangmi cu Khanpughi la khomdek khawhchaam ah ng’zak hlü cu atäng ah kä nami bi hlawt khai” cik ci. ¹⁴ Ngui ng’za hlük ciah pharisee gui cu, cun ah ng’thu cu ng’za u netah, Bawipa Jesuh cu m’lep nak ci gui. ¹⁵ Bawipa Jesuh naw, “Nangmi cu, nami mät naw nami mät chang khän gui ah chang ah ma ah nami m’dang ci. Cun ung phi Khanpughi naw nami m’lung kyong ning hmat gui ci. Chang gui naw ang khän ah ami ngaih cu Khanpughi ah ma ah m’sheshai ah kiak ci. ¹⁶ Tuihnim Johan kä a ng’dang pha ung Moese ng’thukhän gui la profet gui ah cacim gui cu kümbe te ci. Johan ang dang kawn ah tün ne, Khanpughi ah uknak ah mawng ng’Thu Ni cu pyein sak law ah kiak ci. Chang akda gui Khanpughi ah uknak kho ah ng’gut ne lut lawk ci gui. ¹⁷ Cun ung phi Thukhän shaitaak cang’ma ng’lung ät adi maih vai ah mä, khomdek la khankho adi maih vai cu zäi tuba ci. ¹⁸ Akchu nawng ne ahei chu na tu ba ciah pami cu, akchu ah khan ah kat nak bik ciah kiak ci. Chang ah ng’chaa püi ah hnumi chu nak ci cu chang ah chu kat püi ciah kiak ci. ¹⁹ Hngü ät ung chang mangpa tumat om ci. Ani cu ak hnüüp tä akni ak kiom suisa ne, bühmang ä le ne om ci. ²⁰ Ani ah im kawt pei ah ghawipyam zaica ciah Lazarus ming nak ciah chang tumat cu ng’zän ne om ci. Ani cu apumsa nüng khei bäng ah kia sei ui gui naw law ne akhei cu m’leik ci ci gui. ²¹ Ani cu mangpa ah ei k’book kaw ne a ei tu vai ah ng’zoi tu ci ci. ²² Cun kawn ah ghawipyam ci cu si sei, khankho chang gui naw la law u ne, Abrham ah k’coi ung m’shän ci gui, Mangpa cun phi si sei, m’cim ci gui. ²³ Ani cu m’htei mei khui ah ang htei ah gein vai law aih ne khankho cu han dang netah, Abraham la a k’pat lam ah ngok ciah Lazarus cu hmu goi ci. Cun ah hmu goi netah, Mangpa naw; ²⁴ “Paka Abraham aw, kei cu nam gein ä, kei cu m’htei mei khui ung ang htei ah ka geinvai ci nei. Lazarus naw akut m’dawng awn tui tawk netah ka m’lei ung ana m’hteei tu vai ah ka om nak ah zuk tüi law” ci ne m’awi ne ng’khü ci. ²⁵ Cun ung phi Abraham naw, “Ka hta aw, khomdek khan ah nang bühmang gui man la Lazarus ah ghawipyam zaica man gui cu, ngai ba ne shüm ba ä. Tuhbäi ani cu bämang nak ung gawk sei, nang cu geinvai nak ung na gawk pyi ci. ²⁶ Cun bäng ah kä kiak ciah keimi la nangmi ah ng’lak ung thuuk aih ciah gheem-kiaa nu om ci. Cun ah kia sei keimi lamah kaa nangmi lam ah phi bäi, nangmi lam ah kaa keimi lam ah phi bäi a u kä hteit hton hlawt ci nei” ci ne kiak nak ci. ²⁷ Mangpa naw, “Kapa aw, cun ah a kiak ung kei ah kapa ah im ah Lazarus cu na tüih law ba vai ah ka ng’za hlük ci nei. ²⁸ Kei ah ka nau chang sing hma om ci, ngami bawtah shin ah geinvai nak ah kä ami gawk law tu vai ah va m’thein ba gui khai ah Lazarus cu zuk tüi law ba ä” cik ci. ²⁹ Abraham naw, “Nang ah nau gui-am m’thein tu gui khai ah Moses la profet gui om ci gui. Ngami ah ng’thu ngai tu u sä” ci ne kiak nak ci. ³⁰ Cun ung phi mangpa naw, “Kapa, Abraham, cun ah kä kiak ci nei, akcang ah si pyi ciah chang gui ung kaa tumat cu ngami ah a hteh ba ah a kiak ung ngami cu ng’zu ba hman khai gui nei” ci nak ci. ³¹ Abraham naw, “Ngami cu Moses la Profet gui ah ng’thu kä a mi ngaih läi ung sih nak ung kaa tho law ba ci a om ung phi ngami naw, kä zum hlawt khai gui cik ci” ci ne m’thein gui ci.

¹ Bawipa Jesuh naw, ang düihpüi gui-am, “Katnak bi nak vai ah tüihtok nak cu akcang ah om khai, cun ung phi cun ah tüihtok nak bik ciah chang ah hmawk ah ang htei ah kyihkyawk vai kiak ci. ² Ak hmaw tumat kat nak ung gawk khai ah tüihtok nak bik ciah chang cu lungsum khit ne a gawn ung m’äh netah tuili ung shum ung bä tu ba khai. ³ Cun na kia sei geing na ne nami bilawh vai. “Na phäi nau naw a ning kat nak ung, ani cu na m’cäi vai, ani ang zu ba ung akat nak nam gein vai. ⁴ Ani naw kho hnüüp ät ung chih vei ning kat na netah, acun päng ung law ne kei ka kat nak ka ng’zu ba ci nei a ci ung, nang naw ani ah kat nak cu nam gein vai,” ci ne m’cäi gui ci. ⁵ Ang düihpüi gui naw, Bawipa-am, “Kami zum nak na hlüngtai sak gui ä” cik ci gui. ⁶ Bawipa Naw, “Nangmi ung zumnak anhta ui teih pang a om ah a kiak ung, nangmi naw shin ah anli ghing-am,” Na phung ah ng’son ne, tuinu ung ghing ne ng’düi ä” nami ci ung nami pyein ah mäih ah kiak khai nei. ⁷ “Nangmi ung kaa a u naw, lai thawn netah baw, htome shäm netah baw, law ba ciah akchangshäm-am, a gawk law ba vai-am, ei ei law ä ci ne ana khü khai ang? ⁸ “Kei ah hmawk ah ei lo chang ne, ka ei awk zah ng’bi ng’lawh ne, na khap piang netah, ka ei zawp khawn ah na ei tu vai, cik khai ah kä kia ne ang? ⁹ Changshäm cu pyein ah a om ah phäh ah na bä ni ci nak vai kä om ci. ¹⁰ A cun ah mäih ah nangmi cun phi; ami ning bi sak gui avan nami bi zawp ung, “Keimi cu changshäm düt ah kami kiak ci, kami bi vai ah kiak ci cu, kami bi ah kiak ci nei, nami ci vai” ci ne m’cäi gui ci. ¹¹ Bawipa Jesuh cu Jerusalem ah a hteh nak lam ah Samaria la Kalile kho ah khogi lam ung hteit ci. ¹² Pigaw tumat ung ami gawk law ung khei-lei ah ei chang sing ghaa naw Bawipa cu ana dou ci gui. Ngami cu ang shawng pi pi ah ng’düi u netah, ¹³ “Bawipa Jesuh aw, keimi nam gein gui ä” ci ne m’lau ci gui. ¹⁴ Bawipa Jesuh naw, hmu law gui netah, “Nangmi hteit ne taigü gui-am nami pumsa vam hnuh gui vä” cik ci. Ngami cu Taigü gui ah ami hteh nak lam ah hteit ba zawp ci gui. ¹⁵ Ngami ung kaa, chang tumat cu anat nak a maih hmat law netah, Khanpughi cu m’lau ne m’hlüngtai ne, Bawipa Jesuh ah pei ah law ba ci. ¹⁶ Cun kawn ah a kho pei ah m’khuuk doong ne kawp ne, abäkhäk ah mawng cu m’tamkhah ci. ¹⁷ Ani cu Samaritan chang ah kiak ci. Bawipa Jesuh naw, “Khei-lei ah ei chang sing ghaa cu theek ba ci gui, chang sing ko mä a hawi ang? ¹⁸ Khanpughi m’hlüngtai khai ah shin ah chang khui hei ah kawn ah a u kä om ba ne ma?” ci ne ng’shi gui ci. ¹⁹ Cun kawn ah ani-am, “ng’düi law ne hteit ba ä, na zum nak awn na nat nak theek pyi ci nei” ci ne kiak nak ci. ²⁰ Pharisee am shah gui naw, “Khanpughi ah uknak kho cu a i zah ung gawk lawk khai ang?” ci ne Bawipa Jesuh cu ng’shik ci gui. Bawipa Jesuh naw, “Khanpughi ah Uknak kho cu mik awn hmuh vai ah dang ciah kä kiak ci. ²¹ A u naw phi teng tu vä, Khanpughi ah uknak kho cu shin ung om ci, cän ung om ci, ci ne pyein thei vai kä kiak ci. Akcang ah pyein ung Khanpughi ah uknak kho cu na m’lung kyong ah om ci nei” cik ci. ²² Cun kawn ah Bawipa Jesuh naw ang düihpüi gui-am, “Chang ah Htapa ah kho hnüüp ät la nangmi ah ng’zak hlü ah kho hnüüp cu gawk lawk khai. Cun ung phi cun goi cu, kä ng’bui khai. ²³ Chang gui naw, “chang ah Htapa cu shi ah nei a om, cä ah nei a om” ci ne ami pyein ung phi, läk ne kä nami shui- en tu vai. ²⁴ Kho a lai läp ung khankho mik cu kho cawi, kho kem ah khüt ne adei khang ah mäih ah, chang Htapa a kyum law ba hnüüp kiak khai nei. ²⁵ Cun ung phi chang ah Htapa cu nuipai ciah zaica nak la tuhchü chang gui ah huut-taap nak cu bui maa khai nei. ²⁶ Noah ah om zah ung a kiak ah mäih ah chang ah Htapa a gawk law ba khin ung kia law ba khai. ²⁷ Noah ni, htein-paw im kyong ah ami luh kawn ah tui naw lin gui sei, chang gui ami didap ah hnüüp kä gawk pha ung chang gui cu, ei ne aw ne, ng’chu-la ne om te ci gui. ²⁸ A cun ah mäih ah Lotah ah om zah ung phi, chang gui cu ei aw ne, sumlei ne, k’pyu-im ne, kholo ne om te ci gui. ²⁹ Sodom ung kaa Lotah ang düih law hnüüp ung khankho ah kaa zam- mei kho aa law sei, chang gui avan dimaih zawp ci gui. ³⁰ Chang ah Htapa ang dang law ba hnüüp ung phi a cun ah mäih ah kia law ba khai. ³¹ A cu hnüüp im m’kiung khan ah om ciah chang naw, a khawhchaam va la ba khai ah im kyong ah kä a vah luh-en ba vai. Lai ah om ciah chang phi im mah kä a hteh-en ba vai. ³² Lotah ah chu nami shüm ba vai. ³³ A ghin nak hun hlük ci cu, a ghin nak ng’chah khai, a ghin nak ah kä ng’vang ci cu hun nak gah khai. ³⁴ Kei naw akcang ka pyein cu, cun ah mü ung, ih phak tumat ung ip ghawm ci goi ah chang hnih ung kaa, tumat cu la ne tumat cu nawng shüt khai. ³⁵ Sum ng’gon ne suk ciah hnumi hnih ung kaa tumat cu la ne, tumat cu nawng shüt khai. ³⁶ Lai atäng ah bik ci goi ah pami hnih ung kaa tumat cu la ne, tumat cu nawng shüt khai” ci ne m’thein gui ci. ³⁷ Ang düihpüi gui naw, “Bawipa, cun gui cu, a hawn ah kho ung kia lawk khai ang?” ci ne ng’shi u khätah; Bawipa Jesuh naw, “Aksi gui ah om nak ah langta gui ng’bum lawk khai gui nei” ci ne m’thein gui ci.

¹ Cun kawn ah Bawipa Jesuh naw, ang düihpüi gui-am, kä kia düt- en ne ang täi ah ami taigü vai ah, m’tumtäng ne m’thei gui ci. ² Pigawnu tumat ung suki tumat om ci. Ani cu Khanpughi phi kä kyih ci, chang phi kä aa cih chang ah kiak ci. ³ A cun ah pigaw ung hmeinu tumat om ci. Ani cu suki ah a shäng shäng law ne, “Ka ng’küükneet püi ah chang cä, ka näng vai ah na ci pe ä” cik ci. ⁴ Hmeinu ah pyein cu suki naw akda vei maa nak ci. Cun ung phi ak hnu ah “Kei cu Khanpughi phi kä ka kyih ci, chang phi kä ka aa ci. ⁵ Shin ah hmeinu, k’paamcai aih ci, ani ah mawngma düng khai ah ka pyein tu pek khai. Kä cun ung kei nak paamcai lä ne, na zaica sak khai” ci ne amät naw ngai ci. ⁶ “Shin ah kä nik ciah suki ah ng’thu cu ngai shüm vä, ⁷ Khanpughi naw akchang gui cu, am gein gui vai ah amü akhnüüp m’lau ne ami ng’zoih ung kä m’khoichaa gui ah om khai ang? Ani naw ngami am gein gui vai ah düngzeng düt khai ang? Kei naw akcang ka pyein cu; ⁸ Bawipa naw ang ghit ah ng’düng khai ah m’khoichaa pe gui khai nei. Cun ung phi chang ah Htapa a law ba ung khomdek khan ah zumnak cu hmuk khai ang” cik ci. ⁹ Amät naw amät chang khän ah ngai ne, chang k’shedam nak ciah chang gui-am Bawipa Jesuh naw, shin ah m’tumtäng nak cu m’thein gui ci. ¹⁰ “Kho hnüüp ät ung chang hnih cu taigü khai goi ah pum im ah hteit ci goi: tumat cu pharisee, tumat cu akhawnlook ciah kiak ci. ¹¹ Pharisee cu amät bäng ng’düi hnga netah, “Aw, Khanpughi aw, chang gui cu, a i baw ng’za hlük tat ci ni, kä düng ci ni, chang ah hta kat püi ci ni ah kiak ci gui. Kei cu cun ah chang gui ah mäih ah kä ka kiak ci. Shin ah akhawnlook ciah chang ah mäih ah phi kä ka kia tuk ci, cun ah kia sei Khanpughi ka ning m’hlüngtai ci. ¹² Kho hnüüp chih ung hnüüp goi ci, ei hlawi ne ka taigü ci, ka gah phung ah bum ghaa bum ät phi Khanpughi-am ka pek ci,” ci ne taigü ci. ¹³ Cun ung phi akhawnlook ciah chang läi cu, ani awn ang shawng ah ng’düi net, khan kä dang dat ah kawp netah, “Aw, Khanpughi aw, kat nak ka bik ciah kei chang kaa cu nam gein ä” ci ne ang kyang k’beeih ne taigü ci. ¹⁴ Kei naw ka ning m’thein gui cu, cun ah akhawnlook cu akat nak k’phiawn sei a im ah hteit ba ci, pharisee läi cu akat nak kä k’phiawn ci. A i ah kia sei ci ung, amät naw amät m’hlüngtai ci cu neim saknak gah khai, amät naw amät neim sak ci cu m’hlüngtai nak gah khai” ci ne m’cäi gui ci. ¹⁵ Cun sang ung chang am shah gui naw ami hta k’hmaw gui cu Bawipa Jesuh naw ami khan ah akut taih ne hrilham a peit gui vai ah law püi ci gui. Cun cu ang düihpüi gui naw hmu u netah, gen gui ci gui. ¹⁶ Cun ung phi Bawipa Jesuh naw akhmaw gui cu khü gui netah, “Akhmaw hta gui kei ah law u sä, kä maa na gui vä, Khanpughi ah uknak kho cu ngami ah kho ah kiak ci nei; ¹⁷ Kei naw akcang ka pyein cu, akhmawhta ah mäih ah kä zum ciah chang phung cu Khanpughi ah uknak kho ah kä lut hlawt khai nei,” ci ne m’thein gui ci. ¹⁸ Jew changvai tumat naw, “Nik ciah saza aw, angtäi ghin nak gah vai ah a i ang ka bi kaw” ci ne Bawipa Jesuh cu ng’shi lawk ci. ¹⁹ “Bawipa Jesuh naw,” a i ah kia sei kei cu chang k’ni ah na na khü ang? Khanpughi ah kawn ah chang k’ni a u kä om ci nei. ²⁰ Thukhän gui na hmat pyi ci kia ne; changah chuhta kä kat püi vai, chang kä ngawn vai, kä m’guuk vai, hleei pyein ne kä saksi vai, nupa chang m’sui vai, ci gui cu na läk vai” ci ne kiak nak ci. ²¹ Cun ah chang naw, “Cun ah thukhän gui cu ka hmaw sang ung tün ne ka läk pyi ci” cik ci. ²² Cun aci cu Bawipa Jesuh naw ng’za netah, “Nang ung tumat hlü ba ci, na khawhchaam avan zoi ne, ghawipyam ci gui-am na peit gui vai, cun ung nang cu khankho ah na bühmang khai;cun kawn ah kahnu ah na na läk vai” ci ne kiak nak ci. ²³ Cun ah chang cu bühmang ciah kia ne, Bawipa Jesuh ah ng’thu cu ng’za netah ahmai m’kyuum ne hteit ba ci. ²⁴ Cun cu Bawipa Jesuh naw hmu netah, “bühmang ciah chang Khanpughi ah uknak kho ah aluh vai cu khak aih ci nei, ²⁵ Ng’pyüm mik ung seikong a luh vai cu azäi ung zäi hngaw khai, cun ung phi bühmang ciah chang Khanpughi ah uknak kho ah a gawk vai cu kä zäi ci nei” ci ne kiak na gui ci. ²⁶ Cun ah ng’thu ng’zak ciah chang gui naw, “Cun ah akiak ung a u hun nak ah gawk hlawt khai ang?” cik ci gui. ²⁷ Bawipa Jesuh naw, “chang naw kä am khüt cu Khanpughi naw m’khüt ci nei” ci ne kiak na gui ci. ²⁸ Cun kawn ah Peter naw, “Bawipa, keimi cu kami pyu im nawng shüt ne kami ning läk pyi ci nei” ci khätah, ²⁹ Bawipa Jesuh naw, “Kei naw akcang ka pyein cu, Khanpughi ah uknak kho ah hmawk ah, a im lo, akchu hta, anu pa, a phäi nau nawng shüt ciah chang cu. ³⁰ tuhchü a ghin zah ung khawhchaam ang peeih a gah kawn ah, maa ah lawk khai ah kho ung angtäi ghin nak gah khai nei” ci ne m’cäi gui ci. ³¹ Bawipa Jesuh naw, ang düihpüi gui gha-lei-goi cu khü gui netah, “Ngai vä, mik mi cu Jerusalem ah mi hteit lawk ci. Chang ah Htapa ah mawng profet gui naw ami guk ah mäih ah kümbe lawk khai nei. ³² Chang ah Htapa cu chang pakhui hei ah kut ung ap khai gui, päipih khai gui, ami m’shi awn m’thui khai gui; ³³ htung awn that khai gui, ngawn khai gui. Cun ung phi ak hnüüp thum hnüüp ung tho ba ne ghing ba khai nei” cik ci. ³⁴ Cun ung phi ang düihpüi gui naw, ani ah ng’thu cu api phi kä hmat ci gui. Bawipa ah ng’thu cu thuuk aih ne, ng’zih khätah, ngami naw kä hmat hlawt ci gui. ³⁵ Bawipa Jesuh cu, Jerikho gawnu pei ah a gawk law sang ung amik m’dauh tumat cu lam pei ah ngo ne, ng’zoi ne om ci. ³⁶ Ani cu chang gui ah hteh hton shim netah, ng’shi tu gui ci. ³⁷ Chang gui naw, Nazaret ah kaa Bawipa Jesuh a law ah mawng m’thein tuk ci gui. ³⁸ A cun ah chang naw, “David ah Htapa, Jesuh Bawipa, kei cu na m’gein ä” ci ne m’lau ci. ³⁹ Ama ah om ciah chang gui naw, adüm ah a om vai ah ng’lii ne pyein ci gui. Cun ung phi ani cu, “David ah Htapa, Jesuh Bawipa, kei cu nam gein ä” ci ne m’lau gäk gäk ci. ⁴⁰ Cun ah kia sei Bawipa Jesuh cu ng’düi netah, cun ah chang cu ami law püi vai ah pyein ci. Cun ah chang cu a pei ah gawk law khätah; ⁴¹ Bawipa Jesuh naw, “Nang ah hmawk ah a i ka ning bi peit vai ang?” ci ne ng’shik ci. Amik m’dauh naw, “Bawipa, ka mik ma ne m’dei sak ä” cik ci. ⁴² Bawipa Jesuh naw, “Na mik m’dei sä, na zum nak naw, na mik ning m’dei sak pyi ci nei” ci nak ci. ⁴³ A cun vai-am ani cu amik m’dei lawk ci Cun kawn ah Khanpughi ah bämang nak m’hlüngtai ne, Bawipa Jesuh ah hnu ah läk tuk ci. A cun gui cu hmu tuk ciah chang gui ami van cu Khanpughi ah ming m’hlüngtai ci gui.

¹ Bawipa Jesuh cu Jerikho gawnu sun pah ne a hteh nak lam ah ² A cun ah gawnu ung Zakhaeus ming nak ciah, akhawnlook ciah, ang vaipi tumat om ci. Ani cu bühmang ci. ³ Ani naw Bawipa Jesuh a i ah mäih lawk ci ang ci ne, a hmuh tu vai ah k’tha nak ci. Cun ung phi ani cu tawi hta ci kia ne, chang da aih khätah Bawipa Jesuh cu kä hmu tu hlawt ci. ⁴ Cun ah kia sei, Bawipa Jesuh a law nak vai ah lam ung ana va dawng ma netah, k’thei ghing ung kai ne, ana teng ci. ⁵ Bawipa Jesuh cu a cun ung a gawk law ung sing ah khan ah han dan netah, “Zakhaeus, a tuhbäi kyum law ba ä, tuh ngawi nang ah im ah ka kai lawk khai nei” cik ci. ⁶ Zakhaeus cu sing ghing ah khan ah kaa kyum law ba netah, Bawipa Jesuh cu zeikiai ne a na daou ci. ⁷ A cun gui hmu u netah, chang gui naw, “shin ah chang cu kat nak bik ciah im ah kai khai ah hteit ci nei” ci ne ng’htau ci gui. ⁸ Zakhaeus cu ng’düi law netah, Bawipa Jesuh-am “Bawipa, kei ah ka khawh cu a teih k’pai ne ghawipyam ci gui-am ka pek khai nei. Kei naw chang ah ngui kä düng ciah ka lak a om ung phi, a cun ah ngui ah ak phli ah ka pe ba khai nei” cik ci. ⁹ Bawipa Jesuh naw, “shin ah chang cun phi Abraham ah hta ng’shon ah kia sei, hun nak cu a tuh ngawi shin ah im khan ah gawk law pyi ci nei. ¹⁰ Chang ah Htapa cu maih ciah chang gui shui ba gui ne hun gui khai ah kyum lawk ci nei” ci ne Zakhaeus-am kiak nak ci. ¹¹ Cun zah ung Bawipa Jesuh cu Jerusalem gawnu pei ah gawk lawk ci. Chang gui naw Khanpughi ah uknak kho cu atuh bäi dang lawk khai ci ne ngai ci gui. ¹² Cun ah kia khätah Bawipa Jesuh naw, “Mang ah hta tumat cu, ghangpughang-ah kia law vai netah, akho hei ah a shäng hteit ci. ¹³ Kä a hteh pha ung akchang shäm gui sing ghaa cu khü gui netah, kei kä ka gawk law ba phaa ah chuih nami sumlei vai” ci ne gui tangka a phe ci pe gui ci. ¹⁴ Cun ung phi a kho ung ak chang gui naw, ani cu m’thüi na u netah, ‘ani ah uknak kä kami ng’za hlük ci nei’ ci ne ng’shä tüi ne pyein lawk ci gui. ¹⁵ Ani cu Ghangpughang ah kia ne law ba netah, a gawk law ba vai-am a peit gui shüt ah ngui awn sumlei ne a i chü ci ami gah ah hmat hlü netah, chang shäm gui cu khü ne ng’shi gui ci. ¹⁶ Ak htük ah changshäm tumat cu law ne, “Bawipa aw, na na peit shüt tangka aphe awn phe gha ka gah ci nei,” cik ci. ¹⁷ Ghangpughang naw, “Na bä ci, nang cu changshäm k’ni ah na kiak ci, api ung phi na bekhüt ci kia sei, gawnu ghaa na uk vai ka ning pek ci nei” ci nak ci. ¹⁸ Ak hnih nak tumat cun phi law ne, “Bawipa aw, na na peit shüt ah tangka aphe awn phe hma ka gah ci” ci ne pyein ci. ¹⁹ Ghanpughang naw, “Nang-am phi gawnu gaw hma na uk vai ka ning pek ci” ci nak ci. ²⁰ Changshäm tumat cun phi law ne, “Bawipa aw, na na peit shüt ah tangka aphe cu acun a lüng ah om ci nei, ak ni ah ka gim ci nei, ²¹ Nang cu na nget aih ci kia sei ka ning kyih ci. Nang cu kä na kaa phi na lak ci, kä na geit phi na khäm ci ci,” ci ne pyein ci. ²² Ghangpughang naw, “Nang changshe, namät ah ng’thu awn ka ning m’khoi m’chak khai. Kei cu nget ne kä ka kaa phi ka lak ah mawng, kä ka geit phi ka khäm ah mawng, cu hmat lang ne, ²³ a i ah kia sei ng’lon khai ah kä bi ah, ashin düt na na ap law ba ang?” ci ne ng’shik ci. ²⁴ Cun kawn ah ghangpughang naw, apei ah chang gui-am, “Ani ung kaa tangka aphe cu la ne, tangka phe ghaa tak ci-am peit vai nei” cik ci ²⁵ Chang gui naw, “Bawi aw, ani ung tangka phe gha om pyi ci nei” cik ci gui. ²⁶ Ghangpughang naw, “Kei naw akcang ka pyein cu, bühmang ci-am ka pe ba mä khai, shuh ghawi ciah kaa ak om hta avan ka lak pek khai. ²⁷ Cun kawn ah kei ah uknak kä ng’za hlük ciah kei ah gaa gui cu, kama ah lawpüi ne ngawn gui vä, ci ne pyein ci” ci ne m’thein gui ci. ²⁸ Acun kawn ah Bawipa Jesuh cu Jerusalem ah hteh vai ah amät ma ne hteit ci. ²⁹ Olive khomhtung pei Bethpheik la Bethani pigaw pei ah gawk law u netah ang düihpüi gui am, ³⁰ “Mi ma lam ah om ciah pigaw ah nami hteh vai, pigaw ah nami gawk vai-am, a u naw kä ang cun nak man ah ng’se hta tumat cu nami hmuk khai. Cun ah ng’se cu gui awn khit ne k’pawng khai gui, gui cu k’phian ne nami law püi vai. ³¹ Chang naw a i vai ng’se nami k’phian ang ci ne, ami ning shi gui ung, “Shin ah ng’se cu kami Bawipa naw ng’za hlük ci nei ci ne nami pyein vai,” ci ne m’cäi gui ci. ³² A tüih ah chang gui cu hteit u netah, Bawipa naw am cäi gui ah mäih bä ah apäng hmuk ci gui. ³³ Ngami naw ng’se ami k’phian zah ung ka nak ci naw, “Nangmi a i ah kia sei, ng’se nami k’phian ang?” ci ne ng’shi gui ci. ³⁴ Ngami naw, “Shin ah ng’se cu kami Bawipa naw ng’za hlük ci nei” ci ne pyein ci gui. ³⁵ Cun kawn ah ng’se cu Bawipa Jesuh ah om nak ah law püi ci gui. Ng’se ah khan ah ami zih gui phah ne Bawipa Jesuh cu ng’cum sak ci gui. ³⁶ Bawipa Jesuh a law nak ah lam ung chang gui naw, ami zih gui ana phah ci gui. ³⁷ Jerusalem gawnu ang et law nak, Olive m’htung zuk khum nak lam ah a khahpüi law tuk ci gui ami van cu cäicat vai gui ami hmuh ah phäh ah Khanpughi ah ming cu m’lau ne m’hlüngtai ne zeikiai ci gui. ³⁸ Ngami naw, “Khanpughi ah ming awn kyum lawk ciah, Ghangpughang ung Khanpughi ah zeikiai nak om sä. Khankho ung ding gei nak om sä; Khanpughi ah bämang nak cu Khankho ung be sä” ci ne m’lau ci gui. ³⁹ Cun zah ung chang gui ah ng’lung ah kaa pharisee gui naw “Bawipa, na chang gui adüm ah ami om vai ah m’cäi gui ä” cik ci gui. ⁴⁰ Bawipa Jesuh naw, “Kei naw akcang ka pyein cu, shin ah chang gui adüm ah ami om ah a kiak ung lung gui cu tho law ne m’lau lawk khai gui nei” cik ci. ⁴¹ Bawipa Jesuh cu Jerusalem gawnu ah gawk law ne, cun ah gawnu cu hmu law netah, kyap ci. Bawipa Jesuh naw, “Nang Jerusalem, ⁴² nang naw tuh ngawi dimdeeih nak na hmat vai sü ung, zeikiai nak om khai sü te, cun ung phi nang naw, cun kä na hmuk ci. ⁴³ Gaa gui naw nang cu, am kawt päng ung ning mah u ne, ami ning koi nak ah khin gawk lawk khai nei. ⁴⁴ Cun ah gaa gui naw, nang la gaw kyong ah om ciah chang gui cu, avan ngawn ne m’dimdap zawp khai gui. Lung tumat ah khan ah tumat phi ng’taih ne kä om ba khai. A i ah kia sei ci ung nang cu ning hun khai ah Khanpughi a kyum law nak ah khin cu, kä na hmat ah hmawk ah kiak ci” ci ne pyein ci. ⁴⁵ Cun kawn ah Bawipa Jesuh cu taigü im ah hteit ne sumlei ci gui cu k’täm ne gawt gui ci. ⁴⁶ Bawipa Jesuh naw, “Khanpughi ah ng’thu, cacim ung, ‘Kei ah im theing cu Taigü im ah kiak khai’ cik ci. Cun ung phi nangmi naw tuhbäi, ng’thup ciah m’guk-ei gui ah om nak ah nami piang pyi ci nei” ci ne taigü im ung sumlei ci gui-am kiak na gui ci. ⁴⁷ Bawipa Jesuh naw ak hnüüp tä Taigü im ah m’theithang gui ci. Cun ung phi taigü ng’vai gui, Thukhän saza gui la, Jew chang ng’vai gui naw Bawipa Jesuh cu, ami ngawn vai ah k’tha nak ci gui. ⁴⁸ Cun ung phi chang akda naw Bawipa Jesuh ah ng’thu cu, aktung ah ngai ci gui kia sei, a i chaa ah ngawn vai ci cu kä hmat ci gui.

¹ Kho hnüüp ät ung Bawipa Jesuh naw chang gui m’cäi gui ne ng’Thu Ni am thein gui zah ung taigü ng’vai gui ni, thukhän saza gui ni, Jew chang ng’vai gui ni cu law u netah; ² “Shin gui bi nak hning vai ah nang ung a i ang a om? Cun ah bi nak hning cu a u naw ang a ning peit? na pyein vai nei” ci ne ng’shik ci gui. ³ Bawipa Jesuh naw, “Kei phi tumat ka ning shi gui khai, Johan naw tui hnim nak a peit cu; ⁴ Khanpughi ah bi sak ang? chang ah bi sak ang? nami pyein vai nei” ci ne ng’shi tuba gui ci. ⁵ Ngami cu ami mät ng’ge u netah, “a i mi cik khai ang? Khanpughi ah bi sak mi ci ung, a i ah kia sei Johan kä nami zum ang? ci lawk khai. ⁶ Chang ah bi sak mi ci ung, Johan cu profet ah kiak ci ciah zum ci gui naw, lung awn na vawi gui khai gui” ci ne kia u netah, ⁷ ngami naw, “a u ah bi sak ah abi cu kä kami hmat ci nei” cik ci gui. ⁸ Cun ci u khätah, Bawipa Jesuh naw, “Shin ah kabi gui cu a u naw na bi sak sei kabi ah kei naw phi kä ka ning m’thein gui khai” cik ci. ⁹ Cun kawn ah Bawipa Jesuh naw shin ah m’tumtäng nak m’thein gui ci. “Chang tumat naw sapyit lo ung ang geitkaw kawn ah, chang gui ghüh ne bi ne ei sak gui ci. Amät cu a kho hei ah hteit ne aksho om ci. ¹⁰ Hnü ät ung ak chang tumat tüi ne, alo ah k’phlam cu shan sak ci. Cun ung phi lo bik ci gui naw, tu that u netah a i kä peit ah tüi ba ci gui. ¹¹ Cun kawn ah lo mah naw ak chang a hei tumat mä tüi ba ci. Cun cun phi tuthat u netah a i kä peit ah hlawt ba ci gui. ¹² Cun kawn ah lo mah naw, ak chang a hei tumat cu tüi ba mä ci. Cun ah chang cun phi leim khai ah tuthat netah, akpung ah k’täm ne gawt ci gui. ¹³ Cun kawn ah lo mah naw, “Ka hta tumat om ci, acun baw ka tüi khai, ani ahteh läi ung kyih aa khai gui” ci netah, ahta cu tüi ci. ¹⁴ Cun ung phi lo bik ci gui naw ani hmuh netah, “Ani cu lo mah ah hta, pakhui m’düng khai ah chang ah kiak ci, ani ngawn netah lo mi kaa nak khai’ ci u netah; ¹⁵ Lo mah ah hta cu akpung ah hteh püi ne ngawn ci gui. Cun ah a kiak ung lo mah naw a i ci lawk khai ang? ¹⁶ Ani naw law ne ng’hlawh ci gui avan gawt gui netah, a sapyit lo cu a hei ghüh ba ne bi sak khai nei” cik ci. Chang gui naw cun cu ng’za u netah, “cun ah kä kia-en sä” ci ne kiak ci gui. ¹⁷ Bawipa Jesuh naw, chang gui teng gui netah, “Lung im co ci gui naw, ami ghawh ah lung cu, aphu küi pibäih ciah, lung ah kia lawk ci” ciah cacim ah mawng cu ka ning m’thein gui khai. ¹⁸ A cun ah lung ah khan ah zu kiak ciah chang cu hnget ne ng’bät khai, a cun ah lung naw a kiak shi ah chang cu khui ne ng’piäüh khai” ci ne m’thein gui ci. ¹⁹ Thukhän saza gui la taigü ng’vai gui cu, Bawipa Jesuh naw ngami-am ci gui ah amtumtäng cu hmat u netah, Bawipa Jesuh cu pha hlük ci gui. Cun ung phi chang gui cu kyih gui ci gui. ²⁰ Cun ah kia sei ngami naw ami phaa nak vai ah m’kawt cu shui ci gui. Ang thu a hma law ung Roman bawi-am pha ne ap vai ci ne, chang k’ni ah ng’shei ciah chang gui cu Bawipa Jesuh ah tüi ne ng’shi sak ci gui. ²¹ Nagmi naw “Sazapa, na ng’thu la na m’theithang cu hman ciah kami hmat ci. Nang cu chang ah hmai kä teng-en ah Khanpughi ah ng’düng nak ah mawng bäng na pyein ci. ²² Cun ah kia sei, akcang cu na m’thein gui ä: Roman ghangpughang- am k’phlam kami ap khai ang? kä kami ap khai ang?” ci ne ng’shik ci gui. ²³ Bawipa Jesuh naw ngami ah theileh cu hmat netah, ²⁴ “Tangka tumat na m’hnuh law vä, shin ah tangka ung a u ah gup la a u ah ming ang a om?” ci ne ng’shi gui ci. Ngami naw, “Roman ghangpughang ah gup la aming om ci nei” cik ci gui. ²⁵ Bawipa Jesuh naw, “Roman ghangpughang ah kaa cu Roman ghangpughang-am nami ap vai. Khanpughi ah kaa cu Khanpughi-am nami ap vai” cik ci. ²⁶ Ngami naw chang gui ah ma ah Bawipa Jesuh ah ng’thu a hma nak cu kä hmu hlawt u netah, ani ah ng’thu ngai ne, cäi ne adüm ah om ci gui. ²⁷ Sihnak ung kaa thawh ba nak kä om khai ci ah zum ciah Sadducees gui cu Bawipa Jesuh ah law u netah, ²⁸ “Sazapa, Mose ah thukhän ung chang tumat cu ahta kä om sei asih ung akchu cu a phäi nau naw akhäm tu ba vai, a phäi nau ah hnün ung pakhui am düng vai” ciah om ci. ²⁹ Hnü ät ung ng’phäi nau gui chang sing chih om ci gui. Ami phäi ng’vaipi cu chumah netah kä hta pha ne sik ci. ³⁰ Akchu cu anau ng’vaipi naw khäm tu ba ci. Ani phi kä hta pha ne si ba ci. A cun ah anau naw mä khäm tu ba ci. ³¹ Ani phi kä hta ne si ba sei, ami van ng’phäi nau chang sing chih cu ami hta kä om sei si zawp ci gui. ³² Ak hnu ah cun ah hnumi phi sik ci. ³³ Cun ah hnumi cu, cun ah ng’phäi nau chang sing chih ami van ah chu ah kia sei, sih nak ung kaa ami thawh law ba hnüüp ung, ani cu a u ah chu ah kiak khai ang?” ci ne ng’shik ci gui. ³⁴ Bawipa Jesuh naw, “Shin ah m’dek khan ung chang gui cu ng’chula ci gui. ³⁵ Cun ung phi sih nak ung kaa tho ba ne khankho ah kai khai ah chang gui cu, kä ng’chula ba khai gui. ³⁶ Ngami cu khanchang gui ah mäih ah kia ne kä si ba hlawt khai gui Ngami cu sih nak ung kaa tho ba ci gui ah kia ne, Khanpughi ah hta ah kiak ci gui. ³⁷ “Moses naw, mei ah däi ciah k’pluup ah mawng a pyein nak ung, Khanpughi cu Abraham ah Khanpughi, Issak ah Khanpughi, Jakop ah Khanpughi a ci cu, sih nak ung kaa, thawh ah mawng a pyein ah kiak ci. Ngami cu Khanpughi ah ma ah ghing ne om ci gui kia sei, ³⁸ Khanpughi cu sik ci gui ah Khanpughi ah kä kiak ci, ghing ci gui ah Khanpughi ah kiak ci” ci ne m’thein gui ci. ³⁹ Thukhän saza am shah naw, “Sazapa, shin cu nik ciah ng’thu na m’hlan ba ah kiak ci nei” cik ci gui. ⁴⁰ Ngami naw län ne ami ng’shi ba vai kä om khätah, cun ami ci ah kiak ci. ⁴¹ Bawipa Jesuh naw, ngami-am, “A i kia sei Messiah cu David ah ng’shon ah kiak khai, nami ci ang? ⁴² David ghangpughang amät naw Salan cacim ung; “Bawipa naw ka Bawipa-am, Na gaa gui cu na kho kaa ah ka gawk sak gui zawp khai. ⁴³ Cun ah kä ah kiak phaa ah chuih Ka k’pat lam ah na ngoh vai” ci ne pyein ci. ⁴⁴ David naw Messiah-am, Bawipa, ci ne khü ci kia sei, a i chaa ah Messiah cu David ah ng’shon ah kia thei khai ang? ci ne ng’shi gui ci. ⁴⁵ Bawipa Jesuh naw ngai tuk ciah chang khli ah ng’zak vai ah ang düihpüi gui-am, ⁴⁶ “Thukhän saza gui cu geing na ne nami hlawi gui vai. Ngami cu suinu sui ne ä-mak ne hteit shüi shüi ci gui. Sumlei hmun ung chang ah chang m’sui gui vai ng’za hlük ci gui. Pum im ung ak hlüng nak pi ung ngo u ne, da law nak ah pawi ung ani nak pi ung ngo hlük ci gui. ⁴⁷ Hmeinu gui ah khawhchaam phi gut ci gui. Chang naw aktung ah ang ngaih gui vai ah ang sau nu ah taigü ci gui. Ngami ah khan ah Khanpughi ah m’kat nak däm pi khai nei” ci ne m’thein gui ci.

¹ Bawipa Jesuh naw mang shüi netah, pum im ah peit nak ung bühmang ci gui naw, ami khawh ami peit cu hmuk ci. ² Ghawipyam ciah hmeinu tumat naw, kyei tangka hnih hta apeit tu cun phi hmuk ci. ³ Bawipa Jesuh naw, “Kei naw akcang ka pyein cu, shin ah ghawipyam ciah hmeinu naw avan ah däm pi sei pek ci nei. ⁴ Chang a hei gui cu ami khawh akpawih law ung vah Khanpughi-am pek ci gui. Shin ah heminu läi cu a ghawipyam pang ung phi ani ung om ciah a khawh avan pe pyi ci nei” ci ne pyein ci. Ng’thu Pyein. ⁵ Ang düihpüi gui am shah naw, Taigü im ami cawh nak ah lung gui a kiom ah mawng la Khanpughi ami peit tah khawhchaam gui abäkhäk ah mawng cu pyein ne ng’thu ci gui. ⁶ Bawipa Jesuh naw, “Shin ah nami hmuh gui cu avan she ne maih khai nei. Lung k’pei tumat phi a hnün ung kä ng’taih ba shüt sei she ne a maih nak ah a khin gawk lawk khai nei,” cik ci. ⁷ Ngami naw, “Sazapa, a i a khin ung cun gui cu kia lawk khai ang? Acun ah a kiak law gui vai hmat nak vai ah a i gui dang law ma khai ang?” ci ne ng’shik ci gui. ⁸ Bawipa Jesuh naw, “Chang naw kä a ning m’hleei-en gui vai ah geing na ne om vä. Chang akda cu kei ah mäih ah ng’hlawk ne ‘Kei cu Messiah nei’ cik ci om lawk khai nei, acun ah khin cu gawk law pyi ci nei, ci ne ning m’hleei gui ci phi om lawk khai nei. ⁹ A cun gui ah hnu ah kä nami läk-en vai nei. Ng’tuk-ah ah mawng la ng’küükneet nak ah mawng nami ng’zak ung kä nami kyihkyawk- en vai. Acun gui cu akhtük ung gawk law ma khai, cun ung phi kho ang pyi nak vai ah a khin kä gawk law phak ci nei” cik ci. ¹⁰ Cun kawn ah Bawipa Jesuh naw, “Chang pakhui tumat la tumat, kho ahei la ahei ng’tuk nak om khai. ¹¹ A kho päng ung ak nuipai ah shihpi ah thüng nak, ei awk ah maih nak, gawpyam ah ng’peeih nak gawk lawk khai. Kyihkyawk cäicat gui vai khankho ah dang lawk khai. ¹² Cun gui kä a gawk law pha ung chang gui naw ning pha gui ne, ning dukdeiu na gui khai gui. Pum im ah m’khoichaa vai ah ning ap gui u ne, thawng ung ning chum gui khai gui. Nangmi cu kei ah hmawk ah ghangpughang ah ma, bawi ah ma ah nami gawk khai. ¹³ Cun gui cu nangmi naw Thu Ni nami pyein nak vai ah akhin k’ni ah kiak khai. ¹⁴ Cun ah kia sei a i ah nami thu tuba vai kä ng’ä-en u ne, nami m’lung ung nami k’üüp vai. ¹⁵ A i ah kia sei ci ung nami gaa naw kä a ning m’khüt gui vai ah hmuhmat nak la ng’thu m’gawng thei nak cu ka ning pe gui khai. ¹⁶ Nami nupa, phäi nau, mätzah gui naw gaa ah kut ung ning ap gui khai gui. Nangmi ung kaa am shah cu ngawn khai gui. ¹⁷ Kei ah hmawk ah chang gui naw ning gen gui khai gui. ¹⁸ Cun ung phi nami lu ung lusam ng’ma ät phi kä di düt khai. ¹⁹ Akhäng htek ah nami ng’düih vai, cun ung hun phiawn nak nami gah khai. ²⁰ Jerusalem cu gakap gui naw ngäng u sei nami hmuh ung adi law nak vai ng’et lawk ciah nami hmat vai. ²¹ Cun zah ung Judea kho ung om ci gui khomhtung lam ah dawng u sä, pigaw kyong ah om ci gui, pigaw k’pung ah hteit u sä, pigaw pei ah om ci gui pigaw kyong ah kä hteit-en u sä. ²² Cun cu “Hmakat m’kyuk nak ah hnüüp” ah kiak ci, ciah cacim ung kaa ang dang law nak ah kiak ci. ²³ Cun zah ung käu mah ci la ahta züt ciah hnumi gui cu ang htei ah zaica khai gui. Judea kho cu zaica nak ung gawk khai, chang gui ah khan ah hma m’kyuk nak om khai. ²⁴ Chang am shah cu chim awn sik khai gui, am shah cu pha ne, khlei- htein nah ne, a kho päng ung hteh püi khai gui. Chang khui hei gui naw ami uknak kä ang pyi pha ah chuih Jerusalem cu ami kho awn kai nak khai gui. ²⁵ “Hni cha aisi gui ung cäicat vai gui dang lawk khai. Khomdek khan ah chang gui cu tuinu ah ng’hnawk ng’za ne cäicat khai gui. ²⁶ Khomdek khan ah kho ah shet nak a gawk law vai hmat ciah chang gui cu, cäi ng’ä aih khai gui. Kho k’häu ung kumkü aisi gui cu thüng ne zong zawp khai gui. ²⁷ Cun kawn ah küikyang ciah hlüngtai nak la bämang nak awn be ne, ng’mei bawk ung ng’cum ne lawk ciah chang ah Htapa cu nami hmuk khai. ²⁸ Acun gui tün ne agawk law ung, Khanpughi naw aning hun nak gui vai ng’et lawk ci kia sei, täu law ne, ng’düi law ne nami na dan vai” ci ne m’cäi gui ci. ²⁹ Cun kawn ah Bawipa Jesuh naw, m’tumtäng ah am thein gui cu; “Thei ghing la ahei sing ghing gui cä teng vä, ³⁰ Sing gui ami lim law ba ung kho chaa lawk khai ah nami hmat ci. ³¹ Acun ah mäih ah ka pyein gui cu dang law sei nami hmu ung, ‘Khanpughi ah uknak kho ng’et law ci’ ciah nami hmat vai. ³² “Kei naw akcang ka pyein cu, tuhbäi ghing ciah chang gui kä ami sih phaa zawp ung ka pyein gui cu ng’dang zawp khai nei. ³³ Khankho la khomdek ang pyi ung phi, kei ah ng’thu cu kä ng’pyi khai. ³⁴ “Nangmi cu ei awk zeikiai nak düt la khomdek pumsa ah phäh düt ah kä mü thai u ne, geing na ne nami om vai nei. ³⁵ m’khoichaa nak ah hnüüp cu thau ah ng’chawi ah mäih ah nami khan ah akten ah gawk lawk khai nei. Cun ah hnüüp cu khomdek khan chang avan ah khan ah gawk khai nei. ³⁶ Tholet ne nami om vai, gawk lawk khai ah kho ah shet nak cu m’khüt ne, chang ah Htapa ah ma ah ng’düi ne m’khoichaa nak nami awt hning vai ah angtäi sei taigü ne nami om vai nei” ci ne m’cäi gui ci. ³⁷ Bawipa Jesuh cu kho hnüüp zah ung pum im ah m’theithang gui ne, khomü lam ah Olive khomhtung ah kai ci ci. ³⁸ Chang gui cu ang thu ngai tuk khai gui ah kho ngawi ah ng’dawt ne pum im ah law ci ci gui.

¹ Phiawn nak pawi ah ming ciah k’caw kä shum ne m’htut deng ne bi ah pawi cu ng’et lawk ci. ² Taigü ng’vai gui la thukhän saza gui cu, chang gui kyih u netah, Bawipa Jesuh ngawn nak vai ah lam cu adüm ah shui ci gui. ³ Cun kawn ah Satan cu Judas Iskariot ah m’lung kyong ah lut ci. ⁴ Judas cu Taigü ng’vai gui la Pum im ngäng ciah bawi gui ah hteit sei, a i cha ah ami kut ung Bawipa Jesuh a ap gui vai ah mawng cu ng’ge nak ci gui. ⁵ Ngami cu zeikiai u netah, Judas-am ngui peit vai ah shai tak ci gui. ⁶ Judas naw a cun zum netah, chang khli ah kä hmat-en ah ami kut ung Bawipa Jesuh a ap nak gui vai ah a khin cu dät ne om ci. ⁷ K’caw kä shum ah m’htut deng ne binak ah pawi ung, htome hta ngawn ne taigü vai ah a khin cu gawk lawk ci. ⁸ Bawipa Jesuh naw, Peter la Johan-am, “Nangmi hteit ne mi ei vai paskha mü ei ana piang niä” ci ne tüi goi ci. ⁹ “Ngani naw, “a hawi ah kani na pian vai ang?” ci ne ng’shi ba ci goi. ¹⁰ Bawipa Jesuh naw, “Nangni cu pigaw kyong ah nani gawk law ung tui-um phui ciah chang tumat awn nami ng’hmuk khai. Acun ah hnu ah läk ne aluh nak ba ah im ung nani luh tu vai. ¹¹ Cun kawn ah im mah-am, “Bawipa naw, kang düihpüi gui awn atäng ah pasakha mü ei cu, a hawn ung kami ei khai ang?” ci ne kiak ci nei, ciah nami m’thein vai, ¹² Im mah naw, a im ah khan ah kyong ang shawngnu ning m’hnuh gui khai, acun ung nami pian vai” ci ne m’cäi goi ci. ¹³ Ang düihpüi goi cu hteit ni ne, am cäi goi ah mäih ah chang hmu ni netah, pasakha mü ei vai cu piangtham ci goi. ¹⁴ Akhin gawk law sei Bawipa Jesuh cu ang düihpüi gui awn atäng ah mü-ei ei vai ah ngok ci gui. ¹⁵ Bawipa Jesuh naw, “Kei kä ka sih pha ung pasakha mü-ei cu nangmi awn atäng ah ei vai ah ka ng’za hlük ci. ¹⁶ Kei naw ka ning m’thein gui cu, “Khanpughi ah uknak kho ung shin ah mü-ei ei ah mawng, kä ang dang pha ah chuih kei naw kä ka ei ba khai” ci ne pyein ci. ¹⁷ Cun kawn ah Bawipa Jesuh naw, sapyit tui khap cu la ne, Khanpughi m’hlungtai netah, “Shin ah khap cu la ne ng’tei ne aw vä, ¹⁸ Kei naw ka ning m’thein gui cu, tuhbäi ung tün ne Khanpughi ah uknak kho kä a gawk law pha ah chuih, kei naw shin ah mäih cu kä ka aw ba khai nei” cik ci. ¹⁹ Cun kawn ah Bawipa Jesuh naw, m’htut cu la ne Khanpughi m’hlüngtai netah, m’htut cu k’bou ne, ang düihpüi gui-am tei gui netah, ‘Shin ah m’htut cu nangmi ah hmawk ah ka k’bou ah ka pumsa ah kiak ci, ²⁰ kei nami na shüm nak ah la ne ei vä” cik ci. Acun ah mäih ah ei ami ei kawn ah sapyit tui khap cun phi la netah, “Shin ah khap cu Khanpughi ah thukhän thai, aning m’hnüt nak gui vai ah nangmi ah hmawk ah ka huk ah, kasi ah kiak ci,” ci ne pyein ci. ²¹ “Cun ung phi teng vä, gaa ah kut ung kei na ap khai ah chang cu kei awn atäng ah vai tuk ci nei. ²² Chang ah Htapa cu Khanpughi naw akbäi ah mäih ah akcang ah sik khai, cun ung phi ani gaa ah kut ung ap ciah chang ah khan ah shetkat nak om khai nei” cik ci. ²³ Ang düihpüi gui naw, ‘Cun ah bik khai cu, mik mi ung kaa a u ang?’ ci ne ami mät gui ng’shi tuk ci gui. ²⁴ Ang düihpüi gui naw, ami mät ung kaa a u hlüngtai pi ciah ng’cuhcan u khätah, ²⁵ Bawipa Jesuh naw, “Khomdek ghangpughang gui cu chang gui ah khan ah ami hlüngtai nak om ci, uknak ung om ciah chang gui naw phi, kei ng’tüi chang naw na chang m’sui ci, ciah ami mät naw ngai ci gui. ²⁶ Cun ung phi nangmi naw cun ah kä nami ngaih vai. Nangmi ung hlüngtai pi ci cu, ak hmaw pi ah mäih ah om sei, ng’vai pi ci cu changshäm ah mäih ah a om vai. ²⁷ Ngo ne ei khai ah chang la tumbei khai ah chang ung kaa, a u ang ahlüngtai pi kaw? Ngo ne ei khai ah chang cu hlüngtai pi ciah kä kia ne ang? Cun ung phi kei cu nangmi ung tumbei khai ah changshäm ah mäih ka kiak ci. ²⁸ Nangmi cu kei awn atäng ah tüihtok nak nami bui awt pyi ciah kiak ci. ²⁹ Kapa Khanpughi naw uknak vai ana peit ah mäih ah nangmi-am ka ning pe gui ci. ³⁰ Nangmi cu kei ah uknak kho ung kei awn atäng ah nami ei aw tuk khai. Cun kawn ah mang ah kiang ung ngo u netah, Israel pakhui gha-lei-goi cu nami uk khai nei” cik ci. Pyein Ci. ³¹ Bawipa Jesuh naw, “Simon, Simon, htangmguh m’hääi ne, angshi angtak m’chaa ah mäih ah ning m’khoimchaa gui khai ah Satan naw akhin gah pyi ci nei. ³² Cun ah kia sei na zum nak ahtek vai ah ka ning taigü pek ci nei. Nang cu kei ah nang hlah law ba kawn ah, na phäi nau gui cu thagui na peit gui vai nei” cik ci. ³³ Peter naw, “Bawipa, kei cu nang awn, thawng na kium ung phi atäng ah ka kium vai, m’htei na hteh ung atäng ah ka hteh vai ah ka zum ci nei” cik ci. ³⁴ Bawipa Jesuh naw, “Peter aw, kei naw akcang ka pyein cu hngeng mü, ai kä a khon phaa ung, ‘ani kä ka hmat ci nei’ ci ne thum vei na na mak khai nei” ci ne kiak nak ci. ³⁵ Cun kawn ah Bawipa Jesuh naw, “ngui ng’ip hnih la phahnak cu kä nami hteh püi vai pyein ne ka ning tüi gui ci. Cun ung nangmi ung kä küm ci, a i om ne ang?” ci ne ang düihpüi gui cu ng’shi gui ci. Ang düihpüi gui naw, “A i kä om ci nei” cik ci gui. ³⁶ Bawipa Jesuh naw, “Tuhbäi läi ngui ng’ip la ng’za om ciah chang naw a law püi vai nei. Chim kä om ci naw, akhtu zoi ne chim ak khleih vai. ³⁷ Kei naw akcang ka pyein cu, ani phi ngawn phaa nak ng’küh tuk ci nei” ciah cacim cu kei ung küm khai. A i ah kia sei ci ung kei ah mawng ami guk phung cu küm ci nei” ci ne kiak na gui ci. ³⁸ Ang düihpüi gui naw, “Bawipa, teng ä, shin ung chim lu goi om ci nei” cik ci gui. Bawipa Jesuh naw, “Bäi khai nei” cik ci. ³⁹ Bawipa Jesuh cu ahteh man ah Olive m’htung ah hang kai ba sei ang düihpüi gui naw ahnu ah läk tuk ci gui. ⁴⁰ Khomhtung ah gawk u netah Bawipa Jesuh naw, “Tüihtok nak ung kä nami gawk vai ah taigü vä” cik ci. ⁴¹ Cun kawn ah ang düihpüi gui awn li-kiak ät vai ng’lak nak khai ah hteit netah, m’khuukdong ne, ⁴² Aw Kapa, nang zak hlü a om ung shin ah zaica nak ah khap cu kei ung nang shawng sak ä, cun ung phi kei ah ng’zak hlü ah kä kia ne, na mät ah ng’zak hlü ah kia sä” ci ne taigü ci. ⁴³ Khankho ah kaa khanchang kium law ne, ani-am k’thagui be sak ci. ⁴⁴ Bawipa Jesuh cu ang htei ah zaica ne aktung ah taigü ci;am hutui gui cu si ah mäih ah lut law ne m’dek ung kia lawk ci gui. ⁴⁵ Bawipa Jesuh cu ak taigü nak ung kaa tho ne law ba netah, ang düihpüi gui ip u sei hmu gui ci. ⁴⁶ Bawipa Jesuh naw, “A i ah kia sei nami ih ang? Tho law ba ne, tüihtok nak ung kä nami gawk vai ah taigü vä” ci na gui ci. ⁴⁷ Cun ah Bawipa Jesuh naw ng’thu a pyein zah ung ang düihpüi gha- lei-goi ung kaa Judas cu chang gui khah püi ne lawk ci, Ani cu Bawipa Jesuh ah pei ah ng’et law netah, Bawipa Jesuh cu ng’ui ci. ⁴⁸ Bawipa Jesuh naw, “Judas, nang naw chang ah Htapa cu ng’ui netah, gaa ah kut ung na ap khai ma? ci ne ng’shik ci. ⁴⁹ Ang düihpüi gui naw a i ah kia lawk khai, avan hmat u netah “Bawipa, kami chim awn kami väih vai ang?” ci ne ng’shik ci gui. ⁵⁰ Ang düihpüi tumat naw, taigü ng’vai ah changshäm tumat cu chim awn tu sei, akpat lam akhnga hlang ci. ⁵¹ Bawipa Jesuh naw, “A cän bäng ah” ci netah, a cun ah hnga cu akut awn tawk ne m’htei tu sei khan ba ci. ⁵² Cun kawn ah Bawipa Jesuh naw, ani phak khai ah lawk ci gui ah, taigü ng’vai gui ni, pum im ngäng ciah ng’vai gui ni, Jew chang ng’vai gui ni ah ma ah, “Nangmi naw, kei cu m’guk-ei pha ah mäih ah nami na phak khai ah, chim ni, htungtawn ni awn nami lawk ci ma? ⁵³ Kei cu nangmi awn a täng ah ak hnüüp tä sei pum im ah om lang ngä sei, a i ah kia sei kä nami na pha ang? Cun ung phi nangmi ah akhin cu kho hmüp khui ah kiak ci,” ci ne kiak na gui ci. ⁵⁴ Cun ah chang gui naw Bawipa Jesuh cu pha u netah, taigü tung ah im ah hteh püi ci gui. Peter cu ng’shawng pi pi ne läk law gui ci. ⁵⁵ Chang am shah gui cu im chaam kyong ah mei cik ne awm u sei, Peter cu ami ng’lung ah hteit ne mei awm tuk ci. ⁵⁶ Peter a ngoh law tu cu hnumi hta naw hmu ne, m’htei ne teng netah, “Shin ah chang cu Jesuh ah apaw nei” ci ne pyein ci. ⁵⁷ Cun ung phi Peter naw, “Hnumi hta aw, ani cu kei naw kä ka hmat ci nei” cik ci. ⁵⁸ Cun shäng shäng ba sei, chang tumat naw Peter cu hmu netah, “Nang phi ngami ung kaa ah na kiak ci” cik ci. Cung ung phi Peter naw, chang aw, kei cu ngami ung kaa ah kä kiak ci nei” cik ci. ⁵⁹ Cun kawn ah shei cakzat vai lüng ba khätah, chang tumat naw, “Shin ah chang cu Kalile chang ah kiak ci, kia sei, Jesuh ah apaw ah kiak ci nei” ci ne ang kheing ah pyein ci. ⁶⁰ Cun ung phi Peter naw “Chang aw, nangah na pyein ah mawng cu, kei naw kä ka hmat ci nei” cik ci. Peter naw, cun a ci vai-am, ai khong lawk ci. ⁶¹ Bawipa naw a mang law ne Peter cu m’htei ne teng ci. Cun hmu netah, Peter naw, “Hngeng mü ai kä a khon phaa ung nang naw, ‘Ani kä ka hmat ci nei’ ci ne thum vei na na mak khai” ci ne Bawipa ah pyein cu shüm ba ci. ⁶² Cun ah kia sei, akpung ah lut law ne ang htei ah thüi ne kyap ci. ⁶³ Bawipa Jesuh cu ngäng ne m’täp ciah chang gui naw päipih u ne, tuthat ci gui. ⁶⁴ A hmai shung u netah, nang a u naw ang a ning tukthah, na pyein vai nei” ci ne kiak nak ci gui ⁶⁵ A hei ng’thushe gui awn phi Bawipa Cu shedam nak ci gui. ⁶⁶ Kho thai law khätah Jew chang ng’vai gui ah kiak ciah taigüpa gui la thukhän saza gui cu ng’cut u netah Bawipa Jesuh cu Kongci zung ah hteh püi ci gui. ⁶⁷ Ngami naw, “Nang cu Messiah ang? Nam thein gui ä” ci ne ng’shik ci gui. ⁶⁸ Bawipa Jesuh naw, “Ka ning m’thein gui ung phi nangmi naw kä nami zum khai. Ka ning shi gui ung phi nangmi naw kä nami pyein khai. ⁶⁹ Tuhbäi ung tün ne, chang ah Htapa cu hlüngtai pi k’bäih ciah Khanpughi ah akpat lam ah ngo pyi khai nei” ci ne m’thein gui ci ⁷⁰ Ngami naw, “Cun ah a kiak ung nang cu, Khanpughi ah Htapa ah na kiak ci ma?” ci ne ng’shi ba ci gui. Bawipa Jesuh naw, “Kei cu Khanpughi ah Htapa ah ka kiak ciah nangmi naw nami pyein ci” ci ne kiakna gui ci. ⁷¹ Ngami naw, “Saksi a hei kä hlü ba khai nei, mi mät naw ang thu mi ng’za pyi ci nei” ci ne kiak ci gui.

¹ Phak ciah chang gui ami van ng’düi law u ne, Bawipa Jesuh cu Pilat bawi ah hteh püi ci gui. ² Ngami naw, “Shin ah chang kami pha ah mawng cu Khanpughi-am k’phlam kä pe ba vä, ci ne chang gui m’cäi gui ne, amät naw amät phi ‘Kei Messiah nei, Kei ghangpughang nei’ ci ne kia sei, kami hmuk ci nei” ci ne kiak ci gui. ³ Pilat bawi naw, Bawipa Jesuh-am nang cu Jew Ghangpughang ah na kiak ci ma?” ci ne ng’shik ci. Bawipa Jesuh naw, “Na pyein ah mäih ah kiak ci nei” cik ci. ⁴ Cun kawn ah Pilat bawi naw, taigüpa gui la chang khli gui-am, “Shin ah chang hniim nak vai ah amawng kä ka hmuk ci nei” ci ne kiak na gui ci. ⁵ Cun ung phi ngami naw, “shin ah chang cu Kalile kho ung tün ne Judea kho, shin ung gawk lawk khai ah chang gui m’hleei gui ne thüngpyong sak gui ci nei” ci ne m’lau law pi ne pyein ci gui. ⁶ Pilat naw cun ami ci ng’za netah, “Ani cu Kalile chang maa?” ci ne ng’shi gui ci. ⁷ Herod mang ah uknak Kalile ah kaa ah hmat netah, Bawipa Jesuh cu Herod ah hteh püi sak gui ci. Cu zah ung Herod cu Jerusalem ah om zah ci. ⁸ Herod cu Bawipa Jesuh hmu law netah, ang htei ah zei ci. Ani cu Bawipa Jesuh ah mawng ng’za pyi ci kia ne a hmuh nak hlü phi shou lawk ci. Ani cu cäi aih vai gui, Bawipa Jesuh naw abi ung teng tuk khai ah ngaih u ci. ⁹ Herod naw Bawipa Jesuh cu akda ah ng’shi sei phi kä m’hlan tuba ci. ¹⁰ Tagüpa gui la thukhän saza gui naw, Bawipa Jesuh cu akgai ah k’uum ne huut taap ci gui. ¹¹ Herod la agaakap gui naw phi, Bawipa Jesuh cu, päipih ne shedam nak ci gui. Cun kawn ah aktung ah m’sui m’sak netah Pilat bawi ah tüi ba ci. ¹² Herod la Pilat cu a zan ani ng’gen tu man pang ung phi, cun ah hnüüp ung ng’khawt ba ci goi. ¹³ Pilat naw taigüpa gui Jew chang ng’vai gui la chang ahei gui khü gui netah; ¹⁴ Shin ah chang cu, chang gui hleei hlak ne thüngphyong sak gui ci, ci ne nami law püi ci, cun ung phi na mi ma ah kami ng’zak vai ah ng’shi ngä sei, ani hniim nak vai, a i kä ng’dang ci. ¹⁵ Herod mang naw phi a i kä hmu ne, kei ah tüi law ba ci. Shin ah chang ung sihnak vai kat nak a i kä om ci. ¹⁶ Cun ah kia sei ani cu, htung awn that netah, ka tüi ba khai nei” cik ci. ¹⁷ Pilat cu Pasakha pawi päng ung chang gui ah hmawk ah thawng kium ci tumat phiawn sak ci man ci. ¹⁸ Chang khli ami van naw, “Shin ah chang cu ngawn ä, keimi ah hmawk ah Barabbas cu phiawn sak ä,” ci ne atäng ah m’lau ci gui. ¹⁹ (Barabbas cu pigaw kyong ah a thüngphyong sak gui ah phäh la chang a ngawn ah phäh ah thawng kium ci kiak ci). ²⁰ Pilat naw Bawipa Jesuh cu phiawn sak hlü netah, chang gui ah ma ah pyein ba mä ci. ²¹ Cun ung phi chang gui naw, “Shin ah chang cu kutlamtung ung tai ne ngawn vä, Kutlamtung ung tai ne ngawn vä” ci ne m’lau ci gui. ²² Pilat naw, “Ani naw a i kat nak ang a bi? Ani ngawn nak vai ah kat nak tumat phi kä ka hmuk ci. Cun ah kia sei ani cu htung awn that ne m’cäi netah ka tüi ba khai” ci ne ak thum vei nak ah pyein ci. ²³ Cun ung phi chang gui naw, Bawipa Jesuh cu ktumlamtung ung tai ne ngawn vai ah m’lau laih laih u netah, akhnu ah näng ci gui. ²⁴ Pilat naw ngami ah pyein ah mäih ah m’khoichaa nak cu bik ci. ²⁵ Chang akthüng phyong sak nak la chang ah ngawn nak awn thawng kium ci cu ami pyein ah mäi ah phiawn sak ci. Bawipa Jesuh läi cu ami m’hni ah ami bi vai ah ap gui ci. ²⁶ Gakap gui naw Bawipa Jesuh ami hteh law püi zah ung Sairin pigaw ah kaa Simon ming nak ciah chang cu ana law sei, hmu u netah, pha u ne, ktulamtung cu kawh sak u ne, Bawipa Jesuh ah hnu ah läk sak ci gui. ²⁷ Chang gui akda naw a hnu ah läk lawk ci gui. Hnumi gui am shah gui cu ami ng’kyang k’beeih ne kyap ne läk law tuk ci gui. ²⁸ Bawipa Jesuh naw, cun ah hnumi gui lam ah ng’hlat netah, Jerusalem ah hnumi gui aw, kei ah hmawk ah kä kyap u ne, nami mät la nami hta gui ah hmawk ah nami kyah vai. ²⁹ Ahta kä om ci, kä hta ci la tuui kä tu man ciah hnumi cu zeikiai nak om ci, ci nak ah akhin gawk lawk khai nei. ³⁰ Cun ah akhin ung chang gui naw, khomhtung gui-am, ‘keimi ah khan ah piawn ne kia law vä’ ci u ne; khogui gui-am, ‘Keimi ng’min ne na lin law gui ä’ ci ne kiak khai gui. ³¹ Chiing ne lim ciah a ghing hngaw shin hlawk ah ka zaica ung a ghing chawng ci a i hlawk ah zaica khai ang” ci ne kiak na gui ci. ³² Katnak bik ciah changshe hnih cun phi Bawipa Jesuh awn atäng ah ami ngawn gui vai ah hteh püi ci gui. ³³ “Lu koihmun” ming nak ciah k’päng ah gawk u netah, Bawipa Jesuh cu kutlamtung ung tai ne ngawn ci gui. Changshe hnih cun phi tumat akpat lam, tumat ak-eng lam ah tai ne ngawn goi ci gui. ³⁴ Bawipa Jesuh naw, “Ngami cu a i ami bi ah ami mät naw kä hmat ci gui nei, m’gein gui ä” ci ne pyein ci. Chang gui naw Bawipa Jesuh ah a suisak gui cu, m’shüih tawk ne ng’pai ci gui. ³⁵ Chang gui naw ng’düi ne ami dan zah ung Jew chang ng’vai gui naw, “Shin ah chang cu chang hei gui hun gui ciah, Khanpughi naw am düih ah Messiah ah a kiak ung amät naw, amät hun law shüm sä” ci ne päipih ci gui. ³⁶ Gakap gui cun phi zu aktai tu u netah, ³⁷ “Nang cu Jew Ghangpughang ah na kiak ung, na mät naw na mät hun law shüm ä” ci ne päipih ci gui. ³⁸ Bawipa Jesuh ah alu khan ah phi, “Shin cu Jew chang gui ah Ghangpughang nei” ci ne ca gu ne tai ci gui. ³⁹ Kutlamtung ung ami tai goi ah changshe hnih ung kaa tumat naw, “Nang cu Messiah ah kä na kia ne ma? Na mät phi hun ne, keini phi na hun tu goi ä hawza!” ci ne päipih ne pyein ci. ⁴⁰ Ahei changshe tumat naw, “Nang Khanpughi cu kä na kyih ci ma? Nikni cu ani mäih ah m’kat nak ni gah ung phi; ⁴¹ ni mät ah kat nak awn ni mät ni hteit ciah kiak ci, cun ung phi a ni cu a i phi akat nak kä om ci nei” ci ne kiak nak ci. ⁴² Cun kawn ah Bawipa Jesuh-am, “Ghangpughang ah kia ne na uk law hnüüp ung kei phi na shüm tu ba bäi” ci ne pyein ci. ⁴³ Bawipa Jesuh naw, “Kei naw thukhän ne ka pyein cu, atuh ngaw nang cu kei awn atäng ah paradise kho ah na om khai nei” ci ne kiak nak ci. ⁴⁴ Kho hnüüp ng’lung ung tün ne kho k’awinu a khin ung khüt khai ah khomdek khan avan ung khohni kä dei ba ne shitne hmüp zawp ci. ⁴⁵ Taigü im kyong ah ami zai ah zih phi hnih ah teek ne ng’chak ci. ⁴⁶ Bawipa Jesuh cu, “Aw Kapa, Na kut ung Ka Mumcha ka ning ap ci nei” ci ne m’lau netah kät lawk ci. ⁴⁷ Acun gui cu gakap bawi naw hmu netah, “Shin ah chang cu akcang ah, changni chang khän ah kiak ci, ci ne Khanpughi m’hlüngtai ci. ⁴⁸ Teng tuk khai ah lawk ciah chang gui naw, acun gui cu hmu u netah, ang htei ah azä u ne hteit ba ci gui. ⁴⁹ Kalile ah kaa law tuk ci gui ah Bawipa läk lawk ci gui ah hnumi gui la Bawipa hmat ciah chang gui cu ang shawng ah ng’düi u netah, Bawipa Jesuh cu teng ci gui. ⁵⁰ Judea kho Arimathea pigaw ung kaa Josep ming nak ciah chang ng’vai tumat om ci. ⁵¹ Ani cu changni changdüng ah kia ne Khanpughi ah uknak kho a gawk law vai cu ging ciah chang ah kiak ci. Ani cu kongci ng’vai ah a kiak ung phi, ang vai gui ah k’bäi nak la bi nak cu kä zum tuk ciah kiak ci. ⁵² Ani cu Pilat ah hteit ne Bawipa Jesuh ah a gook cu htüm khai ah va pyein ci. ⁵³ Cun kawn ah kutlamtung ung kaa Bawipa Jesuh ah a gook cu la ba ne, zih bawk awn hlawp netah, a u ah kä ng’phuh nak man lung ami shawk ah khui akthai ung k’phuh ne m’cim ci. ⁵⁴ Cun ah hnüüp cu akchuk hnüüp ah kia ne,a ngawi ung kyin nak hnüüp ah kia lawk khai kiak ci. ⁵⁵ Kalile ah kaa Bawipa läk lawk ciah hnumi gui cun phi hteit ne m’cim tu u ne, ⁵⁶ ng’cim hmun la a gook m’shän ne ami k’phuh cu ang hteing ah hmu tuk ci gui. Kyin nak hnüüp ung thukhän läk u ne, a i kä bi ah adüm ah om ci gui.

¹ Ak hnüüp ät hnüüp kho ngawi hta ah, kho kä thai thai sei, hnumi gui cu ami pian m’tham ah tuing’ui gui hteh püi ne, ng’cim hmun ah hteit ci gui. ² Ng’phuh hmun khui m’kawt ami khai nak ah lungnu cu m’hnawn ah kia sei hmu u netah, khui kyong ah lut ci gui. ³ Cun ung phi Bawipa Jesuh ah a gook cu kä hmuk ci gui. ⁴ Cun ah kia sei ngaih tüh khit u ne ami kiak zah ung, pyü ne khang sei suisak ciah chang hnih cu ami ma ah ang ghit ah ng’dang lawk ci goi. ⁵ Cun ah hnumi gui cu kyi ne kawp u khätah, cun ah chang goi naw? “A i ah kia sei ghing ne om ci cu aksi ah om nak ah nami shui ang? ⁶ Ani shin ung kä om ba ci, ghing ne tho ba pyi ci nei. Kalile kho ah a om zah ung; ⁷ “Chang ah Htapa cu kat nak bik ciah chang gui ah kut ung ap khai gui. Kutlamtung ung tai ne ngawn khai gui, cun kawn ah ak hnüüp thum hnüüp ghing ne tho ba khai, ci ne a pyein cu ngai ba shüm vä,” ci ne kiak na gui ci. ⁸ Cun kawn ah hnumi gui cu Bawipa Jesuh ah ng’thu gui man shüm law ba u netah; ⁹ Ng’cim hmun ah kaa im ah dawng ba u ne, ang düihpüi gha-lei-ät la, ang khahpüi gui ami van-am, amawng avan cu m’thein tu gui ci gui. ¹⁰ Ang düihpüi gui-am cun ah m’thein law ba ciah hnumi gui cu, Mari Makdale, Joanna la James ah nu Mari la ahei hnumi gui ah kiak ci. ¹¹ Ang düihpüi gui naw hnumi gui ah pyein cu, kä zum veih ci gui. ¹² Cun ung phi Peter cu dawng ne ng’cim hmun ah hteit netah, ng’phuh hmun cu m’kein ne teng ci. Hlawp nak ah zih akawn ah a i phi kä om khätah, ang htei ah cacät ne im ah dawng law ba ci. ¹³ A cu hnüüp ung ang düihpüi hnih goi cu Emmaus pigaw ah hteit ci goi. Cun ah pigaw cu Jerusalem ung kaa naw mü chih shou ci. ¹⁴ Ngani cu a cun ah amawng gui pyein ne ng’htau ne lawk ci goi. ¹⁵ Cun ah ng’htau ne ani hteh zah ung Bawipa Jesuh amät ani pei ah gawk law ne, ngani awn atäng ah ng’gui law tu ci. ¹⁶ Ngani naw, ani cu hmu ni ne phi Bawipa Jesuh bä ah kä hmat ci goi. ¹⁷ Bawipa Jesuh naw, “Nangni lam na ni hteh ah k’phei ah a i ang nani pyein” ci ne ng’shi goi ci. Cun kawn ah ngami cu, ani hmai m’kiuum ne ng’düi ni netah, ¹⁸ ngani ung kaa Kleopas naw, “Jerusalem ah gawk lawk ciah khin gui ung kaa, nang bäng vah shin ah kho hnüüp gui ah kyong ung, Jerusalem ah hmu ng’zak ah amawng gui cu kä na hmat tu phak ciah kiak ci,” ci ne kiak nak ci ¹⁹ Bawipa Jesuh naw, “A i ah amawng gui ang?” ci ne ng’shi goi ci. Ngani naw, “Nazaret ah kaa Jesuh ah amawng gui nei. Ani cu Khanpughi la chang ah ma ah ang thu ng’htau a bilawh ung hlüngtai thamah nak awn be ciah profet ah kiak ci nei. ²⁰ Keimi ah taigü ng’vai gui la uk ci gui naw ami ngawn vai ah ap u sei, ani cu kutlamtung ung tai ne ami ngawn nei. ²¹ Ani cu Israel chang gui k’phiawn gui khai ciah ami ngaih u ah kiak ci. Cun gui ah akiak law ah amawng gui cu, tuh ngaw awn hnüüp thum law lawk ci nei. ²² Keimi ah kami paw gui hnumi gui cu kho ngawihta ah ng’cim hmun ah hteit ci gui. ²³ Ngami naw a gook kä hmu ba ci gui. Khankho chang gui bäng kami hmuk ci, ci ne pyein law ba ci gui. Cun ah khankho chang gui naw, Bawipa Jesuh cu ghing ba ne om ci nei, cik ci gui, ci ne pyein ci gui. Cun ah kia sei kami ngai khit ci. ²⁴ Keimi ung kaa am shah gui cun phi ng’cim hmun ah hteit tu u ne, hnumi gui ah hmuh ah mäih bä ah hmu tuk ci gui. Bawipa Jesuh läi kä hmuh nei, cik ci gui. ²⁵ Cun kawn ah Bawipa Jesuh naw, “Profet gui ah pyein man gui zum vai ah, shokshü aih ciah chang k’ang gui aw, ²⁶ Messiah cu bämang hlüngtai nak kä a gah pha ung, ashin ah mäih ah zaica nak cu abui awt vai ah hlü ciah kä kia ne ma?” ci ne ng’shi goi ci. ²⁷ Cun kawn ah Bawipa Jesuh naw, Messiah ung tün ne profet gui naw, ngami ah mawng ami guk ah cacim gui cu tän ne pyein ne m’thein goi ci. ²⁸ Ami hteh nak vai ah pigaw k’et law u netah, Bawipa cu ng’täi ne hteit khai pawng ci. ²⁹ Cun ung phi ngani naw, “Tuhbäi kho mü lawk khai kiak ci, keimi awn atäng ah mi ip tu kaw, ci ne khü tuk ci goi. Bawipa Jesuh cu ngani awn atäng ah ip tuk khai ah läk tu goi ci. ³⁰ Ngani awn atäng ah va kai ne ngo tu netah, m’htut cu la ne taigü ci. Cun kawn ah m’htut cu k’bou ne pe tu goi ci. ³¹ Cun kawn ah ngani cu ani mik m’dei law sei, Bawipa Jesuh cu hmat lawk ci goi. Cun ung phi Bawipa cu ani mik ah hmuh ge ah maih ba ci. ³² Ngani naw lam ah ana ng’htau püi goi zah ung phi bäi, cacim ana m’thein goi zah ung bäi, m’lung kyong ah mei däi ciah mäih ah kiak ci nei, ci ne ani mät ng’htau ci goi. ³³ Ngani cu acun vai-am ng’düi law ba ne Jerusalem ah hteit ba ci goi. Acu ah ang düihpüi gha-lei-ät la ang khahpüi gui cu ng’bum ne ana om u sei hmuk ci gui. ³⁴ Ng’bum ne ana om ciah chang gui naw, “Bawipa cu akcang ah tho ba pyi ci nei, Simon Peter ah ma ah ng’dang ba ci nei” ci ne kiak ci gui. ³⁵ Cun kawn ah ngami naw phi, lam ah ami ng’gui ah mawng, m’htut akbou law zah ung Bawipa ah ami hmat law ah mang gui cu, m’thein tu gui ci goi. ³⁶ Cun ah amawng gui cu ang düihpüi goi naw ami m’thein tu gui zah ung, Bawipa Jesuh cu ami lung ah dang law netah, “Nangmi ung Ding gei nak om sä” ci ne pyein ci. ³⁷ Ngami cu mumchaa naw m’kyih gui ciah ngai ne kyikyawk ci gui. ³⁸ Bawipa Jesuh naw, “A i ah kia sei nami kyihkyawk ang? A i ah kia sei m’lung kä üp, ngaih kä gep sei nami kiak ang? Kei ah ka kut la ka kho gui cu na teng vä. ³⁹ Tuhbäi nami hmuh cu kei ka mät ah kiak ci nei. Kei cu na tawn shüm vä, nami hmuh ah mäih ah kei ung ka sa la ka guh gui om ci nei. ⁴⁰ Cun kawn ah a kut la a kho gui cu ang düihpüi gui-am m’hnuh gui ci. ⁴¹ Cun ung phi ngami cu cäi aih u netah, kä zum hlawt ne ami kiak zah ung, “Nangmi ung ei vai om ne ang?” ci ne ng’shi gui ci. ⁴² Ngami naw ngai ng’shai am cawt cu pek ci gui. ⁴³ Bawipa naw cun cu la netah ami ma ah ei tuk ci. ⁴⁴ Cun kawn ah Bawipa Jesuh naw, “Moses ah thukhän, profet gui ah cacim la Salan cacim ung, kei ah mawng ami guk gui phung cu, akcang ah küm khai nei, ci ne nangmi awn atäng ah ka om zah ung ka ning m’thein gui pyi ci. Ka pyein ah mäih ah tuhbäi küm law pyi ci nei” ci ne m’thein gui ci. ⁴⁵ Cun kawn ah ang düihpüi gui naw cacim ami hmat vai ah ami m’lung cu hmawn pe gui netah, ⁴⁶ Bawipa Jesuh naw, “Cacim ung, Messiah cu sihnak awt khai, cun kawn ah ak hnüüp thum hnüüp sihnak ung kaa tho ba khai. ⁴⁷ Ani ah ang ming awn kat phiawn nak la ng’zu vat ba nak ah mawng cu Jerusalem ung tün ne, akho päng ung, chang pakhui avan-am m’thein gui vai nei. ⁴⁸ Nangmi cu a cun ah mawng gui nami mik awn nami hmuk ciah saksi ah nami kiak ci. ⁴⁹ Kapa ah shaitaak ah mäih ah nami khan ah ka gawk law sak khai nei. Cun ung phi nangmi cu, khankho ah kaa hlüngtai nak kä nami gah phaa ah chuih Jerusalem ah om ne nami gin vai nei” ci ne m’cäi gui ci. ⁵⁰ Bawipa Jesuh naw ang düihpüi gui cu Bethani pigaw pei ah khüt ne hteh püi gui netah, akut k’phiat ne hrilham pe gui ci. ⁵¹ Cun ah hrilham a peit gui zah ung, Bawipa Jesuh cu ang düihpüi gui ah ma ung kaa pawng ne, khankho ah kai ba ci. ⁵² Ang düihpüi gui cu ang htei ah zeikiai ne Bawipa Jesuh ah taigü u netah, Jerusalem ah hteit ba u ne; ⁵³ Taigü im ung ang täi sei Khanpughi ah ming m’hlüngtai ne om ci gui.