JAMES

JAMES

¹ Kei James, Khanpughi la Bawipa Jesuh Khrit ah chang shäm naw, khomdek khan avan ung om ci gui ah Khanpughi ah chang gui-am, zeikiai nak thu ka ning m’khäh gui ci nei. ² Ka phäi nau gui aw, nami lam ung tüihtok nak a hlühlü a gawk law ung, zeikiai nak vai nei, ciah nami zum vai. ³ Cun ah mäih tüihtok nak cu zum nak awn m’khüt näng kawn ah khüighaat ne thamah nak cu dang lawk ci, ci cu nami hmat ci nei. ⁴ Nami khüighaat nak naw, zu kiak nak kä om khai ah, ning chaang gui sei, ng’laklo nak kä om ne, nangmi cu küm nak la be nak awn nami om khai nei. ⁵ Nangmi ung chang tumat mat cu cüivai nak ang laklo ah a kiak ung Khanpughi ah taigü sä, Khanpughi naw cüivai nak pek khai nei: a i ah kia sei ci ung, Khanpughi naw ng’khai ne pek ci, chang van-am ng’khai ne pek ci. ⁶ Cun ung phi nami taigü ung zum nak awn ngaih kä pai ne nami taigü vai. Ang ngaih pai ci cu kho naw khi sei ng’hnawk ciah tui hnawk ah mäih ah kiak ci. ⁷ Cun ah mäih ah chang cu, am lung pai ci, a i kä phupit kaizawih thei ciah changah kia ne Bawipa ah ang zoih cu gah khai ah kä ang ngaih en vai nei. ⁹ Pyamtham ciah khritha tumat cu Khanpughi naw a zu chaan tu ah a kiak ung zeikiai sä, ¹⁰ bühmang ciah khritha tumat cu Khanpughi naw a zuk neim sak ung zei kiai sä. Bühmang ci gui cu cheipai ah mäih ah thuum ne ng’kawn khai gui nei. ¹¹ Hni liing naw aghing cu chawng sak ne, apai cu kiawi sak ci, cun ah kia sei akiom nak cu dimaih ci. Acun ah mäih ah bühmang ciah chang cu, amät ah bi abi zah chung ung dimaih nak om khai nei. ¹² Tüihtok nak om pang sei phi bekhüt ciah chang cu, zeikiai nak om ci, a i ah kia sei ci ung cun ah mäih m’nüm nak näng ciah chang cu Khanpughi naw, m’hni ciah chang ah khan ah a shaitaak ah, ghin nak ah m’cümhnah cu gah khai nei. ¹³ Chang tumat cu, cun ah mäih tüihtok nak a aut law ah a kiak ung, “Khanpughi ah tüihtok nak nei,” ci ne kä a pyein-en vai. Akshe naw Khanpughi cu kä tüihtok hlawt ci, Khanpughi amät phi a u kä tüihtok ci. ¹⁴ Cun ung phi chang tumat tüihtok nak a gah nak cu, amät ah shekak ciah ang zak hlü nak lam ah a läk nak ah kiak ci. ¹⁵ Cun ah shekak ciah ng’zak hlü nak cu tüisho law ne cheishoh nak cun phi däm ng’vai law ne, sih nak ah hta lawk ci. ¹⁶ Ka phäi nau gui aw, kä nami ng’laklo-en vai nei! ¹⁷ Nikiom ciah m’shumphyuk nak la kümbe ciah m’cümhnah nak cu, khankho ah kaa lawk ci; Cun cu käng khukhlat ci, hmüp nak kä law püi ci, khankho dei tüisho ciah Khanpughi ung kaa lawë ciaè kia ci. ¹⁸ Khanpughi naw amät ah ng’zak hlü ah, ang thudüng awn chang ghing ah nang dang sak gui ci, cun ah kia sei mik mi cu a tüisho gui nüng ung ak bä pi ah mi kiak ci. ¹⁹ Phäi nau gui aw! nami shüm ba vai cu, ngaihzak nak ung nami zangkhai vai nei, ng’pyeinsak nak la m’lung she nak läi ung, nami shokshü vai nei. ²⁰ Chang ah m’lung she nak naw, Khanpughi ah düng nak kä m’düng thei ci. ²¹ Cun ah kia sei, kä nik ciah om ih la shekak ciah hnünthawh nak cu nami ng’cim sak vai nei. Khanpughi cu dou ne, Khanpughi naw nami m’lung kyong ah a geit ah thu cu nami kutshum vai, acun naw nangmi cu ning hun gui hning ci. ²² Thucim nami ngaihzak nak tu düt awn kä nami hleeihlak-en vai nei;cun ah thu cu akcang ah nami mang thei vai nei. ²³ Thucim cu ngaizak tu netah akcang ah dang khai ah kä mang ciah chang cu, hman ung a müi teng netah, a müi bäbä hmuk ciah chang awn täng ci. ²⁴ Hman a teng zah ung amüi kiom ciah ngai ci, cun ung phi, a hei ah a hteh ba kawn ah amüi cu kä shüm ba ci. ²⁵ Cun ung phi chang gui phiawn sak gui ne, kümbe ciah thukhän cu tengkhen ne ngaizak ciah chang cu, ngai tu netah m’hnih ba düt ciah kä kia ne, akcang ah mang thei ciah kia sei; cun ah chang cu abilawh nak päng ung Khanpughi naw m’shumphyuk khai nei. ²⁶ Chang tumat cu amät naw amät azum nak om ciah a pyein ung phi, am gawng kä ah khäm ah a kiak ung, azum nak cu akholä ah kia ne, amät naw amät m’hleei ciah kiak ci. ²⁷ Pa Khanpughi ah ma ah theing ne ciim ciah azum nak om ciah chang cu;geinvai ciah hmeihta nausen gui la hmeinu gui cu, m’theithang ne, m’dekhan shetkat nak gui phiawn nak vai ah, ahtingling ah om ciah chang ah kiak ci.

¹ Phäi nau gui aw, nangmi cu Bämang ciah Bawipa Jesuh Khrit cu nami zum ciah kia sei, chang ah zodäm pyam mang teng ne kä nami om ih vai nei. ² A vaisü ah nami ng’bum nak ung, bühmang ciah chang tumat cu ghui shawi awi ne sui k’ni sui ne law tuk khai;pyamtham ciah chang tumat cu, sui she sui ne law tuk khai; ³ Nangmi naw sui k’ni sui ne lawk ci cu chang m’sui u ne, ngoh nak nami nam hnawn khai;sui she sui ne lawk ci cu “a cän ung düi ä, kä cun ung kami kho pei ah ngoh law ä,” ci ne nami kiak nak ung, ⁴ nangmi cu chang khinkhawn ne, akshe nami m’lung ngai ciah kä kiak khai aw! ⁵ Ngai vä phäi nau gui aw! Khanpughi naw ani m’hni ci gui ah khan ah a shaitaak ah mäih ah, zum nak ung bühmang vai la Khanpughi ah uk nak kho khäm vai ah, pyamtham ci gui cu, ghü gui ci nei. ⁶ Cun ung phi nangmi naw pyamtham ci cu chang ah kä nami ngai ci, bühmang ci gui naw nangmi cu ning zoshe na gui u ne, zung ah m’kawt mang ah khlaak ung ning hteh püi gui ciah kä kia ne ang? ⁷ Ngahmi cu nangmi naw nami dou ah ming k’ni cu sawngkhei ci gui nei. ⁸ Khanpughi ah uk nak ah thukhän cu nami läk ciah a kiak ung düng ci cu nami bi vai nei:Cun ah thukhän cacim ung om ci cu; “Na chang paw cu na mät awn m’täng ne nam hni vai nei,” ciah kiak ci. ⁹ Cun ung phi chang ah zodäm düt nami teng ah a kiak ung, cheishoh nak nami bik ci kia ne, thukhän nami m’shet ah phäh ah m’khoichaa nak nami gah khai nei. ¹⁰ Thukhän tumat m’shet ciah chang cu thukhän avan m’shet ciah kiak ci nei. ¹¹ “Chang ah chu hta kä kat püi vai,” ciah thukhän cu pe ne, “Chang kä ngawn vai,” ciah thukhän phi a peit ah kiak ci. Chang ah chu hta kä nami kat püi ung phi, chang nami ngawn ah a kiak ung, thukhän nami m’shet ciah kiak ci. ¹² Cun ah kia sei phiawn nak ah thukhän awn, m’khoichaa nak gah khai gui ah, chang gui ah mäih ah, nami om ih vai nei. ¹³ Chimgein nak kä om te ciah chang ah khan ah, Khanpughi naw m’khoichaa nak abi hnüüp ung, chimgein nak kä m’dang khai nei, Cun ung phi m’khoichaa nak ah khan ah chimgein nak ah m’khütnäng nak om ci nei. ¹⁴ Chang tumat cu ka zum ci nei, ci ne thu akni ah a pyein ung phi a hnünthawh nak ung kä ang dang ung, bä tuk khai ang? Cun ah zum nak naw ani hun hning khai ang? ¹⁵ Sui vai, ei vai kä om ciah phäi hta, pai hta gui cu; ¹⁶ “Khanpughi ning m’shumphyuk gui sä, awh ci sui ne, phü ne ei vä,” ci ne akni ah thu püi gui düt ne, a i kä peit taak gui ung, bä khai ang? ¹⁷ Zum nak cun phi a cun ah mäih kiak ci, hnünthawh bilawh nak ung kä dang ciah zum nak cu ak si ah kiak ci. ¹⁸ Cun ung phi chang tumat mat naw, “Chang tumat ung zum nak om ci, ahei tumat ung hnünthawh nak om ci,” ci ne, a kiak law ung, Kei naw “Hnünthawh nak kä om ciah zum nak cu nam hnuh vä, kei naw ka hnünthawh nak awn ka zum nak cu ka ning m’hnuh gui khai nei,” ci ne ka pyein khai. ¹⁹ Khanpughi tumat bäng om ciah nami zum ci, bä ci! Khoshe gui naw phi a cun ah zum ne, kyi ne ng’khlet ci gui. ²⁰ Chang k’aang aw! Hnünthawh nak kä om ciah zum nak cu akholä ah a kiak ah mawng na hmat hlük ci ang? ²¹ Mi pughi Abraham naw Khanpughi ung düng nak cu a i hawkchaa ah ang a gah tu? Ani naw ahtapa Isaak cu kiang ung taih ne a khawihnah nak ah, a hnünthawh nak awn ah kiak ci nei. ²² A zum nak la a hnünthawh nak ang cawih cu kä nami hmuhmat ci maa? A hnünthawh nak naw a zum nak cu kümbe sak ci nei. ²³ “Abraham cu Khanpughi zum ci, azum nak awn ani cu, Khanpughi naw chang düng ah k’bääi ci,” ciah cacim lawk ci cu akcang ah kiak ci. Cun ah kia sei Abraham cu Khanpughi ah teihpüi ah khü ci gui. ²⁴ Chang cu azum nak bäng awn ah kä kiak ci, a hnünthawh nak awn, Khanpughi ung düng nak a gah cu nami hmat ci nei. ²⁵ A cun ah mäih ah hlawhlaang ciah Rahab ah mawng cu kiak ci. Ani naw Israel chang sübük ci gui cu, dou gui netah phiawng ne alam hei ung ami hteh ba vai ah m’thei gui ci. Cun ah a hnünthawh nak awn ani cu Khanpughi ung düng nak gah ci. ²⁶ Cun ah kia sei, mumcha kä om ciah pumsa cu ak si ah a kiak ah mäih ah, hnünthawh nak kä om ciah zum nak cu aksi ah kiak ci.

¹ Ka phäinau gui aw, saza hlük ciah chang kä da-en sä. Nami hmat ah mäih ah mik mi saza gui cu, chang hei gui ah mä, ng’cet pi khai ah m’khoichaa nak mi gah khai nei. ² Mik mi cu ashäng shäng mi sheka thei ci nei. A i zah ung phi hmakat nak kä om khai ah thu thei ciah chang cu, kümbe ciah kiak ci, apumsa avan shum ne htingling ciah chang ah phi kiak ci. ³ Mik mi naw ng’se cu mi m’hnep ne mi m’zein ci, mi ng’zak hlü nak ah mi hteh sak hning ci. ⁴ Ang htei ah däm ciah htinpaw im nu cu, khokhi ne ang pheet ung phi, k’pyü ci naw kyeep ne pang ne, ang zak nak hlü ah ng’hlah sak ci. ⁵ M’lei cun phi a cun ah mäih ah kiak ci, m’lei cu aläm hta ah akiak ung phi, abi nak hning cu dämduh ci. Ang htei ah däm nu ciah bungpuk nu phi, mei m’ghi apihta naw ui zawp hning ci, ci cu ngaih tüih shüm vä. ⁶ M’lei cu mei awn täng ci, cheishoh nak ah phung ah kiak ci; m’lei cu pumsa ah ang pai tumat ah kia ne, shetkat nak cu pumsa avan ung gawk sak ci. M’lei cu mei ah ng’düi ne, mi ghin nak avan cu m’htei mei awn, na uih sak gui thei ci. ⁷ Chang naw kawng khawm, phiu kha, k’phyukphyai, ngak’ai gui cu m’hnep hning ci, am hnep phi akda om ci. ⁸ Cun ung phi, m’lei cu a u chang naw phi kä m’hnep hlawt ci, cun cu chang naw kä am dip hlawt vai ah shetkat nak om ne, sih nak ah m’äm tui awn be ci. ⁹ Mik mi naw Khanpughi Bawipa mi m’hlüngtai nak ung m’lei cu mi mang ci, Khanpughi naw amüi ah a tüi ah mi chang paw mi züihgen nak ung phi, m’lei bä mi mang ci. ¹⁰ M’hlüngtai nak ah thu la züihgen nak ah thu cu, m’gawng tumat ung lut lawk ci nei. Phäinau gui aw, cun cu kä bä ci nei! ¹¹ Tui khawng tumat ung tui k’tui la tui kha lut law man ne ang? ¹² K’thei cu m’kaang ah m’theih man ne ang? K’htui cu k’thei ah m’theih man ne ang? A cun ah mäih ah tui kha ah khawng ung tui k’tui kä lut lawk ci nei. ¹³ Nangmi ung kaa cüivai ne hmuhmat ciah chang tumatmat a om ah akiak ung, akni ah aghin nak la akni ah a om ih nak cu m’lung neim nak la Lulang nak awn dang sak sä. ¹⁴ Cun ung phi nami m’lung kyong ah m’thüikhang nak, khaa nak, m’zawmhau nak gui om khätah nami cüivai nak awn nami khähghah ah a kiak ung, thudüng cu nami hnu ng’tuk püi ciah kiak ci nei. ¹⁵ Cun ah mäih cüivai nak cu khankho ah kaa ah kä kiak ci, khomdek khan ah kaa, mumcha lam ah kä kiak ciah, khoshe ah mawng ah kiak ci. ¹⁶ M’thüi m’khang nak la m’zawmhau nak cun naw, kä ng’käkhtäng nak la shetkat nak a hlü hlü om sak ci, ¹⁷ Cun ung phi Khankho ah kaa cüivai nak läi cu ak htük bäiè ah theingcim netah dimdeeih nak, ng’awigi nak la khawtsheng nak gui cu dang sak ci. Cun cu chimgein nak awn kümbe ne, nikiom nak cu vuipai sak ci, m’khoi m’hnga nak kä om ci, thuvi nak kä om ci. ¹⁸ Dimdeeih nak bik ci gui naw dimdeeih nak ung ami geit ah, geit m’shi ah am theihpai cu nikiom nak ah kiak ci.

¹ Nangmi ung ng’tuk ah nak la ng’vookshan nak cu a hawi ah kaa gawk lawk ci ang? Cun gui cu nami m’lung kyong ung phu ne ng’kiah ciah lünlawi nak vai, ng’zak nak hlü aih ung kaa lawk ci nei. ² Nangmi cu nami ng’zak hlü phung kä gah hlawt u netah chang nami ngawn ge khai ah nami pawng ci. Nami ng’zak hlü aih cu kä nami gah law ah a kiak ung ng’tuk nami ghüh ci, ng’vook nami lup ci. Nami ng’zak hlü kä nami gah ah mawng cu, Khanpughi ah kä nami ng’zoih ah hmawk ah kiak ci. ³ Nami ng’zoih ung phi kä nami gah ah mawng cu, akshe ah nami ng’bü nak la nami mät ah hlimtui nak vai düt ah nami mang nak hlü ah hmawk ah kiak ci. ⁴ Kä bekhüt ciah chang gui! Khomdek ng’zak hlü ah teihpüi cu, Khanpughi ah gaa ah kiak ci nei, ci cu kä nami hmat ci maa? ⁵ “Khanpughi naw mik mi ah kyong ah a thunthan ah mumcha cu, kyihkyawk vai ah ng’zak nak hlü awn be ci nei,” ciah cacim ung om ci cu kä bä khai ah kä nami ngaih en vai nei. ⁶ Cun ung phi Khanpughi ah na peit gui ah chimgein nak cu khüighaat ba pi ci nei. Cacim theing naw, “Khanpughi naw chang ah ng’shei ci gui cu hnu nah gui ne, m’lung neim sak ci gui cu, chimgein nak pe gui ci nei,” ciah a pyein ah bä nak ah kiak ci. ⁷ Cun ah kia sei Khanpughi ah ng’zak hlü cu läk ne khoshe cu nami k’täm vai nei, cun ung nangmi ung kaa dawng khai nei. ⁸ Khanpughi ah pei ah nami law vai, cun ung nangmi ah pei ah Khanpughi lawk khai. Cheishoh ciah chang gui! nami kut m’si vä. Thuvi ciah chang gui nami m’lung theing sak vä! ⁹ Thüisei vä, kyap m’lau vä; nami gaih nak cu, kyah nak ah ng’lat sak vä! nami zei nak cu thüi nak ah ng’lat sak vä! ¹⁰ Bawipa ah ma ah nami m’lung neim sak vä, cun ung ning m’hlüngtai gui khai nei. ¹¹ Phäinau gui aw, tumat la tumat kä ng’täitawk tu vä. A khritha phäinau täitawk ne m’khoichak ciah chang cu, thukhän täitawk ne m’khoichak ciah kiak ci nei. Thukhän nami m’khoichaa ah a kiak ung nangmi cu thukhän läk ciah kä kia ne, m’khoichak ciah nami kiak khai. ¹² Khanpughi tumat bäng cu thukhän pek ci la m’khoichak ciah kiak ci nei. Ani bäng naw vah hun hning ci, m’di hning ci. Nang cu a u chang ah kia ne, nak chang paw cu nam khoichaa tu ang? ¹³ Tuhbäi na ngai vä, “Tuh ngawi baw, ngawi ung baw, mang gaw tumat ah hteit ne, kho kum ät kami om khai. A cu ah sumlei ne ngui akda kami gah khai,” ci ne, nangmi am shah naw nami pyein ci. ¹⁴ Nami ghin nak ngawi ung a i ah a kiak vai ah kä nami hmat ci! Nangmi cu a shäng hta thawk ne khu netah maih ba ciah meikhu awn nami täng ci. ¹⁵ Nangmi naw nami pyein vai cu, “Khanpughi naw ang zak hlü ah akiak ung keimi cu ghing ne, kami bilo hnüntho,” ciah kiak ci. ¹⁶ Cun ung phi nangmi tuhbäi chang ah ng’shei ne nami khähghah ci, cun ah khähgha nak phung cu cheishoh nak ah kiak ci ¹⁷ Cun ah kia sei akni hmat lang ne kä bik ciah chang cu, shetkat nak bik ciah kiak ci.

¹ Bühmang ciah chang gui kei ah thu cu na ngai vä! Nami khan ah gawk lawk khai ah geinvai nak vai ah hmawk ah thüi ne kyap vä! ² Nami bühmang nak cu hoce pyi ci nei, nami suisak gui phi ca naw ei zawp pyi ci nei. ³ Nami ghui ngui gui ung phi hnai kai pyi ci nei, cun ah hnai cu nangmi ning hnu ng’tuk püi gui ciah saksi ah kia ne, nami sa cu mei ah uih ah mäih ah ui ne, ning ei gui khai nei. Shin ah ak hnu bäih ah hnüüp gui ung nang mi cu, m’cun m’hnai ne, bühmang vai nami tha na ba ci maa? ⁴ Nangmi naw nami lo bik ciah chang gui ah ng’cheng cu kä nami pek ci nei. Ngahmi ah ng’cheng shan cu ngai vä! Ngahmi naw ng’cheng shang ne ami m’lau ah k’aw cu, a hlüngtai säih Bawipa, Khanpughi naw ng’zak ci nei. ⁵ Nangmi cu khomdek khan ung ng’päi ng’ze, hlimtui ne nami om ci. Nangmi cu ami ning ngawn nak gui vai ah kho hnüüp ah hmawk ah nami ng’htah ng’awh ciah kiak ci. ⁶ Nangmi naw shetkat nak kä om ciah chang gui m’khoicha ne nami ngawn ci, cun ung phi ngahmi naw kä ning ci tuba gui ci gui. ⁷ Ka phäinau gui aw, Bawipa a law ba güt hnimgei ne om vä. Lo bik ciah chang tumat naw, a lo ung, ak küikyang ah a geitkaw gui am theih tak law vai ah, kho k’aa htük ung kaa naw, kho k’aa ang pyi güt ung, hnimgei ne ging ci nei. ⁸ Nangmi phi hnimgei ne nami om vai nei. Nami ngaih u nak cu khäng htek sä, Bawipa a kyum law nak vai ah hnüüp ng’et lawk ci nei. ⁹ Ka phäinau gui aw, tumat la tumat shetkat nak kä nami ng’lon nen tu vai, cun ung Khanpughi naw kä ning m’khoichaa gui khai. Thu m’chak khai cu gawk law ne ng’düi law pyi ci nei. ¹⁰ Ka phäinau gui aw, Bawipa ah ming awn thu pyein man ci gui ah profet gui cu shüm ba gui vä. Zaica geinvai nak a gawk law ung, hnimgei ne ami khüighaat nak cu nami thei tu vai nei. ¹¹ Ngahmi cu khüighaat ci gui ah kia sei zeikiai ci gui ah khü gui ah kiak ci. Job ung a i hlawk ah hnimgei nak a om cu nami ng’za pyi ci, ak hnu ah Khanpughi naw a i hlawk ah am hteihtang cun phi nami hmat ci. A i ah kia sei ci ung Khanpughi cu chimgein nak la chihna nak awn be ciah Bawipa ah kiak ci. ¹² Ka phäinau gui aw, thukhän shaitaak nami bi ung kä nami ng’gun ng’hta en vai. Khankho khüi ne, khomdek khü ne kä nami ng’gun nen vai, a i phi khü ne kä nami ng’gun nen vai. Nami ng’thu cu hleei ah a kiak ung hleei ah, cang ah a kiak ung cang ah dang khai ah, nami pyein vai nei. Cun ung nangmi cu Khanpughi ah m’khoichaa nak kä nami gah khai ¹³ Nangmi ung kaa zaica nak ung gawk ciah chang cu, taigü sä, zeikiai ciah chang naw ng’äi m’cu sä. ¹⁴ Gawpyam ciah chang naw khrithabum ung ang vaihta gui cu khü gui sä. Ngahmi naw ak gaw cu khitui awn hluk ne Bawipa ah ming ung taigü pe u sä. ¹⁵ Cun ah zum nak awn taigü nak naw ak gaw cu gai sak khai nei, Bawipa naw gaigawng nak cu zuk pe ne, a cheishoh nak gui phi m’geinsei khai nei. ¹⁶ Nami shetkat nak tumat la tumat ng’kiaa ne ng’paa na tu u ne, tumat la tumat nami ng’taigü tu peit vai nei, cun ung gai nak nami gah khai nei. Chang k’ni ah taigü nak cu hlüngtai küikyang nak om ci nei. ¹⁷ Elijah cu mik mi ah mäih ah chang ah hta ah kiak ci. Ani naw kho kä ah aa vai ah ak küikyang ah taigü khätah, khomdek khan ung kho kum thum la avang ung kho kä aa ci. ¹⁸ Cun kawn ah Elijah cu taigü ba mä sei, khan ah kaa kho aa law ba ne, khomdek ung geitkaw gui cu ni ne bä ci. ¹⁹ Ka phainau gui aw, nangmi ung kaa chang tumat cu, thudüng nawng ne lam hma khätah, a hei tumat naw lam düng ung a khü law tu ba ah a kiak ung; ²⁰ Cun ah cheishoh ciah chang lam a hma nak ung kaa khü ne law püi ba ciah chang cu, cheishoh ciah chang ah mumchaa sik nak ung kaa phiawn sak ne, a cheishoh nak gui phung m’geinsei nak a gah vai ah m’hteihtang ciah kiak ci, ci cu nami hmat vai nei.