HEBRU

HEBRU

¹ Caä Phanpughi naw, akda vei, amawng a hei hei awn, profet gui ung, mi pupa gui am thu m’shäk law man ci. ² Cun ung phi shin ah ak hnubäih hnüüp gui ung läi Ahtapa ung thu m’shäk lawk ci nei. Ahtapa awn khopuui cu tüisho ne, kho ah kaa avan cu khäm khai ah Khanpughi naw Ahtapa cu ghü ne m’düih ci. ³ Ahtapa cu Khanpughi ah bämang nak awn pyü ne ng’shü ci, ani cu Khanpughi ah müi akcang aè a kia nak ah hlüngtai ciah ang thu awn, khopuui avan cu khän sak ci. Hnicim chang ah shekat nak gui avan m’gein ne ak phiawn gui kawn ah, khan mawpi ah ahlüngtai säih ah Khanpughi ah k’pat lam ah ngok ci nei. ⁴ Ahtapa cu khanchang gui ah küikyang pi khai ah tüi m’hnüt ne, aming cun phi küikyang pi khai ah Khanpughi naw pek ci. ⁵ Khanpughi naw a u khanchang am phi, “Nang cu ka ning Htapa nei; tuhngawi kei cu nang ah Pa ah ka kia lawk ci,”ci ne kä pyein man ci. A i khanchang ah mawng ung phi Khanpughi naw, “Kei cu ani ah Pa ah ka kiak khai, ani cu kei ah Htapa ah kiak khai,” ci ne kä pyein man ci. ⁶ Cun ung phi Khanpughi naw ng’tüi htük ciah Ahtapa cu m’dekhan ah a tüih law vai ung, “Khanpughi ah khanchang avan naw, Ani cu ami khawihnah vai nei”, ci ne pyein ci. ⁷ Cun ung phi khanchang gui ah mawng a pyein nak ung, “Khanpughi naw ak khanchang gui cu, khokhi ah piang gui ne, ak changshäm gui cu meidäi ah piang gui ci,” ci ne pyein ci. ⁸ Cun ung phi Ahtapa ah mawng a pyein nak läi ung Khanpughi naw, “O Khanpughi, na uk nak ah kho cu, ang täi sei khäng khai nei! Nang naw na chang gui cu ng’müi khai ah Na uk gui ci nei. ⁹ Nang naw akcang cu m’hni ne, cheishoh ci cu na thüi nak ci nei. Cun ah kia sei Khanpughi, na Khanpughi naw, nang cu ning ghü ne, Na paw gui ah tah küikyang pi khai ah, ning m’tamkhah ne, zeikiai nak cu ning pek ci”, cik ci. ¹⁰ Cun kawn ah Khanpughi naw, “Nang Bawipa naw ak htük bäih ah Khomdek cu na tüisho ci, Khan mawpi phi na mät ah kut awn na piang ci. ¹¹ Cun gui cu ng’kawn zawp khai gui, Cun ung phi nang cu na om lä khai; Ngahmi cu suisak ah mäih ah kheei lawk khai gui. ¹² Nang naw zihphak cho ah mäih ah ngahmi cu na cho gui khai, Ngahmi cu suisak ah mäih ah ng’lat zawp khai gui. Cun ung phi nang cu kä na khukhlat ci, Na ghin nak cu kä ng’pyi hlawt ci nei”. ¹³ Khanpughi naw, a u khanchang am phi, “Na gaa gui avan na kho kaa ah, Kä ka gawk sak gui zawp pha ah chuih, Ka k’pat lam ah na ngoh vai nei,” ci ne kä kiak na man ci. ¹⁴ Cun ung khanchang gui cu, a i gui ang? Ngahmi cu hun nak gah ciah chang gui m’hteihtang gui khai ah Khanpughi naw a tüih gui ah, Khanpughi ah khuut bik ciah mumcha gui ah kiak ci.

¹ Mik mi naw mi ng’zak pyi ah thu düng cu khäng khai ah mi shum khai, cun ung mik mi cu lam kä mi hma khai. ² Mi pupa gui am khankho chang gui awn a zuk peit law ah ng’thu cu akcang ah kia sei, cun ah thu kä läk ne kä ngai ciah chang cu m’kat nak gah khai ah a kiak ung, ³ küikyang ciah hun nak cu, a i ah kä mi sui ung, mik mi naw m’kat nak cu a i ah kia ne phi kä mi phiawn ah hlawt khai nei. Shin ah hun nak cu Bawipa a mät naw a shäu law ma ah kiak ci, ng’zak ciah chang gui naw cun cu akcang ah a kiak ah mawng keimi ah ma ah saksi ci gui. ⁴ A cun ah khin ung Khanpughi a mät naw cäi aih vai gui, cäicat vai gui am dang nak awn la a mät ah ng’zak hlü ah Mumcha Theing am shum phyuk nak awn saksi cu dang sak ci. ⁵ Khanpughi naw khanchang gui am lawk ciah khomdek thai cu uk nak vai kä pe gui ci. Cun ah mawng cu mi pyein ah kiak ci. ⁶ Cacim theing am shah ung: “Chang cu a i ah kia sei, nang Khanpughi naw na shüm lä ang; Chang cu a i ah kia sei na teng khen lä ang? ⁷ Nang naw chang cu khanchang ah mä apihta ng’neim ba pi khai ah na tüisho ah kiak ci; Nang naw ani cu bäkhäk nak la m’tamkhah nak awn be sak ne, ⁸ A päng nüng nüng uk khai ah na tüi sho ah kiak ci,” ciah om ci. Cacim theing naw, “Khanpughi naw chang cu apäng nüng nüng uk khai ah a tüi nei.” chang ah kä uk a i kä om ci ciah a pyein ah kiak ci. Cun ung phi chang naw avan a uk cu tuhbäi mik mi naw kä mi hmuk ci. ⁹ Cun ung phi mik mi ah hmuh cu, Khanpughi ah m’gein nak awn chang van ah hmawk ah sik khai ah, khanchang gui ah mä a shänghta ng’neim sak nak gah ciah, Bawipa Jesuh ah kiak ci. A ni cu sih nak a aut ah hmawk ah bäkhäk nak la m’tamkhah nak awn be sei tuhbäi mi hmuk ci. ¹⁰ Apäng avan tüisho ngäng bom ciah Khanpughi naw, ahta akda gui am abäkhäk nak, a teipai nak gui ah, geinvai nak a aut sak nak awn Bawipa Jesuh cu kümbe sak ci.Cun ah Khanpughi naw a bi cu düng ci, a i ah kia sei ci ung cun ah chang gui hun nak ah hteh püi gui ci cu, Bawipa Jesuh ah kiak ci. ¹¹ Bawipa Jesuh naw chang gui cu ami shektkat nak ung kaa theingcim sak gui ci, amät la a theing sak pyi ah chang gui cu tumat pa nak ci gui, cun ah kia sei cun ah chang gui cu, phäinau ah a khü gui vai ah, Bawipa Jesuh cu kä lü ci. ¹² “Kei naw nang ah bi cu ka phäinau gui am kam thein gui khai nei; Kei naw ngahmi ah ng’bum nak ung Nang cu ka ning m’kümto khai nei,” ci ne pyein ci. ¹³ Cun kawn ah Bawipa naw, “Kei cu Khanpughi ung kang ap khai nei,” cik ci, cun kawn ah, “shin ung Khanpughi ah na peit ah hta gui awn atäng ah kami om ci nei,” ci ne pyein ba mä ci. ¹⁴ Cun ah a pyein ah hta gui cu si la sa awn om ci gui ah kia sei, Bawipa Jesuh cu si la sa om ciah hnicim chang ah zu kyum lawk ci. Cun ah a bi cu, khoshe ah hlüngtai nak ah kiak ciah sih nak cu, a sih nak awn am di ah kiak ci. ¹⁵ A cun ah bi ne, sih nak kyih ne, ami ghin ah chuih khleihtein ah kiak ci gui ah chang gui cu hun gui ci. ¹⁶ Ani naw khanchang gui am hteihtang gui ah kä kiak ci;cacim theing ung, “Ani naw Abraham ah hta shon cu m’htei gui ci nei,” ciah mäih ah am htei gui ah kiak ci. ¹⁷ Cun ah ani cu a mawng avan ung a phäinau gui ah mäih kia ne, ak chang gui shetkat nak ung m’gein gui khai ah, bekhüt nak la chimgein nak awn be ne Khanpughi ah khuut bik ciah Taigü Tung ah kiak ci. ¹⁸ Tuhbäi ani naw tüihtok nak gah ciah chang gui cu m’htei gui hning ci, a i ah kia sei ci ung, ani amät cu tüihtok nak la geinvai nak gah pyi ciah kiak ci.

¹ Khanpughi naw a khü gui ah khrihta phäunau gui aw, ngai shüm vä! Bawipa Jesuh Mi zum nak ung Taigü Tung ah kiak khai ah Khanpughi naw a tüih law ah kiak ci nei. ² Mose cu Khanpughi ah im ung a bi lawh nak ung abekhüt ah mäih ah, Bawipa cun phi shin ah bi bik khai ah ghü ne m’düih ciah Khanpughi ah ma ah bekhüt ci. ³ Im co ciah chang tumat cu a im cawh ah mä däm pi khai ah m’tamkhah nak gah khin ci nei. ⁴ Im phung phung cu chang naw co ci cun ung phi apäng avan cu Khanpughi naw co ci. ⁵ Mose cu Khanpughi ah im kyong ah ak changshäm ah kia ne bekhüt ne om ne, ma lam ah Khanpughi ah thu law vai gui cu, ana pyein law ma ci. ⁶ Bawi Khrit läi cu Khanpughi ah im uk ciah Ahtapa ah kia ne, bekhüt ne om ci. Mik mi cu küighaat ne, mi ngaih u nak ah khan ah m’lung üp nak a om ah a kiak ung, Khanpughi ah im ah mi kiak ci. ⁷ Cun ah kia sei Mumcha Theing naw a pyein cu, “Khanpughi ah k’aw Nangmi naw tuhngawi nami ng’zak ah a kiak ung kä nami ling keng vai, ⁸ Nami pupa gui cu Khanpughi ng’küükneet püi u ne, pui kiang ma ah phawtcam ci gui, ngahmi ah mäih ah kä nami lingkeng vai. ⁹ Nami pupa gui cu kum phli-kip ah kiong ung kei naw ka bi cu hmu lang u ne, na phawtcam ci gui, ¹⁰ Cun ah kia sei, kei cu ngahmi ah khan ah m’lung she netah, ‘Ngahmi cu ang täi sei pyai ba ci gui, Ka thukhän phi kä läk hlük ci gui, ci ne pyein ci’. ¹¹ Kei cu m’lung she netah, ‘ami ng’düm nak vai ah kei naw ka peit gui ah kholei ung, ngahmi cu a ngawi ah phi kä lut tuk khai gui,’ ci ne shaita ne ka k’phyun gui ci,” ciah kiak ci. ¹² Zum ciah ka phäi nau gui, ghing ciah Khanpughi nawng nak vai u"-awng ah am lung kiong shekhak ciah chang, nangmi ung kä om en khai ah nami geing nak vai nei. ¹³ Nangmi cu cheishoh nak ung kä thuvi ne kä nami lingkheng-en vai ah, cacim theing naw “tuhngawi” ciah thu anam thein nak gui - a om ah chuih, ak hnüüp tä sei tumat la tumat anmi hteinghtang tu vai nei. ¹⁴ Mik mi cu ak htük ah mäih ah a khüt nak ung khüt sei, khäng ciah ngaihgep a om ah a kiak ung Bawi Khrit awn bilo ghawm ciah chang ah mi kiak ci. ¹⁵ Cacim Theing naw, “Nangmi cu tuhngawi Khanpughi ah k’aw nami ng’zak ah a kiak ung kä nami lingkeng vai, nami pupa gui naw khanpughi ami küükneet püi zah ung ami om ah mäih ah kä nami om vai,” ci ne pyein ci. ¹⁶ Khanpughi ah k’aw cu ng’za lang ne, ng’küükneet püi ciah chang gui cu a u gui ang? Cun gui cu Egip kho ah kaa Mose naw ang khah law püi ba gui ah chang gui nei. ¹⁷ Khokum phli-kip ung Khanpughi naw am lung she nak gui cu a u gui ang? Cheishoh nak bi ne pui kiang ma ah kiu ne sik ci gui ah kiak ci nei. ¹⁸ Khanpughi naw shaita ne ak phyun nak gui ung, “Häi ne düm nak vai ah kei naw ka peit gui ah kholei ung, ngahmi cu a ngawi ah phi kä lut tuk khai gui,” a ci nak gui cu a u gui ang? A ni ng’küükneet püi ciah chang gui a pyein ah kä kia ne ang? ¹⁹ Ngahmi cu cun ah kholei ung kä lut tu hlawt khai gui ah mi hmu gui pyi ci, a i ah kia sei ci ung ngahmi cu kä zum tuk ci gui ah kiak ci.

¹ Khanpughi naw mik mi am ang thu ah shaitak cu mi gah vai ah na pe gui ci. Cun ah ng’düm nak vai ah shaitaak cu phlawi düt ci tumat phi kä om men khai ah nami geing nak vai nei. ² Cau ng’vai gui ah mäih ah mik mi naw ThuNi cu mi ng’zak ci nei. Ngahmi naw ThuNi cu ng’zak ci gui, cun ung phi ngahmi ah phäh ah a bäkhäk nak kä om ci. A i ah kia sei ci ung ngahmi naw ng’zak u ne phi zum nak awn kä ami dou ah hmawk ah kiak ci. ³ Mi zum ciah mik mi läi naw Khanpughi ah shaitaak ah bämang nak cu mi gha ci nei. “Kei naw m’lung k’she netah, Ka m’hnüt ah shaitaak cu, ‘Kei naw ka peit gui vai ah, hüi nak ah khonglei ung ngahmi cu kä lut tu hlawt khai gui nei,’ ci ne a pyein ah mäih ah kiak ci. Khomdek khan a tüisho sang ung a bi lawh gui vai ng’pyi pang sei phi, shin ah thu cu a pyein ah kiak ci. ⁴ Cacim theing ung ak hnüüp chih hnüüp ah mawng a pyein nak ung, “Khanpughi cu ak hnüüp chih hnüüp ung abi gui avan ung ng’düm ci,” ciah om ci. ⁵ Cun ung phi a pyein ba hei ah cacim cu, “Kei naw ka peit gui vai ah hüi nak ah khonglei ung ngahmi cu kä lut tu hlawt khai gui nei”. ciah om ci. ⁶ Cun ah ThuNi ng’za law htük ciah chang gui naw cun ah hüi nak cu kä gah ci gui, a i ah kia sei ci ung ngahmi naw kä ami zum ah hmawk ah kiak ci. Cun ah kia sei cun cu a hei gui naw gah ci gui nei. ⁷ Cun ah ami gah mawng cu, Khanpughi naw “Tuhngawi” ciah ming khai ah am hnüt ah hnüüp naw dang sak ci nei. Khokum ak sho lüng khätah, a cun ah mawng cacim theing ung, David am, am thein cu; “Tuhngawi nangmi naw Khanpughi ah k’aw cu nani ng’zak ah a kiak ung, Nami m’lung kä ling-en sä,” ciah kiak ci. ⁸ Joshua ah peit ah hüi nak cu Khanpughi ah shaitaak ah a kiak vai sü ung Khanpughi naw ak hnüüp hei cu kä pyein ba khai sü te. ⁹ Cun ah kia sei ak hnüüp chih hnüüp Khanpughi ang düm ah mäih ah, Khanpughi ah chang gui ami düm nak vai hnüüp om ba ci. ¹⁰ A i ah kia sei ci ung Khanpughi ah shaitaak ah düm nak gah ciah chang cu, Khanpughi ah mäih ah amät ah bi a bi ung düm nak gah ci nei. ¹¹ Cun ah kia sei düm nak gah vai ah mik tha nak khai nei. Cun ung kä a mi zum ah hmawk ah düm nak kä gah ci gui ah Israel chang gui ah kä mi kiak khai nei. ¹² Khanpughi ah Thu cu ghing ne hnüntho ne, hmün ne ghaat ciah m’htakhim ah tah ghaat pi ci. Cun ah khim naw, ghin nak la mumcha ah ng’chum nak, khlingthang ah kyum nak ung khüt sei, aat pit pit ci. A cun naw chang ah m’lung ung zaak hlü ngaih tüh gui cu m’khoi chak ci. ¹³ Khanpughi ah ng’thuh haih ci a i kä om ci a tüi sho phung phung cu a mik ah hmuh ah dang zawp ci. A cun ah kia sei mi bilawh, ngaih tüh gui phung cu Khanpughi-am mi ap khai nei. ¹⁴ Cun ah kia sei mi zum nak cu m’htek ne mik pang khai nei. A i ah kia sei ci ung, mik mi ung Khanpughi ah ma ah düi ciah Khanpughi ah Htapa, hlüngtai ciah Taigü Tung, Bawipa Jesuh cu om pyi ci. ¹⁵ Mik mi ah Taigü Tung cu mik mi ah shetkat nak kä nam gein gui hlawt ciah kä kiak ci. Mik mi ah Taigü Tung cu, mik mi ah mäih ah tüihtok nak aut ci, cun ung phi cheishoh nak ung kä gawk ci. ¹⁶ Cun ah kia sei mik mi cu mi khüighaat ne, m’gein nak ah hmun Khanpughi ah mang kiang ung mi hteit khai nei. Cun ah hmun ung chik-hna nak la gein nak cu, mi ng’zak hlü phung ung mi gah khai nei.

¹ Taigü Tung nak ci cu cheishoh nak ah hmawk ah phiawn nak vai la küikyan nak vai, chang van ah hmawk ah phyuhteh ne Khanpughi ah khuut bik khai ah ghü ne ami m’düih ah kiak ci. ² Ani amät cu kä a kümbe nak da ci kia sei, lam hma ciah chang, cheishoh ciah chang gui cu chimgein gui ci. ³ Amät cu kä kümbe ciah kia ne, chang ah phäh bäng ah kä kiak ci, amät ah phäh ah phi küikyan nak vai ah phyutheh ciah kiak ci. ⁴ A u naw phi amät naw amät cu taigü tung ah käm düih hning ci.Khanpughi naw Aaroî khü ne am düih ah mäih ah, Khanpughi naw khü ne am düih cun vah Taigü tung ah kia hning ci. ⁵ A cun ah mäih ah Bawi Khrit naw amät naw amät cu Taigü Tung ah käm düih ci. Khanpughi naw Bawi Khrit-am; “Nang cu Ka Htapa ah na kiak ci, Tuhngawi kei cu nang ah Pa ah ka kiak ci”.cik ci. ⁶ Cun kawn ah mä a hei ung, “Nang cu Melchizedek ah hnün ung ngoh ciah Ang täi ah Taigü ah na kiak khai,” ci ne pyein ba ci. ⁷ Bawipa Jesuh cu khomdek khan ung a om zah ung, sih nak ung hun ciah Khanpughi ah ma ah ng’hui ne kyap ne taigü ci. Neim nak la ng’ap nak awn ak taigü cu Khanpguhi naw phi ngaih pek ci. ⁸ Ani cu Khanpughi ah Htapa ah a kiak tupang ung phi, Khanpughi ah thu a läk thei vai ah zaica ne theithang ci. ⁹ Bawipa cu kümbe nak a gah kawn ah, ang thu ngai ciah chang gui-am, ang täi hun nak pe gui ciah ang zung ah kia lawk ci. ¹⁰ Khanpughi naw Bawipa cu Melchizedek ah hnün ung ngok ciah Taigü tung ah ming sak ci. ¹¹ Shin ah a mawng ung ning m’thein gui vai akda om ci, cun ung phi nangmi cu kä nami cüivai ngai ci kia sei, pyeinsak cu kä zäi ci. ¹² Nangmi cu nami m’theithang thei khai ah a khin ah kia law pyi ci, cun ung phi nangmi cu Khanpughi ah thu ak tün nak ung tün ne, chang naw a ning theithang gui vai hlü ba laih laih ci nei. Nangmi cu buh nami ei vai khin law sei phi suuktui laih laih nami awk ci nei. ¹³ Suuk awk ci cu hta züt nau sen akni akshe kä hmuhmat phak ciah kiak ci. ¹⁴ Guh ciah buh ei ci cu ang vai pyi ah kiak ci, khrihta ak ni ak she bui aut ne m’khoi chaa thei pyi ciah kiak ci.

¹ Cun ah kia sei mik mi cu, khrihta ah ng’tün nak a mawng ama gui cu hmuhmat zawp ne, thuuk ciah m’theithang nak ma lam ah mi hteit khai nei. Tün nak ah a mawng gui cu kami ning m’thein gui pyi ah kia sei, leng ne ng’thei ba vai kä hlü ci, kä bä ci cu nawng ne Khanpughi zum vai cu nami hmat pyi ah kiak ci. ² Tui hnim nak ah mawng, kut taih ah mawng, sih nak ung kaa thawh ba ah mawng la ak hnu bäih ah m’khoichaa nak ah mawng gui cu ning m’thei gui pyi ah kiak ci. ³ Ma lam ah mi hteit khai nei! Cun cu Khanpughi naw ang zak hlü a om ung mik mi naw mi bi vai ah kiak ci nei. ⁴ Lam hma ne ami zum nak ng’phleng pyi ciah chang gui cu a i chaa ah ng’zu ba sak gui thei vai ang? Ngah mi cu Khanpughi ah akdei ung, khankho m’cümhnah nak phi m’nüm tu shüm u ne, Mumcha Theing phi gah man ci gui ah kiak ci. ⁵ Ngahmi cu Khanpughi ah Thu ani ah mawng la gawk lawk khai ah akhin ah hlüngtai nak gui cu hmat pyi ci gui ah kiak ci. ⁶ Cun ung phi, ngahmi cu zum nak ung lam hma pyi ci gui nei! Ngahmi cu kä ng’zu ba sak gui hlawt vai nei, a i ah kia sei ci ung ngahmi cu Khanpughi ah Htapa kutlam tung ung ngawm ba mä u ne, thui ng’aa sak ciah kiak ci gui nei. ⁷ A khin ung aa ciah kho aa naw m’hlawh sei, lo bik ci gui ah geit thawh sak ciah m’dek ni cu Khanpughi naw m’shumphyuk ci nei. ⁸ Cun ung phi cun ah m’dek cu m’ghaw la ng’hling bäng a thawh sak ah a kiak ung, mang vai ah kä kia ba ci kia sei, Khanpughi naw k’phyun ne mei awn m’khih ne m’di khai. ⁹ Cun ung phi teihpüi gui awi, cun ah thu pyein ung phi kami ning ngaih gep gui ci nei. Nangmi ung bä pi ciah m’shumphyuk nak om sei, hun nak nami khäm cu kami hmat ci nei. ¹⁰ Khanpughi cu käng kuktak ci. Ani naw nami bilawh la, nami m’hni nak ang dang vai ah cau tün ne tuhbäi ung khüt sei, krihta tumat nami ng’theithang nak tu cu käm hnih khai nei. ¹¹ Keimi naw kami ng’zak hlü pi bäih cu, nangmi ak chang sing naw ak hnu baih aè gawk ung khüt khai ah, nami thawhlet nak cu, nami khän htek sak vai, cun ung nami ngaih u nak cu akcang ah dang lawk khai, ciah kiak ci. ¹² Kä nami dam men vai, zum ne hnimgei nak awn, Khanpughi ahshaitaak nak gah ciah chang gui ah mäih ah nami om vai ah kami ng’za hlük ci nei. ¹³ Khanpughi naw Abraham-am shaitaak nak a peit zah ung a shaitaak bä bä ah bik khai ah ng’phyun ci. Cun ung amät ah hlüngtai pi ci a u kä om ci kia sei, amät ah ming awn ng’phyun ne pyein ci. ¹⁴ Khanpughi naw, “Kei ah ka shaitaak cu, ka ning m’shumphuk khai, pyiing ne ka ning ng’shon sak khai,” cik ci. ¹⁵ Abraham cu hniimgei ne om ne, Khanpughi ah shaitaak cu gah ci. ¹⁶ Chang tumat cu ang phyun ah a kiak ung, a mät ah hlüngtai pi ciah ming awn ng’phyun ci. Cun ah ng’phyun nak naw ng’cuhvah nak avan cu dim sak ci. ¹⁷ Khanpughi naw amä ah ng’bü nak kä am thawnghlai phung vai ah mawng cu, a shaitaak nak gah ciah chang gui ang hteiing ah m’dang gui hlük ci. Cun ah kia sei ng’phyun ne shai a taak ah kiak ci. ¹⁸ Shin ah shaitaak la ng’phyun nak cu, käng thawnghlai hlawt ci la Khanpughi ah hleeihlak nak kä om hlawt ciah amawng hnih ah kiak ci. Cun ah kia sei ani ung mi ng’zi ciah chang gui cu, ana peit gui ah ngaih u nak htek sei pan vai ah mi thamah lawk ci. ¹⁹ Cun ah ngaih u nak cu mik mi ah ghin nak ung lung hling ah mäih ah kia ci, cun cu ng’htei ne ng’kheing ne, khankho im kyong ah, ang cim nak pi säih ung gawk ci. ²⁰ Taigü tung Melchizedek ah hnün ung ngoh ne, ang täi ah Taigü tung ah kiak ciah Bawipa Jesuh cu, mik mi ah hmawk ah cun ah mang im ah lut pyi ci nei.

¹ Shin ah Melchizedek cu Salem ghangpughang ah kia ne, ahlüngtai säih Khanpughi ah taigü ah kiak ci. Abraham naw ghangpughang paphli tu ne näng ne a law ba ung, Melchizedek naw dou ne phyuhtheh nak pek ci. ² Abraham naw agah avan ah bum ghaa bum ät cu pek ci.(Melchizedek ah aming cu ‘Düng nakah Ghangpughang,’ ciah kiak ci. A i ah kia sei ci ung ani cu Salem ghangpughang ah kiak ci. Cun kawn ah ‘Dimdeeih nak ah ghanpughang’ ngah phi ming ci”). ³ Melchizedek ah anu apa, apu api gui la, ang tüi nak, asih nak ah mawng gui cu, ca ung ami guk kä om ci. Ani cu Khanpughi ah Htapa ah mäih ah kia ne, ang täi sei taigüpa ah kiak ci. ⁴ Mi pughi Abraham naw ng’tuk bi ne a gah ah bum ghaa bum ät a peit cu mi teng ung, ani a i hlawk ah hlüngtai ci, ci cu mi hmat khai nei. ⁵ Taigü kyong ah kiak ciah Levi pakhui shon gui naw, Abraham ah hta ng’shon, ami mät ah hta nau gui ah kiak ciah, Israel chang gui ah bum-gha bum ät cu, thukhän ah ng’shui ah, look hning ci gui nei. ⁶ Melchizedek cu Levi pakhui ah kä kiak ci, cun ung phi Khanpughi ah shaitaak gah ciah Abraham ah bum ghaa bum ät cu look ne, phyuhtheh nak pek ci nei. ⁷ Phyuhtheh nak pek ci cu, phyuhtheh nak gah ciah chang ah mä hlüngtai pi ci, ci cu ngaih khit vai kä om ci nei. ⁸ Taigü gui naw bum ghaa bum ät ami loh cu, si thei ciah chang gui naw ami loh ah kiak ci;cun ung phi Melchizedek naw a loh cu, cacim ah mäih ah ghing ci naw a loh ah kiak ci. ⁹ Abraham naw a peit cu, Levi naw Abraham ung a peit ah phi pyein hning vai kiak ci nei. ¹⁰ A i ah kia sei ci ung Abraham la Melchizedek ani ng’hmuh zah ung, Levi cu kä ng’tüi pha ne, Abraham ah pukhui ah om zah ciah pyein vai ah a kiak ah hmawk ah kiak ci nei. ¹¹ Israel chang gui-am thukhän a peit gui zah ung, Levi pakhui taigü gui ung ng’zung ne a peit gui ah kia ci. Tuhbäi Levi pakhui taigü gui ah bilawh cu a kümbe vai sü ung, Aaron ah a hnün ung Melchizedek ah khui m’düng khai ah taigü ang dang lawvai kä hlü khai sü te. ¹² Taigü pakhui ang thawng ah akiak ung thukhän phi ang thawng vai a hlü ah hmawk ah kiak ci. ¹³ Shin ah a mawng gui ung ami pyein ah Mi Bawipa läi cu, Levi pakhui taigü kyong ung kaa ah kä kiak ci, a pakhui hei ung kaa ah kiak ci. ¹⁴ Bawipa Judah pakhui ung ang tüi law cu ak dei ang dang ah kiak ci. Mose naw taigü gui ah mawng a pyein nak ung, Judah pakhui cu kä pyein man ci. ¹⁵ Melchizedek ah mäih ahei taigü dang law seé taigü ahei hei a om vai ah mawng ng’htei law pi ci. ¹⁶ Ani taigü ah a kiak law cu, chang ah thukhän thungzo awn ah kä kiak ci, käng pyii hlawt ciah ah ghin nak ah hlüngtai nak awn ah kiak ci. ¹⁷ Cacim theing ung, “Nang cu Melchizedek ah hnün ung ngok ciah ang täi ah Taigü ah na kiak khai,” ciah mäih ah kiak ci. ¹⁸ Azan thukhän cu kä küm ne a kholä ah kia sei, ami nawng ah kiak ci. ¹⁹ Mose ah thukhän naw a i phi kä kümpäng sak hlawt ci. Tuhbäi mik mi cu bä pi ciah ngaih u nak mi gah pyii ci kia sei, cun ah ngaih u nak awn Khanpughi ah pei ah mi ng’et lawk ci. ²⁰ Cun kawn ah phi Khanpughi ah phyun nak cu om ci. Ahei gui taigü ah ami kiak sang ung cun ah mäih phyun nak cu kä om man ci. ²¹ Cun ung phi cun ah phyun nak awn, Bawipa Jesuh Taigü ah a kiak law sang ung Khanpughi ah thu pyein cu; “Bawipa naw küikyang ciah shaitaak nak bik ci, Cun cu kä ng’hlah püi ba düt khai; Nang cu ang täi sei Taigü ah na kiak khai nei,” ciah kiak ci. ²² Cun ah kä atäng nak awn Bawipa Jesuh cu bä pi ciah thukhän küikyan ciah kia lawk ci. ²³ Cun kawn ah kä atäng nak cu; ahei taigü akda gui cu sik ci guiah kia ne, ami bi kä bi ba hlawt ci gui. ²⁴ Cun ung phi Bawipa Jesuh cu ang täi ghing ci kia ne, Taigü ah kia ne khuut abi cun phi ahei ah kut ung kä gawk hlawt ci. ²⁵ Cun ah kia sei ani ah ang ming ung Khanpughi ah lawk ciah chang gui phung ang täi sei hun gui ci. A i ah kia sei ci ung Bawipa cu cun ah chang gui ah hmawk ah Khanpughi ah ng’coi ng’pak khai ah, ang täi ah a ghin ah hmawk ah kiak ci. ²⁶ Cun ah kia sei Bawipa Jesuh cu mik mi ung hlü ci awn ng’müi ciah Taigü Tung ah kiak ci. Ani cu theingcim ci, shetkat nak ani ung kä om ci. Ani cu shetkat nak ung kaa m’chah ne, khan mawpi ah a thawh ba sak ah kiak ci. ²⁷ Ani cu ahei taigü tung gui awn kä täng ci, Amät ah cheishoh nak la chang hei gui ah cheishoh nak ah hmawk ah ak hnüüp tä sei küikyan nak vawihpeh vai kä hlü ci. A i ah kia sei ci ung amät naw amät apeit sang ung hnü ät ge ang bäng ah ang ap ah hmawk ah kiak ci. ²⁸ Moses ah thukhän naw kä kümbe ciah chang gui cu, Taigü ah m’düih gui ci;cun ung phi thukhän a om kawn ah, ang täi sei kümbe ciah Ahtapa cu Taigü Tung ah phyun ne m’düih ci.

¹ Mi pyein nak ah mawng avan ung ak tung pi cu, mik im ung cun ah Taigü Tung a om pyi ah mawng ah kiak ci. Ani cu Khankho Ghangpughang ah Mang kiang k’pat lam ung ngok ci. ² Bawipa cu a theingcim nak säih ung Taigü Tung ah kia ne bi bik ci, cun ah hmun cu chang ah cawh ah kä kiak ci, Khanpughi ah pian ah phung akcang ah kiak ci. ³ Taigü Tung phung cu Khanpughi am peit vai gui vawihpeh khai ah m’düih ah kiak ci. Cun ah kia sei mik mi ah Taigü Tung cun phi a vawihpeh vai tumat mat om khai ah kiak ci. ⁴ Ani cu m’dek khan ung a om ah a kiak ung taigü ah kä kia hlawt khai, a i ah kia sei ci ung, thukhän awn, peit vai gui cu, ap ciah taigü gui ami om pyii ah hmawk ah kiak ci. ⁵ Taigü gui ah bilawh nak cu khankho ah khawihnah nak ah a müi ah ang hniim ah kiak ci. Mose ah bilawh gui cun phi a cun ah mäih ah kiak ci. Mose naw thukhän kho phung a cawh law vai ung, Khanpughi naw, “M’htung khan ah ka ning m’hnuh ah mäih ah apäng avan cu käm hnih en ne, na pian vai nei,” ci ne am cäi ah hmawk ah kiak ci. ⁶ Cun ung tuhbäi Khanpughi la ak chang gui ah ng’lak ung Bawipa Jesuh naw a pian ah thukhän cu, bä pi ciah shaitaak ung ng’zung ci kia ne, thukhän gui ah tah a bä pi ah mäih ah, Taigü ah kia ne Bawipa Jesuh ah bilawh gui cun phi, cun ah taigü gui ah bilawh gui ah mä bä pi ci nei. ⁷ Ak htük bäih ah thukhän ung cheishoh nak kä a om vai sü ung ak hnih nak thukhän kä hlü khai sü te. ⁸ Cun ung phi Khanpughi naw ak chang gui ah cheishoh nak hmuh netah; “Judah chang gui la Israel chang gui ung, thukhän thai ka bi vai ah a khin cu gawk lawk ci nei. ⁹ Cun cu ami pupa gui Egypt kho ah kaa ami kut ung pang gui ne, Kak plawk ba gui sang ung, ka peit gui ah thukhän awn kä täng ba khai nei. Cun ung ka peit gui ah thukhän cu m’shet u sei, Ngahmi cu kei naw ka nawng gui ci,” ci ne Bawipa naw pyein ci. ¹⁰ Ngawi ah Israel chang gui awn ka bi vai ah thukhän läi cu, “Kei naw ka thukhän cu ngahmi ah m’lung ung thun ne, Ami m’lung ung ka guk khai. Kei cu ngahmi ah Khanpughi ah ka kiak khai, Ngahmi cu kei ah chang ah kiak khai gui. ¹¹ A u chang naw phi amät ah pakhui chang la a im ng’gi lo ng’phei am, Khanpughi a hmat tu vai ah m’theithang vai kä hlü ba khai, Ak hmaw pi ung kaa, ang vai pi ung khüt sei, Chang avan naw kei cu na hmat khai gui nei. ¹² Kei naw ami shetkat nak gui cu kam gein gui khai, Ngahmi naw ami cheishoh nak gui kä shüm ba khai gui,” ci ne pyein ci. ¹³ Khanpughi naw cun ah thukhän thai ah mawng a pyein nak awn, ak htük ah thukhän cu kheei sak ci¬ cun ah kheei ci gui phung cu kä shou pha sei ng’kawn ne maih ci gui nei.

¹ Ak htük ah thukhän ung khawihnah nak ah thumzo la chang ah pian ah khawihnah nak ah hmun hlü ci. ² Khophung ah ama lam cu, piang hnga ne “Hmun Theing,” ci ne k’bäi ci gui. Cun ah kyong ah meidäi taih nak la Khanpughi am vawihpeh vai ah m’htut taih nak ah tawnglaai cu om ci. ³ A cun ah hnu lam zihdung awn shung nak, khophung ah ma bäih ah, “AkTheing Säih Hmun,” cu om ci. ⁴ A cun ah kyong ah ang ui gui mei awn ami m’khih nak ah ghui mangkiang la, ghui bäng awn pian ah Thukhän m’küm om ci. Cun ah m’Küm khui ah manna m’htut ah om nak ah ghui-am, lim ne hnah ciah Aaron ah ng’shopawng la thukhän gui guk ah lung k’paang hnih om ci. ⁵ Cun ah m’küm khan ah cherubim ah gup gui om u ne, cun gui naw cun ung Khanpughi a om ah mawng m’dang ci gui, ami ng’phiaa gui naw shetkat m’gein nak ah kiang cu küm ci gui. Tuhbäi cun gui apüh akheh ah pyein vai kä kiak ci nei. ⁶ Cun ah ami pian kawn ah taigü gui cu bi bik khai gui ah, phung ah ak caw lam ah ak hnüüp tä sei hteit ci gui. ⁷ Cun ung phi Taigü tung tumat bäng vah phung ah ak kyong ah vah lut ci. Ani cun ah aluh cun phi kum ät ung hngü ät ah kiak ci. Cun ah aluh ung amät ah hmawk la chang gui naw kä hmat ne ami cheishoh ah hmawk ah, khawihnah nak vai ah si cu hteh püi ci ci. ⁸ Shin ah a mawng ung Mumcha Theing naw ang dang ah am theithang nak cu, ak pung ah phung a om ah chuih Hmun Theing Säih ah hteh nak vai ah lam kä ng’hmawng ci, ciah kiak ci. ⁹ Shin gui cu tuhchü tawk ne dang sak ciah amawng gui ah kiak ci. Cun cu peit taak nak la ghuthaa nak gui naw khawihnah ciah chang gui ah m’lung cu kä k’umbe sak hlawt ci ciah kiak ci. ¹⁰ Cun gui cu ei awk la theingcim nak ahlühlü bilawh nak gui ung phung ci. Shin gui cu ak pung lam m’hnütbäi nak gui ah kia ne, Khanpughi naw khokthai a pian nak kä phaa sei ng’pyi khai gui. ¹¹ Cun ung phi Bawi Khrit cu om pyii ciah nikiom nak gui ah Taigütung ah kia ne gawk law pyii ci nei. Ani ah khuut bi nak ah phung cu hlüngtai ne kümbe pi ci nei:cun cu chang ah cawh ah kä kiak ci, atüi pian ah khomdek ung kaa ah kä kiak ci. ¹² Bawi Khrit cu Hmun Theing Säih ah hnü ät ge ang bäng ah aluh sang ung, vawihpeh vai ah me ah si, sei ah si cu kä hteh püi ci; Amät ah si hlui cu hteh püi ne, mik mi ah ang täi hun nak cu na pe gui ci. ¹³ Mesi seisi la seipat hta awn m’kümbawh ne phyuhtheh nak naw, kä theing cim ci gui ah kat nak cu, m’si ne, theingcim sak gui ciah a kiak ung, ¹⁴ Bawi Khrit ah si naw a i hlawk ah theingcim sak pi khai aw! Bawi Khrit naw ng’täi ciah Mumcha awn amät cu, kat nak kä om ciah küikyan nak ah kia ne Khanpughi ah ng’ap pyii ci nei. Ani ah sihlui naw, alä düüt ah kiak ciah mi m’lung ngaih cu na theingcim sak gui khai, cun ung mik mi naw ang täi ghing ciah Khanpughi cu mi khawihnah khai nei. ¹⁵ Cun ah kia sei Khanpughi naw a khü ah chang gui naw, Khanpughi ah a shaitaak ah ang täi m’shumphyuk nak ami gah vai ah, Bawi Khrit naw thukhän thai cu piang ci. Cun ah abi cu, ak htük ah thukhän ah kaa ah ami om sang ung chang gui ah ami cheishoh nak gui cu, phiawn khai ah, sih nak tumat a om ah hmawk ah kiak ci. ¹⁶ sih hnuthu ca küm khai ah guk ci cu, akcang ah si pyii ci ci cu, dang pyii ci nei. ¹⁷ Sih hnuthu cu guk ciah chang kä a sih phaa ung kä kümbe ci; cun cu asih kawn ah vah kümbe ci. ¹⁸ Cun ah kia sei ak htük bäih ah thukhän cun phi si awn ah kümbe nak om ci. ¹⁹ Akhtükbäih ung Mose naw thukhän om ci gui phung cu chang gui-am shäu ne m’thein gui ci. Cun kawn ah me ah si la sei ah si cu la ne tui awn k’caw netah, hissop singban la htomu a sen awn, thukhän cauk la chang gui cu k’peh gui ci. ²⁰ Cun kawn ah Mose naw, “shin ah si cu nangmi naw nami läk vai ah Khanpughi naw am hnüt ah thukhän cu, kümbe sak ci nei,” cik ci. ²¹ Cun ah mäih ah Mose naw, thukhän phung la khawihnah nak ung mangca gui phung cu si awn k’peh yawp ci. ²² Akcang ah thukhän ah pyein ah, apäng avan cu si awn vah theingcim ci. Si huk nak awn cheishoh nak cu phiawng hlawt ci. ²³ A shin ah mawnglam awn khankho ung phungpawng ciah amüi gui cu theingcim sak ah kiak ci. Khankho müi gui theingcim nak sak ung küikyang pi ciah küikyan nak cu bi vai kiak ci. ²⁴ Bawi Khrit cu Hmun Theing akcang ah müi ah chang ah pian ah Hmun Theing ung kä lut ci. Ani cu Khankho akcang ung lut ne, tuhbäi mik mi ah hmawk ah Khanpughi ah ma ah gawk ci nei. ²⁵ Jew chang gui ah Taigü Tung cu, a kum tä sei, sei me gui ah si hteh püi ne, Hmun Theing Säih pi ung hteit ci ci. Cun ung phi Bawi Khrit läi cu ng’ap khai ah akda vei kä lut ci. ²⁶ Akda vei lut khai ah akiak vai sü ung Khanpughi naw kho akhan atüi pian ung tün ne akda vei sih nak aut khai sü ah kiak ci. Tuhbäi kho a khüt law vai khin ung ang bäng ge ah hnü ät kium law ne, a hnun gui pe ne, cheishoh nak cu nawtpet zawp pyii ci. ²⁷ Chang cu hnü ät bäng si ne, cun kawn ah Khanpughi ah m’khawichaa nak cu gah ci. ²⁸ A cun ah mäih ah Bawi Khrit cun phi, chang gui ah cheishoh nak phiawn khai ah, hnü ät bäng küikyan ne ng’ap ci. Ani cu cheishoh nak nawt täm ba khai ah kä kiak ciah, ngäng ci gui ah chang gui hun gui khai ah ak hnih vei nak ah kyum law ba khai nei.

¹ Jew thukhän gui cu be ci la bekhüt ciah akcang gui ah kä kiak ci: gawk lawk khai ah nikiom nak gui ah püpüi gui ah kiak ci. Thukhän ah ci ah akum täi sei küikyan nak cu bi ah kiak ci. Cun ung a i hawkcha ah thukhän naw, Khanpughi ah lawk ciah chang gui cu, kümbe sak gui khai aw? ² A vai sü ah Khanpughi khawihnah ciah chang gui ah ami cheishoh nak cu, thukhän naw akcang ah theing cim sak ciah a kiak ung, cun ah chang gui naw ngahmi ung cheishoh nak kä om ba ciah ngai u ne, küikyan nak kä bi ba khai gui ah kiak ci. ³ Cun ah a kum tä sei küikyan nak vai ami bi nak naw chang gui ah cheishoh nak cu m’shüm thein ba gui ci. ⁴ A i ah kia sei ci ung sei ah si la me ah si naw cheishoh nak cu kä nawtpet hlawt ci nei. ⁵ Cun ah kia sei Bawi Khrit naw khomdek khan ung a kyum law sangung Khanpughi ah ma ah; “Nang naw küikyan ghutha nak la peittaak nak cu kä na ng’za hlük ci nei, Cung ung phi kei ah hmawk ah pumsa nam hnüt pyii ci nei. ⁶ “Nang naw sei me awn m’khih ne ghuthaa nak la Zo kyaang ung vawihpeh nak awn cheishoh nak nawtpet ci cu kä nam hni ci nei. ⁷ Cun ah kia sei thukhän ung kei ah mawng ami guk ah mäih ah, “O Khanpughi, Na ng’zak hlü ka bik khai ah, shin ung ka om ci nei, ci ne ka pyein ci,” ciah kiak ci. ⁸ Akhtük bäih ah Bawipa naw, “Ghuthaa nak, peittaak nak, sei me m’khih ne kiang ung vawihpeh nak gui la cheishoh nak gui cu ghuthaa nak awn nawtpet nei, ci gui cu, thukhän ah ng’shui ah bi ah kia pang sei phi, Khanpughi naw kä am hni, kä ang zak hlü ah kiakci nei. ⁹ Cun kawn ah ani naw, “O Khanpughi nang zak hlü ka bik khai ah, shin ung ka om ci nei,” ci ne pyein ci. Cun ah kia sei Khanpughi naw, cäu ghuthaa nak man gui phung ghu shüt netah, Bawi Khrit naw ng’ap ne a küikyan nak awn am thon ah kiak ci. ¹⁰ Bawipa Jesuh Khrit naw Khanpughi ah ang zak hlü läk ne, amät ah pumsa cu, ang bäng ge ah ap ne a peit ah kia sei, mik mi cu theingcim nak mi gah ci. ¹¹ Jew taigü pängpäng naw ak hnüüp tä sei, apeitaak vai la am ghuthaa vawihpeh vai cu bik ci;cun ung phi cun ah ghuthaa nak naw cheishoh nak cu kä nawtpet hlawt ci. ¹² Cun ung phi Bawi Khrit naw hnü ät ang bängah küikyan nak bi ne, cheishoh nak cu nawtpet ci. Hta ng’shon ung ng’täi ciah ng’ap nak phi bik ci, cun kawn ah Khanpughi ah k’pat lam ung kai ne ngok ci. ¹³ A cun ung agaa gui avan a kho kaa ah, Khanpughi naw a gawk sak güt ung ngäng ci nei. ¹⁴ Hnü ät ang bäng ah a küikyan nak awn, theingcim nak gah ci gui cu, ang täi sei kümbe sak gui ci. ¹⁵ Cun kawn ah Mumcha Theing naw phi saksi ana peit nak gui ung ak htükbäih ah, ¹⁶ “Bawipa naw, Shin cu lawk ciah kho hnüüp ung ngahmi awn shaitaak nak ka bi vai kiak ci nei: Kang thukhän cu ami m’sin ung chum ne, Ami m’lung ung ca awn ka guk khai nei,” ci ne pyein ci. ¹⁷ Cun kawn ah Bawipa naw, “Ngahmi ah cheishoh nak la shetkat nak gui phung cu kä ka shümba khai nei,” ci ne pyein ci. ¹⁸ Cun ah cheishoh nak ung kaa, m’geinsei nak a om kawn ah, cheishoh ah hmawk ah ghuthaa vawihpeh vai cu kä hlü ba ci nei. ¹⁹ Cun ah kia sei ka phäinau gui aw, Bawipa Jesuh a sih nak awn mik mi cu kümbe ciah pängze ne Hmun Theing Säih ung mi gawk ci. ²⁰ Bawipa naw amät ah pumsa ah kiak ciah zihdung cu lim ne, lam thai, ghin nak ah lam cu nak hmawn pe gui ci. ²¹ Mik mi ung Khanpughi ah mang im uk ciah küikyang ciah taigü om ci. ²² Cun ah kia sei mik mi cu mi m’lung ngaih theingcim sak ne, mi pumsa tuikci awn m’si netah, ng’cim ciah m’lung, ng’htei ciah zum nak awn, Khanpughi ah pei ah ming et khai nei. ²³ Mik mi cu Khanpughi ah shaitaak kutshum ne mi ng’ap hning pyi ciah kia sei, mi zum la mi ngaih u nak cu khäng khai ah mi kut shum khai nei. ²⁴ Mik mi cu tumat la tumat mi ng’tengkhen tu u neh, mi ng’hteihtang tu u neh, mi ng’zumhni tu u ne, ni kiom ne mi om khai nei. ²⁵ Mi ng’hmuhteng kyumbom nak cu chang m’shah gui ah mäih ah kä mi nawng nüt ten neh, tumat la tumat k’thamah nak ming pe tuk khai, nami hmat ah mäih ah Bawipa ah Hnüüp phi ng’et law pi ci kia sei, tha ng’pe tu ne mi om khai nei. ²⁶ Mik mi cu düng nak mi hmat kawn ah a guih ah mi cheishoh ba ah a kiak ung kat nak küikyan nak vai a i kä om ba khai nei. ²⁷ Mik mi naw m’khoichaa nak la Khanpughi hnungtuk püi ciah chang gui m’khih gui khai ah meiksam cu kyih en vüih vüih ne mi ngäng khai ah kiak ci nei. ²⁸ Mose ah thukhän kä läk ciah chang tumat cu hnih thum saksi sei, akat nak ang dang ah a kiak ung, m’gein nak kä om sei sih nak pek ci gui nei. ²⁹ Khanpughi ah Htapa cu päipih ne, kat nak theing sak ne Khanpughi ah thukhän thai ah kiak ciah si ng’hlui cu gaih m’gin ne, m’gein nak m’kyum lawk ciah Mumcha shetkat nak ci naw, a i hlawk ah nuipai ciah shetkat nak gah khai ci cu nami ngaihtüh shüm vai nei. ³⁰ “Kei naw phu phi ka tuk khai, pu phi ka thung khai, ci ne, Khanpughi naw ak chang gui cu m’khoicha gui khai nei, ciah Bawipa cu mi hmat ci nei. ³¹ Ghin ciah Khanpughi ah kut khui ung kyumkiak cu kyihkyawk aih vai ah kiak ci nei. ³² Zan ä kho hnüüp gui cu ngai ne shüm ba vä, cun zah ung nangmi cu Khanpughi ah ak dei nami hmuh kawn ah zaica nak akda nami gah ung phi, cun naw kä ning m’dimshum gui hlawt ci. ³³ Nangmi cu chang ah ma ah päipih shedam nak nami gah ci, cun ung phi päipih shedam nak gah lawk ci a om ung nami m’gein tuk ci. ³⁴ Nangmi naw thawng ung cum ci gui cu nami chimgein ci, nami khawhcham avan ami ning khäm peit gui ung phi zei ne nami om düt ci, a i ah kia sei ci ung nangmi ung cun ah khawh chaam gui ahtah küikyang pi ne, käng pyii hlawt ciah khawh a om cu nami hmat ah hmawk ah kiak ci. ³⁵ Cun ah kia sei khüighaat ne om vä, cun ung m’cümhnah nak ak bä pi nami gah khai. ³⁶ Khanpughi ah ang zaak hlü bi hning vai la a shaaitaak gah hning vai ah hnimgei ne om vä. ³⁷ Cacim theing ung; “Kä shou pha sei kium lawk khai ah Bawipa cu lawk khai nei; Ani cu kä shokshü khai nei. ³⁸ Ng’düng ciah kakchang gui cu zum ne ghing khai gui nei; Cung ung phi ng’hlat ba ciah chang läi cu, kei naw kä ka zei nak khai nei,” ciah om ci. ³⁹ Mik mi cu hnu ah ng’hlat ba ne chükmaih ciah chang ah kä mi kiak ci, zum ne hun nak gah ciah mi kiak ci.

¹ Zum nak ci cu ngaih u nak gui akcang ah dang lawk khai, kä hmuh hning gui akcang om ci gui, ciah ngaih gep nak ah kiak ci. ² Cau chang gui cu ami zum nak awn Khanpughi am tamkhah nak gah man ci gui. ³ Kä hmuh hning ung kaa naw hmuh hning ah dang lawk khai ah Khanpughi naw ang thuküi awn Khopuui atüisho cu, zum nak awn mi hmat ah kiak ci. ⁴ Abelah naw Kain ah mä bä pi khai ah pe ne akhawihnah cu a zum nak awn ah kiak ci. A zum nak awn ani cu Khanpughi naw chang düng ah k’bäi ci, á i ah kia sei ci ung Khanpughi naw ani ah khawihnah nak cu zei ne adou ah hmawk ah kiak ci. Abelah cu asih tu pang ung phi a zum nak awn tuhgüt thu pyein ci. ⁵ Khanpughi naw Enok akghing ah a kai püi cu, a zum nak awn ah kiak ci. Ani cu Khanpughi naw akghing ah akai püi ah kia ne a u naw shui ne kä hmu ba ci. Khankho ah kä a kai pha ung Enok cu Khanpughi naw zei na aih ci, ciah cacim theing ung om ci. ⁶ Zum nak kä om ci naw Khanpughi kä zei nak ci. Khanpughi om ci, ci ne Khanpughi shui ci naw m’cümhnah nak gah ci. ⁷ A ngawi ah gawk lawk khai ah kä hmu hning ah a mawng gui, Khanpughi naw khän ne am cäi nak Noah naw ang zak cu a zum nak awn ah kiak ci. Ani naw Khanpughi ah thu ngai ne amät ah kiong khui ah phiawn nak ah hteinpaw im cu co ci. Cun ah khomdek chang gui ah shetkat nak cu dang sak ne, ani cu a yum nak awn Khanpughi ung düng nak cu gah ci. ⁸ Abraham naw Khanpughi ah khü äi ne ang htukhä nak ah kho ah, düi ne a hteh cu a zum nak awn ah kiak ci. Ani cu a hawi ahteh vai kä hmat pang ne phi amät ah kho cu nawng shüt ci. ⁹ Ani cu Khanpughi ah shaitaak nak ah kho hei chang ah mäih ah a zum nak awn om tuk ci. Ani cu amät ah mäih ah Khanpughi ahshaitaak gah ciah Isaak la Jakob ah mäih ah phung tu ne om ci. ¹⁰ A i ah kia sei ci ung Khanpughi naw pawngpüi ne a cawhkyan ah hta ng’shon ung khäng ciah mang im cu ngaih u ne a ngäng ah hmawk ah kiak ci. ¹¹ Abraham cu ghi law pyii ci, Sarah cun phi hta khai ah kä kia ba pyii ci, cun ung phi amät ah zum nak awn, Abraham cu ahta om sei pa ah kiak ci. Khanpughi cu a shaitaak ah mäih ah bekhüt ciah ani naw yum ci. ¹² Abraham cu ak si ah mäih ah a kiak te ung phi, ani ah hta ng’shon gui cu, Khankho mik ah aisi chü ah mäih, tuinu kem ah käk khei tai vai ah laigin chü ah mäih ah da ci nei. ¹³ Cun ah chang gui ami van cu zum nak awn sik ci gui. Ngahmi cu Khanpughi ah shaitaak kä gah tuk ci gui, cun ung phi a shou nak ah kaa naw hmuh u ne ana dou tuk ci gui, ngahmi cu khomdek khan ung akho hei chang, geinvai chang ah ami kiak ah mawng cu ng’kiaa ne pyein ci gui. ¹⁴ Cun ah ng’kiaa ci ah chang gui cu, ami mät ah k’chaw vai ah kho shui hnga ci gui ah ng’dang ci nei. ¹⁵ Ngahmi cu ami nawng shüt ah kho kä vang ngaih tüh ba ling ci gui; cun ah kho ah ami hteh ba hlü ah a kiak ung phi hteit ba hning khai gui ah kiak ci. ¹⁶ Cun ung phi ngahmi cu cun ak kho ahtah bä pi ciah khankho ghui kho cu ngaih u ci gui ah kiak ci. Cun ah kia sei Khanpughi cu ami Khanpughi ah ami khü ah hmawk ah Khanpughi cu kä lü ng’aa ci, a i ah kia sei ci ung Ani naw ngahmi ah hmawk ah mang gaw cu a sak pyii ah kiak ci nei. ¹⁷ Khanpughi naw Abraham ah zum nak am nüm nak ung, Abraham naw ahta Issak küikyan nak ah a ap cu zum nak ah kiak ci. Abraham cu Khanpughi naw a shaitaak püi ah chang tumat ah a kiak ung phi, tumat bäng ah ahtapa cu ap ge khai ah pawng ci. ¹⁸ Khanpughi naw, Abraham, “Kei naw shai ka taak ah nang ah hta shon cu, Issak ah ng’shon ah kiak khai nei,” ci ne kiak nak ci. ¹⁹ Abraham naw, Issak cu sik nak ung kaa Khanpughi naw akcang ah thawh ba sak hning ci, ci cu akcang ah zum ci. Akcang ah pyein ung Issak cu sih nak ung kaa Abraham naw a gah ba ah pyein vai ah kia ci. ²⁰ Issak naw Jacob la Isau-am ngawi ah kaa vai m’shumphyuk nak shaitaak a peit goi cu zum nak ah kiak ci. ²¹ Jacob naw a sih law vai ung Josef ah hta gui-am m’shumphyuk nak a peit gui cu zum nak ah kiak ci. Ani cu ang shopawng awn ng’düh netah Khanpughi cu khawihnah ci. ²² Josef naw asih law vai ung, Israel chang gui Egypt kho ah kaa ami phiawn law vai ah mawng pyein ne, apumsa ah a mawng a pyein cu a zum nak ah kiak ci. ²³ Moses cu ami hta nak kawn ah cha thum ah kyong ung anu la apa naw ani thuh cu ani zum nak awn ah kiak ci. Ngahni naw kyom ciah ak hmawhta cu hmu ni netah, ghangpughang ah thu cu k’phleng vai ah kä kyik ci goi. ²⁴ Moses naw ang vai law kawn ah ghangpughang ah hta hnumi ah hta ah kä ka kiak ci nei, ci ne a maa cu a zum nak awn ah kiak ci. ²⁵ Ani naw shetkat nak ung a shäng ng’len ne om ah k’dam, Khanpughi ah chang gui awn atäng ah zaica nak gah cu bä pi khai ah ngai ci. ²⁶ Messiah Bawipa ah hmawk ah lü ng’aa nak gah cu, Egypt kho ah khawcham avan ah tah bä pi ciah k’bäi ci, a i ah kia sei ci ung ani naw ngawi ah gah law vai ah m’cümhnah nak cu a hmuh ah hmawk ah kiak ci. ²⁷ Moses naw ghangpughang ah m’lungshe nak cu kä kyih ne, Egypt kho ung kaa ang düih law ba cu, a zum nak awn ah kiak ci. Ani naw mik awn kä hmuh ah Khanpughi cu hmuk ciah mäih ah hnu ah ng’hlah ba vai cu maa khenggeng ci. ²⁸ Ani naw phiawn nak ah pawi bi ne, m’kawt gui si awn ak peh sak gui cu a zum nak awn ah kiak ci, cun ah kia sei Israel chang gui ah ami hta htük gui cu, sih nak ah Khanchang naw kä ngawn gui ci. ²⁹ Israel chang gui naw tuisen tuinu, kho kawng ah hteh ah mäih ah ami kah cu zum nak awn ah kiak ci. Cun ung phi Egypt chang gui naw, ami ak kah vü tu sangung ngahmi cu tuinu naw hteh gui zawp ci. ³⁰ Israel chang gui naw Jericho gawnu, kho hnüüp chih ung ’khai u sei, ng’vong nak avan ng’gäi ne a kiak cu, ami zum nak awn ah kiak ci. ³¹ Hlawhhlangnu Rahab cu ng’däät ciah chang gui dou gui ne ang khawt püi gui ah hmawk ah, Khanpughi kä zum ci gui awn atäng ah kä a mi ngawn tu cu a zum nak awn ah kiak ci. ³² Kei naw k’täi ne ka pyein ba vai ang? Gidean, Barak, Samsan, Jephthah, David, Samuel la profet gui ah mawng ka pyein nak vai a khin kä ng’büh ci nei. ³³ Ngahmi cu ami zum nak awn kho ak khan avan ung tuk bi u ne, näng nak gah ci gui. Ngahmi cu düng nak awn om u ne, Khanpughi ah á shaitaak cu gah ci gui, kawng hlui ah shai phi m’ghu ci gui. ³⁴ M’gäi ne lawk ciah mei k’hlaw phi m’dim ci gui, khim awn ami sih nak vai ung phi phiawng ci gui. Amik tha ken pang sei phi ak thagui k’ghaat ah mäih ah kiak ci gui, ng’tuk nak ung khüi ghaat u ne a kho hei ah gakap gui phi tu ne näng ci gui. ³⁵ Hnumi gui cun phi ami zum nak awn sih nak ung kaa ghing ba ciah ami pawchang gui cu gah ba ci gui. Am shah gui cu ng’pängze nak gui maa-en u ne, bä ci ciah ghin nak ung thawh ba vai ah, dukdei nak awn sih zawp ci gui. ³⁶ Am shah gui cu k’shedam nak la tukthah nak gah ci gui, am shah gui cu m’si gui awn khit ne thawng ung ami chum gui ah kiak ci. ³⁷ Ngahmi cu lung awn ami vawih gui, m’si awn ami m’chün gui, khim awn ami ngawn gui ah kiak ci.Ngahmi cu pyamthaam u ne, dukdei nak la m’lung ah geinvai nak gah u ne, htome la me ah vun suisak ci gui. ³⁸ Khomdek khan cu ngahmi ah hmawk ah kä bä ci nei! Ngahmi cu khokhäu, kiang maa la kho m’htung zung ah geinvai chang ah mäih ah hteit shüi shüi u ne, lung khui m’dek khui ung va om vük ci gui. ³⁹ Ngahmi cu ami zum nak awn m’hlüngtai nak gah ci gui. Cun ung phi ngahmi cu Khanpughi ah shaitaak kä gah tuk ci gui. ⁴⁰ A i ah kia sei ci ung, Khanpughi naw mik mi ah hmawk ah bä ba pi ciah ng’bü nak am hnüt pyi ah hmawk ah kiak ci. Cun ah ang bü nak cu, cun ah chang gui mik mi awn mi kawng ät u ne, kümbe nak ung mi gawk vai ah hmawk ah kiak ci.

¹ Mik mi ah hmawk ah saksi khai ah chang akda naw nak koi gui ci. Cun ah kia sei mik mi na tüihtook gui ci phung la na shum gui ne mik mi ung kawp ciah shetkat nak phung cu nawtpet netah malam ah ng’bü nak ung gawk vai ah k’tha nak cang ne mi dawng khai nei.” ² Tün nak ung kaa naw pyii nak ung khüt sei, mi zum nak ah ang zung ah kiak ciah Bawipa Jesuh cu ng’kheing sei mi teng khai nei. Ani cu kutlamtung ah mawng ung käm lung k’si phung ci, Bawipa cu ani ung gawk lawk khai ah zeikiai nak ah hmawk ah kutlam tung ung käng zocho phung ne sih nak aut netah Khanpughi ah mang kiang k’patlam ung ngok ci. ³ Chang shekhaa gui naw a i hlawk ah ami thüigen nak cu ngaih tüh u netah, käng zocho käm lungksi phung ne nami om vai nei. ⁴ Nangmi cu shet kat nak ung ng’tuk nami bi nak ung, sih nak ah m’lawi ung kä nami gawk pha hnga ci nei. ⁵ Khanpughi naw ahta ah ning k’hmoh gui ne, k’thamah nak pe ne a ning thu püi gui cu, nami m’hnih ei ci maa? Cun ah thu cu; “Ka hta aw, Bawipa naw aning m’düng ung, Ngai ne na läk vai nei, A ning m’cäi ung kä na thüisei en vai nei, ⁶ A i ah kia sei ci ung, Bawipa naw am hni ah Chang phung cu m’düng ne, A hta ah k’bäi ne a dou phung cu M’kyuk ci nei,” ciah kiak ci. ⁷ Zaica geinvai nak nami gah cu kami pa naw kami hma anam kyuk nak gui ah kiak ci, ciah nami zum vai nei, nami zaica geinvai nak naw, Khanpughi naw ahta ah aning k’bäi gui cu dang sak ci. A kat nak m’kyuk ne apa naw kä a m’cäi man ah hta a u om ne ang? ⁸ Nangmi cu ahta akcang ah nami kiak ci kia sei, kat m’kyuk ne m’cäi nak kä ah om ah a kiak ung, nangmi cu hta akcang ah kä nami kiak ci, hta ng’bah ah nami kiak ci. ⁹ Hnicim chang mi pa naw hma m’kyuk ne nam cäi gui sei, mik mi naw phi mik chang m’sui ci. Cun ah kia sei mumcha lam ung mi pa ah nam cäi nak gui läi cu ak tung pui ah ngai ne mi ghin püi vai ah kiak ci nei. ¹⁰ Akhin ak tawi hta ah kyong ung hnicim chang mi pa naw bä ciah ang ngaih ah nam cäi gui ci; Cun ung phi Khanpughi naw mik mi ah mi kiom nak vai hmawk ah amät ah mäih ah mi theingcim vai ah nam cäi gui ci. ¹¹ Hma m’kyuk nak mi gah cu zeikiai vai ah kä kiak ci, thüisei vai ah kiak ci. Cun ung phi cun ah hma m’kyuk nak naw ang shung sak pyii ah chang cu chang k’ni ah kia ne dinggei ciah ghin nak gah ci nei. ¹² Cun ah kiasei cüüm ciah nami kut cu m’cün u ne, gho ciah nami m’khuuk cu khüi sak vä. ¹³ Düng ciah lam ung k’tha nah ne hteit vä, cun ung ng’khem ciah nami kho cu gai om khai nei. ¹⁴ Chang päng awn dimdeeih sei nami om vai ah k’tha nah vä, theing cim sei nami ghin vai phi k’tha nah vä, cun ah kä om ciah chang naw a u naw phi Bawipa cu kä hmuk khai nei. ¹⁵ Khanpughi ah chimgein nak cu a u naw Kä noi maa-en sä. Khak ciah sing naw am äm tui awn chang akda cu zaica sak ci, a cun ah mäih ah a u phi kä ah kiak-en vai nei. ¹⁶ A u chang phi om k’she ne, mumcha kä cimvai ciah Esau ah mäih ah kä nami kiak-en vai, ani naw hta k’tak-hnga ah a kiak nak cu, ei m’ka ät ah zoi ci nei. ¹⁷ Nami hmat ah mäih ah, ani cu a ngawi ah apa ah m’shumphyuk nak cu ng’za ba hlük ci. Cun ung phi kä gah ba hlawt ci, a i ah kiasei ci ung, ani naw chei khai ah abi pyii, a pian nak ba vai ah lam cu, ang phli tui lut law sei shui ne phi kä hmu hlawt ci nei. ¹⁸ Nangmi cu Israel chang gui ah mäih ah tawnzap thei ah Sinai kho m’htung ung nami gawk ciah kä kiak ci. Cun ah m’htung cu mei m’lei tawt ne, kho m’than ne, puikho khi ne, ¹⁹ phyungheng tum k’aw la khankho k’aw ang thang law nak ah kiak ci.Chang gui naw cun nah k’aw ng’zah u netah, cun kawn ah kä ami ng’zak-en ba vai ah ng’coi ng’paa ci gui. ²⁰ A i ah kiasei ci ung, “Cun ah m’htung cu khisa naw phi a tawn ah a kiak ung lung awn vawi ne ngawn vai,” ciah thukhän cu ami kyih ah hmawk ah kiak ci. ²¹ Cun ah hmuh teng gui cu ang htei ah cäicat vai kia khätah, Moses naw, “Kei cu ng’khlet ne ka kyik ci nei,” ci ne pyein ci. ²² Cun nak vaisü ung nangmi cu Zion m’htung la ang täi ghing ciah Khanpughi ah mang gaw, Khankho Jerusalem, kä khei tai vai ah khanchang gui ah om nak ah nami gawk ci nei. ²³ Nangmi cu Khankho ah ang ming ami guk ah Khanpughi ah hta ak tahnga gui ami ng’bum nak ah zeikiai ne nami gawk pyii ci nei. Nangmi cu hnicim chang avan m’khoichak ciah Khanpughi la kümbe ciah chang gui ah mumcha gui ah om nak ah nami gawk pyii ci nei. ²⁴ Nangmi cu thukhän k’thai piang ciah ah Bawipa Jesuh la Abelah ah si ah mä bä pi ciah shaitaak nak om ciah si ng’hlui ah ng’peh nak ung nami gawk pyii ci nei. ²⁵ Nangmi cu thu k’aw ng’zak vai noi mak ciah chang ah kä nami kiak vai ah nami geing nak vai nei. Khomdek khan ung khankho thu ngaih zak vai ah mak ciah chang gui cu kä phiawng ci gui nei. Cun ah kiasei mik mi naw Khankho ah kaa ng’thu pyein lawk ci cu, mi hnu nak ah a kiak ung a i ung phi kä mi phiawng hlawt khai nei. ²⁶ Cun sang ung Khanpughi ah ng’thu naw khomdek cu thüng sak ci nei. Cun bäng ah kä kiak ciah, tuk bäi, Bawipa naw, “Kei naw hnü ät mä, khomdek bäng ah kä kia ciah, khankho phi ka thüng sak khai nei,” ci ne shai a taak om ci. ²⁷ “Hnü ät mä,” ciah thu m’kha naw ang dang sak cu, a tüi sho gui avan ng’tum sei thüng sak gui netah, m’hnawng gui khai, cun ung kä thük tuk ci gui cu k’pawih shüt khai gui, ciah kiak ci. ²⁸ Mik mi cu kä thüng hlawt ciah uk nak kho mi gah pyii ciah kia sei, Khanpughi mi m’hlüngtai khai nei. Mik mi naw kyih aa nak la m’tamkhah nak awn, Khanpughi cu mi khawihnah khai nei. ²⁹ A i ah kiasei ci ung mik mi ah Khanpughi cu m’khih ne ui ciah mei akcang ah kiak ci nei.

¹ Krihta ah kia ne tumat la tumat nami zumhni tu vai nei. ² Nami im kyong ah khin nami m’kai vai cu nami shüm vai nei. Cun ah khin m’htei ci gui cun naw kä ami hmat ah khankho chang cu khin nak ci gui nei. ³ Thawng kium ci gui cu ngahmi awn atäng ah thawng nami kium tuk ciah mäih ah ngai ne nami shüm gui vai nei. Zaica geinvai ci gui cu ngahmi awn atäng ah zaica geinvai ah mäih ah ngai ne, nami shüm gui vai nei. ⁴ Chungla nak cu chang avan naw ahtingling ah ang ngaih vai nei, Chu la cei cu tumat la tumat bekhüt ne ani om vai. Khanpughi naw cheishoh ci la hlawhlang ciah chang gui cu zuk m’khoichaa gui khai nei. ⁵ Ngui ng’za hlü aih ne kä nami ghin vai, nami mät ung om ci awn nami ng’büh vai. A i ah kiasei ci ung Khanpughi naw, “Kei naw nang cu kä ka ning hteh ta phung khai, kä ka ning nawng phung khai,” ci ne a pyein ah hmawk ah kiak ci. ⁶ Cun ah kia sei, “Bawipa cu kei nam htei ciah Bawi ah kiak ci, Kei cu kä ka kyikyawk khai. A u naw kei ah khan ah a i bi hlawt khai ang? ⁷ Khanpughi ah ng’thu ning m’thein law gui te ciah nami ng’vai gui cu, nami shüm gui vai nei. Ami ghin nak la ami sik nak cu vang ngai ba u netah, ami zum nak cu nami thei leh gui vai nei. ⁸ Bawipa Jesuh Khrit cu zanta, tuhngawi, ngawi zä, käng khukhlat phung ci. ⁹ Lam ng’düng ung kaa lam hma vai ah a hlü hlü ah ami m’theithang nak cu kä nami läk-en vai nei. Ei ei vai ah mawng läk nak vai ah thukhän ah kä kiak ciah, Khanpughi ah m’gein nak awn gah ah thamah nak cu bä ci;a cun ah thukhän läk ciah chang gui cu a i sang ung phi kä bä hlawt ci gui. ¹⁰ Khawihnah nak ah Jew chang gui ah kho phung ung bi bik ciah Taigü gui naw, mik mi ah ng’zokiang ung sonkiän phung api ah phi kä ei hning ci gui nei. ¹¹ “Jew chang gui ah Taigü Tung naw, sei me gui ah asi gui cu cheishoh nak küikyan nak vai ah, a Theingcim nak pi Säih ah a law püi ung phi; sei me gui ah pum cu phung ah ak pung ah mei awn m’khih ci ci gui. ¹² Cun ah kia sei Bawipa Jesuh Khrit cu a si ng’hlui awn chang gui ah, cheishoh nak m’si khai ah, mang gaw ah k’pung ah sik nak aut ci. ¹³ Cun ah kiasei mik mi cun phi gaw ah k’pung ah hteit ne, Bawipa ah lü ng’aa nak cu, mi ng’pai tuk khai nei. ¹⁴ A i ah kia sei ci ung mik mi ah hmawk ah khomdek khan ung ng’tüi hnga ciah mang gaw kä om ci; ngawi ah dang lawk khai ah mang gaw cu mi shui shüi zah ci nei. ¹⁵ Cun ah kia sei mik mi naw Bawipa Jesuh cu, Bawipa nei ciah ng’kiaa nak ah m’gawng awn, ani ah ming ung mi m’kümto nak cu ang täi sei Khanpughi am mi ap khai nei. ¹⁶ Akni bi vai lah tumat la tumat ng’hteihtang tu vai cu kä nami m’hnih-en vai nei, cun gui cu Khanpughi naw ng’zak hlü ah vawihpeh nak ah kiak ci nei. ¹⁷ Nami ng’vaihta gui ah ng’thu cu ngai u ne ami pyein ah nami om vai nei. Ngahmi naw ami bi lawh cu Khanpughi-am m’thein ba khai gui kia sei, kä ng’düm phung ne nangmi cu ning m’htei gui ci gui nei. Nangmi mi naw ami ng’thu cu nami ngaih ah akiak ung ngahmi cu zeikiai ne bilo khai gui nei, Kä nami ngaih ah a kiak ung ngahmi cu thüisei u sei, nangmi ah hmawk ah a i phi a bä nak kä om khai nei. ¹⁸ Keimi ah hmawk ah ang täi sei nami taigü vai nei. Keimi naw kami m’Lung kyong theingcim ciah akcang ah kami hmat ci. A i ah kia sei ci ung keimi cu ang täi sei ng’düng ci bäng kami bi nak hlü ah hmawk ah kiak ci. ¹⁹ Khanpughi naw kä shou pha sei, kei cu nangmi ah om nak ah, ana tüih law vai ah nami taigü vai ah ka ning m’cäi gui ci nei. ²⁰ Sih nak ung khüt sei ng’ap ne, ng’täi ciah thukhän m’hnüt ne k’bäi ciah Htoshäm Bawi ah kiak ciah, Bawipa Jesuh cu Khanpughi naw, sih nak ung kaa thawh ba sak pyi ci nei. ²¹ Nangmi naw dimdeeih nak ah Bawi, Khanpughi ah ang zak hlü nami läk nak hning vai ah, nik ci phung avan ning m’shumphyuk gui sä. Bawipa naw a mät ah ng’zak hlü ah mäih ah mik mi cu, Bawipa Jesuh Khrit awn na piangtham gui sä. Bawi Khrit cu Ngawizä ang’täi sei Bawi mang ne om sä, Amen. ²² Phäi nau gui aw, shin ah k’tha peit nak cu hnimgei ne nami ngaih vai ah ka ning paa nah gui ci nei. Tuhbäi ca ka ning guk law gui cu kä ng’sau aih hnga ci nei. ²³ Mi nau Timothi cu thawng ung kaa phiawng law pyii ci nei ciah ka ning hmat sak gui hlük ci nei. Ani cu agawk law zät ah a kiak ung, nangmi awn ming hmuk khai ah ka law ung, ka khah law püi khai nei. ²⁴ Nami ng’vai gui la Khanpughi ah chang gui avan cu kami zavaih nah gui ci nei. Itali ah kaa phäi nau gui naw phi ning zavaih nah gui ci gui nei. ²⁵ Khanpughi ah chimgein nak cu nami van ah khan ah om sä.