KALATIAN

KALATIAN

¹ Chang ung kaa lawk ci la chang ah m’düih ah kä kyak ciah, Jezuh Khrit la ani sih nak ung kaa thawh ba sak ciah Apa Khanpughi ah m’düih, ang düihpüi kei Paul La; ² shi ah kei awn kami om ghawm ciah phäi nau gui naw, Kalatia kho ah khrihtabum gui-am ca kami pe lawk ci nei: ³ Mi Pa Khanpughi la Bawipa Jezuh Khrit ah m’gein nak la dim deeih nak cu na mi khan ah om sä. ⁴ Mi Pa Khanpughi ah ang zak hlü ah Bawi Khrit cu shin ah shetkat nak ah khin ung na k’phiawn gui khai ah, mi kat nak ah hmawk ah ng’ap pyi ci nei. ⁵ Khanpughi ah bämang nak cu ang täi sei deikhang sä! Amen. ⁶ Bawi Khrit ah m’gein nak awn nang mi ning khü gui ciah Khanpughi cu, ang ghit ah nawng u ne, ng’Thu Ni a hei nami dou ah hmawk ah ka ning cäi nah gui ci nei. ⁷ Akcang ah pyein ung Bawi Khrit ah mawng “Thu Ni ahei,” kä om ci, cun ung phi chang am shah gui naw, Bawi Khrit ah ng’Thu Ni cu m’hlat shüi shüi u ne, ning awng-aa sak gui ci gui. ⁸ Cun ung phi kei naw ka pyein ah ng’Thu Ni awn kä täng ciah ng’thu pyein ci cu, keimi phi bäi, khanchang phi bäi, m’hteikhaw ah hteh nak güt ah m’kat nak cu gah khai nei. ⁹ Keimi naw leng ba ne kami pyein ba mä cu; nangmi naw nami dou ah ng’Thu Ni awn kä täng ciah, ng’Thu Ni pyein ciah chang cu, m’hteikho ah hteh nak güt ah m’kat nak gah sä! ¹⁰ Cun ah ka pyein cu chang naw a na k’bääi vai ah ka pyein ah kya ne ang? Cun ah kä kyak ci, Kei ah ng’zak hlü cu Khanpughi ah nak bääi vai bäng ah kyak ci. Kei cu chang ah na chang m’sui vai ah ka k’tha nak ciah kya ne ang? Cun ah ka k’tha nak ciah a kyak ung kei cu Bawi Khrit ah chang shäm ah kä ka kyak khai. ¹¹ Ka ning m’thein gui khai phäi nau gui aw, kei ka pyein ah ng’Thu Ni cu chang ung kaa lawk ciah kä kyak ci. ¹² Kei naw chang tumatmat ung kaa ka gah ah kä kyak ci, chang tumatmat naw a nam theingthang ah phi kä kyak ci. Bawipa JesuhKhrit amät naw khän ne a nam dang ah kyak ci. ¹³ Kei naw Jew gui ah zum nak ung ka om zah ung a i ah ka bilawh man cu ka ning m’thein gui pyi ah kyak ci. Kei naw Khanpughi zum ci gui cu ak she ah k’dudeiu na gui ne, khrihtabum cu m’di vai ah ka k’tha na pi k’bäih ci. ¹⁴ Kei cu Jew gui ah zum nak akcang ah bi nak ung, kami thawn lawk ciah Jew chang gui ung, pupa gui ah thung law zoman cu k’tha na pi k’bäih ne ka läk ciah kyak ci. ¹⁵ Cun ung phi kei kä ka ng’tüi pha ge ung Khanpughi naw am gein nak awn na ghü ne, a khuut bi vai ah ana khü ah kyak ci. ¹⁶ Cun kawn ah chang pakhui hei gui-am Ahtapa ah mawng Thu Ni cu kam thein gui khai, kei-am Ahtapa cu ana hmu sak ah kyak ci. Cun ah kyasei nam shüm thein tuk khai ah a u phi kä ka ng’shi man ci: ¹⁷ Ang düihpüi ah kya law ma ci gui, ka ng’shi gui khai ah Jerusalem ah phi kä ka hteit man ci. Ak htük bäih ah Arabia kho ah hteit netah Damaskas ah ka law ba ci. ¹⁸ Khokum thum a lüng kawn ah kei cu Peter ka hmuk khai ah Jerusalem ah hteit ne, ani awn atäng ah hnüüp gha lei-hma ka om tuk ci. ¹⁹ Cun ung phi kei naw Bawipa ah nau James ah kawn ah ang düihpüi a hei» á u phi kä ka hmuk ci. ²⁰ Shin ah ka guk cu ng’düng ci, kä ka hleei ciah a kyak ah mawng cu Khanpughi naw hmat ci! ²¹ Cun kawn ah kei cu Siria la Cilicia kho ah ka hteit ci. ²² Cun zah ung Judea kho ah khrihtabum gui naw kei cu kä na hmat phak ci gui. ²³ Ngahmi naw chang hei gui ah pyein ami ng’zak cu, “Mik mi na k’dudeiu na gui man ciah chang naw, zan ä am di vai ah ak tha nak man ah zum nak ah mawng cu, shäu ne pyein ci nei,” ciah kyak ci. ²⁴ Cun ah kyasei ngahmi naw kei ah mawng ung Khanpughi cu m’hlüngtai ci gui.

¹ Khokum gha lei-phli lüng khätah kei la Banabas cu Titus khah püi ne, Jerusalem ah kani hteit ba ci. ² Cun ah ka hteh cu Khanpughi ah lam shüm nak ah kyak ci. Kei cu ang vai ba gui awn ng’hmu u ne, khui hei chang gui-am kam thei tu gui ah Thu Ni ah mawng cu kam thein gui ci. Kei naw azan ka bi phi bäi, tuhbäi ka bi phi bäi, a kholä düt ah a kyak vai kä ka ng’za hlük ci. ³ Ka paw Titus cu Karik chang ah a kyak ung phi ling ne vun-ah nak cu kä ka bi sak ci: ⁴ cun ung phi am shah gui lä naw bi sak vai ng’za hlük ci gui. Cun ah chang am shah gui cu, keimi naw Bawipa Jesuh ung kami kawng ät nak awn kami gah ah ng’päize nak cu na k’tä gui hlü neh keimi ah ng’bum nak ung lut law tuk ci gui ah kyak ci. Ngahmi naw mik mi cu na khlei htein ah gui hlük ci gui. ⁵ Cun ung phi ng’Thu Ni ah düng nak cu nangmi ah hmawk ah a khän nak vai ah, ngahmi cu api ah phi a khin kä kami pe gui ci nei. ⁶ Ang vai ah ng’shei ci gui, a u naw phi kei-am ak thai kä na m’shüm thein tuk ci gui. Ngahmi ang vai ah ami kyak la kä ami kyak cu kei ah hmawk ah kä küikyang ci, a i ah kyasei ci ung Khanpughi naw ak pung a teng nak awn a i kä m’khoichak ci. ⁷ Ngahmi naw ami nam shüm thein nak tu vai sü ung, Khanpughi naw Peter-am Thu Ni cu Jew chang gui-am thein sak gui ah mäih ah, kei-am Thu Ni cu Khui hei chang gui-am kam thein vai ah ana m’düih cu hmu lawk ci gui. ⁸ Khanpughi naw a hlüngtai nak awn Peter cu Jew chang gui ah hmawk ah ang düihpüi ah am düih ah mäih ah, kei cun phi Khui hei chang gui ah hmawk ah ang düihpüi ah nam düih ci. ⁹ Ang vai gui ah kyak ciah James, Peter la Johan ni naw, kei-am Khanpughi naw aküikyang ah ana peit cu na zum pek ci gui. Cun ah kyasei atäng ah bilaw ghawm ah ami k’bäi nak ah, kei la Banabas cu kut ung k’pang ne na zavaih goi ci gui. Kei la Banabas naw khui hei chang gui ng’lung ah ani bi vai la ngahmi naw Jew chang gui ah ng’lung ah ani bi vai ah kami van naw zum ne kami k’bäi ci. ¹⁰ Ngahmi naw ghawipyam ci gui, nami shüm gui vai nei, ci ne nam cäi gui ci gui, cun cu kei naw ka bi hlü pi ah kyak ci. ¹¹ Antiok ung Peter a gawk law zah ung ani ah bilawh cu akcang ah cheishoh ci kyasei, chang gui ah ma ah ani cu m’kat ne ka ng’thu ci. ¹² Ani cu chang khui hei phäi nau gui awn vun vai ne ei aw te ci, cun ung phi James ah tüih law ah chang gui ami gawk law kawn ah, khui hei gui awn vun vai ne kä ei aw ba ci. A i ah kyasei ci ung ani naw, khui hei gui-am vun-ah nak kä bi sak tu gui vai ah pyein ciah chang gui cu a kyih su ah kyak ci. ¹³ A hei Jew khrihta gui cun phi Peter ah mäih ah pyai law shüi shüi u sei, Banabas hngaw naw läk law tu gui ci. ¹⁴ Cun ah ngahmi ah bilawh cu ng’Thu Ni ah ng’düng nak awn kä ah ng’müi law cu, kei naw hmu netah, chang gui ah ma ah, Peter-am, “Nang cu Jew chang ah na kyak ci, cun ung phi chang khui hei ah mäih ah na om ci, Jew chang ah mäih ah kä na om ci. Cun ah kya lang ne a i ah kyasei khui hei chang gui Jew chang gui ah mäih ah ami om tu vai ah na ling nak gui ang?” ci ne ka ng’shik ci. Mawng ¹⁵ Keimi cu Jew chang ah kami ng’tüi lawk ci, kat nak bik ciah khui hei chang gui ah kä kami kyak ci. ¹⁶ Chang cu Bawi Jesuh Khrit a zum nak bäng awn Khanpughi ung ng’düng nak gah ci, ng’thukän a läk nak awn ah kä kyak ci. Keimi cun phi Bawi Khrit Jesuh zum nak awn, Khanpughi ung düng nak gah vai ah, Bawi Khrit cu kami zum ah kyak ci, thukhän läk nak awn ah kä kyak ci. A u chang phi thukhän läk nak awn Khanpughi ung düng nak kä gah hlawt ci. ¹⁷ Mik mi cu Bawi Khrit ung kawng ät nak awn, Khanpughi ung düng nak gah vai ah k’tha nak ah mawng ung, mi mät phi chang khui hei gui ah mäih ah kat nak mi bi cu mi hmuh law ah a kyak ung, Bawi Khrit naw kat nak cu na bi sak gui ciah mi pyein khai ang? Cun ah kä kyak ci nei! ¹⁸ Kam shet pyi cu kam thawh ba ah a kyak ung, kei cu kamät naw ka mät thukhän m’shet ciah kam dang ah kyak ci. ¹⁹ Thukhän naw kei cu na sih sak ciah kyasei, thukhän ah mawng ung kei cu chang k’si ah ka kyak ci. Cun ung kei cu Khanpughi awn atäng ah sih nak ka gah pyi ci: ²⁰ Cun ah kyasei kei kä ka ghing ba ci, Bawi Khrit cu kei ung ghing ci. Tuhbäi ka ghin nak cu Khanpughi ah Htapa ka zum nak awn ka ghin ah kyak ci, cun ah Htapa naw kei nam hni ne, kei ah hmawk ah a hnun gui pe pyi ci. ²¹ Kei naw Khanpughi ah m’gein nak cu kä ka ma phung khai. Cun ung phi chang tumat cu ng’thukhän awn Khanpughi ung düng nak gah ciah a kyak ung, Bawi Khrit ah sih cu a kholä ah kyak ci nei!

¹ Kalatia chang k’ang gui! A u naw ang a ning pluh gui ve? Kutlam tung ung Bawi Jesuh Khrit asih cu, nami mik awn nami hmuh awn täng khai ah, ka ning m’dang gui pyi ci nei! ² Khanpughi ah Mumcha nami gah nak cu, thukhän nami läk nak awn ang? Kä cun ung Thu Ni ngai ne nami zum nak awn ang? m’hlan ne nami pyein vai nei! ³ Nangmi cu a i ah kyasei shin hlawk ah nami ang-ang! Khanpughi ah Mumcha awn tün law u netah, nami mät ah hlüngtai nak awn nami pleh hlük ci maa? ⁴ Nami bui aut gui ah mawng cu a kholä ah kya zawp ne maa? A kholä ah kä kya düt khai nei! ⁵ Khanpuhgi naw Mumcha ning zuk m’kyum gui ne, cäi aih gui vai a ning hmuh sak gui cu, thukhän nami läk nak awn ang? Thu Ni ngai ne nami zum nak awn ang? ⁶ Abraham ah mawng cu mi ngai shüm kaw; cacim naw, “Abraham naw Khanpughi zum ci, a zum nak awn Khanpughi naw chang düng ah dou ci” ciah pyein ci. ⁷ Cun ah kyasei Khanpughi akcang ah zum ci gui cu, Abraham ah hta ng’shon gui ah kyak ci, ci cu nami hmat vai nei. ⁸ Khanpughi naw chang khui hei gui cu ami zum nak awn amät ung düng sak gui khai, ciah cacim naw k’cä ci. Cun ah kyasei cacim naw Thu Ni Abraham-am am thein cu, “Khanpughi naw nang ung, chang ah hta avan-am m’shumphyuk nak pek khai,” ciah kyak ci. ⁹ Abraham naw zum ne m’shumphyuk nak gah ci; ani ah mäih ah zum ciah chang phung naw m’shumphyuk nak cu gah ci gui. ¹⁰ Thukhän läk vai bäng ngaih u ci gui cu a cun naw kyuk gui ci. Cacim theing ung, “Thukhän ca uk ung ami guk phung kä läk ciah chang cu Khanpughi naw m’kyuk ci,” ciah om ci. ¹¹ A u chang phi Thukhän awn Khanpughi ung düng nak kä gah ci, ci cu dang ci, a i ah kyasei ci ung, cacim ung,“Zum nak awn Khanpughi ung düng ciah chang cu, ghing ne om khai.” ¹² Cun ung phi thukhän cu zum nak awn api ah phi kä ng’pha ci. Cacim ung, “Thukhän ung om ci phung-läk ciah chang cu ghing khai nei,” ciah om ci. ¹³ Cacim ung, “Singlam khan ah tai ne ami ngawn naw Khanpughi ah m’kyuk nak gah pyi ci nei,” ciah a om ah mäih-ah Bawi Khrit cu mik mi ah hmawk ah m’kyuk nak gah netah, thukhän awn m’kyuk nak mi gah nak vai sü ung na phiawn gui ci. ¹⁴ Cun ah a mawng cu, chang khui hei gui naw, Abraham-am Khanpughi ah shaitaak ah m’shumphyuk nak cu, Bawi Khrit ah ming ung ami gah tu vai ah kyak ci. Cun ah kyasei mik mi cu zum nak awn, Khanpughi ah shaitaak ah Mumcha cu mi gah khai. ¹⁵ Phäi nau gui aw, ak hnüüp tä nami aut ah m’tumtäng nak tumat ka pyein khai; Chang hnih naw ng’thu khän ne ca ani guk ah a kyak ung, cun ah ca cu a u naw phi kä khui ba hning ci, kä k’be ba hning ci. ¹⁶ Tuhbäi Khanpughi ah shaitaak cu Abraham la ahta ng’shon ah hmawk ah kyak ci. Cacim ah pyein cu “Hta shon gui” chang akda a pyein ah kä kyak ci, “Hta shon” chang tumat a pyein ah kyak ci, aming cu Bawi Khrit ah kyak ci. ¹⁷ Ka pyein hlü cu Khanpughi naw Abraham awn Thukhän bi netah, a cun läk vai ah shaitaak nak a peit ah kyak ci. Khokum phya phli la thum-kip kawn ah ng’dang lawk ciah thukhän naw, cun ah thukhän la Khanpughi ah shaitaak cu kä m’shet hlawt ci. ¹⁸ A vai sü ah Khanpughi ah m’shumphyuk nak cu thukhän ung düi ciah a kyak ung, cun cu shaitaak ung düi ciah kä kya ba khai. Cun ung phi Khanpughi naw a shaitaak awn Abraham cu, cun ah am shumphyuk ah kyak ci. ¹⁹ Cun ah a kyak ung thukhän ah ng’bü nak cu a i ang? Thukhän cu shetkat nak ah mawng m’dang nak ah kyak ci. Cun ah thukhän cu shaitaak nak gah ciah Abraham ah hta ng’shon, kä a gawk law pha ah a khin bäng ung om khai ah kyak ci. Cun ah thukhän cu khanchang gui awn, ng’shä tumat ung a zuk peit law ah kyak ci. ²⁰ Cun ung phi chang tumat bäng naw abi ah kya ne, ng’shä kä hlü ba ci: Khanpughi cu tumat bäng ah kyak ci. ²¹ Cun ung thukhän la Khanpughi ah shaitaak cu hnu ng’tuk ni ne ang? Kä hnu ng’tuk ci goi nei! Chang ah hta naw ghin nak ah thukhän ami gah vai sü ung, a cun läk nak awn chang phung cu Khanpughi ung düng nak gah khai sü te. ²² Cun ung phi, cacim naw, m’dek ah khan avan cu, kat nak ah hlüngtai nak ah kaa ah om ci nei, ci ne pyein ci. Cun ah kyasei Bawi Khrit zum nak ung phung ciah a shaitaak ah m’shumphyuk nak cu, zum ciah chang gui naw gah ci gui. ²³ Zum nak kä a gawk law pha ung, zum nak ang dang law vai zung khüt sei, thukhän naw üüp ne na khai gui ci. ²⁴ Mik mi cu zum nak awn Khanpughi ung düng nak mi gah vai ah thukhän naw, Bawi Khrit a law ba güt ung na ngäng gui ci. ²⁵ Cun ung phi tuhbäi zum nak gawk law pyi ci kyasei thukhän naw kä na kut shum ba gui ci. ²⁶ Nangmi cu zum nak awn Bawi Khrit Jesuh ung kawng ät ne Khanpughi ah hta ah nami kyak ci. ²⁷ Nangmi cu Bawi Khrit ung kawng ät ne tui nami ng’hnim pyi ci kyasei, Bawi Khrit suisa u ne, Bawi Khrit ah mäih ah ghing ne nami ng’thu ci. ²⁸ Cun ah kyasei Jew chang la khui hei, khlei htein la khui mah, pami la hnumi ciah ang lakmah nak kä om ba ci: nangmi nami van cu Bawi Khrit Jesuh ung akawng ät ah nami kyak ci. ²⁹ Nangmi cu Bawi Khrit nami khäm ah a kyak ung, Abraham ah hta ng’shon ah kya u ne, Khanpughi ah a shaitaak cu nami gah khai.

¹ M’täi ne pyein ung Chang tumat ah hta cu apa khawh chaam avan ei mang khai ah a kyak ung phi, kä a ng’vai pha ung khlei htein ah mäih ah om ci. ² Ani cu apa ah k’bäi nak ah akhin kä a gawk pha ung, ani m’hteihtang ci gui la m’cum’cäi ci gui ah kaa ung om ci. ³ Acun ah mäih ah mik mi cun phi mumcha ung kämi khüighaat pha ung, khovang mumcha gui ah khlei htein ah mi kyak ci. ⁴ Cun ung phi ak hnu ah akhin küm law khätah, Khanpughi naw Ahtapa cu zuk m’kyum lawk ci. Ani cu hnicim chang nu nah ne ng’tüi law ne, Jew gui ah thukhän kaa ah om lawk ci; ⁵ Cun cu mik mi Khanpughi ah hta ah mi kyak vai ah, thukhän ah kaa ung kaa, ana k’phiawn gui ah kyak ci. ⁶ Nangmi cu a hta gui ah nami dang vai ah, Khanpughi naw, “Abba, Ka Pa,” ci ne ng’khü ciah Ahtapa ah Mumcha cu mi m’lung kyong ah zuk m’kyum lawk ci. ⁷ Cun ah kyasei nangmi cu khlei htein ah kä kya ba ne, Ahta ah nami kya pyi ci. Ahta ah nami kya pyi ci kyisei, nangmi cu Khanpughi ah pakhui m’düng ciah Ahtapa ah nami kyak ci. ⁸ Nangmi cu Khanpughi kä nami hmat pha ung, Khanpughi ah ng’hlawk¬ ci gui ah khlei htein ah nami kya man ci. ⁹ Tuhbäi ung nangmi naw Khanpughi nami hmat ci--Tuhbäi ung nangmi cu Khanpughi naw ning hmat gui ci--ci ne ka pyein khai. Cun ah kyasei nangmi naw ak tha kä om sei, m’gein vai ciah kho ng’zo cu, a i ah kyasei nami ng’hlah ba shi hlü ang? A i ah kyasei khozo ah khlei htein ah nami kyak ba hlü ang? ¹⁰ Nangmi naw hnüüp, chaa, kum, akhin am shah gui cu, aküikyang ah nami m’hnüt ci. ¹¹ Nangmi ah hmawk ah ka ng’ä ci nei! Nangmi ah hmawk ah ka bi gui shi a kholä düt ah kä kyai lawk khai aw? ¹² Phäi nau gui aw, kei ah mäih ah nami kyak tu vai ah ka ning m’cäi gui ci nei. Kei cu nangmi ah mäih ka lawk ci nei. Nangmi naw kei ah khan ah nami kat nak kä om hnga ci. ¹³ Ak htük bäih ah Thu Ni ka ning m’thein law gui cu kei ka gawpyam su ah kyak ci, ci cu nami shüm ba khai. ¹⁴ Kei ka gawpyam nak naw nangmi a ning cüngvawn sak gui ung phi, nangmi naw kei cu kä nami na päipih ci, kä nami na hnu ng’tuk püi ci; Khankhochang ah mäih, Bawi Khrit Jesuh ah mäih ah nangmi naw kei cu nami na dou ci. ¹⁵ Cun zah ung ang htei ah nami zeikiai te ci, tuhbäi a i ah nami kia lawk ci ang? Cun zah ung nangmi cu nami m’khüt vai sü ung nami mik hngaw kawih ne nami na pek khai ah nami kyak cu ka pyein ba hlük ci. ¹⁶ Tuhbäi kei naw düng ci ka pyein ah hmawk ah, nami gaa ah ka kyai law bawk khai ang? ¹⁷ Chang a hei gui naw nangmi cu ang htei ah ning cungngai gui ci gui, cun cu akni su ah kä kyak ci. Ngahmi ah ng’zak hlü cu, nangmi kei awn nami ng’chaa vai ah kyak ci, cun ung vah nangmi naw ngahmi cu nami cungngai tu ba gui khai kyak ci. ¹⁸ Ak ni su lam ah ngaih peit tu cu nik ci, kei naw ka ning om püi gui zah bäng ah kä kyak ciah, ngahmi cu ang täi sei a cun ah ngaih tüh ei u sä! ¹⁹ Kam hni ah ka hta nau gui aw! Bawi Khrit ah m’lung ngaih nangmi ung kä a om pha ah chuih, kei cu hta lawk khai ah nu ah mäih ah ka zaica ci nei. ²⁰ Kei naw nangmi cu a hei ah m’hleen ne ka ning m’cäi gui hlü ah phäh ah, tuhbäi ge nangmi awn atäng ah ka om hlük ci nei. Kei cu nangmi ah phäh ah ka ng’ä aih ci nei! ²¹ Thukhän ah kaa ah om hlük ciah chang gui, ka ning shi gui hlük ci;thukhän ah pyein cu nangmi naw kä nami ng’zak ci ma? ²² Cun ah thukhän naw, Abraham ung ahtapa hnih om ci, tumat cu khlei htein hnumi ah hta ah kyak ci, tumat cu ng’päi om hnumi ah hta ah kyak ci. ²³ Khlei htein hnumi ah hta cu, hta man düt ah a hta nak ah kyak ci;ng’päi om hnumi ah ahta läi cu Khanpughi ah shaitaak awn ng’tüi lawk ciah kyak ci. ²⁴ Shin cu m’tumtäng nak ah kyak ci:hnumi hnih cu thukhän hnih ah kyak ci. Hnumi tumat cu Hakar ah kya ne, ani ah hta gui cu khlei htein ah kyak ci gui, ani naw Sinai Khomhtung ah Thukhän cu dang sak ci. ²⁵ Hakar cu Arabia kho ah, Sinai m’htung ah hnün ung ng’düi ci. Ani naw tuhbäi khlei htein ah kyak ciah Jerusalem la a cun ung chang gui cu dang sak ci. ²⁶ Cun ung phi Khanmawpi ah Jerusalem cu, ng’päize nak ah kya ne, mi nu ah kyak ci. ²⁷ A i ah kyasei ci ung, Cacim naw; “Kä hta ciah hnumi, kä na hta man ung phi zeikiai ä! Nau poi kä na m’neh man ung phi, viik ne m’lau ä! A cei naw a nawng ah hnumi cu, A cei om ciah hnumi ah mä, da pi sei, Hta nau khai nei!” ciah pyein ci. ²⁸ Phäi nau gui aw, nangmi cu Isaak ah mäih ah Khanpughi ah shaitaak awn nami ng’tüi ciah hta gui nami kyak ci. ²⁹ Cun zah ung ng’tüi law düt ciah hta naw, Khanpughi ah Mumcha awn ng’tüi lawk ciah hta cu k’dudeiu nak ci, tuhbäi phi a cun ah kyak ci. ³⁰ Cun ung phi cacim naw a i ah pyein ci ang, ci ung, “Khlei htein la a hta cu k’täm goi vä;khlei htein hnumi ah hta cu ng’päi om hnumi ah hta awn atäng ah pakhui kä m’düng tuk khai nei,” ci ne pyein ci. ³¹ Cun ah kyasei phäi nau gui aw, mik mi cu, khlei htein hnumi ah hta gui ah kä mi kyak ci, ng’päi om hnumi ah hta gui ah mi kyak ci nei.

¹ Mik mi cu Bawi Khrit naw na k’phiawn gui pyi ci kyasei ng’päizee nak mi gah pyi ci! Cun ah kyasei ng’päizee chang ah kya ne ng’düi vä! Cän kawn ah khlei htein ah kyak ba vai ah kä nami om men vai nei. ² Ngai vä! Kei Paul naw ka ning thu püé gui cu, nangmi naw vun ah nak nami lak ah a kyak ung, Bawi Khrit cu nangmi ah hmawk ah a i ah phi kä ng’khän ciah mäih lawk khai. ³ Vun ah nak gah ci phung naw thukhän avan cu a läk vai nei, ciah ka ning m’cäi ba gui mä ci. ⁴ Khanpughi ung düng nak cu, thukhän läk nak awn nami shui ah akyak ung, nangmi cu Bawi Khrit awn ng’cha u ne, Khanpughi ah m’gein nak ah ak pung ah nami gawk ciah kyak khai. ⁵ Keimi läi cu, kami zum nak ung hlüngtai ciah Khanpughi ah Mumcha ah bi nak awn, Khanpughi ung düng nak cu gah vai ah kami ngaih u ci. ⁶ Mik mi cu Bawi Khrit Jesuh ung mi kawng ät kawn ah, vun ah la kä ah cu ak tung ah kä kyak ci, ak tung cu m’hni nak dang sak ciah zum nak ah kyak ci. ⁷ Azan nangmi ah bi cu bä ci te! Düng nak kä läk vai ah á u naw ang a ning maa nak gui? A i chaa ang a ning k’tü k’phlawh gui? ⁸ Cun ah tüihtok nak cu nangmi ning khü gui ciah Khanpughi ah bi ah kä kyak ci. ⁹ “M’htut den khui avan cu k’caw apihta naw thawh sak ci,” ciah thu cu ngaih tüh ba vä. ¹⁰ Cun nung phi nang mi cu ka ning ngaih gep gui ci. Mik mi cu Bawipa ung mi kawng ät pyi ciah kyasei, nangmi cu a hei ah kä nami ng’phyeek pai khai ah ka ngiah gep ci. Cun nung phi nangmi ning awng aa, ngaih pai sak gui ciah chang cu, Khanpughi naw m’shetkat khai. ¹¹ Phäi nau gui aw, kei naw vun ah nak cu, bi lä vai nei ci ne, ng’thu ka pyein ciah a kyak ung, a i ah kyasei k’dudeiu nak ka aut vai ang? Cun gui cu akcang ah akyak ung, Bawi Khrit ah kutlam tung ah mawng ka pyein cu, thüigen nak vai kä om khai nei. ¹² Nangmi ning cüngvawn sak gui ci gui cu, vun ah bäng ah kä kyasei, ami mät naw ami mät ah k’ci ami k’phyet ung phi bä khai nei. ¹³ Ka phäi nau gui aw, nami ng’päizee khai ah Khanpughi naw ning khü gui pyi ci nei. Cun ung phi cun ah ng’päizee nak awn pumsa ah ng’zak hlü kä nami läk-en vai nei. M’hni nak awn tumat la tumat nami ng’chaan tu vai nei. ¹⁴ “Na paw chang cu na mät awn m’täng ne nam hni vai,” ciah thukhän läk ci cu, thukhän avan läk ciah kyak ci. ¹⁵ Cun ung phi kawng, khawm gui ami ng’tohpah ah mäih ah nami kyak ung, tumat la tumat nami dishum nak ah kyak khai nei. ¹⁶ Kei naw ka pyein hlü cu:Mumcha ah m’shüm thein ah mäih ah nami om vai nei, hnicim chang ah ng’zak hlü cu kä nami läk-en vai nei. ¹⁷ A i ah kya sei ciung Hnicim chang ah ng’zak hlü cu Mumcha ah ng’zak hlü awn hnu ng’tuk ci, Mumcha ah ng’zak hlü cun phi hnicim chang ah ng’zak hlü awn hnu ng’tuk ci. Shin ah hnih goi cu ng’gaa na tuk ci goi. Cun ah kyasei nangmi cu nami mät ah ng’zak hlü ah kä nami bi hlawt ci. ¹⁸ Mumcha naw lam a ning m’shüm gui ah a kyak ung nangmi cu thukhän ah kaa ah kä nami om ba ci. ¹⁹ Hnicim chang ah ng’zak hlü gui cu dang ge ci. Cun gui cu ng’zawpawm nak, shemshai nak, gän düt ah kyak nak; ²⁰ agup khawihnah nak, ng’pluh nak, kawng gaa nak, ng’tuk ah nak, vamneng nak, m’lung she nak, ei hlü-mang k’phya nak; ng’khoikhei nak, ng’phyek ng’pai nak; ²¹ ng’u ng’hneit nak, awktat nak, ei awk ng’nauk naam nak gui la ahei shetkat nak gui ah kyak ci. Kei naw ka ning m’cäi gui hlü cu, a shin ah mäih ah om ih ciah chang naw Khanpughi ah uk nak kho cu kä khäm tu hlawt khai. ²² Cun ung phi Mumcha ah m’theih tak läi cu, m’hni nak, zeikiai nak, dimdeeih nak, hnimgei nak, ng’awi ng’gi nak, ni kiom nak, bekhüt nak; ²³ Hniphnoi nak, la küikyang htingling nak gui ah kyak ci. Shin gui hnu ng’tuk püi khai ah a i ng’thukhän phi kä om ci nei. ²⁴ Bawi Khrit Jesuh khäm pyi ciah chang gui phung naw hnicim chang nak la ng’zak hlü nak avan cu,kutlam tung ung sih püi pyi ci gui nei. ²⁵ Mumcha naw ghin nak na pe gui pyi ci, ani naw mi ghin nak cu na kut shum gui khai nei. ²⁶ Mik mi cu chang ah kä ng’shei vai, tumat la tumat kä ngetngawng vai, kä m’thüikhang vai.

¹ Ka Phäi nau gui aw, chang tumat cu a cheishoh ah a kyak ung, Mumcha k’thamah nak om ci gui naw, m’cäi ne nami ng’düng ba sak vai. Cun cu om ni nak awn nami bi vai. Nami mät phi tüihtok nak ung kä nami gawk vai ah nami geing nak vai. ² Nami phuih kawh nami ng’phuih kawh tu püi vai, a cun ah bi ne Bawi Khrit ah thukhän cu nami läk vai. ³ Amät bä ciah ngai ci cu, amät kä bä ciah a kyak law ung, amät naw amät m’hleei ciah kyak ci. ⁴ Ak chang sing naw amät ah bi cu amät naw am htei vai. Abi cu nik ciah a kyak ung, chang hei ah bi awn kä m’tumtäng-en ne, amät ah bi ung amät ang zum vai. ⁵ A i ah kyasei ci ung ak changsing naw amät ah phuih phäh phäh a phuih vai ah kyak ci. ⁶ Khrihta thuni ng’theithang tuk ciah chang naw, m’thei tuk ci-am ngui ghui khawh chaam cu a peit taak vai nei. ⁷ Ang lih ng’lat ah kä nami om men vai, a u chang naw phi Khanpughi kä m’hleei hlawt khai. Chang cu amät ah geit bä bä amät naw khäm ba khai. ⁸ M’dek chang ah ng’zak hlü ah m’dek ung geit ci naw, sih nak ah a vuipai cu khäm ba khai;Mumcha ah ng’zak hlü ah ng’lei ung geit ci naw, ang täi ghin nak ah a vuipai cu khäm ba khai. ⁹ Cun ah kyasei kä cümbawng ne ak ni ah mi om ih khai: mik mi naw kä mi hnu ng’hlah taak ah a kyak ung, akhin a gawk law hnüüp ung a vuipai cu mi khäm khai. ¹⁰ Cun ah kyasei mik mi naw akhin mi gah päng ung, chang ah hmawk ah ak ni cu mi bik khai, zum ci gui ah kyong khui ah hmawk ah ak tung pi ah mi bik khai. ¹¹ Ka mät naw ka kut awn, a i hlawk ah däm ciah calung gui gu ne ka ning m’khäh law gui cu,teng vä! ¹² Nang mi naw vun ah nak nami bi vai ah ning ling na gui ci gui cu, ak pung bi nak awn khähghah hlük ci gui ah kyak ci nei. Ngahmi cun ah ami ling cu, Bawi Khrit ah kutlam tung ah hmawk ah k’dudeiu nak ami aut vai ami kyih su ah kyak ci nei. ¹³ Vun ah vai ah ling ciah chang gui ge naw, thukhän cu kä läk ci gui nei. Vun ah nak nami bi nak awn khähghah hlü u netah, ami ning bi sak gui ah kyak ci. ¹⁴ Kei läi cu mi Bawipa Jesuh Khrit ah kutlam tung ah hmawk bäng ah ka khähghah khai nei. Bawi Khrit ah kutlam tung ah hmawk ah khomdek cu kei ah phäh ah sik ci, kei cun phi khomdek ah phäh ah ka sik ci. ¹⁵ Chang tumat vun ah vai la kä ah vai cu ak tung ah kä kyak ci, ak thai ah ang tüi vai cu ak tung ah kyak ci. ¹⁶ Shin ah mawng gui läk ne ghin püi ciah chang gui la Khanpughi ah chang gui ah khan ah dimdeeih nak la m’gein nak cu om sä! ¹⁷ Khüm nak ah: cän kawn ah a u naw phi kä na k’shedam men ah ba sä, a i ah kyasei ci ung ka pumsa ung om ciah kang’gaai gui naw, kei cu Bawi Jesuh ah khlei htein ah ka kyak cu m’dang ci nei. ¹⁸ Phäi nau gui aw, mi Bawipa Jesuh Khrit ah m’gein nak cu nami khan ah om sä. Amen.