EPHESIAN

EPHESIAN

¹ Khanpughi ah ang zak hlü ah Bawi Jesuh Khrit ah ang düihpüi ah kyak ciah kei Paul naw, Ephesus gawnu ung Khanpughi ah chang gui, bekhüt ciah khrihta gui-am ca ning peit law gui nei. ² Mipa Khanpughi la Bawipa Jesuh Khrit ah m’gein nak la dimdeeih nak cu nami khan ah om sä! ³ Mi Bawip a Jesuh Khrit ah Pa Khanpughi cu mi m’kümto khai nei! Mik mi cu Bawi Khrit ung mi kawng ät nak awn, ani naw khankho ah mumcha zoushen nak cu nam shumphyuk gui ci. ⁴ Khanpughi naw khomdek kä a tüi pian pha ge ung, mik mi cu Bawi Khrit ung kawng ät nak awn, a ma ah shetkat nak kä om sei theingcim ciah mi kyak vai ah a na ghü gui pyi ah kyak ci. ⁵ Khanpughi naw mik mi cu, am’hni nak awn Bawi Khrit ung a hta gui ah mi kyak khai ah a na k’bäi gui pyi ah kyak ci. Cun cu Khanpughi ah ng’bü nak la ang zak hlü ah kyak ci. ⁶ Am hni pi ah Ahtapa awn anam cümhnah gui ah, Khanpughi ah bämang ciah am gein nak cu mi m’kümto khai nei! ⁷ Bawi Khrit naw ng’ap ne a sih nak awn mik mi cu mi k’phiawn pyi ci, cun cu küikyang ciah Khanpughé ah m’gein nak ah kyak ci. ⁸ Khanpughi naw mik mi am kä ng’vangca ne anam shumphyuk gui ah, am gein nak cu, küikyang aih ci nei. ⁹ Khanpughi naw acüivai nak la alulang nak awn, ang bü nak cu dang khai ah bi bik ci. Bawi Khrit ung akümbe sak ah thuuk ne ng’kau ciah amawng gui cu mik mi am na hmat sak gui ci. ¹⁰ Cun ah Khanpughi naw akümbe sak vaiah ang bü nak cu, akhin aküm law hnüüp ung khankho la khomdek ung a tüisho gui avan cu Bawi Khrit ah lam ma nak awn ang cut sak gui vai ah hmawk ah kyak ci. ¹¹ Apäng avan cu Khanpughi naw am hnüt ak bäi ah mäih ah om kyak ci gui. Khanpughi naw cäu ä ge tün ne a mät ah k’bäi ah ng’bü nak awn, mik mi cu Bawi Khrit ung na kawng ät sak gui ne ak chang ah ana ghü gui hnga ah kyak ci. ¹² Cun ah kyasei ak htük ung Bawi Khrit ging ne mi ngai ciah mik mi naw, Khanpughi ah bämang nak cu mi m’kümto khai nei! ¹³ Nangmi chang pakhui hei gui cun phi, hun nak ah mawng, Thu Ni ah kyak ciah, düng ciah Thu cu ngai ng’za tu u ne, Khanpughi ah chang ah nami kya lawk ci. Nangmi naw Bawi Khrit nami zum lawk ci, cun ah kyasei, Khanpughi naw a shaitaak ah mäih ah Mumcha Theing cu ning m’shumphyuk gui ne, amät ah chang ah ning tüi m’hnüt gui ci. ¹⁴ Cun ah Mumcha Theing cu Khanpughi naw ak chang gui-am apeit ah shaitaak cu mi gah vai ah ang kyän nak ah kyak ci. Cun ah kyasei Khanpughi naw, amät ah chang gui-am kümbe ciah phiawn nak, na pe gui ci, ci cu ngaih gep vai kyak ci. A bämang nak cu mi m’kümto khai nei! ¹⁵ Cun ah kyasei Bawi Jesuh nami zum ah manwg la Khanpughi ah chang gui nami m’hni ah mawng ng’za netah, ¹⁶ nangmi ah hmawk ah ang täi ah Khanpughi kam hlüngtai ci, ning shüm gui ne ka ning taigü pe gui ci. ¹⁷ Nangmi naw Khanpughi nami hmat nak vai ah cüivai nak la lulang nak ah kyak ciah Mumcha cu nami gah vai ah, mi Bawipa Jesuh ah Khanpughi, bämang ciah mi Pa ah ka ning zoih thäh pe gui ci. ¹⁸ Kei naw ani ah ak dei cu nami m’lung awn nami hmuh vai ah ka ning k’thäh pe gui ci, cun ah kyasei, a i nami ngaih u vai ah a ning khü gui ah mawng, ak chang gui-am a peit ah shaitaak cu a i hlawk ah cäicat vai ah abä nak ah mawng, ¹⁹ Ani zum ciah chang gui ung gawklawk ciah ahlüngtai nak cu a i hlawk ah küikyang ciah nami hmat vai ah kyak ci. Nangmi ung gawklawk ciah cun ah hlüngtai nak cu, ²⁰ Bawi Khrit sih nak ung ka thawh ba sak ne khankho ah ak pat lam ung angoh sak zah ung a mang te ah kiak ci. ²¹ Bawi Khrit naw cun ah kho ah khankho uk ci gui, huham mah gui, hlüngtai ci gui, la bawi gui cu uk gui ci. Ani ah ming cu tuhbäi la lawk khai ah khin ung huham ah ci gui phung ah küikyang pi ci. ²² Khanpughi naw ang nüng nüng cu Bawi Khrit ah khaw ka ah chah ne, khrihtabum ung phi avan ah chunglu Bawipa ah ngoh sak ci. ²³ Khrihtabum cu Bawi Khrit ah pumsa ah kia ci kia sei apäng avan cu amät ah kümbe nak awn kümbe sak ci.

¹ Zanä nang mi cu ngaih she nak la shetkat nak ung mumcha aksi ah nami kiak ci. ² Khomdek khan ah cheishoh nak lam cu nami läk ci, kho k’häüung ka, mumchashe ah hlüngtai nak ah uk nak cu nami läk ci, a cun naw tuhbäi Khanpughi kä ngai ciah chang gui cu shum gui ci. ³ Zanä mik mi phi ngami ah mäih ah mi kia man ci. Pumsa ah ng’zak hlü ah mi om ne, pumsa la m’lungngaih ah ni vai düt ah mi bilo man ci. Mik mi cun phi pumsa lam ung, a hei chang gui ah mäih ah Khanpughi ah m’lungshe nak gah khin ciah mi kiak ci. ⁴ Cun ung phi Khanpughi ah m’gein nak cu däm aih ne am hni nak cu hlüng aih khä tah, ⁵ ang thu kä ngaih nak awn mi mumcha a sih nak ung ka, Bawi Khrit awn atäng ah na ghin ba sak gui ci. Nang mi cu Khanpughi ah a gein nak bäng awn hun nak nami gah ciah kiak ci. ⁶ Mik mi cu Bawi Khrit ung mi kawng ät nak awn, sih nak ung ka atäng ah na thawh ba püi gui ne, ani awn atäng ah khankho uk nak vai phi na pe gui ci. ⁷ Cun ah a bi ah mawng cu, mik mi-am am hni nak cu Bawi Khrit awn am dang nak ung, ani ah am gein nak a i hlawk ah adäm ah mawng cu, ngawi zä chang gui naw ami hmat vai ah hmawk ah kiak ci. ⁸ Khanpughi ah m’gein nak ung zum nak awn hun nak nami gah ci. Nami mät ah ni kiom nak la k’tha nak awn ah kä kiak ci, Khanpughi ah m’gein nak ah kiak ci. Cun ah kia sei a u naw a khäh ghah nak vai kä kiak ci. ¹⁰ Bawi Khrit awn kawng ät ne, Khanpughi naw am hnüt bäi ah om k’ni nak ah mäih ah mi om ih vai ah, Khanpughi naw a na tüi sho gui ah kiak ci. ¹¹ Azan ä nang mi cu pumsa awn bi vai kä nami bi tuk ciah kia sei, chang khui hei ah ami ning khü gui cu nami shüm ba vai nei. Pumsa awn bi ah vun ah nak bik ci ah Jew chang gui naw, nangmi cu vun ah nak kä nami bi tuk ciah ning khei gui ci gui. ¹² Cun zah ung nang mi cu Bawi Khrit awn nami ng’shawng ci. Nangmi cu a kho hei chang gui ah kia u ne, Khanpughi ah ghü ah chang ah kä nami kia tuk ci. Khanpughi naw ak chang gui ah hmawk ah shai a taak ah ng’thukhän ung phi, nangmi cu kä nami ng’khämtuk ci, khomdek khan ung Khanpughi kä hmu ne, ngaih u vai kä om ciah chang ah nami kia man te ci. ¹³ Cun ung phi tuhbäi Bawi Khrit Jesuh ung nami kawng ät pyi ci kia sei, Khanpughi awn nami ng’shawng te ciah nang mi cu, Bawi Khrit a sih nak awn nami ng’et pyi ci nei. ¹⁴ Bawi Khrit amät naw Jew chang gui la chang khui hei gui cu, chang pakhui ät ah na piang gui ne, dimdeeih nak na pe gui ci. A pumsa a peit nak awn chang pakhui goi ah ng’tukgen khoikhei nak phi gäi ne m’shet pyi ci nei. ¹⁵ Cun kawn ah Jew chang gui ah thukhän shaitaak gui cu nawng-en ne, Jew chang gui la chang khui hei gui cu, amät ung kawng ät sak gui ne, pakhui thai ah kiak sak gui ci. A cuncha ah dimdeeih nak cu a peit gui ah kiak ci. ¹⁶ Bawi Khrit naw kutlamtung ung a sih nak awn, chang gui ah thüigen nak cu m’dim netah, chang pakhui hnih cu kawngät sak ne, Khanpughi ah law püi ci. ¹⁷ Cun ah kia sei, Khanpughi awn nami ng’shawng te ciah chang khui hei gui la, Khanpughi awn ng’et ci gui ah Jew chang gui, nami van ah ma ah Bawi Khrit cu kium law ne, dimdeeih nak ah Thu Ni cu shäu ne pyein ci. ¹⁸ A cun nak awn chang khui hei gui la Jew pakhui mi van cu Bawi Khrit awn Mumcha tumat ung mi kium ne, Pa Khanpughi ah ma ah mi gawk lawk ciah kiak ci. ¹⁹ Cun ah kia sei nangmi chang khui hei gui cu, chang heinu, thümnu m’donghman ah kä nami kia ba ci:keimi awn atäng ah Khanpughi ah chang, Khanpughi ah kiong khui chang ah nami kia pyi ci. ²⁰ Nangmi cun phi Angdüih püi gui la purofet gui naw ami k’süm ah lung ung ng’lin ah nami kia pyi ci. Cun ah lung k’tung cu Bawi Khrit Jesuh amät ah kiak ci. ²¹ Ani naw cun ah imlo cu shum ne han chang sei, cun cu Bawipa-am ap ah bum im theing ah kia lawk ci. ²² Nangmi cun phi, Bawi Khrit ung kawng ät nak awn, chang khui hei gui awn atäng ah cawhkyan nak nami gah pyi ci kia ne, Mumcha awn Khanpughi ah om nak ah hmun ah nami kia lawk ci.

¹ Shin ah a mawng ung Bawi Khrit ah thawng kium ah ka kiak ciah kei Paul naw, nangmi chang khuihei gui ah hmawk ah Khanpughi ah ka taigü ci nei. ² Nangmi ah hmawk ah shin ah bi bi vai ah, Khanpughi naw am gein nak awn kei-am a na ap ah mawng cu, nangmi naw akcang ah nami ng’zak pyi ah kiak ci. ³ Khanpughi naw thuuk ciah a pawngpüi gui cu kei-am nam thein ci.(Shin ah mawng cu ak tawi ah kei naw ka gu pyi ci, ⁴ Nangmi naw cun ah ka guk cu nami phat ah a kiak ung, Bawi Khrit ah mawng ak thuuk cu kei naw ka hmat ah mawng cu nami hmat khai nei.) ⁵ Cäu läi Khanpughi naw thuuk ciah a mawng cu chang ah hta-am kä m’thein man ci, cun ung phi tuhbäi theingcim ciah ang düihpüi gui la purofet gui-am, Mumcha awn m’thein gui ci nei. ⁶ Cun ah thuuk ciah a mawng ung, Thu Ni awn chang khuihei gui naw, Jew chang gui ah mäih ah Khanpughi ah zoshen nak cu gah tuk ci gui. Jew chang gui la khuihei chang gui cu, pumsa tumat ung ka, ang phyeek pai gui ah kia ne, Bawi Khrit Jesuh ung Khanpughi ah shaitaak cu ng’kühzah ci gui. ⁷ Ahlüngtai nak ah abilawh nak awn Khanpughi naw ana peit ah ak küikyang ah m’cümhnah nak cu, Thu Ni shäu ciah ak chang shäm ah ana pian ah kiak ci. ⁸ Kei cu Khanpughi ah chang gui ung ak chui pi bäih ah ka kiak ci. Cun ung phi Khanpughi naw, Bawi Khrit ah kä khei tai vai ah bühmang nak ah mawng Thu Ni cu chang khuihei gui am m’thein gui vai ah, ⁹ Khanpughi ah thuuk ciah ng’bü nak cu, a i cha dang lawk khai ci cu, chang gui naw ami hmuhmat vai ah m’thein m’kaan nak vai ah a khin ni cu kei am na pek ci nei. Ang tüi avan tüipian ciah Khanpughi naw cau pui pui ung cun ah ak thuuk kau gui cu, a thuh te ah kiak ci. ¹⁰ Cun ah abi ah mawng cu Khan uk ci gui la hlüngtai ci gui naw Bawipa ah cüivai nak a hlühlü cu, tuhchü Krihtabum awn ami hmat sak nak vai ah kiak ci. ¹¹ Khanpughi naw ng’täi ciah ang bü nak awn, mi Bawipa Khrit Jesuh ung dang khai ah abi ah kiak ci. ¹² Mik mi cu Bawi Krih ung mi kawngät nak la ani mi zum nak awn, Khanpughi ah ma ah m’lung üp thamah ne mi gawk pyi ci. ¹³ Cun ah kia sei kä nami ng’zochaw vai, nangmi ah hmawk ah kei cu geinvai nak ka gah ci, cun cu nangmi ah ng’läh nak vai ah kiak ci, cun ah kia sei kä nami ng’zochaw vai nei. ¹⁴ Kei cu Pa Khanpughi ah ma ah m’kuukdong ne kang hui ci, ¹⁵ Ani cu Khankho la khomdek ung kyongkhui mah phung avan naw ming akcang ami gah nak ah kiak ci. ¹⁶ Khanpughi cu bämang ci kia sei, nami m’lung kyong a khüighaat vai ah, ang Mumcha awn hlüngtai nak a ning peit gui vai ah, kei cu ka taigü ci nei. ¹⁷ Nami zum nak awn nami m’lung kyong ung Bawi Khrit naw im ak süm vai ah ka taigü ci nei. Nangmi cu m’hni nak ung ng’zungpyaa ne nami khän htek vai ah ka taigü ci nei, ¹⁸ Cun ung nangmi cu Khanpughi ah chang gui awn atäng ah, Bawi Krih ah m’hni nak cu a i hlawk ah azun, akdang, alu, alawng kiak ci cicu nami hmat lawk khai. ¹⁹ Ani ah m’hni nak cu nami hmat lawk khai, cun ung phi kümbe khai ah a i zah ung phi kä nami hmat hlawt khai--cun ah kia sei Khanpughi ung zungpyaa ne khänghtek vai ah ng’hläm ne nami ngaih gep vai nei. ²⁰ Mik mi ah m’lung kyong ung ahlüngtai nak awn bi bik ci naw, mik mi naw mi ngaih tüh mi ng’zoih thäh ahtah, däm pi sei na pe gui hning ci nei; ²¹ Cun ah Khanpughi ah bäkhäk nak cu, khrihtabum ung la Bawi Khrit ung a kho phlüt ah ng’shü ne om sä! Amen.

¹ Cun ah kia sei Bawipa ah khuut ka bi hmawk ah thawng ka kyum ciah kei naw ka ning m’tholet gui ci nei. Nangmi cu Khanpughi naw khü ne a ning m’düih nak gui awn ng’müi khai ah, hnu m’khin, ma m’hlawi ne nami ghin vai nei. ² Ang täi sei nami m’lung neim sak ne, ng’awi ng’gi ne, hnimgei ne nami om vai nei. Tumat la tumat Lung gei, ngaih ni nak awn, nami m’hni cu dang sak vä. ³ Kawngät nak om khai ah ak ni pi ah nami hnün thawh vai nei, cun cu dimdeeih nak ung nami lukyum khai ah, Mumcha naw a ning pek gui ah kiak ci. ⁴ Khanpughi naw a ning khü nak gui awn, ngaih u nak tumat bäng a om ah mäih ah pumsa tumat Mumcha tumat bäng om ci. ⁵ Bawipa tumat, zumnak tumat, tui hnim nak tumat; ⁶ Hnicim chang avan ah Pa, Khanpughi tumat bäng om ci, Ani cu ang tü a van ah Bawipa, van ung bi bi ne, van ung om ci. ⁷ Bawi Khrit naw a nam shumphyuk gui ah mäih ah, mik mi tumat ci cu küikyang ciah m’cümhnah nak mi gah ci. ⁸ Cacim theing ung lawk ci cu; “Bawipa cu ahlüng nakpi ah hang kai ne, Thawng kyum chang khli cu kai püi gui ci; Hnicim chang van am m’cümhnah nak, pek ci”. ⁹ Tuhbäi, “hang kai ci,” ci cu, a i a pyein hlü ang? Bawipa cu ang neim nak pi bäih ah khomdek ung kyum law ma ci, ciah kiak ci. ¹⁰ Kyum lawk ciah Bawipa cu, a hlüngtai huham awn khopuui be sak khai ah mawpi khankho ah hang kai ba ciah Bawipa ah kiak ci. ¹¹ Hnicim chang am m’c"mhnah nak m’shumphyuk gui ci cun phi, acun ah Bawipa ah kiak ci. Ani naw am shah cu ang düihpüi gui ah, am shah cu profet gui ah, am shah cu thu shäõ ci gui ah, am shah cu pastor gui ah, am shah cu saza gui ah, m’düih gui ci. ¹² Cun ah abi cu Bawi Khrit ah pumsa cawh kyan vai ah, Khanpughi ah chang khli naw, krihta khuut bi vai ah, pawng m’hteim ge vai hmawk ah kaik ci. ¹³ Cun ah kia sei Khanpughi ah Htapa mi hmuhmat nak ung, mi zum nak tumat ah a kiak nak awn, mi van cu atäng ah mi kyumsawm khai nei. Mik mi cu Bawi Khrit ah küm ciah khüt nak ah mäih ah, ang htei ah a hlüng nak ah, cüivai lulaang ciah mi kia lawk khai nei. ¹⁴ Mik mi cu ak hmawhta ah kä mi kia ba ci, cun ah kia sei, ami mät ah m’lung hnga tüidawng düt awn, chang gui lam hma khai ah lam shüm ne thuvi theileh ci gui ah, m’theithang nak khokhni naw kä ning zon shüi shüi en gui sä. ¹⁵ Mik mi cu m’hni nak ah m’lung htek ung, thu thuuk mi pyein nak awn, chunglu ah kiak ciah Bawi Khrit ung ng’phaa vai ah, amawng alam avan ung mi hlüngtai tuk khai nei. ¹⁶ Bawipa ah kut shum nak ah kaa ung a phäh phäh ah om ci gui ah pumsa ung ming bäng bäng ci gui cu a mi van kyumsawm zawp ci gui, pumsa tumat ung ng’gui ng’phaa zawp ci gui. Cun ah kia sei pumsa ung ming phäh phäh ci gui naw ami mät ah bi phäh phäh ami bi law ung, pumsa avan cu, m’hni nak awn däm ng’ghaw sak ci gui. ¹⁷ Cun ah kia sei nang mi cu kä zum ci gui ah mäih ah, kä nami om ih ngaih tüh ba lä vai ah Bawipa ming ung ka ning khän gui ci nei. ¹⁸ Kä zum ci gui ah m’lung ngaih cu hnüp khui ah kiak ci. Ngahmi cu lulang nak maih ne cüivai nak kä om sei, ami m’lung ling ne, Khanpughi ah peit ah ghin nak awn api ah phi käng phaa ci. ¹⁹ Ngahmi cu lü ng’aa nak api phi kä om ba sei, ami m’hni hni ah m’gu plet sheka u ne, shungshet nak kä om sei, shemshai ci gui. ²⁰ Nangmi naw nami ng’theithang ah Bawi Khrit ah mawng cu cun ah kä kiak ci nei. ²¹ Bawipa ah mawng cu akcang ah nami ng’za pyi ci nei. A hnu läk ciah ak chang gui nangmi naw Bawi Jesuh ung Thu thuuk ah mawng cu nami theithang pyi ci nei. ²² Cun ah kia sei ghin cu om düt ah ghin nak man, ak phyim cu lim ne nawng shüt vä. Mät ah ng’zak hlü hlimtui nak awn didap thei ciah, ghin nak phyim cu hnu nah vä. ²³ Nami m’lung la nami ngaih avan cu ak thai ah nami ng’pian sak vainei. ²⁴ Nangmi cu chang thai ah nami kiak vai nei, cun cu Khanpughi naw a müi ah a tüisho la ghin nak akcang ah ang dang sak ah düngdau ci la theingcim ciah kiak ci nei. ²⁵ Cun ah kia sei kä nami hleeihlak-en ba vai, mik mi cu Bawi Khrit ah pumsa ung atäng ah mi lukyum zawp ci kia sei, zum ciah chang gui tumat la tumat düng ciah thu bäng nami pyein vai nei. ²⁶ Nami m’lung a shet law ah a kiak ung phi, nami m’lung she nak cu cheishoh nak ung kä gawk en sä, nami m’lung she nak cu hni naw kä luh-en püi sä. ²⁷ Khoshe-am akhin kä nami peit-en vai nei. ²⁸ M’gu man ciah chang phi käm gu-en ba ne, khüighaat ne hnüntho ne, amät ah hnun m’ghin ne, pyamtham ci phi am hteihtang tu hning vai ah tha na sä. ²⁹ Thu she shaikaa api phi nami shai ung kä lut-en law sä, m’gein nak ah thu bäng lut law sä. Ng’awi gi nak, thamah nak la m’shümthein nak ah thu bäng nami pyein vai nei, cun ung vah ngai zak ci gui ah chang ah phäh ah ni kiom nak om khai. ³⁰ Khanpughi ah Mumcha Theing cu kä nami m’thüi-en vai;a i ah kia sei ci ung Mumcha Theing cu Khanpughi naw nangmi a ning khäm gui ah mawng m’hnüt nak ah kiak ci, ak hnu bäih ah Hnüüp ung nangmi aning phiawn nak gui vai ah, a kyän ah phi kiak ci. ³¹ Thüisei nak, ngetngawng nak, m’lungshe nak gui cu nawng ge vä. Käng li ng’lai kä ng’plah ng’taang ba vä, käm thüikhang kä ng’gen hteet ba vä. ³² Tumat la tumat hnip hnoi ne ng’awi gi tu vä, Khanpughi naw Bawi Khrit ung a ning m’geinsei gui ah mäih ah tumat la tumat m’geinsei tu vä.

¹ Nangmi cu Khanpughi ah hta nau gui ah nami kiak ci, ani ah mäih ah om vai ah nami tha nak vai. ² Bawi Khrit naw mik mi cu nam hni gui ne, Khanpughi ah zumhni ah ng’ui ciah m’küi khän nak la peit nak ah a hnun gui cu a peit ah mäih ah nami ghin nak cu m’hni nak naw ning kut shum gui sä. ³ Nangmi cu Khanpughi ah chang ah nami kiak ci kia sei, pletbeng nak, shetkat nak a hlü hlü la ng’zak hlü aih nak gui ah mawng cu, a pyein pang ah phi kä nami pyein vai nei. ⁴ Ng’li ng’pyaan nak, ng’plahtaang nak, shaila lalei nak ah ng’thu phung kä nami pyein vai nei. Cun ah mäih ah thu nak vai sü ung Khanpughi bäng nami m’kümto vai nei. ⁵ Pletbeng ci gui, shekhak ci gui, ng’zak hlü aih nak om ciah chang gui phung cu, Khanpughi la Bawi Khrit ah uk nak kho ung chang ah kä kia tuk khai gui ci cu akcang ah nami hmat ci nei. (Ng’zak hlü aih nak cu agup khawihnah nak ah kiak ci nei). ⁶ Kä ng’laang ciah ng’thu awn a u naw nang mi cu kä ning k’phiui hnawk-en gui sä, cun ah mäih gui ah hmawk ah, thu kä läk ci gui ah khan ah Khanpughi ah m’lungshe nak om khai nei. ⁷ Cun ah kia sei cun ah mäih chang gui awn api ah phi kä nami ng’ce ng’cäk en vai. ⁸ Nangmi nami mät cun phi hmüp khui ung nami om te ci, cun ung phi Bawipa ah chang ah nami kyak awn ah, nangmi cu akdei ung nami om ci. Cun ah kia sei akdei ung om ciah chang ah mäih ah nami om vai. ⁹ Akdei naw nikiom nak a hlühlü, kümbe htingling nak la düngdau nak gui cu dang sak ci. ¹⁰ Bawipa ah a zei kiai nak cu nami theithang vai nei. ¹¹ Hnüp khui ung om ciah chang gui ah bi, kä ak ni gui cu, kä nami bi en tu vai, cun gui cu nami dang sak vai nei. ¹² (Chang gui naw m’zih m’thuh ne ami bilawh gui cu, pyein tu vai ah phi lü ng’aa vai kiak ci nei). ¹³ Akdei ung dangsak ah a mawng ama phung cu ang zung a pyaa ng’laat ne dang ci nei. ¹⁴ Cun ah dang law ci phung phung cu akdei ah kia lawk ci nei. Cun ah kia sei cacim theing ung; “Ip ci gui let law vä, Sih nak ung kaa tho law vä, Nami khan ah Bawi Khrit ng’shü lawk khai nei”. ciah om ci. ¹⁵ Cun ah kia sei nami ghin nak cu nami geing nak vai nei, chang gu k’aang ah mäih ah kä om u ne, chang lunglaang ah mäih ah nami om vai nei. ¹⁶ Tuhchü cu shekak ciah a khin ah kiak ci, cun ah kia sei, nami gah ah akhin k’ni phung cu, ak ni pi ah nami mang vai nei. ¹⁷ Cun ah kia sei ak gu k’aang ah kä nami om men vai, Bawipa naw nami bi vai ang zak hlü cu k’tha nah ne nami shui vai nei. ¹⁸ Ning m’gämce sak gui khai ah zu cu kä nami awktat vai, Mumcha awn nami kümbe vai nei. ¹⁹ Tumat la tumat nami thu ng’htau nak ung hlim ciah ng’äi gui, m’hlüngtai nak ng’äi gui, theingcim ciah ng’äi gui awn nami thu ng’htau vai nei: nami m’lung kyong ah Bawipa cu m’hlüngtai ne, hlim ciah ng’äi gui la m’hlüngtai nak ng’äi gui cu nami m’cu vai nei. ²⁰ Mi Bawipa Jesuh Khrit ah ming awn, amawng ama avan ung, Pa Khanpughi cu nami m’küito vai nei. ²¹ Bawi Khrit nami chang m’sui nak ah tumat la tumat nami ng’nei ng’aan vai nei. ²² Hnumi gui, Bawipa nami kyih aa ah mäih ah nami cei cu nami kyih aa vai nei. ²³ Krihtabum ah khan ah Bawi Khrit ah huham a om ah mäih ah ak chu ah khan ah a cei ah huham om ci nei. Bawi Khrit cu amät ah pumsa ah kiak ciah Krihtabum ah Hunbawipa ah kiak ci. ²⁴ Cun ah kia sei krihtabum naw Bawi Khrit ah kutshum nak a dou ah mäih ah hnumi gui naw phi nami cei ah kutshum nak cu ak be ah nami dou vai nei. ²⁵ Pami gui, Bawi Khrit naw a hnun gui pe ne krihtabum cu am hni ah mäih ah, nami chu cu nami m’hni vai nei. ²⁶ Bawipa naw a hnun gui a peit nak cu, krithtabum theing sak ne, ang thu awn Khanpughi am ap sei; ²⁷ Krihtabum naw ani ung ang ap law ba ung, ak kiom züm züm ah, alelawi, ak shekha kä om sei akümbe athangpai vai ah hmawk ah kiak ci. ²⁸ Pami gui naw ami chu cu ami mät ah pumsa ami m’hni ah mäih ah ami m’hni vai. Ak chu m’hni ciah chang cu a mät naw amät phi m’hni ciah kiak ci. ²⁹ (A u chang naw phi amät ah pumsa cu kä gen ci, tu m’bei ne m’hteihtang ci, Bawi Khrit naw krihtabum am hteihtang ah mäih ah kiak ci; ³⁰ mik mi cu apumsa ah ang phyeekpaai gui ah mi kiak ci). ³¹ Cacim theing ung a pyein ah mäih ah, “Pami cu anu la apa nawng shüt ne, ak chu awn ng’puikhap ni sei, ngahni hnih cu tumat ah kia lawk khai goi nei,” ci cu bä ci. ³² Shin cu ang htei ah thuuk ne ng’kau ciah thuciim ah kia sei, Bawi Khrit la krihtabum ah hmawk ah kiak ci, ciah ka pyein ci. ³³ Cun ung phi nangmi tumat ci ah hmawk ah phi kiak ci;a cei phung naw ak chu cu amät awn m’täng ne am hni vai, ak chu phung naw phi a cei cu ak chang m’sui vai.

¹ Hta hmaw gui, nami nupa ah thu cu nami läk vai, cun cu khrihta gui ah bi vai ah kiak ci. ² “Na nu la na pa cu nak chang m’sui vai, Cun ung nang cu bämang ne khoding ung ak shou na ghing khai,” ciah cacim ung om ci, cun cu shaitaak nak ah ak htük bäih ah thukhän ah kiak ci. ⁴ Nupa gui, nami hta hmaw gui cu ami m’lung thüi khai ah kä nami bi en vai. Cun ung phi Khanpughi ah ng’zak hlü ah khrihta hläkhäm nak awn nami m’shümthein vai. ⁵ Changshäm gui, Bawi Khrit ah khuut nami bi ah mäih ah kyih-aa ne, khüighaat ne nami chang bawi ah thu cu nami läk vai. ⁶ Nami bawi gui naw ami ning zum gui vai ah, ami ma bäng ah ami thu nami läk ciah kä kia ne, Bawi Khrit ah changshäm ah nami kiak ciah kia sei, Khanpughi ah ang zak hlü ah nami m’lung ngaih avan nawn nami hnün thawh vai nei. ⁷ Chang ah changshäm ah mäih ah kä kiak ciah Bawipa ah khuut bi ah mäih ah zeikiai ne nami bilawh vai nei. ⁸ Nami shüm vai cu, changshäm ah a kiak ung phi, ng’päi om chang ah a kiak ung phi, ak ni bik ciah chang phung cu Bawipa naw m’cümhnah nak pek khai nei. ⁹ Bawi mang gui, nangmi naw phi nami changshäm cu a cun ah mäih ah nami om püi vai nei. Nami m’kyihkyawk nak gui cu nami m’düm vai nei. Nangmi la nami chang shäm gui cu, khankho ah Bawipa tumat bäng naw ning khäm gui ne, zodäm pyammang käm hnga ne atäng ah m’khoi chaa nak bik ci ci cu nami shüm vai nei. ¹⁰ Ak hnu bäih ah ka ning m’cäi gui cu, Bawipa ung kawngät nak la küikyang ciah a hlüngtai nak ung thamah ne khüighaat vä. ¹¹ Khoshe ah thuvi tüihtok nak näng m’khüt nak vai ah, Khanpughi ah ning peik gui ah likhim k’be cu nami awi k’bah vai nei. ¹² Mik mi cu hnicim cang awn ng’tuk mi bik ciah kä kiak ci, khankho ah om ciah mumcha she gui la shin ah kho hmüp nak kho ung, uk ci gui, huham mah gui, la hlüngtai nak om ci gui awn ng’küükneet ne ng’tuk mi bik ciah kiak ci. ¹³ Cun ah kia sei Khanpughi ah likhim k’be cu nami awi k’bah vai nei! cun ung vah shekat geinvai nak ah hnüüp a gawk law ung, gaa ah tuk nak cu nami näng hlawt khai nei. Ng’tuk lu küm sei nami ng’tuk kawn ah nangmi cu nami kho ng’lei ung khüi ne nami ng’düi lawk khai nei. ¹⁴ Cun ah kia sei khüi ne nami ng’düih ge vai nei, thu thuuk ah kiak ciah m’ciu vawp u ne, düngdau nak ah kiak ciah saphaw k’bah u ne, ¹⁵ dimdeih nak ah Thu Ni shäu nak ah kiak ciah phahnak cu nami ng’cum vai nei. ¹⁶ Zum htek nak ah kiak ciah shawiphaw cu ang täi sei nami kawh vai nei, cun ung khoshe naw a shunkah law ah mei ah däi ciah li k’htei cu nami m’diim hlawt khai nei. ¹⁷ Hun nak ah kiak ciah m’si lukhu cu kutshum ne, Mumcha ah m’shumphyuk ah Khanpughi ah ng’Thu ah kiak ciah khimgan cu nami kawh vai nei. ¹⁸ Khanpughi ah m’hteihtang nak gah vai ah ng’zoi thäh ne, taigü nak awn shin gui cu nami bi vai nei. Mumcha ah lam shüm ah mäih ah amawng ama avan ung nami taigü vai nei. Cun ah kia sei nami cimgang cüivai vai, kä nami pyai phung vai, Khanpughi ah chang gui ah hmawk ah ang täi sei nami taigü vai nei. ¹⁹ Kei thu ka pyein zah ung Khanpughi naw thu m’gawng thei nak ana peit vai ah nami na taigü peit vai nei. Cun ung kei naw Thu Ni ah a thuuk nak ah mawng cu dang ne ng’hmat khai ah ka pyein thei khai nei. ²⁰ Kei cu thawng ka cum pang ung phi, shin ah Thu Ni ah hmawk ah ng’shä ah ka kiak ci nei. Shin ah Thu Ni ka pyein khai ah kang düi ci kia sei, khüighaat ne ka shäu vai ah nami na taigü peik vai nei. ²¹ Tichikus, mi m’hni bekhüt ciah mi nau, Bawipa ah khuut bik ciah changshäm naw, kei ah mawng avan cu ning m’thein gui khai nei. Cun nung kei a i ah kia ne ka om cu nami hmat khai nei. ²² Cun ah kia sei ani nang mi ah om nak ah ka tüih law cu, keimi ah mawng a ning m’thein gui vai la k’tha mah nak a ning peit gui vai ah hmawk ah kiak ci. ²³ Pa Khanpughi la Bawipa Jesuh Khrit naw khrihta phäi nau nami van am, dimdeeih nak, la zum nak awn m’hni nak cu ning pe gui sä. ²⁴ Kä si hlawt ciah m’hni nak awn mi Bawipa Khrit m’hni ciah chang gui ah khan ah Khanpughi ah m’geinsei nak cu kümbe ne om sä.