KOLOSE

KOLOSE

¹ Paul, Khanpughi ah ang zak hlü ah Bawi Khrit naw ang düihpüi la mi nau Timothi naw - ² Bawi Khrit ung kawng ät nak awn bekhüt ci ah phäi nau ah kiak ciah Kolose gawnu ah Khanpughi ah chang gui-am, ca ami guk law nei. Mipa Khanpughi naw am gein nak la dimdeeih nak cu ning m’shum phyuk gui sä. ³ Nangmi ah hmawk ah kami taigü päng ung mi Bawipa Jesuh Khrit ah Pa Khanpughi cu kami m’hlüngtai ci nei, ⁴ Bawi Khrit ung nami zum nak ah mawng la Khanpughi ah chang avan nami m’hni nak ah mawng cu, kami ng’zak ci nei. ⁵ Thudüng, thuni a gawk law htük zah ung ng’shut lawk ciah ngaih u nak cu nami ng’za pyi ci nei. Cun ah kia sei nami zum nak la nami m’hni nak cu khankho ah gim ah ngaih u nak ung ng’zung ci nei. ⁶ Thu Ni naw phyutheh nak cu law püi sei, khomdek khan avan ung gawk ci nei. Acun ah mäih ah nangmi ung akhtük ah mäih ah gawk ciah Khanpughi ah m’gein nak cu ng’za u ne, ani ah mawng akcang cu nami hmat law ah kiak ci. ⁷ Nangmi naw Khanpughi ah am gein nak cu Epaphras ah nami ng’thei ci. Ani cu mi changshäm, mik mi ah hmawk ah bekhüt ciah Bawi Khrit ah khuut bik ciah kiak ci. ⁸ Ani naw ana pyein nak gui ah m’hni nak cu, Mumcha naw ning pe gui pyi ci nei. ⁹ Shin ah mawng ung nangmi ah mawng kami ng’zak phung ung, nangmi ah hmawk ah kami taigü ci nei. Khanpughi naw ang zak hlü ah mäih ah Mumcha naw a peit ah kiak ciah, hmuhmat nak, cüivai nak la lunglang nak gui awn a ning be sak gui vai ah, kami k’thäh ci nei. ¹⁰ Cun ah kia sei, nangmi cu Bawipa ah ng’zak hlü ah ghing u ne, ani ah zei nak vai ah nami bilo khai nei. Nami ghin nak naw ni kiom nak bäng bäng cu dang sak sei Khanpughi ung nami hmuhmat nak cu, ng’ghotai khai nei. ¹¹ Amät ah bämang hlüngtai nak ung kaa lawk ciah khüighaat nak naw ning k’thamah sak gui sä, cun ung apäng avan cu hniimgei nak awn nami näng khai nei. Zeikiai nak awn Pa Khanpughi cu m’hlüngtai vai, ani naw akdei ah uknak kho ah, chang ah hmawk nak cu nangmi naw ng’müi ne nami chaw nak tu vai ah ning piang gui ci nei. ¹³ Ani naw mühmüp ah huham ung kaa, na k’plawk gui ne, Ahtapa ah uknak kho ung phiawng ne gawk vai ah na hteh püi gui ci nei. ¹⁴ Ani ung phiawn nak mi gah ci, cun cu mi cheishoh nak ana m’gein gui ah kiak ci. ¹⁵ Bawi Khrit cu kä hmuh thei ah Khanpughi ah, hmuh thei vai ah a müi ah kiak ci. Ani cu atüisho avan ah hlüngtai pi ciah, ng’tüi htük ciah Htapa ah kiak ci. ¹⁶ Ani awn Khanpughi naw, khankho la khomdek ung om ciah ang tüi avan, hmuh thei la kä hmuh thei, mumcha hlüngtai nak gui, bawi gui, uknak gui la huhamah gui cu, tüisho ci. Khanpughi naw, khophlüt avan cu ani awn, ani ah hmawk ah tüisho ci. ¹⁷ Angtüi avan kä a om pha ung Bawi Khrit cu om pyi ci. Ani ung kawng ät nak awn ang tüi avan cu ami om nak vai om sek sek ci. ¹⁸ Ani cu apumsa ah kiak ciah Khrihtabum ah lukhu ah kiak ci. Ani cu pumsa ah ghin nak ah ang zung ah kiak ci. Ani cu sih nak ung kaa tho ba ciah ng’tüi htük ciah Htapa ah kiak ci, ani bäng cu avan ung a om nak htük vai hmun om ci. ¹⁹ Cun cu amät Khanpughi ah m’hnütbäi ah kia sei, amät Khanpughi ah kümbe ciah a müi cu Ahtapa ung om ci. ²⁰ Ahtapa awn khophlüt avan cu amät ung gawk law ba sak zawp khai ah Khanpughi naw k’bäi ci. Khanpughi naw Ahtapa kutlamtung ung ap ne asih nak awn dimdeeih nak bi ne khomdek la khankho ung om ci avan cu amät ah ng’khäm ba sak ci. ²¹ Azan nangmi cu Khanpughi awn ng’shawng u ne akshe nami bilawh nak la nami ngaih tüh nak awn aga ah nami kia te ci. ²² Cun ung phi Ahtapa pumsa awn asih nak awn Khanpughi naw a teihpüi ah ning piang gui ci, amät ma ah theingciim nak la kümbe nak awn ning hteh püi gui ci. ²³ Nangmi cu bekhüt khenggeng ne, khüi khai ah ng’leh u ne, Thu Ni nami ng’zak zah ung nami ngaih u nak cu nami mät naw kä nami thüngphyong sak-en vai. Kei Paul cu shin ah Thu Ni awn changshäm ah ka kiak ci. shin ah Thu Ni cu m’dek ah khan ah chang päng ung gawk khai ah shäu ne pyein ah kiak ci. ²⁴ Tuhbäi nangmi ah hmawk ah ka zaica ah hmawk ah ka zei ci nei. Bawi Khrit naw apumsa ah kiak ciah Khrithabum ah hmawk ah azaica ah mäih ah a gawk güt ung ka pumsa zaica nak awn ka ning m’htei gui khai nei. ²⁵ Khanpughi naw kei cu khrithabum ah changshäm ah na piang pyi ci nei, cun cu nangmi ah ni kiom nak vai ah kei-am ana peit ah kiak ci. Cun cu Thu Ni kümbe khai ah shäu ne pyein nak vai ah kiak ci. ²⁶ Cun ah Thu Ni cu hta ng’shon ung chang avan ung ng’zih te ciah kiak ci, cun ung phi tuhbäi ak chang gui-am phawn ne m’dang gui ci. ²⁷ Khanpughi ah ng’bü nak cu, ng’zih ci cu ak chang gui-am hmat sak gui vai ah kiak ci. Cun ah ng’zih ciah bä nak la mang nak cu, ak chang gui ah hmawk ah kiak ci. Cun ah ng’zih ci cu, Bawi Khrit nangmi ung om ci, ciah kia ne, amawng cu nangmi naw Khanpughi ah bämang nak nami ng’pai tuk khai, ciah kiak ci. ²⁸ Cun ah kiak sei Bawi Khrit ah mawng cu chang nüng-am kami m’thein ci. Bä ciah cüivai nak awn kami m’cäi nak la kami m’thei nak cu, Bawi Khrit ung kawng ät nak awn ak chang sing theek-hai ne, Khanpughi ah ma ah ami gawk law vai ah kiak ci. ²⁹ Shin pyi phleh nak vai ah Bawi Khrit naw anam khüt nak la ka m’lung kyong ung a hnün thawh nak awn, küikyang ciah thagui cu mang ne, k’tha na k’cang ne, ng’khüi ne ka bik ci nei.

¹ Nangmi ah hmawk, laodica chang gui ah hmawk la kei ka changsing kä na hmat ciah chang gui ah hmawk ah, kei naw a i hlawk ah k’tha na ne kabi cu ka ning m’thein gui ci nei. ² Kei naw shin ka bi cu, ngami ami k’tha abe nak vai la m’hni nak ung ami m’lung ngaih a ät nak vai ah kiak ci. Cun ah kia sei ngami cu akcang ah lunglang nak law püi ciah bümbe ciah ngaih gep nak cu gah ci gui. Ashin ah lam awn ngami naw Khanpughi naw am zih ah Bawi Khrit amät cu hmat ci gui. ³ Ani cu thup ne m’küm ah Khanpughi ah cüivai nak la lunglang nak avan k’hmawn nak ah kiak ci. ⁴ Kei naw ka ning m’thein gui cu hleei pyein ne a u naw a i kä ning ng’cuh-en püi gui sä. Ngami naw a i hlawk ah nik ciah ami pyein ung phi kä nik khai nei. ⁵ Ka pumsa awn atäng ah kä mi om pang ung phi, ka Mumcha awn atäng ah ka ning om püi gui ci nei. Bawi Khrit ung nami zum nak awn ng’düi ghawm u ne, khäng ne nami htek cu ning hmu gui ne ka zei ci nei. ⁶ Khrit Jesuh cu Bawipa nei, ci ne nami dou ah a kiak ung ani awn kawng ät ne nami ghin vai. ⁷ Ani ung ak thuuk ah nami ng’zung vai. Ani ung nami ghin nak nami m’shün vai. Ning m’theithang gui ah mäih ah nami zum nak cu a khüighaat law pi vai. Cun kawn ah m’hlüngtai nak awn nami be vai. ⁸ Geing na vä, Bawi Khrit ung kaa ah kä kiak ci, khophlüt sei uk ciah Mumcha gui la, chang naw dou ne am theithang nak ung lawk ciah chang läma, gui ah cüivai nak awn, a u chang naw phi kä ning khlei-htein-en nah gui sä. ⁹ Khanpughi ah ang zung amawng akümbe nak cu, Bawi Khrit ung om ne dang ci nei. ¹⁰ Mumcha uknak la huhamah nak avan cu uk ciah acun ah Bawi ung nami om nak awn nangmi cu kümbe nak nami gah ci. ¹¹ Bawi Khrit ung nami kawng ät nak awn nangmi cu kyoon hnah pyi ah nami kiak ci, cun cu chang ah kyoon ah kä kiak ci. Bawi Khrit ah kyoon ah kiak ci. Cun cu cheishoh nak ah, hlüngtai nak ung kaa phiawn nak ah phi kia tuk ci. ¹² Tui nami ng’hniim cu Bawi Khrit awn nami ng’ciim nak ah kiak ci. Tui nami ng’hniim nak ung Bawi Khrit awn nami tho ba ciah kiak ci. Cun cu ani sih nak ung kaa thawh ba sak ciah Khanpughi ah tholet ciah hlüngtai nak nami zum nak awn ah kiak ci. ¹³ Nangmi cu azan, thukhän kä om ciah chang khui hei la cheishoh ciah chang ah nami kiak nak awn nami mumcha cu si te ci. Cun ung phi tuhbäi Khanpughi naw nangmi cu Bawi Khrit awn nami ghing khai ah ning khü ba gui ci nei. Khanpughi naw mi kat nak gui avan cu, nam gein gui pyi ci nei. ¹⁴ Ani naw, thüilü nak vai ah ng’taang ciah mi puu gui cu, am küm nak ah kutlamtung ung asih nak awn thung pyi ci. ¹⁵ Acun ah kutlamtung khan ah Bawi Khrit naw amät cu, Mumcha uknak ah hlüngtai nak la huham nak gui ung kaa phiawn sak ci. ¹⁶ Cun ah kia sei, ei awk nak ah mawng, hnüüp theing ah mawng, chaa lum la kyin nak ah mawng gui pyein ne, a u -am phi thukhän kä bi-en sak vä. ¹⁷ Cun gui avan cu ngawi ah kaa vai ah apüpüüi gui düt ah kiak ci. Cun ung phi akcang cu Bawi Khrit ah kiak ci. ¹⁸ Khankho chang khawihnah u ne, chang k’ni ah ng’hlawk u ne, ami mik hmuh ah phäh ah aktung ah hlüngtai ciah ng’shei ci gui ah, m’kat nak cu kä nami zuun en vai nei. Amawng hei kä om ci, chang tumat cu khomdek chang ah mawng lam ang ngaih tüh nak awn, am lung kyong cu mei ah khu zawp ci. ¹⁹ Pumsa ah lukhu ah kiak ciah Bawi Khrit akpan cu, chah ne ng’hlah tak ciah kiak ci. Bawi Khrit ah kut shum nak ah kyong ung pumsa cu ng’ghotai ne, thagui khingthang awn ng’khihkaih kawng ät zawp ci:Cun cu Khanpughi naw adäm ng’gho vai ang zak hlü ah mäih ah däm ng’gho lawk ci. ²⁰ Nangmi cu Bawi Khrit ung nami sih nak awn kho ak kaa ah om ciah mumchaa ah uknak ung kaa nami phiawng pyi ci nei. A i ah kia sei khomdek khan cu khäm ne nami om ba hlü ang? A i ah kia sei, ²¹ “Shin kä pan vai, cän kä nüm vai, shin kä tawn vai” ciah thukhän gui cu nami läk ba hlü ang? ²² Azan nami mang man te gui cu tuhbäi mang ba vai ah kä kia ba ci nei. Cun gui cu chang ah pian ah thukhän la m’theithang nak gui ah kiak ci. ²³ Akcang ah pyein ung cun gui cu, khankho chang düt nami khawihnah nak ah cüivai nak ung ng’zung ne dang lawk ciah kiak ci. Chang ah ng’zak hlü ah thuvi nak, pumsa ah m’hni kümbe sak nak, gui ah kiak ci. Cun ung phi cun gui naw, pumsa mawngma ami kut shum nak ung akcang ah aphuma kä dang ci.

¹ Nangmi cu Bawi Khrit awn nami ghing khai ah nami tho pyi ci, Cun ah kia sei, nami m’lung cu khankho ding ung nami ng’lin vai. Cun ah kho cu Bawi Khrit naw a ghui mang kiang ung a ngoh nak ah Khanpughi ah k’patlam ah kiak ci. ² Khankho ding ung nami m’lung cu nami ng’müi sak vai, khomdek ng’lei ung kä nami ng’müi sak vai. ³ Nangmi nami sih ung nami hnun gui cu Bawi Khrit awn Khanpughi ung ng’thup ciah kiak ci. ⁴ Akcang ah nami ghin nak cu Bawi Khrit ah kiak ci nei, ani ang dang law ba ung ani awn atäng ah nami dang tu ba khai, abäkhäk nak phi nami gah tuk khai. ⁵ Nangmi naw sihnak ung nami ap vai cu, nami m’lung kyong ung bi bik ciah khomdek khan ng’zak hlü nak gui ah kiak ciah, ng’zawng’pawm nak, om shet nak, htukhtik nak, cheishoh nak, humhlam nak (Humhlam nak cu a gup khawihnah nak ah kiak ci). ⁶ A shin ah a mawng gui awn Khanpughi ah m’lung she nak cu, thukhän ng’zak ciah chang gui ah khan ah gawk lawk khai. ⁷ Azan nangmi cu ashin ah ng’zak hlü gui awn nami ghing om man ci. Cun zah ung nami ghin nak cu acun gui naw ning shum gui ci. ⁸ Tuhbäi nangmi naw m’lungshe nak, beishet nak la thüigen nak ah amawng gui cu avan nami phiawn nak vai. Ashekha la amsheshai cu nami m’gawng m’lei ung kä lut-en law sä. ⁹ Tumat naw tumat kä am hleeihlak-en vai, nami ghin nak k’phyim cu sut ne nawng shüt ne, ¹⁰ ghin nak akthai awn nami ng’thoon vai. cun cu akthai ah ghin nak la, tüisho ciah Khanpughi naw, kümbe ciah amät ah lunglang nak ning m’shum phyuk gui ne a mät ah müi bä bä ah aning pian ba thai gui ah kiak ci. ¹¹ Ak hnu ah chang khui hei la Jew chang, kyon la kä kyon, ngetngawng ci la m’ghämce ci, changshäm la ng’päize chang ciah khoikhei nak la ng’lakmah nak kä om ba ci, Bawi Khrit cu avan ah kia ne Bawi Khrit cu avan ung om ci. ¹² Nangmi cu Khanpughi ah chang ah nami kiak ci, Khanpughi naw ning m’hni gui ne amät ah chang ah ning ghü gui ci. Cun ah kia sei nami ng’thon nak vai cu m’hteihtang nak, chimgein nak, mät hnga ngaih nak, hniphnoi nak la hniimgei nak ah kiak ci. ¹³ Tumat mat awn nami ng’cuh vai a om law ah a kiak ung phi tumat la tumat nami ng’cang nak tu vai, tumat la tumat nami ng’gein tu vai, Bawipa naw a ning m’gein gui ah mäih ah tumat la tumat nami ng’gein tu vai. ¹⁴ Shin ah ang baan gui avan cu m’hni nak ung phung ci, cun ah m’hni nak naw avan shum ne kümbe kawng ät sak ci. ¹⁵ Bawi Khrit ah ning peit gui ah ding gei nak cu, nami ng’ki ng’phian nak ung a ning m’shumhlawi nak gui ah kiak ci. Cun ah ding gei nak cu kawng ät ne pumsa tumat ah nami kiak vai ah Khanpughi naw aning khü nak gui ah kiak ci. Cun ah kia sei nami m’hlüngtai lä vai nei. ¹⁶ Apäng ah bämang pi k’bäih ciah Bawi Khrit ah ng’thu cu nami m’lung kyong ung khäng ne om sä. Cüivai lunglang nak avan nawn tumat naw tumat cu m’theithang m’cäi ä sei om vä. Nik ciah ng’äi gui, hlim ciah ng’äi gui, theing ciah ng’äi gui m’cu ne, nami m’lung kyong kui ne, Khanpughi cu m’hlüngtai vä. ¹⁷ Nami bi nüng nami ng’thu nüng cu Bawipa Jesuh ah ming awn nami bi vai, Cun cu ani ah ming awn Pa Khanpughi nami m’hlüngtai ah kia ci. ¹⁸ Hnumi gui aw, nami cei ah ng’thu nami ngaih vai nei, cun cu khritha ah nami kiak nak awn nami bi vai ah kiak ci, ¹⁹ Pami guiaw, nami chu nami m’hni vai, kä nami shedam nak vai, ²⁰ Hta hmaw gui aw, nami nupa ah ng’thu nami ngaih vai, cun cu khritha ah nami kiak nak awn nami bi vai ah kiak ci. Cun cu Khanpughi naw a zei nak ah kiak ci. ²¹ Nupa gui nami hta gui cu, ami m’lung thüi ne, ami k’tha maih khai ah kä nami om püi-en gui vai. ²² Changshäm gui aw, hnicim chang nami bawi cu, apäng avan ung nami ngaih vai nei, aning täk gui la aning m’cäi gui ah nami kiak bäng ah kä kia sei, Bawipa nami kyih aa nak awn m’lung theing awn nami hnünthawh peit vai. ²³ Nami bi phung phung cu chang ah bi bi ah mäih ah kä kiak ciah Bawipa ah bi bi ah mäih ah nami m’lung kyong avan awn nami bi vai. ²⁴ Nami shüm vai cu Bawipa naw akchang gui-am a gim peit gui ah m’cümhnah nak cu nangmi -am ning pe gui khai nei, ciah kiak ci. Akhuut nami bi peit ah Bawipa akcang cu Bawi Khrit ah kiak ci nei. ²⁵ Shetkat nak bik ciah chang phung naw, amät ah bi cu k’chaw nak khai nei. A i ah kia sei ci ung Khanpughi naw akchang sing cu amät ah bi phäh phäh awn m’khoichak ci nei.

¹ Bawi gui aw, nami changshäm gui cu nami täkphan nak ung hmai kiang nak la düng nak om sä. Nami mät phi khankho ah nami Bawi a om cu nami shüm ba vai nei. ² Taigü nak ung kä nami m’lung-k’si en vai. Lunglang nak awn taigü ne Khanpughi cu nami m’hlüngtai vai. ³ Keimi ah hmawk ah phi nami taigü vai. Cun ung Khanpughi naw keimi-am a khin k’ni cu na pe gui sei, keimi naw ng’zih ciah Bawi Khrit ah mawng, ng’Thu Ni cu kami shui khai. A cun ah hmawk ah kei cu tuhbäi chü thawng ung ka kium ci nei. ⁴ Na k’taigü pe vä, cun ung ka pyein vai ah ng’thu phung cu ang hteiing ah ka pyein hning khai nei. ⁵ Kä zum ci gui ah chang gui ah ng’lung ah nami hnünthawh ung nami cüivai lunglang vai nei. Akhin nami gah phung cu akni pi ah nami mang thei vai nei. ⁶ Nami ng’thu pyein phung cu zeikiai nak vai la ngaih hlü vai ah kia sä. Chang nüng ah ng’thu a i chaa ah ng’düng khai ah m’hlan ba thei vai ci cu nami hmat kheng geng vai nei. ⁷ Mi nau Tichikus, bekhüt ciah khuut bi, khüghaat ciah Bawipa ah changshäm naw, kei ah mawng avan cu ning m’thein gui khai nei. ⁸ Ani nang mi ah om nak ah ka tüih law cu, keimi a i hawkcha ah kami om ih ah mawng ning m’thein gui ne, aning thawhlet sak gui vai ah hmawk ah kiak ci nei. ⁹ Ani awn atäng ah bä ne bekhüt ciah mi nau nami chang Onesimus phi law tuk ci nei. Ngami naw, shi ah a i i ah a kiak ah mawng gui cu ning m’thein gui khai gui nei. ¹⁰ Kei awn atäng ah thawng kani kium ciah Aristarchus la Barnabas ah ang nam nau Maku ni naw phi ning zavaih na gui ci gui nei. (Maku cu nangmi ah a law ung nami na dou vai ah ning m’cäi gui pyi ah kiak ci nei.) ¹¹ Justus ami ciah Joshua naw phi ning zavaih na gui ci nei. Acun ah ng’thu gui cu zum ciah Jew chang gui ah kia u ne, Khanpughi ah uknak kho ah hmawk ah kei awn atäng ah bi bi u ne, kei cu aktung ah nam hteihtang ci gui nei. ¹² Bawi Khrit Jesuh ah akchang shäm, nami chang ah kiak ciah Epaphras naw phi ning zavaih na gui ci nei. Khäng sei nami ng’düih vai, kä nami püngheiu vai, be ciah khritha ah nami kiak vai, Khanpughi ah ng’zak hlü küm khai ah ang thu nami ngaih vai ah, ani naw akni ah ning taigü pe gui ci nei. ¹³ Nangmi ah hmawk la Laodicae la Hierapolis ah chang gui ah hmawk ah k’thana ne abi ah mawng cu ng’kheing sei ka ning m’thein gui hning ci nei. ¹⁴ Luka, mi seibawi la Demas naw phi ning zavaih na gui ci nei. ¹⁵ Laodicea kho ah phäi nau gui la Nimpha la ani ah im ah pum ci gui ah khrihtabum gui-am zeikiai nak thu ka ning m’khäh gui ci nei. ¹⁶ Shin ah ca nami phat zawp kawn ah Laodicea khithabum gui-am phi nami phat tu sak gui vai nei. Cun bäng ah kä kiak ciah Laodicea kho ah phäi nau gui naw, ami ning guk law gui ah ca phi nami phat vai om khai nei. ¹⁷ Cun kawn ah “Bawipa ah khuut nami bi cu pyi hlah ne nami bi vai nei” ci ne Archippus-am nami m’thein vai nei. ¹⁸ “Paul ah zavaih nak” ciah shin ah ca cu ka mät ah kut kheng awn ka guk nei. M’si gui awn ami na khih nak cu kä nami m’hnih-en vai nei. Khanpughi ah m’gein nak cu nami khan ah om sä, Amen.