LAMKTU

LAMKTU

¹ Theophilus aw: Ka guk htük ah cauk cu Bawipa Jesuh naw bi abi law nak ung leng neh, ² Khankhaw ah akai ba ung khüt ciah kia ci. Cun ah kä ah kai pha ung a ghü gui ah ang düihpüi gui cu Mumcha Theing awn lam shüm gui shüt ci. ³ Ani cu asih kawn ah hnüp phlikip ah kyawng ung ang düihpüi gui ah ma ah akda vei ng’dang ba neh a ghin ba ah mawng cu ak cang ah m’dang shüt ci. Ang düihpüi gui naw ani cu hmuk ci gui, ani naw phi Khanpughi ah uk nak khaw ah mawng cu m’theithang gui ci. ⁴ Ami ng’bum law zah ung Bawipa Jesuh naw, “Jerusalem ung ka kä na mi hteh cang vai, ka ning m’thein gui man ah Pa Khanpughi ah Shaitak cu na mi gin vai. ⁵ Johan naw tui awn hnim nak pek ci, cun ung phi nang mi cu kä sho pha seih Mumcha Theing awn hnim nak na mi gah khai” ci neh m’cäi gui ci. ⁶ Ang düihpüi gui cu ng’bum law u ne tah, “Bawipa, shin ah khin cu Israel chang gui am ami khaw na ap nak ba gui vai ah akhin ah kiah ne ang?” ci ne ng’shik ci gui. ⁷ Bawipa Jesuh naw, “Akhin cu Pa Khanpughi ah m’khüt näng nak bäng ah kiak seih nang mi naw na mi hmat vai ah kä kiak ci. ⁸ Cun ung phi na mi khan ah Mumcha Theing a kyum law ah a kiak ung, nang mi cu hlüng tai nak awn nami be khai. Cun kawn ah nang mi cu Jerusalem, Judea, Samaria lah khaw cawi ah khüt neh kei ah mawng pyein ciah saksi ah nami kiak khai” ci neh kiak na gui ci. ⁹ Cun ah ng’thu a pyän kawn ah ami hmuh ge ah Bawipa Jesuh cu, khan khaw ah kai khätah kho ng’mei naw shung sei kä hmu ba ci gui. ¹⁰ Cun ah a kai kawn ung ang düihpüi gui cu, khankhaw cäi ne dan ci gui. Cun zah ung abauk sui ciah chang gawi ami pei ah ng’dang law ni ne tah, ¹¹ “Kalilee chang gui, a i ah kiak seih khankhaw ng’düi ne nami dan ang? Nang mi ung ka, nami hmuh ge ah khan khaw ah kai ciah Bawipa Jesuh cuh, a cun ah mäih ah kyum law ba khai nei” ci ne pyein ci gawi. ¹² Cun kawn ah ang düihpüi gui cu Olive m’htung ung ka naw, Jerusalem ah hteit ba ci gui. Olives m’htung cu Jerusalem ung kaa naw män m’cawt sho ci. ¹³ Ngah mi cu pigaw ah gawk u ne tah, ami im kai ah im kyawng ah lut ci gui: cun gui cu, Peter, Johan, James, Andru, Philip, Thomas, Bartholome, Matthe, Alfeas ah hta James, Simon ak ling lah James ah hta Judas gui ah kiak ci. ¹⁴ Ngah mi cu Bawipa Jesuh ah anu Mary lah ahei hnu mi gui ni, a naü gui ni, ashäng ashäng atäng ah ng’bum ne k’tai gü ci ci gui. ¹⁵ Kho hnüüp api sho law khä tah, zum ciah chang gui phia lah m’ku cu ng’bum lawk ci gui. ¹⁶ Cun kawn ah Peter cu ng’düi law ne tah, “Phäi näu gui aw, Bawipa Jesuh phak khai gui am, lam shüm gui ciah, Judas Iskariot ah mawng ca ng’cim ung om ci cu küm pyi ci nei. Cun ah ca ng’cim cu Mumcha Theing naw David ah ng’thu awn a pyein ah kiak ci. ¹⁷ Judas cu ang düihpüi tumat ah a ghü tu ah kiah seih mik mi ung ka ah kiak ci. ¹⁸ (Ani cu a shet kat nak awn a gah ah ngui awn, lai tumat cu khleih ne tah, a cun ah lai ung apawi teek ne, ak chi lut law seih kiuh ne sik ci. ¹⁹ Cun ah amanwg cu Jerusalem ah chang gui naw ng’zah u ne tah, cun ah lai cu ami mät ah ng’thu awn “Akeldama” ah sui ci gui, cun cu “Si lon kho” ci ah kiak ci. ²⁰ “Salan ca ng’cim ung, ‘A im cu shiü sä, akyawng khui ah u kä awm ba sä! ‘Ani ah a hnün ung chang ahei naw ng’düi ne bi sä” ciah om ci. ²¹ “Cun ah kia sei Bawipa Jesuh a thawh ba ah mawng mik mi awn atäng ah saksi tuk khai ah chang tumat mi m’düih ba khai. Cun ah chang cu Johan naw tui hnim apeit nak ung tün neh Bawipa Jesuh khankhaw ah akai ba ung khüt khai ah, mik mi awn a täng ah hteit htawn bi lo tuk ciah chang ah kiak khai” ci ci. ²³ Cun kawn ah ngah mi cu chang sing gawi ung ka tumat ghü vai ah k’bäi ci gui. Cun ah chang gawi cu, Barsabbas ami ci (Justus ah phi ami pyein) ah Josef lah Matthias ah kiak ci. ²⁴ Cun kawn ah ngah mi cu, “Bawipa, nang naw chang ah m’lung kyawng avan na hmat ci, Judas cu amät ah ng’zak hlü ah ang’düihpüi ung ka hteit pyi ci. ²⁵ Ani ah hnün ung bik khai ah shin ah chang hnih ung ka, a u na ghü ah nam thein gui ä” ci gui. ²⁶ Cun kawn ah ngah mi ah hmawk ah htung tän neh ng’zuk u ne tah, Matthias cu ghü u neh ang’düihpüi gha-lei-ät awn atäng ah bi tuk khai ah m’düih ci gui.

¹ Pentekos hnüüp ung zum ciah chang gui cu hmun ät ung atäng ah ng’bum ci gui. ² A cun zah ung khankhaw ah ka, khaw khi nu ah mäih ah ng’hmum ciah k’aw cu ami om nak ah kyawng khui ah gawk law ne be ci. ³ Ngami naw mei ah pying cih k’aw cu hmuh ci gui, cun ah pying ne ng’kah ciah mei m’ghi cu tumat ciah khan ah pek ne gawk ci. ⁴ Ngah mi cu Mumcha Theing awn küm be u ne tah, Mumcha Theing ah ng’thu m’sak gui ah ng’thu ahei hei awn ng’thu pyän ci gui. ⁵ Cun zah ung khomdek ah khan, khaw u"ng ah ka lawk ciah zum nak om ci guiah Judah chang gui cu Jerusalem ah om zah ci gui. ⁶ Cun ah k’aw cu ng’zak u ne tah, chang khli gui cu ng’bum lawk ci gui. Ang düipüi gui ah ng’thu pyein cu, chang päng naw ami mät ah ng’thu phäh phäh awn ng’zah u ne tah cäi cat ci gui. ⁷ Cun ah cäi cat ne ngai khit u ne tah, “Shin ah ng’thu pyein ci gui cu Kalile chang gui ah maw? ⁸ a i hawk cha ah, mik mi van naw mi ng’tüi püi ah ng’thu phäh phäh awn mi ng’zak hning ang? ⁹ Mik mi cu Parthia, Media, lah Elam;Mesopotamia, Judea, lah Kappadocia, ¹⁰ Pontus lah Asia;Phrigia lah Pamfilia; Egypt lah Cyrene ah pei Libya ah ka gui ah mi kiak ci. ¹¹ Am shah gui cu Rom ah ka lawk ci gui ah Judah chang gui lah Judah thung ah om tuk ci gui ah akhui hei chang gui ah kiak ci. Am shah gui cu Crete lah Arabia chang gui ah kiak ci. Cun ung phi chang avan naw, Khanpughi ah bä khäk nak ah mawng ami ng’thu pyein cu, mi mät ah ng’thu phäh phäh awn mi ng’zak ci nei” ci ne kiak ci gui. ¹² Ngah mi cu ang’htei ah cäi cat u ne tah, “Shin ah mawng cu a i hawk cha leng leng ang? ci ne ami mät ng’ce cäk ci gui. ¹³ Cun ung phi am shah gui naw, “shin ah chang gui awk tat ci gui nei” cu ne päipih ci gui. ¹⁴ Cun kawn ah Peter cu ang’düihpüi chang gha lei ät ah ng’lung ah ng’düi law ne tah, ak’aw ng’shawng awn, “Judah chang gui lah Jerusalem ung om ciah chang gui, nami van naw nang ngai vä, shin ah mawng cu ka ning m’thien gui khai. ¹⁵ Shin ah chang gui cu nang mi ah pyein ah mäih ah awk tat ci gui ah kä kiak ci nei, tuk bäi cu ngawi lam nazi kaw ah vah kiah phak ci. ¹⁶ Shin gui cu prophet Joel ah ng’thu aküm nak ah kiak ci. Cun ah prophet ah pyein cu: ¹⁷ “Ak hnu bäih ah khaw hnüp gui ung, Chang nüng ah khan ah Mumcha Theing cu ka zuk chah khai, Na mi hta gui kei ah ng’thu shäu khai gui, Ak hmaw chang gui mik hmuk khai gui, aghi ng’vai gui ng’mui mang mah khai gui. ¹⁸ Cun ah khaw hnüüp gui ung, Ka chang gui hnumi ’pami van ah khan ah, Ka Mumcha Theing ka zuk chah lawk khai, ngah mi naw kei ah ng’thu shäu khai gui. ¹⁹ Ak khan ah om ciah khankhaw ah, cäi aih gui vai kam dang khai, ak ka ah om ciah m’dek khan ah, ngaih khit gui vai kam dang khai. Si ng’hlui ng’huk khai, mei m’lei taut neh, mei khu thet khai. ²⁰ Hngi zin mü seih kho hnüüp khai, cha si ng’hlui ah ng’lat neh sen khai, Hlüng tai neh bä khäk ciah Bawipa ah kyum law nak vai ah hnüüp kä ah gawk law pha ung cun gui cu küm lawk khai. ²¹ Cun zah ung Khanpughi ah ng’hui neh k’tai gü ci gui cu, hun nak gah khai gui” ciah Khanpughi naw pyein ci. ²² “Israel chang gui kei ah ng’thu cu ngai zawp vä, Khanpughi naw cäi aih gui vai lah ngaih khit gui vai ah Nazareth chang Bawipa Jesuh ah m’khüt näng nak cu ani awn m’dang pyi ci nei. Cun ah amawng gui cu nami ng’lung ah ng’dang pyi ci kiah seih nami van naw nami hmat zawp pyi ci. ²³ Khanpughi naw pyein neh ak bäi pyi ah mäih ah Bawipa Jesuh cu, nami kut ung ning ap gui pyi ci; nang mi naw ani cu chang k’she gui am kutlam’tung ung na mi ngawn sak gui pyi ci. ²⁴ Cung ung phi ani cu sih nak naw shung neh kä m’khüt ci, Khanpughi naw sih nak ah hlüng tai nak ung ka ’phiawn neh thawh ba sak pyi ci. ²⁵ Ani ah mawng cu David naw: “Khanpughi cu ang täi seih ka hmuk ci; Ani cu kei ah pei ah om seih, kei cu ng’ä ai nak kä om ci. ²⁶ Cun ah kiak sei kei cu zeikiai nak awn küm be neh, kang thu m’gawng ung phi zeikiai nak ah ng’thu be ci. Kei cu sih nak ma nak ciah chang ah ka kiak ung phi, ngaih u nak awn dim deeih nak om khai nei. ²⁷ A i ah kiah sei ci ung nang Bawipa naw kei cu, sih nak ah khaw ung kä nah na nawng düt khai; Nang ung ng’düng ciah na chang cun phi, Ng’cim hmun ung kä na thu kat sak düt khai ah kiak ci. ²⁸ Ghin nak ah lam cu nah na m’shüm pyi ci, atäng ah nah na om püi nak naw na zei kiai sak khai nei” ci neh pyein ci. ²⁹ “Phäi naü gui aw, ming shon law ung ang ming thang ciah David ghangpughang ah amawng cu, ak dei ang dang ah ka ning m’thein gui khai nei. Ani cu si seih m’cim pyi ci gui, ani ah ng’cim hmun cu, tuk ngawi güt mi hmuh vai ah om ci. ³⁰ Ani cu prophet ah kiah neh amät ah hta ng’shawn ung ka, ghangpughang ah kiah ba khai ci ah Khanpughi ah shai tak cu hmat ci. ³¹ David naw ngawi ah Khanpughi naw a i bi lawk khai ci cu hmuh hmat ne tah, Messiah a thawh ba vai ah mawng cu ng’daut ne apyein nak ung; “Ani naw Bawipa cu sih nak ah khaw ung kä nawng düt khai, apum sa phi ng’cim hmun ung kä thu kah düt khai” ci ne pyein ci. ³² Khanpughi naw Bawipa Jesuh sih nak ung ka athawh ba sak ah amawng ung mik mi cu mi van saksi ah mi kiak ci. ³³ Ani cu Apa Khanpughi ah ak pat lam ah ngawk khai ah tho ba neh, Khanpughi ah shaitak ah Mumcha Theing cu gah pyi ne tah, tuk bäi na mi hmuh ng’zak ah Mumcha theing cu mik mi ah khan ah zuk chah lawk ci. ³⁴ David cu Bawipa Jesuh ah mäih ah Khankhaw ah kai ci ah kä kiak ci;Cun ung phi ani naw: “Bawipa naw ka Bawipa am, ³⁵ ‘Na ga gui avan cu na khaw leh nak gui vai ah, Na khaw ka ah kä kam khäm gui pha ah chuih, kak pat lam ah na ngawh vai’ ci neh kiak nak ci” ci neh pyein ci. ³⁶ Cun ah kiah sei Israel chang gui aw, nang mi naw kut lam tung ung tai ne na mi ngawn ah Bawipa Jesuh cu Khanpughi naw Hun Bawipa lah Messiah ah ak bäi pyi cu akcang ah na mi hmat vai nei” ci neh pyein ci. ³⁷ Cun ah ng’thu ng’zak ciah chang gui cu, ang htei ah ami lung khih gui khä tah, Peter lah ahei ang düihpüi gui am, “Phäi naü gui aw, a i ah mi kiak khai ang” ci ne ng’htau gui ci gui. ³⁸ Peter naw, “nang mi ak chang sing cu, nami kat nak ung ka nami ng’zu ba vai, Bawipa Jesuh Khrih ah ming awn tui nami hnim vai, cun ung nami kat nak cu ning m’gein gui seih, nang mi naw Khanpughi ah Mumcha Theing cu nami gah khai. ³⁹ Khanpughi ah shai tak cu, nang mi ah hmawk, nami hta naü gui ah hmawk lah ang shawng ah om ci gui ah Khanpughi naw akhü gui ah chang gui phung ah hmawk ah kiak ci” ci neh m’thein gui ci. ⁴⁰ Peter naw cun bäng ah kä kiak ciah, ng’thu akda pyein neh am cäi gui cu,“nang mi cu, chang she gui naw ami gah vai ah kak ci m’kat nak ung, nami mät naw nami mät cu phiawn sak vä” cik ci. ⁴¹ Chang ak da naw a ni ah ng’thu zum u neh tui ng’hnim u seih cun ah hnüüp ung chang sing phia thum kip lawh law neh da lawk ci gui. ⁴² Ngah mi cu ang düihpüi gui ah ng’thei thang tu u neh atäng ah ip om u neh, atäng ah ei awh u neh, atäng ah k’tai gü u neh, mü pyang ci gui. ⁴³ Ang düihpüi gui naw cäi aih gui vai lah ngaih khit gui vai ak da m’dang u khähtah chang gui cu kyi kyawk zawp ci gui. ⁴⁴ Zum ciah chang gui cu kawng ät neh om u neh ami khawh cham gui phi ng’tei ng’pai neh ei mang ci gui. ⁴⁵ Ngah mi cu ami khawh cham zawi tuh u neh pyamtham ci am ami ng’zak hlü ah ci ah tei pai ci gui. ⁴⁶ Ngah mi cu ak hnüüp tä seih pum im ah ng’bum ci gui. Ami im gui ung phi m’lung neim nak lah, zeikiai nak awn atäng ah vun vai ne ei awk ci gui. ⁴⁷ Ngah mi cu Khanpughi m’hlüng m’tai u neh chang ah ng’lung ah mik hmai kiang seih om ci gui. Khanpughi naw ak hnüüp tä seih hun nak gah ci gui cu da law sak gui ci.

¹ Khaw hnüüp ät ung Peter lah Johan cu kho k’awinu, ’taigü nak khin ung pum im ah hteit ci gawi. ² M’kawt law ’kiom ami ci ah m’kawt pei ah anu puk ah a khaw shum ciah chang tumat cu om ci. Ani cu ak hnüüp tä sei pum im ah lawk ci gui ah ngui ng’zawi khai ah law püi neh ami ngoh sak ciah kiak ci. ³ Ani naw Peter lah Johan pum im ah lut khai gawi ah ani law cu hmuh gawi ne tah, a i baw ani peit vai ah ng’zawi gawi ci. ⁴ Ngah ni naw ani cu m’htei neh teng ni netah, Peter naw, “kei ni na teng gawi ä” ci ne kiak nak ci. ⁵ Cun ah kia sei ani naw, a i baw pe lawk khai gawi ah ngai neh, kheing ne teng gawi ci. ⁶ Cun kawn ah Peter naw, “kei ung ghui ngui kä om ci, cun ung phi kei ung om ci cu ka ning pek khai: Nazaret Bawipa Jesuh Khrit ah ming awn, tho ne na hteh vai, kei naw ka ning khän ci nei,” ci neh kiak nak ci. ⁷ Cun kawn ah ak pat lam a kut ung k’pamgne m’tho ci; acun vai am akhaw la akhaw pha gui cu khüi law seih, ani cu tho ne ng’düi law ne hteit ci. ⁸ Cun kawn ah zeikiai neh Khanpughi m’hlüng m’tai ne, zawng ne kiah ne dawng ne, ami hnu ah hteit tu neh Pum im kiawng ah lut tuk ci. ⁹ Cun ah Khanpughi m’hlüng m’tai neh a hteh cu, chang gui naw hmu u ne tah; ¹⁰ ani cu pum im m’kawt ’kiom pei ah ngawh ne ng’zawi man ciah chang ah hmat ba ci gui. Cun ah kiah seih ani ah mawng cu chang gui naw cäi cat ne ngai khit ci gui. ¹¹ Acun ah chang naw Peter lah Johan cu khem gawi kheng geng khä tah chang gui cu cäi cat u neh Solomon ah k’caw ah ami om nak ah dawng lawk ci gui. ¹² Peter naw chang gui cu hmu gui ne tah, “Israel chang gui, a i ah kiak sei nami cäi cat ang? a i ah kiah seih kei mi cäi cat ne na mi na teng gui ang? kami mät ah hlüng tai nak lah m’khüt näng nak awn, shin ah chang kami gai sak ciah nami ngai ci ma? ¹³ Abraham, Issac, Jakob ni ah Khanpughi, mipu pa gui ah Khanpughi naw, ak chang shäm Bawipa Jesuh am khankhaw bä khäk nak cu pe pyi ci nei. Cun ung phi nang mi naw ga am ap neh, Pilat naw k’phiawn vai ah k’bäi sei phi, Pilat ah ma ah nami k’she ’dam nah pyi ci nei. ¹⁴ Ani cu theing ne ng’cim ne, nik ciah chang ah kiah lang sei phi, nang mi naw Pilat ah ma ah ani cu k’she ’dam nah u ne, chang ngawn ci cu phiawn vai ah na mi ling ci nei. ¹⁵ Ghin nak pe hning ciah Bawipa cu na mi ngawn pyi ci, cun ung phi Khanpughi naw sih nak nung ka thawh ba sak pyi ci, cun cu kei mi naw kami mik awn kami hmuk ci. ¹⁶ Cun ah Bawipa ah hlüng tai ci ah ang ming naw shin ah shum ciah chang cu gai sak pyi ci. Tuk bäi nami hmuh lah nami hmat cu cun ah Bawipa ah ng’ming ung zum nak awn bi ah kiak ci;nami van naw nami hmuh ah mäih ah, Bawipa Jesuh ung zum nak bäng naw shin ah chang cu gai sak ciah kiak ci. ¹⁷ “Phäi naü gui aw, nang mi lah nami ng’vai gui naw, Bawipa Jesuh ah khan ah nami bi gui cu, i kä nami hmat su ah kiak ci, ci cu ka hmat ci nei. ¹⁸ Khanpughi naw Messiah asih vaiah mawng cu prophet gui ung ng’cä neh pyein pyi ci nei; shin cu ang cä ah küm nak ah kiak ci. ¹⁹ Cun ah kiah seih ng’zu ba u neh Khanpughi ah ng’hlat law vä, nami kat nak ning m’gein gui khai. ²⁰ Cun ung vah Khanpughi ah ka mumcha tha mah nak agawk law nak ah khin küm law seih, nangmi ah hmawk ah ghü ne am düih pyi ah Jesuh Messiah cu nami om nak ah tüi lawk khai. ²¹ Khanpughi naw a prophet theing gui ah om zah ung a pyein ah mäih ah, a päng avan ak thai ah kä ang’pian pha ah chuih cun ah Bawi cu khan khaw ah om cang khai. ²² "Nami Bawipa Khanpughi naw, kei a na tüih law ah mäih ah prophet tumat cu nang mi ah tüi lawk khai;cun ah Bawi cu nami mät pakhui ung ka ah kiak khai, ani ah pyein ah ng’thu phung cu, nang mi naw nami ngaih vai nei. ²³ Cun ah prophet ah ng’thu kä ngai ci phung cu, Khanpughi ah ak chang ung ka m’chah ne k’pai netah m’di khai.” ²⁴ Samuel lah ahei prophet gui nawh tuk ngawi ng’dang lawk khai ah amawng gui cu, pyein shüt pyi ci gui nei. ²⁵ Khanpughi naw a prophet gui awn apeit ah shai tak gui lah, Nami pu pa gui am Khanpughi ah ng’thu m’khän gui cu, nang mi ah hmawk ah kiak ci. Khanpughi naw Abraham am, “Nang ah hta ng’shon gui awn khomdek chang avan cu hrilham ka pe gui khai nei. ²⁶ Cun ah kiah seih nang mi naw, nami shet kat nak gui nawng shüt neh, hrilham nami gah vai ah, Khanpughi naw a ghü ah a mät ah chang shäm cu, ak htük bäih ah ning tüih law gui ci nei” ci neh Peter naw pyein ci.

¹ Peter lah Johan naw chang gui am ng’thu ami m’thein gui zah ung taigü gui, pum im ngäng ciah ng’vai lah Sudducees gui cu gawk law ci gui. ² Ngah mi naw sih nak ung ka thawh ba nak ah mawng, m’dang ciah Bawipa Jesuh ah thawh ba ah mawng cu, m’thein gui ni khä tah ngah mi cu m’lung k’she ci gui. ³ Cun ah kiah seih ngah ni cu pha gawi u ne a cun hnüüp kho mü khätah a ngawi ung, khaw ngawi güt thawng ung chum gawi ci gui. ⁴ Cun ung phi a ni ng’thu ng’zah tuk ciah chang ak da naw, Bawipa zum tuk ci gui. Zum ciah chang avan phia hma kip law lawk ci. ⁵ Angawi ung Judah ng’vai gui, agham gui lah ng’thu m’khän saza gui cu Jerusalem ah ng’bum ci gui. ⁶ Ngah mi cu taigü tung Annas lah akyawng ung ka gui ah kiak ciah, Khaiaphar, Johan, Alexander lah ami paw gui awn ng’ge ci gui. ⁷ Ngah mi naw ang düihpüi hnih cu ami ma ah m’düih u ne tah, “Nang ni naw a i cha shin na ni bi ang?, a i hlüng tai nak, a u ah ng’ming awn na ni bi ang?” ci ne ng’ng’shi gawi ci gui. ⁸ Cun ah kiah khä tah Peter naw, Mumcha Theing awn be ne tah, “Chang guiah ami ng’vai gui lah a gham gui aw, ⁹ a khaw shum ciah chang, ak ni ah a gai law ba ah mawng ung kei ni k’cet ne na mi na ng’shi gawi ci, shin ah chang cu, ¹⁰ nang mi naw kut lam tung ung tai ne ngawn uk ci seih Khanpughi naw a thawh ba sak ah Nazaret Bawipa Jesuh Khrit ah hlüng tai ciah ang ming awn theek ne gai ne, nami ma ah ang düih cu, nang mi lah Israel chang van naw nami hmat khainei. ¹¹ Jesuh Khrit cu: “Lung im nami cawh ung nami nawng shüt ah lung cu, ak kui kyang pi bäih ah lung ak tung ah kiah lawk ci” ci ah ca ng’cim ah pyein cu Bawipa Jesuh, ah kia ci. ¹² Ani bäng cun vah Hun Bawi ah kiak ci, khomdek ah khan ung ani ah kawn ah, mik mi na hun gui khai, Khanpughi ah ghü u kä om ci” ci neh m’hlan ba gui ci. ¹³ Peter la Johan cu hmuh hmat nak kä däm ciah chang ah kia lang ni neh ani ng’thu htaü hning cu kawngsi ng’vai gui naw hmuh u ne tah ang htei ah cäi cat ci gui. Ngah ni cu Bawipa Jesuh ah ng’düihpüi gawi ah phi hmat gawi ci gui. ¹⁴ Cun ung phi gai ba nak gah ciah chang cu Peter lah Johan awn atäng ah ng’düi ci kiah khäh tah a i phi kä pyein hlawt ci gui. ¹⁵ Cun ah kiah seih ang düihpüi gui cu tüi ba gui u ne tah ¹⁶ “Shin ah chang gui a i ah ci gui vai ang? cäi aih gui vai ami m’dang cu Jerusalem ung om ciah chang avannaw hmuh hmat pyi ci, käk hleei nak gui hlawt vai kiah pyi ci. ¹⁷ Cun ung phi shin ah amawng cu chang khli naw kä a hmat ten tu vai ah cän kawn ah shin ah chang gawi naw Jesuh ah ming awn a i kä a ni pyein nen ba vai ah khen neh mi ma nah gawi khai nei” ci neh ng’ge ci gui. ¹⁸ Cun kawn ah ang düihpüi gui cu khü ba gui u ne tah Jesuh ang ming awn a i phi kä ami pyein sak, m’thei thang ba gui vai ah khen neh m’cäi gui ci gui. ¹⁹ Cun ung phi Peter la Johan naw, “Nang mi ah ng’thu ngaih vai lah Khanpughi ah ng’thu ngaih vai cu, Khanpughi lam ah ngaih ung a i, ang düng pi ah na mi mät naw m’khoi chah vä; ²⁰ Kei mi läi kami hmuh lah kami ng’zak cu kä pyein ah kä ka mi om hlawt khai nei” ci neh kiak nah gui ci gui. ²¹ Kawngsi ng’vai gui naw, ngah ni cu khen neh k’taap ba goi ne tah tüi ba gawi ci gui. Acun ah amawng gui hmuh tuk ciah chang gui naw Khangpughi m’hlüng m’tai zawp u khä tah ang düihpüi gui cu a i ah phi käm kat gui hlawt ci gui. ²² Shum te ci, cäi cat vai ah gai ciah chang cu a khaw kum phli-kip ah däm ci. ’Taigü Nak. ²³ Peter lah Johan cu ami tüih ba goi kawn ah ani paw gui ah hteit ba ni ne tah taigü ng’vai gui lah agham gui ah pyein ah ng’thu cu m’thein tu ba gui ci gawi. ²⁴ Cun ah ng’thu cu ng’zah u ne tah zum ciah chang gui cu bum u neh, “Khankhaw lah khomdek, tuinu lah ak ghing om avan tüi piang ne uk ciah Khanpughi, ²⁵ na chang shäm, kami pughi David am Mumcha Theing awn nang thu cu; “A i ah kia seih chang pakhui hei gui ami tung tu ang; A i ah kia seih chang gui naw ak she m’zih neh ami pawng püi ang? ²⁶ Khomdek khan ghangpughang gui naw, Khanpughi cu ng’tuk püi vai ah pawng püi pyi ci gui, Bawipa lah Messiah cu hnu ng’tuk püi vai ah ng’bum pyi ci gui” ciah kiak ci. ²⁷ A cun ah mäih ah Herod lah Pontius Pilate cu, chang pa hei gui lah Israel chang gui awn atäng ah Messiah ah nam düih, na chang shäm ah Bawipa Jesuh cu hnu ng’tuk püi vai ah ng’bum man ci gui nei. ²⁸ Cun ah ami bum cu na hlüng tai nak lah nang zak nak hlü awn nak bäi pyi gui aküm be nak vai ah kiak ci nei. ²⁹ Aw Bawipa ngah mi ah pawng püi nak cu zuk chah pe gui ä. Na na chang shäm gui am, nang thu kami pyein nak hning vai tha gui na zuk pe gui ä. ³⁰ Gawi ci naw a gai nak vai, na kut zu k’phiat lawä;Na shäm ah Bawipa Jesuh ah ming theing awn cäi aih vai gui lah ngaih khit vai gui gui cu, zuk m’dang lawä” ci neh Khanpughi ah taigü ci gui. ³¹ Ami taigü zawp vai am cun ah ami taigu nakah hmun cu ng’tum ne thüng ci. Ngah mi cu ami van Mumcha Theing awn be u ne tah, Khanpughi ah ng’thu cu thamah nak awn pyein sak ci gui. ³² Zum ciah chang gui cu ami m’lung ngaih kawng ät u neh, a u naw phi amät ah khawh cham cu aka ah käm tung sei, ami khawh cham avan cu ami ka ghawm ah ngai ci gui. ³³ Ang düihpüi gui cu hlüng tai nak awn k’thamah ne, Bawipa Jesuh a thawh law ba ah mawng cu saksi ci gui, Khanpughi naw phi ngah mi ah khan ah ng’büh mang nak hrilham cu k’be gui ci. ³⁴ Im tak ci naw a im, lai tak ci naw a lai, zawi u ne tah ang düihpüi gui am ap lawk ci gui. ³⁵ Cun kawn ah ang düihpüi gui naw tumat ciah, ng’zak hlü ah ciah, tei pai gui ci gui. Cun ah kiah sei ngah mi ung i kä tak ci cu kä om ci. ³⁶ Saipras khaw ah ka Levit ah ng’shon Josef, ang düihpüi gui naw barnabas (shawih khem tuk ciah ming ci) ah ami khü ah chang tumat cu om ci. ³⁷ Ani naw amät ah lai cu zawi ne tah ngui law püi neh ang düihpüi gui am ap gui ci.

¹ Ananias ming nak ciah chang tumat la ak chu Saphira cu ani khomdek zawi ci gawi. ² Cun-ung phi Ananias cu ak chu ng’ge püi netah alai a zawih cu ateih k’pai neh am shah cu amät ah ka vai gim ne; am shah cu ang düihpüi gui am ap gui ci. ³ Peter naw, “Ananias, nang cu na lai na zawih k’pai ne na gim ah phäh ah Mumcha Theing nam hleei pyi ci nei, a i vai khoshe ah pyein ah na bi ang? ⁴ Shin ah lai kä na zawih pha ung phi na mät ah ka ah kiak ci, shin ah lai na zawih kawn ah phi lai ah phu ngui cu na mät ah ka ah kiak ci, cun ah kia lang sei, a i vai cun ah na ngaih tüh ang? Nang cu chang nam hleei ciah kä kiak ci, Khanpughinam hleei ci ah kiak ci nei” ci ne kiak nak ci. ⁵ Cun ah ng’thu ang zak vai am Ananias cu, kiuh ne sih seih, acun hmuh ng’zah tuk ciah chang gui cu ang htei ah kyi kyawk ci gui, ⁶ Ak hmaw chang gui naw law neh Ananias ah agook cu, zih awn k’tawm ne tah ak pung ah hteh püi neh m’cim ci gui. ⁷ cun kawn ah nazi k’thum lung khä tah Ananias ah ak chu cu gawk lawk ci. Ani cu kä ah gawk law pha ung, ami kiak gui cu kä hmat tu phak ci. ⁸ Peter naw, “na ni lai ngui i chü ah ang na ni zawih? nam thein ä? cineh ng’shik ci. Cun ah hnu mi nawh” ak cang ah, a cun chü ah nei ka ni zawih “cik ci, ⁹ Peter naw,” a i ah kiah sei nang ni naw Khanppughi ah Mumcha Theing m’hleei m’hlak vai ah na ni k’bäi ang? Na cei m’cim ciah chang gui m’kawt law k’pha law ba ci gui nei, ngah mi naw nang mä kawt ne ning m’cim lawk khai gui nei” ci ne kiak nak ci. ¹⁰ Acun vai am cun ah hnu micu Peter ah khaw pei ah kiuh ne sik ci, Ak hmaw chang gui naw cun ah a sih cu hmuh u ne tah kawt ne hteh püi neh a cei ah pei ah m’cim tuk ci gui. ¹¹ Pum ci gui ami van la cun ah amawng ng’zah tuk ciah chang avan cu ang hteiah kyi kyawk ci gui. ¹² Ang düihpüi gui naw chang gui ah ma ah cäi aih gui vai la ngaih khit gui vai akda m’dang ci gui. Zum ciah chang gui ami van cu Solomon ah k’caw ah ng’bum ci gui. ¹³ Chang gui naw ngahmi cu m’hlüng m’tai gui pang u ne phi a u phi ngahmi ung a zäi ah kä ng’läk tuk ci gui. ¹⁴ cun ung phi Bawipa zum ciah hnumi pami gui cu da law pi täi ci gui. ¹⁵ Chang gui naw gaw pai ci gui cu law püi ci gui. Peter a hteh zah ung apü püi naw baw tah ang’hnim vai ah phak ni, kawh nak gui ni awn lam ung m’shäm ci gui. ¹⁶ Cun bäng ah kä kiak ciah Jerusalem ah pei pigaw zung ah ka gawpai ci gui, Khaw ‘she ah kai gui cu ami van gai ba zawp ci gui. ¹⁷ Cun kawn ah Taigü tung la, apaw gui ah kiak ciah pigaw gui ah ka Sadducee gui cu ang Düihpüi gui ah khan ah ang htei ah käng zah hlü ne m’thüi u netah, ci gui vaiah k’bäi ci gui. ¹⁸ Ngahmi naw ang düihgui cu pha gui ne, thawng ung chum gui ci gui. ¹⁹ Cun ung phi khaw mü ah Khanpughi ah khan khaw chang naw, thawng m’kawt cu hmawng ne, ang düihpüi gui cu ak pung ah m’hlaut gui netah, ²⁰ “Nangmi cu Taigü imah hteit u netah chang gui am ghin nak akthai ah mawng m’Thein gui vä” cik ci. ²¹ Ang düihpüi gui cu khankhaw chang ah ng’thu ngai u ne, ai khawn htük ung taigü imah hteit ne m’thei thang ci gui. Taigü tung la apaw gui ni, kawngsi gui ni ng’ge nak vai cineh Zudah ng’vai gui cu khü gui ci gui. Cun kawn ah gakap gui tüi gui ne, ang düihpüi gui cu khü sak gui ci gui. ²² Cun ung phi thawng ah ang düihpüi gui cu kä hmuh u ne, kawngsi gui ah om nakah law ba u netah ²³ Keimi kami gawk ung thawng m’kawt cu ak ni ah ng’khai ci, m’kawt ngäng ci gui phi m’kawt pei ah ng’düi u sei kami hmuh gui ci; cun ung phi chawh hmawng ne kami va luh ung ak kyawng ah u phi kä kami hmuk ci,” ci ne pyein ci gui. ²⁴ Cun ami ci cu Taigü khem lah m’kawt ngäng ciah ang vaipi naw ng’zak ni netah, “Shin ah mawng cu a i hawk cha ang cineh ngai khit ci gui. ²⁵ Cun zak ung chang tumat gawk law netah,” Thawng ung nami chum gui ah chang gui cu taigü im kyawng ah om ne, chang gui m’thei thang gui ci gui nei” ci ne m’thein law gui ci. ²⁶ Cun kawn ah m’kawt ngäng ciah ang vai naw ak chang gui khah püi gui ne, ang düngpüi gui cu va kgü ba gui ci. Cun ung phi chang gui naw lung awn ami vawih gui vaiah ng’ä u netah ang düihpüi gui cu kä tuthat gui ci gui. ²⁷ Cun ah ang düihpüi gui cu law püi gui ne kawngsi gui ah ma ah m’düih gui u netah Taigü tung naw ng’shi gui ci. Ani naw, ²⁸ “A cun ah chang ah ng’ming awn kä na mi m’theithang en ba vai ah, keimi naw ak khengah kami ning maa nah gui pyi ci, Cun ung phi nangmi naw Jerusalem khaw avan ung na mi m’theithang gui pyi ci. Ani ah sih phi keimi ah om ah nami pyein law hlü pyi ci nei” ci ne kiak nah gui ci gui. ²⁹ Peter la apaw gui naw, “Keimi ah ngaih vai cu Khanpughi ah kiak ci, chang ah kä kiak ci. ³⁰ Kami pughi guiah Khanpughi naw kutlamtung ung tai ne nami ngawn ah Bawipa Jesuh cu, thawh ba sak pyi ci. ³¹ Israel chang gui ng’zu ba u netah ami kat ami phiawn nak vai ah, Khanpughi naw cun ah Bawipa cu, thawh ba sak netah akpat lam ung ang vaipi lah Hun Bawipa ah ngoh sak pyi ci nei. ³² Shin ah amawngung keimi cu saksi ah kami kiak ci, ang thu ngai ci gui am a zuk m’kyum lawah kiak ciah, Mumcha Theing cun phi saksi ah kiak ci” ci ne pyein tuba ci gui. ³³ Cun ah ng’thu cu kawngsi ng’vai gui naw ng’zah u netah ang htei ah m’lung she u neh ang düihpüi gui cu ngawn hlü gui ci gui. ³⁴ Cun ung phi Gamallel ming nak ciah Pharisee tumat cu, kawngsi zungah ng’düi law netah ang düihpüi gui cu ashäng ak pung ah ami hteh püi gui vai ah pyein ci. Ani cu chang gui naw ami chang m’sui tu ah ng’thu m’khän saza ah kiak ci. ³⁵ Cun ah chang naw, “Israel chang gui aw, shin ah chang guiah khan ah nami bi vai cu geing nah ne nami bi vai nei, ³⁶ Azan hta Shängung Theudas ming nak ciah chang tumat cu amät naw amät chang k’tung khak ah m’hlüng m’tai ne om ci, a hnu ah läk ciah chang phia’phli vai lawk ci. Cun ung phi ani ami ngawn kawn ah ak chang gui püi zawp u sei abi mawng phi maih zawp ci. ³⁷ Cun kawn ah ming ami k’tä zah ung Galile chang Judas cu ng’dang law ba ne chang gui ng’ge ne m’htawi gui ci. Cunung phi ani cu ngawn u sei ak chang gui phi püi pawng zawp ci gui. ³⁸ Cun ah kiah sei kei naw ka pyein hlü cu, shin ah chang gui kä hei nah gui vä, ami bü ah om u sä; ³⁹ Ngahmi ah ngaih tüh bilawh gui cu, chang ah pawng püi ah akiak ung maih ne ng’kawn khai nei, cunung phi cun gui cu Khanpughi ah ngaih tüh bilawh gui ah akiak ung, nangmi naw kä nami m’dimdap gui hlawt khai, nangmi cu Khanpughi nami hnung’tuk püi ciah kiak lawk khai nei” ci ne pyein ci gui. ⁴⁰ Kawngsi ng’vai gui naw Gamaliel ah ng’thu cu ngai u netah ang düihpüi gui cu khü gui ci gui. Cun kawn ah that gui u netah Bawipa Jesuh ah ng’ming awn ng’thu kä ah mi pyein nen ba vaiah, khen neh m’cäi gui netah tüi ba gui ci gui. ⁴¹ Ang düihpüi gui cu Khanpughi naw Bawipa Jesuh ah hmawk ah hmai m’sheit nak aut khin ci gui ah ak bäi gui ah phäh ah zeikiai u ne kawngsi zungah ka hteit ba ci gui. ⁴² Ak hnüüp tä sei taigü im gui lah chang gui ah im gui ung, Bawipa Jesuh cu Messiah ah akiak ah mawng ng’thu’ ni cu pyän u ne, m’thei thang ba gäk gäk ci gui.

¹ Apipi shou law sei, ang khah püi gui da law pi k’täi ci gui. Cun zah ung Greek ng’thu ah ng’thu ciah Jew chang gui la khomah Jew chang gui ah ng’lak ah kä ami ng’gei nak om ci. Greek ng’thu ah ng’thu ciah Jew chang gui naw, hmeinu gui cu ak hnüüp tä ng’büh khai ah ngui käk dük ci gui cineh’ she nah gui ci gui. ² Cun ah kiah sei ang düihpüi gha-lei-gawi naw zum ciah chang van cu khü gui u netah “Keimi cu Khanpughi ah ng’thu pyein nak nawng en neh ngui ah mawng kami bilawi khai ah kä kiak ci. ³ Cun ah kiah sei, phäi nau gui aw, nangmi ung ka Mumcha Theing awn be neh hmuh hmat nak om ciah chang sing chih nami ghü vai, shin ah mawng bik khai gui ah ngahmi cu kami m’düih gui khai. ⁴ Keimi läi cu taigü nak lah Khanpughi ah ng’thu pyein nak awn akhin be khai ah kami bik khai” cik ci gui. ⁵ Cun ah ami ci cu aming khah püi gui avan naw zum zawp ci gui. Ngahmi naw Mumcha Theing awn be neh ng’düng nak om ciah Stephen cu ghü htük ci gui. Cun kawn ah Philip, Prochorus, Nicanor, Timon, Parmenas lah ak khui hei, Antioch ah ka, Jew thungman zum tuk ciah Nicolaus gui cu ghü gui ci gui. ⁶ Zum ci gui naw cun ah chang gui cu, ang düihpüi gui ah pei ah law püi u khätah ami khan ah ami kut taih ne taigü pe gui ci gui. ⁷ Khanpughi ah ng’thu cu pyän law pi k’täi u sei Jerusalem ung zum ciah chang cu da law pi sei, taigü ng’vai gui phi akda naw zum lawk ci gui. ⁸ Stephen cu Khanpughi ah bäkhäk nak la hlüngtai nak cu akbe ah gah ciah kiah ne, cäicat gui vai lah ngaih khit gui vai cu akda m’dang ci. ⁹ Cunung phi ani cu Cicrene lah Alexandria ah ka, Jew chang gui mah ah pum im ung ka, päize chang gui naw hnu ng’tuk püi ci gui. Acun gui lah Cilicia lah Asia ah ka, Jew chang gui naw Stephen cu ng’küüngneet püi ci gui. ¹⁰ Cun ung phi Stephen cu Mumcha Theing ah peit ah hmuh hmat nakawn ng’thu ci kiah neh käm hlan tu ba hlawt ci gui. ¹¹ Cun ah kiah khätah ani cu Mose lah Khanpughi cu m’kat ne ng’thu pyein sei kami ng’zak ci nei” ci neh ami kiak vai ah, chang am shah am khawh pe neh pyein sak gui ci gui. ¹² Cun ah bi u neh chang akda gui, ami ng’vai gui lah ng’thu m’khä saza gui cu k’tü k’phlawh gui u sei, ngahmi naw Stephen cu phah neh kawngsi zung ah hteh püi ci gui. ¹³ Cun kawn ah hleei neh saksi khai gui phi, thäm law gui ci gui. Cun ah saksi gui naw, “Shin na chang cu taigü im lah Mose ah ng’thu m’khän cu hnu nah neh ng’thu pyein ci nei, ¹⁴ Nazaret chang Jesuh naw ’taigü im cu gä netah, Mose ah peit ah thungzo phi m’shet ciah thu pyein sei kami ng’zak ci nei” ci ne pyän ci gui. ¹⁵ Kawngsi zung ah gawk ciah chang gui naw Stephen cu kheing ne teng u netah, ani ah hmai cu khankhaw chang ah hmai awn täng sei hmuk ci gui.

¹ ’Taigü tung naw Stephen am, “Ngahmi ah pyein cu ak cang ang?” ci ne ng’shik ci. ² Stephen naw, “Phäi nau gui lah Pa ng’vai gui aw, nang ngai vä, mi pughi Abraham cu Haran khaw ah hteit ne kä a om pha ung Mesopotamia ah a om zah ung hlüng tai ciah Khanpughi cu ng’dang netah,” ³ Na mät zah gui lah na khaw cu nawng shüt neh ka ning m’shüm nak ah khaw ah na hteh vai” ci ne kiak nak ci. ⁴ Cun ah kiah sei Abraham cu Chaladean khaw ah ka, Haran kho ah hteit ne om tuk ci. Apa asih kawn ah tuk bäi nami om nak ah khaw ah Khanpughi naw tüi ne om sak ci. ⁵ Cun zah ung Khanpughi naw cun ah khaw ung Abraham am khawh a i phi kä pek ci, khomdek dawng veing hta phi kä pek ci. Cun ung phi cun ah khaw cu, amät am phi bäi, ahta nau gui am phi bäi avan ka ning ap khai ciah shai tak ci. Cun zah ung Abraham ung ahta kä om phak ci. ⁶ Khanpughi naw Abraham am, “Na hta nau gui cu a khaw hei ah chang hei nu ah kiah ne om tuk khai gui, khaw kum phia-phli ung khlei- htein ah kiah u seih chang naw shedam nah gui khai. ⁷ Ngahmi khlei-htein nah gui ciah chang gui cu, kei naw kam khoichaa gui khai. Cun kawn nah nang ah hta nau gui cu cun nah khaw ung ka phiawng u neh, shin ah khaw ung kei cu nak taigü khai gui” ci neh kiak na gui ci. ⁸ Cun kawn ah Khanpughi naw, ang thu m’khän am dang nak ah, vun aat nak ah mawng cu Abraham am ap ci. Cun ah kiah sei Abraham naw, ahta Isaak cu ami hta nak ah ak hnüüp cheit ung van aat nak bi pek ci. Jakob naw ahta sing gha-lei-gawi phi, vun aat nak bi pe gui ci. Jakob ah hta gui cu chang pakhui gha-lei-gawi ah pa gui ah kia lawk ci gui. ⁹ Jakob ah hta gui naw ami nau Josef cu m’thüi nah u neh tah Egipt khaw ah khlei-htein nak kiak khai ah zawi ci gui. ¹⁰ Cun ung phi ani cu Khanpughi naw atäng ah om püi neh, gein vai nak gui ung ka, phiawn sak ci. Josef cu Egipt ghanpughang ah ma ah a gawk law ung Khanpughi naw a hmai kiang sak neh hmuh hmat nak phi pek ci. Cun ah kia sei ghangpughang naw ani cu, Egipt khaw ung bawi ng’vaipi la gawnu mang ah k’hmoh ci. ¹¹ Cun zah ung Egipt lah khanan khaw ung khaw zaw sei gein vai ci gui. Mi pupa gui cu ami ei vai kä om ba ci. ¹² Jakob naw Egipt khaw ung ei vai htang om ciah ng’zah netah ahta gui cu ak htük ah tüi gui ci. ¹³ Ak hnih vei nak ami law ba ung Josef naw a phäi gui naw ami hmat vai ah m’ thein gui ci. Egipt ghangpughang naw phi Josef ah kyongkhui ah mawng cu hmat lawk ci. ¹⁴ Cun ah kia sei Josef naw apa Jakop cu cük ne, chang sing chih- kip-leihma lawk ci gui ah apaw gui ami van Egipt khaw ah ami law vai ah, k’thäh gui ci. ¹⁵ Jakob cu Egipt khaw ah law tuk ci, acu ah amät lah ahta gui ami van sih tuk ci gui. ¹⁶ Ami gok gui cu Shehem pigaw ah hteh püi gui netah Hamor pahta ni ah Abraham naw ngui awn a thawn ba ah ng’cim hmun ung m’cim gui ci gui. ¹⁷ Khanpughi naw Abraham am apeit ah shai tak nak aküm law vai ng’et law khä tah Egipt khaw ung Israel chang gui da law pi ci gui. ¹⁸ Cun kawn ah Egipt khaw ung Josef kä hmat ciah ghangpughang kai lawk ci. ¹⁹ Cun ah ghanpughang naw mi pughi gui cu m’khawi hnga gui neh shedam nah gui ci. Ami hmaw hta gui ami sih vai ah imah ak pung ah hta sak gui ci. ²⁰ Cun zah cu Mose ami hta nak ah khin ah kiak ci, Mose cu ang htei ah kiom ciah ak hmaw hta ah kiak ci. Ani cu cha thum ung apa ah imah ami om püi ah kiak ci. ²¹ Ani cu im ah akpung ah ami ghawh kawn ah Pharaoh Ghangpughang ah hta hnumi hta naw lah neh ahta ah tha neh om püi ci. ²² Mose cu Egipt chang gui ah hmuh hmat nak avan ng’theithang netah, hmuh hmat nak lah m’khüt sheng nak ung hlüngtai ciah chang ah kia lawk ci. ²³ Ani cu a khaw kum phli-kip law khä tah, amät ah pakhui Israel chang gui ah om nak ah hteit khai ah k’bäi ci. ²⁴ Cun ah ahteh zah ung Israel chang cu Egipt chang naw tuthat sei hmuh netah apaw gung tu neh Egipt chang cu ngawn neh phu tuk ci. ²⁵ (Mose naw, Khanpughi naw Israel chang gui k’phiawn gui khai ah a tüih cu, ak chang gui naw hmat khai gui ah ngai ci, cun ung phi ngahmi naw kä hmat ci gui). ²⁶ Angawi ung Israel chang gawi ng’tuh ni sei hmuh gawi netah, Mose naw, “Nang ni cu ng’phäi nau gawi ah kiah netah a i vai na ni ng’tuk ang” ci neh m’chah gawi ci. ²⁷ Cun ung phi ak she ah bik ciah chang naw Mose cu buh neh ’kit netah “Keimi na uk gui neh na na m’khoichaa gui khai ah, a u naw a ning m’düih ang? ²⁸ Zanta Egipt chang na ngawn ah mäih ah, kei mä nah na ngawn hlük ci ma?” ci ne ng’shik ci. ²⁹ Mose cu cun ah ng’thu ng’zah netah Egipt khaw ah ka, dawng neh Midian khaw ah om tuk ci. Cu ah a om nak tu ah pami hnih ah hta ci. ³⁰ Khaw kum phli-kip lüng khä tah Sinai khaw m’htung pei ‘pya lün nu ah, mei ah däi ciah k’plup ah ng’lung ah khankhaw chang cu Mose ah hmuh ah ng’dang ci. ³¹ Cun hmuh ne Mose cu ang htei ah cäi cat ne, m’htei neh ahmuh vai ah hei ’et khäh tah, ³² “Kei cu napu pa gui ah Khanpughi, Abraham, Issac lah Jakob niah Khanpughi nei” ciah Khanpughi ah k’aw cu ng’zak ci. Mose naw kyih kyawk aih netah kä teng hlawt ci. ³³ Khanpughi naw Mose am?,” Na phahnak suut ä, nang düih nak cu theing thap ciah hmun nei, ³⁴ Ka chang gui Egipt khaw ah ami shedam nak gui cu, ka hmu pyi ci nei, Ngahmi ah ng’hlaw ng’ei m’lau ng’pyan phi kang zah pyi ci nei. Cun ah kia sei ngahmi ka hun gui khai ah ka kyum law pyi ci, Tuk bäi law ä, Egipt khaw ah ka ning tüi khai” cik ci. ³⁵ Mose cu Israel chang gui naw ami hnu nak ah chang ah kiak ci. Ngah mi naw, “Keimi na uk gui neh na na m’khoicha gui khai ah a u naw a ning m’düih ang?” ci ne, ng’shik ci gui. Ani cu chang gui uk gui neh mei ah däi ciah k’plup ung dang ciah khankhaw chang ah bi nak püi awn, ak chang gui k’phiawn gui khai ah Khanpughi ah tüih ah kiak ci. ³⁶ Ani naw Egipt khaw lah Tuisen tuinu ung phi bäi, khaw kum phli- kip ung k’pya lünnu ah phi bäi, cäi aih gui vai lah ngaih khit gui vai cu m’dang neh Egipt khaw ah ka, Israel chang gui law püi ba gui ciah kiak ci”. ³⁷ Khanpughi naw ami mät pakhui ung ka, Profet tumat cu, kei a na tüih law ah mäih ah tüi lawk khai nei” ci neh Mose naw Israel chang ghu am kiak na gui ci. ³⁸ Ani cu bung puk ah om ci gui ah Israel chang gui, kami pu pa gui lah Sinai khaw m’htung ung ng’thu püi ciah khankhaw chang awn atäng ah om ciah chang ah kiak ci. Mik mi am ana peit gui vai ah Khanpughi ah ghing ciah ng’thu gah ciah chang ah phi ki ak ci. ³⁹ “Cun ung phi mi pu pa gui cu, ani ah ng’thu kä ngai u neh, ani nawng-en neh Egipt khaw ah hteit ba hlük ci gui. ⁴⁰ Cun ah kia seih ngahmi naw, Aron am,” Keimi lam nam shüm gui khai ah khanpughi-hta gui na pian pe gui ä. Keimi Egipt khaw ah ka, na law püi ba gui ciah Mose cu a i ah kiak ciah kä ka mi hmat ci nei” ci neh kiak ci gui. ⁴¹ Cun kawn ah ami mät naw, seipat hta ah gup piang u neh, acun-am vawih peh taigü neh zeikiai ci gui. ⁴² Cun ah kia sei Khanpughi naw ng’hlah tah gui neh, khankhaw ah aisi gui ah k’taigü sak gui ci. Cun ah mawng Profet guiah ca guk cu; Israel chang gui aw, nang mi naw ‘Pya lün nuah khaw kum phli-kip ah kyawng ung m’ghu ng’tha neh nami tumbei cu, ⁴³ Nangmi naw nami m’kawn law gui cu, Molech ah ng’zo kiang lah nami aisi pughi Rephan ah kiak ci nei; Cun gui cu nami khawihnah vai ah nami mät naw nami pian ah agup gui ah kiak ci. Cun ah kia sei nangmi cu Babilon phlän neh nami hteit khai ah ka ning k’täm gui khai” ciah kiak ci. ⁴⁴ “Kami pupa gui naw, Khanpughi ah om nak ah khaw-phung cu k’pya lün pum ung m’kawn lawk ci gui. Mose am Khanpughi naw am’hmuh ah mäihah cun ah khaw-phung ami cawh ah kiak ci. ⁴⁵ Kami pupa gui naw cun ah khaw-phung cu, ami pa gui ah kut ung do u neh Khanpughi naw ak täm gui ah om nak khaw ah, Joshua awn atäng ah ami tuk gui zah ung m’kawn neh hteh püi ci gui. Cun ah khaw-phung cu David ah uk zah ung khüt sei cun ah khaw ah om ci. ⁴⁶ David cu Khanpughi ah ma ah ahmai kiang ci kiah neh Jakob ah Khanpughi ah a om nak vai taigü im cu Khanpughi naw a cawh sak vai ah ’thäh ne taigü ci. ⁴⁷ Cun ung phi cun ah im a cawh sak cu Solomon ghangpughang ah kiak ci. ⁴⁸ “Cun ung phi hlüng tai pi ’bäih ci ah Khanpughi cu chang ah cawk ah im ung kä om ci. A i ah kia sei ci ung profet ah ng’thu pyein ung: ⁴⁹ “Khanpughi naw,” Khankhaw cu ka mang kiang ah kiak ci, Khomdek cu kang leh khän nak ah kiak ci. Kei ah hmawk ah a i ah mäih im na co khai ang? Kei ah om nak vai ah hmun cu a hawi ang a om? ⁵⁰ Kei ka mät naw ang tüi avan ka tüi piang ciah kä kia ne ang? ci ne pyein ci” ci ah om ci. ⁵¹ Stephen naw, “Nang mi cu nami ling aih aih ci, na mi m’lung naw Khanpughi kä zum hlawt ci, Khanpughi ah ng’thu phi kä nami zum hlük ci, nang mi cu nami pupa gui ah mäih ah Mumcha Theing cu ang täi sei nami hnu nak ci nei, ⁵² nami pupa gui naw kä ami shedam nak ah profet a u om ne ang? Ngah mi cu Khanpughi ah ng’düng ciah chang shäm akyum law vai ah mawng pyein ciah ng’shä gui cu ngawn ci gui nei. ⁵³ Tuk bäi nangmi naw cun ah Bawipa cu, ga ah kut ung ap neh nami ngawn pyi ci nei. Khankhaw chang gui ung Khanpughi naw aning peit gui ah ng’thu m’khän cu gah lang u neh, kä nami läk ci nei.” ci ne kiak nah gui ci. ⁵⁴ Judah kawngsi ng’vai gui cu Stephen ah ng’thu ng’zah u netah ami ha htui neh m’lung k’she ci gui. ⁵⁵ Cun ung phi Stephen cu Mumcha Theing awn be neh khankhaw cu han dan netah, Khanpughi ah bä khäk nak lah Khanpughi ah k’pat lam ung ng’düi ciah Bawipa Jesuh cu hmuk ci. ⁵⁶ Cun kawn ah Stephen naw, “Teng tu vä, khankhaw m’kawt ng’hmawng khätah, Khanpughi ah k’pat lam ung Chang ah Htapa ng’düi sei ka hmuk ci nei” ci ne pyein ci. ⁵⁷ Kawngsi ng’vai gui cu m’lau u neh, ami kut awn ami k’hnga ’bawm zawp u neh, ani ah om nak ah dawng lawk ci gui. ⁵⁸ Stephen cu phah u neh pigaw k’pung ah hteh püi u netah, ng’lung nah ne lung awn vawi ci gui. Vawi ciah chang gui cu ami suinu suut netah Soul ming nak ciah ak hmaw chang tumat am ap ci gui. ⁵⁹ Cun ah lung awn ami vawih zah ung Stephen cu, “Oh Jesuh Bawipa kamumcha na zuk la peä” ci ne ’taigü ci. ⁶⁰ Ani cu m’khuukdoong netah, “Khanpughi awi, shin ah chang gui ah ami kat nak cu m’gein gui ä” ci neh ak’aw m’can neh m’lau netah kät lawk ci. Soul cu Stephen ngawn vai ah zum tuk ciah chang ah kiak ci.

¹ Cu hnüüp ung tün neh Jerusalem ung om ciah khritha gui cu, ak she ah dudeiu nah gui ci ci gui. Cun ah kiah sei ngah mi cu Judea khaw lah Samaria khaw zung ah püi piang zawp u sei. Ang düihpüi gui bäng om ba ci gui. ² Zum ciah chang am shah cu Stephen nah gook cu m’cim u neh thui sei kyap m’lau ci gui. ³ Cun ung phi Soul naw khrithabum gui cu m’di gui vai ah ’tha nak ci. Ani cu a im tung päng ung hteit neh, hnumi ’pami sawkaih gui neh thawng ung chum gui ci. ⁴ A khaw hei hei ah püi piang ci gui ah zum ciah chang gui naw ng’Thu Ni cu hei pyein vük ci gui. ⁵ Philip cu Samaria khaw pigaw ak däm pi ung hteit neh Messiah ah mawng cu pyein ci. ⁶ Chang gui naw Philip ah m’dang ah cäi aih vai gui cu hmu u netah, ang thu cun phi akcang ah ngai ci gui. ⁷ Khaw ’she ah kai gui ah chang akda ung ka, khaw ’she gui cu m’lau ne lut law ne dawng ci gui. Akut khaw shum ciah chang gui phi gai ba ci gui. ⁸ Cun ah kia sei cun ah gawnu ung om ciah chang ami van cu zei kiai ci gui. ⁹ A cun ah pigaw ung Simon ming nak ciah chang tumat om ci. Ani cu amät naw amät ang vai pi ah pyein neh, k’ce kia ne Samaria chang gui cu cäi cat sak gui ci. ¹⁰ Ak kiom akshe, akpyam ang mang chang akda law u netah, “ani cu hlüng tai pi ciah Khanpughi am hlüngtai ah kiak ci nei” ci ne ang thu cu ngai ci gui. ¹¹ Ngahmi cu Simon ah ce ah mawng ung ami cäi cat nak she law pyi ci kiah sei cun nah m’hteih ne ngai ci gui ah kiak ci. ¹² Cun ung phi Khanpughi ah uk nak khaw a mawng ng’Thu Ni lah Bawipa Jesuh amawng Philip naw a pyein zum ciah chang ’hnumi ’pami cu tui ng’hnim ci gui. ¹³ Simon amät cun phi zum law tu netah, tui ng ’hnim tu neh Philip ah pei ah om tuk ci. Ani cu cäi aih gui vai lah ngaih khit gui vai cu hmu netah ang htei ah cäi cat ci. ¹⁴ Jerusalem ah om ciah ang düihpüi gui naw, Samaria chang gui naw Khanpughi ah ng’Thu ami do cu ng’zah u netah, Peter la Johan cu ngah mi ah om nak ah tüi gawi ci gui. ¹⁵ Ngahni gawk law ni netah zum ciah chang gui naw Mumcha Theing ami gah vai ah ’taigü pe gui ci gawi. ¹⁶ A i ah kiah sei ci ung cu hnüüp ung khüt sei, Mumcha Theing cu a u ah khan ah phi kä kyum law phak ciah kiak ci. Ngahmi cu Bawipa Jesuh ah ming awn tui bäng hnim phak ci gui ah kiak ci. ¹⁷ Cun kawn ah Peter lah Johan naw ami khan ah ani kut taih ni khä tah ngah mi cu Mumcha Theing gah ci gui. ¹⁸ Ang düihpüi gui naw ami kut ami taih nak ah chang gui, Mumcha Theing ami gah cu Simon naw hmu tu netah, ¹⁹ “Kei naw ka kut ka taih nak ah chang, Mumcha Theing a gah vai ah, kei am phi hlüng tai nak cu na pe tu vä” ci neh ngui pe gui ci. ²⁰ Cun ung phi Peter naw, “Nang naw Khanpughi ah m’gein nak cu ngui awn nak khleih khai ah na ngaih ah phäh ah na ngui cu, na mät awn atäng ah m’htei khaw a hteit sä; ²¹ Khanpughi ah ma ah nang ngaih käng düng ci kia sei kei mi ah bi nak ung, nang kä na bi tuk khai. ²² Cun ah na shet kat ah phäh ah nang zu ba vai, Cun ah na ngaih tüh cu Khanpughi naw a ning m’gein vai ah nak taigü vai. ²³ Nang cu m’thüi nak awn be neh kat nak ah thawng ung na kium ciah ka ning hmuk ci nei” ci ne kiak nak ci. ²⁴ Simon naw Peter lah Johan am?,“Tuk bäi na ni pyein gui cu kei ah khan ah kä a gawk law vai ah Khanpughi ah nak taigü pe nä” ci ne ng’zawi ci. ²⁵ Peter lah Johan cu Bawipa Jesuh ah mawng ani hmuh ng’zak gui m’dang neh Khanpughi ah ng’thu cu pyein ni netah Jerusalem ah hteit ba ci gawi. Ani hteh nak ba lam ah Samaria pigaw akda ung Bawipa Jesuh ah mawng ng’Thu Ni cu pyein ci gawi. ²⁶ Khanpughi ah khankhaw chang naw Philip am, “Ng’düi law neh Jerusalem ung ka naw Kaza ah hteh nak lam, htum lam ah hteit ä.” ci ne kiak nak ci. (Cun ah lam ung tuhbäi a u kä hteit ba ci). ²⁷ Cun vai am philip cu ng’düi law neh hteit ci. Cun zah ung Etheopia ghangpughang nu ah khawh m’htei pek ciah akci ami k’phyet ah Etheopian bawi tumat om ci. Ani cu a law nak ba ah lam pumung prophet Isaiah ah guk ah cang cim cu phat ci. ²⁹ Mumcha Theing naw Philip am, “ani ah om nak ah hteit neh atäng ah ng’gui püi ä” ci ne kiak nak ci. ³⁰ Cun ah kia sei Philip cu dawng ne apei ah hteit neh, Isaiah ah guk ah cangcim aphat cu ng’zah netah, “Na phat ah cang cim ah mawng cu na hmat ciang?” ci ne ng’shik ci. ³¹ Cun ah chang naw, “a u naw kä a nak phlan tu ung kä ka hmat hlawt khai” ci netah, Philip cu zatha kiaangung atäng ah a ngawh tu vai ah khü ci. Ani ah phat ah cangcim cu: ³² “Ngawn vai ami hteh püi ah Htome hta ah mäih ah ani cu hteh püi ci gui. Amu ami k’teiü peit ung ak’aw käm hluh law neh om ciah Htome hta ah mäih ah, ani cu ak’aw käm hluh law ah om ci. ³³ Ani cu ng’zo m’shaw nak gah ci, ani ah hmawk ah tutäng khai ah bi nak kä om ci. Khomdek khan ah ani ah ghin nak cu ng’pyi pyi ci kiah sei, Ani ah hta nau gui am m’thein m’kan gui khai tumat phi kä om ci.” ci ah kiak ci. ³⁴ Cun ah bawi naw, Philip am, “Prophet naw a u ah mawng a pyein ang? amät ah mawng ang? Chang hei ah mawng ang? nam thein tuä” ci ne ng’shik ci. ³⁵ Philip naw a cun ah cangcim awn tün neh, Bawipa Jesuh ah mawng Thu ’Ni cu m’thein tuk ci. ³⁶ Ngah ni cu hteit gäk gäk ni netah tui ah om nak ah gawk lawk ci gawi. Cun kawn ah cun nah bawi naw, “Shin zah ung tui om ci, tui kä kang hnim cang vai ah na shung shet ci ah mawng a i om ne ang?” ci neh ng’shik ci. ³⁷ (Philip naw, “Nang cu nam lung kyawng avan awn Bawipa Jesuh na zum ah akiak ung tui nang hnim vai” ci neh kiak nak ci. Cun ah bawi naw, “Bawipa Jesuh Khrit cu Khanpughi ah Htapa ah kiak ciah, kei naw ka zum ci nei” cik ci.) ³⁸ Cun kawn ah ng’se cu ng’düm sak netah, ngah ni cu tui ung zu kyum law ni neh Philip naw cun ah bawi cu tui ng’hnim sak ci. ³⁹ Ngah ni cu tui ung ka, ani kai law ba vai am, Khanpughi ah Mumcha Theing naw Philip cu, a khaw hei ah hteh püi sei cunah Bawi naw Philip cu kä hmuh ba ci. Cun ung phi ani cu zeikiai neh lam hteit ba ci. ⁴⁰ A kawn ah Philip cu Azotus gawnu ah gawk ciah hmat lawk ci. Cun kawn ah Sisarea ah hteit ba neh, ahteh nak ba ah lam apigaw päng ung Bawipa Jesuh ah mawng ng’Thu ’Ni cu hei pyein vük ci.

¹ Cun ah akhin ung Soul naw Bawipa ah hnu läk ci gui cu, ngawn pha gui vai ah pawng püi ci. Ani cu ’taigü tung ah hteit natah, ² Bawipa ah hnu läk ciah hnumi ’pami avan ahmuh ung phah neh Jerusalem ah alaw püi nak hning vai ah ap nak ah ca cu, Damaskas ah pum im gui ah ami guk vai ah vah pyein ci. ³ Soul cu Damaskas gawnu pei ah agawk law zah ung khan khaw ah ka akdei cu ang ghit ah ng’dang law neh khang neh shü lawk ci. ⁴ Ani cu khomdek ung kiu neh ng’zän netah, “Soul, Soul?, a i ah kiah sei kei nah na k’dudeiu nak ang?” Ciah ’aw cu ng’zak ci. ⁵ Soul naw, “Bawipa Nang cu a u ang?” cineh ng’shik ci. ⁶ A cun ah k’aw naw, “Kei cu nang naw nak dudeiu nak ah Jesuh nei, cun ung phi tuk bäi ng’düi law ba neh, pigawnu kyawng ah hteit ä, cun kawn ah na bi vai cu na hmat lawk khai nei” ci neh kiak nak ci. ⁷ Soul awn ng’gui lawk ciah chang gui cu, cun ah k’aw ng’zah tupang u neh phi, a i phi kä hmu tuk ci gui kiah neh cäi neh ng’düi ci gui. ⁸ Soul cu m’dek ung ka, ng’düi law ba neh phi amik awn a i kä hmuh ba ci. Cun ah kia sei ang gui püi gui naw, ani cu akut ung k’pang tuh neh Damaskas ah hteh püi ci gui. ⁹ Ani cu ak hnüp thum güt ung a i kä hmu teng ba ci, cun zah pum ung a i phi kä ei auk ah om ci. ¹⁰ Cun zah ung Damaskas ah Ananias ming nak ciah, Khrihta tumat om ci. Ang muimang ung Bawipa naw, “Ananias awi” ci neh khü khätah, “Shi ah ka om ci nei Bawipa” ci neh äi ci. ¹¹ Bawipa naw, “Nang cu ng’düi law neh lam ng’düng ming nak ciah lam ung hteit netah, Judas ah im ung Tarsus pigaw ah ka, Soul ming nak ciah chang cu nah vah shui vai. Ani cu ’taigü netah, ¹² ang muimang ung, Ananias ming nak ciah chang law neh, ak khan ah akut taih khätah amik m’dei law ba ciah, hmuh pyi ci nei” ci neh kiak nak ci. ¹³ Ananias naw, “Bawipa, Jerusalem ah na chang gui ah khan ah, cun ah chang naw ak she ah abi lawh gui cu, chang akda naw pyein u sei kang zah pyi ci nei. ¹⁴ Ani cu ’taigü khem ah peit ah bi nak hning awn, nang ning khanihnah ciah chang gui cu, pha gui khai ah, Damaskas ah lawk ciah kiak ci nei” ci neh pyein ci. ¹⁵ Bawipa naw ani am, “Hteit ä, cun ah chang cu, chang pakhui hei gui, ghangpughang gui lah Israel chang gui am, keiah ming cu m’thein gui khai ah ka ghü ah kiak ci nei. ¹⁶ Kei ah hmawk ah a zaica nak gui vai ah mawng cu, ka mät naw, ani am kam dang khai nei” ci ne kiak nak ci. ¹⁷ Cun ah kia sei Ananias cu Soul ah om nak tu ah im ah hteit netah, ak khan ah akut taih ne, “Ka nau Soul awi, na mik am dei ba vai lah, Mumcha Theing awn na be vai ah hmawk ah, na law nak lam ah na ma ah ng’dang ciah Bawipa Jesuh naw kei cu ana tüih law nei” ci neh pyein ci. ¹⁸ A cun vai am Soul cu ak phlep gui ng’kawk ciah mäih ah amik ung ka, kiah law sei amik cu ci ba ci. Ani cu tho law neh tui ng’hnim ci. ¹⁹ Cun kawn ah tuiei eiawh seih ak thagui be law ba ci. Soul cu Damascus ah zum ciah chang gui awn atäng ah ashäng om ci. ²⁰ Ani cu pum im ah hteit neh Bawipa Jesuh cu, Khanpughi i ah htapa ah akiak ah mawng ng’thu pyein ci. ²¹ Ani ah ng’thu ng’zak ciah chang gui cu cäicat u nehtah, “Shin ah chang cu, Jerusalem ah Bawipa Jesuh ah ’taigü ciah chang gui phung ngawn phah gui ciah kä kia ne ang? Zum ciah chang gui phung phah ne, ’taigü pa gui ah om nak ah hteh püi khai ah sha lawk ciah kä kia ne ang?” ci ne kiak ci gui. ²² Cun ung phi Soul naw, Bawipa Jesuh cu Messiah ah akiak ah mawng cu m’khüt näng nak awn pyein khä tah, Damascus ah om ciah Jew chang gui naw käm hlan tuba hlawt ci gui. ²³ Khaw hnüüp akda ashou law kawn ah, Jew chang gui cu ng’bum uneh, Soul cu ngawn vaiah ng’ge ci gui. ²⁴ Cun ung phi ngahmi ah ng’ge cu Soul naw hmat ci. Ngahmi cu Soul ngawn vaiah amü, ak hnüüp pigaw m’kawt päng ung ng’mah ci gui. ²⁵ Cun ung phi Soul cu ak chang gui naw, khawmü ah vawh ung m’khäp netah, ng’vawng k’pung ah hei chah ci gui. ²⁶ Soul cu Jerusalem ah hteit ba netah ang düihpüi gui ung ng’dawn tuk khai ah k’tha nak ci, Cun ung phi ngahmi naw, ani ang duihpüi ah akiak law tu cu, akcang ah kä ngai u netah kyih ci gui. ²⁷ Cun kawn ah Barnabas naw, Soul cu ang düihpüi gui ah om nak ah khah law püi netah, Bawipa cu Soul naw lam cawih ah ahmuh law amawng, Bawipa naw Soul ang thu püi ah mawng la Damascus ah Soul naw Bawipa Jesuh ming awn ng’thu a pyein ah mawng gui cu tän neh m’thein gui ci. ²⁸ Soul cu ang düihpüi gui awn atäng ah om tuh netah, Jerusalem avan ung hteit neh, Bawipa Jesuh ah ming ung näng nak awn ng’thu pyein ci. ²⁹ Ani cu Greek thu ah ng’thu ci gui ah Jew chang gui awn phi, ng’küüknet neh ng’thu pyein ci gui, Cun ung phi ngahmi naw ani cu ngawn vaiah ng’ge nak ci gui. ³⁰ Cun ah mawng cu ak chang gui naw ng’zah u netah, Soul cu Siesarea ah hteh püi u neh cun ung ka naw, Tarsus ah hteh sak ci gui. ³¹ Cun ah kia sei cun yah ung, Judea, Kalile, la Samaria khrihtabum gui cu ding gei nak om lawk ci. Khrithabum ghui cu Khanpughi kyih aa m’hlüngtai u ne, Mumcha Theing ah htagui be nak awn da law pi k’täi ci gui. ³² Peter cu kho päng ung hteit shüi netah, hnüät ung Khanpughi ah chang gui ah om nak, Lidda pigaw ah gawk lawk ci. ³³ A cu ah shum ne khem ne, kho kum cheit ung zän ci ah Aeneas ming nak ciah chang cu Peter naw hmu netah, ³⁴ “Aneas, Jesuh Khrit naw ning gai sak ci nei, tho ne na ih phak look ä” ci ne kyak nak sei, Aenaes cu a cun vai am hto lawk ci. ³⁵ Cun cu Lidda la Sharon pigaw ah om ci ah chang gui naw hmu u netah, Bawipa cu ami van naw zum lawk ci gui. ³⁶ Joppa pigaw ung, Khanpughi zum ci, Tabitha ming nak ciah hnumi tumat om ci. (Karik thu awn ah ming cu Dorcas ah kya ne kigang ciah kyak ci). Ani cu angtäi sei ak ni bi ne chang phi geinsei ci. ³⁷ Ani cu gaw ne sik sei m’si m’hla u na im akhan kyong ah m’shän ci gui. ³⁸ Lidda pigaw cu Joppa gawnu awn et ci kia sei, zum ciah chang gui naw Peter cu Lidda ah a om hmat u netah, “keimi ah ak zang ah a law vai nei” ci ne m’cäi ne chang hnih tüi ci gui. ³⁹ Cun ah kia sei Peter cu, cun ah chang goi awn atäng ah gui law tuk ci. A gawk law vai am chang gui naw Peter cu im akhan kyong ah hteh püi ci gui. Hmeinu gui cu kyap ne Peter ana bui u ne, Dorkas naw a ghin zah ung a tah ah suinu suitha gui cu ana m’hnuh ci gui. ⁴⁰ Peter naw cun ah chang gui ami van k’caw ah tüi gui netah, khuuk dong ne taigü ci. Cun kawn ah gook lam ah ng’hlat netah, “Tabitha, hto vä,” ci ne pyein ci. Tabitha cu m’dei law ba ne, Peter cu hmu netah, hto ne ngok ci. ⁴¹ Peter naw cun ah hnumi cu k’pang ne ng’düih sak netah, hmeinu gui mah mah ah zum ciah chang gui ami van cu khü gui ne, ghing ba ciah Dorkas cu ap gui ci. ⁴² Cun ah mawng cu Joppa kho van ung thang sei, chang akda naw Khanpughi cu zum lawk ci gui. ⁴³ Peter cu cun ah Joppa pigaw ah mehvun piang ciah Simon awn atäng ah ak sho om tuk ci.

¹ Sisaria gawnu ah Konelius ming nak ciah chang tumat om ci. Ani cu Italian ming nak ciah Roman gaakap shekshen ung kaptain ah kya ci. ² Ani la akyong ung kaa gui ami van cu Khanpughi zum ne kyih aa ci gui ah kia ci. Ani cu Jew chang gui am akda pe taak gui ne, angta"i sei Khanpughi ah taigü ne om ci. ³ Kho k’awi ät nayi thum akhin ung Khanpughi ah khan kho chang cu kyum law ne, “Konelius” cine khü sei hmu ng’zak ci. ⁴ Ani cu cäicat ne khankho chang cu teng netah, “Bawi awi, a i nei” ci ne ng’shik ci. Khankho chang naw, “Na taigü la m’gein nak na bi lawh gui cu Khanpughi naw m’hni ne ning zum ci nei. ⁵ Atukbäi chang tüi ne Joppa gawnu ah Simon Peter ming nak ciah chang cu thäm sak gui ä. ⁶ Ani cu mehvun piang ciah Simon ah im ung om tuk ci, cun ah im cu tuinu kem ah om ci” ci ne kiak nak ci. ⁷ Khankho chang hteit ba khäh tah Konelius naw ak chang shäm hnih la zum nak om ciah ang ngaih u ah gaakap tumat khü gui netah, ⁸ amawng avan m’thein gui ne, Joppa pigaw ah tüi gui ci. ⁹ Ngahmi cu hteit gäk gäk u ne, a ngawi ung Joppa gawnu pei ah gawk law ci gui. Cun zah cu kho hnüüp lung zah ah kya sei Peter cu taigü khai ah im kiungah hang kai ci. ¹⁰ Ani cu ei cawi lawk ci, a ei auk vai ami pian sang ung ani cu mik hmuk ci. ¹¹ Cun ah amik hmuh nak ung khan kho cu ng’hmawng khätah akit phli ung zu khüt va gawk ciah, zih dung nu ah mäih cu khomdek khan ah kiah law sei hmuk ci. ¹² A cun ung kuhzawng khisa, phyuciik khamkho, phiukha avan küm ci. ¹³ “Peter; tho law ne, ngawn ne ei gui ä” ci ah k’aw cu ng’zak ci. ¹⁴ Peter naw, “Bawipa! Cun ah kä kia khai nei, a i zah ung phi kei naw sheka ne kä theingthap ci cu kä ka ei man ci nei” ci nepyein ci. ¹⁵ Cun kawn ah k’aw ng’shan law ba mä ne,“Khanpughi naw theingthap ciah a pyein cu nang naw kä theingthap ciah kä na pyein vai.” ci ne pyein ba ci. ¹⁶ A cun laihlaih ah thum vei a kiak awn ah, zihdung nu ah mäih ah kia lawk ci cu, khankho ah ng’lim ne maih ba ci. ¹⁷ Peter naw cun ah amik hmuh ah mawng cu ak tung ah ngaih tüh ne om ci. Cun zah ung Konelius ah tüih law ah chang gui cu, Simon ah im k’tä ne shui u ne, m’kawt law pei ah gawk law ne ak düi ci gui. ¹⁸ Cun ah chang gui naw, “Simon Peter ming nak ciah nami khin om tu naw?” ci ne ak shi gui ci gui. ¹⁹ Peter naw amik hmuh ah mawng a ngaih tüh khit sang ung, Mumcha Theing naw,“Chang thum naw ning shui lawk ci gui nei, ²⁰ Tho law ne zu kyum ä, ngahmi cu kei naw ka tüih law gui ah kia sei kä shokshü ne ngahmi awn atäng ah na hteh tu vai nei” ci ne kiak nak ci. ²¹ Cun ah kia sei Peter cu lut law netah, “Nangmi naw nami shui ah chang cu kei nei, a i a mawng om sei nami lawk ci ang?” ci ne ng’shi gui ci. ²² Cun ah chang gui naw, “keimi cu kaptain Konelius naw ana tüih law gui nei, Ani cu chang k’ni, Khanpughi zum ci, Jew chang gui naw ami kyih aa ah chang ah kiak ci nei. Khankho chang naw ani ah ma ah nang ning khü ne, na thu a ngaih vai ah pyein ci nei” ci ne pyein ci gui. ²³ Peter naw cun ah chang gui cu kyong ah khü gui netah, cu mü ih tu sak gui ci. A ngawi ung Peter cu khü lawk ci gui ah zung ah theit tu sei, Joppa gawnu ah kaa zum ciah chang gui cun phi hteit tuk ci gui. ²⁴ A ngawi ung Peter cu Sisarea gawnu ah gawk law sei, a na ng’bum ci gui ah Konelius la a phäi nau a teih püi gui naw a na do ci gui. ²⁵ Peter a luh law vai am Konelius naw a na do ne a kho pei ah m’khuuk dong ne ngok ci. ²⁶ Cun ung phi Peter naw, “Tho law ba, kei phi chang ah ka kiak ci nei” ci ne Konelius cu thawh ba sak ci. ²⁷ Cun kawn ah Konelius awn atäng ah ng’htau ne im kyong ah va lut netah, chang akda ana bum u sei hmuk ci. ²⁸ Cun ah chang gui am Peter naw, “Jew chang tumat cu chang pakhui hei ung kä ah khawtsheng tu vai, kä ah ng’et sheng tu vai, ciah zum nak cu nami hmat pyi ci. Cun ung phi, a u shekak ci, a u kä theingthap ci, ci ne käm khoichaa vai ah Khanpughi naw nam hnuh pyi ci nei. ²⁹ Cun ah kia sei, kei cu na khü ci sei kä shokshü ne ka lawk ci, kei nah na khü ah mawng cu pyein law shüm ä” ci ne kiak nak ci. ³⁰ Konelius naw, “hnüüp thum lüng lawk ciah kho hnüüp ät, kho k’awi nayi thum ung kei cu im kyong ah taigü ne ka om ci. Cun zah ung pyü ne ng’shü sei suisak ciah chang tumat cu ka ma ah ng’düi law ne, ³¹ “Konelius! na taigü cu Khanpughi naw ng’za ne, na peit taak cun phi do pyi ci nei. ³² Cun ah kia sei Joppa pigaw ah chang tüi ne, Simon Peter ming nak ciah chang cu na khaw vai. Ani cu tuinu kam pei ah mehvun piang ciah Simon ah im ah om tuk khai nei” ci ne pyein ci. ³³ Cun ah kya sei kei naw chang akzang ah ka tüih law nei. Nang na law ah phäh ah ang thei ah ka zei kyai ci nei. Bawipa ah mawng cu nang ah thu awn kami ng’zak khai ah keimi cu Khanpughi ah ma ah kami gawk law pyi ci nei” ci ne pyein ci. ³⁴ Cun kawn ah Peter naw, “Khanpughi naw ak cang ah chang ah müi hmai ak zaw ak däm kä teng ci, ci cu ka hmat pyi ci nei. ³⁵ Ani kyih aa ne ang zaak hlü ah om ciah chang phung cu, Khanpughi naw pakhui käm khoi chak ci. ³⁶ Israel chang gui am, chang van ah Bawi, Jesuh Khrit ung dimdeeih nak thu k’ni a peit cu nami hmat pyi ci nei. ³⁷ Johan naw tuihnim nak ah mawnglam a pyein kawn ah Kalile ung tün ne, Israel kho avan ung dangshai ci gui la, ³⁸ Nazaret chang Bawipa Jesuh ah khan ah Khanpughi naw Mumcha Theing la hlüng tai nak a peit ah mawng cu nami hmat pyi ci. Ani cu Khanpughi naw atäng ah om püi sei, hteit shüi shüi ne, khoshe ah ei auk gui ah chang gui m’gein gui ne gaigawng sak gui ci. ³⁹ Jerusalem gawnu la Israel kho ung Bawipa naw abi lawh nak gui nüng ung keimi cu saksi ah kami kiak ci. Bawipa cu chang gui naw kutlam tung ung khen ne ngawm ci gui. ⁴⁰ Cun ung phi Khanpughi naw ak hnüüp thum hnüüp thawh ba sak ne, dang ba sak ci. ⁴¹ Chang nüng naw Bawipa cu kä hmuk ci, Khanpughi naw saksi ah ana ghü gui ah keimi naw vah kami hmuk ci. Keimi cu Bawipa sih nak ung kaa a thawh ba kawn ah atäng ah kami ei auk ci. ⁴² Bawipa naw chang gui am thu k’ni kami thein vai la Bawipa cu ak si, ak ghing van m’khoichak khai ah Khanpughi naw am düih ah mawng, kami pyein vai ah khän ne nam cäi gui ci. ⁴³ Bawipa zum ci gui ah chang phung cu a hlüngtai nak ming awn ami kat nak m’geinsei gui khai, ci ne prophet gui naw pyein man ci gui” ci ne pyein ci. ⁴⁴ Cun ah Peter naw thu a pyein sang ung thu ngai ciah chang van ah khan ah Mumcha Theing cu kyum lawk ci. ⁴⁵ Chang pakhui hei gui cun naw phi Khanpughi ah Mumcha Theing cu gah tu u khä tah, Joppa ah kaa Peter awn atäng ah lawk ci gui ah Jew chang gui cu ang htei ah cäicat ci gui. ⁴⁶ A i ah kia sei ci ung ngahmi naw kä hmat ah ng’thu awn Khanpughi ami hlüng tai ah hmawk ah kia ci. ⁴⁷ Cun kawn ah Peter naw, “Shin ah chang gui cu mik mi ah mäih ah Mumcha Theing gah ci gui ah kia ci, cun ah kia sei tui ami hnim vai cu a u naw maa nah gui hning khai ang?” ci ne pyein ci. ⁴⁸ Cun kawn ah Peter naw ngah mi cu Bawipa Jesuh Khrit ah ming ung tui ami hnim vai ah khän gui ci. Ngahmi naw Peter cu a om tu shäng cang vai ah chokai ci gui.

¹ Chang pakhui hei gui naw phi Khanpughi ah Thu Ni ami dogah tu ah mawng cu Judea kho ung ang düihpüi gui la zum pyi ci gui ah chang gui naw ng’za ba ci gui. ² Peter cu Jerusalem ah gawk law khä tah vun aat bi ne zum ciah chang gui naw ng’cecäk püi ci gui. ³ Ngahmi naw, “Nang cu vun aat nak kä bik ci gui ah chang gui ah hteit ne ngahmi awn atäng ah na ei awk tuk ci nei” ci nak ci gui. ⁴ Cun ah kia sei Peter naw amawng ama avan cu va tüi netah m’thein tu gui ci. ⁵ Peter naw, “Kei naw Joppa pigaw ah kamik hmuh nak ung, zih dung nu ah mäih cu, ak kit phli ung k’pang ne, khankho ah kaa ami zuk chah law cu ka hmuk ci. ⁶ Cun ah zihdung nu cu ka pei ah ng’et law sei, m’htei ne teng law ung, kuhzawng khisa, phyuciik khamkhaw, la phyukha gui ah kia sei ka hmuk ci. ⁷ Cun kawn ah, “Peter tho law ne, ngawn ne ei gui ä” ciah k’aw cu ka ng’zak ci. Cun ung phi kei naw, “Bawipa, kä bä khai nei, kä theingthap ci la shekak ci cu kei naw a i sang ung phi kä ka ei man ci nei” ci ne ka pyein tu ba ci. ⁸ Cun ah k’aw naw, “Khanpughi naw theingthap ciah a pyein cu nang naw kä theingthap ciah kä na pyein vai” ci ne pyein ci. ⁹ A cun laih laih ah thum vei kia netah, a cun gui cu khankho ah ng’lim ne maih ba ci gui. ¹⁰ Cun kawn ah ka om nak ah im ah chang sing thum gawk law ghet ci gui. ¹¹ Ngahmi cu Sisarea ah kaa kei ah ami tüih law gui ah kiak ci. ¹² Mumcha Theing naw kä ng’shauk ne ngahmi ung ka ng’läk tu ge vai ah pyein ci. Joppa gawnu ah kaa zum ciah chang sing chuk cun phi kei awn atäng ah hteit tu u sei, kami van cu Konelius ah im ah kami lut ci. ¹³ Konelius naw a im kyong ah khankho chang ng’düi law sei a hmuh ah mawng la, cun ah khankho chang naw Joppa gawnu ah chang tüi ne Simon Peter ming nak ciah chang cu va khü ä. ¹⁴ Ani naw nang la na kyong ung kaa gui naw hun nak nami gah nak vai ah thu ni cu ning thein gui khai nei” ci ne a pyein ah mawng cu nam then tu gui ci. ¹⁵ Cun kawn ah kei naw tün ne thu ka pyein law zah ung, Mumcha Theing cu a htük ung keimi ah khan ah a gawk law ah mäih ah, ngahmi ah khan ah phi gawk law ci. ¹⁶ Cun kawn ung Bawipa naw, “Johan naw tui awn hnim nak pek ci, cun ung phi nang mi cu Mumcha Theing awn hnim nak na mi gah khai” a ci cu ka shüm ba ci. ¹⁷ Khanpughi naw Bawipa Jesuh Khrit mi zum ci gui am m’gein nak ana peit gui ah mäih ah akhui hei gui am phi a peit gui cu dang ci nei. Cun ah kia sei kei cu a i ah kia ne phi Khanpughi cu kä ka maa na hlawt khai” ci ne pyein ci. ¹⁸ Cun ah thu ng’za u netah cun ah chang gui cu, kä pyein m’shet ba u ne, “Khanpughi naw chang pakhui hei gui am phi, ng’zuvat ba ne ghin nak gah vai ah mawng cu pe gui ci nei” ci ne Khanpughi cu m’hlüngtai ci gui. ¹⁹ Bawipa Jesuh zum ciah chang gui cu Stephen ami ngawn zah ung ami shedam ngawn pha gui ah hmawk ah a hei hei ah püi piang zawp ci gui. Am shah gui cu Phoenisia, Saipras, la Antiok gawnu zung ah gawk u ne thu ni cu Jew chang gui bäng am m’thein gui ci gui. ²⁰ Cun ung phi Sairin la Saipras ah kaa zum ciah chang gui cu Antiok ah hteit u ne, Bawipa Jesuh Khrit ah mawng thuni cu chang pakhui hei gui am phi m’thein gui ci gui. ²¹ Ngahmi ung Bawipa ah hlüngtai nak cu om sei, chang akhli naw Bawipa cu zum ne ng’hlat lawk ci gui. ²² Shin ah a mawng gui cu Jerusalem ah khrithabum gui naw ng’za u netah Barnabas cu Antiok ah tüi ci gui. ²³ Ani cu cunah gawnu ah gawk ne, Khanpughi naw chang gui am hriham a peit gui cu hmu ne zeikyai netah, ami m’lung kyong avan awn Khanpughi zum ne ng’düng nak awn ami om vai ah m’cäi gui ci. ²⁴ Barnabas cu chang k’ni ah kia ne, Mumcha Theing awn phi be ne, Düng nak awn phi küm ci kia ne, chang akda cu Bawipa ah khü law gui ci. ²⁵ Cun kawn ah Barnabas cu Soul shui khai ah Tarsus ah hteit ci. ²⁶ Ani cu hmuh netah Antiok khaw ah law sei, ngahmi cu a khokum pum khrithabum gui awn ng’hmuh u ne, chang akda cu m’theithang ci goi. Bawipa zum ciah chang gui ak htük bäih ah Khrihta ah ami khü nak gui cu Antiok gawnu ah kiak ci. ²⁷ Cun ah khin ung Prophet amshah gui cu Jerusalem ah kaa Antiok ah lawk ci gui. ²⁸ Cun gui ung kaa Akabus ming nak ciah prophet cu Mumcha Theing ah thamah nak awn düi law netah khomdek khan avan ung kho zaw ne ei ng’geing khai” ci ne k’cä ci. (Ghanpughang Klaudius ah uk sang ung ak cang ah kho zaw ne ei ng’geing ci). ²⁹ Zum ciah chang gui naw ami m’khüt hning phäh phäh ah, Judea kho ah khritha phäi nau gui cu peit taak gui vai ah k’bäi ci gui. ³⁰ Cun ah k’bäi u netah Jerusalem Khrithabum a gham gui am ami peit taak ah ngui gui cu, Barnabas la Soul am m’khäh gui ci gui.

¹ Cun ah khin ung ghangpughang Herod cu Khritha gui k’dudeiu nak gui vai ah tha nak ci. ² Ani naw Johan ah nau James cu khim awn ngawn sak gui ci. ³ Cun ah amawng Jew chang gui naw ami ng’zaak hlü hmat netah Peter cu pha ne khit ci. (Cun ah khin cu k’cow kä shum ne m’htut den ah pawi khin ah kia ci.) ⁴ Herod naw Peter cu a pha kawn ah chang sing phli ci lawk ciah gaakap hläm phli am ap ne thawng ung chum ci. Herod naw ani cu Pasakha pawi ang pyi kawn ah Jew chang khli ah ma ah m’khoicha vai ah k’bäi ci. ⁵ Cun ah kya sei Peter cu thawng ung chum ci gui. Cun ung phi khrithabum gui naw ami m’lung m’hlün ne Khanpughi ah taigü pek ci gui. ⁶ Herod naw Peter cu chang gui ah ma ah kä a k’plawk pha ah kho mü ät ung, Peter cu ngäng ciah gaakap hnih ang lak ung ip ci. Ani cu m’si gui hnih awn khih u ne, thawng m’kawt pei ah phi gaakap gui naw ngäng ci gui. ⁷ Khanpughi ah khankho chang cu ang ghit ah Peter ah pei ah ng’düi law sei, thawng im kyong cu dei ne khang ci. Khankho chang naw Peter cu ak phleing ung pang ne, “ang ghit ah tho law” ci ne m’tho ci. A cun vai am Peter ah kut ung m’si gui gui cu ng’phian ne zu kia vü yawp ci. ⁸ Khankho chang naw, “na khei htün ne na phahnak ng’cum ba ä” ci ne kiak nak ci. Peter naw a pyein na mäih ah bik ci. Cun kawn ah khankho chang naw, “na suinu sui ne ka hnu ah na läk lawä” cik ci. ⁹ Peter cu thawng kyong ah kaa lut law ne khankho chang ah hnu ah läk ci. Ani naw khankho chang ah bi cu ak cang ah kä ngai ci, amät mik hmuk ciah vah ngai ci. ¹⁰ Ngahni cu vah hleih ci la tawi nak ah ami ngäng nak ah m’kawt cu phlän ni ne, thawng m’si m’kawt nu pei ah gawk law ci goi. Cun ah m’si kawt cu amät hmawng law khä tah ngah ni cu lam gäk gäk ung lut law ne hteit ci goi. Cun kawn ah khankho chang cu ang ghit ah Peter ah pei ah kaa maih ba ci. ¹¹ Peter cu ang shüm law ba kawn ah, “Khanpughi naw a khankho chang cu tüi law ne, Herod ah kut ung kaa la Judah chang gui naw kei ah khan ah ami bi law vai ah zaica nak ung kaa a na phiawn cu tuk bäi ka hmat pyi ci nei” cik ci. ¹² Cun ah a hmat law ba kawn ah ani cu Johan Maku ah nu Mari ah im ah hteit ci. Cun ah im ah chang akda ng’cut ne taigü ci gui. ¹³ Peter naw cunah im kawt cu hei khäk khä tah, choh hmawng khai ah Rodah ming nak ciah ami shäm ah hnumi hta cu lawk ci. ¹⁴ Ani cu Peter ah k’aw hmat ba ne zeikyai netah, choh phi kä hmawn ling ah im kyong ah dawng ne lut ba ne, m’kawt pei ah Peter law ne ang düih cu chang gui am m’thein gui ci. ¹⁵ Cun ah chang gui naw, “nang na gu ci ma?” ci ne kiak nak ci gui. Cun ung phi cun ah ami shäm ah hnumi hta naw ak cang a pyein nah ling ba khä tah cun ah chang gui naw,”Cun ung Peter ah khan chang ah kiak khai” cik ci gui. ¹⁶ Peter naw choh cu hei khäk laih laih khä tah choh ak hmawng u ne, Peter cu hmu u netah cäicat ci gui. ¹⁷ Peter naw a düm ah ami om vai ah a kut awn nüt ne m’cäi gui netah, Khanpughi naw thawng ung kaa ak phiawn ba ah mawng cu m’thein tu gui ci. Cun kawn ah “Shin ah mawng cu James la khritha phäi nau gui am m’thein tu gui vä” ci ne m’cäi gui netah a kho hei lam ah hteit ci. ¹⁸ Kho thai law khä tah, “Peter hawi kiak ci ang” ci ne ngäng ciah gaakap gui cu ang htei ah cäicat ne kyikyawk ci gui. ¹⁹ Herod naw Peter cu shui ba sak gui sei, shui ba ne kä hmuh ba u khä tah ngäng ci gui cu ngawn gui vai ah k’bäi ci. Cun kawn ah Herod cu Judea kho nawng shüt ne Sisarea ah hteit ne om shäng shäng ci. ²⁰ Herod cu Taiar la Sidon ung om ci gui ah chang gui ah khan ah ang htei ah m’lung she khätah, ngahmi cu ng’cut u ne ani cu hmuk khai gui ah lawk ci gui. Ak htük bäih ah mang im uk ciah chang Blastus cu hmuh u netah, ani ah m’gein nak gui awn ghangpughang ah hteit u ne dim gei nak htu pyein ci gui. A i ah kya sei ci ung ngahmi cu Herod ah kho ung kaa ei auk vai ami gah tu ah hmawk ah kiak ci. ²¹ A mi k’bäi nak hnüüp ung Herod cu bawi ah mang zih sui ne, ghangpughang ah mang kiang ung ngoh netah, chang gui ah ma ah ng’thu pyein ci. ²² Chang gui naw, “Shin ah k’aw cu chang ah k’aw ah kä kiak ci Khanpughi ah k’aw ah kiak ci” ne ci ne m’lau ci gui. ²³ Acun vai am Herod cu Khanpughi kä akchang m’sui ah phäh ah Khanpughi ah khan kho chang naw m’di sei, ak seng naw ei sei sik ci. ²⁴ Cun zah ung Khanpughi ah thu cu kho ung thang sei zum ci cu da law pi law pi k’täi ci. ²⁵ Barnabas la Soul cu ani bi ng’pyi law sei Johan Maku khah püi ne Jerusalem ah law ba ci goi.

¹ Antiok khrithabum kyong ung prophet gui la saya gui akda om ci gui: Cun gui cu; Barnabas, Simeon (Pa Le ah phi ami khü) Sairin ah kaa Lucius, Herod Antipas ah a püi Manaen, la Soul ah kiak ci. ² Cun ah chang gui cu Khanpughi ah taigü ne, ei hlawi ne ami om zah ung Mumcha Theing naw ngahmi am, “Kei ah ka bi bik khai goi ah Soul la Barnabas cu khän ne ghü goi vä” ci ne kiak na gui ci. ³ Ngahmi cu ei hlawi ne taigü u ne, ani khan ah ami kut taih neh taigü u netah Khanpughi ah bi bik khai ah tüi goi ci gui. ⁴ Barnabas la Soul cu Mumcha Theing ah lam shüm ah mäih ah Seleucia gawnu ah gawk ni ne, cun ung kaa naw Saipras ah htinpaw awn hteit ci goi. ⁵ Ngahni cu Salamis ah gawk ni netah Judah gui ah pum im ung Khanpughi ah thu pyein ci goi. Johan Maku cun phi ani bi bi lawh püi gui ne ng’gui tuk ci. ⁶ Ngahmi cu cun ah tuikoi phlän ne, Paphos gawnu ah gawk ci gui. Cun ah pigaw ah Bar-Jesuh ming nak ciah, Judah chang prophet ah ng’hlawk ciah k’ce tumat om ci. ⁷ Ani cu gawmang Sergius Paulus a teihpüi ah kiak ci. Cun ah gawmang cu hmuhmat thei ciah chang ah kia ci. Ani cu Khanpughi ah ng’thu ng’za hlü netah Barnabas la Soul cu khü goi ne pyein sak goi ci. ⁸ Cun ung phi (karik thu awn Elimas ming nak ciah) k’ce naw, gawmang naw kä a zum hlawt vai ah Barnabas la Soul cu ng’cuhcan püi goi ci. ⁹ Cun ah kia khä tah Paul ah phi ming ciah Soul cu Mumcha Theing awn be ne k’ce cu kheing ne teng netah, ¹⁰ “Khoshe ah hta, akni m’cheishoh ciah gaa, hleeihlak thei ciah chang, nang cu Khanpughi ah düng nak shek khai ah na bik ci nei. ¹¹ Nang cu a tuk bäi Khanpughi naw ning m’di sei na mik m’dauh khai, khokum ak shou khohni kä na hmu tu ba khai,” ci ne tam ci. A cun vai am k’ce Elimas cu amik le naw shung ne mü sei, akut ung k’pang ne khah tu püi khai cu shui zap ci. ¹² Gawmang naw acun ah mawng gui hmu netah, Bawipa Jesuh cu zum lawk ci, Bawipa ah thu ang ngaih zaak tu ah hmawk ah ang htei ah cäicat ci. ¹³ Paul la a paw gui cu Paphos gawnu ung kaa htinpaw awn Pamphilia kho, Petka gawnu ah gawk ci gui. A cun ung Johan Maku naw nawng gui shüt ne Jerusalem ah hteit ba ci. ¹⁴ Ngahmi cu Perka gawnu ung kaa naw Pisidia kho Antiok gawnu ah gawk u ne, kyin hnüüp ung pum im ah hteit ne ngok ci gui. ¹⁵ Mose ah thu khäm la prophet gui ah ca guk gui cu ami phat pyi kawn ah, Pum im ung ang vai gui naw, “Phäi nau gui aw, chang gui ah thamah nak vai thu nami pyein vai a om ah a kiak ung, nami pyein vai kami zaak hlük ci nei” ci ne chang tüi law ne pyein lawk ci gui. ¹⁶ Paul naw ng’düi law ne akut awn nüt netah thu a pyein cu,; “Israel chang gui la Khanpughi zum ciah khui hei chang gui, ngai zawp vä! ¹⁷ Israel chang gui ah Khanpughi naw mi pughi pa gui cu Egypt kho ah omk’tu ah kia ne ami om tu zah ung ghü gui ne pakhui mah ah am düih gui ah kia ci. A hlüngtai nak awn Egypt kho ah kaa k’plawk ba gui ne, ¹⁸ k’pya lün nu ah khokum phli-kip pum ung hnimgei ne khah püi gui ci. ¹⁹ Ani naw Kanaan kho ung kaa chang pakhui chih cu nawng gui netah, cun ah kho cu ak chang gui am khäm sak gui ci. ²⁰ Shin ah amawng ama ung khüt lawk khai ah khokum phia phli la hma-kip shou lawk ci. Cun kawn ah prophet Samuel ung khüt khai ah m’khoichak ci gui cu pe gui ci. ²¹ Cun kawn ah ami ghangpughang vai ng’zoi u khä tah, Khanpughi naw Benjamin pakhui, Kisha ah htapa Soul cu khokum phli-kip ung ghangpughang ah kiak khai ah m’düih pe gui sei ani, maw kho kum phli-kip ung uk ci. ²² Cun kawn ah Khanpughi naw Soul cu nawng ne David cu Israel ghangpughang ah m’düih ba ci, Khanpughi naw “Jesse ah hta David cu Ka m’lung am lawk ciah chang, Kei ah ng’zak hlü phung bik khai ah chang ah kia sei, ka hmu pyi ci nei” ci ne David ah mawng cu pyein ci. ²³ Khanpughi naw a shaitaak ah mäih ah Israel chang gui ah hmawk ah Hunbawi cu David ah hta ng’shon ung ng’tüi law sak ci. Cun cu Bawipa Jesuh ah kia ci. ²⁴ Cun ah Bawi kä a gawk law pha ung Johan naw Israel chang gui am, ami kat nak ng’zu ba ne tui ami hnim vai ah m’thein gui ci. ²⁵ A bi lawh gui ng’pyi law vai khä tah Johan naw ak chang gui am, “Kei a u ah na mi na ngai ne ang? Kei cu nami gin ah Bawi ah kä ka kiak ci, Cun ah Bawi cu kei ah hnu ah gawk lawk khai, kei cu ani ah pha hnat gui phi ka k’phian khai ah kä khin ci” ci ne pyein ci. ²⁶ “Abraham ah hta ng’shon ah kiak ciah phäi nau gui la Khanpughi zum ciah chang pakhui hei gui aw, Khanpughi naw hun nak ah Thu k’ni cu mik mi ah gawk law sak ci. ²⁷ Jerusalem ung om ciah chang gui la ami ng’vai gui naw cun ah Bawi cu Hunbawi ah akiak kä hmat ci gui, kyin hnüüp päng ung ami phat ah prophet gui ah ca guk ah amawng phi kä hmat ci gui. Cun ung phi ngah mi naw prophet gui ah ng’thu pyein a bä vai ah cun ah Bawi cu ngawn pyi ci gui. ²⁸ Ani ngawn nak vai ah kat nak a i kä om pang sei phi, ani cu ngawn vai ah Pilat bawi ah k’thäh ci gui. ²⁹ Ngahmi naw cun ah Bawipa ah mawng cacim ung om ciah täng ah ami bi zawp kawn ah cun ah Bawipa ah ang düihpüi gui naw a gook cu kutlam tung ung kaa chang ba u ne, ng’cim hmun khui ung k’phuh ci gui. ³⁰ Cun ung phi Khanpughi naw ani cu sik nak ung kaa thawh ba sak ci. ³¹ Cun kawn ah ani cu, Kalile ung kaa naw Jerusalem ah atäng ah ng’gui lawk ci gui ah chang gui ah ma ah kho hnüüp ak sho dang ba ci. Cun ah chang gui cu tuk bäi chü Israel chang gui ah ma ah Hunbawi ah mawng pyein ne saksi ci gui. ³² Tuk bäi kei mi naw Thu Ni cu nang mi ah kami law püi ci, Khanpughi naw a bi lawh gui vai, mi pupa gui ah ma ah shai a taak cu Ami na hta ng’shon gui mik mi ah ma ah, Bawipa Jesuh tho ne a ghin nak ba awn ng’dang pyi ci. Salan ak hnih nak ung; “Nang cu ka Hta ah na kiak ci, tuk ngawi keicu na Pa ah ka kia pyi ci,” ci ne ami guk ah mäih ah kya pyi ci. ³⁴ Sih nak ung kaa a thawh ba ah mawng la ng’cim hmun ung kä a gawk ba phung vai ah mawng cu, Khanpughi naw; “David ah ma ah shai ka taak ah mäih ah, Nang mi am phi A theing la hriham cu ka ning pe gui khai, ci ne pyein ci. ³⁵ A hei ca mawng ung, “Nang naw düng ciah na chang cu thukat nak ung kä na gawk sak khai”, ciah a pyein cu ak cang ah kiak ci. ³⁶ David cu a ghin om zah ung Khanpughi ah ng’zak hlü ah bi bik ci, a sih kawn ah a pupa gui ah ng’cim hmun pei ah m’cim tuk ci gui. A pumsa cu ng’cim hmun ah thukat nak ung gawk ci. ³⁷ Cun ung phi Khanpughi naw sih nak ung kaa a thawh ba sak ah pumsa cu thukat nak kä om ci. ³⁸ phäi nau gui aw, nang mi am ning hmat sak gui hlü cu; Bawipa Jesuh awn kat nak m’gein nak ah mawng ning m’thein nak gui la Ani zum ciah chang phung cu Mose ah thukhän naw kä ak phiawn hlawt ah hmakat nak nüng ung phiawn nak gah ci, ciah kiak ci. ⁴⁰ Prophet gui ah ca guk ung: ⁴¹ A i, i ah kä tä ciah chang gui, teng shüm vä! Tuk ngawi kei naw ka bi lawh gui vai cu, Chang naw tän ne a ning m’thein tu gui ung phi, Kä nami zum ah täng khai, Cun ah kia sei nang mi cu cäicat ne si vä” ciah om ci cu nami khan ah kä gawk law hlawt khai ah nami geing nak vai nei” ci ne m’thein gui ci. ⁴² Pum im ung kaa Paul la Barnabas cu lut law ba ni khä tah chang gui naw, law ba khai ah pum hnüüp phi a cun ah amawng gui ani pyein ba vai ah k’thäh ci gui. ⁴³ Pum nak ung kaa ami ng’pai law ba ung Judah chang gui la, Judah thung ung kaa ng’hlat lawk ciah chang akda naw Paul la Barnabas cu läk law goi ci gui. Ngahmi naw cun ah chang gui am, Khanpughi ah m’gein nak ung ami ghin vai ah m’cäi gui ci goi. ⁴⁴ Cun kawn ah pum ba hnüüp ung gawnu ung kaa chang avan ngai ngai gawk law ci gui. ⁴⁵ Cun ung phi Judah chang gui naw chang khli cu hmu u netah, m’thüi na u ne, Paul ah ng’thu pyein cu ng’cuh püi ci gui. ⁴⁶ Paul la Barnabas naw azan kaa ah tah thamah nak pi awn,” Ak htük bäih ah keimi naw Khanpughi ah thu ni cu kami ning m’thein tu gui ci, Cun ung phi nang mi naw cun ah thu cu hnu nah ne, ang täi ghin nak awn kä nami khin thäk tuk ciah nami k’bäi pyi ci nei. Cun ah kia sei keimi cu, nangmi ung kaa ng’düi law ba ne chang pakhui hei gui ah om nak ah kami hteit khai nei. ⁴⁷ Bawipa naw ana peit gui ah thukhän cu: “Kei naw nangmi cu chang pakhui hei gui ah hmawk ah, akdei ah ka ning m’düih gui ci, Cun ah kia sei khomdek khan avan naw hun nak gah khai, ci ne pyein ci” ci ne pyein sak ci goi. ⁴⁸ Cun ah thu cu chang pakhui hei gui naw ng’za u netah zeikyai u ne, Bawipa ah thu ni cu m’hlüng tai ci gui. Ang täi ghin nak gah khai gui ah a ghü gui naw Bawipa Jesuh cu zum lawk ci gui. ⁴⁹ Cun ah kia sei Bawipa ah thu ni cu, cun ah kho avan ung gawk zawp ci. ⁵⁰ Cun ung phi Judah chang gui naw, gawnu ung ang vai gui la Khanpughi zum ciah ng’bümang ci gui ung kaa hnumi gui cu, took gui u sei, ngahmi naw Paul la Barnabas cu k’dudeiu na goi netah ami kho ung kä om tu ba khai goi ah gawt ne k’täm goi ci gui. ⁵¹ Ang düihpüi goi naw cun ah chang gui ah shetkat nak ang dang vai ah ani kho ung kaa m’vut cu hei khawng shüt netah Ikonium gawnu ah hteit ci goi. ⁵² Antiok gawnu ah zum ciah chang gui cu zeikyai u ne Mumcha Theing awn küm be ci gui.

¹ Ikonium gawnu ung phi Paul la Barnabas naw Pum im ah hteit ne ng’thu pyein ni sei, Judah chang gui la chang pakhui hei gui ak chün naw Bawipa Jesuh cu zum lawk ci gui. ² Cun ung phi kä zum tuk ciah Judah chang gui naw, chang pakhui hei gui cu touk gui u ne, zum ci gui kä ami zei nak gui vai ah m’thüi ci gui. ³ Ang düihpüi gui cu cun ah kho ah ak shou om u ne, Bawipa ah mawng cu k’thamah nak awn pyein ci gui. Bawipa naw ngahmi-ah pyein ah am geinsei nak ah mawng akcang ah ang dang nak vai ah ngahmi am cäi aih gui vai la ngaih khit gui vai ami bi nak hlawt vai ah hlüngtai nak cu pe gui ci. ⁴ Cun ah gawnu ung om ciah chang gui cu k’hnih ah ng’pai ci gui, am shah cu Judah chang gui lam ah kia tuk ci gui, am shah cu Ang düihpüi gui lam ah kia tuk ci gui. ⁵ Judah chang m’shah la chang pakhui hei am shah gui cu ami ng’vai gui awn ng’ge nah u ne, ang düihpüi gui cu k’dukdeiu nah gui ne lung awn vawih gui vai ah k’bäi ci gui. ⁶ Cun ah mawng cu ang düihpüi gui naw ng’za u netah Likaonia kho Liatra la Dabe pigaw ung ah dawng ci gui. ⁷ Ngahmi cu a cun ah kho ung ah Thu Ni cu shäu ne pyein ci gui. ⁸ Listra pigaw ah a nupuk ge ah a kho ng’khem sei kä hteit thei ciah chang tumat om ci. ⁹ Ani cu Paul ah ng’thu pyein ngoh ne ngai tuk ci. Paul naw ani cu kheing ne teng ne, anat nak a maih nak hlawt vai ah a zum nak a om cu hmu netah, ¹⁰ “Tho ne ng’düi ä” ci ne a k’aw m’can ne pyein ci. A cun vai am cun ah chang cu tho ne ng’düi ne m’khan ne hteit ci. ¹¹ Chang gui naw Paul ah bi cu hmu u netah, “Khogam bawi gui cu chang ah ng’hlawk u ne mik mi ah gawk law ci gui nei” ci ne ami mät ah Likaonian thu awn m’lau ci gui. ¹² Ngahmi naw Barnabas cu Zeus ah sui u ne, ng’vai pi ne thu pyein ciah Paul cu Hermes ah sui ci gui. ¹³ Zeus khobawi ah taigü im cu pigaw k’pung ah om sei, k’taigü naw pat gup la papai gui cu pigaw m’kawt pei ah law püi ci. Cun ah taigü la chang gui cu ang düihpüi gui ah ma ah vawi k’pet ne taigü hlük ci gui. ¹⁴ Cun ah ami pawngpüi cu Paul la Barnabas naw ng’za ni netah, ani suisak teek ne ghawt ne, chang gui ah lung ah va dawng ni netah, ¹⁵ “Paw chang gui aw, a i vai shicha na mi bi ang? Keimi phi nangmi ah mäih ah chang ah kami kiak ci nei, Nangmi naw a shin ah mäih ah bi lawh gui cu nawng shüt u neh, ang täi ghing ne, khan la kaa, tui la m’dek, ak ghing ak om avan tüi sho ciah Khanpughi cu nami zum tu vai ah, Thu Ni cu kami pyein khai ah kami lawk ci nei. ¹⁶ Cau pui kho läi Khanpughi naw chang gui cu ami mät ah ng’zaak hlü ah om ih sak gui ci. ¹⁷ Cun ung phi Khanpughi naw a om ah mawng cu ak ni a bi nak awn ang täi sei chang gui am m’dang gui ne, Khankho ah kaa kho zuk aa sak ne, amät ah khin ung vuipai m’theihtak ci phi ning pe gui ci. Ei auk vai ning k’be gui ne m’lung zeikyai nak phi ning pe gui ci” ci ne m’lau ne pyein ci. ¹⁸ Cun ah m’lau ne ami pyein ung phi vawi pet khai ah pawng ci gui cu ma nah ne kä m’khüt ci gui. ¹⁹ Cun ung phi Pisidia kho Antiok la Ikonium ah kaa Judah chang gui gawk law u ne, chang gui cu ami mät täng ah m’hläm gui ci gui. Cun kawn ah Paul cu lung awn vawi u netah si pyi ciah ngai u ne, pigaw k’pung ah so ne hteh püi ci gui. ²⁰ Cun ung phi Paul cu ak chang gui naw läk ne k’bui law u khä tah tho law ba ne pigaw kyong ah hteit ba ci. A ngawi ung Paul la Barnabas cu Derbe pigaw ah hteit ci goi. ²¹ Paul la Barnabas naw Derbe gawnu ah Thu Ni cu pyein ni sei chang akda khritha ah kia lawk ci gui. Cun ung kaa naw Listra Ikonium la Pisidia kho Antiok ah hteit ba ci gui. ²² Ngahni naw, “Khanpughi ah uk nak kho ung gawk vai ah zaica nak akda mi aut khai” ci ne m’theithang gui ne, k’thamah m’lung üp nak pe gui ci goi. ²³ Ngahni naw khritha bum päng ung a gham gui hei m’düih vü ne, ei hlawi ne taigü nak awn, ami zum ah Khanpughi ah ap gui ci ci goi. ²⁴ Paul la Barnabas cu Pisilia kho a ni phlän kawn ah Pamphilia kho ah gawk ci goi. ²⁵ Cun ung kaa naw Perka pigaw ah thu pyein ni netah Attalia pigaw ah gawk ci goi. ²⁶ Antiok ah gawk ba ci gui, Antiok cu tuk bäi ng’pyi khai ah bi a mi bi nak ung m’gein nak ami gah vai ah Khritha bum gui naw Khanpughi ah taigü ne ami ap nak gui ah kia ci. ²⁷ Antiok gawnu ah ami gawk law ba ung ngah ni naw khrithabum gui m’cut gui netah, ngahmi awn Khanpughi naw bi abi nak gui la a pakhui hei gui naw ami zum law tu vai ah lam a hmawn peit gui ah mawng cu m’thein tu ba gui ci goi. ²⁸ Cun kawn ah ngah ni cu zum ciah chang gui awn atäng ah acu ah ak shou om ci goi.

¹ Chang am shah gui cu Judea kho ah kaa Antiok ah hteit u netah, “nangmi cu Mose ah thukhän na mäih ah vun aat nak kä nami bi tu ung hun nak kä nami gah tuk khai” ci ne m’theithang ci gui. ² Paul la Banabas cu cun ah chang gui awn ak tä ah ng’cucan ne ng’küknet ci gui. Cun ah kya sei khrithabum gui naw, cun ah ami ng’cuh a mawng cu ng’shi k’ca ng’ge pai khai goi ah Paul la Barnabas cu ghü goi u netah, zum ci chang am shah gui awn atäng ah ang düihpüi gui la khrithabum ang vai gui ah om nak Jerusalem ah tüih goi vai ah k’bäi ci gui. ³ Khrithabum gui naw cun ah ami chang ghü gui cu pigaw k’pung ah khüt ne tha gui u sei, Rhoenicia la Samaria kho gui cu sun ne hteit ci gui. Cun ah ami hteh nak lam ah khritha gui ah ma ah chang pakhui hei gui naw Khanpughi ami zum law tu a mawng cu m’thein tu gui ci gui; cun ah amawng gui cu ng’za u netah zum ciah chang gui cu zeikyai ci gui. ⁴ Paul la Barnabas cu Jerusalem ah ami gawk law ung, khrithabum gui, ang düihpüi gui la ang vai gui naw a na dou gui u sei, ngahmi awn Khanpughi naw bi a bi ah mawng cu m’thein tu gui ci gui. ⁵ Cun ung phi Pharisee pati ung kaa Bawipa Jesuh zum law tuk ciah chang am shah gui cu ng’düi law u ne, “Chang pakhui hei gui cu vun aat nak bi tuk khai gui, Mose ah thukhän phi läk tuk khai gui” ci ne kiak ci gui. ⁶ Cun ah kia sei ang düihpüi gui la ang vai gui cu cun ah a mawng ng’ge nak vai ah ng’bum ci gui. ⁷ Ak shou ami pyein kawn ah Peter naw ng’düi law netah, “Phäi nau gui aw, Khanpughi naw kei cu chang pakhui hei gui naw ami zum tu vai ah Thu Ni ka pyein khai ah, azan pui nangmi ung kaa kei a na ghü cu nami hmat pyi ci, ⁸ Chang gui ah m’lung ngaih, hmat zawp ciah Khanpughi naw Mumcha Theing cu mik mi am ana peit gui ah mäih ah chang pakhui hei gui am phi a peit nak tu gui awn, ngah mi m’hni ne ang zaak nak hlü gui cu m’dang ci nei. ⁹ Bawipa naw ngahmi cu mik mi awn kä na m’khoicha gui ci; ngah mi naw ami zum ah hmawk ah ami kat nak cu m’gein gui ci. ¹⁰ Cun ah kia sei nang mi naw a i ah kia sei Khanpughi nami ng’küknet püi hlü ang? Mi pupa gui naw phi bäi, mi mät naw phi bäi kämi phuih hlawt ah phuih cu a i ah kia sei ngah mi am nami phuih sak gui hlü ang? ¹¹ Mik mi cun phi ngahmi ah mäih ah mi zum u ne, Bawipa Jesuh ah m’gein nak awn hun nak mi gah ci” ci ne pyein ci. ¹² Khanpughi naw ngahmi awn chang pakhui hei gui ah ng’lung ah cäi aih gui vai la ngaih khit gui vai a bi cu, Barnabas la Paul naw ngak ni khä tah chang a van naw kyiip ah ngai ci gui. ¹³ Ngah ni naw a ni pyein zawp kawn ah James naw, “Phäi nau gui aw, na ngai tu vä! ¹⁴ Khanpughi naw ak htük bäih ah chang pakhui hei gui ung kaa am shah gui cu ak chang ah ghü gui ne am gein gui ah mawng cu Simon naw pyein pyi ci. ¹⁵ Prophet gui ah ng’thu gui cun phi shin ah amawng gui awn ng’müi ci nei. Cacim ung: ¹⁶ Bawipa naw, “Cun kawn ah kei law ba ne, David ah uk nak kho cu ka m’düng ba khai, Shekak ci phi ka co kyang ba khai, ¹⁷ Om ciah chang nüng nüng cu kei ah lawk khai, Kei naw ka khü gui ah chang pakhui hei gui phung cun phi ka khäm gui khai. ¹⁸ Shin cu cau pui Bawipa naw hmat ne a pyein ah kia ci.” ci ne pyein ci. ¹⁹ James naw k’däih ne, “Kei naw ka pyein hlü cu, Khanpughi zum law tuk ci gui ah chang pakhui hei gui zaica khai gui ah bi kä nami bi en vä. ²⁰ Cun ung phi khongzo vawihpeh ng’ghutha nak kä ei vai ah mawng;kä ng’zo khoh dütdüt vai ah mawng;a gawn ung kheik ne ngawn la si phung phung kä ei vai ah mawng gui cu ami hmat hlawi vai ah ca gu ne mi pe gui khai ah ka ngai ci. ²¹ A i ah kia sei ci ung, cau ä tün ne, apigaw päng pum im gui ung, kyin hnüüp phung ung Mose ah thukhän gui cu phat ne, thu awn phi pyein lä ah kia ci” ci ne pyein ci. ²² Cun kawn ah ang düihpüi gui ni, ang vai gui ni, khrithabum gui ni ci ng’ge u netah, Paul la Barnabas awn ng’khap khai ah chang ghü ne, Antiok ah tüih vai ah k’bäi ci gui. Cun ah kia sei, khritha gui naw ang htei ah a mi chang m’sui ah Barsabbas ah ming ciah Judas la Silas cu ghü ci gui. ²³ Ngahni am ca tumat gu ne m’kan goi ci gui, cun ah ca cu: “Na mi phäi nau gui ah kia ciah, ang düihpüi gui la ang vai gui naw, Antiok gawnu, Siria kho la Cilicia kho ung om ci gui ah chang pakhui hei khritha gui am zeikyai ne ca kami ning pe law gui ci nei. ²⁴ Keimi ung kaa chang am shah cu, u ah kä m’cäi ä ah, nangmi ah om nak ah law ne, m’lung ah cüngvawn nak vai ah ng’thu pyein ne, nangmi a mi ning zaica sak gui ah mawng cu kami ng’zak ci nei. ²⁵ Cun ah kia sei keimi naw chang ghü ne nangmi ah tüih law vai ah kami k’bäi ci nei. Ngahni cu keimi naw kami m’hni ah Paul la Barnabas awn atäng ah ng’gui khai gui nei. ²⁶ Paul la Barnabas cu mi Bawipa Jesuh ah bi cu ani sih am lawk khai ah k’tha nah ne bik ci goi ah kia ci. ²⁷ Cun ah kia sei keimi naw ngahni awn atäng ah Judas la Silas cu kami tüi lawk ci nei. Shin ah ca ung kami guk ah a mawng gui cu ami mät naw phi ning m’thein gui khai gui nei. ²⁸ Khongzo am vawihpeh ah ei cu kä ei vai, si phi kä ei vai. ²⁹ A gawn kheik ne ngawn ah sa kä ei vai, kä ng’zawpawm dütdüt vai, ciah thukhän nah kawn ah a hei phuih gih nami khan ah kä a gawk law vai ah Mumcha Theing awn keimi kami gup ät ci nei. Shin ah amawng gui cu nami hlawi ah khoi ung nangmi ah hmawk ah bä ei khai nei. Gai ne zei ne om vä!” ci ah guk ci gui. ³⁰ Ami chang tüih gui cu hteit u ne Antiok ah gawk u netah zum ciah chang gui cu ng’bum sak gui ne, ami ca m’khäh cu pe gui ci gui. ³¹ Cun ah ca cu phat u khä tah ngami am thagui ami peit nak gui ah kia sei ang htei ah zeikyai ci gui. ³² Judas la Silas cu ma lam ah amawng hmat ci gui ah prophet ah kia ni ne, akhin ak shou ung zum ci gui am pumsa thagui mumcha thagui khän nak la thamah nak pe gui ci goi. ³³ Ngahni cu acu ah ak shou om tu ni netah, zum ciah chang gui naw chidam goi ne tüi ba goi ci gui. ³⁴ (cun ung phi Silas cu om shüt khai ah k’bäi ci). ³⁵ Paul la Barnabas cu Antiok gawnu ah om shou ni ne, Bawipa ah thu ni cu chang hei gui awn atäng ah m’theithang pyeinsak ci goi. ³⁶ Hnüüp a pipi shou law khä tah Paul naw Barnabas am, “Bawipa ah Thu Ni mi pyein nak ah pigaw päng phäi nau gui ah om nak ah hteit ne, a i ah ami om ih law cu mi teng m’kein gui khai” ci ne pyein ci. ³⁷ Barnabas naw Johan Maku cu khü ne ng’gui püi vai ah zum ci. ³⁸ Cun ung phi Paul naw ami bi bi nak ang pyi güt ah kä hteh tu ah nawng en gui ne Pamphilia ung hlah ta gui te ci kia sei,ani khü tu ba vai cu kä zum ci. ³⁹ Ngahni acun ah mawng ak tä ah ng’cuhcan ni netah ng’pai ci goi; Barnabas cu Maku khü ne, Saiprus ah htinpaw awn hteit ci. ⁴⁰ Paul cu Silas khü ne hteit ci, zum ci gui naw Paul cu Bawipa ah m’gein nak a gah vai Khanpughi ah ap ci gui. ⁴¹ Paul cu Siria la Cilicia kho zung ah hteit ne, khrithabum gui am k’thamah nak pe gui ci.

¹ Paul cu Derbe la Listra pigaw gui ah gawk law ci. Listra pigaw ah Timothi ming nak ciah khritha tumat om ci. Ani cu Judah chang khritha ah kia ci, cun ung phi a pa cu Krik chang ah kia ci, ² Listra la Ikonium ung om ciah khritha gui naw Timothi cu m’hlüngtai ci gui. ³ Paul naw Timithi cu amät awn atäng ah bi abi tu vai ng’za hlü netah, vun aat nak pek ci. Cun ah a bi ah mawng cu cun ah kho ung om ciah Judah chang gui naw Timothi ah pa cu Krik chang ah kia ciah ami hmat pyi ah hmawk ah kia ci. ⁴ Ngahmi cu apigaw päng ung ami hteh nak ah, Jerusalem ah om ci gui ah ang düihpüi gui la ang vai gui ah thukhän gui cu hmat phyak khai ah hei m’theithang vü gui ne, cun ah thukhän gui cu zum ciah chang gui naw ami läk vai ah m’thein gui ci gui. ⁵ Cun ah kia sei khrithabum ah zum nak khüighaat law pi k’täi ne, zum tuk ciah chang phi da law pi k’täi ci. ⁶ Ngahmi cu Phrikia la Kalatia kho cu phlän ne hteit ci gui, a i ah kia sei ci ung Asia kho ung thu ami pyein vai ah Mumcha Theing naw lam kä m’shüm gui ci. ⁷ Ngahmi cu Misia khogi ung ami gawk law zah ung Bithinia kho ah hteh vai ah tha nak ci gui. ⁸ Cun ung phi Bawipa Jesuh ah Mumcha Theing naw kä hteh sak gui sei, Misia kho cu phlän ne Troas gawnu ah gawk ci gui. ⁹ Cu mü Paul naw ang mui mang ung, “Macedonia kho ah law ne na bawm gui vä” ci ne Mecedonia chang tumat naw ng’düi ne ng’zoi sei hmuk ci, ¹⁰ Cun ah Paul naw amik hmuh vai am keimi cu Macedonia kho ah hteh vai ah kami pawng m’htein ci, a i zah kia sei ci ung, cun ah kho ah om ciah chang gui ah ma ah Thu Ni kami pyein vai ah Khanpughi naw na khü gui ci ciah kami zum nak awn ah kia ci. ¹¹ Keimi cu Troas ung kaa Samothrsia tuigoi bü ne htinpaw awn hteit u ne, a ngawi ung Neapolis pigaw ah kami gawk ci. ¹² Cun ung kaa naw Philippi gawnu ah kami hteit ci. Philippi cu Macedonia kho ah mang gaw tumat ah kia ci. Roman chang gui ah gawnu ah phi kia ci. Cun ung keimi cu kho hnüüp akda kami om ci. ¹³ Kyin hnüüp ung keimi cu pigaw k’pung ah lut law u ne, Judah chang gui ah taigü nak hmun om khai ah kami ngaih nak ah tui kam pei ah kami hteit ci. A cun ung hmumi gui ana ngo u sei, ngoh tu u ne kami m’thein tu gui ci. ¹⁴ Cun ah chang gui ung Thiatira pigaw ung kaa, aphu küi suisak zoi ciah Lidia ming nak ci ah hnumi tumat om ci. Ani cu Khanpughi zum ciah chang ah kia ci. Khanpughi naw Paul ah thu pyein a ngaih zaak nak tu kheng vai ah cun ah hnumi ah m’lung kyong pian tham pek ci. ¹⁵ Cun ah kia sei amät la akyong ung kaa gui ami van cu tui hnim ci gui. Cun kawn ah Lidia naw, “Kei naw Bawipa cu ak cang ah ka zum ciah nami ngaih gep ah akiak ung ka im ah law ne om law tu vä” ci ne k’shet ne na khü gui ci. ¹⁶ Kho hnüüp ät ung keimi cu taigü nak hmun ah kami hteh nak lam ah khoshe naw kai sei cecai ciah, ami chang shäm hnumi hta tumat cu kami hmuk ci. Ani cu ak ce ng’cheng awn a bawi gui ah hmawk ah ngui akda gah ci. ¹⁷ Cun ah hnumi hta naw Paul la keimi cu kami hnu ah na läk law gui netah, “Shin ah chang gui cu Hlüngtai pi bäih ciah Khanpughi ah chang gui nei! ngahmi cu nangmi am hun nak ah mawng ning m’thein gui ciah kia ci gui nei” ci ne m’lau ci. ¹⁸ Cun ah hnumi hta cu kho hnüüp akda ung a cun ci ne ng’hawh laih laih khä tah, Paul cu am lung kä ni law sei, cun ah chang cu ng’hlah shi netah, “Jesuh Khrit ah ming awn kei naw ka ning k’täm ci, shin ah hnumi ung kaa lut law ne a hei ah na hteh vai” ci ne khoshe cu k’täm ci. Acun vai am khoshe cu lut law ne a hei ah hteit ci. ¹⁹ Cun ah hnumi ah a bawi gui naw ngui ami gah nak vai ah m’kawt ang khai ah thüi u netah, Paul la Silas cu pha goi u ne, sumlei nak hmun ah sukyi ng’vai gui ah om nak ah hteh püi goi ci gui. ²⁰ Ngahni cu Roman bawi gui ah ma ah hteh püi goi u netah, “Shin ah chang goi cu Judah chang goi ah kia ci nei, Pigaw kyong ah thüngphyong khai ah bi bik ci goi nei. ²¹ Ngahni naw mik mi ah thukhän nawn hnu ng’tuk gui cu m’theithang ci goi nei; Mik mi cu Roman changah mi kia ci, ngahmi a m’theithang ah thungzo gui cu kämi dou tu hning ci, kämi läk tu hning ci,” ci ne chah goi ci gui. ²² Chang khli gui cun naw ng’lung nah ne Paul la Silas cu tuthat goi ci gui. Ang vai gui naw, Paul la Silas cu ani suisak suut netah ami thah goi vai ah k’bäi ci gui. ²³ Paul la Silas cu tä aih khai ah that goi u netah thawng ung chum goi ci gui. ²⁴ Ang vai gui naw ngahni cu üp-oi khai ah ami chum goi vai ah pyein u khä tah, ngahni cu thawng hmüp khui ah m’tawk goi u ne, ani kho phi sing vüt ne ceep goi ci gui. ²⁵ Khomü cawih ah Paul la Silas cu taigü ni ne, Khanpughi m’hlüngtai ne ng’äi m’cu ni sei, a hei thawng kium gui cun naw ngai tuk ci gui. ²⁶ Cun zah ung ang ghit ah shihpi thüng law khä tah thawng im nu cu ng’kyeet ne thüng ci. Cun vai am thawng m’kawt gui avan ng’hmawng ci, thawng kium gui ami khih nak ah m’si gui gui phi avan ng’phian zawp ci. ²⁷ Thawng ngäng cu ng’shüm law ne thawng m’kawt gui avan ng’hmawng sei hmu netah, thawng kium gui dawng yawp ci gui ah ngai neath, akhim zu phawng ne amät ng’ngawn ne sik khai ah pawng ci. ²⁸ Cun ung phi Paul naw, “Kä ng’cawh en ä, keimi kami van shin ung kami om ci nei” ci ne m’lau ne hawh ci. ²⁹ Thawng ngäng cu mei m’däi ne dawng ne lut law netah, ng’khlet ne Paul la Silas ah kho pei ah kaup ci. ³⁰ Cun kawn ah ngahmi cu k’pung ah luh law püi gui netah, “Bawi gui aw, Hun nak ka gah vai ah a i nei ka bi kaw?” ci ne ng’shi gui ci. ³¹ Ngahmi naw, “Jesuh Bawipa cu na zum vai, cun ung na mät la na kyong ung kaa gui nami van naw hun nak nami gah khai” ci ne m’thein ci gui. ³² Cun kawn ah amät la a im ung om ciah chang gui am Bawipa ah Thu Ni cu m’thein gui ci gui. ³³ A cun mü, acun ah khin ung thawng ngäng naw Paul la Silas cu khü goi ne, ani leim cu m’tui m’seih pe goi ci. Cun kawn ah a cun vai am amät la akyong ung kaa gui cu tui hnim ci gui. ³⁴ Ani naw Paul la Silas cu a im ah khü goi ne, khin nah ne tu m’bei goi ci. Amät la akyong ung kaa gui ami van cu Khanpughi ami zum tu ah phäh ah ang htei ah zeikyai ci gui. ³⁵ A ngawi ung kho ngawi Roman bawi gui naw gaakap ng’vai gui am, “Shin ah chang gui chah ba gui vä” ci ne khän gui ci gui. ³⁶ Cun ah kia sei thawng bawi naw, Paul am, “Bawi naw, nang la Silas cu ning chah ba gui vai ah k’bäi ci nei, cun ah kia sei dimdeeih nak awn hteit ba nä” ci ne m’thein ci. ³⁷ Cun ung phi Paul naw gaakap bawi ah ma ah, “Kei mi cu Roman kho chang ah kami kiak ci, a i hma nak la kat nak phi käm koicha ah, ngahmi naw keini cu, chang khli ah ma ah, that netah thawng ung na chum goi ci gui. Tuk bäi a düm ah na chah ba gui hlü u ne ang? Kä kami lut law ba khainei, Roman bawi gui ami mät law ne na chah ba gui u sä” ci ne kiak nak ci. ³⁸ Gaakap bawi gui naw Roman bawi gui am, a cun ah mawng cu m’thein ba u sei, Paul la Silas cu Roman kho chang ah ani kiak cu hmat law u netah ang htei ah kyikyawk ci gui. ³⁹ Cun ah kia sei ngah mi cu law u ne, Paul la Silas cu ng’ge püi ba goi u netah, thawng ung kaa k’plawk ba goi u ne, cun ah gawnu ung kaa naw ani hteh ba vai ah m’cäi goi ci gui. ⁴⁰ Paul la Silas cu thawng ung kaa lut law ba ni ne, Ladia ah im ah hteit ci goi. Cun kawn ah zum ciah phäi nau gui awn ng’hmuh u netah, thamah nak ah thu ani pyein kawn ah cun ah gawnu ung kaa naw hteit ba ci goi.

¹ Paul la Silas cu Amphilolis la Apollonia pigaw gui sun law ne, Thessalonika gawnu ah gawk law ci gui. Cun ah gawnu ah pum im tumat om ci. ² Paul cu abi man ah mäih ah pum im ah hteit ne, pum hnüüp thum vei ung, cacim cu m’hlan ne tän ne pyein ne chang gui awn ng’cecäk ci gui. ³ Messiah naw zaica nak a bui aut vai ah mawng, la sih nak ung kaa a thawh ba vai ah a mawng gui cu cacim va teng teng ne ng’kheing khai ah m’thein gui ci. Paul naw, “Kei naw nangmi am ka ning m’thein gui ah Bawi Jesuh cu Messiah ah kiak ci” ci ne pyein ci. ⁴ Chang am shah gui cu Paul ah thu pyein zum u ne Paul la Silas ah chang ah kya lawk ci gui. A cun ah mäih ah Khanpughi zum ciah Krik chang akda gui la hnumi ng’vai gui cu ngahni ah chang ah kia lawk ci gui. ⁵ Cun ung phi Judah chang gui cu m’thüi u netah, lam zung ah chang ngetngawng gui khü gui u ne, chang khli ah kiak khai ah ng’bum sak gui netah, pigaw avan ung thüngphyong sak gui ci gui. Cun ah chang gui cu Jason ah im ah lut u ne, Paul la Silas cu chang khli ah ma ah kaih ne m’düih goi vai ah shui goi ci gui. ⁶ Shui ne kä hmu goi u netah cun ah chang gui naw, Jason la zum ciah chang am shah cu pha ne, bawi ng’vai gui ah ma ah law püi u netah, “Shin ah chang gui naw theit shüi shüi ne chang zaica sak ci gui, ngahmi tuk bäi mik mi ah gawnu ah gawk law u sei Jason naw a im ah dou gui ci. ⁷ Shin ah chang gui naw Jesuh ming nak ciah Ghangpughang a hei om ci ci u ne, nang ghangpughang ah thukhän cu plawh ci gui nei” ci ne m’lau ne pyein ci gui. ⁸ Cun ah a mawng gui cu ng’za u netah, chang khli gui la gawnu ung ng’vai gui cu thüngkyüng zawp ci gui. ⁹ Bawi ng’vai gui naw Jason la a paw gui cu ngui kyäng ne ng’lawh sak gui netah tüi ba gui ci gui. ¹⁰ Kho a mü law vai-am zum ciah chang gui naw Paul la Silas cu Berea gawnu ah tüi goi ci gui. Cu ah gawk ni netah ngahni cu pum im ah hteit ci goi. ¹¹ Berea ah chang gui cu Thessalonika ah chang gui ah mä ami m’lung ng’htei pi ci. Cun ah kia ne Paul ah thu pyein cu k’tha na ne ngai ci gui. Paul la Silas ah thu pyein cu ak cang la kä ak cang ah ami hmat nak vai ah cacim cu ak hnüüp tä sei teng kheng ci gui. ¹² Cun ah kia ne chang akda naw Bawipa Jesuh cu zum lawk ci gui, cun ah zum lawk ci gui ung bühmang ci ah Krik hnumi gui la k’pami ng’vai gui phi akda om tuk ci gui. ¹³ Cun ah Paul naw Berea gawnu ung Khanpughi ah Thu Ni a pyein ah mawng cu Thesslonika ah Judah chang gui naw ng’za u netah, Berea ah law u ne chang gui cu touk ne thüngphyong sak ci gui. ¹⁴ A cun vai am zum ciah chang gui naw Paul cu tuinu kam lam ah hteh sak ci gui. Silas la Timothi läi cu Berea ah om shüt ci goi. ¹⁵ Paul tha tuk ci gui ah chang gui cu a ni awn atäng ah Athens ah khüt ne hteit tuk ci gui. Cun kawn ah Paul naw Silas la Timothi cu akzang ah ami tüih goi vai ah m’cäi gui khä tah Berea ah hteit ba ci gui. ¹⁶ Paul cu Athens gawnu ah Silas la Timothi cu ging goi ne a om zah ung, gawnu avan cu agup bäng ah kia sei hmu netah ang htei ah am lung thüi ci. ¹⁷ Cun ah kia sei pum im ah Judah chang gui, Khanpughi zum ciah chang pakhui hei gui la ak hnüüp tä sumlei ne lawk ciah chang gui awn ng’cecäk ci gui. ¹⁸ Epicurean la Stoik Greek hmuhmat chang gui awn phi ng’kükneet ne pyeinsak ci gui. Cun ah chang am shah gui naw, “i baw hmuhmat ciah ng’hlawk ciah shin ah chang cu a i a pyein tu khan ang?” ci ne kiak ci gui. A hei chang gui naw, “Shin ah chang naw, a kho hei chang gui ah khanpughi gui a pyein ah kiak khai nei” cik ci gui. Cun ah ami pyein cu Paul naw Bawi Jesuh amawng la sih nak ung kaa thawh ba ah mawng a pyein ah hmawk ah kia ci. ¹⁹ Cun ah kia sei Paul cu kawng si zung Areopakas gawnu ah hteh püi u netah, “Nang naw na pyeinsak ah m’theithang nak ak thai ah mawng cu kami hmat tu hlük ci nei. ²⁰ Nangmi naw nami pyeinsak ah amanwg am shah gui cu keimi ah hmawk ah ak thai ah kia ci, cun gui ah mawng cu m’hlan ne kami hmat tu hlük ci nei” cik ei ²¹ (Athens chang gui la a kho hei ah kaa lawk ciah ami khin gui cu, cun ah thu thai gui ami ngaih zaak, ami pyeinsak nak awn a khin ng’pyi sak ci gui. ²² Paul cu Areopaka zungnu ma ah ng’düi netah, “Athens chang gui aw, nangmi cu ang htei ah nami zum nak om ciah, apäng avan ka hmuh nak awn ka ning hmat gui ci nei. ²³ Kei cu nami gawnu avan ung hteit shüi shüi ne, nami taigü nak gui cu teng netah, ‘Kä hmat ah Khanpughi ah’ ci ne ca guk ah taigü kiang tumat cu ka hmuk ci. Cun ah nang mi naw kä hmat ne nami taigü ah Khanpughi ah mawng cu tuk bäi ka ning m’thein gui ah kia ci. ²⁴ Khomdek la khomdek khan ah om ci nüng tüi piang ciah Khanpughi cu, khomdek la khankho uk ciah Khanpughi ah kia ne, chang naw kut awn a pian ah pum im ung kä om ci. ²⁵ Khanpughi cu chang avan am hnun gui ghing nak la a päng avan zuk pek ciah kia ne,ang zaak hlü tumatmat om ciah mäih ah chang naw kut awn bi vai kä ng’za hlük ci. ²⁶ Khanpughi naw khomdek khan avan ung om ciah, chang pakhui avan cu, chang tumat ung kaa ng’shon khai ah tüisho netah, ami ghin nak vai ah akhin cu k’bäi pe gui ne, ami om nak vai ah hmun cu m’hnüt pe gui ci. ²⁷ Cu ah abi ah mawng cu chang gui naw Khanpughi cu ami hmu ei hman ah ami shui zap shüm vai ah hmawk ah kia ci. Cun ung phi ak cang ah Khanpughi cu mik mi ung kaa tumat awn phi ng’shawng ciah kä kia ci. ²⁸ Chang tumat naw; “Mik mi cu Khanpughi awn ghing ne, hnün tho ne, om ih ne mi kiak ci.” Nang mi ung kaa ng’äi awn m’thei ciah chang gui naw phi; “Mik mi cun phi Khanpughi ah Hta gui ah mi kiak ci” ci ne ng’äi awm ci gui. ²⁹ Cun ah mik mi cu Khanpughi ah hta gui ah mi kiak ci kia sei, Khanpughi cu chang gui naw ami ngaih tüh ah ami hmuhhmat nak awn ami pyantham ah ghui gup, ngui gup, lung gup, gui ah mäih lawk ci ci ah kä nami hmat ten vai nei. ³⁰ Khanpughi naw i kä ami hmuhhmat zah ung chang gui cu kä a teng kheng gui ung phi, tuk bäi ung kho ng’nü ah om ciah chang gui am, “Na mi kat nak cu ng’zu ba zawp vä” ci ne ng’thu khän gui ci. ³¹ A i ah kia sei ci ung khomdek chang avan, ghü ne am düih pyi ah Bawipa awn, ng’düng ciah m’khoicha nak vai ah hnüüp cu, ak bäi pyi ah hmawk ah kya ci. Cun ah abi law vai ah mawng cu, cun ah Bawipa sih nak ung kaa a thawh ba sak nak awn, khäng htek ciah saksi m’dang pyi ci” ci ne pyein ci. ³² Paul naw, sih nak ung kaa thawh ba nak ah mawng a pyein cu ng’za u netah chang am shah naw päipih ci gui. Cun ung phi am shah gui naw, “Shin ah mawng na pyein cu kami ng’za ba hlü mä ci nei” cik ci gui. ³³ Cun ah kia sei Paul cu cun ah zung ung kaa tho ne hteit ba ci. ³⁴ Chang am shah gui cu Paul awn ng’khawt u netah zum law tuk ci gui. Cun gui cu Areopakas ah zung ung kaa Dionicius la Damaris ming nak ciah hnumi tumat la chang hei am shah gui ah kia ci.

¹ Cun kawn ah Paul cu Athens ah kaa naw Korin ah hteit ci. ² Cun ah gawnu ah Pontus kho ah kaa Akuila ming nak ciah Judah chang tumat la ak chu Priscilla cun awn ng’hmuk ci gui. Ngahni cu ghangpughang Klaudius naw, Roman ung kaa Judah chang avan a hteh ba vai ah k’bäi ne pyein sei Itali ah kaa law ba thai ci goi ah kia ci. ³ Ngah ni cu Paul ah mäih ah mehvun bi ne ei awk ci ah chang ah kia ni khä tah, Paul cu ngahni ah om nak ah hteit ne atäng ah bi lo tuk ci. ⁴ Ani cu pum im ah pum hnüüp päng, ung Judah chang gui la Krik chang gui naw ami zum law tu vai ah ng’thu m’thein gui ci. ⁵ Macedonia ah kaa Silas la Timothi ani law ba kawn ah Paul cu thu Ni bäng k’tha nah ne pyein ne, Bawipa Jesuh cu Messiah ah a kiak ah mawng Judah chang gui am ak ni ah m’thein gui ci. ⁶ Ani cu Judah chang gui naw hnu ng’tuk püi ne k’shedam nah u khätah, Paul naw ami ma ah a sui ’khawng ne, “Nangmi nami dimaih ung phi nami mät ah chaw ah kiak khai nei, kei naw kä ka pyein tu ba khai, tuk bäi ung tün ne chang pakhui hei gui ah hteit ne ka pyein khai nei” ci ne kiak na gui ci. ⁷ Cun kawn ah ani cu, Khanpughi zum ciah Titius Justus ming nak ciah chang pakhui hei ah im ah hteit ne om tuk ci. Cun ah im cu pum im awn ng’et hta ci. ⁸ Pum im uk ciah Krispus ming nak ciah chang la ak kyong ung kaa gui cu Khanpughi zum tuk ci gui. A hei Korin chang akda gui cun phi Thu Ni ng’za tu ne zum tu u ne, tui hnim ci gui. ⁹ Kho mü ät ung Paul ah muimang ung Bawipa naw a pyein cu, “Kei naw nang cu ka ning om püi ci kia sei, kä na kyih vai, na pyein gäk gäk vai, hnu ah kä na ng’hlah en ba vai. ¹⁰ A u naw phi nang kä ning k’shedam nak khai, shin ah gawnu ung om ciah chang akda cu, kei na zum ciah chang gui nei” ci ne pyein ci. ¹¹ Cun ah kia sei Paul cu cun ah gawnu ung kum ät la avang om ne, chang gui am Khanpughi ah Thu Ni cu m’theithang gui ci. ¹² Achaia kho cu Kallio naw Roman bawi ah kia ne a uk zah ung, Judah chang gui ng’cut u netah Paul cu pha ne, zung ah m’kawt ah law püi ci gui. ¹³ Cun ah chang gui naw, “Shin ah chang cu, thukhän nawn hnu ng’tuk ci lam awn Khanpughi cu zum vai ah chang gui cu k’süksaw gui ci nei” ci ne chak ci gui. ¹⁴ Paul naw m’shang tu ba gui khai ah ang bü zah ung Kallio naw, Judah chang gui am, “Shin ah mawng cu hmakat nak ah baw, hleeihlak nak ah baw akyak vai sü ung, nangmi ah ng’chaak nak cu hnimgei ne ka ning ngaih pe gui khai sü te; ¹⁵ Cun ung phi shin cu thu m’gawng pyeinsak ah mawng ah kiak ci kia sei, nami mät naw m’khoicha vä, kei naw kä ka m’khoichak khai nei” ci ne tah ¹⁶ zung ung kaa naw k’täm ba gui ci. ¹⁷ Ngami naw pum im uk ci ah Sosthenes cu pha u netah zung düma ah tuthat ci gui. Cun ung phi Kallio naw i ah kä sui gui ci. ¹⁸ Paul cu Korin ah zum ci gui awn atäng ah kho hnüüp akda om netah, Priscilla la Akuila awn ng’gui ne Siria kho ah htinpaw awn hteit ci gui. Kenkhrea ung kaa htinpaw kä a ng’düih law phaung, Paul cu Khanpughi ah thu khän bik ci kia sei a lu k’teiu ci. ¹⁹ Ephesus ah gawk u netah Paul naw Priscilla la Akuila cu nawng shüt goi ci. Cun kawn ah Pum im ah hteit ne Judah chang gui awn ng’cecäk ci gui. ²⁰ Chang gui naw ngahmi ah a om tu shou cang vai ah chou u sei phi, Paul naw ma nah gui netah, ²¹ “Khanpughi naw ang zaak hlü a om ung nang mi ah om nak ah ka law ba khai nei” ci ne kiak na gui netah, Ephesus ung kaa naw hteit ba ci. ²² Ani cu Sisarea ah gawk netah htinpaw ung kaa naw kyum law ne, Jerusalem ah hteit ne khritha bum gui cu zavaih ah gui ci. Cun kawn ah Antiok ah hteit ci. ²³ A cu ah ak shou om netah, Kalatia kho la Phrikia kho zung ah hteit ne zum ciah chang gui am thamah nak pe gui ci. ²⁴ Cun zah ung Alexandria ah kaa Apollos ming nak ciah Judah chang tumat cu Ephesus ah lawk ci. Ani cu ang htei ah ng’thu m’gawng thei ne cacim phi hmat ciah chang ah kia ci. ²⁵ Ani cu Khanpughi ah bilawh mawnglam phi ngaiza theithang ciah kiak ci, Bawipa Jesuh ah ng’düng ciah amwng ama gui cun phi k’thamah nak awn pyeinsa ne, m’theithang ci. Cun ung phi ani naw Johan ah tui hnim nak bäng hmat ci. ²⁶ Ani cu pum im ah thamah nak awn thu pyein ci, Ang thu ngaiza tuk ci goi ah Priscilla la Akuila naw, ani cu ani im ah khü ni netah, Khanpughi ah bilawh mawnglam cu ng’kheing pi khai ah m’thein tuk ci goi. ²⁷ Apollos cu Achaia kho ah hteit hlü khä tah, Epheus ah zum ciah chang gui naw Achaia ah zum ciah chang gui am, ang hmat nak tu vai ah ca guh ne m’kan ci gui. Ani ci Achaia kho ah gawk netah Khanpughi ah m’gein nak awn zum ciah chang gui cu ak tung ah bilawh püi gui ci. ²⁸ A i ah kia sei ci ung, ani cu chang khli ah ng’lung ah ng’thu a pyein nak ung cacim ung kaa bäng bäng awn m’küikhän ne, Bawi Jesuh Messiah ah a kiak ah mawng cu, Judah chang gui am, ng’kheing khai ah m’hlan ne, am thein gui hning ah phäh ah kia ci.

¹ Apollos cu Korin ung a om zah ung Paul cu a htehthon nak ah kho ung kaa Ephesus ah gawk law ci. Cun ah gawnu ah ang khah püi am shah gui cu hmu gui netah, ² “Nangmi cu zum ciah nami kiak awn ah Mumcha Theing cu nami gah pyi ne ang?” ci ne ng’shi gui ci. Ngahmi naw, “Mumcha Theing a om ah mawng phi kä kami ng’za tu man ci nei” cik ci gui. ³ Paul naw, “Cun ah a kiak ung nang mi cu a i ah mäih ah tui hnim nak ang nami gah” ci ne ng’shi ba gui ci. Ngahmi naw, “Johan ah tui hnin nak kami gak ci nei” cik ci gui. ⁴ Paul naw, “Johan ah tuihnim cu kat nak ung kaa ng’zu ba ci gui ah hmawk ah kia ci, Johan naw ka hnu ah lawk ciah Bawipa cu nami zum vai ci ne Judah chang gui am m’thei gui ci. Cun ah Bawi cu Bawipa Jesuh ah kia ci” ci ne m’thein gui ci. ⁵ Cun ah thu cu ngai za u netah ngami cu Bawipa Jesuh ah ming ung tui hnim ci gui. ⁶ Paul naw ami lu khan ah a kut taih khäh tah Mumcha Theing cu ami khan ah gawk law sei kä hmat ah thu pyein u ne, Khanpughi ah thu phi pyein ci gui. ⁷ Cun gui ami van cu gha-lei-goi lawk ci gui. ⁸ Paul cu chaa thum ah kyong ung chagat ah hteit ne chang gui awn ng’cecäk u ne, Khanpughi ah uk nak kho a mawng cu chang gui naw hmuhmat ne ami dou vai ah kä kyihkyawk ah m’theithang gui ci. ⁹ Cun ung phi chang am shah gui cu ami m’lung m’sing sei kä zum u ne, chang khli ah ng’lung ah Bawipa ah lam ah mawng cu pyein m’sheet ci gui. Cun ah kia sei paul naw zum ci gui cu khah püi gui ne, ngahmi gui cu hteh ta gui netah, Tirannus ah ng’thei im kyong ung ak hnüüp tä sei ng’thu ng’ge püi gui ci. ¹⁰ Cun ah kho kum goi ung lüng ne pyein sa ne bilo khä tah, Asia kho ung om ciah Judah chang la chang pakhui hei chang avan naw, Khanpughi ah Thu Ni cu ngai za zawp ci gui. ¹¹ Khanpughi naw Paul awn ang htei ah küikyang ciah cäi aih gui vai cu m’dang ci. ¹² Chang gui naw Paul ah bi ah zih la Tampu gui pang cu ak gaw gui la khoshe ah kai gui ah om nak ah, ami hteh püi ah akiak ung, nat nak gui cu maih ne, chang kai ciah khoshe gui cu dawng ci gui. ¹³ Hteit shüi shüi ne khoshe k’täm ci gui ah Judah chang am shah gui cun naw phi, Bawipa Jesuh ah ang ming awn khoshe k’täm vai ah k’tha nak ci gui. Ngahmi naw “Paul ah pyein ah Jesuh ah ming awn nang cu ka ning k’täm ci nei” ci ne chang kai ciah khoshe cu kiak nak ci gui. ¹⁴ Cun ah bik ci gui ah chang gui cu, Judah Taigü tung Sheva ah hta gui chang sing chih ah kia ci. ¹⁵ Cun ung phi khoshe naw, “Jesuh cu ka hmat ci, Paul ah mawng phi ka hmat ci, cun ung phi, nang mi cu a u gui ang?” ci ne ng’shi gui ci. ¹⁶ Cun kawn ah ngahmi cu khoshe ah kai ah chang naw, ak tä ah ng’toh püi gui ne m’khüt gui sei, leimbai u ne, ami suisak phi ng’phyit sei, cun ah im ung kaa dawng zawp ci gui. ¹⁷ Cun ah a mawng cu Ephesus ung om ciah Judah chang gui la Krik chang gui naw ng’za u netah, ang htei ah kyikyawk u ne, Bawipa Jesuh ah ming cu m’hlüngtai ci gui. ¹⁸ Bawipa Jesuh zum ciah chang akda gui cun phi law u ne, ng’zou hleip ne ami bilawh kä ani nak cu ah mawng chang gui ah ma ah pyein ne ng’kiaa ci gui. ¹⁹ Ng’zou hleip te ciah chang gui naw, ami hleip nak ah cauk gui cu m’cut ne law püi u netah, chang gui ah ng’lung ah mei awn m’khih ci gui. Cun ah cauk gui ah phu cu tän ne khei ung tangka tämkäp hma-kip phu lawk ci. ²⁰ Cun ah kia sei Bawipa ah huham awn ang Thu cu ng’shui ne abi bi nak cu khüi ghaat law pi ci. ²¹ Cun gui a kiak kawn ah Paul cu Macedonia la Achaia kho ung kaa naw Jerusalem ah hteit khai ah k’bäi ci. Ani naw, “Cu ah ka hteh kawn ah Rom ah phi ka hteit khai” ci ne pyein ci. ²² Ani naw ak chang goi, Timothi la Erastus cu Macedonia a ah tüi goi netah, amät cu Asia kho ung ak shou hta om ci. ²³ Cun zah ung Ephesus ah Bawipa ah mawnglam ah hmawk ah thüngkyüng thüngphyong nak om ci. ²⁴ Demetrius ming nak ciah nguisheh ciah chang naw Artemis kho ah hnumitha ah a gup cu sheh sei, ak chang gui naw khawh akda gah nak ci gui. ²⁵ Ani naw a cun ah ngui sheh ne bi bik ci gui la, acun ah mäih ah a hei bi bik ci gui cu m’cut gui netah, “Paw chang gui aw, shin ah bi mi bi nak awn khawh cham akda mi gah law cu nami hmat ci. ²⁶ Tukbäi nami hmuhmat ah mäih ah Paul naw, chang ah pian ah a gup gui cu Khanpughi ah kä kia ci nei, ci ne Ephesus bäng ung ah kä kya ciah Asia kho avan ung changgui m’hleeihlak ne lam hma sak gui ci nei. ²⁷ Mik mi ah bi lawh cu ang ming she ne ng’ä vai ah kia lawk ci. Cun bäng ah kä kia ciah, Asia la khomdek khan van naw a zum ah kho hnumitha Artimis cun phi ng’ä nak vai kia law ne, a hlüngtai nak phi dimaih lawk khai nei” ci ne pyein ci. ²⁸ Cun ah thu cu ng’za u netah i baw sheh ciah chang gui cu m’lung k’she u ne, “Ephesus ah khohnumitna Artemis cu hlüngtai ci nei” ci ne m’lau ci gui. ²⁹ Gawnu avan pülüük ne thüngkyüng u ne, chang gui naw Paul ah ng’gui püi goi, Macedonia ah kaa, Kaius la Aristarkas cu pha goi u ne gaw ng’lung im nu ah hteh püi goi ci gui. ³⁰ Paul naw cun ah chang gui cu amät naw hmu gui hlük ci, cun ung phi zum ciah ak chang gui naw maa nak ci gui. ³¹ Huham om ciah a teih püi chang gui cun naw phi, gaw ng’lung imnu kyong ah kä a hteh vai ah, Paul cu chang tüi ne m’cäi ci gui. ³² Cun zah ung chang khli cu ng’bum law u ne, am shah a hei, am shah a hnga ah m’lau ci gui, a i ah kia sei ci ung cun ah chang gui akda pi naw ami ng’bum law ah mawng cu kä hmat ci gui. ³³ Judah chang gui naw Alexander cu k’hma ne hteh sak u khätah, shin ah a mawng cu ani ah awm ah chang am shah naw mgai ci gui. Alexander naw chang gui ak ding ah ami om vai ah akut awn nüt gui ne, a mawng ama m’thein gui khai ah k’tha nak ci. ³⁴ Cun ung phi ani cu Judah chang ah kia ciah hmat u netah, “Ephesus ah kho hnumitha Aetemis cu hlüngtai ci nei” ci ne nazi hnih vai ung a täng ah m’lau ci gui. ³⁵ Ak hnu ah gawnu ca k’gu naw chang gui cu ak ding ah om sak gui netah, “Ephesus chang gui aw, Ephesus gawnu cu hlüngtai ciah Artemis mang gaw, la khankaw ah kaa kya lawk ciah lung theing gup ah hmun ah kiak ci, ci cu, chang van naw hmat ci nei. ³⁶ Cun cu u chang naw kä küi hlawt khai nei. Cun ah kia sei m’lung ah phu düüt ah i kä bi ne, ak ding gei ah om vä. ³⁷ Nang mi naw shin goi cu pha ne nami law püi goi ci, cun ung phi ngahni cu mi pum im kyong ah lut ne kä m’gu m’gheim ci goi, mi kho hnumi phi sawngkhei ne kä ng’thu ci goi. ³⁸ Cun ah kia sei Demetrius la a paw gui naw chang tumat cu zung ah ami chaak hlü ung, zung bawi gui la zung ami hmawn nak ah hnüüp gui om ci kia sei, chah hning ci gui nei. ³⁹ Cun ung phi nangmi ung nami pyein vai ah a mawng a hei a om ah a kiak ung, tuungpa ci gui naw ng’ge nah ne m’hnüt k’bäi vai kiak khai nei. ⁴⁰ Tuk ngawi thüngkyüng thüngphyong nak shi, mik mi am nam suh gui hning ci gui nei. Shin ah thüngkyüng nak vai ah a mawng i kä om ci, thüngkyüng nak ah mawng ami nam dang sak gui ung kä mi m’dang hlawt khai nei.” ci ne pyein ci. ⁴¹ Cun ah thu pyein netah gawnu ca k’gu naw, chang gui cu tüi ba gui ci.

¹ Thüngkyüng thüngphong nak ding law khä tah Paul cu zum ciah ak chang gui m’cäi gui ne k’tha gui pe gui netah Macedonia kho ah hteit ci. ² Ani cu cun ah kho ah zum ciah chang gui cu hteit shüi shüi ne thagui pe gui netah Achaia kho ah hteit ba ci. ³ Ani cu a cu ah chaa thum vai om ci. Cun kawn ah Siria kho ah hteit ba khai a pawng zah ung Judah chang gui naw ng’ge na ne hnim vai ah a mi pawngpüi cu hmat ci. Cun ah kia sei Macedonia kho lam ah ng’hlat ne hteit ba khai ah k’bäi ci. ⁴ Berea ah kaa Pirrhus ah hta Sopater, Thessalonia ah kaa Aristarchua la Sekuntus, Derbe ah kaa Kaius, Asia kho ah kaa Tichikus la Trophimus, la Timothi gui cu ani awn ng’gui tuk ci gui. ⁵ Ngahmi cu ana hteit ma u netah Trosa pigaw ah na ging gui ci gui. ⁶ K’caw kä shum ah m’htut den nak ah pawi ng’pyi khä tah keimi cu Philippi ah kaa htinpaw awn law u ne, hnüüp hma lüng khä tah ngahmi ah om nak Troas ah ka mi gawk law ci. A cu ah hnüüp chih kami om tuk ci. ⁷ Hnüüp chih hnüüp ung keimi cu vunvai ne ei auk vai ah kami ng’bum ci. Paul cu a ngawi ung hteit law ba khai ah kia netah cu mü kho cawih ung khüt sei thu pyein ne m’thei thang gui ci. ⁸ Keimi ah ng’bum nak ah kyong khui ah mei im akda kami m’däi ci. ⁹ Eutikus ming nak ciah ak hmaw chang tumat cu, Paul naw thu a pyein ah ung m’kawt khan ah ngoh ne ngam ci. Ngam ne ip law netah im ah ang dün thum nak kaa kia lawk ci. Chang gui naw ami zu chan tu ba zah ung ani cu si pyi ciah kiak ci. ¹⁰ Cun ung phi Paul cu kyum law ne cun ah chang cu Kaup shi ne kyawp netah, “kä ng’ä ai vä! ani ghing zah ci nei” ci ne pyein ci. ¹¹ Paul cu im khan ah hang kai ba netah ang khah püi gui awn atäng ah vunvai ne ei auk ci gui. Ami ei auk awn nah kho thai ghi ghi güt sei ak chang gui awn atäng ah ak shou ng’cecäk u netah cun ah pigaw ung kaa pawng ne hteit ci. ¹² Ang khah püi gui naw kia ne ghing ba ciah chang cu a im ah ami hteh püi ba kawn ah ami m’lung zu kia ba ci. ¹³ Keimi cu ak zang ah ma ne htinpaw awn Assos ah kami na hteit ci Paul cu ’kawng Lam ah hteit netah a cu ah htinpaw ung kium tuk khai kiak ci. ¹⁴ Keimi cu Assos ah Paul awn ng’hmu u netah ani mah ah htinpaw awn Mitilene ah kami hteit ci. ¹⁵ A ngawi ung tui hei ga Chios ah hteit u ne, cun ah ngawi ung Samos tui koi ah kami gawk ci, cun ah ngawi ba ung mä Miletus pigaw ah kami gawk ci. ¹⁶ Paul cu Asia kho ah ak shou kä om hlü netah Ephesus sun pah ne htinpaw awn hteh vai ah k’bäi ci. Ani cu Jerusalem ah Pentekost hnüüp pha vai ah ak zang ah hteit ci. ¹⁷ Miletus ah kaa ge naw Paul naw, Ephesus ah Khrithabum a gham gui am, ami hmuh law vai ah ca gu ne pe gui ci. ¹⁸ Ngahmi gawk law u khätah Paul naw, “Kei cu Asia kho ah ka gawk law hnüüp ung tün ne a i hawk cha ah ka bi lawh cu nang mi naw nami hmat ci. ¹⁹ Kei cu Judah chang gui ah shedam nak awn zaica nak ka gawk zah ung ka ng’phli tui kia law sei phi kam lung neim sak ne, Khanpughi ah chang shäm ah kia ne a bi cu kabik ci. ²⁰ Chang khli ah ng’lung ah phi bäi, nami im gui ah phi kyai, ka pyeinsak m’theithang ung, nangmi ah hmawk ah nik khai phung cu kä ka k’pawih na man ci. ²¹ Judah chang gui am phi bäi, chang pakhui hei gui am phi bäi, Khanpughi ah ma ah ami kat nak ng’zu ba u ne, Bawipa Jesuh cu ami zum vai ah kheing ne ka m’thein gui ci. ²² Tuk bäi Mumcha Theing ah lam shüm nak cu ngai ne Jerusalem ah ka hteit khai. Cä ah a i ah a kiak vai cu kä ka hmat ci. ²³ Kei naw ka hmat cu, a gawnu päng ung Mumcha Theing naw, “Thawng kium nak la zaica nak ung na gawk khai nei” a ci bäng ah kia ci. ²⁴ Kei cu ka hnun gui ah kä ka ng’vang ci, a nam hnüt peit ah bi la, Bawipa Jesuh ah na peit ah bi, pyi ne bi vai cu ak tung ah kia sei, Khanpughi ah m’gein nak mawng Thu Ni cu hteit shüi ne pyein vai bäng ah kia ci. ²⁵ Kei naw hteit shüi shüi ne nami ng’lung ah, Khanpughi ah uk nak kho ah mawng cu ka pyein pyi ci. Cun ung phi nangmi ung kaa a u phi kei na hmu law ba khai kä om ciah ka hmat ci. ²⁶ Cun ah kia sei nang mi ung kaa chang tumatmat cu, a di maih ah a kiak ung, kei ah awm ah kä kiak khai ci cu, ak dei dang ah ka ning m’thein gui ci. ²⁷ A i ah kia sei ci ung kei naw nangmi am Khanpughi ah ang zaak hlü cu ka ning m’thein gui pyi ah hmawk ah kya ci. ²⁸ Cun ah kia sei nami mät naw nami mät la, Mumcha Theing naw nami kut ung a ning ap gui ah Htome gui cu nami m’htei vai. Khanpughi ah khritha bum cu htoshäm ah mäih ah nami m’htei vai, Cun cu Athapa naw a ghinnak pe ne a sih nak awn Amät ah kaa ah k’bäi pyi ci. ²⁹ Kei ka hteh ba kawn ah k’hnei sou gui cu nami ng’lung ah law u ne m’ghä m’ce ne ning tuten gui khai gui ci cu ka hmat pyi ci. ³⁰ Nami mät ung kaa chang am shah naw, zum ciah chang gui naw ami läk gui vai ah, hleeihlak ne ami k’tü phlawh nak ah khin gawk law khai nei. ³¹ Cun ah kia sei kei naw nang mi am kho kum thum pum ung amü ak hnüüp, ka ng’phli tui kia law sei, ka ning m’theithang gui cu nami shüm ba khenggeng vai nei. ³² “Tuk bäi kei naw nang mi cu Khanpughi ah kut ung la, am gein nak ah Thu Ni ung ka ning ap gui ci. Cun ah Thu Ni naw, Khanpughi naw ak chang gui ah hmawk ah am hnüt ah, hriham ning pe gui ne ning düih sak gui khai. ³³ Kei naw chang ah ghui, ngui, sui awi kä kam hni ci. ³⁴ Kei naw shin ah kut awn bi bi ne ka chang gui ah sui ei vai la ka mät ah ng’zaak hlü gui, ka küm be sak cu nami van naw nami hmat pyi ci. ³⁵ K’tha nah ne bi law netah ghawipyam ci m’gein tu nak vai ah a mawng avan cu ka ning m’dang gui pyi ci. Bawipa Jesuh naw, “Va dou nak katah hei peit nak cu, zei kiai nak da pi ci” a ci cu nami shüm ba vai nei. ³⁶ Paul cu thu pyein zawp netah ang khah püi gui awn atäng ah m’khuuk doong ne taigü ci gui. ³⁷ Ngahmi naw Paul cu, kyap ne kyawp ne, ng’uui hnam u ne, gidam ci gui. ³⁸ Paul naw, “Kei cu cän kawn ah kä nami na hmu ba khai” a ci ah hmawk ah ang htei ah thüi sei zaica ci gui. Cun kawn ah ngahmi naw htinpaw ah khüt ne tha tuk ci gui.

¹ Keimi cu ngahmi awn kami ng’pai kawn ah Kos tuikoi ah kami gawk ci. A ngawi ung Rhodes päng ah gawk u ne, cun ung kaa naw Patara pigaw ah kami hteit ci. ² Cun ung kaa naw Phoenicia ah hteit khai ah htinpaw tumat bui u ne, a cung kai tu ne k’täi ne kami hteit ci. ³ Saiprus päng hmuh nak vai ung gawk law u netah, htum täng Siria kho lam ah ka mi hteit ci. Taia gawnu ung ami khawh gui chah shüt khai kia sei kami ng’düm pah ci. ⁴ A cu ah zum ciah chang gui awn ng’hmu u ne, hnüüp chih kami om tuk ci. Ngahmi naw Mumcha Theing ah lam shüm nak awn Paul cu Jerusalam ah kä ah hteh vai ah maa nak ci gui. ⁵ Cun ah ngah mi awn kho hnüüp chih kami om tu kawn ah k’täi ne kami hteit ba ci. Zum ciah chang gui cu ami k’chu, ami hta gui ni, ami van naw pigaw k’pung tui kam pei ah khüt ne na tha tu ba gui u sei, tui kam ah kami van m’khuuk doong ne kami taigü ci. ⁶ Cun kawn ah ng’gidam tu u netah, keimi cu htinpaw khan ah kai u ngäh sei ngahmi cu ami im ah hteit ba ci gui. ⁷ Keimi cu Taia ung kaa naw Ptolemais pigaw ah gawk u ngäh sei, zum ciah chang gui naw na dou law gui u sei, a cu ah hnüüp ät kami om tuk ci. ⁸ A ngawi ung düi law ne hteit ba u ne, Sisarea ah kami gawk ci. A cu ah Thu Ni pyein ciah Philip ah kami kai ci. Ani cu ang düih püi gui bi bi püi gui khai ah Jerusalem khritahbum naw chang sing chih ami ghü nak ung kaa tumat ah kia ci. ⁹ Ani ung kä ceimah phak ciah ahta hnumi phli om ci. Ngahmi cu Khanpughi ah Thu Ni shäu ne pyein ci gui ah kia ci. ¹⁰ Keimi cun ung kami om nak tu a pi pi shou law khäh tah, Akabus ming nak ciah Prophet tumat cu Judea kho ah kaa gawk lawk ci. ¹¹ Ani cu keimi ah om nak ah law ne, Paul ah khei khih nak la ne, akut akhaw cu pin netah, “Shin ah kheikhih nak ka nak ciah chang cu, Jerusalem ah Judah chang gui naw, a shin ah mäih ah khit ne pin u netah, chang pakhui hei gui am ap khai gui nei, ci ne Mumcha Theing naw pyein ci nei” ci ne pyein ci. ¹² Cun cu ng’za u netah, keimi la ana om ciah chang gui naw Paul cu Jerusalem ah kä ah hteh vai ah kami maa nak ci. ¹³ Cun ung phi Paul naw, “A i ah kia sei nang mi kyap lau u ne, kam lung nami na thüi sei sak ang? Kei cu Bawipa Jesuh ah hmawk ah, Jerusalem ung pha ne khih nak bäng ah kä kaak ciah, sih nak vai ah phi ka ng’düi ge ci nei” ci ne kiak na gui ci. ¹⁴ Paul cu m’cäi ne kä gah u netah kei mi naw, “Khanpughi ah ang zaak hlü ah kia sä” ci ne kami om düüt ci. ¹⁵ Kami om tu shäng kawn ah kei mi cu pawng ba u ne, Jerusalem ah kami hteit ba ci. ¹⁶ Sisarea ah kaa zum ciah chang am shah gui cu keimi awn atäng ah law tu u ne, Saiprus ah kaa, zum ciah chang Mnason ah im ah kai vai ah na hteh püi gui ci gui. ¹⁷ Keimi cu Jerusalem ah kami gawk law zah ung zum ciah chang gui naw ak ni ah na dou gui ci gui. ¹⁸ A ngawi ung Paul cu keimi awn atäng ah James hmuk khai ah hteit ci, cun zah ung a gham gui cu ana ng’bum ci gui. ¹⁹ Paul naw ngahmi cu zei ne dou gui netah chang pakhui hei gui ah ma ah ani awn Khanpughi naw a bi law ah a mawng gui cu m’thein tu gui ci. ²⁰ Ngahmi naw Paul ah m’thein tu gui cu ng’za u netah Khanpughi cu m’hlüngtai ci gui. Cun kawn ah Paul am, “Kami nau Paul aw, Judah chang gui ung kaa, tämkäk phia khak naw Bawipa Jesuh cu zum law u ne, ngahmi naw thu khän läk vai ah a i hlawk ah ami ng’zaak hlü cu na hmat pyi ah kia ci nei. ²¹ Nang naw chang pakhui hei gui ah ng’lung ah om tuk ciah Judah chang gui am, “Nami hta gui vun aat nak kä nami bi peit gui vai, Judah thung kä nami läk vai” ci ne, Mose ah thukhän ami nawng vai ah nam theithang gui cu ngahmi naw ng’zak ci gui nei. ²² Tuk bäi nang na law cu k’hläp ah hmat khai gui, a i hawkcha mi bik khai ang? ²³ Cun ah kia sei keimi ah pyein ah bi na bi ung nik khai. Keimi ung thukhän shaitaak bi ciah chang phli om ci. ²⁴ Ngahmi awn atäng ah hteit u netah atäng ah theingcim nak cu nami bi vai, nami lu nami k’teiu nak ah ang khah cu nang naw na peit vai. Cun ah na bi ung nang ah mawng chang gui ah pyein cu kä hman ciah hmu u ne, na mät naw ma ne, Mose ah thukhän cu na läk ciah chang a van naw hmat khai gui. ²⁵ Bawi Jesuh zum law tuk ciah chang pakhui hei ah hmawk läi ah, a gup am ami tu m’bei ah ei auk, si la a gawn ung kheik ne ngawn gui phung kä a mi ei auk vai la ng’zopawm dütdüt gui cu ami hlawi vai ah m’hnüt ne k’bäi u ne, ca guh ne kami pe gui ci nei.” ci ne pyein ci gui. ²⁶ Cun ah kia sei Paul naw a ngawi ung cun ah chang phli cu khü gui netah theingcim nak cu bi püi gui ci. Cun kawn ah ani cu pum im ah hteit ne, theingcim nak a mi bi ang pyi nak vai ah a khin la ami mät phäh phäh naw ap ne ami peit nak vai ah a khin cu ng’daut ne m’thein gui ci. ²⁷ Ak hnüüp chih nak cu ng’pyi law ghep ghep khä tah Asia kho ah kaa Judah chang am shah gui naw, pum im ah Paul cu hmu u netah, chang gui cu took gui ne, Paul cu ng’lung nah ne phak ci gui. ²⁸ Cun ah pha u netah, “Israel chang gui aw, na bi law püi gui vä, shin ah chang cu kho ng’nü ah hteit ne Israel chang gui ni, Mose ah thukhän pum im ah mawng gui ni cu päipih täitawk ne chang gui am m’theithang gui ci nei. Cun bäng ah kä kya ciah shin ah chang naw chang pakhui hei gui cu pum im kyong ah law püi gui ne, ak theingcim nak pi cu shetkat sak ci nei” ci ne m’lau ci gui. ²⁹ (A i ah kya sei cun ah ami pyein ci ung ngahmi naw Paul cu, Ephesus ah kaa Trophimus awn atäng ah gaw ng’lung ah hmu te u netah, Paul naw pum im kyong ah law püi ciah ngai ne ami pyein ah kia ci). ³⁰ Pigaw avan thüngkyüng u ne, chang gui avan dawng law u ne Paul cu pha ne pum im ah k’pung ah saw law ba u netah, pum im m’kawt cu ang ghit ah hei khai ci gui. ³¹ Chang gui naw Paul cu ngawn vai ah ami tha nak zah ung, Roman gaakap bawi naw, Jerusalem gawnu avan ung thüngkyüng thüngphyong ci, ci cu ng’za netah, ³² a cun vai am gaakap bawi gui la gaakap gui cu khü gui ne, chang gui ah ng’bum nak ah dawng lawk ci gui. Chang gui naw gaakap bawi la gaakap gui cu hmu gui netah Paul cu kä tukhtah ah om ci gui. ³³ Cun zah ung gaakap bawi gawk law ne Paul cu pha sak gui ne, m’si gui k’hnih awn pha ne khih sak gui ci. Cun kawn ah Paul cu a u chang ah a kiak la a i kat nak a bi ah ng’shi k’ca gui ci. ³⁴ Cun ah chang gui naw a hei hei ah m’lau ne pyein ci gui. Cun ah m’lau ne k’pamcai u sei, gaakap bawi naw a mawng ak cang cu kä hmat hlawt netah, Paul cu a zung ah ami hteh püi vai ah pyein ci. ³⁵ Gaakap bawi ah zung khlaak pei ah ami gawk law zah ung, chang gui naw k’bui law aih u khä tah, gaakap gui naw Paul cu chang ne hteh püi ci gui. ³⁶ Chang khli gui naw a hnu ah läk law u netah, “Shin ah chang cu ngawn vä” ci ne m’lau ci gui. ³⁷ Gaakap gui naw Paul cu im kyong ah luh law püi vai u khätah, Paul naw gaakap bawi am, “Nang a pi ah ka ning thu püi hlük ci” ci ne pyein ci. Gaakap bawi naw, “Nang Krik thu ah na ng’thu thei ne ang? ³⁸ Zanhta shäng ung ng’küükneet ne ng’tuk bi khai ah, chang phia phli-kip khah püi ne, bunghmu ah dawng ciah, Egypt chang cu nang ah kä kia ne ang?” ci ne ng’shik ci. ³⁹ Paul naw, “Kei cu Judah chang ah ka kyak ci, Cilicia kho, Tarsus mang gaw ung ng’tüi ciah gaw ng’liing mang chang ah ka kiak ci. Na bä ni, chang gui ah ma ah ng’thu ka pyein vai ah nam gein nä” ci ne pyein ci. ⁴⁰ Gaakap bawi naw zum sei, Paul cu khlaak ung ng’düi netah, chang gui ami dingkyiip vai ah akut awn nüt ci. Chang gui dingkyiip zawp u khätah Paul naw Hebru ng’thu awn: shicha pyein ci.

¹ “Israel chang nupa phäi nau gui aw, tuk bäi ka mät ah mawng phlehphlang ne ka pyein lawk khai na ngai tu vä! ² Cun ah Hebru ng’thu awn a pyein cu chang gui naw ng’za u netah dingkyiip law pi ne ngai ci gui. ³ Paul naw k’täih ne,” Kei cu Cilicia kho Tarsus gawnu ung ng’tüi ci ah Judah chang tumat ah ka kiak ci. Jerusalem ung däm ng’vai law ne, pu pa gui naw ami läk ah thukhän cu Kamaliel ah a lüng ah ka theithang tuk ci. Tuk ngawi nangmi Khanpughi ung nami m’lung a ling ah mäih ah kei phi kam lung ling man ci. ⁴ Kei naw Bawipa Jesuh ah lam läk ciah chang gui cu ngawn gui haw ne kak’dudeiu na gui man ci. Hnumi gui, k’pami gui akda pha gui ne Thawng ung phi ka chum gui man ci. ⁵ Kei naw ka pyein ak cang ah a kiak cu, Taigü tung la Kawngsi ng’vai gui mät saksi hning khai gui nei. Ngahmi naw Damaskus ah Judah chang phäi nau gui am ami guk gui ah ca cu, kei naw ka gah ci. Cun ah kia sei Cun ah Bawipa zum ciah chang gui phung pha ne Jerusalem ah law püi ne m’kat gui vai ah, kei cu Damaskas ah ka hteit ci. ⁶ “Kei cu lam ka hteit te ci, Damaskas gawnu kak et law zah, hnüüp lunglai khin ung khankho ah kaa ak dei nu cu ang ghit ah kia law ne, veing ne na shü lawk ci. ⁷ Kei cu m’dek ung kiu ne ng’zän netah, “Soul, Soul, a i ah kia sei kei cu nah na k’dudeiu nak ang” ciah k’aw cu ka ng’zak ci. ⁸ Kei naw Bawipa, nang u nei” ci ne ng’shi ngätah, Bawipa naw, “Kei cu nang naw na k’dudeiu nak ah, Nazaret chang Jesuh nei” ci ne pyein ci. ⁹ Kei awn atäng ah kami ng’gui ciah chang gui naw ak dei cu hmu tu pang u ne phi kei na ng’thu püi ciah k’aw cu kä ng’za tuk ci gui. ¹⁰ Kei naw, “Bawipa, Kei a i ah ka kiak khai ang” ci ne ng’shi ba ngätah, Bawipa naw, Tho law ne, Damaskas ah hteit ä, cu ah na gawk awn ah a i ah na kiak vai cu Khanpughi naw ning m’thein khai nei” ci ne pyein ci. ¹¹ Kei cu cun ah ak dei ah nam dang nak ka mik m’dauh sei, kami ng’gui ci gui naw na k’pang tu u ne, Damaskas ah na hteh püi ci gui. ¹² Cun ah gawnu ah Ananias ming nak ciah chang tumat om ci. Ani cu thukhän läk ne zum nak om ciah chang ah kia sei, Cun ah gawnu ung om ciah Judah chang avan naw amik chang m’sui ah chang ah kia ci. ¹³ Ani cu law ne ka pei ah ng’düi netah, “Ka nau Soul, na mik m’dei ba sä” ci ne pyein ci. A cun vai am ka mik m’dei law ba sei ani cu teng ä tah, ¹⁴ Aninias naw, “Nang cu mi pupa gui ah Khanpughi naw a ng’zaak hlü na hmat vai, düng ciah ak chang shäm na hmuh vai la a cun ah Bawi ah thu k’aw na ng’zaak vai ah hmawk ah ning ghü pyi ci nei. ¹⁵ Nang cu na hmuh na ng’zaak gui a van na pyein khai ah cun ah Bawi ah saksi ah na kya khai nei. ¹⁶ Cun ah kia sei tuk bäi a i vai na ngaih shäng ang? Tho law ne, tui hnim ä, na kat nak gui a ning m’si peit vai ah Bawipa ah taigü ä” ci ne pyein ci. Paul cu Tüi Ci. ¹⁷ “Kei cu Jerusalem ah hteit ba ne, pum im ah ka taigü zah ung ka mik hmuk ci. ¹⁸ Cun ah ka mik hmuh nak ung Bawipa cu dang law netah, “Ang ghit ah kä shou shü ne Jerusalem ung kaa a hei ah na hteh vai, shin ung om ciah chang gui naw, kei ah mawng na saksi cu kä dou khai gui nei” ci ne pyein ci. ¹⁹ Kai naw, “Bawipa Pum im päng ung hteit ne, nang ning zum ciah chang gui pha gui ne, tuthat gui ciah chang, kei ah ka kiak cu ngahmi naw hmat pyi ci gui nei. ²⁰ Nang Bawi ah mawng saksi ciah Stephen ami ngawn zah ung phi kei cu a pei ah om ne ka tängpang tuk ci, ngawn ci gui ah suisak cu ka kawh pe gui ci.” ci ne m’hlan ba ngä tah. ²¹ Bawipa naw, “Hteit ä, a shou nak ah om ciah chang pakhui hei gui ah, nang cu ka ning tüi khai nei” ci ne pyein ci” cik ci. ²² Chang gui naw Paul ah thu cu shin ah thu a pyein güt ngai u netah, “shin ah chang m’dek khan ah kä om tu ba sä, ngawn vä, a ghin tu ba ah kä nik ci nei” ci ne m’lau ne ng’pyang ci gui. ²³ Ngah mi cu ami sui khleek u ne, m’vut kaw ne khankho ah han phyang ne m’lau ci gui. ²⁴ Cun ah kia khä tah Roman Gaakap bawi naw ak chang gui am, Paul cu zung im kyong ah luh püi u netah a i ah kia sei chang gui shin ah ami kiak ah mawng, tuthat ne ng’shi vai ah k’bäi ne täk gui ci. ²⁵ Ani cu tukthah vai ah pin ne ami khih zah ung Paul naw a pei ah ng’düi ciah gaakap bawi ah ma ah, “Roman chang pa tumat, kä ng’shica, kä m’khoicha ah, tukthah vai cu, thukhän nawn ng’bääi ne ang?” ci ne ng’shik ci. ²⁶ Cun ah Thu cu ng’za netah gaakap bawi naw gakap ng’vaipi ah hteit ne, “A i hawkcha na bi ang? A ni cu Roman chang pa tumat ah kyak ci nei” cik ci. ²⁷ Cun kawn ah gakap ng’vaipi cu Paul ah om nak ah law ne,” Nang cu Roman changpa maa? Nam thein ä” ci khä tah, Paul naw, “ä ” cik ci. ²⁸ gakap ng’vaipi naw, “Kei cu ngui akda pe netah, Roman changpa ah ka kia lawk ci nei” ci khätah, Paul naw, “Kei läi Roman changpa ah ka ng’tüi law ge ci nei” ci ne pyein tu ba ci. ²⁹ A cun vai-am Paul cu ng’shica m’khoicha tuk khai ah chang gui phi ng’hlat ba zawp ci gui. Paul cu Roman changpa ah akiak ah mawng la ani m’sii gui awn pin ne ami khih ah mawng cu hmat netah, gakap ng’vaipi cu ang htei ah kyikyawk ci. ³⁰ Paul cu Judah chang gui naw a i kat nak k’bün ne ami k’sung cu, gakap ng’vaipi naw ang dang ah hmat hlük ci. Cun ah kya sei a ngawi ung Paul ami khih nak ah m’sii gui, gui cu k’phian tu ba netah, Taigü la kawngsi ng’vai gui cu ng’cut sak gui ci. Cun kawn ah Paul cu law püi ne ami ma ah ng’düih sak ci.

¹ Paul naw kawngsi ng’vai gui cu kheing ne teng gui netah, “Israel phäi nau gui aw, Kei cu tuk ngawi ung khüt sei, ka ghin na chuih Khanpughi ah ma ah kam lung kyong theingcim sei ka bilo om ih ci nei” ci ne pyein ci. ² Taigü tung Ananias naw a pei ah ng’düi ciah chang gui am, Paul cu am gawng ung k’beeih sak gui ci. ³ Paul naw, “A bauk awn hluk ah k’pang! Nang cu Khangpughi naw ak cang ah ning m’kat khai nei. Nang naw kei cu thukhän teng ne nah na m’khoicha khai ah pawngpüi lang ne, kei ami na thah vai ah na pyein na hmawk ah thukhän cu nam shet pyi ci nei” ci ne kiak nak ci. ⁴ A pei ah ng’düi ci naw Paul am, “Nang naw Khanpughi ah Taigü khem cu na k’shedam nak ci maa?” ci ne ng’shi u khätah, ⁵ Paul naw, “Israel Phäi nau gui aw, ani taigü khem ah a kiak cu kei naw kä ka hmat ci nei, cacim ung,” na kho chang uk ciah bawimang cu ak she ah kä na thu püi vai’ ci ah om ci nei” ci ne kiak na gui ci. ⁶ Paul naw cun ah kawngsi ung amshah cu Pharisee gui, am shah cu Sadduces gui ah ami kiak cu hmat law netah, “Kei cu Pharisee nei, Pharisee ah na hta nei, sih nak ung kaa thawh ba vai ah ka ngaih u ah hmawk ah, tuk bäi cet ne nami na ng’shi ah kiak ci nei” ci ne kawngsi zung k’poh khai ah m’lau ne pyein ci. ⁷ Cun kawn ah Pharisee gui la Sadducee gui cu ami mät ng’cuhcan law u ne, hnih ah ng’pai ci gui. ⁸ (Sadducee gui naw, sih nak ung kaa thawh nak ba kä om ci, khankho chang phi kä om ci, mumcha phi kä om ci, cik ci gui. Cun ung phi Pharisee gui naw cun ah thum avan om ciah zum ci gui). ⁹ Ami ng’vookshan ah k’aw cu ng’shawng law pi k’täi khätah, Pharisee pati ung kaa thukhän saya gui cu ng’düi law u ne, “Shin ah chang ung hmakat nak i kä om ci, khankho chang naw baw, mumcha naw baw ng’thu m’sak ci ah kiak khai” ci ne ng’küükneet ne ng’cuh ci gui. ¹⁰ Ami ng’cuhcan nak cu däm law pi k’täi khätah, gakap ng’vaipi naw Paul cu ami ngawnsheh law vai ah ng’ä netah, gaakap gui am Paul cu m’htei ne zung im kyong ah ami hteh püi ba vai ah pyein ci. ¹¹ A cun mü Khanpughi cu Paul ah ma ah ng’düi netah, “Kä na kyih vai, nang cu Jerusalem ung kei ah mawng na saksi ah mäih ah Rom ung phi na saksi ba khai nei” ci ne kiak nak ci. ¹² A ngawi ung kho ngawi Judah chang amshah gui cu ng’cut ne ng’hmuh u netah, Paul kä mi ngawn pha ah chuih a i phi kä ei auk ah mi om khai ci ne k’bäi ci gui. ¹³ Cun ah ng’ge ci gui cu chang sing phli-kip vai lawk ci gui. ¹⁴ Ngahmi cu taigü khem la ang vai gui ah ma ah hteit u netah, “Keimi cu Paul kä kami ngawn pha ah chuih a i phi kä kami ei aw ba khai ah kami k’bäi ci nei,” ¹⁵ Cun ah kia sei nang la kawngsi ng’vai gui naw Paul cu ak tung ah nami ng’shica hlük ci hlawk ah, Roman gakap bawi ah nami k’thäh ba vai nei. Nangmi ah om nak ah kä ah gawk law pha ung ani cu ngawn vai ah kami na ngäng khai nei” ci ne pyein ci gui. ¹⁶ Cun ung phi Paul ah be ah hta naw cun ah ami ng’ge cu ng’za netah, zung im kyong ah hteit ne Paul am m’thein ci. ¹⁷ Paul naw, gaakap ng’vai tumat cu khü netah, “Shin ah chang hta gakap ng’vaipi ah hteh püi ä, gakap vaipi am, am’thein vai a mawng om ci nei” ci ne pyein ci. ¹⁸ Cun ah kya sei gaakap bawi naw cun ah chang cu gakap vaipi ah hteh püi netah, “thawng kium Paul naw shin ah chang cu nang ah ka law püi vai pyein sei ka law püi nei, ani naw nang ah ma ah a pyein vai amawng tumat om ci nei” ci ne pyein ci. ¹⁹ Shekshen bawi naw cun ah chang hmaw cu akut ung k’pang ne a hei ah hteh püi netah, “Kei ah ma ah a i ang na pyein vai a om” ci ne ng’shik ci. ²⁰ Cun ah chang naw, “Judah ng’vai gui naw Paul cu ak tung ah ng’shica hlük ci gui hlawk ah kia ne, ngawi ung nang naw kawngsi zung ah na hteh püi vai ah, ning k’thäh khai gui ah ng’ge ci gui nei. ²¹ Ngahmi ah k’thäh law cu kä na zum men vai nei. Lam ah chang sing phli-kip naw ng’thup ne mah ci gui nei. Ngahmi cu Paul kä ngawn pha ah chuih a i kä ei auk ba vai, ci ne thukhän ci gui nei. A tuk bäi ge ngahmi cu Paul ngawn vai ah pawng u neh nang bawi ah thu m’cha cu ging ci gui nei” ci ne pyein ci. ²² Shekshen bawi naw, “tuk bäi nah na m’thein gui cu a u am kä nam thein nem vai nei” ci ne m’cäi netah cun ah chang cu tüi ba ci. ²³ Shekshen bawi naw gaakap bawi hnih cu khü goi netah, “Sisarea ah hteit khai gui ah, gaakap phia goi, k’se cum gaakap chih-kip, la k’htei kawt gaakap phia goi cu hneng mü nazi kaw ung ng’düi ge khai gui ah nami m’hnüt vai nei. ²⁴ Paul hmawk ah k’se gui phi nami pawngpüi ge vai. Cun kawn ah ani cu m’htei ne Gawmang Felix ah nami hteh püi vai nei” ci ne m’cäi gui ci. ²⁵ Shekshen bawi naw ca phi gu ne pe gui ci. Cun ah ca ung; ²⁶ “Klawdius Lisias naw Gawmang Felix ah chang m’sui nak awn ca gu lawk ci nei. ²⁷ Judah chang gui naw shin ah chang cu pha ne ngawn khai gui pawng ci gui. Ani cu Roman changpa ah a kiak cu kei naw hmat netah, gaakap gui awn hteit ne ani cu kami k’phiawn nei. ²⁸ Judah chang gui naw a i kat nak k’bün ne ami k’sung cu kei naw hmat hlü netah, ami kawngsi ah ka hteh püi te ci nei. ²⁹ Ani ung sih nak vai kat nak la thawng cum nak vai ah kat nak, a pi phi a om kei naw kä ka hmuk ci. Judah chang gui naw ani cu ami mät ah thukhän nawn m’kat ne ami k’sung ah kia ci. ³⁰ Judah chang gui naw ani ngawn khai gui ah ami pawngpüi cu hmat netah, a cun vai am nang ah ka tüih law ah kiak ci nei. Cun ah chang gui naw phi ami ng’chaak nak ami pyein hlü cu nang ah ma ah ami pyein vai ah ka k’bäi gui nei.” ci ah om ci. ³¹ Gaakap gui naw gakap ng’vaipi ah pyein ah mäih ah Paul cu hteh püi u neh a cun mü Antipatris gawnu ah gawk püi ci gui. ³² A ngawi ung gaakap gui cu ng’hlat law ba u sei, k’se cum gaakap gui naw Paul cu hteh püi ci gui. ³³ K’secum gaakap gui cu Sisarea ah gawk u netah gakap ng’vaipi ah ca cu Gawmang am pe u ne, Paul cun phi ap ci gui. ³⁴ Gawmang naw ca cu phat netah, “nang a i kho ah kaa ang” ci ne Paul cu ng’shik ci. Ani cu Cilicia kho ah kaa ah a kiak cu hmat netah gawmang naw, ³⁵ “Nang ning chak ci gui gawk law u khä tah ka ning shik khai” ci ne kiak nak ci. Cun kawn ah Paul cu Gawmang ah mang im kyong ah ngoh sak ne ami ngäng vai ah m’cäi gui ci.

¹ Ak hnüüp hma hnüüp ung taigü tung Ananias cu ang vai gui awn, ng’Thukthei Tertullus cu khah püi ne Sisarea ah gawk law ci. Ngahmi cu Gawmang Felix ah ma ah law u ne, Paul cu kat nak k’bün ne k’chak ci gui. ² Gawmang naw Paul cu khü ne m’düih khätah, thukthei Tertullus naw; “Nang bawi Gawmang ah na bämang nak la na hmuhmat nak awn tuhgüt ung ding gei sei kami om ci nei. Kami kho ah hmawk ah ak ni pi ak thai pi ah na piantham phi bä ci nei. ³ Cun gui cu keimi naw a kho päng ung ang täi sei zeikyai ne kami dou ci nei. ⁴ Kei naw a khin ak shou kä ka la hlük ci. Cun ah kia sei keimi naw ak tawi ah kami pyein cu nah na ngaih pek gui vai ah ka pyein hlük ci. ⁵ Shin ah chang cu k’tüphlawh thei ci ah kyihkyawk vai ah chang ah kami hmuk ci nei. Ani naw khom’dek khan ung Judah chang gui thüngphyong khai gui ah tüihtok gui ci nei. Ani cu Nazaret chang ah pati ung ng’vai tumat ah kiak ci nei. ⁶ Pum im cun phi shetkat sak khai ah k’tha nah khä tah kami pha nei. (Keimi naw ani cu thukhän awn m’khoichaa vai ah ng’za hlü u ngäh sei phi, ⁷ gakap ng’vaipi Lisias naw kami kut ung kaa ak gat ah ana guh ba gui nei. ⁸ Ani ah kat nak pyein ci gui ah chang gui cun phi nang ah ami law vai ah pyein ci nei). Nang bawi na mät naw na ng’shi ah a kiak ung keimi naw k’sung ne kami k’bün ah kat nak gui avan cu na hmat khai nei” ci ne pyein ci. ⁹ Judah chang khli gui cun naw phi, “ani ah pyein gui cu ak cang bäng bäng nei” ci ne, Paul cu ng’lung nah ne k’sung ci gui. ¹⁰ Gawmang naw nüt ne Paul am pyein tu ba sak khä tah, Paul naw, “Nang naw shin ah kho chang ah khan ah, khokum ak shou ung m’khoicha nak na bi law cu ka hmat ci nei. Tuk bäi ka mät ng’küikyan ne ak cang ka pyein tu ba ah phäh ah phi ka zei ci nei. ¹¹ Kei cu Jerusalem ah Khanpughi ah ka taigü khai ah ka hteh cu hnüüp gha-lei-goi vah law phak ci. Cun cu na mät naw na ng’shi gui ung phi na hmat khai nei. ¹² Taigü im ung phi bä, pum im gui ungphi bäi, pigaw kyong ah phi bäi, chang gui Thüngpyong khai gui ah kei naw ka tüih tok cu Judah chang gui naw kä hmuh man khai gui nei. ¹³ Tuk bäi kei ami na k’sung nak cu ngahmi naw saksi kä m’dang hlawt khai gui nei. ¹⁴ Cun ung phi ngahmi naw kä ng’düng ciah ami pyein ah lam ung pupa gui ah Khanpughi cu ka taigü ci. Mose ah thukhän avan la prophet gui ah cacim avan cun phi ka zum ci. ¹⁵ Kei cu Khanpughi ka zum ci kia ne, chang k’ni, chang she, chang avan cu, sih nak kung kaa tho ba khai ah ka ngaih u ci. A cun ah mäih ah ngahmi naw phi zum ne ngaih u ci gui. ¹⁶ Cun ah kia sei kei cu Khanpughi ah ma, chang ah ma ah, kam lung kyong theing cim khai ah ang täi sei ka k’tha nak ci. ¹⁷ Kei cu Jerusalem ung kaa naw ka hteh nak khokum akda shou law khätah, ka mät ah chang gui am ngui ka thak gui khai la, Khanpughi am peittaak nak ka bik khai ah, ka gawk law ba ci. ¹⁸ Taigü im kyong ah kei cu theingcim nak ka bi kawn ah, peit taak nak ka bi law zah ung, ngahmi naw kei cu na hmuk ci gui. Cun zah ung chang a u kä om ci, thüngpyong pamcai nak phi i kä om ci. ¹⁹ Cun ung phi cun sang ung, Asia kho ah kaa lawk ciah Judah chang am shan gui om ci gui. Kei am k’sung vai kat nak om ci a kiak ung shin ung ami mät law u ne, ²⁰ kei ah kat nak cu nang bawi ah ma ah m’dang ne pyein khin ci gui te. ²¹ Kä cun ung phi kei naw kawngsi ah m’hlan ne ka pyein tuba zah ung, “Kei naw sik ciah chang gui tho ba khai ciah ka ngaih u ah hmawk ah tuk ngawi nami na cet ah kiak ci nei” ci ne m’lau ne ka pyein ah kawn ah a hei ka hma nak a om ah ngahmi naw tuk bäi pyein u sä” ci ne pyein ci. ²² Felix cu a mawng a ma hmat ciah chang ah kia ne, ang shica nak gui cu ng’düm sak gui netah, “gakap ng’vaipi Lisias gawk law khätah ning m’khoicha peit gui vai nei” ci ne kiak na gui ci. ²³ Paul cu ngäng ne m’htei sak gui ne, a paw chang gui naw ami teng m’kein m’hteihtang vai phi zum ne m’cäi gui ci. ²⁴ Kho hnüüp a pi shou law khätah Felix cu ak chu Drusilla awn atäng ah lawk ci goi. Drusilla cu Judah hnumi ah kiak ci. Felix naw Paul cu khü sak gui netah, Bawi Jesuh Khrit zum nak ah mawng a pyein gui cu ngai ng’zak ci. ²⁵ Cun ung phi Paul naw, ni kiom nak ah mawng, htingling vuihgiip nak ah mawng, la gawk law khai ah m’khoichaa nak ah mawng gui cu, tän ne pyein khätah, Felix cu kyikyawk law netah, “Tuk bäi na hteit ba hning ci, cän kawn ah a khin a om nak ung ka ning khü law ba khai” ci ne kiak nak ci. ²⁶ Cun kawn ah phi Felix cu Paul naw ak phiawn vai ah ngui pek khai ah ngai natah a shängshäng khü ne ng’thu püi ci ci. ²⁷ Cun kawn ah khokum goi lüng khä tah, Felix ah hnün ung Porcius Festus cu Gawmang ah kia lawk ci. Felix cu Judah chang gui naw ami chang m’sui vai ng’za hlü netah, Paul cu thawng ung chum lä shüt ci.

¹ Festus cu cun ah kho ah a gawk law nak hnüüp thum lüng khätah, Sisarea ah kaa Jerusalem ah hteit ci. ² Taigü khem gui la Judah chang ang’vaih gui cu, kat nak a hlühlü Paul naw a bi ah pyein neh. Festus ah ma ah chak ci gui. ³ Ngahmi cu Paul ami law püi ung lam ah mah ne ngawn vai ah pawng pyi ci gui ah kia ne, Ngahmi am hlün nak gui ah Paul cu Jerusalem ah a hteh püi ba sak gui vai ah k’thäh ci gui. ⁴ Festus naw, “Paul cu Sisarea ah thawng ung chum ne ngäng ci gui. Kei ka mät kä shou pha sei a cu ah ka hteit lawk khai. ⁵ Nami ng’vaihta gui cu kei awn atäng ah hteit tu u ne, Paul ung a kat nak a om ah a kiak ung tän ne pyein ne kei ah chah u sä” ci ne kiak na gui ci. ⁶ Festus cu Jerusalem ah hnüüp cheit, kaw, ghaa om ba netah Sisarea ah hteit ci. A ngawi ung thu m’cha nak mang kyang ung ngoh netah Paul cu khü sak gui ci. ⁷ Paul gawk law khä tah Jerusalem ah kaa lawk ciah Judah chang gui naw, ani cu k’bui u netah, thuuk ne shah ciah kat nak gui k’bün ne k’sung ci gui, cun ung phi a cun ah mawng saksi käm dang hlawt ci gui. ⁸ Paul naw, “Kei naw, Judah chang gui ah thukhän ah khan ah phi bäi, Pum im ah khan ah phi bäi, ghangpughang ah khan ah phi bäi, ka shetkat nak tumat hta phi kä om ci,” ci ne m’hlan tu ba gui ci. ⁹ Festus cu Judah chang gui ah chang m’sui nak ng’za hlü netah, “Nang cu Jerusalem ah ning hteh püi netah kei naw ka ning ng’shi vai na zum khai ang?” ci ne Paul cu ng’shik ci. ¹⁰ Paul naw, “Kei cu m’khoichaa vai ah ghangpughang ah mang kiang ung ka ng’düi pyi ci. Nang naw na hmat pyi ah mäih ah Judah chang gui ah khan ah kei naw ka kat nak i kä om ci. ¹¹ Ak cangah thukhän khep ne, sih nak vai khin ciah kat nak ka bi ah a kiak ung, nami nam gein vai ah kä ka ng’yoi khai nei. Cun ung phi ngahmi ah nak sung nak cu kä ak cang ah a kiak läi ung a u naw phi kei cu ngah mi ah kut ung kä na ap hlawt khai nei. Kei cu ghangpughang ah ka ng’coipaa ci nei” ci ne pyein ci. ¹² Festus cu ak chang vai gui awn ng’ge ba u netah, “Nang cu ghangpughang ah na ng’paa ci kia sei, ghangpughang ah na hteit khai” ci ne kiak nak ci. Am Thein Tu. ¹³ Cun kawn ah shou hta khä tah Akrippa ghangpughang la ak chu Bernice cu gawmang Festus hmuh ne dou khai goi ah Sisarea ah gawk law ci goi. ¹⁴ Ngahmi ak shou ani om tu kawn ah Festus naw, Ghangpughang am Paul ah mawng cu m’thein tuk ci. Festus naw, “Shin ung Felix naw thawng ung a chum shüt ah chang tumat om ci. ¹⁵ Kei Jerusalem ah ka hteh zah ung, taigü khem gui la Judah chang vai gui naw, shin ah chang cu shetkat nak k’sung u ne, kei naw kam kat vai ah k’thäh ci gui. ¹⁶ Kei naw, ami chak ah chang tumat cu, chak ci gui ah chang gui awn mik hmai ng’chum sei kä ng’hmu sak ah, ngahmi ah chak nak ah mawng cu am hlan nak tu ba gui vai ah, a khin kä peit ah, k’sung ne m’kat cu, Roman thung ah kä kiak ci, ci ne kam thein gui ci. ¹⁷ Cun ung phi ngah mi cu a shi ah gawk law u sei, kei naw ak zä ah a ngawi ung ge, zung ah ngoh ne, cun ah chang cu ka khü sak gui ci. ¹⁸ Chak ci gui naw, ng’düi law ne, ani cu m’kat ne ami k’sung ung phi kei ah ngaih ah kat nak awn ah kä kiak ci. ¹⁹ Ngahmi ah ng’cuh nak cu, ami mät ah zum nak ah mawng la Jesuh ming nak ciah chang ah mawng bäng ah kiak ci. Cun ah Jesuh cu si pyi te ci, cung phi Paul naw ghing ne om ci nei cik ci. ²⁰ Kei naw cun ah mawng gui cu kä pyein m’khüt netah Paul am, “Nang cu Jerusalem ah hteit ne, shin ah ami ning k’sung ah mawng cu, ning shi vai ah na zum ci ang?” ci ne ng’shi ngä sei; ²¹ Cun ung phi Paul naw nang ghangpughang ah m’khoichaa bäbä ng’za hlük ciah pyein ci. Ani na thawng ung om lä netah ghangpughang ah thu m’chaa bä ng’za hlük ciah pyein sei, ani cu nang ghangpughang ah ap law nak ah a khin ung khüt khai ah ami chum vai ah ka pyein nei” ci ne m’thein tuk ci. ²² Akrippa Ghangpughang naw, “Cun ah chang ah ng’thu cu ka mät naw ka ng’za tu hlük ci nei” ci khä tah, Festus naw, “A cun ah chang ah thu cu ngawi ung na ngai ng’zak khai nei” ci ne pyein ci. ²³ A ngawi ung Ghangpughang Akrippa la ak chu Bernice cu, ang htei ah ng’hning kyau khai ah ng’pyang tham ne, gaakap bawi gui la gawnu ung ang vaihta gui awn atäng ah, gawnu im ng’ki kyong ah lut law ci. Cun zah ung Festus ah pyein ah Paul cu luh püi ci gui. ²⁴ Cun kawn ah Festus naw, “Akrippa ghangpughang la shin ung gawk lawk ciah chang ng’vai gui aw, Jerusalem la shin ah gawnu ung om ciah Judah chang gui van naw, ‘Shin ah chang cu kä m’ghin vai nei’ ci neh kei ah k’thäh lawk ci gui. Cun ah ami chaak cu shin ah chang nei. ²⁵ Ani naw sih nak khin vai ah kat nak a bi tumat phi kei naw kä ka hmuk ci nei. Cun ung phi a mät naw ghangpughang ah ka ng’coi ng’paa khai ci sei, nang ghangpughang ah law püi vai ah ka k’bäi ah kiak ci nei. ²⁶ Nang ghangpughang ah ma ah ani ah mawng cu, kei naw a khenggeng ah ka pyein vai i kä om ci nei. Cun ah kia sei ani cu nami ma ah ka law püi ah kiak ci nei. Nang ghangpughang ah ma ah ak tung ah ka ning ap lawk ci nei. Shin ah ka law püi cu, nang ghangpughang naw ng’shi ci tah kei naw ca ka guk vai mawng ang dang vai ah hmawk ah kiak ci nei. ²⁷ A mawng ama a i kä m’dang ah thawng kium tumat chah ba vai cu, lam kä ng’shung khai ah ka ngai ci nei” ci ne pyein ci.

¹ Akrippa naw Paul am, “na mät ah hmawk ah thu na pyein hning ci” ci ne kiak na khä tah; Paul naw a kut k’phyaat ne nüt ne, ² Akrippa ghangpughang! Kei ah khan ah Judah chang gui naw, kat ami na k’sung nak ah mawng cu, nangah ma ah m’hlan ne ka pyein nak tu ba vai ah a khin ka gah cu ang htei ah bä aih ciah ka ngai ci nei. ³ Nang naw Judah chang gui ah thung man la ami ng’cuhcan gui man cu na hmat pyi ci. Cun ah kia sei kei ah thu pyein tu ba cu hnimgei nak awn nah na ngaih pet vai ah ka ng’za hlük ci nei. ⁴ “Kei ka hmaw sang ung tün ne, ka ng’tüi law nak ah kho ung phi bäi, Jerusalem gawnu ung phi bäi, a i hawkcha ka om ih man cu Judah chang gui avan naw hmat ci gui nei. ⁵ Ngahmi naw kei ami na hmat cu shou lawk ci nei. Kei cu Judah gui ah zum nak aküikyang pi k’bäih ah thukhän mah ciah pati ung Pharisee tumat ah ka kiak cu, ami saksi hlü ung saksi hning ci gui nei. ⁶ Khanpughi naw kami pupa gui ah ma ah a shai taak cu ka ngaih u ah phäh ah tuk bäi shin ung ng’cet nak ka aut ah kiak ci. ⁷ Cun ah shaitaak cu Judah pakhui gha-lei-goi naw, amü ak hnüüp Khanpughi ah taigü ne, ami ngaih u ah kiak ci. Ka ghangpughang! A cun ah kei naw ngaih u ne ka om ah hmawk ah Judah chang gui naw kat ami na k’sung ah kia ci nei. ⁸ Shin ung gawk law ciah chang gui! “Khanpughi naw sik ci a thawh ba sak cu, kä zum vai kiak ci” ci ne a i ah kia sei nami pyein ang? ⁹ Kei ka mät naw phi Nazaret chang Jesuh ah ming awn hnu ng’tuk khai ah bi bi vai ka zum man ci. ¹⁰ Jerusalem ung kei naw ka bi gui cu;Kei cu Taigü khem gui ah huham gah netah, Khanpughi ah chang gui cu pha ne thawng ung ka chum gui ci;ngahmi ngawn gui vai ah ami k’bäi law ung phi zum ne ka k’cang na gui ci. ¹¹ Pum im gui ung phi kei naw akda vei ngahmi cu m’sheitkat gui ne, ami zum nak ami nawng vai ah ka k’tha na man ci. Kei cu ngahmi ah khan ah m’lung k’she aih netah, a kho hei gawnu gui zungpum ah hteit ne ngahmi cu ka k’dudeiu na gui ci. ¹² “A cun ah ng’bü nak awn kei cu Taigü khem ah huham nak ca la netah Damaskas ah ka hteit ci. ¹³ Cun ah kami hteh zah, kho hnüüp lunglai ung, hni ah dei pi ciah ak dei cu, khankho ah kaa kia law ne, veing ne na shü law sei ka hmuk ci, kami ng’gui ci gui naw phi hmu tuk ci gui. ¹⁴ A cun vai am kami van kiu ne m’dek ung kami ng’zän ci. Cun kawn ah Hebru ng’thu awn, “Soul, Soul! A i ah kia sei kei nah na k’dudeiu nak ang? Vantang naw a mah ah thah htung ak peh ah mäih ah, nang naw htung m’shum cu nak peh ung na mät ung nak khai nei.” ciah k’aw cu ka ng’za ci. ¹⁵ Kei naw, “Bawipa nang a u nei” ci ne ng’shi ngä tah, Bawipa naw, “Kei cu nang naw na k’dueiu nak ah Jesuh nei, ¹⁶ Nang cu kei ah bi na bik khai, ka ning m’düih khai ah, tuk bäi ka lawk ci. Tuk ngawi na hmuh gui ah a mawng ama gui la, ngawi ah ka ning m’hnuh law vai ah amawng ama gui cu, nang naw chang hei gui ah ma ah saksi ne na pyein khai. ¹⁷ Kei naw nang cu Israel chang gui ah kut ung phi bäi, kei naw ning tüi ngäh sei na hteh nak ah chang pakhui hei gui ah kut ung phi bäi, ka ning hun khai. ¹⁸ Nang naw chang pakhui hei gui ah mik nam dei sak gui khai, ak hmüp ung kaa naw ak dei ah na ng’lat sak gui khai, khogam ah hlüng tai nak ung kaa naw Khanpughi ah hlüngtai nak ung na gawk sak gui khai. Cun ah kia sei ngahmi cu kei ami na zum nak awn, ami kat nak phyawn nak gah ah u ne, Khanpughi ah ghü ah chang gui ah ng’lung ah ami hmun kho gah tuk khai gui. ¹⁹ “Akrippa Ghangpughangmang! Kei naw khankho ah kaa ka hmuh cu kä pyein ah kä ka hlawt ci nei. ²⁰ Damaskas ung tün ne, Jerusalem, Judea kho avan ung la chang pakhui hei gui am, “ami kat nak ung ng’zu ba ne, Khanpughi ah ami ng’hlah law ba vai la ng’zu pyi ciah chang ah mäih ah ami om ih gui vai cu, m’thein gui ne, ng’thu ka pyein ci nei. ²¹ A cun ah hmawk ah Judah chang gui naw kei cu taigü im kyong ah na pha u ne, na ngawn hlük ci gui. ²² Cun ung phi tuk ngawi ung khüt khai ah Khanpughi naw nam htei sei, ak pyam, ang mang, chang khli ah ma ah, ka saksi ci nei. Mose la prophet gui ah ng’thu pyein ah mäih bä bä ah; ²³ Messiah cu sih nak a aut kawn ah, sih nak ung kaa tho ba htük ne, Israel chang gui la chang pakhui hei gui am, hun nak ah ak dei ah mawng cu shäu ne m’thein gui khai nei” ci ne m’hlan ne pyein tu ba ci. ²⁴ Paul naw cun ah thu a pyein zah ung, Festus naw, “Paul aw, nang na gu pyi ci nei, na mät ah hmuhmat nak naw ning gu sak pyi ci nei” ci ne m’lau ne pyein ci. ²⁵ Paul naw, “Ghanpughang aw, kei ak gu ah kä ka kiak ci nei, ak cang cu ngaih na ne ka pyein nei. ²⁶ Ghangpughang mang aw, nang naw shin ah a mawng cu na hmat pyi ci kia sei, na ma ah shicha ka pyein hning ah kiak ci nei. Shin ah a mawng gui cu ang thuh nak ung dang ciah kä kiak ci, nang ghangpughang naw phi avan na hmat pyi ciah ka ngai ci nei. ²⁷ Ghangpughang aw, prophet cacim gui cu na zum ci ang? Na zum ciah kei naw ka hmat ci nei” ci ne pyein ci. ²⁸ Akrippa naw Paul am, “Nang naw kei cu, a shäng hta ung khritha ah na na kiak sak khai ah na ngai ci maa?” ci ne kiak nak ci. ²⁹ Paul naw, “ashäng hta la ak shou nu cu ak tung ah kä kiak ci, nang ghangpughang la tuk bäi ka ng’thu ngai ng’za tuk ciah chang avan cu, shin ah khihpawn nak ung kaa phiawng ne, kei ah mäih ah nami kiak law tu vai ah, Khanpughi ah kak taigü ci nei” ci ne pyein ci. ³⁰ Cun ah kia khä tah, ghangpughang la ak chu Bernice ni, Gawmang ni, ami chang gui ni ami van cu ng’düi law ba ci gui. ³¹ Cun ah ng’düi law ne ami hteh ba kawn ah, “shin ah chang cu sih nak kä cun ung thawng kium nak khin vai ah kat nak abi kä om ci” ci ne ami mät ng’htau ci gui. ³² Akrippa naw Festus am, “Shin ah chang cu ghanpughang ah ng’paa nak kä a bi vai sü ung k’phiawn hning te nei” ci ne pyein ci.

¹ Keimi cu Itali kho ah na hteh püi gui khai gui ah k’bäi u netah, Paul la thawng kium gui ami van cu, Festus naw “Ghangpughang ah shekshen” a mi ciah Roman shekshen ung gaakap bawi Julius ah kut ung ap gui ci. ² Keimi cu Asia kho tuinu kem, pigaw päng ung hteit khai ah, Adrammittium ah kaa lawk ciah htinpaw ung kai tuk u ne, k’täi ne kami hteit ci. Thessalonika ah kaa Macedonia chang, Aristarkas cun phi keimi awn kami ng’gui ci. ³ A ngawi ung keimi cu Sidon ah kami gawk ci. A cu ah Julius naw Paul cu m’gein netah a teihpüi gui awn hmuh sak gui ci. Ngahmi am phi khin chah na sak gui ci. ⁴ Cun ung kaa kami hteh kawn ah kho khi aih khätah khohki ah ng’hlawi nak Saiprus ah kami hteit ci. ⁵ Cun ung kaa naw Cillicia la Pamphilia tuinu ung hteit u ne, Licia kho Maria ah kami gawk ci. ⁶ A cu ah Alexandria ah kaa law ne Itali ah hteit khai ah htinpaw ung ang vai naw na kai tu sak gui sei kami kai tuk ci. ⁷ Keimi cu kho hnüüp akshou hteit kyäp kyäp unetah, Kanidus pigaw pei ah zai ngai ngai ne kami gawk ci. Khokhi kä ng’hlawi sei, khokhi ah ng’shung nak Krete tuikoi lam ah hteit u ne, Salmone m’zum cu kami sun pah ci. ⁸ Tuikem awn ng’et pipi khai ah htinpaw awn hteit u ne, khak ngai ngai sei Lasea pigaw pei, Safe kho ng’phäng ami ci nak ung kami gawk ci. ⁹ Keimi cu cun ung kho hnüüp akda om tu u ngähtah ei hlawi nak ah pawi hnüüp phi ng’phlän pyi ci. Cun ah kya sei tuinu ung hteh vai cu ng’ä ai vai kia lawk ci. Cun ah kya khätah Paul naw, ¹⁰ “Ang vai gui aw, tuk bäi chü tuinu ung htinpaw awn mi hteh ah a kiak ung khawhcham bäng ah kä kyak ciah chang phi mi si hning ciah kei naw ka hmuk ci nei” ci ne m’thein gui ci. ¹¹ Cun ung phi gaakap bawi naw Paul ah thu cu kä zum ne, kaptain la htinpaw kaa nak ciah pyein cu zum ci. ¹² Cun ah pigaw tuikam ung kho hting kho ah htinpaw ang düm nak vai kä ni khähtah, chang akda naw Phoenik tuikam ung ang düm vai ah zum ci gui. Phoenik gawnu tuikam cu, Krete kho ung om ne hni kiaak htumsiip lam ah hmai nak khai ah ami sak ah pigaw ah kiak ci. ¹³ Htum lam ah kaa kho khi law khä tah, htinpaw ung chang gui cu ami ngaih bä ah kia lawk ciah ngai u ne, htinpaw awn Krete tui kam zawi gäk gäk ne hteit ci gui. ¹⁴ Cun ung phi kä shou pha sei hni law siip khokhi ah ami pyein ah khokhi cu ng’güüt ne khi lawk ci. ¹⁵ Htinpaw naw kho akhni law nak ma-pam ne kä m’khüt law ba khä tah keimi cu kami k’tha maih sei, kho ah khi nak lam ah kami ng’nawng tuk ci. ¹⁶ Kauda tuikoi ah htum lam ah kami gawk law zah ung api kami ng’shung nak vai om khätah htinpaw ah hnu ah phyawn nak vai hleikaw hta cu kä di khai ah kami k’tha nak ci. ¹⁷ Htinpaw ung bik ci gui ah chang gui naw hleikaw cu zu kaih u netah htinpaw ah pum ung khäng khai ah pawng ci gui. Ngahmi naw htinpaw cu Libya tuiken laigim hmu ah ang tang vai kyi u netah, htinpaw zih hmai cu api ah m’hlat ba u ne, kho ah khi nak ah ng’nawng sak ci gui. ¹⁸ A ngawi ung cun phi puikho khi ne ng’pheet laih laih khätah htinpaw ung bi ci gui ah ah chang gui naw htinpaw khan ah khawhcham gui cu, kaw ne ak pung ah ghawt zawp ci gui. ¹⁹ A ngawi ung mä htinpaw ung ami pyamtham nak ba ah khawhcham gui cu la ne ghawt zawp ci gui. ²⁰ Keimi cu kho hnüüp ak shou hni chaa, aisi kä kami hmu ba ci, kho phi ak tä ah khi laih laih ci. Ak hnu ah keimi cu kä ghin pyi ah ngai ne kami thagui maih zawp ci. ²¹ Chang gui cu a i kä ei auk ah kho hnüüp ak shou om law zai u khätah, Paul naw ami ng’lung ah ng’düi netah,” Ang vai gui aw, nangmi naw kei ah thu cu ngai uk ci sei, Krete ung kaa kä hteit ne mi om vai sü ung, tuk bäi kämi di maih khai sü te. ²² Cun ung phi kä nami ng’ä ai vai, nangmi ung kaa tumat phi kä di maih khai, htinpaw bäng vah di maih khai. ²³ Kei ah ka Bawi, kei naw ka taigü ah Khanpughi ah khankho chang cu, zanmü kei ah law netah, ²⁴ “Paul kä na kyih vai, Nang cu ghangpughang ah ma ah na gawk khai. Khanpughi naw nang cu a ning m’hni nak awn, atäng ah htinpaw ng’cum tuk ci gui ah chang gui cu sih nak ung kaa k’phiawn gui khai nei.” ci ne pyein ci. ²⁵ Cun ah kia sei kä nami kyih kyawk vai, kei cu Khanpughi ka zum ci, cun ah kia sei, kei ah ma ah khankho chang naw a pyein ah mäih ah kia lawk khai, ciah ka zum ci nei. ²⁶ Cun ung phi mik mi cu tui koi kho kawng tumat ung mi ng’düm khai nei” ci ne pyein ci. ²⁷ Ak hnüüp gha-lei-phli nak kho mü ah, keimi cu, khokhi ne ang pheet nak Meditteranean tuinu ng’lung ah kami om ci. Kho cawih ding ah htinpaw ung bik ci gui ah chang naw kho kawng ng’et lawk ciah hmat ci gui. ²⁸ Ngahmi naw tui ah thuuk cu nüt u netah dawng cheit-kip law sei hmuk ci gui, Cun kawn ah a pi vang nawn ba ne nüt ba u netah dawng ko-kip law sei hmu ba ci gui. ²⁹ Ngahmi cu lung mawk vai ah kyi u ne, htinpaw ama lam ah lung shung nak phli cu zuk chah u netah, “khaw thai law hlah sä” ci ne, taigü ci gui. ³⁰ htinpaw ung bi bik ci gui ah chang gui cu htinpaw ah ma lam ah ng’shung nak vai piang ci gui ah ng’shei u netah, phiawn nak ah hleiko ung dawng khai gui ah ami pawng zah ung; ³¹ Paul naw gaakap bawi la gaakap gui am, “htinpaw ung bi bik ci gui kä ami om ba ung, nangmi nami mät phi nami ghin vai ah ngaih u nak kä om ba khai” ci ne kiak na gui ci ³² Cun kawn ah gaakap gui naw phiawn nak ah hleiko ami khih nak ah gui cu tupit ne hleiko cu kaa ah zuk chak ci gui. ³³ Kho thai law hlü khätah Paul naw, ei ami ei auk vai ah m’cäi gui ne, “A i ah kiak vai ni mä ci ne ngai ne nami om nak hnüüp gha-lei-phli law lawk ci, cun zah pum ung nangmi a i kä nami ei auk ci”, ³⁴ Nangmi nami ghin vai ah hmawk ah ei nami ei vai ah ka ning m’cäi gui ci. Nang mi ung chang tumat ah lu ung kaa, lumu ng’ma ät phi kä di maih khai nei. ³⁵ Cun kawn ah Paul naw m’htut cu la ne, ami van ah ma ah Khanpughi m’hlüngtai ne taigü netah, m’htut cu k’bo ne ei ci. ³⁶ Cun kawn ah ami van k’thamah law ba u netah atäng ah ng’ei ng’auk ci gui. ³⁷ htinpaw khan ah chang a van cu phya goi la chih-kip-lei chuk lawk ci. ³⁸ Avan phü vai ah kami ’ei auk kawn ah, htinpaw a zaang vai ah hmawk ah k’htang ip gui cu tui ung shum ci gui. ³⁹ Kho thai law khätah htinpaw ung bi bik ci gui ah chang gui cu, a haw a i zah ah gawk ah kä ami hmat ung phi, tui ng’khep khokawng tumat hmuh u netah, a cun ung htinpaw ng’düm ne vah kai vai ah k’tha nak ci gui. ⁴⁰ Ngahmi naw lung ami m’kaih nak ah gui, gui cu aat pit u ne lung gui cu tui ung zuk chak ci gui. A cun zah ung a mawng vang ah ami khih nak ah gui, gui cun phi k’phian ci gui. Cun kawn ah htinpaw ma lam ah zihdung cu tai ba u ne, tui kam lam ah m’hnawng ci gui. ⁴¹ Cun ung phi htinpaw cu tui ah ken nak ah gawk ne ng’tang ci. Htinpaw ma lam cu ng’süh sei, kä k’hnün ba hlawt ci a hnu lam läi tui ng’lum gui naw that sei ana a di vük ci. ⁴² Cun zah ung gaakap gui naw thawng cum gui tui ng’väk ne ami dawng vai ah kyih u netah, kaap ne ngawn gui vai ah k’bäi ci gui. ⁴³ Cun ung phi gaakap bawi naw Paul cu k’phiawn hlü netah, gaakap gui naw ami k’bäi ah mäih ah kä ami bi vai ah maa na gui netah, tui ng’väk thei ci gui cu, htinpaw ung kaa ng’phäi sak gui ne, kawng ah vah kai sak gui maa ci. ⁴⁴ Cun kawn ah k’pawih ba ci gui cu, k’peei phe gui ung la, htinpaw kak ciah ak pi gui ung ng’cum ne ami vah kai vai ah m’cäi gui ci. A cu cha ah kei mi cu ka mi van phiawng u ne, kawng ah kami gawk ba ci.

¹ Keimi cu cun ah phiawng ne kaung ah kami gawk awn ah cun ah kho kaung cu Malta ming nak ciah kami hmat lawk ci. ² A cun ung om ciah chang gui naw keimi cu ang htei ah nam gein gui ci gui. Kho aa ne kho m’zu law khä tah, mei cik ne nam awm gui u ne, na khin nah gui ci gui. ³ Paul naw sing pawk ät cu la ne mei ung m’sui ci, Sing cu ui law khätah, sing pawk kyong ah kaa phyuu tumat lut law ne, Paul ah kut ung htui ne ng’bah nak ci. ⁴ Cun ah htui ne ang bah nak cu, cun ung om ciah chang gui naw hmu u netah, “Shin ah chang cu chang ngawn ciah kiak khai, tuinu ung kä si ne a phiawn ung phi, ng’düng nak naw ani kä ghin sak ci” ci ne ami mät ng’htau ci gui. ⁵ Cun ung phi Paul naw phyuu cu k’thüng ne mei ung k’htawp ne, a i phi kä m’neh ne om ci. ⁶ Ngahmi naw Paul cu apumsa ng’phling law sei, kiu ne si lawk khai ah ngai ne teng ci gui. A cun ah ak shou ngäng ne teng u sei phi, Paul cu a i ah phi kä kia law khätah, ngahmi cu ami m’lung thawng sei, “Shin ah chang cu ng’zou nu kya ci nei” ci ne kyak ci gui. ⁷ A cun na pei et ah ami ng’vaipi Publius ah akaa, lai gui om ci. Ani naw keimi gui cu na dou gui ne, hnüüp thum ung na khin nah gui ci. ⁸ Publius ah a pa cu a pawi na sei gaw ne ng’zän ci. Paul cu ani ah im kyong ah lut ne taigü ci. Cun kawn ah ani ah khan ah a kut taih ne gai ba sak ci. ⁹ Cun kawn ah cun ah tui koi kawng ung kaa gawpai ciah chang gui cu Paul ah lawk ci gui. Paul naw ngahmi cu gai sak gui ci. ¹⁰ Ngahmi naw keimi am khawh akda na m’cüm’hnah gui ci gui. Keimi kami hteh law ba vai ung phi kami sho ei vai cu htinpaw khan ah na thak law gui ne nam sho gui ci gui. ¹¹ Chaa thum lüng khätah keimi cu, cun ah tuikoi ung düm te ciah htinpaw awn kami hteit law ba ci. Cun cu Alexandria ah kaa lawk ciah, “Hnamnu ng’phi” ming nak ciah htinpaw ah kia ci. ¹² Keimi cu Sirakua gawnu ah ng’düm u neh hnüüp thum kami om pah ci. ¹³ Cun ung kaa naw hteit ba u ne, Rhekium gawnu ah kami gawk ci. Cun ung kaa naw khokhi ni sei hteit ba u ne, hnüüp goi lüng khätah Puteoli pigaw ah kami gawk ci. ¹⁴ Cun ah pigaw ah zum ciah chang gui awn ng’hmuh u ne, kho hnüüp chih kami om vai pyein ne na chou gui u sei, om tu u netah, Romah ah k’täih ne kami hteit ci. ¹⁵ Romah om ciah zum ciah chang gui naw kami gawk cu ng’za u netah, Appius Market ah phi bäi, kami kai nak im tung thum ah khüt law ne phi bäi, na dou law gui ci gui. Ngahmi cu Paul naw hmu gui netah, Khanpughi m’hlüng m’tai ne k’tha mah law ba ci. ¹⁶ Romah kami gawk awn ah Paul cu, amät bäng, gaakap tumat naw angäng tu hnga vai ah a khin gah ci. ¹⁷ Hnüüp thum lüng khä tah Paul naw cun ah gawnu ung om ciah Judah chang ng’vai gui khü gui ci. Ngahmi cu law ne ng’cut law u khätah, Paul naw, “Israel chang phäi nau gui aw, kei naw mi mät ah pakhui ah khan ah phi bäi, mi pupa gui ah thung man gui ah khan ah phi bäi, m’shetkat ne a i phi ka bi lawh kä om lang sei, kei cu Jerusalem ah Jew chang gui naw na pha u netah, Rom chang gui ah kut ung na ap ci gui nei. ¹⁸ Ngahmi naw kei cu na cet u ne, kei ah bi nak ung sih nak khin vai ah mawng a i kä hmu u netah na phiawn hlük ci gui. ¹⁹ Cun ung phi Judah chang gui naw ke khenggeng u sei, kä ng’näng law netah ghanpughang ah ka ng’paa ah kiak ci. Cun cu mi mät pakhui chang gui ka hnu ng’tuk püi hlü su ah kä kyak ci. ²⁰ Cun ah kia sei nangmi awn ng’hmuh vai ah ka k’tha nak ah kia ci. Kei shin ah m’si gui, gui awn ami na khih cu, Israel chang gui naw, mi ngäng ah Bawipa ah hmawk ah kiak ci” ci ne pyein ci. ²¹ Ngahmi naw, “Keimi naw nang ah mawng, ca tumat phi Judea kho ah kaa kä ka mi gah man ci. Mik mi Judah chang, tumat naw phi law ne, nang ah mawng kä ak ni ah kä pyein man ci. ²² Cun ung phi chang akda naw, a hawi hawi baw, nang ah pati ah mawng cu hnu ng’tuk püi ne ng’thu ci gui nei. Cun ah kia sei nang ah pati ah mawng cu keimi naw phi kami ng’za tu hlük ci nei.” cik ci gui. ²³ Cun ah kia sei ngahmi cu Paul awn hnüüp ng’nüt u netah, ami ng’nüt nak ah hnüüp ung chang akda Paul ah om nak ah gawk law ci gui. Paul naw kho ngawi ah tün ne, mü hun nah khüt khai ah khanpughi ah uk nak ah mawng Thu Ni cu m’thein gui ci. Bawipa Jesuh ah a mawng cun phi, Mose ah thukhän la prophet gui ah cacim gui awn küm khai ah, ngahmi naw ami zum tu vai ah k’tha nah ne m’thein tu gui ci. ²⁴ Chang am shah gui naw Paul ah thu pyein cu bä ci ci ne zum tu u sei phi, am shah gui naw kä zum tuk ci gui. ²⁵ Paul naw shin ah a mawng tumat cu pyein khä tah, ami mät gui ng’cuh ng’can u ne, ng’düi law ne hteit ba ci gui. Paul naw, “Mumcha Theing naw, prophet Isaiah ung, nami pupa gui am, am dang cu ni bä bä ci nei! ²⁶ Cun ah am dang cu; “Nang cu Judah chang gui ah ma ah hteit netah, ‘Nangmi naw ngai ne, ngai ne, phi kä nami hmat khai; Teng ne, teng ne phi kä nami hmuk khai” ci ne kiak nak gui vai. ²⁷ A i ah kia sei ci ung, shin ah chang gui ah m’lung cu aang ci, ami k’hnga cu pang ci, ami mik cu m’shing ci. Cun ah kä kia ne, akcang ah; ami mik cu m’dei ne, ami hnga cu ng’lang ne, ami m’lung cun naw hmuhmat ne, a kiak vai sü ung, kei ah ng’hlat law zawp u sei, Kei naw phi ngahmi cu ka gai sak gui khai,’ ci ne khanpughi naw pyein ci” ci ne m’thein gui ci. ²⁸ Paul naw a khüüp nak ah, “Cun ah kia sei hun phiawn nak ah mawng Khanpughi ah Thu Ni, chang pakhui hei gui ah ma ah pyein khai ah chang cu tüih pyi ah kia sei, ngahmi naw ngai zak khai gui’ ci cu nami hmat vai nei” ci ne m’thein gui ci. ²⁹ (Cun ah Paul naw ng’thu a pyein kawn ah Judah chang gui cu ami mät naw ng’cuh ng’can u ne hteit ba ci gui.) ³⁰ Paul cu cun ah gawnu ah ang vah ah im ung khokum goi ung om ci, ani ah om law tuk ciah chang gui cu ana dou gui ne, ak ni ah khin chah na gui ci. ³¹ Ani naw Khanppughi ah uknak kho amawng thu phi pyein ne, Bawipa Jesuh Khrit ah mawng phi abü ang ngaih ah thamah nak awn m’theithang gui ci.