2 TIMOTHI

¹ Kei Paul, Khanpughi ah zak hlü ah Bawi Khrit Jesuh ah ang düihpüi ah kia ne, Bawi Khrit Jesuh ung kawng ät nak awn, mi gah vai ah shaitaak om ciah ghin nak ah mawng, ka shäu ci naw- ² Kam hni ah ka hta Timothi am ca ka ning guk lawk ci nei: Pa Khanpughi la Hunbawi Khrit Jesuh ah m’gein nak, chihnaa nak la dimdeih nak cu nak khan ah om sä. ³ Pupa gui ah mäih ah m’lung ngaih theing awn a khuut ka bi ah Khanpughi cu kam kümto ci nei. Amü angawi ka taigü nak ung nang cu ning shüm ne Khanpughi cu kam kümto ci nei. ⁴ Nang phlitui ali cu shüm ba ne ang htei ah ka ning hmu hlük ci nei. Nang ka ning hmuh ung kei cu zei nak awn ka be khai nei. ⁵ Na pighi Lois la na nu Eunice ah mäih ah ng’ciim ciah zum nak cu ka shüm ba ci nei. Ngahni ah mäih ah na zum ciah ka ngaih gep ci nei. ⁶ Cun ah kia sei kei naw na khan ah kut taihnak ka ning peik zah ung Khanpughi naw a ning peit ah m’cümhnah nak cu ghing khai ah na shum vai ah ka ning m’shümthein ci nei. ⁷ Khanpughi ah nam shumphyuk gui ah Mumcha naw mik mi cu kä na ng’zawm sak gui ne; cun ah Mumcha naw hlüngtai nak, m’hni nak la htingling nak cu na pe gui ci. ⁸ Cun ah kia sei mi Bawipa mawng saksi vai ah kä na lü ng’aa vai. Bawi Khrit ah chaw ah thawng ka kium ciah kei phi kä na na ng’aa nak vai. Khanpughi ah ning peit ah k’thagui awn geinvai nak cu na dou tu vai nei. ⁹ Na hun gui ne amät ah chang ah anam hnüt gui cu, mi mät ah bilawh nikiom nak awn ah kä kiak ci, amät ah ng’bü nak la m’gein nak awn ah kiak ci nei. Khanpughi naw kho kä ang tün pha ge ung cun ah m’gein nak cu, Bawi Khrit Jesuh ung na pe gui ci. ¹⁰ Cun ung phi tuhchü, mi Hunbawi Khrit Jesuh a kyum law kawn ah, cun ah m’gein nak cu, mik mi ung dang lawk ci. Bawipa naw sih nak ah hlüngtai nak cu m’shiu netah, Thu Ni awn käng khuk hlat ciah ang täi ghin nak cu dang sak ci nei. ¹¹ Khanpughi naw kei cu Thu Ni shäu ciah ang düihpüi la saza ah anam düih ah kiak ci. ¹² A cun ah mawng ung kei cu geinvai nak ka gah ciah kiak ci. Cun ung phi kei ung lung üp nak akbe ah om lä ci. A i ah kia sei ci ung kei a u ung kang ap cu ka hmat ci, kei naw ka ap gui cu ak hnu bäih ah Hnüüp güt ung kut shum khai ci cun phi, kei naw akcang ah ka hmat ci. ¹³ Kei naw ka ning m’theithang ah thu düng cu, thei nak vai ah ak htek ah kutshum ne, Bawi Khrit Jesuh ung kawng ät nak awn mi gah ah zum nak la m’hni nak cu na läk vai nei. ¹⁴ Nang am ning ap ah ak nikiom gui cu, mik mi ung om ciah Mumcha Theing ah hlüngtai nak awn na kutshum vai nei. ¹⁵ Na hmat pyi ah mäih ah Asia khopäng, Phigelus la Hermogenes gawnu gui ung chang gui naw kei cu na hnu na pyi ci gui nei. ¹⁶ Onesiphorus ni ah kyongkhui ung Bawipa ah chimgein nak om sä, ani naw akda vei kei ah lung cu na hüizang sak ci nei. Kei cu thawng ’kium ah ka kiak ung phi, ani naw kei cu kä na ng’aa nak ci nei, ¹⁷ Ani cu Rom gawnu ung a gawk law vai am, kä a na hmuh pha ah chuih kei cu na shui ci nei. ¹⁸ Ephasus gawnu ah ani naw kei a i hlawk ah anam htei cu nang naw na hmat ci nei. Cun ah Hnüüp ung ani ah khan ah Bawipa ah chimgein nak om sä.

¹ Ka hta, Bawi Khrit Jesuh ung kawng ät nak awn mi gah ah m’geinsei nak awn k’thamah ne om ä. ² Saksi gui akda ah ma ah kei naw ka shäu ah m’theithang nak gui cu, nang naw na ng’za pyi ci nei, cun cu la netah, chang hei gui m’theithang tu ba hning khai ah ngaih gep ah chang gui am, nam thei tu ba gui vai nei. ³ Bawi Khrit Jesuh ah bekhüt ciah gakaap ah kia ne geinvai nak cu na dou vai nei. ⁴ A bilawh mawng ung hnüntho ciah gakaap tumat cu, a bawi naw azum vai ah bilo ciah kiak ci, a hei a mawng ama ung käng cawngcam, kä hnün tho ci. ⁵ Thu m’hnüt kä läk ah günglah ciah chang phung naw, a i zah ung phi günglah nak ung näng nak ng’chuh kä gah khai. ⁶ Khüghaat ne kholo ciah chang naw väi lawk ciah geit cu, khäm ba ma khai ah kiak ci. ⁷ Kang thu pyein cu nangaih tüh kheng vai nei, cun ung Bawipa naw hmuhmat nak thei ning pak khai nei. ⁸ David ah ng’shon, sih nak näng ne tho ba ciah Bawi khrit Jesuh cu na shüm kheng vai nei, cun cu kam theithang nak ah Thu Ni ung ka pyein ah kiak ci nei. ⁹ Kei cu Thu Ni ka pyein ah phäh ah ka geinvai ci, m’si gui awn phi ami na khih nak ah kiak ci. Cun ung phi Khanpughi ah Thu läi cu khih pawn nak kä om ci. ¹⁰ Cun ah kia sei kei cu, Khanpughi ah a ghü ah chang gui ah hmawk ah a i phi ka buiaut ci nei. Cun cu ngahmi naw phi Bawi Khrit Jesuh ung hun nak ami gah tu vai la ang täi ah bäkhäk nak a gawk law vai ah hmawk ah kiak ci. ¹¹ Shin cu thu düng ah kiak ci: “Ani awn atäng ah mi sih ah a kiak ung, Ani awn atäng ah mi ghing ba khai. ¹² Mik mi ung khüighaat nak a om ah a kiak ung, Mik mi phi ani ung uk nak mi gah tuk khai. ¹³ Mik mi kä mi bekhüt ung phi, Bawipa cu bekhüt ci, a i ah kia sei ci ung Ani cu amät naw amät cu käm shet phung ci. ¹⁴ Shin ah a mawng ung nak chang gui nam cäi gui vai nei, thu awn ng’vawngshang küütneet ne kä ami kiak vai ah, Khanpughi ah ma ah akheng ah khän ne nam cäi gui vai nei. Cun ah mäih naw ni nak kä pyang ci, zak ciah chang gui ah ngaihdam ah kia ne shetkhat nak ah kiak ci. ¹⁵ Bi bi ah hmawk ah kä lü ng’aa ciah khuutbi la Khanpughi ah thu thuuk düng khaiah m’thei ciah nang cu, Khanpughi ah ng’zak hlü vai ah k’tha na pi bäih ne na bi vai nei. ¹⁶ Zum nak kä om ciah hmühma ne thu shai cu na hlawi vai, Cun ah mäih thushai naw chang cu Khanpughi awn ng’shawng sak pi ci nei. ¹⁷ Cun ah mäih m’theithang nak cu pumsa keing khai ah ei ciah kheipung awn täng ci. Himenaeus la Philetus cun phi a cun ah mäih ah m’theithang ci goi nei. ¹⁸ Ngahmi cu cacim ah düng nak ung kaa lam hma u ne, ’sih nak ung ka mi thawh nak ba cu gawk law pyi ci nei,’ ci u ne zum ciah chang gui ah zum nak cu ng’lat sak ci gui. ¹⁹ Cun ung phi Khanpughi naw ak khäng ah ling ne ak süm cu kä thüng hlawt ci nei. Cun ah khan ah, “Khanpughi naw a mät ah chang gui cu hmat gui ci nei”, ci la “Bawipa ung khäng pyi ciah pyein ciah chang phung naw cheishoh nak cu a phiawn nak vai nei,” ci ah ca cu guk ah kiak ci nei. ²⁰ Mang im ng’ki ah kyong ah ghui la ngui awn pian ni, Sing la m’dek la m’dek awn pian ni ah khlüng la k’am gui om ci. Am shah cu aküi kyang ah kiak ci, am shah cu ang neng düt ah kiak ci. ²¹ Cun ah ak shekha gui phung ung kaa theingcim ciah chang cu a bawi ah hmawk ah bä ne, ak ni phung bi ge khai ah om ciah kia ne, ak küikyang ah kiak ci, a küi kyang nak ung mang hlü vai ah kiak ci. ²² Ak hmaw chang gui ah hüithaw nak cu hlawi ne, Bawipa ah m’lungtheing awn taigü ci gui awn atäng ah düngdau nak,zum nak, m’hni nak la dimdeih nak gui cu na shui vai nei. ²³ Hmühma nak la ak ang ah ng’cuhcan nak gui cu na hlawi vai, Cun gui naw ng’tukvook nak a pian cu na hmat ci nei. ²⁴ Bawipa ah bikbi cu ng’tukvook lup ciah kä a kiak en vai, chang ng’nü m’gein ne, hniimgei thei ci ah saza k’ni ah a kiak vai. ²⁵ Ani hnu ng’tuk püi ciah chang gui cu ang awi gi ah m’cäi thei ciah kiak khai. Cun ah chang gui cu ng’za ba u ne, thu thuuk ami hmat tu vai ah Khanpughi naw akhin k’ni pe gui khai nei. ²⁶ Cun ung ngahmi cu düng nak hmu law u ne, ang zak hlü phung läk khai gui ah pha ne shum gui ciah khoshe ah kut ung kaa phiawng khai gui nei.

¹ Ak hnubäih ah hnüüp gui cu ang cet khengkheng ah kia lawk khai ci cu nami hmat vai nei. ² Chang gui cu ami mät hnga kä ngai u ne, ngui bäng za hlü u ne, khäghah längtang ne, ng’hawhshaak m’ghämce ne kiak khai gui nei. Ngahmi cu ngetngawng u ne, nupa ah beit kä ngai ne, m’gein nak kä om ci, zum nak kä om ciah kiak khai gui nei. ³ Ngahmi cu m’gein nak kä om ci, chihna nak kä om ci, chang ah ming m’shet ci, m’gäi m’cik ci, hlawhlang ciah kiak khai gui nei; ak ni phung cu thüi nak khai gui nei. ⁴ Ngahmi cu ng’lihlak u ne, häipai u ne, ta-äh ne chang ah ng’shei khai gui nei:Khanpughi ah mä hlimtui nak düt cu m’hni pi khai gui nei. ⁵ Ngahmi cu ami khan shai awn ami zum tu ung phi, ak-cang ah hlüngtai nak ah mawng cu hnu ng’tuk püi khai gui nei. Cun ah mäih ah chang gui cu na hlawi gui vai nei. ⁶ Cun ah chang gui ung kaa am shah gui cu, chang gui ah im ung lut u ne, ami thuvi nak awn, ami shetkat nak ung geinvai u ne, ng’zak hlü nak nüng ah tüihtok nak ung om ciah hnumi gui cu, ami kut ung gawk khai ah cik ci gui nei. ⁷ Cun ah hnumi gui cu ang täi sei k’tha nah ne ng’thei tu u ne phi, thu thuuk cu kä hmat hlawt ci gui ah kiak ci. ⁸ Jannes la Jambres naw Moses cu ani hnu ng’tuk püi ah mäih ah, cun ah chang gui naw thu thuuk cu hnu ng’tuk püi ci gui nei. Ngahmi cu lulang cüivai nak kä om sei ami zum nak she pyi ciah chang gui ah kiak ci. ⁹ Ngahmi ah näng nak cu kä i güt khai, a i ah kia sei ci ung Jannes la Jambres ah mäih ah ngahmi ah shetkha m’thüikhang nak cu chang naw hmu lawk khai gui ah kiak ci nei. ¹⁰ Cun ung phi nang cu kei ah m’theithang om ih, la ka ghin nak ung kang bü nak gui cu hmat ne na läk ciah kiak ci nei. Ka zum nak, ka hnimgei nak, kam hni nak, ka khüighaat nak, ¹¹ ka dukdeiu nak, la ka geinvai nak gui cun phi nak shing pyi ci nei. Antioch, Iconium, Listra gawnu gui ung, kei naw a i hlawk ah dukdeiu nak ka buiaut gui cu na hmat ci nei. Cun ung phi Bawipa naw cun gui ung kaa nak phiawn pyi ci nei. ¹² Bawi Khrit Jesuh ung kawng ät ne zum nak ung lünlawi hlük ciah ah chang phung cu dukdeiu nak gah khai nei. ¹³ Chang shekha chang thuvi gui cu, shekha m’thüikhang law pi k’täi khai gui, chang naw phi phiui hnawk gui khai, chang phi phiui hnawk khai gui. ¹⁴ Cun ung phi nang läi cu theithang ne na dou ah thu thuuk cu ak kheng ah na zum vai. A u chang gui ah nang theithang tu te cun phi na hmat vai. ¹⁵ Na hmaw sang ung tün ne, cüivai nak ning pe ne, Bawi Khrit Jesuh zum nak awn hun nak gah vai ah lam shüm ciah, Cacim Theing na hmat ah mawng cu na shüm ba vai nei. ¹⁶ Cacim Theing avan cu Khanpughi naw Mumcha hlüngtai nak awn ak be ah kia sei, thu thuuk m’theithang nak, m’cäi m’ä nak, cheishoh m’dang nak, sheitkat pian nak, la düng sei ghin nak vai ah m’shümthein nak gui ah mawng ah kiak ci. ¹⁷ Cun ah kia sei Khanpughi ah khuut bik ci cu, nikiom nak a hlühlü abi lawh nak vai ah ng’sheitawn vai cu hlü ci, hmuhhmat Lulang nak awn kümbe vai ah phi kiak ci nei.

¹ Khanpughi ah ma la aksi ak ghing avan m’khoicha khai ah Bawi Khrit Jesuh ah ma ah kei naw khen ne ka ning m’thein cu, Bawipa cu Ghanpughang ah kia ci, kia ne uk khai ah kyum lawk ci nei. ² Cun ah kia sei akhin a om ung phi, kä a om ung phi Thu Ni cu na pyein vai nei. Na thu ngai zak ci gui cu ami kat nak dang sak gui ä, m’cäi gui ä, thagui pe gui ä, hnimgein nak awn m’theithang gui ä. ³ Chang gui naw düng ciah zum nak cu kä ngai za hlü ne, amät ah ng’zak hlü düt läk ne, ami mät ah ng’zak hlü bä bä ah thu m’gawng khai ah, m’theithang ci gui cu k’tä ne ami shui nak ah akhin gawk lawk khai nei. ⁴ Ngahmi cu Thucim kä ngai u ne, pumah awi düt ngai lawk khai gui nei. ⁵ Cun ung phi nang läi cu, a i chü ah amawng ama na buiaut ung phi, na mät ngaihmah ne na om vai, geinvai nak na näng vai, Thu Ni cu shäu ne na pyein vai, Khanpughi ah chang shäm ah kia ne bi vai phung cu m’khüt näng ne na bi vai. ⁶ Kei läi cu ng’ghuthaa nak ah ka kiak nak vai ah akhin gawk law pyi ci nei, shin ah ghin nak kang kawn taak vai ah a khin phi ng’et lawk ci nei. ⁷ Kei cu ng’küükneet ne dawng nak ung ak ni pi bäih ah ka bi pyi ci nei, m’hnüt nak ung khüt sei ka dawng pyi ci nei, zum nak phi ka shum pyi ci nei. ⁸ Tuhbäi ung Khanpughi ung düng ciah chang gui am ap vai ah näng nak lukhu naw kei cu na ngäng ci nei. Cun cu düng nak awn m’khoichak ciah Bawipa naw, m’khoichaa nak Hnüüp ung kei am na ap khai nei. Kei bäng ah kä kiak ciah, Bawipa a kyum law ba m’hni ne ngäng ciah chang gui phung am, cun na lukhu cu ap gui khai nei. ⁹ Kei ah na law ge vai ah nak tha nak vai nei. ¹⁰ Demas cu m’dek khan am hni nak awn, kei na nawng ne, Thessalonika ah hteit ci nei. Creseens cu Kalatia ah, Titus cu Dalmatia ah hteit ci gui nei. ¹¹ Luka bäng kei awn kani om ci nei. Maku cu khü ne khah law püi baä, Ani cu kei ah bi nak ung na hun shawih hning khai nei. ¹² Tichikus cu Ephasus ah ka tüih nei. ¹³ Nang na law ung Troas gawnu ah Karpus am ka ap shüt ah suinu la cauk gui, ak tung pi ah mehvun ung guk ah cakchaw gui cu na law püi vai nei. ¹⁴ Kyeei sheh ciah Alexander naw kei cu ak kaa ah na kiak na tuk ci nei, amät ah bi ah khan ah Khanpughi naw a gah vai cu pek khai nei. ¹⁵ Nang naw phi ani cu na ngaih nak vai nei, ani cu mik mi ah thu pyein, hlinghling ah hnu ng’tuk püi ne, thu pyein ciah chang ah kiak ci nei. ¹⁶ Kei cet ne ami na ng’shi sang ung, kei na hunshawih khai ah a u phi kä ng’düi lawk ci, van naw kei cu na nawng ci gui nei. Khanpughi naw ngahmi ah bi nak cu kä ngaihdam men pe gui sä! ¹⁷ Cun ung phi Bawipa cu kei ung om ne k’thagui na pe sei, chang pakhui hei gui am Thu Ni cu shäu ne kam thein gui hning ci, sih vai ah ami na k’bäi nak ung kaa phi ka phiawng ci nei. ¹⁸ Bawipa naw kei cu shetkat nak phung ung nak phiawn ne, amät ah Khan mawpi uk nak ah ngaih gep vai ah na hteh püi khai nei. Ani ung bämang nak cu ngawizä khäng ne om sä! Amen. ¹⁹ Priscilla la Akuila ni, Onesiphorus ah kyongkhui ni gui cu ka zavaih na gui ci nei. ²⁰ Erastus cu Korin ah om shüt ci, Trophimus cu Miletus ah gaw sei ka nawng shüt nei. ²¹ Kho kä ak sik pha ung na law vai ah nak tha nak vai nei. Eubulus, Pudens, Linus, la Klaudia ni gui la Krihta phäi nau avan cu ka zaivaih na gui ci nei. ²² Bawipa cu na mumcha awn atäng ah om sä, Khanpughi ah chimgein nak cu nami van ah khan ah om sä.