12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

2 PETER

1

1 Simon Peter, Bawi Jesuh Khrit ah ak changshäm la ang düihpüi naw, Mi Khanpughi la Hunbawipa Jesuh Khrit ah peit ah, mik mi ah mäih ah küikyang ciah zum nak om ciah chang gui-am ca ka guk law ci nei. 2 Khanpughi la Hunbawipa Jesuh Khrit cu hmuhmat cüivai nak awn, m’geinsei nak la dimdeeih nak cu na mi khan ah kümbe ne om sä. 3 Khanpughi naw akcang ah zum nak awn mi ghin vai ah, khankho hlüngtai nak awn mi ng’zak hlü phung cu, na pe gui ci, cun cu Bawipa hmuhmat Lulang nak awn, amät ah bämang nak la nikiom nak mi gah vai ah na khü gui ciah Bawipa ung a na peit gui ah kiak ci. 4 A cun ah ang htei ah hlüngtai ci la küikyang ciah m’shumphyuk shaitaak cu na pe gui ci. Cun ah m’shumphyuk nak awn nang mi cu, khomdek khan ah shetkat dimaih nak cu phiawn nah u ne, Khanpughi ung nami ng’zung tu ba ci. 5 Cun ah kia sei nami zum nak cu nikiom nak awn, nami nikiom nak cu Lulang nak awn, 6 nami Lulang nak cu htingling nak awn, htingling nak cu khüighaat nak awn, khüighaat nak cu Khanpughi ung bä nak awn, 7 Khanpughi ung bä nak cu ng’phäi nau nak awn, ng’phäinau nak cu zum hni nak awn akümbe vai ah nami tha nak pi bäih vai nei. 8 Cun ah hlü ci gui cu nangmi ung dämda ne a om ah a kiak ung, a cun gui naw Bawipa Jesuh Khrit nami hmuhmat Lulang nak ung ghing ne ning hnünthawh sak gui sei ak cang ah awngtang nak phi om khai. 9 Cun ung phi cun ah hlü nak gui kä om ciah chang cu, ak tawi ah ngai ne, a i kä hmuk ci. Ani cu azanä ashetkat nak ung kaa theingcim nak agah cu kä shüm ba ciah kiak ci. 10 Cun ah kia sei phäinau gui aw, nangmi Khanpughi naw khü ne ning ghü gui ciah, ang täi sei ngaih gep ne, nami tha law nak pi täi ah a kiak ung, a i sang ung phi nami zum nak cu kä nami ng’hlah ta hlawt khai nei. 11 Cun ah kia sei nangmi cu, Hunbawi Jesuh Khrit ah ng’täi ciah Uknak Kho ung luh nak vai ah ng’düng nak cu nami gah khai nei. 12 Cun ah kia sei nangmi cu shin ah a mawng gui hmuhmat ne, nami zum nak ah thu thuuk ung nami khäng htek pyi ciah a kiak pang ung phi, kei naw ang täi sei ka ning m’shümthein ba gui khai nei. 13 Kei ghing ne ka om zah ah chuih shin ah a mawng gui ka ning m’shümthein ba gui lä khai ah ka ngai ci nei. 14 Kei cu kä shou pha sei, shin ah sheka thei ciah pumsa cu ka nawng shüt lawk khai ah ka hmat ci nei, cun cu Bawipa Jesuh Khrit naw ang dang ah anam thein pyi ah kiak ci. 15 Kei ka sih kawn ah shin ah a mawng gui cu, nami shüm ba lä vai ah k’tha na pi bäih ne ka bik khai nei. 16 Bämang nak awn Bawipa Jesuh Khrit a kyum law ba vai ah mawng ning m’thein gui cu, kami mät ah ngaih tüh ah kami pyein ah pumah awi ah kä kiak ci. Keimi cu ani ah hlüngtai nak kami mik awn kami hmuk ciah chang ah kami kiak ci. 17 Pa Khanpughi naw m’tamkhah nak la bämang nak a peit zah ung keimi phi kami om ci, cun sang ung hlüngtai säih ciah bämang nak awn ng’shan lawk ciah thu k’aw cu, “Shin cu kei ah Htapa nei, ani awn kei ka zei ci nei,” ci ah kiak ci. 18 Cun zah ung keimi cu khomhtung theing ung Bawipa awn atäng ah om u ne, khan mawpi ah kaa cun ah k’aw cu kami ng’zak ci. 19 Cun ah kia sei keimi naw profet gui ah shäu ah ng’thu cu kami zum law pi ci. Cun cu nami ngaih tüh kheng vai nei, a i ah kia sei ci ung cun cu hmüp khui ung mei m’däi ah mäih ah, kho a thaih law güt nami m’lung kyong ung khäng ciah thaihke aisi ah kiak ci. 20 Cun ung phi cacim cu a u chang naw phi amät ah ngaih ah kä k’phlan thei ci, ci cu nami shüm vai nei. 21 A i ah kia sei ci ung, a i thu thuuk phi chang ah ng’zak hlü düt ah dang lawk ciah kä kiak ci, Mumcha Theing ah lamshäm nak awn vah chang gui naw, Khanpughi ah thuthuuk cu ami pyein ah kiak ci.

2

1 Thuvi ciah profet gui caü ami dang man ah mäih ah, thuvi ne m’theithang ci gui cu nangmi ah ng’lung ah dang lawk khai nei. Ngahmi naw dimaih nak vai la känç ne düng ciah zum nak cu law püi u ne, na hun gui ciah Bawipa phi mak khai gui nei, Cun gui cu a shänghta dimaih nak ung gawk khai gui nei. 2 Cun ung phi chang akda naw shekak ciah ami lam cu läk khai nei. a i ah kia sei ci ung ngahmi ah bilawh nak awn chang a hei gui naw thucim ah lam cu päipih khai gui nei. 3 Cun ah thuvi ciah saza gui cu ng’zak nak hlü aih awn khän ne düng ciah thu pyein u ne, ami mät ung tang khai ah bik khai gui nei.Cäu ä tün ne ngahmi m’khoicha gui khai cu om pyi ci nei, ngahmi m’di gui khai phi tho pyi ci nei! 4 Khanpughi naw cheishoh ciah khanchang gui phi käm düm gui ci, ngahmi cu m’hteikho ah zuk chah gui ne, M’khoichaa nak ah Hnüüp güt m’si gui awn k’pawng gui ci. 5 Khanpughi naw cäu chang gui phi käm düm gui ci, kä zum ci gui ah chang ah khan ah tuizin mü sak ci; düng nak ah mawng pyein ciah Noah la ahei chang pachih bäng phiawn sak ci. 6 Khanpughi naw Sodom la Komorrah cu mei awn m’khih ne m’di ci, cun cu kä zum ci gui ah chang khan ah gawk lawk khai ah mawng am dang nak ah kiak ci. 7 Cun ung phi chang shekha gui ah om ah cheishoh ciah chang k’ni Lot cu phiawn sak ci. 8 Cun ah chang k’ni cu chang shekha gui ah ng’lung ah om tu ne, ak hnüüp tä sei, ami cheishoh nak cu hmu ne ang htei ah zaica ci. 9 Zum ciah chang gui ami kium nak ung kaa k’phiawn gui vai, chang shekha gui la, 10 pumsa ah ng’zak hlü düt läk ne, Khanpughi ah huham päipih ci gui cu, m’khoichaa nak ah hnüüp ung, m’shetkat gui vai cu Khanpughi naw hmat ci. Cun ah thuvi m’theithang ci gui cu lingkeng ne taäh u ne, bäkhäk ciah khan bawi gui phi a i ah kä sui ne päipih ci gui. 11 Thuvi saza gui ah tah khüighaat pi ne hlüngtai pi pui ci gui ah khanchang gui hngaw naw Bawipa ah ma ah ngahmi cu kä päipih guici gui. 12 Cun ah chang gui cu phaa vai, ngawn vai ah ng’tüi ciah k’pyamasa ah mäih ah kiak ci gui, a i kä ami hmat su ah päipih nak om ci. Ngahmi cu a i kä hmat ciah k’pyamasa ah mäih ah dimaih khai gui. 13 Ngahmi cu chang ami nat sak ah mäih ah ami mät phi nat nak gah khai gui. Ngahmi cu hnüüp lunglai ung ei aw läma u ne, ami pumsa ng’zakhlü cu dap sak ci gui. Ngahmi cu nangmi awn atäng ah ngoh om ei aw u ne, om shek ci gui, hleeihlak nak awn zeikiai ci gui. 14 Ngahmi cu hlahhlawng ciah hnumi bäng teng hlü u ne, a i awn käng büh hlawt ci gui. Ngahmi naw azum nak kä htek ci cu m’vam ung kiak sak ci gui, ami m’lung naw a i baw m’hni aih ci, Ngahmi cu Khanpughi ah k’phyun nak gah ci gui! 15 Ngahmi cu lam düng nawng ne lam hma pyi ci gui, ngahmi cu Balaam ah htapa Beor ah lam läk pyi ci gui. Balaam cu cheishoh nak awn gah ah ngui cu m’hni ci kia ne, 16 a shetkat ah hmawk ah k’shedam nak gah ciah kiak ci. Ang se cu chang ah mäih ah ng’thu ne, cun ah profet she ah bilawh cu ng’düm sak ci nei. 17 Cun ah chang gui cu tui ket ciah hmawilawng ah mäih, khokhi naw k’phyit ne a zon ah khong mei ah mäih ah kiak ci gui. Khanpughi naw ngahmi ah hmawk ah ak hmüp nak pi bäih ah hmun cu taak pe gui ci. 18 Ngahmi naw shetkat nak ung kaa phiawng law thai ciah chang gui cu, khähghah ne thuvi nak ah ng’thu la pumsa ah ng’zak hlü hlimtui nak gui awn k’däk ne lam hma sak gui ci gui. 19 Ngahmi naw chang-am ng’päize nak shai ami taak ung phi, ami mät cu didap nak ah khleihtein ah kiak ci gui. A i ah kia sei ci ung, chang cu ani uk ciah khleihtein ah kiak ci. 20 Chang gui cu mi Hunbawipa Jesuh Khrit ami hmuhhmat nak awn, dek khan shetkat nak ami phiawn nak awn ah, cun ah shetkat nak ah khleihtein ah ami kiak ba ah a kiak ung, ak htük ah mä ak hnu ami ghin nak cu, sheka pi bäih ci. 21 Ng’düng ciah lam hmat ve ve ne Bawipa ah thu theing ng’hlah tak ciah dam ah ta, cun ah lam ng’düng kä hmat tu ling cu bä tu ba ci. 22 “Ui naw am lauk cu ei ba ci,” ci la “Vawk cu tui awn m’si ung phi ng’än ung ng’hlawk ba ci,” ciah thu thuuk cu ngahmi ah hamwk ah kiak ci.

3

1 Teihpüi gui aw, shin ah ca cu ak hnih vei nak ka ning guk law gui ah kiak ci nei. Shin ah caguk ani nik hnih ung, shin ah mawng gui cu shüm ba ne, nami m’lung ngaih theing sei, 2 cau pui profet theing gui ah ng’thu pyein la Hunbawipa naw ang düihpüi gui awn a ning peit gui ah thu khän cu nami shum vai ah ka ng’za hlük ci nei. 3 Ak htük ah, ak hnubäih hnüüp ung, amät ah ng’zak hlü düt ah ghing ciah chang gui dang lawk khai ci cu, nami hmat vai nei. Nghami naw nangmi cu ning gaih m’gin gui ne, 4 “Ani lawk khai ah shaitak ci, kä law ne ma? A hawi ang ani? Kami pupa gui cu si zawp pyi ci gui, cun ung phi apäng avan cu, khomdek ang tüi law sang ung kaa ah mäih bä ah om ci gui nei,” ci ne ning kiak na gui khai gui. 5 Khanpughi naw khan mawpi la khomdek cu ang thu küi awn atüi pian la khomdek cu tui ung kaa tui awn apian ah mawng, 6 khomdek phyim cu tui bä awn am di ah mawng gui cu, ngahmi naw a guih ah m’hnih he ci gui. 7 Cun ung phi khawnmawpi la khomdek cu mei awn kä am di pha ah chuih, Khanpughi ah ng’thu bä awn om lä khai. Khanpughi kä zum ci gui m’khoicha ne am di gui hnüüp ung ngahmi cu dimaih khai gui. 8 Cun ung phi teih püi gui aw, tumat kä nami m’hnih vai cu, Bawipa ung kho hnüüp ät la khokum phia-ghaa cu ang lak kä om ci, atäng ah kiak ci. 9 Chang am shah ah ngaih ah mäih ah, Bawipa cu a shaitaak ah mäih ah bi abi vai ah kä shokshü ci, chang tumat hta phi kä dimaih ne, chang avan cu cheishoh nak ung kaa ami ng’hlah law ba vai ah ng’za hlü ne, hnimgei ne om ci. 10 Bawipa ah hnüüp cu m’guk ei a law ah mäih ah gawk lawk khai nei. Cun ah hnüüp ung khanmawpi cu viik ne ng’pyaang ne maih khai, khankho pumsa avan mei naw m’khih sei dimaih zawp khai, m’dek la m’dek khan ung om ci avan kä om ba khai. 11 Cun ah apäng avan a dimaih zawp ah a kiak ung, nangmi cu a i mäih ah chang ah kia ne nami om khai ang? 12 Khankho cu mei naw m’khih sei dimaih ne, khankho pumsa a phiäp nak vai ah Khanpughi a hnüüp gawk lawk khai ci ne, k’tha nah ne nami ngäng zah ung, nami ghin nak cu theing cim sak ne Khanpughi ah nami ng’ap vai nei. 13 Cun ung phi Khanpughi ah shaitaak ah ng’düng nak ah hmun ah om nak, khankho thai la khomdek thai cu, mi ngäng ci nei. 14 Cun ah kia sei teihpüi gui aw, cun ah hnüüp cu nami gin zah ung, Khanpughi ah ma ah, theing ne shetkat nak kä om sei, dimdeeih nak a om vai ah nami tha nak vai nei. 15 Kami nau Paul naw Khanpughi ah peit ah cüivai nak awn ca a ning guk law gui ah mäih ah Bawipa ah hnimgei nak cu, hun nak nami gah vai ah lam aning m’awng peit gui ah mawng cu, nami hmat vai nei. 16 Shin cu Paul naw a guk ah ca ung ang dang sak ah mawng ah kiak ci. Cun ah ca ung kä hmat zäi vai am shah om ci. Kä hmuhmat la lawklak ciah chang gui naw ang lihlat ah, khei ne pyein ci gui. A hei cacim gui cun phi a cun ah mäih ah m’ki m’hlat u sei, ami mät ah dimaih nak vai ah kiak ci. 17 Cun ung phi teihpüi gui aw, shin ah mawng cu nami hmat pyi ah kiak ci. Chang shekha gui ah lam k’she ung kä nami läk en tu vai ah, khäng sei nami ng’düih nak ung kaa kä nami zung kiak en vai ah geing nah ne nami om vai nei. 18 Mi Hunbawi Jesuh Khrit ah m’gein nak la hmuhmat nak ung nami ng’ghotai law pi vai nei. Cun ah Bawi ah bämang nak cu tuh ngawi tün ne ngawi zä om sä. Amen.