2 KORIN

2 KORIN

¹ Khanpughi ah ang zak hlü ah Bawi Khrih Jesuh ah ang düihpüi Paul la anau Timothi naw-- Korin ung Khanpughi ah Khrihtabum la Achaia kho Khanpughi ah chang gui a van am ca pe lawk ci goi nei. ² Mi Pa Khanpughi la Bawipa Jesuh Khrih naw m’gein nak la dim nak cu ning pe gui sä. ³ M’hteihtang ciah Bawi, chimgein ciah Pa, mi Bawipa Jesuh Khrih ah Pa Khanpughi cu mi m’hlüngtai khai nei! ⁴ Ani naw zaica nak phung ung nam htei gui ci, cun ah kyasei Khanpughi ung mi gah cun ah m’htei nak awn, zaica ciah chang gui cu mi m’htei tu hning ci nei. ⁵ Mik mi naw Bawi Khrih ah aut ah, da aih ciah geinvai nak cu mi aut tu ah mäih ah Bawi Khrih ung Khanpughi ah na peit gui ah m’htei nak cun phi mi gah ci. ⁶ Kei mi kami geinvai ung, nang mi naw m’htei nak la hun nak nami gah vai ah hmawk ah kyak ci. Keimi m’htei nak kami gah ung nangmi cun phi m’htei nak gah u ne, keimi naw kami aut ah geinvai nak cu hnimgei ne, aut m’khüt nak ah thagui cu nami gah khai. ⁷ Cun ah kya sei nangmi cu keimi ah aut ah geinvai nak gui nami aut tu ah mäih ah keimi ah gah ah m’htei nak cun phi nami gah tuk ci; ci cu khäng sei ka mi zum ci. ⁸ Phäinau gui aw, Asia kho ah ka mi aut ah zaica nak ah mawng cu ka ning m’htein gui hlük ci. Cun ah zaica nak cu däm ne gih aih khätah, ghin nak hngaw kami hnu ng’hlah tak ci nei. ⁹ Kami mät naw kami mät sih nak ung kami gawk ciah kami ngai ci. Cun ah a kyak cu keimi naw, kami mät kä ngaih u, u ne, ak si thawh ba sak ciah Khanpughi kami ngiah u vai ah hmawk ah kyak ci. ¹⁰ Cun hlawk ah kyih aih vai ah sih nak ung kaa, Bawipa naw na hun gui ci; na hun ba gui khai; cun kawn ah phi na hun ba gui mä khai ah zum ne mi ngaih u ci. ¹¹ Nangmi naw keimi cu taigü nak awn nami nam htei gui vai. Nangmi akda naw nami k’taigü cu Khanpughi naw ngai ne, keimi cu hrilham na pe gui khai. Chang akda naw keimi ah hmawk ah ami k’aw m’hlaw ne, Khanpugui cu m’hlüngtai khai gui. ¹² Keimi ung m’lung ngaih theing awn khähghah nak vai tumat om ci, cun cu khodek khan ah ghin nak ung, ak tung pi ah, nangmi awn ng’khuihphaa nak ung chang ah cüivai nak awn ah kä kyak ciah Khanpughi ah hlüngtai ciah m’gein nak ung, Khanpughi ah na peit gui ah m’lung theing awn kami pawngpüi bilawh ah kyak ci. ¹³ Shin ah guk ah ca gui cu nangmi naw nami phat hning la nami hmat hning bäng ah kyak ci. ¹⁴ Tuhbäi keimi ah mawng am shah bäng nami hmat ung phi, avan nami hmat khai ah, ka ngaih u ci nei. Cun ah kyasei Mi Bawipa Jesuh a law hnüüp ung, nangmi ah hmawk ah kami khähghah ah mäih ah keimi ah hmawk ah nami khähghah khai nei. ¹⁵ Kei naw shin ah a mawng gui cu ngaih gep ne, nangmi naw hrilham hnih vei nami gah vai ah, ¹⁶ Macedonia kho ah ka hteh lam ah hnü ät, ka law ba lam ah hnüt ät, ka lawk khai, cun ung kaa naw Judea kho ah ka hteh hlawt vai ah nami na m’htei khai ah ka ngai ci. ¹⁷ Cun ah ka ngaih cu kam lung hnih ah ng’pai sei ang Cun ah ka k’bäi cu ka mät bäng ah ngaih ah kyai khai bawk ang? Atäng düt ah “ä ä, ka ka” ka ci ah kyak khai ang? ¹⁸ Khanphghi ah ng’thu cu akcang ah ng’düng ci kyasei, kei ah shaitaak cu, “ä la ka” hnih ah kä kyak ci. ¹⁹ Silas ni, Timothi ni, kei ni naw shäu ne kami pyein ah Khanpughi ah Htapa, Bawi Jesuh cu, “ä” ci shüm “ka” ci shüm ciah Bawi ah kä kyak ci. Ani cu Khanpughi ah ng’zak hlü cu “ä za” cik ciah Bawi ah kyak ci. ²⁰ Khanpughi ah shaitaak avan cang ah m’dang ciah kyak ci. Cun ah kyasei Khanpughi ah bämang nak ang dang vai ah, Bawi Jesuh Khrih ung “Amen” mi ciah kyak ci. ²¹ Bawi Khrih ung kawng ät nak awn keimi la nangmi na ghin sak gui ci cu, Khanpughi a mät ah kyak ci. ²² Khanpughi a mät naw m’khoi ne na khei gui ne, amät ah chang ah ng’kheing vai ah nam hnüt gui ci. Mik mi ah gah vai a na m’küm peit gui cu a kyän nak ah Mumcha Theing cu mi m’lung kyong ung na pe gui ci. ²³ Korin ah kä ka law vai ah ka k’bäi cu nangmi ka ning m’gein nak gui ah a kyak cu kei ah m’lung hmat ciah Khanpughi saksi ci. ²⁴ Nangmi naw a i nami zum vai ah ning k’bäi gui ah kä kyak ci, nangmi ah zum nak cu khäng ciah kami hmat ci. Keimi naw nangmi ah zeikyai nak vai ah nangmi awn atäng ah kami bi ah kyak ci.

¹ Nangmi ah kei ka law ung nami m’lung kä nik khai kyasei, kä ka law ba khai ah ka k’bäi ci nei. ² Nangmi nami m’lung kä nik khai ah ka bi ung, a u naw kei na zei sak khai ang? Kei ah hmawk ah am lung kä nik ci gui ah kawn ah na zei nak ci a u kä om khai nei. ³ Nangmi naw kei cu nami na zei sak khai süte, cun ung phi, kei ka law ung nangmi ah hmawk ah kam lung a thüi vai kyi netah, ca ka guk law te ah kyak ci nei. Kei ka zei ung nangmi nami van nami zei khai ah ka zum ci nei. ⁴ Kei cu ang htei ah thüisei zaica ne, ng’phli tui awn cun ah ca cu ka guk nei: Cun cu nami thüi nak vai ah kä kyak ci Nangmi naw a i hlawk ah ka ning m’hni gui nami hmat nak vai ah ka guk ah kyak ci. ⁵ Chang tumat naw kei a nam thüi ah a kyak ung, kei bäng ah kä kyak ci, nang mi nami van, kä cun ung am shah läi cu ning m’thüi gui ciah kyak ci. (A cun ah chang ah khan ah kat nak kä k’bum hlü ne cun ah ka pyein ah kyak ci). ⁶ Nang mi akda pi naw nami m’kat nak a gah ani naw a kyä vai ah m’kat nak ah kyak ci nei. ⁷ Tuh"bai nuipai sei kä a thüi aih vai ah, ani cu m’gein ne, thamah nak pe vä. ⁸ Kei naw ka ning m’cäi gui cu, akcang ah ani nami m’hni cu nami hmat sak vai nei. ⁹ Zanä kei naw ca ka ning guk law gui cu, tüihtok nak m’khüt vai ah nami ng’düih la, kei ah ning m’shümthein gui läk ghet vai ah nami om ah, hmat nak vai ah kyak ci. ¹⁰ Nangmi naw chang tumat ah kat nak cu nami m’gein ung, kei naw phi ani cu kam gein ci. Chang tumat cu kei naw kam gein vai a hlü law ung, nangmi ah hmawk teng ne Bawi Khrih ah ma ah kam gein ci nei. ¹¹ Cun ung vah Satan cu mik mi ah khan ah kä a näng vai ah mi shung hlawt khai; Satan ah theileh cu mik mi naw mi hmat ci. ¹² Bawi Khrih ah mawng Thu Ni shäu vai ah Troas ung ka gawk law zah ung, a cu ah a khuut bi vai ah Bawipa naw lam kawt na hmawn pe sei ka hmuk ci. ¹³ Cun ung phi mi nau Titus cu kä hmu netah ang htei ah ka cäi ng’ä ci. Cun ah kyasei a cu ah chang gui cu zavaih gui netah Macedonia kho ah ka hteit ci. ¹⁴ Cun ung phi Khanpughi kam hlüngtai ci! a i ah kyasei ci ung Khanpughi naw mik mi cu Bawi Khrih ung na kawng ät sak gui ne, Bawi Khrih ah näng nak tung ak chang phaa ah khän ne a na ng’leen püi gui ah hmawk ah kyak ci. Bawi Khrih ah mawng hmuh hmat nak cu, tui ng’ui ah mäih ah kho ng’nü ung ang ui vai ah Khanpughi naw na mang gui ci. ¹⁵ Mik mi cu Bawi Khrih naw Khanpughi a khawihnah nak ah ng’ui ah mäih ah, hun nak gah sang ci gui la chükmaih sang ci gui ah ng’lung ah mi ng’ui ci. ¹⁶ Chükmaih ci gui ah phäh ah cun ah ng’ui cu, sih nak ah kya ne, hun nak gah ci gui ah phäh ah cun cu ghin nak ah kyak ci. Cun ah kyasei cun ah mäih cu a u awn khinkha khai ang? ¹⁷ Keimi naw a hei chang gui ah so ah, Khanpughi ah ng’thu cu, aphu k’zän khawhchaam ah mäih ah kä kami sumlei nak ci: Khanpughi naw ana tüih gui ah kyasei, amaa ah ang thu cu, Bawi Khrih chang shäm ah kya ne ng’düng sei kami pyein ci.

¹ Shin ah mawng ung keimi cu kami khähghah ciah kya ne ang? Chang am shah gui ah mäih ah k’bääi nak ah ca gui cu, keimi naw nangmi am kami ning peit gui vai hlü ne ang? kä cun ung nangmi ah kami laak vai hlü ne ang? ² Nangmi nami mät cu chang avan naw hmat ne a phat vai ah, keimi ah m’lung ung guk ah ca ah nami kyak ci. ³ Cun ah ca cu Bawi Khrih amät naw gu netah keimi am ana tei sak gui cu dang ci nei. Cun ah ca cu hmein nawn guk ah kä kyak ci, ghing ciah Khanpughi ah Mumcha awn guk ah kyak ci, cun ah ca cu lung ung guk ah kä kyak ci, chang ah m’lung ung guk ah kyak ci. ⁴ Cun ah kami pyein cu Keimi naw Bawi Khrih ung Khanpughi kami zum ah hmawk ah kyak ci. ⁵ Shin ah khuut kami bi hning ciah pyein nak vai ah keimi ung a i k’thagui phi kä om ci, Khanpughi ah na peit gui ah k’thagui bäng vah om ci. ⁶ Kei mi naw thukhän thai ah hmawk ah kami bilawh nak vai ah k’thagui cu na pe gui ci, cun cu guk ah thukhän ah kä kyak ci, Mumcha ah kyak ci. Guk ah thukhän cu sih nak ah kyak ci, Mumcha cu ghin nak ah kyak ci. ⁷ Lung ung guk ah thukhän a peit zah ung Khanpughi ah bämang nak cu deikhang ci. Cun ah deikhang nak cu Mose ah hmai ung ang shu law pipi ung phi, ang htei ah ng’shü sei, Israel chang gui naw kheing ne kä teng hkawt ci gui. Sih nak law püi ciah thu khän hngaw, shin ah mäih bämang nak awn a peit ah a kyak ung, ⁸ Mumcha ah hnüntawh nak ah bä mang nak läi cu a i hlawk ah ng’shükhang khai ang! ⁹ Shet m’kat nak ah thukhän hngaw bämang nak a om ung; Hun nak pek ciah hnünthawh nak cu a i hlawk ah bämang pi khai ang! ¹⁰ Cäu ng’shü man ciah bämang nak cu ng’kon sei, cun ah ng’shü pi ci naw tuh bäi chü küm ci nei. ¹¹ A shänghta hang om ci hngaw ung bämang nak a om ung, ang täi ah om ci ung a i hlawk ah bämang nak om khai ang! ¹² Keimi ung cun ah ngaih u nak om sei ang htei ah kami hluicang ci. ¹³ Keimi cu Mose ah mäih ah kä kami kyak ci, ani cu ng’shu ne maih lawk ciah a hmai ung akdei Israel chang gui naw kä ami hmuh vai ah, a hmai cu shung ci. ¹⁴ Israel chang gui ah m’lung cu ng’khai ci, tuh ngawi güt ung thukhän phyim cu ami phat ba phung ung ami m’lung cu, cun ah tampu naw shung gui ci. Bawi Khrih ung ghing ciah chang bäng naw vah cun ah tampu cu liim hlawt ci. ¹⁵ Tuh ngawi güt, Mose ah thukhän ami phat ba phung ung ami m’lung cu, tampu naw shung gui lä ci. ¹⁶ Mose ah mawng cacim ung om ciah mäih ah, “Ani Bawipa ah ang hlah kawn ah a tampu cu ng’liim pyi ci”, ci cu bä ci. ¹⁷ Bawipa ci cu Mumcha ah kyak ci Bawipa ah Mumcha ah om nak cu ng’päi ng’zee nak ah kyak ci. ¹⁸ Mik mi mi van ah hmai cu a i naw kä shung ba sei, Bawipa ah bämang nak naw na khang gui ci: A cun ah bämang nak cu Mumcha ah kyak ciah Bawipa ung kaa law ne, Amät ah müi ah na ng’huh püi gui sei, ang tät ah abämang nak cu hlüngtai ci.

¹ Khanpughi naw chimgein nak awn a khuut bi vai ah na pe gui sei, k’tha dam nak vai a i kä om ci. ² Keimi naw m’zih vai la lü ng’aa nak vai cu kami nawng shüt ci; keimi cu kä kami thuvi ci, Khanpughi ah ng’thu phi hleei ne kä kami pyein ci. Keimi cu Khanpughi ah maa ah düng ciah akdei ung ghing u ne, chang gui ah ni kyom nak vai ah k’tha na ne kami bik ci. ³ Keimi ah pyein, ah Thu Ni cu ang zih ah a kyak ung chükmaih ci gui ah hmawk ah ng’zih ciah kyak khai. ⁴ Khodek khan ah khoshe naw ami m’lung cu shung sei, ngahmi naw kä zum hlawt ci gui. Satan naw shung gui sei, Khanpughi ah müi ak cang ah kyak ciah, Bawi Khrih ah bämang nak ah mawng, ngahmi ah khan ah ng’shü lawk ciah :Thu Ni ah akdei cu kä hmu hlawt ci gui. ⁵ Keimi naw ka mi mät ah mawng kami pyeinsak ah kä kyak ci; Jesuh Khrih cu Bawi ah a kyak ah mawng la keimi cu Bawi Jesuh ah hmawk ah nangmi ah changshäm ah kami kyak ah mawng kami pyein ci. ⁶ “Hnüp ah khui ung akdei ng’shü lawk khai” ci ne pyein ciah Khanpughi cu, Bawi Khrih ah hmai ung ng’shü ne khang ciah bämang nak ah mawng cu hmat nak vai ah, mik mi ah m’lung kyong ung, akdei cu ng’shü law sak ciah Khanpughi ah kyak ci. ⁷ Cung ung phi Mumcha khawh mi m’küm ciah mik mi cu, m’dek am düt ah mäih mi lawk ci kyasei, mik mi ung uk nak ah hlüngtai nak kä om ci, Khanpughi bäng ung vah om ci. ⁸ Mik mi cu ashäng shäng mi zaica ung phi kä mi ng’pyäuh sagei ci;ak hngü ät mi khüi khaa ung phi, m’lung kä thüi ci; ⁹ Mi gaa ada ung phi, teihpüi kä maih ci, ng’tään vai ah ami nam shän ung phi kä mi di ci. ¹⁰ Bawi Jesuh cu mik mi ah pumsa ung ang dang vai ah, thuka thei ciah mi pumsa naw Bawi Jesuh ah autah sih nak cu ang täi sei mi aut ci. ¹¹ Mik mi cu mi ghin zah ak chuih Bawi Jesuh ah hmawk ah sih nak cu mi aut ci, cun cu mik mi ah thuka thei ciah pumsa ung Bawi Jesuh a ghin ah mawng ang dang vai ah hmawk ah kyak ci. ¹² Sih nak cu keimi ung a hnün thawh ung phi ghin nak cu nangmi ung hnüntho ci. ¹³ Cacim ung, “Kei naw zum ne Thu ka pyein ci” a ci ah mäih ah keimi ung phi zum nak om sei, zum nak awn thu kami pyein ci. ¹⁴ Bawipa Jesuh thawh ba sak ciah Khanpughi naw, kei mi cun phi Bawipa Jesuh awn atäng ah na thawh ba sak gui ne, nangmi awn a"tang ah ama ah na hteh püi gui khai ci cu kami hmat ci. ¹⁵ Shin gui avan cu nangmi ah hmawk ah kyak ci; Khanpughi ah m’gein nak gah ci da law pipi ne, Khanpughi ah bämang nak m’hlüngtai ne taigü ci phi da law pipi khai khai nei. ¹⁶ Shin ah mawng ung keimi a i zah ung phi kami tha kä maih khai nei. Ka mi pumsa cu a dängphai law ung phi ka mi mumcha cu ak hnüüp tä k’thai ba pi pi ci nei. ¹⁷ Keimi naw a shäng ak zaang ah kami aut ah zaica nak naw cun ah hlüngtai pi ciah ang täi sei bämang nak cu na gah sak gui khai nei. ¹⁸ Kei mi naw mik awn hmuh cu kä kami kheing ci, mik awn kä hmuh vah kami kheing ci. Mik awn hmuh cu a shängta khäng ne, Mik awn kä hmuh cu ang täi sei khäng ci.

¹ Mik mi ah om nak ah kyak ciah khodek pumsa cu ang kawn ah a kyak ung, Khanpughi naw khankhaw ah, amät ah pyan ah, ang täi om nak ah im, na k’hman gui khai ci cu mi hmat ci. ² Khodek pumsa awn mi om zah ung khankhaw im cu mi hmu hlü ne, mi ng’hlo ei ci; ³ cun ah khankhaw im ah sui cu mi sui law ung mik mi cu pumsa k’maih ah kä mi kyak khai. ⁴ Khodek im ung mi om zah ung mik mi cu mi ng’hlo ei ci, cun cu khodek pumsa mi nawng hlü su ah kä kyak ci, thuka thei ci ung ng’huuk ne, ang täi ghin nak ah khankhaw pumsa cu ng’zak hlü ah hmawk ah kyak ci. ⁵ Cun ah ng’huuk nak vai na pyan pe gui ci cu khanpughi ah kyak ci, Mik mi am a na gim peit gui, a kyän nak ah Mumcha cu na pe gui ci. ⁶ Cun ah kyasei keimi cu kami k’tha mah ci. Mik mi cu pumsa im ung mi om zah ah chuih Bawipa ah im awn mi ng’shawng ci, ci cu mi hmat ci. ⁷ Mi ghin nak ung zum nak cu ak tung ah kyak ci, mik awn hmuh nak cu ak tung ah kä kyak ci. ⁸ Kei mi cu k’thamah nak om sei, pumsa im cu nawng shüt ne, Bawipa awn atäng ah om vai cu kami ng’za hlü pi ci. ⁹ Keimi cu shi ah, cä ah, a hawi ah om ung phi Bawipa naw ana zei nak gui vai kami ng’za hlük ci. ¹⁰ Mik mi mi van cu m’khoichaa nak mi gah khai ah Bawi Khrih ah maa ah mi gawk zawp khai. Pumsa awn mi om zah ung ak ni, ak she mi bi gui ah ci ah, mi k’chaw phähphäh cu mi gah khai. ¹¹ Keimi cu Khanpughi kami kyih aa ci kya ne, chang gui cu kami m’cäi m’ä gui ci. Khanpughi naw mik mi cu na hmat gui züm ci;nangmi naw kei ah mawng cu nami m’lung kyong ah, nami hmat züm khai ah ka ngai ci. ¹² Cun cu keimi ka mi ming thang vai ah tha nak ba ah kä kyak ci, keimi ah khan ah nangmi ah mingthang nak vai cu k’tha na ne ning peit gui ah kyak ci. Cun ung vah, chang ah om ih kä teng ah a müisa düt teng ne khähghah ciah, chang gui ah ng’thu cu nami m’hlan tuha hlawt khai. ¹³ Keimi cu kä ka mi gu ei ci ang? Kami gu ah a kyak ung Khanpughi ah hmawk ah kyak khai. Kä ka mi gu ah a kyak ung, nangmi ah hmawk ah kyak khai. ¹⁴ Chang tumat cu chang avan ah hmawk ah si sei, chang avan naw ani awn atäng ah sik nak ami aut ah mawng cu tuhbäi keimi naw kami hmat pyi ci kya sei, keimi cu Bawi Khrih ah m’hni nak naw na uk gui pyi ci nei. ¹⁵ Bawipa cu chang van ah hmawk ah sik ci, cun ah kyasei chang gui cu ami ghin zah ung ami mät ah hmawk ah kä ghing ba u ne, ngahmi ah hmawk ah a hnun gui pe ne, tho ne ghing ba ciah Bawipa ah hmawk ah a mi ghin vai ah kyak ci. ¹⁶ Cun ah kyasei keimi naw chang ah m’hnüt nak awn, a u kä kami m’khoi cha ba ci. Zanä keimi naw, Bawi Khrih cu chang ah m’hnüt nak awn kami m’khoichaa man ung phi, tuhbäi cun ah kä kami kya ba ci. ¹⁷ Chang nak ci cu Bawi Khrih ung a ghin ung, ak thai ah ng’tüi ba ciah kyak ci;ak phyim avan ng’kawn zawp ne, avan ak thai ah kya zawp ci. ¹⁸ Cun avan cu Khanpughi ah bi ah kyak ci, Khanpughi naw mik mi cu a gaa ung kaa a teihpüi ah Bawi Khrih awn na ng’thon sak gui ci, chang hei gui cun phi a teihpüi ah ami kyak law tu vai ah, bi nak vai cu na pe gui ci. ¹⁹ Keimi ah ng’thu pyein cu, Khanpughi naw hnicim chang avan, Bawi Khrih awn a teihpüi ah pyan ci ci ah mawng ah kyak ci. Khanpughi naw chang gui ah kat nak cu kä m’hnüt pe gui ci, chang gui a teihpüi ah a kyak sak nak gui ah mawng, thu cu na pe gui ci. ²⁰ Tuhbäi keimi naw Bawi Khrih ah hnün ung kami ning thu püi gui ci, Khanpughi a mät naw keimi ung om ne a ning thu püi gui ah mäih ah kyak ci. Bawi Khrih ah hnün ung keimi kami ng’ge ci nei; Khanpughi ah gaa ung kaa naw a teihpüi ah ng’thawng tu vä. ²¹ Bawi Khrih cu kat nak kä om ci, cun ung phi mik mi cu ani awn kawng ät ne, Khanpughi ah mäih ah mi ng’düng vai ah, Khanpughi naw Bawi Khrih cu mik mi ah hmawk ah, mi kat nak a aut sak ah kyak ci.

¹ Cun ah kyasei Khanpughi ah khuut bi nak ghawm awn nangmi cu kami ning hui na gui ci. Nangmi cu Khanpughi ah m’gein nak nami gah ci kyasei, cun cu kä nami m’di en vai. ² Khanpughi naw, “Ka ning m’htei nak gui vai ah khin a gawk law ung, Nami ng’zoih cu ka ning ngaih pe gui ci nei; Ka ning hun nak gui vai ah khin a gawk law ung, Ka ning m’htei gui ci nei” a ci cu ngai zah vä. Ngai vä, Khanpughi ah m’gein nak gah nak vai ah khin cu, a tuh bäi ah kyak ci; hun nak ah hnüüp cu a tuh ngawi ah kyak ci! ³ Keimi ah khuut bi nak ah mawng ung chang naw kä ah nam kat en gui vai ah, chang ah kä ng’zak hlü a i phi kä kami bi vai ah kami k’tha nak ci. ⁴ Zaica nak khüikhaa nak la geivai nak gui cu, hnimgei nak awn aut u ne, amawng avan ung Khanpughi ah chang shäm ah, kami kyak ah mawng cu kami m’dang ci nei. ⁵ Keimi cu tukthah nak, thawng chum nak, m’thüiplah nak kami gah ci;kä ng’düm ah bi kami bik ci kya ne, ih khin ei khin phi kä om ci. ⁶ Theingcim nak, htangkhaa nak, hnimgei nak, ng’awi ng’gi nak gui awn phi bäi, Mumcha Theing ah m’gein nak la kami m’hni nak ak cang awn phi bäi; ⁷ ng’"dung ciah ng’thu pyein nak la Khanpughi ah hlüngtai nak awn phi bäi, keimi cu Khanpughi ah changshäm ah kami kyak ah mawng cu kami dang sak ci. Ng’tuk bi nak la gaa shung nak ung, ng’düng nak cu, kami li khim ah mäih ah kami mang ci. ⁸ Keimi cu m’tamkhah nak la zoshe nak, päipih nak la m’hlüngtai nak kami gah ci. Kami hleeihlak ciah na pyein gui u sei phi düng nak cu ka mi pyein ci: ⁹ kä mingthang ciah kami kyak ung phi chang van naw na hmat gui ci; ak si ah kami kyak ung phi, nami hmuh a mäih ah kami ghing ci. M’kyuk nak kami gah ung phi a u naw kä na ngawn gui ci. ¹⁰ Thüisei nak a om ung phi ang täi sei kami zei ci; chang k’pyaam ah kami kyak ung phi chang akda kami maang sak ci; khawh a i kä kami taak ung phi apäng avan kami khäm ci. ¹¹ Korin ah teihpüi gui aw! Keimi naw akdei dang ah kami ning thu püi gui ci nei kami m’lung choh phi ang shawng ah kami hmawng ci nei. ¹² Ami m’lung choh khai ci gui cu keimi ah kä kyak ci; keimi ah ma ah ami m’lung choh khai ci cu nangmi ah kyak ci. ¹³ Tuhbäi kei naw ka hta gui ah mäih ah ka ning m’cäi gui ci nei;Keimi ah ning ngaih gui ah mäih ah na ngai gui u ne, nami m’lung choh a ng’shawng ah k’hmawng vä! ¹⁴ Kä zum ci gui awn a"tang täng ah kä nami hnün thawh vai, atäng ah om ih vai ah kä kyak ci. Ak ni la ak ka cu kä ng’gui ng’pha hlawt khai goi. Akdei la ak hnüp cu atäng ah kä om hlawt khai goi. ¹⁵ Bawi Khrih la khoshe cu kä kawng ät hlawt khai goi. Zum ciah chang cu kä zum ciah chang awn kä om ghawm hlawt khai goi. ¹⁶ Khanpughi ah pum im cu a gup gui awn ng’thu kä khän hlawt khai gui. Mik mi cu Ghing ciah Khanpughi ah Pum im ah mi kyak ci! Khanpughi amät naw; “Ka chang gui awn ka im ka pyang khai, Ami ng’lung ah ka om khai! Kei cu ngahmi ah Khanpughi, Ngahmi cu kei ah chang gui ah kyak khai gui” ci ne pyein ci. ¹⁷ Cun ah kyasei Bawipa naw; “Ngahmi cu nawng shüt gui ne, ngahmi awn ng’cha ne nami om vai. Kä theingcim ci cu kut awn phi kä nami tawk en vai, cun ung ka ning dou gui khai. ¹⁸ Kei cu nangmi ah Pa, Nangmi cu kei ah hta gui, ah nami kyak khai, ci ne m’gäi pi ciah Khanpughi naw pyein ci” ciah khän ne pyein ci.

¹ Teihpüi gui aw, shin ah shaitaak gui cu mik mi ah hmawk ah kyak ci. Cun ah kyasei pumsa la m’lungkyong shetkat sak ci phung cu theingcim sak ne, Khanpughi kyih aa nak awn kümbe ciah theingcim ne mi om khai nei. ² Keimi nam hni gui vä. Keimi naw a u phi kami shetkat nak kä om ci; a u phi kä kami didap sak ci, a u ah khan ah phi kä nik khai ah kami m’käng nak kä om ci. ³ Cun ah ka pyein cu nangmi ka ning m’kat gui ah kä kyak ci, azan ka pyein ah mäih ah, nangmi awn sih ung phi ghin ung phi atäng ah om vai ah ka mi ning m’hni gui ah hmawk ah kyak ci. ⁴ Nangmi ka ning ngaih gep gui ci, nang mi ah phäh ah ka längtang ci! Zaica nak a i chü a om ung phi, kei cu k’thamah ne ang htei ah ka zeikyai ci. ⁵ Macedonia kho ah kami gawk law kawn ah phi kami ng’düm nak kä om ci; zaica nak akda kami aut ci, chang gui ah ng’tuk ng’vauk nak akda om sei, ang htei ah kami kyikyawk ng’ä ng’ai ci. ⁶ Zaica ng’ä ng’ai ci, k’thamah sak ciah Khanpughi naw, keimi ah gawk lawk ciah Titus awn k’thagui na pe ba gui ci. ⁷ Cun bäng ah kä kyak ciah, Titus nami m’htei tu ah mawng phi ng’za ne kami zei ci. Kei nami na hmuh hlü aih ah mawng, nami ng’ä aih ah mawng, kei nami na küikyan khai ah nami ng’düih ge ah mawng gui cu, ng’za netah ka zeikyai pi aih ci nei. ⁸ Ka guk law ah ca naw nami m’lung a ning m’thüüi gui ung phi cun ah ca ka guk ah phäh ah kä ka ng’zu ba ci nei. Cun ah ca ah phäh ah kä nami zei cu hmat ne ka thüi te ci, cun ung phi, ⁹ tuhbäi ka zei ci nei, cun cu ka ning m’thüi gui ah hmawk ah kä kyak ci nami thüi nak naw, nami m’lung a ning thawng sak gui ah hmawk ah kyak ci. Cun ah thüisei nak cu Khanpughi naw mang ci kyasei, nangmi ning zaica nak sak gui a i kä om ci. ¹⁰ Khanpughi ah mang ah thüisei nak naw m’lung kyong ng’thawng sak ne, hun nak ah gawk sak ci Cun ah phäh ah thüi nak pi kä om ci! Cun ung phi ng’zu ba nak kä om ciah thüisei nak cu sih nak ah kyak ci. ¹¹ Nami thüisei nak ung Khanpughi ah bi bi cu teng vä! Nami k’thamah law pyi ci, nami kat nak a theing ah mawng nami m’dang law pyi ci, nami m’lung k’she ah phäh ah nami ng’ä pyi ci, nami kyikyawk pyi ci, nami ng’ap pyi ci, cheishoh nak m’kat vai nami hmat pyi ci, a mawng avan ung kat nak nami phyawn nak ah mawng nami mät naw nami m’dang pyi ci nei. ¹² Cun ah kyasei a zan ka guk law ah ca cu, cheishoh ciah chang ah hmawk ah phi kä kyak ci, ami cheishoh nak ah chang ah hmawk ah phi kä kyak ci. Khanpughi ah maa ah nangmi naw keimi cu a i hlawk ah nami na zum hni gui cu akcang ah ang dang vai ah phäh ah kyak ci. ¹³ cun cu dang sei keimi cu kami k’thamah ci. Kami k’thamah bäng ah kä kyak ciah Tutus cu m’hteihtang uk ci sei, ani a zeikyai cu hmuh u netah, ang htei ah kami zei kyai ci. ¹⁴ Kei naw nangmi ah mawng, Ani ah ma ah khähghah ne kam thein te ci, a cun cu nangmi naw dang khai ah nami bi ah kyak ci. Keimi naw nangmi ah maa ah düng ciah thu bä ka mi pyein ci, Titus ah maah khähghah ne kami pyein cun phi ak cang ah kya pyi ci nei. ¹⁵ Ani ah ng’thu ngai ghet khai ah nami om la, ani kyih aa ne nami na dou ah mawng cu, ani naw shüm ba netah, nangmi cu ning m’hni law gui pi ci nei. ¹⁶ Kei cu nangmi ah khan ah m’lung üp ngaih gep nak om khätah ang htei ah ka zeikyai ci nei!

¹ Phäinau gui aw, Macedonia Kho ah Khrihtabum gui am Khanpughi naw am gein nak gui ah mawng cu ka ning m’thein gui hlük ci nei. ² Ngahmi cu zaica nak ak nui ah aut ci gui. Cun ung phi ang htei ah zeikyai u ne, ang htei ah ami pyamthaam pang ung phi, peit taak nak ung, ng’khailang aih ci gui. ³ Ngahmi naw ami peit hning ah kawn ah hang lawn pui khai ah ami peit cu, kei naw ak cang ah hmuh ne ka pyein ci nei. ⁴ Ngahmi naw Judea kho ah Khanpughi ah chang gui cu m’htei tu hlük ci gui, cun ah kya sei keimi ah k’thäh law laih laih ci gui. ⁵ Ngahmi naw keimi ah ngaih zatah däm pi khai ah pe hning ci gui. Ak htük bäih ah ngahmi cu Bawipa ung ng’ap ci gui, cun kawn ah khanpughi ah ng’zak hlü ah keimi ung ng’ap ci gui. ⁶ Shin ah bi tün ne bi lawk ciah Titus naw, shin ah m’hni nak ah bi cu, ang pyi ung khüt sei a ning bi püi gui vai ah kami m’cäi ci nei. ⁷ Nangmi cu zum nak, thu thei nak, hmuhmat nak, m’hteihtang hlü nak la keimi nami nam hni nak gui ung, nami bühmang ciah kyasei shin ah m’hni nak ah bi bi nak ung khailang peittaak nak phi m’dang vä. ⁸ Shin cu ka ning khänkhi gui ah kä kyak ci. Chang gui ah peittaak m’hteintang nak ah mawng ka ning m’thein gui cu nangmi ah m’hni nak ak cang, ah hmat vai ah phäh ah kyak ci. ⁹ Nangmi naw mi Bawipa Jesuh Khrih ah m’gein nak cu nami hmat ci; Ani cu bühmang ciah Bawipa ah a kyak ung phi, nangmi ah hmawk ah pyam ci. A pyaamthaam nak awn ning bühmang sak gui ci. ¹⁰ Ka mät ah ngaih ka pyein hlü cu, tuh kum tün ne nami bi cu, tuhbäi nami m’khüüp ung bä pi khai. Nangmi naw zum nak awn peittaak nak cu nami tün ci. ¹¹ Cun ah kyasei shin ah bi cu k’täi ne m’khüüp ne bi vä. Nangmi naw shin ah bi cu nami ngaih tüh ah mäih ah, m’khüüp ne nami bi vai nei. Nami ngaih ah mäih ah nami peit taak vai nei. ¹² Nangmi naw na mi peit hlü cang ah a kyak ung Khanpughi naw, zum nak cang awn nami peit cu ning dou pe gui khai, nangmi ah kä peit nak hning cu Khanpughi naw kä ning k’thäh gui khai. ¹³ Nangmi ung gih ne chang ung a zang vai ah ka pyein ah kä kyak ci, a tutäng vai ah ka pyein ah kyak ci. Tuh chü nangmi ah bühmang nak naw pyamtham ci gui ak bukbe tu ah mäih ah, nangmi nami pyaamthaam tu ba ung ngahmi ah bühmang nak naw ning k’bukbe ba gui khai. ¹⁵ Cacim naw, “Akda gah ciah kaa, kä k’pawih ci; api gah ciah kaa kä ken ci” a ciah mäih ah kyak ci. ¹⁶ Keimi naw kami ning m’hteihtang gui hlü ah mäih ah Titus cu kyak sak ciah Khanpughi cu m’hlünttai nei. ¹⁷ Titus naw keimi ah khü a dou nak bäng ah kä kyak ciah a mät ah m’hteihtang nak hlü ah m’lung awn, nang mi ah lawk khai ah amät naw ak bäi ah kyak ci nei. ¹⁸ Keimi naw ani awn atäng ah kami nau cu kami tüi lawk ci nei, ani cu, ng’Thu Ni pyein ne bi nak ung Khrihtabum gui naw ami chang m’sui ah chang ah kyak ci nei. ¹⁹ Cun bäng ah kä kyak ciah peittaak nak ah bi bi nak ung keimi awn atäng ah hteit hton ne bi tuk khai ah Khrihtabum gui naw ami ghü ah kyak ci nei. Shin ah peit taak nak ah mawng kami bi cu, Khanpughi ah bämang nak ah hmawk la keimi ah m’hteihtang nak cu ang dang vai ah, phäh ah kyak ci ²⁰ Cun ah ng’khailang ne ami peit gui cu kami bilawh nak ung, keimi cu chang naw kä a nam kat ten gui vai ah kami geing nak ci nei. ²¹ Keimi ah ng’bü nak cu Bawipa ah ma bäng ah kä kyak ciah chang ah ma ah phi ng’düng khai ah bi vai ah kyak ci. ²² Cun ah kya sei ngah ni awn atäng ah kami nau tumat phi kami tüi lawk ci nei: ani cu akda vei teng kheng u ngä sei, chang m’hteihtang ciah chang ah kyak ci nei. Ani cu nangmi ning ngaih gep gui ciah kya ne, ning m’hteihtang gui hlü pi ci nei. ²³ Titus cu nangmi ah hmawk ah kei awn atäng ah bi bik ciah kyak ci; ani awn lawk ci gui ah kami nau gui cu, khrihtabum ah ghü gui, Bawi Khrih ah bämang nak law püi ci gui ah kyak ci. ²⁴ Keimi ah khähghah nak ak cang ah ami hmat tu vai la, ngahmi ung kaa naw khrihtabum gui naw ami hmat tu vai ah, nami hni nak cu nami m’dang gui vai nei.

¹ Judea kho ah Khanpughi ah chang gui m’hteihtang gui vai ah mawng cu ca awn ka guk vai kä hlü ci. ² Nangmi naw nami m’hteihtang hlü gui cu kei naw ka hmat ci, nangmi ah mawng ung Macedonia chang gui ah ma ah ka khähghah ci. “Achaia kho ah phäinau gui tuh kum ge peit taak vai ah pawng tuh kum ge peit taak vai ah pawng pyi ci gui.” ci ne kam thein gui ci. Nangmi ah bi nak hlü naw ngahmi cu k’thamah sak gui ci. ³ Cun ung phi nangmi ah mawng kami khähghah nak k’cang ah ang dang vai ah, phäinau gui cu kami tüih law ah kyak ci. Ka pyein ah mäih ah nami peittaak vai cu nami m’shei m’tawn ge vai nei. ⁴ Kei awn a täng ah Macedonia ah chang gui cu law tu u ne,kä nami ng’sheitawn cu, ami ning hmuh law gui ah a kyak ung, nang mi bäng kä nami ng’aa khai, kami ning ngaih gep gui ah phäh ah kaimi phi ka mi ng’aa khai nei. ⁵ Cun ah kyasei ahei nami taak ah mäih ah nami peit vai na mi nam shei nak vai ah, shin ah phäinau gui tüih law gui ma vai ah hlü ciah ka ngai ci nei. Kei ka gawk law ung nami nam shei pyi ah kyasei, peit vai ah kyasei peit ah kä kyak ciah, zum nak awn peit cu dang khai nei. ⁶ M’shi api geit ci naw geit api khäm ba khai, m’shi akdäm geit ci naw, geit akdäm khäm ba khai! ci cu nami hmat vai nei. ⁷ Ak chang sing naw amät ah m’lung ung azum nak awn a peittaak vai, ng’vang lang ne kä a peit vai, kä peit ung kä bä khai ciah ngai ne kä a peit vai; Khanpughi naw am lung zei nak awn pek ci cun vah m’hni ci. ⁸ Na mi ng’zak hlü avan cu ang täi ah gah u ne, ni kyom nak ahlühlü nami bi nak hning vai ah, Khanpughi naw, nami ng’zak hlü ah däm sei ning pe gui m’khüt ci nei. ⁹ Cacim ung; “Ani naw pyaamthaam ci gui cu, ng’khailang ne pe gui ci; Ani ah m’gein nak cu khäng ne ng’täi ci.” ciah om ci. ¹⁰ M’shi geit ciam, geit m’shi la ei vai pek ciah Khanpughi naw, nami ng’zak hlü ah m’shi avan cu ning pe gui ne, ng’lih pyo sak khai nei. Nami ng’khailang nak ung kaa chünla ciah am theihpai cun phi nami hmuk khai nei. ¹¹ Nangmi naw ang täi sei nami ng’khailang nak vai ah Khanpughi naw ak phlüt sei bühmang nak ning pe gui khai nei. Nangmi ah peittaak nak keimi ah kut ung gah ci gui naw Khanpughi cu m’hlüngtai khai gui nei. ¹² Nangmi naw shin ah bi awn pyamthaam ciah Khanpughi ah chang gui nami m’htei gui bäng ah kä kyak ciah, Khanpughi m’hlüngtai nak ah k’aw phi nami thang sak ci nei. ¹³ Shin ah bi nami bi nak awn chang akda naw Bawi Khrih ah mawng Thu Ni cu khäng sei ami zum tu ah phäh la, nami khawhchaam gui cu, ngahmi la chang hei gui am ng’khailang ne nami peitaak gui ah hmawk ah Khanpughi cu mi m’hlüngtai khai nei. ¹⁴ Nangmi cu Khanpughi ah küikyang ciah m’gein nak cu nami gah ciah kyasei, ngahmi naw nangmi cu ang htei ah ning zum ngak gui u ne, nangmi ah phäh ah k’taigü khai gui nei. ¹⁵ Mik mi naw khei ung kä ng’pyi khai ah am gein nak ah hmawk ah Khanpughi cu mi m’hlüng m’tai khai nei.

¹ Kei Paul Naw Ka ning m’cäi gui hlü cu,--Kei cu nangmi ah ma ah hnawhdeh ne, kä nami hmuh nak ung ka lingtha ciah nami ngai khai. Bawi Khrih ah m’Lung neim nak la ng’awi ng’gi nak awn ka ning hui na gui ci nei, ² Keimi cu khodek khan ah mawng ung kami hnüntho ciah na pyein gui ciah chang gui ah ma ah lingtha nak cu m’dang vai kyak ci nei, nangmi om nak ah ka law ung cun ah mäih lingtha nak m’dang nak vai kä om men sä. ³ Keimi cu khodek khan ah kami om ciah ng’khän ci, cun ung phi khodek khan ah hmawk ah ng’tuk kami bik ciah kä kyak ci. ⁴ Keimi ah kawh ah likhim cu chang ah kawh ah likhim ah kä kyak ci, gaa ah manggaw näng nak ah khanpughi ah hlüngtai nak likhim ah kyak ci. ⁵ Keimi naw kä nik ciah ng’cuhcan nak gui; Khanpughi ah mawng hmuhmat nak gui shungshet ciah om she nak gui kami m’shet zawp ci nei. Chang ah ngaihtüh gui phung cu pha ne k’pang ne, Bawi Khrih cu kami läk sak ci nei. ⁶ Nangmi naw keimi ah ng’thu avan nami ngaih cu kami hmat kawn ah thu kä ngai ci gui cu m’kat ge vai ah keimi om ci nei. ⁷ Nangmi naw ak pung müisa vah nami teng ci, Nangmi ung kaa kei bawi Khrih chang ah ka kyak ci cik ciah chang a u om ne ang? A om ah a kyak ung ani ah mäih ah Keimi phi Bawi Khrih ah chang ah kami kyak ci ci cu, ngaih tüh ba sä ⁸ Kei cu Bawipa ah na peit ah huham ka mang däm te ung phi kä ka ng’aa ci nei, cun ah huham cu nang mi, ning m’shukchaak nak gui vai ah kä kyak ci, ning m’düih m’thawh nak gui vai ah kyak ci. ⁹ Kei naw ca gu ne ka ning m’kyihkyawk gui ciah kä nami ngaih vai nei. ¹⁰ Chang am shah naw, “gai ne lingtha ci, keimi awn a"tang ah a om zah läi ung hnawhdeh ne ang thu phi kä ng’khän te ci” nami cik khai. ¹¹ Keimi cu nangmi awn mi ng’sahwng zah ung, ca kami guk law ah mäih ah kami bik khai ci cu nami hmat sak gui vai nei. ¹² Ami mät naw ami mät m’hlüngtai ciah chang gui awn kä kami ng’caw hlük ci nei, m’tumtäng nak vai phi kä ka mi ng’za hlük ci nei. Ami mät naw ami mät ak tung ah m’düih u netah, täitawk m’khoichak ciah chang gui cu, shekha aih ci gui nei. ¹³ Keimi läi cu m’hnüt nak phlän ne kä kami khähghah khai, Nangmi ah hmawk ah kami bi mah mah ah, Kami bi vai ah Khanpughi naw anam hnüt peit nak gui bäng ung kami khähghah ci nei. ¹⁴ Nangmi cu Khanpughi ah m’hnüt nak ah kyong ung nami om ci kyasei, kei mi naw Bawi Khrih ah mawng Thu Ni kami law püi nak ung kho kami kaan ciah kä kyak ci. ¹⁵ Cun ah kyasei Khanpughi naw bi vai ah a nam hnüt peit gui ah kawn ah chang gui ah bi ah hmawk ah kä kami khähghah ci nei. Nami zum nak däm lawk ciah kyasei, Khanpughi ah am hnüt nak ah kyong ung, nangmi ah ng’lung ah bi nak cu bä lawpi khai ah kami ngaih u ci nei. ¹⁶ Cun ah kyasei keimi naw nangmi ah kho kaan ne a hei kho ung ah, Thu Ni cu kami pyein hning khai. Chang hei gui ah kho ung kami bilawh ah hmawk ah a i ah ung, kä ka mi khähghah khai nei. ¹⁷ Cacim ung, “Khähghah hlük ciah chang cu Bawipa ah bilawh ah hmawk ah khäghah sä” ciah om ci. ¹⁸ A i ah kyasei ci ung Khanpughi naw am hni ah chang cu, amät naw m’hlüngtai ciah kä kyak ci, Bawipa naw am hlüngtai ah chang ah kyak ci.

¹ Kei ah api ah ka shetkat nak cu nami hnimgei vai nei, Nami Bä ni! ² Kei cu nang mi ah hmawk ah Khanpughi a m’thüi ah mäih ah kam thüi ci nei; nangmi cu Bawi Khrih tumat bäng awn ng’puikhah khai goi ah beit pyi ah htalaa ah nami kyak ci. ³ Eve cu k’phyu naw theileh ne am hleeihlak ah mäih ah--nami m’lung cu ng’gogan sei, Bawi Khrih zum ne nami ap nak ang chei vai ah kan ng’ä ci. ⁴ Chang tumat cu nangmi ah law ne, keimi ah kä pyein man ah, a hei Jesuh ah mawngaa pyein law ung, nangmi naw zei ne nami na dou ci; Keimi naw kami pyein ah Thu Ni la keimi ung nami gah ah Mumcha awn api ah phi kä täng ciah thu ni la mumcha cu nami dou ci! ⁵ Kei cu nangmi naw ak tung ah, angdüihpüi ah nami khü ah chang gui ah mä kä ka ng’neim pi khai nei! ⁶ Kei cu thu pyein nak ung ka ghawi ngai ung phi, hmuhmat nak om ciah, chang ah ka kyak ci. Keimi naw cun gui cu, a mawng avan ung ang täisei kami ning hmat sak gui pyi ci. ⁷ Nangmi ak küikyang ah nami kyak vai ah hmawk ah, kei naw ka mät cu ng’neim sak ne, Khanpughi ah mawng Thu Ni cu, alä ah ka ning m’thein gui ci nei. Cun cu kei ah cheishoh ah kya naw? ⁸ Nangmi ah ng’lung ah khuut kabi zah ung khrihtabum a hei gui naw na pe taak ci gui nei. Cun cu nangmi ning m’hteihtang nak gui vai ah a hei khrihtabum gui guhtep gui ah mäih lawk ci. ⁹ Kei cu nangmi awn atäng ah ka om zah ung ngui ka ng’zak hlü zah ung kä ka ning zaica sak gui man ci. Macedonia ah phäinau gui naw kei ah ng’zak hlü phung cu law püi ci ci gui. Kei naw a cau phi; ngawi ah phi, nami phuih kä ka gih sak khai. ¹⁰ Cun ah kei ah khähghah nak cu, Achaia kho avan ung a u naw k’üüp ne kä m’khüt khai ci cu kei ung om ciah Bawi Khrih ah ng’düng nak awn shai ka tak ci nei. ¹¹ Cun ah ka pyein cu nangmi kä ka ning m’hni gui su ah ang? Kei naw ka ning m’hni gui cu Khanpughi naw hmat ci. ¹² Cun ung phi cun ah ang düihpüi ah pyein ciah chang gui naw, keimi ah mäih ah bi tuk ci gui pyein ne kä ami khähghah en hlawt vai ah, tuhbäi kabi ah mäih ah kabi gäk gäk khai nei. ¹³ Cun ah chang gui cu ang düihpüi ak cang ah kä kyak ci gui, ng’hlukhlei ci gui ah kyak ci; Bawi Khrih ah ng’düihpüi ak cang ah ng’hlawk u ne, hleeihlak ne bilo ci gui ah kyak ci. ¹⁴ Cun ah ami bi cu cäcat vai kä kyak ci, Satan hngaw akdei ah khankhaw chang ah ng’hlawk thei ci. ¹⁵ Cun ah kyasei Satan ah chang gui naw ng’düng nak ah mawng pyeinsak ci gui ah ami ng’hlawk cu cäicat vai kä kyak ci. Ak hnu ah ngahmi cu ami mät ah bilawh ah ciah ak cang ah gah ba khai gui nei. Gui ¹⁶ A u naw phi kei cu ak gu ah kä na ngai en sä, cung ung phi nangmi naw ak gu ah mäih ah bawtah na dou vä, cun ung kei ung ka khähghah nak vai api baw tah om khai. ¹⁷ Tuhbäi ka khähghah cu Khanpughi ah ng’zak hlü ah kä kyak ci, ak gu ah mäih ah kei naw khähghah ne ka ng’thu ah kyak ci. ¹⁸ Chang akda cu chang ah bilawh nak lam ung khähghah man ci gui kya sei, kei phi ka khähghah khai nei. ¹⁹ Nangmi cu nami hmuhmat ciah chang gui ah kya ne, ak gu cu zei ne nami m’gein khai. ²⁰ Nangmi naw ning täk phan gui ci, ning m’zung m’za na gui ci, ning hlawt na gui ci, a i ah kä ning sui tu gui ci, nami hmai ning k’beei gui ci, gui cu nami hniimgei ci. ²¹ Keimi naw nang mi ah maa ah shin ah mäih gui kä ka mi bi hning ah mawng cu ng’aa pipi ne ka pyein ci nei. ²² Cun ung phi chang tumat cu ak gu ah mäih ah ang thu ah a kyak ung, kei phi a cun ah mäih ah ka ng’thu khai nei Cun cu gu ng’thu ah kyak ci nei. Cun ah chang gui cu Hebru ah ami kyak ung kei phi a cun, Israel ah ami kyak ung, kei phi a cun, Abraham ah hta ng’shon ah ami kyak ung kei phi a cun, ²³ Bawi Khrih ah changshäm ah ami kyak ung, kei cu ak gu ah mäih ah ka ng’thu ung phi, ngahmi ah tah bä pi ciah ak chang shäm ah ka kyak ci. Kei cu ngahmi ah zai pi ne ka bik ci, da pi sei thawng ka cum ci da pi sei tukthah nak ka hmuk ci, da pi sei sih nak vai ka aut ci. ²⁴ Jew chang gui naw kut thum-kip-lei-ko vei ci hma vei ami na thah nak ka aut ci. ²⁵ Roman chang gui naw thum vei ami na thah nak ka aut ci; Lung awn phi hnü ät na vawi ci gui. Hteinpaw a shet nak thum vei lawk ci, hnü ät ung nazi m’ku lei phli ung tui ung ka ng’hteh ci. ²⁶ Kei cu akda vei ka hteh hton nak ung tui ah lin nak, m’guk ei ah guhtep nak, la ka pakhui chang Jew ah gaa, khui hei chang gui ah gaa; gawnu gui ung gaa, bung hmu ah gaa, tui nu gui kyih nak la teihpüi k’she gui kyih nak gui cu ka aut ci. ²⁷ Kei cu zaica bawngbai ne khuut ka bik ci; ih ah phi kä ka ip hlawt ci, tui ah ka gha ci, ei ah ka cawi ci; phü ne ei vai kä om ci, zii vai kä om ci, sui vai kä om ci ²⁸ Cun kawn ah kä ka pyein tu ah zaica nak gui la khrihtabum ah phäh ah ak hnüüp tä ng’ä ai nak gui om ci. ²⁹ Ak tha zawken ci a om ung, kei phi kak tha ken tuk ci; shetkat nak bi lawk ci om ung ani ah hmawk ah ka ng’ä ai aih ci. ³⁰ Kei cu ka khäghah vai ung ka tha a ken nak ah mawng ung ka khäghah khai. ³¹ Kei kä ka hleeihlak ah mawng cu Bawi Jesuh ah Pa Khanpughi naw hmat ci, cun ah Bawi ah ming cu ang täi sei hlüngtai sä! ³² kei cu Damaskas ung ka om zah ung Aretas ghangpughang ah ‘ka ung kaa bawi naw, kei cu ami na phaa vai ah m’kawt cu ngäng sak gui ci. ³³ Cun ung phi ka chang gui naw, vawh ung m’khäp ne ng’vong k’pung ah na va k’chah ba u sei kei cu ka phyawng ci.

¹ Khäghah cu kä a ni ung phi, kei ka khäghah vai om ci. Cun ah kyasei Bawipa naw ana peit ah muimang la Thuphlaan ah mawng cu m’dang ne ka pyein khai. ² Zanä khokum gha-lei-phli zah ung khrihta tumat cu, ak hlüng pi ah khan khaw ah a zon püi cu kei naw ka hmat ci (Cun cu ak cang ah a kyak la muimang ah a kyak ah kei naw kä ka hmat ci, Khanpughi bäng naw vah hmat ci). ³ A cun ah chang cu Paradise khaw ah zon püi sei, chang ah m’gawng awn kä pyein hlawt ah thu cu ng’zak ci, ci cu leng ne ka pyein ba ci, (Cun cu ak cang ah a kyak la muimang ah a kyak ah kei naw kä ka hmat ci, Khanpughi bäng naw vah hmat ci). ⁵ Cun ah chang ah mawng ung kei ka khäghah khai, cun ung phi ka mät läi cu kak tha a ken ah mawng ah kawn ah khähghah vai kä om ci. ⁶ Kei cu ka kh"ghah hlü ung, ak gu ah kä ka kyak khai, ak cang pyein ciah ka kyak khai Cun ung phi chang naw ana hmuh ng’zak ahtah bä pi sei ana m’hlüngtai vai kä ka ng’za hlük ci kya ne, kä ka khäghah khai nei. ⁷ Kei naw ka hmuh ah cäicat vai mawng ung kei cu kä ami nam hlüngtai en vai ah, kei cu ka pumsa awn geinvai nak ka aut ci nei. Cun ah geinvai nak naw, Satan ah ng’shä tüih ah mäih ah, kei cu na hnem ne, kam ghä m’ce nak cu na k’cheih pek ci nei. ⁸ Cun gui ana liim pet vai ah Bawipa ah thum vei kak taigü ci nei. ⁹ Cun ung phi ani ah nam shan nak cu, “Nang nak tha a ken zah ung kei ah hlüngtai nak cu, ak kuikyang pi ah kyak ci, cun ah kyasei kei ah m’gein nak bäng cu nang ung hlü ciah kyak ci.” ciah kyak ci. Cun ah kyasei kei cu Bawi Khrit ah hlüngtai nak ung ka ng’zii nak vai ah, kak tha a ken ah hmawk ah, zeikyai aih ne ka khäghah ci nei. ¹⁰ Kei cu Bawi Khrit ah hmawk ah tha ken nak, ghingshe nak, geinvai nak, k’dudei nek, la tüihtok nak gui ka aut ung phi, kei cu kak tha a ken zah ung kak thamah ba pi ci nei. ¹¹ Kei cu ak gu ah mäih ah ka kya lawk ci, cun cu nang mi ah na kyak sak ah kyak ci. Nangmi cu kei nak püi ciah nami kya khin te ci. Kei cu a i ah kä ka mawng pang ung phi, ang düihpüi ah nami k’bäi gui ah kä ka ng’neim pi khai. ¹² Kei cu ang düihpüi ah ka kyak ah mawng cu, cäi aih gui vai la cäicat gui vai awn, hniim gei nak awn ka ning m’dang gui ci. ¹³ Kei naw nangmi cu a hei khrihtabum gui ah mäih ah m’täng ne ka ning om püi gui ci, ngui ah mawng bäng ung kä ka ning bilawh sak gui ci. Cun ah kä täng khai ah ka bi ah hmawk ah kei cu nami nam gein vai nei. ¹⁴ Tuh bäi nangmi ah ak thum vei nak ah ka lawk khai ah ka pawng ci nei. Cun ung phi nangmi kä ka ning khüikhaa sak gui khai nei. Nangmi ah khawh kä ka ng’za hlük ci, nangmi vah ka ning za hlü gui ci. Hta hmaw gui naw nupa gui ah hmawk ah khawh käm cun ci gui, nupa gui naw vah hta hmawk gui ah hmawk ah khawh m’cun ci gui. ¹⁵ Nangmi ah hmawk ah a kyak ah khoi ung ka khawh la ka mät cu zeikyai ne ka ng’pyi sak khai nei. Kei naw ang htei ah ka ning m’hni gui ung nangmi naw a pi ah nami nam hni khai maa ¹⁶ Kei naw nangmi phuih kä ka ning gih sak gui ah mawng cu, nami ng’kyaa khai nei. Cun ung phi chang a tumat naw kei naw thuvi ne ka ning m’hleeihlak gui ciah ngai hngaw khai nei. ¹⁷ A i chaa ah ang kei naw ka ning m’hleei gui? Ka tüih law ah chang gui ung kaa, a u awn ang kei naw ka länglawt nak a om? ¹⁸ Kei naw Titus cu ng’paa na ne tüi law ne, ani awn atäng khrihta tumat phi ka tüih law nei. Titus cu nangmi ung länglawt ciah pyein vai kya ne ang? Ani la kei cu ka ni m’lung ngaih täng sei lam tumat ung ka ni hteit ciah kä kya ne ang? ¹⁹ Keimi naw a thawm ah kami mät kami ng’küikyan ciah nami ngai hngaw khai nei! cun ah kä kyak ci, Bawi Khrit ah nam theithang gui ah mäih ah, Khanpughi ah ma ah ng’thu kami pyein ah kyak ci. Teih püi gui aw, keimi ah bi gui phung cu nangmi ah hmawk ah kyak ci nei. ²⁰ Nangmi ah kei ka gawk law ung, ka ning hmuh gui hlü ah mäih ah kä ka ning hmuh gui vai la, nangmi naw phi kei cu nami na hmuh hlü ah mäih ah kä nami na hmuh vai ah kang ä ci nei. Ng’tukvook nak, m’thüikhang nak, m’lungshe nak, ng’küükneet nak, ghingshe nak, khleei nak, m’ghäm’ce nak, ng’go ng’gan nak gui ka hmuh vai ah ang htei ah ka ng’ä ci nei. ²¹ Cän kawn ah nangmi ah kei ka law ba ung Khanpughi naw, nami ma ah, kei cu na lü ng’aa sak khai ni mä, zan ä sheka u netah tuh güt kä ng’zu ba u ne, m’gu plet ng’zaw ng’pawm düut ciah chang gui ah hmawk ah, kei cu ka ng’phli tui kya law ei bawk khai ni mä, ci ne kang ä ci nei.

¹ Tuh bäi kei cu ak thum vei nak ah nangmi ah ka lawk khai nei. Cacim naw, “Amawng ama phung cu chang hnih thum a saksi ung vah m’khoichaa vai” ciah pyein ci. ² Ak hinh vei nak ka law zah ung, kat nak bik ci gui la chang a hei gui am,” cän kawn ah ka law ba ung kä ka ning m’düm gui khai nei”, ci ne, kam cäi gui ah mäih ah, tuhbäi phi a sho nak ah om netah khän ne ka ning m’cäi ba gui mä ci nei. ³ Bawi Khrit naw kei awn thu a pyein ah mawng nangmi naw nami ng’zak hlü cu, ak cang ah nami gah khai nei. Nang mi awn a om nak ung, ani cu ak tha kä ken sei, a hlüngtai nak cu nangmi am ning m’dang gui ci nei. ⁴ Bawipa cu kutlam tung ung ami ngawn zah ung ak tha ken ci ah mäih ah a kyak ung phi, tuhbäi Khanpughi ah hlüngtai nak awn ghing ne om ci nei. Ani ung mi kawng ät nak ung mik mi phi mik tha ken te ci; cun ung phi, Khanpughi ah hlüngtai nak awn, Bawi Khrit ung a täng ah ghing ne, nangmi awn mi ng’hmu teng khai nei. ⁵ Zum ne nami ghin nak a bä la kä cun ah, nami mät naw nami mät m’htei ne m’khoicha shüm vä. Cun ung kä nami pyai ah a kyak ung, Bawi Khrit Jesuh nangmi ung a om cu ak cang ah nami hmat khai nei. ⁶ Keimi kä kami pyai ciah nangmi naw nami hmat khai ah kei naw ka zum ci nei. ⁷ Nangmi kä nami cheishoh phung vai ah Khanpughi ah kami taigü ci nei. Cun cu keimi kami näng ci, ciah m’dang nak ah kä kyak ci nangmi naw ng’düng nak nami bi vai ng’zak nak hlü ah kyak ci, keimi cu kami pyai ciah mäih ah a kyak ung phi a i ah kä kyak khai nei. ⁸ Keimi naw ng’düng nak hnu na ne kä kami bi hlawt khai, düng nak lam ung om ne vah kami bi hlawt khai. ⁹ Keimi kami k’tha ken ne, nangmi nami k’tha a ghaat ung, kei mi kami zei ci nei. Cun ah kyasei nang mi kümbe ciah chang ah nami kyak law vai ah phi kami k’taigü ci nei. ¹⁰ Kei naw shin ah ng’daut ne ca ka ning pet law gui ah mawng cu;kei ka gawk law ung Bawipa ah na pet ah huham cu ak ghaat ah kä ka mang vai ah phäh ah kyak ci. Cun ah huham cu nangmi ning m’küi m’khän nak gui vai ah kyak ci, ning m’shukchaak nak gui vai ah kä kyak ci. ¹¹ Ka phäinau gui aw, gai ne om vä! Kümbe ciah chang ah nami kyak vai ah k’tha nah vä; kei ah ning m’cäi m’ä gui cu ngai ng’zah ne, tumat la tumat kawng ät u ne, dimdeeih nak awn om vä. M’hni nak la dimdeeih nak ah Khanpughi cu, nangmi awn atäng ah om khai nei. ¹² Tumat la tumat ng’phäinau ah ng’ui hnaam ne, ng’zavaih na tu vä. Khanpughi ah chang avan naw ning zavaih gui ci gui nei. ¹³ Bawipa Jesuh Khrit ah m’gein sei nak, Khanpughi ah m’hni zum nak la Mumcha Theing ung pui m’ca nak cu, nami van ah khan ah om sä.