1 TIMOTHI

¹ Mi Hunbawi Khanpughi la mi ngaih u Jesuh Khrih ah m’hnüt nak awn Bawi Khrih ah düih püi ah ka kia ciah kei Paul naw - ² Zum nak ung ka hta akcang ah kia ciah Tomithi-am ca ka guk law ci nei: Mi Pa Khanpughi lah Bawi Khrih Jesuh ah geinsei nak, chimhnat nak la dimdeih nak cu nang ung om sä. ³ Macedonia ah ka hteh law vai ung ka ning m’cäi ah mäih ah Ephesus ah na om cang vai ka ng’za hlük ci. Chang am shah gui naw thuvi ne m’theithang ci gui nei, cun gui cu, ami ng’düm vai ah na khän gui vai. ⁴ Ng’cu can düt vai ah kiak ciah pumah-awi m’cu ne ng’shon lam düt khei ci gui cun phi, cun ah kä ami kiak ba vaiah nam cäi gui vai nei. Cun gui cu Khanpughi ah ng’bü nak ah kä kia ci, zum nak kawn vah cun gui hmat vai kiak ci. ⁵ Cun ah khäntam nak ah a mawng cu, theing ciah nikiom nak, ciim ciah lung ngaih la ng’khän ciah zum nak cu, thawhlet sak nak hlü ah kia ci. ⁶ Chang am shah gui cu shin ah lam hma u ne, shetkat nak düt ng’cuhcan pyeinsak ci gui. ⁷ Ngahmi cu Khanpughi ah thukhän saza ah kia hlük ci gui, cun ung phi ami mät ah thu m’kha la ami thu ah a mawng gui cu kä hmat ci gui. ⁸ Thukhän cu akni ah mang ung nik ciah mi hmat ci. ⁹ Mik mi naw mi shüm hmat vai cu, thukhän m’hnüt cu chang k’ni gui ah hmawk ah kä kia ci, thukhän m’shet ci gui, om shet ci gui, Khanpughi kä hmat ci gui la cheishoh ci gui, zum nak kä om ne mumcha lam kä shing ci gui, ami nupa ngawn ci gui, chang nagawn ci gui, ¹⁰ Pa la pa nu la nu ng’zawpawm düt ne pletbeng ci gui, chang phak ci gui, hleihlak ci gui, kä düng khai ah saksi ci gui la düng ciah zum nak hnu ng’tuk püi ci gui ah hmawk ah kia ci. ¹¹ Shin ah theithang nak cu Thu Ni ung hmu ah Khanpughi ah bämang nak la phruhtheh nak ung ka lawk ciah Thu Ni, Kei naw ka shäu vai ah Khanpughi naw a na ap ah kia ci. ¹² Shin ah bi ka bi nak vai ah thamah nak na pek ciah mi Bawipa Khrih Jesuh cu kam hlüngtai ci nei. Kei naw zanä Bawipa cu ak she ah pyein ne, dukdeu na ne, zoshe na ne, ka kiak man pang ung phi, Bawipa naw kei cu na khinkha sak ne, abi ka bi vai ah nam hnüt sei Bawipa cu kam hlüngtai ci nei. Cun sang ung kei cu zum nak kä om sei, akni akshe phi kä ka hmat ci, cun ah kia sei Bawipa naw kei cu na chimgein ci. ¹⁴ Mi Bawipa naw küikyang ciah am gein nak cu nam shum phruk ne, mi Bawi Khrih ung kawng ät nak awn zum nak la m’hni nak phi na pek ci. ¹⁵ ‘Bawi Khrih Jesuh cu cheishoh ci gui hun khai ah khmodek khan ah kium lawk ci,’ ciah thu cu düng ciah thu ah kia sei, ak be ah dou ne zum vai ah kia ci. Kei cu ak shekha pi ah ka kiak ci, ¹⁶ Cun ung phi Khanpughi naw kei cu nam gein ci, cun ah a nam gein ah mawng cu, ngawi ah Bawi Khrih zum ne ghin nak gah ci gui naw ami thei tu vai ah Bawi Khrih naw a hnimgei nak ah a mawng cu, shekak ciah kei awn am dang ah kiak ci. ¹⁷ Ang täi ah ghing ciah Ghangpughang, sih nat nak kä om ci, mik awn kä hmuh thei, tumat bäng ah Khanpughi cu - m’tam khah nak la bämang nak awn hta ng’shon ung om sä! Amen. ¹⁸ Kahtapa Timothi, cau profet gui naw nang ah mawng ami pyein man ah mäih ah, kei naw shin ah bi cu khän ne ka ning ap ci. Cun ah thu cu, ng’tuk näng nak ah li la khim ah na mang vai nei. ¹⁹ Na zum nak htek ne nam lung ngaih theing ciim sä. Chang am shah gui naw ami lung ung ciim sei kä ngai zäi u ne, ami zum nak cu shet sak ci gui. ²⁰ A cun gui ung Himenaeus la Alexander phi om tuk ci goi. Shin ah mawng naw m’theithang gui sei, nangmi naw Khanpughi ami shetkat nak ami nawng vai ah, kei naw ngahmi cu Satan ah kut ung ka ap gui ci.

¹ Cun ah kia sei ah htük bäih ah chang gui ah hmawk ah Khanpughi huipaa nak, taigü nak, zoih thäh nak, la m’hlüngtai nak gui cu nami bi vai ah ka ning m’cäi gui ci. ² Mik mi cu Khanpughi ung ding gei nak la dimdeih nak awn a htingling ah ghing ne mi om vai ah ghangpughang gui la huham om ciah bawimang gui ah hmawk ah nami taigü vai nei. ³ Cun cu nik ciah kia sei mi Hunbawi Khanpughi ah am hni ah kia ci. ⁴ Chang nüng cu hun nak gah ne thu düng ami hmat vai ah Khanpughi naw ng’za hlük ci. ⁵ Khanpughi tumat bäng om ci, Khanpughi la chang ah ng’lak ung geilam piang ciah, Bawi Khrih Jesuh phi tumat bäng ah kiak ci. ⁶ Cun ah Bawi naw hnicim chang gui phiawn khai ah a pumsa ap ci. Cun cu chang nüng hun vai ah, a khin ni ah a kiak ah mawng, Khanpughi ah ang zak hlü cu am dang nak ah kiak ci. ⁷ Cun ah kia sei, kei cu ang düih püi ah nam düih ne chang khui hei gui ah saza ah kia ne, zum nak thu düng cu ka shäu khai ah na tüi ci. Kei ka hleei ah kä kia ci, thu düng ka pyein na kiak ci. ⁸ Khritha gui ah bum nak phung ung, pami ng’vai gui ami taigü vai, ngahmi cu Khanpughi ah ng’ap pyi ci gui ah kia ne, m’lung she nak la cuhcan nak kä om men sei, ami kut chang ne ami taigü vai ah ka ng’za hlük ci nei. ⁹ Hnumi gui cun phi müisa ne nei aan khai ah ami suisak vai nei:lu m’kin ne, ghui shawi mo sawng, äh awi ne, aküi kyang ah, hnän thang binglawh ne kä ami kiak vai. ¹⁰ Ngahmi cu zum ciah chang gui ah mäih ah ni kiom ciah om ih awn ami bilawh vai nei. ¹¹ Hnumi gui cu ng’awi gi ne, a düm hta ah ami theithang tu vai nei. ¹² Hnumi gui naw ami m’theithang vai la pami ah khan ah ami huham mah vai cu, kei naw kä ka zum ci nei: ngah mi cu kä chawkchek ne ami om vai nei. ¹³ Khanpughi naw Adam cu tüi sho ma netah Eve cu tüi sho ci. ¹⁴ Hmühma nak gah law ma ci cu Adam ah kä kiak ci, hnumi ah kiak ci, Ani naw Khanpughi ah thukhän cu shetkat sak ci. ¹⁵ Cun ung phi hnumi gui cu, a htingling ah om ne, zum nak, m’hni nak la theingciim nak awn ami be ah a kiak ung, ami hta nau nak awn hun nak gah khai gui nei.

¹ “Krithabum ung tahnga khai ah ng’bü ciah chang cu, ni kiom hlimtui ciah bilawh ng’za hlük ciah kiak ci,” ci cu küikyang ciah thu ah kiak ci. ² Krithabum ung tahnga ciah chang cu, m’kat vai ah kä om khai, tumat bäng chu nak khai, ciimvai lunglang khai, htingling khai, a om ih ni kiom khai, khin chang m’htei khai;m’theithang thei khai; ³ Ani cu zu kä aw ne, ng’tuk vook kä lup ne, ng’awi gi ne, dimeih nak ng’zak hlük ciah chang ah kiak khai:ngui m’hni aih ciah chang ah kä kia khai; ⁴ ani cu ak kyong khui uk m’khüt sei ak chu ahta gui naw ami chang m’sui ah kiak khai. ⁵ A mät ah kyong khui am htei htang vai pang kä hmat ciah chang naw, a i cha ah Khanpughi ah Krithabum m’hteihtang hlawt khai zaw? ⁶ Ani cu zum nak khäng htek pyi ciah a kiak vai, kä cun ung ani cu ta-äh law aih ne khoshe ah mäih ah m’khoichaa nak gah khai nei. ⁷ Ani cu Khrithabum ah ak pung ah chang hei gui naw phi ami chang m’sui tu ah kiak khai, cun ung vah khoshe ah kut ung phi kä gawk hlawt khai. ⁸ Krithabum ung bikbi gui cun phi, ami om ih ni ne, ami m’lung ngaih ng’ciim ciah kiak khai. Ngah mi cu kä khleei ne, kä ei awk tat ne, ngui kä ng’za hlü aih ciah kiak khai gui. ⁹ Ngahmi cu zum nak ah thu düng ah mawng, ci theing sei ngaih gep ne kut shum ci gui ah kiak khai. ¹⁰ Ngahmi cu ak htük ung tüihtok nak aut ma u sä, tüihtok nak ami näng ah a kiak ung, ngahmi cu khuut bi tu u sä. ¹¹ Ami chu gui cun phi akni ah m’lung ngaih om ih ci gui ah a kiak vai, khleei khlam ci gui ah kä kiak en sä. ciimvai lunglang ne, ngaih gep vai ah chang ah ami kiak vai. ¹² Khritha bikbi cu tumat bäng chu nak ciah kiak khai, ak chu, ahta, ak kyongkhui uk m’khüt ne, m’hteihtang hlawt ciah kiak khai. ¹³ Ami mät ah bilawh vai m’khüt näng ci gui ah khritha bikbi gui cu, hlüngtai u ne, Khrih Jesuh ung ami zum nak ah mawng cu pyein sa hning ci gui nei. ¹⁴ Kei naw shin ah ca ka guk sang ung kä sho pha sei, nang ah ka lawk khai ah ka ngaih tüh ci nei. ¹⁵ Cun ung phi kei cu ka shokshü ei ah a kiak ung, Khanpughi ah kyongkhui ung om ci gui naw, a i ah om ih vai cu nami hmat vai ah, shin ah ca ka guk law ah kiak ci nei. Cun ah kyongkhui cu ghing ciah Khanpughi ah krithabum ah kiak ci, cun ah Krithabum cu thu düng ah a tung ah kiak ci. ¹⁶ Mik mi ah zum nak ah küikyang nak cu a u naw kä hüüngtaa hlawt khai nei, cun ah mawng cu: Bawipa cu chang ah müi ah ng’tüi ne kyum lawk ci nei, Ani ah theingciim nak cu Mumcha naw m’dang pyi ci nei, Khan chang gui naw phi hmu pyi ci gui nei, Ani ah mawng cu kho nüng ung shäu pyi ci gui nei, M’dek ah khan ung chang gui naw phi Ani cu zum pyi ci gui nei, Ani cu khan kho ah hang kai ba pyi ci nei.

¹ Ngawi ah chang am shah gui cu, hleeihlak ciah mumcha ah thu ngai u ne, khoshe ah m’theithang cu läk u ne, ami zum nak cu nawng lawk khai gui nei ci ne Mumcha naw ang dang ah pyein ci. ² Cun cu m’si m’hling awn m’khih ah mäih ah ami m’lung ngaih sik ciah, hleeihlak ciah chang gui ah m’theithang ah kiak ci. ³ Cun ah chang gui naw, käng chung la vai, ei am shah cu hlawi vai, ciah m’theithang ci gui. Cun ung phi zum ne Thu düng hmat ciah chang gui naw, m’hlüngtai ne taigü u netah, cun ah ei cu ami ei vai ah Khanpughi naw a tüi pian ah kiak ci. ⁴ Khanpughi ah tüi pian phung cu nik ciah kia sei, a i ei phi kä hlawi vai, ei vai phung cu m’hlüngtai ne taigü nak awn dou vai kiak ci, ⁵ A i ah kia sei ci ung, Khanpughi ah ng’thu la taigü nak naw, cun ah ei cu a theing sak pyi ah kiak ci. ⁶ Nang naw shin ah m’cäi nak cu na phäi nau gui-am na peit law vai zung, na mät ah zum nak thu la na mät ah läk ah düng ciah m’theithang nak cu, läk ne Khrit Jesuh ah changshäm k’ni ah na kiak vai nei. ⁷ Pyein ah kä ni ne zum nak kä om ciah puma awi gui cu nami hlawi vai nei. Zum nak ung nami ghin vai ah nami mät naw nami mät nami m’thei vai nei. ⁸ Pumsa lam ung thei nak cu bä kung ci, cun ung phi mumcha lam ung thei nak cu, a mawng avan ung, tuhbäi la ngawi zä ghin nak vai ah bä pi bäih ci. ⁹ Shin cu bekhüt ciah thu ah kia sei, ak be ah dou ne zum vai ah kiak ci. ¹⁰ Mik mi naw tha na ne mi bilawh ah mawng cu, chang nüng ah Hunbawi, ak tung pi ah zum ci gui ah Hunbawi ah kia ne ghing ciah Khanpughi cu mi ngaih u ah hmawk ah kiak ci. ¹¹ Shin ah m’cäi nak gui la m’theithang nak gui cu chang gui am nami peit gui vai nei. ¹² Nang cu na hmaw ci kia sei a u naw kä a ning kahta nak-en vai ah na om vai nei, nang’thu, na om, m’hni nak zum nak la ciimvai nak ung, zum ciah chang gui ami thei tu vai ah na om vai nei. ¹³ Kei kä ka law pha ah chuih chang gui ah ma ah caciim phat ne, thu pyein ne m’theithang ne, k’tha na ne na bi vai nei. ¹⁴ Profet gui ah thu awn, ak tahnga gui naw, na khan ah ami kut taih ne ami ning m’shumphyuk ah mumcha m’cümhnah nak cu, a i baw düt ah kä na ngaih-en vai nei. ¹⁵ Chang van naw na bämang law cu ami ning hmuh vai ah, shin ah a mawng gui cu m’shiin püi ne na bi vai nei. ¹⁶ Geik na ne om ne nam theithang vai nei. Shin ah a mawng gui cu k’tha na ne na bilawh vai nei, cun ung na mät la na thu ngai zak ciah chang gui cu hun nak gah khai gui nei.

¹ Na mät ah ng’vaipi ci cu m’zeek ne kä nang thu püi vai, na pa ah mäih ah na chang m’sui vai. Na mät ah hmaw pi ci gui cu na nau gui ah mäih ah, ² na mät ah ng’vaipi ciah hnumi gui cu, na nu gui ah mäih ah, a mät ah hmawpi ciah hnumi gui cu na be gui ah mäih ah, theingcim ciah m’lung awn na om ih püi gui vai. ³ A mät om ciah hnumi gui cu nami m’hteihtang tu vai nei, ⁴ Cun ung phi cun ah hmeinu ung a hta gui, atu gui, a om ah a kiak ung ngahmi cu ami mät ah kyongkhui ung ami zum nak ah mawngma la tu m’bei m’ghinsei gui ciah ami nupa pupi gui, ami m’hteihtang tuba vai ah mawngma gui cu ami theithang ma vai nei, cun cu Khanpughi ah ng’zak hlü ah kiak ci. ⁵ A mät om ciah hmeinu cu m’hteihtang khai a u kä om sei, Khanpughi ngaih u ne, amü ak hnüüp taigü ne ng’zoi thäh ci nei. ⁶ Cun ung phi a om shek ciah hmeinu läi cu a ghin ung phi ak si ah kiak ci nei. ⁷ Hmeinu gui cu chang naw kä am kat gui vai ah shin ah m’cäi nak gui cu nami m’thein m’kan gui vai nei. ⁸ A paw chang, ak tung pi ah ak kyongkhui chang kä m’hteihtang ci cu, zum nak hnu nak ciah kia ne, kä zum ciah mä sheka tuba ci nei. ⁹ A khokum chuk-kip kä be phak ciah hmeinu cu, hmeinu ah kä k’bäi cang vä. Ani cu hnüät bäng ceimah ciah kiak khai, ¹⁰ a om ani ah mawng ngaih gep nak om khai, ahta gui ak ni ah m’htei ci, khin chang m’htei ci, zum ciah chang gui ni kiom püi gui ci, zaica ciah chang gui m’htei gui ci, nik ciah bi phung tha na ne bik ciah kiak khai. ¹¹ Hmaw ciah hmeinu gui cu hmeinu ah kä nami k’bäi cang vai,a i ah kia sei ci ung ngahmi cu, kä ami htingling law hlawt ung, ceimah law ba hlü netah Bawi Khrit cu hnu nah ci gui ah kia ci. ¹² Cun ah kia sei ngahmi cu, ak htük ung Bawipa ah ma ah ami shaitaak cu m’cheishoh ci gui ah kiak ci. ¹³ Cun kawn ah ngahmi cu a im tung päng ung hteit shüi shüi ne akhin maih sak ci gui, cun bäng ah kä kiak ciah kä pyein vai pyein u neh, chang ah mawng pyein sah hlük ci gui. ¹⁴ Cun ah kia sei hmaw sang ciah hmeinu gui cu ceimah ba u ne, hta nau u ne, ami kyong khui m’htei ne om u sä, cun ung mi ga gui naw mik mi ah mawng ak she ami pyein vai a i kä om khai. ¹⁵ Am shah hmeinu gui cu lam hma u ne, Satan ah hnu ah läk pyi ci gui nei. ¹⁶ Zum ciah hnumi tumat cu a mät ah mätzah kyong khui ung hmeinu a om ah a kiak ung, am hteihtang vai nei. Ngahmi ah phäh ah khrithabum cu kä zaica en sak sä. Cun ung vah khrithabum naw a ngaih u vai kä om ciah hmeinu gui cu m’hteihtang hning khai kiak ci. ¹⁷ Khanpughi ah khuut bik ciah ak tahnga gui cu, ng’cheng a goi thum ah gah khin ci gui ah nami hmat vai nei. Thu Ni shäu ci gui la m’theingthang bilo ci gui cu ak tung pi ah gah khin ci gui nei. ¹⁸ A i ah kia sei ci ung cacim theing naw, “Htang nami leh sak ah seipat cu am gawng kä nami k’büüp-en vai; cun kawn ung bi bik ciah chang phi abi cheng gah khin ci nei,” ciah pyein ci. ¹⁹ Saksi hnih thum kä a om ung ak tahnga m’kat nak vai ah mawng cu kä nami ngaih tüh en vai nei. ²⁰ Shetkat nak bik ciah chang cu, chang a hei gui ami kyihkyawk vai ah phäh ah, chang khli ah lung ah nami m’cäi vai nei. ²¹ Khanpughi ah ma, Bawi Khrit Jesuh ah ma la Theingcim ciah khankho chang gui ah ma ah, kei naw thukhän ka ning peik cu, nang naw shin ah m’cäi nak gui cu läk netah ng’daut ne a i kä nam khoichaa düt en vai, chang ah hmai teng ne a i kä na bi vai. ²² Bawipa ah khuut bik ci am kut taih nak peit nak cu kä nami bi ghet ghet vai, chang ah shetkat nak ung kä nami ng’caw zah tu vai, nami mät theingcim ne nami om vai. ²³ Nang cu a shäng shäng na gawpyam thei ci kia sei, tui bäng kä aw ne, na theek nak vai ah sapyit tui phi na awk vai nei. ²⁴ Chang am shah gui ah cheishoh nak cu dang ge sei, ngahmi m’khoichaa nak cun phi gawk law ge ci. Cun ung phi chang am shah gui ah cheishoh nak läi cu a ngawi ah vah dang lawk ci. ²⁵ A cun ah mäih ah am shah ah nikiom nak gui cu dang ge ci, kä dang ge ciah nikiom nak gui cun phi a i naw kä shungshet hlawt ci.

¹ Khleihtein gui naw ami bawimang ami chang m’sui vai cu ami hmat vai. Cun ung vah Khanpughi ah ming la khritha ah m’theithang nak cu a u naw kä päipih kä pyeinsak khai. ² Khritha bawimang gui ung khleihtein chang shäm a om ah a kiak ung, kä ami shedam nak gui vai, phäi nau gui ah kiak ci, ciah ami ngaih vai. Ami hnün thawh peit gui cu, ami m’hni gui ah khritha gui ah kia sei, ngahmi naw k’tha nah pi ne ami hnün thawh peit gui vai ah kiak ci. Shin ah a mawng gui cu nang naw nam theithang na pyeinsak vai. ³ Hngihnga ciah zum nak m’theithang ne, Bawipa Jesuh Krih ah thu düng la mi zum nak ah m’theithang nak, ⁴ kä ng’müi sak ci cu, chang ah ng’shei aih ne a i ng’hlui kä hmat ciah kiak ci. Ani cu ng’vook shan vai, ng’küük neet vai ng’zak hlü ciah kiak ci. Cun naw vamneng nak, cuhcan nak, m’thüikhang nak, shedam nak, ⁵ gui cu ng’lih pyou sak ci. Cun ah om ih ciah chang gui cu ami lung ngaih hnga sei, thu düng caciim kä hmat ci gui ah kiak ci. Ngahmi naw zum nak ah lam cu bühmang nak ah lam ah ngai ci gui. ⁶ A mät ung om ci awn bä khai ah ngaih gep ciah chang cu, a zum nak naw bühmang nak pek ci. ⁷ Khomdek khan ah mi law sang ung a i nei mi law püi? Khomdek khan ung kaa mi hteh law ba ung mä a i nei mi hteh püi kaw? ⁸ Cun ah kia sei mik mi ung ei vai la sui vai a om ah khoi ung a cun awn mi ng’büh vai nei. ⁹ Bühmang hlük ciah chang gui cu tüihtok nak gah thei ci gui nei, ngahmi cu m’ghämce ne shetkat nak ah ng’zak nak hlü naw pha gui thei ci nei, cun ah zak hlü nak naw ngahmi cu didap sak gui thei ci nei. ¹⁰ A i ah kia sei ci ung ngui zak nak hlü cu, shetkat nak nüng nüng ah ang zung ah kiak ci. Chang am shah gui cu ngui zak hlü aih u netah ami zum nak phi ng’hlah tak ci gui.Cun kawn ah ngahmi cu zaica nak naw ami m’lung shetkat sak sei geinvai ci gui. ¹¹ Nang läi cu Khanpughi ah chang ah na kiak ci kia ne, shin ah shekha gui avan na hlawi vai nei. Düngdau nak, zum thei nak, zumnak, m’hni nak, hnimgei nak, ng’awigii nak gui awn kümbe vai ah nak tha nak vai nei. ¹² Zum nak ah dawng nak ung na näng vai ah dawng ne, ang täi ghin nak cu nak pan vai nei: cun ah ghin nak na gah vai ah nang cu Khanpughi naw a ning khü zah ung, saksi ciah chang khli ah ma ah, Bawipa na zum ah mawng cu ak küikyang ah nang kiaa pyi ci nei. ¹³ A päng avan am ghin nak pek ciah Khanpughi la Pontius Pilate ah ma ah a zum nak a kheng geng ah m’dang ciah Khrit Jesuh ah ma ah kei naw thukhän ka ning pek ci, ¹⁴ Shin ah khäntam nak gui cu läk ne, Bawipa Jesuh Khrit kä a dang law ba pha ah chuih bekhüt ne bi na bi vai nei. ¹⁵ Tumat bäng ah kia ne, phyuhtheh ne uk ciah ghangpughang nüng ah Ghangpughang, bawi nüng ah Bawipa, Khanpughi naw, a khin a küm nak ung Bawipa cu dang law ba sak khai nei. ¹⁶ Khanpughi bäng naw sih nak phiawn nak ci;Ani cu chang naw kä ak et hlawt vai ah pyü ne ng’shü ci ung om ci. Ani cu a u naw kä hmu man ci;Ani cu a u naw kä hmu hlawt ci: Bawipa ung m’tamkhah nak la ang täi sei hlüngtai nak cu om sä! Amen. ¹⁷ Khomdek khan ah bühmang ci gui cu kä ami khähghah längtang aih vai ah nam cäi gui vai nei. Ngahmi cu kä khäng lä khai ah khawhcham kä ngaih u ne, mi gah taang vai ah, ang nüng nüng cu, ang khaai nak awn nam shumphyuk gui ciah Khanpughi cu ami ngaih u vai nei. ¹⁸ Ak ni ami bilawh vai, ni kiom nak ung ami plümshau vai, ami khaailaang vai, la chang am ami peiktaak thei vai ah nam cäi gui vai nei. ¹⁹ Cun ung vah ngahmi cu ngawi ah lawk ciah ghin nak vai ah hmawk ah ak küikyang ah m’kümtho ci gui ah kiak khai. Cun ah a kiak ung vah ngahmi cu ghin nak akcang dou hlawt khai gui. ²⁰ Timothi, kei naw ka ning ap gui cu ngaih na ne nam htei vai nei, ak she ah thu nak la chang am shah naw cheishoh nak lam ami “Hmuhmat nak,” ah ami ngaih ah, ng’cuhcan küükneet nak cu na hlawi vai nei. ²¹ Chang am shah gui cu hmuhmat ci gui ah ami ngaih nak awn, zum nak ah lam cu hma ci gui nei. Nami van ah khan ah Khanpughi ah chimgein nak om sä.